Mathiex

Lai Mathiex

Simin Ting 1

Ru nyiex ma: Cao: Yesux Khrit

1:1-17 koe: daux lai Lukax 3:23-38 *1:3-6 koe: daux lai Ruthax 4:18-22 *1:7-11 koe: 1 lai grawng: been 3:10-17

1 Lai grawh grawng: ru Cao: Yesux Khrit, kawn: Abraham kawn: Dawit. 2 Abraham koe: kawn: Icak, Icak koe: kawn: Yakop, mai: Yakop koe: kawn: Yudax mai: puxaik nawh khankix. 3 Yudax koe: kawn: Pheret mai: Zara, ka moeng nawh Tama. Pheret koe: kawn: Hezaron mai: Hezaron koe: kawn: Aram. 4 Aram koe: kawn: Aminadap, Aminadap koe: kawn: Nashon, mai: Nashon koe: kawn: Salamon. 5 Salamon koe: kawn: Bawzax, ka moeng nawh Rakhap, mai: Bawzax koe: kawn: Obet ka moeng nawh Ruthax, mai: Obet koe: kawn: Yeshie:.

6 Mai: Yeshie: koe: kawn: simiang khunhawkham Dawit. Simiang Dawit koe: kawn: Sawlamun ka bon: pa hoik mawh moeng Uriyax phaoxka: heue:. 7 Sawlamun koe: kawn: Robom, Robom koe: kawn: Abiyax, mai: Abiyax koe: kawn: Asax. 8 Asax koe: kawn: Yosaphat, Yosaphat koe: kawn: Yoram, mai: Yoram koe: kawn: Osiyax. 9 Osiyax koe: kawn: Yotham, Yotham koe: kawn: Akhat, mai: Akhat koe: kawn: Hezakiyax. 10 Hezakiyax koe: kawn: Manashe, Manashe koe: kawn: Amon, mai: Amon koe: kawn: Yosiyax. 11 Yosiyax koe: kawn: Yekhawniyax mai: puxaik nawh khankix, yam mawh bawg yam viex kix hu: ka veng Babulon heue:.

12 Khiax hoik viex kix hu: ka veng Babulon, Yekhawniyax koe: kawn: Shalatilax, mai: Shalatilax koe: kawn: Zerubabelax. 13 Zerubabelax koe: kawn: Abyut, Abyut koe: kawn: Eliakim, mai: Eliakim koe: kawn: Azaw. 14 Azaw koe: kawn: Sadut, Sadut koe: kawn: Akhim, mai: Akhim koe: kawn: Elut. 15 Elut koe: kawn: Elazax, Elazax koe: kawn: Mathan, mai: Mathan koe: kawn: Yakop. 16 Mai: Yakop koe: kawn: Yosiep pa mawh mex Marix, pa keh Yesux kah, pa kok mawh Khrit heue:.

17 Mawh kheu in jah ka Abraham tom: hoek ka Dawit koe: kao: ju pon:, mai: jah ka Dawit tom: hoek yam viex kix hu: ka veng Babulon koe: kao: ju pon:, mai: jah ka yam viex kix hu: ka veng Babulon tom: sidah sidu hoek ka Cao: Khrit koe: kao: ju pon: heue:.

Bon: krih koe: kaux, Yesux lih keh

18 Grawh grawng: keh Cao: Yesux Khrit mawh nin: heue:. Yam miex Nawh Cao:, Marix, mai: Yosiep hoik chawk paox tix, ka: ang kiex bax dex bax dawd mai: paox tix, yaox nawh koe: kaux kheu Khwan: Singax Singeh heue:. 19 Mawh kheu mex nawh Yosiep, mawh pui rah pui see mai: ang rhawm: kieh plakngai: Marix laux, nawh ce: sang briex tix tik nawh heue:. 20 Viang mawh kawx nan: yam keud nawh yuh nan:, jhak heue:, nawh yaox kawncau Siyiex cie Simiang lih bleeh ka nawh ka daux camaox mai: ah nin:, "Yosiep kawn: Dawit eue:, paw lhat tix teei moeng maix Marix, kheu kaux pa koe: daux nawh mawh kheu Khwan: Singax Singeh heue:. 21 Mai: nawh tag keh kawn: simex, mai: maix tag kok ceukaux Nawh mawh Yesux, mawh kheu Nawh tag sang taoh pui cie Nawh khaing: phimap phigrham: kix heue:." 22 Ceu in khawm: uik hoik mawh son sang naog gumlox Simiang pa krai Cao: Jhai: pa ah nin:, 23 1"Jhak heue:, bon: krih tag koe: kaux, mai: keh kawn: simex, mai: kix tag kok ceukaux Nawh mawh Emannoelax." Phan: toe: dee bleeh "Emannoelax," mawh, "Siyiex ot tau mai: ex." 24 Yam siduad Yosiep khaing: it nawh yuh awm: hoik nhie: kawncau Siyiex cie Simiang nawh yuh, mai: teei moeng tix heue:. 25 Viang mawh kawx nan: nawh ang dex mai: nawh, ka: ang nyang keh kawn: Ai, mai: nawh kok ceukaux Nawh mawh Yesux heue:.

Mathiex

Simin Ting 2

Pui ting pingnya cuyi hoek tix krub Yesux khaing: dee singai

1 Yam keh Yesux daux veng Bieliehiem, meung Yudax, daux singaix ju Herut pa mawh khunhawkham, jhak heue:, pui pa ting pingnya cuyi kaoh khaing: plak lih singaix mai: hoek ka veng Yerusaliem, 2 mai: chawk ah nin:, "Kaw pa hoik keh Simiang Khunhawkham pui Yudax koe: dee mawx? Mawh kheu hoik yaox ex simuing: Nawh plak lih singaix, ex tom: hoek tix krub Nawh Cao:." 3 Yam mhong: simiang khunhawkham Herut lox an, nawh mai: pui veng Yerusaliem khawm: uik sung sang rhawm:. 4 Mai: nawh kieh cao: giex kaing: li pa ting khankix mai: pui tiem: lai khawm: uik khrawm: paox tix, mai: nawh chawk kix grawh grawng: tag sang keh Cao: Khrit dee mawx? 5 Mai: kix krai ka nawh ah nin:, "Tag sang keh ka daux veng Bieliehiem meung Yudax, hkeu cao: jhai: hoik tiem: lox ah nin:, 6 2 'Mai: maix veng Bieliehiem meung Yudax eue:, nie iak khaing: paox tix, dee giex kaing: simiang Yudax khankix ang mawh, kheu cao: giex kaing: tag sang lih khaing: maix tix kaux, mai: Nawh tag sang kia: sang ngien pui cie Aux, ceu Isarilax heue:.'"

7 Yam an simiang Herut briex kok pui pa ting pingnya cuyi mai: chawk kix grawh grawng: yaox kix simuing: lai mawx. 8 Mai: nawh ploi: kix hu: ka veng Bieliehiem, khaix tawm: nawh lox ah nin:, "Hu: mai: sawg Kawn: nyawm an mhawm: mhawm:, yam hoik yaox pex Nawh deeh krai ka aux liak, yuh ka mawx son aux kawx, pon tix hu: krub ka Nawh heue:." 9 Mai: khaix hoik mhong: kix lox simiang khunhawkhawm kix lih hu: mai: simuing: pa yaox kix plak lih singaix hu: sivoe kix, tom: hu: kaog piang dee ot Kawn: nyawm an heue:. 10 Mai: yam yaox kix simuing: an kix kied gauxrhawm: gauxrhi: tete.11 Mai: kix laig ka daux nyiex an mai: yaox Kawn: nyawm iak an tau mai: miex Nawh Marix, mai: kix grux ngawng tix krub Nawh, mai: kix hoe: kraung viex tix mai: tawx khawngphak laksawng: ka Nawh Cao: pa mawh khri: mai: sidah bhawng: Lawpan mai: Muran heue:. 12 Mai: khaix an son ang kix deeh ing: ka simiang Herut, Siyiex kieh kix tawng ka daux camaox, mai: kix deeh ing: ka meung kix krax tang: krax heue:.

To: hu: ka daux meung Ejiptux

13 Mai: khaix hoik ing: kix, jhak heue:, kawncau Siyiex cie Simiang tix kaux lih bleeh ka Yosiep ka daux camaox mai: ah nin:, "Kaoh heue:, mai: teei Kawn: nyawm iak mai: miex Nawh, mai: to: hu: ka daux meung Ejiptux, mai: ot tan: tom: deeh krai Aux maix mhong:. Kheu simiang Herut dex sang sawg Kawn: nyawm iak in tix yuh Nawh laux." 14 Mai: Yosiep kaoh mai: teei Kawn: nyawm mai: miex Nawh, mai: lih hu: ka daux meung Ejiptux yam ponsawm: heue:. 15 Mai: ot tan: tom: hoik yum simiang Herut, son sang naog gumlox Simiang pa cao: jhai: hoik ah nin:, 3"Aux hoik kok Kawn: Aux Lih khaing: meung Ejiptux heue:."

16 Yam tawng simiang Herut grawh grawng: pui pa ting pingnya cuyi pie lhen: ka nawh, nawh kied songrhawm: songrhi: tete, mai: nawh ploi: pui hu: pah kawn: nyawm simex yum, pa hoik koe: ra: num mai: pa ang nyang koe: ra: num khawm: uik, pa ot ka daux veng Bieliehiem mai: dee dex tan: ku dah ku dee heue:. Nawh keud nawh sawn: grawh grawng: bawg yam pa hoik mhong: nawh ka pui pa ting pingnya cuyi, mai: nawh tom: yuh nan: heue: 17 Yam an gumlox cao: jhai: Yeramix, pa ah nin:, hoik naog heue:.4

18"Ka daux Ramax mhong: lox pa yiem pa grai, mai: pa kied khirhawm: khirhi:, mawh pa yiem Rakhelax son kawn: nyawm kiex khankix, mai: ang chix khu: rhawm: kiex, kieh nyawm rhawm:, kheu ang kawn: kiex lai koe: heue:."

Ot ka daux veng Nazariet

19 Viang mawh nan: khaix hoik yum simiang Herut jhak heue:, kawncau Siyiex cie Simiang tix kaux lih bleeh ka Yosiep daux camaox, ka daux meung Ejiptux, mai: ah nin:. 20 "Kaoh heue:, teei Kawn: nyawm mai: miex Nawh, mai: hu: ka daux meung Isarilax, kheu pui pa sawg tix teei ju Kawn: nyawm an yum khankix hoik yum heue:." 21 Mai: nawh kaoh, teei Kawn: nyawm an mai: miex Nawh mai: hu: ka meung Isarilax. 22 Viang mawh kawx nan:, yam mhong: nawh grawh grawng: Akhelax giex kaing: meung Yudax, dee keeing: nawh Herut giex kaing: glangka: an, nawh lhat hu: tan:. Mai: kheu Siyiex kieh nawh tawng ka daux camaox, nawh hu: ka daux haktiex meung Galilie:. 23 Mai: nawh hoek mai: ot ka daux veng pa kok mawh Nazariet, son sang naog gumlox pa hoik krai cao: jhai: khankix, 5"Tag kok Nawh mawh pui Nazariet."

Mathiex

Simin Ting 3

Grawng: pa lih sidiex Yohan Cao: com rawm:

3:1-12 koe: daux lai Makux 1:3-8; lai Lukax 3:2-17

1 Mai: ka daux bawg yam an, Yohan cao: baptis C hoek, mai: sidiex gau ka daux tiag daux tu meung Yudax, ah nin:. 2 "Doh keud doh sawn: ka phimap tix, kheu Meung Raoma: dex sang hoek heue:." 3 Kheu mawh kaw in, pa hoik krai cao: jhai: Isayax lox pa ah nin:, 6"Lox pa kok pa yo daux tiag daux tu cox krax Simiang, yuh krax Nawh rah see heue:." 4 Mai: tokaux Yohan ceep kraung hauk Kala-uk, mai: nhawt maox hak ka nyoi tix, mai: pa ih pa un: nawh mawh sido, mai: rawm: hia: tiag heue:. 5 Yam an pui veng Yerusaliem, mai: pui meung Yudax khawm: uik mai: pa ot sivie sivheng: rawm: Yawdan khawm: uik khawm: leeing:, hu: ka Yohan heue:. 6 Mai: kix krai doh ka phimap phigrham: tokaux tix, mai: baptis * ka tawm: taix nawh ka daux rawm: klawng: ting Yawdan heue:. 7 Viang mawh nan: yam yaox Yohan pui Pharishie: mai: Sadukie: khankix hoek tix baptis7 ka nawh, nawh ah nin: ka kix, "Ceu siuing: pa cai: eue:, mawx nhie: pex to:, son sang luan khaing: pa songrhawm: pa tag sang hoek? 8 Kieh plix plix pa keung: ka pa doh keud doh sawn: ka phimap phigrham: tokaux tix heue:. 9 Paw keud tix ah ka daux tokaux tix, Abraham mawh keeing: ex, aux krai ka pex, Siyiex teei simaox in khankix yuh mawh kawn: Abraham ka chix heue:. 10 Yamin kawx moe: hoik koe: ka dex riah num: khaox, mai: khaox pa ang plix plix pa mhawm: khankix khawm: uik, sang kid tix taing sau: daux ngu heue:. 11 Aux baptis pex ka daux rawm: tete, yuh ka mawx son sang doh keud pex ka phimap phigrham: tix heue:. Viang mawh kawx nan: Kaw pa hoek khaix aux lheu: ting khaing: aux, pie kiep Nawh ang aux keung: tix jiang:. Kaw an tag sang baptis pex ka daux Khwan: Singax mai: ngu heue:. 12 Ka daux tawm: taix Nawh koe: bia: yib, mai: Nawh tag kieh nghoxca pa pah Tix singax mai: Nawh tag sau: nghoxca cie Nawh daux krao:, mai: Nawh tag teei grhip gleeing daux ngu pa ang chix yeet heue:."

Yesux rieb tix com rawm:

3:13-17 koe: daux lai Makux 1:9-11; Lukax 3:21,22; Yohan 1:31-34

13 Yam an Yesux kaoh khaing: meung Galilie:, mai: hoek ka Yohan ka rawm: Yawdan, son sang baptis daux tawm: taix nawh. 14 Viang mawh kawx nan: Yohan kieh raw Nawh Cao: ah nin:, "Aux khaw: tix baptis ka daux tawm: taix Maix mai: Maix khex hoek ka aux lie?" 15 Viang mawh kawx nan: Yesux pawk lox mai: ah nin: ka nawh, "Kheu ex khaw: tix hawt been pa rah pa see son sang kieh naog khawm: uik, yamin tawx akhwang: liak." Khaix an Yohan tom: tawx akhwang: heue:. 16 Khaix hoik baptis Yesux Nawh lih khaing: daux rawm: dom: mawx dom: an, mai: jhak heue:, raoma: baoh ka Nawh mai: Nawh yaox Khwan: Siyiex lih awm: sikaux mai: hoek ka piang Nawh, 17 mai: jhak heue:, lox lih khaing: raoma: ah nin:, "In mawh Kawn: pa moh Aux, pa khaw: pa caw rhawm: Aux heue:."

Mathiex

Simin Ting 4

Grawng: pa kham: geu: Yessux pa nyaw phicaox

4:1-11 koe: daux lai Makux 1:12-13; Lukax 4:1-13

1 Yam an Khwan: Cao: tok Yesux hu: ka daux tiag daux tu, son sang kham: geu: pa nyaw phicaox heue:. 2 Mai: Nawh tuah pa ih pa un:, tipon: (40) singaix, tipon: (40) sawm:, Nawh tom: cairhawm: heue:. 3 Yam an cao: nyaw hoek mai: ah nin: ka Nawh, "Phan: Maix mawh Kawn: Siyiex tawx lox kieh simaox in khankix mawh khaomun heue:." 4 Viang mawh kawx nan: Nawh Cao: pawk lox mai: ah nin:, "Hoik tiem: tix deuh ah nin:, 8`'Pui tag im: kheu khaomun nong: nong: ang mawh, viang mawh nan:, im: kheu lox pa lih khaing: jheeh Siyiex ku gum heue:.'"

5 Yam an Phicaox baox viex Nawh hu: ka daux veng singax singeh, mai: deuh Nawh piang dee choek nyiex bwan:. 6 Mai: ah nin: ka Nawh Cao:, "Phan: Maix mawh Kawn: Siyiex, kieh tokaux Tix rau sen:. Kheu hoik tiem: tix deuh, 9 `Nawh tag tawm: lox grawh grawng: Maix, ka kawncau Siyiex Nawh khankix, mai: kix tag yaog Maix ka piang tawm: taix kix, son ang caong Maix sang krox ka simaox.'" 7 Yesux baox ah nin: ka nawh, "Baox hoik tiem: tix deuh ah nin:, 10 `Maix paw vi nyaw ka Simiang Siyiex Maix.'" 8 Yam an phicaox baox viex Nawh Cao: hu: tix bawg ka piang gawng kied lhaong: tix mu:, mai: jhi: Nawh yaox meung piang haktiex khawm: uik, mai: min: plakngai: cie meung khankix, 9 mai: nawh ah nin: ka Nawh Cao:, "Phan: Maix grux ngawng tix krub ka aux, ceu in khawm: uik aux sang tawx ka Maix heue:." 10 Yam an Yesux baox ah nin: ka nawh, "Satan eue:, lih hu: heue:, kheu hoik tiem: tix deuh, 11'Maix tag sang krub ka Simiang Siyiex maix, mai: yuh son Nawh khaing:.'"

11 Yam an phicaox hu: khaing: Nawh Cao:, mai: jhak heue:, kawncau Siyiex khankix hoek tix khan: kheu: ka Nawh heue:.

Yesux jah tix sidiex

12 Yam an khaix hoik mhong: Nawh Cao: grawh grawng: hoik sau: Yohan ka daux thawng: Nawh lih hu: ka daux meung Galilie: heue:. 13 Nawh Cao: prah veng Nazariet, mai: hoek ot ka daux veng Kapeniom, pa koe: dex praok nhawng: daux mee: haktiex Zebulun mai: Napthalix heue:. 14 Yuh ka mawx son sang naog gumlox pa hoik krai cao: jhai: Isayax pa ah nin:, 15 12 "Haktiex Zebulun mai: haktiex Napthalix, pa koe: dex krax pa hawt praok nhawng: mai: bleeh plak toi: rawm: Yawdan, Galilie: dee ot pui tang: ceu tang: cat. 16 Pui pa ot ka daux pa vhaik khankix, pon yaox pa riang pa ting, mai: piang kix pa ot daux haktiex veei krax yum, pa riang hoik lih jhan: heue:."

17 Jah tom: yam an Yesux jah tix sidiex gau, mai: ah nin:, "Doh keud doh sawn: ka phimap tix, kheu Meung Raoma: dex sang hoek heue:."

Grawng: pa kok kawncau pon: kaux

4:18-22 keo: daux lai Makux 1:16-20; Lukax 5:2-11; Yohan 1:35-42

18 Mai: yam hu: Nawh dex rawm: nhawng: Galilie:, Nawh yaox puxaik ra: kaux pa mawh Simon pa kok mawh Petrux, mai: pux nawh Andare, ploi: rub ka daux rawm: nhawng:, kheu mawh kiex pui pa teei kax heue:. 19 Mai: Yesux ah nin: ka kiex, "Hawt khaix Aux heue:, mai: Aux tag kieh pax mawh pui pa teei pui heue:." 20 Mai: dom: mawx dom: an kiex prah rub khankix tan:, mai: hawt khaix Nawh Cao:. 21 Mai: Nawh hu: sivoe ceeix mai: Nawh Cao: yaox puxaik tang: kaux ra: kaux, pa mawh Yakop, kawn: Zebedie:, mai: pux nawh Yohan, ot ka daux reu tau mai: keeing: kiex Zebedie:, mai: cox rub cie kix. Mai: Nawh kok kiex. 22 Mai: dom: mawx dom: an kiex prah reu mai: keeing: kiex mai: hawt khaix Nawh Cao:.

23 Yesux hu: lai ling ka daux meung Galilie: ku dah ku dee mai: gau ka daux nyiex sidiex khankix, mai: sidiex lox bwan: gauxrhawm: gauxrhi:, pa dex pa dawd mai: Meung Siyiex, mai: cox moi: jhawm: saux jhawm: ngia ku ceu sinax pui khankix heue:. 24 Mai: min: plakngai: Nawh Cao: tah ka daux meung surix ku dah ku dee, mai: kix viex pui pa koe: jhawm: saux jhawm: ngia ku ceu, mai: pa kharhawm: kharhi:, mai: pa laig phicaox khankix, mai: pui saux laung: khankix, mai: pui yum taix yum caong khankix, mai: Nawh cox kix moi: heue:. 25 Mai: cub pui pa haoh pa hun: hawt khaix Nawh Cao:, pa kaoh khaing: meung Galilie:, mai: haktiex Dekapolix, mai: veng Yerusaliem, mai: meung Yudax, mai: plak toi: rawm: Yawdan khankix heue:.

Mathiex

Simin Ting 5

Grawng: bwanson: daix ceu pa sidiex ka piang gawng

5:3-12 koe: daux lai Lukax 6:20-23

1 Yam yaox Nawh Cao: cub pui haoh pui hun:, Nawh haok ka piang gawng mai: khaix hoik ngawm Nawh, kawncau Nawh khankix hoek ka Nawh heue:. 2 Mai: Nawh Cao: ang: jheeh Tix, mai: gau kix ah nin:. 3 "Pui pa hot daux khwan: khankix koe: bwanson: heue:, kheu Meung Raoma: mawh cie kix. 4 Pui pa khirhawm: khirhi: khankix koe: bwanson: heue:, kheu kix tag pon pa nyawmrhawm: nyawmrhi:. 5 Pui pa awnrhawm: awnrhi: khankix koe: bwanson: heue:, kheu kix tag pon haktiex. 6 Pui pa cairhawm: cairhi: son pa rah pa see khankix koe: bwanson: heue:, kheu kix tag sak. 7 Pui pa chix caoxrhawm: caoxrhi: khankix koe: bwanson: heue:, kheu kix tag pon ceu pa caoxrhawm:. 8 Pui pa singax daux rhawm: daux rhi: khankix koe: bwanson: heue:, kheu kix tag yaox Siyiex. 9 Pui pa chix kieh chix raw pa simah simaing: ka paox tix kieh yien: khankix, koe: bwanson: heue:, kheu tag kok kix mawh kawn: Siyiex. 10 Pui pa hoik kham: geu: pa tuktiak tukte: son pa rah pa see koe: bwanson: heue:, kheu Meung Raoma: mawh cie kix. 11 Yam pui yuh pa ang khaw: ang jiet ka pex, mai: tuktiak tukte: ka pex, mai: ah pa caox pa ang mawh ang meh ku ceu grawh grawng: pex, kheu Aux, pex koe: bwanson: heue:. 12 Kieh kied gauxrhawm: gauxrhi: heue:, kheu bwanson: kied ting son pex ka daux Meung Raoma:, kheu hoik tuktiak tukte: kix yuh nan:, ka cao: jhai: khankix pa koe: glangka: pex.

13 "Pex mawh kih haktiex heue:, viang mawh nan: phan: pa laoh kih hoik grai:, kienie, chix deeh kieh laoh yuh ka mawx? Lheu: khaing: tik plak praix mai: pui dig greem: caong tix ang koe: bwanson: tid tix. 14 Pex mawh pa riang haktiex heue:, veng pa hoik yuh ka piang gawng ang pon tix mox. 15 Pui pa tok kawkngu ang sax sau: greem: phliex, viang mawh nan:, deuh piang pheen:, yuh ka mawx son sang jhan: riang son pui pa ot daux nyiex khawm: uik. 16 Awm: an kieh pa riang pex jhan: riang sivoe ngai: kawn: pui heue:, yuh ka mawx son sang yaox kix kaing pa yuh pex pa mhawm:, mai: yaogyaw Keeing: pex pa ot daux Meung Raoma:.

17 "Pex paw ce: Aux hoek tix yuh laux lox been li, mai: lox cao: jhai: khankix, Aux hoek tix yuh laux ang mawh, hoek tix kieh naog heue:. 18 Aux krai lox tete telai ka pex, tom: haktiex mai: raoma: ang nyang bax grai:, ngai: lai lai been li viang ki iak miex ding ang ah, ang chix grai: chix grup tix gum kawx, tom: hoik mawh hoik naog khawm: uik. 19 Mawh kheu nan: pui mawx ang ah phan: nawh lheu: gumlox tawm: ceu in pa iak khaing: paox tix, mai: gau pui tang: kaux yuh nan:, tag kok mawh pa nie iak khaing: paox tix ka daux meung raoma:. Viang mawh kawx nan:, pui mawx ang ah phan: nawh hawt yuh, mai: gau pui tang: kaux yuh, tag sang kok nawh mawh pa ting ka daux Meung Raoma:. 20 Aux krai ka pex, phan: pa rah pa see pex ang lheu: khaing: pa rah pa see pui tiem: lai mai: Pharishie: khankix, pex ang tau tix pon laig ka daux Meung Raoma:.

Grawng: been li mai: krax prawng ca:

5:25-26 koe: daux lai Lukax 12:58-59

21 "Pex hoik mhong: grawh grawng: grawng: lox pa hoik krai ka pui ju didix pa ah nin:, 13 `Maix paw vi pah pui yum,' mai: `kaw pa pah pui yum tee: hoek dee ciyang heue:.'

22 Viang mawh kawx nan: Aux krai ka pex, pui pa songrhawm: ka puxaik nawh ku kaux, tee: hoek dee ciyang. Mai: pui mawx ang ah, pa ah ka puxaik nawh,`Raka14,' tee: hoek dee prawng dee ca: cub kuad song: cao: prawng see: khankix, mai: pui mawx ang ah, pa ah, 'maix mawh pui brai:,' tee: hoek daux ngu mawnarhok heue:. 23 Mawh kheu nan:, phan: maix viex pa tan pa lu ka khu: dee tan, mai: doh keud ka phimap pa deuh puxaik maix tix ceu ceu. 24 Deuh pa tan pa lu maix sivoe khu: dee tan mai: hu: ka puxaik maix mai: kieh khaw: kieh caw paox tix ka: ha:, khaix an deeh hoek mai: tan pa tan pa lu maix heue:. 25 Yam hu: maix krax tau mai: kaw pa sang yuh see: ka maix, nied tix yuh pa khaw: rhawm: nawh heue:, phan: ang mawh nan: ha: nawh kox teei tix tawx maix ka cao: prawng see:, mai: cao: prawng see: an teei tix tawx maix ka cao: giex kaing:, mai: cao: giex kaing: sau: maix daux thawng: heue:. 26 Aux krai lox tete telai ka maix, maix ang pon tix lih khaing: dee an, sidah ang maix nyang bax hoik plud piak san: ghoik tix piak heue:.

27 "Pex hoik mhong: gumlox pa hoik ah nin:, 15 'Maix paw phit paw vao mai: moeng pui.' 28 Viang mawh kawx nan:, Aux krai ka pex, pui mawx ang ah, pa jhak ka bon: mai: koe: rhawm: tix sang phit mai: nawh, hoik phit hoik vao mai: nawh daux rhawm: tix heue:. 29 Mai: phan: ngai: khawn: dawm: maix, kieh maix phit, koh tix tik khaing: maix heue:. Laux kraung pakpeung maix tix ceu nie lheu: mhawm: khaing: laig maix daux mawnarhok khawm: kaux tix heue:. 30 Mai: phan: taix khawn: dawm: maix kieh maix phit, kid tix tik heue:. Laux kraung pakpeung maix tix ceu nie lheu: mhawm: khaing: laig maix daux mawnarhok khawm: kaux tix heue:. 31 Viang mawh lox pa krai tix deuh ah nin: ka koe:, 16 'Pui mawx ang ah pa simie tix tik moeng tix, kieh nawh tawx nawh lai grawh grawng: hoik hoik lox heue:.' 32 Viang mawh kawx nan: Aux krai ka pex, pui mawx ang ah phan: nawh tik moeng tix lheu: khaing: grawh grawng: pa phit pa vao nawh, nawh kieh bon: an mawh pui phit pui vao, mai: pui mawx ang ah pa teei tix moeng bon: an nawh phit nawh vao heue:. 33 17 "Pex hoik mhong: lox pa hoik krai ka pui ju didix khankix ah nin:, 'Maix paw tiex paw tu grawh grawng: pa ang mawh ang meh, viang mawh kawx nan:, yuh pa tiex pa tu maix plak sivoe Simiang heue:.'

34 Viang mawh nan: Aux krai ka pex, paw vi tiex paw vi tu ceeix kawx, paw tiex paw tu ka raoma:, kheu raoma: mawh dangngeung Siyiex heue:. 35 Haktiex in kawx paw tiex paw tu kah, kheu mawh ngot dee deuh Nawh caong Tix. Veng Yerusaliem kawx paw tiex paw tu kah, kheu mawh veng laux simiang ting heue:. 36 Paw tiex paw tu ka kaing: tokaux tix, kheu pex ang chix yuh hauk kaing: pex, kieh lung kieh paing tix gawng: kawx. 37 Kieh lox pex mawh, 'mawh heue:. mawh heue:, ang mawh heue:, ang mawh heue:,' khaing:, pa lheu: khaing: an mawh pa lih khaing: pa caox heue:.

38 "Pex hoik mhong: lox pa hoik deuh ah nin:, 18 'Ngai: tix mu: son ngai: tix mu:, mai: rhang: tix plah son rhang: tix plah.' 39 Viang mawh nan: Aux krai ka pex, paw kieh paw raw ka pui caox heue:. Pui mawx ang ah phan: simang: sibax pex khawn: dawm:, deeh veeh ka nawh khawm: tang: plak. 40 Mai: Phan: pui tix kaux kaux simie tix yuh see: ka maix, mai: teei sibex maix, prux vhua: maix kawx baox tawx ka nawh heue:. 41 Mai: pui mawx ang ah pa khin: maix hu: tix lag, hu: mai: nawh ra: lag heue:. 42 Tawx ka kaw pa rawg pa mhaing: ka maix, mai: kaw pa sang yaog sang yaing paw vud tix hu: khaing: nawh heue:. 43 "Pex hoik mhong: lox pa deuh ah nin:, 19 'Maix tag moh pui paox plawg paox nyhawm: tix, mai: koeng ka pui pa koeng ka maix heue:.' 44 Viang mawh kawx nan: Aux krai ka pex, moh pui pa koeng ka pex, mai: rawg bwan:, son pui pa tuktiak tukte: ka pex heue:. 45 Yuh ka mawx son sang mawh pex kawn: Keeing: pex pa ot daux meung raoma:, kheu Nawh kieh singaix lih piang pui caox pui mhawm:, mai: Nawh kieh lhiex lih piang pui rah pui see, mai: pui ang rah ang see heue:. 46 Phan: pex moh pui pa moh ka pex khaing:, pex tag pon bwanson: yuh ka mawx? Pie pui koh mau khankix kawx, yuh nan: ang mawh lie? 47 Phan: pex nawb pex sikah mai: puxaik pex khaing:, pex yuh pa lheu: khaing: tang: kaux pa yuh ka mawx? Pui tang: ceu tang: cat ka yuh nan: ang mawh lie? 48 Mawh kheu nan: pex tag grum mhawm:, awm: grum mhawm: Keeing: pex piang raoma: heue:."

Mathiex

Simin Ting 6

Grawng: pa yuh krax pa mhawm: mai: krax pa rawg bwan:

6:9-13 koe: daux lai Lukax 11:2-4

1 "Rien rhawm: tix yuh ka mawx son ang pex lai yuh pa rah pa see pex sivoe ngai: pui, son sang kieh kix yaox pa yuh pex, phan: ang mawh nan: pex ang pon bwanson: ka Keeing: pex pa ot ka daux meung raoma: heue:.

2 "Mawh kheu nan:, yam yuh maix pa tan pa lu, paw kieh phlu: teet tawng hu: sivoe maix, awm: pui pie pui lhen: khankix yuh ka daux nyiex sidiex khankix, mai: ka daux krax khankix, son sang pon kix min: plakngai: khaing: kawn: pui. Aux krai lox tete telai ka pex kix hoik pon bwanson: kix heue:. 3 Viang mawh kawx nan:, yam yuh maix pa tan pa lu, paw kieh taix khawn: gwiex maix tawng pa yuh taix khawn: dawm:. 4 Yuh ka mawx son sang yuh pa tan pa lu tix dee glip, mai: Keeing: maix pa chix yaox dee glip, tag tawx bwanson: ka maix heue:.

5 "Mai: yam rawg pex bwan:, pex paw yuh awm: pui pie pui lhen: khankix, kheu moh kix tix cung mai: rawg bwan: ka daux nyiex dee sidiex khankix mai: ka gah krax, son sang kieh pui yaox tix heue:. Aux krai lox tete telai ka pex, kix hoik pon bwanson: kix heue:. 6 Viang mawh kawx nan:. yam rawg maix bwan: laig ka daux lawg plak daux mai: khaix hoik nyeep maix siviex, rawg bwan: ka Keeing: maix pa ot dee glip, mai: Keeing: maix pa chix yaox dee glip tag tawx bwanson: ka maix heue:. 7 Mai: yam rawg pex bwan: paw deeh krai lox giex going awm: pui tang: ceu tang: cat, kheu ce: kix tag mhong: lox kix, kheu pa sikah kix tom: nie heue:. 8 Kheu nan: paw kieh awm: kix, mawh kheu Keeing: pex hoik tawng pa lo pex khawm: uik ka: ang pex nyang rawg nyang mhaing: ka Nawh heue:. 9 Mawh kheu nan: pex rawg bwan: yuh nin:,`Keeing: ex pa ot piang meung raoma: kieh ceukaux Maix koe: krax yung: krax yi: heue:. 10 Kieh meung Maix hoek heue:. Awm: naog alo Maix piang meung raoma:, ka piang haktiex in kawx kieh awm: an heue:. 11 Tawx pa ih pa un: pa lo ex son singaix liak. 12 Mai: pluat ploi: phimap phigrham: ex liak, awm: pluat pioi: ex pui pa phit ka ex heue:. 13 Mai: paw viex ex hoek ka daux krax nyaw krax glaw:, viang mawh kawx nan: taoh ex khaing: kaw pa caox liak. Grawh grawng: nawh meung haktiex, mai: siawp sibrawm, mai: min: plakngai:, mawh cie Maix leeing: ju leeing: phan: heue:. Amen.' 14 Phan: pex pluat phimap phigrham: pui tang: kaux, Keeing: pex piang meung raoma: kawx tag pluat phimap pex heue:. 15 Viang mawh kawx nan:, phan: pex ang pluat phimap pui tang: kaux, Keeing: pex kawx ang pluat phimap pex heue:.

Grawng: tuah pa ih pa un: mai: dee sang een: kraung

6:22-23 koe: daux lai Lukax 11:34-36

16 "Lheu: khaing: in, yam tuah pex pa ih pa un: paw kieh voi pakngai: awm: pui pie pui lhen: khankix, mawh kheu kix yuh pakngai: kix ang nyawm tix jhak, son sang kieh pui yaox kix tuah pa ih pa un: tix heue:. Aux krai lox tete telai ka pex, kix hoik pon bwanson: cie kix heue:. 17 Viang mawh kawx nan:, yam tuah maix pa ih pa un: kraix rawm: bee ka kaing: tix, mai: khoek ngai: maix heue:. 18 Yuh ka mawx son ang pui yaox pa tuah maix pa ih pa un:, viang mawh nan: son sang yaox Keeing: maix pa ot dee glip, mai: Keeing: maix pa chix yaox dee glip tag tawx bwanson: ka maix heue:.

19 "Paw vi sawg tix een: kraung son pex piang haktiex, dee pungpieang siah mai: rhaw: chix yuh laux, mai: dee pui briex pui lak chix yieh tix laig mai: briex heue:. 20 Viang mawh nan: sawg tix een: kraung son pex ka daux meung raoma:, dee ang pungpieang siah mai: rhaw: chix yuh laux, mai: dee ang pui briex pui lak chix yieh tix laig mai: briex heue:. 21 Mawh kheu dee koe: kraung maix, rhawm: maix kawx koe: tan: heue:. 22 Pa riang tokaux mawh ngai: heue:, mawh kheu nan: phan: ngai: maix riang kienie, tokaux maix khawm: uik tag naog pa riang heue:. 23 Viang mawh kawx nan:, phan: ngai: maix ang mhawm: tokaux maix tag naog pa vhaik khawm: uik heue:. Mawh kheu nan: phan: pa riang pa koe: daux maix mawh pa vhaik, pa vhaik an kied vhaik miex ding. 24 Pui tix kaux kawx ang chix yuh son simiang ra: kaux, mawh kheu nawh tag koeng ka tix kaux, mai: moh tang: kaux an, phan: ang mawh nan:, nawh tag een: rhawm: ka tix kaux, mai: nieb yuh ka tang: kaux an heue:. Pex ang pon tix yuh son Siyiex, mai: khawm: son sinngao heue:.

Paw koe: krax khi: krax glawh

6:25-33koe: daux lai Lukax 12:22-31

25 Mawh kheu nan: Aux ah nin: ka pex, pex sang ih sang nyaux pa yuh ka mawx son ju tix, mai: sang ceep pa yuh ka mawx, son tokaux tix, paw vi khi: kah. Ju kienie, lheu: mhawm: khaing: pa ih pa un: ang mawh lie? Mai: tokaux lheu: mhawm: khaing: kraung ceep ang mawh lie? 26 Jhak ka sim: pa po: piang raoma: khankix heue:, kix ang rhuat ang van: simie, mai: kix ang vawg, mai: kix ang sau: daux krao:, viang mawh nan:, Keeing: pex piang raoma: tawx kix ih heue:. Pex lheu: mhawm: lheu: ngawh khaing: sim: khankix ang mawh lie? 27 Mai: ka daux pex kheu pa khirhawm: khirhi: pui mawx chix kieh tokaux tix baox lhaong: tix sawk? 28 Mai: pex khirhawm: son kraung ceep yuh ka mawx? Keud tix yaox grawh grawng: tai siyak pa koe: daux tiag, daux tu chix ting chix lhaong: yuh ka mawx. Kix ang yuh kaing mai: ang kling: heue:. 29 Viang mawh nan: Aux krai ka pex viang mawh kraung pa ceep simiang Sawlamun pa ting min: plakngai: ang mhawm: awm: tai an khankix tix kho: kawx heue:. 30 Pex pa iak krax yumrhawm: eue:, phan: Siyiex tawx pa ceep pa mhawm: awm: an ka num: rib num: riem daux tiag daux tu, pa koe: singaix, mai: pa teei tix sau: ka daux, daux ngu pasax, Nawh sang tawx kraung ceep pa lheu: khaing: an ka pex ang mawh lie? 31 Mawh kheu nan: paw khirhawm: tix ah nin:, 'Ex sang ih pa tix? Phan: ang mawh nan: ex sang nyaux pa tix? Phan: ang mawh nan: ex sang ceep pa tix?' 32 Mawh Kheu pui tang: ceu tang: cat khankix sawg ceu an khawm: uik heue:. Grawh grawng: nawh, Keeing: pex piang raoma: hoik tawng grawng: pa lo pex ceu in khankix khawm: uik heue:. 33 Mawh kheu in pex sawg Meung Siyiex mai: pa rah pa see Nawh phaoxka: ha:, mai: Nawh tag baox tawx ceu in khawm: uik ka pex heue:. 34 Mawh kheu nan: paw vi khirhawm: son pasax, kheu pasax tag sang khirhawm: son pasax. Mawh kheu pa ang mhawm: pa caox singaix kub son singaix heue:."

Mathiex

Simin Ting 7

Paw prawng paw ca:

7:3-5 koe: daux lai Lukax 6:41-42

1 "Paw prawng paw ca:, yuh ka mawx son ang pex sang hoek krax prawng krax ca:. 2 Mawh kheu pex prawng pex ca: ka pui yuh ka mawx, tag sang prawng sang ca: ka pex yuh nan:, mai: pex tong: pex tiag tix tawx ka pui tang: kaux miex ding, tag sang deeh tong: deeh tiag tix tawx ka pex yuh nan: heue:. 3 Mai: yuh ka mawx maix jhak kuh ngai: pa iak daux ngai: puxaik maix, mai: ang keud grawh grawng: nuk pa koe: daux ngai: tokaux tix. 4 Phan: ang mawh nan: maix chix ah ka puxaik maix, kieh aux teei tix tik kuh ngai: maix yuh ka mawx? yam kawn: koe: nuk daux ngai: maix. 5 Pui pie pui lhen: eue:, teei tix tik nuk pa koe: daux ngai: maix ka: ha:, mai: maix tag sang yaox mhawm: mhawm:, son sang teei kuh lih khaing: ngai: puxaik maix heue:.

6 "Paw tawx pa singax singeh ka sox, siang: mhawm: ceu pa koe: daux jawx cie pex kawx, paw taing sivoe lig, phan: ang mawh nan: ha kix kox dig greem: caong tix, mai: deeh veeh mai: kiied pex kie.

Rawg mai: tag pon heue:

7:7-11 koe: daux lai Lukax 11:9-13

7 Rawg heue:, mai: tag sang tawx ka pex. Sawg heue:, mai: pex tag sang yaox. Gleuh siviex heue:, mai: tag sang paoh son pex heue:. 8 Grawh grawng: nawh, pa rawg ku kaux tag pon, mai: kaw pa sawg tag yaox, mai: ka kaw pa gleuh siviex tag paoh son nawh heue:. 9 Ka daux pex koe: tix kaux kaux lie, yam rawg yam mhaing: kawn: tix khaomun, pa teei simaox tawx ka nawh. 10 Mai: phan: ang mawh nan:, phan: nawh rawg nawh mhaing: kax, pa tawx siuing: kah lie? 11 Phan: pex pa mawh pui caox kawx, chix tawx kraung pa mhawm: ka kawn: praix tix, Keeing: pex pa ot ka daux meung raoma: tag nie lheu: tawx ceu pa mhawm: ka pui pa rawg ka Nawh miex ding? 12 Mawh kheu nan:, can ceu pa simie pex pui yuh ka tix khawm: uik, pex kawx, yuh nang: nan: ka kix heue:. Kheu in mawh lox lai been li mai: lox cao: jhai: khankix heue:.

13 "Pex laig ka daux siviex pa iak pa sikhawp heue:. Mawh kheu siviex mai: krax pa hoek dee laux dee leeing: mawh pa ting pa vieh, mai: pui pa laig tan: kied nie heue:. 14 Mawh kheu siviex mai: krax pa hoek dee sang pon ju leeing: ju leeing: phan: mawh pa iak pa sikhawp, mai: pui pa yaox kied tux heue:.

Grawng: khaox plix ra: ceu

15 "Rien rhawm: tix ka cao: jhai: pa ang mawh ang meh khankix, pa ceep hak yung: plak piang, viang mawh nan: ka plak daux mawh soxla pa caox heue:. 16 Pex tag tawng kix ka plix kix heue:. Pui pieh plix siiet ka pangkat lie? mai: pieh plix ruh ka pangkat heeik lie? 17 Khaox pa mhawm: ku khaox plix plix pa mhawm:, viang mawh kawx nan: khaox pa ang mhawm: plix plix pa ang mhawm: heue:. 18 Khaox pa mhawm: ang chix plix plix pa ang mhawm:, khaox pa ang mhawm: kawx, ang chix plix plix pa mhawm: heue:. 19 Khaox pa ang plix plix pa mhawm: ku khaox, kid goh mai: taing sau: daux ngu heue:. 20 Mawh kheu nan: pex tag tawng kix ka plix kix heue:. 21 Pui pa kok ka Aux,`Simiang eue: Simiang eue:,' pon tix laig ka daux meung raoma: ku kaux ang lai mawh. Viang mawh kawx nan:, mawh kaw pa yuh hawt alo Keeing: Aux pa ot ka daux meung raoma: khaing: pa pon tix laig heue:. 22 Ka daux singaix an sax, pui haoh pui hun: tag sang ah nin: ka Aux.`Simiang eue:, Simiang eue:, ex hoik sidiex lox jhai: ka daux ceukaux Maix, mai: hoik sigrheu: phicaox khankix ka daux ceukaux Maix, mai: hoik yuh kaing pa ting siawp sibrawm tom: nie ka daux ceukaux Maix ang mawh lie?' 23 Mai: Aux tag krai ka kix sidawng:, 'Aux ang sax tawng pex, pex pa yuh phimap phigrham: khankix eue:, lih hu: khaing: Aux.'

Grawng: jaong num: ra: ceu

7:24-27 koe: daux lai Lukax 6:47-49

24 "Mawh kheu in pui pa mhong: gumlox Aux in, mai: hawt tix yuh ku kaux daux pui, tag sang awm: pui pa lhak pa lhiem: tix kaux, pa sum: nyiex nawh ka piang simaox. 25 Mai: lih lhiex, mai: rawm: haok huan:, mai: bhaung: khankix phlu:, mai: klah ka nyiex an, viang mawh nan: nyiex an ang goh, kheu hoik sum: ka piang simaox heue:. 26 Pui pa mhong: gumlox Aux in mai: ang hawt tix yuh, ku kaux daux pui, tag sang awm: pui daox tix kaux, pa sum: nyiex nawh ka piang mhaik. 27 Mai: lih lhiex, mai: rawm: haok huan:, mai: bhaung: khankix phlu:, mai: klah ka nyiex an, mai: nyiex an goh heue:. Mai: pa goh an kied ting."

28 Mai: khaix hoik sidiex Yesux lox ceu in khankix, cub pui haoh pui hun: khankix daox deng: ka lox sidiex lox gau Nawh Cao: heue:. 29 Mawh kheu Nawh sidiex gau ka kix awm: pui pa koe: siawp sibrawm, mai: ang awm: pui tiem: lai kix khankix heue:.

Mathiex

Simin Ting 8

Grawng: pa kieh Yesux pui saux sipawg singax

8:2-4 koe: daux laiMakux 1:40-44; Lukax 5:12-14

1 Yam lih hoek Nawh Cao: khaing: piang gawng, cub pui haoh pui hun: hawt Nawh heue:. 2 Mai: jhak heue:, pui sipawg tix kaux hoek mai: krub ka Nawh Cao: ah nin:, "Simiang eue:, phan: Maix koe: rhawm:, tix cox aux kieh aux singax Maix chix heue:." 3 Mai: Nawh Cao: nyeu taix Tix mai: teeh ka kaw an ah nin:, "Aux koe: rhawm: heue:, kieh maix singax heue:." Mai: dom: mawx dom: an pa sipawg nawh singax heue:. 4 Mai: Yesux baox ah nin: ka nawh, "Rien rhawm: tix mai: paw krai ka pui tix kaux kawx, viang mawh nan: hu: mai: jhi: tokaux tix ka cao: giex kaing: li pa ting, mai: tawx pa tan pa lu awm: pa nhie: Mose, son sang mawh mhai: sakse: ka kix heue:."

Grawng: pai: kawncau cao: kaing: naing mai: miex moeng Petrux

8:5-13 7:7-11 koe: daux lai Lukax 7:1-10

5 Mai: yam hoik laig Nawh Cao: ka daux veng Kapeniom, cao: giex kaing: naing tix kaux hoek ka Nawh mai: khyox khaw: ka Nawh, 6 ah nin:, "Simiang eue: siliex aux tix kaux koe: jhawm: saux yum taix yum caong mai: it daux nyiex, mai: nawh tuat siviet kied sigrien heue:." 7 Mai: Nawh Cao: ah nin: ka nawh, "Aux sang hoek mai: cox nawh moi: heue:." 8 Mai: cao: giex kaing: naing an pawk lox mai: ah nin:, "Simiang eue:, ang aux keung: tix kieh Maix hoek kreed greem: braux nyiex aux, viang mawh nan: tawx ngie lox tix gum khaing: mai: siliex aux tag moi: heue:. 9 Kheu aux mawh pui ot greem: simiang kawx, aux koe: pui naing greem: aux heue:. Phan: aux nhie: tix kaux hu:, nawh hu:, mai: phan: aux nhie: tang: kaux hoek, nawh hoek heue:, mai: phan: aux nhie: siliex aux yuh ceu in, nawh yuh heue:." 10 Mai: yam mhong: Yesux lox ceu an, Nawh daox deng: kah, mai: ah nin: ka pui pa hawt khaix Nawh khankix, "Aux krai lox tete telai ka pex, ang Aux sax yaox pui pa yumrhawm: niex ding niex dod ka daux pui Isarilax heue:. 11 Aux baox ah nin: ka pex, pui tag hoek khaing: plak lih singaix mai: plak klip singaix tom: nie, mai: tag ngawm tau mai: Abraham mai: Icak mai: Yakop, ka daux meung raoma: heue:. 12 Viang mawh nan: kawnpraix meung an tag grheu: lih plak praix daux pa vhaik, dee tag yiem riag mai: dee greeik rhang: heue:." 13 Mai: Yesux baox ah nin: ka cao: giex kaing: naing an, "Maix hu: heue:, awm: hoik yumrhawm: maix, kieh mawh son maix." Mai: siliex nawh moi: bawg yam nari an heue:.

Yesux pai: pui saux tom: nie

8:14-16 koe: daux lai Makux 1:29-34; Lukax 4:38-41

14 Yam hoek Yesux daux nyiex Petrux, Nawh yaox miex moeng nawh saux mai: it heue:. 15 Mai: Nawh Cao: teeh taix kiex, mai: jhawm: saux kiex grai:, mai: kiex kaoh, mai: khan: kheu: ka Nawh Cao: heue:. 16 Mai: yam hoek yam ponbo kix viex pui pa laig phicaox haoh hun: ka Nawh Cao:, mai: Nawh teei gumlox tix gum khaing: grheu: phicaox khankix lih, mai: Nawh cox pui pa koe: jhawm: saux jhawm: ngia khawm: uik kieh kix moi: heue:. 17 Yuh ka mawx son sang naog lox pa krai cao: jhai: Isayax pa ah nin:, 20 "Tokaux Nawh teei pa iak riang iak rao ex, mai: kawg jhawm: saux jhawm: ngia ex khankix heue:."

Krax pa cheuk cheu: ka pa sang yuh kawncau

8:19-22 koe: daux lai Lukax 9:57-60

18 Yam yaox Yesux cub pui haoh pui hun: ot sivie Nawh tan:, Nawh cao: tawx lox kieh hu: plak toi: rawm: heue:. 19 Mai: pui tiem: lai tix kaux hoek mai: ah nin: ka Nawh Cao:. "Sara Cao: Gau eue:, aux sang hawt dee sang hu: Maix ku dah ku dee heue:." 20 Mai: Yesux ah nin: ka nawh, "Sox praix khankix koe: daux, mai: sim: piang raoma: khankix koe: mheem:, viang mawh kawx nan: Kawn: kawn: pui ang koe: dee deuh kaing: Tix heue:." 21 Mai: kawncau tang: kaux tix kaux ah nin: ka Nawh Cao:, "Simiang eue:, kieh aux hu: sipaung: keeing: aux ka: ha:." 22 Viang mawh kawx nan: Yesux ah nin: ka nawh, "Hawt Aux heue:, mai: kieh pui yum sipaung: pui yum cie kix heue:."

Yesux kieh bhaung: ting yien: yaog tix

8:23-27 koe: daux lai Makux 4:36-41; Lukax 8:22-25, 8:23-27 jhak daux lai Mth. 14:22-33

23 Mai: yam hoik laig Nawh Cao: ka daux reu kawncau Nawh khankix hawt Nawh heue:. 24 Mai: jhak heue:, bhaung: ting hoek tix phlu: ka daux rawm: nhawng:, tom: pukpak rawm: kheem: reu an, viang mawh kawx nan:, Nawh Cao: it heue:. 25 Mai: kix hoek dex ka Nawh Cao: mai: so: Nawh siduad, mai: ah nin:, "Simiang eue:, taohex liak, ex dex sang laux heue:." 26 Mai: Nawh Cao: ah nin: ka kix, "Pex pa iak krax yumrhawm: yumrhi: eue:, pex lhat graung yuh ka mawx?" Yam an Nawh kaoh mai: ah ka bhaung: khankix, mai: rawm: nhawng:, mai: deeh yien: sigrien sigre heue:. 27 Mai: pui khankix daox deng: kah tom: ah nin:, "Kaw in mawh Pui pa yuh ka mawx? Pie bhaung: khankix mai: rawm: nhawng: kawx, nghiet lox Nawh heue:."

Grheu: phi: pa khreeing: lih

8:28-34 koe: daux lai Makux 5:1-17 Lukax 8:26-37

28 Mai: yam hoek Nawh Cao: plak toi: rawm: ka daux meung Kadarax, pui pa koe: phicaox ra: kaux lih khaing: daux simeeig mai: rieb Nawh. Kiex kied kua: tom: ang pui tix kaux kawx pon hu: krax an heue:. 29 Mai: jhak heue:, kiex kok yo ah nin:, "Kawn: Siyiex eue:, Maix koe: pa yuh mai: yiex ceu patix? Maix hoek tix tuktiak tukte: yiex kah, ka: sang hoek bawg yam lie?" 30 Ka dee singai khaing: kix koe: cub lig tix cub pa sawm: tan: heue:. 31 Mai: phicaox khankix khyox khaw: ka Nawh Cao: ah nin:, "Phan: Maix grheu: ex lih, ploi: ex laig ka daux cub lig an liak." 32 Mai: Nawh Cao: ah nin: ka kix, "Hu: heue:." Mai: kix lih hu: laig ka daux lig an khankix, mai: jhak heue:, cub lig an khawm: uik to: lih ka dee nie rieh jun: jee laig ka daux rawm: nhawng: mai: yum daux rawm: heue:. 33 Mai: pui pa liang lig khankix to: hu: laig ka daux veng, mai: krai grawh grawng: ku ceu, pa hoik mawh ka kiex pa hoik laig phicaox heue:. 34 Mai: jhak heue:, pui daux veng khawm: uik hoek tix jhak tix yaox ka Yesux, mai: yam yaox kix Nawh Cao: kix khyox khaw: nhie: Nawh lih hu: khaing: daux meung kix heue:.

Mathiex

Simin Ting 9

Pai: ka pui pa koe: jhawm: saux yum taix yum caong

9:2-8 koe: daux lai Makux 2:3-12; Lukax 5:18-26

1 Mai: Nawh Cao: laig daux reu mai: deeh tiang hu:, mai: hoek ka daux veng tokaux Tix heue:. 2 Mai: jhak heue:, kix viex pui pa koe: jhawm: saux pa yum taix yum caong tix kaux hoek ka Nawh, pa it ka piang ku:, mai: yam yaox Yesux krax yumrhawm: kix, Nawh ah nin: ka kaw pa yum taix yum caong an, "Kawn: eue:, gauxrhawm: heue:, hoik pluat phimap maix heue:." 3 Mai: jhak heue:, pui tiem: lai tiblah ah nin: daux tokaux tix, "Pui in sa lao ka Siyiex heue:." 4 Yesux tawng pa keud pa sawn: kix daux rhawm: tix mai: ah nin:, "Pex keud pex ce: pa caox daux rhawm: tix yuh ka mawx? 5 Lox yuh ka mawx lheu: yie tix ah, 'Hoik pluat phimap maix heue:.' yie tix ah lie? Phan: ang mawh nan:, 'Kaoh, mai: hu: heue:,' yie tix ah lie? 6 Viang mawh kawx nan:, yuh ka mawx pex tag sang tawng grawh grawng: Kawn: kawn: pui koe: siawp sibrawm tix chix pluat phimap ka piang haktiex, (Nawh Cao: baox ah nin: ka pui pa koe: jhawm: saux pa yum taix yum caong an) Kaoh, mai: teei kraung it maix, mai: deeh ing: ka nyiex maix heue:." 7 Mai: kaw an kaoh mai: ing: ka nyiex tix heue:. 8 Yam yaox cub pui haoh pui hun: ceu an, kix lhat mai: yaogyaw Siyiex, pa hoik tawx siawp sibrawm pa yuh nan: ka pui heue:.

Pa kok ka Mathiex

9:9-13 koe: daux lai Makux 2:14-17; Lukax 5:27-32

9 Mai: yam hu: Yesux khaing: tan: Nawh yaox pui tix kaux, pa kaux Mathiex, ngawm dee koh mau, mai: ah nin: ka nawh, "Hawt Aux heue:." Mai: nawh kaoh mai: hawt khaix Nawh Cao: heue:.

10 Mai: khaix an yam ngawm neung Nawh Cao: mai: sawm: ka daux nyiex, jhak heue:, pui koh mau mai: pui ting map ting grham: hoek ngawm tau mai: Yesux mai: kawncau Nawh khankix heue:. 11 Mai: yam yaox Pharishie: khankix ceu an, kix ah nin: ka kawncau Nawh khankix, "Sara Cao: Gau pex sawm: tau mai: pui koh mau mai: pui ting map ting grham: khankix yuh ka mawx? 12 Viang mawh nan: yam mhong: Nawh Cao: lox ceu an Nawh ah nin:, "Pui pa nyawm ot nyawm koe:, ang lo pui pa chix sidah dim: viang mawh kawx nan: mawh pui pa koe: jhawm: saux jhawm: ngia khaing: pa lo pui chix sidah. 13 Pex hu: mai: gau dee bleeh lox in heue:, 21 'Aux moh krax caoxrhawm:, mai: ang moh krax tan krax lu.' Kheu hoek Aux son sang kok pui rah pui see khankix ang mawh, viang mawh nan: hoek tix kok pui pa koe: map koe: grham: heue:."

Grawng: pa krai Yesux krax tuah pa ih pa un:

9:14-17 koe: daux lai Makux 2:18-22; Lukax 5:33-39

14 Yam an kawncau Yohan khankix hoek ka Nawh Cao: mai: ah nin:, "Ex mai: Pharishie: khankix tuah pa ih pa un: lawx lawx, viang mawh nan: kawncau Maix ang tuah pa ih pa un: yuh ka mawx?" 15 Mai: Yesux ah nin: ka kix, "Paoxgrawm pui pa yuh kapaox chix khirhawm: khirhi: yam kawn: ot kaw pa yuh kapaox mai: kix lie? Viang mawh kawx nan: bawg yam singaix tag sang hoek, yam tag sang teei kaw pa yuh kapaox khaing: kix, mai: yam an kix tag tuah pa ih pa un: heue:. 16 Pui tix kaux kawx ang sax teei man: pa khraox blaox kraung ceep pa prim:, phan: yuh nan: kienie, man: pa hoik blaox daux griah tag kieh pa prim: laux, mai: daux griah tag nie vieh khaing: phaoxka: heue:. 17 Pui ang sax teei rawm: plix siiet pa khraox sau: ka daux chee: hak pa prim:, phan: yuh nan: kienie, chee: hak tag bih, mai: rawm: plix siiet tag hieh, mai: chee: hak tag laux heue:. Viang mawh nan: pui sau: rawm: plix sieht pa khraox, ka daux chee: hak pa khraox, mai: khawm: ra: ceu ang laux ang leeing: heue:."

Yuh krax pa daox pa am: mai: pai: jhawm: saux jhawm: ngia

9:18-26 koe: daux lai Makux 5:22-43; Lukax 8:41-56

18 Yam krai Nawh Cao: lox ceu in khankix ka kix, jhak heue:, pui giex kaing: tix kaux hoek mai: krub Nawh Cao: ah nin:, "Kawn: bon: aux tix kaux yamin kawx hoik yum, viang mawh kawx nan: hoek mai: deuh taix Maix piang nawh mai: nawh tag deeh im: heue:." 19 Mai: Yesux kaoh, mai: khawm: kawncau Nawh khankix hawt kaw an heue:, 20 Mai: jhak heue:, yam an bon: tix kaux pa hoik koe: jhawm: saux pa lih nham:, kao: num ra:, hoek plak khaix Nawh mai: teeh caong kraung ceep Nawh Cao: heue:. 21 Kheu nawh keud daux rhawm: tix ah nin:, "Phan: aux teeh kraung ceep Nawh Cao: khaing:, aux tag moi: heue:." 22 Viang mawh nan: Yesux deeh gi mai: yaox bon: an mai: ah nin:, "Kawn: bon: Aux eue:, kieh gauxrhawm: heue:, krax yumrhawm: maix hoik kieh maix moi:." Mai: ka daux bawg yam nari an bon: an moi: heue:. 23 Mai: yam hoek Yesux ka daux nyiex pui giex kaing:, mai: yaox pui pa phlu: lawkleh khankix, mai: cub pui pa sinum siaox tan: khankix. 24 Nawh Cao: ah nin:, "Yoi: heue:, mawh kheu kawn: bon: in ang yum, mawh ngie laig it nawh khaing:." Mai: kix yuh pa ang yung: ang yi: nyiah ka Nawh Cao: heue:. 25 Khaix hoik kieh cub pui lih, Nawh Cao: laig ka daux mai: teei taix bon: an, mai: nyawm bon: an kaoh heue:. 26 Mai: min: plakngai: kheu grawh grawng: ceu an, tah hu: ka daux haktiex an khawm: uik heue:.

27 Mai: yam kaoh Yesux khaing: dee an mai: hu:, pui dugngai: ra: kaux hawt khaix Nawh Cao: mai: kok yo ah nin:, "Kawn: Dawit eue:, caoxrhawm: ka yiex liak." 28 Mai: yam hoik laig Nawh Cao: ka daux nyiex, pui dugngai: an khankiex hoek dex ka Nawh Cao:, mai: Yesux ah nin: ka kiex, "Pax yumrhawm: grawh grawng: pa chix yuh Aux ceu in lie?" Kiex tom: ah nin: ka Nawh Cao:, "Mawh heue: Simiang." 29 Yam an Nawh Cao: teeh ngai: kiex, ah nin:, "Awm: yumrhawm: pax kieh mawh ka pax heue:." 30 Mai: ngai: kiex blah heue:. Mai: Yesux tawm: lox ka kiex ah nin:, "Paw vi kieh pui tawng tix kaux kawx." 31 Viang mawh kawx nan: kiex hu: mai: kieh min: plakngai: Nawh Cao: tah ka daux haktiex an khawm: uik heue:.

32 Mai: yam lih hu: kiex, jhak heue:, pui viex pui aw: pa laig phicaox tix kaux, hoek ka Nawh Cao: heue:. 33 Mai: khaix hoik grheu: phicaox an lih, pui aw: an sikah heue:. Mai: cub pui haoh pui hun: khankix daox deng: kah, mai: ah nin:, "Ang sax yaox ceu pa awm: in daux Isarilax heue:." 34 Viang mawh kawx nan: Pharishie: khankix ah nin:, "Nawh een: rhawm: ka simiang phicaox mai: grheu: phicaox khankix lih heue:."

35 Mai: Yesux hu lai ling ka daux yaong: daux veng khawm: uik, mai: gau ka daux nyiex dee sidiex kix khankix, mai: sidiex lox bwan: pa gauxrhawm: gauxrhi: pa dex pa dawd mai: Meung Siyiex, mai: cox pui pa koe: jhawm: saux jhawm: ngia ku ceu moi: heue:." 36 Viang mawh kawx nan:, yam yaox Nawh Cao: cub pui haoh pui hun: Nawh koe: krax caoxrhawm: son kix, kheu kix koe: krax kharhawm: kharhi: mai: prung: prang: awm: yung: pa ang koe: cao: liang cao: kia: heue:. 37 Yam an Nawh Cao: ah nin: ka kawncau Nawh khankix, "Nghox pa kaux pa khaw: tix vawg nie tete, viang mawh kawx nan: pui pa vawg tux heue:. 38 Mawh kheu nan: pex rawg bwan: ka Simiang cao: nghox, yuh ka mawx son sang ploi: Nawh pui vawg nghox khankix hoek son sang vawg nghox Nawh heue:."

Mathiex

Simin Ting 10

Ploi: kawncau kao: kaux ra: hu: sidiex

10:2-4 koe: daux lai Makux 3:16-19; Lukax 6:14-16; Kawncau 1:13 *10:9-15 koe: daux lai Makux 6:8-11; Lukax 9:3-5; 10:4-12 *10:19-22 koe: daux lai Makux 13:11-13; Lukax 21:12-17 10:26-33 koe: daux lai Lukax 12:2-9 *10:34-35 koe: daux lai Lukax 12:51-53

1 Mai: Nawh Cao: kok kawncau Nawh kao: kaux ra: hoek ka Tix, mai: tawx kix siawp sibrawm piang phi: pa seeing: pa brai: khankix, son sang grheu: kix lih, mai: son sang cox jhawm: saux jhawm: ngia ku ceu moi: heue:.

2 Ceu kaux kawncau Nawh pa ting kao: kaux ra: mawh nin:, kaw phaoxka: mawh Simon, pa kok mawh Petrux, mai: pux nawh Andare. Yakop kawn: Zebedie:, mai: pux nawh Yohan. 3 Philipux mai: Bathawlamie:. Thomax mai: Mathiex pui koh mau. Yakop kawn: Alaphie:, mai: Lebie: ceukaux ru nawh mawh Thatdie:. 4 Simon pui Kananix mai: Yudax Isakariut, kaw pa tik pa tawx Nawh Cao: heue:.

5 Yesux ploi: pui kao: kaux ra: in hu:, mai: tawm: lox ka kix ah nin:, "Pex paw vi hu: dee ot pui tang: ceu tang: cat, mai: paw vi laig daux veng pui Samarix tix veng kawx. 6 Viang mawh kawx nan: hu: ka yung: pa hoik grai: pa dex mai: geh nyiex Isarilax heue:. 7 Mai: yam hu: pex sidiex gau ah nin:, 'Meung Raoma: uik dex sang hoek heue:.' 8 Cox pa koe: jhawm: saux jhawm: ngia moi:, kieh pa hoik yum deeh kaoh im:, kieh pui sipawg khankix singax, mai: grheu: phicaox khankix lih heue:. Pex ang tawx ngawh mai: hoik pon, paw teei ngawh mai: tawx heue:. 9 Paw vi sau: khri:, mau, tawng, daux hau: maox khlax. 10 Paw vi teei bau: son yam hu: krax, paw vi teei sibex ra: pheen:, paw teei kiep, paw teei khaox gix, mawh kheu pui yuh kaing keung: tix pon pa ih pa un: tix heue:. 11 Mai: pex laig daux yaong: daux veng mawx ang ah, sawg tix yaox pui pa keung:, mai: ot tan: tom: lih hu: pex heue:. 12 Yam laig pex daux nyiex, kienie, nawb heue:. 13 Phan: nyiex an keung: kieh pa nhim: pex ot piang nawh heue:, viang mawh kawx nan: phan: ang keung: kieh pa nhim: pex deeh hoek ka pex heue:. 14 Mai: pui mawx ang ah, pa ang rieb pex, mai: ang nghiet lox pex, yam lih hu: pex khaing: daux nyiex an, phan: ang mawh nan: khaing: daux veng an, khruah tix tik phawng: tiex pa koe: ka caong pex tan: heue:. 15 Aux krai lox tete telai ka pex, tag sang lheu: yie tix kham: son haktiex Sawdom mai: Gawmawrax daux singaix ciyang singaix prawng sax, khaing: son veng an heue:.

16 "Jhak heue:, Aux ploi: pex hu: awm: yung: hu: sinax soxla khankix heue:. Kheu nan: pex lhaklhiem: awm: siuing: khankix, mai: ang chix phit awm: sikaux khankix heue:. 17 Rien rhawm: tix ka pui heue:, kheu kix tag teei pex tawx ka cub kuad song: cao: prawng see: khankix, mai: kix tag sivied pex daux nyiex dee sidiex kix khankix heue:. 18 Mai: sivoe pui giex kaing: mai: simiang khunhawkham khankix kawx, tag sang viex pex hu:, mawh kheu Aux, yuh ka mawx son sang mawh mhai: sakse: son kix mai: ka pui tang: ceu tang: cat khankix heue:. 19 Viang mawh nan:, yam teei kix tix tawx pex paw khirhawm: grawh grawng: lox pa sang ah sang krai pex, kheu lox pa sang ah sang krai pex tag tawx ka pex ka daux bawg yam nari an heue:. 20 Mawh kheu pex ah pex krai ang mawh, viang mawh nan: mawh Khwan: Keeing: Cao: pa ah pa sikah ka daux pex heue:. 21 Mai: puxaik tix kaux hoik tix kaux tag sang teei tix tawx puxaik tix son sang pah yum, mai: keeing: kawx tag teei tix tawx kawn: tix, mai: kawnpraix khankix kawx tag kaoh tix yuh ka miex keeing: tix mai: kieh pah kix yum heue:. 22 Mai: pui khawm: uik tag koeng ka pex mawh kheu ceukaux Aux. Viang mawh kawx nan: kaw pa kaux pa cong: tom: sidah kaw an tag hoek krax taoh heue:. 23 Yam tuktiak tukte: pui ka pex daux veng in, to: hu: tang: veng heue:. Aux krai lox tete telai ka pex, ka: ang pex nyang tah daux veng Isarilax khankix, Kawn: kawn: pui tag hoek heue:.

Grawng: ngawh jum pa tawx pa yuh kawncau

24 "Kawncau ang lheu: ting khaing: sara cao: gau, mai: siliex ang lheu: ting khaing: simiang nawh. 25 Phan: kawncau awm: sara cao: gau nawh, mai: siliex awm: simiang nawh, ding heue:. Phan: kix hoik kok Cao: nyiex Belazebulax, kix tag nie lheu: kok pui nyiex Nawh khaing: in miex ding heue:. 26 Mawh kheu in paw vi lhat ka kix, mawh kheu ang koe: tix ceu kawx pa hoik kheem: hoik tawb pa tag ang deeh hoe:, mai: pa hoik mox ang koe: tix ceu kawx pa ang deeh kieh tawng heue:. 27 Pa krai Aux ka pex, ka daux pa vhaik pex hu: krai ka daux pa riang. Pa mhong: pex daux yhaok, yo tix krai ka piang prang: nyiex heue:. 28 Mai: paw lhat ka kix pa chix teei tokaux yum, mai: ang chix teei ju yum. Viang mawh kawx nan: lhat ka kaw pa chix yuh laux khawm: ju khawm: tokaux ka daux mawnarhok heue:. 29 Coh saik tix piak ra: mu: ang mawh lie? Phan: Keeing: pex ang tawx akhwang: sim: khankix ang rau piang tiex tix mu: kawx. 30 Hauk kaing: pex kawx hoik simin khawm: uik heue:. 31 Mawh kheu in paw lhat heue:, pex lheu: ngawh khaing: saik haoh hun: heue:. 32 Pui pa kham: tix rieb tix teei Aux ku kaux, plak sivoe ngai: pui, Aux tag kham: tix rieb tix teei nawh sivoe ngai: Keeing: Aux pa ot ka daux meung raoma: heue:. 33 Viang mawh kawx nan:, pui mawx ang ah, pa thiang: tix tik Aux plak sivoe ngai: pui, Aux tag thiang: tix tik nawh plak sivoe ngai: Keeing: Aux pa ot ka daux meung raoma: heue:.

34 "Paw vi ce: Aux hoek tix ploi: pa nhim: piang haktiex in, Aux hoek tix ploi: pa nhim: ang mawh, viang mawh nan: hoek tix ploi: vaid heue:. 35 Mawh kheu hoek Aux tix kieh keeing: mai: kawn: simex nawh, mai: miex mai: kawn: bon: nawh, mai: yiex mai: mun nawh ang khaw: rhawm: gwieh paox tix heue:. 36 Mai: pui koeng tokaux tix khankix, tag mawh pui daux nyiex tokaux tix heue:. 37 Kaw pa nie lheu: moh miex moh keeing: tix khaing: Aux, ang keung: ka Aux, mai: kaw pa nie lheu: moh kawn: simex kawn: bon: tix khaing: Aux ang keung: ka Aux heue:. 38 Kaw pa ang klawm: khaoxlhak tokaux tix mai: hawt khaix Aux, ang keung: ka Aux heue:. 39 Kaw pa sawg tix yaox ju tokaux tix tag som ju heue:. Mai: kaw pa som ju mawh kheu Aux tag yaox ju heue:.

40 "Kaw pa rieb tix teei pex, rieb tix teei Aux, mai: kaw pa rieb tix teei Aux, rieb tix teei ka Kaw pa ploi: Aux hoek heue:. 41 Kaw pa rieb tix teei cao: jhai: ka daux ceukaux cao: jhai: tag pon bwanson: cao: jhai: heue:. Mai: kaw pa rieb tix teei pui rah pui see ka daux ceukaux pui rah pui see, tag pon bwanson: pui rah pui see heue:. 42 Mai: pui mawx ang ah pa sang tawx kawn: nyawm iak khankix tix kaux nyaux rawm: sikiied tix kawk ngie, ka daux ceukaux kawncau tix kaux kaux, Aux krai lox tete telai ka pex, bwanson: cie nawh tag ang som ang grai: heue:."

Mathiex

Simin Ting 11

Grawng: pa deeh pawk lox pa chawk Yohan Cao: com rawm:

11:2-19 koe: daux lai Lukax 7:18-35

1 Mai: khaix hoik tawm: Yesux lox ka kawncau Nawh kao: kaux ra:, Nawh Cao: lih hu: khaing: tan:, mai: hu: sidiex gau ka daux veng kix khankix heue:.

2 Yam an Yohan ot ka daux thawng: mai: mhong: grawh grawng: kaing pa yuh Cao: Khrit khankix, nawh tom: ploi: kawncau tix tiblah hu:, 3 mai: chawk ah nin: ka Nawh Cao:, "Maix mawh Kaw pa tag sang hoek an lie?, phan: ang mawh nan: ex tag sang krox tix yaox son tang: kaux lie?" 4 Yesux pawk lox mai: ah nin: ka kix, "Pex hu: mai: krai ka Yohan grawh grawng: ceu pa mhong: pa yaox pex, 5 pui dugngai: pon tix deeh yaox, pui laux caong pon tix deeh hu:, pui sipawg deeh kieh singax, pui lheet yhaok deeh chix mhong:, mai: pui pa hoik yum deeh kieh kaoh im:, mai: sidiex gau ka pui hot pui sibhawm: kieh mhong: lox bwan: gauxrhawm: gauxrhi: heue:. 6 Mai: pui mawx ang ah, kaw pa ang yaox dee sideeing dee laux rhawm: ka daux Aux, koe: bwanson: heue:."

7 Mai: khaix hoik hu: kix, Yesux jah tix sidiex gau grawh grawng: Yohan ka cub pui haoh pui hun: khankix, "Pex lih hu: daux tiag daux tu tix jhak pa tix? Pex hu: jhak gawng: priem pa phlu: bhaung: mai: vukvied lie? 8 Phan: ang mawh nan: pex lih hu: tix jhak pa tix? Hu: son sang yaox pui pa ceep kraung pa awn: lie? Kix pa ceep kraung pa awn: khankix ot ka daux nyiex simiang ting khankix heue:. 9 Viang mawh nan: pex lih hu: kheu pa tix? Lih hu: son sang yaox cao: jhai: lie? Mawh heue:, Aux krai ka pex, mawh pa lheu: ting khaing: cao: jhai: heue:. 10 In mawh kaw pa hoik tiem: grawh grawng: nawh ah nin:, 22 'Jhak heue:, Aux ploi: kawncau Aux hu: sivoe pakngai: Maix, pa tag sang cox krax Maix sivoe Maix heue:.' 11 Aux krai lox tete telai ka pex ka daux pui pa keh khaing: bon: khawm: uik, pa lheu: ting khaing: Yohan cao: baptis23 ang sax lih koe: tix kaux kawx, viang mawh kawx nan: kaw pa nie iak khaing: paox tix ka daux meung raoma: lheu: ting khaing: nawh heue:. 12 Jah ka yam Yohan cao: baptis24 tom: sidah sidu hoek bawg yamin, pui rhim: tix teei Meung Raoma: mai: grhawm: tix laig tan: heue:. 13 Grawh grawng: nawh cao: jhai: khawm: uik mai: lox lai been li grux krai lox jhai: tom: hoek Yohan heue:. 14 Phan: pex koe: rhawm: tix sang rieb sang teei, kaw in mawh Eliyax pa tag sang hoek heue:. 15 Kaw pa koe: yhaok tix mhong: kieh nawh mhong: heue:. 16 Ceu pui ju in Aux sang phektem: Awm: pa tix? Awm: kawn: nyawm khankix pa ngawm daux lah, mai: kok paox tix, 17 ah nin:, 'Ex hoik phlu: pi: son pex, mai: pex ang grhaoh ang thiao:. Ex hoik yiem riag, viang mawh kawx nan: pex ang khirhawm: tix heue:.' 18 Kheu Yohan ang ih ang nyaux mai: hoek kawx, kix ah, 'Kaw in koe: phicaox heue:.' 19 Kawn: kawn: pui ih nyaux mai: hoek kawx, kix ah, 'Jhak heue:, Kaw in cha nie luan ih, mai: cha nie luan nyaux rawm: plix siiet, mai: yuh paox yuh pie ka pui koh mau mai: pui ting map ting grham: khankix heue:.' Viang mawh kawx nan: pingnya cuyi hoik rah hoik see ka daux kaing pa yuh tix khankix heue:."

Veng pa ang rhawm: doh keud doh sawn: ka phimap tix

11:21-23 koe: daux lai Lukax 10:13-15

20 Yam an Nawh Cao: jah tix ah ka veng khankix dee hoik yuh Nawh kaing pa ting siawp sibrawm, kheu kix ang doh keud doh sawn: ka phimap tix heue:. 21 "Veng Khawrazin eue:, maix tag pon pa kharhawm: kharhi: heue:, Veng Biesedax eue:, maix tag pon pa kharhawm: kharhi: heue:. Mawh kheu phan: hoik yuh kaing pa ting siawp sibrawm khankix pa hoik yuh ka daux pax, ka daux veng Turux mai: veng Sidom, kiex tag hoik doh keud doh sawn: ka phimap tom: rheung:, ka daux man: pa taing: ka hauk, mai: daux nyaox heue:. 22 Aux krai ka pax daux singaix ciyang singaix prawng sax, tag lheu: yie tix kham: geu: son veng Turux mai: veng Sidom, khaing: son pax heue:. 23 Mai: maix veng Kapeniom eue:, tag yaogyaw maix tom: hoek meung raoma: lie? Maix tag lih hu: daux meung yum heue:. Grawh grawng: nawh phan: hoik yuh kaing pa ting siawp sibrawm khankix pa hoik yuh ka daux maix, ka daux veng Sawdom, veng an tag koe: tom: hoek singaix heue:. 24 Aux krai ka maix, ka daux singaix ciyang singaix prawng sax, tag lheu: yie tix kham: geu: son haktiex Sawdom, khaing: son maix heue:."

Pui pa taug pa mao pon krax laux krax lee:

11:25-27 koe: daux lai Lukax 10:21,22

25 Yam an Yesux baox ah nin:, "Aux yaogyaw, bwanson: Maix. Keeing: eue:, Simiang pa ting piang raoma: mai: haktiex, kheu hoik mox Maix ceu in khankix, khaing: pui lhak lhiem: mai: pa chix tawng khankix, mai: hoik plak kieh kawn: ngie: khankix yaox heue:. 26 Mawh heue:, Keeing:, kheu Maix koe: rhawm: khaw: rhawm: tix yuh nan: heue:. 27 Keeing: Aux hoik tawx khawm: uik ka Aux heue:, mai: tix kaux kawx ang tawng Kawn: Cao: lheu: khaing: Keeing: Cao:, mai: tix kaux kawx ang tawng Keeing: Cao: lheu: khaing: Kawn: Cao:, mai: kaw pa Kawn: Cao: koe: rhawm: tix plak kieh nawh tawng heue:. 28 Pex pa taug pa mao, mai: klawm: kraung cien khankix khawm: uik eue:, hoek ka Aux mai: Aux tag kieh pex laux lee: tix heue:. 29 Teei tix klawm: khaox glawm: Aux heue:, mai: hoek tix gau ka Aux, kheu koe: Aux rhawm: pa awn: pa tiem, mai: ju pex tag yaox dee laux lee: tix heue:. 30 Mawh kheu khaox glawm: Aux mawh pa yie tix klawm:, mai: kraung Aux mawh pa chaong: heue:."

Mathiex

Simin Ting 12

Grawng: cox pai: jhawm: saux jhawm: ngia singaix tuah

12:1-8 koe: daux lai Makux 2:23-28; Lukax 6:1-5, 12:9-14 koe: daux lai Makux 3:1-6; Lukax 6:6-11

1Daux bawg yam an Yesux hu: preeng: ka daux ma: nghoxca ka daux singaix tuah, mai: kawncau Nawh khankix cairhawm:, kheu nan: kix tom: caik tix ih sigleem: nghoxca heue:. 2 Viang mawh nan: Pharishie: khankix yam yaox kix an, kix ah nin: ka Nawh Cao:, "Jhak heue:, kawncau Maix lai yuh pa ang khaw: mai: been li singaix tuah." 3 Viang mawh kawx nan: Nawh Cao: ah nin: ka kix, "Ang pex sax phat grawh grawng: pa yuh Dawit yam nawh, mai: pui pa ot tau mai: nawh khankix kied cairhawm: lie? 4 Grawh grawng: yam laig nawh ka daux nyiex Siyiex, mai: ih khaomun, pa nawh mai: pui pa ot tau mai: nawh khankix ang khaw: tix ih, viang mawh nan: pa cao: giex kaing: li khankix khaing: khaw: tix ih lie? 5 Mai: pex ang sax phat daux lai been li, grawh grawng: cao: giex kaing: li khankix pa ot ka daux nyiex bwan:, yuh pa ang khaw: singaix tuah, mai: ang koe: phimap lie? 6 Viang mawh kawx nan: Aux krai ka pex, pa lheu: ting khaing: nyiex bwan: koe: tin: tix kaux heue:. 7 Viang mawh nan: phan: pex hoik tawng dee bleeh lox in,

25'Aux moh krax caoxrhawm:, mai: ang moh krax tan krax lu,' pex ang deuh phimap ka pui pa ang koe: dee phit.

8 Grawh grawng: nawh Kawn: kawn: pui mawh Simiang singaix tuah heue:."

9 Mai: Nawh Cao: lih hu: khaing: tan:, mai: laig ka daux nyiex sidiex kix heue:. 10 Mai: jhak heue:, koe: pui pa yum taix kroh taix tix khawn: tixkaux, mai: yuh ka mawx son sang pon tix deuh phimap ka Nawh Cao:, kix chawk Nawh ah nin:, "Khaw: tix cox jhawm: saux moi: singaix tuah lie?" 11 Mai: Nawh Cao: ah nin: ka kix, "Ka daux pex koe: pui mawx? pa koe: yung: tix mu:, mai: phan: yung: an rau daux o: singaix tuah, pa ang giex ka yung: an mai: yaog nawh lih? 12 Pui lheu: ngawh khaing: yung: miex ding, mawh kheu nan: pa yuh ceu pa mhawm: singaix tuah khaw: heue:." 13 Khaix an Nawh Cao: ah nin: ka pui an, "Nyeu taix maix heue:." Mai: kaw an nyeu taix tix, mai: deeh mhawm: awm: tang: khawn: heue:. 14 Pharishie: khankix lih hu:. Mai: kum: kawng: grawh grawng: sang pon kix tix yuh Nawh Cao: laux yuh ka mawx.

15 Mai: kheu hoik tawng Yesux grawh grawng: ceu an Nawh lih hu: khaing: tan:, mai: pui hawt khaix Nawh Cao: tom: nie, mai: Nawh cox jhawm: saux kix moi: khawm: uik heue:. 16 Mai: Nawh Cao: tawm: lox ka kix yuh ka mawx son ang kix sang kieh pui tawng Nawh. 17 Yuh ka mawx son sang naog gumlox pa hoik krai cao: jhai: Isayax pa ah nin:, 18 26 "Jhak heue:, Siliex Aux pa hoik laug Aux, pa moh Aux, pa khaw: ka rhawm: Aux, Aux tag deuh khwan: Aux ka piang Nawh, mai: Nawh tag krai grawh grawng: bawg yam prawng ciyang ka pui tang: ceu tang: cat khankix heue:. 19 Nawh tag ang pawk ang thiang: lox mai: ang kok ang yo, mai: pui tag ang mhong: lox Nawh daux krax tix kaux kawx heue:. 20 Priem pa hoik geh, Nawh ang raig pot heue:. Maox kawkngu pa lih taoxngu, Nawh ang preet, tom: hoik ploi: pa prawng pa ciyang Nawh mai: pex heue:. 21 Mai: daux ceukaux Nawh kawn: pui tang: ceu tang: cat khankix tag keud pot jun pot een: rhawm: kah heue:."

Grawng: pa ah ka pui Pharishie: khankix

12:25-29 koe: daux lai Makux 3:23-27; Lukax 11:17-22

22 Yam an kix viex pui pa laig phicaox, pa dugngai:, pa aw:, tixkaux hoek ka Nawh Cao:, mai: Nawh Cao: cox nawh moi:, tom: pui aw: an chix sikah mai: chix yaox heue:. 23 Mai: cub pui haoh pui hun: khankix khawm: uik daox deng: kah mai: ah nin:, "Kaw in ang mawh kawn: Dawit lie?" 24 Viang mawh kawx nan: yam mhong: Pharishie: khankix grawh grawng: ceu an kix ah nin:, "Pui in een: rhawm: ka Belazebulax simiang phicaox mai: grheu: phicaox khankix lih heue:." 25 Mai: kheu tawng Nawh Cao: grawh grawng: pa keud kix daux rhawm: kix Nawh ah nin: ka kix, "Meung ku meung pa ang khaw: paox tix, gwieh paox tix, tag laux tag leeing: heue:. Mai: veng ku veng, nyiex ku nyiex, pa ang khaw: paox tix, gwieh paox tix, ang chix kaux chix cong: heue:. 26 Mai: phan: Satan grheu: Satan lih, nawh ang khaw: mai: gwieh ka tokaux tix heue:. Phan: mawh nan: meung nawh chix kaux chix cong: yuh ka mawx? 27 Mai: phan: Aux een: rhawm: ka Belazebulax mai: grheu: phicaox khankix lih, kawn: praix pex een: rhawm: ka pui mawx mai: grheu: phicaox lih? Mawh kheu nan: kix tag mawh cao: prawng cao: ca: pex heue:. 28 Viang mawh kawx nan: phan: Aux een: rhawm: ka Khwan: Siyiex mai: grheu: phicaox khankix lih, Meung Siyiex hoik hoek ka piang pex tete heue:. 29 Phan: ang mawh nan: pui chix laig ka daux nyiex pui pa ting riang, mai: yuh kraung cie nawh laux, phan: nawh ang phyawk pui pa ting riang an phaoxka: yuh ka mawx? mai: khaix an nawh tag yuh nyiex nawh laux heue:.

Grawng: ceu phimap pa ang lai chix pon pluat ploi:

30 Kaw pa ang ot plak Aux mawh pui pa koeng ka Aux heue:, mai: kaw pa ang khrawm: tau mai: Aux, mawh pa kieh prungprang: heue:. 31 Mawh kheu nan: Aux krai ka pex, tag ploi: phimap mai: pa sa pa lao ka kawn: pui ku ceu, viang mawh kawx nan: pa sa pa lao ka Khwan: Cao: tag ang pluat heue:. 32 Mai: pui mawx ang ah, pa ah lox pa ang khaw: ang jiet ka Kawn: kawn: pui, tag sang pluat nawh heue:, viang mawh kawx nan: pui mawx ang ah, pa ah lox pa ang khaw: ang jiet ka Khwan: Singax Singeh tag ang pluat nawh ju in mai: ju khaix heue:.

Khaing: plix tawng ka khaox

33 Yuh khaox mhawm:, mai: kieh plix nawh mhawm:, phan: ang mawh nan:, yuh khaox ang mhawm:, mai: kieh plix nawh ang mhawm:. Grawh grawng: nawh pon tix tawng khaox kheu plix nawh heue:. 34 Ceu siuing: pa cai: eue:, pex pa mawh pa caox, lai chix krai lox pa mhawm: yuh ka mawx? Kheu jheeh chix krai ceu pa koe: daux rhawm: tom: nie heue:. 35 Pui pa mhawm: viex ceu pa mhawm: lih khaing: dee deuh nawh pa mhawm:, mai: pui pa caox viex ceu pa caox lih khaing: dee deuh nawh pa caox heue:. 36 Aux krai ka pex, gumlox ku gum pa nieb krai pui giex going kix tag sang krai doh grawh grawng: gumlox an khankix ka daux singaix prawng singaix ciyang sax heue:. 37 Grawh grawng: nawh mawh kheu gumlox maix, maix tag pon pa rah pa see, mai: mawh kheu gumlox maix, maix tag pon pa prawng pa ciyang heue:."

Grawng: ang Nawh Cao: yuh kix yaox mhai: pa daox pa am:

12:39-42 koe: daux lai Lukax 11:29-32, 12:43-45 koe: daux lai Lukax 11:24-26

38 Yam an pui tiem: lai mai: Pharishie: tiblah ah nin: ka Nawh Cao:, "Sara Cao: Gau eue:, ex simie tix yaox mhai: pa daox pa am: khaing: Maix tix ceu heue:." 39 Nawh Cao: pawk lox mai: ah nin: ka kix, "Ju pa caox mai: pa phit pa vao sawg tix yaox mhai: pa daox pa am: heue:. Mai: lheu: khaing: mhai: pa daox pa am: cao: jhai: Yonax tag ang tawx mhai: pa daox pa am: ka kix heue:. 40 Mawh kheu awm: hoik ot Yonax ka daux vaig kax ting loe: singaix loe: sawm:, Kawn: kawn: pui kawx, tag ot ka daux tiex loe: singaix loe: sawm: heue:. 41 Pui veng Nineve tag cung tau mai: pui ju in, ka daux singaix prawng singaix ciyang sax, mai: deuh phimap ka piang kix, kheu hoik doh keud doh sawn: kix ka phimap tix, yam sidiex gau Yonax, mai: jhak heue:, Kaw pa lheu: ting khaing: Yonax ot tin: heue:. 42 Simiang Nanghawkhawm caong ma: seh, tag kaoh tau mai: pui ju in ka daux singaix prawng singaix ciyang sax, mai: deuh phimap ka piang kix, kheu hoik hoek nawh khaing: dee sidah haktiex tix nghiet gumlox pingnya cuyi simiang Sawlamun heue:. Mai: jhak heue:, Kaw pa lheu: ting khaing: simiang Sawlamun ot tin: heue:. 43 Khaix hoik lih phi: pa seeing: pa brai: khaing: daux pui, nawh hu: preeng: dee ang rawm: koe:, sawg dee laux kawx, ang yaox heue:. 44 Khaix an nawh ah nin:, 'Aux sang deeh ing: ka nyiex aux, khaing: dee hoik kaoh aux heue:.' Mai: yam hoik hoek nawh tan:, nawh yaox nyiex yi, pa hoik pih, mai: pa hoik cox mhawm: heue:. 45 Khaix an nawh hu: mai: viex phicaox aliah kaux pa lheu: caox khaing: tokaux nawh mai: laig ka daux pui an mai: ot tan: heue:. Mai: pa mawh ka pui an lheu: caox khaing: phaoxka: heue:. Viang mawh pui ju pa caox in kawx tag awm: an heue:."

Grawng: pa khraox krax dex dawd sinax ex kawn: pui

12:46-50 koe: daux lai Makux 3:31-35; Lukax 8:19-21

46 Yam kawn: sidiex gau Nawh Cao: ka cub pui haoh pui hun: khankix, jhak heue:, miex Nawh mai: pux Nawh khankix cung plak praix, mai: sawg tix sikah mai: Nawh Cao: heue:. 47 Mai: pui tixkaux ah nin: ka Nawh Cao:, "Jhak heue:, miex Maix mai: pux Maix khankix cung plak praix mai: sawg tix sikah mai: Maix heue:." 48 Viang mawh kawx nan:, Nawh pawk lox mai: chawk ah nin: ka kaw pa hoik krai ka Nawh, "Miex Aux mawh mawx? Mai: pux Aux khankix mawh mawx?" 49 Mai: Nawh Cao: nyeu taix Tix plak kawncau Nawh khankix mai: ah nin:, "Jhak heue:, miex Aux mai: pux Aux khankix. 50 Mawh kheu pui mawx ang ah pa yuh alo pa khaw: pa caw rhawm: Keeing: Aux pa ot ka daux meung raoma:, pui an mawh pux Aux, mai: nan: Aux, mai: miex Aux heue:."

Mathiex

Simin Ting 13

Yesux teei lox phektem: sidiex grawng: rhuat simie

13:1-15 koe: daux lai Makux 4:1-12; Lukax 8:4-10, 13:16-17 koe: daux lai Lukax 10:23-24

13:18-23 koe: daux lai Makux 4:13-20; Lukax 8:11-15

1Daux singaix an Yesux lih hu: khaing: daux nyiex mai: hu: ngawm dex praok rawm: nhawng:. 2 Mai: cub pui haoh pui hun: khrawm: tix hoek ka Nawh Cao:, kheu nan: Nawh laig daux reu mai: ngawm tan:, mai: pui haoh pui hun: khankix khawm: uik cung ka praok rawm: heue:. 3 Mai: Nawh Cao: sidiex gau ka kix tom: nie ceu, ka daux lox phektem:, mai: ah nin:, "Jhak heue:, pui rhuat simie hu: tix rhuat simie heue:. 4 Mai: yam rhuat nawh simie, simie tiblah cod ka dex krax, mai: sim: khankix hoek sut tix ih simie an heue:. 5 Mai: simie tiblah cod ka tiag simaox, dee ang tiex koe: tom: nie, mai: simie khankix kuah dom: mawx dom: an, mawh kheu ang tiex raux tan:. 6 Mai: yam hoik lih si:ngaix, kied hax koek, mai: kheu ang kix koe: riah kix kroh hu: heue:. 7 Mai: simie tiblah cod ka daux pangkat, mai: pangkat an ting tom: kheem: gut kix heue:. 8 Mai: simie tiblah cod ka dee mhawm: tiex, mai: plix plix, tiblah tix yieh (100) son, mai: tiblah tigliah (60) son, mai: tiblah tingoe: (30) son heue:. 9 Kaw pa koe: yhaok tix mhong: kieh nawh mhong: heue:."

Grawng: krai dee bleeh lox phektem:

10 Mai: kawncau khankix hoek mai: chawk ah nin: ka Nawh Cao:, "Yuh pa tix Maix teei lox phektem: sidiex ka kix?" 11 Mai: Nawh Cao: pawk lox mai: ah nin: ka kix, "Hoik tawx kieh pex tawng grawh grawng: pa raux pa mox, pa dex pa dawd mai: meung raoma:, Viang mawh kawx nan: ka kix, ang tawx kieh kix tawng heue:. 12 Grawh grawng: nawh pui mawx ang ah pa hoik koe: tag sang baox tawx ka nawh, mai: nawh tag sang nie grum koe: heue:. Pui mawx ang ah, pa ang koe:, viang pa hoik koe: nawh kawx, tag sang teei khaing: nawh heue:. 13 Mawh kheu nan: Aux tom: teei lox phektem: sidiex gau ka kix, mawh kheu kix yaox kawx, ang chix yaox, mai: kix mhong: kawx, ang chix mhong:, kix tawng kawx ang tawng heue:. 14 Mai: gumlox pa hoik grux krai cao: jhai: Isayax grawh grawng: kix, pa ah nin: hoik naog heue:. 27 'Pex mhong: kawx, mhong: mai: ang tix tawng ceeix kawx, pex yaox kawx, yaox mai: ang tix yaox ceeix kawx. 15 Kheu rhawm: pui ceu in hoik sivix, mai: yhaok kix ang hiex mhong:, mai: kix hoik yip ngai: tix, yuh ka mawx son ang kix sang yaox. Mai: yuh ka mawx son ang yhaok kix chix mhong:, mai: rhawm: kix chix tawng mai: deeh tieh tix son sang cox Aux kieh kix moi: heue:.' 16 Viang mawh kawx nan:, ngai: pex koe: bwanson: kheu chix yaox kix, mai: yhaok pex kawx koe: bwanson: kheu kix chix mhong: heue:. 17 Aux krai lox tete telai ka pex, cao: jhai: khankix mai: pui rah pui see khankix hoik koe: tom: nie, pa simie tix yaox ceu pa yaox pex, mai: ang pon tix yaox, mai: kix simie tix mhong: pa mhong: pex, mai: ang pon tix mhong: heue:. 18 Mawh kheu in pex nghiet grawh grawng: lox phektem: pui pa rhuat simie. 19 Yam pui tix kaux kaux mhong: lox bwan: pa dex pa dawd mai: meung Siyiex, mai: ang chix tawng dee bleeh, kaw pa caox hoek rud tix teei simie pa hoik rhuat ka daux rhawm: nawh heue:. In mawh grawh grawng: simie pa hoik rhuat dex krax heue:. 20 Simie pa hoik rhuat ka tiag simaox, mawh pui pa mhong: lox bwan:, mai: gauxrhawm: mai: rieb tix teei dom: mawx dom: an. 21 Viang mawh kawx nan: ang nawh koe: riah ka daux tokaux tix, viang mawh nan:, nawh kaux cong: tivud khaing:, mai: yam yaox nawh krax tuktiak tukte: kheu lox bwan: nawh laux rhawm: dom: mawx dom: an heue:. 22 Mai: simie pa rhuat ka daux sinax pangkat, mawh pui pa mhong: lox bwan:, mai: pa khirhawm: khirhi: pa dex pa dawd mai: haktiex, mai: pa chix pie chix lhen: sinngao kheem: gut lox bwan:, mai: nawh ang chix plix plix heue:. 23 Mai: simie pa rhuat dee mhawm: tiex, mawh pui pa mhong: lox bwan: mai: chix tawng chix nghiet, mai: chix plix plix, tiblah tix yieh (100) son, mai: tiblah tigliah (60) son, mai: tiblah tingoe: (30) son heue:."

Lox phektem: nghoxca mai: vhang:

24 Nawh Cao: baox plak kix yaox lox phektem: tang: ceu pa ah nin:, "Meung Raoma: tag awm: pui pa rhuat simie pa mhawm: ka daux ma:. 25 Viang mawh nan: yam pui hoik it, pui koeng nawh hoek mai: rhuat simie vhang: ka daux sinax nghoxca an, mai: lih hu: heue:. 26 Yam kuah gawng: mai: lhax, mai: sigleem: plix, vhang: kawx lih hoek heue:." 27 Mai: siliex khankix hu: ka cao: nyiex mai: ah nin: ka nawh, 'Simiang eue:, yam rhuat maix simie daux ma: maix, maix rhuat pa mhawm: ang mawh lie? Yuh ka mawx vhang: lai koe:?' 28 Mai: nawh ah nin: ka kix, 'Ceu in mawh pa hoik yuh pui koeng heue:.' Mai: siliex khankix baox ah nin: ka nawh, 'Maix simie tix kieh ex hu: khrawm: vhang: khankix lie?' 29 Viang mawh nan: nawh pawk lox ah nin:, "Ang, phan: pex hu: khrawm: vhang: khankix, ha pex kox reeig riah nghoxca glaoh mai: kix heue:. 30 Kiex khawm: ra: ceu ting tau tom: hoek bawg yam vawg, mai: yam hoek bawg yam vawg, aux tag krai ka pui vawg khankix, khrawm: vhang: khankix phaoxka:, mai: vien mad, mai: gleeing kix ka ngu heue:. Viang mawh nan: khrawm: nghoxca mai: sau: daux krao: aux heue:."

Lox phektem: simie sok taux mai: khaox

13:31-32 koe: daux lai Makux 4:30-32; 13: 31-33 koe: daux lai Lukax 13:18-21

31 Nawh Cao: baox plak kix yaox lox phektem: tang: ceu pa ah nin:, "Meung Raoma: tag awm: simie taux klaox tix mu:, pa pui tix kaux rhuat ka daux ma: tix heue:. 32 Viang simie taux klaox mawh pa iak khaing: simie tang: ceu kawx, khaix hoik ting, nawh lheu: ting khaing: num: rib num: riem, mai: lih mawh gawng:, tom: sim: raoma: khankix hoek ot hoek laux ka piang kak nawh heue:."

Lox phektem: susaix mai: mawg phawng: gaox

33 Nawh Cao: baox krai kix mhong: lox phektem: tang: ceu pa ah nin:, "Meung Raoma: awm: susaix pa bon: tix kaux teei mai: mox ka daux phawng: gaox loe: diag tom: susaix an hoik laig ka daux khawm: uik mai: kieh ploh heue:."

34 Grawh grawng: ceu in khawm: uik Yesux teei lox phektem: krai ka cub pui haoh pui hun: khankix heue:. Phan: ang mawh lox phektem: Nawh Cao: ang sidiex ang krai lox ka kix heue:. 35 Yuh ka mawx son sang naog lox pa hoik krai cao: jhai: pa ah nin:, 28 "Aux tag ang: moing ka daux lox phektem:. Aux tag krai grawh grawng: ceu pa hoik mox tom: yam jah haktiex heue:."

Krai dee bleeh lox phektem: nghoxca mai: vhang:

36 Khaix hoik ploi: Nawh Cao: cub pui haoh pui hun: khankix Nawh laig ka daux nyiex, mai: kawncau Nawh khankix hoek dex ka Nawh Cao: mai: ah nin:, "Krai ex mhong: dee bleeh lox phektem: grawh grawng: vhang: ka daux ma: liak." 37 Mai: Nawh Cao: pawk lox mai: ah nin:, "Pui pa rhuat simie pa mhawm: mawh Kawn: kawn: pui heue:. 38 Mai: ma: mawh haktiex, mai: simie pa mhawm: mawh kawnpraix Meung an hkankix, mai: vhang: mawh kawnpraix kaw pa caox khankix heue:. 39 Mai: pui koeng pa rhuat simie vhang: mawh phicaox, mai: bawg yam vawg mawh yam sidah haktiex in, mai: pui pa vawg mawh kawncau Siyiex khankix heue:. 40 Kheu nan: awm: khrawm: vhang: khankix mai: gleeing ka ngu, yam sidah haktiex in tag awm: an heue:. 41 Kawn: kawn: pui tag ploi: kawncau Siyiex cie Nawh hoek, mai: kix tag khrawm: tix teei lih khaing: Meung Nawh, ceu pa kieh phit kieh lud khankix, mai: pui pa yuh pa ang khaw: ang jiet khankix heue:. 42 Mai: tag taing kix sau: daux, daux glah ngu, dee tag yiem riag mai: dee greeik rhang: heue:. 43 Yam an pui rah pui see khankix tag jhan: riang awm: singaix ka daux Meung Keeing: kix heue:. Pui pa koe: yhaok tix mhong:, kieh nawh mhong: heue:."

Lox phekem: grawng: kraung pa ngawh pa hoik mox

44 "Meung Raoma: awm: kraung pa ngawh pa hoik mox ka daux ma:, mai: pui tix kaux yaox kraung an, mai: baox mox, mai: kheu gauxrhawm: nawh, hu: mai: coh pa koe: nawh khawm: uik, mai: liag ma: an heue:."

Lox phektem: grawng: siang: pa kied ngawh

45 "Meung Raoma: baox awm: pui yuh lai tikaux pa sawg siang: ceu pa koe: daux jawx pa mhawm: khankix. 46 Mai: khaix hoik yaox nawh siang: pa koe: daux jawx pa kied ngawh, nawh hu: mai: coh pa koe: nawh khawm: uik, mai: liag siang: an heue:."

Lox phektem: ka pui rub kax

47 "Meung Raoma: baox awm: rub pa ploi: daux rawm: sigrit sigra: mai: khrawm: ku ceu ku cawng heue:. 48 Yam hoik naog rub an kix bluh hu: ka praok rawm: mai: kix ngawm mai: laug pa mhawm: khankix sau: daux aw: daux klong:, viang mawh kawx nan: pa ang mhawm: khankix kix tik heue:, 49 Awm: an yam sidah haktiex in, kawncau Siyiex khankix tag hoek mai: gwieh pa caox khaing: sinax pa rah pa see. 50 Mai: tag taing kix sau: daux daux glah ngu, dee tag yiem riag mai: dee greeik rhang: heue:."

51 Mai: Yesux baox ah nin: ka kix, "Hoik tawng pex grawh grawng: khankix khawm: uik lie?" Mai: kix ah nin: ka Nawh Cao:, "Tawng heue:, Simiang." 52 Mai: Nawh Cao: baox ah nin: ka kix, "Mawh kheu in pui tiem: lai ku kaux pa hoik gau grawh grawng: Meung Raoma: awm: pui tix kaux pa mawh cao: nyiex, pa teei lih ceu pa khraox mai: pa prim: khaing: dee deuh nawh kraung tix heue:."

Yesux deeh hoek ka veng Nazariet

13:54-58 koe: daux lai Makux 6:1-6

53 Khaix hoik sidiex Yesux lox phektem: ceu in khankix, Nawh Cao: lih hu: khaing: tan: heue:.

54 Mai: Nawh Cao: hoek ka daux meung tokaux Tix mai: Nawh gau kix ka daux nyiex sidiex kix, tom: kix kied daox kied deng: mai: ah nin:, "Pui in pon pingnya cuyi, mai: kaing siawp sibrawm khankix dee mawx? 55 In mawh kawn: cangmai ang mawh lie? mai: miex Nawh kok mawh Marix ang mawh lie? mai: pux Nawh khankix mawh Yakop, mai: Yosiep mai: Simon, mai: Yudax ang mawh lie? 56 Mai: nan: Nawh khankix ot tau mai: ex khawm: uik ang mawh lie? Mawh kheu in Pui in pon ceu in khankix khawm: uik dee mawx?" 57 Mai: kix laux rhawm: ka daux Nawh Cao:. Viang mawh kawx nan: Yesux ah nin: ka kix, "Cao: jhai: ang mawh pa ang koe: min: plakngai:, lheu: khaing: daux meung tokaux tix, mai: ka daux nyiex tokaux tix heue:." 58 Nawh Cao: ang yuh kaing siawp sibrawm tom: nie tan:, kheu ang kix yumrhawm: heue:.

Mathiex

Simin Ting 14

Grawng: pa yum Yohan cao: com rawm:

14:1-12 koe: daux lai Makux 6:14-29

1 Yam an simiang Herut mhong: pa krai pui grawh grawng: Yesux. 2 Mai: ah nin: ka kawncau mausoi: nawh khankix, "In mawh Yohan cao: baptis29. Nawh hoik deeh kaoh im: khaing: krax yum, mai: mawh kheu nan: siawp sibrawm khankix tom: yuh kaing ka daux nawh heue:." 3 Grawh grawng: nawh, Herut hoik giex Yohan mai: phyawk nawh mai: sau: nawh ka daux thawng:, kheu Herodi moeng pux nawh Philipux. 4 Kheu Yohan hoik ah nin: ka nawh, "Pa teei maix bon: in ang khaw: mai: been heue:." 5 Viang nawh simie tix pah Yohan yum kawx, nawh lhat ka pui haoh pui hun:, kheu hoik een: hoik sawn: kix nawh mawh cao: jhai: heue:. 6 Viang mawh nan: yam hoek singaix keh Herut, kawn: bon: Herodi yuh thiao: sinax kix, mai: jiet khaw: ka rhawm: Herut heue:. 7 Kheu nan: nawh tiex nawh tu mai: tawx lox ka bon: an, nawh rawg nawh mhaing: ceu pa tix ang ah nawh tag sang tawx heue:. 8 Bon: an hawt yuh awm: pa nhie: miex nawh mai: ah nin:, "Tawx kaing: Yohan cao: baptis30 ka aux tin: daux tawg heue:." 9 Simiang khunhawkham khirhawm: khirhi: kah, viang mawh kawx nan: kheu lox pa hoik tiex hoik tu nawh, mai: kheu pui pa ngawm sawm: tau mai: nawh khankix, nawh tom: tawx lox kieh tawx heue:. 10 Mai: nawh ploi: hu: kid kaing: Yohan ka daux thawng: heue:. 11 Mai: kix viex kaing: nawh daux tawg, mai: tawx ka bon: krih an, mai: nawh viex tix tawx ka miex tix heue:. 12 Mai: kawncau Yohan khankix hoek mai: teei tokaux yum Yohan mai: sipaung: nawh heue:. Mai: kix hu: krai ka Yesux.

Grawng: pa daox pa am: khaomun phwan: lon: mai: kax ra: mu:

14:13-21 koe: daux lai Makux 6:32-44; Lukax 9:10-17; Yohan 6:1-13, 14:13-21 jhak daux lai Mth 15: 32-38

13 Yam mhong: Yesux grawh grawng: an Nawh Cao: lih khaing: tan:, laig ka daux reu, mai: hu: daux tiag daux tu dee ang pui ot, mai: yam mhong: pui haoh pui hun: khankix grawh grawng:, kix lih khaing: daux veng khankix mai: hawt khaix Nawh Cao: ka caong tix heue:. 14 Mai: yam lih hu: Nawh Cao:, Nawh yaox cub pui haoh pui hun: mai: Nawh Cao: caoxrhawm: ka kix, mai: cox pui saux pui ngia kix moi: heue:. 15 Mai: Yam hoek ponbo kawncau Nawh khankix hoek ka Nawh Cao: mai: ah nin:, "Ka dee in mawh daux tiag, mai: bawg yam kawx hoik luan heue:. Ploi: pui haoh pui hun: khankix hu:, son sang hu: laig ka daux yaong: khankix, mai: liag pa ih pa un: son tokaux tix heue:." 16 Viang mawh nan: Yesux ah nin: ka kix, "Kix ang phat lih hu:, pex tawx kix sawm: heue:." 17 Mai: kix baox ah nin: ka Nawh Cao:, "Ex koe: khaomun phwan: lon: mai: kax iak ra: mu: khang:." 18 Mai: Nawh Cao: baox ah nin:, "Viex khankix hoek ka Aux heue:." 19 Mai: Nawh Cao: nhie: pui haoh pui hun: khankix ngawm ka piang rib. Mai: Nawh Cao: teei khaomun phwan: lon: mai: kax ra: mu: an, mai: maong ka raoma:, mai: Nawh Cao: nawb bwan:, mai: sivit khaomun mai: tawx ka kawncau Nawh khankix, mai: kawncau Nawh khankix tawx ka pui haoh pui hun: khankix heue:. 20 Mai: kix khawm: uik ih mai: sak heue:. Mai: kix deeh khrawm: tix teei pa lheu: pa max pa phawng:, mai: naog kao: phliex ra: heue:. 21 Mai: pa ih khankix, simex giex, dex koe: phwan: rheng:, ang krai bon: mai: kawn: nyawm khankix heue:.

Yesux hu: ka caong Tix piang rawm: nhawng:

14:22-33 koe: daux lai Makux 6:45-51; Yohan 6:15-21, 14:34-36 koe: daux lai Makux 6:53-56

22 Mai: dom: mawh dom: an Nawh Cao: nhie: kawncau Nawh khankix laig daux reu, mai: hu: sivoe Nawh plak toi: rawm:, yam ploi: Nawh Cao: cub pui haoh pui hun: khankix hu: heue:. 23 Mai: khaix hoik ploi: Nawh Cao: cub pui haoh pui hun: khankix hu:, Nawh haok ka gawng dee ang pui ot, son sang rawg Tix bwan:. Mai: yam hoek ponsawm: Nawh Cao: ot tan: nong: nong: heue:. 24 Viang mawh kawx nan: yam an reu an ot ka greung rawm: nhawng: mai: kharhawm: kharhi: kheu pukpak rawm:, kheu ang caw plak bhaung: heue:. 25 Yam hoek bawg yam pa pau pon: bawg tix bawg, yam ponsawm:, Nawh Cao: hoek ka kix, ka caong Tix piang rawm: nhawng: heue:. 26 Mai: yam kawncau Nawh khankix yaox pa hu: Nawh Cao: ka caong Tix piang rawm: nhawng: kix die lhat mai: ah nin:, "Mawh miang heue:." Mai: kheu lhat kix kah, kix riag yo heue:. 27 Viang mawh kawx nan: dom: mawx dom: an Yesux sikah mai: kix, ah nin:, "Gauxrhawm: heue:, mawh Aux, pawvi lhat kah." 28 Mai: Petrux pawk lox ka Nawh Cao: mai: ah nin:, "Simiang eue:, phan: mawh Maix, nhie: aux hoek ka Maix ka piang rawm: liak." 29 Mai: Nawh Cao: ah nin:, "Hoek heue:." Mai: Petrux lih khaing: daux reu mai: hu: ka piang rawm: ka caong tix, son sang hu: ka Yesux. 30 Viang mawh nan: yam yaox nawh bhaung: ting, nawh kied lhat, mai: jah tix laig ka daux rawm:, mai: nawh kok yo ah nin:, "Simiang eue:, taoh aux liak." 31 Mai: dom: mawh dom: an Yesux nyeu taix Tix mai: giex nawh, mai: ah nin: ka nawh, "Maix pa iak krax yumrhawm: eue:, yuh pa tix, maix ang yumrhawm:?" 32 Mai: yam hoik laig kiex ka daux reu, bhaung: yien: hu: heue:. 33 Mai: kix pa ot ka daux reu, krub Nawh Cao:, ah nin:, "Maix mawh Kawn: Siyiex tete heue:."

34 Mai: yam hoik tiang kix hoek plak an, kix hoek ka haktiex, ka meung Giennesarit heue:. 35 Mai: yam pui pa ot dee an tawng mawh Nawh Cao:, kix ploi: pui hu: ku dah ku dee sivie sivheng: tan:, mai: kix viex pui saux pui ngia hoek ka Nawh Cao: khawm: uik. 36 Mai: kix khyox khaw: ka Nawh Cao:, son sang pon kix tix teeh caong sibex Nawh khaing:, mai: pa pon tix teeh ku kaux daux pui moi: heue:.

Mathiex

Simin Ting 15

Grawng: been prim: mai: lox tawm: pingnyap

15:1-20 koe: daux lai Makux 7:1-23

1 Yam an Pharishie: mai: pui tiem: lai khankix kaoh khaing: veng Yerusaliem mai: hoek ka Yesux ah nin:, 2 "Yuh pa tix kawncau Maix yuh pa ang khaw: mai: been tax yiex miex keeing:? Kheu ang kix khoek taix tix yam ih khaomun heue:." 3 Mai: Nawh Cao: pawk lox mai: ah nin: ka kix, "Yuh pa tix pex lheu: lox tawm: jhawm: krai Siyiex, kheu lox tax yiex miex keeing: pex? 4 Kheu hoik ah Siyiex, 31 'Yungyi: ka miex mai: keeing: maix heue:,' mai: 32 'Kaw pa map ka miex ka keeing: tix, tag kieh nawh yum tete heue:.' 5 Viang mawh kawx nan: pex ah, 'Pui mawx ang ah pa ah ka miex tix phan: ang mawh nan: ka keeing: tix, 'Cie aux pa lo mai: pa sang koe: bwanson:, son maix, mawh pa hoik tan hoik tawx ka Siyiex. 6 Kaw an tag ang yungyi: ka miex keeing: tix. ' Mawh kheu nan: pex yuh laux gumlox Siyiex, kheu been pex pa toe: tix tawx tix ju hoik tix ju heue:. 7 Pex pa mawh pui pie pui lhen: khankix eue:, Isayax hoik grux krai grawh grawng: pex mhawm: mhawm:, ah nin:, 8 33 'Pui ceu in yungyi: Aux ka siyieb jheeh tix, viang mawh kawx nan: rhawm: kix singai khaing: Aux heue:. 9 Viang mawh nan: kix krub ka Aux giex going, kheu sidiex gau kix been: pa yuh kawn: pui heue:.'" 10 Mai: Nawh Cao: kok cub pui haoh pui hun: hoek ka Tix mai: ah nin: ka kix, "Nghiet, mai: tawng heue:. 11 Pa laig ka daux jheeh pui kieh nawh seeing: brai: ang mawh, viang mawh nan: mawh pa lih khaing: jheeh pui pa kieh nawh seeing: brai: heue:." 12 Yam an kawncau Nawh khankix hoek mai: ah nin: ka Nawh Cao:, "Maix tawng grawh grawng: Pharishie: khankix lauxrhawm: yam mhong: kix lox ceu in lie?" 13 Viang mawh nan: Nawh Cao: pawk lox mai: ah nin:, "Gawng: khaox ku gawng: pa Keeing: Aux piang raoma:, ang sum:, tag sang reeig tix tik heue:. 14 Via kix heue:. Kix mawh pui dugngai: pa jhi: pui dugngai: yaox krax. Mai: phan: pui dugngai: jhi: pui dugngai: yaox krax, khawm: ra: kiex tag rau daux o: heue:."

Grawng: ka daux rhawm: kawn: pui

15 Mai: Petrux pawk lox mai: ah nin: ka Nawh Cao:, "Krai ex mhong: lox phektem: in liak." 16 Mai: Nawh Cao: baox ah nin:, "Pex kawx ang chix tawng ang chix nghiet tom: yamin lie? 17 Ang pex tawng grawh grawng: ceu pa laig ka daux jheeh ku ceu, baox laig ka daux vaig, mai: tik ka daux, daux iang: lie? 18 Viang mawh kawx nan: ceu pa lih hoek khaing: daux jheeh, mawh pa lih khaing: daux rhawm: mai: chix kieh pui seeing: brai: heue:. 19 Mawh kheu mawh khaing: daux rhawm: pa chix keud pa ang mhawm: ang mhiem: khankix heue:. Pa mawh ceu pa pah pui yum, mai: ceu pa phit mai: moeng pui, mai: ceu pa phit pa vao mai: bon:, mai: ceu pa briex pa lak, mai: ceu pa kham: mhai: sakse: pa ang mawh ang meh, mai: ceu pa sa pa lao ka Siyiex heue:. 20 Mawh ceu in khankix pa chix kieh pui seeing: brai:, viang mawh kawx nan: pa ang khoek taix mai: ih, pa ih, kieh pui seeing: brai: ang mawh."

Bon: pui tang: ceu tang: cat koe: krax yumrhawm:

15:21-28 koe: daux lai Makux 7:24-30

21 Mai: Yesux lih hu: khaing: tan:, mai: hu: ka veng Turux mai: veng Sidom heue:. 22 Mai: bon: Khanan tix kaux lih hoek khaing: haktiex an, mai: kok yo ah nin:, "Simiang Kawn: Dawit eue:, caoxrhawm: ka aux liak. Laig phicaox ka kawn: bon: aux mai: kied sigrien sigre heue:." 23 Viang mawh kawx nan: Nawh Cao: ang deeh pawk lox ka kiex tix gum kawx. Mai: kawncau Nawh khankix hoek khyox khaw: ka Nawh Cao: ah nin:, "Kieh bon: an hu: liak, kheu kiex kok yo khaix ex heue:." 24 Viang mawh kawx nan: Nawh Cao: pawk lox mai: ah nin:, "Ploi: Aux hoek lheu: khaing: son yung: pa hoik grai: pa dex mai: geh nyiex Isarilax ang mawh." 25 Viang mawh nan: bon: an hoek mai: krub Nawh Cao: mai: ah nin:, "Simiang eue:, teem: aux liak." 26 Mai: Nawh Cao: pawk lox mai: ah nin:, "Ang khaw: tix teei khaomun cie kawnpraix khankix taing ka sox heue:." 27 Viang mawh nan: bon: an ah nin:, "Mawh heue:, Simiang eue:, viang mawh sox khankix kawx, ih pa cod pa roik greem: pheen: cao: tix heue:." 28 Yam an Yesux baox pawk lox mai: ah nin: ka kiex, "Bon: eue:, krax yumrhawm: maix kied ting heue:, kieh mawh awm: ka pa simie pax." Mai: daux bawg yam nari an kawn: bon: kiex moi: heue:.

29 Mai: Yesux lih khaing: tan: mai: hoek ka dex rawm: nhawng: Galilie:, mai: Nawh Cao: haok piang gawng mai: ngawm tan: heue:. 30 Mai: cub pui haoh pui hun: khankix hoek ka Nawh Cao:, pui laux caong, pui dugngai:, pui aw:, pui laux maung, mai: pui tang: kaux tom: nie ot mai: kix, mai: kix deuh khankix ka dex caong Nawh Cao:, mai: Nawh Cao: kieh kix moi:, 31 tom: pui haoh pui hun: khankix daox deng: kah, yam yaox kix pui aw: deeh chix sikah, mai: pui laux maung deeh mhawm:, mai: pui laux caong deeh chix hu:, mai: pui dugngai: deeh chix yaox, mai: kix yaogyaw Siyiex Isarilax heue:.

Tawx pui pon: rheng: ih sak

15:29-31 koe: daux lai Makux 7:31-37, 15:32-39 koe: daux lai Makux 8:1-10

15:32-39 jhak daux lai Mth 14:13-21

32 Yam an Yesux kok kawncau Nawh khankix hoek ka Tix, mai: ah nin:, "Aux caoxrhawm: ka pui haoh pui hun: khankix, kheu hoik ot kix mai: Aux loe: singaix mai: ang koe: pa ih tid tix mai: ang Aux rhawm: ploi: kix hu: yam kawn: cairhawm: kix. Phan: yuh nan: ha: kix kox khrup hawt krax heue:." 33 Mai: kawncau Nawh khankix ah nin: ka Nawh Cao:, "Ex pon khaomun tom: nie daux tiag, son sang sak pui haoh pui hun: khankix dee mawx?" 34 Mai: Yesux baox chawk kix ah nin:, "Pex koe: khaomun miex lon:?" Mai: kix ah nin:, "Koe: aliah lon:, mai: kax iak ceeix ngie heue:." 35 Mai: Nawh Cao: nhie: cub pui haoh pui hun: khankix ngawm piang tiex. 36 Mai: Nawh Cao: teei khaomun aliah lon: an mai: kax khankix, mai: Nawh Cao: yaogyaw bwanson:, mai: sivit mai: tawx ka kawncau khankix, mai: kawncau khankix tawx ka cub pui haoh pui hun: khankix heue:. 37 Mai: kix khawm: uik ih tom: sak, mai: kix khrawm: pa max, pa phawng:, pa lheu: mai: naog aliah phliex heue:. 38 Mai: kix pa ih, simex giex, koe: pon: rheng:, ang krai bon: mai: kawn: nyawm khankix heue:. 39 Mai: Nawh Cao: ploi: cub pui haoh pui hun: khankix hu:, mai: laig ka daux reu, mai: hu: hoek ka haktiex Magadalax heue:.

Mathiex

Simin Ting 16

Pui Pharishie: khankix hoek tix nyaw glaw: ka Yesux

16:1-12 koe: daux lai Makux 8:11-21

1 Mai: Pharishie: mai: Sadukie: khankix hoek son sang cheuk tix yaox Nawh mai: mhaing: tix nhie: Nawh Cao: jhi: kix yaox mhai: pa daox pa am: khaing: raoma: heue:. 2 Viang mawh nan: Nawh Cao: pawk lox mai: ah nin: ka kix, "Yam ponbo pex ah, 'Tag blang: praix, kheu raoh raoma: heue:.' 3 Mai: yam ponngawb, 'Ang praix mhawm: singaix, tag lhiex tag phlu: bhaung: heue:, kheu raoh raoma: mai: ceep paiawm:.' Pui pie pui lhen: eue:, pex chix jhak chix tawng ka grawh grawng: raoma:. Viang mawh kawx nan: ang pex chix jhak chix tawng ka mhai: grawh grawng: bawg yam lie? 4 Ju pa caox mai: pa phit pa vao sawg tix yaox mhai: pa daox pa am: heue:. Lheu: khaing: mhai: pa daox pa am: cao: jhai: Yonax tag ang tawx mhai: pa daox pa am: ka kix heue:." Mai: Nawh Cao: prah kix mai: lih hu: heue:.

5 Mai: yam hoik hoek kawncau khankix plak toi: rawm: plak an, kix piawm: tix viex khaomun. 6 Yam an Yesux ah nin: ka kix, "Rien rhawm: pex ka susaix Pharishie: mai: Sadukie: khankix heue:." 7 Mai: kix tix kaux hoik tix kaux keud tix ah nin: ka paox tix, "Mawh kheu ang ex viex khaomun heue:." 8 Mai: Yesux tawng grawh grawng: an mai: ah nin:, "Pex pa iak krax yumrhawm: khankix eue:, pex tix kaux hoik tix kaux keud tix ah ka paox tix kheu ang pex koe: khaomun yuh ka mawx? 9 Pex ang tawng, ang doh keud grawh grawng: khaomun phwan: lon:, mai: pui phwan: rheng:, mai: pex deeh pon tix khrawm: miex phliex? 10 Mai: khaomun aliah lon: mai: pui pon: rheng:, mai: pex deeh pon tix khrawm: miex phliex? 11 Yuh pa tix pex khex ang tawng pa ang Aux krai grawh grawng: khaomun ka pex? Viang mawh nan: rien rhawm: pex ka susaix Pharishie: mai: Sadukie: khankix heue:." 12 Yam an kix tawng grawh grawng: Nawh Cao: nhie: kix rien rhawm: tix ka susaix khaomun ang mawh, viang mawh nan:, mawh ka lox sidiex lox gau Pharishie: mai: Sadukie: khankix heue:.

Grawng: tawng Petrux ka mawh Yesux Khrit Kawn: Siyiex

16:13-16 koe: daux lai Makux 8:27-29; Lukax 9:18-20

13 Yam an Yesux hoek ka daux haktiex Kesarix Philipux, mai: Nawh Cao: chawk ka kawncau Nawh khankix ah nin:, "Pui ah Kawn: kawn: pui mawh mawx?" 14 Mai: kix deeh ah nin:, "tiblah ah mawh Yohan cao: baptis34. tiblah ah mawh Eliyax, mai: tang: kaux ah mawh Yeramix, phan: ang mawh nan: mawh cao: jhai: tix kaux kaux heue:." 15 Nawh Cao: baox chawk ka kix ah nin:, "Viang mawh nan: pex ah Aux mawh mawx?" 16 Simon Petrux pawk lox mai: ah nin: ka Nawh Cao:, "Maix mawh Khrit Kawn: Siyiex pa im: ju heue:." 17 Mai: Yesux deeh pawk lox ah nin: ka nawh, "Simon BaYonax eue:, maix ting bwanson: heue:. Mawh kheu nex nham: hoik kieh doh ka maix ang mawh, viang mawh nan: mawh Keeing: Aux pa ot ka daux meung raoma: pa kieh doh ka maix heue:. 18 Aux baox ah nin: ka maix, maix mawh Petrux, mai: Aux tag sum: ceucao: Aux ka piang simaox in, mai: siviex meung yum ang pon tix pex ceucao: an heue:. 19 Mai: Aux tag tawx jiak saw meung raoma: ka maix heue:. Mai: maix phyawk ceu pa tix ang ah piang haktiex in, tag sang phyawk ka daux meung raoma:, mai: maix kah ceu pa tix ang ah, ka piang haktiex in tag sang kah daux meung raoma: heue:." 20 Yam an Nawh Cao: tawm: lox ka kawncau Nawh khankix, son ang kix sang krai grawh grawng: mawh Nawh Cao: Khrit ka pui tix kaux kawx heue:.

Yesux grux krai pa sang kham: geu: Tix krax kharhawm:

16:21-28 koe: daux lai Makux 8:31-9:1; Lukax 9:22-27

21 Jah ka yam an Yesux jhi: kawncau Nawh khankix yaox, grawh grawng: tag sang hu: Nawh ka veng Yerusaliem, mai: kham: geu: tom: nie ceu, daux tawm: taix kuad song:, mai: cao: giex kaing: li pa ting mai: pui tiem: lai khankix, mai: grawh grawng: tag kham: geu: pa teei yum, mai: grawh grawng: tag deeh kaoh im: khaix an daux loe: singaix heue:. 22 Mai: Petrux teei Nawh Cao: hu: mai: ah, ah nin: ka Nawh, "Simiang eue:, kieh grawh grawng: ceu in singai khaing: Maix. Ceu in ang doh mawh ka Maix tix bawg kawx heue:." 23 Viang mawh kawx nan: Nawh Cao: veeh mai: ah nin: ka Petrux, "Satan eue:, hu: plak khaix Aux, maix mawh dee sideeing ka Aux kheu ang maix keud grawh grawng: ceu pa dex pa dawd mai: Siyiex, viang mawh kawx nan: maix keud grawh grawng: ceu pa dex pa dawd mai: kawn: pui khaing:."

Grawng: ngawh jum pa yuh kawncau

24 Yam an Yesux ah nin: ka kawncau Nawh khankix, "Phan: pui tix kaux kaux simie tix hoek khaix Aux, kieh nawh thiang: tix tik tokaux tix mai: klawm: khaoxlhak tix mai: hawt Aux heue:. 25 Mawh kheu pui mawx ang ah, pa simie tix taoh ju tokaux tix, tag sang som ju heue:. Mai: pui mawx ang ah pa som ju son Aux, tag sang pon tix yaox ju heue:. 26 Grawh grawng: nawh, phan: pui tix kaux kaux pon haktiex khawm: uik, mai: som ju tokaux tix, sang koe: bwanson: yuh ka mawx? Lheu: khaing: an, pui pon tix teei pa yuh ka mawx, deeh taoh ju tix kah? 27 Grawh grawng: nawh, Kawn: kawn: pui tag sang hoek ka daux min: plakngai: Keeing: Tix, tau mai: kawncau Siyiex khankix, mai: yam an Nawh tag tawx ka pui ku kaux awm: pa hoik yuh nawh heue:. 28 Aux krai lox tete telai ka pex, pui pa cung tin: tiblah, tag ang cim krax yum tom: kix yaox Kawn: kawn: pui hoek ka daux Meung Tix heue:."

Mathiex

Simin Ting 17

Grawng: Nawh Cao: loh Tokaux Tix ka piang gawng

17:1-8 koe: daux lai Lukax 9:28-36 , 17:1-13 koe: daux lai Makux 9:2-13

1 Khaix an liah singaix Yesux teei Petrux, mai: Yakop, mai: Yohan pa mawh pux Yakop, mai: viex kix haok ka piang gawng lhaong: nong: nong:, dee ang pui ot, 2 mai: tokaux Nawh Cao: loh sivoe kix tan:, mai: pakngai: Nawh jhan: riang awm: singaix, mai: kraung ceep Nawh lih paing awm: pa riang heue:. 3 Mai: jhak heue:, kix yaox Eliyax hoek tau mai: Mose, mai: kiex sikah mai: Nawh Cao: heue:. 4 Mai: Petrux ah nin: ka Yesux, "Simiang eue:, ex ot tin: mhawm: son ex heue:. Phan: Maix koe: rhawm:, aux tag yuh nyiex bang: tin: loe: lhang:. Son Maix tix lhang:, mai: son Mose tix lhang:, mai: son Eliyax tix lhang: heue:." 5 Yam kawn: sikah nawh paiawm: pa riang hoek tix kheem: veei kix, mai: jhak heue:, lox lih khaing: daux paiawm: an, ah nin:, "In mawh Kawn: pa moh Aux, pa khaw: pa caw rhawm: Aux heue:. Nghiet Nawh heue:." 6 Yam mhong: kawncau khankix lox an, kix kied lhat mai: goh gup tix heue:. 7 Mai: Yesux hoek mai: teeh kix mai: ah nin:, "Kaoh heue:, paw vi lhat kah." 8 Mai: kix yaog ngai: tix jhak, mai: ang kix yaox tix kaux kawx lheu: khaing: Yesux nong: nong: heue:.

9 Mai: yam lih hoek kix khaing: gawng, Yesux tawm: lox ka kix ah nin:, "Paw krai grawh grawng: riang susai pa hoik yaox pex ka pui tix kaux kawx, ka: ang Kawn: kawn: pui nyang bax kaoh khaing: yum." 10 Mai: kawncau Nawh khankix chawk Nawh Cao: ah nin:, "yuh ka mawx pui tiem: lai khankix ah Eliyax tag sang hoek phaoxka:?" 11 Mai: Nawh Cao: deeh pawk lox ah nin:, "Eliyax sang hoek tete mai: deeh cox mhawm: khawm: uik heue:. 12 Viang mawh kawx nan: Aux krai ka pex, Eliyax hoik hoek heue:, mai: pui ang tawng nawh, viang mawh nan: kix hoik yuh ka nawh awm: pa simie kix tix yuh. Awm: an Kawn: kawn: pui tag kham: geu: ka daux tawm: taix kix heue:." 13 Yam an kawncau khankix tawng Nawh Cao: krai ka kix grawh grawng: Yohan cao: baptis35 heue:.

Riangrao krax yumrhawm:

17:14-19 koe: daux lai Makux 9:14-28; Lukax 9:37-42

14 Mai: yam hoek kix dee ot cub pui haoh pui hun:, pui tix kaux hoek mai: grux ngawng, mai: ah nin: ka Nawh Cao:, 15 "Simiang eue:, caoxrhawm: ka kawn: simex aux liak, kheu mawh nawh pui saux laung: mai: kied kham: kied geu:, mai: nawh goh daux ngu, daux rawm: lawx lawx heue:. 16 Aux hoik viex nawh hoek ka kawncau Maix khankix, mai: kix ang chix cox nawh moi: heue:. 17 Mai: Yesux pawk lox ah nin:, "Pui ju pa ang koe: krax yumrhawm: yumrhi:, mai: pa nu tix ah eue:, Aux tag kawn: sang ot mai: pex miex grheung:? Aux tag kawn: sang gun sang yeung pex miex grheung:? Viex nawh hoek ka Aux heue:." 18 Mai: Yesux ah ka phi: an, mai: phicaox an lih hu: khaing: nawh, mai: kawn: simex an, moi: ka nari bawg yam an heue:.

19 Yam an kawncau khankix hoek ka Yesux dee ang pui ot mai: chawk ah nin:, "Yuh ka mawx ex ang pon tix grheu: phi: an lih?" 20 Mai: Nawh Cao: deeh pawk lox ah nin: ka kix, "Mawh kheu iak krax yumrhawm: pex heue:. Aux krai lox tete telai ka pex, phan: pex koe: krax yumrhawm: pon mu: simie sok taux klaox tix mu:, pex tag ah ka gawng in, gah maix hu: dee an, mai: nawh tag gah tix, mai: pa ang pex chix yuh tag ang koe: tix ceu kawx heue:. 21 Viang mawh nan: phi: ceu in phan: ang mawh kheu rawg bwan: mai: pa tuah pa ih pa un: ang pon tix lih heue:."

22 Mai: yam ot kix daux meung Galilie: Yesux ah nin: ka kix, "Tag sang tawx Kawn: kawn: pui ka daux tawm: taix kawn: pui khankix. 23 Mai: kix tag teei Nawh yum, mai: daux loe: singaix Nawh tag sang deeh kaoh heue:." Mai: kix kied khirhawm: kah heue:.

Pon mau tawx tix gha: khaing: daux jheeh kax

24 Mai: yam hoek kix ka daux veng Kapeniom, pui pa koh mau didrakma, hoek ka Petrux mai: ah nin:, "Sara Cao: Gau maix ang tawx mau didrakma lie?" 25 Nawh ah nin:, "Mawh heue:." Mai: yam laig nawh daux nyiex, Yesux sikah mai: nawh phaoxka: ah nin:, "Simon eue:, maix ce: yuh ka mawx? Laux simiang haktiex kix pon mau koh khaing: pui mawx? Pon khaing: kawnpraix tix lie? Phan: ang mawh nan: pon khaing: pui tang: lie?" 26 Mai: yam nawh deeh pawk lox ah nin:, "Pon khaing: pui tang: heue:." Yesux ah nin: ka nawh, "Phan: mawh nan: kawnpraix kix pon luan heue:. 27 Viang mawh kawx nan: yuh ka mawx son ang kix sang yuh phit kheu ex, maix hu: ka rawm: nhawng:, mai: ploi: myiet tix mu:, mai: teei kax pa pon phaoxka:, mai: yam hoik ving maix jheeh nawh, maix tag yaox sitate tix phak heue:. Teei an mai: tawx ka kix son Aux mai: son maix heue:."

Mathiex

Simin Ting 18

Glhawk ot kawn: pui ka daux meung raoma:

18:1-5 koe: daux lai Makux 9:33-37; Lukax 9:46-48

1Daux bawg yam nari an kawncau khankix hoek ka Yesux mai: chawk ah nin:, "Pui mawx nie lheu: ting khaing: paox tix ka daux meung raoma:?" 2 Mai: Nawh Cao: kok kawn: nyawm iak tix kaux mai: deuh sinax kix, 3 mai: ah nin:, "Aux krai lox tete telai ka pex, phan: pex ang deeh tieh tix mawh awm: kawn: nyawm iak khankix, pex ang tau tix pon laig ka daux meung raoma: heue:. 4 Mawh kheu nan: pui mawx ang ah, pa kieh rhawm: tix awn: awm: kawn: nyawm iak in, kaw an mawh pa lheu: ting khaing: paox tix ka daux meung raoma: heue:. 5 Mai: pui mawx ang ah, pa rieb tix teei kawn: nyawm iak pa awm: in ka daux ceukaux Aux, rieb tix teei Aux heue:. 6 Viang mawh nan: pui mawx ang ah, pa kieh kawn: nyawm iak khankix pa yumrhawm: ka Aux tix kaux kaux sideeing caong tix, lheu: mhawm: son kaw an, phan: preue: simaox mhaw: pa ting ka ngawg nawh mai: teei nawh cub daux rawm: sigrit sigra: dee raux heue:.

Grawng: pui pa kieh koe: dee sideeing caong

7 "Haktiex in tag kharhawm: kharhi: heue:, kheu koe: dee sideeing caong khankix. Dee sideeing caong khankix tag sang hoek, viang mawh kawx nan: pui pa yuh dee sideeing caong tag kharhawm: kharhi: heue:. 8 Phan: taix maix ang ah, caong maix ang ah, kieh maix sideeing caong tix, kid tix tik khaing: maix heue:. Laux taix laux caong maix mai: laig ka daux pa im: ju mhawm: khaing: koe: taix ra: khawn: mai: caong ra: khawn:, mai: laig ka daux ngu leeing: ju leeing: phan: heue:. 9 Phan: ngai: maix kieh maix sideeing caong tix, koh tix tik khaing: maix. Koe: ngai: maix tix khawn: khaing: mai: laig ka daux pa im: ju, mhawm: khaing: koe: ngai: maix ra: khawn:, mai: taing tix sau: daux ngu mawnarhok heue:. 10 Rien rhawm: tix paw nieb pon yuh ka kawn: nyawm iak khankix tix kaux kawx, kheu krai Aux ka pex kawncau Siyiex cie kix piang raoma: pon tix yaox pakngai: pakbaoh Keeing: Aux pa ot ka daux meung raoma: jheeng: jheeng: heue:. 11 Mawh kheu Kawn: kawn: pui hoek tix taoh pa hoik grai: khankix heue:.

Grawng: phektem: yung: pa grai:

18:12-14 koe: daux lai Lukax15:4-7

12 Pex ce: yuh ka mawx? Phan: pui tix kaux kaux koe: yung: tix yieh, mai: hoik lud krax mai: grai: tix mu:, nawh ang prah pa kawn: koe: tidim: dim: (99) mu:, mai: hu: ka piang gawng khankix mai: hu: sawg yung: pa hoik lud krax mai: grai: an lie? 13 Mai: phan: nawh hoik yaox, Aux krai lox tete telai ka pex, nawh nie lheu: gauxrhawm: grawh grawng: yung: an, khaing: yung: pa ang grai: tidim: dim: (99) mu: heue:. 14 Awm: an Keeing: pex pa ot ka daux meung raoma:, ang rhawm: kieh kawn: nyawm in khankix laux leeing: tix kaux kawx heue:.

Grawng: pa deeh mhawm: mai: paox tix tau

15 Mai: phan: puxaik maix phit maix, hu: jhi: nawh yaox dee phit sinax maix mai: nawh khaing:, phan: nawh nghiet maix, maix hoik pon puxaik maix heue:. 16 Viang mawh nan: phan: nawh ang nghiet maix, baox viex pui tix kaux ra: kaux hu: mai: maix, yuh ka mawx son lox ku gum, tag kaux tag cong:, ka jheeh pui pa kham: mhai: sakse: ra: loe: kaux heue:. 17 Mai: phan: nawh ang nghiet lox kix, krai ka ceucao, mai: phan: nawh ang nghiet ceucao kawx, kieh nawh mawh ka maix awm: pui tang: ceu tang: cat mai: pui koh mau heue:. 18 Aux krai lox tete telai ka pex, pex phyawk ceu pa tix ang ah piang haktiex in, tag sang phyawk ka daux meung raoma:, mai: pex kah ceu pa tix ang ah ka piang haktiex in, tag sang kah daux meung raoma: heue:. 19 Aux dee krai ka pex, phan: ka daux pex ra: kaux ih rhawm: paox tix piang haktiex in, grawh grawng: pa rawg kiex tix ceu ceu, Keeing: Aux pa ot ka daux meung raoma: tag yuh son kiex heue:. 20 Mawh kheu ka dee pui ra: loe: kaux khrawm: paox tix ka daux ceukaux Aux, Aux ot sinax kix heue:."

Grawng: pa pluat ploi: atigliah aliah bawg

21 Yam an Petrux hoek mai: ah nin: ka Nawh Cao:, "Simiang eue:, puxaik aux phit aux mai: aux tag pluat phimap nawh miex bawg? Tom: sidah aliah bawg lie?" 22 Yesux ah nin: ka nawh, "Aux ang krai ka maix 'tom: sidah aliah bawg,' viang mawh kawx nan: Aux krai tom: sidah hoek atigliah (70) aliah (7) bawg heue:. 23 Mawh kheu nan: meung raoma: awm: simiang ting tix kaux, pa sang sawn: riang mai: siliex tix heue:. 24 Mai: yam jah nawh tix sawn: riang, kix viex tix kaux pa ceuk talantan tix mheen: hoek ka nawh. 25 Viang mawh nan: kheu kaw an ang koe: tix tawx ceuk, simiang nawh nhie: kix coh nawh, mai: moeng nawh, mai: kawn: nawh, mai: can pa koe: nawh khawm: uik, mai: tawx ceuk nawh kah heue:. 26 Mawh kheu nan: siliex an grux tix krub nawh, mai: ah nin:, 'Simiang eue:, kawn: deuh ka aux liak, mai: aux tag sang deeh tawx ka maix khawm: uik heue:.' 27 Mai: simiang siliex an caoxrhawm:, mai: ploi: nawh, mai: pluat ceuk nawh khawm: uik heue:. 28 Viang mawh kawx nan: siliex an lih hu:, mai: yaox paox siliex tix tix kaux, pa ceuk ka nawh denari tix yieh, mai: nawh giex nawh, mai: kloeg ghok nawh ah nin:, 'Tawx pa ceuk maix ka aux.' 29 Mawh kheu nan: paox siliex nawh grux tix krub nawh mai: khyox khaw: ah nin:, 'Kawn: deuh ka aux liak mai: aux tag sang deeh tawx ka maix heue:.' 30 Viang mawh nan: nawh ang nghiet, mai: teei nawh sau: daux thawng: tom: sidah hoik tawx nawh ceuk tix khawm: uik heue:. 31 Mawh kheu nan: yam yaox paox siliex nawh tang: kaux khankix grawh grawng: pa yuh nawh kix kied caoxrhawm: son nawh, mai: kix hoek mai: krai ka simiang kix grawh grawng: pa yuh kaw an khawm: uik heue:. 32 Yam an Simiang nawh kok nawh hoek ka tix mai: ah nin:, 'Siliex pa caox eue:, aux hoik pluat ceuk maix khawm: uik, mawh kheu khyox khaw: maix ka aux heue:. 33 Maix ang khaw: tix caoxrhawm: ka paox siliex tix, awm: hoik caoxrhawm: aux ka maix lie?' 34 Mai: simiang nawh songrhawm:, mai: tawx nawh ka pui pa kieh kham: geu: tom: sidah hoik tawx nawh ceuk tix khawm: uik heue:. 35 Awm: an Keeing: Aux piang raoma: kawx tag sang yuh nan: ka pex, phan: pex ku kaux ang pluat phimap puxaik tix, khaing: daux rhawm: pex heue:."

Mathiex

Simin Ting 19

Grawng: pa tik moeng tix

19:1-9 koe: daux lai Makux 10:1-12

1 Khaix hoik sidiex Yesux lox ceu an khankix, Nawh Cao: lih hu: khaing: meung Galilie:, mai: hoek ka daux haktiex Yudax plak toi: rawm: Yawdan heue:. 2 Mai: cub pui haoh pui hun: khankix hawt Nawh Cao:, mai: Nawh cox kix moi: tan: heue:.

3 Mai: Pharishie: khankix hoek ka Nawh Cao: son sang cheuk tix yaox rhawm: Nawh, mai: chawk ah nin:, "Pui khaw: tix tik moeng tix kheu pa phit pa lud ku ceu lie?" 4 Mai: Nawh Cao: pawk lox ah nin:, "Ang pex sax phat grawh grawng: Kaw pa yuh kix yam jah, 'yuh kix mawh simex mai: bon:,' 5 mai: ah nin:, 36 'Mawh kheu in simex tag prah miex keeing: tix, mai: ot tau mai: moeng tix mai: kiex ra: kaux tag mawh nex nham: tix mu: khaing:,' 6 mawh kheu in kiex ang lai deeh mawh ra: kaux, viang mawh kawx nan: mawh tix kaux khaing: heue:. Mawh kheu in pa hoik kleuk Siyiex tau paw kieh pui yieh heue:." 7 Mai: kix ah nin: ka Nawh Cao:, "Phan: mawh nan: yuh ka mawx Mose tawx lox kieh tawx lai grawh grawng: pa hoik hoik lox, mai: tik bon:?" 8 Nawh Cao: baox ah nin: ka kix, "Mawh kheu kiien: rhawm: pex Mose tom: kieh pex tik moeng tix heue:, viang mawh kawx nan: yam jah ang mawh nan: heue:. 9 Mai: Aux krai ka pex, pui mawx ang ah phan: nawh tik moeng tix lheu: khaing: grawh grawng: pa phit pa vao nawh, mai: teei tix moeng tang: kaux, nawh phit nawh vao, mai: kaw pa teei tix moeng bon: pa hoik tik an, nawh phit nawh vao heue:." 10 Mai: kawncau khankix ah nin: ka Nawh Cao:, "Phan: grawh grawng: simex mai: moeng tix mawh nan:, ang khaw: tix teei tix moeng heue:." 11 Viang mawh nan: Nawh Cao: ah nin: ka kix, "Pui khawm: uik ang pon rieb tix teei lox in, viang mawh nan: mawh pa hoik tawx ka kix khaing: pa pon rieb tix teei heue:. 12 Kheu koe: pa mawh pui sieh tom: yam keh hoek khaing: daux vaig miex tix, mai: koe: pui sieh pa pui hoik yuh kieh mawh pui sieh, mai: koe: pui sieh pa hoik yuh tokaux tix mawh pui sieh son meung raoma: heue:. Kaw pa chix rieb tix teei kieh nawh rieb tix teei heue:."

Nawb bwanson: ka kawn: nyawm iak

19:13-15 koe: daux lai Makux 10:13-16; Lukax 18:15-17

13 Yam an kix viex kawn: nyawm iak khankix hoek ka Nawh Cao:, yuh ka mawx son sang deuh Nawh taix Tix ka piang kix mai: rawg bwan: heue:. Viang mawh nan:, kawncau khankix ah ka pui khankix heue:. 14 Viang mawh nan: Yesux ah nin:, "Kieh kawn: nyawm iak khankix hoek ka Aux, paw vi sidien kix, kheu meung raoma: mawh cie pa awm: kix heue:." 15 Mai: Nawh Cao: deuh taix Tix ka piang kix, mai: lih hu: khaing: tan: heue:.

Pui awn: ju pa mawh cao: mi

19:16-29 koe: daux lai Makux 10:17-30; Lukax 18:18-30

16 Mai: jhak heue:, pui tix kaux hoek ka Nawh Cao: ah nin:, "Sara Cao: Gau eue:, aux tag yuh pa mhawm: ceu pa yuh ka mawx, son sang pon aux ju leeing: ju leeing: phan:?" 17 Mai: Nawh Cao: ah nin: ka nawh, "Yuh ka mawx maix lai chawk Aux ka grawh grawng: ceu pa mhawm:? Pa mhawm: koe: tix kaux, viang mawh nan: phan: maix simie tix laig ka daux pa im: ju, priex tix hawt gumlox pingnyap khankix heue:." 18 Kaw an baox ah nin: ka Nawh Cao:, "Pingnyap pa yuh ka mawx?" Mai: Yesux ah nin:, 37"'Maix paw teei ju pui yum, maix paw phit paw vao, maix paw briex paw lak, maix paw kham: mhai: sakse: pa ang mawh ang meh, 19 yungyi: ka miex ka keeing: tix,' mai: 38'maix tag moh paox plawg paox nyhawm: awm: moh tokaux tix heue:.'" 20 Pui awn: ju an baox ah nin: ka Nawh Cao:, "aux hoik hawt yuh ceu in khankix khawm: uik heue:. Aux kawn: taik ceu pa tix?" 21 Mai: Yesux baox ah nin: ka nawh, "Phan: maix simie tix grum naog, hu: coh pa koe: maix, mai: tawx ka pui hot pui sibhawm: khankix, mai: maix tag koe: kraung khrai: ka daux meung raoma:, mai: hoek tix hawt Aux heue:." 22 Viang mawh nan: yam pui awn: ju an mhong: lox an, nawh khirhawm: khirhi: mai: lih hu: heue:. Kheu mawh nawh pui pa koe: kraung khrai: tom: nie heue:.

23 Mai: Yesux ah nin: ka kawncau Nawh khankix, "Aux krai lox tete telai ka pex, pui pa mawh cao: mi nu tix laig ka daux menng raoma: heue:. 24 Mai: Aux baox krai ka pex, laig kala-uk daux kre: nyex lheu: yie khaing: laig cao: mi ka daux meung Siyiex heue:." 25 Mai: yam mhong: kawncau Nawh khankix lox an, kix kied daox deng: kah mai: ah nin:, "Phan: mawh nan: pui mawx tag sang pon hoek krax taoh heue:." 26 Mai: Yesux jhak ka piang kix mai: ah nin: ka kix, "Grawh grawng: in kawn: pui ang chix yuh, viang mawh kawx nan: Siyiex chix yuh ku ceu ku cawng khawm: uik heue:."

Khawngphak pa tag sang pon pa yuh kawncau

27 Yam an Petrux pawk lox mai: ah nin: ka Nawh Cao:, "Ex hoik prah pa koe: tix khawm: uik mai: hawt khaix Maix. Mawh kheu nan: ex tag pon ceu pa tix?" 28 Mai: Yesux baox ah nin: ka kix, "Aux krai lox tete telai ka pex, pex pa hoik hawt khaix Aux khankix, yam hoek bawg yam, yam Kawn: kawn: pui tag ngawm piang dangngeung min: plakngai: Nawh, pex kawx, tag sang ngawm piang dangngeung kao: mu: ra: mai: prawng ka pui Isarilax kao: ceu ra: heue:. 29 Mai: pui mawx ang ah pa hoik prah hoik grham: nyiex nawh, phan: ang mawh nan: puxaik nawh, phan: ang mawh nan:, nan: nawh, phan: ang mawh nan: miex nawh, phan: ang mawh nan: keeing: nawh, phan: ang mawh nan: kawnpraix nawh, phan: ang mawh nan: ma: kaung: nawh khankix, kheu ceukaux Aux, tag sang baox pon tix yieh son, mai: tag sang pon sin:, ju leeing: ju leeing: phan: heue:. 30 Viang mawh kawx nan: pui pa da: khaix tom: nie tag ot ka:, mai: pui pa ot ka: tom: nie tag da: khaix heue:."

Mathiex

Simin Ting 20

Grawng: pui yuh kaing daux sipeem plix siiet

1 Grawh grawng: nawh, meung raoma: awm: cao: nyiex tix kaux, pa lih hu: pon ngawb cao cao, son sang cang: pui yuh kaing ka daux sipeem plix siiet tix heue:. 2 Mai: hoik dud ah nawh mau riang ka pui pa sang yuh kaing khankix, tix singaix denari tix plah, nawh ploi: kix laig ka daux sipeem plix siiet nawh heue:. 3 Mai: yam dex hoek loe: nari39 nawh baox lih hu:, mai: nawh yaox pui tang: kaux khankix pa ang yuh tid tix mai: cung ka daux lah. 4 Mai: nawh ah nin: ka kix, "Pex kawx hu: ka daux sipeem plix siiet aux, mai: khaw: tix tawx miex ding aux tag tawx ka pex heue:.' Mai: kix hu: heue:. 5 Yam dex hoek liah nari40 nawh deeh baox hu:, mai: yam hoek dim: nari41 nawh baox hu: awm: an heue:. 6 Mai: yam dex hoek kao: tix nari42 nawh baox lih hu:, mai: yaox pui tang: kaux khankix cung, mai: nawh baox ah nin: ka kix, 'Pex cung mai: ang yuh tid tix leeing: lang: singaix yuh ka mawx?' 7 Kix ah nin: ka nawh, 'Mawh kheu pui tix kaux kawx ang cang: ex heue:.' Mai: nawh baox ah nin: ka kix. Pex kawx hu: ka daux sipeem plix siiet aux heue:.' 8 Mai: yam hoek ponbo, simiang sipeem plix siiet ah nin: ka kawncau nawh, 'Kok pui pa yuh kaing khankix mai: tawx riang kix, jah ka pui yuh khaix, tom: hoek ka pui yuh ka: heue:.' 9 Mai: yam kix pa hoik cang: bawg yam kao: tix nari43 hoek, kix ku kaux pon denari tix kaux tix plah heue:. 10 Mai: yam pui pa yuh ka: paox tix hoek, kix ce: nie lheu: pon khaing: kix, mai: awm: an kix ku kaux kawx, pon denari tix kaux tix plah heue:. 11 Mai: yam hoik pon kix yuh nan:, kix sibriem ka cao: nyiex, 12 ah nin:, 'Pa da: tix yuh khaix khankix yuh tix nari khaing:, mai: maix hoik tawx ka kix awm: ex, pa hoik yuh kaing leeing: lang: singaix mai: kham: geu: pa kied hax koek heue:.' 13 Viang mawh kawx nan: nawh baox pawk lox mai: ah nin: ka kix tix kaux, 'Paoxgrawm eue:, aux ang yuh pa ang khaw: ka maix, maix hoik cu ka lox pa hoik krai dud son denari tix plah ang mawh lie? 14 Teei pa mawh cie maix mai: hu: heue:. Aux simie tix tawx ka pa yuh khaix awm: maix. 15 Phan: aux yuh pa simie aux tix yuh ka cie aux ang khaw: lie? Phan: ang mawh nan: bohrhawm: maix kheu mhawm: aux lie? 16 Kheu nan: pa da: khaix tag ot ka:, mai: pa ot ka: tag da: khaix heue:. Kheu pa kok koe: nie, viang mawh nan: pa laug tix teei tux heue:."

Grawng: pa grux krai krax kham: geu: mai: pa deeh kaoh im:

20:17-19 koe: daux lai Makux 10:32-34; Lukax 18:31-33

17 Mai: yam haok hu: Yesux ka veng Yerusaliem, Nawh Cao: teei kawncau Nawh kao: kaux ra:, hu: dee ang pui ot, mai: yam hu: krax Nawh ah nin: ka kix, 18 "Jhak heue:, ex tag sang haok hu: ka veng Yerusaliem, mai: tag sang teei tix tawx Kawn: kawn: pui ka cao: giex kaing: li pa ting khankix, mai: pui pa tiem: lai khankix, mai: kix tag sang prawng kieh Nawh yum. 19 Mai: tawx Nawh ka pui tang: ceu tang: cat khankix, son sang yuh kix pa ang cee ang cak, mai: sivied Nawh, mai: tawk Nawh yum piang khaoxlhak, mai: daux loe: singaix Nawh tag sang deeh kaoh im: heue:."

Grawng: ceu pa rawg kawncau ra: kaux tix mawh

20:20-28 koe: daux lai Makux 10:35-45

20 Yam an miex kawn: Zebedie: hoek tau mai: kawn: kiex khankiex ka Nawh Cao:, krub Nawh mai: rawg tix ceu ka Nawh Cao: heue:. 21 Mai: Nawh Cao: ah nin: ka kiex, "Simie pax pa tix?" Kiex deeh ah nin: ka Nawh Cao:, "Tawx lox kieh kawn: aux ra: kaux in ngawm plak taix khawn: dawm: Maix tix kaux mai: plak taix khawn: gwiex tix kaux daux meung Maix liak." 22 Viang mawh kawx nan: Yesux pawk lox mai: ah nin:. "Pex ang tawng ceu pa rawg pex. Pex chix nyaux kawk pa nyaux Aux lie?" Mai: kix baox ah nin: ka Nawh Cao:, "Chix tix heue:." 23 Nawh Cao: baox ah nin: ka kix, "Kawk pa nyaux Aux pex tag sang nyaux tete heue:, viang mawh kawx nan: pa ngawm plak taix khawn: dawm: Aux, mai: plak taix khawn: gwiex Aux, ang mawh cie Aux tix tawx, viang mawh nan: Keeing: Aux hoik cox son pui mawx ang ah tag mawh son kix heue:." 24 Yam mhong: kawncau Nawh kao: kaux grawh grawng: ceu an, kix song: rhawm: ka puxaik kaux ra: an heue:. 25 Viang mawh nan: Yesux kok kix hoek ka Tix, mai: ah nin:, "Pex tawng grawh grawng: simiang pui tang: ceu tang: cat khankix, giex kaing: kix, mai: pui pa ting pa lhaong: kix, khin: ka kix heue:. 26 Ka daux pex tag ang mawh nan:, viang mawh nan: ka daux pex pui mawx ang ah, pa simie tix ting tix lhaong: tag mawh kawncau pex heue:. 27 Mai: ka daux pex pui mawx ang ah, pa simie tix giex kaing: pex, tag mawh siliex pex heue:. 28 Awm: Kawn: kawn: pui hoek son sang kieh pui yuh son Nawh ang mawh, viang mawh nan: hoek son sang yuh son pui, mai: tawx ju tokaux Tix, son sang taoh pui tom: nie heue:."

Cox pai: pui dug ngai:

20:29-34 koe: daux lai Makux 10:46-52; Lukax 18:35-43

29 Mai: yam lih hu: kix khaing: veng Yerikho: cub pui haoh pui hun: hawt khaix Nawh Cao: heue:. 30 Mai: jhak heue:, pui dug ngai: ra: kaux ngawm dex krax, mai: yam mhong: kiex grawh grawng: hu: Yesux praok kiex, kiex kok yo ah nin:, "Simiang kawn: Dawit eue:, caoxrhawm: ka yiex liak." 31 Mai: cub pui haoh pui hun: ah ka kiex, nhie: kiex yawg tix, viang mawh nan: kiex nie kok yo ah nin:, "Simiang kawn: Dawit eue:, caoxrhawm: ka yiex liak." 32 Yesux cung kaog mai: kok kiex ah nin:, "Pax sang kieh Aux yuh ceu pa tix ka pax?" 33 Mai: kiex ah nin: ka Nawh Cao:, "Simiang eue:, yuh ngai: yiex kieh blah liak." 34 Mai: Yesux caoxrhawm:, teeh ngai: kiex, mai: dom: mawx dom: an kiex chix yaox, mai: hawt khaix Nawh Cao: heue:.

Mathiex

Simin Ting 21

Laig daux veng Yerusaliem mai: min: plak ngai:

21:1-9 koe: daux lai Makux 11:1-10; Lukax 19:29-38, 21:4-9 koe: daux lai Yohan 12:12-15

1 Mai: yam dex hoek kix ka veng Yerusaliem, mai: hoek ka yaong: Bephake, ka gawng Sanlun, yam an Yesux ploi: kawncau Nawh ra: kaux hu:, 2 Mai: ah nin: ka kiex, "Hu: ka daux yaong: pa koe: sivoe pax, mai: dom: mawx dom: an pax tag yaox, la pa hoik phyawk, mai: kawn: la pa ot tau mai: nawh. Kah mai: viex hoek ka Aux heue:. 3 Mai: phan: pui tix kaux kaux ah tix ceu ceu ka pax, pax tag deeh krai ah nin:, 'Simiang lo kiex heue:.' mai: kaw an tag ploi: hoek dom: mawx dom: an heue:." 4 Ceu in hoik mawh, son sang naog lox cao: jhai: pa ah nin:, 5 44 "Pex krai ka kawn: bon: Zion, 'jhak heue:, Simiang maix, viex rhawm: awn: mai: brug ka piang la, ka piang kawn: la awn: ju heue:.'" 6 Mai: kawncau khankiex hu: awm: pa hoik nhie: Yesux, 7 mai: viex la mai: kawn: la awn: ju, mai: sau: kraung ceep kix ka piang la, mai: Nawh Cao: ngawm ka piang heue:. 8 Mai: ka daux cub pui haoh pui hun: plak nie teei kraung ceep tix nih tix tawm ka daux krax, mai: tang: kaux khankix kid kak khaing: khaox khankix mai: tawm ka daux krax heue:. 9 Mai: cub pui haoh pui hun: khankix, pa hu: sivoe mai: pa hawt khaix Nawh Cao: kok yo ah nin:, 45"Hosanna ka Kawn: Dawit Kaw pa hoek ka daux ceukaux Simiang ting bwanson: heue:. Hosanna dee lhaong: khaing: paox tix heue:." 10 Mai: yam laig Nawh Cao: ka daux veng Yerusaliem, khawm: veng khawm: uik lulax rhawm:, lawh maw:, mai: chawk ah nin:, "Kaw in mawh mawx?" 11 Mai: cub pui haoh pui hun: khankix ah nin:, "In mawh Cao: Jhai:, Yesux, pa hoek khaing: veng Nazariet ka daux meung Galilie: heue:."

Kieh nyiex bwan: singax singeh

21:12-16 koe: daux lai Makux 11:15-18; Lukax 19:45-47

12 Mai: Yesux laig ka daux nyiex bwan: Siyiex, mai: grheu: pui pa coh pa liag ka daux nyiex bwan: khankix lih, mai: cot pheen: pui pa loh mau khankix, mai: dee ngawm pui coh sikaux khankix cangklud heue:. 13 Mai: Nawh Cao: ah nin: ka kix, "Hoik tiem: tix deuh ah nin:, 46 'Nyiex Aux tag kok mawh dee rawg bwan: heue:.' Viang mawh kawx nan: pex hoik kieh mawh 47 'daux dee ot pui tud pui rhim: heue:.'" 14 Mai: pui dug ngai: mai: pui laux caong khankix hoek ka Nawh Cao: ka daux nyiex bwan:, mai: Nawh cox kix moi: heue:. 15 Viang mawh kawx nan: yam cao: giex kaing: li pa ting khankix, mai: pui tiem: lai khankix yaox ceu pa daox pa am: pa yuh Nawh Cao: khankix, mai: kawn: nyawm khankix pa kok yo ka daux nyiex bwan: ah nin:, "Hosanna ka Kawn: Dawit" kix songrhawm: kah, 16 mai: ah nin: ka Nawh Cao:, "Mhong: Maix pa ah ceu in khankix lie?" Mai: Yesux ah nin: ka kix, "Mawh heue:, ang pex sax phat, 48 'Maix hoik kieh krax yaogyaw grum, khaing: daux jheeh kawn: nyawm iak, kawn: nyawm peuex khankix,' lie?"

Grawng: vhit kroh hu: khaoxruh dom: mawx dom: an

21:18-22 koe: daux lai Makux 11:12-14, 20-24

17 Mai: Nawh Cao: prah kix mai: lih hu: khaing: daux veng, ka yaong: Betanix, mai: it tan: heue:. 18 Yam ponngawb yam deeh hu: Nawh Cao: ka veng, Nawh cairhawm:, 19 mai: yaox khaoxruh tix khaox ka dex krax, mai: Nawh Cao: hu: ka khaox an, mai: yaox ngie lhax khaing:, mai: Nawh Cao: ah nin: ka khaox an, "Jah yamin tom: hoek leeing: ju leeing: phan:, paw lai kieh maix plix tix bawg kawx." Mai: dom: mawx dom: an khaoxruh an vhit mai: kroh hu: heue:. 20 Mai: yam kawncau khankix yaox kix kied daox deng: kah, ah nin:, "Khaoxruh in chix kroh hu: dom: mawx dom: an yuh ka mawx?" 21 Mai: Yesux pawk lox mai: ah nin: ka kix, "Aux krai lox tete telai ka pex, phan: pex yumrhawm:, mai: ang koe: krax pa ang yumrhawm: pex tag ang yuh pa hoik yuh ka khaoxruh in khaing:, viang mawh phan: pex ah ka gawng in kawx, 'Gah dee ot maix, mai: rau ka daux rawm: sigrit sigra: heue:' tag sang mawh. 22 Mai: pa yumrhawm:, mai: pa mhaing: pex, yam rawg pex bwan: ku ceu khawm: uik, pex tag pon heue:."

Chawk cheng: ka grawng: siawp sibrawm Yesux

21:23-27 koe: daux lai Makux 11:27-33; Lukax 20:1-8

23 Mai: yam hoek Nawh Cao: ka daux nyiex bwan:, cao: giex kaing: li pa ting khankix, mai: kuad song: pui khankix hoek ka Nawh Cao: yam sidiex gau Nawh mai: ah nin:, "Maix pon akhwang: siawp sibrawm tix yuh ceu in khankix dee mawx? Mai: pui mawx tawx akhwang: siawp sibrawm in ka Maix?" 24 Mai: Yesux pawk lox mai: ah nin: ka kix, "Aux kawx tag sang chawk pex ka grawh grawng: tix ceu, mai: phan: pex krai ka Aux, Aux kawx tag sang krai ka pex grawh grawng: pon Aux akhwang: siawp sibrawm tix yuh ceu in khankix dee mawx heue:. 25 Krax baptis49 Yohan kaoh khaing: dee mawx? Kaoh khaing: raoma: lie, phan: ang mawh nan: kaoh khaing: kawn: pui lie?" Mai: kix keud tau ah nin:, "Phn: ex ah, 'Kaoh khaing: raoma:,' Nawh Cao: tag chawk ah nin:, 'Phan: mawh nan: yuh pa tix pex ang yumrhawm: ka nawh?' 26 Viang mawh nan: phan: ex ah 'Kaoh khaing: kawn: pui,' ex lhat ka cub pui haoh pui hun: khankix, kheu kix khawm: uik een: Yohan mawh cao: jhai: heue:." 27 Mai: kix pawk lox ka Yesux ah nin:, "Ex ang tawng heue:." Mai: Nawh Cao: baox ah nin: ka kix, "Aux ka ang krai ka pex grawh grawng: pon Aux akhwang: siawp sibrawm tix yuh ceu in khankix dee mawx heue:.

Lox phektem: kawn: simex ra: kaux

28 Viang mawh kawx nan: pex ce: yuh ka mawx? Pui tix kaux koe: kawn: simex ra: kaux, mai: nawh hoek ka kaw phaoxka: ah nin:, 'Kawn: simex aux eue:, maix hu: ka daux sipeem plix siiet singaix heue:.' 29 Mai: nawh deeh pawk lox ah nin:, 'Aux ang hu:.' Viang mawh kawx nan: khaix an nawh doh keud ka phimap tix, mai: hu: heue:. 30 Mai: pui an hoek ka kawn: nawh ra: kaux tix kaux, mai: ah awm: pa hoik ah nawh phaoxka:. Mai: kawn: an pawk lox mai: ah nin:, 'Aux sang hu: heue:, simiang,' viang mawh nan: nawh ang hu:. 31 In ra: kaux mawh mawx pa hawt yuh alo keeing: tix?" Mai: kix ah nin:, "Kaw phaoxka: heue:." Yesux ah nin: ka kix, "Aux krai lox tete telai ka pex, pui pa koh mau khankix, mai: bon: pa coh kaux tix, tag laig ka daux meung Siyiex ka: pex heue:. 32 Kheu hoek Yohan ka pex ka daux krax rah krax see mai: pex ang yumrhawm: ka nawh, viang mawh nan: pui koh mau khankix mai: bon: pa coh kaux tix yumrhawm: ka nawh heue:. Mai: pex, yam pex yaox, khaix an pex ka ang doh keud doh sawn: ka tokaux tix, son sang yumrhawm: ka nawh.

Lox phektem: Cao: sipeem mai: pui vai tix yuh sipeem

21:33-46 koe: daux lai Makux 12:1-12; Lukax 20:9-19

33 "Pex baox nghiet lox phektem: tang: ceu tix ceu heue:. Koe: pui tix kaux pa mawh cao: nyiex, pa sum: sipeem plix siiet tix dah, mai: sum: khaox vie vungviang sipeem an, mai: kaong: dee biiet rawm: plix plix siiet, mai: sum: nyiex lhaong: tix lhang:, mai: yaog mai: vai ka pui pa yuh sipeem plix siiet, mai: hu: tang: praix tang: klawng: heue:. 34 Mai: yam dex hoek bawg yam sang teem plix, nawh ploi: kawncau tix khankix hu: ka pui yuh sipeem, son sang teei plix cie nawh heue:. 35 Mai: pui yuh sipeem khankix giex kawncau nawh, mai: tap tix kaux, mai: teei yum tix kaux, mai: dheem: ka simaox tix kaux heue:. 36 Mai: nawh baox deeh ploi: kawncau tang: kaux hu:, nie lheu: khaing: phaoxka:, mai: pui yuh sipeem khankix yuh ka kix awm: hoik yuh bawg phaoxka: an heue:. 37 Khaix an nawh ploi: kawn: tix hu:, ah nin:, 'Kix tag yungyi: ka kawn: aux heue:.' 38 Viang mawh kawx nan:, yam yaox pui yuh sipeem khankix ka kawn: nawh, kix ah nin: ka paox tix, 'Kaw in mawh cao: sin:. Hoek heue:, ex teei nawh yum mai: teei sin: nawh heue:.' 39 Mai: kix teei nawh mai: taing nawh plak praix sipeem, mai: teei nawh yum heue:. 40 Mawh kheu nan: yam hoek cao: sipeem, nawh tag sang yuh ka mawx ka pui yuh sipeem khankix?" 41 Mai: kix ah nin: ka Nawh Cao:, "Nawh tag yieh yuh laux pui caox an khankix, mai: nawh tag sang yaog sang vai sipeem plix siiet nawh ka pui yuh sipeem tang: kaux, pa sang tawx plix ka nawh yam hoek bawg yam teem plix heue:." 42 Yesux baox ah nin: ka kix, "Ang pex sax phat ka daux phuk lai sigang: khri: pa ah nin: lie? 50 'Simaox pa hoik tik pui pa yuh nyiex, hoik yuh kieh mawh kaing: ka daog. In mawh pa hoek khaing: Simiang, mai: mawh pa daox pa deng: ka ngai: ex heue:.' 43 Mawh kheu nan: Aux ah nin: ka pex, tag teei Meung Siyiex khaing: pex, mai: tawx ka tang: meung pa chix plix plix pa dex pa dawd mai: Meung Siyiex heue:. 44 Mai: pui pa rau ka piang simaox in tag max, mai: simaox in rau ka piang pui mawx ang ah, tag kieh nawh prung: prang: awm: phawng: tiex heue:." 45 Yam cao: giex kaing: li pa ting khankix mai: Pharishie:, khankix mhong: lox phektem: Nawh Cao: khankix, kix tawng Nawh krai grawh grawng: kix heue:. 46 Yam sawg kix tix giex Nawh Cao:, kix lhat ka cub pui haoh pui hun: khankix, kheu kix ce: Nawh mawh cao: jhai: heue:.

Mathiex

Simin Ting 22

Lox phektem: grawng: poi kapaox

22:2-14 jhak daux lai Lukax 14:16-24

1 Mai: Yesux pawk lox mai: deeh krai lox phektem: tiblah ka kix ah nin:, 2 "Meung Siyiex awm: simiang ting tix kaux, pa yuh poi kapaox son kawn: simex tix. 3 Mai: nawh ploi: kawncau nawh khankix hu: kok kix, pa hoik ghaok hoek ka poi glang: ka: an. Mai: kix ang hoek heue:. 4 Mai: nawh baox deeh ploi: kawncau nawh tang: kaux ah nin:, 'Krai ka kix pa hoik ghaok hoek glangka: in. Jhak heue:. Aux hoik cox khre: pa ih pa un:, mai: hoik pah moi aux, mai: hoik pah khawng: brie pa kluing: khankix, mai: hoik cox tix deuh ku ceu, hoek ka poi kapaox heue:.' 5 Viang mawh kawx nan: kix yuh pa ang cee ang cak mai: hu: dee hu: kix, tix kaux hu: ka ma: nawh, mai: tang: kaux hu: ka kraung khrai: nawh, 6 Mai: kix pa deuk tan:, giex kawncau an khankix, mai: yuh pa ang khaw: ang jiet ka kix, mai: teei kix yum heue:. 7 Simiang ting an songrhawm: kah, mai: ploi: pui naing nawh khankix hu: yieh mai: yuh kix pa mawh pui pa pah pui yum, laux, mai: gleeing veng kix heue:. 8 Khaix an nawh ah nin: ka kawncau nawh khankix, 'Hoik cox poi kapaox mhawm:, viang mawh nan: kix pa hoik ghaok hoek glangka: an, ang keung: tix hoek heue:. 9 Mawh kheu nan: pex hu: ka gah krax ting khankix, mai: pex yaox pui miex ding ang ah nhie: kix hoek ka poi kapaox heue:.' 10 Mai: kawncau nawh khankix lih hu: ka krax ting khankix, mai: khrawm: pui pa yaox kix khawm: uik, khawm: pa caox pa mhawm:, mai: nyo naog ka poi kapaox heue:. 11 Viang mawh kawx nan: yam laig simiang ting tix jhak nyo khankix, nawh yaox pui pa ang ceep kraung kapaox tix kaux. 12 Mai: nawh ah nin: ka kaw an, 'Paoxgrawm eue:, yuh pa tix maix ang ceep kraung kapaox mai: hoek tin:?' Mai: kaw an ang nye: kah heue:. 13 Khaix an simiang ting an ah nin: ka kawncau nawh khankix. 'Phyawk taix caong nawh mai: taing nawh daux pa vhaik plak praix heue:,' dee tag yiem riag mai: dee greeik rhang: heue:. 14 Grawh grawng: nawh, pa kok koe: nie, viang mawh nan: pa laug tix teei tux heue:."

Tawx gha: keun: ka Simiang kesa

22:15-22 koe: daux lai Makux 12:13-17; Lukax 20:20-26

15 Yam an Pharishie: khankix kum: kawng: paox tix, grawh grawng: sang pon kix tix yaox dee lud lox Nawh Cao: yuh ka mawx? 16 Mai: kix ploi: kawncau kix khankix tau mai: pui Herut khankix hu: ka Nawh Cao:, ah nin:, "Sara Cao: Gau eue:, ex tawng Maix mawh pa mawh pa meh, mai: sidiex gau grawh grawng: krax Siyiex tete, mai: ang lhat ka pui tix kaux kawx heue:. Kheu ang Maix jhak ka pakngai: kawn: pui heue:. 17 Mawh kheu nan: Maix ce: yuh ka mawx, krai ex mhong: liak? Khaw: tix tawx mau koh ka simiang Kesa lie, ang khaw: tix tawx lie?" 18 Viang mawh kawx nan: Yesux tawng grawh grawng: pa caox kix, mai: ah nin:, "Pui pie pui lhen: khankix eue:, pex nyaw pex cheuk tix yaox Aux yuh ka mawx? 19 Jhi: Aux yaox mau koh heue:." Mai: kix viex denari tix plah ka Nawh Cao: heue:. 20 Mai: Nawh Cao: chawk ah nin: ka kix, "In mawh rieang mawh lai pui mawx?" 21 Kix baox ah nin: ka Nawh Cao:, "Mawh rieang mawh lai Simiang Kesa heue:." Yam an Nawh Cao: baox ah nin: ka kix, "Mawh kheu nan: ceu pa mawh cie Kesa tawx ka simiang Kesa heue:. Mai: ceu pa mawh cie Siyiex tawx ka Siyiex heue:." 22 Mai: yam mhong: kix lox an, kix kied daox deng: kah, mai: prah Nawh Cao:. mai: hu: heue:.

Grawng: pa deeh pawk lox chawk mhaing: pui Sadukie:

22:23-33 koe: daux lai Makux 12:18-27; Lukax 20:27-40

23 Ka daux singaix an Sadukie: khankix hoek ka Nawh Cao:, pa ah ang koe: pa deeh kaoh im: heue:. Mai: kix chawk Nawh Cao:, 24 ah nin:, "Sara Cao: Gau eue:, Mose hoik krai ah nin: 'Phan: pui yum tix kaux mai: ang koe: kawn:, pux nawh tag teei tix moeng, moeng nawh, mai: eei: kawn: ceucat son puxke: nawh heue:.' 25 Yam an koe: puxaik aliah kaux mai: ex. Kaw phaoxka: tix kaux teei tix koe: moeng, mai: yum heue:. Mai: kheu ang nawh koe: kawn:, nawh prah moeng tix ka pux nawh heue:. 26 Awm: an ra: kaux tix kaux, mai: loe: kaux tix kaux. Tom: sidah sidu hoek ka aliah kaux tix kaux yum heue:. 27 Mai: khaix hoik yum kix khawm: uik, bon: an kawx yum heue:. 28 Mawh kheu nan:, yam hoek bawg yam deeh kaoh im:, ka daux kix aliah kaux bon: an tag mawh moeng kaw pa yuh ka mawx? Kheu kix khawm: uik hoik moeng nawh heue:." 29 Viang mawh nan:, Yesux pawk lox mai: ah nin: ka kix, "Pex phit pex lud kheu ang pex tawng Phuk lai sigang: khri: mai: siawp sibrawm Siyiex heue:. 30 Kheu daux bawg yam deeh kaoh im: sax, ang teei mex teei moeng, mai: ang teei tix tawx ka paox tix, viang mawh nan: kix tag awm: kawncau Siyiex ka daux meung raoma: heue:. 31 Lheu: khaing: an grawh grawng: pui pa yum deeh kaoh im:, ang pex sax phat pa hoik krai Siyiex ah nin: ka pex, 32 51'Aux mawh Siyiex Abraham, mai: Siyiex Icak, mai: Siyiex Yakop.' Lie? Siyiex mawh Siyiex pui pa yum ang mawh, viang mawh nan: mawh Siyiex pui pa im: heue:." 33 Mai: yam mhong: cub pui haoh pui hun: khankix lox an, kix kied daox kied deng: ka lox diex lox gau Nawh Cao: heue:.

Gumlox pingnyap pa blon: ting

22:34-40 koe: daux lai Makux 12:28-31

34 Viang mawh nan: yam mhong: Pharishie: khankix grawh grawng: Nawh Cao: hoik kieh Sadukie: khankix yien:, kix khrawm: paox tix heue:. 35 Mai: kix tix kaux pa mawh, cao: prawng cao: tawng lai been chawk Nawh Cao: ka lox tix ceu, son sang cheuk tix yaox Nawh kah, ah nin:, 36 "Sara Cao: Gau eue:, ka daux lai been li, lox pingnyap pa yuh ka mawx, lheu: ting khaing: paox tix?" 37 Mai: Nawh Cao: ah nin: ka nawh, 52" 'Maix tag moh Simiang Siyiex maix khawm: rhawm: khawm: rhi: tix khawm: uik, mai: khawm: ju tix, mai: khawm: ka dee chix keud tix khawm: uik heue:.' 38 In mawh pingnyap pa ting pa lhaong: phaoxka: heue:. 39 Mai: pingnyap ra: gum tix gum pa ah nin: ka awm: in heue:. 53 'Maix tag moh paox plawg paox nyhawm: tix awm: moh tokaux tix heue:.' 40 Ka daux lox pingnyap ra: gum in lox been li mai: lox cao: jhai: khawm: uik hoik grum kah heue:."

Khrit mawh doeh simie kawn: praix mawx

22:41-46 koe: daux lai Makux 12:35-37; Lukax 20:41-44

41 Yam khrawm: Pharishie: khankix paox tix, Yesux chawk kix ka lox tix gum, 42 ah nin:, "Pex ce: grawh grawng: Khrit yuh ka mawx? Nawh mawh Kawn: mawx?" Mai: kix ah nin: ka Nawh Cao:, "Mawh kawn: Dawit heue:." 43 Nawh Cao: baox ah nin: ka kix, "Phan: mawh nan: yuh ka mawx, Dawit kok Nawh mawh Simiang, ka daux Khwan:, ah nin:, 44 54 'Simiang ah nin: ka Simiang aux, ngawm plak taix khawn: dawm: Aux, tom: Aux kieh pui koeng ka Maix, ot greem: caong Maix heue:.' 45 Phan: Dawit kok Nawh mawh Simiang, Nawh chix mawh kawn: nawh yuh ka mawx?" 46 Mai: tix kaux kawx, ang chix pawk lox ka Nawh Cao: tix gum kawx, mai: khaix singaix an pui ring chawk Nawh Cao: ka lox heue:.

Mathiex

Simin Ting 23

Ah ka pui Pharishie:

23:1-7 koe: daux lai Makux 12:38-39; Lukax 20:45-46; 23:37-39 koe: daux lai Lukax 13:34-35

1 Yam an Yesux sidiex gau ka cub pui haoh pui hun: mai: kawncau Nawh khankix, 2 ah nin:, "Pui tiem: lai khankix mai: Pharishie: khankix ngawm ka piang dee ngawm Mose heue:. 3 Mawh kheu nan: pa nhie: kix pex yuh, pex hawt yuh khawm: uik. Viang mawh kawx nan: paw vi hawt yuh awm: pa tuah pa klaung: kix. Kheu kix krai mai: ang yuh heue:. 4 Mawh heue:, kix phyawk kraung pa cien, mai: pa nu tix klawm: mai: deuh piang klip pui. Viang mawh kawx nan: tokaux kix pie gien: taix kawx kix ang gah kraung an heue:. 5 Pa yuh kix khawm: uik kix yuh son sang yaox kawn: pui khaing:. Bau: iak dee sau: kix lai Siyiex kawx, kix yuh kieh vieh, mai: ciem kraung kix kawx kix yuh tom: dha: heue:. 6 Mai: kix moh dee ngawm pa mhawm: khaing: paox tix, dee yuh poi khankix, mai: dee ngawm pa mhawm: khaing: paox tix ka daux nyiex dee sidiex khankix. 7 Mai: ceu pa yungyi: pui ka daux lah daux cau, mai: pa kok pui Rabi eue:, Rabi eue:, ka kix heue:. 8 Viang mawh nan: paw kieh kok pex mawh Rabi, kheu Sara Cao: Gau pex koe: tix kaux khaing:, mai: pex khawm: uik mawh puxaik heue:. 9 Mai: paw vi kok keeing: ka pui tix kaux kawx piang haktiex in, kheu Keeing: pex koe: tix kaux khaing: pa ot ka daux meung raoma: heue:. 10 Mai: paw kieh kok pex mawh cao: bung: kaing:, kheu cao: bung: kaing: pex koe: tix kaux khaing: pa mawh Khrit. 11 Mai: ka daux pex pa simie tix ting khaing: paox tix, tag mawh siliex pex heue:. 12 Mai: pui mawx ang ah, pa yaog tokaux tix ting, tag sang yeen nawh tiem, mai: pui mawx ang ah pa yuh tokaux tix tiem, tag sang yaog nawh ting heue:.

Pa kharhawm: kharhi: pui Pharishie: aliah ceu

13 "Pui tiem: lai mai: Pharishie:, pui pa pie pa lhen: khankix eue:, pex tag kharhawm: kharhi:, mawh kheu nyeep pex meung raoma: sivoe kawn: pui heue:. Kheu tokaux pex kawx ang laig, mai: pa uik laig khankix kawx, pex ang kieh laig heue:. 14 55 Pui tiem: lai mai: Pharishie:, pui pa pie pa lhen: khankix eue:, pex tag kharhawm: kharhi:, kheu pex chix rud tix ih nyiex miexmai khankix, mai: son sang chix pie chix lhen:, rawg bwan: tom: lang:, mawh kheu nan: pex tag nie pon krax prawng krax ciyang pa ting heue:. 15 "Pui tiem: lai mai: Pharishie:, pui pa pie pa lhen: khankix eue:, pex tag kharhawm: kharhi:. Kheu pex sawg ka rawm: sigrit sigra: mai: ka piang haktiex son sang pon pui pa laig ka been pex tikaux, mai: khaix hoik laig nawh daux been pex, pex kieh nawh mawh kawn: mawnarhok lheu: khaing: tokaux pex ra: son heue:.

16 "Pui dug ngai: pa thong: pui yaox eue:, pex tag kharhawm: kharhi: heue:. Pex ah, 'Pui mawx ang ah phan: tiex tu ka nyiex bwan: ang mawh tid tix. Viang mawh nan: pui mawx ang ah, pa tiex tu ka khri: nyiex bwan:, nawh koe: ceuk heue:.' 17 Pui brai: pui dug ngai: eue:, pa yuh ka mawx lheu: ting, mawh khri: lie, phan: ang mawh nan: mawh nyiex bwan: pa kieh khri: singax lie? 18 Mai: pex ah 'Pui mawx ang ah pa tiex pa tu ka khu: dee tan, ang mawh tid tix. Viang mawh nan: pui mawx ang ah, pa tiex tu ka pa tan pa koe: piang dee tan, nawh koe: ceuk heue:.' 19 Pui dug ngai: eue:, pa yuh ka mawx lheu: ting, pa tan pa lu lie, phan: ang mawh nan: khu: dee tan, pa kieh pa tan singax lie? 20 Mawh kheu nan: kaw pa tiex pa tu ka dee tan, nawh tiex tu ka dee tan, mai: ka ceu pa koe: ka piang tan: khawm: uik. 21 Mai: kaw pa tiex pa tu ka nyiex bwan:, tiex tu ka nyiex bwan:, mai: ka Kaw pa ot ka daux nyiex bwan: heue:. 22 Mai: kaw pa tiex tu ka raoma:. tiex tu ka dangngeung Siyiex, mai: ka Kaw pa ngawm piang dangngeung an heue:.

23 "Pui tiem: lai mai: Pharishie:, pui pa pie pa lhen: khankix eue:, pex tag kharhawm: kharhi: heue:, kheu pex tan, taux pak haw:, mai: taux ki, mai: taux ki la, kao: son tix son, viang mawh nan: ang pex yuh grawh grawng: pa ting pa koe: daux lox lai been li, pa mawh, pa khaw: pa jiet, mai: pa caoxrhawm:, mai: pa yumrhawm:, khankix heue:. Viang mawh ceu in khankix kawx pex khaw: tix yuh, mai: ang khaw: tix ang yuh tang: ceu an khankix heue:. 24 Pui dug ngai: pa thong: pui yaox eue:, pa cia tix tik maing mai: bleet Kala-uk heue:.

25 "Pui tiem: lai mai: Pharishie:, pui pa pie pa lhen: khankix eue:, pex tag kharhawm: kharhi: heue:, kheu phak pex plak praix kawk mai: tawg khaing:, viang mawh nan: plak daux naog pa rud tix teei mai: pa nie luan yuh heue:. 26 Pharishie: pa dug ngai: eue:, phak plak daux kawk mai: tawg ka: ha:, yuh ka mawx khawm: plak praix kawx, tag singax heue:.

27 "Pui tiem: lai mai: Pharishie:, pui pa pie pa lhen khankix eue:, pex tag kharhawm: kharhi: heue:, kheu pex awm: simeeig pa hoik kraix simaox ceed, pa nyawm tix jhak plak praix, viang mawh kawx nan: plak daux hoik naog si:ang: pui yum, mai: pa seeing: pa brai: ku ceu heue:. 28 Awm: an pex kawx, yam yaox pui plak praix pex, awm: pa rah pa see, viang mawh nan: plak daux pex, naog pa pie pa lhen:, mai: pa phit pa lud ku ceu heue:.

29 "Pui tiem: lai mai: Pharishie:, pui pa pie pa lhen: khankix eue:, pex tag kharhawm: kharhi: heue:, kheu pex cox pex yuh simeeig cao: jhai: khankix, mai: yuh simeeig pui rah pui see kieh nyawm tix jhak, 30 mai: ah nin:, 'Phan: ex pon tix ot ka daux bawg yam singaix tax du ex khankix, ex ang neuex mai: kix, yam kieh kix nham: cao: jhai: khankix hieh heue:. 31 Mawh kheu nan: pex kham: mhai: sakse: grawh grawng: tokaux pex, mawh kawn: kix pa pah cao: jhai: khankix yum heue:. 32 Kheu nan: yuh kieh pa phit pa lud tax du pex naog heue:. 33 Pex pa mawh siuing:, pa mawh ceucat siuing: pa cai: eue:, pex sang pon tix luan khaing: krax ciyang mawnarhok yuh ka mawx? 34 Kheu nan:, jhak heue:, Aux ploi: cao: jhai:, mai: pui koe: pingnya, mai: pui tiem: lai khankix hoek ka pex heue:. Kix tiblah pex tag sang teei yum, mai: tawk piang khaoxlhak, mai: tiblah pex tag sang sivied ka daux nyiex dee sidiex pex hkankix, mai: tuktiak tukte: kix tix veng hoik tix veng heue:. 35 Yuh ka mawx son nham: pui rah pui see pa hoik lih ka piang haktiex in khawm: uik, tag hoek piang pex, jah ka Abelax pa rah pa see, tom: sidah sidu hoek ka nham: Zakharix pa mawh kawn: Barakhix, pa pex hoik pah yum sinax nyiex bwan: mai: khu: dee tan heue:. 36 Aux krai lox tete telai ka pex, ceu in khawm: uik tag sang hoek ka piang pui ju in heue:.

Ngheeik son veng Yerusaliem

37 "Veng Yerusaliem eue:, veng Yerusaliem pa teei cao: jhai: khankix yum, mai: dheem: pui pa ploi: hoek ka maix ka simaox, Aux simie tix khrawm: kawn: praix maix, awm: ia: miex khrawm: kawn: tix greem: pruik nawh miex bawg, mai: maix ang kieh Aux yuh. 38 Jhak heue:, hoik grham: nyiex pex yi, ka pex heue:. 39 Grawh grawng: nawh Aux krai ka pex, khaix in pex tag ang lai baox yaox Aux, tom: pex ah, 56 'Kaw pa hoek ka daux ceukaux Simiang ting bwanson: heue:.'"

Mathiex

Simin Ting 24

Mhai: sakse: pa sang deeh hoek Nawh Cao:

24:1-51 koe: daux lai Makux 13:1-37; Lukax 21:5-36

1 Mai: yam lih hu: Yesux khaing: daux nyiex bwan:, kawncau Nawh khankix hoek ka Nawh Cao: son sang jhi: Nawh yaox nyiex bwan: khankix heue:. 2 Viang mawh kawx nan: Nawh Cao: ah nin: ka kix, "Pex yaox ceu in khawm: uik ang mawh lie? Aux krai lox tete telai ka pex, tag ang grham: simaox koe: tin: kieh koe: piang paox tix tix lon: kawx, pa tag ang yieh tix tik heue:."

3 Mai: yam ngawm Nawh Cao: ka piang gawng Sanlun, kawncau khankix hoek ka Nawh Cao: dee ang pui ot, mai: ah nin:, "Ceu in khankix tag sang mawh yam mawx? Mai: mhai: sakse: grawh grawng: pa sang deeh hoek Maix, mai: grawh grawng: pa sang sidah haktiex in, tag sang mawh pa yuh ka mawx? krai ex mhong: liak." 4 Mai: Yesux pawk lox ah nin: ka kix, "Yuh ka mawx son ang pui sang pon pie pon lhen: pex, kieh lud, rien rhawm: tix kah heue:. 5 Kheu pui tom: nie tag sang briex tix teei ceukaux Aux mai: hoek ah nin:, 'Aux mawh Khrit heue:,' mai: tag pon pie pon lhen: kieh pui lud tom: nie heue:. 6 Mai: pex tag mhong: grawh grawng: naing, mai: grawh grawng: tag sang yuh naing. Rien rhawm: tix son ang pex sang khirhawm: khirhi: kah, kheu ceu in tag sang mawh, viang mawh nan: ang nyang bax mawh bawg yam sidah heue:. 7 Mawh kheu pui tix ceu mai: tix ceu, tix meung mai: tix meung tag cha: paox tix, mai: praix tag sang sibhawm:, mai: kla: reem tag sang tok dee haoh dee. 8 Viang mawh nan: ceu in khawm: uik mawh pa jah tix kharhawm: kharhi: awm: bon: jah tix saux yam sang keh heue:. 9 Bawg yam an kix tag sang teei tix tawx pex dee tuktiak tukte:, mai: tag sang teei pex yum, mai: pui ku ceu khawm: uik tag sang koeng ka pex, mawh kheu ceukaux Aux heue:. 10 Mai: yam an pui tag sang laux rhawm: sideeing caong tom: nie, mai: teei tix tawx paox tix, mai: koeng ka paox tix, tix kaux mai: tix kaux heue:.

11 Mai: cao: jhai: pa ang mawh ang meh tag sang lih koe: tom: nie, mai: pie lhen: ka pui tom: nie kieh lud heue:. 12 Mai: kheu pa ang khaw: ang jiet baox nie hoek, krax moh krax rhawm: pui tom: nie tag sang iak hu: heue:. 13 Viang mawh kawx nan: pui pa kaux pa cong: tom: sidah, kaw an tag sang hoek krax taoh heue:. 14 Mai: lox bwan: gauxrhawm: gauxrhi: pa dex pa dawd mai: Meung An, tag sang sidiex gau ka piang haktiex khawm: uik, son sang mawh mhai: sakse: ka ceu pui khawm: uik, mai: khaix an bawg yam sidah tag sang hoek heue:.

Singaix pa kharhawm: kharhi:

15 "Mawh kheu nan: yam yaox pex 'ceu pa greeing, pa yuh laux' ceu pa cao: jhai: Danyelax hoik krai grawh grawng:, yam cung dee singax. (Kieh kaw pa phat grawh grawng: an tawng heue:.) 16 Yam an kieh kix pa ot ka daux meung Yudax to: hu: ka piang gawng khankix heue:. 17 Mai: pui pa ot ka piang prang: nyiex, paw kieh nawh lih tix teei kraung pa koe: ka daux nyiex tix. 18 Mai: pui pa ot ka daux ma: paw kieh nawh deeh ing: tix teei kraung ceep tix heue:. 19 Bon: pa koe: kaux, mai: bon: pa tawx kawn: tix peuex ka daux bawg yam singaix an khankix, tag kharhawm: kharhi: heue:. 20 Mai: pex rawg bwan:, yuh ka mawx son bawg yam sang to: pex, tag ang caw yam kuat mai: singaix tuah heue:. 21 Mawh kheu yam an tag sang koe: pa kied kharhawm: kharhi:, ceu pa ang sax koe:, tom: yam jah tix kaw: haktiex dix, sidah sidu hoek bawg yam in, mai: khaix an kawx tag ang lai baox koe: heue:. 22 Mai: phan: ang kieh bawg yam singaix an khankix dawd, tix kaux kawx ang pon tix luan, viang mawh nan: mawh kheu pui pa hoik laug Siyiex tag sang kieh bawg yam singaix an khankix dawd heue:. 23 Yam an phan: pui tix kaux kaux ah nin: ka pex, 'Jhak heue:, Khrit ot tin:, phan: ang mawh nan: ot tan:,' paw vi yumrhawm: kah. 24 Mawh kheu Khrit pa ang mawh ang meh, mai: cao: jhai: pa ang mawh ang meh khankix tag sang lih hoek, mai: jhi: yaox mhai: mai: ceu pa daox pa am: ceu pa kied ting, yuh ka mawx son sang pon pie pon lhen: kieh lud, phan: chix tix, ka pui pa hoik laug Siyiex kawx heue:. 25 Jhak heue:, Aux hoik grux krai ka pex sivoe ka: sang mawh heue:. 26 Mawh kheu nan: phan: kix ah nin: ka pex, 'Jhak heue:, Nawh ot daux tiag daux tu' paw vi hu:. Phan: ah 'Jhak heue:, Nawh ot daux lawg plak daux' paw vi yumrhawm: kah heue:. 27 Kheu awm: tuhsah lih hoek khaing: plak lih singaix, mai: pon tix yaox tom: hoek plak klip singaix, yam hoek Kawn: kawn: pui tag sang awm: an heue:. 28 Tokaux yum koe: dee mawx ang ah, klangpreng tag khrawm: tix tan: heue:.

Deeh lih hoek ka daux min: plak ngai:

29 "Khaix pa kharhawm: kharhi: daux bawg yam singaix an khankix, dom: mawx dom: an, 57'Singaix tag vhaik, mai: khix tag ang tawx pa riang tix, mai: simuing: khankix tag sang rau khaing: raoma:, mai: siawp sibrawm raoma: khankix tag sang yungyiang: heue:.' 30 Mai: yam an tag sang yaox mhai: grawh grawng: Kawn: kawn: pui, ka piang raoma: heue:. Mai: yam an ceu pui piang haktiex khawm: uik tag yiem, mai: kix tag sang yaox Kawn: kawn: pui viex siawp sibrawm mai: min: plak ngai: pa ting hoek ka piang paiawm: ka raoma: heue:. 31 Mai: Nawh tag sang ploi: kawncau Siyiex cie Tix hu: mai: lox teet tawng pa kied ting kied luah, mai: kix tag sang khrawm: pui pa hoik laug cie Nawh, khaing: bhaung: pon: plak, jah dee sidah daog raoma: tix plak, tom: sidah hoek daog raoma: plak an heue:.

Lox phektem: ka khaoxruh

24:37-39 koe: daux lai Lukax 17:26-27, 24:45-51 koe: daux lai Lukax 12:42-46

32 "Gau ka khaoxruh grawh grawng: lox phektem: nawh. Yam awn: kak nawh mai: lih lhax, pex tawng bawg yam raux dex sang hoek. 33 Awm: an yam yaox pex ceu in khankix khawm: uik, kieh tawng Kawn: kawn: pui dex hoek tix ot ka praok siviex khankix heue:. 34 Aux krai lox tete telai ka pex, pui ju in tag ang bax luan, tom: ceu in khankix khawm: uik tag hoik mawh heue:. 35 Raoma: mai: haktiex tag sang grai:, viang mawh kawx nan: gumlox Aux in tag ang grai: heue:. 36 Singaix bawg yam nari an tix kaux kawx ang tawng, viang mawh kawncau Siyiex meung raoma: khankix kawx ang tawng. Kawn: Cao: kawx ang tawng; mawh Keeing: Cao: tix kaux khaing: pa tawng heue:. 37 Mai: yam Kawn: kawn: pui tag sang deeh hoek, tag awm: bawg yam singaix Noax khankix heue:. 38 Mawh kheu awm: singaix an khankix ka: sang haok huan: rawm: pa naog piang haktiex, kix ih, mai: nyaux, mai: teei mex teei moeng, mai: teei tix tawx paox tix, tom: hoek singaix laig Noax ka daux nyiex reu ting heue:. 39 Mai: kix ang tawng tom: rawm: haok huan: mai: sibloe: kix hu: khawm: uik. Yam hoek Kawn: kawn: pui tag sang awm: an heue:. 40 Yam an pui ra: kaux pa ot daux ma:, tag sang teei tix kaux mai: prah tix kaux heue:. 41 Bon: ra: kaux pa krid ka mhaw:, tag sang teei tix kaux mai: prah tix kaux heue:. 42 Mawh kheu ang pex tawng bawg yam si ngaix sang hoek Simiang pex, pau tix jhak heue:. 43 Kieh tawng ceu in heue:, phan: cao: nyiex tawng bawg yam nari sang hoek pui briex, nawh tag sang pau tix jhak mai: ang kieh yieh tix laig daux nyiex tix heue:. 44 Mawh kheu nan: pex rien rhawm: tix, kheu daux bawg yam nari yam ang pex ce:, Kawn: kawn: pui tag sang hoek heue:.

45 "Siliex pa kaux sijax mai: pa koe: pingnya, pa simiang nawh hoik kieh ting piang geh nyiex tix, son sang tawx pa ih pa un: ka kix yam hoek bawg yam khaw: tix tawx, mawh mawx? 46 Yam deeh hoek simiang nawh, siliex pa yaox nawh yuh nan:, ting bwanson: heue:. 47 Aux krai lox tete telai ka pex, simiang nawh tag kieh nawh ting piang pa koe: nawh khawm: uik heue:. 48 Viang mawh nan: phan: siliex pa caox keud tix ah nin: daux rhawm: tix, 'Simiang aux tag sang koi hoek.' 49 Mai: tap ka paox siliex tix, mai: nyaux plai: tau mai: pui pa yoek ka plai: khankix. 50 Simiang nawh tag hoek ka daux singaix pa ang nawh keud nawh ce:, mai: daux bawg yam nari pa ang nawh tawng, 51 mai: mug nawh dud, mai: deuh nawh tau mai: pui pie pui lhen: khankix, dee tag yiem riag mai: dee greeik rhang: heue:."

Mathiex

Simin Ting 25

Lox phektem: ka bon: krih kao: kaux

1 "Yam an meung raoma: tag sang awm: bon: krih kao: kaux, pa teei kawkngu kix mai: hu: rieb kaw pa yuh kapaox heue:. 2 Kix phwan: kaux mawh pui daox, mai: kix phwan: kaux mawh pui lhak pa koe: pingnya heue:. 3 Bon: pa daox khankix, yam teei kix kawkngu kix, kix ang teei tix viex rawm: bee hu:. 4 Viang mawh kawx nan:, pa lhak pa koe: pingnya khankix, teei tix viex rawm: bee daux lawk mai: kawkngu kix heue:. 5 Kheu kaw pa yuh kapaox ang nyang khran: hoek, kix khawm: uik gaing: mai: laig it heue:. 6 Viang mawh kawx nan: yam hoek bawg yam greung sawm:, koe: lox pa yo ah nin:, 'Jhak heue:, kaw pa yuh kapaox, pex hu: tix rieb nawh heue:.' 7 Yam an bon: krih an khawm: uik kaoh, mai: cox kawkngu kix heue:. 8 Pa daox khankix ah nin: ka pa lhak pa koe: pingnya khankix, 'Tawx yix rawm: bee pex liak, kheu kawkngu cie yix dex sang yeet heue:.' 9 Viang mawh nan: pa lhak pa koe: pingnya khankix pawk lox ah nin:, ha rawm: bee ang kub son yix mai: pex, pex hu: liag ka pui pa coh rawm: bee son tokaux pex heue:.' 10 Mai: yam hu: liag kix rawm: bee, kaw pa yuh kapaox hoek, mai: kix pa hoik rien tix mhawm: mhawm:, laig tau mai: nawh dee sang yuh poi kapaox heue:. Mai: hoik nyeep siviex. 11 Khaix an bon: krih tang: kaux phwan: kaux an kawx hoek mai: ah nin:, 'Simiang eue:, simiang eue:, paoh siviex son yix: liak.' 12 Viang mawh kawx nan: nawh pawk lox mai: ah nin:, 'Aux krai lox tete telai ka pex, aux ang tawng pex heue:.' 13 Mawh kheu nan: pau tix jhak, kheu ang pex tawng singaix mai: bawg yam nari an heue:.

Lox phektem: ka siliex pa kaux sijax

25:14-30 koe: daux lai Lukax 19:12-27

14 "Grawh grawng: nawh tag awm: pui tix kaux pa sang hu: ka tang: praix tang: klawng:, pa kok siliex nawh khankix mai: tawx kraung cie nawh ka kix heue:. 15 Mai: nawh tawx ka tix kaux phwan: talantan, mai: baox tawx ka tix kaux ra: talantan, mai: baox tawx ka tang: kaux tix talantan, nawh tawx ka ku kaux awm: pa chix kaux pui mawh kaux pui an, mai: lih hu: heue:. 16 Dom: mawx dom: an kaw pa hoik pon phwan: talantan an hu: yuh lai geu, mai: baox pon rao phwan: talantan heue:. 17 Awm: an kaw pa hoik pon ra: talantan kawx, hu: mai: baox pon rao ra: talantan heue:. 18 Viang mawh kawx nan: kaw pa pon tix talantan, hu: mai: kaong: daux tiex mai: mox mau cie simiang nawh heue:. 19 Yam hoik rheung: nyao, simiang siliex an khankix deeh hoek, mai: sawn: mau mai: kix heue:. 20 Mai: kaw pa hoik pon phwan: talantan an hoek mai: viex pa khraox phwan: talantan, mai: ah nin:, 'Simiang eue:, maix tawx ka aux phwan: talantan, jhak heue:, aux hoik baox pon rao phwan: talantan heue:' 21 Simiang nawh ah nin: ka nawh, 'Mhawm: heue:, siliex pa mhawm: mai: pa kaux sijax eue:, maix hoik kaux sijax piang pa iak pa tux, aux tag kieh maix ting ka piang ceu pa nie heue:. Laig ka daux pa gauxrhawm: simiang maix heue:. 22 Mai: kaw pa hoik pon ra: talantan kawx hoek mai: ah nin:, 'Simiang eue:, maix tawx ka aux ra: talantan, jhak heue:, aux hoik baox pon rao ra: talantan heue:.' 23 Simiang nawh ah nin: ka nawh, 'Mhawm: heue:, siliex pa mhawm: mai: pa kaux sijax eue:, maix hoik kaux sijax ka piang pa iak pa tux, aux tag kieh maix ting ka piang ceu pa nie heue:. Laig ka daux pa gauxrhawm: simiang maix heue:.' 24 Mai: kaw pa hoik pon tix talantan kawx hoek mai: ah nin:, 'Simiang eue:, aux tawng maix mawh pui nu tix ah, pa vawg dee ang maix rhuat, mai: pa khrawm: dee ang maix van: heue:. 25 Aux tom: lhat mai: hu: mox talantan maix ka daux tiex, jhak heue:, maix koe: cie maix heue:.' 26 Simiang nawh pawk lox mai: ah nin: ka nawh, 'Siliex pa caox mai: pa nieh eue:, maix tawng grawh grawng: aux vawg dee ang aux rhuat, mai: khrawm: dee ang aux van:. 27 Mawh kheu nan: maix khaw: tix sau: mau aux daux nyiex mau, mai: yam deeh hoek aux, aux tag deeh pon num: mau cie aux mai: rao heue:. 28 Mawh kheu nan: pex teei talantan an khaing: nawh mai: tawx ka kaw pa koe: kao: talantan an heue:. 29 Grawh grawng: nawh pa koe: ku kaux daux pui tag sang baox tawx ka nawh, mai: nawh tag sang nie grum koe: heue:. Viang mawh nan: kaw pa ang koe:, viang pa hoik koe: nawh kawx tag sang teei khaing: nawh heue:. 30 Grheu: siliex pa ang koe: bwanson: an lih plak praix daux pa vhaik, dee tag yiem riag mai: dee greeik rhang: heue:.'

Grawng: pa prawng ca: mai: ciyang

31 "Yam tag sang hoek Kawn: kawn: pui ka daux min: plakngaix: Nawh, tau mai: kawncau Siyiex khawm: uik yam an Nawh tag sang ngawm piang dangngeung min: pakngai: Nawh. 32 Mai: ceu pui khawm: uik tag sang krawk khrawm: paox tix sivoe Nawh, mai: Nawh tag sang gwieh kix tix kaux khaing: tix kaux, awm: pui liang yung: gwieh yung: khaing: pex khankix heue:. 33 Mai: Nawh tag sang deuh yung: khankix plak taix khawn: dawm: Nawh, viang mawh nan: pex khankix tag sang deuh plak khawn: gwiex heue:. 34 Yam an Simiang Khunhawkham tag sang ah ka kix pa ot plak taix khawn: dawm: Nawh, 'Hoek heue:, pex pa Keeing: Aux hoik nawb bwanson:, teei sin: Meung pa hoik cox son pex, tom: yam jah tix kaw: haktiex heue:. 35 Kheu Aux cairhawm:mai: pex tawx Aux sawm:, mai: Aux sang nyaux nie rawm: mai: pex tawx Aux nyaux, mai: yam mawh Aux nyo pex rieb tix teei Aux. 36 Yam Aux ot kakaong:, pex tawx Aux ceep kraung. Aux saux mai: pex hoek tix kia: Aux. Aux ot ka daux thawng: mai: pex hoek ka Aux heue:.' 37 Yam an pui rah pui see khankix tag sang pawk lox ah nin: ka Nawh, 'Simiang eue:, ex yaox yam cairhawm:Maix, mai: tawx Maix sawm: lai mawx? Ex yaox yam sang nyaux nie Maix rawm:, mai: tawx Maix nyaux lai mawx? 38 Ex yaox yam mawh Maix nyo, mai: rieb tix teei Maix lai mawx? Ex yaox ot kakaong: Maix, mai: tawx Maix ceep kraung lai mawx? 39 Mai: ex yaox yam saux Maix phan: ang mawh nan: yam ot Maix daux thawng:, mai: hoek ka Maix lai mawx?' 40 Mai: Simiang Khunhawhkam tag sang pawk lox mai: ah nin: ka kix, 'Aux krai lox tete telai ka pex, pa yuh pex ka puxaik Aux khankix in tix kaux, viang mawh pa iak khaing: paox tix kawx, pex hoik yuh ka Aux heue:.' 41 Yam an ka kix pa ot plak taix khawn: gwiex Nawh kawx, Nawh tag sang ah nin:, 'Pex pa mawh pa hoik jhax hoik lawg eue:, lih khaing: Aux mai: laig ka daux ngu leeing: ju, pa hoik cox son phicaox mai: kawncau nawh khankix heue:. 42 Kheu Aux cairhawm:mai: pex ang tawx Aux sawm:. Aux sang nyaux nie rawm: mai: pex ang tawx Aux nyaux. 43 Aux mawh nyo mai: pex ang rieb tix teei Aux. Yam Aux ot kakaong:, pex ang tawx Aux ceep kraung. Yam saux mai: ot daux thawng: pex ang hoek ka Aux heue:.' 44 Yam an kix kawx tag sang pawk lox ah nin:, 'Simiang eue:, ex yaox yam Maix cairhawm:, phan: ang mawh nan: yam sang nyaux nie rawm:, phan: ang mawh nan: yam mawh nyo, phan: ang mawh nan: yam ot kakaong:, phan: ang mawh nan: yam saux, phan: ang mawh nan: yam ot daux thawng:, mai: ang kia: ang ngien Maix lai mawx?' 45 Yam an Nawh tag sang pawk lox ah nin: ka kix, 'Aux krai lox tete telai ka pex, pa ang pex yuh ka kaw pa iak khaing: paox tix khankix in tix kaux, pex ang yuh ka Aux heue:.' 46 Mai: kix tag sang hu: laig ka daux pa ciyang leeing: ju heue:. Viang mawh nan: pa rah pa see khankix tag sang laig ka ju leeing: ju leeing: phan: heue:."

Mathiex

Simin Ting 26

Krax kum: kawng: son sang teei Nawh Cao: yum

26:2-5 koe: daux lai Makux 14:1-2; Lukax 22:1-2

1 Khaix hoik krai Yesux grawh grawng: lox ceu an khankix khawm: uik, Nawh Cao: ah nin: ka kawncau Nawh khankix, 2 "Pex tawng grawh grawng: khaix in ra: singaix tag hoek bawg yam poi Pasakha, mai: tag sang tawx Kawn: kawn: pui, son sang tawk Nawh piang khaoxlhak heue:." 3 Yam an cao: giex kaing: li khankix, mai: kuad song: pui khankix khrawm: paox tix ka daux brawk nyiex cao: giex kaing: li pa ting khaing: paox tix, pa kok mawh Kayaphax. 4 Mai: kum: kawng: paox tix, son sang pon lhen: pon nyaw tix teei Nawh Cao: mai: teei Nawh yum heue:. 5 Viang mawh nan: kix ah nin:, "Paw yuh yam yuh poi, kheu lhat pui khankix koe: krax simah simaing: ka paox tix heue:."

Pa groi Marix sidah bhawng: piang kaing: Nawh Cao:

26:6-13 koe: daux lai Makux 14:3-9, 26:6-13 koe: daux lai Lukax 7:37-38; Yohan 12:1-8

6 Yam ot Yesux ka daux yaong: Betanix, daux nyiex Simon pui sipawg, 7 bon: tix kaux hoek ka Nawh Cao: pa koe: sidah bhawng: pa kied ngawh, daux kawng: simaox paing mai: nawh groi sidah an ka piang kaing: Nawh Cao: yam ngawm Nawh mai: sawm: heue:. 8 Viang mawh kawx nan: yam yaox kawncau Nawh khankix, kix songrhawm: kah mai: ah nin:, "Kieh nai: giex going yuh nin: yuh ka mawx? 9 Phan: coh sidah bhawng: in tag sang pon ngawh tom: nie mai: tawx ka pui hot pui sibhawm: khankix heue:." 10 Viang mawh nan: Yesux tawng grawh grawng: an, mai: ah nin: ka kix, "Pex chuh ka bon: in yuh ka mawx? Nawh hoik yuh kaing pa mhawm: ka piang Aux heue:. 11 Mawh kheu pui hot pui sibhawm: ot mai: pex jheeng: jheeng:, viang mawh nan: Aux ot mai: pex jheeng: jheeng: ang mawh. 12 Grawh grawng: nawh, pa groi nawh sidah bhawng: ka piang tokaux Aux, nawh yuh son sang cox Aux, son yam sipaung: heue:. 13 Aux krai lox tete telai ka pex, dee mawx ang ah, dee sang sidiex gau lox bwan: gauxrhawm: gauxrhi: in ka piang haktiex khawm: uik, grawh grawng: ceu pa yuh bon: in kawx, tag sang krai son sang doh keud ka nawh heue:."

Pa coh Yudax Isakariut ka Nawh Cao:

26:14-16 koe: daux lai Makux 14:10-11; Lukax 22:3-6

14 Yam an tix kaux daux kawncau kao: kaux ra: pa kok mawh Yudax Isakariut, hu: ka cao: giex kaing: li pa ting khankix, 15 mai: ah nin:, "Phan: aux tawx Nawh Cao: ka pex, pex sang tawx ka aux miex ding?" Mai: kix' ciang tix tawx mau ka nawh tingoe: (30) plah heue:. 16 Mai: jah ka yam an nawh sawg bawg yam sang pon tix tawx Nawh Cao: ka kix heue:.

17 Daux singaix phaoxka: khaomun pa ang sau: susaix, kawncau Nawh khankix hoek ka Yesux ah nin:, "Maix simie tix kieh ex cox dee sang ih poi Pasakha son Maix dee mawx?" 18 Mai: Nawh Cao: ah nin:, "Hu: ka daux veng ka pui tix kaux, mai: ah nin: ka nawh, 'Sara Cao: Gau ah nin:, bawg yam Aux dex sang hoek, Aux sang ih poi Pasakha tau mai: kawncau Aux daux nyiex maix heue:.'" 19 Mai: kawncau Nawh khankix yuh awm: pa hoik nhie: Yesux kix yuh, mai: kix cox poi Pasakha heue:.

Grawng: poi pasakha

26:17-19 koe: daux lai Makux 14:14-16; Lukax 22:7-13, 26:20-24 koe: daux lai Makux 14:17-21

26: 26-29 koe: daux lai Makux 14: 22-25; Lukax 22:17-20; 1.Kawrin 11:23-25

20 Yam hoek ponbo Nawh Cao: ngawm neung mai: sawm: tau mai: kawncau Nawh kao: kaux ra:, 21 mai: yam sawm: kix Nawh Cao: ah nin:, "Aux krai lox tete telai ka pex, ka daux pex tix kaux tag sang tik sang tawx Aux heue:." 22 Mai: kix kied khi:rhyawm: khirhi: kah mai: kix ku kaux chawk ka Nawh Cao: ah nin:, "Mawh aux lie?, Simiang!" 23 Mai: Nawh Cao: pawk lox ah nin:, "Kaw pa hoik cub taix nawh daux klong: tau mai: Aux, mawh pa sang tik sang tawx Aux heue:. 24 Kawn: kawn: pui tag hu:, awm: hoik tiem: grawh grawng: Nawh. viang mawh kawx nan: pui pa tik pa tawx Kawn: kawn: pui tag kharhawm: kharhi: heue:. Lheu: mhawm: son pui an phan: nawh ang keh heue:." 25 Mai: Yudax kaw pa tik pa tawx Nawh Cao: pawk lox mai: ah nin:, "Rabi eue:, mawh aux lie?" Mai: Nawh Cao: ah nin: ka nawh, "Mawh awm: pa hoik ah maix heue:."

Pang: ka poi Cao:

26:31-35 koe: daux lai Makux 14:27-31; Lukax 22:31-34

26 Mai: yam sawm: kix, Yesux teei khaomun, mai: nawb bwan:, mai: sivit tix tawx ka kawncau Nawh khankix, mai: ah nin:, "Teei, ih, in mawh tokaux Aux heue:." 27 Mai: Nawh Cao: teei kawk, mai: yaogyaw bwanson:, mai: tawx ka kix ah nin:, "Pex khawm: uik nyaux heue:. 28 Kheu in mawh nham: Aux pa dex pa dawd mai: sijax mukheu pa khraox, pa lih son sang ploi: phimap phigrham: pui tom: nie heue:. 29 Viang mawh nan: in Aux krai ka pex, Aux tag ang lai nyaux rawm: plix nhu: plix siiet in, tom: sidah singaix yam tag nyaux Aux pa khraox tau mai: pex ka daux Meung Keeing: Aux heue:." 30 Mai: khaix hoik rhax kix lairhax tix mu:, kix lih hu: ka gawng Sanlun heue:.

31 Yam an Yesux ah nin: ka kix, "Daux sawm: in pex khawm: uik sang laux rhawm: ka daux Aux heue:. Kheu hoik tiem: ah nin:, 58'Aux tag pah cao: liang yung:, mai: yung: cub yung: an khankix, tag prungprang: heue:.' 32 Viang mawh kawx nan: khaix hoik kaoh Aux, Aux tag sang hu: sivoe pex ka daux meung Galilie: heue:." 33 Viang mawh nan: Petrux pawk lox mai: ah nin: ka Nawh Cao:, "Phan: khawm: uik lauxrhawm: ka daux Maix kawx, aux tag ang lauxrhawm: tix bawg kawx heue:." 34 Yesux ah nin: ka nawh, "Aux krai lox tete telai ka maix, daux sawm: in ka: ang ia: nyang ux, maix tag sang thiang: tix tik tix vud Aux loe: bawg heue:." 35 Petrux baox ah nin: ka Nawh Cao:, "Phan: aux tag yum tau mai: Maix kawx, ang aux doh thieng: tix tik tix vud Maix heue:." Kawncau Nawh khawm: uik kawx, ah nan: heue:.

Rawg bwan: ka daux sipeem Kesasemanix

26:36-46 koe: daux lai Makux 14:32-42; Lukax 22:40-46

36 Yam an Yesux hoek tau mai: kix tix dah ka dee kok mawh Kesasemanix, mai: ah nin: ka kawncau Nawh khankix, "Pex ngawm tin: yam Aux hu: rawg bwan: tan:." 37 Mai: Nawh Cao: teei Petrux mai: kawn: Zebedie ra: kaux hu: tau mai: Nawh, mai: Nawh khirhawm: khirhi: mai: sungsang rhawm: heue:. 38 Yam an Nawh Cao: ah nin: ka kix, "Aux kied khirhawm: khirhi: tom: dex sang yum, pex ot tin:, mai: pau tau mai: Aux heue:." 39 Mai: Nawh Cao: hu: sivoe ceeix mai: grux gup mai: rawg bwan:, ah nin:, "Keeing: Aux eue:, phan: chix, kieh kawk in luan khaing: Aux liak, viang mawh kawx nan: paw kieh mawh alo pa caw pa khaw: rhawm: Aux, kieh mawh alo pa caw pa khaw: rhawm: Maix heue:." 40 Nawh Cao: deeh hoek ka kawncau khankix, mai: yaox kix laig it, mai: ah nin: ka Petrux, "Ang pex pon tix pau tau mai: Aux tix nari khaing: lie? 41 Pau mai: rawg bwan: heue:, yuh ka mawx son ang pex sang laig ka daux pa nyaw pa glaw:. Khwan: koe: rhawm: tix sang yuh tete, viang mawh nan: nex mawh pa iak riang iak rao heue:." 42 Nawh Cao: baox deeh hu: ra: bawg tix bawg mai: rawg bwan: ah nin:, "Keeing: Aux eue:, phan: kawk in ang chix luan khaing: Aux, phan: Aux ang nyaux nawh, kieh mawh awm: pa koe: alo Maix heue:." 43 Mai: Nawh Cao: baox deeh hoek mai: yaox kix laig it mawh kheu cien ngai: kix heue:. 44 Mai: Nawh Cao: baox prah kix tix bawg, mai: hu: mai: rawg bwan: loe: bawg tix bawg, mai: baox deeh ah lox awm: phaoxka: heue:. 45 Yam an Nawh Cao: baox hoek ka kawncau Nawh khankix mai: ah nin: ka kix, "Yamin kawn: it mai: laux lee: tix heue:. Jhak heue:, bawg yam nari dex sang hoek, mai: tag sang tik sang tawx Kawn: kawn: pui daux tawm: taix pui phimap phigrham: khankix heue:. 46 Kaoh, ex hu: heue:, jhak heue:, kaw pa sang tik sang tawx Aux dex hoek heue:."

Kham: krax coh mai: krax pa giex

26:47-56 koe: daux lai Makux 14:43-50; Lukax 22:47-53

47 Mai: yam kawn: sikah Nawh Cao:, Yudax pa mawh tix kaux ka daux kix kao: kaux ra:, hoek, tau mai: cub pui kied haoh kied hun: pa viex vaid viex khaox, mai: lih hoek khaing: cao: giex kaing: li pa ting, mai: kuad song: pui khankix heue:. 48 Mai: kaw pa tik pa tawx Nawh Cao: hoik tawx mhai: ka kix tix ceu, ah nin:, "Aux ngheut ka pui mawx ang ah, mawh Kaw an, giex Nawh heue:." 49 Mai: dom: mawx dom: an nawh hoek ka Yesux mai: ah nin:, "Rabi eue:, kieh nyawm ot," mai: ngheut ka Nawh Cao: heue:. 50 Mai: Yesux ah nin: ka nawh, "Paoxgrawm eue:, maix sang hoek yuh ka mawx, yuh heue:." Mai: kix teei taix tix giex Yesux mai: teei Nawh heue:. 51 Mai: jhak heue:, pui pa ot tau mai: Yesux tix kaux, nyeu taix mai: lawd vaid tix, mai: kid yhaok siliex cao: giex kaing: li pa ting piang khawm: uik, dud heue:. 52 Yam an Yesux ah nin: ka nawh, "Deeh sau: vaid maix daux phak tix heue:. Mawh kheu pui pa teei vaid khawm: uik, tag laux ka vaid heue:. 53 Maix lai ce: ang Aux pon mhaing: ka Keeing: Aux, mai: Nawh tag ploi: kawncau Siyiex pa lheu: khaing: kao: liecong ra:59 hoek ka Aux yamin lie? 54 Phan: mawh nan: lox Phuk lai sigang: khri:, pa ah tag mawh nin:, tag chix naog yuh ka mawx?" 55 Daux bawg yam nari an Yesux ah nin: ka cub pui haoh pui hun: khankix, "Pex viex vaid viex khaox hoek tix giex Aux awm: giex ka pui tud pui rhim: lie? Aux ngawm tix sidiex gau ka daux nyiex bwan: ku singaix mai: pex ang giex Aux. 56 Viang mawh kawx nan: ceu in khawm: uik hoik mawh, son sang naog lox phuk lai sigang: khri: cao: jhai: khankix heue:." Yam an kawncau khankix khawm: uik prah Nawh Cao:, mai: to: hu: heue:.

Kham: krax pa ciied tix sivoe ngai: Kayaphax

26:57-68 koe: daux lai Makux 14:53-65; Yohan 18:12-13,19-24

57 Mai: kix pa hoik teei Yesux khankix tok Nawh hu: ka Kayaphax, pa mawh cao: giex kaing: li pa ting piang khawm: uik, dee pui tiem: lai mai: kuad song: khankix hoik khrawm: paox tix heue:. 58 Petrux hawt khaix Nawh Cao: dee singai mai: hoek ka brawk nyiex cao: giex kaing: li pa ting an, mai: laig ka daux, mai: ngawm tau mai: kawncau simiang khankix, son sang yaox dee sidah heue:. 59 Mai: cao: giex kaing: li pa ting khankix, mai: kuad song: cao: prawng see: khawm: uik, sawg mhai: sakse: pa ang mawh ang meh, grawh grawng: Yesux, son sang pon kix tix teei Nawh yum. 60 Mai: kix ang pon ang yaox, viang mawh pui pa kham: mhai: sakse: pa ang mawh ang meh hoek tom: nie kawx heue:. Khaix an ra: kaux hoek, 61 mai: ah nin:, "Pui in ah, 'Aux chix yuh laux nyiex bwan: Siyiex, mai: deeh cox mhawm: daux loe: singaix heue:.'" 62 Mai: cao: giex kaing: li pa ting piang khawm: uik, kaoh cung mai: ah nin: ka Nawh Cao:, "Maix ang deeh pawk lox tid tix lie? Pa kham: pui in mhai: sakse: grawh grawng: Maix mawh pa yuh ka mawx?" 63 Viang mawh nan: Yesux ang nye: kah. Mai: cao: giex kaing: li pa ting an baox ah nin: ka Nawh Cao:, "Aux chawk ka Maix ka daux ceukaux Siyiex pa im:, son sang krai Maix ka ex grawh grawng: mawh Maix Khrit, Kawn: Siyiex lie, ang mawh lie." 64 Yesux ah nin: ka nawh, "Mawh awm: pa hoik ah maix, viang mawh kawx nan: Aux krai ka maix, khaix in pex tag sang yaox Kawn: kawn: pui ngawm plak taix khawn: dawm: Siawp Sibrawm, mai: hoek ka piang paiawm: raoma: heue:." 65 Yam an cao: giex kaing: li pa ting an riah kraung ceep tix, mai: ah nin:, "Kaw in hoik ah lox pa sa pa lao ka Siyiex, ex baox lo pui kham: mhai: sakse: yuh ka mawx? Jhak heue:, pex hoik mhong: lox pa sa pa lao ka Siyiex heue:. 66 Pex ce: yuh ka mawx?" Kix pawk lox mai: ah nin:, "Nawh keung: tix yum heue:." 67 Yam an kix baig rawmmya: ka pakngai: Nawh Cao:, mai: jhawp taix tix klah Nawh, mai: tiblah simang: Nawh Cao: ka tawmtaix tix, 68 ah nin:, "Cao: Khrit eue:, krai lox jhai: ka ex liak, mawh pui mawx pa tap Maix?"

Grawng: thiang: Petrux ka Nawh Cao:

26:69-75 koe: daux lai Makux 14:66-72; Lukax 22:55-62; Yohan 18:16-18, 25-27

69 Yam an Petrux ngawm ka dee brawk nyiex, mai: bon: tix kaux hoek ka nawh ah nin:, "Maix kawx mawh pa ot tau mai: Yesux pui meung Galilie: heue:." 70 Viang mawh kawx nan: nawh thiang: sivoe kix khawm: uik ah nin:, "Aux ang tawng pa ah maix heue:." 71 Mai: khaix hoik lih hu: nawh ka grah nyiex, bon: tang: kaux yaox nawh mai: ah nin: ka kix pa ot tan:, "Pui in kawx ot tau mai: Yesux Pui veng Nazariet heue:." 72 Nawh baox deeh tiex tu thiang: ah nin:, "Aux ang tawng Pui an heue:." 73 Khaix an tix vud kix pa cung dex tan: ah nin: ka Petrux, "Maix kawx mawh tix kaux daux kix tete, kheu lox sikah maix kieh tawng maix heue:." 74 Yam an nawh jah tix jhax mai: tiex tu ah nin:, "Aux ang tawng Pui an." Mai: dom: mawx dom: an ia: ux heue:. 75 Mai: Petrux doh keud ka lox pa hoik krai Yesux ah nin:, "Ka: ang ia: nyang ux, maix tag thiang: tix tik Aux loe: bawg heue:." Mai: nawh lih hu:, mai: nied tix yiem heue:.

Mathiex

Simin Ting 27

Dee sidah sidu Yudax

1 Yam hoek yam ponngawb cao: giex kaing: li pa ting khankix, mai: kuad song: pui khankix khawm: uik kum: kawng: paox tix grawh grawng: Yesux, son sang pon tix teei Nawh yum heue:. 2 Mai: kix phyawk Nawh Cao:, mai: tok Nawh hu:, mai: tawx Nawh ka simiang Pilat heue:.

3 Yam an Yudax kaw pa tik pa tawx Nawh Cao:, yam yaox nawh grawh grawng: kix prawng kix ciyang ka Nawh Cao:, nawh doh keud doh sawn: ka phimap tix, mai: deeh viex mau tingoe: (30) plah deeh tawx ka cao: giex kaing: li pa ting mai: kuad song: khankix, 4 ah nin:, "Aux hoik phit hoik lud, kheu hoik tik hoik tawx aux nham: pa ang koe: dee phit heue:." Viang mawh nan: kix ah nin:, "Dex dawd mai: ex yuh ka mawx? Maix jhak grawh grawng: an heue:." 5 Mai: nawh taing tix tik mau an ka daux nyiex bwan:, mai: lih hu:, mai: hu: rhawt tokaux tix yum heue:. 6 Mai: cao: giex kaing: li pa ting khankix teei mau an mai: ah nin:, "Ang khaw: mai: been li tix sau: mau in ka daux dee deuh mau, kheu mawh ngawh nham: heue:." 7 Mai: kix kum: kawng: teei mau an liag haktiex pui yuh aw: tix dah, son sang yuh dee sipaung: nyo kah heue:. 8 Mawh kheu nan: haktiex an kok mawh, "Haktiex Nham::" tom: hoek singaix yamin heue:. 9 Yam an hoik naog gumlox cao: jhai: Yeramix pa ah nin:, 60"Mai: kix teei mau tingoe: (30) plah an, pa mawh ngawh Nawh, pa hoik deuh ngawh kah, mawh Kaw pa kawn: praix pui Isarilax tiblah hoik deuh ngawh kah heue:. 10 Mai: kix tawx mau an son haktiex pui yuh aw: tix dah, awm: hoik nhie: Siyiex ka aux heue:."

Krax ciied Nawh Cao: sivoe ngai: simiang Pilat

27:11-26 koe: daux lai Makux 15:2-15; Lukax 23:2-3, 18-25; Yohan 18:29-19:16

11 Yam an Yesux cung sivoe simiang, mai: simiang an chawk Nawh Cao: ah nin:, "Maix mawh Simiang Khunhawkham pui Yudax lie?" Mai: Yesux pawk lox ah nin: ka nawh, "Mawh awm: pa ah maix heue:." 12 Yam cao: giex kaing: li pa ting mai: kuad song: khankix deuh phimap ka Nawh Cao:, Nawh ang pawk lox tid tix heue:. 13 Yam an simiang Pilat baox ah nin: ka Nawh Cao:, "Ang maix mhong: mhai: sakse: pa kham: kix grawh grawng: maix tom: nie ceu lie?" 14 Mai: Nawh Cao: ang pawk lox ka nawh tix gum kawx, tom: simiang an kied daox deng: kah heue:. 15 Yam yuh poi an, simiang koe: been tix ploi: pui pa ot daux thawng: tix kaux kaux, pa khaw: rhawm: kix, ka pui haoh pui hun: khankix heue:. 16 Yam an kix koe: pui pa lih ceu ka daux thawng: tix kaux, pa kok mawh Barabax. 17 Mawh kheu nan: yam khrawm: kix paox tix, simiang Pilat chawk kix ah nin:, "Pex simie tix kieh aux ploi: pui mawx ka pex? Barabax lie, phan: ang mawh nan: Yesux pa kok mawh Khrit lie?" 18 Nawh tom: ah nan:, kheu tawng nawh kix hoik tawx Nawh Cao:, kheu bohrhawm: kix kah heue:. 19 Mai: yam ngawm nawh piang dee prawng see:, moeng nawh ploi: pui hoek ka nawh ah nin:, "Paw kieh pa yuh maix koe: tid tix ka Pui rah Pui see an, mawh kheu hoik kham: geu: aux tom: nie ceu singaix ka daux camaox kheu Nawh heue:." 20 Cao: giex kaing: li pa ting mai: kuad song: khankix nyaw pui haoh pui hun: khankix kieh rawg ploi: Barabax, mai: kieh yuh Yesux laux heue:. 21 Simiang baox chawk lox ka kix ah nin:, "Pui ra: kaux in pex simie tix kieh aux ploi: pa yuh ka mawx ka pex?" Mai: kix ah nin:, "Ploi: Barabax heue:." 22 Simiang Pilat baox ah nin: ka kix, "Phan: mawh nan: aux sang yuh pa tix ka Yesux pa kok mawh Khrit?" Kix khawm: uik ah nin:, "Kieh tawk Nawh piang khaoxlhak heue:." 23 Mai: nawh baox ah nin:, "Mawh kheu grawh grawng: pa tix, Nawh hoik yuh pa caox pa yuh ka mawx?" Viang mawh nan: kix nied tix yo ah nin:, "Kieh tawk Nawh piang khaoxlhak heue:." 24 Mawh kheu nan: yam yaox simiang Pilat tokaux tix ang chix yuh tid tix, mai: yaox pui dex simah simaing: ka paox tix, nawh teei rawm: mai: khoek taix tix sivoe pui haoh pui hun: khankix, mai: ah nin:, "Aux ang koe: dee phit, aux luan khaing: nham: Pui pa rah pa see in. Pex jhak grawh grawng: in heue:." 25 Mai: pui khawm: uik pawk lox ah nin:, "Kieh nham: Nawh koe: piang ex, mai: kawn: praix ex heue:." 26 Yam an nawh ploi: Barabax ka kix, viang mawh nan: nawh sivied Yesux, mai: tawx son sang tawk piang khaoxlhak heue:.

Grawng: kham: geu:Yesux krax pa nunai:

27:27-31 koe: daux lai Makux 15:16-20

27 Yam an pui naing simiang khankix teei Yesux hu: ka daux nyiex haw: tix dah dee ot pui naing, mai: khrawm: pui naing hoek khawm: uik. 28 Mai: kix peeik kraung Nawh Cao:, mai: kix ceep sibex raoh ka Nawh heue:. 29 Mai: kix taing: mhok katlawm sau: ka piang kaing: Nawh Cao:, mai: kieh giex priem tix gawng: daux taix khawn: dawm: Nawh, mai: kix grux ngawng sivoe Nawh mai: yuh pa ang cee ang cak, ka Nawh Cao: ah nin:, "Simiang Khunhawkham pui Yudax eue:, kieh nyawm ot heue:." 30 Mai: kix baig ka piang Nawh Cao:, mai: kix teei gawng: priem an mai: sivied kaing: Nawh kah heue:. 31 Mai: khaix hoik yuh kix pa ang cee ang cak ka Nawh Cao:, kix peeik sibex an, mai: deeh ceep kraung ceep cie Nawh, mai: tok Nawh hu: son sang tawk Nawh Cao: piang khaoxlhak heue:.

32 Mai: yam lih hu: kix kix yaox pui Kurene tix kaux, pa kaux Simon, Mai: kix khin: nawh hu:, son sang kieh nawh klawm: khaoxlhak Nawh Cao: heue:.

33 Mai: yam hoek kix tix dah pa kok mawh Gawlaxgawthax, pa sang ah nan: sang ah "Dee Si:ang: Kaing:."

Grawng: pa Tawk Nawh Cao: ka piang khaoxlhak

27:33-44 koe: daux lai Makux 15:22-32; Lukax 23:33-43; Yohan 19:17-24

34 Mai: kix tawx Nawh Cao: nyaux sidah niex pa hoik klao: tau mai: ghin:, mai: yam hoik cim Nawh Cao: tix yaox Nawh ang nyaux heue:. 35 Mai: khaix hoik tawk kix Nawh Cao: piang khaoxlhak. Kix nieb tix yaox mai: gwieh kraung Nawh ka paox tix. 36 Mai: kix ngawm mai: jhak Nawh Cao: tau heue:. 37 Mai: kix deuh lai grawh grawng: pa deuh phimap ka Nawh Cao: ka piang kaing: Nawh pa tiem: ah nin:, "IN MAWH YESUX SIMIANG KHUNHAWKHAM PUI YUDAX." 38 Yam an kix tawk pui tud pui rhim: ra: kaux tau mai: Nawh Cao: piang khaoxlhak, tix kaux plak taix khawn: dawm: mai: tix kaux plak khawn: gwiex heue:. 39 Mai: kix pa hu: pa hoek dex tan:, ah pa ang khaw: ang jiet ka Nawh Cao: mai: vuk vied kaing: tix, 40 mai: ah nin:, "Maix pa yieh nyiex bwan: mai: deeh yuh daux loe: singaix eue:, taoh tokaux Maix. Phan: Maix mawh Kawn: Siyiex lih khaing: khaoxlhak heue:." 41 Awm: an cao: giex kaing: li pa ting, mai: pui tiem: lai, mai: kuad song: khankix kawx, ah pa ang cee ang cak ka Nawh Cao: ah nin:, 42 "Nawh chix taoh pui tang: kaux, tokaux Nawh, Nawh ang chix taoh. Phan: Nawh mawh Simiang Khunhawkham Isarilax, kieh Nawh lih khaing: khaoxlhak yamin, mai: ex tag yumrhawm: ka Nawh heue:. 43 Nawh een: rhawm: ka Siyiex, kieh Nawh taoh Nawh yamin, phan: Nawh simie Nawh, mawh kheu hoik ah Nawh 'Aux mawh Kawn: Siyiex heue:.'" 44 Mai: pui tud pui rhim: pa hoik tawk piang khaoxlhak tau mai: Nawh Cao: kawx, ah lox pa ang khaw: ang jiet ka Nawh awm: an heue:.

Pa lih koe: yam yum Yesux

27:45-56 koe: daux lai Makux 15:33-41; Lukax 23:44-49

45 Jah ka bawg yam 61liah nari praix vhaik piang haktiex khawm: uik tom: hoek 62dim: nari. 46 Mai: yam dex hoek 63dim: nari Yesux kok yo lox sinum ah nin:, "Elix, Elix, lama sabaktanix?" pa ah nin: sang ah, "Siyiex Aux, Siyiex Aux, Maix lai tik vud Aux yuh ka mawx?" 47 Mai: kix pa cung tan: tiblah yam mhong: kix lox an, kix ah nin:, "Pui in kok Eliyax heue:." 48 Mai: dom: mawx dom: an kix tix kaux to: hu: mai: teei tix ceu pa awm: tih pa koe: daux rawm: sigrit sigra: tix mu:, mai: khaix sau: nawh rawm: sidah niex tom: naog, nawh sau: ka toh gawng: priem, mai: tawx Nawh Cao: nyaux heue:. 49 Pui pa taig khankix ah nin:, "Paw chuh, kieh ex jhak Eliyax sang hoek tix taoh Nawh lie, ang hoek lie? 50 Mai: Yesux baox deeh kok yo lox sinum, mai: tawx khwan: Tix dud rhawm: heue:. 51 Mai: jhak heue:, man: tie daux nyiex bwan: griah ra: pak, jah plak piang tom: hoek ka caong, mai: tok kla: reem, mai: simaox rang: tuh heue:. 52 Mai: simeeig khankix kawx baoh, mai: tokaux pui singax pa hoik laig it tom: nie deeh kaoh. 53 Mai: kix lih khaing: daux simeeig khaix hoik kaoh Nawh Cao:, mai: laig ka daux veng pa singax singeh, mai: sidawng: ka pui tom: nie heue:. 54 Pui giex kaing: naing, mai: pui pa pau Yesux tau mai: nawh, yam yaox kix tok kla: reem, mai: ceu pa hoik mawh khankix, kix kied lhat kah mai: ah nin:, "Kaw in mawh Kawn: Siyiex tete heue:." 55 Mai: bon: tom: nie jhak ka dee singai, pa hoik hawt khaix Yesux khaing: meung Galilie: mai: khan: kheu: ka Nawh Cao: heue:. 56 Ka daux kix koe: Marix Magadalax mai: Marix miex Yakop mai: Yosie:, mai: miex kawn: simex Zebedie: heue:.

Pa teei tix priex sipaung: Nawh Cao:

27:57-61 koe: daux lai Makux 15:42-47; Lukax 23:50-56; Yohan 19:38-42

57 Yam hoek ponbo cao: mi tix kaux pa mawh pui Arimase, pa kaux Yosiep, pa tokaux nawh kawx mawh kawncau Yesux. 58 Pui in hu: ka simiang Pilat mai: mhaing: tokaux yum Yesux heue:. Mai: simiang Pilat nhie: tawx tokaux Nawh cao: kah heue:. 59 Mai: Yosiep teei tokaux yum an, mai: pua: ka man: pa singax, 60 mai: hu: deuh ka daux simeeig pa khraox cie nawh, pa hoik saik nawh ka daux rang:. Mai: nawh plu: plie simaox ting mai: thox moing daux simeeig, mai: hu: heue:. 61 Mai: Marix Magadalax, mai: Marix tang: kaux ngawm dex ka simeeig tan: heue:.

62 Yam hoek pasax, pa mawh singaix khaix Ngaix Khre:, cao: giex kaing: li pa ting mai: Pharishie: khankix khrawm: paox tix ka simiang Pilat, 63 mai: ah nin:, "Simiang eue:, ex doh keud grawh grawng: Pui pie Pui lhen: an hoik ah yam kawn: im: Nawh, pa ah nin:, 'Khaix loe: singaix Aux tag deeh kaoh heue:.' 64 Mawh kheu nan: tawx lox kieh pau simeeig mhawm: mhawm: tom: sidah loe: singaix. Phan: ang mawh nan: ha kawncau Nawh khankix kox hoek yam ponsawm: mai: briex tokaux yum Nawh, mai: ah nin: ka pui khankix, 'Nawh hoik deeh kaoh khaing: krax yum,' mai: pa phit phaoxkhaix tag lheu: nu khaing: pa phit phaoxka: heue:." 65 Mai: simiang Pilat ah nin: ka kix, "Pex kieh pau heue:. Pex hu: mai: yuh kaux awm: pa chix tix heue:." 66 Mawh kheu nan: kix hu: yuh simeeig kaux, mai: tawk cum: ka simaox, yam ot pui pau tau mai: kix heue:.

Mathiex

Simin Ting 28

Pa deeh kaoh im: Nawh Cao:

28:1-8 koe: daux lai Makux 16:1-8; Lukax 24:1-10

1 Yam sidah singaix tuah, yam jah praix tix riang ka daux aliah singaix, singaix tix, Marix Magadalax mai: Marix tang: kaux hoek tix jhak simeeig heue:. 2 Mai: jhak heue:, yam an kied ting tok kla: reem kheu kawncau Siyiex cie Simiang lih hoek khaing: raoma: tix kaux mai: plu: plie: tix tik simaox an mai: ngawm ka piang nawh heue:. 3 Grang nawh awm: tuhsah, mai: kraung ceep nawh paing awm: rawm:rha:, 4 mai: pui pau khankix kheu lhat ka nawh siyaung: mai: lih mawh awm: pui yum heue:. 5 Mai: kawncau Siyiex an ah nin: ka bon: an, "Pax paw vi lhat, kheu tawng aux pax sawg Yesux, pa hoik tawk ka piang khaoxlhak heue:. 6 Nawh Cao: ang lai ot tin:, kheu Nawh Cao: hoik kaoh, awm: pa hoik krai Nawh heue:. 64Hoek mai: jhak dee hoik it Simiang. 7 Mai: nied tix hu: krai ka kawncau Nawh khankix, 'Nawh Cao: hoik kaoh im: khaing: krax yum, mai: jhak heue:, Nawh hu sivoe pex ka daux meung Galilie:, mai: pex tag yaox Nawh Cao: tan: heue:.' Jhak heue:, aux hoik krai ka pax." 8 Kiex lhat mai: kied koe: krax gauxrhawm: gauxrhi:, mai: nied tix kaoh khaing: simeeig mai: to: hu: son sang tawx lox ka kawncau Nawh khankix heue:. 9 Mai: jhak heue:, Yesux hu: rieb kiex mai: ah nin:, "Kieh nyawm ot heue:." Mai: kiex hoek mai: giex caong Nawh Cao:, mai: krub ka Nawh heue:. 10 Yam an Yesux ah nin: ka kiex, "Paw vi lhat kah, hu: krai ka puxaik Aux khankix, nhie: kix hu: ka daux meung Galilie:, mai: kix tag yaox Aux tan: heue:."

11 Yam kawn: hu: kiex, jhak heue:, pui pa pau tiblah laig ka daux veng, mai: krai grawh grawng: ceu pa hoik mawh khawm: uik, ka cao: giex kaing: li pa ting khankix heue:. 12 Mai: yam hoik khrawm: kix paox tix tau mai: kuad song: khankix, mai: hoik kum: hoik kawng:, kix tawx mau tom: nie ka pui naing khankix, 13 mai: ah nin:, "Pex ah, 'Kawncau Nawh khankix hoek yam ponsawm:, mai: briex tix teei Nawh hu:, yam laig it ex,' 14 mai: phan: gum lox in hoek ka yhaok simiang, ex tag yuh kieh nawh vhahrhawm:, mai: kieh pex luan khaing: krax prawng krax khi: heue:." 15 Kheu nan: kix teei mau an, mai: yuh awm: hoik gau ka kix, mai: lox ceu an tah hu: ku dah ku dee ka daux pui Yudax, tom: sidah hoek singaix yamin heue:.

Grawng: tawx lox ka kawncau khankix

16 Kawncau an kao: kaux tix hu: ka daux meung Galilie:, mai: haok ka gawng dee hoik krai Yesux ka kix. 17 Mai: yam yaox kix Nawh Cao:, kix krub ka Nawh, viang mawh kawx nan: tiblah ang yumrhawm: kah. 18 Mai: Yesux hoek ka kix mai: sikah ka kix ah nin:, "Siawp sibrawm ka daux meung raoma: mai: ka piang haktiex hoik tawx ka Aux khawm: uik heue:. 19 Mawh kheu nan: pex hu:, mai: kieh ceu pui khawm: uik mawh kawncau mau soi: Aux, mai: 65baptis kix ka daux ceukaux Keeing: Cao:, Kawn: Cao:, mai: Khwan: Singax Singeh Cao: heue:. 20 Mai: gau kix kieh kix hawt yuh ceu pa hoik nhie: Aux ka pex khawm: uik, mai: jhak heue:, Aux tag ot tau mai: pex jheeng: jheeng:, tom: sidah sidu hoek bawg yam sidah haktiex heue:."