Hebrie

Hebrie

Simin Ting 1

Yesux Khrit nie lheu: mhawm: khaing: kawncau Siyiex

1 Siyiex pa hoik sikah ka tax du ex khankix ka daux caojhai: khankix, tom: nie bawg mai: ka tom: nie ceu di dix, 2 ka daux bawg yam sidah singaix in kix, hoik sikah ka ex ka daux Kawn: Nawh Cao:, pa hoik ciak Nawh tix kieh mawh Cao: pa pon sin: ku ceu khawm: uik, Kaw pa hoik teei Nawh Cao: tix yuh khawm: haktiex khankix kah heue:. 3 Nawh mawh pa deeh jhan: ghaix ka min: plakngai: Siyiex, mai: mawh rieang pakpeung tokaux Nawh Cao:, mai: pa joh jhan: ka ku ceu khawm: uik ka gumlox siawp sibrawm Nawh. Mai: khaix hoik yuh Nawh tix kieh singax singeh khaing: phimap phigrham:, Nawh ngawm ka plak taix khawn: dawm: min: plakngai: Siyiex ka dee lhaong: heue:. 4 Kheu hoik lih mawh Nawh pa nie lheu: blon: ting khaing: kawncau Siyiex khankix, mawh kheu hoik pon Nawh son ceukaux pa nie lheu: mhawm: khaing: ceukaux kix heue:. 5 Grawh grawng: nawh hoik sax ah Nawh Cao: ka kawncau Siyiex kaux mawx,

329"Maix mawh Kawn: simex Aux. Aux hoik kieh Maix keh ka daux singaix in heue:."

mai: pa baox ah nin:,

330"Aux tag mawh Keeing: ka Nawh, mai: Nawh tag mawh Kawn: ka Aux heue:."

6 Mai: Nawh Cao: baox deeh ah nin: ka grawng: yam sang deeh viex Kawn: Ai: Tix hoek ka piang haktiex,

331"Maix kieh kawncau Siyiex cie Siyiex khawm: uik krub ka Nawh heue:."

7 Mai: Nawh Cao: ah nin: ka grawng: kawncau Siyiex khankix,

332"Nawh Cao: yuh tix kieh kawncau Siyiex cie Tix mawh bhaung:, mai: kieh pui cau pui soi: Nawh mawh rao ngu heue:."

8 Viang mawh kawx nan: Nawh Cao: ah nin: ka grawng: Kawn: Cao:,

333"Siyiex eue:, dangngeung Maix mawh tom: leeing: ju leeing: phan: heue:. Khaox gix simiang pa rah pa see cie Maix, mawh khaox gix simiang meung Maix heue:. 9 Maix hoik moh ka pa rah pa see, mai: hoik koeng ka pa ang khaw: ang jiet heue:. Mawh kheu nan: Siyiex, pa mawh Siyiex Maix, hoik groi rawm: bee ka Maix, ka rawm: bee pa gauxrhawm:, lheu: khaing: piang paox Maix khankix heue:."

10 Mai:

334"Simiang eue:, ka daux yam jah Maix hoik kaw: num: haktiex heue:. Mai: raoma: khankix mawh khaix taix Maix heue:. 11 An khankix tag sang laux leeing:, viang mawh nan: Maix tag kawn: ca: kaux ca: koe: heue:. Mai: khankix khawm: uik tag sang prim: hu: awm: kraung ceep. 12 Mai: Maix tag sang pua: ka khankix awm: ka man: vhua:. Mai: tag sang deeh thai: deeh loh khankix awm: kraung ceep, viang mawh nan: Maix ca: awm: paox tix, mai: jhong: num Maix khankix ang chix uik chix sidah heue:."

13 Viang mawh kawx nan:, hoik sax ah Nawh Cao: ka kawncau Siyiex kaux mawx?

335"Ngawm plak taix khawn: dawm: Aux, tom: Aux kieh pui pa koeng ka Maix, mawh ngot dee deuh Maix caong Tix heue:."

14 Kawncau Siyiex khankix khawm: uik mawh khwan: pa cau pa soi:, pa hoik ploi: tix yuh son kix pa tag sang pon tix cie sin: krax taoh ang mawh lie?

Simin Ting 2

Tawx stix ka pui pa mhong: lox bwan: khankix

1 Mawh kheu in, ex khaw: tix nie lheu: nied tix nghiet ka ceu pa hoik mhong: ex khankix, phan: ang mawh nan: ha ex kox tang: siyang: hu: khaing: khankix heue:. 2 Grawh grawng: nawh phan: gumlox pa hoik kieh kawncau Siyiex khankix krai hoik mawh pa kaux cong:, mai: can pa phit pa lud mai: pa lieh pa lheu: ku ceu hoik pon krax ciyang awm: pa keung pa khaw:, 3 phan: ex dha: tix ang kriem ka krax taoh pa ting niex ding niex dod, ex lai chix pon luan khaing: krax ciyang yuh ka mawx? Mawh tokaux Simiang pa jah tix krai grawng: krax taoh in ka: sivoe paox tix, mai: kix pa hoik mhong: khankix hoik kham: mhai: sakse: grawng: mawh pa mawh pa meh ka ex, 4 mai: Siyiex kawx kham: mhai: sakse: tau mai: kix, ka mhai: mai: ka ceu pa daox pa am: mai: ka kaing siawp sibrawm tom: nie ceu, mai: ka khawngphak pa hoik gwieh tix tawx Khwan: Singax Singeh, awm: pa khaw: mai: alo Nawh Cao: heue:.

Kawn: pui kwang: priex ka haktiex

5 Grawh grawng: nawh Nawh Cao: ang lai kieh haktiex ju khaix, pa hoik krai ex grawh grawng: kah, ot ka greem: kawncau Siyiex khankix heue:. 6 Viang mawh kawx nan: tix kaux hoik kham: mhai: sakse: kah, tix dah ah nin:,

336"Kawn: pui mawh pa yuh ka mawx? Maix lai kawn: doh keud doh sawn: ka nawh. Phan: ang mawh nan: kawn: kawn: pui mawh pa yuh ka mawx? Maix lai kawn: lai ling ka nawh. 7 Maix hoik yuh nawh iak khaing: kawncau Siyiex khankix ceeix khaing: heue:. Maix hoik ceep nawh ka mhok min: plakngai: mai: ceu pa yungyi:, mai: Maix hoik ciak tix deuh nawh ka piang khaix taix Maix khankix heue:. 8 Maix hoik kieh can ku ceu khawm: uik ot greem: caong nawh heue:."

Grawh grawng: nawh ka daux pa hoik kieh Nawh Cao: can ku ceu ot ka greem: nawh, Nawh ang lai grham: tix ceu kawx pa ang lai ot ka greem: nawh heue:. Viang mawh kawx nan: yamin ex ang nyang bax yaox, pa ot ku ceu ka greem: nawh heue:.

Yesux iak khaing: kawncau Siyiex ceeix khaing: daux tivud ticu

9 Viang mawh kawx nan: ex yaox Kaw pa hoik yuh tix kieh mawh pa iak khaing: kawncau Siyiex khankix ceeix khaing:, pa mawh Yesux, mawh kheu ceu pa kham: geu: krax yum hoik ceep mhok min: plakngai: mai: ceu pa yungyi: kah, yuh ka mawx kheu bwanson: Siyiex Nawh tag sang cim ka krax yum son pui ku kaux daux pui heue:. 10 Grawh grawng: nawh hoik khaw: son Nawh Cao:, pa mawh Kaw pa can pa koe: ku ceu hoik mawh son Nawh, mai: pa can pa koe: ku ceu hoik mawh kheu Nawh, tix viex hoek kawn: praix tom: nie ka min: plakngai:, yuh ka mawx son sang kieh Cao: pa yuh krax taohkix grum mhawm: kheu krax kham: krax geu: heue:. 11 Grawh grawng: nawh, Kaw pa kieh singax, mai: khawm: kix pa hoik kieh singax khawm: uik mawh khaing: Tix Kaux khaing: heue:. Mawh kheu jao in ang Nawh lai kaig tua tix kok kix mawh puxaik, 12 ah nin:,

337"Aux tag sang krai ceukaux Maix ka puxaik Aux khankix, Aux tag sang ah lox rhax yaogyaw Maix ka sigreung cub pui pa khrawm: paox tix."

13 Mai: baox ah nin:,

338"Aux tag sang een: rhawm: ka Nawh Cao: heue:."

Mai: baox deeh ah nin:,

339"Jhak heue:, Aux mai: kawn: praix pa hoik tawx Siyiex ka Aux khankix."

14 Mawh kheu nan:, kheu kawn: praix khankix mawh pa rom tix neuex ka daux nex mai: nham:, tokaux Cao: Khrit kawx hoik teei nex mai: nham: pa awm: an, yuh ka mawx kheu pa yum Nawh, Nawh tag sang pon tix yuh laux ka sibrawm kaw pa hoik koe: siawp sibrawm tix kieh yum, pa mawh phicaox, 15 mai: yuh ka mawx son sang pon ploi: ka can kix khawm: uik, pa hoik mawh siliex, glang: yam im: ju kix kheu pa lhat pa graung ka krax yum heue: 16 Grawh grawng: nawh pa hoek Nawh Cao: ang lai mawh son sang teem: coi ka kawncau Siyiex khankix, viang mawh nan: Nawh Cao: teem: coi ka simie ceucat Abraham heue:. 17 Mawh kheu nan: tom: tag lai yuh Nawh Cao: awm: ka puxaik Nawh khankix, ka daux ku ceu khawm: uik, yuh ka mawx son sang lih mawh Nawh, cao: giex kaing: li pa ting pa chix caoxrhawm: mai: pa kaux sijax, ka ceu pa dex mai: Siyiex, yuh ka mawx son sang yuh pa tan pa lu son phimap phigrham: pui khankix heue:. 18 Mawh kheu tokaux Nawh Cao: hoik yaox tix kham: geu: ka ceu pa nyaw pa glaw:, Nawh Cao: tom: chix teem: chix ku: ka kix pa yaox krax nyaw krax glaw: heue:.

Simin Ting 3

Yesux Khrit lheu: mhawm: khaing: siliex pa singax singeh

1 Mawh kheu nan:, puxaik pa singax singeh, pa mawh pa rom tix pon ka pa kok pa dex mai: raoma: khankix eue:, keud tix yaox ka grawh grawng: Kawncau Pa Ting, mai: Cao: Giex Kaing: Li Pa Ting, pa hoik rieb ex tix teei pa mawh Yesux, 2 pa kaux sijax ka Kaw pa hoik ciak tix deuh Nawh, awm: Mose kawx hoik kaux sijax ka nyiex Siyiex khawm: nyiex heue:. 3 Grawh grawng: nawh hoik een: hoik sawn: Nawh mawh pa keung: tix nie lheu: pon min: plakngai: khaing: Mose, awm: kaw pa sum: nyiex nie lheu: koe: min: plakngai: khaing: nyiex an heue:. 4 Grawh grawng: nawh nyiex ku nyiex mawh pa hoik sum: pui tix kaux kaux, viang mawh kawx nan: Kaw pa hoik sum: hoik yuh ku ceu khawm: uik mawh Siyiex heue:. 5 Mai: Mose hoik kaux sijax ka nyiex Siyiex khawm: nyiex, awm: kawncau, son sang mawh mhai: sakse: ka grawng: ceu pa tag sang krai khaix khankix heue:. 6 Viang mawh kawx nan: Cao: Khrit kia: ka piang nyiex Siyiex, awm: kawn: simex, phan: ex ca: giex tom: kaux ka pa kua: ex, mai: ka ceu pa yaw rangdi ex pa dex mai: krax keud pot jun pot ex, tom: sidah, ex tom: mawh nyiex Nawh heue:. 7 Mawh kheu nan: awm: pa hoik ah Khwan: Singax Singeh yuh nin:,

340"Phan: pex mhong: lox Nawh Cao: singaix, 8 paw kieh rhawm: rhi: pex kiien: kah, awm: ka daux bawg yam pa cheeik tix kieh chu: rhawm: an, ka daux singaix pa nyaw glaw: ka daux tiag daux tu, 9 ka dee tax du pex hoik nyaw glaw: tix cheuk tix yaox Aux, mai: hoik yaox kaing pa yuh Aux khankix been tipon: (40) num heue:. 10 Mawh kheu nan: Aux tom: ang caw rhawm: ka pui ju in, mai: ah nin:, "Kix phit lud ka daux rhawm: rhi: kix ku jheeng: jheeng:, mai: ang kix tawng ka krax Aux khankix heue:.' 11 Mawh kheu nan: Aux songrhawm: songrhi: mai: tiex tu tix ah nin:, 'Kix tag ang pon laig ka daux dee laux dee lee: Aux heue:.'"

Krax kha: ka ceu pa ang yumrhawm:

12 Puxaik khankix eue:, rien rhawm: tix, phan: ang mawh nan: ha pex tix kaux kaux kox koe: rhawm: pa caox pa ang yumrhawm:, pa gwieh hu: khaing: Siyiex pa im: ju heue:. 13 Viang mawh nan: tix kaux lai tix kaux gau ka paox tix, tix singaix hoik tix singaix, glang: yam kawn: kok mawh singaix in, phan: ang mawh nan: ha pex tix kaux kaux kox kiien: rhawm: rhi: kheu pa chix pie chix lhen: phimap heue:. 14 Grawh grawng: nawh ex hoik rom tix lih mawh paox pie ka Cao: Khrit, phan: ex giex tom: kaux tom: sidah, ka pa hoik yumrhawm: tix deuh rhawm: ex yam jah heue:. 15 Kheu kawn: ca: ah nin:,

341"Phan: pex mhong: lox Nawh Cao: singaix, paw kieh rhawm: rhi: pex kiien: kah, awm: ka daux bawg yam pa cheeik tix kieh chu: rhawm: an."

16 Grawh grawng: nawh kix pa hoik mhong: mai: kawn: baox cheeik tix kieh rhawm: Nawh chu: mawh mawx? Can kix pa hoik lih hoek khaing: meung Ejiptux kheu pa thong: Mose hoik yuh nan: ang mawh lie? 17 Mai: kix pa ang Nawh caw rhawm: kah been tipon: (40) num mawh mawx? Mawh ka kix pa hoik yuh phimap, mai: pa tokaux kix hoik goh tix yum ka daux tiag daux tu ang mawh lie? 18 Nawh Cao: hoik tiex tu grawh grawng: kix tag ang pon tix laig ka daux dee laux dee lee: Tix, ka pui mawx, phan: ang mawh ka kix pa lieh lox pa ang cu ang nghiet khankix? 19 Mai: ex yaox grawng: ang kix pon tix laig kah, kheu ang lai yumrhawm: heue:.

Simin Ting 4

Pui yumrhawm: koe: dee laux lee: pa nie lheu: mhawm:

1 Mawh kheu nan: kieh ex lhat graung kah, phan: ang mawh nan: viang hoik deuh lox mukheu grawng: sang pon tix laig ka daux dee laux dee lee: Nawh Cao: kawx, ha pex tix kaux kaux kox ang pon ang hoek kah heue:. 2 Grawh grawng: nawh hoik sidiex lox bwan: gauxrhawm: gauxrhi: ka ex tete, awm: pa hoik sidiex ka khawm: kix heue:. Viang mawh kawx nan: lox pa mhong: an, ang lai koe: bwanson: ka kix, mawh kheu ang krax yumrhawm: kix lai kleuk ka kix pa nghiet khankix heue:. 3 Grawh grawng: nawh ex pa hoik yumrhawm: khankix pon tix laig ka daux dee laux dee lee: an, awm: hoik ah Nawh Cao: nin:,

342"Aux songrhawm: songrhi: mai: tiex tu tix ah nin:, 'Kix tag ang pon laig ka daux dee laux dee lee: Aux heue:.'"

Viang kaing Nawh Cao: khankix hoik yuh tom: hoik, tom: yam jah tix kaw: haktiex dix heue:. 4 Grawh grawng: nawh Nawh Cao: hoik ah nin: tix dah grawh grawng: singaix aliah,

343"Mai: Siyiex hoik laux lee: ka daux singaix aliah, khaing: kaing pa yuh Tix khawm: uik heue:."

5 Mai: hoik baox deeh ah nin:,

344"Kix tag ang pon tix laig ka daux dee laux dee lee: Aux heue:."

6 Mawh kheu nan:, kheu hoik yaox grawng: tiblah tag sang pon tix laig ka daux dee laux dee lee: an, mai: kheu kix pa hoik mhong: pa sidiex lox bwan: gauxrhawm: gauxrhi: ka kix glangka: sivoe in ang lai pon tix laig kah, kheu pa lieh lox mai: pa ang cu ang nghiet, 6 Mawh kheu nan:, kheu hoik yaox grawng: tiblah tag sang pon tix laig ka daux dee laux dee lee: an, mai: kheu kix pa hoik mhong: pa sidiex lox bwan: gauxrhawm: gauxrhi: ka kix glangka: sivoe in ang lai pon tix laig kah, kheu pa lieh lox mai: pa ang cu ang nghiet, 7 Nawh Cao: hoik ciak tix deuh tix singaix ah nin:, "Singaix" ka jheeh Dawit khaix jih jang: glang: gleeing:, (awm: pa hoik ah phaoxka:),

345"Phan: pex mhong: lox Nawh Cao: singaix, paw kieh rhawm: rhi: pex kiien: kah."

8 Grawh grawng: nawh phan: Yawsux hoik tawx pa laux pa lee: ka kix, nawh ang tau tix lai krai grawh grawng: tang: singaix phaox khaix heue:. 9 Mawh kheu nan: kawn: koe: pa laux lee: singaix tuah son pui Siyiex khankix heue:. 10 Grawh grawng: nawh Kaw pa hoik laig ka daux pa laux pa lee: Tix, tokaux Nawh kawx hoik laux lee: khaing: kaing pa yuh Tix, awm: Siyiex kawx hoik laux lee: khaing: kaing pa yuh Nawh heue:. 11 Mawh kheu nan: kieh ex nied tix coca: son sang pon tix laig ka dee laux dee lee: an, yuh ka mawx son ang pui tix kaux kawx sang hawt hu: ka pa awm: riang phek tem: pa lie lox pa ang cu ang nghiet an heue: 12 Grawh grawng: nawh gumlox Siyiex mawh pa im:, mai: pa ca: yuh, mai: nie lheu: lawm khaing: vaid pa lawm khawm: ra: plak, kre: pa yuh ka mawx ang ah, mai: swat laig tom: kieh ju mai: khwan: gwieh paox tix, mai: laig khawm: ka sinax jhong: mai: daux gua, mai: tawng ka pa bak pa keud daux rhawm: rhi: heue:. 13 Mai: ceu pa hoik phan: hoik deuh ang koe: tix ceu kawx pa ang sidawng: ka Nawh Cao:, viang mawh kawx nan: ku ceu khawm: uik mawh pa kakaong: mai: pa hoik paoh ka sivoe ngai: Nawh Cao:, pa mawh Cao: pa sang prawng sang ca: ka ex heue:.

Yesux Khrit mawh Cao: giex kaing: li pa blon: mhawm:

14 Mawh kheu nan: kheu koe: ex cao: giex kaing: li pa ting pa hoik laig ka daux meung raoma:, pa mawh Yesux Kawn: Siyiex, kieh ex giex tom: kaux ka ceu pa hoik rieb ex tix teei heue:. 15 Grawh grawng: nawh ang ex koe: cao: giex kaing: li pa ting pa ang chix caoxrhawm: ka ceu pa iak riang iak rao ex khankix, viang mawh kawx nan: ex koe: Kaw pa hoik sax yaox tix kham: krax nyaw krax glaw: ka can ku ceu ku blawng khawm: uik, viang mawh nan: Nawh ang yuh phimap heue:. 16 Mawh kheu nan: kieh ex viex rhawm: kua: tix greed hoek ka dangngeung bwanson:, yuh ka mawx son sang pon ex krax caoxrhawm:, mai: pon tix yaox bwanson: pa teem: pa coi, ka daux bawg yam pa lo ex khankix heue:.

Simin Ting 5

1 Grawh grawng: nawh cao: giex kaing: li pa ting ku kaux, pa hoik laug tix teei khaing: ka daux kawn: pui, hoik ciak tix deuh son kawn: pui, ka grawh grawng: ceu pa dex pa dawd ka Siyiex, yuh ka mawx son sang mawh nawh cao: tan ka khawngphak mai: ceu pa tan pa lu khankix son phimap phigrham: heue:. 2 Nawh mawh pa chix gun chix yeung ka pui pa ang tawng mai: ka pui pa phit pa lud khankix mhawm: mhawm:, kheu khawm: tokaux nawh kawx mawh pa iak riang iak rao, 3 mai: mawh kheu jao an nawh kawx tag lai tan ceu pa tan pa lu son phimap tokaux tix, awm: pa tan lu nawh son phimap phigrham: kawn: pui tang: kaux khankix heue:. 4 Mai: pui tix kaux kawx ang tang: pon teei ka ara pa koe: min: plakngai: an nong: nong:, viang mawh nan: pon tix teei ngie yam kok Siyiex ka nawh, awm: pa hoik kok ka Arun heue:. 5 Awm: an viang Cao: Khrit kawx ang lai tang: yaog tokaux Tix ting nong: nong:, tix mawh cao: giex kaing: li pa ting, viang mawh nan: mawh Kaw pa hoik ah nin: ka Nawh,

346"Maix mawh kawn: simex Aux, Aux hoik kieh Maix keh ka daux singaix in heue:."

6 Awm: pa hoik ah Nawh Cao: nin: tang: dah,

347"Maix mawh Cao: giex kaing: li tom: leeing: ju leeing: phan:, awm: pa khaw: mai: ara Melakhizediek."

7 Ka daux bawg yam singaix pa ot Cao: Khrit ka daux nex nham:, Nawh kok yo lox ting, mai: roik rawm: ngai:, rawg bwan: mai: khyox khaw: ka Kaw pa chix taoh Nawh khaing: krax yum, mai: hoik nghiet ka lox Nawh an kheu chix nab chix yam Nawh, 8 viang mawh Nawh Kawn: tete kawx, Nawh hoik gau tix chix cu chix nghiet ka ceu pa kham: geu: Nawh khankix, 9 mai: khaix hoik kieh Nawh grum mhawm:, Nawh Cao: tom: lih mawh Cao: pa yuh krax taoh leeing: ju leeing: phan:, ka son can kix pa cu nghiet ka Nawh khawm: uik, 10 mai: Siyiex hoik sum: ceukaux Nawh mawh cao: giex kaing: li pa ting, awm: pa khaw: mai: ara Melakhizediek heue:.

11 Ex koe: lox tix sang krai grawng: Nawh tom: nie ceu, pa mawh ceu pa kied nu tix tawng dee bleeh, mawh kheu hoik lih mawh pex pa ang hiex chix nghiet chix mhong: heue:. 12 Phan: keud grawng: pa hoik luan bawg yam jih jang: glang: gleeing:, pex khaw: tix uik mawh sara cao: gau, viang mawh nan: pex baox deeh lo cao: pa gau pex ka num: lox been li Siyiex khankix, mai: pex hoik lih mawh pa lo rawm: teeh:, mai: pa ang lo pa ih pa un: pa mawh to: heue:. 13 Grawh grawng: nawh pa ih rawm: teeh: ku kaux daux pui ang lai tawng lai chix ka gumlox pa rah pa see, mawh kheu mawh nawh kawn: ngie: heue:.

14 Viang mawh kawx nan: pa ih pa un: pa mawh to:, mawh son pui pa uik grum die huan:, pa mawh kix pa sax shiao ka kraung pakpeung dee chix tawng chix yung kix, tom: hoik gau tix chix gwieh tix tawng, mawh pa yuh ka mawx, mawh pa mhawm:, mai: pa ang mhawm: heue:.

Simin Ting 6

Krax kha: ka pa tik vud pa mawh pa meh

1 Mawh kheu nan: kieh ex prah ka ceu pa gau, pa mawh lox num: been Cao: Khrit khankix, mai: hu: plak sivoe tom: uik grum die huan:, mai: ang baox deeh yuh tix deuh num: pa doh keud doh sawn: ka krax tuah krax klaung: pa yum, mai: ka krax yumrhawm: ka Siyiex, 2 pa dex mai: pa gau grawng: ka baptis348 rawm:, mai: pa deuh taix ka piang, mai: pa deeh kaoh im: khaing: krax yum, mai: pa prawng pa ciyang leeing: ju leeing: phan: heue:. 3 Mai: phan: Siyiex tawx akhwang: ex tag yuh nang: nan: heue:. 4 Phan: mawh grawh grawng: kix pa hoik pon pa riang tix bawg, mai: hoik cim tix yaox ka khawngphak raoma:, mai: hoik kieh mawh pa rom tix pon ka Khwan: Singax Singeh, 5 mai: hoik cim tix yaox ka gumlox Siyiex pa mhawm:, mai: ka siawp sibrawm khankix pa tag sang hoek ju khaix, 6 mai: hoik deeh tieh ka khaix, ang tau tix doh chix kieh kix baox deeh mawh pa khraox, ka pa doh keud doh sawn: ka phimap, kheu kix baox deeh teei Kawn: Siyiex yum ka piang khaoxlhak ka tokaux tix tix bawg, mai: yuh tix kieh Nawh mawh pa kaig tua ka sivoe pui heue:. 7 Grawh grawng: nawh haktiex pa hoik nyaux ka rawm: lhiex pa lih hoek ka piang nawh lawx lawx, mai: pa chix kieh taux lhax lih koe: son kix pa hoik yuh kah khankix, pon bwanson: khaing: Siyiex heue:. 8 Viang mawh nan: phan: haktiex an kieh lih koe: pang: katlawm, sawn: nawh mawh pa ang koe: bwanson:, mai: dex jhax lawg kah, mai: pa sidah nawh mawh pa gleeing heue:.

Mukheu pa kaux pa cong:

9 Viang ah ex nan: kawx, pa moh aux khankix eue:, ex tom: yumrhawm: grawng: ceu pa nie lheu: mhawm: ka grawh grawng: pex, pa mawh ceu pa dex pa neuex mai: krax taoh khankix heue:. 10 Grawh grawng: nawh Siyiex ang lai mawh pa ang rah ang see, tix piawm: ka kaing krax moh krax rhawm: pa hoik jhi: pex ka plak ceukaux Nawh, ka daux pa hoik teem: coi pex ka pui singax singeh khankix, mai: ka daux pa kawn: ca: yuh pex nang: nan: heue:. 11 Mai: ex simie tix kieh pex kaux pui mawx kaux pui an jhi: pa viex khawm: rhawm: tix coca: awm: an, son sang pon krax keud pot jun pot pa grum naog tom: sidah, 12 yuh ka mawx son ang pex lai sang nieh, viang mawh nan: sang mawh pa hawt jawh ka kix pa pon sin: lox mukheu khankix kheu krax yumrhawm: mai: krax gun krax yeung heue:.

13 Grawh grawng: nawh yam tawx Siyiex lox mukheu ka Abraham, kheu ang Nawh yaox tix tiex tu ka pa nie lheu: ting, Nawh tom: deeh tiex tu ka tokaux Tix tiru, 14 ah nin:,

349"Aux tag sang nawb bwanson: ka maix, mai: tag sang kieh maix pre kah tete heue:."

15 Mai: kheu hoik viex rhawm: gun rhawm: yeung tix krox, Abraham tom: pon lox mukheu an heue:. 16 Grawh grawng: nawh kawn: pui chix teei ceu pa nie lheu: ting khaing: tokaux tix tix tiex tu kah, mai: ka daux can ceu pa thungthiang: kix paox tix, lox pa tiex pa tu mawh pa kieh sim kieh dud son sang kieh kaux cong: kah heue:. 17 Mawh kheu Siyiex koe: rhawm: tix sang nie jhi: sidawng: laing laing, ka cao: pa sang pon sin: lox mukheu an, ka grawng: pa ang chix tieh chix loh ceu pa yiag pa bak Nawh, Nawh tom: shiao lox tiex lox tu sinax, 18 yuh ka mawx kheu ra: ceu pa ang chix tieh chix loh, pa ang doh chix kieh Siyiex pie lhen: kah, ex pa hoik to: son dee peung tix giex ka krax keud pot jun pot pa hoik deuh sivoe ex, tag sang pon pa baox tiien riang ka ex heue:. 19 Krax keud pot jun pot an mawh awm: rhiem: ngakngaw: ka son ju ex, pa kaux pa cong:, mai: hoek tom: plak daux man: kang:, 20 ka dee hoik grux laig Yesux tix mawh cao: pa hu: sivoe ka son ex, kheu hoik lih mawh Nawh cao: giex kaing: li pa ting, leeing: ju leeing: phan:, awm: pa khaw: mai: ara Melakhizediek heue:.

Simin Ting 7

Melakhizediek

1 Grawh grawng: nawh Melakhizediek in, pa mawh simiang khunhawkham Saliem, pa mawh cao: giex kaing: li pa ting cie Siyiex pa ting pa lhaong: khaing: paox tix, pa hoik sipub ka Abraham yam deeh dak nawh khaing: pa pah simiang khunhawkham khankix yum, mai: nawb bwan: ka nawh, 2 ka nawh Abraham kawx, hoik gwieh tix tawx can kraung pin pa pon nawh kao: son tix son, (phan: toe: dee bleeh ceukaux Melakhizediek, phaoxka: tix ceu mawh Simiang Khunhawkham pa rah pa see, mai: khaix an mawh Simiang Khunhawkham Saliem, pa mawh Simiang Khunhawkham pa nhim:, 3 pa ang koe: keeing:, pa ang koe: miex, pa ang koe: ceucat pa toe: tix hoek, viang dee jah singaix khankix, mai: dee sidah kawx ang koe:, viang mawh nan: hoik yuh tix kieh nawh awm: Kawn: Siyiex), pa kawn: ca: mawh simiang pa giex kaing: li jheeng: jheeng: heue:.

4 Keud tix yaox grawng: pui an ting miex ding miex glhaong:, pa keeing: ceu ex Abraham, hoik teei tix tawx kraung pin ceu pa blon: ting blon: mhawm: khankix kao: son tix son kah heue:. 5 Mai: kix pa mawh kawn: simex Lewix khankix pa hoik pon ara cao: giex kaing: li, hoik koe: lox tawm: tix sang teei kao: son tix son khaing: pui khankix awm: pa khaw: mai: lox lai been li, pa mawh khaing: puxaik kix, viang in kix kawx hoik lih hoek khaing: bloh Abraham, 6 viang mawh kawx nan: kaw pa ang toe: ceucat nawh hoek khaing: kix, hoik teei kao: son tix son khaing: Abraham, mai: hoik nawb bwan: ka nawh pa koe: lox mukheu khankix heue:. 7 Mai: ang koe: dee thung thiang: grawng: mawh kaw pa nie ting pa nawb bwan: ka kaw pa iak heue:. 8 Lheu: khaing: nan: dee in mawh pui chix yum pa pon kao: son tix son, viang mawh nan: dee an tix kaux pa pon kao: son tix son, mawh pa koe: ceu pa kham: mhai: sakse: grawng: pa im: ju nawh heue:. 9 Phan: krai tix blawng mawh nin:, pie Lewix pa pon kao: son tix son, hoik yaox tix tawx kao: son tix son ka daux Abraham heue:. 10 Grawh grawng: nawh yam sipub Melakhizediek ka Abraham, Lewix kawn: ot ka daux bloh keeing: nawh heue:.

11 Mawh kheu nan: phan: hoik koe: ceu pa grum naog kheu cub cao: giex kaing: li pa dex mai: Lewix, (grawh grawng: nawh hoik mawh kheu cub cao: giex kaing: li an pa hoik pon pui khankix ka lox lai been li), kawn: baox lo pa lih bleeh cao: giex kaing: li tang: kaux awm: pa khaw: mai: ara Melakhizediek, pa ang sawn: mawh pa khaw: mai: ara Arun, yuh ka mawx? 12 Mawh kheu thai: loh ka cub cao: giex kaing: li, viang khawm: ka lox lai been li kawx, tag lai thai: lai loh kah heue:. 13 Grawh grawng: nawh kaw pa hoik krai ceu in khankix ka grawh grawng: nawh an, mawh pa dex mai: ceu pui tang: ceu, pa mawh ceu pui pa pui tix kaux kawx ang sax yuh kaing kia: ngien ka khu: dee tan heue:. 14 Grawh grawng: nawh hoik sidawng: grawng: hoik lih Simiang ex khaing: ceu Yudax, mai: Mose ang lai krai tid tix grawng: pa dex ceu Yudax ka pa yuh cao: giex kaing: li heue:. 15 Mai: ceu pa krai ex nie lheu: sidawng: laing laing, phan: cao: giex kaing: li tang: kaux tag lih bleeh pa awm: Melakhizediek, 16 pa ang mawh cao: giex kaing: li pa hoik kieh tix mawh awm: pa khaw: mai: lox tawm: lai been li pa dex mai: nex nham:, viang mawh nan: mawh pa hoik kieh tix mawh awm: pa khaw: mai: siawp sibrawm ju pa im: pa ang chix sidah heue:. 17 Grawh grawng: nawh hoik kham: mhai: sakse: ah nin:,

350"Maix mawh cao: giex kaing: li tom: leeing: ju leeing: phan:, awm: pa khaw: mai: ara Melakhizediek."

18 Grawh grawng: nawh hoik tiah tix tik ka lox tawm: pa hoik grux tawx sivoe an, kheu mawh pa iak riang iak rao mai: pa ang koe: bwanson:, 19 (Mawh kheu lox lai been li ang lai kieh tix ceu kawx grum naog kah, mai: hoik viex tix kieh koe: krax keud pot jun pot pa nie lheu: mhawm:, kheu krax keud pot jun pot an ex tom: pon tix hoek dex ka Siyiex heue:. 20 Mai: yam kieh Nawh Cao: mawh cao: giex kaing: li ang lai mawh ka pa ang koe: lox tiex lox tu, 21 (phan: mawh ka kix hoik kieh mawh cao: giex kaing: li, ka pa ang koe: lox tiex lox tu, viang mawh kawx nan: hoik kieh Nawh mawh cao: giex kaing: li tau mai: lox tiex lox tu, kheu Kaw pa hoik ah nin: ka Nawh,

351"Simiang hoik tiex hoik tu, mai: tag ang deeh tieh deeh loh Tix khaing: pa ah nin:, 'Maix mawh cao: giex kaing: li tom: leeing: ju leeing: phan:,'")

22 mawh kheu an Yesux hoik lih mawh cao: tang: son sijax mukheu pa nie lheu: mhawm: heue:. 23 Mai: ka kix hoik kieh mawh cao: giex kaing: li tom: nie kaux, mawh kheu ang kix yaox tix yuh jheeng: jheeng: kheu kieh raw krax yum kah heue:. 24 Viang mawh nan: phan: mawh Nawh Cao:, mawh kheu ca: koe: Nawh leeing: ju leeing: phan:, ara cao: giex kaing: li cie Nawh tom: ang thai: ang loh heue:. 25 Mawh kheu nan:, kheu Nawh Cao: kawn: ca: im: ju jheeng: jheeng:, tix khyox khaw: ka son kix pa greed hoek dex ka Siyiex, ka daux Nawh, Nawh tom: pon tix taoh kix tom: sidah heue:.

26 Grawh grawng: nawh ex lo ka cao: giex kaing: li pa ting pa awm: an, pa singax singeh, pa ang koe: dee phit dee lud, pa ang koe: dee seeing: dee brai:, pa hoik tang: tiah khaing: pui phimap phigrham: khankix, mai: pa hoik yuh tix kieh lhaong: khaing: raoma: khankix, 27 pa ang shiao lai tan pa tan pa lu ku singaix, awm: cao: giex kaing: li pa ting an khankix, tag lai tan lu son phimap tokaux tix ka: sivoe, mai: khaix ka son pui tang: kaux khankix heue:. Grawh grawng: nawh, Nawh Cao: hoik tan lu tix bawg khaing: son ku jheeng: jheeng:, yam tan lu Nawh tokaux Tix heue:. 28 Grawh grawng: nawh lox lai been li hoik ciak tix kieh pui pa iak riang iak rao mawh cao: giex kaing: li pa ting, viang mawh kawx nan: lox tiex lox tu pa hoik koe: khaix lox lai been li, hoik ciak tix deuh ka Kawn: Cao:, pa hoik to grum son leeing: ju leeing: phan: heue:.

Simin Ting 8

Yesux Khrit mawh son sijax mukheu pa blon: mhawm:

1 Ka daux grawng: ceu pa krai ex khankix, pa mawh lox kaing: ting mawh in. Ex hoik koe: cao: giex kaing: li pa ting pa awm: an, pa hoik ngawm ka plak khawn: dawm: dangngeung min: plakngai: Siyiex ka daux meung raoma:, 2 pa mawh kawncau son pui khawm: uik, ka dee singax singeh, ka nyiex gox bwan: man: pa mawh pa meh, pa hoik sum: Simiang, pa ang mawh pa sum: pui kah heue:. 3 Grawh grawng: nawh hoik ciak tix deuh ka cao: giex kaing: li ku kaux, son sang tan nawh khawngphak, mai: khawm: pa tan pa lu heue:. Mawh kheu nan: Cao: giex kaing: li pa ting in kawx tag lai koe: ceu pa tan pa lu tix ceu ceu heue:. 4 Phan: Nawh Cao: ot ka piang haktiex, Nawh ang tau tix mawh cao: giex kaing: li, mawh kheu hoik koe: kix pa tan lu khawngphak khankix awm: pa khaw: mai: lox lai been li, 5 pa kaing cau kaing soi: pa yuh kix, mawh riang pa hawt jawh tix yuh, mai: pangpeue: ceu pa dex mai: meung raoma: khankix, awm: pa hoik tawx lox ka Mose yam dex sang yuh nawh nyiex gox bwan: man:, grawh grawng: nawh Nawh Cao: hoik ah nin:,

352"Yuh satix, son sang yuh maix ku ceu khawm: uik awm: pa khaw: mai: rieang peung pa hoik jhi: ka maix ka piang gawng heue:."

6 Viang mawh nan: kaing cau kaing soi: pa hoik pon Yesux yamin, mawh pa nie blon: ting blon: mhawm:, mawh kheu mawh Nawh pui sinax ka sijax mukheu pa nie blon: ting blon: mhawm:, pa hoik kieh mawh kieh kaux ka lox mukheu pa nie blon: ting blon: mhawm: khankix heue:.

Sijax mukheu pa khraox

7 Mawh kheu phan: sijax mukheu pa hoik koe: ka: sivoe an hoik mawh pa ang koe: dee ne dee cha:, ang tau tix lo sijax mukheu ra: mu: tix mu: heue:. 8 Viang mawh nan: Nawh Cao: deuh phimap ka kix ah nin:,

353"'Jhak heue:, singaix khankix tag sang hoek,' Simiang ah nan:, 'Yam tag sang yuh Aux sijax mukheu pa khraox, tau mai: geh nyiex Isarilax, mai: tau mai: geh nyiex Yudax, 9 pa tag ang khaw: mai: sijax mukheu pa hoik yuh Aux tau mai: tax du kix khankix, ka daux singaix an yam teei Aux taix kix, tix tok kix lih khaing: meung Ejiptux heue:. Grawh grawng: nawh kheu ang kix lai ot ka daux sijax mukheu Aux, Aux tom: hoik grham: tix ang keud ang sawn: grawng: kix heue:.' Simiang ah nan:. 10 'In mawh sijax mukheu pa tag sang yuh Aux tau mai: geh nyiex Isarilax, khaix singaix an khankix,' Simiang ah. 'Aux tag sang sau: lox lai been li cie Aux ka daux dee chix keud kix, mai: Aux tag sang tiem: khankix khawm: ka piang rhawm: rhi: kix heue:. Mai: Aux tag mawh Siyiex kix, mai: kix tag sang mawh pui cie Aux heue:. 11 Mai: kix kaux pui mawx kaux pui an tag ang gau paox tix ka paox praix paox yaong: tix, mai: kaux pui mawx kaux pui an ka puxaik tix, ah nin:, Tawng ka Simiang heue:. Grawh grawng: nawh, can khawm: uik tag sang tawng ka Aux, jah ka pa nie iak khaing: paox tix, tom: sidah ka pa nie ting khaing: paox tix ka daux kix heue:. 12 Grawh grawng: nawh Aux tag sang caoxrhawm: ka jhawm: pa phit pa lud kix, mai: Aux tag ang baox lai doh keud ka phimap phigrham: kix heue:.'"

13 Ka daux pa hoik ah Nawh Cao:, "Sijax mukheu pa khraox," Nawh hoik yuh tix kieh sijax mukheu pa hoik koe: ka: sivoe an mawh pa prim: heue:. Mai: ceu pa lih prim: lih kuad an dex sang grai: grhup hu: heue:.

Simin Ting 9

Sijax mukheu Pa prim: mai: pa khraox

1 Phan: mawh sijax mukheu ka: sivoe an tix mu:, hoik koe: been grawng: pa krub, mai: hoik koe: dee singax singeh nawh pa dex mai: haktiex in heue:. 2 Grawh grawng: nawh hoik cox hoik yuh nyiex gox bwan: man: tix lhang:, pa koe: nyiex plak praix tix nyiex, pa kok mawh "Dee Singax Singeh," dee koe: jawk ten:, mai: pheen:, mai: khaomun pa tan pa lu heue:. 3 Mai: plak daux man: kang: ra: mu: tix mu:, koe: nyiex gox man: pa kok mawh, "Dee Kied Singax Singeh Khaing: Paox Tix." 4 pa koe: khu: khri: dee tok nyawng bhawng:, mai: khwi: sijax mukheu pa hoik om: ka khri: khawm: uik heue:. Ka daux khwi: an koe: aw: khri: tix mu:, pa koe: Mannax ka daux, mai: khaox gix Arun pa hoik tux tai, mai: khlawp simaox sijax mukheu, 5 mai: ka piang khwi: an koe: Cherubim, pa dex mai: min: plakngai:, pa tawb veei ka dangngeung pa caoxrhawm: heue:. Phan: mawh grawh grawng: ceu in khankix, ang ex pon tix krai tom: grum tom: sidah yamin heue:. 6 Mai: khaix hoik cox ceu in khankix yuh nin:, cao: giex kaing: li khankix, ca: laig ka daux nyiex gox plak praix tix nyiex ku jheeng: jheeng: tix yuh kaing krub heue:. 7 Viang mawh nan:, phan: mawh ka daux nyiex gox man: ra: nyiex tix nyiex, cao: giex kaing: li pa ting tix kaux khaing: nong: nong:, laig ngie tix num tix bawg, mai: ang sax laig phan: ang viex nham:, pa tan nawh son tokaux tix mai: son ceu pa phit pa lud pui tang: kaux khankix heue:. 8 Khwan: Singax Singeh tom: teei grawng: an jhi: kieh sidawng:, grawng: krax pa laig ka daux Dee Kied Singax Singeh ang nyang bax paoh yam kawn: kaux kawn: koe: nyiex gox man: plak praix heue:. 9 In mawh rieang phektem: ka son bawg yamin awm: pa khaw: mai: khawngphak mai: ceu pa tan pa lu pa teei tix tan khankix, viang ceu an khankix ang chix kieh dee chix keud chix tawng pui pa krub Siyiex grum mhawm: kah, 10 kheu khankix mawh ngie ka pa ih pa un:, mai: pa nyaux, mai: pa khoek pa heem: tom: nie ceu, pa mawh been nex nham: pa hoik deuh tom: sang hoek bawg yam yam sang cox yuh pa khraox khaing: heue:.

11 Viang mawh kawx nan: Cao: Khrit hoik hoek tix mawh Cao: Giex Kaing: Li Pa Ting pa dex mai: ceu pa mhawm: pa mhiem: pa tag sang hoek tix mawh khaix, ka daux nyiex gox bwan: man: pa nie lheu: ting lheu: grum mhawm:, pa ang lai yuh ka taix, pa ah nan: sang ah, pa ang dex mai: ceu pa phan: pa yuh ka haktiex in, 12 mai: ang Nawh lai teei nham: pex mai: nham: kawn: moi khankix, viang mawh nan: teei ka nham: tokaux Tix mai: laig ka daux Dee Kied Singax Singeh, tix bawg khaing: son ku jheeng: jheeng:, khaix hoik pon krax taoh leeing: ju leeing: phan: ka son ex heue:. 13 Grawh grawng: nawh phan: nham: pex mai: nham: moi mhaing: khankix, mai: nyaox moi shiang:, pa phruah ka kix pa hoik seeing: brai:, dee chix kieh nex nham: kix singax singeh kah, 14 nham: Cao: Khrit pa tokaux Nawh pa loig pa ang koe: dee ne hoik tan lu ka Siyiex kheu Khwan: Singax Singeh leeing: ju leeing: phan:, tag sang nie lheu: kieh dee chix keud chix tawng pex singax khaing: krax twah krax klaung: pa dex mai: krax yum, tix sang yuh kaing krub ka Siyiex pa im: ju miex ding? 15 Mai: mawh kheu jao in Nawh Cao: tom: mawh pui sinax ka sijax mukheu pa khraox, kheu hoik yum son sang taohka ceu pa phit pa lud pa hoik ot ka greem: sijax mukheu pa yuh ka: sivoe an tix mu:, yuh ka mawx son kix pa hoik kok ka khankix tag sang pon sin: leeing: ju leeing: phan:, awm: lox mukheu heue:. 16 Grawh grawng: nawh dee koe: lai alo grawng: pa gwieh sin:, tag sang koe: mhai: sakse: grawng: pa hoik yum cao: pa yuh lai an heue:. 17 Grawh grawng: nawh lai alo grawng: pa gwieh sin:, koe: cee ngie khaix hoik yum cao: pa yuh lai an khaing:, mai: yam kawn: klawd nawh ang sax koe: bwanson: heue:. 18 Mawh kheu nan: pie sijax mukheu pa hoik yuh ka: sivoe an kawx, ang lai jah tix deuh tix kieh mawh ka pa ang lih nham: heue:. 19 Grawh grawng: nawh khaix hoik krai Mose lox tawm: ku gum ka pui khawm: uik awm: pa khaw: mai: lox lai been li, nawh teei nham: kawn: moi mai: nham: pex khankix, tau mai: rawm: mai: hauk yung: pa raoh, mai: khaox Hesop354 mai: phruah ka phuk lai an mai: ka khawm: pui khawm: uik, 20 ah nin:,

355"In mawh nham: sijax mukheu pa hoik tawm: Siyiex tix yuh tau mai: pex heue:."

21 Lheu: khaing: an ka nyiex gox bwan: man:, mai: ka khawm: kraung can pa shiao yam yuh kaing krub kawx, nawh teei nham: mai: phruah sau: kah awm: an heue:. 22 Mai: phan: awm: pa khaw: mai: lox lai been li, dex kieh ku ceu khawm: uik singax singeh ka nham:, mai: phan: ang mawh ka pa lih nham: ang koe: krax luan khaing: phimap heue:.

Yesux Khrit mawh son pa tan pa blon: mhawm:

23 Mawh kheu nan: ceu pa mawh pa hoik hawt jawh tix yuh ka ceu pa koe: ka daux meung raoma: khankix, tag lai kieh singax singeh ka ceu in kix heue:. Viang mawh nan: ceu pa mawh pa koe: ka daux meung raoma: tete, tag lai kieh singax singeh ka pa tan pa lu pa nie lheu: mhawm: khaing: in kix heue:. 24 Grawh grawng: nawh Cao: Khrit ang lai laig ka daux Dee Kied Singax Singeh, pa yuh ka taix, pa mawh rieang peung Dee Kied Singax Singeh pa mawh pa meh an, viang mawh nan: pon hoik laig ka daux raoma: tete, son sang plak jhi: tokaux Nawh ka sivoe pakngai: Siyiex ka son ex yamin heue:. 25 Mai: Nawh Cao: ang lai tan ka tokaux Tix lawx lawx, awm: pa laig cao: giex kaing: li pa ting ka daux Dee Kied Singax Singeh tix num hoik tix num, ka pa viex nham: pa ang mawh cie tokaux tix, 26 phan: raux mawh nan:, jah ka yam kaw: haktiex, tom: sidah sidu yamin, Nawh Cao: tag hoik yaox tix kham: geu: lawx lawx, viang mawh nan: yamin, yam mawh bawg yam sidah baux ju khankix, Nawh Cao: hoik lih bleeh son sang teei tix tik ka phimap phigrham:, ka daux pa tan pa lu ka tokaux Nawh tix bawg khaing: heue:. 27 Awm: pa hoik ciak tix kieh pui yum tix bawg, mai: khaix hoik yum tag sang yaox pa prawng pa ciyang, 28 awm: an Cao: Khrit kawx hoik tan ka tokaux Tix tix bawg khaing:, son sang vieh phimap pui tom: nie hu:, mai: Nawh tag sang lih bleeh ra: bawg tix bawg, ka pa tang: tiah pa ang dex mai: phimap, ka kix pa krox son Nawh Cao:, son sang taoh ka kix heue:.

Simin Ting 10

1 Grawh grawng: nawh kheu lox lai been li koe: pangpeue: ceu pa mhawm: pa tag sang hoek khaix khankix, mai: ang lai koe: rieang pakpeung ceu an khankix tete, pa ca: tan ceu pa tan pa lu cao: giex kaing: li kix tix num hoik tix num jheeng: jheeng:, ang lai chix kieh kix pa greed hoek dex khankix grum mhawm: kah heue:. 2 Phan: chix kieh grum mhawm:, tag hoik naox ka pa tan khankix ang mawh lie? Mawh kheu phan: hoik kieh pui pa yuh kaing krub khankix singax ka tix bawg khaing:, dee chix keud chix tawng kix ang tau lai baox mhong: koe: phimap heue:. 3 Viang mawh kawx nan: ka daux pa tan pa lu an khankix koe: ceu pa doh keud doh sawn: ka phimap tix num hoik tix num heue:. 4 Grawh grawng: nawh nham: moi mai: nham: pex khankix pon ang doh chix teei tix tik phimap phigrham: heue:. 5 Mawh kheu nan: yam hoek Cao: Khrit ka piang haktiex Nawh Cao: ah nin:,

356"Maix ang lai simie ka ceu pa tan mai: ceu pa lu, viang mawh nan: Maix hoik cox hoik khre: tokaux ka son Aux tix mu: heue:. 6 Ka daux ceu pa gleeing tix tan khawm: kaux mai: ceu pa tan pa lu son phimap phigrham:, Maix ang caw ang khaw: rhawm: kah heue:. 7 Khaix an Aux tom: ah nin:, 'Jhak heue:, Aux hoik hoek (awm: hoik tiem: daux bua: lai ka grawng: Aux) tix sang yuh alo Maix, Siyiex eue:.'"

8 Awm: pa hoik ah phaoxka: nux, "Ka ceu pa tan mai: ceu pa lu, mai: ka ceu pa gleeing tix tan khawm: kaux, mai: ceu pa tan pa lu son phimap phigrham:, Maix ang lai simie mai: ang caw ang khaw: rhawm: kah heue:." (Ceu an khankix mawh pa tan lu awm: pa khaw: mai: lox lai been li). 9 Khaix an Nawh Cao: hoik ah nin:, "Jhak heue:, Aux hoik hoek tix sang yuh alo Maix heue:." Nawh Cao: teei tix tik ka ceu pa koe: ka: sivoe an, yuh ka mawx son sang kieh kaux cong: ka ra: ceu tix ceu heue:. 10 Ka daux alo pa yuh nan:, hoik kieh ex singax singeh kheu pa teei tix tan tix lu tokaux Yesux Khrit tix bawg khaing: son ku jheeng: jheeng: heue:. 11 Mai: cao: giex kaing: li ku kaux cung ku singaix, tix ngaix hoik tix ngaix tix yuh kaing krub mai: tan lu ka ceu pa tan pa lu pa awm: paox tix lawx lawx, pa ang tau tix chix teei tix tik ka phimap tix bawg kawx heue:. 12 Viang mawh kawx nan: Nawh Cao:, khaix hoik tan Nawh ka pa tan pa lu tix mu: khaing:, son phimap phigrham: ka son leeing: ju leeing: phan:, hoik ngawm ka plak taix khawn: dawm: Siyiex heue:. 13 Mai: ca: krox ca: jun tom: sang kieh pui pa koeng ka Nawh, mawh ngot dee deuh caong Nawh heue:. 14 Grawh grawng: nawh ka pa tan pa lu tix bawg khaing:, Nawh Cao: hoik kieh grum mhawm: leeing: ju leeing: phan: ka kix, pa yuh tix kieh singax singeh khankix heue:. 15 Mai: khawm: Khwan: Singax Singeh kawx kham: mhai: sakse: ka ex, kheu khaix hoik ah Nawh nin:,

35716 "'In mawh sijax mukheu pa tag sang yuh Aux tau mai: kix, khaix singaix an khankix,' Simiang ah. 'Aux tag sang sau: lox lai been li cie Aux ka piang rhawm: rhi: kix, mai: Aux tag sang tiem: khankix khawm: ka dee chix keud kix heue:.'"

17 Nawh baox ah nin:,

358"Mai: Aux tag ang baox lai doh keud ka phimap phigrham: mai: ka jhawm: pa phit pa lud kix heue:."

18 Dee koe: ceu pa luan khaing: phimap khankix, ang lai baox tan baox lu ka son phimap phigrham: heue:.

Krax pa khraox pa im:

19 Mawh kheu nan:, puxaik khankix eue:, kheu koe: ex rhawm: kua: tix pon laig ka daux Dee Kied Singax Singeh, kheu nham: Yesux, 20 ka krax pa khraox pa im:, pa hoik paoh Nawh ka son ex, phlat ka man: kang:, pa ah nan:, sang ah ka tokaux Nawh, 21 mai: kheu koe: cao: giex kaing: li pa ting piang nyiex Siyiex, 22 kieh ex viex rhawm: pa mawh pa meh ka daux pa naog ka krax yumrhawm:, mai: greed dex khaix hoik phruah rhawm: rhi: ex khaing: dee chix keud chix tawng pa mhong: koe: pa caox pa caig, mai: khaix hoik sigrax: tokaux ex ka rawm: pa singax singeh heue:. 23 Kieh ex giex tom: cong: ka krax keud pot jun pot pa hoik rieb ex tix teei, yuh ka mawx son ang lai yungyiang: kah, grawh grawng: nawh Kaw pa tawx lox mukheu mawh pa kaux sijax heue:. 24 Mai: kieh ex keud grawng: paox tix tix kaux lai tix kaux, son sang kieh koe: krax moh krax rhawm:, mai: krax twah krax klaung: pa mhawm: pa mhiem:. 25 Paw vi yuh tix tik ka pa krawk khrwm: ex paox tix, awm: koe: been pui tiblah, viang mawh kawx nan: gau ka paox tix, mai: nie lheu: baox yuh nang: nan: yam yaox pex dex hoek singaix an heue:.

Tawx stix ka pui pa yuh krax phit lud

26 Grawh grawng: nawh khaix hoik grum tawng ex ka pa mawh pa meh, phan: ex baox ca: nieb lak yuh phimap, ang baox lai koe: ceu pa tan pa lu son phimap phigrham:, 27 viang mawh nan: tag koe: pa keud pot ce: pot ceu pa lhat pa graung, grawng: pa sang pon krax prawng krax ciyang, mai: pa songrhawm: songrhi: ngu pa tag sang gleeing ka kix pa koeng pa tieb tie khankix heue:. 28 Pui pa hoik nieb een: tix ang koe: cee ka lox lai been li Mose, phan: koe: cao: pa kham: mhai: sakse: ra: loe: kaux, ang lai koe: krax caoxrhawm: mai: teei yum kah heue:. 29 Kaw pa hoik dig ka Kawn: Siyiex ka greem: caong nawh, mai: hoik een: hoik sawn: nham: sijax mukheu pa hoik kieh nawh singax singeh kah, mawh ceu pa ang singax singeh, mai: hoik nieb yuh pa ang cee ang cak ka bwanson: Khwan: Cao:, pex ce: nawh mawh pa keung: tix pon krax ciyang pa nie lheu: lang: teung: nu miex ding? 30 Grawh grawng: nawh ex tawng ka Kaw pa hoik ah nin:,

359"Pa pawk bix mawh cie Aux heue:, Aux tag sang deeh viied kah."

Mai: baox ah nin:,

360"Simiang tag sang prawng sang ca: ka pui cie Nawh heue:."

31 Pa rau tix laig ka daux tawm: taix Siyiex pa im: ju, mawh ceu pa kied lhat kied graung heue:.

32 Viang mawh kawx nan: doh keud doh sawn: ka singaix glangka: sivoe in khankix, khaix hoik pon pex pa riang, grawng: pa hoik yaox pex tix kham: ceu pa lah paox tix pa ting ka krax kham: krax geu: heue:. 33 Bawg blah hoik mawh kheu pa yuh tix kieh pex mawh pa nieb jhak pui kah, kheu pa yuh ceu pa ang cee ang cak, mai: khawm: pa tuktiak tukte:, mai: bawg blah kheu pa rom tix neuex mai: kix pa yuh pui nang: nan: kah heue:. 34 Grawh grawng: nawh pex hoik caoxrhawm: ka kix pa hoik phyawk hoik laung, mai: hoik gauxrhawm: tix rieb tix teei ka ceu pa rud rhim: tix teei kraung khrai: pex, kheu hoik tawng pex grawng: koe: kraung ceu pa nie lheu: mhawm: son tokaux pex tix ceu pa tag kaux cong: jheeng: jheeng: heue:. 35 Mawh kheu nan: paw tik ka ceu pa viex pex rhawm: kua:, mawh kheu an mawh ceu pa kieh pon bwanson: pa ting heue:. 36 Grawh grawng: nawh pex lo ceu pa gun pa yeung, yuh ka mawx khaix hoik yuh alo Siyiex, pex tag sang pon awm: lox mukheu an heue:.

36137 "Grawh grawng: nawh, khaix in taig bawg yam ceeix ceeix ngie, Kaw pa sang hoek, tag hoek, mai: tag ang gla heue:. 38 Viang mawh kawx nan: Kaw pa rah pa see cie Aux tag sang im: kheu krax yumrhawm:, Mai: phan: Nawh deeh yawn: Tix, ju Aux tag ang khaw: ang caw rhawm: ka daux Nawh heue:."

39 Viang mawh kawx nan: ang ex neuex ka daux kix pa yawn: tix, tix hoek ka krax laux krax leeing:, viang mawh nan: ex neuex ka daux kix pa koe: krax yumrhawm: tom: pon tix hoek krax taoh ju heue:.

Simin Ting 11

Pa yumrhawm: mawh daux krax pa blon: mhawm:

1 Krax yumrhawm: kienie, mawh ceu pa uik vhah rhawm: grawng: sang pon ka ceu pa keud pot jun pot kah, mai: mawh pa sang een: rhawm: tix pon ka ceu pa ang nyang bax yaox heue:. 2 Grawh grawng: nawh hoik mawh ka daux an, pa kuad song: khankix hoik pon pa kham: mhai: sakse: grawng: kix heue:. 3 Mawh kheu krax yumrhawm: ex chix tawng, grawng: pa hoik lih mawh haktiex, kheu gumlox pa teei tix yuh khaing: ceu pa pon tix yaox heue:. 4 Mawh kheu krax yumrhawm: Abelax tan ceu pa tan pa lu pa nie lheu: mhawm: ka Siyiex, khaing: pa tan Ka-inax, mawh kheu nan: nawh tom: pon pa kham: mhai: sakse: ka grawng: nawh, grawng: pa mawh nawh pa rah pa see. Siyiex kham: mhai: sakse: ka grawng: khawngphak pa tan nawh khankix, mai: viang nawh hoik yum kawx, nawh kawn: sikah tom: yamin heue:. 5 Mawh kheu krax yumrhawm: hoik teei tix gah Enawk, yuh ka mawx son ang nawh sang yaox krax yum, mai: sawg ang lai yaox nawh, kheu hoik gah Siyiex nawh hu: heue:. Grawh grawng: nawh, Nawh Cao: hoik kham: mhai: sakse: ka grawng: nawh, grawng: pa hoik yuh nawh pa khaw: pa caw ka rhawm: Siyiex, ka: sivoe sang gah nawh hu: heue:. 6 Mai: phan: ang koe: krax yumrhawm: pon ang doh chix khaw: chix caw ka rhawm: Siyiex, grawh grawng: nawh kaw pa hoek ka Siyiex, tag lai yumrhawm: grawng: mawh Nawh, mai: grawng: mawh Nawh cao: pa tawx bwanson: ka kix pa sawg ka Nawh heue:. 7 Mawh kheu krax yumrhawm:, yam tawx Siyiex lox ka Noax, ka grawng: ceu pa ang nyang bax yaox khankix, nawh lhat graung mai: yuh nyiex reu ting, tom: pon taohpui nyiex nawh heue:. Mawh kheu nan: nawh hoik prawng tix deuh phimap ka haktiex, mai: hoik lih mawh cao: sin: ceu pa rah pa see awm: pa khaw: mai: krax yumrhawm: heue:. 8 Mawh kheu krax yumrhawm: yam kok ka Abraham, nawh nghiet mai: lih hu: ka dee tag sang pon nawh son sin:, mai: nawh lih hu:, viang ang nawh tawng dee sang hu: nawh kawx heue:. 9 Mawh kheu krax yumrhawm:, nawh hoik lih mawh nyo sinie ka daux haktiex pa dex mai: lox mukheu an, awm: mawh ka daux haktiex pa ang mawh cie nawh, mai: nawh ot ka daux nyiex gox man:, tau mai: Icak mai: Yakop, pa rom tix mawh cao: sin: lox mukheu tix mu: khaing: tau mai: nawh heue:. 10 Grawh grawng: nawh, nawh ca: krox tix jhak son veng pa koe: num: jaong rong:, pa cao: sum: cao: yuh mawh Siyiex heue:. 11 Mawh kheu krax yumrhawm: viang tokaux Sara kawx, pon siawp sibrawm tix nghe: simie ceucat, yam hoik luan riex ju nawh, mawh kheu nawh een: nawh sawn: Kaw pa hoik tawx lox mukheu an mawh pa kaux sijax heue:. 12 Mawh kheu nan: pui tix kaux pa awm: pa hoik yum lih mawh keeing: cub pui haoh pui hun: pa awm: simuing: ka daux raoma: khankix, mai: awm: mhaik praok rawm: sigrit sigra: pa ang lai uik chix simin heue:.

13 Pui in khankix khawm: uik hoik yum ka daux krax yumrhawm:, yam ang nyang pon lox mukheu khankix, viang mawh nan: kix hoik kuk puan: khankix dee singai, mai: ah lox rieb ka khankix, mai: hoik kham: grawng: mawh kix pui tang: meung mai: nyo sinie ka piang haktiex heue:. 14 Grawh grawng: nawh kix pa ah lox ceu pa yuh nan: kieh sidawng: grawng: sawg kix son meung cie tokaux kix heue:. 15 Mai: phan: kix hoik keud grawng: haktiex dee hoik lih hoek kix khaing: an tete, kix hoik pon tix deeh ing: kah heue:. 16 Viang mawh kawx nan: kix simie tix cie meung pa nie lheu: mhawm:, pa mawh meung ka raoma: heue:. Mawh kheu nan: Siyiex ang kaig ang tua, ka pa kok Nawh mawh Siyiex kix, grawh grawng: nawh Siyiex hoik cox hoik khre: veng tix veng son kix heue:.

17 Mawh kheu krax yumrhawm:, yam cheuk tix yaox ka Abraham, nawh tan lu ka Icak. Mawh heue:, kaw pa hoik gauxrhawm: tix rieb tix teei lox mukheu khankix, teei tix tan ka kawn: simex tix, pa koe: tix kaux khaing:, 18 pa mawh kaw pa hoik ah nin: ka grawng: nawh,

362"Ka daux Icak tag sang kok mawh simie ceucat maix heue:."

19 Mawh kheu nawh deuh rhawm: grawng: pa Siyiex chix tix kieh Icak deeh kaoh im: pie khaing: krax yum kawx heue:. Phan: awm: lox phektem: nawh hoik deeh pon nawh khaing: krax yum heue:. 20 Mawh kheu krax yumrhawm: Icak nawb bwan: ka Yakop mai: Esaw:, ka grawng: ceu pa tag sang hoek khaix heue:. 21 Mawh kheu krax yumrhawm: yam dex sang yum Yakop nawh nawb bwan: ka kawn: simex Yosiep khawm: ra: kaux, mai: nawh tum piang khaox gix tix mai: krub ka Siyiex heue:. 22 Mawh kheu krax yumrhawm: yam dex sang sidah ju Yosiep, nawh simawd ka grawng: yam sang lih hu: kawn: praix Isarilax, mai: tawm: lox ka grawng: si:ang: tix heue:. 23 Mawh kheu krax yumrhawm: yam keh Mose, kheu yaox miex keeing: nawh, grawng: mawh nawh kawn: pa mhawm: grang, kiex ang lhat ka lox pa hoik tawm: simiang khunhawkham, mai: kiex mox nawh been loe: khix heue:. 24 Mawh kheu krax yumrhawm: khaix hoik ting Mose, nawh ang cu tix kieh kok nawh mawh kawn:, kawn: bon: Pharaw, 25 mai: laug tix rom tix kham: geu: ceu pa nu pa khawm: tau mai: pui Siyiex, khaing: pa pon tix gauxrhawm: gauxrhi:, ka krax gauxrhawm: pa dex mai: phimap tix vong vong, 26 mai: yiag ceu pa map pa dex mai: Cao: Khrit, mawh sinngao pa nie lheu ting khaing: sinngao meung Ejiptux, grawh grawng: nawh, nawh ca: jeung: ngai: tix ka bwanson: pa tag sang pon khaix heue:. 27 Mawh kheu krax yumrhawm: nawh ang lhat ka krax songrhawm: simiang khunhawkham, mai: prah ka meung Ejiptux. Grawh grawng: nawh, nawh kaux cong: awm: pa yaox nawh ka Kaw pa ang ngai: chix yaox heue:. 28 Mawh kheu krax yumrhawm: nawh priex tix yuh poi Pasakha, mai: pa phruah nham:, yuh ka mawx cao: pa yuh laux ka kawn: ai: khankix, tag ang teeh ang chuh ka pui Isarilax heue:. 29 Mawh kheu krax yumrhawm: kix hu: preeng: ka rawm: sigrit sigra: pa raoh, awm: pa hu: ka haktiex pa kroh pa si:oh, mai: yam pui Ejiptux khankix hu: tix yaox awm: an, rawm: lhop ka kix heue:. 30 Mawh kheu krax yumrhawm: guh veng, veng Yerikho: grhup, khaix hoik cuang: kix kah, aliah singaix heue:. 31 Mawh kheu krax yumrhawm: Rahap bon: coh kaux, ang lai laux leeing: tau mai: kix pa ang chix cu chix nghiet khankix, kheu hoik rieb nawh tix teei pui jiang ka daux krax pa nhim: pa yuh paox yuh pie heue:.

32 Mai: aux tag sang baox krai pa yuh ka mawx? Grawh grawng: nawh bawg yam aux tag ang kub phan: aux krai grawh grawng: Gideon, Barak, Samson, mai: Yephathax, mai: grawng: Dawit mai: Samoelax mai: cao: jhai: khankix. 33 Mawh kheu krax yumrhawm: kix hoik pex ka meung haktiex khankix, mai: hoik yuh pa rah pa see, mai: hoik pon lox mukheu khankix, mai: hoik thox ka jheeh sivai sangsi:, 34 mai: hoik kieh siawp sibrawm ngu laux kah, mai: hoik luan khaing: krax laux ka lawm vaid, mai: hoik kieh ting riang ting rao khaing: daux pa iak riang iak rao, mai: hoik lih mawh pa ting riang ka daux pa yuh naing, mai: hoik kieh kru naing pui tang: ceu khankix to: heue:. 35 Mai: bon: khankix hoik pon pa deeh kaoh im: kawn: tix khaing: krax yum, mai: tang: kaux tiblah ang rieb tix teei ka krax ploi: krax taoh, mai: kham: ceu pa tap toi: yum, son sang pon kix pa deeh kaoh im: pa nie lheu: mhawm: heue:. 36 Mai: tang: kaux tiblah kham: geu: ceu pa nieb yuh pa ang cee ang cak kah, mai: pa sivied kah, mawh heue:, mai: lheu: khaing: an kham: geu: ceu pa phyawk mai: pa laung daux thawng: heue:. 37 Hoik dheem: kix ka simaox, hoik si: kix dud ka jhi:, hoik nyaw glaw: ka kix, hoik mug kix yum ka vaid, kix hoik ceep hak yung: mai: hak pex, mai: hu: vung viang, kheu raux ang koe: tid tix, mai: kham: geu: ceu pa tug pa kha:, mai: pa tuktiak tukte:, 38 (Pa mawh pui pa haktiex in ang keung: ka kix), mai: hu: vung viang ka daux tiag daux tu, mai: piang gawng lua, mai: ka daux daux rang:, mai: ka daux daux tiex heue:. 39 Mai: in kix khawm: uik, viang hoik koe: ceu pa kham: mhai: sakse: grawng: kix, kheu krax yumrhawm: kix, kix ang lai pon ka lox mukheu, 40 grawh grawng: nawh, Siyiex hoik kieh koe: ceu pa nie lheu: mhawm: ka son ex, yuh ka mawx son ang lai yuh tix kieh kix grum naog, ka pa tang: tiah khaing: ex heue:.

Simin Ting 12

Yesux mawh pakpeung pa grum mhawm: khawm: uik

1 Mawh kheu yaox ex grawng: koe: ex cub pui pa kham: mhai: sakse: niex ding niex dod pa rob ka ex363, kieh ex tik ka kraung pa cien ku ceu khawm: uik, mai: ka phimap pa yie vungvhien: kah, mai: kieh viex rhawm: gun rhawm: yeung mai: to:, ka ceu pa lah paox tix to: pa hoik deuh ka sivoe ex, 2 mai: jhak ka Yesux pa mawh cao: pa yuh, mai: cao: pa kieh krax yumrhawm: ex grum kah, pa een: ceu pa kaig pa tua mawh pa ang koe: cee, mai: hoik kham: geu: ka khaoxlhak, kheu krax gauxrhawm: pa hoik deuh sivoe Nawh, mai: hoik ngawm ka plak taix khawn: dawm: dangngeung Siyiex heue:. 3 Mawh kheu nan: yuh ka mawx son ang pex sang laux sang khrup rhawm:, keud ka grawh grawng: Kaw pa hoik kham: geu: ceu pa kieh pa raw khaing: daux tawm: taix pui phimap phigrham: ka tokaux Nawh awawx.

Krax sidiex pa mawh keeing:

4 Pa lah pex paox tix ka phimap, pex ang nyang bax cheu: tix yuh tom: sidah lih nham:, 5 mai: pex hoik piawm: ka lox sidiex lox gau pa hoik jeeh nyaw ka pex, awm: ka kawn: simex,

364"Kawn: simex Aux eue:, paw nieb een: tix ang koe: cee ka ceu pa sivied tix gau Simiang ka ex. Yam ah yam ne Nawh Cao: ka maix paw vi laux rhawm: kah. 6 Grawh grawng: nawh kaw pa moh Simiang kah, Nawh sivied tix gau, mai: puat ka kawn: pa rieb Nawh tix teei ku kaux heue:."

7 Ceu pa yaox pex tix kham: geu: khankix mawh son sang sivied tix gau ka pex. Siyiex yuh ka pex awm: yuh ka kawn: Tix heue:. Grawh grawng: nawh, koe: kawn: kaux pui mawx, pa ang keeing: nawh sivied tix gau kah? 8 Viang mawh kawx nan: phan: ang pex yaox tix kham: ceu pa sivied tix gau, pa hoik rom tix kham: khawm: uik kah, pex mawh kawn: cang: mai: ang mawh kawn: tete heue:. 9 Lheu: khaing: an ex hoik koe: keeing: pa dex mai: nex nham: ex, son sang sivied tix gau ka ex, mai: ex hoik yung: yi: ka kix heue:. Ex tag ang nie lheu: cu nghiet ka Keeing: khwan: khankix, mai: im: lie? 10 Grawh grawng: nawh kix hoik sivied tix gau ka ex glang: been singaix ceeix ceeix awm: pa ce: kix mhawm: heue:. Viang mawh kawx nan: Nawh Cao: sivied tix gau kah, son sang koe: ex bwanson: kheu, yuh ka mawx son sang mawh ex pa neuex tix pon ka ceu pa singax singeh Nawh Cao: heue:. 11 Can ceu pa sivied tix gau khawm: uik, yamin, ang lai ce: mawh pa gauxrhawm:, viang mawh nan: ce: mawh pa tug pa kha: heue:. Viang mawh kawx nan: bawg khaix ceu pa sivied tix gau chix kieh kix pa yaox tix kham: kah, pon plix pa nhim:, pa mawh plix pa rah pa see heue:. 12 Mawh kheu nan: yaog ka taix pa hoik tak teue:, mai: ka ngawng pa hoik groik, 13 mai: yuh krax pa see son caong pex, yuh ka mawx son pa chawh tag ang baox kluik jhong: kah, viang mawh nan: son sang moi: kah heue:.

14 Nied tix coca: son sang koe: krax nhim: tau mai: pui khawm: uik, mai: ceu pa singax singeh pa phan: ang pui koe:, tix kaux kawx tag ang pon tix yaox ka Simiang heue:. 15 Jhak mhawm: mhawm:, phan: ang mawh nan:, ha pui tix kaux kaux kox tag ang pon ang hoek ka bwanson: Siyiex heue:. Phan: ang mawh nan: ha riah pa song: tix ceu ceu kox lih kuwah tix laklheut pex, mai: pui tom: nie seeing: brai: kheu heue:. 16 Mai: son tag ang koe: pui phit pui vao tix kaux kaux, phan: ang mawh nan: pui pa ang chix nab chix yam ka Siyiex, awm: Esaw:, pa hoik coh ara kawn: ai:, ka son pa ih pa un: tix brie heue:. 17 Grawh grawng: nawh pex hoik tawng grawng: yam simie nawh tix pon cie sin: bwanson: khaix, nawh yaox tix kham: ceu pa tik pa vud, mai: ang yaox dee sang pon tix doh keud ka ceu pa hoik phit hoik lud nawh, viang lih nawh rawm: ngai: mai: nied tix sawg kawx heue:.

Krax pa tang: siyox gawng Sinai mai: gawng Zion

18 Grawh grawng: nawh ang pex lai hoek ka gawng pa pon tix teeh kah, mai: pa gleeing ka ngu, mai: pa lung, mai: pa vhaik, mai: pa bhaung:, 19 mai: ka lox luah teet tawng, mai: ka lox gumlox khankix. Kix pa mhong: lox an khyox khaw: yuh ka mawx son ang lai baox sikah ka kix, 20 mawh kheu ang kix pon tix kham: lox pa tawm: an,

365"Pie phan: tosat teeh ka gawng an, tag lai dheem: nawh yum ka simaox heue:."

21 Mai: kheu ceu pa yaox an mawh pa koe: dee lhat sigrien sigre, Mose tom: ah nin:,

366"Aux kied lhat mai: siyaung: kah heue:."

22 Viang mawh kawx nan: pex hoik hoek ka gawng Zion, mai: ka veng Siyiex pa im: ju, pa mawh veng Yerusaliem raoma:, mai: ka cub kawncau Siyiex pa ang doh uik chix simin kah, 23 mai: ka cub pa raug rum grum phroik khawm: uik, mai: ka ceucao kawn: pa liang tix keh, pa hoik tiem: daux lai carang ka daux meung raoma:, mai: ka Siyiex pa mawh Cao: prawng Cao: ca: ka khawm: uik, mai: ka khwan: pui pa rah pa see khankix, pa hoik yuh tix kieh grum mhawm:, 24 mai: ka Yesux pa mawh pui sinax ka sijax mukheu pa khraox, mai: ka nham: pa phruah, pa nie blon: mhawm: sikah khaing: pa sikah nham: Abelax heue:.

Meung pa ang lai yung: yiang:

25 Rien rhawm: tix yuh ka mawx son ang pex lai mawh pa ang cu tix nghiet ka Kaw pa sikah heue:. Grawh grawng: nawh phan: kix pa ang cu tix nghiet ka lox kaw pa tawx lox ne ka kix ka piang haktiex, ang pon tix luan kah, ex tag nie lheu: ang pon tix luan phan: ex veeh tix ang nghiet ka Kaw pa tawx lox ne khaing: meung raoma:, 26 Kaw pa lox Nawh hoik kieh haktiex yung: yiang: kah yam an, viang mawh nan:, yamin, Nawh tawx lox mukheu ah nin:,

367"Aux tag ang joeng kieh haktiex baox deeh yung: yiang: ka khaing:, viang ka khawm: raoma: kawx tag sang baox deeh kieh yung: yiang: tix bawg heue:."

27 Mai: lox pa ah, "baox deeh kieh tix bawg," dee bleeh sang ah ka pa sang teei tix tik ka ceu pa hoik yung: yiang: khankix, awm: ceu pa hoik yuh khankix, yuh ka mawx ceu pa ang lai yung: yiang: kah khankix, tag kawn: ca: ot ca: koe: heue:. 28 Mawh kheu hoik pon ex meung pa ang chix kieh yung: yiang: kah, kieh ex koe: bwanson:, son sang chix ex tix yuh kaing krub pa khaw: pa caw ka rhawm: Siyiex, ka krax pa chix yung: chix yi: heue:. 29 Grawh grawng: nawh Siyiex ex mawh ngu pa gleeing heue:.

Simin Ting 13

Yesux Khrit ang chix tieh loh tix tibawg kawx

1 Kieh kawn: ca: koe: krax pa moh pa rhawm: ka puxaik khankix awawx. 2 Paw piawm: tix jhi: krax moh krax rhawm: ka pui pa ang pex meed pex tawng, grawh grawng: nawh, ka daux pa yuh nan:, tiblah hoik kia: hoik ngien ka kawncau Siyiex yam ang lai tawng heue:. 3 Doh keud doh sawn: ka kix pa hoik phyawk hoik laung, awm: mawh pex pa hoik rom tix phyawk tau mai: kix, mai: doh keud doh sawn: ka kix pa tuktiak tukte: pui kah, mawh kheu pex kawx kawn: ot ka daux tokaux heue:. 4 Kieh pa teei mex teei moeng mawh pa koe: min: plakngai: ka daux pui khawm: uik, mai: kieh dee it mawh pa ang seeing: ang brai: heue:. Grawh grawng: nawh pui pa phit pa vao, mai: pa phit pa vao mai: mex mai: moeng pui, Siyiex tag prawng tag ciyang kah heue:. 5 Kieh pex luan khaing: ceu pa moh ka mau, mai: vhah rhawm: ka ceu pa hoik koe: pex awawx. Grawh grawng: nawh tokaux Nawh Cao: hoik ah nin:,

368"Aux tag ang doh tik ka maix, mai: Aux tag ang doh grham: ka maix heue:."

6 Mawh kheu nan: ex tom: chix viex rhawm: kua: tix ah nin:,

369"Simiang mawh cao: pa teem: aux, aux tag ang lhat ang graung heue:. Pui tag chix yuh patix ka aux?"

7 Doh keud doh sawn: ka kix pa hoik giex kaing: ka piang pex, pa mawh pui pa hoik krai gumlox Siyiex ka pex awawx. Mai: keud ka grawh grawng: krax twah krax klaung: kix mai: yam sidah ju kix, mai: hawt jawh ka krax yumrhawm: kix awawx. 8 Yesux Khrit ca: awm: paox tix, kawx kawx, mai: singaix, mai: son leeing: ju leeing: phan: heue:. 9 Paw vi kieh been ceu pa gau tom: nie ceu, pa tang: siyox pa ang pex tawng khankix, vie pex hu: awawx. Grawh grawng: nawh mhawm: tix kieh koe: rhawm: pa kaux pa cong: kheu bwanson:, mai: pa ang mawh pa kaux cong: kheu pa ih pa un:, pa mawh ceu pa hawt hu: kix tix yuh nan: khankix ang lai pon bwanson: ka heue:. 10 Ex koe: khu: dee tan tix mu:, pa kix pa yuh kaing krub ka nyiex gox bwan: man:, ang lai koe: akhwang: tix ih ka khaing: an heue:. 11 Grawh grawng: nawh tokaux tosat khankix, pa cao: giex kaing: li pa ting hoik teei tix viex nham: kix laig ka Dee Kied Singax Singeh, tix sang tan lu son phimap phigrham:, teei tix gleeing plak praix dee bang: heue:. 12 Mawh kheu nan: Yesux kawx, yuh ka mawx son sang kieh pui khankix singax singeh kheu nham: tokaux Tix, Nawh hoik kham: geu: ka plak praix siviex veng heue:. 13 Mawh kheu nan: kieh ex lih hu: plak praix dee bang: ka Nawh, mai: rom tix kham: ka ceu pa nieb map ka Nawh Cao: heue:. 14 Grawh grawng: nawh ang ex lai koe: veng pa kaux pa cong: tin:, viang mawh nan: ex sawg son veng pa tag sang hoek tix mawh khaix heue:.

Khawng: tan ceu pa khaw: caw rhawm: Siyiex

15 Mawh kheu nan: kieh ex ca: tan lu ceu pa tan pa lu pa yaogyaw ka Siyiex jheeng: jheeng:, ka daux Nawh Cao:, pa mawh plix siyieb jheeh khankix pa yaogyaw ceukaux Nawh heue:. 16 Viang mawh kawx nan: paw piawm: tix yuh ceu pa mhawm:, mai: pa vieh rhawm: sibieh tix teem: pui, grawh grawng: nawh ceu pa tan pa lu pa yuh nan:, mawh pa khaw: pa caw ka rhawm: Siyiex heue:. 17 Nghiet ka kix pa giex kaing: ka piang pex, mai: cu nghiet ka kix, grawh grawng: nawh kix mawh pa pau ka son ju pex, awm: kix pa tag sang kham: ceu pa chawk cheng: ka grawh grawng: pex. Yuh ka mawx son pa yuh kix nan: tag mawh ka krax gauxrhawm:, mai: tag ang mawh ka krax pa khirhawm:, mawh kheu phan: mawh ka krax khirhawm: tag ang koe: bwanson: son pex heue:.

18 Rawg bwanson: ex awawx. Grawh grawng: nawh ex yumrhawm: grawng: dee chix keud chix tawng ex, ang lai koe: dee deuh phimap kah, mai: ex simie tix yuh pa mhawm: ka daux ku ceu khawm: uik heue:. 19 Mai: aux nie lheu: khyox khaw: ka pex son sang rawg bwan: yuh nin:, yuh ka mawx son sang deeh hoek aux ka pex laung laung heue:.

Nawb bwanson:

20 Yamin kieh Siyiex cao: pa nhim:, pa hoik deeh vieh Simiang ex Yesux, lih khaing: krax yum, pa mawh Cao: Liang Yung: Pa Ting, pa liang yung: khankix, ka daux nham: sijax mukheu leeing: ju leeing: phan:, 21 kieh pex grum mhawm: ka pa hawt yuh alo Nawh Cao: ka daux ceu pa mhawm: pa mhiem: ku ceu, mai: yuh ceu pa khaw: pa caw plak sivoe Nawh Cao:, ka daux pex, kheu Yesux Khrit. Kieh Nawh koe: min: plakngai: ku ju leeing: ju leeing: phan: liak. Amen.

22 Puxaik khankix eue:, aux khyox khaw: son sang yeung pex ka lox pa sidiex gau in, mawh kheu hoik tiem: aux lox ka pex ceeix ceeix khaing:. 23 Kieh pex tawng grawng: pa hoik pluat ploi: ka puxaik ex Timose. Phan: nawh khran: hoek, yiex tag yaox pex tau heue:.

24 Nawb ka can kix pa giex kaing: ka piang pex, mai: ka pui pa singax singeh khankix khawm: uik awawx. Puxaik meung Itali khankix nawb ka pex heue:.

25 Kieh bwanson: ot tau mai: pex khawm: uik liak. Amen.