1 Timose

Timose Phuk Tix

Simin Ting 1

Lox nawb daux pa simawd

1 Pawlux pa mawh kawncau pa ting Yesux Khrit, kheu pa nhie: Siyiex Cao: Taoh ex, mai: Yesux Khrit pa mawh ceu pa keud pot jun pot ex, 2 tawx ka Timose, pa mawh kawn: aux tete ka daux krax yumrhawm: heue:. Kieh koe: bwanson:, pa caoxrhawm: mai: pa nhim: pa kaoh khaing: Siyiex, Keeing: Cao:, mai: Simiang ex Yesux Khrit liak.

Nawm: lox

3 Awm: khyox aux tix nhie: maix kawn: baox ot ka daux veng Efesux yam hu: aux ka meung Makedonix, son sang gau maix ka pui tiblah, yuh ka mawx son ang kix sang gau ceu pa gau pa tang: pa siyox, 4 mai: son ang sang nghiet ka lox been pa ang tie mawh, mai: ka grawng: ru ceucat pa ang jud ang jai khankix, pa nie kieh thung: thiang: paox tix, khaing: grawh grawng: pa yuh ceu pa hoik een: Siyiex rhawm: kah, pa koe: ka daux krax yumrhawm: heue:. 5 Viang mawh nan: dee sidah lox tawm: an, mawh krax moh, pa lih kaoh khaing: rhawm: rhi: pa singax singeh, mai: dee chix keud chix tawng pa mhawm:, mai: krax yumrhawm: pa mawh pa meh heue:. 6 Ka grawng: ceu an khankix tiblah hoik via hoik lud hu: ka daux pa sikah lox giex going. 7 Kix simie tix mawh sara cao: gau lox lai been li, viang ang kix tawng grawng: pa ah tix, mai: ceu pa dhua: kix mawh pa nie mawh heue:. 8 Viang mawh kawx nan: ex tawng grawh grawng: lox lai been li mawh pa mhawm:, phan: pui chix shiao awm: pa caw pa khaw: mai: been, 9 mai: een: tix tawng grawh grawng: lox lai been li ang mawh pa hoik yuh son pui rah pui see, viang mawh nan: mawh son pui pa ang hawt been li mai: pa ang chix cu chix nghiet, mai: son pui pa ang nab ang yam mai: pa yuh ceu pa ang khaw: ka Siyiex, mai: pui ting map ting grham:, mai: son pui pa ang singax singeh mai: son pui pa ang chix nab chix yam mai: son pui pa tap toi: keeing: tix khankix, mai: son pui pa tap toi: miex tix khankix, mai: son pui pa pah pui yum, 10 mai: son pui pa phit pa vao, mai: son pui pa phit pa vao ka paox simex tix, mai: son pui pa briex pui, mai: son pui pie pui lhen:, mai: son pui pa kham: mhai: sakse: pa ang mawh ang meh, mai: tang: ceu can pa ang caw ka lox ceu pa gau, pa mawh pa meh, 11 pa khaw: ka lox bwan: gauxrhawm: gauxrhi: pa ting min: plakngai: cie Siyiex pa ting bwanson:, pa hoik tawx hoik pong ka aux heue:.

12 Aux yaogyaw bwanson: Nawh Cao:, pa mawh Simiang ex Yesux Khrit, pa hoik kieh aux koe: riang rao heue:. Mawh kheu hoik sawn: Nawh aux mawh pa kaux sijax, mai: ciak tix kieh aux yuh kaing jhaw Nawh, 13 viang hoik mawh aux, pui pa sa pa lao ka Siyiex, mai: pui pa tuktiak tukte:, mai: pui pa nieb pon yuh pa ang cee ang cak glang: ka: in kawx heue:. Viang mawh kawx nan: aux hoik pon krax caoxrhawm: mawh kheu hoik yuh aux khankix kheu ang tix tawng, ka daux pa ang yumrhawm: heue:. 14 Mai: bwanson: Simiang ex kied ting kied nie tau mai: krax yumrhawm: mai: krax moh pa koe: ka daux Yesux Khrit heue:. 15 Lox in mawh pa kaux sijax mai: pa keung: tix rieb tix teei khawm: uik, pa ah, "Yesux Khrit hoek ka piang haktiex son sang taoh pui phimap phigrham: khankix," mai: aux mawh kun: pui phimap heue:. 16 Mawh kheu in aux hoik pon bwanson: pa caoxrhawm:, yuh ka mawx son sang plak jhi: Yesux Khrit ceu pa lang: gun lang: yeung Nawh Cao: ka daux aux pa mawh kun: pui phimap, son sang mawh mhai: son pui pa tag sang yumrhawm: ka Nawh Cao: tom: pon ju leeing: leeing: phan: khaix in sax heue:. 17 Yamin kieh Simiang Khunhawkham leeing: ju leeing: phan:, pa ang chix laux chix yum, mai: pa ang ngai: chix yaox, pa mawh Siyiex tix kaux khaing:, koe: krax yung: yi:, mai: min: plakngai: ku ju leeing: ju leeing: phan: liak! Amen. 18 Kawn: aux Timose eue:, lox tawm: in aux tawx pong ka maix, awm: pa khaw: mai: pa hoik dawg grux keud grawh grawng: maix, yuh ka mawx kheu an kix, maix tag pon yuh naing, pa mawh naing pa mhawm: heue:. 19 Jhawp ka krax yumrhawm:, mai: ka dee chix keud chix tawng pa mhawm:, pa tiblah hoik tik khaing: kix mai: hoik kieh reu krax yumrhawm: laux leeing: kheu heue:. 20 Humene mai: Alezandre khankiex kawx mawh ka daux kix, pa hoik tawx hoik pong aux ka Satan, yuh ka mawx son sang gau kiex, tix ang sa ang lao ka Siyiex heue:.

Simin Ting 2

Ceucao pa kham: mhai: sakse: kah

1 Mawh kheu nan: ka: paox tix khawm: uik aux nhie: maix, khyox khaw:, rawg bwan:, mhaing:, mai: yaogyaw bwanson:, son pui khawm: uik heue:. 2 Son simiang khunhawkham khankix, mai: can pui pa giex kaing: khawm: uik, yuh ka mawx son sang pon ex tix ot yien: mhawm: mhawm: ka daux pa yuh ceu pa khaw: mai: Siyiex, mai: pa chix priex rhawm: tix heue:. 3 In mawh pa mhawm:, mai: pa khaw: sivoe Siyiex Cao: Taoh ex, 4 pa koe: rhawm: tix kieh pui khawm: uik hoek krax taoh, mai: tawng ka pa mawh pa meh heue:. 5 Grawh grawng: nawh koe: ngie Siyiex tix kaux khaing:, mai: pui sinax, sinax Siyiex mai: kawn: pui kawx koe: ngie tix kaux khaing:, Pui an, mawh Yesux Khrit, 6 pa hoik tawx tokaux Tix son sang taoh ka pui khawm: uik heue:. Pa kham: sakse: ka yam caw bawg yam heue:. 7 Mawh ka son an hoik ciak tix kieh aux mawh cao: sidiex cao: gau mai: kawncau pa ting, (Aux ah lox pa mawh pa meh, aux ang pie ang lhen:), son sang mawh aux cao: gau, grawng: krax yumrhawm: mai: pa mawh pa meh, ka pui tang: ceu tang: cat khankix heue:. 8 Mawh kheu nan: aux simie tix kieh simex khankix rawg bwan: ku dah ku dee, mai: yaog taix pa singax singeh, pa ang koe: krax songrhawm: songrhi: mai: krax thung: thiang: heue:. 9 Awm: an aux simie tix kieh bon: khankix chix koe: krax kaig mai: priex rhawm: tix tix ceep kraung pa ang hiex jawg tix, mai: ang simie tix kieh dieh hauk kaing:, mai: ih kraung khri:, phan: ang mawh nan: siang: pa koe: daux jawx, phan: ang mawh nan: kraung ceep pa ting ngawh. 10 Viang mawh nan: kieh krax tuah krax klaung: pa mhawm: mawh pa jawg tix, awm: pa khaw: pa nyawm tix jhak son bon: khankix pa hoik ah tix mawh pa chix nab chix yam mai: pa yuh pa khaw: pa caw ka Siyiex heue:. 11 Kieh bon: gau tix ka daux krax pa yien: pa yawg, mai: ka krax pa grum chix cu chix nghiet heue:. 12 Viang mawh kawx nan: aux ang cu tix kieh bon: mawh cao: gau, mai: cao: giex kaing: piang simex, viang mawh nan: kieh nawh ot yien: yawg tix heue:. 13 Grawh grawng: nawh hoik phan: hoik yuh Adam phaoxka:, tom: yuh Evax khaix heue:. 14 Lheu: khaing: an Adam ang mawh pa nghiet lox pie, viang mawh nan: bon: hoik nghiet lox pie mai: laig ka daux pa phit pa lud heue:. Viang mawh kawx nan: bon: tag hoek krax taoh, ka daux pa keh kix kawn:, phan: kix kawn: ot ka daux krax yumrhawm:, mai: krax moh, mai: krax singax singeh, tau mai: krax pa chix priex rhawmrhi: tix heue:.

Simin Ting 3

1 Lox pa ah nin:, "Phan: pui tix kaux kaux sawg tix pon ara cao: giex kaing: ceucao, nawh simie kaing pa mhawm:," mawh lox pa kaux sijax heue:. 2 Mawh kheu nan: pui pa giex kaing: ceucao tag lai mawh pui pa ang koe: dee deuh phimap kah, pa koe: moeng tix kaux khaing:, mai: pa yuh satix, pa chix priex rhawm: tix, pa chix keud chix sawn:, mai: pa chix khre: ka nyo sinie, mai: pa chix gau heue:. 3 Ang lai mawh pui pa nieb pleung: ka plai: rawm: plix siiet, mai: pa nieb tap toi: ka pui, viang mawh nan: tag lai mawh pa awn: rhawm: awn: rhi:, mai: pa ang simah simaing:, mai: pa ang moh ka mau heue:. 4 Tag lai mawh kaw pa chix giex kaing: nyiex tix, mai: pa koe: rhawm: pa chix keud chix sawn: tix kieh kawn: praix cu nghiet tix heue:. 5 (Viang mawh kawx nan: phan: mawh pui pa ang chix giex kaing: nyiex tokaux tix, nawh tag chix priex ceucao Siyiex yuh ka mawx?) 6 Pa ang mawh pui khraox ih li, ha nawh kox ting rhawm: vao tix, mai: rau ka daux pa sang ciyang ka phicaox. 7 Lheu: khaing: an nawh tag lai mawh, pa pui plak praix kham: mhai: sakse: pa mhawm: kah, phan: ang mawh nan: ha nawh kox rau ka daux pa deuh pui phimap, mai: ka daux kie phicaox heue:. 8 Awm: an pui bung: kaing: ceucao khankix kawx, tag lai mawh pui pa chix keud chix priex rhawm: tix, mai: pa ang mawh pui pa koe: dak ra: mu:, mai: pa ang nieb nyaux plai: rhawm: plix siiet tom: nie, mai: pa ang keud tix pon mau yie ka krax pa ang khaw:. 9 Tag lai mawh pui pa jhawp ka pa raux pa mox krax yumrhawm: ka daux dee chix keud chix tawng tix pa singax singeh heue:. 10 Viang mawh in kix kawx kieh cheu: tix yaox phaoxka:, khaix an phan: ang koe: dee deuh phimap kah, kieh kix yuh pui pa bung: kaing: ceucao heue:. 11 Awm: an moeng kix kawx, tag lai mawh pa chix keud chix priex rhawm: tix, mai: pa ang nieb bied tix ah grawng: pui, mai: pa chix yuh satix, mai: pa kaux sijax ka daux ku ceu khawm: uik heue:. 12 Kieh pui pa bung: kaing: ceucao khankix, mawh pa koe: moeng tix kaux khaing:, pa chix giex kaing: piang kawn: piang praix mai: piang nyiex tix mhawm: mhawm: heue:. 13 Grawh grawng: nawh kix pa hoik yuh kaing cao: bung: kaing: ceucao mhawm: mhawm: pon plakngai: pa mhawm: son tokaux tix, mai: rhawm: pa kied kua: daux krax yumrhawm: pa koe: ka daux Yesux Khrit heue:.

Rong: jaong cie pa mawh pa meh

14 Viang aux keud pot jun pot tix sang hoek ka maix laung laung kawx, aux tiem: grawh grawng: ceu in khankix hu: ka maix, 15 yuh ka mawx phan: aux ang khran: hoek, maix tag lai tawng grawng: pui khaw: tix yuh ka mawx ka daux nyiex Siyiex, pa mawh ceucao Siyiex pa im: ju, mai: rong:, mai: jaong cie pa mawh pa meh heue:. 16 Ceu pa chix nab chix yam mai: pa yuh pa khaw: ka Siyiex, mawh pa kied ting raux, mai: ang koe: dee ne dee ah ka grawng: an heue:.

Nawh Cao: hoik lih bleeh ka daux nex. Khwan: Cao: hoik kham: mhai: sakse: kah, Pa hoik yaox kawncau Siyiex khankix kah, Pa hoik sidiex grawng: Nawh ka pui tang: ceu tang: cat, Pa hoik yumrhawm: pui haktiex kah, Pa hoik teei haok ka daux min: plakngai: heue:.

Simin Ting 4

1 Viang mawh kawx nan:, Khwan: Cao: hoik grux krai sidawng:, grawh grawng: daux bawg yam phaox khaix, pui tiblah tag deeh tieh khaing: krax yumrhawm:, mai: nghiet lox khwan: pa pie pa lhen: khankix, mai: lox ceu pa gau phicaox khankix, 2 pa lih khaing: pui pie pui lhen: khankix, pa ah lox pie lox lhen:, mai: pa dee chix keud chix tawng kix hoik susi: gleeing ka riem: hax, 3 pa ang cu kieh pui mex moeng, mai: nhie: pui tuah pa ih pa un:, pa hoik phan: Siyiex tix deuh, ceu pa pui pa hoik yumrhawm: mai: pa tawng ka pa mawh pa meh, khaw: tix yaogyaw bwanson: mai: ih heue:. 4 Mawh kheu can pa hoik phan: hoik yuh Siyiex ku ceu mawh pa mhawm:, mai: ang koe: pa khaw: tix tik tix vud, phan: rieb tix teei ka daux pa yaogyaw bwanson:. 5 Grawh grawng: nawh ceu an kix kieh singax ka daux gumlox Siyiex mai: pa rawg bwan: heue:.

Sakse: pa kham: ka lawng kaux

6 Phan: maix krai puxaik khankix mhong: grawng: ceu in khankix maix tag mawh cao: diex cao: gau pa mhawm: cie Yesux Khrit, mai: tag baox tiien riang rao ka tix ka daux lox pa yumrhawm: khankix, mai: lox gau pa mhawm:, pa hoik hawt maix tom: yamin heue:. 7 Viang mawh kawx nan: paw dex mai: lox been pa seeing: pa brai:, mai: lox been pa ang tie mawh pa lao yiex kuad khankix, viang mawh nan: gau tokaux tix son sang chix nab chix yam mai: yuh pa khaw: ka Siyiex heue:. 8 Grawh grawng: nawh pa gau plak tokaux koe: bwanson: ceeix ceeix, viang mawh kawx nan: pa chix nab chix yam mai: pa yuh pa khaw: ka Siyiex, koe: bwanson: son ku ceu khawm: uik, mai: koe: lox mukheu son ju in, mai: son ju pa tag sang hoek khaix heue:. 9 Lox pa ah nin: mawh pa kaux sijax mai: pa khaw: tix rieb tix teei khawm: uik heue:. 10 Pa nied tix yuh kaing mai: pa yuh lung ex mawh jao in, mawh kheu ex hoik deuh pa keud pot jun pot ex ka Siyiex pa im: ju, pa mawh Cao: Taoh pui khawm: uik, mai: pa nie mawh son pui pa yumrhawm: khankix heue:. 11 Ceu in khankix tawm: lox mai: gau awawx. 12 Paw kieh pui tix kaux kawx nunai: maix kheu awn: ju maix, viang mawh nan: kieh maix mawh ceu pa hawt jawh pui pa yumrhawm: khankix tix yuh, ka daux pa sikah, mai: ka daux pa yuh maix, mai: ka daux pa moh, mai: ka daux pa yumrhawm:, mai: ka daux pa singax singeh heue:. 13 Nied tix coca: phat lai, mai: jeeh nyaw, sidiex gau, tom: hoek aux awawx. 14 Paw yuh tix dahrhawm: ka khawngphak pa koe: ka daux maix, pa hoik tawx ka maix ka daux pa hoik grux keud, yam deuh kuad ceucao taix ka maix heue:. 15 Viex rhawm: tix khawm: uik mai: nied tix coca: yuh ceu in khankix, yuh ka mawx son sang sidawng: pa haok pa huan: maix ka pui khawm: uik heue:. 16 Rien rhawm: ka tokaux tix, mai: ka ceu pa gau maix awawx. Kaux cong: ka daux ceu in khankix, mawh kheu ka daux pa yuh nin:, maix tag taoh khawm: tokaux tix mai: kix pa mhong: ka maix heue:.

Simin Ting 5

1 Paw vi ah ka kuad, viang mawh nan: jeeh nyaw tix sidiex nawh, awm: mawh nawh keeing:, mai: ka sinaw khankix awm: mawh kix puxaik, 2 mai: ka yiex kuad khankix awm: mawh kix miex, mai: ka bon: krih khankix, awm: mawh kix nan: ka daux pa singax singeh khawm: uik awawx. 3 Yungyi: ka miexmai pa mawh miexmai tete awawx. 4 Viang mawh kawx nan: phan: miexmai koe: kawn:, phan: ang mawh nan: kawnsaux kawnsex, kieh kawn: khankix gau tix yuh ka cub geh nyiex tix phaoxka:, mai: deeh plud bwanson: ka miex keeing: tix, grawh grawng: nawh pa yuh nan: mawh pa khaw: plak sivoe ngai: Siyiex heue:. 5 Bon: pa mawh miexmai tete, pa deuk tix kaux khaing: mai: pa ang koe: tid tix, hoik een: krax keud pot jun pot tix ka Siyiex, mai: nied tix rawg bwan: mhaing: ku ngaix ku sawm: heue:. 6 Viang mawh nan: miexmai pa nieb yuh krax gauxrhawm: haktiex, nawh hoik yum yam kawn: klawd tix heue:. 7 Khawm: ceu in khankix kawx tawm: kah, yuh ka mawx son sang luan kix khaing: krax pa deuh phimap heue:. 8 Viang mawh kawx nan: phan: pui tix kaux kaux ang kia: ang ngien ka pui tokaux tix, mai: nie lheu: mawh ka pui nyiex tokaux tix, nawh hoik thiang: tix tik krax yumrhawm:, mai: nie lheu: caox khaing: pui pa ang yumrhawm: heue:. 9 Paw sau: miexmai pa ang nyang hoek ju tigliah (60) num ka daux carang, mai: kiex tag lai mawh pa hoik koe: ngie mex tix kaux khaing:, 10 mai: pa pui kham: mhai: sakse: ka grawng: pa hoik yuh kiex pa mhawm:, phan: kiex hoik eei: kawn: tix ting, phan: kiex hoik chix kia: nyo sinie, phan: kiex hoik khoek caong pui pa singax singeh khankix, phan: kiex hoik kia: ngien ka pui pa yaox krax tug krax kha:, mai: phan: kiex hoik nied tix coca: yuh kaing pa mhawm: ku ceu, sau: kiex daux carang heue:. 11 Viang mawh nan: paw rieb tix sau: miexmai pa awn: ju khankix, grawh grawng: nawh, ha kix kox ang pon kut rhawm: ka grawng: pa gau Cao: Khrit, mai: koe: rhawm: tix sang baox koe: mex, 12 mai: lih tix mawh phimap, kheu laux yuh kix lox sijax pa hoik tawx phaoxka: heue:. 13 Lheu: khaing: an kix lai ling ka tix nyiex hoik tix nyiex, mai: gau tix nieh, mai: nieh khaing: ang mawh, viang mawh nan: mawh pui bied, pa krai grawng: pa ang kix khaw: tix krai, mai: pa nieb chuh grawng: pa ang dex ang dawd mai: kix heue:. 14 Mawh kheu nan: aux simie miexmai pa awn: ju khankix baox koe: mex, mai: koe: kawn:, mai: bung: tix kia: nyiex tix, son ang sang koe: dee map pa koeng kah heue:. 15 Grawh grawng: nawh pui tiblah hoik via hu: mai: hawt khaix Satan heue:. 16 Phan: bon: tix kaux kaux pa yumrhawm:, koe: miexmai pa caw paoxceu, kieh nawh teem: kix, mai: paw kieh mawh beeh mawh glawm: ceucao, yuh ka mawx son sang pon ceucao tix kia: ngien ka pa mawh miexmai tete heue:.

17 Ka kuad ceucao khankix pa giex kaing: mhawm: mhawm:, sawn: kix mawh pa keung: tix pon min: plakngai: pa yaw ra: son, nie lheu: mawh ka kix pa nied tix yuh kaing pa sidiex pa gau heue:. 18 Grawh grawng: nawh phuk lai singang: khri: ah nin:,

327"Maix tag ang jup jheeh moi ka jup yam dig nawh nghox lih,"

mai: baox ah nin:,

328"Pui yuh kaing keung: tix pon ngawh riang tix heue:."

19 Phan: ang koe: cao: kham: mhai: sakse: ra: loe: kaux, paw rieb pa deuh phimap ka piang kuad ceucao. 20 Ah ka kix pa yuh phimap sivoe ngai: pui khawm: uik, yuh ka mawx son pui pa deuk khankix kawx, sang lhat sang graung kah heue:. 21 Aux tawm: lox ka maix ka sivoe ngai: Siyiex, mai: Yesux Khrit, mai: kawncau Siyiex pa hoik laug khankix nhie: maix hawt yuh ceu in khankix, paw vi yuh tang: siyox, mai: paw jhak ka pakngai: pui heue:. 22 Paw khran: deuh taix tix tawx ara ka piang pui tix kaux kawx, mai: paw neuex tokaux tix ka daux phimap phigrham: pui tang: kaux, kieh tokaux tix singax singeh awawx. 23 Paw lai baox mawh pui nyaux rawm:, viang mawh nan: nyaux rawm: plix siiet ceeix ceeix, son vaig maix, mai: ceu pa saux maix lawx lawx heue:. 24 Phimap pui tiblah sidawng:, mai: hu: sivoe ka dee prawng dee ciyang phimap, mai: phimap pui tiblah hawt khaix kix heue:. 25 Awm: an viang mawh kaing ceu pa mhawm: kawx koe: pa sidawng:, mai: pa ang sidawng: kawx ang pon tix mox heue:.

Simin Ting 6

1 Kieh pui can pa mawh siliex khankix, een: caox kix mawh pa keung: tix pon pa yungyi: khawm: uik, yuh ka mawx ceukaux Siyiex mai: lox ceu pa gau khankix tag ang koe: dee sa dee lao kah heue:. 2 Mai: kix pa koe: cao: pa yumrhawm:, paw kieh kix yuh tix ang nab ang yam ka kix, kheu mawh kix puxaik, viang mawh nan: nie kieh kix yuh son kix, mawh kheu kix pa pon bwanson: kah, mawh pa yumrhawm: mai: pa moh heue:. Sidiex mai: gau ceu in khankix awawx.

3 Phan: pui tix kaux kaux gau lox ceu pa gau pa tang: pa siyox, mai: ang cu ka lox pa mawh pa meh, pa mawh gumlox Simiang ex Yesux Khrit, mai: ka lox ceu pa gau pa khaw: mai: pa nab pa yam pa yuh ceu pa khaw: ka Siyiex. 4 Nawh kroh tix ting rhawm: mai: ang tawng tid tix, viang mawh nan: nawh miag ka pa chawk mai: ka pa thung: thiang: lox, pa lih tix mawh pa bohrhawm:, mai: pa simah simaing:, mai: pa sa pa lao, mai: pa keud grawng: pa caox pa ang tie mawh, 5 mai: pa nie thung: thiang: pui pa rhawm: dee keud kix hoik cux hoik sium: mai: pa ang koe: pa mawh pa meh, pa ce: ceu pa nab pa yam pa yuh pa khaw: ka Siyiex mawh pa sang pon rao kah heue:. 6 Viang mawh kawx nan: phan: vhah rhawm: vhah rhi:, ka ceu pa nab pa yam pa yuh pa khaw: ka Siyiex, mawh pa kied pon rao pa ting heue:. 7 Grawh grawng: nawh ex ang viex tid tix hoek ka piang haktiex, mai: ang ex pon tix viex tid tix lih hu: heue:. 8 Mawh kheu nan: phan: ex koe: pa ih pa un: mai: pa ceep, ex sang vhah rhawm: kah heue:. 9 Viang mawh kawx nan: kix pa koe: rhawm: tix sang mi sang koe:, rau ka daux pa nyaw pa glaw:, mai: ka daux kie, mai: alo nex nham: pa daox pa aw: pa chix yuh laux tom: nie, ceu an khankix mawh pa kieh pui com nok tix yum ka daux pa laux pa leeing: heue:. 10 Grawh grawng: nawh pa moh ka mau mawh riah pa caox ku ceu khawm: uik, mai: pui tiblah kheu simie tix pon ka ceu an, hoik lud hu: khaing: krax yumrhawm:, mai: hoik cun: tokaux tix; pang: phlat ka ceu pa khirhawm: khirhi: tom: nie heue:.

11 Mawh kheu nan: maix pa mawh pui Siyiex eue:, to: khaing: ceu in khankix, mai: hawt khaix pa rah pa see, mai: ceu pa nab pa yam pa yuh pa khaw: ka Siyiex, mai: pa yumrhawm:, mai: pa moh, mai: pa gun pa yeung, mai: pa awnrhawm: awnrhi: heue:. 12 Yuh naing, naing pa mhawm: pa dex pa dawd mai: pa yumrhawm: awawx. Jhawp ka ju leeing: ju leeing: phan:, pa hoik kok tix teei maix kah, mai: pa hoik kham: maix tix teei, yam maix kham: mhai: sakse: pa mhawm: ka sivoe pui pa kham: mhai: sakse: tom: nie heue:. 13 Aux tawm: lox ka maix ka sivoe Siyiex, pa tawx ju pa im: ka ku ceu khawm: uik, mai: ka sivoe Yesux Khrit, pa hoik kham: mhai: sakse: sivoe Pawntix Pilat, ka grawng: pa rieb tix teei pa mhawm: an heue:. 14 Yuh ka mawx son sang priex maix tix hawt lox tawm: an, ka daux pa ang koe: dee pliag dee ne, mai: dee deuh phimap kah, tom: lih bleeh Simiang ex Yesux Khrit heue:. 15 Pa Nawh Cao: tag sang jhi: yaox yam hoek bawg yam pa khaw: cie tix, Kaw pa mawh Simiang pa koe: tix kaux khaing:, pa ting bwanson:, pa mawh Khunhawkham piang khunhawkham, mai: Simiang piang simiang, 16 pa mawh tix kaux khaing: pa ang chix yum, pa ot ka daux pa riang, pa ang pon tix hu: dex kah, pa ang pui sax yaox, mai: pa ang chix yaox kah. Kieh Nawh koe: krax yung: krax yi: mai: siawp sibrawm leeing: ju leeing: phan: liak. Amen.

17 Tawm: lox ka kix pa mi pa koe: ka daux haktiex in, yuh ka mawx son ang kix sang ting rhawm:, mai: yuh ka mawx son ang kix sang een: krax keud pot jun pot ka sinngao pa ang kaux ang cong:, viang mawh kawx nan: kieh een: krax keud pot jun pot ka piang Siyiex, pa tawx ku ceu khawm: uik ka ex, son sang gauxrhawm: kah heue:. 18 Yuh ka mawx son sang yuh kix pa mhawm:, yuh ka mawx son sang mi sang koe: kix daux kaing pa mhawm:, mai: yuh ka mawx son sang koe: kix rhawm: tix sang gwieh tix tawx ka pui, mai: pa koe: rhawm: tix sang yuh paox yuh pie heue:. 19 Mai: khrawm: tix deuh kraung khrai: pa mhawm: mai: jaong pa kaux son tokaux kix son ju phaox khaix, yuh ka mawx son sang pon kix ju pa im:, pa mawh ju tete heue:.

Lox ghoik

20 Timose eue:, pau pa hoik tawx hoik pong ka maix awawx. Via khaing: lox bied pa kieh raw ka pa tawng pa yung, pa lud kok pui mawh krax tawng krax yung, 21 pa pui tiblah hoik rieb tix teei mai: lud loe: khaing: pa yumrhawm: heue:.

Kieh bwanson: koe: mai: maix liak heue:.