1 Yohan

Lai Yohan Phuk Tix

Simin Ting 1

Lox thong: Gumlox lih koe: mu: koe: kaux

1 Mawh pa koe: tom: yam jah, pa hoik mhong: ex, pa hoik yaox ex ka ngai: tix pa hoik pon ex tix jhak kah, mai: pa tawm: taix ex hoik pon tix giex kah, pa dex pa dawd mai: Gumlox Ju Pa Im: heue:. 2 (Mai: Ju Pa Im: an hoik plak kieh sidawng:, mai: ex hoik yaox kah, mai: kham: mhai: sakse: mai: krai ka pex grawng: Ju Pa Im: An, pa mawh Ju Leeing: Ju Leeing: Phan:, pa hoik ot tau mai: Keeing: Cao:, mai: pa hoik plak kieh sidawng: ka ex heue:.) 3 Pa hoik yaox hoik mhong: ex kawx ex krai ka pex, yuh ka mawx pex kawx sang yaox tix yuh paox yuh pie tau mai: ex, mai: pa yuh paox yuh pie ex mawh tau mai: Keeing: Cao:, mai: tau mai: Kawn: Nawh Yesux Khrit heue:. 4 Mai: ex tiem: grawng: ceu in khankix ka pex yuh ka mawx son sang naog krax gauxrhawm: ex kah heue:.

Siyiex mawh Pa Riang

5 Mai: in mawh lox bwan: pa hoik mhong: ex khaing: Nawh, mai: krai ka pex, Siyiex mawh pa riang, mai: ka daux Nawh Cao: pa vhaik ang koe: ceeix kawx heue:. 6 Phan: ex ah, "Ex yuh paox yuh pie tau mai: Nawh Cao:" mai: hu: ka daux pa vhaik, ex mawh pa pie pa lhen:, mai: ang yuh pa mawh pa meh. 7 Viang mawh kawx nan: phan: ex hu: ka daux pa riang, awm: ot Nawh Cao: ka daux pa riang, ex yaox tix mawh paox mawh pie ka paox tix, mai: nham: Kawn: Nawh Yesux sigrah ex singax khaing: phimap phigrham: khawm: uik heue:. 8 Phan: ex ah, "Ex ang koe: phimap phigrham:" ex deeh pie ka tokaux tix tiru, mai: pa mawh pa meh ang koe: ka daux ex heue:. 9 Phan: ex krai doh grawng: phimap phigrham: ex, Nawh kaux sijax mai: rah see son sang pluat ploi: phimap phigrham: ex, mai: son sang kieh ex singax khaing: pa ang rah ang see khawm: uik heue:. 10 Phan: ex ah, "Ex ang sax yuh phimap phigrham:" ex yuh Nawh Cao: mawh pa pie pa lhen:, mai: gumlox Nawh ang koe: ka daux ex heue:.

Simin Ting 2

Cao: Khrit mawh pui sinax son ex

1 Kawn: nyawm pa moh aux khankix eue:, aux tiem: grawh grawng: ceu in khankix ka pex, yuh ka mawx son ang pex lai yuh phimap phigrham: heue:. Mai: phan: pui tix kaux kaux yuh phimap phigrham:, ex koe: Cao: khyox khaw: son ex ka Keeing: Cao: pa mawh Yesux Khrit pa rah pa see heue:. 2 Tokaux Nawh mawh pa tan pa lu pa sang kieh ex luan khaing: phimap phigrham: tix, mai: ang joeng mawh ngie son phimap phigrham: ex khaing:, viang mawh nan: mawh son phimap khawm: beu: haktiex khawm: uik heue:. 3 Phan: ex priex tix hawt lox tawm: jhawm: krai Nawh, kheu in ex tom: tawng grawng: pa tawng ex ka Nawh heue:. 4 Kaw pa ah, "Aux tawng Nawh" mai: ang priex tix hawt lox tawm: jhawm: krai Nawh, mawh pui pie pui lhen: mai: pa mawh pa meh ang koe: ka daux nawh. 5 Viang mawh kawx nan: pui mawx ang ah pa priex tix hawt gumlox Nawh, krax moh krax rhawm: Siyiex hoik grum naog ka daux nawh tete heue:. Mawh kheu in ex tom: tawng grawng: pa ot ex ka daux Nawh heue:. 6 Kaw pa ah "Aux ot ka daux Nawh" tokaux nawh kawx khaw: tix hu: awm: pa hoik hu: Nawh Cao: heue:.

7 Pui pa moh aux khankix eue:, aux ang tiem: tix tawx lox pingnyap pa khraox ka pex, viang mawh nan: mawh lox pingnyap pa prim: pa hoik koe: pex khaing: tom: yam jah. Pingnyap pa prim: an mawh gumlox pa hoik mhong: pex heue:. 8 Viang mawh nan: lox pingnyap pa baox deeh tiem: aux ka pex mawh pa khraox, grawh grawng: nawh mawh pa khraox ka daux Nawh mai: ka daux pex, mawh kheu pa vhaik uik grai: hu:, mai: pa riang pa mawh pa meh hoik jhan: riang heue:. 9 Kaw pa ah ot tix ka daux pa riang, mai: koeng ka puxaik tix, kawn: ot ka daux pa vhaik tom: yamin heue:. 10 Kaw pa moh ka puxaik tix ot ka daux pa riang, mai: ang lai koe: dee sideeing ka daux nawh heue:. 11 Viang mawh kawx nan: kaw pa koeng ka puxaik tix, ot ka daux pa vhaik, mai: hu: ka daux pa vhaik, mai: ang nawh tawng dee hu: tix, mawh kheu pa vhaik hoik kieh ngai: nawh dug heue:.

12 Kawn: nyawm pa moh aux khankix heue:, aux tiem: lai ka pex, mawh kheu hoik pluat hoik ploi: phimap phigrham: pex, kheu ceukaux Nawh heue:. 13 Keeing: khankix eue:, aux tiem: lai ka pex, mawh kheu hoik tawng pex ka Kaw pa hoik koe: khaing: tom: yam jah heue:. Simex pa awn: ju khankix eue:, aux tiem: lai ka pex, mawh kheu hoik pex pex ka kaw pa caox heue:. Kawn: nyawm iak khankix eue:, aux tiem: lai ka pex, mawh kheu hoik tawng pex ka Keeing: Cao: heue:. 14 Keeing: khankix eue:, aux hoik tiem: lai ka pex, mawh kheu hoik tawng pex ka Kaw pa hoik koe: khaing: tom: yam jah heue:. Simex pa awn: ju khankix eue:, aux hoik tiem: lai ka pex, mawh kheu ting riang pex, mai: kheu ot gumlox Siyiex ka daux pex, mai: kheu hoik pex pex ka kaw pa caox heue:.

Paw moh ka haktiex

15 Paw vi moh ka haktiex, viang ceu pa koe: ka daux haktiex kawx, paw vi moh kah heue:. Phan: pui tix kaux kaux moh ka haktiex, krax moh krax rhawm: Keeing: Cao: ang koe: ka daux nawh heue:. 16 Mawh kheu can pa koe: ka daux haktiex khawm: uik, pa mawh pa hawt alo nex nham:, mai: pa hawt alo ngai:, mai: pa yuh tix ting rhawm: yam im: ju, ang mawh pa dex pa dawd mai: Keeing: Cao:, viang mawh nan: mawh pa dex pa dawd mai: haktiex heue:. 17 Haktiex mai: alo pa dex pa dawd mai: haktiex tag grai: hu:, viang mawh nan: kaw pa hawt yuh alo Siyiex, tag kaux leeing: ju leeing: phan: heue:.

18 Kawn: nyawm iak khankix eue:, bawg yamin hoik mawh bawg yam nari sidah heue:. Mai: awm: hoik mhong: pex grawng: sang hoek antikhrit, viang mawh yamin kawx antikhrit hoik lih koe: tom: nie, mawh kheu nan: ex tom: tawng hoik mawh bawg yam nari sidah heue:. 19 Kix hoik lih hu: khaing: ex, viang mawh kawx nan: kix ang dex ang dawd mai: ex, grawh grawng: nawh phan: kix hoik dex hoik dawd mai: ex, kix tag kawn: ot tau mai: ex heue:. Viang mawh nan: kix hoik lih hu:, yuh ka mawx son sang sidawng: grawng: kix khawm: uik ang dex ang dawd mai: ex heue:. 20 Mai: pex hoik pon pa groi rawm: bee khaing: Kaw Pa Singax Singeh, mai: pex hoik tawng ku ceu ku cawng khawm: uik heue:. 21 Aux hoik tiem: lai in ka pex, kheu ang pex tawng ka pa mawh pa meh ang lai mawh, viang mawh nan: mawh kheu hoik tawng pex ka pa mawh pa mex, mai: grawng: pa pie pa lhen: tix ceu kawx ang dex ang dawd mai: pa mawh pa meh heue:. 22 Pui mawx pa mawh pui pie pui lhen:, phan: ang mawh kaw pa thiang: tix tik grawh grawng: mawh Yesux Cao: Khrit? Kaw pa thiang: tix tik Keeing: Cao: mai: Kawn: Cao:, mawh antikhrit heue:. 23 Pui mawh ang ah pa thiang: tix tik ka Kawn: Cao:, ang lai koe: ka Keeing: Cao:, kaw pa kham: tix teei Kawn: Cao:, viang ka khawm: Keeing: Cao: kawx nawh koe: heue:. 24 Phan: mawh pex, kieh pa hoik mhong: pex tom: yam jah ot ka daux pex heue:. Phan: pa hoik mhong: pex tom: yam jah ot ka daux pex, pex kawx tag sang ot ka daux Kawn: Cao: mai: ka daux Keeing: Cao: heue:.

Gumlox mukheu leeing: ju

25 Mai: in mawh lox mukheu pa hoik tawx Nawh ka ex, pa mawh ju leeing: ju leeing: phan: heue:. 26 Aux hoik tiem: ceu in khankix ka pex, grawh grawng: kix pa sang thong: tix kieh pex lud heue:. 27 Phan: mawh pex, pa groi rawm: bee pa hoik pon pex khaing: Nawh Cao:, ot ka daux pex, ang pex lo pui pa gau ka pex tix kaux kawx, viang mawh nan: awm: rawm: bee pa groi Nawh, gau ka pex grawng: ku ceu khawm: uik, mai: mawh pa mawh pa meh, mai: ang mawh pa pie pa lhen:, mai: awm: pa gau an ka pex, pex ot ka daux Nawh heue:. 28 Mai: yamin, kawn: nyawm pa moh aux khankix eue:, ot ka daux Nawh Cao:, yuh ka mawx phan: Nawh Cao: tag sang lih bleeh, ex tag koe: rhawm: pa kua: pa ang ring, mai: ang koe: krax kaig krax tua sivoe Nawh Cao: yam hoek Nawh heue:. 29 Phan: pex tawng grawng: mawh Nawh pa rah pa see, pex tawng grawng: ku kaux daux pui can pa yuh pa rah see kawx, mawh pa hoik keh ka daux Nawh Cao: heue:.

Simin Ting 3

Ra: lai: moh ka paox tix

1 Jhak heue:, Keeing: Cao: hoik tawx krax moh krax rhawm: ka piang ex miex ding miex glhaong: son sang kok ex mawh kawn: Siyiex, mai: mawh ex nan:. Mawh kheu jao in haktiex ang tawng ka ex, kheu ang haktiex tawng ka Nawh Cao: heue:. 2 Pui pa moh aux khankix eue:, yamin ex hoik mawh kawn: Siyiex, pa tag sang mawh ex bawg khaix ang nyang bax plak kieh sidawng: heue:. Viang mawh nan: ex tawng grawng: sang awm: ex Nawh yam sang plak kieh Nawh sidawng:, mawh kheu ex tag sang yaox Nawh awm: mawh Nawh heue:. 3 Mai: ku kaux daux pui pa koe: krax keud pot jun pot pa yuh nan: ka Nawh, nawh yuh tokaux tix singax, awm: singax singeh Nawh Cao: heue:. 4 Pa yuh phimap phigrham: ku kaux daux pui, yuh khawm: pa lheu: tix lox been, mai: phimap phigrham: kienie, mawh pa lheu: lox been heue:. 5 Mai: pex tawng grawh grawng: hoik sidawng: Nawh son sang teei tix klawm: phimap phigrham: ex hu:, mai: ka daux Nawh Cao: ang koe: phimap ceeix kawx heue:. 6 Pui mawx ang ah pa ot ka daux Nawh Cao: ang yuh phimap phigrham:. Pui pa yuh phimap phigrham: ang nyang sax yaox Nawh Cao:, mai: ang nyang bax tawng ka Nawh Cao: heue:. 7 Kawn: nyawm aux khankix eue:, paw kieh pui tix kaux kawx thong: tix kieh pex lud awawx. Kaw pa yuh pa rah pa see, mawh pa rah pa see, awm: rah see Nawh Cao: heue:. 8 Kaw pa yuh phimap phigrham: mawh pa dex pa dawd mai: phicaox, mawh kheu phicaox hoik yuh phimap phigrham: khaing: tom: yam jah heue:. Kawn: Siyiex hoik lih bleeh, yuh ka mawx son sang yieh Nawh kaing pa yuh phicaox heue:. 9 Pui mawx ang ah pa hoik kieh Siyiex kix keh, ang yuh phimap phigrham:, mawh kheu simie Nawh Cao: hoik ot ka daux nawh, mai: ang nawh chix yuh phimap kheu Siyiex hoik kieh nawh keh heue:. 10 Ka daux ceu in kawn: praix Siyiex mai: khawm: kawn: praix phicaox hoik sidawng: kah. Pui mawx ang ah pa ang yuh pa rah pa see mai: ang moh ka puxaik tix, ang dex ang dawd mai: Siyiex heue:. 11 Grawh grawng: nawh in mawh lox bwan: pa hoik mhong: pex tom: khaing: yam jah, yuh ka mawx son sang moh ex ka paox tix heue:. 12 Ang awm: Ka-inax pa dex pa dawd mai: kaw pa caox, mai: pa hoik pah pux tix yum. Ka-inax pah pux tix yum kheu grawng: pa tix? Mawh kheu pa yuh tokaux nawh mawh pa caox, mai: pa yuh pux nawh mawh pa rah pa see heue:.

13 Puxaik khankix eue:, phan: pui haktiex koeng ka pex, paw vi daox deng: kah. 14 Ex tawng grawh grawng: hoik lih ex khaing: pa yum, mai: hoik laig ka daux pa im: ju, mawh kheu moh ex ka puxaik khankix heue:. Kaw pa ang koe: krax moh krax rhawm: ot ka daux pa yum heue:. 15 Pui mawx ang ah pa koeng ka puxaik tix, mawh pui pa pah pui yum heue:. Mai: pex tawng grawh grawng: ju leeing: ju leeing: phan: ang ot ka daux pui pa pah pui yum tix kaux kawx heue:. 16 Ex tom: tawng krax moh krax rhawm:, mawh kheu Nawh Cao: hoik deuh ju Tix tix yum son ex, mai: ex kawx khaw: tix deuh ju tix tix yum son puxaik khankix heue:. 17 Viang mawh nan: pui mawx ang ah pa koe: kraung khrai: haktiex, mai: yaox puxaik tix hot sibhawm: mai: lo tix, mai: nyeep krax caoxrhawm: tix khaing: nawh, krax moh krax rhawm: Siyiex tag chix ot ka daux nawh yuh ka mawx? 18 Kawn: nyawn aux khankix eue:, paw kieh ex moh ka lox dak lox jheeh khaing:, kieh moh ka daux ceu pa yuh tix pa mawh pa meh heue:. 19 Ka daux pa yuh nin: ex tag tawng, grawh grawng: mawh ex pa dex pa dawd mai: pa mawh pa meh, mai: tag kieh rhawm: rhi: ex vhah sivoe Nawh Cao: heue:. 20 Mawh kheu phan: rhawm: rhi: ex deuh phimap ka piang tokaux ex, Siyiex lheu: ting khaing: rhawm: ex, mai: tawng ku ceu ku cawng khawm: uik heue:. 21 Pui pa moh aux khankix eue:, phan: rhawm: ex ang koe: dee deuh phimap ka tokaux tix, ex koe: rhawm: pa kua: pa ang ring ka plak Siyiex heue:. 22 Mai: can pa rawg ex, ex pon khaing: Nawh Cao:, mawh kheu priex ex tix hawt lox tawm: jhawm: krai Nawh Cao:, mai: yuh ceu pa khaw: pa caw ka sivoe ngai: Nawh Cao: heue:. 23 Mai: lox tawm: jhawm: krai Nawh Cao: mawh pa nhie: ex yumrhawm: ka ceukaux Kawn: Nawh Yesux Khrit, mai: son sang moh ka paox tix, awm: hoik tawm: Nawh lox ka ex heue:. 24 Mai: kaw pa priex tix hawt lox tawm: jhawm: krai Nawh Cao:, ot ka daux Nawh Cao:, mai: Nawh Cao: kawx ot ka daux nawh heue:. Mai: mawh kheu in ex tom: tawng grawng: ot Nawh Cao: ka daux ex kheu Khwan: Cao: pa hoik tawx Nawh ka ex heue:.

Simin Ting 4

Cheuk tix yaox ka can khwan: khankix

1 Pui pa moh aux khankix eue:, paw vi yumrhawm: ka can khwan: pa koe: khawm: uik, viang mawh nan: cheu: tix yaox ka khwan: khankix grawng: mawh kix pa dex pa dawd mai: Siyiex lie, ang dex ang dawd lie. Mawh kheu cao: jhai: pa ang mawh ang meh hoik lih hu: ka daux haktiex tom: nie heue:. 2 Pex pon tix tawng Khwan: pa dex pa dawd mai: Siyiex ka daux pa yuh nin:. Khwan: ku mu: pa kham: grawh grawng: hoik hoek Yesux Khrit ka daux nex daux nham: mawh pa dex pa dawd mai: Siyiex heue:. 3 Mai: khwan: ku mu: pa ang kham: grawng: Yesux yuh nan: ang dex ang dawd mai: Siyiex, mai: khwan: pa yuh nin:, mawh khwan: antikhrit, pa hoik mhong: pex grawng: tag sang hoek, mai: yamin kawx nawh hoik ot ka daux haktiex heue:. 4 Kawn: nyawm aux khankix eue:, pex mawh pa dex pa dawd mai: Siyiex, mai: hoik pex ka kix, mawh kheu Kaw pa hoik ot ka daux pex, lheu: ting khaing: kaw pa ot ka daux haktiex heue:. 5 Kix mawh pa dex pa dawd mai: haktiex heue:, mawh kheu nan: kix tom: krai grawh grawng: pa dex pa dawd mai: haktiex, mai: pui haktiex kawx nghiet lox kix heue:. 6 Ex kienie, mawh pa dex pa dawd mai: Siyiex heue:. Kaw pa tawng ka Siyiex nghiet lox ex, kaw pa ang dex ang dawd mai: Siyiex ang nghiet lox ex heue:. Kheu in ex tom: tawng ka khwan: pa mawh pa meh, mai: khwan: pa phit pa lud heue:.

Siyiex mawh krax moh krax rhawm:

7 Pui pa moh aux khankix eue:, kieh ex moh ka paox tix tix kaux hoik tix kaux, mawh kheu krax moh krax rhawm: mawh pa dex pa dawd mai: Siyiex heue:. Mai: pa koe: krax moh krax rhawm: ku kaux, mawh pa hoik kieh Siyiex kix keh, mai: pa tawng ka Siyiex heue:. 8 Kaw pa ang koe: krax moh krax rhawm:, ang tawng ka Siyiex, mawh kheu Siyiex mawh krax moh krax rhawm: heue:. 9 Krax moh krax rhawm: Siyiex ka ex hoik plak kieh sidawng:, ka daux pa ploi: Nawh Kawn: Tix pa koe: tix kaux khaing: hoek ka daux haktiex, yuh ka mawx son sang pon ex tix im: ju kheu Nawh heue:. 10 Krax moh krax rhawm: kienie, mawh kheu moh ex ka Siyiex ang lai mawh, viang mawh nan: mawh kheu moh Nawh Cao: ka ex, mai: hoik ploi: Kawn: Nawh hoek son sang mawh pa tan pa lu pa sang kieh ex luan khaing: phimap phigrham: tix heue:. 11 Pui pa moh aux khankix eue:, phan: Siyiex hoik moh ka ex niex ding niex dod, viang ex kawx khaw: tix moh ka paox tix heue:. 12 Pui tix kaux kawx ang sax yaox ka Siyiex tix bawg kawx heue:. Phan: ex moh ka paox: tix Siyiex ot ka daux ex, mai: krax moh krax rhawm: Nawh grum naog ka daux ex heue:. 13 Mawh kheu in ex tom: tawng grawng: pa ot ex ka daux Nawh Cao:, mai: grawng: pa ot Nawh ka daux ex, kheu Nawh Cao: hoik tawx Khwan: Nawh ka ex heue:. 14 Mai: ex hoik yaox mai: kham: mhai: sakse: grawh grawng: hoik ploi: Keeing: Cao: ka Kawn: Cao:, son sang mawh Cao: Taoh haktiex heue:. 15 Pui mawx ang ah pa kham: grawng: mawh Yesux Kawn: Siyiex, Siyiex ot ka daux nawh, mai: nawh ot ka daux Siyiex heue:. 16 Mai: ex tawng mai: hoik yumrhawm: ka krax moh krax rhawm: Siyiex ka son ex heue:. Siyiex mawh krax moh krax rhawm:, mai: kaw pa ot ka daux krax moh krax rhawm: ot ka daux Siyiex, mai: Siyiex ot ka daux nawh heue:. 17 Ka daux in krax moh krax rhawm: hoik yuh kieh naog ka daux ex, yuh ka mawx son sang koe: ex rhawm: pa kua: pa ang ring ka daux singaix prawng singaix ciyang heue:. Mawh kheu awm: ex Nawh, yam ot ex ka haktiex in heue:. 18 Ang koe: ceu pa lhat ka daux krax moh krax rhawm:, viang mawh nan: krax moh krax rhawm: ceu pa grum naog, taing tix tik ceu pa lhat pa graung, mawh kheu pa lhat pa graung koe: pa prawng pa ciyang, mai: kaw pa koe: krax lhat krax graung ang nyang bax grum naog ka daux krax moh krax rhawm: heue:. 19 Ex moh ka Nawh Cao:, mawh kheu hoik moh Nawh ka ex sivoe heue:. 20 Phan: pui tix kaux kaux ah, "Aux moh ka Siyiex," mai: koeng ka puxaik tix, nawh mawh pui pie pui lhen:, mawh kheu kaw pa ang moh ka puxaik tix pa hoik yaox nawh, ang tau tix chix moh ka Siyiex pa ang nawh sax yaox heue:. 21 Mai: ex hoik koe: lox tawm: lox pingnyap in khaing: Nawh Cao:, kaw pa moh ka Siyiex, viang ka puxaik nawh kawx tag lai moh kah heue:.

Simin Ting 5

Krax yumrhawm: pon pex ka haktiex

1 Pui ku kaux daux pui pa yumrhawm: grawng: mawh Yesux Cao: Khrit, mawh pa Siyiex kieh kix keh heue:. Mai: ku kaux daux pui pa moh ka Kaw pa hoik kieh kix keh, viang ka kix pa Nawh Cao: hoik kieh keh kawx moh heue:. 2 Yam moh ex ka Siyiex mai: priex tix hawt lox tawm: jhawm: krai Nawh, ex tom: tawng grawh grawng: moh ex ka daog dawn: kawn: praix Siyiex khankix kheu heue:. 3 Grawh grawng: nawh, pa priex tix hawt lox tawm: jhawm: krai Nawh mawh pa moh ka Siyiex heue:. Mai: lox tawm: jhawm: krai Nawh ang mawh pa nu tix hawt. 4 Mawh kheu pui mawx ang ah pa hoik kieh Siyiex kix keh, pex ka haktiex heue:. Mai: krax pa pex an kienie, mawh krax yumrhawm: ex heue:. 5 Mai: mawh pui mawx pa pex haktiex, phan: ang mawh kaw pa yumrhawm: grawng: mawh Yesux Kawn: Siyiex? 6 Yesux Khrit mawh Kaw pa hoek ka rawm: mai: ka nham:, mai: ang mawh ka rawm: giex khaing: mawh ka rawm: mai: nham: heue:. 7 Mai: mawh Khwan: Cao: pa kham: mhai: sakse:, mawh kheu Khwan: Cao: mawh pa mawh pa meh heue:. 8 Mai: koe: loe: ceu pa kham: mhai: sakse:, pa mawh Khwan: Cao:, mai: rawm:, mai: nham:, mai: in khawm: loe: ceu mawh tix ceu khaing:. 9 Phan: ex rieb tix teei mhai: sakse: pa kham: kawn: pui, mhai: sakse: pa kham: Siyiex mawh pa nie lheu: ting. Grawh grawng: nawh mhai: sakse: pa kham: Siyiex kienie, mawh mhai: sakse: pa kham: Nawh grawng: Kawn: Tix heue:. 10 Kaw pa yumrhawm: ka Kawn: Siyiex, hoik koe: mhai: sakse: ka daux tokaux tix heue:. Kaw pa ang yumrhawm: ka Siyiex, hoik yuh Nawh Cao: mawh pa pie pa lhen:, mawh kheu ang nawh yumrhawm: ka mhai: sakse: pa kham: Siyiex grawng: Kawn: Tix heue:. 11 Mai: mhai: sakse: in kienie, mawh pa Siyiex hoik tawx ju leeing: ju leeing: phan: ka ex, mai: ju in koe: ka daux Kawn: Nawh heue:. 12 Kaw pa koe: Kawn: Cao: koe: ju an heue:. Kaw pa ang koe: Kawn: Siyiex ang koe: ju an heue:.

Lox ghoik , pa tawng ka Siyiex pon ju leeing: ju leeing: phan:

13 Aux hoik tiem: grawh grawng: ceu in khankix ka pex, pa mawh pa hoik yumrhawm: ka ceukaux Kawn: Siyiex, yuh ka mawx son sang tawng pex, grawng: koe: pex ju leeing: ju leeing: phan: heue:. 14 Mai: pa koe: ex krax kua: mai: pa ang ring plak Nawh Cao: kienie, mawh nin:, phan: ex rawg tix ceu ceu pa khaw: pa caw mai: alo Nawh Cao:, Nawh nghiet ka ex heue:. 15 Mai: phan: ex tawng grawh grawng: pa nghiet Nawh can pa rawg ex, ex tom: tawng grawng: ex pon ceu pa rawg ex ka Nawh Cao: heue:. 16 Phan: pui tix kaux kaux yaox puxaik tix yuh phimap, pa ang mawh phimap tom: hoek krax yum, kieh nawh rawg bwan:, mai: Siyiex tag sang tawx ju ka nawh, son kix pa ang yuh phimap ceu pa tag kieh hoek krax yum. Koe: phimap tom: hoek krax yum heue:. Ang aux ah nawh khaw: tix rawg bwan:, son pa yuh nan:. 17 Pa ang rah ang see khawm: uik mawh phimap heue:. Mai: koe: phimap ceu pa ang kieh hoek tom: krax yum heue:.

18 Ex tawng grawng: pui ku kaux daux pui, pa Siyiex hoik kieh kix keh, ang yuh phimap phigrham: viang mawh nan: kaw pa Siyiex hoik kieh nawh keh, chix priex chix rien tokaux tix, kaw pa caox ang pon teeh pon chuh nawh heue:. 19 Ex tawng grawng: mawh ex pa dex pa dawd mai: Siyiex, mai: grawng: haktiex khawm: uik ca: ot ka daux kaw pa caox heue:. 20 Mai: ex tawng grawh grawng: hoik hoek Kawn: Siyiex, mai: hoik tawx krax pa chix tawng chix yung ka ex, yuh ka mawx son sang tawng ex Kaw pa mawh pa meh, mai: ex hoik ot ka daux Kaw pa mawh pa meh an, pa mawh ka daux Kawn: Nawh Yesux Khrit heue:. In mawh Siyiex pa mawh pa meh, mai: ju leeing: ju leeing: phan: heue:. 21 Kawn: nyawm aux khankix eue:, rien tokaux tix khaing: rieang rao khankix awawx.