1 Petrux

Petrux Phuk Tix

Simin Ting 1

Lox nawb mai: pa yawgyaw bwanson:

1 Petrux, pa mawh kawncau pa ting Cao: Yesux Khrit tiem: ka nyo sinie, can pa prung: prang: tix ot ka daux meung Pawntux, meung Kalatix, meung Kappadawkix, meung Asix, mai: meung Bisunix, 2 pa hoik laug awm: pa khaw: mai: pa grux tawng Siyiex Keeing: Cao: son sang kieh singax singeh ka daux Khwan: Cao:, yuh ka mawx son sang koe: krax cu krax nghiet, mai: pa phruah ka nham: Yesux Khrit heue:. Kieh bwanson: mai: pa nhim: baox thiem: baox thie: ka pex liak awawx. 3 Kieh Siyiex, mai: Keeing Simiang ex Yesux Khrit ting bwanson:, pa hoik kieh ex deeh keh awm: pa khaw: mai: krax caoxrhawm: Nawh pa kied ting, tix koe: krax keud pot jun pot pa im:, ka daux krax pa deeh kaoh im: Yesux Khrit khaing: krax yum, 4 son sang pon sin: pa ang chix laux chix leeing:, mai: pa ang seeing: ang brai:, pa ang chix bheet chix laix, pa hoik priex son pex ka daux meung raoma:, 5 pa mawh pui pa pau Siyiex ka siawp sibrawm Nawh kheu krax yumrhawm: son sang kieh pon krax taoh, pa hoik rien hoik khre: tix plak kieh sidawng: bawg yam sidah khaix sax heue:. 6 Pex kied koe: krax gauxrhawm: ka daux an, viang mawh yamin son bawg yam tix vud ngie, phan: pex tag lai yaox krax khi: kawx, ka daux krax cheuk krax cheu: tom: nie ceu, 7 yuh ka mawx son sang cheu: tix yaox krax yumrhawm: pex, pa lheu: mhawm: lheu: ngawh khaing: khri:, pa chix laux chix leeing:, viang hoik cheu: tix yaox ka ngu kawx, yuh ka mawx tag yaox pa mawh ceu pa yaogyaw, mai: min: plakngai:, mai: pa nab pa yam, yam lih bleeh Yesux Khrit heue:. 8 Kaw pa ang pex sax yaox mai: moh kah heue:. Viang pex ang pon yaox Nawh yamin kawx, pex yumrhawm: ka Nawh, mai: kied koe: krax gauxrhawm: pa ang chix uik krai, pa naog min: plakngai:, 9 mai: pex sang pon bwanson: krax yumrhawm: tix, pa mawh krax taoh ju pex heue:. 10 Grawh grawng: krax taoh in cao: jhai: khankix hoik nied tix sawg chawk cheng:, mai: krai lox jhai: grawng: bwanson: pa sang pon pex heue:. 11 Kix sawg tix tawng bawg yam, mawh yam pa yuh ka mawx, pa Khwan: Cao: Khrit pa ot ka daux kix, jhi: yaox yam grux kham: Nawh mhai: sakse:, grawh grawng: pa tag sang kham: geu: Cao: Khrit, mai: min: plakngai: pa tag sang koe: khaix hoik kham: geu: ceu an khankix heue:. 12 Hoik plak kieh kix tawng grawh grawng: pa yuh kix ang mawh son tokaux tix, viang mawh nan: mawh son pex, yam grux krai kix grawh grawng: ceu pa hoik krai sidawng: ka pex yamin, ka pui pa hoik sidiex gau lox bwan: gauxrhawm: gauxrhi: ka pex, ka daux pa teem: Khwan: Cao: pa hoik ploi: lih khaing: raoma: heue:. Grawh grawng: ceu an khankix kawncau Siyiex simie tix jhak mai: tawng heue:.

Krax ot krax koe: kawn: Khrit daux pui pa khraox

13 Mawh kheu nan: nhawt maox rawd nyoi rhawm: pex, mai: priex rhawm: tix, keud pot jun pot tom: sidah, son bwanson: pa tag sang viex hoek ka pex, yam lih bleeh Yesux Khrit heue:. 14 Kieh awm: kawn: praix pa chix nghiet chix cu lox, mai: paw yuh tokaux tix yaung awm: alo nex nham:, ceu pa sax yuh pex glangka:, yam ang pex lai tawng. 15 Viang mawh kawx nan:, awm: singax singeh Kaw pa hoik kok pex, kieh tokaux pex singax singeh yuh nan: ka daux can pa yuh tix khawm: uik heue:. 16 Mawh kheu hoik tiem: tix deuh ah nin:,

376"Kieh tokaux pex singax singeh, kheu singax singeh Aux heue:."

17 Mai: phan: pex kok ka Nawh awm: pa mawh Nawh Keeing:, pa mawh Kaw pa ang jhak pakngai: pui mai: prawng ca: awm: pa khaw: mai: pa yuh kaux pui mawx kaux pui an, kieh koe: krax lhat krax graung yam kawn: ot kawn: koe: pex heue:. 18 Mawh kheu tawng pex, grawng: ang teei mau khri: ceu pa chix laux chix leeing:, mai: taoh pex khaing: pa giex going pa yuh tix, pa hoik toe: tix tawx ka pex khaing: tax du pex dix heue:. 19 Viang mawh kawx nan: hoik taoh pex ka nham: pa ngawh, pa awm: nham: kawn: yung: pa ang koe: dee ne pa loig, pa mawh nham: Cao: Khrit heue:. 20 Cao: Khrit an, mawh pa hoik grux ciak tix deuh ka: sang jah tix kaw: haktiex, viang mawh nan: pa hoik kieh sidawng:, daux bawg yam sidah in, son pex, 21 pa mawh pui pa hoik yumrhawm: ka Siyiex ka daux Nawh, pa hoik kieh Nawh deeh kaoh im: khaing: krax yum, mai: tawx min: plakngai: ka Nawh, yuh ka mawx son krax pa yumrhawm: mai: krax keud pot jun pot pex, tag mawh ka daux Siyiex heue:. 22 Kheu hoik kieh pex ju tix singax singeh ka daux krax cu krax nghiet pex ka pa mawh pa meh, tom: sang koe: krax moh krax rhawm: pa ang pie ang lhen: ka puxaik khankix, pex nied tix moh paox tix tix kaux hoik tix kaux tom: daux rhawm: tix mhawm: mhawm: heue:. 23 Mawh kheu pex hoik baox deeh keh ka daux simie pa chix laux chix leeing: ang mawh, viang mawh nan: pex hoik deeh keh ka daux simie pa ang chix laux chix leeing:, pa mawh gumlox Siyiex pa im: pa tag kaux leeing: ju leeing: phan: heue:. 24 Grawh grawng: nawh,

377"Ceu kawn: pui khawm: uik awm: num: rib num: riem, mai: min: plakngai: kawn: pui awm: tai rib tai riem heue:. Rib kienie, chix kroh chix vhit hu:, mai: tai nawh chix khrom: hu:. 25 viang mawh nan: gumlox Siyiex tag kaux leeing: ju leeing: phan: heue:."

Mai: in mawh gumlox gauxrhawm: gauxrhi: pa hoik sidiex gau ka pex heue:.

Simin Ting 2

1 Mawh kheu nan: tik pa caox pa caig khawm: uik, mai: pa kheem: pa veux, mai: pa pie pa lhen: khawm: uik, mai: pa bohrhawm: bohrhi:, mai: pa sikah lox caox khawm: uik, 2 awm: kawn: ngie: pa tag khraox keh khankix, simie rawmteeh gumlox bwan: pa singax singeh, yuh ka mawx son sang haok hwan: pex tom: pon krax taoh, 3 phan: pex hoik cim tix yaox grawh grawng: mawh Simiang pa koe: rhawm: tix tawx bwan: tawx son heue:. 4 Mawh kheu nan: hoek ka Nawh, pa mawh Simaox pa im: ju, pa hoik tik kawn: pui kah tete, viang mawh nan: pa hoik laug Siyiex, mai: een: tix mawh pa ting min: plakngai: heue:. 5 Pex kawx awm: simaox pa im: pa sum: tix yuh nyiex pa dex pa dawd mai: khwan:, son sang mawh cub cao: giex kaing: li pa singax singeh, pa sang tan sang lu, ceu pa tan pa lu pa dex pa dawd mai: khwan:, pa caw pa khaw: ka Siyiex ka daux Yesux Khrit heue:. 6 Mawh kheu hoik koe: ka daux phuk lai sigang: khri: yuh nin:,

378"Jhak heue:, Aux hoik deuh Simaox kaing: ka daog ka daux Zion, pa hoik laug tix teei mai: ting min: plakngai:, mai: kaw pa yumrhawm: ka Nawh tag ang hoek krax kaig krax tua heue:."

7 Mawh kheu nan: min: plakngai: an mawh son pex pa yumrhawm: khankix heue:. Viang mawh kawx nan: son pui pa ang yumrhawm: khankix,

379"Simaox pa hoik tik pui pa yuh nyiex hoik yuh kieh mawh kaing: ka daog heue:."

8 Mai:

380"Siamox dee sideeing, mai: Rang: pa kieh phit lud heue:."

Kix sideeing caong tix ka gumlox bwan:, kheu ang kix cu kix nghiet kah, mai: hoik ciak kix tix sang mawh nan: heue:. 9 Viang mawh nan: pex mawh ceu pui pa hoik laug, pa mawh cao: giex kaing: li Simiang, pa mawh ceu pui pa singax singeh, pa mawh pui Siyiex tete, yuh ka mawx son sang jhi: pex grawh grawng: ceu pa ting pa lhaong:, pa mhawm:, Kaw pa hoik kok pex lih khaing: daux pa vhaik, mai: laig ka daux pa riang pa daox pa deng: cie Tix heue:. 10 Ka daux bawg yam pa hoik luan, pex ang mawh ceu pui pa yuh nan:, viang mawh nan: yamin pex hoik mawh ceu pui Siyiex heue:. Glangka: in viang ang pex pon bwanson: pa caoxrhawm: kawx, yamin pex hoik pon bwanson: pa caoxrhawm: heue:.

Daux krax ot krax koe: ex sinax pui pa ang nyang yumrhawm:

11 Pa moh aux khankix eue:, aux khyox khaw: ka pex pa awm: nyo sinie, yuh ka mawx son ang sang yuh ceu pa dex pa dawd mai: alo nex nham: khankix, pa yuh krax naing ka ju heue:. 12 Mai: kieh pa yuh pex mawh pa nyawm tix jhak ka sinax pui tang: ceu tang: cat khankix, yuh ka mawx viang kix ah lox deuh phimap ka piang pex awm: mawh pex pui pa yuh pa caox kawx, kix tag sang yaox kaing pa yuh pex pa mhawm:, mai: yaogyaw Siyiex ka daux singaix pa kia: pa prawng heue:.

Daux krax sinax pa dex dawd ex mai: simiang haktiex

13 Kieh koe: krax cu krax nghiet ka been kawn: pui ku ceu, son Simiang, ka simiang khunhawkham pa ting khaing: paox tix ang ah, 14 mai: ka simiang giex kaing: khankix ang ah, pa hoik ploi: Nawh, son sang ciyang pui pa yuh pa caox khankix, mai: yuh ka mawx son sang yaogyaw kix pa yuh pa mhawm: heue:. 15 Grawh grawng: nawh, Siyiex koe: alo yuh nan:, yuh ka mawx kheu ceu pa mhawm: pa yuh tix, pex tag lai pon kieh lox pui daox pa ang chix tawng khankix yien: glaik tix heue:. 16 Kieh mawh pui ploi:, viang mawh nan: paw vi teei ceu pa ploi: pex, yuh mawh dee du dee jhan:, son sang mawh sibex pa tawb ceu pa caox pa yuh tix, viang mawh nan: kieh awm: siliex Siyiex heue:. 17 Yung: yi: ka pui khawm: uik heue:. Moh ka puxaik khankix heue:. Lhat ka Siyiex heue:. Yung: yi: ka simiang khunhawkham heue:.

Daux krax sinax pa dex dawd ex mai: Nawh Cao:

18 Kawncau khankix eue:, kieh koe: krax lhat mai: cu nghiet ka cao: pex khankix heue:. Ang lai mawh ngie ka pa mhawmrhawm: awnrhawm: khankix, viang ka pa riex khankix kawx, kieh koe: krax cu nghiet kah heue:. 19 Grawh grawng: nawh, phan: pui tix kaux kaux jhak ka pakngai: Siyiex, mai: kham: geu: ceu pa ang khaw:, mawh pa khaw: tix yaogyaw nawh kah heue:. 20 Mawh kheu phan: pex chix viex rhawm: gun rhawm: yeung mai: kham: geu: pa tap toi:, yam phit yam lud, chix yaogyaw yuh ka mawx? Viang mawh kawx nan: yam yuh pex ceu pa mhawm:, mai: yaox tix kham: geu: kheu an, pex tag lai viex rhawm: gun rhawm: yeung, kheu in mawh pa khaw: pa caw mai: Siyiex heue:. 21 Grawh grawng: nawh, hoik kok pex son sang yuh nan: heue:. Mawh kheu Cao: Khrit kawx hoik kham: geu: son pex, mai: hoik deuh ceu pa jhak tix hawt jawh son pex, yuh ka mawx son sang hawt pex ka khaix caong Nawh heue:.

38122 Kaw pa ang sax yuh phimap, mai: pa ang sax yaox lox pie lox lhen: ka jheeh Nawh heue:.

23 Yam yuh pa ang cee ang cak ka Nawh, Nawh ang deeh pawk tix yuh pa ang cee ang cak, mai: yam kham: yam geu: Nawh, Nawh ang deeh bak deeh viang tix yuh tid tix, viang maw nan: Nawh tawx Nawh pong tokaux Tix ka Kaw pa chix prawng chix ca: rah see heue:. 24 Kaw pa hoik kham: geu: phimap phigrham: ex ka piang khaox, ka daux tokaux Tix, yuh ka mawx son sang mawh ex pa hoik yum ka phimap, mai: deeh im: ka pa rah pa see heue:. Kheu khaix rhoi: Nawh pex hoik pon tix deeh moi: heue:. 25 Grawh grawng: nawh, glangka: in pex lud krax hu: awm: yung:, viang mawh nan: yamin pex hoik deeh hoek ka Cao: Liang Cao: Kia: pex, pa mawh Cao: Giex Kaing: ju pex heue:.

Simin Ting 3

Krax ot krax koe: mex moeng tau mai: paox tix

1 Awm: an pex pa mawh moeng khankix, kieh koe: krax cu krax nghiet ka mex tokaux tix, yuh ka mawx phan: mex tix kaux kaux ang koe: krax cu krax nghiet ka gumlox bwan:, viang ang koe: gumlox bwan: kawx, tag sang pon kix ka ceu pa yuh moeng tix, 2 kheu yaox kix pa mhawm:, pa singax singeh, mai: pa yung: yi: pex heue:. 3 Pa jawg pex paw kieh mawh pa yuh plak praix, pa mawh pa dieh hauk tix, mai: vung vhien: tix ve: hoik tix ve:, mai: pa ceep khao kraung khri:, phan: ang mawh nan: pa ceep kraung ceep pa mhawm: heue:. 4 Viang mawh nan: kieh mawh ceu pa jawg pa hoik moh ka daux rhawm: rhi: pa mawh kraung pa ang chix laux chix leeing:, pa mawh rhawm: pa awn:, mai: pa chix yawg rhawm: tix, pa kied koe: ngawh koe: jum plak sivoe ngai: Siyiex heue:. 5 Mawh kheu bon: pa singax singeh khankix, ka daux bawg yam glangka: dix, kawx, hoik een: rhawm: ka Siyiex, mai: hoik jawg tix yuh nan:, mai: hoik koe: krax cu krax nghiet ka mex tix heue:. 6 Awm: Sara nghiet lox Abraham, mai: kok nawh mawh Simiang, pex kawx mawh kawn: bon: Sara, phan: pex yuh pa mhawm: pa mhiem: mai: ang kieh koe: krax lhat krax graung heue:.

7 Awm: an, pex pa mawh mex khankix eue:, ot mai: moeng tix ka daux krax pa chix tawng chix yung, mai: yuh tix tawng grawng: mawh kix pa nie iak riang khaing: pex, viang mawh nan: mawh kheu pex mai: kix, mawh pa sang rom tix pon tau, ka sin: bwanson: pa im: ju kieh koe: krax yung: yi: ka bon:, yuh ka mawx son ang pa rawg pex bawn: sang koe: krax tieb krax tie heue:.

Krax pa yuh paox pie

8 Lox pa ghoik mawh nin:. Kieh pex khawm: uik koe: rhawm: tix mu:, pa koe: rhawm: khi: mai: pa chix khu: rhawm: paox tix, mai: pa koe: krax moh krax rhawm: awm: puxaik khankix, mai: pa koe: krax caoxrhawm: caoxrhi:, mai: pa koe: krax awn: rhawm: awn: rhi: heue:. 9 Paw deeh pawk pa caox son pa caox, mai: paw deeh pawk pa nieb yuh pa ang cee ang cak, son pa ang cee ang cak, viang mawh nan: deeh pawk bwanson:, kheu tawng pex grawng: pa hoik kok pex tix yuh nan:, mai: son sang pon sin: bwanson: heue:. 10 Grawh grawng: nawh,

382"Kaw pa sang moh ju, mai: pa simie tix yaox singaix pa mhawm: khankix, kieh nawh rien dak tix khaing: lox pa caox, mai: kieh nawh rien siyieb jheeh tix, son ang sang ah lox pie lox lhen:. 11 Kieh nawh deeh tieh khaing: pa caox mai: yuh pa mhawm:. Kieh nawh sawg ceu pa nhim: mai: leue nawh heue:. 12 Grawh grawng: nawh ngaix Simiang jhak ka piang pui rah pui see khankix, mai: yhaok Nawh nghiet lox pa rawg pa mhaing: kix heue:. Viang mawh kawx nan: Simiang deeh veeh pakngai: Tix khaing: pui pa yuh pa caox khankix heue:."

Gau tix ka krax pa kham: geu: Khrit son pa rah see

13 Phan: pex nied tix yuh ceu pa mhawm:, mawh kaw pa yuh ka mawx, pa sang yuh pex laux? 14 Viang mawh kawx nan: phan: pex yaox tix kham: geu: kheu pa rah pa see, pex ting bwanson: heue:.

383"Paw vi lhat ka ceu pa yuh kix pa lhat, mai: paw kieh koe: krax lulax rhawm: kah heue:."

15 Viang mawh kawx nan: yuh pa singax tix kieh Khrit mawh Simiang ka daux rhawm: rhi: pex, mai: kieh rien tix jheeng: jheeng:, son sang pon tix pawk lox ka pui ku kaux, pa sang chawk pex ka grawh grawng: krax keud pot jun pot pa koe: ka daux pex, viang mawh nan: viex rhawm: awn:, mai: pa chix lhat chix yung: yi: heue:. 16 Kieh rhawm: dee chix keud chix tawng pex ang koe: dee deuh phimap ka tokaux tix, viang ah lox deuh phimap ka pex, awm: mawh pex pui pa yuh pa caox kawx, yuh ka mawx kix pa nieb ah pa ang cee ang cak grawh grawng: pa yuh pex ka daux Khrit, tag hoek krax kaig krax tua heue:. 17 Grawh grawng: nawh phan: Siyiex koe: alo, son sang kieh pex kham: geu: kheu yuh ceu pa mhawm:, lheu: mhawm: khaing: kham: geu: kheu yuh ceu pa caox heue:. 18 Mawh kheu Khrit kawx hoik kham: geu: son phimap phigrham: ex tix bawg, Kaw pa rah pa see, kham: geu: son pui pa ang rah ang see, yuh ka mawx son sang pon Nawh tix viex ex hoek ka Siyiex, kheu hoik teei Nawh yum ka daux nex nham:, viang mawh nan: Nawh hoik im: ka daux Khwan:. 19 Mawh ka daux khwan: yam hu: Nawh tix sidiex gau ka khwan: pa hoik laung daux thawng: khankix, 20 pa hoik lieh lox pa ang chix cu chix nghiet ka daux bawg yam pa hoik luan glangka: dix, yam Siyiex viex rhawm: pa lang: gun lang: yeung, mai: krox jun kix ka daux bawg yam singaix Noax khankix, yam kawn: yuh kawn: cox nawh nyiex reu ting, dee pui tux, pa mawh daix kaux, pa pon hoek krax taoh khaing: rawm:. 21 Awm: lox phektem: an, daux bawg yam in pex pon hoek krax taoh, kheu krax baptis384 rawm:, (ang mawh ka ceu pa sigrhax pa seeing: pa brai: tokaux tix, viang mawh nan: mawh ceu pa simie tix cie rhawm: deeh chix keud chix tawng pa ang koe: dee deuh phimap plak Siyiex), ka daux krax deeh kaoh im: Yesux Khrit, 22 Kaw pa hoik hu: ka daux meung raoma:, mai: ngawm ka plak taix khawn: dawm: Siyiex heue:. Kawncau Siyiex khankix, mai: pa giex kaing: khankix, mai: siawp sibrawm khankix hoik kieh ot ka greem: Nawh Cao: heue:.

Simin Ting 4

1 Mawh kheu nan: awm: Khrit hoik kham: geu: ka daux nex nham:, tokaux pex kawx, rien kraung naing pa mawh rhawm: pa awm: an heue:. Grawh grawng: nawh kaw pa hoik kham: geu: ka daux nex nham:, ang lai deeh yuh phimap heue:. 2 Yuh ka mawx pex tag ang baox deeh ot ka daux bawg pa kawn: koe: pex hawt alo nex nham: kawn: pui, viang mawh nan: hawt tix yuh alo Siyiex heue:. 3 Mawh kheu ex hoik hawt yuh alo pui tang: ceu tang: cat, ka daux bawg yam ju ex pa hoik luan tom: kub, pa mawh pa chax nie lheu: yuh, mai: pa hawt yuh alo nex nham:, mai: pa chax nie miag ka plai:, mai: pa yuh poi pa chax nie luan, mai: pa chax nie luan ih, mai: pa krub rieang krub rao khankix pa greeing heue:. 4 Kix daox deng: ka kheu ang pex to: hu: tau mai: kix, ka daux pa chax nie luan yuh kix, mai: kix ah pa caox pa ang khaw: ang jiet grawng: pex heue:. 5 Kix tag lai krai grawng: pa yuh tix, ka Kaw pa hoik rien tix sang prawng sang ca:, khawm: ka pui im: pui yum khankix heue:. 6 Mawh kheu nin: viang ka pui pa hoik yum khankix kawx hoik sidiex gau lox bwan: gauxrhawm: gauxrhi:, yuh ka mawx son sang pon prawng pon ca: ka kix, awm: pui pa ot ka daux nex daux nham:, viang mawh nan: yuh ka mawx son sang pon im: kix awm: pa khaw: ka Siyiex ka daux khwan: heue:.

7 Dee sidah ku ceu ku cawng khawm: uik dex sang hoek, mawh kheu nan:, priex rhawm: tix, mai: rawg bwan: heue:. 8 Lheu: khaing: ku ceu khawm: uik kieh koe: krax pa nied tix moh paox tix. Grawh grawng: nawh krax moh chix tawb chix kheem: phimap phigrham: tom: nie heue:. 9 Paw kieh koe: rhawm: pa siviien mai: kia: ngien ka paox tix heue:. 10 Awm: hoik pon kaux pui mawx kaux pui an khawng: phak, shiao son sang koe: bwanson: son paox tix, awm: kawncau pa mhawm: pa kia: pa priex bwanson: Siyiex pa nie ceu heue:. 11 Phan: pui tix kaux kaux sidiex gau, kieh nawh sidiex gau lox tawm: jhawm: krai Siyiex heue:. Phan: pui tix kaux kaux yuh son pui tang: kaux, kieh nawh yuh ka daux riang rao pa tawx Siyiex heue:. Yuh ka mawx son sang koe: min: plakngai: Siyiex ka daux ku ceu khawm: uik kheu Yesux Khrit, kieh Nawh koe: min: plakngai: mai: siawp sibrawm ku ju leeing: ju leeing: phan:. Amen.

12 Pui pa moh aux khankix eue:, yam yaox pex tix kham: krax kham: krax geu: awm: ngu, pa hoek ka piang pex son sang cheu: tix yaox pex, paw ce: mawh pa khaw: tix daox deng: kah, awm: pa hoik mawh ceu pa daox pa deng: ka pex. 13 Viang mawh kawx nan:, mawh kheu mawh pex pa pon tix neuex ka daux krax kham: krax geu: Cao: Khrit gauxrhawm: kah. Yuh ka mawx yam lih bleeh min: plakngai: Nawh pex kawx tag kied koe: krax gauxrhawm: gauxrhi: heue:. 14 Phan: pex yaox tix kham: pa ang cee ang cak kheu ceukaux Cao: Khrit, pex ting bwanson:, mawh kheu Khwan: ting min: plakngai:, pa mawh Khwan: Siyiex ot ka piang pex heue:. 15 Grawh grawng: nawh paw kieh pex yaox tix kham: geu:, tix kaux kawx, kheu pa pah pui yum, phan: ang mawh nan: kheu yuh pui briex, phan: ang mawh nan: kheu yuh pa caox, phan: ang mawh nan: kheu ceu pa chuh ka pa yuh pui tang: kaux heue:. 16 Viang mawh kawx nan: phan: pui tix kaux kaux yaox tix kham: krax kham: krax geu: kheu mawh nawh Khrityan, paw kieh nawh koe: krax kaig krax tua kah, viang mawh nan: kieh nawh yaogyaw Siyiex ka daux ceukaux in heue:. 17 Grawh grawng: nawh bawg yam pa sang jah tix prawng tix ca:, ka pui geh nyiex Siyiex hoik hoek, mai: phan: krax prawng krax ca: an jah ka ex phaoxka:, dee sidah kix pa ang koe: krax cu krax nghiet ka lox bwan: gauxrhawm: gauxrhi: Siyiex, tag sang mawh pa yuh ka mawx? 18 Mai: phan: pui rah pui see nu tix hoek krax taoh, pui pa sang chix nab chix yam mai: pa ang khaw: ka Siyiex mai: pui phimap phigrham: khankix tag sang bleeh dee mawx? 19 Mawh kheu nan: kieh kix pa yaox tix kham: krax kham: krax geu: awm: pa khaw: mai: alo Siyiex, pong tix tawx ju tix, ka daux pa yuh pa mhawm:, ka Cao: Phan: Cao: Yuh pa kaux sijax heue:.

Simin Ting 5

Krax jeeh nyaw ka pui pa mawh kuad song:

1 Mawh kheu nan:, aux pa mawh kuad song: ka daux ceucao tix kaux, mai: pa mawh pui pa kham: mhai: sakse: grawng: krax kham: krax geu: Cao: Khrit, mai: pa mawh khawm: pa sang pon tix neuex tix pon min: plakngai:, pa tag sang lih bleeh, sidiex gau ka kuad song: ceucao khankix ka daux pex heue:. 2 Kia: ngien ka cub yung: Siyiex pa ot ka sinax pex, mai: giex kaing: kix, viang mawh nan: kieh koe: rhawm: tix sang yuh awm: pa khaw: mai: alo Siyiex, mai: paw kieh mawh pa khin: tix yuh, lheu: khaing: an paw kieh mawh kheu moh pex tix pon mau pa seeing: pa brai:, viang mawh nan: kieh koe: rhawm: pa simie tix yuh heue:. 3 Paw nieb yuh tix ting ka piang cub ceucao pa hoik tang: tawx ka pex, viang mawh nan:, kieh tokaux pex mawh mhai: pa hawt cub yung: tix jawh kah heue:. 4 Mai: yam lih bleeh Cao: Liang Yung: pa ting, pex tag sang pon mhok khri: min: plakngai: pa ang chix bheet chix laux heue:. 5 Awm: an pex pa awn: ju khankix eue:, kieh cu kieh nghiet ka kuad song: ceucao heue:. Lheu: khaing: an, pex khawm: uik rawd nyoi tix ka pa awn: rhawm: awn: rhi:, tix sang yuh son paox tix tix kaux lai tix kaux, mawh kheu,

385"Siyiex tieb tie ka pui pa ting rhawm: ting rhi:, viang mawh nan: Nawh tawx bwanson: ka pui pa awn: rhawm: awn: rhi: heue:."

6 Mawh kheu nan: yuh tokaux pex awn: rhawm: awn: rhi:, greem: taix Siyiex pa ting sibrawm, yuh ka mawx son sang yaog Nawh pex ting yam hoek bawg yam heue:. 7 Plee ceu pa khirhawm: pex khawm: uik ka piang Nawh Cao:, kheu kia: ngien Nawh ka pex jheeng: jheeng: heue:. 8 Rien rhawm: tix mai: pau tix jhak, mawh kheu pa koeng pex phicaox awm: sivai sangsi: pa graox mai: hu: lailing tix sawg kug pa sang kiied nawh tix ih heue:. 9 Kieh kaux cong: ka daux krax yumrhawm: pex mai: tieb tie nawh, kheu tawng pex puxaik pex khankix can pa ot ka piang haktiex khawm: uik, yaox tix kham: geu: pa yuh nan: heue:. 10 Mai: Siyiex pa yuh bwanson: khawm: uik, pa hoik kok pex laig ka daux min: plakngai: leeing: ju leeing: phan: Nawh, ka daux Cao: Khrit, khaix hoik yaox pex tix kham: geu: tix vud ngie, tokaux Nawh tag sang kieh pa grum mhawm:, mai: kieh kaux cong:, mai: baox tiien baox thie: riang rao kah heue:. 11 Kieh Nawh koe: min: plakngai: mai: siawp sibrawm ku ju leeing: ju leeing: phan: liak. Amen.

Lox ghoik mai: pa nawb bwan:

12 Aux hoik tiem: lai ka pex ceeix, mai: sipaox ka Silwanux, pa een: aux mawh puxaik ex pa kaux sijax, son sang sidiex gau mai: kham: mhai: sakse: grawh grawng: in mawh bwanson: Siyiex pa mawh pa meh heue:. Pex cung tom: kaux ka daux an heue:. 13 Ceucao pa koe: ka daux veng Babulon, pa hoik laug tau mai: pex, mai: kawn: simex aux Makux nawb ka pex heue:. 14 Nawb ka paox tix tix kaux hoik tix kaux ka pa ngheut pa moh pa rhawm: heue:.

Kieh pa nhim: koe: ka piang pex khawm: uik can pa ot ka daux Cao: Khrit heue:. Amen.