Kawn: Pa Grai:

Scene 1

N: Ex eue: lhax kaing ex. Lhax khaix nieh. Yiex kuad kuih eep awx.
( tawk simaox)
Eue: hoek tawx priex an.
Teei, tawx ceu aux mawx?

[sawm eep]
N: Nyawm lie:?
O1: Eue: nyawm.
O2: Keut Ngox pu lie?

Scene 2

(yam ih priex daux nyiex shiang)

N: Sau:, nyaux! Ai:! Lau teei plai baox ti kawng lie.
O3: Nawx, nawx, di: (din:) heue.
N: Eue: nie maix aux ang mawh simex lie? Ang: aux nyang yoek heue.
Tix kawng. Teei plai.
O4: Nawx! Kup, di: nix.
N : Sin ! teei plai tix kawng. Teei plai!
O5: Aw: Tawx plai tix kawng.
O5: Nawx, ah aux eue:, nie yoek maix Ngox. Nawx ex nawx di: heue: Nawx, nawx
Ex Ngox. Nie yoek maix khaix heue:.
N: Ai Pao: hoik tawng maix been aux. Ang; nyang kup phao:
O3: Nawx,
O5; Nawx, kup heue; kup heue:.
N: ih heue:, nyaux heue:, ih! Ih!.
O5: Nawx heue: Nawx.
N: Ih! Ih.
O5: Eue:, nawx di: heue:. Sidaing yoek maix mie ding heue:. Laux ex. Nawh hoik kup. Hoik kup plai nyaux ex, nawx di: heue:. Nawx ing: ex khaing: pao: heue: Ing: ex phao: heue:. Sidaing yoek maix.
O2: Ing: ex heue:. Ai Rai khai cheu:.
N: Aux krai:, Ot pex mai: Ngox sai yaox pex tawx Ngox pui khai cheu: lie? Aux krai: ang: maix tawng grawng. Maix mawh pa yaox ang: aux tawx pui khai cheu: tix. Pon khai: cao aux.
O4: Aux krai maix mhong. Yoek maix heue:.
N: Aux kawx vit, aux kawx vit cheu.
O5: Aux kawx vit:.
O4: Hu:!


Scene 3

Y: Pux ke: kaoh maix khaing dee mawx lie?
AY: eue: hu aux daux peem heue. Ot miex nox?
Y: Ot, ot.
AY: Aux ang: yaox maix krai miex koe: tin:, eue: tauh aux ted, teei rawm!
Miex! ang: yaox miex mawx?
M: Hoek miex Ai:, Kaoh maix khaing yuh tix kaing lie?
AY: Eue: ang: aux lai chix ah kaing yuh ex.
M: Eue; Ai:! sidaing tauk maix. Taux maix son miex, taux miex son yix pa mawh pux maix. Ex sang yuh ka mawx.
AY: Ang: caox miex. Aux ang; yaox Ngox Mao mawx.
M: Dawg lih nawh khaing nyiex tom: pon ngawp cao ieh. Ex sang yuh pu: ka mawx an:.
AY: Krai aux, ah aux ka pax sijheeng:. Pax paw tax hawt rhawm nawh, paw
Hawt rhawm nawh ah aux ka pa, ang; pax cu tix nghiet, nu tix ah.
M: Eue; Ai: paw tax ah nan, ang; maix yaox kawn: mawh nawh kawn: nyawm. Pax pux aik koe: ra kaux ngie. Aux sang yuh ka mawx. Ang: aux lai chix ah ka mawx ka Ngox. Ang: maix yaox caw ex tix sidiex nawh. Paw lai ah ka nawh. Pax pux aik ra kaux mawh aux sang hawt rhawm Ngox maix cee [IN: chi] aux hoek rhawm Ngox ang: tie mawh. Ex yaox mawh nawh pux. Mawx, ex ngieh tix ah ka nawh, nawh ang teh tix nghiet lox ex. Dong: ex een: ex lox nyaw ka nawh. Maix Ai: mawh maix kawn: Ai:. Ex peem maix. Pax Iet ot mai: miex. In Ngox ex ang: teem, ex ang: sidiex tau kawx ang: chix. Mawh ngie ih ex lox nyaw ka nawh. Ex ngieh tix ah nawh, nawh ngieh tix lih khaing nyiex. Nawh ngieh tix yuh ex yaox. Pax pux aik ra kaux ngie, aux kawx ang: chix tih nawh, aux kawx ang: chix tih maix. Caw ex tix ot tau mhawmmhawm:. Hoek nawh khaix nieh, maix paw tax ah lox caox ka nawh. Ca: ih ex lox nyaw ka nawh. Deh hoek nawh khaix ngie.
AY: Aux mawh chak aux plak ngai pax miex. Eue: nu tix keed. Kawn: nyawm kix yam in: Ang: aux som kieh pax laux rhawm.
M: Maix mawh pa nghiet lox miex. Nawh ang nghiet lox. Mawh kawn: iak Nawh, ang: Nawh nyang tawng tidtix awx. In: pax koe: daux nyiex tin, Pax caw tix prex rhawm tix. Ca: ih lox nyaw ka nawh. Deh hoek nawh khaix nieh.
AY: An, Hoik hoek kawn: pax an! Mau! Ngawm! Ngawm tin.
M : Ngawm Ngox. Ca: ngawm kawn. Kaoh hu: dee mawx lai ngaix lie? Ang: maix teem ex yuh kaing kawx maix caw tix ca: teem miex ot daux nyiex. Paw lai yuh nan khaix in: sax kawn: simex. Ngox!
A: Mau! Mawh ang: maix caox rhawm ka miex lie? Ah miex pa tix maix ang: ca: nghiet. Nyaux maix plai ang: mawh?
N: Puxke: lox pa ah maix tet nawx! Nawx lai cao mawh ang: aux lai som mhong: lox maix. Hoek ngaix mawx sigaix mawx ang ah sawg maix dee lut aux. Nawx! Ang: aux som mhong:. Nawx yam in:, it aux khaing: Miex it aux.
AY: Chak pax sidiex lah, Iet teei kraung aux nox eue: khoet heem: aux tix, miex laux pax awx.
M: Eue: kawn: simex.


Scene 4

(Hu: Ai Yawn mai: Moeng nawh daux Sipeem)

AY: Ngox hie nie ting rhawm nawh.
Y: Ang: som mhai som sikhawp jhawm:.
AY: Brax ting ting jhawm: lie. Kaing ting an pex mawh O: ang: pex sidiex nawh. Grai kawx ang: tie koe: dee pleeh. Ang: tie cu tix nghiet lox ex.
Y: Ang; nawh tie chak min plak ngai ex.
AY: Maix cawng chak kix koe: kix mie kaux maix yuh cix rang lie. Yuh maix cix rang maix tom tie chak kaing yuh kix. Pon sax aux kawx dee hoek tix chak pex lie. Koe: kix mie kaux uik?
Y: A.: [?] pa mawh pa teem yix koe: tix nga: loe.
AY: Tix nga: loe kaux? Aw… aw. eu.. Maix yuh cix rang mhawmmhawm: lie. Yuh maix cix rang mhawmmhawm: khaix maix tom tawx cix rang ka aux awx. Ah: ang: lox didix lai koe:. Ing yiex awx. A: pi awm maix mu: aux yong: ha .. ha.. aw…ing ex awx.


Scene 5

(Ngaox Hu: Fi: Ka I Noi)

I: Miex eu: yuh ka mawx Ngox. Caox maix ka pa tix? Aw: tawng aux sidaing hoah lox miex maix mai: puxke: maix ka maix ang: mawh Ngox?
N: I ..! Nawx! Maix paw lai simawt puxke: aux. Ang: aux som mhong. Ot daux nyiex nawh kawx kin haoh lox haoh sikah.
I: Ah aux ka maix sawg maix yuh kaing. Ang: maix tie nghiet lox aux mawh son maix.
N: I.. nawx paw lai krai lox kien. Nhie maix aux yuh kaing tix? Ang: lai som mhong lox maix. Sawg ex fi: khaing.


Scene 6

(Hu: Fi: Ngox mai: I)

O 1: Ah: Ngox an: sidaing rheen. Hu: nawh dee mawx lie?
O2: Ang: tie khi ka Ngox rie tix mawh hu: fi: ka Noi nox. Ang: maix tieb khi
lah.
O3: He.. ang: pax yuh tix khi rhawm ka kaw in rie nawh tix dex hoek.
Lhax lhax tix caong nawh dee dee hoek, hoik mawh pa ah ex ka paox tix.

(Ngox Hoek Ka Paoxgrawm tix daux Nyiex Plai)

N: Eu: Mau: heu: pex heu: nhie aux pex pau tix ang: pex tie pau. Eu .. Ai: Paong.
O2: An: Ngox hoek an:
N: Fang sox khaing: nhie aux pex pau tix ang: pex tie pau. Yuh ka mawh ha?
O1: Pau yix ha.. Chak.. chak.. plai in.
N: Nawx paw vi ah lox yuh nan.
O1: Sidaing rheen maix.
O3: O: tawx klang iak, tawk klang ting tix mu.
N: Yuh ka mawx ha. Koe: kaing tix nie pex tix pau aux?
O3: Tawx klang iak tix mu.
O2: Aux krai maix mhong chao pau yin maix ka tix. Taik Nyi Kwat mau Ai nawh. Yix tom pau maix som hu mhaing ka nawh. Ah nawh tix tawx pon taix khaix ah.
N: Mawh nhie nawh tix tawx in ngaix lie?
O3: Eu: mhaing nawh tix tawx te te in ngaix.
N: Paw.. pon krai aux ang: pex doh pon. Mhaing ang: mhaing ang: pex doh pon.
O3: He…phan nawh ang: tawx kaw in pauh nawh yum. Pat nawh yum daux bon in.
N: Eu: ex yuh nan ang: tie chix. Ex mawh nyux... ex ..
O2: Sau plai.
Ng: Hoik nhie pex hoek. Hoik yun pex krax ot ex nieh. Brax hu: ex ku ngaix. Ah pex tix hu: aux nhie pex pau aux ang: pex tix pau aux.
O3: He: yaox nawh tix pyaw rhawm tix ka koe: pao klieh tix mai: I.
O1: Rien tix mawh.
O3: Hoik prah nawh paoxgrawm moh tix heu:
N: Pex paw tax ah nin. Phan mawh nan chix lie. Ang: yuh ka mawx lie. kawn: prah aux I. Prah aux nawh daux liah tan. Aux ca hu: ka nawh tix vut ngieh. Lah...
O1: Ta plu pliet. Ang: cu nieh.
O3: Paw.. ang: chix. Grawng in ang: chix.
N: Ang: mawh.
O3: Grawng in ang: chix. Phan ex ang: teem pao tix yam yuh tix kaing mawh pa ang: chix.
O1: Mawh. ang: cu nawx.. ang: ex lai sawn nawh mawh paoxgrawm.
N: Mawh lie. Mawh tix cu nieh. Hu: aux tix cu nieh. Hoik luan prah nawh ot daux liah kaix tix now.
O1: Chix lie.
N: Hoik luan mawh ex paoxgrawm pix ang: aux doh tang rhawm khaing pex.
O3: Eu: an: heu: lox pa krai ex mawh an: heu: Mawh an nix.
N: Chix. Hu: ex ang: yuh ka mawx. Ex.. hu: ex naox. Rhawm aux mawh nan heu: ang: pex tak khi khaix. Hu:
O3: O: hoek sawn ngoih priex plai yaux yix tin nox heu: Caw ma din?
C: caw tix puan.
N: Hoek tawx kaix nieh. Nyi Khwat nyiex kix ang: nyang tawng hawx. Ang: ex nyang tawng nyiex Nyi Khwat kix liex. Pex ca: teei in haix. Ex hu: Hu: ex. Nyiex Nyi Kwat ang: tie tawng.
O3: Ex hu: lie.
N: Hawx. Ai nyawm ka ngai hawx.
O3: Ca: pau aux tin hawx.
N: Eu: eu: Nyi Sin pau ex tin noax. Ca: chak maix hu: naox.
O3: Ngox pex pau aux tin. Aux ca: hu: chak Ngox Khwat dex haih hawx.
N: Chix. chix maix ca: hu: chak naox lah.
P3: Aux ca: hu chak haih hawx.
Ng: Rai: kwan maix chak krien neih.. Hu: chak : [?] hu: maix kix naox nieh.
O3: Ngox, mau pa mhaing maix tix tawx daux in ngaix ang: tawx yuh ka mawh maix chix ang: tawx lie?
O4: Ie: mawh ang: nyang koe ang: nyang yoax tix tawx ka maix.
O3: Paw lai krai lox pie yuh nan.
O4: Kieh koe aux kawx tawx. Kieh koe singaix mawx aux kaw tawx.
O3: Ang: chix. Ang: chix.
O5: Mawh heu: paoxgrawm heu: Ang: koe ex chix yuh ka mawx pao lie? Chix ih nex pao tix lie?
O3: Pax paw lai ah lox yuh dex ang: pax tawx mawh ang: chix naox.
O4: Mawh ang: nyang koe ex sang yuh ka mawx. Phan mawh mau taik an ang: nyang yaox tix tawx in singaix. Som yuh pex pao tix yuh.
O3: A: prai chawm pax. Kaw kiex in.
N: Ex lih. Ngox yuh ka mawx. Hoik nhie maix tix tawx mau ka Ai Pao in ngaix maix kawx ang: tawx yuh ka mawx? Ting rhawm maix ka kix.
O5: Ang: aux nyang yaox tix tawx.
N: Nyi Sin…Hu: hu:
O5: A: a: yuh ka mawx? Hoik krai kix lie?


Scene 7

(Daux Nyiex Ai Yawn Mai: Moeng nawh)

Ay: Hallo: e: mawh aux hax. Yuh ka mawx ah maix? Aw: koe daux nyiex sidax?
Mawh lie? Aw: eu; Pau ex daux nyiex lah ! Maix cao pau ex daux nyiex. Yiex moeng yiex kaw hoek hie. Hawx. Kwoi [? sic] pax lah. E… shi …
Y: Pe ke mawx pa tah maox rhiem hoek ka maix? Mawh grawng pa tix? Yuh Ngox ka mawx?
AY: Ngox .. grawng Ngox .. phit kix paox tix. Hoek miex an.
M: mawh ah kix ka mawx khun.
AY: Ang: mawh tix miex ca: simah kix mai: pao tix daux liah. Tah kix maox rhiem hoek. Ang: kawn: coax miex. Pax paw khi rhawm liex. Yix Iet kaw hu chak tix vut ngieh.
M: Viex pa Iet hu: chak mhawm: Ai!
Y: Miex! paw yuh pax laux rhawm grawng in.
M: Eu: Iet.. Sang sidiex ex yuh ka mawx ang: tie lai tawng. Ah ka mawx ang: tie nghiet lox ex. Susak rhawm aux ka nawh.
Ay: Iet hu: loh kraung maix, maix tom tha tix plih kraung ih aux kix lah! Hu: Iet. Hu: tix rut. Miex pax paw khi rhawm lah. Ang: mawh tidix yong: ang: nie..Ang: coax nie krai kix ka aux ang: coax awt yuh tidix ah kix. Hu: chak aux nawh tix vut liex.
M: Ngox kieh nix kaing lih tivut tivut son ex. Ang: tawng dee sang yuh tix. Vieh pax Iet hu: chak hawx.
Ay: Mawh hoik lih kaing. Ex ang: hu: chak nawh ang: tie chix nan liex. Mawh hoik kok pui ex. Pax cao laux pax hawx. Ang: yuh tidix liex. Ang: mawh kaing ting.
M: Nhiet pax nhiet hoek. Pax nhiet hu: nhiet hoek hawx. Som tawng aux nan. Nyawn nawh deeh ing: daux nyiex mhawmmhawm: hawx.
AY: Aw: aw: e:..
M: Maix ah ka nawh mai:
AY: Laux pax hawx.


Scene 8

(Tawk Ngox Mao)

O5: Ngox Mao: kawn: tawng maix pa yuh tix ka aux lie?
N: Nawx maix paw ah nan ka aux! Yuh ka mawx grawh grawng pax Ai Pao ang: tie shiang mai: aux lie.
O5: Ang: shiang, mawh pa yuh lie.
N: Ang: tawng!
I: Paw ta tawk Ngox! Pex paw ta tawk Ngox! Paw ta tawk Ngox!
M.I: I yuh ka mawx I ? Yuh ka mawx?
I: Caox simaox aux Miex Iak.
M.I: Sinax pax Ngox ra kaux, yam in Miex Iak ang: ah lox kawx ang: lai chix. Phan ex chak Ngox yam iak nawh dix mawh pui laoh lie. Mawh nawh pui mhawm:. Yam in hoik ting taix lang caong nawh, mawh pui lu lhia. Ot nawh daux yaong sawg tix phit mai: pui. Sawg tix simah mai: pui. Phan aux keed son I khi rhawm aux son maix. I hoik mawh maix pui pa hoik koe: pinya cuyi. Ting taix lang caong maix. Maix ang keet son cao tix miex iak ang: lai chix ah lox tidtix ka maix. Laux maix hawx.

Scene 9

(Hoek Ngox Maox daux nyiex.)
M: Ngox hoig hoek maix daux nyiex. Yuh ka mawx? Taug maix lie?
N: Ang: tie taug ha.
M: Nhiet lox khaix in sax. eu. Susak paw lai lu lhia yuh nin. Kaig ka.
N: Nyawm ot maix lie O: miex ang: tix mawh chao aux kheu:
AY: Mao, grawng pa hoik hoig ang: lai ah. Maix tom kieh kaing lih sijheeng: sijheeng: Taug aux ka hawt tix khaix maix sijheeng:. Daux tix vang twah maix paw lai lih plah praix laux maix daux nyiex. Nghiet lox miex an.
N: muih (moh) aux miex kiex mie din? Yun pax nawx liex!
M : E:.. Kaoh hu: heem: maix. Hu: khwet maix laux maixtix khaix hu: khreen: kraung ih maix kix in. Hu: heu:
N: Nieh khwet [** khoek ?] aux tix miex
M: Khwet [** khoek ?] maix, maix laux tix khaix.
N: Hoig sawm pax nox miex?
M: Hoig sawm! laux ex sawm tau khaix.


Scene 10

(Ngox Mao Mai: Pao Klieh Nawh)

N: Ang: miex iak kiex ot daux nyiex nox lie?
I: Ot! Ot kiex.
N: Ot kiex. Aw .. aw. Ang: tie yaox miex iak kiex nox lie?
I: Koe kiex.
N: Aw .. aw. sawg aux feen ... hoig tawng kiex lih aux liex lih aux khaing..
I: Tawng kiex.
M.I: Aw: .. hoek maix Ngox.
N: Miex iak ngawm.
M.I: Hoig sawm maix lie?
N: Hoig nox.
M.I Simie aux tix yaox Ngox.Yam in hoig mawh grum ex mai: pao tix aux sang ah lox ti gum ra gum. Lox pa sang ah aux ka pa ang: tie mawh lox tang dah. Hoig mawh pax pao klieh kawx ang: aux tie thiang ang: tie lox tidtix ka pax. Sivoe coca pex yuh nyiex ma: tix mhawm:. Paw yuh pui lhu lhia.
N: Ie:.. ting bwan son miex iak. Ing: aux haih lah. Koe kaing aux ceeix. I. ing: aux khaing lah! Priex miex iak kiex mhawm:. Chak miex iak kiex mhawmmhawm:.
M.I: Ing: koi Ngox! I .. ang: maix chak Ngox an. Lox ah aux ka nawh lox sidiex aux ka nawh awm nawh pa ang: som nghiet lox miex iak. Mawh pui pa yuh ka mawx ang: tie tawng. Keud aux son I .. son nyiex ma: I .. sivoe ngaix sax. Lhat aux maix yaox krax duxkhax [**] sax. I .. ang: tie keud tang teei rhawm tix. I .. laux maix lah. Keud rhawm maix mhawmmhawm: awx.


Scene 11

(Ngox Mao mai: Paoxgrawm Nawh)

N: Hu: ex tin hie.. Ngox nhie pex tix hu: dee mawx?
O5: Mawh som mie aux tix hu: nyiex Nyi. Mawh chao mawh ngaix keh in ngaix.
N: Mawh som yaox pax in ngaix, som tawx aux pax pluat ploi kra pa yuh tix. Mawh chao pa tix? Kaing pa yuh ex pa hoig luan kawx hoig mawh krax pa lut aux. Som tawx aux pa pluatploi kix. Mawh chao an nox. In singaix sawn ex tix mawh pa grawm pid heu: ang: tie mawh yuh krax lox pa tix. Ai Rai .. Nyi Sin hoek.
O5: Ex ca: dex yaox paox tix lie!
N: Ang: tie mawh tix kaing pa yuh ex an sigaix nhaoh ngaix khi ka: nix phan krax lut koe ka yix pex ca: pluatploi ka yix ah aux nan. Chao pa tix hoig tawng pex krax ot krax koe: ex, an mawh bee pa yuh ex nhaoh.
O5: Phan maix koe: rhawm yuh nan mhawm:. In ngaix mawh ngaix ke Nyi ex tom khrawm paox tix tawx riang rao Nyi nyiex kix.
O6: Laoh lie liex. Ex ca: hu: tawx riang rao aux ku kaux lie. In ngaix mawh ngaix keh aux.
N: Aw: .. in ngaix mawh ngaix keh maix?
O6: Mawh .. ex paoxgrawm ex ca: tawx riang rao paox tix. Ex hu:… eu: mawh tin. heu: eu: .. mawh nyiex Nyi tin.
O5: A:… paoxgrawm paoxgru laoh lie ting buan son liex. Pex hoek tawx ex yaox plak ngai paox tix koe riang rao ex. Laoh lie ting buan son. In hoek ex tix khraix khrawm pex pa mawh paoxgrawm paoxgru tix ang: ex tix yaox tix tawx pui laig. Cao mawh ah ex paoxgrawm paoxgru tix, ang: tie yaox ih pa tix lie.
N: Yix…yix khaing maix hoig .. laoh lie . hoig . Koe siawp sibrawm krax moh ka paox tix. Paw lai yuh tix tang rhawm khaing pao tix lie. Nyi Sin .. Aix lie. ing: mawh moh khrawm ex pao tix.
O5: Khaw! Mhawm: pa yuh pex. Pa yuh pex loe kaux khaw! Ex ku kaux!
N: Aux ing: khaing pex lie!
O5: Kwie ceeix Kwie ceeix!
N: Paw tawx mawh krax lox lut lie!
O6: Khaw ang: yuh pa tix. Hoek maix tix tawx riang rao ex ang: yuh pa tix.
N: Nyi priex kien dee ot pa lah. Mawh .. Ngox.. hoig tawx ex riang rao paox tix. Yix ing: khaing pex nie lah.
O5: Eu:…ang: yuh patix .. ing: Kwie ing: kwie chak krax hu: pex mhawm: awx. chak krax hu: pex mhawm: awx.
N: ang: yuh ka mawx. Pon vid aux cheu ang: yuh pa tix.
O5: Chak krax hu: pex mhawm:!
N: Ang: yuh ka mawx hoig laoh lie.
O5: Viex pex ing: mhawm: awx. Hoek tawx pex riang rao ex mhawm: ex kaw yaox pao tix.khaix in ngaix awx. Ex kaw yaox pao tix ponsax sikaox awx ... chak pex vid cheu; mhawm: awx. chak krax hu: pex.
N: He: caong in..
M: He: .. Hu: maix dee mawx ang: tie nghiet lox miex tix.
Ay: Miex.. eu: .. sh.. saux dong ex ka kaw in hoig mawh yuk ku ngai yoek ku ngaix.
M: Luan yuk nawh ex yoek pu ka mawh?
AY: Pax ang: miex chak in ang: tie mawh yam yuk pui hoig hoek ma: taix hoig hoek kao ra taix in.
M: Ex sang yuh ka mawx ka Mao in? Ex nghiet tix ah nawh nghiet tix yuh ex yaox.
AY: Gram nawh yoek. Gram nawh laik tang laik cao.
M: Hoig luan yoek ex sang yuh ka mawx? Ex sang tih nawh kawx ang: tie chix. Nawh luan yoek ex ang: chak nawh ang: tie chix.
AY: Ang: tie tawng mawh nawh sax eu:.. keud nawh yuh ka mawh sax krax hu: nawh. Saux dong: ka tex. Laux pax miex it. hoig laux. Kawn: pheh kaing ex ang: kaing ex nyang hoig.
M: Ngox.. blah ngai maix kawn: simiex. Kaoh nyux rawm sidax ceeix.
N: tuktik daux nex aux ceeix.
M: Kawn: yoek maix lai sawm kawx. Ang: mawh? Kaw hu: miex dee mawx kawx? Kaoh maix khaing dee mawx kawx?
N: Nyiex paoxgrawm ex. Nyiex tax Cai kix. kok kix yix nyux plai ceeix. Ang: tie mawh chao tix khaing.
M: Maix yoek plai ngaix an nhaox pui kaw hoig giex maix. Miex ah paw lai nyux paw lai yuh.. maix ang: tie nghiet lox miex. Maix ang: nghiet lox puxke: tix maix caw tix ca: nghiet lox miex ceeix. Mawh mie maix tix yuh pa tix maix krai miex mhong awx. Mawh simie maix tix yuh ka mawx? Ca: ang: maix lai nyux plai khaix in ca: mawh nghiet maix lox miex khaix in. Yuh maix kaing pa mhawm: maix krai aux mhong mie maix tix yuh kaing pa tix maix kraix aux mhong.
N: Yuh nin miex. Phan aux ot yuh nin jheeng: jheeng: sivoe ngai aux sax, rien nawh tix ang: lai mawh krax ot. Simie aux tix mhaing mau ka puxke: tix. Aux simie nan tix sawg tix yuh laih lai ka krax Pang Sang.
M: Simie maix yuh kaing pa tix. Maix krai mhawmmhawm: ca: maix lai ih plai ca: ang: maix lai lih plah praix. Ca: ang: maix lai kieh kaing lih tix vut tix vut. Ex daux nyiex kawx kaig ka. Maix ih plai maix hu: yuk plah praix yuh nin. Hoek daux nyiex pui kawx ang: tie lai kieh ex koe ceu ang: tie lai kieh maix koe ceu.
N: Mawh nhie aux tix som hu: yuh kaing haktiex Pang Sang. ca: hu: ka paoxgrawm aux koe paoxgrawm aux tan. Nyi Kham tan vang: pax shiao khi ka an.
M: Maix miex tix hu: Pang Sang dex ca: mawh koe: paoxgrawm maix. Hu: ang: caox. Miex maix tix lo mau mie ding: Aux krai puxke: maix mhong.
N: Ang: pax shiao khi ka. Phan mawh rie tawx puxke: mau ka aux dex, aux kawx ca: coca tix sawg mau khri heue:
M: Khin mawh nan mau simie maix tix lox dex aux ca: krai puxke: maix mhong mhawmmhawm: hawx. Khaix krai aux puxke: maix mhong kieh aux puxke: maix tawx mau ka maix kieh lawt tawx ka maix. Viang mawh nan maix paw nyang hu: dee mawx tix maix ot daux nyiex mhawng mhawm:. Ca: yuh maix ot daux nyiex sivoe puxke: maix. Phan maix hu: plah praix maix dee hu: ih plai. Mau mhaing aux ang: lai pon ka puxke: maix. Ax yuh pu ka mawx? Mhong maix nox?
N: Ang: yuh puh ka mawx miex ang: pa shiao khi khaix lieh. Ang: aux hu: dee mawx.
M: Phan mawh nan ot mhawmmhawm: awx. Aux ca: krai puxke: maix mhong. Hoik krai aux puxke: maix mhong aux lawt tix tawx ka maix awx. Paw lai hu: dee mawx tix.
N: eu…eu..
AY: Een: aux in: dee mawx ah maix?
Y: Tin..!
AY: Kieh kawn: nyawm yuh ah aux ka maix. Maix kieh ax yuh cao. eu.. Ang: doh khaw mai: maix maih.
Y: Ang: kaing yuh ex tie koe.
M: Yuh pax pa tix?
A: Ang: yuh pu! Mawx! Ang: maix yaox..
M: Krai: aux maix mhong lox pa ah pu maix ka maix. Mhaing nawh num mau. Ngox ex. Mhaing nawh tix hu: lai: daux Pang Sang.
AY: Heue: nu keed. Mawh ah pax tix tawx lie?
M: Ex ang: tawx. Nawh nghiet tix ot yuh nin, nawh nghiet tix laux, Nawh hu: plah praix, nawh kieh kaing lih, nawh mawh maix pa sang hu: ah grawng nawh ngieh. Nawh mawh maix pa sang kha tix. Aux miex yuh ka mawx kawx ot daux nyiex kawn: roi: ceeix.
AY: Ex tawng tawx ex nawh viex mau in sax neh. Kieh nawh yuh kaing mhawm:. Kieh nawh coca tix yuh kaing mhawm:. Yuh haok huan sax neh. Ang: awt caox. Mawh lhat ex nawh dee cai: ang: lih glawng kix. Nawh dee nyaux plai,tawx phai kix sax neh, pax tom keed yuh ka mawx sax neh?
M: Eu: ceu an kix. Hoig hu: yuh nawh tix ku ngai ang: lai chix yuh ka mawx? Yam mhaing nawh tawx ka nawh. Hoig luan mhaing miex tix sang tawx ka nawh.
AY: Iet mhong maix did? Mhaing pu maix mau did.
Y: Nie mhaing pex tawx ex tawx.
M: Mhaing Ngox maux Iet, ex ang: tawx ka nawh hoig luan mhaing miex tix tawx ka nawh liex.
AY: Maix ca: sawg awx. Sawg plak bo khaix. Ca: mawh som teei nawh ted. Sawg maix.
M: Mhaing nawh tix yieh.
AY: Tix yieh?
M: Ca: sawg tix yieh mheen: lah!
AY: Cheu: nawh tom ah ka mawx ah?
M: Ah nawh tix sang viex cheu: hu: nan. Gram viex hu: heue:
Y: Som yuh nawh tix ka mawx ah miex?
M: Sang yuh nawh lai: ah nawh.
AY: Lai: tix? lai: tix? lai: yoek ka plai sax nieh.
M: Ex lie yuh pu ka mawx lie? Hoig luan mhaing tix tawx ka nawh. Ex ang: tawx hoig luan mawh lox aux. Hoig luan mawh lox miex. Miex mhaing tix tawx, maix mhaing tix ang: tawx nawh deeh yuh simah ka maix. Ca: tawx lah.
AY: Ca: mawh nyawm rhawm pax! Ax..!


Scene 12

(Daux Nyiex)

Iet: Puxke:. Nyaux Chax.. Miex chax awx.
Miex: Eue…
AY: Ngawm tix vut. Iet: .. ciit (ca) rang awn (an) nhox (nawx) nie. Ciit rang mhaing aux maix tawx mau ka Ngox Sai nhox (nawx). Maix sawg awx. Sawg aux nox (nawx) ang: aux yaox heue:.
Iet: Koe:! Tiem aux tix een tin. Ang: maix nyang yaox lie? In ..
AY: Aw.. mawh phuan mheen: lie? Maix ang tie tiem tix een singaix lie? Singaix tix nhox (nawx)? Ang: aux sidawng: kah.
Iet: Tiem! Khix phuan 7 singaix.
AY: Khix phwan 7 ngaix!Yuh maix priex nhox (nawx) ang: mawh? Jhak maix yuh priex! Miex ! Tax Ai Shiang nhox (nawx), ang: hoek ka miex lie? Ang: tie yaox ca rang nawh!
Miex: Ang: nyang hoek heue: Ang: nyang hoek! Jhak Iet kiex yaox!
AY: Mhaing: aux kix sawg pui 15 kaux nhox (nawx)! Mawx! Ang: tie yaox mawx? Iet lut lieh nix. Ang: kix nyang hoek tix tawx lie!
Miex: Ang: kix nyang hoet tix tawx. Pau ex tix jhak ponbo, yie hoek nawh khaix nieh. Ngox .. Sang hu: maix dee mawx? Ngawm tin!
Ngox: Nhie aux tix hu: plak praix tix vut nieh. Koe lox tix lie?
Miex : Miex “tix” haoh kaing puxke: maix, maix ang: khaw ca: teem puxke: maix yuh kaing.
Ngox, Pie priex ted ang: aux shiao pau tix ih. Mawh yuh nin miex. Kok yiex I, sang yaox yiex paox tix.
Miex: Hoig sawm! Hu: khaix!
Ngox: Mawh pax miex moh aux! Pax ca: chix keud son aux lie miex?
Miex : Hoig sawm! Koi hu: khaix. Miex chak kaing yuh puxke: maix. Priex teem nawh yuh ceeix. Prax ot nawh daux nyiex. Pax puxkaik ra kaux pa ang: lai yuh kaing mai: paox tix.
Ngox: Miex! Nawx! Lox an: Grawh grawng sinax yiex puxke: paox tix. Paw shiao krai. Ang: aux som mhong:. Nawh hoig loi nie tix yuh nawh ang: tawng yuh hoet tom dix nieh. Yaox nawh ang: tix som bieh sin miex keeing tix. Mawh lhat nawh tix ang: pon tawx gwah sin ka.
Mao: Maix paw krai yuh nan.
Ngox: Ang: mawh lie?
Miex: Paw lie krai yuh nan!
Ngox: Yaox maix ang: tix som gwah sin ka aux. Son aux. Ngaix mawx ang: ah sawg maix krax lut aux. Yuh ka mawx?
AY: Ot tix yoek. Ot tix ah lox ang: mawh ang: me. Ah maix singo (sinngao) tix ha .. ah maix singo (sinngao?) tix?
Ngox: Miex simie tix ih sin miex keeing aux did. Chix. Maix ih nong heue:. Hu: aux miex. Pe yuh ka mawx ang: tie chix ah! Mhaing: tix lih ka praix yam mawx ca: haoh lox.
Miex: Ca: kram pa yuh nawh. Viang ang: nawh nyang tawng titix. Kawn: iak nawh.
AY: Ting rhawm nawh miex ang: lai som krai lox.
Miex: Ang: nawh nyang tawng titix. Ang: maix yaox kawn: iak nawh. Maix ca: chak pa yuh nawh ka ax. Kheu pui tang kaux nawh tawng tix lhat. Ang: tie lhat nawh hoig hu: khaing: ex.
AY: Ang: aux laux rhawm ka titix, mawh ah. Grawng in grawng singo (sinngao) sijheeng: sijheeng:. Yaox nawh een: keeing singo (sinngao) tix miex ding.
Miex: Ang: nawh nyang tawng titix ded. Tawng nawh rhawm tix tix ngaix sax nawh koi dee hoek ka ax. Ang: maix yoax kawn: koe: Iet nan. Koe Iet mai: ex ang: ex rhawm kieh nawh laux rhawm. Kieh nawh nyawm rhawm mai: ot tix mai: ex. Mawh pax Ngox pa ra kaux, khawm Iet ex loe kaux, pon kaux nyieh. Paw lai kieh daux nyiex sux sak.
AY: Cai: rhawm ex ted. Kieh Iet yuh priex.
Miex: Iet .. yuh priex awx.


Scene 13

AY: Pax ang: ca: kok miex. Tawx mau ka nawh.
Miex: Ngox!
Ngox: Eue:.
Miex: Teei mau in:. In: mau mhaing: ka puxke: maix. Priex rhawm tix khawm maix viex mau in: hu:. Cox rhawm maix mai:
Ngox: Ting buanson puxke:.
AY: Maix mawh pex pux ex. Lox tang ceu lox lang lang ang: ex lai krai liex. Yam in kie nie kaing ting teei ex rhawm sang yuh maix. Maix ot tin kawx kaing yuh aux maix ang: tie laig rhawm. Maix som cuca tix yuh kaing tang dah ded in mawh yiex miex pa ah sikah lox mai: paox tix ang: mawh lie ? Eue: pa sang ah aux ka maix in singaix kie nie, hu: sivoe ngai maix paw lai kieh awm pa hoig luan. Krax hu: kra ing: ex krax lai ling ing: tiang maix sawg maix mau kix ded pe va mau in kix ang: tie mawh ang: ex lawk ka: Kaing: ting ca: mawh mhawm: ot maix mhawm: priex maix cao tix. Haok huan maix sax nieh. An pa sang koe daux rhawm aux lieh.
Miex: In.. Maix viex mau in: hu: kawx, miex kawx laux rhawm ka. Miex ang: tau tix nyawm ot khaix maix, miex mie tix yiem khaix maix kawx. Viang mawh nan ang: aux nghiet lox maix kawx ang: chix. Mawh kheu tix, maix ot mai: aux maix ang: tie nyawm rhawm khawm ot tix. Ca: cheu: maix yuh lai: Yaox puxke: maix laux rhawm maix deuh hoek ka miex awx.
Ngox: O: mai: puxke: pa ca: chak miex khaix hoet aux Pang Sang awx.
Iet: Son miex paw lai khi rhawm.
Ngox: Yie saux kiex. Saux nyoi kiex pon vhaik pon sawm. Miex priex rhawm pa mhawm: awx. Son aux ang: pa shiao khi ka. Ang: pax tieb yuh tix la laux rhawm son aux. Paw yuh pax koe: chawm saux son aux awx. Aux kawx tang: priex rhawm tix mhawm:.
Ngox: Ca: cux rhawm tix mhawmmhawm: Ngox.
Ngox: Viang mawh nan, puxke: hu: aux awx.
AY: Viex mau. Priex krau maix kix.
Ngox: Miex priex krau tix haih.
Ay: Ang: tie lai chix ah lie? Som hu: nawh ex ang: kieh nawh hu: nawh ot tin kawx lai ling. Phan nawh ang: luan singai khaing ex sax nawh kang: doh tawng tix keud rhawm tix. Kaing ting kie nie ex, ca: mawh mhawm: ot nawh, Ca: mawh deuh chix priex rhawm tix sax.
Miex: Tawx nawh cheu ti hu: plak praix. Viang mawh nan ex mawh miex ang: tie mhawm: rhawm khaix ot mai; nawh. Ot nawh yuh ka mawx sax, hu: nawh yuh ka mawx, maix ka ca: ploi pui paoxgrawm maix kix ca: krai kix mhong ceeix Maix yaox mawh kawn: nyawm ang: nyang tawng ceeix ceeix. Nawh hu: khaing aux, aux kawx yaox tix laux rhawm khaix nawh. Nawh ot maix ex, ex kawx laux rhawm. Ex sang yuh ka mawx.
Ngox: Hu: aux phao:.
Miex: Koi hu: awx.
Ngox: Puxke:.. Priex pax mhawm:. Hu: aux puxke:.
AY: Priex rhawm mhawm: awx. Cu ca maix huh kaing. Maix paw lai kieh awm plak ka:. Ang: maix shiao khi ka miex awx.
Ngox: Miex. Chak miex kiex mhawm: awx, puxke:. Hu: aux.
AY: Paw pax lai awt rawm ngai tix. Hu: sawg nawh mau. Ang: caox. Ca: mawh mhawm: ot nawh sax nieh nawh baox deuh hoek daux nyiex sax nieh ang: pax lai shiao khi ang: mawh lie? Laux pax. Hu: tao: miex.


Scene 14

(Ngox Lih khaing Nyiex)

P1: A:.. Ngox hoek!
Ngox: Hu:.. Sawg aux maix.
P1: Ngawm tin:.
Ngox: Dawd sawg aux maix lie.
P1: Yuh ka mawx?
Ngox: Mawh yuh nin. Sang nhie aux tix lih krax. Smax [?] yiex puxke: paox tix kawx. Hoig viex aux krau tix uik heue. Nhie tix lih sawg tix yuh kaing Pang Sang. Ang: paox aux tix koe kom. Sang hu: nan: maix mai: aux lie?
P1: A:.. su sak rhawm aux. Pie aux ang: aux tie tawng kaing pa som yuh tix tin. Aux ca: ot tin aux ca: ot daux nyiex ang: aux tawng tix yuh puh tix.
Ngox: An: mawh keud maix rhawm tix kaux lie. Phan maix som hu: maix ma: aux khaix aux, ax ang: hu: pot tau nox. Nhie rawt (hawt) maix aux mhawm: heue:. Ang: mawh?
P1: A: in: mawh sinax paoxgrawm liex. Ang: ex tix pon prah paox tix.
Ngox: Mawh lie!
P1: Ex. Aux ot tin aux ang: tawng kaing yuh tix. Aux hu: aux kang: tie tawng. Su sak rhawm aux heue:.
Ngox: Phan mawh hu: maix ded. Hu: teei krau maix aux pau maix tin. Pau daux cheu.
P1: Hu: rhoe maix lie?
Ngox: Phan mawh hu: aux ded. Hoig viex aux krau tix uik.
P1: Maix ang: ih priex plai nang haih lie.
Ngox: Pon. Hoig. Hoig daux nyiex nox.
P1: Phan mawh naox pau aux awx. Aux hu: teei krau tix haih.
Ngox: Hu: teei krau maix. Pau aux maix tin awx. Hu: teei krau maix. Phai: awx nhiet maix phai:. I.. Yuh maix tix?
I: Ngox. Sau aux rawm tai.
Ngox: Pruet (Sau) maix rawm tai. Koe: nang miex iak kiex?
I: Ang: kiex koe: Hu: kiex daux laih:
Ngox: I. Koe: lox krai aux ka maix.
I: Krai daux nyiex. Ngawm daux nyiex. Mawh hu: liag kiex tix daux laih?

[to be continued]