Kawlawsie:

Kawlawsie:

Simin Ting 1

Lox nawb mai: pa yawgyaw bwanson:

1 Pawlux pa mawh kawncau pa ting Yesux Khrit, kheu alo Siyiex, mai: Timose pa mawh puxaik, 2 tawx ka puxaik pa singax singeh mai: pa kaux sijax daux Yesux Khrit khankix, pa ot ka daux veng Kawlawsie: heue:. Kieh pex koe: bwanson: mai: pa nhim: pa kaoh khaing: Keeing: ex Siyiex liak.

3 Ex yaogyaw bwanson: Siyiex pa mawh Keeing: Simiang ex Yesux Khrit, mai: rawg bwan:, son pex ku jheeng: jheeng:, 4 kheu hoik mhong: grawng: krax yumrhawm: pex ka daux Yesux Khrit, mai: krax moh krax rhawm: pex ka pui singax singeh khawm: uik, 5 mawh kheu pa keud pot jun pot, pa hoik een: son pex ka daux meung raoma:, awm: pa hoik mhong: pex phaoxka: ka daux gumlox pa mawh pa meh lox bwan: gauxrhawm: gauxrhi:, 6 pa hoik hoek ka pex, awm: hoik hoek ka daux haktiex khawm: uik, mai: plix plix mai: haok huan:, awm: hoik mawh khawm: ka daux pex, jah tom: singaix yam mhong: yam tawng pex bwanson: Siyiex ka daux pa mawh pa meh, 7 awm: hoik gau pex khaing: Epaphrax, paox siliex pa moh ex, pa mawh cao: diex cao: gau pa kaux sijax Cao: Khrit ka son ex, 8 kaw pa hoik krai ka ex khawm: grawng: krax moh krax rhawm: pex ka daux Khwan: Cao: heue:.

Cao: Khrit pa ang lai dak uik chix tiag

9 Mawh kheu jao in, ex kawx, jah tom: singaix pa mhong: ex grawng: an, rawg bwan: ka son pex ang jud ang jai, mai: mhaing: yuh ka mawx son sang naog pex krax tawng krax yung ka alo Nawh Cao: ka daux pingnya mai: pa chix tawng sidawng: khawm: uik pa dex mai: khwan:, 10 son sang hu: pex awm: pa keung: ka Simiang, mai: son sang caw rhawm: Nawh ka khawm: uik, mai: plix plix ka daux kaing pa mhawm: ku ceu mai: haok huan: ka daux krax tawng krax yung Siyiex, 11 kieh baox koe: riang ka daux siawp sibrawm khawm: uik, awm: pa khaw: mai: riang rao min: plakngai: Nawh, son sang chix grum yeung, mai: chix lang: gun lang: yeung tau mai: krax gauxrhawm: gauxrhi:, 12 yaogyaw bwanson: Keeing: Cao:, Kaw pa hoik yuh ex mawh pa keung: tix rom tix pon sin: pui pa singax singeh ka daux pa riang, 13 Kaw pa hoik taoh ex lih khaing: siawp sibrawm pa vhaik, mai: hoik loh tix sau: ex ka daux meung Kawn: pa moh Nawh Cao: heue:. 14 Ka daux Kawn: Nawh an ex hoek krax taoh mai: krax pluat ploi: phimap phigrham:. 15 Kaw an mawh rieang pakpeung Siyiex pa ang chix yaox kah, pa mawh pa liang tix keh sivoe can pa phan: tix deuh khawm: uik, 16 grawh grawng: nawh hoik phan: hoik yuh ku ceu khawm: uik ka daux Nawh Cao:, can pa koe: ka raoma:, mai: can pa koe: ka piang haktiex, ceu pa chix yaox khankix, mai: khawm: ceu pa ang chix yaox khankix, viang mawh dangngeung khankix ang ah, phan: ang mawh nan: simiang haktiex khankix ang ah, phan: ang mawh nan: simiang giex kaing: khankix ang ah, siawp sibrawm khankix ang ah, ku ceu khawm: uik hoik phan: hoik yuh kheu Nawh mai: son Nawh heue:. 17 Mai: Nawh Cao: hoik dawg mawh ka: sivoe ku ceu khawm: uik, mai: ku ceu khawm: uik krom ka daux Nawh Cao: heue:. 18 Mai: Nawh Cao: mawh kaing: tokaux, pa mawh ceucao, Kaw pa mawh pa jah, pa liang tix keh khaing: pa yum, yuh ka mawx son sang ting tokaux Nawh khaing: ku ceu khawm: uik heue:. 19 Grawh grawng: nawh hoik khaw: hoik caw ka rhawm: Siyiex tix kieh pa grum khawm: uik ot ka daux Nawh Cao:. 20 Mai: kieh ku ceu khawm: uik deeh khaw: ka Tokaux Tix kheu Nawh Cao:, kheu hoik kieh nhim:, kheu nham: khaoxlhak Nawh Cao:, aux ah kheu Nawh Cao:, viang mawh ceu pa koe: ka piang haktiex khankix ang ah, phan: ang mawh nan: ceu pa koe: ka daux raoma: khankix ang ah. 21 Mai: pex, pa hoik tang: tiah paox tix daux bawg yam pa hoik luan, mai: mawh pui pa koeng ka daux rhawm: pex, ka daux kaing pa caox pa yuh pex, 22 viang mawh nan: yamin Nawh Cao: hoik deeh kieh khaw: paox tix, ka daux tokaux nex nham: Nawh, kheu pa yum Nawh, son sang pon tix tawx pex mawh pa hoik singax singeh pa loig pa ang koe: dee deuh phimap ka plak sivoe Nawh Cao:. 23 Phan: pex kawn: ca: ot ka daux krax yumrhawm:, mai: kaux cong: kah, mai: ang gah hu: khaing: krax keud pot jun pot lox bwan: gauxrhawm: gauxrhi: pa hoik mhong: pex, pa hoik sidiex ka can pa hoik phan: hoik deuh khawm: uik ka greem: raoma:, pa hoik kieh aux Pawlux mawh kawncau pa diex pa gau kah heue:.

24 Yamin aux gauxrhawm: ka daux pa kham: geu: aux son pex, mai: kieh ceu pa kharhawm: kharhi: Cao: Khrit pa ang nyang grum naog, naog ka daux nex nham: aux, son tokaux Nawh Cao:, pa mawh ceucao heue:. 25 Hoik kieh aux mawh kawncau pa diex pa gau ka an, awm: pa khaw: mai: ara kawncau pa tawx Siyiex ka aux son pex, son sang kieh gumlox Siyiex grum naog, 26 pa mawh pa raux pa hoik mox ka daux bawg yam mai: ju pa hoik luan khankix khawm: uik, viang mawh kawx nan: yamin hoik plak jhi: ka pui pa singax singeh cie Nawh khankix. 27 pa hoik caw alo Siyiex tix kieh kix tawng, pa mi pa koe: min: plakngai: ceu pa raux pa hoik mox in, ka daux pui tang: ceu tang: cat khankix mawh pa yuh ka mawx, pa mi pa koe: an mawh pa ot Cao: Khrit ka daux pex, pa mawh krax keud pot jun pot son min: plakngai: heue:. 28 Ex krai grawh grawng: Nawh, mai: sidiex ka pui ku kaux, mai: gau ka pui ku kaux ka daux pingnya cuyi khawm: uik, yuh ka mawx son sang pon ex tix tawx pui ku kaux mawh pa hoik grum mhawm: ka daux Cao: Khrit heue:. 29 Aux kawx, nied tix coca: yuh son sang mawh nan:, awm: can pa teei Nawh siawp sibrawm mai: yuh ka daux aux heue:.

Simin Ting 2

Sum: tix ot ka daux Cao: Khrit

1 Grawh grawng: nawh aux simie tix kieh pex tawng grawng: ngah aux paox tix ka son pex miex ding, mai: son kix ka daux veng Lawdikix, mai: son kix can pa ang sax yaox pakngai: aux ka daux nex nham:, 2 yuh ka mawx son sang nyawmrhawm:, rhawm: rhi: kix, kheu hoik kleuk kix tau ka daux krax moh krax rhawm:, tom: pon pa mi pa koe: khawm: uik, pa vhahrhawm: ka grawng: krax tawng krax yung, yuh ka mawx son sang tawng kix pa raux pa mox cie Siyiex, pa mawh Cao: Khrit, 3 kraung laoh lie pingnya cuyi mai: pa tawng pa yung khawm: uik hoik mox ka daux Nawh heue:. 4 Aux ah nin:, yuh ka mawx son ang pui tix kaux kawx sang pon pie pon lhen: pex ka lox nyaw lox glaw: heue:. 5 Grawh grawng: nawh viang tang: ot aux mai: pex ka daux kaux nex nham:, aux ot tau mai: pex ka daux khwan:, mai: gauxrhawm mai: yaox, grawng: pa chix ot pex mhawm: mhawm:, mai: grawng: kaux cong: krax yumrhawm: pex ka daux Cao: Khrit heue:.

6 Mawh kheu nan: awm: hoik rieb pex tix teei Yesux Khrit pa mawh Simiang, hu: ka daux Nawh heue:. 7 Kieh koe: riah mai: kieh sum: haok huan: ka daux Nawh Cao:, mai: kieh krax yumrhawm: pex kaux cong: awm: pa hoik gau ka pex, tau mai: krax yaogyaw bwanson: pa kreh heue:.

8 Rien rhawm: tix, ha kox sang koe: pui tix kaux kaux pa sang nieb giex tix rhim: pex, ka been nawh pa pie pa lhen: pa ang koe: bwanson:, pa hawt been lox lao kawn: pui, mai: been haktiex pa ang grum naog, mai: pa ang hawt Cao: Khrit heue:. 9 Grawh grawng: nawh ka daux Nawh Cao: hoik ot pa grum naog Siyiex khawm: uik ka daux rieang pakpeung tokaux, 10 mai: hoik kieh pex grum naog ka daux Nawh Cao:, pa mawh kaing simiang giex kaing: mai: siawp sibrawm khawm: uik, 11 khawm: ka daux Nawh Cao: hoik pat hak pex, ka been pat hak pa ang yuh ka taix, ka daux pa peeik tix tik tokaux pa dex mai: nex nham:, ka daux pa pat hak Cao: Khrit, 12 kheu hoik sipaung: pex tau mai: Nawh Cao: ka daux krax baptis326 rawm: heue:. Mai: ka daux krax baptis rawm: hoik deeh yaog pex kaoh tau mai: Nawh Cao:, kheu pa yumrhawm: pex ka daux pa yuh Siyiex, Kaw pa kieh Nawh Cao: deeh kaoh khaing: krax yum heue:. 13 Mai: pex pa hoik yum kheu phimap phigrham: pex, mai: kheu ang pat hak pa dex mai: nex nham: pex, Nawh Cao: hoik kieh pex deeh im: tau mai: Nawh, mai: pluat ploi: ka phimap phigrham: ex khawm: uik, 14 mai: hoik preet lai khaix taix been, pa koeng mai: pa ang khaw: ka ex, mai: hoik teei an khaing: sinax ex, tawk ka khaoxlhak, 15 khaix hoik peeik tix tik simiang giex kaing: mai: siawp sibrawm khankix khaing: tokaux Tix, Nawh teei tix plak jhi: khankix sidawng:, yam Nawh pex ka piang kix kheu khaoxlhak heue:.

16 Mawh kheu nan: paw kieh pui tix kaux kawx prawng ca: ka pex, grawng: pa ih pa nyaux, phan: ang mawh nan: grawng: singaix poi, phan: ang mawh nan: grawng: khix khraox, phan: ang mawh nan: grawng: singaix tuah khankix, 17 grawng: ceu an mawh pangpeue: ceu pa tag sang hoek sax, viang mawh kawx nan: tokaux mawh cie Cao: Khrit heue:. 18 Paw kieh pui tix kaux kawx pie lhen: tix teei khawngphak pex khaing: pex, kheu pa nieb yuh pa awn: rhawm: awn: rhi:, mai: pa krub ka kawncau Siyiex khankix, pa ca: keud grawng: pa hoik yaox nawh, mai: nieb kroh tix ting rhawm: giex going kheu rhawm: pa dex mai: nex nham:, 19 mai: ang giex tom: cong: ka pa mawh Kaing:, khaing: Nawh pa mawh dee lih pon tawx riang ka tokaux khawm: uik, mai: kleuk paox tix tau ka jhong: mai: siniag khankix, mai: haok huan: ka pa kieh Siyiex haok huan: heue:.

20 Phan: pex hoik yum tau mai: Cao: Khrit khaing: been haktiex pa ang grum naog khankix, yuh ka mawx pex lai ot awm: pa kawn: im: ka daux haktiex, mai: cu nghiet ka been khankix, (21 Paw vi giex, paw vi cim, paw vi teeh, 22 can ceu pa chix laux chix leeing: ka pa shiao khawm: uik,) pa hawt lox tawm: mai: lox gau kawn: pui? 23 Ceu an khankix mawh ceu pa koe: grang pingnya hawt ceu pa krub pa keud sipie tix, mai: pa tiem rhawm: tiem rhi:, mai: pa lak nieb yuh ka tokaux, viang mawh kawx nan: ang koe: bwanson: tid tix ka pa ngah ka ceu pa yuh hawt alo nex nham: heue:.

Simin Ting 3

Ceep ka pui pa khraox

1 Mawh kheu nan: phan: hoik yaog pex kaoh tau mai: Cao: Khrit, nied tix sawg ceu pa koe: dee long:, dee ngawm Cao: Khrit ka plak taix khawn: dawm: Siyiex heue:. 2 Kieh rhawm: pex keud grawng: ceu pa koe: dee long:, mai: paw keud grawng: ceu pa koe: ka piang haktiex khankix heue:. 3 Grawh grawng: nawh pex hoik yum, mai: hoik mox ju pex tau mai: Cao: Khrit ka daux Siyiex. 4 Yam Cao: Khrit pa mawh ju ex, tag sang sidawng:, yam an pex kawx tag sang sidawng: ka daux min: plakngai: tau mai: Nawh Cao: heue:.

5 Mawh kheu nan: teei yum kraung pakpeung tokaux pex, ka ceu pa koe: ka piang haktiex, pa mawh pa phit pa vao, mai: pa ang singax singeh, mai: alo nex nham:, mai: pa simie pa caox, mai: pa ghoing:, pa mawh ceu pa krub rieang krub rao heue:. 6 Mawh kheu grawng: ceu an khankix, pa songrhawm: songrhi: Siyiex hoek ka piang kawn: pa lieh lox khankix. 7 Pex kawx hoik sax hu: ka ceu an khankix yam kawn: im: pex ka daux pa awm: an heue:. 8 Viang mawh kawx nan: yamin pex tik ka ceu an khawm: uik, mai: ka pa songrhawm: songrhi: mai: ka pa hax: rhawm:, mai: ka pa koeng riang pa ciang khoi:, mai: ka pa nieb ah nieb yuh plakngai: pui laux, mai: ka pa ah lox seeing: lox brai: khaing: daux jheeh pex heue:. 9 Tix kaux lai tix kaux paw pie paw lhen: ka paox tix, kheu pex hoik peeik tix tik pui prim:, mai: khawm: ceu pa yuh nawh, 10 mai: hoik ceep pui khraox, pa kawn: yuh pa khraox pot tom: pon krax tawng krax yung, awm: rieang pakpeung Kaw pa phan: pa yuh nawh heue:. 11 Ka daux pa phan: pa yuh an, ang lai pon koe: pui Helasax, mai: pui Yudax, mai: pa pat hak, mai: pa ang pat hak, mai: pui pheem:, mai: pui Sakusix, mai: siliex, mai: pui ploi:, viang mawh kawx nan: Cao: Khrit mawh khawm: uik mai: ot ka daux khawm: uik heue:.

12 Mawh kheu nan: awm: pui pa hoik laug Siyiex, pa singax singeh, mai: pa moh kah, pex ceep ceu pa moh pa rhawm:, mai: pa caoxrhawm:, mai: pa mhawm: rhawm:, mai: pa tiem rhawm: tiem rhi:, mai: pa awn: rhawm: awn: rhi:, mai: pa lang: gun lang: yeung heue:. 13 Phan: pui tix kaux kaux koe: dee deuh phimap ka pui tix kaux kaux, tix kaux lai tix kaux yeung ka paox tix, mai: pluat ploi: phimap ka paox tix, awm: Cao: Khrit hoik pluat ploi: phimap pex, pex kawx yuh nang: nan: heue:. 14 Mai: ka piang ceu in khawm: uik ceep pa moh pa rhawm:, pa mawh ceu pa vien pa grum mhawm: heue:. 15 Mai: kieh pa nhim: Cao: Khrit giex kaing: ka daux rhawm: rhi: pex, pa hoik kok pex kah, khawm: ka tokaux tix mu: khaing:, mai: kieh pex yaogyaw bwanson: heue:. 16 Kieh gumlox Cao: Khrit ot ka daux rhawm: rhi: pex tom: nie, mai: sidiex gau ka paox tix ka daux krax pingnya cuyi khawm: uik, ka lox rhax yaogyaw, mai: lox rhax lai, mai: lox rhax bwan:, kieh koe: krax yaogyaw bwanson: ka daux rhawm: rhi: pex mai: ah lox rhax ka Siyiex heue:. 17 Mai: pex yuh pa tix ang ah, ka daux gumlox ang ah, ka daux pa yuh ang ah, yuh khawm: uik ka daux ceukaux Simiang Yesux, mai: yaogyaw bwanson: ka Siyiex pa mawh Keeing: Cao: ka daux Nawh heue:.

Grawng: krax ot krax koe:

3:18-4:1 koe: daux lai Efesux 5:22-6:9

18 Moeng khankix eue:, kieh koe: krax cu krax nghiet ka mex tix, awm: pa khaw: ka daux Simiang. 19 Mex khankix eue:, moh ka moeng tix, mai: paw nieb kieh koe: krax songrhawm: ka kix heue:. 20 Kawn: nyawm khankix eue:, nghiet lox miex keeing: tix ka daux ku ceu khawm: uik, grawh grawng: nawh pa yuh nan: mawh pa khaw: pa caw rhawm: ka daux Simiang heue: 21 Keeing: khankix eue:, paw cheeik tix kieh kawn: pex songrhawm:, ha kix kox laux rhawm: kah heue:. 22 Siliex khankix eue:, nghiet lox kix pa mawh cao: pex ka daux nex nham:, ka daux ku ceu khawm: uik, ang mawh ceu pa yuh pa yaox ka ngai: khaing:, viang mawh kawx nan: yuh ka daux pa viex rhawm: tix khawm: uik, ka daux pa lhat pex ka Simiang heue:. 23 Pex yuh pa tix ang ah, viex rhawm: tix coca: tix yuh, awm: pa yuh son Simiang, mai: paw yuh awm: pa yuh son kawn: pui heue:. 24 Mawh kheu hoik tawng pex grawng: tag sang pon bwanson: pa mawh sin: khaing: Simiang. Grawh grawng: nawh pa yuh pex mawh son Simiang Cao: Khrit heue:. 25 Grawh grawng: nawh kaw pa yuh pa ang khaw:, tag sang deeh pon son pa ang khaw: pa hoik yuh nawh an, mai: ang koe: ceu pa jhak ka pakngai: pui heue:.

Simin Ting 4

1 Cao: khankix eue:, yuh pa khaw: mai: pa awm: paox tix ka siliex pex khankix, kheu hoik tawng pex grawng: koe: pex Cao: ka daux meung raoma: heue:.

Lox jeeh sidiex mai: lox nawb

2 Ca: nied tix rawg bwan: pot, mai: pau tix jhak ka daux an tau mai: krax yaogyaw bwanson:, 3 son ex kawx rawg bwan:, yuh ka mawx son sang paoh Siyiex siviex ka ex, son gumlox bwan:, tix sidiex pa raux pa mox grawng: Cao: Khrit, pa hoik phyawk aux kah kheu jao an, 4 mai: son sang chix kieh aux pa raux pa mox an sidawng:, awm: pa khaw: aux tix sidiex heue:. 5 Hu: ka daux pingnya cuyi mai: kix pa ot plak praix, mai: taoh ka bawg yam heue:. 6 Kieh lox sikah pex mhawm: ku jheeng: jheeng:, pa hoik laoh ka kih, yuh ka mawx son sang chix pex tix deeh pawk lox ka pui ku kaux heue:.

7 Grawh grawng: aux khawm: uik, Tukhik pa mawh puxaik pa moh, mai: sara pa kaux sijax, mai: paox siliex ka daux Simiang, tag sang kieh pex tawng heue:. 8 Kaw pa ploi: aux hu: ka pex son jao in, yuh ka mawx son sang tawng pex ka grawng: yix, mai: yuh ka mawx son sang kieh nawh pex nyawmrhawm: kah, 9 pa ploi: aux nawh hu: tau mai: Awnesimux, pa kaux sijax pa mawh puxaik pa moh, pa mawh pui khaing: ka daux pex tix kaux heue:. Kiex tag sang kieh pex tawng grawh grawng: tin: ku ceu khawm: uik heue:.

10 Arittakhux pa mawh paox pa laung tau mai: aux nawb ka pex, mai: Makux pa caw kawn: nan: Banabax, (Grawng: Makux pex hoik pon lox grawng: pa tawm: aux ka pex. Phan: nawh hoek ka pex rieb tix teei nawh awawx.), 11 mai: Yesux pa kok mawh Yusatux, pa dex mai: cub pa pat hak kawx nawb ka pex. Mawh in kix khaing: pa mawh paox pa yuh kaing son meung Siyiex, mai: pui pa kieh aux nyawmrhawm: heue:. 12 Epaphrax pa mawh pui khaing: ka daux pex tix kaux, mai: siliex Yesux Khrit nawb ka pex, mai: nawh nied tix rawg bwan: son pex ku jheeng: jheeng:, yuh ka mawx son sang kaux cung sijung: pex mhawm: mhawm:, mai: uik grum tawng tom: vhahrhawm: ka alo Siyiex khawm: uik heue:. 13 Grawh grawng: nawh aux kham: mhai: sakse: grawng: pa nied nawh tix yuh son pex, mai: son pui veng Lawdikix, mai: veng Herapawlix heue:. 14 Lukax cao: sidah pa moh aux, mai: Demax nawb ka pex heue:. 15 Nawb ka puxaik khankix pa ot ka daux veng Lawdikix, mai: ka Numphax mai: ka ceucao pa khrawm: paox tix ka daux nyiex nawh heue:. 16 Khaix hoik phat lai in ka sinax pex, viang ka ceucao veng Lawdikix kawx, kieh phat heue:. Mai: lai khaing: veng Lawdikix pex phat awawx. 17 Mai: ah nin: ka Akhippux, "Rien rhawm: tix ka kaing jhaw: cao: sidiex pa hoik pon maix ka daux Simiang, yuh ka mawx son sang yuh maix tom: grum naog."

18 Aux Pawlux tiem: lox nawb in ka taix tokaux tix heue:. Doh keud ka ceu pa phyawk ka aux awawx. Kieh bwanson: ot tau mai: pex liak. Amen.