2 Kawrinthux

Kawrinthux Phuk Ra:

Simin Ting 1

Lox nawb mai: pa ting bwanson:

1 Pawlux pa mawh kawncau pa ting Yesux Khrit kheu alo Siyiex, mai: puxaik ex Timose, tawx ka ceucao Siyiex pa koe: ka daux veng Kawrinthux, mai: ka khawm: pui pa singax singeh khawm: uik pa ot ka daux meung Akhayax ku dah ku dee heue:. 2 Kieh pex koe: bwanson:, mai: pa nhim: pa kaoh khaing: Keeing: ex Siyiex mai: Simiang Yesux Khrit liak.

3 Kieh Siyiex pa mawh Keeing: Simiang ex Yesux Khrit, pa mawh Keeing: ceu pa caoxrhawm:, mai: Siyiex ceu pa nyawmrhawm: khawm: uik, koe: bwanson: liak. 4 Kaw pa kieh ex nyawmrhawm: ka daux ceu pa kharhawm: ex khawm: uik, yuh ka mawx son sang pon ex tix kieh kix pa koe: krax kharhawm: ku ceu nyawmrhawm: kah, kheu krax nyawmrhawm: pa hoik kieh Siyiex, ex nyawmrhawm: kah heue:. 5 Grawh grawng: nawh awm: krax kham: krax geu: Cao: Khrit hoik kied nie ka ex, awm: an krax nyawmrhawm: nyawmrhi: ex kawx, hoik kied nie kheu Cao: Khrit heue:. 6 Viang mawh nan:, phan: ex yaox tix kham: krax kharhawm: kharhi:, mawh son sang nyawmrhawm: pex mai: krax taoh pex heue:. Phan: ang mawh nan: phan: kieh ex nyawmrhawm: nyawmrhi:, mawh son sang nyawmrhawm: pex, pa yuh ka daux krax pa chix gun chix yeung tix kieh pon kham: ceu pa kham: geu: khankix, awm: ex kawx yaox tix kham: geu: heue:. 7 Mai: krax keud pot jun pot ex ka son pex kaux cong: kah, kheu tawng ex grawng: awm: mawh pex pa rom tix kham: krax pa kham: pa geu: khankix, awm: an pex kawx mawh pa rom tix pon krax nyawmrhawm: nyawmrhi: heue:. 8 Grawh grawng: nawh, puxaik khankix eue:, ang ex rhawm: kieh pex mawh pa ang tawng kah grawng:, krax pa kharhawm: kharhi: pa hoik hoek ka piang ex ka daux meung Asix, pa mawh grawng: pa raux yeen gut ex tiem, pa nie luan khaing: pa koe: ex sibrawm tix kham:, tom: hoik laux rhawm: ex, pie grawng: pa sang pon klawd ex kah heue:. 9 Viang mawh nan: tokaux ex hoik koe: pa prawng pa ciyang krax yum ka daux tokaux ex tiru, yuh ka mawx son ang ex sang een: rhawm: ka tokaux tix, viang mawh nan: son sang een: rhawm: ka Siyiex pa kieh pa yum deeh kaoh kah, 10 pa hoik taoh ex khaing: krax yum pa ting niex ding niex dod, mai: pa tag sang baox deeh taoh ka pa mawh Kaw pa hoik deuh ex krax keud pot jun pot ex kah, grawng: kawn: sang ca: taoh Nawh ka ex. 11 Viang pex kawx mawh pa teem: pa coi tau, kheu pa rawg pex bwan: ka son ex heue:. Yuh ka mawx pui tom: nie tag sang yaogyaw bwanson: ka son ex, son khawngphak bwanson: pa hoik tawx ka ex, kheu pui pa rawg bwan: tom: nie heue:.

Krax pa kaux sijax mai: pa rah see Pawlux ka pui

12 Grawh grawng: nawh krax pa yaw rangdi ex mawh in, mawh pa mawh mhai: sakse: pa kham: dee chix keud chix tawng ex, grawng: pa tuah pa klaung: ex ka daux haktiex, mai: pa nie lheu: mawh pa tuah pa klaung: ka pex, mawh pa hoik yuh ka daux pa singax singeh mai: ka daux pa viex khawm: rhawm: tix awm: pa khaw: mai: Siyiex, mai: grawng: ang lai mawh pa yuh ka daux pingnya cuyi pa dex mai: nex nham:, viang mawh nan: mawh ka daux bwanson: Siyiex heue:. 13 Grawh grawng: nawh ang ex lai tiem: tang: ceu ka pex, lheu: khaing: pa hoik phat pex, mai: khawm: pa hoik rieb pex tix teei, mai: aux koe: krax keud pot jun pot grawng: pa sang rieb pex tix teei, tom: to sidah, 14 awm: pa hoik dha: rieb pex tix teei ex ceeix, tix mawh dee sang yaw rangdi pex kah, awm: viang pex kawx mawh dee sang yaw rangdi ex, ka daux singaix Simiang ex Yesux heue:.

15 Mai: kheu hoik yumrhawm: aux yuh nin:, aux hoik bak tix sang hoek ka pex kah sivoe, son sang pon pex bwanson: ra: bawg tix bawg heue:. 16 Aux hoik bak tix sang hu: plak pex, mai: phlat hu: ka meung Makedonix, mai: baox yaog khaing: meung Makedonix mai: deeh hoek ka pex, mai: son sang kieh pex hu: tawx aux ka krax hu: ka meung Yudax heue:. 17 Mawh kheu nan: yam keud aux nan:, aux hoik koe: rhawm: pa keud jee keud blaong lie? Phan: ang mawh nan: ceu pa hoik bak aux tix sang yuh khankix, aux hoik bak tix sang yuh awm: pa khaw: mai: nex nham:, kheu hoik koe: pa, "mawh heue:, mawh heue:," mai: pa "ang mawh heue:, ang mawh heue:," mai: aux lie? 18 Viang mawh kawx nan: awm: pa kaux sijax Siyiex, gumlox pa krai ex ka pex ang lai mawh, "mawh heue:," mai: "ang mawh heue:." 19 Grawh grawng: nawh, grawng: Kawn: Siyiex, pa mawh Yesux Khrit pa hoik sidiex ex ka pex, pa mawh aux, mai: Silwanux, mai: Timose, ang lai mawh, "mawh heue:," mai: "ang mawh heue:," viang mawh nan:, hoik mawh, "mawh heue:," ka daux Nawh Cao: heue:. 20 Grawh grawng: nawh, can lox mukheu pa tawx Siyiex khawm: uik mawh, "mawh heue:," ka daux Nawh Cao:, mawh kheu nan: ka daux Nawh Cao: mawh khawm:, "Amen," tom sang koe: min: plakngai: Siyiex kheu ex heue:. 21 Kaw pa hoik kieh ex rom tix kaux cong: tau mai: pex ka daux Cao: Khrit, mai: pa hoik groi rawm: bee ka ex, mawh Siyiex, 22 pa hoik tawk cum: ka ex, mai: hoik tawx gawng294 pa dex mai: Khwan: Cao: ka daux rhawmrhi: ex heue:.

23 Viang mawh nan: aux kok Siyiex son sang mawh Cao: pa kham: mhai: sakse: ka ju aux, grawng: pa ang aux nyang bax hoek ka veng Kawrinthux, hoik mawh son sang deuh sang yam: ka pex heue:. 24 Pa ah nan:, ang lai mawh kheu ting ex ka piang krax yumrhawm: pex, ex mawh ngie pa teem: pa coi ka krax gauxrhawm: pex, grawh grawng: nawh pa cung pex tom: kaux, hoik mawh kheu krax yumrhawm: pex heue:.

Simin Ting 2

Caw kieh krax moh krax rhawm: kaux cong:

1 Viang mawh nan: aux hoik yiag yuh nin: ka son tokaux tix, yuh ka mawx son ang aux lai baox deeh yaox tix hoek ka pex ka daux krax khi: krax glaoh heue:. 2 Grawh grawng: nawh phan: aux kieh pex khirhawm: kah, lheu: khaing: kaw pa aux hoik kieh khi: kah, mawh kaw pa yuh ka mawx pa sang kieh aux gauxrhawm: kah? 3 Kheu koe: aux krax yumrhawm: grawng: krax gauxrhawm: aux, hoik mawh nang: krax gauxrhawm: pex khawm: uik, aux tom: hoik tiem: lai ceu in, phan: ang mawh nan: ha yam hoek aux ka pex, kix pa khaw: tix kieh aux gauxrhawm: kox kieh aux khirhawm: kah heue:. 4 Grawh grawng: nawh pa tiem: aux lai ka pex, hoik mawh ka daux pa kied kharhawm: kharhi: mai: ka daux pa tugrhawm: tugrhi:, mai: ka khawm: pa roik rawm: ngai: tix, ang lai mawh son sang kieh pex khirhawm: kah, viang mawh nan: hoik tiem: son sang tawng pex ka krax moh krax rhawm:, pa kied lang: teung: moh aux ka pex heue:.

5 Viang mawh nan: phan: pui tix kaux kaux hoik kieh koe: krax khirhawm: khirhi:, nawh hoik kieh aux khirhawm: kah ang mawh, viang mawh nan:, kieh pex kub khirhawm: kah (yuh ka mawx son ang aux lai cha nie yeen kah) khawm: uik heue:. 6 Pa pui tom: nie hoik ciyang ka kaw pa yuh nan: hoik kub heue:. 7 Mawh kheu nan: pex nie lheu: khaw: tix pluat ploi: phimap nawh, mai: kieh nawh nyawmrhawm: kah, phan: ang mawh nan: ha ceu pa cha nie khirhawm: nawh kox bleet ka pui pa yuh nan: heue:. 8 Mawh kheu nan: aux tom: khyox khaw: ka pex, son sang baox deeh moh pex ka nawh heue:. 9 Grawh grawng: nawh aux hoik tiem: lai son sang sidah mawh nin:, yuh ka mawx son sang pon aux tix tawng grawng: pa cheu: tix yaox ka pex, grawng: pa koe: pex krax cu krax nghiet ka ku ceu khawm: uik nieh, ang koe: nieh. 10 Viang mawh kawx nan: pex pluat ploi: phimap tix ceu ceu ka pui mawx ang ah aux kawx pluat ploi: kah heue:. Grawh grawng: nawh pie aux, pa hoik pluat ploi: aux, phan: aux hoik pluat ploi: tix ceu ceu, hoik mawh son pex ka plak sivoe Cao: Khrit. 11 Yuh ka mawx son ang Satan sang pon tix pex ex sipie, grawh grawng: nawh ex ang mawh pa ang tawng ka jhawm: ceu pa yuh nawh heue:.

12 Yam hoek aux ka veng Troax ka son lox bwan: gauxrhawm: gauxrhi: Cao: Khrit, mai: yam hoik paoh siviex ka aux ka daux Simiang, 13 ang aux koe: krax nyawmrhawm: ceeix kawx, kheu ang aux yaox pux aux Titux, aux tom: ah lox gwieh ka kix mai: hu: ka daux meung Makedonix heue:.

14 Yaogyaw ka bwanson: Siyiex, pa thong: ex ka daux pa pex, ka daux Cao: Khrit ku jheeng: jheeng:, mai: kieh sidawng: grawng: mawh ex ceu pa sioe: baux krax tawng krax yung ka Nawh Cao: ku dah ku dee heue:. 15 Grawh grawng: nawh ex mawh ceu pa sioe: baux cie Cao: Khrit ka Siyiex, ka daux kix pa hoek krax taoh, mai: ka daux kix pa hoek krax laux krax leeing: heue:. 16 Ka kix pa hoek krax laux krax leeing: mawh ceu pa sioe: baux krax yum tom: hoek krax yum heue:. Ka kix pa hoek krax taoh mawh ceu pa sioe: baux krax im: ju tom: hoek krax im: ju heue:. Mai: mawh mawx pa dak pon yuh ceu in khankix? 17 Ex ang lai awm: ka pui tom: nie, pa nieb lak baox, lak teei lih khaing: gumlox Siyiex, viang mawh nan: ex viex khawm: rhawm: tix sidiex ka daux Cao: Khrit, awm: pa khaw: mai: Siyiex, ka plak sivoe Siyiex heue:.

Simin Ting 3

Kawncau daux sijax mukheu pa khraox

1 Ex baox deeh jah tix yaw ka tokaux tix lie? Phan: ang mawh nan: ex lo lai pa yaw pui ka ex, tix tawx ka pex, phan: ang mawh nan: khaing: pex lie? 2 Pex mawh lai ex, pa hoik tiem: ka daux rhawm: rhi: ex, pa tawng mai: pa phat pui khawm: uik kah heue:. 3 Tokaux pex sidawng: mawh lai Cao: Khrit pa hoik yuh ex, ang lai mawh pa hoik tiem: ka rawm: nammeug, viang mawh nan: mawh pa hoik tiem: ka Khwan: Siyiex pa im: ju heue:. Ang lai mawh pa hoik tiem: ka khlawp simaox khankix, viang mawh nan: mawh pa hoik tiem: ka daux khlawp rhawm: rhi: nex heue:. 4 Mai: ex koe: krax yumrhawm: yuh nin:, kheu Cao: Khrit ka plak Siyiex heue:. 5 Ang lai mawh kheu kub sibrawm ex tix pon yuh ka tokaux tix, tix sang keud sang sawn: tix ceu ceu mawh pa mawh khaing: tokaux tix, viang mawh nan: pa to pon ex tix yuh mawh khaing: Siyiex. 6 Kaw pa hoik kieh ex kub sibrawm tix pon yuh pui cau pui soi: ka sijax mukheu pa khraox heue:. Ang lai mawh ka pa dex mai: lox ngai: lai been li, viang mawh nan: mawh pa dex mai: Khwan:, grawh grawng: nawh, lox ngai: lai been li mawh pa chix teei yum, viang mawh nan: Khwan: mawh pa chix tawx pa im: heue:. 7 Phan: lox been krax yum pa hoik tiem: hoik saik ka simaox, hoik hoek tau mai: min: plakngai:, tom: pui Isarilax ang pon jawg tix jhak ka pakngai: Mose, kheu min: plakngai: pa jhan: khaing: pakngai: nawh, pa mawh min: plakngai: pa chix grai: grup. 8 Lox been pa dex mai: Khwan:, tag ang nie lheu: tawx tau mai: min: plakngai: yuh ka mawx? 9 Grawh grawng: nawh phan: lox been pa dex mai: pa prawng pa ciyang phimap hoik koe: min: plakngai:, lox been pa dex mai: pa rah pa see tag sang kied nie lheu: koe: min: plakngai: heue:. 10 Pa hoik kieh koe: min: plakngai: phaoxka:, hoik kieh tix ang koe: min: plakngai:, kheu min: plakngai: pa nie lheu: ting an heue:. 11 Grawh grawng: nawh phan: ceu pa chix grai: chix grup an, hoik hoek tau mai: min: plakngai:, ceu pa kawn: ca: koe: an mawh pa nie lheu: koe: min: plakngai: heue:.

12 Mawh kheu nan:, kheu koe: ex krax keud pot jun pot yuh nan:, ex tom: shiao lox pa ang mox ang blawm: pa sidawng:, 13 mai: ang awm: Mose pa hoik tawb pakngai: tix ka man: tawb, yuh ka mawx son ang kawnpraix Isarilax khankix sang pon jawg tix jhak ka dee sidah dee ghoik ceu pa grai: grup hu:, 14 viang mawh kawx nan: rhawm: kix hoik kiien:, grawh grawng: nawh sidah sidu tom: hoek singaix yamin yam phat ka lox sijax mukheu pa prim:, man: tawb an kawn: ca: koe:, mawh kheu ang nyang plak jhi: kix yaox, grawng: pa sang teei tix tik man: tawb an mawh ka daux Cao: Khrit heue:. 15 Viang mawh nan: tom: hoek singaix yamin kawx, yam phat lai Mose lai mawx ang ah, man: tawb hoik tawb ka rhawmrhi: kix heue:. 16 Viang mawh nan: kawx yam pui deeh veeh tix plak Simiang lai mawx ang ah, teei tix tik man: tawb an khaing: heue:. 17 Simiang kienie, mawh Khwan: heue:. Mai: dee ot Khwan: Simiang koe: ceu pa ploi: pa luan heue:. 18 Can ex khawm: uik pa hoik bhang: tix ang tawb pakngai:, mawh pa deeh jhan: gaih min: plakngai: Simiang awm: siliak, mai: ca: tieh loh ex tix awm: rieang pakpeung Nawh Cao:, khaing: min: plakngai: ka min: plakngai:, awm: pa kaoh khaing: Simehang, pa mawh Khwan: heue:.

Simin Ting 4

Kaing cau kaing soi: Pawlux pa mawh kawncau

1 Mawh kheu nan:, kheu koe: ex kaing cau kaing soi: in, awm: pa hoik pon ex krax caoxrhawm:, ex ang lai khrup rhawm: kah heue:. 2 Ex hoik tik ka ceu pa kaig pa tua pa mox khankix, mai: ang hu: ka daux ceu pa lak keud tix yuh cuyi:, viang ka gumlox bwan: Siyiex kawx ang nieb muan tix pie lhen: kah, viang mawh nan: kheu plak jhi: pa mawh pa meh sidawng:, ex yuh tix kieh tokaux ex caw rhawm: ka dee chix keud chix tawng pui ku kaux ka plak sivoe Siyiex heue:. 3 Mai: phan: hoik tawb ka lox bwan: gauxrhawm: gauxrhi: ex ka man: tawb, hoik tawb ka daux kix pa hoek krax laux krax leeing: khankix heue:. 4 Ka daux kix pa ang yumrhawm: khankix siyiex haktiex in hoik kieh rhawm: dee chix tawng kix dug kah, yuh ka mawx son ang pa riang lox bwan: gauxrhawm: gauxrhi: min: plakngai: Cao: Khrit, pa mawh riang pakpeung Siyiex, sang jhan: ka piang kix heue:. 5 Grawh grawng: nawh pa sidiex ex ang lai mawh grawng: tokaux tix, viang mawh nan: mawh grawng: mawh Yesux Khrit Simiang, mai: grawng: mawh ex siliex pex, ka son Yesux heue:. 6 Grawh grawng: nawh Siyiex pa hoik ah, "Kieh pa riang lih jhan: khaing: daux pa vhaik," hoik jhan: riang ka daux rhawmrhi: ex, son sang tawx pa riang krax tawng krax yung ka min: plakngai: Siyiex, ka daux pakngai: Yesux Khrit heue:.

7 Viang mawh nan: ex koe: sinngao in ka daux aw: tiex, yuh ka mawx son siawp sibrawm pa kied ting sigrien sigre an, tag sang mawh cie Siyiex, mai: ang mawh pa kaoh khaing: tokaux ex heue:. 8 Viang hoik yeen ka ex ku plak kawx, ang awt hoek krax kharhawm: kharhi:. Viang keud ang doh kawx, ang awt hoek krax laux rhawm: laux rhi:. 9 Viang: tuktiak tukte: kawx, ang lai tik lai grham:. Viang lah bang: lia kawx, ang lai hoek krax laux krax leeing: heue:. 10 Ex ca: dai tix viex ka ceu pa teei Yesux yum ka daux tokaux tix jheeng: jheeng:, yuh ka mawx son sang sidawng: khawm: ceu pa im: Yesux ka daux tokaux ex heue:. 11 Grawh grawng: nawh hoik tawx pong ex pa im: khankix ka krax yum ku jheeng: jheeng: son Yesux, yuh ka mawx son sang sidawng: khawm: ceu pa im: Yesux ka daux nex pa chix yum ex heue:. 12 Mawh kheu nan: krax yum ca: yuh kaing ka daux ex, viang mawh nan: yuh pa im: ju ka daux pex heue:. 13 Viang mawh kawx nan: kheu koe: rhawm: pa yumrhawm: awm: pa khaw: mai: pa hoik tiem: tix deuh ah nin:,

295"Mawh kheu yumrhawm: aux, aux tom: hoik krai heue:,"

mawh kheu viang ex kawx yumrhawm:, ex tom: krai heue:. 14 Mawh kheu hoik tawng grawng: Kaw pa hoik kieh Simiang Yesux deeh kaoh, tag sang kieh khawm: ex deeh kaoh tau mai: Yesux, mai: tag sang teei tix tawx ex tau mai: pex heue:. 15 Grawh grawng: nawh ku ceu khawm: uik hoik mawh son pex, yuh ka mawx son bwanson: sang nie haoh nie teen, mawh kheu pui nie lheu: nie yaogyaw bwanson:, tom: nie lheu: kieh koe: min: plakngai: Siyiex kah heue:.

16 Mawh kheu nan: ex tom: ang lai khrup rhawm: kah. Viang pui plakpraix cie ex ca: rau tix laux hu: kawx, pui plak daux cie ex baox cox khraox tix singaix hoik tix singaix heue:. 17 Grawh grawng: nawh krax kharhawm: kharhi: pa chaong: cie ex, pa mawh tix vud tix cu khaing:, yuh son sang kieh ex nie lheu: ting koe: sinyek sinyek ka min: plakngai: pa cien leeing: ju leeing: phan: heue:. 18 Ang ex jhak ka ceu pa chix yaox ka khankix, viang mawh nan: jhak ka ceu pa ang lai chix yaox khankix, grawh grawng: nawh ceu pa chix yaox khankix mawh pa chix laux chix leeing:, viang mawh nan: ceu pa ang lai chix yaox khankix mawh pa kaux pa koe: leeing: ju leeing: phan: heue:.

Simin Ting 5

Pa mawh tivud ticu mai: pa mawh leeing: ju

1 Grawh grawng: nawh ex hoik tawng phan: yieh laux ka nyiex gox ex pa mawh nyiex pa dex mai: haktiex, ex koe: nyiex pa yuh Siyiex, pa mawh nyiex pa ang yuh ka taix, pa kaux pa koe: leeing: ju leeing: phan: ka daux meung raoma: heue:. 2 Yam kawn: ot ka daux nyiex gox in ex ngia, mai: simie tix ceep ka dee sang ot cie ex ka meung raoma:. 3 Phan: yaox tix ceep kraung yuh nan:, tag ang yaox ex mawh pa kakaong: heue:. 4 Grawh grawng: nawh kheu klawm: ex kraung cien, ex pa kawn: ot ka daux nyiex gox in ngia tete heue:, ang lai mawh kheu simie ex tix peeik kraung ceep tokaux tix, viang mawh nan: mawh kheu simie ex tix baox kieh ceep kraung kah, yuh ka mawx son sang bleet ceu pa im: ka ceu pa chix yum uik heue:. 5 Kaw pa hoik yuh hoik cox ex ka son ceu in mawh Siyiex, pa hoik tawx gawng296 pa dex mai: Khwan: Cao: ka ex heue:. 6 Ex tawng grawng: yam kawn: ot ka daux tokaux tix, ex tang: ot khaing: Simiang, mawh kheu nan: ex tom: koe: rhawm: kua: ku jheeng: jheeng: heue:. 7 (Grawh grawng: nawh ex hu: kheu krax yumrhawm:, mai: ang mawh kheu pa chix yaox heue:). 8 Mawh kheu nie lheu: koe: ex rhawm: tix sang tang: ot khaing: tokaux tix, mai: tix sang ot tau mai: Simiang, aux tom: ah, "Ex koe: rhawm: kua: heue:." 9 Mawh kheu nan: ex tom: hoik een: rhawm: tix tix sang yuh ceu pa khaw: pa caw rhawm: Nawh Cao:, viang yaox ex tix ot ang ah, phan: ang mawh nan: tang: ot ang ah heue:. 10 Grawh grawng: nawh tag sang kieh ex khawm: uik sidawng: ka sivoe dee ngawm tix prawng ca: cie Cao: Khrit, yuh ka mawx son sang pon kaux pui mawx kaux pui an, ka ceu pa hoik yuh tix ka daux tokaux, awm: pa khaw: mai: pa hoik yuh nawh, pa mhawm: ang ah, phan: ang mawh nan: pa caox ang ah heue:.

11 Mawh kheu tawng ex ka krax lhat krax graung pa dex mai: Simiang, ex tom: jeeh: nyaw ka kawn: pui khankix, mai: hoik sidawng: ex ka Siyiex heue:. Mai: aux keud pot jun pot son sang sidawng: ex ka khawm: ka daux dee chix keud chix tawng pex heue:. 12 Ex baox deeh yaw tokaux tix ka pex ang mawh, viang mawh nan: ex tawx jao dee sang pon pex tix yaw rangdi ka ex, yuh ka mawx son sang koe: pex ceu pa pawk ka kix pa yaw rangdi ngie ka ceu pa chix yaox, mai: ang yaw rhangdi ka pa koe: ka daux rhawm: heue:. 13 Grawh grawng: nawh, phan: ex mawh pui yhot kawx, hoik mawh ka son Siyiex, phan: ang mawh nan: phan: ex mawh pui pa ang yhot, hoik mawh ka son pex heue:. 14 Grawh grawng: nawh krax moh krax rhawm: Cao: Khrit pex ka ex, mawh kheu hoik deuh rhawm: ex grawng: phan: Tix Kaux hoik yum ka son pui khawm: uik, pui khawm: uik kawx hoik yum kheu an, 15 mai: Nawh Cao: hoik yum son khawm: uik, yuh ka mawx kix pa im: tag ang lai baox im: ka tokaux tix tiru, viang mawh nan: son sang im: ka Nawh Cao: pa hoik yum son kix, mai: pa hoik deeh kaoh im: heue:. 16 Mawh kheu nan: jah tom: yamin, ex ang lai tawng ka pui tix kaux kawx hawt nex nham:, viang ex hoik tawng ka Cao: Khrit hawt nex nham: kawx, viang mawh nan: yamin ex ang lai baox tawng ka Nawh Cao: yuh nan: heue:. 17 Mawh kheu nan: phan: pui tix kaux kaux ot ka daux Cao: Khrit, nawh mawh ceu pa khraox heue:. Ceu pa prim: khankix hoik grai: hoik grup hu:, mai: jhak heue:, ceu an kix hoik lih mawh pa khraox heue:. 18 Viang mawh kawx nan: ku ceu khawm: uik hoik mawh kheu Siyiex, Kaw pa hoik kieh ex deeh khaw: deeh caw paox tix ka tokaux Nawh, kheu Cao: Khrit, mai: hoik tawx ex kaing pa sidiex grawng: ceu pa deeh khaw: deeh caw paox tix an ka ex heue:. 19 Pa mawh grawng: pa hoik ot Siyiex ka daux Cao: Khrit, tix kieh pui haktiex deeh khaw: deeh caw paox tix ka tokaux Nawh Cao:, mai: pa ang Nawh sawn: tix deuh phimap kix ka kix, mai: grawng: pa hoik tawx hoik pong gumlox bwan: grawng: deeh khaw: deeh caw paox tix an ka ex heue:.

20 Mawh kheu nan: ex tom: mawh pui pa yuh tang:, ka son Cao: Khrit heue:. Mawh awm: Siyiex hoik teei ex tix jeeh nyaw ka pex heue:. Ex khyox khaw: ka pex tang: Cao: Khrit, son sang kieh pex deeh khaw: deeh caw paox tix ka Siyiex heue:. 21 Nawh Cao: hoik kieh Kaw pa ang tawng phimap, mawh phimap ka son ex, yuh ka mawx son sang lih mawh ex pa rah pa see Siyiex ka daux Nawh heue:.

Simin Ting 6

Khyox khaw: pui pa yumrhawm: im: ju son Siyiex

1 Mai: kheu rom tix yuh kaing tau mai: Nawh Cao:, ex tom: khyox khaw: ka pex, yuh ka mawx son pa rieb pex tix teei bwanson: Siyiex tag ang lai mawh pa giex pa going, 2 (grawh grawng: nawh, Nawh Cao: hoik ah nin:,

297"Daux bawb yam pa khaw: pa caw Aux hoik nghiet ka maix, mai: ka daux singaix pa taoh Aux hoik teem: hoik ku: maix."

Jhak heue:, yamin mawh bawg yam pa khaw: pa caw heue:. Jhak heue:, yamin mawh singaix pa taoh heue:), 3 mai: son ang koe: jao dee sideeing ka daux tix ceu kawx, yuh ka mawx son ang lai koe: dee deuh phimap ka kaing cau kaing soi: ex. 4 Viang mawh kawx nan: ka daux ku ceu khawm: uik ex kieh sidawng: grawng: mawh tokaux ex pui cau pui soi: Siyiex, ka daux pa gun pa yeung tom: nie, ka daux pa tug pa kha:, ka daux pa hot pa sibhawm:, ka daux pa kharhawm: kharhi:, 5 ka daux pa sivied, ka daux pa laung daux thawng:, ka daux pa lawh pa maw:, ka daux kaing pa nyhap pa mao, ka daux pa pau khawm: ang yaox tix it, ka daux pa siya: tix, 6 ka daux pa singax singeh, ka daux krax tawng krax yung, ka daux pa lang: gun lang: yeung, ka daux pa mhawm: rhawm: mhawm: rhi:, ka daux Khwan: Singax Singeh, ka daux krax moh krax rhawm: tete telai, 7 ka daux gumlox pa mawh pa meh, ka daux siawp sibrawm Siyiex, kheu kraung naing pa rah pa see ka taix plak khawn: dawm: mai: ka plak khawn: gwiex, 8 kheu min: plakngai: mai: pa ang koe: min: plakngai:, kheu pa map kah, mai: pa yaw kah, awm: pui pie pui lhen:, mai: viang mawh nan: mawh pa mawh pa meh, 9 awm: pa ang tawng kah, mai: viang mawh nan: mawh pa tawng ka mhawm: mhawm:, awm: pa dex sang yum, mai: jhak heue:, ex im: heue:, awm: pa pheuk pa ciyang, mai: ang lai teei yum, 10 awm: pa khirhawm: khirhi:, viang mawh nan: mawh pa gauxrhawm: ku jheeng: jheeng:, awm: pa hot pa sibhawm:, viang mawh nan: mawh pa kieh pui tom: nie mi kah koe: kah, awm: pa ang lai koe: tid tix, mai: viang mawh nan: mawh pa koe: ku ceu khawm: uik heue:.

11 Pui Kawrinthux khankix eue:, jheeh ex hoik ang: ka son pex, rhawm: ex kawx hoik ting hoik vieh kah heue:. 12 Pex ang lai sikhiep sikhawp ka daux ex, viang mawh nan: pex hoik sikhiep sikhawp ka daux krax moh krax rhawm: pex khaing: heue:.

13 Son sang deeh chix tawx pa awm: paox tix, (Aux sikah ka pex awm: ka kawnpraix tix) viang rhawm: pex kawx kieh ting vieh kah heue:.

Tang: gwieh tokaux tix son sang singax singeh

14 Paw rom tix sau: iak tau mai: pui pa ang yumrhawm: khankix, grawh grawng: nawh ceu pa rah pa see chix yuh paox yuh pie ka pa lheu: lox been yuh ka mawx? Phan: ang mawh nan: pa riang chix yuh paox yuh pie ka pa vhaik yuh ka mawx? 15 Mai: Cao: Khrit mai: Belialax298 chix khaw: ka paox tix yuh ka mawx? Phan: ang mawh nan: pui pa yumrhawm: mai: pui pa ang yumrhawm: chix dex mai: paox tix yuh ka mawx? 16 Mai: nyiex bwan: Siyiex mai: rieang rao chix khaw: paox tix yuh ka mawx? Grawh grawng: nawh ex mawh nyiex bwan: Siyiex pa im: ju, awm: pa khaw: mai: pa hoik ah Siyiex yuh nin:,

299"Aux tag ot ka daux kix, mai: hu: ka daux kix, mai: Aux tag mawh Siyiex kix, mai: kix tag mawh pui cie Aux heue:."

17 Mawh kheu nan:, Simiang baox ah nin:,

300"Pex lih hoek khaing: ka daux kix, mai: tang: tiah tix awawx. Paw vi teeh ka ceu pa ang singax singeh, mai: Aux tag rieb tix teei ka pex heue:. 18 Mai: Aux tag mawh Keeing: ka pex, mai: pex tag mawh kawn: simex kawn: bon: ka Aux, Simiang pa ting Pa Koe: Sibrawm Piang Khawm: Uik ah nan: heue:."

Simin Ting 7

1 Pui pa moh aux khankix eue:, kheu koe: lox mukheu in kix, kieh ex kieh tokaux tix singax khaing: ceu pa seeing: pa brai: khawm: uik pa dex mai: nex mai: khwan:, mai: kieh grum ka pa singax singeh ka daux pa lhat pa graung ka Siyiex heue:.

Ka daux krax tug krax kha: kieh koe: krax gauxrhawm:

2 Yuh tix kieh koe: dee ot ex ka daux rhawm: pex, ex ang lai phit ka pui tix kaux kawx, ex ang lai yuh pui laux tix kaux kawx, ex ang nieb pie tix teei kraung khaing: pui tix kaux kawx heue:. 3 Pa ah aux nin:, ang lai mawh son sang deuh phimap ka pex, grawh grawng: nawh glangka: in kawx aux hoik krai, ka grawng: ot pex ka daux rhawmrhi: ex, son sang yum tau mai: im: tau heue:. 4 Aux kied ting kua: lox ka plak pex, krax yaw rangdi aux kied ting kheu pex, aux naog ka krax nyawmrhawm: nyawmrhi:, ka daux krax tug krax hka: ex khawm: uik, krax gauxrhawm: aux uik kreh heue:.

5 Grawh grawng: nawh, pie yam hoek ex ka daux meung Makedonix kawx, tokaux nex ex ang koe: dee nghie: rhawm: ceeix kawx, viang mawh nan: ex yaox krax tug krax kha: ku plak heue:. Plak praix koe: krax naing krax lah paox tix, plak daux koe: krax lhat krax graung heue:. 6 Viang mawh nan: kawx, Kaw pa kieh pui pa tiemrhawm: tiemrhi: nyawmrhawm:, pa mawh Siyiex, hoik kieh ex nyawmrhawm: kheu pa hoek Titux heue:. 7 Mai: ang joeng mawh ngie kheu hoek nawh khaing:, viang mawh nan: mawh kheu khawm: krax nyawmrhawm: pa hoik pon nawh tix nyawmrhawm: kheu pex. Grawh grawng: nawh, nawh krai ka ex grawng: pa ca: byaong pex, mai: grawng: pa khirhawm: pex, mai: grawng: pa viex pex khawm: rhawm: tix ka son aux, mawh kheu nan: aux tom: nie lheu: gauxrhawm: kheu heue:. 8 Grawh grawng: nawh viang aux hoik kieh pex khirhawm: kheu lai aux kawx, ang aux lai khi: kah. Viang aux hoik khi: ka yam yaox aux grawh grawng: lai an hoik kieh pex koe: krax khirhawm: khirhi: tix vud tix cu heue:. 9 Pa gauxrhawm: aux yamin, ang lai mawh kheu hoik kieh pex khirhawm: kah, viang mawh nan: mawh kheu pa hoik kieh pex khirhawm: an hoik kieh pex doh keud doh sawn: ka phimap heue:. Grawh grawng: nawh hoik kieh pex khirhawm: awm: pa khaw: ka Siyiex, yuh ka mawx son ang pex sang pon dee laux kheu ex ceeix kawx heue:. 10 Grawh grawng: nawh krax khirhawm: khirhi: pa khaw: ka Siyiex, yuh tix kieh doh keud doh sawn: ka phimap tom: pon krax taoh, mai: ang mawh dee tag khi: kah heue:. Viang mawh nan: krax khirhawm: khirhi: pa dex mai: haktiex, mawh pa yuh tix kieh yum heue:. 11 Grawh grawng: nawh, jhak heue:, ceu in pa mawh pa kieh khirhawm: khirhi: awm: pa khaw: ka Siyiex, hoik kieh pex koe: rhawm: pa nied tix coca: pa yuh ka mawx, mawh heue:, hoik kieh tiebtie phimap yuh ka mawx, mawh heue:, hoik kieh saux rhawm: yuh ka mawx, mawh heue:, hoik kieh koe: krax lhat krax graung yuh ka mawx, mawh heue:, hoik kieh byaong yuh ka mawx, mawh heue:, hoik kieh viex khawm: rhawm: tix yuh yuh ka mawx, mawh heue:, hoik kieh pawk bix yuh ka mawx heue:. Ka daux ku ceu khawm: uik pex hoik kieh sidawng: grawng: pa singax pex ka daux grawng: an heue:. 12 Mawh kheu nan:, viang aux hoik tiem: lai ka pex kawx, ang lai tiem: son kaw pa hoik phit lud an, viang son kaw pa hoik yaox tix kham: pa phit pa lud kah kawx ang lai mawh, viang mawh nan: hoik mawh yuh ka mawx son sang sidawng: ceu pa nied tix keud pex son ex, ka tokaux pex, ka plak sivoe Siyiex heue:. 13 Mawh kheu nan: ex hoik koe: krax nyawmrhawm: kah, mai: ka krax nyawmrhawm: ex an baox nie lheu: koe: krax gauxrhawm:, kheu krax gauxrhawm: Titux, mawh kheu pex khawm: uik hoik kieh rhawm: nawh deeh haing: deeh nghie: heue:. 14 Phan: aux hoik yaw ka grawng: pex ka nawh tix ceu ceu, ang lai kieh aux kaig tua kah, viang mawh nan: awm: ceu pa hoik krai ex ka pex khawm: uik mawh pa mawh pa meh, viang pa hoik yaw ex pex ka sivoe Titux kawx, hoik sidawng: grawng: mawh pa mawh pa meh heue:. 15 Mai: nawh nie lheu: koe: krax moh krax rhawm: ka pex, yam doh keud nawh ka krax pa chix cu chix nghiet pex khawm: uik, mai: grawh grawng: pa hoik rieb pex nawh ka daux pa lhat pa siyaung: heue:. 16 Aux gauxrhawm: kheu pon aux tix yumrhawm: ka pex ka daux ku ceu heue:.

Simin Ting 8

Tawx riang tawx rao ka pui pa yumrhawm: son sang viex rhawm: tix tan lu

1 Lheu khaing: an, puxaik khankix eue:, ex kieh pex tawng grawng: bwanson: Siyiex pa hoik tawx ka daux ceucao meung Makedonix khankix, 2 grawh grawng: nawh viang cheu: tix yaox kix ka krax tug krax kha: tom: nie, kix kied ting gauxrhawm: gauxrhi:, mai: ceu pa kied hot sibhawm: kix, nie lheu: kieh ceu pa sibieh kix mi koe: heue:. 3 Grawh grawng: nawh aux kham: mhai: sakse: grawng: ang joeng mawh awm: pa chix kix, viang mawh nan: pie pa lheu: khaing: pa chix kix kawx, kix lak tawx heue:. 4 Kix teei lox jeeh: nyaw tom: nie mai: khyox khaw: ka ex son sang kieh kix rom tix yuh paox teem: ka bwanson: in, mai: kaing pa teem: coi ka pui pa singax singeh khankix heue:. 5 Mai: pa yuh nan:, ang lai mawh awm: pa keud pot jun pot ex, viang mawh nan: kix teei tix tawx tokaux tix ka Simiang mai: ka ex phaoxka:, awm: pa khaw: mai: alo Siyiex heue:. 6 Ex tom: khyox khaw: ka Titux, yuh ka mawx son sang yuh nawh kaing bwanson: in ka daux pex tom: hoik sidah, mawh kheu hoik jah nawh tix yuh phaoxka: heue:. 7 Viang mawh nan:, awm: pa pre pex ka ku ceu, ka daux krax yumrhawm:, mai: ka daux pa sikah, mai: ka daux krax tawng krax yung, mai: ka daux pa chix viex rhawm: tix yuh khawm: uik, mai: ka daux krax moh krax rhawm: pex ka ex, viang ka daux khawm: bwanson: in kawx yuh tix kieh pre kah awawx. 8 Pa ah aux nin: ang mawh lox tawm: pa nhie: pex yuh, viang mawh nan: aux teei grawng: pa viex pui tang: kaux khawm: rhawm: tix yuh, mai: cheu: tix yaox grawng: krax moh krax rhawm: pex mawh pa mawh pa meh nieh, ang mawh nieh. 9 Grawh grawng: nawh pex tawng grawng: bwanson: Simiang ex Yesux Khrit, pa mawh grawng: viang Nawh hoik mawh pa mi pa koe: kawx, Nawh Cao: hoik lih mawh pa hot pa sibhawm:, yuh ka mawx son sang lih mawh pex pa mi pa koe:, kheu pa hot pa sibhawm: Nawh Cao: heue:. 10 Viang mawh nan: aux krai pex ceu pa keud pa sawn: aux grawng: ceu in, grawh grawng: nawh in mawh pa mhawm: son pex, pa ang joeng mawh ngie pa liang tix jah yuh, viang mawh nan: khawm: pa simie tix yuh, tom: an num heue:. 11 Viang mawh nan: yamin yuh pa yuh tom: hoik sidah, yuh ka mawx awm: pa hoik koe: rhawm: pa simie pex tix yuh, son sang koe: khawm: pa hoik yuh tom: sidah, awm: pa chix tix heue:. 12 Grawh grawng: nawh phan: koe: rhawm: tix yuh, pa tan pa lu an mawh ceu pa khaw: rhawm: pa rieb tix teei kah, mawh awm: pa khaw: mai: pa koe: pui, mai: ang lai mawh awm: pa khaw: mai: pa ang koe: nawh heue:. 13 Grawh grawng: nawh pa ah aux nin: ang lai mawh son sang kieh pui tang: kaux nghie: rhawm: kah, mai: kieh pex khirhawm: kah, 14 viang mawh nan: mawh kheu grawng: pa kieh sidu koe:, yuh ka mawx son pa lheu: pex yamin sang mawh pa thiem: thie: ka pa cud kix, yuh ka mawx son pa lheu: kix kawx, tag sang mawh pa thiem: thie: ka pa cud pex, son sang koe: ceu pa sidu koe: heue:. 15 Awm: pa hoik tiem: tix deuh ah nin:,

301"Kaw pa hoik pon tom: nie ang lai lheu: kah mai: kaw pa hoik pon ceeix ngie ang lai cud kah heue:."

16 Yaogyaw bwanson: Siyiex, pa hoik kieh Titux koe: rhawm: pa sang nied tix yuh son pex, awm: pa koe: aux heue:. 17 Grawh grawng: nawh, nawh hoik rieb tix teei lox pa khyox pa khaw: ex kah, viang mawh nan: kheu tokaux nawh koe: rhawm: pa sang nied tix yuh, nawh tom: hoik lak hu: ka pex awm: pa khaw: mai: alo tix heue:. 18 Mai: ex ploi: puxaik an hu: tau mai: nawh, pa ceu pa yaw ka nawh ka daux lox bwan: gauxrhawm: gauxrhi: hoik tah ka ceucao khawm: uik heue:. 19 Mai: ang joeng mawh ngie nan:, viang mawh nan: pa mawh kaw pa hoik laug tix ciak ceucao tix sang hu: mai: ex, ka grawng: pa dex mai: bwanson: pa tan pa lu in, pa hoik teei ex tix yuh son sang koe: min: plakngai: Simiang kah, mai: son sang plak jhi: pa koe: rhawm: ex tix yuh heue:. 20 Mai: ex rien rhawm: tix yuh ka mawx son ang lai sang koe: dee deuh pui phimap kah, ka grawng: pa tan pa lu pa nie in, pa hoik kieh ex kia: ngien kah, 21 grawh grawng: nawh ex keud ka grawh grawng: ceu pa khaw: ka plak sivoe ngai: Simiang khaing: ang lai mawh, viang mawh nan: ex keud ka grawng: khawm: pa khaw: plak sivoe ngai: kawn: pui heue:. 22 Mai: ex ploi: puxaik ex tang: kaux hu: mai: kiex, pa hoik cheu: ex tix yaox ka daux tom: nie ceu, tom: nie bawg, mai: tawng grawng: pa chix viex nawh khawm: rhawm: tix yuh heue:. Phan: mawh yamin nawh nie lheu: viex khawm: rhawm: tix, tix nied yuh, kheu kied yumrhawm: nawh ka pex heue:. 23 Phan: pui tix kaux kaux chawk ka grawng: Titux, nawh mawh paoxgrawm aux, mai: paox pa rom tix yuh kaing tau mai: aux ka plak pex, phan: ang mawh nan: phan: chawk ka grawng: puxaik ex khankiex, kiex mawh pui cau pui soi: ceucao khankix, mai: min: plakngai: Cao: Khrit heue:. 24 Mawh kheu nan: pex jhi: mhai: sakse: grawng: krax moh krax rhawm: pex, mai: ceu pa yaw rangdi ex ka pex, ka kix plak sivoe ngai: ceucao khankix awawx.

Simin Ting 9

Tawx nie, bwanson: ka kied nie

1 Phan: mawh grawng: pa dex mai: kaing teem: kaing coi ka pui singax singeh khankix, ang aux shiao lai tiem: ka pex, 2 grawh grawng: nawh aux tawng grawng: pa koe: rhawm: pex tix sang yuh, pa yaw rangdi aux ka grawng: pex ka pui meung Makedonix khankix, grawh grawng: meung Akhayax hoik dawg cox rien tix been tix num pa hoik luan, mai: ceu pa viex pex khawm: rhawm: tix yuh an hoik so: kaoh ka rhawm: kix tom: nie heue:. 3 Viang mawh kawx nan: aux hoik ploi: puxaik khankix hu:, yuh ka mawx son ang pa yaw rangdi ex ka pex tag mawh pa giex going ka grawng: in, mai: yuh ka mawx son sang cox sang rien pex awm: pa hoik krai aux heue:. 4 Phan: ang mawh nan: phan: pui meung Makedonix tiblah hoek tau mai: aux, mai: yaox pa ang pex cox rien tix, (jalao ang ah ka pex), pie ex kawx tag sang hoek krax kaig krax tua, ka pa yumrhawm: grawng: ceu in heue:. 5 Mawh kheu nan: aux tom: yiag grawng: tag lai khyox khaw: ka puxaik khankix, yuh ka mawx son sang grux hu: kix ka pex sivoe, mai: son sang grux dha: cox, pa tan pa lu pa hoik tawx pex lox mukheu kah, yuh ka mawx son an tag sang mawh pa tan pa lu pa hoik cox hoik khre:, mai: son ang sang mawh pa khin: tix kieh tan heue:.

6 Phan: mawh grawng: in, kaw pa rhuat ngie ceeix ceeix khaing:, tag sang yaox tix vawg ngie ceeix ceeix heue:. Mai: kaw pa rhuat tom: nie, tag sang yaox tix vawg tom: nie heue:. 7 Kieh kaux pui mawx kaux pui an yuh awm: pa keud nawh tix sang yuh ka daux rhawm: tix, ang lai mawh ka daux pa lhawk tix tawx, phan: ang mawh nan: ka daux pa khin: tix kieh tawx, grawh grawng: nawh Siyiex moh ka kaw pa gauxrhawm: tix tawx heue:. 8 Mai: Siyiex chix kieh bwanson: khawm: uik pre ka pex, yuh ka mawx son sang grum kub pex ka ku ceu ku cawng, mai: son sang pre ka krax tuah krax klaung: pa mhawm: ku ceu, 9 awm: hoik tiem: tix deuh ah nin:,

302"Nawh hoik roi ka ku dah ku dee, nawh hoik tawx ka pui hot pui sibhawm:. Pa rah pa see nawh ca: ot ca: koe: leeing: ju leeing: phan: heue:."

10 Mai: Kaw pa tawx simie ka cao: pa rhuat, mai: tawx khaomun son cao: pa ih pa un:, tag sang tawx, mai: nie lheu: kieh simie son sang rhuat pex haoh sinyek sinyek, mai: kieh plix pa rah pa see pex piien: kah heue:. 11 Pex tag sang mi koe: ka ceu pa mhawm: ku ceu khawm: uik, tom: grum koe: rhawm: sibieh tix tawx, pa yuh tix kieh koe: krax yaogyaw bwanson: Siyiex, kheu ex heue:. 12 Grawh grawng: nawh kaing pa teem: pa coi in, ang joeng mawh ngie pa kieh ceu pa lo pui pa singax singeh khankix grum naog, viang mawh nan: mawh pa kieh koe: khawm: pa yaogyaw bwanson: Siyiex tom: nie heue:. 13 Mawh kheu yaox grawng: ceu pa cheu: tix yaox pex kheu kaing pa teem: pa coi in, mawh pa kheu kix yaogyaw bwanson: Siyiex, kheu grawng: pa chix cu chix nghiet pex ka lox bwan: gauxrhawm: gauxrhi: Cao: Khrit pa hoik rieb pex tix teei, mai: kheu grawng: pa sibieh pex tix tan lu ka kix, mai: ka pui khawm: uik heue:. 14 Tokaux kix kawx rawg bwan: son pex, mai: ca: byaong son pex, kheu bwanson: Siyiex pa kied ting ka piang pex heue:. 15 Yaogyaw bwanson: Siyiex son khawngphak Nawh Cao: pa ang lai dak chix uik krai heue:.

Simin Ting 10

Pawlux nih nai krai kaing jhaw: pa yuh tokaux tix

1 Tokaux aux Pawlux, pa tiem rhawm: tiem rhi: yam ot mai: pex, viang mawh nan: pa koe: rhawm: kua: yam tang: ot khaing: pex, khyox khaw: ka pex ka ceu pa awnrhawm: awnrhi: mai: ceu pa mhawmrhawm: mhawmrhi: Cao: Khrit heue:. 2 Aux khyox khaw: ka pex, yuh ka mawx son ang aux sang koe: hrawm: kua: yam hoek aux dee ot pex awm: pa hoik deuh rhawm: aux tix viex rhawm: kua: mai: yuh ka kix tiblah, pa een: pa sawn: ex mawh pa hu: awm: pa khaw: mai: nex nham: heue:. 3 Grawh grawng: nawh viang hu: ex ka daux nex nham: kawx, ang ex yuh naing awm: pa khaw: mai: nex nham:, 4 (Grawh grawng: nawh kraung naing pa shiao ex daux naing, ang mawh pa dex mai: nex nham:, viang mawh nan: mawh pa ting siawp sibrawm sivoe Siyiex tix chix yieh laux dee kaux dee cong: khankix heue:), 5 yam ex yieh laux ka ceu pa lak keud lak sawn:, mai: can ceu pa lhaong: ku ceu pa hoik yuh tix tieb tie ka krax pa tawng pa yung ka Siyiex, mai: teei tix viex ka pa yiag pa keud ku ceu son sang giex gang: ka pa cu pa nghiet ka Cao: Khrit heue:. 6 Mai: ex hoik rien rhawm: tix, tix sang pawk bix ka can pa ang chix cu chix nghiet khawm: uik, yam hoik grum naog ceu pa chix cu chix nghiet pex heue:. 7 Pex jhak ngie ka grang plakprai: khaing: lie? Phan: pui tix kaux kaux yumrhawm: ka tokaux tix grawng: mawh nawh cie Cao: Khrit, kieh nawh baox deeh loi keud ka tokaux tix, grawh grawng: awm: mawh nawh cie Cao: Khrit, viang ex kawx mawh nang: cie Cao: Khrit heue:. 8 Grawh grawng: nawh viang aux nie lheu: yaw ka grawng: siawp sibrawm pa hoik tawx Simiang ka ex, son sang kieh pex ting lhaong: mai: ang lai mawh son sang yieh pex laux, ang aux sang koe: dee kaig dee tua kheu heue:. 9 Ang aux rhawm: kieh mawh awm: grang pa glhat aux ka pex ka lai pa tawx aux khankix heue:. 10 Mawh kheu kix tiblah ah nin:, "Lai nawh tom: mawh pa cien pa koe: sibrawm tete, viang mawh nan: phan: tokaux nawh ot, mawh pa iak riang iak rao, mai: lox sikah nawh mawh pa ang tie koe: cee." 11 Kieh pui pa awm: an keud sawn: grawng: lox lai ex mawh pa yuh ka mawx yam tang: ot ex, viang yam ot ex kawx pa yuh ex tag sang mawh nang: nan: heue:. 12 Grawh grawng: nawh ang ex koe: rhawm: kua: tix sawn: tix phiak303 tokaux ex ka kix pa yaw tokaux kix tiblah, viang mawh nan: tokaux kix ra lai teei tokaux kix tix tiag ka tokaux tix, mai: ra lai teei tokaux kix tix phiak ka tokaux tix khankix mawh pa ang koe: krax tawng krax yung heue:. 13 Viang mawh kawx nan: ex tag ang nie luan yaw rangdi khaing: diag ex, viang mawh nan: tag sang tiag awm: pa khaw: mai: diag pa tiag pa hoik gwieh Siyiex tix tawx ka ex, pa glang: hoek tom: ka pex heue:. 14 Grawh grawng: nawh ang ex lai chax nie luan sinied tokaux ex, awm: ang ex lai hoek glang: dee ot pex, grawh grawng: nawh viang tom: dee ot pex kawx ex hoik hoek tix sidiex lox bwan: gauxrhawm: gauxrhi: Cao: Khrit heue:. 15 Ang ex nie luan yaw rangdi khaing: diag ex, ka daux kaing pa yuh pui tang: kaux khankix, viang mawh nan: ex koe: krax keud pot jun pot grawh grawng: yam sang haok huan: krax yumrhawm: pex sipie sipie, ex tag sang nie ting ka daux pex awm: pa khaw: mai: diag tiag ex, tom: sang nie lheu: ting vieh, 16 son sang yaox tix sidiex gau lox bwan: gauxrhawm: gauxrhi: baux haktiex pa luan khaing: pex plak tieh, mai: son ang lai sang yaw rangdi ka daux diag pa tiag pui tang: kaux, pa hoik cox hoik khre: kah heue:.

30417 "Viang mawh nan: kieh kaw pa yaw, yaw rangdi ka daux Simiang heue:."

18 Grawh grawng: nawh ang lai mawh kaw pa yaw ka tokaux tix, pa mawh pa rieb tix teei kah, viang mawh nan: mawh kaw pa yaw Simiang kah, pa mawh pa rieb tix teei heue:.

Simin Ting 11

Pawlux nih nai krai grawng: siawp sibrawm kawncau

1 Aux simie tix kieh pex yeung ka aux, ka grawng: ceu pa daox pa aw: ceeix ceeix, viang mawh nan: pex hoik yeung nang: ka aux tete heue:. 2 Grawh grawng: nawh aux viang ka pex, ka krax viang pa dex mai: Siyiex, mawh kheu aux hoik teei tix tawx pex ka mex tix kaux khaing:, son sang pon aux tix tawx pex ka Cao: Khrit awm: pa mawh bon: krih pa singax singeh heue:. 3 Viang mawh nan: aux lhat pa keud pa sawn: pex sang laux hu: khaing: ceu pa viex khawm: rhawm: mai: pa singax singeh ka plak Cao: Khrit, awm: siuing: hoik lak yuh cuyi: tix pie lhen: ka Evax heue:. 4 Grawh grawng: nawh phan: kaw pa hoek tix sidiex, grawng: Yesux tang: kaux, khaing: Yesux pa sidiex ex, phan: ang mawh nan: phan: pex pon Khwan: pa tang: pa siyox, pa ang pex sax pon, phan: ang mawh nan: lox bwan: gauxrhawm: gauxrhi: pa tang: pa siyox pa ang pex sax rieb tix teei, pa yeung pex ka nawh mhawm: heue:. 5 Grawh grawng: nawh aux sawn: tokaux tix ang lai doh da: khaix kawncau pa ting pa blon: ting khaing: paox tix khankix heue:. 6 Viang ang aux chix sikah tix krai lox kawx, viang mawh nan: ang aux mawh pa ang koe: krax tawng krax yung, ka daux krax ku blawng ex hoik kieh grawng: ceu in, sidawng: ka daux ku ceu khawm: uik ka pex heue:. 7 Phan: ang mawh nan: hoik yuh aux phimap, ka pa yuh tokaux tix tiem son sang yaog pex ting, kheu hoik sidiex aux lox bwan: gauxrhawm: gauxrhi: Siyiex ka pex, giex ang teei ngawh lie? 8 Aux hoik briex305 ka ceucao tang: ceucao khankix, ka pa teei aux mau riang khaing: kix, son sang pon aux tix yuh kaing jhaw: son pex heue:. 9 Mai: yam ot aux tau mai: pex mai: koe: dee lo dee cud, ang aux mawh beeh mawh glawm: ka pui tix kaux kawx, grawh grawng: nawh yam hoek puxaik khankix khaing: meung Makedonix kix tawx ceu pa lo pa cud aux. Mai: ka daux can ku ceu aux hoik priex tokaux tix son ang sang mawh beeh mawh glawm: ka pex, mai: aux tag kawn: ca: priex tokaux tix yuh nan: heue:. 10 Awm: koe: pa mawh pa meh Cao: Khrit ka daux aux, pui tix kaux kawx ang pon kieh aux naox yawg tix ka pa yaw rangdi aux in, grawng: baux haktiex meung Akhayax khankix heue:. 11 Mawh kheu pa tix? Mawh kheu ang aux moh ka pex lie? Siyiex hoik tawng heue:. 12 Viang mawh kawx nan: pa hoik yuh aux, aux tag kawn: ca: yuh nang: nan:, yuh ka mawx son sang pon aux tix tat dud ka jao306 kix, pa simie tix koe: jao307, yuh ka mawx son sang yaox sidawng: grawng: kix pa yaw rangdi tokaux tix, mawh pa awm: ex heue:. 13 Pui pa mawh nan:, mawh kawncau pa ting pa ang mawh ang meh, pa mawh pui yuh kaing pa pie pa lhen:, pa loh tokaux kix mawh awm: grang kawncau pa ting Cao: Khrit heue:. 14 Mai: ang koe: dee daox dee deng: kah, grawh grawng: nawh pie Satan kawx loh tokaux tix mawh awm: grang kawncau Siyiex pa riang heue:. 15 Mawh kheu nan: ang awt koe: dee daox dee deng: kah, phan: pui cau pui soi: nawh, loh tokaux kix mawh awm: grang pui cau pui soi: pa rah pa see. Dee sidah kix tag sang mawh awm: pa khaw: mai: kaing pa yuh kix heue:.

16 Aux baox deeh ah tix bawg, paw kieh pui tix kaux kawx ce: aux mawh pui daox pui aw:, viang mawh nan: phan: pex ce: aux mawh pui daox pui aw:, rieb tix teei aux awm: pa mawh aux pui daox pui aw:, yuh ka mawx son aux kawx sang pon tix yaw tix ceeix ceeix heue:. 17 Ceu pa krai aux, aux krai hawt Simiang ang mawh, viang mawh nan: mawh ka daux ceu pa daox pa aw:, mai: ka daux pa yumrhawm: ka grawng: pa yaw tix heue:. 18 Kheu yaox grawng: pui tom: nie yaw rangdi ka grawng: pa dex mai: nex nham:, tokaux aux kawx sang yaw rangdi kah heue:. 19 Mawh kheu mawh pex pui lhak pui lhem:, pex tom: gauxrhawm: tix yeung ka pui daox pui aw: heue:. 20 Grawh grawng: nawh pex chix yeung ka pui, viang nawh kieh pex mawh siliex ang ah, viang nawh ih mai: pex ang ah, viang nawh giex gang: pex ang ah, viang nawh yaog tokaux tix ting ang ah, viang nawh simang: pakngai: pex ang ah heue:. 21 Pa krai aux mawh ka daux krax pa map tix, awm: pa hoik mawh pa iak riang iak rao. Viang mawh kawx nan: pui tix kaux kaux kua: ka daux ceu pa yuh ka mawx ang ah, (aux krai ka daux ceu pa daox pa aw:) aux kawx kua: kah heue:. 22 Kix mawh pui Hebrie lie? Aux ka mawh heue:. Kix mawh pui Isarilax lie? Aux ka mawh heue:. Kix mawh simie ceucat Abraham lie? Aux ka mawh heue:. 23 Kix mawh pui cau pui soi: Cao: Khrit lie? (Aux krai awm: pui yhot). Aux ka nie lheu: mawh heue:. Aux nie lheu: mawh ka daux kaing pa nyhap pa mao khankix, mai: ka pa nie lheu: ot ka daux thawng:, mai: ka pa sivied pa lheu: khaing: pa chix tiag tix yaox, mai: ka pa dex yum tom: nie bawg heue:. 24 Ka tawmtaix pui Yudax khankix aux hoik pon kham: pa sivied kah tipon (40) taix, yawm tix taix khaing:, tom: sidah phwan: bawg heue:. 25 Hoik tap toi: aux ka khaox loe: bawg, hoik dheem: aux ka simaox tix bawg, aux hoik yaox tix kham: geu: pa laux reu loe: bawg, aux hoik yaox tix ot ka daux rawm: sigrit sigra: tix ngaix mai: tix sawm:, 26 ka daux pa hu: krax tom: nie bawg, ka daux krax lhat krax graung ka rawm: klawng: ting khankix, ka daux krax lhat krax graung ka pui tud pui rhim: khankix, ka daux krax lhat krax graung khaing: pui ceu aux khankix, ka daux krax lhat krax graung khaing: pui tang: ceu tang: cat khankix, ka daux krax lhat krax graung ka daux veng, ka daux krax lhat krax graung ka daux tiag daux tu, ka daux krax lhat krax graung ka daux rawm: sigrit sigra:, ka daux krax lhat krax graung khaing: puxaik pa ang mawh ang meh khankix, 27 ka daux kaing pa nyhap pa mao, ka daux pa krox pa pau lawx lawx, ka daux pa cairhawm: mai: pa sang nyaux nie rawm:, ka daux pa tuah pa ih pa un: lawx lawx, ka daux pa kuat mai: pa ot kakaong: heue:. 28 Lheu: khaing: ceu pa mawh ka plakpraix khankix, kawn: koe: ceu pa yeen ka piang aux ku singaix, pa mawh krax khi: son ceucao khawm: uik heue:. 29 Mawh kaux pui mawx pa iak riang, pa ang aux rom tix iak riang tau? Mawh kaux pui mawx pa pui hoik kieh sideeing kah, pa ang aux haxrhawm: churhawm: kheu? 30 Phan: aux tag lai yaw tix, aux tag sang yaw ka grawh grawng: ceu pa iak riang iak rao aux khankix heue:. 31 Siyiex pa mawh Keeing: Simiang ex Yesux Khrit, pa ting bwanson: leeing: ju leeing: phan:, tawng grawng: ang aux pie lhen: heue:. 32 Ka daux veng Damase simiang giex kaing: pa ot greem: simiang khunhawkham Aretax, pau ka veng pui Damase an son sang giex sang teei aux, 33 mai: hoik koi ploi: aux lih khaing: siviex ka daux phliex, ka guh veng, mai: pon tix luan khaing: tawm: taix nawh heue:.

Simin Ting 12

Riang susai pa yaox Pawlux

1 Aux tag lai yaw tix, viang ang lai koe: bwanson: kawx heue:. Viang mawh nan: aux tag sang baox loi tix krai grawng: riang susai, mai: ceu pa plak jhi: yaox khankix, pa hoik plak jhi: Simiang kah heue:. 2 Aux tawng ka pui tix kaux ka daux Cao: Khrit, hoik giex tix yaog ka pui an tom: hoek ka raoma: loe: thaix glangka: in kao: pon: num heue:. (Hoik mawh ka daux khawm: tokaux lie, ang aux tawng, phan: ang mawh nan:, ang mawh ka daux tokaux lie, ang aux tawng. Siyiex tawng heue:.) 3 Aux tawng ka pui pa yuh nan: tix kaux, (Hoik mawh ka daux khawm: tokaux lie, phan: ang mawh nan: mawh ka pa tang: tiah khaing: tokaux lie, ang aux tawng. Siyiex tawng heue:), 4 grawh grawng: pa hoik giex tix yaog nawh haok ka daux meung Paradisux308, mai: pon tix mhong: gumlox pa ang chix ah kah, pa ang kawn: pui koe: akhwang: tix baox jiem: tix krai heue:. 5 Aux tag yaw rangdi ka grawng: pui pa yuh nan:, viang mawh nan: aux tag ang yaw grawng: tokaux tix lheu: khaing: ceu pa iak riang iak rao aux heue:. 6 Grawh grawng: nawh phan: aux simie tix yaw tix, aux tag ang mawh pa daox pa aw:, mawh kheu pa krai aux tag mawh ngie pa mawh pa meh, viang mawh nan: ang aux yuh, phan: ang mawh nan: ha pui tix kaux kaux kox een: aux mawh pa nie lheu: khaing: pa yaox nawh aux mawh, phan: ang mawh nan: khaing: pa mhong: nawh khaing: aux heue:.

Katlawm ka daux nex Pawlux tix mu:

7 Mai: kheu jao pa kied lang: teung: ting ceu pa plak jhi: kieh yaox khankix, yuh ka mawx son ang aux sang chax nie luan yaog tokaux tix ting, hoik tawx katlawm ka daux nex aux tix mu:, pa mawh kawncau Satan, tix sang klah sang tap ka aux, yuh ka mawx son ang aux sang chax nie luan yaog tokaux tix ting heue:. 8 Yuh ka mawx ceu an sang lih hu: khaing: aux, aux hoik khyox khaw: ka Simiang loe: bawg heue:. 9 Mai: Nawh Cao: hoik ah nin: ka aux, "Bwanson: Aux hoik kub ka son maix. Grawh grawng: nawh yuh tix kieh siawp sibrawm Aux grum ka daux ceu pa iak riang iak rao heue:." Mawh kheu nan: aux gauxrhawm: tix nie lheu: yaw rangdi ka daux ceu pa iak riang iak rao aux khankix, yuh ka mawx son siawp sibrawm Cao: Khrit sang tawb veei ka piang aux heue:. 10 Mawh kheu in aux tom: gauxrhawm: ka daux ceu pa iak riang iak rao aux khankix, mai: ka daux pa yuh pa ang cee ang cak kah, mai: ka daux pa lo pa hot, mai: ka daux pa tuktiak tukte: kah, mai: ka daux pa tug pa kha:, ka son Cao: Khrit, grawh grawng: nawh yam iak riang iak rao aux, yam an aux tom: koe: riang koe: rao heue:.

11 Aux hoik lih mawh pui daox pui aw:, pex hoik khin: aux tix mawh nan:, grawh grawng: nawh pex khaw: tix hoik yaw aux kah, mawh kheu viang ang aux koe: bwanson: tid tix kawx, ang aux doh da: khaix ka daux tix ceu kawx ka kawncau pa ting pa blon: ting khaing: paox tix khankix heue:. 12 Hoik viex rhawm: gun rhawm: yeung khawm: uik tix jhi: mhai: sakse: grawng: mawh kawncau pa ting pa mawh pa meh, ka sinax pex, ka mhai: mai: ka ceu pa daox pa am:, mai: ka kaing siawp sibrawm khankix heue:. 13 Grawh grawng: nawh hoik koe: ceu pa yuh ka mawx, pa hoik yuh tix kieh pex cud tix ang krup ka ceucao pa kawn: deuk khankix, phan: mawh pa lheu: khaing: pa ang tokaux aux mawh beeh mawh glawm: ka pex? Pluat ploi: ceu pa phit pa lud aux ka in liak.

14 Jhak heue:, in mawh loe: bawg tix bawg pa hoik khre: hoik rien aux tix sang hoek ka pex heue:. Mai: aux tag ang lai mawh beeh mawh glawm: ka pex, mawh kheu ang aux sawg kraung cie pex, viang mawh nan: sawg ka pex khaing:, grawh grawng: nawh kawn: praix khankix ang lai khaw: tix mawh cao: khrawm: cao: deuh sinngao son miex keeing: tix, viang mawh nan: mawh miex keeing: pa khaw: tix khrawm: tix deuh son kawn: praix tix heue:. 15 Phan: mawh aux, aux tag sang gauxrhawm: tix cai: kah, mai: tix kieh khawm: tokaux tix uik, ka son ju pex heue:. Phan: aux nie lheu: ting moh ka pex, pa moh ka aux tag sang iak hu: kheu lie? 16 Viang hoik mawh nan: kawx, ang tokaux aux lai mawh beeh mawh glawm: ka pex, viang mawh nan: kheu mawh aux pui lhak lhiem: aux hoik pon taong: pex ka ceu pa nieb pie nieb lhen: heue:. 17 Khex hoik nieb yuh aux cuyi: tix ih kaing: pex, ka kix pa hoik ploi: aux ka pex tix kaux kaux lie? 18 Aux hoik khyox khaw: ka Titux mai: hoik ploi: puxaik an hu: tau mai: nawh heue:. Khex hoik nieb yuh Titux cuyi: tix ih kaing: pex lie? Ex hoik hu: ka daux Khwan: tix mu: khaing: ang mawh lie? Ex hoik hu: ka daux rhoi: khaix caong pa awm: paox tix ang mawh lie?

19 Pex lai ce: jih jang: glang: gleeing: ex hoik sawg tix tieb tie phimap tix ka pex nieh. Ex krai ka daux Cao: Khrit ka plak sivoe Siyiex heue:. Viang mawh kawx nan:, pui pa moh aux khankix eue:, can ku ceu khawm: uik mawh son sang kieh pex ting lhaong: kah heue:. 20 Grawh grawng: nawh, aux lhat yam hoek aux ka pex, ha aux kox yaox kheu tix ceu ceu tag sang yaox pex mawh, awm: pa ang aux simie pex tix mawh, mai: viang pex kawx tag yaox tokaux aux mawh, awm: pa ang pex simie tix yaox aux mawh. Phan: ang mawh nan: ha kheu tix ceu ceu kox tag yaox pa koe: krax simah simaing:, krax bohrhawm: bohrhi:, krax songrhawm songrhi:, krax pa tang: lox siyox moing, krax pa nieb yuh plakngai: pui laux, krax pa ah lox suksiep, krax canyhau: ting rhawm:, mai: krax lawh maw: cuci: heue:. 21 Phan: ang mawh nan: ha yam baox deeh hoek aux ka pex kox, Siyiex aux tag kieh aux tiem rhawm: tiem rhi: ka sivoe pex, mai: aux tag khirhawm: son kix pa haoh pa hun:, pa hoik phit hoik lud glangka: sivoe in, mai: ang doh keud doh sawn: ka pa ang singax singeh, mai: ceu pa phit pa vao, mai: ceu pa hawt alo nex nham:, pa hoik yuh kix heue:.

Simin Ting 13

Khyox khaw: pui pa yumrhawm: tang: deeh ciied ka tokaux tix

1 In mawh pa hoek aux ka pex loe: bawg tix bawg heue:.

309"Tag sang kieh lox ku gum kaux cong: ka jheeh cao: pa kham: mhai: sakse: ra: loe: kaux heue:."

2 Aux hoik grux krai mai: aux baox grux krai, awm: yam ot aux mai: pex ra: bawg tix bawg, yamin viang aux tang: ot kawx, aux ah ka kix pa hoik phit hoik lud glangka: sivoe in, mai: ka khawm: pa deuk khankix khawm: uik, phan: aux baox deeh hoek, aux tag ang yam: kix heue:. 3 Kheu sawg pex mhai: sakse: grawng: pa sikah Cao: Khrit ka daux aux, Kaw pa ang iak riang iak rao ka plak pex, viang mawh nan: pa ting siawp sibrawm ka daux pex, 4 grawh grawng: nawh viang hoik teei Nawh Cao: yum ka piang khaoxlhak kheu pa iak riang iak rao kawx, Nawh im: ju kheu siawp sibrawm Siyiex heue:. Grawh grawng: nawh, viang iak riang iak rao ex ka daux Nawh Cao: kawx, ex tag sang im: tau mai: Nawh kheu siawp sibrawm Siyiex ka plak pex heue:. 5 Chawk cheng: ka tokaux pex grawng: kaux cong: pex ka daux krax yumrhawm: lie? ang kaux lie? Cheu: tix yaox ka tokaux pex heue:. Phan: ang mawh nan: ang pex tawng grawng: tokaux pex, grawh grawng: pa ot Cao: Khrit ka daux pex, phan: pex ang lai mawh pa ang pon tix kham: ceu pa cheu: tix yaox an lie? 6 Viang mawh nan: aux koe: krax keud pot jun pot son sang kieh pex tawng grawng: pa ang ex mawh pa ang pon kham: ka ceu pa cheu: tix yaox an heue:. 7 Ex rawg bwan: ka Siyiex yuh ka mawx son ang pex sang yuh ceu pa caox pa caig tix ceu kawx, ang lai mawh son sang sidawng: grawng: pa pon ex tix kham: ceu pa cheu: tix yaox an, viang mawh nan: mawh son sang yuh pex ceu pa khaw: pa mhawm:, viang mawh ex awm: pa ang pon tix kham: ceu pa cheu: tix yaox an kawx heue:. 8 Grawh grawng: nawh ang ex koe: sibrawm tix cha: tix yuh ka ceu pa mawh pa meh, viang mawh nan: ex pon tix yuh plak pa mawh pa meh khaing: heue:. 9 Grawh grawng: nawh ex gauxrhawm: gauxrhi: yam iak riang iak rao ex, mai: ting riang ting rao pex, mai: son sang grum mhawm: pex kawx, ex rawg bwan: heue:. 10 Mawh kheu jao in aux tom: tiem: lai grawng: ceu in khankix, yam tang: ot aux khaing: pex, yuh ka mawx yam ot aux mai: pex aux tag ang yaox tix yuh pa langteung: ka pex, awm: pa khaw: mai: sibrawm pa hoik tawx Simiang ka aux, son sang yuh sang sum: ting, mai: ang mawh son sang yieh laux heue:.

Lox ghoik

11 Puxaik khankix eue:, in mawh lox pa ghoik pa sidah, gauxrhawm: heue:, kieh grum mhawm: heue:, kieh nyawmrhawm: nyawmrhi: heue:, kieh mawh rhawm: tix mu: khaing: heue:, ot ka daux pa nhim:, mai: Siyiex krax pa moh pa rhawm: mai: krax pa nhim: tag sang ot tau mai: pex heue:. 12 Nawb ka paox tix tix kaux lai tix kaux, ka pa ngheut pa singax singeh heue:.

13 pui pa singax singeh khawm: uik nawb ka pex heue:.

14 Kieh bwanson: Simiang ex Yesux Khrit, mai: krax moh krax rhawm: Siyiex, mai: pa yuh paox yuh pie Khwan: Singax Singeh ot tau mai: pex khawm: uik liak.