1 Thesalonix

Thesalonix Phuk Tix

Simin Ting 1

Lox nawb

1 Pawlux mai: Silwanux mai: Timose, tawx ka ceucao pui veng Thesalonix pa ot ka daux Siyiex Keeing: Cao: mai: Simiang Yesux Khrit heue:. Kieh bwanson: mai: pa nhim: koe: ka pex liak.

Pa ting bwanson: mai: pa yawgyaw

2 Ex yaogyaw bwanson: Siyiex son pex khawm: uik ku jheeng: jheeng:, mai: simawd ka pex ka daux pa rawg ex bwan:, 3 mai: ca: doh keud pot grawng: kaing krax yumrhawm: pex, mai: pa yuh daux krax moh krax rhawm: mai: krax gun krax yeung, ka krax keud pot jun pot ka daux Simiang ex Yesux Khrit, ka sivoe Siyiex mai: Keeing: ex heue:. 4 Puxaik pa moh Siyiex khankix eue:, ex tawng grawng: hoik laug Nawh Cao: ka pex, 5 mawh kheu lox bwan: gauxrhawm: gauxrhi: pa sidiex ex, ang mawh ngie lox giex ka pex, viang mawh kawx nan: mawh khawm: ka daux siawp sibrawm, mai: ka daux Khwan: Singax Singeh, mai: ka daux pa nie vhahrhawm: kheu tawng mawh, awm: pa tawng pex grawng: ex mawh pui pa yuh ka mawx ka son pex, yam ot ex mai: pex heue:. 6 Mai: pex hoik lih mawh pui pa hawt jawh ka ex, mai: ka Simiang, khaix hoik rieb pex lox bwan: ka daux pa kharhawm: kharhi: tom: nie, tau mai: pa gauxrhawm: gauxrhi: Khwan: Singax Singeh, 7 tom: hoik lih pex tix mawh mhai: tix hawt jawh, ka pui pa yumrhawm: khawm: uik pa ot ka daux meung Makedonix mai: meung Akhayax heue:. 8 Grawh grawng: nawh lox bwan: Simiang hoik tah hoik sinum hu: khaing: pex, ang joeng mawh ngie ka daux meung Makedonix mai: meung Akhayax, viang mawh kawx nan: krax yumrhawm: pex ka plak Siyiex hoik tah hu: ku dah ku dee, mawh kheu in ang ex lai shiao ah tid tix heue:. 9 Mawh kheu tokaux kix krai lao, grawng: pa laig ex ka pex mawh pa yuh ka mawx, mai: grawng: pa deeh tieh pex tix hoek ka Siyiex, khaing: rieang rao khankix, son sang yuh son Siyiex pa im: ju mai: pa mawh pa meh, 10 mai: son sang krox son Kawn: Nawh Cao: khaing: raoma:, pa Nawh Cao: hoik deeh kieh kaoh im: khaing: krax yum, pa mawh Yesux, pa sang taoh ex khaing: pa songrhawm: songrhi: pa tag sang hoek heue:.

Simin Ting 2

Pa sum: ka ceucao

1 Puxaik khankix eue:, tokaux pex hoik tawng grawng: pa laig ex ka pex ang mawh pa giex going. 2 Awm: pa hoik tawng pex, viang hoik yaox ex tix kham: geu:, mai: viang hoik yuh pa ang cee ang cak ka ex ka daux veng Philippix kawx, ex viex rhawm: kua: ka daux Siyiex ex tix sidiex gau lox bwan: gauxrhawm: gauxrhi: Siyiex ka pex, ka daux pa kied nie ngah paox tix heue:. 3 Grawh grawng: nawh lox pa sidiex ex ang mawh ceu pa phit pa lud, mai: pa ang singax singeh, mai: ka daux pa pie pa lhen:, 4 viang mawh kawx nan: awm: pa hoik khaw: hoik caw ex ka rhawm: Siyiex tix sang tawx sang pong lox bwan: gauxrhawm: gauxrhi: ka ex, ex tom: sidiex son sang khaw: ka rhawm: kawn: pui ang mawh, viang mawh nan: son sang khaw: ka rhawm: Siyiex, Kaw pa cheu: tix yaox rhawm: rhi: ex heue:. 5 Grawh grawng: nawh awm: pa hoik tawng pex, ang ex sax shiao lox pa nieb lak yaw tix bawg kawx, mai: ang sax sawg jao tix sang nieb mi koe:, grawng: in Siyiex mawh mhai: sakse: kah heue:. 6 Mawh kheu mawh ex kawncau pa ting Cao: Khrit, viang ex tee: chix mawh beeh mawh glawm: kawx, viang khaing: pex ang ah, khaing: tang: kaux ang ah, ang ex sax sawg min: plakngai: khaing: kawn: pui heue:. 7 Viang mawh nan: yam ot ex sinax pex, ex hoik yuh pa awn: pa nge, awm: miex pa kawn: kieh kawn: tix peuex, kia: ngien ka kawn: tix khankix heue:. 8 Awm: an, kheu kied moh ex ka pex, ex gauxrhawm: tix tawx lox bwan: gauxrhawm: gauxrhi: Siyiex ka pex khaing: ang joeng mawh, viang khawm: ju ex kawx simie tix tawx kah, mawh kheu kied moh ex ka pex heue:. 9 Grawh grawng nawh, puxaik khankix eue:, pex doh keud ka pa hoik nyhap hoik mao ex, yam yuh ex kaing leeing: ngaix leeing: sawm:, yuh ka mawx son ang ex sang mawh beeh mawh glawm: ka pex tix kaux kawx, mai: sidiex gau ex lox bwan: gauxrhawm: gauxrhi: ka pex heue:. 10 Pex mawh pa kham: mhai: sakse:, mai: khawm: Siyiex kawx kham: mhai: sakse:, grawng: pa singax singeh mai: pa rah pa see, mai: pa ang koe: dee deuh phimap, ka daux ceu pa hoik yuh tokaux ex ka pex pa yumrhawm: khankix, mawh pa yuh ka mawx. 11 Awm: pa hoik tawng pex grawng: hoik yuh ex ka mawx ka pex ku kaux, awm: yuh keeing: ka kawn: praix tix, mai: sidiex gau mai: jeeh nyaw mai: kham: mhai: sakse: ka pex, 12 yuh ka mawx son sang hu: pex awm: pa keung: ka Siyiex, Kaw pa hoik kok pex laig ka daux meung mai: min: plakngai: cie tokaux Nawh Cao: heue:.

13 Mai: mawh kheu jao in, ex kawx yaogyaw ka bwanson: Siyiex ang jud ang jai, mawh kheu hoik rieb pex tix teei gumlox pa mhong: khaing: ex, pa mawh gumlox bwan: Siyiex, pa ang rieb tix teei awm: mawh gumlox kawn: pui, viang mawh nan: hoik rieb awm: mawh gumlox Siyiex pa mawh pa meh, pa yuh kaing ka plak daux pex pa yumrhawm: khankix heue:. 14 Grawh grawng: nawh, puxaik khankix eue:, pex hoik lih tix mawh pa hawt jawh, yaung ceucao Siyiex pa ot ka daux meung Yudax, daux Yesux Khrit, mawh kheu pex kawx hoik yaox tix kham: geu: ceu pa awm: paox tix khaing: tawmtaix pui meung tokaux pex, awm: kix kawx hoik yaox tix kham: geu: khaing: tawmtaix pui Yudax khankix, 15 pa mawh pui pa hoik pah ka Simiang Yesux mai: khawm: caojhai: khankix yum, mai: ka ex kawx kix tuktiak tukte: kah, mai: kix ang khaw: ka rhawm: Siyiex, mai: mawh pa ang caw ka kawn: pui khawm: uik. 16 Grawh grawng: nawh kix kieh raw ka pa sidiex ex ka pui tang: ceu tang: cat son sang hoek kix krax taoh, son sang grum naog phimap phigrham: kix jheeng: jheeng:, viang mawh kawx nan: pa songrhawm: songrhi: hoik hoek ka piang kix tom: grum naog heue:.

Lox pa viex Temose hoek

17 Puxaik khankix eue:, viang ex yaox tix siyang: ot khaing: pex tix vud tix cu daux tokaux, rhawm: ex ang siyang: ot khaing: pex, ex kied byaong mai: simie tix yaox pex, mai: nie lheu: langteung: coca: son sang yaox pakngai: pakbaox pex heue:. 18 Mawh kheu nan: ex tom: simie tix hoek ka pex, aux Pawlux simie tix hoek ka pex tix bawg hoik tix bawg, viang mawh nan: Satan kieh raw ka ex heue:. 19 Grawh grawng: nawh pa keud pot jun pot ex, phan: ang mawh nan: pa gauxrhawm: ex, phan: ang mawh nan: mhok khri: pa yaw rangdi ex kah, mawh pa yuh ka mawx? Pex mawh pa yuh nan: ka sivoe Simiang ex Yesux Khrit yam sang hoek Nawh ang mawh lie? 20 Grawh grawng: nawh pex mawh min: plakngai: ex, mai: pa gauxrhawm: ex heue:.

Simin Ting 3

1 Mawh kheu nan: yam ang ex lai baox pon yeung, ex keud mhawm: tix sang ot khaix ka daux veng Athen nong: nong:, 2 mai: ploi: Timose puxaik ex, pa mawh kawncau pa yuh kaing jhaw: Siyiex ka pa sidiex lox bwan: gauxrhawm: gauxrhi: cie Cao: Khrit, hu: son sang kieh pex kaux cong: mai: nyawmrhawm: ka krax yumrhawm: pex, 3 yuh ka mawx son ang pex sang laux rhawm: tix kaux kawx, kheu krax kharhawm: kharhi: in kix heue:. Grawh grawng: nawh tokaux pex hoik tawng, grawng: hoik ciak tix deuh ex son pa yuh nin: heue:. 4 Grawh grawng: nawh yam ot ex tau mai: pex, ex hoik grux krai ka pex, grawng: dex sang yaox ex tix kham: geu: ka krax tug krax kha:, mai: hoik lih tix mawh nan:, awm: pa hoik tawng pex heue:. 5 Mawh kheu jao in, aux kawx, yam ang aux baox pon tix yeung, aux ploi: pui hu:, yuh ka mawx son sang tawng grawng: krax yumrhawm: pex, phan: ang mawh nan: ha cao: pa nyaw glaw: kox nyaw glaw: ka pex, mai: kieh kaing pa hoik yuh ex mawh pa giex going. 6 Viang mawh kawx nan: Timose hoik deeh hoek khaing: pex, ka ex yamin, mai: viex lox gauxrhawm: gauxrhi: ka ex grawng: krax yumrhawm: mai: krax moh krax rhawm: pex, mai: grawng: pa doh keud pex ka ex jheeng: jheeng:, mai: kied byaong tix yaox ka ex, awm: ex kawx byaong tix yaox ka pex heue:. 7 Puxaik khankix eue:, mawh kheu jao in, ex tom: nyawmrhawm: nyawmrhi: grawng: pex, ka daux pa khirhawm: mai: pa tug pa kha: ex khawm: uik, kheu krax yumrhawm: pex heue:. 8 Mawh kheu phan: pex kaux cung sijung: ka daux Simiang, ex hoik im: heue:. 9 Grawh grawng: nawh ex tag sang baox deeh pon yaogyaw bwanson: ka Siyiex son pex, son krax gauxrhawm: gauxrhi: khawm: uik, pa gauxrhawm: ex kah kheu pex, sivoe Siyiex ex, yuh ka mawx? 10 Yuh ka mawx son sang pon ex tix yaox pakngai: pakbaox pex, mai: son sang pon tix kieh grum naog, ka pa kawn: cha: daux krax yumrhawm: pex, ex tom: nied tix rawg bwan: leeing: ngaix leeing: sawm: heue:.

11 Yamin kieh Tokaux Keeing: ex Siyiex, mai: Simiang ex Yesux Khrit, jhi: krax sang hu: ex ka pex liak, 12 mai: kieh Simiang kieh krax moh krax rhawm: pex nie baox ting ka paox tix, mai: ka pui khawm: uik, awm: ex kawx moh ka pex, 13 yuh ka mawx son sang sidah kieh Nawh Cao: rhawmrhi: pex kaux cong:, mai: ang koe: dee deuh phimap ka daux pa singax singeh sivoe Keeing: ex Siyiex, yam sang hoek Simiang ex Yesux, tau mai: pui pa singax singeh Nawh Cao: khawm: uik liak.

Simin Ting 4

Krax sidiex gau ka daux krax ot krax koe: pui pa yumrhawm:

1 Lox pa deuk mawh nin:, puxaik khankix eue:, ex khyox khaw: mai: jeeh nyaw pex ka daux Simiang Yesux, yuh ka mawx son sang hu: pex awm: pa hoik rieb pex tix teei khaing: ex grawng: pa khaw: pex tix hu: yuh ka mawx son sang khaw: mai: rhawm: Siyiex, awm: nang: pa hu: pex yamin, yuh ka mawx pex sang nie lheu: baox chix hu: khaing: an sinyek sinyek heue:. 2 Grawh grawng: nawh pex tawng grawng: hoik tawm: ex lox pa yuh ka mawx ka pex ka daux Simiang Yesux heue:. 3 Grawh grawng: nawh ceu pa khaw: ka alo Siyiex, mawh pa singax singeh pex, mai: pa ang dex ang yuh ceu pa phit pa vao, 4 mai: pa chix tawng kaux pui mawx kaux pui an tix priex ka kraung cie tokaux tix, ka daux pa singax singeh mai: pa yungyi:, 5 ang mawh ka daux pa hawt tix yuh alo nex nham:, awm: yuh pui tang: ceu tang: cat khankix, pa ang tawng ka Siyiex, 6 yuh ka mawx pui tix kaux kawx, tag ang sang nieb nie luan yuh, mai: phit ka puxaik tix ka daux grawh grawng: in, mawh kheu Simiang mawh cao: pa ciyang ka ceu in khankix khawm: uik, awm: hoik grux krai ex mai: hoik kham: ex mhai: sakse: ka pex heue:. 7 Grawh grawng: nawh Siyiex ang kok ex son pa ang singax singeh, viang mawh kawx nan: kok ka daux pa singax singeh heue:. 8 Mawh kheu nan: kaw pa thiang: tix tik, thiang: tix tik ka kawn: pui ang mawx, viang mawh nan: thiang: tix tik ka Siyiex, pa tawx Khwan: Singax Singeh Nawh Cao: ka pex heue:.

9 Grawh grawng: krax moh krax rhawm: ka puxaik khankix, ang pex lo pa tiem: pui lai ka pex tix kaux kawx, mawh kheu Siyiex hoik gau ka pex grawng: pa moh ka paox tix tix kaux lai tix kaux heue:. 10 Grawh grawng: nawh pex hoik yuh nang: nan: ka puxaik khawm: uik pa ot ka daux meung Makedonix khawm: uik heue:. Viang mawh kawx nan: puxaik khankix eue:, ex sidiex jeeh nyaw ka pex yuh ka mawx son sang nie lheu: baox koe: krax moh sinyek sinyek. 11 Mai: yuh ka mawx son sang gau pex tix chix ot yien: mhawm: mhawm:, mai: son sang yuh kaing cie tokaux tix, mai: son sang yuh kaing ka taix tix, awm: pa hoik tawm: ex ka pex, 12 mai: yuh ka mawx son sang hu: pex, awm: pa nyawm tix jhak, ka kix pa ot plak praix, mai: son ang lai baox lo tid tix heue:.

Pa keud pot jun pot ka pa sang deeh hoek Simiang

13 Puxaik khankix eue:, ang ex rhawm: kieh pex ang tawng ka grawh grawng: kix pa laig it khankix, son ang pex sang khirhawm:, awm: pui tang: kaux pa deuk khankix pa ang koe: krax keud pot jun pot heue:. 14 Grawh grawng: nawh, phan: ex yumrhawm: ka grawng: pa hoik yum Yesux, mai: pa hoik baox deeh kaoh tix bawg, awm: an khawm: kix pa hoik laig it ka daux Yesux kawx, Siyiex tag viex hoek tau mai: Nawh Cao: heue:. 15 Ex ah nin: ka pex kheu hoik pon ex lox Simiang, grawng: ex pa kawn: klawd mai: pa kawn: deuk tom: yam hoek Simiang, ang tau lai pon hoek ka sivoe kix pa hoik laig it khankix heue:.16 Grawh grawng: nawh, tokaux Simiang tag sang lih khaing: raoma:, tau mai: lox yo, tau mai: lox simiang kawncau Siyiex, mai: tau mai: lox teet tawng Siyiex, mai: pui pa hoik yum ka daux Cao: Khrit tag sang deeh kaoh phaoxka: heue:. 17 Khaix an ex pa kawn: klawd pa kawn: deuk khankix, tag sang teei haok tau mai: kix, ka daux paiawm:, son sang sipub ka Simiang ka daux bhawm: dee long:, mai: ex tag sang ot tau mai: Simiang leeing: ju leeing: phan: heue:. 18 Mawh kheu nan: teei gumlox in mai: khu: rhawm: ka paox tix tix kaux lai tix kaux awawx.

Simin Ting 5

1 Puxaik khankix eue:, grawh grawng: bawg yam khankix, ang pex lo pa tiem: tid tix ka pex heue:. 2 Mawh kheu tokaux pex hoik tawng mhawm: mhawm: grawng: singaix Simiang sang hoek awm: hoek pui briex yam pon sawm: heue:. 3 Yam kix kawn: tag ah "Koe: pa nhim: mai: ang koe: dee lhat," yam an dom: mawx dom: an pa laux pa leeing: sang hoek ka piang kix, awm: pa saux yha: hoek ka piang bon: pa koe: kaux, mai: ang kix tau tix pon luan heue:. 4 Viang mawh kawx nan: puxaik khankix eue:, pex ang ot ka daux pa vhaik, yuh ka mawx son singaix an sang krup pex awm: pui briex, 5 grawh grawng: nawh pex khawm: uik mawh kawn: pa riang mai: kawn: pon singaix, ang ex mawh kawn: pon sawm:, mai: kawn: pa vhaik heue:. 6 Mawh kheu nan: paw kieh ex laig it awm: pui pa deuk khankix, viang mawh kawx nan: kieh ex pau tix jhak mai: priex rhawm: tix heue:. 7 Grawh grawng: nawh kix pa laig it, laig it yam pon sawm:, mai: kix pa yoek, yoek yam pon sawm:, 8 viang mawh nan: kheu mawh ex pa dex pa dawd mai: pon singaix kieh ex priex rhawm: tix, mai: ceep kraung naing pa tie naok pa mawh krax yumrhawm: mai: krax moh krax rhawm:, mai: son mhok rhiem: ceep ka krax keud pot jun pot son sang hoek krax taoh heue:. 9 Grawh grawng: nawh Siyiex hoik ciak tix deuh ex son sang pon pa songrhawm: songrhi: ang mawh, viang mawh nan: hoik ciak tix deuh ex son sang pon krax taoh kheu Simiang ex Yesux Khrit, 10 pa hoik yum son ex, yuh ka mawx viang ex siduad ang ah, phan: ang mawh nan: laig it ang ah, ex sang pon tix im: tau mai: Nawh Cao: heue:. 11 Mawh kheu nan: jeeh nyaw ka paox tix, mai: yuh kieh paox tix haok huan:, awm: pa yuh pex yamin heue:.

Daux krax daux blawng pa yuh paox pie tau

12 Puxaik khankix eue:, ex khyox khaw: ka pex, son sang tawng pex ka kix pa yuh kaing ka sinax pex, mai: giex kaing: ka piang pex ka daux Simiang, mai: pa sidiex tix tawx satix ka pex, 13 mai: son sang yungyi: ka kix, ka daux krax moh krax rhawm: pa kied ting, kheu kaing jhaw: pa yuh kix heue:. Kieh koe: pa nhim: mai: pa ang simah simaing: ka tokaux pex awawx. 14 Mai: puxaik khankix eue:, ex jeeh nyaw ka pex, son sang tawx satix ka kix pa yuh pa ang khaw:, mai: son sang tawx riang ka kix pa iak rhawm: iak rhi:, mai: son sang teem: coi ka kix pa iak riang iak rao, mai: kieh koe: rhawm: pa lang: gun lang: yeung ka pui khawm: uik heue:. 15 Jhak tix yaox yuh ka mawh son ang pui tix kaux kawx sang deeh pawk pa caox, ka son pa caox ka tix kaux kawx, viang mawh kawx nan: hawt tix yuh pa mhawm: jheeng: jheeng: ka paox tix tix kaux lai tix kaux mai: ka pui khawm: uik heue:. 16 Gauxrhawm: jheeng: jheeng: heue:. 17 Rawg bwan: ang jud ang jai. 18 Yaogyaw bwanson: ka daux ku ceu, grawh grawng: nawh in mawh alo Siyiex ka daux Yesux Khrit ka son pex heue:. 19 Paw vi preet yeet ka Khwan: Cao:. 20 Paw vi een: lox jhai: khankix ang koe: cee. 21 Tiag cheu: tix yaox ka ku ceu khawm: uik, mai: jhawp tom: kaux ka pa mhawm:. 22 Paw dex paw yuh, via khaing: pa caox ku ceu awawx.

Lox ghoik mai: pa nawb bwan:

23 Kieh tokaux Siyiex Cao: pa nhim:, kieh pex grum singax khawm: uik, yuh ka mawx son sang priex khwan: pex, mai: ju pex, mai: tokaux pex khawm: uik, son ang sang koe: dee deuh phimap kah, yam hoek Simiang ex Yesux Khrit heue:. 24 Kaw pa hoik kok pex, mawh pa kaux sijax, mai: Nawh tag sang yuh nang: nan: heue:.

25 Puxaik khankix eue:, rawg bwan: ka son ex liak. 26 Nawb ka puxaik khankix khawm: uik ka pa ngheut pa singax singeh heue:. 27 Aux tawm: lox nhie: pex ka daux Simiang, yuh ka mawx son sang kieh phat lai in ka puxaik pa singax singeh khawm: uik heue:.

28 Kieh bwanson: Simiang ex Yesux Khrit ot tau mai: pex liak. Amen.