Lai Yam Jah (Genesis)
Simin Ting 1
Grawng: Pa Phan: Pa Deuh
1 Yam jah Siyiex phan: raoma: mai: haktiex. 2 Haktiex ang koe: pakpeung, mawh bang: praix pa yi, mai: pa vhaik kheem: ka piang tom: dee raux an, mai: Khwan: Siyiex ot vung viang piang rawm: khankix heue:. 3 Khaix an, Siyiex ah nin:, "Kieh pa riang lih koe:," Mai: pa riang lih koe: heue:. 4 Siyiex yaox ka mhawm: pa riang an, Nawh tom: gwieh pa riang khaing: pa vhaik heue:. 5 Nawh kok pa riang mawh ponngaix mai: pa vhaik mawh ponsawm:. Mai: koe: ponbo mai: ponngawb, an mawh singaix tix heue:. 6 Khaix an Siyiex deeh ah nin:, "kieh mee: koe: ka daux sigreung rawm: khankix, mai: kieh rawm: tang: gwieh tix khaing: rawm: khankix." 7 Siyiex yuh mee: praix mai: gwieh rawm: pa koe: plak greem: mee: praix mai: rawm: pa koe: plak piang mee: praix, mai: an lih koe: heue:. 8 Mai: Siyiex kok ceukaux mee: plak piang an mawh raoma: mai: koe: ponbo mai: ponngawb, an mawh singaix ra: heue:. 9 Mai: Siyiex ah nin:, "kieh rawm: khankix pa koe: greem: raoma:, khrawm: paox tix tixdah, mai: kieh dee kroh tiex lih koe:." mai: an lih mawh heue:. 10 Mai: Siyiex kok dee kroh tiex an mawh haktiex, mai: dee hoik khrawm: rawm: pa hoik khrawm: rawm: paox tix, mawh rawm: sigrit sigra:, Nawh yaox mawh pa mhawm: heue:. 11 Mai: Siyiex ah nin:, "kieh tiex kuah rib riem pa koe: simie mai: khaox pa koe: plix ku ceu ka piang ca: haktiex heue:." mai: ceu an khankix lih tix koe: heue:. 12 Mai: haktiex kuah rib riem taux lhax pa koe: simie ceu mawx ceu an, mai: khaox ku ceu pa koe: plix simie awm: ceu mawx ceu an heue:. Siyiex yaox ka hoik mhawm: ceu an kix. 13 Mai: koe: ponbo mai: ponngawb, an mawh singaix loe: heue:. 14 Mai: Siyiex ah nin:, "kieh pa riang lih koe: ka daux mee: praix, raoma:, son sang gwieh ponngaix khaing: ponsawm:, mai: kieh kix mawh mhai: ka son praix klawng: mai: son singaix sawm:, mai: jhong: khix mee: num khankix heue:. 15 "Mai: kieh pa riang pa koe: daux mee: praix an, jhan: riang tix ka piang ca: haktiex." Ceu an khankix lih tix koe: heue:. 16 Mai: Siyiex yuh pa riang ting ra: mu:, pa riang ting an kwang: ka ponngaix mai: pa riang iak an, kwang: ka ponsawm:, mai: Nawh Cao: baox yuh simuing: khankix heue:. 17 Siyiex tawx pa riang an koe: daux mee: praix raoma:, son sang jhan: pa riang ka haktiex, 18 Son sang kwang: ponngaix mai: ponsawm:, son sang gwieh pa riang khaing: pa vhaik, mai: Nawh yaox mawh pa mhawm: heue:. 19 Mai: koe: ponbo mai: ponngawb, an mawh singaix pon: heue:. 20 Mai: Siyiex ah nin:, "Kieh tosat pa im: ju ku ceu lih koe: daux rawm: tom: haoh hun:, mai: kieh sim: khankix pu: ka piang haktiex ka daux mee: praix raoma:." 21 Mawh kheu nan:, Siyiex phan: tosat pa ting pa im: ju daux rawm: sigrit sigra:, mai: can ceu tosat pa chix mo chix hu: daux rawm: tau mai: sim: pa chix pu: khankix, awm: pakpeung ceu mawx ceu an, mai: Nawh yaox mawh pa mhawm: heue:. 22 Mai: Siyiex nawb bwan: ka piang ceu an mai: ah nin:, "Kieh pex pre haoh hun: daux rawm: sigrit sigra:, mai: kieh sim: sai: khankix, pre haoh hun: ka piang haktiex heue:." 23 Mai: koe: ponbo mai: ponngawb, an mawh singaix phwan: heue:. 24 Mai: Siyiex ah nin:, "Kieh tosat pa im: ju ceu mawx ceu an lih koe: ka piang haktiex, khawng: brie mai: tosat pa chix mo pa koe: ka piang haktiex ceu mawx ceu an." Mai: ceu an kix lih tix koe: heue:. 25 Mai: Siyiex phan: totiag totu khawng: brie mai: can tosat pa chix mo piang tiex khankix, koe: ka piang haktiex awm: ceu mawx ceu an, mai: Nawh yaox mawh pa mhawm: heue:. 26 Khaix an Siyiex ah nin:, "Kieh Ex yuh kawn: pui awm: riang pakpeung Cao: Ex, awm: pa hoik khaw: mai: grang Ex, mai: kieh kix kwang: ka piang kax pa koe: daux rawm: sigrit sigra:, mai: ka piang sim: raoma:, mai: ka piang khawng: brie khawm: uik, mai: kwang: ka haktiex, mai: khawm: pa chix mo pa koe: piang haktiex khankix heue:. 27 Mawh kheu nan:, Siyiex yuh kawn: pui awm: riang pakpeung Tix, pa awm: riang pakpeung Siyiex, Nawh Cao: yuh kawn: pui, pa mawh pui simex mai: pui bon: heue:. 28 Khaix an, Siyiex nawb bwan: ka piang kiex mai: ah nin: ka kiex, "Kieh pax baox deeh keh mai: pre haoh hun: ka piang haktiex. Mai: kieh pax kwang: ka piang kax daux rawm: sigrit sigra: mai: sim: pa koe: daux raoma: khawm: can pa im: ju pa chix mo piang haktiex heue:. 29 Mai: Siyiex ah nin:, "Jhak heue:, Aux hoik tawx can ceu rib riem pa koe: simie plix piang haktiex in, ka maix khawm: khaox pa koe: plix simie son sang mawh pa ih pa un: son pex heue:. 30 Mai: ka son can tosat pa koe: piang haktiex, son sim: daux raoma:, mai: son ceu pa chix mo piang tiex khankix pa koe: ju, Aux hoik tawx rib riem pa klai son priex ih kix." Ceu an kix lih tix koe: heue:. 31 Mai: Siyiex yaox ka can pa yuh Tix ku ceu, mai: ceu an khankix mawh pa kied mhawm:. Mai: koe: ponbo mai: ponngawb, an mawh singaix liah heue:.
Simin Ting 2
1 Mawh kheu nan: raoma: mai: haktiex khawm: can ceu pa koe: daux an khankix, hoik hoik hkawm: uik heue:. 2 Ka daux singaix aliah Siyiex hoik hoik kaing jhaw: pa yuh Tix, mai: Nawh Cao: laux lee: Tix singaix aliah an, khaing: kaing jhaw: pa hoik yuh Tix heue:. 3 Mawh kheu nan: Siyiex nawb bwan: ka singaix aliah an mai: kieh singax singeh, mawh kheu Siyiex hoik hoik kaing jhaw: pa phan: pa deuh Tix khawm: uik Nawh tom: laux lee: Tix heue:. 4 In mawh grawng: been pa hoik phan: hoik deuh raoma: mai: haktiex, ka daux singaix pa hoik yuh Simiang Siyiex haktiex mai: raoma: khankix heue:. 5 Yam ang khaox ox mai: rib riem khankix nyang kuah piang haktiex Simiang Siyiex ang nyang kieh rawm: lhiex lih piang haktiex mai: kawn: pui pa sum: tix ih ku ceu piang tiex ang nyang bax koe: heue:. 6 Viang mawh nan:, bhawm: rawm: ciex khankix kieh haktiex caux heue:. 7 Khaix an Simiang Siyiex yuh riang pakpeung kawn: pui khaing: phawng: tiex mai: phlu: bhawm: pa im: ju daux meeh nawh mai: kawn: pui lih mawh pa im: ju heue:.
Krax Im: Ju Daux Sipeem Siyiex
8 Simiang Siyiex sum: sipeem tixdah ka plak lih singaix daux Eden, mai: Nawh Cao: deuh kawn: pui pa hoik yuh Tix ot tan: heue:. 9 Mai: Simiang Siyiex phan: khaox ox pa nyawm tix jhak mai: plix khaox pa mhawm: son pa ih pa un: kuah khaing: tiex, ka daux sigreung sipeem an, koe: khaox im: ju mai: khaox pa tawng pa mhawm: mai: pa ang mhawm: heue:. 10 Mai: rawm: klawng: tix klawng: lih khaing: daux sipeem Eden, son sang kieh tiex caux, mai: khaing: klawng: an deeh gwieh tix mawh pon: klawng: ka plak praix sipeem heue:. 11 Ceukaux rawm: klawng: pa jah an tix klawng: mawh Pishon mai: lih hu: plak haktiex Havilax dee koe: khri: heue:. 12 Mai: khri: haktiex an, mawh pa jiet mhawm:, peeh khaox Badelax mai: siang: simaox Shahan kawx koe: tan: heue:. 13 Ceukaux rawm: klawng: ra: klawng: tix klawng: mawh Gihon mai: lih hu: plak haktiex Kushax heue:. 14 Ceukaux rawm: klawng: loe: klawng: tix klawng: mawh Hidakelax mai: lih hu: plak lih singaix haktiex Ashurix (Asiriya:). Rawm: klawng: pon: klawng: tix klawng: mawh Upharat (Yupharethit) heue:. 15 Simiang Siyiex teei kawn: pui mai: deuh ka daux sipeem Eden son sang priex sang yuh sipeem an heue:. 16 Mai: Simiang Siyiex tawx gumlox ka kawn: pui mai: ah nin:, "Maix pon tix ih ku ceu khaing: khaox ku khaox, pa koe: daux sipeem awm: pa koe: rhawm: tix, 17 viang mawh nan:, maix tak ang pon tix ih khaing: khaox pa tawng pa mhawm: mai: pa ang mhawm:, mawh kheu singaix hoik ih maix khaing: khaox an, maix tak yum tete heue:." 18 Mai: Nawh ah nin:, "Simex tix kaux ang khaw: tix ot nong: nong:, Aux tak baox yuh pui sang teem: coi, awm: pa khaw: mai: nawh heue:." 19 Simiang Siyiex phan: tosat ku ceu piang haktiex, mai: sim: raoma: ku ceu khankix khaing: tiex mai: viex hoek ka kawn: pui son sang yaox nawh mai: chix kok ceukaux kix, can ceu pa kok kawn: pui ka tosat pa im: ju an khankix lih mawh ceukaux kix heue:. 20 Pui simex tawx ceukaux khawng: brie mai: sim: daux raoma: khawm: tosat ku ceu khawm: uik pa koe: piang tiex, viang mawh nan: kawn: pui ang nyang yaox ka pui pa sang teem: coi pa khaw: mai: tix heue:. 21 Mawh kheu nan: Simiang Siyiex kieh kawn: pui laig it, Khaix an Nawh Cao: teei si:ang: praok nawh tix nyaing, mai: deeh nyeep nex kleuk paox tix heue:. 22 Mai: Simiang Siyiex yuh pui bon: tix kaux, khaing: si:ang: praok pa hoik teei Nawh, mai: viex hoek ka pui simex heue:. 23 Mai: pui simex ah nin:, "In mawh si:ang: khaing: si:ang: aux, mai: kok nawh mawh pui bon:, mawh kheu mawh nawh pa hoik teei lih khaing: pui simex heue:." 24 Mawh kheu in, pui simex tak prah ka miex keeing: tix, mai: ot tau mai: moeng tix, mai: kiex ra: kaux tak mawh nex nham: tix mu: khaing: heue:. 25 Kiex mex moeng khawm: ra: ang nyang koe: kraung ceep mai: ang nyang koe: krax kaig krax tua heue:.
Simin Ting 3
Grawng: Pa Nyaw Pa Glaw: Mai: Grheu: Ka Kawn: Pui
1 Siuing: mawh pa nie lhak khaing: can tosat ku ceu piang haktiex pa hoik phan: Simiang Siyiex. Mai: siuing: ah nin: ka bon:, "Siyiex hoik ah ka pax son sang ang pax ih khaing: khaox ku ceu pa koe: daux sipeem tete lie?" 2 Mai: bon: deeh ah nin: ka siuing:, "Yiex pon tix ih khaing: khaox pa koe: daux sipeem." 3 Viang mawh nan:, Siyiex hoik ah nin:, "Pax tak ang pon tix ih ang pon teei ka plix khaox pa koe: sigreung sipeem, phan: ang mawh nan:, pax tak yum heue:." 4 Mai: siuing: deeh ah nin: ka pui bon:, "Pax ang doh yum tete. 5 Mawh kheu Siyiex tawng singaix ih pax plix khaox an, ngai: pax tak blah mai: lih tawng pa mhawm: mai: pa ang mhawm: awm: Siyiex heue:." 6 Mai: yam yaox pui bon: ka plix khaox an, mawh pa mhawm: son pa ih pa un:, mai: koe: grang pa nyawm tix jhak ka ngai: tix, mai: grawng: simie nawh plix khaox an, tawx krax tawng krax yung ka tix nawh tom: teei plix khaox an, mai: ih kah. Mai: nawh tawx ka mex tix mai: nawh kawx ih heue:. 7 Khaix an, ngai: kiex blah khawm: ra: mai: tawng ka ang kraung ceep tix koe:, mai: kiex caing tix ceep kraung ka lhax khaox ruh son sang kheem: ka cao: tix heue:. 8 Yam bo praix, kiex mhong: lox pa hu: Simiang Siyiex daux sipeem, mai: moeng nawh mox tix sinax khaox daux sipeem sivoe ngai: Simiang Siyiex heue:. 9 Mai: Simiang Siyiex kok ka pui simex mai: ah nin: ka nawh, "Ot pax dee mawx?" 10 Mawh kheu nan:, nawh ah nin:, "Aux hoik mhong: lox kok yo Maix Cao: daux sipeem, mai: aux koe: krax lhat krax graung, grawh grawng: nawh aux ang lai koe: kraung ceep mai: mox cao: tix jao an heue:." 11 Mai: Nawh Cao: deeh ah nin:, "Mawh mawx pa krai pax ang koe: kraung ceep lie? Hoik ih pax plix khaox pa ang Aux kieh pax ih lie?" 12 Khaix an kawn: pui deeh ah nin:, "Bon: pa tawx Maix Cao: ot mai: aux, nawh tawx plix khaox an ka aux, mai: aux hoik ih heue:." 13 Mai: Simiang Siyiex ah nin: ka bon:, "Maix hoik yuh ceu in kix jao pa tix lie?" Mai: bon: deeh ah nin:, "Siuing: hoik pie ka aux, mai: aux hoik ih heue:." 14 Mai: Simiang Siyiex ah nin: ka siuing:, "Mawh kheu hoik yuh maix ceu in kix, maix tak pon pa jhax pa lawg lheu: khaing: khawng: brie, mai: tosat haktiex khawm: uik heue:. Maix tak mo ka vaig tix mai: ih phawng: tiex tom: sidah ju tix. 15 Mai: Aux tak kieh pa koeng koe: sinax maix mai: pui bon:, mai: doeh simie ceucat maix mai: doeh simie ceucat bon:, nawh tak dig kaing: maix khlaix, mai: maix tak mat yuh loek caong nawh heue:." 16 Son bon:, Nawh Cao: ah nin:, "Aux tak sang nie blon: tawx krax kharhawm: kharhi: ka maix ka daux pa keh maix kawn: tix Mai: maix tak lo ka mex tix, mai: nawh tak sang kwang: ka piang maix heue:." 17 Khaix an, Nawh Cao: ah nin: ka pui simex, "Mawh kheu nghiet maix ka lox moeng tix, mai: ih plix khaox pa tawm: Aux maix ang ih, haktiex tak mawh pa jhax pa lawg kheu: maix, maix tak yaox tix ih khaing: nawh ka daux pa kharhawm: kharhi: tix, tom: sidah sidu ju tix heue:. 18 Kat lawm mai: pang: kat khankix tak lih koe: son maix, mai: maix tak ih taux lhax khaing: haktiex. 19 Maix tak lih rawm: lah rawm: lee:, son sang pon maix tix ih priex preem, mai: deeh ing: ka phawng: tiex heue:. Grawh grawng: nawh maix hoik mawh pa yuh Aux khaing: phawng: tiex, mai: tak deeh ing: ka phawng: tiex heue:." 20 Mai: pui simex kok ceukaux moeng tix mawh Evax (Evax dee bleeh pa im: ju), kheu mawh nawh miex kawn: pui pa im: ju heue:. 21 Son Adam mai: moeng nawh, Simiang Siyiex yuh kraung ceep ka hak, mai: tawx kiex ceep kah heue:. 22 Khaix an, Simiang Siyiex ah nin:, "Jhak heue:, kawn: pui hoik lih tix tawng pa mhawm: mai: pa ang mhawm: awm: Siyiex; yam in paw lai kieh nawh nyeu taix tix teei tix ih ka plix khaox im: ju an mai: im: ju leeing: ju leeing: phan: heue:." 23 Mawh kheu nan: Simiang Siyiex grheu: kiex lih khaing: daux sipeem Eden mai: kieh kiex thai: tix ih piang tiex, khaing: tiex pa hoik kaoh kiex kah heue:. 24 Nawh Cao: grheu: kiex lih khaing: tan: mai: Nawh Cao: deeh deuh Cherubin (kawncau Siyiex) plak lih singaix sipeem Eden mai: tawx vaid ngu sah pa lawm ka nawh, son sang pau krax ku krax, son daux krax pa hu: ka khaox im: ju an heue:.
Simin Ting 4
Grawng: Pah Ka-inax Ka Abelax
1 Adam hoik ot tau mai: moeng tix Evax, mai: nawh koe: kaux mai: keh Ka-inax (dee bleeh Ka-inax hoik pon). Nawh tom: ah nin:, "Aux hoik pon kawn: pui tix kaux khaing: Simiang Siyiex heue:." 2 Khaix an nawh deeh koe: kaux mai: deeh keh Abelax pa mawh pux Ka-inax. Yam ting Abelax mawh cao: pa liang yung: mai: Ka-inax mawh cao: pa yuh kaing ma: kaung: heue:. 3 Yam hoik hoek bawg yam Ka-inax viex plix nghox plix koi: pa pon nawh khaing: ma: kaung: son sang tan lu tix ka Simiang Siyiex heue:. 4 Abelax kawx viex kawn: yung: pa liang tix pon khaing: cub khaing: daux cub yung: tix mai: bee hoek heue:. Simiang Siyiex rieb tix teei ka Abelax mai: krax tan krax lu nawh. 5 Viang mawh nan:, Nawh Cao: ang rieb tix teei ka Ka-inax mai: krax tan krax lu nawh, Ka-inax songrhawm: songrhi: mai: laux pakngai: heue:. 6 Mawh kheu nan:, Simiang Siyiex ah nin: ka Ka-inax, "Songrhawm: maix jao pa tix? laux pakngai: maix jao pa tix? 7 "Phan: maix yuh pa mhawm:, maix tak pon rieb pa mhawm: ang mawh lie? Phan: maix yuh pa ang mhawm:, phimap hoik pau maix ka diang siviex tan:, mai: phimap an tak hawt alo maix, mai: maix tak caw tix pex ka phimap an heue:." 8 Ka-inax ah nin: ka pux tix Abelax, "Hu: ax ka daux kaung:." Yam hoek kiex daux kaung:, Ka-inax yuh simah ka pux tix Abelax mai: pah nawh yum heue:. 9 Khaix an Simiang Siyiex ah nin: ka Ka-inax, pux maix Abelax ot dee mawx? mai: nawh deeh pawk lox ah nin:, "Aux ang tawng, khex mawh aux pui pa kia: ngien ka pux tix lie?" 10 Mai: Nawh Cao: ah nin:, "Hoik yuh maix ceu pa tix? lox kok yo nham: pux maix khaing: daux tiex hoik hoek ka Aux heue:." 11 "Mawh kheu nan:, haktiex pa hoik ang: jheeh tix rieb nham: pux maix khaing: taix maix an, tak jhax lawg ka maix heue:. 12 Yam yuh maix ma: kaung:, maix tak ang lai pon plix tom: nie, maix tak sang mawh pui pa vung viang ka piang haktiex heue:." 13 Mai: Ka-inax, deeh ah nin: ka Simiang Siyiex, "Krax pa kham: geu: aux in, kied ting lhaong: khaing: pa pon kham: aux heue:." 14 "Jhak heue:, ka daux in singaix Maix Cao: grheu: aux hu: khaing: piang haktiex, son ang aux lai pon tix yaox ka pakngai: Maix, aux tak sang yaox tix vung viang piang haktiex, can pui pa yaox ka aux, tak sang pah aux heue:. 15 Mai: Simiang Siyiex ah nin: ka nawh, " Mawh kheu nan:, can pui pa pah Ka-inax krax pawk bix, tak deeh koe: piang nawh aliah son." Simiang Siyiex deuh mhai: ka piang Ka-inax son sang ang pui pa yaox ka nawh pon pah nawh yum heue:.
Grawng: Kawn: Nyiex Ma: Ka-inax.
16 Khaix an, Ka-inax lih hu: khaing: sivoe ngai: Simiang Siyiex mai: ot ka haktiex Nodax pa koe: plak lih singaix Eden heue:. 17 Ka-inax ot tau mai: moeng tix mai: nawh koe: kaux keh kawn: simex Enawk, mai: nawh sum: veng ting tix mu: mai: kok mawh veng Enawk, awm: ceukaux kawn: tix heue:. 18 Kawn: simex Enawk mawh Irat, kawn: Irat mawh Mahuyelax, kawn: Mahuyelax mawh Mathushalax, mai: kawn: Mathushalax mawh Lamek heue:. 19 Lamek teei tix koe: moeng ra: kaux mai: ceukaux mawh Adax mai: Zilax heue:. 20 Adax keh kawn: simex Yabalax pa mawh keeing: ka can pui pa ot nyiex gox mai: pui pa eei: khawng: brie heue:. 21 Ceukaux pux nawh mawh Yubalax pa mawh keeing: ka can pui pa tah ting: mai: pui paung: shiao: khankix heue:. 22 Zilax keh kawn: simex Tubalaxka-inax, pa mawh cao: pa gau pui ka kaing canglhek, plak tawng mai: rhiem:, mai: nan: Tubalaxka-inax, mawh Nemax heue:. 23 Lamek ah nin: ka moeng tix khankiex, "Adax mai: Zilax eue:, nghiet ka lox aux, moeng Lamek eue:, nghiet ka lox krai aux mawh kheu aux hoik pah kawn: nyawm simex awn: ju tix kaux pa tawx nawh krax tuktiak ka aux heue:." 24 Phan: pui mawx pah ka Ka-inax tak pon pa pawk bix aliah son, mai: phan: pui mawx pah ka Lamek tak pon pa pawk bix atigliah aliah son heue:. 25 Mai: Adam ot tau mai: moeng tix, mai: nawh koe: kaux mai: keh kawn: simex tix kaux, mai: sum: ceukaux nawh mawh Shetax, mawh kheu Siyiex baox tawx doeh simie kawn: pui ka aux, tang: Abelax pa hoik pah Ka-inax heue:. 26 Shetax koe: kawn: simex tix kaux, mai: sum: ceukaux nawh mawh Enot, yam an kawn: pui jah tix kok ka ceukaux Siyiex mai: krub ka Nawh heue:.
Simin Ting 5
Grawng: Doeh Nyiex Ma: Adam.
1 In mawh phuk lai carang grawng: doeh simie nyiex ma: Adam, ka daux bawg yam phan: Siyiex ka kawn: pui, Nawh Cao: yuh awm: grang pakpeung Tix heue:. 2 Nawh Cao: yuh pui simex mai: pui bon:, mai: nawb bwan: ka piang kiex, mai: Nawh kok ceukaux nawh mawh Adam doeh simie kawn: pui ka daux singaix yam hoik phan: Nawh kiex heue:. 3 Yam koe: ju Adam tix yieh tingoe: num, nawh deeh pon kawn: simex tix kaux, pa awm: grang pakpeung nawh mai: kok ceukaux nawh mawh Shetax heue:. 4 Khaix hoik keh Shetax, Adam hoik koe: ju daix yieh num mai: nawh yaox ka kawn: simex mai: kawn: bon: tix khankix heue:. 5 Mawh kheu nan:, Adam im: ju tom: hoek dim: yieh tingoe: num mai: nawh yum heue:. 6 Shetax im: ju tix yieh phwan: num mai: yaox ka kawn: simex tix Enot heue:. 7 Khaix hoik keh Enot, Shetax im: ju tom: hoek daix yieh aliah num mai: nawh baox pon kawn: simex kawn: bon: khankix heue:. 8 Yam hoik naog ju Shetax dim: yieh kao: ra: num nawh yum heue:. 9 Enot im: ju tidim: num mai: nawh deeh pon ka kawn: tix Ka-inan heue:. 10 Khaix hoik keh Ka-inan, Enot im: ju tom: hoek daix yieh kao: phwan: num, mai: nawh deeh baox pon kawn: simex kawn: bon: khankix heue:. 11 Mawh kheu nan:, Enot yaox tix im: ju tom: hoek dim: yieh phwan: num mai: nawh yum heue:. 12 Yam hoik koe: ju Ka-inan atigliah num nawh deeh pon kawn: tix Mahalelax heue:. 13 Khaix hoik keh Mahalelax, Ka-inan im: ju tom: hoek daix yieh tipon: num, mai: nawh baox pon kawn: simex kawn: bon: khankix heue:. 14 Mawh kheu nan:, Ka-inan im: ju tom: hoek dim: yieh kao: num mai: nawh yum heue:. 15 Yam koe: Mahalelax tigliah phwan: num, nawh pon kawn: tix Zarit heue:. 16 Khaix hoik pon nawh Zarit, Mahalelax im: ju tom: hoek daix yieh tingoe: num mai: nawh pon kawn: simex kawn: bon: khankix heue:. 17 Mawh kheu nan:, Mahalelax im: ju tom: hoek daix yieh tidim: phwan: num mai: nawh yum heue:. 18 Zarit koe: ju tix yieh tigliah ra: num mai: nawh pon kawn: tix Enawk heue:. 19 Khaix hoik pon Enawk, Zarit im: ju tom: hoek daix yieh num mai: nawh pon kawn: simex kawn: bon: khankix heue:. 20 Mawh kheu nan:, Zarit im: ju tom: hoek dim: yieh tigliah ra: num mai: nawh yum heue:. 21 Yam koe: ju Enawk tigliah phwan: num mai: nawh pon kawn: tix Mathusalax heue:. 22 Khaix hoik pon nawh Mathusalax, Enawk hawt hu: tau mai: Siyiex been loe: yieh num mai: nawh baox deeh pon kawn: simex kawn: bon: khankix heue:. 23 Mawh kheu nan:, Enawk im: ju tom: hoek loe: yieh tigliah phwan: num heue:. 24 Enawk hu: tau mai: Siyiex mai: nawh ang lai koe: khaix an, mawh kheu hoik deeh teei Siyiex ka nawh heue:. 25 Yam koe: ju Mathusalax tix yieh tidaix aliah num nawh pon kawn: tix Lamet heue:. 26 Khaix hoik pon nawh kawn: tix Lamet, Mathusalax im: ju tom: hoek aliah yieh tidaix ra: num, mai: baox deeh pon ka kawn: simex kawn: bon: khankix heue:. 27 Mawh kheu nan:, Mathusalax im: ju tom: hoek dim: yieh tigliah dim: num mai: nawh yum heue:. 28 Yam koe: ju Lamet tix yieh tidaix ra: num nawh pon kawn: simex tix kaux heue:. 29 Mai: nawh sum: ceukaux nawh mawh Noax, mai: ah nin:, "In tix kaux mawh pa tawx krax nyawmrhawm: nyawmrhi: ka kaing jhaw: pa taug pa mao, pa yuh ex ka taix tix, piang haktiex pa hoik jhax lawg Siyiex kah heue:." 30 Khaix hoik pon nawh kawn: tix Noax, Lamet im: ju tom: hoek phwan: yieh tidim: phwan: num, mai: nawh deeh baox pon kawn: simex kawn: bon: khankix heue:. 31 Mawh kheu nan:, Lamet im: ju tom: hoek aliah yieh atigliah aliah num mai: nawh yum heue:. 32 Yam hoik koe: ju Noax phwan: yieh num nawh pon kawn: tix pa mawh Semax, Hamax mai: Yaphiet heue:.
Simin Ting 6
Grawng: PaCaox Pacaig Mai: Pa Ciyang Ka Kawn: Pui
1 Yam jah kawn: pui lih tix haoh hun: ka piang haktiex, mai: kix koe: kawn: bon: tom: nie, 2 kawn: simex Siyiex khankix yaox mhawm: grang kawn: bon: kawn: pui, mai: kix laug tix teei mawh moeng tix heue:. 3 Mai: Simiang Siyiex ah nin:, "Khwan: Aux tak ang lai ot ka daux kawn: pui leeing: ju, kheu mawh nawh nex nham:, mai: Aux tak sang kieh baux ju nawh die ngie tix yieh tinga: num heue:. 4 Yam an pui Anakat pa ting lhaong: lih koe: ka piang haktiex, Kawn: simex Siyiex khankix, teei tix moeng kawn: bon: kawn: pui, mai: kix pon kawn: praix pa ting riang rao, mai: pa ao: min: tom: yam an son cao: tix heue:. 5 Simiang Siyiex yaox pacaox pacaig yuh kawn: pui hoik ting lhaong: ka piang haktiex, mai: krax keud kix, mawh pa ang mhawm: khaing: heue:. 6 Mai: Simiang Siyiex laux rhawm: ka pa phan: pa yuh Tix kawn: pui piang haktiex, Nawh Cao: kied kleh sigrien sigre heue:. 7 Mawh kheu nan:, Simiang Siyiex ah nin:, "Mawh kheu kied kleh Aux, ka pa hoik phan: hoik yuh tix kawn: pui, Aux tak sang yuh can pa koe: ka piang haktiex in laux leeing: jah ka kawn: pui tom: hoek ka totiag totu can pa chix mo piang tiex khankix, mai: sim: sai: raoma: khankix heue:." 8 Viang mawh nan:, Noax mawh pui pa pon bwanson: ka sivoe ngai: Simiang Siyiex heue:.
Grawng: Yuh Noax Pa Khaw: Rhawm: Siyiex
9 In mawh grawng: doeh simiex ceucat Noax, Noax mawh pui pa rah pa see, mai: pa grum naog, daux doeh simie ceucat nawh, mai: nawh mawh pa hu: tau mai: Siyiex. 10 Noax koe: kawn: simex loe: kaux, pa mawh Shemax, Hamax, mai: Yaphiet heue:. 11 Haktiex hoik cux sium: sivoe ngai: Siyiex, mai: ka piang haktiex in naog ka ceu pa lang: teung: heue:. 12 Mai: Siyiex jhak ka haktiex Nawh Cao: hoik yaox ka laux leeing: cux sium: haktiex, mai: nex nham: kawn: pui khankix kawx hoik hu: ka daux pa laux leeing: haktiex heue:. 13 Mai: Siyiex ah nin: ka Noax, "Dee sidah bawg yam kawn: pui hoik hoek plak sivoe ngai: Aux, mawh kheu hoik naog pa kied lang: teung: piang haktiex jao kix, jhak heue:, Aux tak sang yuh kix laux tau mai: haktiex heue:.
Grawng: Pa Khre: Reu Ting
14 "Yuh reu ting tix mu: son cao: maix, ka khaox Gawpharax, yuh lawg khankix koe: daux reu, mai: kraix peeh khaox gix ka plak daux mai: plak praix heue:." 15 "Pa sang caw maix tix yuh mawh nin:, krax lang: reu kieh koe: loe: yieh sawk, krax vieh kieh koe: tiphwan: sawk, mai: krax lhaong: kieh koe: tingoe: sawk heue:." 16 "Mai: yuh siviex iak koe: ka reu an, mai: kieh tiiem greem: braux tix sawk, kieh ding: siviex koe: ka praok reu, mai: yuh reu an koe: loe: thaix, pa mawh thaix plak greem:, thaix sigreung mai: thaix plak piang heue:, 17 "Jhak heue:, Tokaux Aux sang kieh rawm: kheem: ka piang haktiex, son sang yuh kawn: pui pa im: ju pa koe: greem: raoma: mai: can ceu pa koe: ka piang haktiex khawm: uik khawm: leeing: yum heue:." 18 Viang mawh nan:, Aux tak deuh lox sijax mukheu Tix ka maix, tokaux maix, kawn: simex maix, moeng maix, mai: mun maix khankix, tak yaox tix laig daux reu heue:. 19 "Maix tak yaox tix viex tosat pa im: ju mhaing: mai: shiang: ku mawx ku an laig ka daux reu son sang priex maix kix im: ju tau mai: maix heue:. 20 "Sim: ceu mawx ceu an, tosat ceu mawx ceu an, can pa chix mo piang tiex, ceu mawx ceu an, pa mawh mhaing: mai: shiang: ku mawx ku an hoek ka maix, mai: priex kix im: ju heue:." 21 "Maix tak sang yaox tix khrawm: pa ih pa un: son cao: maix, mai: pa ih pa un: son kix khawm: uik heue:." 22 Mawh kheu nan:, Noax yuh ku ceu awm: gumlox pa hoik tawm: Siyiex ka nawh heue:.
Simin Ting 7
Grawng: Pa Kheem: Rawm:
1 Khaix an Simiang Siyiex ah nin: ka Noax, "Maix mai: nyiex ma: maix khawm: uik laig ka daux reu, mawh kheu Aux hoik yaox pa rah pa see maix sivoe Tix, daux doeh simie ceucat in kix heue:." 2 "Maix teei tosat mhaing: mai: shiang: pa singax aliah ku, mai: tosat mhaing: mai: shiang: pa ang singax ra: ku, 3 "Sim: daux raoma: tix ceu aliah ku khawm: mhaing: mai: shiang:, son sang priex maix doeh simie kix im: ju ka piang haktiex khawm: uik heue:." 4 "Grawh grawng: nawh, khaix hoik naog aliah ngaix Aux tak sang kieh lhiex lih ka piang haktiex in tipon: ngaix tipon: sawm:, mai: Aux tak kieh can ceu pa im: ju, pa hoik phan: hoik yuh Aux khankix laux leeing: ka piang haktiex in heue:." 5 Mai: Noax yuh ku ceu awm: gumlox tawm: Simiang Siyiex ka nawh heue:. 6 Yam kheem: rawm: ka piang haktiex Noax koe: ju liah yieh num heue:. 7 Mawh kheu nan:, Noax mai: kawn: simex nawh, moeng nawh, mai: mun nawh, khankix laig daux reu son sang luat luan khaing: pa kheem: rawm: heue:. 8 Tosat pa singax mai: pa ang singax, sim: sai: raoma: mai: can ceu pa chix mo chix hu: piang tiex; 9 ku mawx ku an; laig daux reu tau mai: Noax, mhaing: mai: shiang: awm: gumlox tawm: Siyiex ka Noax heue:. 10 Khaix hoik hoek aliah singaix, rawm: khankix, lih kheem: ka piang haktiex heue:. 11 Yam koe: ju Noax liah yieh num, daux khix ra: kao: aliah singaix daux khix an rawm: keut khaing: dee raux khawm: uik hoik bih mai: siviex raoma: hoik baoh heue:. 12 Mai: lhiex lih ka piang haktiex tipon: ngaix tipon: sawm: heue:. 13 Ka daux singaix an, Noax mai: kawn: simex nawh Shemax, Hamax, mai: Yaphiet, mai: moeng nawh, mai: mun nawh loe: kaux laig daux reu heue:. 14 Kix mai: tosat ceu mawx ceu an, khawng: brie ceu mawx ceu an, mai: tosat pa chix mo chix hu: piang tiex ceu mawx ceu an, sim: raoma: ceu mawx ceu an ku ceu khankix; 15 Mai: tosat pa im: ju mhaing: mai: shiang: ku mawx ku an laig daux reu tau mai: Noax heue:. 16 Mai: tosat pa mawh mhaing: mai: shiang: ku ceu laig ka daux reu awm: gumlox pa tawm: Siyiex, khaix an Simiang Siyiex nyeep siviex reu ka kix heue:. 17 Rawm: ca: nied tix kheem: ka piang haktiex tipon: ngaix; Rawm: khankix haok hwan: mai: yaog reu haok lhaong: khaing: haktiex heue:. 18 Rawm: haok hwan: sipie sipie mai: ting riang ka piang haktiex, mai: reu sibloe: ka piang rawm: heue:. 19 Rawm: nied tix haok hwan: ting riang mai: gawng lua pa koe: greem: raoma: hoik glip khawm: uik heue:. 20 Rawm: hoik kheem: lhaong: khaing: gawng lua khankix kao: phwan: sawk heue:. 21 Can pa chix chuh piang tiex, pa mawh sim:, tosat khawng: brie ku ceu mai: can pa chix mo piang tiex khawm: uik mai: kawn: pui hoik yum heue:. 22 Mai: can ceu pa im: ju, pa toek bhawm: ka meeh tix, pa ot piang haktiex kawx yum khawm: uik heue:. 23 Nawh Cao: kieh can pa im: ju piang haktiex, pa mawh kawn: pui, khawng: brie, tosat pa chix mo chix hu:, mai: sim: sai: raoma: khankix laux leeing: heue:. Mawh ngie Noax mai: can pa ot tau mai: nawh daux reu pa klawd ju heue:. 24 Rawm: haok hwan: ting lhaong: mai: kheem: ka piang haktiex tix yieh tiphwan: ngaix heue:.
Simin Ting 8
Grawng: Hit Rawm:
1 Siyiex doh keud ka Noax, mai: can pa im: ju pa mawh tosat pa ot mai: nawh daux reu. Siyiex kieh bhaung: ting lih phlu: ka piang haktiex, mai: rawm: khankix dieh hu: heue:. 2 Rawm: keut khaing: dee raux mai: siviex raoma: hoik deeh nyeep tix, mai: lhiex khaing: raoma: kawx ang lai lih heue:. 3 Rawm: khankix, grheuh hu: sipie sipie khaing: haktiex. Mai: khaix hoik naog tix yieh tiphwan: singaix rawm: hoik dieh heue:. 4 Ka daux khix aliah, kao: aliah singaix, reu an tum: ka piang choek gawng Ararat heue:. 5 Rawm: grheuh hu: sipie sipie tom: hoek khix kao:; yam haok khix an, tix singaix, choek gawng khawm: uik blhiien: khaing: daux rawm: heue:. 6 Khaix hoik naog tipon: singaix Noax paoh ka siviex iak reu pa hoik yuh tix heue:. 7 Nawh ploi: lak tixmu: lih hu: ka praix, mai: lak an pu: hu: pu: hoek tom: sidah hoek bawg yam kroh haktiex heue:. 8 Mai: nawh deeh baox ploi: sikaux tixmu: lih hu: ka praix, son sang tawng nawh ka grawng: hit rawm: piang tiex heue:. 9 Viang mawh nan:, sikaux ang nyang yaox dee sang tum: sang laux caong tix, mai: nawh deeh ing: ka reu, kheu kawn: kheem: rawm: ka piang haktiex khawm: uik, mawh kheu nan: nawh nyeu taix tix deeh teei sikaux laig daux reu heue:. 10 Nawh baox deeh pau aliah singaix, mai: nawh baox ploi: sikaux lih hu: khaing: daux reu; 11 mai: sikaux deeh hoek ka nawh plak bo, mai: jhak heue:, nawh teei tix viex lhax khaox Sanlon pa khraox ka gaoh tix, yam an Noax hoik tawng hit rawm: ka piang haktiex heue:. 12 Mawh kheu nan:, nawh deeh baox pau tom: hoek aliah singaix, mai: nawh deeh baox ploi: sikaux lih hu: plak praix, mai: sikaux an, ang lai deeh hoek tibawg kawx heue:. 13 Yam hoik hoek Noax liah yieh mai: tix num, daux khix tix, tix ngaix, rawm: hoik hit mai: haktiex kroh, Noax plak ka braux reu mai: jhak ka plak praix, mai: nawh yaox ka hoik kroh haktiex heue:. 14 Ka daux khix ra:, tinga: aliah ngaix, piang haktiex hoik deeh kroh khawm: uik heue:. 15 Khaix an, Siyiex ah nin: ka Noax, 16 " Lih hu: khaing: daux reu, maix khawm: moeng maix, kawn: simex maix, mai: mun maix ku kaux tau mai: maix heue:." 17 "Viex tosat can pa im: ju pa mawh sim:, mai: khawng: brie mai: tosat pa chix mo chix hu: piang tiex pa ot tau mai: maix son sang baox deeh lih pre haoh hun: kix ka piang haktiex heue:." 18 Mawh kheu nan:, Noax lih hu: ka praix tau mai: kawn: simex nawh, moeng nawh, mai: mun nawh khankix heue:. 19 Can tosat ku ceu, pa chix mo chix hu:, mai: sim: ku ceu, mai: tosat pa chix chuh ka piang haktiex khawm: uik lih hu: khaing: daux reu heue:.
Lox Sijax Mukheu Siyiex Ka Grawng: Pa Phan: Pa Deuh
20 Khaix an Noax yuh khu: dee tan son Simiang Siyiex tix mu:, mai: nawh viex tosat pa singax mai: sim: pa singax ku ceu hoek, mai: gleeing tix tan krax tan pa gleeing ka piang khu: dee tan ka Siyiex heue:. 21 Siyiex khaw: rhawm: mai: rieb ka pa sioe: bhawng: an, mai: Simiang Siyiex ah nin: ka daux rhawm: Tix, "Aux tak ang lai baox jhax lawg ka haktiex kheu jao kawn: pui khaix in, tix bawg kawx, mawh kheu kawn: pui koe: rhawm: rhi: pa caox pa caig jah tom: yam iak tix, Aux tak ang lai baox yuh can pa im: ju khankix laux leeing: awm: pa hoik yuh Aux bawg in heue:." 22 "Glang: yam kawn: koe: haktiex in, baux yam rhuat simie, yam vawg nghox, mai: bawg yam kwat, yam koek praix, yam raux, yam rung, yam pon singaix mai: yam ponsawm:, Aux tak ang lai kieh jud jai heue:."
Simin Ting 9
1 Mai: Siyiex nawb bwan: ka Noax, mai: kawn: nawh khankix mai: ah nin:, "Kieh pex baox deeh keh haoh hun: mai: naog ka haktiex in heue:. 2 "Tosat ku ceu pa koe: piang haktiex, pa mawh sim: raoma: mai: can pa chix chuh piang tiex, mai: can ku ceu pa koe: daux rawm: sigrit sigra: khankix tak koe: krax lhat krax graung sivoe maix heue:. Ceu in kix khawm: uik, Aux hoik appong ka daux tawm: taix maix heue:." 3 "Can ceu pa chix chuh pa im: ju ku ceu, tak sang mawh pa ih pa un: son maix; Aux hoik tawx in kix khawm: uik ka maix awm: tawx taux lhax klai khankix heue:." 4 "Viang mawh nan:, maix ang pon tix ih nex tau mai: nham:, kheu mawh nham: ju heue:." 5 "Aux tak ciyang ka pui pa pah ka ju pex, mai: tak ciyang ka tosat pa laux yuh ka ju pex, mai: ka puxaik pex pa pah ka ju puxaik tix heue:. 6 "Pui mawx ang ah, phan: nawh kieh nham: kawn: pui jauh, nham: nawh kawx, tak yaox tix jauh ka taix kawn: pui heue:. Mawh kheu Siyiex hoik yuh kawn: pui awm: riang pakpeung Tix heue:. 7 "Kieh pex deeh pon kawn: praix tom: nie, mai: kieh pre haoh hun: ka piang haktiex heue:." 8 "Khaix an Siyiex sikah mai: Noax mai: kawn: praix nawh khankix mai: ah nin:; 9 "Jhak heue:, Aux tak yuh sijax mukheu ka pex, mai: son doeh simie ceucat pex khankix." 10 "Mai: can tosat pa im: ju khankix tau mai: pex pa mawh sim:, khawng: brie, mai: tosat ku ceu piang tiex pa hoik lih tau mai: pex khaing: daux reu khawm: uik heue:." 11 "Aux hoik yuh sijax mukheu tau mai: pex, son sang ang lai yuh tosat pa im: ju khankix laux leeing: ka pa kheem: rawm:, mai: ang lai baox kieh rawm: kheem: ka piang haktiex heue:." 12 Mai: Siyiex ah nin:, "In mawh mhai: sakse: sijax mukheu pa yuh Aux sinax pex mai: Aux, mai: tosat pa im: ju, pa ot tau mai: pex, khawm: doeh simie ceucat pex leeing: ju heue:." 13 "Aux tak deuh siyawng mukheu ka daux paiawm:, son sang mawh mhai: sakse: sijax mukheu sinax Aux mai: haktiex heue:." 14 "Yam kieh Aux paiawm: ceep ka piang haktiex, tak sidawng: yaox siyawng mukheu an ka daux paiawm: heue:." 15 "Mai: Aux tak doh keud ka sijax mukheu pa hoik yuh Tix sinax maix mai: Aux, mai: tosat pa im: ju ku ceu khawm: uik; tak ang lai baox deeh kieh rawm: kheem: laux leeing: heue:." 16 "Yam jhak Aux ka siyawng mukheu pa koe: daux paiawm:, Aux tak doh keud ka sijax mukheu pa yuh Tix leeing: ju, tau mai: can tosat pa im: ju pa koe: ka piang haktiex in heue:." 17 Mai: Siyiex baox ah nin: ka Noax, "In mawh mhai: sakse: sijax mukheu pa hoik yuh Aux tix deuh sinax Aux mai: can tosat pa im: ju pa ot piang haktiex khawm: uik heue:."
Noax Mai: Kawn: Simex Nawh Khankix
18 Kawn: simex Noax khankix pa lih khaing: daux reu, mawh Shemax, Hamax mai: Yaphiet. Hamax mawh keeing: Khanan heue:. 19 In kix loe: kaux mawh kawn: simex Noax, pa lih tah hu: ka piang haktiex heue:. 20 Mai: Noax jah tix yuh kaing ma: mai: yuh sipeem plix siiet heue:. 21 Khaix an nawh nyaux rawm: plix siiet tom: yoek tix, mai: it kakaong: daux nyiex gox tix heue:. 22 Hamax keeing: Khanan yaox ka it kakaong: keeing: tix, nawh lih krai puxaik tix ra: kaux mhong: heue:. 23 Viang mawh nan:, Shemax mai: Yaphiet teei kraung ceep tix pheen: mai: kiex deuh piang klip tix, mai: hu: deeh khaix, lhop ka keeing: kiex; mawh kheu jhak kiex plak praix yam lhop kiex nawh, kiex tom: ang chix yaox ka ot kakaong: keeing: tix heue:. 24 Yam siduad Noax khaing: yoek tix ka rawm: plix siiet, nawh tawng pa yuh kawn: simex tix khankix heue:. 25 Nawh jhax lawg Khanan ah nin:, "kieh nawh mawh siliex kah siliex puxaik tix khankix heue:." 26 Mai: nawh ah nin:, "Kieh Simiang Siyiex nawb bwan: ka Shemax mai: kieh Khanan mawh siliex nawh heue:." 27 "Kieh Siyiex joh jhan: Yaphiet ting lhaong: mai: kieh nawh ot daux nyiex gox Shemax, mai: kieh Kkanan mawh siliex nawh heue:." 28 Noax baox im: ju loe: yieh tiphwan: num, khaix kheem: rawm: ka haktiex in heue:. 29 Noax im: ju tom: hoek dim: yieh tiphwan: num, mai: nawh yum heue:.
Simin Ting 10
Doeh Ru Ceucat Pa Kaoh Khaing: Noax.
1 In mawh grawng: doeh ru simie ceucat kawn: simex Noax, pa mawh Shemax, Hamax mai: Yaphiet khankix, Khaix kheem: rawm:, kix keh kawn: praix tom: nie heue:. 2 Kawn: simex Yaphiet mawh Gawmax Magawgax, Madie, Yavan, Tubalax, Meshiet, mai: Tirat khankix heue:. 3 Kawn: simex Gawmax mawh Ashakeniet, Riphat mai: Tawgamax heue:. 4 Mai: kawn: simex Yavan mawh Elishax, Tasux, Kiten, mai: Dawnamix heue:. 5 Jah ka haktiex praok rawm: baoh an, kix gwieh tix ot haktiex tang: dah ku plak, awm: pa koe: lox sikah doeh nyiex ma: kix ceu mawx ceu an mai: lih mawh ceu pui tan: heue:. 6 Kawn: simex Hamax mawh Kushax, Mizareng, Putax, mai: khanan heue:. 7 Kawn: simex Kushax mawh Shebax, Havilax, Sabatax, Ramax, mai: Shatekha, mai: kawn: simex Ramax mawh Shibax mai: Dedam heue:. 8 Kushax pon kawn: simex tix Neyawdax mai: nawh jah tix mawh pui pa ting riang tix kaux piang haktiex heue:. 9 Nawh mawh pui jaw, pa ting riang sivoe ngai: Simiang Siyiex, Mawh kheu nan:, kix ah nawh mawh, "pui jaw pa ting riang pa awm: Neyawdax sivoe ngai: Simiang Siyiex heue:. 10 Yam jah meung nawh mawh Babulon, Eren, Ekhet mai: Kalane, pa koe: daux haktiex Shinax heue:. 11 Jah khaing: haktiex an, nawh hu: ka meung Asurix mai: sum: veng Nineve, veng Yahobok mai: veng Kalax heue:. 12 Sinax veng Kalax mai: veng Nineve nawh baox sum: veng ting Resin heue:. 13 Kawn: Mizareng mawh Luim, Anamim, Lehabim, Naptuhim, 14 Patarusim mai: Khasaluhim heue:, Khasaluhim lih tix mawh ceu pui Philitix, mai: ceu pui Kapturim heue:. 15 Khanan pon kawn: Ai tix Sidon mai: khaix an Hetax, 16 Yebutix, Amorix, mai: Giragashix, 17 Hiwix, Akix mai: Sinix, 18 Avadix, Zemarix mai: Hamatix heue:, khaix an ceu pui Khanan khankix lih hu: prung: prang: tix ot ku dah heue:. 19 Mai: mee: haktiex pui ceu Khanan jah ka Sidom tom: hoek Gerax mai: Gezax, khaix an hoek ka Sawdom, Gawmawrax, Adamax mai: Zebai tom: sidah Lashax heue:. 20 In kix mawh kawn: simex Hamax pa tang: mawh ceucat mawx ceucat an, pa tang: lox sikah mai: tang: dee ot dee koe: daux haktiex cao: kix heue:. 21 Shemax baox deeh koe: kawn: simex khankix, pa mawh keeing: ka pui Hebax pa mawh puxke: Yaphiet heue:. 22 Kawn: simex Shemax khankix mawh Elam, Ashu, Aphazat, Lutax mai: Alam heue:. 23 Kawn: simex Aram mawh Uzax, Hulax, Getax mai: Mashax heue:. 24 Aphazat baox pon kawn: tix Shalax, mai: Shalax baox pon kawn: tix Hebax heue:. 25 Hebax koe: kawn: simex ra: kaux, an tix kaux mawh Phalek, mawh kheu haktiex khankix gweh tix ka daux singaix baux ju nawh, mai: ceukaux pux mawh Yoktan heue:. 26 Yoktan baox pon kawn: tix Alamodak, Shelap, Hazamaviet, Yerax, 27 Hadawram, Uzalax, Digalax, 28 Awbalax, Abimelax, Shebax, 29 Awphirax, Havilax, mai: Yawbat, in kix khawm: uik mawh kawn: simex Yoktan heue:. 30 Dee ot dee koe: kix, jah ka Meshax tom: hoek ka gawng plak lih singaix Sephax heue:. 31 In kix mawh kawn: simex Shemax pa tang: ot mai: ceucat tix, pa tang: lox sikah daux haktiex ot cao: tix heue:. 32 In kix mawh carang doeh nyiex ma: kawn: simex Noax mai: ceucat kix, mai: haktiex lih hu: kix tix ot ku dah ku dee khaix hoik kheem: rawm: ka piang haktiex heue:.
Simin Ting 11
Nyiex Lhaong: Babelax
1 Yam an kawn: pui haktiex khawm: uik, mawh pui tix ceu, mai: lox sikah tix ceu khaing: heue:. 2 Bawg yam an, kix kaoh khaing: plak lih singaix mai: kix yaox ka haktiex dee lung: Shina mai: kix ot tan: heue:. 3 Mai: kix ah nin: ka paox tix, "hoek heue:, kieh ex yuh tiex mak ut mai: gleeing tom: kaux, kix yuh tiex mak ut mawh tang: simaox mai: kix shao graix tang: tiex pilad heue:. 4 Mai: kix ah nin:, "hoek heue:, kieh ex sum: veng ting tix mu:, mai: nyiex lhaong: son cao: ex, tom: cux raoma:, son sang ang ex lai prung: prang: ka haktiex tang: dah, mai: son sang ao: min: ceukaux ex ka piang haktiex in heue:." 5 Mai: Siyiex lih jhak ka veng mai: nyiex lhaong: pa sum: kawn: pui heue:. 6 Mai: Simiang Siyiex ah nin:, "kawn: pui khankix hoik mawh pui tix ceu, mai: lox sikah kix kawx hoik mawh tix ceu khaing:, yam in can pa yuh kix, mai: can pa keud kix phan: ang lai koe: ceu tieb kah, kix tak ca: yuh awm: an heue:." 7 "Hoek heue:, kieh Ex lih hu: mai: tieb tie kix, mai: kieh lox sikah kix tang: khaing: paox tix heue:." 8 Mawh kheu nan:, Simiang Siyiex kieh kix prung: prang: ka piang haktiex ku dah ku dee, mai: ang lai kieh kix sum: veng ting heue:. 9 Mawh kheu hoik kieh Simiang Siyiex lox sikah kix tang: khaing: paox tix, mai: kieh kix prung: prang: ka piang haktiex ku dah ku dee, kix tom: kok veng an mawh Babelax heue:.
Doeh SiMie CeuCat Shemax
10 In mawh doeh simie ceucat Shemax khaix hoik kheem: rawm: haktiex ra: num, Shemax koe: ju tix yieh num mai: nawh pon kawn: simex tix Aphazat heue:. 11 Khaix hoik pon nawh Aphazat, Shemax im: ju phwan: yieh num mai: baox pon kawn: simex kawn: bon: khankix heue:. 12 Yam koe: ju Aphazat tingoe: phwan: num nawh pon kawn: simex tix Shalax heue:. 13 Khaix hoik pon nawh Shalax, Aphazat im: ju pon: yieh loe: num mai: baox pon kawn: simex kawn: bon: khankix heue:. 14 Shalax koe: ju tingoe: num mai: pon kawn: tix Hebax heue:. 15 Khaix hoik pon nawh Hebax, Shalax im: ju pon: yieh loe: num mai: baox pon kawn: simex kawn: bon: khankix heue:. 16 Hebax koe: ju tingoe: pon: num mai: nawh pon kawn: tix Phalek heue:. 17 Khaix hoik pon nawh Phalek, Hebax im: ju pon: yieh tingoe: num mai: nawh baox pon kawn: simex kawn: bon: khankix heue:. 18 Phalek koe: ju tingoe: num mai: nawh pon kawn: tix Ragaw heue:. 19 Khaix hoik pon nawh Ragaw, Phalek im: ju ra: yieh dim: num mai: nawh baox pon kawn: simex kawn: bon: khankix heue:. 20 Yam koe: ju Ragaw tingoe: ra: num mai: nawh pon kawn: tix Seraok heue:. 21 Khaix hoik pon nawh Seraok, Ragaw im: ju tom: hoek ra: yieh aliah num mai: nawh deeh baox pon kawn: simex kawn: bon: khankix heue:. 22 Seraok koe: tingoe: num mai: nawh pon kawn: tix Nakhaw: heue:. 23 Khaix hoik pon nawh Nakhaw:, Seraok im: ju ra: yieh num mai: nawh baox pon kawn: simex kawn: bon: khankix heue:. 24 Nakhaw: ot tinga: dim: num mai: nawh pon kawn: tix Terax heue:. 25 Khaix hoik pon nawh Terax, Nakhaw: im: ju tom: hoek tix yieh kao: dim: num mai: nawh baox deeh pon kawn: simex kawn: bon: khankix heue:. 26 Terax ot atigliah num mai: nawh pon kawn: tix pa mawh Abram, Nakhaw: mai: Haran khankix heue:.
Doeh Simie Ceucat Terax
27 In mawh doeh simie ceucat Terax, Terax pon kawn: tix pa mawh Abram, Nakhaw:, mai: Haran, Haran deeh pon kawn: tix Lotax heue:. 28 Haran yum sivoe keeing: tix Terax daux haktiex ceu pui Kaladie: veng Urax heue:. 29 Khaix an, Abram mai: Nakhaw: teei tix koe: moeng, ceukaux moeng Abram mawh Sarie, mai: ceukaux moeng Nakhaw: mawh Milakha kawn: bon: Haran, pa mawh keeing: ka Milakha mai: Isakha heue:. 30 Viang mawh nan:, Sarie mawh bon: pa neh, pa ang chix koe: kawn: heue:. 31 Mai: Terax viex kawn: simex tix Abram mai: kawn: saux nawh Lotax, pa mawh kawn: Haran, mai: mun nawh Sarie, pa mawh moeng kawn: simex nawh Abram khankix, mai: kix lih hu: khaing: haktiex ceu pui Kaladie: veng Urax, son sang hu: ka meung khanan mai: kix hoek ka Haran mai: ot tan: heue:. 32 Terax im: ju tom: hoek ra: yieh phwan: num mai: Terax yum ka daux veng Haran heue:.
Simin Ting 12
Gumlox Sijax Mukheu Son Abram
1 Simiang Siyiex ah nin: ka Abram, "Lih hu: khaing: haktiex an, mai: khaing: paox ceu paox cat maix khaing: daux nyiex ma: keeing: maix mai: hu: ka meung pa tak sang jhi: Aux maix yaox heue:." 2 "Aux tak yuh maix mawh ceucat pa ting pa lhaong:. Aux tak nawb bwan: ka piang maix mai: kieh min: ceukaux maix ting lhaong:, mai: maix tak mawh pa tawx bwan: ka pui heue:." 3 "Aux tak nawb bwan: ka pui pa nawb bwan: ka piang maix, mai: Aux tak jhax lawg ka pui pa jhax lawg ka maix, ceu pui piang haktiex khawm: uik tak pon bwanson: ka daux maix heue:." 4 Mawh kheu nan:, awm: hoik tawm: Siyiex lox ka nawh, Abram lih hu:, mai: Lotax kawx hu: tau mai: nawh, yam lih Abram khaing: haktiex Haran, ju nawh hoik koe: atigliah phwan: num heue:. 5 Khaix an Abram teei moeng tix Sarie, mai: Lotax kawn: pux nawh, khrawm: kraung khrai: sinngao khawm: pui pa pon nawh khaing: meung Haran, kix lih hu: ka haktiex Khanan, mai: kix hoek ka haktiex Khanan heue:. 6 Abram laig ka haktiex an mai: hoek ka Shekhem, dee koe: khaox piak van: mai: haktiex an mawh ceu pui Khanan pa dawg ot kah heue:. 7 Khaix an Simiang Siyiex lih bleeh ka Abram mai: ah nin:, "Aux tak sang tawx haktiex in son doeh simie ceucat maix heue:." Mai: nawh yuh khu: dee tan tix mu:, ka son Simiang Siyiex, pa hoik lih bleeh ka nawh tan: heue:. 8 Mai: nawh gah tix khaing: tan:, mai: hu: ka gawng pa koe: plak lih singaix ka veng Betelax, mai: nawh sum: nyiex gox man:, plak klip singaix veng Betelax mai: plak lih singaix veng A-ix heue:. Nawh deeh sum: khu: dee tan son Simiang Siyiex tix mu: mai: nawh yaogyaw ceukaux Simiang Siyiex tan: heue:. 9 Mawh kheu nan: Abram deeh hu: khaing: tan: mai: hoek ka plak caong ma: seh heue:.
Abram Hu: Daux Meung Ejiptux
10 Yam an sibhawm: praix lih koe: daux haktiex Khanan mai: Abram lih hu: plak meung Ejiptux, son sang laux lee: tix tivud ticu glang: sinax koe: sibhawm: praix daux haktiex an heue:. 11 Yam dex laig kix ka meung Ejiptux, nawh ah nin: ka moeng tix Sarie, "Aux hoik tawng mawh maix bon: mhawm: grang heue:. 12 Mai: yam yaox pui Ejiptux khankix ka maix, kix tak ah nin:, "in mawh moeng nawh mai: kix tak pah aux, mai: kieh maix im: ju heue:." 13 "Yuh bwanson: krai mawh maix nan: aux, son sang mawh pa mhawm: son aux, kheu bwanson: maix aux tak sang yaox tix im: ju heue:." 14 Yam hoek Abram daux meung Ejiptux, pui Ejiptux khankix yaox ka kied mhawm: grang bon: an heue:. 15 Cao: kaing: cao: kap greem: khunhawkham Pharaw yaox ka nawh mai: yaogyaw nawh sivoe khunhawkham Pharaw mai: kix viex nawh laig ka nyiex haw: khunhawkham Pharaw heue:. 16 Mawh kheu jao bon: an khunhawkham Pharaw tom: priex Abram mhawm: mhawm:, nawh pon tix koe: kawn: yung:, moi, la mhaing:, la shiang:, mai: siliex simex bon:, mai: kala-uk tom: nie heue:. 17 Viang mawh nan: Simiang Siyiex kieh khunhawkham Pharaw pon jhawm: saux ting khawm: nyiex khawm: ma:, kheu teei nawh tix priex Sarie moeng Abram heue:. 18 Khunhawkham Pharaw kok ka Abram mai: ah nin:, "Grawng: pa yuh maix ka aux in mawh pa yuh ka mawx? yuh pa tix maix lai ang krai mawh nawh moeng tix ka aux lie?" 19 "Yuh ka mawx maix lai krai, mawh nawh nan: tix? aux tom: teei nawh mawh moeng tix jao grawng: in heue:. Yam in deeh teei moeng maix hu: heue:." 20 Mai: khunhawkham Pharaw tawx lox ka pui tix khankix mai: viex Abram khawm: moeng nawh mai: can pa koe: nawh khawm: uik lih khaing: tan: heue:.
Simin Ting 13
Sinngao Khanan Son Abram
1 Khaix an Abram lih hu: khaing: meung Ejiptux, khawm: moeng nawh mai: can pa koe: nawh khankix tau mai: Lotax, plak caong ma: seh meung Khanan heue:. 2 Abram kied magmi koe: khawng: brie, mai: mau khri: tom: nie heue:. 3 Mai: nawh hu: krax tom: hoek Betelax, dee sum: tix nyiex gox man: yam jah, sinax veng Betelax mai: veng A-ix heue:. 4 Dee an mawh dee hoik sum: nawh khu: dee tan ka Siyiex tom: yam jah nhaox. Abram kok ceukaux Simiang Siyiex mai: yaogyaw Nawh tan: heue:. 5 Lotax pa hu: tau mai: Abram, mai: nawh kawx yaox tix koe: kawn: yung: khawng: brie mai: nyiex gox man: tom: nie heue:. 6 Mawh kheu haktiex baoh an, hoik sikhawp son sang ot kiex tau, jao hoik haoh hun: kraung khrai: khawng: brie cie kiex khawm: ra:, kiex tom: ang lai chix ot tau kah heue:. 7 Mai: krax simah simaing: lih koe: sinax cao: liang khawng: brie Abram, mai: cao: liang khawng: brie Lotax. Pui ceu Khanan mai: pui ceu Pherazix khankix ot daux meung an heue:. 8 Mawh kheu nan:, Abram tom: ah nin: ka Lotax, "paw kieh krax simah simaing: koe: sinax cao: liang khawng: brie aux mai: maix, kheu mawh ex puxaik heue:." 9 "Haktiex hoik koe: sivoe ngai: maix ang mawh lie? tang: gwieh tix hu: ot khaing: aux. Phan: maix hu: plak gwiex, aux tak hu: plak dawm:. Phan: ang mawh nan:, phan: maix hu: ot plak dawm:, aux tak sang hu: plak gwiex heue:." 10 Lotax yaog tix jhak mai: yaox ka dee lung: haktiex Yawdan dee koe: rawm: tom: nie. Yam an Simiang Siyiex ang nyang yuh veng Sawdom mai: veng Gawmorax laux leeing:, haktiex an khankix hoik awm: sipeem Simiang Siyiex, mai: jiet mhawm: awm: haktiex meung Ejiptux baoh krax hu: ka haktiex Zorax heue:. 11 Khaix an Lotax laug tix teei dee lung: haktiex Yawdan son cao: tix, mai: Lotax lih hu: plak lih singaix. Kiex tom: gwieh paox tix khaing: tan: heue:. 12 Abram ot haktiex Khanan mai: Lotax hu: ot daux veng khankix pa koe: daux lung: Yawdan mai: sum: nyiex gox dex baoh veng Sawdom heue:. 13 Pui pa ot daux veng Sawdom khankix mawh pui pacaox pacaig mai: pui pa ting phimap sivoe ngai: Siyiex heue:. 14 Khaix gwieh Lotax tix khaing: nawh, Simiang Siyiex ah nin: ka Abram, jah ka dee ot maix, mai: maong tix jhak ka plak lih, plak klip, plak laong:, mai: plak seh heue:. 15 "Haktiex pa yaox maix khawm: uik Aux tak sang tawx ka maix mai: doeh simie ceucat maix leeing: ju leeing: phan: heue:. 16 "Mai: Aux tak kieh simie ceucat maix haoh hun: awm: phawng: tiex; phan: pui tix kaux kaux pon simin ka phawng: tiex, simie ceucat maix kawx tak pon tix simin kah heue:." 17 "Kaoh heue:, lih hu: ka daux haktiex an, ka plak lang: mai: ka plak vieh, mawh kheu Aux hoik tawx ka maix heue:." 18 Khaix an Abram gah nyiex gox man: tix khaing: tan:, mai: hu: ot ka haktiex veng Hebron, dee koe: khaox piak van: khankix, mai: nawh deeh sum: khu: dee tan tix mu: son Simiang Siyiex tan: heue:.
Simin Ting 14
Grawng: Taoh Abram Ka Lotax
1 Ka daux baux singaix an, khunhawkham meung Shina pa mawh Amraphelax, khunhawkham meung Elalax pa mawh Arot, khunhawkham meung Elam pa mawh Khedawralawmax, mai: khunhawkham meung Gaw-in pa mawh Tidalax, 2 Mai: kix yuh naing ka khunhawkham meung Sawdom pa mawh Berax, khunhawkham meung Gawmorax pa mawh Berashax, khunhawkham meung Adamaw pa mawh Shinap, khunhawkham meung Zabaing pa mawh Shemabax, mai: khunhawkham meung Belax (meung Belax an mawh haktiex Zawrax) heue:. 3 Kix khawm: uik khrawm: paox tix daux lung: haktiex Sidim, (Sidim mawh nhawng: kih.) 4 Kix yuh siliex khunhawkham Khedawralawmax kao: ra: num mai: yam hoek kao: loe: num kix tieh feen ka nawh heue:. 5 Yam hoek kao: pon: num khunhawkham Khedawralawmax mai: khunhawkham pa ot plak nawh khankix hoek tix puing: veng Ashatarok kanan pa mawh ceu pui Riepen, ceu pui Zuzen, pa ot daux veng Hamax, mai: ceu pui Emen pa ot daux veng Kiriyatin; 6 Mai: ceu pui Hawrix pa ot piang gawng Sina tom: hoek dee singai haktiex Elaparan pa mawh daux tiag daux tu heue:. 7 Khaix an kix deeh veeh tix hu: plak khaix mai: hoek ka veng Enmishapat (pa kok mawh Kadeshax) mai: puing: ka can haktiex pa koe: daux meung Amaliet khawm: veng Hazazutanma dee ot pui ceu Amawrix khankix heue:. 8 Mai: khunhawkham Sawdom, khunhawkham Gawmawrax, khunhawkham Adamax, khunhawkham Zabaing, mai: khunhawkham meung Belax (pa kok mawh Zawrax,) khankix lih hu: mai: puing: naing tau ka daux lung: ting Sidim; 9 Khunhawkham meung Elam Khedawralawmax, khunhawkham meung Gaw-in Tidalax, khunhawkham Amraphelax haktiex Shina, mai: khunhawkham Arok haktiex Elatax khankix, khunhawkham pon: kaux tix plak mai: khunhawkham phwan: kaux tix plak puing: ka paox tix heue:. 10 Daux ngawd Sidim, koe: peeh gai rawm: kah tom: nie, khunhawkham Sawdom mai: khunhawkham Gawmawrax to: mai: cod daux tiex tan: tiblah, can pui pa kawn: deuk khankix to: ka piang gawng khawm: uik heue:. 11 Khaix an kix teei can kraung pa mhawm: mai: pa ih pa un: khawm: uik khaing: veng Sawdom mai: Gawmawrax mai: lih hu: khaing: tan: heue:. 12 Kix teei Lotax pa mawh kawn: pux Abram pa ot veng Sawdom khawm: kraung khrai: nawh mai: lih hu: heue:. 13 Pui tix kaux pa glawd khaing: naing hoek ka Abram ceu pui Hebrie, mai: krai nawh mhong: grawng: an, yam an Abram ot tiag khaox piak van: Mamre pa sum: ceu pui Amawrix, Eshakawlax mai: Anerax mawh pa yuh paox pie mai: Abram heue:. 14 Yam hoik mhong: Abram ka giex kix kawn: pux tix hu:, nawh teei pui naing pa hoik gau tix loe: yieh kao: daix kaux mai: pui pa hoik keh daux nyiex nawh, mai: kieh kix lih hawt puing: ka kix tom: hoek veng Dan heue:. 15 Nawh gwieh cub kru naing tix ra: cub daux plak ponsawm:, mai: hawt puing: kix tom: hoek veng Hawbax, pa koe: plak laong: veng Damase heue:. 16 Mawh kheu nan: nawh deeh viex kraung khrai: pa mhawm: khankix mai: kawn: pux nawh Lotax, khawm: kraung nawh mai: cub bon: mai: pui nawh khawm: uik ing: heue:. 17 khaix hoik kaoh Abram khaing: pex tix ka khunhawkham Khedawralawmax mai: cub khunhawkham pa ot tau mai: nawh khankix, khunhawkham veng Sawdom lih rieb Abram ka daux ngawd Shawe (pa mawh ngawd khunhawkham) tan: heue:.
Abram Mai: Simiang Malakhizediek
18 Mai: khunhawkham Saliem Malakhizediek, pa mawh cao: giex kaing: li pa ting cie Siyiex, viex khaomun mai: rawm: plix siiet hoek ka nawh. 19 Mai: nawh nawb bwan: ka piang Abram mai: ah nin:, "Siyiex pa ting pa lhaong: cao: pa phan: haktiex mai: raoma:, nawb bwan: ka Abram liak; 20 "Mai: kieh bwanson: koe: ka Siyiex dee lhaong:, pa hoik ap pui koeng maix khankix, daux tawm: taix maix." Abram deeh tawx kraung khrai: in pa pon nawh ka khunhawkham an, kao: son tix son heue:. 21 Mai: khunhawkham Sawdom ah nin: ka Abram, "deeh tawx pui in kix ka aux, mai: teei tix cie kraung khrai: in son cao: maix heue:." 22 Viang mawh nan:, Abram deeh ah nin: ka khunhawkham Sawdom, "Aux hoik yaog taix tix ka Simiang Siyiex, pa ting pa lhaong: cao: pa phan: haktiex mai: raoma:, 23 "Mai: aux tak ang doh teei keei: tix nyaing mai: maox kiep tix gieb tix gawng: kawx. Aux tak ang teei kraung cie maix tix ceu kawx, mai: aux ang doh kieh maix ah nin: ka tix, 'aux hoik kieh Abram mag mi heue:.' 24 Viang mawh nan: Aux tak teei priex preem pa hoik ih pui aux khankix, mai: pa khaw: pui pa hawt khaix aux tix pon, pa mawh Aneyax, Eshakawlax mai: Mamre khankix, kieh kix tang: teei son pa caw kix tix pon heue:."
Simin Ting 15
GumLox Mukheu Pa Tawx Siyiex Ka Abram
1 Khaix hoik ceu in kix khawm: uik, gumlox Simiang Siyiex lih hoek ka Abram ka daux riang susai mai: ah nin:, "Abram eue:, paw lhat paw graung. Aux mawh pa tieb tie son maix heue:. Bwanson: hoik ting hoik lhaong: son maix heue:." 2 Viang mawh nan:, Abram deeh ah nin:, "Simiang Siyiex eue:, Maix tak sang tawx ceu pa tix ka aux lie? aux hoik yaox ang kawn: tix lai chix koe:, sinngao nyiex ma: aux khankix, tak yaox tix hu: ka Eliza pui veng Damase ang mawh lie?" 3 Mai: Abram deeh ah nin:, "jhak heue:, maix ang nyang tawx doeh simie ceucat son aux pie tix kaux kawx. Mawh kheu kawn: pa keh daux nyiex ma: aux tix kaux caw tix mawh pui pa plud sinngao aux heue:." 4 Mai: jhak heue:, gumlox Simiang Siyiex deeh hoek ka nawh mai: ah nin:, "Pui in tak pon tix mawh pa plud sinngao maix heue:. Viang mawh nan:, pui pa kaoh khaing: daux tokaux cao: maix, tak sang mawh pui pa plud sinngao maix heue:." 5 Mai: Nawh Cao: kok Abram lih hu: plak plaix mai: ah nin:, "Maong mai: jhak daux raoma:, mai: simin tix yaox ka simuing: khankix heue:." Mai: Nawh Cao: baox ah nin: ka nawh,"Doeh simie ceucat maix tak sang awm: an kix heue:." 6 Mai: Abram koe: krax yumrhawm: ka Simiang Siyiex, mai: Nawh Cao: deuh krax yumrhawm: nawh mawh pa rah pa see heue:. 7 Mai: Nawh Cao: deeh ah nin: ka nawh, "Aux mawh Simiang Siyiex pa viex maix lih khaing: veng Urax dee ot pui ceu Kaladie:, son sang tawx Aux haktiex in ka maix heue:, haktiex in tak mawh sinngao son maix heue:." 8 Mai: nawh ah nin:, "Simiang Siyiex eue:, aux tak sang tawng ka pon tix sinngao an yuh ka mawx?" 9 Mawh kheu nan:, Nawh Cao: deeh ah nin: ka nawh, "Viex kawn: moi shiang: pa koe: loe: num tix mu:, kawn: pex shiang: pa koe: loe: num tix mu:, kawn: yung: mhaing: pa koe: loe: num tix mu: mai: si kaux tix mu: mai: keu kie pa awn: ju tix mu:, hoek ka Aux heue:." 10 Mai: nawh tom: viex ceu in khawm: uik hoek ka Nawh Cao: mai: lug greung ra: plak, mai: nawh deuh kix tang: tiah khaing: paox tix plak mawx plak an heue:. Viang mawh nan:, nawh ang lug nex sim: khankix koe: ra: plak heue:. 11 Yam hoek klang: preng khankix lih tum: piang tosat pa yum an kix, Abram grheu: kix hu: dee singai heue:. 12 Mai: yam hoik klip singaix, Abram hoik kied lhiak it, mai: jhak heue:, krax lhat krax graung mai: pa vhaik lih koe: ka piang nawh heue:. 13 Khaix an, Nawh Cao: ah nin: ka Abram een: maix tawng, simie ceucat maix khawm: uik tak mawh nyo sinie ka daux haktiex pui tang: ceu mai: yuh kaing siliex, mai: kharhawm: khahri:, been pon: yieh num ka pui haktiex an heue:. 14 "Mai: aux tak sang prawng ca: ka pui pa hoik cau ka kix khawm: uik. Khaix hoik an sax, kix tak yaox tix lih hu: tau mai: kraung khrai: tix tom: nie heue:." 15 "Yam in phan: mawh son maix, maix tak yaox tix hu: ka keeing: maix khankix ka daux pa yien: yawg heue:, maix tak yaox krax sipaung: mhawm: yam hoik kuad ju maix heue:." 16 "Khaix hoik luan baux ju ceucat maix pon: ju, kix tak sang deeh yaox tix hoek tin:. Mawh kheu phimap pa yuh pui ceu Amawrix khankix ang nyang bax grum naog kah heue:." 17 Yam hoek bawg yam klip singaix, mai: yam vhaik praix jhak heue:, taox ngu lih khaing: glah ngu, mai: kawk ngu pa riang tix mu:, lai ling sinax khik nex pa hoik lug nawh tix deuh khankix heue:. 18 Ka daux singaix an, Simiang Siyiex yuh sijax mukheu tau mai: Abram, ah nin:, "Son doeh simie ceucat maix, Aux hoik tawx haktiex in, jah ka mee: rawm: klawng: meung Ejiptux tom: hoek ka rawm: klawng: ting Uparat; 19 mai: ceu pui Kenix, ceu pui Kenizix, ceu pui Kadamawnix; 20 ceu pui Hittix, ceu pui pherazix, ceu pui Rephen, 21 ceu pui Amawrix, ceu pui khanan; ceu pui Giragazit, mai: ceu pui Yebutix khankix khawm: uik, Aux hoik ap nawh ka simie ceucat maix heue:."
Simin Ting 16
Grawng: Hagarax Mai: Ishamelax
1 Yam in moeng Abram Sarie ang nyang koe: kawn: tix kaux kawx son nawh, mai: nawh koe: kawncau bon: pui ceu Ejiptux tix kaux pa kok ceu kaux nawh mawh Hagarax; 2 mai: Sarie ah nin: ka Abram, "jhak yam in, Simiang Siyiex ang nyang bax tawx aux koe: kawn:, maix hu: ka kawncau bon: aux, mai: aux tak pon kawn: tix khaing: nawh heue:." Abram nghiet ka lox moeng tix Sarie heue:. 3 Khaix an moeng Abram Sarie teei bon: siliex Hagarax bon: Ejiptux mai: nawh tawx ka Abram son sang mawh moeng nawh heue:. Yam an Abram hoik ot daux haktiex Khanan kao: num heue:. 4 Mawh kheu nan:, nawh hu: ka Hagarax mai: Hagarax koe: kaux heue:. Yam yaox nawh hoik koe: kaux tix ang lai koe: krax nab yam ka sivoe ngai: Sarie heue:. 5 Sarie tom: ah nin: ka Abram, "Krax pa lud aux kieh koe: piang maix heue:. Aux hoik tawx kawncau bon: tix ka daux tawm: taix maix, mai: nawh ang lai koe: krax nab krax yam ka sivoe ngai: aux, jao hoik koe: kaux tix heue:. Kieh Simiang Siyiex prawng ca: ka sinax aux mai: maix heue:." 6 Mawh kheu nan:, Abram ah nin: ka Sarie, "Bon: siliex in koe: daux tawm: taix maix. Maix simie tix yuh ka mawx kawx, koe: ka rhawm: rhi: maix heue:." Yam yuh Sarie krax kharhawm: ka nawh, Hagarax to: tix hu: khaing: nawh heue:. 7 Kawncau Simiang Siyiex yaox ka Hagarax hawt rawm: maw: daux tiag daux tu, plak krax hu: veng Shurax heue:. 8 Mai: Nawh ah nin:, "Bon: siliex Sarie, Hagarax eue:, kaoh maix khaing: dee mawx? maix sang deeh hu: plak mawx?" mai: nawh pawk lox ah nin:, "Aux hoik to: khaing: cao: tix Sarie heue:." 9 Mai: kawncau Simiang Siyiex ah nin: ka nawh, "Deeh ing: ka cao: maix, mai: ap tix ka daux tawm: taix nawh heue:." 10 Kawncau Simiang Siyiex baox deeh ah nin: ka nawh, "Aux tak kieh doeh simie caucat maix lih koe: haoh hun: tom: ang pui khankix pon uik si min kah heue:. 11 Mai: kawncau Simiang Siyiex ah nin: ka nawh, "Jhak heue:, maix hoik koe: kaux, maix tak sang keh kawn: simex tix kaux. Maix tak kok ceukaux nawh mawh 1Ishamelax; kheu hoik mhong: Simiang Siyiex ka krax kharhawm: kharhi: maix heue:." 12 "Nawh tak mawh pui pa pheem: jhawm:, nawh tak yuh krax simah ka pui ku kaux, mai: pui ku kaux tak deeh yuh simah ka nawh heue:. Mai: nawh tak yaox tix ot tau mai: puxaik kawn: keeing: tix khankix heue:." 13 Khaix an, nawh kok yo ka ceukaux Simiang Siyiex pa hoik sikah ka nawh, Maix mawh Siyiex cao: pa yaox ka aux; mai: nawh ah nin:, "Aux hoik yaox Nawh Cao: tin:, ka kaw pa hoik kia: ngien ka aux heue:." 14 Mawh kheu nan:, nawh kok rawm: maw: an mawh Beralahieraw; (dee bleeh mawh rawm: maw: Siyiex im: ju pa yaox ka aux) rawm: maw: an, koe: sinax veng Kadeshax mai: veng Beret heue:. 15 Mawh kheu nan:, Hagarax keh kawn: simex tix kaux son Abram, mai: Abram kok ceukaux nawh mawh Ishamelax, pa keh khaing Hagarax heue:. 16 Abram koe: ju tidaix liah num yam keh Hagarax ka Ishamelax pa mawh kawn: Abram heue:.
Simin Ting 17
Mhai: Sakse: Gumlox Sijax Mukheu
1 Yam hoik koe: ju Abram tidim: dim: num Simiang Siyiex lih bleeh ka Abram mai: ah nin:, "Aux mawh Siyiex pa ting siawp sibrawm;" Hu: plak sivoe ngai: Aux, daux pa grum naog awawx. 2 "Aux tak yuh sijax mukheu sinax Aux mai: maix heue:. Aux tak kieh maix deeh baox haoh hun: tom: nie hu: sivoe ngai: heue:." 3 Khaix an, Abram gup pakngai: tix, mai: Siyiex sikah tau mai: nawh ah nin:; 4 "Jhak heue:, lox sijax mukheu Aux koe: tau mai: maix. Maix tak mawh keeing: ceu pui khawm: uik heue:. 5 "Ceukaux maix tak ang lai kok mawh Abram khaix in, mawh kheu nan: ceukaux maix tak kok mawh Abraham, mawh kheu hoik yuh Aux maix mawh keeing: tix kaux, ka can ceu pui khawm: uik heue:. 6 "Aux tak kieh maix pre haoh hun:, mai: Aux tak yuh maix mawh ceu pui tom: nie mai: simiang khankix tak lih koe: khaing: maix heue:. 7 "Mai: Aux tak kieh lox sijax mukheu tix kaux daux maix, khawm: doeh simie ceucat maix khankix, tix ju hoik tix ju khaix maix heue:. Aux tak mawh Siyiex ka maix khawm: doeh simie ceucat pa koe: khaix maix heue:. 8 "Lheu: khaing: an, Aux tak tawx haktiex in, pa mawh maix nyo sinie mai: khawm: doeh simie ceucat maix, khaix maix sax heue:. Baoh haktiex Khanan in, khawm: uik tak mawh cie maix leeing: ju leeing: phan:, mai: Aux tak mawh Siyiex ka kix heue:."\v 9 Mai: Siyiex ah nin: ka Abraham, "Maix tak priex sijax mukheu Aux tau mai: ceucat maix khawm: uik, khaix maix tix ju hoik tix ju heue:." 10 In mawh lox sijax mukheu Aux, pa caw maix tix priex, sinax Aux mai: maix tom: hoek ka ceucat maix, khaix maix sax heue:. Can pa mawh kawn: simex ku kaux, maix tak kieh kix pat hak khawm: uik heue:. 11 "Maix tak pat ka hak kix, mai: in tak sang mawh mhai: sakse: sijax mukheu sinax Aux mai: maix heue:." 12 "Can kawn: simex pa hoik naog daix ngaix, pa koe: daux ceucat maix, can pui nyo sinie pa hoik liag maix ka mau khawm: uik, pa ang mawh doeh simie ceucat maix khawm: uik tak yaox tix pat hak ku kaux." 13 Can pui pa keh daux nyiex ma: maix, pui pa viex maix hoek, pa hoik liag maix ka mau khankix kawx, kieh kix pat hak khawm: uik heue:, gumlox sijax mukheu Aux, tak ot daux nex nham: maix, mai: mawh gumlox sijax mukheu leeing: ju leeing: phan: heue:. 14 "Kawn: simex pa pat hak, mai: pui pa ang pat hak tix khankix, tak sang kieh nawh tang: tiah tix khaing: pui ceu nawh; mawh kheu lheu: nawh gumlox sijax mukheu Aux heue:." 15 Khaix an, Siyiex ah nin: ka Abraham, "Son moeng maix Sarie, maix tak ang lai yaox tix kok ceukaux nawh mawh Sarie, viang mawh nan:, "tak deeh kok ceukaux nawh mawh Sara heue:." 16 "Mai: Aux tak sang nawb bwan: ka piang nawh, mai: nawh tak maix pon kawn: simex tix kaux khaing: nawh heue:, khaix an, Aux tak nawb bwan: ka nawh, mai: nawh tak mawh miex tix kaux ka can ceu pui khawm: uik, mai: simiang kawn: pui khankix, tak kaoh khaing: nawh heue:." 17 Khaix an Abraham gup ngai: baoh tix mai: nyiah daux rhawm: tix, mai: ah nin:, "Kawn: tix kaux sang pon keh khaing: pui pa hoik koe: ju tix yiex num lie? mai: Sara tak chix koe: kawn: tix kaux yam koe: ju nawh tidim: num yuh ka mawx?" 18 Abraham tom: ah nin: ka Siyiex, "Kieh Ishamelax im: ju sivoe ngai: Maix Cao: heue:." 19 Siyiex ah nin:, "Ang mawh nan: moeng maix Sara tak sang keh kawn: simex tix kaux, mai: kok ceukaux nawh mawh Icak heue:, Aux tak sang priex lox sijax mukheu Tix ka nawh, pa mawh lox sijax mukheu leeing: ju leeing: phan: tau mai: doeh simie ceucat nawh mai: khaix nawh heue:." 20 Phan: mawh son Ishamelax, Aux hoik mhong: lox kok yo maix. Jhak heue: Aux hoik nawb bwan: ka nawh, mai: kieh nawh lih tix pre haoh hun:, mai: kieh nawh baox hun: tom: nie heue:. Nawh tak mawh keeing: simiang kao: kaux ra:, mai: Aux tak yuh nawh mawh ceu pa ting pa lhaong: heue:. 21 "Viang mawh kawx nan:, Aux tak sang priex lox sijax mukheu Tix mai: Icak, pa mawh kawn: maix khaing: Sara daux num pa sang hoek in sax heue:." 22 Hkaix hoik sikah Nawh Cao: mai: nawh, Siyiex deeh yaog tix haok khaing: Abraham tan: heue:. 23 Mawh kheu nan:, Abraham teei kawn: simex tix Ishamelax, can pui pa keh daux nyiex nawh, mai: can pui pa hoik liag nawh, ka mau pa mawh simex ka daux nyiex Abraham khawm: uik, mai: kix pat hak daux singaix an tix ngaix ngie, awm: gumlox pa hoik tawm: Siyiex ka nawh heue:. 24 Abraham koe: ju tidim: dim: nun yam pat nawh hak tix heue:. 25 Mai: Ishamelax koe: ju kao: loe: num yam pat nawh hak tix heue:. 26 Kadaux tix ngaix Abraham mai: kawn: nawh Ishamelax pat hak tix tau heue:. 27 Mai: can kawn: simex pa koe: daux nyiex ma: nawh, khawm: nyo sinie pa hoik liag nawh ka mau khankix kawx, hoik pat hak tix tau mai: nawh heue:.
Simin Ting 18
Sijax Mukheu Pa Sang Keh Kawn: Simex
1 Khaix an Simiang Siyiex lih bleeh ka nawh hawt daux tiag khaox piakvan:, yam ngawm nawh ka diang siviex nyiex gox man:, bawg yam hax koek ka daux singaix an heue:. 2 Mawh kheu nan: nawh yaog ngai: tix mai: yaox pui loe: kaux pa cung hawt nawh tan: heue:. Yam yaox nawh kix, nawh to: hu: khaing: diang siviex nyiex gox man:, mai: hu: rieb ka kix, mai: krub kix ka piang tiex tan: heue:. 3 Mai: nawh ah nin:, "Simiang Siyiex aux eue:, phan: aux mawh pa pon bwanson: ka sivoe ngai: Maix Cao: paw nyang luan khaing: siliex Maix Cao: liak." 4 Kieh aux viex rawm: ceeix mai: khoek caong pex, mai: laux lee: pex greem: khaox ha:. 5 "Aux tak sang viex khaomun hoek mai: ih son sang deeh koe: riang rao pex khawm: rhawm: khawm: rhi: heue:. Khaix an, pex sang deeh ing: khaing: siliex tix chix heue:." Mai: kix ah nin:, "yuh awm: pa ah maix heue:." 6 Mawh kheu nan:, Abraham niied tix laig daux nyiex gox man: ka Sara mai: ah nin:, "Niied maix teei gaox nghox ca loe: klong: mai: klu klao tau mhawm: mhawm:, mai: yuh khaomun kah heue:." 7 Mai: Abraham to: hu: ka cub khawng: brie eei: tix, mai: teei kawn: moi iak tixmu: mai: tawx ka kawncau tix son sang niied kix tix khre: priex preem son kix heue:. 8 Nawh teei bee mai: rawm: teeh tau mai: nex kawn: moi pa hoik khre: nawh hoek ka sivoe kix heue:. Mai: nawh cung greem: khaox dex kix yam ih kix heue:. 9 Khaix an kix ah nin: ka nawh, "Moeng maix Sara ot dee mawx?" mai: nawh deeh ah nin:, "Ot daux nyiex gox man: heue:." 10 Mai: Nawh Cao: ah nin:, "Aux tak deeh hoek ka maix tete, yam hoek singaix keh nawh heue:. Jhak heue:, moeng maix Sara tak sang koe: kawn: simex tix kaux heue:." Sara ngiet lox kix ka diang siviex nyiex gox man:, plak khaix kix heue:. 11 Yam in Abraham mai: Sara hoik kuad sipie mai: Sara hoik hit mee: been bon: daux yam an heue:. 12 Mawh kheu nan: Sara briex nyiah ka daux rhawm: tix mai: ah nin:, "khaix hoik riex ju aux, aux tak sang pon krax pa nyawmrhawm: yuh ka mawx? Abraham kawx hoik kuad heue:." 13 Mai: Simiang Siyiex ah nin: ka Abraham, "Sara nyiah jao pa tix? mai: nawh ah nin:, "Aux rug sang pon kawn: tix tix kaux tete yam hoik kuad aux lie? 14 "Pa ang Simiang Siyiex pon yuh ceu pa nu khankix koe: tix ceuceu lie? yam hoik hoek bawg yam keh nawh, Aux tak deeh hoek ka maix tete heue:. Mai: Sara tak koe: kawn: simex tix kaux heue:." 15 Viang mawh nan:, Sara thiang: nawh jao hoik lhat tix mai: ah nin:, "Aux ang nyiah heue:." Mai: Nawh Cao: ah nin:, "Ang mawh, maix hoik nyiah tete heue:."
Grawng: Pa Khyox Khaw: Abraham Son Veng Sawdom
16 Khaix an pui khankix, yaog tix kaoh khaing: tan: mai: jhak ka plak Sawdom heue:, Abraham lih hu: tau mai: kix, mai: nawh hu: tawx kix tom: hoek daux krax heue:. 17 Mai: Simiang Siyiex ah nin:, "Aux tak sang mox kaing pa yuh Tix ka Abraham yuh ka mawx?" 18 "Abraham tak mawh pui pa ting siawp sibrawm tete daux ceucat nawh mai: kawn: pui piang haktiex in khawm: uik, tak pon bwanson: ka daux nawh heue:." 19 "Mawh kheu hoik tawng Aux nawh, mai: nawh tak sidiex gau ka kawn: praix tix mai: can pui pa koe: daux nyiex ma: nawh, khaix in sax heue:, kix tak hawt grawng: lawng khaix Simiang Siyiex mai: yuh pa rah pa see mai: pa khaw: pa caw heue:. Awm: gumlox Nawh Cao: Nawh tak sang viex ceu in kix hoek ka Abraham heue:." 20 Mai: Simiang Siyiex ah nin:, "Mawh kheu lox kok lox yo Sawdom Gawmawrax mai: phimap krax phit krax lud kix hoik kied ting lhaong: heue:. 21 Aux tak lih hu: mai: jhak ka pa hoik yuh kix khawm: uik, mawh kheu lox kok yo kix hoik hoek ka Aux, mawh ang mawh son sang tawng Aux kah heue:." 22 Khaix an pui an kiex gah tix khaing: tan:, mai: hu: plak Sawdom! Viang mawh nan:, Abraham kawn: ca: cung sivoe Simiang Siyiex tan: heue:. 23 Abraham tom: hoek dex Nawh Cao: mai: ah nin:, "Maix tak yuh pui pa rah pa see laux tau mai: pui caox pui caig khankix lie? 24 Phan: pui pa rah pa see koe: daux veng an, tiphwan: kaux khex sang yuh Maix dee an laux, Maix ang lhawk ka pui pa rah pa see khankix tiphwan: kaux pa ot tan lie? 25 "Kieh krax pa pah pui pa rah pa see tau mai: pui caox pui caig lih hu: singai khaing: Maix Cao:, Mai: kieh pui pa rah pa see kham: geu: tau mai: pui pa caox khankix, hu: singai khaing: Maix Cao: liak, krax prawng ca: Simiang Siyeix ka haktiex mawh krax pa rah pa see ang mawh lie?" 26 Mai: Simiang Siyiex ah nin:, "Phan: Aux yaox pui pa rah pa see daux veng Sawdom tiphwan: kaux Aux tak deeh lhawk ka dee an jao kix heue:." 27 Abraham deeh pawk lox mai: ah nin:, "Mawh tete yam in, viang aux mawh phawng: tiex mai: nyaox kawx, aux tak sang viex lox khyox khaw: in hoek ka Maix Simiang Siyiex heue:." 28 Phan: pui rah pui see an tiphwan: kaux, yawm khaing: phwan: kaux, Maix tak yuh veng an laux kheu ang kix naog tiphwan: kaux lie?" Mai: Nawh Cao: ah nin:, "Phan: Aux yaox koe: kix tipon: phwan: kaux, Aux tak ang yuh kix laux leeing: heue:." 29 Khaix in nawh baox deeh ah nin: ka Nawh Cao:, "Phan: kix koe: tipon: kaux Maix sang yuh ka mawx?" Mai: Nawh Cao: ah nin:, "Aux tak ang yuh laux, jao tipon: kaux an heue:." 30 Mai: nawh ah nin:, "Paw kieh Simiang Siyiex songrhawm: liak," Mai: aux tak sang ah nin:, "Phan: ex kawn: yaox pui mhawm: tingoe: kaux tan:, Maix sang yuh ka mawx?" Nawh Cao: deeh ah nin:, "Aux tak ang yuh laux, phan: Aux kawn: yaox tingoe: kaux tan: heue:." 31 Khaix an nawh ah nin:, "Mawh tete heue:. Aux hoik viex ceu in kix ka piang tokaux cao: tix mai: krai ka Maix Simiang Siyiex heue:. Phan: ex kawn: yaox kix tinga: kaux tan: Maix tak sang yuh ka mawx?" Mai: Nawh Cao: ah nin:, "Aux tak ang yuh kix laux leeing: jao pui an khankix tinga: kaux heue:." 32 Mai: nawh ah nin:, "Paw nyang kieh Simiang Siyiex songrhawm: kah ha:, kieh aux ghoik tix krai tix bawg khaing: heue:, phan: ex kawn: yaox kix kao: kaux tan:, Maix tak sang yuh ka mawx?" Nawh Cao: ah nin:, "Aux tak ang yuh kix laux leeing: jao pui an khankix kao: kaux heue:." 33 Khaix hoik sikah Nawh Cao: tau mai: Abraham, dom: mawx dom: an Nawh Cao: hu: dee hu: Tix, mai: Abraham ing: ka dee ot tix heue:.
Simin Ting 19
Grawng: Pa Caox Pa Caig Sawdom
1 Yam in kawncau Siyiex ra: kaux hoek ka veng Sawdom plakbo mai: Lotax ngawm ka diang siviex nyiex nawh daux veng Sawdom tan: heue:, yam yaox Lotax ka kiex, nawh kaoh hu: mai: rieb kiex heue:. Mai: nawh tawx krax nab yam mai: gup pakngai: tix ka piang tiex. 2 Mai: nawh ah nin:, "Yam in Simiang aux eue:, laig daux nyiex aux pa mawh siliex maix, mai: ot tin: leeing: sawm: ha:. Khoek caong pax mai: deeh kaoh caocao plak ponngawb mai: deeh hu: krax hu: pax heue:." Mai: kiex ah nin:, "Yiex ang laig, viang mawh nan:, yiex tak ot ka praix daux krax leeing: sawm: heue:." 3 Viang mawh nan:, nawh deeh nyaw kiex sigren sigre; Mai: kiex deeh veeh tix plak nawh mai: laig daux nyiex nawh; khaix an, nawh yuh krax khan: kheu: ka kiex, mai: yuh khaomun pa ang viex susaix, son kiex mai: kiex ih kah heue:. 4 Sivoe ang kix nyang it, kawn: simex pa ting pa iak daux veng Sawdom, mai: can pui pa kaoh khaing: ku plak hoek tix rob ka nyiex; 5 Mai: kix kok yo ka Lotax mai: ah nin:, "Pui pa laig daux nyiex maix bo in ot dee mawx? teei kix lih plak praix ka yix, nyawk ka sang yuh yix mai: kix heue:." 6 Lotax lih khaing: diang siviex, mai: hu: ka pui an kix, mai: nyeep siviex plak khaix tix, 7 mai: nawh ah nin:, "Puxaik khankix eue:, paw doh yuh pa caox pa caig inkix liak." 8 "Jhak heue:, aux koe: kawn: bon: ra: kaux pa ang sax dex dawd mai: simex; Kieh aux viex kiex lih ka pex mai: yuh pa koe: rhawm: pex tix yuh; Paw doh yuh tix ceu kawx ka pui in kiex liak, mawh kheu kiex mawh pui pa hoek peung greem: veei nyiex aux heue:." 9 Mai: kix ah nin:, "Deeh plak khaix maix!" Mai: Kix baox ah nin:, "Sang yuh maix tix mawh pui prawng ca: ka pui pa hoek tix peung daux nyiex maix lie; yam in, yix tak sang nie yuh pa ang mhawm: ka maix lheu: khaing: pui an kiex." Mawh kheu nan:, kix tom: nyheen: tix tik Lotax, mai: kix greed hoek ka dex, son sang yuh siviex laux heue:. 10 Viang mawh nan:, kawncau Siyiex khan: kiex nyeu taix tix mai: bluh Lotax laig daux nyiex tau mai: tix, mai: kiex nyeep siviex heue:. 11 Mai: kiex yuh can pui pa ot hawt diang siviex dug ngai: khawm: pui ting pui iak khawm: uik, son sang taug mao kix ka sawg tix siviex heue:.
Grawng: Pa Laux Leeing: Sawdom Mai: Gawmorax
12 Khaix an kawncau Siyiex ah nin: ka Lotax, "kawn: koe: pui pa dex pa dawd mai: maix tix kaux kaux tin: lie? kheue: maix kawn: simex maix kawn: bon: maix, can cie maix pa koe: daux veng khawm: uik teei lih khaing: tin:; 13 "Yiex tak yuh dee in kix laux leeing: heue:. Mawh kheu lox riag yo pui in kix, hoik nie ting lhaong: plak sivoe ngai: Simiang Siyiex, mai: Simiang Siyiex hoik ploi: yiex yuh kix laux leeing: heue:." 14 Mawh kheu nan:, Lotax lih hu: mai: tawx gumlox ka kheue: tix, pa mawh mex kawn: bon: nawh khankix mai: ah nin:, "kaoh, lih hu: khaing: dee in; Mawh kheu Simiang Siyiex tak sang yuh veng in laux phaox heue:! Viang mawh nan:, kheue: nawh khankiex keud nawh mawh lox naknon: tix heue:.
Lotax Mai: Kawn: Nyiex Nawh Lih Khaing: Veng
15 Yam hoik jah praix tix riang plak ponngawb, kawncau Siyiex khankiex niied tix kieh Lotax yuh tom: phai: mai: ah nin:, "Kaoh heue:, teei moeng maix khawm: kawn: bon: maix ra: kaux pa ot tin: heue:. Phan: ang mawh nan:, maix tak yaox tix kham: geu: krax laux leeing: tau mai: pui phimap phigrham: veng in heue:." 16 Yam yaox kiex rheeng: nawh; kawncau Siyiex khankiex bluh nawh, mai: moeng nawh, mai: taix kawn: bon: nawh ra: kaux, mawh kheu Simiang Siyiex kied caox rhawm: ka kix, Mai: kiex viex kix lih khaing: tan:, mai: deuh kix ot ka praix veng heue:. 17 Mawh kheu nan:, khaix hoik viex kix hoek ka praix, mai: ah nin:, "To: tom: klawd ju maix heue:. Paw doh gi plak khaix, mai: paw ot daux lung: tix dah kawx. To: tom: klawd tix ka piang gawng khankix heue:. Phan: ang mawh nan:, maix tak yaox krax laux krax leeing: heue:." 18 Khaix an Lotax deeh ah nin: ka kiex, "Simiang eue:, paw ah yuh nan: liak." 19 "Jhak heue:, siliex maix hoik pon bwanson: sivoe pax, mawh kheu hoik taoh pax ju aux, bwanson: krax caoxrhawm: pax piang aux, hoik kied ting lhaong:; viang mawh nan:, aux ang pon to: tix klawd ka piang gawng khankix, aux lhat ka ceu pa caox khankix krup ka tix mai: yum kah heue:. 20 "Yam in jhak heue:, veng in hoik dex son sang pon to: aux kah heue:. Veng an mawh veng pa iak tix mu: mai: kieh aux to: tix klawd tan:, (veng an ang mawh pa iak tix mu: lie?) Mai: rhawmrhi: aux tak im: ju kah heue:." 21 Mai: nawh ah nin: ka nawh, "Jhak heue:, aux hoik khaw: rhawm: grawng: pa ah maix inkix heue:. Mawh kheu jao lox pa hoik ah pax Aux tak ang lai yuh veng iak an laux heue:," 22 "Niied phai:, mai: to: maix klawd tan:, phan: maix ang nyang hoek tan:, Aux ang nyang pon yuh tix ceu kawx." Mawh kheu nan:, ceukaux veng an tom: kok mawh veng Zawrax kah heue:. 23 Singaix hoik lih ka piang haktiex, yam hoik laig Lotax daux veng Zawrax heue:. 24 Khaix an, Simiang Siyiex kieh ngu mai: mhat lih khaing: daux meung raoma:, mai: lhiex ka piang veng Sawdom mai: Gawmawrax heue:. 25 Mawh kheu nan:, Nawh Cao: yuh veng ankix laux leeing: khawm: daux lung:, mai: can pui pa ot daux veng khankix, tau mai: can ceu pa kuah piang tiex khawm: uik heue:. 26 Viang mawh nan:, moeng Lotax deeh gi tix jhak plak khaix mai: nawh lih tix mawh rong: kih heue:. 27 Mai: Abraham lih hu: caocao plak ponngawb, ka dee hoik cung nawh ka sivoe ngai: Simiang Siyiex tan: heue:. 28 Khaix an, nawh jhak ka plak Sawdom mai: Gawmawrax mai: hawt daux lung: khankix, mai: nawh hoik yaox kah heue:. Mai: jhak heue:, taox ngu khankix ka piang tiex yaog tix haok dee lhaong: awm: taox ngu pa kaoh khaing: glah ngu heue:. 29 Yam hoik yuh Siyiex veng pa koe: daux lung: khankix laux, Siyiex deeh doh keud ka Abraham mai: Nawh taoh Lotax khaing: daux sigreung veng ot nawh, yam yuh Nawh Cao: veng khankix laux leeing: heue:.
Doeh Simie Ceucat Lotax
30 Khaix an, Lotax lih hu: khaing: veng Zawrax mai: ot ka piang gawng tau mai: kawn: bon: nawh ra: kaux tan: heue:. Mawh kheu hoik lhat ot nawh daux veng Zawrax heue:. Mai: cao: nawh khawm: kawn: bon: nawh ra: kaux ot ka daux rang: tix mu: heue:. 31 Yamin kawn: bon: ting nawh ah nin: ka pux nawh, "Keeing: ex hoik kuad mai: simex ang lai koe: ka piang haktiex tix kaux kawx, son sang hoek kix ka ax, awm: been pa koe: ka piang haktiex heue:. 32 "Hoek, ax tawx keeing: nyaux rawm: plix siiet mai: it tau mai: nawh, son sang pon ax ka plix doeh simie ceucat keeing: tix heue:." 33 Mawh kheu nan:, kiex tawx keeing: tix nyaux rawm: plix siiet daux bo an heue:. Kawn: bon: ting nawh, laig it tau mai: keeing: tix, Nawh ang tawng ka yam laig it nawh, mai: yam deeh kaoh nawh heue:. 34 Ka daux singaix khaix, kawn: bon: ting nawh ah nin: ka pux tix, "Aux hoik it tau mai: keeing: tix daux bo luan an tete heue:. Kieh ax deeh tawx nawh nyaux rawm: plix siiet daux bo in; khaix an, maix tom: deeh laig it mai: nawh son sang pon ax plix doeh simie ceucat keeing: tix heue:." 35 Khaix an, kiex tom: yuh rawm: plix siiet, mai: baox tawx keeing: tix nyaux daux bo an, mai: kawn: bon iak nawh yaog tix kaoh hu: mai: laig it tau mai: keeing: tix, nawh ang tawng ka yam laig it nawh, mai: yam deeh kaoh nawh heue:. 36 Mawh kheu nan:, kawn: Lotax khawm: ra: kaux koe: kaux mai: keeing: tix heue:. 37 Kawn: bon: ting nawh keh kawn: simex tix kaux, mai: kok ceukaux nawh mawh Mawbax, mai: nawh mawh keeing: ceu pui Mawbax tom: in singaix heue:. 38 Mai: kawn: bon: iak nawh keh kawn: simex tix kaux, mai: kok ceukaux nawh mawh Benamix; nawh mawh keeing: ceu pui Amon tom: in singaix heue:.
Simin Ting 20
Abraham Mai: Abimalet
1 Abraham lih hu: ka plak seh, mai: ot sinax veng Kadeshax mai: Shurax mai: peung ka veng Gerax tan: heue:. 2 Abraham ah in ka moeng tix Sara, "Nawh mawh nan:aux heue:." Mawh kheu nan:, simiang Gerax pa mawh Abimalet ploi: pui tix hu: teei ka Sara heue:. 3 Viang mawh nan:, Siyiex hoek ka Abimalet daux camaox ponsawm: mai: ah nin: ka nawh, "Maix mawh pui pa yum tix kaux tete heue:. Grawh grawng: nawh, bon: pa hoik teei maix an; mawh moeng pui tix kaux heue:." 4 Simiang Abimalet ang nyang pon tix hoek dex nawh; mai: nawh ah nin:, "Simiang Siyiex eue:, Maix tak sang pah ka ceu pui pa rah pa see lie? 5 "Nawh hoik ah, 'mawh nawh nan: tix ka aux,' pie cao: nawh kawx krai, 'Nawh mawh puxke: aux heue:.' Ka daux krax pa rah pa see mai: taix pa singax singeh aux in, aux hoik phit yuh ceu in heue:." 6 Mai: Siyiex ah ka nawh daux camaox, "Mawh heue:, Aux tawng hoik yuh maix ceu in ka daux krax pa rah pa see rhawmrhi: maix; mawh kheu nan:, son sang ang maix koe: krax phit krax lud ka Aux, Aux hoik tiebtie maix; son ang maix pon tix teei ka nawh heue:." 7 "Mawh kheu nan:, deeh tawx moeng nawh ka nawh; kheu mawh nawh cao: jhai: tix kaux, mai: nawh tak rawg bwan: son maix, mai: kieh maix im: ju kah heue:. Viang mawh nan: phan: maix ang deeh tawx nawh, maix tak yaox tix yum tete, khawm: can ceu pui pa dex pa dawt mai: maix khawm: uik heue:." 8 Simiang Abimalet yaog tix kaoh tom: cao plak ponngawb, mai: kok ka kawncau mausoi: nawh khawm: uik, mai: krai kix mhong: grawng: inkix; mai: pui khawm: uik, kied lhat graung kah heue:. 9 Simiang Abimalet kok Abraham mai: ah nin: ka nawh, "Yuh ka mawx maix yuh ceu inkix ka piang yix? mawh koe: krax phit aux ka maix yuh ka mawx? maix tom: sang viex phimap phigrham: pa ting pa lhaong: koe: ka piang aux mai: meung haktiex aux lie? maix hoik yuh kaing ceu pa ang maix keung: tix yuh heue:." 10 Khaix an, simiang Abimalet ah nin: ka Abraham, "Mawh kheu yaox maix ceu pa yuh ka mawx maix tom: yuh nin: lie?" 11 Mai: Abraham ah nin:, "Grawh grawng: nawh aux hoik keud krax lhat krax graung pui ka Siyiex ang doh koe: dee in tete, mai: kix tak pah aux yum son grawng: moeng aux heue:." 12 "Viang mawh nan:, nawh mawh pux nan: aux tete heue:. Nawh mawh kawn: bon: keeing: aux, mai: ang mawh kawn: bon: miex aux; mai: nawh deeh mawh moeng aux heue:." 13 "Yam hoik hoek bawg yam kieh Siyiex aux vung viang khaing: nyiex ma: keeing: tix, mai: aux ah nin: ka nawh, 'In hoik mawh krax pa caox rhawm:, pa caw maix tix yuh son aux ku dah ku dee; yam hu: dee mawx ang ah, krai, "Nawh mawh puxke: aux." Aux hoik tawm: tix priex ka moeng tix yuh nan: heue:."'" 14 Khaix an simiang Abimalet teei yung: mai: moi, tau mai: kawncau simex, bon: mai: tawx ka Abraham; nawh deeh tawx moeng nawh Sara ka nawh heue:. 15 Mai: Abimalet ah nin:, "Jhak heue:, haktiex aux hoik koe: sivoe ngai: maix; sang moh maix tix ot dee mawx, kieh mawh awm: rhawmrhi: cao: maix heue:." 16 Khaix an, nawh tom: ah nin: ka Sara, "Jhak heue:, aux hoik tawx maukawn ka puxke: maix tix rheng: son sang liag tix tawx man: tawb pakngai: mai: khawm: son paox grawm paox grux maix khankix heue:." Nawh tom: hoik yaox krax sidiex gau grawng: ku ceu heue:. 17 Mawh kheu nan:, Abraham rawg bwan: ka Siyiex, mai: Siyiex pai: jhawm: saux simiang Abimalet mai: moeng nawh, khawm: bon: pa cau nawh khawm: uik heue:. Khaix an kix deeh keh kawn:; 18 mawh kheu Simiang Siyiex hoik nyeep vaig pa chix nghe:, daux nyiex Abimalet jao grawng: moeng Abraham Sara yam an heue:.
Simin Ting 21
Grawng: Keh Icak
1 Simiang Siyiex hoek Tix kia: ngien ka Sara awm: gumlox pa hoik ah Nawh, mai: Nawh Cao: yuh son Sara awm: gumlox pa hoik tawm: Nawh heue:. 2 Sara koe: kaux mai: keh kawn: simex tix kaux son Abraham, yam hoik kuad nawh, daux singaix hoik ah Nawh Cao: tix deuh ka nawh heue:. 3 Mai: Abraham kok ceukaux kawn: simex tix, pa keh son nawh khaing: Sara mawh Icak heue:. 4 Khaix an Abraham pat hak kawn: simex tix Icak, yam laig nawh daix ngaix, awm: gumlox pa tawm: Siyiex ka nawh heue:. 5 Abraham hoik koe: ju tix yieh num yam keh kawn: simex nawh Icak son nawh heue:. 6 Mai: Sara ah nin:, "Siyiex hoik tawx ceu pa nyiah ka aux; mai: can pui pa mhong: kukaux tak yaox tix nyiah tau mai: aux heue:." 7 Mai: Sara ah nin:, "mawh pui mawx pa ah ka Abraham, Sara tak yaox tix tawx kawn: tix peuex; viang mawh nan:, aux hoik keh kawn: simex son nawh tix kaux, yam hoik kuad nawh heue:."
Pa Lih Hu: Hagarax Mai: Ishamelax
8 Mai: kawn: nyawm Icak an haok hwan: ting lhaong:, mai: hoik prag teeh miex tix, yam hoik prag Icak ka teeh miex tix; Abraham yuh poi ting tix mu:, ka daux singaix an heue:. 9 Daux tix ngaix Sara yaox ka kawn: Hagarax, pui ceu Ejiptux, pa keh son Abraham klieh tau mai: kawn: simex nawh Icak heue:. 10 Nawh ah nin: ka Abraham, "Grheu: bon: siliex in, mai: kawn: simex nawh; kawn: simex nawh tak ang chix pon sinngao tau mai: kawn: simex aux Icak heue:." 11 Grawng: in, kied mawh pa sungsang rhawm: kah son Abraham jao mawh kawn: simex nawh heue:. 12 Viang mawh nan:, Siyiex ah nin: ka Abraham, "Paw maix doh laux rhawm: kheu jao kawn: simex in mai: jao siliex bon: in, nghiet ka lox pa krai Sara ka maix, grawh grawng: nawh doeh simie ceucat maix tak koe: ka daux Icak heue:." 13 "Kheu mawh nawh doeh simie ceucat maix, Aux tak yuh kawn: simex siliex bon: maix an, lih tix mawh ceu pui tix cub heue:." 14 Mawh kheu nan:, Abraham kaoh caocao ponngawb teei khaomun mai: singien rawm: mai: vheuk ka piang klip Hagarax heue:. Mai: nawh ap kawn: nyawm an ka nawh, mai: ploi: kiex hu: dee singai, khaix an nawh lih hu: mai: vung viang baoh daux tiag Berashabax heue:. 15 Yam hoik uik rawm: khaing: daux singien hak, nawh deuh kawn: nyawm greem: yeem heue:. 16 Khaix an nawh hu: ngawm dee singai tixdah, dee pon puing: te hoek tix taix, mai: ah nin: ka tokaux tix, "Paw kieh aux yaox ka yum kawn: in liak." Mawh kheu nan: nawh ngawm plak sivoe nawh mai: riag yo khawm: yiem tix heue:. 17 Mai: Siyiex mhong: ka lox kawn: nyawm an, khaix an kawncau Siyiex kok ka Hagarax khaing: daux raoma: mai: ah nin: ka nawh, "Hagarax eue:, koe: krax pa lauxrhawm: maix yuh ka mawx? paw vi khirhawm: grawh grawng: nawh, Siyiex hoik mhong: lox kawn: nyawm an ka dee ot nawh heue:." 18 "Kaoh heue:, yaog ka kawn: nyawm mai: teem nawh ka taix maix; Aux tak yuh nawh mawh ceu pui pa ting tix cub heue:." 19 Siyiex paoh ngai: nawh, mai: nawh yaox ka rawm: maw: tix mu:, khaix an nawh hu: mai: kin rawm: naog daux singien hak an, mai: nawh tawx kawn: nyawn nyaux heue:. 20 Mawh kheu nan:, Siyiex ot tau mai: kawn: nyawm mai: nawh hwan: sipie sipie; mai: nawh ot daux tiag daux tu, Nawh lih tix mawh pui puing: ak tix kaux heue:. 21 Nawh ot daux tiag Paran, mai: miex nawh teei nawh moeng bon: khaing: meung Ejiptux heue:.
Gumlox Sijax Mukheu Tau Mai: Abimalet
22 Khaix hoik luan bawg yam an, simiang Abimilet mai: cao: kaing: kru naing nawh Phikawlax sikah tau mai: Abraham ah nin:, "Siyiex ot tau mai: maix, ka daux can ceu pa yuh maix khawm: uik heue:." 23 "Mawh kheu nan:, yam in tawx krax tiex tu maix ka aux plak sivoe ngai: Siyiex son ang maix lai yuh krax pa lud ka aux mai: ka kawn: praix aux, mai: krax magmi aux khankix, awm: hoik yuh aux krax pa caoxrhawm: ka maix, maix tak caw tix yuh son aux mai: son haktiex pa hoik yaox maix tix peung kah heue:." 24 Mai: Abraham ah nin:, "Aux tak tiex tu kah heue:." 25 Yam yaox Abraham tud rhim: siliex Abimalet ka rawm: maw: tix mu:, Abraham ne raw ka simiang Abimalet heue:. 26 Mai: simiang Abimalet ah nin:, "Aux ang nyang tawng ka pui pa yuh ceu in, maix kawx ang sax krai ka aux, aux ang nyang bax mhong: tom: in singaix heue:." 27 Mawh kheu nan: Abraham teei yung: mai: moi khankix, tawx ka simiang Abimalet, mai: kiex khawm: ra: yuh sijax mu kheu tau heue:. 28 Abraham gwieh tix deuh kawn: yung: shiang: pa awn: aliah mu: khaing: cub yung: nawh tan: heue:. 29 Khaix an simiang Abimalet chawk Abramham, "dee bleeh grawng: gwieh maix kawn: yung: shiang: pa awn: aliah mu: khaing: cub yung: nawh khankix koe: yuh ka mawx?" 30 Mai: nawh ah nin:, "Rieb maix teei kawn: yung: shiang: pa awn: in aliah mu: khaing: daux tawm: taix aux, "Ceu in kix tak mawh mhai: sakse: hoik kaong: aux rawm: maw: in heue:." 31 Mawh kheu nan: nawh kok dee an mawh Berashebax, grawh grawng: nawh, kiex ra: kaux hoik tiextu ka paox tix heue:. 32 Kix yuh sijax mukheu ka Berashebax, khaix an simiang Abimalet mai: cao: kaing: kru naing nawh Phikawlax yaog tix mai: ing: ka haktiex Philitix heue:. 33 Mai: Abraham sum: khaox plix mak kiang: tix num: daux Berashebax, mai: yaogyaw ka Simiang Siyiex, pa mawh Siyiex leeing: ju leeing: phan: heue:. 34 Mai: Abraham peung pan: ka daux haktiex Philitix tom: rheung: heue:.
Simin Ting 22
Grawng: Kaux Sijax Krax YumRhawm: Abraham
1 Khaix hoik luan ceu in kix, Siyiex cheuk cheu: tix yaox ka Abraham, mai: ah nin: ka nawh, "Abraham eue:," mai: nawh pawk lox, "Aux ot tin: heue:." 2 Nawh Cao: ah nin:, "Teei kawn: simex maix Icak, pa kied moh maix, pa koe: tix kaux khaing:, mai: hu: ka haktiex Mawrix, yuh krax tan pa gleeing ka ngu ka son Aux ka piang gawng pa sang jhi: Aux maix yaox heue:." 3 Mawh kheu nan: Abraham kaoh caocao plak ponngawb mai: sau: an: la khankix mai: kok kawncau nawh ra: kaux tau mai: kawn: simex nawh Icak; mai: nawh lug khix son pa sang gleeing nawh mai: kaoh hu: ka dee hoik ah Siyiex ka nawh heue:. 4 Khaix hoek loe: ngaix Abraham yaog ngai: tix mai: yaox ka dee an, dee singai heue:. 5 Abraham ah nin: ka kawncau nawh khankix, "Ot tin: tau mai: la awawx; kawn: nyawm mai: aux tak sang hu: toi: plak an, mai: krub ka Siyiex mai: tak deeh hoek ka pax heue:." 6 Mawh kheu nan:, Abraham teei khix pa sang gleeing tix tan mai: kieh kawn: simex tix Icak klawm: hu:; nawh teei ngu mai: vaig tix kre:, mai: kiex lih hu: tau heue:. 7 Mai: Icak ah nin: ka keeing: tix Abraham, "Keeing: eue:," mai: nawh deeh pawk lox Icak, "Kawn: simex eue:, aux ot tin: heue:." Nawh tom: deeh ah nin:, "Jhak heue:, ngu mai: khix hoik koe:, viang mawh nan:, kawn: yung: pa sang gleeing ex tix tan lu, koe: dee mawx?" 8 Mai: Abraham deeh ah nin:, "Kawn: eue:, Siyiex tak tawx kawn: yung: an, son pa sang gleeing ex tix tan son Nawh Cao: heue:." Kiex ra: kaux lih hu: tau heue:. 9 Yam hoek kix ka dee ah Siyiex ka nawh tan:, Abraham sum: khu: dee tan tix mu: tan:, mai: deuh khix ka piang heue:, nawh phyawk kawn: tix Icak mai: deuh nawh ka piang khix ka khu: dee tan heue:. 10 Khaix an Abraham nyeu taix tix mai: teei vaig son sang pah ka kawn: tix heue:. 11 Viang mawh kawx nan:, kawncau Simiang Siyiex kok nawh khaing: daux raoma: mai: ah nin:, "Abraham Abraham" mai: nawh deeh pawk lox, "Aux ot tin: heue:." 12 Mai: nawh cao: ah nin:, "Maix paw teeh ka kawn: maix mai: paw yuh tix ceu kawx ka nawh; grawh grawng: nawh, yam in Aux hoik tawng lhat maix ka Siyiex mai: Aux hoik yaox ang maix thiang: pa mhaing: Aux kawn: simex tix kaux maix an, son Aux heue:." 13 Mai: Abraham yaog ngai: tix mai: jhak, nawh yaox ka kawn: yung: mhaing: tix mu: plak khaix nawh, pa vung vhiien: rung: tix ka yeem heue:. Mawh kheu nan:, Abraham hu: teei kawn: yung: iak an, mai: gleeing piang khu:, tang: kawn: tix heue:. 14 Mai: Abraham kok ceukaux dee an mawh, "Yahowa yire (dee bleeh mawh Simiang Siyiex tak sang tawx") tom: in singaix pui ah mawh "gawng pa hoik cox khre: Simiang Siyiex" kah heue:. 15 Mai: kawncau Simiang Siyiex deeh kok ka Abraham ra: bawg ti bawg. 16 Nawh ah nin:, "Aux hoik tiextu ka Tokaux Cao: Tix, mawh kheu maix hoik yuh ceu in kix mai: ang thiang: ka kawn: tix kaux maix an ka Aux heue:." 17 "Aux nawb bwan: ka maix, mai: Aux tak kieh doeh simie ceucat maix nie baox haoh hun: awm: simuing: daux raoma: mai: awm: mhaik pa koe: praok rawm: sigrit sigra: heue:. Doeh simie ceucat maix khankix kawx, Aux tak kieh kix kwang: ka diang siviex pui koeng maix khawm: uik heue:. 18 "Can ceu pui khawm: uik ka piang haktiex in, tak pon bwanson: kheu hoik cu nghiet maix ka gumlox Aux heue:." 19 Mawh kheu nan:, Abraham deeh ing: ka kawncau nawh khankiex. Kix yaog tix hu: tau ka Berashebax, mai: Abraham ot tan: heue:.
Grawng: Nyiex Ma: Nakhaw:
20 Khaix hoik luan ceu in kix khawm: uik, Abraham mhong: grawng: krai pui ah nin:, "Moeng pux nawh Nakhaw: pa kaux Milakha hoik keh kawn: simex khankix ka son nawh heue:." 21 "Kawn: Ai: mawh Uzax kawn: nyi mawh Buzax, kawn: sam: mawh Kemoelax pa mawh keeing: Aram, 22 kawn: Sai: mawh Khetiet, kawn: Ngox mawh Hazaw, kawn: Log mawh Piladaha, kawn: Ciet mawh Yidalax mai: kawn: Piet mawh Betoelax khankix, 23 Mai: Betoelax mawh keeing: Rebekax heue:. In kix mawh kawn: simex daix kaux pa keh khaing: Milakha son Nakhaw: pux Abraham khawm: uik heue:. 24 Moeng iak Nakhaw:, pa mawh Ruma kawx, deeh baox keh Tebax, Gahan, Tahashax mai: Makha khankix heue:.
Simin Ting 23
Grawng: Yum Sara Mai: Dee Sipaung: Nawh
1 Sara im: ju tix yieh tinga: aliah num, in mawh baux num im: ju Sara heue:. 2 Mai: Sara yum daux veng Kirathabax pa mawh veng Hebron, ka meung Khanan, Abraham hoek tix yiem doe: son Sara heue:. 3 Mai: Abraham cung sivoe lawng: moeng tix mai: ah nin: ka ceu pui Hetax khankix, 4 "Aux mawh pui tang: meung mai: mawh nyo sinie tix kaux sinax pex. Tawx aux sipaung: tokaux yum moeng tix ka simeeig tix dah ka sinax pex, son sang glip nawh khaing: sivoe ngai: aux heue:." 5 Mai: ceu pui Hetax khankix deeh pawk lox Abraham mai: ah nin:; 6 "Cao: simiang eue:, Nghiet ka lox yix liak; maix hoik mawh pui pa ting min: Siyiex sinax yix, laug maix teei simeeig cie yix mai: sipaung: moeng maix kah, yix ang doh koe: krax thiang: tix kaux kawx, son sang sipaung: maix pui yum kah heue:." 7 Khaix an Abraham yaog tix kaoh, mai: tawx krax nab krax yam, ka can pui pa ot daux meung an, pa mawh ceu pui Hetax khankix heue:. 8 Mai: nawh ah nin: ka kix, "Phan: pex koe: rhawm: tix kieh aux sipaung: pui yum in glip sivoe ngai: aux, nghiet heue:, kieh pex hu: khyox khaw: ka Epharon kawn: simex Zawrax son aux liak." 9 "Son sang tawx Epharon daux rang: Makhaphelax pa mawh cie nawh pa koe: daog kaung: nawh heue:. Ngawh miex ding kawx, kieh nawh coh ka aux, son sang mawh simeeig cie aux sinax pex heue:." 10 Epharon pa mawh ceu pui Hittix, ngawm tau mai: ceu pui Hetax, pawk lox Abraham sivoe ngai: ceu pui Hetax pa laig ka daux siviex an khawm: uik mai: ah nin:; 11 "Ang mawh nan:, cao: simiang aux eue:, nghiet ka lox aux, aux tak tawx daux rang: pa koe: daux kaung: an ka maix; mai: aux tawx ka maix sivoe ngai: pui ceu aux khankix heue:. Sipaung: tokaux yum moeng maix kah heue:. 12 Khaix an Abraham tawx krax nab krax yam ka ceu pui haktiex an khankix heue:. 13 Mai: nawh ah nin: ka Epharon, son sang mhong: pui haktiex an kah, "Phan: maix sang tawx an, nghiet ka lox aux; aux tak sang tawx mau son kaung: an, mai: teei hu:, aux tak sipaung: moeng tix tan: heue:." 14 Mai: Epharon deeh pawk lox Abraham ah nin:; 15 "Cao: simiang eue:, nghiet ka lox aux liak, haktiex an, ngawh caw mau pon: yieh Shekhe heue:. Sinax maix mai: aux, ang koe: grawng: tix ceu kawx, mawh kheu nan:, sipaung: moeng maix kah heue:." 16 Abraham khawrhawm: ka lox Epharon mai: nawh ciang tix tawx mau ka Epharon, awm: hoik tat Epharon jum, pon: yieh Shekhe plah, awm: pa shiao pui yuh lai geu ka sivoe ngai: pui Hetax khankix heue:. 17 Mawh kheu nan:, kaung: Epharon pa koe: ka Makhaphelax, veng Morean, khawm: daux rang:, mai: khaox ox pa koe: daux kaung: khawm: uik, hoik mawh cie nawh heue:. 18 Nawh hoik ap haktiex an ka Abraham sivoe ngai: ceu pui Hetax, mai: can pui pa laig ka daux siviex veng khankix heue:. 19 Khaix hoik ceu inkix, Abraham sipaung: moeng tix Sara ka daux rang: Makhaphelax, sivoe veng Mamre, pa mawh veng Hebron, daux haktiex khanan tan: heue:. 20 Mawh kheu nan:, kaung: an mai: daux rang: an, son sang mawh haktiex simeeig son cie Abraham, mai: ceu pui Hetax khankix hoik ap ka nawh heue:.
Simin Ting 24
Grawng: Koe:: Moeng Icak
1 Abraham hoik kuad mai: riex ju hu: sipie sipie, Simiang Siyiex nawb bwan: ka piang Abraham kuceu heue:. 2 Mawh kheu nan: Abraham kok ka kawncau pa riex ju daux nyiex, pa kwang: ka can pa koe: nawh khawm: uik mai: ah nin:, "Deuh taix maix greem: ba: aux heue:. 3 "Mai: aux tak kieh maix tiex tu ka sivoe ngai: Siyiex, pa mawh Cao: raoma: mai: haktiex, maix ang pon teei kawn: bon: ceu pui Khanan ka dee ot ex tin:, son sang mawh moeng kawn: simex aux heue:." 4 "Viang mawh nan:, maix hu: ka haktiex aux, dee ot ceucat aux, mai: teei moeng tix kaux, son kawn: simex aux Icak heue:." 5 "Kawncau nawh deeh ah nin: ka nawh, "Phan: bon: ang koe: rhawm: tix hawt khaix aux hoek daux meung in, mawh sang kieh maix aux deeh viex kawn: simex tix hu: khaing: dee kaoh tix lie?" 6 Abraham deeh ah nin: ka nawh, "Yuh satix tix, paw doh viex kawn: simex aux hu: tan: heue:." 7 Simiang Siyiex khaing: meung raoma:, pa hoik teei aux lih khaing: nyiex ma: keeing: aux, mai: khaing: haktiex dee ot ceucat aux, mai: pa tawx lox sijax mukheu ka aux ah nin:, "Son doeh simie ceucat maix, Aux hoik tawx haktiex in ka son doeh simie ceucat maix, Nawh tak ploi: kawncau Siyiex hu: sivoe maix, maix tak yaox tix viex moeng tix kaux, son kawn: simex aux khaing: tan: heue:." 8 "Phan: bon: ang koe: rhawm: tix hawt khaix maix, maix hoik pon luan khaing: lox pa tiex tu aux, paw viex ngie kawn: simex aux hu: ka dee an heue:." 9 Mawh kheu nan:, kawncau nawh deuh taix tix greem: ba: Abraham, mai: tiex tu ka grawng: ceu in kix heue:. 10 Mawh kheu koe: kraung kuceu daux tawm: taix kawncau Abraham, nawh teei Kala-uk kao: mu: mai: lih hu:, mai: nawh kaoh hu: ka meung Mesopotimia: mai: hoek ka veng Nakhaw: heue:. 11 Mai: nawh kieh Kala-uk khankix grux ngawng tix plak praix veng dex rawm: maw: tan:, plakbo pa mawh bawg yam hoek kin bon: khankix rawm: heue:. 12 Mai: nawh rawg bwan: ah nin:, "Simiang Siyiex cao: aux Abraham eue:, kieh krax pa keud aux grum naog daux in singaix; mai: jhi: krax pa caoxrhawm: Maix ka cao: simiang aux Abraham liak. 13 "Jhak heue:, aux cung dex rawm: maw:, mai: cub kawn: bon: krih pui veng an khankix hoek tix kin rawm: heue:. 14 "Kieh kawn: bon: pa ah aux nin: kah, tah singien maix mai: tawx aux nyaux kah; phan: nawh ah nin:, nyaux heue:, mai: aux tak baox tawx Kala-uk maix khankix nyaux kah, bon: an tak mawh pa hoik tawx Maix Cao: ka kawncau Tix Icak. Ka ceu inkix, aux tak tawng Maix Cao: jhi: krax caoxrhawm: Tix ka cao: simiang aux Abraham heue:. 15 Yam ang nawh nyang tien hoik rawg bwan:, jhak heue:, Rebekkax kawn: bon: Betoelax klawm: singien rawm: piang klip tix mai: hoek kin rawm:, Betoelax mawh kawn: simex Melakha moeng Nakhaw:, pux Abraham heue:. 16 Kawn: bon: an, kied sidaing: mhawm: grang, mai: nawh mawh kawn: bon: krih pa ang sax pied sax pha: simex tix bawg kawx; nawh lih hu: ka rawm: maw:, mai: kin rawm: daux singien tix naog mai: deeh viex hoek heue:. 17 Kawncau an nied tix to: hu: ka kawn: bon: an mai: ah nin:, "Tawx aux nyaux rawm: khaing: singien rawm: maix ceeix heue:." 18 Mai: nawh ah nin:, "Simiang eue:, nyaux heue:." Khaix an nawh nied tix tah singien rawm: khaing: klip tix, mai: tawx nawh nyaux heue:. 19 Khaix hoik tawx nawh kawncau an nyaux rawm: nawh ah nin:, "Aux tak kin tix tawx rawm: ka Kala-uk maix khankix, tom: hoik sak nyaux kix heue:." 20 Khaix an, nawh nied tix hu: sau: rawm: ka daux dawng: mai: deeh to: tix kin rawm:, son sang yaox Kala-uk khankix tix nyaux khawm: uik heue:. 21 Mai: kaw an, daox deng: ka pa yuh kawn: bon: an, mai: yawg tix, nawh keud tix yaox, mawh ang mawh, pa yuh Simiang Siyiex grawng: krax hoek nawh heue:. 22 Khaix hoik nyaux Kala-uk khankix rawm:, nawh teei krim khri: meeh tix mu:, pa koe: tix plak Shekhe, mai: ble khri: ra: mu:, pa koe: kao: Shekhe mai: tawx ka nawh, 23 mai: ah nin:, "Mawh maix kawn: bon: mawx, krai aux mhong: liak, koe: lawg dee sang paung yix daux nyiex keeing: maix lie?" 24 Mai: nawh deeh ah nin: ka nawh, "Aux mawh kawn: bon: Betoelax kawn: simex Milakha, pa keh khaing: Nakhaw: heue:. 25 Nawh baox ah nin: ka nawh, "Nyiex yix hoik koe: brex nghox mai: pa ih pa un: tom: kub, mai: lawg sang paung pex kawx koe: heue:." 26 Khaix an kawncau an gup kaing: tix mai: yaogyaw ka Simiang Siyiex heue:. 27 Mai: nawh ah nin:, "Kieh bwanson: koe: ka Simiang Siyiex Abraham, Nawh Cao: ang sax mox krax pa caoxrhawm: tix, mai: krax pa rah pa see tix ka simiang aux heue:. Siyiex hoik thong: aux hu: ka nyiex pux simiang aux heue:." 28 Khaix an kawn: bon: an, to: tix ing: krai grawng: inkix ka miex tix daux nyiex heue:. 29 Yam an puxke: Rebekkax, pa mawh Laban to: hu: ka kaw simex an ka rawm: maw: heue:. 30 Yam yaox nawh krim khri: mau mai: ble khri: khankix ka taix nan: nawh, mai: yam hoik mhong: nawh lox Rebekkax ah nin:, "Simex an sikah ka aux heue:," Laban tom: hu: ka kaw an, pa cung tau mai: kala-uk hawt dex rawm: maw: heue:. 31 Mai: nawh ah nin:, "Hoek heue:, Maix mawh pui pa hoik pon bwanson: khaing: Simiang Siyiex; maix lai cung plak praix yuh ka mawx? mawh kheu aux hoik khre: rien nyiex son maix, khawm: dee sang ot Kala-uk khankix heue:." 32 Khaix an, kaw simex an laig daux nyiex, Laban tah an: kala-uk mai: tawx kala-uk sawm: brex, mai: pa ih pa un: tang: ceu, nawh teei tix tawx rawm: son sang khoek kix caong tix heue:. 33 Khaix an kix khan: priex preem sivoe nawh, son sang ih kix; viang mawh nan:, nawh ah nin:, "Aux ang nyang sawm:, sivoe ang tix nyang hoik krai grawng: kaing pa hoek tix heue:." Mai: nawh ah nin:, "Krai grawng: hoek maix heue:." 34 Mawh kheu nan:, nawh tom: ah nin:, "Aux mawh kawncau Abraham heue:." 35 "Simiang Siyiex hoik kied nawb bwan: ka piang cao: simiang aux tom: nie, mai: nawh hoik mawh pui pa ting min:; Siyiex hoik tawx yung: mai: khawng: brie, mau khri: ka nawh, khawm: kawncau simex kawncau bon: khankix, mai: kala-uk mai: la khankix haoh hun: ka nawh heue:." 36 "Mai: Sara moeng cao: simiang aux, keh kawn: simex tix kaux son simiang aux, yam riex ju tix; mai: nawh hoik tawx can ceu pa koe: tix khawm: uik ka nawh heue:. 37 "Cao: simiang aux kieh aux tiex tu mai: ah nin:, "Maix ang pon teei kawn: simex aux moeng ka bon: pui haktiex Khanan pa hoik ot aux kah heue:. 38 'Mai: maix hu: ka nyiex ma: keeing: aux, ka simie ceucat aux, mai: teei tix viex moeng tix kaux, son kawn: simex aux heue:.' 39 Mawh kheu nan:, aux ah nin: ka cao: simiang tix; aux lhat bon: ang cu tix hawt khaix tix heue:." 40 "Viang mawh nan:, nawh ah nin: ka aux, 'Simiang Siyiex pa hoik hawt aux grawng: lawng khaix Nawh, Nawh Cao: tak ploi: kawncau Siyiex ot mai: maix, tom: hoik pon yuh maix kaing yuh tix, maix tak yaox tix viex moeng tix kaux, son kawn: simex aux, khaing: daux doeh simie ceucat aux, mai: khaing: daux nyiex ma: keeing: aux heue:. 41 'Maix tak luat luan khaing: krax pa tiex tu, yam hoek maix ka doeh simie ceucat aux; phan: kix ang tawx kawn: bon: an ka maix, maix tak luan khaing: lox pa tiex tu aux heue:.' 42 "Aux tom: hoek ka rawm: maw: mai: ah nin:, Simiang Siyiex cao: Abraham eue:, maix cox daux krax, pa hu: aux grum mhawm: liak.' 43 Jhak heue:, aux cung hawt rawm: maw: tan:, mai: aux yaox hoek bon: krih tix kin rawm:, mai: aux ah nin: ka nawh, "Tawx aux nyaux rawm: khaing: singien rawm: maix ceeix heue:." 44 Mai: phan: nawh deeh ah nin: ka aux, "Nyaux heue:, mai: aux tak kin rawm: mai: tawx kala-uk maix khankix nyaux kah." Kieh nawh mawh kawn: bon: pa hoik ciak Siyiex tix tawx son kawn: simex cao: simiang aux heue:." 45 "Sivoe ang aux nyang tien hoik sikah grawng: in, Rebekkax hoek khawm: singien rawm:, piang klip tix mai: lih hu: plak rawm: maw: son sang kin rawm: heue:. Aux tom: ah nin: ka nawh, 'tawx aux nyaux rawm: heue:.' 46 Mai: nawh tah singien rawm: tix phai: phai:, khaing: glip tix mai: ah nin:, 'nyaux kah heue:, aux tak baox kin rawm:, mai: tawx kala-uk maix khankix nyaux kah.' Mawh kheu nan:, aux tom: nyaux rawm:, mai: nawh baox kin rawm:, mai: tawx kala-uk aux khankix nyaux heue:. 47 Khaix an aux chawk ka nawh, 'mawh maix kawn: bon: mawx lie?' mai: nawh ah nin:, 'aux mawh kawn: bon: Betoelax kawn: simex Nakhaw:, Nakhaw: mawh pa keh khaing: Milakha.' Mawh kheu nan:, aux sau: krim khri: meeh ka nawh, mai: ble khankix ka taix nawh heue:. 48 Aux gup ngai: tix mai: krub ka Simiang Siyiex mai: tawx krax yaogyaw ka Simiang Siyiex Abraham, pa hoik jhi: aux yaox daux krax pa rah pa see, son sang teei aux kawn: puxaik Abraham son kawn: simex nawh heue:. 49 Yam in, phan: maix koe: krax pa caoxrhawm:, mai: pa sang yuh bwanson: ka cao: simiang aux, pon yuh ang pon yuh krai yam in; aux tak sang hu: plak dawm: phan: ang mawh nan:, plak gwiex heue:." 50 Khaix an Laban mai: Betoelax pawk lox mai: ah nin:, "Kaing in mawh pa kaoh khaing: Simiang Siyiex, yix ang chix krai ka maix mhawm: ang mhawm: heue:." 51 Jhak heue: Rebekkax hoik koe: sivoe ngai: maix, teei nawh hu:, mai: kieh nawh mawh moeng kawn: simex cao: simiang maix, awm: lox pa hoik ah Simiang Siyiex heue:." 52 Yam hoik mhong: kawncau Abraham lox krai kix, nawh tom: grux ngawng tix ka piang tiex mai: krub ka Simiang Siyiex heue:. 53 Mai: kawncau an, teei kraung mau kraung khri: khawm: kraung ceep khankix mai: tawx ka Rebekkax; mai: nawh tawx khawngphak pa ngawh pa mhawm: ka prie: nawh mai: miex nawh heue:. 54 Nawh mai: pui nawh khankix, ih tau nyaux tau mai: paung tan: daux sawm: an, yam kaoh kix pon ngawb caocao mai: nawh ah nin:, "Kieh aux deeh ing: ka cao: simiang tix liak." 55 Prie: nawh mai: miex nawh ah nin:, "Kieh kawn: bon: in ot mai: yix kao: ngaix ha:, khaix an nawh pon tix hu: heue:." 56 Mai: nawh ah nin: ka kix, "Paw nyang tieb tie ka aux liak, awm: hoik yuh Simiang Siyiex krax hu: aux grum mhawm:; kieh aux deeh ing: ka cao: simiang tix heue:." 57 Mai: kix baox ah nin:, "Yix sang kok chawk tix yaox ka rhawm: nawh heue:." 58 Mai: kix kok Rebekkax mai: ah nin: ka nawh, "Sang hu: maix mai: pui in lie?" mai: nawh deeh ah nin:, "Aux sang hu: heue:." 59 Mawh kheu nan: kix ploi: Rebekkax tau mai: cao: pa priex nawh, hu: tau mai: kawncau Abraham mai: pui nawh heue:. 60 Mai: kix nawb bwan: ka Rebekkax mai: ah nin: ka nawh, "Kieh nan: ex mawh miex ka pui kaing: rheng: mai: kaing: mheen:; mai: kieh simie ceucat maix pon kwang: ka siviex veng pui pa koeng ka kix heue:." 61 Khaix an Rebekkax mai: kawn: bon: pa priex nawh khankix, yaog tix kaoh mai: brug kala-uk mai: hawt khaix kawncau an; yam an kawncau Abraham viex Rebekkax hu: khaing: kix heue:. 62 Yam an Icak kaoh khaing: Beralahieraw mai: hu: ot ka baoh Negep (caong ma: seh) heue:. 63 Icak lih hu: plak praix daux kaung: plak bo, mai: maong tix jhak nawh yaox ka cub kala-uk pa hoek khankix heue:. 64 Mai: Rebekkax maong tix jhak mai: yaox ka Icak, nawh lih khaing: kala-uk brug tix heue:. 65 Mai: nawh ah nin: ka kawncau an, "Mawh pui mawx pa lai ling daux kaung: son sang rieb ka ex lie?" Cao: cau an deeh ah nin:,"Nawh mawh simiang aux heue:." Mawh kheu nan:, nawh tom: teei man: tawb tix pheen: mai: tawb ngai: tix kah heue:. 66 Mai: cao: cau an, krai grawng: ku ceu pa hoik yuh tix ka Icak heue:. 67 Khaix an Icak rieb nawh laig daux nyiex gox man: miex tix Sara, mai: teei Rebekkax mawh moeng tix; kheu hoik mawh pa moh nawh kah heue:. Mawh kheu nan:, Icak deeh koe: krax nyawmrhawm: nyawmrhi: khaix yum miex tix heue:.
Simin Ting 25
Abraham Mai: Keturax
1 Abraham baox teei tix koe: moeng tix kaux, mai: ceukaux nawh mawh Keturax heue:. 2 Keturax baox keh Zimaran, Yokshan, Madan, Midiam Ishabet mai: shua heue:. 3 Yokshan koe: kawn: simex Shebax mai: Bedan. Kawn: simex Bedan mawh Ashurim, Letushim, mai: Lumin khankix heue:. 4 Kawn: simex Midiam mawh Ephax, Epharax, Hanok, Abidax mai: Eladax, pui inkix khawm: uik, mawh kawn: praix Keturax heue:. 5 Abraham tawx can pa koe: tix khawm: uik ka Icak heue:. 6 Viang mawh nan:, Abraham tawx khawng: phak, ka kawn: simex, pa pon nawh khaing: moeng iak tix, yam kawn: im: ju nawh, nawh ploi: kix hu: ot haktiex plak lih singaix dee singai khaing: Icak heue:.
Grawng: Yum Abraham Mai: Dee Sipaung:
7 In mawh baux singaix nun im: ju Abraham, nawh im: ju tom: hoek tix yieh atigliah phwan: num heue:. 8 Abraham hoik kied kuad mai: riex ju, nawh yum mhawm: mhawm: mai: hu: tau ka dah dee hu: simie ceucat tix khankix heue:. 9 Kawn: nawh Icak mai: Ishamelax sipaung: nawh ka daux rang:, Makhaphelax ka veng Mamre, daux kaung: Epharon kawn: Zawrax ceu pui Hittix heue:. 10 Kix sipaung: Abraham hawt moeng nawh Sara tan:, dee pa hoik liag Abraham khaing: ceu pui Hittix heue:. 11 Khaix hoik yum Abraham, Siyiex deeh nawb bwan: ka kawn: nawh Icak. Mai: Icak ot dex ka Beralahieraw tan: heue:.
Grawng: Nyiex Ma: Icak Mai: Ishamelax
12 In kix mawh grawh grawng: doeh simie ceucat Ishamelax kawn: Abraham, pa pon nawh khaing: Hagarax pui ceu Ejiptux. Hagarax mawh kawncau Sara mai: keh kawn: son Abraham heue:. 13 In kix mawh ceukaux kawn: simex Ishamelax tau mai: simie ceucat kix, kawn: simex ting Ishamelax mawh, Nabayok; khaix an Kedax, Adabelax, Mibatan, 14 Mishamax, Duma, Mashax, 15 Hadax, Temax, Yeturax, Naphishax mai: Kedamax khankix heue:. 16 Pui in kix mawh kawn: Ishamelax, khawm: ceukaux kix mai: meung dee ot kix, mai: lih mawh simiang kao: ra: kaux daux simie ceucat pui tix heue:. 17 Yam hoik koe: ju Ishamelax tix yieh tingoe: aliah num nawh yum, mai: hu: tau ka dah dee hu: simie ceucat tix khankix heue:. 18 Cub ceu kawn: praix nawh khankix ot sivoe ngai: puxaik kawn: keeing: nawh ka veng Havilax tom: hoek meung Ashurix, pa koe: plak lih singaix meung Ejiptux daux krax hu: ka meung Asiriyax heue:. 19 In mawh grawng: doeh simie ceucat Icak, kawn: simex Abraham, Abraham pon kawn: simex tix Icak heue:. 20 Yam teei nawh moeng tix Rebekkax, Icak hoik naog ju tipon: num, Rebekkax mawh kawn: bon: Batoelax doeh simie ceucat Shurix, pa ot ka Padan, Aram, mai: mawh pux Laban pa ot meung shurix heue:. 21 Yam in Icak khyox khaw: lox ka Simiang Siyiex, mawh kheu moeng nawh mawh bon: neh, Simiang Siyiex nghiet lox khyox khaw: nawh, mai: moeng nawh Rebekkax koe: kaux heue:. 22 Mai: kawn: ngie: pa koe: daux vaig nawh, lulax thung: theen: paox tix, mai: nawh ah nin:, "Grawng: pa lih tix mawh ka aux mawh yuh ka mawx?" Mawh kheu nan: nawh lih hu: son sang chawk cheng: tix ka Siyiex heue:. 23 Simiang Siyiex ah nin: ka nawh, "Ceu pui ra: cub koe: daux vaig maix, ceu pui ra: cub tak sang goih tix khaing: tokaux maix, Ceu pui tix cub tak sang ting riang rao khaing: an tix cub, mai: kawn: pa ting tak yaox tix yuh kawncau pa iak an heue:." 24 Yam hoik naog bawg yam, nawh keh kawn: brawm: heue:. 25 Kawn: pa keh sivoe raoh nex nham:, mawh kheu nie hauk awm: kraung ceep piang nawh, kix tom: kok ceukaux nawh mawh Esaw: heue:. 26 Khaix an pux nawh deeh keh, mai: giex ka loek caong Esaw:, mawh kheu nan:, kix kok ceukaux nawh mawh Yakop, yam keh kawn: an kiex, Icak hoik koe: tigliah num heue:. 27 Mawh kheu nan:, kawn: nyawm an kiex haok hwan: ting sipie sipie, Esaw: lih mawh pui leue tiag mai: pui pa yuh tix ih kaing ma:, Viang mawh nan:, Yakop mawh pui pa awn: rhawm: tikaux, pa ot daux nyiex gox man: heue:. 28 Icak moh ka Esaw:, kheu yaox nawh tix ih nex totiag pa tawx nawh, viang mawh nan:, Rebekkax moh ka Yakop heue:.
Esaw: Coh Ara Kawn: Ai: Tix
29 Tix singaix, Yakop yuh priex mai: ngaik rawm: ceem, Esaw: kaoh khaing: daux tiag khawm: taug mao tix heue:. 30 Mai: Esaw: ah nin: ka Yakop, "Mawh kheu sidaing: taug mao aux, tawx aux ih rawm: ceem raoh pa ngaik maix liak," Mawh kheu nan:, ceukaux nawh lih tix mawh Edom heue:. 31 Yakop ah nin:, "Coh maix tawx ara kawn: Ai: maix ka aux in singaix heue:." 32 Mai: Esaw: ah nin:, "Jhak heue:, aux dex sang yum mai: aux tak sang pon rao ceu pa tix ka ara kawn: Ai: aux an lie?" 33 Khaix an Yakop deeh ah nin:, "Tiex tu maix ka aux daux in singaix," Mawh kheu nan:, mai: nawh coh tix tawx ara pa caw kawn: Ai: tix pon ka Yakop heue:. 34 Yakop tawx Esaw: ih khaomun mai: rawm: ceem raoh, khaix hoik ih nyaux nawh, mai: nawh lih hu:, Esaw: ang nab ang yam ka ara kawn: Ai: tix heue:.
Simin Ting 26
Icak Mai: Simiang Abimaliet
1 Khaix hoik koe: krax sibhawm: praix baux ju Abraham tix bawg, khaix an krax sibhawm: praix baox koe: daux meung an, Icak hu: ka Khunhawkham Philitix pa mawh Abimaliet daux veng Gerax heue:. 2 Yam an Simiang Siyiex deeh lih bleeh ka nawh mai: ah nin:, "Paw lih hu: plak meung Ejiptux, maix ot ka haktiex pa sang krai Aux ka maix heue:. 3 Paung ka daux haktiex in, Aux tak ot tau mai: maix, mai: nawb bwan: ka maix, grawh grawng: nawh, Aux tak tawx haktiex in ka maix mai: ka doeh simie ceucat maix, Aux tak sang kieh gumlox sijax mukheu pa hoik tiex tu Aux ka keeing: maix Abraham grum naog heue:. 4 Mai: Aux tak kieh doeh simie ceucat maix, haoh hun: awm: simuing: ka daux raoma:. Aux tak sang tawx doeh simie ceucat maix, cie haktiex in khawm: uik, kheu jao doeh simie ceucat maix, can ceu pui ka piang haktiex in, tak sang pon bwanson: kah heue:. 5 Mawh kheu Abraham hoik cu nghiet kah lox Aux, mai: priex lox tawm: jhawm: krai Aux, lox lai been li Aux mai: lox tat jhawm: prawng Aux heue:. 6 Mawh kheu nan:, Icak ot ka daux veng Gerax heue:. 7 Mai: pui pa ot baoh haktiex an chawk ka grawng: moeng nawh, Mai: nawh ah nin:, "Nawh mawh nan: aux heue:." Mawh kheu lhat nawh, mai: ang pon krai mawh moeng tix, kheu mhawm: grang Rebekkax, nawh lhat pui baoh an pah tix heue:. 8 Khaix hoik rheung: ot kix tan:, khunhawkham Abimaliet meung Philitix, jhak plak praix khaing: daux siviex iak, mai: nawh yaox Icak klieh tau mai: moeng tix Rebekkax heue:. 9 Khunhawkham Abimaliet kok ka Icak mai: ah nin:, "Bon: an hoik sidawng: mawh moeng maix; yuh ka mawh maix lai ah mawh nan: tix?" Mai: Icak deeh ah nin: ka nawh, "Phan: aux ang ah yuh nin: aux lhat tix yum kheu jao nawh heue:." 10 Khunhawkham Abimaliet deeh ah nin:, "Maix lai yuh ceu in ka yix yuh ka mawx? Phan: pui tix kaux kaux, ot tau mai: moeng maix, maix tak sang plee krax phit krax lud ka piang yix lie? 11 Mawh kheu nan:, khunhawkham Abimaliet tawx lox hu: ka pui ceu tix kawm: uik, mai: ah nin:, "Pui mawx ang ah phan: tieh ka pui in mai: moeng nawh tak yaox tix yum heue:." 12 Mai: Icak rhuat simie ka haktiex an, mai: nawh yaox tix vawg plix nghox daux num an tix yieh son, Simiang Siyiex nawb bwan: ka nawh heue:. 13 Nawh jah tix haok hwan: ting lhaong:, mai: nied tix mag mi ka kraung khrai: ku ceu heue:. 14 Mai: nawh koe: yung:, khawng: brie, mai: kawncau mausoi: tom: nie, mawh kheu nan: ceu pui Philitix khankix bohrhawm: ka nawh heue:. 15 Mai: pui Philitix deeh cee: rawm: maw: khankix pa hoik kaong: kawncau keeing: nawh daux singaix ju Abraham, mai: deeh cee: deeh kheem: tiex naog kah heue:. 16 Khunhawkham Abimaliet ah nin: ka Icak, "Lih hu: dee singai khaing: yix liak, mawh kheu maix hoik nie ting siawp sibrawm khaing: yix heue:." 17 Mawh kheu nan: Icak lih hu: khaing: tan:, mai: nawh sum: nyiex gox man: ka daux lung: baoh veng Gerax mai: ot tan: heue:. 18 Yam an Icak baox kaong: rawm: maw: pa hoik kaong: siliex keeing: nawh Abraham, pa hoik cee: pui Philitix khaix yum keeing: nawh, mai: nawh deeh kok ceukaux rawm: maw: an khankix awm: pa hoik kok keeing: nawh heue:. 19 Kawncau Icak khankix kawx, baox deeh kaong: rawm: maw: daux lung: mai: kix yaox ka dee lih rawm: keut tan: heue:. 20 Cao: liang khawng: brie veng Gerax, mai: cao: liang khawng: brie Icak khankix, simah simaing: ka paox tix mai: ah nin:, "Rawm: maw: inkix mawh cie yix." Mawh kheu simah kix mai: cub nawh tan:, nawh tom: kok ceukaux rawm: maw: an mawh Etiet heue:. 21 Khaix an kix baox kaong: rawm: maw: pa khraox, kix baox simah ka grawng: rawm: maw: an, mawh kheu nan: nawh kok ceukaux mawh Sitanax heue:. 22 Mai: nawh deeh gah tix khaing: tan: mai: baox kaong: rawm: maw: tang: dah, kix ang lai yaox tix simah ka grawng: an, mawh kheu nan: nawh tom: kok ceukaux mawh Yehobok, ah nin:, "Yam in Simiang Siyiex hoik tawx dee ot son ex, mai: ex tak haok hwan: ka daux haktiex in heue:." 23 Khaix an nawh lih hu: khaing: tan: mai: hu: ot ka Berashebax heue:. 24 Simiang Siyiex lih bleeh ka nawh daux bo an mai: ah nin:, "Aux mawh Siyiex keeing: maix Abraham, paw koe: krax lhat krax graung, grawh grawng: nawh, Aux ot tau mai: maix mai: nawb bwan: ka maix mai: kieh simie ceucat maix pre haoh hun:, kheu jao kawncau Aux Abraham heue:." 25 Mawh kheu nan:, nawh sum: khu: dee tan tix mu: ka dee an, mai: kok ka ceukaux Simiang Siyiex, mai: nawh sum: nyiex gox man: tan:, Kawncau Icak khankix deeh kaong: rawm: maw: heue:. 26 Khaix an khunhawkham Abimaliet kaoh khaing: veng Gerax mai: nawh viex paox grawm tix Ahuziet mai: cao: kaing: naing tix Phikolax hoek ka Icak heue:. 27 Icak ah nin: ka kix, "Mawh kheu pa tix maix deeh hoek ka aux, maix hoik koeng ka aux, mai: grheu: aux hu: dee singai khaing: tix ang mawx lie?" 28 Kix deeh ah nin:, "Yix hoik tawng ot Simiang Siyiex tau mai: maix, mawh kheu nan: kieh ex yuh krax pa kaux sijax sinax maix mai: ex, mai: Kieh ex yuh sijax mukheu tau mai: maix heue:." 29 "Son sang ang maix lai tuktiak ka yix, awm: ang yix teeh ka maix mai: ang yuh tid tix ka maix, mai: ploi: maix hu: ka daux pa nhim:. Mawh kheu mawh maix pa pon bwanson: khaing: Siyiex heue:." 30 Mawh kheu nan:, Icak yuh krax khan: kheu: kix ka priex mai: kix ih tau nyaux tau tan: heue:. 31 Kix kaoh plak ponngawb caocao, mai: ah lox pa kaux sijax ka paox tix, Icak deeh ploi: kix ing:, mai: kix ing: khaing: nawh ka daux krax pa nhim: heue:. 32 ka daux singaix an, kawncau Icak hoek, mai: krai nawh mhong: grawng: hoik kaong: kix rawm: maw:, mai: ah nin: ka nawh, "Ex hoik yaox rawm: heue:." 33 Nawh kok ceukaux rawm: maw: an mawh Shebax, mawh kheu nan:, ceukaux veng an tom: mawh Berashebax tom: in singaix heue:. 34 Yam koe: ju Esaw: tipon: num nawh teei tix moeng Berix, pa kaux Yudi, pui ceu Hittix mai: kawn: bon: Elon pa mawh Bashemiet ceu pui Hittix heue:. 35 Mai: kiex hoik kieh Icak mai: Rebekkax laux rhawm: kah heue:.
Simin Ting 27
Icak Nawb Bwan: Ka Yakop
1 Khaix an Icak hoik riex ju, mai: ngai: nawh hoik vuvi ang lai chix yaox kah, nawh kok ka kawn: Ai: tix Esaw: mai: ah nin: ka nawh, "Kawn: simex eue:," Mai: nawh pawk lox ah nin:, "Aux ot tin: heue:." 2 Mai: nawh ah nin:, "Jhak heue:, aux hoik kuad mai: aux ang lai tawng singaix pa sang yum tix heue:." 3 "Yam in, teei kraung naing maix, pa mawh ak mai: te, lih hu: daux tiag mai: yuh tom: pon sawg tix viex nex totiag son aux heue:." 4 "Khre: taux nex pa jiet nyawm, pa moh aux tix ih, mai: viex hoek ka aux, aux tak sang ih mai: khwan: aux tak nawb bwan: ka piang maix sivoe sang yum tix heue:." 5 Rebekkax jawm tix nghiet ka lox krai Icak ka kawn: simex nawh Esaw:. Yam lih hu: Esaw: ka daux tiag son sang viex nex totiag hoek, 6 Rebekkax krai ah nin: ka kawn: simex tix Yakop, "Aux hoik mhong: lox krai keeing: maix, ka puxke: maix Esaw: ah yuh nin:; 7 'viex nex totiag mai: khre: priex nyawm son aux, aux tak ih mai: nawb bwan: ka piang maix, plak sivoe ngai: Simiang Siyiex sivoe yum tix heue:.' 8 Mawh kheu nan: yam in, kawn: simex aux eue:, nghiet ka lox aux, awm: pa nhie: aux maix yuh heue:. 9 Yam in hu: ka daux phung: pex, mai: viex kawn: pex ra: mu: hoek ka aux, aux tak khre: priex nyawm son keeing: maix, awm: pa moh nawh tix ih; 10 mai: viex keeing: maix ih an, son sang nawb nawh bwan: ka piang maix sivoe sang yum tix heue:." 11 Yakop deeh ah nin: ka miex tix Rebekkax, "Jhak heue:, puxke: aux Esaw: mawh pa koe: hauk, mai: aux mawh pui plang: nex ang mawh lie? 12 Keeing: aux tee: rien tix pu: pi: aux, mai: nawh tak keud aux awm: pui pie pui lhen:, aux lhat tix pon krax pa jhax pa lawg, mai: ang pon bwanson: heue:." 13 Mai: miex nawh deeh ah nin: ka nawh, "Kieh krax pa jhax pa lawg ka maix an hoek kapiang aux, kawn: simex aux eue:, nghiet ka lox krai aux khaing:, hu: teei pa ah aux heue:." 14 Nawh lih hu: mai: teei tix tawx ceu an ka miex tix; mai: miex nawh khre: priex pa nyawm pa miag keeing: kix kah heue:. 15 Khaix an Rebekkax teei kraung ceep pa mhawm: kawn: ai: tix Esaw: pa koe: daux nyiex mai: nawh, mai: nawh kieh kawn: simex iak tix Yakop ceep kah; 16 nawh lhop hak pex ka piang taix nawh, mai: dee plang: ngawg nawh; 17 mai: nawh tawx priex pa nyawm mai: khaomun pa hoik cox khre: tix, ka daux taix kawn: simex nawh Yakop heue:. 18 Mawh kheu nan:, Yakop hu: ka keeing: tix mai: ah nin:, "Keeing: eue:," mai: nawh pawk ah nin:, "Aux ot tin:; kawn: simex eue:, mawh maix mawx?" 19 Yakop ah nin: ka keeing: tix, "aux mawh kawn: ai: maix Esaw: heue:. Aux hoik khre:, awm: pa hoik krai maix; Kaoh mai: ih nex totiag pa viex aux, mai: kieh khwan: maix nawb bwan: ka piang aux heue:." 20 Viang mawh nan:, Icak ah nin: ka kawn: simex tix, "Kawn: eue:, maix phex phai: yaox in kix yuh ka mawx?" mai: nawh pawk ah nin:, "Mawh kheu Simiang Siyiex maix keeing:, pa hoik viex hoek ka aux heue:." 21 Khaix an Icak ah nin: ka yakop, "Hoek dex tin:, aux sang pu: pi: tix yaox mawh ang mawh kawn: ai: aux Esaw: heue:." 22 Mawh kheu nan:, yakop hu: dex keeing: tix Icak, mai: nawh sibeet tix yaox nawh mai: ah nin:, "Lox maix tom: mawh lox Yakop, mai: taix maix tom: mawh taix Esaw: heue:." 23 Mai: nawh ang lai tawng ka nawh, kheu taix nawh jiet awm: hauk taix puxke: nawh Esaw:, mawh kheu nan:, nawh nawb bwan: ka piang nawh heue:. 24 Khaix an nawh deeh ah nin:, "Rug mawh maix kawn: ai: aux Esaw: lie?" mai: nawh pawk ah nin:, "Mawh aux heue:." 25 Mai: nawh deeh ah nin:, "Viex in hoek ka aux, aux tak sang ih nex totiag cie kawn: simex aux, mai: khwan: aux tak nawb bwan: ka maix heue:." Mawh kheu nan: nawh viex an hoek ka nawh, mai: nawh ih ka an, mai: ka rawm: plix siiet kawx nyaux kah heue:. 26 Khaix an keeing: nawh Icak ah nin: ka nawh, "Kawn: eue:, hoek dex aux yam in, mai: ngheet ka aux heue:." 27 Mai: Yakop hoek dex, mai: ngheet ka nawh; nawh mhong: jhawm: sioe: kraung ceep nawh, mai: nawb bwan: ah nin:, "Jhawm: sioe: kraung ceep kawn: simex aux awm: sioe: pa kaoh khaing: daux kaung: pa hoik nawb Siyiex bwan: kah heue:." 28 Mawh kheu nan:, kieh Siyiex tawx rawm: ciex raoma:, mai: bee haktiex, mai: nghox koi: mai: rawm: plix siiet tom: nie ka maix heue:. 29 Kieh pui khankix yuh kaing son maix, mai: kieh ceu pui khawm: uik grux ngawng ka maix heue:. "Kieh maix mawh cao: kaing: ka piang puxaik kawn: keeing: tix mai: kieh kawn: simex miex maix khankix, grux ngawng ka maix heue:. Can pui pa jhax lawg ka maix, kieh nawh yaox krax pa jhax lawg, mai: can pui pa nawb bwan: ka maix, kieh pon bwanson: heue:."
Grawng: Grai: Krax Keud Pot Jun Pot Esaw:
30 Khaix hoik nawb Icak bwan: ka Yakop dom: mawx dom: an, mai: yam tak khraox lih hu: Yakop khaing: keeing: tix Icak, puxke: nawh Esaw: hoek khaing: leue tix tiag heue:. 31 Nawh khre: priex pa nyawm mai: viex hoek ka keeing: tix mai: ah nin:, "Kaoh mai: ih ka nex totiag pa pon kawn: simex maix, son sang nawb khwan: maix bwan: ka piang aux heue:. 32 Mai: keeing: nawh Icak ah nin: ka nawh, "Mawh maix mawx?" mai: nawh ah nin:, "Aux mawh kawn: Ai: maix Esaw: heue:." 33 Khaix an Icak yaoh siyaung: kah tete, mai: nawh ah nin:, "Mawh mawx lie? kaw pa hu: leue totiag mai: viex nex hoek ka aux koe: dee mawx? aux hoik ih cie nawh khawm: uik, sivoe ang maix nyang hoek, aux hoik nawb bwan: ka piang nawh mai: nawh tak pon bwanson: tete heue:." 34 Yam hoik mhong: Esaw: lox keeing: tix, nawh riag yo mai: yiem sigrien sigre, mai: nawh ah nin: ka keeing: tix, "Keeing: eue:, nawb bwan: ka aux liak, ka piang aux kawx nawb bwan: liak." 35 Viang mawh nan: nawh ah nin:, "Pux maix hoek pie lhen: mai: hoik teei bwanson: pa nawb aux hu: heue:." 36 Mai: Esaw: ah nin:, "Ang nawh hoik mawh pa kok ceukaux mawh Yakop lie? mawh kheu nawh hoik pie lhen: ka aux ra: bawg, yam jah nawh hoik teei tix cie ara kawn: Ai:, mai: jhak heue:, yam in nawh baox teei bwanson: cie aux." Mai: nawh baox ah nin:, "Maix ang lai deuh bwanson: tix ceu ceu son aux lie?" 37 Icak deeh pawk lox ah nin: ka Esaw:, "Aux hoik kieh nawh mawh cao: simiang maix, aux hoik kieh puxaik nawh khankix mawh kawncau nawh, aux hoik kieh nawh grum naog ka nghox koi: mai: rawm: plix siiet, kawn: eue:, aux kawn: sang chix yuh ceu pa tix son maix lie?" 38 Mai: Esaw: ah nin: ka keeing: tix, "Keeing: eue:, ang bwanson: lai koe: ka maix tix ceu kawx lie? nawb bwan: ka aux liak, baox nawb bwan: ka aux." Esaw: riag yo lox tix mai: yiem heue:. 39 Khaix an keeing: nawh Icak pawk lox ka nawh ah nin:, "Jhak heue:, dee ot dee koe: maix tak sang mawh dee koe: bee haktiex mai: dee koe: rawm: ciex khaing: raoma: heue:. 40 Maix tak eei: ju tix ka vaig mai: tak yuh kaing son pux tix, yam hoik pon tieh feen maix ka nawh, maix tak pon luan khaing: pa kwang: nawh heue:."
Yakop Luad Luan Khaing: Esaw:
41 Mai: Esaw: koeng ka Yakop jao hoik nawb keeing: kix bwan: ka nawh, Esaw: ah nin: daux rhawm: tix, "Singaix pa laux rhawm: aux, jao keeing: tix hoik dex, Khaix an aux tak sang pah ka pux tix Yakop heue:." 42 Mawh kheu nan: Rebekkax hoik mhong: ka lox sikah kawn: Ai: tix, mai: nawh kok ka kawn: simex iak tix Yakop mai: ah nin: ka nawh, "Puxke: maix Esaw: sang yuh krax vhah rhawm: tix son sang pah maix heue:." 43 "Yam in kawn: simex aux eue:, nghiet ka lox krai aux ha:, kaoh mai: to: hu: ka prie: aux Laban pa ot ka daux veng Haran son sang glawd maix," 44 "Ot tau mai: nawh ti vud ti cu, glang: ang krax songrhawm: puxke: maix nyang grai: heue:. 45 Tom: sidah grai: krax songrhawm: nawh mai: yam hoik pi awm: nawh pa yuh maix ka nawh, khaix an, aux tak deeh tawm: maix hoek khaing: tan:. Aux tak sang kieh pax khawm: ra: grai: khaing: ngai: tix ka daux tix ngaix ngie yuh ka mawx?" 46 Mai: Rebekkax ah nin: ka Icak, "Aux hoik kied laux rhawm: jao kawn: bon: Hetax khankix. Phan: Yakop baox teei tix moeng bon: Hetax, daux haktiex in tix kaux kaux, krax im: ju aux chix koe: bwanson: yuh ka mawx?"
Simin Ting 28
1 Khaix an Icak kok ka Yakop mai: nawb bwan: piang nawh ah nin:, "Maix tak ang pon teei tix moeng ka bon: ceu pui Khanan heue:. 2 "Kaoh, hu: ka Padanaram nyiex Betoelax pa mawh keeing: ka miex maix, teei maix moeng kawn: bon: Laban prie: miex maix tix kaux kaux heue:. 3 Kieh Siyeix pa ting siawp sibrawm nawb bwan: ka maix, mai: kieh maix haok hwan:, mai: pre haoh hun:, mai: Kieh maix mawh ceu pui ting daux ceu pui khawm: uik. 4 "Mai: kieh Nawh Cao: tawx bwanson: Abraham ka maix, mai: ka simie ceucat maix, son sang yaox maix tix pon sinngao ka haktiex dee hoik mawh maix nyo sinie pa hoik tawx Siyiex ka Abraham heue:." 5 Mawh kheu nan:, Icak ploi: Yakop hu: dee singai, mai: nawh hu: ka Padanaram ka Laban kawn: simex Betoelax ceu pui Ashurix. Laban mawh prie: Rebekkax miex Yakop mai: Esaw: heue:.
Esaw: Teei Tix Moeng Mahalax
6 Esaw: hoik yaox Icak nawb bwan: ka Yakop mai: ploi: nawh hu: ka Padanaram, son sang teei nawh tix koe: moeng tan:, mai: yam nawb Icak bwan: ka Yakop mai: tawm: lox ka nawh son sang ang nawh teei tix moeng ka bon: Khanan khankix heue:. 7 Yakop hoik cu nghiet ka lox miex keeing: tix mai: lih hu: ka haktiex Padanaram heue:. 8 Esaw: tawng ka ang keeing: kix Icak khaw: rhawm: ka bon: Khanan khankix heue:. 9 Mawh kheu nan:, Esaw: lih hu: ka Ishamelax mai: teei tix moeng ka Mahalax pux Nabayok kawn: bon: Ishamelax, Ishamelax mawh kawn: simex Abraham heue:.
Grawng: Camaox Yakop Ka Betelax
10 Yakop lih hu: khaing: Bereshabax mai: hu: plak meung Haran heue:. 11 Mai: nawh hoek ti dah, mai: nawh ot tan: leeing: sawm:, mawh kheu hoik klip singaix heue:. Nawh teei simaox tix mu: khaing: tan:, son sang gaong yam it tix heue:. 12 Mai: nawh camaox, jhak heue:, bawng: tix mu: jung tix, tom: cux toh tix ka raoma:; kawncau Siyiex khankix lih lih haok haok ka piang bawng: an heue:. 13 Mai: jhak heue:, Simiang Siyiex cung ka piang toh bawng: dee lhaong: mai: ah nin:, "Aux mawh Simiang Siyiex keeing: maix Abraham mai: Siyiex Icak; haktiex pa it maix in, Aux tak tawx ka maix, khawm: doeh simie ceucat maix heue:. 14 "Doeh simie ceucat maix tak nie awm: phawng: tiex, mai: to tah hu: khawm: pon: caong daog raoma:, jah ka plak lih singaix, plak klip singaix, plak caong ma: seh, tom: hoek ka plak caong ma: laong:; tokaux maix khawm: doeh simie ceucat maix khankix, tak lih mawh nyiex ma: pa pon bwanson: ka piang haktiex in heue:. 15 "Jhak heue:, Aux ot tau mai: priex ka maix ka can dee hu: maix ku dah ku dee, mai: deeh viex maix hoek ka haktiex in; mawh kheu Aux tak ang tik vud ka maix, tom: sidah hoik yuh Aux, can ceu pa hoik krai Aux ka maix heue:." 16 Khaix an, Yakop siduad khaing: it tix mai: ah nin:, " Simiang Siyiex ot ka dee in tete; mai: aux ang tawng kah heue:." 17 Nawh lhat graung mai: ah nin:, "Dee in mawh dee koe: krax lhat krax graung ka mieh ding, ka dee in ang awm: tang: dah, mawh nyiex bwan: Siyiex, mai: siviex raoma: heue:." 18 Mai: Yakop kaoh caocao yam ponngawb, mai: teei simaox gaong nawh kaing: tix mai: sum: mawh rong:, mai: groi bee ka toh rong: an heue:. 19 Nawh kok ceukaux dee an mawh Betelax, viang mawh nan:, ceukaux veng an hoik dawg mawh Luza heue:. 20 Yam an Yakop yuh sijax mukheu mai: ah nin:, "Phan: Siyiex ot tau mai: aux, Nawh tak priex aux ka can dee hu: aux ku dah, mai: tawx pa ih pa un: son sang ih aux, mai: kraung ceep pa sang ceep aux kah, 21 "Mawh kheu nan: aux tak deeh hoek ka nyiex keeing: aux ka daux pa nhim: mhawm: mhawm:, Simiang Siyiex mawh Siyiex aux. 22 "Mai: simaox sum: aux pa mawh rong: in, tak mawh nyiex bwan: Siyiex, can ceu pa tawx Maix ka aux khawm: uik aux tak deeh tan kao: son tix son ka Maix heue:.
Simin Ting 29
Yakop Yaox Ka Rakhelax
1 Yam an Yakop hu: krax, mai: hoek ka haktiex dee ot ceu pui plak lih singaix heue:. 2 Nawh jhak mai: yaox ka rawm: maw: tix mu: daux tiag tan:, koe: phung: yung: loe: cub pa it praok rawm: maw: heue:. Mai: cub cao: liang yung: khankix, kin tix tawx yung: nyaux rawm:, mai: piang moing rawm: maw: an, koe: simaox ting ka tix mu: heue:. 3 Cao: liang yung: khankix khrawm: yung: cie kix tan:, mai: gah simaox ting an khaing: moing rawm: maw:, khaix hoik kin kix tix tawx yung: khankix nyaux rawm:, kix deeh tawb moing rawm: maw: an ka simaox heue:. 4 Yakop chawk ah nin: ka kix, "Puxaik khankix eue:, kaoh pex khaing: dee mawx?" kix deeh ah nin:, "Yix kaoh khaing: veng Haran heue:." 5 Nawh baox chawk ah nin: ka kix, "Tawng pex ka Laban kawnsaux simex Nakhaw: lie?" kix ah nin:, "Yix tawng kah nawh heue:." 6 Nawh baox chawk ka kix ah nin:, "Nyawm ot nawh lie?" mai: kix deeh ah nin:, "nawh nyawm ot, jhak heue:, kawn: bon: nawh Rakhelax hoek tau mai: phung: yung: nawh heue:." 7 Nawh ah nin:, "Yam in kawn: mawh yam jung singaix, ang nyang mawh bawg yam khrawm: pui ka khawng: brie tix, tawx yung: nyaux rawm: mai: deeh hu: liang kix ha:." 8 Viang mawh nan: kix ah nin:, "Yix ang nyang pon tawx phung: yung: nyaux rawm: sivoe ang tix nyang gah simao khaing: moing rawm: maw: heue:." 9 Yam kawn: sikah nawh tau mai: kix, Rakhelax hoek tau mai: phung: yung: keeing: nawh; kheu mawh nawh cao: liang yung: heue:. 10 Yam yaox Yakop ka Rakhelax kawn: bon: Laban, prie: miex nawh, Yakop gah simaox khaing: rawm: maw: an, mai: nawh kin tix tawx phung: yung: Laban, prie: miex nawh nyaux rawm: heue:. 11 Khaix an, Yakop ngheet ka Rakhelax nawh yo lox tix mai: yiem heue:. 12 Yakop krai ka mawh tix paox nyiex paox ma: keeing: nawh, mai: mawh tix kawn: simex Rebekkax, ka Rakhelax, mawh kheu nan:, nawh deeh to: tix ing: mai: krai ka keeing: tix heue:. 13 Yam mhong: Laban hoek kawn: nan: tix Yakop, nawh to: tix hu: rieb kah, nawh kawm mai: ngheet, kok nawh ing: ka nyiex tix heue:. Yakop krai grawng: tix khawm: uik ka Laban heue:. 14 Mai: Laban ah nin: ka nawh, "Maix mawh si:ang: aux mai: nex nham: aux," mai: nawh ot tau mai: Laban tix khix heue:.
Yakop Teei Tix Moeng Leax Mai: Rakhelax
15 Khaix an Laban ah nin: ka Yakop, "Mawh kheu mawh maix kawn: pha: aux, maix ang chix pon tix yuh kaing giex going. Krai ngawh riang pa simie maix tix pon ka aux miex ding?" 16 Laban koe: kawn: bon: ra: kaux; Ceukaux kawn: Yex mawh Leax mai: ceukaux kawn: I: mawh Rakhelax heue:. 17 Leax awn: kawn: ngai:, viang mawh nan:, Rakhelax kied mhawm: grang mai: nyawm tix jhak heue:. 18 Yakop moh ka Rakhelax, mai: nawh ah nin:, "Aux tak yuh kaing son maix aliah num son sang yaox aux tix cie kawn: bon iak maix Rakhelax heue:." 19 Mai: Laban ah nin:, "Nie mhawm: son sang tawx aux ka maix, khaing: tawx aux ka pui tang: kaux, ot tau mai: aux heue:." 20 Mawh kheu nan:, Yakop yuh kaing aliah num, son sang pon ka Rakhelax. Kheu kied moh nawh Rakhelax, nawh keud singaix sawm: an awm: ngie ti vud khaing: heue:. 21 Khaix an Yakop ah nin: ka Laban, "Mawh kheu hoik naog singaix, tawx moeng aux, ka aux, son sang ot tau aux mai: nawh heue:." 22 Laban kraix khrawm: pui baoh an, mai: yuh krax khan: kheu: heue:. 23 Yam hoek plak bo, Laban viex kawn: bon: tix Leax hoek ka Yakop, mai: laig ot tau mai: nawh heue:. 24 (Laban ap kawncau bon: tix Zilepax ka Leax Son sang kia: ngien ka nawh heue:.) 25 Yam hoek plak ponngawb, jhak heue:, bon: an mawh Leax, mai: Yakop ah nin: ka Laban, "Yuh ka mawx maix lai yuh nin: ka aux? aux hoik yuh kaing son maix, jao Rakhelax ang mawh lie? mawh kheu jao pa tix, maix pie lhen: ka aux lie?" 26 Mai: Laban ah nin:, "Daux haktiex yix tin:, yix ang sax koe: been tawx pux koe: mex sivoe puxke: tix heue:." 27 Pau tom: naog aliah singaix ha:, khaix hoik baox yuh maix kaing son aux, aliah num, yix tak deeh tawx an tix kaux ka maix heue:." 28 Yakop rieb awm: pa ah kix, yam naog aliah singaix, Laban baox tawx kawn: bon: tix Rakhelax son sang mawh moeng nawh heue:. 29 (Mai: Laban ap kawncau bon: tix Bilaha ka Rakhelax, son sang kia: ngien ka nawh heue:.) 30 Yakop ot tau mai: Rakhelax, mai: nawh moh Rakhelax lheu: khaing: Leax, mai: nawh baox yuh kaing son Laban aliah num heue:.
Grawng: Kawn: Praix Yakop
31 Yam yaox Simiang Siyiex koeng nawh ka Leax, Nawh Cao: kieh nawh koe: kawn:, mai: kieh Rakhelax neh heue:. 32 Mai: Leax koe: kaux mai: keh kawn: simex tix kaux, mai: kok ceukaux nawh mawh Rubin, mai: Leax ah nin:, "Simiang Siyiex hoik yaox ka krax kha: aux rhawm: tix tete, mawh kheu nan: mex aux tak moh ka aux phao: heue:." 33 Nawh baox koe: kaux, mai: keh kawn: simex, mai: ah nin:, "Mawh kheu mhong: Simiang Siyiex krax pa koeng nawh ka aux, Nawh Cao: baox tawx kawn: simex in ka aux," mai: kok ceukaux nawh mawh Simion heue:. 34 Nawh baox koe: kaux mai: keh kawn: simex tix kaux, mai: ah nin:, "Mawh kheu hoik keh aux kawn: simex loe: kaux son nawh, yam in, mex aux tak nie lheu: moh ka aux phao:," kiex tom: kok ceukaux nawh mawh Lewix heue:. 35 Nawh baox koe: kaux mai: keh kawn: simex tix kaux, mai: ah nin:, "Yam in aux tak sang yaogyaw ka Simiang Siyiex," mawh kheu nan:, kiex tom: kok ceukaux nawh mawh Yudax; Khaix an kiex ang lai koe: kawn: heue:.
Simin Ting 30
1 Yam yaox Rakhelax ka ang tix koe: kawn: praix son Yakop tix kaux kawx, Rakhelax bohrhawm: ka puxke: tix, mai: nawh ah nin: ka Yakop, "Tawx aux koe: kawn: praix, phan: ang mawh nan:, deuk ngie yum aux khaing: heue:." 2 Yakop songrhawm: ka Rakhelax mai: nawh ah nin:, "Khex mawh aux tang: tokaux Siyiex, pa tawx maix ang chix koe: kawn: lie?" 3 khaix an nawh ah nin:, "Maix laig ot mai: kawncau aux, Bilaha mai: nawh tak koe: kawn: ka piang ngawng aux, mai: aux tak yaox tix cie kawn: praix khaing: nawh heue:." 4 Khaix an nawh tawx Yakop moeng ka kawncau tix Bilaha mai: kieh nawh laig ot mai: nawh heue:. 5 Mai: Bilaha koe: kaux mai: keh kawn: simex tix kaux son Yakop heue:. 6 Khaix an Rakhelax ah nin:, "Siyiex hoik prawng ca: ka plak aux, mai: hoik mhong: ka lox aux, mai: tawx kawn: simex tix kaux ka aux," mawh kheu nan:, kiex tom: kok ceukaux nawh mawh Dan heue:. 7 Kawncau Rakhelax Bilaha baox koe: kaux, mai: keh kawn: simex ra: kaux tix kaux son Yakop heue:. 8 Khaix an Rakhelax ah nin:, "Aux hoik silah tix blok paox tix mai: puxke: aux, mai: aux hoik pex kah," mawh kheu nan:, kiex tom: kok ceukaux nawh mawh Napthalix heue:. 9 Yam yaox Leax ang tix lai koe: kawn:, nawh tawx Yakop baox moeng kawncau tix Zilapax heue:. 10 Kawncau Leax pa mawh Zilapax keh kawn: simex tix kaux son Yakop heue:. 11 Leax ah nin:, "Aux hoik mhawm: son," mawh kheu nan:, kiex kok ceukaux nawh mawh Gat heue:. 12 Kawncau Leax, Zilapax baox keh kawn: simex ra: kaux tix kaux, son Yakop heue:. 13 Leax ah nin:, "Aux kied gauxrhawm:! mawh kheu kawn: bon: khankix, tak kok aux mawh pa koe: bwanson:," mawh kheu nan:, kiex tom: kok ceukaux nawh mawh Asha heue:. 14 Yam hoek bawg yam vawg nghoxca Rubin hu: ka daux kaung: nawh yaox 1plix makkheu: niex, mai: viex ing: ka miex tix Leax heue:. Khaix an Rakhelax tom: ah nin: ka Leax, tawx plix makkheu: niex pa viex kawn: maix tiblah ka aux liak. 15 Viang mawh nan:, kiex deeh ah nin: ka nawh, "Pa teei maix mex aux hu: keud maix mawh grawng: pa kawn: iak lie? mawh sang baox teei maix plix makkheu: niex, khaing: kawn: simex aux lie?" Rakhelax tom: ah nin:, "Phan: maix tawx aux ih plix in, aux tak tawx mex tix it tau mai: maix daux bo in heue:." 16 Yam hoek Yakop khaing: daux kaung: plak bo, Leax lih hu: plak praix mai: rieb nawh, ah nin:, "Maix caw tix laig ot mai: aux, mawh kheu aux hoik vai maix ka plix makkheu: niex, pa viex kawn: simex aux." Daux bo an, nawh it mai: kiex heue:. 17 Siyiex nghiet ka lox Leax, mai: nawh baox koe: kaux, mai: keh kawn: simex phwan: kaux tix kaux son Yakop heue:. 18 Leax ah nin:, "Mawh kheu hoik tawx aux, kawncau bon: tix ka mex tix, Siyiex hoik tawx ngawh vai aux," mai: kiex tom: kok ceukaux mawh Isakha heue:. 19 Khaix an Leax baox koe: kaux mai: keh kawn: simex liah kaux tix kaux, son Yakop heue:. 20 Mai: Leax ah nin:, "Siyiex hoik tawx khawngphak pa mhawm: ka aux, yam in mex aux, tak ot tau mai: aux jheeing: jheeing:, kheu hoik keh aux kawn: simex liah kaux son nawh," mawh kheu nan:, kiex tom: kok ceukaux mawh Zebulun heue:. 21 Khaix an, nawh baox keh kawn: bon: tix kaux, mai: kok ceu kaux mawh Dina heue:. 22 Siyiex deeh doh keud ka Rakhelax mai: Siyiex nghiet ka lox nawh, mai: baox tawx nawh koe: kawn: heue:. 23 Nawh koe: kaux mai: keh kawn: simex tix kaux. Mai: nawh ah nin:, "Siyiex hoik teei krax pa sa pa lao aux hu:;" 24 Mawh kheu nan:, kiex tom: kok ceukaux nawh mawh Yosiep, mai: ah nin:, "Kieh Siyiex baox tawx kawn: simex tang: kaux ka aux heue:."
Krax Pa Sidu Rhawm: Yakop Mai: Laban
25 Khaix hoik keh Rakhelax ka Yosiep, Yakop ah nin: ka Laban, "Ploi: aux hu:, son sang deeh aux ka haktiex dee ot tix heue:." 26 "Tawx moeng aux mai: kawn: aux khankix pa hoik yuh aux tix tawx kaing ka maix son kix, mai: kieh aux lih hu:, mawh kheu hoik tawng maix ka kaing pa yuh aux son maix heue:." 27 Laban ah nin: ka nawh, "Kieh mawh awm: pa koe: rhawm: maix, aux hoik tawng Simiang Siyiex nawb bwan: ka piang aux jao maix." 28 Khaix an nawh ah nin:, "Sawn: ngawh riang kaing maix ka aux, mai: aux tak sang tawx heue:." 29 Mai: Yakop ah nin: ka nawh, "Maix hoik tawng yuh aux kaing son tix miex ding, mai: hoik tawng khawng: brie tix koe: ka aux miex ding." 30 "Sivoe ang aux nyang hoek, kraung khrai: maix koe: ngie ceeix khaing:, yam in hoik haok hwan: tom: nie; Simiang Siyiex hoik nawb bwan: ka maix glang: yam hoek aux heue:. Mawh kheu nan: aux tak yaox tix sang nyiex ma: tix yam mawx lie?" 31 Nawh ah nin:, "Aux sang tawx ceu pa tix ka maix?" mai: Yakop deeh ah nin:, "Paw lai tawx tix ceu kawx ka aux, phan: maix simie tix yuh bwanson: ka aux, kieh aux baox deeh liang mai: priex ka cub yung: maix khankix heue:." 32 Daux in singaix aux sang hu: ciied tix yaox ka phung: yung:, phung: pex cie maix khawm: uik, aux sang gwieh tix deuh kawn: yung: pa preeh cun:, mai: pa lung khankix khaing: paox tix, mai: aux deeh sang gwieh tix deuh kawn: pex pa preeh pa lung hauk khankix, In khawm: uik tak mawh ngawh riang kaing yuh aux heue:." 33 "Mawh kheu nan: maix tak yaox krax rah krax see aux, yam krai aux ngawh riang tix sivoe ngai: maix. Can pex pa ang preeh, mai: yung: pa ang lung khankix, phan: koe: mai: aux, maix tak ah mawh pa briex aux cie maix heue:." 34 Mai: Laban ah nin:, "Kieh mawh awm: lox pa ah maix heue:." 35 Mawh kheu nan:, ka daux singaix an Laban tang: gwieh pex mhaing: preeh mai: pa lung, khawm: pex shiang: preeh cun:, mai: pa lung, mai: baox laug pex paing mai: kawn: yung: pa lung khankix, mai: nawh ap ka kawn: simex tix heue:. 36 Mai: nawh khan: sinax dee ot tix mai: Yakop singai khaing: paox tix loe: singaix krax, mai: Yakop deeh liang ka cub yung: mai: cub pex Laban pa kawn: deuk khankix heue:. 37 Yakop teei gawng: khaox klai Lipanax, Luzax, mai: Aramon, mai: kheet tix tik lhox nawh, son sang sidawng: pa klai pa paing tix yaox mhawm: mhawm: heue:. 38 Mai: nawh jung tix deuh gawng: khaox pa hoik kheet tix lhox khankix sivoe yung: mai: pex ka dee nyaux rawm: mai: hawt dawng: rawm: nyaux kix, In kix mawh son sang koe: kaux kix yam hoek tix nyaux rawm: heue:. 39 Mawh kheu nan:, cub yung: mai: pex khankix, koe: kaux mai: keh pa preeh mai: pa lung hauk khawm: uik heue:. 40 Mai: Yakop tang: gwieh yung: mai: pex pa preeh, pa preeh cun:, mai: pa lung cie nawh khankix. Veeh ngai: tix ka plak cub yung: mai: cub pex Laban, mai: nawh tang: deuh cub yung: mai: pex cie tix nong: nong: khaing: cie Laban heue:. 41 Mawh kheu nan: yam sikeeing: khawng: brie pa ting riang khankix ka paox tix, son sang koe: kaux ka yaox tix khaox an, Yakop tom: jung gawng: khaox an sivoe ngai: dee chix yaox kix ka dee nyaux rawm: heue:. Mawh son sang koe: kaux kix mai: gawng: khaox an heue:. 42 Viang mawh nan: nawh ang deuh gawng: khaox an, ka sivoe ngai: cub yung: mai: pex pa awn: riang, mawh kheu nan:, pa awn: riang mawh cie Laban mai: pa ting riang mawh cie Yakop heue:. 43 Mawh kheu nan:, Yakop baox nie mag mi hu: sipie sipie, mai: nawh koe: khawng: brie tom: nie pa mawh yung:, pex, kawncau simex kawncau bon:, Kala-uk mai: la haoh hun: heue:.
Simin Ting 31
Yakop To: Khaing: Laban
1 Yakop mhong: sikah kawn: simex Laban khankix, pa ah kix nin:, "Yakop hoik teei kraung khrai: cie keeing: ex hu: khawm: uik, nawh hoik yaox tix mag mi kheu sin: keeing: ex." 2 Yakop yaox ka pak ngai: Laban ang lai awm: sivoe an, hoik tang: tix yaox heue:. 3 Khaix an, Simiang Siyiex ah nin: ka Yakop, "Deeh ing: ka haktiex keeing: maix khankix, mai: ka doeh simie ceucat maix, Aux tak ot tau mai: maix heue:." 4 Mawh kheu nan:, Yakop ploi: pui kok Rakhelax mai: Leax ka daux tiag dee koe: cub phung: yung: nawh heue:. 5 Mai: nawh ah nin: ka kix, "Aux hoik yaox ka ngai: baoh keeing: pex, nawh ang lai koe: rhawm: ka aux, awm: glang: ka: an. Viang mawh nan:, Siyiex keeing: aux, hoik ot tau mai: aux heue:. 6 "Pex tawng ka hoik yuh aux kaing son keeing: pex, khawm: riang rao tix khawm: uik heue:. 7 "Mai: keeing: pex hoik pie lhen: ka aux, mai: hoik loh ngawh riang rao pa keung: aux tix pon kao: bawg, viang mawh kawx nan:, Siyiex ang tawx akhwang: son sang yuh nawh aux laux heue:." 8 "Yam ah keeing: maix kieh khawng: brie pa preeh mawh ngawh riang maix,'khaix an, cub yung: khankix lih keh yung: pa preeh, yam ah keeing: maix, kieh khawng: brie pa preeh cun: mawh ngawh riang maix,' khaix an yung: khankix lih keh kawn: yung: pa preeh cun: heue:. 9 Mawh kheu nan:, Siyiex hoik teei khawng: brie keeing: pex, mai: tawx ka aux heue:. 10 Yam sikeeing: khawng: brie khankix, aux maong tix jhak, mai: yaox ka mawh mhaing: preeh, pa preeh cun: mai: pa lung khankix pa hawt khaix khawng: brie shiang: khankix ka daux camaox aux heue:." 11 Khaix an kawncau Siyiex ah nin: ka aux, daux camaox, 'Yakop eue:,' mai: aux deeh pawk ah nin:, 'aux ot tin: heue:.' 12 Mai: nawh ah nin:, "Yaog ngai: tix mai: jhak, khawng: brie mhaing: pa hawt khawng: brie shiang: khankix, mawh khawng: brie mhaing: preeh, pa preeh cun: mai: pa lung khawm: uik, mawh kheu aux hoik yaox ka ceu pa yuh Laban ka maix heue:. 13 Aux mawh Siyiex Betelax, dee hoik groi maix bee ka rong: simaox an, mai: dee hoik yuh maix sijax mukheu ka Aux heue:. Yam in, kaoh hu: khaing: haktiex in, mai: deeh ing: ka haktiex doeh simie ceucat maix heue:. 14 Khaix an, Rakhelax mai: Leax pawk lox nawh ah nin:, "Kawn: koe: nyum: pa sang pon ex tix ceu ceu, phan: ang mawh nan:, sinngao tix ceu ceu khaing: daux nyiex keeing: ex lie?'" 15 Nawh hoik keud ex mawh pui tang: ceu tang: meung ang mawh lie? mawh kheu nawh hoik coh ex mai: hoik shiao mau ex khawm: uik heue:. 16 "Sinngao pa hoik teei Siyiex khaing: keeing: ex, hoik mawh cie ex mai: son kawn: praix ex, yam in, kieh Siyiex maix yuh ka mawx, maix yuh awm: an heue:." 17 Khaix an, Yakop kaoh mai: yaog tix sau: kawn: moeng tix khankix brug kala-uk heue:. 18 Mai: nawh viex khawng: brie mai: kraung khrai: pa pon tix khaing: Padanaram khawm: uik mai: hu: ka keeing: tix daux haktiex Khanan heue:. 19 Yam hu: rhip Laban hauk yung: tix dah, Rakhelax briex tix teei rieang krub cie keeing: tix khaing: daux nyiex heue:. 20 Yakop briex tix lih hu:, yam ang Laban ceu pui Ashurix tawng, mawh kheu ang nawh rhawm: krai grawng: sang to: tix ka nawh heue:. 21 Nawh to: tau mai: kraung pa koe: tix khawm: uik, nawh kaoh mai: tiang ka rawm: klawng: mai: hu: see ka plak gawng Gilat heue:.
Laban Hoek Ka Yakop
22 Khaix hoik to: Yakop loe: singaix, kix taug krai Laban mhong: heue:. 23 Nawh kok ka puxaik tix mai: hawt khaix nawh, aliah singaix krax, mai: krup kix ka gawng Gilat heue:. 24 Viang mawh nan:, Siyiex hoek ka Laban pui Ashurix ka daux camaox ponsawm: mai: ah nin:, "Rien rhawm: tix, paw lai krai Yakop mhawm: ang mhawm: tix ceu kawx awawx." 25 Mai: Laban krup ka Yakop. Yam in Yakop sum: ka nyiex gox man: ka piang gawng tan:, Laban mai: puxaik nawh khankix kawx, sum: nyiex gox tix ka piang gawng Gilat heue:. 26 Mai: Laban ah nin: ka Yakop, "Mawh yuh maix ka mawx? maix lai pie aux, mai: veix kawn: bon: aux khankix hu: awm: pui pa rhim: tix teei ka vaig yuh ka mawx?" 27 Yuh ka mawx maix lai pie aux, mai: mox tix hu: khaing: aux ngiiep ngiiep, mai: ang krai aux mhong: yuh ka mawx? mawh kheu aux tak ploi: maix hu: ka daux pa gauxrhawm:, mai: ah lai rhax tau mai: tauh chieang: khawm: ting: khankix heue:. 28 "Yuh ka mawx maix lai ang tawx akhwang: ngheet aux ka kawn: saux mai: kawn: bon: tix lie? maix lai yuh awm: pa daox pa aw:. 29 "Aux koe: sibrawm tix yuh maix laux; viang mawh nan:, Simiang Siyiex keeing: maix krai ka aux daux camaox ponsawm: kawx, ah nin:, "Rien rhawm: tix, paw lai krai Yakop mhawm: ang mhawm: tix ceu kawx awawx:. 30 Mai: yam in, mawh kheu kied byaong maix ka nyiex ma: miex keeing: tix, maix tom: to: tix ing:, yuh ka mawx maix lai briex rieang siyiex aux hu:?" 31 Yakop deeh pawk lox Laban mai: ah nin: kah, "Mawh kheu lhat aux maix tud rhim: mai: deeh teei kawn: bon: tix khaing: aux, aux tom: to: heue:." 32 Yaox maix rieang siyiex tix ka pui mawx ang ah, paw lai deuh im: ju heue:. Hu: ci kraung cie maix ka sivoe ngai: puxaik ex khankix mai: teei hu: heue:." Mawh kheu Yakop ang tawng ka briex Rakhelax an heue:. 33 Laban laig ka daux nyiex gox man: Yakop, nyiex gox man: Leax mai: nyiex gox man: kawncau bon: kiex ra: kaux, viang mawh nan:, nawh ang yaox heue:. Khaix an nawh lih khaing: nyiex gox man: Leax mai: laig daux nyiex gox man: Rakhelax heue:. 34 Rakhelax teei rieang krub an, mai: sau: ka daux an: brug kala-uk, mai: ngawm ka piang heue:. Laban hoik tah sawg ka daux nyiex gox man:, mai: ang yaox heue:. 35 Mai: Rakhelax ah nin: ka keeing: tix, "Mawh kheu jao hoek mee: bon: ka aux, paw nyang songrhawm: ka ang aux pon kaoh sivoe ngai: maix liak." Mai: nawh sawg khrieh, viang mawh nan:, nawh ang yaox ka rieang krub daux nyiex heue:. 36 Yakop songrhawm: mai: ah nin: ka Laban, ah nin: ka nawh, "Mawh phit aux ka ceu tix? mawh koe: phimap aux yuh ka mawh, maix phex tix hawt aux yuh nin: lie? 37 "Maix hoik khrieh kraung aux khawm: uik kawx, mawh hoik yaox maix kraung nyiex ma: tix, tix ceu ceu lie? deuh sivoe ngai: puxaik aux mai: puxaik maix, mai: kieh kix prawng ca: sinax ax heue:. 38 "Aux hoik ot tau mai: maix tinga: nun, kawn: yung: shiang: mai: kawn: pex shiang: maix khankix ang sax laux kawn: tix bawg kawx, aux ang sax ih ka nex kawn: yung: mhaing: khaing: cub yung: maix heue:. 39 "Can pa kiied totiag hai: khankix, aux ang sax viex hoek ka maix; aux kawn: kham: tix som kah, pa briex pui daux tawm: taix aux, ponngaix, ponsawm: ang ah, maix nhie: aux plud jheeng: jheeng: heue:." 40 Yam ponngaix, aux hoik grok tix ka koek, mai: yam ponsawm:, aux hoik caux ka rawm: ciex, mai: ang laig it laig tum kah heue:." 41 "Aux hoik ot daux nyiex maix tinga: num, mai: hoik yuh kaing son maix kao: pon: num, son sang pon tix ka kawn: bon: maix khankix, aux hoik baox yuh kaing son maix liah num, son sang pon tix ka khawng: brie maix, maix hoik loh ka ngawh riang aux kao: bawg heue:. 42 Phan: Siyiex keeing: aux, Siyiex Abraham mai: Siyiex pa lhat graung Icak kah, ang ot tau mai: aux, maix tee: ploi: aux ing: mai: taix yi tix tete. Siyiex hoik yaox ka krax kham: geu: aux, mai: kaing pa hoik yuh aux ka taix tix, Nawh tom: kieh thiang: ka maix daux ponsawm: kawx heue:.
Gumlox Sijax Mukheu Laban Tau Mai: Yakop
43 Laban deeh pawk lox ka Yakop ah nin:, "Kawn: bon: an kix kawx mawh kawn: bon: aux, mai: kawn: praix an kix kawx mawh kawn: praix aux, cub kawn: yung: khankix kawx, mawh kawn: yung: aux, can pa yaox maix khawm: uik kawx mawh cie aux heue:. Mawh kheu nan:, daux in singaix aux sang chix yuh ka mawx ka kawn: bon: aux khankix, phan: ang mawh nan:, ka kawn: praix pa hoik keh khaing: kix lie? 44 "Hoek yam in, kieh ex yuh sijax mukheu ka maix mai: aux, mai: kieh mawh mhai: sakse: sinax maix mai: aux heue:." 45 Yakop teei simaox tix mu: mai: sum: mawh rong: heue:. 46 Yakop ah nin: ka puxaik tix khankix, "Kieh ex sut simaox," mai: kix sut simaox, mai: pum: tix deuh. Mai: kix ih priex ka praok pum: simaox an heue:. 47 Laban kok ceukaux simaox an mawh, "Yegadax Sahadutax. (Dee bleeh mawh pum: sakse: heue:.) Viang mawh nan:, Yakop kok mawh Gilat heue:. 48 Mai: Laban ah nin:, "Pum: simaox in mawh sakse: sinax maix mai: aux daux in singaix." Mawh kheu nan:, tom: kok ceukaux mawh Gilat heue:. 49 Mai: baox kok mawh Mizapa, mawh kheu nawh ah nin:, "Kieh Siyiex kia: ngien sinax maix mai: aux, yam tang: ot ex singai khaing: paox tix heue:. 50 "Phan: maix yuh krax kharhawm: ka kawn: bon: aux khankix, phan: ang mawh nan:, phan: maix teei tix moeng bon: tang: kaux, ka piang kawn: bon: aux khankix, viang kawn: pui ang koe: sakse: sinax ex kawx, doh keud ka Siyiex mawh sakse: sinax maix mai: aux heue:." 51 Laban ah nin: ka Yakop, "Jhak ka pum: simaox mai: rong: simaox in, pa hoik deuh aux sinax maix mai: aux heue:. 52 "Kieh pum: simaox mai: rong: simaox in mawh mhai: sakse:, aux tak ang pon luan khaing: mee: pum: simaox in son sang tuktiak tix ka maix, maix kawx tak ang pon tix luan khaing: mee: pum: simaox in mai: rong: simaox in son sang tuktiak tix ka aux heue:." 53 Kieh Siyiex Abraham, Siyiex Nakhaw: mai: Siyiex keeing: kix, prawng ca: sinax ex." Mai: Yakop tiex tu ka Siyiex pa lhat graung keeing: nawh Icak heue:. 54 Mai: Yakop yuh krax tan krax lu ka piang gawng, mai: kok puxaik tix khankix ih priex preem; mai: ot ka piang gawng leeing: sawm: heue:. 55 Laban kaoh ponngawb caocao, mai: ngheet ka kawn: saux mai: kawn: bon: tix khankix, mai: nawb bwan: ka piang kix, Khaix an Laban lih hu: khaing: tan:, mai: ing: ka nyiex tix heue:.
Simin Ting 32
Esaw: Hoek Tix Rieb Yakop
1 Yakop baox hu: krax hu: tix, mai: kawncau Siyiex hoek rieb nawh heue:. 2 Yam yaox Yakop ka kix, nawh ah nin:, "In mawh cub kru naing Siyiex heue:." Mai: nawh kok ceukaux dee an, mawh Mahanim heue:. 3 Yakop ploi: pui cau tix khankix hu: sivoe, ka puxke: tix Esaw: ka haktiex sirax meung Idom; 4 Mai: nawh tawm: lox ka kix ah nin:, "Krai in kix ka Simiang aux Esaw:, mai: aux pa mawh kawncau maix Yakop, pa ot mai: Laban kawn: koe: tom: in singaix heue:. 5 Aux hoik koe: moi, la, yung:, pex, mai: kawncau simex, kawncau bon: khankix; aux hoik ploi: kix hu: krai cao: Simiang aux mhong: grawng: in, son sang mawh pa khaw: pa caw: ka rhawm: maix heue:.'" 6 Mai: kawncau khankix, deeh hoek ka Yakop ah nin:, "Yix hoik bleeh ka puxke: maix Esaw:, nawh hoik ah tix sang viex pui pon: yieh hoek rieb ka maix heue:." 7 Yam an Yakop kied lhat graung mai: khirhawm: khirhi:, nawh gwieh pui pa ot mai: nawh, yung:, pex, moi, mai: kala-uk khankix mawh ra: cub. 8 Mai: nawh ah nin:, "Phan: Esaw: hoek tix puing: ka cub ex tix cub, khaix an cub pa kawn: deuk tak pon tix luad luan heue:." 9 Khaix an Yakop rawg bwan: ah nin:, "O Siyiex keeing: aux Abraham mai: Siyiex keeing: aux Icak, Simiang Siyiex pa hoik ah nin: ka aux, deeh ing: ka haktiex cao: maix, ka doeh simie ceucat maix, Aux tak yuh bwanson: ka maix heue:." 10 Aux ang doh keung: tix pon krax caoxrhawm: caoxrhi: mai: pa kaux sijax pa jhi: Maix Cao: ka kawncau Tix ceeix kawx, yam an dix, aux tiang rawm: klawng: Yawdan mai: khaoxgix tix, mai: yam in aux hoik lih tix koe: paox pie ra: cub heue:. 11 Aux rawg bwan: ka Maix, kieh aux luad luan khaing: daux tawm: taix puxke: tix Esaw: liak; mawh kheu lhat aux nawh hoek puing: yix, tau mai: miex kawn: nyawm khankix heue:. 12 Maix Cao: hoik ah nin:, "Aux tak yuh bwanson: ka maix tete, 'mai: kieh doeh simie ceucat maix haoh hun: awm: mhaik daog rawm: sigrit sigra:, tom: ang pui lai uik simin kah heue:.'" 13 Mawh kheu nan:, nawh paung tan: daux sawm: an, mai: nawh teei pa koe: daux taix tix tiblah, son sang tawx khawng: phak ka puxke: tix Esaw: heue:. 14 Nawh teei pex shiang: ra: yieh mu:, mai: pex mhaing: tinga: mu: khawm: yung: shiang: ra: yieh mu:, mai: yung: mhaing: tinga: mu:, 15 Kala-uk pa biiet rawm: teeh khawm: kawn: pa peuex tingoe: mu:, moi shiang: tipon: mu:, mai: moi mhaing: kao: mu:, la shiang: tinga: mu: mai: kawn: la iak kao: mu: khankix heue:. 16 Mai: nawh tawx ceu an kix ka daux tawm: taix kawncau nawh, mai: kieh kix hu: cub mawx cub an, mai: ah nin: ka kawncau tix khankix, "Kieh pex hu: sivoe aux, mai: kieh diang hu: pex singai sinax cub mawx cub an heue:." 17 Mai: nawh tawx lox ka cub pa hu: sivoe tix cub mai: ah nin:, "Yam yaox pex ka puxke: aux Esaw: mai: yam chawk pex yuh nin:, "Mawh pex cub pui mawx, mai: sang hu: pex plak mawx lie? khawng: phak koe: sivoe pex in mawh cie pui mawx lie? 18 khaix an pex deeh ah, "Inkix mawh cie kawncau maix Yakop; mai: mawh khawng: phak pa tawx ex ka maix cao: simiang ex Esaw:, tokaux Yakop ot plak khaix yix heue:." 19 Nawh baox tawm: lox ka cub ra: mai: cub loe:, can pa hawh khawng: brie hu: khankix mai: ah nin:, "Yam yaox pex ka Esaw: tak krai awm: pa tawm: aux in, 20 mai: baox ah nin:, "Kawncau maix Yakop ot plak khaix yix heue:." Mawh kheu keud nawh nin:," aux tak kieh rhawmrhi: nawh deeh nghie: ka khawng: phak pa hu: sivoe aux, "Mai: an aux tak yaox ngai: baoh nawh, mai: nawh tak rieb ka aux heue:." 21 Mawh kheu nan:, cub pa viex khawng: phak nawh khankix hu: sivoe nawh; mai: tokaux nawh it dee paung kix tan: sawm: an heue:.
Grawng: Blok Yakop Paox Tix Mai: Siyiex
22 Kadaux sawm: an, Yakop kaoh teei moeng tix ra: kaux, mai: kawncau bon: nawh khankiex, mai: kawn: simex nawh kao: tix kaux mai: tiang dee thaw: rawm: klawng: Yabok heue:. 23 Nawh kieh kix tiang hu: plak toi: rawm: klawng: tau mai: kraung khrai: pa koe: nawh khawm: uik heue:. 24 Yakop ot tan: nong: nong:; mai: pui tix kaux blok paox tix mai: nawh tom: dex bah riang praix heue:. 25 Yam hoik yaox kaw an ang tix lai pex ka nawh, nawh tub ka sivieang nawh, mai: sivieang Yakop khluk khlaik tau mai: yam blok kiex paox tix heue:. 26 Mai: nawh ah nin:, kieh aux hu:, mawh kheu praix dex sang riang heue:." Viang mawh nan: nawh ah nin:, "Phan: maix ang nyang nawb bwan: ka aux, aux tak ang ploi: maix hu: heue:." 27 Mai: Nawh ah nin: ka nawh, "Kaux maix pa tix?" Mai: nawh ah nin:, "Aux mawh Yakop heue:." 28 Khaix "Ceukaux maix tak ang lai kok mawh Yakop, viang mawh nan: tak deeh kok mawh Isarilax, mawh kheu hoik pon blok maix paox tix ka Siyiex, mai: kawn: pui, maix hoik pex heue:." 29 Khaix an Yakop chawk nawh mai: ah nin:, "Aux rawg maix krai ceukaux tix ka aux liak." Mai: Nawh ah nin:, "Maix chawk ceukaux Aux jao pa tix lie?" mai: Nawh nawb bwan: ka nawh tan: heue:. 30 Mawh kheu nan: Yakop tom: kok ceukaux dee an mawh Penilax, "Mawh kheu aux hoik yaox ka pakngai: taw: pakngai: Siyiex tan:, mai: ju aux kawn: pon glawd luan heue:." 31 Khaix hoik luan Yakop khaing: dee Penilax dom: mawx dom: an, singaix hoik lih ka piang nawh, nawh hu: mai: chawh tix heue:. 32 Mawh kheu nan:, kawn: praix ceu pui Isarilax khankix ang lai ih ka nex siniag ba:, pa koe: hawt siviang tom: in singaix, mawh kheu hoik tub ka sivieang Yakop dee koe: siniag nawh heue:.
Simin Ting 33
Grawng: Yaox Yakop Mai: Esaw: Paox Tix
1 Yakop yaog ngai: tix mai: jhak, yaox ka hoek Esaw: tau mai: pui pon: yieh kaux, mawh kheu nan:, nawh gwieh tix tawx kawn: nyawm khankix ka Leax mai: Rakhelax khawm: kawncau bon: kiex ra: kaux heue:. 2 Mai: nawh deuh kawncau bon: ra: kaux, mai: kawn: nawh khankix hu: sivoe tix, khaix kix mawh Leax mai: kawn: nawh, pa hu: sigreung nawh deuh Rakhelax mai: kawn: nawh Yosiep ghoik khaix paox tix heue:. 3 Khaix an nawh jah tix hu: sivoe kix mai: nawh gup ka piang tiex, aliah bawg, tom: hoek nawh ka puxke: tix heue:. 4 Yam an, Esaw: to: tix hu: rieb nawh, mai: kawm ka ngawg nawh mai: ngheet paox tix mai: yiem heue:. 5 Esaw: yaog ngai: tix mai: yaox ka bon: tau mai: kawn: nyawm khankix, mai: ah nin:, "Pui pa ot mai: maix khankix mawh pui mawx lie?" Yakop ah nin:, "Kawn: nyawm an khankix mawh bwanson: pa hoik tawx Siyiex ka kawncau maix heue:." 6 Khaix an kawncau bon: khankiex, viex kawn: tix hoek mai: krub ka nawh; 7 Leax kawx, viex kawn: tix khankix hoek mai: krub ka Esaw:; khaix an Yakop mai: Rakhelax hoek dex mai: kix krub ka nawh heue:. 8 Esaw: ah nin:, "Cub khawng: brie pa yaox aux khankix, mawh pa yuh ka mawx?" mai: Yakop ah nin:, "In kix mawh pa sang kieh aux mawh pa khaw: pa caw rhawmrhi: ka sivoe maix simiang heue:." 9 Viang mawh nan:, Esaw: ah nin:, "Pux aux eue:, ceu in aux kawx hoik kub hoik naog kah, deeh priex pa koe: maix khankix son cao: maix heue:." 10 Yakop ah nin:, "Ang mawh nan:, phan: awm: hoik mawh pa khaw: pa caw ka rhawmrhi: maix, rieb maix teei khawngphak in khaing: daux taix aux liak; kied laoh lie ka hoik yaox aux ka pakngai: maix, awm: hoik yaox aux ka pakngai: Siyiex, mawh kheu hoik rieb maix aux ka daux pa gauxrhawm: tix. 11 "Yuh bwanson:, rieb maix teei bwanson: pa viex aux hoek ka maix liak, grawh grawng: nawh, Siyiex hoik tawx bwanson: ka aux, tom: hoik kub hoik naog." Nawh niied tix khyox khaw:, mai: nawh rieb tix teei heue:. 12 Mai: Esaw: ah nin:, "Kieh ex deeh hu: krax hu: tix, aux tak hu: sivoe maix heue:." 13 Viang mawh kawx nan:, Yakop deeh ah nin: ka nawh, "Simiang aux eue:, awm: hoik tawng maix, kawn: nyawm khankix kawx kawn: awn: riang, mai: yung:, pex, moi khankix kawx, kawn: koe: kawn: pa peuex tau mai: aux, phan: sidhiiet kix hu: tix ngaix ngie, kix tee: yum kah heue:." 14 "Mawh kheu nan: kieh simiang aux hu: sivoe ngai: kawncau maix, aux tak koi thong: khawng: brie pa koe: tau mai: aux, mai: kawn: nyawm khankix, son sang pon hoek tom: dee ot maix simiang daux meung Sirax heue:." 15 Mai: Esaw: ah nin:, "Yam in kieh aux prah pui tix tiblah tau mai: maix." Viang mawh nan: nawh deeh ah nin:, "Mawh koe: grawng: yuh ka mawx lie? kieh aux pon pa khaw: pa caw rhawmrhi: maix simiang heue:." 16 Mawh kheu nan:, Esaw: deeh ing: ka meung Sirax daux singaix an heue:. 17 Yakop lih hu: plak Sukok mai: sum: nyiex cao: tix tix lhang:, mai: kawg son khawng: brie nawh khankix tan:, mawh kheu nan:, ceukaux dee an tom: kok mawh Sukok heue:.
Yakop Hoek Ka Meung Khanan
18 Mai: Yakop hoek ka veng Shekhem pa koe: ka daux haktiex Khanan, mai: krax boek tix khaing: ku ceu, yam hoik kaoh nawh khaing: haktiex Padanaram; mai: nawh sum: nyiex gox ot tix, ka sivoe veng an heue:. 19 Mai: nawh liag gwang haktiex, dee hoik sum: nawh nyiex gox man: tix, khaing: kawn: Hamo pa mawh keeing: Shikhem tix yieh plah mau heue:. 20 Ka dee an, nawh sum: khu: dee tan tix mu:, mai: kok mawh Elelaw Isarilax heue:.
Simin Ting 34
Grawh Grawng: Dina
1 Dina kawn: bon: Leax pa hoik keh nawh son Yakop, lih hu: vhi: ka kawn: bon: haktiex baoh an heue:. 2 Yam yaox kawn: simex Hamo, ceu pui Hiwix, pa mawh Shekhem pa kwang: haktiex an, nawh giex tix phit vao mai: Dina, laux yuh min: plak ngai: nawh heue:. 3 Rhawm: rhi: nawh kied koe: ka Dina kawn: bon: Yakop, mai: nawh moh ka bon: an, mai: nyaw glaw: tix sikah ka bon: an, ka lox pa mhawm: heue:. 4 Mawh kheu nan: Shekhem krai ka keeing: tix Hamo mai: ah nin:, "Teei aux cie ka kawn: bon: in, son sang mawh moeng aux heue:." 5 Yakop hoik mhong: ka laux yuh nawh min: plak ngai: kawn: bon: tix Dina, yam an kawn: simex nawh khankix, ot mai: khawng: brie kix daux tiag, mawh kheu nan:, Yakop ot yawg tix mai: krox tom: hoek kix heue:. 6 Mai: keeing: Shekhem, Hamo lih hu: ka Yakop son sang sikah tau mai: nawh heue:. 7 Yam deeh hoek kawn: simex Yakop, khaing: daux tiag kix mhong: grawng: an, kix kied lauxrhawm: mai: kied songrhawm: kah, mawh kheu hoik yuh pui an ceu pa hai: pa meug ka pui Isarilax, mai: phit vao mai: kawn: bon: Yakop, pa ang khaw: tix yuh heue:. 8 Viang mawh nan:, Hamo sikah tau mai: kix ah nin:, "Kawn: simex aux Shekhem, hoik kied moh ka kawn: bon: maix. Yuh bwanson:, kieh nawh teei tix moeng kah liak." 9 "Kieh ex yuh paox nyiex tau mai: pex; mai: tawx kawn: bon: maix ka yix, mai: deeh teei pex cie kawn: bon: yix khankix heue:. 10 "Mai: pex tak ot tau mai: yix, mai: haktiex in tak koe: sivoe pex, ot daux haktiex in, mai: yuh lai yuh geu; mai: teei tix cie kraung khrai: pa koe: daux haktiex in khawm: uik heue:. 11 Shekhem ah nin: ka keeing: bon: mai: puxaik nawwh, "Kieh aux pon bwan: sivoe ngai: pex, can ceu pa rawg pex, aux tak tawx heue:." 12 "Kraung krub mai: khawngphak pa rawg pex, viang nie kawx, aux tak sang tawx awm: pa rawg pex ka aux, tawx ngie kawn: bon: an ka aux, son sang mawh moeng aux heue:." 13 Kawn: simex Yakop khankix deeh pawk lox ka Shekhem mai: keeing: nawh Hamo, ka daux pa lak lhen: tix, mawh kheu hoik yuh nawh krax kaig krax tua ka pux kix Dina heue:. 14 Mai: kix ah nin:, "Yix ang pon tawx nan: yix cie pui pa ang nyang pat hak, mawh kheu phan: yix yuh nan: tak lih tix mawh krax pa kaig tua ka yix heue:. 15 "Phan: mawh son grawng: in ex khaw: rhawm: kieh pex ex yuh nin:, phan: pex yuh awm: been yix, mai: phan: simex pex ku kaux pat hak tix, 16 "Khaix an yix tak tawx kawn: bon: tix khankix ka pex, mai: yix tak teei kawn: bon: pex, yix tak ot tau mai: pex, mai: ex tak mawh pui tix ceu khaing: heue:. 17 "Phan: pex ang cu tix nghiet ka lox yix, mai: ang cu tix pat hak tix, khaix an yix tak deeh teei kawn: bon: tix hu: heue:." 18 Gumlox an khawm: uik Hamo mai: kawn: simex nawh Shekhem khaw: rhawm: kah heue:. 19 Kawn: simex an mawh kheu kied moh nawh ka kawn: bon: Yakop, nawh rieb ka lox pa krai kix, nawh mawh pui pa koe: min: plakngai: khaing: can pui daux nyiex keeing: tix khawm: uik heue:. 20 Hamo mai: kawn: simex nawh Shekhem deeh hoek ka diang siviex veng kix, mai: krai ka pui pa ot daux veng ah nin:; 21 "Pui in kix hoik yuh pa nhim: tau mai: ex, kieh kix ot haktiex in mai: yuh lai yuh geu, mawh kheu haktiex hoik sidaing: vieh, mai: kub son kix, kieh ex teei tix moeng kawn: bon: kix, mai: kieh ex tawx kix teei tix moeng kawn: bon: ex khankix heue:." 22 "Viang mawh nan: phan: ex rieb tix teei been pa pat hak awm: kix, mai: kawn: simex daux sinax ex kukaux tak pat hak tix, kix tak khaw: rhawm: tix ot tau mai: ex, mai: tak mawh ceu pui tix mu: heue:." 23 "Khawng: brie kix, kraung khrai: cie kix, mai: yung: mai: moi cie kix kumu:, tak mawh cie ex khawm: uik sax ang mawh lie? hawt rhawm: kix, mai: kieh kix ot tau mai: ex heue:." 24 Can pui pa lih hu: ka siviex veng kix ku kaux, hoik cu nghiet ka lox Hamo mai: kawn: simex nawh Shekhem, mai: can kawn: simex, pa lih tix hu: ka diang siviex veng, pat hak tix kukaux heue:. 25 Khaix hoik luan loe: ngaix, yam kawn: saux nex khaix pat kix hak tix, kawn: simex Yakop Simion mai: Lewix ra: kaux, pa mawh prie: Dina, teei vaid tix kaux tix kre: mai: laig daux veng an, mai: pah kawn: simex pa ot tan: khawm: uik heue:. 26 Mai: kiex pah Hamo mai: kawn: nawh Shekhem ka vaid, mai: deeh teei Dina ing: khaing: nyiex Shekhem heue:. 27 Kawn: simex Yakop khankix, deeh hu: ka dee pah kix pui tan:, mai: yuh veng laux leeing: jao hoik laux yuh kix min: plakngai: nan: kix heue:. 28 Kix rhim: tix teei phung: yung: kix, moi, mai: la kix khawm: can pa koe: daux veng mai: can pa koe: daux kaung: daux ma: kix; 29 mai: kraung khrai: kix khawm: uik, mai: giex tix viex moeng kawn: kix mawh pa giex pa laung, mai: rhim: tix teei can pa koe: daux nyiex kix mai: yuh laux leeing: heue:. 30 Khaix an Yakop ah nin: ka Simion mai: Lewix, "Pex hoik yuh krax kharhawm: aux, mai: kieh pui haktiex in, ceu pui Khanan mai: ceu pui Pherazix khankix khreeing: brai: ka aux, mawh kheu tux ex sinax kix, kix tak khrawm: paox tix, mai: hoek puing: ka aux, aux tak yaox tix laux leeing: tau mai: kawn: nyiex kawn: ma: tix heue:." 31 Mai: kix deeh ah nin:, "Krax pa yuh kix ka nan: ex awm: bon: coh kaux khex khaw: caw daux krax lie?"
Simin Ting 35
Yakop Deeh Ing: Ka Betelax
1 Siyiex ah nin: ka Yakop, "Kaoh, hu: ka Betelax mai: ot tan:; yuh khu: dee tan tix mu: son Siyiex pa hoik lih bleeh ka maix, yam to: maix khaing: puxke: tix Esaw: heue:." 2 Mai: Yakop ah nin: ka pui kawn: nyiex kawn: ma: tix, mai: can pui pa ot mai: nawh khawm: uik, "Tik ka siyiex pui tang: kaux tang: hak khankix khaing: daux sinax pex, kieh tokaux pex singax singeh, mai: loh kraung ceep tix. 3 "Ex kaoh mai: hu: ka Betelax, aux tak sang yuh khu: dee tan tix mu: tan:, son Siyiex pa hoik pawk lox aux, yam lauxrhawm: aux mai: Cao: pa ot tau ka daux krax hu: aux ku dah ku dee heue:." 4 Mawh kheu nan:, kix tawx siyiex pui tang: kaux tang: hak pa koe: mai: kix ka Yakop khawm: uik, kix baox tawx krim pa koe: ka yhaok tix khawm: uik ka nawh, mai: Yakop sipaung: an khankix greem: khaox piak van: pa koe: dex veng Sekhem heue:. 5 Yam lih hu: kix khaing: tan:, pui pa ot baoh veng an, lhat graung ka Siyiex, kix tom: ring hawt khaix kawn: simex Yakop heue:. 6 Mai: Yakop hoek ka veng Luzax, (pa mawh Betelax) pa koe: daux haktiex Khanan tau mai: pui pa ot mai: nawh khawm: uik heue:. 7 Mai: nawh sum: khu: dee tan tix mu: tan:, mai: kok dee an mawh Ela Betelax, (dee bleeh Ela Betelax mawh nyiex bwan: Siyiex heue:.) Mawh kheu lih bleeh Siyiex ka nawh tan:, yam to: nawh khaing: puxke: tix heue:. 8 Kawncau bon: Rebekkax pa mawh Deborax yum tan:, mai: kix sipaung: nawh ka Betelax greem: khaox piak van:; kix tom: kok ceukaux khaox an mawh Alonbakut heue:. (Dee bleeh AlonBakut mawh khaox piak van: pa yiem heue:.) 9 Yam deeh hoek Yakop khaing: Padanaram, Siyiex lih bleeh ka nawh mai: nawb bwan: ka nawh heue:. 10 Mai: Siyiex ah nin: ka nawh, "Yam in ceukaux maix mawh Yakop, khaix in ceukaux maix tak ang lai kok mawh Yakop, mai: tak kok maix mawh Isarilax." Mawh kheu nan:, Nawh Cao: kok ceukaux Yakop mawh Isarilax heue:. 11 Siyiex baox ah nin: ka nawh, "Aux mawh Siyiex pa ting siawp sibrawm; kieh maix haok hwan: haoh hun:, ceu pui tix ceu mai: cub pui ku ceu, tak lih koe: khaing: maix, mai: khuhawkham khankix, tak lih khaing: doeh simie ceucat maix heue:." 12 Haktiex pa hoik tawx Aux, ka Abraham mai: Icak khankix, Aux sang tawx ka maix, khawm: doeh simie ceucat maix khawm: uik heue:." 13 Khaix an Siyiex haok dee lhaong: khaing: Yakop, dee hoik sikah Nawh Cao: tau mai: nawh heue:. 14 Mai: Yakop sum: rong: simaox tix mu:, ka dee hoik sikah Nawh Cao: tau mai: nawh, nawh groi krax tan ceu pa nyaux ka piang simaox an, mai: groi bee ka piang heue:. 15 Mai: Yakop kok ceukaux dee hoik sikah Siyiex mai: nawh tan:, mawh Betelax heue:.
Grawng: Yum Rakhelax
16 Khaix an kix lih hu: khaing: Betelax, yam dex sang hoek kix ka veng Epharat, bawg yam sang keh Rakhelax kawn: hoik hoek, mai: nawh yaox tix kham: geu: krax saux sigrien sigre heue:. 17 Yam kham: geu: nawh saux sang keh tix, bon: pa priex keh nawh ah nin:, "Paw lhat paw graung, maix tak baox pon kawn: simex tix kaux heue:." 18 Yam dex lih khwan: nawh, (yam sang yum) nawh kok ceukaux kawn: simex tix mawh Bennawnix, (Dee bleeh Bennawnix mawh kawn: simex pa koe: yam lauxrhawm: aux heue:.) Viang mawh nan:, keeing: nawh tom: kok nawh mawh Binyamin heue:. (Dee bleeh Binyamin mawh kawn: simex taix khawn: dawm: aux heue:.) 19 Rakhelax yum, mai: kix sipaung: nawh, hawt krax hu: kix ka veng Epharat (pa kok mawh veng Bieliehiem,) 20 mai: Yakop sum: rong: simaox tix mu: ka piang simeeig kiex. Rong: simaox an, kawn: koe: ka simeeig Rakhelax tom: in singaix heue:. 21 Isarilax lih hu: mai: sum: nyiex gox man:, plak toi: nyiex pau Edax heue:. 22 Yam ot Isarilax ka haktiex an, Rubin hu: it tau mai: moeng iak keeing: tix Bilahax. Isarilax mhong: ka grawng: an heue:.
Kawn: Simex Yakop Kao: Ra: Kaux
23 Yakop koe: kawn: simex kao: ra: kaux, kawn: simex Leax khankix Rubin mawh kawn: Ai:, Simion, Lewix, Yudax, Isakha mai: Zebulun heue:. 24 Kawn: simex Rakhelax khankix, mawh Yosiep mai: Binyamin heue:. 25 Kawn: simex Bilahax pa mawh kawncau bon: Rakhelax mawh Dan mai: Napthalix heue:. 26 Mai: kawn: simex Zilapa pa mawh kawncau bon: Leax, mawh Gat mai: Asha heue:. In kix mawh kawn: simex Yakop pa keh son nawh daux haktiex Padanaram heue:.
Grawng: Pa Yum Icak
27 Mai: Yakop hoek ka keeing: nawh Icak, ka baoh Mamre, phan: ang mawh nan: Kirayabax, (an mawh veng Hebron) dee paung Abraham mai: Icak heue:. 28 Yam an Icak koe: ju tix yieh tidaix num heue:. 29 Mai: Icak hoik kied riex ju mai: kuad hu: sipie sipie hoik sidah ju mai: yum, hu: ka dah dee khrawm: simie ceucat nawh tix, mai: kawn: simex nawh Esaw: mai: Yakop sipaung: nawh heue:.
Simin Ting 36
Grawng: Nyiex Ma: Esaw:
1 In mawh grawng: doeh simie ceucat Esaw: pa mawh ceu pui Edom heue:. 2 Esaw: teei tix moeng kawn: bon: Khanan pa mawh Adax kawn: bon: Elon ceu pui Hittix, mai: Aholibama, kawn: bon: Anax pa mawh kawn: simex Zibeon ceu pui Hewix; 3 Mai: Bashamat nan: Nabayok pa mawh kawn: bon: Isahmelax heue:. 4 Adax keh kawn: simex Eliphat son Esaw:, mai: Bashamat keh kawn: simex Yoelax heue:. 5 Aholibama keh kawn: simex Yushax, Yalam, mai: Kawrax heue:. 6 Khaix an Esaw: viex moeng tix khankix, mai: kawn: simex kawn: bon: tix, mai: can pui pa ot daux nyiex nawh khawm: uik, tau mai: khawng: brie, kraung khrai: nawh khawm: uik pa hoik pon daux haktiex Khanan khankix, mai: hu: ka haktiex dee singai tix dah, khaing: pux nawh Yakop heue:. 7 Mawh kheu kied nie kraung khrai: kiex, kiex ang lai chix ot tau, mai: haktiex ot kiex hoik sikhawp kheu hoik kied nie khawng: brie eei: kiex heue:. 8 Mawh kheu Esaw: ot ka piang gawng Sirax; Esaw: lih tix mawh ceu pui Edom heue:. 9 In mawh doeh simie ceucat Esaw: pa mawh keeing: ka ceu pui Edom pa ot ka piang gawng Sirax heue:. 10 In mawh ceukaux kawn: simex Esaw:; moeng nawh Adax keh kawn: simex Eliphat, moeng nawh Bashamat keh kawn: simex Yoelax heue:. 11 Kawn: simex Elihpat khankix mawh Teman, Awma, Zepho, Gatan mai: Kenat heue:. 12 Moeng iak kawn: simex Esaw: pa mawh Elihpat, pa kaux Timanax keh kawn: simex tix Amaliet son Eliphat, in kix mawh doeh simie ceucat Adax moeng Esaw: heue:. 13 Kawn: simex Yoelax khankix mawh Nahat, Shama, mai: Miza. In kix mawh doeh simie ceucat Bashamat moeng Esaw: heue:. 14 Aholibama moeng Esaw:, mawh kawn: bon: Anax, mai: Anax mawh kawn: simex Zibeon, Aholibama keh kawn: simex pa mawh Yushax, Yalam mai: Kawrax son Esaw: heue:.
Cao: Kaing: Meung Edom
15 Inkix mawh cao: kaing: ka kawn: simex Esaw: khankix heue:. Kawn: simex Eliphat pa mawh kawn: ai: Esaw: khankix mawh, cao: kaing: Teman, cao: kaing: Awma, cao: kaing: Zepho, cao: kaing: Kenat, 16 cao: kaing: Kawrax, cao: kaing: Gatan, mai: cao: kaing: Amalet heue:. Inkix mawh cao: kaing: kawn: simex Eliphat khankix heue:. Kix mawh doe simie ceucat kawn: simex Adax heue:. 17 Kawn: simex Yoelax, pa mawh kawn: simex Esaw: khankix mawh, cao: kaing: Nahat, cao: kaing: Zerax, cao: kaing: Shama, mai: cao: kaing: Miza heue:. in kix mawh cao: kaing: khankix, pa mawh kawn: simex Yoelax daux haktiex meung Edom heue:. Mai: kix mawh doeh simie ceucat kawn: simex Beshemat moeng Esaw: heue:. 18 Kawn: simex Aholibama moeng Esaw: khankix mawh, cao: kaing: Yushax, cao: kaing: Yalam, mai: cao: kaing: Kawrax heue:. Inkix mawh doeh simie ceucat cao: kaing: pa lih khaing: Aholibama moeng Esaw:, kawn: bon: Anax heue:. 19 In kix mawh kawn: simex Esaw:, pa mawh pui meung Edom mai: pa mawh cao: kaing: kix tan: heue:.
Grawng Kawn: Simex Sirax Khankix
20 Kawn: simex Sirax, pa mawh ceu pui Hawrix pa ot daux haktiex an, mawh Lawtan, Shawbax, Zibeon mai: Anax, 21 Dishon, Ezax, mai: Dishan. Inkix mawh cao: kaing: ceu pui Hawrix pa mawh kawn: simex Sirax, ka daux haktiex Edom heue:. 22 Mai: kawn: simex Lawtan khankix mawh Hawrix mai: Henan, nan: Lawtan mawh Timinax heue:. 23 Kawn: simex Shawbalax khankix mawh Alavan, Manahat, Ebalax, Shephaw mai: Awnam heue:. 24 Kawn: simex Zibeon mawh Ayax mai: Anax; Anax mawh pui pa yaox ka dee lih rawm: lhaox, ka daux tiag yam liang nawh la keeing: tix Zibeon heue:. 25 Kawn: Anax mawh Dishon mai: Aholibama pa mawh kawn: bon: nawh heue:. 26 Kawn: simex Dishon khankix mawh, Hemdan, Eshaban, Itaran mai: Kheran heue:. 27 Kawn: simex Ezax khankix mawh, Bilahan, Zavan mai: Akan heue:. 28 Kawn: simex Dishan mawh, Uzax mai: Aram heue:. 29 Inkix mawh cao: kaing: ceu pui Hawrix. Kix tom: mawh cao: kaing: Lawtan, cao: kaing: Shawba, cao: kaing: Zibeon, cao: kaing: Anax, 30 cao: kaing: Dishon, cao: kaing: Eza, mai: cao: kaing: Dishan, inkix khawm: uik, mawh cao: kaing: ceu pui Hawrix, pa yuh cao: kaing: ka haktiex Sirax heue:.
Khunhawkham Haktiex Edom
31 In kix mawh khunhawkham pa kwang: ka haktiex Edom, sivoe ang khunhawkham tix kaux kawx nyang bax kwang: ka piang pui Isarilax heue:. 32 Belax kawn: simex Pawrax kwang: ka haktiex Edom, mai: ceukaux veng ting nawh mawh Dinhabax heue:. 33 Khaix yum Bakax, kawn: simex Zerax pa mawh Yawbap ceu pui haktiex Bawzarax deeh plud tix kwang: khaix nawh heue:. 34 Khaix yum Yawbap, Husham ceu pui haktiex Temanix deeh plud tix kwang: khaix nawh heue:. 35 Khaix yum Husham, kawn: simex Bedat pa mawh Hadax, pa puing: ka ceu pui Midian khankix, ka daux tong Mawbax, deeh plud tix kwang: khaix nawh, ceukaux veng ting nawh, mawh Avit heue:. 36 Khaix yum Hadat, Samalax ceu pui haktiex Masariet deeh plud tix kwang: khaix nawh heue:. 37 Khaix yum Samalax, Shawlax ceu pui haktiex Rehobot pa ot hawt rawm: klawng: deeh plud tix kwang: khaix nawh heue:. 38 Khaix yum Shawlax, Balahanan kawn: simex Akhabaw deeh plud tix kwang: khaix nawh heue:. 39 Khaix yum Balahanan, kawn: simex Abaw, Hadax deeh plud tix kwang: khaix nawh, mai: ceukaux veng ting nawh mawh Paw:, ceukaux moeng nawh mawh Mahetabalax, kawn: bon: Matariet, mai: Matariet mawh kawn: bon: Mezahat heue:.
Grawng: Cao: Kaing: Esaw: Khankix
40 In mawh grawng: ceukaux cao: kaing: doeh nyiex ma: Esaw: khankix, mai: dee ot dee koe: kix mai: min: ceukaux kix pa mawh, cao: kaing: Timanax, cao: kaing: Alavax, cao: kaing: Yetiet, 41 cao: kaing: Aholibama, cao: kaing: Elax, cao: kaing: Pinon, 42 cao: kaing: Kenat, cao: kaing: Teman, cao: kaing: Mibaza, 43 cao: kaing: Magadelax, cao: kaing: Iram khankix, inkix khawm: uik mawh cao: kaing: haktiex Edom, ka dee ot dee koe: kix, ka haktiex pa hoik pon kix tix cie heue:. (Esaw: mawh keeing: ka ceu pui Edom heue:.)
Simin Ting 37
Grawng: CaMaox Yosiep
1 Yamin Yakop hoik ot ka haktiex pa hoik mawh keeing: nawh nyo sinie, daux haktiex Khanan heue:. 2 In mawh grawng: doeh simie ceucat Yakop khankix. Yosiep koe: ju kao: aliah num, mai: nawh mawh cao: liang yung: mai: pex, tau mai: puxke: tix khankix; nawh ot tau mai: kawn: simex Bilaha, mai: kawn: simex Zipalax, Bilaha mai: Zipalax mawh moeng keeing: nawh, Yosiep yie krai grawng: phimap pa yuh kix ka keeing: tix heue:. 3 Yamin Isarilax kied moh ka Yoshiep khaing: kawn: nawh khankix, kheu mawh nawh kawn: simex pa pon nawh yam kuad riex ju tix, mai: caing nawh ceep kraung sibex pa mhawm: grang pa shiang: ka rawm: rawn ku ceu heue:. 4 Viang mawh nan:, yam yaox puxke: nawh khankix, ka kied moh keeing: kix ka Yoshiep khaing: kix, mai: koeng ka nawh, mai: kix ang lai rhawm: sikah ka nawh heue:. 5 Yoshiep camaox mai: nawh krai puxke: tix khankix mhong: mai: kix nie baox koeng ka nawh heue:. 6 Mawh kheu nan:, nawh ah nin: ka kix, "Yuh bwanson: nghiet ka grawng: pa hoik camaox aux liak." 7 "Jhak heue:, yam mad ex lhiem: nghox ka daux kaung:, lhiem: nghox cie aux, yaog tix cung see see; lhiem: nghox cie pex khankix, kaoh cung hawt vung viang an, mai: krub ka lhiem: nghox cie aux heue:." 8 Puxke: nawh khankix ah nin: ka nawh, "Tak sang kwang: maix ka piang yix lie? phan: ang mawh nan:, tak sang mawh maix simiang yix lie?" mawh kheu nan:, kix nie baox koeng ka nawh, ka grawng: camaox pa krai nawh heue:. 9 Khaix an nawh baox deeh camaox tix ceu, mai: nawh krai ka puxke: tix khankix; nawh ah nin:, "Jhak heue:, aux hoik baox deeh camaox grawng: tang: ceu, singaix, khix, mai: simuing: kao: tix mu: krub ka aux heue:." 10 Yam krai nawh ceu an ka keeing: tix mai: puxke: nawh khankix, keeing: kix ne raw nawh mai: ah nin:, "Grawng: pa hoik camaox in, mawh grawng: camaox ceu pa tix lie? Aux mai: miex maix khawm: puxke: maix khankix, tak sang yaox tix hoek gup tix ka piang tiex plak sivoe ngai: maix lie? 11 Mai: puxke: nawh khankix bohrhawm: ka nawh, viang mawh nan: keeing: nawh een: tix tawng grawng: in daux rhawm: tix heue:.
Grawng: Coh PuxKe: Nawh Khankix Ka Yosiep
12 Khaix an puxke: nawh khankix, hu: liang yung: mai: pex cie keeing: kix ka veng Shikhem heue:. 13 Isarilax ah nin: ka Yosiep, "Puxke: maix khankix hu: liang yung: mai: pex plak veng Shekhem ang mawh lie? Hoek heue:, aux tak sang ploi: maix hu: ka kix." mai: nawh deeh ah nin:, "Aux ot tin: heue:." 14 Mai: nawh ah nin: ka nawh, "Hu: jhak kah yam in, mawh nyawm ot nyawm koe: puxke: maix khankix lie? deeh viex lox hoek ka aux." Mawh kheu nan: nawh ploi: nawh khaing: ka daux lung: Hebron mai: nawh hoek ka veng Shekhem heue:. 15 Mai: pui tix kaux yaox ka lai ling nawh ka daux tiag, mai: pui an chawk ka nawh ah nin:, "Sawg maix pa tix lie?" 16 "Aux sawg ka puxke: tix khankix," yuh bwanson: krai aux mhong: dee liang kix yung: liak?" 17 Mai: pui an ah nin:, "Kix hoik lih hu: khaing: tin:, mawh kheu hoik mhong: aux ah kix nin:, 'Hu: ex plak veng Doktan.'" Mawh kheu nan: Yosiep deeh hawt khaix puxke: tix khankix, mai: yaox kix daux veng Doktan heue:. 18 Yam yaox kix hoek nawh dee singai, mai: sivoe ang nawh nyang bax hoek dex kix, kix kum: paox tix son sang pah nawh heue:. 19 Kix ah nin: ka paox tix, tix kaux hoik tix kaux, "Jhak heue:, cao: camaox hoik hoek phao:! 20 "Hoek heue:, kieh ex pah nawh yam in mai: tik nawh ka daux o: ti dah dah, ex tak sang ah nin:,"Totiag tix ceuceu hoik kiied nawh, ex pau tix jhak grawng: camaox nawh sang lih tix mawh yuh ka mawx." 21 Yam mhong: Rubin ka lox an, mai: nawh taoh Yosiep khaing: daux tawm: taix kix mai: ah nin:, "Ex paw doh pah ka nawh heue:." 22 Mai: Rubin ah nin: ka kix, "Paw kieh nham: jauh, ploi: nawh ka daux o: pa koe: daux tiag, paw doh kieh taix pex krox ka nawh." Rubin keud tix sang taoh nawh khaing: daux tawm: taix kix mai: deeh viex nawh ing: ka keeing: tix heue:. 23 Mawh kheu nan: yam hoek Yosiep ka puxke: tix khankix, mai: kix peeik tix tik sibex pa mhawm: grang pa shiiang: ka rawm: rawn ku ceu pa ceep nawh piang tix heue:. 24 Mai: kix teei tix ploi: nawh daux o:. Daux o: an ang koe: tid tix mai: rawm: kawx ang koe: kah heue:. 25 Yam ngawm kix tix sawm:, kix yaog tix jhak mai: yaox ka ceu pui Ishamelax tix cub pa kaoh khaing: haktiex Gilat tau mai: kala-uk, kix tang: ceu pa sioe: bhawng: peeh khaox Balasan, peeh khaox Muran khankix ka piang Kala-uk kix, mai: viex hu: ka meung Ejiptux heue:. 26 Khaix an Yudax ah nin: ka puxaik tix khankix, phan: ex pah pux tix mai: mox nham: nawh, sang koe: bwanson: yuh ka mawx? 27 "Hoek heue:, teei ex coh nawh ka ceu pui Ishamelax khankix, mai: paw kieh taix ex hoek ka piang nawh, kheu mawh nawh pux ex mai: nex nham: ex." mai: puxaik nawh khankix nghiet ka lox nawh ku kaux heue:. 28 Khaix an ceu pui Midian pa yuh lai geu khankix, pha: ka dee ot kix tan:, mawh kheu nan: puxke: nawh khankix bluh Yosiep lih khaing: daux o:, mai: coh nawh ka ceu pui Ishamelax ka mau tinga: Shekhe, mai: kix viex Yosiep hu: ka meung Ejiptux heue:. 29 Yam deeh hoek Rubin ka daux o:, mai: ang lai yaox Yosiep ka daux o:, nawh riah tix tik kraung ceep tix jao heue:. 30 Mai: nawh deeh ing: ka puxaik tix mai: ah nin:, "Kawn: nyawm ang lai ot tan:, mai: aux sang yuh ka mawx?" 31 Khaix an, kix teei sibex Yosiep, mai: kix pah ka kawn: pex tixmu:, mai: cub sibex an daux nham:, 32 Mai: kix tawx sibex pa shiang: ka rawm: rawn ku ceu, mai: viex hoek ka keeing: kix mai: ah nin:, "Yix hoik yaox ka sibex in, jhak tix yaox mawh ang mawh sibex kawn: maix lie?" 33 Mai: nawh pon ci: ka sibex an mai: ah nin:, "In mawh sibex kawn: aux, totiag pa hai: hoik kiied tix ih ka nawh, mai: Yosiep hoik phawng: nex phawng: nham: heue:." 34 Khaix an Yakop riah kraung ceep tix, mai: vhua: nyoi tix ka chee: rhix, mai: lauxrhawm: son kawn: simex tix tom: rheung: singaix sawm: heue:. 35 Kawn: praix nawh khankix, hoek tix khu: rhawm: nawh; nawh thiang: ka lox khu: rhawm: kix mai: ah nin:, "Aux tak sang lih hu: daux simeeig tau mai: kawn: simex tix, ka daux pa voirhawm: voirhi: tix," mawh kheu nan: keeing: nawh yiem grai son Yosiep heue:. 36 Pui Midian khankix, deeh coh Yosiep ka daux meung Ejiptux ka Pawtiphax, pa mawh cao: kaing: greem: khunhawkham Pharaw, Pawtiphax mawh cao: kaing: naing, pa pau ju simiang Pharaw heue:.
Simin Ting 38
Grawng: Yudax Mai: TaMa
1 Yam an, Yudax gwieh tix hu: khaing: puxaik nawh khankix, hu: ot mai: ceu pui Adulan tix kaux pa kaux Hirax heue:. 2 Yudax yaox kawn: bon: ceu pui Khanan pa kaux Shua, mai: nawh teei tix moeng heue:. 3 Mai: nawh koe: kaux mai: keh kawn: simex tix kaux, nawh kok ceukaux nawh mawh Erax heue:. 4 Nawh baox koe: kaux mai: keh kawn: simex tix kaux, mai: nawh kok ceukaux nawh mawh Awnan heue:. 5 Mai: nawh baox koe: kaux mai: keh kawn: simex tix kaux, mai: nawh kok ceukaux nawh mawh Shelax. Nawh ot daux veng Khezip yam keh tix Shelax heue:. 6 Khaix an Yudax teei kawn: Ai: tix Erax koe: moeng tix kaux, mai: ceukaux nawh mawh Tama heue:. 7 Viang mawh nan:, kawn: Ai: Yudax pa mawh Erax yuh pa caox pa caig ka sivoe ngai: Simiang Siyiex, mai: Simiang Siyiex pah nawh yum heue:. 8 Mai: Yudax ah nin: ka Awnan, "Hu: ka moeng puxke: maix, mai: teei tix moeng nawh, son sang deeh plud doeh puxke: maix heue:." 9 Viang mawh nan:, Awnan tawng ka kawn: an, ang lai yaox tix, kok mawh kawn: tix, yam hu: it nawh mai: moeng puxke: tix, nawh kieh rawm: ngang tix lih piang tiex, mawh kheu ang rhawm: kieh kawn: tix plud ka doeh puxke: tix heue:. 10 Can pa yuh nawh, ang lai khaw: rhawm: Siyiex, mawh kheu nan:, Nawh cao: baox pah nawh yum heue:. 11 Khaix an Yudax ah nin: ka mun tix Tama, "Ing: ot awm: miexmai ka nyiex keeing: maix, glang: ang kawn: simex aux Shelax nyang ting," mawh kheu lhat Yudax Shelax yum awm: puxke: tix khankix, mawh kheu nan: Tama lih hu: mai: deeh ot ka nyiex keeing: tix heue:. 12 Khaix hoik rheung: bawg yam, kawn: bon: Shua pa mawh moeng Yudax yum, Yam hoik deeh nyawmrhawm: nawh, Yudax hu: ka pui pa rhip hauk yung: tix, daux veng Timanax tau mai: paoxgrawm paoxgrux tix Hirax, ceu pui Adulan heue:. 13 Mai: pui krai ka Tama ah nin:, "Jhak heue:, paox maix hoik hu: son sang rhip hauk yung: ka veng Timanax heue:." 14 Nawh peeik kraung ceep miexmai mai: kheem: tix ka man: tawb ngai:, mai: lhop ka tokaux tix, mai: nawh ngawm plak krax laig ka veng Timanax; kheu hoik yaox nawh ting Shelax, mai: nawh ang nyang bax yaox tix mawh moeng Shelax heue:. 15 Yam yaox Yudax ka nawh, Yudax keud nawh mawh bon: coh kaux, kheu kheem: nawh pak ngai: tix heue:. 16 Khaix an nawh hu: ka nawh praok krax tan: mai: ah nin:, "Kieh aux hoek ka maix," mawh kheu ang Yudax tawng mawh nawh mun tix heue:. Mai: bon: an ah nin:, "Phan: maix sang hoek ka aux, sang tawx maix, pa tix ka aux lie?" 17 Mai: Yudax ah nin:, "Aux tak tawx kawn: pex ka maix tix mu: khaing: khawng: brie aux heue:." Nawh baox ah nin:, "Sivoe ang maix nyang bax tawx ceu an, pon tawx maix aux priex kraung sakse: tix ceuceu lie?" 18 Nawh ah nin:, "Sang kieh maix aux tawx kraung sakse: ceu pa yuh ka mawh ka tix lie?" Nawh deeh pawk lox ah nin:, "Tang maix deuh cum: tix, maox rawd nyoi tix, mai: khaoxgix tix, khankix pa koe: daux tawm: taix maix heue:." Mawh kheu nan: nawh tawx ceu an kix ka nawh, mai: hu: it tau mai: nawh, bon: an koe: kaux heue:. 19 Khaix an bon: an kaoh hu:, mai: peeik man: tawb ngai: tix mai: deeh ceep ka kraung ceep miexmai heue:. 20 Son sang deeh teei Yudax kraung pa hoik tang tix ka bon: an, nawh ploi: paox grawm tix, ceu pui Adulan hu: tawx kawn: pex ka nawh, viang mawh nan:, nawh ang yaox ka bon: an heue:. 21 Mai: nawh chawk ka pui pa ot baoh an mai: ah nin:, "Bon: pa coh kaux an, pa yie ot praok krax tin:, ot dee mawx?" Mai: kix deeh ah nin:, "Bon: pa coh kaux ang koe: tin: tix kaux kawx heue:." 22 Mai: nawh deeh ing: ka Yudax mai: ah nin:, "Ang aux yaox nawh, pui pa koe: baoh an kawx, krai ka ang bon: coh kaux koe: tan: heue:." 23 Mai: Yudax ah nin:, aux hoik tawx kawn: pex in, mai: maix ang tie yaox ka nawh, kieh nawh teei tix cie kraung khrai: an khankix mawh kheu lhat ex tix kaig tua ka jao an heue:. 24 Khaix hoik luan loe: khix, kix krai Yudax mhong: mai: ah nin:, "Mun maix Tama, hoik yuh bon: coh kaux; lheu: khaing: an nawh hoik koe: kaux kheu sipiag yuh tix bon: coh kaux." Mai: Yudax ah nin:, viex nawh lih ka praix, mai: gleeing nawh heue:." 25 Yam viex kix Tama lih ka praix, nawh tawm: lox mai: sipaox kraung ka paox tix, ah nin:, "Kraung in mawh cie pui mawx? aux hoik koe: kaux mai: nawh heue:." mai: nawh baox ah nin:, "Yuh bwanson: jhi: aux yaox, cao: kraung in kix, pa mawh cum:, mai: maox rawd nyoi mai: khaox grix heue:." 26 Khaix an Yudax tawng kraung an mawh cie tix mai: ah nin:, "Nawh hoik nie rah see khaing: aux, kheu ang aux tawx kawn: simex tix Shelax ka nawh." Mai: Yudax ang lai dex mai: nawh khaix an heue:. 27 Khaix an yam hoek bawg yam sang keh Tama, jhak heue:, kawn: brawm: koe: daux vaig nawh heue:. 28 Yam keh nawh, an tix kaux plih taix tix lih ka praix, mai: bon: cao: pa priex keh nawh teei keei: raoh tix nyaing mai: phyawk ka taix nawh, mai: ah nin:, "In mawh pa sang keh sivoe heue:." 29 Viang mawh nan:, kawn: an deeh leed taix tix laig, mai: puxke: nawh deeh tieh tix lih sivoe, mai: bon: cao: pa priex keh an ah nin:, "Yuh ka mawx maix lai sigrhang: tix lih? kieh see: in, hoek ka piang maix!" Mawh kheu nan: kix kok ceukaux nawh mawh Pharet (Dee bleeh Pharet mawh pui pa preeng: tix lih heue:). 30 Khaix an, pux nawh pa phyawk keei: raoh ka taix lih keh, mai: kix kok ceukaux nawh mawh Zerax heue:.
Simin Ting 39
Grawng: Mawh Yosiep Siliex Daux Meung Ejiptux
1 Pui Ishamelax viex Yosiep hu: ka meung Ejiptux, mai: coh nawh ka Pawtiphax pa mawh cao: kaing: naing tix kaux, greem: Khunhawkham Pharaw cao: pau ju nawh heue:. 2 Simiang Siyiex ot tau mai: Yosiep, mai: kaing jhaw: pa yuh nawh haok hwan: ting lhaong:, mai: nawh yaox tix ot daux nyiex cao: simiang tix, ceu pui Ejiptux heue:. 3 Cao: simiang nawh hoik yaox ka ot Simiang Siyiex tau mai: nawh, Simiang Siyiex kieh can pa yuh nawh khankix haok hwan: ting lhaong:, daux tawm: taix nawh heue:. 4 Mawh kheu nan:, Yosiep mawh pa khaw: pa caw rhawm: sivoe cao: simiang tix, mai: kaing yuh nawh son cao: simiang tix kawx, mawh pa khaw: pa caw uik, mai: kieh Yosiep mawh pa kia: pa ngien ka nyiex ma: tix, mai: nawh ap can ceu pa koe: tix khawm: uik ka daux tawm: taix Yosiep heue:. 5 Jah bawg yam kieh nawh Yosiep mawh cao: kwang: piang nyiex ma: mai: kraung khrai: tix khankix, Simiang Siyiex nawb bwan: ka piang nyiex pui Ejiptux an, kheu jao Yosiep; bwanson: Simiang Siyiex lih koe: piang kraung daux nyiex daux ma: nawh, mai: can pa koe: daux kaung: nawh heue:. 6 Mai: nawh ap can ceu pa koe: tix khawm: uik daux tawm: taix Yosiep, lheu: Khaing: khaomun, pa sang ih nawh, nawh ang lai yuh tix tawng ka kraung khrai: pa koe: tix khankix ceeix kawx. Yosiep kied mhawm: grang mai: pakpeung kaux hak nawh kawx jiet nyawm tix yaox heue:. 7 Mawh kheu nan: moeng cao: simiang nawh, ghoing: rhawm: ka Yosiep mai: ah nin:, "It tau mai: aux heue:." 8 Viang mawh nan: Yosiep thiang: mai: ah nin: ka moeng cao: simiang tix, "Jhak heue:, cao: simiang aux ang yuh tix tawng ka can pa koe: daux nyiex tau mai: aux, mai: nawh hoik ap ku ceu daux tawm: taix aux heue:." 9 "Pui lheu: ting khaing: aux daux nyiex in ang koe: tix kaux kawx; lheu: khaing: maix pa ang nawh ap ka aux ang koe: tix ceu kawx, mawh kheu mawh maix moeng cao: simiang aux, aux lai sang pon yuh pa caox pa caig ting ceu in mai: phit lud ka Siyiex yuh ka mawh?" 10 Nawh nyaw glaw: ka Yosiep tix ngaix hoik tix ngaix, Yosiep ang cu nghiet ka lox kiex, mai: ang it ang ot tau mai: kiex heue:. 11 Daux tix ngaix Yosiep laig ka daux nyiex, son sang yuh kaing jhaw: tix yam ang pui ot ka daux nyiex tix kaux kawx, 12 nawh giex Yosiep mai: bluh ka sibex ceep nawh mai: ah nin:, "It tau mai: aux heue:." Viang mawh nan: Yosiep prah sibex tix daux taix nawh, mai: to: tix lih ka praix heue:. 13 Yam yaox nawh prah Yosiep sibex tix ka daux taix nawh, mai: lih to: ka praix, 14 Nawh kok yo ka pui pa ot ka daux nyiex mai: krai ka grawng: in, mai: nawh ah nin: ka kix, "Jhak heue:, cao: simiang aux viex pui Hebrie in hoek yuh pa ang khaw: ang jiet ka ex, nawh hoek son sang laig it tix mai: aux, aux tom: riag sau: riang riag yo jao an heue:." 15 "Mai: yam hoik mhong: nawh sau: aux riang tix riag yo, nawh prah sibex tix ka aux mai: to: tix hu: ka praix heue:." 16 Mawh kheu nan: nawh priex sibex Yosiep ka tix, tom: deeh hoek cao: simiang tix daux nyiex heue:. 17 Khaix an nawh krai lox awm: pa hoik krai tix ah nin:, "Kawncau Hebrie pa viex maix hoek ka ex laig dee ot aux son sang yuh pa ang khaw: ang jiet ka aux; 18 mawh kheu nan: aux riag yo lox tix, mai: nawh prah sibex tix mai: aux, mai: to: ka plak praix heue:." 19 Yam hoik mhong: cao: simiang ka lox krai moeng tix pa ah nin:, "Kawncau maix hoik yuh nin: ka aux," mai: nawh kied songrhawm: heue:. 20 mai: cao: simiang Yosiep teei mai: sau: nawh laig daux thawng:, dee priex kix pui pa laig thawng: khunhawkham, mai: Yosiep ot daux thawng: tan: heue:. 21 Viang mawh kawx nan:, Simiang Siyiex ot tau mai: Yosiep mai: jhi: nawh yaox krax moh pa caoxrhawm: Tix, Nawh Cao: kieh nawh mawh pa khaw: rhawm: ka sivoe ngai: cao: kaing: thawng: heue:. 22 Can pui pa ot daux thawng: mai: kaing khawm: uik cao: kaing: thawng: hoik ap daux tawm: taix Yosiep heue:. 23 Cao: kaing: thawng: ang lai simi tix jhak ka can ceu pa koe: greem: tawm: taix Yosiep tix ceu kawx, mawh kheu Simiang Siyiex ot tau mai: nawh, can ceu pa yuh nawh ku ceu, Simiang Siyiex kieh haok hwan: heue:.
Simin Ting 40
Grawng: CaMaox Pui Pa Ot Daux Thawng:
1 Khaix an cao: kaing: tawx kawk nyaux khunhawkham mai: cao: kaing: tawx priex ih khunhawkham, phit lud ka khunhawkham tix meung Ejiptux heue:. 2 Mai: khunhawkham Pharaw songrhawm: ka cao: kaing: ra: kaux, pa mawh cao: kaing: tawx kawk nyaux mai: cao: kaing: tawx priex ih nawh, 3 mai: nawh sau: kiex daux thawng:, ka daux nyiex cao: kaing: pa pau thawng: an tau mai: dee laung kix Yosiep tan: heue:. 4 Cao: giex kaing: lien: pa pau khunhawkham, ap kiex ka Yosiep, mai: kieh priex kiex, mai: kiex yaox tix ot tan: tom: kub rheung: heue:. 5 Khaix an cao: kaing: tawx kawk nyaux mai: cao: kaing: tawx priex ih khunhawkham meung Ejiptux, pa hoik laung kix daux thawng: khawm: ra: kiex, kiex tang: camaox pa koe: dee bleeh son kaux mawx kaux an daux tix sawm: tau heue:. 6 Mai: Yosiep hoek ka kix plak ponngawb mai: jhak ka kix, mai: yaox voi rhawm: kiex khawm: ra: heue:. 7 Mawh kheu nan:, nawh chawk cao: kaing: an kiex, pa ot greem: Pharaw pa hoik laung kix tau mai: nawh daux nyiex cao: simiang kix mai: ah nin:, "Daux singaix pax lai lauxrhawm: jao pa tix?" 8 Mai: kiex ah nin: ka nawh, "Yiex camaox tix kaux tix ceu mai: pui pa sang krai yiex mhong: dee bleeh ang koe: tix kaux kawx." Mai: Yosiep ah nin: ka kiex, "Grawng: pa krai dee bleeh camaox mawh pa dex pa dawd mai: Siyiex ang mawh lie? pax krai aux mhong:." 9 Khaix an cao: kaing: tawx kawk nyaux, krai camaox tix ka Yosiep mai: ah nin: ka nawh, "Ka daux camaox aux koe:, nhu: plix siiet tix nhu: sivoe aux, 10 "Mai: nhu: plix siiet an, koe: kak loe: kak, ka piang kak an, koe: kho: pa sang dex pruh kah, mai: lih pruh, kak plix nawh hoik si gleem: plix, mai: jiet mhawm: teem heue:. 11 Kawk nyaux Pharaw koe: daux taix aux, mai: aux teei plix siiet an, biiet daux kawk nyaux Pharaw, mai: ap kawk an daux taix Pharaw heue:." 12 Mai: Yosiep ah nin: ka nawh, "Dee bleeh kak loe: kak an mawh loe: singaix, 13 "Khaix in loe: singaix, Pharaw deeh yaog kaing maix mai: deeh tawx dee ot maix, maix tak deeh yaox tix tawx kawk nyaux Pharaw ka daux taix nawh, awm: pa hoik yaox maix tix yuh glang: ka: in, yam mawh maix cao: tawx kawk nyaux nawh heue:. 14 "Doh keud ka aux, yam yaox maix krax gauxrhawm:, mai: jhi: krax caoxrhawm: maix ka aux, krai grawng: aux ka Pharaw, son sang yaox aux tix lih khaing: nyiex thawng: in heue:. 15 "Mawh kheu mawh aux pui pa briex kix khaing: ceu pui Hebrie tete, aux ang tie koe: dee phit, daux haktiex in, mai: kix sau: aux daux thawng: heue:." 16 Yam yaox cao: kaing: tawx priex ih khunhawkham mhawm: lox dee bleeh camaox an, nawh ah nin: ka Yosiep, "Aux kawx camaox tix cah khrawng: khaomun loe: mu: ka piang kaing: tix, 17 ka daux khrawng: pa koe: ka piang paox tix, koe: priex ih ku ceu son pharaw, sim: khankix hoek mai: tut tix ih, pa koe: daux khrawng: cah aux piang kaing: tix heue:." 18 Mai: Yosiep ah nin:, "Dee bleeh camaox in mawh nin:, khrawng: loe: mu: mawh loe: singaix; 19 "Khaix in loe: singaix, Pharaw tak tat kaing: maix, mai: takteue: maix ka piang khaox, sim: khankix tak tut tix ih nex maix khaing: maix heue:." 20 Khaix luan daux loe: singaix, mawh singaix keh Pharaw, nawh yuh poi singaix keh tix, mai: kok kawncau tix ku kaux, mai: nawh deeh teei cao: kaing: tawx kawk nyaux, mai: cao: kaing: tawx priex ih lih khaing: daux thawng: heue:. 21 Nawh deeh taoh ju cao: kaing: tawx kawk nyaux nawh, mai: deeh kieh nawh yuh cao: kaing: tawx kawk nyaux, nawh deeh yaox tix mawh cao: tawx kawk nyaux daux taix Pharaw; 22 mai: nawh tak teue: cao: kaing: tawx priex ih, awm: pa khaw: mai: lox krai Yosiep ka kiex heue:. 23 Viang mawh nan:, cao: kaing: tawx kawk nyaux ang lai doh keud ka Yosiep, mai: hoik pi awm: ka nawh heue:.
Simin Ting 41
Grawng: Camaox Pharaw
1 Khaix hoik luan ra: num, Pharaw camaox tix ceu, mai: nawh cung hawt klawng: Nilax heue:. 2 Mai: moi miex pa mhawm: plang: pa kluing: aliah mu: lih khaing: daux rawm: klawng: Nilax, mai: kix sawm: rib pa kuah hawt klawng: tan: heue:. 3 Jhak heue:, moi miex pa ang mhawm: grang pa krawx rhao: aliah mu:, baox lih khaing: rawm: klawng: Nilax, mai: cung hawt praok moi miex lih sivoe aliah mu: ka praok rawm: klawng: Nilax heue:. 4 Moi miex pa ang mhawm: grang pa krawx pa rhao: aliah mu: khankix, bleet ka moi miex pa mhawm: plang: pa kluing: an aliah mu:. Mai: Pharaw kawx siduad khaing: it tix heue:. 5 Nawh baox lhiak it, mai: baox camaox ra: bawg ti bawg, sigleem: nghox pa ting mu: jiet mhawm: sok aliah sigleem: lih khaing: num: nghox tix pang: heue:. 6 Mai: jhak heue:, sigleem: nghox pa ghrip aliah mu:, pa laux jao bhaung: lih khaing: plak lih singaix, deeh kuah sijaox khaix kix heue:. 7 Mai: sigleem: nghox pa ghrip aliah mu: an, bleet sigleem: nghox pa ting mu: pa jiet mhawm: sok an, mai: Pharaw siduad, nawh tawng mawh camaox tix heue:. 8 Yam hoek ponngawb, nawh kied koe: krax khirhawm: khirhi:, nawh ploi: pui kok ka cao: sibawk mai: pui koe: pingnya khankix pa ot ka daux meung Ejiptux, Pharaw krai kix mhong: grawng: camaox tix, viang mawh nan: ang koe: pui pa pon krai dee bleeh caomaox Pharaw tix kaux kawx heue:. 9 Khaix an cao: kaing: tawx kawk nyaux ah nin: ka Pharaw, "Aux doh keud ka pa lud tix singaix heue:. 10 "Yam songrhawm: Pharaw ka kawncau tix khankix, maix sau: aux daux thawng: tau mai: cao: kaing: tawx priex ih, ka daux nyiex cao: kaing: naing pau ju khunhawkham, 11 "Yiex ra: kaux tang: camaox daux tix sawm:, mai: yiex khawm: ra: camaox grawng: pa koe: dee bleeh cie mawx cie an heue:. 12 "Pui Hebrie pa awn: ju tix kaux, pa mawh kawncau ka cao: kaing: pau ju khunhawkham ot tau mai: yiex tan:, yam krai yiex camaox tix ka nawh, mai: nawh toe: dee bleeh camaox yiex kaux mawx kaux an, awm: pa hoik camaox yiex heue:. 13 "Awm: pa hoik toe: nawh dee bleeh son yiex hoik lih tix mawh awm: an, maix deeh tawx beeh glawm: cao: kaing: tawx kawk nyaux ka aux, mai: ka kaw an maix takteue: ka nawh kieh nawh yum heue:. 14 Khaix an Pharaw ploi: pui hu: kok ka Yosiep, mai: kix nied tix teei nawh lih khaing: daux thawng:, nawh khlao: hauk jheeh tix mai: loh kraung ceep tix hoek ka Pharaw heue:. 15 Mai: Pharaw ah nin: ka Yosiep, "Aux hoik camaox tix ceu, mai: pui pa pon toe: dee bleeh ang koe: tix kaux kawx, mai: aux hoik mhong: krai kix grawng: chix toe: maix dee bleeh camaox heue:." 16 Yosiep pawk lox Pharaw mai: ah nin:, "Ang mawh aux pa tang: pon krai, Siyiex tak pawk ka dee bleeh camaox maix heue:." 17 Khaix an Pharaw ah nin: ka Yosiep, "Jhak heue:, ka daux pa camaox aux, aux cung ka praok rawm: klawng: Nilax heue:." 18 "Moi miex pa mhawm: plang: pa kluing: aliah mu: lih dom: mawx dom: an, khaing: daux rawm: klawng: Nilax, mai: kix sawm: rib tan: heue:." 19 "Mai: moi miex pa ang mhawm: grang pa krawx pa rhao: tang: mu: aliah mu: lih hoek khaix kix, aux ang sax yaox pa awm: an daux haktiex Ejiptux tix bawg kawx heue:. 20 Mai: moi miex pa ang mhawm: grang pa krawx pa rhao: an ih ka moi miex pa kluing: pa lih sivoe aliah mu:, 21 khaix ih kix ka moi miex an, pui tix kaux kawx, ang tawng ka hoik ih kix ka moi an, mawh kheu kawn: ca: krawx rhao: moi an kix awm: phaox voe heue:. Khaix an aux siduad kah heue:. 22 "Aux baox deeh yaox ka daux camaox tix yuh nin:, "Sigleem: nghox aliah mu: pa jiet mhawm: sok aliah sigleem:, lih khaing: num: nghox tipang:, 23 mai: sigleem: nghox pakroh pavhit aliah sigleem: pa laux ka bhaung: pa hoek plak lih singaix, kuah sijaox khaix kix heue:. 24 Mai: sigleem: nghox pakroh pa vhit an, bleet ka sigleem: nghox pa mhawm: an aliah sigleem: an heue:. Mai: aux krai ceu in ka cao: sibawk khankix, viang mawh nan:, ang koe: pui toe: aux mhong: dee bleeh tix kaux kawx heue:." 25 Khaix an Yosiep ah nin: ka Pharaw, "Grawng: camaox Pharaw mawh ngie tix ceu khaing:, Siyiex hoik jhi: Pharaw yaox ka grawng: pa sang yuh Nawh Cao: heue:." 26 Moi miex aliah mu:, mawh aliah num, mai: sigleem: nghox pa mhawm: kawx, mawh aliah num, mai: camaox in mawh tix ceu khaing: heue:." 27 Moi miex pa krawx pa rhao:, pa ang mhawm: grang pa lih hoek khaix kix, mawh aliah num, sigleem: nghox pa ang koe: tid tix aliah sigleem:, pa hoik laux ka bhaung: pa kaoh khaing: plak lih singaix an, mawh sibhawm: praix aliah num heue:." 28 "Grawng: ceu pa krai aux ka Pharaw in, mawh pa jhi: Siyiex Pharaw yaox pa sang yuh Nawh Cao: heue:. 29 "Tak koe: pa ih pa un: tom: haoh tom: lheu: daux haktiex Ejiptux aliah num, 30 khaix hoik an aliah num, sibhawm: praix tak baox hoek aliah num, tom: hoik pi awm: kix ka pa haoh pa lheu: tix ka daux haktiex Ejiptux, mai: sibhawm: praix tak kieh haktiex khawm: uik laux leeing: heue:. 31 "Mawh kheu pa lang: teung: sibhawm: praix an, pui khankix hoik pi awm: ka pa haoh pa lheu: kix ka glang: ka: an heue:. 32 Grawng: deeh baox Pharaw tix camaox ra: bawg in, mawh pa hoik tat Siyiex tix deuh, mai: Siyiex tak sang khran: kieh ceu in lih tix mawh heue:. 33 "Mawh kheu nan: yam in, kieh Pharaw laug pui pa naog mai: krax tawng mai: pui pa koe: pingnya, mai: kieh nawh kwang: ka piang haktiex Ejiptux heue:. 34 Kieh Pharaw yuh ceu in mai: kieh deuh cao: kaing: khankix, pa sang kwang: ka piang haktiex khawm: uik, mai: kieh kix khrawm: gaox, nghox phwan: son tix son, pa lih khaing: meung Ejiptux, yam kawn: nie nghox daux aliah num heue:." 35 Mai: kieh kix khrawm: pa ih pa un: ka daux num pa mhawm: pa hoek an, mai: rhawm: tix deuh nghox koi: khankix greem: siawp sibrawm Pharaw, mai: kieh kix rhawm: pa ih pa un: ka daux veng khankix heue:. 36 Pa ih pa un: pa rien tix deuh in, mawh son bawg yam sibhawm: praix aliah num, pa sang lih tix hoek daux haktiex Ejiptux, son sang ang pui haktiex yaox krax laux leeing: glang: yam sibhawm: praix heue:
Grawng: Pa Pon Yosiep Siawp Sibrawm
37 Pharaw mai: kawncau nawh khankix khaw: rhawm: ka lox pa krai Yosiep heue:. 38 Mai: Pharaw ah nin: ka kawnceu tix khankix, "Mawh sang pon yaox ex ka pui pa ot khwan: Siyiex ka daux nawh awm: pui in dee mawx lie?" 39 mawh kheu nan: Pharaw ah nin: ka Yosiep, "Mawh kheu Siyiex hoik jhi: maix yaox grawng: in khawm: uik, pui pa koe: rhawm: keud pa mhawm: mai: pui koe: pingnya awm: maix ang lai koe: tix kaux kawx, 40 "Maix tak kwang: ka piang nyiex haw: aux, mai: pui haktiex aux khawm: uik, tak yuh awm: gumlox pa tawm: maix khankix; mawh ngie ting aux khaing: maix, ka piang dang: ngeung tix heue:." 41 Mai: Pharaw ah nin: ka Yosiep, "Jhak heue:, aux hoik yaog maix kwang: ka piang haktiex Ejiptux khawm: uik heue:." 42 Khaix an Pharaw peeik jeep gien: khaing: taix tix mai: ceep ka taix Yosiep, mai: ceep sibex man: pa mhawm: ka piang nawh, mai: maox khri: ka ngawg nawh heue:. 43 Mai: kieh nawh brug ling: lawx brung ra: mu: ti mu: cie tix; Pui khankix kok yo lox sinum sivoe nawh, "Grux ngawng ka nawh!" mawh kheu nan:, Pharaw yaog nawh kwang: ka piang haktiex Ejiptux khawm: uik heue:. 44 Pharaw ah nin: ka Yosiep, "Aux mawh khunhawkham Pharaw, lheu: khaing: pa khaw: rhawm: maix, 1pui tix kaux kawx ang pon yaog taix caong tix ka daux haktiex Ejiptux heue:." 45 Mai: Pharaw kok ceukaux Yosiep mawh Zaphanatapanax, mai: nawh tawx Yosiep moeng Asanax kawn: bon: cao: giex kaing: li Pawtipherax pui veng Awnax heue:. Yosiep lih hu: ka daux pa kwang: tix haktiex Ejiptux ku dah ku dee heue:. 46 Yosiep hoik koe: ju tix ngoe: num, yam yaox nawh tix cung sivoe Pharaw khunhawkham Ejiptux. Mai: Yosiep lih hu: khaing: sivoe plak ngai: nawh, ka daux haktiex Ejiptux ku dah heue:. 47 Bawg yam koe: ceu pa haoh pa lheu: aliah num, haktiex lih tix koe: plix tom: haoh hun: heue:. 48 Nawh khrawm: pa ih pa un: khaing: haktiex Ejiptux, daux aliah num, mai: priex tix deuh daux veng; pa ih pa un: lih khaing: daux kaung: pa koe: rawb rim veng, tang: kieh khrawm:, veng mawx veng an heue:. 49 Yosiep khrawm: nghox koi:, haoh hun: awm: mhaik praok rawm: sigrit sigra:, tom: ang nawh lai uik si min kheu hoik haoh hun: heue:. 50 Sivoe ang num sibhawm: praix nyang hoek, Yosiep pon kawn: simex ra: kaux khaing: Asanax pa mawh kawn: bon: cao: giex kaing: li Pawtipherax veng Awnax heue:. 51 Yosiep kok ceukaux kawn: simex tix mawh Manashe, mawh kheu Siyiex hoik kieh aux pi awm: krax taug krax mao mai: kawn: nyiex kawn: ma: nyiex keeing: tix heue:. 52 Mai: nawh kok ceukaux kawn: simex ra: kaux tix kaux mawh Epharen, mawh kheu Siyiex hoik kieh aux haoh hun: ka daux haktiex pa kha: aux rhawm: tix heue:. 53 Mai: num pa haoh pa lheu: pa ih pa un: aliah num daux haktiex Ejiptux hoik sidah; 54 Mai: num sibhawm praix aliah num hoik jah tix hoek, awm: pa hoik krai Yosiep. Mai: sibhawm: praix lih koe: ka daux haktiex ku dah; viang mawh nan:, daux haktiex Ejiptux koe: pa ih pa un: heue:. 55 Yam sibhawm: praix daux haktiex Ejiptux, pui khankix riag yo ka Pharaw, son pa ih pa un:; mai: Pharaw ah nin: ka pui Ejiptux khankix, "Hu: ka Yosiep awm: pa krai nawh ka pex heue:." 56 Sibhawm: praix lih koe: ka piang haktiex khawm: uik, Yosiep paoh nyiex krao: khankix, mai: coh cai: nghox ka pui Ejiptux, mai: sibhawm: praix, nied tix nie kin: daux haktiex Ejiptux heue:. 57 Kheu kied kin: sibhawm: praix ka meung tang: dah khankix, pui haktiex khankix hoek tix siai: liag nghox ka Yosiep ka haktiex Ejiptux heue:.
Simin Ting 42
Puxaik Yosiep Khankix Hu: Ka Meung Ejiptux
1 Yam mhong: Yakop koe: nghox daux Ejiptux, Yakop ah nin: ka can kawn: simex tix, "Yuh ka mawx pex lai jhak ka paox tix, tix kaux lai tix kaux?" 2 Mawh kheu nan:, "Aux hoik mhong: koe: nghox daux meung Ejiptux tete heue:. Hu: ka dee an, mai: siai: liag tix viex son ex tan:, son sang im: ju ex mai: ang yaox tix yum kah heue:." 3 Puxke: Yosiep kao: kaux hu: meung Ejiptux son sang siai: liag nghox heue:. 4 Yakop ang kieh Binyamin pux Yosiep hu: mai: puxke: nawh khankix, kheu lhat nawh ceu pa kharhawm: hoek ka piang nawh heue:. 5 Kawn: simex Isarilax khankix, hu: siai: liag nghox tau mai: pui hoek siai: liag nghox, mawh kheu sibhawm: praix hoik lih ka daux haktiex Khanan heue:. 6 Yosiep mawh cao: kwang: ka haktiex; mai: nawh mawh cao: coh nghox ka pui haktiex. Puxke: Yosiep khankix hoek, mai: gup ngai: tix piang tiex sivoe ngai: nawh heue:. 7 Yosiep yaox ka puxaik tix khankix, mai: tawng ka kix, viang mawh nan: nawh yuh tix ang tawng, mai: briah ka kix ah nin:, "Kaoh pex khaing: dee mawx?" mai: kix ah nin:, "Yix kaoh khaing: haktiex Khanan, son sang siai: liag pa ih pa un:."\v 8 Viang Yosiep tawng ka puxke: nawh khankix kawx, kix ang lai tawng ka nawh heue:. 9 Yosiep doh keud ka camaox tix, pa hoik camaox nawh grawng: kix, mai: ah nin: ka kix, "Pex mawh pui hoek tix jiang ka ceu pa iak riang yix, daux haktiex in heue:." 10 Kix ah nin: ka nawh, "Simiang eue:, ang doh mawh nan:, yix mawh kawncau maix pa hoek siai: liag pa ih pa un: khaing:." 11 "Yix mawh kawn: keeing: tix kaux khaing:, yix mawh pui rah see, kawncau maix in kix, ang lai mawh pui jiang." 12 Nawh ah nin: ka kix, "Ang mawh, pex hoek tix jhak ceu pa iak riang daux haktiex in." 13 Mai: kix ah nin:, "Kawncau maix, koe: puxaik kao: ra: kaux, mai: mawh kawn: keeing: tix kaux khaing: daux haktiex Khanan; pux ghoik ot mai: keeing: yix tom: yam in, mai: an tix kaux ang lai koe: heue:." 14 Yosiep baox ah nin: ka kix, "Hoik mawh awm: pa ah aux ka pex, pex mawh pui jiang. 15 "Tak yaox tix cheuk cheu: ka pex, phan: pex ang viex pux ghoik tix hoek, awm: im: ju Pharaw, pex tak ang lai yaox tix lih khaing: tin: heue:." 16 "Ploi: pui tix kaux daux pex ing:, mai: kieh viex pux pex hoek, pex pa kawn: deuk, tak sau: daux thawng:, awm: im: ju Pharaw, lox krai pex, mawh ang mawh, tak cheuk tix yaox kah, pex rug mawh pui jiang heue:." 17 Mai: nawh sau: kix daux thawng: loe: singaix heue:. 18 Khaix hoik naog loe: singaix, Yosiep ah nin: ka kix, "Yuh awm: in son sang im: ju pex, kheu mawh aux pui lhat graung ka Siyiex; 19 "Phan: pex mawh pui rah see, kieh puxaik daux pex tix kaux kaux ot daux thawng:, kieh pui deuk khankix viex nghox ing: ka nyiex pex, dee sibhawm: praix, 20 Mai: viex pux ghoik pex hoek ka aux, son sang tawng ex rug mawh lox pex pa mawh pa meh, mai: pex tak ang yaox tix yum, mai: kix yuh awm: an heue:. 21 Khaix an kix ah nin: ka paox tix, "Ex hoik phit ka pux tix tete, grawh grawng: nawh, ex hoik yaox krax kha: nawh rhawm: tix, mai: yam khyox khaw: nawh ka ex, ex ang nghiet; mawh kheu nan:, krax pa kharhawm: in hoik hoek ka piang ex phao: heue:." 22 Rubin deeh ah nin: ka kix, "Aux hoik krai ka pex paw yuh phimap pa phit ka kawn: nyawm in, ang mawh lie? mai: pex ang nghiet ka aux, mawh kheu nan:, krax ciyang son nham: nawh hoik hoek piang ex phao: heue:. 23 Kix ang tawng, Yosiep hoik tawng ka pa krai tix, mawh kheu sikah Yosiep mai: kix, ka pui pa toe: lox heue:. 24 Nawh veeh hu: khaing: kix tivud mai: yiem, mai: nawh deeh hoek sikah mai: kix, mai: nawh teei Simion khaing: kix, mai: phyawk nawh sivoe ngai: kix heue:.
Grawng: Deeh Ing: Puxaik Yosiep Meung Khanan
25 Mai: Yosiep tawx lox mai: kieh kix sau: nghox naog daux chee:, mai: deeh sau: mau cie mawx cie an, daux chee: kix, mai: kieh tawx pa ih pa un: kix son daux krax, mai: kix yuh awm: an heue:. 26 Khaix an kix tang: nghox ka piang la, mai: lih hu: heue:. 27 Mai: ka daux kix tix kaux, paoh chee: cie tix, son sang tawx la sawm:, dee bang: kix, nawh deeh yaox mau cao: tix, ka daux moing chee:; 28 mai: nawh ah nin: ka puxaik tix khankix, jhak pex yaox mau aux hoik deeh sau: tix daux moing chee: aux!" Mai: kix siyaoh lhat graung kah, kix ah nin: ka paox tix, tix kaux lai tix kaux, "Pa yuh Siyiex ka piang ex in, mawh pa yuh ka mawx lie?" 29 yam bleeh kix ka keeing: tix Yakop, daux haktiex Khanan, kix krai nawh mhong: grawng: pa hoik lih mawh ka kix ah nin:, 30 "Pui pa mawh simiang daux haktiex an, briah ka yix, mai: ah yix mawh pui hoek jiang ka haktiex. 31 "Mai: yix ah nin: ka nawh, 'Yix mawh pui rah see, yix ang lai mawh pui jiang; 32 "Yix mawh puxaik kao: ra: kaux, pa mawh keeing: tix kaux khaing:, an tix kaux ang lai koe:, mai: pux ghoik yix ot mai: keeing: yix, tom: yam in daux haktiex Khanan heue:.' 33 Kaw an pa mawh simiang ka haktiex an, ah nin: ka yix, "Son sang tawng aux mawh pex pui rah see, prah pui tix kaux, daux puxaik pex ka aux, mai: teei pa ih pa un: son nyiex ma: pex pa yaox ka sibhawm: praix mai: lih hu: heue:. 34 "Viex pux ghoik pex hoek ka aux, son sang tawng aux ang pex mawh pui jiang mai: tawng pex mawh pui rah see, aux tak deeh ap ka puxaik pex, mai: pex tak yaox tix yuh lai geu daux haktiex in heue:.'" 35 Yam thawk kix chee: tix, kix daox deng: ka deeh yaox ka gie mau cie mawx cie an daux chee: tix; yam yaox kix mai: keeing: kix gie mau an, kix yaoh kah heue:. 36 Mai: keeing: kix Yakop ah nin: ka kix, "Pex hoik rhim: tix teei kawn: aux khankix khaing: aux; Yosiep kawx ang lai koe:, mai: Simion kawx ang lai koe:, yam in pex kawn: sang deeh viex Binyamin; ceu in hoik mawh pa tug ka aux heue:." 37 Khaix an Rubin deeh krai ah nin: ka keeing: tix, phan: aux ang lai deeh viex Binyamin hoek ka maix; pah ka kawn: simex aux khawm: ra: kaux, ap nawh daux taix aux, mai: aux tak deeh viex nawh hoek ka maix heue:. 38 Yakop ah nin:, "Ang aux doh tawx kawn: simex tix hu: tau mai: pex, kheu: hoik yum puxke: nawh, mai: kawn: deuk nawh nong: nong:. Phan: pa caox lih tix mawh ka nawh, daux krax hu: pex, pex tak viex hauk kaing: paing aux laig daux simeeig tau mai: krax lauxrhawm: heue:."
Simin Ting 43
Grawng: Deeh Ing: Kix ka Ejiptux Tau Mai: Binyamin
1 Sibhawm: praix, kied nie kin: daux haktiex Khanan heue:. 2 Mai: khaix hoik uik ih kix nghox pa viex tix khaing: Ejiptux, keeing: kix ah nin: ka kix, "Deeh hu: siai: mai: liag priex son ex ceeix heue:." 3 Yam an Yudax ah nin: ka nawh, "Pui an hoik tawx satix mai: hoik ah lox kin: ka yix yuh nin:, phan: pex ang viex pux tix hoek, pex tak ang pon tix yaox ka ngai: aux heue:." 4 Phan: maix ploi: pux yix hu: mai: yix, yix tak hu: siai: mai: liag pa ih pa un:; 5 "Viang mawh nan: phan: maix ang ploi: nawh hu:, yix tak ang lai hu:, mawh kheu hoik ah pui an ka yix yuh nin:, 'Phan: pex ang viex pux tix hoek, pex tak ang pon tix yaox ngai: aux heue:.'" 6 Mai: Isarilax ah nin:, "Mawh kheu tix pex lai krai pui an mhong: ka kawn: koe: pux tix, mai: yuh krax kharhawm: ka aux yuh ka mawx?" 7 Kix ah nin:, "Pui an, chawk grawng: yix mai: grawng: doeh simie ceucat yix kriiem kre, nawh ah nin:, 'Kawn: im: ju keeing: pex lie? koe: pux tang: kaux pex lie?" Mai: yix deeh krai nawh mhong: awm: pa chawk nawh, mawx sang tawng ah nawh, "Viex pux pex hoek yuh ka mawx?" 8 Mai: Yudax ah nin: ka keeing: tix Isarilax, "Ploi: kawn: nyawm tau mai: yix, mai: yix sang yaog tix hu:, son sang im: ju ex mai: ang yum, ex ku kaux khawm: maix mai: kawn: nyawm iak khankix heue:. 9 "Aux lawk mawh cao: kham: nawh, maix tak deeh mhaing: nawh khaing: daux taix aux, phan: aux ang pon viex nawh hoek mai: deuh sivoe ngai: maix, kieh aux klawm: phimap an leeing: ju heue:." 10 "Phan: yix ang rheung: yuh nin: yam in, yix tee: hoik hoek ra: bawg heue:." 11 Keeing: kix Isarilax ah nin: ka kix, "Phan: mawh nan:, yuh nin:, teei pex viex plix khaox pa mhawm: khaing: daux haktiex in daux bau: pex, mai: tawx khawng: phak ka pui an, viex sidah peeh khaox ceeix, rawm: hia: ceeix, nyawng bhawng:, mai: sidah muran, plix khaox pa awm: sok kram jung mai: plix khaox pa awm: sok ceem tiex heue:. 12 Teei pex viex mau ra: son daux taix tix, mai: mau pa yaox pex ka daux moing chee: kawx deeh viex hu:; bawg blah ha: mawh kix pa pi nieh. 13 "Viex pux pex mai: deeh kaoh hu: ka pui an, phan: aux yaox tix som kawn: tix aux tak lai kham: kah heue:. 14 Kieh Siyiex pa ting siawp sibrawm tawx krax caoxrhawm: ka pex sivoe pui an, son sang deeh ploi: nawh puxke: pex mai: Binyamin heue:." 15 Mawh kheu nan: kix teei khawng: phak mai: mau ra: son daux taix tix, khawm: Binyamin lih hu: ka meung Ejiptux, mai: cung sivoe Yosiep heue:. 16 Yam yaox Yosiep ka Binyamin tau mai: kix, nawh ah nin: ka pui cau tix daux nyiex, "Viex pui in kix laig ka daux nyiex, mai: pah khawng: brie yuh priex preem, mawh kheu pui in kix, sang ih priex ngaix tau mai: aux heue:." 17 Pui an kix yuh awm: pa krai Yosiep, mai: viex kix hu: nyiex Yosiep heue:. 18 Kix kied koe: krax lhat graung, mawh kheu kok nawh kix hoek ka nyiex Yosiep, mai: ah nin:, "In tee: mawh grawng: mau, pa deeh viex ex ing: daux chee: tix bawg voe nhaox, kix tom: kok ex hoek tin:, son sang sawg krax phit ex, mai: plee ka piang ex, mai: sang khrawt la viex ex mai: kieh ex mawh siliex tix heue:." 19 Yam an kix greed tix dex pui cau nyiex Yosiep, kix sikah tau mai: nawh hawt diang siviex, 20 mai: kix ah nin:, "Cao: simiang eue:, bawg sivoe nhaox yix hoek tix siai: liag priex tete; 21 yam hoek yix ka dee bang: tix, yix paoh chee: tix, mai: yaox ka mau, cie pui mawx cie pui an, daux moing chee:, mau yix khankix kawn: grum uik; mawh kheu nan:, yix tom: deeh viex mau in hoek heue:. 22 "Mai: yix baox viex mau tang: dah, daux taix tix, son sang siai: liag pa ih pa un:. Yix ang lai tawng ka pui pa sau: mau yix, daux chee: yix heue:." 23 pui cau an deeh ah nin:, "kieh pa nhim: koe: mai: pex, paw lhat paw graung, Siyiex pex mai: Siyiex keeing: pex, sau: mau daux chee: pex; aux hoik pon mau pex." Khaix an nawh ap Simion ka kix heue:. 24 Khaix an, kawncau an, viex kix laig daux nyiex Yosiep, mai: tawx rawm: kieh kix khoek caong tix, mai: nawh tawx la kix sawm:, 25 kix viex khawng: phak hoek son Yosiep yam ponngaix, mawh kheu mhong: kix sang ih tix priex ngaix tau mai: nawh heue:. 26 Yam hoek Yosiep ka nyiex, kix ap khawng: phak pa viex kix daux taix tix ka Yosiep mai: gup tix piang tiex sivoe nawh heue:. 27 Yosiep singeuh taix kix mai: ah nin:, nyawm ot pex lie? mai: "Keeing: pex tax kuad pa ah pex kawx nyawm ot lie? kawn: im: ju nawh lie?" 28 Kix ah nin:, "Yix pa mawh kawncau maix, keeing: yix nyawm ot, nawh kawn: im: ju;" Kix gup ngai: tix mai: krub ka nawh heue:. 29 Nawh yaog tix jhak mai: yaox pux tix Binyamin pa mawh kawn: simex miex nawh, mai: ah nin:, "In mawh pux ghoik pa hoik krai pex ka aux lie?" Nawh ah nin:, "Kawn: simex aux eue:, kieh Siyiex nawb bwan: ka piang maix." 30 Nawh kied koe: krax caoxrhawm: yam yaox ka pux tix, mawh kheu nan:, Yosiep yaog tix kaoh sijaox, mai: sawg dee sang yiem tix, nawh laig daux lawg it tix mai: yiem heue:. 31 Khaix an nawh khoek ngai: tix mai: lih ka praix, gun rhawm: tix mai: ah nin:, "Khan: priex heue:." 32 Kix khan: dah dee son Yosiep tix dah, son puxaik nawh tix dah, mai: son pui Ejiptux pa sawm: tau mai: nawh tix dah, mawh kheu pui Ejiptux ang sax ih priex tau mai: pui Hebrie, kheu mawh pa khreeing: pui Ejiptux kah heue:. 33 Mai: kix ngawm sivoe ngai: nawh, jah ka kawn: Ai: tom: hoek ka kawn: ghoik, pa ting pa iak awm: hoik koe: been kix, kix ra: lai jhak pak ngai: paox tix, ka daux pa daox pa am: heue:. 34 Khaix an Yosiep teei pa khan: kheu: kix sivoe nawh, mai: tawx nawh ka kix, viang mawh nan:, pa khan: kheu: nawh son Binyamin hoik nie khaing: kix phwan: son, mai: kix ih nyau tau mai: nawh ka daux pa gauxrhawm: heue:.
Simin Ting 44
Grawng: Kawk Nyaux Yosiep
1 Nawh tawx lox ka pui tix daux nyiex mai: ah nin:, "Sau: pa ih pa un: ka chee: pui in kix, tom: pon viex kix ing:, mai: deeh sau: mau cie pui mawx cie pui an, daux moing chee: kix heue:. 2 "Sau: kawk mau pa nyaux aux, daux moing chee: kawn: ghoik an, mai: mau ngaw nghox nawh awawx." Mai: kawncau nawh yuh awm: lox pa krai Yosiep heue:. 3 Yam bah riang praix plak ponngawb, kawncau nawh ploi: kix ing: tau mai: la kix heue:. 4 Yam ang kix nyang luan singai veng, Yosiep ah nin: ka kawncau tix, "Kaoh heue:, nied hawt ka pui an kix, mai: yam krup maix kix, maix ah nin: ka kix, 'Pex lai deeh tawx pa caox ka pa mhawm: yuh ka mawx lie? Yuh ka mawx pex lai briex kawk nyaux aux? 5 "In mawh kawk nyaux cao: simiang aux, pa priex nawh son sang koe: pingnya tix ang mawh lie? pa yuh pex ang lai mawh pa mhawm: heue:.'" 6 Yam krup kawncau an ka kix, nawh krai kix mhong: awm: lox in heue:. 7 Kix ah nin: ka nawh, "Yuh ka mawh cao: simiang aux lai ah lox yuh nin:? kieh ceu in singai khaing: yix pa mawh kawncau maix khankix, yix ang doh yuh ceu in. 8 Jhak heue:, yix deeh viex, mau pa yaox yix daux moing chee: tix, khaing: haktiex Khanan ka maix; yix kawn: sang deeh briex mau nyiex cao: simiang maix yuh ka mawx?" 9 "Yaox maix an ka mawx ang ah, kieh nawh yum, mai: yix kawx tak mawh siliex cao: simiang maix heue:." 10 Nawh ah nin:, "Kieh mawh awm: lox pa ah pex; phan: aux yaox ka pui mawx, kieh mawh siliex aux, pex pa deuk tak ang koe: phimap kah heue:." 11 Khaix an kix nied tah chee: tix piang tiex, mai: tang: paoh ka chee: tix ku kaux heue:. 12 Mai: nawh khrieh kraung kix, jah ka pui pa ting tom: hoek ka pa iak, mai: yaox kawk nyaux daux chee: Binyamin heue:. 13 Khaix an kix riah kraung ceep tix, mai: deeh sau: lhang: la tix ku kaux, mai: deeh ing: daux veng heue:. 14 Yam hoek Yudax mai: puxaik nawh khankix, ka nyiex Yosiep, nawh kawn: ot tan:, mai: kix gup tix piang tiex sivoe nawh heue:. 15 Yosiep ah nin: ka kix, "Yuh ka mawx pex lai yuh nin:? ang pex tawng mawh aux simex pa koe: pingnya tixkaux lie?" 16 Yudax ah nin:, "Ex sang khaw: tix ah yuh ka mawx ka cao: simiang aux lie? Ex sang krai yuh ka mawx? Phan: ang mawh nan:, ex tak sang luat luan khaing: yuh ka mawx? Siyiex hoik yaox krax phit kawncau maix khankix; jhak heue:, yix kham: tix mawh siliex cao: simiang aux, pui pa hoik yaox pex kawk nyaux mai: nawh heue:." 17 Yosiep ah nin:, "Son sang yuh aux an, kieh ceu in singai khaing: aux,mawh ngie pui pa hoik yaox ex kawk daux taix nawh, tak mawh siliex aux, phan: mawh pex, deeh ing: ka keeing: pex, daux pa nhim: heue:."
Yudax Khyox Khaw: Son Binyamin
18 Khaix an Yudax hoek dex nawh mai: ah nin:, "Cao: simiang aux eue:, kieh kawncau maix krai cao: simiang, mhong: lox tix gum liak, paw nyang kieh krax songrhawm: maix lih ka piang kawncau maix ha:, mawh kheu hoik awm: maix Pharaw heue:." 19 "Cao: simiang aux hoik chawk ka kawncau tix khankix mai: ah nin:, "Koe: keeing: pex lie? Phan: ang mawh nan:, koe: pux pex lie?" 20 Mai: yix deeh ah nin:, 'Yix koe: keeing: pa hoik kuad, mai: pux ghoik pa iak tix kaux, pa pon nawh yam riex ju tix, puxke: nawh hoik yum, pa keh khaig: miex nawh, mawh ngai: nawh pa deuk khaing:, keeing: nawh kied moh ka nawh heue:. 21 Khaix an maix deeh ah nin: ka yix kawncau tix, "Viex nawh hoek ka aux, son sang yaox aux ka ngai: tix heue:.' 22 Yam an yix ah nin: ka cao: simiang tix, "Kawn: nyawm an ang doh pon gwieh khaing: keeing: nawh, phan: nawh gwieh hu: khaing: keeing: tix, keeing: nawh tak yum heue:." 23 Khaix an maix ah nin: ka kawncau tix, 'Phan: pex ang viex pux ghoik tix hoek tau mai: pex, pex tak ang lai pon tix yaox ka pakngai: aux heue:.' 24 "Yam deeh ing: yix ka keeing: tix, pa mawh kawncau maix, yix krai nawh mhong: gumlox maix cao: simiang heue:." 25 "Mai: yam ah keeing: yix nin:, 'Deeh hu: siai: liag pa ih pa un: son ex ceeix heue:.' 26 Yix deeh ah nin:, "Yix ang pon hu:; phan: pux ghoik ang hu: tau mai: yix, phan: pux ghoik hu: tau, yix tom: pon hu:, mawh kheu phan: yix ang viex pux ghoik tix hu:, yix tak ang lai pon tix yaox pakngai: pui an heue:.' 27 Khaix an keeing: yix pa mawh kawncau maix ah nin: ka yix, 'pex hoik tawng keh moeng aux kawn: simex son aux ra: kaux; 28 "Tix kaux hoik hu: khaing: aux, mai: aux hoik krai pex mhong; tee: hoik phawng: nex nawh tete, jah tom: yam an aux ang lai yaox nawh. 29 "Phan: pex baox viex in tix kaux khaing: aux mai: kieh pa caox hoek ka piang nawh, pex tak viex hauk kaing: paing aux laig daux simeeig tau mai: krax lauxrhawm: heue:." 30 "Mawh kheu nan:, yam deeh hoek aux ka keeing: tix pa mawh kawncau maix, phan: kawn: nyawm in ang hoek tau mai: yix, mawh kheu rhawmrhi: nawh kied koe: ka daux ju kawn: nyawm an heue:. 31 "Yam yaox nawh ang kawn: nyawm an koe: tau mai: yix, nawh tee: yum, mai: yix kawncau maix tak yaox tix viex, hauk kaing: paing keeing: yix pa mawh kawncau maix hu: ka daux simeeig tau mai: krax lauxrhawm: nawh heue:. 32 Mawh kheu aux kawncau maix mawh cao: pa kham: son kawn: nyawm in, ka keeing: aux, ah nin:, 'Phan: aux ang viex nawh hoek ka maix, aux tak yaox tix klawm: phimap sivoe keeing: tix leeing: ju heue:.' 33 "Mawh kheu nan: kieh aux kawncau maix ot tang: kawn: nyawm an, mai: yuh siliex maix cao: simiang, mai: kieh kawn: nyawm an deeh ing: tau mai: puxke: nawh khankix liak?" 34 Phan: kawn: nyawm an, ang hoek mai: aux, aux sang chix ing: ka keeing: tix yuh ka mawx? Aux lhat tix yaox hoek ceu pa caox ka piang keeing: tix heue:."
Simin Ting 45
Yosiep Deeh Jhi: Tix Ka Puxaik Nawh
1 Khaix an Yosiep ang lai pon gun pon gut rhawm: tix, sivoe pui pa cung hawt nawh khankix, mai: nawh kok yo ka kix, "Kieh kix ku kaux lih hu: khaing: tix heue:." Mawh kheu nan: pui tang: kaux ang lai ot mai: nawh tix kaux kawx, yam jhi: Yosiep puxaik tix tawng ka tokaux tix heue:. 2 Mai: nawh yiem riag, tom: hoik mhong: pui Ejiptux, khawm: can pui pa ot nyiex haw: Pharaw heue:. 3 Yosiep ah nin: ka puxaik tix khankix, "Aux mawh Yosiep; kawn: im: ju keeing: aux lie?" Viang mawh nan:, puxaik nawh khankix ang pon pawk lox nawh, mawh kheu kix hoik daox aw: sivoe ngai: nawh heue:. 4 Mai: Yosiep ah nin: ka puxaik tix khankix, "Hoek dex aux," mai: kix kawx hoek dex nawh. Mai: nawh ah nin:, "Aux mawh pux pex Yosiep, pa hoik coh pex daux meung Ejiptux heue:. 5 "Yam in paw pex lauxrhawm:, mai: paw songrhawm: ka cao: tix, kheu hoik coh pex aux tin:, kheu hoik mawh Siyiex pa ploi: aux hu: sivoe pex, son sang taoh ka ju pui heue:. 6 "Mawh kheu sibhawm: praix, tak hoik ra: num, khaix in kawn: deuk phwan: num pa ang pui nyang pon thai: kaung: mai: vawg nghox heue:. 7 "Mai: Siyiex hoik ploi: aux hu: sivoe pex, son sang deuk pex, piang haktiex mai: son sang taoh aux ju pex khawm: uik, ka daux pa pluat ploi:, pa ting pa lhaong: heue:. 8 "Mawh kheu nan ang lai mawh pex pa ploi: aux hoek tin:, viang mawh nan:, mawh Siyiex; mai: Nawh Cao: kieh aux mawh keeing: ka Pharaw, mai: mawh cao: ka daux nyiex haw:, mai: kwang: ka piang haktiex Ejiptux khawm: uik heue:. 9 "Nied kaoh mai: hu: ka keeing: aux, mai: krai nawh mhong: grawng: pa krai kawn: simex nawh Yosiep, 'Yam in Siyiex hoik kieh aux mawh simiang daux haktiex Ejiptux khawm: uik; hoek ka aux mai: paw lai tuh rhawm: ka tid tix." 10 "Pex tak yaox tix ot ka haktiex Goshen, dex tau mai: aux, viex kawn: praix pex, kawn: saux kawn: sex pex, mai: yung:, khawng: brie, mai: can pa koe: pex khawm: uik heue:. 11 "Aux tak kia: ngien mai: eei: ka pex, phan: ang mawh nan: pex mai: kawn: praix pex, mai: can pa koe: pex khawm: uik, tak hoek krax kharhawm: ka sibhawm: praix, mawh kheu sibhawm: praix kawn: koe: phwan: num heue:.' 12 "Jhak heue:, ngai: pex, mai: ngai: pux aux Binyamin, hoik yaox ka mawh lox sikah aux, khaing: jheeh tix ka pex heue:. 13 Pex krai keeing: aux mhong: grawng: koe: min: aux mai: krax ot krax koe: aux daux meung Ejiptux, awm: pa hoik yaox pex. Nied pex viex keeing: aux hoek tin: heue:." 14 Khaix an nawh kawm ngawg pux tix Binyamin mai: yiem, mai: Binyamin kawx kawm ngawg nawh mai: yiem heue:. 15 Nawh ngheet ka puxke: tix ku kaux mai: yiem piang kix, khaix an puxke: nawh khankix sikah mai: nawh heue:. 16 Yam mhong: pui pa ot daux nyiex haw: Pharaw khankix grawng: "Hoek puxke: Yosiep," Pharaw mai: kawncau nawh khankix gauxrhawm: kah heue:. 17 Mai: Pharaw ah nin: ka Yosiep, "Krai ka puxke: maix khankix mai: yuh nin:, 'Tang: kraung pex piang la mai: deeh ing: ka haktiex Khanan. 18 'Viex keeing: pex mai: pui daux nyiex ma: nawh hoek ka aux, aux tak tawx haktiex pa jiet mhawm: Ejiptux ka pex mai: pex tak sang yaox tix ih ka dee koe: phon: haktiex heue:. 19 'Aux tawx sibrawm kieh maix yuh in:, Teei ling: lawx khaing meung Ejiptux khankix son kawn: nyawm mai: moeng pex; mai: deeh viex keeing: pex hoek heue:. 20 'Paw lai lhawk ka sinngao pex, mawh kheu can ceu pa nie mhawm: daux haktiex Ejiptux hoik mawh son pex heue:.'" 21 Kawn: simex Esarilax khankix, yuh awm: an, Yosiep tawx ling lawx ka kix, awm: lox pa hoik tawm: Pharaw, mai: tawx priex pa ih kix son daux krax heue:. 22 Nawh baox tawx kraung ceep pa sang loh kix tix ka ku kaux; viang mawh nan:, nawh tawx mau ka Binyamin loe: yieh shekhe mai: kraung pa sang loh nawh tix kah phwan: jung heue:. 23 Mai: nawh sipaox ceu in kix ka keeing: tix, la kao: mu: pa tang: kraung pa mhawm: khaing: Ejiptux, mai la shiang: kao: mu:, pa tang: nghox koi:, khaomun, mai: pa ih pa un:, pa sang ih keeing: nawh ka daux krax heue:. 24 Khaix an, nawh ploi: puxke: tix khankix ing:, mai: tawm: lox ka kix, son ang kix simah paox tix hawt krax heue:." 25 Mai: kix lih hu: khaing: Ejiptux mai: hoek ka haktiex Khanan ka keeing: tix Yakop heue:. 26 Mai: kix ah nin: ka nawh, "Yosiep kawn: im: ju, mai: nawh mawh cao: kwang: ka piang haktiex Ejiptux khawm: uik." Yakop daox deng: mai: ang yumrhawm: ka kix heue:. 27 Kix krai can ceu pa ah Yosiep ka nawh, mai: yam yaox nawh ka ling: lawx pa ploi: Yosiep son sang rieb tix kieh nawh brug ing:, rhawmrhi: keeing: kix Yakop deeh koe: riang rao heue:. 28 Khaix an Isarilax ah nin:, "Aux hoik vhah rhawm: kah, kheu kawn: simex aux Yosiep kawn: im: ju, aux sang hu: yaox nawh, sivoe yum tix heue:."
Simin Ting 46
Grawng: Hu: Yakop Ka Ejiptux
1 Isarilax viex kraung pa koe: tix khawm: uik mai: lih hu: krax, yam hoek nawh ka Berashibax, nawh yuh krax pa tan pa lu mai: krub ka Siyiex keeing: nawh Icak heue:. 2 Siyiex sikah tau mai: Isarilax, ka daux riang susai ponsawm:, mai: ah nin:, "Yakop, Yakop!" Mai: nawh ah nin:, "Aux ot tin:." 3 Mai: Nawh Cao: ah nin:, Aux mawh Siyiex, Siyiex keeing: maix; paw lhat paw graung, son sang hu: maix meung Ejiptux, Aux tak kieh maix mawh ceu pui pa ting pa lhaong: daux haktiex an heue:." 4 Aux tak hu: tau mai: maix ka meung Ejiptux, mai: aux tak sang baox deeh viex maix ing:, Yosiep tak yaox tix sibeet ngai: maix heue:." 5 Yakop lih hu: khaing: Berashibax, mai: kawn: simex nawh khankix, viex keeing: tix Yakop, khawm: kawn: nyawm mai: moeng kix daux ling: lawx pa hoik sipaox Pharaw son sang viex kix hoek heue:. 6 Kix teei khawng: brie eei: tix mai: kraung khrai: pa hoik pon tix daux haktiex meung Khanan, mai: hu: ka meung Ejiptux tau mai: Yakop khawm: doeh simie ceucat pa koe: mai: kix uik heue:. 7 Nawh viex kawn: simex tix, mai: kawn: saux kawn: sex nawh, mai: doeh simie ceucat nawh khawm: uik hu: tau mai: tix ka meung Ejiptux heue:. 8 In kix mawh caukaux daux simie Isarilax, pa hoek ka haktiex Ejiptux, Yakop mai: kawn: simex nawh khankix Rubin mawh kawn: Ai: heue:. 9 Kawn: simex Rubin khankix mawh Hanok, Palux, Hezaron mai: Kamix heue:. 10 Kawn: simex Simion khankix mawh Yemoelax, Ya-min, Awhat, Yakhim, Zawha, mai: Shawlax pa mawh kawn: simex khaing: bon: Khanan heue:. 11 Kawn: simex Lewix mawh Geshon, Kawhat mai: Merarix heue:. 12 Kawn: simex Yudax khankix mawh Erax, Awnan, Shelax, Pharet mai: zerax. (Viang mawh nan Erax mai: Awnan hoik yum daux haktiex Khanan), mai: kawn: simex Pharet khankix mawh Herazon mai: Hamulax heue:. 13 Kawn: simex Ishakha khankix mawh Tawlax, Puvax, Yawbax mai: Shiraron heue:. 14 Kawn: simex Zebulon khankix mawh Siriet, Elon mai: Yalelax heue:. 15 In kix khawm: uik mawh kawn: simex Leax pa keh nawh khaing: Yakop daux haktiex Padam Aram tau mai: kawn: bon: Dina,Can pui khawm: uik tau mai: kawn: 1simex kawn: bon: nawh khankix koe: tingoe: loe: kaux heue:. 16 Kawn: simex Gat khankix mawh Ziphion, Hagix, Shonix, Ezabon, Elix, Arawdix mai: Arelix heue:. 17 kawn: simex Asha khankix mawh Yimanax, Ishuah, Ishix, Beriyax mai: nan kix Sherax. Mai: kawn: simex Beriyax khankix mawh Hebax mai: Malakhe heue:. 18 In kix mawh kawn: simex Zilapax, pa mawh kawncau bon: pa tawx Laban ka kawn: bon: tix Leax, pa keh nawh son Yakop kao: liah kaux heue:. 19 Kawn: simex Rakhelax moeng Yakop, mawh Yosiep mai: Binyamin heue:. 20 Yam ot Yosiep ka haktiex Ejiptux, nawh pon kawn: tix Manashe mai: Epharim, kawn: simex in kiex, mawh pa pon nawh khaing: kawn: bon: cao: giex kaing: li Pawtix Pherax, pui veng Awnax pa kaux Ashanat heue:. 21 Kawn: simex Binyamin khankix mawh Belax, Bekhax, Ashabelax, Garax, Neman, Ehix, Rawshax, Muppim, Huppim mai: Aradax heue:. 22 In kix mawh kawn: simex Rakhelax, pa keh nawh son Yakop, kao: pon: kaux heue:. 23 Kawn: simex Dan mawh Hushen; 24 Kawn: simex Napthalix khankix mawh, Yazelax, Gunix, Yezax mai: Shilen heue:. 25 In kix mawh kawn: simex Bilaha pa mawh kawncau bon: pa tawx Laban ka kawn: bon: tix Rakhelax pa keh nawh son Yakop aliah kaux heue:. 26 Can pui pa hu: mai: Yakop ka meung Ejiptux pa kaoh khaing: nawh, ang nyang sawn: ka mun nawh, koe: tigliah liah kaux heue:. 27 Mai: kawn: simex Yosiep, pa keh ka daux Meung Ejiptux koe: ra: kaux; Can pui pa kaoh khaing: daux nyiex ma: Yakop, pa hu: ka meung Ejiptux khawm: uik koe: atigliah kaux heue:.
Yakop Ot Daux Haktiex Goshen
28 Nawh ploi: Yudax hu: sivoe tix ka Yosiep, son sang jhi: kix yaox daux krax Goshen, mai: kix hoek ka haktiex Goshen heue:. 29 Yosiep khre: ling: lawx nawh mai: hu: ka Goshen son sang rieb ka keeing: tix Isarilax, yam hoik hoek sivoe keeing: tix, nawh kawm ngawg keeing: tix, mai: yiem rheung: nyao heue:. 30 Mai: Isarilax ah nin: ka Yosiep, "Yam in kieh aux yum, aux hoik yaox ka ngai: baoh maix, mawh kheu kawn: im: ju maix heue:." 31 Yosiep ah nin: ka puxke: tix khankix, mai: can pui daux nyiex ma: keeing: nawh khanix, "Aux sang hu: ka Pharaw mai: krai ka nawh, 'Puxke: aux khankix mai: can pui pa ot daux nyiex keeing: aux pa kaoh khaing: daux haktiex Khanan hoik hoek ka aux heue:. 32 'Mai: pui in kix mawh cao: liang yung:, mai: kix yuh kaing pa eei: khawng: brie, kix hoik viex yung:, pex, mai: khawng: brie tix, mai: can pa koe: tix heue:.' 33 "Yam kok Pharaw tix chawk ka pex mai: ah nin:, 'Yuh pex kaing: jhaw: pa tix?' 34 "Pex tak ah nin:, 'Kaing jhaw: pa yuh kawncau maix khankix dawg mawh cao: liang khawng: brie, jah yam iak tix tom: hoek in singaix, khawm: yix mai: keeing: yix,' phan: pex krai yuh nan: pex tak yaox tix ot Goshen; mawh kheu cao: liang yung: ku kaux mawh pa seeing: pa brai: ka son pui Ejiptux heue:.
Simin Ting 47
1 Khaix an Yosiep ing: krai ka Pharaw ah nin:, "Keeing: aux mai: puxke: aux khankix, khawm: yung:, pex, mai: khawng: brie, mai: kraung khrai: kix khawm: uik, hoik hoek khaing meung Khanan; mai: kix ot ka daux haktiex Goshen heue:." 2 Mai: nawh teei pui phwan: kaux khaing: sinax puxke: nawh khankix, mai: viex kix hoek ka Pharaw heue:. 3 Pharaw ah nin: ka puxke: nawh khankix, "Yuh pex kaing jhaw: pa tix?" mai: kix ah nin: ka Pharaw," kawncau maix khankix, mawh cao: liang yung:, awm: tax yiex miex keeing: tix heue:." 4 kix ah nin: ka Pharaw, "Yix hoik hoek son sang paung tix daux haktiex in, mawh kheu: kied kin: sibhawm: praix ka daux meung Khanan, ang lai koe: dee ih dee liang son khawng: brie yix, mawh kheu nan: yuh bwanson:, kieh kawncau maix khankix ot ka daux haktiex Goshen liak." 5 Khaix an Pharaw ah nin: ka Yosiep, "Keeing: maix mai: puxke: maix khankix hoik hoek ka maix. 6 Haktiex Ejiptux koe: sivoe maix, kieh keeing: maix mai: puxke: maix khankix, ot dee mhawm: ka daux haktiex Goshen; mai: phan: maix tawng pui pa cheung: ka daux kix tix kaux kaux, yaog kix mawh cao: giex kaing: liang khawng: brie aux heue:." 7 Yosiep viex keeing: tix Yakop hoek sivoe Pharaw, mai: Yakop nawb bwan: ka piang Pharaw heue:. 8 Pharaw ah nin: ka Yakop, "Hoik koe: ju maix miex ding?" 9 Mai: Yakop ah nin: ka Pharaw, "Num singaix mawh aux nyo sinie hoik koe: tix yieh tingoe: num, num pa yaox aux krax mhawm: mawh ceeix khaing:, mai: num pa yaox aux krax pa caox hoik kied nie, ang nyang krup ka baux ju keeing: aux khankix, yam mawh kix nyo sinie heue:." 10 Mai: Yakop nawb bwan: ka Pharaw, mai: lih hu: khaing: sivoe Pharaw heue:. 11 Mai: Yosiep tawx keeing: nawh mai: puxke: tix khankix, ot dee mhawm: haktiex meung Ejiptux, pa mawh haktiex dex ka veng Ramase, mai: tawx kix cie haktiex an, awm: lox pa hoik tawm: Pharaw heue:. 12 Yosiep tawx pa ih pa un: ka keeing: nawh, puxke: nawh mai: can pui pa ot daux nyiex ma: keeing: nawh, awm: diag koe: kix daux nyiex ma: tix heue:.
Kaing Yuh Yosiep Tau Mai: Krax Hot Sibhawm: Praix
13 Pa ih pa un: ang lai koe: daux haktiex ku dah ku dee, sipiag kied kin: sibhawm: praix, mawh kheu nan:, haktiex Ejiptux mai: haktiex Khanan khankix hoik dieh riang jao sibhawm: praix heue:. 14 Mai: Yosiep khrawm: mau pa pon coh tix nghox khaing: daux haktiex Ejiptux, mai: haktiex Khanan khawm: uik, mai: Yosiep viex mau an hoek ka nyiex haw: Pharaw heue:. 15 Yam hoik uik cai: pui haktiex Ejiptux mai: pui haktiex Khanan mau can pa koe: tix khawm: uik, pui Ejiptux hoek ka Yosiep mai: ah nin:, "Tawx pa ih pa un: ka yix liak, yuh ka mawx yix lai sang yum ka plak sivoe ngai: maix? mawh kheu hoik uik cai: yix mau tix heue:." 16 Yosiep ah nin:, phan: mau pex hoik uik, "Viex tix tawx khawng: brie pex ka aux, mai: aux tak sang tawx pa ih pa un: son pex heue:." 17 Mawh kheu nan: kix viex khawng: brie tix hoek ka Yosiep, mai: Yosiep deeh loh kix ih nghox ka brung, yung:, mai: pex, mai: la khankix; nawh loh kix ih priex preem ka khawng: brie cie kix daux num an heue:. 18 Khaix hoik sidah num an, kix deeh hoek ka nawh num khaix mai: ah nin: ka nawh, "Yix ang lai mox tid tix grawng: uik mau tix sivoe maix cao: simiang, khawng: brie yix khankix kawx, hoik mawh cie maix, yix ang lai koe: tix ceu kawx, plak sivoe ngai: maix, lheu: khaing: tokaux yix mai: haktiex yix heue:. 19 "Yuh ka mawx yix lai sang yaox tix yum ka sivoe ngai: maix, khawm: yix mai: haktiex tix yuh ka mawx? liag ka yix mai: haktiex cie yix, ka son pa ih pa un:, yix mai: haktiex yix tak yuh siliex Pharaw, mai: ang yum, mai: son ang haktiex lai riem, tawx simie nghox ka yix heue:." 20 Yosiep liag haktiex Ejiptux khawm: uik son Pharaw; mawh kheu pui Ejiptux khankix hoik coh kaung: tix, jao kied sibhawm: praix ka kix. Haktiex khawm: uik hoik mawh cie Pharaw heue:. 21 Mai: nawh gah pui haktiex hoek ot ka daux veng, jah khaing: taoh mee: haktiex Ejiptux, tom: hoek ka caw mee: haktiex heue:. 22 Mawh ngie haktiex cao: giex kaing: li khankix pa ang nawh lai liag, mawh kheu Pharaw hoik tawx pa ih pa un: ka cao: giex kaing: li khankix, mai: kix hoik pon pa ih pa un: khaing: Pharaw, kix tom: ang lai yaox tix coh haktiex tix khankix heue:. 23 Khaix an Yosiep ah nin: ka pui khankix, "Aux hoik liag pex, mai: haktiex pex daux in singaix son Pharaw, Jhak heue:, teei simie son pex mai: rhuat ka haktiex heue:." 24 "Yam hoik vawg pex nghox sax, pex tak yaox tix tawx ka Pharaw phwan: son tix son, pon: son tak mawh cie pex mai: son simie kaung:, mai: son priex ih pex daux nyiex daux ma:, mai: priex ih son kawn: praix pex khankix heue:." 25 Mai: kix ah nin:, "Maix hoik taoh ka ju yix; kieh yix mawh pa pon bwanson: ka sivoe maix cao: simiang ex liak, mai: yix tak mawh kawncau Pharaw heue:." 26 Mai: Yosiep yuh been pa dex pa dawd mai: meung Ejiptux, pa kaux cong: tom: in singaix, lheu: khaing: haktiex cie cao: giex kaing: li nong: nong:, pa ang mawh cie Pharaw, Pharaw tak yaox tix pon phwan: son tix son heue:.
Lox Sijax Mukheu Yosiep Ka Yakop
27 Pui Isarilax ot ka daux haktiex Ejiptux, baoh Goshen, mai: kix nie baox koe: kraung khrai:, mai: nied tix baox haoh hun: sipie heue:. 28 Yakop ot ka daux haktiex Ejiptux kao: aliah num; mai: nawh koe: ju tix yieh tipon: aliah num heue:. 29 Yam hoek bawg yam dex sang yum Isarilax, nawh kok ka kawn: simex tix Yosiep mai: ah nin: ka nawh, "Yam in phan: aux hoik mawh pa pon bwanson: ka sivoe ngai: maix, deuh taix maix greem: siviang ba: aux, mai: koe: krax caoxrhawm:, pa kaux sijax rah see ka aux, maix paw lai sipaung: aux daux meung Ejiptux liak, 30 "Kieh aux it tau mai: keeing: aux, tax aux khankix; maix deeh viex aux lih khaing: meung Ejiptux, mai: sipaung: aux dee koe: simeeig kix heue:." Yosiep ah nin:, "Aux tak yuh awm: lox pa krai maix heue:." 31 Isarilax ah nin:, "Tiex tu maix ka aux," mai: nawh kawx tiex tu khaix an, Isarilax gup tokaux tix ka piang kaing: gaong ku: it tix heue:.
Simin Ting 48
Yakop Nawb Bwan: Ka Kawn: Simiex Tix Yosiep
1 Yamin khaix hoik luan bawg yam ceu inkix, kix krai Yosiep mhong: grawng: keeing: nawh mai: ah nin:, "Keeing: maix kied saux tete heue:." Mai: nawh viex kawn: simex tix ra: kaux, Manashe mai: Epharen hu: heue:. 2 Mai: pui krai Yakop mhong:, ka hoek kawn: simex nawh, "Jhak heue:, kawn: simex maix Yosiep hoek ka maix phao:," Isarilax teei riang tix, mai: kaoh ngawm piang ku: it tix heue:. 3 Yakop ah nin: ka Yosiep, "Siyiex pa ting siawp sibrawm hoik lih bleeh ka aux, ka veng Luza daux haktiex Khanan mai: nawb bwan: ka aux, 4 "Mai: ah nin: ka aux, 'Jhak heue:, Aux tak sang kieh maix pre haoh hun:, mai: kieh ceucat maix lih mawh ceu pui tom: nie, mai: Aux tak tawx haktiex in ka doeh simie ceucat maix, mai: mawh cie kix leeing: ju leeing: phan: khaix maix heue:.' 5 "Yam in kawn: simex maix ra: kaux, Epharem mai: Manashe, pa pon maix, daux haktiex Ejiptux, sivoe hoek aux ka maix daux Ejiptux tin:, caw tix mawh kawn: simex aux; awm: Rubin mai: Simion heue:." 6 Kawn: praix pa baox pon maix khaix in, tak mawh kawn: praix maix; maix tak kok kix, ka greem: ceukaux puxke: kix, son sinngao kix heue:. 7 "Yam hoek aux khaing: Padanaram, Rakhelax yum hawt krax meung Khanan, dex hoek ka Epharat; mai: aux sipaung: kiex tan: dex krax hu: ka veng Epharat" (Epharat pa mawh Bieliehiem in singaix heue:.)" 8 Yam yaox Isarilax ka kawn: simex Yosiep khankiex, nawh chawk ah nin:, "In kiex mawh pui mawx lie?" 9 Yosiep ah nin: ka keeing: tix, "Kiex mawh kawn: simex aux, pa tawx Siyiex ka aux ka dee in." Mai: nawh ah nin:, "Viex kiex hoek ka aux, aux tak sang nawb bwan: ka kiex heue:." 10 Yam in ngai: Isarilax ang lai chix yaox kheu hoik riex ju nawh, Yosiep viex kiex hoek dex nawh, mai: nawh kawm tix ngheet kiex heue:. 11 Isarilax ah nin: ka Yosiep, "Aux keud tix ang lai yaox ka pak ngai: maix; yam in, Siyiex hoik jhi: aux yaox khawm: kawn: praix maix heue:." 12 Khaix an Yosiep teei kiex lih khaing: ngawng nawh, mai: nawh gup pak ngai: tix piang tiex heue:. 13 Mai: Yosiep teei kiex khawm: ra: kaux, mai: teei taix khawn: dawm: tix, giex ka Epharem mai: deuh khawn: gwiex Isarilax, mai: nawh teei taix khawn: gwiex giex ka Manashe mai: deuh dex plak khawn: dawm: Isarilax heue:. 14 Mai: Isarilax neh taix khawn: dawm: tix, mai: deuh ka piang kaing: Epharem pa mawh pux, mai: taix khawn: gwiex tix piang kaing: Manashe, viang nawh tawng Manashe mawh kawn: Ai: kawx heue:. 15 Mai: nawh nawb bwan: ka Yosiep, mai: ah nin:; "Siyiex pa dawg koe: pa krub keeing: aux Abraham mai: Icak; Siyiex pa tawx pa ih pa un: ka aux leeing: ju, tom: hoek in singaix; 16 kawncau Siyiex pa taoh aux khaing: pa caox pa caig, nawb bwan: ka kawn: nyawm in kiex, mai: kieh ceukaux aux, ceukaux keeing: aux, Abraham mai: Icak koe: ka piang kiex, mai: kieh kiex ting lhaong:, haok hwan: tom: nie ka piang haktiex in heue:." 17 Yam in yam yaox Yosiep deuh keeing: tix taix khawn: dawm: nawh ka piang kaing: Epharem, nawh ang nyawmrhawm: kah, mai: nawh sang teei taix keeing: tix khaing: kaing: Epharem mai: gah tix deuh ka piang kaing: Manashe heue:. 18 Mai: Yosiep ah nin: ka keeing: tix, "Keeing: aux eue:, ang caw, mawh kheu mawh in kawn: Ai:, deuh taix khawn: dawm: maix piang kaing: nawh liak." 19 mai: keeing: nawh thiang: ah nin:, "Kawn: simex aux eue:, aux tawng, aux tawng, nawh tak lih tix mawh ceu pui pa ting tix cub, viang mawh nan:, pux nawh, tak nie lheu: ting khaing: nawh, mai: doeh simie ceucat nawh khankix tak lih tix mawh ceu pui ku cub heue:." 20 Mai: nawh nawb bwan: ka kix daux singaix an, mai: ah nin:, "Mawh kheu maix pui Isarilax tak pon bwanson:, kieh Siyiex kieh maix awm: Epharem mai: Manashe.'" Mawh kheu nan:, nawh yaox Epharem ting sivoe Manashe heue:. 21 "Khaix an Isarilax ah nin: ka Yosiep, "Jhak heue:, hoik hoek bawg yam dex sang yum aux, viang mawh nan: Siyiex tak ot tau mai: pex, maai: tak deeh viex pex hoek ka haktiex keeing: pex tix bawg heue:. 22 Lheu: khaing: an, aux tak tawx haktiex Shekhem ka maix pa pon teei ka lawm vaid, mai: ak, khaing: daux tawm: taix Amawrix, lheu: khaing: pa tawx aux ka puxke: maix heue:."
Simin Ting 49
GumLox Ghoik Yakop Tix Tawm: Ka Kawn: Simex Nawh
1 Mai: Yakop kok ka kawn: simex tix khankix mai: ah nin:, "Khrawm: paox tix tau, aux sang krai pex mhong: pa sang lih hoek tix mawh ka piang pex sivoe ngai: heue:. 2 "Kawn: praix Yakop khankix eue:, khrawm: paox tix, mai: nghiet ka lox keeing: pex Isarilax heue:." 3 "Rubin eue:, maix mawh kawn: Ai: aux, mai: mawh riang aux, plix liang aux tix pon yam ting riang tix, mai: mawh min: plakngai: pa lheu: mhawm:, mai: mawh siawp sibrawm pa lheu: mhawm:. 4 "Awm: rawm: pa ang chix ot ti dah, mai: phrit tix lih, maix tak ang yaox tix mawh pui pa kaux cong:, mawh kheu haok maix ka dee it keeing: tix, maix hoik kieh ku: it keeing: tix khreeing: heue:. 5 Simeon mai: Lewix kiex mawh puxaik, vaid lawm kix mawh kraung naing pa yuh pa caox pa caig heue:. 6 "Ju aux eue:, paw laig daux bang: kum: kix, khwan: aux eue:, paw yuh paox pie tau mai: kix, jao songrhawm: kix, kix hoik pah ka pui, kix hawt alo tokaux cao: tix, mai: mug ka si nieag moi ngha: dud heue:. 7 "Kieh kiex pon krax jhax krax lawg kheu kin: jhawm: pa yuh tix, mai: krax songrhawm: pa kied lang: teung:; aux tak gwieh kiex khaing: pui Yakop mai: kieh kiex prung: prang: khaing: pui Isarilax heue:. 8 "Yudax eue:, puxaik maix khankix tak yaogyaw maix, taix maix tak jhawp ka ngawg pui pa koeng ka maix khankix, puxaik maix khankix kawx, tak hoek tix krub ka maix heue:." 9 Yudax mawh kawn: sivai sangsi: mhaing:; kawn: simex aux eue:, maix kaoh khaing: dee sawg tix ih kug mai: gup tix awm: sivai sangsi: miex, mawh pui mawx pa sang pon hu: so: ka maix lie? 10 pliah tak ang lai tang: tiah khaing Yudax, khaoxgix pa kwang: ang gah tix khaing: sinax caong nawh, tom: sidah sidu sang hoek Shilaw, mai: kawn: pui khawm: uik tak cu nghiet ka nawh heue:. 11 Nawh phyawk la tix ka nhu: plix siiet, mai: phyawk kawn: la iak tix ka nhu: plix siiet pa mhawm:, nawh sidaux kraung tix ka rawm: plix siiet, sidaux sibex tix ka rawm: plix siiet pa raoh awm: nham:; 12 Ngai: nawh hoik raoh kheu rhawm: plix siiet; mai: rhang: nawh hoik paing kheu rhawm: teeh heue:. 13 Zebulun tak ot praok rhawm: sigrit sigra:; mai: mawh dee bang: reu sangphaw: khankix, mai: mee: haktiex nawh hoek tom: veng Sidom heue:. 14 "Isakha mawh pa ting riang awm: la, mai: nawh it tum sinax kawg yung:; 15 "Nawh yaox dee laux lee: pa mhawm:; mai: haktiex dee nyawm tix ot, nawh tak klawm: beeh glawm: kraung cien piang klip tix, mai: mawh siliex pa tawx gha: heue:. 16 Dan tak prawng ka ceu pui tix, awm: doeh simie ceucat pui Isarilax tix ceu heue:. 17 Dan tak mawh siuing: pa koe: jai: pa ot piang krax; siuing: pa ot hawt daux krax, son sang tut ka loek caong brung brug pui, tix sang kieh cao: brug rau plak khaix heue:. 18 "Simiang Siyiex eue:, aux hoik krox jun ka bwanson: krax taoh Maix Cao: heue:. 19 Gat tak mawh pa hawt cub pui con tix puing: ka nawh; viang mawh nan:, nawh tak deeh pon hawt phoek loek caong kix heue:. 20 Asha, Haktiex nawh tak mawh pa kaoh Priex preem pa mhawm: khaing:; mawh pa kied nyawm tete, mai: nawh tak pon yuh priex ih khunhawkham lih tom: nie heue:. 21 Napthalix, mawh cak miex pa blha: tix pa ang koe: dee tuh, pa keh kawn: pa mhawm: heue:. 22 Yosiep mawh kak khaox pa nie plix plix, kak khaox pa nie plix plix hawt rawm: keut; mai: kak khankix jao: luan ka guh veng heue:. 23 Pui naing ak, yuh krax kin: mai: hawt puing: ka nawh, kix puing: mai: koeng ka nawh. 24 Viang mawh nan: ak nawh kawn: koe: riang, mai: plawng: taix nawh cong: sijung:, riang rao tawm: taix pa ting siawp sibrawm Siyiex pa koe: daux Yakop, (pa mawh cao: liang yung:, rang: ting ceu pui Isarilax heue:.) 25 Pa mawh Siyiex keeing: maix, tak teem: coi maix, Cao: pa ting siawp sibrawm tak nawb bwan: ka maix tau mai: bwanson: pa kaoh khaing: daux raoma: long:, bwanson: pa raux pa mox pa koe: plak greem:; bwanson: pa pon khaing: teeh: mai: pa kaoh khaing: daux vaig heue:. 26 Bwanson: pa nawb keeing: maix khankix; nie lheu: mhawm: khaing: bwanson: pa kaoh khaing: gawng leeing: ju, mai: lheu: mhawm: khaing: bwanson: grum naog khaing: ton: leeing: ju leeing: phan: heue:. Son inkix tak ot piang Yosiep mai: ka piang mhok khri: pa koe: piang dong: re: nawh heue:. Mai: hoek ka piang puxaik pa tang: gwieh hu: khaing: nawh heue:. 27 Binyamin tak mawh sox praix, pa leue tix kiied totiag, nawh ih ka nex totiag pon tix ponngawb caocao, mai: deeh gwieh nex totiag pa pon sigrhang: tix son ponbo heue:. 28 In mawh doeh ceucat Isarilax kao: ra: ceu, mai: mawh gumlox sikah keeing: kix, ka kix, mai: lox nawb bwan: ka kix, mai: nawb bwan: ka kix ku kaux, awm: bwanson: pa khaw: kix tix pon heue:.
Grawng: Yum Yakop Mai: Sipaung:
29 Khaix an nawh tawm: lox ka kix mai: ah nin:, "Aux sang deeh hu: neuex tix tau mai: ceu pui aux; sipaung: aux tau mai: keeing: aux khankix ka daux rang: pa koe: daux kaung: Epharon ceu pui Hittix, 30 "Daux rang: pa koe: daux kaung: Makhaphelax ka plak lih singaix haktiex Khanan, kaung: an Abraham hoik liag ka Epharon ceu pui Hittix son sang mawh haktiex simeeig cie nawh heue:." 31 "Kix hoik sipaung: Abraham mai: moeng nawh Sara tan:, mai: kix baox sipaung: Icak mai: moeng nawh Rakhelax tan:, mai: Leax kawx aux hoik sipaung: tan: heue:. 32 "Kaung: mai: daux rang: an, mawh pa hoik liag nawh khaing: ceu pui Hittix heue:." 33 Khaix hoik tawm: Yakop lox ka kawn: simex tix khankix, nawh yaog caong tix deuh ka piang ku: it tix, nawh dud rhawm: mai: hu: ka dee khrawm: simie ceucat tix heue:.
Simin Ting 50
1 Khaix an Yosiep gup ngai: tix ka piang ngai: keeing: nawh, yiem mai: ngheet ka nawh heue:. 2 Yosiep tawx lox ka kawncau tix khankix, pa mawh cao: chix sidah mai: kieh kix khre: keeing: nawh ka sidah bhawng: heue:. Mawh kheu nan: cao: chix sidah khankix, cox khre: Isarilax ka sidah bhawng: heue:. 3 Kix sau: sidah bhawng: ka nawh mai: deuh lawng: nawh tipon: singaix awm: hoik koe: been pa deuh kix pui yum. Khaix hoik luan tipon: singaix pui Ejiptux khankix yiem doe: son Yakop atigliah singaix heue:. 4 Khaix hoik luan singaix yiem doe: kix, Yosiep kok pui yuh kaing nyiex haw: Pharaw mai: ah nin:, "Phan: aux khaw: tix pon bwanson: sivoe ngai: pex, hu: krai ka Pharaw mai: ah nin:, 5 'Keeing: aux hoik kieh aux tiex tu ah nin:, "Aux hoik dex sang yum, pex hu: sipaung: aux ka daux simeeig pa hoik kaong: aux son tix, daux haktiex Khanan heue:.' Mawh kheu nan:, yam in, kieh aux hu: yuh mai: sipaung: ka keeing: tix mai: aux tak deeh hoek heue:." 6 Mai: Pharaw ah nin:, "Hu: mai: sipaung: ka keeing: maix awm: hoik kieh nawh maix tiex tu ka tix heue:." 7 Mawh kheu nan: Yosiep lih hu: son sang sipaung: nawh keeing: tix; kawncau Pharaw mai: khawm: cao: kaing: daux nyiex haw: mai: cao: kaing: ka daux haktiex Ejiptux khankix hu: tau mai: Yosiep heue:. 8 Pui nyiex ma: Yosiep, pui nyiex puxke: nawh, mai: pui nyiex nawh keeing: nawh khankix lih hu: tan:, mawh ngie kawn: nyawm iak cub yung:, mai: pex mai: khawng: brie khankix, pa prah kix daux haktiex Goshen heue:. 9 Cub ling: lawx mai: cub lien: brung pa kied haoh hun: lih hu: tau mai: nawh heue:. 10 Khaix an kix hoek ka glah pah nghox Atat, pa koe: toi: rawm: klawng: Yawdan, kix khrup rhawm: sigrien sigre mai: yiem, Kix khirhawm: yiem doe: son keeing: tix tan: aliah singaix heue:. 11 Yam yaox can pui pa ot daux haktiex Khanan khankix, ka krax pa yiem doe: kix ka daux glah pah nghox Atat, kix ah nin:, "In mawh krax pa kied yiem doe: ceu pui Ejiptux." Mawh kheu nan: dee an kix kok mawh Abelax Mizaren, pa koe: toi: rawm: klawng: Yawdan heue:. 12 Mawh kheu nan: kawn: simex nawh khankix yuh awm: pa hoik tawm: nawh ka kix heue:. 13 Kawn: simex nawh khankix viex nawh hu: ka haktiex Khanan, mai: sipaung: nawh, daux rang: pa koe: daux kaung: Makhapelax, plak lih singaix veng Mamre, pa hoik liag Abraham ka Epharon, ceu pui Hittix, son gwang simeeig tix heue:. 14 Khaix hoik sipaung: nawh keeing: tix, Yosiep deeh ing: ka meung Ejiptux tau mai: puxke: nawh khawm: pui pa hu: sipaung: keeing: nawh khankix heue:.
Lox Krai Yosiep Ka Puxke: Tix
15 Yam yaox puxke: Yosiep khankix ka hoik yum keeing: tix, kix ah nin:, "Ex lhat Yosiep koeng ka ex, mai: deeh pawk bix ka ex, son kaing pa caox pa caig, pa yuh ex ka nawh heue:." 16 Kix ploi: pui cau hu: ka Yosiep mai: ah nin:, "Sivoe sang yum keeing: maix, nawh hoik tawm: lox ka yix ah nin:, 17 'Hu: krai ka Yosiep mai: ah nin:, aux rawg maix pluat ploi: ka krax phit pa yuh puxke: maix khankix mai: phimap kix, mawh kheu hoik yuh kix pa caox pa caig ka maix heue:.' Yam in rawg maix pluat ploi: pa phit kawncau maix khankix, ka daux min: plak ngai: Siyiex keeing: maix heue:." Yam mhong: Yosiep ka lox krai kix nawh yiem kah heue:. 18 Puxke: nawh khankix, hoek gup tix ka sivoe nawh mai: ah nin:, "Jhak heue:, yix mawh kawncau maix heue:." 19 Yosiep deeh ah nin: ka kix, "Paw khirhawm: kah, khex keud pex aux mawh Siyiex lie? 20 "Viang pex keud mawh yuh tix pa caox ka aux kawx, viang mawh nan:, Siyiex hoik kieh mawh ceu pa mhawm:, son sang taoh ju pui tom: nie awm: pa hoik yaox pex daux in singaix heue:. 21 "Mawh kheu nan: paw koe: krax khirhawm:, aux tak eei: liang pex mai: kawn: praix pex ku kaux heue:." Nawh krai lox nyawmrhawm: ka kix mai: lox pa caoxrhawm: caoxrhi: ka kix heue:.
Grawng: Yum Yosiep
22 Yosiep mai: pui nyiex ma: keeing: nawh khankix, ot daux Ejiptux, mai: Yosiep im: ju tom: hoek tix yieh kao: num heue:. 23 Yosiep hoik yaox ka kawn: sex nawh khankix, pa mawh kawn: saux Epharem; kawn: praix Makhirax pa mawh kawn: simex Manashe kawx mawh pa keh piang ngawng Yosiep heue:. 24 Mai: Yosiep ah nin: ka pux aik nawh khankix, "Aux dex sang yum, viang mawh kawx nan:, Siyiex tak hoek tix kia: ngien ka pex, mai: deeh viex pex lih khaing: haktiex in mai: tawx pex hu: ka haktiex pa hoik tiex tu Nawh Cao: ka Abraham, Icak mai: Yakop heue:." 25 Khaix an Yosiep kieh kawn: praix Isarilax khankix, tiex tu tix ah nin:, "Siyiex tak hoek tix kia: ngien ka pex, mai: pex tak viex si:ang: aux hu: khaing: tin: heue:." 26 Yosiep yum yam hoek ju nawh tix yieh kao: num, mai: kix khre: sau: sidah bhawng: ka nawh mai: sau: ka daux lawng: meung Ejiptux heue:.