2 Yohan

Lai Yohan Phuk Ra:

Simin Ting 1

Lox nawb

1 Kaw pa riex ju tiem: tix tawx ka bon: pa hoik laug mai: kawn: praix kiex khankix pa moh aux ka tete telai, mai: ang joeng mawh ngie aux, viang mawh nan: mawh khawm: kix khawm: uik can pa hoik tawng ka pa mawh pa meh heue:. 2 Ex moh pex kheu pa mawh pa meh pa hoik ot ka daux ex, mai: pa tag sang ot tau mai: ex leeing: ju leeing: phan: heue:. 3 Bwanson:, mai: pa caoxrhawm:, mai: pa nhim:, pa kaoh khaing: Siyiex pa mawh Keeing: Cao:, mai: khaing: Yesux Khrit pa mawh Kawn: Keeing: Cao:, tag sang ot tau mai: ex, ka daux pa mawh pa meh, mai: krax moh krax rhawm: heue:.

Hawt yuh lox tawm: Siyiex

4 Aux kied koe: krax gauxrhawm: kheu hoik yaox aux kawn: praix pax tiblah, pa hu: ka daux pa mawh pa meh, awm: pa hoik pon ex lox tawm: khaing: Keeing: Cao: heue:.

Lox gau mai: lox tawx stix

5 Mai: yamin, bon: eue:, aux khyox ka pax, awm: pa tiem: aux lox pingnyap pa khraox ka pa ang mawh, viang mawh nan: mawh pa hoik koe: ex, khaing: tom: yam jah, yuh ka mawx son sang moh ex ka paox tix heue:. 6 Mai: pa hawt ex khaix lox tawm: jhawm: krai Nawh khankix, mawh krax moh krax rhawm: heue:. Mai: in mawh lox pingnyap awm: pa hoik mhong: pex khaing: tom: yam jah, yuh ka mawx son sang hu: pex ka daux lox pingnyap an heue:. 7 Grawh grawng: nawh pui pie pui lhen: hoik lih hu: ka piang haktiex tom: nie, pa mawh kix pa ang kham: grawng: pa hoek Yesux Khrit ka daux nex nham: heue:. In mawh kaw pa pie pa lhen: mai: mawh antikhrit heue:. 8 Rien tokaux pex, yuh ka mawx son ang sang nai: sang grai:, ceu pa hoik yuh ex khankix, viang mawh nan: son sang pon pex bwanson: pa grum naog heue:. 9 Pui mawx ang ah pa lheu: luan yuh, mai: ang ot ka daux lox pa gau Cao: Khrit, ang lai koe: Siyiex, mai: kaw pa ot ka daux lox gau Cao: Khrit, koe: khawm: Keeing: Cao: mai: Kawn: Cao: heue:. 10 Phan: pui tix kaux kaux hoek ka pex pa ang viex lox gau in, paw vi kwan tix rieb nawh laig daux nyiex pex, mai: paw vi ah lox nawb ka nawh heue:. 11 Grawh grawng: nawh kaw pa nawb bwan: ka pui pa yuh nan:, hoik kleuk hoik neuex ka daux krax twah krax klaung: ceu pa caox nawh heue:.

Lox ghoik mai: lox nawb

12 Viang koe: aux grawh grawng: tom: nie ceu son sang tiem: hu: ka pex, ang aux rhawm: teei rawm: nammeug tiem: ka ce:, viang mawh nan: aux keud pot jun pot tix sang hoek ka pex, mai: tix sang sikah taing: taw: pakngai: paox tix, yuh ka mawx son sang grum naog krax gauxrhawm: pex heue:. 13 Kawn: praix puxo: cie pax, pa hoik laug khankix, nawb ka pax heue:.