Lukax

Lai Lukax

Simin Ting 1

Lox jah

1:1-4 koe: daux lai Kawncau 1:1

1 Maw kheu pui tom: nie hoik tiem: tix yaox grawh grawng: ceu pa hoik naog hoik grum mawh sinax ex, 2 Awm: kix pa mawh pa kham: mhai: sakse: grawh grawng: ceu pa hoik yaox ngai: tix, mai: cao: pa viex lox bwan: tom: yam jah, hoik tawx ka ex. 3 Phan: keud tix yaox, aux kawx, pa hoik sawg tix yaox grawh grawng: ku ceu tom: yam jah mhawm: mhawm:, khaw: tix tiem: lai ka maix Thawphilux pa ting pa mhawm: eue:, 4 yuh ka mawx maix tag sang grum tawng grawh grawng: ceu pa hoik gau ka maix, mawh pa mawh pa meh heue:.

Grux krai ka sang keh Yohan Cao: com rawm:

5 Daux bawg yam singaix ju simiang Herut, khunhawkham meung Yudax, koe: cao: giex kaing: li tix kaux, pa kaux Zakharix, pa dex pa dawd mai: cub Abiyax. Moeng nawh mawh kawnbon: ru Aron, mai: ceukau nawh mawh Elizabiet heue:. 6 Mai: kiex khawm: ra: mawh pa rah pa see sivoe Siyiex, mai: hawt lox tawm: jhawm: krai, mai: been Siyiex khawm: uik ang lai koe: dee lud dee loe: heue:. 7 Kiex ang koe: kawn:, kheu Elizabiet mawh pui neh, mai: kiex uik kuad.

8 Yam Zakharix yuh kaing cao: giex kaing: li sivoe Siyex, ceu pa yuh cub pa neuex nawh, 9 awm: pa koe: been cao: giex kaing: li khankix, caw bawg yam, yam laig nawh ka daux nyiex bwan: Siyiex tix tok nyawng bhawng:. 10 Mai: cub pui haoh pui hun: khawm: uik, ot plak praix tix rawg bwan:, bawg yam nari tok nyawng bhawng: heue:. 11 Yam an kawncau Siyiex tix kaux hoek tix cung plak dawm: khu: dee tan nyawng bhawng:. 12 Mai: yam Zakharix yaox, nawh sungsang rhawm: mai: lhat kah heue:. 13 Viang mawh nan: kawncau Siyiex ah nin: ka nawh, "Zakharix eue:, paw lhat paw graung, mawh kheu hoik nghiet lox pa rawg pa mhaing: maix, moeng maix Elizabiet tag keh kawn: simex son maix tix kaux, mai: maix tag kok ceukaux nawh mawh Yohan heue:. 14 Mai: maix tag sang gauxrhawm: gauxrhi:, mai: pui tom: nie tag sang koe: krax gauxrhawm: gauxrhi: kheu keh nawh. 15 Mawh kheu nawh tag ting tag lhaong: sivoe ngai: Simiang, mai: nawh tag ang nyaux plai: rawm: plix siiet mai: ceu pa chix kieh yoek, mai: nawh tag naog Khwan: Singax Singeh, tom: yam ot nawh ka daux vaig miex tix heue:. 16 Mai: nawh tag kieh kawnpraix Isarilax tom: nie deeh tieh tix hoek ka Simiang mai: Siyiex kix. 17 Mai: nawh tag sang hu: sivoe Nawh Cao: ka daux khwan: mai: siawp sibrawm Eliyax, son sang kieh keeing: khankix mai: kawnpraix tix, deeh khaw: paox tix, mai: son sang kieh pa lheu: lox khankix deeh hu: ka daux pingnya cuyi pa rah pa see khankix, son sang cox pui tix ceu pa hoik rien son Siyiex heue:." 18 Zakharix ah nin: ka kawncau Siyiex an, "Grawh grawng: tag sang mawh, ceu in aux chix tawng yuh ka mawx? Mawh kheu aux uik mawh tax kuad, mai: moeng aux ka hoik riex ju uik kuad heue:." 19 Kawncau Siyiex an deeh pawk lox ka nawh ah nin:, "Aux mawh Gabrelax, pa cung sivoe Siyiex, mai: hoik ploi: aux hoek son sang sikah ka maix, mai: kieh aux viex lox gauxrhawm: gauxrhi: ceu in khankix ka maix heue:. 20 Jhak heue:, kheu ang maix yumrhawm: ka lox aux in, maix tag aw: khawm: ang chix sikah, tom: hoek singaix ceu in khankix hoik mawh, pa tag sang naog ka daux bawg yam kix heue:." 21 Mai: pui pa krox Zakharix khankix, daox deng: kheu ot nawh ka daux nyiex bwan: kied rheung: nyao heue:. 22 Mai: yam lih hoek nawh, nawh ang chix sikah mai: kix, kix tom: tawng hoik yaox nawh riang susai ka daux nyiex bwan:. Viang mawh nan: Zakharix jhi: kix yaox mhai:, mai: aw: tix heue:. 23 Yam singaix yuh nawh kaing hoik naog, nawh deeh ing: ka nyiex tix heue:.

24 Khaix singaix an khankix moeng nawh Elizabiet, koe: kaux, mai: nawh mox tokaux tix son phwan: khix, ah nin:, 25 "Simiang hoik yuh ceu in son aux, daux singaix yam kia: Nawh aux, son sang teei kieh aux luan khaing: pa sa kawn: pui heue:."

Grux krai ka sang keh Yesux

26 Khaix an ka daux liah khix, Siyiex ploi: kawncau Nawh Gabrelax hu: ka daux veng meung Galilie: tix veng, pa kok mawh Nazariet, 27 ka bon: krih tix kaux, pa hoik chawk pui tix kaux pa kaux Yosiep, pa mawh ru Dawit, mai: ceukaux bon: krih an mawh Marix heue:. 28 Mai: kawncau Siyiex an laig mai: ah nin: ka nawh, "Bon: pa koe: bwanson: eue:, kieh maix gauxrhawm: heue:. Siyiex ot tau mai: maix. Ka daux ceu bon: maix kied ting bwanson: heue:." 29 Viang mawh nan:, nawh kied sungsang rhawm: ka lox in, mai: keud jee keud blaong daux rhawm: tix, grawh grawng: dee bleeh ceu an. 30 Mai: kawncau Siyiex an ah nin: ka nawh, "Marix eue:, paw lhat paw graung, kheu maix hoik pon bwan: mai: Siyiex. 31 Mai: jhak heue:, maix tag koe: kaux daux vaig tix, mai: keh kawn: simex tix kaux, mai: tag kok ceukaux Nawh mawh Yesux heue:. 32 Nawh tag ting tag lhaong:, mai: tag kok Nawh mawh Kawn:, Kaw pa ting pa lhaong: khaing: khawm: uik, mai: Simiang Siyiex tag tawx ka Nawh dangngeung keeing: Nawh Dawit heue:. 33 Mai: Nawh tag giex kaing: ceucat Yakop leeing: ju leeing: phan:, mai: Meung Nawh tag ang chix sidah ang chix jud chix jai heue:." 34 Viang mawh nan: Marix chawk ah nin: ka kawncau Siyiex an, "Ceu in chix mawh yuh ka mawx? Kheu aux ang koe: mex mai: ang pied ang pha: simex heue:." 35 Mai: kawncau Siyiex an deeh pawk lox mai: ah nin: ka nawh, "Khwan: Singax Singeh tag sang hoek ka piang maix, mai: siawp sibrawm Kaw pa ting pa lhaong: khaing: khawm: uik, tag sang tawb veei ka piang maix, mawh kheu grawng: in Kawn: singax pa tag sang keh, tag kok mawh kawn: Siyiex heue:. 36 Mai: jhak heue:, bon: paoxceu paocat maix Elizabiet kawx, hoik nghe: kawn: simex, nawh kuad kawx, mai: yamin uik koe: liah khix khawm: ah pui pa neh kah. 37 Mawh kheu gumlox Siyiex pa ang koe: siawp sibrawm tag ang koe: tix gum kawx heue:." 38 Mai: Marix baox ah nin:, "Jhak heue:, aux mawh bon: cawng Simiang, awm: lox krai maix kieh mawh ka aux heue:." Mai: kawncau Siyiex an lih hu: khaing: nawh heue:.

Marix hu: vhi: ka Elizabiet

1:46-53 koe: daux lai 1. Samoelax 2:1-10

39 Daux bawg yam singaix an khankix Marix nied tix kaoh mai: hu: ka daux haktiex dee koe: gawng koe: lua, ka veng Yudax tix veng. 40 Mai: laig ka daux nyiex Zakharix mai: nawb bwan: ka Elizabiet. 41 Yam mhong: Elizabiet lox nawb Marix ka nawh, kawn: ngie: pa ot daux vaig nawh jaloh kah, mai: Elizabiet naog mai: Khwan: Singax Singeh heue:. 42 Mai: nawh yo lox sinum ah nin:, "Ka daux ceu bon: maix kied ting bwanson: mai: Plix vaig maix kawx ting bwanson: heue:. 43 Aux pon min: plakngai: pa hoek miex Simiang aux ka aux, yuh nin:, yuh ka mawx? 44 Grawh grawng: nawh, jhak heue:, yam mhong: lox pa nawb maix ka daux yhaok aux, kawn: ngie: pa ot daux vaig aux jaloh kheu gauxrhawm: kah heue:. 45 Mai: nawh pa hoik yumrhawm: ting bwanson:, mawh kheu grawng: ceu pa hoik krai Simiang ka nawh, tag sang naog sang grum heue:." 46 Mai: Marix ah nin:, "Ju aux yaogyaw Simiang, 47 mai: khwan: aux gauxrhawm: ka daux Siyiex Cao: Taoh aux heue:. 48 Mawh kheu Nawh hoik jhak ka bon: cawng pa tiem Nawh. Grawh grawng: nawh, jhak heue:, jah yamin tix ju hoik tix ju, ku ju, tag kok aux mawh pa ting bwanson: heue:. 49 Mawh kheu Kaw pa ting sibrawm hoik yuh ceu pa ting pa lhaong: son aux, mai: ceukaux Nawh mawh pa Singax Singeh heue:. 50 Mai: krax caoxrhawm: Nawh, hoek ka tix ju hoik tix ju, ka piang kix pa chix lhat ka Nawh heue:. 51 Nawh hoik jhi: yaox riang rao ka daux plawng: taix Tix. Nawh hoik kieh pa ting rhawm: ting rhi:, pa keud ka daux rhawm: tix, khankix prung: prang: heue:. 52 Nawh hoik khlut laux simiang khaing: dangngeung dee ngawm kix, mai: hoik yaog pa tiem kieh lhaong: heue:. 53 Pa cairhawm: khankix Nawh hoik kieh sak ka ceu pa nyawm, mai: Nawh hoik ploi: cao: mi khankix hu: yi giex going heue:. 54 Nawh hoik teem: ka Isarilax kawncau mausoi: Nawh, yuh ka mawx son sang doh keud nawh ka krax caoxrhawm: heue:. 55 Awm: lox pa hoik sikah Nawh ka tax du ex khankix ka Abraham khawm: simie ceucat nawh leeing: ju leeing: phan: heue:."

56 Marix ot tau mai: Elizabiet dex loe: khix, mai: deeh ing: ka nyiex tokaux tix heue:.

Grawng: keh Yohan Cao: com rawm:

57 Yam hoik naog bawg yam Elizabiet sang keh, nawh keh kawn: simex tix kaux heue:. 58 Mai: yam hoik mhong: paox plawg paox nyhawm:, paoxceu paoxcat Elizabiet, grawng: krax caoxrhawm: pa ting pa hoik yuh Siyiex son kiex, kix gauxrhawm: tau mai: kiex heue:. 59 Yam uik koe: daix singaix, kix hoek son sang pat hak kawn: nyawm an, mai: kix dex sang kok nawh Zakharix awm: ceukaux keeing: nawh. 60 Miex nawh deeh ah nin: ka kix, "Ang mawh, tag kok nawh mawh Yohan heue:." 61 Mai: kix deeh ah nin: ka kiex, "Ka daux paoxceu paoxcat maix, pui pa sum: ceukau yuh nin: ang koe: tix kaux kawx." 62 Mai: kix yuh mhai: chawk ka keeing: nawh, grawh grawng: nawh, sang simie tix kok nawh ceu pa tix heue:. 63 Mai: nawh mhaing: ce dee tiem: lai, mai: tiem: ah nin:, "Ceukaux nawh mawh Yohan." Mai: kix pa ot tan: khawm: uik daox deng: kah heue:. 64 Mai: jheeh nawh deeh baoh dom: mawx dom: an, mai: siniag dak nawh deeh ghah, mai: nawh deeh sikah, yaogyaw bwanson: Siyiex heue:. 65 Mai: kix pa ot sivie sivheng: tan: khawm: uik lhat kah, mai: grawh grawng: ceu in khankix tah hu: ku dah ku dee ka daux haktiex dee koe: gawng: koe: lua meung Yudax heue:. 66 Mai: kix pa mhong: grawh grawng: ceu in khawm: uik priex tix tawng ka daux rhawm: tix, ah nin:, "Phan: mawh nin:, kawn: nyawm in tag sang mawh pa yuh ka mawx? Mawh kheu ot taix Simiang tau mai: nawh heue:."

Zakharix grux krai tix deuh lox jhai:

67 Mai: keeing: nawh Zakharix naog Khwan: Singax Singeh, mai: krai lox jhai: ah nin:,

68 "Kieh Simiang, Siyiex Isarilax ting bwanson: heue:, mawh kheu Nawh hoik hoek tix lai ling mai: hoik taoh pui cie Tix. 69 Mai: Nawh hoik kieh Cao: Taoh koe: son ex tix kaux, ka daux geh nyiex ceucat kawncau Nawh Dawit. 70 Awm: hoik krai Nawh ka jheeh cao: jhai: pa singax singeh khankix, pa hoik koe: di dix. 71 Grawh grawng: sang taoh ex khaing: pui pa koeng ka ex khankix, mai: khaing: tawm: taix pa bohrhawm: pa khoi: ka ex khawm: uik heue:. 72 Son sang yuh krax caoxrhawm: ka tax du ex khankix, mai: yuh ka mawx son sang doh keud ka lox sijax mukheu pa singax singeh Nawh. 73 Pa mawh lox pa hoik tiex hoik tu Nawh mai: tawx ka Abraham keeing: ex dix, 74 son sang taoh ex luan khaing: daux tawm: taix pa koeng ka ex khankix, yuh ka mawx son sang pon ex luan khaing: krax lhat krax graung, mai: pon tix yuh son Nawh, 75 ka daux pa singax singeh mai: pa rah pa see, daux bawg yam singaix pa kawn: ot kawn: koe: ex ka sivoe Nawh khawm: uik heue:. 76 Mai: kawn: nyawm eue:, tag sang kok maix mawh Cao: Jhai: cie Kaw pa ting pa lhaong: khaing: khawm: uik, mawh kheu maix tag sang hu: sivoe pakngai: Simiang son sang cox krax heue:. 77 Son sang kieh pui cie Nawh tawng grawh grawng: krax taoh, ka daux pa pluat ploi: phimap phigrham: kix heue:. 78 Mawh kheu krax caoxrhawm: Siyiex ex, pa riang singaix khaing: dee lhaong: tag sang hoek tix lai ling ka ex. 79 Son sang jhan: riang ka piang kix pa ngawm ka daux pa vhaik, mai: veei krax yum. Son sang thong: caong ex laig ka daux krax pa nhim: heue:."

80 Mai: kawn: nyawm an haok hwan:, mai: ting riang ka daux Khwan:, mai: nawh ot ka daux tiag daux tu, tom: hoek singaix bawg yam jhi: tokaux tix ka pui Isarilax heue:.

Lukax

Simin Ting 2

Yesux lih keh ka daux veng Bieliehiem

1 Ka daux bawg yam singaix an khankix, Simiang Kesa Awguttux tawx lox kieh pawd kieh teei ceukaux pui pa ot ka daux haktiex khawm: uik. 2 Yam Kurine mawh simiang giex kaing: ka daux meung Surix, in mawh bawg yam teei ceukaux bawg phaoxka: tix bawg heue:. 3 Mai: pui khawm: uik deeh ka daux yaong: daux veng pui mawx pui an, son sang tawx sang kieh pawd ceukaux tix heue:. 4 Mai: Yosiep kawx, kaoh khaing: daux veng Nazariet meung Galilie:, mai: haok ka meung Yudax, ka veng Dawit pa kok mawh Bieliehiem, kheu mawh nawh doeh ru Dawit. 5 Son sang sau: ceukaux tokaux tix mai: Marix, pa hoik chawk nawh, pa hoik koe: kaux mai: dex sang naog bawg yam sang keh heue:. 6 Mai: yam kiex ot tan:, bawg yam singaix sang keh nawh uik naog. 7 Mai: nawh keh Kawn: Ai: tix, mai: pua: nawh daux leem:, daux man:, mai: een: ka daux dawng: moi, kheu ang dee ot koe: son kix daux nyiex nyo heue:.

8 Ka daux meung an koe: cao: liang yung: tiblah pa pau cub yung: kix daux yam ponsawm: heue:. 9 Mai: kawncau Siyiex tikaux hoek tix cung dex kix, mai: min: plakngai: Simiang jhan: riang vung viang kix, mai: kix die lhat kah heue:. 10 Mai: kawncau Siyiex an ah nin: ka kix, "Paw lhat paw graung, jhak heue:, aux viex lox ceu pa mhawm:, pa kied ting gauxrhawm:, pa sang mawh son pui khawm mu: khawm: miang:. 11 Mawh kheu singaix in, daux veng Dawit, Cao: Taoh hoik keh son pex tixkaux pa mawh Khrit Simiang heue:. 12 Mai: in tag mawh mhai: sakse: son pex. Pex tag yaox Kawn: ngie: pa hoik pua: ka leem: ka man:, mai: it ka daux dawng: moi heue:." 13 Mai: dom: mawx dom: an cub kawncau raoma: kied haoh kied hun:, hoek tix ot tau mai: kawncau Siyiex an, mai: yaogyaw Siyiex ah nin:,

14 "Kieh yaog min: plakngai: Siyiex, ka dee kied lhaong: khaing: paox tix, mai: ka piang haktiex kieh pa nhim: koe: ka kawn: pui, pa khaw: pa caw rhawm: Nawh heue:." 15 Khaix kawncau Siyiex khankix hoik deeh ing: ka meung raoma:, cao: liang yung: khankix ah nin: ka paox tix, "Ex, hu: ka veng Bieliehiem, mai: jhak tix yaox ceu pa hoik mawh in, pa hoik kieh Simiang ex tawng heue:." 16 Mai: nied kix tix hu: tau, mai: yaox Marix mai: Yosiep mai: Kawn: ngie: pa it ka daux dawng: moi. 17 Mai: yam hoik yaox kix, kix kieh tawng grawh grawng: lox pa hoik krai ka kix, grawng: Kawn: nyawm in. 18 Mai: pa mhong: khawm: uik daox deng: ka grawh grawng: ceu pa krai cao: liang yung: khankix, ka kix heue:. 19 Viang mawh nan: Marix een: tix tawng, lox ceu in khawm: uik, mai: keud grawh grawng: khankix daux rhawm: tix heue:. 20 Mai: cao: liang yung: khankix deeh ing:, mai: jho: plakngai: mai: yaogyaw Siyiex, kheu ceu pa hoik yaox hoik mhong: kix khawm: uik, jiet awm: lox pa hoik krai ka kix heue:.

Ap pong kawn:ngie: ka daux nyiex bwan:

21 Yam hoik naog daix ngaix, yam uik caw bawg yam sang pat hak Nawh, kok ceukaux Nawh mawh Yesux, awm: pa hoik grux kok kawncau Siyiex, ka: ang nyang bax nghe: Nawh daux vaig heue:. 22 Mai: khaix hoik naog bawg yam singaix pa kieh kix singax khankix, awm: pa koe: daux lox been Mose, kiex viex Nawh haok ka veng Yerusaliem, son sang tawx Nawh ka Simiang. 23 Awm: hoik tiem: daux lox lai been Simiang, 94"Kawn: ai: plix num: ku kaux tag sang kok mawh pa singax son Simiang heue:." 24 Mai: kiex yuh pa tan pa lu, awm: hoik nhie: yuh ka daux lai been Simiang, 95"Sikaux tix brawm:, phan: ang mawh nan: keukie: awn: tix brawm:" heue:. 25 Mai: jhak heue:, ka daux veng Yerusaliem koe: pui pa kaux Simeon tix kaux, pa mawh pui rah pui see pa chix nab yam yungyi:, mai: krox jun son bawg yam sang teem: kieh Isarilax mhawm:, mai: Khwan: Singax Singeh koe: ka piang nawh heue:. 26 Mai: Khwan: Singax Singeh hoik kieh doh ka nawh, grawng: nawh tag ang nyang yum, ka: ang tix bax yaox Cao: Khrit cie Simiang heue:. 27 Mai: Khwan: Cao: tok nawh hu: ka daux nyiex bwan:. Mai: miex keeing: Nawh Cao: viex Kawn: nyawm Yesux hu: tan:, son sang yuh son Nawh awm: koe: lox lai been li. 28 Mai: nawh teei tix teem: Nawh Cao: ka daux tawm: taix tix, mai: yaogyaw bwanson: Siyiex ah nin:, 29 "Simiang eue:, phaox in kieh kawncau Maix koi hu: mhawm: mhawm:, awm: hoik koe: gumlox Maix. 30 Kheu hoik yaox ngai: aux krax taoh Maix, 31 pa hoik cox Maix sivoe pakngai: ceu pui khawm: uik heue:. 32 Pa mawh Pa Riang pa sang kieh doh ka pui tang: ceu tang: cat khankix, mai: pa tag sang yaog min: plakngai: pui Maix Isarilax heue:."

33 Mai: miex keeing: Nawh Cao: daox deng: ka lox pa krai grawng: Nawh heue:. 34 Mai: Simeon nawb bwan: ka kiex, mai: ah nin: ka Marix miex Nawh Cao:, "Jhak heue:, Kawn: nyawm in tag mawh pa sang kieh pui Isarilax tom: nie goh mai: deeh kaoh heue:. Mai: tag sang mawh mhai: pa sa pui kah heue:. 35 Lheu: khaing: an rhawm: maix kawx tag swat ka vaid, yuh ka mawx son sang plak kieh doh pa keud pa sawn: rhawmrhi: pui tom: nie heue:." 36 Mai: yam an koe: yiex jhai: tix kaux pa kaux Anax. Nawh mawh kawn: bon: Phanwelax, pa mawh ceu Asha. Nawh uik kied kuad, mai: yam awn: ju nawh hoik ot mai: mex tix aliah num. 37 Mai: uik mawh nawh miexmai tidaix pon: (84) num, mai: ang nawh lih khaing: nyiex bwan:, nawh ot tan: rawg bwan: mai: twah pa ih pa un:, krub ka Siyiex leeing: ngaix leeing: sawm: heue:. 38 Daux bawg yam nari an nawh hoek mai: yaogyaw bwanson: Siyiex, mai: krai grawh grawng: kawn: nyawm an, ka kix khawm: uik pa krox pa jun son bawg yam sang taoh veng Yerusaliem heue:.

Ing: ka veng Nazariet

39 Mai: khaix miex keeing: Nawh hoik yuh awm: pa nhie: lox been Simiang, ku ceu khawm: uik, kix deeh ing: ka daux meung Galilie:, ka veng tokaux tix Nazariet heue:. 40 Mai: Kawn: nyawm an haok hwan:, mai: ting riang ting rao, mai: naog krax tawng krax yung, pingnya cuyi, mai: bwanson: Siyiex ot ka piang Nawh heue:.

Hoek ih poi Pasakha ka daux veng Yerusaliem

41 Mai: miex keeing: Nawh Cao: hu: ka veng Yerusaliem, ku num, ka poi Pasakha heue:. 42 Yam uik koe: ju Yesux kao: num ra:, kix haok awm: hoik sax koe: been poi. 43 Mai: khaix hoik luan singaix poi khankix, kiex deeh ing:, mai: Kawn: nyawm simex pa mawh Yesux, kawn: ot plak khaix ka daux veng Yerusaliem, mai: miex keeing: Nawh ang tawng grawng: an heue:. 44 Viang mawh nan: kiex ce: Nawh ot ka daux cub pui pa ing: kix tau, mai: kiex ing: tix singaix krax. Khaix an kiex sawg Nawh ka sinax puxaik paoxceu mai: sinax pui pa meed pa tawng kiex, 45 Mai: kheu ang kiex yaox Nawh, kiex deeh hu: sawg Nawh ka veng Yerusaliem heue:. 46 Mai: khaix an loe: singaix kiex yaox Nawh ka daux nyiex bwan:, ngawm sinax sara cao: gau, nghiet lox kix, mai: chawk lox ka kix heue:. 47 Kix pa mhong: lox Nawh khawm: uik daox deng: ka pa kied tawng Nawh, mai: lox pa deeh chix pawk Nawh heue:. 48 Mai: yam yaox kiex Nawh, kiex daox deng: kah, mai: miex Nawh ah nin: ka Nawh, "Kawn: eue:, yuh ka mawx Maix lai yuh nin: ka yiex? Jhak heue:, keeing: Maix mai: aux hoik sawg Maix mai: khirhawm: khirhi: tix heue:." 49 Mai: Nawh Cao: ah nin: ka kiex, "Yuh ka mawx pax lai sawg Aux? Ang pax tawng grawng: tag lai ot Aux ka daux nyiex Keeing: Aux lie?" 50 Mai: ang kiex tawng dee bleeh lox pa krai Nawh ka kiex heue:. 51 Mai: Nawh lih hu: tau mai: kiex, hoek ka veng Nazariet, mai: Nawh Cao: nghiet lox kiex heue:. Miex Nawh een: tix tawng grawng ceu in khankix ka daux rhawm: tix heue:.

52 Mai: tokaux Yesux baox haok baox hwan:, baox ting pingnya mai: baox nie khaw: rhawmrhi: Siyiex mai: kawn: pui heue:.

Lukax

Simin Ting 3

Grawng: lih sidiex Yohan Cao: com rawm:

3:2-10 koe: daux lai Mth. 3:1-10; Makux 1:3-5, 3:16-17 koe: daux lai Mth. 3:11-12; Makux 1:7-8

1 Yam simiang khunhawkham Kesa Tiberix hoik giex kaing: kao: phwan: num, Pawntix Piat mawh simiang giex kaing: meang Yudax, mai: Herut mawh simiang meung Galilie:, Philipux pux nawh mawh simiang haktiex Iture mai: Tarakhawnit, mai: Lusanix mawh simiang haktiex Abilenix. 2 Ka daux bawg yam, Annax mai: Kayaphax mawh cao: giex kaing: li pa ting, lox Siyiex hoek ka Yohan kawn: Zakharix, ka daux tiag daux tu heue:. 3 Mai: nawh hu: daux haktiex rawb rim rawm: Yawdan ku dah ku dee, sidiex gau been krax tawx baptis96, pa doh keud doh sawn: ka phimap tom: pon luan khaing: daux phimap phigrham: heue:. 4 Awm: hoik tiem: daux phuk lai Cao: Jhai: Isayax, gumlox pa ah nin:, 97"Lox pa kok pa yo daux tiag daux tu, cox krax Simiang, yuh krax Nawh rah see heue:. 5 Klawk ku klawk tag sang kieh naog, Gawng ku gawng mai: ton: ku ton: tag sang kieh tiem. Mai: pa kawk pa vawk tag sang kieh see. Mai: krax khluk khlek tag sang kieh plang:. 6 Mai: pui khawm: uik tag sang yaox krax taoh Siyiex heue:." 7 Mawh kheu nan: nawh tom: ah nin: ka cub pui haoh pui hun: pa hoek tix baptis C mai: nawh, "Ceu siuing: pa cai: eue:, mawx nhie: pex to:, son sang luan khaing: pa songrhawm: pa tag sang hoek? 8 Kieh plix plix pa keung: pa doh keud doh sawn: ka phimap phigrham: tokaux tix, paw jah tix ah ka daux tokaux tix Abraham mawh keeing: ex, aux krai ka pex, Siyiex teei simaox in khankix yuh mawh kawn: Abraham ka chix heue:. 9 Yamin kawx moe: hoik koe: ka dex riah num: khaox, mai: khaox pa ang plix plix pa mhawm: khankix khawm: uik, sang kid tix taing sau: daux ngu heue:." 10 Mai: cub pui haoh pui hun: chawk nawh ah nin:, "Phan: mawh nan: ex tag sang yuh ka mawx?" 11 Mai: nawh deeh pawk ah nin: ka kix, "Kieh pui pa koe: sibex ra: pheen: tawx ka pa ang koe: khankix, mai: pui pa koe: priex preem kieh yuh awm: an heue:." 12 Mai: pui koh mau khankix kawx hoek son sang baptis D mai: nawh. Mai: kix chawk ah nin: ka nawh, "Sara cao: gau eue:, ex tag sang yuh ka mawx?" 13 Mai: nawh deeh ah nin: ka kix, "Paw vi teei nie lheu: khaing: pa hoik nhie: pex koh heue:." 14 Pui naing khankix kawx hoek mai: chawk nawh ah nin:, "Mai: ex, ex tag sang yuh ka mawx?" Mai: nawh ah nin: ka kix, "Paw vi khin: tix teei khaing: pui tix kaux kawx. Paw vi deuh phimap pa ang mawh ang meh ka piang pui, mai: kieh rhawm: pex vhah ka mau riang pa pon pex heue:."

15 Mai: yam pui khankix keud jun pot, mai: pui khawm: uik keud daux rhawm: tix grawh grawng: Yohan, mawh nawh Cao: Khrit lie, ang mawh lie. 16 Yohan baox deeh ah nin: ka kix, "Aux baptis E pex ka daux rawm: tete, viang mawh nan: khaix in tag sang hoek Tix kaux, pa nie ting khaing: aux, pie maox kiep Nawh ang aux keung: tix kah. Kaw an tag sang baptis98 pex ka daux Khwan: Singax Singeh mai: daux ngu heue:. 17 Ka daux tawmtaix Nawh koe: bya: yib, mai: Nawh tag kieh nghoxca pa pah Tix singax, mai: Nawh tag sau: nghoxca cie Nawh daux krao:, mai: Nawh tag teei grhip gleeing daux ngu pa ang chix yeet heue:."

18 Nawh teei lox tang: ceu tom: nie sidiex gau lox bwan: gauxrhawm: gauxrhi: ka pui khankix. 19 Viang mawh nan:, kheu ah Yohan ka simiang Herut, grawng: pa teei nawh Herodi moeng pux tix, mai: grawng: ceu pa ang khaw: pa caox caig pa hoik yuh Herut khawm: uik. 20 Nawh baox deeh yuh pa ang khaw:, pa nie lheu: ting khaing: an khawm: uik, pa mawh, pa sau: nawh Yohan daux thawng: heue:.

Yesux hoek Tix com rawm:

3:21-22 koe: daux lai Mth. 3:13-17; Makux 1:9-11, 3:23-38 koe: daux lai Mth. 1:1-17

21 Khaix pui khawm: uik hoik baptis B tix ka rawm:, mai: khaix Yesux kawx hoik baptis,C mai: rawg Tix bwan:, raoma: baoh, 22 mai: Khwan: Singax Singeh lih ka daux riang tokaux, pa awm: sikaux, ka piang Nawh, mai: lox lih khaing: raoma:, "Maix mawh Kawn: pa moh Aux, pa khaw: pa caw rhawm: Aux heue:."

Doeh ceu ru nyiex ma: Yesux

23 Yam tokaux Yesux jah tix sidiex gau, Nawh dex sang koe: tingoe: (30) num. Pui ce: Nawh mawh kawn: Yosiep, pa mawh kawn: Elix. 24 Pa mawh kawn: Mathat, pa mawh kawn: Lewix, pa mawh kawn: Melakhix, pa mawh kawn: Yannax, pa mawh kawn: Yosiep. 25 Pa mawh kawn: Mattalix, pa mawh kawn: Amox, pa mawh kawn: Nahum, pa mawh kawn: Esalix, pa mawh kawn: Nakge, 26 Pa mawh kawn: Maat, pa mawh kawn: Mattalix, pa mawh kawn: Semex, pa mawh kawn: Yosiep, pa mawh kawn: Yodax. 27 Pa mawh kawn: Yohannax, pa mawh kawn: Resax, pa mawh kawn: Zerubabelax, pa mawh kawn: Salutilax pa mawh kawn: Merix. 28 Pa mawh kawn: Melakhix, pa mawh kawn: Atdix, pa mawh kawn: Kosam, pa mawh kawn: Elamodam, pa mawh kawn: Erax. 29 Pa mawh kawn: Yosie:, pa mawh kawn: Eliyaza, pa mawh kawn: Yorim, pa mawh kawn: Matat, pa mawh kawn: Lewix. 30 Pa mawh kawn: Simeon, pa mawh kawn: Yudax, pa mawh kawn: Yosiep, pa mawh kawn: Yanam, pa mawh kawn: Eliakhim. 31 Pa mawh kawn: Mele, pa mawh kawn: Menan, pa mawh kawn: Matathax, pa mawh kawn: Nathan, pa mawh kawn: Dawit. 32 Pa mawh kawn: Yesie:, pa mawh kawn: Obet, pa mawh kawn: Bawzax, pa mawh kawn: Salamon, pa mawh kawn: Nashon. 33 Pa mawh kawn: Aminadap, pa mawh kawn: Aram, pa mawh kawn: Hezaron, pa mawh kawn: Pherit, pa mawh kawn: Yudax. 34 Pa mawh kawn: Yakop, pa mawh kawn: Icak, pa mawh kawn: Abraham, pa mawh kawn: Terax, pa mawh kawn: Nakhaw. 35 Pa mawh kawn: Cerawk, pa mawh kawn: Ragau, pa mawh kawn: Phalek, pa mawh kawn: Hebax, pa mawh kawn: Salax. 36 Pa mawh kawn: KaInan, pa mawh kawn: Aphakcat, pa mawh kawn: Semax, pa mawh kawn: Noax, pa mawh kawn: Lamek. 37 Pa mawh kawn: Mathusalax, pa mawh kawn: Enawk, pa mawh kawn: Zarit, pa mawh kawn: Mahalielelax, pa mawh kawn: KaInan. 38 Pa mawh kawn: Enot, pa mawh kawn: Sethax, pa mawh kawn: Adam, pa mawh kawn: Siyiex heue:.

Lukax

Simin Ting 4

Yesux kham: geu: krax nyaw krax glaw:

4:1-13 koe: daux lai Mth. 4:1-11; Makux 1:12-13

1 Mai: Yesux naog ka Khwan: Singax Singeh, deeh hoek khaing: rawm: Yawdan, mai: Khwan: Cao: tok Nawh hu: ka daux tiag daux tu heue:. 2 Ka daux tipon: (40) ngaix, phicaox nyaw glaw: tix yaox Nawh. Mai: Nawh Cao: ang ih tid tix ka daux singaix an khankix, mai: khaix singaix an khankix hoik naog, Nawh Cao: cairhawm: heue:. 3 Mai: phicaox ah nin: ka Nawh Cao:, "Phan: Maix mawh Kawn: Siyiex tawx lox kieh simaox in mawh khaomun heue:." 4 Mai: Yesux pawk lox ka nawh ah nin:, "Hoik tiem: tix deuh ah nin:, 99'Pui tag im: kheu khaomun nong: nong: ang mawh.'" 5 Mai: phicaox tok Nawh Cao: haok dee lhaong:, mai: jhi: Nawh yaox meung pa koe: ka piang haktiex khawm: uik, ka daux bawg yam tivud ngie. 6 Mai: phicaox baox ah nin: ka Nawh Cao:, "Aux tag tawx Maix siawp sibrawm mai: min: plakngai: pa koe: khankix khawm: uik, mawh kheu hoik tawx kix ka aux, mai: aux tag sang tawx ka kaw pa simie aux tix tawx heue:. 7 Phan: Maix krub ka aux tag mawh cie Maix khawm: uik." 8 Mai: Yesux deeh ah nin: ka nawh, "Hoik tiem: tix deuh ah nin:, 100'Maix tag lai krub ka Simiang Siyiex maix mai: yuh son Nawh khaing: heue:.'" 9 Mai: phicaox baox tok Nawh Cao: hu: ka veng Yerusaliem, mai: deuh Nawh piang dee choek nyiex bwan:, mai: ah nin: ka Nawh, "Phan: Maix mawh Kawn: Siyiex, kieh tokaux Tix rau sen:. 10 Kheu hoik tiem: tix deuh ah nin:, 101'Nawh tag tawm: lox grawh grawng: Maix ka kawncau Siyiex Nawh khankix, son sang kieh pau Maix. 11 Mai: kix tag yaog Maix ka piang tawm: taix kix, son ang caong Maix sang krox ka simaox' heue:." 12 Mai: Yesux baox pawk lox ah nin: ka nawh, "Lox baox hoik deuh tix ah nin:, 102'Maix paw vi nyaw ka Simiang Siyiex maix.'" 13 Khaix hoik nyaw phicaox tix yaox ku ceu, nawh lih hu: khaing: Nawh Cao: tix vong heue:.

Sidiex: gau ka daux meung Galilie:

14 Mai: Yesux naog siawp sibrawm Khwan: Cao: mai: deeh ing: ka daux Meung Galilie:. Mai: min: plakngai: grawh grawng: Nawh tah hu: ku dah ku dee hawt praok sivie tan: khawm: uik heue:. 15 Mai: Nawh Cao: sidiex gau ka daux nyiex sidiex kix khankix, mai: pui khawm: uik yaogyaw Nawh heue:.

16 Mai: Nawh Cao: deeh hoek ka veng Nazariet, dee eei: Nawh ting, mai: Nawh laig ka daux nyiex sidiex, singaix twah, awm: sax koe: been Nawh, mai: cung tix phat lai heue:. 17 Mai: pui tawx ka Nawh Cao: phuk lai Cao: Jhai: Isayax. Mai: Nawh plak mai: yaox dee hoik tiem: ah nin:, 10318 "Khwan: Simiang ot ka piang Aux, mawh kheu hoik groi Nawh rawmbee ka Aux, son sang kieh sidiex gau lox gauxrhawm: gauxrhi: ka pui hot pui sibhawm: khankix heue:. Nawh hoik ploi: kieh Aux krai grawh grawng: pa pluat ploi: ka pui pa hoik laung. Mai: son sang kieh pui dug ngai: deeh yaox heue:. Yuh ka mawx son sang ploi: ka pui se pui sang heue:. 19 Yuh ka mawx son sang krai grawng: jhong: num pa khaw: pa caw mai: Simiang heue:." 20 Mai: Nawh Cao: deeh pua: lai mai: tawx ka cao: pau nyiex sidiex, mai: ngawm Tix heue:. Mai: pui pa ot ka daux nyiex sidiex khawm: uik gong: tix jhak Nawh heue:. 21 Mai: Nawh Cao: jah tix ah nin: ka kix, "Lox phuk lai sigang: khri: in hoik naog ka daux yhaok pex singaix heue:." 22 Mai: khawm: uik kham: mhai: sakse: ka Nawh grawng: in mawh pa mawh pa meh, mai: kix daox deng: ka lox bwan: pa lih khaing: daux jheeh Nawh Cao: mai: ah nin:, "In ang mawh kawn: Yosiep lie?" 23 Mai: Nawh Cao: ah nin: ka kix, "Phan: keud tix yaox pex tag sang ah lox phektem: pa ah nin: ka Aux tete 'Cao: chix sidah eue:, cox tokaux tix moi:, ceu pa yuh ka mawx ang ah, pa hoik mhong: ex grawh grawng: pa yuh Maix: ka daux veng Kapeniom, daux meung tokaux Tix, dee in kawx, yuh liak.'" 24 Mai: Nawh Cao: baox ah nin:, "Aux krai lox tete telai ka pex, ang koe: cao: jhai: tix kaux kawx, pa sang rieb pui tix teei ka daux meung tokaux tix heue:. 25 Viang mawh nan: Aux krai lox pa mawh pa meh ka pex, daux ju bawg yam singaix Eliyax, koe: miexmai tom: nie ka daux Isarilax, yam nyeep raoma: loe: num mai: liah khix, mai: yam kin: sibhawm: praix khawm: uik. 26 Viang mawh nan: ang ploi: Eliyax hu: ka kix tix kaux kawx, lheu: khaing: bon: tix kaux pa mawh miexmai, ka daux veng Zarepthax ka daux meung Sidom heue:. 27 Mai: daux ju bawg yam cao: Jhai: Elishie: koe: pui sipawg tom: nie ka daux Isarilax, viang mawh nan: lheu: khaing: Neman pui Surix, ang kieh kix tix kaux kawx singax heue:." 28 Mai: yam kix pa ot ka daux nyiex sidiex khawm: uik, mhong: grawh grawng: ceu in khankix, kix kied song: rhawm: song: rhi: heue:. 29 Mai: kix yaog tix kaoh mai: grheu: Nawh Cao: lih khaing: daux veng kix, mai: viex Nawh hu: ka piang choek gawng pa tang veng kix tix kah, son sang taing Nawh rau tan:. 30 Viang mawh nan: Nawh Cao: hu: preeng: sinax kix, mai: lih hu: heue:.

Yesux ghreu: phi: pa seeing: pa brai:

4:31-37 koe: daux lai Makux 1:21-28

31 Mai: Nawh Cao: lih hu: ka veng Kapeniom pa mawh veng tix veng ka daux meung Galilie:, mai: Nawh sidiex gau kix singaix twah. 32 Mai: kix daox deng: ka lox sidiex lox gau Nawh Cao:, mawh kheu lox Nawh mawh pa koe: siawp sibrawm heue:. 33 Mai: daux nyiex sidiex kix tan:, koe: pui pa laig phicaox pa seeing: pa brai: tikaux, mai: nawh kok nawh yo lox sinum ah nin:, 34 "Yesux Pui veng Nazariet eue:, ex koe: pa yuh mai: Maix ceu pa tix? Maix hoek tix yuh ex laux lie? Kaw pa Singax Singeh Siyiex eue:, aux hoik tawng Maix mawh mawx" 35 Mai: Yesux ah ka nawh yuh nin:, "Paw nye:, lih hu: khaing: daux nawh heue:." Mai: phicaox an kieh pui an goh sinax kix, mai: lih hu: khaing: daux nawh, ang lai kieh nawh saux ceeix kawx heue:. 36 Mai: pui khawm: uik daox deng: kah, tom: kix tix kaux hoik tix kaux chawk paox tix ah nin:, "In mawh lox pa yuh ka mawx? Mawh kheu Nawh koe: siawp sibrawm tawx lox ka phi: pa seeing: pa brai: khankix, mai: kix lih hu: heue:. 37 Mai: lox grawh grawng: pa yuh Nawh Cao: tah hu: ku dah ku dee sivie tan: heue:.

Cox pai: pui saux pui ngia

4:38-41 koe: daux lai Mth. 8:14-17, 4:38-43 koe: daux lai Makux 1:29-38

38 Mai: Nawh Cao: yaog tix kaoh khaing: nyiex sidiex, mai: laig ka daux nyiex Simon. Mai: miex moeng Simon kin: saux, kheu nan: kix tom: khyox khaw: Nawh Cao: son kiex heue:. 39 Mai: Nawh Cao: cung liiep bon: an, mai: ah ka jhawm: saux an mai: jhawm: saux an grai:, mai: dom: mawx dom: an kiex yaog tix kaoh khan: kheu: ka kix heue:.

40 Mai: yam uik klip singaix kix khawm: uik pa koe: pui saux pui ngia ku ceu ku cawng viex kix hoek ka Nawh Cao:, mai: deuh Nawh taix Tix piang kix ku kaux, mai: kieh kix moi: heue:. 41 Mai: phicaox kawx lih hu: khaing: pui tom: nie, mai: kok yo ah nin:, "Maix mawh Kawn: Siyiex heue:." Mai: Nawh Cao: ah ka kix, ang kieh kix sikah, kheu hoik tawng kix mawh Nawh Cao: Khrit heue:.

42 Yam hoik riang praix Nawh lih hu: ka daux tiag tix dah, mai: pui haoh pui hun: khankix hawt sawg Nawh Cao:, mai: hoek ka Nawh, son sang kieh sang kang: Nawh, yuh ka mawx son ang Nawh lih hu: khaing: kix heue:. 43 Viang mawh nan: Nawh Cao: ah nin: ka kix, "Aux tag sang sidiex gau lox gauxrhawm: gauxrhi: pa dex pa dawd mai: Meung Siyiex khawm: ka daux tang yaong: tang: veng khankix, mawh kheu hoik ploi: Aux son an heue:."

44 Mai: Nawh Cao: hu: sidiex gau daux nyiex sidiex khankix ka daux meung Galilie: heue:.

Lukax

Simin Ting 5

Kok Tix teei ka kawncau khankix

5:1-11 koe: daux lai Mth. 4:18-22; Makux 1:16-20; Yohan 1:40-42

1 Yam cung Nawh Cao: dex rawm: nhawng: Gennesariet cub pui haoh pui hun: theet nyheen: Nawh, son sang mhong: gumlox Siyiex. 2 Mai: Nawh Cao: yaox reu ra: lhang: praok nhawng:, viang mawh nan: pui teei kax khankix hoik lih khaing: reu an, mai: sidaux rub cie tix heue:. 3 Mai: Nawh Cao: laig ka daux reu an tix lhang:, pa mawh cie Simon, mhaing: nawh greed reu khaing: praok ceeix. Mai: Nawh ngawm tan: mai: sidiex gau ka cub pui haoh pui hun: khaing: daux reu an heue:. 4 Mai: khaix hoik sidiex Nawh Cao:, Nawh ah nin: ka Simon, "Gah reu hu: dee raux, mai: ploi: rub maix khankix, son sang pon kax heue:." 5 Mai: Simon deeh pawk lox ah nin:, "Simiang eue:, ex hoik nyhap mao leeing: sawm: mai: ang pon tid tix, viang mawh nan: kheu lox Maix aux tag ploi: rub khankix heue:." 6 Mai: yam kix yuh nan:, kix pon krix kax tom: nie, mai: rub kix jah tix griah heue:." 7 Mai: kix yib taix ka paox tix, pa ot daux reu tang: lhang: an, yuh ka mawx son kix sang hoek tix teem: tix heue:. Kix hoek mai: naog reu khawm: ra: lhang:, tom: reu an kiex jah tix com heue:. 8 Yam yaox Simon Petrux ceu an, nawh krub dex ngawng Yesux ah nin:, "Simiang eue:, lih hu: khaing: aux liak, kheu mawh aux pui ting map ting grham: heue:." 9 Kheu nawh mai: pui pa ot tau mai: nawh khawm: uik kied daox deng: kah, grawng: kax pa hoik pon kix. 10 Yakop mai: Yohan kawn: Zebedie:, pa mawh paox pie Simon kawx, ka awm: an heue:. Mai: Yesux ah nin: ka Simon, "Paw vi lhat, jah dom: yamin maix tag sang mawh pui teei pui heue:." 11 Yam kix hoik viex reu kix ka praok, kix prah grham: khawm: uik, mai: hawt Nawh Cao: heue:.

Grawng: pui saux sipawg mai: pui saux yum taix yum caong

5:12-14 koe: daux lai Mth. 8:2-4; Makux 1:40-44;

12 Yam Nawh Cao: ot ka daux veng khankix tix veng, jhak heue:, pui pa naog sipawg tix kaux, yam yaox nawh Yesux, nawh grux gup, mai: khyox Nawh Cao: ah nin:, "Simiang eue:, phan: Maix koe: rhawm: tix cox aux kieh aux singax Maix chix heue:." 13 Mai: Nawh Cao: nyeu taix Tix teeh ka kaw an ah nin:, "Aux koe: rhawm: heue:. Kieh maix singax heue:." Mai: jhawm: saux sipawg an grai: dom: mawx dom: an. 14 Mai: Nawh Cao: nhie: nawh paw krai ka pui tix kaux kawx, viang mawh kawx nan: Nawh ah, "Hu: jhi: tokaux tix yaox ka cao: giex kaing: li, mai: tan lu kheu hoik singax mai: awm: pa hoik nhie: Mose, son sang mawh mhai: sakse: ka kix heue:." 15 Viang mawh nan: grawh grawng: Nawh Cao: baox nie tah hu: ku dah ku dee, mai: pui haoh pui hun: khrawm: paox tix hoek ka Nawh, son sang nghiet sang mhong: Nawh, mai: son sang kieh Nawh cox jhawm: saux jhawm: ngia tix moi: heue:. 16 Viang mawh nan: Nawh Cao: lih hu: daux tiag daux tu mai: rawg bwan: heue:.

Grawng: cox Yesux pui yum taix yum caong

5:18-26 koe: daux lai Mth. 9:2-8; Makux 2:3-12

17 Ka daux singaix an khankix Nawh Cao: sidiex gau, mai: Pharishie: mai: cao: gau grawng: lox been khankix ngawm dex tan:, pa hoik lih hoek khaing: yaong: ku yaong: ka daux meung Galilie:, mai: meung Yudax, mai: veng Yerusaliem. Mai: siawp sibrawm Simiang koe: tau mai: Nawh son sang cox jhawm: saux jhawm: ngia moi: heue:. 18 Mai: jhak heue:, pui viex pui tix kaux pa koe: jhawm: saux pa yum taix yum caong pa it piang ku:, mai: kix sawg tix viex nawh laig tix een: sivoe Nawh Cao: heue:. 19 Mai: kix ang yaox dee sang pon viex nawh laig, kheu cub pui haoh pui hun:, kix tom: haok piang nyiex, mai: koi ploi: nawh sinax beung: khawm: ku: it ka greung pui sivoe Yesux heue:. 20 Yam yaox krax yumrhawm: kix, Nawh Cao: ah nin:, "Pui eue:, hoik pluat phimap maix heue:." 21 Pui tiem: lai mai: Pharishie: khankix keud tix ah nin:, "Kaw pa ah lox sa lox lao in mawh mawx? Lheu khaing: Siyiex nong: nong: pui mawx pa chix ploi: phimap?" 22 Viang mawh nan: Yesux tawng grawh grawng: pa keud pa sawn: kix, mai: ah nin: ka kix, "Pex keud pa yuh ka mawx ka daux rhawm: tix? 23 Lox pa yuh ka mawx lheu: yie tix ah, 'Hoik pluat phimap maix heue:,' yie tix ah lie? Phan: ang mawh nan:, 'Hoik pluat phimap maix heue:,' yie tix ah lie? Phan: ang mawh nan:, ' kaoh mai: hu: heue:' yie tix ah lie? 24 Viang mawh kawx nan:, yuh ka mawx pex tag sang tawng grawh grawng: Kawn: kawn: pui, koe: siawp sibrawm tix chix pluat phimap ka piang haktiex, (Nawh Cao: baox ah ka kaw pa yum taix yum caong an). 'Aux ah ka maix, kaoh, mai: teei kraung it maix, mai: deeh ing: ka nyiex maix heue:.'" 25 Mai: nawh kaoh dom: mawx dom: an, sivoe kix, mai: teei kraung it nawh piang, mai: lih ing: ka nyiex tix, yaogyaw bwanson: Siyiex heue:. 26 Mai: kix khawm: uik kied daox deng: kah, mai: yaogyaw bwanson: Siyiex, mai: kix naog krax lhat krax graung kah, ah nin:, "Ex hoik yaox ceu pa ang sax yaox singaix heue:."

Pa kok ka Lewix

5:27-32 koe: daux lai Mth. 9:9-13; Makux 2:14-17

27 Mai: khaix ceu an khankix Nawh Cao: lih hu: mai: yaox pui koh mau tix kaux, pa kaux Lewix, ngawm dee koh mau, mai: ah nin: ka nawh, "Hawt khaix Aux heue:." 28 Mai: nawh prah khawm: uik mai: kaoh hawt khaix Nawh Cao: heue:.

29 Mai: Lewix yuh poi ting ka daux nyiex tix, son Naw Cao. Pui koh mau haoh hun: mai: pui tang: kaux khankix ngawm neung tix sawm: tau mai: kix heue:. 30 Pharishie: mai: pui tiem: lai khankix deuh phimap ka kawncau Nawh khankix ah nin:, "Pex lai sawm: rheep tau mai: pui koh mau mai: pui ting map ting grham: yuh ka mawx?" 31 Mai: Yesux pawk lox ah nin: ka kix, "Pui pa nyawm ot nyawm koe:, ang lo pui pa chix sidah dim:, viang mawh kawx nan: mawh pui pa koe: jhawm: saux jhawm: ngia khaing: pa lo pui chix sidah. 32 Aux hoek son sang kok pui rah pui see ang mawh, viang mawh kawx nan: hoek son sang doh keud doh sawn: pui koe: map koe: grham: ka phimap tix heue:."

Yesux krai grawng: twah pa ih pa un:

5:33-39 koe: daux lai Mth. 9:14-17; Makux 2:18-22

33 Mai: kix ah nin: ka Nawh Cao:, "Kawncau Yohan khankix twah pa ih pa un: mai: rawg bwan: lawx lawx. Kawncau Pharishie: khankix kawx yuh awm: an, viang mawh kawx nan: kawncau Maix ih mai: nyaux heue:." 34 Mai: Yesux chawk kix ah nin:, "Pex chix kieh paoxgrawm pui pa yuh ka kapaox twah pa ih pa un: yam kawn: ot kaw pa yuh kapaox mai: kix lie? 35 Viang mawh kawx nan:, bawg yam singaix tag sang hoek, yam tag sang teei kaw pa yuh kapaox khaing: kix;, mai: ka daux singaix an khankix, kix tag sang twah pa ih pa un: heue:." 36 Lox phektem: kawx Nawh Cao: teei tix sidiex ka kix, ah nin:, "Pui tix kaux kawx ang sax riah kraung khraox tix bliah mai: blaox ka kraung prim:, phan: yuh nan: kienie, nawh tag kieh pa khraox griah, mai: bliah pa teei khaing: kraung pa khraox an kawx, tag ang khaw: mai: pa prim:. 37 Mai: pui tix kaux kawx, ang sax teei rawm: plix siiet pa khraox sau: ka daux chee: hak pa prim: khankix. Phan: yuh nan: kienie, rawm: plix siiet pa khraox an tag kieh chee: hak bih, mai: rawm: plix siiet tag hieh, mai: chee: hak tag laux heue:. 38 Viang mawh kawx nan:, rawm: plix siiet pa khraox tag lai sau: ka daux chee: hak pa khraox, mai: khawm: ra: ceu tag ang laux ang leeing: heue:. 39 Mai: pui pa hoik nyaux rawm: plix siiet pa prim:, ang simie tix cie rawm: plix siiet pa khraox. Kheu nawh ah, 'Pa prim: lheu: mhawm: heue:.'"

Lukax

Simin Ting 6

Yesux mawh Simiang ngaix twah

6:1-11 koe: daux lai Mth. 12:1-14; Makux 2:23-3:6

1 Daux singaix twah tix singaix Nawh Cao: hu: preeng: ka daux ma: nghoxca, mai: kawncau Nawh khankix caik sigleem: nghoxca, mai: boi: tix ih daux tawm: taix tix heue:. 2 Pharishie: tiblah ah nin:, "Yuh pa tix pex lai yuh pa ang khaw: mai: been li singaix twah?" 3 Mai: Yesux pawk lox ah nin: ka kix, "Ang pex sax phat grawh grawng: pa yuh Dawit, yam nawh mai: pui pa ot tau mai: nawh kied cairhawm: lie? 4 Grawh grawng: yam laig nawh ka daux nyiex Siyiex mai: teei tix ih khaomun, mai: tawx ka khawm: pui pa ot tau mai: nawh, pa ang pui khaw: tix ih, lheu: khaing: cao: giex kaing: li nong: nong:, lie?" 5 Mai: Nawh Cao: baox ah nin: ka kix, "Kawn: kawn: pui mawh Simiang singaix twah heue:."

6 Ka daux singaix twah tang:, tix singaix, Nawh Cao: laig ka daux nyiex sidiex mai: sidiex gau heue:. Mai: dee an koe: pui tix kaux pa taix khawn: dawm: nawh hoik yum hoik kroh. 7 Pui tiem: lai mai: Pharishie: khankix, jhak tix yaox Nawh Cao:, sang cox Nawh kaw an moi: singaix twah lie, ang cox lie, yuh ka mawx son sang yaox dee deuh phimap ka Nawh Cao: heue:. 8 Viang mawh kawx nan: Nawh Cao: tawng ceu pa keud kix, mai: ah nin: ka pui pa hoik yum kroh taix tix, "Kaoh cung ka sinax tin: heue:." Mai: nawh kaoh cung heue:." 9 Mai: Yesux ah nin: ka kix, "Aux sang chawk pex, khaw: mai: been li tix yuh pa mhawm: singaix twah lie, phan: ang mawh nan: tix yuh laux lie? Khaw: tix taoh ju lie phan: ang mawh nan: khaw: tix pah yum lie?" 10 Mai: Nawh Cao: jhak vung viang ka piang kix khawm: uik, mai: ah nin: ka kaw an, "Nyeu taix maix heue:," mai: nawh yuh nan:, mai: taix nawh deeh mhawm: heue:. 11 Viang mawh nan: kix naog krax songrhawm: songrhi:, mai: kix kum: paox tix grawng: kix sang pon yuh ka mawx ka Yesux heue:.

Laug ka kawncau mausoi: kao: kaux ra:

6:13-16 koe: daux lai Mth. 10:2-4; Makux 3:16-19; Kawncau 1:13

12 Daux bawg yam singaix an khankix, Nawh Cao: haok ka gawng son sang rawg bwan:, mai: Nawh rawg bwan: ka Siyiex leeing: lang: sawm: heue:. 13 Mai: yam hoik riang praix, Nawh Cao: kok kawncau mausoi: Nawh khankix, mai: Nawh laug kao: kaux ra: ka daux kix, pa sum: Nawh ceukaux kawncau Nawh pa ting. 14 Kix mawh Simon pa sum: Nawh Cao: ceukaux Petrux, mai: pux nawh Andare, mai: Yakop, mai: Yohan, mai: Philipux, mai: Bathawlamie:. 15 Mai: Mathiex, mai: Thomax, mai: Yakop kawn: Alaphie:, mai: Simon pa kok mawh Zelut. 16 Mai: Yudax pux Yakop, mai: Yudax Isakariut pa mawh kaw pa tik pa tawx Nawh Cao: heue:. 17 Nawh Cao: lih khaing: gawng tau mai: kix, mai: cung dee lung:, mai: kawncau mausoi: Nawh haoh hun:, mai: pui tom: nie pa kaoh khaing: meung Yudax khawm: uik mai: veng Yerusaliem mai: praok rawm: sigrit sigra: veng Turux mai: veng Sidom, khankix hoek tix nghiet tix mhong: Nawh Cao:, mai: son sang kieh Nawh cox jhawm: saux jhawm: ngia kix moi: heue:. 18 Mai: kix pa kham: geu: kheu phi: pa seeing: pa brai: khankix pon tix moi: nyawm ot nyawm koe: heue:. 19 Mai: cub pui haoh pui hun: khawm: uik sawg tix teeh Nawh Cao:, kheu siawp sibrawm lih khaing: Nawh mai: kieh kix moi: khawm: uik heue:.

Grawng: bwanson: mai: krax kha: rhawm:

6:20-23 koe: daux lai Mth. 5:3-12

20 Mai: Nawh Cao: jhak ka piang kawncau Nawh khankix, ah nin:, "Pex pa hot pa sibhawm: khankix koe: bwanson: heue:, kheu Meung Siyiex mawh cie pex heue:. 21 Pex pa cairhawm: yamin khankix, koe: bwanson: heue:, kheu pex tag sang sak heue:. Pex pa yiem grai yamin, koe: bwanson: heue:, kheu pex tag sang nyiah. 22 Yam pui koeng ka pex, mai: gwieh pex grheu: pex khaing: cub kix, mai: sa lao pex, mai: tik ceukaux pex awm: mawh pa caox, mawh kheu Kawn: kawn: pui, pex koe: bwanson: heue:. 23 Gauxrhawm: ka daux singaix an heue:, gauxrhawm: mai: jaloh kah heue:. Mawh kheu, jhak heue:, bwanson: pex kied ting ka daux meung raoma: heue:. Kheu tax du kix dix, hoik yuh awm: an ka cao: jhai: khankix heue:. 24 Viang mawh kawx nan: pex pa mawh cao: mi, tag kharhawm: kharhi: heue:, kheu hoik pon pex pa nyawmrhawm: nyawmrhi: cie pex heue:. 25 Pex pa hoik sak hoik naog yamin, tag kharhawm: kharhi: heue:, kheu pex tag sang cairhawm: heue:. Pex pa nyiah yamin, tag kharhawm: kharhi: heue:, kheu pex tag sang khirhawm: mai: yiem grai heue:. 26 Yam pui khawm: uik yaw mai: ah pa mhawm: pa mhiem: grawng: pex, pex tag kharhawm: kharhi: heue:, mawh kheu tax du kix dix, hoik yuh awm: an ka cao: jhai: pa ang mawh ang meh khankix heue:.

Grawng: moh ka pui koeng:

6:29-30 koe: daux lai Mth. 5:39-42

27 "Viang mawh nan: Aux krai ka pex pa mhong: khankix, moh ka pui pa koeng ka pex, mai: yuh pa mhawm: son kix pa koeng ka pex heue:. 28 Nawb bwan: ka pui pa lawg ka pex, rawg bawn:, son kix pa yuh pa ang khaw: ang jiet ka pex heue:. 29 Ka kaw pa simang: sibax maix tix plak, tang: plak kawx, baox tawx tix yaox heue:. Mai: ka kaw pa teei prux vhua: maix, sibex maix kawx, paw kieh paw thiang: tix tawx kah heue:. 30 Tawx ka pui pa rawg pa mhaing: ka maix ku kaux, mai: kaw pa teei kraung cie maix, paw lai deeh rawg deeh mhaing: kix khaing: nawh heue:. 31 Mai: awm: simie pex pui yuh ka tix, pex kawx, yuh awm: an ka kix heue:. 32 Mai: phan: pex moh ka pui pa moh ka pex khaing:, pex tag koe: bwanson: yuh ka mawx? Mawh kheu pui ting map ting grham: khankix kawx, deeh moh ka pui pa moh ka kix heue:. 33 Mai: phan: pex yuh pa mhawm: ka pui pa yuh pa mhawm: ka pex khaing:, pex tag koe: bwanson: yuh ka mawx? Mawh kheu pui ting map ting grham: khankix kawx, yuh awm: an heue:. 34 Mai: phan: pex tawx yaog yaing ka pui, pa keud pex tix deeh pon khaing:, pex tag koe: bwanson: yuh ka mawx? Mawh kheu pui ting map ting grham: khankix kawx, tawx yaog yaing ka paox pui ting map ting grham: khankix, tix deeh pon awm: pa tawx kix heue:. 35 Viang mawh kawx nan: moh ka pui pa koeng ka pex, mai: yuh pa mhawm:, mai: tawx yaog yaing paw keud tix deeh pon tid tix, mai: bwanson: pex tag kied ting kied lhaong:, mai: pex tag mawh kawn: Kaw pa ting pa lhaong: khaing: khawm: uik heue:. Mawh kheu Nawh yuh bwan: yuh son ka pui pa ang tawng bwan: tawng son mai: ka pui caox khankix heue:. 36 Mawh kheu nan:, awm: Keeing: pex koe: krax caoxrhawm: caoxrhi:, pex kawx kieh koe: krax caoxrhawm: caoxrhi: heue:.

Grawng: pa prawng pa ca:

6:37-42 koe: daux lai Mth. 7:1-5

37 Paw prawng paw ca:, yuh ka mawx son ang pex sang hoek krax prawng krax ca:. Paw prawng phimap pui, mai: pex tag ang hoek krax prawng phimap heue:. Pluat ploi: phimap ka pui, mai: pex tag hoek krax pluat ploi: heue:. 38 Tawx ka pui, mai: tag sang tawx ka pex pa tong: pa tiag mhawm: mhawm:, pa hoik yeen, mai: pa hoik yungyiang:, mai: pa kreh, pui tag sang tawx ka naok pex heue:. Mawh kheu pex tong: pex tiag tix tawx ka pui tang: kaux miex ding, tag sang baox deeh tong: deeh tiag tix tawx ka pex yuh nan: heue:."

39 Nawh Cao: kawx krai lox phektem: pa ah nin: ka kix, "Pui dug ngai: chix jhi:, pui pa dug ngai: yaox krax lie? Kiex khawm: ra: tag rau daux o: ang mawh lie? 40 Kawncau ang lheu: ting khaing: sara cao:gau tix, viang mawh kawx nan: kawncau ku kaux, yam hoik grum tawng, nawh tag awm: sara cao: gau tix heue:. 41 Mai: yuh ka mawx maix jhak kuh ngai: pa iak daux ngai: puxaik maix, mai: ang keud grawh grawng: nuk pa koe: daux ngai: tokaux tix? 42 Phan: ang mawh nan:, maix chix ah ka puxaik maix, 'Puxaik eue:, kieh aux teei tix tik kuh ngai: maix,' yam maix ang yaox nuk pa koe: ka daux ngai: tokaux tix, yuh ka mawx? Pui pie pui lhen: eue:, teei tix tik nuk pa koe: daux ngai: maix ka: ha:, mai: maix tag sang yaox mhawm: mhawm:, son sang teei kuh pa koe: daux ngai: puxaik maix heue:.

Grawng: khaox mai: plix

6:43-44 koe: daux lai Mth. 7:16,18,20

43 Grawh grawng: nawh, khaox pa mhawm: pa plix plix pa ang mhawm: ang koe: tix khaox kawx, mai: khaox pa ang mhawm: pa plix plix pa mhawm:, ang koe: tix khaox kawx heue:. 44 Mawh kheu chix tawng khaox ku khaox ka plix nawh heue:. Grawh grawng: nawh, pui ang sax pieh plix ruh khaing: pang: kat, mai: ang sax pieh plix siiet khaing: katsai: brex. 45 Pui pa mhawm: viex ceu pa mhawm: lih khaing: daux rhawmrhi: nawh dee deuh pa mhawm:, mai: pui pa caox viex ceu pa caox lih khaing: dee deuh pa caox heue:. Kheu jheeh chix krai ceu pa koe: daux rhawm: tom: naog kreh heue:.

Grawng: num: jaong nyiex

6:47-49 koe: daux lai Mth. 7:24-27

46 "Pex lai kok Aux, 'Simiang eue:, Simiang eue:,' mai: ang yuh ceu pa krai Aux khankix yuh ka mawx? 47 Pui ku kaux daux pui pa hoek ka Aux, pa mhong: gumlox Aux, mai: hawt tix yuh khankix, Aux tag jhi: pex yaox nawh awm: kaw pa yuh ka mawx. 48 Nawh awm: pui pa sum: nyiex tix lhang:, pa kaong: tom: raux mai: yuh num: ka piang simaox, mai: yam haok hwan: rawm:, mai: chun: ka nyiex an, ang chix kieh nawh yungyiang:, mawh kheu hoik sum: nyiex an ka piang simaox heue:. 49 Viang mawh nan: pui pa mhong: lox Aux, mai: ang hawt tix yuh, tag awm: pui pa sum: nyiex nawh ka piang tiex mai: ang koe: num:, mai: yam chun: rawm: nawh, nyiex an goh daux rawm: dom: mawx dom: an, mai: pa laux pa leeing: nyiex an kied ting heue:."

Lukax

Simin Ting 7

Cox pai: ka siliex cao: kaing: naing

7:1-10 koe: daux lai Mth. 8:5-13

1 Khaix hoik sidiex gau Nawh Cao:, kieh pui khankix mhong: lox ceu pa krai Nawh, Nawh laig ka daux veng Kapeniom heue:.

2 Mai: siliex cao: giex kaing: naing tix kaux, pa kied moh nawh, saux dex sang yum. 3 Mai: yam nawh mhong: grawh grawng: Yesux, nawh ploi: kuad song: pui Yudax khankix hu: rawg mhaing: ka Nawh Cao:, nhie: Nawh hoek tix taoh siliex nawh heue:. 4 Mai: yam hoek kix ka Yesux, kix khyox khaw: Nawh Cao: mhawm: mhawm: ah nin:, "Nawh keung: tix pon, pa yuh Maix ceu in son nawh heue:. 5 Kheu moh nawh ceu ex, nawh hoik yuh nyiex sidiex son ex heue:." 6 Mai: Yesux hu: tau mai: kix, mai: yam hoek Nawh Cao: dee ang awt singai khaing: nyiex nawh, cao: giex kaing: naing an ploi: paoxgrawm nawh hu: tix ah nin: ka Nawh Cao:, "Simiang eue:, paw vi baox nyhap rhawm: Maix, kheu ang aux keung: tix kieh Maix hoek kreed greem: braux nyiex aux. 7 Mawh kheu nan: aux keud tokaux tix ang keung: tix hoek ka Maix, viang mawh nan: pie tawx Maix lox khaing:, mai: siliex aux tag moi: heue:. 8 Kheu aux mawh pui ot greem: simiang kawx, aux koe: pui naing greem: aux heue:. Phan: aux nhie: tix kaux hu:, nawh hu:, mai: phan: aux nhie: tang: kaux hoek, nawh hoek heue:. Mai: phan: aux nhie: siliex aux yuh ceu in, nawh yuh heue:." 9 Mai: yam mhong: Yesux ceu an khankix, Nawh daox deng: ka nawh, mai: veeh tix jhak cub pui haoh pui hun: pa hawt khaix Nawh Cao: mai: ah nin:, "Aux krai ka pex, ang Aux sax yaox pui pa yumrhawm: niex ding niex dod ka daux pui Isarilax heue:." 10 Mai: yam pui pa ploi: cao: giex kaing: naing khankix deeh hoek ka nyiex, kix yaox uik moi: siliex an heue:.

Yesux kieh kawn: miexmai kaoh im:

7:11-16 koe: daux lai 1.Simiang 17:17-24; 2.Simiang 4:33-37; Makux 5:21-24, 35-43; Yohan 11:1-44

11 Khaix singaix an pasax, Nawh Cao: hu: ka veng tix veng pa kok mawh NaInax, mai: kawncau Nawh khankix, mai: cub pui haoh pui hun: hu: tau mai: Nawh Cao: heue:. 12 Yam Nawh Cao: hoek dex ka siviex veng, jhak heue:, kix klawm: pui yum lih tix kaux, pa mawh kawn: miex nawh tix kaux khaing:, mai: miex nawh mawh miexmai, mai: pui veng an tom: nie ot tau mai: kiex heue:. 13 Yam yaox Simiang ka bon: an Nawh Cao: caoxrhawm: ka kiex, mai: ah nin: ka kiex, "Paw vi yiem heue:." 14 Mai: Nawh Cao: hoek mai: teeh ka lawng: ka klawm: an, mai: kix pa klawm: nawh cung kaog mhawm: mhawm: heue:. Mai: Nawh Cao: ah nin:, "Sinaw eue:, Aux krai ka maix, kaoh heue:." 15 Mai: kaw pa hoik yum an kaoh ngawm mai: jah tix sikah heue:. Mai: Nawh Cao: teei nawh tawx ka miex nawh heue:. 16 Mai: pui khawm: uik lhat graung kah, mai: kix yaogyaw Siyiex ah nin:, "Cao: Jhai: pa ting hoik lih sinax ex tix kaux, mai: Siyiex hoik hoek tix jhak pui cie Nawh heue:." 17 Mai: lox grawh grawng: pa yuh Nawh Cao: ceu in, tah hu: daux meung Yudax khawm: uik, mai: sivie tan: ku dah ku dee heue:.

Grawng: Yohan cao: com rawm:

7:18-35 koe: daux lai Mth. 11:2-19

18 Mai: kawncau Yohan khankix krai grawh grawng: ceu in khawm: uik heue:. 19 Mai: Yohan kok kawncau tix ra: kaux, ploi: kiex hu: ka Yesux, kieh chawk ah nin:, "Maix mawh Kaw pa tag sang hoek an lie, phan: ang mawh nan: ex tag sang krox tix yaox son tang: kaux lie?" 20 Mai: yam pui khankiex hoek ka Nawh Cao: kiex ah nin:, 'Yohan cao: baptis104 ploi: yiex hoek ka Maix, son sang chawk ah nin:, `Maix mawh Kaw pa tag sang hoek an lie, phan: ang mawh nan: ex tag sang krox tix yaox son tang: kaux lie?'" 21 Ka daux bawg yam nari an, Nawh Cao: cox jhawm: saux jhawm: ngia tom: nie ceu, mai: jhawm: saux preng khankix, mai: pa laig phicaox phicaig khankix, mai: Nawh Cao: cox pui dug ngai: haoh hun:, kieh deeh chix yaox heue:. 22 Mai: Yesux pawk lox ah nin: ka kiex, "Pax hu: mai: krai ka Yohan grawh grawng: ceu pa mhong: pa yaox pax, pui dug ngai: pon tix deeh yaox, pui laux caong pon tix deeh hu:, pui sipawg deeh kieh singax, pui lheet yhaok deeh chix mhong:, mai: pui pa hoik yum deeh kieh kaoh im:, mai: sidiex gau ka pui hot pui sibhawm: kieh mhong: lox bwan: gauxrhawm: gauxrhi: heue:. 23 Mai: pui mawx ang ah, kaw pa ang yaox dee sideeing dee lauxrhawm: ka daux Aux, koe: bwanson: heue:."

24 Mai: khaix hoik ing: kawncau Yohan khankiex, Nawh Cao: jah tix sidiex gau grawh grawng: Yohan, ka cub pui haoh pui hun: khankix, "Pex lih hu: daux tiag daux tu tix jhak pa tix? Pex hu: jhak gawng: priem pa phlu: bhaung: mai: vukvied lie? 25 Phan: ang mawh nan: pex lih hu: son sang yaox pa tix? Hu: son sang yaox pui pa ceep kraung pa awn: lie? Jhak heue:, kix pa ceep kraung pa jiet mhawm:, mai: pa ih priex preem pa nyawm, ot ka daux nyiex simiang ting khankix heue:. 26 Phan: ang mawh nan: pex lih hu: son sang yaox pa tix? Lih hu: son sang yaox cao: jhai: lie? Mawh heue:, Aux krai ka pex, mawh pa lheu: khaing: cao: jhai: heue:. 27 In mawh kaw pa hoik tiem: grawh grawng: nawh ah nin:, 105'JHak heue:, Aux ploi: kawncau Aux hu: sivoe pakngai: Maix, pa tag cox krax Maix sivoe Maix heue:.' 28 Aux krai ka pex, ka daux pui pa keh khaing: bon: khawm: uik, pa lheu: ting khaing: Yohan cao: baptis106 ang koe: tix kaux kawx, viang mawh kawx nan: kaw pa nie iak khaing: paox tix ka daux Meung Siyiex lheu: ting khaing: nawh heue:." 29 Mai: pui khawm: uik, khawm: pui koh mau khankix, yam kix mhong: kix yaogyaw pa rah pa see Siyiex, mai: baptis C ka daux been krax baptis D Yohan heue:. 30 Viang mawh kawx nan: Pharishie: khankix mai: cao: tawng cao: prawng lai been khankix tik pa keud Siyiex son kix, mai: ang baptis E daux tawm: taix nawh heue:. 31 Ceu pui ju in, Aux sang phektem: awm: pa tix? mai: kix sang awm: pa yuh ka mawx? 32 Kix awm: kawn: nyawm khankix pa ngawm daux lah, mai: kok paox tix ah nin:, 'Ex hoik phlu: pi: son pex, mai: pex ang graoh ang thiao:, ex hoik yiem riag, viang mawh kawx nan:, pex ang yiem ang grai heue:.' 33 Kheu Yohan cao: baptis F ang ih khaomun, mai: ang nyaux rawm: plix siiet mai: hoek kawx, pex ah, 'Kaw in koe: phicaox heue:.' 34 Kawn: kawn: pui ih nyaux mai: hoek kawx, pex ah, 'Jhak heue:, Kaw in cha nie luan ih, mai: cha nie luan nyaux rawm: plix siiet, mai: yuh paox yuh pie ka pui pa koh mau mai: pui ting map ting grham: khankix heue:.' 35 Viang mawh kawx nan: pingnya cuyi hoik rah hoik see ka daux kawnpraix tix khawm: uik heue:."

Grawng: pa bon: tix kaux groi sidah bhawng: ka caong Nawh Cao:

7:37-39 koe: daux lai Mth. 26:6-13; Makux 14:3-9; Yohan 12:1-8, 7:41-42 koe: daux lai Mth. 18:23-34

36 Mai: Pharishie: tix kaux nhie: Nawh Cao: hoek tix sawm: tau mai: tix, mai: Nawh Cao: laig ka daux nyiex Pharishie: an, ngawm neung dee sawm: heue:. 37 Mai: jhak heue:, bon: tix kaux ot ka daux veng an, pa mawh pui ting map ting grham:, mai: yam mhong: nawh grawh grawng: Nawh Cao: ngawm neung ka daux nyiex Pharishie: an, nawh viex sidah bhawng: ka daux kawng: simaox paing. 38 Mai: nawh cung plak khaix, dex caong Nawh Cao:, mai: yiem grai mai: kieh rawm: ngai: tix cod piang caong Nawh, mai: teei hauk kaing: tix awt kah, mai: ngheut caong Nawh Cao:, mai: teei sidah bhawng: an groi kah heue:. 39 Yam Pharishie: pa hoik kok Nawh Cao: yaox grawng: an, nawh keud ah nin: ka daux tokaux tix, "Phan: Pui in mawh Cao: Jhai:, Nawh tee: hoik tawng grawng: bon: pa teeh Nawh in, mawh pui pa yuh ka mawx, grawh grawng: nawh mawh bon: ting map ting grham: heue:." 40 Mai: Yesux ah nin: ka nawh, "Simon eue:, Aux koe: ceu krai ka maix ceeix." Mai: kaw an ah nin:, "Sara Cao: eue:, krai ha:." 41 Nawh Cao: baox krai, "Cao: tawx yaog yaing mau tix kaux, koe: pui ceuk ka nawh ra: kaux. Tix kaux ceuk ka nawh denari phwan: yieh (500) plah, mai: tang: kaux ceuk ka nawh tiphwan: (50) plah heue:. 42 Mawh kheu ang kiex koe: tix tawx ceuk an, nawh pluat ploi: ceuk kiex khawm: ra: kaux heue:. Ka daux kiex ra: kaux, mawh kaw pa yuh ka mawx, pa nie lheu: moh ka kaw an?" 43 Simon baox pawk lox mai: ah nin:, "Aux ce: kaw pa pluat nawh ceuk pa nie ting an, mawh pa nie lheu: moh nawh heue:." Mai: Nawh Cao: baox ah nin: ka nawh, "Pa keud pa prawng maix hoik caw heue:." 44 Mai: Nawh Cao: deeh veeh ka bon: an, ah nin: ka Simon, "Yaox maix bon: in lie? Yam laig Aux ka daux nyiex maix, maix ang tawx rawm: khoek son caong Aux, viang mawh nan: bon: in hoik kieh rawm: ngai: nawh cod piang caong Aux, mai: awt ka hauk kaing: tix heue:. 45 Maix ang ngheut ka Aux, viang mawh kawx nan:, jah yam laig Aux tin:, tom: yamin, bon: in, ngheut caong Aux ang jud ang jai heue:. 46 Maix ang groi rawm:bee ka kaing: Aux, viang mawh nan:, bon: in, hoik groi sidah bhawng: ka caong Aux heue:. 47 Mawh kheu nan: Aux krai ka maix, phimap phigrham: nawh pa haoh pa hun:, hoik pluat ploi:. Mawh kheu nawh hoik moh tom: nie. Viang mawh kawx nan:, pui pa pluat ploi: ceeix ngie, moh ceeix ngie heue:." 48 Mai: Nawh Cao: ah nin: ka bon: an, "Hoik pluat hoik ploi: phimap maix heue:." 49 Mai: kix pa ngawm neung tix sawm: tau mai: Nawh Cao:, keud tix ah nin: ka daux tokaux tix, "Kaw in mawh mawx? Viang mawh phimap kawx, Nawh khex ploi: heue:." 50 Mai: Nawh Cao: baox ah nin: ka bon: an, "Krax yumrhawm: yumrhi: maix hoik taohmaix, hu: mhawm: mhawm: heue:."

Lukax

Simin Ting 8

Bon: pa mawh kawncau

1 Khaix an ang awt rheung: Nawh Cao: hu: lai ling tix sidiex gau, ka daux yaong: daux veng khankix, mai: viex lox gauxrhawm: gauxrhi: pa dex pa dawd mai: Meung Siyiex, mai: kawncau Nawh kao: kaux ra:. 2 Mai: bon: tiblah pa Nawh Cao: hoik kieh phicaox lih, mai: hoik cox jhawm: saux jhawm: ngia kix moi: kawx ot tau mai: Nawh heue:. Marix pa kok mawh Magadalax, pa Nawh Cao: hoik kieh phicaox lih khaing: aliah kaux, 3 mai: Yoanax moeng Khunzax, pa mawh kawncau Herut, mai: Susannax, mai: tang: kaux tom: nie teei kraung cie kix, mai: khan: kheu: ka Nawh Cao: mai: pui pa hu: tau mai: Nawh heue:.

Lox phektem: pa rhuat simie

8:4-15 koe: daux lai Mth. 13:2-23; Makux 4:1-20

4 Yam an cub pui haoh pui hun: khrawm: paox tix kaoh khaing: ku veng, hoek ka Nawh Cao:, mai: Nawh sidiex gau kix ka lox phektem: ah nin:, 5 "Pui rhuat simie hu: tix rhuat simie cie tix heue:. Mai: yam rhuat nawh simie tiblah cod ka dex krax, mai: pui dig ka caong tix, mai: sim: raoma: khankix sut tix ih simie an heue:. 6 Mai: simie tiblah cod ka piang simaox, mai: yam kuah, mawh kheu ang leet tom: vhit kroh hu: heue:. 7 Mai: simie tiblah cod ka sinax pang: kat, mai: pang: kat an ting tau mai: kix, tom: kheem: gut kix. 8 Mai: simie tiblah cod ka dee mhawm: tiex, mai: ting tom: plix plix tix yieh son heue:." Mai: yam krai Nawh Cao: grawng: ceu in khankix, Nawh kok yo ah nin:, "Kaw pa koe: yhaok tix mhong: kieh nawh mhong: heue:."

9 Mai: kawncau Nawh khankix chawk Nawh Cao: ka grawng: dee bleeh lox phektem: in heue:. 10 Mai: Nawh Cao: baox ah nin:, "Hoik tawx kieh pex tawng grawh grawng: pa raux pa mox pa dex dawd mai: Meung Siyiex, viang mawh kawx nan:, pa kawn: deuk khankix tag krai ka lox phektem: ka kix, yuh ka mawh kix yaox kawx ang chix yaox, mai: kix mhong: kawx ang chix tawng heue:. 11 Dee bleeh lox phektem: an mawh nin:, simie an mawh gumlox Siyiex heue:. 12 Mai: kix pa cod dex krax, mawh kix pa hoik mhong:, mai: khaix an phicaox hoek mai: teei lox bwan: khaing: daux rhawm: kix, yuh ka mawx son ang kix sang yumrhawm: mai: hoek krax taoh heue:. 13 Mai: kix pa cod ka piang simaox, mawh kix pa hoik mhong:, mai: gauxrhawm: rieb tix teei lox bwan:, mai: kix ang koe: riah, yumrhawm: ngie tivud khaing:, mai: yam hoek bawg yam pa nyaw pa glaw:, kix deeh laux deeh leeing: heue:. 14 Mai: pa cod sinax pang: kat khankix, mawh kix pa hoik mhong:, mai: yam hu: kix krax, pa khirhawm: khirhi: mai: sinngao, mai: ceu pa gauxrhawm: gauxrhi: pa dex pa dawd mai: ju in, kheem: gut kix, tom: ang chix mhawm: plix heue:. 15 Mai: pa koe: ka daux dee mhawm: tiex, mawh kix pa rah pa mhawm: rhawm: pa hoik mhong: lox bwan:, mawh kix pa giex tom: sied, mai: chix gun rhawm: tix plix plix heue:.

Lox phektem: ka kawk ngu

8:19-21 koe: daux lai Mth. 12:46-50; Makux 3:31-35

16 "Mai: pui mawx ang ah, yam hoik tok nawh kawkngu, ang sax tawb ka aw:, lheu: khaing: an ang sax sau: greem: ku:, viang mawh nan: nawh deuh, ka piang dee deuh kawkngu, son sang yaox kix pa laig tan: pa riang nawh heue:. 17 Mawh kheu pa hoik mox ang koe: tix ceu kawx, pa tag ang kieh sidawng:, Lheu: khaing: an ang koe: tix ceu kawx pa hoik glip, pa tag ang tawng, ang hoe: heue:. 18 Mawh kheu nan:, mhong: pex yuh ka mawx rien rhawm: tix kah, kheu kaw pa hoik koe:, tag sang baox tawx ka nawh heue:, mai: ka kaw pa ang koe:, viang mawh pa nawh ce: nawh hoik koe: kawx, tag sang teei khaing: nawh heue:."

19 Mai: miex Nawh Cao: mai: pux Nawh khankix hoek ka Nawh, viang mawh nan: kix ang pon hoek dee ot Nawh Cao:, kheu kied sikhox cub pui haoh pui hun: heue:. 20 Mai: pui krai ka Nawh Cao: ah nin:, "Miex Maix mai: pux Maix khankix cung plak prai, simie tix yaox Maix heue:." 21 Viang mawh kawx nan: Nawh Cao: pawk lox mai: ah nin: ka kix, "Miex Aux mai: pux Aux khankix, mawh in kix, pa mhong: gumlox Siyiex mai: hawt tix yuh heue:."

Kieh bhaung: nhim: yien: khaing: daux rawm: nhawng:

8:22-25 koe: daux lai Mth. 8:23-27; Makux 4:36-41; 6:47-52; Yohan 6:16-21

22 Ka daux singaix an khankix tix singaix Nawh Cao: laig ka daux reu, tau mai: kawncau Nawh khankix, mai: Nawh Cao: ah nin: ka kix, "Ex hu: plak toi: rawm: nhawng: heue:." Mai: kix vai: hu: heue:. 23 Yam kawn: hu: kix Nawh Cao: laig it, mai: bhaung: ting lih tix phlu: ka piang nhawng:, mai: rawm: jah tix naog ka daux reu, mai: kix dex sang hoek krax laux krax leeing: heue:. 24 Mai: kix hoek ka Nawh Cao: so: Nawh kieh siduad, ah nin:, "Simiang eue:, Simiang eue:, ex dex sang laux heue:." Nawh Cao: kaoh mai: ah ka bhaung: mai: pukpak rawm:, mai: kix yien: yawg tix heue:. 25 Mai: Nawh Cao: chawk ah nin: ka kix, "Krax yumrhawm: pex koe: dee mawx?" Viang mawh nan: kix lhat, mai: daox kah, kix tom: ah nin: ka paox tix tix kaux hoik tix kaux, "Kaw in mawh mawx, Nawh tawx lox ka bhaung: mai: rawm: khankix kawx, kix nghiet lox Nawh heue:."

Cox pai: moi: ka pui pa laig phi: kah

8:26-37 koe: daux lai Mth. 8:28-34, 8:26-39 koe: daux lai Makux 5:1-20

26 Mai: kix hoek ka meung Gadarax, pa koe: praok rawm: sidieb meung Galilie:. 27 Mai: yam hoik lih hu: Nawh Cao: ka piang caong raog, pui tix kaux pa hoik lih khaing: daux veng hoek tix rieb Nawh, kaw an phicaox laig kah, mai: ang ceep kraung rheung: nyao, ang ot daux nyiex, viang mawh nan: nawh ot ka daux simeeig khankix heue:. 28 Mai: yam yaox nawh Yesux, nawh riag yo, mai: nawh krub sivoe Nawh Cao:, kok lox sinum ah nin:, "Yesux, Kawn: Siyiex pa ting pa lhaong: khaing: khawm: uik eue:, aux koe: pa yuh mai: Maix ceu pa tix? Aux khyox khaw: ka Maix paw vi tuktieak tukte: ka aux liak." 29 Kheu Nawh Cao: hoik nhie: phi: pa seeing: pa brai: an lih khaing: pui an heue:. Kheu phi: an hoik giex nawh tom: nie bawg, mai: pui hoik kieh pau nawh, mai: phyawk nawh ka ceng mai: hoik sau: gang: ka nawh heue:. Viang mawh nan: nawh rud khankix dud, mai: phicaox an grheu: nawh hu: ot ka daux tiag daux tu heue:. 30 Mai: Nawh Cao: chawk nawh ah nin:, "Ceukaux maix kaux pa tix?' Mai: nawh deeh ah nin:, "Mawh Liecong107 heue:." Mawh kheu hoik laig phicaox ka nawh tom: nie, nawh tom: ah nan:. 31 Mai: kix khyox khaw: ka Nawh Cao:, yuh ka mawx son ang Nawh sang nhie: kix lih hu: laig ka daux, daux dee kied raux heue:. 32 Ka dee an koe: cub lig pa kied hun: sawm: ka gawng tan: heue:. Mai: kix khyox khaw: ka Nawh Cao: yuh ka mawx, son Nawh sang kieh kix laig ka daux lig khankix, mai: Nawh Cao: tawx akhwang: ka kix heue:. 33 Mai: phicaox khankix lih khaing: daux pui an, mai: laig ka daux lig khankix, mai: cub lig an, to: lih ka dee nie rieh nie jun: jee, laig ka daux nhawng:, mai: nok ka rawm: yum heue:. 34 Mai: pui liang lig khankix, yam kix yaox ceu pa hoik mawh an, to: hu: mai: krai grawh grawng: ceu an ka daux yaong: daux veng khankix heue:. 35 Mai: pui khankix hu: tix jhak grawh grawng: ceu pa hoik mawh an, mai: yam kix hoek ka Yesux, mai: yaox pui pa phicaox khankix hoik lih khaing: nawh an, ngawm tan: liep caong Yesux, ceep krang mai: hoik deeh mhawm:, kix lhat kah heue:. 36 Mai: kix pa hoik yaox, krai ka pui khankix, grawh grawng: pa cox mhawm: ka kaw pa laig phicaox an yuh ka mawx. 37 Pui meung Gadarax khawm: uik mai: pui pa ot sivie tan:, khyox khaw: ka Nawh Cao: nhie: Nawh lih hu: khaing: kix, mawh kheu kix kied lhat kied graung kah. Mai: Nawh Cao: deeh laig ka daux reu mai: deeh ing: heue:. 38 Pui pa hoik laig phicaox glangka: an, rawg ka Nawh Cao: tix ot tau mai: Nawh, viang mawh nan: Nawh Cao: nhie: nawh hu: ah nin:, 39 "Ing: ka nyiex maix, mai: krai kix mhong: grawh grawng: ceu pa ting pa lhaong: pa caoxrhawm: Siyiex mai: yuh bwanson:, son maix heue:." Mai: kaw an lih hu: mai: krai grawh grawng: ceu pa ting pa lhaong: pa hoik yuh Yesux son nawh, ka daux veng an khawm: uik heue:.

Krax daox am: ka pa cox jhawm: saux

8:40-56 koe: daux lai Mth. 9:18-26; Makux 5:22-43

40 Mai: yam deeh ing: Yesux cub pui haoh pui hun: khankix rieb Nawh Cao:, kheu kix khawm: uik krox son Nawh heue:. 41 Mai: jhak heue:, pui tix kaux pa kaux YaIrux, pa mawh pui giex kaing: nyiex sidiex tix kaux, hoek mai: krub dex caong Yesux, mai: khyox khaw: nhie: Nawh Cao: hoek ka nyiex tix heue:. 42 Mawh kheu kawn: bon: nawh pa koe: ngie tix kaux khaing:, pa koe: ju dex kao: num ra:, it mai: uik dex sang yum heue:. Yam hu: Nawh Cao: cub pui haoh pui hun: khankix nyheen: ka Nawh heue:.

43 Mai: bon: tix kaux pa hoik koe: jhawm: saux pa lih nham: kao: num ra:, pa hoik cai:, can pa koe: ka nawh khawm: uik, ka pui chix sidah khankix, viang mawh nan:, nawh ang vai ceeix kawx, 44 hoek plak khaix Nawh Cao: mai: teeh caong kraung ceep Nawh, mai: jhawm: saux pa lih nham: nawh, hit dom: mawx dom: an heue:. 45 Mai: Yesux ah nin:, "Mawx pa teeh ka Aux?" Yam pui khawm: uik thiang: grawng: an, Petrux mai: kix pa ot tau mai: nawh khankix, ah nin:, "Simiang eue:, cub pui haoh pui hun: khankix nyheen: ka Maix, tom: uik tip, mai: Maix lai kawn: chawk 'Mawx pa teeh ka Aux?' lie?" 46 Viang mawh nan: Yesux baox ah nin:, "Pui tix kaux kaux hoik teeh ka Aux, kheu Aux tawng hoik lih siawp sibrawm khaing: Aux heue:." 47 Mai: yam bon: an tawng grawh grawng: nawh ang pon tix mox, nawh siyaung: mai: hoek tix krub sivoe Nawh Cao:, sivoe pui khawm: uik, krai mawh kheu grawng: pa tix, nawh hoik teeh ka Nawh Cao:, mai: grawh grawng: hoik moi: tix dom: mawx dom: an heue:. 48 Mai: Nawh Cao: ah nin: ka nawh, "kawn: bon: Aux eue:, krax yumrhawm: maix hoik kieh maix moi:, hu: mhawm: mhawm: heue:."

49 Yam kawn: sikah, Nawh Cao: pui tikaux hoek khaing: nyiex pui giex kaing: nyiex sidiex mai: ah nin:, "Kawn: bon: maix hoik yum heue:. Paw baox laklheut ka Sara Cao: Gau heue:." 50 Viang mawh nan:, yam mhong: Yesux lox an, Nawh Cao: ah nin:, "Paw vi lhat yumrhawm: khaing: heue:, mai: nawh tag sang deeh mhawm:." 51 Mai: yam hoek Nawh Cao: ka nyiex an, Nawh ang kieh pui tix kaux kawx laig tau mai: Tix, lheu: khaing: Petrux, mai: Yohan, mai: Yakop, mai: miex keeing: nyawm bon: an khaing: heue:. 52 Mai: pui khawm: uik yiem riag yiem yo, son nyawm bon: an, viang mawh nan:, Nawh Cao: ah nin: ka kix, "Paw yiem paw grai, mawh kheu bon: in ang yum, mawh ngie laig it nawh khaing:." 53 Mai: kix nieb yuh pa ang nab ang yam nyiah ka Nawh Cao:, kheu tawng kix hoik yum bon: an heue:. 54 Viang mawh nan: Nawh Cao: teei taix kawn: bon: an, mai: kok ah nin:, "Kawn: nyawm bon: eue:, kaoh heue:." 55 Mai: khwan: nawh deeh hoek mai: kawn: bon: an kaoh dom: mawx dom: an. Mai: Nawh Cao: nhie: tawx pa ih pa un: tix ceu ceu ka nawh heue:. 56 Mai: miex keeing: nawh kied daox deng: kah heue:. Nawh Cao: tawm: kiex, son ang sang krai grawh grawng: pa hoik yuh an, ka pui tix kaux kawx heue:.

Lukax

Simin Ting 9

Pa ploi: kawncau kao: ra: kaux

9:3-5 koe: daux lai Mth. 10:9-15; Makux 6:8-11, 9:7-9 koe: daux lai Mth. 14:1-2; Makux 6:14-16

1 Mai: Nawh Cao: kok kawncau Nawh kao: kaux ra: khrawm: paox tix, mai: tawx kix siawp sibrawm ka piang phicaox khawm: uik, mai: son sang pon tix cox jhawm: saux jhawm: ngia moi: heue:. 2 Mai: Nawh Cao: ploi: kix hu: sidiex gau grawh grawng: Meung Siyiex, mai: son sang cox pui pa koe: jhawm: saux jhawm: ngia moi: heue:. 3 Mai: Nawh Cao: ah nin: ka kix, "Paw vi viex tid tix hu:, son yam hu: pex daux krax, paw vi viex khaox gix, paw viex bau:, paw viex khaomun, paw viex mau, sibex kawx paw vi viex ra: pheen: heue:. 4 Mai: pex laig ka daux nyiex mawx ang ah, ot tan: tom: lih hu: pex. 5 Mai: pui miex ding ang ah, pa ang rieb tix teei pex, yam lih hu: pex khaing: veng an, khruah phawng: tiex khaing: caong pex, son sang mawh mhai: sakse: piang kix heue:." 6 Mai: kix lih hu: lai ling daux yaong: daux veng khankix, sidiex gau lox bwan: gauxrhawm: gauxrhi:, mai: cox jhawm: saux jhawm: ngia moi: ku dah ku dee heue:. 7 Yam mhong: simiang Herut grawh grawng: ceu pa hoik mawh khawm: uik, nawh keud ang doh daox kah, mawh kheu pui tiblah ah Yohan hoik deeh kaoh im: khaing: krax yum. 8 Mai: tiblah ah Eliyax hoik lih hoek, mai: tang: kaux khankix ah, cao: jhai: phaoxka: dix hoik deeh kaoh tix kaux kaux heue:. 9 Viang mawh nan: Herut ah nin:, "Aux hoik kid kaing: Yohan, viang mawh nan:, kaw pa mhong: aux grawh grawng: ceu in khankix mawh mawx?" Mai: nawh sawg son sang pon tix yaox Nawh Cao: heue:.

10 Mai: yam deeh hoek, kawncau khankix kix krai ka Nawh Cao: grawh grawng: ceu pa hoik yuh kix. Mai: Nawh Cao: viex kix lih ka veng tix veng, pa kok mawh Biesedax heue:. 11 Viang mawh kawx nan: cub pui haoh pui hun: khankix, tawng grawng: an, mai: hawt Nawh Cao:. Mai: Nawh Cao: rieb kix mai: krai kix mhong: grawh grawng: Meung Siyiex, mai: Nawh cox kix pa koe: jhawm: saux jhawm: ngia moi: heue:.

Tawx pui phwan: rheng: ih sak

9:10-17 koe: daux lai Mth. 14:13-21; Makux 6:32-44; Yohan 6:5-13, 9:13-17 jhak daux lai 2.Simiang 4:42-44

12 Yam dex sang uik pon singaix, plak bo, kawncau Nawh kao: kaux ra: hoek mai: ah nin: ka Nawh Cao:, "Ploi: cub pui haoh pui hun: khankix hu: heue:, yuh ka mawx son kix sang hu: laig ka daux yaong: khankix pa koe: sivie sivheng: tin:, tix it tix tum, mai: son sang pon pa ih pa un:, mawh kheu ot ex daux; tiag daux tu heue:." 13 Viang mawh kawx nan: Nawh Cao: ah nin: ka kix, "Pex tawx pa ih son kix heue:." Mai: kix ah nin:, "Ang ex koe: lheu: khaing: khaomun phwan: lon: mai: kax ra: mu: phan: ex ang hu: liag son pui in khawm: uik. 14 Kheu kix simex dex koe: phwan: rheng: heue:." Mai: Nawh Cao: ah nin: ka kawncau Nawh khankix, "Kieh kix ngawm daux cub, pa koe: been tiphwan: (50) kaux tix cub heue:." 15 Mai: kix yuh awm: hoik nhie: kix, mai: kieh pui khawm: uik ngawm heue:. 16 Mai: Nawh Cao: teei khaomun phwan: lon:, mai: kax ra: mu: an, mai: maong ka raoma:, mai: Nawh nawb bwan: ka khankix, mai: sivit tix tawx ka kawncau Nawh khankix, son sang viex kix tix tawx ka pui khankix heue:. 17 Kix ih mai: sak khawm: uik. Mai: deeh pon tix khrawm: pa lheu: khaix kix, pa max pa phawng: kao: phliex ra: heue:.

Grawng: Yesux mawh mawx

9:18-20 koe: daux lai Mth. 16:13-16; Makux 8:27-29, 9:22-27 koe: daux lai Mth. 16:21-28; Makux 8:31-9:1

18 Yam Nawh Cao: rawg bwan: ot tau mai: kawncau Tix khankix nong: nong:, Nawh chawk kix ah nin:, "Cub pui haoh pui hun: khankix dhua: Aux mawh mawx?" 19 Mai: kix pawk lox ah nin:, "Tiblah ah mawh Yohan cao: baptis108, viang mawh nan: tang: kaux tiblah ah, mawh Eliyax, mai: tang: kaux tiblah baox ah, mawh cao: jhai: phaoxka: dix, hoik deeh kaoh tix kaux kaux heue:." 20 Mai: Nawh Cao: baox ah nin: ka kix, "Viang mawh nan: pex ah Aux mawh mawx?" Petrux pawk lox ah nin:, "Maix mawh Khrit cie Siyiex heue:." 21 Viang mawh nan: Nawh Cao: jawg tix sidiex gau ka kix, mai: tawm: lox ang cu kix krai ka pui tix kaux kawx heue:. 22 Mai: Nawh Cao: ah nin:, "Kawn: kawn: pui tag sang kham: geu: tom: nie ceu, ka daux tawmtaix kuad song:, mai: cao: giex kaing: li pa ting mai: pui tiem: lai khankix, mai: tag sang kham: geu: pa teei yum, mai: tag sang deeh kaoh im: khaix an daux loe: singaix heue:." 23 Mai: Nawh Cao: ah nin: ka pui khawm: uik, "Phan: pui tix kaux kaux simie tix hoek khaix Aux, kieh nawh thiang: tix tik tokaux tix, mai: klawm: khaoxlhak tix ku singaix, mai: hawt Aux heue:. 24 Mawh kheu pui mawx ang ah, pa simie tix taoh ju tokaux tix, tag sang som ju heue:. Viang mawh nan:, pui mawx ang ah pa som ju son Aux, nawh tag pon tix taoh ju heue:. 25 Grawh grawng: nawh, phan: pui tix kaux kaux pon haktiex khawm: uik, mai: som tokaux tix, sang koe: bwanson: yuh ka mawx? 26 Mawh kheu pui mawx ang ah, pa kaig kheu Aux, mai: gumlox Aux, Kawn: kawn: pui kawx, tag sang kaig kheu nawh, yam Nawh viex min: plakngai: cie Tix, mai: min: plakngai: Keeing: Tix, hoek tau mai: kawncau Siyiex pa singax singeh khankix heue:. 27 Aux krai lox pa mawh pa meh ka pex, pui pa cung tin: tiblah, tag ang cim krax yum, tom: kix yaox Meung Siyiex heue:."

Tieh loh Tix ka piang gawng

9:28-36 koe: daux lai Mth. 17:1-8; Makux 9:2-8

28 Khaix hoik ah Nawh Cao: lox ceu in khankix, yam dex hoek daix singaix, Nawh Cao: teei Petrux, mai: Yohan, mai: Yakop, mai: haok ka gawng son sang rawg bwan: heue:. 29 Mai: yam Nawh Cao: rawg bwan:, pakangai: Nawh tieh loh, mai: kraung ceep Nawh lih paing cawk tom: lih riang heue:. 30 Mai: jhak heue:, pui ra: kaux sikah mai: Nawh Cao:, pa mawh Mose mai: Eliyax, 31 pa lih hoek ka daux min: plakngai:, mai: kum: grawh grawng: pa dex sang yum Nawh Cao: ka daux veng Yerusaliem heue:. 32 Petrux mai: kiex pa ot tau mai: nawh, sang it nie mai: gaing: heue:, viang mawh nan: yam hoik siduad kix mhawm: mhawm:, kix yaox min: plakngai: Nawh Cao:, mai: pui ra: kaux pa cung tau mai: Nawh heue:. 33 Mai: yam kiex gwieh hu: khaing: Nawh Cao:, Petrux ah nin: ka Yesux, "Simieng eue:, ex ot tin: mhawm: son ex heue:, kieh ex yuh nyiex bang: loe: lhang:. Son Maix tix lhang:, mai: son Mose tix lhang:, mai: son Eliyax tix lhang:." Nawh ang tawng ceu pa ah tix, tom: ah nan: heue:. 34 Mai: yam kawn: ah nawh ceu in khankix, paiawm: hoek tix kheem: veei kix, mai: kix lhat ka yam laig kix ka daux paiawm: heue:. 35 Mai: lox lih khaing: daux pai:awm an, ah nin:, "in mawh Kawn: Aux, pa laug Aux, pex nghiet Nawh heue:." 36 Yam lih hoek lox an, yaox ngie Yesux ot nong: nong: tix kaux khaing:. Mai: kix ang nye:, mai: ang krai ka pui tix kaux kawx, ka daux bawg yam singaix an khankix, grawh grawng: ceu pa hoik yaox kix heue:.

Cox ka kawn: nyawm simex pa laig phi: kah moi:

9:37-42, 43-45 koe: daux lai Mth. 17:14-18; Makux 9:14-27, 30-32

37Mai: khaix an tix singaix, yam hoik lih hoek kix khaing: gawng, cub pui pa kied haoh kied hun: hoek tix rieb Nawh Cao:. 38 Mai: jhak heue:, ka daux cub pui haoh pui hun:, pui tix kaux kok yo ah nin:, "Sara Cao: Gau eue:, aux khyox khaw: ka Maix, hoek tix jhak ka kawn: simex aux liak. Kheu nawh mawh kawn: pa koe: aux tix kaux khaing: heue:. 39 Mai: jhak heue:, phi: giex nawh mai: nawh riag dom: mawx dom: an, mai: kieh nawh rak rawn:, tom: lih bai heue:. Mai: dex ang yawn: khaing: nawh, yuh nawh tom: kreuek heue:. 40 Mai: aux khyox khaw: ka kawncau Maix khankix nhie: kix grheu: phicaox an lih kawx, kix ang pon tix grheu: heue:." 41 Mai: Yesux pawk lox ah nin:, "pui ju pa ang koe: krax yumrhawm: yumrhi: mai: pa nu tix ah eue:, Aux tag kawn: sang ot mai: pex miex grheung:? Aux tag kawn: sang gun sang yeung pex miex grheung:? Viex kawn: simex maix hoek heue:." 42 Mai: yam kawn: tag hoek nawh, phicaox an biak nawh goh, mai: kieh nawh rak rawn: tix sigrien sigre. Viang mawh nan: Yesux ah ka phi: pa seeing: pa brai: an, mai: kieh kawn: simex an moi:, mai: deeh tawx nawh ka keeing: nawh heue:. 43 Mai: pui khawm: uik daox deng: ka siawp sibrawm pa ting pa lhaong: Siyiex heue:.

Viang mawh nan: yam kix ku kaux kawn: daox deng: ka ceu pa yuh Yesux khankix, Nawh Cao: ah nin: ka kawncau Nawh khankix. 44 "Kieh gumlox in khankix laig ka daux yhaok pex, kheu tag sang tawx Kawn: kawn: pui ka daux tawm: taix kawn: pui khankix heue:." 45 Viang mawh nan: kix ang tawng dee bleeh lox in, mai: hoik mox khaing: kix, yuh ka mawx son ang kix sang tawng, mai: kix lhat chawk Nawh Cao: ka grawh grawng: lox in heue:.

Mawh mawx pa lheu: ting

9:46-48 koe: daux lai Mth. 18:1-5, 9: 46-50 koe: daux lai Makux 9:33-40

46Mai: kix thung: thiang: paox tix, grawh grawng: ka daux kix mawh pui mawx tag sang nie lheu: ting khaing: paox tix. 47 Viang mawh nan: yam yaox Yesux pa keud pa sawn: kix ka daux rhawm: tix, Nawh Cao: teei kawn: nyawm iak tix kaux deuh ka liep Tix, 48 mai: ah nin: ka kix, "pui mawx ang ah, pa rieb tix teei kawn: nyawm iak in ka daux ceukaux Aux, rieb tix teei ka Aux heue:. Mai: pui mawx ang ah, pa rieb tix teei Aux, rieb tix teei ka kaw pa ploi: Aux hoek heue:. Mawh kheu pui pa iak khaing: paox tix ka daux pex, khawm: uik, kaw an tag sang ting heue:."

49 Mai: Yohan ah nin: ka Nawh Cao:, Simiang eue:, ex yaox pui tix kaux pa grheu: phicaox lih ka daux ceukaux Maix, mai: ex kieh nawh, kheu ang nawh hawt tau mai: ex heue:." 50 Viang mawh nan: Yesux ah nin: ka nawh, "paw vi kieh nawh, mawh kheu pui pa ang ot plak pui koeng ka pex, ot plak pex heue:."

51 Yam an yam dex sang hoek bawg yam sinhaix, pa sang rieb tix teei Nawh haok ka piang dee long:, Nawh Cao: jawg veeh pakngai: Tix, son sang hu: ka veng Yerusaliem. 52 Mai: Nawh ploi: kawncau Tix hu: plak sivoe ngai: Nawh Cao:, mai: kix hu: laig ka daux yaong: pui Samarix tix yaong:, son sang cox sang khre: son Nawh Cao: heue:. 53 Mai: pui yaong: an ang rieb tix teei ka Nawh Cao:, kheu Nawh veeh pakngai: Tix, sang hu: ka veng Yerusaliem heue:. 54 Yam kawncau Nawh Yakop mai: Yohan yaox grawng: in, kiex ah nin:, "Simiang eue:, Maix koe: rhawm: tix kieh yiex, nhie: ngu lih khaing: raoma:, mai: gleeing kix, awm: pa hoik yuh Eliyax lie?" 55 Viang mawh nan: Nawh Cao: deeh veeh mai: ah ka kiex. 56 Mai: kix hu: ka tang: yaong: heue:.

Yuh kawncau Tete

9:57-60 koe: daux lai Mth. 8:19-22

57 Yam kawn: hu: kix krax, pui tix kaux ah nin: ka Nawh Cao:, "aux sang hawt Maix ka dee sang hu: Maix ku dah ku dee heue:." 58 Mai: Yesux ah nin: ka nawh, "Sox praix khankix koe: daux, mai: sim: pa po: piang raoma: khankix koe: mheem:, viang mawh kawx nan:, Kawn: kawn: pui ang koe: dee deuh kaing: Tix heue:." 59 Mai: Nawh Cao: ah nin: ka pui tang: kaux tix kaux, "Hawt khaix Aux heue:," viang mawh nan: kaw an ah nin:, "Simiang eue:, kieh aux hu: sipaung: keeing: aux ka: ha:." 60 Viang mawh kawx nan: Nawh Cao: baox ah nin: ka kaw an, "kieh pui yum sipaung: pui yum cie kix heue:, viang mawh nan: maix hu: mai: krai grawh grawng: meung Siyiex heue:." 61 Tang: kaux tix kaux kawx ah nin:, "Simiang eue:, aux sang hawt khaix Maix heue:, viang mawh nan:, kieh aux hu: sikah lox gwieh ka pui pa ot ka daux nyiex aux ka: ha:." 62 Viang mawh nan:, Yesux baox ah nin: ka nawh, "Kaux pui mawx ang ah, pa hoik giex krong: thai:, mai: pa deeh gi plak khaix, ang keung: ang khaw: son meung siyiex heue:."

Lukax

Simin Ting 10

Grawng: ploi: kawncau atigliah kaux

10:4-12 koe: daux lai Lukax 9:3-5, 10:13-15, 21-22 koe: daux lai Mth. 11:21-23, 25-27

10:23-24 koe: daux lai Mth. 13:16-17

1 Mai: khaix ceu in khankix, Simiang, baox laug tix teei kawncau tang: kaux atigliah (70) kaux, mai: ploi: kix hu: tix cub ra: kaux, ra: kaux, plak sivoe ngai: Nawh Cao:, ka daux ku veng mai: ku dah ku dee, dee dex sang hoek Nawh Cao: heue:. 2 Mai: Nawh Cao: ah nin: ka kix, "Nghox pa kaux pa khaw: tix vawg kied nie viang mawh kawx nan: pui pa vawg tux heue:. Mawh kheu nan: pex rawg bwan: ka Simiang cao: nghox, yuh ka mawx son sang ploi: Nawh pui vawg nghox khankix hoek son sang vawg nghox Nawh heue:. 3 Hu: dee hu: pex heue:. jhak heue:, Aux ploi: pex hu: awm: kawn: yung: iak, ka sinax soxla khankix heue:. 4 Paw vi viex hau: mau, bau:, mai: kiep, mai: yam hu: pex krax paw vi ah lox nawb ka pui tikaux kawx heue:. 5 Mai: laig pex ka daux nyiex mawx ang ah, ah lox yuh nin: ka: ha:, 'Kieh pa nhim: koe: piang nyiex in liak.' 6 Mai: phan: kawnpraix pa nhim: koe: tan:, pa nhim: pex tag ot piang nawh, viang mawh nan: phan: ang koe:, pa nhim: an tag deeh ka pex heue:. 7 Ot ka daux nyiex an mai: ih nyaux ceu pa tawx kix. Grawh grawng: nawh, pui yuh kaing keung: tix pon ngawh riang tix. Paw vi gah hu: tix nyiex hoik tix nyiex heue:. 8 Mai: pex laig ka daux veng mawx ang ah, phan: kix rieb tix teei pex, ih ceu pa khan: kix sivoe pex heue:. 9 Mai: cox pui saux ka daux dee an, mai: ah nin: ka kix, 'Meung Siyiex hoik hoek dex ka pex heue:.' 10 Viang mawh kawx nan:, veng mawx ang ah, phan: kix ang rieb tix teei pex, lih hu: ka daux krax veng an khankix, mai: ah nin:, 11 'Phawng: tiex veng pex pa kawb ka caong ex kawx, ex kawt son sang mawh mhai: mawh khen: ka piang pex. Viang mawh nan: kieh tawng ceu in, Meung Siyiex hoik hoek dex ka pex heue:. 12 Aux krai ka pex, ka daux singaix an sax, tag lheu: yie tix kham: geu: son veng Sidom, khaing: son veng an heue:. 13 Veng Khawrazin eue:, maix tag pon pa kharhawm: kharhi: heue:. Veng Biesedax eue:, maix tag pon pa kharhawm: kharhi: heue:. Mawh kheu phan: hoik yuh kaing pa ting siawp sibrawm khankix pa hoik yuh ka daux pax, ka daux veng Turux mai: Sidom, kiex tag hoik dawg doh keud doh sawn: ka phimap tom: rheung:, mai: vhua: tix ka man: pa taing: ka hauk, mai: ngawm ka daux nyaox heue:. 14 Viang mawh nan:, ka daux bawg yam prawng sax, tag lheu: yie tix kham: geu: son veng Turux mai: veng Sidom, khaing: son pax heue:. 15 Veng Kapeniom eue:, tag yaogyaw maix tom: hoek meung raoma: lie? Tag viex maix lih hu: ka daux meung yum heue:. 16 Pui pa nghiet lox pex, nghiet lox Aux heue:. Mai: pui pa tik ka pex, tik ka Aux heue:. Mai: pui pa tik ka Aux, tik ka Kaw. pa ploi: Aux hoek heue:."

17 Mai: kawncau atigliah (70) kaux deeh hoek gauxrhawm: gauxrhi: ah nin:, "Simiang eue:, phicaox phicaig khankix kawx, ot greem: ex nghiet lox ex ka daux ceukaux Maix heue:." 18 Mai: Nawh Cao: ah nin: ka kix, "Aux hoik yaox Satan rau khaing: raoma: awm: tuhsah heue:. 19 Jhak heue:, Aux hoik tawx siawp sibrawm ka pex, son sang pon dig pex piang siuing: mai: tamtim: khankix, mai: ka piang siawp sibrawm pui pa koeng ka pex, mai: tix ceu kawx ang tau tix pon kieh pex saux heue:. 20 Viang mawh kawx nan: paw vi gauxrhawm: kheu phi: khankix ot greem: pex nghiet lox pex, viang mawh nan: gauxrhawm: ka pa hoik tiem: tix deuh ceukaux pex, ka daux meung raoma: heue:."

21 Ka daux bawg yam nari an Nawh Cao: gauxrhawm: ka daux Khwan: Singax Singeh, mai: ah nin:, "Aux yaogyaw bwanson: Maix, Keeing: eue:, Simiang pa ting piang raoma: mai: haktiex, kheu hoik mox Maix ceu in khankix, khaing: pui lhak lhiem: mai: pa chix tawng khankix, mai: hoik plak kieh kawn: ngie: khankix yaox heue:. Mawh heue:, Keeing:, kheu Maix koe: rhawm: khaw: rhawm: tix yuh nan: heue:. 22 Keeing: Aux hoik tawx khawm: uik ka Aux heue:, mai: tix kaux kawx ang tawng Kawn: Cao: mawh mawx, lheu: khaing: Keeing: Cao: tix kaux khaing:, mai: tix kaux kawx ang tawng Keeing: Cao: lheu: khaing: Kawn: Cao:, mai: kaw pa Kawn: Cao: koe: rhawm: tix plak kieh nawh tawng heue:." 23 Mai: Nawh Cao: veeh ka kawncau Nawh khankix, dee ot kix nong: mai: ah nin:, "Ngai: pa pon tix yaox ceu pa yaox pex khankix, ting bwanson: heue:. 24 Grawh grawng: nawh, Aux krai ka pex, cao: jhai: mai: simiang khunhawkham khankix hoik koe: tom: nie pa simie tix yaox ceu pa yaox pex, mai: ang pon tix yaox, mai: kix simie tix mhong: pa mhong: pex, mai: ang pon tix mhong: heue:."

25 Mai: jhak heue:, cao: prawng cao: tawng lai been tikaux kaoh cung son sang cheuk sang nyaw tix yaox Nawh Cao:, chawk ah nin:, "Sara Cao: Gau eue:, son sang pon aux sin: ju leeing: ju leeing: phan:, aux tag sang yuh ka mawx?" 26 Mai: Nawh Cao: ah nin: ka nawh "Hoik tiem: tix deuh daux lai been li pa yuh ka mawx? Maix phat pa ah ka mawx?" 27 Mai: kaw an deeh pawk lox ah nin:,

109"'Maix tag moh Simiang Siyiex maix khawm: rhawm: khawm: rhi: tix khawm: uik, mai: khawm: ju tix khawm: uik, mai: khawm: riang rao tix khawm: uik, mai: khawm: ka dee chix keud tix khawm: uik, mai: maix tag moh paox plawg paox nyhawm: tix awm: moh tokaux tix heue:.'"

28 Mai: Nawh Cao: baox ah nin: ka nawh, "Lox pa pawk maix khaw: heue:. yuh nin: heue:, mai: maix tag pon tix im: ju heue:." 29 Viang mawh nan: kaw an, simie tix yuh tokaux tix, awm: pui rah pui see pa ang koe: dee phit, nawh tom: chawk ah nin: ka Yesux, "Paox plawg paox nyhawm: aux mawh mawx?"

Pui Samari pa mhawm:

10:25-28 koe: daux lai Mth. 22:34-40; Makux 12:28-31

30 Mai: Yesux pawk lox nawh ah nin:, "Pui tix kaux kaoh lih hu: khaing: veng Yerusaliem, son sang hu: ka veng Yerikho:. mai: nawh sidauh pui tud pui rhim: pa rud tix teei kraung nawh khawm: uik, mai: tap toi: nawh, tom: dex yum, mai: grham: nawh tan:, mai: lih hu: heue:. 31 Mai: cao: giex kaing: li tix kaux lih hawt krax an, mai: yam yaox nawh kaw an, nawh via plak teh krax, mai: luan hu: heue:. 32 Mai: awm: an pui Lewix tix kaux kawx, yam hoek nawh tan:, mai: yaox kaw an, via plak teh krax mai: luan hu: heue:. 33 Viang mawh kawx nan:, pui Samarix tix kaux, yam hu: nawh krax hoek dee ot kaw an, mai: yam yaox nawh kaw an, nawh caoxrhawm: kah, 34 mai: hoek ka nawh, mai: groi rawmbee mai: rawm: plix siiet ka dee mat nawh, mai: pua: dee saux nawh, mai: deuh nawh ka piang khawng: brug nawh, mai: viex nawh hu: ka nyiex nyo, mai: kia: ngien nawh heue:. 35 Mai: singaix pasax yam lih hu: nawh teei denari ra: plah mai: tawx ka cao: nyiex nyo an, mai: ah nin: ka nawh, 'Kia: ngien kaw in, mai: baox uik maix miex ding ka piang in, yam deeh hoek aux sax, aux tag deeh viied ka maix heue:.' 36 Maix ce: yuh ka mawx, ka daux pui in loe: kaux, mawx mawh pa mawh paox plawg paox nyhawm: ka kaw pa sidauh pui tud pui rhim: an khankix?" 37 Mai: cao: prawng cao tawng: lai been an, deeh pawk ah nin:, "Mawh kaw pa caoxrhawm: ka nawh heue:." Mai: Yesux baox ah nin: ka nawh, "Maix kawx, hu: mai: yuh awm: an heue:."

Mathax mai: Marix

38 Yam hu: kix krax, Nawh Cao: laig ka daux yaong: tix yaong:, mai: bon: tix kaux pa kaux Mathax, rieb tix teei Nawh Cao: ka daux nyiex tix heue:. 39 Mai: bon: an koe: pux tix kaux pa kaux Marix, pa ngawm liep caong Yesux, mai: nghiet lox Nawh Cao: heue:. 40 Viang mawh nan: Mathax ang nyawm rhawm:, kheu kied haoh kaing pa khan: pa kheu: nawh, mai: hoek tix ah nin: ka Nawh Cao:, "Simiang eue:, Maix ang keud grawng: pux aux, hoik prah grham: aux, yuh kaing khan: kheu: nong: nong: lie? Mawh kheu nan: nhie: nawh teem: aux liak." 41 Mai: Yesux pawk lox ah nin: ka nawh, "Mathax, Mathax eue:, maix khirhawm: mai: sungsang rhawm:, ka kied nie ceu heue:. 42 Viang mawh nan:, lo ngie tix ceu khaing:, mai: Marix hoik laug tix cie ceu pa mhawm: an, pa tag ang teei khaing: nawh heue:."

Lukax

Simin Ting 11

Gau lox rawg bwan:

11:2-4 koe: daux lai Mth. 6:9-13, 11:9-13 koe: daux lai Mth. 7:7-11

1 Ka daux bawg yam an, yam Nawh Cao: rawg bwan: tix dah, khaix hoik rawg Nawh, kawncau Nawh tix kaux ah nin: ka Nawh Cao:, "Simiang eue:, gau ex ka lox rawg bwan:, awm: Yohan hoik gau ka kawncau tix liak. 2 Mai: Nawh Cao: ah nin: ka kix, "Yam rawg pex bwan: ah nin:, 'Keeing: eue:, kieh ceukaux Maix koe: krax yung: krax yi: heue:. Kieh meung Maix hoek heue:. 3 Tawx pa ih pa un: pa lo ex, son tix singaix hoik tix singaix liak. 4 Mai: pluat ploi: phimap ex liak, kheu ex kawx pluat ploi: phimap ka pui pa phit ka ex heue:. Mai: paw viex ex hoek ka daux krax nyaw krax glaw: heue:.'"

5 Nawh Cao: baox ah nin: ka kix, "Ka daux pex pui mawx pa koe: paoxgrawm tix kaux, mai: phan: hu: ka nawh yam greung sawm:, mai: ah nin: ka nawh, 'Paoxgrawm eue:, tawx aux yaog khaomun loe: lon: liak. 6 Mawh kheu paoxgrawm aux tix kaux, kaoh khaing: dee hu: tix mai: hoek ka aux, mai: aux ang koe: ceu pa khan: ka nawh heue:.' 7 Mai: kaw an pawk lox khaing: plak daux ah nin:, 'Paw vi laklheut aux, kheu hoik song: siviex, mai: kawnpraix aux khankix hoik it, dee it, tau mai: aux. Aux ang pon kaoh tix tawx ka maix heue:.' 8 Aux krai ka pex, phan: kaw an ang kaoh tix tawx ka nawh, kheu mawh nawh paoxgrawm nawh, viang mawh nan:, kheu ca: rawg nawh pot ang jud, kaw an tag kaoh tix tawx ka nawh awm: pa lo nawh heue:. 9 Mai: Aux krai ka pex, rawg heue:, mai: tag sang tawx ka pex. Sawg heue:, mai: pex tag sang yaox. Gleuh siviex heue:, mai: tag sang paoh son pex heue:. 10 Grawh grawng: nawh, kaw pa rawg tag pon. mai: kaw pa sawg tag yaox, mai: ka kaw pa gleuh siviex tag paoh son nawh heue:. 11 Ka daux pex pa mawh keeing: koe: tix kaux kaux, yam rawg yam mhaing: kawn: tix khaomun tix lon:, pa sang tawx simaox ka lie? Phan: ang mawh nan: phan: rawg kax, nawh sang tawx siuing: kah, son kax lie? 12 Phan: ang mawh nan:, phan: nawh rawg tawm: tix mu:, nawh sang tawx tamtim: ka nawh lie? 13 Phan: pex pa mawh pui caox kawx, chix tawx kraung pa mhawm: ka kawnpraix tix, Keeing: pex pa ot ka daux meung raoma: tag nie lheu: tawx Khwan: Singax Singeh, ka pui pa rawg ka Nawh miex ding?"

Pui pharishie: khankix ah lox pa sa lao

11:14-15, 17-22, 24-26 koe: daux lai Mth.12:22, 24-29, 43-45, 11:17-22 koe: daux lai Makux 3:23-27

14 Mai: Nawh Cao: grheu: phicaox pa aw: lih tix kaux, mai: yam hoik lih phicaox an pui aw: an chix sikah heue:. Mai: cub pui haoh pui hun: khankix kied daox deng: kah heue:. 15 Viang mawh nan: kix tiblah ah, "Kaw in een: rhawm: ka Belazebulax simiang phicaox, mai: grheu: phicaox khankix lih heue:." 16 Mai: tang: kaux tiblah sawg tix yaox mhai: khaing: raoma:, son sang cheuk tix yaox Nawh Cao:. 17 Viang mawh nan: Nawh Cao: tawng ceu pa keud kix, mai: ah nin: ka kix, "Meung ku meung pa ang khaw: paox tix, gwieh paox tix, tag laux tag leeing: heue:. Nyiex ku nyiex pa ang khaw: paox tix, gwieh paox tix, tag goh tag laux heue:. 18 Mai: phan: Satan kawx, ang khaw:, gwieh tokaux tix, meung nawh chix kaux chix cong: yuh ka mawx? Mawh kheu pex ah, Aux een: rhawm: ka Belazebulax mai: grheu: phicaox khankix lih heue:. 19 Phan: Aux een: rhawm: ka Belazebulax mai: grheu: phicaox khankix lih, kawnpraix pex, een: rhawm: ka pui mawx mai: grheu: phicaox lih? Mawh kheu nan:, kix tag mawh cao: prawng cao: ca: pex heue:. 20 Viang mawh nan: phan: Aux een: rhawm: ka giientaix Siyiex mai: grheu: phicaox khankix lih, Meung Siyiex hoik hoek ka piang pex tete heue:. 21 Yam pui ting riang tix kaux, yam hoik grum kraung naing, mai: pau nyiex nawh mhawm: mhawm:, kraung khrai: nawh ot nhim: mhawm: mhawm:. 22 Viang mawh kawx nan:, yam hoek kaw pa nie ting riang khaing: nawh, mai: pex nawh, mai: teei kraung naing pa deuh nawh rhawm: tix kah, tag teei tix gwieh kraung cie nawh heue:. 23 Kaw pa ang ot plak Aux, mawh pui pa koeng ka Aux heue:. Mai: kaw pa ang khrawm: tau mai: Aux, mawh pa kieh prung: prang: heue:. 24 Khaix hoik lih phi: pa seeing: pa brai: khaing: daux pui, nawh hu: preeng: dee ang rawm: koe:, sawg dee laux kawx, ang yaox heue:. Nawh tom: ah nin:, 'Aux sang deeh ing: ka nyiex aux khaing: dee hoik kaoh aux heue:.' 25 Mai: yam hoik hoek nawh tan:, nawh yaox nyiex pa hoik pih, pa hoik cox mhawm: heue:. 26 Khaix an nawh hu: mai: viex phicaox aliah kaux, pa lheu: caox khaing: tokaux nawh, mai: laig ka daux pui an, mai: ot tan: heue:. Mai: pa mawh ka pui an, lheu: caox khaing: phaoxka: heue:." 27 Yam kawn: krai Nawh Cao: ceu in khankix, bon: tix kaux ka daux cub pui haoh pui hun: an, yo lox sinum ah nin: ka Nawh, "Vaig pa nghe: Maix, mai: teeh pa peuex Maix, ting bwanson: heue:." 28 Viang mawh kawx nan:, Nawh Cao: ah nin:, "Mawh heue:, viang mawh nan: pui pa mhong gumlox Siyiex mai: priex tix hawt khankix, kied ting bwanson: heue:."

Mhai: pa daox pa am: cao: jhai: Yonax

11:29-32 koe: daux lai Mth. 12:39-42

29 Yam kawn: tag khrawm: cub pui haoh pui hun: ka Nawh Cao:, Nawh jah tix ah nin:, "Ju pui in, mawh ju pa caox heue:. Kix sawg tix yaox mhai: pa daox pa am:, mai: lheu: khaing: mhai: pa daox pa am: Yonax, tag ang tawx mhai: pa daox pa am: ka kix heue:. 30 Mawh kheu awm: Yonax hoik mawh mhai: ka pui veng Nineve, Kawn: kawn: pui kawx, tag sang mawh mhai: ka pui ju in heue:. 31 Simiang nanghawkham caong ma: seh, tag kaoh tau mai: pui ju in, ka daux singaix prawng singaix ciyang sax, mai: deuh phimap ka piang kix, kheu hoik hoek nawh khaing: dee sidah haktiex, tix nghiet gumlox pingnya cuyi simiang Sawlamun heue:. Mai: jhak heue:, Kaw pa lheu: ting khaing: simiang Sawlamun ot tin: heue:. 32 Pui veng Nineve tag cung tau mai: pui ju in ka daux singaix prawng singaix ciyang sax, mai: deuh phimap ka piang kix, kheu hoik doh keud doh sawn: kix ka phimap tix, yam sidiex gau Yonax, mai: jhak heue:, Kaw pa lheu: ting khaing: Yonax ot tin: heue:.

Grawng: pa riang tokaux

11:34-35 koe: daux lai Mth. 6:22-23

33 "Tix kaux kawx, ang sax tok kawkngu deuh dee glip, mai: greem: phliex, viang mawh nan: deuh piang dee deuh kawkngu, yuh ka mawx son sang jhan: riang ka pui pa laig tan: khawm: uik heue:. 34 Pa riang tokaux mawh ngai: heue:. Yam riang ngai: maix, tokaux maix khawm: uik kawx, naog pa riang heue:. Viang mawh nan: phan: ngai: maix ang mhawm:, tokaux maix kawx naog pa vhaik heue:. 35 Mawh kheu nan: rien rhawm: tix, yuh ka mawx pa riang pa koe: ka daux maix, tag ang mawh pa vhaik. 36 Mawh kheu, phan: tokaux maix naog pa riang, ang koe: dee vhaik ceeix kawx, tokaux maix tag sang grum naog pa riang, awm: yam kawkngu jhan: pa riang nawh, son maix heue:."

Ceu pa kharhawm: kharhi: pui Pharishie:

37 Yam kawn: sikah Nawh Cao:, Pharishie: tix kaux kok Nawh, son sang sawm: tau mai: nawh, mai: Nawh Cao: laig, mai: ngawm neung dee sawm: heue:. 38 Yam Pharishie: an, yaox Nawh Cao: ang heem: Tix, ka: sang sawm:, nawh daox deng: kah heue:. 39 Mai: Simiang ah nin: ka nawh, "Pex pa mawh Pharishie:, phak plak praix kawk mai: tawg khaing:, viang mawh nan: plak daux pex, naog pa rhim: tix teei, mai: ceu pa caox heue:. 40 Pui daox khankix eue:, Kaw pa yuh plak praix, yuh khawm: plak daux ang mawh lie? 41 Viang mawh kawx nan: son ceu pa tan pa lu, tawx ceu pa koe: plak daux khankix, mai: jhak heue:, ku ceu khawm: uik tag singax ka pex heue:.

42 "Viang mawh nan:, Pharishie: khankix eue:, pex tag kharhawm: kharhi:, kheu pex tan taux phak haw:, mai: num: sidah reu mai: num: sidah sidim: ku ceu, kao: son tix son, mai: ang pex keud grawng: pa prawng pa ca: mai: krax moh krax rhawm: Siyiex. Viang mawh ceu in khankix kawx pex khaw: tix yuh, mai: ang khaw: tix grham: tix ang yuh tang: ceu an khankix heue:. 43 Pharishie: khankix eue:, pex tag kharhawm: kharhi: heue:, kheu pex moh dee ngawm pa mhawm: khaing: paox tix, ka daux nyiex dee sidiex khankix, mai: ceu pa yungyi: pui ka daux lah daux cau khankix heue:. 44 Pex tag kharhawm: kharhi: heue:, kheu pex awm: simeeig pa ang sidawng:, mai: pui pa hu: ka piang kix ang tawng grawng: simeeig koe: tan: heue:."

45 Mai: pui pa tawng pa prawng lai been tix kaux, pawk ah nin: ka Nawh Cao:, "Sara Cao: Gau eue:, pa ah Maix nin:, viang mawh ka ex kawx, Maix map heue:." 46 Mai: Nawh Cao: ah nin:, "Pui tawng pui prawng lai been khankix eue:, pex tag kharhawm: kharhi: heue:, kheu pex kieh pui klawm: kraung pa cien mai: pa nu tix klawm:, mai: tokaux pex, pie gien: taix tix kawx, ang teeh ka kraung an heue:. 47 Pex tag kharhawm: kharhi: heue:, kheu pex cox pex yuh simeeig cao: jhai: khankix, mai: tax du pex, khankix mawh pa teei kix yum heue:. 48 Mawh kheu nan: pex mawh pa kham: mhai: sakse:, mai: jhi: pui yaox grawng: pa caw rhawm: pex, ka kaing ceu pa yuh tax du pex heue:. Mawh kheu kix hoik teei cao: jhai: khankix yum, mai: pex cox pex yuh simeeig kix heue:. 49 Mawh kheu nan: pingnya cuyi Siyiex kawx hoik ah nin:, 'Aux ploi: cao: jhai: mai: kawncau khankix ka kix heue:. Mai: kix tag sang tuktieak tukte: tiblah mai: tag sang pah yum tiblah heue:. 50 Yuh ka mawx nham: cao: jhai: khawm: uik, pa hoik lih tom: yam jah tix kaw: haktiex, tag sang hoek ka piang pui ju in heue:. 51 Jah ka nham: Abelax tom: sidah sidu hoek ka nham: Zakharix, pa hoik laux hoik yum, sinax nyiex bwan: mai: khu: dee tan heue:. Mawh heue:, Aux krai ka pex, tag sang hoek ka piang pui ju in heue:. 52 Pui tawng pui prawng lai been khankix eue:, pex tag kharhawm: kharhi: heue:. Kheu hoik teei pex jiak saw pingnya cuyi. Tokaux pex ang laig, mai: kix pa sang laig kawx, pex kieh pex kang: heue:."

53 Mai: yam hoik lih Nawh cao: khaing: tan:, pui tiem: lai mai: Pharishie: khankix, jah tix kied nyheen: Nawh son sang kieh Nawh Cao: krai grawh grawng: tom: nie ceu heue:. 54 Son sang pon tix giex lox lud, pa lih khaing: jheeh Nawh Cao: heue:.

Lukax

Simin Ting 12

Siyiex kia: ngien, Siyiex priex jhung:

12:2-9 koe: daux lai Mth. 10:26-33

1 Daux bawg yam an, yam cub pui tom: nie mheen: khrawm: paox tix, tom: kix tix kaux hoik tix kaux dig piang paox tix, Nawh Cao: jah tix ah nin: phaoxka: paox tix, ka kawncau Nawh khankix, "Rien rhawm: tix ka susaix Pharishie: khankix, pa mawh pa pie pa lhen: heue:. 2 Viang mawh nan: ang koe: tix ceu kawx, pa hoik kheem: hoik tawb, pa tag ang deeh hoe:, mai: pa hoik mox ang koe: tix ceu kawx, pa ang deeh kieh tawng heue:. 3 Mawh kheu nan:, pex hoik ah ceu pa yuh ka mawx ang ah ka daux pa vhaik, tag sang mhong: ka daux pa riang heue:. Mai: lox pa hoik ah pex ka yhaok, ka daux lawg plak daux, tag sang yo khaing: piang prang: nyiex heue:. 4 Paoxgrawm Aux khankix eue:, Aux ah ka pex, paw lhat ka kix pa chix teei tokaux yum, mai: pa ang chix yuh tid tix khaix an heue:. 5 Viang mawh nan:, Aux sang krai ka pex grawh grawng: pex khaw: tix lhat ka pa yuh ka mawx. Lhat ka kaw pa khaix nawh hoik teei yum, koe: siawp sibrawm tix taing sau: ka daux Mawnarhok. Mawh heue:, Aux krai ka pex, lhat ka kaw an. 6 Coh saik phwan: mu: ngawh asarix ra: piak, ang mawh lie? Mai: Siyiex ang piawm: saik khankix tix mu: kawx heue:. 7 Viang mawh hauk kaing: pex kawx hoik simin khawm: uik heue:. Paw vi lhat kah, kheu nie lheu: mhawm: pex khaing: saik tom: nie heue:. 8 Aux krai ka pex, pui pa kham: tix rieb tix teei Aux ku kaux plak sivoe ngai: kawn: pui, Kawn: kawn: pui kawx, tag sang kham: tix rieb tix teei nawh plak sivoe ngai: kawncau Siyiex khankix heue:. 9 Viang mawh kawx nan: pui pa thiang: tix tik Aux sivoe kawn: pui, Aux tag sang thiang: tix tik nawh sivoe kawncau Siyiex khankix heue:. 10 Pui pa ah lox map ka Kawn: kawn: pui ku kaux, tag sang pluat sang ploi: phimap nawh heue:. viang mawh nan: kaw pa sa lao ka Khawn: Singax Singeh, tag ang pluat ang ploi: nawh heue:. 11 Mai: yam kix viex pex sivoe nyiex sidiex khankix, mai: pui giex kaing: khankix, mai: laux simiang khankix, paw khirhawm: grawh grawng: lox pa sang pawk sang ah pex. 12 Mawh kheu Khwan: Singax Singeh tag sang gau pex ka daux bawg yam nari an, grawng: pex khaw: tix ah lox pa yuh ka mawx heue:."

Ah ka pa koe: rhawm: ghoing: krax ghawx

13 Mai: pui tix kaux ka daux cub pui haoh pui hun: an, ah nin: ka Nawh Cao:, "Sara Cao: Gau eue:, nhie: puxke: aux gwieh sin: ka aux liak." 14 Viang mawh nan: Nawh Cao: chawk ah nin: ka kaw an, "Pui eue:, mawx pa yuh Aux mawh, cao: prawng cao: gwieh ka piang pax?" 15 Mai: Nawh Cao: baox ah nin: ka kix, "Rien rhawm: tix son ang sang ghoing: kah heue:. Mawh kheu ju pui ang ot ka daux pa haoh kraung pa koe: tix heue:." 16 Nawh Cao: baox krai ka kix daux lox phektem: ah nin:, "Haktiex cao: mi tix kaux kied nie pon plix heue:. 17 Mai: nawh keud tix ah nin: ka daux tokaux tix, 'Aux tag sang yuh ka mawx? Kheu ang aux koe: dee een: plix cie tix khankix heue:.' 18 Mai: nawh baox ah nin:, 'Aux tag sang yuh nin: heue:, aux sang yieh nyiex krao: aux khankix, mai: baox deeh yuh pa nie ting, mai: an tag sau: nghoxca mai: kraung aux tan: heue:. 19 Mai: aux tag sang ah nin: ka ju aux, Ju eue:, maix hoik nie koe: kraung pa hoik deuh, son num tom: nie heue:, laux lee: tix, ih, nyaux, mai: gaurhawm: heue:.' 20 Viang mawh kawx nan:, Siyiex ah nin: ka nawh, 'Pui daox eue:, tag sang teei ju maix khaing: maix ka daux sawm: in heue:. Mai: ceu pa hoik cox hoik priex maix khankix, tag sang mawh cie pui mawx?' 21 Kaw pa sawg tix een: kraung khrai: son tokaux tix, mai: pa ang koe: pa hot plak Siyiex, awm: cao: mi an heue:."

Paw vi khi:

12:22-31 koe: daux lai Mth. 6:25-33

22 Mai: Nawh Cao: ah nin: ka kawncau Nawh khankix, "mawh kheu nan: Aux ah nin: ka pex, pex sang ih pa yuh ka mawx, son ju tix, mai: sang ceep pa yuh ka mawx son tokaux tix, paw vi khi: kah. 23 Kheu ju lheu: mhawm: khaing: pa ih pa un:, mai: tokaux lheu: mhawm: khaing: kraung ceep heue:. 24 Keud tix yaox grawh grawng: lak khankix heue:, kix ang rhuat ang van:, mai: kix ang vawg ang pat, mai: kix ang koe: lawg koe: krao: dee een: kraung, viang mawh nan: Siyiex tawx kix sawm:. Pex lheu: ngawh lheu: mhawm: khaing: sim: khankix miex ding? 25 Mawh kheu krax khirhawm: khirhi:, ka daux pex, mawx pa chix kieh, tokaux tix baox lhaong: tix sawk? 26 Phan: pex ang chix yuh ceu pa nie iak khaing: paox tix, pex lai khirhawm: grawh grawng: tang: ceu pa taig khankix yuh ka mawx? 27 Keud tix yaox grawh grawng: tai siyak, chix ting chix lhaong: yuh ka mawx, kix ang yuh kaing, mai: ang kling:, viang mawh nan: Aux krai ka pex, viang mawh kraung pa ceep simiang Sawlamun pa ting min: plakngai:, ang mhawm: awm: tai an khankix tix kho: kawx heue:. 28 Pex pa iak krax yumrhawm: eue:, phan: Siyiex tawx pa ceep pa mhawm: awm: an, ka num: rib num: riem daux tiag daux tu, pa koe: singai: mai: pa teei tix sau: ka daux, daux ngu pasax, Nawh sang tawx kraung ceep pa lheu: khaing: an ka pex ang mawh lie? 29 Paw vi sawg, son pa sang ih pex. mai: son pa sang nyaux pex, mai: paw kieh koe: krax ang yumrhawm: pa keud jee keud blaong. 30 Mawh kheu pui piang meung haktiex khankix khawm: uik, sawg ceu an khankix heue:. Viang mawh nan: Keeing: pex tawng grawh grawng: pa lo pex ceu in khankix heue:. 31 Mawh kheu nan: sawg Meung Siyiex ha:, mai: ceu in khankix tag sang baox tawx ka pex heue:. 32 Cub yung: iak eue:, paw lhat paw graung, mawh kheu Keeing: pex koe: rhawm: tix tawx Meung an ka pex heue: 33 Coh pa koe: pex, mai: yuh bwanson: tawx ka pui hot pui sibhawm: khankix heue:. Mai: yuh hau: pa ang chix prim:, pa mawh sinngao daux meung raoma:, pa ang chix uik chix laux, dee ang pui briex pon hoek dex, mai: dee ang pung piang siah yuh laux heue:. 34 Mawh kheu koe: kraung pex dee mawx, rhawm: pex kawx koe: tan: heue:.

Grux khre: tix sivoe sang deeh lih hoek Nawh Cao:

12:35-36 koe: daux lai Mth. 25:1-13; Makux 13:33-37, 12:39-40, 42-46 koe: daux lai Mth. 24:43-51

35 "Rawd nyoi pex, mai: kieh kawkngu pex lah heue:. 36 Mai: kieh tokaux pex mawh awm: pui pa krox tix jhak son simiang kix, yam deeh hoek nawh khaing: dee ih kapaox heue:. Yuh ka mawx, yam deeh hoek nawh, mai: gleuh siviex. Kix tag sang pon tix paoh son nawh dom: mawx dom: an heue:. 37 Yam simiang deeh hoek, siliex pa nawh yaox, krox tix pau son nawh khankix, ting bwanson: heue:. Aux krai lox tete telai ka pex, nawh tag sang nhawt maox rawd nyoi tix, mai: kieh kix ngawm tix sawm:, mai: tokaux nawh tag sang khan: kheu: ka kix heue:. 38 Mai: phan: nawh sang deeh hoek ponsawm:, bawg yam pau ra: bawg tix bawg110 ang ah, bawg yam pau loe: bawg tix bawg111 ang ah, mai: yaox kix yuh nan:, siliex khankix ting bwanson: heue:. 39 Kieh tawng ceu in heue:, phan: cao: nyiex tawng bawg yam nari sang hoek pui briex, nawh tag sang pau tix jhak, mai: ang grham: ang kieh yieh tix laig daux nyiex tix heue:. 40 Mawh kheu nan:, pex rien rhawm: tix, kheu daux bawg yam nari, yam ang pex ce: Kawn: kawn: pui tag sang hoek heue:."

41 Mai: Petrux chawk ah nin:, "Simiang eue:, Maix ah lox phektem: in ka ex lie, phan: ang mawh nan: ah ka pui khawm: uik lie?" 42 Mai: Simiang deeh ah nin:, "Siliex pa kaux sijax mai: pa koe: pingnya, pa simiang nawh hoik kieh ting piang geh nyiex tix, son sang tawx nyum: pa ih pa un:, ka kix yam hoek bawg yam pa khaw: tix tawx, mawh mawx? 43 Yam deeh hoek, simiang nawh siliex pa yaox nawh yuh nan:, ting bwanson: heue:. 44 Aux krai lox pa mawh pa meh ka pex, simiang nawh tag kieh nawh ting piang pa koe: nawh khawm: uik heue:. 45 Viang mawh nan: phan: siliex an keud tix ah nin: daux rhawm: tix, 'Simiang aux tag sang koi hoek,' mai: jah tix tap simex siliex mai: bon: siliex khankix, mai: ih mai: nyaux tom: yoek tix. 46 Simiang nawh tag hoek ka daux singaix pa ang nawh keud nawh ce:, mai: daux bawg yam nari pa ang nawh tawng, mai: mug nawh dud, mai: teei nawh deuh tau mai: pui pa ang kaux sijax khankix heue:. 47 Mai: siliex pa tawng alo pa caw simiang tix, mai: ang yuh tix rien:, awm: alo pa caw simiang nawh, tag sang sivied nawh tom: nie taix heue:. 48 Viang mawh nan: kaw pa ang tawng, mai: hoik yuh ceu pa khaw: tix sivied nawh kah. tag sang sivied nawh ceeix ngie heue:. Mai: pui mawx ang ah, pa hoik tawx ka nawh tom: nie, tag sang yuh tix teei khaing: nawh tom: nie heue:, mai: ka pui mawx ang ah pa hoik tawx ka daux tawm: taix nawh tom: nie, tag sang deeh rawg deeh mhaing: khaing: nawh tom: nie heue:.

Haktiex lih gwieh paox tix kheu Nawh Cao:

12:51-53 koe: daux lai Mth. 10:34-36

49 "Aux hoek son sang taing ngu ka piang haktiex, mai: alo Aux mawh pa yuh ka mawx? Viang mawh yamin kawx, phan: ngu an hoik cap mhawm: heue:. 50 Lheu: khaing: an, Aux koe: krax baptis112 , pa Aux tag lai baptis C ka tix ceu, mai: ka: ang nyang bax hoik bawg yam an, Aux kied khirhawm: kah miex ding heue:. 51 Pex ce: Aux hoek tix tawx krax nhi:m:rhawm: ka piang haktiex in lie? Aux krai ka pex ang mawh, viang mawh nan:. hoek tix kieh gwieh paox tix heue:. 52 Mawh kheu khaix in, ka daux nyiex tix lhang:, pa koe: phwan: kaux tag gwieh ang khaw: paox tix heue:. Loe: kaux an ang khaw: ka kiex ra: kaux, mai: kiex ra: kaux ang khaw: ka kix loe: kaux heue:. 53 Kix tag sang gwieh paox tix, keeing: tag ang khaw: ka kawn: simex tix, mai: kawn simex kawx tag ang khaw: ka keeing: nawh. Miex tag ang khaw: ka kawn: bon: tix, mai: kawn: bon: kawx tag ang khaw: ka miex nawh. Yiex tag ang khaw: ka mun tix, mai: mun kawx tag ang khaw: ka yiex nawh heue:."

54 Mai: Nawh Cao: baox ah nin: ka cub pui haoh pui hun: khankix, "Yam pex yaox paiawm: haok plak klip singaix, dom: mawx dom: an, pex ah 'Tag sang lhiex heue:.' Mai: mawh heue:. 55 Yam pex yaox phlu: bhaung: khaing: plak caong ma: seh, pex ah, 'Tag kied sieet siaoh heue:.' Mai: mawh heue:. 56 Pex pa mawh pui pie pui lhen: eue:, pex chix jhak chix tawng mhai: haktiex mai: raoma: heue:. Viang mawh nan: yuh ka mawx, pex khex ang chix tawng ka grawh grawng: bawg yam, yamin? 57 Mai: yuh pa tix tokaux pex ang chix tawng, mawh pa yuh ka mawx, pa mawh pa rah pa see? 58 Yam maix hu: ka simiang, tau mai: kaw pa sang yuh see: ka maix, nied tix yuh son sang mhawm: lox an hawt krax, phan: ang mawh nan:, ha: nawh kox reu: maix hu: ka cao: prawng see:, mai: cao: prawng see: an tag teei tix tawx maix ka cao: giex kaing:, mai: cao: giex kaing: sau: maix ka daux thawng: heue:. 59 Aux krai ka maix, maix ang pon lih khaing: dee an, tom: sidah ang maix nyang bax plud piak san ghoik tix piak heue:."

Lukax

Simin Ting 13

Doh keud doh sawn: ka phimap tix

1 Daux bawg yam an pui ot tan: tiblah, pa krai ka Nawh Cao: grawh grawng: pui Galilie: tiblah, pa simiang Pilat hoik kieh nham: kix klao: kleue: tau mai: pa tan pa lu kix heue:. 2 Mai: Nawh Cao: pawk lox ah nin: ka kix, "Pex ce: pui Galilie: khankix nie ting phimap khaing: pui Galilie: tang: kaux khawm: uik, kheu hoik kham: geu: kix ceu an khankix lie? 3 Aux krai ka pex, ang mawh. Viang mawh pex kawx, phan: pex ang doh keud doh sawn: ka phimap tix, pex tag sang laux leeing: awm: an khawm: uik heue:. 4 Phan: ang mawh nan: kix kao: kaux daix, pa nyiex lhaong: Silom hoik grhup dheem: kix yum, pex ce: kix nie lheu: phit khaing: pui pa ot ka daux veng Yerusaliem khawm: uik lie? 5 Aux krai ka pex, ang mawh. Viang mawh pex kawx, phan: pex ang doh keud doh sawn: ka phimap tix, pex tag sang laux leeing: awm: an khawm: uik heue:."

6 Mai: Nawh Cao: baox krai lox phektem: in, "Pui tix kaux koe: khaox ruh pa hoik sum: nawh ka daux sipeem nawh tix khaox, mai: nawh hoek tix sawg plix ka khaox an, mai: ang yaox tid tix heue:. 7 Mai: nawh ah nin: ka pui pa pau sipeem, 'Jhak heue:, daux loe: num pa hoik luan in, aux hoek tix sawg plix ka khaox ruh in, mai: ang yaox tid tix. Kid tix tik heue:. Yuh pa tix kieh nawh kram: haktiex yuh nin:?' 8 Mai: pui pa pau sipeem an, pawk lox ah nin: ka nawh, 'Simiang ka daux num in kawx, kawn: grham: nawh ha:, tom: aux hoik ciag sivie num: nawh, mai: sau: phon: kah heue:. 9 Mai: khaix in phan: nawh chix plix mhawm: heue:, viang mawh nan: phan: ang plix, maix pon kid tix tik heue:.'"

Cox jhawm: saux singaix twah

10 Ka daux singaix twah tix singaix, yam sidiex gau Nawh Cao: ka daux nyiex sidiex, 11 jhak heue:, bon: tix kaux, pa hoik laig phi: pa kieh nawh saux kao: num daix. Nawh hoik bok, tom: ang pon yaog tokaux tix ceeix kawx heue:. 12 Mai: yam Yesux yaox nawh, Nawh Cao: ah nin: ka nawh, "Bon: eue:, maix hoik luan khaing: jhawm: saux jhawm: ngia tix heue:." 13 Mai: Nawh Cao: teei taix Tix deuh ka piang nawh, mai: nawh uik see dom: mawx dom: an, mai: yaogyaw bwanson: Siyiex heue:. 14 Viang mawh nan:, pui giex kaing: nyiex sidiex an, songrhawm: kheu cox Yesux jhawm: saux moi: singaix twah, mai: ah nin: ka cub pui haoh pui hun: khankix, "Koe: liah singaix pa khaw: pui tix yuh kaing jhaw:. Hoek ka daux singaix an khankix, mai: paw vi hoek son sang kieh cox jhawm: saux pex moi:, ka daux singaix twah heue:." 15 Viang mawh kawx nan: Simiang pawk lox ah nin: ka nawh, "Pui pie pui lhen: khankix eue:, pex ku kaux daux pui, ploi: moi ploi: la khaing: kawg, mai: tok hu: tix tawx nyaux rawm:, singaix twah ang mawh lie? 16 Mai: bon: in, pa mawh kawnbon: Abraham, pa hoik phyawk Satan ka daux kao: num daix, ang khaw: tix ploi: nawh khaing: pa hoik phyawk tix, ka daux singaix twah lie?" 17 Yam Nawh Cao: ah nan:, pui pa koeng ka Nawh khawm: uik, koe: krax kaig heue:. Mai: cub pui haoh pui hun: khawm: uik, gauxrhawm: gauxrhi: ka grawh grawng: ceu pa ting min: plakngai: pa yuh Nawh Cao: khankix heue:.

Simie taux klaox mai: susaix

13:18-19 koe: daux lai Makux 4:30-32, 13:18-21 koe: daux lai Mth. 13:31-33

18 Mawh kheu nan: Nawh Cao: baox ah nin:, "Meung Siyiex awm: ceu pa tix? Aux tag plak kieh awm: pa tix? 19 Awm: simie taux klaox tix mu:, pa pui tix kaux, rhuat ka daux sipeem tix heue:. Mai: nawh ting lhaong:, mai: lih mawh khaox ting, mai: sim: raoma: hoek tix ot tix laux ka piang kak nawh khankix heue:."

20 Mai: Nawh Cao: baox deeh ah nin:, "Aux tag plak kieh Meung Siyiex awm: pa tix? 21 Awm: susaix pa bon: tix kaux teei mai: mox ka daux phawng: gaox loe: diag, tom: susaix an hoik laig ka daux khawm: uik mai: kieh ploh heue:."

Sidiex pui ka daux yaong:

13:34-35 koe: daux lai Mth. 23:37-39, 13:34-35 jhak ka daux lai Lukax 19:41

22 Yam kawn: hu: Nawh Cao: krax, Nawh hu: preeng: daux veng daux yaong: khankix, sidiex gau mai: baox loi hu: ka veng Yerusaliem heue:. 23 Mai: pui tix kaux chawk Nawh Cao: ah nin:, "Simiang eue:, tux pui pa sang hoek krax taoh lie?" Mai: Nawh Cao: ah nin: ka kix, 24 "Nied tix coca: son sang pon tix laig ka siviex pa sikhawp sighiep heue:. Mawh kheu, Aux krai ka pex, pui tom: nie tag sang sawg tix laig kah, mai: ang pon laig heue:. 25 Yam cao: nyiex hoik kaoh, mai: hoik song: siviex, mai: pex cung plakpraix, mai: gleuh siviex ah nin:, 'Simiang eue:, paoh siviex son ex liak heue:.' Nawh tag pawk lox mai: ah nin: ka pex, 'Grawng: kaoh pex khaing: dee mawx Aux ang tawng heue:.' 26 Yam an pex tag sang ah nin:, 'Ex hoik ih hoik nyaux dee ot Maix, mai: Maix hoik sidiex gau ka daux krax cie ex khankix heue:.' 27 Mai: Nawh tag sang baox ah nin:, 'Aux krai ka pex, Aux ang tawng dee kaoh pex, pex pa mawh pui pa yuh pa ang rah ang see khawm: uik, lih hu: khaing: Aux heue:.' 28 Yam pex yaox Abraham, mai: Icak, mai: Yakop, mai: cao: jhai: khawm: uik, ka daux Meung Siyiex, mai: hoik taing hoik tik tokaux pex plakpraix, tag sang yiem riag mai: greeik rhang: heue:. 29 Mai: kix tag kaoh hoek khaing: plak lih singaix, mai: plak klip singaix, mai: khaing: caong ma: seh, mai: caong ma: laong:, mai: ngawm ka daux Meung Siyiex heue:. 30 Mai: jhak heue:, kix pa dhah khaix tiblah tag hoek ka:, mai: kix pa hoek ka: tiblah tag dhah khaix heue:."

31 Ka daux bawg yam nari an Pharishie: tiblah hoek tix ah nin: ka Nawh Cao:, "Maix lih mai: hu: khaing: tin:, kheu simiang Herut simie tix pah Maix yum heue:." 32 Mai: Nawh Cao: ah nin: ka kix, "Hu: krai ka sox praix an, 'Aux sang grheu: phicaox khankix lih, mai: cox jhawm: saux jhawm: ngia moi:, singaix mai: pasax, mai: ka daux loe: singaix Aux tag sang grum mhawm: heue:.' 33 Viang mawh kawx nan:, Aux tag hu: krax hu: Aux, singaix, mai: pasax, mai: sikaox, mawh kheu Cao: Jhai: tix kaux kawx ang khaw: tix laux leeing:, plak praix veng Yerusaliem heue:. 34 Veng Yerusaliem eue:, veng Yerusaliem, pa teei cao: jhai: khankix yum, mai: dheem: pui pa ploi: hoek ka maix ka simaox, Aux simie tix khrawm: kawnpraix maix, awm: ia: miex khrawm: kawn: tix greem: pruik nawh miex bawg, mai: maix ang kieh Aux yuh. 35 Jhak heue:, hoik grham: nyiex pex yi ka pex heue:. Aux krai ka pex, pex tag ang lai baox yaox Aux, tom: pex ah, 113 "Kaw pa hoek ka daux ceukaux Simiang ting bwanson: heue:."

Lukax

Simin Ting 14

Grawng: cox jhawm: saux singaix twah

14:8-10 jhak daux lai Loxkab 25:6-7

1 Ka daux singaix twah tix singaix, Nawh Cao: ka daux nyiex simiang Pharishie: tix kaux, son sang sawm:, mai: kix jiang Nawh heue:. 2 Mai: jhak heue:, pui tix kaux pa koe: jhawm: saux rawm: daux vaig mai: uah tix, ot ka sivoe Nawh Cao: tan: heue:. 3 Mai: Yesux chawk ah nin:, ka pui tawng pui prawng lai been, mai: Pharishie: khankix, "Khaw: tix cox jhawm: saux jhawm: ngia moi: ka daux singaix twah lie, ang khaw: lie?" 4 Viang mawh kawx nan: kix ang nye: heue:. Mai: Nawh Cao: teei kaw an, cox jhawm: saux nawh moi:, mai: kieh nawh hu: heue:. 5 Mai: Nawh Cao: baox chawk ah nin: ka kix, "Ka daux pex koe: tix kaux kaux pa koe: la phan: ang mawh nan: pa koe: moi, pa rau ka daux o:, singaix twah, pa tag ang bluh nawh lih dom: mawx dom: an lie?" 6 Mai: kix ang pon pawk lox ka grawh grawng: ceu an heue:.

Lox phektem: ka nyo nyiex

7 Yam yaox Nawh Cao: pui pa hoik kok hoek tix sawm: khankix laug dee ngawm, pa mhawm: khaing: paox tix, Nawh krai lox phektem: yuh nin: ka kix. 8 "Yam pui tix kaux kaux kok maix ih kapaox, paw vi ngawm neung dee mhawm: khaing: paox tix, ha: nawh hoik kok pui pa lheu: ting min: plakngai: khaing: maix, 9 mai: pui pa kok maix, mai: kaw an, hoek tix ah nin: ka maix, 'Yoi: maix, son kaw in heue:.' Yam an maix tag koe: krax kaig mai: lih hu: dee tiem khaing: paox tix heue:. 10 Viang mawh kawx nan:, yam pui kok maix, hu: ngawm neung dee nie tiem khaing: paox tix, yuh ka mawx son yam hoek kaw pa kok maix, nawh tag ah nin: ka maix, 'Paoxgrawm eue:, haok ka dee lhaong: heue:.' Yam an maix tag koe: min: plakngai:, sivoe kix pa ngawm sawm: tau mai: maix khawm: uik heue:. 11 Mawh kheu pui mawx ang ah, pa yaog tokaux tix ting, tag sang yeen nawh tiem, mai: pui mawx ang ah, pa yuh tokaux tix tiem, tag sang yaog nawh ting heue:."

12 Viaung mawh ka kaw pa hoik kok Nawh Cao: kawx, Nawh ah nin:, "Yam kok maix tix khan: kheu: priex ngaix, priex bo, paw vi kok paoxgrawm maix, mai: puxaik maix, mai: paox ceu paox cat maix, mai: paox plawg paox nyhawm: maix pa mawh cao: mi khankix, phan: yuh nan: kix kawx tag deeh kok maix, mai: deeh pawk bwanson: maix heue:. 13 Viang mawh kawx nan: yam yuh maix poi, kok pui hot pui sibhawm:, mai: pui laux maung, mai: pui laux caong, mai: pui dug ngai: khankix, 14 mai: maix tag pon bwanson: heue:. Mawh kheu kix ang pon deeh pawk bwanson: maix heue:. Daux bawg yam deeh kaoh pui rah pui see khankix sax, maix tag sang deeh pon bwanson: heue:."

Lox phektem: ka priex bo ting

14:16-24 jhak daux lai Mth. 22:2-14

15 Yam pui pa ngawm neung sawm: tau mai: Nawh Cao: tix kaux, mhong: lox ceu an khankix nawh ah nin: ka Nawh Cao:, "Kaw pa tag pon tix ih khaomun ka daux Meung Siyiex, ting bwanson: heue:. 16 Viang mawh kawx nan:, Nawh Cao: ah nin: ka kaw an, "Pui tix kaux khre: priex bo ting, mai: ghaok pui tom: nie. 17 Yam hoek bawg yam sawm:, nawh ploi: kawncau tix, hu: nhie: pui pa hoik ghaok khankix hoek ah nin:, 'Hoek heue:, kheu hoik cox hoik khre: ku ceu.' 18 Mai: kix khawm: uik, awm: rhawm: paox tix, nieb ah lox son sang luan tix heue:. Kaw phaoxka: ah nin: ka nawh, 'Aux hoik liag ma: tix gwang, mai: aux tag lai hu: tix jhak heue:. Aux khyox ka maix, ploi: aux liak ha:.' 19 Mai: tang: kaux tix kaux ah nin:, 'Aux hoik liag moi phwan: brawm:, aux sang hu: cheu: tix yaox kix heue:. Aux khyox ka maix, ploi: aux liak ha:.' 20 Mai: tang: kaux tix kaux baox ah nin:, 'Aux hoik teei tix koe: moeng, mawh kheu nan: aux ang pon tix hoek heue:.' 21 Mai: kawncau an deeh hoek, mai: krai grawh grawng: ceu an khankix ka simiang nawh heue:. Yam an cao: nyiex an song: rhawmrhi: mai: ah nin: ka kawncau an, 'Nied tix hu: ka krax ting krax iak ka daux veng, mai: viex pui hot pui sibhawm:, mai: pui laux maung, mai: pui dug ngai:, mai: pui laux caong khankix hoek heue:.' 22 Mai: kawncau an ah nin:, 'Simiang eue:, hoik yuh awm: pa nhie: maix, viang mawh kawx nan: ang nyang bax naog, kawn: koe: dee ot heue:.' 23 Mai: simiang an baox deeh ah nin: ka kawncau nawh an, 'Lih hu: ka krax ting khankix, mai: deeh koe: khaox vie khankix, mai: khin: kix hoek, yuh ka mawx, son sang naog nyiex aux heue:.' 24 Grawh grawng: nawh, aux krai ka pex, pui pa hoik ghaok phaoxka: khankix tix kaux kawx tag ang pon tix cim priex bo aux heue:."

Krax pa cheuk cheu: ka kawncau

25 Cub pui haoh pui hun: tom: nie, hu: tau mai: Nawh Cao:, mai: Nawh veeh tix ah nin: ka kix, 26 "Phan: pui tix kaux kaux hoek ka Aux, mai: ang koeng ka miex tix, mai: keeing: tix, mai: moeng tix, mai: kawn: praix tix. mai: puxaik tix, mai: nan: tix, mai: khawm: ju tix kawx, nawh ang pon tix mawh kawncau Aux heue:. 27 Pui mawx ang ah, pa ang klawm: khaoxlhak tokaux tix, mai: hoek khaix Aux, ang pon tix mawh kawncau Aux heue:. 28 Mawh kheu ka daux pex koe: pui mawx, pa simie tix yuh nyiex lhaong:, pa ang ngawm phaoxka:, mai: sawn: tix yaox grawh grawng: sang uik miex ding, mai: grawh grawng: nawh koe: mau sang kub tix yuh tom: hoik lie, ang kub lie? 29 Phan: ang mawh nan:, ha khaix hoik kaw: nawh num:, mai: ang pon yuh tom: hoik, pui khawm: uik tag map ka nawh, 30 ah nin:, 'Pui in jah tix sum:, mai: ang pon yuh tom: hoik heue:.' 31 Phan: ang mawh nan: koe: simiang khunhawkham mawx, pa sang hu: tix puing: simiang khunhawkham tang: kaux, pa ang ngawm tix kum: kawng: grawh grawng: nawh pon teei pui tix mheen: ngie, mai: pon tix hu: cha: paox tix, ka simiang pa viex pui ra: mheen: lie, ang pon lie? 32 Phan: ang mawh nan:, phan: nawh yiag tix ang pex, yam kawn: ot simiang an dee singai, nawh tag sang ploi: caocau hu: khyox khaw:, son ang naing sang jih, mai: kieh nhim: heue:. 33 Mawh kheu nan: ka daux pex, pui mawx ang ah pa ang tik ang grham: ceu pa koe: tokaux tix khawm: uik, ang pon tix mawh kawncau Aux heue:. 34 Kih kienie mawh pa mhawm:, viang mawh kih kawx, phan: pa laoh nawh hoik grai:, tag sang teei pa yuh ka mawx tix deeh chix kieh nawh laoh? 35 Ang mhawm: son haktiex. viang mawh son pum: phon: kawx ang mhawm:. Pui tik nawh plakpraix khaing:. Kaw pa koe: yhaok tix mhong:, kieh nawh mhong: heue:."

Lukax

Simin Ting 15

Lox phektem: ka yung: pa grai:

15:4-7 koe: daux lai Mth.18:12-14

1 Pui koh mau mai: pui ting map ting grham: khawm: uik, hoek dex ka Nawh Cao:, son sang nghiet Nawh heue:. 2 Pharishie: khawm: pui tiem: lai khankix, sa lao ah nin:, "Pui in nieb rieb tix teei pui ting map ting grham: khankix, mai: sawm: tau mai: kix heue:."

3 Mai: Nawh Cao: krai lox phektem: in ka kix ah nin:, 4 "Ka daux pex koe: pui tix kaux kaux, pa koe: yung: tix yieh, mai: phan: grai: tix mu:, pa ang prah ang grham:, yung: tidim: dim: (99) an, ka daux tiag, mai: hu: sawg pa grai: an tom: hoik yaox nawh lie? 5 Mai: yam hoik yaox nawh yung: an, nawh gauxrhawm: gauxrhi: mai: deuh piang klip tix heue:. 6 Mai: yam hoek nawh ka nyiex tix, nawh kok nawh khrawm: paoxgrawm nawh khankix, mai: paox plawg paox nyhawm: nawh khankix, mai: ah nin: ka kix, 'Gauxrhawm: tau mai: aux heue:, kheu hoik deeh yaox aux yung: aux pa hoik grai: heue:.' 7 Aux krai ka pex, ka daux Meung Raoma: kawx, nie lheu: koe: krax gauxrhawm: gauxrhi:, yam pui koe: map koe: grham: tix kaux, doh keud doh sawn: ka phimap tix, khaing: son pui rah pui see tidim: dim: (99) kaux, pa ang lo krax doh keud doh sawn: ka phimap tix heue:.

Lox phektem: ka mau pa grai:

8 "Phan: ang mawh nan: bon: tix kaux kaux, pa koe: mau kao: bliah, mai: phan: grai: tix bliah, nawh ang tok kawkngu mai: pih nyiex tix, mai: nied tix sawg tom: yaox mau an lie? 9 Mai: yam hoik yaox nawh mau an, nawh kok nawh khrawm: paoxgrawm nawh khankix, mai: paox plawg paox nyhawm: nawh khankix, mai: ah nin:, 'Gauxrhawm: tau mai: aux heue:, kheu hoik deeh yaox aux mau tix bliah pa hoik grai: khaing: aux heue:.' 10 Awm: an, Aux krai ka pex, koe: krax gauxrhawm: gauxrhi:, dee ot kawncau Siyiex khankix, yam pui koe: map koe: grham: tix kaux doh keud doh sawn: ka phimap tix heue:."

Lox phektem: ka kawn: pa lih hu: khaing: nyiex

11 Mai: Nawh Cao: baox ah nin:, "Pui tix kaux koe: kawn: simex ra: kaux. 12 Mai: ka daux kiex, kaw pa mawh pux ah nin: ka keeing: tix, 'Keeing: eue:, tawx aux kraung cie maix, pa khaw: aux tix pon liak.' Mai: nawh gwieh sinngao tix ka kiex heue:. 13 Mai: khaix an ang awt rheung:, kawn: pa mawh pux, khrawm: kraung khrai: cie tix, mai: hu: daux meung dee singai tix meung heue:. Mai: nawh nieb yuh pa ang khaw: ang jiet, mai: kieh sin: cie tix som nai: nawk tan: heue:. 14 Mai: yam nawh hoik uik cai: pa koe: tix khawm: uik, daux meung an kied lang: teung: sibhawm:, mai: tokaux nawh kawx hot sibhawm: heue:. 15 Yam an nawh hu: ka pui meung an tix kaux, mai: yuh siliex nawh heue:. Mai: kaw an ploi: nawh hu: ka daux ma: tix, son sang kia:, sang tawx, lig sawm: heue:. 16 Mai: nawh simie tix sak tu ka ceem pa ih lig khankix, mai: pui tix kaux kawx ang tawx ka nawh heue:. 17 Viang mawh nan: yam nawh deeh doh keud tix, nawh ah nin:, 'Kawncau pa cang: pa caing ka keeing: aux koe: miex ding pa sak mai: ang uik ih, mai: aux siya: tix tin:, dex sang yum heue:. 18 Aux tag kaoh mai: deeh hu: ka keeing: aux, mai: ah nin: ka nawh, 'Keeing: eue:, aux hoik phit hoik yuh phimap ka raoma:, mai: sivoe ngai: maix heue:. 19 Ang keung: tix kawn: kok aux, mawh kawn: simex maix, kieh aux mawh ngie kawncau pa cang: pa caing ka maix tix kaux liak.' 20 Mai: nawh kaoh, mai: deeh hoek ka keeing: tix. Yam kawn: tag hoek nawh, dee singai, keeing: nawh yaox nawh, mai: koe: krax caoxrhawm:, mai: to: tix hu:, mai: khawp ngawg nawh, mai: ngheut nawh heue:. 21 Mai: kawn: simex an ah nin: ka nawh, 'Keeing: eue:, aux hoik phit hoik yuh phimap ka raoma:, mai: sivoe ngai: maix heue:. Ang keung: tix kawn: kok aux, mawh kawn: simex maix heue:.' 22 Viang mawh nan:, keeing: nawh ah nin: ka kawncau nawh khankix, 'Nied tix hu: teei kraung ceep pa lheu: mhawm: khaing: paox tix, mai: ceep ka nawh, mai: sau: jeep giien: ka taix nawh, mai: ceep kiep ka caong nawh heue:. 23 Hu: teei kawn: moi pa kluing: pa bee, mai: pah nawh. Kieh ex ih, mai: yuh krax gauxrhawm: heue:. 24 Mawh kheu kawn: simex aux in hoik yum, mai: yam in hoik deeh im:. Nawh hoik grai:, mai: hoik deeh yaox yamin heue:.' Mai: kix jah tix yuh krax gauxrhawm: gauxrhi: heue:. 25 Yam hoek kawn: nawh pa mawh puxke:, khaing: ma:, mai: hoek ka dex nyiex, nawh mhong: luah lox pi: ku ceu, mai: lox graoh lox thiao:. 26 Mai: nawh kok kawncau tix kaux mai: chawk nawh, grawng: ceu an mawh pa yuh ka mawx. 27 Mai: kawncau an deeh krai ka nawh, 'Pux maix hoik deeh hoek, mai: keeing: maix hoik pah moi iak pa kluing: pa bee, kheu hoik deeh pon nawh tix rieb nawh mhawm: mhawm: heue:.' 28 Viang mawh kawx nan:, nawh pa mawh puxke: an, songrhawm: songrhi: mai: ang laig ka daux nyiex, mai: keeing: nawh lih hu: khyox khaw: nawh heue:. 29 Viang mawh nan: nawh deeh pawk lox ka keeing: tix ah nin:, 'Jhak heue:, aux hoik yuh son maix tom: nie num in kix, mai: aux ang sax lheu: lox maix tix bawg kawx, viang mawh nan: maix ang sax tawx kawn: pex ka aux tix mu: kawx, yuh ka mawx son sang yuh aux krax gauxrhawm: gauxrhi: tau mai: paox grawm aux khankix heue:. 30 Viang mawh kawx nan:, yam kawn: maix pa hoik kieh sin: maix nai: ka bon: coh kaux khankix, deeh hoek, maix hoik pah kawn: moi pa kluing: pa bee son nawh heue:.' 31 Mai: keeing: nawh ah nin: ka nawh, 'Kawn: simex aux eue:, maix ot tau mai: aux jheeng: jheeng:, mai: can pa koe: aux khawm: uik, mawh cie maix heue:. 32 Viang mawh nan: khaw: tix yuh krax gauxrhawm: gauxrhi:, mai: gauxrhawm: heue:. Mawh kheu pux maix in hoik yum, mai: yamin hoik deeh im:, nawh hoik grai:, mai: yamin hoik deeh yaox heue:.'"

Lukax

Simin Ting 16

Lox phektem: ka kawncau pa ang rah ang see

1 Ka kawncau Nawh khankix kawx Nawh Cao: ah nin:, "Koe: cao:mi tix kaux, pa koe: kawncau pa bung: kaing tix kaux, pa dhua: pui nawh kieh kraung khrai: caomi an nai:, mai: krai ka simiang nawh heue:. 2 Mai: simiang nawh kok nawh mai: ah nin: ka nawh, Pa mhong: aux grawh grawng: maix mawh pa yuh ka mawx? Deeh tawx lai carang, grawh grawng: yam yuh maix kawncau pa bung: kaing. Mawh kheu ang maix lai baox pon tix yuh kawncau pa bung: kaing heue:.' 3 Mai: kawncau pa bung: kaing an keud ah nin: daux tokaux tix, 'Aux tag sang yuh ka mawx, kheu simiang aux hoik deeh teei, kaing bung: aux khaing: aux? Aux ang koe: riang tix sang kaong: tiex, mai: phan: caung tix ih, kaig aux kah heue:. 4 Khaix hoik rau aux khaing: kaing bung: aux, aux tag yuh ka mawx aux hoik tawng, son sang rieb pui aux ka daux nyiex kix.' 5 Mai: nawh kok pui pa ceuk ka simiang nawh ku kaux, mai: chawk ah nin: ka kaw phaoxka:, 'Maix ceuk ka simiang aux miex ding?' 6 Mai: kaw an deeh ah nin:, 'Aux ceuk rawm:bee tix yieh diag heue:.' Mai: kawncau pa bung: kaing an ah nin: ka nawh, 'Teei lai grawng: ceuk maix, mai: nied tix tiem: tiphwan: (50) heue:.' 7 Khaix an nawh baox chawk ka tang: kaux ah nin:, 'Mai: maix ceuk cie tix miex ding?' Mai: kaw an deeh ah nin: ka nawh, 'Ceuk nghoxca tix yieh diag heue:.' Mai: kawncau pa bung: kaing an ah nin: ka nawh, 'Teei lai grawng: ceuk maix, mai: nied tix tiem: tidaix (80) heue:.' 8 Mai: simiang nawh yaw kawncau pa bung: kaing pa ang rah ang see an, kheu hoik yuh nawh pa lhak pa lhiem:. Grawh grawng: nawh, kawn: praix pa dex pa dawd mai: haktiex khankix nie lhak lhiem: son bawg yam ju yam ot yam koe: kix, khaing: kawn: praix pa riang khankix heue:. 9 Aux baox krai ka pex, teei sinngao pa nieb hoik pon pex, mai: shiao, yuh ka mawx son sang pon paoxgrawm, yam pa hoik laux sinngao an, pa tag sang rieb pex ka daux nyiex gox pa tag koe: leeing: ju leeing: phan: heue:. 10 Kaw pa kaux sijax ka ceu pa nie iak, ka grawng: pa ting kawx, kaux sijax heue:. Mai: kaw pa ang rah ang see, ka ceu pa nie iak, ka ceu pa ting kawx, ang rah ang see heue:. 11 Mawh kheu nan: phan: pex ang kaux sijax, ka sinngao ceu pa ang rah ang see, mawx sang tawx pex priex sinngao pa mawh pa meh? 12 Phan: pex ang hoik kaux sijax ka cie pui tang: kaux. Mawx tag sang tawx cie tokaux pex, ka pex? 13 Kawncau tikaux kawx ang pon yuh son simiang ra: kaux, mawh kheu nawh tag koeng ka tix kaux, mai: moh tang: kaux an, phan: ang mawh nan:, nawh tag een: rhawm: ka tix kaux, mai: nieb yuh ka tang: kaux an heue:. Pex ang pon tix yuh son Siyiex, mai: khawm: son sinngao heue:."

14 Mai: Pharishie: khankix pa mawh pui pa moh mau, yam mhong: kix lox ceu an khawm: uik, kix yuh pa ang cee ang cak nyiah ka Nawh Cao: heue:. 15 Mai: Nawh Cao: ah nin: ka kix, "Pex mawh pui pa yuh awm: grang pa rah pa see sivoe kawn: pui, viang mawh nan: Siyiex tawng rhawm: rhi: pex. Mawh kheu pa kawn: pui yaog tix kieh ting, mawh pa greeing sivoe ngai: Siyiex heue:. 16 Lai lox been li, mai: cao: jhai: khankix, koe: tom: hoek Yohan heue:. Jah ka bawg yam an, sidiex gau lox bwan: gauxrhawm: gauxrhi: pa dex pa dawd mai: Meung Siyiex, mai: pui ku kaux grhawm: tix laig kah heue:. 17 Viang mawh nan: raoma: mai: haktiex lheu: yie grai:, khaing: ngai: lai pa nie iak tix mu: cod grai: khaing: daux lai been li heue:.

18 "Pui mawx ang ah, pa tik moeng tix, mai: baox moeng tang: kaux, nawh phit nawh vao heue:. Mai: kaw pa teei tix moeng, bon: pa hoik tik mex nawh, phit vao heue:.

Lox phektem: ka cao: mi mai: Lazarux

19 "Koe: caomi tix kaux, mai: nawh ceep kraung raoh klai, mai: kraung man: paing pa mhawm:, mai: yuh krax pa gauxrhawm: gauxrhi: ku singaix heue:. 20 Mai: koe: pui hot tix kaux, pa kaux Lazarux, pa ot dex siviex caomi an. Nawh naog yia khawm: kaux tix. 21 Mai: nawh simie tix ih, pa pruat pa roik, pa cod khaing: pheen: cao:mi an. Mawh heue:, viang mawh sox khankix kawx hoek tix lied dee saux nawh heue:. 22 Yam an tix singaix pui hot an yum mai: kawncau Siyeix khankix, teei nawh hu: deuh nawh ka daux naok Abraham heue:. Cao: mi an kawx yum mai: sipaung: nawh heue:. 23 Mai: nawh kied kharhawm: kharhi: daux meung yum, mai: nawh yaog ngai: nawh tix jhak, mai: yaox Abraham dee singai, mai: Lazarux ka daux naok nawh heue:. 24 Mai: nawh kok yo ah nin:, 'Keeing: Abraham eue:, caoxrhawm: ka aux liak, mai: ploi: Lazarux hoek, yuh ka mawx son nawh sang cub toh giien: tix daux rawm:, mai: kieh dak aux nghie: liak, kheu aux kied kharhawm: kharhi: ka daux rao ngu in heue:.' 25 Viang mawh kawx nan: Abraham ah nin:, 'Kawnpraix eue:, doh keud ka grawh grawng: pa hoik pon maix ceu pa mhawm: cie maix, yam kawn: im: ju maix, mai: awm: an Lazarux hoik pon ceu pa ang mhawm:, pa caox heue:, viang mawh kawx nan:, yamin nawh pon ceu pa khu: rhawm: nawh, pa nyawmrhawm: tin:, mai: maix kham: geu: pa kharhawm: kharhi: heue:. 26 Mai: lheu: khaing: in khawm: uik, sinax yiex mai: maix, koe: rawng ting rawng raux, yuh ka mawx son kix pa sang hu: khaing: tin: ka maix, tag ang chix hu:, mai: tix kaux kawx ang pon tiang tix hoek khaing: tan: ka yiex heue:.' 27 Mai: cao:mi an baox ah nin:, 'Keeing: eue:, phan: mawh nan:, aux khyox ka maix, kieh Lazarux hu: ka nyiex keeing: aux liak. 28 Son sang hu: nawh tix kham: mhai: sakse: ka kix heue:, mawh kheu aux koe: puxaik phwan: kaux, phan: ang mawh nan: ha: kix kawx, hoek ka dee kharhawm: kharhi: tin: heue:.' 29 Viang mawh kawx nan:, Abraham ah nin:, 'Kix koe: Mose mai: cao: jhai: khankix, kieh kix nghiet lox kix heue:.' 30 Mai: kaw an baox ah nin:, 'Ang mawh, keeing: Abraham eue:, viang mawh nan:, phan: tix kaux pa hoik yum, hu: ka kix, kix tag sang doh keud doh sawn: ka phimap tix heue:.' 31 Mai: Abraham baox ah nin: ka nawh, 'Phan: kix ang nghiet Mose mai: cao: jhai: khankix, viang pui tix kaux deeh kaoh khaing: krax yum kawx, kix tag ang cu ang nghiet ka lox nawh heue:.'"

Lukax

Simin Ting 17

Lox sidiex ku ceu

1 Mai: Nawh Cao: ah nin: ka kawncau Nawh khankix, "Phan: dee sideeing ang hoek ang doh mawh, viang mawh nan: kaw pa kieh koe: dee sideeing caong khankix, tag kharhawm: kharhi: heue:. 2 Mhawm: son kaw an phan: preue: simaox mhaw: ka ngawg nawh, mai: taing nawh ka daux rawm: sigrit sigra:, khaing: kieh nawh kawn: nyawm iak khankix tix kaux sideeing caong tix heue:. 3 Tokaux pex rien rhawm: tix heue:, phan: puxaik maix phit lud, ne nawh kah, mai: phan: nawh deeh doh keud doh sawn: tix, ploi: phimap nawh heue:. 4 Mai: phan: nawh phit maix daux tix singaix, tom: aliah bawg, mai: deeh tieh tix hoek ka maix aliah bawg ah nin:, 'Aux deeh doh keud doh sawn: ka phimap heue:.' Pluat ploi: phimap nawh heue:."

5 Mai: kawncau pa ting Nawh khankix ah nin: ka Simiang, "Kieh krax yumrhawm: ex baox nie baox ting liak." 6 Mai: Simiang deeh ah nin:, "Phan: pex koe: krax yumrhawm: pon mu: simie sok taux klaox tix mu:, pex tag ah ka khaox liah in, 'Maix reeig khawm: riah tix, mai: hu: jung ka daux rawm: sigrit sigra: heue:.' Mai: khaox an tag lai nghiet lox pex heue:. 7 Viang mawh kawx nan: ka daux pex, kaux pui mawx, pa koe: siliex pa thai: ma:, phan: ang mawh nan: pa liang yung:, pa sang ah nin: ka nawh, yam deeh hoek nawh khaing: ma:, 'Hoek dom: in mai: ngawm tix sawm: heue:.' 8 Jalao sang ah nan: tee: sang ah nin: ka nawh, 'Khre: ceu pa sang sawm: aux, nhawt maox rawd nyoi maix mai: khan: kheu:, tom: hoik sawm: hoik rheep aux, mai: khaix an maix tag sang sawm: sang rheep tix heue:.' Ang mawh lie? 9 Mawh kheu siliex an hoik yuh ceu pa nawh hoik nhie: nawh yuh khankix, nawh khex sang yaogyaw bwanson: nawh kah lie? 10 Awm: an pex kawx, khaix pex hoik yuh ceu pa hoik nhie: pex yuh khawm: uik. Ah nin:, 'Ex mawh ngie siliex pa ang koe: bwanson:, ex hoik yuh ceu pa khaw: ex tix yuh khaing: heue:.'"

Pui saux sipawg kao: kaux

11 Yam kawn: tag hu: Nawh Cao: ka veng Yerusaliem, Nawh hu: preeng: ka sinax meung Samarix, mai: meung Galilie: heue:. 12 Mai: yam laig Nawh Cao: ka daux yaong: tix yaong:, pui sipawg kao: kaux, cung dee singai, 13 mai: kok yo ah nin:, "Yesux, Simiang eue:, caoxrhawm: ka yix liak." 14 Mai: yam Nawh Cao: yaox kix, Nawh ah nin: ka kix, "Hu: jhi: tokaux pex ka cao: giex kaing: li pa ting khankix heue:." Mai: yam kawn: tag hu: kix, kix deeh singax heue:. 15 Ka daux kix tix kaux yam nawh yaox grawh grawng: hoik deeh moi: tix, nawh deeh tieh tix hoek mai: ah lox sinum yaogyaw Siyiex heue:. 16 Mai: nawh gup ngai: tix dex caong Nawh Cao:, mai: yaogyaw bwanson: Nawh Cao:, kaw an mawh pui Samarix heue:. 17 Mai: Yesux ah nin: ka nawh, "Pa hoik deeh kieh singax koe: kao: kaux ang mawh lie? Viang mawh kawx nan: kix dim: kaux ot dee mawx? 18 Ang koe: pa sang deeh hoek tix yaogyaw bwanson: Siyiex, lheu: khaing: pui tang: ceu tang: cat in lie?" 19 Mai: Nawh Cao: baox ah nin: ka kaw an, "Kaoh mai: hu: dee hu: maix, krax yumrhawm: maix hoik kieh maix moi: heue:."

Grux krai ka pa sang deeh hoek

17:26-27 koe: daux lai Mth. 24:37-39

20 Mai: Pharishie: khankix hoek tix chawk ah nin:, "Meung Siyiex tag sang hoek lai mawx?" Mai: Nawh Cao: pawk lox ah nin: ka kix, "Meung Siyiex hoek ka daux pa chix yaox pui ang mawh heue:. 21 Viang mawh nin: kawx, kix tag ang ah, 'Jhak heue:, koe: tin:,' phan: ang mawh nan:, 'Jhak heue:, koe: tan:.' Mawh kheu Meung Siyiex koe: ka daux pex heue:."

22 Mai: Nawh Cao: ah nin: ka kawncau Nawh khankix, "Singaix bawg yam tag sang hoek, yam sang simie pex tix yaox, singaix bawg yam Kawn: kawn: pui tix singaix, mai: pex tag ang lai pon tix yaox heue:. 23 Mai: kix tag sang ah nin: ka pex, 'Jhak heue:, tan:, jhak heue:, tin:.' Paw lih hu:, viang khaix kix kawx paw hawt heue:. 24 Mawh kheu awm: tuhsah, yam nawh tuh plak daog raoma: tix plak, jhan: riang tom: hoek daog raoma: tang: plak, yam tag sang hoek Kawn: kawn: pui ka daux singaix Nawh, tag sang awm: an heue:. 25 Viang mawh nan: Nawh tag sang kham: geu: tom: nie ceu, mai: kham: geu: pa tik pa vud pui ju in, phaoxka: heue:. 26 Awm: pa hoik mawh ka daux bawg yam singaix Noax khankix, ka daux bawg yam singaix Kawn: kawn: pui kawx, tag sang mawh awm: an heue:. 27 Kix ih, kix nyaux, mai: teei mex teei moeng, mai: teei tix tawx ka paox tix, tom: hoek singaix laig Noax ka daux nyiex reu ting, mai: rawm: haok hwan:, mai: naog piang haktiex, yuh kix laux khawm: uik heue:. 28 Awm: an ka daux bawg yam singaix Lotax khankix, kix ih, kix nyaux, kix liag, kix coh, kix sum:, mai: kix yuh nyiex heue:. 29 Viang mawh kawx nan: ka daux singaix yam lih Lotax khaing: daux veng Sawdom, lih lhiex ngu mai: mhat khaing: raoma: mai: yuh kix laux khawm: uik heue:. 30 Ka daux singaix yam tag sang kieh sidawng: Kawn: kawn: pui, tag awm: an heue:. 31 Ka daux singaix an, pui pa ot ka piang prang: nyiex, paw kieh nawh lih tix teei kraung tix ka daux nyiex, mai: awm: an pui pa ot ka daux ma:, paw kieh nawh deeh plak khaix tix heue:. 32 Doh keud ka moeng Lotax heue:. 33 Pui mawx ang ah pa sawg tix taoh ju tix, tag sang som ju heue:. Viang mawh kawx nan: pui mawx ang ah pa sang som ju, tag sang pon taoh ju tix heue:. 34 Aux krai ka pex, ka daux sawm: an, pui ra: kaux pa it piang ku: tix mu: ngie, tag sang teei tix kaux, mai: tag sang prah tang: kaux an heue:. 35 Bon: ra: kaux pa krid tau ka mhaw:, tag sang teei tix kaux, mai: tag sang prah tang: kaux an heue:." 36 114Pui ra: kaux pa ot daux kaung, tag sang teei tix kaux, mai: tag sang prah tang: kaux an heue:" 37 Mai: kix chawk Nawh Cao: ah nin:, "Simiang eue:, ceu in tag sang mawh ka dee mawx?" Mai: Nawh Cao: pawk lox ah nin: ka kix, "Tokaux yum koe: dee mawx ang ah klang: preng tag sang khrawm: tix tan: heue:."

Lukax

Simin Ting 18

Krax pa rawg bwan: jheeng: jheeng:

1 Mai: Nawh Cao: krai lox phektem: ka kix, yuh ka mawx son sang khaw: kix tix rawg bwan: jheeng: jheeng:, mai: son ang kix sang khrup rhawm:, 2 ah nin:, "Ka daux veng tix veng koe: cao: prawng see: tix kaux, pa ang lhat ka Siyiex, mai: ang chix nab yam pui heue:. 3 Mai: ka daux veng an koe: miexmai tix kaux, pa hu: ka cao: prawng see: an lawx lawx, tix ah nin:, 'Prawng son aux mhawm:, mai: yuh ka pui pa yuh see: ka aux liak.' 4 Ka daux tix vong nawh ang prawng ang yuh, viang mawh kawx nan: khaix an nawh keud tix ah nin: ka daux tokaux tix, 'Viang aux ang lhat ka Siyiex mai: ang nab yam ka pui kawx, 5 mawh kheu miexmai in hoek tix laklheut sugsag aux, aux tag sang prawng plak kiex, phan: ang mawh nan: kiex tag sang kieh aux taug nyhap tix heue:.'" 6 Mai: Simiang baox ah nin:, "Nghiet ka lox cao: prawng see: pa ang rah ang see an heue:. 7 Siyiex tag ang prawng, ang yuh plak pui pa hoik laug Nawh tix teei, pa kok ka Nawh yam pon singaix, mai: yam ponsawm:, viang ang Nawh khran: yuh kawx lie? 8 Aux krai ka pex, Nawh tag sang nied tix prawng laung laung plak kix heue:. Viang mawh kawx nan:, yam sang hoek Kawn: kawn: pui, Nawh tag sang yaox krax yumrhawm: ka piang haktiex in lie?"

Pui koh mau mai: pharishie:

9 Mai: lox phektem: in kawx, Nawh Cao: krai ka kix tiblah, pa een: rhawm: ka tokaux tix, grawng: uik rah uik see tix, mai: nieb een: tix ang koe: cee ka pa kawn: taig khawm: uik an heue:. 10 "Pui ra: kaux haok ka nyiex bwanson: sang rawg bwan:. Tix kaux mawh Pharishie:, mai: tang: kaux an, mawh pui pa koh mau heue:. 11 Pharishie: an cung rawg bwan: tix nong: nong: ah nin:, 'Siyiex eue:, aux yaogyaw bwanson: Maix, kheu ang aux awm: pui tang: kaux khankix, pa nieb rhim: tix teei, pa yuh pa ang rah ang see, pa phit pa vao, mai: mawh kheu ka pui koh mau in kawx, ang awm: heue:. 12 Aux twah pa ih pa un: tix, tix vang twah ra: bawg heue:. Mai: aux tan lu, pa pon aux khawm: uik, kao: son tix son heue:.' 13 Viang mawh kawx nan:, pui pa koh mau an, cung dee singai, mai: pie ngai: nawh, ang yaog tix maong plak raoma:, viang mawh nan: nawh dieh naok tix, mai: ah nin:, Siyiex eue:, caoxrhawm: ka aux pa mawh pui ting map ting grham: liak.' 14 Aux krai ka pex, yam pui in lih hu: ka nyiex tix, nawh hoik nie lheu: pon pa rah pa see, khaing: tang: kaux an heue:. Mawh kheu pui mawx ang ah, pa yaog tokaux tix ting, tag sang yeen nawh tiem, viang mawh kawx nan:, pui mawx ang ah, pa yuh tokaux tix tiem, tag sang yaog nawh ting."

Kawn: nyawm tau mai: Yesux

18:15-17 koe: daux lai Mth.19:13-15; Makux 10:13-16

15 Mai: kix viex khawm: kawn: ngie: tix khankix ka Nawh Cao:, yuh ka mawx son sang teeh Nawh ka kix heue:. Viang mawh nan: yam yaox kawncau Nawh khankix, kix ah ka kix heue:. 16 Viang mawh kawx nan: Yesux kok kix hoek ka Tix ah nin:, "Kieh kawn: nyawm iak khankix hoek ka Aux, paw vi sidien kix, kheu Meung Siyiex mawh cie pa awm: kix heue:. 17 Aux krai lox tete telai ka pex, pui mawx ang ah, pa ang rieb tix teei Meung Siyiex awm: kawn: nyawm iak, tag ang tau tix pon tix laig tan: heue:."

Pui awn: ju pa mawh cao: mi

18:18-30 koe: daux lai Mth.19:16-29; Makux 10:17-30

18 Mai: simiang tix kaux hoek tix chawk Nawh Cao: ah nin:, "Sara Cao: Gau pa mhawm: eue:, aux tag sang yuh ka mawx son sang pon aux, ju leeing: ju leeing: phan:?" 19 Mai: Yesux pawk lox ah nin: ka nawh, "Yuh ka mawx maix lai kok Aux mawh, 'Pa mhawm:?' Lheu: khaing: Siyiex tix kaux khaing:, tix kaux kawx ang mhawm: heue:. 20 Maix tawng lox pingnyap khankix,

115'Paw phit paw vao, paw teei ju pui yum, paw briex paw lak, paw kham: mhai: sakse: pa ang mawh ang meh, yungyi: ka miex ka keeing: tix heue:.'"

21 Mai: kaw an pawk ah nin:, "Aux hoik hawt tix yuh ceu an khankix khawm: uik, tom: yam iak aux heue:." 22 Mai: yam mhong: Yesux lox an, Nawh Cao: ah nin: ka nawh, "Pa taik maix kawn: koe: tix ceu khaing:. Hu: coh pa koe: maix khawm: uik, mai: tawx ka pui hot pui sibhawm: khankix, mai: maix tag koe: kraung khrai: ka daux meung raoma:, mai: hoek tix hawt Aux heue:." 23 Viang mawh nan:, yam mhong: nawh ceu an khankix, nawh kied khirhawm: khirhi:, kheu mawh nawh pa kied koe: heue:. 24 Mai: Yesux jhak ka nawh ah nin:, "Pui pa mawh cao: mi nu son sang laig ka daux Meung Siyiex miex ding heue:. 25 Laig kala-uk ka daux kre: nyex lheu: yie khaing: laig cao: mi ka daux Meung Siyiex heue:." 26 Mai: kix pa mhong: lox an chawk ah nin:, "Phan: mawh nan:, pui mawx tag sang pon hoek krax taoh?" 27 Viang mawh kawx nan: Nawh Cao: deeh ah nin:, "Ceu pa ang kawn: pui chix yuh, Siyiex chix yuh heue:." 28 Mai: Petrux ah nin:, "Jhak heue:, ex hoik prah hoik grham: cie ex, mai: hawt khaix Maix heue:." 29 Mai: Nawh Cao: baox ah nin: ka kix, "Aux krai lox tete telai ka pex, ang koe: pui tix kaux kawx, pa hoik prah hoik grham: nyiex nawh, phan: ang mawh nan:, moeng nawh, phan: ang mawh nan: puxaik nawh, phan: ang mawh nan:, miex keeing: nawh, phan: ang mawh nan: kawnpraix nawh, mawh kheu Meung Siyiex. 30 Pa tag ang baox nie lheu: pon ka daux bawg yamin, mai: ju leeing: ju leeing: phan: ka daux ju khaix heue:."

31 Nawh Cao: teei kix kao: kaux ra: ka Tix, mai: ah nin: ka kix, "Jhak heue:, ex tag sang haok hu: ka veng Yerusaliem, mai: ceu pa cao: jhai: khankix hoik tiem: tix deuh, tag sang grum mawh ka Kawn: kawn: pui heue:. 32 Grawh grawng: nawh, tag sang teei tix tawx Nawh ka pui tang: ceu tang: cat, mai: yuh pa ang cee ang cak, mai: pa ang khaw: ang jiet, mai: baig rawmmya: kah heue:. 33 Mai: kix tag sang sivied Nawh, mai: teei Nawh yum, mai: yam hoik hoek loe: singaix Nawh tag deeh kaoh im: heue:." 34 Kawncau Nawh khankix ang tawng grawh grawng: ceu in khankix, tix ceu kawx heue:. Mawh kheu hoik mox lox in khaing: kix, mai: kix ang tawng grawh grawng: ceu pa ah Nawh Cao: heue:.

Pui dug ngai: deeh chix yaox

18:31-33 koe: daux lai Mth.20:17-19; Makux 10:32-34, 18:35-43 koe: daux lai Mth.20:29-34; Makux 10:46-52

35 Yam Nawh Cao: hoek dex ka veng Yerikho:, pui dugngai: tix kaux ngawm dex krax mai: caung tix ih heue:. 36 Mai: kheu mhong: nawh cub pui haoh pui hun: hu: daux krax, nawh tom: chawk grawng: in mawh pa yuh ka mawx. 37 Mai: kix krai ka nawh, mawh Yesux pui veng Nazariet pa hu: lawng krax heue:. 38 Mai: kaw an kok yo ah nin:, "Yesux kawn: Dawit eue:, caoxrhawm: ka aux liak." 39 Mai: pui pa hu: sivoe khankix, ah ka nawh, son sang yawg nawh tix heue:. Viang mawh nan: nawh nie baox yo ah nin:, "Kawn: Dawit eue:, caoxrhawm: ka aux liak." 40 Mai: Yesux cung, mai: tawx lox nhie: viex kaw an hoek ka Tix, mai: yam nawh hoek dex, Nawh Cao: chawk ka nawh ah nin:, 41 "Maix simie tix kieh Aux yuh pa tix ka maix?" Mai: kaw an ah nin:, "Simiang eue:, kieh ngai: aux chix yaox liak." 42 Mai: Yesux baox ah nin: ka nawh, "Kieh yaox heue:, krax yumrhawm: maix hoik kieh maix moi:." 43 Mai: dom: mawx dom: an kaw an chix yaox, mai: yaogyaw Siyiex, hawt khaix Nawh Cao:. Mai: yam yaox pui khawm: uik ceu an, kix yaogyaw Siyiex heue:.

Lukax

Simin Ting 19

Cao: giex kaing: pui koh mau pa kaux Zakkhie:

1 Nawh Cao: laig mai: yam tag hu: preeng: daux veng Yerikho:. 2 Jhak heue:, pui tix kaux pa kaux Zakkhie:, pa mawh cao: giex kaing: pui koh mau khankix tix kaux, mai: nawh mawh pa mi pa koe: heue:. 3 Nawh sawg son sang yaox Yesux mawh pui pa yuh ka mawx, mai: kheu hun: pui nawh ang pon tix yaox, kheu nawh mawh pui kalu:, pui iak heue:. 4 Mai: nawh to: hu: sivoe, mai: haok ka khaox liah tix khaox, son sang pon tix yaox ka Nawh Cao:, kheu Nawh Cao: uik sang lawng krax an heue:. 5 Mai: yam hoek Yesux ka dee an, Nawh Cao: yaog tix simi, mai: ah nin: ka nawh, "Zakkhie: eue:, nied tix lih laung laung, mawh kheu Aux tag ot ka daux nyiex maix singaix heue:." 6 Mai: nawh nied tix lih, mai: koe: krax gauxrhawm: gauxrhi:, rieb tix teei Nawh Cao: heue:. 7 Mai: yam pui yaox, kix khawm: uik salao ah nin:, "Nawh hoik laig tix paung mai: pui pa ting map ting grham: heue:." 8 Mai: Zakkhie: cung ah nin: ka Simiang, "Jhak heue:, Simiang eue:, kraung pa koe: aux tix plak aux tawx ka pui hot pui sibhawm: khankix, mai: phan: aux hoik teei pa ang khaw: tix teei ka pui mawx ang ah, aux deeh pheuex kah pon: son heue:." 9 Mai: Yesux ah nin: ka nawh, "Singaix krax taoh hoik hoek ka nyiex in, mawh kheu kaw in kawx, mawh kawn: simex Abraham heue:. 10 Mawh kheu Kawn: kawn: pui hoek son sang sawg, mai: tix taoh pa hoik grai: khankix heue:."

Lox phektem: ka siliex kao: kaux

19:12-27 jhak daux lai Mth.25:14-30

11 Mai: yam kawn: nghiet kix ceu in khankix, Nawh Cao: baox krai lox phektem: in, mawh kheu Nawh Cao: dex hoek ka veng Yerusaliem mai: kheu ce: kix Meung Siyiex tag sang bleeh dom: mawx dom: an heue:. 12 Kheu nan: Nawh Cao: ah nin:, "Simiang tix kaux hu: ka daux meung dee singai tix meung, son sang pon haktiex son tokaux tix, mai: deeh hoek heue:. 13 Mai: nawh kok kawncau tix kao: kaux, mai: tawx mau ka kix kao: mina, mai: ah nin: ka kix, 'Yuh lai ka mau in tom: deeh hoek aux heue:.' 14 Viang mawh kawx nan:, pui meung, pui haktiex nawh, koeng ka nawh, mai: ploi: pui hawt khaix nawh ah nin:, "Ex tag ang kieh pui in ting piang ex heue:.' 15 Mai: yam deeh hoek, nawh khaix hoik pon nawh haktiex, nawh tawx lox kieh kok ka kawncau khankix, pa hoik tawx nawh mau, hoek ka nawh, yuh ka mawx son sang pon nawh tix tawng, kix hoik pon rao yuh lai miex ding. 16 Mai: kaw phaoxka: hoek sivoe nawh, ah nin:, 'Simiang eue:, mau cie maix tix mina an, hoik baox pon rao kao: mina heue:.' 17 Mai: nawh baox ah nin: ka kawncau an, 'Mhawm: heue:, kawncau pa mhawm: eue:, mawh kheu hoik yaox maix kaux sijax ka daux pa iak, pa liied, maix giex kaing: veng kao: veng heue:.' 18 Mai: ra: kaux tix kaux hoek, ah nin:, 'Simiang eue:, mau cie maix tix mina, hoik baox pon rao phwan: mina heue:.' 19 Mai: ka kawncau an kawx, nawh ah nin:, 'Maix kawx giex kaing: piang veng phwan: veng heue:.' 20 Mai: tang: kaux tix kaux hoek, ah nin:, 'Simiang eue:, jhak heue:, mau cie maix tix mina an, aux hoik pua: tix deuh ka daux man: khoek in. 21 Mawh kheu lhat aux ka maix, kheu mawh maix pui riex pa nu tix ah heue:. Maix teei ceu pa ang maix deuh, mai: vawg ceu pa ang maix rhuat heue:.' 22 Nawh ah nin: ka kawncau an, 'Kawncau pa caox eue:, aux tag prawng maix ka lox pa lih khaing: jheeh maix heue:. Mawh kheu hoik tawng maix grawng: mawh aux pui riex pa nu tix ah, pa teei ceu pa ang aux deuh, mai: pa vawg ceu pa ang aux rhuat heue:. 23 Phan: mawh nan: yuh ka mawx maix ang tawx mau cie aux ka nyiex dee deuh mau? Mai: yam deeh hoek aux, aux tag hoik pon mau aux khawm: rao heue:.' 24 Mai: nawh ah nin: ka kix pa cung dex tan: khankix, 'Deeh teei mau tix mina an khaing: nawh, mai: tawx ka kaw pa hoik koe: kao: mina heue:.' 25 Mai: kix ah nin: ka nawh, 'Simiang eue:, nawh hoik koe: kao: mina heue:.' 26 'Aux krai ka pex, pa hoik koe: ku kaux daux pui, tag sang baox tawx ka nawh heue:. Mai: kaw pa ang koe:, viang pa hoik koe: nawh kawx, tag sang teei khaing: nawh heue:. 27 Lheu: khaing: an, pui pa koeng ka aux khankix, pa ang rhawm: kieh aux yuh simiang giex kaing: kix, pex viex tin: mai: pah kix yum sivoe aux heue:.'"

Brug kawn: la laig ka daux veng Yerusaliem

19:29-38 koe: daux lai Mth.21:1-9; Makux 11:1-10, 19:35-38 koe: daux lai Yohan 12:12-15

28 Yam hoik krai Nawh Cao: ceu an, Nawh thong: hu: sivoe haok ka veng Yerusaliem heue:.

29 Mai: yam Nawh Cao: hoek dex ka yaong: Bephake mai: yaong: Betanix, ka gawng pa kok gawng Sanlun, Nawh ploi: kawncau Nawh ra: kaux hu:, 30 ah nin:. "Hu: ka daux yaong: pa koe: sivoe pax, mai: yam laig pax ka daux yaong: an, pax tag yaox kawn: la pa hoik phyawk tan:, pa ang pui sax ngawm piang heue:. Kah mai: viex nawh hoek heue:. 31 Mai: phan: pui tix kaux kaux chawk pax, 'Pax lai kah kawn: la in yuh ka mawx?' Pax tag deeh ah nin:, 'Simiang lo nawh heue:.'" 32 Kiex pa hoik ploi:, hu: mai: yaox awm: pa hoik krai Nawh Cao: ka kiex heue:. 33 Mai: yam kawn: tag kah kiex kawn: la an, cao: kawn: la an khankix, chawk kiex ah nin:, "Pax lai kah kawn: la in yuh ka mawx?" 34 Mai: kiex deeh ah nin:, "Simiang lo nawh heue:." 35 Mai: kiex viex kawn: la an hoek ka Yesux, mai: kix teei kraung ceep tix, sau: ka piang kawn: la an, mai: Nawh Cao: ngawm ka piang heue:. 36 Mai: yam hu: Nawh Cao:, kix teei kraung ceep tix nih tix tawm ka daux krax heue:. 37 Mai: yam Nawh Cao: hoek dex ka veng Yerusaliem, mai: lih jee gawng Sanlun, cub kawncau mausoi:, pa haoh pa hun: khawm: uik, koe: krax gauxrhawm: gauxrhi:, mai: yaogyaw Siyiex ka lox sinum, grawh grawng: kaing siawp sibrawm khankix, pa hoik yaox kix, 38 ah nin:,

116"Simiang Khunhawkham pa hoek ka dau ceukaux Simiang, ting bwanson: heue:. Kieh nhim: ka daux meung raoma:, kieh koe: min: plakngai: dee lhaong: khaing: paox tix heue:."

39 Mai: Pharishie: tiblah pa ot ka daux cub pui haoh pui hun: an, ah nin: ka Nawh Cao:, "Sara Cao: Gau eue:, ne ka kawncau mausoi: Maix khankix heue:." 40 Mai: Nawh Cao: deeh pawk lox ah nin: ka kix, "Aux krai ka pex, phan: pui khankix yawg tix, ang nye:, simaox rang: khankix tag sang riag yo heue:."

41 Mai: yam Nawh Cao: hoek dex ka Yerusaliem, mai: yaox veng an, Nawh yiem kah grawh grawng: nawh, 42 ah nin:, "Phan: maix hoik tawng ka daux singaix in, viang mawh phan: maix tawng grawh grawng: ceu pa dex pa dawd mai: pa nhim: maix kawx, mhawm: heue:. Viang mawh nan:, grawh grawng: khankix hoik mox khaing: ngai: maix yamin heue:. 43 Grawh grawng: nawh, bawg yam singaix tag sang hoek ka piang maix, yam pui pa koeng ka maix khankix tag sang yuh tab, yuh lawng, rob maix, mai: tag ot vung viang maix ku plak, mai: laung maix kah heue:. 44 Mai: tag sang kieh maix sidawm sidu mai: tiex, khawm: kawnpraix pa koe: ka daux maix heue:. Mai: kix tag ang grham: kieh simaox koe: tix lon: piang tix lon: ka daux maix, kheu ang maix tawng bawg yam pa hoek pa tawx bwanson: ka maix heue:."

Kieh nyiex bwan: singax

19:45-46 koe: daux lai Mth. 21:12-16; Makux 11:15-18; Yohan 2:13-16

45 Mai: Nawh Cao: laig daux nyiex bwan:, mai: grheu: pui pa coh khankix lih, 46 mai: ah nin: ka kix, "Hoik tiem: tix deuh ah nin:, 'Nyiex aux tag mawh nyiex rawg bwan:,'

117'Viang mawh kawx nan: pex hoik kieh mawh daux, dee ot pui tud pui rhim: heue:."

47 Mai: Nawh Cao: sidiex gau ka daux nyiex bwan: ku singaix. Viang mawh kawx nan: cao: giex kaing: li pa ting khankix, mai: pui tiem: lai khankix, mai: kix pa mawh pui pa ting pa lhaong: khankix, sawg tix yuh Nawh laux. 48 Mai: kix sawg ang pon ang yaox, ceu pa sang yuh kix, kheu pui ku kaux daux pui khawm: uik, breuk Nawh mai: nghiet lox Nawh Cao: heue:.

Lukax

Simin Ting 20

Chawk cheng: ka siawp sibrawm Yesux

20:1-8 koe: daux lai Mth. 21:23-27; Makux 11:27-33

1 Ka daux singaix an khankix tix singaix, yam gau Nawh Cao: ka pui khankix, ka daux nyiex bwan:, mai: sidiex gau lox bwan: gauxrhawm: gauxrhi:, cao: giex kaing: li pa ting khankix, mai: pui tiem lai khankix, hoek tau mai: kuad song: khankix ka Nawh Cao:, 2 mai: chawk ah nin: ka Nawh Cao:, "Krai ex mhong: liak, Maix pon akhwang: siawp sibrawm tix yuh ceu in khankix dee mawx? Mai: pui mawx, mawh kaw pa tawx akhwang: siawp sibrawm in ka Maix." 3 Mai: Nawh Cao: pawk lox ah nin: ka kix, "Aux kawx, tag sang chawk pex ka grawh grawng: tix ceu heue:. Deeh krai ka Aux ha:. 4 Krax baptis118 Yohan, kaoh khaing: raoma: lie?, phan: ang mawh nan: kaoh khaing: kawn: pui lie?" 5 Mai: kix keud tau ah nin:, "Phan: ex ah kaoh khaing: raoma:, Nawh Cao: tag chawk ah nin:, 'Phan: mawh nan: yuh pa tix, pex ang yumrhawm: ka nawh?' 6 Viang mawh nan:, phan: ex ah, 'Kaoh khaing: kawn: pui,' pui khawm: uik tag sang dheem: ex ka simaox heue:. Kheu kix hoik yumrhawm: grawng: mawh Yohan cao: jhai: heue:." 7 Kix tom: pawk lox ah, ang kix tawng grawng: kaoh khaing: dee mawx heue:. 8 Mai: Yesux baox ah nin: ka kix, "Aux ka ang krai ka pex, grawh grawng: pon Aux akhwang: siawp sibrawm tix yuh ceu in khankix dee mawx heue:."

Lox phektem: ka pui pa vai tix yuh sipeem plix siiet

20:9-19 koe: daux lai Mth. 21:33-46; Makux 12:1-12

9 Mai: Nawh Cao: baox jah tix sidiex lox phektem: in, ka pui khankix ah nin:, "Pui tix kaux nawh sum: sipeem plix siiet tix dah mai: yaog mai: tawx vai ka pui pa yuh sipeem plix siiet, mai: hu: tang: praix tang: klawng: rheung: nyao heue:. 10 Mai: yam hoek bawg yam, nawh ploi: kawncau tix tix kaux hu: ka pui yuh sipeem an khankix, yuh ka mawx son sang tawx kix, plix sipeem plix sieht an ka nawh. Viang mawh nan: pui pa yuh sipeem an, tap nawh mai: ploi: nawh ing: giex, taix yi heue:. 11 Mai: nawh baox deeh ploi: kawncau tix tix kaux, mai: ka nawh kawx, kix tap, mai: yuh pa ang khaw: ang jiet ka nawh, mai: ploi: nawh ing: giex, taix yi heue:. 12 Mai: nawh baox ploi: kawncau loe: kaux tix kaux, mai: ka nawh kawx, kix yuh sang yuh ngud, mai: nyhot grheu: nawh lih heue:. 13 Mai: simiang sipeem plix siiet an ah nin:, 'Aux tag sang yuh ka mawx? Aux tag ploi: kawn: simex aux pa moh tix hu: kah heue:. Kix tee: sang yungyi: ka nawh pleei:.' 14 Viang mawh kawx nan:, yam yaox pui yuh sipeem khankix ka nawh, kix keud tix ah nin: ka paox tix tix kaux hoik tix kaux, "Kaw in mawh cao: sin:. Ex teei nawh yum, yuh ka mawx sin: an tag mawh cie ex heue:.' 15 Mai: kix taing vud nawh khaing: sipeem plix siiet an, mai: teei nawh yum heue:. Mawh kheu nan: simiang sipeem plix siiet an, tag sang yuh ka mawx ka kix? 16 Nawh tag hoek yieh tix yuh laux, pui yuh sipeem an khankix, mai: tawx sipeem plix siiet an ka pui tang: kaux heue:." Mai: yam pui khankix mhong: lox an kix ah nin:, "Paw doh kieh mawh nan:." 17 Viang mawh kawx nan:, Nawh Cao: jhak ka piang kix mai: ah nin:, "Phan: mawh nan: lox pa hoik tiem: tix deuh ah nin:,

119'Simaox pa hoik tik pui yuh nyiex, hoik yuh kieh mawh kaing: ka daog,' mawh pa yuh ka mawx? 18 'Pui pa rau ka piang Simaox in ku kaux tag max, mai: Simaox in rau ka piang pui mawx ang ah tag kieh nawh prung: prang: awm: phawng: tiex heue:.'"

Tawx mau koh ka Kesa

20:20-26 koe: daux lai Mth. 22:15-22; Makux 12:13-17

19 Mai: pui tiem lai khankix, mai: cao: giex kaing: lix pa ting khankix sawg tix giex Nawh Cao: ka daux nari dom: an heue:. Mai: kix lhat ka pui khankix, kheu tawng kix Nawh Cao: hoik krai lox phektem: in ka grawng: kix heue:. 20 Mai: kix jhak Nawh Cao:, mai: ploi: pui jiang, pa yuh tokaux tix awm: pui rah pui see, yuh ka mawx son sang pon giex kix Nawh dee lud lox sikah Nawh, son sang pon tix tawx Nawh ka daux tawm: taix simiang giex kaing: haktiex heue:. 21 Mai: kix chawk Nawh Cao: ah nin:, "Sara Cao: Gau eue:, ex tawng pa sidiex pa krai Maix, mawh pa rah pa see, mai: grawng: ang Maix jhak ka pakngai: pui tix kaux kawx, mai: sidiex gau grawh grawng: krax Siyiex tete heue:. 22 Ex khaw: tix tawx mau koh ka simiang Kesa lie?, ang khaw: tix tawx lie?" 23 Viang mawh kawx nan: Nawh Cao: tawng grawng: pa lhak pa lhiem: pa pie kix, mai: ah nin: ka kix, 24 "Jhi: Aux yaox mau denari tix plah heue:. Mau in koe: rieang mai: lai pui mawx?" Mai: kix deeh ah nin:, "Mawh rieang mawh lai simiang Kesa heue:." 25 Mai: Nawh Cao: ah nin: ka kix, "Ceu pa mawh cie Kesa, tawx ka simiang Kesa heue:, mai: ceu pa mawh cie Siyiex tawx ka siyiex heue:." 26 Mai: kix ang pon tix giex dee lud lox Nawh Cao:, ka sivoe pui khankix, mai: kix daox deng: ka lox pawk Nawh, mai: kix yawg tix ang nye: heue:.

Grawng: pa deeh kaoh im:

20:27-40 koe: daux lai Mth. 22:23-33; Makux 12:18-27

27 Sadukie: tiblah hoek ka Nawh Cao:, pa ah ang koe: pa deeh kaoh im: heue:. Mai: kix chawk Nawh, 28 ah nin:, "Sara Cao: Gau eue:, Mose tiem: tix deuh ka ex ah nin:,

120'Phan: puxke: pui tix kaux yum, pa koe: moeng, mai: pa ang koe: kawn:, pux nawh tag sang teei moeng nawh, mai: eei: kawn: ceucat son puxke: nawh heue:.'

29 Koe: puxaik aliah kaux. Kaw phaoxka: teei tix koe: moeng, Nawh ang koe: kawn: koe: praix mai: yum heue:. 30 Mai: ra: kaux tix kaux, 31 mai: loe kaux tix kaux tom: hoek aliah kaux tix kaux kawx, teei bon: an, ang koe: tix prah kawnpraix mai: yum heue:. 32 Khaix an bon: an kawx yum heue:. 33 Mawh kheu nan: yam hoek bawg yam deeh kaoh im:, ka daux kix nawh tag mawh moeng kaw pa yuh ka mawx? Kheu kix khawm: aliah kaux hoik to moeng bon: an heue:." 34 Mai: Yesux ah nin: ka kix, "Kawn: pui haktiex in, teei mex teei moeng, mai: teei tix tawx ka paox tix heue:. 35 Viang mawh kawx nan: kix pa keung: tix pon, ju khaix, mai: ceu pa deeh kaoh khaing: krax yum khankix, ang teei mex teei moeng, mai: ang teei tix tawx ka paox tix heue:. 36 Grawh grawng: nawh, kix ang baox deeh chix yum khaix an, kheu kix sidu awm: kawncau Siyiex khankix, mai: kix mawh kawn: Siyiex, kheu kix mawh pui pa hoik deeh kaoh im: heue:. 37 Lheu: khaing: an, grawh grawng: pui pa yum tag deeh kaoh im:, viang mawh Mose kawx hoik jhi: yaox, dee koe: grawh grawng: yeem khaox, yam nawh kok Siyiex mawh,

121'Siyiex Abraham, mai: Siyiex Icak, mai: Siyiex Yakop heue:.'

38 Nawh ang mawh Siyiex pui yum, viang mawh nan: Nawh mawh Siyiex pui im:, mawh kheu ka Nawh pui khawm: uik mawh pa im: heue:." 39 Mai: pui tiem: lai tiblah deeh ah nin:, "Sara Cao: Gau eue:, caw, mhawm: pa ah Maix heue:." 40 Khaix an kix ang pon chawk lox ka Nawh Cao: tix ceu kawx heue:.

Cao: Khrit mawh kawn: mawh

20:41-47 koe: daux lai Mth. 22:41-23:7; Makux 12:35-40

41 Mai: Nawh Cao: ah nin: ka kix, "Kix ah Khrit mawh kawn: Dawit yuh ka mawx? 42 Grawh grawng: nawh, tokaux Dawit hoik ah nin: ka daux Lai Yaogyaw,

122'Simiang ah nin: ka Simiang aux, ngawm plak taix khawn: dawm: Aux, 43 tom: Aux kieh pui koeng ka Maix:, mawh ngot dee deuh caong Maix heue:.'

44 Mawh kheu nan:, phan: Dawit hoik kok Nawh mawh Simiang, Nawh chix mawh kawn: nawh yuh ka mawx?"

45 Mai: deeh pon mhong: pui khawm: uik, Nawh Cao: ah nin: ka kawncau Nawh khankix, 46 "Rien rhawm: tix ka pui tiem: lai khankix pa simie tix ceep sibex dha: mai: hu:, mai: moh tix kieh pui ah, lox yungyi: ka daux lah daux cau khankix, mai: kix moh dee ngawm, pa mhawm: khaing: paox tix, daux nyiex sidiex khankix, mai: dee mhawm: khaing: paox tix, dee yuh poi khankix heue:. 47 Kix chix rud tix ih nyiex miexmai khankix, mai: son sang chix pie chix lhen:, kix rawg bwan: tom: lang:. Kix tag nie pon krax prawng krax ciyang pa ting heue:."

Lukax

Simin Ting 21

Mau pa tan miexmai

21:1-4 koe: daux lai Makux 12:41-44

1 Mai: Nawh Cao: yaog tix jhak, mai: yaox cao: mi khankix sau: pa tan pa lu kix, ka daux dee deuh mau heue:. 2 Mai: Nawh Cao: yaox miexmai tix kaux pa hot pa sibhawm:, pa sau: tawng ra: bliah iak. 3 Mai: Nawh Cao: ah nin:, "Aux krai lox pa mawh pa meh ka pex, miexmai pa hot pa sibhawm: in, hoik lheu: sau: khaing: kix khawm: uik heue:. 4 Kheu pui in khankix khawm: uik, hoik sau: khaing: pa lheu: kix, viang mawh nan: bon: in hoik sau: khaing: pa hot tix, pa koe: son sang im: ju tix khawm: uik heue:."

Mhai: yam singaix pa tag sang hoek

21:5-36 koe: daux lai Mth. Simin ting 24: Makux Simin ting 13:, 21:12-17 koe: daux lai Mth.10:17-22

5 Mai: yam krai pui tiblah grawh grawng: nyiex bwan: grawng: koe: nyiex bwan: an simaox pa mhawm:, mai: pa tan pa lu, pa hoik cox mhawm: grang, Nawh Cao: ah nin:, 6 "Ceu in khankix ceu pa yaox pex, bawg yam singaix tag sang hoek, yam tag ang grham: simaox koe: tin:, kieh koe: piang paox tix tix lon: kawx, pa tag ang yieh tix tik heue:." 7 Mai: kix chawk Nawh Cao: ah nin:, "Phan: mawh nan:, ceu in khankix tag sang mawh lai mawx? Mai: yam tag sang dex mawh ceu in khankix, tag koe: mhai: pa yuh ka mawx?" 8 Mai: Nawh Cao: deeh ah nin: ka kix, "Yuh ka mawx son ang pui sang pon thong: kieh pex lud, rien rhawm: tix kah heue:. Mawh kheu pui tom: nie tag sang brex tix teei ceukaux Aux, mai: hoek tix ah nin:, 'Aux mawh Nawh heue:.' mai: 'Bawg yam uik hoek heue:.' Pex paw vi hawt khaix kix. 9 Mai: yam mhong: pex grawh grawng: naing, mai: grawng: krax simah simaing:, paw kieh lhat kah. Mawh kheu ceu in khankix tag lai hoek tix mawh phaoxka:, viang mawh kawx nan:, ang nyang bax mawh, bawg yam sidah dom: an heue:."

10 Yam an Nawh Cao: baox ah nin: ka kix, "Pui tix ceu mai: tix ceu, tix meung mai: tix meung, tag cha: paox tix, 11 mai: kla: reem ting tag sang tok, mai: praix tag sang sibhawm:, mai: ceu pa saux preng, tag sang koe: dee haoh dee mai: tag sang koe: ceu pa lhat pa graung, mai: pa ting khaing: raoma: heue:. 12 Viang mawh kawx nan:, ka: sivoe ceu in khawm: uik, kix tag sang giex pex ka taix tix, mai: tag sang tuktieak tukte: pex, mai: tawx pex ka nyiex sidiex khankix, mai: sau: pex daux thawng:, mai: viex pex sivoe simiang khunhawkham khankix, mai: cao: giex kaing: haktiex khankix, kheu ceukaux Aux heue:. 13 Viang mawh nan:, ceu in khankix tag sang mawh mhai: sakse: ka grawng: pex heue:. 14 Mawh kheu nan:, kieh een: tix tawng ka daux rhawm: tix, son ang pex sang grux keud, grawh grawng: sang pawk lox yuh ka mawx. 15 Mawh kheu Aux tag sang tawx pex jheeh, mai: pingnya cuyi, pa pui pa koeng ka pex khawm: uik, ang pon tix tieh tix thiang: heue:. 16 Viang mawh miex keeing: pex kawx, mai: puxaik, mai: paoxceu paoxcat, mai: paoxgrawm khankix, tag sang teei tix tawx pex, mai: kix tag sang kieh teei pex tiblah yum heue:. 17 Mai: pui khawm: uik tag koeng ka pex, mawh kheu ceukaux Aux heue:. 18 Viang mawh nan:, hauk kaing: pex tix gawng: kawx tag ang laux ang leeing: heue:. 19 Mawh kheu pa gun pa yeung, pex tag sang pon cie ju tokaux tix heue:.

20 "Yam yaox pex rob pui naing ka veng Yerusaliem, kieh tawng grawng: pa dex sang laux veng an heue:. 21 Yam an kieh kix pa ot ka daux meung Yudax, to: hu: ka piang gawng khankix heue:. Mai: kieh kix pa ot ka daux veng an, lih hu:, mai: kix pa ot daux tiag daux tu, paw kieh laig tan: heue:. 22 Mawh kheu singaix an khankix, mawh bawg yam sang prawng sang ciyang tix kieh naog, ceu pa hoik tiem: tix deuh khawm: uik heue:. 23 Bon: pa koe: kaux, mai: bon: pa tawx kawn: tix peuex, ka daux bawg yam singaix an khankix tag kharhawm: kharhi: heue:. Grawh grawng: nawh, tag sang koe: pa ting kharhawm: kharhi: ka haktiex in, mai: ceu pa songrhawm: songrhi: ka pui ceu in heue:. 24 Mai: kix tag goh tag laux ka lawm vaid, mai: tag sang giex tix tok kix hu:, ku praix ku meung heue:. Mai: pui tang: ceu tang: cat tag sang dig veng Yerusaliem tiem, tom: bawg yam pui tang: ceu tang: cat khankix, hoik naog heue:.

Grawng: pa tag sang deeh hoek

25 "Mai: tag sang koe: mhai: ka daux singaix, mai: khix, mai: simuing: khankix, mai: ceu pui ka piang haktiex tag kharhawm: kharhi:, ka daux krax daox krax deng:, kheu lox sinum siaox, lox pukpak rawm: sigrit sigra: heue:. 26 Mai: kawn: pui kied lhat mai: lauxrhawm:, kheu keud grawh grawng: ceu pa tag sang hoek lih tix mawh ka piang haktiex, mawh kheu siawp sibrawm raoma: khankix tag sang yungyiang: heue:. 27 Mai: yam an kix tag sang yaox Kawn: kawn: pui, viex siawp sibrawm, mai: min: plakngai: pa ting, hoek ka daux paiawm: heue:. 28 Yam jah tix mawh ceu in khankix, yaog kaing: pex mai: maong tix jhak heue:. Mawh kheu dex hoek bawg yam sang taoh pex." 29 Mai: Nawh Cao: krai lox phektem: pa yuh nin: ka kix, 'Jhak ka khaox ruh, mai: khaox khawm: uik. 30 Yam kix glaoh lhax, pex yaox mai: pie tokaux pex kawx, tawng grawng: dex sang hoek yam raux heue:. 31 Awm: an yam yaox pex ceu in khankix uik sang mawh, kieh pex tawng grawh grawng: Meung Siyiex dex sang hoek heue:. 32 Aux krai lox tete telai ka pex, pui ju in tag ang bax luan, tom: ceu in khankix khawm: uik, tag hoik mawh heue:. 33 Raoma: mai: haktiex tag sang grai:, viang mawh kawx nan:, gum lox Aux in tag ang grai: heue:.

34 "Rien rhawm: tix ka tokaux pex, phan: ang mawh nan:, rhawm: pex tag sivix tag cien kheu ceu pa nie luan yuh pex, mai: pa yoek, mai: ceu pa khirhawm: pa dex pa dawd mai: ju in khankix, mai: singaix an ha kox hoek piang pex yam ang pex keud pex ce: sax, awm: khlap rub heue:. 35 Mawh kheu tag sang hoek piang kix pa ot piang ca: haktiex khawm: uik awm: an heue:. 36 Viang mawh kawx nan:, pex pau tix jhak ku bawg ku yam, mai: rawg bwan:, yuh ka mawx son sang pon pex tix luan khaing: ceu in khankix khawm: uik, pa tag sang hoek tix mawh, mai: son sang pon tix cung sivoe Kawn: kawn: pui heue:."

37 Mai: ku singaix Nawh Cao: sidiex gau ka daux nyiex bwan:, mai: ku sawm: Nawh hu: it hu: tum ka gawng, pa kok mawh gawng Sanlun heue:. 38 Yam ponngawb caocao pui khawm: uik hoek ka Nawh Cao: ka daux nyiex bwan:, son sang nghiet Nawh heue:.

Lukax

Simin Ting 22

Khre: ka dee sang ih poi pasakha

22:1-2 koe: daux lai Mth. 26:2-5; Makux 14:1-2, 10-11

1 Yam an dex hoek poi khaomun pa ang sau: susaix, pa kok mawh Pasakha. 2 Mai: cao: giex kaing: li pa ting, mai: pui tiem: lai khankix, sawg grawh grawng: ceu pa kix sang pon tix teei Nawh Cao: yum, yuh ka mawx, mawh kheu kix lhat ka pui khankix heue:.

3 Mai: Satan laig ka daux Yudax pa kok mawh Isakariut, pa mawh tix kaux ka daux kao: kaux ra: an heue:. 4 Mai: nawh lih hu: kum: kawng: mai: cao: giex kaing: li pa ting khankix, mai: cao: giex kaing nyiex bwan: khankix, grawh grawng: sang pon nawh tix tawx Nawh Cao: ka kix yuh ka mawx. 5 Mai: kix gauxrhawm:, ah lox dud grawng: sang tawx kix mau ka nawh heue:. 6 Mai: nawh cu lox an, mai: sawg bawg yam son sang pon tix tawx Nawh Cao: ka kix, yam ang cub pui haoh ot heue:.

7 Mai: singaix khaomun pa ang sau: susaix, pa mawh yam kix tag lai pah, tag lai tan yung: Pasakha hoek heue:. 8 Mai: Nawh Cao: ploi: Petrux mai: Yohan, ah nin:, "Hu: mai: cox khre: Pasakha son ex, son sang ih ex kah heue:." 9 Mai: kiex chawk ka Nawh Cao:, "Maix simie yiex cox khre: dee mawx?" 10 Mai: Nawh Cao: deeh ah nin: ka kiex, "Jhak heue:, yam laig pax ka daux veng, pui pa viex aw: rawm: tix kaux tag sipub pax heue:. Hawt khaix nawh mai: laig ka daux nyiex dee hu: nawh, 11 mai: ah nin: ka cao: nyiex pa mhawm: an, 'Sara Cao: Gau chawk ah nin: ka maix, 'Lawg son nyo maix, dee tag sang ih Aux Pasakha tau mai: kawncau Aux khankix, koe: dee mawx?' 12 Mai: nawh tag jhi: pax yaox lawg pa ting plak piang, pa hoik koe: kraung. Cox khre: dee an heue:." 13 Mai: kiex hu: mai: yaox awm: pa hoik krai Nawh Cao: ka kiex, mai: kiex cox khre: poi Pasakha heue:.

Priex bo pa ghoik

22:7-13 koe: daux lai Mth.26:17-19; Makux 14:12-16, 22:17-20 koe: daux lai Mth.26:26-29; Makux 14:22-25; 1.Kawrin 11:23-25, 22:21-23 koe: daux lai Mth.26:21-24; Makux 14:18-21; Yohan 13:21-30, 22:25-27 koe: daux lai Mth.20:25-28; Makux 10:42-45, 22:33-34 koe: daux lai Mth.26:33-35; Makux 14:29-31; Yohan 13:37-38

14 Yam uik hoek bawg yam nari, Nawh Cao: ngawm tau mai: kawncau Nawh pa ting kao: kaux ra:. 15 Mai: Nawh Cao: ah nin: ka kix, "Aux koe: rhawm: mai: simie tix ih poi Pasakha in, tau mai: pex ka: sivoe ang Aux nyang bax kham: geu: heue:. 16 Grawh grawng: nawh, Aux krai ka pex, Aux tag ang baox ih Pasakha, tom: hoik grum naog nawh ka daux Meung Siyiex heue:." 17 Mai: Nawh Cao: rieb tix teei kawk, mai: khaix hoik yaogyaw Nawh bwanson:, Nawh ah nin:, "Teei in, mai: gwieh ka paox tix heue:. 18 Grawh grawng: nawh, Aux krai ka pex, Aux tag ang lai baox nyaux rawm: plix nhu: plix siiet, tom: sidah ang nyang bax hoek Meung Siyiex heue:." 19 Mai: Nawh Cao: teei khaomun, mai: khaix hoik yaogyaw Nawh bwanson:, Nawh sivit mai: tawx ka kix ah nin:, "In mawh tokaux Aux pa hoik tawx son pex heue:. Yuh ceu in son sang doh keud doh sawn: ka Aux heue:." 20 Mai: kawk kawx, Nawh teei awm: an, khaix hoik ih priex bo, ah nin: "Kawk in mawh sijax mukheu pa khraox, ka daux nham: Aux, pa mawh pa lih son pex heue:. 21 Viang mawh nan:, jhak heue:, taix kaw pa sang tik sang tawx Aux, koe: tau mai: Aux, piang pheen: in heue:. 22 grawh grawng: nawh, Kawn: kawn: pui tag sang hu: awm: pa hoik dud ah tete, viang mawh kawx nan:, pui pa tik pa tawx Nawh, tag kharhawm: kharhi: heue:." 23 Mai: kix jah tix chawk ka paox tix, grawh grawng:, ka daux kix, pui mawx pa sang yuh ceu in heue:.

Grawng: mawh mawx pa nie ting

24 Lheu: khaing: an kix thung: thiang: paox tix grawh grawng: ka daux kix pui mawx nie ting khaing: paox tix. 25 Mai: Nawh Cao: ah nin: ka kix, "Simiang khunhawkham pui tang: ceu tang: cat khankix giex kaing: kix, mai: kix pa ting piang kix, kok mawh cao: pa teem: khankix heue:. 26 Viang mawh kawx nan:, ka daux pex tag ang mawh nan:, viang mawh nan:, kaw pa ting khaing: paox tix ka daux pex, kieh nawh mawh awm: pui awn: ju heue:. Mai: kaw pa bung: kaing:, kieh nawh awm: pui cau pui soi: heue:. 27 Grawh grawng: nawh, kaw pa yuh ka mawx nie lheu: ting, mawh kaw pa ngawm tix sawm: lie, phan: ang mawh nan: mawh kaw pa khan: kheu lie? Kaw pa ngawm tix sawm: lheu: ting ang mawh lie? Viang mawh kawx nan:, Aux ot sinax pex awm: kaw pa khan: kheu heue:. 28 Viang mawh nan: pex mawh kix pa hoik ot tau mai: Aux, ka daux ceu pa nyaw pa glaw: pa kham: Aux heue:. 29 Mai: Aux tawx meung tix meung ka pex, awm: Keeing: Aux tawx ka Aux, 30 yuh ka mawx son pex tag pon tix ih tix nyaux ka pheen: Aux, ka daux meung Aux, mai: kieh pex ngawm piang dang: ngeung, tix prawng pui Isarilax kao: ceu ra: heue:.

31 "Simon eue:, Simon, jhak heue:, Satan hoik mhaing: maix, yuh ka mawx son sang pon nawh tix grheung: maix, awm: grheung: nghoxca heue:. 32 Viang mawh nan: Aux hoik rawg bwan:, son maix, yuh ka mawx son ang krax yumrhawm: maix sang laux heue:. Mai: yam deeh tieh maix tix hoek maix tag kieh puxaik maix khankix kaux cong: heue:." 33 Mai: Simon deeh ah nin: ka Nawh Cao:, "Simiang eue:, aux uik pon tix hu: mai: Maix, daux thawng: mai: khawm: dee yum heue:." 34 Mai: Nawh Cao: baox ah nin:, "Aux krai ka maix, Petrux eue:, ka daux singaix ia: tag ang ux, tom: ang maix bax thiang: grawh grawng: pa tawng maix Aux loe: bawg heue:."

35 Mai: Nawh Cao: baox ah nin: ka kix, "Yam Aux ploi: pex hu:, yam ang viex hau: mau, mai: bau:, mai: kiep, pex koe: dee lo tix ceu ceu lie?" Mai: kix deeh ah nin:, "Ang lo tid tix heue:." 36 Mai: Nawh Cao: baox ah nin: ka kix, "Viang mawh kawx nan:, yamin, kaw pa koe: hau: mau, kieh nawh viex hu:, mai: kaw pa koe: bau: kieh nawh viex hu: heue:. Mai: kaw pa ang koe: vaid, kieh nawh coh kraung ceep tix mai: liag heue:. 37 Grawh grawng: nawh, Aux krai ka pex, ceu pa hoik tiem: tix deuh tag lai naog ka daux Aux heue:. Pa mawh,

123'Hoik simin Nawh tau mai: pui pa phit pa lud khankix,'

mawh kheu grawh grawng: ceu pa dex pa dawd mai: Aux tag uik sidah heue:." 38 Mai: kix baox ah nin:, "Simiang eue:, jhak heue:, ex hoik koe:, vaid ra: kre: tin: heue:." Mai: Nawh Cao: baox ah nin: ka kix, "Uik kub heue:."

Krax rawg bwan: ka daux sipeem Kesasemanix

22:40-46 koe: daux lai Mth.26:36-46; Makux 14:32-42

39 Nawh Cao: lih mai: hu:, awm: hoik sax koe: been Nawh, ka dee gawng Sanlun, mai: kawncau Nawh khankix kawx hawt khaix Nawh Cao: heue:. 40 Yam hoek Nawh Cao: dee an, Nawh ah nin: ka kix, "Rawg bwan: heue:, yuh ka mawx son ang pex sang laig ka daux pa nyaw pa glaw:." 41 Mai: Nawh Cao: gwieh hu: khaing: kix, pon dee nyak hoek simaox tix taix, mai: Nawh Cao: grux ngawng mai: rawg bwan:, 42 ah nin:, "Keeing: eue:, phan: Maix koe: rhawm:, teei kawk in khaing: Aux liak, viang mawh kawx nan: paw kieh mawh alo pa caw pa khaw: mai: Aux, viang mawh nan: kieh mawh alo pa caw pa khaw: Maix heue:." 43 Mai: kawncau Siyiex tix kaux lih hoek mai: baox thiem: riang rao ka Nawh heue:. 44 Mai: Nawh Cao: kharhawm: kharhi: kied sigrien, mai: baox nied tix rawg bwan:, mai: rawm: lah Nawh lih mawh awm: jah nham: pa ting, mai: cod piang tiex heue:. 45 Mai: yam hoik kaoh Nawh Cao: khaing: rawg bwan:, Nawh hoek ka kawncau Nawh khankix, mai: yaox laig it kix, kheu krax khirhawm: khirhi: heue:. 46 Mai: Nawh Cao: ah nin: ka kix, "Pex laig it yuh ka mawx? Kaoh mai: rawg bwan:, yuh ka mawx son ang pex sang laig ka daux pa nyaw pa glaw: heue:."

Yudax tik tawx kah Yesux

22:47-53 koe: daux lai Mth.26:47-56; Makux 14:43-50; Yohan 18:3-11

47 Yam kawn: sikah Nawh Cao:, jhak heue:, pui pa haoh pa hun:, mai: kaw pa kok mawh Yudax, pa mawh tix kaux ka daux kix kao: kaux ra:, thong: kix hoek, mai: nawh hoek dex ka Yesux mai: ngheut Nawh heue:. 48 Mai: Yesux chawk nawh ah nin:, "Yudax eue:, maix tik maix tawx Kawn: kawn: pui ka pa ngheut lie?" 49 Mai: yam kawncau Nawh khankix, pa ot sivie Nawh Cao:, yaox grawh grawng: pa tag sang mawh, kix chawk ah nin:, "Simiang eue:, ex tag sivoeg ka vaid lie?" 50 Mai: ka daux kix tix kaux kid ka siliex cao: giex kaing: li pa ting, mai: dud yhaok khawn: dawm: nawh heue:. 51 Mai: Yesux ah nin:, "Naox heue:." Mai: Nawh Cao: teeh ka yhaok kaw an, mai: kieh nawh moi: heue:. 52 Mai: Yesux ah nin: ka cao: giex kaing: li pa ting khankix, mai: ka cao: giex kaing: nyiex bwan: khankix, mai: ka kuad song: khankix pa hoek tix teei Nawh Cao:, "Pex viex vaid viex khaox, hoek tix giex ka Aux, awm: giex pui tud pui rhim: lie? 53 Yam ot Aux tan: mai: pex ka daux nyiex bwan: ku singaix, pex ang nyeu taix tix, tix giex Aux, viang mawh nan: in mawh bawg yam nari pex, mai: siawp sibrawm pa vhaik heue:."

Giex ka Yesux

22:55-62 koe: daux lai Mth. 26:69-75; Makux 14:66-72; Yohan 18:16-18, 25-27

54 Mai: kix giex Nawh Cao: mai: tok Nawh mai: viex Nawh hu: ka nyiex cao: giex kaing: li pa ting piang khawm: uik heue:. Mai: Petrux hawt hu: dee singai heue:. 55 Mai: yam hoik phlu: kix ngu ka sinax brawk nyiex, mai: hoik ngawm tau, Petrux kawx, ngawm ka sinax kix heue:. 56 Mai: bon: pa mawh siliex tix kaux, yaox nawh ngawm ka daux pa riang ngu, mai: jawg tix jhak nawh, ah nin:, "Pui in kawx, ot tau mai: Nawh heue:." 57 Viang mawh nan:, nawh thiang: tix ah nin:, "Bon: eue:, Aux ang tawng Nawh." 58 Mai: khaix an tivud tang: kaux tix kaux, yaox nawh mai: ah nin:, "Maix kawx, mawh ka daux kix tix kaux heue:." Viang mawh nan: Petrux deeh ah nin:, "Pui eue:, aux ang mawh." 59 Mai: khaix an dex rheung: tix nari, tang: kaux tix kaux, krai awm: pa uik tawng nawh ah nin:, "Kaw in kawx mawh pa hoik ot tau mai: Nawh tete, kheu mawh nawh pui meung Galilie: heue:." 60 Viang mawh nan: Petrux deeh ah nin:, "Pui eue:, aux ang tawng pa ah maix." Mai: yam kawn: tag sikah nawh, ia: ux dom: mawx dom: an heue:. 61 Mai: Simiang veeh, mai: jhak ka piang Petrux. Mai: Petrux doh keud ka gumlox Simiang, pa hoik krai Nawh Cao: ka nawh, ah nin:, "Ka daux singaix ia: tag ang ux, tom: ang maix, bax thiang: tix tik Aux loe: bawg heue:." 62 Mai: nawh lih hu: mai: nied tix yiem heue:.

Pui naing yuh pa ang cee ang cak ka Yesux

22:63-65 koe: daux lai Mth.26:67-68; Makux 14:65; Yohan 18:22-23

63 Mai: pui pa giex ka Nawh Cao: khankix, yuh pa ang cee ang cak ka Nawh, mai: tap Nawh heue:. 64 Mai: kix lhop vien ka ngai: Nawh Cao:, mai: chawk Nawh ah nin:, "Krai lox jhai: ka ex liak, mawh pui mawx pa tap Maix?" 65 Mai: kix ah lox tang: ceu tom: nie ka Nawh Cao:, son sang yuh ceu pa ang cee ang cak ka Nawh heue:.

Chawk cheng: Nawh Cao: ka sivoe dee khrawm: tix prawng see:

22:67-71 koe: daux lai Mth.26:63-66; Makux 14:61-63; Yohan 18:19-21

66 Mai: yam uik riang praix, kix pa mawh kuad song: pui khankix, khrawm: paox tix, khawm: cao: giex kaing: li pa ting khankix, mai: khawm: pui tiem: lai khankix, mai: kix tok Nawh Cao: hu:, ka dee khrawm: tix prawng see: cie kix, ah nin:, 67 "Phan: Maix mawh Khrit, krai ka ex." Viang mawh kawx nan: Nawh Cao: ah nin: ka kix, "Phan: Aux krai ka pex, pex tag ang yumrhawm: kah. 68 Mai: phan: Aux chawk ka pex, pex tag ang deeh pawk heue:. 69 Viang mawh nan: jah tom: yamin, Kawn: kawn: pui tag sang ngawm, plak taix khawn: dawm:, siawp sibrawm Siyiex heue:." 70 Mai: kix khawm: uik ah nin:, "Phan: mawh nan: mawh Maix Kawn: Siyiex lie?" Mai: Nawh Cao: ah nin: ka kix, "Pex ah mawh Aux heue:." 71 Mai: kix baox ah nin:, "Ex kawn: baox lo mhai: sakse: yuh ka mawx? Kheu tokaux ex hoik mhong: lox khaing: jheeh Nawh heue:."

Lukax

Simin Ting 23

Chawk cheng: sivoe ngai: Simiang Pilat

23:2-3 koe: daux lai Mth.27:11-14; Makux 15:2-5; Yohan 18:29-37, 23:18-25 koe: daux lai Mth.27:15-26; Makux 15:6-15; Yohan 18:39-19:16

1 Mai: cub kix khawm: uik kaoh mai: viex Nawh Cao: hu: ka sivoe simiang Pilat. 2 Mai: kix jah tix deuh phimap ka piang Nawh Cao:, ah nin:, "Ex yaox Pui in yuh kieh pui meung ex lud, mai: ang kieh tawx mau koh ka simiang Kesa, mai: Nawh ah tokaux Tix mawh, 'Khrit Simieaug Khunhawkham heue:.'" 3 Mai: simiang Pilat chawk Nawh Cao: ah nin:, "Mawh Maix Simiang Khunhawkham Pui Yudax lie?" Mai: Nawh Cao: pawk lox ah nin:, "Mawh awm: pa ah maix heue:." 4 Mai: simiang Pilat ah nin: ka cao: giex kaing: li pa ting khankix, mai: ka cub pui pa haoh pa hun: khankix, "Ang aux yaox dee phit dee lud ka daux Pui in tix ceu kawx heue:." 5 Viang mawh kawx nan:, kix nie baox lheu:, nied tix ah nin:, "Nawh hoik cheeik ka kawn: pui, ka lox sidiex lox gau Nawh, jah ka meung Galilie:, mai: ka daux meung Yudax ku dah ku dee, tom: hoek ka dee in heue:." 6 Viang mawh kawx nan: yam mhong: simiang Pilat lox an, nawh chawk kix grawng: mawh Nawh Cao: pui meung Galilie: lie. 7 Mai: yam tawng nawh grawng: mawh Nawh Cao: Pui pa ot greem: simiang Herut, nawh ploi: Nawh Cao: hu: ka simiang Herut, pa tokaux nawh kawx ot ka daux veng Yerusaliem, ka daux bawg yam singaix an khankix heue:.

Kah Nawh tawx hoek ka Herut

8 Yam yaox Herut Yesux, nawh kied gauxrhawm: gauxrhi:, mawh kheu nawh hoik uik dawg rheung: simie tix yaox Nawh Cao:, kheu nawh hoik mhong: grawh grawng: Nawh, mai: simie tix yaox mhai: pa daox pa am: pa yuh Nawh Cao: tix ceu ceu heue:. 9 Mai: nawh chawk Nawh Cao: ka lox tom: nie, viang mawh kawx nan: Nawh ang pawk lox tid tix ka nawh heue:. 10 Mai: cao: giex kaing: li pa ting khankix, mai: pui tiem: lai khankix, cung tan:, mai: nied tix baox deuh phimap ka Nawh Cao: heue:. 11 Mai: Herut, khawm: pui naing nawh khankix, nieb yuh pa ang nab ang yam:, mai: yuh pa ang cee ang cak ka Nawh, mai: kieh Nawh ceep kraung pa jiet mhawm: grang, mai: deeh ploi: Nawh Cao: hu: ka simiang Pilat heue:. 12 Simiang Herut mai: simiang Pilat mawh paoxgrawm dom: an ka daux singaix an heue:. Grawh grawng: nawh, glang: ka: in kiex koeng ka paox tix heue:.

Simiang Pilat simie tix ploi: Yesux

13 Mai: simiang Pilat kok cao: giex kaing: li pa ting khankix, mai: simiang khankix, mai: pui khankix, khrawm: paox tix, 14 mai: ah nin: ka kix, "Pex hoik viex Pui in ka aux, awm: mawh Pui pa kieh pui phit lud heue:. Jhak heue:, aux hoik chawk hoik cheng: Nawh ka sivoe pex, mai: ang yaox dee phit dee lud Pui in, grawng: ceu pa deuh pex phimap ka Nawh heue:. 15 Lheu: khaing: an simiang Herut kawx ang yaox dee phit, kheu nawh hoik deeh ploi: Nawh hoek ka ex, mai: jhak heue:, Nawh ang nyang yuh ceu pa keung: tix yum tid tix heue:. 16 Mawh kheu nan: aux tag sang sivied Nawh mai: ploi: Nawh heue:." 17 (Mawh kheu nan: tag lai ploi: tix kaux ka kix, ka daux poi an heue:). 18 Viang mawh kawx nan: kix khawm: uik kok yo tau ah nin:, "Teei tix tik Pui in, mai: ploi: Barabax ka ex heue:." 19 Barabax mawh pui pa hoik sau: ka daux thawng:, kheu mawh nawh pa hoik tieh hoik feen tix kaux, yam feen ka daux veng an, mai: pa hoik pah pui yum heue:. 20 Mai: simiang Pilat baox deeh ah ka kix tix bawg, kheu simie nawh tix ploi: Yesux. 21 Viang mawh nan: kix khawm: uik kok yo ah nin:, "Tawk Nawh piang khaoxlhak, tawk piang khaoxlhak heue:." 22 Mai: nawh chawk ka kix loe: bawg tix bawg ah nin:, "Mawh kheu pa tix, Pui in hoik yuh pa caox pa yuh ka mawx? Aux ang yaox grawng: ceu pa khaw: Nawh tix yum tix ceu kawx heue:. Mawh kheu nan: aux tag sang sivied Nawh mai: ploi: Nawh heue:." 23 Viang mawh nan: kix nied tix baox kok lox sinum, mhaing: tix kieh tawk Nawh Cao: piang khaoxlhak, mai: lox kix, mai: lox cao: giex kaing: li pa ting khankix pex heue:. 24 Mai: simiang Pilat prawng ca:, yuh ka mawx son sang yuh, awm: ceu pa rawg pa mhaing: kix heue:. 25 Mai: nawh ploi: ka kaw pa hoik sau: ka daux thawng:, kheu pa hoik tieh hoik feen, mai: kheu hoik pah pui yum, awm: pa rawg pa mhaing: kix. Viang mawh nan: Yesux nawh tawx ka kix, son sang yuh awm: pa simie kix tix yuh heue:.

Simon klawm: khaoxlhak son tang: Yesux

23:33-43 koe: daux lai Mth. 27:33-44; Makux 15:22-32; Yohan 19:17-24

26 Mai: yam kix tok Nawh Cao: hu:, kix giex Simon pa mawh pui meung Kurene, pa kaoh khaing: daux tiag, mai: kix deuh khaoxlhak ka piang nawh, son sang klawm: khaoxlhak an hawt Yesux heue:.

27 Mai: cub pui pa kied haoh kied hun: hawt Nawh Cao:, khawm: bon: pa yiem pa grai son Nawh. 28 Viang mawh nan: Nawh Cao: deeh gi mai: ah nin:, "Kawn: bon: veng Yerusaliem khankix eue:, paw yiem paw grai son Aux, viang mawh nan: yiem son tokaux pex, mai: son kawn: praix pex khankix heue:. 29 Grawh grawng: nawh, jhak heue:, singaix bawg yam tag sang hoek, yam kix tag sang ah, 'Bon: pa neh, mai: vaig pa ang sax nghe: kawn:, mai: teeh pa ang sax kieh peuex khankix ting bwanson: heue:.' 30 Yam an kix tag sang jah tix ah nin: ka gawng khankix, 'Rau ka piang ex liak.' Mai: tag ah nin: ka ton: khankix, 'Tawb kheem: ex liak.' 31 Kheu phan: kix yuh ceu in khankix ka khaox im: khaox klai, tag sang yuh ka mawx ka khaox kroh?"

32 Mai: viang mawh pui caox ra: kaux kawx, kix tok hu: tau mai: Nawh Cao:, son sang teei kiex yum heue:.

Tawk Cao: Khrit ka piang khaoxlhak

33 Mai: yam kix hoek tix dah pa kok mawh, Si:ang: Kaing:, kix tawk Nawh Cao: piang khaoxlhak tan:, mai: pui caox an khankiex, kix tawk plak taix khawn: dawm: Nawh tix kaux, mai: khawn: gwiex tix kaux heue:. 34 Mai: Yesux ah nin:, "Keeing: eue:, pluat ploi: phimap kix liak, kheu ang kix tawng pa yuh tix heue:."

124Mai: kix teei kraung ceep Nawh Cao:, mai: nieb tix yaox, mai: gwieh sinax kix heue:.

35 Mai: pui khankix cung tix jhak tan:. Mai: simiang khankix kawx, nied ah pa ang cee ang cak ka Nawh ah nin:, "Nawh hoik taoh ka pui tang: kaux khankix, kieh Nawh taoh tokaux Tix, phan: Nawh mawh Khrit cie Siyiex, pa hoik laug Nawh tix teei." 36 Mai: pui naing khankix kawx, yuh pa ang cee ang cak ka Nawh Cao:, hoek ka Nawh, mai: tawx tix yaox sidah niex ka Nawh, 37 ah nin:, "Phan: Maix mawh Simiang khunhawkham Pui Yudax, taoh tokaux Tix tiru heue:." 38 Mai: kix tiem: tix deuh lai pa ah nin:, ka piang Nawh Cao:, ka daux lai Helasax, mai: lai Romax, mai: lai Hebrie, "IN MAWH SIMIANG KHUNHAWKHAM PUI YUDAX."

39 Mai: ka daux pui caox an khankiex pa hoik preue:, tix kaux ah pa ang khaw: ang jiet ka Nawh Cao: ah nin:, "Phan: Maix mawh Khrit taoh tokaux Tix, mai: yiex heue:." 40 Viang mawh nan: tang: kaux an deeh ah ka kaw an ah nin:, "Viang ka Siyiex kawx ang maix lhat lie, siyox kham: geu: maix krax prawng awm: paox tix lie? 41 Ax kham: geu: yuh nin: uik khaw:, kheu ax pon pa khaw: tix geu:, son ceu pa hoik yuh tix, viang mawh nan: Pui in ang sax yuh pa lud tid tix heue:." 42 Mai: nawh ah nin: ka Yesux, "Simiang eue:, yam hoek Maix ka daux meung Tix, doh keud ka aux liak."

43 Mai: Yesux dee ah nin: ka nawh, "Aux krai lox tete telai ka maix, ka daux singaix maix tag ot tau mai: Aux ka daux Paradisu125 heue:."

Grawng: yam yum Yesux

23:44-49 koe: daux lai Mth.27:45-56; Makux 15:33-41

44 Bawg yam an dex liah nari126, mai: praix vhaik piang haktiex khawm: uik tom: hoek dim: nari127 heue:. 45 Mai: singaix uik vhaik, mai: man: tie ka daux nyiex bwan: griah ka greung heue:. 46 Mai: Yesux kok lox sinum ah nin:,

128"Keeing: eue:, Aux tawx khwan: Tix ka daux tawmtaix Maix."

Mai: khaix hoik ah Nawh nan:, Nawh Cao: deeh tawx khwan: Tix, mai: dud rhawm: heue:. 47 Mai: yam yaox cao: giex kaing: naing an, grawng: ceu pa hoik mawh, nawh yaogyaw Siyiex ah nin:, "Kaw in mawh pui rah pui see tete heue:." 48 Mai: cub pui haoh pui hun: pa hoek tix yaox ceu in tau, yam hoik yaox kix ceu pa hoik mawh khankix, kix dieh naok tix mai: deeh ing: heue:. 49 Mai: pui pa uik meed uik tawng Nawh Cao:, mai: bon: pa hoik hawt hoek tau mai: Nawh Cao: khaing: meung Galilie:, cung dee singai mai: jhak ka ceu in khankix heue:.

Sipaung: Nawh Cao:

23:50-56 koe: daux lai Mth.27:57-61; Makux 15:42-47; Yohan 19:38-42

50 Mai: jhak heue:, pui tix kaux pa kaux Yosiep, pa mawh cao: prawng see:, mai: pui mhawm:, pa rah pa see. 51 (Nawh ang rieb ang khaw: rhawm: ka grawng: pa hoik kum: kawng: kix, mai: yuh). Pa mawh pui Arimasie:, veng pui Yudax tix veng, pa krox tix jhak son yam sang hoek Meung Siyiex. 52 Pui in hu: ka simiang Pilat mai: rawg mhaing: tokaux yum Yesux heue:. 53 Mai: nawh teei tokaux yum Nawh Cao: lih, mai: nawh pua: ka man: paing, mai: deuh Nawh ka daux daux simeeig, pa hoik saik ka daux rang:, mai: dee ang bax sax deuh pui heue:. 54 Mai: singaix an mawh Singaix Khre:, mai: singaix twah dex sang hoek heue:. 55 Mai: bon: khankix pa hoik hoek tau mai: Nawh Cao: khaing: meung Galilie:, hawt khaix mai: yaox simeeig, mai: grawng: deuh tokaux yum Nawh Cao: yuh ka mawx. 56 Mai: kix deeh ing: mai: cox khre: sidah bhawng: mai: sidah kraix khankix heue:.

Mai: kix laux lee: rhawm: tix, singaix twah, awm: pa khaw: mai: lox tawm: heue:.

Lukax

Simin Ting 24

Deeh kaoh im:

24:1-10 koe: daux lai Mth.28:1-8; Makux 16:1-8; Yohan 20:1-8

1 Viang mawh nan:, ka daux aliah singaix singaix tix, yam bah riang caocao, kix hoek ka simeeig mai: viex sidah bhawng: khankix, pa hoik cox hoik khre: kix heue:. 2 Mai: kix yaox simaox hoik plu: plie: hoik gah khaing: simeeig an. 3 Mai: kix laig ka daux mai: kix ang yaox tokaux yum Simiang Yesux heue:. 4 Mai: yam kix daox deng: kah grawh grawng: ceu an, jhak heue:. pui ra: kaux cung dex kix pa ceep kraung pa jiet pruh. 5 Yam kix lhat mai: num: gup ngai: tix ka tiex, kiex ah nin: ka kix, "Yuh ka mawx pex lai sawg Kaw pa im: ju, ka sinax pui yum? 6 Nawh ang ot tin:, Nawh hoik kaoh heue:. Doh keud ka lox pa hoik krai Nawh Cao: ka pex, yam kawn: ot Nawh ka daux meung Galilie:, 7 pa krai grawh grawng: tag sang tawx Kawn: kawn: pui ka daux tawm: taix pui phimap phigrham: khankix, mai: tawk ka piang khaoxlhak, mai: daux loe: singaix tag sang deeh kaoh heue:." 8 Kix doh keud ka lox Nawh Cao: an, 9 mai: deeh khaing: simeeig, mai: krai grawh grawng: ceu in khawm: uik, ka kix kao: kaux tix, mai: ka pa kawn: deuk khawm: uik heue:. 10 Kix pa krai grawh grawng: ceu in khankix, ka kawncau pa ting khankix, mawh Marix Magadalax, mai: Yohannax, mai: Marix miex Yakop, mai: bon: tang: kaux khankix pa ot tau mai: kix heue:. 11 Viang mawh kawx nan: ang kix yumrhawm: ka lox bon: khankix, kheu ce: kix mawh lox nieb krai heue:. 12 Viang mawh nan:, Petrux kaoh mai: to: hu: ka simeeig an, mai: nom: tix jhak ka daux, mai: nawh yaox ngie man: paing khaing:, mai: nawh daox deug: ka grawng: ceu pa hoik mawh an, mai: deeh ing: ka nyiex tix heue:.

Ka piang krax Yaong: Emawk

13 Mai: jhak heue:, ka daux singaix an ka daux kix ra: kaux hu: ka yaong: pa kaux Emawk, pa singai khaing: veng Yerusaliem dex aliah lag. 14 Mai: kiex kum: ka paox tix grawh grawng: ceu pa hoik mawh an khawm: uik heue:. 15 Mai: yam kiex kawn: kum: chawk ka paox tix, tokaux Yesux hoek dex mai: hu: tau mai: kiex heue:. 16 Viang mawh nan: hoik yuh ngai: kiex, yuh ka mawx son ang sang tawng ka Nawh Cao: heue:. 17 Mai: Nawh Cao: chawk ah nin: ka kiex, "Lox kum: pax ka paox tix, yam hu: pax krax, mawh ceu pa yuh ka mawx?" Mai: kiex yut tix kaog mai: yuh awm: pa voi rhawm: tix heue:. 18 Mai: ka daux kiex tix kaux, pa kaux Kalawphax, pawk lox ah nin: ka Nawh Cao:, "Maix mawh nyo pa ot ka daux veng Yerusaliem nong: nong: lie? Kheu ang Maix tawng grawh grawng: ceu pa hoik mawh tan:, ka daux bawg yam singaix in khankix." 19 Mai: Nawh Cao: chawk kiex ah nin:, "Grawh grawng: ceu pa yuh ka mawx?" Mai: kiex deeh ah nin: ka Nawh Cao:, "Mawh grawh grawng: Yesux, Pui Nazariet, pa mawh Cao: Jhai:, pa ting sibrawm ka daux pa yuh, mai: ka daux gumlox, sivoe Siyiex mai: kawn: pui khawm: uik heue:. 20 Mai: grawng: cao: giex kaing: li pa ting khankix, mai: simiang ex khankix, prawng tix tawx Nawh Cao: kieh yum, mai: tawk Nawh piang khaoxlhak heue:. 21 Viang mawh nan: ex hoik keud hoik ce:, Nawh mawh Kaw pa tag sang taoh ceu pui Isarilax heue:. Mawh, mai: lheu: khaing: in khawm: uik, khaix hoik mawh ceu in khankix, uik koe: loe: singaix heue:. 22 Lheu: khaing: an, bon: tiblah daux cub ex, kieh ex daox deng: kah heue:. Kix hoik hu: ka simeeig caocao, 23 mai: yam kix ang yaox tokaux yum Nawh Cao:, kix deeh hoek mai: krai ka ex, grawh grawng: hoik yaox kix riang susai kawncau Siyiex, pa krai ka kix, Nawh Cao: klawd heue:. 24 Mai: pui tiblah pa ot tau mai: ex, hu: ka simeeig an, mai: yaox awm: pa hoik krai bon: khankix, viang mawh nan: kix ang yaox Nawh Cao: heue:."

Krai dee bleeh Lai Sigang: Khri:

25 Mai: Nawh Cao: ah nin: ka kiex, "Pui pa daox mai: pa sivix tix yumrhawm:, ka lox khawm: uik, pa hoik krai cao: jhai: khankix eue:, 26 Khrit tag lai kham: geu: ceu in khankix, mai: khaix an laig ka daux min: plakngai: Nawh ang mawh lie?" 27 Nawh Cao: teei lox Phuk lai sigang: khri: khawm: uik jah ka lai Mose, mai: lai cao: jhai: khawm: uik, plak tix nih nai krai lao grawh grawng: tokaux Tix heue:. 28 Mai: kiex hoek dex ka yaong: dee sang hu: kiex, mai: Nawh Cao: yuh awm: Nawh sang baox hu:, luan khaing: heue:. 29 Mai: kiex kieh raw Nawh Cao: ah nin:, "Ot tau mai: yiex ha:, kheu dex hoek bawg yam ponbo, mai: yam ponsingaix dex luan heue:." Mai: Nawh Cao: laig ot tau mai: kiex heue:. 30 Mai: yam hoik ngawm neung Nawh Cao: tix sawm: tau mai: kiex, Nawh Cao: teei khaomun mai: nawb bwan:, mai: Nawh sivit khaomun an mai: tawx ka kiex heue:. 31 Mai: ngai: kiex deeh blah, mai: kiex tawng mawh Nawh Cao:, mai: Nawh Cao: grai: khaing: pa yaox kiex heue:. 32 Mai: kiex ah nin: ka paox tix, "Yam sikah Nawh Cao: mai: ax hawt krax, mai: plak ax mhong: dee bleeh Phuk lai sigang: khri:, rhawm: ax lulieh kah ang mawh lie?" 33 Mai: kiex kaoh ka bawg yam nari dom: an, mai: deeh hu: ka veng Yerusaliem, mai: kiex yaox kawncau kao: kaux tix khrawm: paox tix, mai pui pa ot tau mai: kix, 34 ah nin:, "Simiang hoik deeh kaoh im: tete, mai: hoik jhi: tokaux Tix ka Simon heue:." 35 Mai: kiex krai grawh grawng: ceu pa hoik mawh, yaox kiex hawt krax, mai: grawng: pa tawng kiex Nawh Cao:, ka yam sivit Nawh khaomun heue:.

Plak jhi: tix tom: nie bawg

36 Mai: yam kix kawn: sikah grawh grawng: ceu in khankix, tokaux Nawh Cao: cung ka sinax kix, mai: ah nin: ka kix, "Kieh pa nhin: koe: mai: pex heue:." 37 Viang mawh nan: kix die lhat die graung kah, mai: kix ce: mawh yaox miang heue:. 38 Mai: Nawh Cao: baox ah nin: ka kix, "Pex sungsang rhawm: yuh ka mawx? Mai: pex keud jee keud blaong daux rhawm tix yuh ka mawx? 39 Jhak ka taix Aux, mai: caong Aux ha:. Mawh Aux heue:. Mai: giex tix yaox Aux, mawh kheu miang ang koe: nex ang koe: si:ang:, awm: pa yaox pex koe: Aux." 40 Mai: khaix hoik ah Nawh Cao: nan:, Nawh jhi: kix yaox taix Tix, mai: caong Tix heue:. 41 Mai: yam kawn: ang kix nyang yumrhawm:, kheu gauxrhawm: mai: daox deng: tix, Nawh Cao: chawk kix ah nin:, "Khex koe: ceu pa ih pex tin: tix ceu ceu lie?" 42 Mai: kix tawx Nawh Cao: kax tong: tix phoi:, mai: khlawp rhawm: hia: tix siag heue:. 43 Mai: Nawh Cao: teei tix ih sivoe kix heue:.

44 Mai: Nawh Cao: baox ah nin: ka kix, "Ceu in khankix mawh awm: lox pa hoik krai Aux ka pex, yam kawn: ot tau Aux mai: pex, grawh grawng: ceu in khankix khawm: uik tag sang naog, pa hoik tiem: tix deuh grawh grawng: Aux, ka daux lai been Mose, mai: daux lai cao: jhai: khankix, mai: daux Lai Yaogyaw heue:. 45 Yam an Nawh Cao: paoh rhawm: kix doh, yuh ka mawx son sang tawng kix dee bleeh Phuk lai sigang: khri: heue:. 46 Mai: Nawh Cao: baox ah nin: ka kix, "Hoik tiem: tix deuh, grawng: Cao: Khrit tag kham: geu:, mai: deeh kaoh im: khaing: krax yum daux loe: singaix. 47 Mai: grawng: tag sang sidiex gau grawh grawng: pa sang doh keud doh sawn: ka phimap mai: krax pluat krax ploi: ka daux ceukaux Aux, jah ka veng Yerusaliem, mai: ka ceu pui khawm: uik khawm: leeing: heue:. 48 Pex mawh pui pa kham: mhai: sakse: grawh grawng: ceu in khankix heue:. 49 Mai: jhak heue:, Aux sang ploi: awm: lox mukheu pa hoik tawx Keeing: Aux, ka piang pex, mawh kheu nan: pex ot ka daux veng in, tom: pon ceep pex siawp sibrawm khaing: dee long: heue:."

Haok piang raoma:

50 Mai: Nawh Cao: thong: kix hu: tom: hoek dex yaong: Betanix, mai: Nawh yaog taix Tix nawb bwan: ka kix heue:. 51 Mai: yam kawn: nawb Nawh Cao: bwan: ka kix, Nawh Cao: gwieh khaing: kix, mai: viex Nawh haok ka daux meung raoma: heue:. 52 Mai: kix krub ka Nawh Cao:, mai: gauxrhawm: gauxrhi: tix, mai: deeh ing: ka veng Yerusaliem heue:. 53 Mai: kix ot ka daux nyiex bwan: jheeng: jheeng:, mai: yaogyaw Siyiex heue:.