Plak Jhi:

Lai Pa Plak Jhi: Kieh Yaox

Simin Ting 1

Lox paoh. Cao: Khrit sang baox deeh hoek

1 Ceu pa plak jhi: Yesux Khrit, pa hoik tawx Siyiex ka Nawh Cao: son sang jhi: ka siliex Nawh khankix, pa mawh ceu pa tag sang khran: hoek tix mawh khankix. Mai: Nawh Cao: ploi: kawncau Siyiex cie Tix tix teei mhai: mai: plak jhi: ka siliex Nawh Yohan, 2 pa kham: mhai: sakse: ka grawng: gumlox Siyiex, mai: grawng: mhai: sakse: Yesux Khrit, awm: can pa hoik yaox nawh khawm: uik heue:. 3 Mawh kheu bawg yam dex sang hoek, kaw pa phat mai: kix pa mhong: gumlox jhai: in khankix, mai: priex tix hawt ceu pa hoik tiem: tix deuh ka daux in khankix, ting bwanson: heue:.

4 Yohan tawx ka ceucao aliah mu: pa koe: ka daux meung Asix, kieh pex koe: bwanson: mai: pa nhim: pa kaoh khaing: Nawh Cao:, pa mawh yamin, mai: pa hoik mawh, mai: pa tag sang hoek tix mawh, mai: khaing: Khwan: aliah mu: pa ot sivoe dangngeung Nawh Cao:, 5 mai: khaing: Yesux Khrit pa mawh cao: pa kham: mhai: sakse: pa kaux sijax, pa mawh pa liang tix keh khaing: pa yum, mai: pa mawh cao: pa giex kaing: piang simiang khunhawkham haktiex khankix liak. Ka Kaw pa hoik moh ka ex, mai: pa hoik ploi: ex khaing: phimap phigrham: ex, ka daux nham: Tix, 6 mai: hoik yuh tix kieh ex mawh khunhawkham mai: cao: giex kaing: li ka Siyiex mai: Keeing: Nawh, kieh Nawh koe: min: plakngai: mai: siawp sibrawm ku ju leeing: ju leeing: phan: liak. Amen. 7 Jhak heue:, Nawh Cao: tag hoek tau mai: paiawm: khankix, mai: ngai: ku ngai: tag sang yaox Nawh, khawm: kix pa hoik swat ka Nawh Cao:, mai: ceu pui haktiex khawm: uik tag sang yiem riag yiem yo kheu Nawh heue:. Tag sang mawh nan: heue:. Amen.

8 "Aux mawh Alaphax mai: Omegax" Simiang Siyiex, Kaw pa mawh yamin, mai: pa hoik mawh, mai: pa tag sang hoek tix mawh, pa mawh Cao: Pa Ting Sibrawm Piang Khawm: Uik, ah nan: heue:.

Krax pa yaw pa ah Cao: Khrit ka ceucao

9 Aux Yohan, pa mawh puxaik pex, mai: paox pa rom tix neuex ka daux pa kharhawm: kharhi:, mai: meung, mai: pa gun pa yeung, ka daux Yesux Khrit, yaox tix ot ka klawn: tiex pa kok mawh Patmo, kheu gumlox Siyiex mai: kheu grawng: mhai: sakse: Yesux heue:. 10 Ka singaix twah Simiang, aux ot ka daux Khwan: Cao: mai: aux mhong: lox pa ting pa luah khaix aux, pa awm: lox teet tawng 11 pa ah nin:, "Tiem: ceu pa yaox maix ka daux phuk lai mai: sipaox ka ceucao aliah mu:, pa koe: ka daux veng Efesux, mai: ka daux veng Sameunax, mai: ka daux veng Perakam, mai: ka daux veng Swatirax, mai: ka daux veng Sadix, mai: ka daux veng Filadefia, mai: ka daux veng Lawdikix khankix awawx." 12 Mai: aux deeh gi son sang yaox mawh lox pa yuh ka mawx pa sikah mai: aux heue:. Mai: khaix hoik gi, aux yaox jawk ten: khri: aliah mu:, 13 mai: ka sigreung jawk ten: an khankix, tix kaux pa awm: Kawn: kawn: pui, pa ceep kraung dha: pa hoek tom: sidaing: caong, mai: pa nhawt maox rawd khri: ka see piang teeh: heue:. 14 Mai: kaing: Nawh mai: hauk kaing: Nawh paing awm: hauk yung:, mai: awm: rawm: rha: heue:. Mai: ngai: Nawh awm: rao ngu heue:. 15 Mai: caong Nawh awm: tawng lheung: pa mhawm: pa hoik thi: ka daux daux glah ngu heue:. Mai: lox Nawh awm: lox rawm: tom: nie heue:. 16 Mai: ka daux taix khawn: dawm: Nawh, giex simuing: aliah mu:, mai: khaing: ka daux jheeh Nawh lih vaid lawm pa lawm khawm: ra: plak, mai: pakngai: Nawh awm: yam sinied singaix tix jhan: riang heue:. 17 Mai: yam yaox aux Nawh, aux goh liep caong Nawh, awm: pa hoik yum heue:. Mai: Nawh Cao: deuh taix khawn: dawn: Nawh ka piang aux, mai: ah nin:, "Paw vi lhat heue:. Aux mawh pa jah mai: pa ghoik khaix, 18 mai: Kaw Pa Im: Ju heue:. Aux hoik yum. mai: jhak heue:. Aux ca: im: ku ju leeing: ju leeing: phan:, mai: Aux koe: jiak saw pa yum mai: meung yum heue:. 19 Mawh kheu nan: tiem: ceu pa hoik yaox maix khankix, mai: ceu pa mawh yamin khankix, mai: ceu pa tag sang hoek tix mawh khaix khankix awawx. 20 Ceu pa raux pa mox grawng: simuing: aliah mu: pa hoik yaox maix ka daux taix khawn: dawm: Aux, mai: jawk ten: khri: aliah mu: an khankix, mawh nin:, simuing: aliah mu: an khankix mawh kawncau Siyiex ceucao aliah mu: an, mai: jawk ten: an khankix, mawh ceucao aliah mu: an heue:."

Simin Ting 2

Lai pa tawx ka ceucao Efesux

1 "Tiem: ka kawncau Siyiex ceucao pa koe: ka daux veng Efesux yuh nin:, 'Ceu in khankix mawh pa ah Kaw pa giex simuing: aliah mu: ka daux taix khawn: dawm: Nawh, mai: pa hu: lai ling ka sigreung jawk ten: khri: aliah mu:. 2 Aux tawng grawng: krax twah krax klaung: maix, mai: kaing pa nyhap pa mao, mai: pa gun pa yeung maix, mai: grawng: pa ang maix pon kham: ka pui pa caox, mai: grawng: pa hoik cheu: tix yaox ka kix pa dhua: tokaux kix mawh kawncau pa ting, pa ang tie mawh, mai: hoik yaox grawng: mawh kix pa pie pa lhen:. 3 Mai: maix hoik gun hoik yeung, mai: hoik kham: geu: son ceukaux Aux, mai: ang laux rhawm: kah heue:. 4 Viang mawh kawx nan: Aux koe: ceu pa deuh phimap ka piang maix, mawh kheu hoik grham: maix ka krax moh awm: pa moh ka phaoxka: heue:. 5 Mawh kheu nan: doh keud ka khaing: dee hoik rau maix, mai: doh keud doh sawn: ka phimap tix, mai: twah klaung: ka ceu pa twah pa klaung: phaoxka:, phan: ang mawh nan: Aux tag hoek ka maix, mai: gah jawk ten: maix khaing: dee ot nawh, phan: maix ang doh keud doh sawn: ka phimap maix heue:. 6 Viang mawh kawx nan: maix koe: ceu in, pa mawh pa koeng ka krax twah krax klaung: pui Nikawlax khankix, pa Aux kawx koeng kah heue:. 7 Kaw pa koe: yhaok kieh nawh mhong:, ceu pa krai Khwan: Cao: ka ceucao khankix awawx. Ka kaw pa pex, Aux tag tawx nawh ih khaing: khaox im: ju, pa koe: ka daux Paradisux390 Siyiex heue:.'

Lai pa tawx ka ceucao Sameunax:

8 "Mai: tiem: ka kawncau Siyiex ceucao pa koe: ka daux veng Sameunax yuh nin:, 'Ceu in khankix mawh pa ah, Cao: pa jah mai: pa ghoik khaix, Kaw pa hoik yum, mai: pa im: ju. 9 Aux tawng grawng: krax kharhawm: kharhi: maix, mai: pa hot pa sibhawm: maix, (viang mawh nan: maix mawh pa mi pa koe:), mai: grawng: pa sa pa lao kix pa dhua: kix mawh pui Yudax, mai: kix ang tie mawh, viang mawh nan: mawh nyiex sidiex Satan heue:. 10 Paw vi lhat ka ceu pa dex sang yaox maix tix kham: geu: khankix. Jhak heue:, phicaox dex teei tix sau: pex tiblah ka daux thawng:, son sang cheu: tix yaox pex, mai: pex tag sang koe: krax kharhawm: kharhi: been kao: singaix heue:. Kieh maix kaux sijax tom: yum, mai: Aux tag sang tawx mhok khri: pa im: ju ka maix heue:. 11 Kaw pa koe: yhaok kieh nawh mhong: ceu pa krai Khwan: Cao: ka ceucao khankix awawx. Ka kaw pa pex, krax yum ra: bawg tix bawg tag ang pon tix kieh nawh saux heue:.'

Lai pa tawx ka ceucao Perakam

12 "Mai: tiem: ka kawncau Siyiex ceucao pa koe: ka daux veng Perakam yuh nin:, 'Ceu in khankix mawh pa ah Kaw pa koe: vaid lawm pa lawm khawm: ra: plak. 13 Aux tawng dee ot maix, pa mawh dee koe: dangngeung Satan, mai: maix ca: giex tom: kaux tom: cong: ka ceukaux Aux, mai: ang lai thiang: tix tik ka krax yumrhawm: Aux, viang ka daux bawg yam singaix Antipax, pa mawh cao: pa kham: mhai: sakse: cie Aux, mai: pa mawh kaw pa kaux sijax cie Aux, pa hoik teei yum ka sinax pex, dee ot Satan heue:. 14 Viang mawh kawx nan: Aux koe: ceu pa deuh phimap ka piang maix ceeix, mawh kheu koe: maix pui tiblah tan:, pa giex ka been pa gau Balam, pa mawh kaw pa hoik gau ka Balak tix sang taing ceu pa sideeing ka: sivoe kawn: praix Isarilax khankix, son sang ih ceu pa hoik tan hoik lu ka rieang rao khankix, mai: son sang phit sang vao heue:. 15 Awm: an maix koe: nang: tiblah pa giex ka been pa gau pui Nikawlax khankix heue:. 16 Mawh kheu nan: doh keud doh sawn: ka phimap tix, phan: ang mawh nan: Aux tag khran: hoek ka maix, mai: teei vaid pa koe: ka daux jheeh Aux, mai: yuh naing ka kix heue:. 17 Kaw pa koe: yhaok kieh nawh mhong:, ceu pa krai Khwan: Cao: ka ceucao khankix awawx. Ka kaw pa pex, Aux tag tawx nawh mannax pa hoik mox an, mai: Aux tag tawx nawh simaox paing tix lon:, mai: ka piang simaox an hoik tiem: ceukaux pa khraox, pa ang pui tawng tix kaux kawx, lheu: khaing: kaw pa pon simaox an heue:.'

Lai pa tawx ka ceucao Swatirax:

18 "Mai: tiem: ka kawncau Siyiex ceucao pa koe: ka daux veng Swatirax yuh nin:, 'Ceu in khankix mawh pa ah Kawn: Siyiex, pa ngai: Nawh awm: rao ngu, mai: pa caong Nawh awm: tawng lheung: pa mhawm:. 19 Aux tawng grawng: krax twah krax klaung: maix, mai: krax moh krax rhawm: maix, mai: krax yumrhawm:, mai: pa yuh kaing cau kaing soi:, mai: pa gun pa yeung, mai: grawng: krax twah klaung: maix phaox khaix, mawh pa nie lheu: khaing: krax twah krax klaung: phaoxka: heue:. 20 Viang mawh kawx nan: Aux koe: ceu pa deuh phimap ka piang maix, mawh kheu khaw: maix paox tix ka bon: Yezabelax, pa dhua: tokaux tix mawh yiex jhai:, mai: nawh gau mai: jeeh nyaw ka siliex Aux khankix son sang phit sang vao, mai: son sang ih ka ceu pa hoik tan hoik lu ka rieang rao heue:. 21 Mai: Aux hoik tawx bawg yam ka kiex, son sang doh keud doh sawn: kiex ka phimap tix, mai: ang kiex koe: rhawm: tix sang doh keud doh sawn: ka pa phit pa vao tix heue:. 22 Jhak heue:, Aux taing kiex ka dee it, mai: kix pa phit pa vao mai: kiex, Aux taing ka daux dee kharhawm: kharhi: pa ting, phan: kix ang doh keud doh sawn: ka jhawm: yuh kiex khankix heue:. 23 Mai: Aux tag teei kawn: praix kiex yum ka krax yum, mai: ceucao khawm: uik tag tawng grawng: mawh Aux Kaw pa sawg liiem plak daux pui khawm: uik, mai: daux rhawm: rhi:, mai: Aux tag sang tawx pex kaux pui mawx kaux pui an, awm: pa khaw: mai: krax pa twah pa klaung: tix heue:. 24 Viang mawh kawx nan: Aux ah nin: ka pex, pa deuk khankix ka daux veng Swatirax, can pa ang lai tawng ka lox pa gau in, mai: pa ang tawng ka ceu pa miag kix tix kok mawh, pa raux Satan heue:. Ang Aux lai baox sau: beeh sau: glawm: tang: ceu ka piang pex heue:. 25 Viang mawh kawx nan: can pa hoik koe: pex, giex tom: cong:, tom: hoek Aux ka pex heue:. 26 Mai: ka kaw pa hoik pex, mai: ka kaw pa priex tix hawt krax twah krax klaung: Aux tom: sidah, Aux tag tawx sibrawm ka piang ceu pui khawm: uik ka nawh, 27 mai: nawh tag sang kwang: sang giex kaing: kix ka khaox gix rhiem:, awm: pah ka aw: tiex cie cao: pa yuh aw: khankix max phawng: vid heue:. Awm: Aux kawx hoik pon khaing: Keeing: Aux heue:. 28 Mai: Aux tag tawx simuing: griang ka nawh heue:. 29 Kaw pa koe: yhaok kieh nawh mhong: ceu pa krai Khwan: Cao: ka ceucao khankix awawx.'" Plak Jhi: Kieh Yaox

Simin Ting 3

Lai pa tawx ka ceucao Sadix

1 "Mai: tiem: ka kawncau Siyiex ceucao pa koe: ka daux veng Sadix yuh nin:,

'Ceu in khankix mawh pa ah Kaw pa koe: Khwan: Siyiex aliah mu: mai: simuing: aliah mu:. Aux tawng grawng: krax twah krax klaung: maix, grawh grawng: pa koe: maix ceukaux pa im: maix, viang mawh nan: maix hoik yum heue:. 2 Maix pau tix jhak, mai: kieh ceu pa kawn: deuk pa dex sang yum khankix kaux cong: kah awawx. Grawh grawng: nawh ang Aux yaox krax twah krax klaung: maix pa hoik grum naog ka sivoe Siyiex Aux heue:. 3 Mawh kheu nan: doh keud ka ceu pa hoik pon hoik mhong: maix, mai: priex tix hawt, mai: doh keud doh sawn: ka phimap tix awawx. Mawh kheu nan: phan: maix ang pau tix jhak, Aux tag hoek awm: pui briex, mai: maix tag ang tawng bawg yam nari pa sang hoek Aux ka maix heue:. 4 Viang mawh kawx nan: maix koe: ceukaux ka daux veng Sadix ceeix ceeix, pa ang lai kieh kraung ceep kix seeing: brai: kah, mai: kheu mawh kix pa keung:, kix tag sang yaox tix ceep kraung paing mai: hu: lai ling tau mai: Aux heue:. 5 Ka kaw pa pex tag sang kieh ceep ka kraung paing yuh nin: heue:. Mai: Aux tag ang doh preet tix tik ceukaux nawh khaing: phuk lai pa im: ju, mai: Aux tag sang kham: grawng: ceukaux nawh sivoe Keeing: Aux, mai: sivoe kawncau Siyiex cie Nawh khankix heue:. 6 Kaw pa koe: yhaok kieh nawh mhong: ceu pa krai Khwan: Cao: ka ceucao khankix awawx.

Lai pa tawx ka ceucao Filadefia

7 "Mai: tiem: ka kawncau Siyiex ceucao pa koe: ka daux veng Filadefia yuh nin:, 'Ceu in khankix mawh pa ah Kaw pa singax singeh, Kaw pa mawh pa mawh pa meh, Kaw pa koe: jiak saw Dawit, Kaw pa paoh mai: tix kaux kawx tag ang pon tix nyeep kah, mai: pa nyeep mai: pa tix kaux kawx tag ang pon tix paoh kah. 8 Aux tawng grawng: krax twah krax klaung: maix, (Jhak heue:, Aux hoik paoh tix deuh siviex sivoe maix pa ang pui tix kaux kawx pon tix nyeep kah), grawh grawng: pa koe: maix siawp sibrawm ceeix ceeix, mai: hoik priex tix hawt gumlox Aux, mai: ang thiang: tix tik ka ceukaux Aux heue:. 9 Jhak heue:, Aux tag kieh kix pa neuex ka nyiex sidiex Satan tiblah, kix pa dhua: kix mawh pui Yudax, mai: kix ang tie mawh, viang mawh nan: pa nieb pie lhen:. Jhak heue:, Aux tag kieh kix hoek tix krub ka sivoe caong maix, mai: tawng grawng: pa moh Aux ka maix heue:. 10 Mawh kheu hoik priex maix tix hawt gumlox pa dex mai: pa gun pa yeung Aux, viang Aux kawx tag sang priex maix khaing: bawg yam nari pa cheukcheu: tix yaox an, pa tag sang hoek ka piang haktiex khawm: uik, son sang cheukcheu: tix yaox ka kix pa ot ka piang haktiex heue:. 11 Aux tag khran: hoek heue:. Giex tom: kaux tom: cong: ka ceu pa hoik koe: maix, yuh ka mawx son ang pui tix kaux kawx sang teei mhok khri: maix heue:. 12 Ka kaw pa pex, Aux tag kieh nawh mawh rong: ka daux nyiex bwan: Siyiex Aux, mai: nawh tag ang baox deeh lih khaing: tan: tix bawg kawx heue:. Mai: Aux tag tiem: ceukaux Siyiex Aux, mai: ceukaux veng Siyiex Aux, pa mawh veng Yerusaliem pa khraox, pa lih hoek khaing: daux meung raoma:, khaing: Siyiex Aux, mai: ceukaux pa khraox cie Aux, ka piang nawh heue:. 13 Kaw pa koe: yhaok kieh nawh mhong: ceu pa krai Khwan: Cao: ka ceucao khankix awawx.'

Lai pa tawx ka ceucao Lawdikix

14 "Mai: tiem: ka kawncau Siyiex ceucao pa koe: ka daux veng Lawdikix, yuh nin:, 'Ceu in khankix mawh pa ah Cao: Amen, pa mawh cao: pa kham: mhai: sakse: pa kaux sijax mai: pa mawh pa meh, pa mawh pa liang ka daux ceu pa hoik phan: hoik yuh Siyiex. 15 Aux tawng grawng: krax twah krax klaung: maix, grawh grawng: pa ang maix tie sikiied, tie hax. Mai: Aux simie tix kieh maix mawh pa sikiied phan: ang mawh nan: pa hax heue:. 16 Mawh kheu mawh maix pa si:u: ngie ceeix ceeix khaing:, mai: pa ang tie hax, tie sikiied, Aux tag peh tix tik maix khaing: daux jheeh Aux heue:. 17 Mawh kheu ah maix, "Aux mawh pa mi pa koe:, mai: hoik koe: sinngao, mai: ang lai baox lo tid tix." Mai: ang tawng grawng: pa mawh maix kaw pa kharhawm: kharhi:, mai: pa khaw: tix caoxrhawm: kah, mai: pa hot pa sibhawm:, mai: pa dug ngai:, mai: pa kakaong: heue:. 18 Aux nhie: maix liag khri: pa hoik thi: ka daux ngu, son sang lih mawh maix pa mi pa koe:, mai: ka kraung ceep pa paing son sang ceep ka tokaux tix, son tag ang ceu pa kaig pa tua pa kakaong: maix sidawng:, mai: ka sidah kraix ngai:, tix sang kraix ka ngai: maix, son sang chix yaox maix kah heue:. 19 Ka can kix pa moh Aux kah, Aux ah kah, mai: sivied tix gau kah heue:. Mawh kheu nan: nied tix coca:, mai: doh keud doh sawn: ka phimap tix awawx. 20 Jhak heue:, Aux cung ka sivoe siviex, mai: gleuh kah heue:. Phan: pui tix kaux kaux mhong: lox Aux mai: paoh siviex, Aux tag laig ka dee ot nawh, mai: Aux tag sawm: rheep tau mai: nawh, mai: nawh tag sawm: rheep tau mai: Aux heue:. 21 Ka kaw pa pex, Aux tag tawx tix kieh nawh ngawm tau mai: Aux ka piang dangngeung Aux, awm: Aux kawx hoik pex, mai: ngawm tau mai: Keeing: Aux ka piang dangngeung Nawh heue:. 22 Kaw pa koe: yhaok kieh nawh mhong: ceu pa krai Khwan: Cao: ka ceucao khankix awawx.'"

Simin Ting 4

Ceu pa lih koe: plak raoma:

1 Khaix ceu an khankix, jhak heue:, aux yaox siviex pa hoik bhang: ka meung raoma: tix mu:, mai: lox pa mhong: aux phaoxka:, awm: lox luah teet tawng pa sikah mai: aux, ah nin:, "Haok tin:, mai: Aux tag jhi: maix yaox ceu pa tag lai hoek tix mawh khaix heue:." 2 Dom: mawx dom: an aux ot ka daux Khwan: Cao:, mai: jhak heue:, koe: dangngeung pa hoik deuh ka daux meung raoma: tix mu:, mai: Tixkaux ngawm ka piang dangngeung an heue:. 3 Mai: grang Kaw pa ngawm an, awm: siang: simaox pa toh riang ku ceu, mai: siang: simaox pa raoh awm: nham:, mai: koe: siyawng mukheu pa grang nawh awm: siang: simaox klai pa vungviang ka dangngeung an. 4 Mai: vungviang dangngeung an, koe: dangngeung tinga: pon: mu:, mai: ka piang dangngeung an khankix aux yaox ngawm kuad song: tinga: kaux pon:, pa ceep kraung ceep pa paing, mai: pa ceep mhok khri: ka kaing: kix heue:.

Krub ka Cao: pa phan: pa deuh pa ngawm piang dangngeung Raoma:

5 Mai: khaing: dangngeung an lih tuh sah mai: lox sikah, mai: lox pa sinum praix heue:. Mai: sivoe dangngeung an, koe: kawkngu pa hoik tok aliah mu:, pa mawh Khwan: Siyiex aliah mu: heue:. 6 Mai: ka sivoe dangngeung an awm: pa koe: rawm: singrit sigra: siliak pa awm: simaox plaung heue:, mai: vungviang dangngeung an koe: tosat pa im: ju pon: mu:, pa naog ngai: ka tokaux kix khawm: plak sivoe mai: khawm: plak khaix heue:. 7 Mai: tosat phaoxka: tix mu: an awm: sivai sangshi:, mai: tosat ra: mu: tix mu: an awm: kawn: moi, mai: tosat loe: mu: tix mu: an, koe: pakngai: awm: pakngai: pui, mai: tosat pon: mu: tix mu: an awm: klang: krih pa po: heue:. 8 Mai: tosat pa im: ju pon: mu: an, koe: pruik tix mu: liah mu: pruik, mai: vungviang mai: plak daux pruik an khankix naog ka ngai: heue:. Mai: kix ang yaox tix laux lee: tix, ca: ah nin: leeing: ngaix leeing: sawm:,

"Simiang Siyiex, Cao: Pa Ting Sibrawm Piang Khawm: uik, pa hoik mawh, mai: pa mawh yamin, mai: pa tag sang hoek tix mawh, mawh pa Singax, Singax, Singax heue:." 9 Mai: yam tosat pa im: ju an khankix yaogyaw min: plakngai: mai: yung: yi:, mai: yaogyaw bwanson: ka Kaw pa ngawm ka piang dangngeung an, pa mawh ka Kaw pa im: ju ku ju leeing: ju leeing: phan:, 10 kuad song: tinga: kaux pon: an khankix goh gup ka sivoe Kaw pa ngawm piang dangngeung an, mai: krub ka Kaw pa im: ju ku ju leeing: ju leeing: phan:, mai: taing mhok khri: kix ka sivoe dangngeung an, ah nin:,

11 "Simiang Siyiex ex eue:, Maix mawh pa keung: tix pon min: plakngai:, mai: pa yung: pa yi:, mai: siawp sibrawm, mawh kheu hoik phan: hoik yuh Maix can ku ceu khawm: uik, mai: kheu khankix hoik mawh, mai: hoik phan: hoik yuh kheu alo Maix heue:."

Simin Ting 5

Phuk lai pa hoik tawk tix nyeep cum: kah aliah mu:

1 Mai: ka daux taix khawn: dawm: Kaw pa ngawm ka piang dangngeung an aux yaox phuk lai pa hoik tiem: lai kah, khawm: plak daux mai: khawm: plak praix, mai: pa hoik tawk tix nyeep ka cum: aliah mu: heue:. 2 Mai: aux yaox kawncau Siyiex pa ting riang tix kaux, pa ah nin: ka lox pa ting pa sinum, "Mawh mawx pa keung: tix paoh ka phuk lai an, mai: teei tix tik ka cum: nawh khankix?" 3 Mai: ang lai koe: tix kaux kawx ka daux meung raoma:, phan: ang mawh nan: ka piang haktiex, phan: ang mawh nan: ka greem: haktiex, pa pon tix paoh ka lai an, phan: ang mawh nan: pa pon tix jhak kah heue:. 4 Mawh kheu ang lai yaox kaw pa keung: tix paoh ka phuk lai an, phan: ang mawh nan: pa keung: tix jhak kah, tix kaux kawx, aux tom: yiem tom: nie heue:. 5 Mai: kuad song: tix kaux ah nin: ka aux, "Paw vi yiem. Jhak heue:, Sivai Sangsi: pa mawh khaing: daux ceucat ceu Yudax, pa mawh Riah Dawit, hoik pex tix paoh ka phuk lai an, mai: ka cum: nawh aliah mu: an heue:." 6 Mai: ka sigreung dangngeung an, mai: ka sigreung tosat pa im: ju pon: mu: an, mai: ka sigreung kuad song: khankix, aux yaox cung Kawn: Yung: tix mu:, awm: pa hoik pah yum kah, pa koe: rung: aliah mu:, mai: ngai: aliah mu:, pa mawh Khwan: Siyiex aliah mu:, pa ploi: hu: ka piang haktiex khawm: uik heue:. 7 Mai: Nawh hoek mai: teei phuk lai an khaing: daux tawm: taix khawn: dawm: Kaw pa ngawm ka piang dangngeung an heue:. 8 Mai: khaix hoik teei Nawh ka phuk lai an, tosat pa im: ju pon: mu: an, mai: kuad song: tinga: kaux pon: an khankix, goh gup ka sivoe Kawn: Yung: an heue:. Mai: kix ku kaux koe: ting: mai: klong: khri: pa naog ka nyawng bhawng:, pa mawh bwan: ceu pa rawg pui pa singax singeh khankix heue:. 9 Mai: kix rhax lox rhax pa khraox, pa ah nin:,

"Maix mawh pa keung: tix teei ka phuk lai an, mai: pa keung: tix paoh ka cum: nawh khankix, mawh kheu hoik pah Maix yum, mai: kheu hoik teei nham: tokaux Maix tix liag ex, pa mawh ceu pui ku ceu, mai: pa mawh pa tang lox sikah ku ceu, mai: pa mawh pui ku ceu, mai: pa mawh pui meung ku meung son Siyiex, 10 mai: hoik yuh tix kieh kix mawh khunhawkham mai: cao: giex kaing: li ka Siyiex ex, mai: kix giex kaing: ka piang haktiex heue:."

Kawncau Siyiex Yawgyaw ka kawn: yung:

11 Mai: aux yaox mai: aux mhong: lox kawncau Siyiex pa haoh pa hun: vungvieang dangngeung an, mai: tosat pa im: ju khankix, mai: kuad song: khankix, mai: kix koe: tix mheen:, tix mheen: bawg, mai: kaing: rheng: bawg kaing: rheng: heue:, 12 mai: kix ah lox pa ting pa sinum ah nin:,

"Kawn: Yung: pa hoik pah yum an mawh pa keung: tix pon siawp sibrawm mai: sinngao, mai: pingnya cuyi, mai: riang rao, mai: pa yung: pa yi:, mai: min: plakngai:, mai: bwanson: heue:." 13 Mai: can pa hoik phan: hoik yuh ku ceu, pa koe: ka daux meung raoma:, mai: ka piang haktiex, mai: ka greem: haktiex, mai: ka piang rawm: sigrit sigra:, mai: aux mhong: can pa koe: ka daux khankix khawm: uik ah nin:,

"Ka Kaw pa ngawm ka piang dangngeung, mai: ka Kawn: Yung:, kieh koe: bwanson:, mai: pa yung: pa yi:, mai: min: plakngai: ku ju leeing: ju leeing: phan: liak." 14 Mai: tosat pa im: ju pon: mu: an kawx, ah "Amen." Mai: kuad song: khankix goh gup mai: krub kah heue:.

Simin Ting 6

Paoh: ka cum: phaoxka: tix mu:

1 Mai: aux yaox yam paoh Kawn: Yung: cum: tix mu: ka daux cum: aliah mu: an, mai: aux mhong: tosat tix mu:, ka daux tosat pa im: ju pon: mu: an, ah nin: ka lox pa awm: lox sinum praix, "Hoek heue:." 2 Mai: aux jhak mai: yaox brung paing tix mu:, mai: kaw pa ngawm ka piang brung an giex ak poh tix mu:, mai: teei tix tawx mhok khri: ka nawh, mai: nawh pex, mai: lih hu: tix pex heue:.

Cum: Ra: mu: tix mu:-Naing sivai

3 Mai: yam paoh Nawh Cao: ka cum: ra: mu: tix mu: an, aux mhong: lox tosat pa im: ju ra: mu: tix mu: ah nin:, "Hoek heue:." 4 Mai: brung tang: mu: tix mu:, pa mawh brung raoh lih hu:, mai: ka kaw pa ngawm ka piang brung an hoik tawx tix kieh nawh teei krax nhim: khaing: haktiex, yuh ka mawx son sang pah pui yum ka paox tix mai: teei tix tawx vaid ting tix kre: ka nawh heue:.

Cum: Loe: mu: tix mu:- -Krax sibhawm: praix

5 Mai: yam paoh Nawh Cao: ka cum: loe: mu: tix mu: an, aux mhong: lox tosat pa im: ju loe: mu: tix mu: ah nin:, "Hoek heue:." Mai: aux jhak mai: yaox brung lung tix mu: heue:. Mai: kaw pa ngawm ka piang brung an koe: jiang ka daux tawm: taix nawh tix mu: heue:. 6 Mai: aux mhong:, awm: mawh lox ka sigreung tosat pa im: ju pon: mu: an ah nin:, "Denari tix plah pon gaox nghoxca tix diag, mai: denari tix plah pon gaox nghoxca lang: sidax loe: diag, mai: maix paw chuh paw yuh laux ka rawm: bee mai: ka rawm: plix siiet heue:."

Cum: Pon: mu: tix mu:- -Krax yum

7 Mai: yam paoh Nawh Cao: ka cum: pon: mu: tix mu: an, aux mhong: lox tosat pa im: ju pon: mu: tix mu: ah nin:, "Hoek heue:." 8 Mai: aux jhak mai: yaox brung pau: tix mu:, mai: ceukaux kaw pa ngawm ka piang brung an, mawh Pa Yum, mai: meung yum hawt hu: tau mai: nawh heue:. Mai: hoik tawx sibrawm ka kix tix ting piang haktiex pon: son tix son, son sang teei yum ka vaid, mai: ka sibhawm: praix, mai: ka krax yum, mai: ka totiag totu haktiex khankix heue:.

Cum: Phwan: mu: tix mu:- -Pa tawx ju son gumlox Siyiex

9 Mai: yam paoh Nawh Cao: ka cum: phwan: mu: tix mu: an, aux yaox ju kix pa hoik teei yum kheu gumlox Siyiex, mai: kheu mhai: sakse: pa kham: kix, ka greem: khu: dee tan heue:. 10 Mai: kix kok yo lox pa ting pa sinum, ah nin:, "Simiang pa giex kaing:, pa singax singeh, pa mawh pa meh eue:, Maix tag ang prawng ang ciyang mai: ang pawk bix ka son nham: ex, ka kix pa ot ka piang haktiex khankix miex grheung:. 11 Mai: teei tix tawx kraung ceep pa paing ka kix ku kaux heue:. Mai: hoik krai ka kix, grawng: tag sang baox laux lee: kix son bawg yam ceeix ceeix, tom: paox siliex kix mai: puxaik kix khankix, pa tag sang teei yum, awm: nang: pa hoik teei kix yum khankix, tag sang grum naog kah heue:.

Cum: Liah mu: tix mu:- -Krax pa lhat ka bawg yam ciyang

12 Mai: aux yaox yam paoh Nawh Cao: ka cum: liah mu: tix mu: an, mai: lih tok kla: reem ting, mai: singaix lih lung awm: man: pa taing: ka hauk, mai: khix khawm: mu: lih mawh awm: nham: heue:. 13 Mai: simuing: raoma: khankix cod ka piang haktiex, awm: khaox ruh kieh plix pa ang nyang teem cia, yam vuk vied bhaung: ting kah nawh heue:. 14 Mai: teei tix gah raoma: hu:, awm: yam pua: ka lai, mai: gah gawng ku gawng, mai: klawn: tiex ku klawn: khaing: dee koe: kix heue:. 15 Mai: khunhawkham haktiex khankix, mai: simiang khankix, mai: cao: giex kaing: naing pa ting khankix, mai: pui mi pui koe: khankix, mai: pui ting riang ting rao khankix, mai: siliex ku kaux, mai: pui ploi: ku kaux, mox tokaux kix ka daux daux rang:, mai: ka rang: pa koe: ka gawng khankix heue:. 16 Mai: kix ah nin: ka gawng mai: ka rang: khankix, "Grhup ka piang ex, mai: mox ex khaing: pakngai: Kaw pa ngawm ka piang dangngeung an, mai: khaing: pa songrhawm: songrhi: Kawn: Yung: liak." 17 Grawh grawng: nawh singaix pa ting pa songrhawm: Kiex hoik hoek. Mai: pui mawx pon tix cung kah?

Simin Ting 7

Grawng: tang: ceu

1 Khaix ceu an aux yaox kawncau Siyiex pon: kaux cung ka daog haktiex pon: daog, mai: giex ka bhaung: haktiex pon: mu:, yuh ka mawx son ang bhaung: sang phlu: ka piang haktiex, mai: ka piang rawm: sigrit sigra:, mai: ka piang khaox khankix tix gawng: kawx heue:. 2 Mai: aux yaox kawncau Siyiex tang: kaux tix kaux haok khaing: plak lih singaix, pa koe: cum: Siyiex pa im: ju, mai: nawh yo lox ting lox sinum ka kawncau Siyiex pon: kaux, pa hoik tawx akhwang: ka kix tix sang chuh sang yuh laux ka haktiex mai: ka rawm: sigrit sigra:, 3 ah nin:, "Paw chuh paw yuh laux ka haktiex. mai: ka rawm: sigrit sigra:, mai: ka khaox khankix, ka: ang ex nyang bax tawk cum: ka dong: re: siliex Siyiex ex khankix heue:."

Pui pa deuk ka daux pui Isarilax

4 Mai: aux mhong: hoik koe: kix miex kaux pa hoik tawk cum: kah, ka daux ceu pui Isarilax khawm: uik koe: tix sien: mai: pon: mheen: mai: pon: rheng: heue:. 5 Ka daux ceu Yudax hoik tawk cum: kah tix mheen: mai: ra: rheng:. Ka daux ceu Ruben tix mheen: mai: ra: rheng:. Ka daux ceu Gat tix mheen: mai: ra: rheng:. 6 Ka daux ceu Asax tix mheen: mai: ra: rheng:. Ka daux ceu Naptalix tix mheen: mai: ra: rheng:. Ka daux ceu Manasie: tix mheen: mai: ra: rheng:. 7 Ka daux ceu Simeon tix mheen: mai: ra: rheng:. Ka daux ceu Lewix tix mheen: mai: ra: rheng:. Ka daux ceu Isakha tix mheen: mai: ra: rheng:. 8 Ka daux ceu Zebulun tix mheen: mai: ra: rheng:. Ka daux ceu Yosiep tix mheen: mai: ra: rheng:. Mai: ka daux ceu Benyamin hoik tawk cum: kah tix mheen: mai: ra: rheng: heue:.

Pa ang lai uik simin pui pa lih hoek khaing: krax kha:

9 Khaix ceu an khankix aux jhak mai: yaox, pui pa kied haoh pa kied hun:, pa ang pui tix kaux kawx pon tix simin kah, khaing: pui meung ku meung, mai: khaing: ceu pui ku ceu, mai: khaing: pui ku ceu, mai: khaing: pui pa tang: lox sikah ku ceu, pa hoik ceep ka kraung ceep pa paing, mai: giex ka lhax khaox jhie: yaong: ka daux tawm: taix kix, mai: cung ka sivoe dangngeung an, mai: ka sivoe Kawn: Yung: heue:. 10 Mai: kix yo lox ting lox sinum ah nin:,

391"Kieh Siyiex ex pa ngawm ka piang dangngeung, mai: Kawn: Yung: koe: pa taoh liak." 11 Mai: kawncau Siyiex khawm: uik pa cung ka vungvieang dangngeung, mai: kuad song: khankix, mai: tosat pa im: ju pon: mu: an, goh gup ka sivoe dangngeung, mai: krub ka Siyiex 12 ah nin:,

"Amen. Kieh Siyiex ex koe: bwanson:, mai: min: plakngai:, mai: pingnya cuyi, mai: pa yaogyaw bwanson:, mai: pa yung: pa yi:, mai: siawp sibrawm, mai: riang rao, ku ju leeing: ju leeing: phan: liak. Amen." 13 Mai: kuad song: khankix tix kaux chawk ah nin: ka aux, "Pui in kix pa ceep ka kraung ceep pa paing, mawh pa yuh ka mawx, mai: kix kaoh khaing: dee mawx?" 14 Mai: aux deeh ah nin: ka nawh, "Simiang aux eue:, maix tawng heue:." Mai: nawh baox ah nin: ka aux, "Pui in kix mawh kix pa hoik daoh khaing: daux krax kharhawm: kharhi: pa ting an, mai: kix hoik sigrhah kraung ceep kix, mai: kieh paing ka daux nham: Kawn: Yung: heue:. 15 Mawh kheu nan: kix tom: yaox tix ot ka sivoe dangngeung Siyiex. Mai: kix yuh kaing krub ka Nawh Cao: ka daux nyiex bwan: Nawh leeing: ngaix leeing: sawm: heue:. Mai: Kaw pa ngawm ka piang dangngeung, tag sang lhop nyiex gox bwan: man: ka piang kix heue:. 16 Kix tag ang baox lai deeh cairhawm: khaix, mai: tag ang baox lai deeh sang nyaux nie rawm: khaix. Viang singaix kawx tag ang jhan: ka piang kix, mai: kix tag ang yaox tix kham: ceu pa hax pa siaoh tix ceu kawx heue:. 17 Grawh grawng: nawh Kawn: Yung: pa ot ka sigreung dangngeung, tag mawh Cao: Liang kix, mai: thong: kix hu: ka rawm: keut dee lih rawm: im: ju heue:. Mai: Siyiex tag sang awt rawm: ngai: kix khawm: uik khaing: ngai: kix heue:."

Simin Ting 8

Cum: Aliah mu: timu:- -Teet tawng Aliah mu:

1 Mai: yam paoh Nawh Cao: ka cum: aliah mu: tix mu: an, yien: yawg tix ka daux meung raoma: khaix been tix plak nari heue:. 2 Mai: aux yaox kawncau Siyiex aliah kaux pa cung ka sivoe Siyiex, mai: tawx teet tawng aliah mu: ka kix heue:.

3 Mai: kawncau Siyiex tang: kaux tix kaux hoek mai: cung liep khu: dee tan, pa koe: klong: khri: dee gleeing nyawng bhawng: heue:. Mai: tawx nyawng bhawng: ka nawh tom: nie, son sang baox tiien thie: nawh ka bwan: pa rawg pui singax singeh khankix, ka piang khu: khri: dee tan, pa koe: sivoe dangngeung an heue:. 4 Mai: taox nyawng bhawng:, tau mai: khawm: bwan: pa rawg pui singax singeh khankix, haok hu: ka sivoe Siyiex, khaing: daux tawm: taix kawncau Siyiex an heue:. 5 Mai: kawncau Siyiex an teei klong: dee gleeing nyawng bhawng: an, mai: nawh sau: ngu tom: naog ka klong: an khaing: khu: dee tan, mai: taing nawh ka piang haktiex, mai: lih mawh pa sinum praix, mai: lox sikah, mai: pa tuh sah, mai: pa tok kla: reem heue:.

6 Mai: kawncau Siyiex aliah kaux pa koe: teet tawng aliah mu: an, cox rien tokaux tix son sang phlu: heue:.

7 Mai: yam phlu: teet tawng phaoxka: tix kaux, lih mawh pre: mai: ngu, pa hoik klao: tau mai: nham:, mai: taing khankix ka piang haktiex, mai: haktiex loe: son tix son gleeing uik, mai: khaox loe: son tix son gleeing uik, mai: can rib pa klai khawm: uik gleeing uik heue:.

8 Mai: kawncau Siyiex ra: kaux tix kaux phlu: teet tawng, mai: teei ceu pa awm: gawng ting pa kawn: gleeing ka ngu, taing sau: daux rawm: sigrit sigra:, mai: rawm: sigrit sigra: loe: son tix son lih mawh nham: heue:. 9 Mai: can ceu pa koe: ka daux rawm: siigrit sigra: loe: son tix son yum heue:. Mai: reu khankix loe: son tix son kawx laux leeing: heue:.

10 Mai: kawncau Siyiex loe: kaux tix kaux phlu: teet tawng, mai: simuing: pa kied ting tix mu: rau khaing: raoma:, pa awm: rup ngu, mai: nawh cod ka piang rawm: klawng: ting khankix loe: son tix son, mai: ka piang rawm: keut khankix heue:. 11 Mai: ceukaux simuing: an mawh, nya mak liang:392 , mai: rawm: loe: son tix son lih mawh nya mak liang: , mai: pui yum tom: nie kheu rawm: khankix, mawh kheu hoik yuh tix kieh kix song: heue:.

12 Mai: kawncau Siyiex pon: kaux tix kaux phlu: teet tawng, mai: yuh laux ka singaix loe: son tix son, mai: ka khix loe: son tix son, mai: ka simuing: khankix loe: son tix son, yuh ka mawx son sang kieh khankix loe: son tix son vhaik hu:, yuh ka mawx son ang pon singaix sang jhan: riang, been singaix loe: son tix son, mai: khawm: pon sawm: kawx mawh nang: nan: heue:.

13 Mai: aux yaox, mai: aux mhong:, pa po: klang: krih ka sigreung raoma:, pa ah nin: ka lox pa ting pa Sinum, "Kix pa ot piang haktiex, tag kharhawm: kharhi:, tag kharhawm: kharhi:, tag kharhawm: kharhi:, kheu lox teet tawng kawncau Siyiex loe: kaux, pa kawn: deuk pa dex sang phlu: heue:."

Simin Ting 9

Teet tawng Phwan: mu: timu:-Paoh: Daux pa ang koe: dee die

1 Mai: kawncau Siyiex phwan: kaux tix kaux phlu: teet tawng, mai: aux yaox simuing: tix mu: pa hoik cod ka piang haktiex khaing: raoma: heue:. Mai: tawx jiak saw daux pa ang koe: dee die ka nawh heue:. 2 Mai: nawh paoh daux pa ang koe: dee die an, mai: taox lih khaing: ka daux daux an. Awm: taox pa lih khaing: daux daux glah ngu pa ting heue:. Mai: kheu taox pa lih khaing: daux an, singaix mai: bhawm: tom: vhaik hu: heue:. 3 Mai: sido khankix lih hu: ka piang haktiex khaing: daux taox: ngu an, mai: hoik tawx siawp sibrawm ka kix, awm: siawp sibrawm pa koe: tamtim: ka piang haktiex khankix heue:. 4 Mai: hoik tawm: lox ka kix son ang kix sang chuh sang yuh laux ka rib haktiex, mai: ka ceu pa klai tix ceu kawx, mai: ka khaox tix gawng: kawx, viang mawh nan: son sang chuh sang yuh saux ngie ka pui khankix pa ang koe: khaix tawk cum: Siyiex ka dong: re: kix heue:. 5 Viang mawh nan: ang lai tawx akhwang: ka kix son sang teei pui khankix yum, tawx akhwang: son sang kieh kix kharhawm: kharhi: been phwan: khix khaing: heue:. Mai: ceu pa kharhawm: kharhi: kix, awm: pa kharhawm: kharhi: yam heeik tamtim: ka pui heue:. 6 Mai: ka daux bawg yam singaix an khankix, pui khankix tag sawg tix yum, mai: pon ang doh lai yaox kah. Mai: kix simie tix yum kawx, krax yum tag to: khaing: kix heue:. 7 Mai: grang pakpeung sido khankix, awm: brung pa hoik cox rien son sang yuh naing heue:. Mai: ka piang kaing: kix awm: pa ceep mhok khri:, mai: pakngai: kix awm: pakngai: kawn: pui heue:. 8 Mai: kix koe: hauk kaing: pa awm: hauk kaing: bon:, mai: rhang: kix awm: rhang: sivai sangsi: heue:. 9 Mai: kix koe: kraung naing pa tie naok, pa awm: kraung naing pa tie naok pa yuh ka rhiem: heue:. Mai: lox luah pruik kix, awm: lox luah ling:, brung tom: nie pa nied tix to: hu: dee yuh naing heue:. 10 Mai: kix koe: sidax pa awm: sidax tamtim:, mai: nyeeig heue:. Mai: ka daux sidax kix khankix, koe: sibrawm kix tix chuh tix yuh saux ka kawn: pui been phwan: khix heue:. 11 Kix koe: simiang khunhawkham ka piang kix pa mawh kawncau Siyiex daux pa ang koe: dee die. Ceukaux nawh ka daux lox Hebrie mawh Abatdon, mai: ka daux lox Helasax nawh koe: ceukaux Apawlion heue:.

12 Pa kharhawm: kharhi: phaoxka: tix ceu hoik luan. Jhak heue:, tag kawn: sang hoek ceu pa kharhawm: kharhi: ra: ceu khaix heue:.

Teet tawng Liah mu: timu:-Kru naing pa hoek khaing: plak lih Singaix

13 Mai: kawncau Siyiex liah kaux tix kaux phlu: teet tawng, mai: aux mhong: lox pa lih khaing: rung: pon: mu: ka khu: khri: dee tan, pa koe: sivoe Siyiex, 14 pa ah nin: ka kawncau Siyiex liah kaux tix kaux pa koe: teet tawng an, "Ploi: kawncau Siyiex pon: kaux pa hoik phyawk ka rawm: klawng: ting Yufrethix awawx." 15 Mai: ploi: ka kawncau Siyiex pon: kaux an, pa hoik cox rien tix son bawg yam nari an, mai: singaix an, mai: khix an, mai: num an, son sang teei kix yum ka kawn: pui loe: son tix son heue:. 16 Mai: kru naing brug brung khankix koe: ra: yieh lan heue:. Aux hoik mhong: grawng: koe: kix miex kaux heue:. 17 Mai: aux yaox brung khankix mai: pui pa brug ka piang kix, ka daux riang susai yuh nin:, kix pa brug khankix koe: kraung naing pa tie naok, pa raoh awm: ngu, mai: pa klai lung awm: simaox Jasen, mai: pa lheung: awm: mhat heue:. Mai: kaing: brung khankix awm: kaing: sivai sangsi:, mai: rao ngu, mai: taox ngu, mai: mhat lih khaing: daux jheeh kix heue:. 18 Kheu preng in loe: ceu, pa mawh rao ngu, mai: taox ngu, mai: mhat, pa lih khaing: daux jheeh kix, teei pui loe: son tix son yum kah heue:. 19 Grawh grawng: nawh siawp sibrawm brung khankix koe: ka daux jheeh kix, mai: ka daux sidax kix, mawh kheu sidax kix awm: siuing:, mai: koe: kaing: kah heue:. Mai: kix teei sidax tix, tix chuh tix yuh pui saux heue:. 20 Mai: kawn: pui pa deuk khankix pa ang yum ka preng in loe: ceu, ang lai doh keud doh sawn: ka phimap, kaing ceu pa hoik yuh kix ka taix tix, yuh ka mawx son ang kix sang krub ka phicaox 393, mai: ka rieang rao khankix, pa yuh ka khri:, mai: ka mau, mai: ka tawng lheung:, mai: ka simaox, mai: ka khaox, pa mawh pa ang chix yaox, chix mhong:, mai: pa ang chix hu: heue:. 21 Mai: kix ang lai doh keud doh sawn: ka phimap, pa teei kix pui yum, mai: ka pa yuh kix phicaox mai: pa ploi: sat, mai: ka ceu pa phit pa vao kix, mai: ka ceu pa briex pa lak kix, khankix heue:.

Simin Ting 10

Kawncau Siyiex mai: phuk lai iak tix pheen:

1 Mai: Aux yaox kawncau Siyiex tang: kaux pa ting riang tix kaux lih hoek khaing: raoma:, pa hoik ceep ka paiawm: tix mu:, mai: siyawng mukheu koe: ka piang kaing: nawh, mai: pakngai: nawh awm: mawh singaix, mai: caong nawh awm: rong: ngu heue:. 2 Mai: nawh koe: phuk lai iak pa hoik plak tix pheen: ka daux tawm: taix nawh, mai: nawh deuh caong khawn: dawm: nawh ka piang rawm: sigrit sigra:, mai: caong khawn: gwiex nawh ka piang haktiex heue:. 3 Mai: nawh yo lox pa ting pa sinum, awm: lox graox sivai sangsi:, mai: yam yo nawh, pa sinum praix aliah mu:, ah lox kix heue:. 4 Mai: yam pa sinum praix aliah mu: an ah lox kix, aux dex sang tiem:, mai: aux mhong: lox pa kaoh khaing: raoma: ah nin:, "Tawk cum: tix nyeep ka lox pa krai pa sinum praix aliah mu: an, mai: paw vi tiem: grawng: khankix awawx." 5 Mai: kawncau Siyiex pa hoik yaox aux cung ka piang rawm: sigrit sigra: mai: ka piang haktiex an, yaog taix khawn: dawm: tix ka raoma:, 6 mai: tiex tu ka greem: Kaw pa im: ju ku ju leeing: ju leeing: phan:, pa mawh Kaw pa hoik phan: hoik yuh raoma:, mai: can pa koe: ka daux nawh khankix, mai: haktiex mai: can pa koe: ka daux nawh khankix, mai: rawm: sigrit sigra: mai: can pa koe: ka daux nawh khankix, ah nin:, "Bawg yam tag ang lai baox koe:, 7 viang mawh kawx nan: ka daux bawg yam singaix lox kawncau Siyiex aliah kaux tix kaux an khankix, yam dex sang phlu: nawh teet tawng, yam an, ceu pa raux pa mox Siyiex, ceu pa khaw: mai: lox pa mhawm: pa mhiem:, pa hoik krai Nawh Cao: ka siliex Nawh pa mawh cao: jhai: khankix, tag grum hoik heue:." 8 Mai: lox pa mhong: aux khaing: raoma: an, aux mhong: baox sikah mai: aux, ah nin:, "Hu: teei phuk lai iak pa hoik plak, pa koe: ka daux tawm: taix kawncau Siyiex pa cung ka piang rawm: sigrit sigra: mai: ka piang haktiex an awawx." 9 Mai: aux hu: ka kawncau Siyiex an mai: nhie: nawh tawx phuk lai iak an ka aux heue:. Mai: nawh ah nin: ka aux, "Teei nawh, mai: ih khawm: uik awawx. Mai: nawh tag kieh vaig maix song:, viang mawh nan: ka daux jheeh maix, nawh tag tie: awm: rawm: hia:." 10 Mai: aux teei phuk lai iak an khaing: daux tawm: taix kawncau Siyiex an, mai: ih nawh khawm: uik, mai: ka daux jheeh aux nawh tie: awm: rawm: hia:, mai: khaix hoik ih aux nawh, kieh vaig aux song: kah heue:. 11 Mai: kix ah nin: ka aux "Maix tag baox deeh krai lox jhai: grawh grawng: ceu pui tom: nie, mai: pui meung tom: nie, mai: pui pa tang: lox sikah tom: nie, mai: simiang khunhawkham tom: nie heue:."

Simin Ting 11

Pui pa kham: mhai: sakse: Ra: kaux

1 Mai: teei tix tawx gawng: priem tix gawng:, pa awm: khaox gix ka aux, mai: ah lox yuh nin:, "Kaoh, mai: tiag tix yaox ka nyiex bwan: Siyiex, mai: ka khu: dee tan, mai: ka kix pa krub ka daux dee an. 2 Viang mawh nan: brawk pa koe: plak praix nyiex bwan:, grham: kah mai: paw vi tiag heue:. Grawh grawng: nawh hoik tawx nawh ka pui tang: ceu tang: cat, mai: kix tag dig veng pa singax singeh greem: caong tix tipon: ra: khix (42) heue:." 3 Mai: Aux tag tawx sibrawm ka cao: pa kham: mhai: sakse: Aux ra: kaux, mai: kiex tag ceep kraung man: pa taing ka hauk, mai: krai lox jhai: been tix rheng: mai: ra: yieh, mai: tigliah (1260) singaix heue:. 4 In kiex mawh khaox Sanlun ra: gawng:, mai: jawk ten: ra: mu:, pa jung sivoe Simiang Cao: haktiex heue:. 5 Mai: phan: pui tix kaux kaux simie tix chuh tix yuh kiex saux, ngu lih khaing: daux jheeh kiex mai: gleeing ka pui pa koeng ka kiex heue:. Mai: phan: pui tix kaux kaux simie tix chuh tix yuh kiex saux, nawh tag lai yaox tix yum ka pa yuh nan: heue:. 6 In kiex koe: siawp sibrawm tix nyeep ka raoma:, son ang lhiex sang lih, ka daux been glang: singaix yam krai kiex lox jhai: heue:. Mai: kiex koe: siawp sibrawm ka piang rawm: khankix, tix sang loh tix kieh kix mawh nham:, mai: son sang kieh preng ku ceu hoek ka haktiex, awm: pa simie kiex miex bawg ang ah heue:. 7 Mai: khaix hoik sidah kham: kiex mhai: sakse:, totiag tix mu: pa lih hoek khaing: daux daux pa ang koe: dee die, tag yuh naing ka kiex, mai: pex kiex, mai: teei kiex yum heue:. 8 Mai: tokaux yum kiex tag noi: ka daux krax veng ting an, pa kok hawt khwan: mawh Sawdom mai: Ejiptux, pa mawh dee hoik teei Simiang kiex yum ka piang khaoxlhak heue:. 9 Mai: pui khaing: ka daux pui ku ceu, mai: ceu pui ku ceu, mai: pui pa tang: lox sikah ku ceu, mai: pui meung ku ceu, jhak ka tokaux pa yum kiex been loe: singaix plak, mai: ang cu tix kieh sipaung: tokaux yum kiex ka daux simeeig heue:. 10 Mai: kix pa ot ka piang haktiex gauxrhawm: ka grawng: kiex, mai: yuh krax gauxrhawm:, mai: kix ralai sipaox khawngphak ka paox tix, mawh kheu cao: jhai: in ra: kaux hoik laklheut ka kix pa ot ka piang haktiex heue:. 11 Mai: khaix loe: singaix plak an, bhawm: pa im: ju pa kaoh khaing: Siyiex laig ka daux kiex, mai: kiex cung ka caong tix heue:. Mai: kix pa yaox ka kiex khankix kied lhat kied graung kah heue:. 12 Mai: kix mhong: lox pa ting pa sinum khaing: raoma: pa ah nin: ka kiex, "Haok tin: heue:." Mai: kiex haok hu: ka daux meung raoma:, ka daux paiawm:, mai: pui pa koeng ka kiex khankix kawx yaox kiex heue:. 13 Mai: ka daux bawg yam nari an tok kla: reem ting, mai: veng kao: son tix son grhup kah heue:, mai: ka pa tok kla: reem an pui yum aliah rheng:, mai: pui pa deuk khankix kied lhat kah sigrien sigre, mai: yaogyaw ka Siyiex meung raoma: heue:.

14 Ceu pa kharhawm: ra: ceu tix ceu hoik luan heue:. Jhak heue:, ceu pa kharhawm: loe: ceu tix ceu tag khran: hoek heue:.

Teet tawng Aliah mu: tix mu:-Meung leeing: ju cie Cao: Khrit

15 Mai: kawncau Siyiex aliah kaux tix kaux phlu: teet tawng, mai: lih koe: lox pa ting pa sinum ka daux raoma:, pa ah nin:,

"MEUNG HAKTIEX IN HOIK LIH MAWH MEUNG SIMIANG EX, MAI: MEUNG KHRIT CIE NAWH CAO:, MAI: NAWH CAO: TAG SANG GIEX KAING: KU JU LEEING: JU LEEING: PHAN: HEUE:." 16 Mai: kuad song: tinga: kaux pon: an pa ngawm ka piang dangngeung kix ka sivoe Siyiex, goh gup mai: krub ka Siyiex, 17 ah nin:,

"Simiang Siyiex Cao: Pa Ting Sibrawm Piang Khawm: Uik, pa mawh yamin, mai: pa hoik mawh eue:, ex yaogyaw bwanson: Maix, mawh kheu hoik teei Maix siawp sibrawm pa ting Maix, mai: hoik giex kaing: heue:. 18 Mai: ceu pui khankix hoik songrhawm: songrhi:, mai: krax songrhawm: songrhi: Maix hoik hoek heue:, mai: bawg yam pa sang prawng sang ciyang ka pui pa hoik yum, mai: bawg yam pa sang tawx bwanson: khawngphak ka siliex Maix cao: jhai: khankix, mai: ka pui pa singax singeh khankix, mai: ka kix pa lhat ka ceukaux Maix, khawm: pa iak pa ting khankix, mai: son sang yuh laux ka kix, pa yuh laux ka haktiex khankix heue:." 19 Mai: paoh ka nyiex bwan: Siyiex pa koe: ka daux meung raoma:, mai: pon tix yaox ka khwi: sijax mukheu Nawh Cao:, ka daux nyiex bwan: Nawh heue:. Mai: khaix an lih mawh pa tuh sah, mai: lox sikah mai: lox pa sinum praix, mai: pa tok kla: reem, mai: lih pre: ting heue:.

Simin Ting 12

Yuh naing ka phicaox

1 Mai: yaox mhai: pa ting ka raoma: tix ceu, pa mawh bon: tix kaux pa ceep ka singaix, mai: khix koe: ka greem: caong nawh, mai: koe: mhok khri: pa koe: simuing: kao: mu: ra: ka piang kaing: nawh heue:. 2 Mai: bon: an koe: kaux, mai: riag kheu pa kharhawm: kharhi: pa saux yha:, mai: pa keh heue:. 3 Mai: yaox mhai: tang: ceu tix ceu ka raoma:, mai: jhak heue:, koe: siyawng ting pa raoh, pa koe: kaing: aliah mu:, mai: rung: kao: mu:, mai: ka piang kaing: nawh khankix koe: mhok khri: aliah mu: heue:. 4 Mai: sidax nawh reu: ka simuing: raoma: loe: son tix son, mai: taing kix ka piang haktiex heue:. Mai: siyawng an cung sivoe bon: pa dex sang keh an, yuh ka mawx yam keh nawh kawn:, nawh tag pon tix ih kawn:, bon: an heue:. 5 Mai: nawh keh kawn: simex mhaing:, pa mawh Kaw pa tag sang giex kaing: ka ceu pui khawm: uik ka khaoxgix rhiem:, mai: kliien Kawn: kiex haok hu: ka Siyiex, mai: ka dangngeung Nawh Cao: heue:. 6 Mai: bon: an to: hu: daux tiag daux tu, ka dee hoik cox Siyiex son kiex, yuh ka mawx son sang kia: ngien kiex tan: been tix rheng: mai: ra: yieh mai: tigliah singaix (1260) heue:.

7 Mai: lih koe: naing ka daux meung raoma:. Mikkhelax mai: kawncau Siyiex nawh khankix, hu: yuh naing ka siyawng an, mai: siyawng an mai: kawncau nawh khankix yuh naing, 8 mai: ang kix pex, mai: ang lai baox koe: dee ot dee koe: kix ka daux meung raoma: heue:. 9 Mai: taing lih ka siyawng ting an, pa mawh siuing: prim: dix, kaw pa kok mawh Phicaox mai: Satan, pa mawh cao: pa pie lhen: ka beu: haktiex khawm: uik heue:. Hoik taing nawh lih ka piang haktiex, mai: kawncau nawh khankix kawx hoik taing lih tau mai: nawh heue:. 10 Mai: aux mhong: lox pa ting pa sinum ka daux meung raoma:, pa ah nin:,

"Yam in uik hoek krax taoh, mai: siawp sibrawm, mai: meung Siyiex ex, mai: sibrawm Khrit cie Nawh heue:. Grawh grawng: nawh, cao: pa deuh phimap ka puxaik ex khankix, ka sivoe Siyiex ex, leeing: ngaix leeing: sawm:, hoik taing lih heue:. 11 Mai: kix hoik pex ka nawh kheu nham: Kawn: Yung:, mai: kheu lox pa kham: mhai: sakse: kix heue:. Mai: kix ang lhawk ka ju tix, viang sidah yaox tix yum kawx heue:. 12 Mawh kheu nan:, raoma: khankix eue:, gauxrhawm: heue:. Haktiex mai: rawm: sigrit sigra: koe: krax kharhawm: kharhi:, mawh kheu phicaox hoik viex krax pa ting songrhawm: songrhi: mai: lih hu: ka pex, kheu hoik tawng nawh grawng: koe: tix bawg yam ceeix khaing: heue:.'

13 Mai: yam yaox siyawng an grawng: hoik taing nawh lih ka haktiex, nawh tuktiak tukte: ka bon: pa hoik keh kawn: simex an heue:. 14 Mai: teei tix tawx pruik klang: krih ting an ra: khawn: ka bon: an, son sang po: hu: kiex ka daux tiag daux tu, ka dee ot kiex, dee sang kia: ngien ka kiex been tix bawg yam, mai: ra: bawg yam, mai: tix plak bawg yam, khaing: pakngai: siuing: an heue:. 15 Mai: siuing: an prauk rawm: lih khaing: daux jheeh nawh, hawt khaix bon: an, awm: rawm: klawng: ting, yuh ka mawx son sang kieh nawh rawm: an sibloe: kiex hu: heue:. 16 Mai: haktiex teem: ka bon: an, mai: ang: jheeh tix mai: bleet ka rawm: klawng: ting an pa hoik prauk siyawng an lih khaing: daux jheeh tix heue:. 17 Mai: siyawng an songrhawm: songrhi: ka bon: an, mai: lih hu: tix sang yuh naing ka simie ceucat bon: an pa kawn: deuk khankix, pa kawn: priex tix hawt ka lox tawm: jhawm: krai Siyiex, mai: pa giex ka mhai: sakse: Yesux.

Simin Ting 13

Totiag pa lih hoek khaing: daux rawm: sigrit sigra:

1 Mai: nawh cung ka piang pak mhaik rawm: sigrit sigra: heue:. mai: aux yaox totiag tix mu: lih khaing: daux rawm: sigrit sigra:, pa koe: kaing: aliah mu:, mai: rung: kao: mu:, mai: ka piang rung: nawh khankix koe: mhok khri: kao: mu:, mai: ka piang kaing: nawh khankix koe: ceukaux ceu pa sa pa lao ka Siyiex khankix heue:. 2 Mai: totiag pa yaox aux an awm: sivai simuing:, mai: caong nawh awm: caong krih, mai: jheeh nawh awm: jheeh sivai sangsi: heue:. Mai: siyawng an tawx siawp sibrawm tix, mai: dangngeung tix, mai: sibrawm giex kaing: tix, ka totiag an heue:. 3 Mai: aux yaox kaing: nawh tix mu: pa awm: pa hoik pah yum kah, mai: hoik kieh rhoi: khaix dee hoik pah nawh an moi: heue:. Mai: pui haktiex khawm: uik daox deng: kah, mai: hawt khaix totiag an heue:. 4 Mai: kix krub ka siyawng an, mawh kheu hoik tawx nawh sibrawm giex kaing: tix ka totiag an heue:. Mai: kix krub ka totiag an ah nin:, "Mawh mawx pa awm: ka totiag in? Mai: mawh mawx pa chix yuh naing ka nawh?" 5 Mai: hoik tawx jheeh ka nawh, pa ah ceu pa ting pa lhaong:, mai: lox sa lox lao ka Siyiex khankix heue:. Mai: hoik tawx sibrawm tix giex kaing: ka nawh been tix pon: ra: khix (42) heue:. 6 Mai: nawh ang: jheeh tix son sang ah lox sa lox lao ka Siyiex, tix sang sa lao ka ceukaux Nawh Cao:, mai: ka nyiex gox bwan: man: Nawh Cao:, pa mawh kix pa ot ka daux meung raoma: heue:. 7 Mai: tawx akhwang: ka nawh tix sang yuh naing ka pui pa singax singeh khankix, mai: tix sang pex kix heue:. Mai: hoik tawx sibrawm tix giex kaing: ka piang ceu pui ku ceu, mai: pui ku ceu, mai: pui pa tang: lox sikah ku ceu, mai: pui meung ku meung, ka nawh heue:. 8 Mai: can pui pa ot ka piang haktiex khawm: uik tag sang krub ka nawh, pa mawh can pa ang lai tiem: tix deuh ka ceukaux kix tom: yam jah tix kaw: haktiex, ka daux phuk lai pa im: ju, cie Kawn: Yung: pa hoik pah yum heue:. 9 Phan: pui tix kaux kaux koe: yhaok, kieh nawh mhong: heue:. 10 Phan: pui tix kaux kaux mawh pa hoik laung ka pui, nawh tag laig ka daux pa laung heue:. Phan: pui tix kaux kaux teei pui yum ka vaid, tag lai teei nawh yum ka vaid heue:. Mawh ka grawng: in heue:, pa pui pa singax singeh khankix gun yeung mai: koe: krax yumrhawm:.

Totiag pa lih hoek khaing: daux haktiex

11 Mai: Aux yaox totiag tang: mu: pa lih hoek khaing: daux haktiex, mai: nawh koe: rung: ra: mu: pa awm: rung: kawn: yung:, mai: lox sikah nawh awm: siyawng heue:. 12 Mai: nawh shiao ka sibrawm pa giex kaing: totiag phaoxka: an tix mu: khawm: uik, ka sivoe ngai: nawh. Mai: nawh yuh tix kieh haktiex, mai: kix pa ot ka daux haktiex khankix, krub ka totiag phaoxka: an tix mu:, pa hoik kieh rhoi: khaix dee hoik pah nawh moi: heue:. 13 Mai: nawh yuh mhai: pa daox pa am: pa kied ting khankix, tom: sidah kieh nawh ngu lih khaing: raoma: ka piang haktiex, ka sivoe ngai: kawn: pui heue:. 14 Mai: nawh pie lhen: ka kix pa ot ka piang haktiex, ka mhai: pa daox pa am:, pa hoik tawx tix kieh nawh yuh sivoe ngai: totiag phaoxka: an, mai: nawh nhie: kix pa ot ka piang haktiex khankix yuh rieang rao totiag pa koe: rhoi: khaix dee hoik mug ka vaid mai: pa im: an heue:. 15 Mai: hoik tawx sibrawm ka nawh tix tawx ju ka rieang rao totiag an, son sang chix sikah rieang rao totiag an, mai: kieh teei yum ka can kix pa ang krub ka rieang rao totiag tix heue:. 16 Mai: ka khawm: uik, can pa iak, mai: pa ting, mai: pa mi pa koe:, mai: pa hot pa sibhawm:, mai: pa ploi:, mai: pa mawh siliex, khankix, nawh kieh sau: mhai: ka taix khawn: dawm: kix, phan: ang mawh nan: ka dong: re: kix, 17 mai: yuh ka mawx son ang pui tix kaux kawx sang pon tix liag, phan: ang mawh nan: sang pon tix coh, lheu: khaing: kaw pa hoik koe: mhai: an, pa mawh ceukaux totiag an, phan: ang mawh nan: nambad ceukaux nawh heue:. 18 Koe: pingnya cuyi ka in heue:. Kaw pa koe: krax tawng krax yung, kieh nawh simin tix yaox ka nambad totiag an awawx. Grawh grawng: nawh nambad an mawh nambad pui tix kaux heue:. Mai: nambad nawh an mawh liah yieh, mai: tix gliah mai: liah mu: (666) heue:.

Simin Ting 14

Pa yuh naing ka piang haktiex

1 Mai: aux jhak mai: yaox, Kawn: Yung: cung ka gawng Zion, tau mai: Nawh Cao: koe: pui tix sien: mai: pon: mheen: mai: pon: rheng: (144,000), pa hoik tiem: ceukaux Nawh Cao:, mai: ceukaux Keeing: Nawh Cao:, ka piang dong: re: kix heue:. 2 Mai: aux mhong: lox khaing: raoma:, pa awm: lox rawm: tom: nie, mai: awm: lox sinum praix pa ting heue:. Mai: lox pa mhong: aux an, awm: lox cao: pa tah ting: khankix, yam tah ting: kix heue:. 3 Mai: kix rhax lox rhax pa khraox ka sivoe dangngeung, mai: sivoe tosat pa im: ju pon: mu: an, mai: kuad song: an khankix, mai: pui tix kaux kawx ang pon gau tix chix lox rhax an lheu: khaing: kix tix sien: mai: pon: mheen:, mai: pon: rheng: (144,000), pa mawh kix pa hoik liag khaing: haktiex heue:. 4 In mawh kix pa ang sax kieh tokaux tix seeing: brai: mai: bon:. Grawh grawng: nawh kix singax awm: bon: krih heue:. In mawh kix pa hawt khaix Kawn: Yung:, ka can dee sang hu: Nawh heue:. In mawh kix pa hoik liag khaing: daux kawn: pui, son sang mawh plix liang ka son Siyiex, mai: ka son Kawn: Yung: an heue:. 5 Mai: ka daux jheeh kix ang lai yaox pa pie pa lhen:, kix mawh pa loig pa ang koe: dee ne heue:.

Kawncau Siyiex krai pao: lox bwan: gauxrhawm: gauxrhi: leeing: ju

6 Mai: aux yaox kawncau Siyiex tang: kaux tix kaux, pa po: ka sigreung raoma:, mai: pa koe: lox bwan: gauxrhawm: gauxrhi: leeing: ju leeing: phan:, son sang sidiex gau ka kix pa ot ka piang haktiex, mai: ka pui meung ku meung, mai: ka ceu pui ku ceu, mai: ka pui pa tang: lox sikah ku ceu, mai: ka pui ku ceu heue:. 7 Mai: nawh ah nin: ka lox pa ting pa sinum, "Lhat graung ka Siyiex, mai: yaogyaw ka Nawh Cao:, mawh kheu bawg yam nari pa prawng pa ciyang Nawh hoik hoek heue:. Mai: krub ka Nawh Cao: pa hoik yuh raoma:, mai: haktiex, mai: rawm: sigrit sigra:, mai: rawm: keut khankix heue:."

8 Mai: kawncau Siyiex tang: kaux, ra: kaux tix kaux, hawt khaix, ah nin:, "Veng Babulon pa ting hoik grhup, hoik grhup heue:. Veng Babulon pa hoik kieh ceu pui khawm: uik nyaux ka rawm: plix siiet pa songrhawm: ceu pa phit pa vao nawh heue:."

9 Mai: kawncau Siyiex tang: kaux, loe: kaux tix kaux, hawt khaix kawncau Siyiex an kiex, mai: ah nin: ka lox pa ting pa sinum, "Phan: pui tix kaux kaux krub ka totiag an, mai: ka rieang rao nawh, mai: rieb tix teei mhai: ka dong: re: tix, phan: ang mawh nan: ka taix tix, 10 nawh tag yaox tix nyaux ka khawm: rawm: plix siiet ceu pa songrhawm: songrhi: Siyiex, pa ang klao: tid tix ka daux kawk pa songrhawm: songrhi: Nawh Cao: heue:. Mai: tag sang yuh tix kieh nawh kharhawm: kharhi: ka ngu mai: mhat, ka sivoe kawncau Siyiex pa singax singeh khankix, mai: ka sivoe Kawn: Yung: an heue:. 11 Mai: taox ngu ceu pa kharhawm: kharhi: kix haok hu: ku ju leeing: ju leeing: phan:. Mai: kix pa krub ka totiag an, mai: ka rieang rao nawh, mai: can pa hoik rieb tix teei ka mhai: ceukaux nawh khankix, pon ang lai yaox tix laux lee: leeing: ngaix leeing: sawm: heue:. 12 Mawh ka grawng: in heue:, pa pui pa singax singeh khankix gun yeung, pa mawh kix pa priex tix hawt ka lox tawm: jhawm: krai Siyiex, mai: ka krax yumrhawm: Yesux heue:.

13 Mai: aux mhong: lox khaing: raoma: pa ah nin:, "Tiem: yuh nin:, 'Jah tom: yamin, kix pa yum ka daux Simiang ting bwanson: heue:. Mawh heue:, Khwan: Cao: ah nan:, yuh ka mawx son sang pon kix tix laux lee: khaing: pa nyhap pa mao kix, mai: kaing ceu pa yuh kix hawt tau mai: kix heue:.'"

14 Mai: aux jhak mai: yaox, paiawm: pa paing tix mu: Mai: ka piang paiawm: an, aux yaox pa ngawm Tix Kaux, pa awm: Kawn: kawn: pui, mai: koe: mhok khri: ka piang kaing: Nawh, mai: ka daux taix Nawh koe: sivawg pa lawm tix mag heue:. 15 Mai: kawncau Siyiex tang: kaux tix kaux lih hoek khaing: daux nyiex bwan:, mai: kok yo lox pa ting pa sinum ka Kaw pa ngawm ka piang paiawm: an ah nin:, "Ploi: sivawg Maix, mai: vawg heue:. Mawh kheu bawg yam nari pa vawg hoik hoek, mawh kheu hoik kaux plix ka piang haktiex heue:." 16 Mai: Kaw pa ngawm ka piang paiawm: an taing sivawg Tix ka piang haktiex, mai: vawg nghox ka haktiex heue:.

17 Mai: kawncau Siyiex tang: kaux tix kaux, lih hoek khaing: daux nyiex bwan: pa koe: ka daux meung raoma: an, nawh kawx koe: sivawg pa lawm tix mag heue:. 18 Mai: kawncau Siyiex tang: kaux tix kaux lih hoek khaing: khu: dee tan, pa mawh kaw pa koe: siawp sibrawm ka piang ngu, mai: nawh kok yo lox pa ting pa sinum, ah nin: ka nawh, "Ploi: sivawg pa lawm maix mai: khrawm: ka sigleem: nhu: plix siiet ka haktiex, grawh grawng: nawh plix siiet nawh khankix hoik sidaing: teem heue:. 19 Mai: kawncau Siyiex an taing sivawg nawh ka haktiex, mai: khrawm: ka plix nhu: plix siiet, ka haktiex, mai: taing sau: ka daux dee biiet tix teei rawm: plix siiet, pa mawh dee biiet pa ting, krax songrhawm: songrhi: Siyiex heue:. 20 Mai: dig ka dee biiet tix teei rawm: plix siiet an, ka plak praix veng, mai: nham: lih khaing: dee biiet tix teei rawm: plix siiet an, tom: hoek ka maox keu: brung khankix, 394pa hoek been glang: ra: yieh lag heue:.

Simin Ting 15

Min: plak ngai: ka piang raoma:

1 Mai: aux yaox mhai: ka daux raoma: tang: ceu tix ceu, pa ting pa lhaong: mai: pa koe: dee daox deng: kah, pa mawh kawncau Siyiex aliah kaux, pa koe: preng aliah ceu, pa mawh pa ghoik khaix khankix, mawh kheu krax songrhawm: songrhi: Siyiex grum hoik ka daux khankix heue:.

2 Mai: aux yaox ceu pa awm: rawm: sigrit sigra: siliak pa hoik klao: tau mai: ngu, mai: ka kix pa hoik pex mai: luan khaing: totiag an, mai: khaing: rieang rao nawh, mai: khaing: nambad ceukaux nawh, cung dex rawm: sigrit sigra: siliak an, mai: kix koe: ting: Siyiex heue:. 3 Mai: kix rhax ka lox rhax Mose, pa mawh siliex Siyiex, mai: ka lox rhax Kawn: Yung:, pa ah nin:,

"Simiang Siyiex Cao: Pa Ting Sibrawm Piang Khawm: Uik eue:, kaing Maix khankix mawh pa ting pa lhaong: mai: pa koe: dee daox deng: kah. Simiang Khunhawkham leeing: ju leeing: phan:, krax pa yuh Maix khankix mawh pa rah pa see mai: pa mawh pa meh heue:. 4 Simiang eue:, mawh mawx pa tag ang lhat mai: ang yaogyaw ka ceukaux Maix, mawh kheu mawh ngie Maix khaing: pa singax singeh heue:. Mawh kheu ceu pui khawm: uik tag sang hoek mai: krub ka sivoe Maix heue:. Mawh kheu jhawm: pa rah pa see yuh Maix hoik sidawng: heue:."

5 Mai: khaix ceu in khankix aux yaox, pa hoik paoh ka nyiex bwan:, pa mawh nyiex gox bwan: man: mhai: sakse:, ka daux meung raoma: heue:. 6 Mai: kawncau Siyiex aliah kaux pa koe: preng aliah ceu an, lih hoek khaing: daux nyiex bwan: an heue:. Kix ceep ka simaox, pa singax mai: pa pruh, mai: hoik nhawt maox rawd khri: ka see piang teeh naok kix heue:. 7 Mai: ka daux tosat pa im: ju pon: mu: an, tix mu: teei klong: khri: aliah mu: pa naog ka pa songrhawm: songrhi: Siyiex, pa im: ju ku ju leeing: ju leeing: phan:, mai: tawx ka kawncau Siyiex aliah kaux an khankix heue:. 8 Mai: nyiex bwan: an naog ka taox ngu khaing: min: plakngai: Siyiex, mai: khaing: siawp sibrawm Nawh Cao: heue:. Mai: tix kaux kawx ang pon tix laig ka daux nyiex bwan: an, tom: sidah hoik hoik preng aliah ceu cie kawncau Siyiex aliah kaux an khankix heue:.

Simin Ting 16

Klong: liah mu: tix mu: krax songrhawm: songrhi: Siyiex

1 Mai: aux mhong: lox pa ting pa sinum khaing: daux nyiex bwan: pa ah nin: ka kawncau Siyiex aliah kaux an, "Pex hu: mai: prauk klong: pa songrhawm: songrhi: Siyiex aliah mu: lih ka piang haktiex awawx."

2 Mai: kawncau Siyiex phaoxka: tix kaux hu: mai: prauk klong: cie tix lih ka piang haktiex, mai: lih mawh muad yia pa lang: teung: saux ka piang pui khankix pa koe: mhai: totiag an, mai: pa krub ka rieang rao nawh heue:.

3 Mai: ra: kaux tix kaux prauk klong: cie tix lih ka daux rawm: sigrit sigra:, mai: rawm: an lih mawh nham:, pa awm: nham: pui pa hoik yum heue:. Mai: can ceu pa im: ju pa koe: ka daux rawm: sigrit sigra: yum khawm: uik heue:.

4 Mai: loe: kaux tix kaux prauk klong: cie tix lih ka daux rawm: klawng: ting mai: ka rawm: keut khankix, mai: rawm: khankix lih mawh nham: heue:. 5 Mai: aux mhong: kawncau Siyiex rawm: an khankix ah nin:, "Kaw Pa Singax Singeh, pa mawh yamin, mai: pa hoik mawh eue:, Maix mawh pa rah pa see, mawh kheu hoik prawng ca: Maix yuh nin: heue:. 6 Grawh grawng: nawh, kix hoik prauk lih ka nham: pui pa singax singeh, mai: cao: jhai: khankix, mai: Maix hoik tawx kix nyaux nham:. Kix mawh pa keung: tix kham: pa yuh nan: heue:." 7 Mai: aux mhong: khu: dee tan ah nin:, "Mawh heue:, Simiang Siyiex, Cao: Pa Ting Sibrawm Piang Khawm: Uik eue:, ceu pa prawng pa ciyang Maix mawh pa mawh pa meh mai: pa rah pa see heue:."

8 Mai: pon: kaux tix kaux prauk klong: cie tix lih ka piang singaix, mai: tawx sibrawm ka singaix son sang hax pui khankix ka ngu heue:. 9 Mai: pui khankix yaox tix kham: pa hax ka ceu pa kied hax sigrien sigre, mai: kix sa lao ka ceukaux Siyiex pa koe: siawp sibrawm ka piang preng in khankix, mai: ang kix doh keud doh sawn: ka phimap tix son sang yaogyaw ka Nawh Cao: heue:.

10 Mai: phwan: kaux tix kaux prauk klong: cie tix lih ka piang dangngeung totiag an, mai: meung nawh lih mawh pa vhaik heue:. Mai: kheu kied saux kix, kix deeh kiied ka dak tix tiru heue:. 11 Mai: kix sa lao ka Siyiex raoma:, mawh kheu pa saux kix, mai: pa muad pa yia, mai: ang kix doh keud doh sawn: ka phimap jhawm: pa yuh tix heue:.

12 Mai: liah kaux tix kaux prauk klong: cie tix lih ka daux rawm: klawng: ting, pa mawh rawm: klawng: ting Yufrethix, mai: rawm: ka daux rawm: klawng: ting an hit kroh, yuh ka mawx son sang cox rien tix, son simiang khunhawkham pa sang hoek khaing: plak lih singaix khankix heue:.

A Magedon

13 Mai: aux yaox khwan: pa seeing: pa brai: loe: mu:, pa awm: khiiet, lih khaing: daux jheeh siyawng an, mai: khaing: daux jheeh totiag an, mai: khaing: daux jheeh cao: jhai: pa ang mawh ang meh an heue:. 14 Grawh grawng: nawh kix mawh khwan: phicaox khankix, pa yuh mhai: pa daox pa am:, pa hu: ka can simiang khunhawkham haktiex khawm: uik, son sang kraix khrawm: kix tix sang yuh naing ka daux singaix pa ting pa lhaong: Siyiex, Cao: Pa Ting Sibrawm Piang Khawm: Uik. 15 (Jhak heue:, Aux sang hoek awm: pui briex pui lak. Kaw pa pau tix jhak, mai: pa priex ka kraung ceep tix ting bwanson:, phan: ang mawh nan:, ha nawh kox yaox tix hu: kakaong:, mai: pui yaox ka pa kaig pa tua nawh heue:). 16 Mai: kix kraix khrawm: kix tau, ka daux dee kok lox Hebrie mawh A Magedon heue:.

Klong: aliah mu: tix mu:

17 Mai: aliah kaux tix kaux prauk klong: cie tix lih ka piang bhawm:, mai: lox pa ting pa sinum lih khaing: daux nyiex bwan:, khaing: dangngeung, ah nin:, "Hoik hoik heue:." 18 Mai: lih mawh pa tuh sah, mai: lox sikah, mai: lox pa sinum praix, mai: lih tok kla: reem ting, pa mawh pa tok kla: reem pa kied ting sigrien sigre, pa ang sax tok pa awm: an, khaix hoik koe: kawn: pui piang haktiex heue:. 19 Mai: gwieh ka veng ting an mawh loe: pak, mai: veng khankix cie ceu pui khankix grhup heue:. Mai: doh keud doh sawn: ka veng Babulon pa ting, ka plak sivoe Siyiex, son sang tawx kawk rawm: plix siiet pa songrhawm: songrhi: Nawh Cao: ka veng an, pa kied langteung: nu heue:. 20 Mai: klawn: tiex ku klawn: to: hu:, mai: gawng khankix kawx ang lai baox yaox kah heue:. 21 Mai: lih pre: pa ting mu: khaing: daux raoma: ka piang kawn: pui, jhawm: cien tix mu: pre: dex koe: kao: phwan: coi heue:. Mai: kawn: pui khankix sa lao ka Siyiex kheu preng pre: an. Mawh keu preng pre: an mawh pa kied ting sigrien sigre heue:.

Simin Ting 17

Krax pa laux leeing: veng Babulon

1 Mai: ka daux kawncau Siyiex aliah kaux, pa koe: klong: aliah mu: an tix kaux, hoek mai: sikah mai: aux, ah nin:, "Hoek tin:, mai: aux tag jhi: maix yaox krax pa prawng pa ciyang ka bon: pa coh kaux pa ting, pa ngawm piang rawm: tom: nie, 2 pa mawh bon: pa simiang khunhawkham haktiex khankix hoik phit hoik vao mai: nawh, mai: hoik kieh kix pa ot ka piang haktiex khankix yoek ka plai: rawm: plix siiet ceu pa phit pa vao nawh heue:. 3 Mai: nawh viex aux hu: ka daux Khwan: Cao:, ka daux tiag daux tu. Mai: aux yaox bon: tix kaux pa ngawm ka piang totiag pa raoh tix mu:, pa naog ceukaux ceu pa sa pa lao ka Siyiex, mai: pa koe: kaing: aliah mu:, mai: rung: kao: mu: heue:. 4 Mai: bon: an ceep kraung pa raoh klai mai: pa raoh rawt, mai: nawh jawg ka khao kraung khri: mai: siang: simaox pa ngawh, mai: siang: pa koe: daux jawx khankix, mai: nawh giex kawk khri: daux taix tix pa naog mai: ceu pa greeing, pa mawh ceu pa seeing: pa brai: pa dex mai: pa phit pa vao nawh heue:. 5 Mai: hoik tiem: ceukaux ka piang dong: re: nawh yuh nin:,

"PA RAUX PA MOX, VENG BABULON PA TING, PA MAWH MIEX BON: COH KAUX KHANKIX, MAI: MIEX CEU PA GREEING CIE HAKTIEX." 6 Mai: aux yaox bon: an yoek ka nham: pui pa singax singeh khankix, mai: ka nham: pui pa kham: mhai: sakse: son Yesux heue:. Mai: yam yaox aux nawh, aux daox deng: kah, ka krax pa kied daox deng: sigrien sigre heue:. 7 Mai: kawncau Siyiex an ah nin: ka aux, "Maix lai daox deng: kah yuh ka mawx? Aux tag sang krai ka maix grawh grawng: ceu pa raux pa mox, pa dex mai: bon: an, mai: pa dex mai: totiag an, pa koe: kaing: aliah mu:, mai: rung: kao: mu:, pa pux ka bon: an heue:. 8 Totiag pa hoik yaox maix an hoik mawh, mai: ang lai mawh, dex sang lih hoek khaing: daux, daux pa ang koe: dee die, mai: hu: ka daux pa laux pa leeing: heue:. Mai: pui pa ot ka piang haktiex khankix, pa mawh kix pa ang lai tiem: tix deuh ka ceukaux kix, tom: yam jah tix kaw: haktiex, ka daux phuk lai pa im: ju, yam yaox kix ka totiag an, pa hoik mawh, mai: pa ang lai mawh, mai: pa tag sang hoek khaix, tag sang daox deng: kah heue:. 9 In mawh rhawm: dee chix keud, pa koe: pingnya cuyi heue:. Kaing: aliah mu: an, mawh gawng aliah mu: pa ngawm bon: an kah, 10 mai: khankix mawh simiang khunhawkham aliah kaux heue:. Kix phwan: kaux hoik rau, mai: kawn: koe: tix kaux, mai: ang nyang bax hoek tix kaux. Mai: yam hoek nawh, nawh tag lai ot tix vud tix cu heue:. 11 Mai: totiag pa hoik mawh, mai: pa ang lai mawh an, tokaux nawh kawx, mawh nang: khunhawkham daix kaux tix kaux, mai: mawh pa neuex mai: simiang aliah kaux an heue:. Mai: nawh hu: ka daux dee laux dee leeing: heue:. 12 Mai: rung: kao: mu: pa hoik yaox maix an, mawh simiang khunhawkham kao: kaux, pa ang nyang bax pon meung, viang mawh nan: kix pon sibrawm giex kaing: awm: simiang khunhawkham, tau mai: totiag an, been tix nari heue:. 13 In kix koe: rhawm: tix mu: khaing:, mai: kix tawx siawp sibrawm kix, mai: sibrawm giex kaing: kix ka totiag an heue:.

Pa Pon Pex Kawn: Yung:

14 In kix tag sang yuh naing ka Kawn: Yung:, mai: Kawn: Yung: tag sang pex ka kix, mawh kheu mawh Nawh Simiang piang simiang, mai: Khunhawkham piang khunhawkham heue:. Mai: kix pa ot tau mai: Nawh Cao:, mawh pa hoik kok, mai: pa hoik laug tix teei, mai: pa kaux sijax heue:." 15 Mai: nawh baox ah nin: ka aux, "Rawm: pa hoik yaox maix khankix, dee ngawm bon: coh kaux an, mawh pui ku ceu, mai: cub pui haoh pui hun: khankix, mai: pui meung ku meung mai: pui pa tang: lox sikah ku ceu heue:. 16 Mai: rung: kao: mu: pa hoik yaox maix an, mai: totiag an, khankix tag koeng ka bon: coh kaux an, mai: yuh nawh yi pak lawg, mai: kakaong:, mai: tag sang ih ka nex nawh, mai: gleeing nawh ka ngu, tom: ngia heue:. 17 Grawh grawng: nawh Siyiex hoik sau: jhawm: keud ka daux rhawm: rhi: kix tix sang yuh hawt alo rhawm: Nawh mai: tix sang koe: kix rhawm: tix mu: khaing:, mai: tix sang tawx meung kix ka totiag an, tom: sidah hoik grum mawh gumlox Siyiex khankix heue:. 18 Mai: bon: pa hoik yaox maix an, mawh veng ting an, pa giex kaing: ka piang simiang khaunhawkham haktiex khankix heue:."

Simin Ting 18

Krax pa grhup laux veng Babulon

1 Khaix ceu an khankix, aux yaox kawncau Siyiex tang: kaux tix kaux lih hoek khaing: daux raoma:, pa koe: siawp sibrawm pa ting, mai: haktiex riang kheu min: plakngai: nawh heue:. 2 Mai: nawh kok lox pa ting pa sinum, ah nin:, "Veng Babulon pa ting hoik grhup, hoik grhup heue:, mai: hoik lih mawh dee ot phicaox khankix, mai: dee laung khwan: pa ang singax singeh ku ceu, mai: dee laung sim: pa seeing: pa brai: mai: pa khaw: tix koeng kah ku ceu heue:. 3 Grawh grawng: nawh ceu pui khawm: uik hoik goh, kheu plai: plix siiet ceu pa phit pa vao nawh heue:. Simiang khunhawkham haktiex khankix hoik phit hoik vao mai: nawh, mai: cao: coh kraung coh khrai: haktiex khankix hoik mi hoik koe:, kheu siawp sibrawm ceu pa cha nie luan nawh heue:."

4 Mai: aux mhong: lox pa tang: khaing: raoma: pa ah nin:, "Pui Aux khankix eue:, lih hu: khaing: daux nawh, yuh ka mawx son ang pex sang yuh paox yuh pie tau mai: phimap phigrham: nawh khankix, mai: yuh ka mawx son ang pex sang pon ka preng nawh khankix heue:. 5 Grawh grawng: nawh phimap phigrham: nawh khankix hoik hoek tom: hoek ka raoma:, mai: Siyiex hoik doh keud doh sawn: ka ceu pa phit pa lud nawh heue:. 6 Deeh viied ka nawh awm: pa hoik tawx nawh, mai: deeh tawx ka nawh ra: son, ka son ceu pa hoik yuh nawh heue:. Ka daux kawk pa hoik klao: nawh, klao: ka son nawh ra: son heue:. 7 Nawh hoik yaw ka tokaux tix, mai: hoik cha nie luan yuh kah miex ding, deeh tawx nawh krax tug krax kha:, mai: krax khirhawm: khirhi: nang: ding heue:. Grawh grawng: nawh, nawh hoik ah nin: ka daux rhawm: tix, 'Aux ngawm tix mawh nanghawkham, mai: ang aux mawh miexmai, mai: aux pon ang doh chix yaox krax khirhawm: khirhi: heue:.' 8 Mawh kheu nan: ka daux tix singaix neh, preng ceu in khankix tag hoek ka piang nawh, pa mawh krax yum, mai: pa khirhawm: khirhi:, mai: pa sibhawm:, mai: tag sang gleeing nawh ka ngu paklawg heue:. Grawh grawng: nawh Simiang Siyiex, pa prawng pa ciyang ka nawh ting riang ting rao heue:.

Yiem grai son veng Babulon

9 Mai: Simiang khunhawkham haktiex khankix pa hoik phit hoik vao, mai: pa hoik cha nie luan ot mai: nawh, tag sang yiem grai, mai: yiem riag yiem yo son nawh, yam jhak kix ka taox pa gleeing nawh. 10 Kix tag sang cung dee singai kheu lhat ka krax tug krax kha: nawh, mai: ah nin:, 'Eue:, eue:, veng Babulon pa ting, veng pa ting riang ting rao eue:, ka daux dom: tix nari neh, krax prawng krax ciyang ka maix hoik hoek heue:.' 11 Mai: cao: coh kraung coh khrai: haktiex khankix, tag yiem grai mai: khirhawm: khirhi: son nawh, mawh kheu pui tix kaux kawx ang baox liag kraung khrai: kix khaix. 12 Pa mawh kraung khrai:, khri:, mai: mau, mai: siang: simaox pa ngawh, mai: siang: pa koe: ka daux jawx, mai: man: rhi: pa mhawm:, mai: man: raoh klai, mai: man: pre, mai: man: raoh rawt, mai: khaox pa sioe: baux ku ceu, mai: kraung nga sang: ku ceu, mai: kraung khaox pa ngawh ku ceu, mai: kraung tawng lheung:, mai: kraung rhiem:, mai: kraung simaox paing, 13 mai: khaox caihung:, mai: amomum ceu siging:, mai: ceu nyawng bhawng:, mai: sidah bhawng:, mai: lawpan, mai: rawm: plix siiet, mai: rawm: bee, mai: mawg gaox nghoxca, mai: moi, mai: yung:, mai: brung, mai: ling: brung, mai: siliex, mai: ju kawn: pui khankix heue:. 14 Mai: plix pa hoik ghoing: rhawm: maix kah khankix hoik grai: hu: khaing: maix, kraung ceu pa mhawm: mai: ceu pa mhawm: grang khawm: uik hoik grai: khaing: maix, mai: kawn: pui tag ang lai baox deeh yaox khankix tix bawg kawx heue:. 15 Mai: cao: pa coh kraung coh khrai: ceu in khankix, pa hoik mi hoik koe: kheu nawh, tag sang cung dee singai kheu lhat ka krax tug krax kha: nawh, mai: yiem grai, mai: khirhawm: tix, 16 ah nin:, 'Eue:, eue:, veng ting eue:, pa hoik ceep kraung man: rhi: pa mhawm:, mai: kraung raoh klai, mai: kraung raoh rawt, mai: pa jawg ka khao kraung khri:, mai: siang: simaox pa ngawh, mai: siang: pa koe: daux jawx khankix, 17 ka daux dom: tix nari neh, sinngao pa ting niex ding niex dod hoik yuh laux pak lawg heue:.' Mai: cao: giex kaing: reu ku kaux, mai: can pui pa brug reu hu: tix dah dah, mai: pui yuh kaing piang reu khankix, mai: can kix pa yuh tix ih kaing piang rawm: sigrit sigra: khawm: uik, cung dee singai, 18 mai: yam jhak kix ka taox ngu pa gleeing nawh, kix kok yo ah nin:, 'Veng pa yuh ka mawx, awm: ka veng ting an?' 19 Mai: kix rhuat phawng: tiex ka piang kaing: tix, mai: yiem riag yiem yo, khirhawm: tix mai: ah nin:, 'Eue:, eue:, veng ting eue:, dee can pui pa koe: reu ka piang rawm: sigrit sigra: khawm: uik, hoik pon tix mi koe:, ka pa ting cai: nawh mau, ka daux dom: tix nari neh, hoik yuh nawh laux pak lawg heue:.' 20 Raoma:, mai: pex pui pa singax singeh khankix, mai: kawncau pa ting khankix, mai: cao: jhai: khankix eue:, gauxrhawm: ka grawng: nawh heue:. Grawh grawng: nawh Siyiex hoik prawng ciyang tix pawk bix pex ka nawh heue:."

21 Mai: kawncau Siyiex pa ting riang tix kaux teei tix yaog simaox tix lon:, pa awm: simaox mhaw: pa ting mai: taing sau: ka daux rawm: sigrit sigra:, ah nin:, "Awm: an ka veng ting Babulon kawx, tag sang sau: riang tix taing nawh lih, mai: pon ang lai yaox nawh khaix heue:. 22 Mai: lox pui pa tah ting:, mai: pui pa ah lox leng: lox klao:, mai: pui pa phlu: pi: lawk leh, mai: pui pa phlu: teet tawng khankix, pon tag ang lai pon mhong: ka daux maix khaix heue:. Mai: pui pa chix yuh khaix taix, khaix taix pa yuh ka mawx ang ah, pon tag ang lai pon tix yaox ka daux maix khaix heue:. Mai: lox pa krid mhaw:, pon tag ang lai pon mhong: ka daux maix khaix heue:. 23 Mai: riang kawk ngu, pon tag ang lai pon tix jhan: ka daux maix khaix heue:. Mai: lox bon: krih, sinaw, cao: pa yuh kapaox, pon tag ang lai mhong: ka daux maix khaix, grawh grawng: nawh cao: pa coh kraung maix khankix, hoik mawh laux simiang haktiex heue:. Mai: hoik pie lhen: ka ceu pui khawm: uik, ka simeed pa yuh maix heue:. 24 Mai: hoik yaox nham: cao: jhai: khankix mai: nham: pui pa singax singeh khankix, mai: nham: can pui pa hoik pah yum ka piang haktiex khawm: uik ka daux maix heue:."

Simin Ting 19

Dee sidah veng ting Bagulon

1 Khaix ceu an khankix aux mhong: awm: mawh lox cub pui haoh pui hun:, pa ting pa sinum, ka daux meung raoma: pa ah nin:,

"Haleluya. Krax taoh, mai: min: plakngai:, mai: siawp sibrawm, mawh cie Siyiex ex heue:. 2 Grawh grawng: nawh krax pa prawng pa ciyang Nawh Cao: khankix, mawh pa mawh pa meh mai: pa rah pa see heue:. Mawh kheu Nawh Cao: hoik prawng hoik ciyang ka bon: coh kaux pa ting an, pa hoik kieh haktiex seeing: brai: ka ceu pa phit pa vao nawh, mai: Nawh Cao: hoik pawk bix nham: siliex Nawh khankix, pa hoik lih ka tawm: taix nawh heue:." 3 Mai: kix baox ah ra: bawg tix bawg. "Haleluya." Mai: taox ngu nawh haok hu: ku ju leeing: ju leeing: phan: heue:. 4 Mai: kuad song: tinga: kaux pon: an, mai: tosat pa im: ju pon: mu: an, goh gup mai: krub ka Siyiex, pa ngawm ka piang dangngeung, ah nin:, "Amen. Haleluya." 5 Mai: lox lih hoek khaing: dangngeung, pa ah nin:.

"Can pex pa mawh siliex Nawh khankix, mai: pex pa lhat ka Nawh Cao: khawm: pa iak pa ting khankix eue:, yaogyaw ka Siyiex ex awawx." 6 Mai: aux mhong: awm: pa mawh lox cub pui pa haoh pa hun:, mai: awm: lox luah rawm: tom: nie, mai: awm: lox pa kied ting sinum praix pa ah nin:,

"Haleluya. Mawh kheu Simiang Siyiex ex hoik giex kaing:, Cao: Pa Ting Sibrawm Piang Khawm: Uik heue:.

Bang: kapaox Kawn: Yung:

7 Kieh ex haing: hiah mai: nied tix gauxrhawm:, mai: tawx min: plakngai: ka Nawh Cao:, mawh kheu hoik hoek bawg yam pa sang teei Kawn: Yung: moeng, mai: moeng Nawh hoik jawg hoik khre: tokaux tix heue:. 8 Mai: hoik tawx nawh ceep tix ka kraung man: rhi: pa mhawm:, pa pruh mai: pa singax singeh, ka tokaux tix. Man: rhi: pa mhawm: an kienie, mawh ceu pa rah pa see pa hoik yuh pui pa singax singeh khankix heue:." 9 Mai: nawh ah nin: ka aux, tiem: yuh nin:, "Kix pa hoik ghaok ka priex bo kapaox Kawn: Yung: ting bwanson: heue:." Mai: nawh baox ah nin: ka aux, "Lox in kix mawh lox Siyiex tete telai heue:." 10 Mai: aux goh gup ka sivoe caong nawh mai: krub ka nawh heue:. Mai: nawh baox ah nin: ka aux, "Maix paw vi yuh nan:. Aux mawh nang: paox siliex tau mai: maix, mai: tau mai: puxaik khankix pa giex ka mhai: sakse: heue:. Krub ka Siyiex awawx. Grawh grawng: nawh mhai: sakse: Yesux mawh rhawm: khwan:, mawh num: ka pa krai lox jhai: khankix heue:."

Yam deeh hoek Cao: Khrit

11 Mai: aux yaox hoik baoh raoma:. Mai: jhak heue:, lih bleeh brung paing tix mu:, mai: Kaw pa ngawm piang brung an, kok ceukaux Nawh mawh, "Pa Kaux Sijax, mai: Pa Mawh Pa Meh." Mai: Nawh prawng ca: mai: yuh naing ka daux pa rah pa see heue:. 12 Mai: ngai: Nawh mawh rao ngu, mai: ka piang kaing: Nawh koe: mhok khri: tom: nie heue:. Mai: Nawh koe: ceukaux pa hoik tiem: tix deuh, pa ang pui tawng tix kaux kawx lheu: khaing: tokaux Nawh heue:. 13 Mai: Nawh ceep ka kraung pa hoik cub ka daux nham:, mai: kok ceukaux Nawh mawh, GUMLOX SIYIEX heue:. 14 Mai: kru naing pa koe: ka daux meung raoma: khankix, brug brung paing, mai: ceep kraung ceep man: rhi: pa mhawm:, pa paing mai: pa singax, mai: hawt khaix Nawh heue:. 15 Mai: khaing: daux jheeh Nawh lih vaid lawm tix kre:, son sang mug ka ceu pui khankix kah. Mai: Nawh tag sang kwang: sang giex kaing: kix ka khaox gix rhiem: heue:. Mai: Nawh dig ka dee biiet tix teei rawm: plix siiet ceu pa songrhawm: songrhi: Siyiex, pa mawh Cao: Pa Ting Sibrawm Piang Khawm: Uik heue:. 16 Mai: Nawh koe: ceukaux pa hoik tiem: ka Piang kraung ceep Nawh, mai: ka piang ba: Nawh, yuh nin:,

KHUNHAWNKHAM PIANG KHUNHAWKHAM MAI: SIMIANG PIANG SIMIANG. 17 Mai: aux yaox kawncau Siyiex tix kaux cung ka daux singaix, mai: nawh kok yo lox sinum ah nin: ka can sim: pa po: sigreung raoma: khawm: uik, "Hoek mai: krawk khrawm: paox tix ka priex bo ting Siyiex, 18 yuh ka mawx son sang yaox pex tix ih nex simiang khunhawkham khankix, mai: nex cao: giex kaing: naing khankix, mai: nex pui pa ting riang khankix, mai: nex brung khankix, mai: nex cao: pa brug ka brung khankix, mai: nex kawn: pui khawm: uik, khawm: pui ploi:, mai: pui pa mawh siliex, mai: pa iak mai: pa ting khankix heue:."

19 Mai: aux yaox totiag an, mai: simiang khunhawkham khankix, mai: kru naing kix, pa hoik krawk khrawm: paox tix son sang yuh naing ka Kaw pa ngawm ka piang brung an, mai: ka kru naing Nawh heue:. 20 Mai: giex ka totiag an, mai: ka khawm: cao: jhai: pa ang mawh ang meh an tau mai: nawh, pa hoik yuh mhai: pa daox pa am: ka sivoe nawh, mai: pa hoik teei mhai: an kix tix pie lhen: ka kix pa hoik pon mhai: totiag an mai: ka kix pa hoik krub ka rieang rao nawh heue:. Taing im: kiex khawm: ra: ka daux nhawng: ngu pa gleeing ka mhat heue:. 21 Mai: teei can pa deuk khankix yum ka vaid Kaw pa ngawm ka piang brung an, pa mawh vaid pa lih khaing: daux jheeh Nawh, mai: sim: an khawm: uik hoik sak ka nex kix heue:.

Simin Ting 20

Satan kham: krax pa phyawk

1 Mai: aux yaox kawncau Siyiex lih hoek khaing: daux raoma: tix kaux, pa koe: jiak saw daux pa ang koe: dee die an, mai: daux taix nawh koe: ceng pa ting tix nyaing heue:. 2 Mai: nawh giex ka siyawng an, pa mawh siuing: prim: dix, pa mawh Phicaox mai: Satan, mai: phyawk nawh son been tix rheng: num, 3 mai: taing nawh sau: ka daux daux pa ang koe: dee die an, mai: nyeep ka moing daux an, mai: tawk cum: ka piang moing daux nawh an, yuh ka mawx son ang nawh lai baox pie ka ceu pui khankix khaix, tom: hoik sidah tix rheng: num an heue:. Khaix an tag sang ploi: nawh tix vud tix cu heue:.

4 Mai: aux yaox dangngeung khankix, mai: ka kix pa ngawm ka piang dangngeung an khankix, mai: hoik tawx akhwang: tix prawng ca: ka kix heue:. Mai: aux yaox ka ju kix pa hoik yaox tix kham: pa kid kaing: kix, son mhai: sakse: Yesux, mai: son gumlox Siyiex, pa mawh kix pa ang krub ka totiag an, mai: ka rieang rao nawh, mai: pa ang rieb tix kieh sau: mhai: ka dong: re: kix, mai: ka taix kix heue:. Mai: kix im:, mai: giex kaing: tau mai: Cao: Khrit been tix rheng: num heue:. 5 Pui pa hoik yum pa deuk khankix, ang lai im: tom: hoik sidah tix rheng: num an heue:. In mawh pa deeh kaoh im: phaoxka: tix bawg heue:. 6 Kaw pa pon tix neuex ka daux pa deeh kaoh im: phaoxka: an tix bawg, ting bwanson:, mai: singax heue:. Ka piang in kix krax yum ra: bawg tix bawg ang lai koe: siawp sibrawm tid tix, viang mawh nan: kix tag sang mawh cao: giex kaing: li Siyiex mai: Cao: Khrit, mai: kix tag sang giex kaing: tau mai: Nawh Cao: been tix rheng: num heue:.

Yah satan mai: taing tix sau: ka daux nhawng: ngu

7 Mai: khaix hoik sidah tix rheng: num an, tag sang ploi: Satan lih khaing: daux dee laung nawh, 8 mai: tag sang lih hu: son sang pie lhen: ka pui, pa ot ka daog haktiex pon: daog, mai: nawh tag khrawm: kix tau son sang yuh naing Gawgax mai: Magawgax, kix koe: pon ghun: awm: mhaik rawm: sigrit sigra: heue:. 9 Mai: kix haok hu: ka plak vieh haktiex khawm: uik, mai: rob ka bang: dee ot pui pa singax singeh khankix, mai: ka veng pa moh an, mai: ngu lih khaing: raoma: mai: gleeing tix tik kix heue:. 10 Mai: phicaox pa hoik pie lhen: ka kix kawx teei tix taing sau: ka daux nhawng: ngu pa gleeing ka mhat an, dee koe: khawm: totiag mai: cao: jhai: pa ang mawh ang meh an heue:. Mai: tag sang kieh kix tug kharhawm: kharhi: leeing: ngaix leeing: sawm: ku ju leeing: ju leeing: phan: heue:.

Krax prawng ca: Kaw pa ngawm piang dangngeung pa paing

11 Mai: aux yaox dangngeung pa ting pa paing tix mu:, mai: ka Kaw pa ngawm ka piang dangngeung an. Haktiex mai: raoma: to: hu: khaing: pakngai: Nawh, mai: pon ang yaox dee ot son kix heue:. 12 Mai: aux yaox pui pa hoik yum, khawm: pa iak pa ting, cung ka sivoe dangngeung an heue:. Mai: paoh ka phuk lai khankix, mai: baox paoh ka phuk lai tang: pheen: tix pheen:, pa mawh phuk lai pa im: ju heue:. Mai: prawng ca: ka pui pa hoik yum khankix khaing: daux ceu pa hoik tiem: tix deuh ka daux phuk lai khankix, awm: pa khaw: mai: ceu pa hoik tang: yuh kix heue:. 13 Mai: rawm: sigrit sigra: deeh tawx pong pui pa hoik yum pa koe: ka daux nawh heue:. Mai: pa yum mai: meung yum kawx deeh tawx pong pui pa hoik yum pa koe: ka daux kiex heue:. Mai: prawng ca: ka kix kaux pui mawx kaux pui an, awm: pa khaw: mai: ceu pa hoik tang: yuh kix heue:. 14 Mai: teei tix taing sau: pa yum mai: meung yum ka daux nhawng: ngu heue:. In mawh pa yum ra: bawg tix bawg, pa mawh nhawng: ngu heue:. 15 Phan: yaox pui tix kaux kaux pa ang lai tiem: tix deuh ka daux phuk lai pa im: ju an, teei tix taing nawh sau: daux nhawng: ngu an heue:.

Simin Ting 21

Raoma: khraox Haktiex khraox

1 Mai: aux yaox ka raoma: pa khraox mai: ka haktiex pa khraox, grawh grawng: nawh raoma: phaoxka: an, mai: haktiex phaoxka: an hoik grai: hu: heue:. Mai: rawm: sigrit sigra: ang baox lai koe: heue:. 2 Mai: aux yaox ka veng pa singax singeh, pa mawh veng Yerusaliem pa khraox, lih hoek khaing: daux raoma: khaing: Siyiex, pa hoik cox khre: tix awm: bon: pa sang koe: mex, pa hoik jawg tix son mex nawh heue:. 3 Mai: aux mhong: lox pa ting pa sinum pa lih khaing: daux dangngeung ah nin:, "Jhak heue:, nyiex gox bwan: man: Siyiex koe: tau mai: kawn: pui, mai: Nawh Cao: tag sang ot tau mai: kix, mai: kix tag sang mawh pui cie Nawh khankix, mai: tokaux Siyiex tag sang ot tau mai: kix, mai: mawh Siyiex kix heue:. 4 Mai: Nawh Cao: tag sang awt tix tik rawm: ngai: can pa koe: khaing: ngai: kix heue:. Mai: krax yum tag ang lai baox koe: khaix heue:. Viang pa khirhawm:, mai: pa yiem, mai: pa saux kawx tag ang baox lai koe: khaix, mawh kheu ceu pa hoik sax mawh phaoxka: khankix hoik grai: hu: heue:." 5 Mai: Kaw pa ngawm ka piang dangngeung an ah nin:, "Jhak heue:, Aux yuh khawm: uik mawh pa khraox heue:." Mai: Nawh Cao: baox ah nin:, "Tiem: heue:, mawh kheu gumlox in khankix mawh pa kaux sijax, mai: pa mawh pa meh heue:." 6 Mai: Nawh Cao: baox ah nin: ka aux, "Khankix hoik lih mawh heue:, Aux mawh Alaphax mai: Omegax, pa mawh Pa Jah, mai: pa Sidah heue:. Aux tag sang tawx giex rawm: keut pa im: ju ka kaw pa sang nyaux nie rawm: heue:. 7 Kaw pa pex, tag sang pon tix cie sin: ceu in khankix heue:. Mai: Aux tag sang mawh Siyiex nawh, mai: nawh tag sang mawh kawn: Aux heue:. 8 Viang mawh kawx nan: ka son pa lhat pa graung, mai: pa ang yumrhawm:, mai: pa greeing, mai: pa mawh pa pah pui yum, mai: pa mawh pa phit pa vao, mai: pa mawh pa yuh simeed yuh sat, mai: pa mawh pa krub rieang krub rao khankix, mai: can pa mawh pa pie pa lhen: khawm: uik, nyum: cie kix tag mawh ka daux nhawng: pa gleeing ka ngu mai: mhat, pa mawh krax yum ra: bawg tix bawg heue:."

Veng Yerusaliem pa khraox

9 Mai: ka daux kawncau Siyiex aliah kaux an, pa koe: klong: aliah mu: pa naog ka preng pa ghoik khaix aliah ceu an, tix kaux hoek mai: nawh sikah mai: aux ah nin:, "Hoek tin:, mai: aux tag sang jhi: maix yaox bon: pa sang koe: mex, pa mawh moeng Kawn: Yung: heue:." 10 Mai: nawh viex aux hu: ka daux Khwan: Cao:, ka gawng pa kied ting kied lhaong: tix mu:, mai: jhi: aux yaox veng Yerusaliam pa singax singeh, lih hoek khaing: daux raoma:, khaing: Siyiex, 11 pa koe: min: plakngai: Siyiex, mai: pa riang nawh awm: siang: simaox pa kied ngawh, pa awm: siang: simaox pa toh: riang ku ceu, pa awm: simaox plaung pa singaong, 12 pa koe: guh veng pa ting pa lhaong:, pa koe: siviex kao: mu: ra:, mai: ka siviex an khankix koe: kawncau Siyiex kao: kaux ra:, mai: ceukaux pui Isarilax kao: ceu ra: kawx hoik tiem: tix deuh ka siviex an khankix heue:. 13 Plak lih singaix koe: siviex loe: mu:, mai: plak caong ma: laong: siviex loe: mu:, mai: plak caong ma: seh siviex loe: mu:, mai: plak klip singaix siviex loe: mu: heue:. 14 Mai: guh veng veng an koe: jaong num: kao: mu: ra:, mai: ka piang jaong an khankix koe: ceukaux kawncau pa ting cie Kawn: Yung: an kao: kaux ra: heue:. 15 Mai: kaw pa sikah mai: aux koe: gawng: priem khri: son diag, son sang tiag ka veng an, mai: ka siviex nawh khankix, mai: ka guh veng nawh heue:. 16 Mai: veng an mawh pa jiet kreng khawm: pon: daog, mai: plak lang: nawh sidu ting awm: plak vieh heue:. Mai: kaw an teei gawng: priem an mai: tiag ka veng an, mai: koe: pon: rheng: mai: phwan: yieh lag. Plak lang: mai: plak vieh, mai: plak lhaong: veng an sidu heue:. 17 Mai: nawh tiag ka guh veng veng an, mai: koe: tix yieh mai: tipon: pon: (144) sawk, awm: pa khaw: mai: sawk pa tiag pui, pa mawh sawk pa tiag kawncau Siyiex heue:. 18 Mai: guh veng nawh mawh pa hoik tham: ka siang: simaox, pa mawh siang: simaox pa toh riang ku ceu, mai: veng an mawh khri: naw naw, pa awm: siliak pa singax heue:. 19 Jaong num: guh veng, veng an khankix, hoik jawg bre ka can siang: simaox pa ngawh ku ceu khawm: uik heue:. Jaong num: phaoxka: tix mu:, mawh siang: simaox pa toh riang ku ceu, mai: ra: mu: tix mu: mawh siang: simaox pa klai singi pa toh riang awm: khri: tao tie395, mai: loe: mu: tix mu: mawh siang: simaox pa paing pau:, mai: pon: mu: tix mu: mawh siang: simaox pa klai siim:, 20 mai: phwan: mu: tix mu: mawh siang: simaox pa bawd raoh bawd paing pau:, mai: liah mu: tix mu: mawh siang: simaox pa raoh awm: nham: mai: aliah mu: tix mu: mawh siang: simaox pa lheung: awm: khri:, mai: daix mu: tix mu: mawh siang: simaox pa klai paing, mai: dim: mu: tix mu: mawh siang: simaox pa raoh eem:, mai: kao: mu: tix mu: mawh siang: simaox pa klai lheung:, mai: kao: tix mu: tix mu:, mawh siang: simaox pa klai singi, mai: kao: mu: ra: tix mu:, mawh sieang simaox pa raoh klai heue:. 21 mai: siviex kao: mu: ra: an, mawh siang: pa koe: ka daux jawx kao: mu: ra:, mai: siviex mawx siviex an hoik tang: mawh siang: pa koe: daux jawx tix mu: tix mu:, mai: krax veng an mawh khri: naw naw, pa pon yaox phlat awm: siliak heue:. 22 Mai: ang aux yaox nyiex bwan: ka daux veng an, grawh grawng: nawh Simiang Siyiex Cao: Pa Ting Sibrawm Piang Khawm: Uik mai: Kawn: Yung: mawh nyiex bwan: nawh heue:. 23 Mai: veng an ang lai lo pa jhan: riang singaix, mai: riang khix, grawh grawng: nawh mawh min: plakngai: Siyiex pa kieh nawh riang, mai: Kawn: Yung: mawh kawk ngu veng an heue:. 24 Mai: ceu pui khawm: uik tag sang hu: ka greung pa riang veng an, mai: simiang khunhawkham haktiex khankix kawx tag sang viex min: plakngai: kix ka daux nawh heue:. 25 Mai: siviex veng an khankix pon tag ang lai nyeep yam pon singaix, (pon sawm: kienie ang lai koe: tan:) 26 mai: kix tag sang viex min: plakngai:, mai: krax yung: krax yi: pui ku ceu khankix ka daux veng an heue:. 27 Mai: ceu pa seeing: pa brai:, phan: ang mawh nan: kaw pa yuh ceu pa greeing mai: pa pie pa lhen: pon ang pon tix laig tan:, viang mawh nan: mawh ngie kix pa hoik tiem: ka daux phuk lai pa im: ju Kawn: Yung: khaing: pa pon tix laig kah heue:.

Simin Ting 22

Rawm: klawng: im: ju mai: khaox im: ju

1 Mai: nawh jhi: aux yaox rawm: klawng: ting rawm: pa im: ju tix klawng:, pa pruh awm: simaox plaung, pa lih hoek khaing: dangngeung Siyiex mai: Kawn: Yung:, 2 ka daux sigreung krax veng an heue:. Mai: ka khawm: ra: plak rawm: klawng: ting an, koe: khaox pa im: ju, pa plix plix kao: ceu ra:, pa plix plix nawh ku khix, mai: lhax khaox an mawh son sang kieh ceu pui ku ceu moi: heue:. 3 Mai: ceu pa jhax pa lawg tag ang lai baox koe: khaix, mai: dangngeung Siyiex mai: Kawn: Yung: tag koe: ka daux veng an, mai: siliex Nawh khankix tag sang yuh kaing krub ka Nawh Cao: heue:. 4 Mai: kix tag sang yaox ka pakngai: Nawh, mai: ceukaux Nawh tag sang koe: ka dong: re: kix heue:. 5 Mai: tag ang lai baox koe: pon sawm: tan: khaix. Mai: kix tag ang lo pa riang kawk ngu, viang pa riang singaix kawx ang lo, grawh grawng: nawh Simiang Siyiex tag tawx pa riang ka kix, mai: kix tag sang giex kaing: ku ju leeing: ju leeing: phan: heue:.

Krax ghaok ceu pa ting pa lhaong:

6 Mai: nawh ah nin: ka aux, "Gumlox in khankix mawh pa kaux sijax mai: pa mawh pa meh, mai: Simiang pa mawh Siyiex khwan: caojhai: khankix, hoik ploi: kawncau Siyiex cie Tix, son sang jhi: ceu pa dex sang hoek tix mawh khankix ka siliex Nawh khankix heue:. 7 Jhak heue:, Aux tag sang khran: hoek laung laung. Kaw pa priex tix hawt gumlox jhai: phuk lai in khankix ting bwanson: heue:."

8 Mai: aux Yohan mawh kaw pa hoik mhong:, mai: hoik yaox ceu in khankix heue:. Mai: yam mhong: yam yaox aux, aux goh gup mai: krub sivoe caong kawncau Siyiex pa hoik jhi: ceu an khankix ka aux heue:. 9 Mai: nawh ah nin: ka aux, "Maix paw vi yuh nan:. Aux mawh nang: paox siliex tau mai: maix mai: tau mai: puxaik pa mawh caojhai: khankix, mai: tau mai: kix pa priex tix hawt gumlox phuk lai in khankix heue:. Krub ka Siyiex heue:."

10 Mai: nawh baox ah nin: ka aux, "Paw vi tawk cum: tix nyeep ka gumlox jhai: phuk lai in khankix, grawh grawng: nawh bawg yam dex sang hoek heue:. 11 Kaw pa ang rah ang see, kieh nawh kawn: ca: yuh pa ang rah ang see awawx. Mai: kaw pa seeing: pa brai:, kieh kawn: ca: yuh nawh mawh pa seeing: pa brai: awawx. Mai: kaw pa rah pa see, kieh nawh kawn ca: yuh pa rah pa see awawx. Mai: kaw pa singax singeh, kieh kawn: ca: yuh nawh mawh pa singax singeh awawx. 12 Jhak heue:, Aux tag sang khran: hoek laung laung, mai: Aux viex ngawh riang mai: Aux, tix sang tawx ka kaux pui mawx kaux pui an awm: pa khaw: mai: kaing pa yuh tix heue:. 13 Aux mawh Alaphax mai: Omegax, pa mawh Pa Liang Phaoxka:, mai: pa Ghoik Khaix, mai: pa mawh Pa Jah mai: Pa Sidah heue:. 14 Kix pa sigrhah kraung ceep tix, mai: pa koe: akhwang: tix hoek ka khaox pa im: ju, mai: pon tix laig ka siviex khankix ka daux veng an, ting bwanson: heue:. 15 Ka plak praix koe: sox khankix, mai: pui pa mawh cao: yuh simeed yuh sat khankix, mai: pui pa phit pa vao khankix, mai: pui pa pah pui yum khankix, mai: pui pa krub rieang krub rao khankix, mai: can pui ku kaux pa moh ka ceu pa pie pa lhen:, mai: pa yuh ceu pa pie pa lhen: heue:.

16 "Aux Yesux, hoik ploi: kawncau Siyiex Tix hu: son sang kham: mhai: sakse: ka maix grawh grawng: ceu in khankix, son ceucao khankix heue:. Aux mawh riah mai: ceucat Dawit, pa mawh Simuing: Griang pa pruh heue:."

17 "Mai: Khwan: Cao:, mai: bon: pa sang koe: mex ah, 'Hoek heue:.' Mai: kaw pa mhong: kieh nawh ah, 'Hoek heue:.' Mai: kaw pa sang nyaux nie rawm:, kieh nawh hoek heue:. Kaw pa koe: rhawm: tix teei, kieh nawh teei giex ka rawm: pa im: ju heue:."

18 Aux kham: mhai: sakse: ka can pui ku kaux pa mhong: gumlox jhai: phuk lai in khankix, phan: pui tix kaux kaux baox tiien lox kah khankix, Siyiex tag sang baox tiien preng ceu pa hoik tiem: ka daux phuk lai in khankix ka nawh heue:. 19 Mai: phan: pui tix kaux kaux teei tix tieh lih khaing: gumlox jhai: phuk lai in khankix, Siyiex tag sang teei tix tik nyum: son cie nawh pa dex mai: khaox pa im: ju, mai: pa singax singeh, pa hoik tiem: ka daux phuk lai in heue:.

20 Kaw pa kham: mhai: sakse: grawh grawng: ceu in khankix ah nin:, "Mawh heue:, Aux tag sang khran: hoek laung laung." Amen. Simiang Yesux eue:, hoek heue:.

21 Kieh bwanson: Simiang Yesux, koe: tau mai: pui pa singax singeh khankix liak. Amen.