Lai tawm------------------------------------------
Lai liang-------------------------------------------
Glawk (1)-Krax bang susaoh grawng sum sang ceucao khraox
Glawk (2)-Krax pa pheet pa dex pa dawd mai: (C.P.Ms )
Glawk (3)-Grawng (10) ceu pa shiang mai: ka piang hak tiex ku dah ku deeh
Glawk (4)-Krax grawng pa awm (10) ceu
Glawk (5)-Krax grawng (10) ceu son giex tix sipub ka taix
Glawk (6)-Gum lox pa yie chawk tix vud tix vud
Glawk (7)-Krax pa tieb pa tiecie (C.P.M)
Glawk (8)-Krax keud krax sawn: pa siet pa viet son (C.P.M)
Glawk (9)-Riang su saih piang hak tiex cie (C.P.M)
Pa kah deeh bleh gum lox dawd (@) lai ka la: pa shiang mai: bang susaoh.
Krax bang su saoh grawng sum sang ceu cao khraox kie nie lih tix koe: kheu kaing jhaw been li pa yuh ex ka piang hak tiex ku dah ku dee heue. Aux mawh pui pa riep gau daux Si Peem Tawx Buan mai: kheu cao: pa jhawp kaing kix tawx bee klawm mai: nhie aux plih tix lih plak lai Vax heue. Mawh kheu nan aux co ca: tix si toe: lih plak lai Vax son sang lih lawm phiet mai: pak peung grieang bang su saoh ceu cao khraox heue.
Son sang lih tix mawh phuk lai in aux pa mawh (Ai Mhawm: / Sieh) co ca: tix kraix khrawm mhaing krax keud krax sawn khaing pa mawh Sa ra ting Sam Rang, Sa ra Marcus Young, Sa ra Yo Siep pa tat pa ciet tix tawx lox lai ngai lai son sang khaw caw khawm uik, mai: paox grawm paox gru aux pa ot daux Si Peem Tawx Buan heue. Mawh kheu nan aux ting buan son ka kix mai: pui in khan kix mawh pa kied si daing koe: ngawh jum son sang yang tix lih phuk lai in heue.
Khaix an ting buan son ka pui pa grum naog mai: riang su saih daux cup International Mission Board pa mawh Jerry Rankin, Avery Willis mai: Don Kammerdiener, mai: pa mawh cup tang meung diang si grit si gra pa mawh Sam James, Bill Bullington mai: John White. Pui pa thung bung tix sum sang ceu cao khraox pa kham tix yuh hu: plak si voe: ngai: khan kix mawh Bill mai: Susan Smith, Curtis mai: Debie Sergeant, Gloria Carlton, David mai: Jan Watson, Kurt mai: Wendy Urbanek, Jim mai: Mary Slack, Scott mai: Janie Holste, Rodney mai Debbie Hammer, Don mai: Anne Dent, mai: Geotge mai: Sheryl Gera, Dale mai: Jane Ellen Wood .
Pui pa jah tix plih num phuk lai in mai: pui pa tawx krax keud krax sawn mai: jhi aux yaox ka daux pa cud pa cha: khan kix ting buan son mai: phan dee koe: pa lud pa loe: kawx kieh mawh bee klawm aux khawm uik liak. Dee ghoik aux keud pot jun pot ka phuk lai in tag sang lih tix mawh krax pa kaux rhawm kaux rhi mai: koe: jhawm jheeh pa mhawm son pui pa gau tix tawng grawng “KRAX BANG SU SAOH GRAWNG SUN SANG CEU CAO KHRAOX” te te te lai heue.
Lai pa si paox hu: pa shiang mai: been li khrityan hoek ku dah ku dee piang hak tiex heue. Yam jah viang mawh khaing dah dee tix blah kawx yam in hoik lih tix mawh awm ku dah ku dee heue. Pui kaing rheng kaing mheen kawx rieb tix yumrhawm: ka Simiang Yesux khrit ka piang hak tiex tom si dah heue. Khaix an ceucao tom lih tix mawh heue. Lheu khaing an kawx kix si diex gau tawx lox buan hu: piang hak tiex ku dah ku dee heue.
Pui pa deeh si toe vheuk tom khaw caw bawg yam nawh jah tix yuh kaing, pui pa ang nyang yumrhawm: koe: (7) lan ka daux dah dee tix mu:, daux an koe: ngie ceucao 3 mu: mai: pui yumrhawm: 85 kaux heue. Khaix 3num an ceucao lih tix koe: (550) mu: mai: pui pa yumrhawm: haok huan diang(55,000) kaux heue.
Sara been li Musalin Arap tix kaux ah Musalin tix mheen haoh pa ot dah dee ex in kix hoik loh tix laig ka daux been li khrityan heue.
Jah 1993num hoek 1997 si nax 3num an lih tix koe: ceucao (500) haoh kheu pui ra: mheen haoh loh tix mawh khrityan heue.
Cub caw been li khrityan, kix kham geu krax pa gut kheem cie cub kuang ca: pa giex kaing hak tiex kix. Viang mawh nan kix sau riang tix yuh kaing jhaw, yam hoek 1990 num kienie ceucao koe: (235) mu: mai: daux 1998num lih tix koe: (3200) mu heue.
Ah sara ting tix kaux yuh nin “Kix sawg tix hu: ka daux ceucao ku dah mai: koh carang pui pa yumrhawm: khraox daux 1996num. Kix pon tix koh pui 15,000 kaux, viang mawh nan kix yaox pui loh tix yumrhawm: koe: ngie 200 kaux.
Sara pa yuh kaing daux Urawpax kham mhai: sak se:. Ka daux 1998num kix mex moeng jah tix sum ceucao nyiex (15) mu:. Khaix 6khix kix yaox haok huan ceucao tom hoek30 mu: heue. Mai kix yumrhawm: tag sang baox haok huan hu: si voe heue.
Ah sara cao: pa tawx lox buan tix kaux. Ka daux meung in son sang pon ex ceucao 4mu: kix yuh kaing been 3o num viang mawh nan 9khix pa hoik luan kix hoik jah mai: ceucao 65mu:. Mawh kheu nan ka piang hak tiex ku dah kawx hoik jah tix yuh kaing bang susaoh grawng sum sang ceucao khraox heue. Bawg tix blah ex chix tix si min kaing pa yuh tix, bawg tix blah ex tawng si dawng kaing pa yuh kheu E-mail pa chix tix si toe: ka daux cag heue. Ka daux ceucao nyiex keinnie pui ceucao deeh mawh cao: pa thung heue. Kied si daing phai krax haok huan sara tix blah ang lai pon tix priex heue. Sara pa tawx been li kix gau tix tawx grawng lai si gang khri tix bawg ra: bawg khaix an kix chix tix mawh cao: kaing iak. Cao: kaing pui nyiex pui yaong kawx pon tix thung gau kheu hoik mawh pa laug Siyiex heue. Ex tawx kix cum rawm mai: tawx khang phak pa mawh phuk lai si gang khri tix kaux tix mu: heue.
Khaix hoik tawx kix krax cum rawm ka pui pa yum rhawm khraox ang kix lai pon jhawp pon priex pon giex ka cup pui an kix kheu kix kied si daing su saoh haok huan heue. Kix guah tix hu: daux meung ku dah mai: gau lai Si gang khri dah dee hoek kix ku dah heue. Khaix an kix mhong lox si tang cup kix sun ceu cao khraox miex ding mawx. Ex yaox grawng ceu in mawh krax pa kied si daing daox am son ex. Kaing in ang tie mawh ex pa jah mai: ang ex lai pon tix tiep tie ka pa haok huan cie kix.
Jah 1993 hoek 1997 ka daux pon num pui riep- tix yum rhawm ka Ye Sux khrit koe: ra: mheen haoh heue. Mawh kheu nan kawx ex yaox ceu cao pa khraox been (500) haoh.
Sa ra cao pa tawx lox buan tom nie kix si pup ka krax pa haok huan rhawm rhi mai: krax pa daox deng khawm ra: ceu. Tom nie ang kix sax yaox ka bang su saoh awm plak piang nawx. Krax pa riep pui tix yum rhawm ka Ye Sux khrit mawh rieang su saih cie sa ra cao tawx lox buan kix heue. Ka daux sok rhawm sa ra cao tawx lox buan kix caw tix koe krax keud kheu pui kaing rheng tom nie kix krox jun pot ka lox si tang gaux rhawm gaux rhi mai: krax pa kix tag riep tix yum rhawm heue.
Mawh kheu nan bawk voe: krax bang su saoh grawng sum sang ceu cao khraox mawh pa tix? Pa chix kieh rhawm rhi ex yung yaing mai: krax pa daox pa am ceu in kix mawh yuh ka mawx? Krax bang su saoh in lih tix koe: dah dee priex klawng mawx? Kheu pa tix ceu pa daox pa am in khraox lih tix hoek bawk yam in. Ceu in mawh been pa khraox lie? Phan ang mawh nan mawh ceu pa yie mawh lie? Kheu pa tix nawh lih tix koe:? Son sang joh jhaong ex ceu in ex caw tix yuh pa tix lie?
Cup sa ra cao tawx lox buan kix mai cao pa jhawp kaing kix sawk krax pawk son krax bang su saoh grawng sum sang ceu cao khraox kheu kix nu tix tawng krax been krax hu: grawng an kix heue. Phan kix sawk te te kix tak yaox tete. Kheu krax grum naog gum lox pa chawk kix mai: lox pawk pa sawk kix phuk lai in tom lih tix koe: heue.
Son sang plak plih ex ceu in kix ex caw tix chawk ka sa ra cao pa tawx lox buan kix tix blah. Ex chawk ka pui pa cox khre daux krax (Strategy coordinators) mai: pui tang kaux kix heue. Ex teei tix priex pa kix hoik si pup mai grawng pa kix yaox khawm uik. Khaix an son sang lih tix mawh phuk lai ting ex lo tix kraix khrawm heue. Ex ghaok tix kok ka pui ceu pui cat ku plak ku van son sang kix tawx krax keud krax sawn mai plak plih krax pa cud cha: ka piang phuk lai ting in heue. Kheu jao cup pui an kix ex sawk sied tixyaox jauh saw pa ting ceu daux bang su saoh in heue. Aux pa mawh cao: pa si toe lox lai in ah ting buan son ka cup pui pa tawx krax keud krax sawn mai pa teem tix lih ka lai in heue.
Krax bak een ex ka phuk lai in mawh (1) Ex plak plih tix yaox dee bleh krax bang su saoh grawng sum sang ceu cao khraox (2) Ex sawk sied tix tawng pak peung krax grawng pa lih tix koe: piang hak tiex ku dah kudee (3) Ex sawk sied tix jiang pa tiep tie ka bang su saoh grawng sum sang ceu cao khraox (4) Ex caw tix bih kah tix yaox son sang tawng ex krax grawng vieh vieh va va (5) Son sang lih tix mawh bang su saoh in ex caw tix joh jhaong tawx riang rao ka daux si pup ka taix yaox ka ngai (6) Ex caw tix koe: gum lox pa pawk ka pui pa yie chawk ka ex heue.
Ceu pa mawh pa meh, pak peung phex tiem kix kawx ex pon tix khrawm piang hak tiex ku dah. Ka daux meung tix blah ex pon tix sidiex tawx lox buan gaux rhawm gaux rhi ka daux krax laik luan yi yien heue. Ka daux meung tix blah kix tiep tie ka been li khrit yan. Kix tuk tiak tuk te ka pui khrit yan. Grawng kuceu khawm uik ex tiem tix een daux lai in heue. Ka daux lai in ang tie mawh pa ex plak jhi pui yaox pak peung pa si mie ex tix plak plih. Mai ang tie mawh ex yum son sang khaw caw krax ot been koe: son sang lai in lih. Grawng ceu pa viex ka daux lai in khawm uik mawh pa hoik si pup ex tix gau nong nong heue. Ex een beem si gud gang son bang susaoh in khaix hoik shiao ex tix ciet cang ka grawng pa shiang mai nawh mhawm mhawm heue.
Aux rawk buan phuk lai in mawh pa mhawm tix shiao son sa ra cao tawx lox buan mai paox grawm paox gru pa yuh kaing jhaw si yiex heue. Krax bak een pa ting mawh son sang pui ku kaux yuh kaing jhaw been li Si yiex mai: son sang tawng kix tix yaox khaix taix pa yuh Si yiex piang hak tiex in ku dah heue. Si yiex hoik plak plih ex pui ceu khawm uik yaox ka “KRAX BANG SU SAOH GRAWNG SUM SANG CEU CAO KHTAOX”heue.
Daux 1998 num, pa mawh “cub caw cao: kaing tang meung” pa ot daux cub caw ting “NUM BEEN LI KU HAK TIEX” kix plak jhi tix tang pa mawh “pui pa grai ka daux khuan son sang deeh pon kix krax taoh pa shiang mai: krax yumrhawm: ka daux Yesux khrit, ex tag jah tix sum van: to kaux krax bang susaoh grawng sum sang: ceucao khraox ka daux ku ceu cad” heue. Lai krax pao: riang su saih: in jhi daux krax ka pui pa klawm kaing pa mawh sara ting (I.M.B) pa ot ka daux meung (150) ku meung piang hak tiex in heue.
Mawh kheu nan, awm ka daux lai pao: an ah “krax bang susaoh grawng sum sang: ceucao khraox mawh pa tix?” Phan ex krai dee bleeh si dawng mai: yie yie kienie can ceu pa mawh ceucao nyiex yaong ku dah dee pa mawh ceu cad mawx ceu cad an, ka daux ku ceu cad tang mawx tang an, grawng krax sum sang: pre haok huan daux ceucao khraox mai: krax pa teei riang rao ting lhaong mai: caw tix mawh daux pak peung kha nan: ghaok sawn: pre lhaong heue.
Ka daux pa kah dee bleeh in hoik viex jauh saw pa ting ceu heue. Jauh saw nam bad tix mawh grawng krax pa teei riang ting lhaong heue. Krax bang susaoh ceucao khraox kienie ex yaox haok huan ka daux krax pa teei riang rao ting lhaong awm krax susaoh tang ceu heue. Ceucao khraox kawx jah tix pre haok huan ka daux bawg yam kied si daing phai: heue. Ceucao khraox pa sum ka daux num been kao: num @ daux num been yieh kawx si daing mhawm heue. Viang mawh nan ang tie lih pak peung bang susaoh. Mawh kheu nan ang chix tix kok grawng bang susaoh heue.
Jauh saw nam bad ra: kienie krax pa haok huan ang mawh ka daux yoyo. Haok huan ka daux pak peung lai sawn:: pre lhaong heue.(2x2=4)(4x4=16). Awm pa ah ex ceucao ra: mu: hoek pon: mu: mai: pon: mu: hoek kao: liah mu: heue. Awm pak peung kha nan: ghaok sawn: in, cub sara pa yuh kaing been li, cub pui pa cheung tix sum sang: ceucao kawx ang chix tux yuh. Bawg yam sum kix ceucao khraox pa mawh to kaux ceucao ex tag yaox haok huan ka daux pak peung kha nan: ghaok sawn: heue.
Dee ghoik kienie pa mawh ceucao nyiex yaong caw tix sum ceucao son nyiex yaong heue. Dee bleeh kienie riang pa susaoh caw tix loh khaing pui plak daux heue. Ang chix tix yuh, sum mai riang rao pa kaoh khaing plak praix heue. Ang ex nieb tix krai lox buan gaux rhawm gaux rhi caw tix jah khaing pui plak daux. Lox buan kienie yie hoek khaing tang meung ka daux cub caw pui ceu tix ceu, yie viex cub caw sara been li kix hoek heue. Viang mawh kawx nan phan ex jah krax bang susaoh grawng sum sang: ceucao khraox dom mawx dom an caw tix lih pak peung pui ceu heue. Bawg yam jah mai: krax pa yuh khawm uik mawh pui plak daux heue. Ang tie mawh pui plak praix hoek tix susaoh.
Krax pa pawk kah ex dee bleeh in si dawng son maix lie? phan ang si dawng ang kub krai pex mhong grawng pa ang mawh bang susaoh. Grawh grawng “Ceucao khan kix jah tix tawx lox buan gaux rhawm gaux rhi” ang mawh krax pa susaoh. Grawng pa tawx lox buan gaux rhawm gaux rhi mawh ngie tix piak tix phex son bang sum sang: ceucao khraox. Ang chix tix mawh ting ting lhaong lhaong vieh vieh va:va:. Pui pa lih khaing krax gau sum sang: ceucao khraox kix caw tix koe: krax bak een son sang kix sum ceucao tix dah ra: dah. Pon: phuan dah kawx chix tix mawh. Pa mawh ceucao cub caw ceu pui khawm uik @ ka daux meung khawm uik ang kix nyang yaox riang su saih son krax bang susaoh grawng sum sang: ceucao khraox. Krax keud pot jun pot kawx ang nyang koe:.
Dee bleeh krax bang susaoh ting pa sum: ceucao khraox kienie pui ceucao daux ku ceucad lo tix kieh pui ceucao tix nie lheu haoh hun daux pui ceu tix, daux mee hak tiex tix, daux krax pa haok huan awm khanan ghaok gap heue.
Krax bang susaoh grawng sum sang: ceucao khraox kienie ang tie mawh ceu pa so: kaoh tix ceu ngie. Lheu khaing ceu pa so: kaoh. In si ngaix ka daux ceucao kied si daing koe: alo ka grawng si plaoh so: kaoh. Viang mawh nan ang nyiang mawh krax sum sang ceucao khraox. Krax pa si diex gau grawng lox buan gaux rhawm gaux rhi mai: pa kham mhai sak se: kix mawh krax pa kied si daing gaux rhawm kheu cub pui haoh hun: kaing rheng: yumrhawm: rieb ka Yesux khrit. Viang mawh nan ang awm mai: grawng sum sang: ceucao khrox. Phan mawh grawng sum sang: ceucao khraox kienie mawh ceucao khraox pre tix haok huan daux bawg yam pa phai khaing daux ceucao prim heue.
Ex jhak kaing pa dex pa dawd mai: bang susaoh grawng sum sang: ceucao khraox. Ex sawg pui pa sum sang: ceucao khraox pa mawh ceu cad pui ceu ka daux shiien daux vi mai: tawx krax gau ka kix heue. Khaix an ploi kix yuh mai: guah tix tawx beeh glawm dah dee ka kix son kix sum: ceucao khraox ka daux pui ceu pui cad kix heue. Grawh grawng pa lih tix koe: ceucao khraox ka daux pui ceu tix ceu, daux dah dee tix mu: mawh krax grawng pa kied si daing mhawm heue. Viang mawh nan krax kaing jhaw pa teei riang rao haok huan kienie koe: ngie ka daux tawm taix pui pa sum ceucao khraox. Krax pa teei riang rao ting lhaong phan ang nyiang laig ot ka daux sok rhawm kawn:pui ceucao @ ka daux ceucao khawm uik khawm mu: ang nyiang chix tix mawh bang susaoh heue.
Phan ex plak tix yaox bawg ghoik kienie krax bang susaoh in ang nyiang hoek ka cuik krax bak een ex. Dee cuik dee ghoik kaing jhaw pa ex yuh kieh mawh son si dawng min plak ngai: Siyiex mai: ceu kaux Siyiex nong nong heue. Awm pui tix kaux bawg yam nawh si toe: yuh paox pie mai: Simiang Siyiex kheu Yesux khrit ceu in khan kix tag sang lih heue. Awm an pui pa hoik khaw ka daux krax grawng lih tix mawh pak peung pui cub pui caw ka daux ceucao, bawg yam an tag si duad mai: im ju tau ka daux buan son Siyiex heue. Kraix khrawm mai: pui pa khaw rhawm ka daux kaing jhaw. Ku bawg ex pon tix mhong ju pa khraox ka daux Yesux khrit min plak ngai: Siyiex tag sang si dawng heue. Ku bawg yam sum ex ceucao khraox ang ex guah pui mawx pa sum ceucao khraox an caw tix yaog yaw buan son siyiex heue.
Mawh kheu nan kheu pa tix ex tag krai lao ceu pa blon mhawm ka grawng sum sang: ceucao khraox lie? Pui pa hoik grai ka daux khuan tom nie caw tix pon ju pa khraox ka daux Yesux khrit mai: kieh min plak ngai: Siyiex mai: ceu kaux Siyiex si dawng ka daux ju kix. Caw kix tix hoek ka daux pui cub pui caw paox plawk paox nyhawm: pa kaux cong ka daux krax yumrhawm: heue.
Viang mawh nan krax bang susaoh grawng sum sang: ceucao khraox kienie ang joeng mawh son sang pre hun ceucao nong nong. Krax pre hun ceucao kienie mawh pa kied si daing mhawm. Viang mawh nan riang su saih krax sum sang ceucao khraox son sang mawh krax susaoh ting pa mawh sara cao: giex been li mai: cub caw pa teei beeh glawm: tix sum ceucao khraox kix caw tix laig si nyek si nyek ka daux ceucao. Awm pa koe: been pa khaw pa caw ka daux ceucao ex caw tix sawg mai: priex ka pui pa grai ka daux khuan heue. Ceucao khraox kawx caw tix pre haok huan heue.
Dee chawk cheu tix yaox jauh saw pa ting ceu sa ra cao: tawx been li mawh pa kied cheung ka sum tix ceucao khraox. Viang mawh nan koe: krax tat mee: pa si min ka daux kix heue. Ceucao pa keh tix tawx pa mawh pui pa tag sang sum ceucao khraox nie lheu khaing heue. Awm plak ceucao kawx chix tix ploi pui hun. Phan ex viex khawm ceucao, pui ceucao khawm nyiex khawm yaong tag lih tix mawh pak peung pui hun glux ka daux bang susaoh grawng sum sang: ceucao khraox. Ang chix via ka ceucao pa ang chix tix si min tag sang lih bleeh te te heue.
Son sang pon ex tix tawng si dawng lhaing lhaing grawng sum sang: ceucao khraox ex cied ciang ka kaing jhaw tix blah awawx. Khaix an ex pheet gau, mai: cih , plih tix jhak daux pa dex pa dawd heue.
Sara cao: viex lox buan been li daux cub NUM KAING PA TAWX BEEN LI KU MEUNG, kix hoik viex mai yuh ka daux kaing tix blah pa mawh krax bang susaoh grawng sum sang: ceucao khraox daux bawg yam in heue. Chix tix ah hoik yuh ka piang hak tiex ku dah ku dee. Ka daux krax susaoh in viang mawh krax sau riang cu ca: sara cao: viex lox buan been li daux cub ex , tix mu: mai: tix mu: tix dah mai: tix dah ang ot tau.
Viang koe: krax tang siyox awm in kawx, krax pa si du kaing jhaw ku ceu daux (C.P.M) kawx koe:. Sara cao: viex lox buan been li tix blah pa mawh (I.M.B), kix laig lih klu klao: mai: cub (C.P.M). Sara tix blah kix thung bung daux bawg yam jah tix yuh bang susaoh. Awm plak greem pak peung pa ex tiag, ka daux hak tiex cao: ot ex kawx koe: krax pa caw tix chix yaung tix teei son sang yuh kaing jhaw.
Awm meung lied tin American tang dah pui pa ot ka daux meung in (ang sang krai ceu kaux meung), kix mawh cub pui Urawpax, pui Hisapin nit mai: pui pa kaoh khaing Afarika heue. Ka daux meung in kheu kix shiao been kuang ca: hak tiex tom yieh num ang koe: krax haok huan daux lai geu. Iak a khwang son pui meung. iang meung kix hot si bhawm kawx kix koe: pui pa chix cu yi ping nya nie lheu khaing tang meung. Pui pa chix lai koe: (90 %) haoh daux meung heue.
Awm been pa hoik toek ka daux pui sin: pui meung kix koe: phuan son ka daux been li Ro ma ka to lit. Ka daux meung kawx jah tom hoek (25) num, simiangkuang ca: meung hak tiex khan kix giex kuang ka daux been li krub pui. Ka daux1991 num, cub pui simiangkuang ca: hak tiex kix, yawm mai: ploi tix tawx pa giex kuang kix mai: jah tix ploi daux krax lai geu, hu: si voe: kawx ploi ka been li krub heue. Deeh ghoik ang kix tawx pa laig luan ka daux been li krub kawx krax ot krax koe: nie lheu mhawm khaing prim heue.
Bawg yam pa hoik luan (100) num, ka daux meung an pa mawh cub (Southern Baptist) “Cub cum rawm: plak seh” kix jah tix yuh kaing been li heue. Ka daux bawg yam pa hoik luan (75) num, pa mawh sara cao: tawx been li khan kix, sum ceucao khraox, keh tix tawh cao: thung bung mai: pang: tix tawx num li cum rawm:, kix koe: kawn:nyawm ceucao been (3000) loe: rheng heue. Khaix an cub caw lien kuang ca: kix priex tix giex hak tiex mai kix teei sara cao: tawx been li kix khawm uik sau daux thawng , khaix an tawx dam ka thaong kix khaing meung heue. Kawn:nyawm ceucao khan kix yawm tix hu: been tix plak, lheu khaing an cao: thung bung daux ceucao kawx grai tix hu: tom nie heue. Khaix hoik an, kix ghlat ka ceucao tag veh ceucao khaing meung heue. Ex yaox krax tugtiag tugte, pa sau daux thawng: mai: yuh krax pa kha rhawm khan kix heue. Viang mawh nan kawn:nyawm ceucao kix haok huan ting lhaong si nyek si nyek ka daux bawg yam krax pa nu pa cien khawp heue.
Mawh kheu jao cu ca: sau riang cub caw Amerikan mai: cub caw cum rawm plak seh kix ka daux meung an lih tix mawh ra: cub pa mawh num li plak blaong mai: num li plak seh. Viang kix mawh ra: cub kawx, daux 1990 num kix khawm ra: cub viex ka daux krax bang susaoh grawng sum sang: ceucao khraox heue.
Daux 1989num, ka daux num li plak blaong kix koe: been (5800)kaux. Ka daux num an, lih tix mawh krax susaoh mai: kawn:ceucao haok huan 5.3% tom hoek 6.9% heue. Daux 1990num, ka daux num li plak blaong, kawn:ceucao kix haok huan 5,800 tom hoek 14,000 heue. Ka daux bawg yam an krax haok huan ceucao koe: 100 tom hoek 1,300 mu: heue. Ka daux bawg yam in pui pa viex ka daux ceucao lhaing lhaing koe: 38,000 kaux mai: kix pau son sang kix cum rawm: heue.
Awm an daux num li plak seh kawx lih tix mawh heue. Daux 1989 kix koe: ceucao 129mu:mai: koe: kawn:ceucao been 7,000 kaux. Ka daux num an kix cum rawm: 533 kaux lih tix mawh krax susaoh heue. Daux 1998num, kawn:ceucao koe:16,000 kaux tiangcum rawm: koe: been 2000 kaux heue. Ka daux bawg yam glang an ceucao haok huan 129 tom hoek 1918 mai: ka daux num been kao: num haok huan 1387% heue.
Ka daux meung A me ri kan, ex yaox sak se: jauh saw pa yuh kaing jhaw daux cub (C.P.M) heue. Cub sara tawx been li tang meung kawx yuh ka daux been simu sima ting heue. Yam jah kix roi ruat gum lox buan gaux rhawm gaux rhi. Bawg yam lih ceucao khraox, kix deeh sum awm pa khaw mai: lai si gang khri. Kix ah pui pa yumrhawm: ku kaux caw tix mawh cao: giex been li. Kix shiao awm sikut gang pa mawh pui ku kaux caw tix viex daux kaing jhaw Siyiex. Viang mawh nan bawg yam cub kuang ca: pa giex kaing hak tiex kix ghreu, thaong: cub sara cao: pa tawx been li khaing meung, ang been li khrityan lai mhawm krax ot krax koe:. Ex si mie tix yaox tag sang grai hu: lie? Phan ang mawh nan ex teei pak peung ceucao pui ceu lie? Khaix num pa hoik luan ceu an, ka daux meung an lih tix mawh ceucao pui ceu kheu meung an dud krax si toe: vheuk mai: cub sara cao: tawx been li heue. Mawh kheu nan ciem num son joh jhaong ka sara ceucao kix heue.
Awm an bawg yam kix tang ot nong nong cub caw sara cao: tawx been li kix pao: lox buan plak lox (Sa peng) ceu pa moh pui sin pui yaong ka daux cag bhaong. Cub caw sara cao: tawx been li mai: cao: nyiex pui khrityan pa hoek tang meung kix khrawm paox tix sum pa mawh cub caw krax rawg buan ting mai: yuh grawng krax rawg buan son pui khrityan mai: pui pa ang nyang yumrhawm: khan kix heue.
Daux 1980 num kix deeh pon tix si toe: vheuk mai: cub sara cao: tawx been li (I.M.B) mai: kix yaox sum sang: mai: cub caw pa cum rawm: ka daux krax yumrhawm:. Ka daux bawg yam in kawx sara cao: tawx been li kix deeh shiao mai: yuh kaing daux pak peung simu sima ting heue. Kix baox deeh kieh laig ju ka daux bang susaoh kix mai: krax rawg buan heue. Kix plak plih ka kawn:cau pa mhawm khan kix. Kix yuh grawh grawng krax ghaok min cao: kaing, krax kum:kawng: deeh yuh kaing cub tawx lox buan (Evenji list), mai: ceucao ((CELLS)) pa kraix khrawm tix rawg buan awm nyiex ma: heue. Kieh grai hu: ceu pa yeung pa veei rhawm ka meung tang dah, lheu khaing an kix yuh sa tix son krax bang susaoh kix ang mawh krax pa moh son pui tang meung heue.
Lheu khaing an sak se: tang dah mai: roi taix deeh yuh kix kawx kawn:koe:. Yam jah bee ma:, kheu kix een ting krax grawng ka krax gau lai si gang khri mai: krax krub krai vai sa ka daux pui khrityan kawx hoik kaux cong ceu in kix heue. Kheu kix chix tiem chix phat ka lig lai mhai ce: lai si gang khri mawh rong deuh rhawm son plak ju khuan pa im son kix heue.
Krax rawg buan kawx viex ka daux pa ting glawg ting ceu. Ka daux bang susaoh in pui khrityan cum rawm: kix kok tix kaux lai tix kaux mawh “Pui pa gru ngawng mai: im ju”. Kix kiex susaoh krax pa im ju kix ka daux krax rawg buan ting mai: krax krub krai vai sa heue.
Pui khrityan im kix kied si daing koe: riang rao ka daux krax yaog yaw ka Siyiex. Ka daux krax krub krai vai sa kawx kied griang pruih mai: lai rhax ting mai: lai rhax yaog yaw heue. Cao: kaing tix kaux daux ceucao tix mu: niep tix yaog yaw ka grawng lai rhax yaog yaw awm in “mawh krax kru naing plak khuan ju pui hak tiex pa ang nyang yumrhawm:” heue.
Ka daux 1992num, lih tix hoek grawng pa kok si lah pa khraox kheu krax hot si bhawm plak lai geu ka daux meung an heue. Son sang pon cub pui khrityan krub krai vai sa ka Siyiex kied si daing nu awm kix sang hu: rawg buan daux nyiex buan pa dex pa dawd kawx lih tix mawh krax pa nu cien son kix. Grawng krax bang susai cie kix kawx deeh lih tix mawh krax pa khawp pa nu baox tix bawg heue. Krax yumrhawm: tag sang laux kheu ang ex pon hu: daux nyiex rawg buan lie? Phan ang mawh nan ex sawg krax doh lih son pa mawh grawng pa kok si lah pa khraox lie? Cub caw khrityan cum rawm:, awm sawg kix krax doh lih pa mawh grawng pa kok si lah pa khraox, ex yaox krax haok huan phai hoek kheu kix yuh krax krubka daux pa dex pa dawd mai: paox plawk paox nyhawm: heue. Bawg yam an, kix plak plih awm sikut gang sa mu: sa ma: ting kix sum ceucao ((CELLS)) pa kraix khrawm tix rawg buan awm nyiex ma: ka cub sara cao: tawx been li kix heue. Been an kawx hoik shiao pui ka piang hak tiex ku dah ku deeh. Daux1992-93 khix jah, kix jah tix sum sang: ceucao nyiex ((CELLS))(237) mu: daux cub caw plak blaong heue.
Kheu krax laux leue: mai: pa meung hak tiex ang yien yawg, ka daux meung an sipub mai: grawng krax pa khraox mai: pa jhi thung pa khraox. Ex caw tix tawx lox buan gaux rhawm gaux rhi ka pui sin pui meung pa hoik laux krax ot krax koe: ka daux krax pa nu pa khawp heue. Kheu daux paox plawk paox nyhawm kix hoek bawg yam dah rhawm rhi mai: singai khaing krax keut pot jun pot heue.
Ka daux bawg yam plu plaoh, cao: kaing cub caw cum rawm kix eue: liang rhawm rhi pa tawx lox buan been li ka yung pa mawh sara cao: gau khraox kix hu: tawx lox buan daux meung ku dah dee heue. Pui ceucao yoyo kix sau rhawm rhi riang rao mai: deeh plak plih rhawm kix heue Daux 1990num, ka daux cub caw num plak blaong: kix paoh nyiex cawng lox buan been li. Kix bak een son pui ceucao yoyo, son been tix num heue. Daux 1998num, pui cheung koe: (110)kaux, pui pa laig carang koe: (40)kaux. Ka daux cub num plak blaong mai: plak seh khawm ra: meung kix pon tix keh lih cao: tawx lox buan tang to: meung (800)kaux. Ka daux ra: num pa hoik luan cao: kaing num plak blaong kix deeh pawk lox ah nin “ka daux meung ku dah pui pa yumrhawm: kaing yieh kix hoik kham tix rieb krax pa laug tix teei son kaing tawx lox buan been li”. Krax bang susaoh grawng sum sang: ceucao khraox daux meung in, lih tix si pre daux tang meung Lied tin Ame ri kan, lheu khaing an ka piang hak tie ku dah ku deeh kawx hoik tawng ka grawng in khan kix heue.
Viang Simiang Siyiex yuh kaing pa ting lhaong ka daux meung Lied ting Ame ri kan kawx lih tix koe: sivix pa laux pa yieh mai: pa ghoing pa voi ka piang bang susaoh kix heue. Awm ka daux lai pao: deeh ghoik, ka daux ceucao num plak blaong pui (38,000) kaux kix ang nyang pon cum rawm. Ka daux krax gau cum rawm kawx kawn:nyawm sang gau lai been (18,00)kaux kix hoik tawx carang son kix gau heue. Kheu pa tix kix nhim koi: son tawx kix krax cum rawm lie?. Cao: kaing been li kix tix kaux yieh ex mhong yuh nin. “Ka daux meung ex ka ang cub sara cao: tawx been li kix lih hu: khaing meung cub pui ceucao meung Ame ri kan kix tan lu: tix deuh bang nyiex (6) liah mu:. 20 num pa hoik luan dix ka daux ceucao ex tix mu: lih tix mawh krax thung thiang kheu shiang mai: sikut gang ceu pui khrityan. Bawg yam an guah cub caw mai: nyiex buan kawx tang viex kix hu: heue. Jah tom yam an, cub pui pa kaoh khaing plak praix ang ex koe: rhawm tix riex son sang mawh kawn:ceucao ku bawg yam. Kheu kix khi rhawm lhat tix teei ka bang nyiex pa deuk” awm in nawh plih ex yaox heue.
1. Kheu kix plak plih pak peung ceucao nyiex, lih tix koe: buan son pa ting krax im ju:, krax susaoh, mai: ka daux haok huan. Ka daux ceucao baux in awm pa koe: been pa tat pa daing ka prauk deeh ot pui kawx ex pon krax pa laig luan son sang pao: lox buan pa mhawm heue.
2. Cao: kaing num been li kix kawx tawx riang rao ka cub pa susaoh ceucao nyiex, jhi daux krax mai: thung kix hoek. Viang krax jhawp kuang pa giex kaing kix iak riang hu: kawx kix khaw rhawm ka daux pa haok huan heue.
3. Kheu krax tugtiag tugte cub pui pa ang rhuat khaix Yesux khrit kix grai hu: heue. Daux bawg yam tix mu: awm pa yumrhawm: cub caw cum rawm kix pa mawh “pui pa yumrhawm: ku kaux caw tix mawh cao: giex been li” kheu grawng an ang ceucao kix yaox krax laux krax leeing. Ceucao pa kuang jhawp mai: si awp si brawm tang dah grai hu: kheu pa gutyeen kix heue.
4. Cub sara cao: tawx been li (I.M.B) kix viex ka daux glawk krax thung bung pa mawh krax tawx lox buan been li heue. Kix tawx riang rao: ka riang su saih (C.P.M). Ang joeng mawh ngie sum kix tix tawx ceucao nyiex, ang kix tawx riang rao son teei kix krax teem mau khri khaing meung tang dah heue.
5. Kix tawx krax gau mai: guah tix tawx kaing yuh kix ka sara cao: tawx been li daux kawn:ceucao heue. Krax grawng mawh jauh saw pa ting ceu son sang pre hu: krax bang susaoh ka daux maung kix ku dah ku deeh heue.
********************************************
Bawg yam jah daux 1990num, lix tix mawh grawng kru naing tieh feen pui ceu ka daux hak tiex meung hawx. Bawg yam haok huan krax lai geu kienie lih tix koe: krax tang siyox pa ting si nax ceu pui pa mak mi: mai: ceu pui pa hot shia heue. Ceu pui khan kix dux pan tix ot ka daux veng ting kheu lai geu pa yuh kix, kix prung prang roi ruat ka daux nyiex ma: kix mai: ka daux krax been li yung yi kix heue. Pui sin pui meung kix pau jun ka sikut gang MAO SI TONG: heue. Been krax rom cao kaing rom tix yuh kaing kawx hoik kaux riah been (40) num heue.
Khaix hoik pre tix va: krax keud krax teei pa khraox, been teei been shiao pa khraox daux meung ku dah, awm koe: pui meung kix rieb ka daux riang rao pa gaux rhawm rhi pui pa ang chix tix rieb ka daux pa lud keud kawx koe heue. Lih tix mawh kru naing mai: cub pa kuang ca: hak tiex ka daux (Tiananmen Square-1989) kheu lih tix koe: bang susaoh cub caw kawn:nyawm cawng Di-mo-ga-re-si.
Viang cub caw kawn:nyawm pa haok rhawm kix hoek ka daux krax pa laux rhawm son cox grawng been meung hak tiex, son plak si voe ngai kawx kawn:grux koe: krax keut pot jun pot heue.
Ka daux bawg yam krax grawng in Cub caw num pa tawx been li ku meung kix ap beeh glawm: ka cao: pa toe: vheuk ka daux simu sima tix kaux daux 1991 num mai: ploi hu: ka daux meung hawx seung “yang shing” heue. Pui an pon a khuang tix gau pheet ka lox hawx mai: been li yung yi cie hawx daux tix num, khaix an nawh cied chawk kriem kriem grawng hak tiex seung yang shing heue. Ka daux hak tiex dee an koe: pui (7) lan mai: koe: num pui ceu (5) ceu. Tix blah ot daux veng, tix blah ot daux yaong piang gawng lua heue. Nawh yuh carang glawk dee yie ot pui sin pui meung kix, mai: nawh jah tix yuh kaing tawx lox buan been li ka dah dee pa ting ceu heue. Viang kix jah ka daux pak peung pa ang khaw kawx pui pa toe: vheuk an cu ca: tix plih ceucao pui ceu ka daux pa kied krox dee raux heue.
Nawh koh ca rang glawk yam jah mai: yaox ceucao nyiex loe: nyiex. Pui ceu “Han” pa mawh hawx pui khrit kix koe: (85) kaux heue. Kawn:pui ceucao kix ang joeng mawh pui riex ju, plak haok huan kawx ang koe: dah rau, ka daux num been tom miex nyao. Ang koe: riang su saih mai: ang koe: krax pa sang mhawm toek hoek heue. Ka daux baux 4, num kheu buan son Siyiex pui pa deeh toe: vheuk an pon tix tawx lox buan been li ka num pui ceu, ceu mawx ceu an heue. Kieh: num:riah koe mai: si pre va: tix hu: daux hak tiex Yang shing ku dah heue.
Kix yaox krax pa tieb pa tie pa ting daux been li yung yi mai: lox si kah krai lao. Kheu ceu an kix, tieb tie awm rang vie pa ting si nax pui ceu yang shing. Mawh kheu nan nawh kraix khrawm khrityan hawx pa yuh kaing jhaw Siyiex ka daux A Shia mai: yuh lih bang susaoh tix ceu heue. Khaix an nawh yuh paox pie been li mai: pui ceu hawx pa sum sang ceucao khraox, nawh tawx pui pa yumrhawm: kix laig viex ka daux an heue. Ka daux bawg yam tix vud cub caw ankix pon tix sum ceucao (6) mu: daux 1994num, mai: kix deeh thie (17) mu: baox tix num. Phao khaix baox (50)mu:, daux 1997kienie si nax loe: num an ceucao khawm uik mawh (195) mu: heue. Mai: si pre vieh va: ka daux seung an khawm uik heue. Ka daux num pui ceu phuan ceu an kawx tang lih tix mawh ceucao mawx ceucao an heue.
Ka daux bawg yam in pui pa toe: vheuk been li nawh yaox phan nawh lih khaing kaing yuh kawx krax haok huan bang susaoh ang chix laux. Khaix tix num an krax bang pa susaoh in haok huan been loe: son mai: lih tix mawh ceucao (550) mu: mai: kawn:pui ceucao koe: (55,000) kaux heue.
Bawg yam pui pa toe: vheuk lih ing khaing yang shing daux 1997num kix pon tix plak plih jauh saw pa ting ceu kheu grawh grawng pa chix phai lih bang susaoh grawng sum sang ceucao khraox. Kheu pa pon plak plih kix ex khawm uik yaox buan son . Kheu nan ex tag krai pex mhong dawd dawd daux in.
Awm kaing jhaw been li tang dah ka daux been li yang shing kawx sau riang tix sum ka daux pa teei riang rao rawg buan si voe ang nyang bax jah kaing jhaw heue. Kheu kix tawng ngawh jum krax rawg buan, krax rawg buan kienie lih tix mawh (D.N.A) pa blon ting ceu ka daux bang susaoh grawng sum sang: ceucao khraox heue. Ceucao yam jah bee ma: kawx jah tix tawx been li awm in heue.
Plak krax gau tix tawx mai: plak krax sum sang cub caw kawx mawh jauh saw pa ting ceu khaix an nawh mawh num:riah son sang jah kaing jhaw mai: son sang haok huan tix bluh taix neh heue. Lheu khaing an kix shiao krax lhak haing ping nya pa mawh “krax cied lih deeh pawk gaih” (Response Filtering) heue. Pa ah ex “Krax cied lih deeh pawk gaih” kienie sang mawh shiao son ceu pa tawx been li ku ceu ka daux dah dee pa ting ceu heue. Kieh been li si tang mhawm hoek ka ku kaux mai: jah ka (Vidio) riang im, cag bhaung, mai: lai rhuat giex heue. Khaix an sara cao: tawx lox buan pau ka “bang pa deeh pawk gaih” (Feed back Loop) ka daux cub caw pui.. Yam cied plih kix ka pui kix yaox pui pa deeh pawk mai: rieb ka si tang lox buan pa mhawm: heue. Awm: an kix sawg tix plah ka cub caw pui pa iak heue. Awm pak peung an kix yaox pa si toe: taing krax pa rhuat si mie lox buan si tang pa mhawm mai: grawng krax tuk bluh rub kax khaing daux rawm. Kix kraix khrawm pui pa viex rhawm mai: kix jah tix sum ceucao khraox ka grawh grawng pa gau lai si gang khri.
Ex pheet gau grawh grawng krax gau mai: pan cub caw. Pui pa deeh toe: vheuk kienie jah mai: pui iak cub pa mawh pui pa kaux cong daux krax yumrhawm:. Kix tawx awm krax gau naing ka kawn:cau mau soi. Khaix an kix gau tix tawx num:riah been krax grawng pa shiang mai: krax pa sum sang: ceucao khraox. Sara cao: tawx been li krai ka been krax grawng in mawh (P.O.U.C.H) heue.(P.O.U.C.H) mawh gum lox ngai lai tix mu heue.
P= Participative mawh pa klu klao, grawng krax gau lai si gang khri mai: krax yaog yaw ka daux krax krubheue. Pui pa hoek awm pak peung ceucao nyiex ma: son sang kix hoek tix yumrhawm: mai: son sang sum ceucao mai: pui pa yumrhawm: heue.
O= Obedience, mawh krax cu nghiet ka gum lox Siyiex. Mawh num:riah cie kaux mawx kaux an mai: son sang haok huan ting lhaong ceucao heue.
U= Unpaid, mawh pa sang ah yuh cao kaing yoyo ka daux ceucao mai: ang teei mau riang khix heue.
C= Cell, mawh pak peung ceucao nyiex ma:, pui pa viex daux an ang chix lheu khaing (15)kaux. Phan lheu kawx guah ra: cub mai: chix tix yuh ceucao khraox.
H= Homes, Kix plih pak peung mai: rop rom tix sawg dah dee awm, Daux nyiex, jah tom hoek si voe shiang coh pui.
Mawh kheu krax grawng POUCH (5)ceu pa yaox ex plak lhaong ceucao kawx pre tix lih tom nie mai: krax lu krax tan khaing tang meung, krax pa klu klao tix yuh kaing mai: ex kawx ang lai lo tidtix.
Pui pa si toe vheuk deeh khaw, nawh sau tix tawx riang su saih ka pa pon nawh tix khrawm pa mawh pui pa yumrhawm: pa khraox kix heue. Son sang pon nawh tix rhuat lox si tang pa mhawm ka daux yang shing, nawh sau pak peung kaing khawm uik awm mawh beeh glawm: kix heue. Kix ra lai tawx riang rao pa mawh krax grawng pa pon kix khaing krax pa kix cied chawk ka pui khraox heue. Kix jhi tix yaox cub pui pa koe: riang rao daux pawk deeh, mai: cub pui pa ang nyang krub heue. Kix kraix khrawm awm Yesux mawh pui pa laug ka kix mai: kheu Nawh tawx been pak peung ka kix son sang kix tawx lox si tang gaux rhawm hoik mawh beeh glawm: kix heue. Pa mawh num:riah (4)ceu son sang sum ceucao khraox pa tat tix een pui an mawh (1) Model, (2) Assist, (3) Watch mai: (4) Leave.
(1) Model = Modeling mawh Son sang kix sum ceucao khraox pa mawh pui pa yumrhawm: pui khraox kix mai: been POUCH.
(2) Assist = Assisting- ang tie mawh ngie cung tix jhak ka ceucao khraox pa hoik sum kix viang mawh nan kix sau riang cu ca: son sang pon keh kix kawn:ceucao khraox heue.
(3) Watch = Watching mawh son sang ang riang pak peung grai. Son sang pon sum kix ceucao khraox mhawm ka daux pa ang kix koe: krax teem: krax gaw khaing sara cao: tawx been li kix heue.
(4) Leave = Leaving mawh pa kieh grawh grawng tang ceu lih hu:. Khaix an caw tix mawh ceu pui cied cied.
Ka daux bawg yam pa dawd pui pa yumrhawm: khraox ka daux hak tiex yang shing kix sum ceucao POUCH tom nie dee si dah hak tiex mai: ceucao mawx ceucao an shiao krax been (Modeling) pa mawh pa tang deeh joh jhaong ka to kaux tix heue. Son sang pon ex tix baox si pre haok huan pa mawh (Assisting), ex caw tix jhak son sang ang riang pak peung grai heue. Viang mawh nan krax baox tix si pre haok huan kawx dud si nax bawg tix blah heue. Viang mawh nan kheu hoik lih ceucao khraox tom nie, krax dud si nax an bawg tix blah ang tau tix yuh laux ka krax bang susaoh kix heue.
Ka daog ka cuik hak tiex yang shing ang chix tix sum nyiex gau lai si gang khri. Viang sara pa ting cao: pa tawx been li nawh pheet gau pak peung mai: shiao awm ceucao yam jah bee ma: pa koe: ka daux lai si gang khri khraox heue.
Sara cao: tawx been li kix gau pui ceucao ka daux nyiex kix son sang kix mawh cao: kaing, khaix an nawh ploi kix hu: mai: deeh baox thie tix gau ka pui pa khraox khan kix heue. Mawh kheu nan pa ah ex krax gau kienie caw tix mawh pa gau tix tawx tix kaux hoik tix kaux heue. Caw tix mawh kawn:cau Siyiex rah see awm pa mawh cao: kaing ka daux ceucao. Awm pa koe: ka daux lai Ma Thiex-28:20 “Mai: gau kix kieh kix hawt yuh ceu pa hoik nhie Aux ka pex khawm uik” ex caw tix yuh heue. Awm pa hoik mawh pui pa yuh kaing jhaw Siyiex can ceu pa chix nawh in si ngaix caw tix baox pre tix gau ka cao: thung baox tix kaux heue Mawh krax been “Yuh mai: gau , Gau mai: yuh” heue. Kied si daing mhawm mai: son sang pon ex tix plak pli to kaux ka daux bawg yam pa dawd heue.
Viang krax pa tugtiag tugte mai: krax pa caox pa caig koe: daux hak tiex yang shing kawx gum lox si tang pa mhawm kawn: susiah ka daux pa ting riang heue. Kix ang chix yuh krax pa tieb tie son sang pon kix tix teek ka bang susaoh an. Krax tix grawng kheu ceucao kienie sipub ka daux nyiex tix cub. Kheu kix ang koe: nyiex baun pa ting pa nie tawng pui krax pa yuh kix kawx ang pui hiex tawng.
Awm pui pa yumrhawm: khraox kix dom mawx dom an kix tawx krax cum rawm heue. Beeh glawm: kix kienie kix caw tix tawx pui tang dah ka Yesux khrit. Khaix an kix sau pak peung kheu pui khraox an kix, tag pon tix sum ceucao khraox heue. Awm kix shiao pui pa yumrhawm: khraox kix ka daux kaing jhaw ex chix tix ah “krax tawx ju” tix grawng heue. Kix sum ceucao khraox mai: pui khraox an kix heue. Mawh kheu nan kawx lih tix mawh bang susaoh pa blon mhawm heue.
Ceucao ka daux meung hawx ang kix koe: num:riah kak guah been li. Ceucao tom nie kawx ang kix teei been kak gauh an kix. Caw tix pau tix jhak grawng pa mawh grawng been teei pui pa lud tag sang laig tix ot daux bang susaoh kix lie? Kheu bang susaoh kix si pre lih huan ku dah ku dee son sang pui tix kaux hoek tix jhawp kuang ka bang susaoh an ang chix tix mawh. Kheu pa ap pong kawn:ceucao kix mawh krax im ju mai: krax pa cu nghiet kix son sang awm mai: lai si gang khri mawh pa ting ceu son kix heue. Ka daux krax pa yuh kix krub krai vai sa kix kleuk mai: grawng krax gau lai si gang khri, mai: kix khawm uik caw tix teei beeh glawm: krax thung heue. Mawh kheu nan ang joeng mawh ngie kia nyien khaing ka daux krax pa lud awm pa mawh rhawm pa lud keud kawx tag sang grai uik heue.
Bawg yam chawk kix kheu pa tix bang susaoh in ang koe: kak guah been li cao: pa deeh toe: vheuk deeh khaw pawk yuh nin. Daux hak tiex hawx simiang cub kuang ca: hak tiex kix tieb tie ka pak peung kak guah. Kheu nan ang kix rhawm kieh mawh grawng kak guah heue. Viang mawh nan nawh deeh pawk ceucao yang shing kienie teei pak peung cub cum rhawm khaing ceucao pa cum rawm tang dah. Kheu kix teei num:riah ka daux lai si gang khri mai krax ap pong pa mawh pui pa yumrhawm: khawm uik caw tix mawh pa yuh kaing jhaw, krax bang susaoh in kienie kaux cong jheeng jheeng heue.
1. Yam jah bee ma: kawx cub pui kawn:nyawm ceucao kix jah ka kaing pa tawx lox buan. Kix ang yuh kaing tawx lox buan si nax ceucao pui pa ang yumrhawm:.
2. Kheu cao: kaing ceucao pa ap pong ka daux ang kix teei riang khix ngawh kaing yuh tix lih tix koe: cao: thung tom nie heue. Kheu nan kawx chix tix yuh kaing jhaw pa khraox tom nie heue.
3. Ka daux bang susaoh yang shing pak peung ceucao nyiex kienie hoik hoek ka piang krax haok huan. Mai: tieb tie tix tawx krax pa tugtiag tugte heue.
4. Cub sara pa tawx lox buan tang meung kheu kix lih hu: ing ka ang cub kuang ca: hak tiex kix koe: krax lhat graung ang lih tix koe: krax sivix mai: kix heue. Lih tix mawh pak peung pa susaoh ceu pui cao: nyiex. Hak tiex hawx kienie kix ting krax cong rhawm ka daux pui ceu heue. Kheu ang kix chix moh ka pui tang meung tang hak tang kaux heue.
********************************************
Ceu pui kix kied hun phung ka daux hak tiex kala lung. Daux dah an koe: num pui ceu tix ceu. Ex kok ka kix mawh pui ceu Bo da ri, dee ting ceu pon dah. Koe: glawk jan pui ceu khawm pon glawk Pui ceu in kix kied hot si bhawm. Ang chix lai. Lheu khaing an pui pa tiem ru pa ang koe: cat khaing paox tix kawx koe:. Kix sawg krax im ju vaig tu mai: krax sum van yuh kaung mai: shiao been lai geu pa mawh ra lai loh ka kraung khrai ceu shiao heue.
Ka praok dah dee an koe: nyiex buan cie Hen du mai: Bara bin. Pui ceu pa grum pa khrawm ku ceu kawx koe: dee tan. Pui ceu Bo da ri 85% mawh been li Hen du mai: can pa daig kix mawh Mu sa lin mai: been li phi heue. Dah dee an koe: veng ting pon veng daux tix veng koe: si min pui koe: tix sien haoh heue.
Jah ka tawm taix sara William Carey been li khrityan jah tix laig daux pui ceu an kix mai: cao: kaing been li kix hoek ka daux num yieh (19). Cub been li cao vun (Khatholik) pa mawh cub Je Sup kix kawx laig ka daux bawg yam tix dum: heue. Daux num yiex (19) mai (20) num cao cao pui haoh pui hun pa hot shia tiem ru kix laig ka daux cub been li cao: vun. Khaix pon kix tix pex kru naing hak tiex daux meung ka la lung daux 1997num kaing jhaw pa yuh been li cao: vun kix jah tix teek heue.
Daux num been yieh (20)cao cao kix yaox pa pex pon pa riang kheu cub sara pa tawx been li Sui Din kix hoek dee tan heue. Cub kix sum ceucao (28) mu: mai: jah tix yuh kaing jhaw heue. Kix ing num been li (20) num si greung. Grawh grawng krax tawx been li cub cum rawm kix dah rau kheu jah ka pui ka la paing kix gutyeen ka pui ka la lung heue. Kheu kix mox tix een lien kix daux nyiex cub pui khrit krax tawx been li nie lih tix mawh krax pa caox heue. Daux yam uik num been yieh (20) num kienie been li khrityan dah rau khaing krax haok huan heue Vong yam 1980 num si nax (25)num ceucao an, ang kix pon sum, eue: ceucao khraox heue.
Ka daux 1989 num cub (Southern Baptist Convention) kix cao: pa deeh kieh khaw daux simu sima tix kaux son Bo da ri. Kaw an gau lox si kah pui cau an mai: krax ot been yung yi kix glang tix num, khaix an nawh jah tix yuh kaing pa susaoh ka daux ceucao nyiex yaong pa mawh riang su saih pa chix tix sum: ceucao khraox heue. Sara an kied si daing lhat graung kheu sara pa sang sum ceucao (6) kaux pui plaux pui yum si nax yuh kix kaing daux plak seh meung ka la lung heue.
Daux 1992 num, sara an nawh yaox krax haok huan pa mhawm kheu nawh baox sawg krax pa sum ceucao ka daux krax daux grawng pa khraox heue. Nawh ploi kawn:cau ra: kaux, ra: kaux ka daux yaong piang gawng lua awm pa jhi Yesux ka daux lai lux ka (10). Phan kix hoek daux yaong an nawh kieh kix sawg pui pa chix yuh paox pie ka daux pa nhim heue. Pui pa yuh kaing jhaw been li ka daud bo da ri kawx sum ceucao awm an heue. Yam hoek cub sara kix ka daux yaong an, kix hu: tau ing tau mai: pui pa chix nhim mai: pa yien yaog ka ang kix nyang bax tawx lox buan gaux rhawm gaux rhi heue. Kix tawx krax gau pheet grawng ceucao kawn:cau ka cub paox nyiex ma: an kix heue. Viang kix ang nyang yumrhawm: kawx kix gau tix tawx grawng lai si gang khri si dawng heue. Yam jah pui pa loh rhawm rhi plak kix koe: tom nie. Khaix an kix deeh kraix khrawm paox nyiex paox ma: kix. Khaix hoik tawx kix cum rawm kieh kix laig ka daux ceucao pa khraox ka daux yaong mawx yaong an heue. Daux 1993num ceucao haok huan 28 tom 36mu:. Baox tix num deeh haok 42mu:. Kix paoh krax gau pa tawx lox buan mai: keh tix tawx sara ceucao mai: ceucao pa khraox khan kix heue.
Daux baux yam an ceucao khan kix kied haok huan tom koe: (547) ceucao daux 1996 num khaix an pre tix lih (1200) mu: daux 1997num heue. 1998num koe: (2000) mu:. Daux a liah num pui pa loh rhawm rhi tix yumrhawm: koe: (55,000) kaux daux Bo da ri heue.
Jauh saw pa ting ceu tix blah ploe tix lih ka daux bang susaoh grawng sum sang ceu ceo: khraox in. Pa mawh sara cao tawx been li kix sawg krax cheuk cheu: daux pak peung ku ceu kawx mawh krax pa mhawm heue. Kheu ex yaox pak peung mawx pak peung an khaw mai: dah dee mawx dah dee an. Dee sum ex ceucao khraox kienie, koe: krax kaux phan ex brawm tau tix sum mai: ceucao nyiex yaong bawg yam tix taix neh. Bawg yam jah ex tix yuh kaing pa mawh cub caw pui khrit kia nyien klawm: kaing mai: caw tix si toe: daing mai: cub pui pa sum ceucao khraox heue.
Khaix hoik rheeng (6) khix, sara cao: tawx been li cied ciang tix cheuk ka kaing jhaw tix mu: hoik tix mu: heue. Bawg yam tawng nawh pui cao: nyiex pa sum ceucao khraox kix viex ka daux glawk pa ting ceu nawh baox thien thie tix yuh kaing jhaw mai: num:riah, riang rao:, bawg yam mai: krax gau pa koe: ka nawh heue.
Pa ting ceu ra: baux tix baux kienie sara (I.M.B) an keh tix plih sara cao: tawx been li pa ot greem nawh pa mawh pui ceu kala lung heue. Pa mawh sara pa kaoh khaing Ame rikan sipub krax pa khawp pa nu kheu ang nawh hiex doh lox si kah kix heue. Nawh ang pon su shiah yuh kaing awm pui nyiex pui meung ka la lung kix heue. Phan kix ra: kaux brawm tix yuh kix yaox kied si daing haok huan kaing yuh kix heue. Sara pa ot daux cub (I.M.B) ot plak praix meung ka la lung, khaix an nawh kum:kawng: mai: cub caw ceu pui ku dah mai: joh jhan ka kaing jhaw an heue. Phan mawh sara cao nyiex ka la lung kienie ot daux meung mai: tawx krax gau ku ceu heue. Nawh jhawp kuang grawng tawx lox buan mai: ka daux kaing pa sum kix ceucao khraox heue.
Pa mawh sara ka lalung kienie krax hu: tu daw pa yuh kaing jhaw nie mhawm khaing sara ka la paing. Viang mawh nan sara paing (I.B.M) kawx pon yuh kaing jhaw mhawm mhawm daux meung tang praix. Kaing jhaw pa yuh nawh kienie nawh chix tix sum cub caw krax pa rawg buan mai: susaoh heue. Mai: kraung khrai ku ceu kawx chix tix kraix khrawm si paox tix tawx ka kix heue. Chix tix yuh grawng si toe lox lai si gang khri, krax pa plih diep cag mai: ot daux hak tiex tang praix. Lheu khaing an krax tawx krax pa gau ku ceu, krax sipub kum:kawng: mai: cub caw cao: kaing A Shia , mai: cao: pui pa tan pa lu plak mau khri kix kawx chix tix yuh mai: ot tang meung heue.
Sara pa tawx been li an ap pa mawh kaing son sang yawm pak peung “cub caw kix pa jhawp kaing” mai: “krax pa teem pa tawx khaing pui meung tang dah ka daux pui ceu Bodari daux been ra: num heue. Hoik khaix ra: num nawh deeh koh priex ka mau pa teem pa taoh an mai: cied ciang ka kaing jhaw khawm uik.
Yam jah tix liang kaing jhaw viang mawh ngie krax pa susaoh son cub caw been li cum rhawm kawx ka daux (7) num cub caw tang dah hoek tix viex laig klu klao mai: kix heue. Phan ex krai mawh kheu jao ang kix pon priex grawng krax ting haok huan ceucao cum rawm daux nyiex daux yaong hueu. Bawg yam jah kix tix sum ceucao ang mawh ngie son sang sum nyiex bang ting, sara an nawh jhak tix kah sivix kaing jhaw pa prung prang heue. Num:riah pa si toe vheuk daux ceucao mawh pa tix? Kix kham cu gum lox Siyiex pa mawh Phuk lai si gang khri nong nong koe: si awp si brawm heue.
Ka daux pa sum sang ceucao khraox Bodari, son sang doh mhawm kaing jhaw pa mawh sara ting kienie nawh een rhawm ka mau khri pa joh jhan plak praix heue. Viang mawh nan koe: krax tat mee grawng mau joh jhan. Kix pon mau son pui pa sum ceucao khraox, pui pa yuh kaing jhaw ceucao, mai: son sang sum nyiex gau lai nong nong ngie. Mau son kawn:nyawm pa rieb tix gau lai mai: son sara cao: pa tawx lox buan kawx kix pon heue. Mawh kheu nan pui pa sum ceucao khraox kix hu: yuh kaing jhaw ka dah dee pa pui tieb tie dee pa nu pa khawp heue. Khaix hoik sum kix ceucao khraox mau pa kix teem kawx teek tan heue. Sara ceucao kawx ang lai pon mau riang khix. Mawh kheu an sara ceucao kienie sawg tix yuh kaing son sang nawh eue ju tix plak nex nham. Kix sang sum bang nyiex kawx ang kix lai pon mau pa pui teem taoh.
Kix deeh plih lox chawk grawng mau pa lu tan pa kix een rhawm tix khaing tang meung tang haktiex son sara tawx lox buan mai: son pui pa sum ceucao khraox. pui nyiex pui yaong kawx kix keud son sang caw kix tix yuh ka mawx? Kix tawx riang rao son sang beeh glawm: an hoek ka piang cao thung cao kaing ceucao kheu ang sara ceucao teei mau riang khix, mai: ang teei mau son nyiex bang pa sum kix heue. Sara cao nyiex cao: yaong kix kawx chawk grawng mau pa joh pa jhaong kix heue. Pa deeh pawk sara ting cao jhawp kaing mawh “Awm sikut gang kaing jhaw sara cao: tawx lox buan khawm uik caw tix teei krax pa joh jhaong meung tang dah”. “Awm pa pon sara pa paing hak kix mau riang khix sara lung hak kix kawx caw tix pon heue”. Ceucao nyiex yaong kix koe: riang rao kheu pon kix riang su saih son sang sum kix ceucao khraox. Ka daux bang kum:kawng: sara cao gau kix koe: sara (1000) haoh mai: kix jah tix sum ceucao ra: mu: tom hoek phuan mu: heue.
Kix sawg pui pa nhim pa yien mai: kix jah tix susaoh ka daux nyiex ma: nawh khaix an nyiex ma: kix loh rhawm tix dum heue. Kix yaox awm an ku yaong heue. Ang kix cum rawm tix kaux tix bawg viang mawh nan cum khawm nyiex ma: heue. Si mex pa mawh cao: nyiex mawh pa thung nyiex ma: kix cum rawm. Khaix an lih tix mawh ceucao nyiex ma: nyiex yaong heue.
1. Tag sang sipub mai: krax pa som pa dah si voe ang ex nyang pex pon. Ang ex ploi tix tawx son krax som mai: caw tix pheet gau krax grawng pa som an heue. Son sang pon sum kix ceucao khraox ka daux Bodari pa mawh sara cao: gau (6) kaux kham tix yum heue.
2. Kieh krax pa keud sawn: pa khraox koe heue. Deeh chawk cheng sawg siag ka daux pa ra lai kum:kawng:. Krax bang susaoh grawng sum sang ceucao khraox tag sang lih bawg yam an heue. Khaix an hoek ka piang krax pa khaw pa caw heue.
3. Kix tawx pak peung lox chawk ra gum son pui pa yumrhawm: Bodari pa mawh krax palih tix keh kawn:cau, mai: krax pa tat tix een sikut gang. Grawng krax yumrhawm: mai: grawng shiao ka daux sipub taix yaox ngai ex sang yuh ka mawx?(1) Dah dee in ex tag sang kieh min plak ngai Siyiex lih hoek lie?(2) Gum lox siyiex pa mawh lai si gang khri krai tix deuh grawng pa tix?
4. Kheu krax gau kix lai si gang khri daux krax pa yie mai: diep cag pa khre kix tix son krax gau gum lox Siyiex ka daux pui pa ang chix ngai lig ngai lai kawx yie tix chix si dawng ka ceu in kix heue.
********************************************
Ka daux num yieh (20) num, bang kru naing lih tix koe: tom nie heue. Lih tix koe: bang pauh pui mai: pui ceu pa gutyeen mai: si awp si brawm. Meung pa sipub mai pa tuk pa kha son chaox rhawm awm Khambawdiya kied iak heue. Kheu Vi yied nam kix yuh pa susaoh hak tiex been (20) num, simiang kummiunit (Paw pawt) yuh hak tiex Khambawdiya laux ka daux bang kru naing an heue. Krax grawng an kienie jah 1975 tom hoek 1979 kheu tap lien Kha ma ru yuh krax plaux pui, krax pa yieh pa yaik, krax pa hot si bhawm ka daux pui daix (8)sien pa mawh pui 3.3 sien yaox krax tug kha laux leeing heue.
Mawh kheu krax grawng ceu in kix ka daux hak tiex Khambawdiya yaox krax laux krax leeing, khaix an cub pui ting kix grai luan mai: cub kawn:nyawm kix ang lai chix ngai lig ngai lai. Khaix an cao: jhawp kaing Vi yied nam kix kieh teek ka bang plaux pui heue. Viang mawh nan ang kix lai koe: krax son sang deeh pon cung pui ceu Khambawdiya kix heue.
Krax loh meung hak tiex kix lih tix koe: kheu krax susaoh pui ceu phung hun kix daux meung an. Viang kix shiao been li vad kaing yieh num kawx pa mawh been kummiunit tawp kheem ka piang kix khawm uik heue. Cub caw been li Cao vun Yo ma kix kawx koe: dah dee, deeh jhawp kix yam jah, viang mawh nan cub caw Kha ma ru kix tieh feen yuh naing kheu kix toe vheuk mai: cub caw France mai: bang jhawp been li Cao vun Yo ma kix heue. Yam jah num yieh been (20) dix pa mawh cub (Christian Missionary Alliance) mai: (Over seas Missionary Fellowship kix sum num:riah cub caw (Pa ro tiet sa tin) ka daux meung kix heue. Viang mawh nan pui pa yumrhawm: ang luan khaing 5000kaux. Bawg yam (Paw pawt) jhawp kaing ka piang Kha ma ru kheu kix yuh krax gutyeen ka been li mai: ghreu sara pa tawx been li kix khaing daux meung heue. Kix sawg tix plaux pui pa yumrhawm: kix heue. Khaix 1990num pui pa yumrhawm: ang luan khaing 600 kaux heue.
Sara pa tawx lox buan daux meung an mawh cub (Overseas Missionary Fellowship) kix pa ploi nawh ot heue. Nawh krai bawg yam jah tix loh ka daux meung an mawh daux 1990 num. Yam hoek 1999num kienie pui pa yumrhawm: haok huan 600 tom hoek 60,000. plak nie mawh cub caw pa cum rawm. Khaix an pa nie nam bad ra: mawh cub caw (Campus Crusade), mai: cub caw pa deuk mawh (Christian and Missionary Alliance).
Krax lai loh pa ting ceu mawh daux 1989 num, khix-12. Kix tawx beeh glawm: ka sara ting tix kaux pa mawh cub (Southern Baptist). Ka daux 1991num nawh gau lox pui ceu an mai: jah tix yuh kaing jhaw heue. To kaux cao nawh ang sum ceucao. Nawh brawm tix yuh kaing mai: pui ceu Kha ma kix. Ka daux tix num nawh pon keh tix plih pui liah kaux pa sang sum ceucao Khambawdiya. Khaix an ang rheeng miex khix tix nawh priex tix yuh phuk lai grawng sum sang ceucao khraox plak gum lox lig lai Kha ma. Nawh gau tix tawx grawng lai si gang khri mai: nawh yuh kix yaox grawng pa sum ceucao mai: piax riang im grawng Yesux heue. Nawh sau tix tawx rhawm jhawm jheet bang susaoh grawng sum sang ceucao khraox mai: riang su saih pa sang hoek gum lox buan daux meung ku dah ku deeh heue.
Daux 1993num, ceucao haok huan 6 mu: tom 10 mu:. Daux 1995num ceucao lih koe: 43mu:, mawh kheu nan kix khrawm cao: kaing kix mai: sum Num been li khrityan cub caw Kha ma. Num khaix mawh 78 mu: daux 1997 lih tix koe: 123mu:. Ka daux meung koe: shien 117 shien , 53shiien lih tix mawh ceucao heue. 1999num kienie koe: ceucao 200 haoh, mai: kawn:ceucao koe: 10,000 haoh. Ceucao tix blah koe: nyiex buan mai: ceucao tix blah mawh ceucao daux nyiex heue.
Sara pa jah tix yuh kaing an, lih ing daux 1996 num nawh deuh cub caw been li tix cub. Kieh ceucao yuh kaing jhaw kriem kriem kre kre. Mawh kheu nan ceucao haok huan hu: si voe: heue.
Bawg yam tiem kix grawng bang su saoh in sara ting an ah yuh nin, “Ka daux pa hoik luan (6) num dix pa susaoh krax rawg buan lih tix koe: daux meung Khambawdiya, ang sax koe: dix dix”. Mawh kheu si awp pa rawg kix buan in kix pon tieb tie son pui pa sum ceucao khraox heue. Kix paoh rhawm rhi pui ceu Kha ma mai: pui ceu an kix jah tix rieb gum lox buan gaux rhawm gaux rhi. Kieh kawn: ceucao kix si plaoh so kaoh mai: ka daux krax rawg buan. Kix mhong Siyiex viex mai: kix mai: kix yaox pa tang siyox ka daux pa im ju kix ku ngaix heue. Kix yaox krax pa daox pa am, sak se: riang su saih, pa ghreu phi caox, krax pai jhawm saux, mai: pa ngah kix ka plak khuan heue.
Krax gau mawh rong pa kaux pa cong, mawh si niak nham krax su saih. Sara ting an paoh nyiex cawng krax gau son sang pui yaong kix yuh cao kaing (RLTPs) ku dah ku deeh. Kix sawg bang nyiex daux yaong mai: jah tix yuh kaing jhaw pa sum ceucao heue. Kix teei krax teem krax coi ceucao. Kix guah krax gau (8) ceu , tix ceu gau (2) tuah heue. Gau grawng lai si gang khri, grawng cao: thung bung, grawng pa tawx lox buan mai: pa sum ceucao khraox. Khawm uik (16) tuah kix kieh hoik daux ra: num heue. Grawng cao: giex kaing, kaing jhaw ka daux ceucao mai: grawng krax pa eue ju kix kawx gau tix tawx heue.
Sara ting an kienie, cheuk cheu tix yuh kaing pa bak een ka daux dah dee pa ting ceu heue. Awm pa daing Sara Paw lux daing tix een daux (Thesalonix2:2) nawh teei tix shiao num:riah daux kaing jhaw heue. Nawh ah paw yuh nong nong, kraix khrawm tix yuh ku kaux.
Riang su saih, krax cheung kaing, ngawh jum, mai: ceu num:riah kix kawx ra lai loh tix gau tix kaux lai tix kaux heue.
Khaix hoik ting lhaong krax bang su saoh, krax pa joh jhaong kawx jah tix hax ruk khaing plak daux. Cao: kaing pui nyiex yaong kix kawx plih tix yaox riang su saih kix heue. Daux ku shien ku pui ceu caw tix koe: ceucao heue. Koe: krax gau pa tawx riang rao mai: kawn: ceucao kix kawx lih tix mawh pui pa sum ceucao heue. Sara ting an ah yuh nin “Ceucao ku dah caw tix deeh sum ceucao khraox, caw tix deeh pre hun, mai: pui pa teei riang khix mai: pa yuh kaing jhaw ang kix hiex haok huan”. Kieh mawh pa susaoh pui ceu. Pa ex kaux rhawm ka tang priex kieh yawm heue. Sara cao: tawx lox buan, teei bawg yam mai: deeh ap pong kaing ka cao: nyiex cao: yaong. Yam an krax bang susaoh nie blon mhawm mai: jah tix pre hun heue.
Sara ting an lih ing daux 1996num, krax bang susaoh kawx lih tix loh pak peung heue. Sara I.M.B kix deeh jhak deeh teem ka pui ankix. Kawn: ceucao cub caw kix ah tix kaux lai tix kaux “Yuh kiang awm si liex pa tiem rhawm rhi mai: tik rhawm rhi pa sang yuh cao: kaing gut piang pui.
Viang ang nyang pon ah pa blon mhawm kawx num been li Khambawdiya kix pon daing tix deuh krax bak een mai: krax khre krax yak dom mawx dom an heue. Kix yuh num:riah ka cub caw cum rawm. Kix si lah paox tix son sang tawx kix lox buan daux meung ku dah ku dee mai: son sang pon sum ceucao khraox daux ku shien. Cao: kaing num been li kix kawx koe: rhawm tix sum ceucao khraox mai: krax tawx lox buan gaux rhawm rhi. Kix sawg pui pa thung bung daux pa sum ceucao khraox mai: tawx krax gau tom hoek daux nyiex daux yaong.
Pak peung pa blon mhawm: lih tix koe: daux ceucao Khambawdiya. Daux pak peung in klu klao tix een krax grawng daux lai si gang khri khraox mai: krax grawng kaing hak tiex Kummiunit. Ka daux ceucao tix mu: pa mawh cao: kaing kawn: ceucao (7) kaux jhawp kaing kix heue. Kix tawx ceu kaux Num dee jhawp kaing ka pui (7) kaux an. Num dee jhawp kaing in kix pa tawx krax jhi krax thung heue. Kaing an kix mawh krax tawx lox buan , son pui chix ngai lig lai, krax krub krai vai sa, krax gau grawh grawng ceucao, krax gau son cub bon:, kawn:nyawm mai: cub caw si mex kix heue.
Bawg yam bang susaoh in haok huan krax grawng cao: kaing pui nyiex pui yaong kawx lih tix haok huan. Sara cao: tawx lox buan ah yuh nin “Phan krax grawng ka daux nyiex yaong koe: krax pa sum sang ceucao khraox kawx brawm tix viex ku jheeng jheeng” heue. Awm plak sara tawx lox buan nawh rien rhawm tix ka pak peung cub caw. Nawh sawg krax gau son pa sang gau nawh tix tawx ka pui. Nawh sawg mau lu tan son daux kaing jhaw nawh.
1. Cub num pa tawx been li ku meung (I.M.B) yam kix een sara ting ka daux Khambawdiya, pa mawh cub caw pa tawx been li tang dah (30)cub haoh kix kawx viex tix hoek heue. Cub caw in kix ang een sa tix ka pa cheung pa doh pa sum ceucao khraox cub (I.M.B) kix heue. Mawh kheu ang kix tawng krax grawng pa sum ceucao khraox mai: ang kix chix shiao heue.
2. Pa mawh sara cao: tawx lox buan nawh ang tie deeh dux taix tix tawx grawng bang susaoh ka cub caw pa yumrhawm: pui Khambawdiya kix heue. Kheu jao pa tix kienie krax bang susaoh an ang mawh cie sara tawx been li, kheu mawh cie ceu pui nyiex pui yaong kix heue.
3. Awm pa hoik plih pak peung daux (2Timose2:2), kix jah tix sum gau tix tawx grawng pa jhawp kaing ka pui nyiex pui yaong. Kix mawh ngie pui pa plih pak peung ka kaing jhaw pa sum sang ceucao khraox heue.
4. Num been li cum rawm Khambawdiya, kix koe: riang su saih ka daux pa susaoh kix. Mawh kheu nan son pui pa thung daux kaing jhaw kix laug pui pa koe: riang su saih mai: tawx beeh glawm: ka kix heue.
Ka piang hak tiex in khawm uik ex yaox krax pa susaoh grawng sum sang ceucao khraox tang ceu tang dah heue. Ex yaox daux meung Tamzamoa, pui ceu Maasai kawx mawh meung Kenya kawx yaox heue. Kheu pa nu cien daux krax hu: krax ing piang gawng dong pa kied lhaong ang cao: tawx been li kix chix tix hoek. Kix tawx riang khix mai: sum tix tawx nyiex buan kawx ang pui mawx koe: rhawm tix yuh kaing jhaw heue. Cub sara IMB kix hu: tawx lox buan dah dee an daux pa nu pa khawp. Kix tawx lox buan gaux rhawm gaux rhi ka pui cau Maasai Kix tawx krax gau cub pa sum sang ceucao khraox mai: cao: kaing cao: kap kix heue. Khaix an pui ceu Maasai kix tang yuh heue.
Khaix an ceucao Maasai kix haok huan, si plaoh mai: im ju heue. Kix haok rhawm ka daux krub krai vai sa mai: yaog yaw Siyiex. Kix gau ka lai si gang khri mai: plih lai rhax yaog yaw lih. Kix kieh mawh lai khoi ya ting grawh grawng ka daux lai si gang khri prim mai: pa khraox heue. Mawh kheu nan krax haok huan ting lhaong pa susaoh grawng sum sang ceucao khraox kawx kied mhawm te te. Kaux num:riah mai: lih tix mawh pak peung ceucao pui ceu.
Awm bang susaoh ceu in kix lih tix hoek tix vud tix vud. Ex mhong ka daux meung plak lih she tix meung koe: pui yumrhawm: 30,000 kaux, Si voe hak tiex Indiya tix dah koe: ceucao (800) mai: pui 100,000, ka daux meung hawx tix dah pui loh rhawm 20,000 kaux daux (4)num, ka daux hak tiex plak klip si ngaix Urawpax ceucao haok huan ra: son daux (6)khix mai: ka daux meung Bara si tix dah ceucao lih tix koe: (383)mu: heue.
Sara cao: tawx lox buan kix ra lai tawx riang rao grawng cie kix heue. Kix yaox kaing jhaw pa daox pa am pa tawx Siyiex ka kix heue. Siyiex yuh kaing jhaw pa blon mhawm daux bawg yam in. Mawh kheu nan ex caw tix si dawng grawng pa hoik mhong ex pa Siyiex ting lhaong si awp mai: kaing jhaw pa yuh nawh ku dah ku deeh heue
Bawg yam pheet gau ex krax pa susaoh grawng sum sang ceucao khraox ka piang hak tiex ku dah dee, dee iak ex yaox krax grawng (10) ceu heue. Phan krax grawng in (10) ceu ang viex ang pui mawx chix sum sang ceucao khraox. Sara cao: tawx lox buan mai: pa sang plih lih krax pa susaoh grawng sum sang ceucao khraox kix kienie caw tix keud mhawm mhawm ka grawng (10) ceu an heue.
Pa ex pheet tix gau pa sum sang kix ceucao khraox pa susaoh kix khawm uik krax rawg buan mawh num:riah, ang viex ang chix. Plak sara ting kienie phan nawh sang plih lih krax pa daing pa khrex son pui ceu tix cub grawng krax rawg buan caw tix mawh kaing rong nam bad tix heue. Viang mawh nan caw tix koe: si awp pa ting lhaong krax rawg buan ka daux ju sara ting an, mai: tag sang pre tix hu: daux ceucao khraox mai: cao: kaing pa khraox kix. Hoik si dawng yam jah num:riah si awp si brawm mai: krax pa pex pon kaoh khaing krax rawg buan. Son ex cheung tix pon ka duax kaing jhaw ting in caw tix si dawng grawng sara an pon tawx riang rao rhawm kua: pa koe: mai: nawh heue. Kheu pa ra lai tawx si awp si brawm krax rawg buan in pui khan kix pon riang su saih, krax kaing jhaw kawx haok huan ting lhaong mai: pre tix hu: daux cao: kaing nyiex yaong khan kix heue.
Iak riang daux pa tawx lox buan (@) phan ang koe: kienie krax pa sum sang ceucao khraox kawx ang chix tix lih hoek. Bawg yam ex tawx lox buan pa mhawm pa grum naog mai: yuh kaing jhaw siyiex daux krax daux grawng kienie krax pa sum ceucao khraox tom hawt khaix an kix heue. Pex jhak dee vawg pui nghaox. “Ex vawg awm pa sum tix, mai: phan ex sum nie ex tag pon tix vawg nie heue. Ka daux bang susaoh grawng sum sang ceucao khraox, cub pui kaing yieh kaing rheng lo tix mhong grawh grawng Yesux khrit pon tix cox khre mai: loh ju kix. Ka daux grawng pa tawx lox buan ting in kienie kix shiao mai: pui cub pui caw pa tawx lox buan. Tix blah kix tawx lox buan daux cag bhaung mai: cag riang im heue. Viang mawh nan pa tawx lox buan tix kaux lai tix kaux kawx caw tix koe: mai: krax pa kham mhai: sak se: son sang pui loh plak ju kawx caw tix koe: heue. Sikut gang pa vawg deeh jhan khaix kawx kawn: koe:. Bawg yam cub caw cao: kuang ca: hak tiex, mai: cub pui sin pa ang yumrhawm: kix tieb tie grux thiang ka kaing jhaw ex pui khrityan krax pa sum sang ceucao khraox mai: grawng pa susaoh khan kix tag sang grai hu: heue.
Ka daux krax pa susaoh grawng sum sang ceucao khraox ku dah pui tix kaux yie cheuk cheu mai: sawg tix yuh ka daux krax grawng mai: glawk jan heue. Khaix an bang susaoh lih tix mawh heue. Dah dee tix blah viang koe: riang rao num:riah plak cao: nyiex cao: yaong kawx kheu sara cao: tawx lox buan ang koe: riang su saih mai: ang tawng cu yi ping nya kix som giex going daux kaing jhaw kix heue. Ceucao kienie ang chix tang lih tix mawh nong nong. Daux si ngaix ka piang hak tiex in cub pui kaing rheng viang kix yumrhawm: mai: rieb ka Yesux khrit kheu pui pa tawx lox buan gaux rhawm gaux rhi kawx ang lih tix mawh ceucao. Ka duax baux bawg yam in krax grawng pa sum sang ceucao khraox kienie caw tix hoek yam krup bawg yam son krax pa lo ex tix vawg khawm uik heue. Bawg yam an krax bang susaoh grawng sum sang ceucao khraox lih tix hoek kriem kriem kre kre heue.
Pie ka daux cub caw pui ceu pa ang chix ngai lig ngai lai, lai si gang khri mawh awm rong ngu mai: jhi daux krax kheu son been pui khrit, si mu si ma ceucao mai: son sang im ju. Ka daux pui ceu pa ang koe: lai si gang khri, yam lih tix hoek bang susaoh pa sum sang ceucao khraox kix sau riang tix phat mai: yuh tix pon glip ngai ka lai si gang khri heue. Kix phat plak gum lox si kah plak cie kix heue. Lai si gang khri kienie awm rong nyiex pa cung son kaing jhaw ceucao ku jheeng jheeng heue. Yam an si awp si brawm lai si gang khri kienie lih hoek tix tawp kheem heue.
Sara cao: tawx lox buan pa viex daux bang susaoh grawng sum sang ceucao khraox, kix yie krai grawng pa caw tix koe: krax si mu si ma mai: daux krax daux grawng son pui pa sum sang ceucao khaox heue. Ang kix yuh mai: to kaux cao: tix. Pau thung kix ka daux kaing jhaw ngie. Kix yuh sara ting daux ceucao mai: tawx cao: nyiex cao: yaong hu: si voe: heue. Viang mawh nan ang kix pau tix jhak giex giex plak khaix kix. Ang mawh ang kix lai koe: kaing jhaw son ceucao. Pui nyiex pui yaong pa sang sum ceucao kawx pon a khwang tix haok krax gau mhawm mhawm. Kix hoik pon krax gau ka sara cao: tawx lox buan, kix deeh sang gau lai si gang khri ka pui pa ang nyang yumrhawm: yuh ka mawx. Mawh kheu nan awm sara cao: tawx lox buan kix hu: si voe tuk taix yeng caong yuh kaing mai: cao: nyiex cao: yaong mai: eue tix plih cao: kaing cao: nyiex cao: yaong si dawng lhaing lhaing heue.
Pa mawh cao: kaing pui ceucao yoyo yie yuh grawng krax susaoh grawng sum sang ceucao khraox. Pui an kix koe: rhawm kua: rhawm haok son sang yuh kaing jhaw so pui ceu kix si nax sawg kix tix yuh kaing jhaw son krax im ju kix. Phan ex tiag ka daux pui ceu pa ang chix ngai lig ngai lai cao: thung an kawx ang chix ngai lai. Pui ceu an kix mawh cao: met kax kienie cao: thung an kawx mawh cao: met kax. ara pa yuh kaing jhaw pa ih riang khix kix hoek bawg yam lih tix mawh krax susaoh te te heue. Tom nie krax haok huan bang susaoh in kix mawh pa thung bung cao: kaing pui ceucao yoyo ngie. Kheu krax pa thung bung in, kix pon cao: pa sum ceucao khraox tom nie. Daux ceucao nyiex kawx pon tix khrawm cao: thung bung. Phan ex deuh rhawm een rhawm ka pui lih khaing nyiex cawng lai si gang khri kheu cao: thung hot shia daux kaing jhaw Siyiex daux ceu pui pa chix ngai lai ang ah daux pui pa ang chix ngai lai ang ah ex yaox krax nu krax cien heue.
Nyiex buan ting chix tix lih koe: daux krax bang susaoh grawng sum sang ceucao khraox heue. Viang mawh nan mawh ceucao pa iak kix heue. Mawh ceucao nyiex pa tag sang pre tix hun. Koe: kawn:nyawm ceucao (10) kaux hoek (30) kaux mai: kix yie sum dah dee pa mawh daux nyiex, kawx mawh daux shiang coh pui tix ceu ceu heue. Ex ah yuh ka mawx kawx ceucao (cells) mai: ceucao nyiex ang awm paox. Pa mawh ceucao (cells) kix si toe vheuk tix cub mai: tix cub. Tom nie kix si toe daing vheuk mai: ceucao miex pa ting. Pa mawh ceucao (Full Gospel Central Church) pa koe: daux meung Koriya, veng So: mawh ceucao (cells) pa ting ceu kaux heue. Ka duax ceucao miex an koe: ceucao (cells) pa iak 500,000 haoh heue.
Ceucao nyiex kienie awm pak peung mai: ceucao (cells). Viang mawh nan ang kix cung ot greem tawm taix cub caw cao: pa jhawp tix mu mu. Ceucao nyiex kienie tang sum tix ot cao: tix nong nong. Ang koe krax pa joh jhaong bang nyiex kix awm ceucao (cells) khan kix. Viang mawh nan kied si daing koe: si awp si brawm plak ju khuan. Mawh kheu nan tix ceu mai: tix ceu tang siyox khaing: paox tix. Phan mawh ceucao (cells) kienie yie tix sum heue. Koe: pui pa pan cub caw son sang khaw daux been shiao. Phan mawh ceucao nyiex kienie kix kham krax pa tugtiag tugte bawg yam pa nu pa cien kheu ang kix koe: pak peung been shiao heue. Kix kham krax pa yuh cao: kuang ca: hak tiex. Viang mawh nan bang susaoh ku dah ex yaox pak peung khawm ra: ceu mai: yie koe: khawm ra: ceu heue.
Ka daux pa susaoh grawng sum sang ceucao khraox, yam jah to kaux sara pa tawx lox buan pa yuh tix sum ka ceucao khraox. Phan ang mawh nan pui pa rieb tix gau grawng sum sang khaing sara kix deeh sum sang ka ceucao heue. Bawg tix blah ka daux pa susaoh lih tix mawh awm pak peung kha nan pre haok huan (4x4)(16x16), ceucao pa dawg koe: lih tix awm pak peung deeh sum kix ceucao khraox heue. Daux glawk in ceucao pui ceu kix caw tix kua rhawm daux pa rieb tix. Krax pa yuh kaing jhaw in kix kienie kix rieb daux rhawm awm beeh glawm: pa tawx Siyiex, awm (saphawax) pa dawg koe: heue. Ang kix lai lo krax pa teem: pa taoh khaing plak praix. Ka daux pa susaoh yuh Nin pui pa yumrhawm: khan kix jah tix yuh kaing pa taoh plak ju khuan heue. Cub pui khraox kix kawx tang sum ceucao khraox heue.
Kix chawk ka daux pa susaoh ceu in caw tix lo son sang haok huan phai phai. Viang mawh nan ang kix chawk lih tix hoek yuh ka mawx. Awm plak pui pa sum ceucao khraox kix pawk phan koe: krax pa haok huan phai phai tag sang lih tix mawh bang susaoh ting. Phan yawm plak haok huan bang susaoh kawx tag sang yawm heue. Kheu krax pre ceucao kied si daing phai ex yaox si dawng cub pui kawx haok huan plak pa rieb ka been li khrit. Pui ceucao kix kawx viex ka daux pa susaoh ka daux pa kua rhawm mai: ih rhawm rhi paox tix heue.
Pui pa cheung kix tiem tix een grawng ceucao pa si plaoh im ju. Pui pa chix cu yi ping nya tom nie kix plak plih roi pak peung ceucao pa si plaoh im ju mai: (1) Krax krub krai vai sa (2)
Krax tawx lox buan mai: krax tawx been li (3) Krax pa gau ping nya plak lai si gang khri mai: krax gau kawn:cau (4) Kaing jhaw Siyiex ku ceu (5) Krax pa yuh paox pie. Bawg yam pheet gau ex krax pa susaoh in ex yaox si dawng roi pak peung in phuan ceu heue. Pui pa sum ceucao khraox kix kham gum lox yuh nin, phan roi pak peung phuan glawk in sidawng plak ceucao kawx tag sang haok huan ting lhaong heue. Krax grawng tang dah kawx chix tix koe:. Viang mawh nan roi pak peung pa ting ceu mawh ceucao pa tawx been li kix heue. Awm ceucao pa deeh sum ceucao khraox kix kienie kix hu: ka pui ceu pa ot dee si ngai. Ceu pa ang chix yuh sara tang meung kix kawx cao: nyiex cao: yaong kix chix yuh heue. Ceu pa tieb tie khawm uik kawx kix pon tix tiang hu: heue.
Awm pa ah ex krax grawng pa sidu awm (10) ceu pa shiang mai: ku meung ku hak tiex, ex yaox ka daux bang susaoh grawng sum sang ceucao khraox. Lheu khaing an pa sang yaox ex ku jheeng jheeng pa mawh roi been shiao (10) ceu kawx koe:. Krax grawng in kix ang tie mawh plak plih ex yaox kriem kriem. Mai: ang plak plih ex yaox been pa liang tix tawx. Ceu an kix viang ang mawh khawm uik tom nie ex yaox daux pa susaoh cub (C.P.M).
Dah dee tix blah ang kix nyang si toe lox plak cie tix ka lai si gang khri. Mawh kheu nan kix shiao lox si kah tang meung tang praix ka daux krax krub siyiex. Ka daux krax rawg buan, rhax lai, mai:krax pa tawx riang rao plak ju khuan mai: lox si kah cie tix kawx ex yaox bawg tix blah heue. Pui ku kaux chix tix viex daux ceucao khraox mai: krax krub krai vai sa daux lox si kah cie tix. Pa mawh sara pa tawx riang rao ka lox si kah plak ceu pui iak, kix nie sipub mai: ceu pui an kix mai: pon tix sum ceucao khraox heue. Pui ceu in kix, kix pon tix plih ceu pa yaox kix daux ngai lai mai: lox si kah cie kix. Pa mawh sara pa tawx lox buan tix blah, kheu kix shiao lox si kah tang meung bawg yam tawx kix lox buan te te awm koe: ding si nax pui ceu mai: kix heue.
Ka daux meung plak klip si ngaix, kix koe: pak peung pa tawx lox buan been tix kaux mai: tix kaux mai: kix rieb Yesux khrit been tix kaux hoik tix kaux. Ka daux bang susaoh ting in kienie mawh pak peung pa tawx lox buan nyiex ma: mai: teei num:riah ka daux paox plawk paox nyhawm: pui ceu. Pa mawh sara (C.P.M) kix, kix doh rhawm ka ceu in khan kix mai: phan kix pon pui pa yumrhawm: tix kaux kix sau riang tix kok nyiex ma: pui an heue. Khaix an lih tix mawh nyiex pui yumrhawm:. Tom nie krax yumrhawm: lih tix mawh cub nyiex cub ma: ka daux ceucao mai: pa mawh cao: kaing nyiex thung bung ka kix heue.
Ka daux bang susaoh grawng sum sang ceucao khraox, son sang tawx kix krax cum rawm ang kix tuk bawg yam rheeng kheu krax pa pheet pa gau. Ex hoik gau ka kix grawng kawn:cau Siyiex ka ang kix nyang loh rhawm si dah si du kawx tag sang caw tix gau heue. Khaix an pui pa yumrhawm: khraox kix jah tix kham mhai: sak se: mai: kix hoi k mawh pui pa jah tix sum ceucao khraox. Ka daux bang susaoh in, pui pa riex ju tix kaux jah tix laig li daux meung Ka la lung ka daux num liang nawh pon tix sum ceucao khraox (42) mu. Ka daux bang susaoh CPM cub sara kix kraix khrawm ka pui pa yumrhawm: khraox mai: kieh kix sum ceucao khraox heue. Ang kix fah rhawm ka haok huan kawn:pui ceucao daux ceucao prim heue.
Ka daux roi pak peung krax sum sang ceucao khraox, ex yaox grawng krax pa cai: rhawm ting heue. Awm kaing jhaw pa taoh pui mawh krax pa ting ceu, kheu nan caw tix een krax bak pa ting son sang pui loh rhawm. Pui pa yumrhawm: khraox yam yaox kix mai: krax pa tugtiag tugte kix pon tix plak jhi pui yaox rhawm pa blon kua pa koe: ka daux kix heue. Krax pa lhat graung mai: rhawm pa sang deeh khaix awm tag sang yien, nyheet ka bang susaoh CPM.
Rhawm pa kua kienie viang chix tix awm pa kok ghauk ex ka pa gut pa yeen mai: chix tix mawh krax pa sau ex bee ngu son ting riang heue. (Yaw sux 1:6 )
Krax bang susaoh grawng sum sang ceucao khraox kienie [**] chix tix lih daux krax grawng pa nu pa khawp. Nu son sang kix rieb ka Yesux khrit. Chix tix koe: grawng pa ang moh paox plawk paox nyhawm: kix. Dah dee tix blah pui tugtiag tugte ka pui pa lih tix mawh khrityan, tix blah kix plaux tix tik heue. Viang pui yumrhawm: kix ot si nax pa caox pa khin pa nu pa khawp awm in kix kawx kix teei riang rao ka gum lox pa tawm Simiang Yesux heue. ( Ma Thie 10:17-25 ). Kheu krax pa gut yeen pui pa ang yumrhawm: kix to: hu: dee si ngai viang mawh nan pui pa yumrhawm: kix mawh pui pa cong pa riex mai: ap pong ka ju tix heue.
Daux meung tix meung kawx mawh, daux pui ceu cad tix ceu kawx mawh yie koe: krax pa grai glip plak cao: kaing mai: krax pa hit plak ju khuan. Grawng ceu in kix chix lih tix mawh kheu krax pa saoh naing, krax pa tuktiag praix klawng, mai: krax pa dux loh dah dee kix heue. Krax bang susaoh grawng sum sang ceucao khraox yie lih tix mawh daux bawg yam an heue. Krax laux krax guah kix kawx lih tix mawh baux bawg yam in heue. Ex caw tix jah krax bang susaoh grawng sum sang ceucao khraox daux baux yam in. Bawg yam prung prang krax pa kaux rhawm mai: krax pa yien yawg awm jhawm ex pui ceu sawg dee een rhawm pa mhawm mai: sawg dee pa kaux rhawm son ju tix.
Kheu ceucao khraox kix lih hoek tom nie, krax pa keh lih cao: kaing pa mhawm kienie mawh pa blon koe: ceu son bang susaoh. Phan cao: kaing ceucao kix baox thie krax gau kix daux nyiex cawng kienie krax bang susaoh chix tix dah rau heue. Ex caw tix yuh sa tix son ang krax haok huan rau ka daux ceucao Caw tix mawh krax gau pa khaw mai: daux kaing jhaw. Caw tix mawh krax gau pa chix tix joh jhan daux krax bang susaoh grawng sum sang ceucao khraox. Krax pa rieb gau daux kaing jhaw kawx tix mu mai: tix mu ang awm paox. Grawng pa gau ex tix jan hoik tix jan kawx kied mhawm. Num:riah pa mawh krax tawx lox buan, krax cu yi ping nya son cao kaing mai: pui pa sum sang ceucao khraox kawx ang koe: ang chix. Sara cao: tawx lox buan kix tawx cu yi ping nya son cao: kaing ku jheeng jheeng son krax bang susaoh grawng sum sang ceucao khraox heue.
Ka daux kak kaing mai: daux cub caw ceucao ang chix tix thung krax pa sum sang ceucao mai: been krax thung mai: si awp khaing num kaing phan ang mawh nan pa jhawp khaing num kaing.
(cells) phan ang mawh nan cao: kaing ceucao nyiex tom chix tix tat kaing mai: nhie kix yuh kaing heue. Ang caw tix pau jun kix gum lox si awp plak piang ka daux kaing jhaw pa tawx lox buan, kaing jhaw pa sum sang ceucao khraox heue.
Ka daux kak kaing mai: daux cub caw ceucao ang chix tix thung krax pa sum sang ceucao mai: been krax thung mai: si awp khaing num kaing phan ang mawh nan pa jhawp khaing num kaing.
Sara cao: pa tawx lox buan pa viex daux krax bang susaoh grawng sum sang ceucao khraox kix ang lai lo tix thung bung. Ang kix lai shiao thung viex pui mai: krax pa joh jhaong plak khaix kawx ang lai lo tix yuh. Jauh saw pa ting ceu mawh krax pa yawm ex pak peung tang meung mai: kieh ex ting lhaong pak peung pui ceu tix heue. Ex gau pui pa yumrhawm: pa khraox ka lai si gang khri, tang: ex teei bawg yam mai: keh tix mawh cao: kaing. Ex caw tix tawx krax keud krax sawn: ka sara cao: si diex daux ceucao dee ang pui tawng heue.
Phan ex jhak carang sara pa viex daux bang susaoh ex chix tix ah carang pa son nai:. Pui an kix yaox jhawm saux, krax lhat graung, pa kaig tua, bawg tix blah kheu krax iak riang kix yaox krax kha rhawm. Cao: kaing tix blah kix sa lao: sara an kix ang kaux cong ka plak khuan. (Plak jhi 12:12 ) Yuh ka mawx kawx ex yaox krax pa kha rhawm kha rhi cie sara in kix. Sang tawx cu yi sa tix ka sara pa tawx lox buan kix bawg yam kix yuh kaing jhaw. Een sa tix ku jheeng jheeng, tiebtie mai: ngah tom pex, mai: teei riang rao ka daux krax rawg buan heue.
********************************************
Krax bang susaoh grawng sum sang ceucao khraox mawh kaing jhaw pa ting pa lhaong cie Simiang Siyiex, buan son pa ting pa lhaong mai: krax pa chaox rhawm chaox rhi yuh kaing tau mai: ex. Ka daux krax bang susaoh grawng sum sang ceucao khraox kienie koe: ceu pa sara cao: tawx lox buan kix teem gaw joh jhaong daux kaing jhaw. Ang tau mawh glawk jan khawm uik. Glawk tix blah kawx mawh pa ting ceu heue. Viang mawh nan krax pa susaoh awm in krax kaing jhaw pa yuh kix lih tix mawh cie pui mawx cie pui an heue. Mawh kheu nan plak sara cao: tawx lox buan kawx kix hoik laug khaix tat kix rhawm mawh krax grawng mawx pa ting ceu, khaix an kix tag caw tix sau riang rao son sang lih tix mawh kaing pa blon mhawm:.
Mawh jauh saw pa ting ceu son krax bang susaoh grawng sum sang ceucao khraox. Jah si ngaix khraox kaing khraox kawx caw tix jah. Mawh kheu nan ex caw tix yaox si dawng dee ghoik ceu pa tix tag sang lih tix mawh. Mawh kheu nan sara cao: tawx lox buan ting kienie tag jah tix sum ceucao pa khaw mai: pak peung ( C.P M ). Awm pa jah kix yuh nan grawng pa tawx lox buan mai: krax pa gau tix tawx son sang pon sum pui ceucao khraox kawx caw tix jah daux ceucao nyiex daux bawg yam tix mu heue. Pak peung pa yuh pui phao voe dix awm pa khre son tawx lox buan, khaix an krax tawx lox buan, pa tawx krax gau, khaix an krax pa sum sang ceucao, awm in ex yie yuh tix ceu hoik tix ceu. Paw lai shiao awm pa prim.
Awm sara cao: pa tawx lox buan ting pa jah tix sum sang joh jhaong ka krax pa susaoh grawng sum sang ceucao khraox kawx caw tix tawng grawng ang kix nyang bax kub daux bawg yam kix, krax lhak krax kua, daux num:riah pa chix pa keud kix. Riang rao kawn:pui pa koe: mai: ex, pui yumrhawm: pa cu nghiet ka gum lox Siyiex kix mawh num:riah son ex. Ex caw tix shiao pui phung hun an kix heue. Ex caw tix chawk lox chawk in, “ Koe: a lo pa tix son sang lih tix mawh bang susaoh grawng sum sang ceucao khraox?” Ka daux krax grawng peung ku ceu koe: (1) Kaing krax rawg buan (2) Krax gau gum lox Siyiex (3) Kaing pa tawx lox buan gaux rhawm rhi, mai: (4) Kaing pa sum sang ceucao khraox. Kaing jhaw tang dah pa sum ka piang rong pa ting ceu (4) ceu an kawx kawn:koe: heue. Krax been paox plawk paox nyhawm:, krax pa si toe taing vheuk, krax pa guah tix teei beeh glawm: mai: kaing jhaw tang ceu kawx kawn:koe: tom nie heue. Mawh kheu nan son sang mawh bang susaoh ang chix tix lih mawh khaing sara cao: tawx lox buan tix kaux, cub caw been li tix cub heue. Caw tix mawh ka daux krax grawng pak peung ku ceu.
Cao: pa si toe: vheuk daux krax grawng pa mhawm kienie nawh caw tix yuh kaing tat dud pa sang kieh nawh mawh mai: pa sang yaox nawh krax pex pon. Kheu sang yaox nawh bang susaoh grawng sum sang ceucao khraox pa mhawm caw tix pex tiang ka pa tieb pa tie jhawk pa krix khan kix heue.
Sara cao: tawx lox buan ah yuh nin “chix tix guah Cao: si toe: vheuk tom khaw caw pa mhawm mai: cao: si toe: vheuk tom khaw caw pa ang mhawm. Nawh tag sang ploe lih bawg yam tieh thiang kix ku ceu heue”. Viang mawh nan ang tie krai son sang tieh thiang ex kaing jhaw pa cheuk cheu tix khawm uik. Viang mawh nan caw tix mawh kaing jhaw pa kaux pa hoek dee khawm uik.
Cao: pa si toe: vheuk daux krax grawng pa mhawm kienie nawh caw tix yuh kaing tat dud pa sang nawh yuh mai: pa sang nawh yaox son sang cheung daux kaing. Kheu sang yaox nawh bang susaoh grawng sum sang ceucao khraox pa mhawm caw tix pex tiang ka pa tieb pa tie jhawk pa krix khan kix heue.
Krax pa ruat si mie lox buan gaux rhawm gaux rhi paw kieh mawh kaing pa nu nai: tix yuh. Sara cao: tawx lox buan tom nie kawx hoik tawng caw tix yuh kaing daux si mu si ma. Ka daux krax pa vawg kriem kre caw tix shiao been “Krax pa teei deeh pawk gaih” . Ex caw tix kraix khrawm ka pui pa yumrhawm: rieb tix teei ka Siyiex, khaix an caw tix yuh kaing jhaw deeh si toe: tom si dah. Plak sara cao: tawx lox buan kawx caw tix chix lox lai pui ceu cie mawx cie an. Kieh kaux cong daux krax yumrhawm:. Nawh tawx krax gau glawk jan mawx glawk jan an. Khaix an nawh sum ceucao khraox tix mu:. Sara cao: tawx lox buan kienie nawh tuk taix yuh kaing tau mai: cub caw been li yuh kaing daux cag bhaung, mai: cub caw pa tawx lox buan khan kix heue. Khaix an nawh kraix khrawm ceu kaux pui pa rieb tix yumrhawm: mai: dah dee ot kix. Khaix an nawh tawx krax gau ka pui khraox an kix, mai: shiao ka daux pa sum kix ceucao khraox heue. Pak peung in kienie phai tix hu: mai: ceucao khraox kawx lih tix koe: phai heue.
Kieh pui yumrhawm: khraox kix si dawng tawng lhaing lhaing grawng yam jah kix tix rieb ka Yesux mawh krax pa klawm khaox lhak. Krax pa yieh laux, pa tugtiag tugte, mai: krax pa tawx ju kix kawx tag sang sipub. Ang ex caw tix daox am: keud lud kah. Ceucao bawg liang ka daux tawm taix kawn:cau Simiang Yesux kix kawx hoik sipub mai: ceu in khan kix. Pui khan kix tag sang sipub mai: grawng ceu an kix ka ang kix nyang bax loh ju tix. Chix tix mawh yam jah kix tix mhong gum lox buan gaux rhawm gaux rhi mai: rieb ka Yesux . Plak ex pa hoik yumrhawm: kawx ex tawx krax tawng krax yung son pui khraox kix tawng ngawh jum pa loh kix ju prim mai: ju khraox. Caw tix gau ka kix mhawm mhawm. (Ma kux 8:34 )
Pak peung pa caw tix haok huan daux ceucao khraox mawh krax pon teei ex pui ka daux Yesux khrit. Kieh mawh kawn:cau pa mhawm mai: plak plih pak peung pui cub pui caw. Khaix an priex son sang mawh pak peung ceucao. Viang pex hoik shiao been in kawx kawn:koe: been tang ceu heue. Sara tix blah kienie kix kraix khrawm cub pui pa ang yumrhawm:. Kix yuh krax krub mai: pa tawx lox buan. Krai kix mhong grawng lai si gang khri. Kix kieh pui pa ang nyang bax mawh pui khrit khan kix pon riang su saih krax pa susaoh mai: jhawm jheet pa sum sang ceucao khraox. Bawg khaix an kix plak plih krax yumrhawm: kix awm pak peung ceucao nyiex ma:.
Awm pa hoik krai ex grawng hak tiex Yang shing daux meung hawx. Ex yaox been krax grawng pa ting ceu. Ka daux pa sum kix ceucao khraox awm pak peung POUCH kienie kix kraix khrawm tix gau lai si gang khri. Kraix khrawm tix krub krai vai sa. Kix plak plih daux lai si gang khri mai: kieh kix cu nghiet tix yuh. Kix pex pon ka grawng ceu an kix. Shiao ka cao: kaing daux ceucao pa ang teei riang khix. Yuh kaing ka daux ceucao nyiex mai: ceucao (cells). Ex tag sang pon krax pa pex pon.
Phan ang koe: cao: kaing ang chix yuh. Yie lih tix koe: lox pa thiang gaih pa mawh grawng lox “ ang tau tix chix haok huan”. Mawh kheu nan een cao: kaing tom nie, mai: yuh kaing ka daux glawk jan. Pex kawn:doh rhawm grawng pa susaoh Khambawdiya? Kix een pui kuad song: (7) kaux ka daux ceucao khraox ku dah. Ka daux pa sum sang ceucao khraox mai: pa susaoh tang ceu kawx yie shiao kix pak peung cub caw cao: kaing. Kix pon keh pui pa thung bung tom nie. Khaix an kix hoik rien tix baox thie ceucao khraox ku dah heue.
Via ka been pa laug tix teei cao: kaing daux ceucao mai: tawx kix haok krax gau tom rheeng kaing khix kaing num. Yuh awm pak peung chawk pawk deeh si ngai mai: yuh kaing jhaw ka daux nyiex yaong, teei krax gau sipub ka taix yaox ka ngai. Ka daux pak peung in kienie haok krax gau tix khix mai: ing yuh kaing jhaw ra: khix. Ka daux ra: loe: num lih tix mawh krax haok huan. Khaix an grawng krax gau son sang mawh kawn:cau pa mhawm mai: cheung daux kaing jhaw, ex caw tix teei bawg yam kaing num. Viang mawh nan ang laux tix yuh kaing jhaw. Krax gau pa blon lhaong kienie viang koe: buan son, son cao: kaing kawx tag sang kieh laux yuh ka bang susaoh grawng sum sang ceucao khraox heue.
Cub sara pa tawx lox buan khan kix viang kix cheung ka daux pa sum ceucao khraox kawx lih tix mawh sivix ka daux kaing yuh kix mai: daux pui ceu dee yuh kix. Bawg tix blah kix laig rhawm daux kaing yuh kix mai: ang kix lai sang plud tix tawx cao: nyiex yaong kix yuh cao: kaing. Mawh kheu jah yam jah kaing jhaw caw tix tuk taix yuh kaing mai cao: kaing nyiex yaong. Caw tix ap pong beeh glawm: ka grawng krub krai vai sa mai: krax pa sum sang ceucao khraox. (2 Tix mo se 2:2) Sara cao: kaing pa tawx been li kienie caw tix lih khaing daux kaing kix awm bawg yam pa keeng. Awm pa ah ex MAWL, Pak peung, krax teem, yuh sa tix, mai: krax lih hu: kix caw tix si dawng mhawm mhawm. Khaix an ceucao nyiex yaong kix tag sang sum ceucao khraox ka daux pa kua rhawm pa ting pa lhaong hu: si voe: heue.
Bawg yam kum:kawng: ex mai: sara cao: tawx lox buan kix ka grawng bang susaoh grawng sum sang ceucao khraox, grawng tang ceu pa haoh hun kawx yie lih tix koe: heue.
Jauh saw pa blon mhawm son sang shiao ka pui pa gaw teem daux kaing jhaw mawh krax pa pon si nax ex pa yuh paox pie heue. Pui pa sang teem ka daux bawg yam pa dawd kix sang teem ka daux si mu si ma pa mhawm:. Viang mawh nan krax pa teem kix tix blah ang joeng mawh ngie pa giex going, kieh mawh pa tieb tie son krax pa sum sang ceucao khraox. Krax pa sum tix tawx nyiex buan, krax pa teem riang khix ka sara cao: si diex, mai: krax pa sawg pa teem pa coi khan kix lih tix mawh pa tieb pa tie jhawk pa krix son bang susaoh heue.
Rawg buan mai: hu: krax, (Prayer Walking), yuh kaing jhaw pa tawx lox buan, grawng ruat lai ruat, tawx krax keud krax sawn: ka pui pa yuh kaing jhaw Siyiex, mai: jah ka pa teem pa viex ka daux kaing paox plawk paox nyhawm: caw tix viex khawm rhawm khawm rhi heue.
Pui pa teem gaw kix chix tix teem ka sara kix mhawm mhawm. Kix chix teem ka sara pa iak riang tix blah, pui pa ang chix lox si kah pui gawng kix, krax pa nu pa khawp daux been yung yi, mai: krax pa nu pa khawp daux nyiex ma: kix kawx chix tix teem heue. Pa blon ting pa blon mhawm krax teem gaw mawh krax pa ruat riang su saih mai: krax pa plih rhawm kua kix heue. Cub kix kienie hu: ka dah dee, dee si ngai mai: sawg pui pa grai daux khuan, yuh kaing jhaw pa cau Simiang Yesux khrit, mai: kieh sara pa tawx lox buan kix mai: pui pa yumrhawm: khraox kix koe: riang rao heue. Krax moh pa chaox rhawm mai: krax pa cu nghiet awm in chix tix pre haok huan daux kaing jhaw heue.
Num cub caw cum rawm mai: num been li kix caw tix yuh paox pie son sang grum naog pa cau Simiang Yesux khrit. Pui pa ap pong son Siyiex caw tix mawh pui pa tuk taix yuh paox pie mai: pui pa ralai tix yuh kaing jhaw heue. Viang mawh nan krax bang susaoh grawng sum sang ceucao khraox kienie riang su saih mawh pa ting ceu son yam jah tix sum mai: son sang haok huan heue. Ka daux cao: kaing pa thung bung kix kawx phan kix koe: riang su saih son ceucao kix chix tix teem ka bang susaoh pa ting heue. Plak sara cao: tawx lox buan kawx yuh krax ra lai tix kum:kawng: grawng riang su saih, tawx krax keud ka daux cu yi ping nya, mai: jhi ex yaox pak peung phek tiem ka daux pa susaoh tix kraix khrawm heue. Daux krax daux glawk cie sara pa tawx lox buan mai: cao: thung bung kak kaing kix ang awm paox. Cao: pa tawx lox buan kix caw tix jhan riang daux pa vhaik. Caw tix hu: daux pui ceucao pa ang nyang hoek lox buan gaux rhawm gaux rhi. Caw tix viex pa riang hu: daux kix. Cao: thung bung cub kak kaing kix kawx kied si daing vieh beeh glawm: kix heue. Cao: pa tawx lox buan kix kawx ang chix tix briex lak pak peung, mai: ang chix tix sugsag daux kaing jhaw kix heue.
Grawh grawng in kix kienie joh jhaong kix bang susaoh grawng sum sang ceucao khraox. Viang mawh nan kawx chix tix mawh pa tieb pa tie. Bawg yam lih tix mawh pak peung nyiex buan pui ceu, kix een ngawh jum ka ceu an heue. Kix rien rhawm tix priex ka nyiex buan an heue. Pa mawh pak peung bang nyiex awm nyiex cawng lai si gang khri, nyiex cawng gau lai, nyiex pai si dah kix kawx kaoh khaing tang meung heue. Dee ghoik mawh krax nu krax cien kheu ex peung rhawm ka tang meung ku jheeng jheeng riang rao haok huan krax sum sang ceucao mai: krax pa tawx lox buan kix kawx iak riang yawm hu: si nyek si nyek heue.
Ka daux meung plak klip si ngaix kix ran: tix tawx grawng nyiex buan. Meung plak klip si ngaix kix sum nyiex buan ting khaix hoik hoek been li khrityan ka kix (300) num. Ka daux baux bawg yam (300)num an grawng been li kienie phai hoek ka plak hak tiex klip si ngaix heue. Kheu kix sum tix tawx nyiex buan tix taix neh awm pa hoik tawx kix kaing jhaw pa mhawm ka kix pui pa yumrhawm: pa khraox heue.
Grawh grawng in kix kienie joh jhaong kix bang susaoh grawng sum sang ceucao khraox. Viang mawh nan kawx chix tix mawh pa tieb pa tie.
Phan mawh grawng in, son bang susaoh grawng sum sang ceucao khraox mhawm: kawx mhawm:, ang mhawm kawx chix tix ah. Pui cub caw tix kaux phan cub caw kix tawx riang rao ka bang susaoh an nawh kawx rawt viex khaix kix heue. Viang mawh nan jah cub caw mai: pui cub caw kix ang viex rhawm tix yuh kienie ang tie lih tix koe: buan son tix tix. Phan ex ang jhak ka son to kaux cao: tix mai: son cub caw tix nong nong viang mawh nan yuh kaing jhaw ka daux ceu kaux Yesux khrit kienie krax bang susaoh an kied koe: buan son heue.
Cub pui pa chix ne kix ah grawng in yie koe: been pa lud keud daux bang susaoh. Chix tix khaw caw viang mawh nan ang chix tix mawh kawx koe:. Pui tix blah mhaing kix tix gau grawng lai si gang khri. Viang mawh nan awm meung I jiptux kix koe: cawng lai si gang khri pa mawh Alesandux pa jah kix tix sum heue. Ka daux cawng lai si gang khri an kienie awm: lih koe pa tawng grawng lai si gang khri tete been pa lud keud kix kawx lih tix koe: heue. Sivix pa ting tom nie kawx lix tix koe: heue. Been pa caw ex teei pa mawh pa meh mawh ka daux phuk lai si gang khri heue. Ka daux baux been num jah ceucao, ceucao kix kied si daing haok huan mai: pre tix lih heue. Bawg yam an cawng lai si gang khri kawx ang nyang koe:. Kix hawt awm (Ma thiex 28:20 ) “Mai: gau kix kieh kix hawt yuh awm pa hoik nhie Aux ka pex khawm uik” awm an kix hawt yuh heue. Kheu lai baux in khaix an cawng lai si gang khri tom lih tix koe: heue. Awm pa ah ex yam in kawx kok ex si lah tix yuh kaing awm lai si gang khri an heue. Ex caw tix gau si diex awm lox pa tawm Yesux khrit mai: caw tix priex tix een heue.
Sara cao: tawx lox buan mai: cao: kaing daux ceucao kix chawk lox chawk tom nie? Pak peung ceucao (cells) mawh yuh ka mawh? Kawn: nyawm khan kix tag sang yuh ka mawx ngaix sin ngaix tuah daux ceucao (cells) lie? Cao: kaing ceucao (cells) kix kawx kham rieb ka grawng iak riang kix khaing ceucao num ting. Kix gau grawng lai si gang khri ka daux si ngaix tuah kawx kied si daing mhawm te te. Ceucao (cells) tix blah kix si mie tix kieh kawn:nyawm kix gau mai: kix heue. Si mie tix yuh krax krub krai vai sa tau. Viang mawh nan pui tix blah ah ang chix tix brawm tau mai: kawn:nyawm mai: caw tix guah tix yuh. Ang ex kieh ting lhaong ka been cie pui ka daux ceucao (cells) mai: guah tix tawx bawg yam son kawn: nyawm kienie yie ka priex mai: shiao ka kix heue. Phan mawh been pa yum ang koe:. Ex yaox yuh tix dah tix ceu. Kheu koe: krax kok si lah ka daux bang su saoh in cao: kaing kix kawx hu: si voe kix sawg cheuk cheu son plak haok huan mai: shiao ka daux pa blon mhawm heue.
Sara pa tawx lox buan tix blah kix yaox krax tang siyox bawg yam kix yuh kaing jhaw pa sum sang ceucao khraox. Kawn:chix tix jah ka daux krax pa mawh pa meh lie? Phan baox deeh jah ang lai chix. Viang mawh nan kawn:chix tix cox dee lud. Caw tix mawh bang susaoh. Ka daux bang susaoh in ang mawh tix jan hoik tix jan mai: khaing tix baux hoik tix baux. Mawh krax pa yuh mai: riang rao ting lhaong. Phan lih tix koe: kaing pa ting ceu kawx caw tix yuh gut gut kheen kheen heue. Phan mawh ka daux num ceu pui son lih tix mawh bang susaoh (C.P.M) caw tix yuh tom si dah ka daux pa ting riang rao pa kua rhawm mai: pa ting ceu khawm uik. Phan ex ang dahriang rao ex tag yaox mhai lhak riang su saih si dawng heue.
********************************************
Krax bang susaoh grawng sum sang ceucao khraox mawh kaing jhaw Siyiex. Ceu pa daox pa am mawh pui ceu kix yuh krax tugtiag tugte krax laux krax leeing ka kaing jhaw pa yuh Siyiex heue. Kheu kaing jhaw Siyiex mawh pa yuh ka daux pui ceu, Nawh si mie tix kieh ex yuh mai: khawm rhawm khawm rhi tix. Phan ang mawh nan pui ceu kix yuh krax pa tieh feen ka Siyiex heue. Krax pa keud pot cie Siyiex kawx kix tag sang yieh laux ka daux plak si voe ngai ang ah bawg yam plak khaix glip ngai ang ah ku jheeng jheeng heue. Sara ting pui pa viex daux bang susaoh in kix plak jhi pa yaox kix pa mawh krax pa laux pa yieh, krax pa tieb pa tie, mai: krax pa tieh thiang kix khawm uik heue. Tete krax bang susaoh in ang pui ceu kix chix yuh. Kheu Siyiex nong nong pa chix yuh, ex pui ceu caw tix rien son sang ang mawh krax pa tieb pa tie ka daux kaing jhaw. Ex pheet gau yaox krax pa tieb tie pa si dawng.
Pa mawh cub been li, num li ting, num been li mai: num jhawp ceucao kix caw tix tawx dee hak tiex yam tawx kix a khwang ka ceucao. Caw tix koe: bang nyiex. Caw tix koe: sara cao: si diex. Phan kix ang tawx a khwang awm tieb tie kix ka bang susaoh. Awm pui khrityan kix, kix si mie tix mawh krax mhawm bawg yam sum kix ceucao khraox. Kix ce: daux rhawm kix ceucao haok huan ting lhaong kheu krax pa grum naog daux (saphawax.) Viang mawh nan bawg yam lih sivix grawng bang nyiex ot, son kraung nyiex ma:, nyiex ot sara, son riang khix, kix kied yaox pa nu pa cien te te heue. Ang kix lai kan keh tix lih ceucao khraox tom nie heue.
Kheu kix een ngawh jum ka been yung yi kix mai krax ot krax koe: kix ang kix sang rieb ka been yung yi tang priex tang meung mai: ang sang yumrhawm: heue. Bawg yam an kheu iak pui pa yumrhawm: kix ang chix tix mawh bang susaoh. Ang kix koe: rhawm mawh khrityan mai: pak peung pa krub krai vai sa kix been plak klip si ngaix. Ka daux krax grawng tom nie kix koe: sivix ka daux ceucao kheu been yung yi pa shiao heue. Son sara kix mawh tix plak, mai: cub khrityan pui nyiex pui yaong kix tix plak koe: sivix kheu been li pui tom nie ang kix lai koe: rhawm kah. Phan ex ang yuh awm: Ra shia, Amerikhan, mai: awm: Urawpax bang susaoh in kawx ang chix tix pre hu: heue.
Viang kix ruat gum lox buan gaux rhawm gaux rhi ka piang hak tiex ku dah son ceucao kawx kix laux min pak ngai kheu khrityan pa mawh pak peung pui hak tiex. Kheu krax yumrhawm: ang koe: pa tuah klaung pui khrityan kix ang loh ju pa khraox mai: ang koe: krax haok huan kheu ploi rhawm kix daux ceu hak tiex heue. Kheu ang koe: krax pa im ju pa susaoh ka daux pui pa yumrhawm: khraox kawx ang kix koe: riang ka daux kaing jhaw. Pa mawh khrityan kienie caw tix rah see, caw tix si ngax. Mawh kheu ang kix koe: ceu an kix ang kix lai kan ah grawng Siyiex pui khrityan mawh cao: taoh heue. Ceucao pa prim tix blah ang kix hiex koe: rhawm ka daux kaing beenli, ang kix koe: rhawm tix sum ceucao khraox, ang kix koe: krax pa cai rhawm son sang taoh kix pui pa grai plak ju khuan. Bawg yam an sara tawx lox buan mai: kawn:pui ceucao kix ang kix lai koe: riang rao tix yuh kheu ang ceucao kix tawx krax teem krax coi ka kix heue.
Tom nie, pie sara cao: pa tawx lox buan kix ang sau tix tawx pak peung pa haok huan ka daux ceucao. Nawh hu: awm to kaux kix pa hu: yieh laux ka bang susaoh. Ku ceu khawm uik kix viex kraung khrai tang meung mai: krax keud krax sawn tang meung laig, mai: nhie pui yuh awm: an heue. Ang kix moh rhawm ka been krax ot krax koe: pui ceu pui nyiex pui yaong kix. Kix yuh grang pak peung nyiex buan tang meung kheu kix shiao: kraung khrai pa sum nyiex, cag teuk lox, khaox ngawm pa kaoh khaing tang meung mai: liag tix deuh ku ceu khawm uik khaing tang meung heue.
Son sang lih bang susaoh daux pui ceu tix ceu, caw tix teei num:riah ka daux been yung yi kix, krax ot krax koe: kix, mai: dah dee ot kix heue. Phan kix sum nyiex mai: ox daux yaong nyiex buan kawx kix caw tix sum mai: ox. Awm ka daux veng kawx phan mawh ceucao nyiex caw tix yuh daux nyiex heue. Phan ex sum pak peung nyiex buan ting pui pa sang mawh khrityan kix tag sang thiang ka grawng an heue. Gumlox chawk pui pa yuh kaing daux CPM mawh “Ceucao in tag sang pon tix pre tix sum lie?” Mawh pui yumrhawm: pa chix tix yuh ceu in kix lie? Phan ang chix tix mawh ex caw tix si ngax nyao ka been tang meung tang praix heue.
Mau kienie kied si daing mhawm. Sara cao: tawx lox buan kawx sawg priex im ju mai: mau. Koe: a lo son sang shiao ka daux krax daux grawng heue. Bawg yam hu: ruat ex si mie lox buan gaux rhawm rhi kawx caw tix shiao heue. Phan ex teei krax joh jhaong cie tang meung lih tix mawh jhawm meed. Mai: caw tix ot daux simu sima kix. Mawh kheu nan pui ceu pa yumrhawm: khraox kix ang kix lai chix yuh mai: rhawm kix mhawm mhawm ka bang susaoh heue. Phan ex teei mau khri khaing tang meung kawx ex ca shiao daux lai pa ruat, rediyo, mai: krax riang im cie Yesux kix heue. Paw shiao son ceucao nong nong. Kix tag guah rhawm rhi ka daux pui ceu kheu phan kix shiao son liag hak tiex, sum nyiex buan, mai: tawx riang khix ka mau pa joh jhaong heue. Ang kix lai pon sum ceucao mai riang rao kix heue.
6. Krax pa jhawp kien ka piang cao: kaing
Sara cao: tawx lox buan ting, cub caw kak kaing kix yuh krax pa jhawp kien ka piang cao: kaing kix kienie bang susaoh kawx ang chix lih tix mawh. Simu sima son kaing jhaw kawx hoik koe: daux lai si gang khri khraox heue. SimiangYesux khrit kawx hoik jhi tix tawx daux (Ma Thiex 4:18-22) pa lo kawn:cau kix tix yuh heue. Sara Paw Lux kawx hoik jhi tix tawx son sara cao: si diex mai: kuad song: kix daux (1 Thiesalonix) heue. Krax pa ting ceu mawh son sang mhawm jhawm daux krax tuah klaung mai: im ju awm Simiang Yesux khrit heue. Ang shiang mai krax chix cu yi piang hak tiex mai: mhok ping nya pa pon tix. Bang susaoh kienie si dawng tix lih kheu Phuk lai si gang khri mai: Si awp Si miang Siyiex kawx tag sang lih hoek heue.
Sara cao: tawx lox buan kix kienie kix yuh tix jan luan tix jan. Phan ex tiag tix yaox, kix yie gau awm son lox si kah pui ceu mawx pui ceu an, krax pa si toe daing, pa kham mhai: sak se:, krax pa keh tix tawx kawn:cau, pa sum ceucao, krax pa keh cao: kaing, mai: krax pa sawg ceucao khraox khan kix, kix yuh tix jan hoik tix jan heue. Viang mawh nan pui tix blah pa yaox ka bang susaoh pa lih tix mawh kienie kix kawx sang loh pak peung heue. Kix rieb tix yuh khawm uik grawng bang susaoh pa chix tix yuh heue. Kix kham mhai: sak se: daux pa ang kix chix lai. Ka ang kix nyang loh rhawm kix tawx krax gau, kix viex hu: nyiex buan, tawx beeh glawm:, mai: jhi kix yaox grawng pa mawh ceucao heue. Mai: kix priex tix tawx son sang haok huan mai: sau tix tawx riang su saih dom mawx dom an heue.
Mawh gum lox pa tiag ex yaox. Awm ceucao khiiet phan kix pon ceucao tix mu: ang kix lai sang hu: si voe:. Kix ca nyawm tix ngawng piang gawng tix dah ngie heue. Ang lai sang dux mai: kix ca ngawm tix kok pui pa sang yuh khrityan, Kix kum:kawng: ka daux krax pa yien yawg. Kix ca yuh pak peung awm kix ka pui pa khraox kawx heue. Phan mawh ceucao goe nyiex kienie su shiah ku jheeng jheeng. Kix cu ca tix sawg mai: priex khrawm kix pui pa grai daux plak ju khuan heue. Kix yuh krax pa tawx been li ting mai: tawx sara kix hu: yuh kaing dee nu dee cien piang hak tiex ku dah heue. Kix sawg pui pa ang nyang yumrhawm:, gau tix tawx grawng lai si gang khri, bluh kix hoek dee ot Siyiex, sawg pui pa grai, yuh kaing daux pa lhak haing, eue riang rao, phan dud si dax kawx sau riang tix hu: si voe: heue. Kix su shiah phai phai mai: kix taoh tix tawx pui grai daux khuan ka Siyiex mai: sum meung rao ma: heue
Awm pa hoik plak plih ex yaox been simu sima nong nong ngie. Awm pui pa yuh krax bang susaoh grawng sum sang ceucao khraox kix caw tix sawg siag plak plih ka pa keud pa sawn: cie Siyiex mai: pa thung Nawh cao: heue. Pa mawh cao: kaing kawx caw kix tix yuh kaing pa cau Siyiex pa jhi thung Siyiex mai khawm rhawm rhi khaing krax pa chix pa tawng kix. Paw kieh mawh pa tieb pa tie alo Siyiex. Yuh kaing jhaw Siyiex daux pa tiem rhawm mai: deuh rhawm ka Siyiex jheeng jheeng. “Krax bang susaoh” kienie mawh kheu Siyiex pa chix yuh nong nong ex caw tix hawt dee jhi siyiex mai: hu: mai: rhawm alo Siyiex heue.
********************************************
Viang lih tix koe: krax bang susaoh grawng sum sang ceucao khraox kawx kaing susaoh pa ang lih tix mawh ceu kawx koe: tom nie heue. Viang kix yaox pak peung daux krax grawng ka daux an kheu grai dee pa ting ceu ang lih tix mawh krax pa cheung heue.
Phek tem tix mu: mawh Musalin daux meung Turiki heue. Ka daux pa hoik luan phuan num dix, pui kaing rheng hoik rieb ka Yesux khrit. Daux 1992 num, pui pa yumrhawm: kix koe: ngie (50) kaux. Kix jah tix yuh kaing susaoh krax rawg buan mai: krax pa tawx lox buan daux beenli daux 1989 num. Viang nhim koi yam jah kawx pui tom nie loh rhawm ka daux 1995 num. Baux tix num kienie pui ceu an kix rieb tix cum rhawm diang 15,000 kaux haoh daux ceucao nyiex yaong kix heue.
Daux in si ngaix awm ex yaox pui pa khraox kix teek dah heue. Viang mawh nan kawn:koe: pui pa loh rhawm 20,000 tom 30,000. Sivix mawh ang kix sum tix tawx ceucao khraox son pui pa laig tix loh rhawm khan kix heue. Son pui pa hoek tix loh rhawm ang koe: nyiex buan mai: khrityan pa ang koe: ceucao kawx koe: tom nie heue. Phan ex keud tix yuh ceucao nyiex son kix kawx kawn:koe: bawg yam. Phan ex tawx krax gau ka kawn:nyawm ceucao tix blah mai: tawx kix jah tix sum ceucao nyiex kienie dee ghoik chix tix mawh bang susaoh pa ting.
Ka daux Afarika kawx koe: cub Musalin kix. Kheu krax tawx lox buan mai: cag bhaung, mai: riang im (video) pui 15,000 haoh loh tix mawh pui khrit heue. Ceucao koe: been (30) ngie. Phan ex ang yuh ceucao nyiex kienie dud kaing pa sang yuh ex plak khaix mai: pui pa yumrhawm: khraox kawx tag sang grai hu: heue.
Awm an krax tang siyox kawx kawn:koe: piang hak tiex tom nie. Cub sara kix keud pot ngie kaing pa chix tix pex son kix, yam lih tix mawh bang susaoh pa ting kienie ang kix lai chix yuh tid tix. Ceucao pa khraox kix ang lai pex ka bawg yam ting lhaong haok huan kawn:pui mai: ang lai chix priex ka ceucao kix heue. Awm pa hoik ah ex dah dee an kix chix tix mawh bang susaoh lie? Phan ex yuh ka daux krax pa siet pa viet kriem kriem kre kre chix tix mawh. Dah dee tix blah kied si daing nhim koi son sang sum kix ceucao khraox. Ex caw tix yuh phai phai mai phan pui hoik nie ka daux ceucao nyiex ex caw tix guah heue.
Ka daux dah dee an phan ex gau lai si gang khri mai: glawk, an mawh ngie si mu si ma tix ceu ngie. Phan ex tiag, ex gau tix tawx si min ting (5) tom hoek (10). Khaix an ex jah tix thung kix rieb ka Siyiex. Khaix an ex deeh gau glawk pa caw tix gau mai: kieh kix si dawng mhawm mhawm mai: kix tom phai haok huan. Pui tix blah kix gau tom lang, kix jah tix gau lai yam jah tom hoek lai plak jhi daux 110 tuah. Ex caw tix chix laug tix gau. Phan ex sum ceucao tix mu: daux ra: num ex caw tix sawg krax son sang pon sum ex daux ra: loe khix.
Awm an pa caw tix gau grawng lai si gang khri 12 tuah kawx caw tix hoik tix gau daux 12 ngaix heue. Ex krai pex mhong grawng bawg yam pa dawd. Paw pi awm riang rao pa ting, krax pa phai pa liiet mawh jauh saw son bang susaoh. Pui tix blah ah krax pa phai pa liiet mawh son sang dah rau. Ang mawh. Maix sang ah phan nhim koi mawh pa mhawm lie? Phan maix sang phai tawx krax bak yak maix lhaong. Tawx beeh glawm: nie ka pui pa yumrhawm: khraox kix. Krax gau son lai si gang khri mai: krax thung bung chix tix tawx tix bawg neh. Ka daux bang susaoh daux (Indiya) pui tix kaux sum ceucao (42) dah daux tix num heue. Dee ghoik cub sara pa tawx lox buan kix tag sang ah grawng ang kix sax yaox grawng ceu an kix heue. Kix yaox grawng ang mawh bang susaoh, kix sang yuh pa tix hu:si voe:.
Son sang pon ex tix yuh awm an, tix blah shiao bawg yam kaing num heue. Ex kraix khrawm grawng pa sang yuh, mai: riang rao yam hoek bawg yam kienie ex tag kaoh tix yuh. Krax pa tieb tie pa nu pa cien kix kawx ex pheet tix cheuk cheu mai: caw tix chix tiang heue. Bawg yam an krax pa nu pa khawp, krax kroh kroing khaox pa ang plix khankix tag tieh loh tix tag lih tai plix mai mhawm grang heue. Yuh mai rhawm pa vao tix heue.
Pa caw deeh jah tix yuh mawh krax susaoh daux plak khuan. Caw tix jah daux sok rhawm mai: caw tix ruk awm ngu ting. Pui ku kaux caw tix hoek krax taoh mai: tawng ka daux pa mawh pa meh. Bawg yam an maix maong tix jhak pa bak yak maix mai: paw doh deeh plak khaix mai: hu: si voe: tix diang hoik tix diangheue.
Ka daux pa im ju ex ku si ngaix Siyiex plak jhi Nawh yuh kaing pa ting pa lhaong ka piang hak tiex ku dah dee. Mawh krax pa daox pa am pa ang ex chix keud. Kheu pa yaox ex ka ngai ex tom yumrhawm:. Pui tom nie ah ka grawng in mawh bang susaoh grawng sum sang ceucao khraox ka pa daox pa am an heue. Krax bang susaoh in kienie ang tie tat tix een kheu grawng pak peung hak tiex rao ma, kheu pui ceu an pui ceu in heue. Ang guah kheu veng ting , yaong iak, kheu pui pa chix lai, pui pa ang chix lai. Kheu daux lai si gang khri Siyiex deeh sang yuh paox pie pa yien pa yaog ka kawn:pui kheu Yesux khrit heue. Bawg yam an Siyiex kok tix laug ka ex mai: yuh kaing jhaw tau mai: Nawh. Phan ex koe: krax pa cai rhawm mai: krax pa thux pa gleeing son bang susaoh an Siyiex kawx tag sang tawx riang su saih ka ex heue.
Ex yaox bang susaoh 5 mu: ka daux 5-num pa hoik luan. Pui 250,000 haoh hoek ka Yesux khrit. Phan mawh bang susaoh 50 mu tag sang lih tix mawh pui miex kaux? Pa ting ceu ang mawh kha nan si min. Pa ting ceu mawh ex yuh kaing jhaw ka daux gaux rhawm rhi mai pui pa hoik laug Siyiex ku dah ku dee. Phan ex yuh pak peung si liex Siyiex nie blon mhawm heue. Siyiex hoik taoh ka pui ceu khawm uik. Mawh kheu nan ex tiang tix hu: ka dee bak yak ex.
Pui pa si lah tix to: kix to: mai: rhawm kua pa ting. Pui tix blah tag sang lih khaing si lah. Pui tix blah tag sang taug. Pui pa si lah tix to: tix blah kix rieb tix teei krax pa kha rhawm mai: to: tom hoek dee bak yak kix heue. Pui pa awm in kix, kix shiao riang rao tom uik ka dee sang laig kix dee bak een. Kheu yaox kix dee bak een kix haok rhawm mai: kix plih riang rao pa koe daux kaux kix khawm uik heue. Pui pa tang to kaux Yesux khrit kawx si lah nawh hoik koe: (2000) num. Pui tix blah via khaing krax to: tix. Ang koe: krax pa kua rhawm mai: vhah rhawm ka dee hoek tix ngie.
Pui khrityan tom nie in si ngaix kix khre son hoek dee bak yak. Kix jhak ka roi su saih. Siyiex kienie tawx khuan si ngax singeh ku jheeng jheeng. Krax bang susaoh in awm Siyiex tiang tix laig ka daux hak tiex in. Deeh cied ciang ka to kaux ju tix mai teei riang rao pa ting khaing Siyiex. Phan mawh pa viex Siyiex ka daux ku ceu khawm uik pui ku kaux tag sang laig dee dang bak yak mai: riang rao tix mai: pa keud pot jun pot. (He Brie 12:1)**
********************************************
(1) cell Church mawh awm pak peung to kaux Yesux pa sum tix deuh mai: cub pui pa yumrhawm: kix. Pui pa yumrhawm: chix tix koe: 10 kaux tom hoek 30 kaux daux ceucao an mai: kix yuh krax krub daux nyiex phan ang mawh nan dah dee tix dah dah. Kix tix cub mai: tix cub si toe: daing paox tix, bawg tix blah kix si toe: daing mai: ceucao miex pa ting heue.
(2) Chronological Bible Storing mawh krax gau lai si gang khri glawk mawx glawk an awm been kreu mai: tawx lox buan ka pui ceu tix ceu ka daux been yung yi mai: krax ot krax koe: kix.
(3) Church Planting Movement (CPM) mawh krax bang susaoh grawng sum sang ceucao khraox ka daux pui ceu tix ceu phan ang mawh nan daux cub pui tix cub awm pak peung kha nan pre haok huan mai: krax haok huan ceucao nyiex yaong heue.
(4) End-vision mawh riang su saih dee ghoik. Bawg yam yuh ex kaing jhaw pa hoik khre daux si mu si ma kheu ex yaox krax pa bak een tix. Ka daux kaing CPM caw tix tiang hu: ka daux krax ting riang rao tom hoek dee bak een ex heue.
(5) Ethos mawh pa sang ah rhawm kua rhawm vao:. Ka daux kaing ghaok rhawm CPM kheu kix sang yaox bang susaoh pa ih rhawm rhi khri mau paox tix mai: plak ju khuan kawx caw tix haok huan heue.
(6) Exogenous mawh can ceu pa kaoh khaing tang priex tang meung.
(7) Exponential Growth mawh pak peung kha nan pre haok huan. Awm 2x2=4 tom mawh 4x4=16.
(8) Five Purposes of a Church mawh ceu pa ting ceu 5ceu (k) krax krub krai vai sa (kh) krax pa tawx lox buan mai: pa yuh been li (g) krax pa gau mai: keh tix tawx kawn:cau Siyiex (ng) yuh kaing been paox plawk paox nyhawm: (p) ra lai yuh paox pie.
(9) House Church mawh ceucao nyiex. Pui chix tix koe: 10 kaux tom hoek 30 kaux viang mawh nan ang awm mai: ceucao (cells).
(10) Incremental Growth mawh pre haok huan ka daux krax kleuk. Phan ceucao koe: 10 mu ku num caw tix pre tix lih 4-5 mu heue.
(11) MAWL (Model, Assist, Watch, and Leave) mawh kaing yuh tix glawk hoik tix glawk son bang susaoh.(k) krax plih pak peung (kh) krax pa teem coi (g) krax pa kuang pa kia (ng) ap kaing jhaw mai: lih hu: ing. Khaix an ceucao nyiex yaong tang yuh haok huan hu: si voe: heue.
(12) Mentoring mawh dee bleeh krax gau mai: tuk taix mai: yuh kaing.
(13) POUCH Churches mawh krax sum sang ceucao khraox. Daux krax grawng mawh (k) Gau grawng lai si gang khri tau mai: yuh krax krub tau (kh) krax cu nghiet ka gum lox Simiang Siyiex (g) Sawg tix plih pui pa ang teei riang khix mai: ap nawh yuh kaing daux ceucao nyiex.
(14) Precision Harvesting mawh pui pa sang sum ceucao khraox kieh nawh sawg pui pa yumrhawm: khraox mai: pa pheet tix gau. Kraix khrawm ka daux pui cub pui caw yam tawx lox buan been li mai: kieh kix yuh kaing pa tag sang hoek heue.
(15) Response Filtering and Feedback Loops mawh grawng krax pa tawx lox buan ku ceu heue. Kraix khrawm plak plih mai: yuh carang, Kraix khrawm ka pui mhawm mhawm mai: kieh kix viex ka daux ceucao khraox.
(16) RLTP (Rural Leadership Training Program) mawh kaing pa keh cao: kaing, cao: pa sum ceucao ka daux bawg yam yuh kaing jhaw. Kix shiao daux meung Khambawdiya. Kix tawx krax gau ka daux bawg yam pa dawd mai: ploi kix hu: yuh kaing. Khaix an kix deeh nhie kix ing mai: baox thie tix gau.
(17) Strategy Coordinator mawh pui pa deeh si toe: vheuk tom khaw caw. Nawh mawh cao: pa khre son sang jah tix yuh kaing jhaw. Nawh teei beeh glawm: tom lih tix mawh bang susaoh ka daux pui ceu tix ceu.
(18) Subsidies mawh mau khri pa joh jhaong mai: krax pa teem pa coi pa kaoh khaing tang meung. Kix teem ka sara cao: si diex mai: pa yuh kaing jhaw. Mawh krax pa tieb tie son bang su saoh grawng sum sang ceucao khraox heue.
********************************************