2 Petrux

Petrux Phuk Ra:

Simin Ting 1

Lox nawb

1 Simon Petrux, pa mawh siliex mai: kawncau pa ting Yesux Khrit, tawx ka kix, pa hoik pon krax yumrhawm: pa awm: paox tix, pa mhawm: pa ngawh, tau mai: ex, ka daux pa rah pa see Siyiex ex, mai: Yesux Khrit Cao: Taoh heue:. 2 Kieh bwanson: mai: pa nhim: baox tiien baox thie: ka pex, ka daux pa tawng pa yung ka Siyiex, mai: Simiang ex Yesux heue:.

Jhawm: krax pa mhawm: kawn: Khrit

3 Siawp sibrawm Nawh Cao: hoik tawx ka ex ku ceu ku cawng khawm: uik pa dex pa dawd mai: pa im: ju, mai: pa chix nab chix yam mai: pa yuh pa khaw: ka Siyiex, ka daux pa tawng pa yung ka Kaw pa hoik kok ex, ka min: plakngai: mai: pa mhawm: cie Tix heue:. 4 Mawh kheu ceu an tom: tawx lox mukheu pa kied ting mai: pa ngawh khankix heue:. Yuh ka mawx kheu lox mukheu an khankix, pex tag sang mawh pa neuex, mai: pa pon ceu pa dex pa dawd ka tokaux Siyiex, kheu hoik luan khaing: pa seeing: pa brai: ceu pa koe: ka daux haktiex in kheu alo nex nham: heue:. 5 mawh heue:, mawh kheu jao in nied tix coca: son sang baox tiien baox thie: pa mhawm: pa mhiem: ka krax yumrhawm: pex, mai: pa chix tawng chix yung ka pa mhawm: an, 6 mai: ka pa chix tawng an, pa chix pex tokaux tix, mai: ka daux pa chix pex tokaux tix, pa chix gun chix yeung, mai: ka daux pa chix gun chix yeung pex an, kieh mawh pa chix nab chix yam mai: pa yuh pa khaw: ka Siyiex heue:. 7 Mai: ka daux pa chix nab chix yam mai: pa yuh pa khaw: ka Siyiex, krax pa moh ka puxaik khankix, mai: ka daux krax pa moh ka puxaik khankix, krax moh krax rhawm: heue:. 8 Grawh grawng: nawh phan: ceu in khankix mawh cie pex, mai: chix haok chix hwan:, kix tag ang kieh pex mawh pui nieh mai: pa ang chix plix plix, ka daux krax pa tawng pa yung ka Simiang ex Yesux Khrit heue:. 9 Viang mawh kawx nan: kaw pa ang koe: ceu in khankix hoik dugngai:, mai: chix yaox ngie pa koe: dee dex khaing:, mai: hoik piawm: grawh grawng: pa hoik sigrah phimap pa prim: nawh heue:. 10 Mawh kheu nan: puxaik khankix eue:, nie baox nied tix coca:, son sang kieh pa hoik kok mai: pa hoik laug pex kaux cong:. Grawh grawng: nawh phan: pex yuh ceu in khankix, pex tag ang lai sideeing caong tix tix bawg kawx heue:. 11 Mawh kheu ka daux pa yuh nin:, tag sang blon: tawx akhwang: ka pex son sang laig ka daux meung leeing: ju leeing: phan: Simiang mai: Yesux Khrit Cao: Taoh ex heue:.

Siawp sibrawm pa ting ceu krax pa tiem: lai

12 Mawh kheu nan: aux tag sang rien tokaux tix jheeng: jheeng:, son sang kieh pex doh keud ka grawh grawng: ceu in khankix, viang hoik tawng pex grawng: khankix, mai: kaux cong: ka daux pa mawh pa meh pa hoik koe: tau mai: pex heue:. 13 Yam kawn: ot kawn: koe: aux ka daux nyiex gox man: in, aux keud aux ce: ceu pa sang kieh aux pex doh keud doh sawn: uik khaw: heue:. 14 Kheu hoik tawng aux bawg yam pa sang peeik aux tix deuh nyiex gox man: in nied tix hoek, awm: hoik grux jhi: Simiang ex Yesux Khrit ka aux heue:. 15 Mawh heue:, aux tag nied tix coca: yuh ka mawx son sang pon pex tix doh keud ka grawng: ceu in khankix, khaix ang aux koe: heue:. 16 Grawh grawng: nawh yam ex kieh pex tawng grawng: siawp sibrawm mai: pa hoek Simiang ex Yesux Khrit, ex hoik hawt lox been pa nieb yuh cuyi: tix keud ang mawh, viang mawh nan: ex mawh pa hoik yaox min: plakngai: mai: pa ting pa lhaong: Nawh Cao: ka ngai: tix heue:. 17 Mawh kheu hoik pon Nawh Cao: pa yung: pa yi: mai: min: plakngai: khaing: Siyiex pa mawh Keeing: Cao:, yam lih hoek lox ka Nawh khaing: Pa Ting Pa Lhaong:, mai: Pa Ting Min: Plakngai:, pa ah nin:,

386"In mawh Kawn: pa moh Aux, pa khaw: pa caw rhawm: Aux heue:."

18 Mai: lox in tokaux ex kawx hoik mhong: yam lih hoek khaing: raoma:, yam ot ex tau mai: Nawh Cao: ka gawng: pa singax singeh heue:. 19 Mai: ex hoik koe: lox jhai: pa hoik yuh nie blon: kaux. Pex hoik yuh pa khaw: ka pa nghiet pex ka in, awm: ka kawkngu pa jhan: riang ka daux dee vhaik, tom: hoek singaix bah riang praix, mai: simuing: grieang hoik lih ka daux rhawm: rhi: pex heue:. 20 Kieh tawng in phaoxka:, dee bleeh lox jhai: pa koe: ka daux phuk lai sigang: khri:, ang chix pon tix teei lih nong: nong: heue:. 21 Grawh grawng: nawh lox jhai: ang sax lih hoek kheu alo kawn: pui tix bawg kawx, viang mawh nan: Khwan: Singax Singeh hoik kieh pui pa singax singeh khankix, krai lox pa kaoh khaing: Siyiex heue:.

Simin Ting 2

Rien tix ka sara cao: gau pa pie pa lhen:

1 Viang mawh kawx nan:, cao: jhai: pa ang mawh ang meh khankix kawx, hoik koe: ka sinax pui khankix, awm: hoik koe: cao: gau pa ang mawh ang meh ka sinax pex. Kix tag briex tix viex laig lox pa tag kieh laux kieh leeing:, mai: viang ka Cao: pa hoik liag kix kawx, kix tag thiang: tix tik kah, mai: nied tix viex ceu pa laux pa leeing: ka piang tokaux kix laung laung heue:. 2 Mai: pui tom: nie tag sang hawt tix yuh krax pa seeing: pa brai: pa yuh kix, mai: mawh kheu sipieag kix tag sang ah lox map, lox caox, grawng: Krax Pa Mawh Pa Meh heue:. 3 Mai: ka daux krax pa ghoing: kix, kix tag sang teei lox pa nieb nyaw nieb glaw: mai: yuh pex mawh kraung khrai:. Krax pa sang prawng sang ca: ka kix tom: di dix tag ang kut tix, mai: krax laux krax leeing: kix ang laig it heue:. 4 Grawh grawng: nawh phan: Siyiex ang deuh ka kawncau Siyiex khankix yam yuh kix phimap phigrham:, viang mawh nan: hoik teei tix taing kix ka daux mawnarhok, mai: hoik tawx hoik pong kix ka daux daux pa vhaik, son sang priex kix tom: singaix prawng singaix ciyang, 5 mai: ang deuh ka haktiex di dix, viang mawh nan: hoik priex mai: taoh ka Noax pa mawh cao: diex cao: gau pa rah pa see, mai: pui tang: kaux aliah kaux yam kieh Nawh Cao: rawm: naog kheem: piang haktiex pui pa ang chix nab chix yam mai: pa yuh pa ang khaw: ka Siyiex, 6 mai: kieh veng Sawdom mai: veng gawmawrax deeh tieh tix mawh nyaox, mai: ciyang yuh laux leeing:, son sang yuh kieh mawh mhai: tix hawt jawh pui khankix ka pa tag ot tag koe: khaix pa ang chix nab chix yam mai: pa yuh pa ang khaw: ka Siyiex, 7 mai: hoik taoh Lotax pa rah pa see, yam kha: nawh rhawm: rhi: kheu pa seeing: pa brai: pa yuh pui caox khankix, 8 (Mawh kheu pui rah pui see an, ot sinax kix, mai: kheu yaox kheu mhong: grawng: pa yuh kix pa ang khaw: mai: been li, tom: chu: ka rhawm: pa rah pa see nawh tix ngaix hoik tix ngaix.) 9 Simiang tawng tix chix taoh pui pa chix nab chix yam mai: pa yuh pa khaw: ka Siyiex khankix, khaing: krax nyaw krax glaw:, mai: chix priex pui pa ang rah ang see khankix greem: krax prawng krax ca:, tom: hoek singaix pa prawng pa ciyang, 10 viang mawh nan: sang nie lheu: ah ka kix pa hawt tix hu: khaix alo nex nham:, ka daux pa simie pa seeing: pa brai:, mai: pa ang chix nab chix yam ka ceu pa giex kaing: heue:. Kix ting rhawm: ting rhi:, mai: nieb hawt alo tokaux tix mai: ang ring ang siyaung: tix ah lox pa ang cee ang cak, ka pa ting min: plakngai: khankix, 11 viang kawncau Siyiex khankix, lheu: ting riang mai: siawp sibrawm khaing: kix kawx, ang viex lox prawng pa ang cee ang cak tix deuh phimap ka kix plak sivoe Simiang heue:. 12 Viang mawh kawx nan: pui in khankix awm: tosat pa ang koe: ceu pa chix keud, pa hoik phan: hoik yuh, son sang teei tix yieh laux, pa nieb ah lox pa ang cee ang cak ka grawh grawng: pa ang kix tawng, ka daux ceu pa yieh kix laux an, tag sang yieh kix laux tete, 13 mai: kham: geu: pa ang khaw:, son ngawh riang pa hoik yuh pa ang khaw: heue:. Kix mawh pui pa sawn: ceu pa chax nie luan yuh yam pon singaix, mawh pa gauxrhawm: gauxrhi:. Kix mawh pa preeh pa pliag, pa gauxrhawm: ka daux pa pie pa lhen: kix, yam sawm: yam ih kix tau ka poi mai: pex. 14 Kix koe: ngai: pa naog ceu pa phit pa vao, pa ang pon yut phimap phigrham:. Kix nyaw glaw: ka rhawm: pa ang kaux ang cong: khankix. Rhawm: kix hoik gaux ka daux krax pa ghoing:. Kix mawh kawn: praix pa lawg pa jhax. 15 Kix hoik prah hoik grham: krax pa rah pa see. Kix hoik lud krax mai: hawt hu: krax Balam kawn: simex Bawsaw, pa moh ngawh riang, son pa yuh ceu pa ang khaw:, 16 viang mawh nan: hoik ah ka nawh kheu phimap tokaux tix. La pa aw: hoik sikah ka lox kawn: pui ka nawh, mai: ne ka ceu pa yhot cao: jhai: an heue:. 17 Pui an khankix awm: rawm: keut pa ang koe: rawm:, mai: awm: simawg pa phlu: bhaung: hu: heue:. Hoik priex tix deuh pa vhaik pa luang son kix heue:. 18 Grawh grawng: nawh, kix ah lox ting mu:, pa giex going, mai: teei ceu pa simie alo nex nham: mai: ceu pa chax nie luan yuh mai: nyaw glaw: ka pui pa dex sang luan khaing: kix pa yuh pa ang khaw: ang jiet heue:. 19 Kix nieb tawx lox mukheu tix sang tawx pa ploi: pa luan ka kix, yam tokaux kix uik mawh siliex ka pa cux pa sium: heue:. Grawh grawng: nawh ceu pa yuh ka mawx pex ka pui ang ah, pui an deeh mawh siliex ka an heue:. 20 Grawh grawng: nawh, phan: khaix hoik luan kix khaing: ceu pa seeing: pa brai: haktiex, kheu pa tawng ka Simiang mai: Cao: Taoh Yesux Khrit, mai: deeh baox krix vung vhien: mai: kieh pex ka kix ka daux ceu an, pa hoik mawh ka kix bawg khaix nie lheu: nu khaing: phaoxka: heue:. 21 Phan: kix ang sax tawng krax pa rah pa see lheu: mhawm: khaing: pa hoik tawng ka krax an, mai: deeh tieh khaing: lox tawm: jhawm: krai pa singax singeh pa hoik tawx ka kix heue:. 22 Hoik mawh ka kix awm: lox tiag pa mawh pa meh pa ah nin:,

387"Sox baox deeh hoek ka pa hoik hao: tix, mai: lig miex pa hoik heem: hoik deeh ka pa lulieh tix daux glaox heue:."

Simin Ting 3

Grawng: pa tag sang deeh hoek Cao: Khrit

1 Pui pa moh aux khankix eue:, in mawh lai pa tiem: aux ra: pheen: tix pheen: ka pex, mai: ka daux khawm: ra: pheen: aux hoik so: tix kieh rhawm: pa singax pex doh keud doh sawn: heue:. 2 Yuh ka mawx sang doh keud doh sawn: pex ka gum lox pa hoik grux krai cao: jhai: pa singax singeh khankix, mai: ka lox tawm: jhawm: krai Simiang Cao: Taoh, pa hoik tawx kawncau pa ting pex heue:. 3 Kieh tawng in phaoxka:, ka daux bawg yam singaix pa sidah khankix, pui pa map pa ang cee ang cak khankix, tag hoek mai: viex pa map pa ang cee ang cak, mai: hawt hu: ka alo tokaux tix, 4 mai: ah nin:, "Lox mukheu grawng: pa sang hoek Nawh koe: dee mawx? Grawh grawng: nawh jah ka singaix pa tax du khankix pa hoik laig it, ku ceu khawm: uik kawn: ca: mawh awm: yam jah tix phan: tix yuh heue:." 5 Grawh grawng: nawh kix su: tix ang rhawm: tawng, grawh grawng: raoma: hoik koe: tom: di dix, mai: haktiex pa hoek tix kieh tan: kieh sied mawh khaing: rawm: mai: sigreung rawm:, kheu gumlox Siyiex, 6 mai: ka gumlox Siyiex pa yuh nan:, haktiex pa koe: yam an, hoik laux hoik leeing: kheu naog mai: kheem: rawm: kah heue:. 7 Raoma: mai: haktiex pa koe: yamin kawx kheu gumlox an, hoik deuh son ngu, mai: hoik priex son singaix pa prawng pa ciyang, mai: pa sang yuh laux, ka pui pa ang nab ang yam mai: pa yuh pa ang khaw: ka Siyiex khankix heue:.

8 Pui pa moh aux khankix eue:, paw vi doh piawm: ka grawng: ceu in, tix singaix ka Simiang awm: tix rheng: num, mai: tix rheng: num, awm: ngie tix singaix heue:. 9 Simiang ang nhim: ka lox sijax mukheu Nawh, awm: pui tiblah keud mawh nhim:, viang mawh kawx nan: Nawh lang: gun lang: yeung ka pex, mai: ang rhawm: kieh pui laux leeing: tix kaux kawx, viang mawh nan: Nawh simie pui khawm: uik doh keud doh sawn: ka phimap tix heue:. 10 Viang mawh nan: singaix Simiang tag sang hoek awm: hoek pui briex. Yam an raoma: khankix tag sang grai: hu: tau mai: lox pa kied sinum, mai: tokaux raoma: khankix (pa mawh khix, singaix mai: simuing:) tag sang ceh sang laux ka pa kied hax, mai: haktiex mai: can pa hoik yuh ka daux nawh tag sang proe ka ngu khawm: uik heue:. 11 Mawh kheu hoik yaox pex grawng: ceu in khawm: uik tag sang grai: hu:, pex khaw: tix mawh pui pa yuh ka mawx, ka daux krax twah krax klaung: pa singax singeh mai: pa chix nab chix yam mai: pa yuh pa khaw: ka Siyiex, 12 tix jhak mai: nied tix simie yam sang hoek singaix Siyiex. Mawh kheu singaix an raoma: khankix tag sang gleeing ka ngu mai: laux grai:, mai: tokaux raoma: khankix (pa mawh khix, singaix, mai: simuing:) tag sang ceh sang laux ka pa kied hax heue:. 13 Viang mawh kawx nan: ex krox tix jhak son raoma: pa khraox, mai: haktiex pa khraox, dee sang ot sang koe: pa rah pa see, awm: pa khaw: mai: lox mukheu pa tawx Nawh heue:.

14 Mawh kheu nan:, pa moh aux khankix eue:, kheu hoik yaox grawng: krox pex tix jhak son ceu in khankix, nied tix coca: yuh ka mawx son sang pon tix yaox pex ka daux pa nhim:, mai: pa loig pa ang koe: dee ne ka sivoe ngai: Nawh Cao: heue:. 15 Mai: sawn: ceu pa lang: gun lang: yeung Simiang ex, mawh krax pa taoh, awm: puxaik pa moh ex Pawlux kawx, hoik tiem: tix tawx ka pex, awm: pa khaw: ka pingnya cuyi pa hoik tawx ka nawh, 16 awm: nawh kawx hoik krai grawng: ceu in khankix ka daux lai can pa tiem: tix khawm: uik. Ka daux lai an khankix lox tiblah nu tix tawng dee bleeh, mai: pui pa ang chix tawng mai: pa ang kaux ang cong: khankix, deeh tieh dee bleeh kix, awm: kix kawx deeh tieh dee bleeh, lox phuk lai sigang: khri: pa tang: khankix, tom: kieh mawh krax laux krax leeing: ka tokaux tix heue:.

Lox ghoik

17 Mawh kheu nan:, pui pa moh aux khankix eue:, kheu hoik grux tawng pex grawh grawng: ceu in khankix, rien rhawm: tix, yuh ka mawx son ang pex sang lud hu:, tau mai: pa yuh pui caox khankix, mai: rau khaing: pa kaux pa cong: pex heue:. 18 Viang mawh kawx nan: kieh haok hwan: ka daux bwanson: mai: krax tawng krax yung Simiang Cao: Taoh ex Yesux Khrit heue:. Kieh Nawh koe: min: plakngai: khawm: yamin mai: leeing: ju leeing: phan: liak. Amen.