Efesux

Efesux

Simin Ting 1

Lox paoh

1 Pawlux pa mawh kawncau pa ting Yesux Khrit kheu alo Siyiex, tawx ka pui pa singax singeh pa ot ka daux veng Efesux, mai: ka pui pa kaux sijax ka daux Yesux Khrit heue:. 2 Kieh pex koe: bwanson:, mai: pa nhim: pa kaoh khaing: Keeing: ex Siyiex mai: Simiang Yesux Khrit heue:.

Bwanson: ka piang raoma:

3 Kieh Siyiex mai: Keeing: Simiang ex Yesux Khrit ting bwanson:, pa hoik tawx bwanson: pa dex mai: khwan: ku ceu ka ex ka meung raoma: daux Cao: Khrit, 4 awm: Nawh Cao: hoik laug tix teei ex daux Cao: Khrit, tom: ka: sang jah tix kaw: haktiex, yuh ka mawx son sang mawh ex pa singax singeh, pa ang koe: dee cha: pa loig sivoe Nawh ka daux krax moh, 5 mai: hoik grux ciak tix kieh ex mawh kawn: tokaux Nawh Cao:, kheu Yesux Khrit, awm: pa khaw: pa caw mai: alo Nawh, 6 son sang yaogyaw min: plakngai: bwanson: Nawh pa hoik yuh bwanson: tix tawx ka ex ka daux Kawn: Pa Moh Nawh, 7 pa hoik pon ex krax taoh kah, kheu nham: Nawh, son sang pon ex pa pluat pa ploi: phimap phigrham: awm: pa khaw: mai: bwanson: pa mi pa koe: Nawh, 8 pa hoik kieh Nawh koe: tom: nie plak ex ka daux pingnya mai: daux krax tawng krax yung, 9 yam kieh ex tawng alo Nawh pa hoik mox kah, awm: pa khaw: mai: alo Nawh pa hoik yiag hoik bak tix kieh mawh daux Khrit, 10 yam hoik naog bawg yam khankix, tix kraix khrawm: kieh grum ku ceu khawm: uik, can ceu pa koe: piang raoma:, mai: can ceu pa koe: ka piang haktiex tix mawh tix mu: khaing: ka daux Khrit. Pa ah aux, mawh ka daux Nawh heue:, 11 pa hoik kieh ex mawh sin:, kheu hoik ciak tix deuh ex awm: pa khaw: mai: pa hoik yiag hoik bak Kaw pa yuh ku ceu khawm: uik hawt alo pa keud Tix, 12 yuh ka mawx son ex pa hoik keud pot jun pot ka daux Cao: Khrit ka: sivoe paox tix, sang mawh son pa yaogyaw min: plakngai: Nawh heue:. 13 Mai: ka daux Nawh kawx, pex hoik mhong: gumlox pa mawh pa meh, pa mawh lox bwan: gauxrhawm gauxrhi: pa dex mai: krax taoh pex, mai: kheu hoik yumrhawm: ka daux Nawh, hoik tawk cum: ka pex ka Khwan: Singax Singeh pa dex mai: lox mukheu heue:. 14 Khwan: an mawh gawng320 ka grawng: sin: ex, tom: bawg yam sang taoh Nawh Cao: cie tokaux Tix, son sang yaogyaw min: plakngai: Nawh heue:.

15 Kheu hoik mhong: aux grawng: krax yumrhawm: pa koe: pex ka daux Simiang Yesux, mai: krax moh pa koe: pex ka pui singax singeh khawm: uik, 16 aux tom: yaogyaw bwanson:, son pex ang jud ang jai, mai: simawd pex ka daux pa rawg bwan:, 17 yuh ka mawx Siyiex Simiang ex Yesux Khrit, pa mawh Keeing: min: plakngai:, tag tawx rhawm: pa koe: pingnya pa chix keud chix doh, ka daux krax tawng krax yung ka Nawh Cao:, 18 son sang kieh ngai: rhawmrhi: pex riang, yuh ka mawx sang tawng pex pa keud pot jun pot pa hoik kok Nawh pex ka mawh pa yuh ka mawx, grawng: sin: pa sang pon Nawh Cao: ka daux pui singax singeh khankix ting miex ding, 19 mai: siawp sibrawm pa kied ting Nawh, ka plak ex pa yumrhawm: ting miex ding, awm: pa khaw: mai: pa yuh siawp sibrawn pa ting riang Nawh an, 20 pa yuh Nawh daux Cao: Khrit, yam kieh Nawh Cao: Cao: Khrit deeh kaoh im: khaing: krax yum, mai: kieh Nawh ngawm plak taix khawn: dawm: Nawh Cao: ka daux raoma:, 21 kied ting ka piang ceu pa giex kaing:, mai: pa koe: min: plakngai:, mai: siawp sibrawm, mai: simiang haktiex mai: ceukaux can ku ceukaux pa hoik kok kah, ang joeng mawh ngie ka ju haktiex in, viang mawh nan: khawm: daux ju pa tag sang hoek phaox khaix khawm: uik heue:. 22 Mai: Nawh Cao: hoik teei tix deuh ku ceu khawm: uik ka greem: caong Nawh, mai: tawx tix kieh Nawh mawh Kaing: ka piang ku ceu khawm: uik ka daux ceucao, 23 pa mawh tokaux Nawh, pa grum naog Kaw pa kieh grum naog ku ceu khawm: uik heue:.

Simin Ting 2

Ju khwan: pa khraox ka daux Ysux Khrit

1 Mai: Nawh Cao: hoik yuh tix kieh pex im: kah, yam hoik yum pex kheu pa phit pa lud mai: phimap phigrham: 2 pa hoik sax hu: pex kah, awm: pa khaw: mai: been haktiex, pa khaw: mai: simiang siawp sibrawm bhawm:, pa mawh khwan: pa yuh kaing ka daux kawn: pa lheu: pa lieh lox khankix. 3 Ex khawm: uik kawx hoik rom tau mai: kix tix bawg, ka daux pa hawt alo nex nham: tokaux tix, mai: hawt yuh pa simie nex nham:, mai: pa lak keud tix yuh, mai: ex hoik mawh nang: kawn: praix pa songrhawm:, awm: hoik mawh pa deuk khankix heue:. 4 Viang mawh kawx nan: Siyiex, pa mi pa koe: ka daux krax caoxrhawm:, kheu krax moh pa kied lang: teung: moh Nawh Cao: ka ex, 5 pie yam hoik yum ex kheu phimap phigrham: tix kawx, Nawh hoik kieh ex im: tau mai: Cao: Khrit, (Pex hoik hoek krax taoh kheu bwanson: heue:), 6 mai: hoik kieh ex deeh kaoh tau mai: Nawh, mai: hoik kieh ex ngawm tau mai: Nawh ka daux raoma:, ka daux Yesux Khrit. 7 Yuh ka mawx ka daux ju pa tag sang hoek khankix, Nawh tag sang pon tix jhi: ceu pa kied ting mi koe: bwanson: Tix, ka daux pa yuh bwanson: ka ex ka daux Yesux Khrit heue:. 8 Grawh grawng: nawh pex hoik hoek krax taoh kheu bwanson: ka daux krax yumrhawm:, mai: ang mawh kheu tokaux tix, mawh khawngphak pa tawx Siyiex. 9 Ang mawh kheu krax tuah pa yuh tix, mawh kheu nan: ang pui pon yaw tix tix kaux kawx ka grawng: an heue:. 10 Grawh grawng: nawh ex mawh khaix taix Nawh pa hoik phan: hoik yuh ka daux Yesux Khrit, son sang tuah sang yuh ceu pa mhawm:, pa hoik grux cox Siyiex son sang hu: ex ka daux ceu an khankix heue:. 11 Mawh kheu nan: doh keud grawh grawng: pex pa mawh pui tang: ceu tang: cat ka daux nex nham:, pa kix pa mawh pa pat hak ka daux nex nham:, pa hoik yuh ka taix, kok mawh pa ang pat hak, 12 hoik mawh pa tang: ot khaing: Cao: Khrit tix bawg, pa hoik tang: tiah tix ang mawh paox khaing: pui Isarilax, mai: pa hoik mawh pa ang dex mai: sijax, pa dex pa dawd mai: lox mukheu, mai: ang koe: krax dee sang keud pot jun pot, mai: ang koe: Siyiex ka daux haktiex in heue:. 13 Viang mawh kawx nan: yamin ka daux Yesux Khrit, pex pa hoik singai tix bawg, hoik kieh dex kheu nham: Cao: Khrit heue:. 14 Grawh grawng: nawh Nawh Cao: mawh pa nhim: ex, pa hoik kieh khawm: ra: mawh tix mu: khaing:, mai: yuh ding: tie ka sigreung laux, 15 kheu hoik kieh Nawh ceu pa koeng pak lawg ka daux tokaux Tix, pa mawh lox tawm: mai: been khankix pa koe: ka daux lai been li, yuh ka mawx son sang pon Nawh tix phan: tix yuh kiex khawm: ra: mawh pui khraox tix kaux khaing:, ka daux tokaux Tix mai: kieh nhim: heue:. 16 Yuh ka mawx son sang kieh khawm: ra: deeh ih rhawm: paox tix, ka daux tokaux tix mu: khaing:, ka Siyiex, kheu khaoxlhak, mai: pah ceu pa koeng yum ka khaoxlhak an heue:. 17 Mai: Nawh Cao: viex tix sidiex lox bwan: gauxrhawm: gauxrhi: pa nhim:, ka pex pa ot dee singai, mai: ka kix pa ot dex heue:. 18 Grawh grawng: nawh mawh kheu Nawh Cao: ex khawm: ra: tom: pon tix laig ka daux Khwan: tix mu: khaing: ka Keeing: Cao: heue:. 19 Mawh kheu nan: pex ang lai baox mawh pui tang: praix tang: klawng:, mai: nyo sinie, viang mawh kawx nan: pex hoik mawh ngie pui tix meung khaing: tau mai: pui singax singeh khankix, mai: pui geh nyiex Siyiex, 20 pa hoik sum: piang jaong rong:, pa mawh kawncau pa ting mai: cao: jhai: khankix, tokaux Yesux Khrit mawh Simaox kaing: ka daog heue:. 21 Ka daux Nawh Cao: khaox joh rong: jhan: khawm: uik jawg tix tok, mai: lih mawh nyiex bwan: pa singax singeh son Simiang heue:. 22 Pex kawx hoik sum: tau ka daux Nawh Cao:, son sang mawh dee ot Siyiex ka daux Khwan: Cao: heue:.

Simin Ting 3

Kaing jhaw: Pawlux

1 Mawh kheu jao in aux Pawlux pa mawh pui pa laung kheu grawng: Yesux Khrit, son pex pui tang: ceu tang: cat. 2 Pex tee: hoik mhong: grawng: bawg yam bwanson: pa hoik tawx Siyiex ka aux son pex, 3 grawh grawng: hoik plak kieh yaox tix kieh aux tawng ceu pa raux pa mox, awm: lox pa hoik tiem: aux phaoxka: ceeix, 4 mawh kheu yam phat pex, pex tag sang tawng grawng: krax tawng krax yung aux ka ceu pa raux pa mox pa dex mai: Cao: Khrit, 5 ceu pa ang sax kieh tawng ka kawn: kawn: pui daux ju pa hoik luan khankix, awm: Khwan: Cao: hoik plak kieh yaox yamin ka kawncau pa ting mai: cao: jhai: pa singax singeh cie Nawh khankix, 6 pa mawh grawh grawng: pui tang: ceu tang: cat kawx sang mawh pui pa rom tix pon sin: tau mai: pui Yudax, mai: rom tix mawh kraung pakpeung tau ka daux tokaux tix mu: khaing:, mai: pa rom tix pon tau ka lox mukheu pa koe: ka daux Yesux Khrit kheu lox bwan: gauxrhawm: gauxrhi:, 7 pa mawh aux cao: diex cao: gau kah, awm: pa khaw: mai: khawngphak bwanson: Siyiex, pa hoik tawx ka aux, awm: pa khaw: mai: pa yuh siawp sibrawm Nawh heue:. 8 Ka aux pa mawh pa nie iak khaing: pui pa singax singeh khawm: uik, hoik tawx bwanson: in, pa kieh aux sidiex lox bwan: gauxrhawm: gauxrhi: ka pui tang: ceu tang: cat, grawh grawng: pa mi pa koe: pa ang lai doh pon uik sawg liiem tix yaox cie Cao: Khrit, 9 mai: son sang kieh pui khawm: uik yaox grawh grawng: pa raux pa mox, pa hoik ciak tix deuh, ceu pa hoik mox tom: ju di dix ka daux Siyiex pa phan: pa yuh ku ceu khawm: uik mawh pa yuh ka mawx. 10 Mai: yuh ka mawx son sang kieh pingnya cuyi Siyiex sidawng: yamin ka simiang giex kaing: mai: siawp sibrawm khankix ka daux raoma: kheu ceucao, 11 awm: ceu pa hoik yiag hoik bak tix deuh Nawh Cao: ka daux Simiang ex Yesux Khrit leeing: ju leeing: phan: heue:. 12 Mawh kheu krax yumrhawm: ka daux Nawh ex tom: koe: rhawm: kua: tix hoek tix een: rhawm: ka Nawh Cao: heue:. 13 Mawh kheu nan: aux tom: khyox khaw: ka pex, son ang pex sang laux rhawm: ka krax kharhawm: kharhi: aux son pex, pa mawh son sang pon pex min: plakngai: heue:.

14 Mawh kheu jao in aux tom: grux ngawng rawg bwan: ka Keeing: Simiang ex Yesux Khrit, 15 pa mawh Kaw pa tawx ceukaux ka ku jieh nyiex ka daux meung raoma: mai: ka piang haktiex heue:. 16 Yuh ka mawx son sang tawx Nawh ka pex, awm: pa khaw: mai: pa mi pa koe: min: plakngai: Nawh, yuh ka mawx son sang baox riang rao pex ka siawp sibrawm kheu Khwan: Nawh Cao: ka daux pui plak daux heue:. 17 Yuh ka mawx son sang ot Cao: Khrit ka daux rhawm: rhi: pex kheu krax yumrhawm:, yuh ka mawx kheu sang kaux sang cong: riah pex ka daux krax moh krax rhawm:, 18 son sang pon pex tix tawng tau mai: pui singax singeh khawm: uik, grawng: plak vieh, mai: plak lhaong:, mai: plak raux mawh miex ding, 19 mai: son sang tawng ka krax moh Cao: Khrit, pa nie lheu: khaing: pa chix tawng, yuh ka mawx son sang naog pex ka pa grum naog Siyiex khawm: uik heue:.

20 Yamin ka Kaw pa kied nie lheu: chix yuh khaing: pa rawg pa keud ex khawm: uik, awm: pa khaw: mai: siawp sibrawm pa yuh kaing ka daux ex, 21 kieh Nawh koe: min: plakngai: ka daux ceucao mai: ka daux Yesux Khrit ku ju khawm: uik leeing: ju leeing: phan: liak. Amen.

Simin Ting 4

Tix mu: khaing: ka daux Khwan: singax singeh

1 Mawh kheu nan: aux pa mawh pui pa laung son Simiang, khyox khaw: ka pex, son sang hu: awm: pa keung: mai: ceu pa kok pa hoik kok ka pex, 2 ka rhawm: pa awn: pa tiem pa lang: gun lang: yeung, mai: yeung ka paox tix ka daux krax moh krax rhawm:, 3 mai: nied tix coca: son sang priex pa mawh tix mu: khaing: pa dex mai: Khwan: Cao:, ka daux pa hoik vien tix tau ka ceu pa nhim: heue:. 4 Koe: ngie tokaux tix mu: khaing:, mai: Khwan: Cao: tix mu: khaing:, awm: ceu pa kok pa hoik kok ka pex mawh ka daux krax keud pot jun pot tix mu: khaing:. 5 Koe: ngie Simiang Tix Kaux khaing:, mai: krax yumrhawm: tix ceu khaing:, mai: krax baptis321 tix ceu khaing:, 6 mai: koe: Siyiex pa mawh Keeing: khawm: uik tix kaux khaing:, Nawh mawh pa ting piang khawm: uik, mai: pa tah preeng: khawm: uik, mai: pa koe: ka daux khawm: uik heue:. 7 Viang mawh kawx nan: hoik tawx bwanson: ka ex ku kaux daux pui, awm: pa khaw: mai: diag khawng: phak Cao: Khrit heue:. 8Mawh kheu nan: Nawh Cao: hoik ah nin:,

322"Yam Nawh haok dee lhaong: Nawh giex tix tok, cub pui pa hoik laung pa hun: heue:."323

9 Pa hoik ah "Nawh haok," sang bleeh ka pa yuh ka mawx, phan: Nawh ang nyang bax hoik lih khawm: ka greem: daux tiex? 10 Kaw pa hoik lih, mawh khawm: Kaw pa hoik haok ka dee nie lhaong: khaing: piang raoma: khawm: uik, yuh ka mawx son sang kieh Nawh ku ceu khawm: uik grum naog heue:. 11 Mai: Nawh Cao: tawx tix kieh tiblah mawh kawncau pa ting, mai: kieh tiblah mawh cao: jhai:, mai: kieh tiblah mawh cao: sidiex lox bwan:, mai: kieh tiblah mawh sara pa kia: ceucao mai: sara cao: gau, 12 son sang kieh pui pa singax singeh khankix grum mhawm:, son kaing sidiex gau, son sang sum: sang yuh tokaux Cao: Khrit ting, 13 tom: ex khawm: uik hoik mawh tix mu: khaing: ka daux krax yumrhawm:, mai: krax tawng krax yung ka Kawn: Siyiex, tom: mawh ex pui pa uik grum die huan:, mai: awm: pa grum pakpeung Cao: Khrit. 14 Yuh ka mawx son ang ex lai baox mawh kawn: nyawm pa phlu: bhaung: ceu pa gau ku bhaung: phlu: vied ve, kheu pa nieb lak keud tix yuh cuyi: pa pie pa lhen:, son sang lud sang loe: heue:. 15 Viang mawh kawx nan: kheu giex pa mawh pa meh ka daux pa moh pa rhawm: ex tag ting tag huan: ka ku ceu khawm: uik ka daux Nawh Cao:, Kaw pa mawh Kaing:, pa mawh Cao: Khrit. 16 Mawh kheu mawh khaing: Nawh Cao: pa tokaux khawm: uik sitoe: paox tix tau, mai: klia: tix tau ka pa deeh lih pon tawx riang kraung daux tokaux ku ceu, awm: pa yuh kraung daux tokaux mawx, kraung tokaux an, son sang ting sang huan: tokaux tix ka daux krax moh krax rhawm: heue:.

Pa hawt hu: pui pa yumrhawm:

17 Mawh kheu nan: aux tom: ah nin:, mai: kham: mhai: sakse: ka daux Simiang, yuh ka mawx son ang pex lai baox hu: awm: pa hu: pui tang: ceu tang: cat ka pa nieb keud kix ceu pa giex going daux rhawm: tix. 18 kheu krax tawng krax yung kix hoik vhaik, kix hoik tang: tiah hu: khaing: Siyiex pa im: ju, mawh kheu pa pheem: pa ang tawng tid tix pa koe: ka daux kix, mawh kheu kiien: rhawm: rhi: kix. 19 Kheu hoik grai: krax chix kaig chix tua kix tom: hoik tawx tokaux tix son sang yuh hawt alo nex nham: ku ceu, mai: rhawm: ghoing: tix nieb yuh pa seeing: pa brai: ku ceu heue:. 20 Viang mawh nan: pa gau pex grawng: Khrit ang doh mawh nan:, 21 phan: pex hoik mhong: Nawh Cao:, mai: hoik gau ka daux Nawh, ceu pa mawh pa meh pa koe: ka daux Yesux. 22 Kieh pex peeik tix tik ceu pa hoik sax yuh pex glangka:, pa mawh pui pa prim:, pa kieh tokaux tix cux sium: kheu hawt alo nex nham: pa pie pa lhen: heue:. 23 Mai: kieh pex mawh pa khraox ka daux khwan: rhawm: rhi: pex, 24 mai: ceep ka pui pa khraox pa hoik phan: hoik yuh ka daux pa rah pa see mai: pa singax singeh pa dex mai: pa mawh pa meh, yaung Siyiex heue:.

25 Mawh kheu nan: tik ceu pa pie pa lhen:, mai: tix kaux lai tix kaux ah lox pa mawh pa meh ka paox plawg paox nyhawm: tix, grawh grawng: nawh ex tix kaux lai tix kaux hoik ra: lai mawh kraung pak peung ka paox tix heue:. 26 Viang pex songrhawm: songrhi: kawx, paw awt kieh mawh phimap. Paw kieh singaix klip ka piang ceu pa songrhawm: songrhi: pex. 27 Paw kieh tawx dee ot phicaox koe:. 28 Kaw pa sax briex paw kieh nawh baox deeh briex, viang mawh kawx nan: kieh nawh yuh kaing, pa mawh kaing pa mhawm: pa yuh ka taix tix, yuh ka mawx son sang koe: nawh ceu pa tawx ka pui pa lo pa ang yaox tix ih khankix heue:. 29 Paw kieh lox pa seeing: pa brai: lih khaing: daux jheeh pex tix gum kawx, viang mawh kawx nan: ah ceu pa mhawm:, awm: pa lo son sang kieh ting lhaong: yam mawx yam an, son sang koe: bwanson: son kix pa mhong: khankix heue:. 30 Mai: paw yuh tix kieh Khwan: Singax Singeh Siyiex khirhawm:, pa mawh pa hoik tawk pex cum: ka daux Nawh, tom: hoek singaix pa taoh heue:. 31 Kieh tik ka ceu pa songrhawm: songrhi: mai: pa hax rhawm: mai: pa chu: rhawm:, mai: pa maw: pa lawh, mai: pa map, mai: pa koeng riang pa ciyang khoi: khaing: pex heue:. 32 Mai: pex tix kaux lai tix kaux caoxrhawm: tix yuh pa mhawm: ka paox tix, mai: viex pa awn: rhawm: awn: rhi:, mai: pluat ploi: phimap ka paox tix, awm: hoik ploi: Siyiex phimap pex ka daux Cao: Khrit heue:.

Simin Ting 5

Hawt jawh ka Cao: Khrit

1 Mawh kheu nan: kieh pex hawt jawh tix yuh pa yuh Siyiex, awm: kawn: praix pa moh khankix, 2 mai: hu: ka daux pa moh pa rhawm:, awm: Cao: Khrit kawx hoik moh ka pex, mai: hoik tawx tokaux Tix son ex, tix mawh pa tan pa lu ka Siyiex, son sang mawh bhawm: pa sioe: baux heue:.

3 Viang mawh kawx nan: awm: pa khaw: mai: pui pa singax singeh khankix, ceu pa phit pa vao, mai: ceu pa ang singax singeh khawm: uik. mai: ceu pa ghoing: khankix, ka ceu in khankix pie pa simawd khaing:, paw doh kieh koe: ka daux pex. 4 Awm: an ceu pa seeing: pa brai:, mai: lox pa nieb ah, mai: lox nieb naknon:, pa mawh ceu pa ang khaw: ang caw khankix paw kieh koe:, viang mawh nan: yuh pa yaogyaw khaing: pa yuh ceu an kix heue:. 5 Grawh grawng: nawh pex tawng mhawm: mhawm: grawng: pui pa phit pa vao, phan: ang mawh nan: pui pa seeing: pa brai:, phan: ang mawh nan: pui pa ghoing:, pa mawh pui pa krub rieang krub rao, ang koe: sin: ka daux meung Cao: Khrit mai: Siyiex tix kaux kawx heue:. 6 Paw kieh pui tix kaux kawx teei lox pa giex pa going mai: pie lhen: pex kah, mawh kheu mawh grawh grawng: ceu in khankix ceu pa songrhawm: songrhi: Siyiex hoek ka piang kawn: praix pa ang cu ang nghiet khankix heue:. 7 Mawh kheu nan: paw kieh pex mawh pa rom tau mai: kix, 8 grawh grawng: nawh pex hoik mawh pa vhaik tix bawg, viang mawh nan: yamin pex hoik mawh pa riang ka daux Simiang, kheu nan: hu: awm: kawn: pa riang heue:. 9 (Grawh grawng: nawh plix pa riang mawh pa mhawm: pa mhiem:, mai: pa rah pa see, mai: pa mawh pa meh ku ceu khawm: uik heue:). 10 Ceu pa khaw: pa caw mai: rhawm: Simiang mawh pa yuh ka mawx cheu: tix yaox, 11 mai: paw lai yuh paox yuh pie ka kaing pa vhaik pa ang koe: bwanson: khankix, viang mawh nan: ne raw ka kix khaing: pa yuh nan:. 12 Grawh grawng: nawh ceu pa moh kix tix yuh dee glip, pie pa phaw: grawng: khankix kawx mawh ceu pa kaig pa tua heue:. 13 Grawng: pa sidawng: phimap ku ceu khawm: uik, mawh kheu pa riang, grawh grawng: nawh ku ceu sidawng: kheu pa riang heue:. 14 Mawh kheu nan: Nawh Cao: hoik ah nin:, "Kaw pa laig it eue:, siduad heue:, mai: kaoh im: khaing: krax yum, mai: Cao: Khrit tag jhan: riang ka piang maix heue:."

15 Mawh kheu nan: rien rhawm: tix ka grawh grawng: pa hu: pex, paw kieh awm: pa ang koe: pingnya, viang mawh nan: kieh awm: pa koe: pingnya, 16 mai: taoh ka bawg yam, mawh kheu singaix in khankix mawh pa caox heue:. 17 Mawh kheu nan: paw vi mawh pa daox pa aw:, viang mawh nan: kieh mawh pa chix tawng grawng: alo Simiang mawh pa yuh ka mawx heue:. 18 Mai: paw kieh yoek ka plai: rawm: plix siiet, pa nieb chix kieh luan yuh cuci:, viang mawh nan: kieh naog ka Khwan: Cao:, 19 sikah ka paox tix tix kaux lai tix kaux ka daux lox yaogyaw, mai: lox rhax lai, mai: lox rhax bwan:, mai: yuh lox pa mhawm: ka rhawm: pex ka Simiang, 20 mai: yaogyaw son ku ceu khawm: uik jheeng: jheeng: ka Keeing: Siyiex, ka daux ceukaux Simiang ex Yesux Khrit heue:. 21 Pex tix kaux lai tix kaux ot greem: paox tix ka daux ceu pa lhat ka Cao: Khrit heue:.

Daux krax ot krax koe: mex moeng

5:22-6:9 koe: daux lai Kawlawsie: 3:18-4:1

22 Moeng khankix eue:, kieh koe: krax cu krax nghiet ka mex tix, awm: koe: ka Simiang awawx. 23 Grawh grawng: nawh mex mawh kaing: piang moeng tix, awm: Cao: Khrit kawx, mawh kaing: ka piang ceucao, pa tokaux Nawh mawh cao: taoh ka tokaux heue:. 24 Viang mawh kawx nan: awm: cu nghiet ceucao ka Cao: Khrit, kieh moeng khankix koe: krax cu krax nghiet ka mex tix ka daux ku ceu heue:. 25 Mex khankix eue:, moh ka moeng tix, awm: moh Cao: Khrit ka ceucao, mai: tawx tokaux Tix son ceucao, 26 yuh ka mawx son sang kieh Nawh ceucao singax, mai: hoik sigrhah ceucao ka daux rawm: mai: ka gumlox, 27 yuh ka mawx son sang pon tawx Nawh ceucao pa koe: min: plakngai: ka tokaux Tix, pa ang koe: dee pliag dee deen, mai: ang koe: pa awm: an tix ceu kawx, mai: yuh ka mawx son sang mawh ceucao pa singax singeh pa loig heue:. 28 Awm: an mex khankix kawx khaw: tix moh ka moeng tix awm: moh ka tokaux tix heue:. Kaw pa moh ka moeng tix moh ka tokaux tix heue:. 29 Grawh grawng: nawh pui tix kaux kawx ang sax koeng ka nex nham: tokaux tix, viang mawh nan: nawh kia: ngien kah, awm: kia: ngien Cao: Khrit ka ceucao, 30 kheu mawh ex kraung pakpeung ka tokaux Nawh Cao: heue:.

32431 "Mawh kheu grawng: in simex tag prah miex keeing: tix, mai: ot tau mai: moeng tix, mai: kiex ra: kaux tag mawh nex nham: tix mu: khaing: heue:."

32 Grawng: in mawh pa kied ting raux, viang mawh nan: aux sang krai ka grawng: Cao: Khrit mai: ceucao heue:. 33 Viang mawh kawx nan: pex kaux pui mawx kaux pui an tag lai moh ka moeng tix awm: moh ka tokaux tix, mai: kieh pa mawh moeng yungyi: ka mex tix heue:.

Simin Ting 6

Grawng: been krax ot krax koe:

1 Kawn: nyawm khankix eue:, nghiet lox miex lox keeing: tix ka daux Simiang, mawh kheu in mawh pa khaw: pa caw heue:.

3252 "Yungyi: ka miex keeing: tix" (pa mawh gumlox tawm: pingnyap gum tix, tau mai: lox mukheu heue:), 3 "son sang mhawm: ka maix mai: son sang lang: ju maix ka piang haktiex heue:."

4 Mai: keeing: khankix eue:, paw yuh tix kieh kawn: pex songrhawm: viang mawh nan: eei: kix ting mai: sivied tix gau mai: sidiex ngoig nge ka kix ka daux pa khaw: mai: Simiang heue:.

5 Siliex khankix eue:, nghiet lox kix pa mawh cao: pex awm: pa khaw: mai: nex nham:, tau mai: krax lhat krax graung, ka daux pa viex rhawm: tix khawm: uik, awm: nghiet pex ka Cao: Khrit. 6 Ang mawh ceu pa yuh pa yaox ka ngai: khaing:, son sang caw rhawm: pui kah, viang mawh nan: yuh awm: siliex Cao: Khrit, pa yuh hawt alo Siyiex khaing: daux rhawm: rhi: heue:. 7 Mai: viex rhawm: pa mhawm: tix yuh kaing pa cau pa soi:, awm: pa yuh son Simiang, mai: ang awm: pa yuh son kawn: pui. 8 Mawh kheu hoik tawng pex, grawng: pui pa yuh ceu pa mhawm: ceu pa yuh ka mawx ang ah, tag sang deeh pon awm: an khaing: Simiang, viang mawh siliex ang ah, mawh pui ploi: ang ah. 9 Mai: pex pa mawh cao: khankix eue:, yuh ceu pa awm: an ka siliex khankix, mai: tik pa ah lox glhat, kheu hoik tawng pex grawng: Cao: pex mai: Cao: kix pa ot ka daux meung raoma:, ang jhak ka pakngai: pui heue:.

10 Lox pa deuk mawh nin:, kieh koe: riang rao ka daux Simiang, mai: ka daux riang rao siawp sibrawm Nawh heue:. 11 Ceep kraung naing Siyiex khawm: uik, yuh ka mawx son sang pon pex tix tieb tie ka jhawm: lhak phicaox heue:. 12 Grawh grawng: nawh pa ngah ex kah ang mawh ka nex nham:, viang mawh nan: mawh ka simiang khankix, mai: ka siawp sibrawm khankix, mai: ka simiang giex kaing: haktiex pa vhaik in khankix, mai: ka cub phicaox phicaig pa ot plak raoma: khankix heue:. 13 Mawh kheu nan: teei kraung naing Siyiex khawm: uik, yuh ka mawx son sang pon pex tix thang: kah, ka daux singaix pa caox an, mai: khaix hoik yuh khawm: uik, kawn: pon tix cung sijung: heue:. 14 Mawh kheu nan: cung heue:, khaix hoik nhawt maox rawd nyoi pa mawh, pa mawh pa meh, ka nyoi tix, mai: khaix hoik ceep kraung naing pa tie naok pa mawh pa rah pa see, 15 mai: khaix hoik ceep kiep pa mawh ceu pa hoik rien tix sidiex lox bwan: gauxrhawm: gauxrhi: pa nhim:, 16 mai: lheu: khaing: ceu in kix teei kraung naing pa tieb tie, pa mawh krax yumrhawm:, yuh ka mawx son sang pon pex tix preet ka te ngu kaw pa caox heue:. 17 Mai: teei mhok rhiem: pa mawh ceu pa taoh, mai: vaid Khwan: Cao: pa mawh gumlox Siyiex, 18 ca: rawg bwan: ku bawg ku yam, ka krax rawg krax mhaing: khawm: uik, ka daux Khwan: Cao:, pau tix jhak, mai: viex rhawm: cong: sijung: mai: rawg bwan:, son pui singax singeh khawm: uik, 19 mai: son aux, yuh ka mawx son sang tawx pa chix ah lox ka aux, ka daux pa ang: aux jheeh tix, son sang chix viex rhawm: kua: tix kieh tawng, grawng: pa raux pa mox lox bwan: gauxrhawm: gauxrhi:, 20 pa mawh aux pui pa yuh tang: kah, ka daux pa phyawk ka ceng. Rawg bwan: yuh ka mawx son sang pon aux tix viex rhawm: kua: tix sidiex lox bwan: an, awm: pa khaw: aux tix sidiex heue:.

Lox ghoik

21 Yuh ka mawx son sang pon pex tix tawng grawng: aux mai: khawm: pa yuh aux, Tukhik pa mawh puxaik pa moh, mai: pa mawh sara pa koe: sijax ka daux Simiang, tag sang kieh pex tawng ku ceu khawm: uik. 22 Mawh kheu grawng: in aux hoik ploi: nawh hu: ka pex, yuh ka mawx son sang tawng pex ka grawng: yix, mai: yuh ka mawx son sang kieh nawh pex nyawmrhawm: kah heue:.

23 Kieh pa nhim: koe: ka puxaik khankix, mai: krax moh tau mai: krax yumrhawm: pa kaoh khaing: Siyiex Keeing: Cao: mai: Simiang Yesux Khrit heue:. 24 Kieh bwanson: koe: mai: kix khawm: uik pa moh Simiang ex Yesux Khrit, ka krax moh krax rhawm: ceu pa mawh tete telai heue:. Amen.