1 Kawrinthux

Kawrinthux Phuk Tix

Simin Ting 1

Lox nawb

1 Pawlux pa hoik kok tix kieh mawh kawncau pa ting Yesux Khrit kheu alo Siyiex, mai: puxaik ex Sotsen, 2 tawx ka ceucao Siyiex pa koe: ka daux veng Kawrinthux, pa mawh kix pa hoik singax singeh ka daux Yesux Khrit, pa hoik kok tix kieh mawh pui singax singeh, tau mai: can kix pa kok ka ceukaux Simiang ex Yesux Khrit ku dah ku dee, pa mawh Simiang kix mai: Simiang ex heue:. 3 Kieh pex koe: bwanson:, mai: pa nhim: pa kaoh khaing: Keeing: ex Siyiex mai: Simiang Yesux Khrit liak.

Yaogyaw bwanson:

4 Aux yaogyaw bwanson: Siyiex aux ku jheeng: jheeng: ka grawh grawng: pex, mawh kheu bwanson: Siyiex pa hoik tawx ka pex ka daux Yesux Khrit. 5 Mawh kheu hoik mi hoik koe: pex ka ku ceu ka daux Nawh Cao:, ka daux pa chix sikah ku ceu khawm: uik, mai: krax tawng krax yung khawm: uik heue:. 6 Awm: pa khaw: mai: mhai: sakse: grawh grawng: Cao: Khrit pa hoik kaux cong: ka daux pex. 7 Mawh kheu nan: pex tom: ang lai da: khaix ka daux khawngphak bwanson: tix ceu kawx, yam ca: krox jun pex son bawg yam sang deeh lih bleeh Simiang ex Yesux Khrit. 8 Kaw pa tag sang kieh pex kaux cong: tom: sidah, yuh ka mawx son sang mawh pex pa ang koe: dee deuh phimap, ka daux singaix Simiang ex Yesux Khrit heue:. 9 Siyiex pa hoik kok pex tix neuex ka daux pa yuh paox yuh pie Kawn: Nawh Simiang ex Yesux Khrit mawh pa kaux sijax heue:. 10 Puxaik khankix eue:, aux khyox khaw: ka pex ka daux ceukaux Simiang ex Yesux Khrit, yuh ka mawx son sang sikah pex khawm: uik ka lox tix ceu khaing:, mai: yuh ka mawx son ang sang koe: krax tang: gwieh ka paoxtix ka daux pex, viang mawh kawx nan: yuh ka mawx son sang rom pex tix grum mhawm: tau, ka daux rhawm: tix mu:, mai: krax keud krax sawn: tix blawng khaing: heue:. 11 Grawh grawng: nawh, puxaik aux khankix eue:, kix pa mawh pui geh nyiex Khlawe hoik krai lao ka aux grawh grawng: pex, grawng: pa koe: krax simah simaing: pa ang khaw: paoxtix ka daux pex heue:. 12 Pa sang ah aux mawh nin:, pex kaux pui mawx kaux pui an lai nieb tang: ah nin:, "Aux mawh pa dex mai: Pawlux," mai: "Aux mawh pa dex mai: Apawlux," mai: "Aux mawh pa dex mai: Kephax," mai: "Aux mawh pa dex mai: Cao: Khrit" heue:.

Pawlux ang cu pui tang: gwieh tix

13 Khex mawh Cao: Khrit pa hoik tang: gwieh kah lie? Hoik teei Pawlux yum ka piang khaoxlhak ka son pex lie? Phan: ang mawh nan: hoik baptis271 pex rawm: ka daux ceukaux Pawlux lie? 14 Aux yaogyaw bwanson: Siyiex, kheu ang aux baptis pex ka rawm: tix kaux kawx, lheu: khaing: Karipux mai: Kayux heue:. 15 Ha pui tix kaux kaux kox sang ah, pex hoik baptis ka daux ceukaux aux heue:. 16 Viang ka geh nyiex Sathephanax kawx, aux hoik baptis kah, phan: mawh pa lheu: khaing: an, ka pui tang: kaux, baptis aux nieh, ang aux baptis nieh, ang lai tawng heue:. 17 Grawh grawng: nawh Cao: Khrit hoik ploi: aux tix sang tawx krax baptis ang mawh, viang mawh kawx nan: hoik ploi: tix sang sidiex gau lox bwan: gauxrhawm: gauxrhi:, ang mawh ka daux pingnya pa chix lox sikah, phan: ang mawh nan:, ha: sang kieh khaoxlhak Cao: Khrit kox mawh pa giex pa going heue:. 18 Grawh grang: nawh gumlox pa dex mai: khaoxlhak mawh pa daox pa aw: ka kix pa hoek krax laux krax leeing:, viang mawh kawx nan: ka ex pa hoek krax taoh mawh lox siawp sibrawm Siyiex heue:. 19 Grawh grawng: nawh hoik tiem: tix deuh ah nin:, 272"Aux tag yuh laux pingnya kix pa koe: pingnya, mai: krax pa chix tawng chix yung kix pa koe: krax chix tawng chix yung, Aux tag sang kieh lih mawh pa ang koe: cee koe: cak heue:." 20 Kaw pa koe: pingnya koe: dee mawx? Pui pa tiem: lai koe: dee mawx? Cao: pa thung: thiang: daux ju in koe: dee mawx? Siyiex hoik kieh pingnya haktiex in lih mawh pa daox pa aw: ang mawh lie? 21 Grawh grawng: nawh, mawh kheu hoik yaox grawng: ka daux pa khaw: mai: pingnya Siyiex, haktiex in ang lai tawng ka Siyiex kheu pingnya tix tiru, hoik caw ka rhawm: Siyiex tix sang kieh kix pa yumrhawm: hoek ka krax taoh, kheu ceu pa daox pa aw: pa sidiex pa gau heue:. 22 Mawh kheu hoik yaox grawng: rawg pui Yudax khankix son mhai: pa daox pa am:, mai: grawng: sawg pui Helasax khankix khaix pingnya, 23 viang mawh nan: ex sidiex grawng: Cao: Khrit pa hoik teei yum piang khaoxlhak, pa hoik mawh dee sideeing ka pui Yudax khankix mai: ceu pa daox pa aw: ka pui tang: ceu tang: cat khankix heue:. 24 Viang mawh nan: kawx, ka kix pa hoik kok tix teei khankix, ka pui Yudax mai: ka khawm: pui Helasax, Cao: Khrit mawh siawp sibrawm Siyiex mai: pingnya Siyiex heue:. 25 Grawh grawng: nawh ceu pa daox pa aw: Siyiex mawh pa nie lheu: ting pingnya khaing: kawn: pui, mai: ceu pa iak riang iak rao Siyiex mawh pa nie lheu: ting riang khaing: kawn: pui heue:. 26 Puxaik khankix eue:, keud ka grawh grawng: pa hoik kok tix teei ka pex, grawng: pa ang koe: pui pa koe: pingnya awm: pa khaw: mai: nex nham: tom: nie, mai: grawng: pa ang koe: pui pa ting siawp sibrawm tom: nie, mai: grawng: pa ang koe: ceu laux simiang tom: nie heue:. 27 Viang mawh kawx nan: Siyiex hoik laug tix teei ceu pa daox pa aw: pa dex mai: haktiex in, yuh ka mawx son sang kieh Nawh, kix pa koe: pingnya kaig tua kah heue:. Mai: Siyiex hoik laug ceu pa iak riang iak rao pa dex mai: haktiex in, yuh ka mawx son sang kieh Nawh, ceu pa ting riang ting rao kaig tua kah heue:. 28 Mai: ceu pa ang koe: bwanson: pa dex mai: haktiex in, mai: ceu pa deuh tix ang koe: cee khankix Siyiex hoik laug tix teei. Mawh heue:, mai: ceu pa ang koe: khankix, yuh ka mawx son sang kieh Nawh, ceu pa koe: khankix, lih mawh pa ang koe: cee koe: cak heue:. 29 Yuh ka mawx son ang pui tix kaux kawx sang yaw tix, sivoe Siyiex heue:. 30 Viang mawh kawx nan: hoik mawh kheu Nawh Cao:, pa ot pex daux Yesux Khrit, pa hoik kieh mawh pingnya, mai: pa rah pa see, mai: pa singax singeh, mai: pa taoh, pa kaoh khaing: Siyiex ka son ex, 31 yuh ka mawx son sang khaw: mai: lox pa hoik tiem: tix deuh ah nin:, 273"Kieh kaw pa yaw, yaw rangdi ka daux Simiang heue:."

Simin Ting 2

Pingnya cuyi mawh pa tawx Siyiex

1 Mai: aux, yam hoek aux ka pex, puxaik khankix eue:, aux viex lox nyug lox nyawm, phan: ang mawh nan: viex pingnya, mai: hoek tix sidiex grawng: mhai: sakse: Siyiex ka pex ang mawh heue:. 2 Grawh grawng: nawh, aux hoik een: rhawm: tix tix ang tawng tid tix, ka daux pex, lheu: khaing: Yesux Khrit, mai: grawng: pa hoik yum Nawh piang khaoxlhak heue:. 3 Mai: aux hoik ot tau mai: pex ka daux pa iak riang iak rao, mai: ka daux pa lhat pa graung, mai: ka daux pa nie siyaung: heue:. 4 Mai: lox sikah aux, mai: lox sidiex aux, ang mawh lox pa chix nyaw chix glaw: pa dex mai: pingnya, viang mawh kawx nan: hoik mawh ka daux pa plak jhi: Khwan: Cao: mai: siawp sibrawm heue:. 5 Yuh ka mawx son ang krax yumrhawm: pex sang mawh ka daux pingnya kawn: pui, viang mawh nan: son sang mawh ka daux siawp sibrawm Siyiex heue:.

6 Viang mawh nan: kawx, ka daux kix pa hoik grum die huan: khankix ex tom: ah lox pingnya heue:. Viang mawh kawx nan: ang mawh pingnya pa dex mai: haktiex in, viang pingnya simiang giex kaing: haktiex in pa uik sang laux sang grai: kawx, ang mawh, 7 viang mawh nan: pa ah ex mawh pingnya Siyiex pa raux, pa mawh pingnya pa hoik mox, pa hoik grux ciak Siyiex tix deuh, ka: sang koe: haktiex khankix, son sang mawh min: plakngai: ex heue:. 8 Pingnya an simiang giex kaing: haktiex in ang lai tawng kah tix kaux kawx, grawh grawng: nawh phan: kix hoik tawng, kix ang tau tix tawk Simiang min: plakngai: ka piang khaoxlhak heue:. 9 Viang mawh nan: awm: pa khaw: mai: pa hoik tiem: tix deuh ah nin:,

274"Ceu pa hoik cox hoik khre: Siyiex ka son kix pa moh ka Nawh, mawh ceu pa ang ngai: sax yaox, mai: ang yhaok sax mhong:, mai: pa ang sax laig ka daux rhawmrhi: kawn: pui heue:."

10 Viang mawh kawx nan:, Siyiex hoik plak jhi: ceu an khankix ka ex ka daux Khwan: Cao:. Grawh grawng: nawh, Khwan: Cao: an sawg liiem ka grawng: ku ceu khawm: uik, khawm: ka ceu pa raux pa nu pa dex mai: Siyiex heue:. 11 Grawh grawng: nawh ka daux kawn: pui khankix, mawh mawx pa tawng, ceu pa dex mai: kawn: pui, lheu: khaing: khwan: pui, pa koe: ka daux nawh? Awm: an ceu pa dex mai: Siyiex khankix kawx, ang koe: cao: tawng, lheu: khaing: Khwan: Siyiex heue:. 12 Ex hoik pon khwan: pa dex mai: haktiex in ang mawh, viang mawh nan: hoik pon Khwan: pa kaoh khaing: Siyiex, yuh ka mawx son sang tawng ex ka ceu pa hoik yuh Siyiex bwanson: tix tawx giex ka ex heue:. 13 Ang ex krai grawh grawng: ceu an khankix ka lox pingnya pa gau kawn: pui kah, viang mawh nan: krai ka lox pa gau Khwan: Cao: kah, mai: krai dee bleeh ceu pa dex mai: Khwan:, ka lox pa dex mai: Khwan: heue:. 14 Pui pa dex mai: nex nham: ang rieb tix teei ceu pa dex mai: Khwan: Siyiex, grawh grawng: nawh ceu an kix mawh pa daox pa aw: ka nawh, mai: nawh ang pon tix tawng grawng: khankix, mawh kheu ceu an khankix mawh pa chix liiem chix chawk cheng: tix tawng ka khwan: khaing: heue:. 15 Viang mawh kawx nan: pui pa dex mai: khwan: chix liiem chix chawk cheng: tix tawng grawh grawng: ku ceu khawm: uik, viang mawh nan: ang pui chix liiem chix chawk cheng: tix tawng ka tokaux nawh tix kaux kawx heue:.

27516 "Grawh grawng: nawh, mawh mawx pa tawng ka rhawm: Simiang, tix sang chix gau nawh ka Nawh Cao:?"

Viang mawh kawx nan: ex hoik pon rhawm: Cao: Khrit heue:.

Simin Ting 3

Im: ju ka pakpeung pa dex mai: Khwan:

1 Puxaik khankix eue:, ang aux pon tix sikah ka pex awm: mawh pui pa dex mai: khwan:, viang mawh kawx nan: tag sikah ka pex awm: ka pui pa dex mai: nex nham:, mai: awm: mawh ka kawn: ngie: khankix ka daux Cao: Khrit heue:. 2 Aux hoik tawx pex nyaux rawmteeh, mai: ang lai tawx pa ih pa un: kah, mawh kheu ang pex nyang bax pon kham:. Pie yamin kawx pex ang nyang bax pon kham:, 3 kheu pex kawn: mawh pa dex mai: nex nham: heue:. Mawh kheu koe: pa bohrhawm: bohrhi: mai: pa simah simaing: ka daux pex, ang pex lai mawh pa dex mai: nex nham:, mai: pa hawt hu: ka been kawn: pui lie? 4 Grawh grawng: nawh yam tix kaux ah, "Aux mawh pa dex mai: Pawlux," mai: tang: kaux tix kaux ah, "Aux mawh pa dex mai: Apawlux," pex kawn: mawh pa dex mai: nex nham: ang mawh lie?

Pui pa yumrhawm: yuh kaing tau mai: Siyiex

5 Phan: mawh nan: Apawlux mawh pa yuh ka mawx? mai: Pawlux mawh pa yuh ka mawx? Mawh pui cau pui soi: pa hoik kieh pex yumrhawm:, awm: pa tang: tawx Simiang ka kaux pui mawx kaux pui an heue:. 6 Aux mawh cao: pa sum:, Apawlux mawh cao: pa see: rawm:, viang mawh kawx nan: Siyiex mawh cao: pa kieh haok huan: heue:. 7 Mawh kheu nan: kaw pa sum: ang ah, kaw pa see: rawm: ang ah, ang lai mawh tid tix, viang mawh kawx nan: mawh Siyiex pa kieh haok huan: heue:. 8 Lheu: khaing: nan: kaw pa sum: mai: kaw pa see: rawm: mawh tix kaux khaing:, viang mawh kawx nan: kaux pui mawx kaux pui an tag sang pon bwanson: awm: pa khaw: mai: kaing pa yuh tix heue:. 9 Grawh grawng: nawh yiex mawh paox pa rom tix yuh kaing tau mai: Siyiex, mai: pex mawh ma: Siyiex mai: nyiex Siyiex heue:. 10 Awm: pa khaw: mai: bwanson: Siyiex pa hoik tawx ka aux, aux hoik kaw: num: awm: cao: pa chix sum: nyiex pa koe: pingnya, mai: pui tang: kaux hoik baox gawp tix sum: ka piang an heue:. Viang mawh kawx nan: kieh pui ku kaux yuh satix ka grawng: pa baox gawp nawh tix sum: ka piang an, yuh ka mawx heue:.

Mawh num: jaong ka daux Cao: Khrit tix mu: khaing:

11 Grawh grawng: nawh pui tix kaux kawx ang chix kaw: num: pa tang:, pa lheu: khaing: num: pa hoik kaw:, pa mawh Yesux Khrit heue:. 12 Viang mawh nan:, phan: pui tix kaux kaux baox gawp tix sum: ka piang num: an, ka khri:, mau, siang: simaox pa ngawh, khaox, rib, brex nghox, ang ah, 13 kaing pa yuh kaux pui mawx kaux pui an tag sang kieh sidawng: kah heue:. Grawh grawng: nawh, Singaix An tag sang kieh sidawng: kah, mawh kheu tag sang plak jhi: nawh ka daux ngu, mai: ngu an nong: nong: tag sang cheu: tix yaox, kaing yuh, kaux pui mawx kaux pui an, grawng: mawh kaing pa yuh ka mawx heue:. 14 Phan: kaing pui tix kaux kaux pa hoik gawp nawh tix sum: ka piang num: an kawn: kaux cong:, kaw an tag sang pon bwanson: heue:. 15 Phan: kaing pui tix kaux kaux hoik proe, nawh tag sang som nai: heue:. Viang mawh kawx nan: tokaux nawh tag sang hoek krax taoh, viang mawh nan: mawh awm: pa hoik boek nawh khaing: ngu heue:.

Pui pa yumrhawm: mawh nyiex bwan: Siyiex

16 Ang pex tawng grawng: mawh pex nyiex bwan: Siyiex, mai: grawng: pa ot Khwan: Siyiex ka daux pex lie? 17 Phan: pui tix kaux kaux yieh nyiex bwan: Siyiex laux, ka nawh kawx Siyiex tag sang yuh laux heue:. Grawh grawng: nawh nyiex bwan: Siyiex mawh pa singax singeh, pex kawx mawh nyiex bwan: an heue:.

18 Paw kieh pui tix kaux kawx deeh pie ka tokaux tix tiru. Phan: pui tix kaux kaux ka daux pex ce: tokaux tix mawh pa koe: pingnya ka daux haktiex in, kieh nawh lih mawh pa daox pa aw:, yuh ka mawx son sang lih mawh nawh pa koe: pingnya heue:. 19 Grawh grawng: nawh pingnya pa dex mai: haktiex in mawh ceu pa daox pa aw: ka sivoe Siyiex heue:. Kheu hoik tiem: tix deuh ah nin:,

276"Nawh giex ka kix ka jhawm: lhak tokaux kix heue:."

20 Mai: baox ah nin: tix bawg,

277"Simiang tawng grawh grawng: pa keud pa sawn: pui pa koe: pingnya, grawng: kix mawh pa giex pa going heue:."

21 Mawh kheu nan: paw kieh pui tix kaux kawx yaw rangdi ka daux kawn: pui heue:. Grawh grawng: nawh ku ceu khawm: uik mawh cie pex heue:. 22 Viang mawh Pawlux ang ah, Apawlux ang ah, Kephax ang ah, haktiex in ang ah, pa im: ang ah, pa yum ang ah, ceu pa koe: yamin khankix ang ah, ceu pa sang hoek tix mawh khaix khankix ang ah, khawm: uik khawm: leeing: mawh cie pex, 23 mai: pex mawh cie Cao: Khrit, mai: Cao: Khrit mawh cie Siyiex heue:.

Simin Ting 4

Paw prawng paw ca: ka pui cau Siyiex

1 Kieh pui een: ex mawh pui cau pui soi: Cao: Khrit, mai: kawncau cao: pa priex ceu pa raux pa mox Siyiex heue:. 2 Lheu: khaing: an, pa mawh kawncau cao: pa priex, tag sang yaox grawng: mawh nawh pa kaux sijax heue:. 3 Viang mawh nan:, pa prawng pa ca: pex aux ang ah, phan: ang mawh nan: pa prawng pa ca: pui tang: kaux ang ah, mawh ngie pa iak pa lied ka aux khaing:. Mawh heue:, pie ka tokaux aux kawx aux ang prawng ang ca: heue:. 4 Grawh grawng: nawh ang aux tawng ceu pa phit pa lud tokaux tix tid tix, viang mawh nan: aux hoik rah see kheu an ang mawh heue:. Viang mawh kawx nan: Kaw pa prawng pa ca: ka aux mawh Simiang heue:. 5 Mawh kheu nan:, paw prawng paw ca: tid tix ka: sivoe sang hoek bawg yam nawh, viang mawh nan: krox tom: yam hoek Simiang, pa tag sang kieh pa riang jhan: ka piang ceu pa hoik mox ka daux pa vhaik khankix, mai: kieh khawm: pa keud pa sawn: daux rhawmrhi: khankix sidawng:. Mai: yam an kaux pui mawx kaux pui an tag sang pon pa yaog pa yaw khaing: Siyiex heue:.

6 Puxaik khankix eue:, ceu in khankix aux hoik yuh rieang phektem: ka tokaux aux mai: Apawlux, ka son pex heue:. Yuh ka mawx son sang pon pex tix gau ka daux yiex, tix ang lai lheu: ka ceu pa hoik tiem: khankix, mai: yuh ka mawx son ang pex sang yuh tix ting rhawm: ting rhi:, tix yaw ka tix kaux, mai: map ka tang: kaux heue:. 7 Grawh grawng: nawh, mawh mawx pa kieh maix tang: siyox? mai: koe: maix ceu pa yuh ka mawx, pa ang maix pon khaing: pui? Phan: hoik pon khaing: pui, maix lai yuh tix yaw awm: grang pa ang maix pon khaing: pui yuh ka mawx? 8 Pie yamin kawx pex hoik naog, pie yamin kawx pex hoik lih mawh pa mi pa koe:, yam kawn: tang: ot khaing: ex, pex hoik lih mawh laux simiang, mai: aux simie pex lih tix mawh laux simiang tete, yuh ka mawx viang ex kawx sang pon rom tix lih mawh laux simiang tau mai: pex heue:.

Pak peung pa mhawm: kawncau pa ting

9 Grawh grawng: nawh, aux ce: Siyiex hoik kieh ex pa mawh kawncau pa ting khankix da: khaix pui khawm: uik, awm: pui pa tag lai hoek krax yum, mawh kheu hoik yuh ex mawh ceu pa lak nieb jhak ka son haktiex, mai: son kawncau Siyiex, mai: khawm: son kawn: pui heue:. 10 Ex mawh pui daox pui aw: ka son Cao: Khrit, viang mawh kawx nan: pex mawh pa koe: pingnya ka daux Cao: Khrit heue:. Ex mawh pa iak riang iak rao, viang mawh kawx nan: pex mawh pa ting riang ting rao heue:. Pex mawh pa kied ting min: plakngai:, viang mawh kawx nan: ex mawh pa ang koe: min: plakngai: heue:. 11 Tom: hoek pie bawg yam nari dom: in kawx, ex cairhawm: cairhi:, mai: sang nyaux nie rawm:, mai: ot kakaong:, mai: kham: geu: ceu pa tap pa toi:, mai: mawh pui vungvieang praix pa ang koe: dee ot heue:. 12 Mai: ex nyhap mao, yuh kaing ka taix tokaux tix heue:. Yam yuh pui pa ang cee ang cak ka ex, ex nawb bwan: ka kix heue:. Yam tuktiak tukte: ka ex, ex gun yeung heue:. 13 Yam ah lox map ka ex, ex deeh khyox khaw: kah heue:. Hoik kieh ex mawh awm: ceu pa seeing: pa brai: cie haktiex, pa mawh sibroe: sibrok pa hoik pih lih khaing: ku ceu khawm: uik, tom: hoek ka bawg yamin heue:.

14 Aux tiem: ceu in khankix son sang kieh pex kaig tua ang mawh, viang mawh nan: aux sidiex gau ka pex awm: mawh pex kawnpraix pa moh aux kah heue:. 15 Grawh grawng: nawh viang pex koe: cao: pa gau grawng: Cao: Khrit tix mheen: kawx, ang pex koe: keeing: tom: nie, mawh kheu hoik mawh aux pa kieh pex keh ka daux Yesux Khrit kheu lox bwan: gauxrhawm: gauxrhi: heue:. 16 Mawh kheu nan: aux tom: khyox khaw: ka pex, son sang mawh pex pa hawt jawh tix yuh khaix aux heue:. 17 Mawh kheu jao in aux tom: hoik ploi: Timose, pa mawh kawn: pa moh aux kah, mai: pa kaux sijax ka daux Simiang hu: ka pex, nawh tag sang kieh pex doh keud doh sawn: ka jhawm: krax pa yuh aux ka daux Cao: Khrit, awm: pa sidiex aux ka ku ceucao pa koe: ku dah ku dee heue:. 18 Pex tiblah kroh tix ting rhawm:, awm: pa ang aux lai sang hoek ka pex heue:. 19 Viang mawh kawx nan: phan: caw ka alo Simiang aux tag sang khran: hoek ka pex, mai: yam an aux tag tawng ka lox kix pa kroh tix ting rhawm: khankix ang mawh, viang mawh nan: tag tawng ka siawp sibrawm kix heue:. 20 Grawh grawng: nawh meung Siyiex ang lai mawh ka daux gumlox, viang mawh nan: mawh ka daux siawp sibrawm heue:. 21 Pex simie pa yuh ka mawx? Aux tag sang viex khaox hoek ka pex lie? Phan: ang mawh nan: sang hoek ka daux krax moh krax rhawm: mai: pa mhawm: rhawm: mhawm: rhi: lie?

Simin Ting 5

Ah ka pa phit vao, krai grawng: been li

1 Hoik tah krai lao grawng: koe: ceu pa phit pa vao ka daux pex, pa mawh ceu pa langteung: phit vao, pie pa ang koe: ka daux pui tang: ceu tang: cat khankix, pa mawh, pui ka daux pex tix kaux, pa nieb teei ka moeng keeing: tix heue:. 2 Mai: jalao pex sang khirhawm: kah mai: grheu: tix tik kaw pa yuh nan: khaing: daux pex, pex brie tix ting rhawm: kah heue:. 3 Viang ang tokaux aux ot mai: pex kawx, aux hoik ot daux khwan:, mai: aux hoik prawng ca: ka kaw pa yuh ceu an, awm: hoik ot aux tau mai: pex heue:. 4 Yam krawk khrawm: pex paox tix ka daux ceukaux Simiang ex Yesux, mai: yam ot khwan: aux mai: pex, tau mai: siawp sibrawm Simiang ex Yesux, 5 tawx pong pui pa yuh nan: ka Satan tix kieh yuh nex nham: nawh laux, yuh ka mawx son sang hoek khwan: nawh krax taoh ka daux singaix Simiang Yesux heue:. 6 Pa yaw rangdi pex ang lai mhawm:. Ang pex tawng grawng: susaix ceeix ngie chix laig tix kieh khaomun ploh khawm: pum: lie? 7 Khawt tix tik susaix pa prim: singax paklawg, son sang mawh pex pum: khaomun pa khraox, awm: pa mawh pex khaomun pa ang sau: susaix heue:. Grawh grawng: nawh, Kawn: Yung: Pasakha ex, pa mawh Cao: Khrit, hoik tan hoik lu heue:. 8 Mawh kheu nan: kieh ex priex tix yuh poi an, viang mawh nan: kawx ang mawh ka susaix pa prim:, mai: viang ka susaix ceu pa ang khaw: ang jiet mai: pa caox pa caig kawx ang mawh, viang mawh kawx nan: mawh ka khaomun pa ang sau: susaix pa singax singeh mai: pa mawh pa meh heue:.

Ot daux haktiex mai: ang hawt been daux haktiex

9 Daux lai pa hoik tiem: aux tix tawx ka pex, hoik nhie: pex ang yuh paox yuh pie ka pui pa phit pa vao heue:. 10 Pa ah aux nan:, ang lai ah ka pui phit pui vao pa dex mai: haktiex, phan: ang maw nan: ka pui pa ghoing:, phan: ang mawh nan: ka pui pa rud pa rhim:, phan: ang mawh nan: ka pui pa krub rieang krub rao khankix, phan: raux ah nan:, pex tag lai lih hu: khaing: haktiex heue:. 11 Viang mawh kawx nan:, lai pa hoik tiem: aux ka pex, mawh pa nhie: pex ang yuh paox yuh pie ka pui pa hoik kok mawh puxaik, pa mawh pui phit pui vao, phan: ang mawh nan: pa mawh pui pa ghoing:, phan: ang mawh nan: pa mawh pui pa krub rieang krub rao, phan: ang mawh nan: pa mawh pui pa sa pa lao, phan: ang mawh nan: pa mawh pui pa yoek ka plai:, phan: ang mawh nan: pa mawh pui pa rud pa rhim: heue:. Pui pa yuh nan: pie sawm: kawx paw sawm: tau mai: nawh awawx. 12 Grawh grawng: nawh, pa prawng pa ca: ka kix pa ot plak praix, chix dex mai: aux yuh ka mawx? Pex prawng pex ca: ka kix pa ot plak daux ang mawh lie? 13 Viang mawh kawx nan: ka kix pa ot plak praix khankix, Siyiex prawng ca: kah heue:.

278"Grheu: tix tik pui pa caox pa caig an khaing: ka daux pex heue:."

Simin Ting 6

Pui singax singeh ang pon tix koe: lox see: ka paox tix

1 Phan: pex koe: lox koe: see: ka paox tix, pex khex ang ring tix hu: prawng ca: ka sivoe pui pa ang rah ang see, khaing: ka sivoe pui pa singax singeh lie? 2 Phan: ang mawh nan: ang pex tawng grawng: pui singax singeh khankix tag sang prawng ca: ka haktiex lie? Mai: phan: pex tag sang prawng ca: ka haktiex, ang pex keung: tix prawng ca: ka ceu pa nie iak khaing: paox tix khankix lie? 3 Ang pex tawng grawng: ex tag sang prawng ca: ka kawncau Siyiex khankix lie? Mawh kheu nan: tag sang nie lheu: yaox tix prawng ca: ka ceu pa dex mai: ju in miex ding? 4 Mawh kheu nan: phan: pex tag sang prawng ca: ka ceu pa dex mai: ju in khankix, pex lai teei kix pa ang koe: bwanson: ka daux ceucao, tix kieh mawh cao: prawng cao: ca: lie? 5 Aux ah nin: son sang kieh pex kaig tua kah heue:. Yuh ka mawx nieh, khex ang koe: pui pa koe: pingnya ka daux pex, pa chix tix prawng ca: ka sinax puxaik tix khankix lie? 6 Ang joeng mawh ngie yuh see: yuh cawng ka paox puxaik tix tix kaux lai tix kaux, viang mawh nan: yuh nang: nan: ka sivoe pui pa ang yumrhawm: khankix heue:. 7 Pa yuh pex see: cawng ka paox tix mawh pa som pa nai: son pex. Yuh ka mawx lai yuh nan:, khaing: pa kham: pex ka ceu pa phit pa lud? Yuh ka mawx lai yuh nan:, khaing: pa kham: pex ka ceu pa lhen: tix teei kraung tix? 8 Piang ang yuh nan:, pex yuh pa phit pa lud, mai: lhen: tix teei kraung puxaik tix heue:.

Kawn: Khrit caw yuh paox yuh pei ka daux pa singax

9 Phan: ang mawh nan: ang pex tawng grawng: pui pa ang rah ang see ang pon tix cie sin: pa mawh meung Siyiex lie? Paw kieh pie lhen: kah. Pui pa phit pa vao ang ah, pui pa krub rieang krub rao ang ah, pui pa phit vao mai: moeng pui ang ah, pui ngeng cai ang ah, pui pa deeh phit vao ka paox simex tix ang ah, 10 pui briex pui lak ang ah, pui pa ghoing: ang ah, pui pa yoek ka plai: ang ah, pui pa sa pa lao ang ah, pui pa rud pa rhim: ang ah, tag ang pon tix cie sin: pa mawh meung Siyiex heue:. 11 Mai: glangka: in, viang pex tiblah kawx hoik mawh pui pa awm: an, viang mawh kawx nan: hoik sigrhah ka pex, viang mawh kawx nan: hoik kieh pex singax, viang mawh kawx nan: hoik kieh pex rah see ka daux ceukaux Simiang Yesux Khrit, mai: ka daux Khwan: Siyiex ex heue:.

12 Aux koe: akhuang: tix pon yuh ku ceu khawm: uik, viang mawh kawx nan: to mhawm: son aux khawm: uik ang mawh. Aux koe: akhuang: tix pon yuh ku ceu khawm: uik, viang mawh kawx nan: ang aux doh kieh ot ka greem: siawp sibrawm tix ceu kawx heue:. 13 Pa ih pa un: mawh son vaig tu, mai: vaig tu mawh son pa ih pa un:, viang mawh kawx nan: Siyiex tag sang kieh laux khawm: ra: ceu heue:. Tokaux ang lai mawh son pa phit pa vao, viang mawh kawx nan: mawh son Simiang, mai: Simiang mawh son tokaux heue:. 14 Lheu: khaing: an Siyiex hoik kieh Simiang deeh kaoh, mai: ka khawm: ex kawx tag sang kieh deeh kaoh kheu siawp sibrawm Nawh heue:. 15 Ang pex tawng grawng: tokaux pex mawh kraung pakpeung Cao: Khrit lie? Phan: mawh nan: aux tag sang teei kraung pakpeung Cao: Khrit, mai: kieh kix mawh kraung pakpeung bon: coh kaux lie? Paw doh kieh mawh nan:. 16 Phan: ang mawh nan:, ang pex tawng grawng: kaw pa hu: kleuk tix tau mai: bon: pa coh kau:, hoik mawh tokaux tix mu: khaing: mai: nawh lie? Grawh grawng: nawh, Nawh Cao: hoik ah nin:,

279"Kiex ra: kaux tag mawh nex nham: tix mu: khaing:."

17 Viang mawh kawx nan:, kaw pa kleuk tokaux tix tau mai: Simiang, mawh khwan: tix mu: khaing: mai: Nawh heue:. 18 To: khaing: pa phit pa vao awawx. can pa yuh pui ku ceu mawh pa koe: plakpraix tokaux, viang mawh kawx nan: kaw pa phit pa vao yuh phimap ka tokaux tix tiru heue:. 19 Phan: ang mawh nan:, ang pex tawng grawng: tokaux pex mawh nyiex bwan: Khwan: Singax Singeh, pa ot ka daux pex, pa hoik pon pex khaing: Siyiex lie? Mai: pex ang lai mawh cie tokaux tix, 20 grawh grawng: nawh hoik liag pex ka pa ngawh, mawh kheu nan: kieh Siyiex koe: min: plakngai: ka daux tokaux pex awawx.

Simin Ting 7

Grawng: Mex moeng mawh Siyiex pa hoik sin

1 Phan: mawh grawng: ceu pa hoik tiem: pex ka aux, mhawm: son simex, tix ang teeh ang dex mai: bon: heue:. 2 Viang mawh kawx nan:, kheu haoh pa phit pa vao, kieh simex ku kaux tang: koe: moeng cie tokaux tix, mai: kieh bon: ku kaux tang: koe: mex cie tokaux tix heue:. 3 Kieh pa mawh mex tawx ka pa mawh moeng awm: pa keung: nawh tix pon, mai: awm: an pa mawh moeng kawx, kieh nawh tawx nang: nan: ka pa mawh mex heue:. 4 Pa mawh moeng ang koe: sibrawm ka piang tokaux tix, viang mawh kawx nan: mawh mex pa koe: heue:. Awm: an pa mawh mex kawx ang koe: sibrawm ka piang tokaux tix, viang mawh kawx nan: mawh moeng pa koe: heue:. 5 Paw vi yuh tix ang cu tix tawx ka paox tix phan: ang mawh ka pa hoik caw rhawm: khawm: ra: kaux, tix yuh nan: tix vong vong, son sang teei bawg yam tix rawg bwan:, mai: baox deeh ot mai: paox tix khaix, phan: ang mawh nan:, ha Satan kox pon nyaw glaw: pex, kheu ang pex pon tix priex rhawm: tix heue:. 6 Viang mawh kawx nan:, aux ah nin: kheu koe: akhwang:, mai: ang lai mawh kheu lox pa tawm: kah heue:. 7 Viang mawh kawx nan:, viang ka pui khawm: uik kawx, aux simie tix kieh awm: aux. Viang mawh nan:, kaux pui mawx kaux pui an tang: pon khawng: phak khaing: Siyiex, tix kaux ceu in, mai: tang: kaux ceu an heue:. 8 Viang mawh nan: kawx, aux ah nin: ka pui pa ang koe: mex koe: moeng, mai: ka miexmai khankix, phan: kix ot awm: aux mhawm: son kix heue:. 9 Viang mawh kawx nan: phan: kix ang chix priex rhawm: tix, kieh kix teei mex teei moeng, grawh grawng: nawh nie lheu: mhawm: tix sang teei mex teei moeng khaing: pa haokrhawm: siaoh: heue:.

Grawng: teei mex moeng sinax kawn: Khrit

10 Phan: mawh ka pa koe: mex koe: moeng khankix, aux tawm: lox kah, viang mawh nan: ang mawh aux pa tawm:, mawh Simiang, yuh ka mawx pa mawh moeng tag ang gwieh tix tang: ot khaing: mex tix, 11 (Viang mawh kawx nan: phan: bon: hoik gwieh tix tang: ot, kieh nawh ot giex nong: nong: mai: ang lai baox koe: mex, phan: ang mawh nan: kieh nawh deeh khaw: ka mex tix.) mai: yuh ka mawx pa mawh mex kawx tag ang lai tik ka moeng tix heue:. 12 Viang mawh kawx nan: ka pa deuk khankix, aux ah nin:, ang lai mawh Simiang pa ah, phan: puxaik tix kaux kaux koe: moeng pa ang yumrhawm:, mai: phan: moeng nawh koe: rhawm: tix sang ot mai: nawh, paw kieh nawh grheu: moeng tix hu:. 13 Mai: phan: pa mawh moeng, koe: mex pa ang yumrhawm:, mai: phan: mex nawh koe: rhawm: tix sang ot mai: nawh, paw kieh nawh grham: mex tix lih hu: heue:. 14 Grawh grawng: nawh mex pa ang yumrhawm: lih mawh pa singax ka daux moeng tix, mai: moeng pa ang yumrhawm: lih mawh pa singax ka daux puxaik pa mawh mex nawh heue:. Phan: ang mawh nan: kawnpraix pex tag lai mawh pa ang singax, viang mawh nan: yamin kix mawh pa singax heue:. 15 Viang mawh nan: kawx phan: pui pa ang yumrhawm: sang lih hu:, kieh nawh lih hu: heue:. Pa mawh puxaik, phan: ang mawh nan: pa mawh nan: ang ah, ang mawh pa giex gang: ka ceu pa yuh nan: heue:. Siyiex hoik kok ex son sang khaw: sang caw paox tix heue:. 16 Pa mawh moeng eue:, maix chix tawng grawng: pa sang pon taoh, ang maix pon taoh, ka mex tix yuh ka mawx? Phan: ang mawh nan:, pa mawh mex eue:, maix chix tawng pa sang pon taoh, ang maix pon taoh, ka moeng tix yuh ka mawx?

Hawt priex tokaux tix ka pa kok Siyiex tix

17 Awm: hoik gwieh Simiang tix tang: tawx ka kaux pui mawx kaux pui an, mai: awm: pa hoik tang: kok Siyiex ka kaux pui mawx kaux pui an, kieh nawh hu: yuh nan: heue:. Mai: aux tawm: lox yuh nin:, ka daux ceucao khawm: uik heue:. 18 Hoik kok ka pa hoik pat hak tix kaux kaux lie? Paw kieh nawh lih mawh pa ang pat hak. Hoik kok ka pa ang pat hak tix kaux kaux lie? Paw kieh nawh pat hak heue:. 19 Pa pat hak ang tie mawh tid tix, mai: pa ang pat hak kawx ang tie mawh tid tix, viang mawh nan: mawh ngie pa priex tix hawt lox tawm: jhawm: krai Siyiex khaing: pa koe: bwanson: heue:. 20 Kieh kaux pui mawx kaux pui an ot ka daux ceu pa kok, pa hoik kok nawh kah heue:. 21 Mawh maix siliex yam kok ka maix lie? Paw lai khi: kah, viang mawh kawx nan: phan: maix koe: sibrawm tix lih mawh pui pa ploi:, shiao ka sibrawm an heue:. 22 Grawh grawng: nawh, kaw pa hoik kok ka daux Simiang, yam mawh nawh siliex, hoik mawh pui pa ploi: cie Simiang, awm: an kaw pa hoik kok yam mawh nawh pui ploi:, mawh siliex cie Cao: Khrit heue:. 23 Pex mawh pa hoik liag ka pa ngawh, paw vi kieh lih mawh siliex kawn: pui heue:. 24 Puxaik khankix eue:, kieh kaux pui mawx kaux pui an, ot tau mai: Siyiex, ka daux ceu pa hoik kok nawh kah heue:.

Pa tiem: ka pa ang nyang teei mex teei moeng

25 Phan: mawh grawh grawng: bon: krih aux ang lai koe: lox tawm: khaing: Simiang, viang mawh nan:, aux pa mawh pui pa hoik pon bwanson: khaing: Simiang tix mawh pui pa kaux sijax, tawx jhawm: pa keud pa sawn: tix kah heue:. 26 Mawh kheu ceu pa kharhawm: kharhi: pa koe: yamin, aux ce: mhawm: son pui tix ca: ot awm: pa ot nawh heue:. 27 Maix hoik mawh pa phyawk moeng kah lie? Paw lai sawg tix luan khaing: nawh awawx. Maix mawh pa hoik kah tix luan khaing: moeng lie? Paw lai baox sawg tix moeng awawx. 28 Viang mawh kawx nan: phan: maix teei tix koe: moeng, maix ang phit ang lud heue:. Mai: phan: bon: krih teei tix koe: mex kawx, nawh ang phit ang lud heue:. Viang mawh nan: kawx pui pa yuh nan: khankix, tag sang yaox krax kharhawm: kharhi: ka daux nex nham:, aux tom: simie tix kieh pex luan khaing: ceu an kix heue:. 29 Viang mawh nan:, puxaik khankix eue:, aux ah nin:, bawg yam pa kawn: deuk ka ex hoik dawd, mawh kheu nan: kieh khawm: kix pa koe: moeng, yuh awm: pa ang kix lai koe: heue:. 30 Mai: kieh kix pa yiem pa grai, yuh awm: kix pa ang yiem ang grai heue:. Mai: kieh kix pa gauxrhawm:, yuh awm: ang kix lai gauxrhawm: heue:. Mai: kieh kix pa liag, yuh awm: pa ang kix lai koe: heue:. 31 Mai: kieh kix pa shiao haktiex in, yuh awm: pa ang shiao tom: grum, grawh grawng: nawh rieang haktiex in mawh pa grai: pa grhup hu: heue:. 32 Aux simie tix kieh pex luan khaing: krax khi: krax glaoh heue:. Pui pa ang koe: moeng chix keud grawng: ceu pa dex mai: Simiang, mai: yuh ka mawx son sang khaw: sang caw nawh ka rhawm: Simiang heue:. 33 Viang mawh nan: pui pa koe: moeng chix keud grawng: ceu pa dex mai: haktiex, mai: yuh ka mawx son sang chix khaw: chix caw nawh ka rhawm: moeng tix, 34 mai: jhawm: keud nawh hoik tang: gwieh tix heue:. Awm: an bon: pa ang koe: mex, mai: khawm: bon: krih, chix keud grawng: ceu pa dex mai: Simiang, mai: yuh ka mawx son tokaux nawh mai: khwan: nawh, khawm: ra: ceu, tag sang mawh pa singax singeh heue:. Viang mawh nan: bon: pa koe: mex, chix keud grawng: ceu pa dex mai: haktiex, mai: yuh ka mawx son sang chix khaw: chix caw nawh ka rhawm: mex tix heue:. 35 Pa ah aux nin:, aux ah ngie son sang koe: bwanson: son pex, mai: ang mawh son sang taing singoe sawt ka piang pex, viang mawh nan: aux ah son sang teem: pex tix chix yuh pa khaw: pa mawh son Simiang pa ang koe: dee lukliak heue:.

36 Phan: pui tix kaux kaux ce: nawh yuh pa ang khaw: ka kawn: bon: krih tix, mai: phan: bon: an hoik luan krih, kieh nawh yuh awm: pa khaw: pa caw ka rhawm: bon: an, pa yuh nawh nan: ang koe: phimap. Kieh teei paox tix heue:. 37 Viang mawh kawx nan: kawx pa hoik een: rhawm: tix kaux, phan: ang koe: dee kin lox, mai: phan: nawh pon tix yuh awm: alo tix, mai: hoik dud keud ka daux rhawm: tix, tix ang kieh kawn: bon: krih tix koe: mex, yuh pa mhawm: heue:. 38 Mawh kheu nan: kaw pa teei tix tawx kawn: bon: krih, tix koe: mex yuh pa mhawm: heue:. Mai: kaw pa ang tawx kawn: bon: krih tix, koe: mex nie lheu: yuh pa mhawm: heue:. 39 Pa mawh moeng hoik phyawk ka mex tix, yam kawn: klawd mex nawh, viang mawh kawx nan:, phan: mex nawh hoik yum, ka pui mawx ang ah, nawh pon tix baox deeh mex, awm: pa khaw: rhawm: nawh, viang mawh nan: pon tix teei ngie pa ot ka daux Simiang heue:. 40 Viang mawh nan: phan: awm: pa keud pa sawn: aux, nawh nie lheu: koe: krax gauxrhawm:, phan: nawh ca: ot, awm: pa ot tix, mai: aux ce:, tokaux aux kawx koe: Khwan: Siyiex heue:.

Simin Ting 8

Grawng: Pa tan ka rieang rao mai: krax bloi: kawn: Khrit

1 Phan: mawh grawng: ceu pa hoik tan hoik lu ka rieang rao, ex tawng grawng: ex khawm: uik hoik koe: krax tawng krax yung heue:. Krax tawng krax yung mawh pa chix kieh ting rhawm: ting rhi:, viang mawh kawx nan: krax moh krax rhawm: mawh pa chix kieh ting kieh lhaong: heue:. 2 Phan: pui tix kaux kaux ce: tix hoik tawng tix ceu ceu, nawh ang nyang bax tawng awm: pa khaw: nawh tix tawng, 3 viang mawh nan: phan: pui tix kaux kaux moh ka Siyiex, Nawh Cao: tawng ka nawh heue:. 4 Mawh kheu nan: grawh grawng: ih ceu pa hoik tan lu ka rieang rao, ex tawng grawng: rieang rao ang mawh tid tix ka daux haktiex in, mai: grawng: pon ang koe: Siyiex lheu: khaing: tix kaux khaing: heue:. 5 Grawh grawng: nawh viang koe: pa kok mawh siyiex ka daux raoma: ang ah, phan: ang mawh nan: ka piang haktiex ang ah, mai: mawh tete, koe: siyiex pa yuh nan: tom: nie, mai: simiang pa yuh nan: tom: nie, 6 viang mawh nan: ka ex koe ngie Siyiex tix kaux khaing:, pa mawh Keeing: Cao:, can pa koe: ku ceu khawm: uik hoik lih mawh ka daux Nawh Cao:, mai: ex kawx mawh son Nawh heue:. Mai: koe: ngie Simiang tix kaux khaing:, pa mawh Yesux Khrit, can pa koe: ku ceu khawm: uik hoik lih mawh kheu Nawh Cao:, mai: ex kawx lih mawh kheu Nawh heue:. 7 Viang mawh kawx nan: pui khawm: uik hoik koe: krax tawng krax yung ka grawng: an ang mawh, pui tiblah viang kix hoik tawng grawng: rieang rao tom: yamin kawx, yam ih ceu pa hoik tan lu ka rieang rao, kix kawn: keud ce: grawng: pa dex mai: rieang rao, mai: kheu dee chix keud chix tawng kix iak riang iak rao, kix seeing: brai: sipiag heue:. 8 Viang mawh nan: pa ih pa un: tag sang kieh ex koe: plakngai: ka Siyiex ang mawh. Phan: ex ang ih, ex ang lai nie lheu: caox, phan: ang mawh nan:, phan: ex ih, ex ang lai nie lheu: mhawm: heue:. 9 Viang mawh nan: rien rhawm: tix, yuh ka mawx ceu pa koe: akhwang: pex tix yuh, tag ang lih mawh pa sideeing ka pa iak riang iak rao khankix heue:. 10 Grawh grawng: nawh phan: pui yaox maix pa koe: krax tawng krax yung ngawm neung tix sawm: ka daux nyiex vad rieang rao, phan: nawh iak riang iak rao, dee chix keud chix tawng nawh, tag sang nie baox kua: tix ih ceu pa tan pa lu ka rieang rao ang mawh lie? 11 Phan: mawh nan:, kaw pa iak riang iak rao, pa mawh puxaik pa hoik yum Cao: Khrit son nawh, hoek krax laux krax leeing: kheu krax tawng krax yung maix heue:. 12 Mai: kheu phit ka puxaik khankix yuh nan:, pex kieh dee chix keud chix tawng kix mat, yam iak riang iak rao nawh, mai: pex phit ka Cao: Khrit sipieag heue:. 13 Mawh kheu nan:, phan: pa ih pa un: kieh puxaik aux sideeing kah, aux tag ang ih nex leeing: ju leeing: phan:, yuh ka mawx son ang aux sang kieh puxaik tix sideeing kah heue:.

Simin Ting 9

Siawp Sibrawm cie kawncau pating Pawlux

1 Ang aux mawh pui ploi: lie? Ang aux mawh kawncau pa ting lie? Ang aux bax yaox ka Simiang ex, Yesux lie? Ang pex mawh kaing jhaw: aux ka daux Simiang lie? 2 Viang ang aux mawh kawncau pa ting ka pui tang: kaux kawx, phan: mawh ka pex aux tom: mawh tete heue:. Grawh grawng: nawh pa ot pex daux Simiang, mawh cum: grawng: mawh aux kawncau pa ting heue:. 3 In mawh lox pa sang tiebtie aux ka kix pa chawk cheng: ka aux grawng: in heue:. 4 Ang ex koe: akhwang: tix pon ih pon nyaux lie? 5 Ang ex koe: akhwang: pon viex ka moeng tix lai ling, pa mawh pui yumrhawm:, awm: kawncau pa ting pa deuk khankix, mai: pux Simieng khankix, mai: Kephax lie? 6 Phan: ang mawh nan:, mawh aux mai: Banabax ngie, pa ang koe: akhwang: tix ang yuh kaing lie?

Pa sidiex lox bwan: ih ka daux lox bwan:

7 Pui naing mawx sax ih mau tokaux tix, tix yuh kaing pui naing? Mawh mawx pa sum: sipeem plix siiet, mai: ang ih ka plix nawh? Phan: ang mawh nan:, mawh mawx pa liang cub yung:, mai: ang ih rawm: teeh cub yung: an? 8 Aux ah ceu in khankix hawt ka been kawn: pui lie? Phan: ang mawh nan:, lox lai been li kawx, ang lai ah nang: nan: lie? 9 Grawh grawng: nawh hoik tiem: tix deuh yuh nin: ka daux lai been li Mose,

280"Maix tag ang jup jheeh moi ka jhup yam dig nawh nghox lih."

Siyiex keud ngie ka son moi lie? 10 Phan: ang mawh nan: ah Nawh ka son ex lie? Mawh heue:, hoik tiem: ka son ex, mawh kheu kaw pa thai: ma: khaw: tix thai: ka daux krax keud pot jun pot, mai: kaw pa pah nghox, khaw: tix pah ka daux krax keud pot jun pot, tix sang pon ih nyum: nghox cie tix heue:. 11 Phan: ex hoik rhuat ceu pa dex mai: khwan: son pex, phan: ex pon tix vawg ceu pa dex mai: nex nham:, mawh grawng: pa ting lie? 12 Phan: pui tang: kaux koe: akhwang: tix ting ka piang pex, ex nie lheu: koe: ang mawh lie? Viang mawh nan: kawx ex ang lai shiao ka akhwang: an, viang mawh nan: ex hoik gun yeung ku ceu khawm: uik, yuh ka mawx son ang ex lai sang kieh raw ka lox bwan: gauxrhawm: gauxrhi: Cao: Khrit heue:. 13 Ang pex tawng grawng: kix pa yuh kaing cau kaing soi: pa dex mai: been pa singax khankix, pon tix ih ceu pa koe ka daux nyiex bwan:, mai: kix pa yuh kaing kia: ka khu: dee tan, rom tix pon nyum: pa tan pa lu cie kix tau mai: khu: dee tan lie? 14 Awm: an Simiang kawx hoik ciak tix kieh kix pa sidiex gau lox buan gauxrhawm: gauxrhi:, pon tix eei: ju kix ka lox bwan: gauxrhawm: gauxrhi: heue:. 15 Viang mawh nan: kawx aux ang lai shiao ka akhwang: ceu in tix ceu kawx, ang aux tiem: ceu in kix son sang kieh pex yuh nan: ka aux, grawh grawng: nawh phan: aux yum nie lheu: mhawm: son aux khaing: pa kieh pui tix kaux kawx kieh ceu pa yaw aux ka in mawh pa giex going heue:. 16 Pa sidiex gau aux lox bwan: gauxrhawm: gauxrhi: ang koe: dee yaw tix kah, grawh grawng: nawh hoik tum: piang aux, mai: phan: ang sidiex ang doh pon. Phan: aux ang sidiex gau lox bwan: gauxrhawm: gauxrhi: aux tag sang pon pa kharhawm: kharhi: heue:. 17 Grawh grawng: nawh phan: aux tang: koe: rhawm: tix sang yuh nin:, aux koe: bwanson: heue:. Viang mawh nan: phan: aux ang koe: rhawm: tix yuh, mai: yuh, aux hoik yuh kaing kawncau pa priex, pa hoik tawx hoik pong ka aux heue:. 18 Phan: mawh nan:, bwanson: aux mawh pa yuh ka mawx? Mawh nin: heue:, aux tag sang kieh lox bwan: gauxrhawm: gauxrhi: mawh pa pon giex pa ang uik ngawh, mai: aux tag ang phat shiao akhwang: pa koe: aux ka daux lox bwan: gauxrhawm: gauxrhi: tom: uik heue:.

Khawngphak cie pa yuh kaing jhaw: tete

19 Viang aux hoik mawh pui ploi: khaing: pui khawm: uik kawx, aux hoik kieh tokaux tix mawh siliex ka khawm: uik, yuh ka mawx son sang nie lheu: pon aux pui tom: nie heue:. 20 Mai: ka pui Yudax, aux hoik lih mawh awm: pui Yudax, yuh ka mawx son sang pon aux ka pui Yudax khankix heue:. Ka kix pa ot greem: lox lai been li, viang ang aux ot greem: lox lai been li kawx, aux hoik lih mawh awm: pui pa ot greem: lox lai been li, yuh ka mawx son sang pon aux ka kix pa ot greem: lox lai been li heue:. 21 Ka kix pa ang koe: lox lai been li aux hoik lih mawh awm: pui pa ang koe: lox lai been li, (viang ang aux mawh pa ang koe: lox been li Siyiex, viang mawh nan: aux ot greem: lox been li Cao: Khrit). Yuh ka mawx son sang pon aux ka kix pa ang koe: lox lai been li heue:. 22 Ka pa iak riang iak rao, aux hoik lih mawh pa iak riang iak rao, yuh ka mawx son sang pon aux ka pa iak riang iak rao khankix heue:. Aux hoik lih mawh ku ceu khawm: uik, ka pui khawm: mu: khawm: miang:, yuh ka mawx son sang pon kieh aux pui tiblah hoek krax taoh heue:. 23 Mai: aux yuh ku ceu khawm: uik ka son lox bwan: gauxrhawm: gauxrhi:, yuh ka mawx son sang pon aux tix mawh pa rom tix pon ka lox bwan: gauxrhawm: gauxrhi: heue:. 24 Ang pex tawng lie? Kix pa lah paox tix to:, to: khawm: uik, viang mawh nan: pa pon khawngphak mawh ngie tix kaux khaing:. Mawh kheu nan: to: heue:, son sang pon pex khawngphak. 25 Mai: pui ku kaux, pa cheu: paox tix ka daux ceu pa klieh priex rhawm: tix ka daux ku ceu khawm: uik heue:. Pa yuh kix nan:, kix yuh son sang pon mhok khri: pa chix laux chix leeing:, viang mawh nan: ex yuh son sang pon mhok khri: pa ang chix laux chix leeing: heue:. 26 Mawh kheu nan: ang aux to: awm: pa keud jee keud blaong, mai: pa klah aux, ang aux klah awm: klah ka bhawm: heue:. 27 Viang mawh nan: aux tap ka tokaux tix, son sang kieh mawh siliex, phan: ang mawh nan: khaix hoik sidiex aux ka pui tang: kaux, ha tokaux aux kox sang mawh pa tik pa vud heue:.

Simin Ting 10

Pa tawx satix ka krax ot krax koe: pui Isarilax daux tiag daux tu

1 Puxaik khankix eue:, ang aux simie tix kieh pex mawh pa ang tawng, grawh grawng: tax du ex khawm: uik hoik ot greem: paiawm:, mai: khawm: uik hoik hu: preeng: ka rawm: sigrit sigra:, 2 mai: grawng: khawm: uik hoik baptis281 ka Mose, ka daux paiawm: mai: ka daux rawm: sigrit sigra:, 3 mai: grawmg: khawm: uik hoik yaox tix ih pa ih pa un: khwan: tix ceu khaing:, 4 mai: grawng: khawm: uik hoik yaox tix nyaux rawm: nyaux khwan: tix ceu khaing:, grawh grawng: nawh kix yaox tix nyaux khaing: rang: khwan: pa hawt khaix kix, mai: rang: an mawh Cao: Khrit heue:. 5 Viang mawh kawx nan: Siyiex ang khaw: ang caw rhawm: ka kix plak nie, grawh grawng: nawh hoik kieh kix laux leeing: ka daux tiag daux tu heue:. 6 Ceu in khankix hoik mawh riang mhai: sakse: ka ex, yuh ka mawx son ang ex sang ghoing: ka ceu pa caox khankix, awm: pa hoik ghoing: kix kah heue:. 7 Mai: paw vi lih mawh pui pa krub rieang krub rao, awm: hoik lih mawh kix tiblah. Awm: hoik tiem: tix deuh ah nin:,

282"Pui khankix ngawm tix ih, mai: nyaux, mai: kaoh tix yuh krax klieh heue:."

8 Mai: paw vi kieh ex phit vao, awm: hoik phit hoik vao kix tiblah, mai: hoik goh tix yum ra: mheen: mai: loe: rheng: ka daux tix singaix khaing:. 9 Mai: paw vi kieh ex cheu: tix yaox ka Simiang, awm: hoik cheu: kix tix yaox tiblah, mai: laux leeing: ka tawm: taix siuing: khankix. 10 Mai: paw vi sa lao awm: hoik sa lao kix tiblah, mai: laux leeing: ka tawm: taix cao: pa yuh laux heue:. 11 Ceu in khankix hoik lih tix kieh mawh riang mhai: sakse: ka son kix, mai: hoik tiem: tix deuh grawng: khankix son sang gau ka ex, pa mawh pui pa dee sidah bawg yam ju khankix, hoik hoek ka piang heue:. 12 Mawh kheu nan: kieh kaw pa ce: nawh cung, rien rhawm: tix phan: ang mawh nan:, ha nawh kox goh heue:. 13 Krax nyaw krax glaw: ang lai hoek ka piang pex tix ceu kawx pa ang kawn: pui pon kham: kah, viang mawh kawx nan: Siyiex mawh pa kaux sijax, pa tag ang kieh pex yaox krax nyaw krax glaw:, pa lheu: khaing: pa pon pex tix kham:, viang mawh nan: tau mai: krax nyaw krax glaw:, tag sang kieh koe: khawm: krax dee chix luan kah, yuh ka mawx son sang pon pex tix kham: ka krax nyaw krax glaw: heue:.

Kieh tix singax singeh mai: ih poi Cao:

14 Mawh kheu nan:, pui pa moh aux khankix eue:, to: khaing: ceu pa krub rieang krub rao awawx. 15 Aux sikah ka pex, awm: pa mawh pex pui pa tawng pa yung, pex keud prawng tix yaox grawng: pa krai aux heue:. 16 Kawk bwanson: pa nawb ex bwan: kah, mawh sijax mukheu pa dex mai: nham: Cao: Khrit ang mawh lie? Khaomun pa sivit ex kah, mawh sijax mukheu pa dex mai: tokaux Cao: Khrit ang mawh lie? 17 Mawh kheu ex pa mawh pui haoh pui hun:, ih ka khaomun an tix lon: khaing:, ex tom: mawh khaomun tix lon: khaing:, tokaux tix mu: khaing: heue:. 18 Jhak ka ceu Isarilax pa khaw: mai: nex nham: heue:. Kix pa ih pa tan pa lu, mawh pa yuh paox yuh pie mai: khu: dee tan ang mawh lie? 19 Phan: mawh nan: pa ah aux mawh pa yuh ka mawx? Sang ah, ceu pa tan pa lu ka rieang rao khankix, mawh tix ceu ceu, phan: ang mawh nan: rieang rao mawh tix ceu ceu lie? 20 Ang lai mawh nan:, ceu pa tan pa lu pui tang: ceu tang: cat khankix, mawh pa tan ka phicaox, mai: ang lai mawh pa tan ka Siyiex. Mai: ang aux rhawm: kieh pex yuh paox yuh pie mai: phicaox khankix heue:. 21 Pex ang pon tix nyaux ka kawk Simiang, mai: ka khawm: kawk phicaox khankix, pex ang pon tix ih ka pheen: Simiang, mai: ka khawm: pheen: phicaox khankix heue:. 22 Phan: ang mawh nan: ex cheeik tix kieh Simiang bohrhawm: bohrhi: kah lie? Ex nie lheu: ting riang khaing: Nawh Cao: lie?

Ih: nyaux yuh ceu tix ang ah yuh son sang koe: min: plak ngai: Siyiex

23 Koe: akhwang: tix pon yuh ku ceu khawm: uik, viang mawh kawx nan: to mhawm: ku ceu khawm: uik ang mawh. Koe: akhwang: tix pon yuh ku ceu khawm: uik, viang mawh nan: to mawh ku ceu khawm: uik pa chix kieh ting lhaong: ang mawh? 24 Paw kieh pui tix kaux kawx sawg bwanson: son tokaux tix, viang mawh nan: kieh nawh sawg son pui tang: kaux heue:. 25 Can pa coh ka daux lah, ih awawx, mai: paw chawk cheng: ka tid tix, kheu son dee chix keud chix tawng tix heue:.

28326 "Grawh grawng: nawh haktiex mai: can pa koe: ka daux nawh mawh cie Simiang heue:."

27 Phan: pui tix kaux kaux pa ang yumrhawm: ghaok ka pex, mai: phan: pex simie tix hu:, can pa deuh sivoe pex ih awawx, mai: paw chawk cheng: ka tid tix, kheu son dee chix keud chix tawng tix heue:. 28 Viang mawh nan: phan: pui tix kaux kaux ah nin: ka maix "In mawh pa hoik tan hoik lu ka rieang rao," paw vi ih, ka son kaw pa hoik krai an, mai: kheu son dee chix keud chix tawng heue:. 29 Dee chix keud chix tawng, pa ah aux, ang lai ah ka cie maix viang mawh nan: ah ka cie tang: kaux an heue:. Yuh ka mawx lai prawng ca: ka akhwang: aux ka dee chix keud chix tawng pui tang: kaux? 30 Phan: aux yaogyaw bwanson: mai: ih, yuh ka mawx lai ah lox caox grawh grawng: aux, ka grawng: ceu pa hoik yaogyaw aux bwanson: kah? 31 Mawh kheu nan: pex ih ang ah, nyaux ang ah, pex yuh ceu pa tix ang ah, yuh son sang koe: min: plakngai: Siyiex kah heue:. 32 Paw vi kieh mawh dee sideeing, ka son pui Yudax khankix ang ah, ka son pui Helasax khankix ang ah, ka son ceucao Siyiex ang ah heue:. 33 Awm: tokaux aux kawx, yuh son sang khaw: sang caw ka rhawm: pui khawm: uik, ka daux ku ceu khawm: uik, mai: ang lai sawg bwanson: son tokaux tix, viang mawh nan: sawg bwanson: son pui tom: nie, yuh ka mawx son sang hoek kix krax taoh heue:.

Simin Ting 11

Daux been krawk khrawm: mai: ih ka poi Cao:

1 Mawh kheu nan: kieh pex mawh pa hawt jawh tix yuh khaix aux, awm: tokaux aux kawx, mawh pa hawt jawh tix yuh ka Cao: Khrit heue:.

2 Aux yaogyaw ka pex, mawh kheu doh keud doh sawn: pex ka aux ka daux ku ceu khawm: uik, mai: kheu giex tom: cong: ka lox been pa hoik tawx aux ka pex khankix heue:. 3 Viang mawh kawx nan: aux simie tix kieh pex tawng, grawng: kaing: simex ku kaux mawh Cao: Khrit, mai: kaing: bon: mawh simex, mai: kaing: Cao: Khrit mawh Siyiex heue:. 4 Simex kaux pui mawx ang ah, yam rawg bwan:, phan: ang mawh nan: yam ah lox jhai:, phan: tawb kaing: tix, mawh pa yuh pa ang yung: yi: ka kaing: tix heue:. 5 Viang mawh kawx nan: bon: kaux pui mawx ang ah, yam rawg bwan:, phan: ang mawh nan: yam ah lox jhai:, phan: ang tawb kaing: tix ka man: tawb, mawh pa yuh pa ang yung: ang yi: ka kaing: tix. Grawh grawng: nawh, awm: mawh tix ceu khaing: mai: ang lai siyox khaing: hoik khlao: nawh kaing: tix heue:. 6 Grawh grawng: nawh phan: bon: ang tawb kaing: tix ka man: tawb, kieh nawh rhip tix tik ka khawm: hauk kaing: nawh, viang mawh kawx nan:, phan: pa hoik rhip hauk kaing:, phan: ang mawh nan: pa hoik khlao: kaing: mawh pa kaig tua ka son bon:, kieh nawh tawb kaing: tix ka man: tawb heue:. 7 Grawh grawng: nawh, simex tom: ang khaw: tix tawb kaing: tix ka man: tawb, kheu mawh nawh rieang pakpeung mai: min: plakngai: Siyiex, viang mawh nan: bon: mawh min: plakngai: simex heue:. 8 Grawh grawng: nawh simex ang lai lih mawh khaing: bon:, viang mawh nan: bon: hoik lih mawh khaing: simex heue:. 9 Viang mawh pa phan: pa yuh ka simex kawx, ang lai mawh son bon:, viang mawh nan: hoik phan: hoik yuh bon:, ka son simex heue:. 10 Mawh kheu jao in bon: khaw: tix koe: mhai: ka piang kaing: nawh, grawng: ot nawh greem: sibrawm mex tix, kheu kawncau Siyiex khankix heue:. 11 Viang mawh nan: kawx, ka daux Simiang bon: mawh pa tang: tiah khaing: simex ang mawh, viang simex kawx ang mawh pa tang: tiah khaing: bon: heue:. 12 Grawh grawng: nawh awm: bon: hoik lih mawh khaing: simex, viang simex kawx lih mawh kheu bon:. Viang mawh nan: ku ceu khawm: uik mawh, pa mawh khaing: Siyiex heue:. 13 Tokaux pex prawng ca: tix yaox, phan: bon: pa ang tawb kaing: tix ka man: tawb mai: rawg bwan: ka Siyiex khaw: lie? 14 Viang been pa lak tawng pui kawx gau ka pex, grawng: phan: simex koe: hauk kaing: pa lang: mawh pa yuh min: plakngai: nawh laux ang mawh lie? 15 Viang mawh kawx nan: phan: bon: koe: hauk kaing: pa lang:, mawh min: plakngai: ka nawh, mawh kheu hoik tawx hauk kaing: ka nawh, tang: man: tawb heue:. 16 Phan: pui tix kaux kaux koe: rhawm: tix sang thiang: ka grawng: been in, viang ex mai: khawm: ceucao Siyiex khankix kawx ang lai koe: been pa yuh nan: heue:.

Ah ka pui pa ang koe: simu mai: ih poi Cao:

17 Viang mawh nan: pa tawx aux lox tawm: in, ang mawh son sang yaogyaw ka pex. Mawh kheu pa khrawm: pex paox tix ang mawh son sang nie lheu: mhawm:, viang mawh nan: mawh son sang nie lheu: caox heue:. 18 Grawng: phaoxka: yam krawk khrawm: pex daux ceucao, aux mhong: grawng: lih koe: krax tang: gwieh pex paox tix, mai: aux kub yumrhawm: kah ceeix heue:. 19 Grawh grawng: nawh tag lai koe: cub pa tang: keud ka daux pex, son sang sidawng: kix pa mawh pa mhawm: ka daux pex heue:. 20 Mawh kheu nan: viang pex krawk khrawm: paox tix ka daux tix dah khaing: kawx, ang lai mawh son sang ih Priexbo Simiang. 21 Grawh grawng: nawh kaux pui mawx kaux pui an tang: grux ih priexbo tokaux tix, tix kaux kaux cairhawm:, mai: tang: kaux yoek kah heue:. 22 Yuh ka mawx hah, ang pex koe: nyiex son dee sang ih, sang nyaux lie? Phan: ang mawh nan: pex nieb yuh tix ang nab ang yam ka ceucao Siyiex, mai: yuh tix kieh kix pa ang koe: tid tix kaig tua kah lie? Aux tag sang ah ka mawx ka pex grawng: in? Aux tag sang yaogyaw pex kah lie? Ang aux lai yaogyaw pex kah heue:.

Grawng: simu ih ka poi Cao: mai: dee bleeh

11:23-25 koe: daux lai Mth. 26:26-28; Makux 14:22-24; Lukax 22:17-20

23 Grawh grawng: nawh, ceu pa hoik tawx hoik pong aux ka pex, mawh pa hoik pon aux khaing: Simiang. Pa mawh grawh mawh grawng: pa teei Simiang Yesux khaomun tix lon:, ka daux sawm: pa tik pa tawx ka Nawh, 24 mai: khaix hoik yaogyaw Nawh bwanson:, Nawh sivit khaomun an, mai: ah nin:, "Teei, ih, in mawh tokaux Aux, pa hoik sivit son pex, yuh ceu in son sang doh keud doh sawn: ka Aux heue:." 25 Awm: an Nawh Cao: teei ka khawm: kawk, khaix priexbo, mai: ah nin:, "Kawk in mawh sijax mukheu pa khraox ka daux nham: Aux, yuh yuh nin: awawx, pex nyaux miex bawg ang ah, son sang doh keud doh sawn: ka Aux heue:." 26 Grawh grawng: nawh pex ih ka khaomun in, mai: nyaux ka kawk in miex bawg ang ah, pex jhi: grawng: pa yum Simiang, tom: sang hoek Nawh Cao: heue:. 27 Mawh kheu nan: kaux pui mawx ang ah, pa ih ka khaomun, mai: ka kawk Simiang, ka daux krax pa ang keung:, tag sang mawh pa phit ka tokaux mai: nham: Simiang heue:. 28 Kieh pui chawk cheng: ka tokaux tix ka: ha:, mai: khaix hoik yuh nan: kieh nawh ih ka khaomun mai: nyaux ka kawk heue:. 29 Grawh grawng: nawh kaw pa ih mai: pa nyaux, ih mai: nyaux krax prawng krax ciyang ka piang tokaux tix tiru, phan: nawh ang tawng ang yaox ka Tokaux An heue:. 30 Mawh kheu jao in pui tom: nie, tom: koe: krax iak riang iak rao, mai: krax ang nyawm ot nyawm koe:, mai: pa laig it khankix kawx ang joeng mawh ngie ceeix khaing: heue:. 31 Viang mawh kawx nan: phan: ex hoik chawk cheng: grawng: in ka tokaux tix mhawm: mhawm:, ex tag ang hoek krax prawng krax ca: heue:. 32 Viang mawh nan: yam prawng ca: ka ex, mawh Simiang pa sivied tix gau ka ex, yuh ka mawx son ang ex sang hoek krax pa prawng pa ciyang phimap tau mai: pui haktiex khankix heue:. 33 Mawh kheu nan:, puxaik aux khankix eue:, yam krawk khrawm: pex paox tix tix sang ih, tix kaux lai tix kaux krox ka paox tix awawx. 34 Phan: pui tix kaux kaux cairhawm:, kieh nawh sawm: ka nyiex tix ha:, yuh ka mawx son pa khrawm: pex paox tix, tag ang mawh pa kieh pex pon krax prawng krax ciyang heue:. Can pa deuk khankix, aux hoek lai mawx ang ah, aux tag koi cox yam an heue:.

Simin Ting 12

Khawng: phak plak Khwan:

1 Puxaik khankix eue:, ang aux rhawm: kieh pex mawh pa ang tawng ka grawng: khawngphak pa dex mai: khwan: khankix. 2 Pex tawng grawng: yam mawh pex pui tang: ceu tang: cat, lak keud tix yuh ka mawx ang ah, tom: hoik tok pex hu: ka rieang rao pa aw: pa ang chix sikah yuh nan: heue:. 3 Mawh kheu nan: aux tom: kieh pex tawng, grawng: pui tix kaux kawx pa sikah ka daux Khwan: Siyiex ang lai ah, "Yesux mawh pa jhax pa lawg," mai: pui tix kaux kawx ang chix ah, "Yesux mawh Simiang," phan: ang mawh ka daux Khwan: Singax Singeh heue:.

4 Koe: khawngphak tom: haoh ceu, viang mawh nan: Khwan: Cao: koe: ngie tix kaux khaing: heue:. 5 Mai: koe: kaing pa cau pa soi: tom: haoh ceu, mai: Simiang mawh tix kaux khaing: heue:. 6 Mai: koe: kaing yuh tom: haoh ceu, viang mawh nan: Siyiex mawh tix kaux khaing:, pa mawh Cao: pa yuh ku ceu khawm: uik, ka daux khawm: uik heue:. 7 Viang mawh nan:, ka kaux pui mawx kaux pui an, hoik tawx ceu pa plak jhi: Khwan: Cao:, son sang pon bwanson: heue:. 8 Grawh grawng: nawh, tawx gumlox pingnya cuyi ka tix kaux kheu Khwan: Cao:, mai: tawx gumlox pa tawng pa yung ka tang: kaux, awm: pa khaw: mai: Khwan: an tix mu: khaing: heue:. 9 Ka tang: kaux tix kaux tawx krax yumrhawm: ka daux Khwan: Cao: an tix mu: khaing:, mai: ka tang: kaux tix kaux tawx khawngphak tix sang chix kieh jhawm: saux moi:, ka daux Khwan: Cao: an tix mu: khaing:, 10 mai: ka tang: kaux tix kaux tawx pa chix yuh kaing siawp sibrawm, mai: ka tang: kaux tix kaux tawx pa chix krai lox jhai:, mai: ka tang: kaux tix kaux tawx pa chix cheu: tix tawng ka khwan: khankix, mai: ka tang: kaux tix kaux tawx ceu pa chix tawng lox ceu pa tang: pa siyox khankix tom: nie ceu, mai: ka tang: kaux tix kaux tawx ceu pa chix teei lih dee bleeh lox ceu pa tang: pa siyox khankix heue:. 11 Viang mawh kawx nan:, ceu in khawm: uik mawh pa yuh Khwan: tix mu: khaing:, mai: gwieh tix tang: tawx ka kaux pui mawx kaux pui an awm: pa khaw: mai: alo Nawh heue:.

Pui yumrhawm: mawh tokaux Khrit, to koe: ceu pa yuh kaing jhaw:

12 Grawh grawng: nawh, awm: mawh tokaux tix mu: khaing:, mai: koe: kraung pakpeung tom: nie, mai: can kraung pakpeung tokaux khawm: uik pa koe: tom: nie, mawh tokaux tix mu: khaing:, Cao: Khrit kawx awm: an heue:.

13 Grawh grawng: nawh hoik mawh ka daux Khwan: tix mu: khaing: pa ex khawm: uik hoik baptis284 ka daux Tokaux tix mu: khaing:, viang mawh pui Yudax ang ah, phan: ang mawh nan: pui Helasax ang ah, viang mawh siliex ang ah, phan: ang mawh nan: pui ploi: ang ah, mai: hoik kieh khawm: uik nyaux ka Khwan: tix mu: khaing: heue:. 14 Grawh grawng: nawh tokaux ang joeng mawh ngie kraung pakpeung tix mu: khaing:, viang mawh nan: mawh tom: nie heue:. 15 Phan: caong ah, "Mawh kheu ang aux mawh taix, ang aux lai dex mai: tokaux," mawh kheu ah nan: ang nawh dex mai: tokaux lie? 16 Phan: yhaok ah, "Mawh kheu ang aux mawh ngai:, ang aux dex mai: tokaux," mawh kheu ah nan: ang nawh dex mai: tokaux lie? 17 Phan: tokaux khawm: uik mawh ngai:, pa chix mhong: tag koe: dee mawx? Phan: tokaux khawm: uik mawh pa chix mhong:, pa chix ngheut tag koe: dee mawx? 18 Viang mawh nan:, yamin Siyiex hoik ciak tix deuh can kraung pakpeung an ku mu: ka daux tokaux, awm: pa khaw: pa caw rhawm: Nawh heue:. 19 Lheu: khaing: an phan: kraung pakpeung khankix khawm: uik hoik mawh ngie kraung pakpeung tix mu: khaing:, tokaux tag koe: dee mawx? 20 Viang mawh kawx nan: yamin koe: kraung pakpeung tom: nie, viang mawh nan: koe: tokaux tix mu: khaing: heue:. 21 Mai: ngai: ang pon ah ka taix, "Ang aux lo ka maix," phan: ang mawh nan: kaing: kawx ang pon ah ka caong, "Ang aux lo ka maix," heue:. 22 Ang lai mawh nan:, kraung pakpeung pa mawh awm: grang pa iak riang iak rao khankix, mawh pa nie lheu: lo heue:.

Been pa shiao ka khawng: phak pa chix tix daux ceucao

23 Mai: ka kraung pakpeung tokaux khankix, pa ce: ex mawh pa yawm min: plakngai:, ex nie lheu: ting tawx min: plakngai: ka khankix heue:. Mai: kraung pakpeung ex pa ang nyawm tix jhak khankix, mawh pa nie lheu: nyawm tix jhak heue:. 24 Viang mawh nan: kraung pakpeung ex pa nyawm: tix jhak khankix, ang lai koe: dee lo kah, viang mawh nan: Siyiex hoik klao: hoik kleuk tokaux tau, mai: tawx min: plakngai: ka kraung pakpeung pa cud kah, 25 yuh ka mawx son tag ang lai koe: dee ang khaw: mai: pa tang: gwieh paox tix, viang mawh nan: yuh ka mawx son sang chix ra: lai keud tix kia: ngien ka paox tix, awm: paox tix heue:. 26 Mai: phan: kraung pakpeung tix mu: yaox krax kham: krax geu:, kraung pakpeung khawm: uik kawx kham: geu: tau mai: kraung pakpeung an heue:. Phan: ang mawh nan:, phan: tix mu: pon min: plakngai:, kraung pakpeung khawm: uik kawx gauxrhawm: tau mai: kraung pakpeung an heue:. 27 Pex mawh tokaux Cao: Khrit, mai: tang: mawh kraung pakpeung ka Nawh heue:. 28 Mai: Siyiex hoik ciak tix deuh ka daux ceucao, phaoxka: tix ceu, ka kawncau pa ting khankix, mai: ra: ceu tix ceu, cao: jhai: khankix, mai: loe: ceu tix ceu, sara cao: gau khankix, khaix an, kaing siawp sibrawm khankix, khaix an, khawngphak pa kieh jhawm: saux jhawm: ngia moi: khankix, mai: pa teem: pa coi khankix, mai: pa bung: pa giex kaing: khankix, mai: pa chix tawng ka lox ceu pa tang: pa siyox khankix tom: nie ceu heue:. 29 Mawh kawncau pa ting khawm: uik lie? mawh cao: jhai: khawm: uik lie? mawh sara cao: gau khawm: uik lie? mawh pa yuh kaing siawp sibrawm khawm: uik lie? 30 Koe: khawngphak pa chix kieh jhawm: saux jhawm: ngia moi: khawm: uik lie? Chix: sikah ka lox ceu pa tang: pa siyox khankix khawm: uik lie? Chix: teei lih dee bleeh lox khawm: uik lie? 31 Viang mawh kawx nan:, nied tix simie ka khawngphak, pa nie lheu: ting khaing: paox tix khankix awawx. Viang mawh nan: aux tag jhi: pex yaox krax pa nie lheu: lang: teung: mhawm: heue:.

Simin Ting 13

Shiao khawng: phak pa chix tix ka daux krax moh

1 Viang aux chix sikah ka lox pui khankix, mai: ka lox kawncau Siyiex khankix kawx, phan: ang koe: krax moh krax rhawm:, aux hoik lih mawh awm: lox bra tawng, phan: ang mawh nan: awm: lox luah chiang: heue:. 2 Mai: viang aux koe: khawngphak pa chix krai lox jhai:, mai: tawng ka pa raux pa mox khawm: uik, mai: ka krax tawng krax yung khawm: uik kawx, mai: viang aux koe: krax yumrhawm: tix sang chix gah ka gawng khankix kawx, phan: ang koe: krax moh krax rhawm:, aux mawh pa ang koe: bwanson: tid tix heue:. 3 Mai: viang aux gwieh tix tawx kraung khrai: aux, tix tawx pui ih kawx, mai: viang aux tawx tokaux tix, tix sang kieh gleeing ka ngu, phan: ang koe: krax moh krax rhawm: ang koe: bwanson: ka son aux tid tix heue:. 4 Krax moh krax rhawm: kienie, mawh pa chix gun chix yeung tom: lang:, mai: chix yuh bwanson:. Krax moh krax rhawm: ang lai chix ghoing:285 kah. Krax moh krax rhawm: ang lai yaw ka tokaux tix, mai: ang lai ting rhawm: ting rhi:, 5 ang lai nieb pon yuh pa ang khaw:, ang lai sawg bwanson: son tokaux tix, ang lai songrhawm: songrhi:, ang lai keud lai sawn: grawng: pa caox pa caig, 6 ang lai gauxrhawm: ka daux krax pa ang rah ang see, viang mawh kawx nan: chix gauxrhawm: ka daux pa mawh pa mex. 7 Tawb kheem: ka ku ceu khawm: uik, yumrhawm: ka ku ceu khawm: uik, keud pot jun pot ka ku ceu khawm: uik, mai: chix gun yeung ka ku ceu khawm: uik heue:. 8 Krax moh krax rhawm: kienie, ang chix jud chix jai, viang koe: lox jhai: khankix kawx, kix tag sang grai: grup heue:. Viang koe: pa chix ka lox ceu pa tang: pa siyox khankix kawx, tag sang jud sang jai heue:. Viang koe: krax tawng krax yung kawx, tag sang grai: grup heue:. 9 Grawh grawng: nawh pa tawng ex ang lai grum naog, mai: pa krai ex lox jhai: ang lai grum naog, 10 viang mawh kawx nan: yam hoik hoek ceu pa grum naog, tag sang kieh pa ang grum naog an grai: grup heue:. 11 Yam mawh aux kawn: nyawm, aux sikah awm: kawn: nyawm, aux keud awm: kawn: nyawm, mai: krax keud krax sawn: aux awm: kawn: nyawm heue:. Yamin kheu hoik riex ju aux, aux hoik tik ka ceu pa dex mai: kawn: nyawm heue:. 12 Yamin ex yaox ngie vuvi ka daux siliak khaing:, viang mawh nan:, yam an tag sang yaox kah, pakngai: taw: pakngai: heue:. Pa tawng aux yamin ang lai grum naog, viang mawh nan:, yam an, aux tag sang grum tawng, awm: pa hoik tawng ka aux heue:. 13 Viang mawh kawx nan:, yamin ca: kawn: koe:, krax yumrhawm:, krax keud pot jun pot, mai: krax moh krax rhawm:, in loe: ceu, mai: ka daux ceu in khankix, mawh krax moh krax rhawm: pa nie lheu: ting heue:.

Simin Ting 14

Khawng: phak pa blon: ting mawh pa sidiex pa krai lox jhai:

1 Hawt leue ka krax moh krax rhawm:, viang mawh nan: nied tix simie ka khawngphak pa dex mai: khwan: khankix, viang mawh nan: pex nie lheu: simie tix sang pon pa chix ah lox jhai: awawx. 2 Grawh grawng: nawh kaw pa sikah ka lox ceu pa ang pui tawng, ang lai sikah ka kawn: pui, viang mawh nan: sikah ka Siyiex, mawh kheu ang pui tix kaux kawx chix nghiet kah heue:. Viang mawh nan: nawh ah ceu pa raux pa mox ka daux khwan: heue:. 3 Viang mawh kawx nan:, kaw pa krai lox jhai:, sikah ka kawn: pui, son sang ting sang lhaong:, mai: son sang sidiex gau, mai: son sang nyawm rhawm: nyawm rhi: kah heue:. 4 Kaw pa sikah ka lox pa ang pui tawng, kieh ngie tokaux tix ting lhaong: khaing:, viang mawh nan:, kaw pa krai lox jhai: kieh ceucao ting lhaong: heue:. 5 Aux koe: rhawm: tix sang kieh pex chix sikah ka lox ceu pa tang: pa siyox khankix, viang mawh nan: aux nie lheu: koe: rhawm: tix sang kieh pex chix krai lox jhai: heue:. Grawh grawng: nawh kaw pa chix krai lox jhai: nie lheu: ting khaing: kaw pa chix sikah ka lox ceu pa tang: pa siyox khankix, phan: nawh ang plak jhi: dee bleeh, yuh ka mawx son sang ting lhaong: ceucao kah heue:. 6 Puxaik khankix eue:, phan: aux hoek ka pex mai: sikah ka lox ceu pa tang: pa siyox khankix, aux chix koe: bwanson: son pex yuh ka mawx? Phan: aux ang lai sikah ka pex ka krax pa plak jhi: pex yaox, phan: ang mawh nan: ka krax tawng krax yung, phan: ang mawh nan: ka krax pa krai lox jhai:, phan: ang mawh nan: ka krax pa gau. 7 Awm: an ceu pa ang koe: ju pa chix luah lox, pa mawh pi: lawkleh ang ah, phan: ang mawh nan: ting: ang ah, phan: lox pa luah kix ang koe: dee tang:, chix tawng grawng: lox pa phlu: pi:, phan: ang mawh nan: lox pa tah ting:, mawh lox pa yuh ka mawx lie? 8 Viang mawh teet tawng kawx phan: luah lox pa ang sidawng:, mawh mawx pa sang khre: tokaux tix son naing. 9 Awm: an pex kawx phan: pex ang ah lox pa yie tix nghiet kah, chix tawng ka lox pa krai an yuh ka mawx? Grawh grawng: nawh pex tag sang sikah ngie ka bhawm: heue:. 10 Tee: koe: ceu lox sikah tom: nie hun: ceu piang ca: haktiex in, mai: ceu mawx ceu an koe: dee bleeh nang: heue:. 11 Mawh kheu nan: phan: aux ang tawng dee bleeh lox an, aux tag mawh pui tang: ceu ka kaw pa sikah an, mai: kaw pa sikah an kawx tag mawh pui tang: ceu ka aux heue:. 12 Mawh kheu nan: viang pex kawx, viex khawm: rhawm: tix tix simie ka khawngphak pa dex mai: khwan: khankix, nied tix sawg tix sang nie lheu: grum ka daux ceu an khankix, pa sang kieh ceucao ting lhaong: kah heue:. 13 Mawh kheu nan: kieh kaw pa sikah ka daux lox ceu pa tang: siyox, rawg bwan:, son sang chix krai nawh dee bleeh heue:. 14 Grawh grawng: nawh phan: aux rawg bwan: ka daux lox ceu pa tang: pa siyox, mawh khwan: aux pa rawg bwan:, viang mawh nan: krax tawng krax yung aux ang koe: bwanson: heue:. 15 Phan: mawh nan: tag sang yuh ka mawx? Aux tag sang rawg bwan: ka daux khwan:, mai: aux tag sang rawg bwan: ka daux khawm: krax tawng krax yung heue:. Aux tag sang ah lox rhax ka daux khwan:, mai: aux tag sang ah lox rhax ka daux khawm: krax tawng krax yung heue:. 16 Phan: ang mawh nan:, phan: maix nawb bwan: ka daux khwan:, kaw pa ang chix, chix ah "Amen," yam yaogyaw maix bwanson:, kheu ang nawh tawng ka lox pa ah maix yuh ka mawx? 17 Grawh grawng: nawh pa yaogyaw maix bwanson: mhawm: tete telai, viang mawh nan: pui tang: kaux ang chix ting lhaong: kheu heue:. 18 Aux yaogyaw ka bwanson: Siyiex, kheu sikah aux ka lox ceu pa tang: pa siyox khankix, nie lheu: khaing: pex khawm: uik heue:. 19 Viang mawh kawx nan: phan: mawh daux ceucao, aux nie lheu: koe: rhawm: tix sang sikah ngie lox phwan: gum ka krax tawng krax yung aux, son sang gau ka pui tang: kaux khankix khaing: pa sikah lox ceu pa tang: pa siyox tix mheen: gum heue:.

20 Puxaik khankix eue:, paw kieh mawh kawn: nyawm ka daux krax pa tawng pa yung pex, viang mawh kawx nan: ka daux krax pa caox pa caig kieh pex mawh kawn: ngie:, viang mawh nan: ka daux krax pa tawng pa yung kieh mawh pa hoik riex ju awawx. 21 Ka daux lai been li hoik tiem: tix deuh ah nin:,

286"'Aux tag sang sikah ka pui ceu in ka dak ceu pa tang: pa siyox, mai: ka siyieb jheeh pui pa tang: pa ang meed ang leen, mai: viang yuh nang: nan: kawx kix ang nghiet ka Aux,' Simiang ah nan: heue:."

22 Mawh kheu nan: ceu lox pa sikah pa tang: pa siyox khankix, mawh son sang mawh mhai: ka kix pa yumrhawm: khankix ang mawh, viang mawh nan: mawh son kix pa ang yumrhawm: heue:. Viang mawh nan: kawx pa ah lox jhai: mawh mhai: son kix pa yumrhawm: khankix, mai: ang mawh ka son kix pa ang yumrhawm: heue:. 23 Mawh kheu nan yam krawk khrawm: pui ceucao paox tix khawm: uik, phan: khawm: uik lai sikah ka lox ceu pa tang: pa siyox khankix, mai: phan: pui pa ang chix, phan: ang mawh nan: pa ang yumrhawm: hoek tix laig, kix tag sang ah, "Yhot pex heue:." Ang mawh lie? 24 Viang mawh nan: phan: khawm: uik ah lox jhai:, mai: phan: pui tix kaux pa ang yumrhawm:, phan: ang mawh nan: pa ang chix, hoek tix laig, pui ceucao khawm: uik plak jhi: phimap nawh, mai: chawk cheng: tix prawng ka nawh heue:. 25 Ceu pa hoik mox ka daux rhawm: rhi: nawh, plak kieh sidawng: kah. Mawh kheu nan: nawh tag sang goh gup, tix krub Ka Siyiex, mai: ah nin:, "Siyiex ot ka sinax pex tete heue:."

26 Phan: mawh nan:, puxaik khankix eue:, tag sang yuh ka mawx? Yam krawk khrawm: pex paox tix, kaux pui mawx kaux pui an tang: koe:, lox rhax yaogyaw, phan: ang mawh nan: koe: lox pa sang gau kah, phan: ang mawh nan: koe: pa sang plak jhi: kieh yaox, phan: ang mawh nan: koe: pa sikah ka lox ceu pa tang: pa siyox, phan: ang mawh nan: koe: pa teei lih dee bleeh heue:. 27 Phan: pui tix kaux kaux sikah ka lox ceu pa ang pui tawng, kieh sikah, ra: kaux, mai: paw doh kieh lheu: khaing: loe: kaux, kieh sikah tix kaux hoik tix kaux, mai: kieh tix kaux krai dee bleeh heue:. 28 Viang mawh nan: phan: ang koe: cao: pa krai dee bleeh, kieh kaw pa sikah yuh nan: yawg tix ka daux ceucao, mai: kieh nawh sikah ka tokaux tix mai: ka Siyiex khaing: heue:. 29 Mai: kieh cao: jhai: khankix sikah ra: kaux, phan: ang mawh nan: loe: kaux, mai: kieh pui tang: kaux khankix keud tix chix gwieh chix prawng ka lox an heue:. 30 Viang mawh nan: phan: plak jhi: kieh yaox tix ceu ceu ka tang: kaux yam ngawm nawh, kieh kaw phaoxka: yawg tix heue:. 31 Grawh grawng: nawh, can pex khawm: uik pon tix krai lox jhai:, tix kaux hoik tix kaux, yuh ka mawx son khawm: uik sang pon tix sawn: tix gau kah, mai: son sang pon pa nyawm rhawm: khawm: uik heue:. 32 Mai: khwan: cao: jhai: khankix, mawh pa cu pa ot greem: ka cao: jhai: khankix. 33 Grawh grawng: nawh, Siyiex ang lai mawh Siyiex pa kieh sungsang, viang mawh nan: mawh Siyiex pa nhim: heue:.

Awm: ka daux ceucao pui pa singax singeh khankix khawm: uik, 34 kieh bon: khankix yawg tix ka daux ceucao khankix awawx. Grawh grawng: nawh ang kix koe: akhwang: tix sikah, viang mawh nan: kieh kix mawh pa ot greem:, awm: pa khaw: mai: lox pa krai lai been li heue:. 35 Viang mawh nan: phan: kix simie tix sawn: tix gau ka tix ceu ceu, kieh kix chawk ka mex tix, ka nyiex, grawh grawng: nawh phan: bon: sikah ka daux ceucao mawh pa kaig pa tua heue:. 36 Mawh pa yuh ka mawx? Khex kaoh gumlox Siyiex khaing: pex lie? Phan: ang mawh nan: hoik hoek ngie ka pex nong: lie?

37 Phan: pui tix kaux kaux ce: tokaux tix mawh cao: jhai:, phan: ang mawh nan: pa dex mai: khwan:, kieh nawh rieb tix teei grawng: ceu pa tiem: aux ka pex khankix mawh lox tawm: Simiang heue:. 38 Viang mawh nan: phan: pui tix kaux kaux mawh pa ang tawng, kieh nawh kawn: ca: mawh pa ang tawng awawx.

39 Mawh kheu nan:, puxaik aux khankix eue:, nied tix simie tix chix krai lox jhai:, mai: paw kieh paw raw ka tix sikah ka lox ceu pa tang: pa siyox khankix. 40 Viang mawh nan: kieh yuh ku ceu khawm: uik awm: pa khaw: mai: pa nyawm tix jhak heue:.

Simin Ting 15

Pa deeh kaoh im: Cao: Khrit

1 Lheu: khaing: an, puxaik khankix eue:, aux baox kieh pex tawng grawng: lox bwan: gauxrhawm: gauxrhi: pa hoik sidiex aux ka pex, pa pex kawx hoik rieb tix teei kah, mai: dee ot dee cung pex kah, 2 pa mawh dee sang pon hoek pex krax taoh kheu, phan: pex giex tom: kaux tom: cong: ka gumlox pa hoik sidiex aux ka pex, mai: phan: pex ang hoik nieb yumrhawm: kah giex going heue:. 3 Grawh grawng: nawh ka: sivoe paox tix khawm: uik, aux hoik tawx hoik pong ka pex, pa mawh ceu pa hoik pon aux, grawng: pa hoik yum Cao: Khrit son phimap phigrham: ex, awm: pa khaw: mai: lox phuk lai sigang: khri:, 4 mai: grawng: pa hoik sipaung: Nawh, mai: pa hoik kieh Nawh Cao: deeh kaoh, khaix daux loe: singaix, awm: pa khaw: mai: lox phuk lai sigang: khri:, 5 mai: grawng: pa hoik lih bleeh Nawh ka Kephax, mai: khaix an ka kix kao: kaux ra:. 6 Khaix an Nawh Cao: lih bleeh ka puxaik pa lheu: phwan: yieh tix dom: neh, mai: kix plak nie kawn: deuk kawn: koe: tom: yamin, viang mawh nan: tiblah hoik laig it heue:. 7 Khaix an Nawh lih bleeh ka Yakop, mai: khaix an ka kawncau pa ting khawm: uik. 8 Mai: ghoik khaix khawm: uik Nawh Cao: lih bleeh khawm: ka aux, pa mawh kawn: pa keh daux bawg yam pa ang khaw: heue:. 9 Grawh grawng: nawh aux mawh pa nie iak ka daux kawncau pa ting khankix, pa ang keung: tix kok mawh kawncau pa ting, mawh kheu aux hoik tuktiak tukte: ka ceucao Siyiex heue:. 10 Viang mawh kawx nan: mawh kheu bwanson: Siyiex aux pon tix mawh, awm: pa mawh aux, mai: bwanson: cie Nawh pa hoik tawx ka aux, ang lai kieh mawh pa giex going, viang mawh nan: aux hoik nied tix nie lheu: blon: yuh khaing: kix khawm: uik, viang mawh nan: ang mawh aux pa yuh, mawh bwanson: Siyiex pa ot tau mai: aux pa yuh heue:. 11 Mawh kheu nan: viang mawh aux ang ah, phan: ang mawh nan: mawh kix ang ah, ex sidiex nang: yuh nin:, mai: pex hoik yumrhawm: ka yuh nin: heue:.

Pa ting ceu krax pa deeh kaoh im: Cao: Khrit

12 Yamin phan: hoik sidiex grawh grawng: pa deeh kaoh im: Cao: Khrit khaing: krax yum, ka daux pex tiblah lai ah, "Ang lai koe: ceu pa deeh kaoh im: khaing: krax yum," yuh ka mawx? 13 Viang mawh nan:, phan: ang lai koe: pa dee kaoh im: khaing: krax yum, pie ka Cao: Khrit kawx, ang lai kieh deeh kaoh heue:. 14 Mai: phan: ang nyang kieh Cao: Khrit deeh kaoh, ceu pa sidiex ex mawh pa ang koe: bwanson:, mai: pa yumrhawm: pex kawx ang koe: bwanson: heue:. 15 Lheu: khaing: mawh nan:, ex hoik mawh cao: pa kham: mhai: sakse: pa ang mawh ang meh grawng: Siyiex, mawh kheu ex hoik kham: mhai: sakse: grawng: Siyiex, ka grawh grawng: Nawh Cao: hoik kieh Cao: Khrit deeh kaoh, pa mawh Kaw pa ang Nawh Cao: deeh kieh kaoh, phan: ang lai kieh pa yum deeh kaoh kah tete. 16 Grawh grawng: nawh phan: ang lai kieh pa yum deeh kaoh kah, pie ka Cao: Khrit kawx, ang lai kieh deeh kaoh kah heue:. 17 Viang mawh nan:, phan: ang nyang kieh Cao: Khrit deeh kaoh, krax yumrhawm: pex ang koe: bwanson: tid tix, mai: pex kawn: ca: ot ka daux phimap phigrham: tix heue:. 18 Lheu: khaing: an, kix pa hoik laig it ka daux Cao: Khrit khankix kawx, hoik laux leeing: heue:. 19 Phan: ex hoik keud pot jun pot ngie ka daux Cao: Khrit khaing: ka daux ju in, ex mawh pa khaw: tix caoxrhawm: kah, nie lheu: khaing: can pui khawm: uik heue:.

20 Viang mawh kawx nan:, yamin, hoik kieh Cao: Khrit deeh kaoh im: khaing: krax yum, pa mawh plix pa liang tix plix khaing: daux kix pa hoik laig it heue:. 21 Grawh grawng: nawh, mawh kheu krax yum hoik hoek kheu pui tix kaux, viang ceu pa deeh kaoh im: khaing: krax yum kawx, hoik hoet kheu Pui tix kaux heue:. 22 Grawh grawng: nawh, awm: yum pui khawm: uik ka daux Adam, awm: an tag sang kieh pui im: khawm: uik ka daux Cao: Khrit heue:. 23 Viang mawh nan: kawx, kaux pui mawx kaux pui an, yam caw glhawk nawh, Cao: Khrit pa mawh plix liang, khaix an yam hoek Nawh Cao:, kix pa mawh cie Cao: Khrit tag sang pon tix im: heue:. 24 Khaix an hoek bawg yam sidah, yam tag sang tawx sang pong Nawh Cao: meung an ka Siyiex, pa mawh Keeing: Cao:, khaix hoik yuh Nawh laux paklawg ka ceu pa giex kaing: khawm: uik, mai: min: plakngai:, mai: siawp sibrawm khawm: uik heue:.

28725 "Grawh grawng: nawh, Nawh tag sang giex kaing: tom: sidah hoik kieh Nawh pui pa koeng ka Nawh khawm: uik, ot greem: caong Nawh heue:."

26 Ceu pa koeng pa tag sang yuh laux ghoik khaix paox tix mawh krax yum heue:.

28827 "Grawh grawng: nawh, Nawh Cao: tag sang teei tix deuh can pa koe: ku ceu khawm: uik ka greem: caong Nawh heue:."

Viang mawh nan: yam ah Nawh Cao:, "Tag sang teei tix deuh can pa koe: ku ceu khawm: uik ka greem: Nawh," hoik sidawng: grawng: ang lai ah ka Kaw pa mawh Cao: pa kieh can ku ceu khawm: uik ot ka greem: Nawh heue:. 28 Mai: khaix hoik kieh can ku ceu khawm: uik ot ka greem: Nawh, khaix an tokaux Kawn: Cao: kawx, tag sang ot ka greem: Cao: pa hoik kieh can ku ceu Siyiex ku ceu khawm: uik, ka daux khawm: uik heue:.

29 Phan: ang mawh nan: kix pa baptis289 rawm: tang: pui pa hoik yum, tag sang yuh ka mawx? Phan: raux ang kieh pui yum deeh kaoh kah tete, kix lai baptis rawm: ka tang: kix yuh ka mawx? 30 Mawh kheu pa tix, ex kawx, lai yaox krax lhat krax caox ku nari? 31 Puxaik khankix eue:, aux ca: yum ku singaix, kheu pa yaw rangdi ka grawng: pex, pa koe: aux ka daux Simiang ex Yesux Khrit heue:. 32 Phan: aux hoik lah paox tix ka totiag hawt been pui ka veng Efesux, koe: bwanson: son aux yuh ka mawx? Phan: pa yum ang lai deeh kaoh,

290"Kieh ex ih mai: nyaux, grawh grawng: nawh pasax ex tag yum heue:."

33 Paw kieh pie ka tokaux tix, ceu pa yuh paox yuh pie ka pa caox pa caig, chix kieh been pa yuh pa mhawm: laux heue:. 34 Siduad tix priex rhawm: tix ka pa rah pa see, mai: paw lai kawn: baox yuh phimap, grawh grawng: nawh pui tiblah ang lai tawng grawng: Siyiex. Pa ah aux nan:, mawh son sang kieh pex kaig tua heue:.

Tokaux pa deeh kaoh im:

35 Viang mawh nan: tix kaux kaux tee: sang chawk ah nin:, "Tag sang kieh pa yum deeh kaoh yuh ka mawx? Mai: yam deeh hoek kix, kix tag sang koe: tokaux pa yuh ka mawx?" 36 Maix pa mawh pui daox eue:, phan: simie pa rhuat maix ang laux, nawh ang lai chix im: chix kuah, 37 mai: yam rhuat maix simie, maix ang lai rhuat tokaux pa tag sang mawh sax, viang mawh nan: rhuat ngie simie giex, viang mawh simie nghoxca ang ah, phan: ang mawh nan: simie tang: ceu ang ah, 38 mawh Siyiex heue:, pa tawx tokaux ka simie an, awm: pa khaw: pa caw rhawm: Nawh, mai: pa tang: tawx tokaux ka simie ceu mawx simie ceu an heue:. 39 Ceu nex khawm: uik ang lai mawh ngie nex tix ceu khaing:, viang mawh nan: koe: nex pui tix ceu, mai: nex tosat tix ceu, mai: nex sim: tix ceu, mai: nex kax tix ceu heue:. 40 Viang tokaux raoma: khankix kawx koe: nang:, mai: tokaux haktiex khankix kawx koe: nang:, viang mawh nan: min: plakngai: tokaux raoma: mawh tix ceu, mai: min: plakngai: tokaux haktiex mawh tang: ceu heue:. 41 Singaix koe: min: plakngai: tix ceu, mai: khix koe: min: plakngai: tang: ceu, mai: simuing: khankix kawx koe: min: plakngai: tang: ceu, ang mawh ngie nan:, pie min: plakngai: simuing: mawh simuing: an kawx tang: siyox kah heue:. 42 Ceu pa deeh kaoh im: khaing: krax yum kawx awm: an heue:. Yam rhuat nawh mawh ka daux pa cu pa sium:, yam deeh kieh nawh kaoh mawh ka daux pa ang chix cu chix sium: heue:. 43 Yam rhuat nawh mawh ka daux pa ang koe: min: plakngai:, yam deeh kieh nawh kaoh mawh ka daux min: plakngai: heue:. Yam rhuat nawh mawh ka daux pa iak riang iak rao, yam deeh kieh nawh kaoh mawh ka daux siawp sibrawm heue:. 44 Yam rhuat nawh mawh tokaux pa dex mai: nex nham:, yam deeh kieh nawh kaoh mawh tokaux pa dex mai: khwan: heue:. Phan: koe: tokaux pa dex mai: nex nham:, viang tokaux pa dex mai: khwan: kawx koe: heue:. 45 Awm: hoik tiem: tix deuh ah nin:,

291"Mai: Adam pa mawh pui ka: sivoe paox tix, hoik lih mawh ju pa im:."

mai: Adam pa mawh khaix, lih mawh khwan: pa tawx ju pa im: heue:. 46 Viang mawh nan: kawx, ang lai mawh pa dex mai: khwan: ka: sivoe paox tix, viang mawh nan: mawh pa dex mai: nex nham: phaoxka:, mai: khaix tom: mawh pa dex mai: khwan: heue:. 47 Pui pa koe: ka: sivoe paox tix an, kheu hoik mawh khaing: tiex, tom: mawh pa dex mai: haktiex heue:. Pui ra: kaux tix kaux an, hoik mawh khaing: raoma: heue:. 48 Kix pa dex mai: haktiex khankix, awm: kaw pa dex mai: haktiex an heue:. Mai: viang kix pa dex mai: raoma: kawx, awm: Kaw pa dex mai: raoma: an heue:. 49 Awm: hoik koe: ex rieang pakpeung pa dex mai: haktiex, viang rieang pakpeung pa dex mai: raoma: kawx, ex tag sang koe: heue:.

Pa raux pa mox krax pa deeh kaoh im:

50 Puxaik khankix eue:, aux ah nin:, mawh kheu nex mai: nham: ang lai pon tix cie sin: meung Siyiex, viang pa cux pa sium: kawx, ang lai pon tix cie sin: pa ang chix cux chix sium: heue:. 51 Jhak heue:, aux tag sang krai ka pex, lox pa raux pa mox tix ceu. Ex can pa koe: khawm: uik tag ang lai laig it, viang mawh nan: ex khawm: uik tag sang tieh sang loh, 52 ka daux tix vud khaing:, ka daux tix khiep ngai: khaing:, yam phlu: teet tawng bawg ghoik khaix heue:. Grawh grawng: nawh tag sang phlu: teet tawng, mai: tag sang deeh kieh pa yum kaoh, ka pa ang chix cux chix sium:, mai: ex tag sang tieh sang loh kah heue:. 53 Grawh grawng: nawh ceu pa cux pa sium: in tag sang ceep ka pa ang chix cux chix sium:, mai: ceu pa chix yum in tag sang ceep ka ceu pa ang chix yum heue:. 54 Viang mawh kawx nan: khaix ceu pa chix cux chix sium: in hoik ceep ka ceu pa ang chix cux chix sium:, mai: ceu pa chix yum in hoik ceep ka ceu pa ang chix yum, yam an tag sang mawh awm: lox pa hoik tiem: tix deuh ah nin:,

292"Ceu pa pex hoik bleet ka krax yum uik heue:."

29355 "Pa yum eue:, pa pex maix koe: dee mawx? Pa yum eue:, nyeeig maix koe: dee mawx?"

56 Nyeeig pa yum mawh phimap, mai: siawp sibrawm mawh lox lai been li heue:. 57 Viang mawh nan: yaogyaw bwanson: Siyiex, pa hoik tawx ex pex kheu Simiang ex Yesux Khrit heue:. 58 Mawh kheu nan: puxaik pa moh aux khankix eue:, kaux cong:, paw kieh chix gah chix greed mai: nied tix yuh kaing Simiang ku jheeng: jheeng:, mawh kheu tawng pex grawng: kaing pa yuh pex ka daux Simiang ang lai mawh pa giex pa going heue:.

Simin Ting 16

Krax pa sidiex tawx riang rao mai: pa nawb bwan:

1 Grawh grawng: krax tan krax lu son pui pa singax songeh khankix, aux hoik tawx lox ka ceucao Kalatix khankix, pex kawx yuh awm: an awawx. 2 Daux aliah singaix singaix tix, kieh pex kaux pui mawx kaux pui an gwieh tix een: mai: priex ka kraung tix, awm: pa pon nawh tix koe:, yuh ka mawx son tag ang lai koh pa tan pa lu yam hoek aux heue:. 3 Mai: yam hoik hoek aux, pex khaw: pex caw rhawm: ka pui mawx ang ah, aux tag sang ploi: kix viex lai, mai: teei tix tawx bwanson: pa tan pa lu pex ka veng Yerusaliem heue:. 4 Viang mawh nan: phan: aux kawx khaw: tix hu:, kix tag sang hu: tau mai: aux heue:. 5 Yam hu: preeng: aux ka meung Makedonix lai mawx ang ah, aux tag sang hoek ka pex, grawh grawng: nawh aux tag sang hu: preeng: ka meung Makedonix heue:. 6 Mai: aux tee: ot tau mai: pex tix vong, phan: ang mawh nan: yaox tix ot tom: sidah yam kuat yung, yuh ka mawx son sang pon hu: tawx pex aux ka krax dee hu: aux dee mawx ang ah heue:. 7 Grawh grawng: nawh ang aux simie tix yaox pex yam hu: krax yamin, mawh kheu aux keud pot jun pot tix sang yaox tix ot mai: pex tix vong vong, phan: Simiang tawx akhwang: heue:. 8 Viang mawh kawx nan: aux tag sang ot ka veng Efesux tom: hoek yam poi Pientekote. 9 Grawh grawng: nawh hoik paoh siviex pa ting, dee sang pon aux tix yuh, mai: pui pa sang kieh sang raw kawx haoh hun: heue:.

10 Phan: Timose hoek, yuh son sang ot nawh tau mai: pex ka daux pa ang koe: krax lhat krax graung awawx, grawh grawng: nawh, nawh kawx yuh kaing jhaw: Simiang, awm: yuh aux nawh heue:. 11 Mawh kheu nan: paw kieh pui tix kaux kawx nieb pon yuh ka nawh awawx. Viang mawh kawx nan: pex ploi: nawh phlat hoek ka aux nhim: mhawm: mhawm:, kheu aux ca: keud pot son sang hoek nawh tau mai: puxaik khankix heue:. 12 Phan: mawh grawng: Apawlux pa mawh puxaik, aux hoik khyox khaw: nawh tom: nie son sang hoek nawh ka pex tau mai: puxaik khankix, mai: ang nawh doh rhawm: hu: ceeix kawx yamin, viang mawh nan: nawh tag sang hoek, phan: nawh pon bawg yam tix sang pon hoek sax heue:.

13 Pau tix jhak heue:, cung kaux cong: ka daux krax yumrhawm:, yuh kieh awm: simex, kieh ting riang ting rao awawx. 14 Can pa yuh pex khawm: uik kieh yuh ka daux krax moh krax rhawm: heue:.

15 Puxaik khankix cue:, aux khyox khaw: ka pex, pex hoik tawng grawng: geh nyiex Sathephanax, pa mawh plix pa liang khankix ka daux meung Akhayax, mai: grawng: hoik deuh kix tokaux tix, tix yuh son pui pa singax singeh khankix, 16 pex kawx cu nghiet ka kix pa awm: khankix, mai: ka khawm: ku kaux pa rom tix yuh kaing, mai: pa nyhap pa mao kah heue:. 17 Aux gauxrhawm: kheu hoik hoek Sathephanax, mai: fawtunatux, mai: Akhayakhux, grawh grawng: nawh ceu pa taig pa cug pex, kix hoik baox tiien grum heue:. 18 Grawh grawng: nawh kix hoik kieh rhawm: aux mai: khawm: rhawm: pex nyawm rhawm: kah heue:. Mawh kheu nan: yuh tix tawng mhawm: mhawm: ka pui pa yuh nan: heue:.

19 Ceucao meung Asix khankix nawb ka pex heue:. Akulax mai: Prisikilax nawb ka pex tom: nie ka daux Simiang, tau mai: khawm: ceucao pa koe: ka daux nyiex kiex heue:. 20 Puxaik khawm: uik nawb ka pex heue:. Tix kaux lai tix kaux nawb ka paox tix ka pa ngheut pa singax singeh awawx.

21 Aux Pawlux tiem: nawb ka pex, ka taix tokaux tix heue:. 22 Phan: pui tix kaux kaux ang moh ka Simiang, kieh nawh mawh pa jhax pa lawg kah awawx. Simiang ex eue: hoek heue:. 23 Kieh bwanson: Simiang Yesux Khrit ot mai: pex liak. 24 Kieh krax moh krax rhawm: aux ot mai: pex khawm: uik ka daux Yesux Khrit. Amen.