Kalatix

Kalatix

Simin Ting 1

Lox paoh

1 Pawlux pa mawh kawncau pa ting, (ang mawh khaing: pui, viang kheu pui kawx ang mawh, viang mawh kawx nan: mawh kheu Yesux Khrit, mai: Siyiex Keeing: Cao:, pa hoik kieh Nawh deeh kaoh im: khaing: krax yum), 2 mai: puxaik can pa ot tau mai: aux, tawx ka ceucao pa ot ka daux meung Kalatix khankix heue:. 3 Kieh pex koe: bwanson: mai: pa nhim: khaing: Siyiex Keeing: Cao: mai: Simiang ex Yesux Khrit, 4 Kaw pa hoik tawx tokaux Tix son phimap phigrham: ex, yuh ka mawx son sang taoh Nawh ex khaing: ju pa caox in, awm: pa khaw: mai: alo Keeing: ex Siyiex, 5 kieh Nawh Cao: koe: min: plakngai: ku ju leeing: ju leeing: phan: liak. Amen.

Grawnh grawng: pa tiem: ka lai in

6 Aux daox deng: ka grawng: pex phex khran: gwieh hu: khaing: kaw pa hoik kok ka pex ka daux bwanson: Cao: Khrit, son lox bwan: gauxrhawm: gauxrhi: pa tang: pa siyox, 7 pa ang mawh lox bwan: gauxrhawm: gauxrhi: tang: ceu, viang mawh nan: koe: pui tiblah pa laklheut ka pex, mai: simie tix loh, lox bwan: gauxrhawm: gauxrhi: Cao: Khrit kieh tang: heue:. 8 Viang mawh ex ang ah, viang kawncau Siyiex pa kaoh khaing: raoma: ang ah, phan: sidiex ka pex lox bwan: gauxrhawm: gauxrhi: pa lheu: pa tang: khaing: lox bwan: gauxrhawm: gauxrhi: pa hoik sidiex ex ka pex, kieh nawh mawh pa pon pa lawg pa jhax heue:. 9 Awm: hoik ah ex glangka:, aux baox deeh ah nang: nan: yamin tix bawg, phan: pui tix kaux kaux sidiex lox bwan: gauxrhawm: gauxrhi: ka pex pa lheu: pa tang: khaing: pa hoik rieb pex tix teei, kieh nawh mawh pa pon pa lawg pa jhax heue:. 10 Grawh grawng: nawh yamin aux sawg tix pon pa khaw: khaing: pui lie? Phan: ang mawh nan: khaing: Siyiex lie? Phan: ang mawh nan: aux nied tix yuh son sang caw rhawm: pui kah lie? Phan: aux kawn: yuh pa caw rhawm: pui kah, aux tag ang lai mawh siliex Cao: Khrit heue:.

Grawng: siawp sibrawm mai: pa pon Pawlux pa plakjhi:

11 Puxaik khankix eue:, aux kieh pex tawng grawng: lox bwan: gauxrhawm: gauxrhi: pa hoik sidiex aux ang mawh pa khaw: pa dex mai: pui heue:. 12 Grawh grawng: nawh aux ang pon lox bwan: an khaing: pui, mai: ang mawh pa gau ka aux, viang mawh nan: pon kheu Yesux Khrit plak jhi: aux yaox heue:. 13 Grawh grawng: nawh pex hoik mhong: grawng: pa yuh aux ka mawx, yam ot aux daux been Yudax, daux bawg yam pa hoik luan, grawng: pa tuktiak tukte: aux ka ceucao Siyiex nie lheu: khaing: pa chix pon tix tiag, mai: pa yieh yuh laux leeing: heue:. 14 Mai: grawng: aux nie ting, lheu: tawng ka daux been Yudax, khaing: ceu pui aux, pa sidu ju, mai: nie lheu: nied tix yuh son been tax keeing: aux khankix heue:. 15 Viang mawh kawx nan: yam caw rhawm: Siyiex, Kaw pa hoik tiah tix deuh aux, tom: khaing: daux vaig miex tix, mai: kok aux kheu bwanson: Nawh, 16 son sang plak jhi: Kawn: Nawh ka daux aux, yuh ka mawx son sang sidiex aux grawng: Nawh ka sinax pui tang: ceu tang: cat khankix mai: dom: mawx dom: an aux ang kum: kawng: tau mai: nex mai: nham:, 17 viang ka veng Yerusaliem kawx ang aux haok hu: ka kix pa hoik mawh kawncau pa ting ka: sivoe aux, viang mawh kawx nan: aux hu: ka daux meung Arebia, mai: aux deeh hu: ka veng Damase tix bawg heue:.

18 Mai: khaix an loe: num aux haok hu: ka veng Yerusaliem, son sang pon tix meed tix tawng ka Kephax, mai: aux ot tau mai: nawh kao: phwan: ngaix heue:. 19 Viang mawh kawx nan: phan: lheu: khaing: Yakop pux Simiang ang aux yaox kawncau pa ting tang: kaux tix kaux kawx heue:. 20 Grawng: ceu pa tiem: aux ceu in ka pex, jhak heue:, ka plak sivoe Siyiex aux ang pie ang lhen:. 21 Khaix an aux hu: ka meung Surix mai: meung Kilikix heue:. 22 Yam an ceucao Cao: Khrit pa koe: ka daux meung Yudax khankix ang nyang bax tawng pakngai: aux. 23 Viang mawh nan: kix hoik mhong: ngie lox pa yuh nin:, "Kaw pa hoik sax tuktiak tukte: ex, yamin sidiex gau grawng: krax yumrhawm:, pa hoik sax yieh nawh tix yuh laux leeing: tix bawg." 24 Mai: kix yaogyaw ka Siyiex kheu grawng: aux heue:.

Simin Ting 2

Ceucao veng Yerusaliem rieb tix teei ka Pawlux

1 Khaix an yam hoik luan kao: pon: num aux deeh haok ka veng Yerusaliem tau mai: Banabax, mai: khawm: Titux kawx, aux viex hu: mai: tix heue:. 2 Aux haok hu: kheu plak jhi: tix kieh aux yaox, mai: aux nih nai lox bwan: gauxrhawm: gauxrhi: ceu pa sidiex aux ka sinax pui tang: ceu tang: cat khankix ka sivoe kix, viang mawh kawx nan: aux krai ngie ka kix pa koe: min: plakngai:, ka dee ang pui ot, phan: ang mawh nan: ha pa to: aux yamin, phan: ang mawh nan: pa hoik to: aux kox mawh pa giex pa going heue:. 3 Viang mawh kawx nan:, pie Titux pa ot tau mai: aux, pa mawh pui Helasax kawx ang khin: tix kieh pat hak. 4 Viang mawh kawx nan: kheu koe: pa yuh grang awm: puxaik tiblah pa briex tix laig son sang jiang ka ceu pa ploi: ex, pa koe: ex daux Yesux Khrit, yuh ka mawx son sang deeh kieh ex mawh siliex heue:. 5 Viang mawh nan: ex ang doh cu ka kix, pie tix nari kawx, yuh ka mawx ceu pa mawh pa meh, pa dex mai: lox bwan: gauxrhawm: gauxrhi: tag kawn: sang kaux cong: ka sinax pex heue:. 6 Kix pa mawh pa koe: min: plakngai: khankix, (kix hoik sax mawh pa yuh ka mawx ang ah, ang mawh tid tix ka aux. Siyiex kienie, ang mawh pa jhak ka pakngai: pui), pa ah aux kix pa koe: min: plakngai: khankix ang tie lai tawx tid tix ka aux, 7 jalao sang mawh nan:, yam kix yaox grawng: hoik tawx hoik pong lox bwan: gauxrhawm: gauxrhi: pa ang pat hak ka aux, awm: hoik tawx lox bwan: gauxrhawm: gauxrhi: pa pat hak ka Petrux, 8 (Grawh grawng: nawh Kaw pa yuh ka daux Petrux son sang kieh nawh mawh kawncau pa ting ka son pui pa pat hak khankix, viang ka daux aux kawx, hoik yuh tix kieh mawh kawncau pa ting ka son pui tang: ceu tang: cat khankix), 9 mai: yam kix tawng grawng: pa hoik tawx bwanson: ka aux, Yakop, mai: Kephax, mai: Yohan, pa dhua: pui kix mawh rong:, tawx pa singeuh taix khawn: dawm: ceu pa yuh paox yuh pie ka aux mai: Banabax, son sang hu: yiex ka pui tang: ceu tang: cat, mai: son sang hu: kix ka pui pa pat hak khankix heue:. 10 Kix koe: ngie rhawm: tix sang kieh yiex doh keud ka pui hot pui sibhawm: khankix, ceu an mawh pa koe: rhawm: aux tix sang nied tix coca: yuh heue:.

11 Viang mawh kawx nan: yam hoek Kephax ka veng Antiuk, aux kieh raw nawh sidu pakngai: nawh, mawh kheu koe: grawng: dee deuh phimap ka nawh. 12 Grawh grawng: nawh ka: sivoe sang hoek pui tiblah khaing: Yakop, nawh sawm: tau mai: pui tang: ceu tang: cat khankix, viang mawh nan: yam hoek kix nawh deeh toek tokaux tix, tix tiah khaing: kix, kheu ring ka kix pa mawh cub pa pat hak heue:. 13 Mai: pui Yudax pa deuk khankix yuh tix pie awm: paox tix tau mai: nawh, tom: pie Banabax kawx hu: plak kix kheu pa pie kix heue:. 14 Viang mawh kawx nan: yam yaox aux grawng: ang kix hu: rah see, awm: pa khaw: mai: pa mawh pa meh lox bwan: gauxrhawm: gauxrhi:, aux ah nin: ka Kephax sivoe kix khawm: uik, "Phan: maix pa mawh pui Yudax, yuh tix ot yaung pui tang: ceu tang: cat khankix, mai: ang yuh tix ot awm: pui Yudax, mai: khex sang khin: tix kieh pui tang: ceu tang: cat khankix yuh tix ot awm: pui Yudax yuh ka mawx? 15 Ex raux mawh nex nham: pui Yudax, mai: ang mawh pui phimap phigrham: tang: ceu tang: cat, 16 viang mawh kawx nan: ex tawng grawng: pui ang hoek krax rah krax see, kheu pa tuah pa klaung: ka lox lai been li, viang mawh nan: hoek kheu krax yumrhawm: ka Yesux Khrit, awm: hoik yumrhawm: ex ka Yesux Khrit, yuh ka mawx son sang pon ex tix hoek krax rah krax see kheu pa yumrhawm: ka Cao: Khrit, mai: ang mawh kheu krax tuah krax klaung: ka lox lai been li, mawh kheu pui tix kaux kawx ang hoek ka krax rah krax see, kheu pa tuah pa klaung: ka lox lai been li heue:. 17 Viang mawh nan: yam sawg ex tix hoek krax rah krax see ka daux Cao: Khrit, phan: yaox tokaux ex mawh pui pa yuh phimap phigrham:, khex mawh Khrit cao: pa yuh son phimap phigrham: lie? Ang doh mawh nan:. 18 Grawh grawng: nawh phan: aux baox deeh cox sum: ceu pa hoik yieh aux tix yuh laux, aux plak jhi: grawng: tokaux aux mawh pui phit pui lud tiru heue:. 19 Lheu: khaing: an kheu lox lai been lih aux hoik yum ka pa dex mai: lox lai been li, yuh ka mawx son sang im: aux ka pa dex pa dawd mai: Siyiex heue:. 20 Aux hoik yum tau mai: Cao: Khrit ka khaoxlhak, mai: yamin ang kawn: baox mawh aux pa im:, viang mawh nan: Cao: Khrit im: ka daux aux heue:. Mai: ceu pa im: aux ka daux nex nham: yamin, aux im: ka daux krax yumrhawm:, pa mawh pa yumrhawm: ka Kawn: Siyiex, pa hoik moh ka aux, mai: hoik tawx tokaux Tix son aux heue:. 21 Aux ang yuh tix kieh bwanson: Siyiex mawh pa giex pa going, grawh grawng: nawh phan: pon krax rah krax see kheu lox lai been li, pa yum Cao: Khrit mawh pa giex going heue:.

Simin Ting 3

Hoek krax rah krax see kheu krax yumrhawm:

1 Pui Kalatix pa daox pa aw: khankix eue:, pa hoik plak kieh sidawng: grawng: pa yum Yesux Khrit piang khaoxlhak sivoe ngai: pex, mawh mawx pa hoik kieh pex nhi: son ang sang nghiet ka lox pa mawh pa meh? 2 Aux simie tix tawng ngie ceu in khaing: pex, pa pon pex Khwan: Cao:, hoik mawh kheu tuah klaung: pex ka lox lai been li lie? Phan: ang mawh nan: pon kheu yumrhawm: ka lox bwan: pa mhong: pex lie? 3 Pex raux phex daox niex ding lie? Viang pex hoik jah tix yuh ka daux Khwan: Cao:, yamin pex sang grum naog ka daux nex nham: lie? 4 Ceu pa hoik kham: geu: pex tom: nie ceu ding dod, mawh ngie pa giex going lie? Phan: mawh pa giex going tete, 5 Kaw pa tawx Khwan: Cao: ka pex, mai: pa yuh mhai: pa daox pa am: ka daux pex, Nawh yuh kheu tuah klaung: pex ka lox lai been li lie? Phan: ang mawh nan:, mawh kheu yumrhawm: ka lox bwan: pa mhong: pex lie?

3106 Awm: hoik yumrhawm: Abraham ka Siyiex, mai: hoik sawn: krax yumrhawm: an mawh pa rah pa see son nawh heue:.

7 Mawh kheu nan: een: tix tawng grawng: kix pa koe: krax yumrhawm:, mawh kawn: Abraham heue:. 8 Mai: Phuk lai sigang: khri: hoik grux yaox grawng: Siyiex tag sang kieh pui tang: ceu tang: cat khankix hoek ka krax rah krax see kheu krax yumrhawm:, tom: hoik grux sidiex lox bwan: gauxrhawm: gauxrhi: ka Abraham ah nin:,

311"Ceu pui khawm: uik tag sang pon bwanson: ka daux maix heue:."

9 Mawh kheu nan: kix pa koe: krax yumrhawm: khankix pon bwanson: tau mai: Abraham pa yumrhawm: heue:. 10 Grawh grawng: nawh can pui pa dex pa dawd mai: pa tuah klaung: ka lox lai been li khankix ot ka greem: pa lawg pa jhax, grawh grawng: nawh hoik tiem: tix deuh ah nin:,

312"Ku kaux daux pui pa ang lai hawt tix yuh ku ceu khawm: uik can pa hoik tiem: ka daux phuk lai been li, mawh pa lawg pa jhax kah heue:."

11 Lheu: khaing: an grawng: pui tix kaux kawx ang hoek krax rah krax see sivoe Siyiex kheu lox lai been li, hoik sidawng: kah, grawh grawng: nawh,

313"Pui pa rah pa see tag sang im: kheu krax yumrhawm: heue:."

12 Mai: lox tawm: lai been li ang dex ang dawd mai: krax yumrhawm:, viang mawh kawx nan:,

314"Kaw pa hawt tix yuh lox tawm: an khankix, tag sang im: ka daux lox tawm: an khankix heue:."

13 Cao: Khrit hoik taoh ex khaing: pa lawg pa jhax lox lai been li, kheu hoik mawh Nawh pa lawg pa jhax son ex, grawh grawng: nawh hoik tiem: tix deuh ah nin:,

315"Pa preue: ka piang khaox ku kaux daux pui, mawh pa lawg pa jhax heue:."

14 Yuh ka mawx son sang pon pui tang: ceu tang: cat khankix bwanson: Abraham ka daux Cao: Khrit heue:. Yuh ka mawx son sang pon ex mukheu grawng: Khwan: Cao:, kheu krax yumrhawm: heue:.

Lox lai been li mai: lox bwan: gauxrhawm:

15 Puxaik khankix eue:, aux krai hawt awm: been pui. Viang mawh ngie sijax mukheu pa yuh kawn: pui kawx, khaix hoik een: sijax mukheu an tix mawh pa lung pa loi, pui tix kaux kawx ang pon tix tik sijax mukheu an, mai: ang baox tiien thie: kah heue:. 16 Lox mukheu khankix hoik krai ka Abraham mai: ka simie ceucat nawh heue:. Nawh Cao: ang ah "simie ceucat khankix," awm: sang ah grawng: pui haoh pui hun:, viang mawh nan: hoik ah, "simie ceucat maix," awm: sang ah ngie grawng: tix kaux khaing:, pa mawh Cao: Khrit heue:. 17 Aux ah nin:, sijax mukheu pa hoik grux een: Siyiex tix mawh pa lung pa loi, lox lai been li, pa jah tix kieh mawh khaix an pon: yieh tingoe: (430) num, ang pon tix yieh laux, son sang kieh lox mukheu an mawh pa giex pa going heue:. 18 Grawh grawng: nawh phan: sin: an mawh pa dex pa dawd mai: lox lai been li, ang baox lai mawh pa dex pa dawd mai: lox mukheu, viang mawh kawx nan: Siyiex hoik tawx sin: an ka Abraham, ka lox mukheu heue:. 19 Phan: mawh nan: lox lai been li mawh son pa yuh ka mawx? Hoik baox tiien thie: lox lai been li kheu phimap phigrham:, tom: sang hoek Simie Ceucat pa hoik tawx lox mukheu kah heue:. Hoik kieh kawncau Siyiex khankix teei tix tawx lox lai been li ka tawm: taix pui sinax heue:. 20 Pa ah pui sinax ang mawh ngie son tix kaux khaing:, viang mawh kawx nan: Siyiex mawh ngie tix kaux khaing: heue:. 21 Phan: mawh nan: lox lai been li mawh pa cha: ka lox mukheu Siyiex lie? Ang doh mawh nan:. Grawh grawng: nawh phan: hoik tawx lox lai been li pa chix kieh im:, tag lai pon pa rah pa see kheu lox lai been li tete telai heue:. 22 Viang mawh kawx nan: lox phuk lai sigang: khri: hoik laung pui khawm: uik ka greem: phimap, yuh ka mawx son sang tawx lox mukheu an kheu krax yumrhawm:, ka kix pa yumrhawm: ka Yesux Khrit heue:.

23 Viang mawh kawx nan: ka sivoe sang hoek krax yumrhawm:, hoik laung mai: pau ex ka greem: lox lai been li, son sang khre: ex son krax yumrhawm: pa tag sang lih bleeh khaix heue:. 24 Mawh kheu nan: lox lai been li hoik mawh cao: thong: cao: gau ex son sang viex ex hoek ka Cao: Khrit, yuh ka mawx son sang hoek ex ka krax rah krax see kheu krax yumrhawm: heue:. 25 Viang mawh kawx nan: yamin kheu hoik hoek krax yumrhawm: an ex ang lai baox ot greem: cao: thong: cao: gau heue:. 26 Grawh grawng: nawh pex khawm: uik mawh kawn: Siyiex kheu krax yumrhawm: ka Yesux Khrit heue:. 27 Grawh grawng: nawh can pex pa hoik baptis316 ka daux Yesux Khrit, hoik ceep ka Cao: Khrit heue:. 28 Ang doh lai pon koe: pui Yudax phan: ang mawh nan: pui Helasax, ang doh lai pon koe: siliex phan: ang mawh nan: pui pa ploi:, ang doh lai pon koe: simex phan: ang mawh nan: bon:, mawh kheu pex khawm: uik mawh ngie tix kaux khaing: ka daux Yesux Khrit heue:. 29 Mai: phan: pex mawh cie Cao: Khrit, pex mawh nang: simie ceucat Abraham, mai: cao: pa pon sin: awm: pa khaw: mai: lox mukheu heue:.

Simin Ting 4

Ceu pa pon kawn: praix Siyiex

1 Viang mawh kawx nan: aux ah nin:, yam kaw pa sang pon sin: ca: kawn: mawh kawn: nyawm, ang nawh siyox khaing: pa mawh siliex, viang mawh nawh cao: sin: khawm: uik kawx, 2 tag lai ot greem: pui pa pau mai: pa kia: pa ngien khankix tom: hoek singaix pa hoik ciak keeing: nawh tix deuh heue:. 3 Awm: an ex kawx, yam mawh ex kawn: nyawm, hoik een: tix kieh mawh siliex greem: been haktiex pa ang grum naog heue:. 4 Viang mawh kawx nan: yam hoik naog bawg yam, Siyiex ploi: Kawn: Tix lih, tix keh khaing: bon:, keh ka greem: lox lai been li, 5 yuh ka mawx son sang taoh Nawh ex, pa ot ka greem: lox lai been li, yuh ka mawx son sang pon ex tix mawh kawn: Nawh heue:. 6 Mai: kheu mawh ex kawn:, Siyiex hoik ploi: Khwan: Kawn: Tix ka daux rhawm: ex tix yo. "Abax Keeing:" heue:. 7 Mawh kheu nan: pex ang baox lai kawn: mawh siliex, viang mawh nan: mawh kawn: heue:. Mai: phan: mawh kawn:, mawh pa sang pon sin: kheu Siyiex heue:.

Ang lai mawh siliex ka lox lai been li

8 Viang mawh kawx nan: glangka: in kheu ang tawng ka Siyiex, pex tom: hoik mawh siliex ka kix pa ang mawh siyiex. 9 viang mawh nan: yamin pex hoik tawng ka Siyiex, phan: ang mawh nan: nie lheu: mawh Siyiex hoik tawng ka pex, yuh ka mawx pex lai deeh tieh tix hu: ka lox been pa ang grum naog, pa bhaw: riang, mai: pa ang koe: bwanson:, pex khex simie tix baox deeh mawh siliex lie? 10 Pex lai tuah klaung: ka singaix mai: jhong: khix mee: num heue:. 11 Aux lhat grawng: pex, ha pa nyhap pa sidieb aux son pex kox mawh pa giex going heue:.

12 Puxaik khankix eue:, aux khyox khaw: ka pex, kieh mawh awm: aux, kheu aux kawx hoik mawh awm: pex heue:. Pex ang phit tid tix ka aux, 13 viang mawh kawx nan: pex hoik tawng mawh kheu grawng: jhawm: saux, aux tom: hoik sidiex lox bwan: gauxrhawm: gauxrhi: ka pex bawg phaoxka:, 14 mai: ceu pa mawh pa nyaw pa glaw: ka pex ka daux nex nham: aux, pex ang lai nieb yuh kah, mai: ang tik kah, viang mawh nan: pex rieb tix teei aux kah, awm: mawh aux kawncau Siyiex, mai: awm: Yesux Khrit heue:. 15 Phan: mawh nan: pa hoik gauxrhawm: pex an koe: dee mawx? Grawh grawng: nawh, aux kham: mhai: sakse: grawng: phan: chix tix, pex tee: hoik kwat ngai: tix mai: tawx ka aux heue:. 16 Kheu hoik krai aux pa mawh pa meh ka pex, khex lih mawh aux pui pa koeng ka pex lie? 17 Kix nied tix coca: grawng: pex, viang mawh nan: ang mawh son ceu pa mhawm:. Kix simie tix klat pex ot plak praix, yuh ka mawx son sang nied pex tix coca: son kix heue:. 18 Viang mawh kawx nan: pa nied tix coca: ka daux ceu pa mhawm:. mawh pa mhawm:, ang joeng mawh ngie yam ot aux tau mai: pex heue:. 19 Kawn: nyawm iak aux, pa aux baox deeh loi tix keh, tom: hoik lih mawh Cao: Khrit ka daux pex khankix eue:, 20 viang mawh yamin kawx, aux kied simie tix ot tau mai: pex, yuh ka mawx son sang pon aux tix tieh loh, lox aux, mawh kheu kied daox aw: aux ka grawng: pex heue:.

21 Krai ka aux liak, pex pa simie tix ot greem: lox lai been li khankix eue:, ang pex nyang mhong: lox lai been li lie? 22 Grawh grawng: nawh, hoik tiem: tix deuh grawng: Abraham koe: kawn: simex ra: kaux, tix kaux mawh pa koe: khaing: bon: pa mawh siliex, mai: tix kaux mawh pa koe: khaing: bon: pa mawh pui ploi: heue:. 23 Kawn: simex pa koe: khaing: bon: siliex an hoik keh hawt been nex nham:, viang mawh kawx nan: kawn: simex pa koe: khaing: bon: pa ploi: an, mawh pa keh kheu lox mukheu heue:. 24 Grawng: ceu in khankix koe: lox phektem: heue:. Grawh grawng: nawh bon: in kiex, mawh sijax mukheu ra: mu:, tix mu: mawh pa kaoh khaing: gawng Sina, pa mawh Hagarax, pa keh kawn: tix mawh siliex heue:. 25 Hagarax mawh gawng Sina pa koe: ka daux meung Arebia, viang mawh nan: awm: veng Yerusaliem pa koe: yamin, pa hoik mawh siliex tau mai: kawn: praix nawh heue:. 26 Viang mawh kawx nan: veng Yerusaliem pa koe: dee long:, mawh pa ploi:, pa mawh miex ex heue:. 27 Grawh grawng: nawh hoik tiem: tix deuh ah nin:,

317"Bon: neh pa ang sax keh kawn: eue:, gauxrhawm: heue:. Bon: pa ang yaox tix geu: pa saux yha: eue:, kok yo kah heue:. Grawh grawng: nawh bon: pa hoik grham: an, nie lheu: koe: kawn: khaing: bon: pa koe: mex an heue:."

28 Puxaik khankix eue:, ex mawh kawn: lox mukheu awm: hoik mawh Icak heue:. 29 Viang mawh kawx nan: awm: kaw pa hoik keh hawt been nex nham: yam an hoik tuktiak tukte: ka kaw pa hoik keh hawt Khwan: Cao:, viang yamin kawx mawh nang: nan: heue:. 30 Viang mawh nan: lox phuk lai sigang: khri: ah ka mawx?

318"Grheu: tix tik bon: siliex mai: kawn: simex kiex, mawh kheu kawn: simex bon: siliex, tag ang lai pon sin: tau mai: kawn: simex bon: pa ploi: heue:."

31 Mawh kheu nan: puxaik khankix eue:, ang ex mawh kawn: praix bon: siliex, viang mawh nan: mawh kawn: praix bon: pa ploi: heue:.

Simin Ting 5

Krax pa mawh kawn: Khrit pui ploi:

1 Grawh grawng: nawh Cao: Khrit hoik ploi: ex son sang mawh pui ploi:, mawh kheu nan: kieh kaux cong: kah, mai: paw baox deeh kieh nien ka ceu pa sang deeh kieh mawh siliex.

2 Jhak heue:, Aux Pawlux ah nin: ka pex, phan: pex lai rieb tix kieh pat hak, Cao: Khrit tag ang koe: bwanson: tid tix son pex. 3 Mawh heue:, aux baox deeh kham: mhai: sakse:, grawng: ku kaux daux pui pa rieb tix kieh pat hak, nawh tag mawh pa koe: ceuk tix sang yuh lox lai been li khawm: uik heue:. 4 Pex pa simie tix hoek krax rah see kheu lox lai been li, hoik dud gwieh hu: khaing: Cao: Khrit, pex hoik rau hu: khaing: bwanson: heue:. 5 Grawh grawng: nawh ex hoik krox tix pon pa keud pot jun pot son krax rah krax see, pa sang pon kheu Khwan: Cao: ka daux krax yumrhawm: heue:. 6 Grawh grawng: nawh ka daux Yesux Khrit, ceu pa pat hak ang ah, pa ang pat hak ang ah, ang koe: bwanson: tid tix, viang mawh kawx nan: mawh krax yumrhawm: pa yuh kheu krax moh krax rhawm:, pa koe: bwanson: heue:. 7 Glang: ka: in pex hoik to: mhawm: mhawm: heue:. Mawh mawx pa hoik sidien pex son ang pex sang nghiet ka lox pa mawh pa meh? 8 Ceu pa jeeh pa nyaw ka pex in ang mawh pa kaoh khaing: Kaw pa hoik kok ka pex heue:. 9 Susaix ceeix ngie chix laig ka pum: khawm: uik, mai: kieh ploh kah heue:. 10 Aux hoik yumrhawm: ka pex ka daux Simiang, grawng: pex tag ang keud pa tang: pa siyox, viang mawh nan: kawx pa laklheut ka pex, mawh pui mawx ang ah, nawh tag geu: pa prawng pa ciyang tokaux tix heue:. 11 Puxaik khankix eue:, phan: aux kawn: sidiex been pat hak, yuh ka mawx lai kawn: tuktiak tukte: ka aux? Phan: mawh nan: ceu pa sideeing ka khaoxlhak hoik teei tix tik heue:. 12 Aux simie tix kieh kix, pa kieh pex lulax, deeh kid tix tik tokaux tix tiru heue:.

Ka daux mee: pa ploi:

13 Grawh grawng: nawh puxaik khankix eue:, hoik kok pex son sang mawh pui ploi:, viang mawh nan: paw vi shiao krax pa ploi: pex, tix mawh dee duh son sang hawt yuh alo nex nham:, viang mawh nan: pex tix kaux hoik tix kaux yuh son paox tix ka daux krax moh heue:. 14 Grawh grawng: nawh lox lai been li khawm: uik hoik grum naog ka daux lox in tix gum khaing:, pa ah nin:,

319"Maix tag moh paox plawg paox nyhawm: maix awm: moh ka tokaux tix heue:."

15 Viang mawh nan: phan: pex kiied mai: ih paox tix, rien rhawm: tix yuh satix, yuh ka mawx son ang pex paklawg kheu paox tix tix kaux lai tix kaux.

16 Aux ah nin:, hu: ka daux Khwan: heue:, mai: pex tag ang yuh tix kieh naog alo nex nham: heue:. 17 Grawh grawng: nawh alo nex nham: mawh pa lah pa cha: ka Khwan:, mai: Khwan: mawh pa lah pa cha: ka alo nex nham:, mawh kheu ceu in kiex mawh pa ang khaw: mai: paox tix, tom: ang pex pon yuh ceu pa simie pex tix yuh heue:. 18 Viang mawh kawx nan: phan: Khwan: Cao: thong: pex hu:, pex ang lai ot greem: lox lai been li heue:. 19 Krax tuah krax klaung: pa khaw: mai: alo nex nham:, mawh in khankix, pa phit pa vao, mai: pa yuh pa ang singax singeh, pa chax nie luan yuh, 20 pa krub rieang krub rao, pa yuh pa dex mai: phi:, pa koeng ka paox tix, pa simah simaing:, pa bohrhawm: bohrhi:, pa songrhawm: songrhi:, pa thung: thiang: paox tix, pa tang: gwieh paox tix, pa tang: yuh cub yuh caw:, 21 pa ghoing:, pa pah pui yum, pa yoek ka plai:, pa silao: tix yuh poi, mai: ceu pa awm: in khankix, pa baox grux krai aux ka pex yamin, awm: pa hoik sax grux krai aux ka pex, grawng: pui pa yuh ceu in khankix tag ang lai pon sin: meung Siyiex heue:. 22 Viang mawh kawx nan:, plix cie Khwan: Cao: mawh, pa moh pa rhawm:, pa gauxrhawm: gauxrhi:, pa nhim:, pa lang: gun lang: yeung, pa chix caoxrhawm:, pa mhawm: pa mhiem:, pa kaux sijax, 23 pa awn: rhawm: awn: rhi:, pa chix priex rhawm: tix, lox been pa sang lah sang cha: ka ceu in khankix ang koe: heue:. 24 Mai: kix pa dex pa dawd mai: Yesux Khrit, hoik tawk yum nex nham: piang khaoxlhak, tau mai: ceu pa keud pa yuh alo nex nham: heue:.

25 Phan: ex im: kheu Khwan: Cao:, viang pa hu: ex kawx kieh mawh daux Khwan: Cao: heue:. 26 Paw kieh ex lih tix mawh pa sawg min: plakngai: pa giex pa going, mai: paw choeng: ka paox tix, mai: paw ghoing: ka paox tix heue:.

Simin Ting 6

Lox tawx stix

1 Puxaik khankix eue:, phan: krup pui tix kaux kaux ka daux phimap pa yuh nawh, pex pa kawn: dex mai: khwan:, khaw: tix viex rhawm: pa awn: pa mhawm: tix deeh cox cai nawh mhawm: heue:. Deeh gi ka tokaux tix, ha maix kox hoek ka krax nyaw krax glaw: heue:. 2 Tix kaux lai tix kaux klawm: glawm: paox tix, mai: kieh lox been li Cao: Khrit naog kah heue:. 3 Grawh grawng: nawh phan: pui tix kaux kaux ce: tokaux tix mawh pa laoh lie, yam ang nawh mawh tid tix, nawh deeh pie ka tokaux tix tiru heue:. 4 Viang mawh kawx nan: kieh kaux pui mawx kaux pui an cheu: tiag tix yaox kaing pa yuh tix phan: yuh nan: nawh tag koe: min: plakngai: ka grawng: tokaux tix khaing:, mai: ang yaw rangdi ka tang: kaux heue:. 5 Grawh grawng: nawh kaux pui mawx kaux pui an tag lai klawm: glawm: tokaux tix heue:. 6 Kieh kaw pa pon pa gau ka daux gumlox bwan:, gwieh tix tawx ceu pa mhawm: can pa koe: tix ka sara cao: gau ka nawh heue:. 7 Paw kieh pie ka tokaux tix, ang doh nieb pon yuh pa ang cee ang cak ka Siyiex heue:. Grawh grawng: nawh pui rhuat simie ceu pa yuh ka mawx ang ah, nawh tag deeh vawg ceu an heue:. 8 Mawh kheu kaw pa rhuat ka daux nex nham: tokaux tix, tag sang deeh vawg pa cux pa sium: khaing: nex nham: heue:. Viang mawh nan: kaw pa rhuat ka daux Khwan: Cao:, tag sang deeh vawg ju leeing: ju leeing: phan: khaing: Khwan: Cao: heue:. 9 Ex paw kieh laux rhawm: laux rhi: ka ceu pa yuh pa mhawm: pa mhiem:, grawh grawng: nawh yam hoek bawg yam ex tag sang pon tix vawg, phan: ex ang khrup rhawm: heue:. 10 Mawh kheu in, yam yaox ex dee pon tix yuh, kieh ex yuh ceu pa mhawm: ka pui khawm: uik, mai: nie lheu: mawh ka kix pa mawh pui geh nyiex krax yumrhawm: heue:.

Lox ghoik ; kham: sakse: mai: pa nawb bwan:

11 Pex yaox grawng: aux hoik tiem: ngai: lai pa ting miex ding ka pex, ka khaix taix tokaux aux heue:. 12 Can pui pa simie tix ao: min: plakngai: ka daux nex nham: khankix khin: tix kieh pex pat hak, yuh ka mawx son ang kix sang yaox tix geu: krax tuktiak tukte: son khaoxlhak Cao: Khrit heue:. 13 Grawh grawng: nawh pie tokaux kix pa hoik rieb tix teei been pa pat hak khankix kawx ang priex tix hawt ka lox lai been li, viang mawh kawx nan: kix simie tix kieh pex pat hak, yuh ka mawx son sang pon kix tix yaw rangdi ka daux nex nham: pex heue:. 14 Viang mawh nan: paw kieh aux yaw rangdi kah tix ceu kawx lheu: khaing: khaoxlhak Simiang ex Yesux Khrit, dee haktiex hoik yum ka aux, mai: aux hoik yum ka haktiex heue:. 15 Grawh grawng: nawh ka daux Yesux Khrit pa pat hak ang ah, pa ang pat hak ang ah, ang koe: bwanson: tid tix, viang mawh nan: ceu pa koe: bwanson: mawh ngie pa mawh pui pa khraox heue:. 16 Mai: can kix pa sang hawt hu: ka daux lox tawm: in, kieh pa nhim: mai: pa caoxrhawm: koe: ka piang kix, mai: ka piang Isarilax cie Siyiex heue:.

17 Jah tom: yamin, paw kieh pui laklheut ka aux tix kaux kawx, mawh kheu aux hoik peeh khaix rhoi: pa hoik yuh ka Yesux daux tokaux aux heue:.

18 Puxaik khankix eue:, kieh bwanson: Simiang ex Yesux Khrit ot tau mai: khwan: pex liak. Amen.