3 Yohan

Lai Yohan Phuk Loe:

Simin Ting 1

Lox nawb

1 Kaw pa riex ju tiem: tix tawx ka Kayux, pa moh pa rhawm:, pa moh aux kah tete telai heue:. 2 Kaw pa moh aux eue:, aux rawg bwan: yuh ka mawx son sang haok hwan: maix ka daux ku ceu khawm: uik, mai: son sang koe: krax nyawm ot nyawm koe:, awm: chix haok chix hwan: ju maix heue:. 3 Grawh grawng: nawh aux kied koe: krax gauxrhawm: gauxrhi: yam puxaik khankix hoek mai: kham: mhai: sakse: grawng: pa mawh pa meh maix, awm: hu: maix ka daux pa mawh pa meh heue:. 4 Krax gauxrhawm: aux pa lheu: ting khaing: yam mhong: grawh grawng: kawn: praix aux khankix hu: ka daux pa mawh pa meh ang lai koe: heue:.

5 Kaw pa moh aux eue:, maix hoik kaux sijax ka daux can pa yuh maix son puxaik khankix, mai: son nyo sinie khankix heue:. 6 Kix hoik kham: mhai: sakse: grawh grawng: krax moh krax rhawm: maix ka sivoe ceucao heue:. Maix tag yuh pa caw pa mhawm:, phan: maix teem: hu: tawx kix, ka daux krax pa hu: kix, awm: pa keung: pa khaw: ka Siyiex. 7 Mawh kheu hoik hu: kix son Ceukaux An, mai: ang teei tid tix khaing: pui tang: ceu tang: cat khankix heue:. 8 Mawh kheu nan: ex khaw: tix rieb ka pui pa yuh nan:, yuh ka mawx son sang mawh ex, pui pa rom tix yuh kaing son pa mawh pa meh heue:.

Pa ah ka Deotriphi

9 Aux hoik tiem: lox tiblah hu: ka caucao, viang mawh kawx nan: Deotriphi pa simie tix ting ka piang kix, ang rieb tix teei ex heue:. 10 Mawh kheu nan:, phan: aux hoek, aux tag kieh doh keud doh sawn: ka ceu pa yuh nawh, mai: ka lox pa caox pa caig, pa ah nawh pa ang cee ang cak grawng: ex heue:. Ang nawh vhah rhawm: ka an ngie, nawh tom: ang rieb tix teei puxaik khankix, mai: ka pui pa koe: rhawm: tix sang rieb kix kawx nawh ang cu kix reb, mai: grheu: kix lih khaing: ceucao heue:.

Hawt jawh ka krax gau pa mhawm:

11 Kaw pa moh aux eue:, paw hawt jawh tix yuh ka ceu pa caox, viang mawh nan: hawt jawh tix yuh ka ceu pa mhawm: heue:. Kaw pa yuh pa caox ang sax yaox ka Siyiex heue:. 12 Pui khawm: uik, mai: khawm: pa mawh pa meh kham: mhai: sakse: grawng: Demetrix heue:. Ex kawx kham: mhai: sakse: son nawh heue:. Mai: maix tawng grawh grawng: mhai: sakse: ex mawh pa mawh pa meh heue:.

Lox ghoik mai: lox nawb

13 Viang hoik koe: aux tom: nie ceu son sang tiem: hu: ka maix, aux ang rhawm: tiem: grawng: an kix ka maix, ka rawm: nammeug mai: ka gawng: rawm: nammeug heue:. 14 Viang mawh nan: khaix in ang awt rheung: aux keud pot jun pot tix sang yaox maix, mai: ex tag sang sikah taing: taw: pakngai: paox tix heue:. Kieh pa nhim: koe: ka piang maix heue:. Paoxgrawm khankix nawb ka maix heue:. Nawb ka paoxgrawm pa ot tan: khankix, ka ceukaux pui mawx ceukaux pui an awawx.