Lai Yonax (Jonah)

Simin Ting 1

1 Gumlox Simiang Siyiex lih hoek ka Yonax kawn: simex Amitie: ah nin:,

2 "Kaoh hu: ka veng ting Nineve kok yo mai: ghlat ka kix, mawh kheu krax pa caox pa caig yuh kix hoik hoek ka plak sivoe ngai: Aux."

3 Viang mawh nan: Yonax keud tix sang to: mox tix ka veng Tasux, khaing: plak sivoe ngai: Siyiex mai: nawh lih hu: ka veng Yawppax, mai: yaox reu ting tix lam pa sang hu: ka veng Tasux, mai: nawh tawx ngawh brug tix reu, nawh laig ka daux reu, mai: brug reu hu: tau mai: kix ka daux veng Tasux, khaing: plak sivoe ngai: Siyiex heue:.

Lih Bhaung: Ting Daux Rawm: Sigrit Sigra:

4 Yam an Siyiex kieh bhaung: ting lih ka piang rawm: sigrit sigra:, bhaung: ting phlu: piang rawm: sigrit sigra:, tom: dex sang laux reu ting heue:.

5 Yam an pui yuh kaing daux reu ku kaux kied lhat graung, mai: pui ku kaux kok yo ka siyiex mawx siyiex an, mai: kix teei tix tik kraung tiblah ka daux rawm:, son sang chaong: reu ting kah, yam an Yonax kied laig it ka daux lawg plak greem: reu ting heue:.

6 Mawh kheu nan:, cao: kaing: reu hu: ka nawh, mai: ah nin:, "Pui pa laig it eue:! yuh ka mawh maix lai laig it, kaoh! mai: rawg bwan: ka siyiex maix, ha siyiex maix siep doh keud ka ex, mai: taoh ex khaing: krax pa laux pa leeing: in nieh."

7 Khaix an pui pa ot ka daux reu "Phaw: tix yuh niieb, son sang tawng kix grawng: in, mawh kheu pui mawx?" Mai: kix niieb tix yaox mai: caw ka Yonax heue:.

8 Mawh kheu nan: kix chawk ka nawh ah nin:, "Mawh pui mawx pa kieh ceu in hoek ka piang ex, krai ex mhong: liak? Mawh yuh maix kaing pa tix? Mawh kaoh maix khaing: dee mawx? Mawh maix pui meung mawx? Mawh maix pui ceu tix?"

9 Nawh deeh pawk ah nin: ka kix, "Aux mawh ceu pui Hebrie, pa lhat graung ka Siyiex Cao: raoma:, Cao: pa phan: haktiex mai: rawm: sigrit sigra:, mai: aux mawh pa to: khaing: plak sivoe ngai: Siyiex heue:."

Grawng: Taing Sau: Yonax Daux Rawm: Sigrit Sigra:

10 Pui khankix nie koe: krax lhat krax graung kah, mai: kix chawk nawh ah nin:, "Maix lai yuh nin: yuh ka mawx?" Mawh kheu krai nawh grawng: tix ka kix, kix tom: tawng mawh nawh pa to: khaing: plak sivoe ngai: Siyiex heue:.

11 Khaix an kix chawk ka nawh ah nin:, "Mawh kheu nie ting bhaung:, mai: puk pak rawm:, son sang yien: yawg bhaung:, ex sang caw tix yuh ka mawh ka maix?"

12 Mai: nawh ah nin: ka kix, "Pex yaog tix taing sau: aux daux rawm: sigrit sigra:, phan: pex yuh nan: rawm: sigrit sigra: tag yien: yawg hu: heue:. Aux tawng bhaung: ting in hoek ka piang pex mawh kheu jao aux heue:."

13 Viang mawh nan: kix coca: tix vai: reu son sang hoek ka praok rawm:. Viang mawh nan: mawh kheu nie ting bhaung:, mai: kix ang lai pex lai pon heue:.

14 Mawh kheu nan: kix kok yo ka Simiang Siyiex ah nin:, "Simiang Siyiex eue:, yix khyox khaw: ka Maix, paw doh kieh yix laux leeing: kheu jao pui in, mai: paw kieh nham: pui pa ang koe: phimap phighram: hoek ka piang yix liak! Simiang Siyiex eue:, Maix hoik yuh awm: pa koe: alo Tix heue:."

15 Yam an kix yaog tix taing sau: Yonax daux rawm: sigrit sigra: heue:.

16 Yam an puk pak rawm: sigrit sigra: kawx yien yawg hu: heue:. khaix an kix lhat graung ka Simiang Siyiex, mai: yuh krax tan krax lu, mai: yuh sijax mukheu ka siyiex heue:.

17 Yam an Simiang Siyiex khre: rien kax ting tix mu:, kieh bleet ka Yonax, mai: Yonax ot ka daux vaig kax ting loe: singaix loe: sawm: heue:.

Simin Ting 2

Lox Rawg Yonax Bwan:

1 Khaix an Yonax ot ka daux vaig kax ting mai: rawg bwan: ka Siyiex tix,

2 mai: nawh ah nin:, "Yam yaox aux krax kharhawm: kharhi: aux kok yo ka Siyiex, mai: Nawh Cao: pawk lox aux heue:. Yam ot aux daux meung yum mai: riag yo, Maix Cao: mhong: ka lox aux heue:.

3 Mawh kheu Maix Cao: hoik teei tix sau: aux daux dee raux sigreung rawm:, rawm: sigrit sigra: hoik vung viang aux, mai: puk pak rawm: cie Maix khankix hoik kheem: ka piang aux heue:.

4 Aux ah nin:, 'kheu mawh aux pui pa hoik tik tix khaing: sivoe ngai: Maix Cao:, aux keud tix ang lai yaox ka nyiex bwan: pa singax singeh Maix Cao: heue:.'

5 Rawm: khankix hoik rob vung viang aux, tom: dex sang yum aux, mai: dee pa raux sigreung rawm: hoik ot vung viang aux, rib riem rawm: sigrit sigra: khankix hoik vung vhiien: ka kaing: aux heue:.

6 Aux hoik lih bleeh ka num: caong gawng, mai: jhong: siviex haktiex hoik nyeep ka aux leeing: ju, viang mawh nan: Siyiex aux eue:, Maix Cao: tag sang taoh ju aux lih khaing: dung raux daux nu heue:.

7 Yam khrup rhawmrhi: aux, aux doh keud ka Simiang Siyiex, mai: lox rawg aux bwan: hoik laig hoek ka plak sivoe ngai: Maix Cao:, ka daux nyiex bwan: pa singax singeh Maix Cao: heue:.

8 Pui pa yungyi: ka rieng rao pa giex pa going khankix, kix hoik tik vud krax caox rhawm: siyiex tix heue:.

9 Viang mawh nan: aux tag sang yaogyaw ka Maix ka daux pa tan pa lu pa ap peung ka Maix; mai: tag yuh sijax mukheu awm: pa hoik ah aux tix yuh heue:. Bwanson: krax taoh mawh pa kaoh khaing: Simiang Siyiex heue:."

10 Khaix an Simiang Siyiex tawx lox ka kax ting, mai: kax ting an hao: Yonax lih caong raog ka dee kroh tiex heue:.

Simin Ting 3

Grawng: Nghiet Yonax Lox Siyiex

1 Gumlox Simiang Siyiex baox hoek ka Yonax ra: bawg tix bawg ah nin:,

2 "Kaoh mai: hu: ka veng ting Nineve mai: krai pao: awm: lox pa hoik tawm: Aux ka maix heue:."

3 Mawh kheu nan: Yonax kaoh hu: ka veng ting Nineve awm: gumlox pa hoik tawm: Siyiex heue:. Veng ting Nineve mawh veng pa kied ting mai: veng pa ting ceu mai: veih loe: singaix krax heue:.

4 Mawh kheu nan: Yonax jah tix laig hu: ka daux veng tix singaix krax, mai: krai pao: ah nin:, "Khaix hoik luan tipon: ngaix tag sang pluk pliak tix tik ka veng Nineve heue:."

Grawng: Tieh Loh Pui Veng Nineve Rhawm: Tix

5 Mawh kheu nan:, pui veng ting Nineve khankix yumrhawm: ka Siyiex, mai: kix krai pao: son sang twah pa ih pa un:, jah ka pui ting tom: hoek ka pui iak khawm: uik, mai: ceep ka chee: rhix heue:.

6 Mai: yam hoik mhong: khunhawkham veng ting Nineve ka lox satang in khankix, nawh lih khaing: dangngeung dee ngawm tix, mai: peeik sibex dha: tix mai: ceep ka chee: rhix ngawm ka daux nyaox heue:.

7 Mai: nawh tawx lox hu: ka pui pa ot ka daux veng ting Nineve, grawng: hoik mawh lox tawm: khaing: khunhawkham mai: pui ting pa ot greem: nawh khankix pa ah nin:, "Paw doh kieh pui tix kaux kawx, mai: khawng: brie pa mawh moi, yung: khankix ih nyaux tix ceu kawx heue:.

8 Mawh kheu nan: kieh pui ku kaux mai: khawng: brie khankix ceep ka chee: rhix mai: kieh pui ku kaux sau: riang tix rawg bwan: ka Siyiex heue:. Kieh pui ku kaux tieh loh khaing: kaing pa caox pa caig pa yuh tix mai: tik vud ka pa lang: teung: kin: pa yuh nawh ka taix tix heue:.

9 Pui mawx pa tawng ka pa sang deeh tieh Siyiex Tix mai: doh keud doh sawn: mai: deeh veeh tix khaing: pa songrhawm: songrhi: Nawh Cao:, mai: ang lai kieh ex hoek krax laux krax leeing:?"

10 Khaix an Siyiex hoik yaox kaing pa yuh kix, mai: hoik tieh loh kix tix khaing: pa caox pa caig yuh tix, mai: Siyiex deeh tieh loh rhawmrhi: Tix khaing: krax pa ah Nawh tix sang ciyang ka kix mai: caox rhawm:, Nawh ang lai ciyang heue:.

Simin Ting 4

1 Viang mawh nan: Yonax ang lai nyawm rhawm: nyawm rhi:, mai: nawh kied songrhawm: rhi: heue:.

2 Mawh kheu nan:, nawh rawg bwan: ka Siyiex mai: ah nin:, "Siyiex eue:, yam ot aux daux haktiex tix, aux hoik ah yuh nan: ang mawh lie? Mawh kheu nan:, aux tom: nied tix to: hu: ka veng Tasux, mawh kheu hoik tawng aux Maix mawh Siyiex pa koe: bwanson:, mai: pa koe: krax caoxrhawm: caoxrhi: mai: ang khran: songrhawm: songrhi:, pa naog ka krax moh krax rhawm:, mai: pa hoik tieh loh tix khaing: pa hoik ah Maix Cao: tix sang ciyang heue:.

3 Mawh kheu nan: yam in, teei ju aux khaing: aux, phan: aux yum nie lheu: mhawm: khaing: im: aux heue:."

4 Khaix an Simiang Siyiex ah nin:, "Pa songrhawm: songrhi: maix yuh nin:, khex khaw: lie?"

5 Mawh kheu nan:, Yonax lih hu: khaing: daux veng, mai: ngawm praok veng plak lih singaix heue:. Nawh yuh tix cie nyiex gox tix lhang: tan:, mai: ngawm greem: veei nyiex gox an, tom: hoek bawg yam pon yaox tix ceu pa sang yuh ka mawx ka veng heue:.

6 Mai: Simiang Siyiex cox khre: khaox bee ia: son nawh tix pang: kieh lhaong: ka piang Yonax tom: veei ka piang nawh, son sang kieh nawh nyawm rhawm: nyawm rhi: khaing: krax lauxrhawm: lauxrhi: heue:. Mawh kheu nan:, Yonax kied koe: krax gauxrhwm: gauxrhi: kheu khaox an heue:.

7 Viang mawh nan: yam hoik bah riang praix ponngawb singaix khaix, Siyiex khre: viag tix mu:, mai: kiied ka khaox bee ia: an vhit kroh hu: heue:.

8 Yam lih singaix, Siyiex khre: bhaung: pa kied hax khaing: plak lih singaix, mai: kieh koek tong: ka kaing: Yonax, mai: kieh nawh peei: awn: riang heue:. khaix an nawh koe: rhawm: pa simie tix yum, mai: ah nin:, "Yum aux nie lheu: mhawm: khaing: im: aux heue:.

9 Khaix an, Siyiex ah nin: ka Yonax, "Pa songrhawm: maix kheu jao khaox bee ia: in khex khaw: caw lie?" Mai: nawh deeh ah nin:, "Pa songrhawm: aux son sang yum tix mawh pa khaw: pa caw heue:."

10 Mai: Simiang Siyiex ah nin:, "Khaox pa ang maix taug mao tix sum:, mai: pa ang maix priex kieh ting lhaong:, kuah daux tix sawm: mai: deeh yum daux tix sawm: khaing: maix lai kawn: lhawk kah.

11 Mai: ka veng ting Nineve pa ot pui daux tix sien: ra: mheen: kaux haoh, pa ang nyang tawng tix gwieh taix gwiex taix dawm: mai: khawng: brie pa haoh hun: an khankix ang Aux khaw: tix nie lhawk kah lie?"