2 Timose

Timose Phuk Ra:

Simin Ting 1

Lox nawb

1 Pawlux pa mawh kawncau pa ting Yesux Khrit, kheu alo Siyiex, awm: pa khaw: mai: lox mukheu grawng: ju pa im: pa koe: ka daux Yesux Khrit. 2 tawx ka Timose, kawn: pa moh aux heue:. Kieh koe: bwanson:, mai: pa caoxrhawm:, mai: pa nhim:, pa kaoh khaing: Siyiex Keeing: Cao:, mai: Simiang ex Yesux Khrit liak.

Kaux sijax ka kaing jhaw: Simiang mai: viex rhawm: tix sidiex

3 Aux yaogyaw ka Siyiex, pa yuh aux kaing krub kah, ka daux rhawm: dee keud pa singax singeh, awm: hoik yuh tax keeing: aux khankix, yam doh keud aux ka maix, ka daux pa rawg aux bwan: ang jud ang jai khawm: ponngaix ponsawm:, 4 mai: kied byaong mai: simie tix yaox maix, yam doh keud aux ka pa lih rawm: ngai: maix, yuh ka mawx son sang naog krax gauxrhawm: aux heue:. 5 Kheu hoik kieh aux doh keud ka krax yumrhawm: pa ang koe: dee ne, pa koe: ka daux maix, pa hoik koe: phaoxka: ka daux yiex Lo-ix maix, mai: ka daux miex maix Unik, mai: pa hoik yumrhawm: aux grawng: pa koe: ka daux maix khawm: heue:. 6 Mawh kheu jao in aux tom: kieh maix deeh doh keud, yuh ka mawx son maix sang sigwiex tix so: khawngphak Siyiex, pa hoik koe: ka daux maix, kheu deuh aux taix kah heue:. 7 Grawh grawng: nawh Siyiex hoik tawx ex rhawm: pa chix lhat chix graung ang mawh, viang mawh nan: hoik tawx rhawm: pa koe: siawp sibrawm, mai: pa moh pa rhawm:, mai: pa chix priex rhawm: tix heue:. 8 Mawh kheu nan: paw kaig ka pa kham: mhai: sakse: grawng: Simiang ex, mai: ka grawng: aux pa mawh pui pa hoik laung cie Nawh, viang mawh nan: neuex mai: aux daux pa kham: geu: pa nu son lox bwan: gauxrhawm: gauxrhi:, awm: pa khaw: mai: siawp sibrawm Siyiex, 9 pa hoik taoh ex, mai: pa hoik kok ex kah, pa kok pa singax singeh, ang mawh ka pa khaw: mai: kaing pa yuh ex, viang mawh kawx nan: mawh pa khaw: mai: pa hoik yiag hoik bak Nawh, mai: bwanson: pa hoik tawx ka ex ka daux Yesux Khrit, tom: ka: sivoe yam jah tix koe: bawg yam, 10 viang mawh nan: hoik sidawng: yamin ka pa lih bleeh Cao: Taoh ex Yesux Khrit, Kaw pa hoik kieh kloi: krax yum, mai: pa viex pa im:, mai: pa ang chix yum, tix kieh sidawng: ka daux lox bwan: gauxrhawm: gauxrhi:, 11 pa hoik ciak tix kieh aux mawh cao: sidiex, mai: kawncau pa ting, mai: sara cao: gau ka pui tang: ceu tang: cat khankix heue:. 12 Grawh grawng: nawh, mawh kheu grawng: in aux tom: yaox tix kham: geu: ceu in khankix, viang mawh kawx nan: ang aux lai kaig tua, mawh kheu hoik tawng aux Kaw pa hoik yumrhawm: aux kah, mai: aux tawng grawng: chix pau Nawh ka ceu pa hoik tawx hoik pong aux ka Nawh tom: singaix an heue:. 13 giex tom: sied ka gumlox pa mawh pa meh, ceu pa hoik mhong: maix khaing: aux, ka daux pa yumrhawm:, mai: pa moh pa rhawm: pa koe: ka daux Yesux Khrit heue:. 14 Ceu pa mhawm: pa hoik tawx hoik pong ka maix an, pau ka daux Khwan: Singax Singeh pa ot ka daux ex heue:.

15 Maix hoik tawng grawh grawng: pui meung Asix khawm: uik hoik tieh tix hu: khaing: aux, khawm: kiex pa mawh Pukilux mai: Heramogen heue:. 16 Kieh Simiang caoxrhawm: ka piang nyiex Awnesiphaw liak, maw kheu hoik kieh nawh aux nyawmrhawm: lawx lawx, mai: ang lai kaig ka grawng: ceng cie aux heue:. 17 Viang mawh nan: yam hoek aux ka veng Romax nawh nied tix coca: sawg aux mai: yaox ka aux heue:. 18 (Kieh Simiang kieh nawh pon pa caoxrhawm: khaing: Simiang ka daux singaix an liak). Mai: maix hoik tawng mhawm: mhawm: grawng: hoik yuh nawh miex ceu son aux ka daux veng Efesux heue:.

Simin Ting 2

Een: rhawm: tix kaux cong: ka daux Simiang

1 Mawh kheu nan:, kawn: aux eue:, kieh baox thiem: riang ka daux bwanson: pa koe: ka daux Yesux Khrit heue:. 2 Mai: ceu pa hoik mhong: maix khaing: aux khankix, ka sinax pui kham: mhai: sakse: tom: nie, maix tawx pong ka pui pa kaux sijax khankix, pa sang chix gau ka khawm: pui tang: kaux khankix heue:. 3 Kham: geu: ka ceu pa nu tau mai: aux, awm: pui naing pa mhawm: cie Yesux Khrit awawx. 4 Pui mawx ang ah pa yuh pui naing, yuh tix ang kieh tokaux tix koe: dee tuh dee vhak ka grawng: pa tang: yuh tix, yuh ka mawx son sang pon yuh nawh pa khaw: pa caw rhawm: ka kaw pa hoik kieh nawh mawh pui naing. 5 Mai: phan: pui tix kaux kaux cha: paox tix ka daux pa klieh, ang lai tawx nawh ceep mhok khri:, phan: nawh ang hawt yuh awm: pa koe: been. 6 Pui pa yuh kaing ka daux ma:, tag lai mawh pa pon plix ka: sivoe paox tix heue:. 7 Keud ka grawng: pa krai aux. Grawh Grawng: nawh Simiang tag sang tawx krax tawng krax yung ka maix ka daux ku ceu khawm: uik heue:. 8 Doh keud ka Yesux Khrit pa mawh ceucat Dawit, pa hoik deeh kaoh im: khaing: krax yum, awm: pa khaw: mai: lox bwan: gauxrhawm: gauxrhi: pa sidiex aux heue:. 9 Mawh kheu lox sidiex an, aux yaox tix kham: geu: pa nu, tom: phyawk aux awm: pui caox, viang mawh kawx nan: ang pon tix phyawk ka gumlox Siyiex heue:. 10 Mawh kheu nan: aux tom: kham: tom: geu: ku ceu khawm: uik, son pui pa hoik laug khankix, yuh ka mawx kix kawx, sang pon krax taoh pa koe: ka daux Yesux Khrit, tau mai: min: plakngai: leeing: ju leeing: phan: heue:. 11 Lox pa ah nin: mawh pa kaux sijax, "Phan: ex hoik yum tau mai: Nawh, ex tag sang im: tau mai: Nawh heue:. 12 Phan ex gun pa kham: pa geu:, ex tag sang pon tix giex kaing: tau mai: Nawh heue:. Phan: ex thiang: tix tik Nawh, viang Nawh Cao: kawx tag sang thiang: tix tik ex heue:. 13 Viang ang ex kaux sijax kawx, Nawh Cao: kawn: kaux sijax, mawh kheu ang Nawh pon thiang: tix tik tokaux Tix heue:.

Pui yuh kaing pa ang koe: dee kaig tua

14 Kieh kix deeh doh keud ka grawh grawng: ceu in khankix, mai: tawm: lox ka kix sivoe Simiang, yuh ka mawx son ang kix sang coca: grawng: pa thung: thiang: ka lox pa ang tie koe: bwanson: tid tix, pa kieh pui pa nghiet khankix laux leeing: kah heue:. 15 Nied tix coca: yuh ka mawx son sang pon maix tix tawx tokaux tix ka Siyiex, pa mawh pui pa hoik cheu: tix yaox kah, pa mawh pui yuh kaing pa ang koe: dee kaig tua pa chix gwieh ka gumlox pa mawh pa meh awm: pa khaw: heue:. 16 Viang mawh kawx nan: via khaing: lox bied pa caox khankix, mawh kheu gumlox khankix sang nie kieh lud hu: ka daux pa ang khaw: ka Siyiex. 17 Mai: lox kix chix sawm: hu: awm: kaman. Kiex Humenex mai: Philit kawx mawh ka daux kix heue:. 18 Pa mawh pui pa hoik lud hu: khaing: pa mawh pa meh, mai: ah "Krax pa deeh kaoh im: hoik luan," mai: kieh krax yumrhawm: pui tiblah laux kah heue:. 19 Viang mawh kawx nan: jaong num: Siyiex kaux cong:, pa koe: cum: yuh nin, "Simiang tawng kix pa mawh cie Tix," mai: khawm: pa ah, "Kieh pa kok ka ceukaux Simiang ku kaux daux pui lih hu: khaing: pa ang rah ang see heue:." 20 Ka daux nyiex pa ting koe: ngie klong: khri: klong: mau khaing: ang mawh, viang mawh nan: koe: khawm: tawg khaox klong: tiex, tiblah mawh pa koe: min: plakngai:, mai: tiblah mawh pa ang koe: min: plakngai: heue:. 21 Mawh kheu nan: phan: pui tix kaux kaux kieh tokaux tix singax khaing: in khankix, nawh tag mawh klong: pa koe: min: plakngai:, pa singax, mai: pa mhawm: son sang shiao cao: nyiex, pa hoik cox hoik khre: ka son kaing pa mhawm: ku ceu heue:. 22 To: khaing: alo nex nham: sinaw, mai: hawt khaix pa rah pa see, mai: krax yumrhawm:, mai: krax moh krax rhawm:, mai: krax nhim:, tau mai: kix pa kok ka Simiang, khaing: daux rhawm: rhi: pa singax singeh heue:. 23 Viang mawh kawx nan: via khaing: pa chawk pa cheng: pa daox pa aw:, mai: tawng grawng: khankix mawh pa chix kieh simah simaing: heue:. 24 Siliex Simiang tag ang lai simah simaing:, viang mawh nan: tag lai viex rhawm: awn: ka pui khawm: uik, pa jiet chix gau, mai: pa pon gun pon yeung, 25 tag lai viex rhawm: awn: rhawm: tiem mai: gau ka kix pa deeh kieh raw ka tokaux tix, ha Siyiex kox deeh kieh kix doh keud ka phimap tix mai: hoek ka pa tawng pa yung pa mawh pa meh, 26 mai: yuh ka mawx son sang pon kix tix deeh taoh tokaux tix khaing: daux kie phicaox, pa hoik giex kix son sang kieh hawt alo nawh heue:.

Simin Ting 3

Lox tawx satix ka singaix sidah khankix sax

1 Een: tix tawng ceu in, ka daux bawg yam singaix sidah khankix sax, tag mawh bawg yam pa langteung: nu heue:. 2 Grawh grawng: nawh pui tag sang mawh pui pa moh tokaux tix, mai: pa moh mau, mai: pa yaw tix, mai: pa ting rhawm:, mai: pa sa pa lao, mai: pa ang nghiet lox miex keeing:, mai: pa ang tawng bwanson:, mai: pa ang singax singeh, 3 pa ang koe: krax moh, pie been moh pa sax koe: pui, pa ang rhawm: pluat phimap pui, pa nieb deuh phimap ka pui, pa ang chix priex rhawm: tix, pa langteung: caox, pa ang moh ka pa mhawm:, 4 pui lulie: pa ang kaux sijax, pui pa nieb yuh tix tawng uik, pui canyhau:, pui pa nie lheu: moh krax gauxrhawm: haktiex khaing: pa moh ka Siyiex, 5 mai: pui pa yuh grang awm: mawh kix pa nab pa yam pa yuh pa khaw: ka Siyiex, viang mawh nan: kix hoik thiang: tix tik ka siawp sibrawm cie an heue:. Via hu: khaing: khawm: inkix awawx. 6 Grawh grawng: nawh, mawh in kix pa mawh kix pa laig daux nyiex khankix miep miep, mai: giex ka bon: daox khankix, pa peeh phimap, mai: pa tok hu: alo nex nham: ka ku ceu heue:. 7 Viang kix meung: tix gau kawx, kix ang sax hoek ka krax tawng krax yung ka pa mawh pa meh heue:. 8 Mai: awm: Yanne mai: Yambre kieh raw ka Mose, pui in kix kawx, kieh raw ka pa mawh pa meh heue:. Pa mawh pui pa hoik sium: daux rhawm: dee chix keud tix, mai: pa ang koe: bwanson: tid tix ka krax yumrhawm: heue:. 9 Kix tag ang pon tix baox yuh hu: sivoe, mawh kheu pa nieb yuh kix tag sang sidawng: ka pui khawm: uik, awm: pa hoik yuh kiex Yanne mai: Yambre heue:. 10 Viang mawh kawx nan: maix hoik hawt tix tawng ka pa gau aux, mai: ka krax tuah krax klaung:, mai: ka pa keud, mai: ka krax yumrhawm:, mai: ka krax pa lang: gun lang: yeung, mai: ka pa moh pa rhawm:, mai: ka pa gun pa yeung, 11 mai: ka pa tuktiak tukte:, mai: ka pa kham: pa geu:, mai: ceu pa hoik mawh ka aux khankix, ka daux veng Antiuk, mai: ka veng Ikawnix, mai: ka veng Lusatrax, mai: grawng: ceu pa tuktiak tukte: pa hoik kham: geu: aux heue:. Mai: khaing: ceu an khankix khawm: uik Simiang hoik taoh aux kah heue:. 12 Mawh heue:, mai: can pui pa simie tix yuh pa khaw: pa caw mai: Siyiex ka daux Yesux Khrit khawm: uik, tag sang yaox tix kham: pa tuktiak tukte: heue:. 13 Pui caox khankix mai: pui pa nieb kroh tix pie khankix, tag sang nie caox sinyek sinyek, mai: pie ka pui tang: kaux, mai: kieh pie ka khawm: tokaux tix heue:. 14 Viang mawh kawx nan: maix ot kaux cong: ka daux ceu pa hoik gau maix, mai: pa hoik tawng maix mawh pa mawh tete, kheu hoik tawng grawng: pa gau maix ceu an khankix khaing: pui pa yuh ka mawx, 15 mai: jah tom: yam mawh maix kawn: nyawm maix hoik tawng phuk lai sigang: khri: pa singax singeh, pa chix kieh maix koe: pingnya tom: hoek ka krax taoh kheu pa yumrhawm: ka daux Yesux Khrit. 16 Phuk lai sigang: khri: can pa koe: khankix, mawh pa hoik phlu: Siyiex bhawm:, mai: koe: bwanson:, son pa gau, mai: son sang plak jhi: tix tawng phimap, mai: son pa cox dee lud, mai: son pa gau ceu pa rah pa see, 17 yuh ka mawx son sang kieh pui Siyiex mawh pa grum naog, mai: pa hoik rien tix son kaing pa mhawm: ku ceu heue:.

Simin Ting 4

Lox pa nawm: cao: Pawlux tix deuh

1 Aux tawm: lox ka maix ka sivoe Siyiex, mai: Yesux Khrit, pa tag sang prawng sang ca: ka khawm: pui im: mai: pui yum, mai: kheu pa lih bleeh Nawh mai: meung Nawh, 2 sidiex gumlox bwan:, nied tix coca: yam caw bawg yam ang ah, yam ang caw bawg yam ang ah, mai: plak jhi: pui yaox phimap, mai: ah, ne, mai: jeeh nyaw, mai: gau ka krax pa lang: gun lang: yeung khawm: uik heue:. 3 Grawh grawng: nawh bawg yam tag sang hoek yam kix tag ang pon kham: tix nghiet ka lox gau pa mawh pa meh, viang mawh kawx nan: kheu ngiex yhaok kix, kix tag sang khrawm: sang pum: sara cao: gau, pa sang hawt alo nex nham: kix heue:. 4 Mai: kix tag sang veeh yhaok tix ang nghiet ka pa mawh pa meh, mai: tieh tix nghiet ka lox been pa ang tie mawh khankix heue:. 5 Viang mawh kawx nan: maix priex rhawm: tix ka daux ku ceu khawm: uik, kham: geu: ka pa nu, yuh kaing sara cao: sidiex, yuh tix kieh pa yuh maix grum naog heue:. 6 Grawh grawng: nawh uik tan aux awm: pa prauk rawm: tan, mai: bawg yam lih hu: aux hoik hoek heue:. 7 Aux hoik yuh naing, naing pa mhawm:, aux hoik sidah to:, ka krax dee to:, aux hoik priex ka krax yumrhawm: heue:. 8 Jah tom: yamin hoik deuh mhok khri: pa rah pa see son aux, pa Simiang, pa mawh Cao: Prawng Pa Rah Pa See tag sang tawx ka aux ka daux singaix an, mai: ang joeng mawh ngie ka aux viang mawh kawx nan: ka khawm: pui pa moh ka pa lih bleeh Nawh Cao: khawm: uik heue:.

Lox stang pa tang: gwieh tang: hu:

9 Nied tix coca: son sang hoek ka aux laung laung, 10 mawh kheu Dema hoik prah aux, kheu moh nawh ka haktiex in mai: hoik hu: ka veng Thesalonix, mai: Krisake hoik hu: ka meung Kalatix, mai: Titux hoik hu: ka meung Dalamatix heue:. 11 Mawh ngie Lukax pa ot tau mai: aux khaing:. Rieb tix teei Makux mai: viex nawh hoek tau mai: maix, mawh kheu nawh koe: bwanson: son aux daux kaing sidiex aux heue:. 12 Aux hoik ploi: Tukhik hu: ka veng Efesux heue:. 13 Yam hoek maix viex sibex da: pa deuh aux mai: Kapux daux veng Troax, mai: phuk lai khankix, mai: nie ting mawh ka lai hak khankix heue:. 14 Alezandre cao: tiem: tawng raoh hoik yuh pa caox ka aux tom: nie, Simiang tag sang deeh tawx ka nawh awm: pa hoik yuh nawh heue:. 15 Rien rhawm: tix ka nawh khawm: awawx, kheu nawh hoik ting kieh raw ka lox ex heue:. 16 Yam tieb tie aux grawng: pa deuh phimap ka aux bawg phaoxka:, ang ot plak aux tix kaux kawx, viang mawh nan: grham: aux khawm: uik, paw awt kieh hoek ka piang kix liak. 17 Viang mawh kawx nan: Simiang ot plak aux, mai: baox tiien riang rao ka aux, yuh ka mawx son sang pon grum sidiex aux lox bwan:, mai: son sang pon mhong: pui tang: ceu tang: cat khawm: uik heue:. Mai: hoik taoh aux khaing: daux jheeh sivai sangsi: heue:. 18 Simiang tag sang taoh aux khaing: kaing pa caox ku ceu, mai: priex aux tom: hoek ka meung raoma: cie Nawh heue:. Kieh Nawh Cao: koe: min: plakngai: ku ju leeing: ju leeing: phan: liak. Amen.

Lox pa nawb bwan:

19 Nawb ka Prisikilax mai: Akulax, mai: pui nyiex Awnisiphaw: khankix awawx. 20 Erattux hoik ot khaix ka veng Kawrinthux, viang mawh nan: kheu saux Trawphimux aux hoik prah nawh ka veng Meletux heue:. 21 Nied tix coca: hoek ka: sivoe bawg yam kuat awawx. Upulux, mai: Pudix, mai: Linux, mai: Klawdix, mai: puxaik khankix khawm: uik, nawb ka maix heue:.

22 Kieh Simiang ot tau mai: khwan: maix liak. Kieh bwanson: koe: mai: maix heue:.