Phuk Lai Sigang: Khri: Siyiex - 5 Lox Bwan:
LAI MATHIEX
(Matthew)
Mathiex
Ru Nyiiex Ma: Cao: Yesux Khrit
Lukax 3:23-38 ; Ruthax 4:18-22;
1 Grawng: Been 3:10-17
Lai grawhgrawng: ru Cao: Yesux Khrit, kawn: Abraham kawn: Davit.
Abraham koe: kawn: Icak, Icak koe: kawn: Yakop, mai Yakop koe: kawn: Yudax mai puxaik nawh khankix.
Yudax koe: kawn: Pheret mai Zara, kah moeng nawh Tama. Pheret koe: kawn: Hezaron mai Hezaron koe: kawn: Aram.
Aram koe: kawn: Aminadap, Aminadap koe: kawn: Nashon, mai Nashon koe: kawn: Salamon.
Salamon koe: kawn: Bawzax, kah moeng nawh Rakhap, mai Bawzax koe: kawn: Obet kah moeng nawh Ruthax, mai Obet koe: kawn: Yeshie:.
Mai Yeshie: koe: kawn: simiang khunhawkham Davit. Simiang Davit koe: kawn: Sawlamun kah bun: pa hoik mawh moeng Uriyax phaoka: heue.
Sawlamun koe: kawn: Robom, Robom koe: kawn: Abiyax, mai Abiyax koe: kawn: Asax.
Asax koe: kawn: Yosaphat, Yosaphat koe: kawn: Yoram, mai Yoram koe: kawn: Osiyax.
Osiyax koe: kawn: Yotham, Yotham koe: kawn: Akhat, mai Akhat koe: kawn: Hezakiyax.
Hezakiyax koe: kawn: Manashe, Manashe koe: kawn: Amon, mai Amon koe: kawn: Yosiyax.
Yosiyax koe: kawn: Yekhawniyax mai puxaik nawh khankix, yam mawh bawg yam viex kix hu: kah veng Babulon heue.
Khaix hoik viex kix hu: kah veng Babulon, Yekhawniyax koe: kawn: Shalatilax, mai Shalatilax koe: kawn: Zerubabelax.
Zerubabelax koe: kawn: Abyut, Abyut koe: kawn: Eliakim, mai Eliakim koe: kawn: Azaw.
Azaw koe: kawn: Sadut, Sadut koe: kawn: Akhim, mai Akhim koe: kawn: Elut.
Elut koe: kawn: Elazax, Elazax koe: kawn: Mathan, mai Mathan koe: kawn: Yakop.
Mai Yakop koe: kawn: Yosiep pa mawh mex Marix, pa keh Yesux kah, pa kok mawh Khrit heue.
Mawh kheu in: jah kah Abraham tom: hoek kah Davit koe: kao: ju pon:, mai jah kah Davit tom: hoek yam viex kix hu: kah veng Babulon koe: kao: ju pon:, mai jah kah yam viex kix hu: kah veng Babulon tom: sidauh sidu hoek kah Cao: Khrit koe: kao: ju pon: heue.
Grawhgrawng: Keh Yesux Khrit
Lukax 2:1 - 7
Grawhgrawng: keh Cao: Yesux Khrit mawh nin: heue. Yam miex Nawh Cao:, Marix, mai Yosiep hoik chawk paox tix, kah: ang kiex bax dex bax dawd mai paox tix, yaox nawh koe: kaux kheu Khwan: Singax Singeh heue.
Mawh kheu mex nawh Yosiep, mawh pwi rah pwi see mai ang rhawm: kieh plakngai: Marix laux, nawh ce: sang briex tix tik nawh heue.
Viang mawh kawx nan: yam keud nawh yuh nan:, jhak heue, nawh yaox kawncau Siyiex cie Simiang lih bleeh kah nawh kah daux camaox mai ah nin:, "Yosiep kawn: Davit eue, paw lhat tix teei moeng maix Marix, kheu kaux pa koe: daux nawh mawh kheu Khwan: Singax Singeh heue.
Mai nawh tag keh kawn: simex, mai maix tag kok ceukaux Nawh mawh Yesux, mawh kheu Nawh tag sang taoh pwi cie Nawh khaing: phimap phigrham: kix heue."
Ceu in: khawm: uik hoik mawh sonsang naog gumlox Simiang pa krai Cao: Jhai: pa ah nin:,
"Jhak heue, bunkrih tag koe: kaux, mai keh kawn: simex, mai kix tag kok ceukaux Nawh mawh Emannoelax." Phan: toe: dee bleeh "Emannoelax," mawh, "Siyiex ot tau mai ex."
Yam siduad Yosiep khaing: it nawh yuh awm: hoik nhie: kawncau Siyiex cie Simiang nawh yuh, mai teei moeng tix heue.
Viang mawh kawx nan: nawh ang dex mai nawh, kah: ang nyang keh kawn: Ai, mai nawh kok ceukaux Nawh mawh Yesux heue.
Pwi Ting Pingnya Cuyi: Hoek Tix Krub Kah Yesux
Yam keh Yesux daux veng Bieliehiem, meung Yudax, daux singaix ju Herut pa mawh khunhawkham, jhak heue, pwi pa ting pingnya cuyi: kaoh khaing: plak lih singaix mai hoek kah veng Yerusaliem,
mai chawk ah nin:, "Kaw pa hoik keh Simiang Khunhawkham pwi Yudax koe: dee mawx? Mawh kheu hoik yaox ex simuing: Nawh plak lih singaix, ex tom: hoek tix krub Nawh Cao:."
Yam mhong: simiang khunhawkham Herut lox an:, nawh mai pwi veng Yerusaliem khawm: uik sungsang rhawm:.
Mai nawh kieh cao: giex kaing: li pa ting khankix mai pwi tiem: lai khawm: uik khrawm: paox tix, mai nawh chawk kix grawhgrawng: tag sang keh Cao: Khrit dee mawx?
Mai kix krai kah nawh ah nin:, "Tag sang keh kah daux veng Bieliehiem meung Yudax, hkeu cao: jhai: hoik tiem: lox ah nin:,
Mai maix veng Bieliehiem meung Yudax eue, nie iak khaing: paox tix, dee giex kaing: simiang Yudax khankix ang mawh, kheu cao: giex kaing: tag sang lih khaing: maix tix kaux, mai Nawh tag sang kia: sang ngien pwi cie Aux, ceu Isarilax heue"
Yam an: simiang Herut briex kok pwi pa ting pingnya cuyi: mai chawk kix grawhgrawng: yaox kix simuing: lai mawx.
Mai nawh ploi: kix hu: kah veng Bieliehiem, khaix tawm: nawh lox ah nin:, "Hu: mai sawg Kawn: nyawm an: mhawmmhawm:, yam hoik yaox pex Nawh deeh krai kah aux liak, yuh kah mawx son aux kawx, pon tix hu: krub kah Nawh heue."
Mai khaix hoik mhong: kix lox simiang khunhawkhawm kix lih hu: mai simuing: pa yaox kix plak lih singaix hu: sivoe kix, tom: hu: kaog piang dee ot Kawn: nyawm an: heue.
Mai yam yaox kix simuing: an: kix kied gauxrhawm: gauxrhi: tete.
Mai kix laig kah daux nyiiex an: mai yaox Kawn: nyawm iak an: tau mai miex Nawh Marix, mai kix grux ngawng tix krub Nawh, mai kix hoe: kraung viex tix mai tawx khawngphak laksawng: kah Nawh Cao: pa mawh khri: mai sidauh bhawng: Lawpan mai Muran heue.
Mai khaix an: son ang kix deeh ing: kah simiang Herut, Siyiex kieh kix tawng kah daux camaox, mai kix deeh ing: kah meung kix krax tang: krax heue.
To: Hu: Kah Daux Meung Ejiptux
Mai khaix hoik ing: kix, jhak heue, kawncau Siyiex cie Simiang tix kaux lih bleeh kah Yosiep kah daux camaox mai ah nin:, "Kaoh heue, mai teei Kawn: nyawm iak mai miex Nawh, mai to: hu: kah daux meung Ejiptux, mai ot tan: tom: deeh krai Aux maix mhong:. Kheu simiang Herut dex sang sawg Kawn: nyawm iak in: tix yuh Nawh laux."
Mai Yosiep kaoh mai teei Kawn: nyawm mai miex Nawh, mai lih hu: kah daux meung Ejiptux yam ponsawm: heue.
Mai ot tan: tom: hoik yum: simiang Herut, sonsang naog gumlox Simiang pa cao: jhai: hoik ah nin:, "Aux hoik kok Kawn: Aux Lih khaing: meung Ejiptux heue."
Yam tawng simiang Herut grawhgrawng: pwi pa ting pingnya cuyi: pie lhen: kah nawh, nawh kied songrhawm: songrhi: tete, mai nawh ploi: pwi hu: pah kawn: nyawm simex yum:, pa hoik koe: ra: num mai pa ang nyang koe: ra: num khawm: uik, pa ot kah daux veng Bieliehiem mai dee dex tan: kudauh kudee heue. Nawh keud nawh sawn: grawhgrawng: bawg yam pa hoik mhong: nawh kah pwi pa ting pingnya cuyi:, mai nawh tom: yuh nan: heue
Yam an: gumlox cao: jhai: Yeramix, pa ah nin:, hoik naog heue.
"Kah daux Ramax mhong: lox pa yiiem pa grai, mai pa kied khirhawm: khirhi:, mawh pa yiiem Rakhelax son kawn: nyawm kiex khankix, mai ang chix khu: rhawm: kiex, kieh nyawmrhawm:, kheu ang kawn: kiex lai koe: heue."
Deeh Ing: Kah Veng Nazariet
Viang mawh nan: khaix hoik yum: simiang Herut jhak heue, kawncau Siyiex cie Simiang tix kaux lih bleeh kah Yosiep daux camaox, kah daux meung Ejiptux, mai ah nin:.
"Kaoh heue, teei Kawn: nyawm mai miex Nawh, mai hu: kah daux meung Isarilax, kheu pwi pa sawg tix teei ju Kawn: nyawm an: yum: khankix hoik yum: heue."
Mai nawh kaoh, teei Kawn: nyawm an: mai miex Nawh mai hu: kah meung Isarilax.
Viang mawh kawx nan:, yam mhong: nawh grawhgrawng: Akhelax giex kaing: meung Yudax, dee keeing: nawh Herut giex kaing: glangka: an:, nawh lhat hu: tan:. Mai kheu Siyiex kieh nawh tawng kah daux camaox, nawh hu: kah daux haktiex meung Galilie:.
Mai nawh hoek mai ot kah daux veng pa kok mawh Nazariet, sonsang naog gumlox pa hoik krai cao: jhai: khankix, "Tag kok Nawh mawh pwi Nazariet."
Grawng: Pa Lih Sidiex Yohan Cao: Com Rawm:
Makux 1:3-8; Lukax 3:2-17
Mai kah daux bawg yam an:, Yohan cao: baptis hoek, mai sidiex gau kah daux tiag daux tu meung Yudax, ah nin:.
"Doh keud doh sawn: kah phimap tix, kheu Meung Raoma: dex sang hoek heue."
Kheu mawh kaw in:, pa hoik krai cao: jhai: Isayax lox pa ah nin:, “Lox pa kok pa yo daux tiag daux tu cox krax Simiang, yuh krax Nawh rauh see heue."
Mai tokaux Yohan ceep kraung hauk Kala-uk, mai nhawt maox hak kah nyoi tix, mai pa ih pa un: nawh mawh sido, mai rawm: hia: tiag heue.
Yam an: pwi veng Yerusaliem, mai pwi meung Yudax khawm: uik mai pa ot sivie sivheng: rawm: Yawdan khawm: uik khawm: leeing:, hu: kah Yohan heue.
Mai kix krai doh kah phimap phigrham: tokaux tix, mai baptis * kah tawm: taix nawh kah daux rawm: klawng: ting Yawdan heue.
Viang mawh nan: yam yaox Yohan pwi Pharishie: mai Sadukie: khankix hoek tix baptiskah nawh, nawh ah nin: kah kix, "Ceu siuing: pa cai: eue, mawx nhie: pex to:, sonsang luan khaing: pa songrhawm: pa tag sang hoek?
Kieh plix plix pa keung: kah pa doh keud doh sawn: kah phimap phigrham: tokaux tix heue.
Paw keud tix ah kah daux tokaux tix, Abraham mawh keeing: ex, aux krai kah pex, Siyiex teei simaox in: khankix yuh mawh kawn: Abraham kah chix heue.
Yamin kawx moe: hoik koe: kah dex riah num: khaox, mai khaox pa ang plix plix pa mhawm: khankix khawm: uik, sang kid tix taing sau: daux ngu heue.
Aux baptis pex kah daux rawm: tete, yuh kah mawx sonsang doh keud pex kah phimap phigrham: tix heue. Viang mawh kawx nan: Kaw pa hoek khaix aux lheu: ting khaing: aux, pie kiep Nawh ang aux keung: tix jiang:. Kaw an: tag sang baptis pex kah daux Khwan: Singax mai ngu heue.
Kah daux tawm: taix Nawh koe: bia: yib, mai Nawh tag kieh nghoxca pa pah Tix singax mai Nawh tag sau: nghoxca cie Nawh daux krao:, mai Nawh tag teei grhip gleeing daux ngu pa ang chix yeet heue."
Yesux Rieb Tix Com Rawm:
Makux 1:9-11; Lukax 3:21,22; Yohan 1:31-34
Yam an: Yesux kaoh khaing: meung Galilie:, mai hoek kah Yohan kah rawm: Yawdan, sonsang baptis daux tawm: taix nawh.
Viang mawh kawx nan: Yohan kieh raw Nawh Cao: ah nin:, "Aux khaw: tix baptis kah daux tawm: taix Maix mai Maix khex hoek kah aux lie?"
Viang mawh kawx nan: Yesux pawk lox mai ah nin: kah nawh, "Kheu ex khaw: tix hawt been pa rah pa see sonsang kieh naog khawm: uik, yamin tawx akhwang: liak." Khaix an: Yohan tom: tawx akhwang: heue.
Khaix hoik baptis Yesux Nawh lih khaing: daux rawm: dom: mawx dom: an:, mai jhak heue, raoma: baoh kah Nawh mai Nawh yaox Khwan: Siyiex lih awm: sikaux mai hoek kah piang Nawh,
mai jhak heue, lox lih khaing: raoma: ah nin:, "In: mawh Kawn: pa moh Aux, pa khaw: pa caw rhawm: Aux heue."
Grawng: Pa Kham: Geu: Yesux Pa Nyaw Phicaox
Makux 1:12-13; Lukax 4:1-13
Yam an: Khwan: Cao: tok Yesux hu: kah daux tiag daux tu, sonsang kham: geu: pa nyaw phicaox heue.
Mai Nawh twah pa ih pa un:, tipon: (40) singaix, tipon: (40) sawm:, Nawh tom: cairhawm: heue.
Yam an: cao: nyaw hoek mai ah nin: kah Nawh, "Phan: Maix mawh Kawn: Siyiex tawx lox kieh simaox in: khankix mawh khaomun heue."
Viang mawh kawx nan: Nawh Cao: pawk lox mai ah nin:, "Hoik tiem: tix deuh ah nin:, `’Pwi tag im: kheu khaomun nongnong: ang mawh, viang mawh nan:, im: kheu lox pa lih khaing: jheeh Siyiex ku gum heue"
Yam an: Phicaox baox viex Nawh hu: kah daux veng singax singeh, mai deuh Nawh piang dee choek nyiiex bwan:.
Mai ah nin: kah Nawh Cao:, "Phan: Maix mawh Kawn: Siyiex, kieh tokaux Tix rau sen:. Kheu hoik tiem: tix deuh, `Nawh tag tawm: lox grawhgrawng: Maix, kah kawncau Siyiex Nawh khankix, mai kix tag yaog Maix kah piang tawm: taix kix, son ang caong Maix sang krox kah simaox"
Yesux baox ah nin: kah nawh, "Baox hoik tiem: tix deuh ah nin:, `Maix paw vi nyaw kah Simiang Siyiex Maix."
Yam an: phicaox baox viex Nawh Cao: hu: tix bawg kah piang gawng kied lhaong: tix mu:, mai jhi: Nawh yaox meung piang haktiex khawm: uik, mai min: plakngai: cie meung khankix,
mai nawh ah nin: kah Nawh Cao:, "Phan: Maix grux ngawng tix krub kah aux, ceu in: khawm: uik aux sang tawx kah Maix heue."
Yam an: Yesux baox ah nin: kah nawh, "Satan eue, lih hu: heue, kheu hoik tiem: tix deuh, :Maix tag sang krub kah Simiang Siyiex maix, mai yuh son Nawh khaing:"
Yam an: phicaox hu: khaing: Nawh Cao:, mai jhak heue, kawncau Siyiex khankix hoek tix khan: kheu: kah Nawh heue.
Yesux Jah Tix Yuh Kaing
Makux 1:39; Lukax 4:14,15
Yam an: khaix hoik mhong: Nawh Cao: grawhgrawng: hoik sau: Yohan kah daux thawng: Nawh lih hu: kah daux meung Galilie: heue.
Nawh Cao: prah veng Nazariet, mai hoek ot kah daux veng Kapeniom, pa koe: dex praok nhawng: daux mee: haktiex Zebulun mai Napthalix heue.
Yuh kah mawx sonsang naog gumlox pa hoik krai cao: jhai: Isayax pa ah nin:,
"Haktiex Zebulun mai haktiex Napthalix, pa koe: dex krax pa hawt praok nhawng: mai bleeh plak toi: rawm: Yawdan, Galilie: dee ot pwi tang: ceu tang: cat.
Pwi pa ot kah daux pa faik khankix, pon yaox pa riieng pa ting, mai piang kix pa ot daux haktiex veei krax yum:, pa riieng hoik lih jhan: heue."
Jah tom: yam an: Yesux jah tix sidiex gau, mai ah nin:, "Doh keud doh sawn: kah phimap tix, kheu Meung Raoma: dex sang hoek heue."
Grawng: Pa Jah Kok Kawncau Pon: Kaux
Makux 1:16-20; Lukax 5:1-11; Yohan 1:35-42
Mai yam hu: Nawh dex rawm: nhawng: Galilie:, Nawh yaox puxaik ra: kaux pa mawh Simon pa kok mawh Petrux, mai pux nawh Andare, ploi: rub kah daux rawm: nhawng:, kheu mawh kiex pwi pa teei kax heue.
Mai Yesux ah nin: kah kiex, "Hawt khaix Aux heue, mai Aux tag kieh pax mawh pwi pa teei pwi heue."
Mai dom: mawx dom: an: kiex prah rub khankix tan:, mai hawt khaix Nawh Cao:.
Mai Nawh hu: sivoe ceeix mai Nawh Cao: yaox puxaik tang: kaux ra: kaux, pa mawh Yakop, kawn: Zebedie:, mai pux nawh Yohan, ot kah daux reu tau mai keeing: kiex Zebedie:, mai cox rub cie kix. Mai Nawh kok kiex.
Mai dom: mawx dom: an: kiex prah reu mai keeing: kiex mai hawt khaix Nawh Cao:.
Yesux hu: lailing kah daux meung Galilie: kudauh kudee mai gau kah daux nyiiex sidiex khankix, mai sidiex lox bwan: gauxrhawm: gauxrhi:, pa dex pa dawd mai Meung Siyiex, mai cox moi: jhawm: saux jhawm: ngia kuceu sinax pwi khankix heue.
Mai min: plakngai: Nawh Cao: tah kah daux meung Surix kudauh kudee, mai kix viex pwi pa koe: jhawm: saux jhawm: ngia kuceu, mai pa kharhawm: kharhi:, mai pa laig phicaox khankix, mai pwi saux laung: khankix, mai pwi yum: taix yum: caong khankix, mai Nawh cox kix moi: heue.
Mai cub pwi pa haoh pa hun: hawt khaix Nawh Cao:, pa kaoh khaing: meung Galilie:, mai haktiex Dekapolix, mai veng Yerusaliem, mai meung Yudax, mai plak toi: rawm: Yawdan khankix heue.
Grawng: Sidiex Yesux Kah Piang Gawng
Lukax 6:20-23
Yam yaox Nawh Cao: cub pwi haoh pwi hun:, Nawh haok kah piang gawng mai khaix hoik ngawm Nawh, kawncau Nawh khankix hoek kah Nawh heue.
Mai Nawh Cao: ang jheeh Tix, mai gau kix ah nin:.
"Pwi pa hot daux khwan: khankix koe: bwanson: heue, kheu Meung Raoma: mawh cie kix.
Pwi pa khirhawm: khirhi: khankix koe: bwanson: heue, kheu kix tag pon pa nyawmrhawm: nyawmrhi:.
Pwi pa awnrhawm: awnrhi: khankix koe: bwanson: heue, kheu kix tag pon haktiex.
Pwi pa cairhawm: cairhi: son pa rah pa see khankix koe: bwanson: heue, kheu kix tag sak.
Pwi pa chix caoxrhawm: caoxrhi: khankix koe: bwanson: heue, kheu kix tag pon ceu pa caoxrhawm:.
Pwi pa singax daux rhawm: daux rhi: khankix koe: bwanson: heue, kheu kix tag yaox Siyiex.
Pwi pa chix kieh chix raw pa simah simaing: kah paox tix kieh yiien: khankix, koe: bwanson: heue, kheu tag kok kix mawh kawn: Siyiex.
Pwi pa hoik kham: geu: pa tuktiaktukte: son pa rah pa see koe: bwanson: heue, kheu Meung Raoma: mawh cie kix.
Yam pwi yuh pa ang khaw: ang jiet kah pex, mai tuktiaktukte: kah pex, mai ah pa caox pa ang mawh ang meh kuceu grawhgrawng: pex, kheu Aux, pex koe: bwanson: heue.
Kieh kied gauxrhawm: gauxrhi: heue, kheu bwanson: kied ting son pex kah daux Meung Raoma:, kheu hoik tuktiaktukte: kix yuh nan:, kah cao: jhai: khankix pa koe: glangka: pex.
Kih mai Pa Riieng
Makux 5:50; Lukax 14:34,35
"Pex mawh kih haktiex heue, viang mawh nan: phan: pa laoh kih hoik grai:, kienie, chix deeh kieh laoh yuh kah mawx? Lheu: khaing: tik plak praix mai pwi dig greem: caong tix ang koe: bwanson: tidtix.
Pex mawh pa riieng haktiex heue, veng pa hoik yuh kah piang gawng ang pon tix mox.
Pwi pa tok kawkngu ang sax sau: greem: phliex, viang mawh nan:, deuh piang pheen:, yuh kah mawx sonsang jhan: riieng son pwi pa ot daux nyiiex khawm: uik.
Awm: an: kieh pa riieng pex jhan: riieng sivoe ngai: kawn: pwi heue, yuh kah mawx sonsang yaox kix kaing pa yuh pex pa mhawm:, mai yaogyaw Keeing: pex pa ot daux Meung Raoma:.
Yesux Hoek Tix Kieh Lox Lai Beenli Grum Naog
"Pex paw ce: Aux hoek tix yuh laux lox beenli, mai lox cao: jhai: khankix, Aux hoek tix yuh laux ang mawh, hoek tix kieh naog heue.
Aux krai lox tete telai kah pex, tom: haktiex mai raoma: ang nyang bax grai:, ngai: lai lai beenli viang ki iak miex ding ang ah, ang chix grai: chix grup tix gum kawx, tom: hoik mawh hoik naog khawm: uik.
Mawh kheu nan: pwi mawx ang ah phan: nawh lheu: gumlox tawm: ceu in: pa iak khaing: paox tix, mai gau pwi tang: kaux yuh nan:, tag kok mawh pa nie iak khaing: paox tix kah daux meung raoma:. Viang mawh kawx nan:, pwi mawx ang ah phan: nawh hawt yuh, mai gau pwi tang: kaux yuh, tag sang kok nawh mawh pa ting kah daux Meung Raoma:.
Aux krai kah pex, phan: pa rah pa see pex ang lheu: khaing: pa rah pa see pwi tiem: lai mai Pharishie: khankix, pex ang tau tix pon laig kah daux Meung Raoma:.
Paw Pah Pwi Yum:
"Pex hoik mhong: grawhgrawng: grawng: lox pa hoik krai kah pwi ju didix pa ah nin:, `Maix paw vi pah pwi yum:, mai `kaw pa pah pwi yum: tee: hoek dee ciyang heue.
Viang mawh kawx nan: Aux krai kah pex, pwi pa songrhawm: kah puxaik nawh kukaux, tee: hoek dee ciyang. Mai pwi mawx ang ah, pa ah kah puxaik nawh,`Raka, tee: hoek dee prawng dee ca: cub kuad song: cao: prawng see: khankix, mai pwi mawx ang ah, pa ah,maix mawh pwi brai:, tee: hoek daux ngu mawnarhok heue.
Mawh kheu nan:, phan: maix viex pa tan pa lu kah khu: dee tan, mai doh keud kah phimap pa deuh puxaik maix tix ceu ceu.
Deuh pa tan pa lu maix sivoe khu: dee tan mai hu: kah puxaik maix mai kieh khaw: kieh caw paox tix kah: ha:, khaix an: deeh hoek mai tan pa tan pa lu maix heue.
Yam hu: maix krax tau mai kaw pa sang yuh see: kah maix, nied tix yuh pa khaw: rhawm: nawh heue, phan: ang mawh nan: ha: nawh kox teei tix tawx maix kah cao: prawng see:, mai cao: prawng see: an: teei tix tawx maix kah cao: giex kaing:, mai cao: giex kaing: sau: maix daux thawng: heue.
Aux krai lox tete telai kah maix, maix ang pon tix lih khaing: dee an:, sidauh ang maix nyang bax hoik plud piak san: ghoik tix piak heue.
Paw Phit Paw Vao mai Moeng Kawn: Pwi
"Pex hoik mhong: gumlox pa hoik ah nin:, Maix paw phit paw vao mai moeng pwi
Viang mawh kawx nan:, Aux krai kah pex, pwi mawx ang ah, pa jhak kah bun: mai koe: rhawm: tix sang phit mai nawh, hoik phit hoik vao mai nawh daux rhawm: tix heue.
Mai phan: ngai: khawn: dawm: maix, kieh maix phit, koh tix tik khaing: maix heue. Laux kraung pakpeung: maix tix ceu nie lheu: mhawm: khaing: laig maix daux mawnarhok khawm: kaux tix heue.
Mai phan: taix khawn: dawm: maix kieh maix phit, kid tix tik heue. Laux kraung pakpeung: maix tix ceu nie lheu: mhawm: khaing: laig maix daux mawnarhok khawm: kaux tix heue.
Grawng: Pa Tik Mex Moeng:
Mathiex 19:9; Makux 10:11,12; Lukax 16:18
Viang mawh lox pa krai tix deuh ah nin: kah koe:, Pwi mawx ang ah pa simie tix tik moeng tix, kieh nawh tawx nawh lai grawhgrawng: hoik hoik lox heue.
Viang mawh kawx nan: Aux krai kah pex, pwi mawx ang ah phan: nawh tik moeng tix lheu: khaing: grawhgrawng: pa phit pa vao nawh, nawh kieh bun: an: mawh pwi phit pwi vao, mai pwi mawx ang ah pa teei tix moeng bun: an: nawh phit nawh vao heue.
"Pex hoik mhong: lox pa hoik krai kah pwi ju didix khankix ah nin:,Maix paw tiex paw tu grawhgrawng: pa ang mawh ang meh, viang mawh kawx nan:, yuh pa tiex pa tu maix plak sivoe Simiang heue.
Paw Tieh Paw Tu
Viang mawh nan: Aux krai kah pex, paw vi tiex paw vi tu ceeix kawx, paw tiex paw tu kah raoma:, kheu raoma: mawh dangngeung Siyiex heue.
Haktiex in: kawx paw tiex paw tu kah, kheu mawh ngot dee deuh Nawh caong Tix. Veng Yerusaliem kawx paw tiex paw tu kah, kheu mawh veng laux simiang ting heue.
Paw tiex paw tu kah kaing: tokaux tix, kheu pex ang chix yuh hauk kaing: pex, kieh lung kieh paing tix gawng: kawx.
Kieh lox pex mawh,mawh heue. mawh heue, ang mawh heue, ang mawh heue, khaing:, pa lheu: khaing: an: mawh pa lih khaing: pa caox heue.
Paw Pawk Bix
"Pex hoik mhong: lox pa hoik deuh ah nin:, Ngai: tix mu: son ngai: tix mu:, mai rhang: tix plah son rhang: tix plah
Viang mawh nan: Aux krai kah pex, paw kiex paw paw kah pwi caox heue. Pwi mawx ang ah phan: simang: sibax pex khawn: dawm:, deeh veeh kah nawh khawm: tang: plak.
Mai Phan: pwi tix kauxkaux simie tix yuh see: kah maix, mai teei sibex maix, prux fua: maix kawx baox tawx kah nawh heue.
Mai pwi mawx ang ah pa khin: maix hu: tix lag, hu: mai nawh ra: lag heue.
Tawx kah kaw pa rawg pa mhaing: kah maix, mai kaw pa sang yaog sang yaing paw vud tix hu: khaing: nawh heue.
Moh Kah Pwi Pa Koeng Kah Pex
Lukax 6:27-28, 32-36
"Pex hoik mhong: lox pa deuh ah nin:, Maix tag moh pwi paoxplawg paoxnyhawm: tix, mai koeng kah pwi pa koeng kah maix heue
Viang mawh kawx nan: Aux krai kah pex, moh pwi pa koeng kah pex, mai rawg bwan:, son pwi pa tuktiaktukte: kah pex heue.
Yuh kah mawx sonsang mawh pex kawn: Keeing: pex pa ot daux meung raoma:, kheu Nawh kieh singaix lih piang pwi caox pwi mhawm:, mai Nawh kieh lhiex lih piang pwi rah pwi see, mai pwi ang rah ang see heue.
Phan: pex moh pwi pa moh kah pex khaing:, pex tag pon bwanson: yuh kah mawx? Pie pwi koh mau khankix kawx, yuh nan: ang mawh lie?
Phan: pex nawb pex sikah mai puxaik pex khaing:, pex yuh pa lheu: khaing: tang: kaux pa yuh kah mawx? Pwi tang: ceu tang: cat kah yuh nan: ang mawh lie?
Mawh kheu nan: pex tag grum mhawm:, awm: grum mhawm: Keeing: pex piang raoma: heue."
Grawng: Pa Yuh Krax Pa Mhawm:
Pwi tix kaux kawx ang chix yuh son simiang ra: kaux, mawh kheu nawh tag koeng kah tix kaux, mai moh tang: kaux an:, phan: ang mawh nan:, nawh tag een: rhawm: kah tix kaux, mai nieb yuh kah tang: kaux an: heue. Pex ang pon tix yuh son Siyiex, mai khawm: son sinngao heue.
Paw Koe: Krax Khirhawm: Khirhi:
Lukax 12:22-31
Mawh kheu nan: Aux ah nin: kah pex, pex sang ih sang nyaux pa yuh kah mawx son ju tix, mai sang ceep pa yuh kah mawx, son tokaux tix, paw vi khi: kah. Ju kienie, lheu: mhawm: khaing: pa ih pa un: ang mawh lie? Mai tokaux lheu: mhawm: khaing: kraung ceep ang mawh lie?
Jhak kah sim: pa po: piang raoma: khankix heue, kix ang rhuat ang van: simie, mai kix ang vawg, mai kix ang sau: daux krao:, viang mawh nan:, Keeing: pex piang raoma: tawx kix ih heue. Pex lheu: mhawm: lheu: ngawh khaing: sim: khankix ang mawh lie?
Mai kah daux pex kheu pa khirhawm: khirhi: pwi mawx chix kieh tokaux tix baox lhaong: tix sawk?
Mai pex khirhawm: son kraung ceep yuh kah mawx? Keud tix yaox grawhgrawng: tai siyak pa koe: daux tiag, daux tu chix ting chix lhaong: yuh kah mawx. Kix ang yuh kaing mai ang kling: heue.
Viang mawh nan: Aux krai kah pex viang mawh kraung pa ceep simiang Sawlamun pa ting min: plakngai: ang mhawm: awm: tai an: khankix tix kho: kawx heue.
Pex pa iak krax yumrhawm: eue, phan: Siyiex tawx pa ceep pa mhawm: awm: an: kah num: rib num: riem daux tiag daux tu, pa koe: singaix, mai pa teei tix sau: kah daux, daux ngu pasax, Nawh sang tawx kraung ceep pa lheu: khaing: an: kah pex ang mawh lie?
Mawh kheu nan: paw khirhawm: tix ah nin:,Ex sang ih patix? Phan: ang mawh nan: ex sang nyaux patix? Phan: ang mawh nan: ex sang ceep patix?:
Mawh Kheu pwi tang: ceu tang: cat khankix sawg ceu an: khawm: uik heue. Grawhgrawng: nawh, Keeing: pex piang raoma: hoik tawng grawng: pa lo pex ceu in: khankix khawm: uik heue.
Mawh kheu in: pex sawg Meung Siyiex mai pa rah pa see Nawh phaoka: ha:, mai Nawh tag baox tawx ceu in: khawm: uik kah pex heue.
Mawh kheu nan: paw vi khirhawm: son pasax, kheu pasax tag sang khirhawm: son pasax. Mawh kheu pa ang mhawm: pa caox singaix kub son singaix heue."
Paw Prawng Paw Ca:
Lukax 6:37-38, 41-42
"Paw prawng paw ca:, yuh kah mawx son ang pex sang hoek krax prawng krax ca:.
Mawh kheu pex prawng pex ca: kah pwi yuh kah mawx, tag sang prawng sang ca: kah pex yuh nan:, mai pex tong: pex tiag tix tawx kah pwi tang: kaux miex ding, tag sang deeh tong: deeh tiag tix tawx kah pex yuh nan: heue.
Mai yuh kah mawx maix jhak kuh ngai: pa iak daux ngai: puxaik maix, mai ang keud grawhgrawng: nuk pa koe: daux ngai: tokaux tix.
Phan: ang mawh nan: maix chix ah kah puxaik maix, kieh aux teei tix tik kuh ngai: maix yuh kah mawx? yam kawn: koe: nuk daux ngai: maix.
Pwi pie pwi lhen: eue, teei tix tik nuk pa koe: daux ngai: maix kah: ha:, mai maix tag sang yaox mhawmmhawm:, sonsang teei kuh lih khaing: ngai: puxaik maix heue.
"Paw tawx pa singax singeh kah sox, siang: mhawm: ceu pa koe: daux jawx cie pex kawx, paw taing sivoe lig, phan: ang mawh nan: ha kix kox dig greem: caong tix, mai deeh veeh mai kiied pex kie.
Rawg, Sawg, Glheuh Siviex
Lukax 11:9-13
Rawg heue, mai tag sang tawx kah pex. Sawg heue, mai pex tag sang yaox. Gleuh siviex heue, mai tag sang paoh son pex heue.
Grawhgrawng: nawh, pa rawg kukaux tag pon, mai kaw pa sawg tag yaox, mai kah kaw pa gleuh siviex tag paoh son nawh heue.
Kah daux pex koe: tix kauxkaux lie, yam rawg yam mhaing: kawn: tix khaomun, pa teei simaox tawx kah nawh.
Mai phan: ang mawh nan:, phan: nawh rawg nawh mhaing: kax, pa tawx siuing: kah lie?
Phan: pex pa mawh pwi caox kawx, chix tawx kraung pa mhawm: kah kawnpraix tix, Keeing: pex pa ot kah daux meung raoma: tag nie lheu: tawx ceu pa mhawm: kah pwi pa rawg kah Nawh miex ding?
Mawh kheu nan:, can ceu pa simie pex pwi yuh kah tix khawm: uik, pex kawx, yuh nang: nan: kah kix heue. Kheu in: mawh lox lai beenli mai lox cao: jhai: khankix heue.
Siviex Pa iak Pa Sikhawp
Lukax 13:24
"Pex laig kah daux siviex pa iak pa sikhawp heue. Mawh kheu siviex mai krax pa hoek dee laux dee leeing: mawh pa ting pa vieh, mai pwi pa laig tan: kied nie heue.
Mawh kheu siviex mai krax pa hoek dee sang pon ju leeing ju leeing phan: mawh pa iak pa sikhawp, mai pwi pa yaox kied tux heue.
Tag Tawng Khaox Kah Plix Kix
Lukax 6:43-44
"Rien rhawm: tix kah cao: jhai: pa ang mawh ang meh khankix, pa ceep hak yung: plak piang, viang mawh nan: kah plak daux mawh soxla pa caox heue.
Pex tag tawng kix kah plix kix heue. Pwi pieh plix siiet kah pangkat lie? mai pieh plix ruh kah pangkat heeik lie?
Khaox pa mhawm: ku khaox plix plix pa mhawm:, viang mawh kawx nan: khaox pa ang mhawm: plix plix pa ang mhawm: heue.
Khaox pa mhawm: ang chix plix plix pa ang mhawm:, khaox pa ang mhawm: kawx, ang chix plix plix pa mhawm: heue.
Khaox pa ang plix plix pa mhawm: ku khaox, kid goh mai taing sau: daux ngu heue.
Mawh kheu nan: pex tag tawng kix kah plix kix heue.
Aux Ang Sax Tawng Pex
Lukax 13:25-27
Pwi pa kok kah Aux,`Simiang eue Simiang eue, pon tix laig kah daux meung raoma: kukaux ang lai mawh. Viang mawh kawx nan:, mawh kaw pa yuh hawt alo Keeing: Aux pa ot kah daux meung raoma: khaing: pa pon tix laig heue.
Kah daux singaix an: sax, pwi haoh pwi hun: tag sang ah nin: kah Aux.`Simiang eue, Simiang eue, ex hoik sidiex lox jhai: kah daux ceukaux Maix, mai hoik sigrheu: phicaox khankix kah daux ceukaux Maix, mai hoik yuh kaing pa ting siawpsibrawm tom: nie kah daux ceukaux Maix ang mawh lie?:
Mai Aux tag krai kah kix sidawng:,Aux ang sax tawng pex, pex pa yuh phimap phigrham: khankix eue, lih hu: khaing: Aux
Pwi Sum: Nyiiex Ra: Kaux
Lukax 6:47-49
"Mawh kheu in: pwi pa mhong: gumlox Aux in:, mai hawt tix yuh kukaux daux pwi, tag sang awm: pwi pa lhak pa lhiem: tix kaux, pa sum: nyiiex nawh kah piang simaox.
Mai lih lhiex, mai rawm: haok huan:, mai bhaung: khankix phlu:, mai klah kah nyiiex an:, viang mawh nan: nyiiex an: ang goh, kheu hoik sum: kah piang simaox heue.
Pwi pa mhong: gumlox Aux in: mai ang hawt tix yuh, kukaux daux pwi, tag sang awm: pwi daox tix kaux, pa sum: nyiiex nawh kah piang mhaik.
Mai lih lhiex, mai rawm: haok huan:, mai bhaung: khankix phlu:, mai klah kah nyiiex an:, mai nyiiex an: goh heue. Mai pa goh an: kied ting."
Mai khaix hoik sidiex Yesux lox ceu in: khankix, cub pwi haoh pwi hun: khankix daox deng: kah lox sidiex lox gau Nawh Cao: heue.
Mawh kheu Nawh sidiex gau kah kix awm: pwi pa koe: siawpsibrawm, mai ang awm: pwi tiem: lai kix khankix heue.
Yesux Pai: Moi: Pwi Saux Sipawg Singax
Makux 1:40-44; Lukax 5:12-14
Yam lih hoek Nawh Cao: khaing: piang gawng, cub pwi haoh pwi hun: hawt Nawh heue.
Mai jhak heue, pwi sipawg tix kaux hoek mai krub kah Nawh Cao: ah nin:, "Simiang eue, phan: Maix koe: rhawm:, tix cox aux kieh aux singax Maix chix heue."
Mai Nawh Cao: nyeu taix Tix mai teeh kah kaw an: ah nin:, "Aux koe: rhawm: heue, kieh maix singax heue." Mai dom: mawx dom: an: pa sipawg nawh singax heue.
Mai Yesux baox ah nin: kah nawh, "Rien rhawm: tix mai paw krai kah pwi tix kaux kawx, viang mawh nan: hu: mai jhi: tokaux tix kah cao: giex kaing: li pa ting, mai tawx pa tan pa lu awm: pa nhie: Mose, sonsang mawh mhai: sakse kah kix heue."
Grawng: Pai: Moi: Kawncau Cao: Kaing: Naing
Lukax 7:1-10
Mai yam hoik laig Nawh Cao: kah daux veng Kapeniom, cao: giex kaing: naing tix kaux hoek kah Nawh mai khyox khaw: kah Nawh,
ah nin:, "Simiang eue siliex aux tix kaux koe: jhawm: saux yum: taix yum: caong mai it daux nyiiex, mai nawh tuat siviet kied sigrien heue."
Mai Nawh Cao: ah nin: kah nawh, "Aux sang hoek mai cox nawh moi: heue."
Mai cao: giex kaing: naing an: pawk lox mai ah nin:, "Simiang eue, ang aux keung: tix kieh Maix hoek kreed greem: braux nyiiex aux, viang mawh nan: tawx ngie lox tix gum khaing: mai siliex aux tag moi: heue.
Kheu aux mawh pwi ot greem: simiang kawx, aux koe: pwi naing greem: aux heue. Phan: aux nhie: tix kaux hu:, nawh hu:, mai phan: aux nhie: tang: kaux hoek, nawh hoek heue, mai phan: aux nhie: siliex aux yuh ceu in:, nawh yuh heue."
Mai yam mhong: Yesux lox ceu an:, Nawh daox deng: kah, mai ah nin: kah pwi pa hawt khaix Nawh khankix, "Aux krai lox tete telai kah pex, ang Aux sax yaox pwi pa yumrhawm: nie ding nie dod kah daux pwi Isarilax heue.
Aux baox ah nin: kah pex, pwi tag hoek khaing: plak lih singaix mai plak klip singaix tom: nie, mai tag ngawm tau mai Abraham mai Icak mai Yakop, kah daux meung raoma: heue.
Viang mawh nan: kawnpraix meung an: tag grheu: lih plak praix daux pa faik, dee tag yiiem riag mai dee greeik rhang: heue."
Mai Yesux baox ah nin: kah cao: giex kaing: naing an:, "Maix hu: heue, awm: hoik yumrhawm: maix, kieh mawh son maix." Mai siliex nawh moi: bawg yam nari an: heue.
Yesux Pai: Moi: Miex Moeng: Petrux
Makux 1:29-31; Lukax 4:38-39
Yam hoek Yesux daux nyiiex Petrux, Nawh yaox miex moeng nawh saux mai it heue.
Mai Nawh Cao: teeh taix kiex, mai jhawm: saux kiex grai:, mai kiex kaoh, mai khan: kheu: kah Nawh Cao: heue.
Yesux Pai: Moi: Pwi Saux Tom: Nie
Makux 1:32-34; Lukax 4:40-41
Mai yam hoek yam ponbo kix viex pwi pa laig phicaox haoh hun: kah Nawh Cao:, mai Nawh teei gumlox tix gum khaing: grheu: phicaox khankix lih, mai Nawh cox pwi pa koe: jhawm: saux jhawm: ngia khawm: uik kieh kix moi: heue.
Yuh kah mawx sonsang naog lox pa krai cao: jhai: Isayax pa ah nin:, "Tokaux Nawh teei pa iak riang iak rao ex, mai kawg jhawm: saux jhawm: ngia ex khankix heue."
Pwi Pa Khaw: Tix Hawt Khaix Yesux
Lukax 9:57-62
Yam yaox Yesux cub pwi haoh pwi hun: ot sivie Nawh tan:, Nawh cao: tawx lox kieh hu: plak toi: rawm: heue.
Mai pwi tiem: lai tix kaux hoek mai ah nin: kah Nawh Cao:. "Sara Cao: Gau eue, aux sang hawt dee sang hu: Maix kudauh kudee heue."
Mai Yesux ah nin: kah nawh, "Sox praix khankix koe: daux, mai sim: piang raoma: khankix koe: mheem:, viang mawh kawx nan: Kawn: kawn: pwi ang koe: dee deuh kaing: Tix heue."
Mai kawncau tang: kaux tix kaux ah nin: kah Nawh Cao:, "Simiang eue, kieh aux hu: sipaung: keeing: aux kah: ha:."
Viang mawh kawx nan: Yesux ah nin: kah nawh, "Hawt Aux heue, mai kieh pwi yum: sipaung: pwi yum: cie kix heue."
Yesux Kieh Bhaung: Ting Yiien Yawg
Makux 4:36-41; Lukax 8:22-25
Mai yam hoik laig Nawh Cao: kah daux reu kawncau Nawh khankix hawt Nawh heue.
Mai jhak heue, bhaung: ting hoek tix phlu: kah daux rawm: nhawng:, tom: pukpak rawm: kheem: reu an:, viang mawh kawx nan:, Nawh Cao: it heue.
Mai kix hoek dex kah Nawh Cao: mai so: Nawh siduad, mai ah nin:, "Simiang eue, taohex liak, ex dex sang laux heue."
Mai Nawh Cao: ah nin: kah kix, "Pex pa iak krax yumrhawm: yumrhi: eue, pex lhat graung yuh kah mawx?" Yam an: Nawh kaoh mai ah kah bhaung: khankix, mai rawm: nhawng:, mai deeh yiien: sigrien sigre heue.
Mai pwi khankix daox deng: kah tom: ah nin:, "Kaw in: mawh Pwi pa yuh kah mawx? Pie bhaung: khankix mai rawm: nhawng: kawx, nghiiet lox Nawh heue."
Yesux Grheu: Phicaox Lih Khaing: Pwi Ra: Kaux
Makux 5:1-20; Lukax 8:26-39
Mai yam hoek Nawh Cao: plak toi: rawm: kah daux meung Kadarax, pwi pa koe: phicaox ra: kaux lih khaing: daux simeeig mai rieb Nawh. Kiex kied kua: tom: ang pwi tix kaux kawx pon hu: krax an: heue.
Mai jhak heue, kiex kok yo ah nin:, "Kawn: Siyiex eue, Maix koe: pa yuh mai yiex ceu patix? Maix hoek tix tuktiaktukte: yiex kah, kah: sang hoek bawg yam lie?"
Kah dee singai khaing: kix koe: cub lig tix cub pa sawm: tan: heue.
Mai phicaox khankix khyox khaw: kah Nawh Cao: ah nin:, "Phan: Maix grheu: ex lih, ploi: ex laig kah daux cub lig an: liak."
Mai Nawh Cao: ah nin: kah kix, "Hu: heue." Mai kix lih hu: laig kah daux lig an: khankix, mai jhak heue, cub lig an: khawm: uik to: lih kah dee nie rieh jun: jee laig kah daux rawm: nhawng: mai yum: daux rawm: heue.
Mai pwi pa liang lig khankix to: hu: laig kah daux veng, mai krai grawhgrawng: kuceu, pa hoik mawh kah kiex pa hoik laig phicaox heue.
Mai jhak heue, pwi daux veng khawm: uik hoek tix jhak tix yaox kah Yesux, mai yam yaox kix Nawh Cao: kix khyox khaw: nhie: Nawh lih hu: khaing: daux meung kix heue.
Yesux Pai: Moi: Pwi Pa Koe: Jhawm: SauxYum: Taix Yum: Caong
Makux 2:1-12; Lukax 5:17-26
Mai Nawh Cao: laig daux reu mai deeh tiang hu:, mai hoek kah daux veng tokaux Tix heue.
Mai jhak heue, kix viex pwi pa koe: jhawm: saux pa yum: taix yum: caong tix kaux hoek kah Nawh, pa it kah piang ku:, mai yam yaox Yesux krax yumrhawm: kix, Nawh ah nin: kah kaw pa yum: taix yum: caong an:, "Kawn: eue, gauxrhawm: heue, hoik pluat phimap maix heue."
Mai jhak heue, pwi tiem: lai tiblah ah nin: daux tokaux tix, "Pwi in: salao kah Siyiex heue."
Yesux tawng pa keud pa sawn: kix daux rhawm: tix mai ah nin:, "Pex keud pex ce: pa caox daux rhawm: tix yuh kah mawx?
Lox yuh kah mawx lheu: yie tix ah,Hoik pluat phimap maix heue yie tix ah lie? Phan: ang mawh nan:,Kaoh, mai hu: heue, yie tix ah lie?
Viang mawh kawx nan:, yuh kah mawx pex tag sang tawng grawhgrawng: Kawn: kawn: pwi koe: siawpsibrawm tix chix pluat phimap kah piang haktiex, (Nawh Cao: baox ah nin: kah pwi pa koe: jhawm: saux pa yum: taix yum: caong an:) Kaoh, mai teei kraung it maix, mai deeh ing: kah nyiiex maix heue."
Mai kaw an: kaoh mai ing: kah nyiiex tix heue.
Yam yaox cub pwi haoh pwi hun: ceu an:, kix lhat mai yaogyaw Siyiex, pa hoik tawx siawpsibrawm pa yuh nan: kah pwi heue.
Pa Kok Kah Mathiex
Makux 2:14-17; Lukax 5:27-32
Mai yam hu: Yesux khaing: tan: Nawh yaox pwi tix kaux, pa kaux Mathiex, ngawm dee koh mau, mai ah nin: kah nawh, "Hawt Aux heue." Mai nawh kaoh mai hawt khaix Nawh Cao: heue.
Mai khaix an: yam ngawm neung Nawh Cao: mai sawm: kah daux nyiiex, jhak heue, pwi koh mau mai pwi ting map ting grham: hoek ngawm tau mai Yesux mai kawncau Nawh khankix heue.
Mai yam yaox Pharishie: khankix ceu an:, kix ah nin: kah kawncau Nawh khankix, "Sara Cao: Gau pex sawm: tau mai pwi koh mau mai pwi ting map ting grham: khankix yuh kah mawx?
Viang mawh nan: yam mhong: Nawh Cao: lox ceu an: Nawh ah nin:, "Pwi pa nyawm ot nyawm koe:, ang lo pwi pa chix sidauh dim: viang mawh kawx nan: mawh pwi pa koe: jhawm: saux jhawm: ngia khaing: pa lo pwi chix sidauh.
Pex hu: mai gau dee bleeh lox in: heue, Aux moh krax caoxrhawm:, mai ang moh krax tan krax lu Kheu hoek Aux sonsang kok pwi rah pwi see khankix ang mawh, viang mawh nan: hoek tix kok pwi pa koe: map koe: grham: heue."
Grawng: Pa Krai Yesux Krax Twah Pa Ih Pa Un:
Makux 2:18-22; Lukax 5:33-39
Yam an: kawncau Yohan khankix hoek kah Nawh Cao: mai ah nin:, "Ex mai Pharishie: khankix twah pa ih pa un: lawlawx, viang mawh nan: kawncau Maix ang twah pa ih pa un: yuh kah mawx?"
Mai Yesux ah nin: kah kix, "Paoxgrawm pwi pa yuh kapaox chix khirhawm: khirhi: yam kawn: ot kaw pa yuh kapaox mai kix lie? Viang mawh kawx nan: bawg yam singaix tag sang hoek, yam tag sang teei kaw pa yuh kapaox khaing: kix, mai yam an: kix tag twah pa ih pa un: heue.
Pwi tix kaux kawx ang sax teei man: pa khraox blaox kraung ceep pa prim:, phan: yuh nan: kienie, man: pa hoik blaox daux griah tag kieh pa prim: laux, mai daux griah tag nie vieh khaing: phaoka: heue.
Pwi ang sax teei rawm: plix siiet pa khraox sau: kah daux chee: hak pa prim:, phan: yuh nan: kienie, chee: hak tag bih, mai rawm: plix siiet tag hieh, mai chee: hak tag laux heue. Viang mawh nan: pwi sau: rawm: plix sieht pa khraox, kah daux chee: hak pa khraox, mai khawm: ra: ceu ang laux ang leeing: heue."
Kawn: Bun: Pa Yum: mai Bun: Pa Lih Nham: Kao: Num Ra:
Makux 5:21-43; Lukax 8:40-56
Yam krai Nawh Cao: lox ceu in: khankix kah kix, jhak heue, pwi giex kaing: tix kaux hoek mai krub Nawh Cao: ah nin:, "Kawn: bun: aux tix kaux yamin kawx hoik yum:, viang mawh kawx nan: hoek mai deuh taix Maix piang nawh mai nawh tag deeh im: heue."
Mai Yesux kaoh, mai khawm: kawncau Nawh khankix hawt kaw an: heue,
Mai jhak heue, yam an: bun: tix kaux pa hoik koe: jhawm: saux pa lih nham:, kao: num ra:, hoek plak khaix Nawh mai teeh caong kraung ceep Nawh Cao: heue.
Kheu nawh keud daux rhawm: tix ah nin:, "Phan: aux teeh kraung ceep Nawh Cao: khaing:, aux tag moi: heue."
Viang mawh nan: Yesux deeh gi mai yaox bun: an: mai ah nin:, "Kawn: bun: Aux eue, kieh gauxrhawm: heue, krax yumrhawm: maix hoik kieh maix moi:." Mai kah daux bawg yam nari an: bun: an: moi: heue.
Mai yam hoek Yesux kah daux nyiiex pwi giex kaing:, mai yaox pwi pa phlu: lawkleh khankix, mai cub pwi pa sinum siaox tan: khankix.
Nawh Cao: ah nin:, "Yoi: heue, mawh kheu kawn: bun: in: ang yum:, mawh ngie laig it nawh khaing:." Mai kix yuh pa ang yung: ang yi: nyiah kah Nawh Cao: heue.
Khaix hoik kieh cub pwi lih, Nawh Cao: laig kah daux mai teei taix bun: an:, mai nyawm bun: an: kaoh heue.
Mai min: plakngai: kheu grawhgrawng: ceu an:, tah hu: kah daux haktiex an: khawm: uik heue.
Yesux Pai: Moi: Pwi Dug Ngai: Ra: Kaux
Mai yam kaoh Yesux khaing: dee an: mai hu:, pwi dugngai: ra: kaux hawt khaix Nawh Cao: mai kok yo ah nin:, "Kawn: Davit eue, caoxrhawm: kah yiex liak."
Mai yam hoik laig Nawh Cao: kah daux nyiiex, pwi dugngai: an: khankiex hoek dex kah Nawh Cao:, mai Yesux ah nin: kah kiex, "Pax yumrhawm: grawhgrawng: pa chix yuh Aux ceu in: lie?" Kiex tom: ah nin: kah Nawh Cao:, "Mawh heue Simiang."
Yam an: Nawh Cao: teeh ngai: kiex, ah nin:, "Awm: yumrhawm: pax kieh mawh kah pax heue."
Mai ngai: kiex blah heue. Mai Yesux tawm: lox kah kiex ah nin:, "Paw vi kieh pwi tawng tix kaux kawx."
Viang mawh kawx nan: kiex hu: mai kieh min: plakngai: Nawh Cao: tah kah daux haktiex an: khawm: uik heue.
Yesux Pai: Moi: Pwi Aw: Tix Kaux
Mai yam lih hu: kiex, jhak heue, pwi viex pwi aw: pa laig phicaox tix kaux, hoek kah Nawh Cao: heue.
Mai khaix hoik grheu: phicaox an: lih, pwi aw: an: sikah heue. Mai cub pwi haoh pwi hun: khankix daox deng: kah, mai ah nin:, "Ang sax yaox ceu pa awm: in: daux Isarilax heue."
Viang mawh kawx nan: Pharishie: khankix ah nin:, "Nawh een: rhawm: kah simiang phicaox mai grheu: phicaox khankix lih heue."
Yesux Caoxrhawm: Kah Pwi Haoh Pwi Hun:
Mai Yesux hu lailing kah daux yaong: daux veng khawm: uik, mai gau kah daux nyiiex dee sidiex kix khankix, mai sidiex lox bwan: pa gauxrhawm: gauxrhi: pa dex pa dawd mai Meung Siyiex, mai cox pwi pa koe: jhawm: saux jhawm: ngia kuceu moi: heue."
Viang mawh kawx nan:, yam yaox Nawh Cao: cub pwi haoh pwi hun: Nawh koe: krax caoxrhawm: son kix, kheu kix koe: krax kharhawm: kharhi: mai prungprang:awm: yung: pa ang koe: cao: liang cao: kia: heue.
Yam an: Nawh Cao: ah nin: kah kawncau Nawh khankix, "Nghox pa kaux pa khaw: tix vawg nie tete, viang mawh kawx nan: pwi pa vawg tux heue.
Mawh kheu nan: pex rawg bwan: kah Simiang cao: nghox, yuh kah mawx sonsang ploi: Nawh pwi vawg nghox khankix hoek sonsang vawg nghox Nawh heue."
Kawncau Kao: Kaux Ra:
Makux 3:13 – 19; Lukax 6:12 – 16 (GNB)
Mai Nawh Cao: kok kawncau Nawh kao: kaux ra: hoek kah Tix, mai tawx kix siawpsibrawm piang phi: pa seeing: pa brai: khankix, sonsang grheu: kix lih, mai sonsang cox jhawm: saux jhawm: ngia kuceu moi: heue.
Ceukaux kawncau Nawh pa ting kao: kaux ra: mawh nin:, kaw phaoka: mawh Simon, pa kok mawh Petrux, mai pux nawh Andare. Yakop kawn: Zebedie:, mai pux nawh Yohan.
Philipux mai Bathawlamie:. Thomax mai Mathiex pwi koh mau. Yakop kawn: Alaphie:, mai Lebie: ceukaux ru nawh mawh Thatdie:.
Simon pwi Kananix mai Yudax Isakariut, kaw pa tik pa tawx Nawh Cao: heue.
Ploi: Kawncau Kao: Kaux Ra: Hu: Sidiex
Makux 6:7 – 13; Lukax 9:1 – 6
Yesux ploi: pwi kao: kaux ra: in: hu:, mai tawm: lox kah kix ah nin:, "Pex paw vi hu: dee ot pwi tang: ceu tang: cat, mai paw vi laig daux veng pwi Samarix tix veng kawx.
Viang mawh kawx nan: hu: kah yung: pa hoik grai: pa dex mai geh nyiiex Isarilax heue.
Mai yam hu: pex sidiex gau ah nin:,Meung Raoma: uik dex sang hoek heue
Cox pa koe: jhawm: saux jhawm: ngia moi:, kieh pa hoik yum: deeh kaoh im:, kieh pwi sipawg khankix singax, mai grheu: phicaox khankix lih heue. Pex ang tawx ngawh mai hoik pon, paw teei ngawh mai tawx heue.
Paw vi sau: khri:, mau, tawng, daux hau: maox khlax.
Paw vi teei bau: son yam hu: krax, paw vi teei sibex ra: pheen:, paw teei kiep, paw teei khaox gix, mawh kheu pwi yuh kaing keung: tix pon pa ih pa un: tix heue.
Mai pex laig daux yaong: daux veng mawx ang ah, sawg tix yaox pwi pa keung:, mai ot tan: tom: lih hu: pex heue.
Yam laig pex daux nyiiex, kienie, nawb heue.
Phan: nyiiex an: keung: kieh pa nhim: pex ot piang nawh heue, viang mawh kawx nan: phan: ang keung: kieh pa nhim: pex deeh hoek kah pex heue.
Mai pwi mawx ang ah, pa ang rieb pex, mai ang nghiiet lox pex, yam lih hu: pex khaing: daux nyiiex an:, phan: ang mawh nan: khaing: daux veng an:, khruah tix tik phawng: tiex pa koe: kah caong pex tan: heue.
Aux krai lox tete telai kah pex, tag sang lheu: yie tix kham: son haktiex Sawdom mai Gawmawrax daux singaix ciyang singaix prawng sax, khaing: son veng an: heue.
Kham: Geu: Ceu Pa Tuktiaktukte:
Makux 13:9-13; Lukax 21:12-17
"Jhak heue, Aux ploi: pex hu: awm: yung: hu: sinax soxla khankix heue. Kheu nan: pex lhaklhiem: awm: siuing: khankix, mai ang chix phit awm: sikaux khankix heue.
Rien rhawm: tix kah pwi heue, kheu kix tag teei pex tawx kah cub kuad song: cao: prawng see: khankix, mai kix tag sivied pex daux nyiiex dee sidiex kix khankix heue.
Mai sivoe pwi giex kaing: mai simiang khunhawkham khankix kawx, tag sang viex pex hu:, mawh kheu Aux, yuh kah mawx sonsang mawh mhai: sakse son kix mai kah pwi tang: ceu tang: cat khankix heue.
Viang mawh nan:, yam teei kix tix tawx pex paw khirhawm: grawhgrawng: lox pa sang ah sang krai pex, kheu lox pa sang ah sang krai pex tag tawx kah pex kah daux bawg yam nari an: heue.
Mawh kheu pex ah pex krai ang mawh, viang mawh nan: mawh Khwan: Keeing: Cao: pa ah pa sikah kah daux pex heue.
Mai puxaik tix kaux hoik tix kaux tag sang teei tix tawx puxaik tix sonsang pah yum:, mai keeing: kawx tag teei tix tawx kawn: tix, mai kawnpraix khankix kawx tag kaoh tix yuh kah miex keeing: tix mai kieh pah kix yum: heue.
Mai pwi khawm: uik tag koeng kah pex mawh kheu ceukaux Aux. Viang mawh kawx nan: kaw pa kaux pa cong: tom: sidauh kaw an: tag hoek krax taoh heue.
Yam tuktiaktukte: pwi kah pex daux veng in:, to: hu: tang: veng heue. Aux krai lox tete telai kah pex, kah: ang pex nyang tah daux veng Isarilax khankix, Kawn: kawn: pwi tag hoek heue.
"Kawncau ang lheu: ting khaing: sara cao: gau, mai siliex ang lheu: ting khaing: simiang nawh.
Phan: kawncau awm: sara cao: gau nawh, mai siliex awm: simiang nawh, ding heue. Phan: kix hoik kok Cao: nyiiex Belazebulax, kix tag nie lheu: kok pwi nyiiex Nawh khaing: in: miex ding heue.
Pwi Pa Caw Ex Tix Lhat Kah
Lukax 12:2-7
Mawh kheu in: paw vi lhat kah kix, mawh kheu ang koe: tix ceu kawx pa hoik kheem: hoik tawb pa tag ang deeh hoe:, mai pa hoik mox ang koe: tix ceu kawx pa ang deeh kieh tawng heue.
Pa krai Aux kah pex, kah daux pa faik pex hu: krai kah daux pa riieng. Pa mhong: pex daux yhaok, yo tix krai kah piang prang nyiiex heue.
Mai paw lhat kah kix pa chix teei tokaux yum:, mai ang chix teei ju yum:. Viang mawh kawx nan: lhat kah kaw pa chix yuh laux khawm: ju khawm: tokaux kah daux mawnarhok heue.
Coh saik tix piak ra: mu: ang mawh lie? Phan: Keeing: pex ang tawx akhwang: sim: khankix ang rau piang tiex tix mu: kawx.
Hauk kaing: pex kawx hoik simin khawm: uik heue.
Mawh kheu in: paw lhat heue, pex lheu: ngawh khaing: saik haoh hun: heue.
Rieb mai Thiang: Tix Tik Kah Khrit
Lukax 12:8-9
Pwi pa kham: tix rieb tix teei Aux kukaux, plak sivoe ngai: pwi, Aux tag kham: tix rieb tix teei nawh sivoe ngai: Keeing: Aux pa ot kah daux meung raoma: heue.
Viang mawh kawx nan:, pwi mawx ang ah, pa thiang: tix tik Aux plak sivoe ngai: pwi, Aux tag thiang: tix tik nawh plak sivoe ngai: Keeing: Aux pa ot kah daux meung raoma: heue.
Pa Nhim: mai Vaig
Lukax 12;51-53; 14:26-27
"Paw vi ce: Aux hoek tix ploi: pa nhim: piang haktiex in:, Aux hoek tix ploi: pa nhim: ang mawh, viang mawh nan: hoek tix ploi: vaig heue.
Mawh kheu hoek Aux tix kieh keeing: mai kawn: simex nawh, mai miex mai kawn: bun: nawh, mai yiex mai mun nawh ang khaw: rhawm: gwieh paox tix heue.
Mai pwi koeng tokaux tix khankix, tag mawh pwi daux nyiiex tokaux tix heue.
Kaw pa nie lheu: moh miex moh keeing: tix khaing: Aux, ang keung: kah Aux, mai kaw pa nie lheu: moh kawn: simex kawn: bun: tix khaing: Aux ang keung: kah Aux heue.
Kaw pa ang klawm: khaoxlhak tokaux tix mai hawt khaix Aux, ang keung: kah Aux heue.
Kaw pa sawg tix yaox ju tokaux tix tag som ju heue. Mai kaw pa som ju mawh kheu Aux tag yaox ju heue.
Pa Pon Bwanson:
Makux 9:41
"Kaw pa rieb tix teei pex, rieb tix teei Aux, mai kaw pa rieb tix teei Aux, rieb tix teei kah Kaw pa ploi: Aux hoek heue.
Kaw pa rieb tix teei cao: jhai: kah daux ceukaux cao: jhai: tag pon bwanson: cao: jhai: heue. Mai kaw pa rieb tix teei pwi rah pwi see kah daux ceukaux pwi rah pwi see, tag pon bwanson: pwi rah pwi see heue.
Mai pwi mawx ang ah pa sang tawx kawn: nyawm iak khankix tix kaux nyaux rawm: sikiied tix kawk ngie, kah daux ceukaux kawncau tix kauxkaux, Aux krai lox tete telai kah pex, bwanson: cie nawh tag ang som ang grai: heue."
Yohan Cao: Com Rawm: Ploi: Kawncau Tix Hu: Chawk Kah Yesux
Lukax 7:18-35
Mai khaix hoik tawm: Yesux lox kah kawncau Nawh kao: kaux ra:, Nawh Cao: lih hu: khaing: tan:, mai hu: sidiex gau kah daux veng kix khankix heue.
Yam an: Yohan ot kah daux thawng: mai mhong: grawhgrawng: kaing pa yuh Cao: Khrit khankix, nawh tom: ploi: kawncau tix tiblah hu:,
mai chawk ah nin: kah Nawh Cao:, "Maix mawh Kaw pa tag sang hoek an: lie?, phan: ang mawh nan: ex tag sang krox tix yaox son tang: kaux lie?"
Yesux pawk lox mai ah nin: kah kix, "Pex hu: mai krai kah Yohan grawhgrawng: ceu pa mhong: pa yaox pex,
pwi dugngai: pon tix deeh yaox, pwi laux caong pon tix deeh hu:, pwi sipawg deeh kieh singax, pwi lheet yhaok deeh chix mhong:, mai pwi pa hoik yum: deeh kieh kaoh im:, mai sidiex gau kah pwi hot pwi sibhawm: kieh mhong: lox bwan: gauxrhawm: gauxrhi: heue.
Mai pwi mawx ang ah, kaw pa ang yaox dee sideeing dee lauxrhawm: kah daux Aux, koe: bwanson: heue."
Mai khaix hoik hu: kix, Yesux jah tix sidiex gau grawhgrawng: Yohan kah cub pwi haoh pwi hun: khankix, "Pex lih hu: daux tiag daux tu tix jhak patix? Pex hu: jhak gawng: priem pa phlu: bhaung: mai vuhvied lie?
Phan: ang mawh nan: pex lih hu: tix jhak patix? Hu: sonsang yaox pwi pa ceep kraung pa awn: lie? Kix pa ceep kraung pa awn: khankix ot kah daux nyiiex simiang ting khankix heue.
Viang mawh nan: pex lih hu: kheu patix? Lih hu: sonsang yaox cao: jhai: lie? Mawh heue, Aux krai kah pex, mawh pa lheu: ting khaing: cao: jhai: heue.
In: mawh kaw pa hoik tiem: grawhgrawng: nawh ah nin:,
Jhak heue, Aux ploi: kawncau Aux hu: sivoe pakngai: Maix, pa tag sang cox krax Maix sivoe Maix heue
Aux krai lox tete telai kah pex kah daux pwi pa keh khaing: bun: khawm: uik, pa lheu: ting khaing: Yohan cao: baptis
ang sax lih koe: tix kaux kawx, viang mawh kawx nan: kaw pa nie iak khaing: paox tix kah daux meung raoma: lheu: ting khaing: nawh heue.
Jah kah yam Yohan cao: baptis
tom: sidauh sidu hoek bawg yamin, pwi rhim: tix teei Meung Raoma: mai grhawm: tix laig tan: heue.
Grawhgrawng: nawh cao: jhai: khawm: uik mai lox lai beenli gruh krai lox jhai: tom: hoek Yohan heue.
Phan: pex koe: rhawm: tix sang rieb sang teei, kaw in: mawh Eliyax pa tag sang hoek heue.
Kaw pa koe: yhaok tix mhong: kieh nawh mhong: heue.
Ceu pwi ju in: Aux sang phektem: Awm: patix? Awm: kawn: nyawm khankix pa ngawm daux lah, mai kok paox tix,
ah nin:,Ex hoik phlu: pi: son pex, mai pex ang grhaoh ang thiao:. Ex hoik yiiem riag, viang mawh kawx nan: pex ang khirhawm: tix heue
Kheu Yohan ang ih ang nyaux mai hoek kawx, kix ah,Kaw in: koe: phicaox heue
Kawn: kawn: pwi ih nyaux mai hoek kawx, kix ah,Jhak heue, Kaw in: cha nie luan ih, mai cha nie luan nyaux rawm: plix siiet, mai yuh paox yuh pie kah pwi koh mau mai pwi ting map ting grham: khankix heue Viang mawh kawx nan: pingnya cuyi: hoik rah hoik see kah daux kaing pa yuh tix khankix heue."
Veng Pa Ang Doh Keud Kah Phimap Tix
Lukax 10:13-15
Yam an: Nawh Cao: jah tix ah kah veng khankix dee hoik yuh Nawh kaing pa ting siawpsibrawm, kheu kix ang doh keud doh sawn: kah phimap tix heue.
"Veng Khawrazin eue, maix tag pon pa kharhawm: kharhi: heue, Veng Biesedax eue, maix tag pon pa kharhawm: kharhi: heue. Mawh kheu phan: hoik yuh kaing pa ting siawpsibrawm khankix pa hoik yuh kah daux pax, kah daux veng Turux mai veng Sidom, kiex tag hoik doh keud doh sawn: kah phimap tom: rheung:, kah daux man: pa taing: kah hauk, mai daux nyaox heue.
Aux krai kah pax daux singaix ciyang singaix prawng sax, tag lheu: yie tix kham: geu: son veng Turux mai veng Sidom, khaing: son pax heue.
Mai maix veng Kapeniom eue, tag yaogyaw maix tom: hoek meung raoma: lie? Maix tag lih hu: daux meung yum: heue. Grawhgrawng: nawh phan: hoik yuh kaing pa ting siawpsibrawm khankix pa hoik yuh kah daux maix, kah daux veng Sawdom, veng an: tag koe: tom: hoek singaix heue.
Aux krai kah maix, kah daux singaix ciyang singaix prawng sax, tag lheu: yie tix kham: geu: son haktiex Sawdom, khaing: son maix heue."
Hoek Laux Lee: mai Aux
Lukax 10:21,22
Yam an: Yesux baox ah nin:, "Aux yaogyaw, bwanson: Maix. Keeing: eue, Simiang pa ting piang raoma: mai haktiex, kheu hoik mox Maix ceu in: khankix, khaing: pwi lhak lhiem: mai pa chix tawng khankix, mai hoik plak kieh kawn: ngie: khankix yaox heue.
Mawh heue, Keeing:, kheu Maix koe: rhawm: khaw: rhawm: tix yuh nan: heue.
Keeing: Aux hoik tawx khawm: uik kah Aux heue, mai tix kaux kawx ang tawng Kawn: Cao: lheu: khaing: Keeing: Cao:, mai tix kaux kawx ang tawng Keeing: Cao: lheu: khaing: Kawn: Cao:, mai kaw pa kawn Cao: koe: rhawm: tix plak kieh nawh tawng heue.
Pex pa taug pa mao, mai klawm: kraung cien khankix khawm: uik eue, hoek kah Aux mai Aux tag kieh pex laux lee: tix heue.
Teei tix klawm: khaox glawm: Aux heue, mai hoek tix gau kah Aux, kheu koe: Aux rhawm: pa awn: pa tiiem, mai ju pex tag yaox dee laux lee: tix heue.
Mawh kheu khaox glawm: Aux mawh pa yie tix klawm:, mai kraung Aux mawh pa chaong: heue."
Yesux Mawh Simiang Singaix Twah
Makux 2:23-28; Lukax 6:1-5
Daux bawg yam an: Yesux hu: preeng: kah daux ma: nghoxca kah daux singaix twah, mai kawncau Nawh khankix cairhawm:, kheu nan: kix tom: caik tix ih sigleem: nghoxca heue.
Viang mawh nan: Pharishie: khankix yam yaox kix an:, kix ah nin: kah Nawh Cao:, "Jhak heue, kawncau Maix lai yuh pa ang khaw: mai beenli singaix twah."
Viang mawh kawx nan: Nawh Cao: ah nin: kah kix, "Ang pex sax phat grawhgrawng: pa yuh Davit yam nawh, mai pwi pa ot tau mai nawh khankix kied cairhawm: lie?
Grawhgrawng: yam laig nawh kah daux nyiiex Siyiex, mai ih khaomun, pa nawh mai pwi pa ot tau mai nawh khankix ang khaw: tix ih, viang mawh nan: pa cao: giex kaing: li khankix khaing: khaw: tix ih lie?
Mai pex ang sax phat daux lai beenli, grawhgrawng: cao: giex kaing: li khankix pa ot kah daux nyiiex bwan:, yuh pa ang khaw: singaix twah, mai ang koe: phimap lie?
Viang mawh kawx nan: Aux krai kah pex, pa lheu: ting khaing: nyiiex bwan: koe: tin: tix kaux heue.
Viang mawh nan: phan: pex hoik tawng dee bleeh lox in:, Aux moh krax caoxrhawm:, mai ang moh krax tan krax lu, pex ang deuh phimap kah pwi pa ang koe: dee phit.
Grawhgrawng: nawh Kawn: kawn: pwi mawh Simiang singaix twah heue."
Yesux Pai: Moi: Pwi Pa Yum: Taix Tix Khawn:
Makux 3:1-6; Lukax 6:6-11
Mai Nawh Cao: lih hu: khaing: tan:, mai laig kah daux nyiiex sidiex kix heue.
Mai jhak heue, koe: pwi pa yum: taix kroh taix tix khawn: tixkaux, mai yuh kah mawx sonsang pon tix deuh phimap kah Nawh Cao:, kix chawk Nawh ah nin:, "Khaw: tix cox jhawm: saux moi: singaix twah lie?"
Mai Nawh Cao: ah nin: kah kix, "Kah daux pex koe: pwi mawx? pa koe: yung: tix mu:, mai phan: yung: an: rau daux o: singaix twah, pa ang giex kah yung: an: mai yaog nawh lih?
Pwi lheu: ngawh khaing: yung: miex ding, mawh kheu nan: pa yuh ceu pa mhawm: singaix twah khaw: heue."
Khaix an: Nawh Cao: ah nin: kah pwi an:, "Nyeu taix maix heue." Mai kaw an: nyeu taix tix, mai deeh mhawm: awm: tang: khawn: heue.
Pharishie: khankix lih hu:. Mai kum: kawng: grawhgrawng: sang pon kix tix yuh Nawh Cao: laux yuh kah mawx.
Siyiex Laug Kah Silieh Tix
Mai kheu hoik tawng Yesux grawhgrawng: ceu an: Nawh lih hu: khaing: tan:, mai pwi hawt khaix Nawh Cao: tom: nie, mai Nawh cox jhawm: saux kix moi: khawm: uik heue.
Mai Nawh Cao: tawm: lox kah kix yuh kah mawx son ang kix sang kieh pwi tawng Nawh.
Yuh kah mawx sonsang naog gumlox pa hoik krai cao: jhai: Isayax pa ah nin:,
"Jhak heue, Siliex Aux pa hoik laug Aux, pa moh Aux, pa khaw: kah rhawm: Aux, Aux tag deuh khwan: Aux kah piang Nawh, mai Nawh tag krai grawhgrawng: bawg yam prawng ciyang kah pwi tang: ceu tang: cat khankix heue.
Nawh tag ang pawk ang thiang: lox mai ang kok ang yo, mai pwi tag ang mhong: lox Nawh daux krax tix kaux kawx heue.
Priem pa hoik geh, Nawh ang raig pot heue. Maox kawkngu pa lih taoxngu, Nawh ang preet, tom: hoik ploi: pa prawng pa ciyang Nawh mai pex heue.
Mai daux ceukaux Nawh kawn: pwi tang: ceu tang: cat khankix tag keud pot jun pot een: rhawm: kah heue."
Yesux mai Belazebulax
Makux 3:20-30; Lukax 11:14-23
Yam an: kix viex pwi pa laig phicaox, pa dugngai:, pa aw:, tixkaux hoek kah Nawh Cao:, mai Nawh Cao: cox nawh moi:, tom: pwi aw: an: chix sikah mai chix yaox heue.
Mai cub pwi haoh pwi hun: khankix khawm: uik daox deng: kah mai ah nin:, "Kaw in: ang mawh kawn: Davit lie?"
Viang mawh kawx nan: yam mhong: Pharishie: khankix grawhgrawng: ceu an: kix ah nin:, "Pwi in: een: rhawm: kah Belazebulax simiang phicaox mai grheu: phicaox khankix lih heue."
Mai kheu tawng Nawh Cao: grawhgrawng: pa keud kix daux rhawm: kix Nawh ah nin: kah kix, "Meung ku meung pa ang khaw: paox tix, gwieh paox tix, tag laux tag leeing: heue. Mai veng ku veng, nyiiex ku nyiiex, pa ang khaw: paox tix, gwieh paox tix, ang chix kaux chix cong: heue.
Mai phan: Satan grheu: Satan lih, nawh ang khaw: mai gwieh kah tokaux tix heue. Phan: mawh nan: meung nawh chix kaux chix cong: yuh kah mawx?
Mai phan: Aux een: rhawm: kah Belazebulax mai grheu: phicaox khankix lih, kawnpraix pex een: rhawm: kah pwi mawx mai grheu: phicaox lih? Mawh kheu nan: kix tag mawh cao: prawng cao: ca: pex heue.
Viang mawh kawx nan: phan: Aux een: rhawm: kah Khwan: Siyiex mai grheu: phicaox khankix lih, Meung Siyiex hoik hoek kah piang pex tete heue.
Phan: ang mawh nan: pwi chix laig kah daux nyiiex pwi pa ting riang, mai yuh kraung cie nawh laux, phan: nawh ang phyawk pwi pa ting riang an: phaoka: yuh kah mawx? mai khaix an: nawh tag yuh nyiiex nawh laux heue.
Kaw pa ang ot plak Aux mawh pwi pa koeng kah Aux heue, mai kaw pa ang khrawm: tau mai Aux, mawh pa kieh prungprang: heue.
Mawh kheu nan: Aux krai kah pex, tag ploi: phimap mai pa sa pa lao kah kawn: pwi kuceu, viang mawh kawx nan: pa sa pa lao kah Khwan: Cao: tag ang pluat heue.
Mai pwi mawx ang ah, pa ah lox pa ang khaw: ang jiet kah Kawn: kawn: pwi, tag sang pluat nawh heue, viang mawh kawx nan: pwi mawx ang ah, pa ah lox pa ang khaw: ang jiet kah Khwan: Singax Singeh tag ang pluat nawh ju in: mai ju khaix heue.
Pon Tix Tawng Khaox Kheu Plix Nawh
Lukax 6:43-45
Yuh khaox mhawm:, mai kieh plix nawh mhawm:, phan: ang mawh nan:, yuh khaox ang mhawm:, mai kieh plix nawh ang mhawm:. Grawhgrawng: nawh pon tix tawng khaox kheu plix nawh heue.
Ceu siuing: pa cai: eue, pex pa mawh pa caox, lai chix krai lox pa mhawm: yuh kah mawx? Kheu jheeh chix krai ceu pa koe: daux rhawm: tom: nie heue.
Pwi pa mhawm: viex ceu pa mhawm: lih khaing: dee deuh nawh pa mhawm:, mai pwi pa caox viex ceu pa caox lih khaing: dee deuh nawh pa caox heue.
Aux krai kah pex, gumlox ku gum pa nieb krai pwi giex going kix tag sang krai doh grawhgrawng: gumlox an: khankix kah daux singaix prawng singaix ciyang sax heue.
Grawhgrawng: nawh mawh kheu gumlox maix, maix tag pon pa rah pa see, mai mawh kheu gumlox maix, maix tag pon pa prawng pa ciyang heue."
Pharushie: Tiblah Simie Tix Yaox Mhai: Pa Daox Pa Am: Khaing: Yesux
Makux 8:11,12; Lukax 11:29-32
Yam an: pwi tiem: lai mai Pharishie: tiblah ah nin: kah Nawh Cao:, "Sara Cao: Gau eue, ex simie tix yaox mhai: pa daox pa am: khaing: Maix tix ceu heue."
Nawh Cao: pawk lox mai ah nin: kah kix, "Ju pa caox mai pa phit pa vao sawg tix yaox mhai: pa daox pa am: heue. Mai lheu: khaing: mhai: pa daox pa am: cao: jhai: Yonax tag ang tawx mhai: pa daox pa am: kah kix heue.
Mawh kheu awm: hoik ot Yonax kah daux vaig kax ting loe: singaix loe: sawm:, Kawn: kawn: pwi kawx, tag ot kah daux tiex loe: singaix loe: sawm: heue.
Pwi veng Nineve tag cung tau mai pwi ju in:, kah daux singaix prawng singaix ciyang sax, mai deuh phimap kah piang kix, kheu hoik doh keud doh sawn: kix kah phimap tix, yam sidiex gau Yonax, mai jhak heue, Kaw pa lheu: ting khaing: Yonax ot tin: heue.
Simiang Nanghawkhawm caong ma: seh, tag kaoh tau mai pwi ju in: kah daux singaix prawng singaix ciyang sax, mai deuh phimap kah piang kix, kheu hoik hoek nawh khaing: dee sidauh haktiex tix nghiiet gumlox pingnya cuyi: simiang Sawlamun heue. Mai jhak heue, Kaw pa lheu: ting khaing: simiang Sawlamun ot tin: heue.
Phi: Pa Seeing: Deeh Ing: Kah Nyiiex Tix
Lukax 11:24-26
Khaix hoik lih phi: pa seeing: pa brai: khaing: daux pwi, nawh hu: preeng: dee ang rawm: koe:, sawg dee laux kawx, ang yaox heue.
Khaix an: nawh ah nin:,Aux sang deeh ing: kah nyiiex aux, khaing: dee hoik kaoh aux heue Mai yam hoik hoek nawh tan:, nawh yaox nyiiex yi, pa hoik pih, mai pa hoik cox mhawm: heue.
Khaix an: nawh hu: mai viex phicaox aliah kaux pa lheu: caox khaing: tokaux nawh mai laig kah daux pwi an: mai ot tan: heue. Mai pa mawh kah pwi an: lheu: caox khaing: phaoka: heue. Viang mawh pwi ju pa caox in: kawx tag awm: an: heue."
Miex Yesux mai Pux Nawh Cao: khankix
Makux 3:31-35; Lukax 8:19-21
Yam kawn: sidiex gau Nawh Cao: kah cub pwi haoh pwi hun: khankix, jhak heue, miex Nawh mai pux Nawh khankix cung plak praix, mai sawg tix sikah mai Nawh Cao: heue.
Mai pwi tixkaux ah nin: kah Nawh Cao:, "Jhak heue, miex Maix mai pux Maix khankix cung plak praix mai sawg tix sikah mai Maix heue."
Viang mawh kawx nan:, Nawh pawk lox mai chawk ah nin: kah kaw pa hoik krai kah Nawh, "Miex Aux mawh mawx? Mai pux Aux khankix mawh mawx?"
Mai Nawh Cao: nyeu taix Tix plak kawncau Nawh khankix mai ah nin:, "Jhak heue, miex Aux mai pux Aux khankix.
Mawh kheu pwi mawx ang ah pa yuh alo pa khaw: pa caw rhawm: Keeing: Aux pa ot kah daux meung raoma:, pwi an: mawh pux Aux, mai nan: Aux, mai miex Aux heue."
Lox Phektem: Grawng: Ruat Simie
Makux 4:1-9; Lukax 8:4-8,
Daux singaix an: Yesux lih hu: khaing: daux nyiiex mai hu: ngawm dex praok rawm: nhawng:.
Mai cub pwi haoh pwi hun: khrawm: tix hoek kah Nawh Cao:, kheu nan: Nawh laig daux reu mai ngawm tan:, mai pwi haoh pwi hun: khankix khawm: uik cung kah praok rawm: heue.
Mai Nawh Cao: sidiex gau kah kix tom: nie ceu, kah daux lox phektem:, mai ah nin:, "Jhak heue, pwi ruat simie hu: tix ruat simie heue.
Mai yam rhuat nawh simie, simie tiblah cod kah dex krax, mai sim: khankix hoek sut tix ih simie an: heue.
Mai simie tiblah cod kah tiag simaox, dee ang tiex koe: tom: nie, mai simie khankix kuah dom: mawx dom: an:, mawh kheu ang tiex raux tan:.
Mai yam hoik lih si:ngaix, kied hax koek, mai kheu ang kix koe: riah kix kroh hu: heue.
Mai simie tiblah cod kah daux pangkat, mai pangkat an: ting tom: kheem: gut kix heue.
Mai simie tiblah cod kah dee mhawm: tiex, mai plix plix, tiblah tiyieh (100) son, mai tiblah tigliah (60) son, mai tiblah tingoe: (30) son heue.
Kaw pa koe: yhaok tix mhong: kieh nawh mhong: heue."
Grawhgrawng: Teei Lox Phektem:
Makux 4:10-12; Luka 8:9-10
Mai kawncau khankix hoek mai chawk ah nin: kah Nawh Cao:, "Yuh patix Maix teei lox phektem: sidiex kah kix?"
Mai Nawh Cao: pawk lox mai ah nin: kah kix, "Hoik tawx kieh pex tawng grawhgrawng: pa raux pa mox, pa dex pa dawd mai meung raoma:, Viang mawh kawx nan: kah kix, ang tawx kieh kix tawng heue.
Grawhgrawng: nawh pwi mawx ang ah pa hoik koe: tag sang baox tawx kah nawh, mai nawh tag sang nie grum koe: heue. Pwi mawx ang ah, pa ang koe:, viang pa hoik koe: nawh kawx, tag sang teei khaing: nawh heue.
Mawh kheu nan: Aux tom: teei lox phektem: sidiex gau kah kix, mawh kheu kix yaox kawx, ang chix yaox, mai kix mhong: kawx, ang chix mhong:, kix tawng kawx ang tawng heue.
Mai gumlox pa hoik gruh krai cao: jhai: Isayax grawhgrawng: kix, pa ah nin: hoik naog heue. Pex mhong: kawx, mhong: mai ang tix tawng ceeix kawx, pex yaox kawx, yaox mai ang tix yaox ceeix kawx.
Kheu rhawm: pwi ceu in: hoik sivix, mai yhaok kix ang hiex mhong:, mai kix hoik yip ngai: tix, yuh kah mawx son ang kix sang yaox. Mai yuh kah mawx son ang yhaok kix chix mhong:, mai rhawm: kix chix tawng mai deeh tieh tix sonsang cox Aux kieh kix moi: heue
Viang mawh kawx nan:, ngai: pex koe: bwanson: kheu chix yaox kix, mai yhaok pex kawx koe: bwanson: kheu kix chix mhong: heue.
Aux krai lox tete telai kah pex, cao: jhai: khankix mai pwi rah pwi see khankix hoik koe: tom: nie, pa simie tix yaox ceu pa yaox pex, mai ang pon tix yaox, mai kix simie tix mhong: pa mhong: pex, mai ang pon tix mhong: heue.
Dee Bleeh Lox Phektem:
Maku 4:13-20; Lukax 8:11-15
Mawh kheu in: pex nghiiet grawhgrawng: lox phektem: pwi pa ruat simie.
Yam pwi tix kauxkaux mhong: lox bwan: pa dex pa dawd mai meung Siyiex, mai ang chix tawng dee bleeh, kaw pa caox hoek rud tix teei simie pa hoik rhuat kah daux rhawm: nawh heue. In: mawh grawhgrawng: simie pa hoik rhuat dex krax heue.
Simie pa hoik rhuat kah tiag simaox, mawh pwi pa mhong: lox bwan:, mai gauxrhawm: mai rieb tix teei dom: mawx dom: an:.
Viang mawh kawx nan: ang nawh koe: riah kah daux tokaux tix, viang mawh nan:, nawh kaux cong: tivud khaing:, mai yam yaox nawh krax tuktiaktukte: kheu lox bwan: nawh lauxrhawm: dom: mawx dom: an: heue.
Mai simie pa rhuat kah daux sinax pangkat, mawh pwi pa mhong: lox bwan:, mai pa khirhawm: khirhi: pa dex pa dawd mai haktiex, mai pa chix pie chix lhen: sinngao kheem: gut lox bwan:, mai nawh ang chix plix plix heue.
Mai simie pa rhuat dee mhawm: tiex, mawh pwi pa mhong: lox bwan: mai chix tawng chix nghiiet, mai chix plix plix, tiblah tiyieh (100) son, mai tiblah tigliah (60) son, mai tiblah tingoe: (30) son heue."
Lox Phektem: Nghoca mai Fang:
Nawh Cao: baox plak kix yaox lox phektem: tang: ceu pa ah nin:, "Meung Raoma: tag awm: pwi pa ruat simie pa mhawm: kah daux ma:.
Viang mawh nan: yam pwi hoik it, pwi koeng nawh hoek mai ruat simie fang: kah daux sinax nghoxca an:, mai lih hu: heue.
Yam kuah gawng: mai lhax, mai sigleem: plix, fang: kawx lih hoek heue.”
Mai siliex khankix hu: kah cao: nyiiex mai ah nin: kah nawh,Simiang eue, yam rhuat maix simie daux ma: maix, maix rhuat pa mhawm: ang mawh lie? Yuh kah mawx fang: lai koe:?:
Mai nawh ah nin: kah kix,Ceu in: mawh pa hoik yuh pwi koeng heue Mai siliex khankix baox ah nin: kah nawh,Maix simie tix kieh ex hu: khrawm: fang: khankix lie?:
Viang mawh nan: nawh pawk lox ah nin:, “Ang, phan: pex hu: khrawm: fang: khankix, ha pex kox reeig riah nghoxca glaoh mai kix heue.
Kiex khawm: ra: ceu ting tau tom: hoek bawg yam vawg, mai yam hoek bawg yam vawg, aux tag krai kah pwi vawg khankix, khrawm: fang: khankix phaoka:, mai vien mad, mai gleeing kix kah ngu heue. Viang mawh nan: khrawm: nghoxca mai sau: daux krao: aux heue."
Lox Phektem: Grawng: Simie Taux Klaox
Makux 4:30-32; Lukax 13:18-19
Nawh Cao: baox plak kix yaox lox phektem: tang: ceu pa ah nin:, "Meung Raoma: tag awm: simie taux klaox tix mu:, pa pwi tix kaux rhuat kah daux ma: tix heue.
Viang simie taux klaox mawh pa iak khaing: simie tang: ceu kawx, khaix hoik ting, nawh lheu: ting khaing: num: rib num: riem, mai lih mawh gawng:, tom: sim: raoma: khankix hoek ot hoek laux kah piang kak nawh heue."
Lox Phektem: Susaix mai Phawng: Gaox
Lukax 13:20-21
Nawh Cao: baox krai kix mhong: lox phektem: tang: ceu pa ah nin:, "Meung Raoma: awm: susaix pa bun: tix kaux teei mai mox kah daux phawng: gaox loe: diag tom: susaix an: hoik laig kah daux khawm: uik mai kieh ploh heue."
Yesux Shiao Lox Phektem:
Makux 4:33-34
Grawhgrawng: ceu in: khawm: uik Yesux teei lox phektem: krai kah cub pwi haoh pwi hun: khankix heue. Phan: ang mawh lox phektem: Nawh Cao: ang sidiex ang krai lox kah kix heue.
Yuh kah mawx sonsang naog lox pa hoik krai cao: jhai: pa ah nin:, "Aux tag ang moing kah daux lox phektem:. Aux tag krai grawhgrawng: ceu pa hoik mox tom: yam jah haktiex heue."
Krai Dee Bleeh Lox Phektem: Nghoca mai Fang:
Khaix hoik ploi: Nawh Cao: cub pwi haoh pwi hun: khankix Nawh laig kah daux nyiiex, mai kawncau Nawh khankix hoek dex kah Nawh Cao: mai ah nin:, "Krai ex mhong: dee bleeh lox phektem: grawhgrawng: fang: kah daux ma: liak."
Mai Nawh Cao: pawk lox mai ah nin:, "Pwi pa ruat simie pa mhawm: mawh Kawn: kawn: pwi heue.
Mai ma: mawh haktiex, mai simie pa mhawm: mawh kawnpraix Meung an: hkankix, mai fang: mawh kawnpraix kaw pa caox khankix heue.
Mai pwi koeng pa ruat simie fang: mawh phicaox, mai bawg yam vawg mawh yam sidauh haktiex in:, mai pwi pa vawg mawh kawncau Siyiex khankix heue.
Kheu nan: awm: khrawm: fang: khankix mai gleeing kah ngu, yam sidauh haktiex in: tag awm: an: heue.
Kawn: kawn: pwi tag ploi: kawncau Siyiex cie Nawh hoek, mai kix tag khrawm: tix teei lih khaing: Meung Nawh, ceu pa kieh phit kieh lud khankix, mai pwi pa yuh pa ang khaw: ang jiet khankix heue.
Mai tag taing kix sau: daux, daux glah ngu, dee tag yiiem riag mai dee greeik rhang: heue.
Yam an: pwi rah pwi see khankix tag jhan: riieng awm: singaix kah daux Meung Keeing: kix heue. Pwi pa koe: yhaok tix mhong:, kieh nawh mhong: heue.”
Lox Phektem: Grawng: Kraung Pa Ngawh Pa Hoik Mox
"Meung Raoma: awm: kraung pa ngawh pa hoik mox kah daux ma:, mai pwi tix kaux yaox kraung an:, mai baox mox, mai kheu gauxrhawm: nawh, hu: mai coh pa koe: nawh khawm: uik, mai liag ma: an: heue.”
Lox Phektem: Grawng: Siang: Pa Kied Ngawh
"Meung Raoma: baox awm: pwi yuh lai tikaux pa sawg siang: ceu pa koe: daux jawx pa mhawm: khankix.
Mai khaix hoik yaox nawh siang: pa koe: daux jawx pa kied ngawh, nawh hu: mai coh pa koe: nawh khawm: uik, mai liag siang: an: heue.”
Lox Phektem: Kah Pwi Rub Kax
"Meung Raoma: baox awm: rub pa ploi: daux rawm: sigrit sigra: mai khrawm: kuceu ku cawng heue.
Yam hoik naog rub an: kix bluh hu: kah praok rawm: mai kix ngawm mai laug pa mhawm: khankix sau: daux aw: daux klong:, viang mawh kawx nan: pa ang mhawm: khankix kix tik heue,
Awm: an: yam sidauh haktiex in:, kawncau Siyiex khankix tag hoek mai gwieh pa caox khaing: sinax pa rah pa see.
Mai tag taing kix sau: daux daux glah ngu, dee tag yiiem riag mai dee greeik rhang: heue."
Kraung Pa Khraox mai Pa Prim:
Mai Yesux baox ah nin: kah kix, "Hoik tawng pex grawhgrawng: khankix khawm: uik lie?" Mai kix ah nin: kah Nawh Cao:, "Tawng heue, Simiang."
Mai Nawh Cao: baox ah nin: kah kix, "Mawh kheu in: pwi tiem: lai kukaux pa hoik gau grawhgrawng: Meung Raoma: awm: pwi tix kaux pa mawh cao: nyiiex, pa teei lih ceu pa khraox mai pa prim: khaing: dee deuh nawh kraung tix heue."
Pwi Nazariet Ang Rieb Kah Yesux
Makux 6:1-6; Lukax 4:16-30
Khaix hoik sidiex Yesux lox phektem: ceu in: khankix, Nawh Cao: lih hu: khaing: tan: heue.
Mai Nawh Cao: hoek kah daux meung tokaux Tix mai Nawh gau kix kah daux nyiiex sidiex kix, tom: kix kied daox kied deng: mai ah nin:, "Pwi in: pon pingnya cuyi:, mai kaing siawpsibrawm khankix dee mawx?
In: mawh kawn: cangmai ang mawh lie? mai miex Nawh kok mawh Marix ang mawh lie? mai pux Nawh khankix mawh Yakop, mai Yosiep mai Simon, mai Yudax ang mawh lie?
Mai nan: Nawh khankix ot tau mai ex khawm: uik ang mawh lie? Mawh kheu in: Pwi in: pon ceu in: khankix khawm: uik dee mawx?"
Mai kix lauxrhawm: kah daux Nawh Cao:. Viang mawh kawx nan: Yesux ah nin: kah kix, "Cao: jhai: ang mawh pa ang koe: min: plakngai:, lheu: khaing: daux meung tokaux tix, mai kah daux nyiiex tokaux tix heue."
Nawh Cao: ang yuh kaing siawpsibrawm tom: nie tan:, kheu ang kix yumrhawm: heue.
Grawng: Pa Yum: Yohan Cao: Com Rawm:
Makux 6:14-29; Lukax 9:7-9
Yam an: simiang Herut mhong: pa krai pwi grawhgrawng: Yesux.
Mai ah nin: kah kawncau mausoi: nawh khankix, “In: mawh Yohan cao: baptis
. Nawh hoik deeh kaoh im: khaing: krax yum:, mai mawh kheu nan: siawpsibrawm khankix tom: yuh kaing kah daux nawh heue.”
Grawhgrawng: nawh, Herut hoik giex Yohan mai phyawk nawh mai sau: nawh kah daux thawng:, kheu Herodi moeng pux nawh Philipux.
Kheu Yohan hoik ah nin: kah nawh, "Pa teei maix bun: in: ang khaw: mai been heue.”
Viang nawh simie tix pah Yohan yum: kawx, nawh lhat kah pwi haoh pwi hun:, kheu hoik een: hoik sawn: kix nawh mawh cao: jhai: heue.
Viang mawh nan: yam hoek singaix keh Herut, kawn: bun: Herodi yuh thiao: sinax kix, mai jiet khaw: kah rhawm: Herut heue.
Kheu nan: nawh tiex nawh tu mai tawx lox kah bun: an:, nawh rawg nawh mhaing: ceu patix ang ah nawh tag sang tawx heue.
Bun: an: hawt yuh awm: pa nhie: miex nawh mai ah nin:, "Tawx kaing: Yohan cao: baptis
kah aux tin: daux tawg heue."
Simiang khunhawkham khirhawm: khirhi: kah, viang mawh kawx nan: kheu lox pa hoik tiex hoik tu nawh, mai kheu pwi pa ngawm sawm: tau mai nawh khankix, nawh tom: tawx lox kieh tawx heue.
Mai nawh ploi: hu: kid kaing: Yohan kah daux thawng: heue.
Mai kix viex kaing: nawh daux tawg, mai tawx kah bunkrih an:, mai nawh viex tix tawx kah miex tix heue.
Mai kawncau Yohan khankix hoek mai teei tokaux yum: Yohan mai sipaung: nawh heue. Mai kix hu: krai kah Yesux.
Yesux Tawx Pwi Phwan: Rheng: Ih Priex
Makux 6:30-44; Lukax 9:10-17; Yohan 6:1-14
Yam mhong: Yesux grawhgrawng: an: Nawh Cao: lih khaing: tan:, laig kah daux reu, mai hu: daux tiag daux tu dee ang pwi ot, mai yam mhong: pwi haoh pwi hun: khankix grawhgrawng:, kix lih khaing: daux veng khankix mai hawt khaix Nawh Cao: kah caong tix heue.
Mai yam lih hu: Nawh Cao:, Nawh yaox cub pwi haoh pwi hun: mai Nawh Cao: caoxrhawm: kah kix, mai cox pwi saux pwi ngia kix moi: heue.
Mai Yam hoek ponbo kawncau Nawh khankix hoek kah Nawh Cao: mai ah nin:, "Kah dee in: mawh daux tiag, mai bawg yam kawx hoik luan heue. Ploi: pwi haoh pwi hun: khankix hu:, sonsang hu: laig kah daux yaong: khankix, mai liag pa ih pa un: son tokaux tix heue."
Viang mawh nan: Yesux ah nin: kah kix, "Kix ang phat lih hu:, pex tawx kix sawm: heue."
Mai kix baox ah nin: kah Nawh Cao:, "Ex koe: khaomun phwan: lon: mai kax iak ra: mu: khang:."
Mai Nawh Cao: baox ah nin:, "Viex khankix hoek kah Aux heue."
Mai Nawh Cao: nhie: pwi haoh pwi hun: khankix ngawm kah piang rib. Mai Nawh Cao: teei khaomun phwan: lon: mai kax ra: mu: an:, mai maong kah raoma:, mai Nawh Cao: nawb bwan:, mai sivit khaomun mai tawx kah kawncau Nawh khankix, mai kawncau Nawh khankix tawx kah pwi haoh pwi hun: khankix heue.
Mai kix khawm: uik ih mai sak heue. Mai kix deeh khrawm: tix teei pa lheu: pa max pa phawng:, mai naog kao: phliex ra: heue.
Mai pa ih khankix, simex giex, dex koe: phwan: rheng:, ang krai bun: mai kawn: nyawm khankix heue.
Yesux Hu: Kah Caong Tix Piang Rawm:
Makux 6:45-52; Yohan 6:15-21
Mai dom: mawh dom: an: Nawh Cao: nhie: kawncau Nawh khankix laig daux reu, mai hu: sivoe Nawh plak toi: rawm:, yam ploi: Nawh Cao: cub pwi haoh pwi hun: khankix hu: heue.
Mai khaix hoik ploi: Nawh Cao: cub pwi haoh pwi hun: khankix hu:, Nawh haok kah gawng dee ang pwi ot, sonsang rawg Tix bwan:. Mai yam hoek ponsawm: Nawh Cao: ot tan: nongnong: heue.
Viang mawh kawx nan: yam an: reu an: ot kah greung rawm: nhawng: mai kharhawm: kharhi: kheu pukpak rawm:, kheu ang caw: plak bhaung: heue.
Yam hoek bawg yam pa pau pon: bawg tix bawg, yam ponsawm:, Nawh Cao: hoek kah kix, kah caong Tix piang rawm: nhawng: heue.
Mai yam kawncau Nawh khankix yaox pa hu: Nawh Cao: kah caong Tix piang rawm: nhawng: kix die lhat mai ah nin:, "Mawh miang heue." Mai kheu lhat kix kah, kix riag yo heue.
Viang mawh kawx nan: dom: mawx dom: an: Yesux sikah mai kix, ah nin:, "Gauxrhawm: heue, mawh Aux, pawvi lhat kah."
Mai Petrux pawk lox kah Nawh Cao: mai ah nin:, "Simiang eue, phan: mawh Maix, nhie: aux hoek kah Maix kah piang rawm: liak."
Mai Nawh Cao: ah nin:, "Hoek heue." Mai Petrux lih khaing: daux reu mai hu: kah piang rawm: kah caong tix, sonsang hu: kah Yesux.
Viang mawh nan: yam yaox nawh bhaung: ting, nawh kied lhat, mai jah tix laig kah daux rawm:, mai nawh kok yo ah nin:, "Simiang eue, taoh aux liak."
Mai dom: mawh dom: an: Yesux nyeu taix Tix mai giex nawh, mai ah nin: kah nawh, "Maix pa iak krax yumrhawm: eue, yuh patix, maix ang yumrhawm:?"
Mai yam hoik laig kiex kah daux reu, bhaung: yiien: hu: heue.
Mai kix pa ot kah daux reu, krub Nawh Cao:, ah nin:, "Maix mawh Kawn: Siyiex tete heue."
Pwi Pa Pon Teeh Kah Yesux Pon Tix Moi:
Makux 6:53-56
Mai yam hoik tiang kix hoek plak an:, kix hoek kah haktiex, kah meung Giennesarit heue.
Mai yam pwi pa ot dee an: tawng mawh Nawh Cao:, kix ploi: pwi hu: kudauh kudee sivie sivheng: tan:, mai kix viex pwi saux pwi ngia hoek kah Nawh Cao: khawm: uik.
Mai kix khyox khaw: kah Nawh Cao:, sonsang pon kix tix teeh caong sibex Nawh khaing:, mai pa pon tix teeh kukaux daux pwi moi: heue.
Grawng: Been Prim: mai Lox Tawm: Pingnyap
Makux 7:1-13
Yam an: Pharishie: mai pwi tiem: lai khankix kaoh khaing: veng Yerusaliem mai hoek kah Yesux ah nin:,
"Yuh patix kawncau Maix yuh pa ang khaw: mai been tax yiex miex keeing:? Kheu ang kix khoek taix tix yam ih khaomun heue."
Mai Nawh Cao: pawk lox mai ah nin: kah kix, "Yuh patix pex lheu: lox tawm: jhawm: krai Siyiex, kheu lox tax yiex miex keeing: pex?
Kheu hoik ah Siyiex,
Yungyi: kah miex mai keeing: maix heue, mai
Kaw pa map kah miex kah keeing: tix, tag kieh nawh yum: tete heue
Viang mawh kawx nan: pex ah,Pwi mawx ang ah pa ah kah miex tix phan: ang mawh nan: kah keeing: tix,Cie aux pa lo mai pa sang koe: bwanson:, son maix, mawh pa hoik tan hoik tawx kah Siyiex.
Kaw an: tag ang yungyi: kah miex keeing: tix. Mawh kheu nan: pex yuh laux gumlox Siyiex, kheu been pex pa toe: tix tawx tix ju hoik tix ju heue.
Pex pa mawh pwi pie pwi lhen: khankix eue, Isayax hoik gruh krai grawhgrawng: pex mhawmmhawm:, ah nin:,
Pwi ceu in: yungyi: Aux kah siyieb jheeh tix, viang mawh kawx nan: rhawm: kix singai khaing: Aux heue.
Viang mawh nan: kix krub kah Aux giex going, kheu sidiex gau kix been: pa yuh kawn: pwi heue"
Ceu Pa Kieh Kawn: Pwi Seeing: Brai:
Makux 7:14-23
Mai Nawh Cao: kok cub pwi haoh pwi hun: hoek kah Tix mai ah nin: kah kix, "Nghiiet, mai tawng heue.
Pa laig kah daux jheeh pwi kieh nawh seeing: brai: ang mawh, viang mawh nan: mawh pa lih khaing: jheeh pwi pa kieh nawh seeing: brai: heue."
Yam an: kawncau Nawh khankix hoek mai ah nin: kah Nawh Cao:, "Maix tawng grawhgrawng: Pharishie: khankix lauxrhawm: yam mhong: kix lox ceu in: lie?"
Viang mawh nan: Nawh Cao: pawk lox mai ah nin:, "Gawng: khaox ku gawng: pa Keeing: Aux piang raoma:, ang sum:, tag sang reeig tix tik heue.
Via kix heue. Kix mawh pwi dugngai: pa jhi: pwi dugngai: yaox krax. Mai phan: pwi dugngai: jhi: pwi dugngai: yaox krax, khawm: ra: kiex tag rau daux o: heue."
Mai Petrux pawk lox mai ah nin: kah Nawh Cao:, "Krai ex mhong: lox phektem: in: liak."
Mai Nawh Cao: baox ah nin:, "Pex kawx ang chix tawng ang chix nghiiet tom: yamin lie?
Ang pex tawng grawhgrawng: ceu pa laig kah daux jheeh kuceu, baox laig kah daux vaig, mai tik kah daux, daux iang: lie?
Viang mawh kawx nan: ceu pa lih hoek khaing: daux jheeh, mawh pa lih khaing: daux rhawm: mai chix kieh pwi seeing: brai: heue.
Mawh kheu mawh khaing: daux rhawm: pa chix keud pa ang mhawm: ang mhiem: khankix heue. Pa mawh ceu pa pah pwi yum:, mai ceu pa phit mai moeng pwi, mai ceu pa phit pa vao mai bun:, mai ceu pa briex pa lak, mai ceu pa kham: mhai: sakse pa ang mawh ang meh, mai ceu pa sa pa lao kah Siyiex heue.
Mawh ceu in: khankix pa chix kieh pwi seeing: brai:, viang mawh kawx nan: pa ang khoek taix mai ih, pa ih, kieh pwi seeing: brai: ang mawh."
Krax Yumrhawm: Bun: Khanan Tix Kaux
Makux 7:24-30
Mai Yesux lih hu: khaing: tan:, mai hu: kah veng Turux mai veng Sidom heue.
Mai bun: Khanan tix kaux lih hoek khaing: haktiex an:, mai kok yo ah nin:, "Simiang Kawn: Davit eue, caoxrhawm: kah aux liak. Laig phicaox kah kawn: bun: aux mai kied sigrien sigre heue."
Viang mawh kawx nan: Nawh Cao: ang deeh pawk lox kah kiex tix gum kawx. Mai kawncau Nawh khankix hoek khyox khaw: kah Nawh Cao: ah nin:, "Kieh bun: an: hu: liak, kheu kiex kok yo khaix ex heue."
Viang mawh kawx nan: Nawh Cao: pawk lox mai ah nin:, "Ploi: Aux hoek lheu: khaing: son yung: pa hoik grai: pa dex mai geh nyiiex Isarilax ang mawh."
Viang mawh nan: bun: an: hoek mai krub Nawh Cao: mai ah nin:, "Simiang eue, teem: aux liak."
Mai Nawh Cao: pawk lox mai ah nin:, "Ang khaw: tix teei khaomun cie kawnpraix khankix taing kah sox heue."
Viang mawh nan: bun: an: ah nin:, "Mawh heue, Simiang eue, viang mawh sox khankix kawx, ih pa cod pa roik greem: pheen: cao: tix heue."
Yam an: Yesux baox pawk lox mai ah nin: kah kiex, "Bun: eue, krax yumrhawm: maix kied ting heue, kieh mawh awm: kah pa simie pax." Mai daux bawg yam nari an: kawn: bun: kiex moi: heue.
Yesux Pai: Moi: Pwi Haoh Pwi Hun:
Mai Yesux lih khaing: tan: mai hoek kah dex rawm: nhawng: Galilie:, mai Nawh Cao: haok piang gawng mai ngawm tan: heue.
Mai cub pwi haoh pwi hun: khankix hoek kah Nawh Cao:, pwi laux caong, pwi dugngai:, pwi aw:, pwi laux maung, mai pwi tang: kaux tom: nie ot mai kix, mai kix deuh khankix kah dex caong Nawh Cao:, mai Nawh Cao: kieh kix moi:,
tom: pwi haoh pwi hun: khankix daox deng: kah, yam yaox kix pwi aw: deeh chix sikah, mai pwi laux maung deeh mhawm:, mai pwi laux caong deeh chix hu:, mai pwi dugngai: deeh chix yaox, mai kix yaogyaw Siyiex Isarilax heue.
Tawx Pwi Pon: Rheng: Ih Priex
Makux 8:1-10
Yam an: Yesux kok kawncau Nawh khankix hoek kah Tix, mai ah nin:, "Aux caoxrhawm: kah pwi haoh pwi hun: khankix, kheu hoik ot kix mai Aux loe: singaix mai ang koe: pa ih tidtix mai ang Aux rhawm: ploi: kix hu: yam kawn: cairhawm: kix. Phan: yuh nan: ha: kix kox khrup hawt krax heue."
Mai kawncau Nawh khankix ah nin: kah Nawh Cao:, "Ex pon khaomun tom: nie daux tiag, sonsang sak pwi haoh pwi hun: khankix dee mawx?"
Mai Yesux baox chawk kix ah nin:, "Pex koe: khaomun miex lon:?" Mai kix ah nin:, "Koe: aliah lon:, mai kax iak ceeix ngie heue."
Mai Nawh Cao: nhie: cub pwi haoh pwi hun: khankix ngawm piang tiex.
Mai Nawh Cao: teei khaomun aliah lon: an: mai kax khankix, mai Nawh Cao: yaogyaw bwanson:, mai sivit mai tawx kah kawncau khankix, mai kawncau khankix tawx kah cub pwi haoh pwi hun: khankix heue.
Mai kix khawm: uik ih tom: sak, mai kix khrawm: pa max, pa phawng:, pa lheu: mai naog aliah phliex heue.
Mai kix pa ih, simex giex, koe: pon: rheng:, ang krai bun: mai kawn: nyawm khankix heue.
Mai Nawh Cao: ploi: cub pwi haoh pwi hun: khankix hu:, mai laig kah daux reu, mai hu: hoek kah haktiex Magadalax heue.
Pwi Pharishie: mai Sadukie: Khankix Sawg Tix Yaox Mhai: Pa Daox Pa Am:
Makux 8:11-13; Lukax 12: 54-56
Mai Pharishie: mai Sadukie: khankix hoek sonsang cheuk tix yaox Nawh mai mhaing: tix nhie: Nawh Cao: jhi: kix yaox mhai: pa daox pa am: khaing: raoma: heue.
Viang mawh nan: Nawh Cao: pawk lox mai ah nin: kah kix, "Yam ponbo pex ah,Tag blang: praix, kheu raoh raoma: heue
Mai yam ponngawb,Ang praix mhawm: singaix, tag lhiex tag phlu: bhaung: heue, kheu raoh raoma: mai ceep paiawm: Pwi pie pwi lhen: eue, pex chix jhak chix tawng kah grawhgrawng: raoma:. Viang mawh kawx nan: ang pex chix jhak chix tawng kah mhai: grawhgrawng: bawg yam lie?
Ju pa caox mai pa phit pa vao sawg tix yaox mhai: pa daox pa am: heue. Lheu: khaing: mhai: pa daox pa am: cao: jhai: Yonax tag ang tawx mhai: pa daox pa am: kah kix heue." Mai Nawh Cao: prah kix mai lih hu: heue.
Susaix Pharishie: mai Sadukie:
Makux 8:14-21
Mai yam hoik hoek kawncau khankix plak toi: rawm: plak an:, kix piawm: tix viex khaomun.
Yam an: Yesux ah nin: kah kix, "Rien rhawm: pex kah susaix Pharishie: mai Sadukie: khankix heue."
Mai kix tix kaux hoik tix kaux keud tix ah nin: kah paox tix, "Mawh kheu ang ex viex khaomun heue."
Mai Yesux tawng grawhgrawng: an: mai ah nin:, "Pex pa iak krax yumrhawm: khankix eue, pex tix kaux hoik tix kaux keud tix ah kah paox tix kheu ang pex koe: khaomun yuh kah mawx?
Pex ang tawng, ang doh keud grawhgrawng: khaomun phwan: lon:, mai pwi phwan: rheng:, mai pex deeh pon tix khrawm: miex phliex?
Mai khaomun aliah lon: mai pwi pon: rheng:, mai pex deeh pon tix khrawm: miex phliex?
Yuh patix pex khex ang tawng pa ang Aux krai grawhgrawng: khaomun kah pex? Viang mawh nan: rien rhawm: pex kah susaix Pharishie: mai Sadukie: khankix heue."
Yam an: kix tawng grawhgrawng: Nawh Cao: nhie: kix rien rhawm: tix kah susaix khaomun ang mawh, viang mawh nan:, mawh kah lox sidiex lox gau Pharishie: mai Sadukie: khankix heue.
Petrux Kham: Mhai: Sakse Grawng: Mawh Yesux Kawn: Siyiex
Makux 8:27-30; Lukax 9:18-21
Yam an: Yesux hoek kah daux haktiex Kesarix Philipux, mai Nawh Cao: chawk kah kawncau Nawh khankix ah nin:, "Pwi ah Kawn: kawn: pwi mawh mawx?"
Mai kix deeh ah nin:, "tiblah ah mawh Yohan cao: baptis. tiblah ah mawh Eliyax, mai tang: kaux ah mawh Yeramix, phan: ang mawh nan: mawh cao: jhai: tix kauxkaux heue."
Nawh Cao: baox chawk kah kix ah nin:, "Viang mawh nan: pex ah Aux mawh mawx?"
Simon Petrux pawk lox mai ah nin: kah Nawh Cao:, "Maix mawh Khrit Kawn: Siyiex pa im: ju heue."
Mai Yesux deeh pawk lox ah nin: kah nawh, "Simon BaYonax eue, maix ting bwanson: heue. Mawh kheu nex nham: hoik kieh doh kah maix ang mawh, viang mawh nan: mawh Keeing: Aux pa ot kah daux meung raoma: pa kieh doh kah maix heue.
Aux baox ah nin: kah maix, maix mawh Petrux, mai Aux tag sum: ceucao: Aux kah piang simaox in:, mai siviex meung yum: ang pon tix pex ceucao: an: heue.
Mai Aux tag tawx jiak saw meung raoma: kah maix heue. Mai maix phyawk ceu patix ang ah piang haktiex in:, tag sang phyawk kah daux meung raoma:, mai maix kah ceu patix ang ah, kah piang haktiex in: tag sang kah daux meung raoma: heue."
Yam an: Nawh Cao: tawm: lox kah kawncau Nawh khankix, son ang kix sang krai grawhgrawng: mawh Nawh Cao: Khrit kah pwi tix kaux kawx heue.
Yesux Gruh Krai Grawng: Pa Sang Kham: Nawh Tix Yum:
Makux 8:31-9:1; Lukax 9:22-27
Jah kah yam an: Yesux jhi: kawncau Nawh khankix yaox, grawhgrawng: tag sang hu: Nawh kah veng Yerusaliem, mai kham: geu: tom: nie ceu, daux tawm: taix kuad song:, mai cao: giex kaing: li pa ting mai pwi tiem: lai khankix, mai grawhgrawng: tag kham: geu: pa teei yum:, mai grawhgrawng: tag deeh kaoh im: khaix an: daux loe: singaix heue.
Mai Petrux teei Nawh Cao: hu: mai ah, ah nin: kah Nawh, "Simiang eue, kieh grawhgrawng: ceu in: singai khaing: Maix. Ceu in: ang doh mawh kah Maix tix bawg kawx heue."
Viang mawh kawx nan: Nawh Cao: veeh mai ah nin: kah Petrux, "Satan eue, hu: plak khaix Aux, maix mawh dee sideeing kah Aux kheu ang maix keud grawhgrawng: ceu pa dex pa dawd mai Siyiex, viang mawh kawx nan: maix keud grawhgrawng: ceu pa dex pa dawd mai kawn: pwi khaing:."
Yam an: Yesux ah nin: kah kawncau Nawh khankix, "Phan: pwi tix kauxkaux simie tix hoek khaix Aux, kieh nawh thiang: tix tik tokaux tix mai klawm: khaoxlhak tix mai hawt Aux heue.
Mawh kheu pwi mawx ang ah, pa simie tix taoh ju tokaux tix, tag sang som ju heue. Mai pwi mawx ang ah pa som ju son Aux, tag sang pon tix yaox ju heue.
Grawhgrawng: nawh, phan: pwi tix kauxkaux pon haktiex khawm: uik, mai som ju tokaux tix, sang koe: bwanson: yuh kah mawx? Lheu: khaing: an:, pwi pon tix teei pa yuh kah mawx, deeh taoh ju tix kah?
Grawhgrawng: nawh, Kawn: kawn: pwi tag sang hoek kah daux min: plakngai: Keeing: Tix, tau mai kawncau Siyiex khankix, mai yam an: Nawh tag tawx kah pwi kukaux awm: pa hoik yuh nawh heue.
Aux krai lox tete telai kah pex, pwi pa cung tin: tiblah, tag ang cim krax yum: tom: kix yaox Kawn: kawn: pwi hoek kah daux Meung Tix heue."
Yesux Loh Tokaux Tix Ka Piang Gawng
Makux 9:2-13; Lukax 9:28-36
Khaix an: liah singaix Yesux teei Petrux, mai Yakop, mai Yohan pa mawh pux Yakop, mai viex kix haok kah piang gawng lhaong: nongnong:, dee ang pwi ot,
mai tokaux Nawh Cao: loh sivoe kix tan:, mai pakngai: Nawh jhan: riieng awm: singaix, mai kraung ceep Nawh lih paing awm: pa riieng heue.
Mai jhak heue, kix yaox Eliyax hoek tau mai Mose, mai kiex sikah mai Nawh Cao: heue.
Mai Petrux ah nin: kah Yesux, "Simiang eue, ex ot tin: mhawm: son ex heue. Phan: Maix koe: rhawm:, aux tag yuh nyiiex bang: tin: loe: lhang:. Son Maix tix lhang:, mai son Mose tix lhang:, mai son Eliyax tix lhang: heue."
Yam kawn: sikah nawh paiawm: pa riieng hoek tix kheem: veei kix, mai jhak heue, lox lih khaing: daux paiawm: an:, ah nin:, "In: mawh Kawn: pa moh Aux, pa khaw: pa caw rhawm: Aux heue. Nghiiet Nawh heue."
Yam mhong: kawncau khankix lox an:, kix kied lhat mai goh gup tix heue.
Mai Yesux hoek mai teeh kix mai ah nin:, "Kaoh heue, paw vi lhat kah."
Mai kix yaog ngai: tix jhak, mai ang kix yaox tix kaux kawx lheu: khaing: Yesux nongnong: heue.
Mai yam lih hoek kix khaing: gawng, Yesux tawm: lox kah kix ah nin:, "Paw krai grawhgrawng: riieng susai: pa hoik yaox pex kah pwi tix kaux kawx, kah: ang Kawn: kawn: pwi nyang bax kaoh khaing: yum:."
Mai kawncau Nawh khankix chawk Nawh Cao: ah nin:, "yuh kah mawx pwi tiem: lai khankix ah Eliyax tag sang hoek phaoka:?"
Mai Nawh Cao: deeh pawk lox ah nin:, "Eliyax sang hoek tete mai deeh cox mhawm: khawm: uik heue.
Viang mawh kawx nan: Aux krai kah pex, Eliyax hoik hoek heue, mai pwi ang tawng nawh, viang mawh nan: kix hoik yuh kah nawh awm: pa simie kix tix yuh. Awm: an: Kawn: kawn: pwi tag kham: geu: kah daux tawm: taix kix heue."
Yam an: kawncau khankix tawng Nawh Cao: krai kah kix grawhgrawng: Yohan cao: baptis heue.
Yesux Pai: Moi: Pwi Saux Laung: Tix Kaux
Makux 9:14-29; Lukax 9:37-43
Mai yam hoek kix dee ot cub pwi haoh pwi hun:, pwi tix kaux hoek mai grux ngawng, mai ah nin: kah Nawh Cao:,
"Simiang eue, caoxrhawm: kah kawn: simex aux liak, kheu mawh nawh pwi saux laung: mai kied kham: kied geu:, mai nawh goh daux ngu, daux rawm: lawlawx heue.
Aux hoik viex nawh hoek kah kawncau Maix khankix, mai kix ang chix cox nawh moi: heue.
Mai Yesux pawk lox ah nin:, "Pwi ju pa ang koe: krax yumrhawm: yumrhi:, mai pa nu tix ah eue, Aux tag kawn: sang ot mai pex miex grheung:? Aux tag kawn: sang gun sang yeung pex miex grheung:? Viex nawh hoek kah Aux heue."
Mai Yesux ah kah phi: an:, mai phicaox an: lih hu: khaing: nawh, mai kawn: simex an:, moi: kah nari bawg yam an: heue.
Yam an: kawncau khankix hoek kah Yesux dee ang pwi ot mai chawk ah nin:, "Yuh kah mawx ex ang pon tix grheu: phi: an: lih?"
Mai Nawh Cao: deeh pawk lox ah nin: kah kix, "Mawh kheu iak krax yumrhawm: pex heue. Aux krai lox tete telai kah pex, phan: pex koe: krax yumrhawm: pon mu: simie sok taux klaox tix mu:, pex tag ah kah gawng in:, gah maix hu: dee an:, mai nawh tag gah tix, mai pa ang pex chix yuh tag ang koe: tix ceu kawx heue.
Viang mawh nan: phi: ceu in: phan: ang mawh kheu rawg bwan: mai pa twah pa ih pa un: ang pon tix lih heue."
Yesux Baox Krai Grawng: Pa Sang Kham: Nawh Tix Yum:
Makux 9:30-32; Lukax 9:43b-45
Mai yam ot kix daux meung Galilie: Yesux ah nin: kah kix, "Tag sang tawx Kawn: kawn: pwi kah daux tawm: taix kawn: pwi khankix.
Mai kix tag teei Nawh yum:, mai daux loe: singaix Nawh tag sang deeh kaoh heue." Mai kix kied khirhawm: kah heue.
Tawx Mau Koh Son Nyiiex Bwan:
Mai yam hoek kix kah daux veng Kapeniom, pwi pa koh mau didrakma, hoek kah Petrux mai ah nin:, "Sara Cao: Gau maix ang tawx mau didrakma lie?"
Nawh ah nin:, "Mawh heue." Mai yam laig nawh daux nyiiex, Yesux sikah mai nawh phaoka: ah nin:, "Simon eue, maix ce: yuh kah mawx? Laux simiang haktiex kix pon mau koh khaing: pwi mawx? Pon khaing: kawnpraix tix lie? Phan: ang mawh nan: pon khaing: pwi tang: lie?"
Mai yam nawh deeh pawk lox ah nin:, "Pon khaing: pwi tang: heue." Yesux ah nin: kah nawh, "Phan: mawh nan: kawnpraix kix pon luan heue.
Viang mawh kawx nan: yuh kah mawx son ang kix sang yuh phit kheu ex, maix hu: kah rawm: nhawng:, mai ploi: myiet tix mu:, mai teei kax pa pon phaoka:, mai yam hoik ving maix jheeh nawh, maix tag yaox sitate tix phak heue. Teei an: mai tawx kah kix son Aux mai son maix heue."
Mawh Pwi Mawx Pa Nie Lheu: Ting Khaing: Paox Tix?
Makux 9:33-37; Lukax 9:46-48
Daux bawg yam nari an: kawncau khankix hoek kah Yesux mai chawk ah nin:, "Pwi mawx nie lheu: ting khaing: paox tix kah daux meung raoma:?"
Mai Nawh Cao: kok kawn: nyawm iak tix kaux mai deuh sinax kix,
mai ah nin:, "Aux krai lox tete telai kah pex, phan: pex ang deeh tieh tix mawh awm: kawn: nyawm iak khankix, pex ang tau tix pon laig kah daux meung raoma: heue.
Mawh kheu nan: pwi mawx ang ah, pa kieh rhawm: tix awn: awm: kawn: nyawm iak in:, kaw an: mawh pa lheu: ting khaing: paox tix kah daux meung raoma: heue.
Mai pwi mawx ang ah, pa rieb tix teei kawn: nyawm iak pa awm: in: kah daux ceukaux Aux, rieb tix teei Aux heue.
Pwi Pa Yuh Pa Sideeing:
Makux 9:42-48; Lukax 17:1-2
Viang mawh nan: pwi mawx ang ah, pa kieh kawn: nyawm iak khankix pa yumrhawm: kah Aux tix kauxkaux sideeing caong tix, lheu: mhawm: son kaw an:, phan: preue: simaox mhaw: pa ting kah ngawg nawh mai teei nawh cub daux rawm: sigrit sigra: dee raux heue.
"Haktiex in: tag kharhawm: kharhi: heue, kheu koe: dee sideeing caong khankix. Dee sideeing caong khankix tag sang hoek, viang mawh kawx nan: pwi pa yuh dee sideeing caong tag kharhawm: kharhi: heue.
Phan: taix maix ang ah, caong maix ang ah, kieh maix sideeing caong tix, kid tix tik khaing: maix heue. Laux taix laux caong maix mai laig kah daux pa im: ju mhawm: khaing: koe: taix ra: khawn: mai caong ra: khawn:, mai laig kah daux ngu leeing ju leeing phan: heue.
Phan: ngai: maix kieh maix sideeing caong tix, koh tix tik khaing: maix. Koe: ngai: maix tix khawn: khaing: mai laig kah daux pa im: ju, mhawm: khaing: koe: ngai: maix ra: khawn:, mai taing tix sau: daux ngu mawnarhok heue.
Grawng: Phektem: Yung: Pa Hoik Grai:
Lukax15:3-7
Rien rhawm: tix paw nieb pon yuh kah kawn: nyawm iak khankix tix kaux kawx, kheu krai Aux kah pex kawncau Siyiex cie kix piang raoma: pon tix yaox pakngai: pakbaoh Keeing: Aux pa ot kah daux meung raoma: jheengjheeng: heue.
Mawh kheu Kawn: kawn: pwi hoek tix taoh pa hoik grai: khankix heue.
Pex ce: yuh kah mawx? Phan: pwi tix kauxkaux koe: yung: tiyieh, mai hoik lud krax mai grai: tix mu:, nawh ang prah pa kawn koe: tidim: dim: (99) mu:, mai hu: kah piang gawng khankix mai hu: sawg yung: pa hoik lud krax mai grai: an: lie?
Mai phan: nawh hoik yaox, Aux krai lox tete telai kah pex, nawh nie lheu: gauxrhawm: grawhgrawng: yung: an:, khaing: yung: pa ang grai: tidim: dim: (99) mu: heue.
Awm: an: Keeing: pex pa ot kah daux meung raoma:, ang rhawm: kieh kawn: nyawm in: khankix lauxleeing: tix kaux kawx heue.
Puxaik Pa Yuh Phimap
Mai phan: puxaik maix phit maix, hu: jhi: nawh yaox dee phit sinax maix mai nawh khaing:, phan: nawh nghiiet maix, maix hoik pon puxaik maix heue.
Viang mawh nan: phan: nawh ang nghiiet maix, baox viex pwi tix kaux ra: kaux hu: mai maix, yuh kah mawx son lox ku gum, tag kaux tag cong:, kah jheeh pwi pa kham: mhai: sakse ra: loe: kaux heue.
Mai phan: nawh ang nghiiet lox kix, krai kah ceucao, mai phan: nawh ang nghiiet ceucao kawx, kieh nawh mawh kah maix awm: pwi tang: ceu tang: cat mai pwi koh mau heue.
Aux krai lox tete telai kah pex, pex phyawk ceu patix ang ah piang haktiex in:, tag sang phyawk kah daux meung raoma:, mai pex kah ceu patix ang ah kah piang haktiex in:, tag sang kah daux meung raoma: heue.
Aux dee krai kah pex, phan: kah daux pex ra: kaux ih rhawm: paox tix piang haktiex in:, grawhgrawng: pa rawg kiex tix ceu ceu, Keeing: Aux pa ot kah daux meung raoma: tag yuh son kiex heue.
Mawh kheu kah dee pwi ra: loe: kaux khrawm: paox tix kah daux ceukaux Aux, Aux ot sinax kix heue."
Grawng: Pa Pluat Ploi Atigliah Aliah Bawg
Yam an: Petrux hoek mai ah nin: kah Nawh Cao:, "Simiang eue, puxaik aux phit aux mai aux tag pluat phimap nawh miex bawg? Tom: sidauh aliah bawg lie?"
Yesux ah nin: kah nawh, "Aux ang krai kah maixtom: sidauh aliah bawg, viang mawh kawx nan: Aux krai tom: sidauh hoek atigliah (70) aliah (7) bawg heue.
Mawh kheu nan: meung raoma: awm: simiang ting tix kaux, pa sang sawn: riang mai siliex tix heue.
Mai yam jah nawh tix sawn: riang, kix viex tix kaux pa ceuk talantan tix mheen: hoek kah nawh.
Viang mawh nan: kheu kaw an: ang koe: tix tawx ceuk, simiang nawh nhie: kix coh nawh, mai moeng nawh, mai kawn: nawh, mai can pa koe: nawh khawm: uik, mai tawx ceuk nawh kah heue.
Mawh kheu nan: siliex an: grux tix krub nawh, mai ah nin:,Simiang eue, kawn: deuh kah aux liak, mai aux tag sang deeh tawx kah maix khawm: uik heue
Mai simiang siliex an: caoxrhawm:, mai ploi: nawh, mai pluat ceuk nawh khawm: uik heue.
Viang mawh kawx nan: siliex an: lih hu:, mai yaox paox siliex tix tix kaux, pa ceuk kah nawh denari tiyieh, mai nawh giex nawh, mai kloeg ghok nawh ah nin:,Tawx pa ceuk maix kah aux
Mawh kheu nan: paox siliex nawh grux tix krub nawh mai khyox khaw: ah nin:,Kawn: deuh kah aux liak mai aux tag sang deeh tawx kah maix heue
Viang mawh nan: nawh ang nghiiet, mai teei nawh sau: daux thawng: tom: sidauh hoik tawx nawh ceuk tix khawm: uik heue.
Mawh kheu nan: yam yaox paox siliex nawh tang: kaux khankix grawhgrawng: pa yuh nawh kix kied caoxrhawm: son nawh, mai kix hoek mai krai kah simiang kix grawhgrawng: pa yuh kaw an: khawm: uik heue.
Yam an: Simiang nawh kok nawh hoek kah tix mai ah nin:,Siliex pa caox eue, aux hoik pluat ceuk maix khawm: uik, mawh kheu khyox khaw: maix kah aux heue.
Maix ang khaw: tix caoxrhawm: kah paox siliex tix, awm: hoik caoxrhawm: aux kah maix lie?:
Mai simiang nawh songrhawm:, mai tawx nawh kah pwi pa kieh kham: geu: tom: sidauh hoik tawx nawh ceuk tix khawm: uik heue.
Awm: an: Keeing: Aux piang raoma: kawx tag sang yuh nan: kah pex, phan: pex kukaux ang pluat phimap puxaik tix, khaing: daux rhawm: pex heue."
Grawng: Pa Tik Moeng Tix
Makux 10:1-12
Khaix hoik sidiex Yesux lox ceu an: khankix, Nawh Cao: lih hu: khaing: meung Galilie:, mai hoek kah daux haktiex Yudax plak toi: rawm: Yawdan heue.
Mai cub pwi haoh pwi hun: khankix hawt Nawh Cao:, mai Nawh cox kix moi: tan: heue.
Mai Pharishie: khankix hoek kah Nawh Cao: sonsang cheuk tix yaox rhawm: Nawh, mai chawk ah nin:, "Pwi khaw: tix tik moeng tix kheu pa phit pa lud kuceu lie?"
Mai Nawh Cao: pawk lox ah nin:, "Ang pex sax phat grawhgrawng: Kaw pa yuh kix yam jah,yuh kix mawh simex mai bun:,
mai ah nin:,
Mawh kheu in: simex tag prah miex keeing: tix, mai ot tau mai moeng tix mai kiex ra: kaux tag mawh nex nham: tix mu: khaing:,
mawh kheu in: kiex ang lai deeh mawh ra: kaux, viang mawh kawx nan: mawh tix kaux khaing: heue. Mawh kheu in: pa hoik kleuk Siyiex tau paw kieh pwi yieh heue."
Mai kix ah nin: kah Nawh Cao:, "Phan: mawh nan: yuh kah mawx Mose tawx lox kieh tawx lai grawhgrawng: pa hoik hoik lox, mai tik bun:?"
Nawh Cao: baox ah nin: kah kix, "Mawh kheu kiien: rhawm: pex Mose tom: kieh pex tik moeng tix heue, viang mawh kawx nan: yam jah ang mawh nan: heue.
Mai Aux krai kah pex, pwi mawx ang ah phan: nawh tik moeng tix lheu: khaing: grawhgrawng: pa phit pa vao nawh, mai teei tix moeng tang: kaux, nawh phit nawh vao, mai kaw pa teei tix moeng bun: pa hoik tik an:, nawh phit nawh vao heue."
Mai kawncau khankix ah nin: kah Nawh Cao:, "Phan: grawhgrawng: simex mai moeng tix mawh nan:, ang khaw: tix teei tix moeng heue."
Viang mawh nan: Nawh Cao: ah nin: kah kix, "Pwi khawm: uik ang pon rieb tix teei lox in:, viang mawh nan: mawh pa hoik tawx kah kix khaing: pa pon rieb tix teei heue.
Kheu koe: pa mawh pwi sieh tom: yam keh hoek khaing: daux vaig miex tix, mai koe: pwi sieh pa pwi hoik yuh kieh mawh pwi sieh, mai koe: pwi sieh pa hoik yuh tokaux tix mawh pwi sieh son meung raoma: heue. Kaw pa chix rieb tix teei kieh nawh rieb tix teei heue."
Yesux Nawb Bwan: Kah Kawn: Nyawm iak Khankix
Makux 10:13-16; Lukax 18:15-17
Yam an: kix viex kawn: nyawm iak khankix hoek kah Nawh Cao:, yuh kah mawx sonsang deuh Nawh taix Tix kah piang kix mai rawg bwan: heue. Viang mawh nan:, kawncau khankix ah kah pwi khankix heue.
Viang mawh nan: Yesux ah nin:, "Kieh kawn: nyawm iak khankix hoek kah Aux, paw vi sidien kix, kheu meung raoma: mawh cie pa awm: kix heue."
Mai Nawh Cao: deuh taix Tix kah piang kix, mai lih hu: khaing: tan: heue.
Pwi Awn: Ju Caomi Tix Kaux
Makux 10:17-31; Lukax 18:18-30
Mai jhak heue, pwi tix kaux hoek kah Nawh Cao: ah nin:, "Sara Cao: Gau eue, aux tag yuh pa mhawm: ceu pa yuh kah mawx, sonsang pon aux ju leeing ju leeing phan:?"
Mai Nawh Cao: ah nin: kah nawh, "Yuh kah mawx maix lai chawk Aux kah grawhgrawng: ceu pa mhawm:? Pa mhawm: koe: tix kaux, viang mawh nan: phan: maix simie tix laig kah daux pa im: ju, priex tix hawt gumlox pingnyap khankix heue."
Kaw an: baox ah nin: kah Nawh Cao:, "Pingnyap pa yuh kah mawx?" Mai Yesux ah nin:, "Maix paw teei ju pwi yum:, maix paw phit paw vao, maix paw briex paw lak, maix paw kham: mhai: sakse pa ang mawh ang meh,
yungyi: kah miex kah keeing: tix, mai :maix tag moh paoxplawg paoxnyhawm: awm: moh tokaux tix heue"
Pwi awn: ju an: baox ah nin: kah Nawh Cao:, "aux hoik hawt yuh ceu in: khankix khawm: uik heue. Aux kawn: taik ceu patix?"
Mai Yesux baox ah nin: kah nawh, "Phan: maix simie tix grum naog, hu: coh pa koe: maix, mai tawx kah pwi hot pwi sibhawm: khankix, mai maix tag koe: kraungkhrai: kah daux meung raoma:, mai hoek tix hawt Aux heue."
Viang mawh nan: yam pwi awn: ju an: mhong: lox an:, nawh khirhawm: khirhi: mai lih hu: heue. Kheu mawh nawh pwi pa koe: kraungkhrai: tom: nie heue.
Mai Yesux ah nin: kah kawncau Nawh khankix, "Aux krai lox tete telai kah pex, pwi pa mawh cao: mi nu tix laig kah daux meung raoma: heue.
Mai Aux baox krai kah pex, laig kala-uk daux kre: nyex lheu: yie khaing: laig cao: mi kah daux meung Siyiex heue."
Mai yam mhong: kawncau Nawh khankix lox an:, kix kied daox deng: kah mai ah nin:, "Phan: mawh nan: pwi mawx tag sang pon hoek krax taoh heue."
Mai Yesux jhak kah piang kix mai ah nin: kah kix, "Grawhgrawng: in: kawn: pwi ang chix yuh, viang mawh kawx nan: Siyiex chix yuh kuceu ku cawng khawm: uik heue."
Khawngphak Pa Tag Sang Pon Pa Yuh Kawncau
Yam an: Petrux pawk lox mai ah nin: kah Nawh Cao:, "Ex hoik prah pa koe: tix khawm: uik mai hawt khaix Maix. Mawh kheu nan: ex tag pon ceu patix?"
Mai Yesux baox ah nin: kah kix, "Aux krai lox tete telai kah pex, pex pa hoik hawt khaix Aux khankix, yam hoek bawg yam, yam Kawn: kawn: pwi tag ngawm piang dangngeung min: plakngai: Nawh, pex kawx, tag sang ngawm piang dangngeung kao: mu: ra: mai prawng kah pwi Isarilax kao: ceu ra: heue.
Mai pwi mawx ang ah pa hoik prah hoik grham: nyiiex nawh, phan: ang mawh nan: puxaik nawh, phan: ang mawh nan:, nan: nawh, phan: ang mawh nan: miex nawh, phan: ang mawh nan: keeing: nawh, phan: ang mawh nan: kawnpraix nawh, phan: ang mawh nan: ma: kaung: nawh khankix, kheu ceukaux Aux, tag sang baox pon tiyieh son, mai tag sang pon sin:, ju leeing ju leeing phan: heue.
Viang mawh kawx nan: pwi pa da: khaix tom: nie tag ot kah:, mai pwi pa ot kah: tom: nie tag da: khaix heue."
Grawng: Pwi Yuh Kaing Daux Sipeem Plix Siiet
Grawhgrawng: nawh, meung raoma: awm: cao: nyiiex tix kaux, pa lih hu: pon ngawb cao cao, sonsang cang: pwi yuh kaing kah daux sipeem plix siiet tix heue.
Mai hoik dud ah nawh mau riang kah pwi pa sang yuh kaing khankix, tix singaix denari tix plah, nawh ploi: kix laig kah daux sipeem plix siiet nawh heue.
Mai yam dex hoek loe: nari
nawh baox lih hu:, mai nawh yaox pwi tang: kaux khankix pa ang yuh tidtix mai cung kah daux lah.
Mai nawh ah nin: kah kix, "Pex kawx hu: kah daux sipeem plix siiet aux, mai khaw: tix tawx miex ding aux tag tawx kah pex heue Mai kix hu: heue.
Yam dex hoek liah nari
nawh deeh baox hu:, mai yam hoek dim: nari
nawh baox hu: awm: an: heue.
Mai yam dex hoek kao: tix nari
nawh baox lih hu:, mai yaox pwi tang: kaux khankix cung, mai nawh baox ah nin: kah kix,Pex cung mai ang yuh tidtix leeing: lang: singaix yuh kah mawx?:
Kix ah nin: kah nawh,Mawh kheu pwi tix kaux kawx ang cang: ex heue Mai nawh baox ah nin: kah kix. Pex kawx hu: kah daux sipeem plix siiet aux heue
Mai yam hoek ponbo, simiang sipeem plix siiet ah nin: kah kawncau nawh,Kok pwi pa yuh kaing khankix mai tawx riang kix, jah kah pwi yuh khaix, tom: hoek kah pwi yuh kah: heue
Mai yam kix pa hoik cang: bawg yam kao: tix nari hoek, kix kukaux pon denari tix kaux tix plah heue.
Mai yam pwi pa yuh kah: paox tix hoek, kix ce: nie lheu: pon khaing: kix, mai awm: an: kix kukaux kawx, pon denari tix kaux tix plah heue.
Mai yam hoik pon kix yuh nan:, kix sibriem kah cao: nyiiex,
ah nin:,Pa da: tix yuh khaix khankix yuh tix nari khaing:, mai maix hoik tawx kah kix awm: ex, pa hoik yuh kaing leeing: lang: singaix mai kham: geu: pa kied hax koek heue
Viang mawh kawx nan: nawh baox pawk lox mai ah nin: kah kix tix kaux,Paoxgrawm eue, aux ang yuh pa ang khaw: kah maix, maix hoik cu kah lox pa hoik krai dud son denari tix plah ang mawh lie?
Teei pa mawh cie maix mai hu: heue. Aux simie tix tawx kah pa yuh khaix awm: maix.
Phan: aux yuh pa simie aux tix yuh kah cie aux ang khaw: lie? Phan: ang mawh nan: bohrhawm: maix kheu mhawm: aux lie?
Kheu nan: pa da: khaix tag ot kah:, mai pa ot kah: tag da: khaix heue. Kheu pa kok koe: nie, viang mawh nan: pa laug tix teei tux heue."
Grawng: Pa Gruh Krai Krax Kham: Geu: mai Deeh Kaoh Im: Loe: Bawg Tix Bawg
Makux 10:32-34; Lukax 18:31-34
Mai yam haok hu: Yesux kah veng Yerusaliem, Nawh Cao: teei kawncau Nawh kao: kaux ra:, hu: dee ang pwi ot, mai yam hu: krax Nawh ah nin: kah kix,
"Jhak heue, ex tag sang haok hu: kah veng Yerusaliem, mai tag sang teei tix tawx Kawn: kawn: pwi kah cao: giex kaing: li pa ting khankix, mai pwi pa tiiem: lai khankix, mai kix tag sang prawng kieh Nawh yum:.
Mai tawx Nawh kah pwi tang: ceu tang: cat khankix, sonsang yuh kix pa ang cee ang cak, mai sivied Nawh, mai tawk Nawh yum: piang khaoxlhak, mai daux loe: singaix Nawh tag sang deeh kaoh im: heue."
Grawng: Pa Rawg Miex Son Kawn: Tix
Makux 10:35-45
Yam an: miex kawn: Zebedie: hoek tau mai kawn: kiex khankiex kah Nawh Cao:, krub Nawh mai rawg tix ceu kah Nawh Cao: heue.
Mai Nawh Cao: ah nin: kah kiex, "Simie pax patix?" Kiex deeh ah nin: kah Nawh Cao:, "Tawx lox kieh kawn: aux ra: kaux in: ngawm plak taix khawn: dawm: Maix tix kaux mai plak taix khawn: gwiex tix kaux daux meung Maix liak."
Viang mawh kawx nan: Yesux pawk lox mai ah nin:. "Pex ang tawng ceu pa rawg pex. Pex chix nyaux kawk pa nyaux Aux lie?" Mai kix baox ah nin: kah Nawh Cao:, "Chix tix heue."
Nawh Cao: baox ah nin: kah kix, "Kawk pa nyaux Aux pex tag sang nyaux tete heue, viang mawh kawx nan: pa ngawm plak taix khawn: dawm: Aux, mai plak taix khawn: gwiex Aux, ang mawh cie Aux tix tawx, viang mawh nan: Keeing: Aux hoik cox son pwi mawx ang ah tag mawh son kix heue."
Yam mhong: kawncau Nawh kao: kaux grawhgrawng: ceu an:, kix song: rhawm: kah puxaik kaux ra: an: heue.
Viang mawh nan: Yesux kok kix hoek kah Tix, mai ah nin:, "Pex tawng grawhgrawng: simiang pwi tang: ceu tang: cat khankix, giex kaing: kix, mai pwi pa ting pa lhaong: kix, khin: kah kix heue.
Kah daux pex tag ang mawh nan:, viang mawh nan: kah daux pex pwi mawx ang ah, pa simie tix ting tix lhaong: tag mawh kawncau pex heue.
Mai kah daux pex pwi mawx ang ah, pa simie tix giex kaing: pex, tag mawh siliex pex heue.
Awm: Kawn: kawn: pwi hoek sonsang kieh pwi yuh son Nawh ang mawh, viang mawh nan: hoek sonsang yuh son pwi, mai tawx ju tokaux Tix, sonsang taoh pwi tom: nie heue."
Yesux Pai: Moi: Pwi Dug Ngai: Ra: Kaux
Makux 10:46-52; Lukax 18:35-43
Mai yam lih hu: kix khaing: veng Yerikho: cub pwi haoh pwi hun: hawt khaix Nawh Cao: heue.
Mai jhak heue, pwi dug ngai: ra: kaux ngawm dex krax, mai yam mhong: kiex grawhgrawng: hu: Yesux praok kiex, kiex kok yo ah nin:, "Simiang kawn: Davit eue, caoxrhawm: kah yiex liak."
Mai cub pwi haoh pwi hun: ah kah kiex, nhie: kiex yawg tix, viang mawh nan: kiex nie kok yo ah nin:, "Simiang kawn: Davit eue, caoxrhawm: kah yiex liak."
Yesux cung kaog mai kok kiex ah nin:, "Pax sang kieh Aux yuh ceu patix kah pax?"
Mai kiex ah nin: kah Nawh Cao:, "Simiang eue, yuh ngai: yiex kieh blah liak."
Mai Yesux caoxrhawm:, teeh ngai: kiex, mai dom: mawx dom: an: kiex chix yaox, mai hawt khaix Nawh Cao: heue.
Yesux Brug La Awn: Ju Laig Daux Veng Yerusaliem
Makux 11:1-11; Lukax 19:28-40, Yohan 12:12-19
Mai yam dex hoek kix kah veng Yerusaliem, mai hoek kah yaong: Bephake, kah gawng Sanlun, yam an: Yesux ploi: kawncau Nawh ra: kaux hu:,
Mai ah nin: kah kiex, "Hu: kah daux yaong: pa koe: sivoe pax, mai dom: mawx dom: an: pax tag yaox, la pa hoik phyawk, mai kawn: la pa ot tau mai nawh. Kah mai viex hoek kah Aux heue.
Mai phan: pwi tix kauxkaux ah tix ceu ceu kah pax, pax tag deeh krai ah nin:,Simiang lo kiex heue mai kaw an: tag ploi: hoek dom: mawx dom: an: heue."
Ceu in: hoik mawh, sonsang naog lox cao: jhai: pa ah nin:, 5
"Pex krai kah kawn: bun: Zion,jhak heue, Simiang maix, viex rhawm: awn: mai brug kah piang la, kah piang kawn: la awn: ju heue"
Mai kawncau khankiex hu: awm: pa hoik nhie: Yesux,
mai viex la mai kawn: la awn: ju, mai sau: kraung ceep kix kah piang la, mai Nawh Cao: ngawm kah piang heue.
Mai kah daux cub pwi haoh pwi hun: plak nie teei kraung ceep tix nih tix tawm kah daux krax, mai tang: kaux khankix kid kak khaing: khaox khankix mai tawm kah daux krax heue.
Mai cub pwi haoh pwi hun: khankix, pa hu: sivoe mai pa hawt khaix Nawh Cao: kok yo ah nin:,
"Hosanna kah Kawn: Davit Kaw pa hoek kah daux ceukaux Simiang ting bwanson: heue. Hosanna dee lhaong: khaing: paox tix heue."
Mai yam laig Nawh Cao: kah daux veng Yerusaliem, khawm: veng khawm: uik lulax rhawm:, lawh maw:, mai chawk ah nin:, "Kaw in: mawh mawx?"
Mai cub pwi haoh pwi hun: khankix ah nin:, "In: mawh Cao: Jhai:, Yesux, pa hoek khaing: veng Nazariet kah daux meung Galilie: heue."
Yesux Kieh Nyiiex Bwan: Singax
Makux 11:15-19; Lukax 19:45-48; Yohan 2:13-22
Mai Yesux laig kah daux nyiiex bwan: Siyiex, mai grheu: pwi pa coh pa liag kah daux nyiiex bwan: khankix lih, mai cot pheen: pwi pa loh mau khankix, mai dee ngawm pwi coh sikaux khankix cangklud heue.
Mai Nawh Cao: ah nin: kah kix, "Hoik tiem: tix deuh ah nin:, Nyiiex Aux tag kok mawh dee rawg bwan: heue Viang mawh kawx nan: pex hoik kieh mawh daux dee ot pwi tud pwi rhim: heue"
Mai pwi dug ngai: mai pwi laux caong khankix hoek kah Nawh Cao: kah daux nyiiex bwan:, mai Nawh cox kix moi: heue.
Viang mawh kawx nan: yam cao: giex kaing: li pa ting khankix, mai pwi tiem: lai khankix yaox ceu pa daox pa am: pa yuh Nawh Cao: khankix, mai kawn: nyawm khankix pa kok yo kah daux nyiiex bwan: ah nin:, "Hosanna kah Kawn: Davit" kix songrhawm: kah,
mai ah nin: kah Nawh Cao:, "Mhong: Maix pa ah ceu in: khankix lie?" Mai Yesux ah nin: kah kix, "Mawh heue, ang pex sax phat, Maix hoik kieh krax yaogyaw grum, khaing: daux jheeh kawn: nyawm iak, kawn: nyawm peuex khankix, lie?"
Mai Nawh Cao: prah kix mai lih hu: khaing: daux veng, kah yaong: Betanix, mai it tan: heue.
Yesux Jhax Lawg Kah Khaoxruh
Makux 11:12-14, 20-24
Yam ponngawb yam deeh hu: Nawh Cao: kah veng, Nawh cairhawm:,
mai yaox khaoxruh tix khaox kah dex krax, mai Nawh Cao: hu: kah khaox an:, mai yaox ngie lhax khaing:, mai Nawh Cao: ah nin: kah khaox an:, "Jah yamin tom: hoek leeing ju leeing phan:, paw lai kieh maix plix tix bawg kawx." Mai dom: mawx dom: an: khaoxruh an: fit mai kroh hu: heue.
Mai yam kawncau khankix yaox kix kied daox deng: kah, ah nin:, "Khaoxruh in: chix kroh hu: dom: mawx dom: an: yuh kah mawx?"
Mai Yesux pawk lox mai ah nin: kah kix, "Aux krai lox tete telai kah pex, phan: pex yumrhawm:, mai ang koe: krax pa ang yumrhawm: pex tag ang yuh pa hoik yuh kah khaoxruh in: khaing:, viang mawh phan: pex ah kah gawng in: kawx,Gah dee ot maix, mai rau kah daux rawm: sigrit sigra: heue: tag sang mawh.
Mai pa yumrhawm:, mai pa mhaing: pex, yam rawg pex bwan: kuceu khawm: uik, pex tag pon heue."
Chawkcheng: Kah Grawng: Siawpsibrawm Yesux
Makux 11:27-33; Lukax 20:1-8
Mai yam hoek Nawh Cao: kah daux nyiiex bwan:, cao: giex kaing: li pa ting khankix, mai kuad song: pwi khankix hoek kah Nawh Cao: yam sidiex gau Nawh mai ah nin:, "Maix pon akhwang: siawpsibrawm tix yuh ceu in: khankix dee mawx? Mai pwi mawx tawx akhwang: siawpsibrawm in: kah Maix?"
Mai Yesux pawk lox mai ah nin: kah kix, "Aux kawx tag sang chawk pex kah grawhgrawng: tix ceu, mai phan: pex krai kah Aux, Aux kawx tag sang krai kah pex grawhgrawng: pon Aux akhwang: siawpsibrawm tix yuh ceu in: khankix dee mawx heue.
Krax baptis
Yohan kaoh khaing: dee mawx? Kaoh khaing: raoma: lie, phan: ang mawh nan: kaoh khaing: kawn: pwi lie?" Mai kix keud tau ah nin:, "Phn: ex ah,Kaoh khaing: raoma:, Nawh Cao: tag chawk ah nin:,Phan: mawh nan: yuh patix pex ang yumrhawm: kah nawh?:
Viang mawh nan: phan: ex ahKaoh khaing: kawn: pwi, ex lhat kah cub pwi haoh pwi hun: khankix, kheu kix khawm: uik een: Yohan mawh cao: jhai: heue."
Mai kix pawk lox kah Yesux ah nin:, “Ex ang tawng heue.” Mai Nawh Cao: baox ah nin: kah kix, "Aux kah ang krai kah pex grawhgrawng: pon Aux akhwang: siawpsibrawm tix yuh ceu in: khankix dee mawx heue.
Lox Phektem: Grawng: Kawn: Simex Ra: Kaux
Viang mawh kawx nan: pex ce: yuh kah mawx? Pwi tix kaux koe: kawn: simex ra: kaux, mai nawh hoek kah kaw phaoka: ah nin:,Kawn: simex aux eue, maix hu: kah daux sipeem plix siiet singaix heue
Mai nawh deeh pawk lox ah nin:,Aux ang hu: Viang mawh kawx nan: khaix an: nawh doh keud kah phimap tix, mai hu: heue.
Mai pwi an: hoek kah kawn: nawh ra: kaux tix kaux, mai ah awm: pa hoik ah nawh phaoka:. Mai kawn: an: pawk lox mai ah nin:,Aux sang hu: heue, simiang, viang mawh nan: nawh ang hu:.
In: ra: kaux mawh mawx pa hawt yuh alo keeing: tix?" Mai kix ah nin:, "Kaw phaoka: heue." Yesux ah nin: kah kix, "Aux krai lox tete telai kah pex, pwi pa koh mau khankix, mai bun: pa coh kaux tix, tag laig kah daux meung Siyiex kah: pex heue.
Kheu hoek Yohan kah pex kah daux krax rah krax see mai pex ang yumrhawm: kah nawh, viang mawh nan: pwi koh mau khankix mai bun: pa coh kaux tix yumrhawm: kah nawh heue. Mai pex, yam pex yaox, khaix an: pex kah ang doh keud doh sawn: kah tokaux tix, sonsang yumrhawm: kah nawh.
Lox Phektem: Cao: Sipeem mai Pwi Vai Sipeem
Makux 12:1-12; Lukax 20:9-19
"Pex baox nghiiet lox phektem: tang: ceu tix ceu heue. Koe: pwi tix kaux pa mawh cao: nyiiex, pa sum: sipeem plix siiet tix dauh, mai sum: khaox vie vungviang sipeem an:, mai kaong: dee biiet rawm: plix plix siiet, mai sum: nyiiex lhaong: tix lhang:, mai yaog mai vai kah pwi pa yuh sipeem plix siiet, mai hu: tang: praix tang: klawng: heue.
Mai yam dex hoek bawg yam sang teem plix, nawh ploi: kawncau tix khankix hu: kah pwi yuh sipeem, sonsang teei plix cie nawh heue.
Mai pwi yuh sipeem khankix giex kawncau nawh, mai tap tix kaux, mai teei yum: tix kaux, mai dheem: kah simaox tix kaux heue.
Mai nawh baox deeh ploi: kawncau tang: kaux hu:, nie lheu: khaing: phaoka:, mai pwi yuh sipeem khankix yuh kah kix awm: hoik yuh bawg phaoka: an: heue.
Khaix an: nawh ploi: kawn: tix hu:, ah nin:,Kix tag yungyi: kah kawn: aux heue
Viang mawh kawx nan:, yam yaox pwi yuh sipeem khankix kah kawn: nawh, kix ah nin: kah paox tix,Kaw in: mawh cao: sin:. Hoek heue, ex teei nawh yum: mai teei sin: nawh heue
Mai kix teei nawh mai taing nawh plak praix sipeem, mai teei nawh yum: heue.
Mawh kheu nan: yam hoek cao: sipeem, nawh tag sang yuh kah mawx kah pwi yuh sipeem khankix?"
Mai kix ah nin: kah Nawh Cao:, "Nawh tag yieh yuh laux pwi caox an: khankix, mai nawh tag sang yaog sang vai sipeem plix siiet nawh kah pwi yuh sipeem tang: kaux, pa sang tawx plix kah nawh yam hoek bawg yam teem plix heue."
Yesux baox ah nin: kah kix, "Ang pex sax phat kah daux phuk lai sigang: khri: pa ah nin: lie? Simaox pa hoik tik pwi pa yuh nyiiex, hoik yuh kieh mawh kaing: kah daog. In: mawh pa hoek khaing: Simiang, mai mawh pa daox pa deng: kah ngai: ex heue
Mawh kheu nan: Aux ah nin: kah pex, tag teei Meung Siyiex khaing: pex, mai tawx kah tang: meung pa chix plix plix pa dex pa dawd mai Meung Siyiex heue.
Mai pwi pa rau kah piang simaox in: tag max, mai simaox in: rau kah piang pwi mawx ang ah, tag kieh nawh prungprang:awm: phawng: tiex heue."
Yam cao: giex kaing: li pa ting khankix mai Pharishie:, khankix mhong: lox phektem: Nawh Cao: khankix, kix tawng Nawh krai grawhgrawng: kix heue.
Yam sawg kix tix giex Nawh Cao:, kix lhat kah cub pwi haoh pwi hun: khankix, kheu kix ce: Nawh mawh cao: jhai: heue.
Lox Phektem: Grawng: Pwie Kapaox
Lukax 14:15-24
Mai Yesux pawk lox mai deeh krai lox phektem: tiblah kah kix ah nin:,
"Meung Siyiex awm: simiang ting tix kaux, pa yuh pwie kapaox son kawn: simex tix.
Mai nawh ploi: kawncau nawh khankix hu: kok kix, pa hoik ghaok hoek kah pwie glang: kah: an:. Mai kix ang hoek heue.
Mai nawh baox deeh ploi: kawncau nawh tang: kaux ah nin:,Krai kah kix pa hoik ghaok hoek glangka: in:. Jhak heue. Aux hoik cox khre: pa ih pa un:, mai hoik pah moi aux, mai hoik pah khawng: brie pa kluing: khankix, mai hoik cox tix deuh kuceu, hoek kah pwie kapaox heue
Viang mawh kawx nan: kix yuh pa ang cee ang cak mai hu: dee hu: kix, tix kaux hu: kah ma: nawh, mai tang: kaux hu: kah kraungkhrai: nawh,
Mai kix pa deuk tan:, giex kawncau an: khankix, mai yuh pa ang khaw: ang jiet kah kix, mai teei kix yum: heue.
Simiang ting an: songrhawm: kah, mai ploi: pwi naing nawh khankix hu: yieh mai yuh kix pa mawh pwi pa pah pwi yum:, laux, mai gleeing veng kix heue.
Khaix an: nawh ah nin: kah kawncau nawh khankix,Hoik cox pwie kapaox mhawm:, viang mawh nan: kix pa hoik ghaok hoek glangka: an:, ang keung: tix hoek heue.
Mawh kheu nan: pex hu: kah gah krax ting khankix, mai pex yaox pwi miex ding ang ah nhie: kix hoek kah pwie kapaox heue
Mai kawncau nawh khankix lih hu: kah krax ting khankix, mai khrawm: pwi pa yaox kix khawm: uik, khawm: pa caox pa mhawm:, mai nyo naog kah pwie kapaox heue.
Viang mawh kawx nan: yam laig simiang ting tix jhak nyo khankix, nawh yaox pwi pa ang ceep kraung kapaox tix kaux.
Mai nawh ah nin: kah kaw an:,Paoxgrawm eue, yuh patix maix ang ceep kraung kapaox mai hoek tin:?: Mai kaw an: ang nye: kah heue.
Khaix an: simiang ting an: ah nin: kah kawncau nawh khankix.Phyawk taix caong nawh mai taing nawh daux pa faik plak praix heue, dee tag yiiem riag mai dee greeik rhang: heue.
Grawhgrawng: nawh, pa kok koe: nie, viang mawh nan: pa laug tix teei tux heue."
Tawx Gha: Keun: Kah Simiang Kesa
Makux 12:13-17; Lukax 20:20-26
Yam an: Pharishie: khankix kum: kawng: paox tix, grawhgrawng: sang pon kix tix yaox dee lud lox Nawh Cao: yuh kah mawx?
Mai kix ploi: kawncau kix khankix tau mai pwi Herut khankix hu: kah Nawh Cao:, ah nin:, "Sara Cao: Gau eue, ex tawng Maix mawh pa mawh pa meh, mai sidiex gau grawhgrawng: krax Siyiex tete, mai ang lhat kah pwi tix kaux kawx heue. Kheu ang Maix jhak kah pakngai: kawn: pwi heue.
Mawh kheu nan: Maix ce: yuh kah mawx, krai ex mhong: liak? Khaw: tix tawx mau koh kah simiang Kesa lie, ang khaw: tix tawx lie?"
Viang mawh kawx nan: Yesux tawng grawhgrawng: pa caox kix, mai ah nin:, "Pwi pie pwi lhen: khankix eue, pex nyaw pex cheuk tix yaox Aux yuh kah mawx?
Jhi: Aux yaox mau koh heue." Mai kix viex denari tix plah kah Nawh Cao: heue.
Mai Nawh Cao: chawk ah nin: kah kix, "In: mawh rieng mawh lai pwi mawx?"
Kix baox ah nin: kah Nawh Cao:, "Mawh rieng mawh lai Simiang Kesa heue." Yam an: Nawh Cao: baox ah nin: kah kix, "Mawh kheu nan: ceu pa mawh cie Kesa tawx kah simiang Kesa heue. Mai ceu pa mawh cie Siyiex tawx kah Siyiex heue."
Mai yam mhong: kix lox an:, kix kied daox deng: kah, mai prah Nawh Cao:. mai hu: heue.
Pa Chawk Grawng: Pa Deeh Kaoh Im: Pwi Yum:
Makux 12:18-27; Lukax 20:27-40
Kah daux singaix an: Sadukie: khankix hoek kah Nawh Cao:, pa ah ang koe: pa deeh kaoh im: heue. Mai kix chawk Nawh Cao:,
ah nin:, "Sara Cao: Gau eue, Mose hoik krai ah nin:Phan: pwi yum: tix kaux mai ang koe: kawn:, pux nawh tag teei tix moeng, moeng nawh, mai eei: kawn: ceucat son puxke: nawh heue
Yam an: koe: puxaik aliah kaux mai ex. Kaw phaoka: tix kaux teei tix koe: moeng, mai yum: heue. Mai kheu ang nawh koe: kawn:, nawh prah moeng tix kah pux nawh heue.
Awm: an: ra: kaux tix kaux, mai loe: kaux tix kaux. Tom: sidauh sidu hoek kah aliah kaux tix kaux yum: heue.
Mai khaix hoik yum: kix khawm: uik, bun: an: kawx yum: heue.
Mawh kheu nan:, yam hoek bawg yam deeh kaoh im:, kah daux kix aliah kaux bun: an: tag mawh moeng kaw pa yuh kah mawx? Kheu kix khawm: uik hoik moeng nawh heue."
Viang mawh nan:, Yesux pawk lox mai ah nin: kah kix, "Pex phit pex lud kheu ang pex tawng Phuk lai sigang: khri: mai siawpsibrawm Siyiex heue.
Kheu daux bawg yam deeh kaoh im: sax, ang teei mex teei moeng, mai ang teei tix tawx kah paox tix, viang mawh nan: kix tag awm: kawncau Siyiex kah daux meung raoma: heue.
Lheu: khaing: an: grawhgrawng: pwi pa yum: deeh kaoh im:, ang pex sax phat pa hoik krai Siyiex ah nin: kah pex,
‘Aux mawh Siyiex Abraham, mai Siyiex Icak, mai Siyiex Yakop Lie? Siyiex mawh Siyiex pwi pa yum: ang mawh, viang mawh nan: mawh Siyiex pwi pa im: heue."
Mai yam mhong: cub pwi haoh pwi hun: khankix lox an:, kix kied daox kied deng: kah lox diex lox gau Nawh Cao: heue.
Gumlox Pingnyap Pa Blon: Ting
Makux 12:28-34
Viang mawh nan: yam mhong: Pharishie: khankix grawhgrawng: Nawh Cao: hoik kieh Sadukie: khankix yiien:, kix khrawm: paox tix heue.
Mai kix tix kaux pa mawh, cao: prawng cao: tawng lai been chawk Nawh Cao: kah lox tix ceu, sonsang cheuk tix yaox Nawh kah, ah nin:,
"Sara Cao: Gau eue, kah daux lai beenli, lox pingnyap pa yuh kah mawx, lheu: ting khaing: paox tix?"
Mai Nawh Cao: ah nin: kah nawh, "Maix tag moh Simiang Siyiex maix khawm: rhawm: khawm: rhi: tix khawm: uik, mai khawm: ju tix, mai khawm: kah dee chix keud tix khawm: uik heue
In: mawh pingnyap pa ting pa lhaong: phaoka: heue.
Mai pingnyap ra: gum tix gum pa ah nin: kah awm: in: heue. Maix tag moh paoxplawg paoxnyhawm: tix awm: moh tokaux tix heue
Kah daux lox pingnyap ra: gum in: lox beenli mai lox cao: jhai: khawm: uik hoik grum kah heue."
Lox Chawk Grawng: Khrit Mawh Kawn: Pwi Mawx
Makux 12:35-37; Lukax 20:41-44
Yam khrawm: Pharishie: khankix paox tix, Yesux chawk kix kah lox tix gum,
ah nin:, "Pex ce: grawhgrawng: Khrit yuh kah mawx? Nawh mawh Kawn: mawx?" Mai kix ah nin: kah Nawh Cao:, "Mawh kawn: Davit heue."
Nawh Cao: baox ah nin: kah kix, "Phan: mawh nan: yuh kah mawx, Davit kok Nawh mawh Simiang, kah daux Khwan:, ah nin:,
Simiang ah nin: kah Simiang aux, ngawm plak taix khawn: dawm: Aux, tom: Aux kieh pwi koeng kah Maix, ot greem: caong Maix heue
Phan: Davit kok Nawh mawh Simiang, Nawh chix mawh kawn: nawh yuh kah mawx?"
Mai tix kaux kawx, ang chix pawk lox kah Nawh Cao: tix gum kawx, mai khaix singaix an: pwi ring chawk Nawh Cao: kah lox heue.
Yesux Ah Kah Pwi Pharishie: mai Cao: Tiem: Lai
Makux 12:38-39; Lukax 11:43-46; 20:45-46
Yam an: Yesux sidiex gau kah cub pwi haoh pwi hun: mai kawncau Nawh khankix,
ah nin:, "Pwi tiem: lai khankix mai Pharishie: khankix ngawm kah piang dee ngawm Mose heue.
Mawh kheu nan: pa nhie: kix pex yuh, pex hawt yuh khawm: uik. Viang mawh kawx nan: paw vi hawt yuh awm: pa twah pa klaung: kix. Kheu kix krai mai ang yuh heue.
Mawh heue, kix phyawk kraung pa cien, mai pa nu tix klawm: mai deuh piang klip pwi. Viang mawh kawx nan: tokaux kix pie gien: taix kawx kix ang gah kraung an: heue.
Pa yuh kix khawm: uik kix yuh sonsang yaox kawn: pwi khaing:. Bau: iak dee sau: kix lai Siyiex kawx, kix yuh kieh vieh, mai ciem kraung kix kawx kix yuh tom: dha: heue.
Mai kix moh dee ngawm pa mhawm: khaing: paox tix, dee yuh pwie khankix, mai dee ngawm pa mhawm: khaing: paox tix kah daux nyiiex dee sidiex khankix.
Mai ceu pa yungyi: pwi kah daux lah daux cau, mai pa kok pwi Rabi eue, Rabi eue, kah kix heue.
Viang mawh nan: paw kieh kok pex mawh Rabi, kheu Sara Cao: Gau pex koe: tix kaux khaing:, mai pex khawm: uik mawh puxaik heue.
Mai paw vi kok keeing: kah pwi tix kaux kawx piang haktiex in:, kheu Keeing: pex koe: tix kaux khaing: pa ot kah daux meung raoma: heue.
Mai paw kieh kok pex mawh cao: bung: kaing:, kheu cao: bung: kaing: pex koe: tix kaux khaing: pa mawh Khrit.
Mai kah daux pex pa simie tix ting khaing: paox tix, tag mawh siliex pex heue.
Mai pwi mawx ang ah, pa yaog tokaux tix ting, tag sang yeen nawh tiem, mai pwi mawx ang ah pa yuh tokaux tix tiem, tag sang yaog nawh ting heue.
Pa Kharhawm: Kharhi: Pwi Pharishie: Aliah Ceu
Makux 12:40; Lukax 11:39-42, 44,52, 20:47
"Pwi tiem: lai mai Pharishie:, pwi pa pie pa lhen: khankix eue, pex tag kharhawm: kharhi:, mawh kheu nyeep pex meung raoma: sivoe kawn: pwi heue. Kheu tokaux pex kawx ang laig, mai pa uik laig khankix kawx, pex ang kieh laig heue.
54 Pwi tiem: lai mai Pharishie:, pwi pa pie pa lhen: khankix eue, pex tag kharhawm: kharhi:, kheu pex chix rud tix ih nyiiex miexmai: khankix, mai sonsang chix pie chix lhen:, rawg bwan: tom: lang:, mawh kheu nan: pex tag nie pon krax prawng krax ciyang pa ting heue.
"Pwi tiem: lai mai Pharishie:, pwi pa pie pa lhen: khankix eue, pex tag kharhawm: kharhi:. Kheu pex sawg kah rawm: sigrit sigra: mai kah piang haktiex sonsang pon pwi pa laig kah been pex tikaux, mai khaix hoik laig nawh daux been pex, pex kieh nawh mawh kawn: mawnarhok lheu: khaing: tokaux pex ra: son heue.
"Pwi dug ngai: pa thong: pwi yaox eue, pex tag kharhawm: kharhi: heue. Pex ah,Pwi mawx ang ah phan: tiextu kah nyiiex bwan: ang mawh tidtix. Viang mawh nan: pwi mawx ang ah, pa tiextu kah khri: nyiiex bwan:, nawh koe: ceuk heue
Pwi brai: pwi dug ngai: eue, pa yuh kah mawx lheu: ting, mawh khri: lie, phan: ang mawh nan: mawh nyiiex bwan: pa kieh khri: singax lie?
Mai pex ahPwi mawx ang ah pa tiex pa tu kah khu: dee tan, ang mawh tidtix. Viang mawh nan: pwi mawx ang ah, pa tiextu kah pa tan pa koe: piang dee tan, nawh koe: ceuk heue
Pwi dug ngai: eue, pa yuh kah mawx lheu: ting, pa tan pa lu lie, phan: ang mawh nan: khu: dee tan, pa kieh pa tan singax lie?
Mawh kheu nan: kaw pa tiex pa tu kah dee tan, nawh tiextu kah dee tan, mai kah ceu pa koe: kah piang tan: khawm: uik.
Mai kaw pa tiex pa tu kah nyiiex bwan:, tiextu kah nyiiex bwan:, mai kah Kaw pa ot kah daux nyiiex bwan: heue.
Mai kaw pa tiextu kah raoma:. tiextu kah dangngeung Siyiex, mai kah Kaw pa ngawm piang dangngeung an: heue.
“Pwi tiem: lai mai Pharishie:, pwi pa pie pa lhen: khankix eue, pex tag kharhawm: kharhi: heue, kheu pex tan, taux pak haw:, mai taux ki, mai taux ki la, kao: son tix son, viang mawh nan: ang pex yuh grawhgrawng: pa ting pa koe: daux lox lai beenli, pa mawh, pa khaw: pa jiet, mai pa caoxrhawm:, mai pa yumrhawm:, khankix heue. Viang mawh ceu in: khankix kawx pex khaw: tix yuh, mai ang khaw: tix ang yuh tang: ceu an: khankix heue.
Pwi dug ngai: pa thong: pwi yaox eue, pa cia tix tik maing mai bleet Kala-uk heue.
"Pwi tiem: lai mai Pharishie:, pwi pa pie pa lhen: khankix eue, pex tag kharhawm: kharhi: heue, kheu phak pex plak praix kawk mai tawg khaing:, viang mawh nan: plak daux naog pa rud tix teei mai pa nie luan yuh heue.
Pharishie: pa dug ngai: eue, phak plak daux kawk mai tawg kah: ha:, yuh kah mawx khawm: plak praix kawx, tag singax heue.
"Pwi tiem: lai mai Pharishie:, pwi pa pie pa lhen khankix eue, pex tag kharhawm: kharhi: heue, kheu pex awm: simeeig pa hoik kraix simaox ceed, pa nyawm tix jhak plak praix, viang mawh kawx nan: plak daux hoik naog si-ang: pwi yum:, mai pa seeing: pa brai: kuceu heue.
Awm: an: pex kawx, yam yaox pwi plak praix pex, awm: pa rah pa see, viang mawh nan: plak daux pex, naog pa pie pa lhen:, mai pa phit pa lud kuceu heue.
"Pwi tiem: lai mai Pharishie:, pwi pa pie pa lhen: khankix eue, pex tag kharhawm: kharhi: heue, kheu pex cox pex yuh simeeig cao: jhai: khankix, mai yuh simeeig pwi rah pwi see kieh nyawm tix jhak,
mai ah nin:,Phan: ex pon tix ot kah daux bawg yam singaix tax du ex khankix, ex ang neuex mai kix, yam kieh kix nham: cao: jhai: khankix hieh heue.
Mawh kheu nan: pex kham: mhai: sakse grawhgrawng: tokaux pex, mawh kawn: kix pa pah cao: jhai: khankix yum: heue.
Kheu nan: yuh kieh pa phit pa lud tax du pex naog heue.
Pex pa mawh siuing:, pa mawh ceucat siuing: pa cai: eue, pex sang pon tix luan khaing: krax ciyang mawnarhok yuh kah mawx?
Kheu nan:, jhak heue, Aux ploi: cao: jhai:, mai pwi koe: pingnya, mai pwi tiem: lai khankix hoek kah pex heue. Kix tiblah pex tag sang teei yum:, mai tawk piang khaoxlhak, mai tiblah pex tag sang sivied kah daux nyiiex dee sidiex pex hkankix, mai tuktiaktukte: kix tix veng hoik tix veng heue.
Yuh kah mawx son nham: pwi rah pwi see pa hoik lih kah piang haktiex in: khawm: uik, tag hoek piang pex, jah kah Abelax pa rah pa see, tom: sidauh sidu hoek kah nham: Zakharix pa mawh kawn: Barakhix, pa pex hoik pah yum: sinax nyiiex bwan: mai khu: dee tan heue.
Aux krai lox tete telai kah pex, ceu in: khawm: uik tag sang hoek kah piang pwi ju in: heue.
Yesux Khirhawm: Son Veng Yerusaliem
Lukax 13:34-35
"Veng Yerusaliem eue, veng Yerusaliem pa teei cao: jhai: khankix yum:, mai dheem: pwi pa ploi: hoek kah maix kah simaox, Aux simie tix khrawm: kawnpraix maix, awm: ia: miex khrawm: kawn: tix greem: pruik nawh miex bawg, mai maix ang kieh Aux yuh.
Jhak heue, hoik grham: nyiiex pex yi, kah pex heue.
Grawhgrawng: nawh Aux krai kah pex, khaix in: pex tag ang lai baox yaox Aux, tom: pex ah, Kaw pa hoek kah daux ceukaux Simiang ting bwanson: heue"
Yesux Gruh Krai Grawng: Sang Laux Nyiiex Bwan:
Makux 13:1-2; Lukax 21:5-6
Mai yam lih hu: Yesux khaing: daux nyiiex bwan:, kawncau Nawh khankix hoek kah Nawh Cao: sonsang jhi: Nawh yaox nyiiex bwan: khankix heue.
Viang mawh kawx nan: Nawh Cao: ah nin: kah kix, "Pex yaox ceu in: khawm: uik ang mawh lie? Aux krai lox tete telai kah pex, tag ang grham: simaox koe: tin: kieh koe: piang paox tix tix lon: kawx, pa tag ang yieh tix tik heue."
Mhai: Sakse Pa Sang Hoek Bawg Yam Sidauh
Makux 3:3-13; Lukax 21:7-19
Mai yam ngawm Nawh Cao: kah piang gawng Sanlun, kawncau khankix hoek kah Nawh Cao: dee ang pwi ot, mai ah nin:, "Ceu in: khankix tag sang mawh yam mawx? Mai mhai: sakse grawhgrawng: pa sang deeh hoek Maix, mai grawhgrawng: pa sang sidauh haktiex in:, tag sang mawh pa yuh kah mawx? krai ex mhong: liak."
Mai Yesux pawk lox ah nin: kah kix, "Yuh kah mawx son ang pwi sang pon pie pon lhen: pex, kieh lud, rien rhawm: tix kah heue.
Kheu pwi tom: nie tag sang briex tix teei ceukaux Aux mai hoek ah nin:,Aux mawh Khrit heue, mai tag pon pie pon lhen: kieh pwi lud tom: nie heue.
Mai pex tag mhong: grawhgrawng: naing, mai grawhgrawng: tag sang yuh naing. Rien rhawm: tix son ang pex sang khirhawm: khirhi: kah, kheu ceu in: tag sang mawh, viang mawh nan: ang nyang bax mawh bawg yam sidauh heue.
Mawh kheu pwi tix ceu mai tix ceu, tix meung mai tix meung tag cha: paox tix, mai praix tag sang sibhawm:, mai kla: reem tag sang tok dee haoh dee.
Viang mawh nan: ceu in: khawm: uik mawh pa jah tix kharhawm: kharhi: awm: bun: jah tix saux yam sang keh heue.
Bawg yam an: kix tag sang teei tix tawx pex dee tuktiaktukte:, mai tag sang teei pex yum:, mai pwi kuceu khawm: uik tag sang koeng kah pex, mawh kheu ceukaux Aux heue.
Mai yam an: pwi tag sang lauxrhawm: sideeing caong tom: nie, mai teei tix tawx paox tix, mai koeng kah paox tix, tix kaux mai tix kaux heue.
Mai cao: jhai: pa ang mawh ang meh tag sang lih koe: tom: nie, mai pie lhen: kah pwi tom: nie kieh lud heue.
Mai kheu pa ang khaw: ang jiet baox nie hoek, krax moh krax rhawm: pwi tom: nie tag sang iak hu: heue.
Viang mawh kawx nan: pwi pa kaux pa cong: tom: sidauh, kaw an: tag sang hoek krax taoh heue.
Mai lox bwan: gauxrhawm: gauxrhi: pa dex pa dawd mai Meung An:, tag sang sidiex gau kah piang haktiex khawm: uik, sonsang mawh mhai: sakse kah ceu pwi khawm: uik, mai khaix an: bawg yam sidauh tag sang hoek heue.
Ceu Pa Kied Kharhawm: Kharhi:
Makux 13:14-23; Lukax 21:20-24
"Mawh kheu nan: yam yaox pex ceu pa greeing, pa yuh laux ceu pa cao: jhai: Danyelax hoik krai grawhgrawng:, yam cung dee singax. (Kieh kaw pa phat grawhgrawng: an: tawng heue.)
Yam an: kieh kix pa ot kah daux meung Yudax to: hu: kah piang gawng khankix heue.
Mai pwi pa ot kah piang prang nyiiex, paw kieh nawh lih tix teei kraung pa koe: kah daux nyiiex tix.
Mai pwi pa ot kah daux ma: paw kieh nawh deeh ing: tix teei kraung ceep tix heue.
Bun: pa koe: kaux, mai bun: pa tawx kawn: tix peuex kah daux bawg yam singaix an: khankix, tag kharhawm: kharhi: heue.
Mai pex rawg bwan:, yuh kah mawx son bawg yam sang to: pex, tag ang caw: yam kuat mai singaix twah heue.
Mawh kheu yam an: tag sang koe: pa kied kharhawm: kharhi:, ceu pa ang sax koe:, tom: yam jah tix kaw: haktiex dix, sidauh sidu hoek bawg yamin:, mai khaix an: kawx tag ang lai baox koe: heue.
Mai phan: ang kieh bawg yam singaix an: khankix dawd, tix kaux kawx ang pon tix luan, viang mawh nan: mawh kheu pwi pa hoik laug Siyiex tag sang kieh bawg yam singaix an: khankix dawd heue.
Yam an: phan: pwi tix kauxkaux ah nin: kah pex,Jhak heue, Khrit ot tin:, phan: ang mawh nan: ot tan:, paw vi yumrhawm: kah.
Mawh kheu Khrit pa ang mawh ang meh, mai cao: jhai: pa ang mawh ang meh khankix tag sang lih hoek, mai jhi: yaox mhai: mai ceu pa daox pa am: ceu pa kied ting, yuh kah mawx sonsang pon pie pon lhen: kieh lud, phan: chix tix, kah pwi pa hoik laug Siyiex kawx heue.
Jhak heue, Aux hoik gruh krai kah pex sivoe kah: sang mawh heue.
Mawh kheu nan: phan: kix ah nin: kah pex,Jhak heue, Nawh ot daux tiag daux tu: paw vi hu:. Phan: ahJhak heue, Nawh ot daux lawg plak daux: paw vi yumrhawm: kah heue.
Kheu awm: tuhsah lih hoek khaing: plak lih singaix, mai pon tix yaox tom: hoek plak klip singaix, yam hoek Kawn: kawn: pwi tag sang awm: an: heue.
Tokaux yum: koe: dee mawx ang ah, klangpreng tag khrawm: tix tan: heue.
Yam Deeh Hoek Kawn: Kawn: Pwi
Makux 13:24-27; Lukax 21:25-28
"Khaix pa kharhawm: kharhi: daux bawg yam singaix an: khankix, dom: mawx dom: an:, :Singaix tag faik, mai khix tag ang tawx pa riieng tix, mai simuing: khankix tag sang rau khaing: raoma:, mai siawpsibrawm raoma: khankix tag sang yungyiang: heue
Mai yam an: tag sang yaox mhai: grawhgrawng: Kawn: kawn: pwi, kah piang raoma: heue. Mai yam an: ceu pwi piang haktiex khawm: uik tag yiiem, mai kix tag sang yaox Kawn: kawn: pwi viex siawpsibrawm mai min: plak ngai: pa ting hoek kah piang paiawm: kah raoma: heue.
Mai Nawh tag sang ploi: kawncau Siyiex cie Tix hu: mai lox teettawng pa kied ting kied luah, mai kix tag sang khrawm: pwi pa hoik laug cie Nawh, khaing: bhaung: pon: plak, jah dee sidauh daog raoma: tix plak, tom: sidauh hoek daog raoma: plak an: heue.
Lox Phektem: Kah Khaoxruh
Makux 13:28-31. Lukax 21:29-33
"Gau kah khaoxruh grawhgrawng: lox phektem: nawh. Yam awn: kak nawh mai lih lhax, pex tawng bawg yam raux dex sang hoek.
Awm: an: yam yaox pex ceu in: khankix khawm: uik, kieh tawng Kawn: kawn: pwi dex hoek tix ot kah praok siviex khankix heue.
Aux krai lox tete telai kah pex, pwi ju in: tag ang bax luan, tom: ceu in: khankix khawm: uik tag hoik mawh heue.
Raoma: mai haktiex tag sang grai:, viang mawh kawx nan: gumlox Aux in: tag ang grai: heue.
Tix Kaux Kawx Ang Tawng Singaix Bawg Yam Nari
Makux 13:32-37; Lukax 17:26-30,34-36
Singaix bawg yam nari an: tix kaux kawx ang tawng, viang mawh kawncau Siyiex meung raoma: khankix kawx ang tawng. Kawn: Cao: kawx ang tawng; mawh Keeing: Cao: tix kaux khaing: pa tawng heue.
Mai yam Kawn: kawn: pwi tag sang deeh hoek, tag awm: bawg yam singaix Noax khankix heue.
Mawh kheu awm: singaix an: khankix kah: sang haok huan: rawm: pa naog piang haktiex, kix ih, mai nyaux, mai teei mex teei moeng, mai teei tix tawx paox tix, tom: hoek singaix laig Noax kah daux nyiiex reu ting heue.
Mai kix ang tawng tom: rawm: haok huan: mai sibloe: kix hu: khawm: uik. Yam hoek Kawn: kawn: pwi tag sang awm: an: heue.
Yam an: pwi ra: kaux pa ot daux ma:, tag sang teei tix kaux mai prah tix kaux heue.
Bun: ra: kaux pa krid kah mhaw:, tag sang teei tix kaux mai prah tix kaux heue.
Mawh kheu ang pex tawng bawg yam si ngaix sang hoek Simiang pex, pau tix jhak heue.
Kieh tawng ceu in: heue, phan: cao: nyiiex tawng bawg yam nari sang hoek pwi briex, nawh tag sang pau tix jhak mai ang kieh yieh tix laig daux nyiiex tix heue.
Mawh kheu nan: pex rien rhawm: tix, kheu daux bawg yam nari yam ang pex ce:, Kawn: kawn: pwi tag sang hoek heue.
Siliex Pa Kaux Sijax mai Siliex Pa Caox
Lukax 12:41-48
"Siliex pa kaux sijax mai pa koe: pingnya, pa simiang nawh hoik kieh ting piang geh nyiiex tix, sonsang tawx pa ih pa un: kah kix yam hoek bawg yam khaw: tix tawx, mawh mawx?
Yam deeh hoek simiang nawh, siliex pa yaox nawh yuh nan:, ting bwanson: heue.
Aux krai lox tete telai kah pex, simiang nawh tag kieh nawh ting piang pa koe: nawh khawm: uik heue.
Viang mawh nan: phan: siliex pa caox keud tix ah nin: daux rhawm: tix,Simiang aux tag sang koi hoek
Mai tap kah paox siliex tix, mai nyaux plai: tau mai pwi pa yoek kah plai: khankix.
Simiang nawh tag hoek kah daux singaix pa ang nawh keud nawh ce:, mai daux bawg yam nari pa ang nawh tawng,
mai mug nawh dud, mai deuh nawh tau mai pwi pie pwi lhen: khankix, dee tag yiiem riag mai dee greeik rhang: heue."
Lox Phektem: Kah Bunkrih Kao: Kaux
"Yam an: meung raoma: tag sang awm: bunkrih kao: kaux, pa teei kawkngu kix mai hu: rieb kaw pa yuh kapaox heue.
Kix phwan: kaux mawh pwi daox, mai kix phwan: kaux mawh pwi lhak pa koe: pingnya heue.
Bun: pa daox khankix, yam teei kix kawkngu kix, kix ang teei tix viex rawm: bee hu:.
Viang mawh kawx nan:, pa lhak pa koe: pingnya khankix, teei tix viex rawm: bee daux lawk mai kawkngu kix heue.
Kheu kaw pa yuh kapaox ang nyang khran: hoek, kix khawm: uik gaing: mai laig it heue.
Viang mawh kawx nan: yam hoek bawg yam greung sawm:, koe: lox pa yo ah nin:,Jhak heue, kaw pa yuh kapaox, pex hu: tix rieb nawh heue
Yam an: bunkrih an: khawm: uik kaoh, mai cox kawkngu kix heue.
Pa daox khankix ah nin: kah pa lhak pa koe: pingnya khankix,Tawx yix rawm: bee pex liak, kheu kawkngu cie yix dex sang yeet heue
Viang mawh nan: pa lhak pa koe: pingnya khankix pawk lox ah nin:, ha rawm: bee ang kub son yix mai pex, pex hu: liag kah pwi pa coh rawm: bee son tokaux pex heue
Mai yam hu: liag kix rawm: bee, kaw pa yuh kapaox hoek, mai kix pa hoik rien tix mhawmmhawm:, laig tau mai nawh dee sang yuh pwie kapaox heue. Mai hoik nyeep siviex.
Khaix an: bunkrih tang: kaux phwan: kaux an: kawx hoek mai ah nin:,Simiang eue, simiang eue, paoh siviex son yix: liak
Viang mawh kawx nan: nawh pawk lox mai ah nin:,Aux krai lox tete telai kah pex, aux ang tawng pex heue
Mawh kheu nan: pau tix jhak, kheu ang pex tawng singaix mai bawg yam nari an: heue.
Lox Phektem: Kah Siliex Pa Kaux Sijax
Lukax 19:11-27
"Grawhgrawng: nawh tag awm: pwi tix kaux pa sang hu: kah tang: praix tang: klawng:, pa kok siliex nawh khankix mai tawx kraung cie nawh kah kix heue.
Mai nawh tawx kah tix kaux phwan: talantan, mai baox tawx kah tix kaux ra: talantan, mai baox tawx kah tang: kaux tix talantan, nawh tawx kah kukaux awm: pa chix kaux pwi mawh kaux pwi an:, mai lih hu: heue.
Dom: mawx dom: an: kaw pa hoik pon phwan: talantan an: hu: yuh lai geu, mai baox pon rao phwan: talantan heue.
Awm: an: kaw pa hoik pon ra: talantan kawx, hu: mai baox pon rao ra: talantan heue.
Viang mawh kawx nan: kaw pa pon tix talantan, hu: mai kaong: daux tiex mai mox mau cie simiang nawh heue.
Yam hoik rheung: nyao, simiang siliex an: khankix deeh hoek, mai sawn: mau mai kix heue.
Mai kaw pa hoik pon phwan: talantan an: hoek mai viex pa khraox phwan: talantan, mai ah nin:,Simiang eue, maix tawx kah aux phwan: talantan, jhak heue, aux hoik baox pon rao phwan: talantan heue:
Simiang nawh ah nin: kah nawh,Mhawm: heue, siliex pa mhawm: mai pa kaux sijax eue, maix hoik kaux sijax piang pa iak pa tux, aux tag kieh maix ting kah piang ceu pa nie heue. Laig kah daux pa gauxrhawm: simiang maix heue.
Mai kaw pa hoik pon ra: talantan kawx hoek mai ah nin:,Simiang eue, maix tawx kah aux ra: talantan, jhak heue, aux hoik baox pon rao ra: talantan heue
Simiang nawh ah nin: kah nawh,Mhawm: heue, siliex pa mhawm: mai pa kaux sijax eue, maix hoik kaux sijax kah piang pa iak pa tux, aux tag kieh maix ting kah piang ceu pa nie heue. Laig kah daux pa gauxrhawm: simiang maix heue
Mai kaw pa hoik pon tix talantan kawx hoek mai ah nin:,Simiang eue, aux tawng maix mawh pwi nu tix ah, pa vawg dee ang maix rhuat, mai pa khrawm: dee ang maix van: heue.
Aux tom: lhat mai hu: mox talantan maix kah daux tiex, jhak heue, maix koe: cie maix heue
Simiang nawh pawk lox mai ah nin: kah nawh,Siliex pa caox mai pa nieh eue, maix tawng grawhgrawng: aux vawg dee ang aux rhuat, mai khrawm: dee ang aux van:.
Mawh kheu nan: maix khaw: tix sau: mau aux daux nyiiex mau, mai yam deeh hoek aux, aux tag deeh pon num: mau cie aux mai rao heue.
Mawh kheu nan: pex teei talantan an: khaing: nawh mai tawx kah kaw pa koe: kao: talantan an: heue.
Grawhgrawng: nawh pa koe: kukaux daux pwi tag sang baox tawx kah nawh, mai nawh tag sang nie grum koe: heue. Viang mawh nan: kaw pa ang koe:, viang pa hoik koe: nawh kawx tag sang teei khaing: nawh heue.
Grheu: siliex pa ang koe: bwanson: an: lih plak praix daux pa faik, dee tag yiiem riag mai dee greeik rhang: heue
Grawng: Pa Prawng Ca: mai Siyang
"Yam tag sang hoek Kawn: kawn: pwi kah daux min: plakngaix: Nawh, tau mai kawncau Siyiex khawm: uik yam an: Nawh tag sang ngawm piang dangngeung min: pakngai: Nawh.
Mai ceu pwi khawm: uik tag sang krawk khrawm: paox tix sivoe Nawh, mai Nawh tag sang gwieh kix tix kaux khaing: tix kaux, awm: pwi liang yung: gwieh yung: khaing: pex khankix heue.
Mai Nawh tag sang deuh yung: khankix plak taix khawn: dawm: Nawh, viang mawh nan: pex khankix tag sang deuh plak khawn: gwiex heue.
Yam an: Simiang Khunhawkham tag sang ah kah kix pa ot plak taix khawn: dawm: Nawh,Hoek heue, pex pa Keeing: Aux hoik nawb bwanson:, teei sin: Meung pa hoik cox son pex, tom: yam jah tix kaw: haktiex heue.
Kheu Aux cairhawm:mai pex tawx Aux sawm:, mai Aux sang nyaux nie rawm: mai pex tawx Aux nyaux, mai yam mawh Aux nyo pex rieb tix teei Aux.
Yam Aux ot kakaong:, pex tawx Aux ceep kraung. Aux saux mai pex hoek tix kia: Aux. Aux ot kah daux thawng: mai pex hoek kah Aux heue
Yam an: pwi rah pwi see khankix tag sang pawk lox ah nin: kah Nawh, Simiang eue, ex yaox yam cairhawm:Maix, mai tawx Maix sawm: lai mawx? Ex yaox yam sang nyaux nie Maix rawm:, mai tawx Maix nyaux lai mawx?
Ex yaox yam mawh Maix nyo, mai rieb tix teei Maix lai mawx? Ex yaox ot kakaong: Maix, mai tawx Maix ceep kraung lai mawx?
Mai ex yaox yam saux Maix phan: ang mawh nan: yam ot Maix daux thawng:, mai hoek kah Maix lai mawx?:
Mai Simiang Khunhawhkam tag sang pawk lox mai ah nin: kah kix,Aux krai lox tete telai kah pex, pa yuh pex kah puxaik Aux khankix in: tix kaux, viang mawh pa iak khaing: paox tix kawx, pex hoik yuh kah Aux heue
Yam an: kah kix pa ot plak taix khawn: gwiex Nawh kawx, Nawh tag sang ah nin:,Pex pa mawh pa hoik jhax hoik lawg eue, lih khaing: Aux mai laig kah daux ngu leeing ju, pa hoik cox son phicaox mai kawncau nawh khankix heue.
Kheu Aux cairhawm:mai pex ang tawx Aux sawm:. Aux sang nyaux nie rawm: mai pex ang tawx Aux nyaux.
Aux mawh nyo mai pex ang rieb tix teei Aux. Yam Aux ot kakaong:, pex ang tawx Aux ceep kraung. Yam saux mai ot daux thawng: pex ang hoek kah Aux heue
Yam an: kix kawx tag sang pawk lox ah nin:, Simiang eue, ex yaox yam Maix cairhawm:, phan: ang mawh nan: yam sang nyaux nie rawm:, phan: ang mawh nan: yam mawh nyo, phan: ang mawh nan: yam ot kakaong:, phan: ang mawh nan: yam saux, phan: ang mawh nan: yam ot daux thawng:, mai ang kia: ang ngien Maix lai mawx?:
Yam an: Nawh tag sang pawk lox ah nin: kah kix,Aux krai lox tete telai kah pex, pa ang pex yuh kah kaw pa iak khaing: paox tix khankix in: tix kaux, pex ang yuh kah Aux heue
Mai kix tag sang hu: laig kah daux pa ciyang leeing ju heue. Viang mawh nan: pa rah pa see khankix tag sang laig kah ju leeing ju leeing phan: heue."
Kum: Kawng: Sonsang Teei Yesux Yum:
Makux 14:1-2; Lukax 22:1-2; Yohan 11:45-53
Khaix hoik krai Yesux grawhgrawng: lox ceu an: khankix khawm: uik, Nawh Cao: ah nin: kah kawncau Nawh khankix,
"Pex tawng grawhgrawng: khaix in: ra: singaix tag hoek bawg yam pwie Pasakha, mai tag sang tawx Kawn: kawn: pwi, sonsang tawk Nawh piang khaoxlhak heue."
Yam an: cao: giex kaing: li khankix, mai kuad song: pwi khankix khrawm: paox tix kah daux brawk nyiiex cao: giex kaing: li pa ting khaing: paox tix, pa kok mawh Kayaphax.
Mai kum: kawng: paox tix, sonsang pon lhen: pon nyaw tix teei Nawh Cao: mai teei Nawh yum: heue.
Viang mawh nan: kix ah nin:, "Paw yuh yam yuh pwie, kheu lhat pwi khankix koe: krax simah simaing: kah paox tix heue."
Marix Groi Sidauh Bhawng: Piang Kaing: Yesux
Makux 14:3-9, Lukax 7:37-38; Yohan 12:1-8
Yam ot Yesux kah daux yaong: Betanix, daux nyiiex Simon pwi sipawg,
bun: tix kaux hoek kah Nawh Cao: pa koe: sidauh bhawng: pa kied ngawh, daux kawng: simaox paing mai nawh groi sidauh an: kah piang kaing: Nawh Cao: yam ngawm Nawh mai sawm: heue.
Viang mawh kawx nan: yam yaox kawncau Nawh khankix, kix songrhawm: kah mai ah nin:, "Kieh nai: giex going yuh nin: yuh kah mawx?
Phan: coh sidauh bhawng: in: tag sang pon ngawh tom: nie mai tawx kah pwi hot pwi sibhawm: khankix heue."
Viang mawh nan: Yesux tawng grawhgrawng: an:, mai ah nin: kah kix, "Pex chuh kah bun: in: yuh kah mawx? Nawh hoik yuh kaing pa mhawm: kah piang Aux heue.
Mawh kheu pwi hot pwi sibhawm: ot mai pex jheengjheeng:, viang mawh nan: Aux ot mai pex jheengjheeng: ang mawh.
Grawhgrawng: nawh, pa groi nawh sidauh bhawng: kah piang tokaux Aux, nawh yuh sonsang cox Aux, son yam sipaung: heue.
Aux krai lox tete telai kah pex, dee mawx ang ah, dee sang sidiex gau lox bwan: gauxrhawm: gauxrhi: in: kah piang haktiex khawm: uik, grawhgrawng: ceu pa yuh bun: in: kawx, tag sang krai sonsang doh keud kah nawh heue."
Yudax Isakariut Kham: Tixc Coh Yesux
Makux 14:10-11; Lukax 22:3-6
Yam an: tix kaux daux kawncau kao: kaux ra: pa kok mawh Yudax Isakariut, hu: kah cao: giex kaing: li pa ting khankix,
mai ah nin:, "Phan: aux tawx Nawh Cao: kah pex, pex sang tawx kah aux miex ding?" Mai kix: ciang tix tawx mau kah nawh tingoe: (30) plah heue.
Mai jah kah yam an: nawh sawg bawg yam sang pon tix tawx Nawh Cao: kah kix heue.
Yesux Ih Pwie Pasakha mai Kawncau Nawh Khankix
Makux 14:12-21; Lukax 22:7-14, 21-23 ; Yohan 13:21-30
Daux singaix phaoka: khaomun pa ang sau: susaix, kawncau Nawh khankix hoek kah Yesux ah nin:, "Maix simie tix kieh ex cox dee sang ih pwie Pasakha son Maix dee mawx?"
Mai Nawh Cao: ah nin:, "Hu: kah daux veng kah pwi tix kaux, mai ah nin: kah nawh,Sara Cao: Gau ah nin:, bawg yam Aux dex sang hoek, Aux sang ih pwie Pasakha tau mai kawncau Aux daux nyiiex maix heue"
Mai kawncau Nawh khankix yuh awm: pa hoik nhie: Yesux kix yuh, mai kix cox pwie Pasakha heue.
Yam hoek ponbo Nawh Cao: ngawm neung mai sawm: tau mai kawncau Nawh kao: kaux ra:,
mai yam sawm: kix Nawh Cao: ah nin:, "Aux krai lox tete telai kah pex, kah daux pex tix kaux tag sang tik sang tawx Aux heue."
Mai kix kied khi:rhyawm: khirhi: kah mai kix kukaux chawk kah Nawh Cao: ah nin:, "Mawh aux lie?, Simiang!"
Mai Nawh Cao: pawk lox ah nin:, "Kaw pa hoik cub taix nawh daux klong: tau mai Aux, mawh pa sang tik sang tawx Aux heue.
Kawn: kawn: pwi tag hu:, awm: hoik tiem: grawhgrawng: Nawh. viang mawh kawx nan: pwi pa tik pa tawx Kawn: kawn: pwi tag kharhawm: kharhi: heue. Lheu: mhawm: son pwi an: phan: nawh ang keh heue.”
Mai Yudax kaw pa tik pa tawx Nawh Cao: pawk lox mai ah nin:, "Rabi eue, mawh aux lie?" Mai Nawh Cao: ah nin: kah nawh, "Mawh awm: pa hoik ah maix heue."
Yesux Pang: Kah Pwie Cao:
Makux 14:22-26; Lukax 22:14-20;
Mai yam sawm: kix, Yesux teei khaomun, mai nawb bwan:, mai sivit tix tawx kah kawncau Nawh khankix, mai ah nin:, "Teei, ih, in: mawh tokaux Aux heue."
Mai Nawh Cao: teei kawk, mai yaogyaw bwanson:, mai tawx kah kix ah nin:, "Pex khawm: uik nyaux heue.
Kheu in: mawh nham: Aux pa dex pa dawd mai sijax mukheu pa khraox, pa lih sonsang ploi: phimap phigrham: pwi tom: nie heue.
Viang mawh nan: in: Aux krai kah pex, Aux tag ang lai nyaux rawm: plix nhu: plix siiet in:, tom: sidauh singaix yam tag nyaux Aux pa khraox tau mai pex kah daux Meung Keeing: Aux heue."
Mai khaix hoik rhax kix lairhax tix mu:, kix lih hu: kah gawng Sanlun heue.
Yam an: Yesux ah nin: kah kix, "Daux sawm: in: pex khawm: uik sang lauxrhawm: kah daux Aux heue. Kheu hoik tiem: ah nin:, :Aux tag pah cao: liang yung:, mai yung: cub yung: an: khankix, tag prungprang: heue
Viang mawh kawx nan: khaix hoik kaoh Aux, Aux tag sang hu: sivoe pex kah daux meung Galilie: heue."
Viang mawh nan: Petrux pawk lox mai ah nin: kah Nawh Cao:, "Phan: khawm: uik lauxrhawm: kah daux Maix kawx, aux tag ang lauxrhawm: tix bawg kawx heue."
Yesux ah nin: kah nawh, "Aux krai lox tete telai kah maix, daux sawm: in: kah: ang ia: nyang ux, maix tag sang thiang: tix tik tix vud Aux loe: bawg heue."
Petrux baox ah nin: kah Nawh Cao:, "Phan: aux tag yum: tau mai Maix kawx, ang aux doh thieng: tix tik tix vud Maix heue." Kawncau Nawh khawm: uik kawx, ah nan: heue.
Yesux Rawg Bwan: Kah Daux Sipeem Kesasemanix
Makux 14:32-42; Lukax 22:39-46
Yam an: Yesux hoek tau mai kix tix dauh kah dee kok mawh Kesasemanix, mai ah nin: kah kawncau Nawh khankix, "Pex ngawm tin: yam Aux hu: rawg bwan: tan:."
Mai Nawh Cao: teei Petrux mai kawn: Zebedie ra: kaux hu: tau mai Nawh, mai Nawh khirhawm: khirhi: mai sungsang rhawm: heue.
Yam an: Nawh Cao: ah nin: kah kix, "Aux kied khirhawm: khirhi: tom: dex sang yum:, pex ot tin:, mai pau tau mai Aux heue."
Mai Nawh Cao: hu: sivoe ceeix mai grux gup mai rawg bwan:, ah nin:, "Keeing: Aux eue, phan: chix, kieh kawk in: luan khaing: Aux liak, viang mawh kawx nan: paw kieh mawh alo pa caw pa khaw: rhawm: Aux, kieh mawh alo pa caw pa khaw: rhawm: Maix heue."
Nawh Cao: deeh hoek kah kawncau khankix, mai yaox kix laig it, mai ah nin: kah Petrux, "Ang pex pon tix pau tau mai Aux tix nari khaing: lie?
Pau mai rawg bwan: heue, yuh kah mawx son ang pex sang laig kah daux pa nyaw pa glaw:. Khwan: koe: rhawm: tix sang yuh tete, viang mawh nan: nex mawh pa iak riang iak rao heue."
Nawh Cao: baox deeh hu: ra: bawg tix bawg mai rawg bwan: ah nin:, "Keeing: Aux eue, phan: kawk in: ang chix luan khaing: Aux, phan: Aux ang nyaux nawh, kieh mawh awm: pa koe: alo Maix heue."
Mai Nawh Cao: baox deeh hoek mai yaox kix laig it mawh kheu cien ngai: kix heue.
Mai Nawh Cao: baox prah kix tix bawg, mai hu: mai rawg bwan: loe: bawg tix bawg, mai baox deeh ah lox awm: phaoka: heue.
Yam an: Nawh Cao: baox hoek kah kawncau Nawh khankix mai ah nin: kah kix, "Yamin kawn: it mai laux lee: tix heue. Jhak heue, bawg yam nari dex sang hoek, mai tag sang tik sang tawx Kawn: kawn: pwi daux tawm: taix pwi phimap phigrham: khankix heue.
Kaoh, ex hu: heue, jhak heue, kaw pa sang tik sang tawx Aux dex hoek heue."
Pa Giex Kah Yesux
Makux 14:43-50; Lukax 22:47-53; Yohan 18:3-12
Mai yam kawn: sikah Nawh Cao:, Yudax pa mawh tix kaux kah daux kix kao: kaux ra:, hoek, tau mai cub pwi kied haoh kied hun: pa viex vaig viex khaox, mai lih hoek khaing: cao: giex kaing: li pa ting, mai kuad song: pwi khankix heue.
Mai kaw pa tik pa tawx Nawh Cao: hoik tawx mhai: kah kix tix ceu, ah nin:, "Aux ngheut kah pwi mawx ang ah, mawh Kaw an:, giex Nawh heue."
Mai dom: mawx dom: an: nawh hoek kah Yesux mai ah nin:, "Rabi eue, kieh nyawm ot," mai ngheut kah Nawh Cao: heue.
Mai Yesux ah nin: kah nawh, "Paoxgrawm eue, maix sang hoek yuh kah mawx, yuh heue." Mai kix teei taix tix giex Yesux mai teei Nawh heue.
Mai jhak heue, pwi pa ot tau mai Yesux tix kaux, nyeu taix mai lawd vaig tix, mai kid yhaok siliex cao: giex kaing: li pa ting piang khawm: uik, dud heue.
Yam an: Yesux ah nin: kah nawh, "Deeh sau: vaig maix daux phak tix heue. Mawh kheu pwi pa teei vaig khawm: uik, tag laux kah vaig heue.
Maix lai ce: ang Aux pon mhaing: kah Keeing: Aux, mai Nawh tag ploi: kawncau Siyiex pa lheu: khaing: kao: liecong ra: hoek kah Aux yamin lie?
Phan: mawh nan: lox Phuk lai sigang: khri:, pa ah tag mawh nin:, tag chix naog yuh kah mawx?"
Daux bawg yam nari an: Yesux ah nin: kah cub pwi haoh pwi hun: khankix, "Pex viex vaig viex khaox hoek tix giex Aux awm: giex kah pwi tud pwi rhim: lie? Aux ngawm tix sidiex gau kah daux nyiiex bwan: ku singaix mai pex ang giex Aux.
Viang mawh kawx nan: ceu in: khawm: uik hoik mawh, sonsang naog lox phuk lai sigang: khri: cao: jhai: khankix heue." Yam an: kawncau khankix khawm: uik prah Nawh Cao:, mai to: hu: heue.
Kham: Krax Pa Ciied Tix Sivoe Ngai: Kayaphax
Makux 14:53-65; Lukax 22:54-55,63-71;
Yohan 18:13-14, 19-24
Mai kix pa hoik teei Yesux khankix tok Nawh hu: kah Kayaphax, pa mawh cao: giex kaing: li pa ting piang khawm: uik, dee pwi tiem: lai mai kuad song: khankix hoik khrawm: paox tix heue.
Petrux hawt khaix Nawh Cao: dee singai mai hoek kah brawk nyiiex cao: giex kaing: li pa ting an:, mai laig kah daux, mai ngawm tau mai kawncau simiang khankix, sonsang yaox dee sidauh heue.
Mai cao: giex kaing: li pa ting khankix, mai kuad song: cao: prawng see: khawm: uik, sawg mhai: sakse pa ang mawh ang meh, grawhgrawng: Yesux, sonsang pon kix tix teei Nawh yum:.
Mai kix ang pon ang yaox, viang mawh pwi pa kham: mhai: sakse pa ang mawh ang meh hoek tom: nie kawx heue. Khaix an: ra: kaux hoek,
mai ah nin:, "Pwi in: ah,Aux chix yuh laux nyiiex bwan: Siyiex, mai deeh cox mhawm: daux loe: singaix heue"
Mai cao: giex kaing: li pa ting piang khawm: uik, kaoh cung mai ah nin: kah Nawh Cao:, "Maix ang deeh pawk lox tidtix lie? Pa kham: pwi in: mhai: sakse grawhgrawng: Maix mawh pa yuh kah mawx?"
Viang mawh nan: Yesux ang nye: kah. Mai cao: giex kaing: li pa ting an: baox ah nin: kah Nawh Cao:, "Aux chawk kah Maix kah daux ceukaux Siyiex pa im:, sonsang krai Maix kah ex grawhgrawng: mawh Maix Khrit, Kawn: Siyiex lie, ang mawh lie."
Yesux ah nin: kah nawh, "Mawh awm: pa hoik ah maix, viang mawh kawx nan: Aux krai kah maix, khaix in: pex tag sang yaox Kawn: kawn: pwi ngawm plak taix khawn: dawm: Siawpsibrawm, mai hoek kah piang paiawm: raoma: heue."
Yam an: cao: giex kaing: li pa ting an: riah kraung ceep tix, mai ah nin:, "Kaw in: hoik ah lox pa sa pa lao kah Siyiex, ex baox lo pwi kham: mhai: sakse yuh kah mawx? Jhak heue, pex hoik mhong: lox pa sa pa lao kah Siyiex heue.
Pex ce: yuh kah mawx?" Kix pawk lox mai ah nin:, "Nawh keung: tix yum: heue."
Yam an: kix baig rawmmya: kah pakngai: Nawh Cao:, mai jhawp taix tix klah Nawh, mai tiblah simang: Nawh Cao: kah tawmtaix tix,
ah nin:, "Cao: Khrit eue, krai lox jhai: kah ex liak, mawh pwi mawx pa tap Maix?"
Petrux Thiang Tix Tik Kah Yesux
Makux 14:66-72; Lukax 22:56-62;
Yohan 18:15-18, 25-27
Yam an: Petrux ngawm kah dee brawk nyiiex, mai bun: tix kaux hoek kah nawh ah nin:, "Maix kawx mawh pa ot tau mai Yesux pwi meung Galilie: heue."
Viang mawh kawx nan: nawh thiang: sivoe kix khawm: uik ah nin:, "Aux ang tawng pa ah maix heue."
Mai khaix hoik lih hu: nawh kah grah nyiiex, bun: tang: kaux yaox nawh mai ah nin: kah kix pa ot tan:, "Pwi in: kawx ot tau mai Yesux Pwi veng Nazariet heue."
Nawh baox deeh tiextu thiang: ah nin:, "Aux ang tawng Pwi an: heue."
Khaix an: tix vud kix pa cung dex tan: ah nin: kah Petrux, "Maix kawx mawh tix kaux daux kix tete, kheu lox sikah maix kieh tawng maix heue."
Yam an: nawh jah tix jhax mai tiextu ah nin:, "Aux ang tawng Pwi an:." Mai dom: mawx dom: an: ia: ux heue.
Mai Petrux doh keud kah lox pa hoik krai Yesux ah nin:, "Kah: ang ia: nyang ux, maix tag thiang: tix tik Aux loe: bawg heue." Mai nawh lih hu:, mai nied tix yiiem heue.
Grawng: Tawx Yesux Kah Simiang Pilat
Makux 15:1; Lukax 23:1,2; Yohan 18:28-32
Yam hoek yam ponngawb cao: giex kaing: li pa ting khankix, mai kuad song: pwi khankix khawm: uik kum: kawng: paox tix grawhgrawng: Yesux, sonsang pon tix teei Nawh yum: heue.
Mai kix phyawk Nawh Cao:, mai tok Nawh hu:, mai tawx Nawh kah simiang Pilat heue.
Grawng: Yum: Yudax Isakariut
Kawncau 1:18,19
Yam an: Yudax kaw pa tik pa tawx Nawh Cao:, yam yaox nawh grawhgrawng: kix prawng kix ciyang kah Nawh Cao:, nawh doh keud doh sawn: kah phimap tix, mai deeh viex mau tingoe: (30) plah deeh tawx kah cao: giex kaing: li pa ting mai kuad song: khankix,
ah nin:, “Aux hoik phit hoik lud, kheu hoik tik hoik tawx aux nham: pa ang koe: dee phit heue.” Viang mawh nan: kix ah nin:, "Dex dawd mai ex yuh kah mawx? Maix jhak grawhgrawng: an: heue."
Mai nawh taing tix tik mau an: kah daux nyiiex bwan:, mai lih hu:, mai hu: rhawt tokaux tix yum: heue.
Mai cao: giex kaing: li pa ting khankix teei mau an: mai ah nin:, "Ang khaw: mai beenli tix sau: mau in: kah daux dee deuh mau, kheu mawh ngawh nham: heue."
Mai kix kum: kawng: teei mau an: liag haktiex pwi yuh aw: tix dauh, sonsang yuh dee sipaung: nyo kah heue.
Mawh kheu nan: haktiex an: kok mawh, "Haktiex Nham:" tom: hoek singaix yamin heue.
Yam an: hoik naog gumlox cao: jhai: Yeramix pa ah nin:, "Mai kix teei mau tingoe: (30) plah an:, pa mawh ngawh Nawh, pa hoik deuh ngawh kah, mawh Kaw pa kawn praix pwi Isarilax tiblah hoik deuh ngawh kah heue.
Mai kix tawx mau an: son haktiex pwi yuh aw: tix dauh, awm: hoik nhie: Siyiex kah aux heue."
Simiang Pilat Chawk Kah Yesux
Makux 15:2-5; Lukax 23:3-5; Yohan 18:33-38
Yam an: Yesux cung sivoe simiang, mai simiang an: chawk Nawh Cao: ah nin:, "Maix mawh Simiang Khunhawkham pwi Yudax lie?" Mai Yesux pawk lox ah nin: kah nawh, "Mawh awm: pa ah maix heue."
Yam cao: giex kaing: li pa ting mai kuad song: khankix deuh phimap kah Nawh Cao:, Nawh ang pawk lox tidtix heue.
Yam an: simiang Pilat baox ah nin: kah Nawh Cao:, "Ang maix mhong: mhai: sakse pa kham: kix grawhgrawng: maix tom: nie ceu lie?"
Mai Nawh Cao: ang pawk lox kah nawh tix gum kawx, tom: simiang an: kied daox deng: kah heue.
Krai Pao: Pa Yum: Yesux
Makux 15:6-15; Lukax 23:13-25; Yohan 18:39-19:16
Yam yuh pwie an:, simiang koe: been tix ploi: pwi pa ot daux thawng: tix kauxkaux, pa khaw: rhawm: kix, kah pwi haoh pwi hun: khankix heue.
Yam an: kix koe: pwi pa lih ceu kah daux thawng: tix kaux, pa kok mawh Barabax.
Mawh kheu nan: yam khrawm: kix paox tix, simiang Pilat chawk kix ah nin:, "Pex simie tix kieh aux ploi: pwi mawx kah pex? Barabax lie, phan: ang mawh nan: Yesux pa kok mawh Khrit lie?"
Nawh tom: ah nan:, kheu tawng nawh kix hoik tawx Nawh Cao:, kheu bohrhawm: kix kah heue.
Mai yam ngawm nawh piang dee prawng see:, moeng nawh ploi: pwi hoek kah nawh ah nin:, "Paw kieh pa yuh maix koe: tidtix kah Pwi rah Pwi see an:, mawh kheu hoik kham: geu: aux tom: nie ceu singaix kah daux camaox kheu Nawh heue."
Cao: giex kaing: li pa ting mai kuad song: khankix nyaw pwi haoh pwi hun: khankix kieh rawg ploi: Barabax, mai kieh yuh Yesux laux heue.
Simiang baox chawk lox kah kix ah nin:, "Pwi ra: kaux in: pex simie tix kieh aux ploi: pa yuh kah mawx kah pex?" Mai kix ah nin:, "Ploi: Barabax heue."
Simiang Pilat baox ah nin: kah kix, "Phan: mawh nan: aux sang yuh patix kah Yesux pa kok mawh Khrit?" Kix khawm: uik ah nin:, "Kieh tawk Nawh piang khaoxlhak heue."
Mai nawh baox ah nin:, "Mawh kheu grawhgrawng: patix, Nawh hoik yuh pa caox pa yuh kah mawx?" Viang mawh nan: kix nied tix yo ah nin:, "Kieh tawk Nawh piang khaoxlhak heue."
Mawh kheu nan: yam yaox simiang Pilat tokaux tix ang chix yuh tidtix, mai yaox pwi dex simah simaing: kah paox tix, nawh teei rawm: mai khoek taix tix sivoe pwi haoh pwi hun: khankix, mai ah nin:, "Aux ang koe: dee phit, aux luan khaing: nham: Pwi pa rah pa see in:. Pex jhak grawhgrawng: in: heue."
Mai pwi khawm: uik pawk lox ah nin:, "Kieh nham: Nawh koe: piang ex, mai kawnpraix ex heue."
Yam an: nawh ploi: Barabax kah kix, viang mawh nan: nawh sivied Yesux, mai tawx sonsang tawk piang khaoxlhak heue.
Grawng: Kham: Geu: Yesux Krax Pa Nunai:
Makux 15:16-20; Yohan 19:2,3
Yam an: pwi naing simiang khankix teei Yesux hu: kah daux nyiiex haw: tix dauh dee ot pwi naing, mai khrawm: pwi naing hoek khawm: uik.
Mai kix peeik kraung Nawh Cao:, mai kix ceep sibex raoh kah Nawh heue.
Mai kix taing: mhok katlawm sau: kah piang kaing: Nawh Cao:, mai kieh giex priem tix gawng: daux taix khawn: dawm: Nawh, mai kix grux ngawng sivoe Nawh mai yuh pa ang cee ang cak, kah Nawh Cao: ah nin:, "Simiang Khunhawkham pwi Yudax eue, kieh nyawm ot heue."
Mai kix baig kah piang Nawh Cao:, mai kix teei gawng: priem an: mai sivied kaing: Nawh kah heue.
Mai khaix hoik yuh kix pa ang cee ang cak kah Nawh Cao:, kix peeik sibex an:, mai deeh ceep kraung ceep cie Nawh, mai tok Nawh hu: sonsang tawk Nawh Cao: piang khaoxlhak heue.
Mai yam lih hu: kix kix yaox pwi Kurene tix kaux, pa kaux Simon, Mai kix khin: nawh hu:, sonsang kieh nawh klawm: khaoxlhak Nawh Cao: heue.
Grawng: Pa Tawk Yesux Yum: Piang Khaoxlhak
Makux 15:21-32; Lukax 23:26-43; Yohan 19:17-27
Mai yam hoek kix tix dauh pa kok mawh Gawlaxgawthax, pa sang ah nan: sang ah "Dee Si-ang: Kaing:."
Mai kix tawx Nawh Cao: nyaux sidauh nie pa hoik klao: tau mai ghin:, mai yam hoik cim Nawh Cao: tix yaox Nawh ang nyaux heue.
Mai khaix hoik tawk kix Nawh Cao: piang khaoxlhak. Kix nieb tix yaox mai gwieh kraung Nawh kah paox tix.
Mai kix ngawm mai jhak Nawh Cao: tau heue.
Mai kix deuh lai grawhgrawng: pa deuh phimap kah Nawh Cao: kah piang kaing: Nawh pa tiiem: ah nin:, "IN: MAWH YESUX SIMIANG KHUNHAWKHAM PWI YUDAX."
Yam an: kix tawk pwi tud pwi rhim: ra: kaux tau mai Nawh Cao: piang khaoxlhak, tix kaux plak taix khawn: dawm: mai tix kaux plak khawn: gwiex heue.
Mai kix pa hu: pa hoek dex tan:, ah pa ang khaw: ang jiet kah Nawh Cao: mai vuh vied kaing: tix,
mai ah nin:, "Maix pa yieh nyiiex bwan: mai deeh yuh daux loe: singaix eue, taoh tokaux Maix. Phan: Maix mawh Kawn: Siyiex lih khaing: khaoxlhak heue."
Awm: an: cao: giex kaing: li pa ting, mai pwi tiem: lai, mai kuad song: khankix kawx, ah pa ang cee ang cak kah Nawh Cao: ah nin:,
"Nawh chix taoh pwi tang: kaux, tokaux Nawh, Nawh ang chix taoh. Phan: Nawh mawh Simiang Khunhawkham Isarilax, kieh Nawh lih khaing: khaoxlhak yamin, mai ex tag yumrhawm: kah Nawh heue.
Nawh een: rhawm: kah Siyiex, kieh Nawh taoh Nawh yamin, phan: Nawh simie Nawh, mawh kheu hoik ah NawhAux mawh Kawn: Siyiex heue"
Mai pwi tud pwi rhim: pa hoik tawk piang khaoxlhak tau mai Nawh Cao: kawx, ah lox pa ang khaw: ang jiet kah Nawh awm: an: heue.
Grawng: Pa Yum: Yesux
Makux 15:33-41; Lukax 23:44-49; Yohan 19:28-30
Jah kah bawg yam liah nari praix faik piang haktiex khawm: uik tom: hoek dim: nari.
Mai yam dex hoek dim: nari Yesux kok yo lox sinum ah nin:, "Elix, Elix, lama sabaktanix?" pa ah nin: sang ah, "Siyiex Aux, Siyiex Aux, Maix lai tik vud Aux yuh kah mawx?"
Mai kix pa cung tan: tiblah yam mhong: kix lox an:, kix ah nin:, "Pwi in: kok Eliyax heue."
Mai dom: mawx dom: an: kix tix kaux to: hu: mai teei tix ceu pa awm: tih pa koe: daux rawm: sigrit sigra: tix mu:, mai khaix sau: nawh rawm: sidauh nie tom: naog, nawh sau: kah toh gawng: priem, mai tawx Nawh Cao: nyaux heue.
Pwi pa taig khankix ah nin:, "Paw chuh, kieh ex jhak Eliyax sang hoek tix taoh Nawh lie, ang hoek lie?
Mai Yesux baox deeh kok yo lox sinum, mai tawx khwan: Tix dud rhawm: heue.
Mai jhak heue, man: tie daux nyiiex bwan: griah ra: pak, jah plak piang tom: hoek kah caong, mai tok kla: reem, mai simaox rang: tuh heue.
Mai simeeig khankix kawx baoh, mai tokaux pwi singax pa hoik laig it tom: nie deeh kaoh.
Mai kix lih khaing: daux simeeig khaix hoik kaoh Nawh Cao:, mai laig kah daux veng pa singax singeh, mai sidawng: kah pwi tom: nie heue.
Pwi giex kaing: naing, mai pwi pa pau Yesux tau mai nawh, yam yaox kix tok kla: reem, mai ceu pa hoik mawh khankix, kix kied lhat kah mai ah nin:, "Kaw in: mawh Kawn: Siyiex tete heue."
Mai bun: tom: nie jhak kah dee singai, pa hoik hawt khaix Yesux khaing: meung Galilie: mai khan: kheu: kah Nawh Cao: heue.
Kah daux kix koe: Marix Magadalax mai Marix miex Yakop mai Yosie:, mai miex kawn: simex Zebedie: heue.
Grawng: Sipaung: Yesux
Makux 15:42-47; Lukax 23:50-56; Yohan 19:38-42
Yam hoek ponbo cao: mi tix kaux pa mawh pwi Arimase, pa kaux Yosiep, pa tokaux nawh kawx mawh kawncau Yesux.
Pwi in: hu: kah simiang Pilat mai mhaing: tokaux yum: Yesux heue. Mai simiang Pilat nhie: tawx tokaux Nawh cao: kah heue.
Mai Yosiep teei tokaux yum: an:, mai pua: kah man: pa singax,
mai hu: deuh kah daux simeeig pa khraox cie nawh, pa hoik saik nawh kah daux rang:. Mai nawh plu: plie simaox ting mai thox moing daux simeeig, mai hu: heue.
Mai Marix Magadalax, mai Marix tang: kaux ngawm dex kah simeeig tan: heue.
Simiang Pilat Tawx Pwi Pau Kah Simeeig
Yam hoek pasax, pa mawh singaix khaix Ngaix Khre:, cao: giex kaing: li pa ting mai Pharishie: khankix khrawm: paox tix kah simiang Pilat,
mai ah nin:, "Simiang eue, ex doh keud grawhgrawng: Pwi pie Pwi lhen: an: hoik ah yam kawn: im: Nawh, pa ah nin:,Khaix loe: singaix Aux tag deeh kaoh heue
Mawh kheu nan: tawx lox kieh pau simeeig mhawmmhawm: tom: sidauh loe: singaix. Phan: ang mawh nan: ha kawncau Nawh khankix kox hoek yam ponsawm: mai briex tokaux yum: Nawh, mai ah nin: kah pwi khankix,Nawh hoik deeh kaoh khaing: krax yum:, mai pa phit phaokhaix tag lheu: nu khaing: pa phit phaoka: heue."
Mai simiang Pilat ah nin: kah kix, "Pex kieh pau heue. Pex hu: mai yuh kaux awm: pa chix tix heue."
Mawh kheu nan: kix hu: yuh simeeig kaux, mai tawk cum: kah simaox, yam ot pwi pau tau mai kix heue.
Pa Deeh Kaoh im: Yesux
Makux 16:1-10; Lukax 24:1-12; Yohan 20:1-10
Yam sidauh singaix twah, yam jah praix tix riieng kah daux aliah singaix, singaix tix, Marix Magadalax mai Marix tang: kaux hoek tix jhak simeeig heue.
Mai jhak heue, yam an: kied ting tok kla: reem kheu kawncau Siyiex cie Simiang lih hoek khaing: raoma: tix kaux mai plu: plie: tix tik simaox an: mai ngawm kah piang nawh heue.
Grang nawh awm: tuhsah, mai kraung ceep nawh paing awm: rawm:rha:,
mai pwi pau khankix kheu lhat kah nawh siyaung: mai lih mawh awm: pwi yum: heue.
Mai kawncau Siyiex an: ah nin: kah bun: an:, "Pax paw vi lhat, kheu tawng aux pax sawg Yesux, pa hoik tawk kah piang khaoxlhak heue.
Nawh Cao: ang lai ot tin:, kheu Nawh Cao: hoik kaoh, awm: pa hoik krai Nawh heue.
Hoek mai jhak dee hoik it Simiang.
Mai nied tix hu: krai kah kawncau Nawh khankix,Nawh Cao: hoik kaoh im: khaing: krax yum:, mai jhak heue, Nawh hu sivoe pex kah daux meung Galilie:, mai pex tag yaox Nawh Cao: tan: heue Jhak heue, aux hoik krai kah pax."
Kiex lhat mai kied koe: krax gauxrhawm: gauxrhi:, mai nied tix kaoh khaing: simeeig mai to: hu: sonsang tawx lox kah kawncau Nawh khankix heue.
Mai jhak heue, Yesux hu: rieb kiex mai ah nin:, "Kieh nyawm ot heue." Mai kiex hoek mai giex caong Nawh Cao:, mai krub kah Nawh heue.
Yam an: Yesux ah nin: kah kiex, "Paw vi lhat kah, hu: krai kah puxaik Aux khankix, nhie: kix hu: kah daux meung Galilie:, mai kix tag yaox Aux tan: heue."
Lox Pa Krai Cao: Pau Khankix
Yam kawn: hu: kiex, jhak heue, pwi pa pau tiblah laig kah daux veng, mai krai grawhgrawng: ceu pa hoik mawh khawm: uik, kah cao: giex kaing: li pa ting khankix heue.
Mai yam hoik khrawm: kix paox tix tau mai kuad song: khankix, mai hoik kum: hoik kawng:, kix tawx mau tom: nie kah pwi naing khankix,
mai ah nin:, "Pex ah,Kawncau Nawh khankix hoek yam ponsawm:, mai briex tix teei Nawh hu:, yam laig it ex,
mai phan: gum lox in: hoek kah yhaok simiang, ex tag yuh kieh nawh fahrhawm:, mai kieh pex luan khaing: krax prawng krax khi: heue."
Kheu nan: kix teei mau an:, mai yuh awm: hoik gau kah kix, mai lox ceu an: tah hu: kudauh kudee kah daux pwi Yudax, tom: sidauh hoek singaix yamin heue.
Yesux Lih Bleeh Kah Kawncau Nawh Khankix
Makux 16:14-18; Lukax 24:36-49;
Yohan 20:19-23; Kawncau 1:6-8
Kawncau an: kao: kaux tix hu: kah daux meung Galilie:, mai haok kah gawng dee hoik krai Yesux kah kix.
Mai yam yaox kix Nawh Cao:, kix krub kah Nawh, viang mawh kawx nan: tiblah ang yumrhawm: kah.
Mai Yesux hoek kah kix mai sikah kah kix ah nin:, "Siawpsibrawm kah daux meung raoma: mai kah piang haktiex hoik tawx kah Aux khawm: uik heue.
Mawh kheu nan: pex hu:, mai kieh ceu pwi khawm: uik mawh kawncau mausoi: Aux, mai baptis kix kah daux ceukaux Keeing: Cao:, Kawn: Cao:, mai Khwan: Singax Singeh Cao: heue.
Mai gau kix kieh kix hawt yuh ceu pa hoik nhie: Aux kah pex khawm: uik, mai jhak heue, Aux tag ot tau mai pex jheengjheeng:, tom: sidauh sidu hoek bawg yam sidauh haktiex heue."
1 Isayax - 7:14
2 Mikha - 5:2
3 Hosia - 11:1
4 Yeramix 31:15
5 Isayax - 11:1
6 Isayax - 40:3
7 baptis, dee bleeh mawh cubcom
8 Lai sidiex - 8:3
9 Yaogyaw - 91:11,12
10 Lai sidiex - 6:16
11 Lai sidiex - 6:13
12 Isayax - 9:1,2
13 Lihu - 20:13
14 Dee bleeh Raka’ mawh pa deux pa pheem:
15 Lihu - 20:14
16 Lai sidiex - 24:1,3
17 Lihu - 20:7, Simin - 30: 2, Lai sidiex - 23: 21
18 Lihu - 21:24
19 Laikrub - 19:18
20 Isayax - 53:4
21 Hosia - 6: 6
22 Malakhix - 3:1
23 C. baptis, dee bleeh mawh cubcom
24?
25 Hosia - 6: 6
26 Isayax - 41:8,42:1-4
27 Isayax - 6:9,10
28 Yaogyaw - 78: 2
29 baptis, dee bleeh mawh cubcom
30?
31 Lihu - 20:12
32 Lihu - 21:17, Lai sidiex - 21:18
33 Isayax - 29:13
34 baptis, dee bleeh mawh cubcom
35 baptis, dee bleeh mawh cubcom
36 Yamjah - 2: 24
37 Lihu - 20:12-16
38 Laikrub - 19:18
39 loe: nari, mawh bawg yam dim: nari ponngawb kah ex heue
40 liah nari, mawh bawg yam jung singaix kao: nari ra: heue
41 dim: nari, mawh bawg yam loe: nari plakbo heue
42 kao: tix nari, mawh bawg yam phwan: nari plakbo heue
43 Isayax - 62:11, Zakharix - 9:9
44 Yaogyaw - 118:26
45 Isayax - 56:7
46 Yeramix - 7:11
47 Yaogyaw - 8: 2
48 baptis, dee bleh mawh cubcom
49 Yaogyaw - 118:22,23
50 Lihu - 3:6,16
51 Lai sidiex - 6:5
52 Laikrub - 19:18
53 Yaogyaw - 110:1
54 Daux pheen: pa prim:tiblah koe: gumlox in: mai pheen: tixblah ang lai koe:.
55 Yaogyaw - 118:26
56 Isayax 13:10, 34:4
57 Zakharix - 13:7
58 kao: liecong ra:, dee bleeh mawh cub tab ting kao: tab ra:
59 Zakharix - 11:12,13
60 liah nari, mawh bawg yam jung singaix kao: ra: nari kah ex heue
61 dim: nari, mawh bawg yam loe: nari plakbo kah ex heue
62 Daux lai tang: ceu kix tiem: yuh nin:, Hoek mai jhak dee hoik deuh hoik een: Simiang
63 baptis, dee bleeh mawh cubcom
LAI MAKUX
(Mark)
Makux
Grawng: Lox Sidiex Yohan Cao: Com Rawm:
Mathiex 3:1-12; Lukax 3:1-18; Yohan 1:19-28
Dee jah lox bwan: gauxrhawm: gauxrhi: Cao: Yesux Khrit, Kawn: Siyiex awm: hoik tiem: daux lai Cao: Jhai: Isayax.
"Jhak heue, Aux ploi: kawncau Aux hu: sivoe plakngai: Maix, pa tag sang cox krax Maix heue.
"Lox pa kok pa yo daux tiag daux tu cox krax Simiang, yuh krax Nawh rauh see heue."
Yohan cao: baptis hoek daux tiag daux tu, mai sidiex grawhgrawng: been baptis pa doh keud doh sawn: kah phimap tom: pon luan khaing: daux phimap phigrham: heue.
Mai pwi meung Yudax khawm: uik, mai pwi: veng Yerusaliem khawm: uik, hu: kah nawh. Kix krai doh phimap phigrham: tokaux tix, mai baptis kah nawh daux rawm: klawng: ting Yawdan heue.
Mai Yohan ceep kraung hauk kala-uk, mai nhawt maox hak kah nyoi tix, mai ih sido mai rawm: hia: tiag heue.
Mai nawh sidiex ah nin:, "Khaix in: tag sang hoek Tix kaux pa nie ting khaing: aux, pie maox kiep Nawh ang aux keung: nom: tix kah.
Aux baptis pex kah daux rawm:, viang mawh kawx nan: Nawh tag baptis pex kah daux Khwan: singax singeh heue.”
Yesux Com Rawm: mai Kham: Geu: Pa Nyaw Glaw:
Mathiex 3:13-4:11; Lukax 3:21-22- 4:1-13
Kah daux bawg yam singaix an: khankix, Yesux kaoh khaing: veng Nazariet, meung Galilie:, mai hoek baptis daux tawm: taix Yohan kah daux rawm: Yawdan,
Mai yam Nawh lih khaing: daux rawm: dom: mawx dom: an:, Nawh yaox baoh raoma:, mai Khwan: lih awm: sikaux kah piang Nawh heue.
Mai lox lih khaing: raoma: ah nin:, “Maix mawh kawn: pa moh Aux, pa khaw: pa caw rhawm: Aux heue.”
Mai dom: mawx dom: an:, Khwan: Cao: grheu: Nawh hu: kah daux tiag daux tu heue.
Mai Nawh ot kah daux tiag daux tu tipon: (40) ngaix, mai kham: geu: pa nyaw Satan, mai ot tau mai totiag totu, mai Kawncau Siyiex khankix khan: kheu: kah Nawh Cao: heue.
Kok Kah Pwi Teei Kax Pon: Kaux
Mathiex 4:12-22; Lukax 4:14,15 – 5:1-11;
Khaix hoik sau: Yohan daux thawng: Yesux hoek kah daux meung Galilie:, mai sidiex gau lox bwan: gauxrhawm: gauxrhi: pa dex pa dawd mai Siyiex.
Mai ah nin:, "Bawg yam hoik naog, mai meung Siyiex dex sang hoek, doh keud doh sawn: kah phimap, mai yumrhawm: kah lox bwan: gauxrhawm: gauxrhi: heue.”
Mai yam Nawh hoek dex rawm: nhawng: Galilie:, Nawh yaox Simon mai Andare pux Simon, ploi: rub kah daux rawm: nhawng:, kheu kiex mawh pwi pa teei kax heue.
Mai Yesux ah nin: kah kiex, "Hawt khaix Aux heue, mai Aux tag sang kieh pax lih mawh pwi pa teei pwi heue.”
Mai dom: mawx dom: an: kiex prah rub khankix tan:, mai hawt khaix Nawh Cao:.
Mai Nawh hu: sivoe ceeix mai Nawh yaox Yakop, kawn: Zebedie: mai pux nawh Yohan, ot daux reu mai cox rub tan:.
Mai Nawh kok kiex dom: mawx dom: an:, mai kiex prah keeing: kiex Zebedie: mai pwi cang: pwi caing khankix kah daux reu, mai hawt khaix Nawh Cao:.
Yesux Grheu: Phi: Pa Seeing: Pa Brai: Lih
Lukax 4:31-37
Mai kix hu: kah veng Kapeniom, mai dom: mawx dom: an: singaix twah Nawh laig kah daux nyiiex sidiex mai sidiex gau tan: heue.
Mai kix daox deng: kah lox sidiex lox gau Nawh Cao:, kheu lox gau Nawh awm: pa koe: siawpsibrawm, mai ang awm: pwi tiem: lai khankix heue.
Mai daux nyiiex dee sidiex kix tan:, koe: pwi pa laig phi: pa seeing: pa brai: tix kaux, mai nawh kok nawh yo,
ah nin:, "Yesux Pwi veng Nazariet eue ex koe: pa yuh mai Maix ceu patix. Maix hoek tix yuh ex laux lie? Kaw pa Singax Singeh Siyiex eue, aux hoik tawng Maix mawh mawx."
Mai Yesux ah kah nawh yuh nin:, "Paw nye:, lih hu: khaing: daux nawh heue."
Mai phi: pa seeing: pa brai: an:, kieh pwi an: goh mai kok lox sinum lih hu: khaing: daux nawh heue
Mai pwi khawm: uik khawm: leeing: daox deng: kah, tom: kix chawk paox tix, tix kaux hoik tix kaux ah nin:, "In: mawh patix? Lox sidiex lox gau pa khraox pa koe: siawpsibrawm. Nawh tawx lox kah phi: pa seeing: pa brai: kawx, kix nghiiet lox Nawh heue.
Mai dom: an: lox grawhgrawng: Nawh Cao: tah hu: kudauh kudee kah daux meung Galilie: kah praok sivie sivheng: tan:.
Yesux Pai: Moi: Jhawm Saux Miex Moeng Petrux
Mathiex 8:14-17; Lukax 4:38-41
Mai dom: mawx dom: an: yam lih kix khaing: daux nyiiex sidiex, kix hu: mai laig kah daux nyiiex Simon mai Andare, tau mai Yakop mai Yohan heue.
Miex moeng Simon kiex saux mai it, mai dom: mawx dom: an: kix krai grawhgrawng: kiex kah Nawh Cao: heue.
Mai Nawh Cao: hu: giex taix kiex yaog kiex kaoh, mai jhawm: saux kiex grai: dom: mawx dom: an:, mai kiex khan: kheu: kah kix heue.
Yam klip singaix, yam ponbo kix viex pwi pa koe: jhawm: saux jhawm: ngia mai pwi pa laig phicaox khawm: uik hoek kah Nawh Cao:.
Mai pwi veng khawm: uik khrawm: paox tix ot praok sivie tan: heue.
Nawh Cao: cox pwi pa koe: jhawm: saux kuceu kieh kix moi:, mai Nawh grheu: phicaox lih tom: nie, mai Nawh ang kieh phicaox khankix sikah, kheu kix hoik tawng Nawh Cao: heue.
Yesux Hu: Sidiex Daux Meung Galilie Kudauh Kudee
Lukax 4:42-44
Yam pon ngawb yam ang praix bax mung riang, Nawh Cao: kaoh mai hu: kah daux tiag tix dauh, mai rawg bwan: dee an:.
Mai Simon mai pwi pa ot tau mai nawh khankix hawt Nawh Cao: heue.
Kix yaox Nawh Cao:, mai ah nin: kah Nawh, "Pwi khawm: uik sawg Maix heue."
Mai Nawh Cao: ah nin: kah kix, "Ex hu: tang: dauh tang: dee, kah daux tang: yaong: tang: vie, yuh kah mawx viang mawh tan: kawx Aux kah pon tix sidiex, kheu Aux hoek son ceu in: heue."
Mai Nawh Cao: laig sidiex kah daux nyiiex sidiex kix khankix daux meung Galilie: kudauh kudee, mai Nawh grheu: phicaox khankix lih hu: heue.
Kieh Pwi Sipawg Singax
Mathiex 8:1-4; Lukax 5:12-16
Pwi sipawg tix kaux hoek kah Nawh Cao:, grux ngawng khyox kah Nawh ah nin:, "Phan: Maix koe: rhawm: tix cox aux kieh aux singax Maix chix heue."
Yesux caoxrhawm: kah nawh, mai nyeu taix Tix teeh kah kaw an:, mai ah nin: kah nawh, "Aux koe: rhawm: heue. Kieh maix singax heue."
Mai jhawm: saux sipawg an: grai: dom: mawx dom: an:, mai nawh singax heue.
Mai Nawh Cao: kieh kaw an: lih hu:, khaix hoik tawx Nawh lox.
Pa ah nin: kah nawh, “Rien rhawm: tix paw vi krai tix ceu kawx kah pwi tix kaux kawx, viang mawh kawx nan: hu: mai jhi: cao: giex kaing: li yaox kah tokaux tix, mai tan lu kheu hoik singax maix, awm: ceu pa hoik nhie: Mose, sonsang mawh mhai: sakse kah kix heue.”
Viang mawh kawx nan:, kaw an: lih hu: jah tix krai grawhgrawng: ceu in: tom: nie, tah kudauh kudee, tom: Yesux ang pon tix laig kah daux veng sidawng:. Nawh ot kah plak praix daux tiag, mai pwi kudauh kudee hoek kah Nawh Cao: heue.
Yesux Pai: Moi: Kah Pwi Pa Yum: Taix Yum: Caong Tixc Kaux
Mathiex 9:1-8; Lukax 5:17-26
Khaix an: tix singaix Nawh Cao: baox deeh laig kah daux veng Kapeniom, mai yam kix mhong: grawhgrawng: Nawh Cao: ot kah daux nyiiex tix nyiiex.
Pwi haoh pwi hun: khrawm: paox tix tan:, tom: dee ot, tom: dex siviex kah ang koe:, mai Nawh krai kix mhong: gumlox bwan: heue.
Yam an: kix viex pwi pa koe: jhawm: saux pa yum: taix yum: caong hoek kah Nawh Cao: tix kaux. Pwi pon: kaux klawm: nawh hoek heue.
Yam an: kheu cub pwi haoh pwi hun: kix ang pon hoek dex kah Nawh Cao:, kix tom: yieh braux nyiiex piang dee ot Nawh, mai khaix kix hoik yieh braux nyiiex kix teei ku: dee it kaw pa yum: taix yum: caong an:, mai kix koi ploi: lih dee an: heue.
Yesux yaox krax yumrhawm: kix mai Nawh ah nin: kah kaw pa yum: taix yum: caong an:, "Kawn: eue, hoik pluat phimap maix heue."
Pwi tiem: lai tiblah ngawm tan:, mai kix keud daux rhawm: tix yuh nin:,
"Yuh kah mawx Pwi in: ah lox yuh nin:, Nawh salao kah Siyiex heue. Lheu: khaing: Siyiex tix kaux khaing:, pwi mawx chix ploi: phimap?"
Dom: mawx dom: an: Yesux tawng kah daux rhawm: Tix, grawhgrawng: pa keud kix daux rhawm: kix, mai ah nin: kah kix, "Pex lai keud ceu in: khankix kah daux rhawm: pex yuh kah mawx?
Lox yuh kah mawx lheu: yie tix ah, kah kaw pa koe: jhawm: saux pa yum: taix yum: caong,Hoik pluat phimap maix heue, yie tix ah lie? Phan: sang mawh: nan:,Kaoh, viex kraung it maix mai hu: heue, yie tix ah lie?
Viang mawh kawx nan:, yuh kah mawx sonsang tawng pex grawhgrawng: Kawn: kawn: pwi chix pluat phimap kah piang haktiex, (Nawh ah nin: kah kaw pa koe: jhawm: saux pa yum: taix yum: caong),
Aux krai kah maix, kaoh, viex kraung it maix mai deeh ing: kah nyiiex maix heue."
Mai kaw an: kaoh dom: mawx dom: an: mai teei kraung it tix lih hu: sivoe ngai: pwi khawm: uik, tom: kix khawm: uik daox deng: kah, mai yaogyaw Siyiex, ah nin:, "Ex ang sax yaox pa yuh nin: tix bawg kawx."
Kok kah Lewix
Mathiex 9:9-13; Lukax 5:27-32
Mai Nawh Cao: deeh hu: kah dex praok rawm: nhawng: tix bawg mai cub pwi haoh pwi hun: khawm: uik hoek kah Nawh, mai Nawh Cao: sidiex gau kah kix heue.
Yam hu: krax Nawh Cao: yaox Lewix kawn: simex Alaphie:, ngawm daux nyiiex koh mau, mai Nawh Cao: ah nin: kah nawh, “Hawt Aux heue.” Mai nawh kaoh mai hawt khaix Nawh Cao: heue.
Khaix an: yam ngawm neung Nawh dex pheen: kah daux nyiiex kaw an:, pwi koh mau mai pwi koe: map koe: grham: khankix ngawm neung tau mai Yesux mai kawncau Nawh khankix, kheu kix pwi haoh pwi hun: hawt khaix Nawh Cao: heue.
Yam pwi tiem: lai mai Pharishie: khankix yaox Nawh sawm: tau mai pwi pa koh mau mai pwi koe: map koe: grham: khankix, kix ah nin: kah kawncau Nawh khankix, "Nawh lai sawm: tau mai pwi koh mau mai pwi koe: map koe: grham khankix yuh kah mawx?"
Mai yam mhong: Yesux Nawh ah nin: kah kix, “pwi pa nyawm ot nyawm koe:, ang lo pwi pa chix sidauh dim:, viang mawh kawx nan: mawh pwi pa koe: jhawm: saux jhawm: ngia khaing: pa lo pwi chix sidauh. Aux hoek sonsang kok pwi pa rah pa see ang mawh, viang mawh kawx nan:, hoek tix kok pwi pa koe: map koe: grham: heue.”
Grawng: Twah Pa Ih Pa Un:
Mathiex 9:14-17; Lukax 5:33-39
Bawg yam an: kawncau Yohan mai Pharishie: khankix twah pa ih pa un:, mai kix hoek mai ah nin: kah Nawh Cao:, “Kawncau Yohan mai kawncau Pharishie: khankix twah pa ih pa un:, viang mawh nan: yuh kah mawx kawncau Maix lai ang twah pa ih pa un:?"
Mai Yesux chawk kix ah nin:, "Yam pwi yuh kapaox ot tau mai paoxgrawm nawh khankix, kix chix twah pa ih pa un: lie? Yam pwi yuh kapaox kawn: ot mai kix, kix ang tau tix chix twah pa ih pa un:.
Viang mawh kawx nan:, bawg yam singaix tag sang hoek, yam tag sang teei kaw pa yuh kapaox khaing: kix, mai kah daux singaix an: kix tag sang twah pa ih pa un: heue.
Pwi tix kaux kawx ang sax teei man: pa khraox blaox kraung ceep pa prim:, phan: yuh nan: kienie, man: pa khraox pa hoik blaox daux griah tag kieh pa prim: laux, mai daux griah tag nie vieh khaing: phaoka: heue.
Mai pwi tix kaux kawx ang sax teei rawm: plix siiet pa khraox sau: kah daux chee: hak pa prim:, phan: yuh nan: kienie, rawm: plix siiet pa khraox tag kieh chee: hak an: bih, mai khawm: rawm: plix siiet mai khawm: chee: hak tag laux tag nai: kah heue. Viang mawh kawx nan: kix sau: rawm: plix siiet pa khraox kah daux chee: hak pa khraox heue."
Yesux Mawh Simiang Singaix Twah
Mathiex 12:1-8; Lukax 6:1-5
Kah daux singaix twah tix singaix yam Nawh Cao: hu: preeng: daux ma: nghoxca, kawncau Nawh khankix caik tix teei sigleem: nghoxca heue.
Mai Pharishie: khankix ah nin: kah Nawh Cao:, "Jhak heue, yuh patix kix lai yuh pa ang khaw: mai beenli singaix twah?"
Nawh Cao: baox pawk lox mai ah nin: kah kix “Ang pex sax phat grawhgrawng: pa yuh Davit yam lo nawh, yam nawh mai pwi ot tau mai nawh kied cairhawm: lie?
Grawhgrawng: yam laig nawh kah daux nyiiex Siyiex, yam Abyathax mawh cao: giex kaing: li pa ting, mai ih hkaomun, mai tawx kah khawm: pwi pa ot tau mai nawh, pa pwi pa ang mawh cao: giex kaing: li ang khaw: tix ih lie?"
Mai Nawh Cao: baox ah nin: kah kix, "Singaix twah hoik yuh son kawn: pwi heue. Yuh kawn: pwi son singaix twah ang mawh.
Mawh kheu in: Kawn: kawn: pwi mawh Simiang singaix twah heue."
Yesux Pai: Moi: Pwi Yum: Taix Tix Khawn:
Mathiex 12:9-14; Lukax 6:6-11
Nawh Cao: deeh laig kah daux yiex dee sidiex, mai pwi pa taix nawh hoik yum: hoik kroh tix khawn:, ot tan: tix kaux.
Nawh Cao: sang cox kah kaw an: singaix twah lie, ang cox lie, kix jhak tix yaox Nawh Cao:, yuh kah mawx sonsang pon tix deuh phimap kah Nawh heue.
Mai Nawh Cao: ah nin: kah pwi pa hoik yum: taix, kroh taix tix khawn: an:, "Kaoh cung tin: heue."
Mai Nawh Cao: baox chawk ah nin: kah kix, "Khaw: mai beenli tix yuh pa mhawm: singaix twah lie, phan: ang mawh nan: khaw: tix yuh laux lie? Khaw: tix taoh ju lie, phan: ang mawh nan: khaw: tix pah yum: lie?" Viang mawh nan: kix ang nye: heue.
Khaix an: Nawh Cao: songrhawm: mai jhak sivie tan: kah piang kix, Nawh Cao: khirhawm: kheu kien: rhawm: kix, mai ah nin: kah pwi an:, "Nyeu taix maix heue," mai nawh nyeu taix tix, mai taix nawh deeh mhawm: heue.
Mai Pharishie: khankix lih hu: mai dom: mawx dom: an: kix kum: kawng: mai kawncau mausoi: Herut grawhgrawng: kix sang pon tix yuh Nawh Cao: laux yuh kah mawx heue.
Cox Moi: Pwi Saux Khankix Hawt Praok Rawm: Nhawng:
Mathiex 12:15-16; Lukax 6:17-19
Yesux mai kawncau Nawh khankix hu: kah rawm: nhawng: mai cub pwi haoh pwi hun: pa kaoh khaing: meung Galilie:, hawt khaix kix heue. Mai meung Yudax,
mai khaing: veng Yerusaliem, mai khaing: veng Idom, mai haktiex plak toi: rawm: Yawdan, mai kix pa ot sivie sivheng: veng Turux mai veng Sidom khankix, pwi haoh pwi hun: mhong: grawhgrawng: pa yuh Nawh Cao:, mai hoek kah Nawh heue.
Mawh kheu pwi kied haoh kied hun: tan:, yuh kah mawx son ang kix sang theen: Nawh tom: tip, Nawh Cao: nhie: kawncau Nawh khankix kieh reu iak krox dex Nawh tix lhang: heue.
Mawh kheu Nawh hoik cox pwi moi: tom: nie, can pwi pa koe: jhawm: saux jhawm: ngia khawm: uik, tom: theen: kah Nawh sonsang pon teeh kix kah Nawh Cao:.
Mai yam phi: pa seeing: pa brai: khankix yaox Nawh Cao: kix goh gup sivoe Nawh mai kok yo ah nin:, "Maix mawh Kawn: Siyiex heue."
Mai Nawh tawm: lox kah kix tom: nie, yuh kah mawx son ang kix sang kieh pwi tawng Nawh Cao: heue.
Yesux Lauk Kawncau Kao: Kaux Ra:
Mathiex 10:1-4; Lukax 6:12-16
Mai Nawh Cao: haok kah gawng mai kok pwi pa simie Nawh tix kok khankix, mai kix hoek kah Nawh heue.
Mai Nawh Cao: ciak tix deuh pwi kao: kaux ra:, sonsang ot kix tau mai Nawh mai yuh kah mawx sonsang ploi: kix hu: sidiex,
mai Nawh tawx kix siawpsibrawm sonsang chix cox jhawm: saux jhawm: ngia moi:, mai chix grheu: phicaox lih heue.
Kao: kaux ra: an: mawh, Simon pa sum: Nawh Cao: ceukaux khraox Petrux,
mai Yakop kawn: simex Zebedie:, mai Yohan pa mawh pux Yakop, mai (Nawh Cao:, sum: ceukaux khraox kiex Bawnaji, dee bleeh ceukaux an:, mawh kawn: simex sinum praix.)
Mai Andare, mai Philipux, mai Bathawlamie:, mai Mathiex, mai Thomax, mai Yakop pa mawh kawn: simex Alaphie:, mai Thatdie:, mai Simon pwi Kananix.
Mai Yudax Isakariut, pa tik pa tawx Nawh Cao: heue. Mai kix hu: laig daux nyiiex tix nyiiex,
Yesux Mai Belazebulax
Mathiex 12:22-32; Lukax 11:14-23; 12:10
mai pwi haoh pwi hun: deeh khrawm: tan: tix bawg, tom: kix ang pon tix ih pa ih pa un: heue.
Yam puxaik kawn: keeing: Nawh khankix mhong: grawhgrawng: an:, kix hoek tix giex Nawh Cao: kheu kix ah Nawh yhot heue.
Mai pwi pa tiiem: lai khankix pa lih hoek khaing: veng Yerusaliem kawx, ah nin:, "Nawh koe: Belazebulax mai kheu een: Nawh rhawm: kah simiang phicaox Nawh tom: grheu: phicaox khankix lih heue."
Mai Nawh Cao: kok kix hoek kah Nawh, mai Nawh teei lox phektem: ah nin: kah kix, "Satan chix grheu: Satan lih yuh kah mawx?
Mai phan: meung tix meung ang khaw: paox tix, gwieh paox tix, meung an: ang chix kaux chix cong: heue.
Mai phan: nyiiex tix nyiiex ang khaw: paox tix, gwieh paox tix, nyiiex an: ang chix kaux chix cong: heue.
Mai phan: Satan kaoh mai ang khaw: kah tokaux tix, gwieh paox tix, nawh ang chix kaux chix cong:, tag sidauh tag laux heue.
Pwi tix kaux kawx ang chix laig kah daux nyiiex pwi pa ting riang, mai yuh kraung cie nawh laux, phan: nawh ang phyawk pwi pa ting riang an: kah:, mai khaix an: nawh tag yuh nyiiex nawh laux heue.
Aux krai lox tete telai kah pex, tag sang pluat phimap kawn: pwi khawm: uik, mai lox pa sa pa lao kah Siyiex khawm: uik heue.
Viang mawh kawx nan:, pwi mawx ang ah pa sa pa lao kah Khwan: Singax Singeh, ang pluat phimap nawh tix bawg kawx, viang mawh nan: phimap pa yuh nawh an:, mawh phimap leeing ju leeing phan: heue."
Mawh kheu hoik ah kix, "Nawh koe: phi: pa seeing: pa brai:" Nawh tom: ah nan:.
Miex Nawh Cao: Mai Pux Nawh Cao: Khankix
Mathiex 12:46-50; Lukax 8:19-21
Mai miex Nawh Cao: mai pux Nawh khankix hoek cung plak praix, mai kix ploi: pwi hu: kah Nawh tix kok Nawh heue.
Mai cub pwi haoh pwi hun: ngawm sivie Nawh Cao:, mai kix ah nin: kah Nawh, "Jhak heue, miex Maix mai pux Maix khankix ot plak praix mai sawg Maix heue."
Mai Nawh Cao: pawk lox ah nin: kah kix, "Miex Aux mai pux Aux khankix mawh mawx?"
Mai Nawh jhak kah piang pwi pa ngawm sivie sivheng: Nawh khankix, mai Nawh Cao: baox ah nin:, "Jhak heue, miex Aux mai pux Aux khankix.
Mawh kheu pwi mawx ang ah pa yuh alo pa khaw: pa caw rhawm: Siyiex, pwi an: mawh pux Aux, mai nan: Aux, mai miex Aux heue."
Lox Phektem: Grawng: Ruat Simie
Mathiex 13:1-9; Lukax 8:4-9
Mai Nawh deeh jah tix sidiex gau dex praok rawm: nhawng: Mai cub pwi kied haoh kied hun: khrawm: paox tix hoek kah Nawh Cao:, kheu nan: Nawh laig ngawm kah daux reu, mai reu ot kah daux rawm: nhawng:, mai cub pwi haoh pwi hun: ngawm piang tiex kah praok rawm: nhawng: heue.
Mai Nawh Cao: sidiex gau kix tom: nie ceu kah daux lox phektem:, mai Nawh ah nin: kah kix kah daux lox sidiex lox gau Nawh.
"Nghiiet heue, jhak heue, pwi ruat simie hu: tix ruat simie heue.
Mai yam rhuat nawh simie, simie tiblah cod kah dex krax, mai sim: khankix hoek sut tix ih simie khankix heue.
Mai simie tiblah cod kah piang tiex dee koe: simaox, dee ang tiex koe: tom: nie, mai simie an: kuah dom: mawx dom: an:, mawh kheu ang tiex raux tan:.
Mai yam hoik lih singaix, kied hax: koek, mai kheu ang kix koe: riah, kix kroh hu: heue.
Mai simie tiblah cod kah sinax pang: kat, mai pang: kat an: ting tom: kheem: gut kix, mai kix ang chix plix plix heue.
Mai simie tiblah cod kah dee mhawm: tiex, mai plix plix heue, mai kix ting mai piien: tom: pon tingoe: (30) son, mai tigliah (60) son, mai tiyieh (100) son heue."
Mai Nawh baox ah nin:, "Kaw pa koe: yhaok tix mhong:, kieh nawh mhong: heue."
Grawng: Teei Lox Phektem: Sidiex
Mathiex 13:10-17; Lukax 8:9-10
Mai yam ot Nawh Cao: nongnong:, kix pa ot sivie sivheng: Nawh mai kawncau Nawh kao: kaux ra: khankix hoek mai chawk Nawh grawhgrawng: lox phektem: khankix heue.
Mai Nawh Cao: ah nin: kah kix, "Hoik tawx kieh pex tawng grawhgrawng: pa raux pa dex pa dawd mai Meung Siyiex, Viang mawh kawx nan: kah kix pa ot plak praix tag krai kuceu kah daux lox phektem: heue.
Yuh kah mawx viang kix yaox kawx, kix yaox mai ang yaox, mai viang kix mhong: kawx, kix mhong: mai ang pon tix tawng, phan: ang mawh nan: ha: kix kox deeh tieh hoek mai luan khaing: phimap kix"
Pa Krai Dee Bleeh Grawng: Pwi Ruat Simie
Mathiex 13:18-23; Lukax 8:11-15
Mai Nawh Cao: baox ah nin: kah kix, "Pex ang tawng lox phektem: in: lie? Phan: mawh nan: pex tag chix tawng lox phektem: khawm: uik yuh kah mawx?
Pwi pa ruat simie kienie, rhuat gumlox bwan: heue.
Grawhgrawng: pa ruat simie lox bwan: dex krax mawh nin:, yam hoik mhong: kix gumlox, Satan hoek dom: mawx dom: an: mai teei gumlox pa hoik rhuat kah daux kix heue.
Grawhgrawng: pa ruat simie dee haoh simaox mawh nin: yam hoik mhong: kix lox bwan:, kix gauxrhawm: mai rieb tix teei dom: mawx dom: an:.
Mai kix ang koe: riah kah daux tokaux tix, viang mawh nan: kix kaux kix cong: tivud khaing:. Mai yam yaox kix krax tuktiaktukte: kheu lox bwankix lauxrhawm: dom: mawx dom: an: heue.
Grawhgrawng: pa ruat simie kah daux pang: kat mawh nin:, in: mawh kix pa hoik mhong: lox bwan:,
Mai pa khirhawm: khirhi: pa dex pa dawd mai haktiex, mai pa chix pie chix lhen: sinngao, mai pa simie tix pon tang: ceu khankix, kheem: gut lox bwan: tom: ang chix plix plix heue.
Grawhgrawng: pa ruat simie dee mhawm: tiex mawh nin:, mawh kix pa mhong: gum lox bwan: mai rieb tix teei, mai plix plix tingoe: (30) son, mai tigliah (60) son, mai tiyieh (100) son heue."
Kawkngu Pa Mox Greem: Phliex
Lukax 8:16-18
Mai Nawh Cao: baox ah nin: kah kix, "Viex kawkngu sonsang sau: greem: phliex greem: ku: lie? Mai ang mawh sonsang deuh piang dee deuh kawkngu lie?
Mawh kheu pa hoik mox ang koe: tix ceu kawx, pa tag ang kieh sidawng:, mai pa hoik yuh kieh glip ang koe: tix ceu kawx, pa tag ang plak kieh sidawng:.
Phan: pwi tix kauxkaux koe: yhaok tix mhong:, kieh nawh mhong: heue."
Mai Nawh Cao: baox ah nin: kah kix, "Grawhgrawng: pa hoik mhong: pex rien rhawm: tix kah, pex tong: pex tiag tix tawx kah pwi tang: kaux miex ding, tag sang deeh tong: deeh tiag tix tawx kah pex yuh nan:, mai pa lheu: khaing: an: kah sang tawx kah pex heue.
Mawh kheu kaw pa hoik koe:, tag sang baox tawx kah nawh heue, mai kaw pa ang koe:, viang pa hoik koe: nawh kawx, tag sang teei khaing: nawh heue."
Lox Phektem: Grawng: Pa Kuah Simie
Mai Nawh Cao: baox ah nin:, "Meung Siyiex awm: pwi pa ruat simie piang tiex.
Mai nawh it ponsawm: mai deeh kaoh ponsingaix, viang mawh nan:, grawhgrawng: simie an: kuah, mai ting lhaong: yuh kah mawx, nawh ang tawng heue.
Haktiex chix kieh koe: plix nongnong: heue. Phaoxka: kieh koe: gawng:, koe: lhax, mai khaix an: kieh koe: sigiag, mai khaix an: kieh koe: plix pa naog kah daux sigleem: nawh heue.
Yam hoik kaux plix, pwi an: teei sivawg vawg dom: mawx dom: an:, kheu bawg yam kaux hoik hoek heue."
Lox Phektem: Grawng: Simie Taux Klaox
Mathiex 13:31-32,34; Lukax 13:18-19
Mai Nawh Cao: baox ah nin:, "Meung Siyiex awm: ceu patix? Ex tag teei lox phektem: yuh kah mawx, krai grawhgrawng: nawh?
Awm: simie taux klaox tix mu:, pa yam rhuat piang tiex, ceu pa iak khaing: simie kuceu khawm: uik pa koe: kah piang haktiex in: heue.
Viang mawh kawx nan: khaix hoik ruat simie an:, nawh kuah lih ting tom: ting khaing: num: rib num: riem khawm: uik, mai koe: kak pa ting, tom: sim: raoma: khankix pon tix ot tix laux lee: greem: veei nawh heue."
Mai Nawh Cao: teei lox phektem: pa awm: an: tom: nie, sidiex krai gumlox bwan: kah kix, pa chix nghiiet kix heue.
Mai phan: ang mawh kah daux lox phektem: Nawh ang sidiex ang krai lox kah kix, viang mawh nan: kah kawncau Nawh khankix, Nawh krai sidawng: kuceu khawm: uik dee ang pwi ot heue.
Yesux Kieh Bhaung: Ting mai Pukpak Rawm: Yiien: Yawg
Mathiex 8:23-27; Lukax 8:22-25
Daux singaix an: yam ponbo Nawh Cao: ah nin: kah kix, "Ex hu: plak toi: rawm: heue."
Mai kix prah cub pwi haoh pwi hun:, mai kix viex Nawh Cao: awm: ot Nawh daux reu, mai reu tang: reu tiblah hu: tau mai Nawh heue.
Mai bhaung: ting hoek tix phlu:, mai pukpak rawm: chun: laig daux reu, tom: reu an: uik sang naog heue.
Mai tokaux Nawh Cao: ot plak sidax reu, it kah piang mhawn: gaong mai kix so: Nawh siduad, mai ah nin: kah Nawh, "Sara Cao: Gau eue, Maix ang keud grawhgrawng: hoek ex krax laux lie."
Mai Nawh Cao: kaoh mai ah kah bhaung:, mai Nawh ah nin: kah rawm: nhawng: "Kieh nhim:, yiien: heue." Mai bhaung: yiien:, mai rawm: nhawng: yawg tix heue.
Mai Nawh Cao: baox ah nin: kah kix, "Pex lhat yuh kah mawx? Pex ang nyang koe: krax yumrhawm: lie?"
Mai kix die lhat kah, mai tix kaux hoik tix kaux ah nin: kah paox tix, "Kaw in: mawh mawx? viang bhaung: mai rawm: nhawng: kawx nghiiet lox Nawh heue."
Yesux Pai: Moi: Pwi PA Koe: Phi: Pa Seeing: Pa Brai: Tix Kaux
Mathiex 8:28-34; Lukax 8:26-39
Mai kix hoek plak toi: rawm: nhawng:, kah daux meung Gadarax.
Mai khaix hoik lih Nawh Cao: khaing: daux reu dom: mawx dom: an:, pwi tix kaux pa koe: phi: pa seeing: pa brai:, lih khaing: daux simeeig mai rieb Nawh Cao: heue.
Kaw an: ot kah daux simeeig khankix, mai pwi tix kaux kawx ang pon phyawk nawh, pie kah maox ceng kawx ang pon.
Mawh kheu hoik sax phyawk nawh kah ceng mai sau: gang: kah nawh lawlawx glang: kah: an:, mai nawh hoik rud ceng mai gang: khankix dud, mai pwi tix kaux kawx ang koe: riang tix kieh nawh nge heue.
Mai yam ponngaix ponsawm: nawh ot kah daux simeeig mai piang gawng khankix, mai nawh kok nawh yo, mai teei simaox pat tokaux tix kah jheengjheeng: heue.
Mai yam yaox nawh Yesux dee singai nawh to: hu: mai krub kah Nawh Cao: heue.
Mai nawh kok nawh yo lox sinum mai ah nin:, "Yesux, Kawn: Siyiex pa ting pa lhaong: khaing: khawm: uik eue, aux koe: pa yuh mai Maix ceu patix? Aux khyox khaw: kah Maix kah daux ceukaux Siyiex, pawvi tuktiaktukte: aux heue."
Kheu Nawh Cao: ah nin: kah nawh, "Phi: pa seeing: pa brai: eue, lih hu: khaing: daux pwi in: heue."
Mai Nawh Cao: chawk nawh ah nin:, "Ceukaux maix kaux patix?" Mai nawh pawk lox kah Nawh Cao: mai ah nin:, "Ceukaux aux kaux Liecong kheu kied haoh hun: ex heue."
Mai nawh khyox khaw: kah Nawh Cao: tom: nie, yuh kah mawx son ang Nawh sang grheu: kix lih khaing: daux meung an: heue.
Kah dee an: koe: cub lig pa kied hun: sawm: kah gawng tan: heue.
Mai kix khyox khaw: kah Nawh Cao: ah nin:, "Ploi: ex hu: kah daux lig khankix, sonsang laig ex kah daux kix heue."
Mai Nawh Cao: tawx akhwang: kah kix, mai phi: pa seeing: pa brai: khankix lih hu:, mai laig kah daux lig khankix, mai cub lig an: pa dex koe: ra: rheng:, to: lih kah dee nie rieh nie jun: jee laig kah daux rawm: nhawng:, mai nok yum: kah daux rawm: nhawng: heue.
Mai pwi liang lig khankix to: hu:, mai krai grawhgrawng: ceu an: kah daux yaong: daux veng khankix, mai pwi khankix hoek tix jhak grawhgrawng: pa hoik mawh an:,
Yam hoek kix kah Yesux, mai yaox kaw pa hoik laig phicaox khankix glangka: in: pa koe: Liecong
, ngawm tan: mai ceep kraung mai nawh hoik deeh mhawm:, kix lhat kah heue.
Mai kix pa hoik yaox krai kah pwi khankix grawhgrawng: pa hoik mawh kah kaw pa laig phicaox khankix, mai grawhgrawng: lig khankix heue.
Mai kix khyox khaw: kah Nawh Cao: nhie: Nawh lih hu: khaing: daux meung kix heue.
Yam laig Nawh Cao: kah daux reu, kaw pa hoik laig phicaox kah glangka: an:, khyox khaw: mhaing: tix ot tau mai Yesux.
Viang mawh nan: Nawh Cao: ang tawx akhwang: kah nawh, mai ah nin: kah nawh, "ing: kah nyiiex maix, mai puxaik kawn: keeing: maix, mai krai kix mhong: grawhgrawng: pa ting pa lhaong: pa caoxrhawm: Simiang mai yuh bwanson:, son maix heue."
Mai kaw an: hu: kah daux meung Dekapolix mai jah tix krai grawhgrawng: ceu pa ting pa lhaong: pa hoik yuh Yesux son nawh, mai pwi khawm: uik daox deng: kah heue.
Kawn: Bun: Pa Yum: mai Bun: Pa lih Nham: Kao: Num Ra:
Mathiex 9:18-26; Lukax 8:41-56
Mai Yesux deeh hu: plak toi: rawm: daux reu, mai cub pwi haoh pwi hun: khrawm: paox tix hoek kah Nawh, yam ot Nawh dex rawm: nhawng: tan: heue.
Mai pwi giex kaing: nyiiex sidiex tix kaux, pa kaux YaIrux, yam yaox nawh Nawh Cao:, nawh krub dex caong Nawh,
mai khyox khaw: kah Nawh Cao: ah nin:, "Kawn: nyawm bun: iak aux, dex sang yum:, hoek sonsang deuh Maix taix Tix piang nawh liak, yuh kah mawx sonsang deeh moi: nawh mai im: heue."
Mai Nawh Cao: hu: tau mai kaw an:, mai cub pwi haoh pwi hun: hawt khaix Nawh, mai theen: kah Nawh Cao: heue.
Mai bun: tix kaux pa hoik koe: jhawm: saux pa lih nham: kao: num ra:.
Pa hoik kham: geu: tom: nie ceu daux tawm: taix pwi chix sidauh khankix, mai hoik cai: can pa koe: nawh khawm: uik, viang mawh nan: nawh ang moi: ceeix kawx, baox nie khaing:.
Kheu hoik mhong: nawh grawhgrawng: Yesux, nawh hoek daux cub pwi plak khaix mai teeh kraung ceep Nawh Cao: heue.
Nawh keud ah nin:, "Phan: aux teeh kraung ceep Nawh Cao: khaing:, aux tag moi: heue."
Mai nham: nawh hit dom: mawx dom: an:, mai nawh tawng daux tokaux tix grawhgrawng: jhawm: saux nawh hoik moi: heue.
Mai dom: mawx dom: an: Yesux tawng daux tokaux Tix, grawhgrawng: siawpsibrawm hoik lih khaing: Nawh, mai Nawh Cao: deeh gi cub pwi an: mai ah nin:, "Pwi mawx pa teeh kraung ceep Aux?"
Mai kawncau Nawh khankix ah nin: kah Nawh Cao:, "Maix yaox cub pwi haoh hun: nie ding nie dod theen: kah Maix, mai Maix chawk,Pwi mawx pa teeh Aux: lie?"
Mai Nawh Cao: simi tix yaox vungvieang Nawh, sonsang yaox pwi pa hoik yuh ceu in:.
Bun: an: nawh hoik tawng pa hoik yuh kah tokaux tix, nawh tom: lhat tom: siyaung:, mai hoek mai krub sivoe Nawh Cao:, mai krai kah Nawh khawm: uik rauh see heue.
Mai Nawh Cao: ah nin: kah nawh, "Kawn: bun: Aux eue, krax yumrhawm: maix hoik kieh maix moi:, hu: mhawmmhawm: heue. Kieh maix luan khaing: jhawm: saux maix heue."
Yam kawn: sikah Nawh Cao:, pwi hoek khaing: nyiiex pwi giex kaing: nyiiex sidiex mai ah nin:, "Kawn: bun: maix hoik yum: heue. Yuh patix maix lai kawn: laklheut kah Sara Cao: Gau?"
Yesux mhong: lox pa hoik krai an:, mai ah nin: kah pwi giex kaing: nyiiex sidiex, "Paw vi lhat yumrhawm: khaing: heue."
Mai Nawh Cao: ang kieh pwi tix kaux kawx hawt Tix, lheu: khaing: Petrux, mai Yakop, mai Yohan pux Yakop heue.
Mai kix hoek kah daux nyiiex pwi giex kaing: nyiiex sidiex, mai Nawh Cao: yaox pa sinum siaox, mai pwi haoh pwi hun: nied tix yiiem riag yiiem yo heue.
Khaix hoik laig Nawh Cao: tan: Nawh ah nin: kah kix, "Yuh patix pex lai sinum siaox, mai yiiem riag yuh nin:? Kawn: nyawm in: hoik yum: ang mawh, mawh ngie laig it nawh khaing:."
Mai kix nieb yuh pa ang nab ang yam: nyiah kah Nawh Cao: heue. Nawh Cao: kieh pwi pa ot tan: khawm: uik lih hu:, mai Nawh teei miex keeing: kawn: nyawm an: mai kix pa ot tau mai Nawh, mai laig kah dee ot kawn: nyawm an: heue.
Mai Nawh Cao: teei taix kawn: nyawm an: mai ah nin: kah nawh, "Talita kumix," phan: toe: lox an: dee bleeh ah nin:, "Kawn: nyawm bun: eue, Aux krai kah maix, kaoh heue."
Mai dom: mawx dom: an: kawn: nyawm bun: an: kaoh mai hu:, kheu ju nawh hoik koe: kao: num ra: heue. Mai dom: mawx dom: an: kix kied koe: krax daox krax deng: kah heue.
Mai Nawh Cao: tawm: lox kah kix tom: nie, paw kieh pwi tix kaux kawx tawng grawhgrawng: ceu in:. Mai Nawh Cao: nhie: kix tawx nawh ih pa ih pa un: heue.
Pwi Veng Nazariet Ang Rieb Kah Yesux
Mathiex. 13:53-58; Lukax 4:16-30
Mai Nawh Cao: lih hu: khaing: tan: mai hoek kah daux meung tokaux Tix, mai kawncau Nawh khankix hawt Nawh Cao: heue.
Mai yam hoek singaix twah Nawh Cao: jah tix sidiex gau kah daux nyiiex sidiex, mai pwi haoh hun: pa mhong: Nawh Cao:, kied daox kied deng: mai ah nin:, "Pwi in: pon ceu in: khankix dee mawx? Mai hoik tawx pingnya cuyi:, pa yuh kah mawx kah Pwi in:? Kaing pa ting siawpsibrawm ceu in: chix mawh daux tawm: taix Nawh yuh kah mawx?
In: mawh Cang Mai, Kawn: Marix, mai puxke: Yakop mai Yose, mai Yudax, mai Simon khankix ang mawh lie?" Mai kix lauxrhawm: kah Nawh Cao: heue.
Mai Yesux ah nin: kah kix, "Cao: jhai: ang mawh pa ang koe: min: plakngai:, lheu: khaing: daux meung tokaux tix, mai sinax paoxceu paoxcat tix, mai kah daux nyiiex tokaux tix heue."
Mai Nawh Cao: ang pon yuh kaing pa ting siawpsibrawm tan:, lheu: khaing: teei taix Tix deuh kah piang pwi pa koe: jhawm: saux tiblah mai kieh kix moi:.
Mai Nawh Cao: daox deng: kah krax pa ang kix yumrhawm: heue. Mai Nawh Cao: hu: lailing tix sidiex gau kah daux yaong: khankix sivie sivheng: tan: heue.
Yesux Ploi: Kawncau Kao: Kaux Ra: Hu: Sidiex Gau
Mathiex 10:5-15; Lukax 9:1-6
Mai Nawh Cao: kok kawncau Nawh kao: kaux ra: hoek kah Tix, mai ploi: kix hu: tix cub ra: kaux, ra: kaux. Mai Nawh Cao: tawx siawpsibrawm kah kix piang phi: pa seeing: pa brai: khankix heue.
Mai Nawh Cao: tawx lox kah kix, nhie: kix paw vi viex tidtix hu:, son yam hu: daux krax, lheu: khaing: khaox gix. Paw vi viex bau:, mai khaomun, mai mau daux hau: maox khlax.
Viang mawh nan: ceep kiep, mai paw vi ceep sibex ra: pheen: heue.
Mai Nawh Cao: ah nin: kah kix, "Pex laig kah daux nyiiex dee mawx ang ah, ot tan: tom: lih hu: pex khaing: tan: heue.
Mai dee mawx ang ah, pa ang rieb pex, mai dee ang kix nghiiet lox pex, yam lih hu: pex khaing: tan: khruah phawng: tiex pa koe: greem: caong pex, som sang mawh mhai: sakse kah kix heue."
Mai kix lih hu: mai sidiex gau, yuh kah mawx kawn: pwi sang doh keud doh sawn: kah phimap heue.
Mai kix grheu: phicaox phicaig lih tom: nie, mai kix groi rawm: bee kah pwi saux haoh hun: mai cox kix moi: heue.
Grawng: Pa Yum: Yohan Cao: Com Rawm:
Mathiex. 14: 1-12, Lukax 9:7-9
Mawh kheu hoik tawng grawhgrawng: ceukaux Nawh Cao: kudauh kudee, simiang khunhawkham Herut kawx, mhong: mai nawh ah nin:, "Yohan cao: baptis (cubcom) hoik deeh kaoh im: khaing: krax yum:, mai mawh kheu nan: siawpsibrawm khankix tom: yuh kaing kah daux nawh heue."
Viang mawh kawx nan: pwi tang: kaux tiblah ah, "Mawh Eliyax heue." Mai tang: kaux tiblah ah, "Mawh Cao: Jhai:, awm: cao: jhai: khankix tix kauxkaux pa koe: phaoka: heue."
Viang mawh kawx nan:, yam mhong: Herut grawhgrawng: ceu an: nawh ah nin:, "In: mawh Yohan pa hoik kid aux kaing: nawh, pa hoik deeh kaoh im: heue."
Grawhgrawng: nawh, tokaux Herut hoik ploi: pwi hu: giex Yohan mai phyawk nawh sau: daux thawng:. Kheu Herodix moeng pux nawh Philipux, mawh kheu hoik teei nawh tix moeng heue.
Kheu Yohan hoik ah nin: kah Herut, "Pa teei maix moeng pux maix, ang khaw: mai been heue."
Mai tokaux Herodix koeng kah nawh, mai koe: rhawm: tix sang pah nawh yum:, viang mawh nan: ang kiex pon yuh.
Herut lhat kah Yohan, kheu tawng nawh grawhgrawng: mawh nawh pwi rah pwi see mai pa singax singeh, mai nawh kia: ngien nawh heue. Mai yam nawh nghiiet lox nawh, nawh kied sivix rhawm:, viang mawh nan: nawh koe: rhawm: gauxrhawm: tix sang nghiiet nawh heue.
Yam hoek bawg yam pa yie pa khaw: tix ngaix, yam Herut yuh pwie singaix keh tix, son simiang nawh, mai pwi giex kaing: naing, mai pwi pa ting pa lhaong: daux meung Galilie: khankix.
Mai yam kawn: bun: tokaux Herodix hoek mai yuh thiao:, Herut mai pwi khankix pa ngawm sawm: tau mai nawh khawrhawm: khawrhi:, mai simiang khunhawkham: ah nin: kah bunkrih an:, "Maix simie ceu patix ang ah, rawg kah aux mai aux tag tawx kah maix heue."
Nawh tiex nawh tu mai baox ah nin: kah nawh, "Maix rawg maix mhaing: ceu patix ang ah kah aux, tom: hoek haktiex aux tix plak kawx, aux tag tawx kah maix heue."
Mai bon an: lih hu: chawk kah miex nawh ah nin:, "Aux sang rawg sang mhaing: ceu patix?" Mai miex nawh pawk lox ah nin:, "Rawg kaing: Yohan cao: baptis heue."
Mai bun: an: grhawm: tix laig kah simiang khunhawkham dom: mawx dom: an:, mai rawg mhaing: ah nin:, "Aux simie maix tawx kaing: Yohan cao: baptis daux tawg kah aux yamin heue."
Viang simiang khunhawkham kied khirhawm: kawx, kheu lox pa hoik tiex hoik tu nawh, mai kheu pwi pa ngawm sawm: tau mai nawh khankix, nawh ang rhawm: lheu: lox bun: an: heue.
Mai dom: mawx dom: an: simiang khunhawkham ploi: pwi naing pa pau tix, tix kaux hu:, mai nhie: nawh hu: viex kaing: Yohan hoek. Mai kaw an: hu: kid kaing: Yohan kah daux thawng:.
Mai viex kaing: nawh daux tawg tawx kah bunkrih an: heue. Mai bun: an: tawx kah miex tix heue.
Yam kawncau Yohan khankix mhong:, kix hoek mai teei tokaux yum: nawh, mai hu: deuh hu: sipaung: nawh daux simeeig heue.
Yesux Tawx Pwi Phwan: Rheng: Ih Priex
Mathiex. 14:13-21; Lukax 9:10-17; Yohan 6:1-14
Mai kawncau pa ting khankix khrawm: paox tix hoek kah Yesux, mai krai Nawh Cao: grawhgrawng: khawm: uik, pa hoik yuh kix mai pa hoik sidiex gau kix heue.
Mai Nawh Cao: ah nin: kah kix, "Pex hoek kah daux tiag dee ang pwi ot, mai laux lee: tivud heue." Kheu pwi haoh pwi hun: hoek hoek hu: hu:, tom: ang kix koe: bawg yam sawm: heue.
Mai kix brug reu hu: daux tiag tix dauh dee ang pwi ot.
Mai yam yaox pwi kix hu:, mai tawng mawh kix, pwi khrawm: paox tix to: hu: kah caong tix, khaing: yaong: khaing: veng khawm: uik, mai hoek kah sivoe kix heue.
Mai yam lih Nawh Cao: Nawh yaox cub pwi haoh pwi hun:, mai Nawh Cao: caoxrhawm: kah kix, mawh kheu awm: kix yung: pa ang koe: cao: liang cao: kia:, mai Nawh Cao: sidiex gau kah kix tom: nie ceu heue.
Yam uik dex sang hoek ponbo, kawncau Nawh khankix hoek kah Nawh Cao: mai ah nin:, "Kah dee in: mawh kah daux tiag heue, mai dex sang hoek yam ponbo.
Kheu nan: kieh pwi khankix hu: kah daux yaong: khankix pa koe: sivie sivheng: tin:, yuh kah mawx sonsang liag kix pa ih pa un: son tokaux kix heue."
Viang mawh nan: Nawh Cao: pawk lox ah nin: kah kix, "Pex tawx kix ih heue." Mai kix baox ah nin: kah Nawh Cao:, "Ex sang teei mau denari ra: yieh hu: liag khaomun mai tawx kix ih lie?"
Mai Nawh Cao: baox ah nin: kah kix, "Pex koe: khaomun miex lon:? Hu: jhak tix yaox." Mai khaix hoik tawng kix kix ah nin:, koe: khaomun phwan: lon: mai kax ra: mu: heue."
Mai Nawh Cao: nhie: pwi khawm: uik yuh cub yuh caw: mai ngawm kah piang rib pa klai heue.
Mai kix ngawm daux cub daux caw: pa koe: been tiyieh mai pa koe: been tiphwan: (50) tix cub heue.
Mai Nawh Cao: teei khaomun phwan: lon: mai kax ra: mu:, mai maong kah raoma: mai Nawh nawb bwan:, mai Nawh sivit lon: khaomun khankix mai tawx kah kawncau khankix, sonsang viex kix tix tawx kah pwi khankix heue. Mai Nawh Cao: gwieh kax an: ra: mu: kah pwi khawm: uik heue.
Mai kix khawm: uik ih mai sak heue.
Mai kix deeh khrawm: tix teei khaomun pa max pa phawng: mai kax, mai naog kao: phliex ra: heue.
Pwi pa ih khaomun an: simex giex koe: phwan: rheng: heue.
Yesux Hu: Kah Caong Tix Piang Rawm:
Mathiex 14:22-33; Yohan 6:15-21
Mai khaix an: dom: mawx dom: an: Nawh Cao: nhie: kawncau Nawh khankix laig daux reu mai hu: sivoe Nawh plak toi: rawm: kah veng Biesedax. Yam kawn: ploi: tokaux Nawh Cao: cub pwi haoh pwi hun: khankix hu:.
Mai khaix Nawh Cao: hoik ploi: pwi khankix, Nawh haok kah gawng sonsang rawg bwan: heue.
Yam hoek ponsawm: reu an: ot kah greung rawm: nhawng:, mai Nawh Cao: ot kah haktiex nongnong: heue.
Mai Nawh Cao: yaox kawncau Nawh khankix kharhawm: tix vai: reu, kheu ang caw: plak bhaung:. Yam hoek bawg yam pa pau pon: bawg tix bawg, yam ponsawm:, Nawh Cao: hu: kah caong Tix piang rawm: nhawng: hoek kah kix, mai Nawh yuh awm: sang luan hu: khaing: kix heue.
Yam yaox kix Nawh Cao: hu: kah caong Tix kah piang rawm: nhawng:, kix ce: mawh miang mai kix tom: riag yo;
Kheu kix khawm: uik yaox Nawh, mai die lhat kah. Viang mawh kawx nan: dom: mawx dom: an: Nawh Cao: sikah kah kix mai ah nin: kah kix. "Gauxrhawm: heue. mawh Aux, paw vi lhat kah."
Mai Nawh Cao: hoek dee ot kix laig daux reu, mai bhaung: yiien:, mai kix kied daox kied deng: kah, kah daux tokaux tix heue.
Mawh kheu ang kix tawng grawhgrawng: lon: khaomun khankix, rhawm: kix tom: kien: heue.
Pai: Moi: Pwi Saux Pwi Ngia Kah Haktiex Giennesarit
Mathiex 14:34-36
Mai yam hoik tiang hoek kix plak an:, kix hoek kah haktiex, kah meung Giennesarit, mai phyawk reu kah praok heue.
Yam lih kix khaing: daux reu dom: mawx dom: an: pwi khankix tawng mawh Nawh Cao:,
mai to: hu: kudauh kudee kah daux haktiex an:. Kix mhong: grawhgrawng: Nawh Cao: ot dee mawx ang ah, kix klawm: pwi saux khankix piang ku: hoek tan: heue.
Mai Nawh Cao: laig daux yaong:, daux veng, daux ma: khankix, dee mawx ang ah, kix deuh pwi saux khankix daux lah daux cau mai khyox khaw: kah Nawh Cao:, yuh kah mawx sonsang pon teeh kix caong sibex Nawh khaing: heue. Mai pa pon teeh kah Nawh Cao: kukaux daux pwi moi: heue.
Grawng: Pa Seeing: Mai Pa Singax
Mathiex 15:1-20
Pharishie: khankix mai pwi tiem: lai tiblah kaoh khaing: veng Yerusaliem mai khrawm: paox tix hoek kah Nawh Cao:.
Mai yaox kawncau Nawh tiblah, teei taix pa seeing: pa brai:, pa mawh taix ang khoek, mai ih khaomun, mai kix deuh phimap heue.
Mawh kheu Pharishie: khankix mai pwi Yudax khawm: uik ang ih pa ih pa un:, kah: ang kix nyang khoek taix tix mhawmmhawm:, kheu kix hawt been tax yiex miex keeing: kix heue.
Mai yam hoek kix khaing: daux lah, kah: ang kix nyang heem: tokaux tix, kix ang ih pa ih pa un:, mai lheu: khaing: nan: kawn: koe: been tang: ceu tom: nie pa hoik rieb kix tix teei tix hawt, pa mawh been phak kawk, mai aw:, mai klong: tawng khankix heue.
Pharishie: mai pwi tiem: lai khankix chawk kah Nawh Cao: ah nin:, "Yuh kah mawx kawncau Maix khankix ang hawt been tax yiex miex keeing:, mai teei taix pa seeing: pa brai: ih khaomun cie kix?"
Mai Nawh Cao: ah nin: kah kix, "Cao: Jhai: Isayax hoik gruh krai mhawmmhawm: grawhgrawng: pex pa mawh pwi pie pwi lhen: ah nin:,
:Pwi ceu in: yungyi: Aux kah siyieb jheeh tix, viang mawh kawx nan: rhawm: kix singai khaing: Aux heue.
Viang mawh nan: kix krub kah Aux giex going, kheu sidiex gau kix been pa yuh kawn: pwi heue
Pex tik vud lox tawm: jhawm: krai Siyiex, mai giex been kawn: pwi tom: sied heue."
Mai Nawh Cao: baox ah nin: kah kix, "Pex tik mhawmmhawm: lox pa hoik nhie: Siyiex pex yuh, yuh kah mawx sonsang pon hawt pex been pex.
Mawh kheu Mose hoik ah nin:,
:Yungyi: kah miex maix mai keeing: maix heue, mai
:kaw pa map kah miex kah keeing: tix tag kieh nawh yum: tete heue
Viang mawh kawx nan:, pex ah,Phan: pwi tix kaux ah nin: kah miex tix, phan: ang mawh nan:, kah keeing: tix, cie aux ceu patix ang ah pa lo mai pa sang koe: bwanson:, son maix mawh Kawban, (Pa ah nan:, sang ah,pa hoik tan hoik tawx kah Siyiex).
Pex ang baox kieh nawh yuh tix ceu kawx son miex keeing: nawh.
Mawh kheu nan: pex yuh laux gumlox Siyiex, kheu been pex pa toe: tix tawx tix ju hoik tix ju heue. Mai pex yuh pa awm: in: tom: nie ceu heue."
Ceu Pa Ang Kieh Kawn Pwi Singax
Mathiex 15:10-20
Mai yam an: Nawh Cao: kok pwi khawm: uik hoek kah Tix, mai Nawh Cao: ah nin: kah kix, "Pex kukaux daux pwi nghiiet Aux, mai kieh tawng heue.
Pa koe: plak praix kawn: pwi ang koe: tix ceu kawx, pa chix laig daux nawh mai kieh nawh seeing: brai:, viang mawh kawx nan: mawh ceu pa lih khaing: daux kawn: pwi pa chix kieh nawh seeing: brai: heue.
Pwi mawx ang ah, phan: nawh koe: yhaok tix mhong:, kieh nawh mhong: heue."
Yam Nawh Cao: lih khaing: cub pwi haoh pwi hun:, mai hoik laig daux nyiiex tix nyiiex, kawncau Nawh khankix chawk Nawh grawhgrawng: lox phektem: an: heue.
Mai Nawh Cao: ah nin: kah kix, "Pex kawx ang chix tawng ang chix nghiiet lie? Pex ang tawng grawhgrawng: ceu pa ot plak praix mai laig kah daux kawn: pwi, ang chix kieh nawh seeing: brai: lie?
Mawh kheu ceu an: khankix ang laig kah daux rhawm: nawh, viang mawh nan: laig kah daux vaig nawh mai baox lih hu: kah daux, daux iang: heue." Pa krai Nawh nan:, Nawh sang ah pa ih pa un: khawm: uik mawh pa singax heue.
Mai Nawh Cao: baox ah nin:, "Mawh ceu pa lih khaing: daux kawn: pwi pa chix kieh nawh seeing: brai: heue.
Kheu mawh khaing: plak daux, daux rhawmrhi: kawn: pwi pa chix keud ceu pa ang mhawm: ang mhiem: khankix heue. Pa mawh ceu pa phit mai moeng pwi, mai ceu pa phit pa vao mai bun:, mai ceu pa pah pwi yum:,
mai ceu pa briex pa lak, mai ceu pa ghoing: kah cie pwi, mai ceu pa yuh pa caox khankix, mai ceu pa pie pa lhen:, mai ceu pa simie tix yuh ceu pa ang khaw: ang jiet, mai ceu pa bohrhawm: pa khoi:, mai ceu pa sa pa lao kah Siyiex, mai ceu pa ting rhawm: ting rhi:, mai pa yuh ceu pa daox pa aw: khankix heue.
Ceu pa ang mhawm: ang mhiem: ceu in: khawm: uik, mawh ceu pa lih khaing: plak daux, mai kieh pwi seeing: brai: heue."
Krax Yumrhawm: Bun: Tix Kaux
Mathiex 15:21-28
Mai Nawh Cao: kaoh khaing: tan: mai hu: daux haktiex veng Turux mai veng Sidom, mai laig kah daux nyiiex tix nyiiex, Nawh ang rhawm: kieh pwi tawng, viang mawh kawx nan: Nawh ang pon tix mox heue.
Mai bun: tix kaux pa koe: kawn: bun: iak tix kaux pa laig phi: pa seeing: pa brai:, mhong: grawhgrawng: Nawh Cao:, mai hoek krub kah caong Nawh heue.
Bun: an: mawh ceu Helasax, pwi meung Suripiniki. Mai kiex khyox khaw: kah Nawh Cao:, nhie: Nawh grheu: phicaox an: lih khaing: kawn: bun: tix heue.
Mai Nawh Cao: ah nin: kah kiex, "Kieh kawnpraix sawm: tom: sak kah: ha:, mawh kheu ang khaw: tix teei khaomun cie kawnprai khankix taing kah sox heue
Viang mawh kawx nan: bun: an: deeh pawk lox mai ah nin: kah Nawh Cao:, "Mawh heue, Simiang eue, viang mawh sox khankix kawx, ih pa cod pa roik greem: pheen: sawm: kawnpraix khankix heue."
Mai Nawh Cao: baox ah nin: kah kiex, "Mawh kheu gumlox in: pax hu: heue. Phicaox hoik lih hu: khaing: daux kawn: bun: pax heue."
Mai bun: an: deeh ing: kah nyiiex tix, mai yaox kawn: nyawm an: it kah piang ku:, mai phicaox hoik lih hu: heue.
Yesux Pai: Moi: Pwi Lheet Pwi Kle:
Mai Nawh Cao: baox lih hu: khaing: haktieturux, mai hu: preeng: meung Sidom, mai hu: preeng: sinax meung Dikapolix mai sidauh sidu hoek kah rawm: nhawng: Galilie: heue.
Mai kix viex pwi pa lheet yhaok, mai kle: yam sikah tikaux, mai kix khyox khaw: kah Nawh Cao:, nhie: Nawh deuh taix Tix piang kaw an: heue.
Mai Nawh Cao: teei nawh lih hu: khaing: cub pwi haoh pwi hun:, dee ang pwi ot, mai Nawh Cao: teei gien: taix Tix sau: daux yhaok kaw an:, mai Nawh Cao: baig rawmmya: mai teeh kah dak nawh heue.
Mai Nawh maong plak raoma: mai ngia mai ah nin: kah kaw an:, "Ephathax." (Pa ah nan:, sang ah, "Paoh heue.")
Mai yhaok nawh paoh heue, mai siniag dak nawh deeh ghah, mai nawh chix sikah sidawng: heue.
Mai Nawh Cao: tawm: lox kah kix, yuh kah mawx son ang kix krai kah pwi tix kaux kawx. Viang mawh nan: Nawh Cao: tawm: lox kah kix miex ding, kix nie kieh tah hu: heue.
Mai kix kied daox kied deng: kah tete tom: ang chix tiag chix krai, mai ah nin:, "Nawh hoik yuh khawm: uik mhawmmhawm: heue. Viang mawh pwi pa lheet yhaok kawx Nawh deeh cox kieh mhong:, mai pwi aw: kawx, deeh kieh chix sikah heue."
Yesux Tawx Pwi Pon: Rheng: Ih Priex
Mathiex 15:32-39
Daux bawg yam singaix an: khankix, yam baox koe: cub pwi haoh pwi hun:, mai kix ang koe: pa ih pa un: tidtix. Nawh Cao: kok kawncau Nawh khankix mai ah nin: kah kix,
"Aux caoxrhawm: kah pwi haoh pwi hun: khankix, kheu hoik ot kix mai Aux loe: singaix mai ang koe: pa ih tidtix heue.
Mai phan: Aux ploi: kix ing: kah nyiiex kix, yam kawn: cairhawm: kix, kix tag khrup rhawm: hawt krax heue. Lheu: khaing: in:, kix tiblah hoek khaing: dee singai heue."
Mai kawncau Nawh khankix pawk lox mai ah nin: kah Nawh Cao:, "Pon tix kieh pwi khankix sak kah khaomun daux tiag yuh kah mawx?"
Mai Nawh Cao: chawk kix ah nin:, "Pex koe: khaomun miex lon:?" Mai kix deeh krai "Koe: aliah lon: heue."
Mai Nawh Cao: nhie: pwi haoh pwi hun: khankix ngawm piang tiex, mai Nawh teei khaomun aliah lon: an:, mai khaix hoik yaogyaw bwanson:, Nawh Cao: sivit mai tawx kah kawncau Nawh khankix, kieh kix tawx kah pwi khankix. Mai kix viex hu: tawx kah pwi haoh pwi hun: khankix heue.
Mai kax iak kawx kix koe: ceeix. Khaix hoik nawb bwanson:, kax an: kawx, Nawh Cao: nhie: tawx kah pwi khankix heue.
Mai kix ih tom: sak heue, mai kix khrawm: pa max pa phawng: pa lheu:, aliah phliex heue.
Mai kix pa hoik ih khankix dex koe: pon: rheng: heue. Mai Nawh Cao: ploi: pwi khankix hu: heue.
Mai dom: mawx dom: an: Nawh Cao: laig kah daux reu, tau mai kawncau Nawh khankix, mai hoek kah daux haktiex Dalamanutha heue.
Pharishie: Khankix Mhaing: Nawh Cao: Jhi: Mhai: Pa Daox Pa Am:
Mahtiex 16:1-4
Mai Pharishie: khankix lih hoek mai chawk lox kah Nawh Cao:, mai sawg tix kieh Nawh Cao: jhi: kix yaox mhai: pa daox pa am: khaing: raoma:, sonsang cheuk tix yaox rhawm: Nawh heue.
Mai Nawh Cao: ngia daux khwan: Tix mai ah nin:, "Yuh patix pwi ju in: sawg mhai: pa daox pa am:? Aux krai lox tete telai kah pex, tag ang tawx mhai: pa daox pa am: kah pwi ju in: tix ceu kawx heue."
Mai Nawh Cao: lih khaing: kix, mai deeh laig kah daux reu, mai hu: plak toi: rawm: heue.
Susaix Pharishie: khankix mai Herut
Mathiex 16:5-12
Mai kix piawm: tix viex khaomun hu:, mai ang lai koe: khaomun mai kix daux reu, lheu: khaing: tix lon: khaing:.
Mai Nawh Cao: tawm: lox kah kix ah nin:, "Rien rhawm: tix kah susaix Pharishie: khankix, mai susaix Herut heue."
Mai kix tix kaux hoik tix kaux keud tix ah nin: kah paox tix, "Mawh kheu ang koe: khaomun heue."
Mai Yesux tawng grawhgrawng: an:, tom: ah nin: kah kix, "Yuh patix pex keud tix ah kah paox tix, kheu ang pex koe: khaomun? Pex ang chix yaox ang chix tawng lie? Rhawmrhi: pex kawn: kien: lie?
Pex koe: ngai: kawx, ang chix yaox lie? Pex koe: yhaok kawx, ang chix mhong: lie? Pex ang nyang doh keud kah lie?
Yam sivit Aux khaomun phwan: lon: tix tawx kah pwi phwan: rheng:, pex hoik pon tix khrawm: pa max pa phawng: miex phliex?" Mai kix ah nin: kah Nawh Cao:, "Pon kao: phliex ra: heue."
"Yam Aux sivit khaomun aliah lon: tawx kah pwi pon: rheng:, pex pon tix khrawm: pa max pa phawng: miex phliex?" Mai kix baox ah nin: kah Nawh Cao:, "Pon aliah phliex heue."
Mai Nawh Cao: baox ah nin: kah kix, "Pex ang nyang bax tawng lie?"
Yesux Pai: Moi: Pwi Dugngai: Kah Veng Biesedax
Mai kix hoek kah veng Biesedax. mai pwi viex pwi pa dugngai: tix kaux hoek kah Nawh Cao:, mai kix khyox khaw: kah Nawh Cao: nhie: Nawh teeh kah kaw an: heue.
Mai Nawh Cao: giex taix pwi dugngai: an: mai viex nawh lih hu: plakpraix veng, mai khaix hoik baig Nawh Cao: rawmmya: kah piang ngai: nawh, mai deuh taix Tix kah piang nawh, Nawh Cao: chawk ah nin: kah kaw an:, "Maix uik chix yaox tix ceu ceu lie?"
Mai kaw an: yaog tix jhak mai ah nin:, "Aux yaox pwi heue, kheu aux yaox kix awm: khaox pa hu: krax heue."
Mai Nawh Cao: baox deuh taix Tix kah piang ngai: kaw an:, mai nawh jhak mhawmmhawm:, mai nawh moi: deeh chix yaox, tom: nawh uik grum yaox kuceu sidawng: heue.
Mai Nawh Cao: ploi: nawh ing: kah nyiiex nawh, mai ah nin:, "Paw vi laig kah daux yaong: an:, mai paw vi krai kah pwi tix kaux kawx kah daux yaong: an: heue."
Petrux Kham: Grawng: Mawh Yesux Cao: Khrit
Mathiex 16:13-20; Lukax 9:18-21
Mai Yesux lih hu: tau mai kawncau Nawh khankix mai laig kah daux yaong: Kesarix Philipux khankix. Yam kawn hu: krax Nawh Cao: chawk kah kawncau Nawh khankix ah nin:, "Pwi khankix ah Aux mawh mawx?"
Mai kix krai kah Nawh Cao: ah nin:, "Tiblah ah mawh Yohan cao: baptis, mai tiblah ah mawh Eliyax, viang mawh nan: tiblah ah mawh Cao: Jhai: tix kauxkaux heue."
Mai Nawh Cao: baox ah nin: kah kix, "Viang mawh nan: pex ah Aux mawh mawx?" Petrux pawk lox mai ah nin: kah Nawh Cao:, "Maix mawh Khrit heue."
Mai Nawh Cao: tawm: lox kah kix, son ang kix sang krai grawhgrawng: Nawh Cao: kah pwi tix kaux kawx heue.
Yesux Gruh Krai Pa Tag Sang Kham: Geu: Nawh Tom Nie Ceu Mai Yum:
Mathiex 16:21-28; Lukax 9:22-27
Mai Nawh Cao: jah tix gau kah kix, “grawhgrawng: Kawn: kawn: pwi tag sang kham: geu: tom: nie ceu, mai tag kham: geu: pa tik pa vud kuad song: khankix, mai cao: giex kaing: li pa ting khankix, mai pwi tiem: lai khankix, mai grawhgrawng: tag kham: geu: pa teei yum:, mai grawhgrawng: khaix an: loe: singaix tag deeh kaoh im: heue.”
Mai Nawh Cao: krai ceu an: sidawng: heue. Petrux teei Nawh Cao: hu: mai ah kah Nawh heue.
Viang mawh kawx nan: khaix Nawh Cao: hoik veeh mai yaox kawncau Nawh khankix, Nawh Cao: ah kah Petrux yuh nin:, "Satan eue, hu: plak khaix Aux, kheu ang maix keud grawhgrawng: ceu pa dex pa dawd mai Siyiex, viang mawh nan: maix keud grawhgrawng: ceu pa dex pa dawd mai kawn: pwi khaing:."
Mai Nawh Cao: kok cub pwi haoh pwi hun: khankix mai kawncau Nawh khankix, hoek kah Tix, mai ah nin: kah kix, "Phan: pwi tix kauxkaux simie tix hoek khaix Aux, kieh nawh thiang: tix tik tokaux tix, mai klawm: khaoxlhak tix, mai hawt Aux heue.
Mawh kheu pwi mawx ang ah, pa simie tix taohju tokaux tix, tag sang som ju heue. Mai pwi mawx ang ah pa som ju son Aux, mai son lox bwan: gauxrhawm: gauxrhi:, tag pon tix taoh ju heue.
Grawhgrawng: nawh, phan: pwi tix kauxkaux pon haktiex khawm: uik, mai som ju tokaux tix, sang koe: bwanson: yuh kah mawx?
Grawhgrawng: nawh, pwi pon tix teei pa yuh kah mawx, deeh taoh ju tix kah?
Mawh kheu pwi mawx ang ah, pa kaig kheu Aux mai gumlox Aux, kah daux bawg yam ju pwi in:, pa phit pa vao mai pa ting map ting grham:, Kawn: kawn: pwi kawx, tag sang kaig kheu nawh, yam Nawh viex min: plakngai: Keeing: Tix, mai kawncau Siyiex pa singax singeh hoek heue."
Pa Loh Nawh Tokaux Tix
Mathiex 17:1-13; Lukax 9:28-36
Mai Nawh Cao: baox ah nin: kah kix, "Aux krai lox tete telai kah pex. Koe: pwi pa cung dex tin: tiblah, pa tag ang cim krax yum:, tom: kah: ang kix bax yaox pa hoik hoek Meung Siyiex kah daux siawpsibrawm heue."
Khaix an: liah singaix, Yesux teei Petrux, mai Yakop, mai Yohan, mai viex kix haok kah piang gawng lhaong: nongnong:, kah dee ang pwi ot, mai tokaux Nawh Cao: loh sivoe kix tan: heue.
Mai kraung ceep Nawh kied paing cawt tom: lih riang, mai tom: pwi sidaux kraung piang haktiex in: tix kaux kawx, ang chix kieh paing awm: an: heue.
Mai kix yaox Eliyax hoek tau mai Mose, mai kiex sikah mai Yesux heue.
Mai Petrux ah nin: kah Yesux, "Rabi eue, ex ot tin: mhawm: son ex heue, kieh ex yuh nyiiex bang: loe: lhang:. Son Maix tix lhang:, mai son Mose tix lhang:, mai son Eliyax tix lhang: heue."
Kheu kix kied lhat, mai nawh ang tawng lox pa sang krai, nawh tom: ah nan: heue.
Mai paiawm: hoek tix kheem: veei kix, mai lox lih khaing: paiawm: an: ah nin:, "In: mawh Kawn: pa moh Aux heue, nghiiet Nawh heue."
Yam an: dom: mawx dom: an: kix jhak vungviang kix, mai ang kix yaox pwi tix kaux kawx lheu: khaing: Yesux nongnong:, pa ot tau mai kix heue.
Mai yam lih hoek kix khaing: gawng, Nawh Cao: tawm: lox kah kix, “yuh kah mawx son ang kix krai kah pwi tix kaux kawx, grawhgrawng: ceu pa hoik yaox kix, kah: ang Kawn: kawn: pwi nyang bax deeh kaoh khaing: krax yum: heue.”
Kix priex tix hawt lox an:, mai chawk paox tix tix kaux hoik tix kaux grawhgrawng: dee tag bleeh lox pa ah, "Deeh kaoh khaing: krax yum: heue."
Mai kix chawk Nawh Cao: ah nin:, "Yuh kah mawx pwi tiem: lai khankix ah Eliyax tag sang hoek phaoka:?"
Mai Nawh Cao: ah nin: kah kix, "Eliyax tag hoek phaoka: tete, mai cox mhawm: khawm: uik heue. Mai pa hoik tiem: grawhgrawng: Kawn: kawn: pwi, tag kham: geu: tom: nie ceu, mai pa tik pa vud sang yuh kah mawx?
Viang mawh nan: Aux krai kah pex, Eliyax hoik hoek heue, mai kix hoik yuh kah nawh awm: pa simie kix tix yuh awm: pa hoik tiem: grawhgrawng: nawh heue."
Yesux Pai: Moi: Kawn: Nyawm Simex Pa Laig Phi: Tix Kaux
Mathiex 17:14-21; Lukax 9:37-45
Mai yam hoek kix kah kawncau Nawh khankix, kix yaox cub pwi haoh pwi hun: ot sivie kix tan:, mai pwi tiem: lai khankix chawk lox kah kix tan: heue.
Mai dom: mawx dom: an: yam cub pwi haoh pwi hun: khawm: uik yaox Nawh Cao:, kix kied daox kied deng: kah, mai to: hu: kah Nawh Cao: mai ah lox nawb kah Nawh heue.
Mai Nawh Cao: ah nin: kah kix, "Pex chawk lox patix kah kix?"
Mai pwi tix kaux kah daux cub pwi hun: pawk lox mai ah nin: kah Nawh Cao:, "Sara Cao: Gau eue, aux hoik viex kawn: simex aux pa laig phi: pa aw: hoek kah Maix heue.
Mai phi: an: giex nawh dee mawx ang ah, nyhot nawh goh, mai bai lih khaing: jheeh nawh, mai nawh greeik rhang: tix, mai krawx hu: heue. Mai aux khyox kah kawncau Maix khankix nhie: kix grheu: phi: an: lih, viang mawh nan: kix ang pon grheu: lih heue."
Mai Nawh Cao: pawk lox mai ah nin: kah kix, "Pwi ju pa ang koe: krax yumrhawm: yumrhi: eue, Aux tag kawn: sang ot mai pex miex grheung:? Aux tag kawn: sang gun sang yeung pex miex grheung:? Viex nawh hoek kah Aux heue."
Mai kix viex nawh hoek kah Nawh Cao:, mai yam phi: an: yaox Nawh Cao: dom: mawx dom: an: nawh nyhot kaw an: goh piang tiex, mai nawh lulieh tix, mai bai lih khaing: jheeh nawh heue.
Mai Nawh Cao: chawk kah keeing: nawh ah nin:, "Ceu in: hoik hoek kah nawh miex grheung:?" Mai keeing: nawh pawk lox ah nin:, "Mawh tom: yam mawh nawh kawn: nyawm iak heue.
Mai yuh kah mawx sonsang yuh nawh laux, phi: an: hoik taing nawh daux ngu, mai daux rawm: lawlawx heue. Viang mawh nan:, phan: Maix chix yuh tix ceu ceu, caoxrhawm: kah ex, mai teem: liak."
Mai Yesux baox ah nin: kah nawh, "Maix ah,Phan: Maix chix, pwi pa yumrhawm: yumrhi: chix kuceu heue."
Mai dom: mawx dom: an: keeing: kawn: nyawm an: yo mai ah nin:, "aux yumrhawm: heue, teem: krax ang yumrhawm: aux liak."
Mai yam yaox Yesux cub pwi haoh pwi hun: to: hoek tau, Nawh Cao: ah kah phi: pa seeing: pa brai:, lox ah nin:, "Phi: pa aw: pa lheet eue, Aux tawx lox kah maix, lih khaing: daux nawh, mai paw lai baox laig kah nawh heue."
Mai phi: an: kok yo mai biak nawh mai lih hu: khaing: daux nawh heue. Mai kawn: nyawm an: lih mawh awm: pwi pa hoik yum:, tom: pwi haoh hun: ah nin:, "Nawh hoik yum: heue."
Viang mawh nan: Yesux teei taix nawh mai yaog nawh, mai nawh kaoh heue.
Yam hoik laig Nawh Cao: kah daux nyiiex, mai yam kawncau Nawh ot tau mai Nawh Cao: nongnong:, kix chawk Nawh ah nin:, "Yuh kah mawx ang ex pon tix grheu: phi: an: lie?"
Mai Nawh Cao: pawk lox mai ah nin: kah kix, "Phi: ceu in: phan: ang mawh kheu rawg bwan: mai pa twah pa ih pa un: ang pon tix lih heue."
Yesux Baox Gruh Krai Grawng: Pa Sang Yum: Tix
Mathiex 17:22-23; Lukax 9:43b-45
Mai kix lih hu: khaing: tan:, mai hu: preeng: kah daux meung Galilie:, mai Nawh Cao: ang rhawm: kieh pwi tawng tix kaux kawx heue.
Kheu Nawh Cao: gau kah kawncau Nawh khankix, mai ah nin: kah kix, "Tag sang tawx Kawn: kawn: pwi kah daux tawm: taix kawn: pwi khankix, mai kix tag teei Nawh yum:, mai khaix hoik yum: Nawh loe: singaix Nawh tag deeh kaoh im: heue."
Viang kix ang tawng dee bleeh lox an: kawx, kix lhat chawk kah Nawh Cao: heue.
Pwi Mawx Pa Nie Lheu: Ting Khaing: Paox Tix?
Mathiex 18:1-5; Lukax 9:46-48
Mai kix hoek kah veng Kapenion, mai yam ot Nawh Cao: kah daux nyiiex, Nawh chawk kix ah nin:, "Yam hoek pex daux krax pex kum: pex thungthiang: paox tix grawhgrawng: patix?"
Viang mawh nan: kix ang nye:, kheu hoik thungthiang: kix paox tix, yam hoek daux krax, grawhgrawng: pwi mawx daux kix, lheu: ting khaing: paox tix heue.
Mai Nawh Cao: ngawm kok kix kao: kaux ra: hoek, mai Nawh ah nin: kah kix, "Phan: pwi tix kauxkaux simie tix ting khaing: paox tix, nawh tag mawh kaw pa dauh khaix khawm: uik, mai siliex khawm: uik heue."
Mai Nawh Cao: teei kawn: nyawm iak tix kaux, mai deuh nawh sinax kix, mai kawm nawh kah taix Tix, mai Nawh Cao: ah nin: kah kix,
"Pwi mawx ang ah pa rieb tix teei kawn: nyawm iak pa awm: in: khankix, tix kaux, kah daux ceukaux Aux, rieb tix teei Aux, mai pwi mawx ang ah pa rieb tix teei Aux, rieb tix teei Aux ang mawh, viang mawh nan: rieb tix teei Kaw pa ploi: Aux hoek heue."
Pwi Pa Ang Koeng Kah Ex Ot Plak Ex
Lukax 9:49-50
Yohan ah nin: kah Nawh Cao:, "Sara Cao: Gau eue, ex yaox pwi tix kaux pa grheu: phicaox lih kah daux ceukaux Maix, mai ex kieh nawh kheu ang nawh hawt mai ex heue."
Viang mawh nan: Yesux ah nin:, "Paw vi kieh nawh, kheu ang koe: pwi tix kaux kawx, pa yuh kaing pa ting siawpsibrawm kah daux ceukaux Aux, pa pon tix krai pa caox grawhgrawng: Aux laung laung heue.
Mawh kheu pwi pa ang koeng kah ex, ot plak ex heue.
Pwi mawx ang ah pa tawx pex nyaux rawm: tix kawk, mawh kheu mawh pex cie Cao: Khrit, Aux krai lox tete telai kah pex, bwanson:, cie nawh tag ang piawm: ang grai: heue.
Tawx Satix Son Ang Pwi Laig Daux Mawnasrhok
Mathiex 18:6-9; Luaka 17:1-2
Mai pwi mawx ang ah pa kieh kawn: nyawm iak khankix pa yumrhawm: kah Aux tix kauxkaux sideeing caong tix, lheu: mhawm: son kaw an:, phan: preue: simaox mhaw: pa ting kah ngawg nawh mai taing nawh kah daux rawm: sigrit sigra: heue.
Mai phan: taix maix kieh maix sideeing caong tix, kid tix tik heue. Laux taix maix mai laig kah daux pa im: ju, mhawm: khaing: koe: taix ra: khawn: mai laig kah daux mawnarhok, kah daux ngu pa ang chix yeet heue.
Dee ang kawng chix yum: mai dee ang ngu chix yeet.
Mai phan: caong maix kieh maix sideeing caong tix, kid tix tik heue. Laux caong maix mai laig kah daux pa im: ju, mhawm: khaing: koe: caong ra: khawn: mai taing sau: kah daux mawnarhok, kah daux ngu pa ang chix yeet heue.
Dee ang kawng chix yum:, mai dee ang ngu chix yeet.
Mai phan: ngai: maix kieh maix sideeing caong tix, koh tix tik heue. Koe: ngai: maix tix khawn: mai laig kah daux Meung Siyiex, mhawm: khaing: koe: ngai: ra: khawn: mai taing sau: daux mawnarhok heue."
Dee ang kawng chix yum:, mai dee ang ngu chix yeet.
Kheu tag teei kih ngu sau: kah pwi kukaux daux pwi, mai pa tan pa lu ku mu:, tag teei kih sau: kah heue.
Kih kienie mawh pa mhawm:, viang mawh kawx nan: phan: pa laoh kih hoik grai:, tag sang teei pa yuh kah mawx tix deeh chix kieh nawh laoh? Kieh kih koe: kah daux tokaux pex, mai kieh tix kaux hoik tix kaux khaw: paox tix heue."
Yesux Sidiex Grawng: Ang Mex Moeng Sang Tik Paox Tix
Mathiex 19:1-12; Lukax 16:18
Mai Nawh cao: kaoh khaing: tan: mai hoek kah daux haktiex Yudax plak toi: rawm: Yawdan, mai cub pwi haoh pwi hun: baox deeh khrawm: paox tix hoek kah Nawh Cao:, mai Nawh Cao: baox deeh sidiex gau kah kix awm: pa hoik sax yuh Nawh heue.
Mai Pharishie: tiblah hoek kah Nawh mai chawk Nawh Cao: ah nin:, sonsang cheuk tix yaox Nawh, "Pwi khaw: tix tik moeng tix lie?"
Mai Nawh Cao: baox pawk lox mai ah nin: kah kix, "Mose hoik nhie: pex yuh kah mawx?"
Mai kix ah nin:, "Mose kieh tiem: lai grawhgrawng: hoik hoik lox, mai kieh tik nawh heue."
Viang mawh kawx nan:, Yesux ah nin: kah kix, "Mawh kheu kien: rhawm: pex Mose tom: tiem: tix deuh lox tawm: pa yuh nan: heue.
Tom: yam jah vah ma: la: rawm: dix, Siyiex yuh simex mai bun: heue.
Mawh kheu grawng: in: simex tag prah miex keeing: tix, mai ot tau mai moeng tix.
Mai kiex ra: kaux tag mawh nex nham: tix mu: khaing:, mawh kheu nin:, kiex ang lai deeh mawh ra: kaux, viang mawh kawx nan: mawh tix kaux khaing: heue.
Mawh kheu in: pa hoik kleuk Siyiex tau paw kieh pwi yieh heue."
Mai yam ot kah daux nyiiex kawncau Nawh khankix baox chawk kah Nawh Cao: grawhgrawng: ceu an: heue.
Mai Nawh ah nin: kah kix, "Pwi mawx ang ah pa tik moeng tix, mai baox moeng tang: kaux, phit vao kah bun: an: heue.
Mai phan: bun: tik mex tix, mai baox mex tang: kaux, nawh phit nawh vao heue."
Yesux Nawb Bwan: Kah Piang Kawn: Nyawm iak Khankix
Mathiex 19:13-15; Lukax 18:15-17
Mai kix viex kawn: nyawm iak khankix hoek kah Nawh Cao:, yuh kah mawx sonsang teeh Nawh kix, viang mawh nan: kawncau khankix ah kah pwi khankix heue.
Viang mawh kawx nan: yam yaox Yesux, Nawh Cao: songrhawm:, mai ah nin: kah kix, "Kieh kawn: nyawm iak khankix hoek kah Aux, paw vi sidien kix, kheu Meung Siyiex mawh cie pa awm: kix heue.
Aux krai lox tete telai kah pex, pwi mawx ang ah pa ang rieb tix teei Meung Siyiex awm: kawn: nyawm iak, tag ang tau tix pon tix laig tan: heue."
Mai Nawh Cao: kawm kix daux taix Tix, mai deuh taix Tix kah piang kix, mai nawb bwan: kah kix heue.
Grawng: Caomi Awn: Ju Tix Kaux
Mathiex 19:16-30; Lukax 18:18-30
Mai yam Nawh Cao: lih hu: kah daux krax, pwi tix kaux to: hoek kah Nawh, mai grux ngawng mai chawk kah Nawh Cao: ah nin:, "Sara Cao: Gau pa mhawm: eue, aux tag yuh kah mawx, sonsang pon aux ju leeing ju leeing phan:?"
Mai Yesux pawk lox ah nin: kah nawh, "Yuh kah mawx maix lai kok Aux mawhpa mhawm:?: Lheu: khaing: Siyiex tix kaux khaing:, tix kaux kawx ang mhawm: heue.
Maix tawng lox pingnyap khankix, :Paw teei ju pwi yum:, paw phit paw vao, paw briex paw lak, paw kham: mhai: sakse pa ang mawh ang meh, paw lhen: tix teei kraung cie pwi, yung: yi: kah miex kah keeing: tix heue"
Mai kaw an: pawk lox mai ah nin: kah Nawh Cao:. "Sara Cao: Gau eue, aux hoik hawt tix yuh ceu an: khankix khawm: uik tom: yam iak aux heue."
Yesux jhak kah kaw an: mai moh nawh, mai ah nin: kah nawh, "Pa taig mai kawn: koe: tix ceu. Hu: coh pa koe: maix kuceu mai tawx kah pwi hot pwi sibhawm: khankix, mai maix tag koe: kraungkhrai: kah daux meung raoma:, mai hoek tix hawt Aux heue."
Yesux Baox Krai Grawng: Pa Sang
Yum: Tix Bawg Loe:
Mathiex 20:17-19; Lukax 18:31-34
Mai nawh khirhawm: khirhi: voi rhawm: tix mai lih hu: heue. Kheu mawh nawh pwi pa koe: kraungkhrai: tom: nie heue.
Mai Yesux jhak tix yaox vungviang Nawh, mai ah nin: kah kawncau Nawh khankix, "Pwi pa mawh cao: mi nu sonsang laig kah daux Meung Siyiex miex ding heue."
Mai kawncau Nawh khankix kied daox deng: kah lox Nawh Cao: an:, viang mawh nan: Yesux baox deeh ah nin: kah kix, "Kawnpraix eue, pwi pa een: rhawm: kah sinngao tix khankix, nu sonsang laig kah daux Meung Siyiex miex ding heue.
Laig Kala-uk daux kre: nyex lheu: yie khaing: laig cao: mi kah daux Meung Siyiex heue."
Viang mawh nan: kix kied daox kied deng: kah, mai ah nin: kah Nawh Cao:, "Phan: mawh nan:, pwi mawx tag sang pon hoek krax taoh?"
Yesux jhak kah piang kix mai ah nin:, "Grawhgrawng: in: kawn: pwi ang chix yuh. Viang mawh nan: ang mawh pa ang Siyiex chix yuh, kheu Siyiex chix yuh kuceu ku cawng khawm: uik heue."
Yam an: Petrux ah nin: kah Nawh Cao:, "Jhak heue, ex hoik prah hoik tik khawm: uik, mai hoik hawt Maix heue."
Yesux ah nin:, "Aux krai lox tete telai kah pex, ang koe: pwi tix kaux kawx pa hoik prah hoik grham: nyiiex nawh, phan: ang mawh nan:, puxaik nawh, phan: ang mawh nan:, nan: nawh, phan: ang mawh nan:, miex nawh, phan: ang mawh nan:, keeing: nawh, phan: ang mawh nan:, kawnpraix nawh, phan: ang mawh nan:, ma: kaung: nawh khankix, kheu Aux, mai kheu lox bwan: gauxrhawm: gauxrhi:.
Pa tag ang pon nyiiex, mai puxaik, mai nan:, mai miex, mai kawnpraix, mai ma: kaung:, tiyieh son kah daux bawg yamin:, tau mai krax tuktiaktukte:, mai daux ju khaix, tag pon ju leeing ju leeing phan: heue.
Viang mawh nan:, pwi pa ot kah: tom: nie, tag da: khaix, mai pwi pa ot khaix tom: nie, tag ot kah: heue."
Yesux Baox Gruh Krai Pa Sang Kham: Geu: Tix Krax Yum:
Mathiex 20:17-19; Lukax 18:31-33
Yam kawn: hu: kix krax, yam haok kix kah veng Yerusaliem, Yesux hu: sivoe kix, mai kix kied daox kied deng: kah, mai pa hawt Nawh khankix die lhat heue. Mai Nawh Cao: baox teei kix kao: kaux ra:, mai krai kah kix grawhgrawng: ceu pa tag sang mawh kah tokaux Nawh,
ah nin:, "Jhak heue, ex tag sang haok hu: kah veng Yerusaliem, mai tag sang teei tix tawx Kawn: kawn: pwi kah cao: giex kaing: li pa ting khankix, mai pwi pa tiiem: lai khankix, mai kix tag sang prawng kieh Nawh yum:, mai tawx Nawh kah pwi tang: ceu tang: cat khankix,
mai kix tag sang yuh pa ang cee ang cak kah Nawh, mai baig rawmmya: kah piang Nawh, mai sivied Nawh, mai teei Nawh yum: heue. Mai khaix an: loe: singaix Nawh tag deeh kaoh im: heue."
Lox Pa Rawg Yakop Mai Yohan
Mathiex 20:20-28
Mai Yakop mai Yohan, pa mawh kawn: Zebedie: hoek dex kah Nawh Cao: mai ah nin: kah Nawh, "Sara Cao: Gau eue, yiex rawg mhaing: ceu patix kah Maix ang ah, yiex simie kieh Maix yuh son yiex heue."
Mai Nawh Cao: chawk ah nin: kah kiex, "Pax simie kieh Aux yuh ceu patix son pax?"
Mai kiex baox ah nin: kah Nawh Cao:, "Kieh yiex tix kaux ngawm plak taix khawn: dawm: Maix, mai tix kaux plak taix khawn: gwiex Maix, kah daux min: plakngai: Maix liak."
Viang mawh kawx nan: Yesux ah nin: kah kiex, “Pax ang tawng grawhgrawng: pa rawg pax. Pax chix nyaux kawk pa nyaux Aux lie? Phan: ang mawh nan:, pax chix kham: krax baptis pa baptisAux lie?"
Mai: kiex baox ah nin: kah Nawh Cao:, "Chix tix heue." Mai Yesux baox ah nin: kah kiex. "Kawk pa nyaux Aux, pax tag sang nyaux heue, mai pax tag sang baptis, kah daux krax baptis pa baptis Aux heue.
Viang mawh kawx nan:, pa ngawm plak taix khawn: dawm: Aux, mai plak taix khawn: gwiex Aux, ang mawh cie Aux tix tawx, viang mawh nan: hoik cox son pwi mawx ang ah, tag mawh son kix heue."
Yam mhong: kawncau Nawh kao: kaux grawhgrawng: ceu an:, kix songrhawm: kah Yakop mai Yohan heue.
Mai Yesux kok kix, hoek kah Tix, mai ah nin: kah kix, "Pex tawng grawhgrawng: pa yuh simiang piang pwi tang: ceu tang: cat khankix, giex kaing: kix, mai pwi pa ting pa lhaong: kix, khin: kah kix heue.
Viang mawh nan:, kah daux pex tag ang mawh nan:, kah daux pex pwi mawx ang ah, pa simie tix ting tix lhaong:, tag mawh kawncau pex heue.
Mai kah daux pex, pwi mawx ang ah, pa simie tix giex kaing: pex, tag mawh siliex pwi khawm: uik heue.
Grawhgrawng: nawh, Kawn: kawn: pwi kawx, hoek sonsang kieh pwi yuh son Nawh ang mawh. Viang mawh nan: hoek sonsang yuh son pwi, mai tawx ju tokaux Tix, sonsang taoh pwi tom: nie heue."
Yesux Pai: Moi: Pwi Dugngai: Pa Kaux Batimie:
Mathiex 20:29-34; Lukax 18:35-43
Mai kix hoek kah veng Yerikho:, mai yam lih Nawh Cao: khaing: veng Yerikho: tan:, tau mai kawncau Nawh khankix, mai pwi haoh pwi hun:, kawn: Timie:, pa mawh Batimie: pa dugngai: mai caung tix ih, ngawm dex krax heue.
Yam mhong: nawh grawhgrawng: mawh Yesux pwi Nazariet, nawh kok nawh yo ah nin:, "Yesux kawn: Davit eue, caoxrhawm: kah aux liak."
Mai pwi tom: nie ah kah nawh, sonsang yawg nawh tix heue, viang mawh nan: nawh nie baox yo ah nin:, "Kawn: Davit eue, caoxrhawm: kah aux liak."
Yesux cung kaog mai ah nin:, "Kok nawh hoek heue." Mai kix kok pwi pa dugngai: an:, mai ah nin: kah nawh, "Gauxrhawm: heue, kaoh, Nawh Cao: kok maix heue."
Mai nawh tik man: fua: tix, ja loh tix kaoh mai hoek kah Yesux heue."
Mai Yesux chawk nawh mai ah nin:, "Maix simie tix kieh Aux yuh patix kah maix?" Mai pwi dugngai: an: ah nin: kah Nawh Cao:, "Rabonix eue, kieh ngai: aux chix yaox liak."
Mai Yesux baox ah nin: kah nawh, "Hu: heue, krax yumrhawm: maix hoik kieh maix moi: heue." Mai dom: mawx dom: an: nawh deeh chix yaox, mai hu: hawt Nawh Cao: daux krax heue.
Yesux Brug La Awn: Ju Laig Daux
Veng Yerusaliem
Mathiex 21:1-11; Lukax 19:28-40; Yohan 12:12-19
Mai yam dex hoek kix kah veng Yerusaliem, kah yaong: Bephake mai yaong: Betanix, kah gawng Sanlun, Nawh Cao: ploi: kawncau Nawh ra: kaux hu:,
mai ah nin: kah kiex, "Hu: kah daux yaong: pa koe: sivoe pax, mai yam laig pax kah daux yaong: an:, dom: mawx dom: an: pax tag yaox, kawn: la pa hoik phyawk tan: pa ang pwi sax ngawm piang heue. Kah mai viex nawh hoek heue.
Mai phan: pwi tix kauxkaux chawk pax ah nin:,Pax yuh ceu in: kheu patix?: pax deeh krai ah nin:,Simiang lo nawh heue Mai kaw an: tag deeh ploi: nawh hoek tin: dom: mawx dom: an: heue."
Mai kiex hu:, mai yaox kawn: la tix mu: pa hoik phyawk dex siviex plak praix kah daux krax. Mai kiex kah nawh heue.
Mai pwi pa cung tan: tiblah ah nin: kah kiex, "Pax kah la in: yuh kah mawx?"
Mai kiex ah kah kix awm: pa hoik krai Yesux, mai kix ploi: kiex hu: heue.
Mai kiex viex kawn: la an: kah Yesux, mai teei kraung ceep tix sau: kah piang kawn: la an:, mai Nawh Cao: ngawm kah piang nawh heue.
Mai pwi haoh pwi hun: teei krang ceep tix nih tix tawm kah daux krax, mai tiblah teei kak khaox pa hoik kid kix khaing: daux ma: mai tawm heue.
Mai kix pa hu: sivoe, mai kix pa hawt khaix khankix kok yo ah nin:, "Hosanna, Kaw pa hoek kah daux ceukaux Simiang ting bwanson: heue.
Meung keeing: ex Davit pa uik sang hoek, ting bwanson: heue. Hosanna dee lhaong: khaing: paox tix heue."
Mai Nawh Cao: laig kah daux veng Yerusaliem, mai laig kah daux nyiiex bwan:, mai khaix hoik jhak Nawh Cao: vungviang kah kuceu ku cawng, mawh kheu hoik hoek bawg yam ponbo, Nawh Cao: lih hu: tau mai kawncau Nawh kao: kaux ra: kah yaong: Betanix heue.
Yesux Jhax Lawg Kah Khaoxruh
Mathiex 21:18-19;
Mai singaix pasax yam hoik lih hoek kix khaing: yaong: Betanix, Nawh Cao: cairhawm: heue.
Mai Nawh Cao: yaox khaoxruh tix khaox kah dee singai pa koe: lhax, kheu nan: Nawh hu: sonsang sawg tix yaox plix. Mai yam hoek Nawh Cao: kah khaox an:, Nawh yaox ngie lhax khaing:, kheu bawg yam plix plixruh ang nyang bax hoek.
Mai Yesux ah nin: kah khaox an:, "Jah yamin: tom: hoek leeing ju leeing phan:, paw kieh pwi tix kaux kawx ih plix khaing: maix" Mai kawncau Nawh khankix mhong: lox an: heue.
Yesux Kieh Nyiex Bwan: Singax
Mathiex 21:12-17; Lukax 19:45-48; Yohan 2:13-22
Mai kix hoek kah veng Yerusaliem, mai Nawh Cao: laig kah daux nyiiex bwan:, mai jah tix grheu: pwi pa coh pa liag kah daux nyiiex bwan: khankix lih, mai cot pheen: pwi pa loh mau khankix, mai dee ngawm pwi coh sikaux khankix cangklud heue.
Mai Nawh Cao: ang cu tix kieh pwi tix kaux kawx, viex kraung tidtix hu: preeng: daux nyiiex bwan:.
Mai Nawh Cao: sidiex gau ah nin: kah kix, "Hoik tiem: tix deuh ah nin:, :Nyiiex Aux tag kok mawh nyiiex dee rawg pwi kuceu bwan:, ang mawh lie? viang mawh kawx nan: pex hoik kieh mawh daux, dee ot pwi tud pwi rhim: heue."
Mai cao: giex kaing: li pa ting khankix, mai pwi tiem: lai khankix mhong: grawng: an:, mai sawg tix yaox, kix sang pon tix yuh Nawh Cao: laux yuh kah mawx. Kheu kix lhat kah Nawh Cao:, mawh kheu cub pwi haoh pwi hun: daox deng: kah lox sidiex lox gau Nawh heue.
Mai yam hoek ponbo ku bo Nawh Cao: lih khaing: daux veng heue.
Khaoxruh Pa Fit Pa Kroh Lhax
Mathiexc 21:20-22
Pon ngawb yam hu: kix krax, kix yaox khaoxruh an: hoik fit hoik kroh hu: khawm: uik jah tom: riah nawh heue.
Mai Petrux doh keud kah grawhgrawng: ceu an:, mai ah nin: kah Nawh Cao:, "Rabi eue, jhak heue, khaoxruh pa hoik jhax Maix, hoik fit hoik kroh hu: khawm: uik heue."
Mai Yesux pawk lox mai ah nin: kah kix, "Yumrhawm: kah daux Siyiex heue.
Aux krai lox tete telai kah pex, pwi mawx ang ah pa ah kah gawng in:,Gah dee ot maix, mai rau kah daux rawm: sigrit sigra: heue, Mai ang koe: krax ang yumrhawm:, viang mawh kawx nan: phan: nawh yumrhawm: grawhgrawng: pa hoik ah nawh tag mawh, tag mawh son nawh heue.
Mawh kheu nan: Aux krai kah pex, pa rawg bwan: mai pa mhaing: pex kuceu khawm: uik, pex yumrhawm: grawhgrawng: pex pon khankix, mai pex tag sang pon heue.
Mai yam mawx ang ah, yam cung pex tix rawg bwan:, phan: pex koe: dee deuh phimap kah pwi tang: kaux, pluat phimap nawh heue. Yuh kah mawx son Keeing: pex pa ot kah daux meung raoma: tag pluat phimap phigrham: pex heue.
Viang mawh kawx nan: phan: pex ang pluat phimap pwi tang: kaux, Keeing: pex pa ot kah daux meung raoma: kawx tag ang pluat phimap phigrham: pex heue."
Grawng: Pa Chawk Pon Yesux Akhwang: Khaing: Dee Mawx
Mathiex 21:23-27; Lukax 20:1-8
Mai kix deeh hoek kah daux veng Yerusaliem, mai yam hu: lailing Nawh Cao: kah daux nyiiex bwan:, cao: giex kaing: li mai pwi tiem: lai, mai kuad song: khankix hoek kah Nawh Cao: heue.
Mai kix chawk ah nin: kah Nawh Cao:, "Maix pon akhwang: siawpsibrawm tix yuh ceu in: khankix dee mawx? Mai pwi mawx tawx akhwang: siawpsibrawm in: kah Maix, tix yuh ceu in: khankix?"
Viang mawh nan: Yesux ah nin: kah kix, "Aux sang chawk pex kah grawhgrawng: tix ceu, mai pex deeh krai kah Aux, mai Aux tag sang krai kah pex grawhgrawng: pon Aux akhwang: siawpsibrawm tix yuh ceu in: khankix dee mawx heue.
Krax baptis Yohan kaoh khaing: raoma: lie? Phan: ang mawh nan: kaoh khaing: kawn: pwi lie? deeh krai kah Aux liak."
Mai kix keud tau ah nin:, "Phan: ex ahKaoh khaing: raoma:, Nawh Cao: tag chawk ah nin:,Phan: mawh nan: yuh patix pex ang yumrhawm: kah nawh?:
Viang mawh nan: phan: ex ahkaoh khaing: kawn: pwi" Kix lhat kah pwi khankix, kheu pwi khawm: uik een: Yohan mawh cao: jhai: tete heue.
Mai kix pawk lox kah Yesux ah nin:, "Ex ang tawng heue." Mai Yesux baox ah nin: kah kix, "Aux kah ang krai kah pex grawhgrawng: pon Aux akhwang: siawpsibrawm tix yuh ceu in: khankix dee mawx heue."
Lox Phektem: Cao: Sipeem Mai Cao: Vai
Mathiex 21:33-46; Lukax 20:9-19
Mai Nawh Cao: baox jah tix sidiex kah kix kah daux lox phektem: heue. "Pwi tix kaux nawh sum: sipeem plix siiet tix dauh, mai sum: khaox vie vungviang sipeem an:, mai kaong: daux dee biiet rawm: plix siiet, mai sum: nyiiex lhaong: tix lhang:, mai yaog mai tawx vai kah pwi pa yuh sipeem plix siiet, mai hu: tang: praix tang: klawng: heue.
Mai yam hoek bawg yam nawh ploi: kawncau tix tikaux hu: kah pwi yuh sipeem an: khankix, sonsang rieb tix teei plix khaing: sipeem plix siiet, kah pwi pa yuh sipeem khankix heue.
Mai kix teei nawh mai tap nawh, mai ploi: nawh ing: giex, taix yi heue.
Mai nawh baox deeh ploi: kawncau tang: kaux tix kaux, mai kix teei simaox dheem: kaing: nawh saux, mai yuh pa ang khaw: ang jiet kah nawh mai ploi: nawh ing: heue.
Mai nawh baox ploi: kawncau tang: kaux, mai kix teei nawh yum:. Mai nawh baox ploi: kawncau tang: kaux tom: nie, mai kix tap tiblah, mai teei yum: tiblah heue.
Nawh kawn: koe: kawn: pa moh tix tix kaux khaing:, mai nawh ploi: nawh hu: ghoik khaix kah kix ah nin:,Kix tag yungyi: kah kawn: aux heue
Viang mawh kawx nan: pwi pa yuh sipeem an: khankix, ah nin: kah paox tix,Kaw in: mawh cao: sin:. Hoek heue, ex teei nawh yum:, mai sin: nawh tag mawh cie ex heue
Mai kix giex nawh mai teei nawh yum:, mai taing nawh khaing: daux sipeem plix siiet heue.
Mawh kheu nan: cao: sipeem plix siiet tag sang yuh kah mawx? Nawh tag hoek mai yieh tix yuh laux pwi yuh sipeem an: khankix, mai tawx sipeem plix siiet an: kah pwi tang: kaux heue.
Ang pex sax phat Phuk lai sigang: khri: pa ah nin: lie?
:Simaox pa hoik tik pwi yuh nyiiex, hoik yuh kieh mawh kaing: kah daog.
In: mawh pa hoek khaing: Simiang, mai mawh pa daox pa deng: kah ngai: ex heue"
Mai kix sawg tix giex Nawh Cao:, viang mawh nan: kix lhat kah cub pwi haoh pwi hun:, kheu tawng kix Nawh hoik sidiex lox phektem: an: kah grawhgrawng: kix, mai kix prah Nawh Cao: mai hu: heue.
Grawng: PaTawx Gha: Keun: Kah Kesa
Mathiex 22:15-22; Lukax 20:20-26
Mai kix ploi: Pharishie: mai kawncau Herut tiblah hu: kah Nawh Cao:, yuh kah mawx sonsang pon kix tix giex, dee lud lox sikah Nawh heue.
Mai yam hoek kix kix ah nin: kah Nawh Cao:, "Sara Cao: Gau eue, ex tawng Maix mawh pa mawh pa meh, mai ang lhat kah pwi tix kaux kawx, kheu ang Maix jhak kah pakngai: kawn: pwi, mai sidiex gau grawhgrawng: krax Siyiex tete heue. Khaw: tix tawx mau koh kah simiang Kesa lie, ang khaw: tix tawx lie?
Ex tag tawx lie? Phan: ang mawh nan:, ex tag ang tawx lie?" Viang mawh kawx nan: Nawh Cao: tawng grawhgrawng: pa pie pa lhen: kix, mai ah nin: kah kix, "Pex nyaw pex cheuk tix yaox Aux yuh kah mawx? Viex denari tix plah sonsang jhak Aux nawh."
Mai kix viex, mai Nawh Cao: chawk ah nin: kah kix, "In: mawh rieng mawh lai pwi mawx?" Mai kix ah nin: kah Nawh Cao:, "Mawh rieng mawh lai simiang Kesa heue."
Mai Yesux baox ah nin: kah kix, "Ceu pa mawh cie Kesa, tawx kah simiang Kesa heue. Mai ceu pa mawh cie Siyiex tawx kah Siyiex heue." Mai kix kied daox kied deng: kah Nawh Cao: heue.
Pa Chawk Grawng: Pa Deeh Kaoh
Im: Khaing: Krax Yum:
Mathiex 22:23-33; Lukax 20:27-38
Sadukie: khankix hoek kah Nawh Cao:, pa ah ang koe: pa deeh kaoh im: heue. Mai kix chawk Nawh Cao: ah nin:,
"Sara Cao: Gau eue, Mose tiem: tix deuh kah ex ah nin:,Phan: puxaik pwi tix kaux yum:, mai prah moeng tix khaix tix, mai ang koe: kawn:, pux nawh, tag teei moeng nawh mai eei: kawn: ceucat son puxke: nawh heue
Koe: puxaik aliah kaux. Kaw phaoka: teei tix koe: moeng, nawh ang koe: kawn: mai yum: heue.
Mai ra: kaux tix kaux kawx teei bun: an:, ang koe: tix prah kawn: khaix nawh, mai yum: heue. Mai loe: kaux tix kaux kah awm: an: heue.
Aliah kaux tix kaux kawx ang koe: kawn: tix prah heue. Khaix kix khawm: uik, bun: an: kawx yum: heue.
Mawh kheu nan: yam hoek bawg yam deeh kaoh im:, kah daux kix nawh tag mawh moeng kaw pa yuh kah mawx? Kheu kix khawm: aliah kaux hoik to moeng bun: an: heue."
Yesux pawk lox mai ah nin: kah kix "Pex phit pex lud kheu ang pex tawng Phuk lai sigang: khri: mai siawpsibrawm Siyiex, ang mawh lie?
Mawh kheu yam kix tag deeh kaoh im: khaing: krax yum:, kix ang teei mex moeng, mai ang teei tix tawx kah paox tix, viang mawh nan:, kix tag awm: kawncau Siyiex kah daux meung raoma: heue.
Lheu: khaing: an: grawhgrawng: pwi yum: khankix tag sang deeh kaoh, ang pex sax phat kah daux phuk lai Mose lie? dee koe: grawhgrawng: yam sikah Siyiex mai nawh kah daux yeem khaox ah nin:, :Aux mawh Siyiex Abraham, mai Siyiex Icak, mai Siyiex Yakop. Lie?:
Nawh ang mawh Siyiex pwi yum:, viang mawh nan:, Nawh mawh Siyiex pwi im:. Pex kied phit kied lud heue."
Lox Pingnyap Pa Blon Ting
Mathiex 22:34-40; Lukax 10:25-28
Pwi tiem: lai tix kaux hoek mai mhong: lox pa chawk kix kah paox tix, mai nawh tawng grawhgrawng: Nawh Cao: hoik pawk lox kah kix mhawmmhawm:, mai chawk Nawh Cao: ah nin:, "Lox pingnyap pa yuh kah mawx lheu: ting khaing: paox tix khawm: uik?"
Yesux baox pawk lox ah nin:, "Pa lheu: ting khaing: paox tix mawh in:, :Pwi Isarilax eue, nghiiet heue, Simiang Siyiex ex, mawh Simiang tix kaux khaing:.
Mai maix tag moh Simiang Siyiex maix khawm: rhawm: khawm: rhi: tix khawm: uik, mai khawm: ju tix, mai khawm: kah dee chix keud tix khawm: uik, mai khawm: riang khawm: rao tix khawm: uik heue
Pingnyap ra: gum tix gum mawh in:, :Maix tag moh paoxplawg paoxnyhawm: tix awm: moh tokaux tix heue Lox pingnyap pa lheu: ting khaing: ceu in: ang koe:."
Mai pwi tiem: lai an: ah nin: kah Nawh Cao:, "Mawh pa mawh pa meh heue. Sara Cao: Gau eue. pa krai Maix mhawm:, Siyiex koe: tix kaux khaing:, mai lheu: khaing: Nawh Cao: Siyiex tang: kaux ang koe:.
Mai pa moh Nawh khawm: rhawm: khawm: rhi: khawm: uik, mai pa chix tawng khawm: uik, mai khawm: riang khawm: rao khawm: uik, mai pa moh paoxplawg paoxnyhawm: tix awm: moh tokaux tix, nie lheu: khaing: pa tan pa lu khawm: uik, pa gleeing kah ngu heue"
Mai yam yaox Yesux nawh chix keud tix pawk lox mhawmmhawm:, Nawh Cao: ah nin: kah nawh, "Maix ang singai khaing: Meung Siyiex heue." Mai khaix an: pwi tix kaux kawx ang pon chawk Nawh Cao: kah lox tidtix heue.
Lox Pa Chawk Yesux Kah Cao: Kaing: Khankix
Mathiex 22:41-46; Lukax 20:41-44,
Yam sidiex gau Yesux kah daux nyiiex bwan: Nawh ah nin:, "Pwi tiem: lai khankix ah Khrit mawh kawn: Davit: yuh kah mawx?
Tokaux Davit hoik ah nin: kah daux Khwan: Singax Singeh, :Simiang ah nin: kah Simiang aux, ngawm plak taix khawn: dawm: Aux, tom: Aux kieh pwi koeng kah Maix mawh ngot dee deuh caong Maix heue
Tokaux Davit hoik kok Nawh mawh Simiang. Nawh chix mawh kawn: nawh yuh kah mawx?" Pwi haoh pwi hun: khankix gauxrhawm: tix nghiiet lox Nawh Cao: heue.
Yesux Ah Kah Pwi Tiem Lai Khankix
Mathiex 23:1-36; Lukax 20:45-47
Mai yam sidiex gau Nawh Cao:, Nawh baox ah nin: kah kix, "Rien rhawm: tix kah pwi tiem: lai khankix, pa simie tix ceep sibex dha: mai hu:, mai kieh pwi ah lox yungyi: kah daux lah daux cau khankix.
Mai kix moh dee ngawm pa mhawm: khaing: paox tix;, daux nyiiex sidiex khankix, mai dee mhawm: khaing: paox tix dee yuh pwie khankix heue.
Kix mawh pa chix rud tix ih nyiiex miexmai: khankix, mai sonsang chix pie chix lhen: kix rawg bwan: tom: lang:. Kix tag nie pon krax prawng krax ciyang pa ting heue."
Mau Tan Miexmai:
Lukax 21:1-4
Mai Nawh Cao: ngawm dex kah dee deuh mau, mai jhak kah pwi haoh pwi hun: sau: mau, dee sau: mau tan, mai cao: mi tom: nie sau: tom: nie.
Mai miexmai: pa hot pa sibhawm: hoek tix kaux, mai sau: tawng ra: bliah iak, pa keung: been tix piak.
Mai Nawh Cao: kok kawncau Nawh khankix hoek kah Tix, mai ah nin: kah kix, "Miex mai pa hot pa sibhawm: in: hoik sau: nie lheu: khaing: kix pa sau:, kah daux dee sau: mau khawm: uik.
Kheu kix khawm: uik, hoik sau: khaing: pa lheu: kix, viang mawh kawx nan:, bun: in: hoik sau: khaing: pa hot tix pa koe: nawh khawm: uik, viang mawh pa mawh sonsang im: ju tix, nawh hoik sau: heue."
Yesux Gruh Krai Grawng: Pa
Sang Laux Nyiiex Bwan:
Mathiex 24:1-2; Lukax 21:5-6
Mai yam lih hu: Nawh Cao: khaing: daux nyiiex bwan:, kawncau Nawh tix kaux hoek mai ah nin: kah Nawh, "Sara Cao: Gau eue, jhak heue, simaox an: khankix awm: pa yuh kah mawx, mai nyiiex an: khankix awm: pa yuh kah mawx."
Mai Yesux ah nin: kah nawh, "Yaox maix nyiiex pa ting an: khankix lie? Tag ang grham: simaox koe: tin: kieh koe: piang paox tix tix lon: kawx, pa tag ang yieh tix tik heue."
Mhai: Sakse Pa Sang hoek Bawg Yam sidauh
Mathiex 24:3-14; Lukax 21:7-19
Mai yam ngawm Nawh Cao: kah piang gawng Sanlun, pa koe: sivoe nyiiex bwan:, Petrux, mai Yakop, mai Yohan, mai Andare, hoek mai chawk Nawh dee ang pwi ot, ah nin:,
"Ceu in: khankix tag sang mawh lai mawx? Mai yam tag sang dex mawh ceu in: khankix, tag koe: mhai: pa yuh kah mawx? Krai kah ex liak."
Mai Yesux ah nin: kah kix, "Yuh kah mawx son ang pwi sang pon pie pon lhen: pex kieh lud, rien rhawm: tix kah heue.
Pwi tom: nie tag sang briex tix teei ceukaux Aux, mai hoek ah nin:,Aux mawh Nawh heue Mai tag pon pie pon lhen: kieh pwi lud tom: nie heue.
Mai yam pex tag sang mhong: grawhgrawng: naing, mai grawhgrawng: tag sang yuh naing, paw vi khirhawm: khirhi: kah heue, ceu in: tag sang mawh, viang mawh nan: ang nyang bax mawh bawg yam sidauh heue.
Mawh kheu pwi tix ceu mai tix ceu, tix meung mai tix meung tag cha: paox tix, mai kla: reem tag sang tok dee haoh dee, mai praix tag sang sibhawm:. Ceu in: khawm: uik mawh pa jah tix kharhawm: kharhi: heue.
"Rien rhawm: tix kah, kheu kix tag tawx pex kah cub kuad song: cao: prawng cao: ca: khankix, mai tag sang sivied pex kah daux nyiiex dee sidiex khankix, mai pex tag sang cung sivoe cao: giex kaing: haktiex, mai simiang khunhawkham khankix, son Aux, sonsang mawh mhai: sakse kah kix heue.
Mai tag sang sidiex gau lox bwan: gauxrhawm: gauxrhi: kah ceu pwi khawm: uik phaoka:.
Mai yam tok kix pex hu: tawx dee prawng dee ca:, paw khirhawm: grawhgrawng: lox pa sang ah sang krai pex phaoka:, viang mawh kawx nan:, lox pa sang tawx kah pex daux bawg yam nari an:, pex krai pex ah lox an:, mawh kheu ang mawh pex pa krai pa ah, viang mawh nan:, mawh Khwan: Singax Singeh heue.
Mai puxaik tix kaux hoik tix kaux tag sang teei tix tawx puxaik tix, sonsang pah yum:, mai keeing: kawx tag teei tix tawx kawn: tix, mai kawnpraix khankix kawx tag kaoh tix yuh kah miex keeing: tix mai kieh pah kix yum: heue.
Mai pwi khawm: uik tag koeng kah pex mawh kheu ceukaux Aux, viang mawh kawx nan: kaw pa kaux pa cong: tom: sidauh, kaw an: tag sang hoek krax taoh heue.
Ceu Pa Kharhawm: Kharhi:
Mathiex 24:15-28; Lukax 21:20-24
"Viang mawh nan: yam yaox pex ceu pa greeing pa yuh laux, cung dee ang nawh khaw: tix cung, (kieh kaw pa phat tix yaox tawng heue), yam an: kieh kix pa ot kah daux meung Yudax to: hu: kah piang gawng khankix heue.
Mai pwi pa ot kah piang prang nyiiex, paw kieh nawh lih laig daux nyiiex, tix teei tix ceu kawx khaing: daux nyiiex tix.
Mai pwi pa ot kah daux ma:, paw kieh nawh deeh ing: tix teei kraung ceep tix heue.
Bun: pa koe: kaux, mai bun: pa tawx kawn: tix peuex, kah daux bawg yam singaix an: khankix, tag kharhawm: kharhi: heue.
Mai pex rawg bwan:, yuh kah mawx son bawg yam an:, tag ang caw: yam kwat heue.
Mawh kheu yam an: tag sang koe: pa kharhawm: kharhi:, ceu pa ang sax koe:, tom: yam jah Siyiex tix vah ma: la: rawm:, sidauh sidu hoek bawg yamin:, mai khaix an: kawx tag ang lai baox koe: heue.
Mai phan: Simiang ang kieh bawg yam singaix an: khankix dawd, tix kaux kawx ang pon tix luan, viang mawh kawx nan: mawh kheu pwi pa laug Siyiex, pa hoik laug Nawh, Nawh kieh singaix an: khankix dawd heue.
Yam an: phan: pwi tix kauxkaux ah nin: kah pex,Jhak heue, Khrit ot tin:, phan: ang mawh nan:,Jhak heue, ot tan:, paw vi yumrhawm: kah.
Mawh kheu Khrit pa ang mawh ang meh, mai cao: jhai: pa ang mawh ang meh khankix tag sang lih hoek, mai tag sang jhi: yaox mhai: mai ceu pa daox pa am:, yuh kah mawx sonsang pon pie pon lhen: kieh lud, phan: chix tix, kah pwi pa hoik laug Siyiex heue.
Viang mawh nan: pex rien rhawm: tix, jhak heue, Aux hoik gruh krai kah pex grawhgrawng: kuceu sivoe kah: sang mawh heue.
Yam Deeh Sang Hoek Kawn: Kawn: Pwi
Mathiex 24:29-31; Lukax 21:25-28
"Khaix pa kharhawm: kharhi: daux bawg yam singaix an: khankix, singaix tag faik, mai khix tag ang tawx pa riieng tix,
mai simuing: khankix tag sang rau khaing: raoma:, mai siawpsibrawm pa koe: kah daux raoma: khankix tag sang yung: yiang: heue.
Yam an: kix tag yaox Kawn: kawn: pwi viex siawpsibrawm pa ting mai min: plakngai:, mai hoek kah daux paiawm: heue.
Mai yam an: Nawh tag sang ploi: kawncau Siyiex khankix hu: khrawm: pwi pa hoik laug cie Nawh, khaing: bhaung: pon: plak, jah dee sidauh haktiex, tom: hoek dee sidauh raoma: kudauh kudee heue.
Lox Phektem: Grawng: Khaoxruh
Mathiiex 24:32-35; Lukax 21:29-33
"Gau kah khaoxruh grawhgrawng: lox phektem: nawh. Yam awn: kak nawh mai lih lhax, pex tawng bawg yam raux dex sang hoek,
awm: an: yam yaox pex ceu in: khankix uik sang mawh, kieh tawng Nawh dex hoek tix ot kah praok siviex khankix heue.
Aux krai lox tete telai kah pex, pwi ju in: tag ang bax luan, tom: ceu in: khankix khawm: uik tag hoik mawh heue.
Raoma: mai haktiex tag sang grai:, viang mawh kawx nan: gumlox Aux in: tag ang grai: heue.
Tix Kaux Kawx Ang Tawng Singaix Mai Bawg Yam
Mathiex 24:36-44
Singaix bawg yam nari an: tix kaux kawx ang tawng, viang mawh kawncau Siyiex kah daux meung raoma: khankix kawx ang tawng, Kawn: Cao: kawx ang tawng, mawh ngie Keeing: Cao: pa tawng heue.
"Mawh kheu ang pex tawng bawg yam an:, rien rhawm: tix, pau tix jhak mai rawg bwan: heue.
Grawhgrawng: in: tag awm: pwi tix kaux, pa prah nyiiex tix mai hu: ot tang: praix tang: klawng:, khaix hoik tawx nawh siawpsibrawm kah kawncau nawh khankix, mai hoik tawx kaing kah kaux pwi mawx kaux pwi an:, mai hoik nhie: pwi pau siviex pau tix jhak heue.
Mawh kheu nan: pau tix jhak heue, kheu ang pex tawng bawg yam sang hoek simiang cao: nyiiex, tag mawh yam ponbo lie, phan: ang mawh nan:, yam greung sawm: lie, phan: ang mawh nan:, yam ux ia: lie, phan: ang mawh nan:, yam ponngawb lie, pex ang lai tawng heue.
Phan: ang mawh nan:, ha Nawh kox hoek yam ang pex ce:, mai yaox laig it pex heue.
Pa krai Aux kah pex, Aux krai kah khawm: uik, pau tix jhak heue."
Sawg Krax Pa Sang Pon Teei Yesux Yum:
Mathiex 26:1-5; Lukax 22:1-2; Yohan 11:45-53
Khaix an: ra: singaix mawh pwie Pasakha mai pwie khaomun pa ang sau: susaix mai cao: giex kaing: li pa ting khankix mai pwi tiem: lai khankix, sawg tix lhen: tix nyaw Nawh Cao:, yuh kah mawx sonsang pon giex mai teei Nawh yum: heue.
Kheu kix ah nin:, "Paw yuh yam yuh pwie, phan: ang mawh nan: ha pwi khankix kox lih koe: krax maw: lawh cuci: kheu heue."
Bun: Tix Kaux Groi: Sidauh bhawng: Piang Kaing:
Yesux Daux Yaong: Betanix
Mathiex 26:6-13; Yohan 12:1-8
Yam ot Nawh Cao: kah daux yaong: Betanix, daux nyiiex Simon pwi sipawg, yam ngawm Nawh tix sawm:, bun: tix kaux hoek kah Nawh Cao: pa koe: sidauh bhawng: Nadu pa kied ngawh, daux kawng: simaox paing, mai nawh pah kawng: an: max, mai groi sidauh an: kah piang kaing: Nawh Cao: heue.
Viang mawh kawx nan: koe: tiblah pa songrhawm: mai ah nin: kah paox tix, "Kieh sidauh bhawng: in: nai: giex going yuh nin: yuh kah mawx?
Phan: coh sidauh bhawng: in: tag sang pon ngawh lheu: denari loe: yieh plah, mai tawx kah pwi hot pwi sibhawm: khankix heue." Mai kix ah, kix deuh phimap kah bun: an: heue.
Viang mawh nan:, Yesux ah nin:,Paw chuh nawh, pex lai laklheut nawh yuh kah mawx? Nawh hoik yuh kaing pa mhawm: kah piang Aux heue.
Mawh kheu pwi hot pwi sibhawm: ot mai pex jheengjheeng:, mai pex simie tix yuh pa mhawm: kah kix lai mawx ang ah, pex pon tix yuh, viang mawh nan:, Aux ot mai pex jheengjheeng: ang mawh.
Nawh hoik yuh pa chix yuh tix. Nawh hoik groi sidauh bhawng: kah tokaux Aux, sivoe, son bawg yam sipaung: heue.
Aux krai lox tete telai kah pex, dee mawx ang ah, dee sang sidiex gau lox bwan: gauxrhawm: gauxrhi: in: kah piang haktiex kudauh kudee khawm: uik, grawhgrawng: ceu pa yuh bun: in: kawx, tag sang krai, sonsang doh keud kah nawh heue."
Yudax Isakariut Khawrhawm: Tix Ap Yesux
Mathiex 26:14-16; Lukax 22:3-6
Mai Yudax Isakariut pa mawh tix kaux kah daux kawncau kao: kaux ra:, hu: kah cao: giex kaing: li pa ting khankix, yuh kah mawx sonsang tawx Nawh Cao: kah kix heue.
Mai kix, yam mhong: kix lox an:, gauxrhawm: mai tawx lox mukheu grawhgrawng: sang tawx mau kah nawh heue. Mai nawh sawg bawg yam pa mhawm: yuh kah mawx, sonsang pon tawx nawh Nawh Cao: kah kix heue.
Yesux Ih Pwie Pasakha Tau Mai
Kawncau Nawh Khankix
Mathiex 26:17-25; Lukax 22:7-14, 21-23; Yohan 13:21-30
Daux singaix tix, khaomun pa ang sau: susaix, khaix hoik pah hoik tan kix yung: Pasakha, kawncau Nawh khankix ah nin: kah Nawh Cao:, "Maix simie tix kieh ex hu: cox dee sang ih Maix pwie Pasakha dee mawx?
Mai Nawh Cao: ploi: kawncau Nawh ra: kaux hu:, mai ah nin: kah kiex, "Hu: kah daux veng, mai pwi pa viex aw: rawm: tix kaux tag sipub pax heue. Hawt khaix nawh.
Mai nawh laig dee mawx ang ah, ah nin: kah cao: nyiiex an:, Sara Cao: Gau ah nin:,Lawg son nyo maix, dee tag sang ih Aux Pasakha tau mai kawncau Aux khankix, koe: dee mawx?:
Mai tokaux nawh tag sang jhi: pax yaox lawg pa ting plak piang, pa hoik koe: kraung mai pa hoik cox. Cox khre: dee an: son ex heue."
Mai kawncau khankiex hu: laig kah daux veng, mai yaox awm: pa hoik krai Nawh Cao: kah kiex, mai kiex cox khre: pwie Pasakha heue.
Mai yam hoek ponbo Nawh Cao: hoek tau mai kix kao: kaux ra:.
Mai yam ngawm neung kix mai sawm:, Yesux ah nin:, "Aux krai lox tete telai kah pex, kah daux pex tix kaux pa sawm: tau mai Aux, tag sang tik sang tawx Aux heue."
Kix khirhawm: khirhi: kah, mai tix kaux hoik tix kaux ah nin: kah Nawh Cao:, "Mawh aux lie?"
Mai Nawh Cao: baox ah nin: kah kix, "Mawh kah daux kao: kaux ra: tix kaux, pa mawh kaw pa cub daux klong: tau mai Aux heue.
Kawn: kawn: pwi tag hu:, awm: hoik tiem: grawhgrawng: Nawh, viang mawh kawx nan: pwi pa tik pa tawx Kawn: kawn: pwi tag kharhawm: kharhi: heue. Lheu: mhawm: son pwi an: phan: nawh ang keh heue."
Priex Bo Cie Simiang
Mathiex 26:26-30; Lukax 22:14-20
Mai yam sawm: kix Nawh Cao: teei khaomun, mai khaix hoik nawb Nawh bwan:. Nawh sivit mai tawx kah kix ah nin:, "Pex teei heue, in: mawh tokaux Aux heue."
Mai Nawh Cao: teei kawk, mai khaix hoik yaogyaw Nawh bwanson:, Nawh tawx kah kix mai kix khawm: uik nyaux kah heue.
Mai Nawh Cao: ah nin: kah kix, "In: mawh nham: Aux pa dex pa dawd mai sijax mukheu pa khraox, pa lih son pwi tom: nie heue.
Aux krai lox tete telai kah pex, Aux tag ang nyaux rawm: plix nhu: plix siiet in:, tom: sidauh singaix yam tag nyaux Aux pa khraox kah daux meung Siyiex heue."
Mai khaix hoik rhax kix lai rhax tix mu: kix lih hu: kah gawng Sanlun heue.
Yesux Gruh Krai Grawng: Pa Sang Thiang: Petrux Tix Tik Kah Nawh Cao:
Mathiex 26:31-35; Lukax 22:31-34; Yohan 13:36-38
Mai Yesux ah nin: kah kix, "Pex khawm: uik tag sang lauxrhawm: kah heue. Kheu hoik tiem: ah nin:, :Aux tag pah cao: liang yung:, mai yung: khankix tag prungprang: heue
Viang mawh kawx nan:, khaix hoik deeh kaoh Aux, Aux tag sang hu: sivoe pex kah daux meung Galilie: heue."
Viang mawh nan: Petrux ah nin: kah Nawh Cao:, "Viang kix khawm: uik lauxrhawm: kawx, aux tag ang lauxrhawm: heue."
Mai Yesux ah nin: kah nawh, "Aux krai lox tete telai kah maix, daux singaix, daux sawm: in:, kah: ang ia: nyang ux ra: bawg, maix tag sang thiang: tix tik tix vud Aux loe: bawg heue."
Viang mawh nan: nawh baox krai lox kied riex ah nin:, "Phan: aux tag yum: tau mai Maix kawx, ang aux doh thiang: tix tik tix vud Maix heue." Mai kix khawm: uik kawx, ah awm: an: heue.
Yesux Rawg Bwan: Daux Sipeem Kesasemanix
Mathiex 26:36-46; Lukax 22:39-46
Mai kix hoek tix dauh dee kaux Kesasemanix, mai Nawh Cao: ah nin: kah kawncau Nawh khankix, "Pex ngawm tin: yam Aux hu: rawg bwan: heue."
Mai Nawh Cao: teei Petrux, mai Yakop, mai Yohan, hu: tau mai Nawh, mai Nawh Cao: kied daox kied deng: mai sungsang rhawm: heue.
Mai Nawh Cao: ah nin: kah kix, "Aux kied khirhawm: khirhi:, tom: dex sang yum:, pex ot tin:, mai pau heue."
Mai Nawh Cao: hu: sivoe ceeix mai grux gup kah piang tiex, mai rawg bwan:, yuh kah mawx bawg yam nari an: tag luan khaing: Nawh, phan: chix kieh luan heue.
Mai Nawh Cao: ah nin:, "Abax, Keeing: eue, Maix chix yuh kuceu heue. Teei kawk in: khaing: Aux liak, viang mawh kawx nan:, paw kieh mawh alo pa caw pa khaw: rhawm: Aux, viang mawh nan: kieh mawh pa caw pa khaw: rhawm: Maix heue."
Mai Nawh Cao: deeh hoek mai yaox kix laig it mai ah nin: kah Petrux, "Simon eue, laig it maix lie? Ang maix pon tix pau tix nari khaing: lie?
Pau mai rawg bwan: heue, yuh kah mawx son ang pex sang laig kah daux pa nyaw pa glaw:. Khwan: koe: rhawm: tix sang yuh tete, viang mawh nan: nex mawh pa iak riang iak rao heue."
Mai Nawh Cao: baox deeh lih hu:, mai rawg bwan: mai ah lox awm: phaoka: heue.
Mai Nawh Cao: baox deeh hoek mai yaox kix laig it, kheu ngai: kix cien. Mai kix ang tawng lox pa sang pawk kah Nawh heue.
Mai Nawh Cao: deeh hoek loe: bawg tix bawg mai ah nin: kah kix. "Yamin: kawn: it mai laux lee: tix heue. Ding heue, bawg yam nari hoik hoek, jhak heue, tag sang tik sang tawx Kawn: kawn: pwi daux tawmtaix pwi phimap phigrham: khankix heue.
Kaoh, ex hu: heue, jhak heue, kaw pa sang tik sang tawx Aux dex hoek heue."
Pa Giex Kah Yesux
Mathiex 26:47-56; Lukax 22:47-53; Yohan 18:3-12
Mai yam kawn sikah Nawh Cao:, dom: mawx dom: an:, Yudax pa mawh tix kaux kah daux kix kao: kaux ra:, hoek tau mai cub pwi haoh hun:, pa viex vaig viex khaox, mai lih hoek khaing: cao: giex kaing: li pa ting, mai pwi tiem: lai, mai kuad song: khankix heue.
Mai kaw pa tik pa tawx Nawh Cao: hoik tawx mhai:, sonsang kieh kix tawng tix ceu ah nin:, "Aux ngheut pwi mawx ang ah, mawh Kaw an:. Giex Nawh, mai tok Nawh hu: mhawmmhawm:."
Mai yam hoek nawh, nawh hoek kah Nawh Cao: dom: mawx dom: an:, mai ah nin:, "Rabi eue," mai ngheut kah Nawh heue.
Mai kix giex tix teei Nawh Cao: heue.
Viang mawh nan: kah daux kix pa cung de tan: tix kaux lawd vaig tix, mai kid yhaok siliex cao: giex kaing: li pa ting piang khawm: uik dud heue.
Mai Yesux ah nin: kah kix, "Pex viex vaig viex khaox hoek tix giex Aux awm: giex kah pwi tud pwi rhim: lie?
Aux ot tau mai pex mai sidiex gau kah daux nyiiex bwan: ku singaix, mai pex ang giex Aux. Viang mawh kawx nan: ceu in: hoik mawh sonsang naog Phuk lai sigang: khri: heue."
Mai kawncau Nawh khawm: uik prah Nawh Cao:, mai to: hu: heue.
Tok Yesux Hu: Sivoe Cao: Giex Kaing: Li Pa Ting Mai Kuad Song Khankix
Mathiex 26:57-68; Lukax 22:54-55, 63-71; Yohan 18:13-14, 19-24
Mai pwi pa awn: ju tix kaux hawt khaix Nawh Cao:, pa koe: man: fua: tix pheen:, pa fua: kah tokaux kakaong: tix, mai kix giex nawh heue.
Viang mawh kawx nan: nawh prah man: fua: nawh tan:, mai to: hu: kakaong: heue.
Mai kix tok Yesux hu: kah cao: giex kaing: li pa ting piang khawm: uik, mai cao: giex kaing li pa ting khankix, mai kuad song; mai pwi tiem: lai khankix, khrawm: paox tix tau mai nawh heue.
Petrux hawt khaix Nawh Cao: dee singai mai hoek kah brawk nyiiex cao: giex kaing: li pa ting an:, mai ngawm tau mai pwi cau simiang khankix, mai co ngu heue.
Cao: giex kaing: li pa ting khankix mai kuad song: cao: prawng see: khawm: uik sawg mhai: sakse grawhgrawng: Yesux, sonsang pon tix teei Nawh yum:, mai ang kix yaox.
Mawh kheu pwi tom: nie kham: mhai: sakse pa ang mawh ang meh grawhgrawng: Nawh Cao:, mai mhai: sakse pa kham: kix ang khaw: paox tix.
Mai tiblah cung mai kham: mhai: sakse grawhgrawng: Nawh Cao: ah nan:,
"Ex mhong: Nawh ah nin:,Aux tag yieh nyiiex bwan: in: pa hoik yuh kah taix, mai daux loe: singaix Aux tag baox yuh tix lhang: pa ang yuh kah taix heue"
Viang mawh nan: kawx, mhai: sakse kix ang khaw: paox tix.
Cao: giex kaing: li pa ting cung sinax kix, mai chawk Yesux ah nin:, "Maix ang deeh pawk lox tidtix lie? Pa kham: mhai: sakse ceu in: grawhgrawng: Maix, mawh pa yuh kah mawx?"
Viang mawh nan: Nawh Cao: ang nye:, ang pawk lox tidtix. Cao: giex kaing: li an:, baox deeh chawk Nawh Cao: ah nin:, "Maix mawh Khrit, Kawn:, Cao: Pa Ting Bwan: lie?"
Mai Yesux ah nin:, "Mawh Aux heue. Mai pex tag sang yaox Kawn: kawn: pwi ngawm plak khawn: dawm: siawpsibrawm mai hoek tau mai paiawm: raoma: khankix heue."
Mai cao: giex kaing: li pa ting an: riah kraung ceep tix, mai ah nin:, "Ex baox lo mhai: sakse yuh kah mawx?
Pex hoik mhong: lox sa lox lao Nawh kah Siyiex heue. Pex ce: yuh kah mawx?" Mai kix khawm: uik prawng ca: Nawh, ah Nawh keung: tix yum: heue.
Mai tiblah baig rawmmya: kah piang Nawh Cao:, mai tawb pakngai: Nawh Cao:, mai jhawp taix tix klah Nawh Cao:, mai ah nin: kah Nawh, "Krai lox jhai: heue." Mai pwi cau simiang khankix kawx, yam rieb tix teei Nawh Cao:, kix teei taix tix simang: Nawh kah.
Petrux Thiang: Tix Tik Yesux
Mathiex 26:69-75; Lukax 22:56-62; Yohan 18:15-18, 25-27
Yam ngawm Petrux greem: kah brawk, bun: pa mawh kawncau cao: giex kaing: li pa ting an: hoek,
mai yaox Petrux co ngu, mai bun: an: jhak kah nawh, mai ah nin:, "Maix kawx, mawh pa ot tau mai Yesux pwi veng Nazariet heue."
Viang mawh kawx nan: nawh thiang: ah nin:, "Aux ang tawng ang yung pa ah maix heue." Mai nawh lih hu: kah grah nyiiex mai ia: ux heue.
Mai bun: an: baox yaox nawh tix bawg mai ah nin: kah pwi pa cung dex tan:, "In: mawh kix tix kaux heue."
Mai nawh baox thiang: tix bawg, mai khaix an: tivud, kix pa cung dex tan: baox ah nin: kah Petrux, "Maix mawh daux kix tix kaux tete heue, kheu maix mawh pwi meung Galilie: heue."
Viang mawh kawx nan: nawh jah tix jhax, mai tiextu ah nin:, "Ang aux tawng Pwi in: pa krai pex."
Mai dom: mawx dom: an: ia: ux ra: bawg tix bawg heue. Mai Petrux doh keud kah lox pa hoik krai Yesux kah nawh ah nin:, "Kah: ang ia: nyang ux ra: bawg, maix tag sang thiang: tix tik Aux loe: bawg heue." Mai yam nawh keud grawhgrawng: ceu an: nawh yiiem heue.
Grawng: Tawx Yesux Kah Simiang Pilat
Mathiex 27:1-2, 11-14; Lukax 23:1-5; Yohan 18:28-38
Daux ponngawb dom: mawx dom: an:, cao: giex kaing: li pa ting khankix, mai kuad song: mai pwi tiem: lai khankix, mai cub cao: prawng see: khawm: uik, kum: paox tix, mai phyawk Yesux, mai viex Nawh Cao: hu: tawx kah simiang Pilat heue.
Mai simiang Pilat chawk Nawh Cao: ah nin:, "Maix mawh Simiang Khunhawkham pwi Yudax lie? Mai Nawh cao: pawk lox kah nawh ah nin: “Pa ah maix mawh heue.”
Mai cao: giex kaing: li khankix deuh phimap kah Nawh Cao: tom: nie ceu heue.
Mai simiang Pilat baox deeh chawk Nawh Cao: ah nin:, "Maix ang pawk lox tidtix lie? Jhak heue, kix deuh phimap kah Maix tom: nie ceu miex ding."
Viang mawh kawx nan: Yesux ang lai pawk lox tidtix, tom: simiang Pilat daox deng: kah heue.
Tat See: Nawh Cao: Mawh Pa Yum:
Mathiex 27:15-26; Lukax 23:13-25; Yohan 18:39-19:16
Yam yuh pwie an: nawh hoik sax ploi: pwi pa ot daux thawng: tix kaux kah kix, awm: kaw pa rawg kix kah nawh heue.
Mai koe: pwi tix kaux pa kok mawh Barabax, pa phyawk tau mai kix pa mawh pwi feen pwi tieh, pwi pa hoik teei pwi yum: yam feen yam tieh kix heue.
Mai cub pwi haoh pwi hun: khankix hu: mai rawg mai mhaing: kah nawh, nhie: nawh yuh awm: pasax yuh nawh, son kix heue.
Mai simiang: Pilat pawk lox kah kix ah nin:, "Pex simie tix kieh aux ploi: Simiang Khunhawkham Pwi Yudax kah pex lie?"
Kheu nawh tawng cao: giex kaing: li pa ting khankix, hoik teei tix tawx Nawh kheu boh rhawm: kix kah heue.
Viang mawh nan: cao: giex kaing: li pa ting khankix cheeik kah cub pwi haoh pwi hun: khankix, yuh kah mawx sonsang ploi: nawh Barabax kah kix khaing: Nawh heue.
Mai simiang Pilat baox deeh chawk kix ah nin:, "Phan: mawh nan: aux tag yuh patix kah Kaw pa kok pex mawh Simiang Khunhawkham Pwi Yudax?"
Mai kix baox kok yo ah nin:, "Tawk Nawh piang khaoxlhak heue."
Mai simiang Pilat baox ah nin: kah kix, "Mawh kheu grawhgrawng: patix, Nawh hoik yuh pa caox pa yuh kah mawx?" Viang mawh kawx nan: kix nied tix yo ah nin:, "Tawk Nawh piang khaoxlhak heue."
Simiang Pilat simie tix kieh pwi haoh pwi hun: khankix fahrhawm:, nawh tom: ploi: Barabax kah kix, mai teei tix tawx Yesux, sonsang sivied Nawh, mai tawk Nawh Cao: piang khaoxlhak heue.
Pwi Naing Yuh Pa Ang Cee Ang Cak Kah Yesux
Mathiex 27:27-31; Yohan 9:2-3
Mai pwi naing khankix tok Nawh Cao: hu: kah brawk nyiiex dee ot pwi naing, mai kok pwi naing khawm: uik khrawm: paox tix heue.
Mai kix teei krang raoh klai ceep kah Nawh Cao:, mai taing: mhok katlawm sau: kah Nawh Cao: heue.
Mai kix jah tix ah nin: kah Nawh Cao:, "Simiang Khunhawkham pwi Yudax eue, kieh nyawm ot heue."
Mai kix teei priem tix gawng: mai sivied kaing: Nawh Cao: kah, mai baig rawmmya: kah piang Nawh, mai grux ngawng tix krub kah Nawh Cao: heue.
Mai khaix hoik yuh kix pa ang cee ang cak kah Nawh Cao:, kix peeik kraung pa raoh klai khaing: Nawh, mai deeh ceep kraung cie Nawh. Mai kix tok Nawh hu: song sang tawk Nawh Cao: piang khaoxlhak heue.
Grawng: Tawk Yesux Yum: Piang Khaoxlhak
Mathiex 27:33-44; Lukax 23:33-43; Yohan 19:17-27
Mai kix khin: Simon pwi meung Kurene, pa mawh keeing: Alezandru mai Rufu, pa hoek khaing: daux tiag, hu: mai kix, sonsang kieh nawh klawm: khaoxlhak Nawh Cao: heue.
Mai kix viex Nawh Cao: hu: kah dee mawh Gawlagawthax, phan: toe: lox an: dee bleeh mawh, "Dee Si-ang: Kaing:" heue.
Mai kix tawx tix yaox sidauh nie pa hoik klao: tau mai Muran kah Nawh Cao:. Viang mawh kawx nan: Nawh ang rieb tix teei.
Mai kix tawk Nawh Cao: piang khaoxlhak, mai gwieh kraung Nawh sinax kix, khaix hoik nieb kix tix yaox grawhgrawng: pwi mawx tag sang teei pa yuh kah mawx.
Yam tawk kix Nawh Cao: piang khaoxlhak, mawh bawg yam loe: nari heue.
Lai grawhgrawng: pa deuh phimap kah Nawh Cao:, hoik tiem: tix deuh plak piang, pa ah nin:, "SIMIANG KHUNHAWKHAM PWI YUDAX."
Mai kix tawk pwi tud pwi rhim: ra: kaux tau mai Nawh Cao: piang khaoxlhak, plak taix khawn: dawm: Nawh tix kaux, mai plak khawn: gwiex Nawh tix kaux.
Mai Phuk lai sigang: khri: pa ah nin: hoik naog, "Hoik simin Nawh tau mai pwi pa yuh pa ang khaw: ang jiet khankix heue."
Mai kix pa hu: pa hoek dex tan:, ah pa ang khaw: ang jiet kah Nawh Cao:, mai vuhvied kaing: tix, mai ah nin:, "Ha:, Maix pa yieh nyiiex bwan: mai deeh yuh daux loe: singaix eue,
taoh tokaux Maix mai lih khaing: khaoxlhak heue."
Awm: an: cao: giex kaing: li pa ting mai pwi tiem: lai khankix kawx, ah pa ang cee ang cak kah Nawh Cao: ah nin:, "Nawh chix taoh pwi tang: kaux, tokaux Nawh, Nawh ang chix taoh.
Kieh Khrit, Simiang Khunhawkham Pwi Isarilax, lih khaing: khaoxlhak yamin, yuh kah mawx sonsang yaox ex mai yumrhawm: kah heue." Mai kiex pa hoik tawk tau mai Nawh Cao: piang khaoxlhak kawx, ah pa ang cee ang cak kah Nawh heue.
Grawng: Yum: Yesux
Mathiex 27:45-56; Lukax 23:44-49;Yohan 19:28-30
Yam hoek liah nari praix faik piang haktiex khawm: uik tom: hoek dim: nari.
Mai yam hoek dim: nari Yesux kok yo lox sinum ah nin:, "Eloi, Eloi, lama sabaktani?" Phan: toe: lox an: dee bleeh mawh, "Siyiex Aux, Siyiex Aux, Maix lai tik vud Aux yuh kah mawx?"
Pwi pa cung dex tan: tiblah yam mhong: kix lox an:, ah nin:, "Jhak heue, Nawh kok kah Eliyax."
Mai kix tix kaux to: hu: mai teei ceu pa awm: tih pa koe: daux rawm: sigrit sigra: tix mu: pa naog rawm: sidauh nie, mai sau: kah toh gawng: priem, mai tawx Nawh Cao: nyaux ah nin:, "Paw chuh, kieh ex jhak Eliyax sang hoek tix teei Nawh lih lie, ang hoek lie?"
Mai Yesux ah lox sinum mai deeh tawx khwan: Tix heue.
Mai yam an: man: tie daux nyiiex bwan: griah ra: pak, jah plak piang tom: hoek kah caong heue.
Yam an: pwi giex kaing: naing pa cung dex Nawh Cao:, yaox Nawh deeh tawx khwan:, mai nawh ah nin:, "Pwi in: mawh Kawn: Siyiex tete heue."
Bun: khankix kawx ot dee singai mai jhak heue. Kah daux kix koe: Marix Magadalax: mai Marix miex Yakop pa iak, mai Yosiep, mai Salom,
pa yam ot Nawh Cao: kah daux meung Galilie:, hoik hawt Nawh mai khan: kheu kah Nawh Cao:, mai bun: tang kaux tom: nie pa hoik hoek tau mai Nawh Cao: kah veng Yerusaliem heue.
Grawng: Sipaung: Yesux
Mth. 27:57-61; Lukax 23:50-56; Yohan 19:38-42
Yam hoek ponbo kheu mawh Singaix Khre:, pa mawh singaix sivoe singaix twah,
Yosiep pwi Arimase, pa mawh simiang pa koe: min: plakngai: pa tokau: nawh kawx, krox tix jhak son yam sang hoek Meung Siyiex. Nawh viex rhawm: kua: hu: kah simiang Pilat, mai rawg mai mhaing: tokaux yum: Yesux heue.
Simiang Pilat daox deng: kah grawng: Nawh Cao: hoik khran: yum: yam an:, mai nawh kok pwi giex kaing: naing hoek kah nawh, mai chawk kah nawh grawhgrawng: hoik rheung: yum: Nawh Cao: lie?
Mai yam nawh hoik mhong: grawhgrawng: ceu an: kah pwi giex kaing: naing, nawh tawx tokaux yum: Nawh Cao: kah Yosiep heue.
Mai nawh liag man: paing, mai teei Nawh Cao: lih, mai pua: Nawh kah man: paing an:, mai sau: kah daux, daux simeeig, pa hoik saik kah daux rang: heue. Mai nawh plu: plie simaox mai thox moing daux simeeig an: heue.
Mai Marix Magadalax mai Marix miex Yosie:, yaox dee een: tokaux yum: Nawh Cao: heue.
Grawng: Pa Deeh Kaoh Im: Nawh Cao:
Mathiex 28:1-8; Lukax 24:1-12; Yohan 20:1-10
Mai yam hoik luan singaix twah, Marix Magadalax mai Marix miex Yakop, mai Salom liag sidauh bhawng:, yuh kah mawx sonsang kraix kah Nawh Cao:.
Mai daux aliah singaix, singaix tix, yam kied cao, kix hu: hoek kah simeeig yam hoik lih singaix heue.
Mai kix ah nin: kah paox tix, "Pwi mawx tag sang plu: plie simaox an: khaing: moing daux simeeig son ex."
Mai kix yaog tix jhak mai yaox simaox an: hoik plu: plie hoik gah tix. Simaox an: mawh pa kied ting heue.
Mai kix laig kah daux simeeig mai yaox pwi awn: ju tix kaux ngawm plak khawn: dawm:, mai ceep sibex dha: pa paing, mai kix yaoh kah heue.
Mai nawh ah nin: kah kix, "Paw yaoh paw lhat heue. Pex sawg Yesux pwi veng Nazariet pa hoik tawk piang khaoxlhak. Nawh Cao: hoik kaoh. Nawh ang ot tin:, jhak kah dee hoik een: kix Nawh Cao: heue.
Viang mawh kawx nan: hu: mai krai kawncau Nawh khankix mai Petrux. "Nawh sang hu: sivoe pex kah daux meung Galilie:, pex tag sang yaox Nawh Cao: tan:, awm: hoik krai Nawh kah pex heue"
Mai kix lih mai to: hu: khaing: simeeig, kheu krax lhat krax siyaung:, mai krax daox, krax deng:, hoik hoek piang kix, kix ang krai tidtix kah pwi tix kaux kawx, kheu kied lhat kix heue.
Yesux Jhi: Tokaux Tix Kah Marix Magadalax
Mathiex 28;9-10; Yohan 20:11-18
Yam Nawh Cao: hoik deeh kaoh im:, cao cao daux aliah singaix, singaix tix, Nawh jhi: tokaux Nawh yaox kah Marix Magadalax kah: heue. Pa mawh bun: pa hoik sigrheu: Nawh Cao: phi: caox aliah kaux lih khaing: heue.
Mai nawh hu: mai krai kix pa hoik ot tau mai Nawh Cao:, yam kix khirhawm: mai yiiem.
Mai kix, yam mhong: kix, grawhgrawng: Nawh Cao: hoik deeh im:, mai grawhgrawng: nawh hoik yaox Nawh Cao: kix ang yumrhawm: kah.
Yesux Jhi: Tokaux Tix Kah Kawncau Nawh Ra: Kaux
Lukax 24:13-35
Mai khaix ceu in: khankix Nawh Cao: baox jhi: yaox tokaux Nawh, daux rieng pak peung tang: ceu, yam hu: kawncau Nawh ra: kaux krax daux tiag heue.
Mai kiex hu: mai krai grawhgrawng: ceu in: kah kawncau pa deuk khankix, mai kix ang yumrhawm: kah kiex heue.
Yesux Jhi: Tokaux Tix Kah Kawncau Nawh Kao: Kaux Tix
Mathiex 28:16-20; Lukax 24:39-49; Yohan 20:19-23
Mai khaix an: Nawh Cao: baox jhi: yaox tokaux Nawh kah kix kao: kaux tix, yam ngawm: neung kix tix sawm:. Mai Nawh Cao: ah kah kix, kheu krax ang yumrhawm:, mai pa kien: rhawm: kix, mawh kheu kix ang yumrhawm: kah pwi pa hoik yaox Nawh Cao:, khaix hoik deeh kaoh Nawh heue.
Mai Nawh Cao: ah nin: kah kix, "Pex hu: kah piang haktiex khawm: uik mai sidiex gau lox bwan: pa gauxrhawm: gauxrhi: in:, kah can pwi pa hoik phan: hoik yuh khawm: uik heue.
Pwi pa yumrhawm: mai baptis, tag hoek krax taoh heue, viang mawh kawx nan: pwi pa ang yumrhawm: tag hoek krax prawng krax ciyang heue.
Mai mhai: sakse ceu in: khankix tag mawh kah kix pa yumrhawm:. Kix tag sang sigrheu: phicaox lih kah daux ceukaux Aux, mai kix tag sang sikah daux lox pwi ceu pa khraox.
Kix tag sang pon teei tix yaog siuing:, mai phan: kix pon nyaux pa awp tix ceu ceu, ang chix kieh kix saux tidtix. Kix tag sang deuh taix tix piang pwi saux pwi ngia, mai kix tag moi: heue."
Yesux Haok Meung Raoma:
Lukax 24:50-53
Khaix hoik krai Simiang Yesux ceu in: kah kix, rieb tix teei Nawh haok kah daux meung raoma: mai kieh ngawm plak taix khawn: dawm: Siyiex heue.
Mai kix lih hu: mai sidiex gau kudauh kudee. Mai Simiang yuh kaing tau mai kix, mai kieh lox bwan: kaux cong:, kheu mhai: pa hawt khankix heue.
1 Malakhix - 3:1
2 Isayax - 40:3
3 Isayax - 6:10
4 liecong, dee bleeh mawh cub phung: pa kied haoh hun:
5.B. baptis, dee bleeh mawh cubcom
6 Isayax - 29:13
7 Lihu - 20:12
8 Lihu - 21:17
9 baptis, dee bleeh mawh cubcom
10 Yamjah - 2: 24
11 Lai sidiex - 5:16-20
12.B.C. baptis, dee bleeh mawh cubcom
13 Isayax - 56:7; Yeramix - 7:11
14 baptis, dee bleeh mawh cubcom
15 Yaogyaw - 118::22,23
16 Lihu - 3: 2-6
17 Lai sidiex - 6:4,5
18 laikrub - 19:18
19 Yaogyaw - 110:1
20 Zakharix - 13:7
21 loe: nari, mawh dim: nari plak ponngawb heue
22 Isayax - 53:12
23 liah nari, mawh bawg yam jung singaix kao: ra: nari heue
24 dim: nari, mawh bawg yam loe: nari plakbo
25 baptis, dee bleeh mawh cubcom
LAI LUKAX
(Luke)
Lukax
Lox Jah
Kawncau 1:1
Maw kheu pwi tom: nie hoik tiem: tix yaox grawhgrawng: ceu pa hoik naog hoik grum mawh sinax ex,
Awm: kix pa mawh pa kham: mhai: sakse grawhgrawng: ceu pa hoik yaox ngai: tix, mai cao: pa viex lox bwan: tom: yam jah, hoik tawx kah ex.
Phan: keud tix yaox, aux kawx, pa hoik sawg tix yaox grawhgrawng: kuceu tom: yam jah mhawmmhawm:, khaw: tix tiem: lai kah maix Thawphilux pa ting pa mhawm: eue,
yuh kah mawx maix tag sang grum tawng grawhgrawng: ceu pa hoik gau kah maix, mawh pa mawh pa meh heue.
Pa Krai Grawng: Keh Yohan Cao: Com Rawm:
Daux bawg yam singaix ju simiang Herut, khunhawkham meung Yudax, koe: cao: giex kaing: li tix kaux, pa kaux Zakharix, pa dex pa dawd mai cub Abiyax. Moeng nawh mawh kawnbon: ru Arun, mai ceukau nawh mawh Elizabiet heue.
Mai kiex khawm: ra: mawh pa rah pa see sivoe Siyiex, mai hawt lox tawm: jhawm: krai, mai been Siyiex khawm: uik ang lai koe: dee lud dee loe: heue.
Kiex ang koe: kawn:, kheu Elizabiet mawh pwi neh, mai kiex uik kuad.
Yam Zakharix yuh kaing cao: giex kaing: li sivoe Siyex, ceu pa yuh cub pa neuex nawh,
awm: pa koe: been cao: giex kaing: li khankix, caw bawg yam, yam laig nawh kah daux nyiiex bwan: Siyiex tix tok nyawng bhawng:.
Mai cub pwi haoh pwi hun: khawm: uik, ot plak praix tix rawg bwan:, bawg yam nari tok nyawng bhawng: heue.
Yam an: kawncau Siyiex tix kaux hoek tix cung plak dawm: khu: dee tan nyawng bhawng:.
Mai yam Zakharix yaox, nawh sungsang rhawm: mai lhat kah heue.
Viang mawh nan: kawncau Siyiex ah nin: kah nawh, "Zakharix eue, paw lhat paw graung, mawh kheu hoik nghiiet lox pa rawg pa mhaing: maix, moeng maix Elizabiet tag keh kawn: simex son maix tix kaux, mai maix tag kok ceukaux nawh mawh Yohan heue.
Mai maix tag sang gauxrhawm: gauxrhi:, mai pwi tom: nie tag sang koe: krax gauxrhawm: gauxrhi: kheu keh nawh.
Mawh kheu nawh tag ting tag lhaong: sivoe ngai: Simiang, mai nawh tag ang nyaux plai: rawm: plix siiet mai ceu pa chix kieh yoek, mai nawh tag naog Khwan: Singax Singeh, tom: yam ot nawh kah daux vaig miex tix heue.
Mai nawh tag kieh kawnpraix Isarilax tom: nie deeh tieh tix hoek kah Simiang mai Siyiex kix.
Mai nawh tag sang hu: sivoe Nawh Cao: kah daux khwan: mai siawpsibrawm Eliyax, sonsang kieh keeing: khankix mai kawnpraix tix, deeh khaw: paox tix, mai sonsang kieh pa lheu: lox khankix deeh hu: kah daux pingnya cuyi: pa rah pa see khankix, sonsang cox pwi tix ceu pa hoik rien son Siyiex heue."
Zakharix ah nin: kah kawncau Siyiex an:, "Grawhgrawng: tag sang mawh, ceu in: aux chix tawng yuh kah mawx? Mawh kheu aux uik mawh tax kuad, mai moeng aux kah hoik riex ju uik kuad heue."
Kawncau Siyiex an: deeh pawk lox kah nawh ah nin:, "Aux mawh Gabrelax, pa cung sivoe Siyiex, mai hoik ploi: aux hoek sonsang sikah kah maix, mai kieh aux viex lox gauxrhawm: gauxrhi: ceu in: khankix kah maix heue.
Jhak heue, kheu ang maix yumrhawm: kah lox aux in:, maix tag aw: khawm: ang chix sikah, tom: hoek singaix ceu in: khankix hoik mawh, pa tag sang naog kah daux bawg yam kix heue."
Mai pwi pa krox Zakharix khankix, daox deng: kheu ot nawh kah daux nyiiex bwan: kied rheung: nyao heue.
Mai yam lih hoek nawh, nawh ang chix sikah mai kix, kix tom: tawng hoik yaox nawh riieng susai: kah daux nyiiex bwan:. Viang mawh nan: Zakharix jhi: kix yaox mhai:, mai aw: tix heue.
Yam singaix yuh nawh kaing hoik naog, nawh deeh ing: kah nyiiex tix heue.
Khaix singaix an: khankix moeng nawh Elizabiet, koe: kaux, mai nawh mox tokaux tix son phwan: khix, ah nin:,
"Simiang hoik yuh ceu in: son aux, daux singaix yam kia: Nawh aux, sonsang teei kieh aux luan khaing: pa sa kawn: pwi heue."
Pa Krai Grawhgrawng: Keh Yesux
Khaix an: kah daux liah khix, Siyiex ploi: kawncau Nawh Gabrelax hu: kah daux veng meung Galilie: tix veng, pa kok mawh Nazariet,
kah bunkrih tix kaux, pa hoik chawk pwi tix kaux pa kaux Yosiep, pa mawh ru Davit, mai ceukaux bunkrih an: mawh Marix heue.
Mai kawncau Siyiex an: laig mai ah nin: kah nawh, "Bun: pa koe: bwanson: eue, kieh maix gauxrhawm: heue. Siyiex ot tau mai maix. Kah daux ceu bun: maix kied ting bwanson: heue."
Viang mawh nan:, nawh kied sungsang rhawm: kah lox in:, mai keud jee keud blaong daux rhawm: tix, grawhgrawng: dee bleeh ceu an:.
Mai kawncau Siyiex an: ah nin: kah nawh, "Marix eue, paw lhat paw graung, kheu maix hoik pon bwan: mai Siyiex.
Mai jhak heue, maix tag koe: kaux daux vaig tix, mai keh kawn: simex tix kaux, mai tag kok ceukaux Nawh mawh Yesux heue.
Nawh tag ting tag lhaong:, mai tag kok Nawh mawh Kawn:, Kaw pa ting pa lhaong: khaing: khawm: uik, mai Simiang Siyiex tag tawx kah Nawh dangngeung keeing: Nawh Davit heue.
Mai Nawh tag giex kaing: ceucat Yakop leeing ju leeing phan:, mai Meung Nawh tag ang chix sidauh ang chix jud chix jai heue."
Viang mawh nan: Marix chawk ah nin: kah kawncau Siyiex an:, "Ceu in: chix mawh yuh kah mawx? Kheu aux ang koe: mex mai ang pied ang pha: simex heue."
Mai kawncau Siyiex an: deeh pawk lox mai ah nin: kah nawh, "Khwan: Singax Singeh tag sang hoek kah piang maix, mai siawpsibrawm Kaw pa ting pa lhaong: khaing: khawm: uik, tag sang tawb veei kah piang maix, mawh kheu grawng: in: Kawn: singax pa tag sang keh, tag kok mawh kawn: Siyiex heue.
Mai jhak heue, bun: paoxceu paocat maix Elizabiet kawx, hoik nghe: kawn: simex, nawh kuad kawx, mai yamin uik koe: liah khix khawm: ah pwi pa neh kah.
Mawh kheu gumlox Siyiex pa ang koe: siawpsibrawm tag ang koe: tix gum kawx heue."
Mai Marix baox ah nin:, "Jhak heue, aux mawh bun: cawng Simiang, awm: lox krai maix kieh mawh kah aux heue." Mai kawncau Siyiex an: lih hu: khaing: nawh heue.
Marix Hu: Fi: Kah Elizabiet
Daux bawg yam singaix an: khankix Marix nied tix kaoh mai hu: kah daux haktiex dee koe: gawng koe: lua, kah veng Yudax tix veng.
Mai laig kah daux nyiiex Zakharix mai nawb bwan: kah Elizabiet.
Yam mhong: Elizabiet lox nawb Marix kah nawh, kawn: ngie: pa ot daux vaig nawh jaloh kah, mai Elizabiet naog mai Khwan: Singax Singeh heue.
Mai nawh yo lox sinum ah nin:, "Kah daux ceu bun: maix kied ting bwanson: mai Plix vaig maix kawx ting bwanson: heue.
Aux pon min: plakngai: pa hoek miex Simiang aux kah aux, yuh nin:, yuh kah mawx?
Grawhgrawng: nawh, jhak heue, yam mhong: lox pa nawb maix kah daux yhaok aux, kawn: ngie: pa ot daux vaig aux jaloh kheu gauxrhawm: kah heue.
Mai nawh pa hoik yumrhawm: ting bwanson:, mawh kheu grawng: ceu pa hoik krai Simiang kah nawh, tag sang naog sang grum heue."
Lox Rhax Pa Yaogyaw Marix
Mai Marix ah nin:, "Ju aux yaogyaw Simiang,
mai khwan: aux gauxrhawm: kah daux Siyiex Cao: Taoh aux heue.
Mawh kheu Nawh hoik jhak kah bun: cawng pa tiiem Nawh. Grawhgrawng: nawh, jhak heue, jah yamin tix ju hoik tix ju, ku ju, tag kok aux mawh pa ting bwanson: heue.
Mawh kheu Kaw pa ting sibrawm hoik yuh ceu pa ting pa lhaong: son aux, mai ceukaux Nawh mawh pa Singax Singeh heue.
Mai krax caoxrhawm: Nawh, hoek kah tix ju hoik tix ju, kah piang kix pa chix lhat kah Nawh heue.
Nawh hoik jhi: yaox riang rao kah daux plawng: taix Tix. Nawh hoik kieh pa ting rhawm: ting rhi:, pa keud kah daux rhawm: tix, khankix prungprang:heue.
Nawh hoik khlut laux simiang khaing: dangngeung dee ngawm kix, mai hoik yaog pa tiiem kieh lhaong: heue.
Pa cairhawm: khankix Nawh hoik kieh sak kah ceu pa nyawm, mai Nawh hoik ploi: cao: mi khankix hu: yi giex going heue.
Nawh hoik teem: kah Isarilax kawncau mausoi: Nawh, yuh kah mawx sonsang doh keud nawh kah krax caoxrhawm: heue.
Awm: lox pa hoik sikah Nawh kah tax du ex khankix kah Abraham khawm: simie ceucat nawh leeing ju leeing phan: heue."
Marix ot tau mai Elizabiet dex loe: khix, mai deeh ing: kah nyiiex tokaux tix heue.
Grawng: Keh Yohan Cao: Com Rawm:
Yam hoik naog bawg yam Elizabiet sang keh, nawh keh kawn: simex tix kaux heue.
Mai yam hoik mhong: paoxplawg paoxnyhawm:, paoxceu paoxcat Elizabiet, grawng: krax caoxrhawm: pa ting pa hoik yuh Siyiex son kiex, kix gauxrhawm: tau mai kiex heue.
Yam uik koe: daix singaix, kix hoek sonsang pat hak kawn: nyawm an:, mai kix dex sang kok nawh Zakharix awm: ceukaux keeing: nawh.
Miex nawh deeh ah nin: kah kix, "Ang mawh, tag kok nawh mawh Yohan heue."
Mai kix deeh ah nin: kah kiex, "Kah daux paoxceu paoxcat maix, pwi pa sum: ceukau yuh nin: ang koe: tix kaux kawx."
Mai kix yuh mhai: chawk kah keeing: nawh, grawhgrawng: nawh, sang simie tix kok nawh ceu patix heue.
Mai nawh mhaing: ce dee tiiem: lai, mai tiem: ah nin:, "Ceukaux nawh mawh Yohan." Mai kix pa ot tan: khawm: uik daox deng: kah heue.
Mai jheeh nawh deeh baoh dom: mawx dom: an:, mai siniag dak nawh deeh ghah, mai nawh deeh sikah, yaogyaw bwanson: Siyiex heue.
Mai kix pa ot sivie sivheng: tan: khawm: uik lhat kah, mai grawhgrawng: ceu in: khankix tah hu: kudauh kudee kah daux haktiex dee koe: gawng: koe: lua meung Yudax heue.
Mai kix pa mhong: grawhgrawng: ceu in: khawm: uik priex tix tawng kah daux rhawm: tix, ah nin:, "Phan: mawh nin:, kawn: nyawm in: tag sang mawh pa yuh kah mawx? Mawh kheu ot taix Simiang tau mai nawh heue."
Lox Jhai: Pa Krai Zakharix
Mai keeing: nawh Zakharix naog Khwan: Singax Singeh, mai krai lox jhai: ah nin:,
"Kieh Simiang, Siyiex Isarilax ting bwanson: heue, mawh kheu Nawh hoik hoek tix lailing mai hoik taoh pwi cie Tix.
Mai Nawh hoik kieh Cao: Taoh koe: son ex tix kaux, kah daux geh nyiiex ceucat kawncau Nawh Davit.
Awm: hoik krai Nawh kah jheeh cao: jhai: pa singax singeh khankix, pa hoik koe: di dix.
Grawhgrawng: sang taoh ex khaing: pwi pa koeng kah ex khankix, mai khaing: tawm: taix pa bohrhawm: pa khoi: kah ex khawm: uik heue.
Sonsang yuh krax caoxrhawm: kah tax du ex khankix, mai yuh kah mawx sonsang doh keud kah lox sijax mukheu pa singax singeh Nawh.
Pa mawh lox pa hoik tiex hoik tu Nawh mai tawx kah Abraham keeing: ex dix,
sonsang taoh ex luan khaing: daux tawm: taix pa koeng kah ex khankix, yuh kah mawx sonsang pon ex luan khaing: krax lhat krax graung, mai pon tix yuh son Nawh,
kah daux pa singax singeh mai pa rah pa see, daux bawg yam singaix pa kawn ot kawn: koe: ex kah sivoe Nawh khawm: uik heue.
Mai kawn: nyawm eue, tag sang kok maix mawh Cao: Jhai: cie Kaw pa ting pa lhaong: khaing: khawm: uik, mawh kheu maix tag sang hu: sivoe pakngai: Simiang sonsang cox krax heue.
Sonsang kieh pwi cie Nawh tawng grawhgrawng: krax taoh, kah daux pa pluat ploi: phimap phigrham: kix heue.
Mawh kheu krax caoxrhawm: Siyiex ex, pa riieng singaix khaing: dee lhaong: tag sang hoek tix lailing kah ex.
Sonsang jhan: riieng kah piang kix pa ngawm kah daux pa faik, mai veei krax yum:. Sonsang thong: caong ex laig kah daux krax pa nhim: heue."
Mai kawn: nyawm an: haok hwan:, mai ting riang kah daux Khwan:, mai nawh ot kah daux tiag daux tu, tom: hoek singaix bawg yam jhi: tokaux tix kah pwi Isarilax heue.
Grawhgrawng: Keh Yesux
Mathiex 1:18-25
Kah daux bawg yam singaix an: khankix, Simiang Kesa Awguttux tawx lox kieh pawd kieh teei ceukaux pwi pa ot kah daux haktiex khawm: uik.
Yam Kurine mawh simiang giex kaing: kah daux meung Surix, in: mawh bawg yam teei ceukaux bawg phaoka: tix bawg heue.
Mai pwi khawm: uik deeh kah daux yaong: daux veng pwi mawx pwi an:, sonsang tawx sang kieh pawd ceukaux tix heue.
Mai Yosiep kawx, kaoh khaing: daux veng Nazariet meung Galilie:, mai haok kah meung Yudax, kah veng Davit pa kok mawh Bieliehiem, kheu mawh nawh doeh ru Davit.
Sonsang sau: ceukaux tokaux tix mai Marix, pa hoik chawk nawh, pa hoik koe: kaux mai dex sang naog bawg yam sang keh heue.
Mai yam kiex ot tan:, bawg yam singaix sang keh nawh uik naog.
Mai nawh keh Kawn: Ai: tix, mai pua: nawh daux leem:, daux man:, mai een: kah daux dawng: moi, kheu ang dee ot koe: son kix daux nyiiex nyo heue.
Cub Cao: Liang Yung: mai Kawncau Siyex
Kah daux meung an: koe: cao: liang yung: tiblah pa pau cub yung: kix daux yam ponsawm: heue.
Mai kawncau Siyiex tikaux hoek tix cung dex kix, mai min: plakngai: Simiang jhan: riieng vungviang kix, mai kix die lhat kah heue.
Mai kawncau Siyiex an: ah nin: kah kix, "Paw lhat paw graung, jhak heue, aux viex lox ceu pa mhawm:, pa kied ting gauxrhawm:, pa sang mawh son pwi khawm mu: khawm: miang:.
Mawh kheu singaix in:, daux veng Davit, Cao: Taoh hoik keh son pex tixkaux pa mawh Khrit Simiang heue.
Mai in: tag mawh mhai: sakse son pex. Pex tag yaox Kawn: ngie: pa hoik pua: kah leem: kah man:, mai it kah daux dawng: moi heue."
Mai dom: mawx dom: an: cub kawncau raoma: kied haoh kied hun:, hoek tix ot tau mai kawncau Siyiex an:, mai yaogyaw Siyiex ah nin:,
"Kieh yaog min: plakngai: Siyiex, kah dee kied lhaong: khaing: paox tix, mai kah piang haktiex kieh pa nhim: koe: kah kawn: pwi, pa khaw: pa caw rhawm: Nawh heue."
Khaix kawncau Siyiex khankix hoik deeh ing: kah meung raoma:, cao: liang yung: khankix ah nin: kah paox tix, "Ex, hu: kah veng Bieliehiem, mai jhak tix yaox ceu pa hoik mawh in:, pa hoik kieh Simiang ex tawng heue."
Mai nied kix tix hu: tau, mai yaox Marix mai Yosiep mai Kawn: ngie: pa it kah daux dawng: moi.
Mai yam hoik yaox kix, kix kieh tawng grawhgrawng: lox pa hoik krai kah kix, grawng: Kawn: nyawm in:.
Mai pa mhong: khawm: uik daox deng: kah grawhgrawng: ceu pa krai cao: liang yung: khankix, kah kix heue.
Viang mawh nan: Marix een: tix tawng, lox ceu in: khawm: uik, mai keud grawhgrawng: khankix daux rhawm: tix heue.
Mai cao: liang yung: khankix deeh ing:, mai jho: plakngai: mai yaogyaw Siyiex, kheu ceu pa hoik yaox hoik mhong: kix khawm: uik, jiet awm: lox pa hoik krai kah kix heue.
Appong: Yesux Kah Daux Nyiiex Bwan:
Yam hoik naog daix ngaix, yam uik caw bawg yam sang pat hak Nawh, kok ceukaux Nawh mawh Yesux, awm: pa hoik grux kok kawncau Siyiex, kah: ang nyang bax nghe: Nawh daux vaig heue.
Mai khaix hoik naog bawg yam singaix pa kieh kix singax khankix, awm: pa koe: daux lox been Mose, kiex viex Nawh haok kah veng Yerusaliem, sonsang tawx Nawh kah Simiang.
Awm: hoik tiem: daux lox lai been Simiang, 1"Kawn: ai: plix num: kukaux tag sang kok mawh pa singax son Simiang heue."
Mai kiex yuh pa tan pa lu, awm: hoik nhie: yuh kah daux lai been Simiang, 2"Sikaux tix brawm:, phan: ang mawh nan: keukie: awn: tix brawm:” heue.
Grawng: Yaox Simion Kah Cao: Khrit
Mai jhak heue, kah daux veng Yerusaliem koe: pwi pa kaux Simeon tix kaux, pa mawh pwi rah pwi see pa chix nab yam yungyi:, mai krox jun son bawg yam sang teem: kieh Isarilax mhawm:, mai Khwan: Singax Singeh koe: kah piang nawh heue.
Mai Khwan: Singax Singeh hoik kieh doh kah nawh, grawng: nawh tag ang nyang yum:, kah: ang tix bax yaox Cao: Khrit cie Simiang heue.
Mai Khwan: Cao: tok nawh hu: kah daux nyiiex bwan:. Mai miex keeing: Nawh Cao: viex Kawn: nyawm Yesux hu: tan:, sonsang yuh son Nawh awm: koe: lox lai beenli.
Mai nawh teei tix teem: Nawh Cao: kah daux tawm: taix tix, mai yaogyaw bwanson: Siyiex ah nin:,
"Simiang eue, phao in: kieh kawncau Maix koi hu: mhawmmhawm:, awm: hoik koe: gumlox Maix.
Kheu hoik yaox ngai: aux krax taoh Maix,
pa hoik cox Maix sivoe pakngai: ceu pwi khawm: uik heue.
Pa mawh Pa riieng pa sang kieh doh kah pwi tang: ceu tang: cat khankix, mai pa tag sang yaog min: plakngai: pwi Maix Isarilax heue."
Mai miex keeing: Nawh Cao: daox deng: kah lox pa krai grawng: Nawh heue.
Mai Simeon nawb bwan: kah kiex, mai ah nin: kah Marix miex Nawh Cao:, "Jhak heue, Kawn: nyawm in: tag mawh pa sang kieh pwi Isarilax tom: nie goh mai deeh kaoh heue. Mai tag sang mawh mhai: pa sa pwi kah heue.
Lheu: khaing: an: rhawm: maix kawx tag suat kah vaig, yuh kah mawx sonsang plak kieh doh pa keud pa sawn: rhawmrhi: pwi tom: nie heue."
Anax Kham: Mhai: Sakse Grawng: Cao: Pa Taoh
Mai yam an: koe: yiex jhai: tix kaux pa kaux Anax. Nawh mawh kawn: bun: Phanwelax, pa mawh ceu Asha. Nawh uik kied kuad, mai yam awn: ju nawh hoik ot mai mex tix aliah num.
Mai uik mawh nawh miexmai: tidaix pon: (84) num, mai ang nawh lih khaing: nyiiex bwan:, nawh ot tan: rawg bwan: mai twah pa ih pa un:, krub kah Siyiex leeing: ngaix leeing: sawm: heue.
Daux bawg yam nari an: nawh hoek mai yaogyaw bwanson: Siyiex, mai krai grawhgrawng: kawn: nyawm an:, kah kix khawm: uik pa krox pa jun son bawg yam sang taoh veng Yerusaliem heue.
Yesux Deeh Ing: Kah Veng Nazariet
Mai khaix miex keeing: Nawh hoik yuh awm: pa nhie: lox been Simiang, kuceu khawm: uik, kix deeh ing: kah daux meung Galilie:, kah veng tokaux tix Nazariet heue.
Mai Kawn: nyawm an: haok hwan:, mai ting riang ting rao, mai naog krax tawng krax yung, pingnya cuyi:, mai bwanson: Siyiex ot kah piang Nawh heue.
Grawng: Ot Yesux Daux Nyiex Bwan:
Mai miex keeing: Nawh Cao: hu: kah veng Yerusaliem, ku num, kah pwie Pasakha heue.
Yam uik koe: ju Yesux kao: num ra:, kix haok awm: hoik sax koe: been pwie.
Mai khaix hoik luan singaix pwie khankix, kiex deeh ing:, mai Kawn: nyawm simex pa mawh Yesux, kawn: ot plak khaix kah daux veng Yerusaliem, mai miex keeing: Nawh ang tawng grawng: an: heue.
Viang mawh nan: kiex ce: Nawh ot kah daux cub pwi pa ing: kix tau, mai kiex ing: tix singaix krax. Khaix an: kiex sawg Nawh kah sinax puxaik paoxceu mai sinax pwi pa meed pa tawng kiex,
Mai kheu ang kiex yaox Nawh, kiex deeh hu: sawg Nawh kah veng Yerusaliem heue.
Mai khaix an: loe: singaix kiex yaox Nawh kah daux nyiiex bwan:, ngawm sinax sara cao: gau, nghiiet lox kix, mai chawk lox kah kix heue.
Kix pa mhong: lox Nawh khawm: uik daox deng: kah pa kied tawng Nawh, mai lox pa deeh chix pawk Nawh heue.
Mai yam yaox kiex Nawh, kiex daox deng: kah, mai miex Nawh ah nin: kah Nawh, "Kawn: eue, yuh kah mawx Maix lai yuh nin: kah yiex? Jhak heue, keeing: Maix mai aux hoik sawg Maix mai khirhawm: khirhi: tix heue."
Mai Nawh Cao: ah nin: kah kiex, "Yuh kah mawx pax lai sawg Aux? Ang pax tawng grawng: tag lai ot Aux kah daux nyiiex Keeing: Aux lie?"
Mai ang kiex tawng dee bleeh lox pa krai Nawh kah kiex heue.
Grawng: Haok Hwan: Ting Lhaong: Pingnya Yesux
Mai Nawh lih hu: tau mai kiex, hoek kah veng Nazariet, mai Nawh Cao: nghiiet lox kiex heue. Miex Nawh een: tix tawng grawng ceu in: khankix kah daux rhawm: tix heue.
Mai tokaux Yesux baox haok baox hwan:, baox ting pingnya mai baox nie khaw: rhawmrhi: Siyiex mai kawn: pwi heue.
Lox Sid1ex Yohan Cao: Com Rawm:
Mathiex 3:1-12; Makux 1:3-8,; Yohan 1:19-28
Yam simiang khunhawkham Kesa Tiberix hoik giex kaing: kao: phwan: num, Pawntix Piat mawh simiang giex kaing: meang Yudax, mai Herut mawh simiang meung Galilie:, Philipux pux nawh mawh simiang haktiex Iture mai Tarakhawnit, mai Lusanix mawh simiang haktiex Abilenix.
Kah daux bawg yam, Annax mai Kayaphax mawh cao: giex kaing: li pa ting, lox Siyiex hoek kah Yohan kawn: Zakharix, kah daux tiag daux tu heue.
Mai nawh hu: daux haktiex rawb rim rawm: Yawdan kudauh kudee, sidiex gau been krax tawx baptis , pa doh keud doh sawn: kah phimap tom: pon luan khaing: daux phimap phigrham: heue.
Awm: hoik tiem: daux phuk lai Cao: Jhai: Isayax, gumlox pa ah nin:, Lox pa kok pa yo daux tiag daux tu, cox krax Simiang, yuh krax Nawh rauh see heue.
Klawk ku klawk tag sang kieh naog, Gawng ku gawng mai ton: ku ton: tag sang kieh tiem. Mai pa kawk pa vawk tag sang kieh see. Mai krax khluk khlek tag sang kieh plang:.
Mai pwi khawm: uik tag sang yaox krax taoh Siyiex heue."
Mawh kheu nan: nawh tom: ah nin: kah cub pwi haoh pwi hun: pa hoek tix baptis mai nawh, "Ceu siuing: pa cai: eue, mawx nhie: pex to:, sonsang luan khaing: pa songrhawm: pa tag sang hoek?
Kieh plix plix pa keung: pa doh keud doh sawn: kah phimap phigrham: tokaux tix, paw jah tix ah kah daux tokaux tix Abraham mawh keeing: ex, aux krai kah pex, Siyiex teei simaox in: khankix yuh mawh kawn: Abraham kah chix heue.
Yamin kawx moe: hoik koe: kah dex riah num: khaox, mai khaox pa ang plix plix pa mhawm: khankix khawm: uik, sang kid tix taing sau: daux ngu heue."
Mai cub pwi haoh pwi hun: chawk nawh ah nin:, "Phan: mawh nan: ex tag sang yuh kah mawx?"
Mai nawh deeh pawk ah nin: kah kix, "Kieh pwi pa koe: sibex ra: pheen: tawx kah pa ang koe: khankix, mai pwi pa koe: priex preem kieh yuh awm: an: heue."
Mai pwi koh mau khankix kawx hoek sonsang baptis mai nawh. Mai kix chawk ah nin: kah nawh, "Sara cao: gau eue, ex tag sang yuh kah mawx?"
Mai nawh deeh ah nin: kah kix, "Paw vi teei nie lheu: khaing: pa hoik nhie: pex koh heue."
Pwi naing khankix kawx hoek mai chawk nawh ah nin:, "Mai ex, ex tag sang yuh kah mawx?" Mai nawh ah nin: kah kix, "Paw vi khin: tix teei khaing: pwi tix kaux kawx. Paw vi deuh phimap pa ang mawh ang meh kah piang pwi, mai kieh rhawm: pex fah kah mau riang pa pon pex heue."
Mai yam pwi khankix keud jun pot, mai pwi khawm: uik keud daux rhawm: tix grawhgrawng: Yohan, mawh nawh Cao: Khrit lie, ang mawh lie.
Yohan baox deeh ah nin: kah kix, "Aux baptis pex kah daux rawm: tete, viang mawh nan: khaix in: tag sang hoek Tix kaux, pa nie ting khaing: aux, pie maox kiep Nawh ang aux keung: tix kah. Kaw an: tag sang baptis pex kah daux Khwan: Singax Singeh mai daux ngu heue.
Kah daux tawmtaix Nawh koe: bya: yib, mai Nawh tag kieh nghoxca pa pah Tix singax, mai Nawh tag sau: nghoxca cie Nawh daux krao:, mai Nawh tag teei grhip gleeing daux ngu pa ang chix yeet heue."
Nawh teei lox tang: ceu tom: nie sidiex gau lox bwan: gauxrhawm: gauxrhi: kah pwi khankix.
Viang mawh nan:, kheu ah Yohan kah simiang Herut, grawng: pa teei nawh Herodi moeng pux tix, mai grawng: ceu pa ang khaw: pa caox caig pa hoik yuh Herut khawm: uik.
Nawh baox deeh yuh pa ang khaw:, pa nie lheu: ting khaing: an: khawm: uik, pa mawh, pa sau: nawh Yohan daux thawng: heue.
Yesux hoek Tix com rawm:
Mathiexc 3:13-17; Makux 1:9-11
Khaix pwi khawm: uik hoik baptis B tix kah rawm:, mai khaix Yesux kawx hoik baptis,C mai rawg Tix bwan:, raoma: baoh,
mai Khwan: Singax Singeh lih kah daux riang tokaux, pa awm: sikaux, kah piang Nawh, mai lox lih khaing: raoma:, "Maix mawh Kawn: pa moh Aux, pa khaw: pa caw rhawm: Aux heue."
Doeh Ru Ceucat Yesux Khrit
Mathiexc 1:1-17
Yam tokaux Yesux jah tix sidiex gau, Nawh dex sang koe: tingoe: (30) num. Pwi ce: Nawh mawh kawn: Yosiep, pa mawh kawn: Elix.
Pa mawh kawn: Mathat, pa mawh kawn: Lewix, pa mawh kawn: Melakhix, pa mawh kawn: Yannax, pa mawh kawn: Yosiep.
Pa mawh kawn: Mattalix, pa mawh kawn: Amox, pa mawh kawn: Nahum, pa mawh kawn: Esalix, pa mawh kawn: Nakge,
Pa mawh kawn: Maat, pa mawh kawn: Mattalix, pa mawh kawn: Semex, pa mawh kawn: Yosiep, pa mawh kawn: Yodax.
Pa mawh kawn: Yohannax, pa mawh kawn: Resax, pa mawh kawn: Zerubabelax, pa mawh kawn: Salutilax pa mawh kawn: Merix.
Pa mawh kawn: Melakhix, pa mawh kawn: Atdix, pa mawh kawn: Kosam, pa mawh kawn: Elamodam, pa mawh kawn: Erax.
Pa mawh kawn: Yosie:, pa mawh kawn: Eliyaza, pa mawh kawn: Yorim, pa mawh kawn: Matat, pa mawh kawn: Lewix.
Pa mawh kawn: Simeon, pa mawh kawn: Yudax, pa mawh kawn: Yosiep, pa mawh kawn: Yanam, pa mawh kawn: Eliakhim.
Pa mawh kawn: Mele, pa mawh kawn: Menan, pa mawh kawn: Matathax, pa mawh kawn: Nathan, pa mawh kawn: Davit.
Pa mawh kawn: Yesie:, pa mawh kawn: Obet, pa mawh kawn: Bawzax, pa mawh kawn: Salamon, pa mawh kawn: Nashon.
Pa mawh kawn: Aminadap, pa mawh kawn: Aram, pa mawh kawn: Hezaron, pa mawh kawn: Pherit, pa mawh kawn: Yudax.
Pa mawh kawn: Yakop, pa mawh kawn: Icak, pa mawh kawn: Abraham, pa mawh kawn: Terax, pa mawh kawn: Nakhaw.
Pa mawh kawn: Cerawk, pa mawh kawn: Ragau, pa mawh kawn: Phalek, pa mawh kawn: Hebax, pa mawh kawn: Salax.
Pa mawh kawn: KaInan, pa mawh kawn: Aphakcat, pa mawh kawn: Semax, pa mawh kawn: Noax, pa mawh kawn: Lamek.
Pa mawh kawn: Mathusalax, pa mawh kawn: Enawk, pa mawh kawn: Zarit, pa mawh kawn: Mahalielelax, pa mawh kawn: KaInan.
Pa mawh kawn: Enot, pa mawh kawn: Sethax, pa mawh kawn: Adam, pa mawh kawn: Siyiex heue.
Yesux Kham: Geu: Krax Nyaw Glaw:
Mathiex 4:1-11; Makux 1:12-13
Mai Yesux naog kah Khwan: Singax Singeh, deeh hoek khaing: rawm: Yawdan, mai Khwan: Cao: tok Nawh hu: kah daux tiag daux tu heue.
Kah daux tipon: (40) ngaix, phicaox nyaw glaw: tix yaox Nawh. Mai Nawh Cao: ang ih tidtix kah daux singaix an: khankix, mai khaix singaix an: khankix hoik naog, Nawh Cao: cairhawm: heue.
Mai phicaox ah nin: kah Nawh Cao:, "Phan: Maix mawh Kawn: Siyiex tawx lox kieh simaox in: mawh khaomun heue."
Mai Yesux pawk lox kah nawh ah nin:, "Hoik tiem: tix deuh ah nin:, :Pwi tag im: kheu khaomun nongnong: ang mawh"
Mai phicaox tok Nawh Cao: haok dee lhaong:, mai jhi: Nawh yaox meung pa koe: kah piang haktiex khawm: uik, kah daux bawg yam tivud ngie.
Mai phicaox baox ah nin: kah Nawh Cao:, "Aux tag tawx Maix siawpsibrawm mai min: plakngai: pa koe: khankix khawm: uik, mawh kheu hoik tawx kix kah aux, mai aux tag sang tawx kah kaw pa simie aux tix tawx heue.
Phan: Maix krub kah aux tag mawh cie Maix khawm: uik."
Mai Yesux deeh ah nin: kah nawh, "Hoik tiem: tix deuh ah nin:, :Maix tag lai krub kah Simiang Siyiex maix mai yuh son Nawh khaing: heue"
Mai phicaox baox tok Nawh Cao: hu: kah veng Yerusaliem, mai deuh Nawh piang dee choek nyiiex bwan:, mai ah nin: kah Nawh, "Phan: Maix mawh Kawn: Siyiex, kieh tokaux Tix rau sen:.
Kheu hoik tiem: tix deuh ah nin:, :Nawh tag tawm: lox grawhgrawng: Maix kah kawncau Siyiex Nawh khankix, sonsang kieh pau Maix. 11 Mai kix tag yaog Maix kah piang tawm: taix kix, son ang caong Maix sang krox kah simaox’ heue."
Mai Yesux baox pawk lox ah nin: kah nawh, "Lox baox hoik deuh tix ah nin:, :Maix paw vi nyaw kah Simiang Siyiex maix."
Khaix hoik nyaw phicaox tix yaox kuceu, nawh lih hu: khaing: Nawh Cao: tix vong heue.
Yesux Jah Kaing Yuh Tix Daux Meung Galilie
Mathiex 4:12-17; Makux 1:14-15
Mai Yesux naog siawpsibrawm Khwan: Cao: mai deeh ing: kah daux Meung Galilie:. Mai min: plakngai: grawhgrawng: Nawh tah hu: kudauh kudee hawt praok sivie tan: khawm: uik heue.
Mai Nawh Cao: sidiex gau kah daux nyiiex sidiex kix khankix, mai pwi khawm: uik yaogyaw Nawh heue.
Pwi Nazariet Ang Rieb Kah Yesux
Mathiex 13:53-58; Makux 6:1-6
Mai Nawh Cao: deeh hoek kah veng Nazariet, dee eei: Nawh ting, mai Nawh laig kah daux nyiiex sidiex, singaix twah, awm: sax koe: been Nawh, mai cung tix phat lai heue.
Mai pwi tawx kah Nawh Cao: phuk lai Cao: Jhai: Isayax. Mai Nawh plak mai yaox dee hoik tiem: ah nin:, 10
"Khwan: Simiang ot kah piang Aux, mawh kheu hoik groi Nawh rawmbee kah Aux, sonsang kieh sidiex gau lox gauxrhawm: gauxrhi: kah pwi hot pwi sibhawm: khankix heue. Nawh hoik ploi: kieh Aux krai grawhgrawng: pa pluat ploi: kah pwi pa hoik laung. Mai sonsang kieh pwi dug ngai: deeh yaox heue. Yuh kah mawx sonsang ploi: kah pwi se pwi sang heue.
Yuh kah mawx sonsang krai grawng: jhong: num pa khaw: pa caw mai Simiang heue."
Mai Nawh Cao: deeh pua: lai mai tawx kah cao: pau nyiiex sidiex, mai ngawm Tix heue. Mai pwi pa ot kah daux nyiiex sidiex khawm: uik gong: tix jhak Nawh heue.
Mai Nawh Cao: jah tix ah nin: kah kix, "Lox phuk lai sigang: khri: in: hoik naog kah daux yhaok pex singaix heue."
Mai khawm: uik kham: mhai: sakse kah Nawh grawng: in: mawh pa mawh pa meh, mai kix daox deng: kah lox bwan: pa lih khaing: daux jheeh Nawh Cao: mai ah nin:, "In: ang mawh kawn: Yosiep lie?"
Mai Nawh Cao: ah nin: kah kix, "Phan: keud tix yaox pex tag sang ah lox phektem: pa ah nin: kah Aux teteCao: chix sidauh eue, cox tokaux tix moi:, ceu pa yuh kah mawx ang ah, pa hoik mhong: ex grawhgrawng: pa yuh Maix: kah daux veng Kapeniom, daux meung tokaux Tix, dee in: kawx, yuh liak"
Mai Nawh Cao: baox ah nin:, "Aux krai lox tete telai kah pex, ang koe: cao: jhai: tix kaux kawx, pa sang rieb pwi tix teei kah daux meung tokaux tix heue.
Viang mawh nan: Aux krai lox pa mawh pa meh kah pex, daux ju bawg yam singaix Eliyax, koe: miexmai: tom: nie kah daux Isarilax, yam nyeep raoma: loe: num mai liah khix, mai yam kin: sibhawm: praix khawm: uik.
Viang mawh nan: ang ploi: Eliyax hu: kah kix tix kaux kawx, lheu: khaing: bun: tix kaux pa mawh miexmai:, kah daux veng Zarepthax kah daux meung Sidom heue.
Mai daux ju bawg yam cao: Jhai: Elishie: koe: pwi sipawg tom: nie kah daux Isarilax, viang mawh nan: lheu: khaing: Neman pwi Surix, ang kieh kix tix kaux kawx singax heue."
Mai yam kix pa ot kah daux nyiiex sidiex khawm: uik, mhong: grawhgrawng: ceu in: khankix, kix kied song: rhawm: song: rhi: heue.
Mai kix yaog tix kaoh mai grheu: Nawh Cao: lih khaing: daux veng kix, mai viex Nawh hu: kah piang choek gawng pa tang veng kix tix kah, sonsang taing Nawh rau tan:.
Viang mawh nan: Nawh Cao: hu: preeng: sinax kix, mai lih hu: heue.
Pwi Pa Laig Phi: Pa Seeing: Pa Brai: Tix Kaux
Makux 1:21-28
Mai Nawh Cao: lih hu: kah veng Kapeniom pa mawh veng tix veng kah daux meung Galilie:, mai Nawh sidiex gau kix singaix twah.
Mai kix daox deng: kah lox sidiex lox gau Nawh Cao:, mawh kheu lox Nawh mawh pa koe: siawpsibrawm heue.
Mai daux nyiiex sidiex kix tan:, koe: pwi pa laig phicaox pa seeing: pa brai: tikaux, mai nawh kok nawh yo lox sinum ah nin:,
"Yesux Pwi veng Nazariet eue, ex koe: pa yuh mai Maix ceu patix? Maix hoek tix yuh ex laux lie? Kaw pa Singax Singeh Siyiex eue, aux hoik tawng Maix mawh mawx"
Mai Yesux ah kah nawh yuh nin:, "Paw nye:, lih hu: khaing: daux nawh heue." Mai phicaox an: kieh pwi an: goh sinax kix, mai lih hu: khaing: daux nawh, ang lai kieh nawh saux ceeix kawx heue.
Mai pwi khawm: uik daox deng: kah, tom: kix tix kaux hoik tix kaux chawk paox tix ah nin:, "In: mawh lox pa yuh kah mawx? Mawh kheu Nawh koe: siawpsibrawm tawx lox kah phi: pa seeing: pa brai: khankix, mai kix lih hu: heue.
Mai lox grawhgrawng: pa yuh Nawh Cao: tah hu: kudauh kudee sivie tan: heue.
Yesux Pai: Moi: jhawm: Saux Miex Moeng Petrux mai Pwi Tom Nie
Mathiex 8:14-17; Makux 1:29-34
Mai Nawh Cao: yaog tix kaoh khaing: nyiiex sidiex, mai laig kah daux nyiiex Simon. Mai miex moeng Simon kin: saux, kheu nan: kix tom: khyox khaw: Nawh Cao: son kiex heue.
Mai Nawh Cao: cung liiep bun: an:, mai ah kah jhawm: saux an: mai jhawm: saux an: grai:, mai dom: mawx dom: an: kiex yaog tix kaoh khan: kheu: kah kix heue.
Mai yam uik klip singaix kix khawm: uik pa koe: pwi saux pwi ngia kuceu ku cawng viex kix hoek kah Nawh Cao:, mai deuh Nawh taix Tix piang kix kukaux, mai kieh kix moi: heue.
Mai phicaox kawx lih hu: khaing: pwi tom: nie, mai kok yo ah nin:, "Maix mawh Kawn: Siyiex heue." Mai Nawh Cao: ah kah kix, ang kieh kix sikah, kheu hoik tawng kix mawh Nawh Cao: Khrit heue.
Yesux Sidiex Daux Nyiex Sidiex Khankix
Makux 1:35-39
Yam hoik riang praix Nawh lih hu: kah daux tiag tix dauh, mai pwi haoh pwi hun: khankix hawt sawg Nawh Cao:, mai hoek kah Nawh, sonsang kieh sang kang: Nawh, yuh kah mawx son ang Nawh lih hu: khaing: kix heue.
Viang mawh nan: Nawh Cao: ah nin: kah kix, "Aux tag sang sidiex gau lox gauxrhawm: gauxrhi: pa dex pa dawd mai Meung Siyiex khawm: kah daux tang yaong: tang: veng khankix, mawh kheu hoik ploi: Aux son an: heue."
Mai Nawh Cao: hu: sidiex gau daux nyiiex sidiex khankix kah daux meung Galilie: heue.
Yesux Jah Tix Kok Kah Kawncau Tix Khankix
Mathiex 4:18-22; Makux 1:16-20
Yam cung Nawh Cao: dex rawm: nhawng: Gennesariet cub pwi haoh pwi hun: theet nyheen: Nawh, sonsang mhong: gumlox Siyiex.
Mai Nawh Cao: yaox reu ra: lhang: praok nhawng:, viang mawh nan: pwi teei kax khankix hoik lih khaing: reu an:, mai sidaux rub cie tix heue.
Mai Nawh Cao: laig kah daux reu an: tix lhang:, pa mawh cie Simon, mhaing: nawh greed reu khaing: praok ceeix. Mai Nawh ngawm tan: mai sidiex gau kah cub pwi haoh pwi hun: khaing: daux reu an: heue.
Mai khaix hoik sidiex Nawh Cao:, Nawh ah nin: kah Simon, "Gah reu hu: dee raux, mai ploi: rub maix khankix, sonsang pon kax heue."
Mai Simon deeh pawk lox ah nin:, "Simiang eue, ex hoik nyhap mao leeing: sawm: mai ang pon tidtix, viang mawh nan: kheu lox Maix aux tag ploi: rub khankix heue."
Mai yam kix yuh nan:, kix pon krix kax tom: nie, mai rub kix jah tix griah heue."
Mai kix yib taix kah paox tix, pa ot daux reu tang: lhang: an:, yuh kah mawx son kix sang hoek tix teem: tix heue. Kix hoek mai naog reu khawm: ra: lhang:, tom: reu an: kiex jah tix com heue.
Yam yaox Simon Petrux ceu an:, nawh krub dex ngawng Yesux ah nin:, "Simiang eue, lih hu: khaing: aux liak, kheu mawh aux pwi ting map ting grham: heue."
Kheu nawh mai pwi pa ot tau mai nawh khawm: uik kied daox deng: kah, grawng: kax pa hoik pon kix.
Yakop mai Yohan kawn: Zebedie:, pa mawh paox pie Simon kawx, kah awm: an: heue. Mai Yesux ah nin: kah Simon, "Paw vi lhat, jah dom: yamin maix tag sang mawh pwi teei pwi heue."
Yam kix hoik viex reu kix kah praok, kix prah grham: khawm: uik, mai hawt Nawh Cao: heue.
Yesux Pai: Moi: Pwi Sipawg Singax
Mathiex 8:1-4; Makux 1:40-45
Yam Nawh Cao: ot kah daux veng khankix tix veng, jhak heue, pwi pa naog sipawg tix kaux, yam yaox nawh Yesux, nawh grux gup, mai khyox Nawh Cao: ah nin:, "Simiang eue, phan: Maix koe: rhawm: tix cox aux kieh aux singax Maix chix heue."
Mai Nawh Cao: nyeu taix Tix teeh kah kaw an: ah nin:, "Aux koe: rhawm: heue. Kieh maix singax heue." Mai jhawm: saux sipawg an: grai: dom: mawx dom: an:.
Mai Nawh Cao: nhie: nawh paw krai kah pwi tix kaux kawx, viang mawh kawx nan: Nawh ah, "Hu: jhi: tokaux tix yaox kah cao: giex kaing: li, mai tan lu kheu hoik singax mai awm: pa hoik nhie: Mose, sonsang mawh mhai: sakse kah kix heue."
Viang mawh nan: grawhgrawng: Nawh Cao: baox nie tah hu: kudauh kudee, mai pwi haoh pwi hun: khrawm: paox tix hoek kah Nawh, sonsang nghiiet sang mhong: Nawh, mai sonsang kieh Nawh cox jhawm: saux jhawm: ngia tix moi: heue.
Viang mawh nan: Nawh Cao: lih hu: daux tiag daux tu mai rawg bwan: heue.
Yesux Pai: Moi: Pwi Yum: Taix Yum: Caong Tix Kaux
Mathiex 9:1-8; Makux 2:1-12
Kah daux singaix an: khankix Nawh Cao: sidiex gau, mai Pharishie: mai cao: gau grawng: lox been khankix ngawm dex tan:, pa hoik lih hoek khaing: yaong: ku yaong: kah daux meung Galilie:, mai meung Yudax, mai veng Yerusaliem. Mai siawpsibrawm Simiang koe: tau mai Nawh sonsang cox jhawm: saux jhawm: ngia moi: heue.
Mai jhak heue, pwi viex pwi tix kaux pa koe: jhawm: saux pa yum: taix yum: caong pa it piang ku:, mai kix sawg tix viex nawh laig tix een: sivoe Nawh Cao: heue.
Mai kix ang yaox dee sang pon viex nawh laig, kheu cub pwi haoh pwi hun:, kix tom: haok piang nyiiex, mai koi ploi: nawh sinax beung: khawm: ku: it kah greung pwi sivoe Yesux heue.
Yam yaox krax yumrhawm: kix, Nawh Cao: ah nin:, "Pwi eue, hoik pluat phimap maix heue."
Pwi tiem: lai mai Pharishie: khankix keud tix ah nin:, "Kaw pa ah lox sa lox lao in: mawh mawx? Lheu khaing: Siyiex nongnong: pwi mawx pa chix ploi: phimap?"
Viang mawh nan: Yesux tawng grawhgrawng: pa keud pa sawn: kix, mai ah nin: kah kix, "Pex keud pa yuh kah mawx kah daux rhawm: tix?
Lox pa yuh kah mawx lheu: yie tix ah,Hoik pluat phimap maix heue, yie tix ah lie? Phan: ang mawh nan:,Hoik pluat phimap maix heue, yie tix ah lie? Phan: ang mawh nan:, kaoh mai hu: heue’ yie tix ah lie?
Viang mawh kawx nan:, yuh kah mawx pex tag sang tawng grawhgrawng: Kawn: kawn: pwi, koe: siawpsibrawm tix chix pluat phimap kah piang haktiex, (Nawh Cao: baox ah kah kaw pa yum: taix yum: caong an:).Aux ah kah maix, kaoh, mai teei kraung it maix, mai deeh ing: kah nyiiex maix heue"
Mai nawh kaoh dom: mawx dom: an:, sivoe kix, mai teei kraung it nawh piang, mai lih ing: kah nyiiex tix, yaogyaw bwanson: Siyiex heue.
Mai kix khawm: uik kied daox deng: kah, mai yaogyaw bwanson: Siyiex, mai kix naog krax lhat krax graung kah, ah nin:, "Ex hoik yaox ceu pa ang sax yaox singaix heue."
Yesux Kok Kah Lewix
Mathiex 9:9-13; Makux 2:13-17
Mai khaix ceu an: khankix Nawh Cao: lih hu: mai yaox pwi koh mau tix kaux, pa kaux Lewix, ngawm dee koh mau, mai ah nin: kah nawh, "Hawt khaix Aux heue."
Mai nawh prah khawm: uik mai kaoh hawt khaix Nawh Cao: heue. Mai Lewix yuh pwie ting kah daux nyiiex tix, son Naw Cao. Pwi koh mau haoh hun: mai pwi tang: kaux khankix ngawm neung tix sawm: tau mai kix heue.
Pharishie: mai pwi tiem: lai khankix deuh phimap kah kawncau Nawh khankix ah nin:, "Pex lai sawm: rheep tau mai pwi koh mau mai pwi ting map ting grham: yuh kah mawx?"
Mai Yesux pawk lox ah nin: kah kix, "Pwi pa nyawm ot nyawm koe:, ang lo pwi pa chix sidauh dim:, viang mawh kawx nan: mawh pwi pa koe: jhawm: saux jhawm: ngia khaing: pa lo pwi chix sidauh.
Aux hoek sonsang kok pwi rah pwi see ang mawh, viang mawh kawx nan: hoek sonsang doh keud doh sawn: pwi koe: map koe: grham: kah phimap tix heue."
Pa Chawk Grawng: Twah Pa Ih Pa Un:
Mathiex 9:14-17; Makux 2:18-22
Mai kix ah nin: kah Nawh Cao:, "Kawncau Yohan khankix twah pa ih pa un: mai rawg bwan: lawlawx. Kawncau Pharishie: khankix kawx yuh awm: an:, viang mawh kawx nan: kawncau Maix ih mai nyaux heue."
Mai Yesux chawk kix ah nin:, "Pex chix kieh paoxgrawm pwi pa yuh kah kapaox twah pa ih pa un: yam kawn: ot kaw pa yuh kapaox mai kix lie?
Viang mawh kawx nan:, bawg yam singaix tag sang hoek, yam tag sang teei kaw pa yuh kapaox khaing: kix;, mai kah daux singaix an: khankix, kix tag sang twah pa ih pa un: heue."
Lox phektem: kawx Nawh Cao: teei tix sidiex kah kix, ah nin:, "Pwi tix kaux kawx ang sax riah kraung khraox tix bliah mai blaox kah kraung prim:, phan: yuh nan: kienie, nawh tag kieh pa khraox griah, mai bliah pa teei khaing: kraung pa khraox an: kawx, tag ang khaw: mai pa prim:.
Mai pwi tix kaux kawx, ang sax teei rawm: plix siiet pa khraox sau: kah daux chee: hak pa prim: khankix. Phan: yuh nan: kienie, rawm: plix siiet pa khraox an: tag kieh chee: hak bih, mai rawm: plix siiet tag hieh, mai chee: hak tag laux heue.
Viang mawh kawx nan:, rawm: plix siiet pa khraox tag lai sau: kah daux chee: hak pa khraox, mai khawm: ra: ceu tag ang laux ang leeing: heue.
Mai pwi pa hoik nyaux rawm: plix siiet pa prim:, ang simie tix cie rawm: plix siiet pa khraox. Kheu nawh ah,Pa prim: lheu: mhawm: heue"
Yesux Mawh Simiang Singaix Twah
Mathiex 12:1-8; Makux 2:23-38
Daux singaix twah tix singaix Nawh Cao: hu: preeng: kah daux ma: nghoxca, mai kawncau Nawh khankix caik sigleem: nghoxca, mai boi: tix ih daux tawm: taix tix heue.
Pharishie: tiblah ah nin:, "Yuh patix pex lai yuh pa ang khaw: mai beenli singaix twah?"
Mai Yesux pawk lox ah nin: kah kix, "Ang pex sax phat grawhgrawng: pa yuh Davit, yam nawh mai pwi pa ot tau mai nawh kied cairhawm: lie?
Grawhgrawng: yam laig nawh kah daux nyiiex Siyiex mai teei tix ih khaomun, mai tawx kah khawm: pwi pa ot tau mai nawh, pa ang pwi khaw: tix ih, lheu: khaing: cao: giex kaing: li nongnong:, lie?"
Mai Nawh Cao: baox ah nin: kah kix, "Kawn: kawn: pwi mawh Simiang singaix twah heue."
Yesux Pai: Moi: Pwi Pa Yum: Taix Tix Khawn:
Mathiex 12:9-14; Makux 3:1-6
Kah daux singaix twah tang:, tix singaix, Nawh Cao: laig kah daux nyiiex sidiex mai sidiex gau heue. Mai dee an: koe: pwi tix kaux pa taix khawn: dawm: nawh hoik yum: hoik kroh.
Pwi tiem: lai mai Pharishie: khankix, jhak tix yaox Nawh Cao:, sang cox Nawh kaw an: moi: singaix twah lie, ang cox lie, yuh kah mawx sonsang yaox dee deuh phimap kah Nawh Cao: heue.
Viang mawh kawx nan: Nawh Cao: tawng ceu pa keud kix, mai ah nin: kah pwi pa hoik yum: kroh taix tix, "Kaoh cung kah sinax tin: heue." Mai nawh kaoh cung heue."
Mai Yesux ah nin: kah kix, "Aux sang chawk pex, khaw: mai beenli tix yuh pa mhawm: singaix twah lie, phan: ang mawh nan: tix yuh laux lie? Khaw: tix taoh ju lie phan: ang mawh nan: khaw: tix pah yum: lie?"
Mai Nawh Cao: jhak vungviang kah piang kix khawm: uik, mai ah nin: kah kaw an:, "Nyeu taix maix heue," mai nawh yuh nan:, mai taix nawh deeh mhawm: heue.
Viang mawh nan: kix naog krax songrhawm: songrhi:, mai kix kum: paox tix grawng: kix sang pon yuh kah mawx kah Yesux heue.
Yesux Laug Kawncau Mausoi: Kao: Kaux Ra:
Mathiex 10:1-4; Makux 3:13-19
Daux bawg yam singaix an: khankix, Nawh Cao: haok kah gawng sonsang rawg bwan:, mai Nawh rawg bwan: kah Siyiex leeing: lang: sawm: heue.
Mai yam hoik riang praix, Nawh Cao: kok kawncau mausoi: Nawh khankix, mai Nawh laug kao: kaux ra: kah daux kix, pa sum: Nawh ceukaux kawncau Nawh pa ting.
Kix mawh Simon pa sum: Nawh Cao: ceukaux Petrux, mai pux nawh Andare, mai Yakop, mai Yohan, mai Philipux, mai Bathawlamie:.
Mai Mathiex, mai Thomax, mai Yakop kawn: Alaphie:, mai Simon pa kok mawh Zelut.
Mai Yudax pux Yakop, mai Yudax Isakariut pa mawh kaw pa tik pa tawx Nawh Cao: heue.
Yesux Sidiex Gau mai Cox Moi: Jhawm: Saux Kuceu
Mathiex 4:23-25
Nawh Cao: lih khaing: gawng tau mai kix, mai cung dee lung:, mai kawncau mausoi: Nawh haoh hun:, mai pwi tom: nie pa kaoh khaing: meung Yudax khawm: uik mai veng Yerusaliem mai praok rawm: sigrit sigra: veng Turux mai veng Sidom, khankix hoek tix nghiiet tix mhong: Nawh Cao:, mai sonsang kieh Nawh cox jhawm: saux jhawm: ngia kix moi: heue.
Mai kix pa kham: geu: kheu phi: pa seeing: pa brai: khankix pon tix moi: nyawm ot nyawm koe: heue.
Mai cub pwi haoh pwi hun: khawm: uik sawg tix teeh Nawh Cao:, kheu siawpsibrawm lih khaing: Nawh mai kieh kix moi: khawm: uik heue.
Grawng: Bwanson: mai Pa Kharhawm:
Mathiex 5:1-12
Mai Nawh Cao: jhak kah piang kawncau Nawh khankix, ah nin:, "Pex pa hot pa sibhawm: khankix koe: bwanson: heue, kheu Meung Siyiex mawh cie pex heue.
Pex pa cairhawm: yamin khankix, koe: bwanson: heue, kheu pex tag sang sak heue. Pex pa yiiem grai yamin, koe: bwanson: heue, kheu pex tag sang nyiah.
Yam pwi koeng kah pex, mai gwieh pex grheu: pex khaing: cub kix, mai salao pex, mai tik ceukaux pex awm: mawh pa caox, mawh kheu Kawn: kawn: pwi, pex koe: bwanson: heue.
Gauxrhawm: kah daux singaix an: heue, gauxrhawm: mai jaloh kah heue. Mawh kheu, jhak heue, bwanson: pex kied ting kah daux meung raoma: heue. Kheu tax du kix dix, hoik yuh awm: an: kah cao: jhai: khankix heue.
Viang mawh kawx nan: pex pa mawh cao: mi, tag kharhawm: kharhi: heue, kheu hoik pon pex pa nyawmrhawm: nyawmrhi: cie pex heue.
Pex pa hoik sak hoik naog yamin, tag kharhawm: kharhi: heue, kheu pex tag sang cairhawm: heue. Pex pa nyiah yamin, tag kharhawm: kharhi: heue, kheu pex tag sang khirhawm: mai yiiem grai heue.
Yam pwi khawm: uik yaw mai ah pa mhawm: pa mhiem: grawng: pex, pex tag kharhawm: kharhi: heue, mawh kheu tax du kix dix, hoik yuh awm: an: kah cao: jhai: pa ang mawh ang meh khankix heue.
Moh Kah Pwi Koeng: Khankix
Mathiex 5:38-48; 7:12
"Viang mawh nan: Aux krai kah pex pa mhong: khankix, moh kah pwi pa koeng kah pex, mai yuh pa mhawm: son kix pa koeng kah pex heue.
Nawb bwan: kah pwi pa lawg kah pex, rawg bawn:, son kix pa yuh pa ang khaw: ang jiet kah pex heue.
Kah kaw pa simang: sibax maix tix plak, tang: plak kawx, baox tawx tix yaox heue. Mai kah kaw pa teei prux fua: maix, sibex maix kawx, paw kieh paw thiang: tix tawx kah heue.
Tawx kah pwi pa rawg pa mhaing: kah maix kukaux, mai kaw pa teei kraung cie maix, paw lai deeh rawg deeh mhaing: kix khaing: nawh heue.
Mai awm: simie pex pwi yuh kah tix, pex kawx, yuh awm: an: kah kix heue.
Mai phan: pex moh kah pwi pa moh kah pex khaing:, pex tag koe: bwanson: yuh kah mawx? Mawh kheu pwi ting map ting grham: khankix kawx, deeh moh kah pwi pa moh kah kix heue.
Mai phan: pex yuh pa mhawm: kah pwi pa yuh pa mhawm: kah pex khaing:, pex tag koe: bwanson: yuh kah mawx? Mawh kheu pwi ting map ting grham: khankix kawx, yuh awm: an: heue.
Mai phan: pex tawx yaog yaing kah pwi, pa keud pex tix deeh pon khaing:, pex tag koe: bwanson: yuh kah mawx? Mawh kheu pwi ting map ting grham: khankix kawx, tawx yaog yaing kah paox pwi ting map ting grham: khankix, tix deeh pon awm: pa tawx kix heue.
Viang mawh kawx nan: moh kah pwi pa koeng kah pex, mai yuh pa mhawm:, mai tawx yaog yaing paw keud tix deeh pon tidtix, mai bwanson: pex tag kied ting kied lhaong:, mai pex tag mawh kawn: Kaw pa ting pa lhaong: khaing: khawm: uik heue. Mawh kheu Nawh yuh bwan: yuh son kah pwi pa ang tawng bwan: tawng son mai kah pwi caox khankix heue.
Mawh kheu nan:, awm: Keeing: pex koe: krax caoxrhawm: caoxrhi:, pex kawx kieh koe: krax caoxrhawm: caoxrhi: heue.
Prawng Ca: Kah Pwi Tang: Kaux
Mathiex 7:1-5
Paw prawng paw ca:, yuh kah mawx son ang pex sang hoek krax prawng krax ca:. Paw prawng phimap pwi, mai pex tag ang hoek krax prawng phimap heue. Pluat ploi: phimap kah pwi, mai pex tag hoek krax pluat ploi: heue.
Tawx kah pwi, mai tag sang tawx kah pex pa tong: pa tiag mhawmmhawm:, pa hoik yeen, mai pa hoik yungyiang:, mai pa kreh, pwi tag sang tawx kah naok pex heue. Mawh kheu pex tong: pex tiag tix tawx kah pwi tang: kaux miex ding, tag sang baox deeh tong: deeh tiag tix tawx kah pex yuh nan: heue."
Nawh Cao: kawx krai lox phektem: pa ah nin: kah kix, "Pwi dug ngai: chix jhi:, pwi pa dug ngai: yaox krax lie? Kiex khawm: ra: tag rau daux o: ang mawh lie?
Kawncau ang lheu: ting khaing: sara cao:gau tix, viang mawh kawx nan: kawncau kukaux, yam hoik grum tawng, nawh tag awm: sara cao: gau tix heue.
Mai yuh kah mawx maix jhak kuh ngai: pa iak daux ngai: puxaik maix, mai ang keud grawhgrawng: nuk pa koe: daux ngai: tokaux tix?
Phan: ang mawh nan:, maix chix ah kah puxaik maix,Puxaik eue, kieh aux teei tix tik kuh ngai: maix, yam maix ang yaox nuk pa koe: kah daux ngai: tokaux tix, yuh kah mawx? Pwi pie pwi lhen: eue, teei tix tik nuk pa koe: daux ngai: maix kah: ha:, mai maix tag sang yaox mhawmmhawm:, sonsang teei kuh pa koe: daux ngai: puxaik maix heue.
Grawng: Khaox mai Plix
Mathiex 7:16-20; 12:33-35
Grawhgrawng: nawh, khaox pa mhawm: pa plix plix pa ang mhawm: ang koe: tix khaox kawx, mai khaox pa ang mhawm: pa plix plix pa mhawm:, ang koe: tix khaox kawx heue.
Mawh kheu chix tawng khaox ku khaox kah plix nawh heue. Grawhgrawng: nawh, pwi ang sax pieh plix ruh khaing: pang: kat, mai ang sax pieh plix siiet khaing: katsai: brex.
Pwi pa mhawm: viex ceu pa mhawm: lih khaing: daux rhawmrhi: nawh dee deuh pa mhawm:, mai pwi pa caox viex ceu pa caox lih khaing: dee deuh pa caox heue. Kheu jheeh chix krai ceu pa koe: daux rhawm: tom: naog kreh heue.
Pwi Sum: Nyiiex Ra: Kaux
Mathiex 7:24-27
"Pex lai kok Aux,Simiang eue, Simiang eue, mai ang yuh ceu pa krai Aux khankix yuh kah mawx?
Pwi kukaux daux pwi pa hoek kah Aux, pa mhong: gumlox Aux, mai hawt tix yuh khankix, Aux tag jhi: pex yaox nawh awm: kaw pa yuh kah mawx.
Nawh awm: pwi pa sum: nyiiex tix lhang:, pa kaong: tom: raux mai yuh num: kah piang simaox, mai yam haok hwan: rawm:, mai chun: kah nyiiex an:, ang chix kieh nawh yungyiang:, mawh kheu hoik sum: nyiiex an: kah piang simaox heue.
Viang mawh nan: pwi pa mhong: lox Aux, mai ang hawt tix yuh, tag awm: pwi pa sum: nyiiex nawh kah piang tiex mai ang koe: num:, mai yam chun: rawm: nawh, nyiiex an: goh daux rawm: dom: mawx dom: an:, mai pa laux pa leeing: nyiiex an: kied ting heue."
Yesux Pai: Moi: Jhawm: Saux Siliex Cao: Kaing: Naing
Mathiex 8:5-13
Khaix hoik sidiex gau Nawh Cao:, kieh pwi khankix mhong: lox ceu pa krai Nawh, Nawh laig kah daux veng Kapeniom heue.
Mai siliex cao: giex kaing: naing tix kaux, pa kied moh nawh, saux dex sang yum:.
Mai yam nawh mhong: grawhgrawng: Yesux, nawh ploi: kuad song: pwi Yudax khankix hu: rawg mhaing: kah Nawh Cao:, nhie: Nawh hoek tix taoh siliex nawh heue.
Mai yam hoek kix kah Yesux, kix khyox khaw: Nawh Cao: mhawmmhawm: ah nin:, "Nawh keung: tix pon, pa yuh Maix ceu in: son nawh heue.
Kheu moh nawh ceu ex, nawh hoik yuh nyiiex sidiex son ex heue."
Mai Yesux hu: tau mai kix, mai yam hoek Nawh Cao: dee ang awt singai khaing: nyiiex nawh, cao: giex kaing: naing an: ploi: paoxgrawm nawh hu: tix ah nin: kah Nawh Cao:, "Simiang eue, paw vi baox nyhap rhawm: Maix, kheu ang aux keung: tix kieh Maix hoek kreed greem: braux nyiiex aux.
Mawh kheu nan: aux keud tokaux tix ang keung: tix hoek kah Maix, viang mawh nan: pie tawx Maix lox khaing:, mai siliex aux tag moi: heue.
Kheu aux mawh pwi ot greem: simiang kawx, aux koe: pwi naing greem: aux heue. Phan: aux nhie: tix kaux hu:, nawh hu:, mai phan: aux nhie: tang: kaux hoek, nawh hoek heue. Mai phan: aux nhie: siliex aux yuh ceu in:, nawh yuh heue."
Mai yam mhong: Yesux ceu an: khankix, Nawh daox deng: kah nawh, mai veeh tix jhak cub pwi haoh pwi hun: pa hawt khaix Nawh Cao: mai ah nin:, "Aux krai kah pex, ang Aux sax yaox pwi pa yumrhawm: nie ding nie dod kah daux pwi Isarilax heue."
Mai yam pwi pa ploi: cao: giex kaing: naing khankix deeh hoek kah nyiiex, kix yaox uik moi: siliex an: heue.
Yesux Kieh Kawn: Miexmai: Deeh Kaoh Im:
Khaix singaix an: pasax, Nawh Cao: hu: kah veng tix veng pa kok mawh Na-i-nax, mai kawncau Nawh khankix, mai cub pwi haoh pwi hun: hu: tau mai Nawh Cao: heue.
Yam Nawh Cao: hoek dex kah siviex veng, jhak heue, kix klawm: pwi yum: lih tix kaux, pa mawh kawn: miex nawh tix kaux khaing:, mai miex nawh mawh miexmai:, mai pwi veng an: tom: nie ot tau mai kiex heue.
Yam yaox Simiang kah bun: an: Nawh Cao: caoxrhawm: kah kiex, mai ah nin: kah kiex, "Paw vi yiiem heue."
Mai Nawh Cao: hoek mai teeh kah lawng: kah klawm: an:, mai kix pa klawm: nawh cung kaog mhawmmhawm: heue. Mai Nawh Cao: ah nin:, "Sinaw eue, Aux krai kah maix, kaoh heue."
Mai kaw pa hoik yum: an: kaoh ngawm mai jah tix sikah heue. Mai Nawh Cao: teei nawh tawx kah miex nawh heue.
Mai pwi khawm: uik lhat graung kah, mai kix yaogyaw Siyiex ah nin:, "Cao: Jhai: pa ting hoik lih sinax ex tix kaux, mai Siyiex hoik hoek tix jhak pwi cie Nawh heue."
Mai lox grawhgrawng: pa yuh Nawh Cao: ceu in:, tah hu: daux meung Yudax khawm: uik, mai sivie tan: kudauh kudee heue.
Yohan Cao: Com Rawm: Ploi: Kawncau Tix Hu: Kah Yesux
Mathiex 11:2-19
Mai kawncau Yohan khankix krai grawhgrawng: ceu in: khawm: uik heue.
Mai Yohan kok kawncau tix ra: kaux, ploi: kiex hu: kah Yesux, kieh chawk ah nin:, "Maix mawh Kaw pa tag sang hoek an: lie, phan: ang mawh nan: ex tag sang krox tix yaox son tang: kaux lie?"
Mai yam pwi khankiex hoek kah Nawh Cao: kiex ah nin:,Yohan cao: baptis11 ploi: yiex hoek kah Maix, sonsang chawk ah nin:, `Maix mawh Kaw pa tag sang hoek an: lie, phan: ang mawh nan: ex tag sang krox tix yaox son tang: kaux lie?:"
Kah daux bawg yam nari an:, Nawh Cao: cox jhawm: saux jhawm: ngia tom: nie ceu, mai jhawm: saux preng khankix, mai pa laig phicaox phicaig khankix, mai Nawh Cao: cox pwi dug ngai: haoh hun:, kieh deeh chix yaox heue.
Mai Yesux pawk lox ah nin: kah kiex, "Pax hu: mai krai kah Yohan grawhgrawng: ceu pa mhong: pa yaox pax, pwi dug ngai: pon tix deeh yaox, pwi laux caong pon tix deeh hu:, pwi sipawg deeh kieh singax, pwi lheet yhaok deeh chix mhong:, mai pwi pa hoik yum: deeh kieh kaoh im:, mai sidiex gau kah pwi hot pwi sibhawm: kieh mhong: lox bwan: gauxrhawm: gauxrhi: heue.
Mai pwi mawx ang ah, kaw pa ang yaox dee sideeing dee lauxrhawm: kah daux Aux, koe: bwanson: heue."
Mai khaix hoik ing: kawncau Yohan khankiex, Nawh Cao: jah tix sidiex gau grawhgrawng: Yohan, kah cub pwi haoh pwi hun: khankix, "Pex lih hu: daux tiag daux tu tix jhak patix? Pex hu: jhak gawng: priem pa phlu: bhaung: mai vuhvied lie?
Phan: ang mawh nan: pex lih hu: sonsang yaox patix? Hu: sonsang yaox pwi pa ceep kraung pa awn: lie? Jhak heue, kix pa ceep kraung pa jiet mhawm:, mai pa ih priex preem pa nyawm, ot kah daux nyiiex simiang ting khankix heue.
Phan: ang mawh nan: pex lih hu: sonsang yaox patix? Lih hu: sonsang yaox cao: jhai: lie? Mawh heue, Aux krai kah pex, mawh pa lheu: khaing: cao: jhai: heue.
In: mawh kaw pa hoik tiem: grawhgrawng: nawh ah nin:, Jhak heue, Aux ploi: kawncau Aux hu: sivoe pakngai: Maix, pa tag cox krax Maix sivoe Maix heue
Aux krai kah pex, kah daux pwi pa keh khaing: bun: khawm: uik, pa lheu: ting khaing: Yohan cao: baptis13 ang koe: tix kaux kawx, viang mawh kawx nan: kaw pa nie iak khaing: paox tix kah daux Meung Siyiex lheu: ting khaing: nawh heue.”
Mai pwi khawm: uik, khawm: pwi koh mau khankix, yam kix mhong: kix yaogyaw pa rah pa see Siyiex, mai baptis C kah daux been krax baptis Yohan heue.
Viang mawh kawx nan: Pharishie: khankix mai cao: tawng cao: prawng lai been khankix tik pa keud Siyiex son kix, mai ang baptis E daux tawm: taix nawh heue.
Ceu pwi ju in:, Aux sang phektem: awm: patix? mai kix sang awm: pa yuh kah mawx?
Kix awm: kawn: nyawm khankix pa ngawm daux lah, mai kok paox tix ah nin:,Ex hoik phlu: pi: son pex, mai pex ang graoh ang thiao:, ex hoik yiiem riag, viang mawh kawx nan:, pex ang yiiem ang grai heue
Kheu Yohan cao: baptis ang ih khaomun, mai ang nyaux rawm: plix siiet mai hoek kawx, pex ah,Kaw in: koe: phicaox heue
Kawn: kawn: pwi ih nyaux mai hoek kawx, pex ah,Jhak heue, Kaw in: cha nie luan ih, mai cha nie luan nyaux rawm: plix siiet, mai yuh paox yuh pie kah pwi pa koh mau mai pwi ting map ting grham: khankix heue
Viang mawh kawx nan: pingnya cuyi: hoik rah hoik see kah daux kawnpraix tix khawm: uik heue."
Bun: Tix Kaux Groi: Sidauh bhawng: Kah Caong Nawh Cao:
Mai Pharishie: tix kaux nhie: Nawh Cao: hoek tix sawm: tau mai tix, mai Nawh Cao: laig kah daux nyiiex Pharishie: an:, ngawm neung dee sawm: heue.
Mai jhak heue, bun: tix kaux ot kah daux veng an:, pa mawh pwi ting map ting grham:, mai yam mhong: nawh grawhgrawng: Nawh Cao: ngawm neung kah daux nyiiex Pharishie: an:, nawh viex sidauh bhawng: kah daux kawng: simaox paing.
Mai nawh cung plak khaix, dex caong Nawh Cao:, mai yiiem grai mai kieh rawm: ngai: tix cod piang caong Nawh, mai teei hauk kaing: tix awt kah, mai ngheut caong Nawh Cao:, mai teei sidauh bhawng: an: groi kah heue.
Yam Pharishie: pa hoik kok Nawh Cao: yaox grawng: an:, nawh keud ah nin: kah daux tokaux tix, "Phan: Pwi in: mawh Cao: Jhai:, Nawh tee: hoik tawng grawng: bun: pa teeh Nawh in:, mawh pwi pa yuh kah mawx, grawhgrawng: nawh mawh bun: ting map ting grham: heue."
Mai Yesux ah nin: kah nawh, "Simon eue, Aux koe: ceu krai kah maix ceeix." Mai kaw an: ah nin:, "Sara Cao: eue, krai ha:."
Nawh Cao: baox krai, "Cao: tawx yaog yaing mau tix kaux, koe: pwi ceuk kah nawh ra: kaux. Tix kaux ceuk kah nawh denari phwan: yieh (500) plah, mai tang: kaux ceuk kah nawh tiphwan: (50) plah heue.
Mawh kheu ang kiex koe: tix tawx ceuk an:, nawh pluat ploi: ceuk kiex khawm: ra: kaux heue. Kah daux kiex ra: kaux, mawh kaw pa yuh kah mawx, pa nie lheu: moh kah kaw an:?"
Simon baox pawk lox mai ah nin:, "Aux ce: kaw pa pluat nawh ceuk pa nie ting an:, mawh pa nie lheu: moh nawh heue." Mai Nawh Cao: baox ah nin: kah nawh, "Pa keud pa prawng maix hoik caw heue."
Mai Nawh Cao: deeh veeh kah bun: an:, ah nin: kah Simon, "Yaox maix bun: in: lie? Yam laig Aux kah daux nyiiex maix, maix ang tawx rawm: khoek son caong Aux, viang mawh nan: bun: in: hoik kieh rawm: ngai: nawh cod piang caong Aux, mai awt kah hauk kaing: tix heue.
Maix ang ngheut kah Aux, viang mawh kawx nan:, jah yam laig Aux tin:, tom: yamin, bun: in:, ngheut caong Aux ang jud ang jai heue.
Maix ang groi rawm:bee kah kaing: Aux, viang mawh nan:, bun: in:, hoik groi sidauh bhawng: kah caong Aux heue.
Mawh kheu nan: Aux krai kah maix, phimap phigrham: nawh pa haoh pa hun:, hoik pluat ploi:. Mawh kheu nawh hoik moh tom: nie. Viang mawh kawx nan:, pwi pa pluat ploi: ceeix ngie, moh ceeix ngie heue."
Mai Nawh Cao: ah nin: kah bun: an:, "Hoik pluat hoik ploi: phimap maix heue."
Mai kix pa ngawm neung tix sawm: tau mai Nawh Cao:, keud tix ah nin: kah daux tokaux tix, "Kaw in: mawh mawx? Viang mawh phimap kawx, Nawh khex ploi: heue."
Mai Nawh Cao: baox ah nin: kah bun: an:, "Krax yumrhawm: yumrhi: maix hoik taohmaix, hu: mhawmmhawm: heue."
Bun: Khankix Khankheu: Kah Yesux
Khaix an: ang awt rheung: Nawh Cao: hu: lailing tix sidiex gau, kah daux yaong: daux veng khankix, mai viex lox gauxrhawm: gauxrhi: pa dex pa dawd mai Meung Siyiex, mai kawncau Nawh kao: kaux ra:.
Mai bun: tiblah pa Nawh Cao: hoik kieh phicaox lih, mai hoik cox jhawm: saux jhawm: ngia kix moi: kawx ot tau mai Nawh heue. Marix pa kok mawh Magadalax, pa Nawh Cao: hoik kieh phicaox lih khaing: aliah kaux,
mai Yoanax moeng Khunzax, pa mawh kawncau Herut, mai Susannax, mai tang: kaux tom: nie teei kraung cie kix, mai khan: kheu: kah Nawh Cao: mai pwi pa hu: tau mai Nawh heue.
Lox Phektem: Grawng: Pwi Ruat Simie
Mathiex 13::1-9; Makux 4:1-9
Yam an: cub pwi haoh pwi hun: khrawm: paox tix kaoh khaing: ku veng, hoek kah Nawh Cao:, mai Nawh sidiex gau kix kah lox phektem: ah nin:,
"Pwi ruat simie hu: tix ruat simie cie tix heue. Mai yam rhuat nawh simie tiblah cod kah dex krax, mai pwi dig kah caong tix, mai sim: raoma: khankix sut tix ih simie an: heue.
Mai simie tiblah cod kah piang simaox, mai yam kuah, mawh kheu ang leet tom: fit kroh hu: heue.
Mai simie tiblah cod kah sinax pang: kat, mai pang: kat an: ting tau mai kix, tom: kheem: gut kix.
Mai simie tiblah cod kah dee mhawm: tiex, mai ting tom: plix plix tiyieh son heue." Mai yam krai Nawh Cao: grawng: ceu in: khankix, Nawh kok yo ah nin:, "Kaw pa koe: yhaok tix mhong: kieh nawh mhong: heue."
Grawng: Teei Lox Phektem: Sidiex
Mathiex 13:10-17; Makux4:10-12
Mai kawncau Nawh khankix chawk Nawh Cao: kah grawng: dee bleeh lox phektem: in: heue.
Mai Nawh Cao: baox ah nin:, "Hoik tawx kieh pex tawng grawhgrawng: pa raux pa mox pa dex dawd mai Meung Siyiex, viang mawh kawx nan:, pa kawn deuk khankix tag krai kah lox phektem: kah kix, yuh kah mawh kix yaox kawx ang chix yaox, mai kix mhong: kawx ang chix tawng heue.
Pa Krai Dee Bleeh Grawng: Pwi Raut Simie
Mathiex 13:18-23; Makuxc 4:13-20
Dee bleeh lox phektem: an: mawh nin:, simie an: mawh gumlox Siyiex heue.
Mai kix pa cod dex krax, mawh kix pa hoik mhong:, mai khaix an: phicaox hoek mai teei lox bwan: khaing: daux rhawm: kix, yuh kah mawx son ang kix sang yumrhawm: mai hoek krax taoh heue.
Mai kix pa cod kah piang simaox, mawh kix pa hoik mhong:, mai gauxrhawm: rieb tix teei lox bwan:, mai kix ang koe: riah, yumrhawm: ngie tivud khaing:, mai yam hoek bawg yam pa nyaw pa glaw:, kix deeh laux deeh leeing: heue.
Mai pa cod sinax pang: kat khankix, mawh kix pa hoik mhong:, mai yam hu: kix krax, pa khirhawm: khirhi: mai sinngao, mai ceu pa gauxrhawm: gauxrhi: pa dex pa dawd mai ju in:, kheem: gut kix, tom: ang chix mhawm: plix heue.
Mai pa koe: kah daux dee mhawm: tiex, mawh kix pa rah pa mhawm: rhawm: pa hoik mhong: lox bwan:, mawh kix pa giex tom: sied, mai chix gun rhawm: tix plix plix heue.
Kawk Ngu Pa EEn: Greem: Phliex
Makux 4:21-35
"Mai pwi mawx ang ah, yam hoik tok nawh kawkngu, ang sax tawb kah aw:, lheu: khaing: an: ang sax sau: greem: ku:, viang mawh nan: nawh deuh, kah piang dee deuh kawkngu, sonsang yaox kix pa laig tan: pa riieng nawh heue.
Mawh kheu pa hoik mox ang koe: tix ceu kawx, pa tag ang kieh sidawng:, Lheu: khaing: an: ang koe: tix ceu kawx pa hoik glip, pa tag ang tawng, ang hoe: heue.
Mawh kheu nan:, mhong: pex yuh kah mawx rien rhawm: tix kah, kheu kaw pa hoik koe:, tag sang baox tawx kah nawh heue, mai kah kaw pa ang koe:, viang mawh pa nawh ce: nawh hoik koe: kawx, tag sang teei khaing: nawh heue."
Miex mai Pux Yesux Khankix
Mathiex 12:46-50; Makux 3:31-35
Mai miex Nawh Cao: mai pux Nawh khankix hoek kah Nawh, viang mawh nan: kix ang pon hoek dee ot Nawh Cao:, kheu kied sikhox cub pwi haoh pwi hun: heue.
Mai pwi krai kah Nawh Cao: ah nin:, "Miex Maix mai pux Maix khankix cung plak prai, simie tix yaox Maix heue."
Viang mawh kawx nan: Nawh Cao: pawk lox mai ah nin: kah kix, "Miex Aux mai pux Aux khankix, mawh inkix, pa mhong: gumlox Siyiex mai hawt tix yuh heue."
Yesux Kieh Bhaung: Ting mai Pukpak Rawm: Yiien Yawg
Mathiex 8:23-27; Makux 4:35-41
Kah daux singaix an: khankix tix singaix Nawh Cao: laig kah daux reu, tau mai kawncau Nawh khankix, mai Nawh Cao: ah nin: kah kix, "Ex hu: plak toi: rawm: nhawng: heue." Mai kix vai: hu: heue.
Yam kawn: hu: kix Nawh Cao: laig it, mai bhaung: ting lih tix phlu: kah piang nhawng:, mai rawm: jah tix naog kah daux reu, mai kix dex sang hoek krax laux krax leeing: heue.
Mai kix hoek kah Nawh Cao: so: Nawh kieh siduad, ah nin:, "Simiang eue, Simiang eue, ex dex sang laux heue." Nawh Cao: kaoh mai ah kah bhaung: mai pukpak rawm:, mai kix yiien: yawg tix heue.
Mai Nawh Cao: chawk ah nin: kah kix, "Krax yumrhawm: pex koe: dee mawx?" Viang mawh nan: kix lhat, mai daox kah, kix tom: ah nin: kah paox tix tix kaux hoik tix kaux, "Kaw in: mawh mawx, Nawh tawx lox kah bhaung: mai rawm: khankix kawx, kix nghiiet lox Nawh heue."
Yesux Pai: Moi: Pwi Pa Laig Phicaox Tix Kaux
Mathiex 8:28-34; Makux 5:1-20
Mai kix hoek kah meung Gadarax, pa koe: praok rawm: sidieb meung Galilie:.
Mai yam hoik lih hu: Nawh Cao: kah piang caong raog, pwi tix kaux pa hoik lih khaing: daux veng hoek tix rieb Nawh, kaw an: phicaox laig kah, mai ang ceep kraung rheung: nyao, ang ot daux nyiiex, viang mawh nan: nawh ot kah daux simeeig khankix heue.
Mai yam yaox nawh Yesux, nawh riag yo, mai nawh krub sivoe Nawh Cao:, kok lox sinum ah nin:, "Yesux, Kawn: Siyiex pa ting pa lhaong: khaing: khawm: uik eue, aux koe: pa yuh mai Maix ceu patix? Aux khyox khaw: kah Maix paw vi tuktieak tukte: kah aux liak."
Kheu Nawh Cao: hoik nhie: phi: pa seeing: pa brai: an: lih khaing: pwi an: heue. Kheu phi: an: hoik giex nawh tom: nie bawg, mai pwi hoik kieh pau nawh, mai phyawk nawh kah ceng mai hoik sau: gang: kah nawh heue. Viang mawh nan: nawh rud khankix dud, mai phicaox an: grheu: nawh hu: ot kah daux tiag daux tu heue.
Mai Nawh Cao: chawk nawh ah nin:, "Ceukaux maix kaux patix?: Mai nawh deeh ah nin:, "Mawh Liecong14 heue." Mawh kheu hoik laig phicaox kah nawh tom: nie, nawh tom: ah nan:.
Mai kix khyox khaw: kah Nawh Cao:, yuh kah mawx son ang Nawh sang nhie: kix lih hu: laig kah daux, daux dee kied raux heue.
Kah dee an: koe: cub lig pa kied hun: sawm: kah gawng tan: heue. Mai kix khyox khaw: kah Nawh Cao: yuh kah mawx, son Nawh sang kieh kix laig kah daux lig khankix, mai Nawh Cao: tawx akhwang: kah kix heue.
Mai phicaox khankix lih khaing: daux pwi an:, mai laig kah daux lig khankix, mai cub lig an:, to: lih kah dee nie rieh nie jun: jee, laig kah daux nhawng:, mai nok kah rawm: yum: heue.
Mai pwi liang lig khankix, yam kix yaox ceu pa hoik mawh an:, to: hu: mai krai grawhgrawng: ceu an: kah daux yaong: daux veng khankix heue.
Mai pwi khankix hu: tix jhak grawhgrawng: ceu pa hoik mawh an:, mai yam kix hoek kah Yesux, mai yaox pwi pa phicaox khankix hoik lih khaing: nawh an:, ngawm tan: liep caong Yesux, ceep krang mai hoik deeh mhawm:, kix lhat kah heue.
Mai kix pa hoik yaox, krai kah pwi khankix, grawhgrawng: pa cox mhawm: kah kaw pa laig phicaox an: yuh kah mawx.
Pwi meung Gadarax khawm: uik mai pwi pa ot sivie tan:, khyox khaw: kah Nawh Cao: nhie: Nawh lih hu: khaing: kix, mawh kheu kix kied lhat kied graung kah. Mai Nawh Cao: deeh laig kah daux reu mai deeh ing: heue.
Pwi pa hoik laig phicaox glangka: an:, rawg kah Nawh Cao: tix ot tau mai Nawh, viang mawh nan: Nawh Cao: nhie: nawh hu: ah nin:,
"Ing: kah nyiiex maix, mai krai kix mhong: grawhgrawng: ceu pa ting pa lhaong: pa caoxrhawm: Siyiex mai yuh bwanson:, son maix heue." Mai kaw an: lih hu: mai krai grawhgrawng: ceu pa ting pa lhaong: pa hoik yuh Yesux son nawh, kah daux veng an: khawm: uik heue.
Kawn: Bun: Ya-i-rux mai Kawn: Bun: Pa Teeh Kraung Ceep Yesux
Mathiex 9:18-26; Makux 5:22-43
Mai yam deeh ing: Yesux cub pwi haoh pwi hun: khankix rieb Nawh Cao:, kheu kix khawm: uik krox son Nawh heue.
Mai jhak heue, pwi tix kaux pa kaux YaIrux, pa mawh pwi giex kaing: nyiiex sidiex tix kaux, hoek mai krub dex caong Yesux, mai khyox khaw: nhie: Nawh Cao: hoek kah nyiiex tix heue.
Mawh kheu kawn: bun: nawh pa koe: ngie tix kaux khaing:, pa koe: ju dex kao: num ra:, it mai uik dex sang yum: heue. Yam hu: Nawh Cao: cub pwi haoh pwi hun: khankix nyheen: kah Nawh heue.
Mai bun: tix kaux pa hoik koe: jhawm: saux pa lih nham: kao: num ra:, pa hoik cai:, can pa koe: kah nawh khawm: uik, kah pwi chix sidauh khankix, viang mawh nan:, nawh ang vai ceeix kawx,
hoek plak khaix Nawh Cao: mai teeh caong kraung ceep Nawh, mai jhawm: saux pa lih nham: nawh, hit dom: mawx dom: an: heue.
Mai Yesux ah nin:, "Mawx pa teeh kah Aux?" Yam pwi khawm: uik thiang: grawng: an:, Petrux mai kix pa ot tau mai nawh khankix, ah nin:, "Simiang eue, cub pwi haoh pwi hun: khankix nyheen: kah Maix, tom: uik tip, mai Maix lai kawn: chawkMawx pa teeh kah Aux?: lie?"
Viang mawh nan: Yesux baox ah nin:, "Pwi tix kauxkaux hoik teeh kah Aux, kheu Aux tawng hoik lih siawpsibrawm khaing: Aux heue."
Mai yam bun: an: tawng grawhgrawng: nawh ang pon tix mox, nawh siyaung: mai hoek tix krub sivoe Nawh Cao:, sivoe pwi khawm: uik, krai mawh kheu grawng: patix, nawh hoik teeh kah Nawh Cao:, mai grawhgrawng: hoik moi: tix dom: mawx dom: an: heue.
Mai Nawh Cao: ah nin: kah nawh, “kawn: bun: Aux eue, krax yumrhawm: maix hoik kieh maix moi:, hu: mhawmmhawm: heue.”
Yam kawn: sikah, Nawh Cao: pwi tikaux hoek khaing: nyiiex pwi giex kaing: nyiiex sidiex mai ah nin:, "Kawn: bun: maix hoik yum: heue. Paw baox laklheut kah Sara Cao: Gau heue."
Viang mawh nan:, yam mhong: Yesux lox an:, Nawh Cao: ah nin:, "Paw vi lhat yumrhawm: khaing: heue, mai nawh tag sang deeh mhawm:."
Mai yam hoek Nawh Cao: kah nyiiex an:, Nawh ang kieh pwi tix kaux kawx laig tau mai Tix, lheu: khaing: Petrux, mai Yohan, mai Yakop, mai miex keeing: nyawm bun: an: khaing: heue.
Mai pwi khawm: uik yiiem riag yiiem yo, son nyawm bun: an:, viang mawh nan:, Nawh Cao: ah nin: kah kix, "Paw yiiem paw grai, mawh kheu bun: in: ang yum:, mawh ngie laig it nawh khaing:."
Mai kix nieb yuh pa ang nab ang yam nyiah kah Nawh Cao:, kheu tawng kix hoik yum: bun: an: heue.
Viang mawh nan: Nawh Cao: teei taix kawn: bun: an:, mai kok ah nin:, "Kawn: nyawm bun: eue, kaoh heue."
Mai khwan: nawh deeh hoek mai kawn: bun: an: kaoh dom: mawx dom: an:. Mai Nawh Cao: nhie: tawx pa ih pa un: tix ceu ceu kah nawh heue.
Mai miex keeing: nawh kied daox deng: kah heue. Nawh Cao: tawm: kiex, son ang sang krai grawhgrawng: pa hoik yuh an:, kah pwi tix kaux kawx heue.
Yesux Ploi: Kawncau Kao: Kaux Ra: Hu: Sidiex
Mathiex 10:5-15; Makux 6:7-13
Mai Nawh Cao: kok kawncau Nawh kao: kaux ra: khrawm: paox tix, mai tawx kix siawpsibrawm kah piang phicaox khawm: uik, mai sonsang pon tix cox jhawm: saux jhawm: ngia moi: heue.
Mai Nawh Cao: ploi: kix hu: sidiex gau grawhgrawng: Meung Siyiex, mai sonsang cox pwi pa koe: jhawm: saux jhawm: ngia moi: heue.
Mai Nawh Cao: ah nin: kah kix, "Paw vi viex tidtix hu:, son yam hu: pex daux krax, paw vi viex khaox gix, paw viex bau:, paw viex khaomun, paw viex mau, sibex kawx paw vi viex ra: pheen: heue.
Mai pex laig kah daux nyiiex mawx ang ah, ot tan: tom: lih hu: pex.
Mai pwi miex ding ang ah, pa ang rieb tix teei pex, yam lih hu: pex khaing: veng an:, khruah phawng: tiex khaing: caong pex, sonsang mawh mhai: sakse piang kix heue."
Mai kix lih hu: lailing daux yaong: daux veng khankix, sidiex gau lox bwan: gauxrhawm: gauxrhi:, mai cox jhawm: saux jhawm: ngia moi: kudauh kudee heue.
Grawng: Yum: Yohan Cao: Com Rawm:
Mathiex 14:1-12; Makux 6:14-29
Yam mhong: simiang Herut grawhgrawng: ceu pa hoik mawh khawm: uik, nawh keud ang doh daox kah, mawh kheu pwi tiblah ah Yohan hoik deeh kaoh im: khaing: krax yum:.
Mai tiblah ah Eliyax hoik lih hoek, mai tang: kaux khankix ah, cao: jhai: phaoka: dix hoik deeh kaoh tix kauxkaux heue.
Viang mawh nan: Herut ah nin:, "Aux hoik kid kaing: Yohan, viang mawh nan:, kaw pa mhong: aux grawhgrawng: ceu in: khankix mawh mawx?" Mai nawh sawg sonsang pon tix yaox Nawh Cao: heue.
Yesux Tawx Pwi Phwan: Rheng: Ih Priex
Mathiex 14:13-21; Makux 6:30-44; Yohan 6:1-14,
Mai yam deeh hoek, kawncau khankix kix krai kah Nawh Cao: grawhgrawng: ceu pa hoik yuh kix. Mai Nawh Cao: viex kix lih kah veng tix veng, pa kok mawh Biesedax heue.
Viang mawh kawx nan: cub pwi haoh pwi hun: khankix, tawng grawng: an:, mai hawt Nawh Cao:. Mai Nawh Cao: rieb kix mai krai kix mhong: grawhgrawng: Meung Siyiex, mai Nawh cox kix pa koe: jhawm: saux jhawm: ngia moi: heue.
Yam dex sang uik pon singaix, plak bo, kawncau Nawh kao: kaux ra: hoek mai ah nin: kah Nawh Cao:, "Ploi: cub pwi haoh pwi hun: khankix hu: heue, yuh kah mawx son kix sang hu: laig kah daux yaong: khankix pa koe: sivie sivheng: tin:, tix it tix tum, mai sonsang pon pa ih pa un:, mawh kheu ot ex daux; tiag daux tu heue."
Viang mawh kawx nan: Nawh Cao: ah nin: kah kix, "Pex tawx pa ih son kix heue." Mai kix ah nin:, "Ang ex koe: lheu: khaing: khaomun phwan: lon: mai kax ra: mu: phan: ex ang hu: liag son pwi in: khawm: uik.
Kheu kix simex dex koe: phwan: rheng: heue." Mai Nawh Cao: ah nin: kah kawncau Nawh khankix, "Kieh kix ngawm daux cub, pa koe: been tiphwan: (50) kaux tix cub heue."
Mai kix yuh awm: hoik nhie: kix, mai kieh pwi khawm: uik ngawm heue.
Mai Nawh Cao: teei khaomun phwan: lon:, mai kax ra: mu: an:, mai maong kah raoma:, mai Nawh nawb bwan: kah khankix, mai sivit tix tawx kah kawncau Nawh khankix, sonsang viex kix tix tawx kah pwi khankix heue.
Kix ih mai sak khawm: uik. Mai deeh pon tix khrawm: pa lheu: khaix kix, pa max pa phawng: kao: phliex ra: heue.
Petrux Kham: Grawng: Mawh Yesux Cao: Khrit
Mathiex 16:13-19; Makux 8:27-29
Yam Nawh Cao: rawg bwan: ot tau mai kawncau Tix khankix nongnong:, Nawh chawk kix ah nin:, "Cub pwi haoh pwi hun: khankix dhua: Aux mawh mawx?"
Mai kix pawk lox ah nin:, "Tiblah ah mawh Yohan cao: baptis15, viang mawh nan: tang: kaux tiblah ah, mawh Eliyax, mai tang: kaux tiblah baox ah, mawh cao: jhai: phaoka: dix, hoik deeh kaoh tix kauxkaux heue."
Mai Nawh Cao: baox ah nin: kah kix, "Viang mawh nan: pex ah Aux mawh mawx?" Petrux pawk lox ah nin:, "Maix mawh Khrit cie Siyiex heue."
Yesux Gruh Krai Grawng: Pa Yum: mai Pa Deeh Kaoh Im: Nawh
Mathiex 16:20-28; Makux 8:30-9:1
Viang mawh nan: Nawh Cao: jawg tix sidiex gau kah kix, mai tawm: lox ang cu kix krai kah pwi tix kaux kawx heue.
Mai Nawh Cao: ah nin:, "Kawn: kawn: pwi tag sang kham: geu: tom: nie ceu, kah daux tawm taix kuad song:, mai cao: giex kaing: li pa ting mai pwi tiem: lai khankix, mai tag sang kham: geu: pa teei yum:, mai tag sang deeh kaoh im: khaix an: daux loe: singaix heue."
Mai Nawh Cao: ah nin: kah pwi khawm: uik, "Phan: pwi tix kauxkaux simie tix hoek khaix Aux, kieh nawh thiang: tix tik tokaux tix, mai klawm: khaoxlhak tix ku singaix, mai hawt Aux heue.
Mawh kheu pwi mawx ang ah, pa simie tix taoh ju tokaux tix, tag sang som ju heue. Viang mawh nan:, pwi mawx ang ah pa som ju son Aux, nawh tag pon tix taoh ju heue.
Grawhgrawng: nawh, phan: pwi tix kauxkaux pon haktiex khawm: uik, mai som tokaux tix, sang koe: bwanson: yuh kah mawx?
Mawh kheu pwi mawx ang ah, pa kaig kheu Aux, mai gumlox Aux, Kawn: kawn: pwi kawx, tag sang kaig kheu nawh, yam Nawh viex min: plakngai: cie Tix, mai min: plakngai: Keeing: Tix, hoek tau mai kawncau Siyiex pa singax singeh khankix heue.
Aux krai lox pa mawh pa meh kah pex, pwi pa cung tin: tiblah, tag ang cim krax yum:, tom: kix yaox Meung Siyiex heue."
Yesux Tieh Loh Tokaux Tix
Mathiex 17:1-8; Makux 9:2-8
Khaix hoik ah Nawh Cao: lox ceu in: khankix, yam dex hoek daix singaix, Nawh Cao: teei Petrux, mai Yohan, mai Yakop, mai haok kah gawng sonsang rawg bwan: heue.
Mai yam Nawh Cao: rawg bwan:, pakangai: Nawh tieh loh, mai kraung ceep Nawh lih paing cawk tom: lih riieng heue.
Mai jhak heue, pwi ra: kaux sikah mai Nawh Cao:, pa mawh Mose mai Eliyax,
pa lih hoek kah daux min: plakngai:, mai kum: grawhgrawng: pa dex sang yum: Nawh Cao: kah daux veng Yerusaliem heue.
Petrux mai kiex pa ot tau mai nawh, sang it nie mai gaing: heue, viang mawh nan: yam hoik siduad kix mhawmmhawm:, kix yaox min: plakngai: Nawh Cao:, mai pwi ra: kaux pa cung tau mai Nawh heue.
Mai yam kiex gwieh hu: khaing: Nawh Cao:, Petrux ah nin: kah Yesux, "Simieng eue, ex ot tin: mhawm: son ex heue, kieh ex yuh nyiiex bang: loe: lhang:. Son Maix tix lhang:, mai son Mose tix lhang:, mai son Eliyax tix lhang:." Nawh ang tawng ceu pa ah tix, tom: ah nan: heue.
Mai yam kawn: ah nawh ceu in: khankix, paiawm: hoek tix kheem: veei kix, mai kix lhat kah yam laig kix kah daux paiawm: heue.
Mai lox lih khaing: daux pai:awm an:, ah nin:, “in: mawh Kawn: Aux, pa laug Aux, pex nghiiet Nawh heue.”
Yam lih hoek lox an:, yaox ngie Yesux ot nongnong: tix kaux khaing:. Mai kix ang nye:, mai ang krai kah pwi tix kaux kawx, kah daux bawg yam singaix an: khankix, grawhgrawng: ceu pa hoik yaox kix heue.
Yesux Grheu: Phicaox Lih Khaing: Kawn: Nyawm Tix Kaux
Mathiex 17:14-18; Makux 9:14-27
Mai: khaix an: tix singaix, yam hoik lih hoek kix khaing: gawng, cub pwi pa kied haoh kied hun: hoek tix rieb Nawh Cao:.
Mai jhak heue, kah daux cub pwi haoh pwi hun:, pwi tix kaux kok yo ah nin:, “Sara Cao: Gau eue, aux khyox khaw: kah Maix, hoek tix jhak kah kawn: simex aux liak. Kheu nawh mawh kawn: pa koe: aux tix kaux khaing: heue.
Mai jhak heue, phi: giex nawh mai nawh riag dom: mawx dom: an:, mai kieh nawh rak rawn:, tom: lih bai heue. Mai dex ang yawn: khaing: nawh, yuh nawh tom: kreuek heue.
Mai aux khyox khaw: kah kawncau Maix khankix nhie: kix grheu: phicaox an: lih kawx, kix ang pon tix grheu: heue.”
Mai Yesux pawk lox ah nin:, “pwi ju pa ang koe: krax yumrhawm: yumrhi: mai pa nu tix ah eue, Aux tag kawn: sang ot mai pex miex grheung:? Aux tag kawn: sang gun sang yeung pex miex grheung:? Viex kawn: simex maix hoek heue.”
Mai yam kawn: tag hoek nawh, phicaox an: biak nawh goh, mai kieh nawh rak rawn: tix sigrien sigre. Viang mawh nan: Yesux ah kah phi: pa seeing: pa brai: an:, mai kieh kawn: simex an: moi:, mai deeh tawx nawh kah keeing: nawh heue.
Mai pwi khawm: uik daox deng: kah siawpsibrawm pa ting pa lhaong: Siyiex heue. Viang mawh nan: yam kix kukaux kawn: daox deng: kah ceu pa yuh Yesux khankix, Nawh Cao: ah nin: kah kawncau Nawh khankix.
Yesux Baox Gruh Krai Grawng: Pa Tag Sang Yum: Nawh
Mathiex 17:22-23; Makux 9:30-32
"Kieh gumlox in: khankix laig kah daux yhaok pex, kheu tag sang tawx Kawn: kawn: pwi kah daux tawm: taix kawn: pwi khankix heue.”
Viang mawh nan: kix ang tawng dee bleeh lox in:, mai hoik mox khaing: kix, yuh kah mawx son ang kix sang tawng, mai kix lhat chawk Nawh Cao: kah grawhgrawng: lox in: heue.
Pwi Mawx Pa Lheu: Ting Khaing: Paox Tix?
Mathiex 18:1-5; Makux 9:33-37
Mai: kix thungthiang: paox tix, grawhgrawng: kah daux kix mawh pwi mawx tag sang nie lheu: ting khaing: paox tix.
Viang mawh nan: yam yaox Yesux pa keud pa sawn: kix kah daux rhawm: tix, Nawh Cao: teei kawn: nyawm iak tix kaux deuh kah liep Tix,
mai ah nin: kah kix, “pwi mawx ang ah, pa rieb tix teei kawn: nyawm iak in: kah daux ceukaux Aux, rieb tix teei kah Aux heue. Mai pwi mawx ang ah, pa rieb tix teei Aux, rieb tix teei kah kaw pa ploi: Aux hoek heue. Mawh kheu pwi pa iak khaing: paox tix kah daux pex, khawm: uik, kaw an: tag sang ting heue.”
Pwi Pa Ang Koeng Kah Pex, Ot Plak Pex
Makux 9:38-40
Mai Yohan ah nin: kah Nawh Cao:, Simiang eue, ex yaox pwi tix kaux pa grheu: phicaox lih kah daux ceukaux Maix, mai ex kiex nawh, kheu ang nawh hawt tau mai ex heue.”
Viang mawh nan: Yesux ah nin: kah nawh, “paw vi kiex nawh, mawh kheu pwi pa ang ot plak pwi koeng kah pex, ot plak pex heue.”
Pwi Yaong: Sdamarix Ang Rieb Kah Yesux
Yam an: yam dex sang hoek bawg yam sinhaix, pa sang rieb tix teei Nawh haok kah piang dee long:, Nawh Cao: jawg veeh pakngai: Tix, sonsang hu: kah veng Yerusaliem.
Mai Nawh ploi: kawncau Tix hu: plak sivoe ngai: Nawh Cao:, mai kix hu: laig kah daux yaong: pwi Samarix tix yaong:, sonsang cox sang khre: son Nawh Cao: heue.
Mai pwi yaong: an: ang rieb tix teei kah Nawh Cao:, kheu Nawh veeh pakngai: Tix, sang hu: kah veng Yerusaliem heue.
Yam kawncau Nawh Yakop mai Yohan yaox grawng: in:, kiex ah nin:, “Simiang eue, Maix koe: rhawm: tix kieh yiex, nhie: ngu lih khaing: raoma:, mai gleeing kix, awm: pa hoik yuh Eliyax lie?”
Viang mawh nan: Nawh Cao: deeh veeh mai ah kah kiex.
Mai kix hu: kah tang: yaong: heue.
Pwi Pa Khaw: Tixc Yuh Kawncau Yesux
Mathiex 8:19-22
Yam kawn: hu: kix krax, pwi tix kaux ah nin: kah Nawh Cao:, “aux sang hawt Maix kah dee sang hu: Maix kudauh kudee heue.”
Mai Yesux ah nin: kah nawh, “Sox praix khankix koe: daux, mai sim: pa po: piang raoma: khankix koe: mheem:, viang mawh kawx nan:, Kawn: kawn: pwi ang koe: dee deuh kaing: Tix heue.”
Mai Nawh Cao: ah nin: kah pwi tang: kaux tix kaux, “Hawt khaix Aux heue,” viang mawh nan: kaw an: ah nin:, “Simiang eue, kieh aux hu: sipaung: keeing: aux kah: ha:.”
Viang mawh kawx nan: Nawh Cao: baox ah nin: kah kaw an:, "Kieh pwi yum: sipaung: pwi yum: cie kix heue, viang mawh nan: maix hu: mai krai grawhgrawng: meung Siyiex heue.”
Tang: kaux tix kaux kawx ah nin:, “Simiang eue, aux sang hawt khaix Maix heue, viang mawh nan:, kieh aux hu: sikah lox gwieh kah pwi pa ot kah daux nyiiex aux kah: ha:.”
Viang mawh nan:, Yesux baox ah nin: kah nawh, “Kaux pwi mawx ang ah, pa hoik giex krong: thai:, mai pa deeh gi plak khaix, ang keung: ang khaw: son meung Siyiex heue.”
Yesux Ploi: Kawncau Tang: Kaux Atigliah Kaux Hu: Sidiex
Mai khaix ceu in: khankix, Simiang, baox laug tix teei kawncau tang: kaux atigliah (70) kaux, mai ploi: kix hu: tix cub ra: kaux, ra: kaux, plak sivoe ngai: Nawh Cao:, kah daux ku veng mai kudauh kudee, dee dex sang hoek Nawh Cao: heue.
Mai Nawh Cao: ah nin: kah kix, "Nghox pa kaux pa khaw: tix vawg kied nie viang mawh kawx nan: pwi pa vawg tux heue. Mawh kheu nan: pex rawg bwan: kah Simiang cao: nghox, yuh kah mawx sonsang ploi: Nawh pwi vawg nghox khankix hoek sonsang vawg nghox Nawh heue.
Hu: dee hu: pex heue. jhak heue, Aux ploi: pex hu: awm: kawn: yung: iak, kah sinax soxla khankix heue.
Paw vi viex hau: mau, bau:, mai kiep, mai yam hu: pex krax paw vi ah lox nawb kah pwi tikaux kawx heue.
Mai laig pex kah daux nyiiex mawx ang ah, ah lox yuh nin: kah: ha:,Kieh pa nhim: koe: piang nyiiex in: liak
Mai phan: kawnpraix pa nhim: koe: tan:, pa nhim: pex tag ot piang nawh, viang mawh nan: phan: ang koe:, pa nhim: an: tag deeh kah pex heue.
Ot kah daux nyiiex an: mai ih nyaux ceu pa tawx kix. Grawhgrawng: nawh, pwi yuh kaing keung: tix pon ngawh riang tix. Paw vi gah hu: tix nyiiex hoik tix nyiiex heue.
Mai pex laig kah daux veng mawx ang ah, phan: kix rieb tix teei pex, ih ceu pa khankix sivoe pex heue.
Mai cox pwi saux kah daux dee an:, mai ah nin: kah kix,Meung Siyiex hoik hoek dex kah pex heue
Viang mawh kawx nan:, veng mawx ang ah, phan: kix ang rieb tix teei pex, lih hu: kah daux krax veng an: khankix, mai ah nin:,
Phawng: tiex veng pex pa kawb kah caong ex kawx, ex kawt sonsang mawh mhai: mawh khen: kah piang pex. Viang mawh nan: kieh tawng ceu in:, Meung Siyiex hoik hoek dex kah pex heue.
Aux krai kah pex, kah daux singaix an: sax, tag lheu: yie tix kham: geu: son veng Sidom, khaing: son veng an: heue.
Veng Pa Ang Yumrhawm: Khankix
Mathiex 11:20-24
Veng Khawrazin eue, maix tag pon pa kharhawm: kharhi: heue. Veng Biesedax eue, maix tag pon pa kharhawm: kharhi: heue. Mawh kheu phan: hoik yuh kaing pa ting siawpsibrawm khankix pa hoik yuh kah daux pax, kah daux veng Turux mai Sidom, kiex tag hoik dawg doh keud doh sawn: kah phimap tom: rheung:, mai fua: tix kah man: pa taing: kah hauk, mai ngawm kah daux nyaox heue.
Viang mawh nan:, kah daux bawg yam prawng sax, tag lheu: yie tix kham: geu: son veng Turux mai veng Sidom, khaing: son pax heue.
Veng Kapeniom eue, tag yaogyaw maix tom: hoek meung raoma: lie? Tag viex maix lih hu: kah daux meung yum: heue.
Pwi pa nghiiet lox pex, nghiiet lox Aux heue. Mai pwi pa tik kah pex, tik kah Aux heue. Mai pwi pa tik kah Aux, tik kah Kaw. pa ploi: Aux hoek heue."
Kawncau Tang: Kaux Atigliah Kaux Deeh Hoek
Mai kawncau atigliah (70) kaux deeh hoek gauxrhawm: gauxrhi: ah nin:, "Simiang eue, phicaox phicaig khankix kawx, ot greem: ex nghiiet lox ex kah daux ceukaux Maix heue."
Mai Nawh Cao: ah nin: kah kix, "Aux hoik yaox Satan rau khaing: raoma: awm: tuhsah heue.
Jhak heue, Aux hoik tawx siawpsibrawm kah pex, sonsang pon dig pex piang siuing: mai tamtim: khankix, mai kah piang siawpsibrawm pwi pa koeng kah pex, mai tix ceu kawx ang tau tix pon kieh pex saux heue.
Viang mawh kawx nan: paw vi gauxrhawm: kheu phi: khankix ot greem: pex nghiiet lox pex, viang mawh nan: gauxrhawm: kah pa hoik tiem: tix deuh ceukaux pex, kah daux meung raoma: heue."
Yesux Gauxrhawm:
Mathiex 11:25-27; 13:16-17
Kah daux bawg yam nari an: Nawh Cao: gauxrhawm: kah daux Khwan: Singax Singeh, mai ah nin:, "Aux yaogyaw bwanson: Maix, Keeing: eue, Simiang pa ting piang raoma: mai haktiex, kheu hoik mox Maix ceu in: khankix, khaing: pwi lhak lhiem: mai pa chix tawng khankix, mai hoik plak kieh kawn: ngie: khankix yaox heue. Mawh heue, Keeing:, kheu Maix koe: rhawm: khaw: rhawm: tix yuh nan: heue.
Keeing: Aux hoik tawx khawm: uik kah Aux heue, mai tix kaux kawx ang tawng Kawn: Cao: mawh mawx, lheu: khaing: Keeing: Cao: tix kaux khaing:, mai tix kaux kawx ang tawng Keeing: Cao: lheu: khaing: Kawn: Cao:, mai kaw pa kawn Cao: koe: rhawm: tix plak kieh nawh tawng heue."
Mai Nawh Cao: veeh kah kawncau Nawh khankix, dee ot kix nong: mai ah nin:, "Ngai: pa pon tix yaox ceu pa yaox pex khankix, ting bwanson: heue.
Grawhgrawng: nawh, Aux krai kah pex, cao: jhai: mai simiang khunhawkham khankix hoik koe: tom: nie pa simie tix yaox ceu pa yaox pex, mai ang pon tix yaox, mai kix simie tix mhong: pa mhong: pex, mai ang pon tix mhong: heue."
Lox Phektem: Grawng: Pwi Samarix Pa Mhawm:
Mai jhak heue, cao: prawng cao: tawng lai been tikaux kaoh cung sonsang cheuk sang nyaw tix yaox Nawh Cao:, chawk ah nin:, "Sara Cao: Gau eue, sonsang pon aux sin: ju leeing ju leeing phan:, aux tag sang yuh kah mawx?"
Mai Nawh Cao: ah nin: kah nawh "Hoik tiem: tix deuh daux lai beenli pa yuh kah mawx? Maix phat pa ah kah mawx?"
Mai kaw an: deeh pawk lox ah nin:, Maix tag moh Simiang Siyiex maix khawm: rhawm: khawm: rhi: tix khawm: uik, mai khawm: ju tix khawm: uik, mai khawm: riang rao tix khawm: uik, mai khawm: kah dee chix keud tix khawm: uik, mai maix tag moh paoxplawg paoxnyhawm: tix awm: moh tokaux tix heue"
Mai Nawh Cao: baox ah nin: kah nawh, “Lox pa pawk maix khaw: heue. yuh nin: heue, mai maix tag pon tix im: ju heue.”
Viang mawh nan: kaw an:, simie tix yuh tokaux tix, awm: pwi rah pwi see pa ang koe: dee phit, nawh tom: chawk ah nin: kah Yesux, "Paoxplawg paoxnyhawm: aux mawh mawx?"
Mai Yesux pawk lox nawh ah nin:, "Pwi tix kaux kaoh lih hu: khaing: veng Yerusaliem, sonsang hu: kah veng Yerikho:. mai nawh sidauh pwi tud pwi rhim: pa rud tix teei kraung nawh khawm: uik, mai tap toi: nawh, tom: dex yum:, mai grham: nawh tan:, mai lih hu: heue.
Mai cao: giex kaing: li tix kaux lih hawt krax an:, mai yam yaox nawh kaw an:, nawh via plak teh krax, mai luan hu: heue.
Mai awm: an: pwi Lewix tix kaux kawx, yam hoek nawh tan:, mai yaox kaw an:, via plak teh krax mai luan hu: heue.
Viang mawh kawx nan:, pwi Samarix tix kaux, yam hu: nawh krax hoek dee ot kaw an:, mai yam yaox nawh kaw an:, nawh caoxrhawm: kah,
mai hoek kah nawh, mai groi rawmbee mai rawm: plix siiet kah dee mat nawh, mai pua: dee saux nawh, mai deuh nawh kah piang khawng: brug nawh, mai viex nawh hu: kah nyiiex nyo, mai kia: ngien nawh heue.
Mai singaix pasax yam lih hu: nawh teei denari ra: plah mai tawx kah cao: nyiiex nyo an:, mai ah nin: kah nawh,Kia: ngien kaw in:, mai baox uik maix miex ding kah piang in:, yam deeh hoek aux sax, aux tag deeh viied kah maix heue
Maix ce: yuh kah mawx, kah daux pwi in: loe: kaux, mawx mawh pa mawh paoxplawg paoxnyhawm: kah kaw pa sidauh pwi tud pwi rhim: an: khankix?"
Mai cao: prawng cao tawng: lai been an:, deeh pawk ah nin:, "Mawh kaw pa caoxrhawm: kah nawh heue." Mai Yesux baox ah nin: kah nawh, "Maix kawx, hu: mai yuh awm: an: heue."
Yesux Hu: Fi: Kah Mathax mai Marix
Yam hu: kix krax, Nawh Cao: laig kah daux yaong: tix yaong:, mai bun: tix kaux pa kaux Mathax, rieb tix teei Nawh Cao: kah daux nyiiex tix heue.
Mai bun: an: koe: pux tix kaux pa kaux Marix, pa ngawm liep caong Yesux, mai nghiiet lox Nawh Cao: heue.
Viang mawh nan: Mathax ang nyawmrhawm:, kheu kied haoh kaing pa khan: pa kheu: nawh, mai hoek tix ah nin: kah Nawh Cao:, "Simiang eue, Maix ang keud grawng: pux aux, hoik prah grham: aux, yuh kaing khan: kheu: nongnong: lie? Mawh kheu nan: nhie: nawh teem: aux liak."
Mai Yesux pawk lox ah nin: kah nawh, "Mathax, Mathax eue, maix khirhawm: mai sungsang rhawm:, kah kied nie ceu heue.
Viang mawh nan:, lo ngie tix ceu khaing:, mai Marix hoik laug tix cie ceu pa mhawm: an:, pa tag ang teei khaing: nawh heue."
Lox Rawg Bwan: Pa Gau Yesux
Mathiex 6:9-13, 7:7-11
Kah daux bawg yam an:, yam Nawh Cao: rawg bwan: tix dauh, khaix hoik rawg Nawh, kawncau Nawh tix kaux ah nin: kah Nawh Cao:, "Simiang eue, gau ex kah lox rawg bwan: awm: Yohan hoik gau kah kawncau tix liak.
Mai Nawh Cao: ah nin: kah kix, "Yam rawg pex bwan: ah nin:,Keeing: eue, kieh ceukaux Maix koe: krax yung: krax yi: heue. Kieh meung Maix hoek heue.
Tawx pa ih pa un: pa lo ex, son tix singaix hoik tix singaix liak.
Mai pluat ploi: phimap ex liak, kheu ex kawx pluat ploi: phimap kah pwi pa phit kah ex heue. Mai paw viex ex hoek kah daux krax nyaw krax glaw: heue"
Paoxgrawm Pa Hoek Yam Greung Sawm: Tix Kaux
Nawh Cao: baox ah nin: kah kix, "Kah daux pex pwi mawx pa koe: paoxgrawm tix kaux, mai phan: hu: kah nawh yam greung sawm:, mai ah nin: kah nawh,Paoxgrawm eue, tawx aux yaog khaomun loe: lon: liak.
Mawh kheu paoxgrawm aux tix kaux, kaoh khaing: dee hu: tix mai hoek kah aux, mai aux ang koe: ceu pa khan: kah nawh heue
Mai kaw an: pawk lox khaing: plak daux ah nin:,Paw vi laklheut aux, kheu hoik song: siviex, mai kawnpraix aux khankix hoik it, dee it, tau mai aux. Aux ang pon kaoh tix tawx kah maix heue
Aux krai kah pex, phan: kaw an: ang kaoh tix tawx kah nawh, kheu mawh nawh paoxgrawm nawh, viang mawh nan:, kheu ca: rawg nawh pot ang jud, kaw an: tag kaoh tix tawx kah nawh awm: pa lo nawh heue.
Mai Aux krai kah pex, rawg heue, mai tag sang tawx kah pex. Sawg heue, mai pex tag sang yaox. Gleuh siviex heue, mai tag sang paoh son pex heue.
Grawhgrawng: nawh, kaw pa rawg tag pon. mai kaw pa sawg tag yaox, mai kah kaw pa gleuh siviex tag paoh son nawh heue.
Lox Phektem: Grawng: Keeing: Pa Mhawm:
Mathiex 7:7-11
Kah daux pex pa mawh keeing: koe: tix kauxkaux, yam rawg yam mhaing: kawn: tix khaomun tix lon:, pa sang tawx simaox kah lie? Phan: ang mawh nan: phan: rawg kax, nawh sang tawx siuing: kah, son kax lie?
Phan: ang mawh nan:, phan: nawh rawg tawm: tix mu:, nawh sang tawx tamtim: kah nawh lie?
Phan: pex pa mawh pwi caox kawx, chix tawx kraung pa mhawm: kah kawnpraix tix, Keeing: pex pa ot kah daux meung raoma: tag nie lheu: tawx Khwan: Singax Singeh, kah pwi pa rawg kah Nawh miex ding?"
Yesux mai Belazebulax
Mathiex 12:22-30; Makux 3:20-27
Mai Nawh Cao: grheu: phicaox pa aw: lih tix kaux, mai yam hoik lih phicaox an: pwi aw: an: chix sikah heue. Mai cub pwi haoh pwi hun: khankix kied daox deng: kah heue.
Viang mawh nan: kix tiblah ah, "Kaw in: een: rhawm: kah Belazebulax simiang phicaox, mai grheu: phicaox khankix lih heue."
Mai tang: kaux tiblah sawg tix yaox mhai: khaing: raoma:, sonsang cheuk tix yaox Nawh Cao:.
Viang mawh nan: Nawh Cao: tawng ceu pa keud kix, mai ah nin: kah kix, "Meung ku meung pa ang khaw: paox tix, gwieh paox tix, tag laux tag leeing: heue. Nyiiex ku nyiiex pa ang khaw: paox tix, gwieh paox tix, tag goh tag laux heue.
Mai phan: Satan kawx, ang khaw:, gwieh tokaux tix, meung nawh chix kaux chix cong: yuh kah mawx? Mawh kheu pex ah, Aux een: rhawm: kah Belazebulax mai grheu: phicaox khankix lih heue.
Phan: Aux een: rhawm: kah Belazebulax mai grheu: phicaox khankix lih, kawnpraix pex, een: rhawm: kah pwi mawx mai grheu: phicaox lih? Mawh kheu nan:, kix tag mawh cao: prawng cao: ca: pex heue.
Viang mawh nan: phan: Aux een: rhawm: kah giientaix Siyiex mai grheu: phicaox khankix lih, Meung Siyiex hoik hoek kah piang pex tete heue.
Yam pwi ting riang tix kaux, yam hoik grum kraung naing, mai pau nyiiex nawh mhawmmhawm:, kraungkhrai: nawh ot nhim: mhawmmhawm:.
Viang mawh kawx nan:, yam hoek kaw pa nie ting riang khaing: nawh, mai pex nawh, mai teei kraung naing pa deuh nawh rhawm: tix kah, tag teei tix gwieh kraung cie nawh heue.
Kaw pa ang ot plak Aux, mawh pwi pa koeng kah Aux heue. Mai kaw pa ang khrawm: tau mai Aux, mawh pa kieh prungprang:heue.
Phi: Pa Seeing: Pa Brai: Deeh Ing: Kah Nyiex Tix
Mathiex 12:43-45
Khaix hoik lih phi: pa seeing: pa brai: khaing: daux pwi, nawh hu: preeng: dee ang rawm: koe:, sawg dee laux kawx, ang yaox heue. Nawh tom: ah nin:,Aux sang deeh ing: kah nyiiex aux khaing: dee hoik kaoh aux heue
Mai yam hoik hoek nawh tan:, nawh yaox nyiiex pa hoik pih, pa hoik cox mhawm: heue.
Khaix an: nawh hu: mai viex phicaox aliah kaux, pa lheu: caox khaing: tokaux nawh, mai laig kah daux pwi an:, mai ot tan: heue. Mai pa mawh kah pwi an:, lheu: caox khaing: phaoka: heue."
Pwi Mhong: Gumlox Siyiex mai Priex Tix Hawt Ting Bwanson:
Yam kawn: krai Nawh Cao: ceu in: khankix, bun: tix kaux kah daux cub pwi haoh pwi hun: an:, yo lox sinum ah nin: kah Nawh, "Vaig pa nghe: Maix, mai teeh pa peuex Maix, ting bwanson: heue."
Viang mawh kawx nan:, Nawh Cao: ah nin:, "Mawh heue, viang mawh nan: pwi pa mhong gumlox Siyiex mai priex tix hawt khankix, kied ting bwanson: heue."
Kix Sawg Tix Yaox Mhai: Pa Daox Pa Am: Kah Yesux
Mathiex 12:38-42
Yam kawn: tag khrawm: cub pwi haoh pwi hun: kah Nawh Cao:, Nawh jah tix ah nin:, "Ju pwi in:, mawh ju pa caox heue. Kix sawg tix yaox mhai: pa daox pa am:, mai lheu: khaing: mhai: pa daox pa am: Yonax, tag ang tawx mhai: pa daox pa am: kah kix heue.
Mawh kheu awm: Yonax hoik mawh mhai: kah pwi veng Nineve, Kawn: kawn: pwi kawx, tag sang mawh mhai: kah pwi ju in: heue.
Simiang nanghawkham caong ma: seh, tag kaoh tau mai pwi ju in:, kah daux singaix prawng singaix ciyang sax, mai deuh phimap kah piang kix, kheu hoik hoek nawh khaing: dee sidauh haktiex, tix nghiiet gumlox pingnya cuyi: simiang Sawlamun heue. Mai jhak heue, Kaw pa lheu: ting khaing: simiang Sawlamun ot tin: heue.
Pwi veng Nineve tag cung tau mai pwi ju in: kah daux singaix prawng singaix ciyang sax, mai deuh phimap kah piang kix, kheu hoik doh keud doh sawn: kix kah phimap tix, yam sidiex gau Yonax, mai jhak heue, Kaw pa lheu: ting khaing: Yonax ot tin: heue.
Pa Riieng Tokaux
Mathiex 5:15-16; 6:22-23
"Tix kaux kawx, ang sax tok kawkngu deuh dee glip, mai greem: phliex, viang mawh nan: deuh piang dee deuh kawkngu, yuh kah mawx sonsang jhan: riieng kah pwi pa laig tan: khawm: uik heue.
Pa riieng tokaux mawh ngai: heue. Yam riang ngai: maix, tokaux maix khawm: uik kawx, naog pa riieng heue. Viang mawh nan: phan: ngai: maix ang mhawm:, tokaux maix kawx naog pa faik heue.
Mawh kheu nan: rien rhawm: tix, yuh kah mawx pa riieng pa koe: kah daux maix, tag ang mawh pa faik.
Mawh kheu, phan: tokaux maix naog pa riieng, ang koe: dee faik ceeix kawx, tokaux maix tag sang grum naog pa riieng, awm: yam kawkngu jhan: pa riieng nawh, son maix heue."
Yesux Caox Kah Pharishie: mai Cao: Prawng Lai Been
Mathiex 23:1-36; Makux 12:38-40; Lukax 20:45-47
Yam kawn: sikah Nawh Cao:, Pharishie: tix kaux kok Nawh, sonsang sawm: tau mai nawh, mai Nawh Cao: laig, mai ngawm neung dee sawm: heue.
Yam Pharishie: an:, yaox Nawh Cao: ang heem: Tix, kah: sang sawm:, nawh daox deng: kah heue.
Mai Simiang ah nin: kah nawh, "Pex pa mawh Pharishie:, phak plak praix kawk mai tawg khaing:, viang mawh nan: plak daux pex, naog pa rhim: tix teei, mai ceu pa caox heue.
Pwi daox khankix eue, Kaw pa yuh plak praix, yuh khawm: plak daux ang mawh lie?
Viang mawh kawx nan: son ceu pa tan pa lu, tawx ceu pa koe: plak daux khankix, mai jhak heue, kuceu khawm: uik tag singax kah pex heue.
"Viang mawh nan:, Pharishie: khankix eue, pex tag kharhawm: kharhi:, kheu pex tan taux phak haw:, mai num: sidax reu mai num: sidax sidim: kuceu, kao: son tix son, mai ang pex keud grawng: pa prawng pa ca: mai krax moh krax rhawm: Siyiex. Viang mawh ceu in: khankix kawx pex khaw: tix yuh, mai ang khaw: tix grham: tix ang yuh tang: ceu an: khankix heue.
Pharishie: khankix eue, pex tag kharhawm: kharhi: heue, kheu pex moh dee ngawm pa mhawm: khaing: paox tix, kah daux nyiiex dee sidiex khankix, mai ceu pa yungyi: pwi kah daux lah daux cau khankix heue.
Pex tag kharhawm: kharhi: heue, kheu pex awm: simeeig pa ang sidawng:, mai pwi pa hu: kah piang kix ang tawng grawng: simeeig koe: tan: heue."
Mai pwi pa tawng pa prawng lai been tix kaux, pawk ah nin: kah Nawh Cao:, "Sara Cao: Gau eue, pa ah Maix nin:, viang mawh kah ex kawx, Maix map heue."
Mai Nawh Cao: ah nin:, "Pwi tawng pwi prawng lai been khankix eue, pex tag kharhawm: kharhi: heue, kheu pex kieh pwi klawm: kraung pa cien mai pa nu tix klawm:, mai tokaux pex, pie gien: taix tix kawx, ang teeh kah kraung an: heue.
Pex tag kharhawm: kharhi: heue, kheu pex cox pex yuh simeeig cao: jhai: khankix, mai tax du pex, khankix mawh pa teei kix yum: heue.
Mawh kheu nan: pex mawh pa kham: mhai: sakse, mai jhi: pwi yaox grawng: pa caw rhawm: pex, kah kaing ceu pa yuh tax du pex heue. Mawh kheu kix hoik teei cao: jhai: khankix yum:, mai pex cox pex yuh simeeig kix heue.
Mawh kheu nan: pingnya cuyi: Siyiex kawx hoik ah nin:,Aux ploi: cao: jhai: mai kawncau khankix kah kix heue. Mai kix tag sang tuktieak tukte: tiblah mai tag sang pah yum: tiblah heue.
Yuh kah mawx nham: cao: jhai: khawm: uik, pa hoik lih tom: yam jah tix kaw: haktiex, tag sang hoek kah piang pwi ju in: heue.
Jah kah nham: Abelax tom: sidauh sidu hoek kah nham: Zakharix, pa hoik laux hoik yum:, sinax nyiiex bwan: mai khu: dee tan heue. Mawh heue, Aux krai kah pex, tag sang hoek kah piang pwi ju in: heue.
Pwi tawng pwi prawng lai been khankix eue, pex tag kharhawm: kharhi: heue. Kheu hoik teei pex jiak saw pingnya cuyi:. Tokaux pex ang laig, mai kix pa sang laig kawx, pex kieh pex kang: heue."
Mai yam hoik lih Nawh cao: khaing: tan:, pwi tiem: lai mai Pharishie: khankix, jah tix kied nyheen: Nawh sonsang kieh Nawh Cao: krai grawhgrawng: tom: nie ceu heue.
Sonsang pon tix giex lox lud, pa lih khaing: jheeh Nawh Cao: heue.
Rien Rhawm: Tix Kah Pwi Pa Pie Pa Lhen:
Mathiex 10:26-27
Daux bawg yam an:, yam cub pwi tom: nie mheen: khrawm: paox tix, tom: kix tix kaux hoik tix kaux dig piang paox tix, Nawh Cao: jah tix ah nin: phaoka: paox tix, kah kawncau Nawh khankix, "Rien rhawm: tix kah susaix Pharishie: khankix, pa mawh pa pie pa lhen: heue.
Viang mawh nan: ang koe: tix ceu kawx, pa hoik kheem: hoik tawb, pa tag ang deeh hoe:, mai pa hoik mox ang koe: tix ceu kawx, pa ang deeh kieh tawng heue.
Mawh kheu nan:, pex hoik ah ceu pa yuh kah mawx ang ah kah daux pa faik, tag sang mhong: kah daux pa riieng heue. Mai lox pa hoik ah pex kah yhaok, kah daux lawg plak daux, tag sang yo khaing: piang prang nyiiex heue.
Pwi Pa Caw Ex Tix Lhat Kah
Mathiex 10:28-31
Paoxgrawm Aux khankix eue, Aux ah kah pex, paw lhat kah kix pa chix teei tokaux yum:, mai pa ang chix yuh tidtix khaix an: heue.
Viang mawh nan:, Aux sang krai kah pex grawhgrawng: pex khaw: tix lhat kah pa yuh kah mawx. Lhat kah kaw pa khaix nawh hoik teei yum:, koe: siawpsibrawm tix taing sau: kah daux Mawnarhok. Mawh heue, Aux krai kah pex, lhat kah kaw an:.
Coh saik phwan: mu: ngawh asarix ra: piak, ang mawh lie? Mai Siyiex ang piawm: saik khankix tix mu: kawx heue.
Viang mawh hauk kaing: pex kawx hoik simin khawm: uik heue. Paw vi lhat kah, kheu nie lheu: mhawm: pex khaing: saik tom: nie heue.
Pwi Pa Rieb mai Pwi Pa Thiang: Kah Cao: Khrit
Mathiex 10:32-33;12:32; 10:19-20
Aux krai kah pex, pwi pa kham: tix rieb tix teei Aux kukaux plak sivoe ngai: kawn: pwi, Kawn: kawn: pwi kawx, tag sang kham: tix rieb tix teei nawh plak sivoe ngai: kawncau Siyiex khankix heue.
Viang mawh kawx nan: pwi pa thiang: tix tik Aux sivoe kawn: pwi, Aux tag sang thiang: tix tik nawh sivoe kawncau Siyiex khankix heue.
Pwi pa ah lox map kah Kawn: kawn: pwi kukaux, tag sang pluat sang ploi: phimap nawh heue. viang mawh nan: kaw pa salao kah Khawn: Singax Singeh, tag ang pluat ang ploi: nawh heue.
Mai yam kix viex pex sivoe nyiiex sidiex khankix, mai pwi giex kaing: khankix, mai laux simiang khankix, paw khirhawm: grawhgrawng: lox pa sang pawk sang ah pex.
Mawh kheu Khwan: Singax Singeh tag sang gau pex kah daux bawg yam nari an:, grawng: pex khaw: tix ah lox pa yuh kah mawx heue."
Lox Phektem: Grawng: Caomi Pa Daox
Mai pwi tix kaux kah daux cub pwi haoh pwi hun: an:, ah nin: kah Nawh Cao:, "Sara Cao: Gau eue, nhie: puxke: aux gwieh sin: kah aux liak."
Viang mawh nan: Nawh Cao: chawk ah nin: kah kaw an:, "Pwi eue, mawx pa yuh Aux mawh, cao: prawng cao: gwieh kah piang pax?"
Mai Nawh Cao: baox ah nin: kah kix, "Rien rhawm: tix son ang sang ghoing: kah heue. Mawh kheu ju pwi ang ot kah daux pa haoh kraung pa koe: tix heue."
Nawh Cao: baox krai kah kix daux lox phektem: ah nin:, "Haktiex cao: mi tix kaux kied nie pon plix heue.
Mai nawh keud tix ah nin: kah daux tokaux tix,Aux tag sang yuh kah mawx? Kheu ang aux koe: dee een: plix cie tix khankix heue
Mai nawh baox ah nin:,Aux tag sang yuh nin: heue, aux sang yieh nyiiex krao: aux khankix, mai baox deeh yuh pa nie ting, mai an: tag sau: nghoxca mai kraung aux tan: heue.
Mai aux tag sang ah nin: kah ju aux, Ju eue, maix hoik nie koe: kraung pa hoik deuh, son num tom: nie heue, laux lee: tix, ih, nyaux, mai gaurhawm: heue
Viang mawh kawx nan:, Siyiex ah nin: kah nawh,Pwi daox eue, tag sang teei ju maix khaing: maix kah daux sawm: in: heue. Mai ceu pa hoik cox hoik priex maix khankix, tag sang mawh cie pwi mawx?:
Kaw pa sawg tix een: kraungkhrai: son tokaux tix, mai pa ang koe: pa hot plak Siyiex, awm: cao: mi an: heue."
Paw Vi Khirhawm: Khirhi:
Mathiex 6:25-34
Mai Nawh Cao: ah nin: kah kawncau Nawh khankix, "mawh kheu nan: Aux ah nin: kah pex, pex sang ih pa yuh kah mawx, son ju tix, mai sang ceep pa yuh kah mawx son tokaux tix, paw vi khi: kah.
Kheu ju lheu: mhawm: khaing: pa ih pa un:, mai tokaux lheu: mhawm: khaing: kraung ceep heue.
Keud tix yaox grawhgrawng: lak khankix heue, kix ang rhuat ang van:, mai kix ang vawg ang pat, mai kix ang koe: lawg koe: krao: dee een: kraung, viang mawh nan: Siyiex tawx kix sawm:. Pex lheu: ngawh lheu: mhawm: khaing: sim: khankix miex ding?
Mawh kheu krax khirhawm: khirhi:, kah daux pex, mawx pa chix kieh, tokaux tix baox lhaong: tix sawk?
Phan: pex ang chix yuh ceu pa nie iak khaing: paox tix, pex lai khirhawm: grawhgrawng: tang: ceu pa taig khankix yuh kah mawx?
Keud tix yaox grawhgrawng: tai siyak, chix ting chix lhaong: yuh kah mawx, kix ang yuh kaing, mai ang kling:, viang mawh nan: Aux krai kah pex, viang mawh kraung pa ceep simiang Sawlamun pa ting min: plakngai:, ang mhawm: awm: tai an: khankix tix kho: kawx heue.
Pex pa iak krax yumrhawm: eue, phan: Siyiex tawx pa ceep pa mhawm: awm: an:, kah num: rib num: riem daux tiag daux tu, pa koe: singai: mai pa teei tix sau: kah daux, daux ngu pasax, Nawh sang tawx kraung ceep pa lheu: khaing: an: kah pex ang mawh lie?
Paw vi sawg, son pa sang ih pex. mai son pa sang nyaux pex, mai paw kieh koe: krax ang yumrhawm: pa keud jee keud blaong.
Mawh kheu pwi piang meung haktiex khankix khawm: uik, sawg ceu an: khankix heue. Viang mawh nan: Keeing: pex tawng grawhgrawng: pa lo pex ceu in: khankix heue.
Mawh kheu nan: sawg Meung Siyiex ha:, mai ceu in: khankix tag sang baox tawx kah pex heue.
Sinngao Meung Raoma:
Mathiex 6:19-21
Cub yung: iak eue, paw lhat paw graung, mawh kheu Keeing: pex koe: rhawm: tix tawx Meung an: kah pex heue
Coh pa koe: pex, mai yuh bwanson: tawx kah pwi hot pwi sibhawm: khankix heue. Mai yuh hau: pa ang chix prim:, pa mawh sinngao daux meung raoma:, pa ang chix uik chix laux, dee ang pwi briex pon hoek dex, mai dee ang pung piang siah yuh laux heue.
Mawh kheu koe: kraung pex dee mawx, rhawm: pex kawx koe: tan: heue.
Siliex Pa Krox Jun Khankix
"Rawd nyoi pex, mai kieh kawkngu pex lah heue.
Mai kieh tokaux pex mawh awm: pwi pa krox tix jhak son simiang kix, yam deeh hoek nawh khaing: dee ih kapaox heue. Yuh kah mawx, yam deeh hoek nawh, mai gleuh siviex. Kix tag sang pon tix paoh son nawh dom: mawx dom: an: heue.
Yam simiang deeh hoek, siliex pa nawh yaox, krox tix pau son nawh khankix, ting bwanson: heue. Aux krai lox tete telai kah pex, nawh tag sang nhawt maox rawd nyoi tix, mai kieh kix ngawm tix sawm:, mai tokaux nawh tag sang khan: kheu: kah kix heue.
Mai phan: nawh sang deeh hoek ponsawm:, bawg yam pau ra: bawg tix bawg17 ang ah, bawg yam pau loe: bawg tix bawg18 ang ah, mai yaox kix yuh nan:, siliex khankix ting bwanson: heue.
Kieh tawng ceu in: heue, phan: cao: nyiiex tawng bawg yam nari sang hoek pwi briex, nawh tag sang pau tix jhak, mai ang grham: ang kieh yieh tix laig daux nyiiex tix heue.
Mawh kheu nan:, pex rien rhawm: tix, kheu daux bawg yam nari, yam ang pex ce: Kawn: kawn: pwi tag sang hoek heue."
Siliex Pa Kaux Sijax mai Pa Ang Kaux Sijax
Mathiex 24:45-51
Mai Petrux chawk ah nin:, "Simiang eue, Maix ah lox phektem: in: kah ex lie, phan: ang mawh nan: ah kah pwi khawm: uik lie?"
Mai Simiang deeh ah nin:, "Siliex pa kaux sijax mai pa koe: pingnya, pa simiang nawh hoik kieh ting piang geh nyiiex tix, sonsang tawx nyum: pa ih pa un:, kah kix yam hoek bawg yam pa khaw: tix tawx, mawh mawx?
Yam deeh hoek, simiang nawh siliex pa yaox nawh yuh nan:, ting bwanson: heue.
Aux krai lox pa mawh pa meh kah pex, simiang nawh tag kieh nawh ting piang pa koe: nawh khawm: uik heue.
Viang mawh nan: phan: siliex an: keud tix ah nin: daux rhawm: tix,Simiang aux tag sang koi hoek, mai jah tix tap simex siliex mai bun: siliex khankix, mai ih mai nyaux tom: yoek tix.
Simiang nawh tag hoek kah daux singaix pa ang nawh keud nawh ce:, mai daux bawg yam nari pa ang nawh tawng, mai mug nawh dud, mai teei nawh deuh tau mai pwi pa ang kaux sijax khankix heue.
Mai siliex pa tawng alo pa caw simiang tix, mai ang yuh tix rien:, awm: alo pa caw simiang nawh, tag sang sivied nawh tom: nie taix heue.
Viang mawh nan: kaw pa ang tawng, mai hoik yuh ceu pa khaw: tix sivied nawh kah. tag sang sivied nawh ceeix ngie heue. Mai pwi mawx ang ah, pa hoik tawx kah nawh tom: nie, tag sang yuh tix teei khaing: nawh tom: nie heue, mai kah pwi mawx ang ah pa hoik tawx kah daux tawm: taix nawh tom: nie, tag sang deeh rawg deeh mhaing: khaing: nawh tom: nie heue.
Pwi Tag Gwieh Paoh Kheu Yesux
Mathiex 10:34-36
"Aux hoek sonsang taing ngu kah piang haktiex, mai alo Aux mawh pa yuh kah mawx? Viang mawh yamin kawx, phan: ngu an: hoik cap mhawm: heue.
Lheu: khaing: an:, Aux koe: krax baptis19 , pa Aux tag lai baptis C kah tix ceu, mai kah: ang nyang bax hoik bawg yam an:, Aux kied khirhawm: kah miex ding heue.
Pex ce: Aux hoek tix tawx krax nhi:m:rhawm: kah piang haktiex in: lie? Aux krai kah pex ang mawh, viang mawh nan:. hoek tix kieh gwieh paox tix heue.
Mawh kheu khaix in:, kah daux nyiiex tix lhang:, pa koe: phwan: kaux tag gwieh ang khaw: paox tix heue. Loe: kaux an: ang khaw: kah kiex ra: kaux, mai kiex ra: kaux ang khaw: kah kix loe: kaux heue.
Kix tag sang gwieh paox tix, keeing: tag ang khaw: kah kawn: simex tix, mai kawn simex kawx tag ang khaw: kah keeing: nawh. Miex tag ang khaw: kah kawn: bun: tix, mai kawn: bun: kawx tag ang khaw: kah miex nawh. Yiex tag ang khaw: kah mun tix, mai mun kawx tag ang khaw: kah yiex nawh heue."
Kieh Chix Tawng Ka Bawg Yam
Mathiex 16:2-3
Mai Nawh Cao: baox ah nin: kah cub pwi haoh pwi hun: khankix, "Yam pex yaox paiawm: haok plak klip singaix, dom: mawx dom: an:, pex ahTag sang lhiex heue Mai mawh heue.
Yam pex yaox phlu: bhaung: khaing: plak caong ma: seh, pex ah,Tag kied sieet siaoh heue Mai mawh heue.
Pex pa mawh pwi pie pwi lhen: eue, pex chix jhak chix tawng mhai: haktiex mai raoma: heue. Viang mawh nan: yuh kah mawx, pex khex ang chix tawng kah grawhgrawng: bawg yam, yamin?
Yuh Pa Mhawm: Kah Pwi Pa Sang Yuh See: Kah Maix
Mathiex 5:25-26
Mai yuh patix tokaux pex ang chix tawng, mawh pa yuh kah mawx, pa mawh pa rah pa see?
Yam maix hu: kah simiang, tau mai kaw pa sang yuh see: kah maix, nied tix yuh sonsang mhawm: lox an: hawt krax, phan: ang mawh nan:, ha: nawh kox reu: maix hu: kah cao: prawng see:, mai cao: prawng see: an: tag teei tix tawx maix kah cao: giex kaing:, mai cao: giex kaing: sau: maix kah daux thawng: heue.
Aux krai kah maix, maix ang pon lih khaing: dee an:, tom: sidauh ang maix nyang bax plud piak san ghoik tix piak heue."
Doh Keud Ka Phimap Tix (a) Tag Yum:
Daux bawg yam an: pwi ot tan: tiblah, pa krai kah Nawh Cao: grawhgrawng: pwi Galilie: tiblah, pa simiang Pilat hoik kieh nham: kix klao: kleue: tau mai pa tan pa lu kix heue.
Mai Nawh Cao: pawk lox ah nin: kah kix, "Pex ce: pwi Galilie: khankix nie ting phimap khaing: pwi Galilie: tang: kaux khawm: uik, kheu hoik kham: geu: kix ceu an: khankix lie?
Aux krai kah pex, ang mawh. Viang mawh pex kawx, phan: pex ang doh keud doh sawn: kah phimap tix, pex tag sang lauxleeing: awm: an: khawm: uik heue.
Phan: ang mawh nan: kix kao: kaux daix, pa nyiiex lhaong: Silom hoik grhup dheem: kix yum:, pex ce: kix nie lheu: phit khaing: pwi pa ot kah daux veng Yerusaliem khawm: uik lie?
Aux krai kah pex, ang mawh. Viang mawh pex kawx, phan: pex ang doh keud doh sawn: kah phimap tix, pex tag sang lauxleeing: awm: an: khawm: uik heue."
Lox Phektem: Kah Khaoxruh Pa Ang Koe: Plix
Mai Nawh Cao: baox krai lox phektem: in:, "Pwi tix kaux koe: khaoxruh pa hoik sum: nawh kah daux sipeem nawh tix khaox, mai nawh hoek tix sawg plix kah khaox an:, mai ang yaox tidtix heue.
Mai nawh ah nin: kah pwi pa pau sipeem,Jhak heue, daux loe: num pa hoik luan in:, aux hoek tix sawg plix kah khaoxruh in:, mai ang yaox tidtix. Kid tix tik heue. Yuh patix kieh nawh kram: haktiex yuh nin:?:
Mai pwi pa pau sipeem an:, pawk lox ah nin: kah nawh,Simiang kah daux num in: kawx, kawn: grham: nawh ha:, tom: aux hoik ciag sivie num: nawh, mai sau: phon: kah heue.
Mai khaix in: phan: nawh chix plix mhawm: heue, viang mawh nan: phan: ang plix, maix pon kid tix tik heue"
Yesux Pai: Moi: Jhawm: Saux Bun: Laig Phi: Kao: Num Daix
Kah daux singaix twah tix singaix, yam sidiex gau Nawh Cao: kah daux nyiiex sidiex,
jhak heue, bun: tix kaux, pa hoik laig phi: pa kieh nawh saux kao: num daix. Nawh hoik bok, tom: ang pon yaog tokaux tix ceeix kawx heue.
Mai yam Yesux yaox nawh, Nawh Cao: ah nin: kah nawh, "Bun: eue, maix hoik luan khaing: jhawm: saux jhawm: ngia tix heue."
Mai Nawh Cao: teei taix Tix deuh kah piang nawh, mai nawh uik see dom: mawx dom: an:, mai yaogyaw bwanson: Siyiex heue.
Viang mawh nan:, pwi giex kaing: nyiiex sidiex an:, songrhawm: kheu cox Yesux jhawm: saux moi: singaix twah, mai ah nin: kah cub pwi haoh pwi hun: khankix, "Koe: liah singaix pa khaw: pwi tix yuh kaing jhaw:. Hoek kah daux singaix an: khankix, mai paw vi hoek sonsang kieh cox jhawm: saux pex moi:, kah daux singaix twah heue."
Viang mawh kawx nan: Simiang pawk lox ah nin: kah nawh, "Pwi pie pwi lhen: khankix eue, pex kukaux daux pwi, ploi: moi ploi: la khaing: kawg, mai tok hu: tix tawx nyaux rawm:, singaix twah ang mawh lie?
Mai bun: in:, pa mawh kawnbon: Abraham, pa hoik phyawk Satan kah daux kao: num daix, ang khaw: tix ploi: nawh khaing: pa hoik phyawk tix, kah daux singaix twah lie?"
Yam Nawh Cao: ah nan:, pwi pa koeng kah Nawh khawm: uik, koe: krax kaig heue. Mai cub pwi haoh pwi hun: khawm: uik, gauxrhawm: gauxrhi: kah grawhgrawng: ceu pa ting min: plakngai: pa yuh Nawh Cao: khankix heue.
Lox Phektem: Simie Taux Klaox
Mathiex 13:31-32, Makux 4:30-32
Mawh kheu nan: Nawh Cao: baox ah nin:, "Meung Siyiex awm: ceu patix? Aux tag plak kieh awm: patix?
Awm: simie taux klaox tix mu:, pa pwi tix kaux, rhuat kah daux sipeem tix heue. Mai nawh ting lhaong:, mai lih mawh khaox ting, mai sim: raoma: hoek tix ot tix laux kah piang kak nawh khankix heue."
Lox Phektem: Grawng: Susaix
Mathiex 13:33
Mai Nawh Cao: baox deeh ah nin:, "Aux tag plak kieh Meung Siyiex awm: patix?
Awm: susaix pa bun: tix kaux teei mai mox kah daux phawng: gaox loe: diag, tom: susaix an: hoik laig kah daux khawm: uik mai kieh ploh heue."
Siviex Pa Sikhawp Sikhiep
Mathiex 7:13-14 ,21-23
Yam kawn: hu: Nawh Cao: krax, Nawh hu: preeng: daux veng daux yaong: khankix, sidiex gau mai baox loi hu: kah veng Yerusaliem heue.
Mai pwi tix kaux chawk Nawh Cao: ah nin:, "Simiang eue, tux pwi pa sang hoek krax taoh lie?" Mai Nawh Cao: ah nin: kah kix,
"Nied tix coca: sonsang pon tix laig kah siviex pa sikhawp sighiep heue. Mawh kheu, Aux krai kah pex, pwi tom: nie tag sang sawg tix laig kah, mai ang pon laig heue.
Yam cao: nyiiex hoik kaoh, mai hoik song: siviex, mai pex cung plakpraix, mai gleuh siviex ah nin:,Simiang eue, paoh siviex son ex liak heue Nawh tag pawk lox mai ah nin: kah pex,Grawng: kaoh pex khaing: dee mawx Aux ang tawng heue
Yam an: pex tag sang ah nin:,Ex hoik ih hoik nyaux dee ot Maix, mai Maix hoik sidiex gau kah daux krax cie ex khankix heue
Mai Nawh tag sang baox ah nin:,Aux krai kah pex, Aux ang tawng dee kaoh pex, pex pa mawh pwi pa yuh pa ang rah ang see khawm: uik, lih hu: khaing: Aux heue
Yam pex yaox Abraham, mai Icak, mai Yakop, mai cao: jhai: khawm: uik, kah daux Meung Siyiex, mai hoik taing hoik tik tokaux pex plakpraix, tag sang yiiem riag mai greeik rhang: heue.
Mai kix tag kaoh hoek khaing: plak lih singaix, mai plak klip singaix, mai khaing: caong ma: seh, mai caong ma: laong:, mai ngawm kah daux Meung Siyiex heue.
Mai jhak heue, kix pa dhah khaix tiblah tag hoek kah:, mai kix pa hoek kah: tiblah tag dhah khaix heue."
Krax Moh Yesux Ka Veng Yerusaliem
Mathiex 23:37-39
Kah daux bawg yam nari an: Pharishie: tiblah hoek tix ah nin: kah Nawh Cao:, "Maix lih mai hu: khaing: tin:, kheu simiang Herut simie tix pah Maix yum: heue."
Mai Nawh Cao: ah nin: kah kix, "Hu: krai kah sox praix an:,Aux sang grheu: phicaox khankix lih, mai cox jhawm: saux jhawm: ngia moi:, singaix mai pasax, mai kah daux loe: singaix Aux tag sang grum mhawm: heue
Viang mawh kawx nan:, Aux tag hu: krax hu: Aux, singaix, mai pasax, mai sikaox, mawh kheu Cao: Jhai: tix kaux kawx ang khaw: tix lauxleeing:, plak praix veng Yerusaliem heue.
Veng Yerusaliem eue, veng Yerusaliem, pa teei cao: jhai: khankix yum:, mai dheem: pwi pa ploi: hoek kah maix kah simaox, Aux simie tix khrawm: kawnpraix maix, awm: ia: miex khrawm: kawn: tix greem: pruik nawh miex bawg, mai maix ang kieh Aux yuh.
Jhak heue, hoik grham: nyiiex pex yi kah pex heue. Aux krai kah pex, pex tag ang lai baox yaox Aux, tom: pex ah, 20 “Kaw pa hoek kah daux ceukaux Simiang ting bwanson: heue.”
Yesux Pai: Moi: Jhawm: Saux Rawm: Daux Vaig mai Uah
Kah daux singaix twah tix singaix, Nawh Cao: kah daux nyiiex simiang Pharishie: tix kaux, sonsang sawm:, mai kix jiang Nawh heue.
Mai jhak heue, pwi tix kaux pa koe: jhawm: saux rawm: daux vaig mai uah tix, ot kah sivoe Nawh Cao: tan: heue.
Mai Yesux chawk ah nin:, kah pwi tawng pwi prawng lai been, mai Pharishie: khankix, “Khaw: tix cox jhawm: saux jhawm: ngia moi: kah daux singaix twah lie, ang khaw: lie?”
Viang mawh kawx nan: kix ang nye: heue. Mai Nawh Cao: teei kaw an:, cox jhawm: saux nawh moi:, mai kieh nawh hu: heue.
Mai Nawh Cao: baox chawk ah nin: kah kix, "Kah daux pex koe: tix kauxkaux pa koe: la phan: ang mawh nan: pa koe: moi, pa rau kah daux o:, singaix twah, pa tag ang bluh nawh lih dom: mawx dom: an: lie?"
Mai kix ang pon pawk lox kah grawhgrawng: ceu an: heue.
Ngawm Dee Tiiem Khaing: Paox Tix
Yam yaox Nawh Cao: pwi pa hoik kok hoek tix sawm: khankix laug dee ngawm, pa mhawm: khaing: paox tix, Nawh krai lox phektem: yuh nin: kah kix.
"Yam pwi tix kauxkaux kok maix ih kapaox, paw vi ngawm neung dee mhawm: khaing: paox tix, ha: nawh hoik kok pwi pa lheu: ting min: plakngai: khaing: maix,
mai pwi pa kok maix, mai kaw an:, hoek tix ah nin: kah maix,Yoi: maix, son kaw in: heue Yam an: maix tag koe: krax kaig mai lih hu: dee tiiem khaing: paox tix heue.
Viang mawh kawx nan:, yam pwi kok maix, hu: ngawm neung dee nie tiem khaing: paox tix, yuh kah mawx son yam hoek kaw pa kok maix, nawh tag ah nin: kah maix,Paoxgrawm eue, haok kah dee lhaong: heue Yam an: maix tag koe: min: plakngai:, sivoe kix pa ngawm sawm: tau mai maix khawm: uik heue.
Mawh kheu pwi mawx ang ah, pa yaog tokaux tix ting, tag sang yeen nawh tiem, mai pwi mawx ang ah, pa yuh tokaux tix tiem, tag sang yaog nawh ting heue."
Viaung mawh kah kaw pa hoik kok Nawh Cao: kawx, Nawh ah nin:, "Yam kok maix tix khan: kheu: priex ngaix, priex bo, paw vi kok paoxgrawm maix, mai puxaik maix, mai paox ceu paox cat maix, mai paoxplawg paoxnyhawm: maix pa mawh cao: mi khankix, phan: yuh nan: kix kawx tag deeh kok maix, mai deeh pawk bwanson: maix heue.
Viang mawh kawx nan: yam yuh maix pwie, kok pwi hot pwi sibhawm:, mai pwi laux maung, mai pwi laux caong, mai pwi dug ngai: khankix,
mai maix tag pon bwanson: heue. Mawh kheu kix ang pon deeh pawk bwanson: maix heue. Daux bawg yam deeh kaoh pwi rah pwi see khankix sax, maix tag sang deeh pon bwanson: heue."
Lox Phektem: Kah Priex Bo Ting
Mathiex 22:1-14
Yam pwi pa ngawm neung sawm: tau mai Nawh Cao: tix kaux, mhong: lox ceu an: khankix nawh ah nin: kah Nawh Cao:, "Kaw pa tag pon tix ih khaomun kah daux Meung Siyiex, ting bwanson: heue.
Viang mawh kawx nan:, Nawh Cao: ah nin: kah kaw an:, "Pwi tix kaux khre: priex bo ting, mai ghaok pwi tom: nie.
Yam hoek bawg yam sawm:, nawh ploi: kawncau tix, hu: nhie: pwi pa hoik ghaok khankix hoek ah nin:,Hoek heue, kheu hoik cox hoik khre: kuceu
Mai kix khawm: uik, awm: rhawm: paox tix, nieb ah lox sonsang luan tix heue. Kaw phaoka: ah nin: kah nawh,Aux hoik liag ma: tix gwang, mai aux tag lai hu: tix jhak heue. Aux khyox kah maix, ploi: aux liak ha:
Mai tang: kaux tix kaux ah nin:,Aux hoik liag moi phwan: brawm:, aux sang hu: cheu: tix yaox kix heue. Aux khyox kah maix, ploi: aux liak ha:
Mai tang: kaux tix kaux baox ah nin:,Aux hoik teei tix koe: moeng, mawh kheu nan: aux ang pon tix hoek heue
Mai kawncau an: deeh hoek, mai krai grawhgrawng: ceu an: khankix kah simiang nawh heue. Yam an: cao: nyiiex an: song: rhawmrhi: mai ah nin: kah kawncau an:,Nied tix hu: kah krax ting krax iak kah daux veng, mai viex pwi hot pwi sibhawm:, mai pwi laux maung, mai pwi dug ngai:, mai pwi laux caong khankix hoek heue
Mai kawncau an: ah nin:,Simiang eue, hoik yuh awm: pa nhie: maix, viang mawh kawx nan: ang nyang bax naog, kawn: koe: dee ot heue
Mai simiang an: baox deeh ah nin: kah kawncau nawh an:,Lih hu: kah krax ting khankix, mai deeh koe: khaox vie kh nkix, mai khinkix hoek, yuh kah mawx, sonsang naog nyiiex aux heue
Grawhgrawng: nawh, aux krai kah pex, pwi pa hoik ghaok phaoka: khankix tix kaux kawx tag ang pon tix cim priex bo aux heue."
Pa Keung: Tix Mawh Kawncau Yesux
Mathiex 10:37-38
Cub pwi haoh pwi hun: tom: nie, hu: tau mai Nawh Cao:, mai Nawh veeh tix ah nin: kah kix,
"Phan: pwi tix kauxkaux hoek kah Aux, mai ang koeng kah miex tix, mai keeing: tix, mai moeng tix, mai kawnpraix tix. mai puxaik tix, mai nan: tix, mai khawm: ju tix kawx, nawh ang pon tix mawh kawncau Aux heue.
Pwi mawx ang ah, pa ang klawm: khaoxlhak tokaux tix, mai hoek khaix Aux, ang pon tix mawh kawncau Aux heue.
Mawh kheu kah daux pex koe: pwi mawx, pa simie tix yuh nyiiex lhaong:, pa ang ngawm phaoka:, mai sawn: tix yaox grawhgrawng: sang uik miex ding, mai grawhgrawng: nawh koe: mau sang kub tix yuh tom: hoik lie, ang kub lie?
Phan: ang mawh nan:, ha khaix hoik kaw: nawh num:, mai ang pon yuh tom: hoik, pwi khawm: uik tag map kah nawh,
ah nin:,Pwi in: jah tix sum:, mai ang pon yuh tom: hoik heue
Phan: ang mawh nan: koe: simiang khunhawkham mawx, pa sang hu: tix puing: simiang khunhawkham tang: kaux, pa ang ngawm tix kum: kawng: grawhgrawng: nawh pon teei pwi tix mheen: ngie, mai pon tix hu: cha: paox tix, kah simiang pa viex pwi ra: mheen: lie, ang pon lie?
Phan: ang mawh nan:, phan: nawh yiag tix ang pex, yam kawn: ot simiang an: dee singai, nawh tag sang ploi: caocau hu: khyox khaw:, son ang naing sang jih, mai kieh nhim: heue.
Mawh kheu nan: kah daux pex, pwi mawx ang ah pa ang tik ang grham: ceu pa koe: tokaux tix khawm: uik, ang pon tix mawh kawncau Aux heue.
Kih Pa Ang Laoh
Mathiex 5:13; Makux 9:50
Kih kienie mawh pa mhawm:, viang mawh kih kawx, phan: pa laoh nawh hoik grai:, tag sang teei pa yuh kah mawx tix deeh chix kieh nawh laoh?
Ang mhawm: son haktiex. viang mawh son pum: phon: kawx ang mhawm:. Pwi tik nawh plakpraix khaing:. Kaw pa koe: yhaok tix mhong:, kieh nawh mhong: heue."
Yung: Pa Grai:
Mathiex 18:12-14
Pwi koh mau mai pwi ting map ting grham: khawm: uik, hoek dex kah Nawh Cao:, sonsang nghiiet Nawh heue.
Pharishie: khawm: pwi tiem: lai khankix, salao ah nin:, "Pwi in: nieb rieb tix teei pwi ting map ting grham: khankix, mai sawm: tau mai kix heue."
Mai Nawh Cao: krai lox phektem: in: kah kix ah nin:,
"Kah daux pex koe: pwi tix kauxkaux, pa koe: yung: tiyieh, mai phan: grai: tix mu:, pa ang prah ang grham:, yung: tidim: dim: (99) an:, kah daux tiag, mai hu: sawg pa grai: an: tom: hoik yaox nawh lie?
Mai yam hoik yaox nawh yung: an:, nawh gauxrhawm: gauxrhi: mai deuh piang klip tix heue.
Mai yam hoek nawh kah nyiiex tix, nawh kok nawh khrawm: paoxgrawm nawh khankix, mai paoxplawg paoxnyhawm: nawh khankix, mai ah nin: kah kix,Gauxrhawm: tau mai aux heue, kheu hoik deeh yaox aux yung: aux pa hoik grai: heue
Aux krai kah pex, kah daux Meung Raoma: kawx, nie lheu: koe: krax gauxrhawm: gauxrhi:, yam pwi koe: map koe: grham: tix kaux, doh keud doh sawn: kah phimap tix, khaing: son pwi rah pwi see tidim: dim: (99) kaux, pa ang lo krax doh keud doh sawn: kah phimap tix heue.
Mau Pa Grai:
"Phan: ang mawh nan: bun: tix kauxkaux, pa koe: mau kao: bliah, mai phan: grai: tix bliah, nawh ang tok kawkngu mai pih nyiiex tix, mai nied tix sawg tom: yaox mau an: lie?
Mai yam hoik yaox nawh mau an:, nawh kok nawh khrawm: paoxgrawm nawh khankix, mai paoxplawg paoxnyhawm: nawh khankix, mai ah nin:,Gauxrhawm: tau mai aux heue, kheu hoik deeh yaox aux mau tix bliah pa hoik grai: khaing: aux heue
Awm: an:, Aux krai kah pex, koe: krax gauxrhawm: gauxrhi:, dee ot kawncau Siyiex khankix, yam pwi koe: map koe: grham: tix kaux doh keud doh sawn: kah phimap tix heue."
Kawn: Simex Pa Grai:
Mai Nawh Cao: baox ah nin:, "Pwi tix kaux koe: kawn: simex ra: kaux.
Mai kah daux kiex, kaw pa mawh pux ah nin: kah keeing: tix,Keeing: eue, tawx aux kraung cie maix, pa khaw: aux tix pon liak Mai nawh gwieh sinngao tix kah kiex heue.
Mai khaix an: ang awt rheung:, kawn: pa mawh pux, khrawm: kraungkhrai: cie tix, mai hu: daux meung dee singai tix meung heue. Mai nawh nieb yuh pa ang khaw: ang jiet, mai kieh sin: cie tix som nai: nawk tan: heue.
Mai yam nawh hoik uik cai: pa koe: tix khawm: uik, daux meung an: kied lang: teung: sibhawm:, mai tokaux nawh kawx hot sibhawm: heue.
Yam an: nawh hu: kah pwi meung an: tix kaux, mai yuh siliex nawh heue. Mai kaw an: ploi: nawh hu: kah daux ma: tix, sonsang kia:, sang tawx, lig sawm: heue.
Mai nawh simie tix sak tu kah ceem pa ih lig khankix, mai pwi tix kaux kawx ang tawx kah nawh heue.
Viang mawh nan: yam nawh deeh doh keud tix, nawh ah nin:,Kawncau pa cang: pa caing kah keeing: aux koe: miex ding pa sak mai ang uik ih, mai aux siya: tix tin:, dex sang yum: heue.
Aux tag kaoh mai deeh hu: kah keeing: aux, mai ah nin: kah nawh,Keeing: eue, aux hoik phit hoik yuh phimap kah raoma:, mai sivoe ngai: maix heue.
Ang keung: tix kawn: kok aux, mawh kawn: simex maix, kieh aux mawh ngie kawncau pa cang: pa caing kah maix tix kaux liak
Mai nawh kaoh, mai deeh hoek kah keeing: tix. Yam kawn: tag hoek nawh, dee singai, keeing: nawh yaox nawh, mai koe: krax caoxrhawm:, mai to: tix hu:, mai khawp ngawg nawh, mai ngheut nawh heue.
Mai kawn: simex an: ah nin: kah nawh,Keeing: eue, aux hoik phit hoik yuh phimap kah raoma:, mai sivoe ngai: maix heue. Ang keung: tix kawn: kok aux, mawh kawn: simex maix heue
Viang mawh nan:, keeing: nawh ah nin: kah kawncau nawh khankix,Nied tix hu: teei kraung ceep pa lheu: mhawm: khaing: paox tix, mai ceep kah nawh, mai sau: jeep giien: kah taix nawh, mai ceep kiep kah caong nawh heue.
Hu: teei kawn: moi pa kluing: pa bee, mai pah nawh. Kieh ex ih, mai yuh krax gauxrhawm: heue.
Mawh kheu kawn: simex aux in: hoik yum:, mai yamin: hoik deeh im:. Nawh hoik grai:, mai hoik deeh yaox yamin heue Mai kix jah tix yuh krax gauxrhawm: gauxrhi: heue.
Yam hoek kawn: nawh pa mawh puxke:, khaing: ma:, mai hoek kah dex nyiiex, nawh mhong: luah lox pi: kuceu, mai lox graoh lox thiao:.
Mai nawh kok kawncau tix kaux mai chawk nawh, grawng: ceu an: mawh pa yuh kah mawx.
Mai kawncau an: deeh krai kah nawh,Pux maix hoik deeh hoek, mai keeing: maix hoik pah moi iak pa kluing: pa bee, kheu hoik deeh pon nawh tix rieb nawh mhawmmhawm: heue
Viang mawh kawx nan:, nawh pa mawh puxke: an:, songrhawm: songrhi: mai ang laig kah daux nyiiex, mai keeing: nawh lih hu: khyox khaw: nawh heue.
Viang mawh nan: nawh deeh pawk lox kah keeing: tix ah nin:,Jhak heue, aux hoik yuh son maix tom: nie num inkix, mai aux ang sax lheu: lox maix tix bawg kawx, viang mawh nan: maix ang sax tawx kawn: pex kah aux tix mu: kawx, yuh kah mawx sonsang yuh aux krax gauxrhawm: gauxrhi: tau mai paoxgrawm aux khankix heue.
Viang mawh kawx nan:, yam kawn: maix pa hoik kieh sin: maix nai: kah bun: coh kaux khankix, deeh hoek, maix hoik pah kawn: moi pa kluing: pa bee son nawh heue
Mai keeing: nawh ah nin: kah nawh,Kawn: simex aux eue, maix ot tau mai aux jheengjheeng:, mai can pa koe: aux khawm: uik, mawh cie maix heue.
Viang mawh nan: khaw: tix yuh krax gauxrhawm: gauxrhi:, mai gauxrhawm: heue. Mawh kheu pux maix in: hoik yum:, mai yamin hoik deeh im:, nawh hoik grai:, mai yamin hoik deeh yaox heue"
Kawncau Pa Ang Rah Ang See
Kah kawncau Nawh khankix kawx Nawh Cao: ah nin:, "Koe: cao:mi tix kaux, pa koe: kawncau pa bung: kaing tix kaux, pa dhua: pwi nawh kieh kraungkhrai: caomi an: nai:, mai krai kah simiang nawh heue.
Mai simiang nawh kok nawh mai ah nin: kah nawh, Pa mhong: aux grawhgrawng: maix mawh pa yuh kah mawx? Deeh tawx lai carang, grawhgrawng: yam yuh maix kawncau pa bung: kaing. Mawh kheu ang maix lai baox pon tix yuh kawncau pa bung: kaing heue
Mai kawncau pa bung: kaing an: keud ah nin: daux tokaux tix,Aux tag sang yuh kah mawx, kheu simiang aux hoik deeh teei, kaing bung: aux khaing: aux? Aux ang koe: riang tix sang kaong: tiex, mai phan: caung tix ih, kaig aux kah heue.
Khaix hoik rau aux khaing: kaing bung: aux, aux tag yuh kah mawx aux hoik tawng, sonsang rieb pwi aux kah daux nyiiex kix
Mai nawh kok pwi pa ceuk kah simiang nawh kukaux, mai chawk ah nin: kah kaw phaoka:,Maix ceuk kah simiang aux miex ding?:
Mai kaw an: deeh ah nin:,Aux ceuk rawm:bee tiyieh diag heue Mai kawncau pa bung: kaing an: ah nin: kah nawh,Teei lai grawng: ceuk maix, mai nied tix tiem: tiphwan: (50) heue
Khaix an: nawh baox chawk kah tang: kaux ah nin:,Mai maix ceuk cie tix miex ding?: Mai kaw an: deeh ah nin: kah nawh,Ceuk nghoxca tiyieh diag heue Mai kawncau pa bung: kaing an: ah nin: kah nawh,Teei lai grawng: ceuk maix, mai nied tix tiem: tidaix (80) heue
Mai simiang nawh yaw kawncau pa bung: kaing pa ang rah ang see an:, kheu hoik yuh nawh pa lhak pa lhiem:. Grawhgrawng: nawh, kawnpraix pa dex pa dawd mai haktiex khankix nie lhak lhiem: son bawg yam ju yam ot yam koe: kix, khaing: kawnpraix pa riieng khankix heue.
Aux baox krai kah pex, teei sinngao pa nieb hoik pon pex, mai shiao, yuh kah mawx sonsang pon paoxgrawm, yam pa hoik laux sinngao an:, pa tag sang rieb pex kah daux nyiiex gox pa tag koe: leeing ju leeing phan: heue.
Kaw pa kaux sijax kah ceu pa nie iak, kah grawng: pa ting kawx, kaux sijax heue. Mai kaw pa ang rah ang see, kah ceu pa nie iak, kah ceu pa ting kawx, ang rah ang see heue.
Mawh kheu nan: phan: pex ang kaux sijax, kah sinngao ceu pa ang rah ang see, mawx sang tawx pex priex sinngao pa mawh pa meh?
Phan: pex ang hoik kaux sijax kah cie pwi tang: kaux. Mawx tag sang tawx cie tokaux pex, kah pex?
Kawncau tikaux kawx ang pon yuh son simiang ra: kaux, mawh kheu nawh tag koeng kah tix kaux, mai moh tang: kaux an:, phan: ang mawh nan:, nawh tag een: rhawm: kah tix kaux, mai nieb yuh kah tang: kaux an: heue. Pex ang pon tix yuh son Siyiex, mai khawm: son sinngao heue."
Yesux Tawx Satix Kah Pharishie: Khankix
Mathiex 11:12-13; 5:31-32; Makux 10:11-12
Mai Pharishie: khankix pa mawh pwi pa moh mau, yam mhong: kix lox ceu an: khawm: uik, kix yuh pa ang cee ang cak nyiah kah Nawh Cao: heue.
Mai Nawh Cao: ah nin: kah kix, "Pex mawh pwi pa yuh awm: grang pa rah pa see sivoe kawn: pwi, viang mawh nan: Siyiex tawng rhawmrhi: pex. Mawh kheu pa kawn pwi yaog tix kieh ting, mawh pa greeing sivoe ngai: Siyiex heue.
Lai lox beenli, mai cao: jhai: khankix, koe: tom: hoek Yohan heue. Jah kah bawg yam an:, sidiex gau lox bwan: gauxrhawm: gauxrhi: pa dex pa dawd mai Meung Siyiex, mai pwi kukaux grhawm: tix laig kah heue.
Viang mawh nan: raoma: mai haktiex lheu: yie grai:, khaing: ngai: lai pa nie iak tix mu: cod grai: khaing: daux lai beenli heue.
"Pwi mawx ang ah, pa tik moeng tix, mai baox moeng tang: kaux, nawh phit nawh vao heue. Mai kaw pa teei tix moeng, bun: pa hoik tik mex nawh, phit vao heue.
Tax Caomi mai Lazarux
"Koe: caomi tix kaux, mai nawh ceep kraung raoh klai, mai kraung man: paing pa mhawm:, mai yuh krax pa gauxrhawm: gauxrhi: ku singaix heue.
Mai koe: pwi hot tix kaux, pa kaux Lazarux, pa ot dex siviex caomi an:. Nawh naog yia khawm: kaux tix.
Mai nawh simie tix ih, pa pruat pa roik, pa cod khaing: pheen: cao:mi an:. Mawh heue, viang mawh sox khankix kawx hoek tix lied dee saux nawh heue.
Yam an: tix singaix pwi hot an: yum: mai kawncau Siyeix khankix, teei nawh hu: deuh nawh kah daux naok Abraham heue. Cao: mi an: kawx yum: mai sipaung: nawh heue.
Mai nawh kied kharhawm: kharhi: daux meung yum:, mai nawh yaog ngai: nawh tix jhak, mai yaox Abraham dee singai, mai Lazarux kah daux naok nawh heue.
Mai nawh kok yo ah nin:,Keeing: Abraham eue, caoxrhawm: kah aux liak, mai ploi: Lazarux hoek, yuh kah mawx son nawh sang cub toh giien: tix daux rawm:, mai kieh dak aux nghie: liak, kheu aux kied kharhawm: kharhi: kah daux rao ngu in: heue
Viang mawh kawx nan: Abraham ah nin:,Kawnpraix eue, doh keud kah grawhgrawng: pa hoik pon maix ceu pa mhawm: cie maix, yam kawn: im: ju maix, mai awm: an: Lazarux hoik pon ceu pa ang mhawm:, pa caox heue, viang mawh kawx nan:, yamin nawh pon ceu pa khu: rhawm: nawh, pa nyawmrhawm: tin:, mai maix kham: geu: pa kharhawm: kharhi: heue.
Mai lheu: khaing: in: khawm: uik, sinax yiex mai maix, koe: rawng ting rawng raux, yuh kah mawx son kix pa sang hu: khaing: tin: kah maix, tag ang chix hu:, mai tix kaux kawx ang pon tiang tix hoek khaing: tan: kah yiex heue
Mai cao:mi an: baox ah nin:,Keeing: eue, phan: mawh nan:, aux khyox kah maix, kieh Lazarux hu: kah nyiiex keeing: aux liak.
Sonsang hu: nawh tix kham: mhai: sakse kah kix heue, mawh kheu aux koe: puxaik phwan: kaux, phan: ang mawh nan: ha: kix kawx, hoek kah dee kharhawm: kharhi: tin: heue
Viang mawh kawx nan:, Abraham ah nin:,Kix koe: Mose mai cao: jhai: khankix, kieh kix nghiiet lox kix heue
Mai kaw an: baox ah nin:,Ang mawh, keeing: Abraham eue, viang mawh nan:, phan: tix kaux pa hoik yum:, hu: kah kix, kix tag sang doh keud doh sawn: kah phimap tix heue
Mai Abraham baox ah nin: kah nawh,Phan: kix ang nghiiet Mose mai cao: jhai: khankix, viang pwi tix kaux deeh kaoh khaing: krax yum: kawx, kix tag ang cu ang nghiiet kah lox nawh heue"
Phimap Phigrham:
Mathiex 18:6-7, 21-22; Makux 9:42
Mai Nawh Cao: ah nin: kah kawncau Nawh khankix, "Phan: dee sideeing ang hoek ang doh mawh, viang mawh nan: kaw pa kieh koe: dee sideeing caong khankix, tag kharhawm: kharhi: heue.
Mhawm: son kaw an: phan: preue: simaox mhaw: kah ngawg nawh, mai taing nawh kah daux rawm: sigrit sigra:, khaing: kieh nawh kawn: nyawm iak khankix tix kaux sideeing caong tix heue.
Tokaux pex rien rhawm: tix heue, phan: puxaik maix phit lud, ne nawh kah, mai phan: nawh deeh doh keud doh sawn: tix, ploi: phimap nawh heue.
Mai phan: nawh phit maix daux tix singaix, tom: aliah bawg, mai deeh tieh tix hoek kah maix aliah bawg ah nin:,Aux deeh doh keud doh sawn: kah phimap heue Pluat ploi: phimap nawh heue."
Krax Yumrhawm:
Mai kawncau pa ting Nawh khankix ah nin: kah Simiang, "Kieh krax yumrhawm: ex baox nie baox ting liak."
Mai Simiang deeh ah nin:, "Phan: pex koe: krax yumrhawm: pon mu: simie sok taux klaox tix mu:, pex tag ah kah khaox liah in:,Maix reeig khawm: riah tix, mai hu: jung kah daux rawm: sigrit sigra: heue Mai khaox an: tag lai nghiiet lox pex heue.
Kaing Pa Caw Siliex Tix Yuh
Viang mawh kawx nan: kah daux pex, kaux pwi mawx, pa koe: siliex pa thai: ma:, phan: ang mawh nan: pa liang yung:, pa sang ah nin: kah nawh, yam deeh hoek nawh khaing: ma:,Hoek dom: in: mai ngawm tix sawm: heue
Jalao sang ah nan: tee: sang ah nin: kah nawh, Khre: ceu pa sang sawm: aux, nhawt maox rawd nyoi maix mai khan: kheu:, tom: hoik sawm: hoik rheep aux, mai khaix an: maix tag sang sawm: sang rheep tix heue Ang mawh lie?
Mawh kheu siliex an: hoik yuh ceu pa nawh hoik nhie: nawh yuh khankix, nawh khex sang yaogyaw bwanson: nawh kah lie?
Awm: an: pex kawx, khaix pex hoik yuh ceu pa hoik nhie: pex yuh khawm: uik. Ah nin:,Ex mawh ngie siliex pa ang koe: bwanson:, ex hoik yuh ceu pa khaw: ex tix yuh khaing: heue"
Yesux Pai: Moi: Pwi Sipawg Kao: Kaux
Yam kawn: tag hu: Nawh Cao: kah veng Yerusaliem, Nawh hu: preeng: kah sinax meung Samarix, mai meung Galilie: heue.
Mai yam laig Nawh Cao: kah daux yaong: tix yaong:, pwi sipawg kao: kaux, cung dee singai,
mai kok yo ah nin:, "Yesux, Simiang eue, caoxrhawm: kah yix liak."
Mai yam Nawh Cao: yaox kix, Nawh ah nin: kah kix, "Hu: jhi: tokaux pex kah cao: giex kaing: li pa ting khankix heue." Mai yam kawn: tag hu: kix, kix deeh singax heue.
Kah daux kix tix kaux yam nawh yaox grawhgrawng: hoik deeh moi: tix, nawh deeh tieh tix hoek mai ah lox sinum yaogyaw Siyiex heue.
Mai nawh gup ngai: tix dex caong Nawh Cao:, mai yaogyaw bwanson: Nawh Cao:, kaw an: mawh pwi Samarix heue.
Mai Yesux ah nin: kah nawh, "Pa hoik deeh kieh singax koe: kao: kaux ang mawh lie? Viang mawh kawx nan: kix dim: kaux ot dee mawx?
Ang koe: pa sang deeh hoek tix yaogyaw bwanson: Siyiex, lheu: khaing: pwi tang: ceu tang: cat in: lie?"
Mai Nawh Cao: baox ah nin: kah kaw an:, "Kaoh mai hu: dee hu: maix, krax yumrhawm: maix hoik kieh maix moi: heue."
Grawng: Meung Siyiex Pa Sang Hoek
Mathiex 24:23-28, 37-41
Mai Pharishie: khankix hoek tix chawk ah nin:, "Meung Siyiex tag sang hoek lai mawx?" Mai Nawh Cao: pawk lox ah nin: kah kix, "Meung Siyiex hoek kah daux pa chix yaox pwi ang mawh heue.
Viang mawh nin: kawx, kix tag ang ah,Jhak heue, koe: tin:, phan: ang mawh nan:,Jhak heue, koe: tan: Mawh kheu Meung Siyiex koe: kah daux pex heue."
Mai Nawh Cao: ah nin: kah kawncau Nawh khankix, "Singaix bawg yam tag sang hoek, yam sang simie pex tix yaox, singaix bawg yam Kawn: kawn: pwi tix singaix, mai pex tag ang lai pon tix yaox heue.
Mai kix tag sang ah nin: kah pex,Jhak heue, tan:, jhak heue, tin: Paw lih hu:, viang khaix kix kawx paw hawt heue.
Mawh kheu awm: tuhsah, yam nawh tuh plak daog raoma: tix plak, jhan: riieng tom: hoek daog raoma: tang: plak, yam tag sang hoek Kawn: kawn: pwi kah daux singaix Nawh, tag sang awm: an: heue.
Viang mawh nan: Nawh tag sang kham: geu: tom: nie ceu, mai kham: geu: pa tik pa vud pwi ju in:, phaoka: heue.
Awm: pa hoik mawh kah daux bawg yam singaix Noax khankix, kah daux bawg yam singaix Kawn: kawn: pwi kawx, tag sang mawh awm: an: heue.
Kix ih, kix nyaux, mai teei mex teei moeng, mai teei tix tawx kah paox tix, tom: hoek singaix laig Noax kah daux nyiiex reu ting, mai rawm: haok hwan:, mai naog piang haktiex, yuh kix laux khawm: uik heue.
Awm: an: kah daux bawg yam singaix Lotax khankix, kix ih, kix nyaux, kix liag, kix coh, kix sum:, mai kix yuh nyiiex heue.
Viang mawh kawx nan: kah daux singaix yam lih Lotax khaing: daux veng Sawdom, lih lhiex ngu mai mhat khaing: raoma: mai yuh kix laux khawm: uik heue.
Kah daux singaix yam tag sang kieh sidawng: Kawn: kawn: pwi, tag awm: an: heue.
Kah daux singaix an:, pwi pa ot kah piang prang nyiiex, paw kieh nawh lih tix teei kraung tix kah daux nyiiex, mai awm: an: pwi pa ot kah daux ma:, paw kieh nawh deeh plak khaix tix heue.
Doh keud kah moeng Lotax heue.
Pwi mawx ang ah pa sawg tix taoh ju tix, tag sang som ju heue. Viang mawh kawx nan: pwi mawx ang ah pa sang som ju, tag sang pon taoh ju tix heue.
Aux krai kah pex, kah daux sawm: an:, pwi ra: kaux pa it piang ku: tix mu: ngie, tag sang teei tix kaux, mai tag sang prah tang: kaux an: heue.
Bun: ra: kaux pa krid tau kah mhaw:, tag sang teei tix kaux, mai tag sang prah tang: kaux an: heue."
21Pwi ra: kaux pa ot daux kaung, tag sang teei tix kaux, mai tag sang prah tang: kaux an: heue”
Mai kix chawk Nawh Cao: ah nin:, “Simiang eue, ceu in: tag sang mawh kah dee mawx?” Mai Nawh Cao: pawk lox ah nin: kah kix, “Tokaux yum: koe: dee mawx ang ah klang: preng tag sang khrawm: tix tan: heue.”
Lox Phektem: Miexmai: mai Cao: Prawng See:
Mai Nawh Cao: krai lox phektem: kah kix, yuh kah mawx sonsang khaw: kix tix rawg bwan: jheengjheeng:, mai son ang kix sang khrup rhawm:,
ah nin:, "Kah daux veng tix veng koe: cao: prawng see: tix kaux, pa ang lhat kah Siyiex, mai ang chix nab yam pwi heue.
Mai kah daux veng an: koe: miexmai: tix kaux, pa hu: kah cao: prawng see: an: lawlawx, tix ah nin:,Prawng son aux mhawm:, mai yuh kah pwi pa yuh see: kah aux liak
Kah daux tix vong nawh ang prawng ang yuh, viang mawh kawx nan: khaix an: nawh keud tix ah nin: kah daux tokaux tix,Viang aux ang lhat kah Siyiex mai ang nab yam kah pwi kawx,
mawh kheu miexmai: in: hoek tix laklheut sugsag aux, aux tag sang prawng plak kiex, phan: ang mawh nan: kiex tag sang kieh aux taug nyhap tix heue"
Mai Simiang baox ah nin:, "Nghiiet kah lox cao: prawng see: pa ang rah ang see an: heue.
Siyiex tag ang prawng, ang yuh plak pwi pa hoik laug Nawh tix teei, pa kok kah Nawh yam pon singaix, mai yam ponsawm:, viang ang Nawh khran: yuh kawx lie?
Aux krai kah pex, Nawh tag sang nied tix prawng laung laung plak kix heue. Viang mawh kawx nan:, yam sang hoek Kawn: kawn: pwi, Nawh tag sang yaox krax yumrhawm: kah piang haktiex in: lie?"
Lox Phektem: Grawng: Pharishie:
mai Pwi Koh Mau
Mai lox phektem: in: kawx, Nawh Cao: krai kah kix tiblah, pa een: rhawm: kah tokaux tix, grawng: uik rah uik see tix, mai nieb een: tix ang koe: cee kah pa kawn taig khawm: uik an: heue.
"Pwi ra: kaux haok kah nyiiex bwanson: sang rawg bwan:. Tix kaux mawh Pharishie:, mai tang: kaux an:, mawh pwi pa koh mau heue.
Pharishie: an: cung rawg bwan: tix nongnong: ah nin:,Siyiex eue, aux yaogyaw bwanson: Maix, kheu ang aux awm: pwi tang: kaux khankix, pa nieb rhim: tix teei, pa yuh pa ang rah ang see, pa phit pa vao, mai mawh kheu kah pwi koh mau in: kawx, ang awm: heue.
Aux twah pa ih pa un: tix, tix vang twah ra: bawg heue. Mai aux tan lu, pa pon aux khawm: uik, kao: son tix son heue
Viang mawh kawx nan:, pwi pa koh mau an:, cung dee singai, mai pie ngai: nawh, ang yaog tix maong plak raoma:, viang mawh nan: nawh dieh naok tix, mai ah nin:, Siyiex eue, caoxrhawm: kah aux pa mawh pwi ting map ting grham: liak
Aux krai kah pex, yam pwi in: lih hu: kah nyiiex tix, nawh hoik nie lheu: pon pa rah pa see, khaing: tang: kaux an: heue. Mawh kheu pwi mawx ang ah, pa yaog tokaux tix ting, tag sang yeen nawh tiem, viang mawh kawx nan:, pwi mawx ang ah, pa yuh tokaux tix tiem, tag sang yaog nawh ting."
Yesux Nawb Bwan: Ka Piang Kawn: Nyawm iak Khankix
Mathiex 19:13-15; Makux 10:13-16
Mai kix viex khawm: kawn: ngie: tix khankix kah Nawh Cao:, yuh kah mawx sonsang teeh Nawh kah kix heue. Viang mawh nan: yam yaox kawncau Nawh khankix, kix ah kah kix heue.
Viang mawh kawx nan: Yesux kok kix hoek kah Tix ah nin:, "Kieh kawn: nyawm iak khankix hoek kah Aux, paw vi sidien kix, kheu Meung Siyiex mawh cie pa awm: kix heue.
Aux krai lox tete telai kah pex, pwi mawx ang ah, pa ang rieb tix teei Meung Siyiex awm: kawn: nyawm iak, tag ang tau tix pon tix laig tan: heue."
Grawng: Caomi Awn: Ju Tix Kaux
Mathiex 19:16-30; Makux 10:17-31
Mai simiang tix kaux hoek tix chawk Nawh Cao: ah nin:, "Sara Cao: Gau pa mhawm: eue, aux tag sang yuh kah mawx sonsang pon aux, ju leeing ju leeing: phan:?"
Mai Yesux pawk lox ah nin: kah nawh, "Yuh kah mawx maix lai kok Aux mawh,Pa mhawm:?: Lheu: khaing: Siyiex tix kaux khaing:, tix kaux kawx ang mhawm: heue.
Maix tawng lox pingnyap khankix,
22:Paw phit paw vao, paw teei ju pwi yum:, paw briex paw lak, paw kham: mhai: sakse pa ang mawh ang meh, yungyi: kah miex kah keeing: tix heue"
Mai kaw an: pawk ah nin:, "Aux hoik hawt tix yuh ceu an: khankix khawm: uik, tom: yam iak aux heue."
Mai yam mhong: Yesux lox an:, Nawh Cao: ah nin: kah nawh, "Pa taik maix kawn: koe: tix ceu khaing:. Hu: coh pa koe: maix khawm: uik, mai tawx kah pwi hot pwi sibhawm: khankix, mai maix tag koe: kraungkhrai: kah daux meung raoma:, mai hoek tix hawt Aux heue."
Viang mawh nan:, yam mhong: nawh ceu an: khankix, nawh kied khirhawm: khirhi:, kheu mawh nawh pa kied koe: heue.
Mai Yesux jhak kah nawh ah nin:, "Pwi pa mawh cao: mi nu sonsang laig kah daux Meung Siyiex miex ding heue.
Laig kala-uk kah daux kre: nyex lheu: yie khaing: laig cao: mi kah daux Meung Siyiex heue."
Mai kix pa mhong: lox an: chawk ah nin:, "Phan: mawh nan:, pwi mawx tag sang pon hoek krax taoh?"
Viang mawh kawx nan: Nawh Cao: deeh ah nin:, "Ceu pa ang kawn: pwi chix yuh, Siyiex chix yuh heue."
Mai Petrux ah nin:, "Jhak heue, ex hoik prah hoik grham: cie ex, mai hawt khaix Maix heue."
Mai Nawh Cao: baox ah nin: kah kix, "Aux krai lox tete telai kah pex, ang koe: pwi tix kaux kawx, pa hoik prah hoik grham: nyiiex nawh, phan: ang mawh nan:, moeng nawh, phan: ang mawh nan: puxaik nawh, phan: ang mawh nan:, miex keeing: nawh, phan: ang mawh nan: kawnpraix nawh, mawh kheu Meung Siyiex.
Pa tag ang baox nie lheu: pon kah daux bawg yamin, mai ju leeing ju leeing phan: kah daux ju khaix heue."
Yesux Krai Grawng: Pa Sang Yum: Tix Bawg Loe:
Mathiex 20:17-19; Makux 10:32-34
Nawh Cao: teei kix kao: kaux ra: kah Tix, mai ah nin: kah kix, "Jhak heue, ex tag sang haok hu: kah veng Yerusaliem, mai ceu pa cao: jhai: khankix hoik tiem: tix deuh, tag sang grum mawh kah Kawn: kawn: pwi heue.
Grawhgrawng: nawh, tag sang teei tix tawx Nawh kah pwi tang: ceu tang: cat, mai yuh pa ang cee ang cak, mai pa ang khaw: ang jiet, mai baig rawmmya: kah heue.
Mai kix tag sang sivied Nawh, mai teei Nawh yum:, mai yam hoik hoek loe: singaix Nawh tag deeh kaoh im: heue."
Kawncau Nawh khankix ang tawng grawhgrawng: ceu in: khankix, tix ceu kawx heue. Mawh kheu hoik mox lox in: khaing: kix, mai kix ang tawng grawhgrawng: ceu pa ah Nawh Cao: heue.
Yesux Pai: Moi: Pwi Dugngai: Pa Kaux Batimie:
Mathiex .20:29-34; Makux 10:46-52
Yam Nawh Cao: hoek dex kah veng Yerikho:, pwi dugngai: tix kaux ngawm dex krax mai caung tix ih heue.
Mai kheu mhong: nawh cub pwi haoh pwi hun: hu: daux krax, nawh tom: chawk grawng: in: mawh pa yuh kah mawx.
Mai kix krai kah nawh, mawh Yesux pwi veng Nazariet pa hu: lawng krax heue.
Mai kaw an: kok yo ah nin:, "Yesux kawn: Davit eue, caoxrhawm: kah aux liak."
Mai pwi pa hu: sivoe khankix, ah kah nawh, sonsang yawg nawh tix heue. Viang mawh nan: nawh nie baox yo ah nin:, "Kawn: Davit eue, caoxrhawm: kah aux liak."
Mai Yesux cung, mai tawx lox nhie: viex kaw an: hoek kah Tix, mai yam nawh hoek dex, Nawh Cao: chawk kah nawh ah nin:,
"Maix simie tix kieh Aux yuh patix kah maix?" Mai kaw an: ah nin:, "Simiang eue, kieh ngai: aux chix yaox liak."
Mai Yesux baox ah nin: kah nawh, "Kieh yaox heue, krax yumrhawm: maix hoik kieh maix moi:."
Mai dom: mawx dom: an: kaw an: chix yaox, mai yaogyaw Siyiex, hawt khaix Nawh Cao:. Mai yam yaox pwi khawm: uik ceu an:, kix yaogyaw Siyiex heue.
Grawng: Yesux mai Zakkhie:
Nawh Cao: laig mai yam tag hu: preeng: daux veng Yerikho:.
Jhak heue, pwi tix kaux pa kaux Zakkhie:, pa mawh cao: giex kaing: pwi koh mau khankix tix kaux, mai nawh mawh pa mi pa koe: heue.
Nawh sawg sonsang yaox Yesux mawh pwi pa yuh kah mawx, mai kheu hun: pwi nawh ang pon tix yaox, kheu nawh mawh pwi kalu:, pwi iak heue.
Mai nawh to: hu: sivoe, mai haok kah khaox liah tix khaox, sonsang pon tix yaox kah Nawh Cao:, kheu Nawh Cao: uik sang lawng krax an: heue.
Mai yam hoek Yesux kah dee an:, Nawh Cao: yaog tix simi, mai ah nin: kah nawh, "Zakkhie: eue, nied tix lih laung laung, mawh kheu Aux tag ot kah daux nyiiex maix singaix heue."
Mai nawh nied tix lih, mai koe: krax gauxrhawm: gauxrhi:, rieb tix teei Nawh Cao: heue.
Mai yam pwi yaox, kix khawm: uik salao ah nin:, "Nawh hoik laig tix paung mai pwi pa ting map ting grham: heue."
Mai Zakkhie: cung ah nin: kah Simiang, "Jhak heue, Simiang eue, kraung pa koe: aux tix plak aux tawx kah pwi hot pwi sibhawm: khankix, mai phan: aux hoik teei pa ang khaw: tix teei kah pwi mawx ang ah, aux deeh pheuex kah pon: son heue."
Mai Yesux ah nin: kah nawh, "Singaix krax taoh hoik hoek kah nyiiex in:, mawh kheu kaw in: kawx, mawh kawn: simex Abraham heue.
Mawh kheu Kawn: kawn: pwi hoek sonsang sawg, mai tix taoh pa hoik grai: khankix heue."
Lox Phektem: Grawng: Kawncau Kao: Kaux mai Mau Kao: Mina
Mai yam kawn: nghiiet kix ceu in: khankix, Nawh Cao: baox krai lox phektem: in:, mawh kheu Nawh Cao: dex hoek kah veng Yerusaliem mai kheu ce: kix Meung Siyiex tag sang bleeh dom: mawx dom: an: heue.
Kheu nan: Nawh Cao: ah nin:, "Simiang tix kaux hu: kah daux meung dee singai tix meung, sonsang pon haktiex son tokaux tix, mai deeh hoek heue.
Mai nawh kok kawncau tix kao: kaux, mai tawx mau kah kix kao: mina, mai ah nin: kah kix,Yuh lai kah mau in: tom: deeh hoek aux heue
Viang mawh kawx nan:, pwi meung, pwi haktiex nawh, koeng kah nawh, mai ploi: pwi hawt khaix nawh ah nin:, "Ex tag ang kieh pwi in: ting piang ex heue
Mai yam deeh hoek, nawh khaix hoik pon nawh haktiex, nawh tawx lox kieh kok kah kawncau khankix, pa hoik tawx nawh mau, hoek kah nawh, yuh kah mawx sonsang pon nawh tix tawng, kix hoik pon rao yuh lai miex ding.
Mai kaw phaoka: hoek sivoe nawh, ah nin:,Simiang eue, mau cie maix tix mina an:, hoik baox pon rao kao: mina heue
Mai nawh baox ah nin: kah kawncau an:,Mhawm: heue, kawncau pa mhawm: eue, mawh kheu hoik yaox maix kaux sijax kah daux pa iak, pa liied, maix giex kaing: veng kao: veng heue
Mai ra: kaux tix kaux hoek, ah nin:,Simiang eue, mau cie maix tix mina, hoik baox pon rao phwan: mina heue
Mai kah kawncau an: kawx, nawh ah nin:,Maix kawx giex kaing: piang veng phwan: veng heue
Mai tang: kaux tix kaux hoek, ah nin:,Simiang eue, jhak heue, mau cie maix tix mina an:, aux hoik pua: tix deuh kah daux man: khoek in:.
Mawh kheu lhat aux kah maix, kheu mawh maix pwi riex pa nu tix ah heue. Maix teei ceu pa ang maix deuh, mai vawg ceu pa ang maix rhuat heue
Nawh ah nin: kah kawncau an:,Kawncau pa caox eue, aux tag prawng maix kah lox pa lih khaing: jheeh maix heue. Mawh kheu hoik tawng maix grawng: mawh aux pwi riex pa nu tix ah, pa teei ceu pa ang aux deuh, mai pa vawg ceu pa ang aux rhuat heue.
Phan: mawh nan: yuh kah mawx maix ang tawx mau cie aux kah nyiiex dee deuh mau? Mai yam deeh hoek aux, aux tag hoik pon mau aux khawm: rao heue
Mai nawh ah nin: kah kix pa cung dex tan: khankix,Deeh teei mau tix mina an: khaing: nawh, mai tawx kah kaw pa hoik koe: kao: mina heue
Mai kix ah nin: kah nawh,Simiang eue, nawh hoik koe: kao: mina heue
Aux krai kah pex, pa hoik koe: kukaux daux pwi, tag sang baox tawx kah nawh heue. Mai kaw pa ang koe:, viang pa hoik koe: nawh kawx, tag sang teei khaing: nawh heue.
Lheu: khaing: an:, pwi pa koeng kah aux khankix, pa ang rhawm: kieh aux yuh simiang giex kaing: kix, pex viex tin: mai pah kix yum: sivoe aux heue"
Yesux Brug La Awn: Ju Lai g Daux Veng Yerusaliem
Mathiex .21:1-9; Makux 11:1-11; Yohan 12:12-15
Yam hoik krai Nawh Cao: ceu an:, Nawh thong: hu: sivoe haok kah veng Yerusaliem heue.
Mai yam Nawh Cao: hoek dex kah yaong: Bephake mai yaong: Betanix, kah gawng pa kok gawng Sanlun, Nawh ploi: kawncau Nawh ra: kaux hu:,
ah nin:. "Hu: kah daux yaong: pa koe: sivoe pax, mai yam laig pax kah daux yaong: an:, pax tag yaox kawn: la pa hoik phyawk tan:, pa ang pwi sax ngawm piang heue. Kah mai viex nawh hoek heue.
Mai phan: pwi tix kauxkaux chawk pax,Pax lai kah kawn: la in: yuh kah mawx?: Pax tag deeh ah nin:,Simiang lo nawh heue"
Kiex pa hoik ploi:, hu: mai yaox awm: pa hoik krai Nawh Cao: kah kiex heue.
Mai yam kawn: tag kah kiex kawn: la an:, cao: kawn: la an: khankix, chawk kiex ah nin:, "Pax lai kah kawn: la in: yuh kah mawx?"
Mai kiex deeh ah nin:, "Simiang lo nawh heue."
Mai kiex viex kawn: la an: hoek kah Yesux, mai kix teei kraung ceep tix, sau: kah piang kawn: la an:, mai Nawh Cao: ngawm kah piang heue.
Mai yam hu: Nawh Cao:, kix teei kraung ceep tix nih tix tawm kah daux krax heue.
Mai yam Nawh Cao: hoek dex kah veng Yerusaliem, mai lih jee gawng Sanlun, cub kawncau mausoi:, pa haoh pa hun: khawm: uik, koe: krax gauxrhawm: gauxrhi:, mai yaogyaw Siyiex kah lox sinum, grawhgrawng: kaing siawpsibrawm khankix, pa hoik yaox kix,
ah nin:, 23"Simiang Khunhawkham pa hoek kah dau ceukaux Simiang, ting bwanson: heue. Kieh nhim: kah daux meung raoma:, kieh koe: min: plakngai: dee lhaong: khaing: paox tix heue."
Mai Pharishie: tiblah pa ot kah daux cub pwi haoh pwi hun: an:, ah nin: kah Nawh Cao:, "Sara Cao: Gau eue, ne kah kawncau mausoi: Maix khankix heue."
Mai Nawh Cao: deeh pawk lox ah nin: kah kix, "Aux krai kah pex, phan: pwi khankix yawg tix, ang nye:, simaox rang: khankix tag sang riag yo heue."
Yesux Yiiem Son Veng Yesrusaliem
Mai yam Nawh Cao: hoek dex kah Yerusaliem, mai yaox veng an:, Nawh yiiem kah grawhgrawng: nawh,
ah nin:, "Phan: maix hoik tawng kah daux singaix in:, viang mawh phan: maix tawng grawhgrawng: ceu pa dex pa dawd mai pa nhim: maix kawx, mhawm: heue. Viang mawh nan:, grawhgrawng: khankix hoik mox khaing: ngai: maix yamin heue.
Grawhgrawng: nawh, bawg yam singaix tag sang hoek kah piang maix, yam pwi pa koeng kah maix khankix tag sang yuh tab, yuh lawng, rob maix, mai tag ot vungviang maix ku plak, mai laung maix kah heue.
Mai tag sang kieh maix sidawm sidu mai tiex, khawm: kawnpraix pa koe: kah daux maix heue. Mai kix tag ang grham: kieh simaox koe: tix lon: piang tix lon: kah daux maix, kheu ang maix tawng bawg yam pa hoek pa tawx bwanson: kah maix heue."
Yesux Kieh Nyiex Bwan: Singax
Mathiex 21:12-17; Makux 11:15-19; Yohan 2:13-22
Mai Nawh Cao: laig daux nyiiex bwan:, mai grheu: pwi pa coh khankix lih,
mai ah nin: kah kix, "Hoik tiem: tix deuh ah nin:, Nyiiex aux tag mawh nyiiex rawg bwan:, 24:Viang mawh kawx nan: pex hoik kieh mawh daux, dee ot pwi tud pwi rhim: heue."
Mai Nawh Cao: sidiex gau kah daux nyiiex bwan: ku singaix. Viang mawh kawx nan: cao: giex kaing: li pa ting khankix, mai pwi tiem: lai khankix, mai kix pa mawh pwi pa ting pa lhaong: khankix, sawg tix yuh Nawh laux.
Mai kix sawg ang pon ang yaox, ceu pa sang yuh kix, kheu pwi kukaux daux pwi khawm: uik, breuk Nawh mai nghiiet lox Nawh Cao: heue.
Chawk Grawng: Pon Yesux Akhwang:
Mathiex 21:23-27; Makux 11:27-33
Kah daux singaix an: khankix tix singaix, yam gau Nawh Cao: kah pwi khankix, kah daux nyiiex bwan:, mai sidiex gau lox bwan: gauxrhawm: gauxrhi:, cao: giex kaing: li pa ting khankix, mai pwi tiem lai khankix, hoek tau mai kuad song: khankix kah Nawh Cao:,
mai chawk ah nin: kah Nawh Cao:, "Krai ex mhong: liak, Maix pon akhwang: siawpsibrawm tix yuh ceu in: khankix dee mawx? Mai pwi mawx, mawh kaw pa tawx akhwang: siawpsibrawm in: kah Maix."
Mai Nawh Cao: pawk lox ah nin: kah kix, "Aux kawx, tag sang chawk pex kah grawhgrawng: tix ceu heue. Deeh krai kah Aux ha:.
Krax baptis Yohan, kaoh khaing: raoma: lie?, phan: ang mawh nan: kaoh khaing: kawn: pwi lie?"
Mai kix keud tau ah nin:, "Phan: ex ah kaoh khaing: raoma:, Nawh Cao: tag chawk ah nin:,Phan: mawh nan: yuh patix, pex ang yumrhawm: kah nawh?:
Viang mawh nan:, phan: ex ah,Kaoh khaing: kawn: pwi, pwi khawm: uik tag sang dheem: ex kah simaox heue. Kheu kix hoik yumrhawm: grawng: mawh Yohan cao: jhai: heue."
Kix tom: pawk lox ah, ang kix tawng grawng: kaoh khaing: dee mawx heue.
Mai Yesux baox ah nin: kah kix, "Aux kah ang krai kah pex, grawhgrawng: pon Aux akhwang: siawpsibrawm tix yuh ceu in: khankix dee mawx heue."
Lox Phektem: Cao: Sipeem mai Cao: Vai
Mathiex 21:33-46; Makux 12:1-12
Mai Nawh Cao: baox jah tix sidiex lox phektem: in:, kah pwi khankix ah nin:, "Pwi tix kaux nawh sum: sipeem plix siiet tix dauh mai yaog mai tawx vai kah pwi pa yuh sipeem plix siiet, mai hu: tang: praix tang: klawng: rheung: nyao heue.
Mai yam hoek bawg yam, nawh ploi: kawncau tix tix kaux hu: kah pwi yuh sipeem an: khankix, yuh kah mawx sonsang tawx kix, plix sipeem plix sieht an: kah nawh. Viang mawh nan: pwi pa yuh sipeem an:, tap nawh mai ploi: nawh ing: giex, taix yi heue.
Mai nawh baox deeh ploi: kawncau tix tix kaux, mai kah nawh kawx, kix tap, mai yuh pa ang khaw: ang jiet kah nawh, mai ploi: nawh ing: giex, taix yi heue.
Mai nawh baox ploi: kawncau loe: kaux tix kaux, mai kah nawh kawx, kix yuh sang yuh ngud, mai nyhot grheu: nawh lih heue.
Mai simiang sipeem plix siiet an: ah nin:,Aux tag sang yuh kah mawx? Aux tag ploi: kawn: simex aux pa moh tix hu: kah heue. Kix tee: sang yungyi: kah nawh pleei:
Viang mawh kawx nan:, yam yaox pwi yuh sipeem khankix kah nawh, kix keud tix ah nin: kah paox tix tix kaux hoik tix kaux, "Kaw in: mawh cao: sin:. Ex teei nawh yum:, yuh kah mawx sin: an: tag mawh cie ex heue
Mai kix taing vud nawh khaing: sipeem plix siiet an:, mai teei nawh yum: heue. Mawh kheu nan: simiang sipeem plix siiet an:, tag sang yuh kah mawx kah kix?
Nawh tag hoek yieh tix yuh laux, pwi yuh sipeem an: khankix, mai tawx sipeem plix siiet an: kah pwi tang: kaux heue." Mai yam pwi khankix mhong: lox an: kix ah nin:, "Paw doh kieh mawh nan:."
Viang mawh kawx nan:, Nawh Cao: jhak kah piang kix mai ah nin:, "Phan: mawh nan: lox pa hoik tiem: tix deuh ah nin:, :Simaox pa hoik tik pwi yuh nyiiex, hoik yuh kieh mawh kaing: kah daog, mawh pa yuh kah mawx? 18Pwi pa rau kah piang Simaox in: kukaux tag max, mai Simaox in: rau kah piang pwi mawx ang ah tag kieh nawh prungprang:awm: phawng: tiex heue"
Tawx Mau Koh Kah Kesa
Mth. 22:15-22; Makux 12:13-17
Mai pwi tiem lai khankix, mai cao: giex kaing: lix pa ting khankix sawg tix giex Nawh Cao: kah daux nari dom: an: heue. Mai kix lhat kah pwi khankix, kheu tawng kix Nawh Cao: hoik krai lox phektem: in: kah grawng: kix heue.
Mai kix jhak Nawh Cao:, mai ploi: pwi jiang, pa yuh tokaux tix awm: pwi rah pwi see, yuh kah mawx sonsang pon giex kix Nawh dee lud lox sikah Nawh, sonsang pon tix tawx Nawh kah daux tawm: taix simiang giex kaing: haktiex heue.
Mai kix chawk Nawh Cao: ah nin:, "Sara Cao: Gau eue, ex tawng pa sidiex pa krai Maix, mawh pa rah pa see, mai grawng: ang Maix jhak kah pakngai: pwi tix kaux kawx, mai sidiex gau grawhgrawng: krax Siyiex tete heue.
Ex khaw: tix tawx mau koh kah simiang Kesa lie?, ang khaw: tix tawx lie?"
Viang mawh kawx nan: Nawh Cao: tawng grawng: pa lhak pa lhiem: pa pie kix, mai ah nin: kah kix,
"Jhi: Aux yaox mau denari tix plah heue. Mau in: koe: rieng mai lai pwi mawx?" Mai kix deeh ah nin:, "Mawh rieng mawh lai simiang Kesa heue."
Mai Nawh Cao: ah nin: kah kix, "Ceu pa mawh cie Kesa, tawx kah simiang Kesa heue, mai ceu pa mawh cie Siyiex tawx kah siyiex heue."
Mai kix ang pon tix giex dee lud lox Nawh Cao:, kah sivoe pwi khankix, mai kix daox deng: kah lox pawk Nawh, mai kix yawg tix ang nye: heue.
Chawk Grawng: Pa Deeh Kaoh Im:
Mathiex 22:23-33; Makux 12:18-27
Sadukie: tiblah hoek kah Nawh Cao:, pa ah ang koe: pa deeh kaoh im: heue. Mai kix chawk Nawh,
ah nin:, "Sara Cao: Gau eue, Mose tiem: tix deuh kah ex ah nin:,
27:Phan: puxke: pwi tix kaux yum:, pa koe: moeng, mai pa ang koe: kawn:, pux nawh tag sang teei moeng nawh, mai eei: kawn: ceucat son puxke: nawh heue
Koe: puxaik aliah kaux. Kaw phaoka: teei tix koe: moeng, Nawh ang koe: kawn: koe: praix mai yum: heue.
Mai ra: kaux tix kaux,
mai loe kaux tix kaux tom: hoek aliah kaux tix kaux kawx, teei bun: an:, ang koe: tix prah kawnpraix mai yum: heue.
Khaix an: bun: an: kawx yum: heue.
Mawh kheu nan: yam hoek bawg yam deeh kaoh im:, kah daux kix nawh tag mawh moeng kaw pa yuh kah mawx? Kheu kix khawm: aliah kaux hoik to moeng bun: an: heue."
Mai Yesux ah nin: kah kix, "Kawn: pwi haktiex in:, teei mex teei moeng, mai teei tix tawx kah paox tix heue.
Viang mawh kawx nan: kix pa keung: tix pon, ju khaix, mai ceu pa deeh kaoh khaing: krax yum: khankix, ang teei mex teei moeng, mai ang teei tix tawx kah paox tix heue.
Grawhgrawng: nawh, kix ang baox deeh chix yum: khaix an:, kheu kix sidu awm: kawncau Siyiex khankix, mai kix mawh kawn: Siyiex, kheu kix mawh pwi pa hoik deeh kaoh im: heue.
Lheu: khaing: an:, grawhgrawng: pwi pa yum: tag deeh kaoh im:, viang mawh Mose kawx hoik jhi: yaox, dee koe: grawhgrawng: yeem khaox, yam nawh kok Siyiex mawh, 28:Siyiex Abraham, mai Siyiex Icak, mai Siyiex Yakop heue.
Nawh ang mawh Siyiex pwi yum:, viang mawh nan: Nawh mawh Siyiex pwi im:, mawh kheu kah Nawh pwi khawm: uik mawh pa im: heue."
Mai pwi tiem: lai tiblah deeh ah nin:, "Sara Cao: Gau eue, caw, mhawm: pa ah Maix heue."
Khaix an: kix ang pon chawk lox kah Nawh Cao: tix ceu kawx heue.
Lox Pa Chawk Yesux Kah Cao: Kaing: Khankix
Mathiex 22:41-46; Makux 12:35-37
Mai Nawh Cao: ah nin: kah kix, "Kix ah Khrit mawh kawn: Davit yuh kah mawx?
Grawhgrawng: nawh, tokaux Davit hoik ah nin: kah daux Lai Yaogyaw, 29:Simiang ah nin: kah Simiang aux, ngawm plak taix khawn: dawm: Aux, 43 tom: Aux kieh pwi koeng kah Maix:, mawh ngot dee deuh caong Maix heue.
Mawh kheu nan:, phan: Davit hoik kok Nawh mawh Simiang, Nawh chix mawh kawn: nawh yuh kah mawx?"
Yesux Caox Ka Cao: Tiem: Lai Mai Pharishie:
Mathiex 23:1-36; Makux 12:38-40
Mai deeh pon mhong: pwi khawm: uik, Nawh Cao: ah nin: kah kawncau Nawh khankix,
"Rien rhawm: tix kah pwi tiem: lai khankix pa simie tix ceep sibex dha: mai hu:, mai moh tix kieh pwi ah, lox yungyi: kah daux lah daux cau khankix, mai kix moh dee ngawm, pa mhawm: khaing: paox tix, daux nyiiex sidiex khankix, mai dee mhawm: khaing: paox tix, dee yuh pwie khankix heue.
Kix chix rud tix ih nyiiex miexmai: khankix, mai sonsang chix pie chix lhen:, kix rawg bwan: tom: lang:. Kix tag nie pon krax prawng krax ciyang pa ting heue."
Mau Pa Tan Miexmai:
Makux 12:41-44
Mai Nawh Cao: yaog tix jhak, mai yaox cao: mi khankix sau: pa tan pa lu kix, kah daux dee deuh mau heue.
Mai Nawh Cao: yaox miexmai: tix kaux pa hot pa sibhawm:, pa sau: tawng ra: bliah iak.
Mai Nawh Cao: ah nin:, "Aux krai lox pa mawh pa meh kah pex, miexmai: pa hot pa sibhawm: in:, hoik lheu: sau: khaing: kix khawm: uik heue.
Kheu pwi in: khankix khawm: uik, hoik sau: khaing: pa lheu: kix, viang mawh nan: bun: in: hoik sau: khaing: pa hot tix, pa koe: sonsang im: ju tix khawm: uik heue."
Yesux Gruh Krai Grawng: Pa SangLaux Nyiiex Bwan:
Mathiex 24:1-2; Makux 13:1-2
Mai yam krai pwi tiblah grawhgrawng: nyiiex bwan: grawng: koe: nyiiex bwan: an: simaox pa mhawm:, mai pa tan pa lu, pa hoik cox mhawm: grang, Nawh Cao: ah nin:,
“Ceu in: khankix ceu pa yaox pex, bawg yam singaix tag sang hoek, yam tag ang grham: simaox koe: tin:, kieh koe: piang paox tix tix lon: kawx, pa tag ang yieh tix tik heue.”
Krax Pa Khrarhawm: mai Pa Tuktiaktukte:
Mathiex 24:3-14; Makux 13:3-13
Mai kix chawk Nawh Cao: ah nin:, "Phan: mawh nan:, ceu in: khankix tag sang mawh lai mawx? Mai yam tag sang dex mawh ceu in: khankix, tag koe: mhai: pa yuh kah mawx?"
Mai Nawh Cao: deeh ah nin: kah kix, "Yuh kah mawx son ang pwi sang pon thong: kieh pex lud, rien rhawm: tix kah heue. Mawh kheu pwi tom: nie tag sang brex tix teei ceukaux Aux, mai hoek tix ah nin:,Aux mawh Nawh heue maiBawg yam uik hoek heue Pex paw vi hawt khaix kix.
Mai yam mhong: pex grawhgrawng: naing, mai grawng: krax simah simaing:, paw kieh lhat kah. Mawh kheu ceu in: khankix tag lai hoek tix mawh phaoka:, viang mawh kawx nan:, ang nyang bax mawh, bawg yam sidauh dom: an: heue."
Yam an: Nawh Cao: baox ah nin: kah kix, "Pwi tix ceu mai tix ceu, tix meung mai tix meung, tag cha: paox tix,
mai kla: reem ting tag sang tok, mai praix tag sang sibhawm:, mai ceu pa saux preng, tag sang koe: dee haoh dee mai tag sang koe: ceu pa lhat pa graung, mai pa ting khaing: raoma: heue.
Viang mawh kawx nan:, kah: sivoe ceu in: khawm: uik, kix tag sang giex pex kah taix tix, mai tag sang tuktieak tukte: pex, mai tawx pex kah nyiiex sidiex khankix, mai sau: pex daux thawng:, mai viex pex sivoe simiang khunhawkham khankix, mai cao: giex kaing: haktiex khankix, kheu ceukaux Aux heue.
Viang mawh nan:, ceu in: khankix tag sang mawh mhai: sakse kah grawng: pex heue.
Mawh kheu nan:, kieh een: tix tawng kah daux rhawm: tix, son ang pex sang grux keud, grawhgrawng: sang pawk lox yuh kah mawx.
Mawh kheu Aux tag sang tawx pex jheeh, mai pingnya cuyi:, pa pwi pa koeng kah pex khawm: uik, ang pon tix tieh tix thiang: heue.
Viang mawh miex keeing: pex kawx, mai puxaik, mai paoxceu paoxcat, mai paoxgrawm khankix, tag sang teei tix tawx pex, mai kix tag sang kieh teei pex tiblah yum: heue.
Mai pwi khawm: uik tag koeng kah pex, mawh kheu ceukaux Aux heue.
Viang mawh nan:, hauk kaing: pex tix gawng: kawx tag ang laux ang leeing: heue.
Mawh kheu pa gun pa yeung, pex tag sang pon cie ju tokaux tix heue.
Yesux Gruh Krai Grawng: Pa Sang Laux Veng Yerusaliem
Mathiex 24:15-21; Makux 13:14-19
"Yam yaox pex rob pwi naing kah veng Yerusaliem, kieh tawng grawng: pa dex sang laux veng an: heue.
Yam an: kieh kix pa ot kah daux meung Yudax, to: hu: kah piang gawng khankix heue. Mai kieh kix pa ot kah daux veng an:, lih hu:, mai kix pa ot daux tiag daux tu, paw kieh laig tan: heue.
Mawh kheu singaix an: khankix, mawh bawg yam sang prawng sang ciyang tix kieh naog, ceu pa hoik tiem: tix deuh khawm: uik heue.
Bun: pa koe: kaux, mai bun: pa tawx kawn: tix peuex, kah daux bawg yam singaix an: khankix tag kharhawm: kharhi: heue. Grawhgrawng: nawh, tag sang koe: pa ting kharhawm: kharhi: kah haktiex in:, mai ceu pa songrhawm: songrhi: kah pwi ceu in: heue.
Mai kix tag goh tag laux kah lawm vaig, mai tag sang giex tix tok kix hu:, ku praix ku meung heue. Mai pwi tang: ceu tang: cat tag sang dig veng Yerusaliem tiem, tom: bawg yam pwi tang: ceu tang: cat khankix, hoik naog heue.
Yam Sang Deeh Hoek Kawn: Kawn: Pwi
Mathiex 24:29-31; Makux 13:24-27
"Mai tag sang koe: mhai: kah daux singaix, mai khix, mai simuing: khankix, mai ceu pwi kah piang haktiex tag kharhawm: kharhi:, kah daux krax daox krax deng:, kheu lox sinum siaox, lox pukpak rawm: sigrit sigra: heue.
Mai kawn: pwi kied lhat mai lauxrhawm:, kheu keud grawhgrawng: ceu pa tag sang hoek lih tix mawh kah piang haktiex, mawh kheu siawpsibrawm raoma: khankix tag sang yungyiang: heue.
Mai yam an: kix tag sang yaox Kawn: kawn: pwi, viex siawpsibrawm, mai min: plakngai: pa ting, hoek kah daux paiawm: heue.
Yam jah tix mawh ceu in: khankix, yaog kaing: pex mai maong tix jhak heue. Mawh kheu dex hoek bawg yam sang taoh pex."
Lox Phektem: Grawng: Khaoxruh
Mathiex 24:32-35; Makux 13:28-31
Mai Nawh Cao: krai lox phektem: pa yuh nin: kah kix,Jhak kah khaoxruh, mai khaox khawm: uik.
Yam kix glaoh lhax, pex yaox mai pie tokaux pex kawx, tawng grawng: dex sang hoek yam raux heue.
Awm: an: yam yaox pex ceu in: khankix uik sang mawh, kieh pex tawng grawhgrawng: Meung Siyiex dex sang hoek heue.
Aux krai lox tete telai kah pex, pwi ju in: tag ang bax luan, tom: ceu in: khankix khawm: uik, tag hoik mawh heue.
Raoma: mai haktiex tag sang grai:, viang mawh kawx nan:, gum lox Aux in: tag ang grai: heue.
Rien Rhawm: mai Pau Tix Jhak
"Rien rhawm: tix kah tokaux pex, phan: ang mawh nan:, rhawm: pex tag sivix tag cien kheu ceu pa nie luan yuh pex, mai pa yoek, mai ceu pa khirhawm: pa dex pa dawd mai ju in: khankix, mai singaix an: ha kox hoek piang pex yam ang pex keud pex ce: sax, awm: khlap rub heue.
Mawh kheu tag sang hoek piang kix pa ot piang ca: haktiex khawm: uik awm: an: heue.
Viang mawh kawx nan:, pex pau tix jhak ku bawg ku yam, mai rawg bwan:, yuh kah mawx sonsang pon pex tix luan khaing: ceu in: khankix khawm: uik, pa tag sang hoek tix mawh, mai sonsang pon tix cung sivoe Kawn: kawn: pwi heue."
Mai ku singaix Nawh Cao: sidiex gau kah daux nyiiex bwan:, mai ku sawm: Nawh hu: it hu: tum kah gawng, pa kok mawh gawng Sanlun heue.
Yam ponngawb caocao pwi khawm: uik hoek kah Nawh Cao: kah daux nyiiex bwan:, sonsang nghiiet Nawh heue.
Briex Tix Kum: Sonsang Tiehcha: Ka Yesux
Mathiex 26:2-5; Makux 14:1-2, Yohan 11:45-53
Yam an: dex hoek pwie khaomun pa ang sau: susaix, pa kok mawh Pasakha.
Mai cao: giex kaing: li pa ting, mai pwi tiem: lai khankix, sawg grawhgrawng: ceu pa kix sang pon tix teei Nawh Cao: yum:, yuh kah mawx, mawh kheu kix lhat kah pwi khankix heue.
Yudax Isakariut Khawrhawm: Tix Tawx Yesux
Mathiex 26:14-16; Makux 14:10-11
Mai Satan laig kah daux Yudax pa kok mawh Isakariut, pa mawh tix kaux kah daux kao: kaux ra: an: heue.
Mai nawh lih hu: kum: kawng: mai cao: giex kaing: li pa ting khankix, mai cao: giex kaing nyiiex bwan: khankix, grawhgrawng: sang pon nawh tix tawx Nawh Cao: kah kix yuh kah mawx.
Mai kix gauxrhawm:, ah lox dud grawng: sang tawx kix mau kah nawh heue.
Mai nawh cu lox an:, mai sawg bawg yam sonsang pon tix tawx Nawh Cao: kah kix, yam ang cub pwi haoh ot heue.
Yesux Cox Khre: Sonsang ih Pwie Pasakha
Mathiex 26:17-25; Makux 14:12-21; Yohan 13:21-30
Mai singaix khaomun pa ang sau: susaix, pa mawh yam kix tag lai pah, tag lai tan yung: Pasakha hoek heue.
Mai Nawh Cao: ploi: Petrux mai Yohan, ah nin:, "Hu: mai cox khre: Pasakha son ex, sonsang ih ex kah heue."
Mai kiex chawk kah Nawh Cao:, "Maix simie yiex cox khre: dee mawx?"
Mai Nawh Cao: deeh ah nin: kah kiex, "Jhak heue, yam laig pax kah daux veng, pwi pa viex aw: rawm: tix kaux tag sipub pax heue. Hawt khaix nawh mai laig kah daux nyiiex dee hu: nawh,
mai ah nin: kah cao: nyiiex pa mhawm: an:,Sara Cao: Gau chawk ah nin: kah maix,Lawg son nyo maix, dee tag sang ih Aux Pasakha tau mai kawncau Aux khankix, koe: dee mawx?:
Mai nawh tag jhi: pax yaox lawg pa ting plak piang, pa hoik koe: kraung. Cox khre: dee an: heue."
Mai kiex hu: mai yaox awm: pa hoik krai Nawh Cao: kah kiex, mai kiex cox khre: pwie Pasakha heue.
Priex Bo Simiang
Mathiex .26:26-30; Makux 14:22-26; 1.Kaw 11:23-25
Yam uik hoek bawg yam nari, Nawh Cao: ngawm tau mai kawncau Nawh pa ting kao: kaux ra:.
Mai Nawh Cao: ah nin: kah kix, "Aux koe: rhawm: mai simie tix ih pwie Pasakha in:, tau mai pex kah: sivoe ang Aux nyang bax kham: geu: heue.
Grawhgrawng: nawh, Aux krai kah pex, Aux tag ang baox ih Pasakha, tom: hoik grum naog nawh kah daux Meung Siyiex heue."
Mai Nawh Cao: rieb tix teei kawk, mai khaix hoik yaogyaw Nawh bwanson:, Nawh ah nin:, "Teei in:, mai gwieh kah paox tix heue.
Grawhgrawng: nawh, Aux krai kah pex, Aux tag ang lai baox nyaux rawm: plix nhu: plix siiet, tom: sidauh ang nyang bax hoek Meung Siyiex heue."
Mai Nawh Cao: teei khaomun, mai khaix hoik yaogyaw Nawh bwanson:, Nawh sivit mai tawx kah kix ah nin:, "In: mawh tokaux Aux pa hoik tawx son pex heue. Yuh ceu in: sonsang doh keud doh sawn: kah Aux heue."
Mai kawk kawx, Nawh teei awm: an:, khaix hoik ih priex bo, ah nin: "Kawk in: mawh sijax mukheu pa khraox, kah daux nham: Aux, pa mawh pa lih son pex heue.
Viang mawh nan:, jhak heue, taix kaw pa sang tik sang tawx Aux, koe: tau mai Aux, piang pheen: in: heue.
grawhgrawng: nawh, Kawn: kawn: pwi tag sang hu: awm: pa hoik dud ah tete, viang mawh kawx nan:, pwi pa tik pa tawx Nawh, tag kharhawm: kharhi: heue."
Mai kix jah tix chawk kah paox tix, grawhgrawng:, kah daux kix, pwi mawx pa sang yuh ceu in: heue.
Thungthiang: Grawng: Mawh Pwi Mawx Pa Lheu: Ting Khaing: Paox Tix
Lheu: khaing: an: kix thungthiang: paox tix grawhgrawng: kah daux kix pwi mawx nie ting khaing: paox tix.
Mai Nawh Cao: ah nin: kah kix, "Simiang khunhawkham pwi tang: ceu tang: cat khankix giex kaing: kix, mai kix pa ting piang kix, kok mawh cao: pa teem: khankix heue.
Viang mawh kawx nan:, kah daux pex tag ang mawh nan:, viang mawh nan:, kaw pa ting khaing: paox tix kah daux pex, kieh nawh mawh awm: pwi awn: ju heue. Mai kaw pa bung: kaing:, kieh nawh awm: pwi cau pwi soi: heue.
Grawhgrawng: nawh, kaw pa yuh kah mawx nie lheu: ting, mawh kaw pa ngawm tix sawm: lie, phan: ang mawh nan: mawh kaw pa khan: kheu lie? Kaw pa ngawm tix sawm: lheu: ting ang mawh lie? Viang mawh kawx nan:, Aux ot sinax pex awm: kaw pa khan: kheu heue.
Viang mawh nan: pex mawh kix pa hoik ot tau mai Aux, kah daux ceu pa nyaw pa glaw: pa kham: Aux heue.
Mai Aux tawx meung tix meung kah pex, awm: Keeing: Aux tawx kah Aux,
yuh kah mawx son pex tag pon tix ih tix nyaux kah pheen: Aux, kah daux meung Aux, mai kieh pex ngawm piang dang: ngeung, tix prawng pwi Isarilax kao: ceu ra: heue.
Yesux Gruh Krai Grawng: Pa Sang Thiang: Petrux Tix Tik Kah Nawh Cao:
Mathiex 26:31-35; Makux 14:17-31; Yohan 13:36-38
"Simon eue, Simon, jhak heue, Satan hoik mhaing: maix, yuh kah mawx sonsang pon nawh tix grheung: maix, awm: grheung: nghoxca heue.
Viang mawh nan: Aux hoik rawg bwan:, son maix, yuh kah mawx son ang krax yumrhawm: maix sang laux heue. Mai yam deeh tieh maix tix hoek maix tag kieh puxaik maix khankix kaux cong: heue."
Mai Simon deeh ah nin: kah Nawh Cao:, "Simiang eue, aux uik pon tix hu: mai Maix, daux thawng: mai khawm: dee yum: heue."
Mai Nawh Cao: baox ah nin:, "Aux krai kah maix, Petrux eue, kah daux singaix ia: tag ang ux, tom: ang maix bax thiang: grawhgrawng: pa tawng maix Aux loe: bawg heue."
Haumau, Bau mai Vaig
Mai Nawh Cao: baox ah nin: kah kix, "Yam Aux ploi: pex hu:, yam ang viex hau: mau, mai bau:, mai kiep, pex koe: dee lo tix ceu ceu lie?" Mai kix deeh ah nin:, "Ang lo tidtix heue."
Mai Nawh Cao: baox ah nin: kah kix, "Viang mawh kawx nan:, yamin, kaw pa koe: hau: mau, kieh nawh viex hu:, mai kaw pa koe: bau: kieh nawh viex hu: heue. Mai kaw pa ang koe: vaig, kieh nawh coh kraung ceep tix mai liag heue.
Grawhgrawng: nawh, Aux krai kah pex, ceu pa hoik tiem: tix deuh tag lai naog kah daux Aux heue. Pa mawh,
30:Hoik simin Nawh tau mai pwi pa phit pa lud khankix,
mawh kheu grawhgrawng: ceu pa dex pa dawd mai Aux tag uik sidauh heue."
Mai kix baox ah nin:, "Simiang eue, jhak heue, ex hoik koe:, vaig ra: kre: tin: heue." Mai Nawh Cao: baox ah nin: kah kix, "Uik kub heue."
Yesux Rawg Bwan: Kah Daux Sipeem Kesasemanix
Mathiex 26:36-46; Makux 14:32-42
Nawh Cao: lih mai hu:, awm: hoik sax koe: been Nawh, kah dee gawng Sanlun, mai kawncau Nawh khankix kawx hawt khaix Nawh Cao: heue.
Yam hoek Nawh Cao: dee an:, Nawh ah nin: kah kix, "Rawg bwan: heue, yuh kah mawx son ang pex sang laig kah daux pa nyaw pa glaw:."
Mai Nawh Cao: gwieh hu: khaing: kix, pon dee nyak hoek simaox tix taix, mai Nawh Cao: grux ngawng mai rawg bwan:,
ah nin:, "Keeing: eue, phan: Maix koe: rhawm:, teei kawk in: khaing: Aux liak, viang mawh kawx nan: paw kieh mawh alo pa caw pa khaw: mai Aux, viang mawh nan: kieh mawh alo pa caw pa khaw: Maix heue."
Mai kawncau Siyiex tix kaux lih hoek mai baox thiem: riang rao kah Nawh heue.
Mai Nawh Cao: kharhawm: kharhi: kied sigrien, mai baox nied tix rawg bwan:, mai rawm: lah Nawh lih mawh awm: jah nham: pa ting, mai cod piang tiex heue.
Mai yam hoik kaoh Nawh Cao: khaing: rawg bwan:, Nawh hoek kah kawncau Nawh khankix, mai yaox laig it kix, kheu krax khirhawm: khirhi: heue.
Mai Nawh Cao: ah nin: kah kix, "Pex laig it yuh kah mawx? Kaoh mai rawg bwan:, yuh kah mawx son ang pex sang laig kah daux pa nyaw pa glaw: heue."
Pa Giex Kah Yesux
Mathiex 26:47-56; Makux 14:43-50; Yohan 18:2-11
Yam kawn: sikah Nawh Cao:, jhak heue, pwi pa haoh pa hun:, mai kaw pa kok mawh Yudax, pa mawh tix kaux kah daux kix kao: kaux ra:, thong: kix hoek, mai nawh hoek dex kah Yesux mai ngheut Nawh heue.
Mai Yesux chawk nawh ah nin:, "Yudax eue, maix tik maix tawx Kawn: kawn: pwi kah pa ngheut lie?"
Mai yam kawncau Nawh khankix, pa ot sivie Nawh Cao:, yaox grawhgrawng: pa tag sang mawh, kix chawk ah nin:, "Simiang eue, ex tag sivoeg kah vaig lie?"
Mai kah daux kix tix kaux kid kah siliex cao: giex kaing: li pa ting, mai dud yhaok khawn: dawm: nawh heue.
Mai Yesux ah nin:, "Naox heue." Mai Nawh Cao: teeh kah yhaok kaw an:, mai kieh nawh moi: heue.
Mai Yesux ah nin: kah cao: giex kaing: li pa ting khankix, mai kah cao: giex kaing: nyiiex bwan: khankix, mai kah kuad song: khankix pa hoek tix teei Nawh Cao:, "Pex viex vaig viex khaox, hoek tix giex kah Aux, awm: giex pwi tud pwi rhim: lie?
Yam ot Aux tan: mai pex kah daux nyiiex bwan: ku singaix, pex ang nyeu taix tix, tix giex Aux, viang mawh nan: in: mawh bawg yam nari pex, mai siawpsibrawm pa faik heue."
Grawng: Pa Thiang: Petrux Ka Yesux
Matiex 26:57-58, 69-75; Makux 14:53-54, 66-72 Yohan 18:12-18, 25-27
Mai kix giex Nawh Cao: mai tok Nawh mai viex Nawh hu: kah nyiiex cao: giex kaing: li pa ting piang khawm: uik heue. Mai Petrux hawt hu: dee singai heue.
Mai yam hoik phlu: kix ngu kah sinax brawk nyiiex, mai hoik ngawm tau, Petrux kawx, ngawm kah sinax kix heue.
Mai bun: pa mawh siliex tix kaux, yaox nawh ngawm kah daux pa riieng ngu, mai jawg tix jhak nawh, ah nin:, "Pwi in: kawx, ot tau mai Nawh heue."
Viang mawh nan:, nawh thiang: tix ah nin:, "Bun: eue, Aux ang tawng Nawh."
Mai khaix an: tivud tang: kaux tix kaux, yaox nawh mai ah nin:, "Maix kawx, mawh kah daux kix tix kaux heue." Viang mawh nan: Petrux deeh ah nin:, "Pwi eue, aux ang mawh."
Mai khaix an: dex rheung: tix nari, tang: kaux tix kaux, krai awm: pa uik tawng nawh ah nin:, "Kaw in: kawx mawh pa hoik ot tau mai Nawh tete, kheu mawh nawh pwi meung Galilie: heue."
Viang mawh nan: Petrux deeh ah nin:, "Pwi eue, aux ang tawng pa ah maix." Mai yam kawn: tag sikah nawh, ia: ux dom: mawx dom: an: heue.
Mai Simiang veeh, mai jhak kah piang Petrux. Mai Petrux doh keud kah gumlox Simiang, pa hoik krai Nawh Cao: kah nawh, ah nin:, "Kah daux singaix ia: tag ang ux, tom: ang maix, bax thiang: tix tik Aux loe: bawg heue."
Mai nawh lih hu: mai nied tix yiiem heue.
Grawng: Yuh Pa Ang Cee Ang Cak mai Taptoi: Kah Yesux
Mathiex 26:67-68; Makux 14:65;
Mai pwi pa giex kah Nawh Cao: khankix, yuh pa ang cee ang cak kah Nawh, mai tap Nawh heue.
Mai kix lhop vien kah ngai: Nawh Cao:, mai chawk Nawh ah nin:, "Krai lox jhai: kah ex liak, mawh pwi mawx pa tap Maix?"
Mai kix ah lox tang: ceu tom: nie kah Nawh Cao:, sonsang yuh ceu pa ang cee ang cak kah Nawh heue.
Viex Yesux Hu: Sivoe Dee Prawng See:
Mathiex 26:63-66; Makux 14:55-64; Yohan 18:19-24
Mai yam uik riang praix, kix pa mawh kuad song: pwi khankix, khrawm: paox tix, khawm: cao: giex kaing: li pa ting khankix, mai khawm: pwi tiem: lai khankix, mai kix tok Nawh Cao: hu:, kah dee khrawm: tix prawng see: cie kix, ah nin:,
"Phan: Maix mawh Khrit, krai kah ex." Viang mawh kawx nan: Nawh Cao: ah nin: kah kix, “Phan: Aux krai kah pex, pex tag ang yumrhawm: kah.
Mai phan: Aux chawk kah pex, pex tag ang deeh pawk heue.
Viang mawh nan: jah tom: yamin, Kawn: kawn: pwi tag sang ngawm, plak taix khawn: dawm:, siawpsibrawm Siyiex heue.”
Mai kix khawm: uik ah nin:, "Phan: mawh nan: mawh Maix Kawn: Siyiex lie?" Mai Nawh Cao: ah nin: kah kix, "Pex ah mawh Aux heue."
Mai kix baox ah nin:, "Ex kawn: baox lo mhai: sakse yuh kah mawx? Kheu tokaux ex hoik mhong: lox khaing: jheeh Nawh heue."
Viex Yesux Hu: Sivoe Simiang Pilat
Mathiex .27:1-2, 11-14; Makux 15:1-5; Yohan 18:28-38,
Mai cub kix khawm: uik kaoh mai viex Nawh Cao: hu: kah sivoe simiang Pilat.
Mai kix jah tix deuh phimap kah piang Nawh Cao:, ah nin:, "Ex yaox Pwi in: yuh kieh pwi meung ex lud, mai ang kieh tawx mau koh kah simiang Kesa, mai Nawh ah tokaux Tix mawh,Khrit Simieaug Khunhawkham heue"
Mai simiang Pilat chawk Nawh Cao: ah nin:, "Mawh Maix Simiang Khunhawkham Pwi Yudax lie?" Mai Nawh Cao: pawk lox ah nin:, "Mawh awm: pa ah maix heue."
Mai simiang Pilat ah nin: kah cao: giex kaing: li pa ting khankix, mai kah cub pwi pa haoh pa hun: khankix, "Ang aux yaox dee phit dee lud kah daux Pwi in: tix ceu kawx heue."
Viang mawh kawx nan:, kix nie baox lheu:, nied tix ah nin:, "Nawh hoik cheeik kah kawn: pwi, kah lox sidiex lox gau Nawh, jah kah meung Galilie:, mai kah daux meung Yudax kudauh kudee, tom: hoek kah dee in: heue."
Viang mawh kawx nan: yam mhong: simiang Pilat lox an:, nawh chawk kix grawng: mawh Nawh Cao: pwi meung Galilie: lie.
Mai yam tawng nawh grawng: mawh Nawh Cao: Pwi pa ot greem: simiang Herut, nawh ploi: Nawh Cao: hu: kah simiang Herut, pa tokaux nawh kawx ot kah daux veng Yerusaliem, kah daux bawg yam singaix an: khankix heue.
Viex Yesu Hu: Sivoe Simiang Herut
Yam yaox Herut Yesux, nawh kied gauxrhawm: gauxrhi:, mawh kheu nawh hoik uik dawg rheung: simie tix yaox Nawh Cao:, kheu nawh hoik mhong: grawhgrawng: Nawh, mai simie tix yaox mhai: pa daox pa am: pa yuh Nawh Cao: tix ceu ceu heue.
Mai nawh chawk Nawh Cao: kah lox tom: nie, viang mawh kawx nan: Nawh ang pawk lox tidtix kah nawh heue.
Mai cao: giex kaing: li pa ting khankix, mai pwi tiem: lai khankix, cung tan:, mai nied tix baox deuh phimap kah Nawh Cao: heue.
Mai Herut, khawm: pwi naing nawh khankix, nieb yuh pa ang nab ang yam:, mai yuh pa ang cee ang cak kah Nawh, mai kieh Nawh ceep kraung pa jiet mhawm: grang, mai deeh ploi: Nawh Cao: hu: kah simiang Pilat heue.
Simiang Herut mai simiang Pilat mawh paoxgrawm dom: an: kah daux singaix an: heue. Grawhgrawng: nawh, glang: kah: in: kiex koeng kah paox tix heue.
Tat Lox Sonsang Pah Yesux Yum:
Mathiex 27:15-26; Makux 15:6-15; Yohan 18:39-19:16
Mai simiang Pilat kok cao: giex kaing: li pa ting khankix, mai simiang khankix, mai pwi khankix, khrawm: paox tix,
mai ah nin: kah kix, "Pex hoik viex Pwi in: kah aux, awm: mawh Pwi pa kieh pwi phit lud heue. Jhak heue, aux hoik chawk hoik cheng: Nawh kah sivoe pex, mai ang yaox dee phit dee lud Pwi in:, grawng: ceu pa deuh pex phimap kah Nawh heue.
Lheu: khaing: an: simiang Herut kawx ang yaox dee phit, kheu nawh hoik deeh ploi: Nawh hoek kah ex, mai jhak heue, Nawh ang nyang yuh ceu pa keung: tix yum: tidtix heue.
Mawh kheu nan: aux tag sang sivied Nawh mai ploi: Nawh heue."
(Mawh kheu nan: tag lai ploi: tix kaux kah kix, kah daux pwie an: heue).
Viang mawh kawx nan: kix khawm: uik kok yo tau ah nin:, "Teei tix tik Pwi in:, mai ploi: Barabax kah ex heue."
Barabax mawh pwi pa hoik sau: kah daux thawng:, kheu mawh nawh pa hoik tieh hoik feen tix kaux, yam feen kah daux veng an:, mai pa hoik pah pwi yum: heue.
Mai simiang Pilat baox deeh ah kah kix tix bawg, kheu simie nawh tix ploi: Yesux.
Viang mawh nan: kix khawm: uik kok yo ah nin:, "Tawk Nawh piang khaoxlhak, tawk piang khaoxlhak heue."
Mai nawh chawk kah kix loe: bawg tix bawg ah nin:, "Mawh kheu patix, Pwi in: hoik yuh pa caox pa yuh kah mawx? Aux ang yaox grawng: ceu pa khaw: Nawh tix yum: tix ceu kawx heue. Mawh kheu nan: aux tag sang sivied Nawh mai ploi: Nawh heue."
Viang mawh nan: kix nied tix baox kok lox sinum, mhaing: tix kieh tawk Nawh Cao: piang khaoxlhak, mai lox kix, mai lox cao: giex kaing: li pa ting khankix pex heue.
Mai simiang Pilat prawng ca:, yuh kah mawx sonsang yuh, awm: ceu pa rawg pa mhaing: kix heue.
Mai nawh ploi: kah kaw pa hoik sau: kah daux thawng:, kheu pa hoik tieh hoik feen, mai kheu hoik pah pwi yum:, awm: pa rawg pa mhaing: kix. Viang mawh nan: Yesux nawh tawx kah kix, sonsang yuh awm: pa simie kix tix yuh heue.
Grawng: Tawk Yesux Yum: Piang Khaolhak
Mathiex 27:32-44; Makux 15:21-32; Yohan 19:17-27
Mai yam kix tok Nawh Cao: hu:, kix giex Simon pa mawh pwi meung Kurene, pa kaoh khaing: daux tiag, mai kix deuh khaoxlhak kah piang nawh, sonsang klawm: khaoxlhak an: hawt Yesux heue.
Mai cub pwi pa kied haoh kied hun: hawt Nawh Cao:, khawm: bun: pa yiiem pa grai son Nawh.
Viang mawh nan: Nawh Cao: deeh gi mai ah nin:, "Kawn: bun: veng Yerusaliem khankix eue, paw yiiem paw grai son Aux, viang mawh nan: yiiem son tokaux pex, mai son kawnpraix pex khankix heue.
Grawhgrawng: nawh, jhak heue, singaix bawg yam tag sang hoek, yam kix tag sang ah,Bun: pa neh, mai vaig pa ang sax nghe: kawn:, mai teeh pa ang sax kieh peuex khankix ting bwanson: heue
Yam an: kix tag sang jah tix ah nin: kah gawng khankix, Rau kah piang ex liak Mai tag ah nin: kah ton: khankix,Tawb kheem: ex liak
Kheu phan: kix yuh ceu in: khankix kah khaox im: khaox klai, tag sang yuh kah mawx kah khaox kroh?"
Mai viang mawh pwi caox ra: kaux kawx, kix tok hu: tau mai Nawh Cao:, son sang teei kiex yum: heue.
Mai yam kix hoek tix dauh pa kok mawh, Si-ang: Kaing:, kix tawk Nawh Cao: piang khaoxlhak tan:, mai pwi caox an: khankiex, kix tawk plak taix khawn: dawm: Nawh tix kaux, mai khawn: gwiex tix kaux heue.
Mai Yesux ah nin:, "Keeing: eue, pluat ploi: phimap kix liak, kheu ang kix tawng pa yuh tix heue." Mai kix teei kraung ceep Nawh Cao:, mai nieb tix yaox, mai gwieh sinax kix heue.
Mai pwi khankix cung tix jhak tan:. Mai simiang khankix kawx, nied ah pa ang cee ang cak kah Nawh ah nin:, "Nawh hoik taoh kah pwi tang: kaux khankix, kieh Nawh taoh tokaux Tix, phan: Nawh mawh Khrit cie Siyiex, pa hoik laug Nawh tix teei."
Mai pwi naing khankix kawx, yuh pa ang cee ang cak kah Nawh Cao:, hoek kah Nawh, mai tawx tix yaox sidauh nie kah Nawh,
ah nin:, "Phan: Maix mawh Simiang khunhawkham Pwi Yudax, taoh tokaux Tix tiru heue."
Mai kix tiem: tix deuh lai pa ah nin:, kah piang Nawh Cao:, kah daux lai Helasax, mai lai Romax, mai lai Hebrie, "IN: MAWH SIMIANG KHUNHAWKHAM PWI YUDAX."
Mai kah daux pwi caox an: khankiex pa hoik preue:, tix kaux ah pa ang khaw: ang jiet kah Nawh Cao: ah nin:, "Phan: Maix mawh Khrit taoh tokaux Tix, mai yiex heue."
Viang mawh nan: tang: kaux an: deeh ah kah kaw an: ah nin:, "Viang kah Siyiex kawx ang maix lhat lie, siyox kham: geu: maix krax prawng awm: paox tix lie?
Ax kham: geu: yuh nin: uik khaw:, kheu ax pon pa khaw: tix geu:, son ceu pa hoik yuh tix, viang mawh nan: Pwi in: ang sax yuh pa lud tidtix heue."
Mai nawh ah nin: kah Yesux, "Simiang eue, yam hoek Maix kah daux meung Tix, doh keud kah aux liak."
Mai Yesux dee ah nin: kah nawh, "Aux krai lox tete telai kah maix, kah daux singaix maix tag ot tau mai Aux kah daux Paradisu32 heue."
Grawng: Yum: Yesux
Mathiex 27:45-56; Makux 15:33-41; Yohan 19:28-30
Bawg yam an: dex liah nari33, mai praix faik piang haktiex khawm: uik tom: hoek dim: nari34 heue.
Mai singaix uik faik, mai man: tie kah daux nyiiex bwan: griah kah greung heue.
Mai Yesux kok lox sinum ah nin:, 35"Keeing: eue, Aux tawx khwan: Tix kah daux tawmtaix Maix."
Mai khaix hoik ah Nawh nan:, Nawh Cao: deeh tawx khwan: Tix, mai dud rhawm: heue.
Mai yam yaox cao: giex kaing: naing an:, grawng: ceu pa hoik mawh, nawh yaogyaw Siyiex ah nin:, "Kaw in: mawh pwi rah pwi see tete heue."
Mai cub pwi haoh pwi hun: pa hoek tix yaox ceu in: tau, yam hoik yaox kix ceu pa hoik mawh khankix, kix dieh naok tix mai deeh ing: heue.
Mai pwi pa uik meed uik tawng Nawh Cao:, mai bun: pa hoik hawt hoek tau mai Nawh Cao: khaing: meung Galilie:, cung dee singai mai jhak kah ceu in: khankix heue.
Grawng: Sipaung: Yesux
Mathiex 27:57-61; Makux 15:42-47; Yohan 19:38-42
Mai jhak heue, pwi tix kaux pa kaux Yosiep, pa mawh cao: prawng see:, mai pwi mhawm:, pa rah pa see.
(Nawh ang rieb ang khaw: rhawm: kah grawng: pa hoik kum: kawng: kix, mai yuh). Pa mawh pwi Arimasie:, veng pwi Yudax tix veng, pa krox tix jhak son yam sang hoek Meung Siyiex.
Pwi in: hu: kah simiang Pilat mai rawg mhaing: tokaux yum: Yesux heue.
Mai nawh teei tokaux yum: Nawh Cao: lih, mai nawh pua: kah man: paing, mai deuh Nawh kah daux daux simeeig, pa hoik saik kah daux rang:, mai dee ang bax sax deuh pwi heue.
Mai singaix an: mawh Singaix Khre:, mai singaix twah dex sang hoek heue.
Mai bun: khankix pa hoik hoek tau mai Nawh Cao: khaing: meung Galilie:, hawt khaix mai yaox simeeig, mai grawng: deuh tokaux yum: Nawh Cao: yuh kah mawx.
Mai kix deeh ing: mai cox khre: sidauh bhawng: mai sidauh kraix khankix heue. Mai kix laux lee: rhawm: tix, singaix twah, awm: pa khaw: mai lox tawm: heue.
Grawng: Pa Deeh Kaoh Im: Yesux
Mathiex .28:1-10; Makux 16:1-8; Yohan 20:1-10
Viang mawh nan:, kah daux aliah singaix singaix tix, yam bah riieng caocao, kix hoek kah simeeig mai viex sidauh bhawng: khankix, pa hoik cox hoik khre: kix heue.
Mai kix yaox simaox hoik plu: plie: hoik gah khaing: simeeig an:.
Mai kix laig kah daux mai kix ang yaox tokaux yum: Simiang Yesux heue.
Mai yam kix daox deng: kah grawhgrawng: ceu an:, jhak heue. pwi ra: kaux cung dex kix pa ceep kraung pa jiet pruh.
Yam kix lhat mai num: gup ngai: tix kah tiex, kiex ah nin: kah kix, "Yuh kah mawx pex lai sawg Kaw pa im: ju, kah sinax pwi yum:?
Nawh ang ot tin:, Nawh hoik kaoh heue. Doh keud kah lox pa hoik krai Nawh Cao: kah pex, yam kawn: ot Nawh kah daux meung Galilie:,
pa krai grawhgrawng: tag sang tawx Kawn: kawn: pwi kah daux tawm: taix pwi phimap phigrham: khankix, mai tawk kah piang khaoxlhak, mai daux loe: singaix tag sang deeh kaoh heue."
Kix doh keud kah lox Nawh Cao: an:,
mai deeh khaing: simeeig, mai krai grawhgrawng: ceu in: khawm: uik, kah kix kao: kaux tix, mai kah pa kawn deuk khawm: uik heue.
Kix pa krai grawhgrawng: ceu in: khankix, kah kawncau pa ting khankix, mawh Marix Magadalax, mai Yohannax, mai Marix miex Yakop, mai bun: tang: kaux khankix pa ot tau mai kix heue.
Viang mawh kawx nan: ang kix yumrhawm: kah lox bun: khankix, kheu ce: kix mawh lox nieb krai heue.
Viang mawh nan:, Petrux kaoh mai to: hu: kah simeeig an:, mai nom: tix jhak kah daux, mai nawh yaox ngie man: paing khaing:, mai nawh daox deug: kah grawng: ceu pa hoik mawh an:, mai deeh ing: kah nyiiex tix heue.
Kah piang krax Yaong: Emawk
Mai jhak heue, kah daux singaix an: kah daux kix ra: kaux hu: kah yaong: pa kaux Emawk, pa singai khaing: veng Yerusaliem dex aliah lag.
Mai kiex kum: kah paox tix grawhgrawng: ceu pa hoik mawh an: khawm: uik heue.
Mai yam kiex kawn: kum: chawk kah paox tix, tokaux Yesux hoek dex mai hu: tau mai kiex heue.
Viang mawh nan: hoik yuh ngai: kiex, yuh kah mawx son ang sang tawng kah Nawh Cao: heue.
Mai Nawh Cao: chawk ah nin: kah kiex, "Lox kum: pax kah paox tix, yam hu: pax krax, mawh ceu pa yuh kah mawx?" Mai kiex yut tix kaog mai yuh awm: pa voi rhawm: tix heue.
Mai kah daux kiex tix kaux, pa kaux Kalawphax, pawk lox ah nin: kah Nawh Cao:, "Maix mawh nyo pa ot kah daux veng Yerusaliem nongnong: lie? Kheu ang Maix tawng grawhgrawng: ceu pa hoik mawh tan:, kah daux bawg yam singaix in: khankix."
Mai Nawh Cao: chawk kiex ah nin:, "Grawhgrawng: ceu pa yuh kah mawx?" Mai kiex deeh ah nin: kah Nawh Cao:, "Mawh grawhgrawng: Yesux, Pwi Nazariet, pa mawh Cao: Jhai:, pa ting sibrawm kah daux pa yuh, mai kah daux gumlox, sivoe Siyiex mai kawn: pwi khawm: uik heue.
Mai grawng: cao: giex kaing: li pa ting khankix, mai simiang ex khankix, prawng tix tawx Nawh Cao: kieh yum:, mai tawk Nawh piang khaoxlhak heue.
Viang mawh nan: ex hoik keud hoik ce:, Nawh mawh Kaw pa tag sang taoh ceu pwi Isarilax heue. Mawh, mai lheu: khaing: in: khawm: uik, khaix hoik mawh ceu in: khankix, uik koe: loe: singaix heue.
Lheu: khaing: an:, bun: tiblah daux cub ex, kieh ex daox deng: kah heue. Kix hoik hu: kah simeeig caocao,
mai yam kix ang yaox tokaux yum: Nawh Cao:, kix deeh hoek mai krai kah ex, grawhgrawng: hoik yaox kix riieng susai: kawncau Siyiex, pa krai kah kix, Nawh Cao: klawd heue.
Mai pwi tiblah pa ot tau mai ex, hu: kah simeeig an:, mai yaox awm: pa hoik krai bun: khankix, viang mawh nan: kix ang yaox Nawh Cao: heue."
Mai Nawh Cao: ah nin: kah kiex, "Pwi pa daox mai pa sivix tix yumrhawm:, kah lox khawm: uik, pa hoik krai cao: jhai: khankix eue,
Khrit tag lai kham: geu: ceu in: khankix, mai khaix an: laig kah daux min: plakngai: Nawh ang mawh lie?"
Nawh Cao: teei lox Phuk lai sigang: khri: khawm: uik jah kah lai Mose, mai lai cao: jhai: khawm: uik, plak tix nih nai krai lao grawhgrawng: tokaux Tix heue.
Mai kiex hoek dex kah yaong: dee sang hu: kiex, mai Nawh Cao: yuh awm: Nawh sang baox hu:, luan khaing: heue.
Mai kiex kieh raw Nawh Cao: ah nin:, "Ot tau mai yiex ha:, kheu dex hoek bawg yam ponbo, mai yam ponsingaix dex luan heue." Mai Nawh Cao: laig ot tau mai kiex heue.
Mai yam hoik ngawm neung Nawh Cao: tix sawm: tau mai kiex, Nawh Cao: teei khaomun mai nawb bwan:, mai Nawh sivit khaomun an: mai tawx kah kiex heue.
Mai ngai: kiex deeh blah, mai kiex tawng mawh Nawh Cao:, mai Nawh Cao: grai: khaing: pa yaox kiex heue.
Mai kiex ah nin: kah paox tix, "Yam sikah Nawh Cao: mai ax hawt krax, mai plak ax mhong: dee bleeh Phuk lai sigang: khri:, rhawm: ax lulieh kah ang mawh lie?"
Mai kiex kaoh kah bawg yam nari dom: an:, mai deeh hu: kah veng Yerusaliem, mai kiex yaox kawncau kao: kaux tix khrawm: paox tix, mai pwi pa ot tau mai kix,
ah nin:, "Simiang hoik deeh kaoh im: tete, mai hoik jhi: tokaux Tix kah Simon heue."
Mai kiex krai grawhgrawng: ceu pa hoik mawh, yaox kiex hawt krax, mai grawng: pa tawng kiex Nawh Cao:, kah yam sivit Nawh khaomun heue.
Yesux Lih Bleeh Kah Kawncau Nawh Khankix
Mathiex 28:16-20; Makux 16:14-18; Yohan 20:19-23
Mai yam kix kawn: sikah grawhgrawng: ceu in: khankix, tokaux Nawh Cao: cung kah sinax kix, mai ah nin: kah kix, "Kieh pa nhin: koe: mai pex heue."
Viang mawh nan: kix die lhat die graung kah, mai kix ce: mawh yaox miang heue.
Mai Nawh Cao: baox ah nin: kah kix, "Pex sungsang rhawm: yuh kah mawx? Mai pex keud jee keud blaong daux rhawm tix yuh kah mawx?
Jhak kah taix Aux, mai caong Aux ha:. Mawh Aux heue. Mai giex tix yaox Aux, mawh kheu miang ang koe: nex ang koe: si-ang:, awm: pa yaox pex koe: Aux."
Mai khaix hoik ah Nawh Cao: nan:, Nawh jhi: kix yaox taix Tix, mai caong Tix heue.
Mai yam kawn: ang kix nyang yumrhawm:, kheu gauxrhawm: mai daox deng: tix, Nawh Cao: chawk kix ah nin:, "Khex koe: ceu pa ih pex tin: tix ceu ceu lie?"
Mai kix tawx Nawh Cao: kax tong: tix phoi:, mai khlawp rawm: hia: tix siag heue.
Mai Nawh Cao: teei tix ih sivoe kix heue.
Mai Nawh Cao: baox ah nin: kah kix, "Ceu in: khankix mawh awm: lox pa hoik krai Aux kah pex, yam kawn: ot tau Aux mai pex, grawhgrawng: ceu in: khankix khawm: uik tag sang naog, pa hoik tiem: tix deuh grawhgrawng: Aux, kah daux lai been Mose, mai daux lai cao: jhai: khankix, mai daux Lai Yaogyaw heue.
Yam an: Nawh Cao: paoh rhawm: kix doh, yuh kah mawx sonsang tawng kix dee bleeh Phuk lai sigang: khri: heue.
Mai Nawh Cao: baox ah nin: kah kix, "Hoik tiem: tix deuh, grawng: Cao: Khrit tag kham: geu:, mai deeh kaoh im: khaing: krax yum: daux loe: singaix.
Mai grawng: tag sang sidiex gau grawhgrawng: pa sang doh keud doh sawn: kah phimap mai krax pluat krax ploi: kah daux ceukaux Aux, jah kah veng Yerusaliem, mai kah ceu pwi khawm: uik khawm: leeing: heue.
Pex mawh pwi pa kham: mhai: sakse grawhgrawng: ceu in: khankix heue.
Mai jhak heue, Aux sang ploi: awm: lox mukheu pa hoik tawx Keeing: Aux, kah piang pex, mawh kheu nan: pex ot kah daux veng in:, tom: pon ceep pex siawpsibrawm khaing: dee long: heue."
Yesux Haok Meung Raoma:
Makux 16:19-20; Kawncau 1:9-11
Mai Nawh Cao: thong: kix hu: tom: hoek dex yaong: Betanix, mai Nawh yaog taix Tix nawb bwan: kah kix heue.
Mai yam kawn: nawb Nawh Cao: bwan: kah kix, Nawh Cao: gwieh khaing: kix, mai viex Nawh haok kah daux meung raoma: heue.
Mai kix krub kah Nawh Cao:, mai gauxrhawm: gauxrhi: tix, mai deeh ing: kah veng Yerusaliem heue.
Mai kix ot kah daux nyiiex bwan: jheengjheeng:, mai yaogyaw Siyiex heue.
1 Lihu - 13:2
2 Lai krub - 12:8
3.C.D.E. baptis, dee bleeh mawh cubcom
4 Isayax - 40:3-5
A. B. C. baptis, dee bleeh mawh cubcom.
6 Lai sidiex - 8:3
7 Lai sidiex - 6:13
8 Yaogyaw - 91:11,12
9 Lai sidiex - 6:16
10 Isayax - 61:1, 2
11 cubcom, dee bleeh mawh sgrhah
12 Malakhix - 3:1
13.C.D.E.F. baptis, dee bleeh mawh cubcom
14 Liecong, dee bleeh mawh cubphung: pa kied haoh hun:
15 baptis, dee bleeh mawh cubcom
16 Lai sidiex - 6:5; Laikrub - 19:18
17 ra: nari ponsawm:
18 loe: nari ponsawm:
19 C.baptis, dee bleeh mawh cubcom
20 Yeramix - 22:5; Yaogyaw -118:26
21 Koe: daux phuk prim: tiblah mai ang lai koe: awm: in: tiblah .
22 Lihu - 20:12-16
23 Yaogyaw - 118:26
24 Isayax - 56:7; Yeramix - 7:11
25 baptis, dee bleeh mawh cubcom
26 Yaogyaw - 118::22
27Lai sidiex - 25:5,6
28 Lihu -3:2-6,15
29 Yaogyaw - 110:1
30 Isayax - 53:12
31 Yaogyaw - 22:18
32 dauh dee pa gauxrhawm:
33 liah nari, mawh yam jung singaix bawg yam kao: ra: nari
34 dim: nari, mawh loe: nari plakbo kah ex heue
35 Yaogyaw 31:5
LAI YOHAN
(John)
Yohan
Gumlox Im: Ju
Yam jah koe: Gumlox, Gumlox an: ot mai Siyiex, Gumlox an: mawh Siyiex heue.
Yam jah Nawh kah ot mai Siyiex.
Pa koe: kuceu ku cawng koe: kheu yuh Nawh, mai pa koe: pa ang Nawh yuh ang koe: tix ceu kawx heue.
Kah daux Nawh koe: Ju Pa Im:, mai Ju Pa Im: an: mawh Pa riieng kawn: pwi heue.
Mai Pa riieng an: ca: jhan: riieng kah daux pa faik, mai pa faik ang chix pex chix kieh Pa riieng an: yeet heue.
Yohan Cao: Com Rawm: Kham: Mhai: Sakse Grawng: Pa Riieng
Pwi lih hoek tix kaux, pa hoik ploi: hoek khaing: Siyiex, mai ceukaux nawh mawh Yohan heue.
Nawh hoek tix mawh cao: kham: mhai: sakse, sonsang pon nawh tix kham: mhai: sakse grawhgrawng: Pa riieng, yuh kah mawx sonsang yumrhawm: pwi khawm: uik kheu nawh heue.
Nawh ang mawh pa riieng, viang mawh nan: nawh hoek tix kham: mhai: sakse grawhgrawng: Pa riieng heue.
Pa riieng tete telai, pa chix tawx pa riieng kah kawn: pwi kukaux daux pwi, uik hoek piang haktiex heue.
Nawh hoik ot kah piang haktiex, mai haktiex in: mawh pa yuh Nawh, viang mawh kawx nan: haktiex in: ang tawng kah Nawh heue.
Nawh hoek kah cie Nawh, mai kix pa mawh cie Nawh ang rieb Nawh.
Viang mawh kawx nan:, kah pwi pa rieb kah Nawh mai pwi pa yumrhawm: kah ceukaux Nawh khankix Nawh tawx siawpsibrawm tix sang mawh kawn: Siyiex heue.
Kix keh kheu nham: ang mawh, kheu alo nex ang mawh, kheu alo kawn pwi ang mawh, mawh kheu Siyiex heue.
Gumlox Hoik Lih Mawh Nex
Gumlox an: hoik lih mawh Nex, mai ot sinax ex, mai ex pon yaox min: plakngai: Nawh, pa awm: min: plakngai: Kawn: Keeing: Cao: tix kaux khaing:, pa naog bwanson: mai pa mawh pa meh heue.
Yohan kham: mhai: sakse grawhgrawng: Nawh mai kok yo ah nin:, "In: mawh Kaw pa krai aux,Kaw pa tag sang hoek khaix aux nie ting khaing: aux, kheu hoik dawg koe: Nawh kah: aux heue"
Mawh kheu pa naog daux Nawh, ex khawm: uik hoik pon, bwanson: piang bwanson: heue.
Grawhgrawng: nawh, lox lai beenli hoik tawx kah Mose, bwanson: mai pa mawh pa meh hoik lih hoek kheu Yesux Khrit heue
Yam mawx ang ah, pwi ang sax yaox Siyiex tix kaux kawx. Kawn: Cao: tix kaux khaing: pa ot piang naok Keeing: Cao:, mawh pa hoik plak kieh tawng Nawh heue.
Lox Pa Sidiex Yohan Cao: Com Rawm:
Mathiex 3:1-12; Makux 1:1-8; Lukax 3:1-18
In: mawh mhai: sakse pa kham: Yohan, yam ploi: pwi Yudax cao: giex kaing: li kix mai pwi Lewix khankix hu: khaing: veng Yerusaliem tix sang chawk kah nawh, "Maix mawh mawx?"
Yohan ang pie ang lhen: krai sidawng: ah nin:, "Aux ang mawh Cao: Khrit."
Mai kix baox chawk nawh, "Phan: mawh nan: maix mawh pa yuh kah mawx? Maix mawh Eliyax lie?" Mai nawh baox ah nin:, "Aux ang mawh." "Maix mawh Cao: Jhai: an: lie?" Nawh baox deeh pawk lox in:, "Ang mawh heue."
Kix baox ah nin: kah nawh, "Maix mawh mawx? Krai kah ex liak, sonsang koe: ex lox tix sang krai kah pwi pa ploi: ex hoek. Sang ah maix kah grawng: tokaux tix kah mawx?"
Nawh baox ah nin:, "Aux mawh, :Lox pa kok pa yo daux tiag daux tu, kieh krax Simiang rauh see heue. Awm: lox pa hoik krai cao: jhai: Isayax."
Pwi pa kix hoik ploi: hoek khankix mawh Pharishie:.
Mai kix baox chawk kah nawh ah nin:, "Phan: maix ang mawh Cao: Khrit, mai ang mawh Eliyax, mai ang mawh Cao: Jhai: an:, yuh patix maix baptis pwi kah rawm:?"
Yohan baox pawk lox ah nin:, "Aux baptis kah daux rawm: heue, viang mawh kawx nan: koe: Kaw pa ot greung pex tix kaux, pa ang pex tawng.
Mawh Nawh heue, pa hoek khaix aux, pa nie ting khaing: aux, pie maox kiep Nawh ang aux keung: tix kah."
Ceu in: mawh pa yuh daux yaong: Betanix, plak toi: rawm: Yawdan kah dee baptis Yohan heue.
Kawn: Yung: Siyiex
Singaix pasax Yohan yaox Yesux hoek kah nawh, mai ah nin:, "Jhak heue, Kawn: Yung: Siyiex pa teei phimap phigrham haktiex hu:.
Nawh mawh pa hoik krai aux,Kaw pa tag sang hoek khaix aux nie ting khaing: aux, kheu hoik dawg koe: Nawh kah: aux heue
Aux kah: ang tawng Nawh, viang mawh kawx nan: sonsang tawng pwi Isarilax kah Nawh aux tom: hoek tix baptis heue."
Yohan kham: mhai: sakse ah nin:, "Aux hoik yaox Khwan: Cao: lih khaing: raoma: awm: sikaux mai tum: piang Nawh.
Aux kah: ang tawng Nawh, viang mawh kawx nan: Kaw pa ploi: aux hoek tix baptis hoik ah nin: kah aux, Piang mawx ang ah, Kaw pa yaox maix Khwan: Cao: lih tum: mai ot piang Nawh, Kaw an: mawh cao: baptis
kah daux Khwan: Singax Singeh heue
Ceu in: aux hoik yaox, mai aux kham: mhai: sakse grawng: mawh Nawh Kawn: Siyiex heue."
Pa Liang Tix Mawh Kawncau Yesux
Mathiex 4:18-22; Makux 1:16-20; Lukax 5::2-11
Singaix pasax Yohan baox deeh cung tau mai kawncau nawh ra: kaux.
Nawh jhak yam hu: Yesux mai ah nin:, "Jhak kah Kawn: Yung: Siyiex heue."
Mai kawncau ra: kaux an: mhong: lox pa ah nawh, mai kiex hawt Yesux heue.
Yesux deeh gi mai yaox kiex hawt Nawh mai ah nin:, "Sawg pax patix?" Mai kiex ah nin: kah Nawh Cao:. "Rabi eue, (Pa ah Rabi dee bleeh mawh Sara Cao: Gau) ot Maix dee mawx?"
Nawh baox ah nin: kah kiex, "Hoek mai pax tag sang yaox heue." Mawh kheu nan: kiex hu: mai yaox dee ot Nawh Cao:, mai kheu hoik hoek bawg yam kao: nari singaix an: kiex tom ot mai Nawh heue.
Daux kiex ra: kaux pa mhong: lox krai Yohan mai hawt khaix Nawh Cao:, tix kaux mawh Andare pux Simon Petrux.
Kah: sivoe nawh sawg puxke: nawh Simon mai ah nin: kah nawh, "Ex hoik yaox Misiyax." (Pa ah Misiyax dee bleeh mawh Cao: Khrit).
Nawh viex nawh hoek kah Yesux heue. Yesux jhak kah nawh mai ah nin:, "Maix mawh Simon kawn: Yonax, tag sang kok maix mawh Kephax heue." (Dee bleeh Kephax mawh Petrux, mai dee bleeh Petrux mawh Rang:.)
Yesux Kok Philipux mai Nasanilax
Singaix pasax Yesux koe: rhawm: tix hu: daux Meung Galilie:, mai Nawh Cao: yaox Philipux mai ah nin: kah nawh, "Hawt Aux heue."
Philipux mawh pwi Biesedax veng dee ot Andare mai Petrux heue.
Philipux sawg mai yaox Nasanilax, mai ah nin: kah nawh, "Ex hoik yaox Kaw pa hoik tiem: Mose grawhgrawng: Nawh kah daux lai beenli mai pa cao: jhai: khankix kawx hoik tiem: grawhgrawng: Nawh, pa mawh Yesux kawn: Yosiep pwi veng Nazariet heue."
Mai Nasanilax baox chawk ah nin: kah nawh, "Ceu pa mhawm: pa mhiem: chix lih kah daux veng Nazariet tix ceu ceu lie?" Philipux baox ah nin: kah nawh, "Hoek tix jhak heue."
Yesux yaox pa hoek Nasanilax kah Tix mai ah nin:, "Jhak heue, pwi Isarilax tete, pa ang chix pie chix lhen:."
Nasanilax chawk ah nin: kah Nawh Cao:, "Maix tawng aux yuh kah mawx?" Yesux deeh pawk lox kah nawh, mai ah nin:, "Kah: ang Philipux nyang bax kok maix, yam ot maix greem: khaoxruh, Aux hoik dawg yaox maix heue."
Nasanilax baox pawk lox mai ah nin: kah Nawh, "Rabi eue, Maix mawh Kawn: Siyiex, Simiang Khunhawkham pwi Isarilax heue."
Yesux pawk lox mai ah nin: kah nawh, "Kheu hoik krai Aux kah maix,Aux yaox maix ot greem: khaoxruh, maix tom: yumrhawm: kah lie? Maix tag sang pon tix yaox ceu pa nie lheu: ting khaing: in: sax heue."
Nawh Cao: baox ah nin: kah nawh, "Aux krai lox tete telai kah maix, khaix in: maix tag sang yaox baoh raoma:, mai kawncau Siyiex haok mai lih kah piang Kawn: kawn: pwi heue."
Pwie Kapaox Daux Veng Kanax
Khaix an: daux loe: singaix pwi ih kapaox daux veng Kanax kah daux meung Galilie:, mai miex Yesux kah ot tan:.
Lheu: khaing: an:, kix kok Yesux mai kawncau Nawh khankix hoek tix ih kapaox tan:.
Mai yam ang rawm: plix siiet kub, miex Yesux ah nin: kah Nawh Cao:, "Kix ang koe: rawm: plix siiet heue."
Mai Yesux deeh ah nin: kah kiex, "Bun: eue, Aux koe: ceu pa yuh mai pax patix? Bawg yam Aux ang nyang bax hoek."
Miex Nawh ah nin: kah pwi cau pwi soi: khankix, "Nawh nhie: pex yuh ceu pa yuh kah mawx ang ah, yuh awawx."
Kah dee an: koe: ang simaox liah mu:, awm: pa khaw: mai been pwi Yudax khankix tix kieh singax heue. Tix mu: ang kub sau: ra: loe: glawm: rawm:.
Yesux ah nin: kah kix, "Sau: rawm: tom: naog kah ang khankix heue." Mai kix sau: rawm: tom: naog.
Mai Yesux ah nin: kah kix, "Yamin pug hu: tawx kah cao: giex kaing: kapaox heue." Mai kix viex hu:.
Yam cao: giex kaing: kapaox cim tix yaox rawm: pa hoik kieh mawh rawm: plix siiet, kheu ang nawh tawng grawhgrawng: rawm: plix siiet hoek khaing: dee mawx, (viang mawh kawx nan: pwi cau pwi soi: pa pug rawm: khankix tawng heue.) nawh kok kah kaw pa teei tix koe: moeng,
mai ah nin: kah nawh, "Pwi kukaux viex tix tawx rawm: plix siiet pa mhawm: phaoka:, mai khaix hoik nyaux pwi tom: sak, viex pa ang mhawm: khaix, viang mawh nan: maix deuh rawm: plix siiet pa mhawm: tom: yamin heue."
In: pa mawh mhai: pa daox pa am: pa liang tix yuh, Yesux yuh kah daux veng Kanax, daux meung Galilie:, mai kheu nan: min: plakngai: Nawh sidawng:, mai kawncau Nawh khankix yumrhawm: kah Nawh heue.
Khaix an: Nawh Cao: hu: kah veng Kapeniom, Nawh mai miex Nawh, mai pux Nawh khankix, mai kawncau Nawh khankix, mai kix ang ot tan: miex singaix tix.
Yesux Kieh Nyiex Bwan: Singax
Mathiex 21:12-13; Makux 11:15-17; Lukax 19:45-46
Yam an: dex sang hoek yam yuh pwie Pasakha pwi Yudax, mai Yesux haok kah veng Yerusaliem heue.
Mai daux nyiiex bwan: tan:, Nawh Cao: yaox pwi pa coh moi, mai yung:, mai sikaux, mai pwi pa loh mau ngawm tan:.
Mai Nawh teei maox siah klia: tix yuh pa sang sivied, grheu: kix lih khawm: uik khaing: daux nyiiex bwan:, khawm: yung:, khawm: moi khankix, mai Nawh klup tix tik mau pwi pa loh mau, mai Nawh cot pheen: kix cangklud.
Mai Nawh ah nin: kah pwi pa coh sikaux khankix, "Teei ceu in: lih heue, paw kieh nyiiex Keeing: Aux mawh dee coh kraung coh khrai:."
Mai kawncau Nawh khankix doh keud grawng: hoik tiem: tix deuh ah nin:,
5"Pa viex Aux khawm: rhawm: mai nied tix yuh son nyiiex Maix tag sang ih Aux uik heue."
Yam an: pwi Yudax khankix chawk ah nin: kah Nawh Cao:. "Pa yuh Maix ceu in: khankix, Maix sang jhi: ex yaox mhai: pa daox pa am: ceu tix?"
Mai Yesux pawk lox ah nin: kah kix, "Yieh nyiiex bwan: in: laux, mai daux loe: singaix Aux tag sang deeh cox heue."
Mawh kheu nan: pwi Yudax ah nin:, "Yam sum: nyiiex bwan: in: uik tipon: liah (46) num, mai Maix sang deeh cox daux loe: singaix khaing: lie?"
Viang mawh kawx nan:, Nawh sang ah kah nyiiex bwan: tokaux Tix heue.
Kheu an: khaix hoik deeh kaoh Nawh Cao: khaing: krax yum:, kawncau Nawh doh keud kah lox pa hoik krai Nawh, mai yumrhawm: kah Phuk lai sigang: khri:, mai lox pa hoik krai Yesux heue.
Yesux Tawng Rhawmrhi: Kawn: Pwi
Yam ot Yesux kah daux veng Yerusaliem daux pwie Pasakha, pwi haoh pwi hun: yumrhawm: kah ceukaux Nawh, kheu yaox kix mhai: pa daox pa am: pa yuh Nawh Cao: heue.
Viang mawh kawx nan: Yesux ang een: rhawm: tix tawx tokaux Tix kah kix, kheu tawng Nawh pwi khawm: uik heue.
Mai ang Nawh lo cao: pa kham: mhai: sakse grawhgrawng: pwi, kheu hoik tawng tokaux Nawh pa koe: kah daux kawn: pwi heue.
Yesux mai Nikawdimu
(Grawng: deeh baox keh)
Yam an: koe: Pharishie: tix kaux, pa kaux Nikawdimu, pa mawh simiang giex kaing: pwi Yudax tix kaux.
Nawh hoek kah Yesux yam ponsawm: mai ah nin: kah Nawh, "Rabi eue, ex tawng Maix mawh cao: gau pa kaoh khaing: Siyiex, kheu pwi tix kaux kawx ang chix yuh mhai: pa daox pa am: pa yuh Maix inkix, phan: Siyiex ang ot tau mai nawh heue."
Yesux pawk lox mai ah nin: kah nawh, "Aux krai lox tete telai kah maix, phan: pwi ang baox deeh keh tix bawg, nawh ang pon tix yaox Meung Siyiex heue."
Nikawdimux baox ah nin: kah Nawh Cao:, "Pwi pa hoik riex ju sang pon tix baox deeh keh yuh kah mawx? Nawh deeh chix laig kah daux vaig miex tix, mai baox deeh chix keh kah lie?"
Yesux baox deeh pawk lox mai ah nin:, "Aux krai lox tete telai kah maix, phan: pwi ang keh daux rawm: mai Khwan:, nawh ang pon tix laig kah daux Meung Siyiex.
Pa keh khaing: nex mawh nex, mai pa keh khaing: Khwan: mawh khwan: heue.
Paw daox paw am: kheu hoik krai Aux kah maix,maix tag baox deeh keh
Bhaung: kienie, simie tix phlu: dee mawx nawh phlu: tan:, mai maix pon mhong: lox nawh, viang mawh kawx nan: ang maix tawng kaoh khaing: dee mawx, mai sang hu: dee mawx. Pwi pa keh daux Khwan: kukaux kawx awm: an: heue."
Nikawdimu baox pawk lox mai ah nin: kah Nawh, "Ceu in: khankix tag chix mawh yuh kah mawx?"
Yesux baox pawk lox mai ah nin: kah nawh, "Maix mawh cao: gau kah daux pwi Isarilax tix kaux, mai ang maix tawng ceu in: lie?
Aux krai lox tete telai kah maix, ex krai ceu pa tawng ex, mai kham: mhai: sakse grawng: pa hoik yaox ex, mai pex ang rieb tix teei mhai: sakse pa kham: ex.
Phan: Aux hoik krai maix grawhgrawng: ceu pa dex mai haktiex in:, mai maix ang yumrhawm: kah, phan: Aux krai maix grawhgrawng: ceu pa dex mai meung raoma:. maix chix yumrhawm: yuh kah mawx?
Pwi tix kaux kawx ang sax haok kah meung raoma:, lheu: khaing: Kaw pa lih khaing: meung raoma:, pa mawh Kawn: kawn: pwi pa ot daux meung raoma: heue.
Awm: hoik yaog Mose siuing: kah daux tiag daux tu, viang kah Kawn: kawn: pwi kawx, tag sang yaog yuh nan:,
yuh kah mawx can pwi pa yumrhawm: kah Nawh Cao: khankix tag ang lai hoek krax laux krax leeing:, mai pon ju leeing ju leeing phan: heue.
"Mawh kheu Siyiex kied moh haktiex sigrien sigre, Nawh tom: tawx Kawn: Tix pa koe: tix kaux khaing: , yuh kah mawx son can pwi pa yumrhawm: kah Nawh khankix, tag ang lai hoek krax laux krax leeing:, viang mawh nan: pon ju leeing ju leeing phan: heue.
Grawhgrawng: nawh, Siyiex ploi: Kawn: Nawh hoek sonsang prawng sang ciyang kah haktiex ang mawh, viang mawh nan: ploi: hoek sonsang hoek haktiex krax taoh kheu Nawh heue.
Kaw pa yumrhawm: kah Nawh Cao: ang hoek krax prawng krax ciyang, viang mawh kawx nan: kaw pa ang yumrhawm: kah Nawh, krax prawng krax ciyang hoik koe: piang nawh, kheu ang nawh yumrhawm: kah ceukaux Kawn: Siyiex pa koe: tix kaux khaing: heue.
Tag hoek krax prawng. Krax ciyang kheu Pa riieng hoik hoek piang haktiex in:, mai kawn: pwi nie lheu: moh kah pa faik khaing: pa riieng, in: mawh kheu pa yuh kix mawh pa caox heue.
Grawhgrawng: nawh, pa yuh pa caox kukaux daux pwi nieh jhak kah pa riieng, mai ang hoek kah pa riieng, son ang pa yuh tix sang lih heue.
Viang mawh kawx nan:, kaw pa yuh pa mawh pa meh hoek kah pa riieng, sonsang sidawng: pa yuh tix, grawng: mawh pa hoik yuh kah daux Siyiex heue."
Yesux mai Yohan Cao: Com Rawm:
Khaix ceu in: khankix, Yesux mai kawncau Nawh khankix hu: kah daux meung Yudax, mai Nawh ot mai kix tan:, mai tawx krax baptis heue.
Mai Yohan kawx baptis daux Enon dex veng Salim, kheu haoh rawm: tan:, mai kix hoek tix baptis heue.
Kheu yam an: ang nyang bax sau: Yohan kah daux thawng: heue.
Yam an: kawncau Yohan khankix mai pwi Yudax tix kaux thungthiang: paox tix grawhgrawng: pa kieh singax.
Mai kix hoek kah Yohan mai ah nin: kah nawh, "Rabi eue, Kaw pa ot mai maix plak toi: rawm: Yawdan, pa kham: maix mhai: sakse son Nawh, jhak heue, Nawh kawx tawx krax baptis mai pwi khawm: uik hoek mai Nawh."
Yohan baox pawk lox mai ah nin:, "Pwi ang pon tix ceu kawx phan: ang mawh pa tawx kah nawh khaing: raoma:.
Tokaux pex mawh mhai: sakse grawng: pa hoik krai aux,Aux ang mawh Cao: Khrit, viang mawh kawx nan: aux mawh kaw pa hoik ploi: kah: sivoe Nawh khaing:
Kaw pa pon mhoeng: yam yuh kapaox, mawh kaw pa yuh kapaox heue, viang mawh kawx nan: paoxgrawm nawh pa cung dex mai mhong: nawh, kied gauxrhawm: gauxrhi: kheu mhong: nawh lox kaw pa yuh kapaox. Awm: an: krax gauxrhawm: aux hoik naog heue.
Nawh tag sang baox ting baox lhaong:, viang mawh kawx nan: aux tag sang deeh iak hu: heue.
Cao: Pa Kaoh Khaing: Meung Raoma:
"Kaw pa kaoh khaing: dee long: mawh pa ting: piang khawm: uik. Kaw pa kaoh khaing: haktiex mawh pa dex pa dawd mai haktiex, mai chix krai grawhgrawng: haktiex khaing:. Kaw pa kaoh khaing: raoma: mawh pa ting piang khawm: uik.
Nawh kham: mhai: sakse grawng: pa hoik yaox Nawh, mai pa hoik mhong: Nawh, viang mawh nan: pwi tix kaux kawx, ang rieb tix teei mhai: sakse pa kham: Nawh.
Kaw pa rieb tix teei mhai: sakse pa kham: Nawh, hoik tawk cum: nawh grawhgrawng: Siyiex mawh pa kaux sijax heue.
Kaw pa Siyiex ploi: hoek chix krai chix ah gumlox Siyiex, kheu Siyiex ang tiag tix tawx Khwan: kah heue.
Keeing: Cao: moh Kawn: Cao:, mai hoik tawx kuceu khawm: uik kah daux tawm: taix Nawh heue.
Kaw pa yumrhawm: kah Kawn: Cao: koe: ju leeing ju leeing phan:, mai kaw pa ang yumrhawm: kah Kawn: Cao: ang lai pon tix yaox ju, viang mawh kawx nan: pa songrhawm: Siyiex koe: piang nawh heue."
Yesux mai Bun: Samarix
Mawh kheu nan: yam Simiang tawng Pharishie: hoik mhong: grawhgrawng: pon Nawh kawncau mai baptis
kah pwi nie lheu: khaing: Yohan,
(Viang mawh kawx nan: tokaux Yesux ang tawx krax baptis , mawh kawncau Nawh pa baptis
khaing:).
Nawh lih khaing: meung Yudax, mai baox deeh hu: kah meung Galilie: heue.
Mai Nawh caw tix hu: preeng: kah daux meung Samarix,
mawh kheu nan: Nawh Cao: hoek kah veng Samarix tix veng pa kaux Sukha, dex kah haktiex pa tawx Yakop kah kawn: nawh Yosiep heue.
Mai kah dee an: koe: rawmmaw: Yakop. Yesux taug kheu hu: krax, mai ngawm dex rawmmaw: tan:. Yam an: dex hoek liah nari heue.
Bun: Samarix tix kaux hoek tix kin rawm:, mai Yesux ah nin: kah nawh, "Tawx Aux nyaux rawm: liak."
(Mawh kheu yam an: kawncau Nawh khankix hoik hu: tix liag pa ih pa un: kah daux veng heue.)
Bun: Samarix baox ah nin: kah Nawh Cao:, "Yuh kah mawx Maix pa mawh pwi Yudax mhaing: tix nyaux rawm: kah aux pa mawh bun: Samarix?" (Grawhgrawng: nawh, pwi Yudax ang sax yuh paox yuh pie kah pwi Samarix.)
Yesux baox pawk lox mai ah nin: kah nawh, "Phan: maix tawng bwanson: khawngphak pa tawx Siyiex, mai Kaw pa ah,Tawx Aux nyaux rawm: mawh mawx? Maix sang mhaing: rawm: kah Nawh, mai Nawh sang tawx rawm: im: ju kah maix heue."
Mai bun: an: baox ah nin: kah Nawh Cao:, "Simiang eue, Maix ang koe: ceu pa pug tidtix, mai rawmmaw: in: kied raux tete, kheu nan: Maix lai pon rawm: im: ju kah dee mawx?
Maix khex lheu: ting khaing: keeing: ex Yakop pa tawx rawm:maw: in: kah ex lie? pa tokaux nawh, mai kawn: nawh, mai khawng: mai brie nawh pa hoik nyaux kah rawmmaw: in:.
Yesux baox pawk lox mai ah nin: kah nawh, "Pwi pa nyaux rawm: in: kukaux tag sang deeh nyaux nie rawm: heue.
Viang mawh kawx nan:, pwi mawx ang ah pa nyaux rawm: pa tawx Aux, tag ang lai baox deeh sang nyaux nie rawm: tix bawg kawx, viang mawh nan: rawm: pa sang tawx Aux kah nawh tag sang mawh rawmmaw: pa lih rawm: kah daux nawh, tom: kieh mawh ju pa im: leeing ju leeing phan:."
Bun: an: baox ah nin: kah Nawh, "Simiang eue, tawx rawm: an: kah aux liak, son ang aux sang nyaux nie rawm: phao khaix, mai son ang aux lai baox yaox tix hoek krax nie glang: nie gleeing: tix kin rawm: tin:."
Yesux baox pawk lox mai ah nin: kah nawh, "Hu: kok mex maix mai deeh hoek tin:."
Bun: an: baox pawk lox mai ah nin: kah Nawh Cao:, "Aux ang koe: mex." Yesux baox ah nin: kah nawh, “Pa ah maix,Aux ang koe: mex, caw tete.
Kheu maix hoik koe: mex phwan: kaux, mai kaw pa koe: maix yamin, ang lai mawh mex maix, pa ah maix mawh pa mawh pa meh heue.”
Bun: an: baox ah nin: kah Nawh, "Simiang eue, aux tawng Maix mawh Cao: Jhai: heue.
Pa mawh tax du ex dix, krub kah gawng in:, pex ah dee khaw: pwi tix krub mawh kah daux veng Yerusaliem."
Yesux baox ah nin: kah nawh, "Bun: eue, yumrhawm: kah lox Aux, bawg yam tag sang hoek, yam pex tag ang krub Keeing: Cao: kah piang gawng in: mai kah daux veng Yerusaliem.
Pex krub kah pa ang pex tawng, ex krub kah pa tawng ex, kheu krax taoh hoek khaing: pwi Yudax heue.
Viang mawh kawx nan:, bawg yam nari tag sang hoek, mai hoik hoek yamin, yam pwi pa krub kah Keeing: Cao: tete, tag krub kah daux khwan: mai kah daux pa mawh pa meh, kheu sawg Keeing: Cao: pa yuh nan: tix mawh pwi pa krub kah Nawh heue.
Siyiex mawh Khwan:, mai pwi pa krub kah Nawh, tag krub kah Nawh kah daux khwan: mai kah daux pa mawh pa meh heue."
Bun: an: baox ah nin: kah Nawh Cao:, "Aux hoik tawng grawng: sang hoek Misiyax, (Kaw pa kok mawh Cao: Khrit), yam hoik hoek Nawh, Nawh tag sang krai kuceu khawm: uik kah ex heue."
Yesux baox ah nin: kah nawh, "Aux pa sikah mai maix mawh Nawh heue."
Yam an: kawncau Nawh deeh hoek, mai daox deng: kheu sikah Nawh mai bun: an:. Viang mawh kawx nan: tix kaux kawx ang chawk kah Nawh, "Maix sawg patix? Phan: ang mawh nan: Maix sikah mai bun: an: yuh kah mawx?"
Bun: an: deuh aw: rawm: nawh tan:, mai deeh hu: kah daux veng mai ah nin: kah pwi khankix,
"Hoek tix jhak kah Pwi tix kaux, pa hoik krai aux can ceu pa hoik yuh aux khawm: uik khawm: leeing:. Khex chix mawh Nawh Cao: Khrit lie?"
Mai kix lih khaing: daux veng mai hu: kah Nawh.
Yam an: kawncau Nawh khankix khyox khaw: mai ah nin: kah Nawh Cao:, "Rabi eue, sawm: ha: ceeix."
Viang mawh kawx nan: Nawh baox pawk lox mai ah nin: kah kix, "Aux koe: pa ih pa un: pa ang pex tawng."
Mawh kheu in: kawncau Nawh tix kaux hoik tix kaux ah nin: kah paox tix, "Khex hoik viex tix kauxkaux tix tawx pa ih pa un: kah Nawh lie?"
Yesux baox ah nin: kah kix, "Pa ih pa un: Aux mawh pa yuh alo Kaw pa ploi: Aux hoek, mai pa yuh kaing Nawh tom: hoik heue.
Pex ah khaix in: pon: khix tag hoek bawg yam vawg nghox, ang mawh lie? Aux krai kah pex, jhak heue, yaog ngai: pex tix jhak kah kaung: kah ma: khankix, nghox hoik kaux hoik paing heue, mai yam khaw: tix vawg hoik hoek heue.
Kaw pa vawg tag pon ngawh riang mai khrawm: plix yuh kah mawx sonsang pon ju leeing ju leeing phan:. Yuh kah mawx kawx pa rhuat mai kaw pa vawg tag sang pon tix gauxrhawm: tau.
Grawhgrawng: nawh lox pa hoik koe: pa ah nin:,Tix kaux mawh cao: rhuat mai tix kaux mawh cao: vawg hoik mawh tete heue.
Aux ploi: pa hu: vawg dee ang pex sax yuh kaing, tang: kaux hoik yuh kaing, mai pex hoik laig kah daux kaing pa yuh kix heue."
Mai pwi Samarix veng an: tom: nie yumrhawm: kah Nawh Cao:, kheu krai bun: an: lox pa ah nin:, "Nawh hoik krai aux pa hoik yuh aux khawm: uik."
Kheu nan:, yam pwi Samarix hoek kah Nawh, kix khyox khaw: Nawh ot mai kix, mai Nawh Cao: ot tan: ra: singaix.
Mai pwi haoh pwi hun: baox yumrhawm: kheu gumlox Nawh Cao:.
Mai kix ah nin: kah bun: an:, "Yamin ex yumrhawm: kheu lox pa hoik krai maix ang mawh. Mawh kheu tokaux ex hoik mhong: lox Nawh, mai tawng grawng: in: mawh Cao: Khrit te te, pa mawh Cao: pa taoh haktiex heue."
Pwi Galilie Rieb Kah Yesux
Khaix an: ra: singaix Nawh lih khaing: tan: mai hu: kah daux meung Galilie:.
Kheu tokaux Yesux hoik kham: mhai: sakse grawng: Cao: Jhai: ang koe: min: plakngai:, kah daux meung tokaux tix.
Yam hoek Nawh kah daux meung Galilie:, pwi Galilie: khankix rieb Nawh, kheu hoik yaox kix pa yuh Nawh daux pwie kah veng Yerusaliem, kheu ot kix kah daux pwie an: heue.
Yesux Pai: Moi: Kah Kawn: Simex
Simiang Tix Kaux
Mai Nawh deeh hoek kah Kanax daux meung Galilie: dee hoik kieh Nawh rawm: mawh rawm: plix siiet. Mai koe: simiang tix kaux pa kawn nawh saux kah daux veng Kapeniom.
Yam mhong: nawh grawng: hoik kaoh Yesux khaing: meung Yudax, mai hoek kah daux meung Galilie:, nawh hu: kah Nawh Cao:, mai khyox khaw: kah Nawh Cao:, sonsang lih hoek Nawh tix cox kawn: nawh moi:. Mawh kheu saux nawh dex yum: heue.
Mawh kheu nan: Yesux ah nin: kah nawh, "Phan: maix ang yaox mhai:, mai ceu pa daox pa am: khankix, maix ang tau tix yumrhawm: kah."
Simiang an: baox ah nin: kah Nawh Cao:, "Simiang eue, kah: ang kawn: aux nyang bax yum: lih hoek liak."
Yesux baox ah nin: kah nawh, "Hu: dee hu: maix heue, kawn: maix tag klawd heue." Pwi an: yumrhawm: kah lox pa krai kah nawh, mai nawh hu: dee hu: tix heue.
Mai yam kawn: tag ing: nawh, kawncau nawh khankix caong rieb nawh, mai krai grawng: klawd kawn: nawh heue.
Mawh kheu in: nawh chawk kix grawng: jah kawn: nawh tix vai yam mawx. Mai kix baox pawk lox mai ah nin:, "Jhawm: saux nawh grai: kawkawx bawg yam
aliah nari."
Mawh kheu in: keeing: nawh tawng grawng: bawg yam an: mawh, bawg yam krai Yesux lox in: kah nawh, "Kawn: maix tag klawd heue." mai tokaux nawh, mai pwi daux nyiiex nawh khawm: uik yumrhawm: heue.
In: mawh mhai: pa daox pa am:, pa yuh Yesux ra: bawg tix bawg khaix lih Nawh khaing: meung Yudax mai hoek kah daux meung Galilie: heue.
Yesux Pai: Jhawm: Saux Kah Rawm: Dung Betesadax
Khaix in: koe: pwie pwi Yudax tix mu:, mai Yesux haok hu: kah veng Yerusaliem.
Kah daux veng Yerusaliem dex Siviex Yung:, koe: rawm: dung tix mu:, pa kok daux lox Hebrie Betesadax. Rawm: dung an: koe: grah phwan: lhang: heue.
Kah piang grah an: khankix pwi pa koe: jhawm: saux jhawm: ngia it tan: kied haoh kied hun: tete. Pwi dugngai: kah koe:, pwi laux caong kah koe:, mai pwi yum: tix plak kah koe:, kix krox yam yungyiang: rawm: an:.
Kheu yam hoek bawg yam kawncau Siyiex tix kaux lih hoek mai yuh rawm: an: yungyiang:. Khaix yungyiang: rawm: an: pwi mawx pon laig kah: sivoe paox tix, jhawm: saux tokaux nawh moi: heue.
Mai pwi pa saux tingoe: daix (38) num tix kaux ot kah dee an:.
Yam yaox Yesux it nawh tan:, mai tawng grawhgrawng: hoik rheung: ot nawh tan: awm: an:, Nawh Cao: chawk nawh ah nin:, "Sang moi: nie maix lie?"
Pwi pa saux an: baox pawk lox mai ah nin:, "Simiang eue, yam yungyiang: rawm:, ang aux koe: pwi tix teei aux sau: kah daux rawmdung an: tix kaux kawx, yam hu: aux pwi tang: kaux pon laig kah: sivoe aux heue."
Yesux ah nin: kah nawh, "Kaoh heue, teei kraung it maix mai hu: heue."
Mai dom: mawx dom: an: pwi an: moi: mai teei kraung it tix mai hu: heue. Singaix an: mawh singaix twah.
Mawh kheu nan: pwi Yudax ah nin: kah kaw pa hoik moi: an:, "Singaix mawh ngaix twah, mai pa viex maix kraung it tix hu: ang khaw: mai beenli."
Viang mawh kawx nan: kaw an: baox pawk lox mai ah nin:, "Kaw pa cox aux moi: hoik ah nin: kah aux, "Teei kraung it maix mai hu: heue"
Kix baox chawk kah nawh, "Mawh pwi mawx pa nhie: maix teei kraung it maix mai hu:?"
Viang mawh kawx nan: kaw pa hoik moi: an:, ang tawng cao: cox tix moi:. Kheu koe: pwi haoh pwi hun: kah dee an:. Yesux hoik lih hu: khaing: tan:.
Khaix an: Yesux yaox nawh kah daux nyiiex bwan: mai ah nin: kah nawh, "Jhak heue, maix hoik moi:, khaix in: paw lai baox yuh phimap, phan: ang mawh nan:, ha pa lheu: nu kox hoek piang maix heue."
Pwi an: hu: mai krai kah pwi Yudax, Kaw pa cox nawh moi: mawh Yesux.
Mawh kheu nan: pwi Yudax tuktiaktukte: kah Yesux, mai sawg tix pah Nawh yum:, kheu hoik yuh Nawh ceu in: khankix singaix twah heue.
Viang mawh kawx nan: Yesux baox pawk lox mai ah nin: kah kix, "Keeing: Aux yuh kaing tom: hoek yamin, mai Aux kah yuh heue."
Mawh kheu jao in: pwi Yudax nie sawg tix pah Nawh yum:, kheu yuh Nawh singaix twah laux khaing: ang joeng mawh, viang mawh nan: Nawh kok Siyiex mawh Keeing: Tix, mai kheu Nawh hoik yuh tix kieh tokaux Tix sidu mai Siyiex heue.
Siawpsibrawm Kawn: Cao:
Mawh kheu nan: Yesux baox pawk lox kah kix mai ah nin:, "Aux krai lox tete telai kah pex heue, Kawn: Cao: ang chix yuh tix ceu kawx nongnong:, viang mawh kawx nan: Nawh yuh ceu pa yaox Nawh Keeing: Cao: yuh khaing:, mai ceu pa yuh Keeing: Cao:, Kawn: Cao: kawx yuh ceu an: heue.
Kheu Keeing: Cao: moh Kawn: Cao:, Nawh tom: jhi: Nawh yaox ceu pa yuh Tix khawm: uik khawm: leeing:. Mai Nawh tag jhi: Nawh yaox kaing pa nie lheu: ting khaing: in:, sonsang kieh pex daox deng: kah heue.
Grawhgrawng: nawh awm: Keeing: Cao: kieh pwi yum: deeh kaoh, mai kieh kix im:, awm: an: viang Kawn: Cao: kawx, koe: rhawm: tix sang kieh pwi mawx im: kah chix Tix heue.
Keeing: Cao: ang prawng ang ciyang pwi tix kaux kawx, viang mawh kawx nan: Nawh hoik tawx krax prawng krax ciyang kah Kawn: Cao: khawm: uik.
Yuh kah mawx son kawn: pwi khawm: uik sang yungyi: kah Kawn: Cao:, awm: yungyi: kix kah Keeing: Cao:. Kaw pa ang yungyi: kah Kawn: Cao:, ang yungyi: kah Keeing: Cao: pa ploi: Nawh hoek heue.
Aux krai lox tete telai kah pex, kaw pa mhong: lox Aux mai pa yumrhawm: kah Kaw pa ploi: Aux hoek, hoik koe: ju leeing ju leeing phan:, mai ang hoek krax ciyang, viang mawh kawx nan: hoik luan khaing: krax yum: mai laig kah daux ju pa im: heue.
Aux krai lox tete telai kah pex, bawg yam nari tag sang hoek, mai hoik hoek yamin, yam pwi pa hoik yum: khankix tag mhong: lox Kawn: Siyiex, mai kix pa mhong: tag im: heue.
Grawhgrawng: nawh, awm: Keeing: Cao: koe: ju kah daux tokaux Tix, Nawh tawx kah Kawn: Cao: koe: ju kah daux tokaux Tix yuh nang: nan:.
Mai Nawh Cao: hoik tawx sibrawm kah Nawh tix ciyang, kheu mawh Nawh Kawn: kawn: pwi heue.
Paw daox paw deng: kah ceu in:, kheu bawg yam tag sang hoek, yam can pa ot kah daux simeeig khawm: uik tag mhong: lox Nawh,
mai lih hoek. Kix pa hoik yuh pa mhawm: pa mhiem: deeh kaoh kah son pa im: ju heue, mai kix pa hoik yuh pa caox pa ang mhawm: ang mhiem:, tag deeh kaoh kah son krax prawng krax ciyang heue.
Mhai: Sakse Pa Kham: Yesux
"Ang Aux chix yuh tix ceu kawx nongnong:, Aux prawng ciyang awm: pa mhong: Aux, mai krax prawng krax ciyang Aux mawh pa rah pa see. Mawh kheu ang Aux sawg tix yuh alo tokaux Tix, viang mawh nan: Aux yuh alo Keeing: Cao: pa ploi: Aux hoek heue.
Phan: Aux kham: mhai: sakse grawhgrawng: tokaux Tix, mhai: sakse Aux ang mawh pa mawh pa meh.
Mawh tang: kaux pa kham: mhai: sakse grawng: Aux, mai Aux tawng grawng: mhai: sakse pa kham: Nawh grawhgrawng: Aux mawh pa mawh pa meh heue.
Pex hoik ploi: hu: kah Yohan, mai nawh hoik kham: mhai: sakse kah pa mawh pa meh.
Viang mawh kawx nan:, ang Aux rieb tix teei mhai: sakse pa kham: pwi, viang mawh nan: Aux tom: krai ceu in: khankix yuh kah mawx sonsang hoek pex krax taoh heue.
Nawh mawh kawkngu pa lah mai pa jhan: riieng, mai pex koe: rhawm: tix gauxrhawm: kah daux pa riieng nawh tivud khaing:.
Viang mawh kawx nan: Aux koe: mhai: sakse pa nie lheu: ting khaing: mhai: sakse pa kham: Yohan, kheu kaing pa hoik tawx Keeing: Cao: kah Aux, sonsang yuh tom: hoik, pie pa mawh kaing ceu pa yuh Aux in:, mawh pa kham: mhai: sakse son Aux grawng: pa hoik ploi: Keeing: Cao: Aux hoek heue.
Mai Keeing: Cao: pa hoik ploi: Aux hoek, hoik kham: mhai: sakse grawhgrawng: Aux. Ang pex sax mhong: lox Nawh tix bawg kawx, mai ang pex sax yaox rieng pakpeung: Nawh tix bawg kawx.
Mai gumlox Nawh ang ot kah daux pex, mawh kheu ang pex yumrhawm: kah Kaw pa ploi: Nawh hoek heue.
Pex sawg daux Phuk lai sigang: khri: kheu ce: pex tix sang pon ju leeing ju leeing phan: kah daux phuk lai an: heue, mai phuk lai an: mawh pa kham: mhai: sakse grawhgrawng: Aux.
Mai sonsang pon pex ju pa im: pex ang lai hoek kah Aux heue.
Ang Aux rieb tix teei min: plakngai: pa tawx kawn: pwi.
Viang mawh kawx nan:, Aux tawng grawng: krax moh krax rhawm: Siyiex ang koe: kah daux pex.
Aux hoek kah daux ceukaux Keeing: Aux, mai pex ang rieb tix teei Aux, phan: tang: kaux hoek kah daux ceukaux tokaux tix, pex tag sang rieb tix teei kah kaw an:.
Pex chix yumrhawm: yuh kah mawx? Pex pa sawg tix pon min: plakngai: kah paox tix, tix kaux hoik tix kaux, mai pex ang sawg tix pon min: plakngai: kah Siyiex pa koe: tix kaux khaing:.
Paw ce: Aux sang deuh phimap kah pex plak sivoe ngai: Keeing: Cao:. Pa sang deuh phimap kah pex kawn: koe: tix kaux, pa mawh Mose pa een: pex rhawm: tix kah heue.
Grawhgrawng: nawh phan: pex hoik yumrhawm: kah Mose, pex tag sang yumrhawm: kah Aux, kheu hoik tiem: nawh grawhgrawng: Aux heue.
Viang mawh kawx nan: phan: pex ang yumrhawm: kah lox ceu pa tiiem: Mose, pex tag sang chix yumrhawm: kah lox Aux yuh kah mawx?"
Tawx Pwi Phwan: Rheng: Ih Priex
Mathiex 14:13-21; Makux 6:30-44; Lukax 9:10-17
Khaix an: Yesux hu: plak toi: rawm: nhawng: Galilie:, pa mawh nhawng: Tiberix.
Mai cub pwi pa kied haoh kied hun: hawt Nawh, kheu hoik yaox kix mhai: pa daox pa am: pa yuh Nawh piang kix pa koe: jhawm: saux jhawm: ngia heue.
Mai Yesux haok hu: kah gawng tix mu:, mai ngawm tau mai kawncau Nawh khankix tan:.
Yam an: dex sang hoek bawg yam pwie Pasakha pwi Yudax.
Yesux yaog tix jhak, mai yaox cub pwi pa kied haoh kied hun: hoek kah Nawh, mai Nawh Cao: ah nin: kah Philipux, “Ex sang pon tix liag khaomun sonsang yaox pwi inkix tix ih dee mawx?”
Ceu pa ah Nawh kah Philipux in: mawh pa cheuk tix yaox nawh, kheu tokaux Nawh Cao: sang yuh kah mawx, Nawh hoik tawng.
Philipux baox pawk lox mai ah nin: kah Nawh, “Teei mau denari ra: yieh mai liag khaomun kawx, ang tau tix kub kukaux kix ku ceeix.
Kawncau Nawh tix kaux, Andare, pa mawh pux Simon Petrux ah nin: kah Nawh Cao:.
"Kawn: nyawm pa ot tin: tix kaux, koe: khaomun nghoxca pa lang: sidax phwan: lon: mai kax iak ra: mu:, viang mawh kawx nan: son pwi nie ding nie dod sang koe: bwanson: yuh kah mawx?"
Mai Yesux ah nin:, "Kieh pwi khankix ngawm heue." Kah dee an: kied haoh rib tete, mai pwi ngawm heue. Kix dex koe: phwan: rheng:.
Yesux teei khaomun an: mai yaogyaw bwanson:, mai gwieh tix tawx kah pwi pa ngawm tan: khankix, mai Nawh teei kax gwieh kah kix awm: an:, kix moh miex ding, tawx ding heue.
Mai khaix hoik ih kix tom: sak, Nawh Cao: ah nin: kah kawncau Nawh khankix, "Khrawm: pa max pa phawng:, pa haoh pa lheu: khankix, yuh kah mawx son ang sang grai: tidtix."
Mawh kheu nan: kix deeh khrawm: pa max pa phawng:, pa haoh pa lheu:, khaomun phwan: lon: an: khaix hoik ih pwi, mai deeh naog kao: phliex ra: heue.
Mawh kheu nan: yam yaox pwi mhai: pa daox pa am: pa hoik yuh Nawh Cao: kix ah nin:, “Kaw in: mawh Cao: Jhai: an: pa hoek piang haktiex tete heue.”
Yesux Hu: Ka Caong Tix Piang Rawm:
Mathiex 14:22-33; Makux 6:45-52
Mawh kheu tawng Yesux grawng: koe: kix rhawm: tix sang giex tix khin: Nawh yuh simiang Nawh tom: baox deeh lih hu: kah piang gawng nongnong: heue.
Mai yam uik hoek ponbo kawncau Nawh khankix lih hu: kah rawm: nhawng:.
Mai kix laig kah daux reu tix mu:, mai kix hu: plak veng Kapeniom. Yam an: praix hoik faik, mai Yesux ang nyang bax hoek kah kix.
Mai kheu phlu: bhaung: ting, pukpak rawm: haok hwan: heue.
Khaix hoik vai: kix reu hu: loe: pon: lag, kix yaox Yesux hu: kah caong Tix piang rawm:, mai hoek kah dex reu, mai kix die lhat kah.
Viang mawh kawx nan: Nawh Cao: ah nin: kah kix, “Mawh Aux heue, paw vi lhat kah.”
Kheu nan: kix tom: rieb tix teei Nawh laig daux reu, mai dorn: mawx dom: an:, reu hoek kah praok dee sang hu: kix heue.
Pwi Haoh Pwi Hun Sawg Kah Yesux
Singaix pasax cub pwi haoh pwi bun: cung kah toi: rawn: nhawng: plak an:, kix hoik yaox koe: reu iak tan: tix mu: khaing:, mai Yesux ang laig mai kawncau Nawh khankix yam laig kix kah daux reu an:, kawncau Nawh khankix hoik hu: nongnong: heue.
Viang mawh kawx nan: reu iak hoek khaing: veng Tiberix, mai hoek dex dee pon ih kix khaomun khaix Simiang hoik yaogyaw bwanson:.
Yam cub pwi haoh pwi hun: yaox Yesux mai kawncau Nawh khankix ang ot tan:, tokaux kix laig daux reu mai hu: tix sawg Yesux kah daux veng Kapeniom.
Yam yaox kix Nawh Cao: plak toi: rawm: nhawng:, kix ah nin: kah Nawh, "Rabi eue, Maix hoek tin: lai mawx?"
Yesux Mawh Khaomun Pa Im: Ju
Yesux baox pawk lox mai ah nin: kah kix, "Aux krai lox tete telai kah pex, pex sawg Aux kheu hoik yaox pex mhai: pa daox pa am: ang mawh, viang mawh nan: mawh kheu hoik pon pex tix ih khaomun tom: sak heue.
Paw coca: tix yuh tix pon pa ih pa un: pa chix laux chix leeing:, viang mawh kawx nan: coca: sonsang pon pa ih pa un: pa kaux tom: pon ju leeing ju leeing phan:. pa sang tawx Kawn: kawn: pwi kah pex. Kheu mawh Nawh pa Siyiex, Keeing: Cao: hoik tawk cum: kah heue."
Mawh kheu nan: kix tom: chawk Nawh ah nin:, “Ex tag lai yuh kah mawx, sonsang pon ex tix yuh kaing Siyiex ?”
Yesux baox pawk lox mai ah nin: kah kix, " Kaing Siyiex mawh pa yumrhawm: pex kah Kaw pa ploi: Nawh hoek heue."
Mawh kheu nan: kix tom: baox ah nin: kah Nawh, "Maix sang yuh ex yaox mhai: pa daox pa am: sonsang yurnrhawrn: ex kah Maix ceu patix ? Maix sang yuh kaing ceu patix ?
Tax du ex khankix hoik pon tix ih Mannax kah daux tiag daux tu, awrn: hoik tiem: tix deuh ah nin:,
‘Nawh tawx khaomun kah kix khaing: meung raoma: sonsang ih heue. "
Mawh kheu nan: Yesux baox pawk lox mai ah nin: kah kix, "Aux krai lox tete telai kah pex, ang lai mawh pa tawx Mose khaomun khaing: raoma: kah pex. Viang mawh kawx nan: mawh Keeing: Aux pa tawx khaomun pa mawh pa meh khaing: raoma: kah pex heue.
Grawhgrawng: nawh khaomun Siyiex mawh pa lih hoek khaing: Raorna:, mai tawx ju pa irn: kah haktiex heue."
Mawh kheu nan: kix tom: baox ah nin: kah Nawh Cao:, "Simiang eue, tawx khaomun an: kah ex ku bawg ku yam."
Yesux baox ah nin: kah kix, "Aux mawh khaomun pa im: ju heue, kaw pa hoek kah Aux tag ang lai cairhawm:, mai kaw pa yumrhawm: kah Aux tag ang lai sang nyaux nie rawm: tix bawg kawx heue.
Viang mawh kawx nan: Aux hoik krai kah pex grawng: pa hoik yaox pex kah Aux, viang mawh nan: ang pex yumrhawm: kah Aux heue.
Can pa tawx Keeing: Cao: kah Aux, hoek kah Aux khawrn: uik, mai kaw pa hoek kah Aux, ang Aux doh tik doh vud tix bawg kawx.
Grawhgrawng: nawh Aux lih hoek khaing: raoma: sonsang yuh alo tokaux Tix ang mawh, viang mawh nan: Aux hoek tix yuh alo Kaw pa ploi: Aux hoek beue.
Mai in: mawh alo Kaw pa ploi: Aux hoek, mawh pa ang kieh Aux yuh grai: pwi pa tawx Nawh Cao: kah Aux tix kaux kawx, viang mawh nan: kieh kix deeh kaoh singaix sidauh khaix heue.
Grawhgrawng: nawh in: mawh alo Keeing: Aux, sonsang pon pwi pa yaox kah Kawn: Cao:, mai pa yum:rhawrn: kah Nawh khankix kukaux, ju leeing ju leeing phan:. Mai Aux sang kieh kix deeh kaoh singaix sidauh khaix heue."
Yam an: pwi Yudax khankix salao kah Nawh Cao: kheu hoik ah Nawh, " Aux mawh khaomun pa lih hoek khaing: raoma:."
Mai kix ah nin:, "In: mawh Yesux kawn: Yosiep ang mawh lie? Miex keeing: Nawh ex kah tawng ang mawh lie? Nawh ah,Aux maw pa lih hoek khaing: raoma:, yuh kah mawx?"
Yesux baox pawk lox mai ah nin: kah kix, " Tix kaux hoik tix kaux paw sa paw lao kah paox tix heue.
Pwi tix kaux kawx ang pon hoek kah Aux. Phan: Keeing: Cao: pa ploi: Aux hoek ang bluh nawh hoek, mai Aux tag deeh kieh nawh kaoh singaix sidauh khaix heue.
Awrn: lox pa hoik tiem: daux Lai cao: jhai: khankix,
:Mai Siyiex tag gau kah kix khawm: uik Pwi pa hoik mhong: mai pa hoik pon gau kah Keeing: Cao: kukaux hoek kah Aux heue.
Pwi tix kaux kawx hoik yaox kah Keeing: Cao: lheu: khaing: Kaw pa kaoh khaing Siyiex ang mawh, Nawh torn: hoik yaox kah Keeing: Cao: heue.
Aux krai lox tete telai kah pex, kaw pa yumrhawm: hoik koe: ju leeing ju leeing phan:.
Aux mawh khaomun pa irn: ju heue.
Tax du pex khankix dix ih Mannax daux tiag daux tu, viang mawh nan: kix hoik yum: heue.
In: mawh khaomun pa lih hoek khaing: raoma: sonsang pon pwi tix ih kah, mai ang yum: tix bawg kawx heue.
Aux mawh khaomun pa im: ju pa lih hoek khaing: raoma:, phan: pwi ih khaomun in: nawh tag irn: leeing ju leeing phan:. Khaomun pa sang tawx Aux mawh nex Aux heue, Aux sang tawx sonsang im: ju haktiex heue.”
Kheu in: pwi Yudax khankix tix kaux hoik tix kaux thungthiang: paox tix ah nin:, "Pwi in: sang chix tawx ex ih nex Tix yuh kah mawx?"
Mawh kheu nan: Yesux tom: baox ah nin: kah kix, "Aux krai lox tete telai kah pex, phan: pex ang ih nex Kawn: kawn: pwi, mai ang nyaux nham: Nawh, pex ang koe: ju pa im: kah daux tokaux pex.
Pwi pa ih nex mai nyaux nharn: Aux, koe: ju leeing ju leeing phan:, mai Aux tag deeh kieh nawh kaoh singaix sidauh khaix heue.
Grawhgrawng: nawh nex Aux mawh ceu pa ih tete, mai nharn: Aux mawh ceu pa nyaux tete.
Pwi pa ih nex mai pa nyaux nham: Aux ot kah daux Aux, mai Aux ot kah daux nawh.
Awm: Keeing: Cao: pa im: Ju mawh pa ploi: Aux hoek, mai Aux irn: ju kheu Keeing: Cao:, awrn: an: kawx pa ih kah Aux kawx, im: ju kheu Aux heue.
Khaomun in: mawh pa lih hoek khaing: raorna:, mai ang awm: mannax pa tax du pex khankix hoik ih mai hoik yum:, kheu pwi pa ih khaomun in: tag irn: ju leeing ju leeing phan: heue."
Yam krai Nawh lox in:, mawh yam sidiex gau Nawh kah daux nyiiex sidiex veng Kapeniorn heue.
Gumlox Ju Leeing Ju Leeing Phan:
Yam mhong: kawncau Nawh khankix kah lox in:, kix pa haoh pa hun: ah nin:, "Lox in: mawh pa nu tete, pwi mawx chix nghiiet kah?"
Viang mawh kawx nan: kheu tawng Yesux kah daux tokaux Tix grawng: pa sa pa lao kawncau Nawh khankix grawhgrawng: in: Nawh tom: ah nin: kah kix, "Pex lauxrhawm: kheu lox in: lie?"
Phan: pex yaox Kawn: kawn: pwi deeh haok hu: dee hoik ot Nawh phaoka:, pex sang ce: yuh kah mawx?
Mawh khwan: pa kieh im: ju, nex ang koe: bwanson: tidtix. Lox pa hoik krai Aux kah pex mawh khwan: mai mawh ju pa im: heue.
Viang mawh kawx nan: kah daux pex koe: tiblah pa ang yumrhawm:." Mawh kheu hoik tawng Yesux tom: yam jah grawng: mawh pwi mawx pa ang lai yumrhawm:, mai kaw pa sang tik sang tawx Nawh heue.
Nawh Cao: tom: ah nin:, "Mawh kheu jao in: Aux hoik krai kah pex, pwi tix kaux kawx ang pon hoek kah Aux, phan: ang mawh Keeing: Cao: pa kieh nawh hoek."
Mawh kheu in: kawncau Nawh pa haoh pa hun: deeh tieh tix lih hu:, mai ang deeh hu: mai Nawh Cao: heue.
Mai Yesux ah nin: kah kawncau Nawh kao: kaux ra:, "Pex kawx sang lih hu: khaing: Aux lie?"
Simon Petrux pawk lox mai ah nin: kah Nawh, "Simiang eue, ex tag sang hu: kah pwi mawx? Maix koe: gumlox ju leeing ju leeing phan:.
Mai ex hoik yum:rhawrn: mai tawng grawng: mawh Maix Kaw pa Singax Singeh Siyiex heue.
Yesux baox pawk lox mai ah nin: kah kix, “Aux hoik laug tix teei pex kao: kaux ra: ang mawh lie? Viang mawh kawx nan: kah daux pex tix kaux mawh phicaox heue.”
Nawh sang ah kah Yudax Isakariut, kawn: Simon, kheu mawh nawh kaw pa sang tik sang tawx Nawh Cao:, mai nawh mawh nang: tix kaux kah daux cub kawncau kao: kaux ra: heue.
Yesux mai Pux Nawh Cao: Khankix
Khaix ceu in: khankix Yesux hu: lailing kah daux meung Galilie:. Nawh ang hu: kah daux meung Yudax, kheu pwi Yudax sawg tix pah Nawh Cao: yum: heue.
Yam an: dex hoek pwie Nyiiex Bang: pwi Yudax.
Mawh kheu nan: pux Nawh Cao: khankix ah nin: kah Nawh, "Lih hu: khaing: tin: mai hu: kah meung Yudax heue, sonsang yaox kawncau mausoi: Maix khankix kah kaing pa yuh Maix heue.
Grawhgrawng: nawh pwi tix kaux kawx, ang yuh tix ceu kawx dee glip, phan: nawh sang kieh pwi tawng tix sidawng:. Phan: Maix yuh ceu in: khankix, kieh haktiex tawng Maix sidawng: heue."
Mawh kheu pie pux Nawh khankix kawx ang yumrhawm: kah Nawh Cao: kix tom: ah nan: heue.
Mawh kheu nan: Yesux ah nin: kah kix, "Bawg yam Aux ang nyang bax hoek, viang mawh nan: bawg yam pex hoik khaw: ku bawg ku yam heue.
Pwi haktiex ang chix koeng kah pex, viang mawh kawx nan: kix koeng kah Aux, mawh kheu kham: Aux mhai: sakse grawng: pa yuh kix mawh pa caox.
Pex haok hu: kah pwie an: heue. Aux ang lai hu: kah pwie an:, kheu bawg yam Aux ang nyang bax naog."
Mai khaix hoik ah Nawh nan:, Nawh Cao: deeh ot kah daux meung Galilie: heue.
Yesux Hu: Daux Pwie Nyiiex Bang:
Viang mawh kawx nan: khaix hoik haok hu: pux Nawh khankix kah pwie an:, Nawh Cao: kawx haok hu: heue. Viang mawh nan: ang Nawh hu: sidawng:, briex mox tix hu: heue.
Mawh kheu nan: pwi Yudax khankix sawg Nawh daux pwie mai chawk ah nin:, "Ot Nawh dee mawx?"
Mai cub pwi pa ot tan: thungthiang: paox tix grawhgrawng: Nawh Cao:. Tiblah ah, "Nawh mawh pwi mhawm:," mai tang: kaux tiblah ah, "Ang Nawh mawh pwi mhawm:, viang mawh nan: Nawh thong: cub pwi haoh pwi hun: lud heue.”
Viang mawh kawx nan:, pwi tix kaux kawx ang krai grawhgrawng: Nawh dee sidawng:, kheu lhat kix kah pwi Yudax khankix heue.
Yam dex hoek bawg yam greung yuh pwie, Yesux haok hu: kah daux nyiiex bwan: mai sidiex gau heue.
Mawh kheu nan: pwi Yudax khankix daox deng: kah lox Nawh mai ah nin:, "Kaw in: ang gau lai, Nawh chix tawng lai yuh kah mawx?"
Mawh kheu nan: Yesux baox pawk lox kah kix mai ah nin:, "Lox diex lox gau Aux in: ang mawh cie Aux, viang mawh nan: mawh cie Kaw pa ploi: Aux hoek heue.
Phan: pwi tix kauxkaux koe: rhawm: tix yuh alo Nawh Cao:, nawh tag sang tawng lox diex lox gau Aux in:, mawh pa kaoh khaing: Siyiex lie, phan: ang mawh nan: mawh pa lak keud Aux tix ah lie.
Kaw pa lak keud tix krai khaing: tokaux tix, mawh pa sang sawg son min: plakngai: tokaux tix. Viang mawh kawx nan:, kaw pa sawg min: plakngai: son kaw pa ploi: nawh hoek mawh pa mawh pa meh, mai kah daux kaw an: ang koe: pa ang rah ang see tix ceu kawx heue.
Mose hoik tawx lox lai beenli kah pex ang mawh lie? Viang mawh kawx nan: ang pex hawt yuh awm: lox lai beenli an: tix kaux kawx. Pex lai sawg tix pah Aux yum: yuh kah mawx?"
Cub pwi haoh pwi hun: an: baox pawk lox mai ah nin:, "Maix koe: phicaox heue, pwi mawx sawg tix pah Maix yum:?"
Yesux baox pawk lox mai ah nin: kah kix, "Aux hoik yuh kaing tix ceu mai pex khawm: mu: khawm: miang daox deng: kah heue.
Mose hoik tawx been pa pat hak kah pex, viang mawh kawx nan: ang mawh pa kaoh khaing: Mose, mawh pa kaoh khaing: tax du pex, mai viang mawh singaix twah kawx, pex pat hak pwi heue.
Phan: sang pat hak singaix twah, son ang sang yuh laux lox lai beenli pa tawx Mose, kheu cox Aux pwi moi: singaix twah pex songrhawm: kah Aux lie?
Paw prawng paw ca: hawt grang pa yaox pex plak praix, prawng rah prawng see heue."
In: Mawh Cao: Khrit lie?
Yam an: pwi veng Yerusaliem tiblah ah nin:, "In: mawh Kaw pa sawg kix tix pah yum: ang mawh lie?
Jhak heue, Nawh krai lox dee sidawng:, mai ang kix tie ah tidtix kah Nawh heue. Khex hoik tawng simiang khankix grawng: mawh Nawh Khrit tete lie?"
Viang mawh kawx nan:, Pwi in: kaoh khaing: dee mawx ex hoik tawng. Viang mawh nan:, yam sang hoek Cao: Khrit, pwi tix kaux kawx ang tawng grawng: hoek Nawh khaing: dee mawx."
Yam sidiex gau Yesux kah daux nyiiex bwan:, Nawh kok yo mai ah nin:, "Pex tawng kah Aux, mai kaoh Aux khaing: dee mawx kawx, pex hoik tawng heue. Mai Aux hoek kheu alo tokaux Tix ang mawh, viang mawh kawx nan: Kaw pa ploi: Aux hoek mawh pa mawh pa meh heue, mai pex ang tawng kah Nawh.
Aux tawng Nawh heue, mawh kheu kaoh Aux khaing: Nawh, mai Nawh mawh pa ploi: Aux hoek heue."
Mawh kheu nan: kix sawg tix teei tix giex Nawh Cao:, viang mawh nan:, kheu ang bawg yam nari Nawh nyang bax hoek, pwi tix kaux kawx ang pon tix giex Nawh.
Viang mawh kawx nan: kah daux cub pwi haoh pwi hun: an:, pwi tom: nie yumrhawm: kah Nawh Cao: mai kix ah nin:, "Yam tag sang hoek Cao: Khrit, Nawh tag sang yuh ex yaox mhai: pa daox pa am: lheu: khaing: pa yuh Pwi in: lie?"
Ploi: Pwi Cau Hu: Giex Yesux
Yam mhong: Pharishie: lox sikah lox maw: pwi khankix grawhgrawng: Nawh, cao: giex kaing: li pa ting khankix, mai Pharishie: khankix ploi: pwicau khankix hu: tix giex Nawh.
Yam an: Yesux ah nin: kakix, "Aux baox ot tau mai pex tivud khaing:, mai Aux deeh hu: kah Kaw pa ploi: Aux hoek.
Pex tag sang sawg Aux, viang mawh nan:, ang pex lai yaox Aux, mai dee ot Aux, ang pex pon tix hoek kah.
Mawh kheu nan: pwi Yudax khankix tix kaux hoik tix kaux ah nin: kah paox tix, "Pwi in: sang hu: dee mawx, son ang ex lai pon tix yaox Nawh? Nawh sang hu: kah pwi pa hoik prungprang:hu: sinax pwi Helasax, mai sidiex gau kah pwi Helasax khankix lie?
Lox pa ah Nawh nin:,Pex tag sang sawg Aux, viang mawh nan: ang pex lai yaox Aux, mai dee ot Aux ang pex pon tix hoek kah, sang ah Nawh kah mawx?"
Rawm: Klawng: Pa Im: Ju
Singaix sidauh yuh pwie, singaix pa ting pa lhaong:, Yesux cung mai kok yo ah nin:, "Phan: pwi tix kauxkaux sang nyaux nie rawm:, kieh nawh hoek kah Aux mai nyaux heue.
Pwi pa yumrhawm: kah Aux, awm: hoik koe: kah daux Phuk lai singang: khri:,Rawm: klawng: pa im: ju tag sang lih hu: kah daux nawh heue"
Viang mawh kawx nan:, Nawh sang krai grawhgrawng: Khwan: Cao:, pa pwi pa sang yumrhawm: kah Nawh tag sang pon. Grawhgrawng: nawh yam an: ang nyang bax tawx Khwan: Cao:, kheu ang nyang bax tawx min: plakngai: Yesux heue.
Krax Pa Yaox Pwi Hun: Kah Nawh Cao: Ang Awm: Paox Tix
Mawh kheu nan: pwi daux cub pwi haoh pwi hun: tiblah yam mhong: kix lox ceu in:, kix ah nin:, "Kaw in: mawh Cao: Jhai: an: tete heue."
Tang: kaux ah nin:, "In: mawh Khrit heue," viang mawh kawx nan:, tiblah ah nin:, "Khex sang lih hoek Cao: Khrit khaing: daux meung Galilie: lie?
Hoik krai kah daux Phuk lai sigang: khri:,
grawng: sang hoek Cao: Khrit kah daux simie ceucat Davit, mai khaing: yaong: dee ot Davit, Bieliehiem, ang mawh lie?"
Mai cub pwi haoh pwi hun: an: tang: gwieh paox tix kheu Nawh heue.
Mai kix tiblah simie tix teei Nawh, viang mawh kawx nan:, tix kaux kawx ang giex Nawh.
Pwi Yudax Pa Ang Yumrhawm: Kah Gumlox Krai Nawh Khankix
Yam an: puicau khankix deeh hoek kah cao: giex kaing: li pa ting, mai kah Pharishie: khankix, mai kix chawk kah kix ah nin:, "Yuh patix pex ang viex Nawh hoek?"
Mai puicau khankix baox pawk lox mai ah nin:, "Pwi tix kaux kawx ang sax krai lox awm: Nawh tix bawg kawx."
Mai Pharishie: khankix baox pawk lox mai ah nin:, "Pex khex nghiiet lox pie lox lhen: Nawh lie?"
Simiang mai Pharishie: khankix yumrhawm: kah Nawh tix kauxkaux lie?
Viang mawh kawx nan:, cub pwi haoh pwi hun: pa ang tawng lox lai beenli khankix pon pa lawg pa jhax heue.
Nikawdimux (pa ot kah daux cub kix tix kaux, pa hoik hoek kah Yesux yam pon sawm:), ah nin:,
"Lox lai beenli ex, prawng ca: mai ciyang kah pwi, kah: sang mhong: lox nawh, mai tawng grawng: pa yuh nawh lie?"
Kix baox pawk lox mai ah nin: kah nawh, "Maix kawx mawh pwi Galilie: lie? Sawg tix yaox son tokaux tix, mai maix sang tawng cao: jhai: ang lih khaing: meung Galilie: tix kaux kawx."
Mai kix tang: ing: kah daux nyiiex pwi mawx nyiiex pwi an: heue.
Grawng: Viex Bun: Pa Phit Vao Hoek Kah Yesux
Viang mawh kawx nan:, Yesux hu: kah gawng Sanlun.
Mai yam pon ngawb caocao Nawh deeh hoek tix laig kah daux nyiiex bwan:, mai pwi khawm: uik khawm: leeing: hoek kah Nawh, mai Nawh ngawm mai gau kah kix heue.
Mai pwi tiem: lai mai Pharishie: khankix viex bun: tix kaux pa hoik yaox kix yam phit yam vao nawh, mai kieh nawh ot sinax pwi tan:.
Mai kix ah nin: kah Nawh Cao:, "Sara Cao: Gau eue, pon giex bun: in: dom: yam phit yam vao nawh heue.
Daux lai beenli Mose nhie: ex teei simaox dheem: pwi pa yuh nan: yum:. Viang mawh kawx nan:, Maix sang ah grawhgrawng: nawh yuh kah mawx?"
Kix ah nin: kheu sang cheuk kix tix yaox Nawh, mai sonsang yaox dee deuh phimap kah piang Nawh Cao: heue. Yam an: Yesux nom: mai teei gien: taix Tix tiem: piang tiex.
Viang mawh kawx nan: kheu ca: chawk kix Nawh lawlawx, Nawh cung mai ah nin: kah kix, "Kaw pa ang koe: phimap kah daux pex, kieh nawh teei simaox dheem: kah nawh kah: ha:."
Mai Nawh Cao: deeh nom: mai tiem: piang tiex.
Mai kix pa hoik mhong: lox an:, rhawm: dee chix keud chix tawng kix, deeh kieh doh kah phimap tokaux tix, mai tix kaux hoik tix kaux lih hu:, jah kah pwi riex ju lheu: khaing: paox tix, tom: sida hoek kah pwi awn: ju. Mai kix prah Yesux ot nongnong:, mai bun: an: cung sinax tan: tix kaux khaing: heue.
Yam an: Yesux yaog tix kaoh, mai ang yaox pwi tang: kaux tix kaux kawx, yaox ngie bun: an: tix kaux khaing:, mai Nawh Cao: ah nin: kah nawh, "Bun: eue, pwi pa deuh phimap piang maix ot dee mawx? Pwi tix kaux kawx ang prawng ang ciyang see: maix lie?"
Nawh baox pawk lox mai ah nin:, "Tix kaux kawx ang prawng ang ciyang, Simiang eue." Mai Yesux baox ah nin:, "Aux kah ang ciyang maix, hu: heue, mai khaix in: paw baox yuh phimap tix bawg kawx."
Yesux Mawh Pa Riieng Haktiex
Yam an: Yesux baox ah nin: kah kix tix bawg, "Aux mawh Pa riieng haktiex heue. Kaw pa hawt khaix Aux tag ang hu: kah daux pa faik, viang mawh nan: nawh tag sang pon pa riieng pa im: ju heue."
Pharishie: khankix ah nin: kah Nawh Cao:, "Maix kham: mhai: sakse grawhgrawng: tokaux Tix, mhai: sakse Maix ang mawh pa mawh pa meh heue."
Yesux baox pawk lox mai ah nin: kah kix, "Viang Aux kham: mhai: sakse grawhgrawng: tokaux Tix, mhai: sakse Aux mawh pa mawh pa meh, kheu tawng Aux dee kaoh hoek Aux, mai dee sang hu: Aux heue. Viang mawh kawx nan:, ang pex tawng dee kaoh hoek Aux mai dee sang hu: Aux.
Pex prawng ciyang hawt nex heue, Aux kienie ang prawng ang ciyang kah pwi tix kaux kawx.
Viang mawh kawx nan:, phan: Aux prawng ciyang, pa prawng pa ciyang Aux mawh pa mawh pa meh, kheu ot Aux nongnong: ang mawh, Keeing: Cao: pa ploi: Aux hoek ot tau mai Aux heue.
Mai hoik tiem: daux lai beenli pex, grawng: lox kham: mhai: sakse pwi ra: kaux mawh pa mawh pa meh.
Aux mawh Kaw pa kham: mhai: sakse grawhgrawng: tokaux Tix, mai Keeing: Cao: pa ploi: Aux hoek kham: mhai: sakse kah grawng: Aux heue."
Kheu nan: kix baox chawk Nawh Cao: ah nin:, "Keeing: Maix ot dee mawx?" Yesux baox pawk lox mai ah nin:, "Pex ang tawng kah Aux, viang kah Keeing: Aux kawx pex ang tawng. Phan: pex tawng kah Aux, Keeing: Aux kawx, pex kah sang tawng heue."
Yam sidiex gau Nawh daux nyiiex bwan:, Nawh krai lox ceu in: kah daux lawg dee deuh mau. Tix kaux kawx ang giex Nawh kheu bawg yam Nawh ang nyang bax hoek heue.
Dee Sang Hu: Aux Ang Pex Pon Tix Hoek Kah
Nawh baox ah nin: kah kix tix bawg, "Aux sang hu: heue, mai pex tag sang sawg kah Aux, mai pex tag yum: kah daux phimap tix. Dee sang hu: Aux ang pex pon tix hoek kah."
Mawh kheu nan: pwi Yudax khankix ah nin:, "Nawh sang plaux tokaux tix yum: lie? Kheu ah Nawh, Dee sang hu: Aux ang pex pon tix hoek kah"
Mai Nawh ah nin: kah kix, "Pex mawh pa kaoh khaing: plak greem:, Aux mawh pa kaoh khaing: dee long:. Pex mawh pwi haktiex in:, ang Aux mawh pwi haktiex in:.
Mawh kheu nan: Aux tom: hoik krai kah pex,Pex tag yum: kah daux phimap tix Graw grawng: nawh phan: pex ang yumrhawm: grawng: mawh Aux Kaw an:, pex tag sang yum: kah daux phimap tix heue."
Mawh kheu nan: kix baox pawk lox ah nin: kah Nawh Cao:, "Maix mawh mawx?" Yesux baox ah nin: kah kix, "Aux mawh awm: pa hoik krai kah pex tom: yam jah heue.
Aux koe: lox pa krai, pa prawng grawhgrawng: pex kied nie tete, viang mawh kawx nan:, Kaw pa ploi: Aux hoek mawh pa mawh pa meh, mai ceu pa mhong: Aux mai Nawh, Aux sidiex ceu an: khankix kah haktiex heue."
Ang kix tawng grawng: krai Nawh grawhgrawng: Keeing: Cao: kah kix.
Mawh kheu nan: Yesux ah nin: kah kix, "Khaix hoik yaog pex Kawn: kawn: pwi, yam an: pex tag sang tawng grawng: Aux mawh Kaw an:, mai grawng: pa ang Aux yuh alo tokaux Tix tix ceu kawx, viang mawh kawx nan:, Aux sidiex ngie ceu pa gau Keeing: Cao: kah Aux khankix khaing:.
Mai Kaw pa ploi: Aux hoek ot tau mai Aux, ang Nawh prah Aux ot nongnong:, kheu yuh Aux ceu pa khaw: rhawm: Nawh ku jheengjheeng: heue."
Yam krai Nawh ceu in: khankix pwi yumrhawm: kah Nawh Cao: haoh hun: heue.
Pa Mawh Pa Meh Kieh Pex Luan
Mawh kheu nan: Yesux ah nin: kah pwi Yudax pa hoik yumrhawm: kah Nawh khankix, "Phan: pex ot kah daux gumlox Aux, pex mawh kawncau mausoi: Aux tete heue.
Mai pex tag sang tawng pa mawh pa meh, mai pa mawh pa meh an: tag sang kieh pex luan."
Mai kix pawk lox kah Nawh Cao: ah nin:, "Ex mawh simie ceucat Abraham, mai ang ex sax yuh siliex yuh cawng kah pwi tix kaux kawx. Maix ah,Tag sang kieh pex luan, yuh kah mawx?"
Yesux baox pawk lox mai ah nin: kah kix, "Aux krai lox tete telai kah pex, pwi pa yuh phimap phigrham: kukaux daux pwi mawh siliex phimap heue.
Siliex kienie, pon tix ot kah daux nyiiex jheengjheeng: ang mawh. Pa mawh kawn: pon tix ot kah daux nyiiex jheengjheeng: heue.
Mawh kheu nan: phan: Kawn: Cao: kieh pex luan, pex pon luan tete.
Aux tawng pex mawh simie ceucat Abraham, viang mawh kawx nan:, pex sawg tix pah Aux yum: kheu gumlox Aux ang ot kah daux pex.
Aux sidiex ceu pa hoik yaox Aux mai Keeing: Aux khankix, viang pex kawx yuh ceu pa hoik yaox pex kah keeing: pex heue."
Kawn: Prai: Phicaox
Kix baox pawk lox mai ah nin: kah Nawh, "Abraham mawh keeing: ex." Yesux baox ah nin: kah kix, "Phan: pex mawh kawn: Abraham, pex khaw: tix yuh awm: pa yuh Abraham.
Viang mawh kawx nan:, yamin pex sawg tix pah Aux yum:, Pwi pa hoik krai pex ceu pa mawh pa meh, pa hoik mhong: Aux kah Siyiex heue. Abraham ang lai yuh nan:.
Pex yuh khaing: ceu pa yuh keeing: pex heue." Kix baox pawk lox mai ah nin: kah Nawh Cao:, "Ex ang mawh kawn: pa phit pa vao, pa nghe: ngie, Keeing: ex koe: tix kaux khaing: pa mawh Siyiex heue."
Yesux baox ah nin: kah kix, "Phan: Siyiex mawh Keeing: pex, pex tag sang moh Aux, kheu kaoh Aux khaing: Siyiex mai hoek heue. Grawhgrawng: nawh, Aux hoek kheu alo tokaux Tix ang mawh, viang mawh kawx nan: mawh Nawh Cao: pa ploi: Aux hoek heue.
Mawh kheu patix pex lai ang tawng lox Aux? Mawh kheu ang pex chix nghiiet lox Aux heue.
Pex lih hoek khaing: keeing: pex pa mawh phicaox, mai pex simie tix yuh alox keeing: pex. Tom: yam jah nawh mawh pa pah pwi yum:, mai nawh ang cung kah daux pa mawh pa meh, kheu pa mawh pa meh ang koe: kah daux nawh. Yam nawh ah lox pie lox lhen:, nawh lak ah lox tokaux tix, kheu mawh nawh pa chix pie chix lhen:, mai keeing: pa pie pa lhen: heue.
Viang mawh kawx nan:, kheu krai Aux pa mawh pa meh, pex ang yumrhawm: kah Aux.
Kah daux pex mawh mawx pa pon jhawp pon krai grawng: koe: Aux phimap? Phan: Aux krai lox pa mawh pa meh, yuh patix pex lai ang yumrhawm: kah Aux?
Kaw pa dex pa dawd mai Siyiex chix nghiiet lox Siyiex, Kheu ang pex dex dawd mai Siyiex pex ang chix nghiiet lox Nawh heue."
Yesux mai Abraham
Pwi Yudax khankix baox pawk lox mai ah nin: kah Nawh Cao:, "Pa ah ex, Maix mawh pwi Samarix, mai pa koe: phicaox, khaw:, ang mawh lie?"
Yesux baox pawk lox ah nin:, "Ang Aux koe: phicaox, viang mawh kawx nan: Aux yungyi: kah Keeing: Aux, mai pex yuh pa ang yung: ang yi: kah Aux heue.
Viang mawh nan: ang Aux sawg min: plakngai: tokaux Tix. Koe: tix kaux pa sawg min: plakngai: son Aux, pa sang prawng sang ciyang.
Aux krai lox tete telai kah pex, phan: pwi priex tix hawt lox Aux, nawh tag ang yaox krax yum: tix bawg kawx heue."
Pwi Yudax khankix baox ah nin: kah Nawh Cao:, "Yamin ex tawng Maix koe: phicaox tete, Abraham mai cao: jhai: khankix hoik yum:, mai Maix ah,Phan: pwi priex tix hawt lox Aux ang yaox tix cim krax yum: tix bawg kawx
Khex lheu: ting Maix khaing: keeing: ex Abraham pa hoik yum: lie? Mai cao: jhai: khankix kawx hoik yum:. Maix sang yuh tokaux Maix mawh mawx?"
Yesux baox pawk lox mai ah nin:, "Phan: Aux yaogyaw tokaux Tix, pa yaogyaw an: ang koe: bwanson: tidtix. Mawh Keeing: Aux pa yaogyaw Aux, Kaw pa ah pex mawh Siyiex pex heue.
Pex ang lai tawng Nawh, viang mawh kawx nan: Aux tawng Nawh, mai phan: Aux ah,ang Aux tawng Nawh, Aux tag awm: nang: pex pa mawh pwi pie pwi lhen:. Aux tawng Nawh mai priex tix hawt lox Nawh heue.
Keeing: pex Abraham gauxrhawm: kheu tag sang yaox nawh singaix Aux, nawh hoik yaox mai gauxrhawm: kah heue.
Kheu nan: pwi Yudax khankix ah nin: kah Nawh Cao:, "Pie ju Maix ang nyang bax koe: tiphwan: (50) num. mai Maix khex hoik yaox Abraham lie?"
Yesux baox ah nin: kah kix, "Aux krai lox tete telai kah pex, kah: ang Abraham nyang bax keh, Aux hoik dawg mawh heue."
Mawh kheu nan: kix tom: teei simaox sonsang dheem: Nawh kah. Viang mawh kawx nan: Yesux mox tokaux Tix, mai hu: sinax kix mai lih khaing: daux nyiiex bwan: heue.
Yesux Pai: Moi: Pwi Dug Ngai: Tom Yam Keh
Yam lawng Yesux krax Nawh yaox pwi pa dug ngai: tom: yam keh tix tix kaux.
Mai kawncau Nawh khankix chawk Nawh ah nin:, "Rabi eue, kaw in: dug ngai: kheu phimap pwi mawx? Dug kheu phimap nawh lie? Dug kheu phimap miex keeing: nawh lie?"
Yesux deeh pawk lox mai ah nin:, "Pwi in: kah ang yuh phimap, miex keeing: nawh kah ang yuh phimap, viang mawh kawx nan: sonsang sidawng: kaing Siyiex kah daux nawh, nawh tom: yuh nin: heue.
Aux tag yuh kaing: Kaw pa ploi: Aux hoek yam mawh pon singaix. Ponsawm: tag sang hoek yam ang pwi tix kaux kawx chix yuh kaing heue.
Yam ot Aux piang haktiex, Aux mawh pa riieng haktiex heue."
Khaix hoik ah Nawh nan:, Nawh baig rawmmya: piang tiex mai yuh tiex lan, mai kraix kah ngai: pwi pa dug ngai: an:.
Mai ah nin: kah nawh, "Hu: khoek kah daux rawm: dung Silawng heue." (Dee bleeh Silawng mawh ploi: hu:). Mawh kheu nan: nawh hu: khoek ngai: tix, mai ngai: nawh chix yaox yam deeh hoek nawh heue.
Mawh kheu nan: paoxplawg paoxnyhawm: nawh, mai kix pa hoik yaox nawh glangka: an: yam caung nawh tix ih, ah nin:, "Kaw in: mawh kaw pa ngawm mai caung tix ih ang mawh lie?"
Tang: kaux tiblah ah, "Mawh nawh heue." Tang: kaux tiblah ah, "Ang lai mawh nawh, mawh pwi pa awm: nawh heue." Tokaux nawh ah nin:, "Aux mawh kaw an: heue."
Mawh kheu nan: kix chawk nawh ah nin:, "Phan: mawh nan: hoik paoh ngai: maix yuh kah mawx?"
Nawh baox pawk lox ah nin:, "Pwi pa kaux Yesux Nawh yuh tiex lan mai kraix kah ngai: aux mai ah nin: kah aux,Hu: khoek kah daux rawm: dung Silawng heue, kheu nan: aux hu: khoek mai ngai: aux chix yaox heue."
Mai kix chawk nawh ah nin:, "Ot Nawh dee mawx?" Mai nawh pawk lox ah nin:, "Ang aux tawng heue."
Pharishie: Chawkcheng: Kah Pwi Dug Ngai:
Kix teei kaw pa hoik dugngai: glangka: an:, mai viex nawh hu: kah Pharishie: khankix heue.
Singaix yuh Yesux tiex lan mai cox ngai: nawh blah mawh singaix twah,
mawh kheu nan: Pharishie: khankix baox deeh chawk nawh ah nin:, "Ngai: maix pon tix chix yaox yuh kah mawx?" Mai nawh ah nin: kah kix, "Nawh kraix tiex lan kah ngai: aux, mai aux hu: khoek ngai: tix, mai aux pon tix chix yaox."
Mawh kheu nan: Pharishie: tiblah ah nin:, "Pwi an: ang mawh pa hoek khaing: Siyiex, kheu ang Nawh twah klaung: singaix twah." Viang mawh kawx nan: pwi tang: kaux ah nin:, "Pwi caox chix yuh mhai: pa daox pa am: yuh nin: yuh kah mawx?" Kheu nan: kix tix kaux hoik tix kaux tang: lox siyox moing ang khaw: paox tix.
Mawh kheu nan: kix baox deeh chawk pwi pa hoik dugngai: an: ah nin:, "Kheu cox Nawh ngai: maix blah maix sang ah kah mawx grawng: Nawh?" Mai nawh pawk lox mai ah nin:, "Nawh mawh Cao: Jhai: heue."
Viang mawh kawx nan:, pwi Yudax khankix ang yumrhawm: grawng: hoik dugngai: nawh tix bawg, mai grawng: hoik pon nawh tix chix yaox, kah: ang kix nyang bax kok miex keeing: kaw pa hoik pon tix yaox,
mai chawk kiex ah nin:, "In: mawh kawn: pax, pa ah pax,dugngai: tom: yam keh: lie? Phan: mawh nan: yamin nawh lai chix yaox yuh kah mawx?"
Miex keeing: nawh pawk lox mai ah nin:, "Yiex tawng kaw in: mawh kawn: yiex pa dugngai: tom: yam keh heue.
Viang mawh kawx nan:, mawh kheu patix nawh chix yaox yamin ang yiex tawng, mai yiex ang tawng Kaw pa cox ngai: nawh blah heue. Nawh hoik riex ju, chawk kah nawh mai nawh tag krai grawhgrawng: tokaux tix heue."
Miex keeing: nawh ah nan: kheu lhat kiex kah pwi Yudax khankix, grawhgrawng: nawh pwi Yudax khankix hoik kum: hoik kawng: paox tix yuh nin:, phan: pwi tix kauxkaux rieb tix teei Yesux mai ah Nawh mawh Cao: Khrit, tag sang grheu: nawh lih khaing: daux nyiiex sidiex heue.
Mawh kheu in: miex keeing: nawh ah, "Nawh hoik riex ju, chawk kah nawh mai nawh tag krai grawhgrawng: tokaux tix heue."
Mai kix baox kok pwi pa hoik dugngai: an: hoek ra: bawg tix bawg, mai ah nin: kah nawh, "Yaogyaw Siyiex heue, ex hoik tawng Nawh mawh Pwi phimap phigrham:."
Mawh kheu nan: pwi dugngai: an: tom: baox pawk lox mai ah nin:, "Mawh Nawh Pwi phimap phigrham: lie, Pwi mhawm: lie, ang aux tawng. Aux tawng tix ceu khaing:, glangka: in: aux dugngai:, mai yamin aux hoik chix yaox heue."
Kix baox chawk nawh ah nin:, "Nawh yuh kah mawx kah maix? Nawh cox ngai: maix blah yuh kah mawx?"
Nawh pawk lox kah kix ah nin:, "Pie yamin aux hoik krai kah pex mai pex ang nghiiet. Mawh kheu patix pex simie tix baox deeh mhong:? Viang mawh pex kawx simie tix yuh kawncau Nawh lie?"
Yam an: kix blin lox kah nawh mai ah nin:, "Maix mawh kawncau Nawh, ex kienie, mawh kawncau Mose.
Ex tawng hoik sikah Siyiex mai Mose, viang mawh kawx nan: Pwi in: kaoh khaing: dee mawx ang ex tawng."
Kaw an: baox pawk lox mai ah nin: kah kix, "Pex ang tawng Nawh kaoh khaing: dee mawx, viang mawh kawx nan: Nawh hoik cox ngai: aux blah, kheu nan: koe: dee daox deng: kah.
Ex tawng grawng: ang Siyiex nghiiet lox pwi phimap phigrham: khankix, viang mawh kawx nan: phan: pwi krub kah Siyiex mai hawt yuh alo Nawh, Nawh nghiiet lox kaw an: heue.
Tom: yam jah tix kaw: haktiex dix, ang sax mhong: tix bawg kawx, grawng: pa chix cox tix kaux kawx, kah pwi pa hoik dugngai: tom: yam keh tix kieh ngai: nawh blah tix kaux kawx heue.
Phan: Pwi in: ang mawh pa hoek khaing: Siyiex, Nawh ang tau tix chix yuh tix ceu kawx."
Kix baox pawk lox mai ah nin: kah nawh, "Maix mawh pa keh kah daux phimap phigrham:, mai maix gau kah ex lie?" Mai kix grheu: tix tik nawh khaing: nyiiex sidiex heue.
Dug Ngai: Plak Khwan:
Yesux mhong: grawng: grheu: kix tix tik nawh, mai Nawh Cao: yaox nawh mai chawk nawh ah nin:, "Yumrhawm: maix kah Kawn: Siyiex lie?"
Nawh baox pawk lox mai chawk ah nin:, "Simiang eue, sonsang yumrhawm: aux kah Nawh, Nawh mawh mawx?"
Mai Yesux baox ah nin: kah nawh, "Maix hoik yaox Nawh, mai Kaw pa sikah mai maix yamin mawh Nawh heue."
Kaw an: baox ah nin:, "Simiang eue, aux yumrhawm: heue." Mai nawh krub kah Nawh Cao:.
Mai Yesux baox ah nin:, "Aux hoek piang haktiex in: sonsang prawng sang ciyang heue, yuh kah mawh ngai: kix pa ang chix yaox khankix tag sang chix yaox, mai yuh kah mawx kix pa chix yaox khankix, tag sang dug kah heue.
Pharishie: pa ot mai Nawh khankix tiblah mhong: lox in: mai chawk ah nin:, "Viang ex kawx hoik dugngai: lie?"
Yesux baox pawk lox mai ah nin: kah kix, "Phan: ngai: pex dug tete, pex ang koe: phimap, viang mawh kawx nan: yamin pex ah,Ex chix yaox tix, kheu nan: phimap pex kawn: ca: koe: heue."
Lox Phektem: Grawng: Cao: Liang Yung:
"Aux krai lox tete telai kah pex, kaw pa ang laig daux siviex kawg yung:, mai haok laig tang: dauh mawh pwi briex pwi lak heue.
Viang mawh kawx nan:, kaw pa laig kah daux siviex mawh cao: pa liang yung: heue.
Pwi pau siviex paoh siviex son nawh, mai yung: khankix nghiiet lox nawh, mai nawh kok ceukaux yung: cie nawh mai thong: kix lih.
Khaix hoik kieh nawh yung: cie tokaux nawh lih khawm: uik nawh hu: sivoe kix, mai kheu yung: khankix tawng lox nawh kix tom: hawt nawh heue.
Viang mawh kawx nan:, kix ang hawt pwi pa ang kix tawng kix meed, kix to: hu: khaing: nawh heue, kheu ang kix tawng lox, pwi pa ang kix tawng kix meed."
Yesux krai lox phektem: in: kah kix, viang mawh kawx nan: ang kix tawng dee bleeh lox ceu pa krai Nawh kah kix heue.
Yesux Mawh Cao: Liang Yung: Pa Mhawm:
Kheu nan: Yesux baox ah nin: kah kix, "Aux krai lox tete telai kah pex, Aux mawh siviex yung: heue.
Can pwi pa hoek kah: sang hoek Aux khawm: uik mawh pwi briex mai pwi tud pwi rhim:, viang mawh kawx nan: yung: khankix ang nghiiet lox kix.
Aux mawh siviex, pwi mawh ang ah phan: nawh laig daux Aux, nawh tag hoek krax taoh, mai laig laig lih lih, mai yaox dee pon tix ih.
Pwi briex hoek ngie sonsang briex, mai pah yum:, mai yuh laux khaing:. Aux hoek sonsang pon kix pa im: ju, mai sonsang pon kix ju pa im: pa nie lheu: khaing: in: heue.
Aux mawh cao: pa liang yung: pa mhawm: heue. Cao: pa liang yung: pa mhawm: tik ju tix yum: son yung: cie nawh khankix.
Kaw pa mawh pwi cang: pwi caing, pa ang mawh cao: liang yung:, kheu yung: khankix ang mawh cie nawh, yam yaox hoek soxla nawh grham: yung: khankix mai to: heue, mai soxla kiied yung: mai kieh yung: khankix prungprang:tang: to: heue.
Nawh to: kheu mawh nawh pwi cang: pwi caing mai ang keud son yung: khankix heue.
Aux mawh cao: liang yung: pa mhawm: heue, mai Aux tawng cie Aux, mai cie Aux tawng Aux.
Awm: tawng Keeing: Cao: kah Aux, Aux tawng kah Keeing: Cao:, mai Aux tik ju tix yum: son yung: khankix heue.
Mai Aux kawn: koe: yung: pa ang neuex daux kawg yung: in:, viang mawh kix kawx Aux tag lai viex hoek, mai kix tag sang nghiiet lox Aux, mai kix tag sang lih mawh cub yung: tix cub khaing:, mai pa liang yung: tix kaux khaing:.
Keeing: Cao: moh Aux kheu tik Aux ju tokaux Tix tix yum:, sonsang baox deeh teei Aux kah tix bawg heue.
Tix kaux kawx ang teei ju Aux khaing: Aux, viang mawh kawx nan: mawh pa lak tik Aux tix yum: tokaux Tix tiru. Aux koe: siawpsibrawm tix tik tix deuh ju Aux, mai Aux koe: siawpsibrawm tix deeh teei ju Aux heue. In: mawh lox tawm: pa pon Aux khaing: Keeing: Aux heue."
Mawh kheu lox ceu inkix pwi Yudax khankix baox tang: lox siyox moing ang khaw: paox tix heue.
Kix pa haoh pa hun: ah nin:, "Nawh koe: phicaox mai yhot heue, pex lai nghiiet lox Nawh yuh kah mawx?"
Tang: kaux ah nin:, "Lox Nawh in: ang mawh lox pwi pa laig phicaox. Phicaox khex chix cox pwi dugngai: blah ngai: lie?"
Yesux Yaox Tix Kham: Pa Thiang Pwi Tix Tik Kah
Yam an: mawh yam yuh kix pwie tawx pong kah daux veng Yerusaliem,
mai yam an: mawh bawg yam kwat heue. Mai yam an: Yesux hu: lailing kah daux nyiiex bwan: piang grah Sawlamun.
Mawh kheu nan: pwi Yudax khankix hoek tix ot vungviang Nawh Cao: mai ah nin: kah Nawh, "Pa ang Maix sang kieh ex tawng grawhgrawng: Maix sidawng: tag sang koe: miex grheung:? Phan: Maix mawh Cao: Khrit krai kah ex sidawng: heue."
Yesux pawk lox ah nin: kah kix, "Aux hoik krai kah pex, mai ang pex yumrhawm: kah. Kaing pa yuh Aux kah daux ceukaux Keeing: Cao: mawh mhai: sakse grawng: Aux heue.
Viang mawh kawx nan:, awm: hoik krai Aux kah pex, pex ang yumrhawm: kheu ang pex mawh yung: Aux.
Yung: Aux nghiiet lox Aux, mai Aux tawng kah kix, mai kix hawt khaix Aux heue.
Mai Aux tawx ju leeing ju leeing phan: kah kix, mai kix ang hoek krax laux krax leeing: tix bawg kawx. Lheu: khaing: an: pwi tix kaux kawx ang pon rud tix teei kix khaing: daux tawm: taix Aux heue.
Keeing: Aux pa tawx yung: khankix kah Aux, mawh pa lheu: ting khaing: khawm: uik, mai pwi tix kaux kawx ang pon rud tix teei kix khaing: daux tawm: taix Keeing: Aux.
Yesux mai Keeing: Cao: Mawh Tix Kaux Khaing:
Aux mai Keeing: Aux mawh tix kaux khaing:."
Yam an: pwi Yudax khankix baox deeh teei simaox sonsang dheem: Nawh Cao: kah.
Yesux baox pawk lox mai ah nin: kah kix, "Aux hoik yuh pex yaox kaing pa mhawm: pa kaoh khaing: Keeing: Aux kied nie tete. Kah daux kaing pa yuh Aux khankix an:, mawh kheu grawhgrawng: kaing yuh kah mawx, pex sang teei simaox dheem: Aux kah?"
Pwi Yudax khankix baox pawk lox mai ah nin: kah Nawh Cao:, "Ex sang dheem: Maix kah simaox kheu kaing pa mhawm: ang mawh. Viang mawh kawx nan: mawh kheu salao Maix kah Siyiex, mai kheu Maix pa mawh kawn: pwi khaing:, yuh tokaux Tix mawh Siyiex heue."
Yesux baox pawk lox mai ah nin: kah kix, "Hoik tiem: kah daux Phuk lai beenli pex ah nin:, 12:Aux ah pex mawh siyiex,ang mawh lie?
Phan: Nawh Cao: kok pwi pa hoik pon lox khaing: Siyiex mawh siyiex, mai ang chix yuh laux lox phuk lai sigang: khri:,
pex sang ah grawng: Kaw pa Siyiex hoik kieh singax, mai ploi: hoek piang haktiex,Maix salao kah Siyiex, kheu hoik krai Aux,Aux mawh Kawn: Siyiex, lie?
Phan: Aux ang yuh kaing Keeing: Aux paw yumrhawm: kah Aux.
Viang mawh kawx nan:, phan: Aux yuh, viang ang pex yumrhawm: kah Aux kawx, yumrhawm: kah kaing khankix, sonsang tawng pex, mai yumrhawm: grawng: ot Keeing: Aux kah daux Aux, mai grawng: ot Aux kah daux Keeing: Cao:."
Kheu nan: kix baox deeh sawg tix giex Nawh tix bawg, viang mawh kawx nan: Nawh Cao: luan khaing: kah daux tawm: taix kix heue.
Mai Nawh Cao: baox deeh hu: plak toi: rawm: Yawdan kah dee baptis
Yohan phaoka:, mai Nawh ot tan: heue.
Mai pwi haoh pwi hun: hoek kah Nawh mai ah kix nin:, "Yohan ang yuh mhai: pa daox pa am:, viang mawh kawx nan:, lox pa krai nawh grawhgrawng: Pwi in: khawm: uik mawh pa mawh pa meh heue."
Mai kah dee an: pwi haoh pwi hun: yumrhawm: kah Nawh Cao: heue.
Grawng: Yum: Lazarux
Pwi tix kaux saux, pa mawh Lazarux pwi yaong: Betanix, dee ot Mathax mai pux nawh Marix heue.
In: mawh Marix pa hoik teei sidauh bhawng: mai kraix kah Simiang mai teei hauk kaing: tix awt kah caong Nawh Cao:. Mawh puxke: nawh Lazarux pa koe: jhawm: saux heue.
Mawh kheu nan:, nan: nawh khankiex ploi: pwi hu: kah Nawh Cao: mai ah nin:, "Jhak heue, Simiang eue, kaw pa moh Maix koe: jhawm: saux heue."
Viang mawh kawx nan: yam mhong: Yesux lox an: Nawh Cao: ah nin:, "Jhawm: saux an: ang mawh jhawm: saux tom: yum:, viang mawh nan: mawh jhawm: saux sonsang sidawng: min: plakngai: Siyiex, mai sonsang koe: min: plakngai: Kawn: Siyiex heue."
Yesux moh Mathax mai pux nawh, mai Lazarux heue.
Viang mawh kawx nan: yam hoik mhong: Nawh grawhgrawng: saux Lazarux, Nawh Cao: baox ot dee ot Tix tan: ra: singaix.
Khaix an: Nawh ah nin: kah kawncau Nawh khankix, "Ex, ex deeh hu: kah daux meung Yudax tix bawg heue."
Mai kawncau Nawh khankix ah nin: kah Nawh, "Rabi eue, pwi Yudax khankix sawg tix dheem: Maix kah simaox, tag khraox mawh yamin, mai Maix khex sang baox deeh hu: tan: tix bawg lie?"
Yesux baox pawk lox mai ah nin:, "Tix singaix koe: kao: nari ra: ang mawh lie? Pwi mawx ang ah, phan: nawh hu: yam pon singaix ang lai sideeing caong tix kheu yaox nawh pa riieng haktiex in:.
Viang mawh kawx nan:, pwi mawx ang ah, phan: hu: yam ponsawm: sideeing caong tix, mawh kheu ang pa riieng koe: kah daux nawh."
Khaix hoik ah Nawh Cao: baox ah nin: kah kix, "Paoxgrawm ex Lazarux hoik laig it, viang mawh kawx nan: Aux sang hu: so: nawh siduad khaing: pa it nawh heue."
Mawh kheu nan: kawncau Nawh khankix baox ah nin: kah Nawh Cao:, "Simiang eue, phan: nawh hoik laig it nawh tag sang vai heue."
Yesux hoik krai grawhgrawng: pa hoik yum: nawh, viang mawh nan: kawncau Nawh khankix ce: Nawh krai grawhgrawng: pa laux lee: tix it khaing:.
Mawh kheu nan: yam an: Yesux tom: krai sidawng: kah kix mai ah nin:, "Lazarux hoik yum:.
Mai Aux gauxrhawm: son pex, kheu ang Aux ot tan:, yuh kah mawx pex tag sang yumrhawm: kah Ex, ex hu: kah nawh heue."
Kheu nan: Thomax pa kok kaux Didumux. Ah nin: kah paox kawncau tix khankix, "Ex, ex kawx hu: yum: tau mai Nawh Cao: heue."
Yesux Mawh Pa Deeh Kaoh Im: Mai Ju
Yam hoek Yesux tan:, hoik sipaung: Lazarux kah daux simeeig koe: pon: singaix heue.
Yaong: Betanix dex kah veng Yerusaliem, singai paox tix dex koe: ra: lag khaing:.
Mai pwi Yudax hoek kah Mathax mai Marix haoh hun:, sonsang khu: rhawm: kiex kheu yum: puxke: kiex heue.
Mawh kheu nan: yam mhong: Mathax grawng: sang hoek Yesux, nawh hu: rieb kah Nawh Cao:, viang mawh kawx nan: Marix kawn: ngawm kah daux nyiiex heue.
Mathax ah nin: kah Yesux, "Simiang eue, phan: Maix ot tin: puxke: aux tag ang yum:.
Viang mawh nan: pie yamin kawx, aux tawng Maix rawg kah Siyiex ceu patix ang ah, Siyiex tag tawx kah Maix heue."
Yesux ah nin: kah nawh, "Puxke: maix tag baox deeh kaoh heue."
Mathax pawk lox mai ah nin: kah Nawh Cao:, "Aux tawng grawng: tag sang deeh kaoh nawh, yam deeh kaoh pwi yum: singaix sidauh sax heue."
Yesux baox ah nin: kah nawh, “Aux mawh ceu pa deeh kaoh mai pa im: ju heue. Pwi pa yumrhawm: kah Aux, viang nawh hoik yum: kawx, tag sang im: heue.
Mai pwi pa kawn im: kukaux daux pwi, pa yumrhawm: kah Aux, tag ang yum: tix bawg kawx. Yumrhawm: maix kah lox in: lie?”
Mai nawh pawk lox mai ah nin: kah Nawh Cao:, "Mawh heue, Simiang, Aux hoik yumrhawm: grawng: mawh Maix Cao: Khrit Kawn: Siyiex. Kaw pa hoek piang haktiex in: heue."
Yesux Yiiem
Khaix hoik ah nawh nan:, nawh hu: mai briex kok pux nawh Marix mai ah nin:, "Sara Cao: Gau hoik hoek, mai Nawh kok maix heue.
Mai Marix yam mhong: nawh lox an: nied tix kaoh mai hu: kah Nawh Cao: heue.
(Yam an: Yesux ang nyang hoek kah daux yaong:, viang mawh nan: Nawh kawn: ot dee hoik rieb Mathax kah Nawh.)
Pwi Yudax khankix pa ot mai Marix kah nyiiex, mai khu: rhawm: nawh, yam yaox kix Marix nied tix kaoh mai lih hu:, kix hawt khaix nawh, kheu ce: kix nawh sang hu: yiiem kah dee simeeig heue.
Mawh kheu nan: yam hoik hoek Marix kah dee ot Yesux mai yaox Nawh, nawh krub dex kah caong Nawh Cao: mai ah nin:, "Simiang eue, phan: Maix ot tin: puxke: aux tag ang yum:."
Yam yaox Yesux pa yiiem Marix mai pa yiiem pwi Yudax khankix pa hoek mai nawh, Nawh Cao: ngia daux rhawm: Tix, mai kied koe: krax khirhawm: khirhi:,
mai chawk ah nin:, "Pex deuh pex sipaung: nawh dee mawx?" Kix baox pawk lox mai ah nin: kah Nawh, "Simiang eue, hoek tix jhak heue."
Yesux yiiem heue.
Mawh kheu nan: pwi Yudax khankix ah nin:, "Jhak heue, Nawh phex moh nawh miex ding."
Viang mawh kawx nan: kix tiblah ah nin:, "Pwi in: pa hoik kieh pwi dugngai: blah ngai:, son ang Lazarux sang yum: ang Nawh chix yuh lie?"
Lazarux Deeh Kaoh Im:
Mawh kheu nan: Yesux baox deeh ngia kah daux tokaux Tix tix bawg, mai hoek kah dee simeeig pa mawh daux rang:, mai hoik thox simaox kah moing daux an:.
Yesux ah nin:, "Greed tix tik simaox an: heue." Mathax, pux kaw pa hoik yum: an: ah nin: kah Nawh Cao:, "Simiang eue, yamin nawh tee: hoik cux hoik sium:, kheu hoik yum: nawh pon: singaix heue."
Yesux ah nin: kah nawh, "Aux hoik krai maix grawng: phan: maix yumrhawm:, maix tag sang yaox kah min: plakngai: Siyiex ang mawh lie?"
Kheu nan: kix greed tix tik simaox an:, mai Yesux maong mai ah nin:, "Keeing: eue, Aux yaogyaw bwanson: Maix kheu hoik nghiiet Maix lox Aux.
Mai Aux tawng grawng: nghiiet Maix lox Aux jheengjheeng:, viang mawh kawx nan: yuh kah mawx sonsang yumrhawm: cub pwi haoh pwi hun: pa cung sivie tin:, grawng: pa ploi: Maix Aux hoek, Aux tom: ah nin:."
Mai khaix hoik ah Nawh nan:, Nawh Cao: kok lox ting lox sinum ah nin:, "Lazarux eue, lih hoek heue."
Kaw pa hoik yum: an: lih hoek. Taix caong nawh hoik pua: kah man: simeeig, mai pakngai: nawh hoik vien kah man: phaced. Yesux ah nin: kah kix, "Yah tix ploi: nawh heue."
Kumkawng: Sonsang Pah Yesux Yum:
Mathiex 26:1-5; Makux 14:1-12; Lukax 22:1-2
Mawh kheu nan: pwi Yudax haoh hun: pa hoek mai Marix pon tix yaox ceu pa yuh Nawh mai yumrhawm: kah Nawh Cao: heue.
Viang mawh kawx nan: kix tiblah hu: kah Pharishie: khankix mai krai kah kix grawhgrawng: ceu pa hoik yuh Yesux.
Mawh kheu nan: cao: giex kaing: li, mai Pharishie: khankix, khrawm: tix kum: kawng: paox tix ah nin:, "Ex sang yuh kah mawx? Kheu Pwi an: yuh mhai: pa daox pa am: kied nie tete.
Phan: ex grham: Nawh yuh nin:, pwi khawm: uik tee: yumrhawm: kah Nawh, mai pwi Romax tag sang hoek mai rud tix teei hu: dee ot ex mai khawm: pwi ex heue."
Kah daux cub kix pwi tix kaux, pa kaux Kayaphax, pa mawh cao: giex kaing: li pa ting piang paox tix khawm: uik kah daux num an:, ah nin: kah kix, "Pex ang tawng tidtix.
Mai ang pex keud grawhgrawng: pa yum: pwi tix kaux khaing: son pwi khawm: uik, yuh kah mawx son ang pwi Yudax sang lauxleeing: khawm: uik, nie lheu: mhawm: son pex heue."
Lox pa ah nawh an: ang mawh lox pa lak keud tokaux nawh tix ah, viang mawh kawx nan: kheu yuh nawh cao: giex kaing: li pa ting piang paox tix kah daux num an:, nawh tom: hoik krai lox jhai: grawng: pa tag sang yum: Yesux son pwi ceu an: heue.
Mai ang joeng mawh ngie son pwi ceu an: khaing:, viang mawh nan: mawh sonsang deeh kraix deeh khrawm: kawn: Siyiex khankix pa hoik prungprang:kudauh kudee tix kieh mawh tix mu: khaing:.
Mawh kheu nan: jah tom: singaix an: kix kum: kawng: paox tix sonsang pah Nawh Cao: yum: heue.
Mawh kheu nan: khaix an: Yesux ang lai hu: sidawng: sinax pwi Yudax, Nawh lih khaing: tan: mai hu: dee dex daux tiag, kah daux veng pa kaux Epharim, mai ot tau mai kawncau Nawh khankix tan:.
Yam an: dex hoek pwie Pasakha pwi Yudax khankix, mai pwi haoh pwi hun: lih khaing: daux yaong: daux vie dee ot kix, mai haok hu: kah veng Yerusaliem kah: sang yuh pwie Pasakha, sonsang kieh tokaux tix singax singeh heue.
Mawh kheu nan: kix tom: sawg Yesux, mai yam cung kix kah daux nyiiex bwan: tix kaux hoik tix kaux chawk kah paox tix mai ah nin:, "Pex ce: yuh kah mawx? Nawh sang hoek kah daux pwie in: lie?"
Yam an: cao: giex kaing: li pa ting khankix mai Pharishie: khankix hoik tawm: lox yuh kah mawx phan: pwi tix kauxkaux tawng dee ot Nawh Cao: nhie: kix krai, sonsang giex kix Nawh heue.
Marix Groi: Sidauh Bhawng: Ka Yesux
Mathiex 26:6-13; Makux 14:3-9;
Kah: sang yuh pwie Pasakha liah singaix Yesux deeh hoek kah yaong: Betanix, dee ot Lazarux kaw pa Yesux hoik kieh kaoh im: khaing: krax yum:.
Mawh kheu nan: kix khre: priex bo son Nawh Cao: tan:, mai Mathax khan: priex preem. Viang Lazarux kawx, mawh tix kaux kah daux pwi khankix pa ngawm neung tau mai Nawh Cao: heue.
Yam an: Marix teei sidauh bhawng: Nadu tix pawng, pa kied ngawh tete kraix kah caong Yesux, mai teei hauk kaing: nawh awt kah caong Nawh Cao:. Mai pa sioe: baux sidauh bhawng: an: naog kah daux nyiiex khawm: uik heue.
Yam an: Yudax Isakariut, pa mawh kawncau Nawh tix kaux, pa sang tik sang tawx Nawh, ah nin:,
"Yuh kah mawx ang coh sidauh bhawng: in: denari loe: yieh (300) plah mai tawx kah pwi pa hot pa sibhawm:?"
Nawh ah nan: kheu keud nawh son pwi hot pwi sibhawm: ang mawh, viang mawh nan: hoik mawh kheu mawh nawh pwi briex, mai pa viex hau: mau, mai sax teei mau pa sau: kah hau: an: heue.
Kheu nan: Yesux ah nin:, "Paw lai chuh kah nawh, kieh nawh priex sidauh bhawng: in: son singaix yam sipaung: Aux heue.
Grawhgrawng: nawh pwi hot pwi sibhawm: ot mai pex jheengjheeng:, viang mawh nan: Aux ot mai pex jheengjheeng: ang mawh."
Kumkawng: Sonsang Pah Lazarux Yum:
Mawh kheu nan: pwi Yudax pa haoh pa hun: tawng grawhgrawng: ot Yesux tan:, pa hoek kix mawh kheu Yesux khaing: ang mawh, viang mawh kawx nan: hoek kheu simie kix tix yaox Lazarux pa Nawh Cao: hoik kieh kaoh khaing: krax yum:.
Mai cao: giex kaing: li pa ting khankix, kum: kawng: paox tix grawhgrawng: sang pah khawm: Lazarux yum:.
Mawh kheu hoik mawh kheu jao nawh pwi Yudax haoh hun: lih hu: mai yumrhawm: kah Yesux heue.
Yesux Brug La Awn: Ju Laig Daux Veng Yerusaliem
Mathiex 21:1-11; Makux 11:1-11; Lukax 19:28-40
Singaix pasax pwi haoh pwi hun: pa hoik hoek kah pwie, yam mhong: kix grawh grawng: sang hoek Yesux kah veng Yerusaliem,
kix teei lhax khaox, khaox jhie: yaong:, mai hu: rieb Nawh Cao:, mai kok yo ah nin:, "Hosanna, Kaw pa hoek kah daux ceukaux Simiang ting bwanson:, pa mawh Simiang Khunhawkham Isarilax."
Mai khaix hoik yaox Yesux la awn: ju tix mu:, Nawh ngawm piang la an:, awm: pa hoik tiem: kah daux phuk lai sigang: khri: ah nin:,
"Kawn: bun: Zion eue, paw lhat, jhak heue, Simiang Khunhawkham maix ngawm kah piang kawn: la mai hoek kah maix heue."
Phaoxka: kawncau Nawh khankix ang lai tawng grawhgrawng: ceu an: khankix, viang mawh kawx nan: khaix hoik yaog min: plakngai: Yesux, yam an: kix doh keud kah pa hoik tiem: grawhgrawng: Nawh Cao:, mai grawng: pa hoik yu kix ceu an: khankix kah Nawh heue.
Pwi haoh pwi hun: pa hoik ot mai Nawh Cao: yam kok Nawh Lazarux lih khaing: daux simeeig, mai kieh nawh kaoh khaing: krax yum:, kham: mhai: sakse heue.
Hoik mawh kheu khawm: jao in: cub pwi haoh pwi hun: an: hoek tix rieb Nawh Cao:, kheu hoik mhong: kix grawhgrawng: mhai: pa daox pa am: pa yuh Nawh an: heue.
Mawh kheu nan: Pharishie: khankix tix kaux hoik tix kaux ah nin: kah paox tix, "Pex jhak heue, ang pex tie pon yuh tidtix, jhak heue, haktiex in: hoik hawt Nawh khawm: uik heue."
Pwi Helasax Khankix Sawg Kah Yesux
Kah daux pwi khankix pa haok tix krub kah daux pwie, koe: pwi Helasax tiblah,
mawh kheu nan: inkix hoek kah Philipux pa mawh pwi veng Biesedax meung Galilie: mai ah nin:, "Simiang eue, ex simie tix yaox Yesux heue."
Philipux hu: krai kah Andare, mai Andare mai Philipux hu: krai kah Yesux heue.
Yesux pawk lox mai ah nin:, "Bawg yam nari pa sang yaog min: plakngai: Kawn: kawn: pwi hoik hoek.
Aux krai lox tete telai kah pax, phan: simie nghoxca ang rau piang tiex mai ang laux kienie, ca: mawh simie nghox tix mu: khaing:, viang mawh kawx nan:, phan: laux, chix plix haoh hun:.
Kaw pa moh ju tokaux tix tag sang som ju, mai kaw pa koeng kah ju tix piang haktiex in:, tag sang priex ju son ju leeing ju leeing phan: heue.
Pwi mawh ang ah phan: nawh yuh son Aux, kieh nawh hawt khaix Aux, mai dee ot Aux viang kawncau Aux kawx tag sang pon tix ot tan: heue. Pwi mawh ang ah, phan: nawh yuh son Aux Keeing: Cao: tag yaog nawh ting heue.
Bawg yamin Aux koe: krax khirhawm: khirhi:, mai Aux tag sang ah kah mawx? Sang ah,Keeing: eue. Taoh Aux khaing: bawg yam nari in: liak, lie? Viang mawh kawx nan: pa hoik hoek Aux mawh son bawg yam nari in: heue.
Keeing: eue, kieh yaogyaw ceukaux Maix heue." Yam an: lox lih khaing: raoma: mai ah nin:, "Aux hoik yaogyaw kah, mai Aux tag sang baox deeh yaogyaw kah tix bawg heue."
Pwi haoh pwi hun: pa cung dex tan: mhong: lox an: mai ah nin:, "Sinum praix heue." Tang: kaux khankix ah nin:, "Mawh kawncau Siyiex pa sikah mai Nawh."
Yesux Krai Grawng: Pa Sang Kham: Geu: Nawh Tix Yum:
Yesux pawk lox mai ah nin:, "Lox an: hoek son Aux ang mawh, viang mawh nan: hoek son pex heue.
Bawg yamin hoik hoek bawg yam pa sang prawng sang ciyang haktiex, bawg yamin tag sang grheu: simiang haktiex in: lih heue.
Mai phan: yaog Aux khaing: haktiex in:, Aux tag sang bluh pwi khawm: uik hoek kah tokaux Tix heue."
Viang mawh kawx nan: pa ah Nawh nan:, Nawh Cao: jhi: grawng: sang yum: Nawh yuh kah mawx heue.
Pwi haoh pwi hun: khankix tom: baox pawk lox mai ah nin: kah Nawh Cao:, "Ex mhong: khaing: daux lai beenli grawhgrawng: Cao: Khrit tag sang ot jheengjheeng:. Phan: mawh nan:, yuh kah mawx Maix lai ahtag sang yaog Kawn: kawn: pwi?: Kawn: kawn: pwi mawh mawx?"
Mawh kheu nan: Yesux pawk lox mai ah nin: kah kix, "Pa riieng kawn: ot mai pex tivud khaing:. Pex hu: yam kawn: koe: pa riieng awawx. Phan: ang mawh nan: ha pa faik kox krup pex heue. Grawhgrawng: nawh kaw pa hu: kah daux pa faik ang nawh tawng dee hu: tokaux tix.
Pwi Pa ang Yumrhawm: Khankix
Yam kawn: koe: pex pa riieng, yumrhawm: kah pa riieng heue, sonsang lih mawh pex kawn: pa riieng heue." Khaix hoik ah Yesux ceu an:, Nawh lih hu: mai mox tokaux Tix khaing: kix heue.
Viang Nawh hoik yuh mhai: pa daox pa am: nie ding nie dod plak sivoe kix, viang mawh nan: ang kix yumrhawm: kah Nawh Cao:.
Kheu nan: lox pa krai cao: jhai: Isayax pa ah nawh nin: hoik naog, "Simiang eue, pwi mawx hoik yumrhawm: kah lox diex lox gau ex? Mai taix Simiang hoik plak jhi: kah pwi mawx?"
Hoik mawh kheu jao inkix tom: ang pon tix yumrhawm: kah, mawh kheu Isayax hoik baox deeh krai ah nin:,
Nawh hoik kieh ngai: kix ang chix yaox, mai hoik yuh rhawm: kix kiien:, son ang ngai: kix chix yaox, mai son ang rhawm: kix chix tawng, mai son ang kix deeh tieh tix hoek, sonsang cox Aux tix kieh kix moi:."
Isayax ah lox in: mawh kheu hoik yaox nawh min: plakngai: Nawh Cao:, mai nawh tom: hoik krai grawhgrawng: Nawh.
Viang mawh kawx nan: pie simiang khankix kawx haoh hun: yumrhawm: kah Nawh, viang mawh nan: kheu lhat kix Pharishie: khankix, grheu: kix lih khaing: daux nyiiex sidiex, ang kix kieh sidawng grawng pa rieb kix kah Nawh Cao:.
Mawh kheu moh kix min: plakngai: pa tawx kawn: pwi nie lheu: khaing: min: plakngai: pa tawx Siyiex heue.
Prawng Ca: Kheu Gumlox Yesux
Mai Yesux kok yo mai ah nin:, "Pwi pa yumrhawm: kah Aux, yumrhawm: kah Aux khaing: ang mawh, yumrhawm: kah Kaw pa ploi: Aux hoek heue.
Mai pwi pa yaox kah Aux, yaox kah Kaw pa ploi: Aux hoek heue.
Aux mawh pa riieng pa hoek piang haktiex, yuh kah mawx pwi pa yumrhawm: kah Aux kukaux daux pwi tag ang lai sang ot kah daux pa faik heue.
Mai pwi mawx ang ah, phan: mhong: lox Aux khankix, mai ang priex tix hawt kah, Aux ang prawng ang ciyang kah nawh, mawh kheu hoek Aux tix ciyang haktiex ang mawh, viang mawh nan: hoek sonsang taoh haktiex in: heue.
Pwi pa tik kah Aux mai pa ang rieb tix teei lox diex lox gau Aux, Kaw pa sang prawng sang ciyang kah nawh hoik koe: tix kaux. Gumlox pa krai Aux in: mawh pa tag sang prawng sang ciyang kah nawh singaix sidauh sax.
Mawh kheu lox pa krai Aux, ang mawh lox pa kaoh khaing: tokaux Tix. Viang mawh nan: Keeing: Cao: pa ploi: Aux hoek, tawm: lox kah Aux grawng: ceu pa sang krai sang sidiex Aux heue.
Mai Aux tawng grawng: lox pa tawm: Nawh mawh ju leeing ju leeing phan:. mawh kheu nan: ceu pa krai pa sidiex Aux, mawh lox tawm: jhawm: krai Keeing: Cao: kah Aux heue."
Yesux Khoek Kah Caong Kawncau Tix Khankix
Kah: sang yuh pwie Pasakha Yesux tawng nari bawg yam tag sang lih hu: Nawh khaing: haktiex mai hu: kah Keeing: Cao: hoik hoek. Mawh kheu moh Nawh cie Nawh pa ot piang haktiex in:, Nawh moh tom: sidauh heue.
Mai yam ih kix priex bo, kheu phi: caox hoik sau: pa keud pa sawn: kah daux rhawm: Yudax Isakariut, pa mawh kawn: Simon, sonsang tik sang tawx nawh Cao: Yesux,
Yesux hoik tawng grawhgrawng: Keeing: Cao: hoik tawx khawm: uik kah daux tawm: taix Nawh, mai grawng: hoik lih hoek Nawh khaing: Siyiex, mai grawng: tag sang deeh hu: kah Siyiex.
Nawh Cao: kaoh khaing: pheen: mai peeik kraung ceep Nawh mai teei. Man: phaced nhawt kah nyoi tokaux Tix.
Khaix an: Nawh teei rawm: prauk sau: kah daux klong: ting mai jah tix khoek caong kawncau Nawh khankix, mai awt caong kix kah phaced pa hoik nhawt Nawh kah nyoi Tix heue.
Yam hoek Nawh kah Simon Petrux, Petrux ah nin: kah Nawh Cao:, "Simiang eue, Maix khex sang khoek caong aux lie?"
Yesux baox pawk lox mai ah nin: kah nawh, "Grawhgrawng: pa yuh Aux ang maix nyang tawng yamin, viang mawh kawx nan: maix koi tawng khaix in: sax."
Petrux baox ah nin: kah Nawh Cao:, "Ang aux doh kieh Maix khoek caong tix tix bawg kawx." Yesux baox pawk lox mai ah nin: kah nawh, "Phan: Aux ang khoek maix ang maix dex dawd mai Aux heue."
Simon Petrux baox ah nin: kah Nawh Cao:, "Simiang eue, ang joeng mawh ngie caong aux khaing:, viang khawm: taix khawm: kaing: aux kawx khoek kah liak."
Yesux baox ah nin: kah nawh, "Kaw pa hoik heem: tix lo ngie pa khoek caong nawh khaing:, mai nawh hoik singax khawm: kaux tix khawm: uik. Pex hoik singax, viang mawh nan: pex singax khawm: uik ang mawh."
Mawh kheu hoik tawng Nawh kaw pa sang tik sang tawx Nawh, mawh kheu nan: Nawh tom: ah, "Pex singax khawm: uik ang mawh."
Khaix hoik khoek Nawh caong kix mai hoik deeh ceep kraung Tix, Nawh Cao: deeh ngawm neung mai ah nin: kah kix, "Pex tawng grawhgrawng: pa hoik yuh Aux kah pex lie?
Pex kok Aux mawh,Sara Cao: Gau, maiSimiang, pa ah pex caw tix, kheu mawh Aux nan: heue.
Phan: Aux pa mawh Simiang mai Sara Cao: Gau hoik khoek caong pex, viang pex kawx khaw: tix khoek caong kah paox tix tix kaux hoik tix kaux heue.
Grawhgrawng: nawh, Aux hoik tawx pex rieng dee sang hawt jawh, yuh kah mawx sonsang hawt yuh pex awm: pa hoik yuh Aux kah pex heue.
Aux krai lox tete telai kah pex, siliex ang lheu: ting khaing: simiang nawh, mai kaw pa hu: ang lheu: ting khaing: cao: pa ploi: nawh hu:.
Phan: pex tawng ceu in: khankix, phan: pex hawt yuh, pex ting bwanson: heue.
Ang Aux krai grawhgrawng: pex khawm: uik. Aux tawng pwi pa hoik laug Aux heue, viang mawh kawx nan: yuh kah mawx sonsang naog lox Phuk lai singang: khri: pa ah nin:,
:Kaw pa ih khaomun Aux, yaog loek caong tix tiied kah Aux heue
Jah tom: yamin khaix in: Aux sang gruh krai kah pex grawhgrawng: ceu pa tag sang hoek tix mawh, kah: ang nyang bax mawh, yuh kah mawx yam lih mawh ceu an:, pex tag sang yumrhawm: grawng: mawh Aux Kaw an: heue.
Aux krai lox tete telai kah pex, kaw pa rieb tix teei pwi pa ploi: Aux hu:, rieb tix teei Aux heue, mai kaw pa rieb tix teei Aux, rieb tix teei kah Kaw pa ploi: Aux hoek heue."
Gruh Krai Pa Sang Kham: Krax Pa Tik Pa Tawx
Mathiex 26:20 -25; Makux 14:17-21; Lukax 22:21-23
Khaix hoik krai Yesux ceu an:, Nawh koe: krax khirhawm: khirhi: daux khwan: Tix mai kham: mhai: sakse ah nin:, "Aux krai lox tete telai kah pex, kah daux pex tix kaux tag sang tik sang tawx Aux heue."
Kawncau Nawh khankix tix kaux hoik tix kaux jhak kah paox tix mai keud jee keud blaong grawhgrawng: sang ah Nawh kah pwi mawx.
Kah dex pheen: tan: kawncau daux kawncau Nawh tix kaux, neung kah piang naok Yesux, pa moh Yesux kah.
Mawh kheu nan: Simon Petrux yib taix kah nawh mai ah nin:, "Krai ex mhong: liak, Nawh sang ah grawhgrawng: pwi mawx?"
Nawh deeh neung piang naok Yesux mai chawk Nawh ah nin:, "Simiang eue, mawh pwi mawx?"
Yesux tom: baox pawk lox ah nin:, "Mawh kaw pa sang teei Aux khaomun tix bliah, mai tawx kah nawh, khaix cub Aux daux klong: heue." Mawh kheu nan: Nawh Cao: teei khaomun tix bliah mai khaix hoik cub, Nawh tawx kah Yudax Isakariut kawn: Simon.
Mai khaix hoik teei nawh khaomun an:, Satan laig kah daux nawh, mai Yesux ah nin: kah nawh, "Ceu pa sang yuh maix, nied tix yuh laung laung heue."
Yam an: pwi pa ot kah pheen: ang tawng tix kaux kawx Nawh sang ah nin: kah nawh kheu ceu patix.
Tiblah ce: kheu priex Yudax hau: mau, yam ah Yesux nan:, Nawh Cao: nhie: nawh, "Hu: liag ceu pa lo ex son pwie." Phan: ang mawh nan:, kieh nawh tawx tix ceu ceu kah pwi hot pwi sibhawm: heue.
Khaix hoik teei Yudax khaomun an:, nawh lih hu: dom: mawx dom: an:. Bawg yam an: mawh yam ponsawm:.
Lox Tawm: Pingnyap Pa Khraox
Khaix hoik lih hu: nawh, Yesux ah nin:, “Yamin hoik kieh Kawn: kawn: pwi koe: min: plakngai:, mai hoik kieh Siyiex koe: min: plakngai: kah daux Nawh heue.
Phan: Siyiex koe: min: plakngai: kah daux Nawh, Siyiex tag kieh Nawh koe: min: plakngai: kah daux tokau: Tix, mai Nawh tag sang kieh Nawh koe: min: plakngai: yamin heue.
Kawn: nyawm Aux eue, Aux kawn: ot mai pex tivud khaing:. Pex tag sang sawg Aux, mai awm: hoik krai Aux kah pwi Yudax khankix,Dee sang hu: Aux pex ang pon tix hoek kah, Aux tom: krai kah pex yamin heue.
Aux tawx gumlox pingnyap pa khraox kah pex, yuh kah mawx sonsang moh pex paox tix tix kaux hoik tix kaux, awm: hoik moh Aux kah pex, yuh kah mawx sonsang moh pex paox tix tix kaux hoik tix kaux heue.
Phan: pex tix kaux hoik tix kaux moh paox tix, pwi khawm: uik tag tawng pex mawh kawncau Aux, kheu grawng: an: heue.”
Yesux Gruh Krai Grawng: Pa Sang Thiang Petrux Tix Tik Kah Nawh Cao:
Mathiex 26:31-35; Makux 14:27-31; Lukax 22:31-34
Simon Petrux baox chawk Nawh Cao: ah nin:, "Simiang eue, Maix sang hu: dee mawx?" Yesux pawk lox mai ah nin:, "Dee sang hu: Aux maix ang pon tix hawt Aux yamin, viang mawh kawx nan: maix tag sang pon tix hawt Aux khaix in: heue."
Petrux baox chawk ah nin: kah Nawh Cao:, "Simiang eue, mawh kheu patix ang aux pon tix hawt Maix yamin? Aux koe: rhawm: tix sang tik sang deuh ju tix yum: son Maix heue."
Yesux baox pawk lox mai ah nin:, "Maix koe: rhawm: tix sang tik sang deuh ju tix yum: son Aux lie? Aux krai lox tete telai kah maix, kah: ang iya: nyang ux, maix tag sang thiang: tix tik tix vud Aux loe: bawg heue."
Yesux Mawh Daux Krax Pa Hoek Kah Keeing: Cao:
"Paw kieh rhawm: pex koe: krax khirhawm: khirhi:, yumrhawm: kah Siyiex, kah Aux kawx yumrhawm: heue.
Daux nyiiex Keeing: Aux koe: lawg haoh hun:, phan: ang mawh nan: Aux tag hoik krai kah pex, mawh kheu sang hu: cox Aux dee ot son pex.
Mai phan: Aux hu: cox dee ot son pex, Aux tag deeh hoek mai teei pex hu: son sang ot tau mai Aux, yuh kah mawx viang pex kawx sang pon tix ot dee ot Aux heue.
Mai pex tawng krax pa hu: dee sang hu: Aux."
Thomax baox ah nin: kah Nawh Cao:, "Simiang eue, ang ex tawng dee sang hu: Maix, ex khex chix tawng krax yuh kah mawx?"
Yesux baox pawk lox mai ah nin: kah nawh, "Aux mawh daux krax, mai pa mawh pa meh, mai ju heue. Phan: ang mawh daux Aux pwi tix kaux kawx ang pon tix hoek kah Keeing: Cao:.
Phan: pex hoik tawng kah Aux, viang mawh Keeing: Aux kawx pex tag tawng heue. Jah tom: yamin pex tawng Nawh, mai hoik yaox kah Nawh Cao:."
Philipux ah nin: kah Nawh, "Simiang eue, jhi: ex yaox Keeing: Cao: liak, sonsang fahrhawm: ex kah."
Yesux baox ah nin: kah nawh, "Philipux eue, Aux hoik ot mai pex nie grheung: nie grhaoh, mai maix khex ang tawng Aux lie? Pwi pa hoik yaox kah Aux, hoik yaox kah Keeing: Cao:, yuh kah mawx maix lai ah,Jhi: ex yaox Keeing: Cao:?:
Ang maix yumrhawm: grawhgrawng: ot Aux kah daux Keeing: Cao:, mai Keeing: Cao: ot kah daux Aux lie? Gumlox pa krai Aux khankix ang lai mawh lox pa kaoh khaing: tokaux Tix. Viang mawh kawx nan:, Keeing: Cao: ot kah daux Aux mai yuh kaing Nawh khankix heue.
Yumrhawm: kah grawhgrawng: ot Aux kah daux Keeing: Cao:, mai grawng: pa ot Keeing: Cao: kah daux Aux. Phan: ang mawh nan: yumrhawm: kah Aux kheu sipie kaing khankix heue.
Aux krai lox tete telai kah pex, kaw pa yumrhawm: kah Aux tag sang yuh kaing pa yuh Aux, mai nawh tag sang yuh kaing pa nie lheu: ting khaing: inkix, kheu sang hu: Aux kah Keeing: Cao: heue.
Mai pex sang rawg sang mhaing: ceu patix ang ah, kah daux ceukaux Aux, Aux tag sang yuh heue, yuh kah mawx sonsang koe: min: plakngai: Keeing: Cao:, kah daux Kawn: Cao: heue.
Phan: pex rawg pex mhaing: tix ceu ceu kah daux ceukaux Aux, Aux tag sang yuh heue.
Phan: pex moh kah Aux, pex tag sang priex tix hawt lox pa tawm: Aux khankix heue.
Lox Sijax Mukheu Pa Sang Ploi Khwan: Singax Singeh Hoek
Mai Aux tag sang rawg sang mhaing: kah Keeing: Cao:, mai Nawh tag sang tawx Cao: Teem: kah pex tang: kaux, sonsang ot Nawh mai pex leeing ju leeing phan:,
pa mawh Khwan: pa dex mai pa mawh pa meh heue. Kheu haktiex ang tawng ang yaox Nawh, tom: ang pon tix rieb tix teei Nawh. Viang mawh nan: pex tawng Nawh, kheu ot Nawh mai pex, mai tag sang ot kah daux pex heue.
Ang Aux lai prah tix kieh pex mawh kawn: doe:, Aux tag sang deeh hoek kah pex heue.
Khaix in: ang rheung: haktiex in: ang lai pon tix yaox Aux, viang mawh kawx nan: pex tag yaox Aux, kheu im: ju Aux, pex kawx tag sang im: ju heue.
Kah daux singaix an:, pex tag sang tawng grawng: pa ot Aux kah daux Keeing: Aux, mai grawng: pa ot pex kah daux Aux, mai grawng: pa ot Aux kah daux pex heue.
Kaw pa koe: lox tawm: Aux khankix, mai priex tix hawt, mawh kaw pa moh kah Aux, mai kaw pa moh kah Aux, Keeing: Aux tag moh kah nawh, mai Aux kah moh nawh, mai plak jhi: tokaux Aux kah nawh heue."
Yudax, (Pa ang mawh Yudax Isakariut) chawk mai ah nin: kah Nawh Cao:, "Simiang eue, Maix tag sang plak jhi: ex yaox tokaux Maix, mai ang jhi: haktiex yaox yuh kah mawx?"
Yesux pawk lox mai ah nin: kah nawh, "Phan: pwi moh kah Aux nawh tag sang priex tix hawt gumlox Aux, mai Keeing: Aux tag moh kah kaw an:, mai Yiex tag hoek kah nawh, mai ot tau mai nawh heue.
Kaw pa ang moh kah Aux ang priex tix hawt gumlox Aux khankix, mai gumlox pa mhong: pex ang mawh lox Aux, viang mawh nan: mawh lox Keeing: Cao: pa ploi: Aux hoek heue.
Aux hoik krai lox ceu in: khankix kah pex, yam kawn: ot Aux tau mai pex.
Viang mawh kawx nan:, Cao: Teem: pex, pa mawh Khwan: Singax Singeh, pa Keeing: Cao: tag ploi: hoek kah daux ceukaux Aux, Nawh tag sang gau pex kuceu khawm: uik, mai kieh pex doh keud kah lox pa hoik krai Aux kah pex khawm: uik heue.
Aux deuh pa nhim: mai pex, pa nhim: Aux, Aux tawx kah pex. Pa tawx Aux kah pex ang awm: pa tawx haktiex. Paw kieh rhawm: pex koe: krax khirhawm: khirhi:, viang krax lhat krax graung kawx paw kieh koe: awawx.
Pex hoik mhong: lox pa hoik krai Aux kah pex, viang lih hu: Aux yamin, Aux tag sang deeh hoek kah pex heue. Phan: pex moh Aux, pex sang gauxrhawm: kheu hu: Aux kah Keeing: Cao:, grawhgrawng: nawh Keeing: Cao: nie lheu: ting khaing: Aux heue.
Mai yamin Aux hoik gruh krai kah: sang hoek nawh tix mawh, yuh kah mawx sonsang yumrhawm: pex yam tag hoek ceu an: tix mawh heue.
Khaix in: Aux tag ang lai baox sikah mai pex tom: nie, kheu simiang haktiex sang hoek. Viang hoek kawx ang nawh koe: tidtix kah daux Aux.
Viang mawh kawx nan: sonsang tawng haktiex grawng: pa moh Aux kah Keeing: Cao:, mai grawng: yuh Aux awm: lox tawm: jhawm: krai Keeing: Cao: heue. Kaoh ex lih hu: khaing: tin: heue."
Yesux Mawh Nhu: Plix Siiet Pas Mawh Pa Meh
"Aux mawh nhu: plix siiet pa mawh pa meh, mai Keeing: Aux mawh cao: pa pau sipeem.
Kak pa ang plix plix ku kak, Nawh kid tix tik, mai kak pa plix plix ku kak sonsang nie chix plix plix khaing: in:, Nawh cox pawt mhawmmhawm: heue.
Yamin pex hoik singax, kheu lox pa hoik krai Aux kah pex.
Ot kah daux Aux, mai Aux ot kah daux pex. Awm: kak ang chix plix plix nongnong: phan: nawh ang ot kah daux nhu: miex, awm: an: phan: pex ang ot kah daux Aux, pex ang chix plix plix.
Aux mawh nhu: plix siiet, mai pex mawh kak khankix heue. Kaw pa ot kah daux Aux mai Aux ot kah daux nawh, chix plix plix haoh hun:. Grawhgrawng: nawh phan: pex tang: tiah kaing: Aux, pex ang chix yuh tidtix heue.
Phan: pwi ang ot kah daux Aux, teei tix tik nawh awm: kak mai kroh hu: heue, mai pwi khrawm: kak khankix mai taing daux ngu mai gleeing kix heue.
Phan: pex ot kah daux Aux, mai gumlox Aux ot kah daux pex, pex simie tix rawg ceu patix ang ah, rawg heue, mai tag sang yuh son pex.
Keeing: Aux koe: min: plakngai:, kheu pa plix pex plix haoh hun:, mai pex tag mawh kawncau Aux heue.
Awm: hoik moh Keeing: Cao: kah Aux, viang Aux kawx hoik moh kah pex heue. Pex ot kah daux pa moh Aux awawx.
Phan: pex priex tix hawt lox pa tawm: Aux khankix, pex tag ot kah daux pa moh Aux heue. Awm: Aux kawx hoik priex tix hawt lox tawm: Keeing: Cao: khankix, mai ot kah daux pa moh Nawh heue.
Aux hoik krai lox ceu in: khankix kah pex, yuh kah mawx sonsang ot pa gauxrhawm: Aux kah daux pex, mai sonsang naog krax gauxrhawm: pex heue.
In: mawh lox pa tawm: Aux, pex tix kaux hoik tix kaux moh paox tix, awm: pa hoik moh Aux kah pex heue.
Krax moh pa lheu: ting khaing: pa deuh pwi ju tix yum: son paoxgrawm tix khankix ang koe:.
Phan: pex hawt yuh ceu pa hoik tawm: Aux kah pex, pex mawh paoxgrawm Aux khankix heue.
Ang Aux lai baox kok pex mawh siliex, kheu ang siliex tawng pa yuh simiang tix. Viang mawh nan: Aux hoik kok pex mawh paoxgrawm, kheu hoik kieh Aux pex tawng can ceu pa hoik mhong: Aux khaing: Keeing: Cao: khawm: uik.
Pex laug tix teei Aux ang mawh, viang mawh nan: Aux hoik laug tix teei pex, mai hoik ciak tix deuh pex, yuh kah mawx sonsang hu: plix pex plix, mai sonsang kaux cong: plix pex heue. Yuh kah mawx pex sang rawg ceu patix ang ah, kah Keeing: Cao: kah daux ceukaux Aux, Nawh sang tawx kah pex.
Aux hoik tawm: ceu in: khankix kah pex, yuh kah mawx sonsang moh pex paox tix tix kaux hoik tix kaux heue.
Pa Koeng Haktiex Kah
Phan: haktiex in: koeng kah pex. Pex tawng grawhgrawng: haktiex hoik koeng kah Aux, kah: sang koeng kah pex heue.
Phan: pex dex dawd mai haktiex, haktiex tag moh cie nawh, viang mawh nan: kheu ang pex dex dawd mai haktiex, mai kheu hoik laug Aux tix teei pex lih khaing: haktiex, haktiex tom: koeng kah pex heue.
Doh keud kah lox pa hoik krai Aux kah pex,Siliex ang lheu: ting khaing: simiang nawh Phan: kix hoik tuktiaktukte: kah Aux, viang pex kawx, kix tag sang tuktiaktukte: kah heue. Phan: kix hoik priex tix hawt gumlox Aux, viang lox pex kawx kix tag sang priex tix hawt heue.
Viang mawh nan: kix tag sang yuh ceu in: khawm: uik kah pex, kheu ceukaux Aux, in: mawh kheu ang kix tawng kah Kaw pa ploi: Aux hoek heue.
Phan: Aux ang hoek, mai ang sidiex ang gau kah kix, kix ang koe: phimap, viang mawh nan: yamin ang kix koe: dee duh grawhgrawng: phimap kix heue.
Pwi pa koeng kah Aux, viang kah Keeing: Aux kawx, kix koeng kah heue.
Phan: Aux ang yuh kaing pa ang pwi tang: kaux sax yuh, kah sinax kix, kix ang lai koe: phimap. Viang mawh kawx nan: yamin kix hoik yaox, mai hoik koeng kah Aux mai khawm: kah Keeing: Aux heue.
Viang mawh nan: sonsang naog gumlox pa hoik tiem: kah daux lai beenli kix pa ah nin: :Ang koe: grawhgrawng: tidtix mai kix koeng kah Aux heue.
Viang mawh kawx nan: yam hoik hoek Cao: Teem: pa sang ploi: Aux hoek khaing: Keeing: Cao: kah pex, pa mawh Khwan: pa mawh pa meh, pa lih hoek khaing: Keeing: Cao:, Nawh tag sang kham: mhai: sakse grawhgrawng: Aux.
Mai pex kawx tag sang kham: mhai: sakse, mawh kheu hoik ot pex tau mai Aux tom: yam jah heue.
"Yuh kah mawx son ang pex sang lauxrhawm:, Aux tom: hoik krai lox ceu in: khankix kah pex heue.
Kix tag sang grheu: tix tik pex lih khaing: daux nyiiex sidiex khankix, mawh heue, bawg yam nari tag sang hoek yam pwi mawx ang ah, pa pah pex yum:, sang ce: tix yuh kaing krub kah son Siyiex.
Mai kix tag yuh ceu in: khankix kheu ang kix lai tawng kah Keeing: Cao:, mai khawm: kah Aux.
Kaing Pa Yuh Khwan: Singax Singeh
Mai Aux hoik krai grawhgrawng: ceu in: khankix kah pex, yuh kah mawx yam hoek bawg yam nari pa sang lih mawh khankix pex tag sang doh keud kah pa hoik krai Aux grawhgrawng: khankix. Ang Aux krai ceu in: khankix kah pex tom: yam jah, kheu ot Aux tau mai pex heue.
Viang mawh kawx nan: yamin Aux sang hu: kah Kaw pa hoik ploi: Aux hoek, mai pex tix kaux kawx ang chawk Aux,Maix sang hu: dee mawx?:
Viang mawh kawx nan: kheu hoik krai Aux grawhgrawng: ceu in: khankix kah pex, rhawm pex naog pa khirhawm: khirhi: heue.
Viang mawh kawx nan: Aux krai lox pa mawh pa meh kah pex, pa hu: Aux mhawm: son pex heue. Grawhgrawng: nawh phan: Aux ang hu: Cao: Teem: ang lai hoek kah pex, viang mawh nan: phan: Aux hu: Aux sang ploi: Nawh hoek kah pex heue.
Mai Nawh, yam hoik hoek Nawh tag sang plak jhi: haktiex yaox kah phimap, mai pa rah pa see, mai pa ciyang.
Mawh kheu ang kix yumrhawm: kah Aux, Nawh sang plak jhi: yaox grawhgrawng: phimap heue.
Mawh kheu hu: Aux kah Keeing: Cao:, mai kheu ang pex lai baox yaox Aux khaix in:, Nawh tag sang plak jhi yaox grawhgrawng: pa rah pa see heue.
Mawh kheu hoik prawng hoik ciyang kah simiang haktiex in:, Nawh tag sang plak jhi: yaox grawhgrawng: pa ciyang heue.
Aux kawn: koe: lox ceu pa sang krai kah pex tom: nie ceu, viang mawh kawx nan: ang pex pon kham: pon geu: yamin.
Viang mawh nan: yam Nawh, pa mawh Khwan: pa mawh pa meh hoik hoek, Nawh tag sang thong: pex kah daux pa mawh pa meh khawm: uik heue. Mawh kheu ang Nawh sang krai lox khaing: tokaux Tix, viang mawh kawx nan: Nawh tag sang krai can ceu pa mhong: Nawh, mai Nawh tag sang krai kah pex grawhgrawng: ceu pa tag sang hoek khaix in: heue.
Nawh tag sang kieh Aux koe: min: plakngai:, kheu tag sang teei Nawh cie Aux mai krai kah pex heue.
Can ceu pa koe: Keeing: Cao: khawm: uik mawh cie Aux, mawh kheu nan: Aux tom: hoik krai kah pex,Nawh tag sang teei cie Aux mai krai kah pex heue
Pa Lauxrhawm: mai Pa Gauxrhawm:
Khaix in: rheung: tivud khaing: pex ang lai yaox Aux, mai khaix in: rheung: tivud khaing: pex tag sang baox deeh yaox Aux tix bawg."
Mawh kheu nan: kawncau Nawh tiblah tix kaux hoik tix kaux ah nin: kah paox tix, "Pa ah Nawh,Khaix in: rheung: tivud khaing: pex ang lai yaox Aux, mai khaix in: rheung: tivud khaing: pex tag sang baox deeh yaox Aux tix bawg, mai pa ah nin:,Mawh kheu hu: Aux kah Keeing: Cao:, sang ah kah mawx?"
Mawh kheu nan: kix baox ah nin:, "Pa ah Nawh,Khaix in: rheung: tivud khaing:, Nawh sang ah kah mawx? Ang ex tawng lox pa krai Nawh heue."
Yesux tawng grawhgrawng: pa simie kix tix chawk lox kah Nawh, mai Nawh Cao: ah nin: kah kix, "Pex tix kaux hoik tix kaux chawk kah paox tix grawhgrawng: lox pa krai Aux pa ah nin:,Khaix in: rheung: tivud khaing: pex ang lai yaox Aux, mai khaix in: rheung: tivud khaing: pex tag sang baox deeh yaox Aux tix bawg, lie?
Aux krai lox tete telai kah pex, pex tag sang yiiem grai mai yiiem riag yiiem yo heue, viang mawh kawx nan: haktiex in: tag sang gauxrhawm: gauxrhi:, pex kienie tag sang khirhawm: khirhi:, viang mawh nan: pa khirhawm: pex tag sang puk pliak tix mawh pa gauxrhawm: heue.
Yam saux yha: bun:, nawh koe: pa khirhawm: khirhi:, kheu bawg yam nari nawh hoik hoek. Viang mawh kawx nan: khaix hoik keh kawn:, nawh gauxrhawm: kheu hoik keh pwi tix kaux piang: haktiex, mai ang nawh lai doh keud kah pa kham: pa geu: nawh khaix.
Awm: an: pex koe: pa khirhawm: khirhi: yamin, viang mawh nan: Aux tag sang deeh yaox pex tix bawg, mai rhawm: pex tag sang gauxrhawm: gauxrhi: heue, mai krax gauxrhawm: pex tix kaux kawx ang pon rud pon teei khaing: pex.
Mai kah daux singaix an: pex tag ang chawk Aux lox tix ceu kawx. Aux krai lox tete telai kah pex, pex rawg ceu patix ang ah kah daux ceukaux Aux kah Keeing: Cao:, Nawh tag tawx kah pex heue.
Tom: yamin ang pex sax rawg tix ceu kawx kah daux ceukaux Aux. Yuh kah mawx krax gauxrhawm: pex sang naog, rawg heue, mai pex tag pon.
Yesux Hoik Pex Kah Haktiex
"Aux hoik krai ceu in: khankix kah daux lox phektem:, viang mawh kawx nan: bawg yam tag sang hoek yam Aux tag ang teei lox phektem: tix krai kah pex, viang mawh nan: yam an: Aux tag teei lox sidawng: krai grawhgrawng: Keeing: Cao: kah pex heue.
Kah daux singaix an: pex tag sang rawg bwan: kah daux ceukaux Aux, mai Aux ang krai kah pex, Aux sang rawg kah Keeing: Cao: son pex,
kheu tokaux Keeing: Cao: moh kah pex, mawh kheu moh pex kah Aux, mai hoik yumrhawm: grawng: pa lih hoek Aux khaing: Keeing: Cao: heue.
Aux lih hoek khaing: Keeing: Cao: mai hoik hoek piang haktiex in:, mai Aux sang baox deeh lih khaing: haktiex mai hu: kah Keeing: Cao: heue."
Kawncau Nawh khankix ah nin: kah Nawh, "Yamin Maix ang krai lox phektem:, Maix krai lox pa sidawng:.
Yamin ex hoik tawng grawng: tawng Maix kuceu khawm: uik, mai Maix ang lo pwi pa chawk kah Maix kuceu khawm: uik, mai Maix ang lo pwi pa chawk kah Maix tix kaux kawx, kheu in: ex yumrhawm: grawng: lih hoek Maix khaing: Siyiex heue."
Yesux baox pawk lox mai ah nin: kah kix, "Yamin pex hoik yumrhawm: lie?
Jhak heue, bawg yam nari tag sang hoek, mawh heue, pie yamin kawx hoik hoek, yam pex tag sang prungprang:hu: dee ot pwi mawx dee ot pwi an:, mai sang prah Aux ot nongnong:. Viang mawh kawx nan: Aux ot nongnong: ang mawh, kheu Keeing: Cao: ot tau mai Aux heue.
Aux hoik krai lox ceu in: khankix kah pex, yuh kah mawx sonsang koe: pex pa nhim: kah daux Aux, kah piang haktiex in: pex tag yaox krax kharhawm: kharhi:, viang mawh kawx nan: kieh koe: rhawm: cong: heue, Aux hoik pex kah haktiex in: heue."
Yesux Rawg Bwan: Son Kawncau Tix Khankix
Khaix hoik ah Yesux ceu an: khankix Nawh maong tix jhak plak raoma:, mai ah nin:, "Keeing: eue, bawg yam nari hoik hoek, kieh Kawn: Maix koe: min: plakngai: liak, yuh kah mawx son Kawn: Cao: sang kieh Maix koe: min: plakngai: heue.
Awm: hoik tawx Maix siawpsibrawm kah Nawh piang ceu pwi khawm: uik, yuh kah mawx Nawh sang tawx ju leeing ju leeing phan:, kah can pwi pa hoik tawx Maix kah Nawh khawm: uik heue.
Mai in: mawh ju leeing ju leeing phan:, yuh kah mawx sonsang tawng kix kah Maix, pa mawh Siyiex pa mawh pa meh tix kaux khaing:, mai Yesux Khrit pa hoik ploi: Maix hoek kah.
Aux hoik kieh Maix koe: min: plakngai: piang haktiex in:. Aux hoik yuh kaing pa tawx Maix kah Aux son pa yuh tom: hoik.
Mai Keeing: eue, yamin kieh Aux koe: min: plakngai: mai tokaux Maix, awm: pa hoik koe: Aux mai Maix kah: sang koe: haktiex dix heue.
Aux hoik plak jhi: ceukaux Maix kah pwi pa hoik tawx Maix kah Aux khaing: haktiex. Kix hoik mawh cie Maix, mai Maix hoik tawx kix kah Aux, mai kix priex tix hawt gumlox Maix heue.
Yamin kix hoik tawng grawng: can ceu pa tawx Maix kah Aux khawm: uik, mawh pa hoek khaing: Maix.
Kheu gumlox pa hoik tawx Maix kah Aux, Aux hoik tawx kah kix, mai kix hoik rieb tix teei kah khankix, mai kix hoik tawng grawhgrawng: pa hoik lih hoek Aux khaing: Maix: tete, mai kix yumrhawm: grawhgrawng: pa hoik ploi: Maix Aux hoek heue.
Aux rawg bwan: kah son kix, ang Aux rawg bwan: kah son haktiex, viang mawh kawx nan:, Aux rawg bwan: kah son pa hoik tawx Maix kah Aux khankix, kheu kix mawh cie Maix.
Mai cie Aux khawm: uik mawh cie Maix, mai cie Maix mawh cie Aux, mai Aux koe: min: plakngai: kheu kix heue.
Mai yamin ang Aux lai deeh ot kah piang haktiex in:, viang mawh kawx nan: kix kawn: ot piang haktiex in:, mai Aux sang deeh hoek kah Maix. Keeing: pa singax eue, priex kix pa hoik tawx Maix kah Aux kah daux ceukaux Maix liak, yuh kah mawx sonsang mawh kix tix kaux khaing: awm: mawh Ax tix kaux khaing: heue.
Yam ot Aux mai kix piang haktiex in:, Aux priex kix kah daux ceukaux Maix, pwi pa hoik tawx Maix kah Aux khankix Aux hoik kia: hoik pau, mai tix kaux kawx ang laux ang leeing:, lheu: khaing: kaw pa mawh kawn: pa laux pa leeing:, sonsang naog lox pa koe: kah daux Phuk lai sigang: khri: heue.
Mai yamin Aux tag sang hoek kah Maix, mai Aux krai ceu in: khankix yam kawn: ot Aux kah piang haktiex in:, yuh kah mawx sonsang koe: kix pa gauxrhawm: Aux tom: naog kah daux tokaux kix heue.
Aux hoik tawx gumlox Maix kah kix, mai haktiex koeng kah kix, kheu kix ang dex ang dawd mai haktiex, awm: ang Aux lai dex dawd mai haktiex heue.
Ang Aux lai rawg sonsang teei Maix kix lih khaing: haktiex, viang mawh kawx nan: rawg sonsang priex Maix kix khaing: pa caox heue.
Kix ang dex ang dawd mai haktiex, awm: ang Aux lai dex dawd mai haktiex.
Kieh kix singax kah daux pa mawh pa meh Maix. Gumlox Maix mawh pa mawh pa meh heue.
Awm: hoik ploi: Maix Aux hoek kah piang haktiex in:, viang Aux kawx hoik ploi: kix hu: kah piang haktiex heue.
Mai Aux kieh tokaux Tix singax son kix, yuh kah mawx tokaux kix kawx tag sang singax kah daux pa mawh pa meh heue.
Ang Aux lai rawg bwan: kah son kix khaing:, viang mawh nan: rawg khawm: son pwi khankix pa tag sang yumrhawm: kah Aux kheu gumlox kix heue.
Yuh kah mawx kix khawm: uik tag sang mawh tix kaux, Keeing: Cao: eue, awm: ot Maix kah daux Aux, mai Aux ot kah daux Maix, yuh kah mawx kix kawx tag sang ot kah daux Ax, mai sonsang yumrhawm: haktiex grawng: pa hoik ploi: Maix Aux hoek heue.
Mai min: plakngai: pa hoik tawx Maix kah Aux, Aux hoik tawx kah kix, yuh kah mawx sonsang mawh kix tix kaux khaing:, awm: mawh Ax tix kaux khaing:.
Aux ot kah daux kix, mai Maix ot kah daux Aux, yuh kah mawx sonsang grum lih mawh kix tix kaux, mai sonsang tawng haktiex grawng: mawh Maix pa ploi: Aux hoek, mai grawhgrawng: hoik moh Maix kah kix, awm: hoik moh Maix kah Aux heue.
Keeing: eue, Aux simie tix kieh kix pa hoik tawx Maix kah Aux, ot tau mai Aux kah dee ot Aux, yuh kah mawx sonsang yaox kix min: plakngai: Aux, pa hoik tawx Maix kah Aux, mawh kheu hoik moh Maix kah Aux kah: sang jah tix kaw: num: haktiex heue.
O Keeing: pa rah pa see, haktiex in: ang lai tawng kah Maix, viang mawh nan: Aux hoik tawng kah Maix, mai inkix tawng grawng: pa hoik ploi: Maix Aux hoek heue.
Mai Aux hoik kieh kix tawng kah ceukaux Maix, mai Aux tag sang baox kieh kix tawng heue, yuh kah mawx krax moh pa hoik moh Maix kah Aux, tag sang ot kah daux kix, mai sonsang ot Aux kah daux kix heue."
Pa Ap mai Giex Yesux
Mathiex 26:47-56; Makux 14:43-50; Lukax 22:47-53
Khaix hoik ah Yesux lox ceu an: khankix, Nawh lih hu: tau mai kawncau Nawh khankix kah plak toi: rawm: klawng: Kedron, dee koe: sipeem tix dauh, mai Nawh Cao: mai kawncau Nawh khankix laig tan: heue.
Mai Yudax kaw pa sang tik sang tawx Nawh Cao: kawx, tawng dee an:, kheu Yesux hoik hu: tan: tau mai kawncau Nawh khankix lawlawx heue.
Mawh kheu in: Yudax viex pwi naing mai puicau cao: giex kaing: li pa ting khankix, mai Pharishie: khankix, viex ngu proh mai kawkngu mai kraung naing mai hoek tan:.
Mawh kheu hoik tawng Yesux grawng: ceu pa tag sang hoek kah piang Nawh khawm: uik, Nawh Cao: tom: hu: mai chawk kah kix ah nin:, "Sawg pex pwi mawx?"
Kix deeh pawk lox kah Nawh Cao: mai ah nin:, "Sawg Yesux pwi veng Nazariet." Yesux baox ah nin: kah kix, "Aux mawh Nawh heue." Mai Yudax kaw pa sang tik sang tawx Nawh Cao: kawx, cung tau mai kix heue.
Yam krai Yesux kah kix, "Aux mawh Nawh heue," kix deeh yawn: plak khaix mai goh piang tiex heue.
Mawh kheu nan: Nawh Cao: baox deeh chawk kah kix, "Sawg pex pwi mawx?" Mai kix ah nin:, "Sawg kah Yesux pwi veng Nazariet heue."
Yesux baox pawk lox mai ah nin:, "Aux hoik krai kah pex grawng: mawh Aux Nawh, mawh kheu nan: phan: pex sawg Aux, kieh pwi in: khankix hu: dee hu: kix heue."
(Yuh kah mawx lox pa hoik ah Nawh nin:, "Pwi pa hoik tawx Maix kah Aux khankix, Aux ang kieh laux kieh leeing: tix kaux kawx," tag naog heue).
Yam an: Simon Petrux kheu koe: nawh vaig tix kre: lawd vaig an:, mai kid tix tik yhaok khawn: dawm: siliex cao: giex kaing: li pa ting piang khawm: uik. (Ceukaux siliex an: mawh Malakhux).
Mawh kheu nan: Yesux ah nin: kah Petrux, "Teei vaig maix deeh sau: kah daux phak tix. Kawk pa hoik tawx Keeing: Cao: kah Aux, Aux tag ang lai nyaux kah lie?"
Grawng: Viex Yesux Hu: Sivoe Annax
Yam an: cao: giex kaing: naing mai pwi naing nawh, mai puicau pwi Yudax khankix giex Yesux mai phyawk Nawh Cao: heue.
Mai kix tok Nawh hu: kah: sivoe kah Annax, kheu mawh nawh paox Kayaphax, cao: giex kaing: li pa ting piang paox tix daux num an:.
Kayaphax mawh kaw pa hoik gau lox kah pwi Yudax khankix, grawhgrawng: pa yum: pwi tix kaux son pwi khankix mawh pa mhawm: son kix heue.
Grawng: Pa Thiang: Petrux Tix Tik Kah Yesux
Mathiex 26:69-70; Makux 14:66-68; Lukax 22:55-57
Simon Petrux mai kawncau tang: kaux tix kaux hawt hu: khaix Yesux heue. Kawncau an: mawh pa tawng cao: giex kaing: li pa ting, mai laig tau mai Yesux kah daux nyiiex haw: cao: giex kaing: li pa ting an:.
Petrux kienie, cung dex siviex plak praix. Mawh kheu nan: kawncau tang: kaux an:, pa tawng cao: giex kaing: li pa ting an: kah, hu: sikah mai bun: pa pau siviex an:, mai viex Petrux laig heue.
Yam an: bun: pa pau siviex ah nin: kah Petrux, "Maix kawx mawh kawncau Pwi an: tix kaux lie?" Nawh deeh ah nin:, "Aux ang mawh."
Yam an: siliex mai puicau khankix hoik phlu: gaoxngu mai cung tan:. Kheu kwat yam an:, kix cung tix co ngu, mai Petrux kawx cung tau mai kix mai co ngu heue.
Grawng: Chawkcheng: Cao: Giex Kaing: Li Pa Ting Kah Yesux
Mathiex 26:59-66; Makux 14:55-64; Lukax 22:66-71
Yam an: cao: giex kaing: li pa ting an: chawk kah Yesux grawhgrawng: kawncau mausoi: Nawh khankix, mai grawhgrawng: pa sidiex pa gau Nawh.
Yesux baox pawk lox kah nawh mai ah nin:, "Aux hoik krai sidawng: kah haktiex khawm: uik. Aux hoik sidiex hoik gau daux nyiiex dee sidiex khankix mai daux nyiiex bwan:, mai dee khrawk khrawm: pwi Yudax khankix paox tix jheengjheeng:, mai ang Aux mox tix sidiex dee glip tix ceu kawx.
Maix lai chawk kah Aux yuh kah mawx? Chawk kah kix pa hoik mhong: kah Aux, grawng: pa hoik krai Aux patix kah kix. Jhak heue, khankix tawng grawng: ceu pa hoik krai Aux khankix heue."
Mai yam hoik ah Nawh Cao: lox an:, puicau pa cung tan: tix kaux teei taix tix simang: Yesux kah, mai ah nin:, "Maix khex pawk lox kah cao: giex kaing: li pa ting yuh nan: lie?"
Yesux pawk lox mai ah nin:, "Phan: Aux hoik ah pa caox pa ang khaw:, tawx mhai: sakse grawhgrawng: pa caox pa ang khaw: an:, viang mawh kawx nan: phan: Aux hoik krai ceu pa mhawm:, yuh patix maix lai simang: Aux?"
Mawh kheu nan: Annax ploi: Yesux hu: awm: pa hoik phyawk Nawh kah Kayaphax, pa mawh cao: giex kaing: li pa ting piang paox tix heue.
Petrux Baox Thiang: Tix Tik Kah Yesux
26:71-75; Makux 14:69-72; Lukax 22:58-62
Yam an: Simon Petrux cung tan: mai co ngu. Mawh kheu nan: kix ah nin: kah nawh, "Maix kawx mawh kawncau Nawh tix kaux lie?" Nawh thiang: mai ah nin:, "Aux ang mawh."
Siliex cao: giex kaing: li pa ting, pa mawh paox ceu kaw pa hoik kid Petrux tix tik yhaok tix kaux ah nin:, "Aux hoik yaox maix ot tau mai Yesux kah daux sipeem ang mawh lie?"
Petrux baox deeh thiang: tix bawg, mai ia: ux dom: mawx dom: an: heue.
Grawng: Pa Tawx Yesux Kah Simiang Pilat
Mathiex 27:1-2, 11-14; Makux 15:1-5; Lukax 23:1-5
Pon ngawb caocao kix viex Yesux lih khaing: Kayaphax mai tok Nawh hu: kah daux nyiiex haw:. Viang mawh kawx nan: tokaux kix ang laig kah daux nyiiex haw:, sonsang luan kix khaing: pa seeing: pa brai:, mai pon tix ih pwie Pasakha heue.
Mawh kheu nan: simiang Pilat lih hu: kah kix mai chawk ah nin:, "Pex deuh phimap ceu patix kah Pwi in:?"
Kix baox pawk lox mai ah nin: kah nawh, "Phan: Pwi in: ang mawh Pwi pa yuh pa caox, ang ex lai viex tix tawx Nawh kah maix."
Mawh kheu nan: simiang Pilat baox ah nin: kah kix, "Pex teei Nawh mai prawng ca: Nawh awm: pa khaw: mai beenli pex." Pwi Yudax khankix baox ah nin: kah nawh, "Ang ex koe: akhwang: tix pah pwi yum: tix kaux kawx."
(Yuh kah mawx sonsang naog lox pa hoik gruh krai Yesux grawhgrawng: sang yum: Nawh, kah krax yum: pa yuh kah mawh heue).
Mawh kheu nan: simiang Pilat deeh laig kah daux nyiiex haw:, mai kok Yesux mai chawk ah nin: kah Nawh Cao:, "Maix mawh Simiang Khunhawkham Pwi Yudax lie?"
Yesux baox pawk lox mai ah nin:, "Lox in: mawh lox pa lak keud maix tix ah lie, phan: ang mawh nan: mawh pa pwi tang: kaux hoik krai kah maix grawng: Aux lie?"
Simiang Pilat baox pawk lox mai ah nin:, "Aux mawh pwi Yudax lie? Pwi ceu Maix, mai cao: giex kaing: li pa ting khankix, hoik tawx Maix kah aux. Maix hoik yuh ceu patix?"
Yesux baox pawk lox ah nin:, "Meung Aux ang dex ang dawd mai haktiex in:, phan: meung Aux dex dawd mai haktiex in:, kawncau Aux tag sang yuh naing son ang sang kieh tawx Aux kah daux tawm: taix pwi Yudax, viang mawh nan: meung Aux ang dex ang dawd mai pa yuh nin:."
Mawh kheu nan: simiang Pilat chawk ah nin: kah Nawh Cao:, “Phan: mawh nan: Maix mawh Simiang Khunhawkham lie?" Yesux baox pawk lox mai ah nin: kah nawh, "Awm: pa ah maix, Aux mawh simiang khunhawkham heue, Mawh kheu in: Aux tom: keh, mai mawh kheu in: Aux hoek piang haktiex in:, yuh kah mawx sonsang kham: Aux mhai: sakse grawhgrawng: pa mawh pa meh. Pa dex pa dawd mai pa mawh pa meh kukaux daux pwi nghiiet lox Aux heue."
Tawx Lox Sonsang Pah Yesux Yum:
Mathiex 27:15-31; Makux 15:6-20; Lukax 23:13-25
Simiang Pilat baox chawk ah nin: kah Nawh Cao:, "Pa mawh pa meh mawh patix?" Mai khaix hoik ah nawh nin:, nawh deeh lih hu: kah pwi Yudax khankix tix bawg mai ah nin: kah kix, "Aux ang yaox pa phit pa lud kah Kaw in: tix ceu kawx.
Viang mawh nan:, pex koe: been, pa kieh aux ploi: pwi tix kaux kah pex yam yuh pwie Pasakha, mawh kheu nan: pex sang kieh aux ploi: Simiang Khunhawkham Pwi Yudax kah pex lie?"
Yam an: kix khawm: uik baox kok tix bawg mai ah nin:, "Ang sang kieh ploi: Pwi in:, ploi: kah Barabax heue." Barabax mawh pwi tud pwi rhim: heue.
Khaix an: simiang Pilat teei Yesux mai kieh sivied Nawh.
Mai pwi naing khankix taing: mhok kat lawm mai sau: kah piang kaing: Nawh Cao:, mai teei kraung ceep raoh klai mai ceep kah Nawh.
Mai kix hoek kah Nawh Cao: mai ah nin:, "Simiang Khunhawkham Pwi Yudax eue, kieh nyawm ot heue." Mai kix teei taix tix simang: Nawh kah.
Mai simiang Pilat deeh lih hu: tix bawg mai ah nin: kah pwi khankix, "Jhak heue, aux viex Nawh lih kah pex, yuh kah mawx sonsang tawng pex grawng: pa ang aux yaox dee phit dee lud kah daux Nawh tix ceu kawx."
Mawh kheu nan: Yesux ceep mhok kat lawm mai ceep kraung ceep raoh klai mai lih hoek heue. Mai simiang Pilat ah nin: kah kix, "Jhak kah Pwi in: heue."
Yam cao: giex kaing: li pa ting khankix mai puicau kix khankix yaox Nawh Cao: kix kok yo ah nin:, "Tawk Nawh piang khaoxlhak heue. Tawk Nawh piang khaoxlhak heue." Simiang Pilat ah nin: kah kix, "Tokaux pex teei Nawh mai tawk Nawh piang khaoxlhak heue, kheu ang aux yaox deeh phit deeh lud Nawh tix ceu kawx heue."
Pwi Yudax khankix baox pawk lox mai ah nin: kah nawh, "Ex koe: beenli mai phan: hawt beenli ex Nawh khaw: tix yum: kheu Nawh yuh tokaux Tix mawh Kawn: Siyiiex heue."
Mawh kheu nan: yam mhong: simiang Pilat lox an:, nawh baox nie lhat kah.
Mai nawh deeh laig daux nyiiex haw:, mai chawk Yesux ah nin:, "Maix kaoh khaing: dee mawx?" Viang mawh kawx nan: Yesux ang pawk lox tix gum kawx heue.
Yam an: simiang Pilat baox ah nin: kah Nawh Cao:, "Ang Maix sikah mai aux lie? Maix ang tawng grawng: pa koe: aux siawpsibrawm tix ploi: Maix, mai siawpsibrawm tix tawk Maix piang khaoxlhak lie?"
Yesux baox pawk lox mai ah nin: kah nawh, "Maix ang tau tix koe: siawpsibrawm tix yuh tix ceu kawx kah Aux, phan: ang tawx kah maix khaing: dee long:. Mawh kheu nan: kaw pa teei tix tawx Aux kah maix nie lheu: ting phimap heue."
Jah tom: yam an: simiang Pilat sawg tix ploi: Nawh Cao:, viang mawh kawx nan: pwi Yudax khankix kok yo mai ah nin:, "Phan: maix ploi: Pwi in:, maix ang lai mawh paox pie simiang Kesa. Can pwi kukaux pa yuh tokaux tix mawh simiang khunhawkham mawh pwi pa koeng kah simiang ting Kesa heue."
Mawh kheu nan: yam hoik mhong: simiang Pilat lox ceu an: kix, nawh viex Yesux lih, mai kieh Nawh ngawm dee ngawm cao: prawng see:, dee kok mawh Dee Tawm Simaox, (Lox Hebrie kok mawh Kabathax).
Singaix an: mawh singaix khre: kix son pwie Pasakha, mai dex hoek
liah nari. Mai simiang Pilat ah nin: kah pwi Yudax khankix, "Jhak Simiang Khunhawkham pex heue."
Mawh kheu nan: kix tom: kok yo mai ah nin:, "Teei tix tik Nawh. Teei tix tik Nawh. Tawk Nawh piang khaoxlhak heue." Simiang Pilat baox ah nin: kah kix, "Aux tag sang teei tix tawk Simiang Khunhawkham pex piang khaoxlhak lie?" Cao: giex kaing: li pa ting khankix pawk lox mai ah nin:, "Ang ex lai koe: simiang khunhawkham lheu: khaing: simiang Kesa tix kaux kawx heue."
Yam an: simiang Pilat tawx Yesux kah kix, sonsang tawk Nawh piang khaoxlhak. Mai kix teei Yesux mai tok Nawh hu: heue.
Grawng: Tawk Yesux Kah Piang Khaoxlhak
Mathiex 27:32-44; Makux 15::21-32; Lukax 23::26-43
Mai Nawh Cao: klawm: khaoxlhak tokau: Tix hu: dee kok mawh Dee Siang: Kaing:. Daux lox Hebrie kok mawh Gawlagawthax heue.
Kix tawk Nawh Cao: piang khaoxlhak kah dee an:, mai tang: kaux ra: kaux kawx kix tawk tau mai Nawh Cao:, tix kaux tix plak, mai Yesux ot kah sinax heue.
Mai simiang Pilat tiem: tix deuh lai kah piang khaoxlhak Nawh Cao: pa ah nin:, YESUX PWI VENG NAZARIET, SIMIANG KHUNHAWKHAM PWI YUDAX."
Lai an: pwi Yudax haoh hun: phat tix yaox heue, mawh kheu dee tawk kix Yesux piang khaoxlhak dex kah veng, mai lai pa tiiem: an: mawh daux lox Hebrie, mai lox Romax, mai lox Helasax heue.
Mawh kheu nan: cao: giex kaing: li pwi Yudax pa ting khankix hu: kah simiang Pilat mai ah nin:, "Paw tiem: lai pa ah,Simiang Khunhawkham Pwi Yudax, viang mawh nan: tiem: lox pa ah nin:,Nawh ah, Aux mawh Simiang Khunhawkham Pwi Yudax"
Simiang Pilat baox pawk lox mai ah nin:, "Pa hoik tiem: aux, aux hoik tiem:."
Mawh kheu nan: khaix hoik tawk pwi naing khankix Yesux kah piang khaoxlhak, kix teei kraung ceep Nawh mai gwieh pon: son, son pwi naing tix kaux tix son, sibex kawx kix teei heue. Sibex an: ang koe: khaix caing, mawh pa hoik taing: jah tom: plak piang tom: dee hoik.
Mawh kheu nan: kix tix kaux hoik tix kaux ah nin: kah paox tix, "Ex paw riah sibex in:, ex nieb tix yaox pwi mawx sang pon." In: mawh sonsang naog gumlox Phuk lai sigang: khri: pa ah nin:, "Kix gwieh tix teei kraung ceep Aux, mai nieb tix yaox mai teei sibex Aux." Kheu nan: pwi naing khankix tom: yuh ceu an:.
Yam an: miex Nawh Cao: mai pux o: miex Nawh Cao:, mai Marix moeng Kalawphax, mai Marix Magadalax khankix cung dex kah khaoxlhak Cao: Yesux heue.
Mawh kheu nan: yam yaox Yesux miex Nawh mai kawncau pa moh Nawh cung dex tan:, Nawh Cao: ah nin: kah miex Nawh, "Bun: eue, jhak kah kawn: maix heue."
Khaix an: Nawh Cao: baox ah nin: kah kawncau an:, "Jhak kah miex maix heue." Mai jah tom: yam an: kawncau an: teei miex Nawh Cao: ot mai tix kah daux nyiiex nawh heue.
Grawng: Yum: Yesux
Mathiex 27:45-56; Makux 15:33-41,
Lukax 23:44-49
Khaix an: kheu tawng Yesux grawng: pa hoik hoik kuceu, yuh kah mawx sonsang naog gumlox Phuk lai sigang: khri:, Nawh Cao: ah nin:, "Aux sang nyaux nie rawm:."
Kah dee an: koe: aw: pa naog rawm: sidauh nie tix mu:, mai kix teei tix ceu pa awm: tih , pa koe: daux rawm: sigrit sigra: mai cub kah daux rawm: sidauh nie, mai sau: kah toh kak khaox Hesop , mai yaog tix sau: kah jheeh Nawh Cao:.
Mawh kheu nan: khaix hoik ih Yesux rawm: sidauh nie, Nawh Cao: ah nin:, "Hoik hoik khawm: uik." Mai Nawh nom: kaing: Tix, mai deeh tawx Khwan: Tix heue.
Suat Paw: Yesux Kah Pliah
Singaix an: mawh Singaix Khre:, mai yuh kah mawx son ang sang koe: tokaux yum: khankix kah piang khaoxlhak singaix twah, (mawh kheu singaix twah an: mawh pa ting pa lhaong:), pwi Yudax khankix tom: hu: rawg hu: mhaing: kah simiang Pilat kieh nawh nhie: raig caong kix pot, sonsang pon tix tik kix kah heue.
Mawh kheu nan: pwi naing khankix hu: mai raig caong kaw phaoka: tix kaux pot, mai tang: kaux an: pa hoik tawk tau mai Yesux.
Viang mawh kawx nan:, yam hoek kix kah Yesux, mai yaox hoik yum: Nawh Cao:, kix ang lai raig caong Nawh pot heue.
Viang mawh nan:, pwi naing tix kaux teei pliah suat paw: Nawh Cao: kah, mai nham: mai rawm: lih dom: mawx dom: an: heue.
Mai kaw pa hoik yaox grawhgrawng: an: kham: mhai: sakse, mai mhai: sakse nawh mawh pa mawh pa meh. Mai nawh tawng grawng: lox pa krai nawh mawh pa mawh pa meh, yuh kah mawx viang pex kawx tag sang yumrhawm: kah heue.
Grawhgrawng: nawh ceu in: khankix hoik mawh sonsang naog lox Phuk lai sigang: khri: pa ah nin:, "Siang: Nawh tag ang lai pot tix mu: kawx heue."
Mai daux Phuk lai sigang: khri: tang: dauh baox deeh ah nin:, "Kix tag sang jhak kah Kaw pa hoik suat kix kah heue."
Grawng: Sipaung: Kah Yesux
Mathiex 27:57-61; Makux 15:42-47; Lukax 23:50-56
Mai khaix ceu in: khankix, Yosiep pa mawh pwi veng Arimase, pa mawh kawncau mausoi: Yesux tix kaux, viang mawh nan: nawh briex tix yuh kheu lhat nawh kah pwi Yudax khankix, hu: rawg hu: mhaing: tix teei tokaux yum: Yesux, kah simiang Pilat, mai simiang Pilat tawx akhawng: kah nawh, mawh kheu nan: nawh hu: teei tokaux yum: Nawh Cao: heue.
Mai Nikawdimux pa mawh kaw pa hoik hoek kah Nawh Cao: yam ponsawm: phaoka: kawx, viex sidauh bhawng: pa mawh Muran mai Acaw pa hoik klao: tau, dex tingoe: (30) coi.
Mawh kheu nan: kix teei tokaux yum: Yesux, mai teei man: pua: tokaux Nawh tau mai sidauh bhawng: an:, awm: sax koe: been pwi Yudax, yam sang sipaung: kix pwi heue.
Koe: sipeem tix dauh kah dex dee hoik tawk Nawh Cao: piang khaoxlhak, mai kah daux sipeem an: koe: simeeig pa khraox tix dauh:, dee ang sax deuh pwi tix kaux kawx heue.
Kheu singaix an: mawh Singaix Khre: pwi Yudax, mai kheu koe: simeeig an: dex dee an:, kix tom: deuh tokaux yum: Yesux tan: heue.
Simeeig Pa Yi
Mathiex 28:1-8; Makux 16:1-8; Lukax 24:1-12
Kah daux aliah singaix, singaix tix pon ngawb caocao yam kawn: faik praix, Marix Magadalax hu: kah simeeig, mai yaox hoik gah simaox khaing: simeeig heue.
Mawh kheu nan: nawh tom: to: hu: kah Simon Petrux mai kawncau tang: kaux pa moh Yesux, mai ah nin: kah kiex, "Kix hoik teei Simiang lih khaing: daux simeeig, mai ang ex tawng dee hoik een: kix Nawh Cao: heue."
Mawh kheu nan: Petrux mai kawncau tang: kaux an: lih hu: mai hu: kah simeeig.
Kiex khawm: ra: kaux to: hu: tau, viang mawh nan: kawncau tang: kaux an: luan khaing: Petrux mai hoek kah simeeig kah: sivoe heue.
Mai nawh nom: tix jhak kah daux, mai nawh yaox man: pua: pa koe: tan:, viang mawh nan: ang nawh laig kah daux heue.
Yam hoek Simon Petrux pa hawt khaix nawh, nawh laig kah daux simeeig mai yaox man: pua: khankix tan:,
mai man: phaced pa hoik koe: piang kaing: Nawh Cao:, ang lai koe: tau mai man: pua: khankix, viang mawh nan: hoik pua: tix een: tang: dauh heue.
Yam an: kawncau tang: kaux an: pa hoik hoek kah simeeig kah: sivoe an: kawx, laig mai yaox, mai yumrhawm: kah heue.
Mawh kheu ang kix nyang bax tawng gumlox pa koe: kah daux Phuk lai sigang: khri:, pa ah Nawh Cao: tag sang deeh kaoh im: khaing: krax yum:.
Kheu nan: kawncau an: deeh ing: kah dee ot kiex heue.
Yesux Lih Bleeh Kah Marix Magadalax
Mathiex 28:9-10; Makux 16:9-11
Viang mawh kawx nan: Marix cung kah plak praix simeeig mai yiiem heue. Yam yiiem nawh tan: nawh nom: tix jhak kah daux simeeig,
mai nawh yaox kawncau Siyiex ra: kaux ceep kraung pa paing mai ngawm kah dee hoik een: tokaux yum: Yesux kah, plak kaing: Nawh tix kaux mai plak caong tix kaux heue.
Mai kiex chawk nawh ah nin:, "Bun: eue, yiiem maix kheu patix?" Nawh deeh ah nin: kah kiex, "Mawh kheu hoik teei kix Simiang aux, mai ang aux tawng dee hoik een: kix Nawh heue."
Khaix hoik ah nawh nan:, nawh deeh gi plak khaix tix mai yaox Yesux cung tan:, viang mawh kawx nan: ang nawh tawng mawhYesux heue.
Yesux chawk mai ah nin: kah nawh, "Bun: eue, yiiem maix kheu patix? Sawg maix pwi mawx?" Nawh ce: Nawh mawh kaw pa pau sipeem mai pawk lox ah nin: kah Nawh Cao:, "Simiang eue, phan: Maix hoik teei Nawh hu:, krai aux mhong: dee een: maix Nawh liak, mai aux tag sang teei tix viex Nawh hu: heue."
Yesux baox ah nin: kah nawh, "Marix eue." Mai nawh deeh gi mai ah nin: kah Nawh Cao: kah lox Hebrie, "Rabonix." Pa ah Rabonix mawh Sara Cao: Gau.
Yesux baox ah nin: kah nawh, “Paw vi teeh Aux, kheu ang Aux nyang bax haok hu: kah Keeing: Cao:. Viang mawh kawx nan: hu: kah puxaik Aux khankix, mai krai kix grawhgrawng: pa sang haok Aux kah Keeing: Aux mai Keeing: pex, mai Siyiex Aux mai Siyiex pex heue.”
Mai Marix Magadalax hu: mai krai kah kawncau khankix, "Aux hoik yaox Simiang heue." Mai grawhgrawng: pa hoik krai Nawh Cao: ceu an: khankix kah nawh heue.
Yesux Lih Bleeh Kah Kawncau Nawh Khankix
Mathiex 28:16-20; Makux 16:14-18; Lukax 24:36-49
Kah daux bo singaix an:, kah daux aliah singaix, singaix tix, mai khaix hoik nyeep dee ot kawncau khankix, kheu lhat kix kah pwi Yudax khankix, Yesux hoek mai cung kah sinax kix, mai ah nin: kah kix, "Kieh pa nhim: koe: mai pex heue."
Mai khaix ah Nawh nan:, Nawh Cao: jhi: kix yaox taix Nawh mai paw: Nawh. Mawh kheu nan: yam yaox kawncau khankix kah Simiang, kix tom: koe: krax gauxrhawm: gauxrhi: heue.
Yam an: Yesux baox deeh ah nin: kah kix, "Kieh pa nhim: koe: mai pex heue. Awm: hoik ploi: Keeing: Cao: Aux hoek, Aux kawx ploi: pex hu: yuh nan: heue."
Mai khaix hoik ah Nawh nan:, Nawh Cao: phlu: piang kix mai ah nin:, "Pex rieb tix teei kah Khwan: Singax Singeh awawx.
Pex ploi: kah phimap pwi mawx ang ah, tag sang ploi: phimap nawh khankix heue. Pex deuh kah phimap pwi mawh ang ah, tag sang kawn: ca: deuh kah phimap nawh khankix heue."
Yesux mai Thomax
Viang mawh kawx nan: yam hoek Yesux, Thomax pa mawh kawncau tix kaux kah daux kawncau kao: kaux ra:, pa kok mawh Didumux ang ot mai kix.
Mawh kheu nan: kawncau tang: kaux an: khankix ah nin: kah nawh, "Ex hoik yaox Simiang heue." Viang mawh kawx nan: nawh deeh ah nin: kah kix, "Phan: aux ang yaox khaix dee tawk jimrhiem: kah tawm: taix Nawh, mai ang pon tix sau: gien: taix aux kah daux khaix tawk jimrhiem:, mai ang pon tix sau: taix aux kah paw: Nawh, aux ang lai yumrhawm: kah heue."
Mai khaix an: daix singaix, kawncau Nawh khankix deeh ot kah daux dee ot tan: tix bawg, mai Thomax kawx ot tan: mai kix. Viang hoik nyeep siviex kawx, Yesux hoek mai cung sinax kix mai ah nin:, "Kieh pa nhim: koe: mai pex heue."
Yam an: Nawh Cao: ah nin: kah Thomax, "Nyeu gien: taix maix, mai jhak kah tawm: taix Aux, mai nyeu taix maix sau: tix yaox kah daux paw: Aux. Paw kieh koe: krax ang yumrhawm:, viang mawh nan: kieh koe: krax yumrhawm: heue."
Thomax deeh pawk lox mai ah nin: kah Nawh Cao:, "Simiang aux, mai Siyiex aux."
Yesux baox ah nin: kah nawh, "Kheu hoik yaox maix Aux maix tom: yumrhawm: kah. Pwi pa ang yaox mai yumrhawm: khankix, ting bwanson: heue."
Grawhgrawng: Pa Tiem: Kah Phuk Lai Inkix
Mhai: pa daox pa am: tang: ceu pa yuh Yesux sivoe kawncau khankix, pa ang lai tiem: kah daux phuk lai in: kied nie tete.
Viang mawh kawx nan: hoik tiem: ceu inkix, sonsang yumrhawm: pex grawng: mawh Yesux Cao: Khrit, pa mawh Kawn: Siyiex, mai yuh kah mawx kheu yumrhawm: pex, pex tag sang pon ju pa im: kah daux ceukaux Nawh Cao: heue.
Yesux Lih Bleeh Kah Kawncau Aliah Kaux
Khaix ceu an: khankix Yesux baox deeh jhi: tokaux Nawh yaox kah kawncau Nawh tiblah kah dex rawm: nhawng: Tiberix, mai Nawh jhi: tokaux Tix yaox yuh nin: heue.
Simon Petrux mai Thomax pa kok mawh Didumux, mai Nasanilax pwi veng Kanax meung Galilie:, mai kawn: Zebedie:, mai kawncau tang: kaux ra: kaux khankix ot tau heue.
Simon petrux ah nin: kah kix, “Aux sang hu: sawg kax ha:.” Kix deeh ah nin: kah nawh, “Ex kawx sang hu: mai maix heue.” Kix lih hu: mai laig kah daux reu, mai daux sawm: an: kix ang pon tidtix.
Viang mawh kawx nan:, ponngawb yam jah praix tix riieng, Yesux cung kah caong raog tan:, viang mawh nan: kawncau khankix ang tawng mawh Yesux.
Mawh kheu nan: Yesux tom: chawk ah nin: kah kix, “Kawnpraix eue, pex koe: pa ih pa un: tix ceu ceu lie?” kix pawk lox mai ah nin: kah Nawh, “ang koe:.”
Mai Nawh Cao: baox ah nin: kah kix, “Ploi: rub pex kah plak khawn: dawm: reu, mai pex tag sang pon heue.” Mawh kheu nan: kix ploi: rub, mai ang pon bluh rub, kheu kied nie pon kax haoh hun:.
Kawncau pa moh Yesux an: ah nin: kah petrux, “Mawh Simiang heue.” Kheu nan: yam mhong: Simon Petrux grawhgrawng: mawh Nawh Simiang, nawh deeh ceep sibex nawh, (kheu hoik ot kakaong: nawh), mai phoh laig kah daux rawm: nhawng: heue.
Kawncau tang: kaux khankix hoek kah daux reu, mai bluh rub pa hoik naog kax hoek heue. Kheu ang kix singai khaing: praok, dex koe: tiphwan: (50) tawp khaing:.
Yam hoik hoek kix kah praok kix yaox ngu swah, mai pa groh kax, kah piang ngu an: mai khaomun heue.
Yesux ah nin: kah kix, “viex kax pa pon pex yamin tiblah heue.”
Mawh kheu nan: Simon petrux laig kah daux reu mai bluh rub pa naog kax pa ting tiyieh tiphwan: loe: (153) hoek kah praok, viang mawh kax nie ding nie dod, rub an: ang griah ang laux heue.
Khre: Pa Ih Pa Un: Son Kawncau Khankix
Yesux ah nin: kah kix, “Hoek tix ih priex ngawb heue.” Mai kawncau khankix tix kaux kawx ang pon tix chawk Nawh, “Maix mawh mawx?” kheu hoik tawng kix grawng: mawh Nawh Simiang heue.
Yesux hoek mai teei khaomun mai kax tawx kah kix.
In: mawh loe: bawg tix bawg, pa jhi: Yesux tokaux Tix kah kawncau Nawh khankix, khaix hoik kaoh Nawh khaing: krax yum: heue.
Yesux mai Petrux
Khaix hoik ih kix priex ngawb Yesux chawk kah Simon petrux ah nin:, “Simon kawn: Yonax eue, maix lheu: moh kah Aux khaing: inkix lie?” Nawh ah nin: kah Nawh Cao:, “Mawh heue, Simiang eue, Maix hoik tawng grawng: pa moh aux kah Maix.” Nawh Cao: baox ah nin: kah nawh, “ tawx kawn: yung: Aux khankix sawm: heue.”
Nawh Cao: baox chawk kah nawh ra: bawg tix bawg mai ah nin: “Simon kawn: Yonax eue, maix moh kah Aux lie?” Nawh baox pawk lox mai ah nin: kah Nawh Cao:, “Mawh heue, Simiang eue, Maix tawng grawng: pa moh aux kah Maix.” Nawh Cao: baox ah nin: kah nawh, “Liang yung: Aux khankix heue.”
Nawh Cao: baox chawk kah nawh loe: bawg tix bawg mai ah nin:, “Simon kawn: Yonax eue, maix moh kah Aux lie?” Petrux khirhawm: kheu hoik chawk Nawh Cao: kah nawh tom: hoek loe: bawg, “maix moh kah Aux lie?” Mai nawh ah nin: kah Nawh Cao:, “Simiang eue Maix tawng grawhgrawng: kuceu khawm: uik, Maix tawng grawng: pa moh aux kah Maix heue.” Yesux baox ah nin: kah nawh, “Tawx yung: Aux khankix sawm: heue.
Aux krai lox tete telai kah maix, yam awn: ju maix, maix chix nhawt maox rawd nyoi tokaux tix tiru, mai maix pon hu: dee simie maix tix hu:. Viang mawh kawx nan:, yam hoik kuad maix, maix tag sang nyeu taix mai pwi tang: kaux tag sang nhawt maox rawd maix, mai viex maix hu: dee ang maix simie tix hu: heue.”
Yam ah nan: Nawh Cao: sang krai grawhgrawng: Petrux tag sang yum: yuh kah mawx, sonsang koe: min: plakngai: Siyiex kah heue. Mai khaix hoik ah Nawh nan:, Nawh Cao: baox ah nin: kah nawh, “Hawt khaix Aux heue.”
Yesux mai Kawncau Tang: Kaux
Petrux deeh gi tix jhak plak khaix mai yaox kawncau pa moh Yesux, hawt hoek khaix kiex, nawh mawh kaw pa neung kah naok Yesux yam ih kix priexbo yam an: nhaox, mai chawk ah nin:, “Kaw pa sang tik sang tawx Maix mawh mawx?”
Yam yaox Petrux kah nawh, nawh chawk ah nin: kah Yesux, “Simiang eue, grawhgrawng: pwi in: sang yuh kah mawx?”
Yesux baox ah nin: kah nawh, “Phan: Aux sang kieh nawh ot tom: deeh hoek Aux sax, sang dex sang dawd mai maix yuh kah mawx? Maix kienie hawt khaix Aux heue.”
Kheu an: lox pa ah, “kawncau an: tag ang lai yum:,” tah hu: kah puxaik khankix. Viang mawh kawx nan: Yesux ang ah, “Nawh tag ang lai yum:.” Nawh ah nin:, “Phan: Aux sang kieh nawh ot tom: deeh hoek Aux sax, sang dex sang dawd mai maix yuh kah mawx?”
Mawh kawncau in: pa kham: mhai: sakse grawhgrawng: ceu in: khankix, mai pa tiiem: grawhgrawng: ceu inkix, mai ex tawng mhai: sakse pa kham: nawh mawh pa mawh pa meh heue.
Lox Ghoik
Pa yuh Yesux tang: ceu kawn: koe: haoh hun:, phan: tiem: grawhgrawng: kuceu khankix, ceu mawx ceu an:, aux ce: pie haktiex in: kawx, ang doh kub sau: phuk lai pa sang tiem: khankix heue.
1 Isayax - 40:3
2.C.D.E. baptis, dee bleeh mawh cubcom
3 baptis, dee bleeh mawh cubcom
4 Kao: nari, mawh bawg yam pon: nari plakbo heue
5 Yaogyaw - 69: 9
6 B.C.D.baptis, dee bleeh mawh cubcom
A.B.C. baptis, dee bleeh mawh cubcom
D liah nari, mawh yam jung singaix bawg yam kao: ra: nari
8 aliah nari, mawh bawg yam khaix priexngaix tix nari heue.
9 Nehamix - 9:15, lihu - 16:4, 15
10 Isayax - 54:13
11 Mikha - 5:2
12 Yaogyaw - 82: 6
13 baptis, dee bleeh mawh cubcom
14 Yaogyaw -118:26
15 Zakharix - 9:9
16 Isayax - 53:1
17 Isayax - 6:10
18 Yaogyaw - 41: 9
19 Yaogyaw - 35:19,69:4
20 Liah nari., caw mawh yam jung singaix bawg yam kao: ra: nari
21 Yaogyaw - 22: 18
22 Yaogyaw - 69: 21
23 pa awm: tih’ mawh gai rawm: sigrit sigra:, phan: hoik kroh si daing: jhok rawm: heue
24 Hesop’ mawh ceu khaox im: krim tix ceu heue
25 Yaogyaw - 34:20; Lihu - 12:46
26 Zakharix - 12:10
27 Acaw’ mawh ceu khaox pa kied sioe: baux sioe: bhawng: tix ceu heue