Philemon

Philemon

Simin Ting 1

Lox nawb mai: pa yawgyaw bwanson:

1 Pawlux, pa mawh pui pa hoik laung son Yesux Khrit, mai: puxaik ex Timose, tawx ka Philemon pa moh ex, mai: pa mawh pui rom tix yuh kaing tau mai: ex, 2 mai: ka Appix nan: ex, mai: ka Akippux pa mawh pa rom tix mawh pui naing tau mai: ex, mai: ka ceucao daux nyiex maix heue:. 3 Kieh maix koe: bwanson: mai: pa nhim: pa kaoh khaing: Siyiex Keeing: ex, mai: Simiang Yesux Khrit heue:.

4 Aux yaogyaw bwanson: Siyiex aux kah jheeng: jheeng:, mai: simawd maix ka daux pa rawg aux bwan:, 5 mawh kheu mhong: aux grawng: krax moh maix, mai: krax yumrhawm: pa koe: maix plak Simiang Yesux, mai: khawm: plak pui singax singeh khawm: uik heue:. 6 Yuh ka mawx ceu pa yuh paox yuh pie, ka krax yumrhawm: maix, tag sang koe: bwanson:, ka daux krax tawng krax yung ka ceu pa mhawm: ku ceu, pa koe: ka daux maix, ka son Cao: Khrit heue:. 7 Grawh grawng: nawh aux hoik kied koe: krax gauxrhawm: mai: pa nyawmrhawm: ka daux krax moh maix, mawh kheu rhawm: rhi: pui pa singax singeh khankix hoik pon tix nyawmrhawm: nyawmrhi: kheu maix, puxaik eue:.

Khyox khaw: ka son Awnesimux

8 Mawh kheu nan: viang aux koe: rhawm: kua: daux Cao: Khrit tix nie khin: maix yuh ceu pa khaw:, 9 viang mawh nan: aux Pawlux pa uik kuad, mai: pa mawh khawm: pui pa hoik laung son Yesux Khrit yamin, nie lheu: koe: rhawm: tix sang khyox khaw: ka maix ka daux krax moh krax rhawm: heue:. 10 Aux khyox khaw: ka maix son kawn: aux Awnesimux, pa hoik pon hoik kieh aux keh, ka daux pa phyawk aux in. 11 Kaw pa ang koe: bwanson: son maix nhaox, viang mawh kawx nan: yamin koe: bwanson: ka maix mai: ka aux heue:. 12 Aux deeh ploi: tokaux nawh ing: ka maix, pa mawh rhawm: rhi: aux tete, rieb tix teei nawh liak. 13 Viang aux simie tix kawn: kieh nawh ot tau mai: aux, yuh ka mawx son sang teem: nawh tix kia: ngien ka aux, ka daux pa phyawk son lox bwan: gauxrhawm: gauxrhi:, 14 viang mawh kawx nan: phan: aux ang nyang pon lox maix ang aux rhawm: yuh tix ceu kawx, yuh ka mawx ceu pa mhawm: pa sang yuh maix ka aux tag ang mawh pa khin: tix kieh yuh, viang mawh nan: son sang mawh pa lak keud maix tix yuh hawt alo tix tiru heue:. 15 Grawh grawng: nawh, ha kox hoik kieh nawh gwieh hu: khaing: maix tix vong, yuh ka mawx maix tag sang pon nawh son ku jheeng: jheeng:, 16 ang baox mawh awm: siliex, viang mawh kawx nan: mawh pa nie lheu: khaing: siliex, pa mawh puxaik pa moh, pa moh aux kah, viang mawh nan: nie lheu: mawh ka maix miex ding, ka daux nex nham:, mai: khawm: ka daux Simiang heue:. 17 Mawh kheu nan: phan: maix een: aux mawh paox pie, rieb tix teei nawh, awm: sang rieb tix teei ka tokaux aux heue:. 18 Viang mawh kawx nan: phan: nawh hoik phit ka maix, phan: ang mawh nan: phan: nawh ceuk ka maix tix ceu ceu, deuh mawh cie aux. 19 Aux Pawlux tiem: lai in ka taix tokaux tix, "Aux tag sang deeh plud kah heue:." Aux ang lai krai grawng: maix ceuk khawm: tokaux maix ka aux heue:. 20 Mawh heue:, pux eue:, kieh aux koe: krax gauxrhawm: khaing: maix ka daux Simiang. Kieh rhawm: aux nyawmrhawm: daux Cao: Khrit liak.

Keud pot, lox nawb mai: pa nawb bwan:

21 Mawh kheu yumrhawm: aux ka grawng: pa chix cu chix nghiet maix, aux tom: tiem: hu: ka maix, Kheu tawng aux grawng: maix sang nie lheu: yuh khaing: pa ah aux heue:. 22 Lheu: khaing: an, viang mawh dee ot kawx, cox son aux liak, mawh kheu koe: aux krax keud pot jun pot, grawng: sang deeh tawx aux ka maix, kheu rawg maix bwan: heue:.

23 Epaphrax, pa mawh paox aux, ka daux pa laung son Yesux Khrit nawb ka maix, 24 mai: Makux, mai: Aritakhux, mai: Demax, mai: Lukax, pa mawh paox yuh kaing aux khankix kawx, nawb ka maix heue:.

25 Kieh bwanson: Simiang ex Yesux Khrit ot tau mai: khwan: maix liak! Amen.