Phuk Lai Sigang: Khri: Siyiex - 3 Pingnya
LAI EZARAX
(Ezra)
Ezarax
Grawng: Sidax Sidu Giex Laung Khaing: Babulon
Kah daux num jah Kurux khunhawkham haktiex Pasha tix kwang: kah haktiex, sonsang grum naog gumlox pa hoik krai Simiang Siyiex khaing: daux jheeh Yeramix, Simiang Siyiex hoik so: rhawmrhi: khunhawkham haktiex Pasha, mai kieh nawh krai pao: kah daux meung haktiex nawh kudauh kudee, mai hoik tiem: kah daux lai krai ah nin:,
Sairat khunhawkham haktiex Pasha ah nin:, "Simiang Siyiex kah piang raoma: hoik tawx meung haktiex can pa koe: khawm: uik kah aux heue. Mai Nawh Cao: hoik tawx lox kah aux, sonsang sum: aux nyiiex bwan: son Nawh Cao: tix lhang: kah daux veng Yerusaliem kah daux haktiex Yudax heue.
Kah daux pex mawh pwi mawx pa mawh pwi Nawh Cao: kieh Siyiex ot mai nawh, kieh haok hu: kah veng Yerusaliem kah daux haktiex Yudax, mai sum: nyiiex bwan: Simiang Siyiex ceu pwi Isarilax Siyiex pa ot kah daux veng Yerusaliem mawh Siyiex heue.
Mai can pwi pa kawn deuk kudauh kudee kah dee peung dee pan: nawh tix ot tivud ticu khankix, kieh pwi khankix teem: coi kah mau mai khri:, khawm: khawng: brie tix khankix kah nawh, lheu: khaing: krax tan krax lu krax lu pa koe: khawm: rhawmrhi: nawh tix tan khankix son nyiiex bwan: Siyiex kah daux veng Yerudaliem heue.
Khaix an: cao: kaing: nyiiex ma: cub pwi Yudax mai Binyamin khankix, mai cao: giex kaing: li pwi Lewix khankix, mai can pwi pa hoik so: Siyiex rhawmrhi: kix khawm: uik, yaog tix kaox hu: sonsang sum: nyiiex bwan: Simiang Siyiex kah daux veng veng Yerusaliem heue.
Mai pwi pa ot hawt rawb rim kix khawm: uik, mai teem: coi tawx kraung mau kraung khri: khankix, khawm: kraungkhrai: mai khawng: brie pa koe: ngawh koe: jum tix khankix lheu: khaing: can pa koe: rhawmrhi: kix tix tan heue.
Khunhawkham Sairat teei kraung shiao khankix khaing: nyiiex bwan: Simiang Siyiex, pa hoik rhim: khunhawkham Nebukhaneza tix teei khaing: veng Yerusaliem mai pa hoik priex tix deuh kah daux nyiiex bwan: Siyiex cie tix;
mai Sairat khunhawkham haktiex Pasha hoik teei ankix lih khaing: daux taix Midaredat pa mawh cao: priex kraung, mai simin tix tawx kah cao: kaing: pwi Yudax Sheshabaza heue.
In: mawh kraung shiao khankix, klong: khri: tingoe: mu:, klong: mau tix rheng: mu:, mai vaig mau tinga: dim: kre:,
pan khri: tingoe: mu:, pan mau pon: yieh kao: mu:, mai kraung shiao tang: ceu kahnkix tix rheng: ceu heue.
can kraung mau kraung khri: khawm: uik hoik koe: phwan: rheng: pon: yieh ceu, Sheshabaza hoik teei kraung shiao ceu inkix khawm: uik tau mai pwi pa giex pa laung khankix khaing: veng Babulon ing: kah veng Yerusaliem heue.
Can Pwi Pa Giex Pa Laung Khankix Hoik Deeh Ing:
Inkix mawh pwi pa ot kien haktiex an: pa deeh ing: khaing: krax pa giex pa laung tix khankix, pwi pa hoik viex Nebukhaneza khunhawkham Babulon hu: dee singai kah veng Babulon khankix mai can pwi pa deeh ing: kah veng Yerusaliem haktiex Yudax kukaux daux pwi kah veng ot tix heue.
Can pwi pa hoek tau mai Terubagelax khankix mawh Yawsux Nehamix, Serayax, Relayax, Modekhie:, Bilashan, Misapa, Bizava, Rehum, mai Banax heue. Carang ceu pwi Isarilax khankix mawh awm: in:,
Cub kawnpraix Parot khankix ra: rheng: tiyieh atigliah ra: (2172) kaux,
Cub kawnpraix Shaphatiyax khankix loe: yieh atigliah ra: (372) kaux.
Cub kawn: parix Arax khankix aliah yieh atigliah phwan: (775) kaux.
Cub kawnpraix Pahatmobax; khaing: kah daux cub kawnpraix Yehu mai Yobax khankix, ra: rheng: daix yieh kao: ra: (2812) kaux.
Cub kawnpraix Elam khankix tix rheng: ra: yieh tiphwan: pon: (1254) kaux.
Cub kawnpraix Zatux khaknkix dim: yieh tipon: phwan: (945) kaux.
Cub kawnpraix Zakie: khankix aliah yieh tigliah (760) kaux.
Cub kawnpraix Banix khankix, liah yieh tipon: ra: (642) kaux.
Cub kawnpraix Bebie: khankix liah yieh tinga: loe: (623) kaux.
Cub kawnpraix Azagat khankix, tix rheng: ra: yieh tinga: ra: (1222) kaux.
Cub kawnpraix ceu pwi Adonikam khankix liah yieh tigliah liah (666) kaux.
Cub kawnpraix Bigavie: khankix ra: rheng: mai tiphwan: liah (2056) kaux.
Cub kawnpraix Adim khankix pon: yieh tiphwan: pon: (454) kaux.
Cub kawnpraix Ata khaing: Hezakiyax khankix, tidim: daix (98) kaux.
Cub kawnpraix Bezie: khankix loe: yieh tinga: loe: (323) kaux.
Cub kawnpraix Yorax khankix, tiyieh kao: ra: (112) kaux.
Cub kawnpraix Hashum khankix, ra: yieh tinga: loe: (223) kaux.
Cub kawnpraix Gibax khankix tidim: phwan: (95) kaux.
Cub kawnpraix Bieliehiem khankix tiyieh tinga: loe: (123) kaux.
Pwi veng Netawpha khankix tiphwan: liah (56) kaux.
Pwi veng Anatok khankix tiyieh tinga: daix (128) kaux.
Pwi veng Azamaviet khankix tipon: ra: (42) kaux.
Pwi veng Kilayatarim pwi veng Khephirax mai Berot khankix, aliah yieh tipon: loe: (743) kaux.
Pwi veng Ramax mai pwi veng Gebax khankix, liah yieh tinga: tix (621) kaux.
Pwi veng Mikhamat khankix, tiyieh tinga: ra: (122) kaux.
Pwi veng Betelax mai pwi veng A-ix khankix ra: yieh tinga: loe: (223) kaux.
Pwi veng Nebo khankix, tiphwan: ra: (52) kaux.
Pwi veng Magabit khankix, tiyieh tiphwan: liah (156) kaux.
Cub kawnpraix Elam tang: kaux tix rheng: ra: yieh tiphwan: pon: (1254) kaux.
Cub kawnpraix Harim khankix,loe: yieh tinga: (320) kaux.
Pwi veng Lawda, pwi veng Hadi mai pwi veng Ono khankix, aliah yieh tinga: phwan: (725) kaux.
Pwi veng Yerikho: khankix, loe: yieh tipon: phwan: (345) kaux.
Pwi veng Senax khankix loe: rheng: liah yieh tingoe: (3630) kaux.
Cub kawnpraix Yedayax khankix khaing: daux nyiiex ma: cao: giex kaing: li Yawsux dim: yieh atigliah loe: (973) kaux.
Cub kawnpraix Imerax khankix, tix rheng: mai tiphwan: ra: (1052) kaux.
Cub kawnpraix Pashurax khankix, tix rheng: ra: yieh tipon: aliah (1247) kaux.
Cub kawnpraix Harim khankix, tix rheng: mai kao: aliah (1017) kaux.
Cub pwi Lewix khankix, tom: mawh cub kawnpraix Yawsux mai Kamelax khaing: daux cub kawnpraix Hodavix khankix atigliah pon: (74) kaux heue.
Cub pa ah lai rhax khankix, mawh cub kawnpraix Ashapha tiyieh tinga: daix (128) kaux.
Cub kawnpraix pa pau siviex khankix, maawh cub kawnpraix Shalum khankix, cub kawnpraix Ata khankix, cub kawnpraix Talamon khankix, cub kawnpraix Akup khankix, cub kawnpraix Hatitax khankix, mai cub kawnpraix Shobiet khawm: uik tiyieh tingoe: dim: (139) kaux.
Netinim cao: pa yuh kaing daux nyiiex bwan: khankix, mawh cub kawnpraix Zihax khankix, cub kawnpraix Hshupha khankix, cub kawnpraix Tabaok khankix,
cub kawnpraix Tarot khankix, mai cub kawnpraix Siyaha khankix, mai cub kawnpraix Padon khankix,
cub kawnpraix Lebanax khankix, cub kawnpraix Hagabax khankix, cub kawnpraix Akup khankix,
cub kawnpraix Hagap khankix, cub kawnpraix Shalamie khankix, mai cub kawnpraix Hanan khankix,
cub kawnpraix Gidelax khankix, cub kawnpraix Gaha khankix, mai cub kawnpraix Rayax khankix,
cub kawnpraix Rezin khankix, cub kawn: Nekodax khankix, mai cub kawnpraix Gazam khankix,
cub kawnpraix Uzax khankix, cub kawnpraix Paseyax khankix, mai cub kawn: Beshie khankix,
cub kawnpraix Asanax khankix, cub kawnpraix Mehunim khankix,mai cub kawnpraix Nephuzim khankix,
cub kawnpraix Bakabuk khankix, cub kawnpraix Hakupha khankix, mai cub kawnpraix Harahurax khankix,
cub kawnpraix Hazalut khankix, cub kawnpraix Mehidax khankix, mai cub kawnpraix Harasha khankix,
cub kawnpraix Bakok khankix, cub kawnpraix Sisarax khankix, cub kawnpraix Tamax khankix,
cub kawnpraix Neziyax khankix, mai cub kawnpraix Hatipha khankix, heue.
Cub kawnpraix kawncau Sawlamon khankix, mawh kawnpraix Sotie khankix, cub kawnpraix Sawpheriet khankix, cub kawnpraix Parudax khankix,
cub kawnpraix Yolax khankix, cub kawnpraix Dakok khankix cub kawnpraix Gidelax khankix,
cub kawnpraix Shephatiyax khankix, cub kawnpraix Hattilax khankix,cub kawnpraix Hokheriet khankix, kawnpraix Zebem mai cub kawnpraix Ami khankix heue.
Netanim cao: pa yuh kaing daux nyiiex bwan: khawm: uik mai khawm: kawnpraix kawncau Sawlamon khankix koe: loe: yieh tidim: ra: (392) kaux.
Mai pwi in: khankix mawh pa kaox khaing: veng Telamilax veng Talhashax, veng Kherup, veng Adadan mai veng Imerax khankixx; viang mawh kix ang pon jhi: doeh nyiiex ma: keeing: kix, mai doeh nyiiex ma: ceucat kix sidawng: kah ang kix mawh ceu pwi Isarilax;
Kix tom: mawh cub kawnpraix Delayax khankix, cub kawnpraix Tobix khankix mai cub kawnpraix Nekodax khankix koe: liah yieh tiphwan: ra: (652) kaux;
Mai sinax cub kawnpraix cao: giex kaing: li khankix, pa mawh cub kawnpraix Hobayax mai cub kawnpraix Kozax khankix, mawh kheu teei tax du kix tix moeng bun: Bazilie pa mawh pwi haktiex Gilat, mai hoik kok ceukaux kix mawh Bazilie heue.
In: hoik mawh pwi pa sawg kix tix yaox kah daux sinax ceu pwi pa hoik daux carang khaing: daux sinax ceucat kix, viang mawh nan: kix ang lai yaox kix kah daux carang, mawh kheu kix hoik mawh pwi pa teei tix lih khaing: cao: giex kaing: li kheu ang kix lai singax heue.
Mai cao: kwang: haktiex tawx lox ang cu kix can ceu pa kied singax singeh tom: hoek bawg yam ang cao: giex kaing: li nyang bax shiao kah Urim mai Tumin heue.
Cub pwi hun: khawm: uik hoik koe: pon: mheen: ra: rheng: loe: yieh tigliah (42360) kaux,
Lheu: khaing: an: kawncau simex kawncau bun: kix, pa ot tau mai kix tan: hoik koe: aliah rheng: loe: yieh tingoe: aliah (7337) kaux, mai kix koe: simex, bun: cub pa ah lai rhax khankix ra: yieh (200) kaux heue.
Kix koe: brung aliah yieh tingoe: liah (736) mu:, mai kix koe: law ra: yieh tipon: phwan: (245) mu:,
kix koe: kala-uk pon: yieh tingoe: phwan: (435) mu:, mai kix koe: la liah rheng: aliah yieh tinga: (6720) mu: heue.
Cao: kaing: cao: kap daux nyiiex ma: tiblah yam hoek kix kah nyiiex bwan: Simiang Siyiex pa koe: daux veng Yerusaliem, kix hoik tan lu tau mai khawmrhawm: khawmrhi: tix kah son nyiiex bwan: Siyiex, sonsang sum: nyiiex bwan: kah dauh dee prim:,
mai kix hoik tawx krax tan can pa pon yuh tix khankix hoek kah daux krao: sinngao son kaing, plah khri: liah mheen: tix rheng: (61000) dalit, mai mau phwan: mheen: (50000) mina mai kraung ceep cao: giex kaing: li tiyieh (100) pheen: heue.
Mawh kheu nan: cao: giex kaing: li pwi Lewix khankix, mai pwi khankix tiblax cao: pa ah lai rhax khankix, mai cao: pau diang siviex, mai Netinim cao: pa yuh kaing daux nyiiex bwan: khankix, hoik ot kah daux veng cao: tix, mai ceu pwi Isarilax khankix hoik tang: ot kah daux veng cao: tix khawm: uik heue.
Krax Pa Deeh Yaox Tix Krub Kah Daux Veng Yerusaliem
Mai bleeh kah daux khix aliah, mai kawnpraix ceu pwi Isarilax pa hoik ot kah daux veng daux yaong: khankix, kraix Khrawm: paox tix hoek kah daux veng Yerusaliem kah daux pa grum Rhawm: grum rhi: heue.
Khaix an: Yawsux kawn: simex Yozadak mai puxaik nawh cao: giex kaing: li khankix, mai Zerubabelax kawn: simex Shelatilax yaog tix kaoh mai sum: khu: dee tan Siyiex ceu pwi Isarilax, sonsang tan krax tan pa gleeing kah piang khu: dee tan awm: krax pa hoik tiem: tix kah daux phuk lai been Mose, pa mawh pwi Siyiex heue.
Mawh kheu lhat graung kix kah pwi ot rawb rim kix khankix, mai kix sum: khu: dee tan kah piang jaong num: dee prim:, mai kix tan krax tan pa gleeing kah piang an:, son Simiang Siyiex, pa mawh krax tan pa gleeing son plak ponngawb mai son plak ponbo khawm: ra: bawg heue.
Kix deeh yuh pwie nyiiex gox bang: awm: krax pa hoik tiem: an: tix deuh kah daux phuk lai beenli mai kix tan krax tan pa gleeing ku singaix, kah daux carang been awm: pa keung: pa khaw: tix tan son ku ngaix;
Khaix an: kix tan krax tan pa gleeing awm: been pa yuh tix sijheeng:, mai krax tan yam haok khix khraox, mai pwie krax tan pa singax singeh son Simiang Siyiex awm: pa hoik tat tix deuh khawm: uik, mai son can pwi kukaux pa koe: rhawmrhi: tix tan krax tan kah Simiang Siyiex heue.
Jah haok khix aliah tix ngaix, kix tan krax tan pa gleeing tix khankix kah Simiang Siyiex, viang mawh nan: jaong num: nyiiex bwan: Simiang Siyiex ang nyang bax sum: tix heue.
Kix tawx mau kah cao: pa chix saik simaox khankix, mai kah cangmai khankix, mai khawm: pa ih pa un:, mai khawm: pa nyaux mai khawm: rawm: bee khankix kah pwi veng Sidon, mai pwi veng Tairax khankix, sonsang viex khaox Arit khankix hoek khaing: gawng Lebanon, sibloe: hoek kah daux reu veng Yawppa praok rawm: sigrit sigra:, awm: hoik pon kix khaing: Kurux khunhawkham haktiex Pasha heue.
Grawng: Jah Tix Sum: Kah Nyiiex Bwan:
Kah daux num ra: khix ra: yam hoek bleeh kix kah nyiiex bwan: Siyiex kah daux veng Yerusaliem, Zerubabelax kawn: simex Shatalilax, Yawsux kawn: simex Yozadok, mai can puxaik kix Cao: giex kaing: li mai pwi Lewix pa kawn deuk khankix, mai can pwi pa lih khaing: pa giex pa laung khawm: uik mai can pwi pa hoek kah veng Yerusaliem, jah tix yuh kaing, mai kix laug kah pwi Lewix khankix, sonsang kia: ngiien kix kah piang kaing jhaw: kah daux nyiiex bwan: Simiang Siyiex heue.
Khaix an: Yawsux mai kawnpraix nawh, mai puxaik kix khankix, Kadamelax mai kawnpraix nawh, khawm: kawnpraix Yudax khankix, rom tix kaoh sonsang kia: ngiien kix kah piang pwi pa yuh kaing nyiiex bwan: Siyiex tau mai kawnpraix Henadat khawm: kawnpraix kix mai puxaik kix pwi Lewix heue.
Yam yaog cao: sum: nyiiex khankix jaong num: nyiiex bwan: Simiang Siyiex, cao: giex kaing: li khankix cung khawm: kraung ceep tix mai teettawng khankix, pwi Lewix mai kawnpraix Ashapha khankix, hoik cung tan: tau mai tauh chiang sonsang yaogyaw kah Simiang Siyiex awm: koe: been phing: beenli pa hoik deuh Davit khunhawkham ceu pwi Isarilax heue.
Mai kix rhax lai pa deeh ra lai pawk kah paox tix, kah daux krax pa yaogyaw mai ting bwanson: kah Simiang Siyiex ah nin:; "Mhawh kheu Nawh Cao: mawh pa mhawm: mawh kheu pa cao: rhawm: Nawh Cao: kaux cong: leeing ju leeing phan: son ceu pwi Isarilax heue." Khaix na pwi khawm: uik kok yo lox sinum kah daux krax pa yaogyaw kix kah Simiang Siyiex, kheu hoik sum: kix jaong num nyiiex bwan: Simiang Siyiex heue.
Mawh kheu nan: cao: giex kaing: li khankix mai pwi Lewix khankix, mai cao: kaing: cao: kap nyiiex ma: kix, pwi riex ju khankix, pa hoik pon yaox kah nyiiex bwan: phao kah: hoik yiiem yo kah lox pa kied ting, yam hoik sum: kix jaong num: nyiiex bwan: kah ngai: kix; mai pwi hun: khankix kok yo lox tix kah daux krax pa gauxrhawm: gauxrhi: heue.
Mawh kheu nan: pwi khankix ang lai chix pon gwieh kah lox sinum riag yo pwi kah daux krax pa gaurhawm: gaurhi: tix khaing: lox sinum yiiem pwi khankix, kheu jao hoik yo pwi khankix lox tix kah daux krax pa kied ting sinum, mai lox sinum an: hoik mawh pa mhong: tom: dee singai heue.
Krax Tiebtie Sonsang Deeh Sum: Kah Nyiiex Bwan:
Yam hoik mhong: pwi koeng ceu pwi Yudax mai ceu pwi Binyamin khankix kah sang sum: doeh simie ceucat can pwi pa giex pa laung tix khankix kah nyiiex bwan: Simiang Siyiex ceu pwi Isarilax,
kix hoik hoek kah Zerubabelax mai doeh cao: kaing: pwi Isarilax khankix mai ah nin: kah kix "Kieh yix sum: nyiiex bwan: in: tau mai pex liak, grawhgrawng: nawh yix sawg Siyiex pex awm: sawg pex kah; mai yix hoik tan lu kah Nawh Cao:, jah daux singaix thong: Esarahadon khunhawkham Asurix yix hoek tin: heue."
Viang mawh nan: Zerubabelax mai Yawsux mai doeh cao: kaing: cao: kap daux nyiiex ma: ceu pwi Isarilax khankix ah nin: kah kix, "Pex ang pon yuh tix ceu kawx tau mai yix sonsang sum: nyiiex bwan: Siyiex yix heue. Viang mawh nan: yix sang tang: sum: kah son Simiang Siyiex ceu pwi Isarilax nongnong:, awm: pa hoik tawm: khunhawkham Kurux pa mawh khunhawkham Pasha kah yix heue."
Khaix an: pwi haktiex khankix hoik kieh pwi Yudax khankix awn: riang awn: rao mai tuktiaktukte: kix,
mai vai cao: pa hawt grawng: see: khankix, yuh krax keud pa sawn: kix lauxleeing: prung prang, jah singaix baux Kurux khunhawkham haktiex Pasha tom: hoek baux ju krax kwang: Darix khunhawkham haktiex Pasha heue.
Krax Tiebtie Sonsang Deeh Sum: Kah Veng Yerusaliem
Yam jah Ahashoerux tix kwang: haktiex, kix hoik tiem: tix tawx lai pa tang phimap kah can pwi pa ot kah daux haktiex Yudax mai veng Yerusaliem heue.
Kah daux singaix Atazerit kawx, Bishalam, Mitaretat, Tabelax mai paox pie kix pa kawn deuk, baox tiem: tix tang kah Atazerit khunhawkham haktiex Pasha mai lai in: mawh pa tiiem: tix kah ngai: lai Aremix mai deeh thut tix kah plak lox Aremix khankix heue.
Rehum pa mawh cao: kaing: ting Shimashie pa mawh cao: tiem: lai, hoik tiem: lai tieh feen kah pwi veng Yerusaliem mai tawx kah khunhawkham Atazerit awm: in: heue.
Rehum pa mawh cao: kaing: ting pa kwang: teug lai, Shimashie pa mawh cao: pa tiiem: lai khawm: paox pie kiex, pwi haktiex Dinie, pwi haktiex Aphasatakhit khankix, pwi haktiex Tapalax, pwi haktiex Pasha khankix pwi haktiex Eriet mai pwi haktiex Babulon pwi haktiex Shushan,pwi haktiex Dehavi khankixmai: pwi haktiex Elam khankix,
mai can pwi khankix, pa hoik gah simiang Osanapa pa mawh pwi ting pwi lhaong: mai pa kied laoh kied lie, kieh ot kah daux nyiiex veng yaong: haktiex Samarix khankix, mai can pwi pa kawn deuk baoh haktiex kah plak toi: rawm: klawng: Upharetix khankix kah plak klip singaix heue.
In: mawh lai pa hoik sipaox kix kah nawh son khunhawkham Atazerit mai khaing: kawncau maix khankix pa ot baoh haktiex plak toi: rawm: Upharetix khankix heue.
Kieh khunhawkham tawng kah pwi Yudax pa hoik hoek khaing: maix khankix, hoik bleeh kah daux veng Yerusaliem mai kix sum: veng pa yie tieh feen pa caox pa caig an:, mai yuh guh veng an: dex hoik, mai deeh cox sum: kah jaong num: veng heue.
Kieh hkhunhawkham tawng yamin:, phan: veng in: hoik mawh pa sum: guh veng tix kaux, kix tag ang lai tawx gha: mai keen:, mai mau gawng, mai krao: mau cie khunhawkham tag mawh pa nie iak hu: sipie sipie kah heue.
yamin: mawh kheu ih yix kih kied mau cai: pa kaoh khaing: daux nyiiex khunhawkham, yix ang rhawm: yaox kah krax ceet min: khunhawkham; mawh kheu nan: yix tom: ploi: pwi hu: krai grawng: inkix kah khunhawkham heue.
Sonsang sigaw maix tix yaox kah grawhgrawng: ceu an: kah daux phuk lai keeing: maix khankix heue. Mai maix tag yaox grawng: an: khankix kah daux phuk lai pa hoik tiem: tix khankix, mai tawng kah veng in: mawh pa yie tieh feen, mai pa tawx krax pa tuktiaktukte: kah khunhawkham khankix, mai kah kien haktiex an: tom: dix, mawh kheu jao in: tom: kieh veng in: lauxleeing: heue.
Ex gruh krai grawng: in: kah khunhawkham phan: veng in: sum: tix mai phan: guh veng hoik sang tix khawm: uik, khaix an: maix tag ang yaox tix kwang: kah baoh haktiex plak toi: rawm: klawng: heue.
Khaix an: khunhawkham deeh tawx lox pawk tix son Rehum cao: kaing: ting, mai son Shimashie cao: tiem: lai, mai kah son paox pie pa kawn deuk tau mai kix khawm: uik, pa ot kah daux haktiex Samarix mai kah son can pa kawn deuk khankix kah daux haktiex plak toi: rawm: klawng:, kieh pa nhim: koe: kah piang pex heue.
Lai pa sipaox pex kah aux hoik toe: tix phat sidawng: kah plak sivoe aux heue.
mai aux hoik tawx lox tix kieh kix sawg ciied tix yaox, mai hoik yaox veng in: yuh krax tieh krax feen kah khunhawkham kah daux bawg yam pa hoik luan, mai pa tieh pa feen mai grawng: kaing pa ang mhawm: khankix, hoik kleuk tix kah daux veng an: heue.
Khunhawkham pa koe: siawpsibrawm khankix pasax ot kah daux veng Yerusaliem, mai kix hoik kwang: kah kien haktiex an: khawm: uik pa koe: toi: rawm: klawng: plak klip singaix mai hoik tawx gha:, mai keen: mai mau gawng khankix kah kix heue.
Yamin: pex tawx lox hoek sonsang naox kah pa sum: veng in:, krox jun tom: hoek bawg yam tawx aux lox tix hoek heue.
Yuh satix tix, paw lai nhim:, chix lai sang kieh pa som pa nai: pa laux pa leeing: pa cien hoek kah piang khunhawkham yuh kah mawx lie?
Yamin: yam phat kix lai khunhawkham Atazerit kah sivoe Rehum, mai Shimashie cao: tiem: lai khawm: paox kiex khankix, kix niied tix hu: kah veng Yerusaliem tiebtie khin: kah pwi Yudax khankix, kieh naox kah kaing yuh kix heue.
Mawh kheu nan: kaing jhaw: nyiiex bwan: Siyiex kah daux veng Yerusaliem hoik kaog tom: hoek bawg yam kwang: khunhawkham haktiex Pasha ra: num tix num heue.
Grawng: deeh Toe: Tix Sum: Kah Nyiiex Bwan:
Yam an: cao: jhai: Hagie mai Zakharix kawn: simex Ido mai cao: jhai: khankix krai lox jhai: tawx riang rao kah pwi Yudax, pa ot kah daux haktiex Yudax mai veng Yerusaliem, kah daux min: ceukaux Siyiex ceu pwi Isarilax heue.
Mawh kheu nan: Zerubabelax kawn: simex Shalatilax mai Yawsux kawn: simex Yozadak kaoh mai jah tix sum: nyiiex bwan: Siyiex pa koe: kah daux veng Yerusaliem; mai cao: jhai: Siyiex khankix, hoik ot tau mai kix mai teem: coi kah kix heue.
Kah daux bawg yam an: Tatenie pa mawh cao: pa kwang: hawt baoh haktiex toi: rawm: klawng: Upharetix plak klip singaix, mai Shetabozanie mai paox pei kiex khankix, hoek mai chawk kah kix ah nin:, "Mawh pwi mawx pa tawx lox kah pex, sonsang sum: nyiiex bwan: in:, mai sonsang yuh kah guh veng in: lie?"
Khaix an: yix hoik krai kix mhong: ceukaux pwi an: khankix pa pang: tix sum: nyiiex bwan: in: heue.
Viang mawh nan: ngai: siyiex kix kia: ngiien kah piang kuad song: nong: yu pwi Yudax khankix, sonsang ang kix kaog tom: hoek bawg yam deeh hoek lai grawng: an: khaing: khunhawkham Darix heue. Khaix an: kix deeh pawk lai tix pheen: kah grawng: pa dex pa dawd mai in: heue.
Lai in: tix pheen: mawh lai tiem: Tatenie cao: kwang: baoh haktiex plak toi: rawm: klawng: plak klip singaix mai Shetabozanie khawm: paox pie kix khankix, mai pwi Pasha khankix pa ot kah baoh haktiex plak toi: rawm: klawng: plak klip singaix kah son khunhawkham Darix.
Kix hoik tawx lai in: hu: kah nawh tix pheen: kah daux pa tiiem: ah nin:, "Kieh pa nhim: koe: kah piang khunhawkham Darix heue.
Kieh khunhawkham tawng kah hu: yix laig kah daux haktiex Yudax mai hoek kah nyiiex bwan: Siyiex pa ting pa lhaong:, pa hoik sum: kah lon simaox pa kied ting khankix, mai khaox khankix hoik sau: tix kah ding: nyiiex, mai kaing hoik phai: kah daux pa sau: kix riang rao tix mai tag sang pon tix hoik kah daux tawm: taix kix heue.
Khaix an: yix chawk kah kuad song: nong: yu khankix,mai ah nin: kah kix, "Mawh pwi mawx pa tawx lox kieh pex sum: nyiiex bwan: in: mai yuh kah guh veng inkix lie?"
Yix baox deeh chawk ceukaux kix sonsang deeh krai yix kah maix, mai sonsang pon tiem: yix tix tawx ceukaux pwi khankix pa mawh cao: kaing: ting kah daux sinax kix heue.
Mai kix hoik deeh pawk kah yix ah nin:, "Yix mawh cub kawncau mausoi: Siyiex raoma: mai haktiex, mai yix deeh sum: nyiiex bwan: pa hoik dawg sum: tix tom: num pa hoit kied rheeng: dix, pa hoik grum naog sum: khunhawkham pa ting pa lhaong: ceu pwi Isarilax tix kaux heue.
Mawh kheu jao hoik so: keeing: yix khankix pa songrhawm: songrhi: Siyiex meung raoma:, Nawh Cao: tom: ap kix kah daux taix Nebukhaneza khunhawkhamh haktiex Babulon mai ceu pwi Khakladie khankix, pa hoik yuh nyiiex in: lauxleeing: mai rhim: pwi khankix hu: kah veng Babulon heue.
Viang yuh nan: kawx, kah daux num jah Kurux khunhawkham Babulon tix kwang: kah haktiex, khunhawkham Kurux hoik tawx lox hoek sonsang deeh sum: kah nyiiex bwan: Siyiex in: heue.
"Kraung khri: kraung mau nyiiex bwan: Siyiex pa hoik rhim: Nebukhaneza khaing: daux nyiiex bwan: kah daux veng Yerusaliem, mai can pa viex nawh laig kah daux nyiiex bwan: veng Babulon, khunhawkham Kurux hoik deeh teei kraungkhrai: an: khankix lih khaing: daux nyiiex bwan: Babulon, mai nawh ap tix tawx ankix kah cao: kaing: ting pa kaux Sheshaboza heue.
"Mai khunhawkam ah nin: kah nawh,teei kraung shiao inkix lih hu: kah daux nyiiex bwan: pa koe: kah daux veng Yerusaliem, mai deeh sum: nyiiex bwan: Siyiex kah gwang prim: heue.
"Mawh kheu nan: Sheshaboza hoek tix sum: jaong num: nyiiex bwan: Siyiex, pa koe: kah daux veng Yerusaliem; mai jah khaing: daux bawg yam an: tom: hoek kah daux bawg yam ca: kawn: yuh tix mai ang nyang chix hoik heue."
Yamin: phan: ceu ankix mawh ceu pa mhawm: kah son khunhawkham, kieh ciied tix yaox pa koe: kah daux krao: sinngao nyiiex haw: khunhawkham Kurux sonsang deeh sum: kix nyiiex bwan: Siyiex in:, kah daux veng Yerusaliem, mai kieh khunhawkham deeh krai yix mhong: kah khaw: rhawm: ang khaw: rhawm: kah grawhgrawng: in: heue.
Gumlox Tawx Khunhawkham Darix
Khaix an: khunhawkham Darix tawx lox mai sonsang sawg kah bua: lai, dee deuh kix sinngao daux veng Babulon heue.
Mai kix yaox bua: lai tix bua:, kah daux nyiiex veng Akhametax pa koe: kah daux haktiex Medix, kah daux bua: lai an: hoik tiem: tix awm: in: heue.
Kah daux num jah khunhawkham Kurux tix kwang: kah haktiex, khunhawkham Kurux tawx lox son gawng nyiiex Simiang Siyiex pa koe: kah daux veng Yerusaliem heue." Kieh nyiiex bwan: mawh pa deeh sum: tix, kah dee pa hoik appong: kix krax tan; mai kieh jaong num: nyiiex bwan:, mawh pa sum: tom: kaux cong: , mai kieh krax lhaong: koe: tigliah sawk, mai krax vieh koe: tigliah sawk,
mai sang: kah simaox ting lon: loe: tia: mai kah khaox pa khraox tix tia: heue. Kieh krax pa uik shiao tix khankix mawh pa lih khaing: daux krao: sinngao cie khunhawkham heue.
Deeh kieh tawx kraung khri: kraung mau nyiiex bwan: Siyiex, pa hoik rhim: khunhawkham Nebukhaneza khaing: nyiiex bwan:, veng Yerusaliem mai pa hoik viex hu: kah veng babulon khankix, deeh tawx ing: kah nyiiex bwan: pa koe: kah daux veng Yerusaliem, mai sau: kah dauh dee koe: ceu mawx ceu an: kah daux nyiiex bwan: Siyiex."
Yamin: Tatenie cao: kaing: ting kah baoh haktiex toi: rawm: klawng: plak klip singaix, mai Shetabozanie mai can paox pie pex pa mawh ceu pwi Aphatiet pa ot kah toi: rawm: klawng: plak klip khankix, lih hu: singai khaing: tan: heue.
Paw sidien kah kaing nyiiex bwan: in: mai yuh hu: sivoe; kieh cao: kaing: ting pwi Yudax mai cub kuad song: nong: yu ceu pwi Yudax khankix, sum: nyiiex bwan: Siyiex in: kah piang dee prim: heue.
Lheu: khaing: an: aux tawx lox tix kah pa tag sang caw: pex tix yuh son kuad song: nong: yu ceu pwi Yudax khankix, sonsang sum: nyiiex bwan: Siyiex in:, ngawh riang yuh kaing nyiiex bwan: khankix, mawh pa tawx tix kah daux krax pa shiao khunhawkham khaing: keen: pa pon koh kah piang baoh haktiex toi: rawm: klawng: plak klip singaix; in: mawh pa tawx tix dom: mawx dom: an: kah pwi inkix, sonsang ang kix lai laux kah kaing jhaw: heue.
Mai pa mawh can ceu pa lo kix, kawn: moi iak, yung: mhaing:, mai kawn: yung: khankix, son krax tan pa gleeing cie Siyiex raoma:, nghox ca, kih, rawm: plix siiet, mai bee khankix, awm: been pa hoik tat cub cao: giex kaing: li pa ot kah daux veng Yerusaliem khankix, tawx kah kix tix ngaix hoik tix ngaix paw kieh jud heue.
Son tag sang appong: kix tix tan krax tan pa sioe: bhawng: kah Siyiex raoma:, mai rawg bwan: kah son ju khunhawkham mai kawn: simex nawh khankix heue.
Aux baox deeh tawx lox tix, phan: pwi tix kauxkaux tieh loh kah lox in:, teei khaox rong: nyiiex nawh tix gawng: mai tag teue: nawh mai kieh nyiiex nawh mawh pum: aing: moi kheu jao grawng: in: heue.
Phan: khunhawkham tix kauxkaux ang ah, mai can pwi pa sau: taix tix sonsang tieh loh kah ceu an: ang ah, mai sonsang yuh pa laux pa leeing: kah nyiiex bwan: Siyiex pa koe: kah daux veng Yerusaliem in:, mai kieh Siyiex pa yuh min: ceukaux Cao: Tix ot tan: yuh kix lauxleeing: heue. Aux Darix hoik tawx lox in:, kieh mawh pa yuh tix phai phai: heue.
Grawng: Hoik Nyiiex Bwan: Mai Pa Appong:
Khaix an: Tatenie cao: kaing: ting pa kwang: baoh haktiex plak toi: rawm: plak klip singaix, Shetabozannie mai paox pie kiex khankix, hoik sau: riang sau: rao tix yuh kaing in: phai phai: awm: lox pa hoik tawx khunhawkham Darix heue.
Mawh kheu nan: kuad song: nong: yu pwi Yudax khankix hoik sum: nyiiex bwan: mhawmmhawm:, awm: gumlox pa hoik grux sidiex cao: jhai: Hagie, mai Tekhariyax kawn: simex Ido khankix heue. Mai kix hoik sum: mai yuh ankix hoik khawm: uik, awm: gumlox pa hoik tawm: Siyiex ceu pwi Isarilax, mai lox tawx khunhawkham Kurux mai khunhawkham Darix mai Atazarit khunhawkham haktiex Pasha heue.
Yamin: nyiiex bwan: hoik sum: tix kah daux khix Adarax loe: ngaix daux num kwang: khunhawkham Darix kah haktiex liah num tix num heue.
Khaix an: kawnpraix ceu pwi Isarilax mai cao: giex kaing: li pwi Lewix, mai doeh simie ceu cat pa kawn deuk khaing: krax pa giex pa laung tix khankix, yuh pwie pa appong: nyiiex bwan: Siyiex, tau mai krax gauxrhawm: gauxrhi: tix heue.
Mai kix krax tan pa appong: nyiiex bwan: Siyiex in:, kah moi mhaing: tiyieh mu:, khawm: krax tan pa pluat ploi: phimap kah son ceu pwi Isarilax khankix kah pex mhaing: kao: ra: mu:, awm: koe: carang doeh simie ceucat pwi Isarilax khankix heue.
Kix hoik yaog tix deuh cao: goex kaing: li mai pwi Lewix khankix awm: pa tang: koe: cub caw: kix kah son kaing jhaw: Siyiex kah daux veng Yerusaliem, awm: pa hoik tiem: tix deuh kah daux phuk lai Mose heue.
Grawng: Yuh Pwie Pasakha (Pwie Luat Luan)
Mai cub doeh doe simie ceucat can pa giex pa laung tix khankix hoik yuh pwie Pasakha kah daux khix tix kao: pon: ngaix heue.
Cao: giex kaing: li mai Lewix khankix hoik kieh tokaux tix singax singeh khawm: uik, mai kix pah kawn: yung: iak pwie Pasakha son doeh simie ceucat pwi pa giex pa laung khawm: uik, mai son puxaik kix pa mawh cao: giex kaing: li khankix mai son tokaux cao: kix heue.
Khaix an: kawnpraix ceu pwi Isarilax khankix; pa deeh ing: khaing: krax pa giex pa laung tix, mai pwi pa hoik tang: tiah tokaux tix khaing: ceu pa seeing: pa brai: ceu pwi baoh haktiex ankix sonsang sawg kix kah Simiang Siyiex ceu pwi Isarilax kix hoik ih pwie Pasakha tau heue.
Mai kix gauxrhawm: gauxrhi: yuh pwie khaomuun pa ang sau: susaix, aliah singaix; mawh kheu Simiang Siyiex kieh kix gauxrhawm: gauxrhi: mai kieh rhawmrhi: khunhawkham Asurix deeh veeh tix hoek kah plak kix, sonsang tuk taix yaing caong kix mai koe: riang rao tix yuh kaing jhaw: nyiiex bwan: Siyiex, pa mawh Siyex ceu pwi Isarilax heue.
Grawng: Hoek Ezarax Kah Veng Yerusaliem
Yamin: khaix hoik ceu inkix, kah daux bawg yam kwang: Atazerit khunhawkham Pasha kah haktiex, Ezarax kawn: simex Serayax pa mawh kawn: simex Azarix, kawn: simex Hilakhix.
Hilakiyax mawh kawn: simex Shalum, Shalum mawh kawn: simex Tadok, Tadok mawh kawn: simex Ahitup,
Ahitup mawh kawn: simex Amariyax, Amariyax mawh kawn: simex Azariyax, Azariyax mawh kawn: simex Merayok,
Merayok mawh kawn: smiex Tarahiyax, Tarahiyax mawh kawn: simex Awzi, Awzi mawh kawn: simex Bukhix,
Bukhix mawh kawn: simex Abishu, Abishu mawh kawn: simex Phinehiet, Phinehiet mawh kawn: simex Elaza, Elaza mawh kawn: simex Arun pa mawh cao: giex kaing: li pa ting heue.
Ezarax in: hoik hoek khaing: Babulon; mai nawh mawh cao: pa min: kah lai lox tat jhawm: prawng pa hoik tawx Siyiex ceu pwi Isarilax kah Mose heue. Khunhawkham hoik cu tix tawx pa mhaing: nawh khankix kah nawh, mawh kheu hoik koe: plawng: taix Simiang Siyiex kah piang nawh heue.
Kawnpraix ceu pwi Isarilax khankix tiblah, pa mawh cao: giex kaing: pwi Lewix, cao: pa ah lai rhax, cao: pau siviex, mai cao: pa kham: geu: tix yuh kaing nyiiex bwan: Siyiex khankix hoik hoek kah veng Yerusaliem, baux yam kwang: khunhawkham Atazarit kah daux haktiex aliah num heue.
Mai Ezarax hoek kah veng Yerusaliem daux khix phwan:, baux num kwang: khuhawkham kah haktiex aliah num tix num heue.
Kah daux khix tix tix ngaix nawh jah krax tix khaing: veng Babulon, mai kah daux khix phwan: tix ngaix nawh hoek kah veng Yerusaliem, mawh kheu hoik koe: plawng: taix mhawm: Siyiex kah piang nawh heue.
Grawhgrawng: nawh Ezarax hoik but rhawmrhi: tix sawg gumlox tat jhawm: prawng Simiang Siyiex mai sonsang hawt yuh, mai sonsang gau tix gumlox beenli mai lox tat jhawm: prawng pa deuh tix khankix kah daux ceu pwi Isarilax heue.
Grawng: Lai Tiem: Atazerit kah Ezarax
In: mawh bua: lai pa tiiem: khunhawkham Atazerit tix tawx kah cao: giex kaing: li pa mawh cao: pa tiiem: lai mai pa min: kah gumlox pingnyap Simiang Siyiex mai kah gumlox beenli Nawh Cao: pa hoik tawx kah ceu pwi Isarilax khankix;
khaing: Atazerit pa mawh khunhawkham piang khunhawkham khankix, tawx hoek kah cao: giex kaing: li Ezarax, pa mawh cao: tiem: lai pa min: kah gumlox tat jhawm: prawng Siyiex meung raoma: tix kaux, kieh pa nhim: pa grum naog koe: kah piang maix hu: sivoe ngai: heue.
Aux tawx lox tix kah can pwi Isarilax khankix, mai cao: giex kaing: li mai pwi Lewix pa ot kah daux meung haktiex aux khankix, pa tang: koe: rhawm: koe: rhi: tix hu: kah veng Yerusaliem khawm: uik, tag pon tix hu: tau mai maix heue.
Khunhawkham mai cao: tawx krax keud krax sawn: nawh khankix aliah kaux hoik ploi: maix hu:, sonsang chawkcheng: kah grawng: haktiex Yudax mai veng Yerusaliem, tau mai gumlox tat jhawm: prawng Siyiex maix pa koe: kah daux tawm: taix maix khankix,
mai baox teei maix viex mau khri: an: khankix, pa koe: rhawmrhi: khunhawkham mai cao: pa tawx krax krax sawn: nawh khankix tix tan kah Siyiex ceu pwi Isarilax, pa ot kah daux veng Yerusaliem,
tau mai mau mai khri: pa pon maix khaing: baoh haktiex Babulon khankix, mai khawm: krax tan krax lu pa koe: rhawm: pwi mai cao: giex kaing: li khankix tix tan, kah son nyiiex cao: kix kah daux veng Yerusaliem;
mawh kheu nan: yamin: maix teei mau in: mai nied tix liag moi mhaing:, yung: mhaing:, mai kawn: yung: iak khankix tau mai krax tan phawng: nghox ca im:, mai khawm: kax pa nyaux khankix, mai tan ceu an: kah piang khu: dee tan nyiiex bwan: Siyiex daux veng Yerusaliem heue.
Mai kah can mau khri: pa kawn deuk khankix aix mai puxaik maix khankix mhawm: tix yuh kah mawx son pex yuh ceu ankix awm: pa koe: alo Siyiex pex heue.
Mai son kraung shiao son kaing jhaw: nyiiex bwan: Siyiex pa hoik ap kah maix, teei maix tawx khankix khawm: uik kah plak sivoe Siyiex daux veng Yerusaliem heue.
Mai can ceu pa kawn lo khankix son nyieax bwan: Siyiex maix, mai pa kawn sang caw: maix tix liag khankix, teei tix tawx khaing: daux krao: sinngao cie khunhawkham heue.
Mai aux pa mawh khunhawkham Atazerit tawx lox tix kah cao: pa priex sinngao khankix, pa ot kah baoh haktiex toi: rawm: klawng: plak klip singaix khawm: uik, tag tawx can ceu pa mhaing: cao: giex kaing: li Ezarax cao: tiem: lai pa min: kah gumlox tat jhawm: prawng Simiang Siyiex meung raoma:, kieh pex khre: tix tawx phai phai:,
tom: hoek mee: tiyieh talantan mau, mai gaox nghox ca tiyieh kawrax, khawm: rawm: plix shiiet khankix tiyieh bat, mai rawm: bee tiyieh bat, khawm: kih pa ang lai simin heue.
Can ceu pa hoik tawx Siyiex meung raoma:, kieh mawh pa coca: tix yuh grum naog mhawmmhawm:, son nyiiex bwan: Siyiex meung raoma: heue. Yuh kah mawx lai sang kieh krax songrhawm: songrhi: hoek kah piang khunhawkham mai kah piang meung haktiex khunhawkham khawm: doeh kawn: simex nawh khankix yuh kah mawx lie?
Aux baox krai mai kieh pex tawng ang lai mawh pa khaw: kah daux been sonsang koh tix keen:, mai mau gawng, mai ngawh gha: khankix kah cao: giex kaing: li pwi Lewix khankix, mai cao: pa ah lai rhax, cao: pa pau siviex, pa khaw: tix yuh kaing son nyiiex bwan: mai pwi cau son nyiiex bwan: Siyiex heue.
Mai maix pa mawh Ezarax eue, pa hoik tawx Siyiex cuyi: pingnya kah maix, maix tag yaog tix deuh cao: prawng see:, mai cao: tat see:, mai cao: pa kwang: kah baoh haktiex toi: rawm: klawng: plak klip singaix khawm: uik, kah can pwi pa tawng kah gumlox tat jhawm: prawng Siyiex maix, mai gau kah can pwi pa ang nyang tawng kah ceu ankix heue.
Can pwi pa ang hawt yuh awm: gumlox tat jhawm: prawng Siyiex maix, mai kah lox tawx khunhawkham khankix, kieh nied tix prawng ca: kah piang nawh, kah daux pa pah yum: ang ah, krax pa grheu: lih ang ah, krax pa rhim: tix teei kraung khankix ang ah, krax pa laung kah daux thawng: ang ah heue.
Kieh krax pa yaogyaw bwanson: Simiang Siyiex keeing: ex khankix, pa hoik sau: tix deuh pa awm: in: kah daux rhawmrhi: khunhawkham sonsang sum: nyiiex bwan: Simiang Siyiex pa koe: kah daux veng Yerusaliem mhawm: grang,
mai hoik pon krax pa caoxrhawm: kah plak sivoe khunhawkham mai cub cao: tawx krax keud krax sawn: nawh khankix, mai kah plak sivoe cub cao: kaing: naing ting khawm: uik pa ot greem: tawm: taix khunhawkham heue. Mawh kheu nan: aux hoik koe: riang koe: rao, awm: hoik koe: plawng: taix Simiang Siyiex kah piang aux, mai aux hoik kraix khrawm: cao: kaing: ting pwi Isarilax khankix lih hu: tau mai tix heue.
Nyiiex Ma: Cao: Kaing: Khankix Pa Deeh Ing: Tau Mai Ezarax
In: mawh cub nyiiex ma: cao: kaing: khankix, mai doeh simie ceucat, kix pa hoik lih hu: tau mai aux khaing: veng Babulon kah baux yam kwang: khunhawkham Atazerit.
Khaing: daux cub kawnpraix Phinehiet khankix mawh Gerashom mai khaing: cub kawnpraix Itama khankix mawh Danyelax mai khaing: cub kawnpraix Davit khankix mawh Hatux.
Khaing: cub kawnpraix Shekhanix daux doh doeh Parot khankix mawh Zekharix mai pa rom carang tix tau mai nawh khankix koe: simex tiyieh tiphwan: kaux.
Khaing: daux cub kawnpraix Pahatmobax mawh Elihonie kawn: simex Zerahiyax mai simex pa rom tix tau mai nawh ra: yieh kaux;
khaing: daux cub kawnpraix Shekhanix mawh Yahazilax mai simex pa rom tix tau mai nawh loe: yieh kaux;
Khaing: daux cub kawnpraix Adin, mawh Ebiet kawn: simex Yawnasan mai simex pa rom tix tau mai nawh mawh tiphwan: kaux;
Khaing: daux cub kawnpraix Elam, mawh Yeshayax kawn: simex Ataliyax, mai simex pa rom tix tau mai nawh atiglaih kaux;
Khaing: daux cub kawnpraix Shephatiyax, mawh Zebadiyax kawn: simex Mikhalax, mai simex pa rom tix tau mai nawh tidaix kaux;
Khaing: daux cub kawnpraix Yobax, mawh Obadix kawn: simex Yehelax, mai simex pa arom tix tau mai ra: yieh kao: daix kaux;
Khaing: daux kawnpraix Shelomit, mawh Yoshiphin, mai simex pa rom tix tau mai nawh tiyieh tigliah kaux;
Khaing daux cub kawnpraix Bebie, mawh Zakharix. Kawn: simex Bebie, mai smex pa rom tix tau mai nawh tinga: daix kaux;
Khaing: daux kawnpraix Azagat, mawh Yohanan kawn: simex Hakatan, mai simex pa rom tix tau mai nawh tiyieh kao: kaux;
Khaing: cub kawnpraix ghoik Adonikam, ceukaux mawh inkix Elipheliet, Yoelax, mai Shemayax mai smex pa rom tix tau mai kix tigliah kaux.
Khaing: daux kawnpraix Bigavie, mawh Utie, mai Zabuk, mai simex pa rom tix tau mai kix atigliah kaux.
Kawncau Mausoi: Son Nyiiex Bwan:
Yamin: aux kraix khrawm: kix hoek kah hawt rawm: klawng: pa lih hu: plak veng Ahava, mai kix bang: tix ot tan: loe: singaix heue. Aux hoik jhak kah sinax pwi mai daux sinax cao: giex kaing: li khankix, mai ang yaox kah cub kawnpraix pwi Lewix khankix tan heue.
Khaix an: aux kok kah cao: kaing: khankix pa mawh Eliaza, Arelax, Shemayax, Elanatan, Yarip, Elanatan, Natan, Zakharix, mai Meshulam, mai khawm: pwi pa koe: krax tawng krax yung khankix pa mawh Yoyarip mai Elanatan hoek kah tix heue.
Mai aux tawx lox kieh kix hu: Ido pa mawh cao: kaing: ting kah dauh dee pa mawh veng Khasiphia, mai tawm: grawng: pa sang caw: kix tix krai kah Ido mai puxaik nawh khankix pa mawh pwi kham: tix yuh kaing son nyiiex bwan: Siyiex, kah dauh dee ot kix kah daux veng Khasiphia, son tag sang viex kix kawncau mausoi: an: khankix hoek kah yix, son nyiiex bwan: Siyiex ex heue.
Khaix an: kah daux bwanson: siawpsibrawm plawng: taix Siyiex kah piang ex, kix viex pwi tix kaux pa koe: krax tawng krax yung, pa kaoh khaing: kawnpraix Mahali kawn: simex Lewix pa mawh kawnpraix ceu pwi Isarilax mai pa kok ceukaux mawh Sheribix tau mai kawnpraix nawh khankix, mai puxaik kix kao: daix kaux;
mai Hashabix tau mai Yeshayax khaing: kawnpraix Merarix khawm: puxaik nawh khankix mai cub kawnpraix kix tinga: kaux;
ma: pwi pa kham: tix yuh kaing nyiiex bwan: Siyiex khankix, pa hoik yaog Davit mai cao: kaing: cao: kap khankix tix deuh beeh glawm: son kaing jhaw: ceu pwi Lewix khankix ra: yieh tinga: kaux, kix khawm: uik hoik mawh pa tiiem: tix deuh ceukaux heue.
Twah Pa Ih Pa Un: Mai Rawg Bwan:
Yam an: aux krai pao: sonsang twah kah pa ih pa un: kah hawt baoh rawm: klawng: Ahava tan:, sonsang tiem rhawm: tiiem rhi: ex kah plak sivoe Siyiex ex, sonsang sawg ex krax pa rauh pa see khaing: kah daux Nawh Cao: son ex, mai son kawnpraix ex khankix mai son kraungkhrai: sinngao cie ex khawm: uik heue.
Grawhgrawng: nawh aux kaig tua kah mhaing: tix krax teem: kah khunhawkham pa mawh pwi naing mai pwi naing brung khankix sonsang tiebtie kix ex khaing: daux krax daux laux khaing: pwi koeng, mawh kheu hoik krai ex lox yuh nin: kah khunhawkham, "Siawpsibrawm plawng: taix Siyiex koe: kah piang ex can pwi pa sawg kah pa mhawm: Nawh Cao: mai krax songrhawm: songrhi: Nawh Cao: koe: kah piang pwi pa tik vud kah Nawh Cao: heue.
Mawh kheu nan: ex hoik twah pa ih pa un: hoik khyox khaw: grawng: in: kah Siyiex ex, mai Nawh cao: hoik pawk lox rawg ex bwan: heue.
Khawngphak Son Nyiiex Bwan:
Khaix an: aux laug tix deuh cao: giex kaing: li pa ting kao: ra: kaux, pa mawh Sherebix, Hashubix, mai khawm: puxaik kix khankix kao: kaux,
mai hoik ciang tix tawx mau mai khri: khawm: kraung pa shiao khankix, kah kix pa mawh pa tan pa lu son nyiiex bwan: Siyiex ex, pa hoik tan khunhawkham mai cao: pa tawx krax keud krax sawn: nawh khankix khawm: cao: kaing: ting greem: nawh khankix, mai pwi Isarilax khankix pa ot tan: khawm: uik heue.
Pa hoik ciang aux tix tawx kah daux tawm: taix kix mawh mau liah yieh tiphwan: talantan, mai kraung mau khankix tiyieh talantan, mai khri: khankix tiyieh talantan,
pan khri: tinga: mu:, pa sidu cien mai plah khri: tix rheng: plah, mai kawk nyaux ra: mu: pa yuh tix kah tawng pa mhawm: plang: mai pa kied koe: ngawh koe: jum awm: khri: khankix heue.
Mai aux ah nin: kah kix, "Pex mawh pa singax singeh son Simiang Siyiex; kraung shiao khankix kawx mawh pa singax singeh, mai mau khankix kawx mawh pa tan pa lu kah daux pa koe: rhawm: koe: rhi: tix kah son Simiang Siyiex keeing: pex heue.
"Yuh satix mai pau tix jhak tom: sidauh hoik ciang maix tix tawx kah plak sivoe cao: giex kaing: li pa ting mai pwi Lewix khankix, mai cao: kaing: cao: kap nyiiex ma: ceu pwi Isarilax khankix, kah daux lawg nyiiex bwan: Simiang Siyiex pa koe: kah daux veng Yerusaliem heue."
Mawh kheu nan: cao: giex kaing: li mai pwi Lewix khankix, hoik rieb kah mau mai khri: mai khawm: kraung shiao khankix pa hoik ciang tix, sonsang viex ankix hu: kah nyiiex bwan: Siyiex ex kah veng Yerusaliem heue.
Pa Deeh Ing: Kah Veng Yerusaliem
Khaix an: ex hoik lih khaing: rawm: klawng: Ahava kah daux khix tix kao: ra: ngaix, sonsang hu: kah veng Yerusaliem heue. Mai siawpsibrawm plawng: taix Simiang Siyiex ex koe: kah piang ex, mai Nawh Cao: taoh ex khaing: tawm: taix pwi koeng mai khaing: pwi jawm khankix hawt krax laux heue.
Mawh kheu nan: ex hoik hoek kah veng Yerusaliem mai ot tan: loe: singaix heue.
Yam hoek kah daux pon: ngaix tingaix, mau khri: mai kraung shiao can pa hoik viex ex hoek mai tix khankix, hoik ciang tix kah daux nyiiex bwan: Siyiex ex, mai tawx kah taix Meremot kawn: simex cao: giex kaing: li Uriyax mai Eliza kawn: simex Phineniet pa ot tau mai nawh tan:, mai pwi Lewix khankix pa mawh Yozabat kawn: simex Yawsux mai Nodix kawn: simex Binnui khankix hoik koe: tau mai kix.
Kah daux singaix an:, kix simin tix ciang can pa koe: ceu mai tiem: tix deuh kah daux carang khawm: uik heue.
Can pwi pa hoik deeh hoek khaing: hoik giex hoik laung tix khankix, hoik tan krax tan pa gleeing tix khankix kah Siyiex eu pwi Isarilax, kah moi mhaing: kao: ra: mu:, son ceu pwi Isarilax khawm: uik, mai yung: mhaing: tidim: liah mu:, mai kawn: yung: iak atigliah aliah mu:, mai khawm: pex mhaing: khankix kao: ra: mu:, son krax tan pa pluat ploi: phimap, in: khawm: uik mawh krax tan pa gleeing son Simiang Siyiex heue.
Mai kix ap lox tawm: khunhawkham kah pwi tang: tokaux khunhawkham mai kah cao: pa kwang: haktiex khankix kah baoh haktiex toi: rawm: klawng: plak klip singaix khankix heue. Mawh kheu nan: kix hoik tawx krax teem: krax coi kah pwi khankix mai kah nyiiex bwan: Siyiex heue.
Grawng: Teei Mex Teei Moeng Mai Pwi Tang: Ceu
Khaix hoik grawng: ceu inkix, cub cao: kaing: cao: kap khankix hoek kah aux mai ah nin:, "Pwi Isarilax khankix mai cao: giex kaing: li mai pwi Lewix khankix ang nyang pon tang: tiah tix khaing: pwi haktiex baoh an: khankix, tau mai krax pa seeing: pa brai: ceu pwi Khannan, ceu pwi Hitix, ceu pwi Perazix, ceu pwi Yebutix, ceu pwi Amawnix, ceu pwi Mawbax, ceu pwi Ejiptux mai ceu pwi Amawrix khankix heue.
"Mawh kheu kix hoik teei tix moeng kawn: bun: kix tiblah son tokaux tix mai son kawn: simex tix khankix, sonsang lai laig kix simie pa singax singeh tix tau mai pwi pa ot kah daux haktiex an: khankix heue. Taix cao: kaing: cao: kap mai cao: kwang: haktiex khankix hoik grux yuh pa phit pa lud in: heue."
Mawh kheu nan: yam mhong: aux grawng: ceu in:, aux riah kraung ceep tix mai sibex lang: jung tix, mai aux reeig hauk kaing: hauk bheup tix khankix tiblah, mai ngawm kah daux pa daox am: tix heue.
Khaix an: pwi kukaux pa sikua kah: gumlox Siyiex ceu pwi Isarilax, hoik deeh kraix khrawm: tix hoek kah aux, kheu pa phit pa lud yuh pwi ankix pa hoik veeh tix hu: mawh pa giex pa laung, mai ngawm kah daux pa daox pa am: tix tom: hoek bawg yam appong: tix krax tan plak bo heue.
Yam hoek bawg yam pa appong: krax tan plak bo; aux yaog tix kaoh khaing: pa twah tix pa ih pa un:, mai kraung hoik griah tix khawm: sibex lang: jung tix, aux grux ngawng tix mai yaog taix tix kah Simiang Siyiex aux,
mai ah nin:, "Siyiex aux eue, aux kied kaig mai laux min: plakngai: ang lai pon yaog ngai: baoh tix kah Maix Siyiex aux heue. Mawh kheu pa phit pa lud yuh yix, hoik kheem: kah piang kaing: cao: yix, mai phimap phighram: yix hoik cux kah daux raoma: heue.
"Jah baux singaix ju keeing: ex khankix tom: hoek kah daux in: singaix, ex hoik kied koe: pa phit pa lud, mawh kheu phimap phighram: ex, khunhawkham ex khankix, khawm: cao: giex kaing: li ex khankix, mawh pa hoik ap tix kah daux taix khunhawkham haktiex tang: dauh khankix, krax pa yum: krax pa giex pa laung, krax pa tud pa rhim: mai pa laux min: plakngai:, awm: pa koe: ceu inkix daux singaix heue.
"Mai yamin: daux tivud ticu, bwanson: siawpsibrawm Simiang Siyiex hoik jhi: tix kah ex kawn: kieh ex deuk mai glawd tiblah, mai hoik tawk ex awm: jim: kaux cong: dee pa singax singeh Nawh Cao:, mai Siyiex tag kieh ngai: ex riang mai deeh tawx ex pon toek bhawm: tix khaing: dee pa kham: ex tix mawh siliex heue.
Mawh kheu ex hoik mawh siliex, viang mawh nan: Siyiex ang nyang tik vud kah ex, khaing: dee pa kham: ex tix mawh siliex; mawh kheu nan: Nawh Cao: kawn: kieh ex pon krax pa caoxrhawm: caox rhi: kah plak sivoe ngai: khunhawkham haktiex Pasha sonsang deeh kieh ex im: ju, mai deeh sum: kah nyiiex bwan: Siyiex ex, mai sonsang deeh cox ex kah dee pa laux khankix, sonsang tawx ghux veng dee peung ex daux haktiex Yudax veng Yerusaliem heue.
Mai yamin: Siyiex eue, yix kawn: koe: ceu pa ah khaix in: lie? mawh kheu yix hoik tik vud kah gumlox ping nyap Maix khankix,
Pa hoik tawm: Maix Cao: kah kawncau cao: jhai: Maix khankix, pa ah nin:,haktiex pa sang hu: laig maix teei tix cie mawh haktiex pa kheeing: pa brai:, kheu pa seeing: pa brai: pwi haktiex an: khankix, jah kah daog haktiex plak in: tom: hoek kah daog haktiex plak an: hoik naog kah pa seeing: pa brai: kix heue.
Mawh kheu nan: paw doh tawx kawn: bun: pex khankix mawh moeng kawn: simex kix, mai paw doh teei kawn: bun: kix mawh moeng kawn: simex pex, mai paw doh sawg krax pa nhim: kix mai krax pa mag pa mi kix, sonsang pon pex pa koe: riang koe: rao mai sonsang pon yaox pex tix ih ceu pa mhawm: khaing: haktiex in: mai prah ankix, mawh sinngao kah son kawnpraix pex khankix leeing ju awawx
Mawh kheu kaing pa caox pa caig mai pa phit pa lud ting yuh ex, ex tom: yaox tix kham: geu: yuh nin:, viang Siyiex ciyang kah ex kawx, kawn: lheu: iak khaing: phimap phighram: pa caw ex tix kham: geu:, mai hoik tawx ex pon krax pa taoh awm: in:,
ex kawn: sang deeh baox phit kah gumlox pingnyap Maix Cao: khankix, mai teei mex teei moeng tau mai pwi pa seeing: pa brai: inkix yuh kah mawx lie? Mawh ang Maix Cao: songrhawm: songrhi: kah yix tom: hoik yuh Maix Cao: yix lauxleeing: , son ang pwi pa kawn deuk lai koe: pa kawn glawd lai koe: tix kaux kawx lie?
Simiang Siyiex Isarilax eue, Maix Cao: mawh pa rauh pa see, yix pa mawh pwi pa kawn deuk tom: yaox tix glawd tom: hoek kah daux in: singaix, yix ot kah plak sivoe ngai: Maix Cao: tin:, tau mai pa koe: phimap phighram: tix, mawh kheu nan: ang koe: pwi pa pon cung tix ot kah plak sivoe ngai: Maix Cao: kheu jao in: heue."
Grawng: Tik Moeng Pa Mawh Bun: Tang: Ceu Mai Kawnpraix Khankix
Glang: yam kawn: rawg Ezarax bwan: mai glang: yam kawn: khyox khaw: nawh mai yiiem khawm: roik rawm: ngai: tix, gup tix kah plak sivoe ngai: nyiiex bwan: Siyiex, cub pwi hun: khaing: ceu pwi Isarilax pa mawh simex , bun: mai kawn: nyawm khankix, kraix khrawm: paox tix hoek kah nawh, mai yiiem khawm: tug rhawm: tix sigrien sigre heue.
Mai Shekhanix kawn: simex Yeshelax pa kaoh khaing: daux cub kawnpraix Elam khankix tix kaux, mai ah nin: kah Ezarax, "Ex hoik phit hoik lud kah Siyiex ex, mai hoik teei tix moeng pwi tang: ceu tang: cat khaing: daux pwi haktiex an: khankix; viang grawng: in: koe: yuh nin: kawx krax keud pot jun pot kawn: koe: kah daux ceu pwi Isarilax heue.
Mawh kheu nan: kieh ex yuh sijax mukheu tau mai Siyiex ex yamin:, sonsang pon tik ex cub bun: inkix khawm: uik, mai kawnpraix pa keh khaing: kix, awm: krax keud krax sawn: pa hoik tawx cao: simiang ex, mai khawm: can pwi pa hoik lhat hoik graung kah gumlox pingnyap Siyiex ex khankix, mai yuh ankix awm: pa koe: lox tat jhawm: prawng heue.
"Kaoh heue, in: mawh grawng: beeh glawm: maix heue. yix tag ot tau mai maix. Kieh koe: pa kua: rhawm: kua: mai yuh tix an: heue."
Khaix an: Ezarax yaog tix kaoh mai kieh cao: kaing: cao: kap cao: giex kaing: li mai pwi Lewix khankix, mai pwi Isarilax khankix, tiextu sonsang hawt yuh kix awm: gumlox in: heue. Mawh kheu nan: kix hoik tiextu kah heue.
Khaix an: Ezarax yaog tix kaoh khaing: plak sivoe nyiiex bwan: Siyiex, mai hu: laig kah daux lawg Yehohanan kawn: simex Eliaship; mai yam hoek nawh tan, nawh ang ih khaomun mai ang nyaux rawm:, mawh kheu nawh hoik ngia mai khirhawm: kheu jao son phimap phighram: pwi pa kaoh khaing: pa giex pa laung heue.
Mai kix tawx lox hu: kah daux haktiex Yudax mai kah veng Yerusaliem son doeh simie ceucat pa deeh giex hoek khaing: pa giex pa laung khawm: uik, sonsang kraix khrawm: kix hoek kah daux veng Yerusaliem,
mai can pwi pa ang hoek kah daux loe: singaix, awm: lox pa hoik tat cao: kaing: cao: kap mai kuad song: nong: yu khankix, mai rhim: kraungkhrai: sinngao nawh khawm: uik, mai gwieh tokaux nawh lih khaing: cub pwi hun: pa hoik kaoh khaing: pa giex pa laung tix heue.
Mawh kheu nan: cub simex ceu pwi Yudax mai Binyamin khawm: uik, khrawm: paox tix kah veng Yerusaliem daux loe: singaix heue. Ngaix an: mawh khix dim: tinga: ngaix; mai pwi khawm: uik ngawm tix ot kah daux bing: pak sivoe nyiiex bwan: Siyiex, tau mai sikua lhat tix kheu jao grawng: in: mai kheu kied ting lhiex heue.
Khaix an: cao: giex kiang: li kaoh cung mai ah nin: kah kix, "Pex hoik koe: krax phit krax lud kheu hoik teei tix moeng bun: pwi tang: ceu tang: cat mai pex hoik nie thie: phimap phighram: kah piang ceu pwi Isarilax khankix heue.
"Mawh kheu nan: khyox khaw: kah Simiang Siyiex keeing: pex yamin:, mai yuh awm: lox Nawh Cao:; mai gwieh tokaux pex khaing: pwi haktiex an: mai khaing: moeng pwi tang: ceu tang: cat khankix heue."
Khaix an: cub pwi hun: khawm: uik, deeh pawk lox pa kied ting mai ah nin:, "Mawh heue, ex tag sang yuh awm: lox hoik tat maix heue."
Viang mawh nan: pwi kawn: koe: tom: nie; mai kawn: mawh bawg yam ting lih lhiex, mai ex ang nyang pon hu: cung plak praix heue. Mai in: ang tie mawh pa chix hoik daux tix ngaix ra: ngaix, mawh kheu jao kawn: kied nie koe: pa phit pa lud ex kah grawhgrawng: in: heue.
Yuh bwanson: kieh cao: kaing: cao: kap khaing: daux cub pwi hun: ex khawm: uik ot tan:; mai kieh pwi pa ot kah daux veng ex, pa teei tix moeng pwi tang: ceu tang: cat khankix hoek bleeh kah daux bawg yam pa hoik tat tix deuh, tau mai kuad song: nong: yu khankix khaing: daux veng cao: kix, tom: hoek bawg yam hoik luan pa kied kin: songrhawm: songrhi: Siyiex ex khaing: ex kah son grawng: in: heue."
Mawh ngie Yawnasan kawn: simex Asahelax mai Yahaziyax kawn: simex Tikavax pa kieh pa thiang: kah grawng: in:, mai Meshulam mai Shabethie pa mawh pwi Lewix khankix pa hoik joh jhan: kah kix heue.
Khaix an: cub doeh simie ceucat pwi pa giex pa laung khankix hawt yuh awm: an: heue. Mai cao: giex kaing: li Ezarax tau mai cao: kaing: cao: kap doeh nyiiex ma: keeing: nawh khankix, hoik mawh pa tang: gwieh nawh tix deuh awm: pa koe: doeh nyiiex ma: keeing: nawh khankix, kah daux ceukaux kix kukaux, mai kix ngawm cied tix yaox grawng: an: khix kao: tix ngaix heue.
Yam hoek khix tix tix ngaix kix hoik cied kah pwi, pa hoik teei tix moeng bun: pwi tang: ceu tang: cat khankix heue.
Grawng: Tik Kah Moeng Pwi Tang: Ceu Tang: Cat
Kah daux sinax cub kawnpraix cao: giex kaing: li khankix pa hoik teei tix moeng bun: pwi tang: ceu tang: cat khankix hoik yaox awm: in: plak greem:, khaing: daux cub kawnpraix Yawsux kawn: simex Yozadak mai pux nawh pa mawh Maseyax, Eliaza, Yarip mai Gedaliyax khankix heue.
Mai kix hoik kham: sijax mukheu son tag sang tik kix moeng tix khankix mai pa hoik phit hoik lud tix, kix hoik teei tix tan yung: mhaing: tix mu: khaing: daux cub yung: son phimap pa hoik phit hoik lud kix heue.
Khaing: daux cub kawnpraix Imerax, pa mawh Hananix mai Zebadix,
khaing: daux cub kawnpraix Harim, pa mawh Meseyax, Eliyax, Shemayax, Yehelax, mai Uziyax khankix;
khaing: daux cub kawnpraix Pashurax, pa mawh Elionie, Maseyax, Ishamelax, Natanelax, Yozabat mai Elasa khankix heue.
Khaing: daux cub pwi Lewix, tom: mawh Yozabat, Shimi, Kelayax, pa mawh Kelata, Petahiyax, Yudax, mai Eliaza khankix heue.
Khaing: daux cub cao: pa ah lai rhax, tom: mawh Eliaship, khaing: daux cao: pa pau siviex, tom: mawh Shalum, Teliem, mai Urix khankix heue.
Mai pwi tang: kaux ceu pwi Isarilax, pa kaoh khaing: kawnpraix Parot pa mawh Ramix, Yezix, Malakhix, Miyamin, Eliza, Malakhiyax mai Benayax khankix;
khaing: daux cub kawnpraix Elam, tom: mawh Matanix, Zakharix, Yehelax, Abadi, Yeramot, mai Elia khankix;
khaing: daux cub kawnpraix Zadux, tom: mawh Elionie, Eliaship, Mataniyax, Yeramot, Zabat mai Azizax khankix;
khaing: daux cub kawnpraix Bebie, tom: mawh Yehohanan, Hananiyax, Zabie, mai Atalie khankix;
khaing: daux cub kawnpraix Banix, tom: mawh Meshulam, Maluk, Adayax, Yashup, Shelax, mai Ramot khankix;
khaing: daux kawnpraix Pahatmobax, tom: mawh Adanax, Khelelax, Benayax,Maseyax, Matanix, Bezalelax, Binnui, mai Manashe khankix;
khaing: daux cub kawn: Harim, tom: mawh Eliaza, Ishiyax, Malakhiyax, Shemayax, Simeon,
Binyamin, Maluk, mai Shemariyax khankix,
khaing: daux cub kawnpraix Hashum, tom: mawh Matenie, Matata, Zabat, Eliphaliet, Yeramie, Manashe, mai Shimix khankix;
khaing: daux cub kawnpraix Banix, tom: mawh Madie, Amaram, Uelax,
Beneyax, Bedeyax, Kheluk,
Vanix, Meramot, Eliaship,
Matanix, Matenie, Yasaw,
Banix, Binnui, Shimix,
Shelemix, Nasan, Adayax,
Makhanadebie, Shashie, Sharie,
Azarelax, Shelamix, Shemarix,
Shalum, Amarix, mai Yosiep khankix,
khaing: daux cub kawnpraix Nebo, tom: mawh Yeyelax, Matitix, Zabat, Zebinax, Yadie, Yolax, mai Benayax khankix heue.
Inkix mawh can pwi pa hoik teei tix moeng bun: pwi tang: ceu tang: cat khankix, mai khaing: daux cub kix tiblah, hoik koe: kawn: simex kawn: bun: tau mai moeng tix khankix heue.
LAI NEHAMIX
(Nehemiah)
Nehamix
Nehamix Rawg Bwan: Son Pwi Nawh Khankix
In: mawh gumlox krai Nehamix kawn: simex Hakhalix heue.Yam kwang: khunhawkham Atazarit haktiex tinga: num tix num kah daux khix Khisalix, mawh yam ot aux kah daux nyiiex haw: veng Shushan,
Yam an: Hananix pa mawh puxaik aux tix kaux, hoek bleeh tau mai pwi khankix khaing: haktiex Yudax; mai aux chawk kix kah grawng: pwi Yudax pa hoik glawd tiblah, mai pa glawd khaing: pa giex pa laung tix khankix mai grawng: veng Yerusaliem heue.
Mai kix ah nin: kah aux, "Can pwi pa glawd khaing: pa giex pa laung khankix, kah daux kien haktiex an:, koe: krax pa kied kharhawm: kharhi: mai kah lox sibriem heue. Guh veng Yerusaliem kawx hoik ghrup, siviex veng khankix kawx hoik proe kah ngu heue.
Mawh kheu nan: yam hoik mhong: aux lox ankix, aux ngawm tix yiiem doe: mai lauxrhawm: lauxrhi: tom: hoik kied rheung: singaix; aux twah pa ih pa un: mai rawg Bwan: kah plak sivoe Siyiex pa ot meung raoma: heue.
Mai aux rawg Bwan: ah nin:, "Simiang Siyiex raoma: Siyiex pa kied ting kied lhaong:, pa koe: siawp sibrwm pa lhat pa graung eue, Maix Cao: mawh pa priex pa jhung: kah gumlox sijax mukheu Tix, mai caoxrhawm: caox rhi: kah pwi ankix pa moh kah Maix Cao: mai pa hawt tix yuh awm: pa koe: gumlox pingnyap Maix Cao: khankix heue.
Yuh bwanson: kieh yhaok Maix Cao: mawh pa nghiiet mai kieh ngai: Maix Cao: mawh pa simi tix jhak, kah lox rawg Bwan: kawncau Maix plak sivoe Maix Cao: yamin: leeing: ngaix leeing: sawm:, son kawnpraix ceu pwi Isarilax, pa mawh kawncau mausoi: Maix khankix, mai aux khyox khaw: krai doh kah grawng: phimap phighram: kawnpraix ceu pwi Isarilax khankix, pa hoik phit hoik lud kah Maix Cao: heue. Cub nyiiex ma: keeing: aux mai khawm: tokaux cao: aux hoik phit hoik lud heue.
Yix hoik yuh ceu pa kied caox kah Maix Cao: mai ang lai priex lai rien kah gumlox pingnyap, mai gumlox beenli mai lox tat jhawm: prawng pa hoik tawm: hoik deuh Maix Cao: kah kawncau Maix Mose heue.
Deeh doh keud doh sawn: kah gumlox pa hoik tawm: Maix Cao: kah kawncau Maix Mose, pa ah nin:, "Phan: pex ang kaux sijax Aux kieh pex prungprang:rai ruat kah daux sinax pwi tang: ceu tang: cat,
viang mawh nan: phan: pex deeh veeh tix hoek kah Aux mai priex tix hawt gumlox pingnyap Aux mai hawt tix yuh ankix, viang pex hoik mawh pa grheu: tix hu: dee pa kied singai khaing: greem: raoma: kawx, Aux tag kraix khrawm: pex hoek khaing: tan:, mai deeh viex pex hoek kah dee pa hoik laug Aux tix deuh, sonsang kaux cong: min: ceukaux Aux heue.
Kix mawh kawncau mausoi: Maix Cao: mai ceu pwi Maix Cao: pa hoik taoh Maix Cao: tix teei kah siawpsibrawm pa kied ting kied lhaong: Maix Cao:, mai riang rao plawng: taix Maix Cao: heue.
Simiang Siyiex eue, yuh bwanson: daong yhaok Maix Cao: nghiiet kah lox bwan: rawg kawncau Maix Cao:, mai lox bwan: rawg kawncau mausoi: Maix Cao: khankix; pa koe: krax lhat krax graung kah min: ceukaux Maix Cao:, mai tawx krax haok hwan: kah kawncau Maix Cao: kah daux in: sigaix, mai tawx kix pon krax pa caoxrhawm: caox rhi:, kah plak sivoe ngai: pwi in: liak." Grawhgrawng: nawh aux hoik mawh cao: pa giex kawk nyaux khunhawkham heue.
Pa Ploi: Nehamix Hu: Kah Veng Yerusaliem
Yam kwang: khunhawkham Atazarit kah haktiex tinga: num tix num kah daux khix Nisan, mai aux teei rawm: plix siiet deuh kah sivoe ngai: nawh mai tawx an: kix kah khunhawkham heue. Glang: kah: in: ang sax koe: krax lauxrhawm: lauxrhi: kah plak sivoe nawh tix bawg kawx heue.
Mawh kheu nan: khunhawkham ah nin: kah aux, "Yuh kah mawh maix ang tie koe: krax saux krax ngia, maix lai kieh ngai: baoh tix ngeem yuh nan: lie? In: ang mawh tidtix, an: hoik mawh pa koe: krax lauxrhawm: lauxrhi: maix heue. " Khaix an: aux hoik koe: krax lhat krax graung,
mai aux deeh ah nin: kah khunhawkham, "Kieh khunhawkham lang: ju lang: phan: heue. Miex hoik lauxleeing: dee koe: simeeig keeing: aux khankix, mai siviex veng khankix kawx hoik gleeing kah ngu, ngai: baoh aux lai ang ngeem yuh kah mawh lie?"
Khax an: khunhawkham ah nin: kah aux, "Mawh sang mhaing: maix ceu patix?" Mawh kheu nan: aux hoik rawg Bwan: kah Siyiex raoma: heue.
Mai aux ah nin: kah khunhawkham, "Phan: an: mawh pa khaw: rhawm: hkkunhawkham mai phan: kawncau maix hoik pon krax pa caoxrhawm: caox rhi: kah plak sivoe ngai: Maix, aux rawg maix ploi: tix hu: kah haktiex Yudax, kah daux veng dee koe: simeeig keeing: aux khankix, sonsang deeh pon cox sum: aux ankix heue."
Yam an: khunhawkham chawk aux ah nin:, Nanghawkham kawx ngawm praok nawh, "Mawh sang rheeng: krax hu: maix miex ghreeng:? Mai sang deeh hoek yam mawx lie? Mawh kheu nan: an: hoik mawh pa khaw: rhawmrhi: khunhawkham sonsang ploi: aux hu:; mai aux hoik tat tix deuh bawg yam kah nawh heue.
Lheu: khaing: an: aux ah nin: kah khunhawkham, "Phan: in: mawh pa khaw: rhawmrhi: khunhawkham tawx aux viex lai son cao: kwang: kien baoh haktiex toi: rawm: klawng: plak klip singaix khankix, sonsang pon tawx kix akhwang: tiang aux tix hu: tom: hoek kah haktiex Yudax,
mai baox tiem: tix tawx lai tix pheen: kah Ashap pa mawh cao: pa pau daux nong: cie khunhawkham son tag sang tawx nawh khaox an: khankix kah aux, pa sang yuh khaox lat siviex tab nyiiex bwan: pa sitoe: tix kah guh veng mai nyiiex pa sang ot aux," awm: koe: plawng: taix pa mhawm: Siyiex kah piang aux, khunhawkham kawx tawx ankix kah aux heue.
Khaix an: aux hu: kah cao: kwang: kien baoh haktiex toi: rawm: klawng: mai plak klip singaix mai tawx lai pa tiiem: khunhawkham kah kix heue. Yamin: khunhawkham ploi: cao: kaing: naing cub kru naing khankix mai pwi naing brung hankix hu: tau mai aux heue.
Yam mhong: Sanbalat ceu pwi Horonix mai Tobix cao: kaing: ceu pwi Amon khankix kah grawng: an:, kix kied sungsang rhawm: kah hoek pwi tix kaux tix sawg tix yuh pa mhawm: son kawnpraix ceu pwi Isarilax khankix heue.
Nehamix Tawx Riang Rao Kieh Pwi Sum: Guh Veng Khraox
Mawh kheu nan: aux hoek kah veng Yerusaliem mai ot tan: loe: ngaix heue.
Khaix an: aux yaog tix kaoh kah daux ponsawm:, mai khawm: pwi tiblah pa ot tau mai aux, mai aux ang krai pwi tix kaux kawx mhong: kah ceu pa sau: Siyiex kah daux rhawmrhi: aux, son kaing pa sang yuh tix kah daux veng Yerusaliem; lheu: khaing: khawng: brie pa brug aux ang lai koe: khawng: brie tang: ceu mai aux heue.
Mai aux lih hu: plak praix daux ponsawm:, kah siviex daux ngawd, mai hoek kah rawm: siyawng mai kah siviex dee tik pwi pa seeing: pa brai: khankix, mai cied tix yaox kah guh veng Yerusaliem pa hoik grhup hoik groing, mai siviex khankix pa hoik gleeing kah ngu heue.
Khaix an: aux deeh hu: kah plak siviex rawm: keut mai kah dung rawm: khunhawkham, viang mawh nan: daux krax sang tiang brung aux tix hu: ang lai koe: heue.
Mawh kheu nan: kah daux ponsawm: an:, aux lih hu: kah plak siviex daux ngawd mai cied tix yaox kah guh veng; khaix an: aux deeh veeh tix plak khaix mai laig kah daux siviex daux ngawd, mai ing: kah daux krax an: heue.
Mai cao: pa kwang: veng khankix ang nyang tawng kah dee hu: aux mai ceu pa yuh aux khankix; aux ang nyang krai grawng: inkix, kah pwi Yudax, mai kah cao: giex kaing: li, kah cub simiang, kah cub cao: pa kwang: veng, mai kah pwi tang: kaux khankix, pa hoik yuh kaing heue.
Khaix an: aux ah nin: kah kix, "Pex hoik yaox krax pa kharhawm: kharhi: ex in:, mai grhup groing veng Yerusaliem, mai grawng: pa hoik gleeing siviex veng khankix kah ngu, hoek heue, mai kieh ex deeh sum: guh veng Yerusaliem, sonsang ang lai koe: lox sibriem kah ex heue."
Mai aux krai grawng: koe: riang rao plawng: taix Siyiex tau mai aux, mai grawng: gumlox pa mhawm: khunhawkham pa hoik krai nawh kah aux heue." Khaix an: kix yaog taix yaing caong paox tix sonsang yuh kah kaing jhaw: ceu pa mhawm: in: heue.
Viang mawh nan: yam mhong: Sanbalat ceu pwi Haronix, mai Tobix, pa mawh cao: kaing: ceu pwi Amon mai Geshem ceu pwi Arap khankix kah grawng: an:, kix hoik nyiah mai bleh kah ex, mai ah nin:, "Pa yuh pex in: mawh ceu patix lie? mawh sang deeh tieh feen pex kah khunhawkham lie?"
Mawh kheu nan: aux deeh pawk lox kix mai ah nin:, "Siyiex meung raoma: tag sang tawx akhwang: yuh yix tom: hoik heue. Yix pa mawh kawncau mausoi: Nawh khankix, tag sang yaog tix kaoh sum:, viang mawh pex ang lai koe: nyum:, akhwang:, mhai: sakse pa doh keud doh sawn: tix ceu kawx kah daux veng Yerusaliem heue.
Grawng: Pa Deeh Sum: Guh Veng
Yam an: pa mawh Eliaship cao: giex kaing: li pa ting yaog tix kaoh tau mai puxaik nawh khankix, pa mawh cao: giex kaing li mai sum: siviex yung:; kix hoik yuh an: mawh pa singax singeh mai hoik tag teue: tix deuh plah siviex, kix hoik sum: guh veng jah kah nyiiex pau dee lhaong: Hame-a (nyiiex pau dee lhaong: tiyieh) tom: hoek kah nyiiex pau dee lhaong: Hananelax, mai khaix an: kix mawh pa singax singeh heue.
plak khaix Eliaship mawh pwi veng Yerikho: khankix pa cox sum: heue. Khaix kix mawh Zakurax kawn: simex Imarix pa cox sum: heue.
Cub kawnpraix Hasenax khankix hoik cox sum: siviex kax; kix hoik sau: tix deuh khaox lat nawh khankix mai plah siviex mai sau: siviex mai khawm: jhong: siviex heue.
Khaix kix tom: mawh Maramot kawn: simex simex Uriyax, pa mawh kawn: simex Koza, pa cox tix sum: heue. Khaix kix tom: mawh Meshulam kawn: simex Berokhix kawn: simex Meshazabelax pa cox tix sum:, khaix kix tom: mawh Zadok kawn: simex Banax pa hoik cox sum: heue.
Khaix kix tom: mawh pwi veng Teko pa cox sum:, viang mawh nan: simiang kix, hoik ang sau: riang rao klip kix sonsang yuh tix kaing cie cao: simiang kix heue.
Khaix an: Yoyadax kawn: simex Pasha mai Meshulam kawn: simex Beshodeyax pa cox sum: siviex prim:, kix hoik sau: tix deuh khaox lat nawh khankix mai plah siviex, mai saw mai khawm: jhong: siviex heue.
Khaix kix tom: mawh Malatix pwi veng Gebom mai Yadom pwi Meronot mai khawm: pwi Gebom, mai pwi Mizapa khankix pa cox sum: tom: hoek kah nyiiex ot cao: kwang: veng baoh haktiex toi: rawm: klawng: plak klip singaix heue.
Khaix kix tom: mawh Uzelax kawn: simex Hahayax pa mawh cangkam tix kaux pa cox sum: heue, Khaix nawh tom: mawh Hananix pa mawh cao: yuh sidauh bhawng: tix kaux pa cox sum:, mai kix hoik yuh veng Yerusaliem kaux cong: tom: hoek kah dee vieh guh veng heue.
Khaix kix tom: mawh Rephayax kawn: simex Harax, pa mawh cao: pa kwang: baoh haktiex veng Yerusaliem tix plak pa cox tix sum: heue.
Khaix kix tom: mawh Yedayax kawn: simex Harumap pa cox tix sum: can pa koe: kah plak sivoe nyiiex cao: nawh heue. Mai khaix nawh tom: mawh Hattux kawn: simex Hashabanix pa cox khre: tix sum: nawh heue.
Malakhiyax kawn: simex Harim mai Hashut kawn: simex Pahat-Mawba pa cox sum: tang: dauh mai khawm: nyiiex lhaong: tao: ngu heue.
Khaix nawh tom: mawh Shalum kawn: simex Halohat pa mawh cao: pa kwang: baoh haktiex veng Yerusaliem khankix tix plak nawh mai kawn: bun: nawh khankix pa cox tix sum: heue.
Hanum mai can pwi pa ot kah daux veng Zanaw cox sum: siviex daux ngawd heue. Kix hoik sum: ankix, mai sau: tix deuh khaox plah siviex khankix, tau mai saw siviex khawm: jhong: siviex khankix, mai hoik cox tix sum: guh veng pa lang: tix rheng: sawk, tom: hoek kah siviex dee tik ceu pa seeing: pa brai: heue.
Malakhiyax kawn: simex Rekhap pa mawh cao: pa kwang: baoh haktiex veng Biethakharem hoik cox sum: siviex dee tik ceu pa seeing: pa brai: khankix heue. Nawh hoik sum: an:, mai sau: tix deuh khaox plah siviex khankix tau mai saw siviex, mai khawm: jhong: siviex heue.
Shalum kawn: simex Kholahozie pa mawh cao: pa kwang: baoh haktiex veng Mizapa, hoik cox tix sum: siviex rawm: keut heue; Nawh hoik sum: ankix, mai hoik sau: braux, mai hoik sau: tix deuh khaox plah siviex khankix, tau mai saw siviex, mai khawm: jhong siviex, mai hoik cox guh veng rawm: dung silawng pa koe: hawt sipeem tai khunhawkham tom: hoek kah glawk bawng: pa lih hu: khaing: veng Davit heue.
Khaix nawh tom: mawh Nehamix kawn: simex Azabuk, pa mawh cao: pa kwang: baoh haktiex veng Bietzurax tix plak pa cox tix sum: tom: hoek kah baoh dee koe: sivoe simeeig Davit, mai hoek kah rawm: dung pa yuh pwi khankix tom: hoek kah dee singai nyiiex cao: kaing: pa kied ting riang ting rao heue.
Khaix nawh tom: mawh cub pwi Lewix khankix, Rehum kawn: simex Banix pa cox tix sum:, khaix nawh tom: mawh Hashabix pa mawh cao: kwang: baoh haktiex veng Kilax tix plak, pa cox tix sum: kah baoh haktiex nawh heue.
Khaix nawh tom: mawh puxaik kix khankix, Bavie kawn: simex Henadat pa mawh cao: kwang: baoh veng Kilax pa kawn deuk an: tix plak, pa cox tix sum: heue.
Khaix nawh tom: mawh Ezarax kawn: simex Yeshu, pa mawh cao: kwang: veng Mizapa pa cox tix sum: kah tix baux pa koe: kah plak sivoe krax haok kah plak nyiiex krao: kraung naing dee kawk daog veng heue.
Khaix nawh tom: mawh Baruk kawn: simex Zabie sau: riang sau: rao tix cox sum: kah tix baux, jah khaing: dee kawk veng tom: hoek kah siviex nyiiex cao: giex kaing: li ting Eliaship heue.
Khaix nawh tom: mawh Meramot kawn: simex Uriyax pa mawh kawn: simex Koza pa cox tix sum: kah tix baux, jah khaing: daux siviex nyiiex Eliaship tom: hoek dee sidauh daog nyiiex Eliaship heue.
Khaix nawh tom: mawh cub cao: giex kaing: li pwi ot daux lung: khankix pa cox tix sum: heue.
Khaix an: tom: mawh Binyamin mai Hashup khankix pa cox sum: baoh pa koe: plak sivoe nyiiex kix heue. Khaix kix tom: mawh Azarix kawn: simex Meseyax pa mawh kawn: simex Ananix pa deeh cox tix sum: hawt baoh nyiiex nawh heue.
Khaix nawh tom: mawh Binnui kawn: simex Henadat pa cox tix sum: kah tix baux, jah khaing: nyiiex Azarix tom: hoek kah daog veng dee kawk guh veng heue.
Palalax kawn: simex Usie pa cox tix sum: kah baoh plak sivoe dee kawk daok veng, see nyiiex pau dee lhaong:, pa jawn: tix lih khaing: nyiiex lhaong: khunhawkham pa koe: hawt biang nyiiex thawng: heue. Khaix nawh tom: mawh Pedayax kawn: simex Parot pa cox tix sum: heue.
Khaix an: pa kham: tix yuh kaing jhaw: nyiiex bwan: Siyiex, pa ot kah daux nyiiex pau dee lhaong: Ophelax khankix, pa cox tix sum: tom: hoek kah baoh plak sivoe siviex rawm:, pa koe: kah see plak lih singaix mai kah see dee jawn: tix lih khaing: nyiiex pau dee lhaong: heue.
Khaix kix tom: mawh pwi veng Teko khankix pa cox tix sum: kah tix baux, pa koe: plak khaix nyiiex pau tap pa kied lhaong: dee jawn: tix lih mai hoek kah guh veng Ophelax heue.
Kah plak laong: siviex brung tom: mawh cao: giex kaing: li khankix, pa cox tix sum: kudauh pa koe: kah plak nyiiex cao: kix heue.
Khaix kix tom: mawh Zadok kawn: simex Imerax pa cox tix sum: kah pa koe: plak sivoe nyiiex cao: nawh heue. Khaix nawh tom: mawh Shemayax kawn: simex Shekhanix pa mawh cao: pa pau siviex plak lih singaix, pa cox tix sum: heue.
Khaix nawh tom: mawh Hananix kawn: simex Shelemix mai Hanun kawn: simex Zalap liah kaux tix kaux, pa cox tix sum: kah tix baux, khaix nawh tom: mawh Meshulam kawn: simex Berekhix pa cox tix sum: pa koe: kah plak sivoe dee ot nawh heue.
Khaix nawh tom: mawh Malakhiyax pa mawh cangkam tix kaux, pa cox tix sum: singai tom: hoek kah nyiiex pwi pa kham: tix yuh kaing jhaw: nyiiex bwan: Siyiex, pa koe: plak sivoe siviex Miphakat, tom: hoek kah lawg plak piang pa koe: daog veng an: heue.
Mai sinax lawg plak piang pa koe: daog veng, tom: hoek siviex yung: khankix tom: mawh cangkam mai cao: lai cao: geu khankix, pa cox tix sum: heue.
Guh Veng Pa Tiebtie Kah Pwi Koeng
Yam mhong: Shanbalat kah grawng: hit deeh cox sum: ex guh veng, nawh kied meet rhawm: meet rhi: mai kied songrhawm: songrhi: mai salao kah pwi Yudax khankix heue.
Mai nawh krai lox kah plak sivoe puxaik tix mai cub kru naing Samarix khankix ah nin:, "Mawh yuh pwi Yudax pa awn: riang inkix ceu patix lie? mawh sang kaux cong: yuh kix tokaux cao: tix lie? mawh sang tan lu kix tix lie? mawh sang hoik yuh kix ceu an: tingaix ngie lie? mawh tag sang vaoh kix lon: simaox khaing: daux pum: nyhee: pa hoik gleeing khankix sum: guh veng kah lie?"
Yamin: Tobiyax ceu pwi Amon pa ot praok nawh mai ah nin:, "Can guh veng simaox pa sum: kix, phan: sox praix haok kah piang nawh tag ghrup yuh lon: simaox guh veng kix heue.
Simiang Siyiex eue, nghiiet liak, mawh kheu hoik kham: geu: pa sa pa lao pwi; deeh kieh lox pa sa pa lao kix deeh hoek kah piang kaing: cao: kix, mai kieh kix awm: pwi pa tud pa rhim: khankix kah daux haktiex pa giex pa laung tix liak!
Paw doh kheem: kah pa phit pa lud kix mai paw doh preet phimap phighram: kix grai: khaing: plak sivoe Maix Cao: liak; mawh kheu kix so: krax songrhawm: songrhi: Maix Cao: kah plak sivoe pwi sum: guh veng khankix heue.
Mawh kheu nan: yix hoik sum: guh veng, mai guh veng hoik sitoe tix lhaong: haok tix plak tau heue. Mawh kheu pwi hun: khankix hoik koe: rhawm: tix yuh kaing heue.
Yam hoik mhong: Sanbalat, Tobix pa mawh ceu pwi Arap, ceu pwi Amon mai ceu pwi Ashadot khankix, kah hoik jhak kix tix cox sum: guh veng Yerusaliem mai kah jhak kix tix deeh thox daux doh khankix, kix kied songrhawm: songrhi: kah heue.
Mai kix khawm: uik kum: paox tix sang yuh pa caox mai hoek puing: kah veng Yerusaliem mai kieh pa suk sag koe: heue.
Viang mawh nan: ex hoik rawg Bwan: kah Siyiex ex, kheu jao pwi ankix, ex deuh cao: pa pau tix jak koe: leeing: ngaix leeing: sawm: heue.
Khaix an: pwi Yudax khankix tiblah ah nin:, "Can pwi pa yuh kaing khankix kawx hoik dauh riang rao, mai nyhee: nyhawk khankix kawx hoik kied nie, mawh kheu nan:, ex ang lai sum: kah guh veng heue."
Mai pwi koeng ex khankix ah nin:, "Yam ang kix tawng ang kix yaox ex lih hoek kah sinax kix mai pah kix yum:, kieh kaing yuh kix kaog heue."
Mawh kheu nan: pwi Yudax pa ot dex kix, hoek krai grawng: an: kah ex kao: bawg, "Kix tag kaoh khaing: dee ot tix kudauh mai hoek puing: kah ex heue."
Mawh kheu nan:, aux hoik deuh pwi khankix kah plak khaix guh veng dee tiiem kah dee nie sidawng: tix yaox awm: pa hoik koe: doeh nyiiex ma: kix cub mawx cub an: tau mai vaig, pliah mai ak kix heue.
Mai aux jhak tix yaox mai yaog tix kaoh krai kah cub simiang mai kah cub cao: kaing: cao: kap, mai cub pwi pa kawn deuk khankix ah nin:, "Paw lhat paw graung kah kix awawx. Doh keud doh sawn: kah Simiang Siyiex, pa kied ting kied lhaong: mai koe: siawpsibrawm pa kied lhat graung kah, mai puing: naing son puxaik pex, son kawn: simex kawn: bun: pex, mai son moeng pex mai son nyiiex ma: pex khankix heue."
Mai yam mhong: pwi koeng ex khankix kah hoik tawng ex kah grawng: in:, Siyiex hoik yieh krax pa keud pa sawn: kix lauxleeing:, mai ex khawm: uik deeh ing: kah guh veng mai pwi kukaux tang: deeh yuh kaing yuh cao: tix heue.
Mawh kheu nan:, jah kah daux bawg yam an:, kawncau aux tix plak yuh kaing mai tix plak giex pliah, giex kraung plah tiebtie, mai ak, mai ceep kah kraung plah rhiem: khankix, mai cao: kaing: cao: kap hoik ot kah plak khaix nyiiex pwi Yudax khawm: uik heue.
Can pwi khankix pa sum: guh veng mai can pwi pa klawm: tiex pid khankix, tix khawn: taix yuh kaing mai tix khawn: taix giex kah kraung naing heue.
Pwi pa cox sum: khankix kukaux, hoik tang: giieb vaig kah nyoi tix, yam yuh nawh kaing, mai pwi phlu: teettawng hoik cung hawt praok aux heue.
Khaix an: aux ah nin: kah cub simiang, mai cao: pa kwang:, mai can pwi pa kawn deuk khankix, "Kaing in: mawh pa kied ting mai pa kied vieh, mai ex hoik kied singai ot khaing: paox tix, tix kaux hoik tix kaux kah piang guh veng heue.
"Mawh kheu nan:, yam mhong: pex kah lox teettawng dee mawx ang ah, pex kraix khrawm: paox tix hoek kah yix tan: heue. Siyiex ex tag puing: son ex heue."
Mawh kheu nan:, sau: riang rao ex yuh kaing, mai pwi tix plak hoik giex kah pliah, jah kah mee: riang praix tom: hoek bawg yam hoik toh simuing: khankix heue.
Kah daux baux yam an:, aux baox ah nin: kah pwi khankix, "Kieh pwi kukaux mai kawncau nawh, ot daux veng Yerusaliem ponsawm:, sonsang mawh kix cao: pau ex daux ponsawm: mai yam yuh kaing plak ponngaix heue."
Mawh kheu nan:, tokaux aux, puxaik aux, kawncau aux, mai pwi pau veng pa hawt hu: khaix aux khankix, ang lai peeik kraung ceep tix tix kaux kawx yam lih kin kix rawm: kawx tang: giex kraung naing tix heue.
Nehamix Yaox Krax Tuk Tieak Tukte
Pwi khankix mai moeng kix kied riag yo mai pa deuh phimap kah puxaik kix pwi Yudax heue.
Mawh kheu can pwi ankix ah nin:, "Ex mai khawm: kawn: simex kawn: bun: ex khankix mawh pa kied nie; mawh kheu nan: kieh pon teei nghox khankix kah son kix, sonsang pon ex tix ih mai im: ju kah heue."
Pwi tiblah ah nin:, "Yix hoik tang kah haktiex mai gwang sipeem plix siiet, mai khawm: nyiiex tix khankix, sonsang pon yix tix liag nghox khankix, kheu hoik sibhawm: praix heue."
Pwi tiblah baox ah nin:, "Yix hoik yaog mau, sonsang tawx tix keen: cie khunhawkham kah son haktiex yix mai si peem plix siiet yix khankix heue.
"Mawh kheu nan: nex nham: yix awm: nex nham: puxaik yix khankix, mai kawnpraix yix khankix awm: kawnpraix kix, mai yaox tix khin: kawn: simex kawn: bun: tix khankix yuh siliex, kawn: bun: yix khankix pa hoik yuh siliex kawx yix ang lai pon taoh kix lih heue. Mawh kheu hoik laig haktiex mai sipeem plix siiet yix khankix kah daux tawm: taix pwi tang: kaux heue."
Mai aux hoik kied songrhawm: songrhi:, yam mhong: tix kah lox riag yo kix mai lox krai kix heue.
Khaix hoik bre aux tix keud, aux hoik ne hoik raw cub simiang mai pa kwang: khankix mai ah nin: kah kix, "Pex kukaux lai teei rao mau khaing: puxaik tix," Mawh kheu nan: aux kraix khrawm: pwi khankix hoek tix klah lox kah kix daux bang: kum: heue.
Ma: aux ah nin: kah kix, "Awm: pa hoik deeh pon taoh ex kah puxaik tix pwi Yudax khankix, pa hoik coh tix kah pwi tang: ceu tang: cat khankix. Yamin: khex sang deeh coh pex puxaik tix khankix lie? Phan: ang mawh nan: mawh tag sang deeh mawh kix pa coh tix kah ex lie? Khaix an: kix yiien: yawg mai ang lai tawng pa ah tix heue.
Mai aux ah nin:, "Ceu pa yuh pex khankix ang lai mawh pa mhawm:, mawh ang pex khaw: tix hu: kah daux pa lhat graung tix kah Siyiex ex, sonsang tiebtie lox sax lao pwi tang: ceu tang: cat, pa mawh pwi koeng ex khankix lie?"
"Aux, mai puxaik aux, khawm: puxaik aux khankix, kawn: tawx kix ceuk mau mai nghox khankix, yuh bwanson: kieh ex naox, krax pa teei tix rao mau in: liak."
"Kah daux in: singaix deeh tawx can pa mawh haktiex sipeem plix siiet, mai nyiiex, mai mau pa teei pex rao khaing: kix, tiyieh son tix son mai nghox an: khankix, khawm: rawm: plix siiet pa khraox mai khawm: rawm: bee, pa hoik tat pex tix teei kah kix heue."
Mai kix ah nin:, "Yix sang deeh tawx ankix, mai yix ang lai deeh mhaing: tix ceu kawx khaing: kix; yix tag sang yuh awm: lox pa krai maix heue." Khaix an: aux kok cao: giex kaing: khankix mai kieh kix yuh krax tieh tu tix, sonsang hawt yuh kix awm: gumlox sijax mukheu in: heue.
Khaix an: aux kah tix khruah kah man: kraung ceep pa rawd kah nyoi tix mai ah nin:, "Ceu pwi pa ang hoek tix yuh awm: sijax mukheu in:, kieh Siyiex khruah nawh singai khaing: nyiiex cao: nawh, mai khaing: sinngao nawh, mai khruah nawh tom: hoik yi heue." Mai cub pwi hun: khankix hoik ah "Amen." Mai yaogyaw kah bwanson: Simiang Siyiex khawm: uik heue. Khaix an: pwi hun: khankix yuh nawh awm: pa koe: gumlox sijax mukheu in: heue.
Grawng: Pa Koe: Rhawm: Koe: Rhi: Nehamix
Jah bawg yam yaog aux tix mawh cao: pa kwang: kah daux meung Yudax, jah kah num kwang: khunhawkham Atazerit kah haktiex tinga: num, tom: hoek tingoe: ra: num tix num, glang: daux kao: ra: num, aux mai puxaik aux khankix ang nyang sax ih priex son nyum: cao: pa kwang: khankix tibawg kawx heue.
Viang mawh nan: cao: pa kwang: veng sivoe aux khankix, hoik deuh beeh pa cien piang pwi khankix, mai teei tix ih khaomun mai rawm: plix siiet, mai mau tix ngaix tipon: shekhe khaing: kix; pie kawncau kix kawx, hoik yuh krax kwang: pa langteung: kah piang pwi khankix, viang mawh nan:, aux ang lai yuh awm: an: kheu lhat graung tix kah Siyiex heue.
Aux ca: baox toe: tix yuh guh veng ang jud, mai ex ang liag haktiex, kawncau aux khawm: uik hoik kraix khawm: paox tix yuh kaing tau heue.
Lheu: khaing: ankix pa hoek kah ex, khaing: ceu pwi tang: ceu khankix pa ot hawt vungviang ex, koe: pwi Yudax mai cao: pa kwang: khankix tiyieh tiphwan: kaux, pa sawm: tau mai pheen: aux jheengjheeng: heue.
Can ceu pa hoik khre: rien tix kah son aux ku singaix, mawh moi tix mu:, mai yung: pa hoik laug tix liah mu:, mai ia: sim: khankix kawx hoik khre: rien tix kah son aux, mai kao: ngaix tix bawg rawm: plix siiet kuceu hoik khre: rien tix tom: nie; viang mawh nan: aux ang lai mhaing: priex nyum: kah son cao: pa kwang: veng, kheu jao kied cien kaing jhaw: kah piang pwi khankix heue.
Siyiex eue, doh keud doh sawn: kah ceu pa mhawm:, awm: pa hoik yuh aux khawm: uik kah son pwi khankix, mai nawb bwan: kah aux liak.
Grawng: Kraix Khrawm: Tix Tieh Feen Kah Nehamix
Yam hoik mhong: Sanbalat, Tobix, Geshem pwi Arap, mai khawm: pwi koeng ex pa kawn deuk khankix, kah hoik sum: aux guh veng, mai ang dee doh lai koe: tix dauh kawx, viang aux ang nyang sau: plah siviex khankix kah siviex veng khankix kawx,
Sanbalat mai Geshem ploi: pwi hoek kah aux mai ah nin:, "Hoek heue, kieh ex pub paox tix kah daux yaong: tix yaong: pa koe: daux lung: Onaw heue." Viang mawh nan: kix hoik keud tix sang yuh krax pa ang mhawm: kah aux heue.
Mawh kheu nan:, aux ploi: cao: cau khankix hu: kah kix mai ah nin:, "Aux kawx yuh kaing pa kied ting kied lhaong:, mawh kheu nan:, aux ang nyang pon lih hoek, aux khex sang prah kaing yuh tix kheu sang hoek tix kah pex yuh kah mawh lie?"
Viang mawh nan:, kix hoik ploi: lox in: hoek kah aux pon: bawg, mai aux hoik deeh pawk kah kix awm: phao voe heue.
Khaix an: Sanbalat baox ploi: kawncau tix hoek kah aux, phwan: bawg tibawg awm: phao voe tau mai lai pa ang nyang nyeep tix kah daux tawm: taix nawh heue.
Kah daux lai an: hoik tiem: ah nin:, "An: hoik mawh pa krai kah daux sinax ceu pwi tang: ceu tang: cat khankix, mai Geshem kawx ah yuh nin:, maix mai pwi Yudax khankix hoik keud tix sang dee tieh feen; mawh kheu nan: maix tom: cox tix sum: guh veng, sonsang yuh maix khunhawkham kix heue.
Maix hoik yaog tix deuh cao: jhai: khankix sonsang krai pao: grawng: maix kah daux veng Yerusaliem pa ah nin:,khunhawkham koe: tix kaux kah daux meung Yudax heue Yamin: tag sang krai grawhgrawng: inkix, kah khunhawkham, mawh kheu nan:, kieh ex kum: tau mai paox tix awawx."
Khaix an: aux deeh ploi: pwi hu: kah nawh mai ah nin:, "Awm: can ceu pa ah maix khankix, ang tie mawh tix ceu kawx, mawh ngie pa lak keud maix tix sang yuh kah daux rhawmrhi: tix heue."
Grawhgrawng: nawh kix khawm: uik simie tix yuh yix koe: krax lhat krax graung mai ah nin:, "Plawng: taix kix tag mawh pa awn: riang awn: rao, mai ang lai hoik yuh kaing pa yuh tix heue." Siyiex eue yamin: kieh plawng: taix aux koe: riang koe: rao liak.
Khaix an: aux hoik hoek kah nyiiex Shemayax kawn: simex Delayax, kawn: simex Mahetabelax, pa mawh cao: mox tix tawx lox satang mai nawh ah nin:, "Kieh ex pub paox tix kah daux nyiiex bwan: Siyiex, kah plak daux lawg nyiiex bwan:, mai kieh ex nyeep siviex nyiiex bwan:, mawh kheu kix hoek tix sang pah maix yum: kah daux sawm: in:, kix tag hoek tix pah maix yum: tete heue."
Mai aux ah nin:, "Pwi pa awm: aux in: tag sang to: lie? Mai pa awm: aux tag sang laig kah daux nyiiex bwan: sonsang taoh ju tix lie? Aux ang laig heue."
Khaix an: aux hoik briex tawng kah ang mawh Siyiex pa ploi: nawh hoek, viang mawh nan: nawh hoik krai pao: lox jhai: krax pa tieh feen kah aux, kheu hoik cang: Tobix mai Sanbalat kah nawh heue.
Grawhgrawng: cang: kix kah nawh, mawh sonsang koe: krax pa lhat pa graung aux, mai koe: krax phit krax lud, sonsang deeh pon kix tix krai pao: kah grawng: krax pa caox pa caig, mai koe: lox salao kah aux heue.
Siyiex eue doh keud kah kaing pa yuh Tobix mai Sanbalat, mai cao: jhai: bun: Nawdix mai cao: jhai: pa kawn deuk khankix, sonsang yuh aux koe: krax pa lhat pa graung heue.
Guh Veng Hoik Sum: Tix Khawm: Uik
Mawh kheu nan: guh veng hoik sum: tix kah daux khix Elula tinga: phwan: ngaix, rheung: tiphwan: ra: ngaix heue.
Mai yam hoik mhong: cub pwi koeng ex khankix kah grawng: an:, mai ceu pwi khawm: uik pa ot hawt vungviang ex khankix, hoik yaox kah ceu inkix, mai kix hoik kied kaig kah yaox kix ngai: cao: tix heue. Mawh kheu kix hoik briex tawng kah kaing pa hoik yuh Siyiex ex heue.
Lheu: khaing: an: kah daux glang: singaix ankix, cub simiang Yudax khankix hoik sipaox lai hoek kah Tobix tom: nie, mai lai pa tawx Tobix kawx hoik deeh hoek kah kix heue.
Mawh kheu pwi Yudax tom: nie hoik krax pa kawx sijax tau mai Tobix mawh kheu mawh nawh kheue: Shekhenix kawn: simex Ara mai kawn: simex Yehohanan hoik teei tix moeng kawn: bun: Meshulam, kawn: simex Derakhix heue.
Kix hoik krai kaing pa mhawm: yuh nawh khankix kah plak sivoe ngai: aux mai deeh krai lox sikah aux hoek kah nawh heue. Mai Tobix deeh sipaox lai hoek kah sonsang ghlat tix aux heue.
Khaix hoik sum: guh veng mai aux hoik tok plah siviex, mai aux hoik tang: tawx beeh glawm: kah cao: pa pau diang siviex, mai cao: pa ah lai rhax mai pwi Lewix khankix,
mai aux tix tawx veng Yerusaliem kah pux aux Hananix mai Hanan pa mawh cao: kaing: nyiiex pau dee lhaong:, kheu hoik mawh nawh pwi pa kaux sijax tix kaux mai pa lhat kah Siyiex lheu: khaing: pwi hun: heue.
Mai aux krai ah nin: kah kix, "Paw nyang paoh siviex veng Yerusaliem sivoe hax koek, glang: yam kawn: cung kix tix pau caw tix nyeep siviex mai sau: tix deuh jhong:, mai baox tawx beeh glawm: pau veng kah can pwi pa ot kah daux veng Yerusaliem khankix, mai tang: pau tix jhak kah plak sivoe nyiiex pwi mawx nyiiex pwi an: heue."
Pwi Pa Giex Pa Laung Khankix Pa Hoik Deeh Ing: Kah Veng Yerusaliem
Yamin: veng hoik kied vieh kied va: viang mawh nan: pwi pa ot kah daux khankix kied tux mai ang nyang sum: nyiiex khankix kah daux heue.
Khaix an: Siyiex hoik so: kah daux rhawmrhi: aux, sonsang kraix khrawm: kah cub simiang khankix, mai cao: pa kwang: haktiex mai khawm: pwi khankix, sonsang laig carang kix awm: pa koe: doeh nyiiex ma: kix heue. Mai aux hoik yaox carang doeh nyiiex ma: pa mawh pwi khankix pa hoik deeh hoek bawg phao voe, mai yaox pa tiiem: tix deuh kah daux an: yuh nin: heue.
Inkix mawh pwi pa deeh hoek khaing: krax pa giex pa laung tix, pa mawh pwi pa hoik sax viex kix hu: pa hoik rhim: Nebukhaneza khunhawkham veng Babulon hu: mawh pwi pa giex pa laung mai pa hoik deeh ing: kah veng Yerusaliem mai kah meung Yudax kukaux kah veng ot kaux mawx kaux an: heue.
Can pwi pa hoek tau mai Zerubabelax mawh Yeshu, Nehamix; Azarix, Ranix, Nahamanix, Modekhie, Bilashan, Misapariet, Bigavie, Nehum mai Bana khankix heue. Carang ceu pwi Isarilax khankix mawh awm: in: plak greem:;
Cub kawnpraix Parot, ra: rheng: tiyieh atigliah ra: kaux,
cub kawnpraix Shephatix khankix loe: yieh atigliah ra: kaux,
cub kawnpraix Ara liah yieh tiphwan: ra: kaux;
cub kawnpraix Pahanobax, pa mawh kawnpraix Yeshu mai Yawbax khankix, ra: rheng: daix yieh kao: daix kaux;
cub kawnpraix Elam tix rheng: ra: yieh tiphwan: pon: kaux;
cub kawnpraix Zattux daix yieh tipon: phwan: kaux;
cub kawnpraix Zakhai, aliah yieh tigliah kaux;
cub kawnpraix Binnui, liah yieh tipon: daix kaux;
cub kawnpraix Bebie, liah yieh tinga: daix kaux;
cub kawnpraix Azagat, ra: rheng: loe: yieh tinga: ra: kaux;
cub kawnpraix Adonikam, liah yieh tigliah aliah kaux;
cub kawnpraix Bigavie, ra: rheng: tiglaih aliah kaux;
cub kawnpraix Adin, liah yieh tiphwan: phwan: kaux;
cub kawnpraix Ata pa mawh Hezakix, tidim: daix kaux;
cub kawnpraix Hashum, loe: yieh tinga: daix kaux;
cub kawnpraix Bezie, loe: yieh tinga: pon: kaux;
cub kawnpraix Harip, tiyieh kao: ra: kaux;
cub kawnpraix Gibon, tidim: phwan: kaux;
pwi veng Bieliehiem mai pwi veng Netopha, tiyieh tidaix daix kaux;
pwi veng Anatut, tiyieh tinga: daix kaux;
pwi veng Bietazamaviet, tipon: ra: kaux;
pwi veng Kirayatvarim, veng Khephirax, mai veng Berot, aliah yieh tipon: loe: kaux;
pwi veng Rama mai veng Geba, liah yieh tinga: tix kaux;
pwi veng Mikmat, tiyieh tinga: ra: kaux;
pwi veng Betelax mai A-ix, tiyieh tinga: loe: kaux;
pwi veng Nebo tang: kaux, tiphwan: ra: kaux;
cub kawnpraix pwi veng Elam tang: kaux, tix rheng: ra: yieh tiphwan: pon: kaux;
cub kawnpraix Harim, loe: yieh tinga: kaux;
cub kawnpraix pwi veng Yerikho:, loe: yieh tipon: phwan: kaux;
cub kawnpraix pwi veng Lawdax, veng Hadit, mai veng Awnaw, aliah yieh tinga: tix kaux;
cub kawnpraix pwi veng Sena, loe: rheng: dim: yieh tingoe: kaux; khankix heue.
Carang cub cao: giex kaing: li mawh cub kawnpraix Yedayax khaing: daux cub nyiiex ma: Yeshu, dim: yieh atigliah loe: kaux;
cub kawnpraix Imerax, tix rheng: mai tiphwan ra: kaux;
cub kawnpraix Pashurax, tix rheng: ra: yieh tipon: aliah kaux;
cub kawnpraix Harim, tix rheng: kao: aliah kaux heue.
Carang pwi Lewix khankix mawh cub kawnpraix Yeshu, khaing: ceu pwi Kamelax, mai khaing: cub kawn: Hodeva, atigliah pon: kaux heue.
Cao: pa rhax lai khankix, mawh cub kawnpraix Asap, tiyieh tipon: daix kaux heue.
Cao: pau siviex mawh cub kawnpraix Shalum,cub kawnpraix Ata, cub kawnpraix Talamon, cub kawnpraix Akakup, cub kawnpraix Hatita, cub kawnpraix Shobie, khankix tiyieh tingoe: daix kaux heue.
pwi pa kham: tix yuh kaing jhaw: daux nyiiex bwan: khankix mawh cub kawnpraix Zibax, cub kawnpraix Hashupha cub kawnpraix Tabaok;
cub kawnpraix Kerot,cub kawnpraix Siyax, cub kawnpraix Padon;
cub kawnpraix Lebana, cub kawnpraix Hagaba, cub kawnpraix Salamie,
cub kawnpraix Hanan, cub kawnpraix Giddelax, cub kawnpraix Gaha,
cub kawnpraix Reyax, cub kawnpraix Rizin, cub kawnpraix Nekoda,
cub kawnpraix Gazam, cub kawnpraix Uza, cub kawnpraix Paseyax,
cub kawnpraix Besie, cub kawnpraix Munim, cub kawnpraix Nepheshesim,
cub kawnpraix Bakabuk, cub kawnpraix Hakupha, cub kawnpraix Harahurax;
cub kawnpraix Bazalit, cub kawnpraix Mehidax, cub kawnpraix Harasha;:
cub kawnpraix Barakot, cub kawnpraix Siserax, cub kawnpraix Tama,
cub kawnpraix Neziyax, mai cub kawnpraix Hatipha khankix heue.
Cub kawnpraix Sawlamon khankix mawh cub kawnpraix Sotie, cub kawnpraix Sopheriet, cub kawnpraix Peradax,
cub kawnpraix Yala, cub kawnpraix Dakon, cub kawnpraix Giddelax,
cub kawnpraix Shephatix, cub kawnpraix Hattilax, cub kawnpraix Pokheriet, khaing: ceu pwi Zebem, mai cub kawnpraix Amon khankix heue.
Pwi pa kham: tix yuh kaing jhaw: nyiiex bwan: Siyiex khankix, mai cub kawncau Sawlamon khankix loe: yieh tidim: ra: kaux heue.
mai kix can pwi pa kaoh khaing: veng Telamelax, veng Telaharasha, veng Kherup, veng Addon, mai veng Imera khankix, mai kix mawh pa ang pon tix sidawng: tawng kah nyiiex ma: keeing: kix mai doeh simie ceucat lih kix kah mawh ang mawh ceu pwi Isarilax khankix;
pa mawh cub kawnpraix Delayax, cub kawnpraix Tobix, cub kawnpraix Nekodax khankix liah yieh tipon: ra: kaux;
khaing: daux cub cao: giex kaing: li khankix mawh cub kawnpraix Habayax, cub kawnpraix Koza, cub kawnpraix Bazilie, pa teei tix moeng kawn: bun: Bazilie pwi haktiex Gilat tix kaux, mai hoik kok ceukaux kix awm: an: heue.
Inkix mawh pwi pa sawg kix tix yaox kah daux sinax can pwi pa laig daux carang daux simie ceucat kix, viang mawh nan:, kix ang lai yaox kix kah daux carang mawh kheu nan: kix hoik mawh pwi pa teei tix lih khaing: cao: giex kaing: li kheu ang kix lai singax heue.
Mai cao: kwang: haktiex tawx lox ang cu kix ih can ceu pa kied singax singeh tom: hoek bawg yam ang cao: giex kaing: li nyang bax shiao kah Urim mai Tumim heue.
Cub pwi hun: khawm: uik hoik koe: pon: mheen: ra: rheng: loe: yieh tigliah kaux,
Lheu: khaing: an: kawncau simex kawncau bun: kix, pa ot tau mai kix tan: hoik koe: aliah rheng: loe: yieh tingoe: aliah kaux, mai kix koe: simex, bun: cub pa ah lai rhax khankix ra: yieh tipon: phwan: kaux heue.
Kix koe: brung aliah yieh tingoe: liah mu:, mai kix koe: law ra: yieh tipon: phwan: mu:,
kala-uk pon: yieh tingoe: phwan: mu:, mai kix koe: la liah rheng: aliah yieh tinga: mu:.
Mai cao: kaing: cao: kap nyiiex ma: keeing: kix tiblah, hoik tawx pa tan pa lu tix khankix kah son kaing jhaw: heue. Cao: pa kwang: haktiex hoik tawx plah khri: tix rheng: dalit, mai khawm: pan ting tiphwan: mu:, mai khawm: kraung ceep cao: giex kaing: li phwan: yieh tingoe: pheen:, laig kah daux krao: sinngao an: heue.
Cao: kaing: cao: kap cub nyiiex ma: cub keeing: kix tiblah, hoik tawx plah khri: ra: mheen: dalit, mai mau ra: rheng: ra: yieh minax, laig kah daux krao: sinngao heue.
Mai cub pwi pa kawn deuk khankix hoik tawx plah khri: ra: mheen: dalit, mai mau ra: rheng: minax, mai khawm: kraung ceep cao: giex kaing: li tigliah aliah pheen: heue.
Mawh kheu nan: cao: giex kaing: li mai pwi Lewix cao: pau siviex, cao: pa ah lai rhax, mai khawm: pwi khankix tiblah, pwi pa kham: tix yuh kaing jhaw: nyiiex bwan: Siyiex khankix, mai ceu pwi Isarilax khankix hoik ot kah daux veng cao: kix heue.
Grawng: Phat Ezarax Lox Tat Jhawm: Prawng
Yam hoek kah daux khix aliah, kawnpraix ceu pwi Isarilax khankix hoik ot kah daux veng cao: kix heue. Yam an: pwi hun: khawm: uik kraix khrawm: paox tix tau awm: pwi tix kaux, kah daux bing: pak pa koe: plak sivoe siviex rawm:, mai kix nhie: Ezarax cao: tiem: lai viex phuk lai lox tat jhawm: prawng Mose pa hoik tawm: Simiang Siyiex kah ceu pwi Isarilax khankix hoek heue.
Kah daux khix aliah tix ngaix cao: giex kaing: li Ezarax hoik viex phuk lai lox tat jhawm: prawng hoek plak sivoe cub pwi hun:, pa mawh simex mai bun: khankix can pwi pa chix nghiiet chix tawng khawm: uik heue.
Khaix an: nawh phat khaing: phuk lai an: kah daux bing: pak plak sivoe siviex rawm:, jah kah plak ponngawb tom: hoek bawg yam jung singaix, kah plak sivoe simex, bun:, khankix can pwi pa chix nghiiet chix tawng; mai pwi khankix daong yhaok tix nghhiet kah phuk lai lox tat jhawm: prawng an: heue.
Mawh kheu nan: Ezarax cao: tiem: lai cung tix ot piang grah khaox pa hoik yuh tix deuh son an:, mai pwi pa cung tix ot kah praok kah plak taix khawn: dawm: nawh tom: mawh Matatix, Shemax, Anayax, Uriyax, Hilakhix, mai Meseyax khankix, mai pwi pa cung tix ot kah plak taix khawn: gwiex tom: mawh Padayax, Mishelax, Malakhiyax, Hashum, Hashabadanax, Zakharix mai Meshulam khankix heue.
Mai Ezarax plak kah phuk lai an: kah plak sivoe ngai: pwi hun: khawm: uik, mawh kheu hoik cung tix ot kah piang dee pa lhaong: khaing: pwi khawm: uik, mai yam plak nawh kah phuk lai an:, pwi yaog tix cung khawm: uik heue.
Mai Ezarax yaogyaw kah Simiang Siyiex, pa mawh Siyiex pa kied ting kied lhaong:, khaix an: pwi hun: khankix yaog taix tix deeh pawk tix ah "Amen Amen" heue. mai kix gup pakngai: tix kah piang tiex mai ngeuh kaing: tix krub kah Simiang Siyiex heue.
Yeshu mai Sherabix, yamin: Akhup, Shabetie, Hodiyax, Maseyax, Kelita, Azarix, Yozabat, Hanan, Pelayax mai pwi Lewix khankix, baox teem: tix krai pwi hun: tawng kah dee bleeh lox tat jhawm: prawng khankix, mai pwi khankix cung tix ot kah dax dee ot cao: tix heue.
Mawh kheu nan: kix hoik phat phuk lai lox tat jhawng prawng Siyiex; sidawng: laing laing, mai dee krai kix mhong: sonsang tawng dee bleeh lox lai pa phat tix khankix heue.
Mai Nehamix pa mawh cao: pa kwang: haktiex, mai Ezarax pa mawh cao: giex kaing: li mai cao: tiem: lai, pwi Lewix cao: pa gau pa sawn: kah pwi hun: mai ah nin: kah pwi khawm: uik, "In: singaix mawh ngaix pa singax singeh kah son Simiang Siyiex ex, paw lai koe: krax pa khrup rhawm: mai paw lai yiiem heue." Mawh kheu mhong: pwi khawm: uik kah lox tat jhawm: prawng in:, kix tom: yiiem kah heue.
Khaix an: nawh ah nin: kah kix, "Hu: krax hu: pex ih pa kluing: pa bee mai nyaux ceu pa tie: mai gwieh tix tawx nyum: kah pwi pa ang koe: tidtix, mawh kheu in: singaix mawh ngaix pa singax singeh kah son Simiang Siyiex ex, paw koe: krax lauxrhawm:, mawh kheu krax gauxrhawm: gauxrhi: pa tawx Simiang Siyex mawh riang rao pex heue."
Mawh kheu nan: pwi Lewix kieh pwi khawm: uik yiien: yawg tix mai ah nin:, "Mawh kheu in: singaix mawh ngaix pa singax singeh; paw koe: krax lauxrhawm: lauxrhi: heue."
Mai pwi khawm: uik hu: sonsang ih mai nyaux, mai gwieh tix tawx nyum: kah pwi mai gauxrhawm: gauxrhi: kah daux pa kied ting kied lhaong:, hoik tawng kix dee bleeh lox sidiex lox gau kah kix heue.
Pwie Nyiiex Gox
Kah daux ra: ngaix tingaix cub cao: kaing: cao: kap nyiiex ma: keeing: cub pwi hun: khawm: uik, tau mai cao: giex kaing: li mai pwi Lewix khankix, kraix khrawm: paox tix hoek kah Ezarax cao: pa tiiem: lai, sonsang tawng tix kah gumlox tat jhawm: prawng heue.
Mai kix hoik yaox can ceu pa hoik tiem: tix kah daux lox tat jhawm: prawng pa hoik tawx Simiang Siyiex kah Mose, pa sang ot kawnpraix ceu pwi Isarilax kah daux nyiiex gox lhax khaox glang: yam yuh pwie kah daux khix aliah.
Mai kix krai pao: jah kah veng Yerusaliem mai veng kudauh kudee mai ah nin:, "Lih hu: kah piang gawng piang lua, mai teei tix viex lhax khaox Sanlun; kak khaox gix, kak khaox griex kak khaox jhie: yaong: mai kak khaox pa nie lhax khankix, sonsang yuh nyiiex gox, awm: pa hoik tiem: tix deuh heue."
Khaix an: pwi khankix hoik lih hu: mai deeh viex kak khaox khankix hoek mai yuh nyiiex gox son tokaux tix, mai pwi kukaux hoik tang: sau: kah piang braux nyiiex cao: tix, mai kah biang dee ot dee koe: tix, mai kah biang nyiiex bwan: Siyiex mai kah bing: pak siviex rawm:, mai kah bing: pak siviex Epharem khankix heue.
Mawh kheu nan: cub pwi hun: khawm: uik khawm: leeing: pa mawh pwi pa hoik deeh ing: khaing: pa giex pa laung tix khankix, hoik yuh nyiiex gox kak khaox mai hoik ngawm tix ot greem: nyiiex gox; mawh kheu daux glang: baux singaix Yawsux kawn: simex Nun tom: hoek bawg yamin: singaix kawnpraix ceu pwi Isarilax khankix ang nyang sax yaox tix yuh awm: an: tibawg kawx, mai pwi khawm: uik kied koe: krax gauxrhawm: gauxrhi: kah heue.
Jah kah daux singaix liang tom: hoek daux singaix ghoik, nawh phat kah phuk lai gumlox tat jhawm: prawng ku ngaix heue. mai kix khan: kheu: pwie aliah singaix; mai yam hoek kah daux daix ngaix, kix yuh pwie singax singeh awm: hoik koe: been tix yuh heue.
Grawng: Khyox Khaw: Kah Phimap Phighram: Tix
Yam hoik hoek khix in: tinga: pon: ngaix, kawnpraix ceu pwi Isarilax khankix krawk khrawm: paox tix ot tau mai tawx pa ih pa un:, mai ceep kah man: chee: rhix, mai rhuat phawng: tiex kah piang kaing: tix heue.
Khaix can pwi pa kaoh khaing: doeh ceu pwi Isarilax khankix, tang: tiah tokaux tix khaing: pwi tang: ceu tang: cat khankix, mai kix yaog tix cung tix krai doh kah phimap phighram: tix mai kah phimap phighram: keeing: kix heue.
Kah daux singaix an: pon: son tix son kix hoik yaog tix cung dee ot dee koe: tix mai hoik phat khaing: daux phuk lai lox tat jhawm: prawng Simiang Siyiex kix, mai son bawg yam pon: son tix son kix hoik krai doh phimap phighram: cao: tix mai krub kah Simiang Siyiex kix heue.
Khaix an: Yeshu, Banix, Kamelax, Shebanix, Bunnix, Sherabix, Danix mai Khenanix khankix cung kah glawk bawng: pwi Lewix mai riag yo lox pa kied ting kah Simiang Siyiex kix heue.
Khaix pwi Lewix, Yeshu, Kamelax, Hashabanix, Sherabix, Hodiyax, Shebanix, mai Petahix khankix ah nin:, "Kaoh cung mai yaogyaw bwanson: Simiang Siyiex pex, leeing ju leeing phan:, "Kieh yaogyaw kah min: ceukaux pa ting siawpsibrawm Maix Cao:, pa hoik ting lhaong: kah piang bwanson: khawm: uik mai kah daux krax pa yaogyaw heue."
Mawh ngie Maix Cao: Tix kaux khaing: pa mawh Simiang Siyiex, Maix Cao: yuh raoma: kah piang raoma:, tau mai can pa koe: khawm: uik, haktiex mai can pa koe: kah piang haktiex khawm: uik, rawm: sigrit sigra: mai can pa koe: kah daux khawm: uik, mai Maix Cao: hoik priex jhung: kah kix khawm: uik, can pa koe: daux raoma: khankix krub kah Maix Cao: heue.
"Maix Cao: mawh Simiang Siyiex, pa hoik laug kah Abram; mai hoik viex nawh lih khaing: veng Urax haktiex Kaladie: mai hoik loh ceukaux nawh mawh Abraham,
Maix Cao: hoik yaox rhawmrhi: pa kaux sijax nawh kah plak sivoe Maix Cao:, mai hoik yuh sijax mukheu tau mai nawh, sonsang tawx tix haktiex ceu pwi Hittix, ceu pwi Amawrix, ceu pwi Pharazi, ceu pwi Yebuzix, mai haktiex ceu pwi Gerashi khankix, kah doeh simie ceucat nawh khankix heue. Maix Cao: yuh awm: gumlox sikah tix khankix, mawh kheu Maix Cao: mawh pa rauh pa see heue.
" Maix Cao: yaox krax kharhawm: kharhi: keeing: yix kah daux haktiex meung Ejiptux, mai hoik mhong: lox riag yo kix hawt rawm: sigrit sigra: raoh heue.
Maix Cao: hoik jhi: mhai: sakse pa daox pa am: khankix kah khunhawkham Pharaw, mai kah cub kawncau nawh khankix, mai kah pwi haktiex khankix, mawh kheu Maix Cao: hoik tawng kah jhawm: pa ting rhawm: ca nyhau: kix kah piang tax du yix heue. Mawh kheu grawng: an:, Maix Cao: hoik koe: min: ceukaux tom: hoek kah daux in: singaix heue.
Maix Cao: kieh rawm: sigrit sigra: gwieh tix sivoe kix, sonsang pon tiang kix tix hu: sigreung rawm: sigrit sigra kah piang tiex kroh; mai Maix Cao: hoik tik kah pwi pa yuh krax kharhawm: kharhi: khankix daux rawm: pa kied raux, awm: simaox tix lon:.
Lheu: khaing: an: Maix Cao: hoik thong: kix tau mai rong: ngu paiawm:, mai ponsawm: tau mai rong: ngu sonsang jhan: riieng piang krax hu: kix heue.
"Maix cao: lih kah piang gawng Sina, mai sikah tau mai kix khaing: raoma:, mai hoik tawx been pa rauh pa see khankix, mai kah lox tat jhawm: prawng pa mawh pa meh, khawm: lox lai beenli pa mhawm: mai gumlox tawm: pingnyap khankix,
Maix Cao: hoik kieh kix tawng singaix twah pa singax singeh mai hoik tawm: tix deuh been jhawm: pa khaw: pa caw tix hawt khankix, mai lox lai beenli mai lox tat jhawm: prawng khankix khaing: daux tawm: taix Mose kawncau Maix Cao: heue.
Yam cairhawm: kix Maix cao: hoik tawx kix ih khaomun khaing: raoma:, yam sang nyaux nie kix rawm: Maix Cao: viex kix nyaux rawm: pa kaoh khaing: daux rang:, mai hoik krai sonsang laig kix tix teei haktiex pa hoik tiextu Maix Cao: tix tawx kah kix heue.
"Viang mawh nan: kix kukaux pa mawh keeing: ex khankix hoik ting rhawm: ca: nyhau: mai hoik kieh ngawg tix cong: mai ang nghiiet kah gumlox tawm: pingnyap Maix Cao: heue.
Kix hoik thiang: mai ang nghiiet mai ang doh keud kah pa daox pa am: pa hoik yuh Maix Cao: kah daux sinax kix, viang mawh nan: kix kieh ngawg tix cong:, mai kah daux pa tieh pa feen kix, kix hoik yaog kah cao: kaing: tix kaux, sonsang deeh ing: kah dee yuh tix siliex kah daux meung Ejiptux, viang mawh nan:, Maix Cao: mawh Siyiex pa chix pluat ploi: phimap, mai pa chix tawx bwanson: mai krax caoxrhawm: caox rhi: mai nhim: kah daux pa songrhawm: songrhi:, pa grum naog kah daux krax caoxrhawm: mai ang lai tik lai vud kah kix heue.
Lheu: khaing: an:, kix hoik raug rieng kawn: moi tix mu:, son tokaux cao: kix mai ah nin:, "In: mawh siyiex yix, pa hoik viex yix lih khaing: meung Ejiptux, mai hoik yuh pa sa pa lao pa kied ting kied lhaong: kawx,
viang mawh nan: Maix Cao: koe: krax pa caoxrhawm: caox rhi:, Maix Cao: ang tik vud kix kah daux tiag daux tu, rong: paiawm: pa thong: kah krax hu: kix daux pon singaix ang grai:, mai rong: ngu pa thong: kix hu: kah daux ponsawm: ca: jhan: riieng kah kix, kah daux krax pa tag sang hu: kix heue.
Maix Cao: hoik tawx khwan: pa mhawm: Tix gau sawn: kah kix, mai ang nyang pluat khaomun Mannax khaing: jheeh kix, mai hoik tawx kix nyaux rawm: yam sang nyaux nie kix rawm: heue.
Daux tipon: num Maix Cao: hoik priex rhawm: kix, kah daux tiag daux tu kix ang koe: pa cud pa cha: tix ceu kawx, kraung ceep kix ang nyang prim:, mai caong kix ang uah heue.
Lheu: khaing: an: Maix Cao: hoik tawx meung haktiex mai ceu pwi kah kix, mai hoik gwieh veng baux mawx baux an:, mawh kheu nan: kix hoik rom tix cie haktiex Sihong khunhawkham Heshabon mai haktiex Awga, pa mawh khunhawkham Bashan heue.
Maix Cao: hoik kieh kawnpraix kix haoh hun:, awm: simuing: raoma: khankix, mai viex kix hu: kah daux tiag, pa hoik krai Maix Cao: kah keeing: kix, sonsang hu: kix mai teei tix cie heue.
Mawh kheu nan: kawnpraix kix laig mai teei tix cei haktiex; Maix Cao: hoik grheu: tix tik pwi pa ot daux haktiex an: kah plak sivoe kix, pa mawh ceu pwi Khanan, mai hoik ap tix tawx kix kah daux tawm: taix kix, tau mai khunhawkham mai pwi haktiex khankix, sonsang pon yuh kix kah kix, awm: pa koe: rhawm: kix tix yuh heue.
Mai kix rhim: tix teei veng pa kaux pa cong: khankix, haktiex pa mhawm: phon:, nyiiex pa naog kraungkhrai: khawm: uik, rawm: maw: pa hoik kaong: tix khankix, sipeem plix siiet, sipeem khaox sanlum khankix, mai khaox pa plix plix pa kied haoh hun: heue. Mawh kheu nan: kix hoik yaox tix ih tom: sak tom: kluing: tix kah, mai gauxrhawm: gauxrhi: kah daux bwanson: Siyiex pa kied ting kied lhaong: Maix Cao: heue.
viang mawh nan: kix ang cu nghiiet mai hoik tieh feen kah Maix Cao:, mai tik vud kah lox tat jhawm: prawng Maix Cao: plak khaix tix mai hoik pah kah cao: jhai: Maix Cao: khankix, pa sideix gau kix sonsang veeh tix ing: kah Maix Cao:, mai kix hoik yuh kaing pa sa pa lao pa kied ting kied lhaong: heue.
Mawh kheu nan: Maix Cao: hoik ap tix tawx kix kah daux tawm: taix pwi koeng kix khankix, pa hoik map nai: kah kix; mai yam pa kha: kix rhawmrhi: tix, yam riag yo kix kah Maix Cao:, Maix Cao: hoik nghiiet khaing: daux raoma:; awm: pa kied nie koe: krax pa caoxrhawm: caox rhi: Maix Cao:, Maix Cao: hoik tawx cao: taoh kax kix, pa hoik deeh taoh tix teei kix khaing: daux tawm: taix pwi koeng kix heue.
"Viang mawh nan: khaix hoik laux lee: kix tix mhawmmhawm: kix hoik baox yuh pa caox pa caig kah plak sivoe ngai: Maix Cao:, mawh kheu nan: Maix Cao: dee ap kix kah daux tawm: taix pwi koeng kix, sonsang kwang: kah piang kix; viang yuh nan: kawx, yam deeh hoek kix mai hoik riag yo kah Maix Cao:, Maix Cao: hoik nghiiet khaing: daux raoma:, mai Maix Cao: hoik taoh kah kix tom: nie bawg kah daux krax caoxrhawm: caox rhi: Maix Cao: heue.
Viang Maix Cao: tawx satix sonsang deeh hoek kix kah lox tat jhawm: prawng Maix Cao: kawx, viang mawh nan:, kix kawn: koe: krax ting rhawm: ca nyhau:, mai ang cu nghiiet kah lox tawm: pingnyap Maix Cao: khankix, mai hoik phit hoik lud kah grawng: krax prawng krax ciyang Maix Cao: khankix,awm: pa khaw: pwi tix kaux, hawt jawh tix yuh mai im: ju kah heue. Mai kix hoik reek reen: klip tix hoik kieh ngawg tix cong:, mai ang lai nghiiet kah heue.
Viang mawh nan:, Maix cao: hoik gun yeung kah kix tom: rheeng: num, mai Maix Cao: tawx satix mai sidiex gau kix kah khwan: Maix Cao: pa kaoh khaing: jheeh: cao: jhai: khankix heue. Viang mawh nan: kix ang lai nghiiet jao in:, Maix Cao: tom: ap kix kah daux tawm: taix pwi haktiex an: khankix heue.
Viang yuh kah mawh kawx kah daux krax caoxrhawm: pa kied ting kied lhaong: Maix Cao:, Maix Cao: ang nyang yuh kix lauxleeing:, mai ang nyang tik vud kah kix, mawh kheu Maix Cao: mawh Siyiex pa grum naog kah pa caoxrhawm: caox rhi: heue.
Mawh kheu nan: Siyiex ex eue, Siyiex pa kied ting kied lhaong:, pa kied ting riang ting rao, mai pa koe: siawpsibrawm krax lhat krax graung, pa priex pa jhung: kah gumlox sijax mukheu mai krax caoxrhawm: caox rhi: Tix eue, paw kieh krax pa kha: rhawm: kha: rhi: an: khankix, mawh pa iak pa lied kah plak sivoe ngai: Maix Cao: pa hoek piang yix, mai kah khunhawkham yix, kah cao: giex cao: kwang: yix, mai kah cao: giex kaing: li yix, kah keeing: yix, mai kah pwi Maix Cao: khawm: uik, jah kah yam kwang: khunhawkham Asurix kah haktiex tom: hoek kah daux in: singaix heue.
Viang yuh kah mawh kawx Maix Cao: rah see kah can ceu pa hoik lih tix mawh kah piang yix khawm: uik, mawh kheu maix Cao: hoik kied kaux sijax tete, viang mawh nan: yix hoik yuh pa ang rah ang see heue.
Cub khunhawkham yix mai cao: kwang: yix khankix, cao: giex kaing: li yix mai keeing: yix khankix, ang lai priex rien kah lox tat jhawm: prawng Maix Cao:, mai ang lai nghiiet kah lox tawm: pingnyap Maix Cao: khankix, mai; kah mhai: sakse Maix Cao:, pa hoik kham: Maix Cao: mhai: sakse kah piang kix heue.
Grawhgrawng: nawh kix ang lai yuh kaing jhaw: Maix Cao:, kah daux meung haktiex tix, viang Maix Cao: tawx bwanson: pa mhawm: tom: nie, mai haktiex pa kied vieh, pa mhawm: phon: kah kix kawx, kix ang lai veeh tix khaing: kaing pa caox pa caig pa yuh tix heue.
"Kah daux in: singaix yix hoik mawh siliex, mawh siliex kah daux haktiex tawx Maix Cao: kah keeing: yix khankix, kah daux haktiex pa yaox yix tix ih kah plix pa mhawm: kuceu pa koe: khaing: tan: heue.
Mawh kheu jao phimap phighram: yix, khunhawkham pa yaog Maix Cao: tix deuh kah piang yix, hoik ghrang: tix ih plix pa kied haoh hun: kah daux haktiex in: khaing: yix; mai kwang: kah piang tokaux yix mai kah piang khawng: brie yix awm: pa koe: rhawmrhi: kix, mai yix ot kah daux pa kharhawm: kharhi: tix heue.
Mawh kheu jao grawng: in:, yix khawm: uik yuh sijax mukheu mai tiem: tix deuh an:; mai cub cao: kaing: pa thong: pa bung: yix khankix mai pwi Lewix yix khankix, mai cao: giex kaing: li yix khankix, hoik tawk cum: kah piang an: heue.
Pwi Pa Tawk Cum: Kah Lox Sijax Mukheu
Yamin: can pwi pa tawk cum: kah piang lai pa hoik tiem: tix khankix, mawh Nehamix, cao: pa kwang: haktiex kawn: simex Hakhali mai Zedekiyax.
Serayax, Azarix, Yeramix,
Pashura, Amarix, Malakhiyax,
Hatut, Shephanix, Maluk,
Harim, Merarot, Obadix,
Danyelax, Gineton, Baruk,
Meshulam, Abiyax, Miyamin,
Mazix, Bilagie, mai Shemayax, khankix heue. Inkix mawh cao: giex kaing: li khankix heue.
Pwi Lewix khankix mawh Yeshu kawn: simex Azaniyax mai Binnuix pa kaoh khaing: daux cub kawn: simex Henadat, mai Kamelax khankix heue.
Puxaik kix mawh Shebanix, Hodiyax, Kelita, Pelayax, Hanan,
Mikha, Rehop, Hashbix,
Zakhurax, Sherabix, Shebanix,
Hodeyax, Banix, mai Baninu, khankix heue.
Cao: kaing: cao: kap kah pwi khankix mawh Parot, Pahatmobax, Elam, Zatux,Banix,
Bunnix, Azagat, Bebie,
Adoniyax, Bigavie,
Ata, Hezakiyax, Azurax,
Hodiyax, Hashum, Bezie,
Harip, Anatok, Nebie,
Magabisha, Meshulum, Hezirax,
Meshazabelax, Zadok, Yadua,
Pelatix, Hanan, Anayax,
Hoshe, Hanarix, Hoshup,
Halohiet, Pilaha, Shobek,
Rehum, Hashabanax, Maseyax,
Ahiyax, Hanan, Anan,
Maluk, Harim, mai Banax khankix heue.
Lox Sijax Mukheu Pa Hoik Tawk Cum:
Can pwi pa kawn deuk an: khankix (cub cao: giex kaing: li, cub pwi Lewix, mai cub cao: pau siviex, cub pa rhax lai, pwi pa kham: tix yuh kaing jhaw: nyiiex Siyiex khankix, mai can pwi pa hoik tang: tiah tokaux tix khaing: pwi haktiex an:, khawm: moeng khawm: kawn: simex kawn: bun: kix khankix, mai pwi koe: krax keud krax sawn: mai kax tawng krax yung khankix, mai kix sang hawt lox tat jhawm: prawng Siyiex),
Kix hoik sitoe: tix mai puxaik tix, cao: kwang: tix, mai hoik laig kah daux pa tiex pa tu tix, sonsang hawt kix kah daux gumlox tat jhawm: prawng Siyiex pa hoik tawx kah Mose, pa mawh kawncau mausoi: Siyiex, mai sonsang priex rien mai awm: pa koe: gumlox pingnyap Siyiex Simiang cao: ex, mai been pa deuh Nawh Cao:; khawm: lox lai beenli Nawh Cao: khankix,
sonsang ang ex tawx kawn: bun: tix khankix mawh moeng pwi haktiex an:, mai son ang kawn: bun: kix teei kawn: simex ex khankix,
Mai phan: pwi haktiex an: khankix viex kraungkhrai: mai pa ih pa un: hoek coh singaix twah, mai singaix pa singax singeh Siyiex ang ah, ex ang pon liag khaing: kix, mai ex ang lai yuh kaing kaung: yuh tix yam hoek daux aliah num, mai ang lai pon tix mhaing: kah ceuk tix ceu kawx heue.
Ex hoik yuh tix deuh been khankix kah son cao: tix, sonsang teei mau loe: son tix son lix khaing: daux tix shekhe pa pon tix ku num, son nyiiex bwan: Siyiex ex,
mai khaomun pa khan: tix tan sivoe, mai krax tan phawng: nghox ca im:, son krax tan pa gleeing singaix twah sijheeng:, son yam haok khix khraox, mai pwie pa hoik tat tix deuh khankix, son kraung pa singax singeh khankix, mai son krax tan pa gleeing pa pluat ploi: phimap, sonsang yuh pa khyox pa khaw: kah son ceu pwi Isarilax khankix, mai son kaing jhaw: nyiiex bwan: ex khankix heue.
Mai ex nieb tix yaox kah daux sinax cao: giex kaing li, pwi Lewix, mai pwi hun: khankix, sonsang viex kix khix son krax tan kah daux nyiiex Siyiex ex, awm: pa hoik yuh cub nyiiex ma: keeing: ex khankix, kah daux bawg yam pa hoik tat tix deuh tix num hoik tix num, sonsang gleeing tix kah piang khu: dee tan Simiang Siyiex ex, awm: krax pa hoik tiem: kah daux lox tat jhawm: prawng heue.
Mai ex yuh been sonsang viex ex plix liang khaing: haktiex ex, mai plix khaox plix ox pa liang ex tix pon khaing: khaox plix pa koe: khawm: uik, hoek kah nyiiex bwan: Siyiex tix num hoik tix num,
awm: pa hoik tiem: tix deuh kah daux lox tat jhawm: prawng, mai viex kawn: ai: plix num: ex, Mai khawng: eei: brie liang ex, mai cub moi pa liang tix keh mai cub pex, cub yung: khankix hoek kah nyiiex bwan: Simiang Siyiex ex kah cao: giex kaing: li cao: yuh kaing jhaw: Siyiex kah daux nyiiex bwan: Siyiex ex heue.
Mai viex khaomun phawng: nghox ca pa hoik klu klao: pa liang tix yuh khankix, mai krax tan krax lu khawm: plix khaox plix ox kuceu mai rawm: plix siiet pa khraox, rawm: bee pa khraox khankix, hoek kah cao: giex kaing: li kah daux lawg pa koe: kah daux nyiiex bwan: Siyiex ex, sonsang viex kao: son tix son hoek khaing: haktiex cao: ex kah pwi Lewix khankix, mawh kheu pwi Lewix mawh cao: rieb kao: son tix son khaing: daux cub pwi yuh kaing ma: khawm: uik heue.
Yam rieb pwi Lewix khankix kah kao: son tix son, cao: giex kaing: li doeh simie ceu cat Arun caw tix ot tau mai kix, mai pwi Lewix tag teei kao: son tix son khaing: daux kao: son tix son hoek kah nyiiex bwan: Siyiex ex, kah daux krao: sinngao heue.
Grawhgrawng: nawh Kawnpraix ceu pwi Isarilax mai kawnpraix pwi Lewix khankix, tag viex krax tan phawng: nghox ca im:, mai rawm: plix siiet pa khraox khawm: bee, hoek kah daux lawg priex kraung kah dee koe: kraung sinngao pa singax singeh khankix, mai kah dee ot cao: giex kaing: li pa yuh kaing jhaw: Siyiex khankix, mai cao: pau siviex khankix cao: rhax lai khankix; mai ex tag ang pon prah kah nyiiex bwan: Siyiex ex heue.
Grawng: Pwi Pa Ot Kah Daux Veng Yerusaliem
Cub cao: kaing cao: kap pwi khankix hoik ot kah daux veng Yerusaliem, mai cub pwi pa kawn deuk khankix hoik nieb tix yaox khaing: daux pwi kao: kaux, tix kaux an: tag tawx ot kah daux veng Yerusaliem veng pa singax singeh, mai pa kawn deuk dim: kaux khaing: kao: kaux an:, tag ot kah daux veng tang: dauh tang dee heue.
Mai pwi khawm: uik nawb bwan: kah piang pwi khankix pa hoik koe: rhawmrhi: tix ot kah daux veng Yerusaliem heue.
In: mawh cao: kaing: khankix khaing: kien haktiex an: pa hoek kah daux veng Yerusaliem heue. (Viang mawh nan:, pwi pa hoik tang: ot kah veng kah nyiiex yaong: cao: tix kah daux haktiex Yudax mawh pwi Isarilax mai cao: giex kaing: li, pwi Lewix, pwi kham: tix yuh kaing jhaw: nyiiex bwan: Siyiex, mai khawm: doeh simiex ceucat kawncau khunhawkham Sawlamon khankix heue).
In: mawh cub kawnpraix ceu pwi Yudax mai kawnpraix ceu pwi Binyamin khankix pa ot kah daux veng Yerusaliem tan:, kawnpraix ceu pwi Yudax khankix mawh Atayax kawn: simex Urix kawn: simex Zakharix, kawn: simex Amarix, kawn: simex Shephatix, kawn: simex Mahalalelax, cub kawnpraix Pariet khankix,
mai Maseyax kawn: simex Baruk, kawn: simex Kholahozie kawn: simex Hazayax, kawn: simex Adayax, kawn: simex Yoyarip,kawn: simex Zakharix, kawn: simex Shilonix heue.
Cub kawn: simex Pariet pa ot kah daux veng Yerusaliem khawm: uik, koe: pon: yieh tiglaih daix kaux, pa mawh pwi pa koe: rhawm: vao rhawm: kua: heue.
Mai inkix mawh cub kawn: simex Salux kawn: simex Meshulam; kawn: simex Yodax, kawn: simex Pedayax,kawn: simex Kolayax, kawn: simex Meseyax, kawn: simex Itelax, kawn: simex Yeshayax;
mai khaix nawh mawh Gabie, mai Salie khankix, koe: dim: yieh tinga: daix kaux heue.
Yolax kawn: simex Zakharix, tom: mawh cao: kaing: kix, mai Yudax kawn: simex Senuamawh cao: kwang: veng ra: kaux heue.
Khaing: daux cub cao: giex kaing: li khankix: mawh Yedayax kawn: simex Yoyarip, mai Yakhin;
Serayax kawn: simex Hilakix, kawn: simex Meshulam, kawn: simex Zadok, kawn: simex Merayot, kawn: simex Ahitup; mawh cao: kaing nyiiex bwan: Siyiex heue.
Puxaik kix pa yuh kaing nyiiex bwan: khankix koe: daix yieh tinga: ra: kaux, mai Adayax kawn: simex Yeroham, kawn: simex Pelalix, kawn: simex Amazix, kawn: simex Zakharix, kawn: simex Peshurax, pa deeh mawh kawn: simex Malakhiyax,
mai puxaik nawh pa mawh cao: kaing: daux nyiiex ma: keeing: kix koe: ra: yieh tipon: ra: kaux, mai Amashen kawn: simex Azarelax kawn: simex Ahazen kawn: simex Meshilamot, kawn: simex Imarax,
mai puxaik kix pa mawh pwi pa kied ting riang ting rao mai pa koe: rhawm: vao rhawm: kua: khankix, koe: tiyieh tinga: daix kaux, cao: kaing: kix mawh Zabadelax kawn: simex Hagadoling heue.
Ceu pwi Lewix khankix mawh Shemayax kawn: simex Hashup, kawn: simex Azarikam, kawn: simex Hashabix, kawn: simex Bunnix;
Shababetie mai Yozabat, cao: kaing: cao: kap pwi Lewix khankix, mawh cao: pa kia: ngiien kaing jhaw: plak kah praix nyiiex bwan: Siyiex;
mai Matanix kawn: simex Mikha, kawn: simex Zabadix, kawn: simex Asap, pa mawh cao: kaing: pa thong: kix jhak krax yaogyaw bwanson: tau mai krax rawg Bwan:, mai Bakabukiyax mawh ra: kaux tix kaux khaing: daux sinax puxaik nawh khankix, mai Abada kawn: simex Shammua, kawn: simex Kalalax, kawn: simex Yedutun heue.
Pwi Lewix pa ot kah daux veng pa singax singeh khawm: uik koe: ra: yieh tidaix pon: kaux heue.
Lheu: khaing: an: cub cao: pau siviex khankix mawh Akkup, Talamon,mai cub puxaik kix pa priex rien kah siviex khankix koe: tiyieh atigliah ra: kaux khawm: uik heue.
Mai can pwi Isarilax pa kawn deuk pa mawh cao: giex kaing: pwi Lewix khankix, pa ot kah daux veng nyiiex yaong: haktiex Yudax khankix mai pwi kukaux hoik tang: ot kah daux haktiex sinngao cie tix heue.
Viang mawh nan:, pwi kham: tix yuh kaing jhaw: nyiiex bwan: Siyiex khankix ot kah daux Ophilax heue. Ziha mai Gishapax mawh cao: kwang: kah piang cao: kham: tix yuh kaing jhaw: nyiiex bwan: Siyiex heue.
Cao: pa kia: nghieh kah piang pwi Lewix pa ot kah daux veng Yerusaliem khankix mawh Ozix kawn: simex Banix, kawn: simex Hashabix, kawn: simex Asap cao: pa rhax lai khankix mawh cao: kia: ngien kaing jhaw: Siyiex heue.
Grawhgrawng: nawh khunhawkham tawx lox kah son grawng: kix cub pa rhax lai sonsang pon kix nyum: pa ih pa un: pa caw kix tix pon tix ngaix hoik tix ngaix heue.
Petahix kawn: simex Meshezabelax pa kaoh khaing: cub kawnpraix Zerax kawn: simex Yudax mawh cao: kaing: son grawng: kaing kuceu kah piang pwi haktiex greem: khunhawkham heue.
Pwi Ot Plak Praix Veng Yerusaliem
Mai pwi tom: nie ot kah dee dex kaing ma: nyiiex yaong: tix khankix, kawnpraix ceu pwi Yudax tiblah ot kah daux veng Kirayatabax mai nyiiex yaong: an: khankix, veng Dibon mai nyiiex yaong: an: khankix,
Kah aux veng Yeshu, veng Moladax, veng Bietpeliet,
veng Haza, Shualax, mai veng Berashebax mai nyiiex yaong: an: khankix,
Kah daux veng Zikalat mai veng Hiekona mai nyiiex yaong: an: khankix,
kah daux veng Enrimon, veng Zorax, veng Yamut,
veng Zanaw, veng Adalam, mai nyiiex yaong: kix khankix, kah daux veng Lakhisha mai tong kaung: an: khankix; kah daux veng Azaka mai nyiiex yaong: an: khankix heue. kix hoik ot baoh an:, jah khaing: veng Berashebax tom: hoek kah daux ngawd Hinnom khankix heue.
Cub kawnpraix ceu pwi Binyamin pa kaoh khaing: veng Gebax khankix hoik ot kah dax veng Mimat veng A-ix mai veng Betelax, mai nyiiex yaong: kix khankix;
kah daux veng Anatok, veng Nobax, veng Ananix,
kah daux veng Hazo, veng Rama, veng Gittem,
kah daux veng Hittix, veng Zebom, veng Nebalat,
kah daux veng Lodax, veng Omaw, mai kah daux ngawd pwi chix yuh kaing tix khankix heue.
Cub pwi Lewix pa ot kah daux haktiex Yudax hoik gwieh tix ot kah daux haktiex Binyamin heue.
Cao: Giex Kaing: Li Mai Pwi Lewix
In: mawh cub cao: giex kaing: li mai pwi Lewix khankix, pa hoik hoek tau mai Zerubabelax, kawn: simex Shalatelax, mai Yeshu Serayax, Yeramix, Ezarax,
Amarix, Maluk, Hatut,
Shekanix, Rehum, Meramot,
Ido, Geneton, Abiyax,
Miyamin, Madia, Bilaga,
Shemayax, Yawyarip, Yelayax,
Salu, Amok, Hilakhix, mai Yedayax,khankix heue. Inkix mawh cub cao: kaing: cao: giex kaing: li khankix mai khawm: puxaik kix kah daux baux singaix Yeshu heue.
Lheu: khaing: an: cub pwi Lewix khankix mawh Yeshu, Binnui, Kamelax, Sherabix, Yudax, mai Matanix, mawh pa thong: pa bung: pwi kah lai rhax pa yaogyaw bwanson: tau mai puxaik nawh khankix heue.
Bakabukix, mai Unix, mai puxaik kix khankix hoik cung tix ot kah plak see kix yam koe: beeh glawm: kix heue.
Yeshu mawh keeing: kah Yoyakim, Yoyakim mawh keeing: kah Eliyaship; Eliyaship mawh keeing: kah Yoyadax,
mai Yoyadax mawh keeing: kah Yawnasan, Yawnasan mawh keeing: kah Yadua heue.
Cao: kaing: kah daux cub cao: giex kaing: li, kah daux baux singaix Yoyakim hoik mawh inkix heue. Khaing: Sherayax mawh Merayax, khaing: Yeramix, mawh Hananix,
khaing: Ezarax mawah Meshulam, khaing: Amarix mawh Yehohanan,
khaing: Melikhu mawh Yawnasan, khaing: Shebanix mawh Yosiep;
khaing: Harim mawh Adanax, khaing: Merayok mawh Helakie,
khaing: Ido mawh Zakharix, khaing: Giheton mawh Meshulam,
khaing: Abiyax mawh Zikhrix, kawn: simex Miyamin, khaing: Mawdia mawh Pilatix;
khaing: Bilaga mawah Shammua, khaing: Shemayax mawh Yehonasan,
khaing: Yoyarip, mawh Matatenie, khaing: Yedayax mawh Uzi,
khaing: Salatie mawh Kalalie, khaing: Amok mawh Eba,
khaing: Hilakhix mawh Hasabix, mai khaing: Yedayax mawh Netanelax heue.
Daux glang: bawg yam kwang: simiang Darix ceu pwi Pasha kah haktiex, carang pa tiiem: tix deuh grawng: pwi Lewix, mai cao: giex kiang: li pa hoik sax mawh cao: kaing: kah daux nyiiex ma: keeing: kix hoik dawg koe: tom: baux ju Eliaship, Yoyadax, Yohanan, mai Yadua heue.
Carang cub kawn: simex pwi Lewix khankix, mai cao: kaing: cao: kap paox nyiiex paox ma: keeing: kix to:, hoek baux singaix Yohanan, pa mawh kawn: simex Eliahship, hoik tiem: tix kah daux phuk lai been khankix heue.
Mai cub cao: kaing: cub Lewix khankix, mawh Hashabix, sherabix, mai Yeshu kawn: simex Kamelax, tau mai puxaik kix hoik cung tix ot see paox tix sonsang lai loh tix yaogyaw mai ting bwanson: kah Siyiex awm: gumlox pa tawm: Davit, pa mawh pwi Siyiex heue.
Matanix, Bakabukix, Obadix, Meshulam, Talamon, mai Akkup khankix hoik mawh cao: pau siviex krao: kraung heue.
In: mawh pwi pa ot tau mai kix, kah daux baux singaix ju Yoyakim kawn: simex Yeshu, kawn: simex Yozadak, mai kah daux singaix ju Nehamix pa mawh cao: pa kwang: veng, mai Ezarax cao: giex kaing: li cao: tiem: lai heue.
Grawng: Appong: Nehamix Kah Guh Veng
Yam hoek baux yam appong: kix kah guh veng Yerusaliem kix hu: sawg pwi Lewix khankix, kah dee ot dee koe: kix khawm: uik, sonsang hoek yuh kix krax pa appong: Yerusaliem, tau mai pa gauxrhawm: gauxrhi: mai pa ting bwanson: tau mai pa rhax lai mai chiang: mai ting: koe: maox khawm: ting: pawd khankix heue.
Mai cub kawn: simex cao: pa rhax lai khankix kraix khrawm: paox tix khaing: hawt vungviang veng Yerusaliem mai khaing: yaong: Netawphatix khankix,
khaing: nyiiex yaong: baoh veng Gilakalax, mai khaing: daux tong veng Gebax mai veng Azamaviet khankix heue. Mawh kheu cao: pa rhax lai khankix, hoik sum: tix ot nyiiex yaong: hawt vungviang Yerusaliem son cao: kix heue.
Khaix an: cao: giex kaing: li mai pwi Lewix khankix hoik kieh tokaux tix singax, mai pwi hun: khawm: guh veng singax heue.
Mawh kheu nan: aux viex cao: kaing: pwi Yudax khankix haok piang guh veng mai hoik yaog tix deuh cub caw: ting pa rhax lai yaogyaw bwanson: koe: ra: cub mai an: tix cub hoik hu: plak khawn: dawm: piang guh veng plak sivex dee tik pwi ceu pa seeing: pa brai;
Khaix kix mawh Hoshayax mai cub cao: kaing: pwi Yudax khankix tix plak pa hu:,
mai Azarix, Ezarax, Meshulam,
Yudax, Binyamin, Shemayax, Yeramix,
mai cub kawn: simex cao: giex kaing: li khankix pa giex teettawng, mawh Zakharix, kawn: simex Yawnasan, Yawnasan mawh kawn: simex Shemayax, Shemayax mawh kawn: simex Matanix, Matanix mawh kawn: simex Mikhayax, Mikhayax mawh kawn: simex Zakhurax, Zakhurax mawh kawn: simex Asap,
mai puxaik nawh khankix pa mawh Shenayax, Azarailax,Milalie, Gilalie, Ma-ix, Natanelax, Yudax mai Hananix tau mai kraung ting: tah Davit, pa mawh pwi Siyiex; mai Ezarax pa mawh cao: tiem: lai hu: sivoe kix heue.
Kah plak sivoe hawt baoh siviex rawm: keut tan:, kix haok piang krax guh veng kah glawk bawng: veng Davit, see nyiiex haw: Davit kah blaong tom: hoek kah siviex plak lih singaix heue.
Cub pa rhax lai yaogyaw bwanson: tang: cub, hoik hu: kah krax plak gwieh, mai ang hawt khaix kix tau mai pwi khankix tix plak kah piang guh veng, mai tiang tix hu: khaing: dee pau pa lhaong: nyiiex tao: ngu tom: hoek dee kied siva: guh veng,
mai tiang kah piang siviex Epharem,kah piang diang siviex prim:, mai kah piang siviex Kax mai kah nyiiex pau dee lhaong: Hananelax, mai kah nyiiex pau dee lhaong: Meax, tom: hoek kah siveix yung:, mai kix kaog kah hawt siviex thawng: heue.
Mawh kheu nan:, cao: pa rhax lai yaogyaw bwanson: khankix ra: cub cung kah daux nyiiex bwan: Siyiex, aux mai cao: pa kwang: haktiex khankix tix plak hoik cung tau mai aux,
mai cub cao: giex kaing: li khankix pa mawh Eliakim, Maseyax, Mikhayax, Elionie, Zakharix mai Hananix, pa giex teettawng,
mai Maseyax, Shemayax, Eliaza, Urix, Yehohanan, Malakhiyax, Elam, mai Eza khankix hoik ot tau tan: heue. Cao: pa rhax lai khankix hoik rhax lai kah daux pa kied ting sinum Yezarahix mawh cao: bung: cao: thong: kah kix heue.
Kah daux singaix an: kix hoik tan to: tan pa appong: tom: nie mai krax pa gauxrhawm: gauxrhi: tix, mawh kheu Siyiex hoik kieh kix gauxrhawm: mai krax pa kied ting, bun: mai kawn: nyawm khankix kawx gauxrhawm:, krax pa gauxrhawm: veng Yerusaliem hoik mhong: tix tom: singai heue.
Grawng: Teei Beeh Glawm: Son Nyiiex Bwan:
Mai kah daux bawg yam an:, kix hoik yaox pwi tiblah mawh pa teei beeh glawm: kah piang krao: lawg priex kraung khankix, son krax tan krax lu, plix khaox plix ox pa liang tix plix, mai son kao: son tix son, pa khrawm: kix khaing: daux tong kaung: daux veng khankix, pa mawh nyum: pa hoik tat awm: lox tat jhawm: prawng son cao: giex kaing: li mai pwi Lewix khankix, mawh kheu ceu pwi Yudax khankix hoik gauxrhawm: gauxrhi: kah cao: giex kaing: li mai pwi Lewix pa yuh kaing jhaw: Siyiex heue.
Cao: giex kaing: li mai pwi Lewix hoik priex rien tix yuh kaing jhaw: Siyiex kix, cao: pa rhax lai mai cao: pau siviex khankix kawx, hoik priex rien tix yuh awm: gumlox tawm: Davit mai kawn: simex nawh Sawlamon heue.
Tom: kah daux baux singaix ju Davit mai Asap cao: kaing: ting kah cub cao: rhax lai khankix mai pa rhax lai yaogyaw bwanson: kah Siyiex hoik dawg koe: tom: yam an: heue.
Kah daux baux singaix Zerubabelax mai kah daux baux singaix ju Nehamix khankix, ceu pwi Isarilax khawm: uik hoik tang: tawx nyum: son cao: pa ah lai rhax mai son cao: pau siviex khankix, nyum: pa caw kix tix pon son ku singaix, kix hoik tang: gwieh tix tan ceu pa singax singeh an: khankix son pwi Lewix, mai pwi Lewix khankix hoik dee tang: gwieh tix tan ceu ankix, son kawnpraix Arun khankix heue.
Been Krax Gwieh Cub
Kah daux singaix an: kix phat pwi mhong: kah gumlox phuk lai Mose, mai kah daux lai ankix kix yaox krax pa hoik tiem: tix sonsang ang ceu pwi Amon mai ceu pwi Mawbax khankix, pon laig kah daux sinax cub pwi hun: cie Siyiex khankix,
mawh kheu ang kix rieb kah kawnpraix ceu pwi Isarilax khankix kah khaomun mai rawm:, kix hoik vai Balam sonsang tieh feen mai jhax lawg kah kix, viang mawh nan:, Siyiex hoik deeh loh krax pa jhax lawg an:, mawh ceu pa nawb bwanson: heue.
Yam hoik mhong: kix kah gumlox tat jhawm: prawng an:, kix hoik gwieh pwi haoh pwi hun: pa neuex tix tau khawm: uik khing: ceu pwi Isarilax khankix heue.
Grawng: Pa Deeh Cox Khre: Nehamix
Sivoe in: cao: giex kaing: li Eliaship hoik koe: siawpsibrawm kah piang lawg krao: priex kraung nyiiex bwan: Siyiex ex khankix mai hoik yuh paox yuh pie tau mai Tobix heue.
Mai hoik khre: lawg pa ting tix mu: son nawh, kah dee priex kix krax tan phawng: nghox ca im: mai can ceu pa sioe: bhawng:, kraung shiao mai nghox ca kao: son tix son, mai rawm: plix siiet pa khraox khawm: bee khankix, pa hoik tawm: tix sonsang tawx kah pwi Lewix cao: rhax lai, cao: pau siviex, mai krax tan krax lu khankix son cub cao: giex kaing: li khankix heue.
Viang mawh nan: glang: yam sinax in: khankix, aux ang lai ot kah daux veng Yerusaliem, mawh kheu kah daux bawg yam hoik kwang: Atazerit khunhawkham veng Babulon kah haktiex tingoe: ra: num tix num, aux deeh ing: kah khunhawkham, kah daux khaix singaix an: aux hoik pon akhwang: khaing: khunhawkham,
yam hoek aux kah veng Yerusaliem mai yaox kah ceu pa caox pa caig pa yuh Eliaship son Tobix kah pa khre: rien lawg tix mu: son nawh kah daux biang nyiiex bwan: Siyiex heue.
Mai ceu pa kied meet rhawm: meet rhi: kah tete, mawh kheu nan: aux tom: teei tix tik kraung nyiiex kraung ma: Tobix khawm: uik khaing: daux lawg heue.
Khaix an: aux tawx lox sonsang yuh kix lawg singax, mai aux hoik deeh viex kraung shiao nyiiex bwan: Siyiex khankix laig kah daux lawg tau mai krax tan phawng: nghox ca im: mai ceu pa sioe: bhawng: khankix heue.
Aux hoik deeh tawng kah ang pwi Lewix khankix nyang bax pon nyum: pa khaw: tix tawx kah kix pa mawh pwi Lewix khankix kukaux mai cao: pa rhax lai pa yuh kaing jhaw: khankix mai hoik deeh ing: kah tong kaung: tix heue.
Mawh kheu nan: aux hoik ne raw kah cao: pa kwang: haktiex khankix, mai ah nin:, "Nyiiex bwan: Siyiex lai chix mawh pa tik pa vud tix yuh kah mawh lie?" Mai aux hoik kraix khrawm: pwi Lewix tau mai hoik deeh yaog tix deuh kix kah dee ot dee koe: kix heue.
Khaix pwi Yudax khawm: uik hoik viex nghox ca, rawm: plix siiet pa khraox mai bee khankix pa mawh krax tan kao: son tix son hoek kah nyiiex krao: priex kraung heue.
Mai aux hoik yaog tix deuh cao: pa kwang: khankix kah piang nyiiex krao: priex kraung, pa mawh cao: giex kaing: li Shelemix mai cao: tiem: lai Zadok mai khaing: daux pwi Lewix khankix tom: mawh Pedayax mai khaix kix tom: mawh Hanan mawh kawn: simex Zakharix, Zakhurax mawh kawn: simex Mataniyax heue. Kheu mawh kix pa hoik koe: krax pa kaux sijax mai kaing jhaw: tom: mawh pa sang gwieh tix tawx kraung kah son puxaik kix heue.
Siyiex eue doh keud doh sawn: kah aux son grawng: in:, mai paw doh preet tix tik kaing ceu pa mhawm: yuh aux khankix, kah pa hoik yuh aux kah son nyiiex bwan: Siyiex aux mai son kaing jhaw: khankix heue.
Kah daux singaix yam an: aux hoik yaox pwi tiblah kah daux haktiex Yudax, pa briiet rawm: plix siiet kah daux singaix twah, mai paw viex lhiem: nghox khankix hoek, mai tang: rawm: plix siiet kah piang la, khawm: sigleem: plix siiet mai plix ruh khankix mai kuceu khawm: uik, pa hoik viex kix hoek kah daux veng Yerusaliem kah daux singaix twah, mai aux hoik sax tawx satix kah kix sonsang ang kix coh cai: lai gee singaix twah heue.
Pwi veng Turux pa ot kah daux veng Yerusaliem teei kax mai kraung lai kuceu ku cawng hoek, mai coh kah pwi Yudax daux singaix twah heue.
Khaix an: aux hoik ne raw kah cub simiang pa laoh pa lie pwi Yudax khankix, mai ah kah kix, "Yuh kah mawx pex lai yuh ceu pa caox pa caig yuh nin:, sonsang kieh tix singaix twah seeing: brai: kah yuh kah mawh?
"Mawh ang keeing: pex khankix hoik yuh awm: an:, mai ang mawh Siyiex pa hoik viex krax laux krax leeing: in: khawm: uik hoek kah piang ex mai kah piang veng in: lie? Mai lai kawn: baox viex krax songrhawm: songrhi: hoek kah piang ceu pwi Isarilax khankix, pa hoik seeing: brai: yuh tix singaix twah heue."
Mawh kheu nan: kah daux siviex veng Yerusaliem kah daux bawg yam jah praix tix sang faik sivoe singaix twah tix ngaix, aux hoik tawx lox sonsang nyeep kix kah siviex veng khankix, mai tawx beeh glawm: sonsang ang kix paoh siviex tom: hoik luan singaix twah, khaix aux yaog tix deuh kawncau tix khankix tiblah sonsang pau jhak kah siviex khankix, sonsang ang viex beeh glawm: pa cien khankix laig kah daux veng singaix twah heue.
Mawh kheu nan: cao: yuh lai yuh geu khankix mai cao: coh cao: cai: kraung kuceu, hoik pan: hoik peung kah plak praix veng Yerusaliem been tix bawg ra: bawg heue.
Mai tawx satix mai ah nin: kah kix, "Pex lai pan: peung plak praix guh veng yuh kah mawx lie? Phan: pex baox deeh yuh nin:, Aux tag giex kah pex," jah khaing: yam an:, kix ang lai hoek tix bawg kawx kah daux singaix twah heue.
Mai aux tawx lox kah pwi Lewix khankix, sonsang yuh kix tokaux tix singax, mai sonsang hu: pau kix kah siviex veng, mai sonsang kieh kix singaix twah singax singeh, Siyiex deeh doh keud doh sawn: kah aux, son kaing in: mai pluat ploi: kah aux, awm: koe: krax caoxrhawm: caox rhi: pa kied ting Maix Cao: liak.
Kah daux singaix an: aux hoik yaox kah pwi Yudax tiblah pa teei tix moeng ceu pwi Ashadok, ceu pwi Amon, mai ceu pwi Mawbax khankix heue.
Mai kawnpraix kix tix plak hoik sikax lox ceu pwi Ashadok, mai ang lai chix sikax lox pwi Yudax, viang mawh nan: kix hoik sikah kah lox sikax ceu pwi mawx pwi an: heue.
Mai aux ne raw kix, jhax lawg kah kix, sivied kix tiblah, reeig hauk kix, mai hoik kieh kix tiextu tix kah Siyiex, ah nin:, "Pex tag ang pon tawx kawn: bun: tix mex kawn: simex kix, mai pex tag ang pon tix teei kawn: bun: kix mawh moeng kawn: simex pex khawm: cao: pex heue."
Ang mawh Sawlamon khunhawkham ceu pwi Isarilax pa hoik phit hoik lud kah grawng: ceu inkix lie? Viang mawh nan:, kah daux sinax haktiex pa haoh pa hun: khunhawkham pa awm: nawh ang koe: tix kaux kawx, pa kied moh Siyiex kah nawh, mai Siyiex hoik kieh nawh mawh khunhawkham kah piang ceu pwi Isarilax, viang yuh kah mawh kawx, bun: tang: praix tang: klawng: khankix kawn: pon kieh nawh phit lud heue.
"Mawh khex sang nghiiet yix kah krax pa yuh pex, pa caox pa caig pa kied ting in:, mai pa phit pa lud pex kah Siyiex ex, kah teei pex tix moeng bun: tang: praix tang: klawng: khankix lie?"
Mai pwi tix kaux pa kaoh khaing: daux cub kawn: simex Yoyadax pa mawh kawn: simex cao: giex kaing: li pa ting Eliaship pa mawh kheue: Sanbalat pwi Horonix, mawh kheu aux hoik grheu: nawh lih khaing: tix heue.
Siyiex aux eue, doh keud kah kix, mawh kheu kix hoik seeing: yuh grawng: pa mawh tix cao: giex kaing: li mai sijax mukheu pa hoik yuh Maix Cao: tau mai cao: giex kaing: li mai pwi Lewix khankix heue.
Mawh kheu nan: aux hoik kieh kix singax mai hoik kieh kix tang: tiah tix khaing: pwi tang: praix tang: klawng: kuceu, aux hoik yaog tix tawx beeh glawm: kah cao: giex kaing: li mai pwi Lewix khankix kaux mawx kaux an:, kah daux kaing jhaw: pa yuh nawh,
Mai aux kieh kix viex tix tan khix mai plix khaox plix ox pa liang kix tix pon phao voe hoek kah bawg yam pa hoik tat tix deuh, Siyiex aux eue, doh keud kah aux mai tawx bwanson: kah aux liak.
LAI ISATAX
(Esther)
Isatax
Khunhawkham Teei Nanghawkham Vasati Lih Khaing: Dang Ngeung
Khaix hoik luan ceu ankix kah daux baux singaix kwang: khunhawkham Ashuerux, (in: mawh khunhawkham Ashuerux pa hoik kwang: haktiex jah khaing: haktiex Kalalung (India) tom: hoek kah haktiex Ethiopia khankix mai nawh kwang: kah haktiex tiyieh tinga: aliah baoh heue).
Kah daux singaix ankix, yam hoik ngawm khunhawkham Ashuerux tix mawh khunhawkham kah piang dangngeung haktiex cao: nawh, pa hoik koe: kah daux Shushan pa mawh nyiiex tab pa lhaong:,
kah daux bawg yam kwang: nawh kah haktiex daux loe: num tix num, nawh yuh pwie son cao: kaing: cao: kap nawh mai son kawncau mausoi: nawh khawm: uik, mai khawm: cao: kaing: cao: kap pa koe: siawpsibrawm piang haktiex Pasha mai Midix khankix, mai cub simiang pa ting pa lhaong: greem: nawh khankix, mai khawm: kawn: simiang baoh haktiex an: khankix, mai sonsang hoek kix kah plak sivoe nawh,
yam jhi: nawh kix yaox krax pa mag mi min: plakngai: meung haktiex nawh khankix, mai khawm: krax pa kied haok hwan: siawpsibrawm krax kwang: krax pang: nawh khankix son daux singaix ankix, mawh tiyieh tidaix ngaix khawm: uik heue.
Mai yam naog singaix inkix, khunhawkham khan: kheu: tix yuh pwie pa rheung: aliah ngaix son pwi khawm: uik, pa hoik bleeh tix hoek kah daux nyiiex tab lhaong: Shushan, jah khaing: kah pa ting tom: hoek kah pa iak kah daux gwang piang sipeem nyiiex ot simiang heue.
Man: tieb pa paing mai pa klai raoma: khankix hoik phyawk tau mai maox keei: man: ceu pa mhawm: mai hoik tauk tix kah maox keei: man: pa lung pliex an: khankix kah piang jeep mau mai piang rong: simaox paing khankix, mai ku: it ku: tawm khankix hoik mawh pa yuh tix kah khri: mai man: pa koe: kah piang meeh tawm an: tix mu: pa tawm tix kah piang simaox paing, siang: simaox raoh simaox lheung: mai simaox lung khankix heue.
Mai kix khan: kheu: tix tawx rawm: nyaux khankix kah daux kawk khri: mai kawk nyaux ankix ku mu: hoik tang: siyox khaing: paox tix, tau mai rawm: plix siiet nyaux khunhawkham khankix tom: nie, awm: krax pa fahrhawm: khunhawkham heue.
Awm: pa koe: been krax nyaux ankix ang lai mawh ceu pa sang khin: tix nyaux kah. Son grawng: an: khunhawkham hoik tawx lox kah cub simiang iak pa ot daux nyiiex ma: nawh khankix, sonsang hawt yuh kix awm: krax pa nyawmrhawm: nyawm rhi: kaux pwi mawx kaux pwi an: heue.
Nanghawkham Vashati baox yuh pwie tix mu: son bun: khankix kah daux nyiiex haw: cie khunhawkham Ashuerux heue.
Kah daux aliah ngaix tingaix, yam gaurhawm gaurhi khunhawkham tau mai nyaux tix rawm plix siiet, nawh tawm lox kah Mehuman, Bizata, Habawna, Bigata, Abagata, Zeta, mai Kahka khankix pa mawh pwi sieh aliah kaux, pa hoik kaing kah daux plak sivoe khunhawkham Ashuerux,
sonsang viex nanghawkham Vashati hoek kah plak sivoe khunhawkham khawm: krax ceep tix mhok khri: simiang mai jhi: krax pa mhawm: grang nawh kah pwi khankix mai sivoe iak an: khankix, kheu hoik mhawm: grang nawh tix jhak heue.
Viang mawh nan: nanghakham Vashati hoik thieang tix hoek kah lox tawm: khunhawkham, kah pa hoik viex cub pwi sieh nawh khankix, mawh kheu nan: khunhawkham meet rhawm: meet rhi:, mai krax pa songrhawm: songrhi: nawh hoik hax awm: ngu kah daux rhawm: nawh heue.
Khaix an: khunhawkham ah nin: kah pwi pa koe: pingnya ciyi khankix, pa hoik chix tawng kah bawg yam khankix, grawhgrawng: nawh in: mawh krax pa yuh khunhawkham kah plak sivoe pwi khankix pa hoik tawng kah been mai grawng: krax prawng krax ca:,
pwi inkix pa kied dex kah nawh tom: hoik mawh Khashana, Sheta, Adamata, Tashisha, Mariet, Masena mai Memukan khankix pa mawh kawn: simiang haktiex Pasha mai haktiex Midix khankix aliah kaux, pa hoik kied laoh kied lie kah plak sivoe khunhawkham mai pa kied lhaong: glawk kaing kah daux meung haktiex an: khankix heue.
Mawh sang caw: ex tix yuh patix kah nanghawkham Vashati awm: krax pa koe: been kheu jao ang nawh caw tix nghiiet kah lox tawm: khunhawkham Ashuerux pa hoik viex kix hoek khaing: pa sieh an: khankix lie?
Mai Memukan deeh pawk tix ah nin:, kah plak sivoe khunhawkham mai cub kawn: simiang an: khankix; nanghawkham Vashati ang joeng mawh pa hoik phit hoik lud kah khunhawkham nongnong: ngie, mai nawh hoik phit hoik lud kah kawn: simiang an: khawm: uik, mai pwi pa koe: kah daux baoh haktiex cie khunhawkham Ashuerux khawm: uik heue.
Mai jhawm: krax yuh nanghawkham an: tag mawh pa hoik tawng bun: khawm: uik kah, mawh kheu nan: kix tom: koe: lox sibriem kah mex tix khankix kah daux plak sivoe ngai: cao: kix, yam deeh krai kix grawng: yuh nin:, khunhawkham Ashuerux tawm: lox tix kah nanghawkham Vashati sonsang hoek jhi: nawh tix kah plak sivoe nawh, viang mawh nan: ang cu tix hoek heue.
Daux singaix in: cub moeng simiang haktiex Pasha mai haktiex Midix khankix tag ah nin: kah cub cao: kaing: greem: khunhawkham khankix, kah pa hoik mhong: tix grawng: jhawm: nanghawkham an:, mawh kheu nan: krax pa kied kaig tua mai krax pa meet rhawm: meet rhi: tag mawh pa koe: kah heue.
Phan: an: mawh pa khaw: rhawm: khunhawkham, kieh siawpsibrawm khunhawkham preet tix khaing: nawh mai kieh mawh pa tiiem: tix deuh kah daux been ceu pwi Pasha mai Midix, sonsang ang been an: sang mawh pa hoik tieh loh tix, mai Vashati tag ang lai yaox tix hoek kah plak sivoe khunhawkham Ashuerux khaix in: tibawg kawx, mai kieh khunhawkham tawx glawk nanghawkham mawh nawh kah pwi tang: kaux, pa mawh pwi pa nie lheu: mhawm: khaing: nawh heue.
Yam pa pao: lox khunhawkam kah daux hatiex dee pang: dee kwang: khankix, kheu an: hoik mawh pa kied vieh va: can moeng pwi pa ting pa iak khankix khawm: uik tag yaox tix deuh minkix heue.
Mai krax pa deeh pawk lox an:, hoik krox rhawmrhi: khunhawkham mai cub kawn: simiang greem: nawh khankix, mai simiang hoik yuh nawh awm: gumlox pa hoik ah Menukham heue.
Khaix an: nawh tiem: tix tawx lai khankix hu: kah simiang ot hawt baoh haktiex an: khankix, pa mawh lai tix pheen: son cao: haktiex ku plak, mai kah pwi khankix kukaux, kah plak lox sikah cao: kix, mai pwi kukaux tag mawh cao: kwang: cao: pang: kah daux nyiiex cao: tix mai sikah kah lox pwi tix heue.
Isatax Yaox Tix Mawh Nanghawkham
Yam hoik deeh fah rhawmrhi: krax pa meet rhawm: meet rhi: khunhawkham Ashuerux, nawh doh keud kah Vashati mai khawm: ceu pa hoik yuh nawh khankix, mai gumlox sibrawm ceu pa hoik prawng ca: kah nawh heue.
Mai cub kawncau khunhawkham khankix, ah nin: kah khunhawkham, "Kieh ex rawg bunkrih awn: ju pa mhawm: grang pa loig son khunhawkham heue.
Mai kieh khunhawkham yaog tix deuh cao: kaing: khankix, kah daux baoh haktiex nawh khankix, sonsang pon kix tix kraix khrawm: bunkrih awn: ju, pa mhawm: grang pa loig an: khankix hoek kah nyiiex pau dee lhaong: Shushan greem: krax pa appong: Hegie pa mawh simex sieh cie khunhawkham pa mawh cao: pa appong: tix priex bun: khankix, mai tawx sidauh ceu pa sang khre: rien kix tix mhawm: grang kah heue.
Khaix an: kieh bun: awn: ju pa pon tawx krax krox rhawmrhi: khunhawkham deeh mawh nanghawkham tang: Vashati, ceu inkix hoik mawh pa khaw: rhawm: khaw: rhi: khunahawkham mai hoik hawt tix yuh awm: an: heue.
Kah daux nyiiex pau dee lhaong: Shushan koe: pwi Yudax tix kaux, pa kaux Mawdakie:, kawn: Yairax kawn: simex Shimi pa mawh kawn: simex Kisha, pa mawh ceu pwi Binyamin tix kaux heue.
Nawh mawh pwi pa viex kix luan dee singai, khaing: veng Yerusaliem tau mai cub pwi pa giex pa laung khankix, pa mawh pa giex tix tau mai Yekhawnix pa mawh khunhawkham meung Yudax, pa hoik teei Nebukhaneza pa mawh khunhawkham veng Babulon hu: heue.
Mai Mawdakie: teei tix eei: Hadasa, pa kaux Isatax pa mawh kawn: bun: keeing: iak nawh kheu jao mawh nawh pa ang koe: miex koe: keeing:, kawn: bun: awn: ju an:, mhawm: grang tix yaox, yam hoik yum: keeing: nawh mai miex nawh Mawdakie: teei tix eei: nawh awm: kawn: bun: tix heue.
Yam hoik mhong: kix kah lox khunhawkham mai kah lox pa ghaok khankix, mai yam kraix khrawm: cub bun: awn: ju an: khankix tix hoek tom: nie kah nyiiex dee lhaong: Shushan greem: krax pa kwang: Hegie, Isatax kawx hoik mawh pa teei tix hu: tau kah nyiiex haw: khunhawkham, kah daux krax pa priex pa rien Hegie, pa mawh cao: pa kwang: tix jhak kah piang bun: an: khankix heue.
Mai bun: awn: ju an: hoik yuh krax pa khaw: rhawm: khaw: rhi: Hegie, mai Isatax hoik pon krax pa koe: pakngai:, mawh kheu nawh hoik nied tix tawx kraung sidauh ceu pa sang khre: rien nawh tix koe: krax pa mhawm: grang mai khawm: kraungkhrai: pa sang ceep nawh khankix heue. Khaix an: bun: kawncau pa hoik laug tix khankix aliah kaux, hoik baox tawx kah nawh khaing: daux nyiiex haw: khunhawkham mai kieh nawh mai khawm: bun: kawncau nawh khankix hu: kah daux pa kied mhawm: kah daux nyiiex cub bun: khankix heue.
Isatax ang nyang bax krai ceu pwi tix mai; grawng: paox nyiiex paox ma: tix khankix, mawh kheu Mawdakie: tawx satix kah nawh sonsang ang nawh krai grawng: an: heue.
Mai Mawdakie: lailing tix jhak kah daux plak sivoe rawb rim piang brawk dee ot cub bun: khankix ku ngaix, sonsang tawng nawh grawng: ot grawng: koe: Isatax mai grawng: ceu pa hoik yuh kix kah nawh heue.
Bun: awn: ju ankix kaux mawx kaux an:, lai loh tix hoek kah khunhawkham Ashuerux, khaix hoik naog bawg yam cox khre: kix tokaux tix daux kao: ra: khix awm: pa hoik koe: been krax pa hawt kix tix yuh son bun: an: khankix, mawh kheu awm: hoik tat kix tix deuh bawg yam singaix pa sang khre: rien kix tokaux tix kah bee muran liah khix, mai kah sidauh bhawng: liah khix mai khawm: krax pa khre: pa rien son krax pa sang mhawm: grang bun: khankix heue.
Mai kix khre: rien tix awm: bun: awn: ju ankix kaux mawx kaux an: hu: jhi: tokaux tix kah khunhawkham mai kix hoik tawx ceu pa koe: rhawmrhi: kix tix sang viex tau mai tix khaing: brawk dee ot cub bun: khankix, hoek kah nyiiex haw: khunhawkham heue.
Kah daux plak bo nawh hu: laig mai kah plak pon ngawb nawh deeh ing: kah nyiiex cub bun: ankix ra: dauh tidauh kah dee ot cao: pa kwang: cub bun: ankix, pa mawh Shagaza pwi sieh cie khunhawkham pa kia: ngien kah cub moeng iak khunhawkham khankix, nawh tag ang yaox tix laig daux dee ot khunhawkham bawg khaix, phan: khunhawkham ang lai koe: rhawmrhi: kah nawh mai deeh kok kah ceukaux nawh heue.
Yam hoik hoek bawg yam cie Isatax kawn: bun: Abihie pa mawh keeing: iak Mawdakie: pa hoik teei tix eei: nawh awm: kawn: bun: tix, sonsang hu: laig kah dee ot khuhawkham nawh ang lai mhaing: tix viex tix ceu kawx, lheu: khaing: krax keud krax sawn: pa tawx Hegie pa mawh pwi sieh cie khunhawkham pa mawh cao: pa kwang: cub bun: khankix, mai Isatax hoik pon pa khaw: rhawmrhi: kah plak sivoe ngai: pwi khawm: uik, pa hoik pon tix yaox kah nawh heue.
Isatax hoik mawh pa viex tix hu: kah khunhawkham Ashuerux, kah daux nyiiex haw: nawh, kah daux bawg yam khix kao:, pa mawh khix tobiet kah daux bawg yam pa kwang: nawh kah haktiex aliah num tix num heue.
Khunhawkham hoik moh kah Isatax nie lheu: khaing: bun: tang: kaux an: khankix, mai nawh hoik pon bwanson: mai pa koe: pakngai:, kah plak sivoe ngai: khunhawkham nie lheu: khaing: bunkrih khankix, mawh kheu nan: nawh yaog tix deuh mhok khri: nanghawkham kah piang nawh, mai yaog nawh mawh nanghawkham son tang: Vashati heue.
Mai khunhawkham yuh pwie ting, pa mawh pwie Isatax son cao: kaing: cao: kap greem: nawh mai kawncau nawh khankix, mai; hoik pao: tix krai singaix laux lee: pwi khankix been tingaix kah daux baoh haktiex an: khankix mai hoik tawx khawngphak tix hu: kudauh kudee awm: krax pa koe: rhawm: koe: rhi: khunhawkham heue.
Mawdakie: Jhi: Grawng: Krax Pa Yum: Tix Ceu
Yam deeh kraix khrawm: cub bunkrih khankix tix tau kah daux ra: bawg tibawg, Mawdakie: ngawm tix ot kah daux diang siviex khunhawkham heue.
Yamin: Isatax ang nyang bax krai pa ot paox nyiiex paox ma: tix mai kawncau pwi tix, awm: krax pa hoik tawm: Mawdakie: tix deuh kah nawh, mawh kheu Isatax hoik cu nghiiet kah lox tawm: Mawdakie: awm: hoik eei: nawh ting heue.
Kah daux bawg yam singaix ankix, glang: yam kawn: ngawm Mawdakie: diang siviex khunhawkham pwi sieh cie khunhawkham ra: kaux pa mawh Bigatan mai Tariet cao: pau siviex ankiex kied koe: krax meet rhawm: meet rhi: sawg krax pa sang sau: taix tix kah piang khunhawkham Ashuerux heue.
Mawdakie: tawng kah grawng: an: mai mawh cao: Mawdakie: dee krai nawh kah Nanghawkham Isatax,mai Isatax krai kah nanghawkham, mai Isatax deeh hu: krai kah khunhawkham kah daux min: ceukaux Mawdakie: heue.
Mai yam hoik yuh nawh krax pa chawkcheng: kah pwi ankiex nawh hoik tawng mawh tete, mai; teuk teue: kiex kah piang plawng: khaox, mai an: hoik mawh pa hoik tiem: tix kah daux phuk lai been ankix, kah plak sivoe khunhawkham heue.
Grawng: Yuh Haman Pa Caox Pa Caig Kah Pwi Yudax
Khuhawkham Ashuerux yaok tix deuh hamam kawn: simex Hamedata pa mawh ceu pwi Agat mai deuh nawh mawh pa ting pa lhaong: mai deuh dee ngawm nawh lhaong: khaing: kah piang cub simiang greem: cao: nawh khawm: uik, pa ot tau mai nawh heue.
Mai kawncau khunhawkham pa ot kah daux siviex lhaong: khunhawkham ngeuh kaing tix mai krub kah Haman, kheu jao hoik tawm: khunhawkham tix deuh lox tix son grawng: nawh awm: an:, viang mawh nan: Mawdakie: ang cu tix ngeuh kaing: tix mai ang krub kah heue.
Cub kawncau khunhawkham khankix pa ot kah daux siviex lhaong: khunhawkham khankix ah nin: kah Mawdakie:, maix lai yuh pa phit pa lud kah gumlox tawm: khunhawkham kheu jao pa yuh kah mawh lie?
Yam sikah kix kah nawh ku singaix, nawh ang cu tix nghiiet kah lox kix, mai kix hu: krai kah Haman grawng: Mawdakie: kriem ang kriem, mawh kheu Mawdakie: krai kah hoik mawh nawh pwi Yudax tix kaux kah kix heue.
Yam yaox Haman kah ang Mawdakie: cu tix ngeuh kanig: tix mai ang krub kah tix, Haman kied koe: krax pa songrhawm: songrhi: kah heue.
Nawh keud tix sang pah Mawdakie: yum: nongnong:, kheu kix hoik kraix nawh mhong: grawng: ceu pwi Mawdakie:, lheu: khaing: an: Haman hoik sawg tix yuh krax laux krax leeing: kah pwi Yudax pa koe: kah daux haktiex khunhawkham Ashuerux khawm: uik, can pa mawh ceu pwi Mawdakie:.
Kah daux khix tix, pa mawh khix nisan yam hoek kah daux num kwang: Ashuerux kah haktiex kao: ra: num tix num, kix cawk (pura) pa mawh nieb, kah plak sivoe Haman sonsang tat kix singaix mai khix tom: hoek bawg yam caw kah daux khix kao: ra: pa mawh khix adax heue.
Haman ah nin: kah khunhawkham Ashuerux, koe: cub pwi khankix tix cub pa hoik prungprang:mai pa hoik klu klao tix sinax pwi khankix, daux veng khawm: uik pa mawh haktiex maix been ot kix mawh pa tang: siyox khaing: cie pwi, mai kix ang cu tix priex rien gumlox been cie khunhawkham, mawh kheu nan: an: ang lai mawh pa koe: bwanson: kah son khunhawkham sonsang kawn: deuh kix ot heue.
"Phan: an: mawh pa khaw: rhawm: khunhawkham, kieh tiem: lai tawx lox sonsang yuh kix lauxleeing:, mai aux tag tawx mau tix mheen: talantan, kah daux tawm: taix pwi ankix pa yuh kaing grawhgrawng: an:, sonsang viex laig kah daux krao: sinngao khunhawkham heue."
Khunhawkham peeik cum: jeep gien: khaing: taix tix mai tawx kah Haman kawn: simex Hamedata ceu pwi Agat, pa mawh pwi koeng ceu pwi Yudax khankix heue.
Mai khunhawkham ah nin: kah Haman, "Mau mai pwi khankix hoik mawh pa tawx kah maix, sonsang yuh kah kix, awm: krax pa yaox maix mawh pa mhawm: son maix heue.
Cao: pa tiiem: lai khunhawkham khankix mawh pa kok tix hoek kah daux khix tix kao: loe: ngaix, mai lox tawm: an: hoik mawh pa tiiem: tix, awm: pa hoik tawm: Haman tix deuh kah son kuad yaong: pwi khunhawkham khankix, mai kah son cao: pa kwang: veng khankix pa hoik kwang: kah piang baoh haktiex ankix ku dax kudee, mai kah son cao: kaing: cao: kap pwi khawm: uik, mai kah son baoh haktiex ankix ku dax, awm: pa koe: ngai: lai cao: kix mai kah son pwi khankix kukaux kah daux pa koe: gumlox sikah cao: kix, kah daux min ceukaux khunhawkham Ashuerux an: hoik mawh pa tiiem: tix mai hoik mawh pa yeen tix kah cum: jeep gien: taix cie khunhawkham heue.
Mai lai khankix hoik mawh pa tawx tix hu: khaing: cao: pa tawx lai, kah daux baoh haktiex cie khunhawkham khawm: uik, sonsang yuh pa laux pa leeing: mai; sonsang yuh krax pa pah yum: mai sang yuh ceu pwi Yudax khankix lauxleeing: pak lawk, khawm: pa awn: ju mai khawm: pa riex ju, mai khawm: kawn: nyawm mai khawm: bun: khankix kah daux tix ngaix ngie yam hoek daux khix kao: ra: pa mawh khix adax kao: loe: ngaix, mai sonsang yuh kix krax pa tud pa rhim: kah kraungkhrai: sinngao kix khawm: uik heue.
Gumlox lai an: tix pheen:, tag sang mawh pa pao: tix awm: gumlox tawm: kah daux baoh haktiex ankix kudauh, mai tag mawh lai pa yang tix kah son pwi khawm: uik sonsang khre: kix tix kah daux singaix an: heue.
Cao: pa tawx lai khankix nied tix lih hu: awm: gumlox pa hoik tawm: khunhawkham mai gumlox tawm: an:, mawh pa pao: tix kah daux nyiiex pau dee lhaong: Shushan, mawh kheu nan: khunhawkham mai Haman ngawm tix nyaux rawm: plix siiet tau, viang mawh nan: pwi veng Shushan hoik koe: krax pa sungsang rhawm: kah heue.
Grawng: Koe: Rhawm: Isatax Tix Teem: Coi Kah Pwi Yudax
Yam hoik tawng Mawdakie: kah an: khawm: uik, nawh riah kraung ceep tix khankix mai ceep kraung pa kawm: mai kraix nyaox khankix piang tix, mai hu: laig kah daux sigreung veng heue. Nawh riag yo lox tix tau mai lox pa kied ting mai yiiem sigrien sigre heue.
Nawh hu: tom: hoek kah bing: pak pa koe: kah plak sivoe diang siviex khunhawkham kheu jao ang pwi tix kaux kawx yaox tix laig kah daux diang siviex tau mai krax pa ceep tix kraung pa kawm: heue.
Mai kah daux baoh haktiex dee hoik koe: lox tawm: khunhawkham lox ngia pa kied ting koe: kah daux sinax pwi Yudax khankix, tau mai krax pa twah pa ih pa un:, mai krax pa yiiem riag yiiem yo mai pwi khankix it tom: nie tau mai kraung pa kawm: mai nyaox khankix heue.
Kawncau bun: Isatax mai pwi sieh nawh khankix, hoek krai nawh mhong: grawng: an: mai nanghawkham hoik koe: krax pa lauxrhawm: lauxrhi: kah, khaix an: nawh sipaox kraung ceep khankix, sonsang ceep Mawdakiex kah, mai sonsang peeik kix tix teei kraung kawm: khaing: kah piang nawh; viang mawh nan: nawh ang cu tix rieb kraung ankix heue.
Isatax kok kah Hatiet pa mawh pwi sieh tix kaux khaing: daux cub pwi sieh cie khunhawkham, pa hoik tawx kix mawh cao: pa jhak pa ngien kah nawh, mai Isatax tawx lox tix kah nawh son grawng: Mawdakie:, sonsang hu: jhak mawh ceu patix mai jao patix heue.
Mai Hatiet hu: kah Mawdakie: kah dax dee ot nawh bing: pak, pa koe: plak sivoe diang siviex khunhawkham heue.
Mai Mawdakie: krai nawh mhong: grawng: ankix khawm: uik khawm: leeing: pa hoik lih kah piang nawh, mai khawm: grawng: mau pa hoik ah Haman tix sang tawx sau: kah daux krao: sinngao cie khunhawkham khankix, sonsang yuh kix krax pa lauxleeing: kah pwi Yudax khankix heue.
Nawh baox tawx lai gumlox pao: pa hoik tiem: tix son krax pa sang yuh kix lauxleeing: kah pwi Yudax kah nawh mai pa hoik tawx tix khaing: Shushan pa mawh nyiiex khunhawkham sonsang pon jhi: nawh lai an: kah Isatax, mai kraix lao gumlox an: sidawng: kah Isatax sonsang hu: laig nawh kah dee ot khunhawkham mai sonsang hu: yuh nawh krax pa khyox khaw: lox awn: tix kah nawh mai khyox khaw: tix krai lox kah plak sivoe khunhawkham son ceu pwi nawh khankix heue.
Mai Hatiet hoik deeh ing: mai krai Isatax mhong: gumlox sikah Mawdakie: khankix heue.
Mai Isatax sikah mai Hatiet mai nawh tawx gumlox tawm: tix kah nawh son Mawdakie: heue.
Cub kawncau khunhawkham khankix mai can pwi pa ot baoh haktiex khunhawkham khankix, tawng kah koe: been tix mu:, simex kaux mawx ang ah, bun: kaux mawx ang ah, pa hu: laig kah plak daux piang dee ot khunhawkham mai pa ang nyang mawh pa kok tix hoek khankix, tag sang mawh pa pah yum: khawm: uik, lheu: khaing: pwi tix kaux pa nyee khunhawkham pliah khri: giex tix lih kah son pwi an: mai nawh tag pon tix im: ju heue. Kah daux tingoe: singaix inkix tokaux cao: aux mawh pa ang nyang bax kok tix laig kah dee ot khunhawkham heue.
Mawh kheu nan: kix krai gumlox Isatax kah Mawdakie:.
Mawdakie: krai kix mhong: lox pa sang dee pawk tix kah Isatax ah nin:, "Paw doh keud kah daux rhawmrhi: maix, kah tag sang pon glawd maix kah ot tix kah daux nyiiex nanghawkham nie lheu: khaing: pwi Yudax tang: kaux khankix heue."
Phan: maix kawn: ca: kut tix ot kah daux krax pa yiien: pa yawg kah daux bawg yamin:, krax im: ju maix pa taoh pa lawd tag sang lih kaoh kah son pwi Yudax khankix khaing: tang: dauh tang: dee, viang mawh nan: maix mai nyiiex ma: keeing: maix khankix, tag sang lauxleeing: heue. Khex ang maix nyang bax tawng grawng: krax pa hoik pon maix tix mawh nanghawkham kah daux haktiex in:, son daux bawg yam an: awm: in: lie?
Khaix an: Isatax deeh krai kix mhong: sonsang deeh ing: kix tawx gumlox pawk in: kah Mawdakie: heue.
"Hu: heue, kraix khrawm: ceu pwi Yudax pa koe: kah daux veng Shushan khankix, mai twah pa ih pa un: son aux; paw ih paw nyaux son daux loe: singaix loe: sawm:, kawncau bun: aux kahnkix mai aux kawx tag twah kah pa ih pa un: awm: an:, mai khaix an: aux tag hu: kah khunhawkham, kah daux krax pa tieh feen been; mai phan: mawh pa yum:, aux tag kham: tix yum: kah.
Khaix an: Mawdakie: hu: krax hu: tix mai yuh awm: gumlox pa hoik tawm: Isatax kah nawh khawm: uik.
Pwie Khan: Kheu: Isatax
Kah daux bawg yam hoek daux loe: singaix, Isatax ceep kraung ceep nanghawkham mai ex cung kah plak daux piang nyiiex haw: khunkhawkham pa koe: plak toi: nyiiex khunhawkham glang: yam kawn: ngawm khunhawkham kah piang dangngeung cie nawh kah daux nyiiex haw:, khawm: jhak simi tix kah plak see diang laig daux nyiiex haw: heue.
Yam yaox khunhawkham kah cung nanghawkham Isatax kah daux piang plak daux an:, Isatax hoik yaox pon tix bwanson: plak sivoe nawh, mai khunhawkham yaog tix tawx pliah khri: pa koe: daux taix tix kah Isatax, khaix an: Isatax hu: dex mai hu: teeh kah toh plai:h an:.
Mai khunhawkham ah nin: kah nawh, "Nanghawkham Isatax eue, mawh sang lo maix ceu patix lie? mawh sang mhaing: maix ceu patix lie? Aux tag sang tawx kah maix tom: haktiex aux khankix tix plak."
Isatax deeh pawk ah nin:, "Phan: mawh pa khaw: rhawmrhi: khunhawkham, kieh khunhawkham mai Haman hoek tix ih priex pwie khan: kheu: pa khre: rien son nawh kah daux in: singaix."
Mai khunhawkham ah nin:, "Kok Haman hoek phai phai:, sonsang pon nawh tix yuh, awm: ah Isatax, mawh kheu nan: khunhawkham mai Haman hu: kah pwie priex pa hoik khre: rien Isatax heue.
Kah daux pwie khan: kheu: rawm: plix siiet khunhawkham ah nin: kah Isatax, "Mawh koe: rhawmrhi: maix tix sang lo ceu patix lie? Aux tag tawx kah maix, mawh sang mhaing: maix ceu patix lie? tom: meung haktiex aux tix plak lie? Aux tag tawx heue."
Isatax deeh pawk lox ah nin:, "Ceu pa sang lo aux mai ceu pa sang khyox khaw: aux rawg mhaing: aux mawh inkix."
Phan: aux mawh pa pon bwanson: kah plak sivoe khunhawkham mai phan: mawh pa khaw: rhawmrhi: khunhawkham tix sang tawx ceu pa lo aux mai yuh ceu pa khyox khaw: rawg mhaing: aux khankix grum naog, kieh khunhawkham mai Haman hoek kah pwie pa khre: rien aux tix khan: kheu: kah son kix, mai kah daux pasax, aux tag yuh awm: pa ah khunhawkham heue.
Pa Bak Haman Tix Pah Kah Mawdakie:
Kah daux singaix an: Haman lih hu: kah plak praix khawm: gauxrhawm: mai nyawmrhawm: tix, viang mawh nan: yam yaox Haman kah Mawdakie: kah daux diang siviex khunhawkham mai Mawdakie: ang lai kaoh cung nab yam kah plak sivoe nawh tan:, nawh kied koe: krax pa songrhawm: songrhi: kah Mawdakie:.
Mai Haman gun rhawmrhi: tix mai ing: kah nyiiex mai nawh ploi: pwi hu: kok kah paoxgrawm paoxgru nawh khankix mai khawm: moeng nawh Zeriet.
Mai Haman kraix kix mhong: grawng: pa mag mi tix, mai pa haoh hun: kawnpraix tix khankix, mai grawng: pa hoik yaog khunhawkham tix deuh nawh mawh pa kied ting lhaong: khaing: kah piang cao: kaing: cao: kap khankix, mai khawm: kah piang kawncau cub khunhawkham khankix.
Haman baox ah nin:, "Lheu: khaing: aux, nagnhawkham Isatax ang lai ghaok pwi tix kaux kawx, sonsang hoek tix tau mai khunhawkham kah pwie priex pa hoik khre: rien nawh, mai kah daux pasax kawx nawh baox deeh ghaok aux, hu: tau mai khunhawkham.
Glang: yam kawn: yaox aux Mawdakie: pa mawh pwi Yudax an:, pa ngawm diang siviex khunhawkham, ceu inkix khawm: uik ang lai mawh pa koe: bwanson: kah son aux.
Khaix an: moeng nawh Zeriet mai khawm: paoxgrawm paoxgru nawh khankix khawm: uik ah nin: kah nawh, "Yuh khaox sigang:, kieh lhaong: tiphwan: sawk, mai yam hoek plak ponngawb, tawx krax pa keud pa sawn: maix kah khunhawkham, sonsang teuk teue: Mawdakie: yum: kah piang an:; khaix an: hu: kah daux pa gauxrhawm: gauxrhi: tix tau mai khunhawkham kah pwie priex khan: kheu: an:, mai ceu an: mawh pa khaw: rhawm: khaw: rhi: Haman; mawh kheu nan: nawh tom: yuh tix jung khaox sigang: heue.
Khunhawkham Yaog Tix Tawx Pa Koe: Min: Kah Mawdakie:
Kah daux sawm: an: khunhawkham ang lai laig it, mawh kheu nan: nawh tawx lox kieh pwi tix kaux viex phuk lai grawng: can pa hoik tiem: daux lai been khankix hoek; mai kix phat kah plak sivoe khunhawkham.
Mai hoik yaox kah daux pa hoik tiem: an: khankix tix deuh kah pa hoik krai Mawdakie: grawng: Bigatan mai Teriet, mai pa mawh pwi sieh cie khunhawkham ra: kaux, pa mawh cao: pa pau diang siviex khankix, pa sawg tix sang sau: taix tix kah piang khunhawkham Ashuerux heue.
Khunhawkham ah nin:, "Hoik yaog tix tawx min: ceu patix kah piang Mawdakie: son grawng: in: lie?" Mai kawncau khunhawkham pa hoik hoek kah plak sivoe nawh khankix, ah nin:, "Ang nyang bax yaox tix tawx tidtix kah nawh."
Mai khunhawkham ah nin:, "Mawh pwi mawx pa koe: kah daux piang lawg plak daux lie? Yamin: Haman taug khraox laig kah daux piang lawg plak praix nyiiex haw: khunhawkham, sonsang tawx tix krax pa keud pa sawn: sonsang kieh khunhawkham teuk teue: Mawdakie: yum:, kah piang khaox sigang: jung pa hoik khre: rien nawh tix deuh.
Kawncau khunhawkham khankix ah in: kah nawh, "Haman koe: tan:, nawh cung kah daux piang lawg tan:," mai khunhawkham ah nin:, "Kieh laig heue."
Haman laig kah plak daux, mai khunhawkham chawk tix yaox nawh, "Mawh sang yuh ceu patix son pwi pa koe: krax gauxrhawm: gauxrhi: khunhawkham tix sang yaog min: pakngai: nawh lie? Haman hoik keud tix ah nin: kah daux rhawm: tix, "Mawh pwi pa gauxrhawm: gauxrhi: khunhawkham tix sang yaog min: pakngai: nawh, lheu: khaing: aux lie?"
Mai Haman pawk tix ah nin: kah khuhawkham, "Son pwi pa tag sang gauxrhawm: gauxrhi:; khunhawkham tix sang yaog min: pakngai: nawh,
kieh viex hoek kraung ceep lang: jung cie khunhawkham tix pheen:, mai khawm: brung brug khunhawkham tix mu:, pa koe: Mhok khri: khunhawkham tix deuh kah piang kaing: nawh heue.
Mai ap sibex lang: jung in: mai brung, kah daux tawm: taix pwi pa mawh simiang pa kied laoh kied lie cie khunhawkham tix kaux, son tag sang pon jhi: pwi pa gauxrhawm: gauxrhi: khunhawkham tix sang yaog min: pakngai: nawh, mai kieh nawh brug brung, lailing kah daux bing: pak veng mai pao: krai grawng: ankix kah plak sivoe nawh: mawh kheu nan: an: tag mawh pa hoik yuh tix kah pwi an:, kah pa gauxrhawm: gauxrhi: khuhawkham tix sang yaog min: pakngai: nawh heue.
Khunhawhkam ah nin: kah Haman, "Nied tix yuh phai phai:, teei sibex lang: jung mai; brung, awm: krax keud krax sawn: pa hoik tawx maix, mai yuh awm: an: kah Mawdakie: pa mawh pwi Yudax, kah pa ngawm daux diang siviex khunhawkham, paw prah tix ang yuh can ceu pa hoik ah maix khawm: uik awawx."
Haman teei sibex lang: jung mai brung hoek, mai tawx Mawdakie: ceep mai kieh nawh bruk brung mai lailing daux bing: pak veng mai pao: lox tix kah plak sivoe nawh ah nin:, "Awm: krax pa yuh nin: mawh pa yuh kah pwi pa khaw: rhawm: khaw: rhi: khunhawkham tix san yaog min: pakngai: nawh heue.
Mawdakie: deeh ing: kah diang siviex khunhawkham, mai Haman kawx nied tix ing: kah nyiiex tix tau mai krax pa voi rhawm: mai kheem: kaing: tix.
Yam hoik krai Haman grawng: ankix kah moeng tix Zariet khawm: kah paoxgrawm paoxgru tix khankix, kah ceu ankix kuceu, pa hoik lih tix mawh kah piang nawh khankix, pwi pa koe: pingnya cuyi: khankix mai khawm: moeng nawh Zariet deeh ah nin: kah nawh, "Maix hoik jah tix som kah sivoe Mawdakie:, phan: nawh ruk mawh pwi pa kaoh khaing: daux doeh simie ceucat pwi Yudax, maix tag ang pex kah nawh, maix tag mawh pa som pa nai: kah plak sivoe nawh tete.
Glang: yam kawn: sikah kix tau mai pwi sieh cie khuhawhkham khankix hoek mai sigleeig Haman hu: kah pwie priex sawm: pa hoik khre: rien Isatax tix khan: kheu: heue.
Haman Hoik Teuk Teue: Tix Yum: Tang: Mawdakie:
Khunhawkham mai Haman hu: sawm: priex bo tau mai nganghawkham Isatax.
Kah daux ra: ngaix tingaix, kah daux pwie nyaux rawm: plix siiet, khunhawkham baox ah nin: kah Isatax, "Nanghawkham Isatax eue, maix sang lo ceu patix lie? Aux tag sang tawx kah maix, maix mhaing: ceu patix aux tag sang tawx kah maix tom: meung haktiex aux khankix tix plak.
Nanghawkham Isatax deeh pawk ah nin:, "Khunhawkham eue, phan: aux mawh pa pon bwanson: kah plak sivoe ngai: maix, mai phan: mawh pa khaw: rhawm: khaw: rhi: khunhawkham kah, kieh ju aux deeh mawh pa tawx tix kah aux kah daux krax pa lo aux, mai khawm: ju pwi ceu cie aux khankix, kah daux krax pa khyox khaw: rawg mhaing: aux.
Aux mai pwi ceu aux khankix yix hoik mawh pa coh tix, sonsang yuh lauxleeing: mai sonsang pah yix yum:, mai song sang mawh yix pa grai: grup lauxleeing: pak lawg, phan: yix mawh pa hoik coh tix awm: siliex simex mai bun: khankix, aux tag sang nyeep jheeh tix ang nye: ang nyux, viang son krax pa som pa nai: khunhawkham. pwi koeng ang pon tawx ngawh tawx jum tix bawg kawx.
Khunhawakham Ashuerux pawk lox ah nin: kah nanghawkham Isatax, "Mawh nawh pwi mawh? mai ot nawh dee mawh? mai mawh pwi mawx pa koe: rhawm: vao tix keud grawng: an: kah daux rhawm: tix, sonsang yuh nawh ceu pa awm: an: lie?"
Mai Isatax deeh ah nin:, "Pwi koeng pa sang yuh krax pa tieh feen, mai pwi koeng an: mawh Haman pa caox pa caig in:," mawh kheu nan: Haman hoik koe: krax lhat krax graung kah plak sivoe khunhawkham mai nanghawkham.
Khunhawkham kaoh khawm: songrhawm: songrhi: tix khaing: daux pwie nyaux rawm: plix siiet mai hu: laig kah daux sipeem nyiiex haw: khunhawkham; viang mawh nan: Haman hoik cung kah plak sivoe naghawkham Isatax deeh khyox khaw: son ju nawh, kheu jao grawng: hoik tawng nawh ceu pa caox pa caig pa hoik tat kah piang nawh khaing: khunhawkham.
Yam deeh hoek khunhawkham khaing: daux sipeen nyiiex haw: khunhawkham, yam hoek nawh kah dee nyaux kix pwie rawm: plix siiet, Haman hoik gup tix plak see ku: it, dee ot Isatax tan:, mai khunhawkham ah nin:, "Mawh tag sang baox deeh yuh nawh krax pa khin: kah nanghawkham yam kawn: koe: aux kah daux nyiiex lie? awm: hoik lih lox sikah an: khaing: daux jheeh khunhawkham kix hoik kheem: ngai: baoh Haman daux yam an: heue."
Mai Habawnax pa mawh pwi tix kaux khaing: daux cub pwi sieh khankix ah nin: kah khunhawkham, "Jhak heue, khaox sigang: jung an: pa lhaong: tiphwan: sawk, pa hoik yuh Haman tix deuh son Mawdakie: pa hoik krai lox pa mhawm: son tang: khunhawkham kawn: jung tix kah daux nyiiex Haman tan:." Mai khunhawkham ah nin:, teuk teue: nawh yum: kah piang an: heue.
Grawng: Deeh Taoh Isatax Kah Pwi Yudax
Kah daux singaix an: khunhawkham Ashuerux tawx nanghawkham Isatax cie nyiiex Haman pa mawh pwi koeng ceu pwi Yudax khankix, mai Mawdakie: hoek kah plak sivoe ngai: khunhawkham kheu jao hoik krai Isatax kah grawng: mawh nawh paox nyiiex paox ma: tix.
Mai khunhawkham peeik jeep gien: cum: tix kah pa hoik deeh teei nawh tix priex khaing: Haman mai tawx kah Mawdakie:, mai Isatax ap tix deuh Mawdakie: kwang: kah piang nyiiex Haman.
Isatax deeh baox sikah kah khunhawkham mai gup tix hawt caong nawh, mai khyox khaw: kah nawh, mai roik rawm: ngai:, sonsang teei nawh tix tik pa caox pa caig pa yuh Haman, pa mawh ceu pwi Agazit, mai khawm: krax grawng: pa rang tix yuh kah pwi Yudax khankix.
Mai khunhawkham nyeu gawng: pliah khri: kah plak see Isatax, mai Isatax yaog tix kaoh cung kah plak sivoe khunhawkham,
mai ah nin:, "Phan: an: mawh pa khaw: rhawm: khaw: rhi: khunhawkham mai aux pon bwanson: kah plak sivoe ngai: nawh mai phan: ceu an: tag sang mawh pa yaox tix kah daux pa khaw: pa caw kah khunhawkham, mai phan: aux mawh pa khaw: rhawm: khaw: rhi: kah daux ngai: nawh, kieh lai an: mawh pa tiiem: tix, sonsang deeh preet tix tik lai grawng: pa hoik yuh tix khankix, khaing: Haman pa mawh kawn: simex Hamedata pa mawh ceu pwi Agat pa hoik tiem: nawh tix yuh krax laux krax leeing: kah pwi Yudax khankix, pa ot kah daux baoh haktiex cie khunhawkham khawm: uik.
Aux sang pon kham: geu: tix yaox grawng: krax pa caox pa caig ankix, pa tag sang hoek kah piang ceu pwi aux khankix yuh kah mawx lie? Phan: ang mawh nan: aux khex sang pon kham: geu: tix yaox krax laux krax leeing: doeh simie ceucat aux khankix yuh kah mawx lie?
Khunhawkham Ashuerux ah nin: kah nanghawkham Isatax mai Mawdakie: pa mawh pwi Yudax; "Aux hoik tawx nyiiex Haman kah Isatax tete,mai hoik teuk teue: nawh yum: kah piang khaox sigang: jung an:, kheu jao grawng: hoik coca: nawh tix sang sau: taix tix kah piang pwi Yudax khankix."
Tokaux cao: maix deeh tiem: gumlox pa tawm: tix pheen: kah son pwi Yudax khankix, awm: krax pa koe: rhawmrhi: maix tix yuh, kah daux ceukaux khunhawkham mai yeen kah cum: jeep gien: khunhawkham; mawh kheu lai tix pheen: pa hoik tiem: tix kah daux ceukaux khunhawkham, mai pa hoik yeen tix kah cum: jeep gien: khunhawkham pwi tix kaux kawx tag ang pon tix preet.
Mai kix hoik kok cao: tiem: lai khunhawkham khankix hoek daux khix loe:, pa mawh khix Sivan tinga: loe: ngaix, mai an: hoik mawh pa tiiem: tix awm: can pa hoik tawm: Mawdakie: kah pwi Yudax cao: kwang: veng khankix, mai cub simiang pa kwang: baoh haktiex Idiyax tom: hoek kah haktiex Ethiopia (Khusha) pa koe: tiyieh tinga: aliah meung, son meung ankix ku meung kah plak ngai: lai cao: kix, mai son ceu pwi kuceu kah plak lox sikah cao: kix, mai son pwi Yudax khankix kah plakngai: lai cao: kix mai kah plak lox sikah cao: kix.
Mai nawh hoik tiem: lai ankix kah daux ceukaux khunhawkham Ashuerux, mai hoik yeen cum: jeep gien: khunhawkham, mai tawx lai ankix hu: kah cao: tawx lai pa brug brung eei: khunhawkham pa kied phai: to: an:.
Kah daux lai ankix khunhawkham tawx akhwang: kah pwi Yudax khankix, pa koe: kah daux veng ku veng, sonsang kraix khrawm: kix paox tix tau mai tiebtie son ju kix sonsang yuh lauxleeing:, pah yum: mai kieh grai: grup singax pak lawg kah pwi baoh haktiex pa sang hoek tix puing: kah kix, khawm: kawn: nyawm mai bun: dai: khankix, mai tud rhim: tix cie kraungkhrai: kix,
kah daux tix ngaix ngie, daux baoh haktiex khunhawkham Ashuerux kah daux khix kao: ra: pa mawh khix Adax kao: loe: ngaix.
Lai gumlox tiem: tix pheen: mawh pa hoik tawx tix hu:, kah daux baoh haktiex ankix kudauh,mai kah pwi khankix, sonsang rien pwi Yudax khankix tix kah daux singaix an:, sonsang deeh pawk kix bix tix kah pwi koeng kix;
mai cao: pa tawx lai ankix, hoik yaog tix brug brung khunhawkham, li hu: kah daux lox pa si dhiiet khunhawkham kah kix, mai lox tawm: an: hoik mawh pa ploi: tix lih khaing: daux nyiiex pau dee lhaong: Shushan an:.
Mawdakie: lih khaing: plak sivoe dee ot khunhawkham, kah daux dee hoik ceep nawh kraung ceep khunhawkham pa klai raoma: mai pa paing khanix tau mai ceep tix mhok khri: ting pa ceep khunhawkham, mai khawm: kraung ceep man: ceu pa mhawm: pa lung pliex tix pheen:; mai pwi Shushan hoik grum naog kah daux krax pa gauxrhawm: gauxrhi:.
Mai pwi Yudax khankix hoik koe: krax pa chaong: rhawm: chaong: rhi: tau mai krax pa gauxrhawm: gauxrhi: tau mai pa koe: min: pakngai: tix.
Mai kah daux baoh haktiex ankix mai khawm: veng ku veng kah dee hoek gumlox tawm: khunhawkham mai pwi Yudax khankix hoik koe: krax pa nyawmrhawm: nyawm rhi: mai khawm: krax pa gauxrhawm: gauxrhi: tix, mai kix khan: kheu: tix yuh pwie, mai laux lee: tix tingaix, khaix an: pwi haktiex ankix hoik kied nie deeh tieh tix laig kah been pwi Yudax kheu jao lhat graung kix kah pwi Yudax heue.
Grawng: Pah Pwi Yudax Kah Pwi Koeng
Kah daux khix kao: ra:, pa mawh khix Adax kao: loe: ngaix, mawh yam hoek son gumlox pa tawm: khunhawkham mai pa hoik pao: nawh khankix, sonsang mawh pa yuh tix, kah daux singaix an:, pwi koeng pwi Yudax khankix hoik keud pot jun pot tix sang koe: krax pex siawpsibrawm kix, mai pwi Yudax deeh tieh tix pex kah siawpsibrawm pwi pa hoik koeng kah kix.
Pwi Yudax khankix hoik kraix khrawm: paox tix kah daux nyiiex yaong: veng cao: kix, pa koe: kah daux haktiex khunhawkham Ashuerux khawm: uik, sonsang sau: kix taix pah yum: kah pwi pa sawg tix yuh krax pa kharhawm: kharhi: kah kix, mai pwi tix kaux kawx ang pon yaog tix tiebtie kah kix hkeu jao hoik lhat graung pwi khawm: uik kah kix.
Mai simiang cao: pa kwang: daux kien ku kien, ku veng, mai cao: kaing: tang khunhawkham, mai cao: pa kwang: veng khankix, mai can pwi pa yuh kaing jhaw: khunhawkham khankix, hoik teem: coi kah pwi Yudax khankix, kheu jao hoik lhat graung kix kah Mawdakie:.
Mawh kheu Mawdakie: mawh pa ting pa lhaong: kah daux nyiiex haw: khunhawkham, mai krax ao: min: nawh hoik tah hoek kah daux haktiex khawm: uik, pa mawh Mawdakie: hoik kied nie yaog tix haok hwan: ting lhaong: tix ngaix hoik tix ngaix.
Mai pwi Yudax khankix hoik pah yum: kah pwi koeng kix khankix kah vaig, mai yuh can ceu pa koe: rhawm: kix tix yuh kah pwi pa koeng kah kix.
Mai kah daux nyiiex pau dee lhaong: Shushan an:, pwi Yudax khankix hoik yuh laux pah yum: kah pwi khankix phwan: yieh kaux.
Khawm: Pashandata, Dalaphon, Asapata,
Phawrata, Adalia, Aridata,
Pamashata, Arisai, Aridai mai Vayezata,
pwi inkix kao: kaux mawh kawn: simex Haman, kawn: simex Hamedatax pa mawh pwi koeng pwi Yudax khankix pa hoik pah kix yum: viang mawh nan: kix ang sau: taix tix teei kah kraungkhrai: kix.
Kah daux singaix an: carang pwi ankix pa hoik pah kix yum: kah daux nyiiex pau dee lhaong: Shushan an:, hoik mawh pa viex tix jhi: kah khunhawkham.
Mai khunhawkham ah nin: kah nanghawkham Isatax, "Pwi Yudax khankix hoik yuh laux pah yum: kah pwi phwan: yieh kaux, kah daux nyiiex pau dee lhaong: veng Shushan, mai khawm: kawn: simex Haman khankix kao: kaux, mawh hoik yuh kix ceu patix? kah daux baoh haktiex pa kawn deuk cie khunhawkham lie? Yamin: sang lo maix ceu patix? Aux tag tawx kah maix, phan: ang mawh nan: sang baox mhaing: maix ceu patix lie? Aux tag sang yuh son maix,
mai Isatax ah nin:, "Phan: mawh pa khaw: pa caw rhawm: khunhawkham kieh pwi Yudax pa ot daux veng Shushan khankix sonsang deeh pon yuh kix daux pasax awm: gumlox pa hoik pao: tix kah daux in: singaix, kieh kix teuk teue: kawn: simex Haman kao: kaux kah piang khaox sigang: jung heue.
khunhawkham tawx gumlox in: kieh kix yuh gumlox pao: lih khaing: nyiiex Shushan, mai kix teuk teue: kawn: simex Haman khankix kao: kaux.
Mai kah daux khix Adax kao: pon: ngaix pwi Yudax pa ot daux veng Shushan baox kraix khrawm: paox tix tau mai pah yum: kah pwi loe: yieh kaux daux veng Shushan, viang mawh nan: kix ang sau: taix tix teei kah kraungkhrai: khankix.
Cub pwi Yudax pa kawn deuk kah daux haktiex khunhawkham khankix kraix khrawm: paox tix tau mai tiebtie ju tix laux lee: tix khaing: pwi koeng, mai pah kah pwi koeng yum: aliah mheen: phwan: rheng: kaux, viang mawh nan: kix ang sau: taix tix teei kah kraungkhrai: khankix.
In: mawh pa hoik yuh kah daux khix Adax kao: loe: ngaix mai yam hoek kah daux kao: pon: ngaix, kix laux lee: tix mai yuh tix deuh an: mawh singaix pwie tix ngaix, mai khawm: singaix pwie pa gauxrhawm: gauxrhi:.
Grawng pawie purim
Pwi Yudax pa ot kah daux veng Shushan khankix kraix khrawm: paox tix tau kah daux singaix kao: loe:, mai kah daux singaix kao: pon: mai khawm: kah daux singaix kao: phwan: khix an:, kix laux lee: tix mai yuh tix deuh an: mawh singaix pwie tingaix, mai singaix pwie pa gauxrhawm: gauxrhi:.
Mai pwi Yudax daux nyiiex daux yaong: pa ang nyang bax lai lawm tix kah guh veng khankix, hoik khan: kheu: tix yuh pwie kah daux singaix kao: pon:, daux khix Adax an:, mawh singaix pa gauxrhawm: gauxrhi:, mai khawm: singaix khan: kheu: tix pwie singaix tien singaix laux, mai deuh singaix an: mawh singaix tawx tix khawngphak kah paox tix, tix kaux hoik tix kaux.
Mai Mawdakie: tiem: grawng: ceu inkix tawx hu: kah pwi Yudax khawm: uik, pa koe: daux haktiex hkhunhawkham Ashuerux, khawm: dee dex mai dee singai khawm: uik,
sonsang yuh kix pwie an: kah daux sinax kix, mai sonsang khan: kheu: kix yuh pwie an: ku num, kah daux khix Adax kao: pon:, kao: phwan: ngaix,
awm: singaix laux lee: pwi Yudax tix khaing: pwi koeng tix khankix, awm: mawh khix pa hoik dee tieh kix krax pa lauxrhawm: lauxrhi: tix, hoek krax pa gauxrhawm: gauxrhi: son kix, mai khaing: krax khirhawm: khirhi: tom: hoek singaix laux lee: kix tix, yuh mawh singaix khan: kheu: pwie mai singaix pa gauxrhawm: gauxrhi:, mai hoik deuh mawh singaix tawx tix khawngpak kah paox tix, tix kaux hoik tix kaux mai singaix tawx tix khawngphak kah pwi pa hot pa shia: khankix heue.
Pwi Yudax khankix hoik rieb been yungyi: pa jah kix tix yuh, awm: pa hoik tiem: Mawdakie: kah kix,
kheu jao grawng: Haman pa mawh kawn: simex Hamedata pa mawh ceu pwi Agat pwi koeng cub pwi Yudax kahnkix, hoik keud tix sang pah kah pwi Yudax khankix yum: mai sang yuh kix grai: grup mai hoik yuh nieb (pura), sonsang yuh kix lauxleeing: pak lawg.
Yam hoik hoek Isatax kah plak sivoe khunhawkham, nawh tawm: lox tix kah lai, grawng: ceu pa caox caig in:, pa hoik keud Haman tix yuh kah piang pwi Yudax khankix, deeh kieh hoek kah piang kaing: cao: nawh, mai teuk teue: nawh mai kawn: simex nawh khankix kah piang khaox sigang: jung an:.
Mawh kheu nan: kix kok singaix in: mawh purim, khaix ceukaux pura, mawh kheu jao grawng: gumlox ankix pa koe: kah daux lai in:, mai khawm: ceu pa hoik yaog kix kah son grawng: in:, mai khawm: ceu pa hoik lih tix koe: kah piang kix,
pwi Yudax khankix pang: tix deuh been mai deuh beeh glawm: kah piang tokaux cao: kix, mai khawm: kah piang doeh simie ceucat kix mai can pwi pa tag sang sitoe: tix mai kix, mai kah daux krax pa ang lai tik lai vud kix tag khan: kheu: tix yuh singaix in: ra: ngaix, daux ku num, awm: krax pa hoik tiem: tix gumlox pa sang hawt kix tix yuh khankix, mai awm: bawg yam krax pa hoik tat tix,
mai singaix inkix, mawh pa doh keud doh sawn: tix mai pa hawt priex rien kah daux baux ju sinax doeh simie ceucat kix ku cub ku caw, ku nyiiex ku ma:, ku kien mai ku veng, son ang singaix purim inkix tag ang lai piawm: tix, mai khan: kheu: tix yuh pwie singaix an: kah daux sinax pwi Yudax khankix, mai krax pa deeh doh keud doh sawn: kix kah ankix, tag mawh pa ang chix grai: kah daux sinax doeh simie ceucat kix.
Nanghawkham Isatax kawn: bun: Abihelax mai Mawdakie: pa mawh ceu pwi Yudax, hoik tiem: lai siawpsibrawm pa grum naog ra: bawg tibawg sonsang kaux cong: lai purim.
Mawdakie: tawx lai ankix hu: kah pwi Yudax khawm: uik, pa ot kah daux haktiex kwang: khunhawkham Ashuerux khankix tinga: aliah kien, tau mai gumlox pa nhim: mai pa mawh pa meh,
song sang kaux cong: singaix purim in: kah daux bawg yam pa hoik tin tix deuh awm: hoik tat Mawdakie:, pa mawh pwi Yudax mai manghawkham Isatax tix deuh nawh son kix, mai awm: hoik tawx kix gumlox paox an: kah son tokaux cao: kix mai kah son doeh simie ceucat kix, sonsang twah kix priex preem mai yiiem yo.
Mawh kheu nan: gumlox Isatax hoik kieh grawng: purim cong:, mai grawng: in: mawh pa hoik tiem: tix kah daux phuk lai heue.
Grawng: Yaog Glawk Beeh Glawm: Mawdakie:
Mai khunhawkham Ashuerux koh keen kah piang haktiex, mai kah piang klawn: tiex pa koe: daux rawm: sigrit sigra:.
Mai grawng: kaing can pa yuh nawh khankix kah siawpsibrawm nawh khawm: uik, mai krax pa koe: riang koe: rao nawh khankix mai grawng: pa hoik yaog khunhawkham kah Mawdakie: ting lhaong:, kah dee pa hoik yaog khunhawkham ang hoik mawh pa tiiem: tix deuh daux phuk lai gumlox been cub khunhawkham haktiex Midix mai haktiex Pasha lie?
Grawhgrawng: nawh Mawdakie: pa mawh ceu pwi Yudax, hoik mawh simiang ra: kaux tix kaux greem: khunhawkham Ashuerux mai hoik mawh pa kied ting kied lhaong: kah daux sinax ceu pwi Yudax khankix mai pwi hun: pa mawh puxaik nawh khankix hoik rieb tix teei nawh kah daux krax pa mhawm:, mai mawh pa sawg kah krax pa mhawm: son ceu pwi nawh khankix, mai mawh pa sikah gumlox pa nhim: kah doeh simie ceucat tix khawm: uik heue.
LAI YAWBAX
(Job)
Yawbax
Grawng: Yawbax Mai PwiNyiiex Ma: nawh Kah Haktiex Uzax
Koe: pwi tix kaux pa kaux Yawbax pa ot daux haktiex Uzax pwi an: mawh pwi grum naog mai pa rauh pa see, mai nawh mawh pwi pa lhat pa graung kah Siyiex mai via khaing: pa caox pa caig heue.
Mai nawh koe: kawn: simex aliah kaux mai kawn: bun: loe: kaux heue.
Sinngao nawh khankix mawh yung: aliah rheng:, kala-uk loe: rheng:, moi tang: phwan: yieh, la shiang: phwan: yieh mu:, mai pwi daux nyiiex daux ma: nawh khankix kied haoh kied hun: heue. Mawh kheu nan:, pwi in: mawh pwi pa kied ting kied lhaong: khaing: sinax ceu pwi baoh haktiex plak lih singaix khawm: uik heue.
Yam hoek bawg yam singaix keh kawn: simex nawh khankix, kix yuh pwie krax khan: krax kheu: kah daux nyiiex cao: kix, mai kix ploi: pwi hu: ghaok kah nan: kix loe: kaux hoek tix ih nyaux tau mai kix heue.
Mawh kheu nan: yam hoik naox kix pwie pa yuh tix, Yawbax kok kix hoek sonsang yuh kix singax mai nawh yaog tix kaoh caocao daux ponngawb mai hu: tan krax tan pa gleeing khankix, awm: hoik koe: carang kix khawm: uik heue. Grawhgrawng: nawh, Yawbax hoik keud yuh nin:, "Kawn: simex aux khankix hoik phit hoik lud mai jhax lawg kah Siyiex kah daux rhawmrhi: kix heue." Mawh kheu nan:, Yawbax yuh awm: an: sijheeng: heue.
Satan Yuh Jhawm: Keud Yawbax Lauxleeing:
Kah daux an: tix ngaix yam hoek kawn: simex Siyiex tix khrawm: paox tix hoek kah plak sivoe Simiang Siyiex, mai satan kawx rom tix hoek kah daux sinax kix heue.
Mai Simiang Siyiex ah nin: kah satan, "Mawh kaoh maix khaing: dee mawx?" satan deeh pawk lox kah Simiang Siyiex mai ah nin:, "Aux kaoh khaing: lailing tix hu: kah piang haktiex, mai hu: jee hu: blaong sonsang simi tix jhak kah piang ceu an: kix heue."
Khaix an: Simiang Siyiex ah nin: kah satan, "Mawh hoik sax keud maix tix yaox kah grawng: kawncau Aux Yawbax, pwi pa awm: nawh ang lai koe: kah piang ca: haktiex, pa mawh pwi pa ang koe: dee deuh phimap pa grum naog mai pa rauh pa see, nawh mawh pwi pa lhat pa graung kah Siyiex mai pa via khaing: pa caox pa caig lie?"
Mawh kheu nan: satan deeh pawk lox kah Simiang Siyiex mai ah nin:, "Phan: Yawbax ang pon bwanson: khaing: Maix Cao: nawh sang lhat graung kah Maix Cao: lie?
"Ang hoik mawh Maix Cao: pa hoik yuh hawt vungviang nawh, mai hawt vungviang daux nyiiex nawh khankix ku daog ang mawh lie? Maix Cao: hoik nawb bwanson: kah piang kaing jhaw: pa yuh nawh kah taix tix khankix, mai kraungkhrai: sinngao nawh khankix, hoik haok hoik hwan: kah daux haktiex in: heue.
Viang mawh nan: yamin: nyeu plawng: taix Maix Cao: mai teeh kah can pa koe: nawh khawm: uik, mai nawh tag jhax lawg kah Maix Cao: kah plakngai: Maix Cao: tete heue.
Mawh kheu nan: Simiang Siyiex deeh ah nin: kah satan, "Jhak heue, can pa hoik koe: nawh khankix koe: kah daux siawpsibrawm maix; paw kieh ngie taix tix teeh piang nawh khaing:. Khaix an:, satan lih hu: khaing: kah plak sivoe Simiang Siyiex heue.
Yawbax Som SinNgao Mai Kawnpraix
Yam an: kah daux tix ngaix, yam kawn: ih kawn: nyaux kawn: simex kawn: bun: nawh khankix rawm: plix siiet, kah daux nyiiex puxke: ting kix,
Mai cao: cau tix kaux hoek kah Yawbax mai ah nin:, yam moi kawn: thai: kaung: mai la kawn: sawm: rib hawt praok kix,
pwi Shebax khankix hoik puing: kah kix, mai viex kix hu: dee singai, mai kix hoik pah tix tik kawncau khankix kah vaig, mawh aux nongnong: tix kaux pa klawd sonsang krai kah maix heue
Yam kawn: tag sikah nawh, pwi tang: kaux baox hoek mai ah nin:, "Ngu Siyiex hoik cod khaing: Raoma: mai hoik gleeing kah yung: mai cao: pau yung: khankix proe uik, mai mawh aux nongnong: tix kaux pa klawd sonsang deeh ing: krai kah maix heue."
Yam kawn: tag sikah nawh, pwi tang: kaux baox hoek mai ah nin:,ceu pwi Kaladie loe: cub, hoik rhim: kah cub Kala-uk an: khankix mai viex kix hu: dee singai, mawh heue, mai kix hoik pah cub kawncau khankix kah lawm vaig, mai mawh aux nongnong: tix kaux pa klawd deeh ing: krai kah maix heue.
Yam kawn: tag sikah nawh, pwi tang: kaux baox deeh hoek mai ah nin:, kawn: simex maix mai kawn: bun: maix khankix kawn: ih kawn: nyaux rawm: plix siiet kah daux nyiiex puxke: ting kix,
Mai bhaung: ting hoek sijaox khaing: daux tiag mai hoik klah kah nyiiex an: khawm: pon: daog, mai nyiiex an: hoik ghrup kah piang pwi awn: ju an: khankix mai kix hoik yum: mai mawh aux nongnong: tix kaux pa klawd sonsang deeh ing: krai kah maix heue.
Khaix an: Yawbax kaoh mai riah kah sibex lang: jung ceep tix mai khlao: hauk kaing: tix, mai nawh goh gup tix krub piang tiex heue.
Mai nawh ah nin:, aux hoik lih khaing: daux vaig miex tix kah daux pa ang tix viex kraung ceep, mai aux tag deeh ing: tau mai pa ang tix viex kraung ceep, Simiang Siyiex mawh pa tawx mai Simiang Siyiex kawx deeh teei hu:, kieh yawgyaw ceukaux Simiang Siyiex heue.
Kah grawng: ceu in: khawm: uik, Yawbax ang yuh phimap mai ang phit lud kah Siyiex heue.
Grawng: Yuh Satan Krax Ot Yawbax Lauxleeing:
Khaix an: kah daux tix ngaix yam hoek cub kawn: simex Siyiex khankix tix khrawm: paox tix hoek kah plak sivoe Simiang Siyiex, mai satan kawx rom paox hoek kah sinax kix kah plak sivoe Simiang Siyiex heue.
Mai Simiang Siyiex ah nin: kah satan, "Mawh kaoh maix khaing: dee mawx?" mai satan deeh pawk lox kah Simiang Siyiex mai ah nin:, aux kaoh khaing: lailing tix hu: kah piang haktiex, mai hu: jee hu: blaong sonsang simi tix jhak kah piang ceu an: kix heue."
Khaix an: Simiang Siyiex ah nin: kah satan, "Mawh sax keud maix tix yaox, kah grawng: kawncau Aux Yawbax, pwi pa awm: nawh ang lai koe: kah piang ca: haktiex, pa mawh pwi pa ang koe: dee deuh phimap, pa grum naog mai pa rauh pa see, nawh mawh pwi pa lhat pa graung kah Siyiex mai pa via khaing: pa caox pa caig lie? mai nawh ca: kawn: giex krax rah krax see tix kaux cong:, viang maix hoik sau: riang Aux sonsang yuh nawh lauxleeing: kah daux pa ang koe: ceu koe: grawng: heue."
Mawh kheu nan: satan deeh pawk lox Simiang Siyiex mai ah nin:, "Hak tag mawh son hak! mawh heue, pwi tix kaux tag pon tawx can pa koe: nawh khawm: uik son ju nawh heue."
Viang mawh nan: yamin: nyeu taix Maix Cao: mai teeh si-ang: nawh mai nex nawh, mai nawh tag jhax lawg kah Maix Cao: kah plak sivoe ngai: Maix Cao: heue."
Mawh kheu nan: Simiang Siyiex ah nin: kah satan, "Jhak heue, nawh koe: kah daux tawm: taix maix, viang mawh nan: kieh ngie ju nawh tix ceu klawd heue."
Khaix an: satan lih hu: khaing: kah plak sivoe Simiang Siyiex, mai kieh Yawbax geu: jhawm: saux muad pa kied kin: jah kah tiag caong tom: hoek kah piang kaing: nawh heue.
Mai nawh teei shiag aw: max, sonsang kraig tokaux tix kah, mai nawh ngawm kah daux nyaox heue.
Khaix an: moeng nawh ah nin: kah nawh, "Mawh ca: kawn: giex maix kah pa rauh pa see tix lie? jhax lawg Siyiex mai yum: khaing: heue."
Viang mawh nan: Yawbax ah nin: kah nawh, "Maix krai lox caox awm: bun: pa hai pa meug tix kaux heue. Mawh sang rieb ex tix teei ceu pa mhawm: khaing: Siyiex mai ang ex pon rieb tix teei krax kharhawm: kharhi: lie?" kah daux ceu in: khawm: uik, Yawbax ang kieh jheeh tix koe: krax phit krax lud heue."
Paoxgrawm Yawbax Loe: Kaux
Yam hoik mhong: paoxgrawm Yawbax loe: kaux kah grawng: pa kha: nawh rhawmrhi: tix kuceu, kix hoek kah nawh khaing: dee ot tix kaux mawx kaux an: pa mawh Eliphat ceu pwi Tematix khankix heue. Kix hoik yuh krax pa tat tix bawg yam tix mu: mai paox tix, sonsang bleeh kix tix mai khu: rhawmrhi: tau mai nawh mai sonsang tawx tix krax pa nyawmrhawm: nyawm rhi: kah nawh heue.
Mai yam yaog kix tix jhak khaing: dee singai, mai ang tawng kah nawh, kix hoik yo lox tix mai yiiem riag, khaix an: kix tang: riah sibex lang: jung ceep cao: tix kukaux mai rhuat phawng: tiex kah piang raoma: sonsang cod kah piang tix heue.
Mawh kheu nan: kix hoik ngawm tix ot tau mai nawh kah piang tiex aliah singaix aliah sawm: mai pwi tix kaux kawx, ang lai sikah lox pie tix gum kawx kah nawh, kheu jao yaox kix kah krax pa kied lang: teung: ting kha: nawh rhawmrhi: tix heue.
Grawng: Ngia Yawbax Kah Singaix Keh Tix
Khaix an: Yawbax ang jheeh tix mai deeh jhax lawg kah singaix keh tix heue.
Mai Yawbax sikah mai ah nin:;
"Kieh singaix keh aux mawh pa lauxleeing:, mai kieh pon sawm: pa ah hoik nghe:kawn: simex tix kaux an: lauxleeing: heue
Kieh singaix an: mawh pa faik, paw kieh Siyiex khaing: dee long: simi tix jhak kah singaix an:, mai paw kieh pa riieng jhan: tix kah piang an: heue.
Kieh pa faik veei meung yum: map nai: grawng: nawh, kieh paiawm: kheem: kah piang an:, kieh pa ceep daux singaix an: mawh pa kied lhat graung heue.
Kah daux sawm: an:, kieh pa faik kheem: kah nawh paw lai kieh nawh simin tix tau kah daux sinax singaix mai num, paw kieh an: mawh pa rom tix tau mai khix khankix heue.
Kieh sawm: an: mawh sawm: pa neh! paw kieh lox ceu pa gauxrhawm: gauxrhi: hoek laig kah daux an: heue.
Kieh pwi pa jhax lawg singaix khankix deeh jhax lawg kah singaix an:, kieh pwi pa pon so: rhawm: siyawng jhax lawg kah sawm: an: heue.
Kieh simuing: plak ponngawb mawh pa faik, kieh nawh sawg kah pa riieng viang mawh nan:, nawh ang yaox kah, mai paw kieh yaox kah bah riieng praix daux singaix an:,
grawhgrawng: nawh ang lai nyeep kah siviex vaig miex aux, mai ang lai mox krax lauxrhawm: lauxrhi: khaing: ngai: aux heue.
Aux lai ang yum: kah bawg yam jah tix keh yuh kah mawx lie? Aux lai ang dud rhawm: yam lih khaing: daux vaig miex tix dix yuh kah mawx lie?
Ngawng lai rieb tix teem kah aux kheu jao patix? mai teeh lai tawx aux peuex kheu jao patix?
Phan: ang mawh nan: aux tag noi: tix mai hoik pon krax yiien: yawg, aux tag hoik laig it, mai hoik mawh pa laux lee: tix,
tau mai khunhawkham haktiex mai cao: pa tawx rhawm: keud dong: sawn: khaing: piang haktiex, pa hoik deeh cox sum: pa laux pa leeing: son tokaux cao: kix,
phan: ang mawh nan: tau mai kawn: Simiang pa koe: khri:, mai pwi pa hoik naog yuh mau kah nyiiex tix;
phan: ang mawh nan: aux lai ang awm: kah kawnngie: pa keh ang naog khix tix kaux, mai kawnngie: pa ang sax yaox kah pa riieng yuh kah mawx lie?
Kah daux an: pwi caox ang pon tawx krax tuktiaktukte: kah, mai can pwi taug pwi mao khankix hoik pon pa laux lee: tix heue.
Pwi pa giex pa laung khankix hoik pon krax laux lee: tix tau, kix ang lai mhong: kah lox map cao: kaing: tix heue.
Pwi iak pwi ting kawx ot baoh tan, mai siliex an:, hoik luat luan khaing: cao: Simiang tix heue.
Yuh kah mawx pa riieng lai kawn: jhan: riieng tix kah son pwi pa kharhawm: kharhi: tix, kawn: kieh ju pa im: koe: kah daux pwi pa kin: rhawm: yuh kah mawx,
pwi pa pau son krax yum:, viang mawh nan:, krax yum: ang chix hoek, mai nie lheu: sawg tix yaox krax yum:, khaing: kraungkhrai: sinngao khankix,
pwi pa gauxrhawm: sigrien sigre, yam yaox kix kah simeeig mai nie koe: krax gauxrhawm: gauxrhi: kah ang mawh lie?
Yuh kah mawx lai tawx pa riieng kah pwi, pa mox daux krax pa hu: tix, mai kah pwi pa hoik laung Siyiex tix deuh khankix, yuh kah mawx lie?
Grawhgrawng: nawh aux hoik koe: pa nyia sivoe sang ih tix pa ih pa un:, mai rawm: ngai: pa yiiem doe: aux hoik lih awm: rawm: heue.
Grawhgrawng: nawh ceu pa kied lhat kied graung hoik hoek kah piang aux, mai ceu pa lhat aux, hoik lih tix koe: kah piang aux heue.
Aux ang koe: ceu pa nhim: rhawm: mai ang koe: ceu pa yiien: pa yawg, aux ang koe: pa laux lee: tix, kheu jao hoek krax kharhawm: kharhi: heue."
Grawng: Ne Eliphat Kah Phit Lud Yawbax
Khaix an: Eliphat ceu pwi Teman deeh pawk lox mai ah nin:,
Phan: aux cheuk tix krai lox tix gum kah maix, mawh sang pon kham: maix kah lie? viang mawh nan:, mawh pwi mawx pa sang pon ot giex going khawm: ang tix sikah lie?
Maix hoik sidiex gau kah pwi tom: nie, mai maix hoik tawx riang rao kah taix pwi pa iak riang khankix heue.
Gumlox maix khankix hoik joh jhan: kah pwi pa sideeing caong tix, mai maix hoik tawx riang rao kah ngawng pa awn: riang khankix;
viang mawh nan: yamin: ceu pa kharhawm: kharhi: hoik hoek kah piang maix, mai teeh kieh maix taug mao;
krax pa nab pa yam maix krax pa een: maix rhawm: tix, mai krax pa rauh pa see pa hu: maix, mai krax keud pot jun pot maix khankix koe: dee mawx lie?
Keud tix yaox yamin:, mawh pwi pa ang koe: dee deuh phimap mawx pasax hoek krax laux krax leeing: lie? Phan: ang mawh nan:, pwi pa rauh pa see mawx pasax teei tix tik kah dee mawx lie?
Awm: pa hoik tawng hoik yaox aux pwi pa thai: kaung: phimap mai van simie pa hai pa vao khankix, tag deeh yaox tix vawg awm: an: heue.
Kix tag lauxleeing: kheu bhawm: pa sileed Nawh Cao:, mai kix grai: kheu bhawm: pa songrhawm: Nawh Cao: heue.
Lox graox sivai sangsi:, mai lox riag sivai sangsi: pa kied kua:, mai rhang: kawn: sivai sangsi: khankix hoik goh hoik groing kah heue.
Sivai sangsi: kua: an: hoik yum: kheu ang lai yaox tix ih kug, mai kawn: miex sivai sangsi: khankix hoik prungprang: tix hu: kudauh heue.
Yam an: lox sikah tix gum, hoek kah aux khaing: dee glip, mai yhaok aux hoik mhong: kah lox pa koi sikah an: heue.
Kah daux krax keud krax ce: khaing: susai: ponsawm: yam hoik laig it laig tom pwi;
Krax lhat mai krax siyaung: hoek kah piang aux, mai kieh si-ang: aux khankix siyaung: kah heue.
Khaix an: khwan: tix mu: tiang sivoe ngai: aux, hauk haw: pa koe: piang aux khawm: uik hoik pruh kah heue.
Khwan: an: kawn: kaog, viang mawh nan:, aux ang tie pon gwieh kah pak peung, mai yaox ngie riang pang: peue: kah plak sivoe ngai: tix, yam an: aux mhong: lox pa nhim: tix gum mai ah nin:,
"Pwi pa chix yum: khex sang rah see kah plak sivoe ngai: Siyiex lie? Mawh chix singax kawn: pwi khaing: sivoe ngai: cao: pa phan: pa deuh tix lie?
Jhak heue Nawh Cao: kawn: ang yumrhawm: kah kawncau mau soi tix khankix, mai kawn: deuh kawncau Siyiex kawx mawh pa daox pa aw:,
Mawh kheu nan: pwi pa kaoh khaing: phawng: tiex mai pa ot daux nyiiex tiex khankix, nie sang koe: ceu pa krai grawng: kix yuh kah mawx, mai pwi an: khankix hoik phawng: hoik groing kah vaig ang mawh lie?
Kix hoik mawh pa laux pa leeing: kah daux tix singaix khaing:, kix tag grai: grup leeing ju mai pwi tix kaux kawx ang simawd kah kix heue.
Viang mawh pa kied mhawm: grang min: plakngai: kix kawx hoik luan hu: khaing: kix ang mawh lie? Kix tag yum:, tau mai pa ang tix koe: pingnya cuyi: heue.
Grawng: Pon Yawbax Lox Sidiex Gau Khaing: Siyiex
"Kok yo yaox yamin:, mawh pwi mawx pa sang pawk lox maix lie? mawh kawn: sang koe: pwi pa singax mawx sang veeh tix hoek teem: kah maix lie?
Grawhgrawng: nawh krax songrhawm: songrhi: an: tag pah kah pwi hai pwi meug, mai krax bohrhawm: bohrhi: pah kah pwi pa ang koe: krax tawng krax yung heue.
Yam yaox aux kah kaux num riah pwi hai pwi meug, viang mawh nan: aux hoik jhax lawg kah dee ot dee koe: nawh heue.
Kawnpraix nawh khankix, singai khaing: dee yiien: dee yawg, yam kha: kix rhawm: tix daux siviex veng mai cao: pa taoh kix ang lai koe: tix kaux kawx heue.
Grawhgrawng: nawh pwi pa cairhawm: khankix, hoik teei tix ih nghox vawg nawh khaing: sipeem pa vie tix kah pang: kat, mai pwi pa simie tix nyaux rawm: khankix hoik bleet kah sinngao kix heue.
Grawhgrawng: nawh krax kharhawm: ang lai kaoh khaing: phawng: tiex, mai krax suksag ang lai lih khaing: daux tiex,
mawh kheu nan: kawn: pwi keh son pa kharhawm: kharhi:, awm: nyia ngu kah piang heue.
Viang mawh kawx nan: phan: mawh kah aux, aux tag sawg kah Siyiex, mai aux tag ap tix tawx grawng: kaing kuceu kah siyiex,
pa yuh ceu pa kied ting kied lhaong: mai pa daox pa am: khawm: uik, pa ang lai dak uik simin kah heue.
Nawh Cao: kieh lhiex lih kah piang haktiex, mai ploi: rawm: khankix, lih kah tong kaung: heue.
Nawh Cao: yaog pwi tiemrhawm: tiiemrhi: ot kah dee pa lhaong: mai kieh pwi pa koe: krax yiiem grai khankix deeh nyawmrhawm: heue.
Nawh Cao: kieh pwi pa kawk rhawm: kawk rhi: khankix laux, mai sonsang ang kix lai pon yuh kah can ceu pa bak kix heue.
Nawh Cao: giex pwi koe: pingnya cuyi: kah jhawm: lhak tokaux kix, mai kieh krax keud krax sawn: pwi lukliak khankix mawh giex going heue.
Kix tag pub kah pa faik kah daux bawg yam pon singaix, mai pupi: tix hu: yam jung singaix, awm: plak ponsawm: heue.
Viang mawh nan:, Nawh Cao: taoh pwi hot sibhawm: khaing: vaig lawm khaing: daux jheeh pa kied ting riang ting rao mai khaing: daux tawm: taix kix heue.
Mawh kheu nan: pwi hot pwi shia: tag koe: krax keud pot jun pot, mai pwi ang rah ang see tag nyeep kah jheeh tix heue.
"Jhak heue, pwi pa hoik ciied hoik thi: Siyiex kah, mawh pa koe: bwanson:; mawh kheu nan:, paw koe: ceu pa sibriem, kah ceu pa hoik cox cao: pa ting siawpsibrawm mawh pa mhawm: awawx.
Grawhgrawng: nawh, Nawh Cao: kieh dee saux koe:, viang mawh nan:, Nawh Cao: pua: kah dee saux an:, Nawh Cao: kieh krax mat koe:, viang mawh nan:, taix Nawh Cao: deeh kieh moi: khawm: uik heue.
Nawh Cao: tag taoh maix lih khaing: daux pa kharhawm: kharhi: liah ceu, mawh heue, ceu pa caox pa caig aliah ceu an:, tag ang lai krox teeh kah maix heue.
Kah daux yam hot sibhawm:, Nawh Cao: tag taoh maix khaing: krax yum:, mai daux naing, Nawh Cao: tag taoh maix khaing: siawpsibrawm vaig heue.
Mai tag mox maix khaing: dak pa sibriem pwi, mai maix tag ang koe: krax lhat krax graung, yam hoek ceu pa laux pa leeing: heue.
Maix tag nyiah maung pa laux pa leeing: an: mai pa hot sibhawm: an:, mai maix tag ang koe: krax lhat krax graung kah totiag totu piang haktiex heue.
Grawhgrawng: nawh maix tag yuh sijax mukheu tau mai simaox kah daux kaung:, mai totiag totu pa koe: daux kaung: khankix tag yuh pa nhim: tau mai maix heue.
Maix tag yaox nyiiex gox tix koe: ceu pa nhim:; yam deeh ing: maix kah dee ot dee koe: tix, mai ang lai koe: krax lauxrhawm: lauxrhi: heue.
Maix tag tawng kah haoh hun: doeh simie ceu cat tix, mai kawnpraix kawn: saux kawn: sex tix khankix nie awm: rib riem kah piang haktiex heue.
Maix tag hoek kah daux simeeig, yam naog ju tix, awm: lhiem: nghox pa kaux yam hoek bawg yam pa khaw: tix vawg heue.
Jhak heue, keud tix yaox kah in:, hoik mawh pa mawh pa meh, nghiiet kah heue, mai kieh maix tawng kah tokaux tix heue."
Grawng: Lox Krai Yawbax
Khaix an: Yawbax deeh pawk lox mai ah nin:,
"Krax pa lauxrhawm: aux, kieh ciang tix yaox mhawmmhawm:, mai krax pa kharhawm: kharhi: aux khankix kieh khrawm: tix daux ngai: jiang heue.
Mawh kheu nan:, an: tag mawh pa nie cien khaing: mhaik rawm: sigrit sigra:, mawh kheu lox sikah aux hoik kied luan heue.
Grawhgrawng: nawh te puing cao: pa ting siawpsibrawm ot kah daux aux, khwan: aux nyaux kah jai: kix, krax lhat krax graung pa jhi: Siyiex hoik dia: tix kah plak sivoe aux heue.
Mawh sax riag la tiag yam koe: rib sawm: tix, mai mawh sax riag moi yam koe: rib sawm: tix lie?
Mawh sang pon ih priex ceet khawm: ang tix sau: kih lie? Phan: ang mawh nan:, mawh koe: jhawm: nyawm kah daux brang: tawm: ia: lie?
Ceu pa thiang: aux tix ang teeh kah khankix, mawh priex pa seeing: pa brai: kah son aux heue.
Kieh aux pon kah can ceu pa rawg pa mhaing: tix, mai kieh Siyiex tawx kah can ceu pa simie aux tix pon kah heue.
An: tag mawh pa khaw: rhawmrhi: Siyiex, sonsang yuh aux lauxleeing:, mai Nawh Cao tag nyeu plawng: taix Tix lih, mai tat tix tik aux heue.
Khaix an: aux tag koe: krax nyawmrhawm: nyawm rhi:, viang kah daux krax pa kied kharhawm: kharhi: kawx aux kawn: koe: krax gauxrhawm: gauxrhi:, paw kieh Nawh Cao: lai koe: pa lhawk kah aux, mawh kheu aux ang thiang: kah gumlox pa singax singeh Nawh Cao: heue.
Mawh koe: riang rao ceu patix kah aux kah daux pa keud pot tix lie? Mai mawh ceu pa sidauh sidu patix, kah tag sang kawn: kieh aux gun yeung tix baox lang: ju lie?
Mawh riang rao aux riang rao simaox lie? Phan: ang mawh nan: mawh nex aux nex tawng lie?
Krax teem: krax coi ang lai koe: kah daux aux tete, mai krax keud krax sawn: aux hoik deek hoik die ang mawh lie?
Pwi pa koe: krax caoxrhawm: caoxrhi: kah paoxgrawm tix pa hoek krax kharhawm: kharhi:, tag mawh pa luat luan khaing: pa lhat pa graung kah cao: pa ting siawpsibrawm heue.
Puxaik aux khankix hoik vungviang hu: awm: rawm: klawng: iak, awm: lih hu: rawm: daux ngawd daux klawng: hit mai grai: hu:,
rawm: klawng: an: hoik faik kah rawm: sidap, mai kah dee an: hoik mox tix kah rawmrha: heue.
Yam siu: rawm: an: nawh grai: hu:, mai yam hax koek kix kroh hit khaing: dee ot dee koe: tix heue.
Cub pwi hu: krax khankix hoik lud krax hu: tix mai grai: hu: sipie sipie heue.
Cub pwi Tema pa yuh lai geu hu: krax, jhak kah cub pwi pa kaoh khaing: haktiex Shebax kah daux krax pa keud pot jun pot tix heue.
Kix koe: krax lauxrhawm: lauxrhi:, kheu jao keud pot jun pot tix, yam hoek kix tankix koe: krax kaig krax tua kah heue.
Grawh grang: nawh pex kukaux awm: nang: an: mawh pa giex pa going, pex yaox kah krax tug krax kha: aux mai pex lhat graung kah heue.
Mawh hoik sax ah aux nin:,viex tix ceu ceu hoek kah aux lie? Phan: ang mawh nan:,tan tix tawx khawngphak tix ceu ceu son aux khaing: daux sinngao pa koe: maix lie?:
Phan: ang mawh nan::taoh aux khaing: daux tawm: taix pwi koeng lie? Phan: ang mawh nan:, laug tix teei aux khaing: daux tawm: taix pa nunai: kah aux lie?
"Gau kah aux mai aux tag ot yiien: yawg tix, jhi: aux yaox kah grawhgrawng: pa phit pa lud aux liak.
Gumlox pa mawh pa meh mawh pa kied ting sibrawm tete! lox pa sibriem pex khankix koe: bwanson: kah ceu patix lie?
mawh keud maix tix sang deuh phimap kah lox sikah aux lie? Mai lox sikah pwi pa ang koe: krax keud pot jun pot khankix awm: bhaung: heue.
Mawh heue, pex hoik yuh pa kin: pa kheem: kah kawn: doe:, mai pex coh kah paoxgrawm paoxgru awm: diang lai heue.
Mawh kheu nan: yamin: koe: krax fahrhawm: fahrhi: sonsang jhak kah aux liak; grawhgrawng: nawh, mawh hoik sax pie lhen: aux kah plak sivoe ngai: pex lie?
Yamin: deeh keud tix yaox mhawmmhawm:, paw yuh pa ang rah ang see, yamin: baox deeh keud tix yaox mhawmmhawm: aux kawn: cung sijung: kah daux pa rauh pa see heue.
Mawh koe: pa ang rah ang see kah piang dak aux lie? Mawh ang aux pon cim tix yaox mai pon gwieh tix tawng kah ceu pa koe: phimap phighram: lie?"
Yawbax Kham: Geu: Ceu Pa Ang Nyawmrhawm:
"Mawh ang kawn: pwi yaox tix taug mao yam ot tix kah piang haktiex in: lie? Bawg yam singaix pa yaox nawh tix ot khankix, ang hoik awm: pwi pa cang: tix kaux lie?
Awm: siliex tix kaux pa keud ce: sonsang klip singaix, mai awm: pwi cang: tix kaux, pa ca: keud ce: kah son ngawh riang tix khankix,
mawh kheu nan: aux hoik yaox tix kham: geu: pa kharhawm: tix kaing: khix tix khix hoik tix khix, mai krax pa taug pa mao aux daux ponsawm: kawx hoik mawh nyum: cie aux heue.
Yam it aux, aux ah nin:,mawh sang kaoh aux yam mawx!, mai mawh sang sidauh sawm: yam mawx lie? Grawhgrawng: nawh aux hoik tieh jee tieh blaong tix tom: bah riieng praix heue.
Graik mai phawng: tiex khankix hoik kheem: piang nex aux awm: kraung ceep, mai hak hoik bih tix mawh leem heue.
"Baux singaix aux nie lheu: phai: khaing: breeing keei: taing: khankix, mai hoik luan hu: kah daux pa ang koe: krax keud pot jun pot heue.
Kieh aux doh keud doh sawn: kah ju tix awm: toek ex bhawm: tix khaing:, ngai: aux tag ang lai baox yaox kah ceu pa mhawm: heue.
Ngai: pwi pa yaox kah aux tag ang lai baox yaox kah aux; yam simi ngai: Maix Cao: kah piang aux, aux hoik grai: hu: heue.
Awm: prungprang: grai: paiawm: dee singai, mawh kheu nan: pwi pa lih kah daux simeeig khankix kawx tag ang lai yaox tix deeh hoek heue.
Nawh tag ang lai yaox tix deeh ing: kah nyiiex tix, dee ot dee koe: nawh, tag ang lai tawng kah nawh tix bawg kawx heue.
"Mawh kheu nan: aux tag ang lai nyeep kah jheeh tix, mai khwan: aux tag sikah kah daux pa taug pa mao tix, aux tag bawgbe kah daux pa lauxrhawm: tix heue.
Khex mawh aux rawm: sigrit sigra:, phan: ang mawh nan: mawh siyawng pa deuh Maix Cao: mawh cao: pa pau tix kia: kah piang aux lie?
Yam ah aux nin:,dee it aux tag tawx krax nyawmrhawm: nyawm rhi: aux, mai ku: it aux tag sang tawx krax pa nyawm pa nyiah aux,
Khaix an: Maix Cao: ghlat aux kah krax pa camaox tix, mai kieh aux yaoh yee: kah riieng susai: khankix,
Aux kawn: laug tix teei krax pa yum:, mai krax yum: tag nie lheu: mhawm: khaing: krax pa lhawk aux kah si-ang: tix heue.
Aux seeing: kah krax im: ju tix, aux tag ang lai im: jheengjheeng: heue. Kieh aux ot nongnong:, grawhgrawng: nawh baux singaix aux khankix hoik awm: pa toek ex bhawm: tix khaing: heue.
Kawn: pwi mawh ceu patix, sonsang yaogyaw Maix Cao: nawh mawh pa ting ceu, mai Maix Cao: lai koe: rhawmrhi: kah piang nawh,
Maix Cao: lai hoek fi: kah nawh ku ngawb, mai cheukcheu: kah nawh ku bawg ku yam lie?
Maix Cao: tag ang jhak ang simi kah aux kawn: sang rheung: miex ghreung:; mai kieh aux ot nongnong: tom: sidauh pon bleet aux rawm: mia: tix lie?
Cao: pa pau kah kawn: pwi eue, phan: aux koe: phimap, mawh sang caw: aux tix yuh ceu patix kah Maix Cao: lie? Maix Cao: hoik kieh aux, awm: mhai: pa tang: Maix Cao: tix deuh kheu jao patix, mai kieh aux mawh beeh glawm: pa ciien kah son Maix Cao: lie?
Yuh kah mawx Maix Cao: lai ang pluat ploi: kah pa phit pa lud aux mai ang teei phimap phighram: aux luan kheu patix lie? Yamin: aux tag sang it kah daux phawng: tiex, mai Maix Cao: tag sawg aux plak ponngawb, viang mawh nan:, aux ang lai ot heue."
Biladat Krai Grawng: Doh Keud Yawbax Kah Phimap Tix
Khaix an: Biladat ceu pwi Shua pawk lox mai ah nin:,
"Mawh kawn: sang sikah maix grawng: ceu in: miex ghreung: lie? mai lox jheeh maix khankix kawn: sang awm: bhaung: ting miex ghreung: lie?
Mawh yuh Siyiex krax prawng krax ca: Tix ang rah ang see lie? Phan: mawh nan:, mawh pluk pliak Siyiex pa ting siawpsibrawm pa rauh pa see Tix lie?
Phan: kawn: simex maix khankix yuh phimap mai phi lud kah Nawh Cao:, Nawh Cao: hoik teei tix tik kix kheu jao pa phit pa lud kix heue.
Phan: maix tag sawg Siyiex kah daux krax pa singax rah see rhawm: tix, mai khyox khaw: kah cao: pa ting siawpsibrawm,
phan: maix hoik mawh pa singax mai pa rauh pa see, yamin: Nawh Cao: tag kaoh son maix tete, mai kieh maix haok hwan: ting lhaong: kah daux krax pa rauh pa see can dee ot dee koe: maix heue.
Yam jah viang maix hoik mawh pa iak kawx, dee sidauh sidu maix tag ting lhaong: haok hwan: heue.
Yuh bwanson: chawkcheng: tix yaox kah grawng: pa hoik luan kah kuad riex ju, mai keud tix yaox kah can ceu pa hoik gau keeing: maix khankix mawh patix,
grawhgrawng: nawh ex mawh kawn: pa keh kawx kawx ngie khaing:, mai ex ang tawng kah tidtix, mawh kheu singaix baux ju ex kah piang haktiex in:, mawh ngie pang: peue: khaing: heue.
Mawh ang kix gau maix mai ang krai maix mhong: lie? mai ang kix krai lox pa tawng kix daux rhawm: daux rhi: tix lie?
Mawh chix kuah pang: jo: kah dauh dee ang tiex leet lie? mai mawh chix klai rib kuah hawt klawng: yam ang rawm: koe: lie?
Viang ang kid glang: yam kawn: klai lhax kawx, an: kawn; nie yie fit sivoe pang: tang: ceu heue.
Awm: an: daux krax hu: can pwi pa piawm: kah Siyiex khankix, mai krax keud pot jun pot pwi kin: jhawm: khankix tag laux tag leeing:,
can ceu pa een: kix rhawmrhi: tix kah tag mawh pa dud, mai can ceu pa deuh kix rhawmrhi: tix kawx tag awm: nyiiex greeih heue.
Nawh peung kah nyiiex tix, viang mawh kawx nan:, ang kaux cong: heue. Nawh giex kah nyiiex an:, viang mawh nan: nyiiex an: ang kaux heue.
Nawh ting lhaong: mai klai kah daux koek, mai kak nawh khankix di tix tah hu: kah daux sipeem nawh heue.
Riah nawh hoik vungfiien: tix kah vungviang pum: simaox, mai ot kah sinax rang: khankix heue.
Phan: nawh mawh pa lauxleeing: khaing: daux dee ot tix, khaix an: dee an: tag thiang: tix tik nawh, mai ah nin:, aux ang sax yaox maix heue.
Jhak heue, krax pa gauxrhawm: gauxrhi: nawh, nawh tag awm: in: mai khaing: kah daux haktiex nawh pwi tang: ceu tag kuah kah heue.
Jhak heue, Siyiex tag ang lai tik lai vud kah pwi pa kaux sijax mai rah see mai Nawh Cao: ang lai teem: coi kah pwi pa caox pa caig khankix heue.
Nawh Cao: tag sang kieh jheeh maix nyiah mai kieh siyieb jheeh maix koe: krax pa gauxrhawm: gauxrhi: heue.
Can pwi pa koeng kah maix tag ceep tix kah pa kaig pa tua, mai dee ot dee koe: pa caox pa caig tag hoek krax som krax nai: heue."
Grawng: Ang Yawbax Koe: Lox Pawk Kah Siyiex
Yawbax deeh pawk lox mai ah nin: heue.
"Mawh heue, aux tawng lox an: mawh pa mawh pa meh, viang mawh nan:, sang pon rah see kawn: pwi sivoe ngai: Siyiex miex ding?
Phan: Siyiex koe: rhawm: tix sang deuh phimap kah pwi tix kauxkaux, khaing: kah daux tix rheng: bawg nawh tag ang lai deeh pon pawk kah Nawh Cao: pie tix bawg kawx.
Siyiex mawh pa koe: pingnya pa daox pa am:, koe: siawpsibrawm mai ting riang ting rao heue. Mawh pwi mawx pa sang pon tiextu mai pon pex kah Nawh Cao:?
Nawh Cao: gah gawng lua mai kix ang tien tawng, Nawh Cao: pluk pliak tix tik kix kah daux pa songrhawm: songrhi: Tix,
Nawh Cao: yungyang: haktiex kieh greed khaing: dee ot nawh, mai rong: khankix kawx pungpang: heue.
Nawh Cao: tawx lox kah singaix, mai ang kieh lih; Nawh Cao: tie kah simuing: khankix,
Nawh Cao: nih Tix kheem: kah raoma:, mai dig piang pukpak rawm: sigrit sigra: khankix,
Nawh Cao: hoik phan: hoik deuh simuing: Ashax, simuing: Khatilax, mai simuing: Khimax, an: khankix mai cub simuing: pa koe: kah plak seh,
Nawh Cao: yuh kaing ceu pa kied ting kied lhaong: pa ang ex lai dak pon tawng, Mawh heue, krax pa daox pa am: mawh pa ang lai uik simin kah heue.
Nawh Cao: hu: kah plak sivoe aux, aux ang chix yaox kah Nawh Cao:; Nawh Cao: luan hu: sivoe aux mai aux ang tien tawng kah.
Phan: Nawh Cao: teei tix priex hu: dee singai, pwi mawx pa sang pon tiebtie Nawh Cao: lie? Mawh mawx pa pon ah nin: kah Nawh Cao: yuh Maix Cao: patix lie?"
Phan: Siyiex ang deeh yoi: krax pa songrhawm: songrhi: Tix, cub pa yuh paox yuh pie pa lhaong: rhawm: lhaong: rhi: khankix, tag phawng: tag laux greem: Nawh Cao: heue.
Kah piang an: aux tag sang deeh pawk kah Nawh Cao: yuh kah mawx? Mai laug tix teei gumlox pa yuh kah mawx sonsang krai sivoe ngai: Nawh Cao:?
Viang aux rah see kawx aux ang lai pon pawk lox kah Nawh Cao:, aux tag khyox khaw: kah cao: pa prawng see: rah see kah piang aux heue.
Viang Nawh Cao: deeh pawk lox pa kok aux kawx aux tag ang lai yumrhawm:, kah nghiiet Nawh Cao: kah lox tix heue.
Grawhgrawng: nawh, Nawh Cao: yuh aux lauxleeing: kah bhaung: ting, mai baox kieh jhawm: saux haoh hun: kah piang nex aux, pa ang koe: grawng: koe: ceu heue.
Nawh Cao: ang tawx akhwang: sang sileed aux bhawm: tix, mai kieh jhawm: saux pa kiied kin: naog kah piang aux heue.
Phan: ah een: rhawm: tix kah riang rao tix ceuceu, Nawh Cao: mawh pa kiied ting riang ting rao; mai phan: ah mawh pa rauh pa see, mawh pwi mawx pa tag sang mawh sakse plak aux kah daux nyiiex prawng see: lie?
Viang aux ah mawh tix pa rauh pa see kawx, jheeh aux mawh pa ciyang kah aux, viang aux ah mawh tix pa hoik grum naog kawx, rhawm: pa kawk pa vawk aux hoik si dawng: sivoe Nawh Cao: heue.
Mai phan: aux mawh pa grum naog kawx, aux ang nyang tawng kah tokaux cao: tix, aux lauxrhawm: kah ju cao: tix heue.
Awm: lox pa sang krai aux khankix mawh yuh nin:;Nawh Cao: tag yuh pwi pa ang koe: dee deuh phimap mai khawm: pwi caox pwi caig khankix lauxleeing: heue
Phan: jhawm: saux preng mawh pa viex krax yum: hoek tix taix neh, Nawh Cao: tag nyiah kah krax kham: geu: pwi pa ang koe: phimap heue.
Haktiex in: hoik ap tix tawx kah daux tawm: taix pwi caox pwi caig heue. Nawh Cao: tieb thox ngai: cao: prawng see: khankix heue. Phan: ang mawh Nawh Cao:, mawh pwi mawx pa sang pon prawng see: an: lie?
Singaix aux nie lheu: phai: khaing: pwi pa to: tix kaux, kix to: dee singai kawx mai ang yaox kah pa mhawm: heue.
Kix nie lheu: phai: khaing: reu ting, mai luan hu: awm: teei klang: krih tosat ih cao: tix heue.
Phan: aux ah nin:,aux tag piawm: kah lox riag yo tix, mai aux tag peeik tix tik ngai: baoh pa khirhawm: tix, mai deeh ceep kah ceu pa nyawmrhawm:,
aux lhat graung kah ceu pa kham: geu: tix khawm: uik; aux tawng kah ang Maix Cao: lai giex tix deuh aux awm: pwi pa ang koe: phimap phighram: heue.
Phan: aux yaox mawh tix pwi koe: phimap, yuh kah mawx aux lai kawn: coca: tix yuh kaing pa giex pa going kheu jao patix lie?
Phan: aux sighrah tokaux tix kah rawmrha:, mai khoek taix tix sonsang singax kah sidauh khoek kawx,
viang yuh nan: Maix Cao: tag nyhot aux laig kah daux tiex, mai kraung ceep aux khankix tag seeing: kah aux heue.
"Grawhgrawng: nawh, Nawh Cao: ang mawh kawn: pwi awm: aux, sonsang pon pawk aux lox Nawh Cao:, mai ex tag hu: kah dee prawng see: tau mai paox tix heue.
Ang lai koe: pwi pa sang ah grawng: ceu an: kah sinax ex, pa tag sang deuh taix tix kah piang ex khawm: ra: lie?
Kieh Nawh Cao: teei khaox gix Tix hu: singai khaig: aux, mai paw kieh aux lhat graung kah pa ghlat Maix liak.
Khaix an: aux tag sikah kah daux pa ang koe: krax lhat krax graung kah Nawh Cao:, viang mawh kawx nan: rhawm: aux ang lai koe: yuh nan: tete heue.
Grawng: Deeh Khyox Khaw: Yawbax Tix Kah Siyiex
"Khwan: aux hoik ngau kah ju aux, aux tag kieh ceu pa ngau tix hoek piang tix, aux tag sikah kah daux krax pa kied songrhawm: songrhi: khwan: tix heue.
Aux tag ah nin: kah Siyiex,paw nyang ciyang aux liak: jhi: aux yaox grawng: deuh Maix Cao: phimap kah aux heue.
Mawh yaox Maix Cao: ceu pa yeen ya in: khankix mawh pa mhawm: mai seeing: brai: kah kaing pa yuh Maix Cao: kah taix Tix, mai khaw: tix tawx bwan: kah piang krax keud krax sawn: pwi caox pwi caig lie?
Mawh koe: ngai: Maix Cao: awm: nex nham: lie? Phan: ang mawh nan: mawh yaox Maix Cao: awm: pa yaox kawn: pwi lie?
Mawh awm: singaix Maix Cao: singaix kawn: pwi khankix lie? Mawh awm: num Maix Cao: singaix sawm: simex ting riang ting rao tix kaux lie?
Yuh kah mawx Maix Cao: lai sawg kah krax pa phit pa lud aux, mai sonsang yaox tix kah phimap phighram: aux,
viang Maix Cao: tawng kah ang aux mawh pwi phit lud, mai ang lai koe: pwi tix kaux kawx pa sang taoh aux lih khaing: daux tawm: taix Maix Cao:.
Plawng: taix Maix Cao: hoik phan: hoik yuh pakpeung: aux koe: mhawmmhawm:, viang mawh nan:, Maix Cao: tag sang deeh yuh aux lauxleeing: heue.
Doh keud doh sawn: kah hoik phan: hoik yuh Maix Cao: aux kah tiex heue. Mai Maix Cao: sang deeh kieh aux mawh phawng: tiex lie?
Ang hoik mawh Maix Cao: pa rauk aux lih awm: rawm:teeih, mai kieh aux kiien: awm: klon: rawm:teeih,
mai lhop aux kah hak mai nex, mai kleuk si-ang: mai siniag aux khankix kaux tau ang mawh lie?
Maix Cao: hoik kieh aux im: ju mai hoik nawb bwanson: kah aux, mai Maix Cao: hoik liem lia kia: ngien kah khwan: aux heue.
Mai ceu inkix hoik mawh pa mox Maix Cao: kah daux rhawm: Tix, aux hoik tawng mawh in: pa koe: tau mai Maix Cao:,
phan: aux phit lud, Maix Cao: hoik mhai: tix deuh kah aux, mai ang pluat ploi: aux khaing: krax pa phit pa lud aux heue.
Phan: aux mawh pwi caox, aux tag pon krax kharhawm: kharhi:; viang aux rah see kawx, aux ang lai pon yaog kaing: tix heue. Aux hoik naog kah pa kaig tua; jhak kah pa lauxrhawm: lauxrhi: aux liak!
Phan: aux yaog tokaux tix lhaong:, Maix Cao: tag leue aux awm: sivai sangsi: pa kied hai:, mai Maix Cao: deeh jhi: krax lhat krax graung pa daox pa am: Tix kah aux heue.
Maix Cao: hoik plak jhi: mhai: sakse pa lud aux, mai kieh krax pa songrhawm: songrhi: Maix Cao: nie haoh hun: kah piang aux, Maix hoik khre: naing pa khraox kah son aux ku jheeng: heue.
Yuh kah mawx Maix Cao: lai viex aux lih khaing: daux vaig miex tix? Phan: ang mawh nan: aux hoik yum: kah: ang pwi nyang yaox aux kah ngai: tix heue.
Pa ang caw: tix mawh kah aux hoik lih tix mawh. Pa teei aux lih khaing: daux vaig miex tix mai hoek kah daux simeeig heue.
Singaix sawm: khankix hoik mawh pa dawg sawn: aux ang mawh lie? prah aux ot nongnong:, sonsang koe: krax nyawmrhawm: aux daux bawg yam pa deuk ceeix,
sivoe sang hu: aux kah dee pa ang aux lai yaox tix ing:, kah haktiex pa faik, mai kah veei pa yum: khankix,
pa mawh haktiex pa faik awm: ponsawm:, mai veei yum:, pa ang lai koe: ceu pa riieng pie tix bawk kawx, kah dee mawh pa riieng an: awm: pa faik heue."
Zopha Tawx Riang Sonsang Doh Keud Yawbax
Khaix an: Zopha ceu pwi Nemat pawk lox mai ah nin:,
"Mawh sang koe: bwanson: kah pawk tix lox lie? Mawh sang khaw: pwi tie: lox sikah tix pon krax pa pluat ploi: lie?
Mawh sang kieh maix pwi yiien: yawg kah lox pie tix lie? Mai yam sikah maix kah lox sibriem, mawh ang pwi tix kaux kawx kaig kah lie?
Grawhgrawng: nawh maix hoik ah nin:,been cie aux hoik rah see, mai aux mawh pa singax kah plak sivoe ngai: Maix Cao: heue
Viang mawh nan: kieh mawh Siyiex pa ah kah maix, mai paoh siyieb jheeh Tix yuh maix laux,
sonsang jhi: Nawh Cao: maix yaox kah pingnya cuyi: pa raux pa mox khankix, mawh kheu nan: phan: Nawh jhi: maix yaox ceu an: khankix viang maix keung: tix khawm: geu: kah phimap tix kawx, maix tag tawng grawng: ang lai tawx phimap kah maix heue.
"Mawh pon sawg maix kah ceu pa kied raux Siyiex lie? Mawh pon yaox maix kah mee: pa hoik tat hoik deuh cao: pa ting siawpsibrawm lie?
An: khankix mawh pa nie lheu: lhaong: khaing: raoma:, mawh sang pon yuh maix tix lie? Nie lheu: khaing: meung yum:, mawh sang pon tawng maix yuh kah mawx lie?
An: khankix phan: tiag tix yaox mawh pa nie lheu: lang: khaing: haktiex, mai nie lheu: vieh khaing: rawm: sigrit sigra: heue.
"Phan: Nawh Cao: giex tix laung maix daux thawng: mai prawng see: kah maix, mawh pwi mawx pa sang pon tiebtie kah Nawh Cao: lie?
Grawhgrawng: nawh, Nawh Cao: tawng kah krax pie krax lhen: pwi khankix, Nawh Cao: yaox grawng: pa caox pa caig yuh kix heue. Mawh ang Nawh Cao: lai tiag cheu tix yaox grawng: an: khankix lie?
Grawhgrawng: nawh pwi daox pwi aw: tix kaux tag lih tix koe: pingnya cuyi:, yam hoik keh kawn: la tiag tix mu: tix mawh pwi tix kaux heue.
"Yawbax eue, deuh rhawm: maix rah see, mai deeh hoek sawg kah Nawh Cao:;
phan: krax phit krax lud koe: kah daux tawm: taix maix, mai teei tix tik khaing: maix dee singai, mai paw kieh pa caox pa caig khankix ot daux nyiiex gox maix;
khaix an: maix tag pon yaog ngai: tix kah daux krax pa ang tix koe: pa seeing: pa brai:, mawh heue, maix tag mawh pa kaux pa cong:, mai ang koe: krax lhat krax graung;
Grawhgrawng: nawh, maix tag sang piawm: kah krax kharhawm: kharhi: tix, mai doh deud kah ceu an: khankix hoik luan hu: awm: rawm: dee singai;
Mai ju maix tag mawh pa nie lheu: riang khaing: pa riieng yam jung singaix heue. Viang hoik faik kawx maix tag sang awm: pa riieng ponngawb heue.
Mai maix tag sang yaox tix ot kah daux pa yiien: yawg, kheu koe: krax keud pot jun pot tix, mawh heue, viang maix hoik som nai: yamin: kawx, mai maix tag yaox tix laux lee: kah daux pa yiien: pa yawg heue.
Yam it maix pwi tix kaux kawx, tag ang pon yuh maix lhat graung; mawh heue, pwi tom: nie tag mhaing: krax teem: kah maix heue.
Viang mawh kawx nan: ngai: pwi caox khankix tag sang iak riang iak rao, mai kix ang lai yaox daux krax klawd tix, mai krax keud pot jun pot kix tag mawh pa som pa nai: tau mai ju kix heue."
Grawng: Deeh Pawk Yawbax Lox Nawh Cao:
Khaix an: Yawbax pawk lox mai ah nin:,
"Lox pa krai pex kawx mawh lox kawn: pwi, mai yam yum: pex pingnya cuyi: pex tag yum: tau mai pex heue,
Viang mawh nan: aux hoik koe: krax tawng krax yung awm: pex, ang aux lai mawh pa beuh khaing: pex heue. Mawh pwi mawx pa ang tawng kah can ceu pa krai pex inkix lie?
"Aux mawh pwi pa hoik kham: geu: lox pa ne pa raw, khaing: paoxplawg paoxnyhawm: khankix, yam kok yo aux kah Siyiex, mai Nawh Cao: pawk lox rawg aux bwan: kah daux pa rauh pa see mai kah daux krax pa ang koe: pa deuh phimap, hoik pon kah pa nyiah pwi mai kah lox pa sibriem heue.
Daux pa keud pa sawn: pwi pa mag pa mi khankix hoik awm: ceu pa map pa nai: mai pa brah son; in: khankix hoik mawh pa khre: rien tix sonsang cang klad pwi heue.
Nyiiex gox pwi con khankix tag koe: ceu pa nhim: kah, mai can pwi pa so: Siyiex songrhawm: tag yaox tix ot daux pa yiien: yawg, mawh kheu viex kix siyiex tix hawt taix tix heue.
"Viang mawh nan: chawkcheng: tix yaox kah tosat khankix, mai kix tag gau pex kah, mai sim: sai: raoma:, khankix tag krai pex mhong:,
Phan: ang mawh nan: chawkcheng: tix yaox kah haktiex, mai kix tag gau pex kah; mai kax daux rawm: sigrit sigra: tag sang krai pex mhong: sidawng: laing laing heue.
Kah daux sinax ceu in: khawm: uik mawh pwi mawx pa ang tawng mawh taix Siyiex pa phan: kah lie?
Kah daux can pa koe: ju kuceu mai kawn: pwi pa toek bhawm: tix khankix koe: kah daux tawm: tai Nawh Cao: ang mawh lie?
Ang mawh yhaok pa cheuk kah lox sikah pwi, mai ang mawh jheeh khankix pa cim kah jhawm: priex lie?
Pwi pa riex ju naog mai pingnya cuyi:, mai pwi lang ju kawx naog kah krax tawng krax yung heue.
Nawh Cao: naog kah pingnya cuyi: mai kah riang rao, Nawh Cao: chix tawx rhawm: keud dong: sawn: mai krax tawng krax yung heue.
Phan: Nawh Cao: yieh kah ceu an:, an: tag ang lai pon deeh sum: kah; phan: Nawh Cao: phyawk laung kah pwi tix kaux, ang lai chix koe: krax luat luan heue.
Phan: Nawh Cao: thox tix deuh kah rawm: khankix, rawm: tag hit, phan: Nawh Cao: deeh ploi: lih tag kheem: kah haktiex heue.
Nawh Cao: hoik naog kah siawpsibrawm mai pingnya cuyi: heue. Pa pie pa lhen: mai pwi pie pwi lhen: khankix, koe: kah daux taix Nawh Cao: heue.
Nawh Cao: teei tix tik kah pingnya cao: kwang: haktiex khankix, mai kieh cao: prawng see: khankix yhot vaw kah heue.
Nawh Cao: pluat ara khunhawkham khankix, mai phyawk nyoi kix kah maox rawd nyoi heue.
Nawh Cao: teei tix tik kah cao: giex kaing: li khankix hu: awm: pwi tud pwi rhim:, mai kieh pwi ting riang ting rao khankix hoek krax som krax nai: heue.
Nawh Cao: kieh pwi koe: sibrawm lox sikah yiien: yawg tix, mai teei tix tik kah pingnya krax keud kuad song: nong: yu khankix hu: singai heue.
Nawh Cao: kieh kawn: laux Simiang khankix kaig tua, mai teei tix tik kah kraung naing pwi ting riang ting rao khankix heue.
Nawh Cao: plak sidawng: grawng: ceu pa kied raux khankix khaing: daux pa faik, mai viex veei pa yum: deeh hoek kah daux pa riieng heue.
Nawh Cao: yuh meung haktiex ting lhaong:, mai deeh yuh kix lauxleeing:, Nawh Cao: yuh meung haktiex khankix vieh, mai kieh kix pungprang: hu: dee singai heue.
Nawh Cao: teei tix tik krax tawng krax yung khaing: cao: kaing: ting pwi khankix piang haktiex, kieh kix vungviang kah daux tiag daux tu pa ang krax lai koe: heue.
Kix pupi: tix hu: kah daux pa faik tau mai ang koe: pa riieng, mai Nawh Cao: kieh kix hu: tutiex awm: pwi yoek heue.
Jhak heue, Ngai: aux hoik yaox in: khawm: uik, yhaok aux hoik mhong: mai hoik tawng kah in: heue.
Can ceu pa tawng pex aux kawx tawng; aux ang mawh pwi beuh khaing: pex heue.
Viang mawh nan: aux tag sikah kah cao: pa koe: siawpsibrawm, mai aux tag koe: rhawm: tix kum: grawng: an: tau mai Siyiex heue.
Viang mawh kawx nan: pex mawh pa khre: rien tix kah pa pie pa lhen:, pex mawh cao: sidax pa ang chix tix shiao heue.
Phan: pex ot yawg tix, mai pa ot yawg an: tag awm: koe: pingnya pex heue.
Yamin: nghiiet kah grawng: pa krai aux khankix, mai priex kah gumlox pa khyox khaw: siyieb jheeh aux khankix heue.
Mawh sang sikah maix lox caox kah Siyiex, mai krai lox pie lox lhen: khankix kah Nawh Cao: lie?
Mawh sang jhak maix plakngai: Nawh Cao: lie? Mawh sang koe: krax pa thungthiang: maix kah Siyiex lie?
Phan: Siyiex jawg tix jhak kah maix mhawmmhawm: sang yaox Nawh Cao: ceu pa mhawm: kah maix tix ceu ceu lie? Mawh keud maix tix pon pie lhen: kah Siyiex awm: pon pie lhen: maix kah pwi tix lie?
Phan: pex moh tix jhak kah plakngai: pwi, Nawh Cao: tag sidiex kah pex tete heue.
Mawh ang pex koe: krax lhat graung kah siawpsibrawm min: plakngai: Nawh Cao:, mai ang lhat pa yaox yee: Nawh Cao: glup kah piang pex lie?
Gumlox been kab pex khankix, ang koe: bwanson: awm: nyaox, guh veng pa tiebtie pex tix kah khankix, tag awm: guh veng glaox heue.
"Ot yiien: yawg tix ha: mai tawx akhwang: kieh aux sikah, khaix an: kieh ceu pa sang mawh khankix lih tix mawh heue.
Aux tag khliak nex cao: tix kah rhang: tix, mai giex ju tix kah taix tix yuh kah mawx lie?
Viang Nawh Cao: pah kah aux, mai ang lai koe: krax keud pot jun pot kawx, viang yuh nan: kawx, aux tag sang krai grawng: pa yuh tokaux cao: tix khankix kah plak sivoe Nawh Cao: heue.
Nawh Cao: tag mawh krax pa taoh son aux, mawh kheu pwi tud pwi rhim: ang pon hoek kah plak sivoe Nawh Cao: heue.
Jawg tix nghiiet kah lox aux, mai kieh lox pa krai aux laig daux yhaok pex heue.
Yamin: jhak heue, aux hoik khre: rien see: son tokaux tix, mawh kheu tawng aux mawh tix pa caw heue.
Mawh pwi mawx pa sang pon krai dee phit dee lud aux lie? Phan: yuh nan: aux tag ot yiien: yawg tix, mai aux tag kham: tix yum: kah heue.
Yawbax Rawg Bwan: Mai Voi Rhawm: Tix
"Siyiex eue, kieh aux rawg tix chawk kah Maix ra: ceu liak, khaix an: aux tag ang lai mox tix kah plak sivoe ngai: Maix Cao:,
deeh yoi: taix Maix Cao: kieh singai khaing: aux, mai paw ghlat aux kah pa lhat pa graung Maix Cao: liak?
Khaix an: deeh kok aux, mai aux tag deeh pawk, phan: ang mawh nan: kieh aux sikah sivoe, mai Maix Cao: deeh pawk kah lox aux liak?
Phimap phighram: krax phit krax lud aux hoik koe: miex ding? kieh aux tawng kah krax pa phit pa lud tix mai kah phimap phighram: pa hoik yuh tix khankix heue.
Maix Cao: lai mox pakngai: tix mai keud aux awm: pwi koeng Maix Cao: yuh kah mawx lie?
Mawh sang ghlat Maix Cao: kah lhax khaox phlu: bhaung: siyaoh lie? sang hawt pheet Maix Cao: khaix brex nghox pa kroh an: lie?
Grawhgrawng: nawh Maix Cao: hoik tiem: ceu pa sang lang: teung: kin: khankix kah piang aux, mai deeh kieh aux kham: sinngao phimap pa yuh tix yam mawh kawn: nyawm awn: ju heue.
Maix Cao: hoik sau: tix deuh gang: kah caong aux, mai pau tix kia: krax hu: aux khankix heue. Maix Cao: hoik tat tix deuh mee: kah diang caong hu: aux khankix heue.
Pwi pa yaox tix kham: ceu an: tag awm: ceu pa rham: rhaw:, mai awm: kraung ceep pa ih greeing heue.
"Pwi pa keh khaing: bun: mawh pa dawd ju mai mawh pa naog kah krax kharhawm: kharhi: heue.
Nawh lih pruh awm: tai, mai fit hu: sipie sipie; nawh to: awm: veei pangpeue:, mai ang lai kaog lai nien heue.
Mawh sang blah Maix Cao: ngai: Tix jhak kah piang pwi yuh nan:, mai viex aux hoek sonsang prawng see: tau mai Maix Cao: lie?
Mawh pwi mawx pa sang pon teei ceu pa singax lih khaing: daux pa ang singax lie? Ang koe: pie tix kaux kawx heue.
Baux singaix cie nawh khankix, hoik mawh pa tat tix deuh, bawg yam khix singaix ot nawh khankix mawh pa koe: tau mai Maix Cao:, Maix Cao: hoik tat tix deuh baux yam nawh pa ang nawh lai pon yaox tix luan kah heue.
Veeh ngai: Tix singai khaing: nawh, sonsang yaox nawh tix laux lee: yiien: yawg tix kah daux singaix nawh, awm: pwi cang: pwi vai tix kaux heue.
"Grawhgrawng: nawh viang kid tix tik kah khaox an: kawx kawn: koe: krax keud pot jun pot kah khaox an:, mai khaox an: tag kawn: sang glaoh mai glaoh awn: ang jud heue.
Viang riah khaox an: hoik mawh pa riex kah daux tiex kawx, mai phan: ngu: khaox an: yum: kah piang tiex kawx,
yam haok bhawm: rawm: an: tag deeh glaoh mai deeh kieh glaoh khaox lih mawh awm: gaw khaox tix gawng: heue.
Viang mawh nan: pwi tag yum: mai ghrup rham:, khaix hoik dud rhawm: nawh, mai nawh sang ot dee mawx lie?
Awm: hoik jud rawm: khaing: rawm: sigrit sigra:, mai klawng: pa hit pa kroh rawm: khaing:,
Mawh kheu nan: pwi pa laig it, ang lai deeh kaoh heue. Tom: hoek bawg yam ang raoma: baox lai koe:, kix tag ang lai siduad, mai ang lai kaoh khaing: pa it tix heue.
"Phan: Maix Cao: mox aux kah daux simeeig sang mawh pa mhawm: miex ding, tom: hoek bawg yam ang krax songrhawm: songrhi: Maix Cao: nyang bax luan, khaix an: deuh bawg yam pa doh keud doh sawn: Maix Cao: kah aux liak!
Phan: pwi tix kaux hoik yum: mawh kawn: sang baox im: nawh lie? Aux ca: kawn: krox jun kah bawg yam singaix pa kharhawm: kharhi: tix, tom: sidauh hoek bawg yam deeh tieh loh aux tokaux tix heue.
Maix Cao: tag kok, mai aux tag deeh pawk kah Maix Cao:, Maix Cao: tag koe: rhawm: koe: rhi: kah piang kaing pa yuh Maix Cao: kah taix Tix heue.
Grawhgrawng: nawh yamin: Maix Cao: hoik simi kah diang caong hu: aux khankix, viang mawh nan:, paw jhak kah piang phimap phighram: aux liak!
Krax pa phit pa lud aux khankix hoik nyeep tix daux hau: mai tawk cum: kah, Maix Cao: hoik mad tix deuh phimap pa lud pa loe: aux heue.
"Viang mawh nan: awm: ghrup gawng, mai phawng: hu:, mai awm: gah greed rang: khaing: dee ot tix;
awm: klah rawm: kah simaox hu: dee singai, mai awm: rawm: lhiex pa thah phawng: tiex khaing: haktiex, mawh kheu nan: Maix Cao: tag yuh krax keud pot jun pot kawn: pwi lauxleeing: heue.
Maix Cao: pex kah nawh leeing ju, mai nwh tag grai: grup, Maix Cao: tieh loh rieng pakpeung: nawh, mai ploi: nawh hu: dee singai heue.
Viang kawn: simex nawh hoek kah daux pa koe: min: kawx, mai nawh ang lai tawng kah kix, viang kix hoek daux pa yeen tix tiem kawx mai nawh tag ang lai simawd tix tawng an: kix heue.
Viang mawh nan: nawh tawng kah kied saux kraing kah tokaux tix, mai khwan: ju nawh kawx hoik ngia kah tete heue."
Grawng: Deuh Eliphat Phimap Kah Yawbax
Khaix an: Eliphat ceu pwi Teman pawk lox mai ah nin:,
"Mawh khaw: pwi pa koe: pingnya cuyi: tix pawk lox pa ang koe: tau mai bwanson: mai kieh tokaux tix naog kah bhaung: pa hoek khaing: plak lih singaix lie?
Mawh khaw: nawh tix kum: grawng: lox pa ang koe: dee bleeh, phan: ang mawh nan: kah lox pa ang koe: bwanson: lie?
Mawh heue, krax pa lhat graung maix ang koe: bwanson:, mai mawh pa tieb krax rawg bwan:, kah plak sivoe Siyiex heue.
Grawhgrawng: nawh krax phit krax lud hoik gau kah jheeh maix, mai maix laug tix teei dak pa vawk pa kawk heue.
Jheeh cao: maix ciyang kah maix, mai ang lai mawh aux, siyieb jheeh cao: maix mawh pa kham: mhai: sakse kah maix heue.
"Mawh maix pwi pa liang tix keh lie? Phan: ang mawh nan:, mawh hoik phan: hoik deuh kah sivoe kah: sang phan: gawng lua khankix lie?
Mawh hoik sax mhong: maix kah kaing pa khre: Siyiex lie? Mawh pon tiag maix mee: koe: pingnya cuyi: tokaux tix lie?
Tawng maix ceu patix pa ang ex tawng kah lie? Tawng maix kah ceu patix pa ang koe: kah daux ex lie?
Pwi paing hauk kaing: mai pwi riex ju, pa nie kuad khaing: keeing: maix koe: kah daux sinax ex,
Mawh keud maix krax nyawmrhawm: pa tawx Siyiex maix mawh pa iak mai hoik koe: gumlox ceu pa mox an: tau mai maix lie?
Yuh kah mawx maix lai kieh tokaux tix hawt kah rhawmrhi: tix mai lud loe: lie? Mai blaig ngai: maix tix jhak kah ceu patix,
Maix lai kieh khwan: ju tix tieh feen kah Siyiex, mai kieh lox ceu in: lih khaing: jheeh tix lie?
"Kawn: pwi mawh pa yuh kah mawx nawh sang chix singax lie? Mai nawh mawh pwi pa keh khaing: bun:, nawh sang chix rah see yuh kah mawx?
Viang kah kawncau Nawh Cao: kawx Nawh ang een: rhawm: kah, mai kix kawx ang lai mawh pa singax kah daux ngai: Nawh Cao:,
mai pwi nyaux kah phimap pa seeing: pa brai: awm: rawm:, mawh heue, kix mawh pa caox pa caig mai ang koe: bwanson: tidtix heue.
"Aux krai kah maix nghiiet lox aux, aux krai can ceu pa tawng pa yaox tix khankix kah Maix,
can ceu pa krai pwi ting pingnya cuyi: an: khankix, ang lai mawh pa mox tix, pie tix ceu kawx, mai an: kix hoik mawh pa rieb kix tix teei khaing: keeing: kix,
Kix mawh pa tang: ot kah haktiex cao: tix nongnong:, mai pwi tang: ceu tang: cat ang luklaig tix ot kah daux sinax kix,
pwi caox pwi caig an: tag yaox tix kham: geu: kah jhawm: saux jhawm: nyia tom: sidauh ju tix, mai pwi pa map pa yeen ya kah pwi khankix tag ang lai tawng kah singaix ju tix heue.
Lox pa lhat pa graung koe: kah daux yhaok nawh; yam koe: krax pa haok hwan: ting lhaong: nawh pwi pa yuh laux tag hoek kah nawh heue.
Nawh ang lai koe: krax keud pot sonsang luat luan tix, khaing: daux pa faik, mai vaig lawm hoik jawm kah nawh heue.
Nawh vungviang tix hu: sawg kah pa ih pa un: mai ah nin:,mawh koe: an: dee mawx lie?: Nawh tawng kah koe: bawg yam pa faik an: kah son nawh heue.
Krax kharhawm: kharhi: mai krax lauxrhawm: lauxrhi: khankix mawh pa kieh nawh koe: krax lhat krax graung, kix pex kah nawh awm: hoik khre: rien khunhawkham tix kah son naing heue.
Grawhgrawng: nawh, nawh nyeu taix tix sonsang tiebtie kah Siyiex, mai tang: yuh tokaux tix kaux cong:, khaing: cao: pa ting siawpsibrawm,
Mai nawh to: kah daux pa kiien: ngawg tix sonsang tieh feen kah Nawh Cao:, tau mai kraung tieb pa pu tix heue.
Mawh kheu ngai: baoh nawh hoik naog kah pa kluing: klon bi vaig nawh hoik rob tix kah nyoi nawh kawx,
Nawh yaox tix ot kah daux veng pa yiien:, mai kah daux nyiiex pa ang pwi lai ot kah tix kaux kawx pa dex sang goh sang laux heue.
Nawh tag ang lai chix mi mai krax mag mi nawh tag ang lai pre hu:, mai kraungkhrai: sinngao nawh khankix, tag ang lai mawh pa tah hu: kah piang haktiex heue.
Nawh tag ang lai pon lih khaing: daux pa faik, rao ngu tag voeg kak nawh khankix kroh, mai bhawm: pa kaoh khaing: jheeh Nawh Cao: tag phlu: nawh luan hu: dee singai heue.
Paw kieh nawh een: rhawm: tix kah ceu pa giex pa going, mai deeh pie lhen: kah tokaux cao: tix, mawh kheu pa giex pa going an: tag mawh khawngphak cie nawh heue.
An: tag mawh pa sidauh sivoe ang bawg yam cie nawh nyang hoek, mai kak nawh khankix tag ang lai klai heue.
Nawh tag yungyang: kah plix siiet pa ang nyang teem cie nawh khrum: kah nhu: plix siiet, mai awm: cia kho: tai khaox Sanlun heue.
Grawhgrawng: nawh cub pwi tud pwi rhim: khankix tag mawh pwi nie, mai ngu tag proe kah nyiiex gox pwi pa ih mau cun: praok heue.
Kix nghe: krax pa kharhawm: kharhi:, mai keh ceu pa giex pa going, vaig kix hoik koe: kaux kah ceu pa pie pa lhen: heue.
Yawbax Deuh Phimap Kah Paoxgrawm Tix
Khaix an: Yawbax pawk lox mai ah nin:,
"Aux hoik dawg mhong: lox ceu ankix; krax khu: pex rhawm: aux mawh krax taug krax mao kah aux heue.
Mawh ang lox giex going pa phlu: awm: bhaung: lai chix uik lie? mawh ceu patix pa so: kah rhawm: maix sonsang deeh pawk maix lox yuh nin: lie?
Aux kawn: pon sikah awm: pon sikah pex, phan: ju maix ot kah dee ot ju aux, aux kawx chix pon pum: lox kah piang pex, mai pon vuhvied kaing: tix kah pex,
Viang mawh nan: aux tag kieh pex koe: riang, kah jheeh tix mai krax pa nyawmrhawm: khaing: daux siyieb jheeh aux, tag sang deeh kieh pa lauxrhawm: maix khiien: moi: kah heue.
"Viang aux sikah kawx krax lauxrhawm: aux ang nyang khiien:, mai viang aux ang nye: nyux kawx, aux tag sang khiien: kah miex ding lie?
Viang mawh nan: Nawh Cao: hoik kieh aux taug mao; Maix Cao: hoik kieh paoxgrawm paoxgru aux khankix yiien: heue.
Maix Cao: hoik sau: gang: kah aux, mai an: tag mawh pa kham: sakse kah piang aux, mai tokaux pa krawx rhao: aux kaoh tieh feen aux; mai baox nie kham: sakse kah plak ngai: aux heue.
Nawh Cao: riah tix tik aux kah daux pa songrhawm: songrhi: Tix, mai koeng kah aux, Nawh Cao: greeik rhang: Tix kah aux, pwi koeng aux hoik blaig ngai: tix kah piang aux heue.
Kix ang moing tix kah aux, kix simang: kah sibax aux, sonsang kaig tua aux, kix kraix khrawm: paox tix deeh tieh feen kah aux heue.
Siyiex hoik ap tix tawx aux kah pwi pa ang rah ang see, mai hoik deeh veeh tix tawx aux kah daux tawm: taix pwi caox pwi caig khankix heue.
Yam ot aux yiien: yawg tix, Nawh Cao: raig kah aux, Nawh Cao: giex ngawg aux, mai siblat aux tom: phawng:, Nawh cao: hoik tang: tix deuh aux mawh mhai: son Nawh Cao:,
Cao: puing: ak Nawh Cao: khankix hoik lai lawm kah aux, Nawh Cao: kieh te an: kix klah daux sokrhawm: aux, mai ang lai koe: krax caoxrhawm:; Nawh Cao: hieh tix tik ghin: aux kah piang tiex heue.
Nawh Cao: kieh aux mat, mai baox lux kah dee mat an:; Nawh Cao: breeng: tix yuh aux laux awm: pwi naing pa vao pa kua: heue.
"Aux hoik caing tix ceep chee: rhix pa kawm: kah piang nex tix, mai deuh kaing: tix kah daux phawng: tiex heue.
Ngai: baoh aux hoik raoh kheu yiiem tix, mai veei krax yum: hoik kheem: kah siyieb ngai: aux;
pie kah daux tawm: taix aux kawx ang koe: ceu pa kin:, mai lox bwan: rawg aux mawh pa singax heue.
"Haktiex eue, paw doh kheem: kah nham: aux, mai paw kieh lox yiiem yo aux ang koe: dee laux lee: tix liak!
Pie tom: yamin: sakse aux hoik koe: kah daux raoma: tete, mai kaw pa kham: sakse aux koe: kah dee lhaong: heue.
Paoxgrawm paoxgru aux khankix hoik sibriem kah aux, rawm: ngai: aux hoik jah sivoe ngai: Siyex heue.
Awm: pon kah kum: pwi tau mai paoxgrawm paoxgru tix, mai kieh pwi pon kah kum: tau mai Siyiex awm: nang nan: heue.
Grawhgrawng: nawh bawg yam khix num ang lai rheung:, aux tag sang hu: krax pa ang tix lai koe: krax deeh hoek heue.
Yawbax Rawg Bwan: Sonsang Luat Luan
Khwan: ju aux hoik sidauh, bawg yam singaix aux hoik uik, simeeig hoik koe: son aux heue.
Ang hoik mawh pwi pa nu nai: kah aux pa ot tau mai aux lie? Mai ngai: aux ca: yaox kah pa tuktiaktukte: kix ang mawh lie?
"Yamin: deuh sakse tix ceu ceu son aux kah Maix Cao: liak. Mawh pwi mawx pa sang singeuh taix tix tau mai aux lie?
Mawh kheu hoik kieh Maix Cao: rhawmrhi: kix faik khaing: krax tawng krax yung, mawh kheu nan: Maix Cao: tag ang lai yaog kix lhaong: heue.
Awm: koe: lox kab kuad tix deuh ah nin:, pwi pa ap paoxgrawm tix kah son mau, mai kawnpraix nawh khankix, tag yaox tix kham: geu: son an: heue.
Mai Nawh Cao: hoik kieh aux mawh pa sa pa lao pwi khankix, mai kix baig rawm: mia: tix kah pakngai: aux heue.
Ngai: aux kawx hoik pupi kheu krax pa lauxrhawm: lauxrhi:, mai tokaux aux khawm: uik hoik awm: pangpeue: heue.
Pwi rah pwi see khankix tag daox deng: kah grawng: in:, mai pwi ang koe: phimap khankix so: rhawmrhi: tix tieh feen kah pwi ang rah ang see khankix heue.
Pwi rah see tag kaux cong: daux krax hu: tix, mai pwi pa singax taix khankix, tag sang ting riang kah piang ting riang heue.
Viang mawh nan: yuh bwanson:, pex kukaux baox deeh hoek khawm: uik, grawhgrawng: nawh aux ang yaox pwi pa koe: pingnya cuyi: kah daux sinax pex tix kaux kawx heue.
Singaix sawm: aux khankix hoik luan hu:, krax bak krax viang aux mai rhawm: keud aux khankix kawx hoik lauxleeing: heue.
Kix tieh loh ponsawm: mawh ponngaix, mai kix ah nin:pa riieng dex hoek, mai pa riieng an: mawh pa faik heue.
Phan: aux pau simeeig mawh son nyiiex ot aux, phan: aux tawm dee it tix ot daux pa faik,
phan: aux ah nin: kah pa cux pa si um:,maix mawh keeing: aux, mai phan: aux ah nin: kah graik,maix mawh miex aux mai nan: aux,
Phan: mawh nan: krax keud pot jun pot aux, koe: dee mawx? mawh pwi mawx pa chix yaox kah krax keud pot jun pot aux lie?
Mawh tag sang lih hu: krax keud pot jun pot aux tau mai aux daux siviex meung yum: lie? Mawh sang laux lee: an: kix tix tau mai ex kah daux phawng: tiex lie?"
Grawng: Krai Biladat Krax Kham: Geu: Pwi Caox Pwi Caig
Khaix an: Biladat ceu pwi Shuhix pawk lox mai ah nin:,
"Mawh kawn: sang rheung: sikah maix miex ghreung: lie? Kieh koe: krax tawng krax yung, mai khaix an: aux tag sang sikah heue.
Yuh kah mawx ex lai sawn: tix awm: khawng: brie khankix, maix lai jhak ex awm: pwi daox pwi aw: kah daux ngai: tix yuh kah mawx lie?
Maix pa mawh pwi pa riah tix tik tokaux tix kah daux pa songrhawm: songrhi: tix, mawh tag sang tik vud haktiex tix kah sipiag maix lie? Phan: ang mawh nan:, mawh sang gah rang: tix khaing: dee ot tix lie?
"Pa riieng pwi caox pwi caig tag yeet hu: tete, mai rao ngu nawh ang lai pon tix riieng kah heue.
Pa riieng kah daux nyiiex gox nawh lih tix mawh pa faik mai kawk ngu pa koe: praok nawh, tag mawh pa yeet heue.
Diang caong pa koe: riang nawh hoik dawd, mai krax keud krax sawn: nawh, tag kieh nawh cangklad goh heue.
Grawhgrawng: nawh, tokaux nawh hoik krix kah rub, mai caong nawh hoik cub tix daux kie heue.
Kie hoik gluah kip kah loek caong nawh, mai rub hoik vungfiien: tix giex nawh heue.
Maox jhawk hoik mox tix son nawh daux tiex mai kie hoik taung: tix son nawh kah daux krax heue.
Krax lhat krax graung hoik ghlat nawh ku plak, mai sigheet loek caong nawh heue.
Riang rao nawh hoik yawm kheu cairhawm: nawh, mai krax laux krax leeing: hoik pau praok nawh heue.
Pa lauxleeing: an: hoik kraing kaux hak nawh, mai kawn: ai: meung yum: hoik bleet riang rao nawh heue.
Nawh Cao: hoik reeig nawh khaing: nyiiex gox dee een: nawh rhawm: tix, mai viex nawh hu: kah khunhawkham pa lhat graung heue.
Pa ang mawh cie kix, tag ot kah daux nyiiex gox kix, mhat tag rhuat tix kah piang dee ot dee koe: nawh heue,
Riah nawh hoik kroh tom: plak greem:, mai kak plak piang khankix tag fit heue.
Krax pa doh keud kah nawh tag lauxleeing: khaing: kah piang haktiex, mai ceukaux nawh tag ang lai koe: kah daux krax daux laux heue.
Nawh hoik mawh pa grheu: tix khaing: pa riieng mai laig kah daux pa faik, mai pheet nawh lih khaing: haktiex heue.
Nawh ang koe: kawn: koe: praix sinax ceu pwi nawh khankix, mai ang lai koe: doehdoe pie tix kaux kawx kah dee ot dee koe: tix heue.
Can pwi pa ot kah plak klip singaix, tag koe: krax daox krax am: kah baux singaix ju nawh, mai pwi pa ot kah plak lih singaix, tag koe: krax yaoh yee: kah heue.
An: mawh dee ot dee koe: pwi caox pwi caig tete, mai in: mawh dee ot dee koe: pwi ang tawng kah Siyiex heue.
Yawbax Een: Rhawm: Kah Cao: Pa Taoh Nawh
Khaix an: Yawbax pawk lox mai ah nin:,
"Mawh kawn: sang tuktiak pex khwan: ju aux mai tuktiak aux phawng: vid kah lox sikah tix miex ghreung: lie?
Hoik mawh kao: bawg pa sibriem pex kah aux, pex ang lai kaig lai tua kah lud loe: tix kah aux heue.
Mai phan: aux lud tete, krax lud aux tag ot tau mai aux heue.
Mawh kheu yaw pex tokaux tix piang aux mai teei krax kaig krax tua aux deeh sibriem aux kah,
Pex khaw: tix tawng kah hoik mawh pa yuh Siyiex kah aux, mai hoik vungvhiien: aux kah rub Nawh Cao: heue.
Phan: aux yiiem doe: son grawng: lud loe: tix, ang koe: pwi nghiiet heue. Phan: aux riag yo ang koe: pwi prawng rah see heue.
Nawh Cao: hoik thox hoik vie krax hu: aux kah die son ang aux pon tiang, Nawh Cao: hoik deuh pa faik kah daux krax hu: aux heue.
Nawh Cao: hoik peeik tix tik kah min: plakngai: aux khaing: aux, mai hoik peeik mhok khri: khaing: kaing: aux heue.
Nawh Cao: hoik raig aux pot ku plak, mai aux hoik pak khawm: uik, Nawh Cao: hoik reeig tix tik krax keud pot jun pot aux awm: laoh kah gawng: khaox heue.
Nawh Cao: hoik kieh krax pa songrhawm: songrhi: tix rup kah piang aux, mai Nawh Cao: simin aux awm: pwi koeng tix kaux heue.
Pwi naing Nawh khankix hoek tau mai kaong: krax hoek puing: tix aux, mai yuh tab hawt vungviang nyiiex gox aux heue.
Nawh Cao: hoik gah puxaik aux khankix singai khaing: aux, mai can pwi pa meed aux khankix, hoik deeh mawh pwi tang: pwi praw: kah aux khawm: uik heue.
Paox nyiiex paox ma: aux hoik tik vud kah aux, mai paoxgrawm paoxgru pa kied dex mai aux khankix hoik piawm: aux heue.
Can pwi pa ot kah daux nyiiex aux, mai khawm: kawncau bun: aux khankix, hoik deuh aux awm: nyo sinie; aux hoik mawh pwi tang: praix tang: klawng: kah daux ngai: kix heue.
Aux kok kah kawncau tix, viang mawh nan: nawh ang lai pawk, aux khyox khaw: nawh kah jheeh tix heue.
Moeng aux ang pon dex aux kheu sioe: bhawm: aux, mai puxaik lih aux kawx hoik seeing: brai: kah aux heue.
Pie kawn: nyawm iak khankix kawx hoik nunai: kah aux, yam yaog aux tix kaoh mai kix hoik nyiah maung aux heue.
Paoxgrawm paoxgru pa dex pa dawd mai aux khankix seeing: brai: kah aux khawm: uik, mai can pwi pa moh aux khankix, deeh tieh feen kah aux heue.
Deuk ngie hak pa kawb kah si: ang aux, mai mawh ngie ngi aux pa kawn glawd nongnong: heue.
"Pex pa mawh paoxgrawm paoxgru aux khankix eue, caoxrhawm: kah aux, caoxrhawm: kah aux liak! grawhgrawng: nawh khawn: taix Siyiex hoik tiah aux heue.
Pex lai khin: kah aux, awm: yuh Siyiex kah aux, mai ang fahrhawm: fahrhi: kah ih tix nex aux yuh kah mawx lie?
Kieh tiem: tix een: kah lox sikah aux yamin:! Kieh mhai: tix deuh kah daux phuk lai heue.
Saik tix deuh ngai: lai an: kah piang rang: kah gawng: tiem: rhiem: sonsang kaux leeing ju leeing phan: heue.
Mawh kheu aux tawng kah im: ju cao: pa taoh aux, mai Nawh Cao: tag cung kah piang tiex yam sidauh praix;
mai khaix hoik tawng aux lauxleeing: kaux hak tix, tokaux aux tag sang yaox kah Siyiex,
Kah kaw pa tag sang yaox kah tokaux cao: aux kah, mai ngai: aux tag jhak kah nawh mai ang lai mawh pwi tang: kaux heue. Mai rhawmrhi: pa simie aux khankix hoik khrup kah heue.
Phan: pex ah mawh sang yuh ex krax khin: kah nawh miex ding lie?: num: riah grawhgrawng: ankix hoik yaox kah daux aux,
kieh tokaux pex koe: krax lhat krax graung kah vaig, mawh kheu krax songrhawm: songrhi: viex krax ciyang kah vaig, kieh pex tawng kah koe: krax prawng krax ca: heue."
Grawng: Krai Zopha Kah Grawng: Pwi Caox Pwi Caig
Khaix an: Zopha ceu pwi Nemat pawk lox mai ah nin:,
Mawh kheu kied sungsang rhawm: aux, aux koe: lox pa sang pawk kheu jao grawng: an: heue.
Aux hoik mhong: lox pa deuh phimap mai lox salao aux, mai khwan: krax tawng krax yung aux kieh aux pawk kah lox kix heue.
"Mawh ang maix tawng bawg yam jah didix, mai yam jah tix deuh kawn: pwi kah piang haktiex,
Krax pa yaw rangdi pwi caox pwi caig mawh tivud ticu, mai krax gauxrhawm: pwi tud pwi rhim: khankix mawh ngie tivud ngie ang mawh lie?
Viang min: plakngai: nawh lhaong: tom: hoek raoma: mai kaing: nawh cux paiawm: kawx,
nawh tag grai: grup leeing ju leeing phan: awm: aing: pa tik cao: nawh, can pwi pa hoik sax yaox kah nawh tag sang ah nin:, mawh ot nawh dee mawx lie?
Nawh tag pu: luan awm: camaox mai ang lai yaox kah, mawh heue, nawh tag grai: hu: awm: riieng susai: daux ponsawm: heue.
Can ngai: pa hoik sax yaox kah nawh, tag ang lai baox yaox kah nawh tix bawg kawx, mai kah dee sax ot nawh kawx, tag ang lai baox yaox kah nawh tix bawg kawx heue.
Kawn: prai nawh khankix tag sawg krax teem: krax coi kah pwi hot pwi shia: mai taix nawh kawx, tag deeh viied sinngao kah pwi heue.
Si: ang nawh viang naog kah riang rao pwi awn: ju kawx, viang mawh nan: an: tag sang mawh pa noi: tix it tau mai nawh daux phawng: tiex heue.
"Viang ceu pa caox pa caig ankix mawh pa tie: pa ngaig kah daux jheeh nawh kawx, mai nawh tag mox tix deuh an: greem: dak tix,
Viang nawh lhawk kah, mai ang tik, kawn: ca: kum daux jheeh tix,
priex ih pa kawn koe: kah daux vaig daux tu nawh khankix, tag deeh tieh tix mawh pa niex mai an: tag deeh tieh tix mawh cai: siuing: rang: kah daux nawh heue.
Nawh tag bleet tix ih kah sinngao, mai tag deeh hao: lih, Siyiex tag teei an: kix lih khaing: daux vaig nawh heue.
Nawh tag peeb kah cai: siuing: rang:, dak siuing: num: tag sang pah nawh yum: heue.
Nawh tag ang yaox kah rawm: klawng:, pa mawh rawm: klawng: dee lih rawm: hia: mai rawm:teeih khankix heue.
Nawh ang lai yaox tix bleet kah kaing pa yuh tix, mai deeh yaox tix tawx kah pwi, nawh ang lai fahrhawm: fahrhi: kah, kheu mawh pa deeh tawx nawh kah pwi heue.
Grawhgrawng: nawh, nawh kheem: gut kah pwi hot pwi shia:, mai ang lai simi kah kix, mai hoik tud rhim: kah nyiiex pa ang tix sum: heue.
"Grawhgrawng: nawh, rhawm: ghoeng: nawh ang chix fah, nawh tag ang pon priex kah ceu pa khaw: rhawm: tix pie tix ceu kawx heue.
Ceu pa deuk khankix pa ang nawh bleet tix ih ang koe: tix ceu kawx, mawh kheu nan: krax mhawm: ot nawh tag ang lai kaux cong: heue.
Yam ot nawh kah daux krax pa kub ih kub un: mai nawh tag yaox tix ot kah daux pa cud pa cha: tix; taix pa kharhawm: kharhi: ku plak tag hoek tix yuh nawh laux heue.
Yam ah nawh tix sang baox naok vaig tu tix naog, Siyiex tag ploi: krax songrhawm: songrhi: Nawh Cao: lih hoek kah piang nawh, yam kawn: ih nawh heue.
Viang nawh to: khaing: kraung naing rhiem: kawx, ak tawng tag krox nawh mai phlat heue.
Nawh toek te an: lih khaing: tokaux tix, toh vaig pa plang: tag lih khaing: daux ghin: nawh heue. Krax pa lhat pa graung tag hoek kah piang nawh;
pa faik khawm: uik hoik khrawm: tix deuh sonsang mawh kraungkhrai: sinngao nawh heue. Ngu pa ang chix yeet an: tag gleeing kah nawh, mai khawm: pwi pa kawn deuk kah daux nyiiex gox nawh heue.
Raoma: tag vaoh phimap nawh lih, mai haktiex tag kaoh mai deeh tieh feen kah nawh heue.
Krax haok hwan: nyiiex ma: nawh khankix tag lih hu: khaing: nawh, mai kraung nawh khankix tag simam: hu: singai:, daux singaix songrhawm: songrhi: Nawh Cao: heue.
In: mawh nyum: son pwi pa caox pa caig pa kaoh khaing: Siyiex mai sinngao pa hoik tat Siyiex tix tawx kah son nawh heue.
Lox Krai Yawbax Kah Pwi Caox Pwi Caig
Khaix an: Yawbax pawk lox mai ah nin:,
"Bre tix nghiiet kah lox sikah aux, mai kieh mawh pa nyawmrhawm: nyawmrhi: maix heue.
Gun rhawm: maix tivud ha:, sonsang sikah aux, mai khaix hoik sikah aux pex sang krai patix pon tix krai heue.
"Phan: mawh lox son aux mawh koe: lox ngau aux kah piang pwi lie? Mai phan: an: mawh kah aux yuh kah mawh aux lai sang pon gun kah lie?
Jhak kah aux mai pa daox pa deng: kah; teei taix pex mai thox jheeh pex kah khaing:,
yam doh keud aux kah grawng: ceu in:, aux hoik yaoh kah, mai kaux hak aux hoik siyaung: kah heue.
Pwi caox pwi caig khankix pon tix im: ju lang: ju mai ting riang kah daux pa koe: siawpsibrawm tix yuh kah mawx lie?
Doeh simie ceucat kix tag pang: tix tau mai kix kah plak sivoe kix, mai cub kawnpraix kix tag yaox tix ot plak sivoe ngai: kix heue.
Nyiiex kix mawh pa yiien: pa yawg khaing: krax lhat krax graung, khaox puat Siyiex kawx ang lai hoek kah piang kix heue.
Moi mhaing: kix mhawm: simie ang koe: krax som krax nai:, moi shiang: kix keh kawn: ang sax laux tix geh kawx heue.
Kix tag ploi: kawn: nyawm iak khankix hu: awm: phung: yung:, mai kawnpraix kix tag graoh thiao: heue.
Kix rhax lai mai ting: plah khaox mai ting: ting sideed maox, mai koe: krax gauxrhawm: gauxrhi: tau mai lox pi: langhai: heue.
Kix kieh singaix sawm: tix khankix luan hu: daux krax mag mi tix, mai kah daux tivud khaing: kix tag lih hu: kah daux meung yum: heue.
Viang mawh nan: kix kawn: ah nin: kah Siyiex, "Lih hu: khaing: yix, grawhgrawng: nawh yix ang lai koe: rhawm: tix sang tawng daux krax Maix Cao: heue.
Cao: pa ting siawpsibrawm pa sang yuh yix kaing jhaw: Nawh Cao: mawh pwi mawx lie? Phan: ex rawg bwan: kah Nawh Cao: sang pon ex bwan: ceu patix?:
Jhak heue, sinngao kix ang lai koe: kah daux tawm: taix kix, krax keud krax sawn: pwi caox pwi caig khankix hoik singai khaing: aux.
Kawk ngu cie pwi caox pwi caig khankix yeet lawlawx, krax laux krax leeing: tag hoek kah piang kix lawlawx, mai Siyiex tag gwieh tix tawx krax lauxrhawm: lauxrhi: tau mai krax songrhawm: songrhi: Nawh Cao: kah kix ang mawh lie?
Kix awm: nyhee: nyhawk sivoe bhaung:, mai awm: kam: pa tah bhaung: ting luan dee singai lawlawx heue.
Kix ah nin:,Siyiex rhawm: tix deuh phimap phighram: kix, son kawnpraix kix, kieh Nawh Cao: pawk bix kah nawh, son tag sang tawng nawh an: khankix heue.
Kieh ngai: nawh yaox kah krax pa laux pa leeing: nawh, mai kieh nawh nyaux kah pa songrhawm: songrhi: cao: pa ting siawpsibrawm heue.
Grawhgrawng: nawh khix num nawh hoik sidauh nawh kawn: sang chix priex rien kah kawn: nyiiex kawn: ma: tix yuh kah mawx?
Mawh pwi mawx pa koe: krax tawng krax yung tix pon gau sawn: kah Siyiex pa mawh cao: prawng kah pwi ankix pa ot kah dee pa lhaong: lie?
Pwi tix kaux yum: yam kawn: naog riang rao tix, kah daux pa grum naog mai pa yiien: pa yawg tix,
gun: teeh nawh naog kah rawm:teeih, mai gua si: ang nawh kawx kawn: mhawm: caux heue.
Pwi tang: kaux yum: kah daux krax pa kied kharhawm: kharhi: ju tix, mai ang nyang sax yaox tix cim kah priex nyawm rawm: lhong: heue.
Kiex khawm: ra: it kah daux phawng: tiex, awm: paox tix, mai ngaw hoik kheem: kah kiex heue.
"Jhak heue, aux tawng kah krax keud krax sawn: maix khankix, mai khawm: grawng: pa sang phit lud maix kah aux heue.
Mawh kheu maix ah nin:,mawh koe: nyiiex haw: Simiang dee mawx lie? mai koe: nyiiex gox dee ot pwi caox pwi caig khankix dee mawx lie?:
Mawh ang maix nyang sax chawk kah pwi pa hu: krax lie? Mai ang maix tawng kah mhai: sakse pa yuh kix lie?
Grawhgrawng: nawh yam hoek kah daux singaix pa laux pa leeing:, pwi caox pwi caig khankix tag pon tix luat luan, mai kix tag pon krax teem: kieh luan khaing: krax songrhawm: songrhi: heue.
Mawh pwi mawx pa sang pon ciak ci kaing yuh nawh kah plak sivoe ngai: nawh lie? Mai mawh pwi mawx pa sang deeh viied phimap nawh son ceu pa hoik yuh nawh lie?
Nawh tag sang mawh pa viex hu: kah daux simeeig, mai cao: pau simeeig an: cox khre: kah simeeig nawh heue.
Lon: tiex pa koe: daux lung: an: mawh pa tie: kah son nawh, pwi kukaux pa hoek khaix nawh mai pa hu: sivoe nawh khankix ang lai uik simin kah heue.
Maix ang pon tawx krax nyawmrhawm: nyawmrhi: aux kah lox giex going tix khankix, mai kah lox pawk pa ang koe: bwanson: yuh kah mawh lie?"
Eliphat Deuh Phimap Kah Yawbax
Khaix an: Eliphat ceu pwi Teman pawk lox mai ah nin:,
Awm: pon kawn: pwi bwanson: kah pingnya pa yuh cao: tix, khex sang pon yuh pwi bwanson: kah Siyiex lie?"
Mawh tag pon kieh maix cao: pa ting siawpsibrawm nyawmrhawm: kheu pa rauh pa see tix lie? Phan: ang mawh nan: kheu pa rauh pa see pa mhawm: maix tag kieh krax haok hwan: bwanson: koe: kah Siyiex yuh kah mawx lie?
Mawh kheu jao lhat graung maix kah Nawh Cao:, Nawh Cao: tom: sidiex gau kah maix, mai yuh see: kah maix lie?
Ceu pa caox pa caig yuh maix mawh pa kied ting kied lhaong:, mai phimap maix mawh pa ang lai koe: dee sidauh sidu ang mawh lie?
Grawhgrawng: nawh maix hoik rien tix teei kraungkhrai: pa tang puxaik maix kah daux pa ang rah ang see, mai peeik tix teei kraung ceep kix pwi hot pwi sibhawm: heue.
Maix ang sax tawx pwi taug pwi mao nyaux rawm:, mai ang sax tawx pwi cairhawm: cairhi: sawm: heue.
Viang mawh kawx nan: pwi pa koe: siawpsibrawm hoik teei giex tix cie haktiex, mai pwi koe: min: plakngai: hoik pon tix ot kah dee an: heue.
Mai hoik grheu: miexmai: hu: dee singai mai taix yi tix, mai hoik raig taix kawn: doe: graig heue.
Mawh kheu nan:, kie pa taong: hoik koe: hawt vungviang maix, mai krax lhat krax graung pa hoek dom: mawx dom: an: tag tawx krax kharhawm: kah maix,
phan: ang mawh nan: pa faik tag sang bleeh son ang maix lai chix yaox mai rawm: pa kied ting tag kheem: kah piang maix heue.
"Mawh ang Siyiex ot daux raoma: kah dee lhaong: lie? Mai jhak kah simeeig pa kied lhaong: khankix mai kix kied lhaong: tete!
Grawhgrawng: nawh maix ah nin:,Siyiex tawng ceu patix lie? Mawh sang pon prawng Nawh Cao: see: kah daux pa kied faik an: lie?
Paiawm: pa kied pu ceep kheem: kah Nawh Cao: son ang Nawh Cao: chix yaox, mai Nawh Cao: lailing kah piang mee: dee choek raoma: heue.
Mawh kawn: sang lawng maix kah krax prim: tix, pa mawh diang krax pa hoik sax hu: pwi caox khankix,
Pwi pa hoik tat tix tik num: riah sivoe hoek bawg yam cie kix, pa hoik kheem: rawm: hu: dee singai khankix ang mawh lie?
Kix ah nin: kah Siyiex,lih hu: khaing: yix! mawh sang pon yuh cao: pa ting siawpsibrawm patix kah piang yix lie?:
Viang mawh nan: Nawh Cao: hoik kieh nyiiex kix naog tau mai ceu pa mhawm:, viang mawh kawx nan: kieh krax keud krax sawn: pwi caox khankix, singai khaing: aux heue.
"Pwi rah pwi see khankix gauxrhawm: gauxrhi: kah yaox tix an:, mai pwi pa ang koe: phimap khankix tag nyiah maung pwi caox,
Pwi koeng ex khankix hoik lauxleeing: tete, mai ngu hoik gleeing kah can pa kawn deuk kix heue
"Yamin: kieh maix yuh paox pie tau mai Nawh Cao:, mai ot kah daux krax pa nhim:; phan: yuh nan: ceu pa mhawm: tag hoek kah maix heue.
Yuh bwanson: rieb tix teei lox sidiex gau pa kaoh khaing: daux jheeh Nawh Cao:, mai priex gumlox Nawh Cao: kah daux rhawm: tix heue.
Phan: maix deeh hoek kah cao: pa ting siawpsibrawm, mai tik krax phit krax lud tix khankix luan dee singai khaing: nyiiex gox maix, maix tag sum: tix mawh pa kaux pa cong: heue.
Khaix an: maix tag khrawm: khri: awm: phawng: tiex daux nyiiex tix, mai khrawm: khri: Awphirax kah daux rawm: klawng: awm: lon: simaox heue.
Mawh heue, cao: pa ting siawpsibrawm tag mawh khri: kah maix, mai mawh mau pa kied koe: ngawh koe: jum kah maix;
khaix an: maix tag koe: krax gauxrhawm: gauxrhi: kah daux cao: pa ting siawpsibrawm, mai maix tag maong tix jhak kah Siyiex heue.
Yam rawg maix bwan: kah Nawh Cao:, mai Nawh Cao: tag nghiiet kah maix, mai maix tag pon bwanson: kah sijax mukheu yuh tix heue.
Kaing jhaw: pa yuh maix khawm: uik tag haok hwan: ting lhaong:, mai pa riieng tag jhan: kah piang krax hu: maix heue.
Siyiex yeen tix tik kah pwi ting rhawm: ting rhi:, mai yaog kah pwi pa awn: rhawm: awn: rhi: heue.
Pie kah pwi pa ang koe: dee luan khaing: phimap phighram: kawx, Nawh Cao: tag taoh lawd kah nawh, mai nawh tag hoek krax taoh kah khawn: taix pa singax singeh tix khankix heue."
Yawbax Krai Grawng: Pa rauh See Prawng Ca: Siyiex
Khaix an: Yawbax pawk lox mai ah nin:,
"Kah daux in: singaix, aux yaox tix kham: geu: kah ceu pa kied song: kah daux pa ngia tix, mai taix aux hoik simeue kheu jao grawng: pa ngia aux heue.
Kieh aux tawng kah dee sang sipub tix kah Nawh Cao:, sonsang pon hoek aux kah dangngeung Nawh Cao: liak!.
Aux tag sang tang grawng: see: kah plak sivoe Nawh Cao:, mai kieh lox pa thungthiang: naog kah jheeh tix heue.
Aux tag tawng kah lox pawk Nawh Cao: kah aux, mai doh rhawm: doh rhi: kah ceu pa krai Nawh Cao: kah tix heue.
Mawh sang thungthiang: Nawh Cao: kah aux tau mai siawpsibrawm pa kied ting Nawh Cao: lie? Ang mawh nan:! Nawh Cao: tag nghiiet kah aux heue.
Pwi rah pwi see pon kah kum: tau mai Nawh Cao:, mai aux tag pon luat luan khaing: krax prawng krax ciyang leeing ju leeing phan: heue.
Jhak heue, aux hu: sivoe, viang mawh nan: Nawh Cao: ang ot tan:, mai yam deeh aux plak khaix aux ang tien yaox kah Nawh Cao:,
yam yuh Nawh Cao: kaing kah plak gwiex, aux ang tie maong tix jhak kah Nawh Cao:; yam deeh veeh Nawh Cao: tix kah plak khawn: dawm: aux ang tien yaox kah Nawh Cao: heue.
Viang mawh nan: Nawh Cao: tawng kah krax hu: aux, khaix hoik ciied Nawh Cao: kah aux, aux tag lih mhawm: awm: khri: heue.
Aux hawt grawng: lawng khaix caong Nawh Cao: tom: sidauh, mai aux ang lai via tix khaing: dau krax hu: Nawh Cao: heue.
Aux ang tik kah gumlox pingnyap pa kaoh khiang: jheeh Nawh Cao:, aux hoik priex gumlox pa kaoh khaing: jheeh Nawh Cao:, nie lheu: ting ngawh khaing: pa ih pa un: tix heue.
"Viang mawh nan: mawh pwi mawx pa sang pon tieh loh kah rhawmrhi: Nawh Cao: pa ang chix tieh chix loh tix tix bawg kawx lie? Mai Nawh Cao: tag yuh awm: pa koe: alo Nawh Cao: tix sang yuh heue.
Grawhgrawng: nawh kah son aux Nawh Cao: yuh tix tawx pa hoik tat tix deuh tom: grum naog, mai ceu an: khankix tom: nie koe: tau mai Nawh Cao: heue.
Mawh kheu nan: aux hoik koe: pa yaoh yee: kah plak sivoe ngai: Nawh Cao:, yam keud aux tix yaox grawng: in: aux koe: krax lhat krax graung kah Nawh Cao: heue.
Grawhgrawng: nawh Siyiex hoik yuh rhawmrhi: aux laux, mai cao: pa ting siawpsibrawm hoik kieh aux yaoh yee:;
mawh kheu ang Nawh Cao: tik aux laig kah daux pa faik, mai ang lai mox pa kied faik an: khaing: pakngai: aux heue.
Grawng: Ngia Yawbax Kah Pa Kied Kin: Piang Haktiex
"Bawg yam khankix ang mawh pa ang mox tix khaing: cao: pa ting siawpsibrawm, yuh kah mawx pwi khankix pa tawng kah Nawh Cao:, ang yaox kah singaix prawng Nawh Cao: see: lie?
"Pwi tiblah chix greed kah mhai: rong: haktiex khankix; kix tud rhim: kah cub yung: cub pex mai viex tix cie son cao: tix heue.
Kix grheu: kah la cub kawn: doe: khankix hu: dee singai, mai kix teei tix cie moi miexmai: awm: kraung tang tix deuh heue.
Kix nyhot pwi pa cud pa cha: khankix lih khaing: daux krax, mai pwi hot sibhawm: piang haktiex hoik tang: mox tix heue.
Kix lih hu: awm: tosat la tiag sonsang yuh kaing mai sau: riang rao tix sawg pa ih pa un:, daux tiag daux tu son kawnpraix tix heue.
Kix khrawm: nyhee: nghox kah daux kaung:, mai sut tix viex plix siiet khaing: sipeem pwi caox pwi caig heue.
Kix ang koe: kraung ceep mai ceu pa lhop, kix it kah kaong: leeing: sawm: bawg yam kuat praix heue.
Kix hoik caux kah lhiex khaing: piang gawng mai blawm: tix ot hawt rang:, kheu ang koe: dee peung heue.
Kawn: nyawm pa ang koe: keeing: khankix, pwi tiblah hoik pluat tix teei jheeh nawh khaing: teeh miex nawh mai pwi hot sibhawm: hoik yaox tix tang kraung tix heue.
Pwi hot pwi shia: lih hu: khawm: kah kaong: tix, mai pa ang tix koe: kraung ceep, mai kix klawm: lhiem: nghox pwi khawm: cairhawm: tix heue.
Mai kix krid bee mai biiet rawm: plix siiet cie pwi daux dang: biiet plix siiet, mai pa sang nyaux nie tix rawm: heue.
Pwi awn: riang pa dex yum: hoik ngia kah daux veng, mai ju pwi saux pwi mat khankix riag yo rawg mhaing: kah Siyiex, viang mawh nan: Nawh Cao: ang nghiiet kah lox kix heue.
"Koe: pwi tiblah tieh feen kah pa riieng, kix ang sax tawng kah pa riieng, mai ang hu: kah daux krax pa riieng an: heue.
Cao: pa pah pwi yaog tix kaoh caocao, nawh pah pwi hot pwi shia: mai pwi cud pwi cha: khankix, mai daux ponsawm: nawh mawh pwi briex heue.
Ngai: pwi phit vao mai moeng kawn: pwi khankix keud pot jun pot sonsang faik praix mai ah nin:,ang ngai: pwi mawx chix yaox kah aux; mai nawh hoik mox grang pakngai: tix heue.
Yam faik praix kix yieh tix laig kah daux nyiiex khankix, mai pon ngaix kix mox tokaux tix khaing: pa riieng heue.
Grawhgrawng: nawh plak ponngawb kix deuh awm: veei pa yum: son tix, mai kix tawng veei pa yum: mawh pa lhat pa graung kah son tix heue.
"Kix tag mawh pa sibloe: kah piang rawm:, nyum: cie kix mawh pa jhax pa lawg kah piang haktiex, mai nawh tag ang lai yaox tix hoek kah daux sipeem plix siiet kix heue.
Awm: kroh hit rawm: ciex mai grai: hu: kheu hax koek, mawh kheu nan: can pwi pa koe: krax phit krax lud tag grai: grup kah daux meung yum: heue.
Vaig pa hoik keh kah nawh tag piawm: kah nawh, graik tag ih nex nawh awm: priex nyawm, pwi tix kaux kawx tag ang lai doh keud kah nawh tix bawk kawx, mai pwi caox pwi caig khankix, tag graig awm: gaw khaox heue.
Mawh kheu nawh yuh krax kharhawm: kharhi: kah bun: neh ang chix koe: kawn:, mai ang yuh ceu pa mhawm: kah miexmai: heue.
"Viang mawh nan: Siyiex yuh laux kah pwi pa kied ting riang khankix kah siawpsibrawm Nawh Cao:, viang nawh yaog tix kaoh kawx ang koe: pwi pa rien kah ju nawh tix kaux kawx heue.
Nawh Cao: priex rien kah kix mhawmmhawm:, mai kix deuh rhawm: tix kah piang an:; mai ngai: Nawh Cao: ca: jhak kah piang krax hu: kix heue.
Kix hoik yaog kah tokaux cao: tix tivud ticu, khaix an: tag grai: hu:, kix hoik hoek kah daux pa yeen tix kieh kix tiiem, mai hoik teei tix tik kix lih khaing: daux krax awm: pwi tang: kaux khankix, mai kix tag kroh hu: awm: sigleem: nghox khankix heue.
"Phan: ang mawh nan:, mawh pwi mawx pa sang pon plih pon jhi: kah mawh aux pwi pa pie pa lhen: tix kaux, mai kieh lox sikah aux ang mawh tidtix lie?"
Grawng: Ah Biladat Sang Chix Rah See Kawn: Pwi Lie?
Khaix an: Biladat ceu pwi Shuhix pawk lox mai ah nin:,
"Siawpsibrawm mai min: krax lhat krax graung mawh cie Nawh Cao:, Nawh Cao: kieh pa nhim: Tix koe: kah dee pa kied lhaong: heue.
Mawh sang pon simin pwi tix kauxkaux kah cub kru naing Nawh Cao: lie? Pa riieng Nawh Cao: jhan: riieng kah piang pwi mawx lie?
Khaix an: pwi sang pon rah see kah plak sivoe Siyiex yuh kah mawx lie? Phan: ang mawh nan: pwi pa keh khaing: bun: tag sang pon singax yuh kah mawx?
Khix ang koe: pa riieng, mai simuing: khankix ang lai mawh pa singax plak sivoe ngai: Nawh Cao:,
Mawh kheu nan: kawn: pwi pa iak awm: viag tix mu: sang koe: dee bleeh ceu tix, mai kawn: pwi pa awm: graik tix mu: sang koe: bwanson: kah plak sivoe ngai: Siyiex yuh kah mawx?: "
Grawng: Krai Yawbax Iak Riang Kawn: Pwi
Khaix an: Yawbax pawk lox mai ah nin:,
"Mawh hoik teem: maix kah pwi pa iak riang yuh kah mawx? mai hoik taoh maix kah taix pa awn: riang yuh kah mawx?
Mawh hoik tawx maix krax keud krax sawn: kah pwi pa ang koe: pingnya cuyi: yuh kah mawx? Mai hoik paoh maix tix tawx rhawm: keud dong: sawn: kah pwi khankix yuh kah mawx?
Mawh hoik krai maix gumlox in: kah pwi mawx? Mai mawh khwan: pwi mawx pa kieh maix krai lie?
"Pa yum: pa ot greem: tiex daux simeeig mai pa ot greem: rawm: khankix hoik si kua heue.
Meung yum: hoik plak tix sidawng: sivoe ngai: Nawh Cao:, mai krax laux krax leeing: ang lai pon kheem: heue.
Nawh Cao: hoik tawm hoik di raoma: kah piang dee yi, mai Nawh Cao: teuk teue: tix deuh haktiex kah piang pa ang lai koe: ceu pa joh pa jhan: tix ceu kawx heue.
Nawh Cao: hoik kie tix deuh rawm: kah daux paiawm: pa kied pu ceep, mai paiawm: khankix ang lai dud lai ghah heue.
Nawh Cao: hoik kheem: tix deuh pakngai: dangngeung Nawh Cao: mai rurie paiawm: Nawh Cao: kah piang an: heue.
Nawh Cao: hoik tat tix deuh mee: rhoi: praix piang rawm: khankix, kah sinax mee: pa riieng mai pa faik heue.
Rong: raoma: khankix hoik sikua, mai daox deng: kah krax pa sidiex gau Nawh Cao: heue.
Nawh Cao: sidiex rawm: sigrit sigra: kah siawpsibrawm Tix mai kieh yiien:, khaix an: Nawh Cao: yieh bhaung: ting laux kah pingnya Tix heue.
"Khwan: Nawh Cao: phan: kah can pa koe: daux raoma: khankix mhawm: grang, mai taix Nawh Cao: hoik phan: kah siyawng pa kied phai: heue.
In: khankix kawn: mawh ngie pa iak pa liied kah Nawh Cao:, mai kawn: mawh ngie awm: mhong: ex lox supsiep khaing: Nawh Cao:! mawh kheu nan: mawh pwi mawx pa sang pon tawng lox sinum praix siawpsibrawm Nawh Cao: lie?"
Grawng: Kaux Rhawm: Yawbax Kah Grum Naog Cao: Tix
Lheu: khaing: an: Yawbax deeh toe: lox kab tix mai ah nin:,
"Awm: im: ju Siyiex Cao: pa ting siawpsibrawm pa teei grawng: see: aux hu: dee singai, mai pa hoik yuh khwan: ju aux hoek kah daux pa kham: geu:,
glang: yam kawn: im: ju aux, mai yam kawn: toek aux bhawm: pa tawx Siyiex kah meeh tix,
jheeh aux tag ang lai sikah lox caox lox caig, mai dak aux tag ang lai ah lox pie lox lhen: heue.
Sonsang ah aux mawh pex pa khaw: pa caw, kieh an: mawh pa singai khaing: aux, tom: hoek bawg yam sang yum: aux kawx, aux tag ang thiang: kah ah aux tix mawh pa khaw: pa caw heue.
Aux giex tix priex krax pa rauh pa see tix kaux cong:, mai aux ang ploi: kah, rhawm: aux tag ang lai koe: dee deuh phimap kah cao: tix, glang: yam im: ju aux heue.
"Kieh pwi koeng kah aux mawh awm: pwi caox pwi caig, mai kieh pwi pa kaoh deeh tieh feen kah aux, mawh awm: pwi pa ang rah ang see heue.
Grawhgrawng: nawh phan: Siyiex teei kah ju pwi tud pwi rhim:, krax keud pot jun pot kix kah sinngao pa pon tix sang koe: bwanson: yuh kah mawx?
Mawh sang nghiiet Siyiex kah lox riag yo nawh, yam hoek krax pa kharhawm: kharhi: kah piang nawh lie?
Mawh sang koe: krax nyawmrhawm: nyawmrhi: nawh kah daux cao: pa ting siawpsibrawm an: lie? Mawh tag sang rawg nawh bwan: kah Siyiex jheengjheeng: lie?
"Aux tag sang gau pex kah grawhgrawng: taix Siyiex mai aux ang lai mox kah can ceu pa koe: tau mai cao: pa ting siawpsibrawm an: heue.
Tokaux pex khawm: uik hoik yaox kah ceu pa mawh an: tete, pex lai kawn: kieh rhawm: keud pa giex pa going naog kah daux rhawm: tix yuh kah mawx lie?
In: mawh nyum: pa pon pwi caox khaing: Siyiex, mai mawh sinngao cie pwi pa yuh krax kharhawm: kharhi: pa hoik pon rieb khaing: taix cao: pa ting siawpsibrawm,
viang kawnpraix nawh koe: tom: nie kawx tag yum: kah lawm vaig, mai kawnpraix nawh khankix, sawg miex ding kawx tag ang kub ih heue.
Can pwi kix pa kawn deuk khankix kawx tag mawh pa sang sipaung: tix kah daux meung yum:, mai cub miexmai: kix kawx ang yiiem ang doe: kix,
viang nawh pum: tix priex mau awm: phawng: tiex, mai khrawm: tix deuh kraung ceep awm: glaox kawx,
viang nawh khrawm: tix deuh an: khankix kawx, pwi rah pwi see tag sang ceep kah, mai pwi pa ang koe: dee phit dee lud tag sang gwieh tix cai: kah mau an: heue.
Nawh sum: nyiiex tix awm: kawn: pungpiang shiah, mai awm: nyiiex gox pa yuh cao: pa pau yam heue.
Yam laig it pwi mag mi nawh ang lai pon khrawm: tix deuh kraungkhrai:, mai yam blah nawh ngai: tix sinngao nawh hoik grai: uik heue.
Krax lhat krax graung tag hoek piang nawh awm: kheem: rawm:, mai bhaung: ting tag sang tah nawh hu: dee singai kah daux ponsawm: heue.
Bhaung: plak lih singaix tag tah nawh luan hu: dee singai, mai bhaung: an: tag pih tix tik nawh lih khaing: dee ot nawh heue.
An: mawh pa kharhawm: pa tawx Siyiex lih kah piang nawh, mai ang lai koe: krax caoxrhawm: kah nawh, nawh tag simie tix luat luan khaing: tawm: taix siawpsibrawm Nawh Cao: heue.
Pwi khankix tag dieh taix tix kah nawh, mai tag nyiah maung nawh mai grheu: nawh lih khaing: dee ot nawh heue.
Grawng: Sidiex Yawbax Daux Pa Koe: Pingnya
Mau koe: hawt daux rhoi: mau tete, mai kah dauh dee koe: khri: pwi cied tix teei khri: tan: heue.
Rhiem: mawh pa kaong: tix teei khaing: daux tiex, mai tawng raoh mawh pa hoik raug tix lih khaing: simaox heue.
Kawn: pwi laig kah dauh dee raux pa kied faik, kix sawg tix liiem kah daux pa kied raux haktiex, mai kix kaong: simaox kah daux pa kied faik an: heue.
Kix hu: dee singai kah dee ang pwi sax ot mai ang sax dig kah caong tix mai kaong: kah mau heue. Kix teuk teue: tix kah maox mai laig yuh kaing kah daux an: heue.
Viang priex preem lih khaing: haktiex kawx, viang mawh nan: kah greem: haktiex tag hax awm: ngu, awm: an: kah piang haktiex kawx tag hax kah ngu heue.
Lon simaox khankix mawh num: riah dee lih simaox siang: raoh, mai phawng: tiex an: koe: khri: kah heue.
Krax an: sim: tix mu: kawx ang sax tawng kah, mai ngai: klang: kawx ang sax yaox kah heue.
Sivai sangsi: mai tosat pa hai khankix kawx ang nyang sax dig sax pha: kah krax an: heue.
Nawh deuh taix tix kah piang simaox pa kiien:, mai nawh pluk pliak kah gawng lua tom: hoek num: riah gawng khankix heue.
Nawh toh rawng rawm: phlat khaing: rang: khankix, mai ngai: nawh chix yaox kah ceu pa kied laoh lie kuceu heue.
Nawh klat kah rawm: klawng: pa lih hu: an:, mai nawh kaong: kah ceu pa mox an: khankix hoek kah daux pa riieng heue.
"Viang mawh nan: koe: pingnya cuyi: dee mawx lie? Mai koe: krax tawng krax yung khankix dee mawx lie?
Kawn: pwi ang pon tawng kah ngawh jum pingnya cuyi:, mai ang mawh ceu pa chix yaox kah dau pwi pa im: ju kah piang haktiex heue.
Kah daux dee pa kied raux ah nin:,an: ang koe: kah daux aux, mai rawm: sigrit sigra: ah nin:,an: ang koe: tau mai aux,
Pingnya cuyi: ang mawh pa pon liag kah khri:, mai mawh pa ang pon ciang tix tawx jum pingnya cuyi: kah mau heue.
An: ang mawh pa pon tat jum kah khri: Awphirax, mai kah simaox siang: raoh khankix heue.
Khri: ang ah simaox siang: ang ah, ang doh sidu jum awm: pingnya cuyi: tix ceu kawx, mai ang pon loh kah kraungkhrai: simaox siang: mai khri: nawnaw khankix heue.
Simaox siang: mai siang: pa pruh riang ang pon tiag kah pingnya cuyi:, grawhgrawng: nawh ngawh jum pingnya cuyi: mawh pa kied lhaong: khaing: simaox siang: raoh heue.
Simaox siang: pa koe: grang kuceu khaing: haktiex Etiopia kawx ang krup kah an:, mai ang pon tat ngawh jum an: kah khri: nawnaw heue.
"Kheu nan: pingnya cuyi: kaoh khaing: dee mawx lie? Mai koe: dee ot krax tawng krax yung dee mawx lie?
An: khankix mawh pa mox tix khaing: ngai: can pa im: ju khawm: uik, mai sim: khaing: raoma: kawx ang chix yaox kah heue.
Krax laux krax leeing: mai krax yum: ah nin:,ex hoik mhong: grawng: pingnya cuyi: an: khankix kah yhaok tix heue
Siyiex tawng daux krax pingnya cuyi:, mai Nawh Cao: tawng kah dee koe: pingnya cuyi: heue.
Grawhgrawng: nawh, Nawh Cao: hoik jhak tom: sidauh sidu haktiex, mai yaox kah can ceu pa koe: greem: raoma: khawm: uik,
Nawh Cao: tiag diag ciien bhaung:, mai tiag kah diag pa koe: rawm: awm: pa khaw: mai diag tix heue.
Nawh Cao: yuh been koe: kah son lhiex, mai phan: kah krax pa tuh sah mai pluk plak praix,
khaix an: Nawh Cao: hoik yaox kah pingnya cuyi: mai hoik plak sidawng:, Nawh Cao: khre: rien tix deuh, mai cheukcheu: tix yaox kah heue.
Mai Nawh Cao: ah nin: kah kawn: pwijhak heue, krax lhat krax graung kah Siyiex mawh pingnya, mai pa via khaing: pa caox pa caig mawh krax tawng krax yung heue.
Grawng: Ghoik Yawbax Tix Krai Lox Tiebtie Kah Cao: Tix
Yawbax sitoe: lox kab tix mai ah nin:,
"Kieh aux deeh awm: khix num pa hoik luan khankix, mai awm: kah singaix liiem lia kia: ngien Siyiex kah piang aux,
yam jhan: riieng kawk ngu Nawh Cao: kah piang kaing: aux, aux een: rhawm: kah pa riieng Nawh Cao: mai pon lawng tix hu: kah daux pa faik;
kieh aux deeh awm: singaix yam kawn: awn: ju tix, yam koe: krax pa yuh Siyiex paox pie kah piang nyiiex gox aux,
yam kawn: koe: cao: pa ting siawpsibrawm tau mai aux mai yam koe: kawnpraix aux khankix hawt vungviang aux;
ku diang caong hu: aux khankix hoik naog kah rawm:teeih, mai simaox rang: khankix hoik lih tix mawh bee kah son aux heue.
"Yam hu: aux kah siviex veng pa koe: daux veng, yam khre: aux tix sang ngawm kah daux krax tan:,
cub kawn: nyawm awn: ju khankix hoik mox tix kah yaox aux, mai pwi riex ju khankix yaog tix kaoh cung,
kawn: Simiang khankix hoik naox kah lox sikah tix, mai kix thox jheeh tix kah taix tix,
pwi ting pwi lhaong: khankix hoik yawg tix, mai dak kix hoik pid dao kix heue.
Yam mhong: kix kah lox aux, khaix an: kix nawb bwan: kah aux mai yam hoik yaox ngai: kix kah aux, khaix an: kix yaogyaw kah aux,
grawhgrawng: nawh aux hoik sax taoh pwi hot pwi shia:, pwi ang koe: miex keeing:, mai pwi pa ang koe: cao: teem: coi khankix yam riag yo kix heue.
Bwanson: pwi pa dex sang hoek krax laux krax leeing:, hoik hoek kah piang aux, mai aux hoik kieh miexmai: gauxrhawm: tix pon rhax lai heue.
Aux ceep kah pa rauh pa see, mai awm: kraung ceep kah piang tix, krax pa rauh pa see aux hoik awm: sibex lang: jung, mai lawk kaing: heue.
Aux mawh ngai: kah pwi pa dug ngai:, mai aux mawh caong kah son pwi laux caong khankix heue.
Aux mawh keeing: kah pwi pa hot pa sibhawm:, mai aux chawkcheng: tix yaox grawhgrawng: kaing pwi pa ang aux sax meed sax tawng heue.
Aux hoik raig tix tik kah nga pwi caox khankix, mai hoik teei ceu pa tud pa rhim: nawh tix ih khaing: rhang: nawh heue.
Khaix an: aux ah nin:,aux tag sang yum: kah daux mheem: tix, mai singaix sawm: aux khankix nie lheu: haoh hun: awm: mhaik heue.
Riah aux hoik prungprang: tix laig tom: hoek daux rawm: khankix, mai rawm: ciex khankix hoik jauh kah piang kak aux leeing: sawm: heue.
Min: plakngai: aux mawh pa kawn pruh tau mai aux, mai ak aux mawh pa tawx riang rao kah taix aux heue
Mai pwi khankix hoik pau tix nghiiet kah lox sikah aux, mai hoik yiien: yawg tix kah pa tawx aux krax keud krax sawn: heue.
Khaix hoik krai aux lox kah kix, kix ang nye: nyux mai lox sikah aux hoik jauh kah piang kix awm: rawm: ciex heue.
Kix hoik pau kah aux, awm: pau tix lhiex, mai kix ang jheeh tix tom: vieh, awm: pau kix rawm: lhiex lha: praix heue.
Aux nyiah ghuing: kah kix yam lauxrhawm: kix, mai grang pakpeung: ngai: nyiah ghuing: aux an: mawh riang rao kah kix heue.
Aux laug tix tawx daux krax son kix, mai ngawm tix mawh cao: kaing:; mawh kheu nan: aux hoik ot awm: khunhawkham tix kaux sinax cub kru naing, mai awm: pwi pa kieh pwi lauxrhawm: khankix deeh nyawmrhawm: heue.
"Viang mawh nan: yamin: pwi awn: ju khaing: aux khankix nunai: kah aux, mai keeing: kix kawx hoik seeing: brai: kah aux mai ang lai kieh aux koe: jum awm: kah sox pau yung: aux heue.
Taix pa koe: riang rao kix, kix pa hoik grai: grup, tag sang mawh pa koe: bwanson: kah son aux yuh kah mawx?
Kix hoik hot sibhawm: mai cairhawm:, mai kix to: tix ot kah daux tiag daux tu dee yiien: pwi mai ih kah riah khaox riah ox,
kix pon taux lhax kah daux yeem daux yaw, mai kaong: riah lhax lai: khankix mawh priex ih kah son tix heue.
Mai grheu: kix lih khaing: daux sinax pwi khankix, mai pwi yo hawt khaix kix, awm: pheet kah cao: briex heue.
Kix ot kah daux rang: daux tiex kah hawt liep gawng pa kied rieh heue.
Kix ngia greem: yeem greem: yaw, mai phux paox tix ot greem: pang: kat heue.
Kix hoik mawh kawnpraix pwi hai pwi meug, mawh heue, kix mawh kawnpraix pa brai: maung khankix, mai hoik yaox tix kham: pa grheu: pwi tix lih khaing: haktiex heue.
Mai yamin: aux lih tix mawh lai rhax pa sibriem kix kah aux heue.
Kix seeing: kah aux mai kix via singai khaing: aux, kix ang lai ring tix baig kah ngai: aux heue.
Grawhgrawng: nawh, Nawh Cao: hoik deen kah lah ak aux mai hoik yuh krax kharhawm: aux, mai kix hoik yah maox keu: plak sivoe aux heue.
Cub pwi pa ang leut khankix yaog tix kaoh plak taix khawn: dawm: aux, mai nyhot kah caong aux, mai kix yaog tix kaoh tieh feen kah aux sonsang lauxleeing: aux heue.
Kix yieh krax hu: aux laux, kix baox nie sau: riang sonsang goh aux, mai ang koe: pwi tawx satix kah kix heue.
Kix hoek awm: hoek tix khaing: daux krax pa vieh, mai kling: tix hoek kah aux awm: bhaung: ting khaing: daux pa lauxleeing: heue.
Krax lhat krax graung hoik hoek kah piang aux, kix hawt min: siawwp sibrawm aux awm: bhaung:, mai krax haok hwan: aux hoik grai: hu: awm: paiawm: heue.
Mai yamin: rhawmrhi: aux hoik bih kheu hoik krup krax pa kham: pa geu: kah diang hu: aux heue.
Si-ang: aux khankix hoik saux hoik greeing daux ponsawm:, mai siniag aux khankix ang lai chix moi: heue.
Jhawm: saux aux hoik kied kin:, awm: kraung ceep kah piang tokaux aux, mai rhawt kah aux awm: ngawg sibex aux heue.
Nawh Cao: nyhot tix tik aux cod kah daux ung:, mai aux deeh lih awm: phawng: tiex mai nyaox heue.
"Aux riag yo kah Maix Cao:, viang mawh nan: Maix Cao: ang lai pawk kah aux; aux kaoh cung, mai Maix Cao: ang lai gi kah aux heue.
Maix Cao: hoik yuh krax pa kied kin: kah aux, tau mai riang taix pa ting riang Maix Cao: hoik ciyang kah aux heue.
Maix Cao: yaog aux haok daux bhaung:, mai kieh aux brug kah bhaung: an:, Maix Cao: hoik kieh krax pa pex aux lauxleeing: heue.
Grawhgrawng: nawh aux tawng grawng: sang viex Maix Cao: aux hoek kah daux pa yum:, mai kah nyiiex khre: riien Maix Cao: tix deuh son pwi pa im: ju heue.
"Yam nih Nawh Cao: taix Tix kah piang pum: pa laux pa leeing: an: khankix, viang kix riag yo khyox khaw: kawx mawh giex going heue.
Mawh ang aux sax yiiem son pwi tug pwi kha: tix lie? Mawh ang khwan: ju aux koe: krax lauxrhawm: lauxrhi: son pwi hot pwi shia: lie?
Viang mawh nan: yam jhak aux kah pa mhawm:, pa caox pa caig hoek bleeh kah aux, mai yam krox jun aux kah pa riieng pa faik bleeh kah aux heue.
Kah daux rhawm: aux koe: pa hax pa siaoh, mai ang koe: pa nhim: pa nghie:, singaix pa kharhawm: hoek sipub kah aux heue.
Aux lailing kah daux pa faik, kah dee ang pa riieng lai koe:, aux cung kah daux sinax pwi hun:, mai riag yo son krax teem: krax coi heue.
Aux mawh puxaik sox tiag, mai mawh paoxgrawm kah sim: kala-uk khankix heue.
Hak aux lih tix lung mai ghruah hu: khaing: aux; si: ang aux khankix hoik hax awm: ngu heue.
Lox ting: feuk cie aux hoik deeh tieh mawh lox ngia, mai lox shiao: paung: aux deeh tieh tix awm: lox yiiem heue.
"Aux hoik yuh sijax mukheu mai ngai: tix, son ang aux sang jhak kah bunkrih awn: ju heue.
Grawhgrawng: nawh krax pa gwieh Siyiex tix tawx khaing: plak piang mawh ceu patix, mai sinngao pa sang tawx Siyiex khaing: kah dee pa lhaong: mawh ceu patix lie?
Ang an: mawh krax laux krax leeing: son pwi caox pwi caig, mai krax som krax nai: kah pwi pa yuh ceu pa phit pa lud khankix lie?
Mawh ang Nawh Cao: yaox krax lawng aux, mai ang simin kah diang caong hu: aux khankix lie?
"Phan: aux mawh pa lawng daux krax pa pie pa lhen:, phan: ang mawh nan: phan: caong aux hoik phai: hu: kah daux pa kheem: pa vhee: pwi,
kieh ciang aux kah jiang pa khaw: ngai: jiang, mai kieh Siyiex tawng kah pa rauh pa see aux heue.
Phan: diang caong hu: aux lud daux krax hu: tix, phan: ang mawh nan:, phan: rhawm: aux hoik hawt alo ngai: aux, phan: ang mawh nan: mai phan: ceu pa seeing: hoik kawg kah taix aux tix ceu ceu,
Khaix an: kieh pwi tang: kaux teei tix ih simie pa rhuat aux, kieh pwi tang: kaux reeig tix tik kah simie pa van: aux heue.
Phan: rhawm: aux ghoing: kah moeng pwi tang: kaux, phan: ang mawh nan:, phan: aux jiang kah diang siviex paoxplawg paoxnyhawm: tix khankix,
khaix an: kieh moeng aux krid mhaw: kah son pwi tang: kaux, mai kieh pwi tang: kaux khankix nunai: kah piang moeng aux heue.
Mawh kheu in: mawh pa caox pa caig mai mawh krax phit krax lud pa sang keung: tix hoek krax prawng krax ciyang heue.
Mawh kheu an: mawh ngu pa proe tix sang kieh krax laux krax leeing: koe:, mai sang reeig tix tik krax haok hwan: aux khankix heue.
"Phan: aux ang nghiiet kah grawhgrawng: pa hoek ngia kawncau bun: aux mai kawncau simex aux khankix kah aux,
Khaix an: yam kaoh cung Siyiex aux sang yuh kah mawx? yam yaog Siyiex tix kaoh mai yam cheukcheu: Nawh Cao: kah aux, aux tag sang deeh pawk kah Nawh Cao: yuh kah mawx lie?
Ang hoik mawh Nawh Cao: pa hoik phan: hoik deuh aux tom: kah daux vaig lie? mai ang mawh Nawh Cao: pa phan: yiex khawm: ra: awm: paox tix khaing: kah daux vaig miex tix lie?
"Ang aux sax tawx sax yee kah pwi hot pwi sibhawm: yam koe: ceu pa lo kix lie? Mai hoik sax kieh aux miexmai: laux pakngai: lie?
Phan: ang mawh nan:, ang aux sax tawx kawnpraix pa ang koe: miex keeing: ih priex mai ih sivoe ngai: kix lie?
(Viang mawh kawx nan:, jah tom: yam kawn: awn: ju aux, aux hoik priex nawh awm: keeing: tix kaux, mai khaix keh aux kah daux vaig miex tix aux hoik teem: hoik coi kah miexmai:,)
Phan: aux hoik yaox kah pwi yum: tix kauxkaux pa ang koe: kraung ceep, phan: ang mawh nan:, pwi hot pwi sibhawm: tix kauxkaux, pa ang koe: kraung pa sang lhop kah tokaux tix,
Phan: rhawmrhi: nawh ang tawx bwanson: kah aux, mai phan: nawh ang siu: kah hauk yung: aux khankix,
Phan: aux yaog taix tix tiah kah piang pwi pa ang koe: miex koe: keeing:, yam yaox aux mai phan: ang teem: coi kah nawh kah dee prawng see:,
khaix an: kieh plawng: taix aux khlut khaing: klip aux, mai kieh taix aux graig heue.
Grawhgrawng: nawh krax laux krax leeing: pa sang kaoh khaing: Siyiex, mawh krax lhat krax graung kah son aux, mawh kheu jao siawpsibrawm pa kied ting kied lhaong: Nawh Cao:, aux ang kan yuh tidtix heue.
"Phan: aux kieh khri: mawh krax keud pot jun pot tix, mai phan: aux ah nin: kah khri: nawnaw,maix mawh pa een: aux rhawm: tix kah,
Phan: aux koe: krax pa gauxrhawm: gauxrhi: kheu jao hoik ting lhaong: krax pa mag mi aux, mai kheu hoik kied nie pon aux pa yuh aux kah taix tix,
yam maong aux tix jhak kah singaix pa riieng tix, mai yam simi aux tix yaox kah sawng: riang khix,
kah daux rhawm: aux hoik koe: pa yiien: yawg pa raux pa mox mai jheeh aux hoik ngheet kah taix aux,
in: mawh krax phit krax lud pa keung: tix hoek krax prawng krax ca:, mawh kheu aux hoik thiang: kah Siyiex, pa ot dee lhaong: heue.
"Mawh hoik gauxrhawm: aux kheu pa lauxleeing: pwi koeng kah aux mai ja loh tix yam hoik yaox mawh ceu pa caox pa caig lie?
(Aux ang lai kieh jheeh tix koe: phimap kah mhaing: tix jhax lawg kah ju nawh,)
Mawh ang pwi pa ot kah daux nyiiex gox aux khankix sax ah nin:,mawh pwi mawx pa ang nyang bax fahrhawm: fahrhi: tau mai nex moi nawh tan: lie?:
(Viang mawh nan: son ang nyo sinie lai vu vie tix paung kah daux krax, aux hoik paoh siviex kah son pwi hu: krax,)
Phan: aux kheem: krax pa phit pa lud tix khankix awm Adam, mai mox tix deuh phimap kah daux rhawm: dieb naok aux,
Grawhgrawng: nawh aux lhat graung kah cub pwi ting mai pwi haoh pwi hun: khankix, mai pwi kuceu nunai: aux kieh aux kaig tua, mawh kheu nan: aux hoik yawg tix mai ang kan lih plak praix,
o kieh pwi tix kauxkaux nghiiet kah lox krai aux, mai hoek jhak kah lai mhai: sakse aux, o kieh cao: pa ting siawpsibrawm pawk kah lox aux, mai kieh cao: prawng see: tiem: tix priex grawng: an: khankix kah daux phuk lai heue.
Aux tag sang deuh an: kah piang klip tix tete, mai ceep piang kaing: tix awm: mhok khri: tix mu:,
aux tag sang plak tix kieh Nawh Cao: tawng diang caong hu: tix ku diang, mai tag greed tix dex Nawh Cao: awm: Simiang tix kaux heue.
"Phan: haktiex ot aux kok yo deuh phimap kah aux, mai phan: rhoi: thai: khankix yiiem tau mai paox tix,
Phan: aux ih plix an: khankix mai ang tix uik mau, mai hoik yuh cao: haktiex khankix koe: krax som krax nai: ju tix,
khaix an: kieh pang: kat kuah tang: sivawng mai kieh fang: kuah tang: nghoxca heue." Gumlox sikah Yawbax hoik sidauh heue.
Grawng: Thiang: Elihux Kah Yawbax
Mawh kheu nan: pwi inkix loe: kaux hoik yaog tix mai pawk lox Yawbax, mawh kheu jao hoik ah nawh mawh tix pwi rah pwi see heue.
Khaix an: Elihux kawn: simex Barakhelax ceu pwi Buzix, pa mawh doeh simie ceucat Ramax songrhawm: kah Yawbax heue. Krax songrhawm: songrhi: nawh hoik lih kheu jao jhi: nawh grawng: rah see tix khaing: Siyiex heue.
Krax songrhawm: songrhi: nawh hoik baox lih kah piang paoxgrawm paoxgru nawh khankix loe: kaux, kheu jao yaox nawh kah ang kix lai pawk lox tix mai kix prawng ca: deuh Yawbax koe: phimap heue.
Yamin: kheu mawh kix loe: kaux pa riex ju khaing: Elihux nawh hoik pau tix sang sikah mai Yawbax heue.
Yam yaox Elihux kah ang jheeh kix loe: kaux lai pawk lox tidtix nawh kied songrhawm: songrhi: kah kix heue.
Mawh kheu nan: Elihux kawn: simex Barakhelax ceu pwi Buzi, pawk lox mai ah nin: "Aux mawh pa awn: ju, mai pex mawh pa kied riex ju; mawh kheu nan: aux koe: krax lhat krax graung, mai ang lai kan paoh grawng: pa yaox tix kah pex heue.
Aux ah nin: pwi riex ju khaw: tix mawh pa krai lox, mai pwi pa kied lang: ju khankix khaw: tix mawh cao: pa sidiex gau krax koe: pingnya cuyi: heue
Viang mawh nan: khwan: koe: kah daux kawn: pwi, mai bhawm: pa phlu: Cao: pa ting siawpsibrawm tix sau: mawh pa kieh nawh koe: krax tawng krax yung heue.
Pwi pa ting pa lhaong: khankix ang lai mawh pa koe: pingnya cuyi: jheengjheeng:, mai pwi riex ju khankix ang mawh pa tawng kah pa mawh pa meh jheengjheeng: heue.
"Mawh kheu nan: aux sang ah nin:,nghiiet kah lox krai aux, aux tag sang krai pao: grawng: krax pa yaox aux heue.
Aux hoik pau tix mhong: kah lox krai pex khankix, aux hoik krox tix nghiiet kah grawhgrawng: pa rin pex tix sang krai heue.
Aux hoik jawg tix nghiiet kah pex mhawmmhawm:, mai pwi khaing: daux pex tixkaux kawx, ang pex kah Yawbax, mai ang pon pawk lox nawh heue. v 13 Paw lai ah yuh nin:,yix hoik yaox kah pingnya cuyi:, mawh Siyiex pa kieh nawh pex mai ang lai mawh kawn: pwi heue
Yamin: nawh ang lai pon jhi: lox sikah tix kah aux, mawh kheu nan: aux ang lai pawk lox kah nawh, tau mai lox pa hoik ah nawh heue.
"Kix hoik daox deng: mai ang lai baox pawk, mai kix ang lai koe: lox sang krai tix gum kawx heue.
Yam pau aux tix nghiiet, mai kix ang ah tidtix, kix cung ot yawg tix, mai ang lai baox pawk lox tix bawg kawx heue.
Aux sang baox krai kah cie tix, mai aux sang krai pao: krax grawng: pa yaox tix heue.
Grawhgrawng: nawh aux koe: lox pa grum naog tix sang krai, khwan: kah daux aux hoik so: aux yuh an: heue.
Vaig aux awm: rawm: plix siiet ang koe: daux sang lih; mai an: awm: hau: hak rawm: plix siiet pa khraox pa dex sang bih heue.
Aux sang sikah sonsang nghie: rhawm: tix, aux sang ang jheeh tix, mai deeh pawk kah heue.
Aux ang lai jhak kah pakngai: pwi tix kaux kawx, mai paw kieh aux yaogyaw mai glaw: pwi pie tix kaux kawx heue.
Grawhgrawng: nawh phan: aux yaogyaw mai glaw: pwi tang: kaux cao: pa phan: pa deuh aux tag sang teei tix tik aux heue.
Elihux Ne Raw Kah Yawbax
Mawh kheu nan:, Yawbax eue, yuh bwanson: nghiiet kah lox aux mai hawt tix yuh khawm: uik heue.
Yamin: aux ang jheeh tix, dak kah daux jheeh aux hoik sikah heue.
Lox sikah aux khankix kaoh khaing: rhawm: pa rauh pa see aux, siyieb jheeh aux krai grawng: krax tawng krax yung aux heue.
Khwan: Siyiex hoik phan: hoik deuh kah aux, mai bhawm: cao: pa ting siawpsibrawm kieh aux im: ju heue.
Phan: maix pon pawk lox aux pawk heue, khre: rien lox pa sang sikah maix kah plak sivoe aux, kieh maix kaux cong: heue.
Aux mai maix awm: paox tix kah plak sivoe ngai: Siyiex, aux kawx hoik mawh pa phan: tix khaing: phawng: tiex heue.
Paw kieh maix koe: krax lhat krax graung kah daux aux tix ceu kawx, mai taix aux kawx tag ang tawx pa cien piang maix heue.
"Lox pa sikah maix mai aux hoik mhong: khaing: maix yuh nin: tete,
"Aux mawh pa singax, mai pa ang koe: dee phit dee lud, aux ang koe: phimap, mai ang koe: dee deuh phimap kah aux tix ceu kawx heue.
Viang mawh nan:, Nawh Cao: sawg dee sang deuh phimap kah piang aux, Nawh Cao: hoik simin aux awm: pwi koeng Nawh Cao:,
Nawh Cao: sau: gang: kah caong aux, mai Nawh Cao: pau krax lih hu: aux khawm: uik heue.
"Jhak heue, kah grawng: in: maix ang mawh pa rauh pa see, aux tag deeh pawk kah maix, mawh kheu Siyiex mawh pa nie lheu: ting khaing: kawn: pwi heue.
Maix lai yuh krax pa thungthiang: kah Nawh Cao: jao patix lie? Grawhgrawng: nawh Nawh Cao: ang lai jhi: grawng: gumklox sikah Tix pie tix ceu kawx heue.
Grawhgrawng: nawh Siyiex sikah kah daux an: tix ceu, phan: ang mawh nan: kah daux tang: ceu, viang mawh nan: kawn: pwi ang chix tawng kah heue.
Kah daux camaox mai kah daux riieng susai: yam laig it nyawm tum nawh kah piang ku: dee it tix ponsawm:,
Khaix an: Nawh Cao: paoh yhaok kawn: pwi, mai tawk cum: kah gumlox sidiex gau kah kix heue.
Sonsang deeh veeh kawn: pwi tix khaing: kaing pa yuh tix, mai sonsang luan kix khaing: pa ting jhawm: kawn: pwi,
Nawh teei tix priex khwankix khaing: daux simeeig mai ju kix khaing: krax pa yum: kah vaig heue.
"Kawn: pwi yaox tix kham: geu: tau mai krax saux krax ngia kah piang dee it tix, mai khaing: jhawm: saux kraing si: ang khankix tom: nie,
Ju nawh hoik seeing: kah khaomun, mai rhawm: nawh kawx hoik uh kah priex preem heue.
Nex nawn nawh hoik dieh hu: sipie sipie, mai si-ang: pa ang sax yaox tix bawg kawx hoik lih plak praix heue.
Mawh heue, khwan: nawh greed tix dex simeeig, mai ju nawh sang hoek dex tawm: taix cao: prawng see: khankix heue.
"Mawh kheu nan: sonsang jhi: Nawh Cao: grawng: krax pa rauh pa see Tix kah pwi, viang cao: cau pa ao: min: koe: kaing: rheng: kawx,
khaix an: Nawh Cao: tag koe: krax pa caoxrhawm: kah son nawh mai ah nin:, "deeh taoh tix teei nawh khaing: krax pa sang laig nawh kah daux simeeig, aux hoik yaox krax pa deeh taoh tix tix ceu,
nex nham: nawh tag sang lheu: awn: khaing: kawn: nyawm mai nawh tag lih tix awm: baux singaix yam awn: ju tix heue.
Nawh rawg bwan: kah Siyiex, mai nawh pon bwanson: khaing: Siyiex, nawh tag yaox pakngai: Nawh Cao: tau mai krax pa gauxrhawm: gauxrhi:, grawhgrawng: nawh, Nawh Cao: tawx krax pa rauh pa see Tix kah pwi heue.
Mai nawh tag rhax lai sivoe ngai: pwi mai ah nin:, "Aux hoik phit hoik lud, mai hoik tieh feen kah ceu pa mawh pa meh, mai aux ang lai yaox tix kham: phimap kah pa keung: aux tix kham: kah heue.
Nawh Cao: tag taoh tix teei khwan: ju aux khaing: krax pa sang laig nawh kah daux simeeig, mai ju nawh tag pon tix yaox kah pa riieng heue.
"Jhak heue, Siyiex yuh ceu an: khankix, kah pwi ra: bawg, mai loe: bawg heue.
sonsang teei khwan: ju nawh khaing: daux simeeig, mai sonsang kieh pa riieng nawh mawh pa jhan: riieng kah daux ju pwi pa im: heue.
"Yawbax eue, daong yhaok tix mai nghiiet kah lox aux, kieh maix koe: krax nhim: rhawm: mai aux tag sang krai kah maix heue.
Phan: maix koe: pa sang krai tix ceu ceu krai kah aux, grawhgrawng: nawh aux koe: rhawm: tix sang kieh maix mawh pa rauh pa see heue.
Phan: ang koe: ceu pa krai yawg tix mai nghiiet kah lox aux, mai aux tag gau maix kah pingnya cuyi: heue."
Elihux Krai Pao: Grawng: Pa rauh Pa See Siyiex
Elihux deeh pawk lox mai ah nin:,
Pex pa koe: pingnya cuyi: khankix eue, nghiiet lox pa krai aux, pex pa koe: krax tawng krax yung khankix daong jhaok tix nghiiet kah aux heue.
Mawh kheu yhaok chix cheuk kah lox, awm: chix cim jheeh tix yaox kah priex preem khankix heue.
Kieh ex laug tix teei pa rauh pa see son tokaux tix, kieh tokaux ex tawng mawh ceu patix pa mhawm: kah son cao: ex heue.
"Mawh kheu Yawbax ah nin:, aux mawh pwi rah pwi see, viang mawh nan:, Siyiex hoik kieh pa rauh pa see aux som,
mawh sang pie lhen: aux maix krai phit lud tix kah daux pa rauh pa see tix lie? Viang aux ang koe: krax phit krax lut kawx, jhawm: saux pa ang lai chix moi: koe: kah aux heue
Mawh pwi mawx pa awm: Yawbax pa nyaux kah lox sibriem khankix awm: rawm:,
kix mawh pwi yuh paox hu: krax tau mai pwi caox, mai lailing hu: tau mai pwi ang rah ang see heue.
Grawhgrawng: nawh, nawh ah nin:, pa gauxrhawm: gauxrhi: nawh kah daux Siyiex ang mawh pa tawx bwanson: kah pwi tix ceu kawx heue
"Mawh kheu nan: can pex pa koe: krax tawng krax yung, nghiiet kah lox aux kieh pa caox pa caig mai pa yuh phimap phighram: mawh pa singai khaing: Siyiex Cao: pa ting siawpsibrawm heue.
Grawhgrawng: nawh Nawh Cao: tag deeh viied kah nawh awm: kaing yuh nawh, mai kieh lih koe: kah nawh, awm: pa yuh nawh heue.
Siyiex ang sax yuh pa caox pa caig tete, cao: pa ting siawpsibrawm tag ang koe: krax tieh loh kah krax rah krax see Tix heue.
Mawh pwi mawx pa hoik tawx beeh glawm: kwang: haktiex in: kah Nawh Cao: lie? Phan: ang mawh nan: mawh pwi mawx pa hoik yaog Nawh Cao: mawh pa kwang: khawm: bee: haktiex lie?
Phan: Nawh Cao: ang koe: alo kah pwi, mai phan: Nawh Cao: teei tix priex kah khwan: ju Nawh Cao: deeh hoek kah Tix,
nex nham: kawn: pwi khankix tag mawh pa laux pa leeing: mai pwi deeh ing: kah piang tiex heue.
"Phan: maix koe: krax tawng krax yung keud tix yaox kah lox aux khankix,
mawh tag sang kwang: pwi koeng kah pa rauh pa see kah haktiex lie? Mawh sang prawng ca: maix kah Cao: pa ting siawpsibrawm pa mawh pwi pa kied rah kied see lie?
Mawh khaw: tix ah nin: kah khunhawkham,maix mawh pa giex pa going, mai khaw: tix ah kah pwi ting pwi lhaong: khankix, mawh kix pwi caox pwi caig lie?:
Viang yuh nan: Nawh Cao: ang tie mawh pa jhak kah plakngai: Simiang, Nawh Cao: ang tie mawh pa khan: kah ngai: cao: mi lheu: khaing: pwi hot pwi shia:, grawhgrawng: nawh kix mawh pa phan: pa deuh Nawh Cao: kah taix Tix khawm: uik heue.
Kah daux tivud ticu kix tag yum: daux greung sawm:, pwi khankix hoik siyaung: mai grai: hu:, pwi pa ting riang ting rao khankix hoik teei tix tik kah daux pa ang taix pwi tiah kix heue.
"Grawhgrawng: nawh ngai: Nawh Cao: jhak kah piang krax hu: kawn: pwi khankix, Nawh Cao: yaox kah diang caong hu: kix khawm: uik heue.
Pa faik mai veei yum: ang lai pon mox tokaux pwi yuh krax phit krax lud heue.
Grawhgrawng: nawh, Nawh Cao: ang lai lo tix prawng ca: kah daux pa chawkcheng:, kah plak sivoe ngai: Siyiex lawlawx heue.
Nawh Cao: raig tix tik kah pwi pa ting riang ting rao khankix tom: phawk, tau mai pa ang tix lai chawkcheng:, mai yaog tix deuh pwi tang: kaux plud kah dauh dee ot kix heue.
Mawh kheu nan: Nawh Cao: tawng kah kaing yuh kix, Nawh Cao: tik kix laig kah daux pa faik ponsawm:, mai kix hoik mawh pa phawng: lauxleeing: heue.
Nawh Cao: tawk kah kix awm: pwi caox pwi caig kah sivoe ngai: pwi hun: khankix heue.
Grawhgrawng: nawh kix deeh veeh tix hu: khaing: Nawh Cao:, mai ang lai keud grawng: krax Nawh Cao: tix ceu kawx heue.
Mawh kheu nan: kix hoik kieh lox yiiem pwi hot pwi shia: hoek kah Nawh Cao:, grawhgrawng: nawh Nawh Cao: mhong: kah lox yiiem pwi pa kharhawm: kharhi: khankix heue.
Yam tawx Nawh Cao: krax pa yiien: yawg, khaix an: mawh pwi mawx pa sang pon tuktiag tukte: kah lie? Mai yam mox Nawh Cao: pakngai: Tix, khaix an: mawh pwi mawx pa san pon yaox kah Nawh Cao:, pwi tix meung ang ah mai pwi tix kauxkaux ang ah, sang pon yaox kah Nawh Cao: lie?
Son ang pwi caox pwi caig sang pon kwang:, mai lhat pwi khankix krix kah jhawk taong: heue.
"Grawhgrawng: nawh koe: pwi mawx pa ah nin: kah Siyiex,aux hoik yaox tix kham: krax pa sidiex gau, mai aux tag ang lai baox yuh krax phit krax lud tix bawg kawx,
Gau aux kah ceu pa ang aux chix yaox, phan: aux hoik yuh krax phit krax lud, aux tag ang lai yuh tix bawg kawx heue.
Mawh keud maix tix sang pon bwanson: khaing: Nawh Cao:, kah daux pa yuh alo tix kheu jao thiang: maix kah kaing yuh Nawh Cao: lie? Maix tag yaox tix laug tix teei an:, mai ang mawh aux, mawh kheu an: krai ceu pa tawng maix heue.
"Kieh pwi koe: krax tawng krax yung khankix krai kah aux, mai kieh pwi koe: pingnya khankix nghiiet kah lox aux;
Yawbax krai lox tau mai pa ang tix koe: krax tawng krax yung, lox nawh khankix mawh lox pa ang koe: pingnya heue
Kieh Yawbax mawh pa kham: geu: tom: sidauh, grawhgrawng: nawh lox pawk nawh khankix awm: lox pwi caox pwi caig khankix heue.
Grawhgrawng: nawh, nawh baox naok krax tieh krax feen kah piang phimap tix; nawh dieh taix tix kah sinax ex, mai baox nie ah lox pa tieh pa feen kah Siyiex heue."
Elihux Prawng Ca: Kah Pa rauh Pa See Cao: Tix
Lheu: khaing: an: Elihux pawk lox mai ah nin:,
"Mawh keud maix pa ah tix mawh pa caw lie?mawh keud maix krax pa rauh pa see tix mawh pa nie lheu: blon: khaing: Siyiex lie?:
Grawhgrawng: nawh maix ah yuh nin:,mawh sang pon aux bwanson: ceu patix lie? mai sang nie pon aux rao ceu patix khaing: yuh phimap lie?:
"Aux tag pawk lox maix mai paoxgrawm paoxgru khankix pa ot tau mai maix heue.
Maong tix jhak plak raoma: mai simi tix jhak kah paiawm: pa nie lheu: lhaong: khaing: maix heue.
Phan: maix yuh phimap, mawh sang pon kieh maix pa grum naog Siyiex lauxleeing: lie? Phan: ang mawh nan:, phan: maix yuh phimap tom: nie, mawh sang pon yuh maix patix kah Nawh Cao: lie?
Phan: maix mawh pa rauh pa see, mawh sang pon tawx maix patix kah Nawh Cao: lie? Phan: ang mawh nan:, mawh sang pon rieb Nawh Cao: patix khaing: daux tawm: taix maix lie?
Krax pa caox pa caig yuh maix hu: krox kah pwi pa awm: kaux cao: maix, mai krax pa rauh pa see maix tag tawx bwanson: kah kawn: pwi pa awm: maix heue.
"Kix riag yo kheu jao pa kharhawm: kharhi: tom: nie, mai kix riag yo son pa sang pon krax teem: krax coi khaing: taix pa kied ting riang ting rao heue.
Viang mawh nan: ang koe: pwi tix kaux kawx pa ah nin:,koe: Siyiex Cao: pa phan: pa deuh aux, pa tawx akhwang: rhax aux lai daux ponsawm:,
Pa nie lheu: gau ex khaing: totiag haktiex, mai pa yuh ex nie lheu: koe: pingnya khaing: sim: raoma: khankix koe: dee mawx lie?:
Viang kix kok yo lox tix kawx, Nawh Cao: ang lai pawk, kheu pa yaw kix rangdi daux pa caox pa caig heue.
Siyiex ang nghiiet kah lox pa giex pa going tete, mai cao: pa ting siawpsibrawm ang lai yuh tix tawng kah lox kix heue.
Viang maix ah ang tix yaox Nawh Cao: kawx, kheu mawh Nawh Cao: pa prawng rah see, mai maix krox jun daux Nawh Cao: heue.
Mai yamin: kheu grawng: ang Nawh Cao: nyang tawx krax kham: krax geu: kah daux pa songrhawm: songrhi: Tix, mai Nawh Cao: ang nyang teei krax phit krax lud maix koe: ceu,
Mawh kheu nan: Yawbax ang jheeh tix kah daux pa ah tix lox giex going, mai nawh baox nie sikah kah lox pa ang koe: cee koe: cak heue."
Elihux Krai Pao: Grawng: Mhawm: Siyex
Elihux baox toe: tix krai lox mai ah nin:,
"Gun yeung kah aux ceeix ha:, mai aux tag jhi: maix yaox kah koe: lox pa sang krai tix tang: Siyiex heue.
Aux tag viex krax tawng krax yung tix hoek khaing: dee singai, aux tag jhi: grawng: rah see Siyiex Cao: pa phan: pa deuh aux heue.
Grawhgrawng: nawh lox sikah aux in: ang lai mawh pa lud pa loe:, pwi pa grum naog kah krax tawng krax yung tix kaux ot tau mai maix heue.
"Jhak heue, Siyiex mawh pa ting siawpsibrawm, mai ang mawh pa nunai: kah pwi tix kaux kawx; Nawh Cao: mawh pa koe: siawpsibrawm kah daux riang rao krax tawng krax yung heue.
Nawh Cao: ang mawh pa priex jhung: kah ju pwi caox pwi caig, viang mawh kawx nan: Nawh Cao: prawng ca: rah see kah pwi pa kharhawm: kharhi: heue.
Nawh Cao: ang lai ghaix ngai: tix khaing: pwi rah pwi see, mai kieh kix ngawm kah piang dangngeung tau mai khunhawkham khankix, mawh kheu Nawh Cao: hoik yaog kix ot tan: leeing ju, mai kix hoik mawh pa ot dee lhaong: heue.
Mai phan: mawh pa hoik phyawk kix kah maox ceng khankix, mai phan: maox pa kharhawm: kharhi: vungvhien: tix kah kix,
khaix an: Nawh Cao: tag krai grawng: kaing pa yuh kix, mai khawm: krax pa phit pa lud kix khankix, mai kah pa hoik yuh kix kah daux krax pa ang khaw: ang caw: heue.
Nawh Cao: tag paoh yhaok kix, sonsang nghiiet kah lox tawm: jhawm: krai Nawh Cao: mai tawx lox kah kix sonsang veeh kix tix khaing: krax phit krax lud tix heue.
Phan: kix cu nghiiet mai yuh kaing jhaw: Nawh Cao:, singaix sawm: khix num kix tag luan, kah daux krax pa haok pa hwan:, mai kah daux krax pa gauxrhawm: gauxrhi: khankix heue.
Viang mawh nan: phan: kix ang cu nghiiet, kix tag laux tag leeing: kah vaig, mai kix tag yum: kah daux krax pa ang tix koe: krax tawng krax yung heue.
"Viang mawh nan: pwi tud pwi rhim: khankix rhawm: tix deuh krax songrhawm: songrhi: kah daux rhawm: tix, yam phyawk laung Nawh Cao: kix, kix ang lai kok yo son krax teem: heue.
Kix yum: yam kawn: im: ju tix, mai ju kix tag sidauh kah daux sinax pwi pa seeing: pa brai: khankix heue.
Nawh Cao: deeh taoh pwi hot pwi shia: khaing: kah daux pa kharhawm: kharhi:, mai paoh yhaok kix yam hoek krax kharhawm: kharhi: heue.
"Nawh Cao: tag viex maix lih hu: khaing: daux krax pa kin: pa nu, mai laig dauh dee vieh dee va:, pa ang mawh dauh dee si khawp, mai tag sang khan: priex preem pa nyawm pa ngaig kah piang pheen: sawm: maix heue.
Viang mawh nan: maix hoik naog kah krax ciyang kah daux krax yuh pwi pa caox pa caig, krax ciyang mai krax prawng krax ca: tag giex gang: kah maix heue.
Yuh satix tix grawhgrawng: nawh krax songrhawm: songrhi: Nawh Cao: tag koe: kah piang maix, mai paw kieh mau taoh pa ting ngawh ting jum an: viex maix lud krax heue.
Krax pa mag pa mi maix mai siawpsibrawm pa kied ting maix an: sang pon taoh kah maix khaing: krax pa kharhawm: lie?
Paw koe: rhawmrhi: kah ponsawm:, pa mawh bawg yam tat tix tik pwi khankix khaing: dee ot dee koe: kix heue.
Yuh satix tix paw lai veeh tix hu: plak krax phit krax lud awawx, grawhgrawng: nawh maix hoik laug tix teei in: khaing: krax pa kharhawm: kharhi: heue.
"Jhak heue, Siyiex hoik jhi: pa ting pa lhaong: Nawh Cao: kah siawpsibrawm Tix, mai mawh pwi mawx pa chix tawx krax gau krax sawn: awm: Nawh Cao: lie?
Mawh pwi mawx pa pon jhi: krax hu: Nawh Cao:, phan: ang mawh nan: mawh pwi mawx pa pon ah nin: lie?Maix Cao: hoik yuh pa lud pa loe: heue
Elihux Krai Pao: Grawng: Krax Kwang: Siyiex
"Doh keud tix yaogyaw kaing jhaw: yuh Nawh Cao:, khaing: lai rhax pa rhax pwi khankix heue.
Kawn: pwi kukaux hoik yaox kaing yuh Nawh Cao: khaing: dee singai heue.
"Jhak heue, Siyiex mawh pa ting pa lhaong:, mai ex ang chix pon tawng kah Nawh Cao:, mai khix num Nawh Cao: khankix mawh pa ang ex dak pon simin tix tawng heue.
Grawhgrawng: nawh, Nawh Cao: jhok rawm: ciex khankix haok plak piang, mai deeh tieh tix mawh rawm: lhiex kah daux paiawm: heue.
Pa kieh paiawm: khankix groi rawm: lhiex lih cod kah piang pwi tom: nie heue.
Mawh pwi mawx pa sang pon tawng kah grawng: tah hu: paiawm: khankix ku sidauh, mai kah grawng: lih sinum praix khankix kah daux nyiiex gox bwan: Nawh Cao: lie?
Jhak heue, Nawh Cao: kieh pa riieng pluk plak praix jhan: ku caong daog nyiiex gox bwan:, mai kheem: tom: kah dee pa kied raux rawm: sigrit sigra: heue.
Kah son grawng: in: Nawh Cao: prawng ca: kah piang pwi khankix mai Nawh Cao: tawx pa ih pa un tom: kub tom: naog kah kix heue.
Tawm: taix Nawh Cao: kheem: kah piang pluk plak praix, mai tawx lox kieh sah tuh kah pwi koeng heue.
Lox sinum praix krai pao: grawhgrawng: Nawh Cao:, mai khawng: brie khankix kawx tawng kah grawhgrawng: hoek blaung: ting heue.
"Kah son grawng: in: rhawm: aux hoik kied siyaung: luah ah pug pug, mai phuh tix lih khaing: dee ot tix heue.
Nghiiet kah lox sinum praix Nawh Cao:, mai mawh lox sinum pa kaoh khaing: daux jheeh Nawh Cao: heue.
Nawh Cao: ploi: sinum praix luah hu: sidauh greem: raoma:, mai kieh sah tuh tom: dee sidauh haktiex heue.
Khaix hoik an: lox sinum praix lih tix ah reeng reeng, tau mai lox sinum tuh sah mai siawpsibrawm Nawh Cao:, khaix hoik mhong: kah lox an: mai Nawh Cao: ang lai yut kah lox sinum praix mai bhaung: ting heue.
Siyex kieh lox Tix lih mai sinum praix mai krax pa kied daox kied am:, Nawh Cao: yuh ceu pa kied ting kied lhaong: kah pa ang ex lai dak uik tawng kah heue.
Grawhgrawng: nawh, Nawh Cao: ah nin: kah rawmrha:, lih koe: kah piang haktiex, awm: an: lhiex mai lhiex ting khankix kawx lih tix koe: kheu siawpsibrawm Nawh Cao: heue.
Nawh Cao: mad kah taix kawn: pwi kukaux, sonsang pon tawng pwi khankix kah kaing jhaw: yuh Nawh Cao: heue.
Tosat khankix laig ot daux tiex, mai laux lee: tix tan: heue.
Keu: kang: lux kaoh khaing: caong ma: seh, mai bhaung: sikiied hoek khaing: caong ma: laong: heue.
Siyiex phlu: bhawm: Tix lih mawh sidap, mai kieh rawm: pa kied vieh lih tix klon heue.
Nawh Cao: kieh bhawm: rawm: ciex deeh tieh tix mawh paiawm:, pa riieng Nawh Cao: kieh paiawm: grai: heue.
Kix cuang vungviang piang bee: ma: haktiex, mai hu: kah daux pa kia: pa ngien Nawh Cao:, sonsang mawh awm: can ceu pa hoik tawm: Nawh Cao: tix deuh kah kix, kah piang bee: ma: haktiex khawm: uik heue.
Nawh Cao: kieh ceu an: khawm: uik lih tix mawh, son pa ciyang ang ah, sonsang priex rien haktiex ang ah mai son krax caoxrhawm: caoxrhi: Nawh khankix ang ah heue.
"Yawbax eue, nghiiet kah lox in:, cung yawg tix mai jawg tix keud kah kaing jhaw: pa daox pa am: yuh Siyiex khankix heue.
Mawh hoik tawng maix kah grawng: tawx Siyiex lox tix kah ceu an: khankix, mai kieh pa riieng paiawm: cie Nawh Cao: jhan: riieng lie?
Mawh tawng maix kah sidawm phin: tum paiawm: kah raoma:, pa mawh kaing jhaw: krax pa daox pa am: Nawh Cao:, Kaw pa grum naog kah daux krax tawng krax yung lie?
Yam yuh Nawh Cao: haktiex yiien: kah bhaung: pa phlu: tix hoek khaing: plak seh mai kieh kraung ceep maix si aoh kah, tawng maix kah lie?
Mawh hoik yaox maix tix nih tawm raoma: khankix tau mai Nawh Cao:, pa kiien: awm: siliak pa raug tix lie?
"Gau yix kah grawng: pa sang caw: yix tix krai kah Nawh Cao:, mawh kheu yix ang lai chix krai tix ceu kawx, kheu jao koe: pa faik yix heue.
Mawx pa sang pon krai kah Nawh Cao: awm: pa koe: rhawmrhi: tix sang krai lie? Koe: pwi tix kauxkaux pa koe: rhawm: tix sang simie tix hoek krax laux krax leeing: lie?
Yam phlu: bhaung: raoma: kieh blang:, kawn: pwi ang lai pon simi tix jhak kah pa riieng an: heue.
Pa sawng: riang khri: jhan: hoek khaing: plak laong:, mai siawpsibrawm krax pa lhat koe: tau mai Siyiex heue.
Ex ang lai pon sawg liiem kah Kaw pa ting siawpsibrawm, Nawh Cao: mawh pa kied blon: mhawm: kah daux siawpsibrawm, kah daux krax prawng krax ca: mai kah daux pa grum naog kah daux pa rauh pa see, Nawh Cao: ang lai yeen ya kah pwi tix kaux kawx heue.
Mawh kheu nan: kawn: pwi khankix koe: krax lhat krax graung kah Nawh Cao:, Nawh Cao: ang lai deuh lai sawn: pwi pa een: tokaux tix koe: pingnya cuyi: kah daux rhawm: tix koe: ceu heue.
Siyiex Plak Jhi: Siawmp Sibrawm Tix Kah Yawbax
Khaix an: Simiang Siyiex pawk lox Yawbax khaing: daux bhaung: ting mai ah nin:,
"Mawh pwi mawx pa kieh krax keud krax sawn: Aux faik kah lox sikah pa ang koe: krax tawng krax yung lie?
Yamin: rawd nyoi maix awm: mawh tix simex tix kaux, aux tag chawk kah maix, mai deeh pawk lox chawk Aux kah maix heue.
"Yam sum: Aux kah num: riah haktiex khankix mawh ot maix dee mawx lie? Phan: maix hoik tawng kah inkix krai Aux mhong: heue.
Mawh pwi mawx pa pon tiag kah diag koe: haktiex, phan: maix tawng krai Aux mhong:, phan: ang mawh nan: mawh pwi mawx pa pawd tix deuh rhoi: mee: nawh kah piang an: lie?
Mawh hoik phyawk num: riah haktiex tix kah patix lie? Phan: ang mawh nan: mawh pwi mawx pa sum: tix deuh lon: simaox daog nawh lie?
Yam khrawm: simuing: ponngawb paox tix rhax lai, mai yam hoik riag yo cub kawnpraix Siyiex khankix tau mai pa gauxrhawm: gauxrhi:.
"Phan: ang mawh nan:, mawh pwi mawx pa hoik nyeep tix deuh siviex rawm: sigrit sigra:, yam hoik breeng: nawh tix lih keh khaing: daux vaig miex tix,
Yam hoik yuh Aux paiawm: khankix mawh kraung ceep nawh, mai kieh pa kied faik an: mawh man: leem: pa pua: kah mee: koe: an:,
yam hoik yuh aux tix deuh mee: pa tat aux khankix kaux son an:, mai hoik sau: tix deuh siviex mai jhong: siviex,
yam ah Aux nin:,maix tag pon tix hoek singai die pie in:, viang mawh nan: maix paw lai luan singai khaing: in:, mai krax pukpak rawm: pa lhaong: rhawm: lhaong: rhi: maix kieh kaog tin: heue
"Mawh sax tawm: maix lox kah ponngawb tom: yam jah maix tix keh, mai mawh hoik khre: maix kah dauh dee ot bah riieng praix lie?
Sonsang mawh pa riieng ponngawb an: pa giex tom: kah yoh haktiex, mai khruah pwi caox pwi caig lih khaing: daux haktiex lie?
Haktiex hoik awm: glaox pa koe: greem: cum: tix mu: mai cung tix lih awm: kraung ceep pa mhawm: heue.
Pa riieng pwi caox pwi caig khankix hoik grai: khaing: kix mai plawng: taix pa yaog tix kawx hoik grai: heue.
Mawh hoik sax laig maix kah daux rawm: keut kah daux rawm: sigrit sigra: khankix lie? Phan: ang mawh nan: mawh hoik sax laig lailing maix kah daux kawn: moik lie?
Mawh hoik sax paoh siviex meung yum: tix kah son maix lie? Mai hoik sax yaox maix kah diang siviex yum: khankix lie?
Mawh hoik sax tah tum grum tawng maix kah haktiex in: khawm: uik lie? Phan: maix tawng uik krai aux mhong:,
"Mawh koe: krax pa sang thong: hu: kah dee koe: pa riieng dee mawx? mai koe: dee ot pa faik kah dee mawx?
Mawh sang pon viex maix kix hoek kah dee ot dee koe: kix, mai sang pon tawng maix kah daux krax pa sang hoek kah nyiiex nawh lie?
Maix tee: tawng kah grawng: pa hoik dawg keh tix mai pa kied lang: ju tix heue.
"Mawh hoik sax laig maix kah daux nyiiex krao: sinngao rawmrha:, phan: ang mawh nan: mawh hoik sax yaox maix kah nyiiex krao: sinngao rawm: pre: khankix,
kah pa hoik khre: aux tix deuh son bawg yam krax pa kharhawm: kharhi:, mai son singaix bawg yam puing: naing daux naing khankix lie?
Mawh tah hu: pa riieng kah daux krax yuh kah mawx? Phan: ang mawh nan: mawh hoik tah hu: bhaung: plak lih singaix kah piang haktiex yuh kah mawx?
"Mawh pwi mawx pa hoik paoh tix deuh rhoi: hu: rawm: raoh, sonsang ba: rawm:, phan: ang mawh nan: rhoi: grawng: krax hu: sah,
sonsang kieh nawh lhiex lih kah piang haktiex, kah dee ang pwi ot tix kaux kawx, mai kah daux tiag daux tu, kah dee ang pwi ot tix kaux kawx,
Sonsang tawx haktiex yi, leet kah rawm: mai kieh rawm: klawng: lih hu: kieh rib awn: kuah ting lhaong: heue.
Mawh koe: keeing: lhiex lie? Phan: ang mawh nan: mawh pwi mawx pa kieh rawm: ciex lih koe: lie?
Mawh kaoh rawm: sidap khaing: daux vaig pwi mawx lie? Mai klon: rawm: ciex daux raoma: mawh pwi mawx pa keh nawh lie?
Rawm: khankix kiien: awm: simaox, mai kah dee raux rawm: hoik mawh lon: heue.
Mawh pon khrawm: maix tix phyawk kah simuing: khimax (simuing: grawng: lat) khankix ot tau, phan: ang mawh nan: mawh chix yah maix maox vien rawb simuing: pa kied riang an: lie?
Mawh pon plih maix simuing: Mazarot lih kah daux bawg yam cie nawh lie? Phan: ang mawh nan:, mawh pon thung: pon bung: maix kah simuing: krih ting grang hu: tau mai cub simuing: iak khankix lie?
Mawh tawng maix kah been pa koe: raoma: lie? Mawh pon deuh maix been an: mawh pa kwang: kah piang ca: haktiex lie?
"Mawh pon pao: maix lox tix hoek kah daux paiawm:, sonsang pon kheem: rawm: lhiex tom: nie kah maix lie?
Mawh pon ploi: maix pa riieng plukplak praix lih, sonsang hu: kix mai ah nin: kah maix lie?Ex koe: tin: heue
Mawh pwi mawx pa sau: tix deuh pingnya cuyi: kah daux tokaux lie? Mai mawh pwi mawx pa sau: krax tawng krax yung kah daux rhawm: lie?
Mawh pwi mawx pa pon simin kah paiawm: kah pingnya cuyi: tix lie? Phan: ang mawh nan: mawh pwi mawx pa pon lhauk si ngiien rawm: raoma: khankix lie?
Yam klao: phawng: tiex tix kiien: tau mai klon: tiex khankix, mai deeh kab tix mawh tiex tau mai paox tix lie?
"Mawh pon leue maix totiag sonsang ih sivai sangsi:, phan: ang mawh nan: mawh sang pon tawx maix kawn: sivai sangsi: awm: ju pa cairhawm: an: sak lie?
Yam kawn: tum kix kah daux rang:, phan: ang mawh nan: yam kawn: nyat kix tix kah daux yeem daux yaw mai jawm kix tix pau lie?
Mawh pwi mawx pa tawx lak ih priex, yam riag yo kawn: lak kah Siyiex, mai vungviang kheu ang pa ih kix koe: lie?
"Mawh tawng maix kah bawg yam sang keh kawn: pex rang: lie? Phan: ang mawh nan: mawh pon mhai: maix kah bawg yam sang keh cak lie?
Mawh pon simin maix khix, singaix, yam naog bawg yam sang keh kix lie? Phan: ang mawh nan: mawh tawng maix kah bawg yam nghe: kix kawn: tix lie?
Kix buk nyoi tix, mai keh kawn: tix lih, mai luan khaing: saux yha: tix heue.
Kawn: iak kix nyawm ot siu: koe: mai kix ting lhaong: kah daux tiag daux tu, kix lih hu: mai ang lai deeh hoek kah miex tix heue.
"Mawh pwi mawx pa ploi: la tiag ot kah daux pa ang koe: krax tieb krax tie lie? Mawh pwi mawx pa yah kah maox keu: brung tiag khankix,
Aux hoik yuh daux tiag mawh nyiiex kix, mai hoik kieh lung: ting mawh dee ot kix lie?
Nawh sibriem kah lox sinum kawn: pwi pa ot daux veng, nawh ang deuh lox yo pwi hoh tiag koe: ceu koe: mu: heue.
Hawt liiep gawng lua mawh dee sawg kuah kix tix ih, mai sawg liiem kah rib klai kuceu heue.
"Mawh sang cu moi praix tix yuh kaing son maix lie? Mawh sang cu nawh tix it kah daux kawg maix lie?
Mawh pon phyawk maix moi praix kah maox sonsang hawt nawh daux rhoi: grawng: thai: lie? Phan: ang mawh nan: mawh sang cu nawh tix hawt khaix maix yam thai: maix kah daux lung: lie?
Mawh sang yumrhawm: maix kah nawh kheu jao kied ting riang nawh lie? Phan: ang mawh nan: mawh sang pon ap maix kaing cien yuh tix kah nawh lie?
Mawh sang yumrhawm: maix sonsang viex nawh nghox khaing: daux glah nghox, mai hoek sau: daux krao: nyiiex maix lie?
"Sim: kala-uk jiet chix yib pruik tix daux pa yaw rangdi tix, viang mawh nan: han: tiag naog kah hauk mai pruik pa mhawm: ang mawh lie?
Grawhgrawng: nawh, nawh prah tawm: tix kah piang tiex, mai kieh tawm: khankix siu: kah daux phawng: tiex,
nawh ang khirhawm: kah sang dig caong tix khawn: kah tawm: tix max, phan: ang mawh nan: kah sang yuh totiag kah tawm: an: phawng: heue.
Nawh nieb pon yuh kah kawn: tix kah daux pa kin: rhawmrhi:, awm: ang kix lai mawh kawn: nawh, riang rao kaing yuh nawh mawh pa giex pa going mai ang koe: cee koe: cak heue.
Grawhgrawng: nawh Siyiex hoik phan: hoik deuh nawh mawh pa koe: pingnya, mai ang lai kieh nawh koe: krax tawng krax yung heue.
Yam yaog nawh tokaux tix lhaong:, nawh nyiah maung brung mai pwi brug heue.
"Mawh pon tawx maix brung kieh koe: riang lie? Mawh hoik jhup maix tix deuh ngawg nawh kah grang plukplak praix lie?
Mawh pon kieh maix nawh phuh tix awm: sido lie? Mai lox phliah nawh meeh tix mawh ceu pa lhat pa graung heue.
Nawh haik tiex kah daux lung: daux ngawd, mai yaw rangdi jaloh tix kah pa koe: riang tix, nawh breeng: tix laig kah daux naing heue.
Nawh sibriem kah ceu pa lhat pa graung mai ang koe: krax yaoh krax yee:, mai nawh ang chix via tix khaing: lawm vaig heue.
Lox luah khruah lawk te sidauh kah nawh, tau mai rao pliah mai plah rhiem: tieb pa mhawm: plang: heue.
Nawh ting rhawm: canyhau: mai haik tiex tau mai krax pa songrhawm: songrhi: tix, nawh ang lai pon cung yawg tix kheu jao mhong: kah sinum luah lox teettawng heue.
Kah sigreung sinum lox teettawng, nawh ah lox tixhi hieh hi hieh heue Nawh mhong: sioe: bhawm: naing khaing: dee singai, mai kah lox yo cao: kaing: naing khankix mai khawm: siaox naing heue.
"Mawh pon pu: klang: ce: kah pingnya tawx maix, mai di pruik tix pu: hu: kah see plak seh lie?
Mawh tawx maix lox tix kieh klang: krih pu:, mai yuh mheem: tix kah piang dee pa lhaong: lie?
Nawh ot kah piang rang: mai ot kah piang choek rang: kah dee pa kaux pa cong: heue.
Khaing: dee an: ngai: nawh kok puan: dee singai mai jiang kah totiag heue.
Kawn: nawh khankix yawt kah nham:, phan: pa yum: koe: dee mawx nawh kawx ot tan: heue."
Lheu: khaing: an: Simiang Siyiex pawk lox Yawbax mai ah nin:,
"Mawh sang khaw: pwi an: pa tieh feen kah cao: pa ting siawpsibrawm tix sidiex Nawh lie? Nawh pa mawh pwi pa tang phimap kah Siyiex, kieh nawh deeh pawk heue."
Grawng: Pa Deeh Pawk Yawbax Kah Siyiex
Khaix an: Yawbax deeh pawk lox Simiang Siyiex mai ah nin:,
"Jhak heue, aux mawh pwi caox; aux tag sang deeh pawk kah Maix Cao: yuh kah mawx lie? Aux tag thox jheeh tix kah taix tix heue.
Aux hoik loe: tix sikah tix bawg, viang mawh nan: aux tag ang lai baox ah khaix in:, aux hoik loe: tix pawk ra: bawg, viang nawh nan: aux tag ang lai baox jiiem: lox tix heue.
Grawng: Silah Siyiex Kah Yawbax
Khaix an: Simiang Siyiex pawk lox kah Yawbax khaing: daux bhaung: ting mai ah nin:,
"Yamin: rhawt maox nyoi maix awm: mawh tix simex tix kaux; Aux tag chawk kah maix, mai deeh pawk lox chawk aux kah maix heue.
Mawh sang preet maix tix tik kah krax prawng krax ca: Aux lie? Mawh keud maix tix mawh pwi rah pwi see, mai deuh Aux mawh pa koe: phimap lie?
Mawh koe: riang rao plawng: taix maix awm: plawng: taix Siyiex lie? Phan: ang mawh nan: mawh sang pon kieh maix lox tix sinum awm: sinum lox Nawh Cao: lie?
Khaix an: ceep kah siawpsibrawm min: plakngai: mai pa mhawm: grang, mai khre: tokaux tix kah ceu pa yaogyaw koe: min: mai kah ceu pa mhawm: grang an: khankix heue.
Peeik tix tik krax songrhawm: songrhi: khaing: daux maix; mai jhak kah pwi pa ting rhawm: canyhau: khankix, mai yeen nawh tiiem heue.
Jhak kah pwi pa ting rhawm: canyhau: kukaux, mai deeh kieh kix hoek dee pa tiiem, dig tix tik pwi caox pwi caig khankix kah dee ot dee koe: kix heue.
Mox kix tau kah daux phawng: tiex, mai tawb ngai: kix kah pa faik heue.
Khaix an: Aux tag sang deeh rieb kah maix, sonsang pon taoh taix khawn: dawm: cao: maix kah maix heue.
"Yamin: jhak kah tosat Behemok (Brung rawm:), pa phan: Aux tix deuh tau mai maix, nawh sawm: rib awm: moi heue.
Jhak heue, riang nawh koe: kah nyoi nawh, mai siawpsibrawm nawh koe: kah siniak vaig nawh heue.
Nawh vuh vied sidax tix awm: gaw khaox Arit, mai siniag ba: viang nawh kab tix kaux tix gap hoik tix gap heue.
Si-ang: nawh khankix awm: gawng: tawng lheung:, mai si-ang: praok nawh khankix awm: gawng: rhiem: heue.
Nawh mawh ceu pa phan: pa deuh Siyiex phao voe, Mawh ngie Nawh Cao: pa phan: pa deuh nawh nongnong:, pa pon viex vaig lawm Tix hoek dex heue.
Gawng lua khankix tawx pa ih pa un: kah son nawh, mai tosat klieh tau mai paox tix daux tong tan: heue.
Nawh noi: tix it greem: veei pang: kraox rawm: khankix, mai kah daux yeem pang: jo: khankix mai kah daux ung: heue.
Veei pang: kraox rawm: khankix, kheem: kah nawh, pang: khaox siglai hawt klawng: khankix vungviang kah nawh heue.
Viang rawm: klawng: hwan: miex ding kawx, nawh ang khirhawm:, mai viang rawm: klawng: Yawdan thah tix laig daux jheeh nawh kawx nawh ang gah ang greed tix,
mawh pwi mawx pa sang pon dung: ngai: nawh dug mai phyawk kah, mai teei rhiem: cieh meeh nawh mai tuk hu: lie?
"Mawh sang pon bluh maix tix teei tosat Levitan (goe: rawm:) kah miiet, mai pon phyawk dak nawh kah maox lie?
Mawh sang pon cieh maix meeh nawh kah gawng: jo:, phan: ang mawh nan: mawh sang pon toh maix kap nawh kah rhiem: feuk lie?
Mawh sang khyox khaw: nawh tix kah maix tom: nie lie? Mawh sang sikah nawh lox awn: lox tiem kah maix lie?
Mawh sang yuh nawh sijax mukheu mai maix lie? Mawh sang kieh maix nawh mawh kawncau tix leeing ju lie?
Mawh sang klieh maix mai nawh awm: sim: lie? Phan: ang mawh nan: mawh sang phyawk maix tix laung nawh son kawncau bun: tix khankix lie?
Mawh sang khan: kheu: paoxgrawm paoxgru maix priex preem tix brie son nawh lie? Mawh sang gwieh kix tix tawx nawh kah sinax pwi yuh lai geu lie?
Mawh sang pon suat maix hak nawh kah pliah kak rao lie? Phan: ang mawh nan: mawh sang pon suat maix kaing nawh kah pliah suat lie?
Teuh taix tix kah piang nawh, paw lai baox keud tix sang yuh naing kah nawh tix bawg kawx,
Pa keud pex tix sang pex kah nawh mawh pa giex pa going, pie yaox ex kah nawh hoik mawh pa lhat ex kah ang mawh lie?
Ang koe: pwi tix kaux kawx pa kan hu: so: nawh kaoh cung. Awm: an: mawh pwi mawx pa pon cung tix ot kah plak sivoe Aux lie?
Mawh pwi mawx pa hoik yuh bwanson: kah Aux, sonsang deeh viied Aux bwanson: kah nawh lie? Can ceu pa koe: greem: raoma: kuceu mawh cie Aux heue.
"Aux tag ang mox tix deuh kah grawng: caong levitan (goe: rawm:) khankix, mai riang rao siawpsibrawm nawh, mai khawm: kah kraung pa koe: min: plakngai: nawh heue.
Mawh pwi mawx pa pon khleeing: tix tik kraung ceep plak praix nawh lie? Mawh pwi mawx pa pon greed tix dex hawt kap brung pa koe: ra: thaix an: lie?
Mawh pwi mawx pa pon paoh siviex plak sivoe ngai: nawh, mai dia: rhang: nawh khankix mawh pa kied lhat ex kah ang mawh lie?
Dia: glawk rhang: nawh, mawh pa kieh nawh koe: min: plakngai: hoik nyeep tix kaux awm: pa hoik tawk tix cum:,
An: tix mu: hoik tix mu: singip paox tix son ang bhaung: pon laig kah dau sinax khankix,
Kix hoik sitoe: paox tix tix mu: hoik tix mu:, kix kab tau mai paox tix tix plak hoik tix plak mai ang lai chix tang: tiah khaing: paox tix heue.
Yam miah nawh lih tix sawng: riang, mai ngai: nawh awm: pa riieng plak ponngawb heue.
Khaing: daux jheeh nawh lih mawh rong: ngu pa rup, mai nyia ngu khankix pu: tix lih khaing: an: heue.
Taox ngu lih khaing: daux meeh nawh, awm: kaoh khaing: aw: rawm: lok pa kied hax heue.
Yam si leed nawh bhawm: tix kieh suah rup, mai rao ngu pa rup an: lih khaing: jheeh nawh heue.
Nawh koe: riang kah ngawg tix, mai krax lhat krax graung hoik graoh kah plak sivoe nawh heue.
Nex nawn siniag sinu nawh khankix hoik kleuk tix tau mai paox tix, mai kaux cong: ang lai chix greed chix gah tix heue.
Rhawm: nawh kied kiien: awm: simaox, mai kied kiien: awm: simaox mhaw: pa koe: plak greem: heue.
Yam yaog nawh tix kaoh, can pa kied ting riang ting rao khankix koe: krax lhat krax graung, mawh kheu: kied lhat kix mai kix hu: teed kah can pa koe: hawt praok tix heue.
Viang pwi blung nawh kah vaig kawx ang koe: dee bleeh, mai kah pliah ang ah, te ang ah, mai pliah kak ang ah, ang lai mawh pa koe: bwanson: heue.
Nawh hoik een: hoik sawn: rhiem: awm: brex nghox, mai tawng lheung: awm: khaox rham: heue.
Te ang pon kieh nawh to:, simaox puing: kah ak maox vuh vied kawx awm: sibroe: kah son nawh heue.
Krong: pliah khankix nawh hoik deuh awm: gawng: nghox, nawh nyiah kah nyeu pwi pliah kah tix heue.
Kah greem: nawh lawm awm: shiag aw: brak max, mai khaix hu: nawh awm: rhoi: thai: kah daux ung: heue.
Nawh kieh dee pa raux lok awm: lok aw:, nawh kieh rawm: sigrit sigra: awm: aw: pa kraix bee kah heue.
Nawh prah pa sawng: riang plak khaix krax hu: tix, mai kieh rawm: sigrit sigra: paing awm: hauk paing heue.
Kah piang ca: haktiex ang lai koe: pa awm: nawh tix ceu kawx, nawh hoik mawh ceu pa phan: tix pa ang koe: krax lhat krax graung heue.
Nawh deuh can ceu pa ting khankix ang koe: ceu, mai nawh mawh Simiang kah piang kawnpraix pa koe: krax lhaong: rhawm: lhaong: rhi: khawm: uik heue.
Grawng: Doh Keud Yawbax Kah Phimap Tix
Khaix an: Yawbax pawk lox Simiang Siyiex mai ah nin:,
"Aux tawng kah pon yuh Maix Cao: kuceu, mai krax keud krax sawn: Maix Cao:, ang koe: pwi pa pon kieh pon thiang: kah heue.
Maix Cao: hoik chawk yuh nin:mawh pwi mawx pa pon mox krax keud krax sawn: daux pa ang tix koe: krax tawng krax yung lie?" Mawh kheu nan: aux hoik loe: tix ah, kah ceu pa ang aux tawng dee bleeh, ceu pa ang tawng khankix kieh mawh pa daox pa am: kah son aux heue.
Yuh bwanson: nghiiet heue, mai kieh aux sikah liak! Maix Cao: hoik chawk ah nin:,Aux tag chawkcheng: tix yaox maix, mai maix deeh pawk lox aux heue
"Aux hoik sax mhong: grawng: Maix Cao: kah daux yhaok tix heue. Viang mawh nan: yamin: aux hoik yaox Maix Cao: heue.
Mawh kheu nan: aux seeing: kah tokaux tix, mai doh keud kah phimap phighram: tix kah daux pa ngawm daux phawng: tiex mai nyaox heue."
Khaix hoik ah Simiang Siyiex lox in: kah Yawbax, mai Simiang Siyiex deeh ah nin: kah Eliphat ceu pwi Teman; "Krax pa songrhawm: songrhi: Aux hoik lih kah piang maix mai paoxgrawm maix rakaux heue. Grawhgrawng: nawh ang maix lai krai ceu pa khaw: pa caw kah Aux awm: hoik krai kawncau Aux Yawbax heue.
Mawh kheu nan: yamin: teei moi mhaing: aliah mu: mai yung: aliah mu:, kah son maix mai hu: kah kawncau Aux Yawbax, mai yuh krax tan pa gleeing kah son maix, khaix an: mai kawncau Aux Yawbax tag rawg bwan: son maix heue. Grawhgrawng: nawh Aux tag rieb kah lox bwan: rawg nawh, mawh kheu nan: Aux tag ang lai deuh phimap kah maix awm: pa koe: rhawm: cao: maix heue. Grawhgrawng: nawh maix ang lai krai ceu pa khaw: pa caw kah Aux awm: hoik krai kawncau Aux Yawbax heue."
Mawh kheu nan: Elihux ceu pwi Teman mai Biladat ceu pwi Shua mai Zopha ceu pwi Nemat lih hu: mai yuh nawh awm: gumlox pa tawm: Simiang Siyiex kah kix, mawh kheu hoik rieb Simiang Siyiex kah lox rawg Yawbax bwan: heue.
Mai Simiang Siyiex deeh tawx can pa hoik som nai: Yawbax khankix, khaix hoik rawg nawh bwan: kah son paoxgrawm paoxgru tix heue. Simiang Siyiex hoik tawx lheu: khaing: pa koe: nawh glang: kah: an: ra: son heue.
Khaix an:, puxaik pux o: nawh khankix mai pwi meed pwi tawng nawh glang: kah: in: kukaux, hoek bleeh kah nawh mai hoik ih nyaux tau mai nawh kah daux nyiiex nawh, mai kix tawx lox nyawmrhawm: nyawmrhi: mai khu: rhawm: nawh, son krax pa kharhawm: pa hoik viex Simiang Siyiex hoek kah piang nawh khankix heue. Kix kukaux hoik tawx mau plah mai jheep gien: khri: tix taix kah nawh heue.
Mai Simiang Siyiex hoik nawb bwan: kah piang Yawbax, bwanson: pa pon nawh baox nie lheu: pon khaing: pa koe: nawh yam jah heue. Grawhgrawng: nawh, nawh hoik koe: yung: khankix tix mheen: pon: rheng: mu:, mai kala-uk liah rheng: mu:, mai moi tang: tix rheng: mu:, mai la shiang: tix rheng: mu: heue.
Nawh baox pon kawn: simex aliah kaux mai kawn: bun: loe: kaux heue.
Mai nawh kok ceukaux kawn: yex tix mawh Yemima mai ceukaux kawn: i tix mawh Kizi mai ceukaux kawn: am: tix mawh KerinHapapuk heue.
Kah daux haktiex baoh an: khawm: uik bun: pa lheu: mhawm: grang khaing: cub kawn: bun: Yawbax ang koe: tix kaux kawx, mai keeing: kix tawx kix sidu pon sin: sinax puxaik kix heue.
Khaix an: Yawbax im: ju tiyieh tipon: num, mai hoik yaox kawnpraix mai kawn: saux kawn: sex tix khankix son daux ju pwi pon: ju heue.
Mawh kheu nan: Yawbax hoik yum: mai riex ju tix mai grum naog ju tix heue.
LAI YAOGYAW
(Psalms)
Yaogyaw
Ceu Pa Gauxrhawm: Gauxrhi: Tete Telai
Pwi pa ang hu: kah daux pa nyaw pa glaw: pwi pa ang rah ang see khankix, mai pwi pa ang cung ang ot kah daux krax pwi pa caox pa caig khankix, mai pwi pa ang ngawm tau mai pwi pa yuh pa ang cee ang cak khankix,
mai pwi pa gauxrhawm: kah daux beenli Simiang Siyiex, mai pa keud ku singaix ku sawm: khankix, koe: bwanson: heue.
Nawh awm: khaox pa kuah praok rawm: klawng: mai yam hoek bawg yam, chix plix plix heue. Mai lhax nawh kawx, ang chix teue: chix kroh, mai kaing pa yuh nawh kuceu khawm uik kawx tag sang ting lhaong: heue.
Viang mawh kawx nan:, pwi pa caox pa caig khankix, ang lai mawh nan:, kix awm: kam: riex pa phlu: bhaung: hu: heue.
Mawh kheu in: pwi pa ang rah ang see khankix, ang kaux ang cong: bawg yam prawng ca: kah kix, mai pwi pa caox pa caig khankix, ang pon tix ot dee ot pwi pa rauh pa see khankix heue.
Grawhgrawng: nawh, Simiang Siyiex hoik tawng kah daux krax pwi pa rauh pa see khankix, mai daux krax pwi pa ang rah ang see khankix, tag hoek krax laux krax leeing: heue.
Simiang Pa Hoik Laug Siyiex
Mawh kheu patix ceu kawn: pwi khankix, rien tix sang tieh feen kah Siyiex, mai mawh kheu patix ceu pwi in: khankix, briex kum: kawng: paox tix, sonsang yuh kaing pa ang koe: ceu koe: cak yuh kah mawx?
Simiang haktiex khankix, mai khunhawkham khankix ah nin:, "Ex briex kum: kawng: paox tix sonsang tieh feen kah Siyiex, mai phyawk kah Simiang Cao: Khrit1 pa hoik laug Nawh Cao: heue."
Ex tieh feen kah kix, sonsang luan ex khaing: pa kwang: kix kah ex, mai kix ah nin:, ex yieh tix tik kah pa kwang: kix kah piang ex heue.
Siyiex ngawm kah piang dangngeung Tix kah piang raoma: mai nyiah kah kix heue. Nawh Cao: kieh kix kaig tua heue.
Nawh Cao: sikah kah kix kah daux pa songrhawm: songrhi:, mai Nawh kieh kix khirhawm: mai lhat graung kah pa kied songrhawm: Nawh heue.
Mai Nawh Cao: ah nin:, "Aux hoik deuh Simiang cie Aux, kah piang gawng Zion pa singax singeh cie Aux heue."
Mai Simiang ah nin:, "Aux tag sang krai lox pa hoik krai Siyiex kah pwi khankix, Maix mawh kawn: simex Aux, Aux hoik kieh maix keh kah daux singaix heue.
Rawg kah Aux heue, phan: rawg Aux tag tawx ceu pwi khawm uik kah Maix, mai haktiex khawm uik kawx mawh cie Maix heue.
Maix teei khaoxgrix rhiem: mai kwang: kah piang kix, mai Maix tag sang pah kix phawng:, awm: pah kah aw: tiex phawng: heue."
Simiang haktiex mai khunhawkham khankix eue, nghiiet kah lox pa sidiex Aux yamin: awawx.
Yuh kaing jhaw: Siyiex kah daux pa lhat pa graung, mai gauxrhawm: gauxrhi: heue.
Nghiiet kah kawn: Nawh, phan: ang yuh nan:, Nawh tag songrhawm: songrhi: mai maix tag hoek krax laux krax leeing: heue. Grawhgrawng: nawh, Nawh Cao: lih pa bwanson: heue.
Lox Rawg Bwan: Plak Ponngawb
Lox pa rawg Davit bwan: yam to: nawh mox khaing: kawn: tix Abasalon
Simiang Siyiex eue, pwi pa koeng kah aux kied nie heue, pwi pa sang lah sang cha: kah aux kawx, kied haoh kied hun: heue.
Mai pwi haoh pwi hun: khankix krai grawng: aux ah nin:, Siyiex ang tau tix teem: kah nawh,
viang mawh kawx nan:, Simiang Siyiex eue, Maix mawh Cao: pa tiebtie aux, mai min: plakngai: aux, mai Cao: pa vaoh kaing: aux heue.
Sonsang teem: coi kah aux, yam kok yo aux kah Siyiex, Nawh Cao: ot kah piang gawng pa singax singeh mai nghiiet kah lox aux, mai deeh pawk kah lox aux heue.
Aux laig it mai deeh siduad mhawmmhawm:, grawhgrawng: nawh, Siyiex priex kah aux heue.
Viang pwi pa koeng kah aux, rob vungviang aux, kaing: mheen: kaing: sien: kawx, ang aux doh lhat.
Simiang Siyiex eue, kaoh heue, mai Siyiex aux eue, taoh kah aux heue. Mai Nawh Cao: simang: sibax pwi pa koeng kah aux khankix, mai raig rhang: pwi pa caox khankix heue.
Krax taoh mawh pa kaoh khaing: Siyiex, kieh bwanson: Nawh Cao: koe: kah piang pwi Nawh Cao: khankix liak.
Lox Rawg Bwan: Plak Ponbo
Lox yaogyaw Davit
Siyiex pa rauh pa see cao: pa priex aux eue, deeh pawk kah lox pa kok pa yo aux liak. Yam koe: krax pa khirhawm: khirhi: aux, Maix mawh Cao: pa teem: coi aux heue. Yamin kawx, caoxrhawm: kah aux mai nghiiet kah lox pa rawg aux bwan: liak.
Pwi khankix eue, pex kawn: sang nieb yuh min: plakngai: aux laux miex grheung:? Mai pie lhen: yuh kaing ceu pa ang rah ang see, mai pex kawn: sang moh tix yuh kah ceu pa ang koe: bwanson: miex grheung:?
Deuh pex tawng Simiang Siyiex hoik laug tix teei pwi pa singax singeh tix deuh son Nawh Cao:, mai Nawh Cao: nghiiet kah lox pa kok pa yo aux kah Nawh heue.
Kah daux pa lhat pa graung, tik kah phimap pa yuh tix, mai pex laig kah daux lawg dee it mai nghiiet kah daux rhawm: tix, kah grawng: inkix mhawmmhawm: heue.
Krax tan krax lu pa rauh pa see, tan lu kah Siyiex mai deuh rhawm: kah Nawh Cao: heue.
Mawh kheu jao pwi tom: nie ah nin:, "Mawh pwi mawx pa sang jhi: ex yaox ceu pa mhawm: pa mhiem: nieh, Simiang Siyiex eue, kieh pa riieng min: plakngai: Maix jhan riang kah piang ex liak."
Mai kieh rhawm: aux nie lheu: gauxrhawm: gauxrhi: khaing: kix pa pon gaox, pon nghox, mai pa pon plix siiet tom: nie liak.
Yam it aux laig it mhawmmhawm:, grawhgrawng: nawh, Maix Simiang Siyiex tix kaux khaing:, kieh aux luan khaing: pa caox pa ang mhawm: heue.
Lox Rawg Bwan: Sonsang Priex
Lox pa yaogyaw Davit
Simiang Siyiex eue, nghiiet kah lox aux mai lox pa ngia aux liak.
Simiang Siyiex eue, mawh kheu rawg aux bwan: kah Maix, nghiiet kah lox pa kok pa yo aux liak.
Simiang Siyiex eue, yam ponngawb Maix mhong: kah lox aux, mai yam ponngawb Maix mhong: lox rawg aux bwan: kah daux krax krox krax jun sivoe ngai: Maix heue.
Maix mawh Siyiex pa ang moh kah pwi pa ang rah ang see, mai ang rieb tix teei kah pwi pa caox heue.
Pwi pa caox pa caig ang pon tix hoek dee ot Maix, mai Maix koeng kah pwi pa ang rah ang see khawm uik heue.
Maix tag sang yuh laux kah pwi pa pie pa lhen: khankix, Simiang Siyiex seeing: brai: kah pwi pa pah pwi yum:, mai pwi pa pie pa lhen: khankix heue.
Phan: mawh aux pon tix hoek daux nyiiex Maix, kheu pon bwanson: Maix tom: nie, mai koe: rhawm: lhat kah Maix, mai pon tix krub kah Maix, daux nyiiex bwan: pa singax singeh heue.
Simiang Siyiex eue, mawh kheu koeng pwi kah aux, thong: aux hu: kah krax pa rauh pa see Maix liak, kieh daux krax Maix rah see sivoe ngai: aux liak.
Jheeh kix ang kaux sijax, daux rhawm: kix mawh pa caox, daux ghok kix mawh simeeig pa hoik bhang:, dak kix kawx jiet chix nyaw glaw: heue.
Siyiex eue kieh phimap hoek kah piang kix, kieh kix sivu kah krax keud krax sawn: tix, mai grheu: tix tik kix kheu phimap pa phit pa lud kix tom: nie, mawh kheu tieh feen kix kah Maix heue.
Pwi pa deuh rhawm: kah Maix, koe: krax gauxrhawm:. Kix koe: krax gauxrhawm: mai kok yo kheu kia: ngien Maix kah kix heue. Kix pa moh kah ceukaux Maix, kieh koe: krax gauxrhawm: gauxrhi: kah daux Maix liak.
Simiang Siyiex eue, nawb bwanson: kah pwi pa rauh pa see mai kieh bwanson: Maix tiebtie kah kix, awm: kraung naing pa tiebtie heue.
Lox Rawg Bwan: Yam Khirhawm:
Lox pa yaogyaw Davit
Simiang Siyiex eue, paw nyang deuh phimap kah piang aux, kah daux pa songrhawm: Maix, mai paw nyang sivied tix gau aux kah daux pa kied songrhawm: songrhi: Maix liak.
Simiang Siyiex eue, teem: coi kah aux, mawh kheu iak riang iak rao aux, Simiang Siyiex eue, kieh aux deeh brax deeh moi:, mawh kheu si-ang: aux hoik yung yiang: heue.
Mai ju aux kied lhat kied graung2 heue. Simiang Siyiex eue, aux kawn: sang kham: geu: miex grheung:?
Simiang Siyiex eue, Maix deeh hoek tix taoh ju aux liak. Mai deeh taoh aux kah daux krax pa caoxrhawm: Maix liak.
kah daux meung yum: ang pwi lai doh keud doh sawn: kah Maix, kah dee an:, pwi mawx pa sang yaogyaw kah Maix?
Aux iak riang iak rao kheu kied kha: aux rhawm: tix, mai jah rawm: ngai: leeing: ngaix leeing: sawm:, tom: kieh dee it aux caux lan heue.
Laux ngai: aux kheu khirhawm: aux, vuvi ngai: aux, jao pwi pa koeng kah aux khankix heue.
Pwi pa yuh kaing pa caox pa caig khankix eue, via hu: khaing: aux heue. Siyiex hoik mhong: kah lox yiiem riag yo aux heue.
Mai Simiang Siyiex hoik mhong: kah lox pa khyox khaw: aux, mai Simiang Siyiex hoik nghiiet kah lox pa rawg aux bwan: heue.
Can pwi pa koeng kah aux khawm uik, tag hoek krax kaig krax tua mai hoek krax som krax nai: heue. Kix kaig tua mai tang: to: dom: mawx dom: an: heue.
Lox Rawg Bwan: Son Pa rauh Pa See
Lox pa rhax Davit kah Simiang Siyiex son ceu pwi Benyamin
Simiang Siyiex aux eue, aux deuh rhawm: kah Maix heue, teei aux lih khaing: tawm: taix pwi pa tuktiaktukte:, mai taoh kah aux liak.
Phan: ang mawh nan:, awm: pa ang koe: cao: pa taoh, mai kix teei ju aux, awm: sivai sangsi: pa kiied pa rud tix tik heue.
Simiang Siyiex aux eue, phan: aux hoik yuh nan: ang ah, mai phan: koe: see: pa ang khaw: kah daux taix aux ang ah,
mai phan: aux deeh yuh krax phit krax lud kah pwi pa hoik khaw: kah aux, pa ang tie koe: grawhgrawng:, mai tuktiaktukte: awm: pwi pa koeng ang ah.
Phan: aux siep koe: phimap tix ceu ceu, kieh pwi pa koeng kah aux, hoek leue tix pon giex kah ju aux heue. Mai kieh kix dig ju aux kah piang tiex, mai kieh min: plakngai: aux rau dee tiiem kah daux phawng: tiex liak.
Simiang Siyiex eue, kah daux pa songrhawm: songrhi: Maix, kaoh liak, teei riang rao Maix mai tiebtie kah pwi pa koeng kah aux liak, siduad kah son aux, mai prawng ca: kah son aux liak.
Kieh ceu kawn: pwi khawm uik krawk khrawm: tix rob vungviang Maix, mai Maix deeh haok kah piang kix kah dee lhaong:,
Simiang Siyiex mawh Cao: pa prawng ca: kah kawn: pwi heue. Simiang Siyiex eue, aux rah see ang ah, grum naog ang ah, jhak mai prawng ca: kah piang aux liak.
Kieh pwi pa yuh kaing pa ang rah ang see khankix som, mai pwi pa yuh kaing pa rauh pa see khankix kaux cong: liak, Maix mawh Siyiex pa rauh pa see, Cao: pa chawkcheng: kah rhawmrhi: mai sok lax heue.
Siyiex mawh Cao: pa tiebtie kah aux, mai mawh Cao: pa taoh kah pwi pa rauh pa see heue.
Siyiex mawh Cao: pa prawng ca: rah see, mai Nawh Cao: songrhawm: songrhi: kah pwi pa ang rah ang see jheengjheeng: heue.
Phan: pwi ang thai: lox cox rhawm: tix, Siyiex klaing: vaig heue, mai Nawh Cao: hoik vaik ak mai nyeu tix deuh heue.
Kraung naing pa chix kieh yum:, mai te pa hoik rup ngu, Nawh Cao: hoik rien son kix heue.
Jhak heue, nawh yaox tix kham: geu: kah pa keh kah daux phimap phigrham:, mai nawh teei tix nghe: kah krax keud krax sawn: pa ang mhawm:, lih keh tix mawh pa khirhawm: khirhi: heue.
Nawh hoik kaong: daux tiex pa kied raux, mai tokaux nawh deeh rau kah daux tiex pa hoik kaong: nawh tiru heue.
Krax keud krax sawn: pa yuh nawh, pa ang mhawm: deeh hoek kah piang kaing: nawh, mai kaing pa yuh nawh pa ang mhawm: an:, deeh hoek kah piang khwan kaing: nawh heue.
Phan: mawh aux, tag sang yaogyaw kah Siyiex, Cao: pa prawng ca: pa rauh pa see, mai rhax lai yaogyaw kah ceukaux Simiang Siyiex pa ting pa lhaong: khaing: khawm uik heue.
Min: Plakngai: Siyiex Mai Min: Plakngai: Kawn: Pwi
Simiang Siyiex ex eue, ceukaux Maix mawh pa ting pa lhaong: kah piang haktiex in: khawm uik heue. Mai min: plakngai: Maix pa ting pa lhaong: hoik koe: kah piang raoma: heue.
Maix tawx krax yaw rangdi kah jheeh kawn: nyawm mai kawn: ngie: pa kawn peuex khankix, mai pwi pa koeng, mai pwi pa bak tix yuh krax phit krax lud daux rhawm: tix ang ah, Maix chix kieh yiien: yawg tix heue.
Phan: aux keud tix yaox grawng: pa phan: pa deuh Maix raoma:, khix, simuing: kah gien: taix Maix,
mai kawn: pwi mawh pa yuh kah mawx? Maix lai kawn: doh keud doh sawn: kah nawh. Phan: ang mawh nan: kawn: kawn: pwi mawh pa yuh kah mawx? Maix lai kawn: lailing kah nawh.
Maix hoik yuh nawh iak khaing: kawncau Siyiex khankix ceeix khaing: heue. Maix hoik ceep nawh kah mhok min: plakngai: mai ceu pa yungyi:.
Mai kieh Nawh giex kaing: kah can pa hoik phan: hoik deuh Maix khankix.
Pa mawh yung:, moi, totiag totu pa koe: piang haktiex,
sim: raoma: mai kax mai pa chix chuh chix hu: kah daux rawm: khankix hoik deuh kah greem: caong Nawh heue.
Simiang Siyiex eue, ceukaux Maix mawh pa ting pa lhaong: kah piang haktiex in: khawm uik heue.
Pa Yaogyaw Kah Siyiex
Simiang Siyiex eue, aux viex khawm rhawm: khawm rhi: tix, khawm uik yaogyaw kah Maix heue. Mai aux tag plak jhi: ceu pa daox pa am: Maix khawm uik heue.
Aux tag gauxrhawm: gauxrhi: kah daux Maix, mai aux tag rhax lai yaogyaw kah ceukaux Maix Siyiex pa ting pa lhaong: heue.
Grawhgrawng: nawh, pwi pa koeng kah aux khankix, deeh plak khaix mai goh tix lauxleeing: sivoe ngai: Maix heue.
Maix ot plak aux, mai hoik prawng ca:, Maix ngawm piang dangngeung tix prawng ca: rah see heue.
Maix hoik sivied tix gau kah pwi tang: ceu tang: cat khankix, mai Maix yieh tix tik kah pwi pa caox pa caig khankix, mai preet tix tik ceukaux kix leeing ju leeing phan: heue.
Pwi pa koeng khankix hoik laux hoik leeing:, mai veng dee ot kix kawx, hoik grai: hoik grhup pak lawg heue.
Simiang Siyiex mawh pa kaux pa cong: leeing ju leeing phan:, mai Nawh Cao: hoik cox dangngeung dee prawng dee ca:.
Nawh tag prawng ca: kah kawn: pwi piang haktiex kah daux pa rauh pa see, mai Nawh tag prawng ca: rah see kah kawn: pwi heue.
Simiang Siyiex mawh dee deuh rhawm: pwi pa yaox tix kham: geu: krax tuktiaktukte:, mai mawh dee deuh rhawm: yam hoek krax khirhawm: khirhi: heue.
Pwi pa tawng kah ceukaux Maix khankix, tag yumrhawm: kah Maix heue. Grawhgrawng: nawh, Simiang Siyiex eue, Maix ang chix tik chix vud kah can pwi pa sawg kah Maix heue.
Rhax lai yaogyaw kah Simiang Siyiex, pa ot kah daux veng Zion, mai krai grawng: pa yuh Nawh Cao: kah pwi khawm uik awawx.
Nawh Cao: chawkcheng: kah pwi pa teei ju pwi yum: khankix, mai doh keud kah pwi pa hoik yum: khankix heue. Nawh Cao: ang doh piawm: kah lox pa kok pa yo pwi pa kharhawm: kharhi: khankix heue.
Simiang Siyiex eue, caoxrhawm: mai taoh tix teei kah aux liak. Jhak kah pwi pa koeng kah aux, mai pa tuktiaktukte: kix kah aux liak, mai taoh tix teei aux lih khaing: krax yum: liak.
Phan: yuh nan:, aux tag sang jhi: bwanson: Maix khawm uik kah sivoe ngai: kawn: pwi pa ot kah daux veng Zion khankix heue. Mai aux gauxrhawm: gauxrhi: kheu hoik taoh Maix tix teei aux heue.
Pwi tang: ceu tang: cat khankix, deeh rau kah daux tiex pa hoik kaong: kix, mai caong kix deeh krix kah kie pa hoik taong: hoik kheem: cao: kix heue.
Simiang Siyiex yuh tokaux Nawh sidawng: kah daux pa prawng pa ca: Tix heue. Mai pwi pa ang rah ang see khankix, deeh sivu kah kaing pa hoik yuh tix tiru heue.
Pwi pa ang rah ang see mai can pwi pa piawm: kah Siyiex khankix, tag sang grheu: kix lih hu: kah daux meung yum: heue.
Nawh Cao: ang doh piawm: kah kix, pwi pa hot pa sibhawm: mai krax pa krox pa jun, pwi pa kharhawm: kharhi: khankix, ang chix laux chix leeing:, leeing ju leeing phan: heue.
Simiang Siyiex eue, kaoh heue, paw kieh pwi pex, mai kieh pwi tang: ceu tang: cat kham: geu: kah krax pa chawk pa cheng: sivoe ngai: Maix mai prawng ca: kah kix liak.
Simiang Siyiex eue, glhat kah kix liak, mai kieh kix tawng grawng: mawh kix pwi giex liak.
Lox Rawg Bwan: Sonsang Teem: Coi
Simiang Siyiex eue, Maix chix cung dee singai yuh kah mawx? Mawh kheu patix Maix chix mox yam yaox krax pa khirhawm: khirhi: yuh kah mawx?
Pwi pa ang rah ang see pa ting rhawm: canyhau: khankix, chix kieh pwi pa hot pa sibhawm: khankix, kharhawm: kharhi: heue. Mai kix tag yaox tix kham: pa giex pa phyawk pwi kah pa nieb lak keud kix tix yuh tiru heue.
Pwi pa ang rah ang see khankix, chix yuh grang tokaux tix, mai chix yaw kah tokaux tix mai nieb yuh pa ang cee ang cak kah Siyiex heue.
Pwi pa ang rah ang see khankix, keud daux rhawm: tix ah nin:, "Nawh Cao: ang lai deeh teei," kheu ang Siyiex koe: heue.
Krax pa hu: Nawh mawh pa kaux jheengjheeng:, mai krax prawng krax ca: Nawh, viang lhaong: mai singai khaing: Nawh kawx, Nawh Cao: phlu: tix tik kah pwi pa koeng kah Nawh khawm uik heue.
Nawh keud tix ah nin: kah tokaux tix, aux ang gah ang greed tix, mai ang tau tix hoek kah daux pa kharhawm: kharhi: tix bawg kawx heue.
Kah daux jheeh nawh hoik naog lox pa jhax pa lawg, mai pa pie pa lhen:, mai coh lox coh sikah heue, greem: dak nawh hoik naog ceu pa ang mhawm:, mai pa ang rah ang see heue.
Nawh briex mox tix hawt dex praok yaong: mai briex jawm tix pah pwi pa ang koe: phimap yum: dee glip, mai ngai: nawh briex jiang tix jhak kah pwi pa hot pa sibhawm: khankix heue.
Nawh briex mox tix awm: mox sivai sangsi: kah daux yeem heue. Nawh mox tix sonsang giex kah pwi hot pwi sibhawm:, mai nawh taing sau: rub kah pwi hot pwi sibhawm: tix sang giex kix hu: heue.
Pwi pa iak riang iak rao khankix, rau hu: kah daux tawm: taix pwi pa ting siawpsibrawm khankix heue.
Mai nawh ah nin: kah daux rhawm: tix, Siyiex hoik piawm: kah aux, Nawh Cao: hoik veeh ngai: Tix khaing: aux, mai ang yaox kah aux tix bawg kawx heue.
Simiang Siyiex eue, kaoh heue, Siyiex eue, yaog taix Maix liak, paw doh piawm: kah pwi pa kharhawm: kharhi: liak.
Mawh kheu patix pwi pa ang rah ang see khankix, nieb yuh pa ang cee ang cak kah Siyiex, kah daux rhawm: tix mai ah, "Ang lai jhak kah kix lie"?
Viang mawh kawx nan:, Maix hoik yaox heue, grawhgrawng: nawh, Maix mawh Cao: pa chix teem: kah pwi pa kharhawm: kharhi: khankix, mai pwi hot pwi sibhawm: khankix koe: kah daux tawm: taix Maix, mai Maix mawh cao: pa teem: coi kah kawn: doe: pa ang koe: miex keeing: khankix heue.
Maix raig tix tik kah plawng: taix pwi pa ang rah ang see khankix, mai pwi pa yuh pa caox pa caig khankix, son ang Maix sang yaox kah pa yuh kix tix bawg kawx heue.
Mai Siyiex mawh Khunhawkham leeing ju leeing phan: heue. Pwi tang: ceu tang: cat khankix, tag sang grai: hu: kah daux meung Nawh heue.
Simiang Siyiex eue, Maix hoik mhong: kah lox pa rawg pa mhaing: pwi pa kharhawm: kharhi: khankix, mai Maix kieh rhawm: kix nhim:, mai daong yhaok Maix nghiiet kah lox pa mhaing: kix liak.
Maix tag sang nghiiet kah lox pwi pa kharhawm: kharhi:, mai kawn: doe: pa ang koe: miex keeing: khankix, mai Maix ot kah plak kix, mai prawng ca: kah son kix kah pwi pa glhat kah kix heue.
Pa Deuh Rhawm: Kah Siyiex
Aux deuh rhawm: kah Simiang Siyiex heue, mawh kheu patix pex ah nin: kah ju aux, "Pu: hu: kah piang gawng awm: sim: yuh kah mawx"?
Jhak heue, pwi pa ang rah ang see khankix, hoik vaik ak mai sau: te sonsang puing: kah pwi pa rauh pa see khankix kah daux pa faik heue.
Phan: num: hoik laux hoik leeing:, pwi pa rauh pa see chix yuh kah mawx?
Simiang Siyiex ot kah daux nyiiex bwan: Nawh pa singax singeh heue. Dangngeung Simiang Siyiex koe: kah piang meung raoma:, ngai: Nawh jhak, mai siyieb ngai: Nawh sigaig kah pa yuh kawn: pwi heue.
Simiang Siyiex cheuk tix yaox kah pwi pa rauh pa see, mai Nawh koeng kah pwi pa ang rah ang see mai pa yuh pa caox pa caig khankix heue.
Nawh Cao: kieh gaox ngu rup lih kah piang kix pa ang rah ang see, pa mawh ngu mhat mai bhaung: caox pa kied hax, tag sang kieh mawh son pa ih kix heue.
Simiang Siyiex mawh pa rauh pa see, grawhgrawng: nawh, Nawh Cao: moh kah pa rauh pa see, mai Nawh ot plak pwi pa rauh pa see heue.
Lox Rawg Bwan: Sonsang Teem: Coi
Simiang Siyiex eue, taoh aux liak, grawhgrawng: nawh, pwi pa mhawm: ang koe:, mai pwi pa kaux sijax kawx, hoik grai: hu: khaing: kawn: pwi heue.
Paoxplawg paoxnyhawm: pa ot tau kawx, tix kaux hoik tix kaux, lah cha: kah paox tix, kah siyieb jheeh pa pie pa lhen:, mai kix sikah kah paox tix mai koe: rhawm: ra: mu: heue.
Simiang Siyiex tag sang pat tix tik siyieb jheeh, mai dak pa ah lox ting lox lhaong: mai pa pie pa lhen: khawm uik heue.
Pwi pa ah nin:, ex teei dak tix pex heue, siyieb jheeh ex tang: koe: mai ex, mai pwi mawx mawh Simiang kah piang ex, kix nieb ah nan: heue.
Simiang Siyiex ah nin:, "Aux tag kaoh cung sipiag kix, pwi pa yaox tix kham: geu: kah pa tuktiaktukte:, mai krax kharhawm: kharhi:, mai krax pa cairhawm: cairhi:, mai pwi pa ngheeik ngia khankix heue, mai Aux tag sang tawx krax pa nyawmrhawm: nyawmrhi: kah pwi pa yaox tix kham: geu: kah krax pa nunai: khankix heue.
Gumlox Simiang Siyiex singax singeh awm: mau pa hoik thi: mai hoik tieh aliah bawg heue.
Simiang Siyiex eue, Maix kia: ngien kah kix, mai tiebtie kah kix, ceu pwi yamin jheengjheeng: heue.
Pwi pa ang rah ang see khankix, vuvie tix sinax kawn: pwi kudauh kudee tom: yam hoek bawg yam yaog lhaong: kah pwi pa tiiem khankix heue.
Lox Rawg Bwan: Sonsang Teem: Coi
Simiang Siyiex eue, Maix tag sang piawm: kah aux miex grheung:? Maix tag sang mox ngai: tix khaing: aux miex grheung:?
Ceu pa khirhawm: khirhi: kah daux rhawm: aux ku singaix ku sawm:, aux kawn: sang yaox tix kham: miex grheung:? Pwi pa koeng kah aux khankix, kawn: sang ting kah piang aux miex grheung:?
Simiang Siyiex aux eue, veeh plakngai: Maix mai nghiiet kah lox aux liak, kieh ngai: aux riang liak, phan: ang mawh nan:, ha kox laig it mai yum: heue.
Pwi pa koeng kah aux, tag sang ah nin: nieh, "Aux hoik pex kah nawh", nu kah gauxrhawm: pwi pa lak lheet kah aux khankix, yam yaox aux krax khirhawm: khirhi: heue.
Viang mawh kawx nan:, aux deuh rhawm: kah krax pa caoxrhawm: Maix, mai rhawm: aux koe: krax gauxrhawm: gauxrhi: kah krax pa taoh Maix heue.
Aux rhax lai yaogyaw kah Simiang Siyiex, mawh kheu hoik yuh Nawh bwanson: kah aux heue.
Pwi Pa Caox Pa Caig
Pwi pa daox pa aw: khankix keud tix ah nin: kah daux rhawm: tix, "Ang Siyiex koe:," mai kix mawh pwi pa hoik cux hoik sium:, mai yuh pa seeing: pa brai: heue. Pwi pa yuh pa mhawm: pa mhiem: ang koe: tix kaux kawx.
Simiang Siyiex ot kah piang meung raoma:, mai jhak kah kawn: pwi mai koe: pa tawng pa yung mai pwi pa sawg kah Nawh koe: tix kauxkaux lie? Ang koe: lie?
Kawn: pwi khawm uik hoik lud krax, mai hoik cux hoik sium: awm: paox tix khawm uik, pwi pa yuh pa mhawm: ang koe:, pon ang koe: pie tix kaux kawx.
Can pwi pa yuh pa caox khawm uik ang kix tawng lie? Kix kiied tix ih pwi Aux, awm: ih kix khaomun mai ang kok kah Siyiex lie?
Kah dee an:, tag koe: krax pa kied lhat kied graung, grawhgrawng: nawh, Siyiex ot plak pwi pa rauh pa see heue.
pex kieh pwi pa hot pa sibhawm: kaig tua, mawh kheu kix deuh rhawm: kah Simiang Siyiex heue.
Kieh krax taoh pwi Isarilax lih hoek khaing: piang gawng Zion liak, yam deeh viex Simiang Siyiex siliex pa viex kix hu: deeh hoek, Yakop tag gauxrhawm: gauxrhi: mai pwi Isarilax tag sang gauxrhawm: gauxrhi: heue.
Ceu Pa Moh Siyiex
Simiang Siyiex eue, pwi mawx sang ot kah daux nyiiex bwan: Maix? Pwi mawx sang ot kah piang gawng pa singax singeh Maix?
Pwi pa hu: kah daux krax pa rauh pa see, mai pwi pa yuh pa mhawm: pa mhiem:, mai pwi pa krai lox pa kaux sijax kah daux rhawm: tix.
Mai pwi pa ang teei dak tix coh lox coh sikah, mai pwi pa ang yuh kaing pa ang mhawm: ang mhiem: kah paoxgrawm tix, mai pwi pa ang sa ang lao kah paoxplawg paoxnyhawm: tix.
Mai pwi pa ang yuh paox yuh pie kah pwi pa caox pa caig sivoe ngai: nawh, mai lhat graung kah Siyiex, viang tokaux nawh lauxleeing: kawx, sijax mukheu nawh ang yuh laux awm: pa hoik tiex hoik tu nawh heue.
Nawh tawx pwi yaog yaing mau kawx, ang teei rao mai mawh pwi pa ang ih mau chun: praok kah pwi pa ang koe: phimap phigrham:, mai nawh tag mawh pa kaux pa cong: leeing ju leeing phan: heue.
Pa Chix Deuh Rhawm: Kah Lox Rawg Bwan:
Siyiex eue, kia: ngien kah aux liak, grawhgrawng: nawh, aux deuh rhawm: kah Maix heue.
Aux ah nin: kah Siyiex, "Maix mawh Simiang aux, lheu: khaing: Maix ceu pa mhawm: ang koe: mai aux."
Pwi pa singax singeh pa ot kah daux meung Maix, mawh pwi pa mhawm: pa mhiem: pa khaw: rhawm: aux heue.
Can pwi pa hawt kah krax tang: nyaing tag sang pon krax pa kharhawm: kharhi: tom: nie heue. Aux ang rhawm: kieh nham: tix lih, sonsang tan lu kah son kix, pie ceukaux kix kawx, aux ang rhawm: kieh simawd simie.
Simiang Siyiex mawh sonsang pon aux sin:, mai son kawk pa sang nyaux aux heue. Maix mawh Cao: pa priex sin: aux, mai Cao: pa chix gwieh heue.
Mee: haktiex pa keung: aux tix kwang:, caw dee mhawm:, mai sin: pa pon aux mawh pa mhawm: pa mhiem: heue.
Aux yaogyaw bwanson: Simiang Siyiex, kah pa tawx krax pa tawng pa yung kah aux, yam ponsawm: kawx, rhawm: aux deeh so: kah aux heue.
Aux deuh Simiang Siyiex sivoe ngai: aux jheengjheeng: heue, grawhgrawng: nawh, kheu Nawh Cao: ot plak khawn: dawm: aux, mai ang aux lai greed lai gah.
Mawh kheu in:, rhawm: aux tom: nyawmrhawm:, mai min: plakngai: aux tag gauxrhawm: gauxrhi:, lheu: khaing: in: nex aux kawx, ot kah daux krax krox krax jun heue.
Grawhgrawng: nawh, Maix ang tik ang grham: ju aux kah daux meung yum:, mai Maix ang kieh pwi pa singax singeh cie Maix hoek krax cux krax sium:.
Maix tag jhi: aux yaox krax pa im: ju, krax pa grum naog mai krax pa gauxrhawm: gauxrhi: sivoe ngai: Maix, mai koe: krax pa gauxrhawm: gauxrhi: dex taix khawn: dawm: Maix jheengjheeng: heue.
Lox Rawg Bwan: Pwi Pa Koe: Phimap Tix Kaux
Simiang Siyiex eue, ot plak pwi pa rauh pa see mai nghiiet kah lox pa kok pa yo aux liak, veeh yhaok Maix mai nghiiet kah lox pa rawg pa mhaing: aux kah daux jheeh pa ang pie ang lhen: liak.
Kieh krax prawng krax ca: aux, mawh pa kaoh khaing: Maix, mai kieh ngai: Maix jhak kah grawng: pa rauh pa see liak.
Mai cheukcheu: tix yaox kah rhawm: aux, hoek tix kia: ngien kah aux yam ponsawm:, yam cheukcheu: Maix tix yaox kah aux, mai ang yaox phimap tidtix, pa keud aux mai lox jheeh aux kawx, ang koe: dee phit dee lud.
Mawh kheu hawt aux gumlox Maix, mai via khaing: krax pa caox pa caig, pa yuh pwi tang: kaux khankix heue.
Kieh caong aux kaux cong: yam hu: aux daux krax Maix, mai son ang caong aux cang: klad liak.
Simiang Siyiex eue, aux rawg mhaing: kah Maix mawh kheu hoik pawk Maix lox aux, veeh yhaok Maix mai nghiiet lox aux liak.
Teei taix khawn: dawm: Maix taoh kah pwi pa deuh rhawm: kah Maix khaing: tawm: taix pwi pa tieh pa feen kah Maix, Simiang eue, Maix jhi: yaox krax moh krax rhawm: pa daox pa am: Maix liak.
Kia: ngien aux, awm: jhak Maix kah kawn: ngai: Tix, mai tawb aux kah greem: veei pruik Maix liak.
Mai kieh aux luan khaing: tawm: taix pwi pa caox pa caig, pa tuktiaktukte: kah aux, pa mawh pwi pa koeng pa simie tix teei aux yum:, mai pa rob hawt dex vungviang aux khankix liak.
Kix ca: keud son pa sak tokaux tix, mai ah lox ting lox lhaong: heue.
Aux hu: dee mawx ang ah, kix hoik rob vungviang aux, sonsang goh aux kah piang tiex, kix jeung: ngai: kah aux heue.
Awm: sivai sangsi: pa simie tix rud tix ih kah to: pa hoik pon tix, mai awm: kawn: sivai sangsi: pa mox tix kah daux yeem dee ot tix heue.
Simiang Siyiex eue, kaoh heue, tiebtie kah kix, mai nyhot kix goh liak, teei vaig Maix mai kieh aux luan khaing: tawm: taix pwi pa ang rah ang see khankix liak.
Simiang Siyiex eue, kah daux tawm: taix Maix, kieh aux luan khaing: tawm: taix pwi, mai tawm: taix pwi haktiex liak. Yam kawn: im: ju kix yamin: kieh kix sak naog kah sin: Maix, mai kieh kix deuh son kawnpraix tix ang ah, mai son kawn: saux kix heue.
Grawhgrawng: nawh, aux mawh pwi pa rauh pa see tag sang pon tix yaox kah plakngai: Maix heue. Yam siduad aux, rhawm: aux hoik grum naog awm: rieng pakpeung: Maix heue.
Lox Lai rhax Davit Khaix Hoik Pex Kah Pwi pa Koeng kah Nawh Khankix
Simiang Siyiex eue, aux moh kah Maix, kheu mawh Maix riang rao aux heue.
Simiang Siyiex mawh rang: ting dee deuh aux rhawm: tix, mai mawh guh veng pa kaux pa tiebtie kah aux, rung: pa lawm Nawh taoh tix teei aux, mai mawh tab pa kaux son aux heue.
Mai aux tag kok yo kah Simiang Siyiex, pa khaw: aux tix yaogyaw kah Nawh mawh kheu hoik taoh Nawh aux luan khaing: daux tawm: taix pwi pa koeng kah aux khankix heue.
Maox krax yum: hoik rob vungviang aux, mai aux lhat kah rawm: klawng: yum: pa chix kieh laux heue.
Maox meung yum: hoik rob vungviang aux, mai aux hoik krix kah kie krax yum: heue.
Yam yaox aux krax nu krax khawm, aux kok yo kah Simiang Siyiex, mai aux rawg mhaing: kah Nawh heue. Mai Nawh mhong: kah lox kok yo aux kah daux nyiiex bwan: Nawh, mai lox pa kok yo aux sivoe ngai: Nawh hoek daux yhaok Nawh heue.
Yam an: haktiex yungyiang: pungpang:, mai gawng lua khankix greed tix hu:, mawh kheu kied songrhawm: Nawh Cao: heue.
Mai taox ngu lih khaing: daux meeh Nawh, mai ngu lih khaing: daux jheeh Nawh, mai gaox ngu rup kheu Nawh heue.
Nawh Cao: plak raoma: lih hoek kah greem: caong Nawh mai lih tix mawh pa faik heue.
Nawh Cao: brug kah kawncau Siyiex Cherubin hoek, mai pu: hu: vungviang mai hu: kah piang pruik bhaung: heue.
Nawh yuh pa faik mai mox kah daux rawm:, mai paiawm: lung rob vungviang Nawh heue.
Mawh kheu jhan pa riieng sivoe ngai: Nawh, mai paiawm: viex mu: pre:, mai gaox ngu pung prang: hu: heue.
Simiang Siyiex pa ting pa lhaong:, kieh sinum praix lih kah piang raoma:, mai ploi: lox sinum lih mawh mu: pre: mai gaox ngu heue.
Nawh puing: ak hu: kah kix, mai ploi: pukplak praix mai kieh kix som mai tang: to: heue.
Simiang Siyiex eue, Maix deuh phimap kah kix, kah daux pa toek Maix bhawm: kah daux meeh Tix, mai Maix kieh greem: rawm: mai jaong num: haktiex lih sidawng: heue.
Nawh Cao: ot dee lhaong: mai nyeu taix Tix tok aux lih khaing: kah daux rawm: pa ting pa raux heue.
Mai taoh tix teei aux lih khaing: pwi pa koeng kah aux, pa nie lheu: ting riang khaing: aux, mai pa koeng riang ciang khoi: kah aux khankix, mawh kheu ang aux lai pex kah kix heue.
Kix hoek tix yuh pa caox kah aux, mai singaix yam yaox aux krax khirhawm: khirhi:, viang mawh nan:, Simiang Siyiex mawh dee deuh aux rhawm: heue.
Nawh thong: aux hu: kah dee vieh dee va:, mai Nawh taoh tix teei aux, kheu kied moh Nawh aux heue.
Simiang Siyiex tawx bwanson:, awm: pa rauh pa see aux, mai tawx awm: taix pa singax singeh aux heue.
Grawhgrawng: nawh, kheu hawt aux daux krax Simiang Siyiex jheengjheeng:, mai aux ang lai yuh pa caox pa caig mai ang lai tik kah Siyiex .
Krax prawng krax ca: Nawh, hoik koe: sivoe ngai: aux, mai aux ang tik kah beenli Nawh Cao: heue.
Aux hoik grum ceu pa mhawm: pa mhiem: sivoe ngai: Nawh, mai aux hoik via kah phimap pa caox heue.
Grawhgrawng: nawh, Simiang Siyiex, tawx bwanson: awm: pa rauh pa see aux, mai tawx awm: taix pa singax singeh plak sivoe ngai: Nawh Cao: heue.
Mai tawx krax pa caox rhawm: kah kix, pwi pa chix caox rhwm:, Maix tawx krax grum naog kah kix pa grum naog heue.
Maix tawx pa singax singeh kah kix pwi pa singax singeh, mai Maix tawx pa lah pa cha: kah kix pwi pa lah pa cha: heue.
Maix taoh tix teei kah pwi pa hot pa sibhawm: khankix, mai yeen tiem kah pwi pa ting rhawm: lhaong: ngai: khankix heue.
Simiang Siyiex tok kawk ngu aux mai jhan riang kah daux pa faik heue.
Grawhgrawng: nawh, aux pon to: dex tab Maix, mai pon jao: kah guh veng, mawh kheu deuh aux rhawm: kah Maix heue.
Mai daux krax Siyiex mawh pa grum naog, mai sijax mukheu Simiang Siyiex, hoik mawh pa thi: tix singax singeh heue. Nawh Cao: mawh ceu pa tiebtie kah kix pwi pa deuh rhwm: kah Nawh heue.
Lheu: khaing: Simiang Siyiex, siyiex mawx pa kawn koe: tix kauxkaux, lheu: khaing: Simiang Siyiex ex, simaox rang: mawx pa kawn ting khaing: Nawh lie?
Siyiex teei maox rawd nyoi, mai nhawt kah nyoi aux, mai kieh krax hu: aux rah see heue.
Nawh kieh caong aux brax to: awm: caong cak, mai kieh aux cung kah dee lhaong: heue.
Nawh gau taix aux, sonsang chix puing: naing, mai plawng: taix aux pon raig tix tik kah ak rhiem: heue.
Nawh tawx ceu pa tiebtie pa taoh kah aux, mai taix khawn: dawm: Nawh joh jhan kah aux heue. Nawh yaog aux ting kah daux krax gun krax yeung pa caoxrhawm: Nawh heue.
Nawh Cao: kieh krax hu: aux blang:, son ang caong aux cang klad.
Aux pheet kah pwi pa koeng kah aux tom: krup, mai phan: aux ang nyang yuh kix laux lak pak leeing:, ang aux deeh hoek.
Aux dig kix goh kah greem: caong tix, tom: ang kix lai pon kaoh.
Grawhgrawng: nawh, Maix nhawt maox rawd nyoi aux, sonsang koe: riang tix chix puing: naing kah kix pa ot tang: plak goh greem: caong aux heue.
Maix hoik kieh pwi pa koeng kah aux khankix, to: plak khaix aux mai aux sang yuh lauxleeing: kah pwi pa koeng kah aux pak lawg heue.
Mai kix riag yo miex ding kawx, ang koe: pwi pa taoh, kix kok yo kah Simiang Siyiex kawx, Nawh Cao: ang lai pawk.
Yam an: aux krid kix phawng: awm: phawng: tiex pa phlu: bhaung:, mai aux klup tix tik kix kah daux krax awm: nyheu: nyhawk heue.
Mai Maix kieh aux luan khaing: pwi pa lah pa cha: kah aux, Maix kieh aux mawh Simiang cao: pa giex kaing: piang pwi tang: ceu tang: cat, pwi pa ang aux tawng khankix, mawh siliex aux heue.
Yam mhong: kix lox aux, nghiiet lox aux dom: mawx dom: an:, mai pwi tang: ceu tang: cat khankix khyox khaw: kah aux heue.
Kix khleep ngai: mai lih hu: khawm siyaung: tix khaing: daux tab dee mox tix heue.
Simiang Siyiex mawh Cao: pa im: ju, mai rang: ting aux, kieh koe: bwanson: liak, kieh yaog ting lhaong: kah Siyiex Cao: taoh aux liak.
Siyiex Cao: prawng ca: plak aux, kieh cub pwi khankix ot kah greem: aux.
Mai Maix kieh aux luan khaing: daux tawm: taix pwi pa koeng kah aux, Maix yaog aux ting lhaong: kah piang pwi pa ot tang: plak, mai kieh aux luan khaing: daux tawm: taix pwi pa tud pa rhim: khankix heue.
Mawh kheu nan: Simiang Siyiex eue, aux tag sang yaogyaw kah Maix, mai aux tag sang rhax lai yaogyaw kah ceukaux Maix heue.
Nawh Cao: hoik tawx krax taoh pa ting pa lhaong: kah Simiang pa hoik laug Nawh, mai Nawh Cao: hoik yuh bwanson: jah kah Davit kaw pa hoik groi Nawh rawm: bee mai simie ceucat nawh leeing ju leeing phan: heue.
Min: Plakngai: Siyiex
Raoma: plak jhi: min: plakngai: Siyiex, mai plak jhi: grawng: pa hoik yuh Nawh Cao: kah taix Tix khawm uik heue.
Hoik krai tix ngaix hoik tix ngaix, hoik gau tix sawm: hoik tix sawm:.
Ang lai ang: moing, ang lai krai lox, ang mhong: lox tidtix.
Mai maox tiag kix hoik tah hu: kah piang haktiex kudauh kudee, mai lox kix hoik tah praix tom: sidauh haktiex heue. Kah piang an: Nawh dueh nyiiex gox son singaix heue.
Singaix an:, awm: pwi pa yuh kapaox pa lih khaing: daux lawg nyiiex nawh, mai gauxrhawm: to: hu: hawt krax awm: pwi pa ting riang heue.
Nawh lih hu: lailing dee sidauh raoma:, tix dauh hoik tix dauh, mai ang pon tix mox tix ceu kawx, kheu sidaing: hax heue.
Gumlox Beenli Siyiex
Beenli Simiang Siyiex mawh pa grum naog mai chix cox rhawmrhi: ju ex heue. Mhai: sakse pa kham: Simiang Siyiex mawh pa mawh pa meh, mai chix kieh pwi pa ang koe: pingnya deeh koe: pingnya heue.
Beenli Simiang Siyiex mawh pa rauh pa see, mai chix kieh rhawmrhi: koe: krax gauxrhawm: gauxrhi:, lox tawm: beenli Simiang Siyiex mawh pa singax singeh, mai chix kieh ngai: ex riang heue.
Rhawm: pa lhat pa graung kah Simiang Siyiex, mawh pa singax singeh jheengjheeng:, mai krax pa prawng pa ca: Simiang Siyiex mawh pa kaux sijax mai pa rauh pa see khawm uik heue.
Gumlox Simiang Siyiex mawh pa lheu: mhawm: khaing: khri:, mai lheu: mhawm: khaing: khri: pa hoik thi: tom: nie, mai nie lheu: tie: khaing: rawm: kaing: hia:, mai nie lheu: tie: khaing: rawm: kaing: hia: pa khaw: kah rhawmrhi: pwi heue.
Mawh kheu ceu in:, awm: pa hoik tawx Maix satix kah pa mawh siliex Maix, Maix deeh tawx kah kix, pwi pa pon hawt tix yuh khankix, tag pon bwanson: pa ting heue.
Pwi mawx pa chix tawng kah dee phit dee lud tokaux tix? kieh aux luan khaing: phimap pa koe: dee glip liak.
tiebtie kah siliex Maix, son ang lai yuh phimap pa ting liak, paw lai kieh phimap khankix ting kah piang aux liak, phan: yuh nan:, aux hoik grum naog mai luan khaing: pa phit pa lud pa ting heue.
Kieh lox pa lih khaing: daux jheeh aux, mai krax pa keud pa sawn: aux mawh pa khaw: rhawm: khaw: rhi: kah plak sivoe ngai: Maix liak. Mai Simiang Siyiex eue, Maix mawh rang: ting aux, mai mawh Cao: pa Taoh aux heue.
Lox Rawg Bwan: Son: Sang Mawh Pa Pex
Kieh Simiang Siyiex pawk lox maix yam yaox maix krax khirhawm: khirhi:, kieh ceukaux Siyiex Yakop yaog Maix ting lhaong: liak.
Kieh Nawh Cao: ploi: krax teem: krax coi pa kaoh khaing: Maix dee singax singeh, mai krax pa joh jhan lih khaing: piang gawng Zion heue.
Kieh Nawh Cao: doh keud doh sawn: kah krax lu krax tan kuceu khawm uik, mai rieb tix teei kah pa gleeing tix tan khankix liak.
Kieh Nawh Cao: tawx can ceu pa simie maix tix lo, mai baox tawx krax pa keud pa sawn: maix grum naog khawm uik heue.
Aux gauxrhawm: gauxrhi: kah krax taoh Maix, mai aux pak chix kah daux ceukaux Siyiex, kieh Simiang Siyiex tawx pa rawg Maix bwan: khawm uik liak.
Yamin aux hoik tawng grawng: Simiang Siyiex hoik taoh kah Kaw pa hoik groi Nawh rawm: bee, Nawh Cao: ot kah piang meung raoma: kah dee singax singeh, mai pawk lox kix, mai taoh kix kah taix khawn: dawm: Nawh Cao: heue.
Mai pwi tiblah deuh rhawm: kah ling: moi, ling: brung, phan: mawh ex yaogyaw kah ceukaux Simiang Siyiex ex heue.
Kix sideeing caong mai goh heue, phan: mawh ex kaoh cung heue.
Simiang Siyiex eue, taoh kah aux liak, mai deeh pawk kah lox aux yam kok yo aux kah Maix liak.
Lox Yaogyaw Kheu Hoik Pex Nawh
Simiang Siyiex eue, kah daux riang rao pa tawx Maix, Simiang gauxrhawm: gauxrhi:, mai kah daux pa taoh Maix kied gauxrhawm: gauxrhi: heue.
Maix caoxrhawm: mai tawx awm: pa lo nawh kah daux rhawm: tix, Maix paw thiang: tix tik kah lox pa rawg nawh bwan: kah jheeh liak.
Grawhgrawng: nawh, Maix tawx bwanson: pa kied mhawm:, mai Maix ceep mhok khri: kah piang kaing: Nawh heue.
Nawh sawg bwanson: krax pa im: ju, mai Maix tawx krax pa lang: ju leeing ju leeing phan: heue.
Nawh ting min: plakngai: kheu krax pa taoh Maix, mai tawx min: plakngai: Maix mai siawpsibrawm pa ting deuh kah piang nawh heue.
Mai Maix hoik ciak tix deuh bwanson: kah Nawh leeing ju leeing phan:, mai kieh Nawh kied gauxrhawm: sivoe ngai: Maix heue.
Grawhgrawng: nawh, Simiang deuh rhawm: kah Simiang Siyiex, mai Nawh kaux cong: leeing ju leeing phan:, kheu bwanson: Siyiex Cao: pa ting pa lhaong: khaing: khawm uik heue.
taix Maix tag sipub kah pwi pa koeng kah Maix khawm uik, mai taix khawn: dawm: Maix tag sipub kah pwi pa koeng pa khoi: kah Maix heue.
Yam lih pa songrhawm: Siyiex, kieh kix lih mawh awm: glah ngu, mawh kheu kied songrhawm: Siyiex, mai tag bleet kix, mai tag sang gleeing tix tik kix kah daux ngu heue.
Maix tag yieh tix tik simie ceucat kix kah piang haktiex, mai tag yuh kawnpraix kix lauxleeing: kah sinax kawn: pwi heue.
Grawh grawng nawh, kix keud tix yuh pa ang mhawm: tang: plak kah Maix, viang mawh nan:, ceu pa nieb keud kix tix yuh khankix, lih tix mawh pa giex pa going heue.
Grawhgrawng: nawh, Maix kieh kix deeh veeh tix hu: plak khaix tix mai Maix nyeu te kah plakngai: kix heue.
Simiang Siyiex eue, kieh yaogyaw kah Maix, kheu riang rao siawpsibrawm Maix, mai ex rhax lai yaogyaw kah Maix heue.
Lox Kok Yam Khirhawm: Mai Lox Yaogyaw
Siyiex Aux, Siyiex Aux, Maix lai tik vud Aux yuh kah mawx? Yam kok yo Aux Maix, sonsang taoh kah Aux, Maix lai ot singai khaing: Aux yuh kah mawx?
Siyiex Aux eue, yam kok yo Aux Maix, yam pon singaix Maix ang pawk lox Aux, mai yam ponsawm: kawx, Aux kok yo Maix, mai Aux ang yaox dee laux dee lee: tix heue.
Maix mawh Cao: pa singax singeh, pa ot kah daux pa yaogyaw pwi Isarilax heue.
Tax du ex khankix, deuh rhawm: kah Maix, mawh kheu kix deuh rhawm: kah Maix, Maix tom: taoh kix luan heue.
Mai kix kok yo kah Maix, mai hoek krax taoh, mai Maix kieh kix luan khaing: krax pa kaig pa tua heue.
Phan: mawh aux, ang mawh pwi, mawh ngie kawng3, mai dee sa dee lao pwi mai dee yuh pwi khawm uik pa ang ceu ang cak kah heue.
Can pwi pa yaox kah aux khawm uik, nyiah meung aux, mai kix blex dak tix, mai vutvied kaing: kap tix heue.
Mai kix ah nin:, nawh deuh rhawm: kah Simiang Siyiex, sonsang taoh nawh luan heue. Mawh kheu khaw: rhawm: Nawh Cao: kah nawh kieh taoh nawh lih heue.
Maix kieh aux deuh rhawm: kah Maix, tom: yam bluh Maix aux lih khaing: vaig miex tix, mai yam kawn: peuex aux teeh miex tix heue.
Aux hoek kah daux tawm: taix Maix tom: yam keh, mai Maix hoik dawg mawh Siyiex aux tom: yam ot aux kah daux vaig miex tix heue.
Paw lai ot singai khaing: aux, grawhgrawng: nawh, krax khirhawm: khirhi: hoik dex mai aux, mai pwi pa teem: coi aux ang koe: tix kaux kawx.
Moi mhaing:, moi praix rob vungviang aux tom: nie, mai moi praix pa ting riang ting rao pa koe: kah daux meung Bashan kawx, rob vungviang aux heue.
Kix ang: jheeh tix awm: sivai sangsi: pa graox mai rud kiied tix ih heue.
Kix klup tix tik aux, piang tiex awm: rawm:, si-ang: siawp aux kawx, hoik tang: hu:, rhawm: aux kawx, ceh hu: awm: bee kax, kah daux naok aux heue.
Riang rao aux hoik hit kroh hu: awm: aw: taux, dak aux kawx, hoik klieb hu: mai si-ang: kap heue. Mai hoik kieh aux rau daux phawng: tiex tom: sidauh yum: heue.
Cub sox khankix rob vungviang aux, mai cub pwi pa caox khankix kawx, hoik rob vungviang aux, mai suat taix caong aux doh heue.
Aux hoik pon simin kah si-ang: tokaux aux, mai kix maong tix jhak kah aux heue.
Kix teei kraung ceep aux gwieh tix ih, mai sibex aux kawx, kix nieb tix yaox heue.
Viang mawh kawx nan:, Simiang Siyiex eue, paw lai ot singai khaing: aux liak. Maix pa mawh Cao: riang rao aux eue, nied tix hoek laung laung mai teem: coi aux liak.
Mai taoh ju aux khaing: lawm vaig mai taoh pwi pa moh aux khankix lih khaing: daux tawm: taix sox khankix liak.
Taoh aux lih khaing: jheeh sivai sangsi: khankix liak, mai deeh pawk lox aux yam kok yo aux Maix kah daux teet rung: moi liak.
Aux tag krai grawng: Maix kah puxaik aux khankix heue. Aux tag yaogyaw Maix kah sinax pwi haoh pwi hun: khankix heue.
Pwi pa lhat pa graung kah Simiang Siyiex khankix eue, yaogyaw kah Nawh Cao: heue. Simie ceucat Yakop khawm uik eue, yaog min: plakngai: Nawh ting heue. Ceu pwi Isarilax khankix eue, lhat graung kah Nawh Cao: heue.
Grawhgrawng: nawh, Nawh Cao: ang nieb yuh pa ang cee ang cak kah pwi pa hot pa sibhawm:, mai pa kharhawm: kharhi:, Nawh ang veeh ngai: khaing: kix, mai Nawh Cao: nghiiet kah lox pa rawg pa mhaing: kix heue.
Aux yaogyaw kah Maix kah daux sinax pwi haoh pwi hun:, mai aux hawt yuh sijax mukheu awm: pa hoik kham: aux tix yuh sivoe ngai: pwi pa lhat pa graung kah Maix heue.
Pwi pa hot pa sibhawm: tag yaox tix sawm: tom: sak heue, mai pwi pa sawg kah Siyiex khankix tag yaogyaw kah Nawh Cao: heue. Kieh rhawm: pex koe: riang koe: rao jheengjheeng: liak.
Dee sidauh haktiex khawm uik, tag sang doh keud mai deeh tieh tix hoek kah Simiang Siyiex, pwi kuceu khawm uik, tag sang krub plak sivoe ngai: Maix heue.
Grawhgrawng: nawh, piang haktiex khawm uik, hoik mawh meung cie Nawh, mai Nawh Cao: kwang: kah piang pwi khawm uik heue.
Can kix pa mi pa koe: pa ih pa un: khankix, deuh rhawm: kah pa ih pa un: tix, mai can kix pa hu: daux phawng: tiex ang krox kah ju tix, kix tag grux ngawng tix krub kah Nawh Cao: heue.
Simie ceucat kix kawx, tag sang krub kah Nawh Cao:, mai krai grawng: Simiang Siyiex kah pwi leeing ju leeing phan: heue.
Kix tag sang deeh lih hoek tix plak jhi: grawng: pa rauh pa see Nawh Cao: kah kix pwi pa tag sang keh khankix heue.
Simiang Siyiex Mawh Cao: Pa Liang Yung: aux
Simiang Siyiex mawh cao: pa liang yung: aux, aux ang lai lo tidtix.
Nawh Cao: kieh aux it, mai kieh aux sawm: dee klai rib, Nawh thong: aux hu: kah praok rawm: klawng: pa singaong.
Nawh baox tawx riang rao kah ju aux, Nawh thong: aux hu: kah daux krax pa rauh pa see kah daux ceukaux Nawh heue.
Viang aux yaox tix hu: kah daux klawng: daux ngawd veei krax yum: kawx, aux ang lhat kah, grawhgrawng: nawh, Maix ot mai aux, khaox puat Maix mai khaox gix Maix kieh aux nyawm rhwm:.
Maix cox khre: pheen: sawm: aux sivoe ngai: pwi pa koeng kah aux khankix heue. Maix groi rawm: bee piang kaing: aux, mai kawk rawm: bee aux, deeh kreh heue.
Bwanson: krax caoxrhawm: pa mhawm: Maix, hawt grawng: lawng khaix aux, tom: hoek nyiiex meung raoma: leeing ju leeing phan: heue.
Simiang Cao: Pa Ting Pa Lhaong:
Haktiex mai can pa koe: piang haktiex khawm uik, hoik mawh cie Siyiex, mai kawn: pwi pa ot kah piang haktiex khawm uik kawx mawh cie Siyiex heue.
Grawhgrawng: nawh, deuh ceu an: khankix piang rawm: sigrit sigra: mai kieh kaux cong: kah piang rawm: khankix heue.
Pwi mawx pon tix hoek kah piang gawng dee ot Simiang Siyiex? mai pwi mawx pa pon tix cung dee singax singeh Nawh Cao:?
Mawh pwi pa singax taix, mai pwi pa singax singeh daux rhawm:, mai pwi pa ang kieh rhawm: tix hu: kah daux pa pie pa lhen:, mai pwi pa ang jhax ang lawg khankix.
Simiang Siyiex nawb bwanson: kah pwi khankix, mai krax pa rauh pa see Siyiex taoh kah nawh heue.
Kix mawh ceu pwi pa sawg kah Siyiex, mai pwi pa sawg kah plakngai: Siyiex Yakop heue.
Mawh kheu sang hoek Simiang pa ting min: plakngai:, siviex ting mai siviex khankix eue, paoh heue,
Simiang pa ting min: plakngai: mawh mawx? Mawh Cao: pa ting siawpsibrawm:, mai riang rao: mai mawh Siyiex Cao: pa puing: naing kah daux siawpsibrawm heue.
Mawh kheu sang hoek Simiang pa ting min: plakngai:, siviex ting mai siviex khankix eue, paoh heue,
Simiang pa ting min: plakngai: mawh mawx? Mawh Simiang Siyiex Cao: kru naing raoma:, mai mawh Simiang khunhawkham pa ting min: plakngai: heue.
Lox Rawg Bwan: Sonsang Priex
Simiang Siyiex eue, aux tawx ju tix kah Maix heue.
Siyiex aux eue, aux deuh rhawm: kah Maix, paw kieh aux hoek krax kaig krax tua, mai paw kieh pwi pa koeng kah aux, gauxrhawm: gauxrhi: mai pex kah aux liak.
Pwi pa keud pot jun pot kah Maix tete khankix, tag ang hoek krax kaig krax tua, mai pwi pa nieb yuh pa ang tie koe: grawng: khankix, tag hoek krax kaig krax tua heue.
Simiang Siyiex eue, jhi: aux yaox daux krax Maix liak, mai gau aux kah daux krax Maix liak.
Thong: aux hu: kah daux krax pa mawh pa meh Maix, mai thong: gau aux liak, grawhgrawng: nawh, Maix mawh Siyiex Cao: pa taoh aux, mai aux krox jun kah Maix leeing: singaix heue.
Simiang Siyiex eue, doh keud doh sawn: kah krax pa caoxrhawm: Maix, mai krax moh krax rhawm: pa hoik dawg koe: Maix didix.
Paw lai doh keud doh sawn: kah phimap pa yuh aux, yam kawn: mawh aux kawn: nyawm, Simiang Siyiex eue, awm: krax pa caoxrhawm: Maix, mai doh keud doh sawn: kah aux, mawh kheu mawh Maix, Cao: pa jiet mhawm: heue.
Simiang Siyiex mawh pa grum naog pa mhawm: pa mhiem: mai pa rauh pa see heue, mawh kheu in: Nawh jhi: daux krax kah pwi pa koe: phimap phigrham: heue.
Nawh thong: kah pwi pa awnrhawm: awnrhi: hu: kah daux krax pa khaw: pa caw Nawh, mai thong: gau kix kah daux krax Nawh.
Can pwi pa hawt kah daux krax beenli Nawh mai pwi pa hawt tix yuh kah sijax mukheu Nawh khankix, Nawh Cao: tag sang thong: kix hu: kah daux krax moh krax rhawm: Nawh heue.
Simiang Siyiex eue, kah daux ceukaux Maix, pluat ploi: phimap aux pa kied ting liak.
Pwi mawx ang ah, pa lhat pa graung kah Simiang Siyiex, Nawh Cao: jhi: nawh yaox daux krax pa simie tix hu: awm: pa moh nawh heue.
Daux rhawm: nawh yaox tix ot nhim: mhawmmhawm:, mai simie ceucat nawh kawx, tag pon sin: kah daux meung Nawh heue.
Simiang Siyiex yuh paox pie kah pwi pa lhat pa graung kah Nawh khankix, mai kieh kix tawng kah sijax mukheu Nawh heue.
Mai ngai: aux jhak kah Simiang Siyiex jheengjheeng:, grawhgrawng: nawh, Nawh Cao: hoik taoh caong aux lih khaing: kie heue.
Veeh ngai: Maix plak aux, mai caoxrhawm: kah aux liak, taig aux tixkaux khaing:, kheu pa hot pa sibhawm: heue.
Rhawm: aux hoik naog kah krax pa khirhawm: khirhi:, mai kieh aux luan khaing: kah daux pa kharhawm: kharhi: liak.
keud kah pa hot pa sibhawm: aux, mai krax pa kharhawm: kharhi: aux mai pluat ploi: phimap phigrham: aux khawm uik liak.
Jhak kah pwi pa koeng kah aux khankix, mawh kheu kied haoh kied hun:, pwi pa koeng riang cieang khoi: kah aux heue.
Priex kah ju aux, mai taoh aux liak, kheu aux deuh rhawm: kah Maix, mai paw kieh aux hoek krax kaig krax tua liak.
Mawh kheu hoik krox jun aux kah Maix, mai kieh pa rauh pa see Maix priex aux liak.
Simiang Siyiex eue, taoh pwi Isarilax lih khaing: kah daux pa kharhawm: kharhi: khawm uik liak.
Lox Rawg Bwan: Pwi Pa Mhawm: Tix Kaux
Simiang Siyiex eue, mawh kheu hawt aux tix yuh daux krax pa mhawm: Maix, mai prawng ca: plak aux liak, Simiang Siyiex eue, aux ang gah ang greed tix, kheu aux deuh rhawm: kah Maix heue.
Simiang Siyiex eue, chawkcheng: tix yaox aux, kieh rhawm: aux mai sok lax aux singax liak.
Bwanson: krax moh krax rhawm: Maix koe: sivoe ngai: aux, kheu aux priex tix hawt kah beenli Maix, daux krax pa rauh pa see heue.
Aux ang lai ngawm tau mai pwi pa chix pie chix lhen: khankix, aux ang lai laig kah cub pwi pa chix mox chix kheem: khankix.
Aux koeng kah dee kum: pwi pa ang rah ang see khankix, aux ang lai ngawm tau mai pwi pa caox pa caig khankix.
Simiang Siyiex eue, aux tag sang khoek taix tix kah daux pa ang koe: phimap, mai ot hawt vungviang khu: dee tan Maix.
Aux sang rhax lai yaogyaw bwanson: Maix, mai krai grawng: pa daox pa am: pa yuh Maix khawm uik heue.
Simiang Siyiex eue, aux kied moh kah nyiiex dee ot Maix, mai min: plakngai: Maix heue.
Paw lai kieh khwan ju aux ot tau mai pwi phimap phigrham:, mai pwi pa pah pwi yum: khankix liak.
Kah daux tawm: taix kix koe: krax pa caox pa ang mhawm:, mai taix khawn: dawm: kix hoik naog kah khawngphak chun: praok heue.
Phan: mawh aux, tag hawt daux krax pa rauh pa see, caoxrhawm: mai taoh aux liak.
Aux cung kah caong tix, mai yaogyaw kah Maix kah daux sinax pwi pa haoh pa hun: khankix heue.
Lox Rawg Bwan: Yaogyaw
Simiang Siyiex mawh pa riieng aux, mai Cao: taoh aux, aux sang lhat kah pwi mawx? Simiang Siyiex mawh riang rao son ju aux, aux sang lhat kah pwi mawx?
Yam hoek pwi pa caox pa caig mai pwi pa koeng, pa deuh phimap kah aux khankix, kiied tix ih nex aux, mai kix sideeing caong mai goh heue.
Viang pwi naing khankix yuh tab kawx, aux ang lhat, viang kix viex kru naing mai hoek tix puing: kah aux kawx, rhawm: aux kaux cong: kheu aux deuh rhawm: kah Siyiex heue.
Aux rawg tix ceu kah Simiang Siyiex, yam kawn: im: ju aux, sonsang pon aux tix ot kah daux nyiiex Siyiex, mai sonsang yaox min: plakngai: pa mhawm: grang Siyiex, mai aux sawg sonsang yaox tix ot kah daux nyiiex Bwan: Nawh heue.
Grawhgrawng: nawh, yam hoek krax khirhawm: khirhi:, Maix tiebtie aux kah daux nyiiex gox bwan:, mai Maix mox aux kah daux nyiiex bwan: Maix, mai Nawh Cao: deuh aux kah piang rang: ting heue.
Yamin: hoik yaog kaing: aux kah piang pwi pa koeng pa rob vungviang aux khankix, mawh kheu in:, aux gauxrhawm: gauxrhi: mai tan lu kah daux nyiiex bwan: Maix, tag rhax lai mai ah lai rhax yaogyaw kah Simiang Siyiex heue.
Simiang Siyiex eue, nghiiet kah lox pa kok yo aux liak, caoxrhawm: kah aux, mai pawk lox aux liak.
Yam ah Maix nin: kah aux, sawg pakngai: Aux, mai daux rhawm: aux ah nin:, Simiang Siyiex eue, aux sawg pakngai: Maix heue.
Paw lai mox pakngai: Maix khaing: aux liak, mai yam songrhawm: songrhi: Maix, paw lai tik aux liak, grawhgrawng: nawh, awm: pa hoik sax teem: coi Maix kah aux, paw lai tik vud kah aux, mai teem: coi aux liak.
Viang miex keeing: aux prah kah aux kawx, Siyiex ang prah kah aux mai priex kah aux heue.
Simiang Siyiex eue, jhi: daux krax Maix mai gau aux, mai thong: aux hu: kah daux krax Maix pa rauh pa see, mawh kheu haoh pwi pa koeng kah aux heue.
Paw lai kieh aux hoek kah daux tawm: taix pwi pa koeng kah aux khankix, grawhgrawng: nawh, pwi pa kham: mhai: sakse pa ang mawh ang meh, mai pwi pa ting rhawm:, pa tuktiaktukte: kah aux khankix sang lah sang cha: kah aux heue.
Phan: aux ang koe: krax yumrhawm: kah bwanson: Simiang Siyiex pa im: ju, aux ang yaox tix ot dee ot kix heue.
Mai krox jun kah Simiang Siyiex, teei riang teei rao mai viex rhawm: kua: tix krox jun pot kah Simiang Siyiex heue.
Lox Rawg Bwan: Sonsang Teem:
Simiang Siyiex mawh rang: ting aux, aux kok yo kah Maix, paw lai yuh tix ang pawk lox aux liak, phan: Maix ang pawk kah lox aux, aux awm: kix pwi pa lih hu: kah daux simeeig heue.
Nghiiet kah lox aux, yam kok yo aux kah Maix, mai yam yaog aux taix tix daux lawg dee kied singax singeh heue.
Paw kieh aux hu: tau mai pwi pa caox pa caig khankix, mai pwi pa yuh pa ang rah ang see khankix, mai pwi pa ah lox bied kah paoxplawg paoxnyhawm:, mai pa keud ceu pa ang mhawm: kah daux rhawm: khankix heue.
Deeh tawx kah kix, awm: pa hoik yuh kix, deeh tawx pa caox kah kix, awm: pa hoik yuh kix pa caox, mai tawx kah kix, awm: pa hoik yuh kix kah taix tix, prawng ca: kah kix awm: phimap pa yuh kix heue.
Grawhgrawng: nawh, mawh kheu kix map kah pa hoik yuh Siyiex, mai khaix taix pa hoik yuh Siyiex khankix, Nawh Cao: ang kieh kix kaux cong: mai yieh kix lauxleeing: heue.
Kieh Simiang Siyiex koe: bwanson: liak, mawh kheu hoik nghiiet Nawh lox pa rawg pa mhaing: aux heue.
Simiang Siyiex mawh riang rao aux, mai pa tiebtie aux, aux deuh rhawm: kah Nawh, mai Nawh teem: coi kah aux, mawh kheu in:, aux tom: gauxrhawm: gauxrhi:, mai rhax lai yaogyaw min: plakngai: Nawh Cao: heue.
Simiang Siyiex mawh riang rao pwi Nawh, mai Cao: pa taoh, kieh kaux cong: kah kaw pa hoik groi Nawh rawm: bee heue.
Taoh kah pwi Maix khankix, mai tawx sin: bwanson: Maix kah kix liak, kia: ngien kah kix mai yaog kix ting lhaong: jheengjheeng: leeing ju liak.
Lox Cie Simiang
Kawnpraix Siyiex khankix eue, yaog min: plakngai: Siyiex, mai siawpsibrawm Nawh heue.
Tawx min: plakngai: kah ceukaux Simiang Siyiex, mai teei tix ceep kraung pa singax singeh mai krub kah Nawh heue.
Gumlox Simiang Siyiex koe: kah piang rawm: sigrit sigra:, mai Siyiex pa ting min: plakngai:, kieh praix sinum, Simiang Siyiex ot kah piang rawm: khankix heue.
Gumlox Simiang Siyiex mawh pa grum naog siawpsibrawm, mai gumlox Simiang Siyiex grum naog kah min: plakngai: pa ting heue.
Gumlox Simiang Siyiex, raig tix tik kah khaox piakvan mai Simiang Siyiex raig tix tik kah khaox piakvan pa koe: kah piang gawng Lebanon khankix heue.
Siyiex kieh gawng Lebanon mai gawng Sirion4 jaloh awm: kawn: moi mai kawn: moi praix heue.
Gumlox Simiang Siyiex, kieh rao ngu gwieh tix heue.
Gumlox Simiang Siyiex kieh daux tiag daux tu yungyiang:, mai Simiang Siyiex, kieh daux tiag daux tu Kadesax yungyiang: heue.
Gumlox Simiang Siyiex kieh cak miex keh kawn: mai gah tix tik khaox ox khankix, mai can pa ot kah nyiiex Nawh Cao: khawm uik krai grawng: min: plakngai: Nawh Cao: heue.
Simiang Siyiex ot kah piang rawm: pa hoik kheem: an:, mai Simiang Siyiex ngawm mai yuh Simiang jheengjheeng: leeing ju heue.
Simiang Siyiex tawx riang rao kah pwi Nawh khankix, mai Simiang Siyiex nawb bwanson: pa nhim: kah pwi Nawh khankix heue.
Lox Rawg Bwan: Pa Yaogyaw
Simiang Siyiex eue, aux yaogyaw kah Maix, mawh kheu taoh Maix aux mai Maix ang kieh pwi pa koeng khankix, gauxrhawm: kah piang aux.
Simiang Siyiex aux eue, aux kok yo kah Maix mai Maix kieh aux nyawmrhawm: heue.
Simiang Siyiex eue, Maix hoik taoh aux lih khaing: daux meung yum:, mai ang kieh aux hoek kah daux simeeig, mai hoik kieh ju aux nyawmrhawm: heue.
Pwi pa singax singeh Siyiex khankix eue, rhax lai yaogyaw kah Nawh mai yaogyaw kah ceukaux Nawh Cao: pa singax singeh heue.
Krax pa songrhawm: songrhi: Nawh, mawh tivud khaing:, mai bwanson: pa mhawm: Nawh koe: leeing ju leeing phan:, mai pa yiiem pa grai mawh tix sawm: khaing:, mai krax gauxrhawm: tag hoek plak ponngawb heue.
Yam mhawm: ot mhawm: koe: aux, aux ah nin:, "Aux ang doh khirhawm:.
Simiang Siyiex eue, gawng dee ot aux kaux cong: mawh kheu bwanson: Maix, phan: Maix veeh pakngai: tix khaing: aux, aux hoek krax kharhawm: kharhi: heue.
Simiang Siyiex eue, nghiiet kah lox pa rawg pa mhaing: aux kah Maix liak.
Phan: aux laig kah daux simeeig koe: bwanson: yuh kah mawx? Phawng: tiex tag yaogyaw kah Maix lie? Nawh tag plak jhi: sijax mukheu Maix lie?
Simiang Siyiex eue, nghiiet kah lox aux, mai caoxrhawm: teem: coi aux liak, Simiang Siyiex eue, aux kok yo kah Maix teem: coi kah aux liak.
Yam an: krax khirhawm: khirhi: aux, Maix kieh mawh krax graoh krax thiao:, mai Maix peeik tix tik kraung ceep pa khirhawm: khirhi: aux, mai deeh tawx kraung ceep pa gauxrhawm: gauxrhi: heue.
Mawh kheu in:, phan: aux ang yaogyaw kah Maix, aux ang doh pon ot, Simiang Siyiex aux eue, aux rhax lai yaogyaw bwanson: Maix jheengjheeng: leeing ju leeing phan: heue".
Lox Rawg Bwan: Pwi Pa Deuh Rhawm: Kah Siyiex
Simiang Siyiex eue, aux deuh rhawm: kah Maix heue, Maix kieh aux luan khaing: krax pa kaig pa tua jheengjheeng: liak, mai taoh kah aux awm: pa rauh pa see Maix liak.
Veeh yhaok Maix plak aux mai nied tix taoh aux laung laung liak, Maix mawh rang: ting pa kaux son aux, mai mawh tab dee deuh aux rhawm: tix heue.
Maix mawh rang: ting son aux, mai mawh tab dee deuh aux rhawm: tete heue, mai thong: gau aux hu: kah daux ceukaux Maix liak.
Mawh kheu Maix mawh dee deuh aux rhawm:, taoh aux lih khaing: daux kie pa taong: kix kah aux liak.
Simiang Siyiex pa kaux sijax eue, aux tawx ju tix kah Maix, mai taoh aux liak.
Aux koeng kah pwi pa krub kah pa giex pa going, phan: mawh aux deuh rhawm: kah Simiang Siyiex heue.
Aux tag koe: krax gauxrhawm: gauxrhi:, kah krax caoxrhawm: Maix, mai Maix jhak kah pa hot pa sibhawm: aux, mai Maix hoik yaox kah ju aux pa kharhawm: kharhi: heue.
Maix ang tawx aux kah tawm: taix pwi pa koeng kah aux khankix, mai Maix kieh caong aux cung kah dee vieh dee va: heue.
Simiang Siyiex eue, caoxrhawm: kah aux, mawh kheu hoik hoek krax pa khirhawm: khirhi:, mai ngai: aux rhawm: aux, mai vaig aux kied tug kheu pa khirhawm: khirhi: aux heue.
Aux hoik dawd ju, mawh kheu khirhawm: khirhi: aux, aux ngia ku num, mai riang rao aux rau hu:, mai si-ang: aux graig hu: kheu phimap heue.
Mawh kheu pwi pa koeng kah aux khankix, salao kah aux, mai paoxplawg paoxnyhawm: aux, mai paox meed paox leen aux khankix kawx, seeing: brai: kah aux heue. Pwi pa yaox kah aux hawt krax hawt laux kawx, lhat mai to: heue.
Kix hoik piawm: aux, mai ang lai doh keud kah aux, awm: pwi pa hoik yum: tix kaux, mai kix deuh aux awm: diang aw: caox heue.
Aux mhong: lox pa sa pa lao pwi grawng: aux, mai ceu pa lhat pa graung koe: ku plak, kix khrawm: tix yuh cub caw: mai kum: paox tix, keud tix sang teei ju aux yum: heue.
Viang mawh kawx nan:, Simiang Siyiex eue, aux deuh rhawm: kah Maix heue. Mai aux krai yuh nin:, Maix mawh Siyiex aux heue.
Bawg yam aux koe: daux tawm: taix Maix, mai taoh aux luan khaing: kah daux tawm: taix pwi pa koeng kah aux, mai pwi pa tuktiaktukte: kah aux khankix liak.
Kieh pakngai: Maix jhan riang kah piang aux liak, kieh bwanson: krax pa caoxrhawm: Maix taoh aux liak.
Simiang Siyiex eue, aux rawg bwan: kah Maix, paw lai kieh aux koe: krax pa kaig pa tua liak, kieh pwi pa caox pa caig khankix, hoek krax pa kaig pa tua, mai kieh glaik tix daux meung yum: liak.
Pwi pa ting rhawm: lhaong: ngai:, pwi pa yuh pa ang cee ang cak ang nab ang yam, pwi pa ah lox map lox tiex kah pwi pa rauh pa see khankix, mai pwi pa koe: siyieb jheeh pa chix ling: tix ah lox bied khankix, kieh yiien: yawg liak.
Bwanson: pa hoik priex Maix son pwi pa lhat pa graung kah Maix, pa hoik cox Maix son pwi pa deuh rhawm: kah Maix, sivoe ngai: kawn: pwi mhawm: miex ding?
Maix hoik teei tix mox kix daux tawm: taix Tix, mai kieh kix luan khaing: pa nieb yuh pwi pa koeng khankix, Maix priex kix daux nyiiex bwan: Maix, mai kieh kix luan khaing: jheeh pa simah simaing: heue.
Kieh Simiang Siyiex koe: bwanson: liak, grawhgrawng: nawh, Maix hoik jhi: krax moh krax rhawm: pa daox pa am: kah aux, kah daux veng Maix pa kaux pa cong: heue.
Aux lhat graung sivoe ngai: Maix, mawh kheu ce: aux Maix hoik tik kah tix, viang mawh nan:, yam kok yo aux kah Maix, mai yam rawg aux bwan:, Maix nghiiet kah lox aux heue.
Pwi pa singax singeh khankix eue, moh kah Simiang Siyiex heue. Simiang Siyiex kia: ngien kah pwi pa kaux sijax khankix, mai deeh tawx phimap tom: nie kah pwi pa ting rhawm: ting rhi: khankix heue.
Pwi pa deuh rhawm: kah Simiang Siyiex khankix eue, teei riang rao mai kieh koe: rhawm: kua: rhawm: vao heue.
Krai Doh Phimap Mai Pluat Phimap
Pwi pa hoik luan khaing: phimap, mai phimap pa tawb pa kheem: khankix, koe: bwanson: heue.
Pwi pa luan khaing: phimap phimap pa deuh Simiang Siyiex, mai rhawm: pa ang koe: ceu pa pie pa lhen:, koe: bwanson: heue.
Phan: aux ang krai doh kah phimap tix, si-ang: aux kroik, kheu ngia aux leeing: lang: singaix heue.
taix Maix cien kah piang aux ku ngaix ku sawm:, mai rawm: lauh lih jheengjheeng: awm: bawg yam rung praix heue.
Aux krai doh phimap phigrham: sivoe ngai: Maix, aux ang mox phimap pa phit pa lud tix, aux khyox khaw: grawng: pa lheu: aux lox Maix Simiang Siyiex heue. Maix hoik pluat ploi: phimap pa phit aux heue.
Mawh kheu in:, kieh pwi pa singax singeh khankix, tag sang rawg mhaing: kah Maix yam sipub kix kah Maix, phan: yuh nan:, rawm: ting haok hwan kawx, ang lai pon tix kheem: dex kix heue.
Maix mawh dee mox aux, mai Cao: pa tiebtie aux, yam khirhawm: khirhi: aux heue. Kieh lox rhax grawng: krax taoh rob vungviang aux heue.
Aux tag sang gau kah maix mai tag sang jhi: krax pa sang hu: maix, Aux kia: ngien maix mai priex kah maix heue.
Paw lai kieh awm: brung, law, pa ang tawng praix phan: ang cu tix hoek kah maix, sau: maox keu: kag daux jheeh nawh, mai sonsang pon tok nawh hu: heue.
Pwi pa ang rah ang see khankix, yaox tix kham: geu: krax pa kharhawm: kharhi: tom: nie, mai pwi pa deuh rhawm: kah Simiang Siyiex khankix, bwanson: krax pa caoxrhawm: hoik rob vungviang nawh heue.
Pwi pa rauh pa see khankix eue, gauxrhawm: gauxrhi: kah daux Simiang Siyiex awawx. Pwi pa rauh pa see rhawmrhi: khankix eue, rhax lai gauxrhawm: gauxrhi: awawx.
Lox Rhax Pa Yaogyaw
Pwi pa rauh pa see khankix eue, rhax lai gauxrhawm: gauxrhi: kah daux Simiang Siyiex awawx, krax pa gauxrhawm: tix yaogyaw mawh pa keung: pa khaw: mai pwi pa rauh pa see heue.
Tah ting: mai yaogyaw kah Simiang Siyiex awawx, teei ting: pa koe: maox kao: nyaing mai rhax lai yaogyaw awawx.
Ah lox rhax pa khraox sivoe ngai: Nawh Cao: awawx, gauxrhawm: gauxrhi: mai tah ting: mhawmmhawm: pa nyawm tix nghiiet lox awawx.
Grawhgrawng: nawh, gumlox Simiang Siyiex mawh pa rauh pa see mai krax prawng krax ca: Nawh kawx, mawh pa khaw: mai sijax mukheu pa rauh pa see heue.
Nawh Cao: moh kah pwi yuh kaing pa rauh pa see mai prawng ca: awm: pa khaw: pa caw mai beenli heue. Mai bwanson: krax pa caoxrhawm: Simiang Siyiex hoik naog kah piang haktiex khawm bee: ma: heue.
Raoma: mai can pa koe: piang raoma: khawm uik, Simiang Siyiex hoik yuh kah bhawm: gumlox Nawh heue.
Nawh Cao: kieh rawm: sigrit sigra: khrawm: tix tau, mai rawm: sigrit sigra: pa raux khankix, priex kah daux dee kaux heue.
Kieh haktiex khawm bieh khawm baung lhat graung kah Simiang Siyiex awawx, kieh kawn: pwi can pa ot piang hakrtiex khawm uik, nab yam yungyi: kah Nawh Cao: heue.
Grawhgrawng: nawh, Simiang Siyiex ah ceu patix, lih mawh ceu an: heue, Nawh Cao: tawx lox mai lih mawh heue.
Simiang Siyiex tik vud kah ceu pa kum: kawng: pwi tang: ceu tang: cat, mai yieh tix tik kah krax pa keud pa sawn: kix heue.
Krax pa hoik ciak Siyiex tix deuh mawh pa kaux cong: leeing ju, mai ceu pa hoik keud Nawh Cao: daux rhawm: Tix, kaux cong: leeing ju leeing phan: heue.
Pwi pa hoik laug Siyiex tix teei khankix, mawh sin: Nawh Cao: mai kix koe: bwanson: heue.
Simiang Siyiex ot kah piang raoma: jhak mai yaox kah kawn: pwi khawm uik heue.
Nawh Cao: ot kah dee ot Tix, jhak kah kawn: pwi piang tiex khawm uik mai tawng kah kix heue.
Nawh Cao: yuh rhawmrhi: kix koe: mai jhak kah pa yuh kix khawm uik heue.
Simiang kaux pwi mawx ang ah, pon krax nyawmrhawm: kheu haoh hun: pwi naing ang mawh, mai cao: giex kaing: naing pa hoek krax taoh mawh kheu ting riang ting rao tix ang mawh.
Brung kawx mawh pa giex pa going, nawh ang pon taoh kah riang rao pa ting nawh.
Jhak heue, ngai: Simiang Siyiex jhak kah pwi pa lhat pa graung kah Nawh, mai pwi pa deuh rhawm: kah bwanson: krax pa caoxrhawm: Nawh khankix heue.
Kieh kix luan khiang: krax yum:, mai kieh kix im: ju yam hot yam sibhawm: heue.
Ju ex krox jun pot kah Simiang Siyiex, Nawh Cao: mawh Cao: pa teem: coi ex, mai Cao: pa tiebtie ex heue.
Mawh kheu ex deuh rhawm: kah ceukaux Nawh pa singax singeh, mai rhawm: ex tom: koe: krax gauxrhawm: gauxrhi: kah daux Simiang Siyiex heue.
Simiang Siyiex eue, mawh kheu krox jun ex kah Maix, kieh bwanson: krax pa caoxrhawm: Maix koe: kah piang ex liak.
Yaogyaw Kah Bwanson: Siyiex
Aux tag sang yaogyaw kah bwanson: Simiang Siyiex ku bawg ku yam, mai yaogyaw kah Nawh jheengjheeng: heue.
Ju aux deuh rhawm: kah Simiang Siyiex, mai yaw rangdi, yam mhong: kix pwi pa hot pa sibhawm: khankix, tag gauxrhawm: gauxrhi: heue.
Yaogyaw bwanson: Siyiex tau mai aux, ex yaogyaw ceukaux Nawh ting lhaong: heue.
Yam sawg aux kah Simiang Siyiex, Nawh deeh pawk kah lox aux, mai taoh aux luan khaing: pa lhat pa graung khawm uik heue.
Pwi pa maong tix jhak kah Nawh Cao: khankix, pon pa riieng heue. Pakngai: kix ang hoek krax pa kaig pa tua heue.
Lox kok yo pwi pa hot pa sibhawm:, Simiang Siyiex nghiiet lox nawh, mai taoh nawh lih khaing: kah daux pa kharhawm: kharhi: kuceu khawm uik heue.
Kawncau Siyiex cie Simiang, deuh tab rob vungviang kix pa lhat pa graung kah Nawh mai taoh kah kix heue.
Cim tix yaox grawng: pa mhawm: pa mhiem: Siyiex, mai pwi pa deuh rhawm: kah Siyiex, koe: bwanson: heue.
Pwi pa singax singeh Simiang Siyiex khankix eue, lhat graung kah Simiang Siyiex awawx, mai can pwi pa lhat kah Nawh ang lai baox lo tidtix.
Kawn: sivai sangsi: khankix, cairhawm: mai ang yaox tix ih pa ih kawx, can pwi pa sawg kah Simiang Siyiex khankix, pa simie tix pon pa mhawm: pa ang kix pon ang koe: tix ceu kawx heue.
Kawn: nyawm khankix eue, hoek kah aux, mai nghiiet lox aux, aux tag sang gau pex kah beenli pa lhat pa graung kah Simiang Siyiex heue.
Pwi mawx pa simie tix im: ju, mai lang: ju lang: phan:, mai pa krox jun kah singaix bawg yam pa mhawm: khankix.
Kieh dak tix luan khaing: pa caox pa ang mhawm:, mai jheeh nawh kawx, paw vi ah lox pa pie pa lhen:,
via khaing: ceu pa caox, mai yuh ceu pa mhawm:, mai sawg kah pa khaw: pa caw mai hawt leue tom: krup awawx.
Grawhgrawng: nawh, ngai: Simiang Siyiex jhak kah piang pwi rah pwi see khankix, mai yhaok Nawh nghiiet kah lox pa rawg pa mhaing: kix heue.
Pwi pa yuh pa caox pa caig khankix, Simiang Siyiex vud ngai: khaing: kix, mai tik vud kix, tom: kawn: pwi piang haktiex ang tawng, mai ang lai doh keud kah kix heue.
Simiang Siyiex nghiiet kah lox pa kok yo pwi pa rauh pa see khankix, mai taoh kix lih khaing: krax pa kharhawm: kharhi: kuceu khawm uik heue.
Siyiex ot dex mai pwi pa lauxrhawm: laux rhi: khankix, mai Nawh taoh kah pwi pa awnrhawm: awnrhi: khankix heue.
Pwi pa rauh pa see khankix, viang kix yaox krax pa kharhawm: kharhi: tom: nie kawx, Simiang Siyiex taoh kix lih khaing: ceu an: kuceu khawm uik heue.
Nawh Cao: priex si-ang: Nawh khawm uik mhawmmhawm:, mai ang kieh pot tix nyaing kawx.
Pwi pa yuh pa caox, yum: kah pa caox, pwi pa koeng kah pa rauh pa see khankix, yaox tix prawng ca: kah phimap phigrham: pa yuh tix heue.
Simiang Siyiex, taoh kah ju siliex Nawh, mai pwi pa deuh rhawm: kah Nawh khankix, ang hoek krax prawng krax ciyang phimap tix kaux kawx heue.
Lox Rawg Bwan: Sonsang Teem:
Simiang Siyiex eue, Maix lah cha: kah pwi pa lah cha: kah aux, Maix puing: kah pwi pa puing: kah aux.
Teei kraung naing pa tiebtie Maix, kaoh mai teem: coi aux liak.
Teei pliah mai vaig Maix tiebtie kah pwi pa hawt pheet khaix aux khankix liak, kieh daux rhawm: aux ah nin:, Maix mawh Cao: pa taoh aux heue.
Pwi pa sawg tix plaux kah ju aux khankix, kieh plakngai: kix hoek krax pa kaig pa tua, mai pwi pa bak tix yuh pa caox kah aux khankix, kieh deeh blak plak khaix tix, mai koe: krax pa kaig pa tua khawm lhat tix liak.
Kieh kix awm: kam: riex pa phlu: bhaung: hu:, kieh kawncau Siyiex cie Simiang hawt pheet tix tik kix liak.
Kieh krax hu: kix faik mai nyu:, mai kieh kawncau Siyiex cie Simiang hawt pheet tix tik kix liak.
Ang koe: krax koe: grawng: tidtix kawx, kix mox tix taong: kie mai kaong: daux tiex mai tag sang teei ju aux yum: heue.
Pwi pa yuh nan:, yam ang kix tien tawng kieh krax laux krax leeing: hoek kah piang kix liak, mai kieh kix deeh krix kah kie pa hoik taong: tix mai daux tiex pa hoik kaong: kix tiru liak.
Phan: yuh nan:, ju aux deuh rhawm: kah Simiang Siyiex mai koe: krax gauxrhawm: gauxrhi: heue, deuh rhawm: kah krax pa taoh Nawh mai gauxrhawm: gauxrhi: heue.
Simiang Siyiex eue, si-ang: aux khawm uik ah nin:, pwi mawx sang awm: Maix, Cao: Taoh pwi pa hot pa sibhawm: khaing: daux tawm: taix pwi pa ting riang ting rao khaing: nawh, mai tawx krax nyawmrhawm: nyawmrhi: kah pwi pa hot pa sibhawm: mai pa cud pa cha: khankix heue.
Pwi pa kham: mhai: sakse pa ang rah ang see khankix, kaoh mai chawk kah aux grawng: pa ang aux tawng.
Kix deeh pawk pa caox kah ceu pa mhawm: pa yuh aux, mai kix sang teei khawm ju mai kieh aux lauxrhawm: heue.
Phan: mawh nan:, yam yaox kix jhawm: saux jhawm: ngia, mai aux ceep kraung pa taing: kah maox rhix, mai aux kieh rhawm: aux twah pa ih pa un:, mai bwan: pa rawg aux deeh hoek kah piang naok aux heue.
Aux deuh kix awm: paoxgrawm mai puxaik, awm: pwi pa khirhawm: khirhi: mai yiiem son miex tix, aux khirhawm: son kix mai gup kaing: tix heue.
Yam yaox aux krax khirhawm: khirhi:, kix khrawm: paox tix gauxrhawm: mai yuh pa ang cee ang cak, mai pwi pa ang aux tawng khankix giex aux mai tap toi: kah aux heue.
Kix deuh aux awm: pwi pa caox pa caig mai greeik rhang: tix kah aux heue.
Simiang Siyiex eue, Maix kawn: tag sang jhak bawg yam miex grheung:? Taoh ju aux khaing: daux pa laux pa leeing:, ceu pa lheu: moh aux khaing: paox tix, taoh aux khaing: sivai sangsi: khankix liak.
Phan: yuh nan:, aux tag yaogyaw bwanson: Maix kah sinax pwi haoh pwi hun: heue.
Pwi pa nieb koeng giex going kah aux, paw kieh kix gauxrhawm: gauxrhi: kah piang aux, mai pwi pa nieb ciang khoi: kah aux, paw kieh nawh khiep ngai: tix kah aux liak.
Grawhgrawng: nawh, kix ang chix krai lox pa yiien: pa yawg ti bawg kawx, sawg kix tix krai lox pa pie pa lhen: kah pwi pa ot mhawmmhawm: khankix heue.
Kix ang: jheeh tix mai ah nin: kah aux, ha ha:, ngai: ex hoik yaox kah ceu an: heue.
Simiang Siyiex eue, Maix hoik yaox kah ceu in:, paw glaik yiien: yawg tix, Siyiex eue, Maix paw lai ot singai khaing: aux liak.
Simiang Siyiex aux eue, siduad mai kaoh heue, prawng ca: kah ceu pa hoek kah piang aux liak.
Simiang Siyiex aux eue, prawng ca: kah aux awm: pa rauh pa see Maix liak, paw kieh kix gauxrhawm: kah piang aux liak.
Paw kieh kix ah nin:, kah daux rhawm: tix, ha ha:, ex hoik naog alo tix, paw peung: kieh kix ah, hoik pex ex kah nawh.
Can pwi pa gauxrhawm: gauxrhi: yam yaox aux krax khirhawm: khirhi: khankix, kieh kix hoek krax pa kaig pa tua mai voi plakngai: liak. Pwi pa yaw kah tokaux tix, tag sang ceep kraung pa kaig pa tua, mai laux plakngai: heue.
Pwi pa deuh rhawm: kah pa rauh pa see khankix, kieh kix rhax lai mai gauxrhawm: gauxrhi: liak. Mai kieh kix ah nin: jheengjheeng:, kieh Simiang Siyiex khaw: rhawm: khaw: rhi: mai tawx krax pa nyawmrhawm: nyawmrhi: mai min: plakngai: pa ting kah siliex Nawh heue.
Dak aux tag sang krai grawng: pa rauh pa see Maix, mai yaogyaw kah Maix ku singaix heue.
Grawng: Pa Hai Kawn: Pwi
Pwi pa koe: phimap mai pa ang rah ang see ah nin: kah daux rhawm: tix, krax pa lhat pa graung kah Siyiex ang koe: sivoe ngai: nawh.
Grawhgrawng: nawh, nawh yuh grang tix awm: pa ang koe: phimap pa seeing: pa brai:, mai pa koeng kah pa caox pa caig plak sivoe ngai: tokaux tix heue.
Lox pa lih khaing: jheeh nawh mawh pa seeing: pa brai: mai pa pie pa lhen:, tik kah cuyi: pingnya mai ceu pa mhawm: pa mhiem: khankix heue.
Nawh keud ceu pa caox pa caig pa ang mhawm: kah dee it tix, mai nawh hawt kah daux krax pa seeing: pa brai:, mai nawh ang seeing: brai: kah ceu pa caox khankix heue.
Siyiex Mawh Pa Kied Mhawm:
Simiang Siyiex eue, krax moh krax caoxrhawm: Maix hoik hoek tom: raoma:, mai sijax mukheu: Maix hoek kah paiawm: heue.
Krax pa rauh pa see Maix, awm: gawng heue, mai krax prawng krax ca: Maix mawh pa kied raux heue. Simiang Siyiex eue, Maix teem: coi kah kawn: pwi mai khawm totiag totu heue.
Siyiex eue, krax pa moh pa caoxrhawm: Maix ting lhaong: miex ding? Mai kawn: pwi deuh rhawm: kah Maix, mai ot greem: veei pruik Maix heue.
Kix tag sak mai kluing: bee kah daux nyiiex Maix, mai Maix tag tawx kix nyaux rawm: klawng: im: ju heue.
Grawhgrawng: nawh, daux lih rawm: im: ju koe: mai Maix, aux yaox pa riieng kah daux pa riieng Maix heue.
Krax pa moh pa caoxrhawm: Maix koe: kah piang pwi pa tawng kah Maix, kieh pa rauh pa see Maix, koe: kah piang kix pa koe: rhawm: rah rhawm: see liak.
Paw kieh caong pwi pa ting rhawm: ting rhi: dig kah aux liak, paw kieh taix pwi pa ang rah ang see grheu: aux to: liak.
Pwi pa yuh phimap hoik goh tan, kix goh mai ang lai pon tix kaoh heue.
Dee Sidauh Krax Pwi Caox Mai Pwi Mhawm:
Paw khirhawm: kah grawng pwi caox, paw lai ghoing: kah grawng: pa yuh pwi pa ang rah ang see.
Grawhgrawng: nawh, ang lai rheung:, tag sang vawg kah kix awm: rib riem, mai rib riem pa klai tag awm: pa kroh hu: heue.
Deuh rhawm: kah Simiang Siyiex mai yuh ceu pa mhawm: pa mhiem: heue, ot kah daux meung Nawh mai kaux sijax mukheu kah daux beenli Nawh Cao: awawx.
Gauxrhawm: gauxrhi: kah daux Simiang Siyiex awawx, phan: yuh nan:, Nawh tag tawx pa grum naog awm: pa lo daux rhawm: maix khawm uik heue.
Tawx tokaux maix kah Simiang Siyiex awawx, deuh rhawm: kah Nawh Cao: awawx, phan: yuh nan:, Nawh tag teem: coi maix heue.
Nawh Cao: kieh pa rauh pa see maix toh awm: pa riieng, mai kieh pa rauh pa see pa yuh maix jhan riang awm: yam jung singaix heue.
Ot yiien: yawg tix sivoe ngai: Siyiex, mai krox jun kah Nawh Cao: awawx, paw khirhawm: kah grawng: pwi pa nieb khin: tix yuh kah maix, mai pwi pa bak tix yuh pa caox pa ang mhawm: kah maix5.
Paw kieh songrhawm:, tik kah ceu pa songrhawm:, paw kieh rhawm: maix koe: krax phit krax lud heue.
Pwi pa phit pa lud khankix, tag sang yaox tix kham: kah pa tik pa vud heue. Pwi pa krox pa jun pot kah Simiang Siyiex khankix, tag pon sin: meung Nawh Cao: heue.
Ang lai rheung: tix vud pwi ang rah ang see ang koe:, maix sawg kix kawx ang lai yaox dee ot kix heue.
Pwi pa awnrhawm: awnrhi: khankix, tag pon sin: kah daux meung Nawh Cao:, mai tag gauxrhawm: pa grum naog pa nhim: heue.
Pwi pa ang rah ang see khankix, greeik rhang: mai bak tix yuh kah pwi pa rauh pa see khankix heue.
Siyiex hoik tawng bawg yam singaix hoik hoek mai nyia kah nawh heue.
Pwi pa ang rah ang see khankix, lawd vaig tix, mai vaik ak tix, sang plaux kah pwi pa hot pa sibhawm: mai pwi pa rauh pa see yum: heue.
Viang mawh nan:, vaig kix tag deeh laig kah daux rhawm: kix, mai ak kix kawx, tag pot heue.
Kraung pa koe: pwi pa rauh pa see ceeix khaing: kawx, nie lheu: mhawm: khaing:, pa koe: kraung pwi pa ang rah ang see tom: nie heue.
Grawhgrawng: nawh, plawng: taix pwi pa ang rah ang see khankix, tag pot heue. Simiang Siyiex teem: coi kah pwi pa rauh pa see khankix heue.
Simiang Siyiex hoik tawng bawg yam singaix mai kieh sin: ngao kix grum kaux jheengjheeng: heue.
Yam yaox kix krax pa nu pa khawm, ang kix lai kaig tua, mai yam sibhawm: praix kix yaox tix ih tom: sak heue.
Mai pwi pa ang rah ang see khankix, tag hoek krax laux krax leeing: heue, pwi pa koeng kah Siyiex khankix, viang mhawm: grang kah dee sax ih kix kawx, tag lauxleeing: grai: hu: awm: taox ngu heue.
Mai pwi pa ang rah ang see khankix, yaog yaing mai ang lai rhawm: deeh tawx, phan: mawh pwi pa rauh pa see khankix, koe: krax pa caoxrhawm: mai deeh tawx heue.
Can pwi pa pon bwanson: Nawh Cao: khankix, tag pon sinngao kah daux meung Nawh Cao:, can pwi pa jhax pa lawg Nawh Cao: khankix, tag hoek krax pa tik pa vud Nawh heue.
Simiang Siyiex jhi: daux krax pa hu: nawh, mai Nawh khaw: rhawm: khaw: rhi: kah krax pa hu: nawh heue.
Pwi an: viang goh kawx, ang awt hoek krax laux krax leeing:, grawhgrawng: nawh, Simiang Siyiex tok taix nawh heue.
Jah tom: yam awn: ju aux, tom: hoek yam kuad aux, ang sax yaox tik Maix kah pwi pa rauh pa see, mai kawnpraix kix pa caung tix ih ang koe:.
Nawh koe: rhawm: pa chix caoxrhawm: jheengjheeng:, mai tawx yaog yaing kah pwi, mai kawnpraix nawh khankix, tag pon bwanson: heue.
Via khaing: ceu pa caox mai yuh kah ceu pa mhawm: awawx, phan: yuh nan:, tag yaox tix ot kaux cong: jheengjheeng: heue.
Simiang Siyiex khaw: rhawm: kah krax pa rauh pa see, mai Nawh ang tik kah pwi pa singax singeh Nawh, Nawh Cao: tag kia: ngien kah kix jheengjheeng: heue. Nawh tag tik kah kawnpraix pwi pa ang rah ang see khankix heue.
Can pwi pa rauh pa see khankix, tag pon sin: meung Nawh Cao:, mai yaox tix ot tau mai Nawh jheengjheeng: leeing ju heue.
Jheeh pwi pa rauh pa see, chix krai lox cuyi: pingnya, mai dak nawh kawx, chix krai lox pa rauh pa see heue.
Mai gumlox beenli Simiang Siyiex, ot kah daux rhawm: nawh mai caong nawh ang cang klad ang goh heue.
Pwi pa ang rah ang see khankix, jawm tix pah pwi pa rauh pa see yum: heue.
Viang mawh nan:, Simiang Siyiex ang tik kah pwi pa rauh pa see kah daux tawm: taix pwi caox an:, yam chawkcheng: Nawh, ang lai hoek krax prawng ca: phimap heue.
Krox jun pot kah Simiang Siyiex mai hu: kah daux krax Nawh awawx, Nawh Cao: tag yaog maix ting mai tawx sin: kah daux meung Nawh Cao:, mai maix tag yaox pa laux pa som pwi pa ang rah ang see khankix heue.
Viang aux yaox pwi pa ang rah ang see khankix, pa nieb kwang: tokaux tix, ting lhaong: awm: khaox ting khaox mhawm: kawx.
Khaix an: nawh gah hu: mai grai: mu: heue, aux sawg nawh kawx ang yaox.
Keud kah pwi pa hoik grum mhawm:, mai jhak kah pwi pa rauh pa see awawx, mai pwi an: tag pon pa nhim:, ju khaix tom: sidauh heue.
Can pwi pa phit pa lud khankix, tag hoek krax laux krax leeing:, mai pwi pa ang rah ang see khankix, kix tag yaox tix kham: pa tik pa vud ju khaix heue.
Krax taoh pwi pa rauh pa see khankix, lih hoek khaing: Simiang Siyiex, mai mawh dee deuh rhawm: yam yaox kix krax khirhawm: khirhi: heue.
Simiang Siyiex teem: coi kix mai taoh kix, mai Nawh Cao: taoh kix lih khaing: daux tawm: taix pwi pa ang rah ang see khankix, kheu kix deuh rhawm: kah Nawh Cao: heue.
Lox Pa Rawg Bwan: Pwi Pa Kharhawm: Kharhi: Tix Kaux
Simiang Siyiex eue, viang Maix songrhawm: songrhi: kawx, paw lai deuh phimap kah aux liak. Paw lai sivied tix gau aux kah pa kied songrhawm: Maix liak.
Te Maix hoik laig kah aux, mai taix Maix hoik yeen kah aux.
Mawh kheu lih krax pa songrhawm: songrhi: Maix, nex aux ang koe: krax nyawm ot, mawh kheu phimap aux, ang koe: krax brax krax moi:.
Phimap pa yuh aux hoek kah piang kaing: aux, awm: kraung pa cien pa ang aux lai pex tix klawm: heue.
Mawh kheu mawh aux pwi pa seeing: pa brai: mai pon jhawm: saux pa brai: pa cux heue.
Aux kied yaox tix kham: geu: dee tiiem mai ceep kraung caox mai lailing tix leeing: lang: singaix heue.
Mai nyoi aux pon jhawm: saux si aoh hax mai nex aux ang koe: dee nyawm ot.
Rhawm: aux bih, mai siyaung: tix mai riag yo heue.
Simiang Siyiex eue, can pa lo aux khawm uik hoik koe: sivoe ngai: Maix, lox pa ngia aux kawx, kieh Maix tawng heue.
Rhawm: aux siyaung: mai riang rao aux kawx, hoik grai: khaing: aux heue.
Mawh kheu saux ngia aux, paox moh aux mai paoxgrawm aux khankix cung dee singai mai puxaik aux khankix kawx, via tix tik aux heue.
Pwi pa sawg kah ju aux khankix, taong: kie kah aux heue. Mai pwi pa sawg tix yuh pa caox pa caig kah aux khankix kawx krai lox pa ang khaw: mai nieb keud tix yuh pa caox leeing: lang: singaix heue.
Phan: mawh aux yuh tix ang mhong: awm: pwi pa lheet yhaok, mai yuh tix ang chix sikah awm: pwi aw: heue.
Aux awm: pwi pa ang chix mhong:, mai awm: pwi pa ang chix pawk lox sikah heue.
Grawhgrawng: nawh, Simiang Siyiex eue, aux deuh rhawm: kah Maix pa mawh Siyiex aux, deeh pawk kah lox aux liak.
Phan: ang mawh nan:, ha kix kox gauxrhawm: kah piang aux, yam cangklad aux, pwi pa ot tang: plak khankix,
ha kix kox yaw tokaux tix ah nin:, yam dex goh aux, mai yam saux yam ngia aux doh deud kah heue.
Aux krai doh kah phimap tix, aux khirhawm: khirhi: kheu hoik yuh aux phimap tix heue.
pwi pa koeng kah aux khankix, kix nyawm ot mai ting riang ting rao, mai pwi pa koeng kah aux kah daux pa ang mawh ang meh kawx, kied haoh kied hun: heue.
Mawh kheu yuh aux pa mhawm:, mai ceu pa rauh pa see kix deeh tawx pa caox kah pa yuh aux pa mhawm: heue.
Simiang Siyiex eue, paw lai tik vud aux liak, Siyiex eue, paw lai ot singai khaing: aux liak.
Siyiex Cao: pa taoh kah aux eue, nied Maix lih teem: coi kah aux liak.
Pwi Pa Kharhawm: Kharhi: Tix Kaux Krai Doh Kah Phimap Tix
Aux ah nin:, aux yuh satix mai priex rhawm: kah dak tix son ang lai phit lud, yam ot pwi pa ang rah ang see sivoe ngai: aux, mai aux thox jheeh tix ang ah lox tidtix heue.
Ang aux lai sikah awm: pwi aw:, pie lox ceu pa mhawm: kawx, ang aux krai, viang mawh kawx nan:, krax pa lauxrhawm: aux nie kin: heue.
Kah daux rhawm: aux hoik si aoh yam keud aux tokaux tix, lih hax awm: rop ngu heue.
Simiang Siyiex eue, kieh aux tawng tom: sidauh krax, kah grawng: ju aux, mai sonsang tawng aux grawng: pa chix laux chix leeing: tokaux tix heue.
Jhak heue, Maix hoik kieh ju aux dawd, mai ju aux kawx ang mawh tidtix, sivoe ngai: Maix, phan: mawh kawn: pwi, viang nawh ting lhaong: kawx, mawh pa giex pa going heue.
Phan: mawh kawn: pwi awm: ngie kawn: peue:, mai kharhawm: kharhi:, ang koe: bwanson: tidtix, viang kix khrawm: tix deuh kraungkhrai: kawx, ang kix tawng kah pwi sang pon heue.
Simiang Siyiex eue, yamin: aux krox jun pot kah ceu patix? krax krox krax jun pot aux, koe: ngie kah daux Maix khaing: heue.
Taoh aux lih khaing: phimap pa phit pa lud tix liak, paw kieh pwi pa caox khankix, map mai salao kah aux liak.
Mawh kheu grawng: kaing pa yuh Maix, aux tom: ang lo tix ah tidtix heue.
paw nyang ciyang kah aux ha:, aux ot daux tawm: taix pa sivied Maix tix gau, mai riang rao aux hoik uik heue.
Maix sivied tix ciyang kah kawn: pwi, mawh kheu phimap nawh, Maix kieh min: plakngai: pa khaw: rhawm: kix grai: hu:, awm: kawng6 pa chix yuh laux mai kawn: pwi khawm uik mawh pa giex pa going heue.
Simiang Siyiex eue, nghiiet kah lox pa rawg pa mhaing: aux, mai veeh yhaok Maix nghiiet kah lox pa kok yo aux liak, paw lai jhak kah rawm: ngai: aux, aux mawh ngie nyo sinie sivoe ngai: Maix, awm: ju tax du ex khankix heue.
Veeh pak ngai: Maix kah aux sonsang nyawmrhawmrhi: aux, tom: ang aux nyang gah hu: mai grai: hu: liak.
Lox Rhax Yaogyaw
Aux krox jun pot kah Simiang Siyiex, mai Nawh veeh plakngai: kah aux, mai nghiiet kah lox pa kok yo aux heue.
Nawh cao: taoh aux lih khaing: daux tiex mai daux glaox pa caox pa caig heue. Mai deuh caong aux kah piang rang: ting, mai kieh rhoi: khaix caong aux kaux cong: heue.
Nawh Cao: teei lox rhax pa khraox sau: kah daux jheeh aux, sonsang yaogyaw kah Siyiex heue. Yam pwi haoh pwi hun: yaox, kix lhat graung mai deuh rhawm: kah Simiang Siyiex heue.
Pwi pa deuh rhawm: kah Simiang Siyiex, mai pa via hu: khaing: pwi pa ting rhawm: ting rhi:, mai pwi pa krub rieng krub rao khankix koe: bwanson: heue.
Simiang Siyiex aux eue, ceu pa daox pa am: mai pa keud Maix son ex, kied haoh kied hun: heue, mai ceu pa yiag pa bak Maix tix deuh sivoe ngai: Maix ang doh uik, phan: aux krai grawng: ceu pa yuh Maix, kied haoh kied hun:, tom: ang aux lai uik simin heue.
Maix ang simie tix cie kah kraung ceu pa tan pa lu, aux hoik paoh yhaok tix, mai ang rawg kah kraung ceu pa gleeing tix tawx sonsang ploi: phimap phigrham:.
Aux tag sang hu: heue, awm: pa hoik tiem: aux tix deuh grawng: aux, daux bua: Phuk Lai heue.
Siyiex aux eue, aux kied gauxrhawm: gauxrhi: sonsang hawt yuh alo Maix, gumlox beenli Maix kawx, ot kah daux rhawmrhi: aux heue.
Aux hoik sidiex gumlox pa rauh pa see Maix, sinax pwi haoh pwi hun: hankix heue. Simiang Siyiex eue, Maix hoik tawng grawng: pa ang aux thox jheeh tix heue.
Lox beenli pa rauh pa see Maix kawx, ang aux lai mox kah daux rhawm: tix, mai aux hoik sidiex grawng: krax taoh Maix mai pa kaux sijax, krax moh krax rhawm: mai pa kaux sijax Maix, aux ang lai mox sinax pwi haoh pwi hun: khankix heue.
Simiang Siyiex eue, paw gun krax pa caoxrhawm: pa moh Maix kah aux liak, mai krax pa caoxrhawm: Maix, mai sijax mukheu Maix kia: ngien kah aux jheeing: jheeng: liak.
Lox Rawg Bwan: Sonsang Teem:
Grawhgrawng: nawh krax khirhawm: haoh hun: tom: ang uik tawng hoik rob vungviang aux heue. Phimap hoik krup kah aux tom: ang aux pon jhak, nie lheu: khaing: hauk kaing:, mai rhawmrhi: aux hoik iak hu: heue.
Simiang Siyiex eue, Maix taoh kah aux liak, Simiang Siyiex eue, nied tix teem: coi kah aux liak.
Pwi pa sawg tix plaux ju aux khankix, kieh kix kaig tua mai laux plakngai: liak, pwi pa simie tix yuh pa caox kah aux khankix, kieh kix lhat mai hoek krax pa kaig pa tua liak.
Can pwi pa ah nin: kah aux, ha ha:, ha ha:, kieh voi rhawmrhi: mai hoek krax pa kaig pa tua liak.
Can pwi pa sawg kah Maix khankix, kieh kix gauxrhawm: gauxrhi: kah daux Maix liak, can kix pa khaw: rhawm: khaw: rhi: kah bwanson: krax taoh Maix, mai kix ah nin:, kieh min: plakngai: Simiang Siyiex ting lhaong: jheengjheeng: liak.
Phan: mawh aux viang aux hot sibhawm: kawx, Siyiex kawn: doh keud kah aux heue, Maix mawh Cao: pa teem: coi aux, mai taoh kah aux heue, Siyiex aux eue, paw lai koi.
Lox Rawg Bwan: Pwi Saux Tix Kaux
Pwi pa doh keud doh sawn: kah pwi pa hot pa sibhawm: khankix ting bwanson: heue. Simiang Siyiex kieh nawh luan kah bawg yam singaix pa nu pa khawm heue.
Simiang Siyiex tag teem: coi kah nawh, mai kieh ju nawh nyawmrhawm: nyawmrhi: mai nawh tag sang pon bwanson: kah daux meung Nawh Cao: heue. Mai Maix ang tawx nawh kah pwi pa koeng kah nawh khankix.
Simiang Siyiex tag sang joh jhan teem: coi kah nawh, yam saux yam ngia nawh, mai Siyiex cox dee it nawh heue.
Aux ah nin:, "Simiang Siyiex eue, caoxrhawm: kah aux liak, mai kieh jhawm: saux ju aux moi: liak, mawh kheu hoik phit hoik lud aux kah Maix heue".
Pwi pa koeng kah aux khankix, krai lox map kah aux, nawh tag yum: mai ceukaux nawh grai: lai mawx?
Yam hoek nawh tix jhak kah aux, nawh ah lox pie lox lhen: heue, kah daux rhawm rhi: nawh, keud tix krai grawng: pa ang mhawm: yam lih hu: nawh heue.
Can pwi pa koeng kah aux khankix, ot tang: plak mai krai lox supsiep kah paox tix, tix kaux hoik tix kaux, mai keud pa ang mhawm: ang mhiem: kah piang aux heue.
Mai kix nieb ah nin:, nawh hoik goh mai ang tau tix deeh pon kaoh tix bawg kawx heue.
Paoxgrawm pa yumrhawm: aux, pa ih khaomun aux, yaog caong tix tiied kah aux heue.
Simiang Siyiex eue, caoxrhawm: kah aux, kieh aux deeh kaoh, sonsang deeh viied aux tix pawk phimap kix liak.
Son ang pwi pa koeng kah aux khankix pex aux, teem: coi kah aux liak, mai kieh aux tawng grawng: pa moh Maix aux heue.
Maix hoik teem: coi mai kieh aux grum koe: mai tawx dee ot aux sivoe ngai: Maix leeing ju leeing phan: heue.
Kieh Simiang Siyiex ceu pwi Isarilax koe: bwanson: leeing ju leeing phan: liak. Amen, Amen.
Lox Rawg Bwan: Pa Ot Kah Daux Haktiex Praix Pwi Tix Kaux
Siyiex eue, awm: krox jun cak kah rawm: klawng: pa si kiied, mai ju aux kawx, krox jun pot kah Maix heue.
Ju aux simie kah Siyiex pa im: ju, (awm: pa simie tix sawm:) aux tag sang hoek tix jhi: plakngai: aux sivoe ngai: Maix lai mawx?
Rawm: ngai: aux lih tix mawh pa ih aux ku singaix ku sawm: ang jud heue. Mai pwi tang: kaux ca: chawk ah nin: kah aux, Siyiex maix koe: dee mawx?
Yam doh keud aux kah ceu an: khankix, aux khrup rhawm: heue, grawhgrawng: nawh, yam rom aux tix hu: tau mai pwi haoh pwi hun:, mai ah lox gauxrhawm: gauxrhi:, mai lox rhax yaogyaw mai thong: pwi haoh pwi hun: khankix hu: kah daux nyiiex Siyiex heue.
Ju aux eue, mawh kheu patix rhawm: maix iak hu: yuh nin: yuh kah mawx? Mawh kheu patix maix ang ot yiien: yawg tix kah daux aux yuh kah mawx? Krox jun pot kah Siyiex awawx. Aux tag sang ah lox rhax yaogyaw bwanson: Siyiex pa krub aux, mai Cao: pa taoh aux tix bawg heue.
Siyiex eue, ju aux hoik iak riang hu: kah daux aux heue. Grawhgrawng: nawh, aux doh keud kah Maix kah praok rawm: klawng: Yawdan mai kah piang gawng Heramon mai gawng Mizarax heue.
Rawm: sigrit sigra: pa raux tix mu: hoik tix mu:, mai pukpak rawm: sinum siaox khankix, hoik kheem: kah aux heue.
Viang mawh kawx nan:, yam pon singaix Siyiex caoxrhawm: tawx bwanson: mai yam ponsawm: kawx, rhax lai yaogyaw kah Siyiex Cao: ju aux, ot mai aux heue.
aux ah nin:, kah Siyiex pa mawh Rang: ting aux, mawh kheu patix Maix lai piawm: aux, yam yaox aux tix kham: geu: krax tuktiaktukte:, mai pwi pa koeng kah aux, mai yam yaox aux tix ceep kraung pa caox pa blai yuh kah mawx?
Pwi pa koeng kah aux khankix, ca: chawk ah nin: kah aux, Siyiex maix koe: dee mawx? Mai kix salao kah aux mai simie tix raig si-ang: aux pot heue.
Ju aux eue, mawh kheu patix rhawm: maix iak hu: yuh nin: yuh kah mawx? Mawh kheu patix maix ang ot yiien: yawg tix kah daux aux yuh kah mawx? Krox jun pot kah Siyiex awawx. Aux tag sang ah lox rhax yaogyaw bwanson: Siyiex pa krub aux, mai Cao: pa taoh aux tix bawk heue.
Lox Rawg Bwan: Pwi Pa Ot Meung Pwi
Siyiex eue, prawng ca: kah see: aux, mai teem: coi aux kah pwi pa ot tang: plak pa ang koe: krax caoxrhawm: liak, mai taoh aux luan khaing: tawm: taix pwi pa ang kaux sijax mai pwi pa ang rah ang see liak.
Maix mawh Siyiex dee deuh aux rhawm: heue, mawh kheu patix Maix lai tik vud aux, yam yaox aux tix kham: geu: krax pa tuktiaktukte: pwi pa koeng kah aux, mai yam yaox aux tix ceep kraung pa caox pa blai yuh kah mawx?
Ploi: pa riieng Maix mai pa kaux sijax Maix lih hoek liak, mai thong: kix hu: kah piang gawng Maix pa singax singeh, mai thong: aux hu: kah daux nyiiex bwan: Maix liak.
Phan: yuh nan:, aux tag hoek kah khu: dee tan Maix, mai gauxrhawm: gauxrhi: tix hoek kah dee ot Maix, mai tah ting: ah lox rhax yaogyaw kah Siyiex aux heue.
Ju aux eue, mawh kheu patix rhawm: maix iak hu: yuh nin: yuh kah mawx? Mawh kheu patix maix ang ot yiien: yawg tix kah daux aux yuh kah mawx? Krox jun pot kah Siyiex awawx. Aux tag sang ah lox rhax yaogyaw bwanson: Siyiex pa krub aux, mai Cao: pa taoh aux tix bawg heue.
Lox Rawg Bwan: Sonsang Priex
Siyiex eue, ex hoik mhong: kaing pa yuh Maix kah ju tax du ex didix.
Maix hoik teei taix Tix, mai sigrheu: kah pwi tang: ceu tang: cat khankix, mai tawx dee ot kah tax du ex khankix heue, Maix tuktiaktukte: kah pwi tang: ceu khankix mai kieh pwi tax du ex khankix pre haoh hun: heue.
Kix teei vaig mai kwang: haktiex ang mawh, kix teei plawng: taix tix, taoh kah tokaux tix ang mawh, mawh kheu koe: alo Maix, mai Maix teei taix khawn: dawm: Maix mai pa riieng pakngai: Maix taoh kah kix heue.
Siyiex eue, Maix mawh Simiang Khunhawkham aux heue. Prawng ca: mai taoh kah aux ceu pwi Yakop liak.
Aux deuh rhawm: kah Maix, mai nyhot tix tik kah pwi pa koeng kah aux heue. Aux deuh rhawm: kah ceukaux Maix, mai dig kah pwi pa koeng kah aux khankix heue.
Ang aux deuh rhawm: kah ak viex tix, mai vaig aux kawx, ang pon tix taoh aux.
Mawh Maix khaing: pa pon tix taoh aux luan khaing: pwi pa koeng kah aux khankix heue. Maix kieh pwi pa koeng kah aux khankix hoek krax pa kaig pa tua heue.
Aux yaw rangdi kah daux Siyiex, leeing: lang: singaix mai yaogyaw ceukaux Maix jheeng jheeng heue.
Viang mawh kawx nan:, Maix tik aux mai kieh aux kaig tua, mai ang hu: tau mai kru naing aux khankix.
Mai kieh aux deeh dak khaix, sivoe ngai: pwi pa koeng kah aux khankix, mai pwi pa koeng kah aux khankix hoik rud rhim: tix teei pa simie kix tix teei khawm uik heue.
Maix hoik teei tix tawx aux kah kix awm: kawn: yung: pa sang pah tix ih, mai hoik kieh pungprang: hu: sinax pwi tang: ceu tang: cat heue.
Maix ang teei ngawh mai hoik coh kah pwi Maix, pa coh Maix ang koe: krax pa mi pa koe:, mai ang chix haok chix hwan heue.
Pa yuh Maix kah ex kieh pwi pa ot paoxplawg paoxnyhawm: salao mai pwi pa ot dex sivie sivheng: ex nyiah mai kaig tua heue.
Pa yuh Maix kah ex kieh pwi tang: ceu tang: cat map kah ex, mai kieh cub pwi haoh pwi hun: vuh vied kaing: kah ex heue.
Aux laux min: plakngai: leeing: lang: singaix, mai krax pa kaig pa tua aux koe: sivoe ngai: aux heue.
Grawhgrawng: nawh aux mhong: lox map, lox pa sa pa lao mai lox bak lox viang pwi pa koeng khankix heue.
Viang ex yaox tix kham: nie ding nie dod kawx, ang ex doh piawm: Maix, mai ang tik kah sijax mukheu Maix.
Rhawm: aux ang deeh kah plak khaix, mai ang lud hu: khaing: krax beenli Maix.
Phan: mawh Maix teei tix tik dee ot sox praix mai kheem: ex kah veei krax yum: heue.
Phan: ex piawm: kah ceukaux Siyiex ex, mai phan: nyeu taix tix kah siyiex pwi tang: ceu tang: cat khankix.
Phan: Maix ang chawkcheng: kah kaing pa yuh ex khex chix lie? Grawhgrawng: nawh, Maix hoik tawng ceu pa mox kah daux rhawm: tix khawm uik heue.
Mawh kheu son Maix, ex yaox tix kham: yum: jheengjheeng:, mai pwi tang: kaux deuh ex awm: kawn: yung: pa sang pah heue.
Siyiex eue, siduad heue, mawh kheu patix, Maix lai laig it , kaoh heue, paw lai tik kah ex jheeing: jheeing: liak.
Mawh kheu patix Maix vud plakngai: khaing: ex, mai Maix piawm: ex yam yaox ex krax kharhawm: kharhi: mai krax pa tuktiaktukte: yuh kah mawx?
Ju ex hoik rau hu: tom: sidaing: tiex, mai tokaux aux kawx, hoik cux kah piang tiex heue.
Kaoh mai teem: coi kah ex liak, mai taoh ex kah daux krax moh krax caoxrhawm: Maix liak.
Lox Rhax Pa Yuh Simiang Kah Paox
Lai pa tiiem: aux, ah lox rhax kah paox plak sivoe ngai: Simiang khunhawkham, rhawmrhi: aux kied naog krax gauxrhawm: gauxrhi: heue. Mai dak aux kawx sidaing: chix ah awm: gawng: nammeug pwi pa chix tiem: lai tix kaux heue.
Maix lheu: mhawm: khiang: paox kawn: pwi heue, jheeh Maix hoik naog kah lox bwanson: heue. Mawh kheu in: Siyiex tom: tawx bwanson: kah maix jheengjheeng: heue.
Simiang pa ting siawpsibrawm eue, teei vaig min: plakngai: Maix pa ting mai kawg heue.
Kieh siawpsibrawm Maix pex hu:, mai brug hu: kah lox pa mawh pa meh mai lox pa awn: pa tiiem, mai lox pa rauh pa see liak, taix khawn: dawm: Maix tag sang jhi: kah ceu pa lhat pa graung heue.
Mawh kheu kied lawm te Maix, mai laig kah daux rhawmrhi: pwi pa koeng kah Simiang khunhawkham khankix, mai kix goh greem: caong Maix heue.
Siyiex eue, dangngeung Maix mawh dangngeung pa kaux pa cong: leeing ju leeing phan: heue. Mai meung Maix mawh pa rauh pa see heue.
Maix moh kah ceu pa rauh pa see, mai koeng kah pa ang rah ang see heue. Mawh kheu in:, Siyiex eue, mai Siyiex maix yaog maix nie lheu: ting khaing: paoxgrawm maix khankix, mai hoik groi rawm: bee pa gauxrhawm: gauxrhi: kah maix heue.
Muran, acaw7, mai khaox caihung:, pa sioe: baux hoik bhawng: kah kraung ceep mai lox tah ting: rhax lai yaogyaw kah maix kieh maix gauxrhawm: gauxrhi:, kah daux nyiiex haw: pa hoik yuh maix kah nga sang: heue.
Kawn: bun: Simiang khunhawkham khankix kudauh, ot tau mai kawn: bun: Simiang, mai plak taix khawn: dawm: maix, moeng maix nanghawkham ceep kraung khri: (awfirax) mai cung tix heue.
Kawn: bun: eue, nghiiet heue, veeh yhaok tix mai keud mhawmmhawm:, piawm: kah ceu pwi maix, mai nyiiex ma: miex keeing: maix awawx.
Phan: yuh nan:, Simiang khunhawkham tag moh kah maix, mawh kheu mhawm: grang maix mai nawh hoik mawh Simiang maix, mai krub kah Nawh heue.
Jah kah kawn: bun: Simiang veng Turux, mai cub pwi mag pwi mi khankix, viex khawngphak laksawng: mai hoek tix rieb kah maix heue.
Mai kawn: bun: Simiang khunhawkham khankix, koe: min: plakngai: mai ceep kix kraung pa hoik yuh kah khri: heue.
Khaix hoik ceep kix kraung pa mhawm: grang kah nawh, hu: tau mai paox bunkrih nawh, mai viex nawh hu: kah Simiang khunhawkham heue.
Kix viex ceu pa gauxrhawm: gauxrhi: mai laig kah daux nyiiex haw: Simiang khunhawkham heue.
Son keeing: khankix, Maix hoik ciak tix deuh kah kawnpraix kix, sonsang mawh Simiang kah piang haktiex khawm uik heue.
Aux tag sang teei ceukaux Maix tah hu: kah kawn: pwi khankix, mai ceu kawn: pwi tix ju hoik tix ju, mai kawn: pwi khankix yaogyaw kah Maix ku ju leeing ju leeing phan: heue.
Siyiex Ot Mai Ex
Simiang Siyiex mawh dee deuh ex rhawm:, mai tawx riang rao kah ex, mai teem: coi kah ex yam yaox krax pa khirhawm: khirhi: heue.
Mawh kheu in: viang haktiex gah greed hu:, mai gawng lua yungyiang: hu: kah daux rawm: sigrit sigra: kawx, mai rawm: sigrit sigra: sinum siaox mai sigu: hu: kawx,
mai pukpak rawm: haok hwan, mai gawng lua khankix yungyiang: hu: kawx, aux ang lhat heue.
Koe: rawm: klawng: tix mu:, mai rawm: klawng: an:, mawh dee ot Siyiex Cao: pa ting pa lhaong:, mai veng pa singax singeh dee gauxrhawm: heue.
Siyiex ot kah daux veng an:, mai veng an: ang lai yungyiang: mai Siyiex teem: coi kah nawh, tom: yam jah praix tix riieng heue.
Ceu kawn: pwi khankix, lawh maw: cuci:, mai haktiex khankix yungyiang:, mai Siyiex ploi: lox Tix lih, mai haktiex ceh hu: awm: rawm: heue.
Simiang Siyiex Cao: kru naing raoma: ot tau mai ex, mai Siyiex ceu pwi Yakop mawh dee deuh ex rhawm: heue.
Hoek tix jhak kah pa yuh Simiang Siyiex, haktiex lauxleeing: heue.
Mai Nawh Cao: raig ak mai pliah pot, baux mawx baux an:, mai teei ngu gleeing tix tik kah ling: khankix, mai kieh naing yiien: tom: sidauh haktiex khawm uik heue.
Ot yiien: yawg mai kieh pex tawng, grawng: mawh Aux Siyiex awawx. Aux mawh Siyiex pa ting siawpsibrawm piang kawn: pwi mai piang haktiex khawm uik heue.
Simiang Siyiex Cao: kru naing raoma: ot tau mai ex, mai Siyiex ceu pwi Yakop mawh dee deuh ex rhawm: heue.
Cao: Pa Giex Kaing: Pa Ting Siawpsibrawm
Ceu kawn: pwi khawm uik eue, dieh taix tix awawx, ah lox sinum mai kok yo kah Siyiex awawx.
Grawhgrawng: nawh Simiang Siyiex mawh Cao: pa ting pa lhaong: khaing: khawm uik, mai mawh Siyiex pa caw ex tix lhat graung kah, mai Nawh mawh Simiang Khunhawkham pa giex kaing: kah piang haktiex khawm uik heue.
Nawh Cao: teei tix deuh ceu pwi khankix kah greem:, mai cub pwi ku cub, deuh kah greem: caong ex heue.
Nawh Cao: laug tix teei kah Yakop pa moh Nawh, sonsang mawh Sin: min: plakngai: son ex heue.
Simiang Siyiex kok yo lox pa gauxrhawm: gauxrhi:, mai lox phlu: teettawng mai haok heue.
Ah lox rhax mai yaogyaw kah Siyiex awawx, mai ah lox rhax yaogyaw kah Simiang khunhawkham mai ah lox rhax awawx, ah lox rhax heue.
Grawhgrawng: nawh Siyiex mawh Cao: pa giex kaing: piang haktiex khawm uik, ah lox rhax yaogyaw kah Nawh heue.
Siyiex giex kaing: piang ceu kawn: pwi khawm uik, mai Nawh Cao: ngawm kah piang dangngeung Nawh, pa singax singeh heue.
Kuad song: nong: yu cub pwi ku cub khawm uik, khrawm: paox tix hoek kah kawnpraix Siyiex Abraham heue, grawhgrawng: nawh, kraung pa tiebtie mawh kraung cie Siyiex mai kieh Nawh mawh Cao: pa ting pa lhaong: heue.
Veng Zion Cie Siyiex
Simiang Siyiex mawh pa ting pa lhaong: mai khaw: tix yaogyaw kah Siyiex pa ot kah piang gawng dee singax singeh kah daux veng Nawh heue.
Gawng Zion mawh pa lhaong: mai pa mhawm: grang mai mawh dee gauxrhawm: gauxrhi: kah piang haktiex khawm uik, kah daog plak laong: mawh dee koe: veng Simiang Khunhawkham pa ting pa lhaong: heue.
Siyiex kieh tawng, Nawh mawh dee deuh rhawm: kah daux nyiiex an: heue.
Jhak heue, Simiang khunhawkham khankix, hoek tix kum: kawng: mai paox tix heue.
Mai yam yaox, kix kied daox kied am:, lhat yaoh, mai to: hu: heue.
Kix kied lhat kied graung kah veng an:, mai yaox krax kharhawm: kharhi: awm: bun: pa sang keh heue.
Maix teei bhaung: plak lih singaix, mai kieh raig tix tik kah nyiiex reu ting veng Tasux heue.
Awm: pa hoik sax mhong: ex, ex hoik pon tix yaox kah veng Simiang Siyiex Cao: kru naing raoma: pa mawh Siyiex ex heue, Mai Siyiex tag kieh veng an: kaux cong: leeing ju leeing phan: heue.
Siyiex eue, ex doh keud doh sawn: kah bwanson: krax moh krax rhawm: Maix, kah daux nyiiex bwan: Maix heue.
Siyiex eue, awm: hoik tah hu: ceukaux Maix kah piang haktiex tom: sidauh, min: plakngai: Maix kawx, kieh sidauh heue. Mai taix khawn: dawm: Maix hoik grum naog kah beenli pa rauh pa see heue.
Mawh kheu krax pa prawng ca: Maix, gawng Zion mai kawn: bun: Yudax khankix, gauxrhawm: gauxrhi: heue.
Hawt rob vungviang veng Zion mai simin tix deuh kah nyiiex pa ting pa lhaong: khankix,
mai een: tix tawng kah guh veng nyiiex haw:, sonsang pon tix krai kah ju kawnpraix khankix heue.
Grawhgrawng: nawh, Siyiex ex mawh Siyiex leeing ju leeing phan: heue. Mai Nawh Cao: tag sang thong: ex hu: tom: sidauh yum: heue.
Pwi Daox Pa Deuh rhawm: Kah Mau Khri:
Ceu kawn: pwi khwm: uik eue, nghiiet heue awawx.
Kawn: pwi piang haktiex khawm uik, pa iak pa ting ang ah pa mi pa hot ang ah, khrawm: paox tix nghiiet awawx.
Jheeh aux krai lox cuyi: pingnya, mai rhawmrhi: aux keud sawn: kah pa dex pa dawd mai cuyi: pingnya heue.
Aux veeh yhaok tix nghiiet kah lox been mai tah ting: mai plak jhi: grawng: ceu pa raux pa mox heue.
Yam hoek bawg yam pa nu, pa caox pa caig, mai yam hoek rob pwi pa caox pa caig khankix kawx, aux tag lhat kah ceu patix?
Pwi pa deuh rhawm: kah kraungkhrai: tix, mai kix yaw tix, kheu kied haoh kraungkhrai: kix heue.
Kaux pwi mawx ang ah, ang doh pon taoh kah puxaik tix, mai sonsang taoh, ang doh pon tawx ngawh kah Siyiex.
Sonsang taoh kah ju kix mawh pa kied ngawh pa kied ting jum heue. Phan: yuh nan:, ju kix tag som nai: giex heue.
Pwi ang pon taoh kah ju, sonsang im: leeing ju, mai son ang lai hoek kah daux simeeig heue.
Nawh yaox yuh nin:, pwi pa koe: cuyi: pingnya kawx chix yum: awm: an:, pwi pa daox pa aw: pa koe: rhawm: tosat kawx, chix laux chix leeing: mai kraungkhrai: kix, prah kah pwi tang: kaux tang: hak heue.
Kix keud daux rhawm: tix, nyiiex kix mai dee ot dee koe: kix mawh pa kaux pa cong: leeing ju, mai ceukaux kix ao: min: kah piang haktiex heue.
Viang mawh kawx nan:, min: plakngai: kix, ang lai chix kaux chix cong:, mai nawh chix laux chix leeing: awm: pa laux tosat heue.
Kix deuh rhawm: tix kah daux pa yuh nan:, mai pwi khankix nghiiet lox sikah kix heue.
Grheu: kix lih hu: kah daux meung yum:, awm: cub yung:, mai Simiang meung yum:, tag sang ih kix heue, mai pwi pa rauh pa see khankix, giex kaing: kwang: kix been tix ngawb mai tokaux dee ot kix, dee tieh loh mai dee ot kix mawh meung yum: heue.
Phan: mawh aux, Siyiex priex aux, mai taoh ju aux khaing: siawpsibrawm meung yum: heue.
Yam yaox maix mag mi pwi mai koe: mau koe: khri:, mai ting min: plakngai: haok hwan nyiiex ma: nawh, paw kieh rhawm: maix ghoing: kah heue.
Yam yum: nawh, kraungkhrai: nawh, mai min: plakngai: nawh, ang lai pon tix viex hawt khaix nawh tix ceu kawx heue.
Yam kawn: im: ju nawh, nawh chix yaw kah tokaux tix, mai yam yuh nawh kaing son tokaux tix, pwi yaogyaw kah nawh heue.
Viang mawh kawx nan:, nawh tag sang hu: kah dee ot tax du (Yadie kix) heue, mai kix ang yaox kah pa riieng leeing ju leeing phan: heue.
Pwi pa grum naog kah min: plakngai: mai pa ang koe: cuyi: pingnya khankix, awm: tosat pa hoek krax pa laux pa leeing: heue.
Krub Kah Daux Pa rauh Pa See
Simiang Siyiex Cao: pa ting siawpsibrawm, tawx lox kah haktiex plak lih singaix tom: sidauh plak klip singaix heue.
Pa riieng Siyiex, pa jhan riang pa grum ceu pa mhawm: grang, lih kah piang gawng Zion heue.
Siyiex ex hoik hoek mai Nawh Cao: ang ot yiien: yawg tix, ngu hax sivoe ngai: Nawh Cao:, mai hawt dex sivie sivheng: Nawh, koe: lhiex ting mai bhaung: ting heue.
Nawh Cao: kok kah raoma: mai haktiex, sonsang chawkcheng: tix prawng ca: kah pwi Nawh khankix, mai ah nin:,
"Kieh pwi pa moh Aux, mai pa hoik tan hoik lu pa hoik yuh sijax mukheu mai Aux, khrawm: paox tix hoek kah Aux heue."
Raoma: khankix, plak jhi: grawng: pa hoik yuh Nawh Cao: pa rauh pa seeh, mawh kheu tokaux Siyiex mawh Cao: pa prawng ca: pa rauh pa see heue.
Pwi Aux khankix eue, nghiiet heue awawx, Aux tag sang krai heue, ceu pwi Isarilax eue, Aux tag kham: sakse plak pex heue. Aux mawh Simiang Siyiex pex heue.
Aux ang deuh phimap kah pex, grawng: pa gleeing pex tix tan lu, mai pa tan pa lu pex kuceu, hoik koe: sivoe ngai: Aux jheengjheeng: heue.
Aux ang mhaing: tix cie moi daux nyiiex maix, mai pex mhaing: pa koe: daux kawg maix.
Mai totiag totu, mai tosat, kaing: pak, kaing: rheng:, mai pa ot kah piang gawng khankix mawh cie Aux khawm uik heue.
Aux tawng sim: pa ot kah piang gawng khankix khawm uik, mai totiag totu khankix, ot mai Aux heue.
Phan: Aux cairhawm: Aux ang krai kah maix, haktiex mai can pa koe: kah haktiex mawh cie Aux heue.
Khex tag sang ih Aux nex moi lie? Khex tag sang nyaux Aux nham: pex lie?
Tan lu ceu pa yaogyaw bwanson: kah Siyiex awawx. Mai tawx ceu pa tan pa lu maix kah Siyiex Cao: pa ting pa lhaong: awm: pa hoik deuh maix sijax mukheu awawx.
Yam hoek krax khirhawm: khirhi: kok yo kah Aux, mai Aux tag taoh maix heue. Maix tag yaogyaw kah min: plakngai: Aux heue.
Siyiex ah nin: kah pwi pa ang rah ang see khankix, maix chix krai kah lox beenli Aux, mai sijax mukheu Aux, dex dawd mai maix yuh kah mawx?
Maix koeng kah lox pa sidiex gau Aux, mai tik lox Aux plak khaix tix ang mawh lie?
Yam yaox maix pwi pa briex, rhawm: maix awm: nawh, mai maix chix yuh paox yuh pie kah pwi pa phit pa vao kah moeng kawn: pwi heue.
Jheeh maix chix ah lox pa caox pa caig, mai dak maix chix ah lox pa pie pa lhen: heue.
Maix ngawm mai krai lox pa lah pa cha: kah puxaik tix, mai salao kah kawn: pa keh miex maix heue.
Aux glaik tix kah ceu pa yuh maix kawx, maix ce: Aux mawh awm: maix nieh, mai phimap pa yuh maix, Aux tag sang plak jhi: maix yaox sivoe ngai: maix heue.
Pwi pa piawm: kah Siyiex khankix eue, doh keud doh sawn: kah grawng: inkix awawx. Phan: ang mawh nan:, nu kah ang Cao: taoh pex koe:, mai Aux tag rud tix tik pex, baux mawx baux an: heue.
Pwi pa tan pa lu mai pa yaogyaw kah bwanson: Aux mawh pwi pa kieh min: plakngai: Aux sidawng: heue. Mai daux krax pa keud pa hu: nawh kawx, Aux tag plak jhi: bwanson: Siyiex Cao: pa taoh heue.
Lox Rawg Bwan: Sonsang Pluat Ploi: Phimap
Simiang Siyiex eue, awm: koe: rhawm: Maix, yuh bwanson: caoxrhawm: kah aux liak, awm: koe: krax pa caoxrhawm: Maix tom: nie, preet tix tik phimap pa phit pa lud aux liak.
Mai sigrhah phimap phigrham: aux tom: bawh khawm uik, mai kieh singax singeh liak.
Aux tawng aux yung pa phit pa lud tix, mai doh keud kah phimap pa phit pa lud tix jheengjheeng: heue.
Aux hoik phit lud kah Maix, mai aux hoik yuh pa ang rah ang see sivoe ngai: Maix, mawh kheu krax prawng krax ca: Maix pa rauh pa see pluat ploi: phimap aux heue.
Grawhgrawng: nawh, aux viex phimap phigrham:, tom: yam keh aux, mai tom: yam ot aux kah daux vaig miex tix heue.
Maix moh kah rhawm: pa rauh pa see, mai gau aux kah cuyi: pingnya pa raux pa mox kah daux rhawm: aux liak.
Mai sonsang singax singeh aux, teei lhax khaox haisop8 mai kieh aux singax singeh mai tawx bwanson: kah aux liak. Mai sigrhah aux paing awm: rawmrha: liak.
Sonsang nyawmrhawm: gauxrhawm: aux, kieh aux mhong: lox Maix liak, phan: yuh nan:, si-ang: pa hoik raig Maix tag sang gauxrhawm: gauxrhi: heue.
Veeh plakngai: Maix khaing: phimap pa hoik yuh aux, mai preet tix tik kah phimap phigrham: khawm uik liak.
Simiang Siyiex eue, kieh daux rhawm: aux singax singeh liak. Cox rhawmrhi: aux mawh pa khraox mai kieh kaux cong: liak.
Paw lai grheu: tix tik aux khaing: Maix liak, paw lai teei khwan singax singeh Maix khaing: aux liak.
Caoxrhawm: deeh tawx akhwang: krax gauxrhawm: gauxrhi: pa dex pa dawd mai krax taoh Maix kah aux liak, tawx krax gauxrhawm: gauxrhi: Maix mai teem: coi kah aux liak.
Sonsang pon aux tix gau krax pa rauh pa see Maix kah kix, pwi pa ang rah ang see, mai sonsang deeh hoek pwi pa koe: phimap phigrham: kah Maix heue.
Simiang Siyiex Cao: pa taoh aux eue, kieh aux luan khaing: phimap pa simie tix pah pwi yum: liak, mai dak aux, ah lox rhax pa gauxrhawm: gauxrhi: grawng: pa rauh pa see Maix heue.
Simiang Siyiex eue, paoh kah siyieb jheeh aux liak, jheeh aux tag sang yaogyaw bwanson: Maix heue.
Maix ang moh kah ceu pa tan pa lu, phan: ang mawh nan:, aux tan lu kah Maix, mai Maix ang khaw: rhawm: kah ceu pa gleeing tix tan heue.
Ceu pa tan pa lu pa khaw: rhawm: Siyiex mawh rhawm: pa bih, Siyiex eue, rhawm: pa bih Maix ang chix tik chix vud heue.
Kieh rhawm: pa gauxrhawm: gauxrhi: Maix, yuh bwanson: kah gawng Zion liak, deeh cox kah guh veng, veng Yerusaliem liak.
Yam an: krax lu krax tan, pa rauh pa see pa gleeing tix tan ang ah, pa gleeing tix tan khawm kaux ang ah, Maix gauxrhawm: gauxrhi: kah heue. Yam an:, tag sang teei moi mhaing: mai tan lu kah piang khu: dee tan Maix heue.
Krax Prawng Ca: Siyiex Mai BwanSon: Nawh
Pwi pa ting riang eue, mawh kheu patix maix yaw tix, sonsang yuh laux kah bwanson: pa yuh pwi yuh kah mawx? Krax moh krax rhawm: Siyiex kaux cong: jheengjheeng: heue.
Mai dak maix lawm awm: gawn:, mai pie lhen: kah ceu pa caox pa caig, mai yuh kah ceu pa caox pa caig heue.
Maix nie lheu: moh pa caox khaing: pa mhawm:, mai nie lheu: moh lox pa pie pa lhen: khaing: lox pa rauh pa see heue.
Dak pa chix pie chix lhen: eue, maix khaw: rhawm: kah lox pa sang yuh pwi laux heue.
Siyiex tag raig tix tik maix jheengjheeng: heue. Nawh Cao: teei tix tik maix khaing: nyiiex gox maix mai bluh tix tik maix khaing: dee ot pwi pa im: ju heue.
Pwi pa rauh pa see khankix, yaox mai lhat graung heue. Kix nyiah kah nawh mai ah nin:,
"Jhak heue, pwi pa ang deuh rhawm: kah Siyiex mai nawh deuh rhawm: kah kraungkhrai: tix mai nawh kaux cong: kah phimap pa caox heue."
Phan: mawh aux, awm: khaox sanlun pa mhawm: klai pa koe: kah daux nyiiex Siyiex, mai aux deuh rhawm: kah krax moh krax rhawm: Siyiex leeing ju leeing phan: heue.
Aux tag sang yaogyaw Maix kah kaing pa hoik yuh Maix jheengjheeng: leeing ju leeing phan: heue. Aux tag krox jun pot ceukaux Maix sivoe ngai: pwi pa moh kah Maix, mawh kheu Maix mawh pa jiet mhawm: heue.
Kawn: Pwi Mawh Pa Caox Pa Hai
Pwi pa daox pa aw: khankix, keud tix ah nin: kah daux rhawm: tix, Siyiex ang koe:, mai kix mawh pwi pa hoik cux hoik sium:, mai chix yuh ceu pa seeing: pa brai: heue. Mai pwi pa yuh pa mhawm: pa mhiem: ang koe: tix kaux kawx.
Simiang Siyiex ot kah piang raoma: mai jhak kah kawn: pwi, koe: pa tawng pa yung mai pwi pa sawg kah Nawh tix kauxkaux lie? Ang koe: lie?
Kawn: pwi khawm uik, hoik lud krax, mai hoik cux hoik sium: awm: paox tix khawm uik, mai pwi pa yuh pa mhawm: pa mhiem: ang koe:, pie tix kaux kawx ang koe:.
Can pwi pa nieb yuh pa caox khankix khawm uik, ang kix tawng lie? kiied tix ih pwi Aux, awm: ih kix khaomun mai ang kok yo kah Siyiex lie?
Kah dee an:, tag koe: krax pa kied lhat graung, grawhgrawng: nawh, Siyiex kieh si-ang: pwi pa yuh tab tang: plak, pung prang: hu: heue. Mai kix hoek krax pa kaig pa tua heue.
Kieh krax taoh pwi Isarilax lih hoek khaing: piang gawng Zion liak. Yam deeh viex Simiang Siyiex pwi Nawh, pa hoik viex kix hu: deeh hoek, Yakop tag gauxrhawm: gauxrhi:, mai pwi Isarilax tag gauxrhawm: gauxrhi: heue.
Lox Rawg Bwan: Sonsang Luan Khaing: Pwi Koeng
Simiang Siyiex eue, kieh ceukaux Maix taoh aux liak, mai teei siawpsibrawm Maix prawng ca: plak aux liak.
Simiang Siyiex eue, nghiiet lox pa rawg aux bwan: mai veeh yhaok Maix nghiiet kah lox pa lih khaing: jheeh aux liak.
Grawhgrawng: nawh, pwi tang: praix ot tix plak, kaoh mai yuh pa caox kah aux, pwi pa caox khankix, ang khan ngai: Maix, sawg tix teei ju aux heue.
Jhak heue, Siyiex teem: coi kah aux, Siyiex ot tau mai pwi pa joh jhan kah ju aux heue.
Nawh Cao: deeh pawk ceu pa caox kah pwi pa koeng kah aux khankix heue, mai tik vud kix awm: pa koe: lox mukheu Maix heue.
Aux tag sang gauxrhawm: gauxrhi: tix tan lu kah Maix, Simiang Siyiex aux eue, aux tag sang yaogyaw kah ceukaux Maix mawh kheu Maix mawh pa jiet mhawm: heue.
Grawhgrawng: nawh, Maix hoik taoh aux kah daux pa kharhawm: kharhi:, mai ngai: aux hoik yaox kah pwi pa koeng kah aux khankix heue.
Lox Rawg Bwan: Sonsang Teem: Coi
Simiang Siyiex eue, nghiiet kah lox pa rawg aux bwan: liak, paw lai mox khaing: pa rawg pa mhaing: aux liak.
Jhak kah aux mai deeh pawk lox aux liak, aux iak riang iak rao mai ngia khirhawm: khirhi: heue.
Mawh kheu lox pwi pa koeng kah aux, kheu pa tuktiaktukte: pa ang rah ang see mai pa deuh phimap kah piang aux, kah daux pa songrhawm: songrhi: mai koeng kah aux heue.
Rhawmrhi: tokaux aux siyaung: mai kied lhat graung kah krax yum: pa sang hoek kah piang aux heue.
Krax pa lhat pa siyaung: hoek kah piang aux, mai hoik kheem: kah piang aux heue.
Aux ah nin:, kieh aux koe: pruik awm: sikaux liak, phan: yuh nan:, aux sang pu: hu: tang: dauh tang: dee mai laux lee: tix mhawmmhawm: heue.
Aux tag sang hu: dee singai mai tom: dee ot dee koe: kah daux tiag daux tu heue.
Aux nied tix to: sonsang luan khaing: lhiex ting bhaung: ting heue.
Simiang Siyiex eue, kieh lox pa ah kix pung prang: grai: mu: liak, mawh kheu hoik yaox aux, khin: tix teei mai tud rhim: kah daux veng heue.
Kix ca: daw hu: kah piang guh veng leeing: ngaix leeing: sawm: ang jud ang jai, mai yuh krax pa caox pa caig, mai yuh pa seeing: pa brai: kah daux veng heue.
Mai kix khin: tix yuh ceu pa ang khaw: kah daux sigreung veng mai tuktiaktukte: mai pie lhen: kah pwi daux krax heue.
Pwi pa sa pa lao kah aux, ang mawh pwi pa koeng kah aux, phan: mawh, aux pon gun pon yeung heue. Pwi pa ot tang: plak ang mawh pwi koeng kah aux, phan: mawh, aux pon via heue.
Pwi pa yuh nan: mawh mhai: pwi plak aux, mai paoxgrawm aux, mai pwi pa meed pa tawng aux heue.
Ex tang: kum: kawng: mai paox tix mhawmmhawm: mai ex hu: tau mai cub pwi haoh pwi hun: kah daux nyiiex Siyiex heue.
Kieh Simiang kix yum: giex liak, phan: kix kawn: im: ju, kieh lih hu: kah daux meung yum:, grawhgrawng: nawh, phimap koe: dee ot kix mai kah daux kix heue.
Phan: mawh aux, kok kah Siyiex, mai Simiang Siyiex taoh aux heue.
Yam ponbo, yam ponngawb, mai yam ponsingaix, aux kharhawm: mai ngia, mai Nawh Cao: mhong: lox aux heue.
Yam yuh kix naing kah aux, Nawh Cao: taoh ju aux, mai kieh aux nyawmrhawm: heue. Pwi pa ot plak aux kied sidaing: nie hun: heue.
Siyiex Cao: pa jah bah ma: la: rawm: dix, nghiiet kah lox aux, mai yeen kix goh, mawh kheu ang kix thai: lox cox rhawm: tix, mai ang koe: rhawm: lhat kah Siyiex heue.
Pwi pa yuh nan:, chix phit chix lud kah paoxgrawm tix mai ang kaux sijax heue.
Lox jheeh nawh nyu: awm: bee (thaw: pat)9 kawx, daux rhawm: nawh keud grawng: sang yuh naing heue. Mai lox nawh awn: awm: bee kawx, awm: vaig pa hoik lawd tix deuh heue.
Kraung cien pa klawm: maix deuh piang Simiang Siyiex awawx. Mai Nawh tag teem: coi kah maix heue. Nawh ang sax kieh pa lhat pa graung hoek kah piang pwi pa rauh pa see heue.
Siyiex eue, Maix teei tix sau: kix kah daux pa laux pa leeing: heue. Mai pwi pa teei ju pwi yum:, mai pwi pa ang kaux sijax, paw kieh kix im: ju pie tix plak singaix, phan: mawh aux deuh rhawm: kah Maix heue.
Lox Rawg Bwan: Pwi Pa Deuh Rhawm: Kah Siyiex
Simiang Siyiex eue, Caoxrhawm: kah aux liak, grawhgrawng: nawh, kix blin lox mai sawg tix yuh kah aux, mai tuktiaktukte: kah aux leeing: lang: singaix heue.
Pwi pa koeng kah aux khankix, puing: kah aux leeing: singaix, mai pwi pa puing: kah aux kied nie heue.
Yam lhat graung aux, aux deuh rhawm: kah Maix heue.
Aux deuh rhawm: kah Siyiex mai yaogyaw kah gumlox Nawh heue. Aux deuh rhawm: kah Siyiex, aux tag ang lhat ang graung, mai kawn: pwi tag pon yuh patix kah aux.
Kix kieh lox aux mawh pa phit pa lud ku singaix, mai kix keud ngie pa caox pa ang mhawm: kah aux heue.
Kix khrawm: paox tix, hawt jawm tix teei ju aux, mai yuh tix tawng khaix caong aux heue.
Simiang Siyiex eue, pwi pa yuh pa ang rah ang see khankix, tag sang luan yuh kah mawx? Kah daux pa songrhawm: songrhi: Maix, kid tix tik pwi ceu an: khankix liak.
Maix hoik tawng grawng: vu vie aux tix kudauh kudee, teei rawm: ngai: aux sau: tix deuh daux kawk rawm: Maix, hoik koe: carang kah daux lai Maix ang mawh lie?
Mawh kheu ot Siyiex plak aux, yam kok aux kah Nawh, mai aux tawng pwi pa koeng kah aux khankix, deeh dak plak khaix tix heue.
Aux deuh rhawm: kah Siyiex mai yaogyaw kah gumlox Nawh heue. Aux deuh rhawm: kah Siyiex mai yaogyaw kah gumlox Nawh heue.
Aux deuh rhawm: kah Siyiex, aux tag ang lhat ang graung, kawn: pwi tag pon yuh patix kah aux.
Simiang Siyiex eue, awm: pa hoik yuh aux sijax mukheu sivoe ngai: Maix, aux tag hawt kah sijax mukheu pa hoik yuh tix mai yaogyaw kah Maix heue.
Grawhgrawng: nawh, Maix hoik taoh ju aux khaing: krax yum:, mai Maix hoik taoh caong aux khaing: pa sideeing, sonsang hu: aux sivoe ngai: Maix kah daux pa riieng kah pwi pa im: ju khankix ang mawh lie?
Lox Rawg Bwan: Sonsang Teem: Coi
Simiang Siyiex eue, caoxrhawm: kah aux liak, caoxrhawm: kah aux liak. Ju aux deuh rhawm: kah Maix, mai deuh rhawm: tix kah greem: veei pruik Maix tom: sidauh luan ceu pa khirhawm: khirhi: heue.
Aux tag kok yo kah Siyiex Cao: pa ting pa lhaong:, Cao: pa kieh see: aux hoik mhawm: heue.
Nawh Cao: ot meung raoma: mai taoh kah aux, mai pwi pa ting rhawm: ting rhi: khankix kaig tua heue. Siyiex tag sang tawx krax caoxrhawm: mai sijax mukheu pa kaux hoek heue.
Ju aux ot kah daux cub sivai sangsi:, aux yaox tix it mai pwi kah daux glah ngu10 mai rhang: kix awm: pliah mai te, dak kix awm: vaig pa kied lawm heue.
Simiang Siyiex eue, kieh Maix nie lheu: lhaong: khaing: lhaong: raoma: liak, mai kieh min: plakngai: Maix, tah hu: kah piang haktiex in: khawm uik liak.
Kix hoik taong: tix deuh kie kah daux krax pa hu: aux, rhawmrhi: aux hoik iak hu: kah dee tiiem, mai kix hoik kaong: tix deuh daux sivoe aux, mai tokaux kix deeh rau kah daux an: tiru heue.
Simiang Siyiex eue, rhawm: aux kaux cong: heue, rhawm: aux kaux cong: heue. Aux rhax lai yaogyaw kah Maix heue.
Ju aux eue, siduad heue, chiang: mai ting: khankix eue, siduad heue. Aux kawx siduad caocao heue.
Simiang Siyiex eue, Aux tag yaogyaw kah Maix sinax pwi haoh pwi hun: khankix heue.
Grawhgrawng: nawh, krax caoxrhawm: Maix hoek tom: sidauh raoma:, mai pa sijax mai pa mawh pa meh Maix , hoek tom: sidauh paiawm: heue.
Simiang Siyiex eue, kieh Maix nie lheu: lhaong: khaing: lhaong: raoma: liak. Mai kieh min: plakngai: Maix tah hu: kah piang haktiex khawm bee: ma: liak.
Lox Rawg Bwan: Sonsang Prawng Ca: Kah Pwi Pa Caox
Pwi pa prawng pa ca: khankix eue, khex prawng ca: pex kah kawn: pwi kah daux pa rauh pa see nang: lie?
Ang tau tix mawh, kah daux rhawm: pex ca: keud pa caox mai pex ciang tix yaox kah pa tuktiaktukte: pa yuh pex kah taix tix kah piang haktiex in: heue.
Pwi pa ang rah ang see khankix, koe: rhawm: pa caox tom: yam ot daux vaig miex tix, mai chix pie chix lhen: mai lud krax hu: tom: yam keh tix heue.
Jai: kix awm: jai: siuing:. Kix awm: siuing: caox pa lheet pa thox yhaok tix.
Kix ang nghiiet lox cao: kix, mai yuh tokaux tix mawh pa hoik tawng heue.
Simiang Siyiex eue, laoh tix tik rhang: kix khaing: jheeh kix liak, Simiang Siyiex eue, laoh tix tik rhang: gieb sivai sangsi: pa awn: ju khankix liak.
Kieh kix grai: mu: awm: rawm: liak, yam nyeu kix ak kieh kix graig awm: te heue.
Mai kieh kix awm: hoi: lux pa mo hu: mai awm: kawn: ngie: pa laux daux vaig miex tix, pa ang tie yaox kah singaix heue.
Kieh kix awm: khix braw pa phlu: ngu, mai aw: pa ang tien tawng yam hax tix, yam im: kix ang ah, yam hax kix ang ah, kieh bhaung: tah kix hu: liak.
Pwi pa rauh pa see khankix, tag gauxrhawm: gauxrhi: yam yaox kix krax pa ciyang yuh nan:, mai tag khoek caong kix kah daux nham: pwi pa ang rah ang see khankix heue.
Mai pwi tang: dauh tag ah nin:, pwi pa rauh pa see khankix, pon bwanson: tete te lai heue. Siyiex Cao: pa prawng ca: pa rauh pa see koe: tete kah piang haktiex, kawn: pwi ah nan: heue.
Lox Rawg Bwan: Sonsang Priex
Simiang Siyiex aux eue, taoh aux lih khaing: daux tawm: taix pwi pa koeng kah aux khankix mai yaog aux ting lhaong: khaing: pwi pa ot tang: plak khankix liak.
Maix taoh aux lih khaing: tawm: taix pwi pa yuh phimap, mai taoh aux lih khaing: daux tawm: taix pwi pa pah pwi yum: khankix liak.
Jhak heue, kix jawm tix pah ju aux, mai pwi pa ting riang tang: plak khrawm: paox tix sang yuh kah aux heue. Simiang Siyiex eue, ang mawh kheu phit lud aux, aux ang tie koe: phimap tidtix.
Kix nieb to: tix hoek tix sang yuh kah aux, siduad mai teem: coi kah aux mai jhak kah aux liak.
Simiang Siyiex Cao: kru naing raoma:, pa mawh Siyiex Isarilax eue, siduad mai sivied tix gau kah pwi tang: ceu tang: cat khankix liak. Mai paw lai caoxrhawm: kah pwi pa ot kah daux phimap tix kaux kawx.
Mai kix deeh hoek yam ponbo mai luan lox awm: pa raoh sox mai lailing hawt veng heue.
Jheeh kix chix krai lox bied mai vaig koe: mai siyieb jheeh kix, mai chawk ah nin: kah paox tix, pwi mawx tag sang mhong: lox ex.
Viang mawh kawx nan:, Simiang Siyiex eue, Maix tag nyiah kah kix mai salao kah pwi tang: ceu tang: cat khankix heue.
Riang rao aux eue, aux krox jun pot kah Maix heue, mai Siyiex mawh dee deuh aux rhawm: heue.
Krax caoxrhawm: Simiang Siyiex, tag hoek tix teem: coi kah aux, mai Siyiex tawx akhwang: awm: pa simie aux sonsang yaox aux kah piang pwi pa koeng kah aux khankix heue.
Siyiex Cao: pa tiebtie aux eue, paw awt nyang teei kix yum: liak, phan: Maix pah kix yum:, ha pwi aux kox piawm: rhawm: tix, mai teei siawpsibrawm Maix mai kieh kix pung prang: hu: kudauh kudee mai rau hu: heue.
Mawh kheu lox phimap jheeh kix, mai ting lox sikah kix, mai pie lhen:, mai lox pa ah kix, kieh deeh hoek kah piang kix liak.
Kah daux pa songrhawm: songrhi: Maix, kieh kix lauxleeing: grai: hu: pak lawg khawm uik liak. Mai kieh kix tawng mawh Maix Siyiex Cao: pa giex kaing:, jah kah ceu pwi Yakop tom: sidauh haktiex khawm uik liak.
Mai kieh kix deeh hoek yam ponbo mai lawh awm: raoh sox hawt vungviang veng heue.
Yam ponsawm: kieh kix deeh hoek khru khrieh tix sawg pa ih pa un:, mai ang sak mai kix ot giex yuh nan: heue.
Phan: mawh aux, rhax lai grawng: siawpsibrawm Maix, plak ponngawp, tag ah lox rhax pa gauxrhawm: grawng: krax caoxrhawm: Maix heue. Grawhgrawng: nawh, Maix mawh dee deuh aux rhawm:, yam yaox aux krax khirhawm: khirhi: heue.
Riang rao aux eue, rhax lai yaogyaw kah Nawh Cao: heue. Mai Siyiex mawh dee deuh aux rhawm:, mai Cao: pa caoxrhawm: kah aux heue.
Lox Rawg Bwan: Sonsang Taoh
Simiang Siyiex eue, kah daux pa songrhawm: songrhi: Maix, Maix hoik tik kah ex, mai ex hoik pung prang: rai ruat heue. Viang mawh nan:, deeh kieh ex im: ju liak.
Maix hoik kieh haktiex yungyiang: mai bih, viang mawh kawx nan:, haktiex pa bih an:, kieh deeh kleuk ih paox tix singip liak, kawn: ca: yungyiang: pot heue.
Maix hoik kieh kix kharhawm: kharhi:, mai hoik tawx rawm: plix siiet pa chix yoek kah kix heue.
Maix tawx chix kah pwi pa lhat pa graung kah Maix, sonsang pak kheu sijax mukheu pa kaux heue.
Yuh kah mawx sonsang nyawmrhawm: pwi pa moh kah Maix khankix, mai teei taix khawn: dawm: Maix taoh kah pwi pa nghiiet lox aux khankix liak.
Siyiex sikah kah daux pa singax singeh Nawh Cao:, mai aux gauxrhawm: gauxrhi: heue. Aux tag sang gwieh kah veng Sekhem heue. Mai aux tiag tix yaox kah tong Sukot heue.
Mai aux giex kaing: kwang: meung Kilat heue. Meung Manashie: kawx, aux giex kaing: kwang: kah heue. Meung Epharem mawh siawpsibrawm kaing: aux, meung Yudax mawh khaox gix min: plakngai: aux heue.
Meung Mawbax mawh aw: dee khoek heem: aux tix, meung Edom mawh dee deuh aux kiep tix, meung Philitix mawh dee riag dee brie aux kheu pex aux.
Pwi mawx pa sang thong: aux hu: kah veng pa ting riang ting rao, mai pwi mawx pa sang jhi: daux krax hu: aux kah meung Edom.
Simiang Siyiex eue, Maix hoik tik vud kah ex ang mawh lie?
Simiang Siyiex eue, Maix ang hu: tau mai cub kru naing ex lie? Maix teem: coi ex khaing: pa khirhawm: khirhi: liak, mai krax taoh kawn: pwi mawh pa giex pa going heue.
Kah daux riang rao Siyiex, ex tom: koe: rhawm: kua: heue. Nawh mawh Cao: pa tag sang dig kah piang pwi pa koeng
Lox Rawg Bwan: Sonsang Priex
Simiang Siyiex eue, nghiiet kah lox pa kok yo aux, mai deuh tix tawng kah lox pa rawg aux bwan: liak.
Aux kok yo kah Maix jah tom: sidauh haktiex, yam iak rhawmrhi: aux, Maix viex aux hu: kah rang: ting pa nie lheu: lhaong: khaing: aux liak.
Maix mawh dee deuh aux rhawm:, mai mawh tab pa kaux sivoe ngai: pwi pa koeng kah aux khankix heue.
Aux ot kah daux nyiiex gox Maix jheengjheeng:, mai aux deuh rhawm: kah greem: veei pruik Maix heue.
Simiang Siyiex eue, Maix hoik mhong: kah sijax mukheu pa hoik yuh aux, mai Maix tawx sin: kah pwi pa lhat pa graung kah ceukaux Maix khankix kah aux heue.
Maix tag kieh Simiang Khunhawkham lang: ju lang: phan: mai jhong: khix, mee: num nawh kieh kaux cong: ku ju leeing ju leeing phan: liak.
Nawh tag ngawm sivoe ngai: Siyiex leeing ju leeing phan: heue. Maix kieh krax caoxrhawm: mai sijax mukheu Maix teem: coi mai priex kah nawh liak.
Mawh kheu in:, aux tag rhax lai yaogyaw kah ceukaux Maix jheengjheeng: mai ku singaix ku sawm: awm: pa hoik yuh aux lox sijax mukheu heue.
Fahrhawmrhi: Kah Pa Hoik Priex Siyiex
Ju aux chix ot yiien: yawg tix sivoe ngai: Siyiex, mai krax taoh aux kaoh khaing: Nawh Cao: heue.
Nawh Mawh rang: ting mai Cao: taoh aux, mai mawh dee deuh aux rhawm: mai aux ang lai lhat graung kah tix ceu kawx.
Pex reem tix puing: kah pwi tix kaux, sonsang laux nawh miex grheung:, pex khawm uik keud ce: nawh awm: ding: tiex pa yungyiang: mai tiex luklin: pa yuye miex grheung:?
Kix keud tix kieh nawh rau khaing: dee lhaong:, jheeh kix chix nawb bwan:, viang mawh nan:, rhawm: kix koe: lox pa lawg pa jhax, mai kix moh pa pie pa lhen: heue.
Ju aux chix ot yiien: yawg tix sivoe ngai: Siyiex, grawng: krax krox jun pot aux kaoh khaing: Nawh Cao: heue.
Nawh mawh rang: ting mai Cao: taoh aux, mai mawh dee deuh aux rhawm:, mai aux ang lai lhat graung kah tix ceu kawx.
Krax taoh aux mai min: plakngai: aux mawh Siyiex, mai rang: ting pa tawx riang kah aux, mai dee deuh aux rhawm: mawh Siyiex heue.
Kawn: pwi khankix eue, deuh rhawm: kah Nawh Cao: ku bawg ku yam heue. Mai plak jhi: rhawmrhi: pex sivoe ngai: Nawh Cao: awawx. Siyiex mawh dee deuh ex rhawm: heue.
Pwi pa brai: pa ang koe: bwanson:, min: plakngai: kix mawh pa pie pa lhen:, mai phan: ex ciang tix yaox daux jiang hoik grai: mu: ang lai koe: tidtix heue.
Paw nieb ting rhawm: ting rhi: kah pon yuh krax tuktiaktukte:, paw nieb kroh tix yuh grang kah kraungkhrai: pa nieb pon rhim: tix teei kah pwi, viang maix magmi kah mau, khri: kawx, paw deuh rhawm: kah an:.
Siyiex hoik krai tix bawg, mai aux baox mhong: ra: bawg, grawng: pa koe: siawpsibrawm mai Siyiex heue. Simiang Siyiex eue, Maix hoik grum naog mai krax caoxrhawm:, Maix deeh tawx bwanson: kah kix, kaux pwi mawx kaux pwi an:, awm: kaing pa hoik yuh tix heue.
Krox Jun Kah Siyiex
Simiang Siyiex eue, Maix mawh Siyiex aux, aux coca: tix sawg Maix heue. Ju aux kied simie tix lo kah Maix, mai tokaux aux kied byaong kah Maix, awm: haktiex kroh kram: dee ang rawm: koe: heue.
Mawh kheu nan:, aux maong tix jhak kah Maix, kah dee singax singeh sonsang yaox min: plakngai: siawpsibrawm Maix heue.
Mawh kheu krax caoxrhawm: Maix nie lheu: mhawm: khaing: ju, mai jheeh aux tom: yaogyaw kah Maix heue.
Mawh kheu in:, yam kawn: im: ju aux, aux tag yaogyaw bwanson: pa ting Maix mai aux deuh rhawm: kah ceukaux Maix mai yaog taix tix krub kah Maix heue.
Ju aux hoik sak awm: pa ih aux nex pa kluing: pa bee, mai jheeh aux tag gauxrhawm: gauxrhi: mai yaogyaw kah Maix heue.
Yam it aux dee it, aux doh keud doh sawn: kah Maix, mai aux keud grawng: Maix leeing: sawm: heue.
Mawh kheu teem: coi Maix aux, aux gauxrhawm: gauxrhi: greem: veei pruik Maix heue.
Ju aux deuh rhawm: kah Maix, mai taix khawn: dawm: Maix joh jhan kah aux heue.
Pwi pa sawg tix yuh ju aux laux khankix, tag laig hu: kah greem: tiex heue.
Kix tag yum: kah lawm vaig pa lawm, mai sox praix ih nex kix heue.
Phan: mawh Simiang khunhawkham tag gauxrhawm: gauxrhi: kah daux Siyiex heue. Mai can pwi pa kaux sijax mai pa tiextu kah daux Nawh Cao: khankix, tag mhawm: grang heue. Pwi pa ah lox pie lox lhen: khankix tag sang thox jheeh kix heue.
Lox Rawg Bwan: Sonsang Teem:
Simiang Siyiex eue, nghiiet kah lox pa rawg aux bwan: mai taoh ju aux khaing: pwi pa koeng kah aux, mai teem: coi kah aux liak.
Mai tiebtie aux khaing: pa keud pwi pa caox tix yuh mai pa kum: kix tix yuh phimap liak.
Cub pwi an: khankix, dak kix awm: vaig pa hoik klaing: tix, pa kix hoik rien lox pa song: awm: te pa hoik nyeu tix heue.
Kix ot dee glip mai ah tix sang puing: kah pwi mhawm: heue, kix ting rhawm: khawm puing: tix, mai ang lhat heue.
Sonsang yuh kix pa caox pa ang mhawm:, mai tawx riang tawx rao kah paox tix, tix kaux hoik tix kaux mai kum: paox tix grawng: sang taong: kie, mai kix ah nin:, pwi mawx pa tag sang yaox ex.
Kix chix sawg mai chawkcheng: kah grawng: see: pa ang rah ang see, kix chix klawngkloek tix chawk khawm uik, mai pa keud kix kah daux rhawm: tix, mawh pa kied raux kied mox heue.
Viang mawh kawx nan:, Siyiex tag puing: kix kah te dom: mawx dom: an:, mai kix kied mat kied lheet heue.
Dak kix deeh puing: kah cao: kix, mai yam yaox pwi kah kix, vuhvied kaing: mai to: heue.
Pwi khankix khawm uik, lhat graung mai tawng pa yuh Siyiex mhawmmhawm: mai krai kah pwi khankix heue.
pwi pa rauh pa see khankix, tag gauxrhawm: gauxrhi: mai deuh rhawm: kah daux Simiang Siyiex heue. Mai pwi pa rauh pa see rhawmrhi: khankix tag yaw rangdi heue.
Yaogyaw Kah BwanSon: Siyiex
Simiang Siyiex eue, krax pa yiien: yawg mai krax yaogyaw mai pa kaux sijax koe: kah daux veng Zion heue.
Siyiex Cao: pa nghiiet kah lox pa rawg aux bwan: eue, kawn: pwi khawm uik, tag sang greed tix hoek kah Maix heue.
Aux ang lai pex pon kheu nie krax pa ang rah ang see, viang mawh kawx nan:, Maix pluat ploi: phimap pa phit pa lud aux liak.
Pwi pa hoik laug Maix tix teei, mai pwi pa greed tix hu: kah daux nyiiex bwan: Maix khankix koe: bwanson: heue. Kieh ex sak kah ceu pa mhawm:, pa koe: kah daux nyiiex Maix, mai pa koe: kah daux nyiiex bwan: pa singax singeh Maix heue.
Siyiex Cao: pa taoh ex eue, Maix hoik nghiiet kah lox pa rawg ex bwan:, kah daux pa jhi: Maix ex yaox kah ceu pa daox pa am: pa yuh Maix, mai kawn: pwi pa ot tom: sidauh haktiex khawm uik, mai pwi pa ot kah daux rawm: sigrit sigra: ku daog ku diem khawm uik, deuh rhawm: kah Maix heue.
Maix hoik grum naog mai siawpsibrawm mai riang rao pa ting, mai Maix hoik kieh gawng lua kaux cong: heue.
Lox pa sinum siaox rawm: sigrit sigra: mai lox pa sinum pukpak rawm: mai lox pa maw: pa lawh kawn: pwi khankix, Maix chix kieh yiien: yawg tix heue.
Pwi pa ot dee singai khankix, yaox mhai: pa daox pa am: pa yuh Maix mai lhat graung heue. Kawn: pwi pa ot plak lih singaix mai khawm plak klip singaix, gauxrhawm: gauxrhi: heue.
Maix hoek tix jhak kah haktiex mai kieh lhiex lih mai kieh haktiex koe: phon: mai mhawm: heue. Mai Siyiex kieh rawm: klawng: naog mai cox haktiex mai chix kieh plix nghox plix koi: lih koe: plix son kawn: pwi heue.
Mai Siyiex kieh haktiex caux mai kaung: sidawm mhawmmhawm:, mai kieh lhiex lih sonsang awn: tiex, mai Nawh Cao: tawx bwanson: kah khaox pa kuah khankix heue.
Nawh Cao: teei bwanson: pua: tix deuh kah jhong: khix mee: num khankix, mai khaix caong Maix mawh pa jah bwanson: heue.
Jah tix sau: kah dee mhawm: daux tiag daux tu, mai gawng lua khankix kawx, rawd maox nyoi mai gauxrhawm: heue.
Daux tong kaung: dee mhawm: dee sawm: kawx, hoik naog kah cub yung: cub pex, mai daux kaung: khankix kawx, hoik naog pang: num: nghox koi:, mai kix ah lox rhax sinum pa kied nyawm tix nhiet heue.
Lox Rhax Yaogyaw Kah BwanSon:
Kawn: pwi piang haktiex khawm uik eue, ah lox sinum yaogyaw kah Siyiex awawx.
Rhax lai yaogyaw min: plakngai: ceukaux Nawh Cao:, mai plak jhi: min: plakngai: Nawh mai yaogyaw kah Nawh Cao: heue.
Mai krax pa prawng pa ca: Maix mawh pa kied daox kied am:, mai kheu kied ting siawpsibrawm Maix mai pwi pa koeng kah Maix khankix, lhat graung mai khyox khaw: kah Maix heue.
Kawn: pwi piang haktiex khawm uik tag krub kah Maix mai rhax lai yaogyaw kah Maix heue, Kix rhax lai yaogyaw kah ceukaux Maix heue.
Hoek tix jhak kah krax prawng krax ca: pa yuh Siyiex khankix, mai krax prawng krax ca: Siyiex kah kawn: pwi mawh ceu pa daox pa am: heue.
Nawh Cao: kieh rawm: sigrit sigra: kroh hu:, mai lih mawh tiex mai kix pon tix hu: kah caong tix heue. Mai ex gauxrhawm: gauxrhi: kah daux Siyiex kah dee an: heue.
Nawh Cao: giex kaing: kah daux siawpsibrawm Nawh jheengjheeng: heue. Mai ngai: Nawh Cao: jhak kah kawn: pwi kuceu, paw lai kieh pwi pa thiang: tix tik kah Nawh yaogyaw tokaux tix ting tiru heue.
Ceu kawn: pwi khawm uik eue, yaogyaw kah Siyiex ex awawx, rhax lai yaogyaw kah bwanson: Nawh Cao: kah lox pa sinum heue.
Grawhgrawng: nawh, Maix kieh ex im: ju mai ang kieh caong ex cang: klad heue.
Simiang Siyiex eue, Maix hoik cheuk tix yaox aux, awm: mau pa hoik thi: heue.
Maix hoik kieh ex krix kah daux kie mai hoik sau: kraung pa cien kah piang blawg ex heue.
Maix hoik kieh pwi dig piang kaing: aux, viang aux yaox tix hu: daux ngu daux rawm: kawx, mawh kheu bwanson: Maix aux hoek dee nyawrhawm: nyawm rhi: heue.
Aux viex krax tan krax lu mai gleeing tix tan lu kah daux nyiiex Maix heue.
Yam yaox aux krax pa kharhawm: kharhi:, siyieb jheeh aux, mai jheeh aux krai lox sijax mukheu pa hoik yuh aux mai Maix heue.
Aux tag sang teei tix tan yung: pa kluing: pa bee, mai ceu pa sioe: baux mai gleeing tix tan kah Maix khawm moi khawm pex heue.
Pwi pa lhat pa graung kah Siyiex khankix khawm uik eue, hoek tix nghiiet heue, aux tag sang krai pex mhong: grawng: pa hoik yuh Nawh bwanson: kah ju aux heue.
Jheeh aux kok yo kah Nawh Cao:, mai dak aux kawx, yaogyaw kah Nawh heue.
Phan: aux koe: phimap kah daux rhawm: tix, Siyiex ang nghiiet kah lox pa rawg aux.
Yamin: Siyiex hoik nghiiet mai deuh tix tawng kah lox pa rawg aux bwan: heue.
Siyiex ang tik kah lox pa rawg aux bwan:, mai ang lai deeh teei kah bwanson: pa hoik tawx kah aux, kieh Nawh koe: bwanson: liak.
Lox Rhax Yaogyaw Kah Bwanson:
Kieh Siyiex pa koe: krax caoxrhawm: tawx bwanson: kah ex liak, jhan pa riieng pakngai: Maix kah ex liak.
Mai kieh kawn: pwi piang haktiex tawng kah grawng: krax pa yuh Maix, kieh ceu pwi khawm uik pon bwanson: krax taoh Maix liak.
Simiang Siyiex eue, kieh ceu kawn: pwi yaogyaw kah Maix, kieh kawn: pwi yaogyaw kah Maix liak.
Mai kieh ceu pwi kuceu gauxrhawm: gauxrhi:, mai rhax lai gauxrhawm: gauxrhi: liak, grawhgrawng: nawh, Maix prawng ca: kawn: pwi kah daux beenli pa rauh pa see, mai Maix tawx krax nyawmrhawm: nyawmrhi: kah ceu kawn: pwi piang haktiex khawm uik heue.
Simiang Siyiex eue, kieh ceu kawn: pwi yaogyaw kah Maix, kieh kawn: pwi yaogyaw kah Maix liak.
Haktiex tang: deeh chix plix plix, Siyiex mawh Cao: pa tawx bwanson: kah ex heue.
Siyiex tag sang baox tawx bwanson: kah ex, mai tag lhat graung kah Nawh Cao: tom: sidauh haktiex khawm uik heue.
Lox Rhax Pa Pex
Siyiex kaoh mai yuh laux kah pwi pa koeng kah Nawh, mai kieh pung prang: hu: kudauh kudee liak, mai pwi pa koeng kah Nawh khankix, kieh to: khaing: Nawh liak.
Kieh kix vungvang hu:, awm: vungvang taox ngu liak, mai kieh kix ceh hu: awm: bee kax pa dex ngu, kieh pwi pa ang rah ang see, lauxleeing: sivoe ngai: Siyiex liak.
Mai kieh pwi pa rauh pa see khankix, gauxrhawm: gauxrhi: sivoe ngai: Siyiex liak, mai kieh kix gaux sile: he: sivoek liak.
Ah lai kah Siyiex mai rhax lai yaogyaw kah ceukaux Nawh, cox daux krax sivoe sang hu: Nawh daux tiag, mai ceukaux Nawh mawh Simiang Siyiex heue. Mai gaux sile: he: sivoek, sivoe ngai: Nawh Cao: awawx.
Siyiex ot kah daux nyiiex bwan: pa singax singeh Nawh, mai mawh keeing: kah kawn: doe: khankix, mai prawng ca: kah son miexmai: khankix heue.
Siyiex tawx akhwang: kah pwi pa ang koe: paox pie, mawh nyiiex ma: heue, mai Nawh Cao: tawx krax nyawmrhawm: nyawmrhi: kah pwi pa ot daux thawng: daux gang: khankix. Mai phan: mawh pwi pa tieh pa feen kah Nawh khankix, yaox tix ot dee kroh dee kram: heue.
Simiang Siyiex eue, yam thong: Maix kah pwi Maix mai hu: kah daux tiag.
Mawh kheu min: plakngai: Maix, haktiex yungyiang: mai lhiex lih khaing: raoma: heue. Mawh kheu min: plakngai: Siyiex, gawng Sina kawx, yung yiang: heue.
Simiang Siyiex eue, Maix kieh lhiex lih tom: nie, mai joh jhan kah sinngao Maix pa mawh pwi pa taug pa mao khankix heue.
Pwi Maix khankix hoik yaox dee ot dee koe: tix heue. Simiang Siyiex eue, Maix hoik rien tix deuh bwanson: kah son kix pwi pa hot pa sibhawm: heue.
Mawh kheu Siyiex tawx lox kieh pwi hu: sidiex lox bwan: gauxrhawm: gauxrhi: kah son pwi pa ang nyang tawng khankix heue.
Simiang Khunhawkham mai kru naing nawh khankix to: heue, mai bun: pa deuk daux nyiiex nawh khankix, gwieh tix ih kah kraungkhrai: pa hoik pon kix heue.
Mawh kheu hoik caw pex tix ot sinax gawng mai awm: sikaux pa hoik om: pruik tix kah mau, mai hauk tix kah khri: raoh heue.
Siyiex Cao: pa grum mai siawpsibrawm pa ting, yam kieh Nawh Cub Simiang khunhawkham khankix, pung prang: dee ot kix tan, mai awm: rawmrha: pa lih kah piang gawng Zalamon heue.
Gawng Basan pa lhaong: pa choek pa grum naog mawh gawng Basan cie Siyiex heue.
Gawng pa grum naog pa lhaong: pa choek khankix eue, yuh patix pex lai jiang kah gawng pa simie Siyiex tix ot yuh kah mawx? Mai Simiang Siyiex yuh dee ot Nawh, kah piang gawng tan, jheengjheeng: leeing ju leeing phan: heue.
Ling: brung cie Siyiex pa nie lheu: khaing: kaing: mheen: kaing: sien:, lih hoek khaing: gawng Sina mai hu: kah dee ot pa singax singeh heue.
Yam deeh haok Nawh Cao: kah dee lhaong:, Nawh giex tix viex pwi hu: tom: nie, mai Simiang Siyiex ot kah daux sinax kawn: pwi, mai pon rieb khawngphak laksawng: khaing: pwi Nawh khankix, mai khawm pwi pa tieh pa feen heue.
Siyiex mawh pa koe: bwanson: ku jheengjheeng: mai Cao: pa taoh kah ex yam tuktiaktukte: pwi kah ex heue.
Simiang Siyiex ex mawh Cao: pa taoh kah ex, mai mawh Siyiex Cao: pa taoh ex lih khaing: kah daux krax pa yum: heue.
Siyiex tag sang tawk kaing: pwi pa koeng kah Nawh, mai raig tix tik ngawg pwi pa yuh phimap phigrham: tete heue.
Siyiex ah nin:, Aux tag viex kix hoek khaing: meung Basan mai Aux viex kix hoek khaing: rawm: sigrit sigra: pa raux.
Phan: yuh nan:, maix tag dig kah nham: kix, mai sox maix khankix tag sang lied tix ih nham: kix heue.
Simiang Siyiex eue, kix hoik yaox pa hu: Maix, Siyiex aux, mai Simiang Khunhawkham aux, kah dee singax singeh heue.
Cao: pa rhax lai hu: sivoe, mai bunkrih cao: tah kraung: hu: sinax, mai cao: pa tah ting: hawt khaix heue.
Ceu pwi Isarilax khawm uik eue, yaogyaw kah Siyiex, kah daux dee khrawm: pwi haoh pwi hun: khankix paox tix heue.
Jah kah Benyamin pa iak mai tom: hoek kah Simiang Yudax, mai Simiang Zebulon, mai khawm Simiang Napthalix heue.
Simiang Siyiex eue, jhi: ex yaox siawpsibrawm Maix liak. Simiang Siyiex eue, kieh bwanson: pa yuh Maix kah ex kaux cong: liak.
Kieh Simiang khunhawkham khankix, viex khawngphak laksawng: kah Maix, son daux nyiiex bwan: pa koe: kah daux veng Yerusaliem liak.
Mai sidiex gau kah tosat pa caox pa hai:, pa ot kah daux tiag priem ang ah, mai cub phong: moi praix (Oksabax) mai kawn: moi pa awn: ju pa eei: pwi khankix, viex bliah mau mai krub kah Maix kah daux pa viex rhawm: awn: rhawm: tiiem liak. Ceu pwi pa simie tix yuh naing khankix, kieh pung prang: hu: kudauh kudee liak.
Kieh cao: cau Simiang khaing: meung Ejiptux hoek liak, mai kieh pwi meung Ethiopia: nied tix yaog taix tix kah Siyiex heue.
Can meung pa koe: kah piang haktiex khawm uik eue, rhax lai yaogyaw kah Siyiex awawx.
Rhax lai yaogyaw kah Siyiex Cao: pa jah tom: dix, mai Cao: pa brug kah raoma: kah piang raoma:, jhak heue, Nawh Cao: ploi: lox pa ting pa sinum hu: heue.
Mai rieb tix teei grawng: pa ting Siyiex siawpsibrawm awawx, min: plakngai: Nawh koe: kah piang pwi Isarelax mai siawpsibrawm Nawh kieh sidawng: kah daux paiawm: heue.
Simiang Siyiex eue, Maix mawh pa khaw: ex tix lhat graung kah praix dee singax singeh Maix heue. Siyiex Isarilax mawh Cao: pa tawxriang rao mai siawpsibrawm kah pwi Nawh khankix heue. Kieh Siyiex koe: bwanson: liak.
Lox Pa Kok Sonsang Teem:
Simiang Siyiex eue, taoh aux liak, grawhgrawng: nawh, rawm: hoik hoek mee: ngawg aux heue.
Caong aux ang koe: dee dig, hoik blawn daux glaox dee raux heue. Mai aux hoik hoek dee raux rawm:, mai pukpak rawm: hoik kheem: hoik lhop kah aux.
Aux kied taug mao mai hoik si oh ghok kah kok yo tix Maix, mai ngai: aux kawx hoik meu: kah maong tix jhak Maix, pa mawh Siyiex aux heue.
Pwi pa nieb koeng kah aux, nie lheu: khaing: hauk kaing: aux heue. Mai pwi pa simie tix yuh aux laux khankix, nie lheu: ting riang khaing: aux, mai aux yaox tix deeh viied kraung pa ang aux teei heue.
Simiang Siyiex eue, Maix hoik tawng mawh aux pwi pa caox, mai phimap aux ang pon tix mox sivoe ngai: Maix heue.
Simiang Siyiex Cao: kru naing raoma: eue, mawh kheu aux, paw kieh pwi pa krox jun pot kah Maix hoek krax pa kaig pa tua liak. Siyiex ceu pwi Isarilax eue, mawh kheu aux, paw kieh pwi pa sawg kah Maix hoek krax pa lhat pa graung liak.
Aux hoik yaox tix kham: krax pa sa pa lao, mai krax pa kaig pa tua hoik naog kah ngai: aux kheu Maix heue.
Aux hoik awm: nyo kah daux puxaik aux, mai awm: pwi tang: praix tang: klawng: sivoe ngai: kawn: nyiiex kawn: ma: aux khankix heue.
Mai krax khirhawm: khirhi: pa dex mai nyiiex Maix hoik bleet kah aux heue11. Lox pa sa pa lao kix kah Maix hoik hoek kah piang aux heue.
Yam yiiem aux khawm rhawm: khawm rhi: tix, mai twah pa ih pa un: kawx, kix salao kah aux heue.
Yam ceep aux kraung chee: rhix, kix ah lox jiem: lak law: kah aux heue.
Yam ngawm kix bang: kum: daux siviex lawng, mai yoek kah plai: mai ah lox rhax grawng: aux heue.
Simiang Siyiex eue, phan: mawh aux, rawg bwan: kah Maix, bawg yam pa khaw: pa mhawm:, Siyiex eue, awm: pa grum naog krax caoxrhawm: Maix, mai sijax mukheu Maix, deeh pawk lox aux mai taoh aux liak.
Mai taoh aux lih khaing: daux glaox mai paw kieh aux blawn liak, kieh aux luat luan khaing: tawm: taix pwi pa koeng kah aux mai rawm: pa raux liak.
Paw kieh rawm: hwan kheem: aux liak, paw kieh aux glip dee raux liak, paw kieh rawm: kheem: eet aux liak.
Simiang Siyiex eue, mawh kheu bwanson: pa mhawm: pa yuh Maix mai nghiiet lox aux liak, veeh ngai: Maix kah aux, kah daux pa caoxrhawm:, krax moh krax rhawm: Maix tom: nie liak.
Paw mox ngai: Maix khaing: aux pa mawh siliex Maix liak, krax pa khirhawm: khirhi: hoik hoek kah piang aux, nghiiet lox aux laung laung liak.
Greed tix hoek dex kah ju aux, mai taoh aux liak, mawh kheu kied haoh pwi pa koeng kah aux, kieh aux luan khaing: kix liak.
Maix hoik tawng grawng: pa yaox aux tix kham: geu:, kah pa sa pa lao mai pa kaig pa tua, mai laux min: plakngai:, mai pwi pa koeng kah aux khankix, hoik sidawng: sivoe ngai: Maix heue.
Mawh kheu lox pa sa pa lao, rhawm: aux hoik bih hoik tug, mai aux krox jun pot, mai pwi pa sang caoxrhawm: kah aux ang koe: tix kaux kawx, mai aux sawg pwi pa sang kieh aux nyawmrhawm: nyawmrhi: kawx, ang yaox tix kaux kawx heue.
pie sang ih aux kawx, kix tawx aux ih sidah song:, pie sang nyaux aux rawm: kawx, kix tawx aux nyaux sidah niex heue.
Kieh pheen: sawm: kix mawh kie pa hoik taong: sivoe ngai: kix, pa yuh kix kieh deeh hoek kah piang kix liak.
Kieh ngai: kix dug, son ang kix sang yaox mai kieh nyoi kix siyaung: hu: jheengjheeng: liak.
Kieh krax songrhawm: Maix Cao: hieh kah piang kix, mai kieh krax meet rhawm: Maix hawt krup kix liak.
Kieh dee ot kix yiien: tom: ang mhong: lox tidtix, pie pa ot daux nyiiex gox kix kawx, paw lai kieh koe: tix kaux kawx.
Grawhgrawng: nawh, kix tuktiaktukte: kah pwi pa sivied Maix, mai kix baox lux kah pwi pa hoik kieh Maix kix saux heue.
Baox thie: phimap kah piang phimap kah kix, paw kieh kix laig kah daux pa rauh pa see Maix.
Maix Preet tix tik ceukaux kix kah daux carang pa im: ju, mai paw lai tiem: tix deuh ceukaux kix tau mai pwi pa rauh pa see.
Phan: mawh aux hot sibhawm: mai kharhawm: kharhi: tix heue. Simiang Siyiex eue, bwanson: krax taoh Maix tag yaog aux ting lhaong: heue.
Aux rhax lai yaogyaw kah ceukaux Siyiex, mai plak jhi: kah bwanson: Nawh Cao: heue.
Pa yuh nan: nie lheu: khaw: rhawm: Simiang Siyiex, khaing: moi pa grum koe: khawm rung: khawm kloh heue.
Pwi pa awn: rhawm: awn: rhi: khankix yaox mai gauxrhawm: gauxrhi: heue. Pwi pa sawg kah Siyiex khankix eue, kieh pex koe: riang rao liak.
Simiang Siyiex nghiiet kah lox pwi hot pwi sibhawm:, mai Nawh ang nieb yuh kah pwi Nawh, pa hoik giex hoik laung khankix heue,
kieh raoma: haktiex rawm: sigrit sigra: mai kawn: pwi khawm uik yaogyaw kah Siyiex heue,
Siyiex taoh kah veng Zion mai deeh cox veng Yudax, kix ot tan mai giex kaing: heue.
Ceu cat kawnpraix siliex Nawh khankix, tag pon tix cie sin: veng an:, mai pwi pa moh kah ceukaux Nawh Cao: khankix yaox tix ot tan heue.
Lox Rawg Bwan: Sonsang Teem:
(Yawgyaw 40:13-17)
Simiang Siyiex eue, Maix taoh aux liak, Simiang Siyiex eue, nied tix teem: coi aux liak.
Pwi pa sawg tix pah ju aux khankix, kieh kaig tua mai laux pakngai: liak, mai pwi pa simie tix yuh pa caox khankix, kieh kix lhat graung mai hoek krax pa kaig pa tua liak.
Can pwi pa ah nin: kah aux, ha ha:, ha ha:, kieh kix voi rhawm: mai hoek krax pa kaig pa tua liak.
Can pwi pa sawg kah Maix khankix, kieh kix gauxrhawm: gauxrhi: kah daux Maix liak, can kix pa khaw: rhawm: khaw: rhi: kah bwanson: krax taoh Maix, mai kix ah nin:, kieh min: plakngai: Simiang Siyiex ting jheengjheeng: liak.
Phan: mawh aux, viang aux hot sibhawm: kawx, nied hoek kah aux liak, Maix mawh Cao: pa teem: coi aux, mai taoh kah aux heue. Simiang Siyiex eue, paw lai koi, niied hoek liak.
Lox Rawg Bwan: Tax Kuad Tix Kaux
Simiang Siyiex eue, aux deuh rhawm: kah Maix heue, kieh aux luan khaing: krax pa kaig pa tua jheengjheeng: liak.
Awm: pa koe: pa rauh pa see Maix kieh aux luan liak, veeh yhaok Maix plak aux mai taoh aux liak.
Kieh Maix mawh rang: ting dee ot aux, mai dee hoek aux jheengjheeng: liak. Maix koe: siawpsibrawm tix taoh aux, grawhgrawng: nawh, Maix mawh rang: ting aux, mai tab dee deuh aux rhawm: heue.
Siyiex aux eue, taoh aux khaing: daux tawm: taix pwi pa caox pa caig mai pa ang rah ang see liak.
Simiang Siyiex eue, Maix mawh pa krox jun pot aux, mai Maix mawh dee deuh aux rhawm: tom: yam mawh aux kawn: nyawm heue.
Aux deuh rhawm: kah Maix tom: yam keh aux, mai aux hoik pon bwanson: Maix tom: yam kawn: ot aux daux vaig miex tix, mawh kheu nan:, aux tag yaogyaw kah Maix jheengjheeng: heue.
Viang aux awm: ceu pa daox pa am: sivoe ngai: pwi haoh pwi hun: khankix kawx, Maix mawh dee deuh aux rhawm: pa kaux pa cong: heue.
Jheeh aux naog kah pa yaogyaw kah min: plakngai: Maix ku singaix heue.
Paw lai tik kah aux, yam hoik kuad aux liak, paw lai tik vud aux, yam hoik iak riang rao aux liak.
Pwi pa koeng kah aux, pa ot tang: plak khankix, salao kah aux heue. Kix jawm tix teei ju aux.
Siyiex hoik tik nawh, ex hawt pheet tix giex nawh, pwi pa taoh nawh ang koe: tix kaux kawx, kix ah nan: heue,
Simiang Siyiex eue, paw lai ot singai khaing: aux liak. Siyiex eue, nied tix teem: coi aux laung laung liak.
Kieh pwi pa phit pa lud kah ju aux khankix hoek krax pa kaig pa tua, mai hoek krax pa laux pa som heue. Kieh pwi pa sawg tix deuh phimap kah aux khankix, hoek kah daux pa sa pa lao mai hoek krax pa som pa nai: liak.
Phan: mawh aux, krox jun pot kah Maix jheengjheeng:, mai tag sang nie lheu: yaogyaw piang yaogyaw kah Maix heue.
Jheeh aux tag sang krai pa rauh pa see Maix, mai grawng: krax taoh Maix ku singaix heue. Mai ang dak uik simin bwanson: Maix Cao: heue.
Kah daux siawpsibrawm Siyiex aux tag sang krai grawng: krax pa rauh pa see Maix khaing: heue.
Simiang Siyiex eue, Maix hoik gau aux tom: yam mawh aux kawn: nyawm heue. Maix hoik jhi: ceu pa daox pa am: Maix tom: singaix yamin heue.
Simiang Siyiex eue, viang aux hoik riex ju mai hoik paing hauk kaing: kawx, paw awt nyang tik vud aux ha:, mawh kheu aux, ang nyang yaox tix jhi: siawpsibrawm Maix kah pwi inkix, mai pwi tag sang koe: khaix khankix heue.
Simiang Siyiex eue, krax pa rauh pa see Maix mawh pa kied ting kied lhaong: heue. Siyiex eue, pwi mawx tag awm: Maix?
Maix hoik jhi: aux yaox krax pa khirhawm: khirhi:, mai ceu pa nu pa khawm tom: nie, mai deeh kieh aux nyawmrhawm: nyawmrhi:, mai kieh aux deeh kaoh khaing: haktiex pa raux heue.
Maix hoik kieh aux magmi mai nyawmrhawm: nyawmrhi:, kah daux singaix pa hoik luan heue.
Simiang Siyiex eue, aux tah ting: mai yaogyaw kah sijax mukheu Maix, Siyiex Cao: pa singax singeh ceu pwi Isarilax eue, aux tah ting: mai rhax lai yaogyaw kah Maix heue.
Yam rhax aux lai kah Maix, jheeh aux kawx tag gauxrhawm: gauxrhi: mai ju aux pa hoik taoh Maix kawx, gauxrhawm: gauxrhi: heue.
Dak aux kawx, tag sang krai grawng: pa rauh pa see Maix, ku singaix jheengjheeng: heue, grawhgrawng: nawh, pwi pa sawg phimap pa phit pa lud aux, hoik hoek krax pa kaig pa tua mai laux pakngai: heue.
Lox Rawg Bwan: Son Simiang
Lox lai Yawgyaw kah son Sawlamun
Simiang Siyiex eue, tawx akhwang: krax pa prawng ca: pa rauh pa see Maix kah kawn: Simiang khunhawkham liak.
Sonsang chix prawng ca: nawh kah pwi Maix rah see, mai tawx krax pa rauh pa see kah pwi pa hot sibhawm: Maix khankix heue.
Kah daux krax pa rauh pa see Maix kieh gawng iak gawng ting khankix, tawx krax pa nyawmrhawm: nyawmrhi: kah pwi Maix liak.
Mai kieh nawh prawng ca: rah see kah pwi pa hot pa sibhawm: mai teem: coi kah pwi pa ang kub ih khankix, mai yuh lauxleeing: kah pwi pa tuktiaktukte: kah pwi heue.
Kieh ceu kawn: pwi ku ju, lhat graung kah Maix, glang: yam kawn: koe: khix, singaix heue.
Nawh Cao: tag sang lih hoek awm: lhiex, pa lih piang rib pa hoik vawg mai awm: lhiex pa kieh haktiex caux heue.
Mai yam singaix baux ju nawh, pwi pa rauh pa see sang magmi, mai nyawmrhawm: nyawmrhi: tom: pa riieng khix ang nyang grai: heue.
Mai rawm: sigrit sigra: tix mu: tom: sidauh hoik tix mu:, mai rawm: klawng: ting tix klawng: hoik tix klawng:, tom: sidauh haktiex nawh tag sang giex kaing: heue.
Mai pwi pa ot kah daux tiag daux tu krub sivoe ngai: Nawh , mai pwi pa koeng kah Nawh khankix, tag sang lied tix ih phawng: tiex heue.
Simiang khunhawkham meung Tasux khankix, mai khunhawkham rawm: sigrit sigra: khankix, hoek tawx gha: kah nawh, mai khunhawkham Shebax mai khunhawkham Sebax hoek tix tawx khawngphak laksawng: kah nawh heue.
Mai lheu: khaing: an:, Simiang khunhawkham khawm uik, tag grux tix krub kah nawh, mai ceu pwi khawm uik tag yuh kaing jhaw: nawh heue.
Grawhgrawng: nawh, yam kok yo pwi pa ang kub pa ih pa un:, mai pwi pa hot pa sibhawm: pa ang koe: dee deuh rhawm: khankix, Nawh tawx krax pa nyawmrhawm: nyawmrhi: kah kix heue.
Nawh caoxrhawm: mai taoh kah ju kix pwi pa hot pa sibhawm: mai pwi pa ang kub pa ih pa un: khankix heue.
Nawh taoh ju kix lih khaing: daux tawm: taix pwi pa pie pa lhen:, mai pwi pa tuktiaktukte:, mai nham: kix mawh pa ngawh sivoe ngai: Nawh heue.
Yam im: ju nawh, kix teei khri: meung Shebax mai tawx kah nawh, mai kix rawg bwan: son nawh, mai yaogyaw kah nawh ku singaix jheengjheeng: heue.
Mai plix nghox plix koi: tag teen haoh kah daux meung nawh, awm: rib riem pa koe: kah daux tiag gawng Lebanon heue. Pwi veng nawh kawx, tag haoh hun: awm: rib riem kah daux meung an: heue.
Ceukaux Nawh tag kaux cong: mai ting lhaong: haok hwan jheengjheeng: tom: ang singaix grai: hu: heue. Mai kawn: pwi khankix tag pon bwanson: Nawh, pwi tang: ceu tang: cat tag yaogyaw bwanson: khawm uik heue.
Kieh Simiang Siyiex, Siyiex pwi Isarilax, Cao: pa yuh ceu pa daox pa am: tix kaux khaing: koe: bwanson: liak.
Kieh ceukaux min: plakngai: Nawh koe: bwanson: jheengjheeng: liak, kieh min: plakngai: Nawh grum naog mai tah hu: kah piang haktiex in: khawm uik liak, Amen! mai Amen!
Lox rawg bwan: Davit kawn: Yeshie: hoik hoik heue.
Pa rauh Pa See Cie Siyiex
Lox lai pa yawgyaw Asax
Siyiex tawx bwanson: kah piang pwi Isarilax pa singax singeh kah daux rhawm: khankix tete telai heue.
Phan: mawh aux caong aux bheet mai dex lud krax hu: heue.
Grawhgrawng: nawh, yam yaox aux magmi pwi pa ang rah ang see, mai pwi pa ting rhawm: ting rhi: khankix, aux briex boh rhawm: kah kix heue.
Kix ang yaox tix kharhawm: kharhi: mai koe: riang rao tom: sidauh yum: heue.
Kix ang yaox ceu pa nu pa khawm awm: pwi tang: kaux, mai kix ang yaox tix kham: kah krax pa tuktiaktukte:, awm: pwi khankix.
Mawh kheu in:, kix ting rhawm: ting rhi:, awm: pa tauk soi: kah ngawg tix, mai jawg tix ceep kraung pa tuktiaktukte: heue.
Mawh kheu hoik kluing:, ngai: kix naog kah ceu pa caox pa caig mai rhawm: kix hoik luan keud luan sawn: tix heue.
Kix chix yuh pa caox pa caig mai tuktiaktukte: kah daux lox nyiah mai chix krai lox pa ting pa lhaong: heue.
Jheeh kix tiextu kah raoma:, mai dak kix vungviang, tah hu: kah haktiex heue.
Mawh kheu in:, pwi Siyiex khankix, deeh hoek kah kix mai yumrhawm: kah lox kix, awm: pa chix sak chix ih heue.
Mai kix ah nin:, Siyiex chix tawng yuh kah mawx? Khex koe: krax tawng krax yung mai Siyiex lie?
Pwi pa ang rah ang see an: khankix, mai kix magmi jheengjheeng:, mai kraungkhrai: kix kawx, haoh hun: tom: nie heue.
Viang aux kieh rhawm: tix singax kawx, ang doh koe: bwanson:, mai viang aux ploi: phimap tix, mai khoek taix kawx, ang koe: bwanson:.
Aux yaox tix kham: geu: krax pa laklheet krax pa sidiex ku ngawb ku singaix heue.
Phan: aux ah, khaw: rhwm: kah daux rhawm: tix, aux awm: pa pie pa lhen: kah ceu pwi Maix heue.
Yam keud yam sawn: aux kah grawng: ceu an:, aux ce: mawh pa nu pa khawm heue.
Khaix hoik hoek aux kah daux nyiiex bwan: pa singax singeh Siyiex, aux tom: tawng grawng: pa sidauh heue.
Maix hoik teei tix sau: kix kah dee kied nyu: tete, mai kah daux pa laux pa leeing: heue.
Kah daux tix vud tix cu khaing:, kheu pa lhat pa graung, kix hoek krax laux lak pak leeing: dom: mawx dom: an: heue.
Simiang Siyiex eue, awm: pa deuh pwi tix tawng grawng: pa camaox yam siduad khaing: it tix, mai yam siduad Maix, tag kieh ceu pa yuh kix mawh pa ang koe: cee koe: cak heue.
Yam kied sauxrhawm: aux, tuat hoek tom: sok lax aux heue.
Aux mawh pwi pa daox pa aw:, pa ang koe: cuyi: pingnya, awm: tosat sivoe ngai: Maix heue.
Viang mawh kawx nan:, aux ot mai Maix jheengjheeng:, mai Maix giex kah taix khawn: dawm: aux heue.
Maix tawx krax tawng krax yung mai thong: aux hu: heue. Khaix an: Maix tag teei aux hu: kah daux min: plakngai: Maix heue.
Lheu: khaing: Maix tix kaux, pwi mawx tag sang ot mai aux daux meung raoma:? Lheu: khaing: Maix tix kaux, kah piang haktiex in:, aux kawn: lo pwi mawx?
Nex nham: aux, mai rhawmrhi: aux, hoik laux hu: heue. Viang mawh kawx nan:, Siyiex mawh rang: ting mai riang rao son ju aux leeing ju leeing phan: heue.
Jhak heue, pwi pa ot singai khaing: Maix, tag hoek krax laux krax leeing: heue. Mai pwi pa gwieh hu: khaing: Maix, mai pa phit pa lud khawm uik, yuh lauxleeing: heue.
Phan: mawh aux, greed tix hoek dex mai Siyiex mawh pa mhawm: son aux heue. Aux deuh rhawm: kah Simiang Siyiex, mai krai grawng: pa yuh Nawh kah pwi khawm uik heue.
Lox Rawg Bwan: Sonsang Taoh
Simiang Siyiex eue, mawh kheu patix Maix lai tik vud aux jheengjheeng:, mawh kheu patix Maix lai songrhawm: songrhi: kah yung: khankix, pasax sawm: kah dee sawm: tix?
Doh keud kah cub pwi Maix khankix dix, mai pwi pa hoik laug Maix, sonsang mawh sin: ang ah, mai sonsang ot Maix kah gawng Zion ang ah heue.
Hoek tix jhak kah dee hoik yieh Maix tix tik kah pwi pa koeng pa yuh pa ang rah ang see kuceu khawm uik, kah daux nyiiex bwan: Maix pa singax singeh liak.
Pwi pa koeng kah Maix khankix, kok yo sinax pwi Maix heue. Mhai: sakse Maix, kix yuh mawh mhai: sakse cie tix heue.
Mai kix yuh tix mawh awm: pwi pa viex moe: mai hu: kid khaox kah daux tiag.
Yaminkix tieh tix viex moe:, daix mai yieh tix tik kraung nyiiex bwan: Maix heue.
Kix gleeing tix tik kah nyiiex bwan: Maix pa singax singeh, nyiiex bwan: dee ot ceukaux Maix kawx, kix hoik yeen hoek tom: sidaing: tiex heue.
Mai kix ah nin: kah daux rhawm: tix, "Ex tag yieh tix tik kah ceu pwi kix pak lawg," mai gleeing tix tik kah nyiiex bwan: Siyiex, pa koe: kah piang haktiex khawm uik heue.
Ang ex lai yaox mhai: sakse tokaux tix, tix ceu kawx, cao: jhai: kah ang koe:, cao: pa krai ex mhong: grawng: bawg yam kah ang koe:, mai kawn: koe: miex grheung: ang tawng?
Simiang Siyiex eue, pwi pa koeng kah ex, tag salao kah ex miex grheung:? Pwi pa koeng kah Maix yuh pa ang cee ang cak kah ceukaux Maix jheengjheeng: lie?
Mawh kheu patix, Maix lai deeh yawn: taix khawm dawm: Maix khaing: ex yuh kah mawx? Teei taix Maix lih khaing: naok Maix mai yuh kix lauxleeing: heue.
Tom: yam jah, Siyiex dawg mawh Simiang Khunhawkham Cao: pa taoh kah sinax haktiex tete heue.
Maix hoik kieh rawm: sigrit sigra: gwieh hu: kah daux siawpsibrawm, mai Maix hoik raig tix tik kaing: siyawng pa ot kah daux rawm: heue.
Maix hoik raig tix tik kaing: kax ting (Levitan)12 mai tawx kah can pa ot kah daux tiag daux tu sonsang ih kix heue.
Maix kieh daux rawm: keut mai rawm: rawng lih, mai rawm: klawng: pa koe: rawm: jheengjheeng: kawx, Maix kieh kroh hu: heue.
Ponngaix mai ponsawm: kawx, mawh cie Maix, mai Maix hoik yuh pa riieng mai singaix heue.
Maix hoik deuh bawg yam rung bawg yam kwat, mai mee: haktiex in: khawm uik heue.
Simiang Siyiex eue, viang pwi pa koeng salao kah Maix mai pwi pa caox pa caig yuh pa ang cee ang cak kah ceukaux Maix kawx, doh keud kah kix liak.
Paw lai teei ju sikaux Maix tawx kah totiag khankix liak. Mai paw lai piawm: kah pwi pa hot pa sibhawm: jheengjheeng: liak.
Maix doh keud kah sijax mukheu Maix liak, grawhgrawng: nawh, kah daux pa faik kah piang haktiex in:, hoik naog dee ot dee koe: pwi tud pwi rhim: mai pa tuktiaktukte: khankix heue.
paw kieh pwi pa yaox tix kham: geu: kah krax pa tuktiaktukte: hoek krax pa kaig pa tua mai krax pa lauxrhawm: lauxrhi: liak. Mai kieh pwi pa hot pa sibhawm: khankix, yaogyaw kah ceukaux Maix liak.
Simiang Siyiex eue, kaoh mai prawng ca: kah see: Maix liak, doh keud kah pwi pa caox pa caig, pa sa pa lao kah Maix jheengjheeng: liak.
Paw lai piawm: kah lox pwi pa koeng kah Maix, lox pa maw: pa lawh pwi pa tieh pa feen kah Maix nie lheu: haoh hun: sinyek sinyek heue.
Siyiex Cao: Prawng Ca:
Lai pa yawgyaw Asax
Simiang Siyiex eue, ex yaogyaw kah Maix heue, kheu hoik dex ceukaux Maix, mai ex khawm mhai: sakse ceu pa daox pa am: pa yuh Maix, mai ex yaogyaw kah Maix heue.
Bawg yam pa bak aux kah kix, aux prawng ca: kah kix rah see heue.
Haktiex mai pwi haktiex, viang yungyiang: hu: kawx, Aux kieh jaong num: haktiex kaux cong: heue.
Aux ah nin: kah pwi pa ting rhawm: ting rhi: khankix, pex paw lai ting rhawm: ting rhi:, mai pwi pa caox pa caig khankix, paw yuh rung: tix choek;
Paw yuh rung: tix choek, mai pwi pa ang rah ang see khankix, paw yuh rung: tix choek, mai paw kieh ghok kiien: lox sikah.
Grawh grang nawh, krax yaogyaw, ang mawh pa kaoh khaing: plak lih singaix mai plak klip singaix, mai kah daux tiag daux tu.
Cao: pa prawng pa ca: mawh Siyiex heue. Nawh yeen tix kaux tiem mai yaog tix kaux lhaong: heue.
Kah daux tawm: taix Simiang Siyiex, koe: kawk pa hoik naog rawm: plix siiet pa khiien: heue. Nawh prauk rawm: plix siiet pa hoik klao: mai rawm: sidauh lih heue. Kawn: pwi piang haktiex pa ang rah ang see khankix khawm uik biiet tix nyaux kah glhaok an: heue.
Phan: mawh aux yaogyaw kah Siyiex ceu pwi Yakop mai rhax lai yawgyaw kah jheengjheeng: heue.
Aux tag kid tix tik rung: choek pwi pa ang rah ang see khankix, mai aux tag yaog rung: choek pwi pa rauh pa see khankix heue.
Siyiex Mawh Cao: Pa Pex
Lai pa yawgyaw Asax
Pwi pa tawng kah Siyiex koe: kah daux meung Yudax, mai ceukaux Nawh Cao: ting lhaong: kah daux Isarilax heue.
Nyiiex gox Nawh Cao: koe: kah veng Saliem, mai dee ot Nawh mawh kah piang gawng Zion heue.
Kah dee an: Nawh Cao: raig tix tik te, kraung naing, vaig, mai kraung naing pa tie naok khankix heue.
Maix nie lheu: ting min: plakngai: khaing: gawng pa ot totiag totu khankix heue.
Pwi pa vao pa kua: khankix, laig it khaix yaox kix tix kham: geu: pa tud pa rhim: heue. Mai pwi pa ting riang ting rao khankix, ang yaox taix kix tix kaux kawx.
Siyiex ceu pwi Yakop eue, kah daux pa sivied Maix tix gau, cao: pa brug ling: brung mai khawm brung sidaing: laig it heue.
pa khaw: ex tix lhat graung kah mawh ngie Maix tix kaux khaing:, yam songrhawm: songrhi: Maix, pwi mawx tag sang pon tix cung sivoe ngai: Maix.
Siyiex taoh kah kawn: pwi haktiex, pa awn: rhawm: awn: rhi: khawm uik heue.
Yam kaoh Nawh tix prawng ca:, Nawh ploi: lox prawng ca: lih khaing: raoma:, mai haktiex lhat graung mai yiien: yawg tix heue.
Krax pa songrhawm: kawn: pwi, deeh tieh tix mawh pa yaogyaw kah Maix, mai krax pa songrhawm: songrhi: pa kawn deuk khankix kawx, Maix hoik rawd tix deuh kah maox rawd nyoi heue.
Kaux sijax mukheu, awm: pa hoik yuh maix tix deuh sijax mukheu kah Simiang Siyiex pex awawx. Mai kieh can pwi pa ot sivie Maix, viex khawngphak laksawng: hoek kah Maix mai lhat graung kah Maix Cao: heue.
Nawh Cao: yeen tiem kah kawn: Simiang mai kieh Simiang khunhawkham haktiex khankix, lhat graung heue.
Tawx Krax Nyawmrhawm: Yam Khirhawm:
Lox lai pa yaogyaw Asax
Aux ploi: lox mai kok yo kah Siyiex heue, Mai Nawh nghiiet lox pa kok yo aux heue.
Yam hoek aux krax khirhawm: khirhi:, aux sawg kah Maix Siyiex heue. Yam ponsawm: aux yaog taix tix rawg bwan:, ju aux thiang: tix tik pa nyawmrhawm: heue.
Aux keud grawng: Siyiex mai khirhawm: khirhi: mai ngia tix heue. Aux keud rhawm: tix mai lauxrhawm: heue.
Maix kieh ngai: aux blah leeing: sawm:, aux khirhawm: khirhi: tom: ang lai pon sikah heue.
Mai Aux doh keud kah grawng: singaix pa hoik luan, mai jhong: khix mee: num pa hoik luan dix.
Bawg yam ponsawm: aux jawg tix keud mai rhax lai mai aux chawk kah daux rhawm: tix ah nin:, mai aux chawkcheng: kah ju tix heue.
Siyiex khex hoik tik vud aux jheengjheeng: lie? Khaix in: ang Nawh yuh bwanson: kah aux tix bawg kawx lie?
Mai krax caoxrhawm: Nawh hoik uik jheengjheeng: lie? Sijax mukheu Nawh hoik lauxleeing:, leeing ju leeing phan: lie?
Hoik piawm: Nawh krax caoxrhawm: lie? Nawh Cao: hoik prah hoik grham: krax caoxrhawm: pa moh, kheu songrhawm: songrhi: Nawh lie?
Phan: yuh nan:, aux lawk kham: geu: grawng: pa ting rhawm: aux heue. Lheu: khaing: taix khawn: dawm: Siyiex, pa ting pa lhaong: khaing:, pa chix cox kah aux heue.
Aux tag krai kah grawng: kaing pa hoik yuh Maix mai doh keud kah ceu pa daox pa am: pa hoik yuh Maix tom: didix.
Aux keud grawng: ceu pa hoik yuh Maix, mai krax prawng krax ca: Maix khankix heue.
Simiang Siyiex eue, daux krax Maix mawh pa singax singeh heue. Siyiex mawx pa lheu: ting khaing: Maix Siyiex lie?
Maix mawh Siyiex Cao: pa chix yuh ceu pa daox pa am:, mai pa hoik jhi: siawpsibrawm kah ceu kawn: pwi khankix heue.
Maix hoik teei plawng: taix mai hoik taoh kah pwi Maix, ceu pwi Yakop mai ceu pwi Yosiep khankix heue.
Simiang Siyiex eue, rawm: khankix yaox kah Maix mai lhat graung heue. Mai rawm: pa raux khankix kawx, yung yiang: heue.
Paiawm: khankix, lih mawh rawm:, raoma: kawx, sinum praix heue. Te Maix kawx, hoik tah hu: kudauh kudee heue.
Lox tuh sah Maix viex tix kah daux bhaung: keu: kang: lux, mai puk plak praix khankix, hoik riang yuh haktiex heue. Mai haktiex kawx yung yiang: hu: heue.
Daux krax Maix koe: kah daux rawm: sigrit sigra:, mai grawng: hu: Maix kied sidaing: vieh, mai khaix Caong Maix ang chix yaox sidawng:.
Maix hoik teei taix Mose mai Arun, thong: kah pwi Maix awm: cub phung: yung: heue.
Siyiex Mai Pwi Cie Nawh Khankix
pwi cie Aux khankix eue, veeh yhaok pex nghiiet kah lox beenli Aux, mai gumlox pa krai Aux awawx.
Aux tag ang: moing tix, mai krai lox phektem: kah pex, mai Aux tag plak jhi: grawng: pa raux pa mox jah tom: didix heue.
Mai ex hoik mhong: hoik tawng grawhgrawng: pa hoik krai tax ex khankix.
Mai ex ang mox khaing: kawnpraix kix, sonsang yaogyaw kah Simiang Siyiex, mai siawpsibrawm: mai ceu pa daox pa am:, pa hoik yuh Nawh Cao: khankix, krai kah kix, pa tag sang hoek tix mawh sax heue.
Grawhgrawng: nawh, Nawh Cao: deuh sonsang kham: mhai: sakse kah geh nyiiex Yakop mai deuh lox tawm: beenli kah geh nyiiex Isarilax heue. Gumlox beenli an:, Nawh Cao: tawx kah tax ex, keeing: ex, sonsang kieh kawnpraix kix tawng heue.
Mai kawnpraix kix pa keh khaix, deeh gau kah kawn: kix, kawn: kix tom: deeh sitoe: tix gau kah kawn: saux, kawn: sex kix tawng.
Sonsang yumrhawm:, deuh kix rhawm: kah Siyiex, mai son ang lai piawm: kah ceu pa hoik yuh Siyiex khankix, mai sonsang hawt tix yuh lox beenli Nawh Cao: khankix,
son ang kix sang mawh pwi pa tieh pa feen kah Siyiex, mai son ang kix sang mawh rhawm: pwi pa ang rah ang see, mai son ang kix sang mawh khwan pa ang kaux sijax kah Siyiex, awm: tax du kix heue.
Ceu pwi Epharim khankix, viang kix viex kraung naing mai ak kawx, yam puing: naing kix deeh dak plak khaix heue.
Kix ang lai krox kah sijax mukheu Siyiex, mai kix ang hawt kah daux krax beenli Nawh Cao:.
Mai kix piawm: kah ceu pa daox pa am: pa jhi: Nawh Cao: kah kix heue.
Nawh Cao: hoik yuh ceu pa daox pa am:, sivoe ngai: tax kix, keeing: kix, kah daux lung: Zoan kah daux meung Ejiptux heue.
Nawh Cao: kieh rawm: sigrit sigra: gwieh mai khrawm: tix tau mai kieh kix tiang hu: heue.
Bawg yam ponngaix Nawh Cao: kieh rong: paiawm: jhi: kix yaox daux krax, mai bawg yam ponsawm: kieh pa riieng ngu jhi: kix yaox daux krax leeing: sawm: heue.
Nawh Cao: tawk simaox rang: daux tiag, mai kieh rawm: lih tom: nie, mai tawx kix nyaux heue.
Mai Nawh Cao: kieh rawm: pa lih khaing: daux rang: an:, lih hu: awm: rawm: klawng: heue.
Pwi an: khankix nie lheu: ting phit lud mai tieh feen kah Siyiex Cao: pa ting pa lhaong: kah daux tiag daux tu heue.
Kix hawt alo tix mai keud daux rhawm: tix yuh nin:, ex cheu: mhaing: tix yaox pa ih pa un: kah Siyiex?
Mai kix baox ah nin: kah Siyiex, "Khex pon khre: Nawh pheen: sawm: ex kah daux tiag daux tu lie?
Jhak heue, kix ah lox map kah Siyiex mai ah nin:, Nawh Cao: tawk kah rang: mai chix kieh rawm: lih awm: rawm: klawng:, khaomun mai nex kawx, Nawh Cao: tag sang pon tawx, pon khre: kah son pwi Nawh khankix lie?"
Siyiex mhong: lox an: mai kied songrhawm: songrhi: heue. Mai kieh ngu gleeing tix tik kix geh nyiiex Yakop mai Isarelax heue.
Grawhgrawng: nawh, kix ang yumrhawm: kah Siyiex, mai ang tawng kah bwanson: krax taoh Nawh Cao:.
Nawh Cao: tawm: lox kah paiawm: dee lhaong:, mai paoh siviex raoma: heue.
Nawh Cao: kieh Mannax lih, awm: lih lhiex mai tawx pa ih pa un:, gaox, nghox son pa sang ih kix khaing: raoma: heue.
Mai kix khawm uik, yaox tix ih kah khaomun pa ih pa un: kawncau Siyiex, pa tawx Nawh Cao: kah kix, mai kieh kix ih tom: sak tix heue.
Nawh Cao: kieh bhaung: plak lih singaix phlu: hu: kah raoma:, mai Nawh Cao: teei siawpsibrawm Tix viex bhaung: caong ma: seh hoek heue.
Nawh Cao: kieh nex lih tom: nie awm: lih lhiex, mai pa awm: phawng: tiex pa mawh sim: pa pu: tom: haoh tom: hun: sidu awm: mhaik rawm: sigrit sigra:, lih kah piang kix heue.
Nawh Cao: kieh rau hawt praok nyiiex bang: dee ot kix heue.
Nawh Cao: tawx kah kix, awm: pa simie kix tix ih tom: sak tix heue.
Yam kawn: tag sawm: kix, mai ang nyang tien sak,
krax pa songrhawm: songrhi: Siyiex deeh hoek kah piang kix, mai Nawh Cao: pah pwi brax pwi kwa:, mai teei kah pwi Isarilax pa awn: ju khankix yum: heue.
Viang kix hoik yaox ceu pa daox pa am: kuceu kawx, kix ang yumrhawm:, mai ca: kawn: phit lud heue.
Mawh kheu nan:, Nawh Cao: kieh singaix sawm: kix luan giex going mai khix num kix sidauh kah pa kharhawm: heue.
Yam teei Nawh Cao: kix yum:, kix sawg kah Nawh Cao: heue. Kix deeh hoek tix sawg kah Nawh Cao: heue.
Mai kix doh keud kah grawng: mawh Siyiex rang: ting cie kix, mai Siyiex Cao: pa ting piang khawm uik, mai mawh Cao: pa taoh kah kix heue.
Viang mawh kawx nan:, mawh ngie jheeh giex, dak kix ah lox pa pie pa lhen: heue.
Phan: mawh rhawm: kix, ang rah ang see kah Nawh, mai ang kix tie kaux sijax kah Nawh Cao: heue.
Viang mawh kawx nan:, phan: mawh Nawh Cao:, Caoxrhawm: kah kix, mai ang tik ang vud kah kix, mai pluat ploi: phimap phigrhawm: kix heue. Mai Nawh Cao: gun yeung tom: nie bawg, viang kied songrhawm: kawx Nawh ang awt yuh kix laux.
Mai Nawh Cao: doh keud kah mawh kix ngie nex nham: khaing:, phan: khwan hoik luan hu:, ang lai chix deeh hoek khaix heue.
Mai kix tieh feen kah Nawh Cao: kah daux tiag daux tu, mai kix kieh Nawh Cao: songrhawm: songrhi: kah daux tiag dee ang pwi ot kah dee yiien: tom: nie bawg heue.
Mai kix cheuk tix yaox kah Siyiex lawlawx, mai yuh pa ang cee ang cak kah Siyiex Isarilax Cao: pa singax singeh heue.
Mai kix piawm: kah plawng: taix Siyiex pa taoh kix lih khaing: singaix bawg yam, yam ot kix kah daux tawm: taix pwi pa koeng kah kix heue.
Nawh Cao: hoik yuh mhai: sakse kah daux meung Ejiptux, mai yuh mhai: ceu pa daox pa am: kah daux lung: Zoan heue.
Nawh Cao: kieh rawm: keut, rawm: klawng: khankix, lih mawh nham: tom: kieh kix ang chix ih chix nyaux heue.
Nawh Cao: ploi: maing13 pa chix kiied, mai khet khankix, pa chix yuh laux, hoek kah kix heue.
Nawh Cao: kieh kawng mai sido (araphax) yuh laux to: ma: to: koi: mai kraungkhrai: kix pak lawg heue.
Nawh Cao: kieh mu: pre: yuh laux kah nhu: plix siiet khankix, mai kieh lon: sidap yuh laux kah khaoxruh khankix heue.
Nawh Cao: kieh mu: pre: yuh laux cub yung:, moi kix khankix yum:, mai kieh sah tuh, khawng: brie kix khankix yum: heue.
Nawh Cao: kied songrhawm: songrhi: kah kix, mai tawx krax kharhawm: kharhi: mai ploi: kawncau Siyiex pa caox khankix, hoek tix tuktiaktukte: kah kix heue.
Nawh Cao: hoik rien tix deuh krax kah pa songrhawm: songrhi: Tix, mai Nawh Cao: ang lai lhawk kah ju kix, kieh kix yum: kah saux preng heue.
Nawh Cao: pah kawn: Ai14 daux meung Ejiptux yum: khawm uik, pa mawh pwi ting pwi lhaong: khawm dee ot pwi Hamax heue.
Phan: mawh pwi Nawh khankix, Nawh kieh lih awm: cub yung: mai viex kix lih daux tiag daux tu, awm: cub yung: heue.
Nawh Cao: priex kix luan mhawmmhawm:, mai ang kieh kix koe: krax pa lhat pa graung, viang mawh nan:, Nawh Cao: kieh rawm: sigrit sigra: kheem: kah pwi pa koeng khankix heue.
Nawh Cao: thong: kix hu: tom: sidauh, mee: haktiex Nawh Cao: pa singax singeh, mai haktiex gawng lua pa pon Nawh kah taix khawn: dawm: pa giex tix kaing: heue.
Mai Nawh Cao: grheu: tix tik kah pwi tang: ceu tang: cat khankix, sivoe ngai: kix, mai gwieh kix ih haktiex, sin: pa khaw: kix tix pon, kah geh nyiiex Isarilax mai kieh kix sum: nyiiex bang: dee ot kix tan heue.
Viang mawh kawx nan:, kix cheukcheu: mai tieh feen kah Siyiex Cao: pa ting pa lhaong:, mai kix ang nghiiet kah lox grawng: pa hoik kham: Nawh tix deuh sakse khankix,
Mai kix deeh tieh hu: mai yieh lox sijax mukheu laux awm: tax du kix heue. Kix hoik lud krax hu:, awm: ak pa vawk te heue.
Kix teei dee ot pa lhaong:, mai yuh Nawh Cao: songrhawm: songrhi: mai krub kah rieng rao pa hoik yuh kah tawng khankix, kieh rhawm: Nawh Cao: sungsang heue.
Siyiex hoik mhong: hoik tawng mai Nawh Cao: lih songrhwm:, mai kied seeing: brai: kah pwi Isarilax heue.
Nawh Cao: tik kah nyiiex gox bwan: man Silon pa deuh son pwi Nawh khankix heue.
Nawh Cao: teei siawpsibrawm: mai min: plakngai: Nawh tawx hu: kah daux tawm: taix pwi pa koeng khankix heue.
Nawh Cao: teei tix tawx pwi cie Nawh kah lawm vaig, mai Nawh Cao: lih songrhawm: songrhi: kah sinngao cie Nawh khankix heue.
Mai kieh sinaw khankix yum: daux ngu, mai ang kieh bunkrih khankix yaox tix koe: mex.
Mai Cao: giex kaing: li khankix laux, yum: kah lawm vaig, lawm pliah, miexmhai tai nhang: khankix, ang lai kieh kix yiiem.
Yam an: Siyiex siduad awm: pwi pa siduad khaing: it tix, mai ting riang rao awm: pwi pa nyaux rawm: plix siiet heue.
Nawh Cao: tawx krax pa kharhawm: kharhi:, kieh pwi pa koeng khankix, deeh dak plak khaix mai kieh kix hoek krax pa kaig pa tua jheengjheeng: heue.
Nawh Cao: teei tix tik kah nyiiex gox Yosiep, mai ang laug tix teei kah geh nyiiex Epharim.
Viang mawh kawx nan:, Nawh Cao: laug tix teei kah geh nyiiex Yudax mai gawng Zion pa moh Nawh heue.
Nawh Cao: sum: nyiiex bwan:, pa singax singeh awm: pa koe: choek dee lhaong:, mai awm: pa kieh Nawh haktiex kaux cong: jheengjheeng: heue.
Nawh Cao: laug tix teei aux, Davit lih khaing: daux kawg yung: heue.
Nawh Cao: laug tix teei aux, awm: yung: miex pa priex kawn: tix, mai kieh aux priex pwi Nawh geh nyiiex Yakop pa mawh sinngao Nawh ceu pwi Isarilax khankix heue.
Mawh kheu nan:, Nawh priex kix mai thong: kix hu: kah daux tawm: taix tix, awm: pa koe: rhawm: Nawh heue.
Lox Rawg Bwan: Sonsang Taoh
Siyiex eue, pwi tang: ceu tang cat khankix, hoik hoek kah daux sin: Maix, kix hoik kieh nyiiex Bwan: pa singax singeh Maix, seeing: brai: mai hoik yieh tix tik veng Yerusaliem heue.
Kix hoik teei tix tawx sim: raoma: khankix, ih kah tokaux yum: siliex Maix khankix, mai kix hoik teei tix tawx nex nham: pwi Maix kah totiag pa caox khankix heue.
Mai kix teei nham: kix hieh hawt vungviang veng Yerusaliem, awm: lih rawm: mai ang koe: pwi sipaung:.
Paoxplawg paoxnyhawm: pa ot dex vungviang aux khankix, salao mai nyiah maung aux heue.
Simiang Siyiex eue, krax songrhawm: songrhi: Maix ang cu tix naox yiien:, kawn: sang rheung: miex grheung:? Mai rhawmrhi: Maix ang nyang fah, tag sang hax awm: ngu, kawn: rheung: miex grheung:?
Krax pa songrhawm: songrhi: Maix teei tix hieh kah piang pwi tang: ceu tang: cat pa ang tawng kah Maix, mai kah piang pwi meung pa ang kok kah ceukaux Maix khankix heue.
Grawhgrawng: nawh, kix kiied tix ih kah nex geh nyiiex Yakop mai yieh laux dee ot dee koe: kix heue.
Phimap pa yuh tax keeing: ex dix, paw kieh hoek kah piang ex liak. Mawh kheu ex hoik rau hoik ot dee tiiem, mai Maix caoxrhawm: kah ex, mai nied tix teem: coi laung laung liak.
Siyiex Cao: pa taoh kah ex eue, kah daux min: plakngai: ceukaux Maix, teem: coi kah ex liak. Kah daux ceukaux Maix taoh tix teei aux mai ploi: phimap phigrham: aux liak.
Mawh kheu patix, pwi tang: ceu tang: cat khankix ah nin:, Siyiex kix koe: dee mawx? Mai Maix prawng ca: kah nham: pwi Maix, pa hoik teei pwi tang: ceu tang: cat khankix, sidawng: kah sivoe ngai: ex liak.
Maix nghiiet kah lox pa riag, pa ngia pwi pa ot kah daux thawng: khankix, mai taoh kah pwi pa tag sang pah yum: khankix kah daux plawng: taix Maix pa ting siawpsibrawm liak.
Siyiex eue, kah piang pwi, paoxplawg paoxnyhawm: aux, pa sa pa lao kah Maix khankix, deeh viied tix tawx phimap kah piang naok kix, tom: sidauh aliah son liak.
Mawh kheu nan:, can ex pa mawh pwi Maix, mai cub yung: pasax sawm: tau mai Maix khankix, tag sang yaogyaw kah Maix jheengjheeng: mai plak jhi: bwanson: Maix kah pwi pa tag sang mawh khaix in: leeing ju leeing phan: heue.
Lox Rawg Bwan: Sonsang Deeh Cox Haktiex
Cao: liang yung: Isarilax mai pa thong: kah ceu pwi Yosiep awm: cub yung: eue, veeh yhaok Maix nghiiet liak, Cao: pa ot kah piang Cherubin eue, ploi: pa riieng Maix liak.
Jhi: siawpsibrawm Maix kah sivoe ngai: ceu pwi Epharim, Binyamin, Manasie: mai hoek tix taoh kah ex liak.
Siyiex eue, kieh ex deeh tieh loh mai jhi: pa riieng pakngai: Maix liak, phan: yuh nan:, ex tag sang hoek krax taoh heue.
Simiang Siyiex Cao: kru naing raoma: eue, krax pa songrhawm: songrhi: Maix, kawn: sang kieh koe: kah piang pwi Maix pa rawg bwan: kah Maix rheung: miex grheung:?
Maix tawx kix ih khaomun rawm: ngai:, mai tawx kix nyaux rawm: ngai: tom: sak tix heue.
Mai kieh paoxplawg paoxnyhawm: ex khankix, thungthiang: kah ex heue. Mai pwi pa koeng kah ex khankix, ah lox map mai nyiah kah ex heue.
Simiang Siyiex Cao: kru naing raoma: eue, kieh ex deeh tieh loh mai jhi: pa riieng pakngai: Maix liak, phan: yuh nan:, ex tag sang hoek krax taoh heue.
Maix hoik viex tix sum: nhu: plix siiet khaing: meung Ejiptux, mai grheu: pwi tang: ceu tang: cat khankix to: heue.
Maix hoik rien hoik cox dee ot nawh mai riah nawh khankix, hoik tah hu: ku meung heue.
Veei nawh hoik tah hoik kheem: kah gawng khankix, mai kak nawh khankix kawx, kheem: veei kah piang khaox piakvan pa kied ting kied lhaong: khankix heue.
Nawh kieh kak nawh khankix, ting lhaong: hu: tom: sidaing: hoek kah rawm: sigrit sigra:, mai nyoig rao nawh kawx, tah hu: tom: hoek kah rawm: klawng: ting, (Upharat) heue.
Mawh kheu patix yamin:, Maix lai yieh tix tik khaox vie nawh, mai can pwi pa hu: krax dex nawh khankix, pieh tix ih plix nawh.
Mai prieh kee nhu: nawh dud, mai totiag pa caox hoik ih kah heue.
Siyiex Cao: kru naing raoma: eue, ex khyox khaw: kah Maix, deeh hoek ha: tix bawg liak, ot piang meung raoma: mai kia: ngien kah ex liak. Hoek tix jhak kah nhu: plix siiet khankix liak.
Kah nhu: pa hoik sum: taix khawn: dawm: Maix tix deuh, priex kix, sonsang haok hwan mai kaux cong: son Maix.
Hoik gleeing kah ngu, mai hoik kid tix tik heue. Mawh kheu pakngai: Maix, pa sidiex kix hoik hoek krax pa laux pa leeing: heue.
Teei taix Maix deuh kah piang pwi pa dex mai taix khawn: dawm: Maix, mai kieh kawn: pwi grum ting riang ting rao son Maix liak.
Phan: yuh nan:, ex ang lai deeh yawn: plak khaix khaing: Maix, kieh ex im: ju liak, ex tag rawg bwan: kah ceukaux Maix heue.
Simiang Siyiex Cao: kru naing raoma: eue, kieh ex deeh tieh deeh loh mai jhi: pa riieng pakngai: Maix liak, phan: yuh nan:, ex tag hoek krax taoh heue.
Lox Yaogyaw Kah Son Nyiiex Bang: Pwie
Ex ah lox rhax pa gauxrhawm: gauxhri:, yaogyaw kah Siyiex Cao: pa tawx riang tawx rao kah ex heue. Mai kok yo lox sinum kah Siyiex Yakop heue.
Ah lox rhax mai tah kraung:, tah ting: susi:15, pa nyawm tix nghiiet heue.
Phlu: teettawng kah singaix khix khraox, mai singaix pang: khix, mai singaix yuh pwie ting heue.
Ceu in: mawh beenli pa deuh Siyiex Yakop kah son pwi Isarilax heue.
Nawh Cao: prawng ca: tix deuh kah geh nyiiex Yosiep tix kham: sakse yam lih hu: nawh kah daux meung Ejiptux, dee ang aux tawng lox tawng pwi kah heue.
Aux kieh kraung pa cien luan khaing: piang klip nawh, mai taix nawh kawx, kieh luan khaing: sawng beeh klawm: heue.
Yam yaox maix krax pa kharhawm: kharhi:, maix kok yo Aux, Aux taoh tix teei kah maix heue. Aux deeh pawk lox Maix, dee tuh sah dee glip mai cheukcheu: tix yaox maix kah praok rawm: klawng: Meribax heue.
Pwi aux khankix eue, nghiiet heue, Aux tawm: tix deuh lox kah maix, geh nyiiex Isarilax eue, maix nghiiet kah lox Aux liak.
Mai siyiex pwi tang: ceu tang: cat ang pon tix koe: mai maix, mai maix ang pon tix krub kah siyiex tang: praix tang: klawng:.
Aux mawh Simiang Siyiex maix Cao: pa taoh maix lih khaing: daux meung Ejiptux heue, ang: jheeh maix tom: vieh tom: va:, Aux tag tawx maix ih tom: sak tix heue.
Mai pwi Aux khankix, ang nghiiet kah lox Aux, ceu pwi Isarilax tee: ang moh kah Aux nieh.
Mawh kheu in:, Aux tom: kieh rhawm: kix kiien:, mai kieh kix hu:, awm: pa sikix tix hawt yuh16.
Pwi Aux khankix, nghiiet kah lox Aux, kieh ceu pwi Isarilax hawt daux krax Aux liak.
Phan: hawt pwi pa koeng khankix, Aux nied tix yeen kix tiem mai taix Aux tiebtie, yuh laux kah kix pwi pa lah pa cha: kah kix heue.
Pwi pa koeng kah Simiang Siyiex khankix, khyox khaw: kah Nawh Cao: mai pwi aux khankix kawx, koe: akhwang: kaux cong: jheengjheeng: heue.
Nawh Cao: tag sang tawx kix ih kah gaox kah nghox tom: sak, pa kied mhawm: mai rawm: hia: pa lih khaing: daux rang: heue.
Cao: Pa Giex Kaing: Pa Ting Siawpsibrawm
Siyiex cung kah daux siyiex pa haoh pa hun:, mai prawng ca: kah sinax kix heue.
Pex jhak kah pakngai: pwi pa ang rah ang see, mai kawn: prawng ca: pa ang rah ang see rheung: miex grheung:?
Pex prawng ca: mai ot plak pwi pa hot pa sibhawm:, mai kawn: doe: pa ang koe: miex keeing: khankix, yuh pa khaw: mai beenli mai ot plak kix pa hot pa sia: mai pa cairhawm: cai: rhi: khankix awawx.
Mai taoh kah pwi pa hot pa sibhawm: mai pa cairhawm: cairhi: khankix, luan khaing: daux taix pwi pa ang rah ang see khankix awawx.
Mai kix ang tawng ang yung, kix lailing kah daux pa faik, mai jaong num: haktiex yungyiang: khawm uik heue.
Aux ah nin: kah pex, pex mawh Siyiex heue, mai can pa koe: khawm uik mawh kawn: Siyiex Cao: pa ting pa lhaong: heue.
Viang mawh kawx nan:, pex tag sang yum: awm: kawn: pwi, mai hoek krax laux krax sum awm: kawn: Simiang heue.
Siyiex eue, kaoh mai prawng ca: kah haktiex liak, grawhgrawng: nawh, kawn: pwi khawm uik mawh cie Maix heue.
Lox Rawg Bwan: Sonsang Som Pwi Pa Koeng
Lai yaogyaw pa ah Asax
Siyiex eue, paw lai glaik yiien: yawg tix liak, Maix paw yuh tix ang tawx lox pa sang krai Tix mai paw lai kaog liak.
Jhak heue, pwi pa koeng kah Maix khankix, yuh lox maw: cuci: mai pwi pa koeng kah Maix khankix, hoik kaoh heue.
Mai kix briex kum: paox tix nong: nong:, sonsang yuh lauxleeing: kah pwi pa priex Maix khankix heue.
Mai kix ah nin: kah paox tix, hoek heue, ex grhiem: tix tik kah ceu pwi Isarilax, yuh kah mawx son ang pwi lai doh keud kah ceukaux kix khaix in: sax heue.
Mai kix ih rhawmrhi: simau paox tix, mai briex kum: tix sang tieh feen kah Maix heue.
Mawh cub pwi Edom, ceu pwi Isamelax, pwi Mawbax, pwi meung Hagarax,
pwi meung Gebalax, pwi meung Amon, pwi meung Amaliet, ceu pwi Philitix, mai pwi veng Turux khankix heue.
Mai ceu pwi Asurix khankix kawx, rom tau mai kix cub geh nyiiex Lotax heue.
Maix yuh kix yaox jhawm:, awm: pa hoik yuh Maix kah ceu pwi Midian, mai Simiang Sisarax, mai Simiang Yaben kah praok rawm: klawng: Khison liak.
Kix hoek krax laux krax som kah daux Endawrax mai mawh phon: kah piang tiex heue.
Yuh simiang kix, khankix, awm: yuh Maix kah simiang Awrebax mai simiang Zebax, mai yuh simiang haktiex kix khawm uik awm: yuh Maix kah simiang Zebahax mai simiang Zalamonnax,
cao: pa ah nin:, ex rud tix teei nyiiex bwan: kix, mawh cie ex heue.
Siyiex aux eue, kieh kix awm: phawng: tiex pa phlu: bhaung: keu: kang: lux hu:, mai kam: pa phlu: bhaung: hu: liak.
Awm: pa gleeing ngu kah daux tiag daux tu, mai kah piang gawng lua khankix,
Maix teei bhaung: ting lhiex ting lah kah kix, mai teei bhaung: caox glhat tix tik kix liak.
Simiang Siyiex eue, kieh plakngai: kix kaig tua, mai kieh kix sawg kah ceukaux Maix liak.
Mai kieh kix hoek krax pa kaig pa tua, mai koe: krax pa lhat pa graung liak, mai kieh kix koe: krax pa taug pa mao mai kieh hoek krax pa laux pa som liak.
Mai kieh kix tawng kah ceukaux Maix tix kaux khaing: pa mawh Simiang Siyiex tix kaux khaing:, Cao: pa ting kah piang haktiex khawm uik liak.
Pa Krox Pa Jun Kah Nyiiex Siyiex
Simiang Siyiex Cao: kru naing raoma: eue, nyiiex bwan: dee ot Maix, mawh pa kied sidaing: mhawm: heue.
Ju aux sawg dee ot Simiang Siyiex mai hoik iak riang iak rao hu: heue. rhawm: aux mai tokaux aux, sawg mai kok yo kah Siyiex pa im: ju heue.
Simiang Siyiex Cao: kru naing raoma:, mai Simiang Khunhawkham aux, mai Siyiex aux eue, sim: saik koe: dee ot dee koe: mai sim: sivoeg koe: mheem: dee tawm: dee vah kah dee dex khu: dee tan Maix heue.
pwi pa ot kah daux nyiiex Maix khankix, koe: bwanson: heue, kix tag yaogyaw kah Maix jheengjheeng: heue.
Mai pwi pa teei riang rao kah Maix, mai pwi pa koe: rhawm: kah daux krax Maix khankix, koe: bwanson: heue.
Yam preeng: kix tix hu: kah daux ngawd dee kroh dee kram: kawx, kah dee an:, deeh kieh rawm: keut lih tom: nie, mai rawm: lhiex cao kawx, kieh bwanson: kheem: veei kah heue.
Mai kix nie hu:, nie koe: riang sinyek mai jhi: pakngai: kix kah Siyiex, kah daux veng Zion heue.
Simiang Siyiex Cao: kru naing raoma: eue, nghiiet kah lox pa rawg aux bwan: liak. Siyiex Yakop eue, veeh yhaok Maix mai nghiiet liak.
Siyiex Cao: pa tiebtie eue, jhak kah pakngai: pwi pa hoik laug Maix tix teei liak.
Pon tix ot dee ot Maix tix singaix, nie lheu: mhawm: khaing: ot tang: dauh tang: dee tix rheng: singaix heue. Aux nie lheu: moh tix pau diang siviex nyiiex Maix Siyiex, khaing: ot nyiiex dee ot pwi pa caox pa ang rah ang see khankix heue.
Simiang Siyiex mawh singaix, mai Cao: pa tiebtie heue. Simiang Siyiex mawh Cao: pa tawx bwanson:, mai min: plakngai: heue. Nawh Cao: ang lai tik vud ceu pa mhawm: kah son pwi pa rauh pa see khankix tix ceu kawx heue.
Simiang Siyiex Cao: kru naing raoma: eue, pwi pa deuh rhawm: kah Maix khankix, koe: bwanson: heue.
Lox Rawg Bwan: Sonsang Yaox Tix Ot Yiien: Mhawmmhawm:
Simiang Siyiex eue, Maix moh kah meung tix, mai geh nyiiex Yakop pa hoik giex hu: khankix, deeh hoek tawx liak.
Maix pluat ploi: phimap pwi Maix khankix, mai hoik kheem: phimap kix khawm uik heue.
Kieh krax pa songrhawm: songrhi: Maix grai: uik, mai yawn: rhawm: Maix khaing: krax pa songrhawm: songrhi: liak.
Siyiex Cao: pa taoh ex eue, kieh ex deeh tieh deeh loh tix, mai kieh yiien: kah rhawm: pa hoik sax songrhawm: songrhi: Maix liak.
Khex songrhawm: songrhi: Maix kah ex jheengjheeng: lie? Mai krax pa songrhawm: songrhi: Maix ang cu tix grai: leeing ju lie?
Maix hoik kieh ex im: ju, mai kieh pwi Maix khankix, gauxrhawm: gauxrhi: kah daux Maix ang mawh lie?
Simiang Siyiex eue, Maix jhi: ex yaox krax pa caoxrhawm: Maix, mai taoh ex kah bwanson: Maix liak.
Aux tag sang krox tix nghiiet kah gumlox pa sang krai Simiang Siyiex heue. Grawhgrawng: nawh, Nawh koe: gumlox pa nhim:, kah pwi Nawh pa singax singeh khankix, viang mawh kawx nan:, paw lai deeh yuh pa caox pa caig khaix in: liak.
Mai bwanson: krax taoh Nawh Cao:, hoik hoek dex kix kah pwi pa lhat pa graung kah Nawh Cao:, mai min: plakngai: Nawh Cao:, hoik ot kah daux meung ex tete telai heue.
Krax caoxrhawm: mai sijax mukheu hoik rob paox tix, pa rauh pa see mai pa nhim:, tix kaux hoik tix kaux ngheut paox tix heue.
Sijax mukheu lih khaing: haktiex, mai pa rauh pa see lih khaing: raoma: tag num: tix jhak heue.
Simiang Siyiex tawx bwanson: pa mhawm: kah ex, mai tawx kraungkhrai: (plix nghox plix koi:) Nawh kah haktiex ex heue.
Mai krax pa rauh pa see hu: sivoe Nawh Cao:, mai khaix Caong Nawh hawt hu: heue.
Lox Rawg Bwan: Sonsang Teem:
Simiang Siyiex eue, veeh yhaok Maix nghiiet lox aux liak. Aux mawh pa hot pa sibhawm: heue.
Siyiex aux eue, priex kah jux aux, mawh kheu mawh aux pwi pa moh Maix, mai taoh kah siliex pa deuh rhawm: kah Maix liak.
Siyiex eue, aux sawg tix kok yo Maix leeing: lang: singaix heue. caoxrhawm: teem: coi kah aux liak.
Siyiex eue, mawh kheu sawg aux kah Maix, kieh rhawm: siliex Maix gauxrhawm: gauxrhi: liak.
Siyiex eue, Maix hoik grum naog rhawmrhi: pa mhawm:, mai rhawm: pa gun pa yeung, can pwi pa rawg bwan: kah Maix pon krax caoxrhawm: Maix tom: nie heue.
Simiang Siyiex eue, nghiiet kah lox pa rawg aux bwan:, mai caoxrhawm: kah ceu pa rawg pa mhaing: aux liak.
Singaix yam yaox aux krax khirhawm: khirhi:, aux kok yo Maix, mai deeh pawk kah lox aux liak.
Simiang Siyiex eue, kah daux siyiex khankix, siyiex pa awm: Maix ang koe:, kaing pa yuh kawx, pa awm: kaing pa yuh Maix ang koe: heue.
Simiang Siyiex eue, can ceu pwi pa phan: pa deuh Maix khankix, greed tix hoek grux ngawng sivoe ngai: Maix, mai yaogyaw min: plakngai: ceukaux Maix heue.
Maix mawh Cao: pa ting pa lhaong:, mai hoik yuh ceu pa daox pa am: khankix heue. Siyiex mawh ngie Maix tix kaux khaing: heue.
Simiang Siyiex eue, jhi: daux krax Maix kah aux liak. Aux tag sang hawt daux krax pa mawh pa meh Maix heue. Mai kieh rhawm: aux grum dex mai kied lhat kied graung kah ceukaux Maix liak.
Simiang Siyiex aux eue, aux viex khawm rhawm: khawm rhi: mai yaogyaw kah Maix, mai yaog ceukaux Maix ting lhaong: jheengjheeng: heue.
Krax pa caoxrhawm: Maix, kied ting kah piang aux heue. Maix hoik taoh ju aux lih khaing: tawm: taix kah greem: meung yum: heue.
Siyiex eue, pwi pa ting rhawm: ting rhi: khankix, kaoh cung tang: plak kah aux, mai cub pwi pa caox pa caig khankix, ang khan ngai: Maix, mai sawg tix teei ju aux heue.
Simiang Siyiex eue, Maix mawh Siyiex pa grum naog krax pa caoxrhawm: caoxrhi:, mai Cao: pa chix yuh bwanson:, mai pa chix gun chix yeung, mai krax pa caoxrhawm: pa kaux sijax tom: haoh tom: hun: heue.
Veeh ngai: Maix plak aux, mai caoxrhawm: teem: coi kah aux liak. Mai tawx riang tawx rao siawpsibrawm Maix kah aux, mai taoh kah kawn: simex, bun: siliex cawng Maix liak.
jhi: aux yaox mhai: ceu pa daox pa am: pa mhawm:, mai kieh pwi pa koeng kah aux, yaox mai kieh kix kaig tua liak. Grawhgrawng: nawh, Maix teem: coi kah aux, mai tawx pa nyawmrhawm: nyawmrhi: liak.
Yaogyaw Kah Veng Yerusaliem
Jaong num: nyiiex bwan: Nawh Cao: sum: tix deuh kah piang gawng pa singax singeh heue.
Simiang Siyiex nie lheu: moh, siviex Zion khaing: can dee ot Yakop khawm uik heue.
Veng Siyiex eue, awm: lox pa hoik koe: tix deuh grawng: Maix mawh pa ting min: plakngai: heue.
Can kix pa meed pa tawng kah aux, aux hoik mhai: tix tawng kah veng Rakhap mai veng Babulon heue. Mai jhak kah meung Philitix, meung Turux, meung Kusax khankix mawh pwi pa keh khaing: kah daux veng an: heue.
Mai veng Zion kawx, ceu pwi kuceu hoik keh kah daux veng an: heue, Mai kix ah nin: kah paox tix, Siyiex Cao: pa ting pa lhaong: tokaux Nawh pa kieh veng an: kaux cong: heue.
Yam teei Siyiex carang ceu pwi an: khankix, Nawh ah nin:, ceu pwi an: khankix, mawh pa keh kah daux veng an: heue.
Cub pwi pa ah lai rhax, mai pwi pa yuh pwie, graoh thiao:, mai ceu pa gauxrhawm: (krax pyaw) aux kieh koe: kah daux maix heue.
Lox Rawb Bwan:, Sonsang Teem:
Simiang Siyiex Cao: pa taoh aux eue, aux kok yo sivoe ngai: Maix ku singaix ku sawm: heue.
Mai ceu pa rawg aux bwan:, kieh hoek plak sivoe ngai: Maix liak. Mai nghiiet kah lox pa kok yo aux liak.
Khwan ju aux hoik naog krax pa kharhawm: kharhi:, mai ju aux kawx, dex hoek kah meung yum: heue.
Kix hoik simin aux tau mai kix pa hoik lih hu kah daux simeeig awm: pwi pa hoik uik riang heue.
Mai tik aux awm: pwi pa hoik yum: khankix, mai awm: pwi pa hoik laig it kah daux simeeig pa ang Maix lai doh keud, pa hoik singai khaing: tawm: taix Maix heue.
Maix hoik taing tix sau: aux kah daux pa kied raux, pa hoik kheem: pa faik kah daux pa kied sidaing: raux heue.
Krax pa songrhawm: songrhi: Maix hoik gut kah piang aux, Maix kieh pukpak rawm: khankix, tuktiaktukte: kah aux heue.
Mai Maix hoik gah paox pa tawng pa yung aux, singai khaing: aux, Maix hoik kieh kix seeing: brai: kah aux, mai Maix hoik gang: aux, ang pon tix lih plak praix heue.
Ngai: aux laux kheu yaox aux tix kham: geu: krax pa kharhawm: kharhi:, mai Simiang Siyiex eue, aux yaog taix tix kok yo kah Maix jheengjheeng: heue.
Maix tag sang jhi: mhai: ceu pa daox pa am: kah pwi pa hoik yum: khankix lie? Pwi pa hoik yum: khankix, tag deeh kaoh tix yaogyaw kah Maix lie?
Mai kix simawd krax pa caoxrhawm: Maix kah daux simeeig lie? Mai kix krai sijax mukheu Maix kah dee laux dee leeing: lie?
Kix chix tawng ceu pa daox pa am: Maix kah daux pa faik lie? Mai kix chix tawng gumlox pa rauh pa see Maix kah daux meung yum: lie?
Simiang Siyiex eue, aux kok yo kah Maix heue. Mai lox pa rawg aux bwan: ponngawb hoek sivoe ngai: Maix heue.
Simiang Siyiex eue, mawh kheu patix, Maix tik ju aux? Mawh kheu patix Maix vud pakngai: tix khaing: aux?
Aux yaox tix kham: geu: krax pa kharhawm: kharhi:, mai dex sang yum: tom: yam iak ju aux heue. Mai aux yaox tix kham: geu: krax pa prawng ca: Maix mai krax pa taug pa mao heue.
Krax pa songrhawm: songrhi: Maix hoik kheem: veei kah aux, krax pa lhat pa prawng ca: Maix hoik yuh aux laux heue.
Kix khrawm: paox tix mai rob kah aux leeing: lang: singaix, awm: hoik rob rawm: vungviang aux heue.
Maix hoik gah paoxgrawm pa moh aux, mai paoxgrawm aux, hu: dee singai khaing: aux, mai pwi pa meed pa tawng aux khankix kawx, mawh ngie pwi pa ot kah daux pa faik heue.
Lox Rhax Yam Khirhawm:
Aux tag sang ah lox rhax krax caoxrhawm: Simiang Siyiex jheengjheeng:, mai jheeh aux tag sang krai grawng: sijax mukheu Maix kah ceu pwi jheengjheeng: leeing ju heue.
Mai aux tag sang krai koe: krax caoxrhawm: Maix jheengjheeng:, mai sijax mukheu Maix, kaux cong: kah piang raoma: heue.
Siyiex ah nin:, Aux yuh sijax mukheu tau mai kaw pa hoik laug Aux tix teei kah lox tiex lox tu kah siliex Aux Davit ah nin:,
Aux tag sang kieh simie ceucat maix tag kaux cong: jheengjheeng:, mai kieh dangngeung maix tag kaux cong: kah daux ceu pwi leeing ju heue.
Simiang Siyiex eue, raoma: tag yaogyaw kah kaing pa hoik yuh Maix, ceu pa daox pa am:, mai sijax mukheu Maix kah sinax cub pwi pa singax singeh khankix heue.
Grawhgrawng: nawh, kah daux raoma: pwi mawx tag sang pon tix lah cha: kah Simiang Siyiex? mai kawnpraix Siyiex khankix, mai pwi mawx tag sang awm: Simiang Siyiex?
Siyiex mawh pa lhat pa graung cub pwi pa singax singeh khankix kah, mai Nawh mawh pa nab pa yam nie lheu: khaing: pwi pa ot rob vungviang Nawh khankix heue.
Simiang Siyiex Cao: kru naing raoma: eue, pwi pa ting riang ting rao pa awm: Maix ang koe:, sijax mukheu Maix pa kaux pa cong: kawx, rob vungviang Maix heue.
Maix mawh Cao: pa giex kaing: kah rawm: sigrit sigra: pa ting riang mai chix kieh yiien: yawg kah haok hwan pukpak rawm: ting heue.
Maix hoik plaux kah riah ceu pwi Rakhap yum:, mai teei plawng: taix Maix pa ting riang ting rao, mai kieh pwi pa koeng khankix, prung prang: hu: kudauh kudee heue.
Raoma: mai haktiex mai kraung can ceu pa koe: kah daux an: khankix, mawh cie Maix, mai mawh pa hoik phan: hoik yuh Maix heue.
Caong ma: seh mai caong ma: laong: kawx, mawh pa phan: pa deuh Maix, mai gawng Taborax mai gawng Heramon, deuh rhawm: kah Maix, mai rhax lai gauxrhawm: gauxrhi: heue.
Plawng: taix Maix hoik grum naog kah siawpsibrawm, mai taix Maix mawh pa ting riang ting rao, mai taix khawn: dawm: Maix mawh pa kied lhaong: heue.
Krax pa rauh pa see mai krax prawng krax ca: Maix, mawh jaong num: dangngeung Maix heue. Mai krax pa caoxrhawm: mai sijax mukheu hu: sivoe ngai: Maix heue.
Simiang Siyiex eue, ceu pwi pa mhong: pa tawng kah Maix, mai pa gauxrhawm: gauxrhi: khankix, koe: bwanson: heue. Mai kix yaox tix lailing kah daux pa riieng pakngai: Maix heue.
Kix pon tix gauxrhawm: kah daux ceukaux Maix leeing: lang: singaix jheengjheeng:, mai yaog kix ting, mawh kheu krax pa rauh pa see Maix heue.
Mai min: plakngai: Maix mawh riang rao kix, bwanson: Maix kawx, hoik yaog kah rung: choek ex heue.
Simiang Siyiex mawh Cao: pa tiebtie ex, mai Simiang khunhawkham: ex khankix mawh cie Siyiex pa singax singeh Isarilax heue.
Pa yuh Siyiex sijax mukheu mai Davit
Yam an: tix bawg dix, Maix krai kah kix pwi pa singax singeh khankix, kah daux riieng susai: mai ah nin:, Aux hoik tawx pong krax pa teem: coi kah pwi pa ting riang ting rao, Aux hoik laug tix teei pwi tix kaux ting, kah daux cub pwi khankix heue.
Aux yaox siliex Aux Davit mai groi rawm: bee pa singax singeh mai hoik laug tix deuh nawh heue.
Taix Aux ot plak nawh, mai plawng: taix Aux kieh nawh kaux cong: heue.
Pwi pa koeng khankix, ang nieb pon tud pon rhim: tix teei kraungkhrai: nawh, mai pwi pa ang rah ang see khankix, ang lai pon tix tuktiaktukte: kah nawh heue.
Aux tag sang pah pwi pa koeng kah nawh khankix sivoe ngai: nawh, mai tawx krax pa kharhawm: kharhi: kah pwi pa koeng kah nawh khankix heue.
Sijax mukheu mai krax pa caoxrhawm: Aux tag ot tau mai nawh, mai Aux yaog rung: choek nawh kah daux ceukaux Aux heue.
Aux tag sang teei taix nawh, deuh piang rawm: sigrit sigra:, mai teei taix khawn: dawm: nawh, deuh kah piang rawm: klawng: khankix heue.
Nawh kok yo Aux mai ah nin:,Maix mawh Siyiex aux, mai keeing: aux, mai mawh Rang: Cao: pa taoh aux heue
Aux tag sang ciak tix deuh nawh mawh ara kawn: Ai:, mai yaog nawh ting kah piang Simiang haktiex khawm uik heue.
Mai krax pa caoxrhawm: Aux tag sang een: kah son nawh jheengjheeng:, mai sijax mukheu Aux, kaux cong: kah piang nawh heue.
Aux tag sang kieh simie ceucat nawh kaux cong: jheengjheeng:, mai kieh dangngeung nawh kaux cong: leeing ju leeing phan: awm: singaix meung raoma: heue.
Phan: kawnpraix nawh, tik vud kah lox tawm: beenli Aux, mai ang hawt kah lox pa hoik deuh Aux.
Phan: kix nieb yuh mai ang hawt kah lox tawm: beenli Aux khankix,
Aux tag sang teei khaox saux sivied tix gau kix, kah phimap pa phit pa lud kix, kheu yuh kix phimap heue.
Viang mawh kawx nan:, krax pa caoxrhawm: Aux, ang lai teei lih khaing: nawh, mai sijax mukheu Aux kawx, ang lai yuh laux heue.
Aux ang nieb yuh kah sijax mukheu Aux, mai ang doh tieh loh kah lox pa hoik lih khaing: jheeh Aux.
Aux hoik tiextu kah pa rauh pa see, mai pa singax singeh tix ah nin:, "Aux ang doh pie lhen: kah Davit."
Mai Aux tag sang kieh simie ceucat nawh kaux cong: jheengjheeng:, mai dangngeung nawh kawx, awm: singaix kah plak sivoe ngai: Aux heue.
Nawh Cao: ah nin:, "Aux tag sang kieh Maix kaux cong: awm: khix jheengjheeng:, mai kieh awm: sakse pa pau kah sijax mukheu kah piang raoma: heue."
Mawh Kheu Hoek Simiang Krax Som Mai Khirhawm:
Viang mawh nan:, Maix songrhawm: songrhi: mai seeing: brai: mai hoik tik kah Simiang pa hoik laug Maix tix teei heue.
Mai Maix hoik yuh laux kah sijax mukheu pa hoik yuh Maix tau mai siliex Maix, mai hoik taing mhok khri: nawh hoek tom: sidaing: tiex heue.
Maix hoik raig tix tik kah nghaong: pa vie nawh, mai hoik yieh tix tik kah nyiiex tab nawh heue.
Can pwi pa lawng krax khankix, tud rhim: tix teei nawh, mai paoxplawg paoxnyhawm: nawh khankix, ah lox pa sa pa lao kah nawh heue.
Mai yaog taix khawn: dawm: pwi pa koeng kah nawh khankix, mai kieh pwi pa lah pa cha: kah nawh khankix khawm uik gauxrhawm: gauxrhi: heue.
Maix kieh lawm vaig nawh koih (veng:) mai ang lai pon tix kieh nawh cung kah dee puing: naing heue.
Maix kieh min: plakngai: nawh grai: hu:, Maix hoik taing dangngeung nawh tom: sidaing: tiex heue.
Maix kieh ju pa awn: nawh dawd hu: mai kieh nawh kaig tua heue.
Lox Rawg Bwan: Sonsang Taoh
Simiang Siyiex eue, Maix glaik tix mox, bawg yam miex grheung:? Mai krax pa songrhawm: songrhi: Maix hax awm: ngu, bawg yam miex grheung:?
Doh keud kah kawn: pwi pa hoik phan: hoik deuh Maix, kah aux pa dawd ju, pa chix laux chix leeing:, pa ang koe: dee bleeh tidtix liak.
Pwi pa im: ju, mai pa ang yaox krax yum:, mai pa chix taoh kah ju tix, khaing: daux tawm: taix siawpsibrawm meung yum: mawh pwi mawx?
Siyiex eue, krax pa caoxrhawm: Maix, mai sijax mukheu Maix, pa hoik tiextu Maix kah siliex Maix Davit dix, koe: dee mawx?
Doh keud kah aux, pa yaox tix kham: geu: kah pa sa pa lao pwi liak. Mai see: pwi kuceu khawm uik, aux hoik viex kah piang naok tix heue.
Grawhgrawng: nawh, Simiang Siyiex eue, pwi pa koeng kah Maix khankix, chix sa chix lao kah Maix heue. Mai kix salao kah khaix caong pwi pa hoik groi Maix rawm: bee kah heue.
Kieh Simiang Siyiex koe: bwanson: leeing ju leeing phan: liak. Amen! Amen!
Rawg Bwan: Sonsang Caoxrhawm: Siyiex
Siyiex eue, Maix mawh deeh deuh ex rhawm: ku ju leeing ju leeing phan: heue.
Kah: sivoe ang Maix nyang phan: nyang yuh, gawng lua mai haktiex mai can pa koe: khawm uik, jah tom: haktiex phaoka: dix, tom: sidauh haktiex phao khaix leeing ju, Maix hoik dawg mawh Siyiex heue.
Maix ah nin:, "Kawn: pwi khankix eue, deeh kah phawng: tiex, dee hoik kaoh maix heue."
Tix rheng: num sivoe ngai: Maix, awm: kawx kawx, mai bawg yam ponsawm: tix yam khaing:.
Nawh Cao: tag viex kix hu: awm: rawm: pa hwan, mai kix awm: pwi pa hoik laig it, mai awm: rib riem pa ting ponngawb khaing: heue.
Mai plak ponngawb mhawm: pruh mai haok hwan, yam hoek plak ponbo kroh mai laix hu: heue.
Ex hoek krax laux krax leeing: kheu krax pa songrhawm: songrhi: Maix, mai khirhawm: mai lhat graung kheu krax pa songrhawm: songrhi: Maix heue.
Phimap ex, pa sidawng: ang ah, phimap ex pa mox ang ah, hoik sidawng: pa riieng plakngai: Maix heue.
Bawg yam singaix, ex gah tix hu:, mawh kheu krax pa songrhawm: songrhi: Maix, mai jhong: mee: num ex luan hu:, awm: pa keud daux rhawm: daux rhi: tix heue.
Mai ju ex koe: ngie atigliah num, phan: ting riang ting rao koe: tidaix num, viang mawh kawx nan:, ex yaox tix ot khawm pa taug pa mao, mai pa lauxrhawm: lauxrhi:, mai khran luan hu:, ang lai lih tix mawh tidtix khaix heue.
Pwi mawx pa tawng kah jhawm: krax pa songrhwm: songrhi: Maix, mai krax pa songrhawm: songrhi: Maix mawh pa khaw: tix lhat graung kah heue.
Mai gau kah ex, kieh ex simin tix tawng kah bawg yam singaix tokaux tix, mai kieh ex koe: rhawm: pa koe: cuyi: pingnya liak.
Siyiex eue, Maix deeh hoek liak, kawn: sang ot miex grheung: doh keud kah son siliex Maix khankix liak.
Kieh ex pon krax pa caoxrhawm: Maix ku ngawb liak. Phan: yuh nan:, ex tag gauxrhawm: gauxrhi: mai rhax lai pa gauxrhawm: gauxrhi: heue.
Caoxrhawm: mai kieh ex deeh pon tix gauxrhawm: gauxrhi:, singaix bawg yam pa hoik luan, yam tuktiaktukte: Maix kah ex, mai jhong: khix mee: num Maix krax pa hoik yaox ex tix kham: geu: liak.
Mai kieh kaing pa yuh Maix sidawng: kah siliex Maix khankix, mai kieh min: plakngai: Maix sidawng: kah kawnpraix kix liak.
Simiang Siyiex eue, kieh bwanson: Maix hoek kah piang ex liak. Mai kieh kaing pa yuh ex, kaux cong: son ex liak.
Siyiex Mawh Cao: Pa Priex
Pwi pa ot kah dee pa tiebtie Siyiex, Cao: pa ting pa lhaong: khaing: khawm uik, tag sang pon tix ot kah greem: veei siawpsibrawm Nawh heue.
Aux krai kah Simiang Siyiex ah nin:, "Maix mawh dee deuh aux rhawm:, mai mawh tab aux, mai Siyiex pa deuh aux rhawm: heue."
Nawh Cao: kieh maix luan khaing: kie pa hoik taong: cao: jaw mai saux preng heue.
Nawh tag teei hauk pruik tix, tawb kheem: kah maix, mai maix yaox tix ot mhawmmhawm: kah greem: pruik Nawh, mai sijax mukheu Nawh mawh kraung naing pa tiebtie heue.
Maix tag ang koe: pa lhat pa graung kah ceu pa lhat ponsawm:, mai te pa puing: pon singaix,
mai ang lhat kah Jhawm: saux pa hu: kah daux pa faik, mai jhawm: saux pa chix yuh laux yam jung singaix khankix heue.
Viang pwi tix rheng: kaux goh dex maix, mai pwi tix mheen: kaux goh plak taix khawn: dawm: maix kawx, tag ang doh pon yuh tidtix kah maix heue.
Maix tag jhak kah ngai: tix, mai briex yaox kah phimap pa hoek kah piang pwi pa ang rah ang see khankix heue.
Simiang Siyiex eue, Maix mawh dee deuh aux rhawm: heue. Maix hoik hoek dee ot Siyiex pa ting pa lhaong:, khaing: khawm uik heue.
Mai ceu pa caox pa caig, ang pon tix hoek kah piang maix, mai ceu pa lhat pa graung ang pon tix dex kah nyiiex dee ot maix heue.
Nawh Cao: tag tawm: lox grawng: Maix kah kawncau Siyiex khankix, tag sang kia: ngien Maix, kah daux krax pa hu: Maix khankix.
Mai son ang caong Maix sang krox kah simaox, kix tag sang yaog Maix kah tawm: taix kix heue.
Maix tag sang dig kah sivai sangsi: mai siuing: pa cai:, mai yaog caong Maix mai dig kah sivai sangsi: pa awn: ju mai siyawng heue.
Mawh kheu moh nawh Aux, Aux tag sang taoh kah nawh, mawh kheu tawng nawh kah ceukaux Aux, Aux tag sang yaog nawh ting heue.
Yam tag kok nawh kah Aux, Aux deeh pawk kah lox nawh heue. Mai yam yaox nawh krax pa kharhawm: kharhi:, Aux ot kah plak nawh heue. Mai Aux tag taoh nawh lih mai yaog min: plakngai: nawh sidawng: heue.
Aux tag sang kieh nawh lang: ju lang: phan: mai kieh nawh nyawmrhawm: nyawmrhi:, mai jhi: nawh yaox bwanson: krax taoh Aux kah nawh heue.
Lox Rhax Pa Yaogyaw
Yaogyaw kah bwanson: Simiang Siyiex mai rhax lai kah ceukaux Siyiex, Cao: pa ting pa lhaong: khaing: khawm uik.
Mai teei ting: pa koe: maox kao: nyaing, mai teei ting: pa mhawm: lox pa khaw: tix tah khankix,
mai jhi: krax pa caoxrhawm: Nawh, ku ngawb, mai sijax mukheu Nawh ku sawm: jheengjheeng: heue.
Simiang Siyiex eue, Maix kieh aux gauxrhawm: gauxrhi:, kheu kaing pa hoik yuh Maix, mai aux tag rhax lai, pa gauxrhawm: gauxrhi: kah ceu pa hoik yuh Maix kah taix Tix heue.
Simiang Siyiex eue, kaing pa hoik yuh Maix, mawh ceu pa kied ting kied lhaong:, mai krax pa keud pa sawn: Maix kawx, mawh pa kied nie raux heue.
Mai pwi pa koe: rhawm: totiag, mai pwi pa caox pa ang tawng khankix.
Mai pwi pa ang rah ang see khankix, lih kuah awm: rib riem, mai yam pruh, pwi pa nieb yuh khankix, tag hoek krax pa laux pa leeing:, leeing ju heue.
Grawhgrawng: nawh, Maix mawh Simiang Siyiex, Cao: pa ting piang khawm uik, leeing ju leeing phan: heue.
Jhak heue, pwi pa koeng kah Maix khankix, hoek krax pa laux pa leeing: heue. Jhak heue, pwi pa nieb yuh khankix khawm uik kawx, hoik prung prang: rai ruat hu: heue.
Maix hoik yaog rung: choek aux, awm: rung: moi praix, mai teei rawm: bee pa khraox kraix kah aux heue.
Mai ngai: aux hoik yaox kah pwi pa koeng kah aux, mai yhaok aux hoik mhong: kah pwi pa yuh pa caox pa lah pa cha: kah aux khankix heue.
Mai pwi pa rauh pa see khankix, tag ting pang: lang: lhax awm: khaox jhie: yaong:, mai ting lhaong: haok hwan awm: khaox piakvan, pa koe: kah piang gawng Lebanon heue.
Pwi pa sum: kah daux nyiiex Siyiex khankix, tag mhawm: pruh mhawm: grang kah dee ot Siyiex ex heue.
Viang kix hoik rie ju kawx, deeh mhawm: plix, mhawm: tai heue.
Mai plak jhi: sidawng:, Simiang Siyiex mawh pa rauh pa see, mai Nawh mawh Rang: ting aux, mai kieh aux luan khaing: ceu pa ang rah ang see heue.
Siyiex Mawh Simiang
Simiang Siyiex ceep kraung pa koe: min: plakngai: mai ot kah daux nyiiex haw: Tix heue. Mai Simiang Siyiex hoik ceep kraung pa yuh nan:, mai nhawt maox rawd nyoi, pa ting riang ting rao, mai kieh haktiex kaux cong: tom: sidauh mai ang kieh vuhvat yung yiang: heue.
Mai dangngeung Maix hoik koe: tom: yam jah dix, mai Maix hoik koe: tom: yam jah dix, mai Maix hoik koe: jheengjheeng: kah: sivoe ang haktiex nyang bax koe: dix heue.
Simiang Siyiex eue, rawm: klawng: khankix kawx, mai klawng: khankix, ploi: lox lih, mai pukpak rawm: klawng: khankix, lih sinum siaox heue.
Simiang Siyiex pa ot kah dee lhaong: khaing: paox tix, Maix nie lheu: koe: siawpsibrawm khaing: rawm: pa luah pa sinum rawm: tom: nie, mai pukpak rawm: sigrit sigra: pa ting riang heue.
Simiang Siyiex eue, mhai: sakse pa kham: Maix, mawh pa kaux pa cong:, mai pa singax singeh, mai pa rauh pa see, mawh pa koe: kah daux nyiiex Maix jheengjheeng: heue.
Siyiex Cao: Pa Prawng Ca: Piang Khawm Uik
Simiang Siyiex eue, Maix mawh Siyiex Cao: pa prawng ca: heue. Mai ploi: pa riieng Maix liak.
Cao: pa prawng ca: kah kawn: pwi piang haktiex eue, kaoh heue, deeh viied tix tawx ngawh phimap kah pwi pa ting rhawm: ting rhi: khankix liak.
Simiang Siyiex eue, pwi pa yuh pa ang rah ang see khankix, kawn: sang gauxrhawm: gauxrhi: miex grheung:?
Can pwi pa nieb yuh khankix, kawn: haoh lox haoh sikah mai ah lox ting lox lhaong: miex grheung:?
Simiang Siyiex eue, kix yuh laux kah pwi Maix mai tuktiaktukte: kah sin: Maix heue.
Kix teei kah miexmai: tai nhang: yum:, mai plaux kah nyo sinie, mai kawn: doe: pa ang koe: miex koe: keeing: khankix yum: heue.
Mai kix ah nin:, "Simiang Siyiex ang yaox, mai Siyiex ceu Yakop ang lai deuh tix tawng heue."
Pwi pa koe: rhawm: totiag khankix eue, nghiiet tix tawng heue. Mai pwi pa caox khankix eue, pex koe: cuyi: pingnya mai koe: sitix yam lai mawx?
Siyiex Cao: pa hoik yuh yhaok, khex ang Nawh mhong: lie? Mai Siyiex Cao: pa hoik yuh ngai:, khex ang Nawh yaox lie?
Nawh mawh Cao: pa gau kah pwi kuceu ku cawng, mai Cao: pa gau cuyi: pingnya kah pwi khankix, khex ang Nawh tawx phimap lie?
Simiang Siyiex tawng, grawhgrawng: pa keud kawn: pwi mawh pa giex pa going heue.
Simiang Siyiex eue, pwi pa hoik gau Maix mai pa hoik gau Maix kah beenli khankix, koe: bwanson: heue.
Maix tawx krax nyawmrhawm: nyawmrhi:, kieh luan khaing: singaix bawg yam krax pa kharhawm: kharhi:, tom: sidauh kaong: tix deuh daux tiex son pwi pa ang rah ang see khankix heue.
Simiang Siyiex ang doh tik vud kah pwi Nawh khankix, mai ang Nawh tik vud kah sin: Nawh khankix heue.
Mai krax prawng krax ca: Nawh mawh pa rauh pa see, mai can pwi pa koe: rhawm: pa rauh pa see khankix, tag hawt khaix Nawh heue.
pwi mawx tag kaoh cung plak aux, mai tiebtie kah pwi pa caox khankix, pwi mawx tag kaoh cung plak aux, mai tiebtie kah pwi pa ang rah ang see khankix.
Phan: Simiang Siyiex ang teem: coi aux, ang lai rheung: ju aux tag rau hu: kah dee yiien: dee yawg heue.
Yam ah aux nin:, caong aux cang klad, mai Simiang Siyiex eue, joh jhan aux kah krax pa caoxrhawm: Maix liak.
Mai yam haoh rhawm: keud aux, Maix kieh aux nyawmrhawm: nyawmrhi:, mai kieh ju aux gauxrhawm: gauxrhi: heue.
Mai dangngeung pa nieb yuh mai krax pa keud pa sawn: pwi pa ang rah ang see, khex chix yuh paox yuh pie kah pa khaw: pa caw kah Maix lie?
Kix khrawm: paox tix sang pah kah pwi rah pwi see khankix, mai kix pah kah pwi pa ang koe: phimap tidtix heue.
Viang mawh kawx nan:, Simiang Siyiex mawh tab aux, mai Siyiex mawh Rang: ting dee deuh aux rhawm: heue.
Maix tag kieh phimap kix, deeh hoek kah piang kix, mai kid tix tik kah pwi pa nieb yuh khankix, mai Simiang Siyiex ex tag sang kid tix tik mai yuh lauxleeing: heue.
Lox Rhax Yaogyaw
Hoek heue, ex rhax lai gauxrhawm: gauxrhi: kah Simiang Siyiex heue. Ah lox pa gauxrhawm: pa sinum kah Rang: Cao: pa taoh ex heue.
Mai yaogyaw bwanson: Nawh, hu: plak sivoe ngai: Nawh, mai ah lox rhax yaogyaw, mai kok yo lox sinum kah Nawh heue.
Grawhgrawng: nawh, Simiang Siyiex mawh pa ting pa lhaong: khaing: khawm uik, mai Nawh mawh Simiang Khunhawkham: pa ting piang siyiex khawm uik heue.
Mai dee kied raux haktiex khankix, koe: kah daux tawm: taix Nawh, mai gawng ting gawng lhaong: khankix kawx, mawh cie Nawh Cao: heue.
Rawm: sigrit sigra: kawx, mawh cie Nawh, mai mawh pa hoik phan: hoik yuh Nawh, mai haktiex caong raog khankix kawx mawh pa hoik yuh Nawh kah taix Tix heue.
Hoek heue, ex num: tix krub kah Nawh, mai ex grux ngawng sivoe ngai: Simiang Siyiex, Cao: pa phan: pa deuh kah ex.
Grawhgrawng: nawh, Nawh Cao: mawh Siyiex ex, mai ex mawh pwi pa hoik sax sawm: mai Nawh, mai mawh cub yung: pa ot greem: tawm: taix Nawh heue.
Kah daux singaix, phan: pex mhong: lox plak jhi: Nawh, paw kieh rhawm: pex kiien:.
Mai yam ot keeing: pex, tax pex kah daux tiag Meribax tipon: num, mai kix cheukcheu: laklheut tix yaox kah Aux kuceu ku cawng, viang kix hoik yaox kah kaing ceu pa hoik yuh Aux khankix kawx, kix yuh tix mawh tang: plak, mawh kheu nan:, Aux tom: seeing: brai: kah ceu pwi in: khankix.
Mai ah nin:, "kix mawh pwi pa koe: rhawm: pa chix phit chix lud heue. Mai kix ang tawng kah daux krax dee hu: dee hoek Aux heue."
Mawh kheu nan:, Aux kied songrhawm: songrhi: mai tiextu tix ah nin:, "Kix tag ang pon tix laig kah daux dee laux dee lee: Aux heue."
Siyiex Mawh Cao: Pa Giex Kaing:
Ah lox rhax pa khraox yaogyaw kah Simiang Siyiex heue. Kawn: pwi piang haktiex khawm uik eue, ah lox rhax kah Simiang Siyiex heue.
Ah lox rhax kah Simiang Siyiex, mai yaogyaw kah ceukaux Nawh heue. Mai tix singaix hoik tix singaix krai grawng: krax pa taoh Nawh Cao: heue.
Mai plak jhi: min: plakngai: Nawh Cao:, kah pwi tang: ceu tang: cat khankix, mai grawng: ceu pa daox pa am:, pa hoik yuh Nawh khankix kah daux ceu pwi kuceu heue.
Grawhgrawng: nawh, Siyiex mawh Cao: pa ting pa lhaong:, pa khaw: ex tix yaogyaw heue. Mai mawh Cao: pa khaw: ex tix lhat graung khaing: siyiex khawm uik heue.
Mai siyiex pwi tang: ceu tang: cat khawm uik mawh ngie pa giex pa going heue. Simiang Siyiex mawh Cao: pa yuh raoma: mai haktiex heue.
Min: plakngai: mai siawpsibrawm koe: sivoe ngai: Nawh, riang rao mai pa mhawm: grang koe: kah daux nyiiex bwan: Nawh Cao: heue.
Ceu pwi kuceu khawm uik eue, rieb tix teei kah Simiang Siyiex Cao: pa koe: min: plakngai: mai siawpsibrawm heue.
Rieb tix teei kah ceukaux Nawh pa ting min: plakngai:, mai viex kraung pa lu pa tan mai laig kah daux nyiiex Bwan: Nawh heue.
Mai ceep kraung pa mhawm: pa singax mai krub kah Simiang Siyiex heue. Pwi piang haktiex khawm uik eue, koe: krax pa lhat pa graung sivoe ngai: Nawh Cao: heue.
Krai kah pwi tang: ceu tang: cat khankix, Simiang Siyiex mawh Cao: pa giex kaing: haktiex kaux cong:, mai ang chix gah chix greed, Nawh Cao: prawng ca: krax pa rauh pa see kah pwi khawm uik heue.
Kieh raoma: mai haktiex gauxrhawm: gauxrhi: heue. Mai kieh rawm: sigrit sigra: mai can pa koe: kah daux nawh khawm uik, kieh lox sinum siaox heue.
Kaung: mai can pa koe: kah daux nawh khawm uik kawx, kieh gauxrhawm: gauxrhi: heue. Yam an:, khaox, ox, mai can pa koe: kah daux tiag daux tu khawm uik ah lox rhax pa gauxrhawm: gauxrhi: sivoe ngai: Simiang Siyiex heue.
Grawhgrawng: nawh, Nawh Cao: lih hoek tix prawng ca: kah kawn: pwi haktiex heue. Nawh Cao: tag prawng ca: kah haktiex hawt beenli pa rauh pa see, mai kah kawn: pwi hawt awm: sijax mukheu Nawh heue.
Siyiex Mawh Cao: Pa Giex Kaing:
Simiang Siyiex mawh cao: pa giex kaing:, mai kieh haktiex gauxrhawm: gauxrhi:. Mai klawn: tiex pa koe: kah daux rawm: khankix gauxrhawm: gauxrhi: liak.
Paiawm: mai pa faik rob vungviang Nawh Cao:, mai krax pa prawng ca: Nawh hawt beenli rah rah see see, mai mawh jaong num: dangngeung aux heue.
Ngu hu: sivoe ngai: Nawh, mai gleeing kah pwi pa koeng kah Nawh khankix heue.
Pukplak praix Nawh Cao:, kieh haktiex riang heue. Haktiex yaox mai siyaung: heue.
Mai gawng lua khankix, hoik ceh rawm: hu: awm: bee kax, kah plak sivoe ngai: Simiang Siyiex Cao: pa giex kaing: haktiex khawm uik heue.
Mai raoma: plak jhi: kah krax pa rauh pa see Nawh Cao:, mai ceu pwi khawm uik yaox kah min: plakngai: Nawh Cao: heue.
Can pwi pa krub riang krub rao, mai pa yaw rangdi khankix, ang lai mawh tidtix, mai hoek krax pa kaig pa tua heue. Mai siyiex khankix eue, krub kah Nawh Cao: heue.
Simiang Siyiex eue, veng Zion mhong: mai gauxrhawm: gauxrhi:, mai kawn: bun: Yudax khankix, gauxrhawm: gauxrhi: kheu krax prawng ca: Maix heue.
Simiang Siyiex eue, Maix mawh Cao: pa ting pa lhaong: khaing: kawn: pwi haktiex khawm uik heue. Mai khaw: tix nie lheu: yaog Maix ting lhaong: lheu: khaing: siyiex khawm uik heue.
pwi pa moh kah Simiang Siyiex khankix eue, seeing: brai: kah ceu pa ang mhawm: ang mhiem: khankix, mai Nawh tag teem: coi kah ju pwi pa moh kah Nawh, mai taoh kix lih khaing: daux tawm: taix pwi pa ang rah ang see khankix heue.
Pa riieng mawh son pwi pa rauh pa see, krax pa gauxrhawm: gauxrhi: mawh pa hoik rhuat son pwi pa rauh pa see, kah daux rhawm: heue.
Mai pwi pa rauh pa see khankix eue, gauxrhawm: gauxrhi: kah daux Simiang Siyiex, mai yaogyaw kah ceukaux Nawh pa singax singeh heue.
Siyiex Mawh Cao: Pa Giex Kaing: Haktiex
Ah lox rhax pa khraox mai yaogyaw kah Simiang Siyiex, mai Nawh Cao: hoik yuh grawng: ceu pa daox pa am:, taix khawn: dawm: Nawh, mai plawng: taix Nawh pa singax singeh, hoik yuh krax taoh son Nawh heue.
Simiang Siyiex hoik kieh bwanson: krax taoh Nawh sidawng:, krai gumlox Nawh pa rauh pa see, sivoe ngai: pwi tang: ceu tang: cat khankix heue.
Nawh Cao: doh keud kah krax pa caoxrhawm: mai sijax mukheu pa hoik yuh Nawh mai ceu pwi Isarilax, mai bwanson: krax pa taoh Siyiex, hoik yaox pwi piang haktiex tom: sidauh heue.
Mai haktiex khawm uik eue, teei lox pa ting pa sinum kok yo kah Simiang Siyiex, mai ah lox rhax pa gauxrhawm: gauxrhi: mai yaogyaw kah Nawh heue.
Tah ting: mai rhax lai kah Simiang Siyiex, tah ting: mai yaogyaw heue.
Phlu: teettawng mai teei lox pa sinum kok yo sivoe ngai: Simiang Siyiex, pa mawh Simiang Khunhawkham heue.
Mai kieh rawm: sigrit sigra: mai can pa koe: kah daux nawh, kieh haktiex mai can pa koe: kah daux nawh, ah lox pa ting pa sinum kah Nawh heue.
Mai kieh rawm: klawng: khankix dieh taix tix, mai gawng lua khankix, rhax lai gauxrhawm: sivoe ngai: Simiang Siyiex heue.
Grawhgrawng: nawh, Nawh Cao: hoik hoek tix prawng ca: kah pwi haktiex, Nawh Cao: teei beenli pa rauh pa see, mai prawng ca: kah haktiex, mai teei sijax mukheu Nawh prawng ca: kah kawn: pwi khankix heue.
Siyiex Mawh Cao: Pa Giex Kaing: Pa Ting Siawpsibrawm
Simiang Siyiex mawh cao: pa giex kaing:, mai kieh kawn: pwi khankix koe: pa lhat pa graung heue. Nawh Cao: ot kah piang Cherubin heue. Mai kieh haktiex khankix yungyiang: heue.
Simiang Siyiex pa ting lhaong: kah piang gawng Zion mai yaog tix kieh Nawh ting lhaong: kah piang kawn: pwi khawm uik heue.
Kieh kix yaogyaw kah ceukaux Nawh, pa ting pa lhaong: mai kieh koe: krax pa lhat pa graung liak. Grawhgrawng: nawh, Nawh Cao: mawh pa singax singeh heue.
Simiang Khunhawkham pa ting siawpsibrawm moh kah krax pa prawng ca: pa rauh pa see heue. Mai Maix kieh krax pa prawng ca: rah see mai kaux cong:, mai krax pa prawng ca: pa rauh pa see kah daux geh nyiiex Yakop heue.
Yaogyaw kah Simiang Siyiex ex liak. Mai krub kah Nawh, sivoe ngot dee deuh Nawh Caong Tix, grawhgrawng: nawh, Nawh Cao: mawh pa singax singeh heue.
kah daux cao: giex kaing: li khankix, mawh Mose mai Arun, kah daux kix pwi pa krub kah ceukaux Nawh mawh Samoelax, pwi in: khankix yam krub kix kah Simiang Siyiex, Nawh Cao: deeh pawk lox kix heue.
Nawh Cao: ot kah daux rong: paiawm:, mai sikah kah kix heue. Mai kix kawx, priex tix hawt kah lox pa kham: Nawh sakse, mai kah lox tawm: beenli pa deuh Nawh khankix heue.
Simiang Siyiex ex eue, Maix deeh pawk lox kix heue. Viang Maix tawx phimap awm: ceu pa hoik yuh kix kawx, Maix mawh Siyiex Cao: pa lang: gun lang: yeung kah kix heue.
Yaogyaw kah Simiang Siyiex mai krub kah Nawh kah gawng pa singax singeh Nawh heue. Gawh grawng: nawh, Nawh Cao: mawh pa singax singeh heue.
Lox Rhax Yaogyaw
Kawn: pwi haktiex khawm uik eue, kok yo lox sinum kah Simiang Siyiex heue.
Gauxrhawm: gauxrhi: mai yuh kaing jhaw: Simiang Siyiex awawx. Mai ah lox rhax pa gauxrhawm: gauxrhi: mai hu: plak sivoe ngai: Nawh Cao: heue.
Mai pex deuh tix tawng, Simiang Siyiex mawh Siyiex awawx. Nawh mawh Cao: pa phan: pa yuh kah ex, mai mawh Siyiex ex, mai ex kawx mawh pwi Nawh, mai cub yung: pasax sawm: mai Nawh heue.
Rieb tix teei kah bwanson: Nawh pa kied ting mai laig kah daux siviex Nawh, mai viex min: plakngai: Nawh laig kah dee ot Nawh heue. Mai yaogyaw kah bwanson: Nawh mai yaogyaw kah ceukaux Nawh heue.
Grawhgrawng: nawh, Simiang mawh pa jiet mhawm: heue. Mai krax pa caoxrhawm: Nawh koe: jheengjheeng:, mai sijax mukheu Nawh mawh pa kaux cong: ku ju leeing ju leeing phan: heue.
Lox Sijax Mukheu Simiang Tix Kaux
Simiang Siyiex eue, aux rhax lai grawng: krax pa caoxrhawm: Maix mai krax prawng ca: hawt beenli pa rauh pa see, sivoe ngai: Maix heue.
Mai aux teei cuyi: pingnya satix hawt beenli Maix grum heue. Maix tag sang hoek kah aux lai mawx? Aux tag viex rhawm: pa singax pa grum mai hoek kah daux nyiiex aux heue.
Aux ang nieb yuh kah kaing ceu pa ang mhawm:, sivoe ngai: tix, mai aux seeing: brai: kah pwi pa lud krax hu: khankix, mai ang lai kieh pied tix heue.
Pwi pa vawk rhawm: khankix, aux tag kieh kix lih hu: khaing: tix, aux ang lai yuh paox pie kah pwi pa caox pa caig khankix heue.
Mai aux tag yieh tix tik kah pwi pa yuh plakngai: paoxplawg paoxnyhawm: tix laux khankix, aux ang lai gun yeung kah pwi pa ting rhawm: ting rhi: khankix heue.
Ngai: aux tag jhak kah pwi pa kaux sijax khankix, mai kieh kix hoek ot mai aux, mai pwi pa hu: daux krax pa grum pa tag sang yuh kaing aux heue.
Mai pwi pa chix lukliak khankix, ang pon tix ot kah daux nyiiex aux, mai pwi pa chix ah lox pa pie pa lhen: khankix, ang pon tix ot plak sivoe ngai: aux heue.
Mai can pwi pa caox pa caig khankix, tag sang teei tix tik khaing: daux veng Siyiex heue. Mai pwi meung pa yuh pa caox pa caig khankix, tag yuh kix laux cao cao heue.
Lox Rawg Bwan: Pwi Pa Khirawm: Tix Kaux
Simiang Siyiex eue, nghiiet kah lox pa rawg aux bwan:, mai lox pa kok yo aux kieh hoek kah Maix liak.
Paw lai mox ngai: Maix khaing: aux, singaix yam yaox aux krax pa khirhawm: khirhi:, mai yam kok yo aux kah Maix, nghiiet lox aux, mai nied tix pawk kah lox aux liak.
Grawhgrawng: nawh, singaix bawg yam aux, uik hu:, awm: taox ngu, mai si-ang: aux uik hax awm: gaox ngu heue.
Mai rhawm: aux hoik sang, hoik mat, awm: rib riem pa hoik fit hoik kroh mai hoik piawm: tix sawm: rheep heue.
Mawh kheu lox pa ngia pa riag aux, aux hoik krawx, taig ngie si-ang: heue.
Aux hoik awm: sim: "Vampo"17 pa ot kah daux tiag daux tu mai awm: sim: pang: plawh, pa ot kah gwang yaong: prim: pa hoik laux heue.
Aux pau nong: nong:, awm: sim: pa ot kah piang braux nyiiex tix mu: khaing: heue.
Mai pwi pa koeng kah aux khankix, salao kah aux, leeing: lang: singaix heue. can pwi pa ot tang: plak khankix, ah pa ang cee ang cak mai map kah aux, mai jhax lawg kah aux heue.
Mai aux yaox tix ih nyaox, awm: ih khaomun, mai yam nyaux aux, yaox tix nyaux mai rawm: ngai:, kheu ang Maix fahrhawm: kah aux, mai Maix songrhawm: songrhi: kah aux heue.
Maix hoik yaog aux ting lhaong:, mai deeh tik vud kah aux heue.
Mai singaix bawg yam aux, awm: veei pang: peue: pa lang:, mai aux hoik fit hoik kroh hu:, awm: rib riem heue.
Simiang Siyiex eue, Maix mawh Siyiex leeing ju leeing phan:, mai doh keud doh sawn: kah ceukaux Maix ku ju leeing ju leeing phan: heue.
Maix kaoh, mai caoxrhawm: kah veng Zion heue. Mai bawg yam pa caoxrhawm: kah nawh, mai bawg yam pa hoik ciak Maix tix deuh hoik hoek heue.
Mai siliex Maix khankix, moh kah simaox Nawh khankix, mai caoxrhawm: kah phawng: tiex Nawh khankix heue.
Pwi tang: ceu tang: cat khankix tag lhat graung kah ceukaux Simiang Siyiex, mai Simiang haktiex khankix khawm uik, tag lhat graung kah min: plakngai: Maix heue.
Grawhgrawng: nawh, Simiang Siyiex, yuh veng Zion mai viex min: plakngai: Nawh sidawng: heue.
Nawh Cao: deuh tix tawng lox pa rawg kix bwan:, pwi pa ang koe: dee peung dee pan khankix, Nawh ang nieb nunai: kah pa rawg kix bwan: heue.
Grawhgrawng: nawh, Nawh hoik tiem: tix deuh son pwi pa tag sang mawh phao khaix, mai pwi pa hoik phan: hoik yuh Nawh khankix, tag sang yaogyaw kah Simiang Siyiex heue.
Simiang Siyiex ot dee lhaong:, kah dee singax singeh mai num: tix jhak khaing: raoma: mai yaox kah haktiex heue.
Kieh nghiiet kah lox pa riag pwi pa ot kah daux thawng:, mai ploi: lih kah pwi pa hoik bak kix tix pah yum:.
Kieh kawn: pwi khankix, teei kah ceukaux Simiang Siyiex mai plak jhi: sidawng: kah piang gawng Zion mai yaogyaw kah bwanson: Nawh Cao:, mai plak jhi: sidawng: kah daux veng Yerusaliem heue.
Yam ceu pwi kuceu ku ru mai pwi ku meung kudauh, kraix khrawm: pwi tix, mai krub kah Simiang Siyiex heue.
Mai Nawh Cao: kieh riang rao aux dieh hu:, kah daux krax pa hu: aux, mai kieh singaix bawg yam aux dawd hu: heue.
Siyiex aux eue, aux krai yuh nin:, "Paw nyang teei ju aux lih, yam kawn: awn: ju aux liak." Mai jhong: khix mee: num Maix kaux cong: ku ju leeing ju leeing phan: heue.
Simiang aux eue, kah daux yam jah, Maix hoik kaw: num: haktiex heue. Mai raoma: kawx, mawh khaix taix Maix heue.
Mai ceu an: khankix, tag sang lauxleeing:, viang mawh kawx nan:, Maix kawn: ca: kaux ca: koe: heue. Mai ceu an: khankix tag sang prim: hu: awm: kraung ceep, mai Maix tag sang pua: kah ceu an: khankix, awm: man vhua:, mai tag sang dee thai: loh ceu an: khankix awm: kraung ceep heue.
Viang mawh nan:, Maix ca: awm: paox Tix, mai jhong: khix mee: num Maix, ang chix uik chix sidauh heue.
Maix ot mai kawnpraix siliex Maix khankix, mai simie ceucat kix kawx, tag kaux cong: sivoe ngai: Maix heue.
Siyiex Mawh Krax Moh Krax Rhawm:
Ju aux eue yaogyaw kah Simiang Siyiex heue, can pa koe: kah daux aux khawm uik eue, yaogyaw kah ceukaux Nawh pa singax singeh heue.
Ju aux eue, yaogyaw kah Simiang Siyiex heue, paw piawm: kah bwanson: Nawh Cao: khankix heue.
Nawh Cao: hoik ploi: phimap maix kuceu, mai hoik kieh jhawm: saux maix moi: khawm uik heue.
Nawh Cao: taoh ju maix lih khaing: kah daux pa laux pa leeing:, mai bwanson: krax caoxrhawm: Nawh, koe: kah piang kaing: maix heue.
Mai Nawh Cao: teei ceu pa mhawm: mai kieh ju maix fahrhawm: fah rhi:, mai deeh cox ju maix, awn: awm: klang: krih heue.
Simiang Siyiex prawng ca: rah see son pwi pa kham: geu: kah krax pa tuktiak tute: khawm uik heue.
Mai Nawh Cao: hoik krai kaing ceu pa sang yuh Nawh kah Mose, mai plak jhi: kaing pa yuh Nawh khankix kah ceu pwi Isarilax heue.
Simiang Siyiex hoik grum naog kah krax pa caoxrhawm:, mai pa chix yuh bwanson:, mai pa lang: gun lang: yeung, mai krax pa caoxrhawm: tom: nie heue.
Nawh ca: deuh phimap jheengjheeng: ang mawh, Nawh deuh pa phit daux rhawm: Tix jheengjheeng: ang mawh heue.
Nawh ang lai deeh tawx phimap kah phimap, awm: phimap pa hoik yuh ex heue.
Awm: lhaong: raoma: khaing: haktiex, krax pa caoxrhawm: Nawh Cao: kied ting lhaong: kah piang can pwi pa lhat pa graung kah Nawh khankix heue.
Mai awm: pa singai, plak lih singaix, khaing: plak klip singaix, Nawh Cao: kieh phimap ex, singai khaing: ex heue.
Awm: pa caoxrhawm: keeing: kah kawn: tix, Simiang Siyiex caoxrhawm: kah can pwi pa lhat pa graung kah Nawh khankix heue.
Grawhgrawng: nawh, Nawh Cao: hoik tawng grawng: tokaux ex, mai doh keud kah mawh ex phawng: tiex heue.
Singaix bawg yam ex kawn: pwi, awm: num: rib num: riem mai nawh chix pruh awm: tai daux tiag daux tu heue.
Bhaung: phlu: nawh luan hu: mai tai nawh grai: hu:, mai ang tawng deeh bleeh nawh khaix.
Mai krax pa caoxrhawm: Simiang Siyiex, jah tom: dix, tom: hoek leeing ju, ca: koe: kah piang can pwi pa lhat pa graung kah Nawh heue.
Mai pwi pa priex kah sijax mukheu Nawh mai pa koe: satix, mai pa priex tix hawt kah lox tawm: beenli Nawh khankix, mai krax pa rauh pa see Nawh, koe: kah piang kawnpraix kix leeing ju heue.
Simiang Siyiex deuh dangngeung Nawh piang raoma:, mai siawpsibrawm pa giex Nawh kaing: tah hu: kudauh kudee heue.
Mai kawncau Siyiex pa ting siawpsibrawm mai pa nghiiet kah gumlox Nawh mai pa hawt tix yuh kah gumlox pa tawx Nawh khankix eue, yaogyaw kah Simiang Siyiex heue.
Mai cub kawncau raoma:, pa hawt tix yuh kah alo Nawh Cao: khankix eue, yaogyaw kah Simiang Siyiex heue.
Mai can pa phan: pa deuh Nawh kudauh kudee khawm uik eue, yaogyaw kah Simiang Siyiex heue. Ju aux eue, yaogyaw kah Simiang Siyiex heue.
Yaogyaw Kah Cao: Pa Phan: Pa Deuh
Ju aux eue, yaogyaw kah Simiang Siyiex heue. Siyiex aux eue, Maix mawh Cao: pa kied ting kied lhaong: heue. Maix hoik ceep kah min: plakngai: siawpsibrawm pa ting pa lhaong: heue.
Maix teei pa riieng Maix, mai tawb kheem: kah tokaux tix, awm: pa teei tix ceep kraung kah tokaux tix, Maix teei kah raoma: mai tawb tix deuh heue.
Maix teei jaong num: dee ot daux lawg plak piang, mai yuh dee ot Maix kah daux rawm: mai brug ling: paiawm:, mai hu: lailing kah pruik bhaung: khankix.
Maix kieh kawncau tokaux Maix khankix, awm: bhaung: mai kieh pwi cau pwi soi: Maix khankix, awm: raongu heue.
Maix hoik kaw: tix deuh jaong num: haktiex, mai ang chix gah chix greed mai kaux cong: jheengjheeng: heue.
Maix kieh rawm: sigrit sigra: kheem: kah haktiex, awm: tawb kheem: kraung ceep, mai kieh rawm: khankix, tawb kheem: kah piang gawng lua khankix heue.
Mai yam sidiex gau Maix kah kix, kix lih to: heue. Mai yam mhong: kix lox sinum praix, kix nied tix to: hu: heue.
Mai kix haok kah gawng khankix, mai hoek kah dee cox Maix dee ot son kix heue.
Maix hoik gwieh tix deuh mee: haktiex, ang kieh kix pon tix tiang, mai ang kieh kix kheem: kah haktiex heue.
Simiang Siyiex kieh rawm: keut lih kah daux klawng: daux ngawd mai kah piang gawng lua khankix heue.
Mai kieh totiag totu piang haktiex khawm uik nyaux heue. Mai la tiag khankix kawx, yaox tix nyaux tom: sak heue.
Sim: raoma: khankix, ot kah praok rawm: an:, mai kix ah lox kah piang kak khaox khankix heue.
Maix ot kah daux lawg plak piang mai tawx rawm: kah gawng lua mai haktiex, mai kix hoik nyawmrhawm: kah bwanson: pa yuh Maix heue.
Mai Maix kieh rib riem kuah sonsang ih totiag totu, mai kieh nghox kuah son pa sang ih kawn: pwi, kieh pa ih pa un: lih khaing: daux tiex heue.
Mai kieh rawm: plix siiet koe:, pa kieh rhawm: kawn: pwi gauxrhawm:, kieh rawm: bee pa mhawm: koe:, blang: yuh plakngai: pwi, mai kieh khaomun koe:, pa cong: yuh rhawmrhi: kawn: pwi heue.
Mai khaox piakvan pa sum: Simiang Siyiex, kah piang gawng Lebanon khankix kawx, koe: krax nyawmrhawm: nyawmrhi: heue.
Mai sim: khankix, hoek tix yuh mheem: kah khaox an: khankix, mai sigaig khankix, hoek tix yuh mheem: kah khaox gix an: khankix heue.
Mai kieh kyah khankix ot kah dee lhaong: gawng, mai kieh ghot (saphan) khankix ot kah daux rang: heue.
Nawh Cao: hoik yuh tix deuh khix, mawh mhai: son bawg yam, mai singaix kawx, kieh tawng bawg yam tag laig it heue.
Nawh Cao: yuh pa faik kieh mawh ponsawm:, mai totiag totu khawm uik, lailing yam an: heue.
Mai sivai sangsi: pa awn: ju khankix, graox mai sawg tix ih kug kah Siyiex heue.
Yam lih singaix, kix deeh hoek mai dee it kah daux dee ot kix heue.
Kawn: pwi kawx, lih hu: yuh kaing tom: hoek bawg yam ponbo heue.
Simiang Siyiex eue, grawng: pa phan: pa yuh Maix khankix, kied nie haoh hun: heue. Mai can pa koe: khankix khawm uik, Maix hoik yuh kah cuyi: pingnya Tix heue. Kraungkhrai: Maix hoik grum naog kah piang haktiex heue.
Mai totiag totu pa iak pa ting, pa chix hu: chix mo, pa ang lai uik simin khankix ot kah daux rawm: sigrit sigra: pa ting pa vieh heue.
Kah dee an:, reu ting khankix kawx, lailing mai kax ting pa hoik yuh Maix khankix kawx, klieh kah daux rawm: an: heue.
Totiag totu khankix khawm uik, kix krox jun kah ceu pa ih pa un: pa tawx Maix kah kix yam hoek bawg yam heue.
Mai kix ih awm: pa tawx Maix kah kix heue. Kix nyawmrhawm: nyawmrhi:, kah pa tawx Maix ceu pa mhawm: kah taix tix heue.
Phan: Maix vud ngai: khaing: kix, kix kharhawm: kharhi: heue. Mai phan: Maix teei ju kix yum:, kix deeh kah phawng: tiex heue.
Maix ploi: Khwan singax Maix yuh kix, deeh cox yuh plakngai: haktiex pa khraox heue.
Kieh min: plakngai: Simiang Siyiex kaux cong: leeing ju leeing phan: liak. Mai kieh Siyiex koe: krax pa gauxrhawm: gauxrhi:, kah ceu pa hoik yuh Nawh khankix liak.
Nawh Cao: jhak kah haktiex, mai haktiex siyaung: heue. Nawh chuh kah gawng mai gawng lih mawh taox ngu heue.
Aux tag ah lox rhax kah Simiang Siyiex, yam kawn: im: ju aux heue. Aux tag ah lox rhax yaogyaw kah Siyiex aux yam kawn: klawd aux heue.
Mai yam kawn: keud aux daux rhawm: tix, kieh khaw: kah rhawm: Nawh liak. Aux kawx, tag koe: krax gauxrhawm: gauxrhi: kah daux Simiang Siyiex heue.
Can pwi pa phit pa lud khankix, Nawh Cao: teei tix tik khaing: haktiex, mai pwi pa ang rah ang see khankix, ang lai kieh koe: phao khaix, ju aux eue, yaogyaw kah Simiang Siyiex heue. Haleluya!
Siyiex Mai Pwi Nawh
Yaogyaw kah bwanson: Simiang Siyiex heue. Mai rawg bwan: kah ceukaux Nawh, mai plak jhi: kaing ceu pa hoik yuh Nawh kah pwi khankix heue.
Rhax lai kah Nawh heue, rhax lai yaogyaw kah Nawh heue. Mai krai grawng: kaing ceu pa daox pa am:, pa yuh Nawh khankix.
mai yaw rangdi kah daux ceukaux pa singax singeh Nawh. Kieh rhawm: can pwi pa sawg kah Simiang Siyiex, gauxrhawm: gauxrhi: heue.
Sawg kah siawpsibrawm Simiang Siyiex heue. Mai sawg kah plakngai: Nawh jheengjheeng: heue.
Doh keud kah grawng: ceu pa daox pa am: pa hoik yuh Nawh, mai ceu pa daox, lox tawm: beenli pa hoik lih khaing: jheeh Nawh khankix heue.
Mai simie ceucat siliex Nawh Abraham, mai kawnpraix Yakop, pa hoik laug Nawh tix teei khankix eue,
Nawh Cao: mawh Simiang Siyiex ex, mai Nawh prawng ca: kah piang haktiex khawm uik heue.
Mai Nawh Cao: doh keud kah sijax mukheu Nawh, mai gumlox tawm: beenli, pa hoik krai Nawh tix deuh tom: sidauh ju pwi tix rheng: ju heue.
Sijax mukheu pa hoik yuh Nawh tix deuh mai Abraham, mai pa hoik tiextu Nawh kah Icak.
Sijax mukheu pa hoik yuh Nawh, sonsang mawh pa kaux pa cong: kah Yakop, mai sijax mukheu an:, tag sang mawh pa kaux pa cong: leeing ju leeing phan: son pwi Isarilax heue.
Aux tag teei haktiex meung Khanan, pa mawh sin:, pa tag sang pon pex, tawx kah maix heue.
Kah daux ceu pwi ex, phan: simin tix yaox ang awt nie, tux, yam mawh kix nyo sinie kah daux meung an: heue.
Yam lailing kix tix veng hoik tix veng, mai tix meung hoik tix meung,
Siyiex ang kieh pwi mawx tuktiaktukte: kah kix, Siyiex sivied tix gau kah simiang khunhawkham kah son kix heue.
Paw lai chuh kah can pwi pa hoik kraix Aux rawm: bee, mai paw lai deuh phimap kah cao: jhai: Aux khankix.
Mai Siyiex kieh sibhawm: praix hoek kah daux meung an:, mai teei tix tik kah ceu pa ih pa un: khawm uik.
Mai Nawh Cao: ploi: pwi hu: tix kaux sivoe kix, pa mawh Yosiep pa yaox tix kham: geu: pa coh sonsang mawh siliex pwi heue.
Mai kix sau: gang: kah caong nawh, mai tuktiaktukte: kah nawh, mai kieh nawh kharhawm: kharhi: heue.
Kah: sivoe ang lox nawh nyang grum naog, Simiang Siyiex cheukcheu: tix yaox nawh heue.
Mai simiang khunhawkham pa giex kaing: pwi khankix, ploi: pwi hu: taoh nawh lih mai tawx krax nyawmrhawm: nyawmrhi: heue.
Mai nawh deuh Yosiep mawh simiang pa giex kaing: nyiiex haw: nawh, mai kieh nawh priex kraungkhrai: sinngao nawh khawm uik heue.
Mai nawh tawx akhwang:, sonsang phyawk, mai sonsang sidiex gau kah simiang greem: nawh khankix, awm: pa simie nawh tix yuh heue.
Mai Isarilax hoek kah daux meung Ejiptux, mai Yakop hu: bang: haktiex ceu pwi Hamax heue.
Mai Siyiex kieh pwi Nawh pre, haoh hun:, mai ting riang ting rao khaing: pwi pa koeng khankix heue.
Mai Nawh Cao: tieh loh rhawm: kix, mai kieh kix koeng mai bohrhawm: bohrhi: kah pwi Nawh khankix heue.
Khaix an: Nawh Cao: laug tix teei mai ploi: siliex Nawh Mose mai Arun heue.
Maix kieh jhi: mhai: sakse Nawh Cao: khankix, kah daux meung Ejiptux, mai yuh mhai: ceu pa daox pa am:, Nawh khankix, kah daux haktiex ceu pwi Hamax heue.
Nawh Cao: ploi: pa faik, kieh faik heue. Mai kix ang pon tiebtie kah gumlox Nawh Cao:.
Mai Nawh Cao: kieh rawm: mawh nham:, mai kax khankix yum: heue.
Mai kieh khet naog kah haktiex kix, khawm daux nyiiex haw: dee ot simiang heue.
Mai Nawh Cao: tawx lox, kieh brang: mai maing lih, naog kah haktiex kix heue.
Mai Nawh Cao: kieh mu: pre: lih, tang: lhiex mai kieh raongu lih kah haktiex kix heue.
Mai Nawh Cao: kieh lah kah piang nhu: plix siiet mai khaoxruh mai raig tix tik kah khaox pa koe: kah daux meung kix heue.
Mai Nawh Cao: tawx lox kah sido, mai sido pa haoh pa hun: tom: ang lai uik simin lih hoek kah daux meung kix heue.
Mai ih, taux lhax, rib riem, mai plix nghox plix koi: pa koe: kah daux meung kix heue.
Mai Siyiex kieh kawn: Ai: kix yum: khawm uik, pa moh mai pa deuh kix rhawm: tix kah heue.
Mai khaix an:, Nawh Cao: viex pwi Isarilax lih hu: khawm brax khawm kua:, mai viex tix mau khri: lih hu: heue.
pwi meung Ejiptux, koe: krax gauxrhawm: gauxrhi:, yam lih hu: pwi Isarilax heue.
Grawhgrawng: nawh, kix kied lhat kied graung kah kix heue. Mai Nawh Cao: kheem: veei paiawm: kah piang kix, mai ti: pa riieng ngu yam ponsawm: kah kix heue.
Yam rawg yam mhaing: kix, Nawh Cao: tawx keed hoek kah kix, mai tawx khaomun raoma: sonsang fahrhawm: kix heue.
Mai Nawh Cao: paoh kah rang: mai rawm: lih mai lih hu: kah dee kroh tiex, awm: rawm: klawng: heue.
Grawhgrawng: nawh, Nawh Cao: doh keud kah sijax mukheu pa singax singeh tau mai siliex Nawh Abraham heue.
Nawh Cao: kieh pwi Nawh khankix lih mai pwi pa hoik laug Nawh khankix, ah lox gauxrhawm: gauxrhi: mai lih hu: heue.
Mai Nawh Cao: teei tix tawx haktiex pwi tang: ceu tang: cat kah kix, mai kix pon tix ih kah kaing pa yuh pwi tang: ceu khankix heue.
Mai kieh kix hawt yuh lox tawm: beenli Nawh khankix, mai hawt tix twah klaung: lox tawm: beenli Nawh heue. Haleluya!
Siyiex Yuh BwanSon: Kah Pwi Nawh
Yaogyaw kah bwanson: Simiang Siyiex heue. Mawh kheu Nawh mawh pa jiet mhawm: mai krax caoxrhawm: Nawh koe: jheengjheeng: heue.
Mai pwi mawx pa tag sang pon tix krai grawng: pa yuh Simiang Siyiex kah siawpsibrawm pa ting pa lhaong: Nawh?
Mai pwi mawx pa tag sang pon tix plak jhi: kah bwanson: Nawh khawm uik? Can pwi pa hawt tix yuh kah beenli Nawh, mai pa hawt kah krax pa rauh pa see Nawh ku bawg, koe: bwanson: heue.
Simiang Siyiex eue, viex rhawm: sibieh Maix doh keud kah aux, mai taoh kah aux, mai hoek tix jhak kah aux liak.
Mai kieh aux yaox kah pa mhawm: can pwi pa hoik laug Maix tix teei khankix, kieh aux gauxrhawm: gauxrhi: mai pwi Maix, pa gauxrhawm: gauxrhi: khankix, kieh aux yaw rangdi tau mai can kix pa mawh sin: Maix liak.
Mai ex hoik phit hoik lud, awm: pa hoik phit lud tax du ex, mai ex hoik yuh phimap mai pa ang rah ang see heue.
Mai tax du ex khankix ang kix tawng kah ceu pa daox pa am:, pa hoik yuh Maix kah daux meung Ejiptux, mai kix piawm: kah krax caoxrhawm: Maix tom: nie, mai kix tieh feen kah Nawh praok rawm: sigrit sigra: pa raoh Edom heue.
Viang mawh kawx nan:, Nawh Cao: taoh kix, mawh kheu ceukaux Nawh, mai Nawh kieh siawpsibrawm Nawh pa ting, sidawng: heue.
Nawh Cao: tawx lox kah rawm: sigrit sigra: pa raoh Edom, mai rawm: an:, kroh hu: heue. Mai Nawh Cao: thong: kix hu: dee raux, awm: hu: piang tiex kroh heue.
Mai Nawh Cao: taoh kix khaing: kah daux tawm: taix pwi pa koeng kah kix, mai taoh kix lih kah daux tawm: taix pwi pa khoi: pa ciang kah kix heue.
Mai rawm: an:, kheem: tix tik kah pwi pa koeng kah kix khankix, mai ang lai deuk tix kaux kawx heue.
Yam an: kix yumrhawm: kah lox Nawh Cao:, mai rhax lai yaogyaw kah bwanson: Nawh Cao: heue.
Viang mawh kawx nan:, kix khran piawm: kah ceu pa hoik yuh Nawh Cao:, mai kix ang krox ang pau kah krax pa keud pa sawn: Nawh Cao: heue.
Mai kix koe: rhawm: pa ghoing: kah ceu pa ih pa un: kah daux tiag, mai kix tom: cheukcheu: tix yaox kah Siyiex, dee yiien: dee ang pwi ot heue.
Nawh Cao: tawx kah kix awm: pa mhaing: kix heue. Viang mawh kawx nan:, Nawh Cao: tawx pa yhawm: pa krawx kah kix heue.
Mai kix bohrhawm: bohrhi: kah Mose kah daux tab, mai Arun pa mawh pwi pa singax singeh Simiang Siyiex heue.
Mai yam an:, haktiex bih mai bleet tix ih kah Datan mai cub kix pa laig kah Abiram heue.
Mai ngu lih kah piang cub caw kix, mai gleeing kah pwi pa ang rah ang see khankix heue.
Mai kix raug rieng kawn: moi kah piang gawng Hawrap, mai krub kah nawh heue.
Kix teei min: plakngai: mai loh kah rieng kawn: moi pa chix ih rib heue.
Mai kix hoik piawm: kah Siyiex, Cao: pa hoik taoh kah kix, mai Cao: pa yuh grawng: kaing ceu pa ting pa lhaong:, kah daux meung Ejiptux,
mai yuh ceu pa daox pa am: khankix, kah dee ot ceu pwi Hamax, mai grawng: ceu pa lhat pa graung kah praok rawm: sigrit sigra: Edom heue.
Mawh kheu in:, Siyiex tom: keud tix yuh laux kah pwi Nawh khankix, viang mawh kawx nan:, Mose siliex pa hoik laug Nawh tix teei tom: cung sivoe Nawh mai khyox khaw: son ang Nawh sang yuh kix lauxleeing: heue.
Mai kix nieb yuh ang kieh koe: ceu kah meung pa jiet mhawm: an:, mai kix ang yumrhawm: kah lox mukheu pa hoik krai Siyiex heue.
Mai kix ah lox bawg lox be kah nyiiex bang: dee ot tix, mai ang lai nghiiet kah gumlox Simiang Siyiex heue.
Yam an: Nawh Cao: yaog taix Tix tang plak, mai kieh kix goh tix yum: kah daux tiag heue.
Mai kieh simie ceucat kix, goh sinax pwi tang: ceu tang: cat khankix, mai jhax lawg kah kix, mai kieh kix prung prang: rai ruat hu: ku praix ku klawng: heue.
Mai kix hawt khaix siyiex Balapekurax mai ih kah ceu pa hoik tan hoik lu sivoe ngai: pa yum: heue.
Mawh kheu nan:, kix yuh ceu pa songrhawm: songrhi: Siyiex, mai kieh ceu pa saux preng hoek kah piang kix heue.
Yam an: Phinahat kaoh mai prawng ca: kah pwi pa yuh pa caox pa caig khankix, mai saux preng grai: hu: khaix heue.
Mawh kheu yuh nawh nan:, deuh nawh mawh pa rauh pa see, ku ju leeing ju leeing phan: heue.
Khaix an: kix baox yuh krax pa songrhawm: songrhi: Nawh Cao:, kah praok rawm: Meribax, mai Mose tom: yaox tix kham: geu: krax kharhawm: kharhi: sipiag kix heue.
Mawh kheu yuh kix pa sungsang rhawm: Mose, jheeh nawh tom: ah lox pa ang khaw: tix ah kah kix heue.
Mai kix ang yuh laux kah pwi tang: ceu tang: cat, mai kix ang hawt yuh kah gumlox Simiang Siyiex heue.
Mai kix ot tau mai pwi tang: ceu tang: cat, mai gau kah beenli kix heue.
Mai kix krub kah rieng rao kix, mai krix kah kie pa taong: kix heue.
Mai kix teei kawn: simex mai kawn: bun: kix mai tan lu kah phicaox heue.
Mai kix plaux kawn: simex mai kawn: bun: kix, pa ang koe: phimap, mai teei nham: kix mai tan lu kah rieng rao meung Khanan, mai meung an:, seeing: brai: kah nham: heue.
Mai kix yuh tokaux tix seeing: brai: kah kaing pa yuh kix, mai kix phit lud kah pa yuh tix heue.
Mawh kheu in:, Simiang Siyiex tom: lih krax songrhawm: songrhi: kah pwi Nawh khankix, mai seeing: brai: kah sin: Nawh heue.
Mai Nawh Cao: teei tix tawx kah daux tawm: taix pwi tang: ceu tang: cat khankix, mai kieh pwi pa koeng kah kix, giex kaing: kah piang kix heue.
Pwi pa koeng kah kix, tuktiaktukte: kah kix, mai kix yaox tix ot mai yuh siliex greem: tawm: taix kix heue.
Viang Nawh Cao: hoik taoh kah kix, tom: nie bawg kawx kix ca: keud krax tieh krax feen, kheu phimap pa yuh kix heue.
Viang mawh kawx nan:, Nawh Cao: jhak kah krax pa kharhawm: kharhi: kix, mai mhong: kah lox pa kok pa yo kix heue.
Nawh Cao: doh keud kah sijax mukheu pa hoik yuh Nawh son kix, mai caoxrhawm: kah kix, awm: krax pa caoxrhawm: Nawh tom: nie heue.
Siyiex kieh kix deeh pon krax caoxrhawm: khaing: pwi pa hoik viex kix hu: khawm uik heue.
Simiang Siyiex eue, khrawm: tix taoh ex lih khaing: pwi tang: ceu tang: cat, mai rieb tix teei kah bwanson: ceukaux Maix pa singax singeh mai pa ting pa lhaong: heue. Aux yaw rangdi mai gauxrhawm: gauxrhi: yaogyaw kah Maix heue.
Kieh Simiang Siyiex ceu pwi Isarilax koe: bwanson: tom: sidauh haktiex leeing ju leeing phan: liak. Mai kieh kawn: pwi khawm uik rieb tix ah, Amen. Haleluya!
Yaogyaw Kah Siyiex
Yaogyaw kah bwanson: Simiang Siyiex, mawh kheu Nawh mawh pa jiet mhawm:, mai krax pa caoxrhawm: Nawh koe: jheengjheeng: heue.
Mai kieh kix can pa hoik taoh, Simiang Siyiex pa mawh kix pa hoik taoh Nawh, khaing: daux tawm: taix pwi pa koeng khankix.
Mai can kix pa ot kah daux meung pa koe: plak lih singaix, mai plak klip singaix, caong ma: laong: mai caong ma: seh khankix, Nawh deeh viex kix hoek heue.
Mai kix lailing kah daux tiag daux tu, dee yiien: dee yawg mai ang yaox veng dee ot pwi.
Mai kix lauxrhawm: lauxrhi: kheu ang yaox tix sawm:, mai ang yaox tix nyaux rawm: heue.
Kix kok yo kah Simiang Siyiex, yam yaox kix krax pa hot pa sibhawm: mai Nawh Cao: taoh kix kah daux pa kharhawm: kharhi: heue.
Mai Nawh Cao: thong: kix hu: kah daux krax pa rauh pa see, mai kieh kix hoek kah veng dee ot pwi heue.
Kieh pwi khankix khaw: tix keud kah krax pa caoxrhawm:, mai ceu pa daox pa am:, pa hoik yuh Nawh kah kawn: pwi khankix, mai kieh kix yaogyaw kah Simiang Siyiex heue.
Grawhgrawng: nawh, Nawh Cao: tawx awm: pa simie kix, mai pwi pa cai: rhawm: khankix, Nawh tawx ceu pa ih pa un: pa mhawm: tom: sak heue.
Mai kix yaox tix ot kah daux pa faik, mai kah daux veei krax yum:, mai yaox tix kharhawm: kharhi: kah pa phyawk maox ceng heue.
Mawh kheu thiang: kix tix tik kah gumlox Siyiex, mai nieb yuh pa ang cee ang cak kah krax pa keud pa sawn: Siyiex Cao: pa ting pa lhaong: khaing: khawm uik heue.
Mawh kheu in:, Nawh Cao: kieh kaing pa yuh kix, deeh hoek kah kix tiru mai rau dee tiiem mai kix goh mai ang koe: cao: pa yaog heue.
Kix kok yo kah Simiang Siyiex, yam yaox kix krax pa hot pa sibhawm: mai Nawh Cao: taoh kix kah daux pa kharhawm: kharhi: heue.
Mai Nawh Cao: teei kix lih khaing: kah daux pa faik mai veei krax yum:, yah tix ploi: kix khaing: pa phyawk heue.
Kieh pwi khankix khaw: tix keud kah krax pa caoxrhawm:, mai ceu pa daox pa am: pa hoik yuh Nawh kah kawn: pwi khankix, mai kieh kix yaogyaw kah Simiang Siyiex heue.
Grawhgrawng: nawh, Nawh Cao: raig tix tik kah siviex tawng lheung: mai tat dud kah gawng: rhem: khankix heue.
Mai pwi pa koe: rhawm: pa caox khankix, yaox tix kharhawm: kharhi:, kheu lud kix krax hu: tix, mai yuh phimap heue.
Kix ih ceu pa seeing: pa brai: kuceu, mai hoek dex siviex krax yum:,
mai kix kok yo kah Simiang Siyiex, yam yaox kix krax pa hot pa sibhawm:, Nawh Cao: taoh kix kah daux pa kharhawm: kharhi: heue.
Nawh Cao: ploi: gumlox Tix, mai kieh jhawm: saux jhawm: ngia kix moi:, mai taoh kix lih khaing: daux pa laux pa leeing: heue.
Mai kieh pwi khankix khaw: tix keud kah krax pa caoxrhawm:, mai ceu pa daox pa am:, pa hoik yuh Nawh kah kawn: pwi khankix, mai kieh kix yaogyaw kah Simiang Siyiex heue.
Kieh kix tan lu, mai rieb tix teei kah bwanson: Nawh Cao:, mai rhax lai gauxrhawm: gauxrhi:, mai plak jhi: kah grawng: kaing pa hoik yuh Nawh Cao: khankix heue.
Mai can kix pa brug reu ting mai tiang rawm: sigrit sigra: mai pa yuh kaing kah piang rawm: khankix.
Kix pon tix yaox grawng: kaing pa hoik yuh Simiang Siyiex, mai ceu pa daox pa am: pa yuh Nawh Cao:, kah daux pa raux pa mox heue.
Mai Nawh Cao: tawx kieh bhaung: ting phlu: mai kieh pukpak rawm: haok hwan heue.
Kix haok kah piang raoma:, mai deeh lih kah dee raux dee mox, mai kix lauxrhawm: lauxrhi: kheu yaox krax pa khirhawm: khairhi: heue.
Mai viex kix vungviang vungvang awm: pwi pa yoek kah plai:, mai viex krax tawng kix grai: hu: heue.
Mai kix kok yo kah Simiang Siyiex yam yaox kix krax pa hot pa sibhawm:, mai Nawh Cao: taoh kix khaing: kah daux pa kharhawm: kharhi: heue.
Nawh Cao: kieh bhaung: ting grai:, mai kieh pukpak rawm: yiien: yawg tix heue.
Yam an: kix koe: krax gauxrhawm: gauxrhi: kheu yiien: yawg hu: yuh nan: heue. Mai Nawh Cao: thong: kix hu: kah dee bang: reu ting dee simie kix tix hu: heue.
Mai kieh pwi khankix, khaw: tix keud kah krax caoxrhawm: mai ceu pa daox pa am: pa hoik yuh Nawh kah kawn: pwi khankix, mai kieh kix yaogyaw kah Simiang Siyiex heue.
Kieh kix yaog Nawh ting, sinax dee khrawm: pwi haoh pwi hun:, mai kieh kix yaogyaw kah dee khrawm: kix kuad song: nong: yu khankix heue.
Mai Nawh kieh rawm: klawng: lih mawh daux tiag daux tu, mai dee lih rawm: keut khankix kieh kroh hu: heue.
Haktiex dee mhawm: dee koe: phon: kawx, kieh ceet hu: kheu phimap pa yuh pwi haktiex heue.
Mai Nawh Cao: deeh kieh rawm: naog kah daux tiag daux tu, mai kieh rawm: keut deeh lih kah dee kroh haktiex heue.
Mai Nawh Cao: tawx kah pwi pa cairhawm: cairhi: ot kah dee an:, mai kix yuh veng son dee ot kix heue.
Mai kix yuh ma: yuh kaung: mai sum: plix siiet mai pon plix khaox mai plix nghox plix koi: tom: nie heue.
Nawh Cao: nawb bwanson: kah kix, mai kieh kawnpraix kix pre haoh hun:, mai cub yung:, cub moi kix kawx, kied haoh kied hun: heue.
Viang yuh nan: kawx, yam yaox kix krax pa tuktiaktukte:, mai yaox krax laux krax som, kix lauxrhawm: lauxrhi: heue.
Mai Nawh Cao: teei krax pa kaig pa tua, tawx kah kawn: laux Simiang khankix, mai kieh kix vuvie kah daux tiag daux tu, dee ang krax koe: heue.
Nawh Cao: teei pwi pa hot pa sibhawm: lih khaing: kah daux pa kharhawm: kharhi:, mai yaog kix deuh dee lhaong: mai kieh mawh nyiiex ma: haoh hun: awm: cub yung: heue.
Mai pwi pa rauh pa see yaox mai gauxrhawm: gauxrhi: heue. Can phimap phigrham: khankix, ang lai simawd thox jheeh tix heue.
Mai pwi pa koe: cuyi: pingnya khankix, kieh tawng kah grawng: bwanson: krax pa caoxrhawm: Simiang Siyiex heue.
Lox Rawg Bwan: Sonsang Teem:
Siyiex eue, aux hoik rien rhawm: tix, mai ju aux rhax lai yaogyaw kah Maix heue.
Ting: si:18 mai ting: tah eue, siduad heue, aux kawx siduad caocao heue.
Simiang Siyiex eue, aux tag yaogyaw Maix kah sinax pwi haoh pwi hun: khankix, mai aux tag rhax lai yaogyaw Maix sinax ceu pwi khankix heue.
Grawhgrawng: nawh, krax caoxrhawm: Maix hoik hoek tom: raoma:, mai sijax mukheu Maix hoik hoek daux paiawm: heue.
Siyiex eue, kieh Maix nie lheu: lhaong: khaing: lhaong: raoma:, mai kieh min: plakngai: Maix tah hu: kah piang haktiex in: khawm uik liak.
Mai sonsang pon can pwi pa moh kah Maix, pa nyawmrhawm: nyawmrhi:, teei taix khawn: dawm: Maix taoh mai nghiiet kah lox aux liak.
Mawh kheu hoik krai Siyiex kah daux nyiiex bwan: pa singax singeh, aux tag gauxrhawm: gauxrhi: heue. Mai aux tag gwieh kah veng Sekhem mai tiag kah daux lung: Sukot heue.
Meung Gilat mai meung Manashe mawh cie aux heue. Phan: mawh meung Epharem mawh riang rao dee deuh aux kaing: tix, mai meung Yudax mawh pliah dee ot aux heue.
Mai meung Mawbax mawh aw: dee heem: aux, meung Edom mawh dee deuh aux kiep, meung Philitix mawh dee brie aux lox pa pex.
Pwi mawx pa sang tawx aux kah daux veng pa ting riang, mai pwi mawx tag sang jhi: daux krax pa hu: aux kah meung Edom.
Siyiex eue, Maix hoik tik vud kah ex ang mawh lie? Siyiex eue, Maix ang hu: mai kru naing ex lie?
Teem: coi kah ex sonsang luan khaing: pwi pa koeng kah ex khankix, grawhgrawng: nawh, kawn: pwi ang chix taoh tidtix heue.
Mawh kheu Siyiex ex, tag koe: rhawm: pa kwa: heue. Mai Nawh Cao: tag dig kah pwi pa koeng kah ex khankix heue.
Lox Ngia Pwi Pa Khirhawm:
Siyiex pa yaogyaw aux eue, paw glaik tix ot yiien: yawg liak.
Mai pwi pa ang rah ang see, mai pwi pa ang kaux sijax khankix, ot tang: plak mai ang: moing tix mai ah lox pa pie pa lhen: kah aux heue.
Mai kix nieb ah lox pa ang khaw: mai hoek rob tix puing: aux, kah pa ang tie koe: grawng: heue.
Aux moh kix mai rawg bwan: son kix kawx, kix tiebtie lah cha: kah aux heue.
Mai kix deeh viied tix tawx phimap pa ang mhawm: kah bwanson: pa yuh aux, mai krax moh aux, mai kix deeh tawx ceu pa koeng kah aux heue.
Mai teei pwi pa ang rah ang see, mai deuh kah piang pwi pa yuh nan:, mai kieh pwi pa koeng ot dex plak taix khawn: dawm: nawh liak.
Yam hoek bawg yam prawng ca:, kieh nawh som liak. Mai kieh lox pa rawg nawh bwan: mawh pa phit pa lud liak.
Kieh ju nawh dawd, mai kieh pwi tang: kaux, pon kaing pa yuh nawh liak.
Kieh kawn: nawh mawh kawn: doe:, mai kieh moeng nawh mawh miexmai: liak.
Mai kieh kawn: nawh khankix, vuvie kudauh, kieh caung tix ih liak. Kieh kix lih khaing: dee ot tix, pa laux pa leeing: mai caung tix ih liak.
Mai kieh cao: pa ceuk pa rawm khrawt tix teei can pa koe: nawh uik, mai kieh pwi tang: praix tud rhim: tix teei kah kraungkhrai: pa yuh pa pon nawh liak.
Paw kieh pwi yuh bwanson: kah nawh, mai paw kieh pwi caoxrhawm: kah kawn: doe:, kawn: nawh tix kaux kawx liak.
Kieh simie ceucat nawh dud, mai kieh ceukaux nawh grai: hu: khaix nawh heue.
Mai kieh Simiang Siyiex, doh keud kah phimap pa yuh tax du nawh, mai paw lai ploi: phimap pa yuh miex nawh heue.
Kieh phimap an: sidawng sivoe ngai: Simiang Siyiex jheengjheeng:, mai kieh nawh teei tix tik kah ceu pa doh keud son kix khaing: piang haktiex khawm uik heue.
Grawhgrawng: nawh, nawh ang koe: krax caoxrhawm: tix teem:, mai nawh tuktiaktukte: kah pwi pa hot pa sibhawm:, mai pwi pa lauxrhawm: lauxrhi: khankix tom: sidauh yum: heue.
Awm: moh nawh pa jhax pa lawg, pa jhax pa lawg an:, deeh hoek kah piang nawh heue. Mai nawh ang moh kah bwanson:, mai bwanson: an:, singai khaing: nawh heue.
Mai nawh teei tix ceep pa jhax pa lawg, awm: pa ceep kraung, ceu an: laig kah daux vaig nawh, awm: rawm:, mai laig kah daux si-ang: nawh awm: bee heue.
Mai kieh nawh teei tix vhua: pa jhax pa lawg an:, kah tokaux tix awm: vhua: prux, mai nhawt kah nyoi tix, awm: maox rawd nyoi heue.
pwi pa koeng kah aux, pa ah lox caox pa ang mhawm: kah ju aux, pa ot tang: plak khankix, kieh kix pon krax pa kham: geu: khaing: Simiang Siyiex heue.
Simiang Siyiex eue, pau aux kheu ceukaux Maix liak. Mai taoh aux kah daux krax caoxrhawm: Maix liak.
Aux hoik hot sibhawm:, mai rhawm: aux hoik saux kah daux aux heue.
Aux hoik gah hoik greed hu:, awm: kawn: peue: pa lang: heue. Mai viex aux haok blaong lih jee awm: sido heue.
Mai nge: ngawng aux hoik iak riang, yung ye kheu ang sawm:, mai nex aux kawx krawx hu: heue.
Mai pwi tang: kaux salao kah aux, mai yam yaox kix kah aux, vugvied kaing: tix heue.
Simiang Siyiex aux eue, teem: coi kah aux liak. Awm: koe: krax caoxrhawm: Maix, taoh kah aux liak.
Kieh kix tawng grawng: siawpsibrawm taix Maix mawh Simiang Siyiex Cao: pa prawng ca: heue.
Viang kix ah lox pa jhax pa lawg kawx, Maix tawx bwanson: liak. Mai yam kaoh cung kix, kieh koe: krax pa kaig pa tua mai kieh siliex Maix gauxrhawm: gauxrhi: heue.
Pwi pa koeng kah aux khankix, kieh kix ceep kah ceu pa lhat mai pa kaig pa tua, kieh kix tawb kheem: min: plakngai: pa laux kah tokaux tix, awm: pa vhua: kah prux heue.
Aux tag yaogyaw kah bwanson: Simiang Siyiex, kah jheeh tix, sigrien sigre heue. Aux tag yaogyaw kah Nawh, sinax pwi pa haoh pa hun: heue.
Grawhgrawng: nawh, Nawh Cao: cung dex plak taix khawn: dawm: pwi pa hot pa sibhawm:, mai taoh ju kix lih khaing: daux tawm: taix krax prawng ca: phimap heue.
Siyiex Mai Simiang Pa Hoik Laug Nawh Tix Deuh
Simiang ah nin: kah Simiang aux, "Ngawm plak taix khawn: dawm: Aux, tom: Aux kieh pwi pa koeng kah maix mawh ngot dee deuh maix caong tix heue."
Simiang Siyiex tag teei pliah siawpsibrawm Nawh, ploi: lih khaing: veng Zion mai giex kaing: kah daux sinax pwi, pa koeng kah Maix khankix heue.
Singaix yam jhi: Maix siawpsibrawm pwi Maix khankix, ceep kah kraung pa singax singeh, mai koe: rhawm: sibieh tix tan lu, mai sinaw khankix hoek kah Maix awm: lih rawm: ciex ponngawb heue.
Simiang Siyiex tiextu tix ah nin:, "Maix mawh Cao: giex kaing: li leeing ju leeing phan:, awm: pa khaw: mai Melakhizediek." Khaix in:, ang koe: rhawm: pa tieh pa loh.
Siyiex pa ot plak taix khawn: dawm: Maix yam lih pa songrhawm: songrhi: Nawh, Nawh Cao: ciyang kah simiang khankix lauxleeing: heue.
Mai Nawh tag prawng ca: kah pwi tang: ceu tang: cat khankix heue. Nawh kieh tokaux pwi pa yum: tah hu: kudauh kudee, mai pah kaing: kix sau: kah daux tiex pa ting pa vieh heue.
Mai Nawh Cao: nyaux rawm: pa lih kah dex krax, mai Nawh Cao: yaog kaing: Tix heue.
Yaogyaw Kah Siyiex
Aux tag viex khawm rhawm: khawm rhi: tix yaogyaw kah bwanson: Simiang Siyiex, kah dee khrawm: pwi pa rauh pa see, mai sinax pwi pa haoh pa hun: khankix heue.
Grawng: kaing ceu pa hoik yuh Simiang Siyiex, mawh pa kied ting kied lhaong:, mai can pwi pa khaw: rhawm: khankix, viex khawm rhawm: khawm rhi: tix, chawkcheng: tix sawg kah ceu an: heue.
Grawng: kaing ceu pa hoik yuh Nawh khankix mawh pa grum kah min: plakngai:, mai beenli pa rauh pa see Nawh kaux cong: jheengjheeng: heue.
Mai Nawh Cao: kieh ceu pa daox pa am: khankix, mawh son pa tag sang doh keud doh sawn: mai Simiang Siyiex grum koe: rhawm: pa chix yuh bwanson: mai rhawm: pa chix caoxrhawm: heue.
Nawh Cao: tawx ceu pa ih pa un:, kah pwi pa lhat, pa nab yam kah Nawh heue. Mai doh keud kah sijax mukheu Nawh jheengjheeng:.
Mai Nawh Cao: jhi: siawpsibrawm kah daux kaing pa yuh Nawh khankix, mai teei sin: pwi tang: ceu tang: cat khankix tawx kah kix heue.
Grawng: ceu pa hoik yuh Nawh kah daux tawm: taix Tix khankix, mawh ceu pa dex pa dawd mai sijax mukheu, mai pa rauh pa see, mai lox tawm: beenli Nawh khawm uik mawh pa kaux pa cong: heue.
Mai sijax mukheu Nawh, mai ceu pa rauh pa see Nawh, kaux cong: jheengjheeng: heue.
Nawh Cao: taoh tix teei kah pwi Nawh khankix, mai yuh tix deuh sijax mukheu pa kaux pa cong: jheengjheeng: heue. Ceukaux Nawh mawh pa singax singeh mai pa khaw: tix lhat graung kah heue.
Mai ceu pa lhat pa graung kah Simiang Siyiex mawh num: cuyi: pingnya heue. Pwi pa hawt grawng: lawng khaix lox tawm beenli khankix, mawh pwi pa chix keud chix sawn: heue. Mai min: plakngai: nawh koe: jheengjheeng: heue.
Ceu Pa Gauxrhawm: Gauxrhi: Pwi Mhawm: Tix Kaux
Pwi pa lhat pa graung kah Simiang Siyiex, mai pa gauxrhawm: gauxrhi: kah lox tawm: beenli Nawh khankix, koe: bwanson: heue.
Mai simie ceucat kix ting riang ting rao kah piang haktiex mai can kix pa rauh pa see koe: bwanson: heue.
Mai sinngao kraungkhrai: hoik naog kah daux nyiiex nawh, bwanson: pa rauh pa see nawh, kaux cong: jheengjheeng: heue.
Mai son pwi pa rauh pa see khankix, pa riieng lih jhan kah daux pa faik, pwi pa yuh nan:, koe: rhawm: pa chix yuh bwanson: mai koe: rhawm: pa chix caoxrhawm:, mai koe: rhawm: pa rauh pa see heue.
Mai pwi pa koe: rhawm: pa chix caoxrhawm:, mai chix tawx pwi yaog yaing khankix, koe: bwanson: heue. Phan: hoek bawg yam singaix prawng ca:, nawh mawh cao: pa pex heue.
Mai nawh ang hoek krax laux krax som tix bawg kawx, tag kaux cong: jheengjheeng:, mai pwi pa rauh pa see khankix, tag mawh sonsang doh keud doh sawn: jheengjheeng: heue.
Mai nawh ang lhat kah lox pa caox pa ang mhawm: khankix, kah daux rhawm: nawh, kaux cong: kah daux Simiang Siyiex heue.
Rhawm: nawh kaux cong: mai ang lhat ang graung, mawh kheu hoik tawng nawh daux rhawm: tix, mai pwi pa koeng kah nawh khankix tag hoek krax laux krax som heue.
Nawh hoik gwieh tix tawx kah pwi pa hot pa sibhawm: khankix mai krax pa rauh pa see nawh, kaux cong: jheengjheeng: mai tag yaog min: plakngai: nawh ting lhaong: heue.
Yam yaox pwi pa ang rah ang see khankix, songrhawm: songrhi: mai greeik rhang: tix, mai can kix pa ang rah ang see khankix teh hu: mai lauxleeing: grai: mu: heue.
Yaogyaw Kah BwanSon: Siyiex
Yaogyaw heue, siliex Simiang Siyiex khankix eue, yaogyaw kah ceukaux Simiang Siyiex awawx.
Mai kieh ceukaux Simiang Siyiex koe: bwanson: jah tom: yamin: mai leeing ju leeing phan: liak.
Mai jah plak lih singaix tom: hoek plak klip singaix, mawh pa khaw: tix yaogyaw kah ceukaux Simiang Siyiex heue.
Simiang Siyiex pa ting kah piang kawn: pwi khawm uik, mai min: plakngai: Nawh koe: piang raoma: heue.
Pwi mawx tag awm: Simiang Siyiex ex pa ot kah dee lhaong:.
Taing lih tokaux tix sonsang jhak kah kraungkhrai: piang raoma: mai piang haktiex khankix heue.
Nawh Cao: tag yaog kah kix pwi pa hot pa sibhawm: ting khaing: daux phawng: tiex, mai yaog kix pwi pa cud pa cha: khaing: daux phon:.
Mai tawx dee ot dee koe: kah kix, tau mai kawn: laux kawn: Simiang pa giex kaing: kah piang pwi khankix heue.
Nawh Cao: kieh bun: neh pa ang koe: kawn: ot kah daux nyiiex mai deeh kieh keh kawnpraix, mai koe: krax gauxrhawm: gauxrhi: heue. Haleluya!
Lai Rhax Pwie Pasakha
Yam lih pwi Isarilax simie ceucat Yakop khaing: dee ot ceu pwi pa caox khankix khaing: meung Ejiptux,
ceu pwi Yudax mawh dee pa singax singeh, mai ceu pwi Isarilax mawh dee giex Nawh Cao: kaing: heue.
Mai rawm: sigrit sigra: yaox kawx, to: heue. Mai rawm: Yawdan yaox kawx, deeh vai: tix plak khaix heue.
Mai gawng ting khankix, jah loh tix awm: yung: mhaing:, mai gawng iak khankix, jah loh tix awm: kawn: yung: heue.
Mai rawm: sigrit sigra: eue, maix to: yuh kah mawx? Mai rawm: Yawdan eue, maix deeh vai: tix plak khaix yuh kah mawx?
Mai gawng ting eue, maix jah loh tix awm: yung: mhaing: yuh kah mawx? Mai gawng iak eue, maix jah loh tix awm: kawn: yung: yuh kah mawx?
Haktiex eue, ot siyaung: sivoe ngai: Siyiex, pa mawh Siyiex Yakop heue.
Nawh Cao: kieh simaox mawh rawm: nhawng:, mai kieh rang: mawh rawm: keut heue.
Siyiex Koe: Tix Kaux Khaing:
Simiang Siyiex eue, ex ang koe: min: plakngai:, ex ang koe: min: plakngai:, kah daux ceukaux Maix, krax caoxrhawm: mai sijax mukheu Maix, kieh koe: min: plakngai: liak.
Mawh kheu patix pwi tang: ceu tang: cat khankix ah nin:, "Siyiex kix koe: dee mawx?"
Siyiex ex ot kah piang meung raoma:, mai Nawh Cao: yuh awm: pa koe: alo Nawh heue.
Mai rieng pa krub kix mawh pa yuh pwi kah mau, kah khri: khankix, mai mawh ngie pa yuh kawn: pwi kah taix tix heue.
Mai rieng pa krub kix an:, koe: jheeh mai ang chix sikah, koe: ngai: mai ang chix yaox.
Koe: yhaok mai ang chix mhong:, koe: meeh mai ang chix ngheet,
koe: taix mai ang chix giex, koe: caong mai ang chix hu:, mai ghok kix ang chix lih lox.
Mai cao: pa yuh khankix kawx, awm: an: heue. Can pwi pa deuh rhawm: kah an: khankix kawx, awm: an: heue.
Ceu pwi Isarilax khankix eue, deuh rhawm: kah Simiang Siyiex heue. Mai Nawh Cao: mawh Cao: pa teem: coi kah pwi Isarilax mai Cao: pa tiebtie kah pex heue.
Simie ceucat Arun eue, deuh rhawm: kah Simiang Siyiex heue. Nawh Cao: mawh Cao: pa teem: coi kah simie ceucat Arun mai Cao: pa tiebtie kah pex heue.
Can pwi pa lhat pa graung kah Simiang Siyiex khankix eue, deuh rhawm: kah Simiang Siyiex heue. Nawh Cao: mawh Cao: pa teem: coi mai mawh Cao: pa tiebtie kah pex heue.
Simiang Siyiex doh keud doh sawn: kah ex, mai nawb bwanson: kah ex heue. Mai Nawh Cao: nawb bwanson: kah ceu pwi Isarilax, mai nawb bwanson: kah simie ceucat Arun heue.
Mai can pwi pa lhat pa graung kah Simiang Siyiex khankix, Nawh Cao: nawb bwanson: kah kix, khawm pa iak pa ting heue.
Kieh Simiang Siyiex, kieh pex mai kawnpraix pex, pre haoh hun: liak.
Pex mawh pwi pa nawb Simiang Siyiex Cao: pa phan: pa yuh raoma: mai haktiex bwanson: kah heue.
Mai raoma: mawh, raoma: cie Siyiex heue. Haktiex mawh pa hoik tawx Nawh kah kawn: pwi heue.
Mai pwi pa hoik yum:, mai pwi pa hoik lih hu: kah dee yiien: dee yawg khankix, ang chix deeh yaogyaw kah Siyiex.
Phan: mawh ex, yaogyaw kah Simiang Siyiex, jah tom: yamin: hoek tom: leeing ju leeing phan: heue. Haleluya!
Yaogyaw Kah Bwanson:
Aux moh kah Siyiex, mawh kheu nghiiet Nawh kah ceu pa rawg pa mhaing: aux heue.
Mawh kheu nghiiet Nawh Cao: kah lox aux, aux tag sang yaogyaw kah Nawh, yam kawn: im: ju aux heue.
Mai maox krax yum: khankix, hoik rob kah aux, mai meung yum: hoik giex kah aux, mai aux yaox krax pa kharhawm: kharhi: heue.
Yam an: aux rawg bwan: kah ceukaux Simiang Siyiex mai khyox khaw: ah nin:, "Simiang Siyiex eue, taoh kah ju aux liak."
Simiang Siyiex koe: rhawm: pa chix yuh bwanson:, mai koe: rhawm: pa rauh pa see, mai Siyiex ex koe: krax pa chix caoxrhawm: heue.
Mai Simiang Siyiex teem: coi kah pwi pa daox pa aw: khankix, mai yam ot aux kah dee tiiem, Nawh Cao: taoh tix teei aux heue.
Ju aux eue, deeh kah dee ot maix mhawmmhawm: heue. Simiang Siyiex hoik yuh bwanson: kah maix heue.
Maix hoik taoh ju aux khaing: krax yum:, mai hoik awt rawm: ngai: khaing: ngai: aux, mai hoik taoh caong aux khaing: dee sideeing caong heue.
Mawh kheu in:, aux tag hu: sivoe ngai: Simiang Siyiex, kah daux dee ot pwi pa im: ju khankix heue.
Viang aux yaox tix kham: krax kham: krax geu: kawx, aux kawn: ah kawn: koe: krax yumrhawm: heue.
Aux ang yuh satix, mai loe: tix ah nin:, "Pwi khawm uik chix ah lox pa pie pa lhen: heue."
Mai bwanson: pa hoik yuh Simiang Siyiex kah aux kuceu khawm uik, aux tag sang deeh pon viied yuh kah mawx?
Mai aux tag giex kah kawk krax taoh, mai rawg bwan: kah daux ceukaux Simiang Siyiex heue.
Mai aux tag tan lu kah plak sivoe ngai: pwi Siyiex khawm uik, awm: pa hoik yuh aux sijax mukheu kah Simiang Siyiex heue.
Mai krax yum: can pwi pa singax singeh pa moh Nawh Cao:, mawh pa kied ngawh, sivoe ngai: Simiang Siyiex heue.
Simiang Siyiex eue, aux mawh siliex Maix tete heue, aux mawh siliex Maix mai aux mawh kawn: simex bun: siliex Maix heue. Maix hoik yah aux lih khaing: pa phyawk tix heue.
Aux tag tan lu mai yaogyaw kah bwanson: Maix, mai rawg mhaing: kah daux ceukaux Simiang Siyiex heue.
Aux tag tan lu kah plak sivoe ngai: pwi Siyiex khawm uik, awm: pa hoik yuh aux sijax mukheu kah Simiang Siyiex heue.
Veng Yerusaliem eue, nyiiex dee ot Simiang Siyiex, koe: kah sigreung maix heue. Haleluya!
Yaogyaw Kah Siyiex
Ceu pwi kuceu khawm uik eue, yaogyaw kah Simiang Siyiex heue. Mai simie ceucat pwi khawm uik eue, yaogyaw kah Nawh Cao: heue.
Grawhgrawng: nawh, krax caoxrhawm: Nawh kied ting kied lhaong:, mai sijax mukheu Simiang Siyiex mawh pa kaux pa cong: leeing ju leeing phan: heue. Haleluya!
Rawg Bwan:, Sonsang Pex
yaogyaw kah bwanson: Simiang Siyiex, mawh kheu Nawh Cao: mawh pa jiet mhawm:, mai krax caoxrhawm: Nawh koe: jheengjheeng: heue.
Kieh ceu pwi Isarilax rieb tix teei mai ah nin:, "Kieh krax caoxrhawm: Nawh Cao: koe: jheengjheeng: liak."
Kieh simie ceucat Arun rieb tix teei mai ah nin:, "Kieh krax caoxrhawm: Nawh Cao: koe: jheengjheeng: liak."
Kieh can pwi pa lhat pa graung kah Simiang Siyiex, rieb tix teei mai ah nin:, "Kieh krax caoxrhawm: Nawh Cao: koe: jheengjheeng: liak."
Yam ot aux kah daux dee sikhawp sikhiep, aux kok yo kah Simiang Siyiex, mai Nawh pawk lox aux, mai kieh aux ot kah dee vieh dee va: heue.
Simiang Siyiex ot plak aux, mai aux tag ang lhat ang graung, kawn: pwi tag chix yuh kah mawx kah aux?
Simiang Siyiex ot kah plak aux, mai mawh Cao: pa teem: coi aux, mai aux tag yaox kah hoek krax pa laux pa leeing:kah pwi pa koeng kah aux heue.
Pa deuh rhawm: kah Simiang Siyiex, nie lheu: mhawm: khaing: pa deuh rhawm: kah paox kawn: pwi heue.
Pa deuh rhawm: kah Simeiang Siyiex nie lheu: mhawm: khaing: pa deuh rhawm: kah laux Simiang heue.
Viang pwi khawm uik rob vungviang aux kawx, aux tag deuh rhawm: kah ceukaux Simiang Siyiex, mai yuh kix lauxleeing: heue.
Kix hoik rob vungviang aux, viang kix rob vungviang aux kawx, aux tag deuh rhawm: kah ceukaux Simiang Siyiex, mai yuh kix lauxleeing: heue.
Viang kix rob vungviang aux, awm: phong: hia: kawx, tag yeet hu: awm: pang: kat pa gleeing kah ngu heue. Aux tag deuh rhawm: kah ceukaux Simiang Siyiex mai yuh kix lauxleeing: heue.
Viang maix yuh lung mai nyhot aux goh kawx, Simiang Siyiex mawh Cao: teem: aux heue.
Simiang Siyiex mawh riang rao aux, mai aux tag rhax lai grawng: pa taoh Nawh aux heue.
Lox pa gauxrhawm: gauxrhi: mai lox grawng: krax taoh koe: kah dee ot pwi pa rauh pa see heue. Mai taix khawn: dawm: Simiang Siyiex mawh pa ting riang ting rao heue.
Simiang Siyiex yaog taix khawn: dawm: Tix, mai taix khawn: dawm: Simiang Siyiex mawh pa ting riang ting rao heue.
Aux tag ang yum:, mai yam kawn: im: ju aux, aux tag baox krai grawng: ceu pa hoik yuh Simiang Siyiex heue.
Viang Simiang Siyiex hoik sivied tix gau aux tom: yaox jhawm kawx, Nawh ang nyang tawx aux yum:.
Paoh siviex pa rauh pa see kah son aux, mai aux tag sang laig tix yaogyaw bwanson: Simiang Siyiex heue.
Mai in: mawh siviex Simiang Siyiex, can pwi pa rauh pa see khaing:, pa pon tix laig heue.
Aux tag yaogyaw kah Maix, grawhgrawng: nawh, Maix hoik nghiiet kah lox aux, mai hoik taoh kah aux heue.
Simaox pa hoik tik pwi pa yuh nyiiex, sidauh khaix pon tix mawh kaing: kah daog heue.
Grawng: in: mawh ceu pa hoik yuh Simiang Siyiex heue. Mai mawh ceu pa daox pa am: kah ngai: ex heue.
Singaix in: mawh singaix pa hoik kieh Simiang Siyiex ex gauxrhawm: gauxrhi: kah daux Nawh Cao: heue awawx.
Simiang Siyiex eue, taoh kah ex liak, ex khyox khaw: kah Maix, Simiang Siyiex eue, tawx bwanson: liak, ex khyox khaw: kah Maix heue.
Kieh kaw pa hoek kah daux ceukaux Simiang koe: bwanson: liak. Mai ex ot kah daux nyiiex Simiang Siyiex mai yaogyaw kah Maix heue.
Simiang Siyiex mawh Siyiex Cao: pa ploi: pa riieng hoek kah ex heue. Mai teei maox phyawk kah to: ceu pa tan pa lu mai sigang: kah rung: khu: dee tan.
Maix mawh Simiang Siyiex ex, mai ex tag yaogyaw kah Maix heue. Maix mawh Siyiex ex, mai ex tag yaogyaw Maix ting heue.
Yaogyaw kah bwanson: Simiang Siyiex, mawh kheu Nawh mawh pa jiet mhawm:, mai krax caoxrhawm: Nawh koe: jheengjheeng: leeing ju heue.
Gumlox Tawm: Beenli Siyiex
Mai can pwi pa grum hawt kah beenli Simiang Siyiex khankix, koe: bwan: heue.
Mai can pwi pa priex kah sakse pa kham: Nawh khankix, mai pwi pa viex khawm rhawm: khawm rhi: tix, mai sawg kah Nawh khankix, koe: bwanson: heue.
Mai kix ang chix yuh phimap, kix hu: hoek kah daux krax Nawh heue.
Nawh Cao: hoik tawx hoik gau lox tawm: beenli sonsang cuca: ex tix hawt twah klaung: heue.
Kieh daux krax pa hu: aux kaux cong:, mai sonsang pon tix hawt lox tawm: beenli Maix khankix liak.
Yam hawt aux tix yuh kah lox tawm: beenli Maix khawm uik, kieh aux luan khaing: krax pa kaig pa tua liak.
Aux viex rhawm: pa rauh pa see mai yaogyaw kah bwanson: Maix, yam gau aux krax prawng ca: Maix khankix rah see heue.
Aux tag hawt tix yuh kah lox tawm: beenli Maix khankix heue. Paw lai tik vud aux liak.
Nghiiet kah lox tawm: beenli Siyiex
Pwi pa awn: ju khankix, daux krax pa hu: nawh chix singax yuh kah mawx? Mawh nin: heue, yuh satix mai hawt kah gumlox Nawh Cao: heue.
Mai aux viex khawm rhawm: khawm rhi: tix, sawg kah Maix heue. Mai paw kieh aux lud hu: khaing: lox tawm: beenli Maix liak.
Aux hoik priex gumlox Maix kah daux rhawm: tix, son ang sang phit lud kah Maix heue.
Simiang Siyiex eue, Maix koe: bwanson: heue. Gau aux kah lox tawm: beenli Maix liak.
Mai aux teei jheeh tix sidiex kah grawng: pa kaoh khaing: daux jheeh Maix khawm uik heue.
Aux gauxrhawm: gauxrhi:, kah daux krax pa kham: mhai: sakse khankix, awm: pa pon aux kraungkhrai: kuceu khawm uik heue.
Aux tag keud kah grawng: pa hoik sidiex gau Maix khankix, mai jhak kah daux krax pa hu: Maix khankix heue.
Aux tag gauxrhawm: gauxrhi: kah daux lox tawm: beenli Maix khankix, mai ang doh piawm: kah gumlox Maix heue.
Gauxrhawm: Gauxrhi: Kah Lox Tawm: Beenli Siyiex
Yuh bwanson: kah aux, yam kawn: im: ju aux, mai sonsang pon hawt aux gumlox Maix heue.
Mai paoh ngai: aux, sonsang chix yaox aux kah ceu pa daox pa am:, kah daux beenli Maix heue.
Aux mawh nyo sinie kah piang haktiex in:, paw lai mox lox tawm: beenli Maix khaing: aux liak.
Mai rhawm: aux bih hu:, kheu simie tix yaox kah krax prawng ca: Maix ku jheengjheeng: heue.
Nawh Cao: sivied tix gau kah pwi pa ting rhawm: ting rhi:, mai pa yaox tix kham: geu: kah lox pa jhax pa lawg kheu chanie luan yuh kah lox tawm: beenli Maix khankix heue.
Mai kieh aux luan khaing: pwi pa sa pa lao mai pa ah lox pa ang cee ang cak, kheu hawt aux kah sakse pa kham: Maix heue.
Simiang khankix, ot tang: plak tix briex kum: grawng: aux, viang mawh kawx nan:, aux mawh siliex Maix keud sawn: grawng: lox tawm: beenli Maix khankix heue. 24 Grawng: pa kham: Maix tix deuh sakse khankix, mawh dee gauxrhawm: gauxrhi: mai pa tawx krax keud krax sawn: kah aux heue.
Keud Dud Sonsang Nghiiet Kah Lox Tawm: Beenli
Ju aux ot kah daux phawng: tiex, mai kieh aux im: ju awm: pa koe: gumlox Maix liak.
Aux tag krai jhawm: ceu pa hoik yuh aux khankix, Maix hoik nghiiet kah lox aux, mai Maix gau aux kah lox tawm: beenli Maix liak.
kieh aux tawng daux krax pa sidiex gau Maix liak, phan: yuh nan:, aux doh keud kah ceu pa daox pa am: pa hoik yuh Maix khankix heue.
Rhawm: aux sijieh mai teh hu: kheu krax pa lauxrhawm: lauxrhi: heue. Mai kieh aux kaux cong: awm: pa koe: gumlox Maix liak.
kieh aux kwieh hu: khaing: krax pa pie pa lhen: mai caox rhawm: tawx lox tawm: beenli Maix kah aux liak.
Aux hoik laug tix teei kah krax sijax mukheu Maix, mai aux hoik priex kah krax pa prawng ca: Maix kah sivoe ngai: aux heue.
Aux hoik priex tix hawt kah grawng: ceu pa hoik kham: mhai: sakse khankix, Simiang Siyiex eue, paw kieh aux hoek krax pa kaig pa tua liak.
Aux tag leue tix hawt kah daux krax lox tawm: beenli Maix, yam kieh Maix aux koe: cuyi: pingnya heue.
Lox Rawg Bwan: Sonsang Mawh Pwi Pa Tawng
Simiang Siyiex eue, gau aux kah daux krax lox tawm: beenli Maix liak, aux tag hawt tom: sidauh heue.
Mai kieh aux tawng cuyi: pingnya Maix liak. Aux tag hawt kah lox tawm: beenli Maix, mai viex khawm rhawm: khawm rhi: tix mai hawt yuh heue.
Mai thong: aux hu: kah daux krax lox tawm: beenli Maix, aux moh kah daux krax an: heue.
Mai kieh aux koe: rhawm: koe: rhi:, kah grawng: ceu pa kham: mhai: sakse, lheu: khaing: pa koe: rhawm: pa mi pa koe: liak.
Mai kieh ngai: aux via khaing: pa ang koe: bwanson: tidtix, mai kieh aux im: ju kah daux krax Maix liak.
Kieh gumlox Maix kaux cong: kah siliex pa lhat pa graung kah Maix khankix liak.
Kieh ceu pa sa pa lao mai pa lhat pa graung aux grai: hu: liak. Mai krax pa prawng ca: Maix mawh pa mhawm: heue.
Aux krox tix nghiiet kah lox pa sidiex gau Maix khankix heue. Mai kieh aux im: ju kah beenli pa rauh pa see Maix liak.
Pa Deuh Rhawm: Kah Lox Tawm: Beenli Siyiex
Simiang Siyiex eue, kieh krax caox rhawm: Maix mai bwanson: krax taoh Maix hoek kah piang aux, awm: pa koe: gumlox Maix liak.
Mawh kheu nan:, sonsang pon aux tix pawk lox pa sa pa lao pwi khankix, kheu deuh aux rhawm: kah gumlox Maix heue.
Paw lai teei lox sijax mukheu lih khaing: daux jheeh aux, mawh kheu krox jun pot aux kah krax prawng ca: Maix heue.
Aux ang lai laux lee: mai hawt tix yuh lox tawm: beenli Maix jheengjheeng: heue.
Aux chawkcheng: tix sawg kah lox pa sidiex gau Maix khankix, mai aux tag yaox tix hu: kah daux pa vieh pa ang koe: pa tiebtie heue.
Aux tag krai grawng: ceu pa hoik kham: mhai: sakse khankix, kah simiang khankix, mai ang koe: krax pa kaig pa tua.
Mai aux tag gauxrhawm: gauxrhi: kah daux lox tawm: beenli Maix kah pa moh aux khankix heue.
Aux tag yaog kah taix tix, hu: kah lox tawm: beenli Maix pa moh aux mai pa doh keud aux kah lox tawm: beenli Maix khankix heue.
Pa Fahrhawm: Kah Lox Tawm: Beenli Siyiex
Doh keud doh sawn: kah gumlox pa hoik deuh Maix kah aux, grawng: pa kieh Maix aux krox jun pot liak.
Mawh kheu gumlox Maix aux yaox tix im: ju, kheu gumlox an:, aux koe: krax nyawmrhawm: nyawmrhi: yam yaox aux krax pa kharhawm: kharhi: heue.
Viang pwi pa ting rhawm: ting rhi: khankix salao kah aux kawx, aux ang doh tikvud lox tawm: beenli Maix.
Simiang Siyiexeue:, aux doh keud doh sawn: kah krax prawng ca: Maix tom: dix, mai kieh tokaux aux nyawmrhawm: nyawmrhi: tiru heue.
Aux kied songrhawm: songrhi: kah pwi pa nieb yuh khankix, mawh kheu tik kix kah lox tawm: beenli Maix khankix heue.
Mai lox tawm: beenli Maix khankix, mawh grawng: lox rhax kah daux nyiiex yam mawh aux nyo heue.
Simiang Siyiex eue, aux doh keud doh sawn: kah ceukaux Maix bawg yam ponsawm: mai hawt kah lox tawm: beenli Maix heue.
Mawh kheu nghiiet aux kah lox pa sidiex gau Maix khankix, aux tom: koe: riang heue.
Nghiiet Lox Tawm: Beenli Siyiex
Simiang Siyiex eue, Maix mawh son aux, aux hoik krai tix deuh, aux tag sang nghiiet gumlox Maix khankix heue.
Aux khyox khaw: kah Maix, khawm rhawm: khawm rhi: tix mai kieh aux pon bwanson: Maix mai krax caoxrhawm: Maix, awm: pa koe: gumlox Maix liak.
Yam keud aux grawng: krax pa hu: aux khankix, caong aux deeh tieh tix hu: kah grawng: pa hoik kham: mhai: sakse heue.
Aux ang lai koi, nied tix hawt yuh kah lox tawm: beenli Maix heue.
Viang pwi pa ang rah ang see rob vungviang aux kawx, aux ang doh piawm: kah lox tawm: beenli Maix heue.
Yam jhak aux kah krax prawng ca: Maix hawt beenli khankix, aux kaoh yam greung sawm: mai yaogyaw kah bwanson: Maix heue.
Mai aux yuh paox pie kah pwi pa lhat pa graung kah Maix, mai pwi pa nghiiet kah lox pa sidiex gau Maix khankix heue.
Simiang Siyiex eue, krax caoxrhawm: Maix hoik naog kah piang haktiex, mai gau aux kah lox tawm: beenli Maix liak.
Lox Tawm: Beenli Siyiex Khankix Kied Ngawh
Simiang Siyiex eue, Maix yuh bwanson: kah siliex Maix awm: pa koe: gumlox Maix heue.
Mai tawx pa tawng pa yung cuyi: pingnya pa mhawm: kah aux, kheu aux yumrhawm: Kah lox tawm: beenli Maix heue.
Kah: sivoe ang aux nyang yaox tix kham: geu: krax kharhawm: kharhi:, aux hoik lud krax hu: tix heue. Viang mawh kawx nan: yamin:, aux hoik deeh hawt kah gumlox Maix heue.
Maix koe: rhawm: pa mhawm: pa mhiem: mai rhawm: pa chix yuh bwanson: heue. Mai gau aux kah lox tawm: beenli Maix liak.
Viang pwi ting rhawm: ting rhi: khankix ot tang: plak mai keud lox pa pie pa lhen: kawx, aux tag viex khawm rhawm: khawm rhi: mai priex tix hawt gumlox pa sidiex gau Maix heue.
Mai rhawm: kix hoik awm: lon: bee, phan: mawh aux, gauxrhawm: gauxrhi: kah lox tawm: beenli Maix heue.
Mai kra: pa kharhawm: kharhi: aux, mawh pa ting bwanson:, son aux, grawhgrawng: nawh, sonsang gau aux kah lox tawm: beenli Maix heue.
Mai lox tawm: beenli pa kaoh khaing: jheeh Maix nie lheu: mhawm: khaing: mau, khri:, kaing: rheng, kaing: mheen: kah son aux heue.
Lox Tawm: Beenli Siyiex Mawh Pa rauh Pa See
Taix Maix hoik yuh aux, mai kieh aux mawh pakpeung: tix, mai kieh aux tawng krax tawng krax yung sonsang chix gau aux lox tawm: beenli Maix liak.
Pwi pa lhat pa graung kah Maix khankix, yam yaox kix kah aux gauxrhawm: gauxrhi: mawh kheu krox jun pot aux kah gumlox Maix heue.
Simiang Siyiex eue, aux tawng grawng: krax prawng ca: Maix mawh pa mawh pa meh, mai pa kieh Maix aux yaox krax kharhawm: kharhi: khaw: mai sijax mukheu Maix heue.
Aux rawg mhaing: kah Maix, awm: koe: lox mukheu Maix, tawx krax caoxrhawm: Maix kieh aux nyawmrhawm: nyawmrhi: liak.
Mai kieh krax caoxrhawm: Maix hoek kah piang aux, mai kieh aux im: ju liak. Grawhgrawng: nawh, aux gauxrhawm: gauxrhi: kah lox tawm: beenli Maix heue.
Kieh pwi pa ting rhawm: ting rhi: khankix kaig tua liak. Mawh kheu kix nieb yuh pa ang rah ang see kah aux, phan: mawh aux, doh keud doh sawn: kah lox pa sidiex gau Maix heue.
Mai pwi pa lhat pa graung kah Maix, mai pwi pa tawng kah Maix, mhai: sakse pa kham: Maix tix deuh khankix tag deeh hoek kah aux heue.
Mai kieh rhawm: aux grum naog kah lox tawm: beenli Maix, kieh aux luan khaing: krax pa kaig pa tua liak.
Lox Rawg Bwan: Sonsang Taoh
Ju aux krox ju pot kah bwanson: krax taoh Maix, mai aux iak riang hu: heue. Viang mawh kawx nan:, aux krox jun pot kah gumlox Maix heue.
Mai ngai: aux krox jun pot kah gumlox Maix, mai iak riang hu:, mai Maix tag tawx krax nyawmrhawm: nyawmrhi: kah aux bawg yam lai mawx?
Mai aux hoik awm: singiien rawm: pa krat singao, viang mawh kawx nan:, aux ang doh piawm: kah lox tawm: beenli Maix heue.
Aux kawn: sang yaox tix ot bawg yam miex grheung:? Maix tag prawng ca: kah pwi pa tuktiaktukte: kah aux lai mawx?
Mai pwi pa ting rhawm: ting rhi: mai pa lheu: kah lox tawm: beenli Maix khankix, hoik kaong: daux kah son aux heue.
Lox tawm: beenli Maix khawm uik mawh pa grum mai sijax mukheu heue. Kix nieb tuktiaktukte: kah aux, teem: coi kah aux liak.
Kix dex teei tix tik aux khaing: piang haktiex, viang mawh kawx nan:, aux ang tik kah lox pa sidiex gau Maix heue.
kieh aux im: ju awm: krax caoxrhawm: Maix liak. Mai aux tag priex tix hawt kah gumlox pa kham: Maix kah jheeh Tix heue.
Pa Yumrhawm: Kah Lox Tawm: Beenli Siyiex
Simiang Siyiex eue, gumlox Maix kaux cong: kah piang raoma: jheengjheeng: heue.
Mai sijax mukheu Maix kaux cong: piang ceu pwi leeing ju leeing phan: heue. Maix hoik phan: haktiex mai kieh nawh kaux cong: jheengjheeng: heue.
Mai can pa koe: khawm uik mawh siliex Maix, mai krax prawng ca: Maix kaux cong: tom: hoek singaix heue.
Phan: aux ang gauxrhawm: gauxrhi: kah beenli Maix nieh, aux hoik dawg lauxleeing: yam yaox aux krax kharhawm: kharhi: heue.
Mai aux ang piawm: kah ceu pa sidiex gau Maix tix bawg kawx, grawh grawng nawh, Maix kieh aux im: kah lox beenli Maix heue.
Aux mawh cie Maix heue. Mai taoh kah aux, mawh kheu sawg aux kah lox pa sidiex gau Maix heue.
Pwi pa ang rah ang see khankix, kix pau tix sang yuh aux lauxleeing: heue. Viang mawh kawx nan:, aux tag doh keud doh sawn: kah grawng: pa kham: mhai: sakse heue.
Mai aux hoik grum yaox dee sidauh kuceu khwm: uik, mai gumlox beenli Maix mawh pa kied ting kied vieh heue.
Pa Moh Kah Lox Tawm: Beenli Siyiex
Aux kied moh kah lox tawm: beenli Maix sigrien sigre, mai aux doh keud doh sawn: mai lih rhawm: kah leeing: lang: singaix heue.
Mai lox tawm: beenli Maix khankix, kieh aux nie lheu koe: cuyi: pingnya khaing: pwi pa koeng kah aux khankix, mai beenli an:, kaux cong: mai aux jheengjheeng: heue.
Mawh kheu doh keud doh sawn: aux kah pa kham: mhai: sakse, aux nie lheu tawng khaing: sara cao: gau tix heue.
Mawh kheu priex aux tix hawt kah lox pa sidiex gau Maix, mai nie lheu: koe: krax tawng krax yung khaing: pwi pa riex ju khankix heue.
Mai aux tik kah ceu pa ang mhawm: mai priex tix hawt kah gumlox Maix heue.
Aux ang tang: hu: khaing: krax prawng ca: Maix, mawh kheu hoik gau Maix kah aux heue.
Mai gumlox Maix sidaing: tie: kah daux ghok aux, mai nie lheu: tie: khaing: rawm: hia: kah daux jheeh aux heue.
Krax tawng krax yung aux, haok hwan, mawh kheu lox pa sidiex gau Maix mai aux koeng kah daux krax pa ang mawh ang meh khankix heue.
Pa Riieng Lox Tawm: Beenli Siyiex
Gumlox Maix mawh kawk ngu son caong aux, mai mawh pa jhan riang kah daux krax aux heue.
Mai aux hoik tiextu ah nin:, "aux tag priex tix hawt krax prawng ca: Maix rah rah see see heue."
Simiang Siyiex eue, aux kied kharhawm: kharhi: tix, kieh aux im: ju awm: pa koe: gumlox Maix heue.
Simiang Siyiex eue, aux khyox khaw: kah Maix rieb tix teei kah krax pa tan pa lu aux khawm rhawm: khawm rhi: mai tokaux jheeh jhai: tix liak. Mai gau aux kah krax prawng ca: Maix liak.
Mai ju aux koe: kah daux taix aux jheengjheeng: heue. Viang mawh kawx nan:, aux ang piawm: kah beenli Maix heue.
Pwi pa ang rah ang see khankix, hoik taong: tix deuh kie kah son aux heue. Viang mawh kawx nan:, aux ang lud hu: kah daux krax lox pa sidiex gau Maix heue.
Aux rieb tix teei kah pa kham: Maix tix deuh sakse khankix, mawh son sin: tokaux aux jheengjheeng:, mai ceu ankix kieh rhawm: aux gauxrhawm: gauxrhi: heue.
Mai aux viex rhawm: tix hawt kah lox tawm: beenli Maix tom: sidauh jheengjheeng: heue.
Koe: Krax Taoh Kah Lox Tawm: Beenli Siyiex
Aux koeng kah pwi pa koe: rhawm: ra: mu: pa nieb yuh khankix, mai aux moh kah beenli Maix heue.
Maix mawh dee mox aux, mai kraung naing pa tiebtie aux, mai krox jun pot kah gumlox Maix heue.
Pwi pa yuh phimap khankix eue, lih hu: khaing: aux heue. Mai tag priex tix hawt kah lox tawm: beenli Siyiex heue.
Mai joh jhan aux awm: koe: gumlox Maix, mai kieh aux im: ju liak. Mai paw kieh aux hoek krax pa kaig pa tua kah pa krox jun pot aux Maix liak.
Mai teem: coi kah aux sonsang pon krax pa nyawmrhawm: nyawmrhi:, mai tag hawt kah lox tawm: beenli Maix jheengjheeng: heue.
Maix tik vud kah pwi pa lud krax kah lox tawm: beenli Maix khankix heue. Pa keud kix mawh pa pie pa lhen: heue.
Maix deuh pwi haktiex pa ang rah ang see khankix khawm uik mawh kraung pa dauh jum heue. Mawh kheu in:, aux tom: moh kah pa kham: mhai: sakse heue.
Hauk haw: aux pruh kheu kied lhat kied graung kah Maix, kheu krax prawng ca: Maix heue.
Pa Priex Tix Hawt Kah Lox Tawm: Beenli Siyiex
Aux yuh awm: krax prawng ca: mai prawng ca: rah see heue. Mai paw lai tik vud aux kah daux tawm: taix pwi pa tuktiek tukte: kah aux liak.
Maix rieb tix teei kah siliex Maix kah daux pa mhawm: liak. Paw kieh pwi pa ting rhawm: ting rhi: khankix, tuktiaktukte: kah siliex Maix liak.
Mai ngai: aux hoik iak riang kah pau tix bwanson: krax taoh Maix, mai gumlox pa rauh pa see Maix heue.
Yuh kah aux awm: koe: Maix krax caoxrhawm:, mai gau aux kah lox tawm: beenli Maix liak.
Aux mawh siliex Maix heue. Caoxrhawm: tawx krax tawng krax yung kah aux, mai kieh aux tawng pa kham: mhai: sakse khankix liak.
Bawg yam sang prawng ca: Simiang Siyiex hoik hoek, grawhgrawng: nawh, kix hoik tik kah beenli Maix heue.
Phan: mawh aux, moh kah lox tawm: beenli Maix, nie lheu: khaing: khri: pa hoik thi: heue.
Mawh kheu in:, aux priex kah lox pa sidiex gau Maix khawm uik, mawh pa rauh pa see, mai koeng kah krax pa ang mawh ang meh heue.
Rhawm: Pa Simie Tix Priex Hawt Lox Tawm: Beenli Siyiex
Grawng: pa kham: mhai: sakse khankix mawh ceu pa daox pa am:, mai ju aux priex tix hawt heue.
Gumlox Maix mawh pa plak jhi: pa riieng kah pwi pa ang tawng tidtix khankix, kieh deeh tawng heue.
Aux ang: jheeh tix mai taug mao kah simie tix pon kah lox tawm: beenli Maix heue.
Yuh bwanson: jhak kah aux, awm: pasax yuh Maix kah kix pwi pa moh kah ceukaux Maix liak.
Awm: koe: gumlox Maix, kieh diang caong aux kaux cong: liak. Mai paw kieh phimap ting kah piang aux liak.
Taoh aux lih khaing: daux pwi pa tuktiaktukte: kah aux liak. Mai aux tag priex tix hawt kah lox sidiex gau Maix heue.
Kieh pakngai: Maix jhan riang kah piang aux, mai gau aux kah lox tawm: beenli Maix khankix liak.
Mawh kheu ang kix priex tix hawt kah beenli Maix, rawm: ngai: aux lih awm: rawm: klawng: heue.
Lox Tawm: Beenli Siyiex Mawh Pa rauh Pa See
Simiang Siyiex eue, Maix mawh pa rauh pa see heue. Grawng: krax prawng ca: Maix khankix kawx, mawh pa rauh pa see heue.
Mhai: sakse pa kham: Maix tix deuh khankix, mawh pa khaw: mai beenli pa rauh pa see mai pa kaux sijax tom: nie heue.
Mai aux sungsang laux rhawm: tix, kheu pwi pa koeng kah aux khankix, piawm: kah lox beenli Maix heue.
Mawh kheu gumlox Maix mawh pa kied singax singeh, mai mawh pa khaw: rhawm: siliex Maix khankix kah heue.
Aux mawh pwi pa iak, pa yaox tix kham: geu: kah pa nieb yuh pwi pa ang cee ang cak kah heue. Viang mawh kawx nan:, aux ang piawm: kah gumlox pa sidiex gau Maix khankix heue.
Pa rauh pa see Maix mawh pa rauh pa see leeing ju leeing phan: heue. Mai beenli Maix mawh beenli pa kaux sijax heue.
Viang pa nu pa khawm, mai pa kharhawm: kharhi: hoek kah piang aux kawx, lox tawm: beenli Maix khankix, kieh aux gauxrhawm: gauxrhi: heue.
Grawng: pa kham: mhai: sakse khankix mawh pa rauh pa see jheengjheeng: heue. Tawx krax tawng krax yung mai kieh aux im: ju liak.
Lox Rawg Bwan: Sonsang Taoh
Simiang Siyiex eue, aux viex khawm rhawm: khawm rhi: tix kok yo, nghiiet kah lox aux liak. Aux tag priex tix hawt kah lox tawm: beenli Maix heue.
Aux kok yo kah Maix, taoh aux liak, mai aux tag priex tix hawt mhai: sakse pa kham: Maix khankix heue.
Aux kok yo kah Maix, kah: ang praix nyang riang, aux krox jun pot kah gumlox Maix heue.
Kah: sivoe ang ponsawm: nyang bax luan, aux siduad mai doh keud doh sawn: kah gumlox Maix heue.
Simiang Siyiex eue, awm: koe: krax caoxrhawm: Maix nghiiet kah lox aux liak. Mai kieh aux im: ju kah krax prawng ca: Maix liak.
Pwi pa ang mhawm:, pa keud tix yuh pa ang mhawm: khankix hoik hoek dex aux, kix mawh pa singai khaing: beenli Maix heue.
Simiang Siyiex eue, Maix ot dex aux, mai lox tawm: beenli Maix khawm uik mawh pa kaux sijax heue.
Aux hoik tawng pa kham: mhai: sakse khankix, mawh pa kaux pa cong: jheengjheeng: tom: didix heue.
Rawg Mhaing: Sonsang Taoh
Jhak kah pa kharhawm: kharhi: mai taoh aux liak, aux ang piawm: beenli Maix heue.
Priex aux mai taoh aux liak, kieh aux im: ju awm: pa koe: gumlox Maix liak.
Krax taoh Maix singai khaing: pwi pa ang rah ang see khankix, mawh kheu ang kix sawg kah lox tawm: beenli Maix khankix heue.
Simiang Siyiex eue, rhawm: pa caoxrhawm: Maix, koe: tom: nie heue. Kieh aux im: ju awm: pa khaw: mai krax prawng ca: Maix liak.
Pwi pa tuktiaktukte: kah aux, mai pwi pa lah pa cha: kah aux kied nie heue. Viang mawh kawx nan:, aux ang via hu: khaing: grawng: pa kham: mhai: sakse khankix heue.
Yam yaox aux kah pwi pa ang kaux sijax khankix, aux songrhawm: songrhi: heue. Grawhgrawng: nawh, kix ang nghiiet kah gumlox Maix heue.
Jhak mai keud grawng: pa moh aux, kah lox pa sidiex gau Maix khankix liak. Simiang Siyiex eue, kieh aux im: ju awm: pa koe: Maix pa caoxrhawm: liak.
Gumlox Maix khawm uik mawh pa mawh pa meh heue. Mai pa prawng ca: Maix tix deuh khawm uik mawh pa kaux cong: jheengjheeng: heue.
Deuh Lox Tawm: Beenli Siyiex Mawh Pa Ting
Viang simiang khankix tuktiaktukte: aux kah pa ang tie koe: grawng: kawx, rhawm: aux lhat graung kah gumlox Maix heue.
Aux gauxrhawm: kah gumlox Maix, awm: pwi pa yaox kah kraungkhrai: pa ngawh heue.
Aux seeing: brai: mai nieh mhong: kah lox pa pie pa lhen: heue. Viang mawh kawx nan:, aux moh kah lox beenli Maix heue.
Aux yaogyaw kah Maix, tix singaix aliah bawg, kheu krax prawng ca: Maix mawh pa rauh pa see heue.
Pwi pa moh kah gumlox beenli Maix khankix, ang koe: krax lauxrhawm: lauxrhi: mai pon pa nhim: tom: nie heue.
Simiang Siyiex eue, aux krox jun pot kah bwanson: krax taoh Maix, mai priex tix hawt lox tawm: beenli Maix heue.
Ju aux priex tix hawt kah pa hoik kham: Maix tix deuh sakse khankix, mai aux kied moh sigrien sigre heue.
Aux priex tix hawt kah lox pa sidiex gau Maix, mai pa kham: Maix tix deuh sakse khankix heue. Mai daux krax aux khawm uik koe: sivoe Maix heue.
Lox Rawg Bwan: Sonsang Teem:
Simiang Siyiex eue, kieh lox pa kok yo aux hoek sivoe ngai: Maix liak. Mai tawx krax tawng krax yung kah aux awm: pa koe: gumlox Maix liak.
Kieh lox pa rawg pa mhaing: aux hoek sivoe ngai: Maix liak. Taoh kah aux awm: pa koe: gumlox Maix liak.
Jheeh aux tag ah lox yaogyaw, mawh kheu gau Maix aux kah lox tawm: beenli Maix khankix heue.
Dak aux tag ah lox rhax kah gumlox Maix, mawh kheu lox tawm: beenli Maix mawh pa rauh pa see heue.
Kieh taix Maix teem: coi kah aux, mawh kheu aux laug tix teei kah lox sidiex gau Maix heue.
Simiang Siyiex eue, aux krox jun pot kah bwanson: krax taoh Maix heue. Mai aux gauxrhawm: gauxrhi: kah daux beenli Maix heue.
Kieh aux im: ju mai yaogyaw kah Maix, mai teem: coi kah aux kah krax prawng ca: Maix liak.
Aux hoik lud krax hu:, awm: yung: pa hoik grai: hu: tix mu:, mai sawg kah aux liak. Aux ang piawm: kah lox tawm: beenli Maix heue.
Lox Rawg Bwan: Sonsang Teem:
Lai rhax haok rawg bwan:
Aux kok yo kah Simiang Siyiex yam yaox aux krax kharhawm: kharhi:, mai Nawh nghiiet kah lox aux heue.
Simiang Siyiex eue, taoh ju aux lih khaing: jheeh pwi pa ang koe: sijax, mai khaing: dak pa pie pa lhen: liak.
Mai dak pa pie pa lhen: eue, Nawh Cao: tag tawx patix kah maix, Nawh tag baox tawx sonsang baox bon maix patix,
Nawh Cao: tag awm: te lawm pwi pa ting riang mai gaoxngu pa kied hax heue.
Aux koe: krax kharhawm: kharhi:, yam ot kah daux haktiex Mesiek, mai kah daux nyiiex gox Keda heue.
Ju aux hoik rheung: ot tau mai pwi pa koeng kah pa nhim: heue.
Aux moh kah plak pa nhim:, phan: aux krai yuh nan:, kix simie tix puing: naing heue.
Siyiex Cao: Pa Priex Kah Ex
Lai rhax haok rawg bwan:
Aux maong tix jhak kah gawng lua khankix, krax pa teem: coi aux kaoh khaing: dee mawx?
Krax pa teem: coi aux kaoh khaing: Simiang Siyiex Cao: pa yuh raoma: mai haktiex heue.
Nawh Cao: ang kieh caong maix cang klad, mai Cao: pa pau maix ang it heue.
Jhak heue, Cao: pa pau kah ceu pwi Isarelax ang gaing: ang it heue.
Simiang Siyiex mawh Cao: pa priex maix heue. Mai Simiang Siyiex mawh veei dee deuh maix rhawm: mai ot plak taix khawn: dawm: maix heue.
Yam pon singaix ang ah, ang kieh singaix tiah kah maix, mai yam ponsawm:, ang kieh khix chuh kah maix heue.
Simiang Siyiex tiebtie kah pa ang mhawm: pa caox khawm uik mai priex kah ju maix heue.
Simiang Siyiex tag priex maix, yan lih, yam laig maix, jah tom: yamin: mai hu: sivoe ngai: jheengjheeng: leeing ju heue.
Yaogyaw Ka Veng Yerusaliem
Lai rhax haok Davit rawg bwan:
Yam ah kix kah aux ex hu: kah daux nyiiex Simiang Siyiex ex, aux kied koe: krax gauxrhawm: gauxrhi: heue.
Veng Yerusaliem eue, caong ex cung kah daux siviex maix khankix heue.
Veng Yerusaliem, hoik yuh pa mhawm:, pa awm: paox tix.
Mai kah daux veng an:, awm: pa koe: lox tawm: beenli kah ceu pwi Isarelax pa mawh pwi Simiang Siyiex, sonsang haok kix tix yaogyaw kah ceukaux Simiang Siyiex tan heue.
Dangngeung dee prawng ca: hawt beenli mai dangngeung ceu cat simiang Davit koe: tan heue.
Mai rawg bwan: sonsang yiien: yawg veng Yerusaliem mai can pwi pa moh kah veng an:, tag pon pa nyawmrhawm: nyawmrhi: heue.
Kieh pa yiien: yawg koe: kah guh veng maix, mai kieh koe: krax nyawmrhawm: nyawmrhi: kah daux nyiiex haw: Maix liak.
Aux tag krai ah nin: kah son puxaik mai paoxgrawm paox krux khankix, "Kieh pa yiien: yawg koe: kah daux maix liak."
Mai aux tag sawg bwanson: son maix kah daux nyiiex Simiang Siyiex heue.
Lox Rawg Bwan: Sonsang Caoxrhawm:
Lai rhax haok rawg bwan:
Aux maong tix jhak kah Siyiex pa ot kah piang meung raoma: heue.
Awm: siliex khankix, maong tix jhak kah taix Simiang kix, mai awm: bun: siliex khankix maong tix jhak kah taix miex simiang kix khankix, ex kawx maong tix jhak kah Simiang Siyiex tom: pon ex bwanson: krax caoxrhawm: Maix heue.
Simiang Siyiex eue, yuh bwanson: caoxrhawm: kah ex liak. Mawh kheu hoik yaox ex tix kham: geu: kah krax pa kaig pa tua tom: nie heue.
Mai ju ex hoik yaox tix kham: gau: kah pwi pa nieb ah pa ang cee ang cak, mai pa sa pa lao, mai pwi pating rhawm: ting rhi: khankix, yuh tix kieh ex kaig tua tom: nie heue.
Cao: Pa Taoh Kah Isarelax
Lai rhax haok Davit rawg bwan:
Ceu pwi Isarelax ah nin:, "Keud tix yaox phan: Simiang Siyiex ang ot plak ex.
Phan: Simiang Siyiex ang ot plak ex, pwi pa koeng kah ex tang: plak khankix.
Krax pa songrhawm: songrhi: kix lih mai hoik bleet tix ih ex khawm kaux khawm ju pleue:.
Yam an:, rawm: khankix kheem: ex mai rawm: klawng: khankix hoik jao: hu: kah piang ju ex pleue:.
Mai rawm: klawng: caox khankix hoik jao: hu: kah piang ju ex pleue:."
Kieh Simiang Siyiex pa ang tawx ex hoek kah krax pa laux pa leeing: ting bwanson: heue.
Ju ex hoik pon tix luan hu:, awm: sim: pa luan khaing: maox jhawk pa taong: kix, ex kawx hoik pon tix luan kheu hoik dud maox jhawk heue.
Cao: pa teem: coi ex koe: kah daux ceukaux Simiang Siyiex Cao: pa yuh raoma: mai haktiex heue.
Siyiex Priex Kah Pwi Nawh Khankix
Lai rhax haok rawg bwan:
Pwi pa deuh rhawm: kah Simiang Siyiex kaux cong: jheengjheeng:, awm: gawng Zion ang chix gah chix greed tix bawg kawx heue.
Mai awm: rob gawng hawt vungviang veng Yerusaliem, Simiang Siyiex rob hawt pwi Nawh khankix, jah tom: yamin mai hu: sivoe ngai: leeing ju leeing phan: heue.
Pwi pa rauh pa see khankix, tag ang pon tix yuh phimap phigrham:, mai krong: pliah pwi pa ang rah ang see khankix ang lai pon tix giex kaing: kah piang sin: pwi pa rauh pa see heue.
Simiang Siyiex eue, yuh bwanson: kah pwi pa mhawm: pa mhiem:, mai pwi pa rauh pa see kah daux rhawm: khankix liak.
Pwi pa lud hu: kah krax pa kawk pa vawk khankix, Simiang Siyiex tag teei lih tau mai pwi pa ang rah ang see khankix heue. Kieh pa nhim: koe: tau mai ceu pwi Isarelax liak.
Rawg Bwan: sonsang Taoh
Lai rhax haok rawg bwan:
Yam Simiang Siyiex, kieh pwi Zion pa phyawk hu: deeh hoek, ex awm: ngie pwi pa camaox heue.
Yam an:, jheeh ex grum naog kah krax nyiah, mai dak ex grum naog kah lox rhax pa gauxrhawm: gauxrhi: heue. Mai pwi tang: ceu tang: cat khankix kawx, ah nin:, "Simiang Siyiex hoik yuh kaing pa ting son kix heue."
Simiang Siyiex hoik yuh kaing pa ting pa lhaong: son ex, mai ex kawx, koe: krax gauxrhawm: gauxrhi: heue.
Simiang Siyiex eue, can ex pa hoik phyawk hu: khankix kieh deeh hoek awm: rawm: klawng: plak seh liak.
Mai pwi pa jah rawm: ngai: mai ruat simie khankix, tag gauxrhawm: gauxrhi: mai vawg nghox heue.
Pwi pa jah rawm: ngai: mai lih hu: ruat simie khankix, tag deeh viex lhiem: nghox hoek khawm gauxrhawm: gauxrhi: tix tete heue.
Yaogyaw Ka Bwanson: Siyiex
Lai rhax haok Sawlamun rawg bwan:
Phan: Simiang Siyiex ang yuh nyiiex, kix pa yuh mawh pa giex pa going heue. Mai phan: Simiang Siyiex ang pau veng in:, kix cao: pa pau mawh pa giex pa going heue.
Viang pex kaoh caocao mai ang it tom: faik praix kawx, kharhawm: kharhi: kah pa ih pa un: ang koe: bwanson:. Siyiex tawx krax pa nyawm it nyawm tum kah pwi pa moh Nawh khankix heue.
Kawnpraix pa keh khankix mawh sin: pa tawx Simiang Siyiex, mai mawh khawngphak pa tawx Nawh Cao: heue.
Mai kawnpraix pa keh yam awn: ju kix, awm: te pa koe: kah daux taix pwi pa kua: pa vao heue.
Pwi pa naog te kah mawk khankix koe: bwanson: heue. Mai kix tag ang koe: krax pa kaig pa tua yam prawng ca: kah pwi pa koeng kah kix, mai kix pau kah daux siviex veng an: heue.
Khawngphak pwi pa chix nghiiet kah lox Siyiex
Lai rhax haok rawg bwan:
Pwi pa lhat pa graung kah Simiang Siyiex, mai pa hawt hu: kah daux krax Nawh khankix, koe: bwanson: heue.
Phan: yuh nan:, maix tag yaox tix ih kah ceu pa yuh maix kah taix tix heue. Mai maix tag koe: bwanson: mai yaox tix ih mhawmmhawm: heue.
Moeng maix tag awm: nhu: plix siiet pa plix tom: nie, kah daux nyiiex maix kawnpraix maix rob vungviang pheen: sawm: maix, awm: pa sum: khaox sanlun heue.
Mai jhak heue, pwi pa lhat pa graung kah Simiang Siyiex khankix koe: bwanson: yuh nan: heue.
Simiang Siyiex, tag ot kah piang gawng Zion mai nawb bwanson: kah maix, mai maix tag yaox bwanson: pa pon veng Yerusaliem kah ju maix heue.
Mai tag sang kieh maix yaox kah kawn: saux maix khankix heue. Kieh pa nhim: koe: kah piang ceu pwi Isarelax liak.
Lox Rawg Bwan: Son Pwi Pa Koeng Kah Pwi Isarilax
Lai rhax haok rawg bwan:
Ceu pwi Isarelax ah nin:, "Kix hoik tuktiaktukte: aux, tom: yam awn: ju aux miex bawg nieh,
mai kix hoik tuktiaktukte: aux, tom: yam awn: ju aux miex bawg nieh, viang mawh nan: kix ang pex aux."
Pwi pa thai: khankix, thai: kah piang si-ang: krawng: aux, rhoi: thai: kied lang: awm: khaix mug heue.
Simiang Siyiex mawh pa rauh pa see heue. Mai Nawh tat dud kah maox pwi pa ang rah ang see khankix heue.
Can pwi pa koeng kah veng Zion khankix khawm uik, kieh kix hoek krax pa kaig pa tua mai deeh dak plak khaix liak.
Kieh kix awm: rib pa kuah piang braux nyiiex, mai kieh kix lak kroh hu: kah: ang pwi nyang reeig tix tik heue.
Mai pwi pa vawg kah rib an:, ang lai pon pie tix jhawp, mai pwi pa jhoi: nawh kawx, ang pon tix glien heue.
Mai can pwi pa lawng krax an:, ang pon tix ah, "Kieh bwanson: Simiang Siyiex hoek kah piang pex liak. Ex deuh rhawm: kah ceukaux Simiang Siyiex mai nawb bwan: kah pex heue."
Lox Rawg Bwan: Sonsang Teem:Lai rhax haok rawg bwan:
Simiang Siyiex eue, aux ot kah dee raux dee nu mai kok yo kah Maix heue.
Simiang Siyiex eue, veeh yhaok Maix, mhong: kah lox aux, mai nghiiet kah lox pa rawg aux bwan: liak.
Simiang Siyiex eue, phan: Maix tiem: tix deuh kah phimap ex, pwi mawx pon tix cung sivoe Maix.
Pa chix ploi: phimap mawh Maix, kieh ex lhat graung kah Maix heue.
Aux krox kah Simiang Siyiex, ju aux kawx, krox jun kah Maix heue.
Aux krox jun pot kah gumlox Maix, mai ju aux kawx, krox jun pot kah Simiang Siyiex nie lheu: khaing: kix, pa krox jun yam bah riieng praix ponngawb heue.
Ceu pwi Isarelax eue, krox jun pot kah Simiang Siyiex liak, grawhgrawng: nawh, krax caoxrhawm: mai bwanson: krax taoh koe: mai Simiang Siyiex tom: nie heue.
Nawh Cao: taoh tix teei ceu pwi Isarelax khaing: daux phimap phigrham: khawm uik heue.
Lox Rawg Bwan: pa peLai rhax haok Davit rawg bwan:
Simiang Siyiex eue, rhawm: aux ang lhaong:, mai ngai: aux kawx ang maong tix jhak, mai aux ang hu:, ang hoek, kah daux kaing pa ting pa ang keung: kah tokaux tix heue.
Aux hoik fahrhawm: kah tokaux tix, maiot nhim: awm: kawn: nyawm pa prah peuex teeh miex, mai rhawm: aux kawx, awm: kawn: nyawm pa prah peuex heue.
Can pwi Isarelax eue, krox jun pot kah Simiang Siyiex jah tom: yamin, hu: sivoe ngai: leeing ju leeing phan: heue.
Yaogyaw Kah Nyiiex Bwan:
Lai rhax haok rawg bwan:
Simiang Siyiex eue, doh keud doh sawn: kah Davit, pa yaox nawh tix kham: geu: mai krax kharhawm: kharhi: nawh liak.
Nawh hoik tiextu tix kah Simiang Siyiex pa ting siawpsibrawm pa krub ceu pwi Yakop mai ah nin:,
"Aux ang nyang laig kah daux nyiiex dee ot tix, aux ang lai haok it kah piang ku: de it tix.
Ang kieh ngai: it, mai ang kieh siyieb ngai: aux yip,
tom: sidauh ang aux nyang yaox nyiiex dee ot Simiang Siyiex, mai dee ot Siyiex pa ting siawpsibrawm pa krub ceu pwi Yakop kah heue.
Mai ex hoik mhong: nyiiex gox Siyiex an: koe: kah meung Epharat, kah daux tiag daux tu heue."
Laig kah daux nyiiex bwan: dee ot Nawh, mai ex grux ngawng tix krub dex ngot dee deuh Nawh caong heue.
Simiang Siyiex eue, tokaux Maix mai teug sijax mukheu mai min: plakngai: siawpsibrawm Maix haok ot kah dee ot Maix liak.
Kieh cao: giex kaing: li Maix khankix, ceep kraung pa rauh pa see, mai kieh pwi pa singaix singeh Maix khankix rhax lai pa gauxrhawm: gauxrhi: liak.
Mawh kheu jhak Maix kah plakngai: siliex Maix Davit, mai paw lai tik plakngai: kaw pa hoik groi Maix rawm: bee kah liak.
Lox sijax mukheu pa hoik tiextu Simiang Siyiex kah Davit, mai Nawh ang yuh laux kah sijax an:, mai Aux tag sang kieh simie ceu cat maix mawh pa ngawm kah piang dangngeung maix heue.
Phan: kawnpraix maix priex tix hawt yuh kah lox tawm: beenli Aux, mai grawng: pa hoik kham: Aux mhai: sakse, pa hoik gau Aux kah maix khankix, kawnpraix kix kawx, tag sang pon tix ngawm kah piang dangngeung maix jheengjheeng: leeing ju leeing phan: heue.
Mai Simiang Siyiex laug tix teei kah veng Zion mai khaw: kah rhawm: Nawh, mai yuh mawh dee ot Nawh jheengjheeng: heue.
Mai veng in: mawh, veng dee ot Aux jheengjheeng:, mawh kheu simie Aux tix ot kah daux veng in: heue.
Mai Aux tag nie lheu: nawb bwanson:, son pa ih pa un: kah nawh heue. Mai Aux tag tawx pwi pa hot pa sibhawm: nawh ih pa ih pa un: tom: sak heue.
Aux tag kieh cao giex kaing: li nawh khankix, jawg tix ceep kah kraung krax taoh, mai pwi pa singax singeh nawh khankix, ah lox sinum mai ah lox rhax pa gauxrhawm: gauxrhi: heiue:.
Aux tag kieh rung: lawm Davit lih tan heue. Aux hoik cox khre: kawk ngu son kaw pa hoik groi Aux rawm: bee heue.
Mai Aux tag teei krax pa kaig pa tua ceep kah pwi pa koeng kah nawh khankix, mai teei mhok khri: nawh pa pruh riang ceep kah piang kaing: nawh heue.
Moh Kah Paox Tix
Lai rhax haok Davit rawg bwan:
Puxaik pa ih rhawmrhi: simau paox tix, mai pa yuh paox yuh pie ot tix tau, kied mhawm: heue, mai kied sidaing: mhawm: grang heue.
Awm: rawm: bee pa hieh lih piang kaing: Arun mai ba: lih hu: kah hauk jheeh nawh tom: hoek kah ngawg sibex nawh heue.
Mai awm: rawm: ciex pa koe: kah piang gawng Heramon mai pa lih hu: kah gawng Zion heue. Kah dee an:, Simiang Siyiex hoik prawng ca: tix deuh bwanson: pa mhawm: pa im: ju leeing ju leeing phan: heue.
Lox Pa Kok Pa Yo, Pa Yaogyaw Ka Siyiex Lai rhax haok rawg bwan:
Siliex Simiang Siyiex pa pau kah daux nyiiex Siyiex pon sawm: khankix khawm uik eue, yaogyaw kah Simiang Siyiex heue.
Mai yaog taix tix kah dee singax singeh, mai yaogyaw kah Simiang Siyiex heue.
Kieh Simiang Siyiex Cao: pa yuh raoma:, mai haktiex, ot kah piang gawng Zion mai nawb bwanson: kah maix liak.
Lox Rhax Pa Yaogyaw
Yaogyaw kah ceukaux Simiang Siyiex heue; siliex Simiang Siyiex khankix eue, yaogyaw kah Nawh heue.
Pex pa cung kah daux nyiiex Siyiex khankix, mai pa pau kah jaong num: nyiiex Siyiex ex khankix eue, yaogyaw heue.
Mawh kheu Simiang Siyiex mawh pa jiet mhawm:, mai yaogyaw kah Simiang Siyiex heue. Mai rhax lai yaogyaw kah ceukaux Nawh heue. Pa yuh nan: mawh pa mhawm: grang heue.
Grawhgrawng: nawh, Simiang hoik laug tix teei kah ceu Yakop son Nawh, mai ceu pwi Isarelax mawh kraung cie Nawh heue.
Aux tawng grawng: Simiang Siyiex ex mawh Cao: pa ting khaing: Siyiex khawm uik heue.
Simiang Siyiex an:, awm: pa simie Nawh, Nawh Cao: hoik yuh raoma: mai haktiex mai rawm: sigrit sigra: pa raux pa mox kudauh kudee heue.
Mai Nawh Cao: kieh bhawm: rawm: haok kah dee sidauh haktiex heue. Nawh Cao: yuh pukplak praix pa viex lhiex, mai Nawh Cao: teei bhaung: lih khaing: daux teug kraungkhrai: Nawh heue.
Nawh Cao: plaux kawn: Ai:19 kah daux meung Ejiptux, jah kah pwi tom: hoek kah khawng: brie heue.
Meung Ejiptux eue, Nawh ploi: mhai: sakse grawng: ceu pa daox pa am: khankix, hoek kah maix, jah kah Simiang Pharaw, mai siliex nawh, mai pwi nawh khawm uik heue.
Nawh Cao: yuh kah ceu pwi tom: nie lauxleeing:, mai simiang pa ting min: pa mawh,
Sihon simiang khunhawkham meung Amawrix, mai Awgax simiang khunhawkham meung Bashan khankix yum:, mai yuh kah meung Khanan lauxleeing: khawm uik heue.
Mai teei tix tawx haktiex an:, mawh dee ot kix pa mawh sin: pwi Nawh Isarelax khankix heue.
Simiang Siyiex eue, ceukaux Maix kaux cong: jheengjheeng:, mai Simiang Siyiex eue, ceukaux Maix mawh pa doh keud doh sawn: kah ku ju leeing ju leeing phan: heue.
Mai Simiang Siyiex prawng ca: kah plak pwi cie Nawh khankix, mai doh keud doh sawn: kah son siliex Nawh khankix heue.
Mai rieng rao pa krub pwi tang: ceu tang: cat khankix, mawh mau, mawh khri: heue. Mawh kraung pa yuh pwi kah taix tix heue.
Koe: jheeh kawx, ang chix sikah, kix koe: ngai: kawx, ang chix yaox,
mai kix koe: yhaok kawx, ang chix mhong:, kah daux jheeh kix ang koe: ju toek bhawm: lih, bhawm: laig heue.
Cao: yuh khawm cao: pa deuh rhawm: kah, kix hoik awm: paox tix heiue:.
Ceu pwi Isarelax eue, yaogyaw kah Simiang Siyiex heue. Mai ceu pwi Arun eue, yaogyaw kah Simiang Siyiex heue.
Ceu pwi Lewix eue, yaogyaw kah Simiang Siyiex heue. Mai pex pa lhat pa graung kah Simiang Siyiex khankix eue, yaogyaw kah Simiang Siyiex heue.
Kieh koe: bwanson: kah Simiang Siyiex pa ot kah daux veng Yerusaliem mai kah piang gawng Zion liak. Haleluya!
Lox Rhax Yaogyaw Bwanson:
Yaogyaw kah bwanson: Simiang Siyiex, mawh kheu jiet mhawm: Nawh, mai krax caoxrhawm: Nawh koe: jheengjheeng: leeing ju heue.
Yaogyaw kah bwanson: Siyiex, mawh kheu mawh Nawh pa ting kah piang siyiex khawm uik, mai krax caoxrhawm: Nawh koe: jheengjheeng: leeing ju heue.
Yaogyaw kah bwanson: Simiang, mawh kheu mawh Nawh pa ting kah piang Simiang khawm uik, mai krax caoxrhawm: Nawh koe: jheengjheeng: leeing ju heue.
Yaogyaw kah Cao: pa yuh ceu pa daox pa am: Tix kaux khaing:, kheu koe: krax caoxrhawm: Nawh jheengjheeng: leeing ju heue.
Nawh teei cuyi: pingnya mai yuh raoma:, mawh kheu krax caoxrhawm: Nawh koe: jheengjheeng: leeing ju heue.
Nawh tawm haktiex kah piang rawm: khankix, mawh kheu krax caoxrhawm: Nawh koe: jheengjheeng: leeing ju heue.
Nawh yuh pa riieng pa ting, mawh kheu krax caoxrhawm: Nawh koe: jheengjheeng: leeing ju heue.
Nawh yuh singaix kieh mawh son pon singaix, mawh kheu krax caoxrhawm: Nawh koe: jheengjheeng: leeing ju heue.
Nawh yuh khix mai simuing: khankix, kieh mawh son ponsawm: heue. Mawh kheu krax caoxrhawm: Nawh koe: jheengjheeng: leeing ju heue.
Nawh plaux kawn: Ai: meung Ejiptux yum:, mawh kheu krax caoxrhawm: Nawh koe: jheeng: jheeng : leeing ju heue.
Nawh taoh ceu pwi Isrelax lih khaing: kix, mawh kheu krax caoxrhawm: Nawh koe: jheengjheeng: leeing ju heue.
Nawh teei taix pa ting siawpsibrawm, mai nyeu plawng: taix Tix yuh nan:, mawh kheu krax caoxrhawm: Nawh koe: jheengjheeng: leeing ju heue.
Mai yam tiang kix rawm: sigrit sigra: Edom dud hu: khawm ra: plak, mawh kheu krax caoxrhawm: Nawh koe: jheengjheeng: leeing ju heue.
Kieh ceu pwi Isarelax khankix preeng: hu: kah daux rawm: sigrit sigra:, mawh kheu krax caoxrhawm: Nawh koe: jheengjheeng: leeing ju heue.
Teei simiang Pharaw mai cao: giex kaing: naing nawh khankix, goh kah daux rawm: sigrit sigra: Edom, mawh kheu krax caoxrhawm: Nawh koe: jheengjheeng: leeing ju heue.
Nawh teei pwi Nawh khankix hu: tawx kah daux tiag daux tu, mawh kheu krax caoxrhawm: Nawh koe: jheengjheeng: leeing ju heue.
Nawh yuh kah simiang ting khankix lauxleeing:, mawh kheu krax caoxrhawm: Nawh koe: jheengjheeng: leeing ju heue.
Nawh teei simiang pa ting min: plakngai: khankix yum:, mawh kheu krax caoxrhawm: Nawh koe: jheengjheeng: leeing ju heue.
Nawh teei Sihon simiang khunhawkham meung Amawrix yum:, mawh kheu krax caoxrhawm: Nawh koe: jheengjheeng: leeing ju heue.
Nawh teei Awgax simiang khunhawkham meung Bashan yum:, mawh kheu krax caoxrhawm: Nawh koe: jheengjheeng: leeing ju heue.
Nawh teei haktiex dee ot kix tawx kah sin: Tix, mawh kheu krax caoxrhawm: Nawh koe: jheengjheeng: leeing ju heue.
Nawh teei tix tawx sin: kah siliex Nawh ceu pwi Isarelax khankix, mawh kheu krax caoxrhawm: Nawh koe: jheengjheeng: leeing ju heue.
Nawh doh keud doh sawn: kah ex, yam yaox ex tix ot dee tiiem, mawh kheu krax caoxrhawm: Nawh koe: jheengjheeng: leeing ju heue.
Nawh hoik taoh ex lih khaing: daux tawm: taix pwi pa koeng kah ex, mawh kheu krax caoxrhawm: Nawh koe: jheengjheeng: leeing ju heue.
Nawh tawx ceu pa ih pa un: kah can pa koe: khawm uik, mawh kheu krax caoxrhawm: Nawh koe: jheengjheeng: leeing ju heue.
Yaogyaw kah bwanson: Siyiex, Cao raoma:, mawh kheu krax caoxrhawm: Nawh koe: jheengjheeng: leeing ju heue.
Lox Ngia Pwi Isarilax Yam Yuh Siliex Pwi
Ex ngawm dex praok rawm: klawng: Babulon khankix, mai doh keud kah veng Zion, mai yiiem heue.
Mai ting: ex khankix, ex teei tix fak kah khaox (momakhax)20 khankix kah dee an: heue.
Grawhgrawng: nawh, kah dee an: kix pa viex ex hu: khankix, nhie: ex rhax lai, mai tuktiaktukte: kah ex, "Mai ah ex mhong: lox pa gauxrhawm: gauxrhi:, mai lox rhax pa rhax pex kah gawng Zion tix phuk phuk kah ex liak."
Ex tag pon ah lox rhax Simiang Siyiex, kah meung tang: dauh tang: dee yuh kah mawx?
Veng Yerusaliem eue, phan: aux piawm: kah maix, kieh taix khawn: dawm: aux, piawm: kah pa chix tix liak.
Phan: aux ang doh keud doh sawn: kah maix, phan: aux ang teei kah veng Yerusaliem, mai deuh kah dee mhawm:, lheu: khaing: pa gauxrhawm: gauxrhi: aux pa ting kieh dak aux, kawb kah ghok aux liak.
Simiang Siyiex eue, doh keud doh sawn: kah, singaix hoek yuh kix veng Yerusaliem laux, ceu pwi Edom khankix ah nin:, "Yuh nawh laux, yuh nawh laux, yuh laux tom: hoek kah jaong num: nawh heue."
Kawn: bun: Babulon eue, maix taksang hoek krax laux krax leeing: heue. Pwi pa deeh viied phimap kah maix awm: pa hoik yuh maix kah ex, koe: bwanson: heue.
Pwi pa teei kawnpraix maix mai blok kah piang simaox, koe: bwanson: heue.
Lox Rawg Bwan: Pa Yaogyaw Bwanson:
Simiang Siyiex eue, aux tag viex khawm rhawm: khawm rhi: tix yaogyaw kah Maix heue. Mai aux tag rhax lai yaogyaw kah Maix sivoe ngai: siyiex khankix heue.
Aux tag grux gawng tix krub Maix kah daux nyiiex bwan: Maix pa singax singeh mai yaogyaw ceukaux Maix, kheu krax caoxrhawm: Maix, mai sijax mukheu Maix heue. Grawhgrawng: nawh, Maix nie lheu: kieh sijax mukheu Maix ting khaing: ceukaux Maix heue.
Singaix kok yo aux kah Maix, Maix nghiiet kah lox aux, mai teei siawpsibrawm Maix mai kieh ju aux deeh koe: riang rao heue.
Simiang Siyiex eue, mai Simiang khunhawkham haktiex yaogyaw kah min: plakngai: Maix, kheu hoik mhong: kix lox pa hoik lih khaing: jheeh Maix khankix heue.
kix tag hawt kah daux krax Simiang Siyiex mai rhax lai heue. Grawhgrawng: nawh, min: plakngai: Simiang Siyiex kied ting heue.
Simiang Siyiex, viang mawh Nawh pa ot dee lhaong: kawx, jhak kah pwi pa awnrhawm: awnrhi: heue. Pwi pa ting rhawm: ting rhi: khankix, Nawh Cao: hoik tawng tom: dee singai heue.
Viang aux hu: kah daux pa kharhawm: kharhi: tom: nie kawx, Maix tag kieh aux im: ju heue. Maix nyeu taix tix kah pwi pa koeng, pa kied songrhawm: songrhi: kah aux khankix, taix khawn: dawm: Maix taoh tix teei kah aux heue.
Simiang Siyiex, tag kieh grawng: pa dex mai aux hoik hoik, Simiang Siyiex eue, krax caoxrhawm: Maix, kaux cong: jheengjheeng: leeing ju, Maix paw lai tik kah ceu pa hoik yuh Maix kah taix tix liak.
Yaogyaw Kash Cuyi: Pingnya Siyiex
Simiang Siyiex eue, Maix chawkcheng: tix yaox aux Maix tawng heue.
Maix hoik tawng kah pa ngawm aux, mai pa cung aux heue. Maix ot dee singai mai tawng kah pa keud pa sawn: aux heue.
Maix chawkcheng: tix yaox kah pa hu: pa it aux, mai Maix tawng kah jhawm: hu: jhawm: ing: aux khawm uik heue.
Kah: sivoe ang aux nyang lih lox tix gum kawx, Simiang Siyiex eue, Maix hoik tawng kah grawng: khawm uik heue.
Maix ot hawt vungviang mai aux, mai teei taix Maix deuh kah piang aux heue.
Krax tawng krax yung an: khankix, mawh ceu pa daox pa am:, pa ang aux lai chix yuh, ang lai pon tix hoek krup kah heue.
Aux tag sang hu: dee mawx? Sonsang luan khaing: Khwan Maix? Tag sang to: dee mawx? Sonsang luan khaing: pakngai: Maix?
Phan: aux haok daux raoma: kawx, Maix hoik ot tan, phan: aux tawm tix it kah daux meung yum: kawx, Maix hoik ot tan heue.
Phan: aux teei pruik ponngawb mai hu: dee sidauh rawm: sigrit sigra: kawx,
kah dee an: kawx, taix Maix tag tawx kah aux, mai taix khawn dawm: Maix giex kah aux heue.
Phan: aux ah, pa faik tawb kheem: aux, yam ponsawm: kawx pa riieng jhan rob vungviang aux heue.
Pa faik ang doh pon tawb kheem: sivoe ngai: Maix tix ceu kawx, ponsawm: riang awm: pon singaix, pa riieng kiex pa faik awm: paox tix sivoe ngai: Maix heue.
Maix hoik phan: hoik yuh sok lax aux, mai tokaux aux khawm uik, kah daux vaig miex tix heue.
Aux tag yaogyaw kah Maix, mawh kheu aux hoik grum naog kah mhai: sakse ceu pa daox pa am:, mai ceu pa lhat pa graung khankix heue. Kaing pa yuh Maix in: khankix mawh ceu pa daox pa am:, maiju aux hoik tawng mawh tete heue.
Tokaux aux hoik sidawng: sivoe ngai: Maix, yam kleuk yam yuh Maix aux, kah greem: tiex kah dee glip heue.
Kah: ang aux nyang bax mawh pwi, Maix hoik yaox heue. Mai kah: sivoe ang Maix nyang yuh kah ceu an: khankix tix ceu kawx, Maix hoik tiem: tix deuh daux carang Maix khawm uik heue.
Siyiex aux eue, krax pa keud pa sawn: Maix kah aux mawh ceu pa kied ting ngawh ting jum mai kied nie sigrien sigre heue.
Phan: aux simin tix yaox nawh, nie lheu: nie khaing: mhaik khankix heue. Mai yam siduad aux, ot tau mai Maix heue.
Siyiex aux eue, Maix teei pwi pa ang rah ang see khankix yum: liak. Pex pa pah pwi yum: khankix eue, lih hu: khaing: aux heue.
Kix ah lox pa lah pa cha: kah Maix, mai pwi pa koeng kah Maix khankix, nieb ah lox pa ang cee ang cak kah Maix huee:.
Simiang Siyiex eue, aux koeng kah pwi pa koeng kah Maix khankix, ang mawh lie? Aux seeing: brai: kah pwi pa cung tang: plak ang mawh lie?
Aux koeng kah kix, khawm rhawm: khawm rhi: tix, mai deuh kix mawh pwi pa koeng aux heue.
Siyiex aux eue, Maix chawkcheng: kah aux mai tawng daux rhawm: aux heue. Cheu: tix yaox aux, mai tawng kah rhawm: pa keud pa sawn: aux liak.
Jhak kah aux, hu: ang aux hu: kah daux krax pa caox lie, mai tawx aux hu: kah daux krax leeing ju leeing phan: liak.
Rawg Bwan:, Sonsang Priex
Simiang siyiex eue, taoh aux khaing: tawm: taix pwi pa caox liak. Mai tiebtie teem: coi aux khaing: tawm: taix pwi pa caox khankix liak.
Kix keud ceu pa ang mhawm: kah daux rhawm: tix, mai kix cheeik naing koe: ku singaix jheengjheeng: heue.
Mai kix klaing: dak tix, awm: siuing:, siyieb jheeh kix koe: jai: awm: siuing: mheem: heue.
Simiang Siyiex eue, tiebtie mai teem: coi aux khaing: tawm: taix pwi pa ang rah ang see, mai tiebtie teem: coi aux khaing: tawm: taix pwi pa caox pa caig mai keud tix sang kieh aux goh heue.
Pwi pa ting rhawm: ting rhi: khankix, teei maox siah mai mox tix taong: kie kah son aux, mai kix teei rub di tix deuh kah daux krax kah son aux heue.
Aux krai tix deuh kah Simiang Siyiex ah nin:, "Maix mawh Siyiex aux heue." Simiang Siyiex aux eue, nghiiet kah lox pa rawg pa mhaing: aux liak.
Simiang Siyiex aux eue, siawpsibrawm pa taoh Maix aux, Maix tawb kheem: kah kaing: aux singaix puing: naing heue.
Simiang Siyiex eue, paw lai tawx akhwang: pa grum naog kah pwi pa ang rah ang see liak. Mai paw lai tawx krax pa keud kix grum naog liak.
Yam yaog kix kaing: mai rob vungviang aux, lox pa ang mhawm: pa lih khaing: jheeh kix, kieh deeh hoek kah piang kix liak.
Kieh gaox ngu khankix rau kah piang kix liak. Mai kieh rau kah daux ngu mai kah daux pa kied raux liak. Paw kieh kix deeh pon kaoh tix bawg kawx heue.
Mai pwi pa ah lox pa caox pa caig khankix, paw kieh dee ot kix kaux cong: piang haktiex in:, mai krax kharhawm: kharhi: khankix, hawt leue khaix kix, pa mawh pwi pa caox pa caig, tom: sidauh lauxleeing: heue.
Aux tawng Simiang Siyiex tem: coi kah pwi pa hot pa sibhawm:, mai prawng ca: ot plak pwi pa hot pa sibhawm: heue.
Mai pwi pa rauh pa see khankix, tag yaogyaw kah ceukaux Maix, mai pwi pa rauh pa see kah daux rhawm: daux rhi: khankix, pon tix ot tau mai Maix heue.
Lox Pa Rawg Bwan: Ponbo
Simiang Siyiex eue, aux kok yo Maix, nied tix hoek kah aux liak. Mai yam kok yo aux kah Maix, nghiiet kah lox aux liak.
Kieh pa rawg pa mhaing: aux, awm: nyawng bhawng: pa sang gleeing tix tan, mai kieh aux yaog taix tix rien awm: krax pa tan pa lu plak ponbo sivoe ngai: Maix liak.
Simiang Siyiex eue, deuh pa tiebtie sivoe jheeh aux liak, pau siviex siyieb jheeh aux liak.
Paw kieh rhawm: aux keud kah ceu pa ang mhawm: khankix, paw lai kieh aux neuex mai pwi pa yuh phimap phigrham:, mai paw lai kieh aux hu: kah daux krax pwi pa ang rah ang see khankix liak. Mai paw lai kieh aux ih ceu pa ih pwi an: khankix liak.
Kieh pwi pa rauh pa see sivied tix gau aux liak. Mai tag koe: bwanson: heue. Kieh nawh sidiex gau aux liak. Tag mawh rawm: bee pa kraix kah kaing: aux heue. Baox yuh kawx, paw kieh kaing: aux thiang: liak. Yamin aux ot tang: plak mai rawg bwan: grawng: pwi pa nieb yuh khankix heue.
Pwi pa ting cao: giex kaing: kix, ploi: rau kah daux rang:, kix mhong: lox aux heue. Mai lox aux mawh pa nyawm tix nghiiet.
Awm: pung prang: khix lug pwi, si-ang: ex kawx, pung prang: kah siviex meung yum: heue.
Simiang Siyiex eue, aux maong tix jhak kah Maix heue. Aux deuh rhawm: kah Maix heue.
Paw lai hieh tix tik ju aux liak, Maix kieh aux luan khaing: kie pa taung: kix son aux, mai kieh aux luan khaing: jhawk pa taong: pwi pa yuh phimap khankix liak.
Yam hoik luan aux khaing: khankix, kieh pwi pa ang rah ang see khankix, kieh cao: kix deeh krix kah kie pa hoik taong: kix tiru liak.
Lox Rawg Bwan: Sonsang Teem:
Aux kok yo kah Simiang Siyiex, aux rawg bwan: mai kok yo kah Simiang Siyiex heue.
Mai aux ah lox ngia sivoe ngai: Nawh, mai krai lao ceu pa kharhawm: kharhi: kah sivoe ngai: Nawh heue.
Yam laux rhawm: aux, Maix hoik tawng kah krax hu: aux heue. Kix briex mox tix taong: kie kah krax hu: aux heue.
Aux jhak kah plak taix khawn: dawm:, mai ang yaox kah pwi pa tawng aux, mai ang koe: krax glawd krax to:, pwi pa lhawk kah ju aux kah ang koe:.
Simiang Siyiex eue, aux kok yo kah Maix heue. Maix mawh dee deuh aux rhawm:, sonsang pon aux tix ot meung dee ot pwi pa im: ju khankix heue.
Nghiiet kah lox pa kok pa yo aux, pwi pa kharhawm: kharhi: liak. Mai taoh aux lih khaing: daux tawm: taix pwi pa tuktiaktukte: kah aux liak. Mawh kheu kix ting riang ting rao khaing: aux heue.
Mai taoh aux lih khaing: daux thawng:, sonsang pon aux tix yaogyaw ceukaux Maix liak. Yam yuh Maix bwanson: kah aux, kix pa mawh pwi pa rauh pa see khankix, tag ot rob vungviang aux heue.
Lox Rawg Bwan: Sonsang Teem:
Simiang Siyiex eue, nghiiet kah lox pa rawg aux bwan: mai ceu pa rawg pa mhaing: aux liak. Mai deeh pawk kah lox aux awm: pa koe: sijax mukheu mai pa rauh pa see Maix liak.
Maix paw lai prawng ca: aux liak, pwi mawx ang ah, pwi pa im: ju khankix, pwi pa ang koe: phimap, pa rauh pa see sivoe ngai: Maix ang koe: tix kaux kawx.
Pwi pa koeng khankix, tuktiaktukte: kah ju aux, dig ju aux tom: hoek sidaing: tiex, mai kieh aux ot kah daux pa faik awm: pwi pa hoik rheung: yum: heue.
Aux laux rhawm: mai rhawm: aux bih heue.
Mai aux doh keuh kah singaix bawg pa hoik luan khankix dix, mai keud can pa hoik yuh Maix khawm uik, mai pa hoik yuh Maix kah taix Tix khankix heue.
Aux taong taix tix kah Maix heue, mai ju aux simie tix ih Maix, awm: tiex krox pa simie tix nyaux rawm: heue.
Simiang Siyiex eue, nied tix deeh pawk kah lox aux liak, aux hoik laux rhawm: heue. Paw lai mox ngai: Maix khaing: aux, awm: kix pa lih hu: daux tiex heue.
Kieh aux mhong: krax caoxrhawm: Maix, yam ponngawb caocao liak, aux deuh rhawm: kah Maix heue. Kieh Maix tawng krax hu: aux liak, aux viex rhawm: tix hu: kah Maix heue.
Simiang Siyiex eue, taoh aux khaing: tawm: taix pwi pa koeng kah aux liak. Aux deuh rhawm: kah Maix heue.
Gau kah aux, sonsang chix hawt aux alo Maix liak, Maix mawh Siyiex aux heue. Kieh Khwan singax Maix thong: aux hu: kah dee lung: dee mhawm: liak.
Simiang Siyiex eue, kieh aux im: ju kheu ceukaux Maix liak, teei ju aux lih khaing: kah daux pa kharhawm: kharhi: awm: pa rauh pa see Maix liak.
Awm: koe: krax caoxrhawm: Maix, teei tix tik pwi pa koeng kah aux khawm uik, mai yuh lauxleeing: kah pwi pa tuktiaktukte: kah aux khawm uik, aux mawh siliex Maix heue.
Lox Yaogyaw Pwi Pa Pex
Simiang Siyiex pa mawh rang: ting, mai Cao: pa gau aux chix puing: naing, kieh koe: bwanson: liak.
Nawh caoxrhawm: kah aux, mai mawh guh veng aux mawh tab aux, mai mawh Cao: pa taoh aux lih mai Cao: pa tiebtie aux, mai mawh dee deuh, Cao: pa teei ceu pwi aux deuh greem: aux heue.
Simiang Siyiex eue, kawn: pwi mawh pa yuh kah mawx? Khex deuh Maix tix tawng lie? Kawn: pwi mawh pa yuh kah mawx, Maix lai doh keud doh sawn: kah nawh?
Kawn: pwi awm: ngie taox bhawm:, mai bawg yam nawh dawd mai chix luan hu:, awm: kawn: peue: heue.
Simiang Siyiex eue, Maix plak raoma:, mai lih hoek liak, chuh kah gawng khankix liak, kix tag lih taox ngu heue.
Ploi: pukplak praix Maix mai puing: ak Maix kah kix, mai tuktiaktukte: kah kix, mai kieh kix pung prang: hu: liak.
Yaog taix Maix dee lhaong:, mai taoh aux lih khaing: kah daux rawm: pa kied raux mai kah daux tawm: taix pwi tang: praix tang: klawng: khankix liak.
Mai jheeh kix chix ah lox pa pie pa lhen: mai taix khawn: dawm: mawh pa chix pie chix lhen: heue.
Siyiex eue, aux tag ah lox rhax pa khraox kah Maix heue. Mai aux tah ting: pa koe: maox kao: nyaing mai yaogyaw kah Maix heue.
Maix tawx krax pa pex pa pon kah simiang khunhawkham khankix mai kieh siliex Maix Davit luan khaing: krax lawm vaig lawm pliah heue.
Mai taoh aux lih khaing: tawm: taix pwi tang: praix tang: klawng: liak, jheeh kix chix ah lox pa pie pa lhen:, mai taix khawn: dawm: kix kawx chix pie chix lhen: heue.
Kieh kawn: simex ex, pa awn: ju khankix, ting lhaong: awm: kawn: khaox pa sum:, mai kieh kawn: bun: ex khankix, kieh awm: rong: simaox pa mhawm: pa koe: kah daog nyiiex bwan: liak.
Kah daux nyiiex daux ma: aux, kieh grum naog kraungkhrai: pa shiao mai pa ih pa un:, mai plak praix kieh yung: aux khankix keh haoh hun: kaing: rheng: kaing: mheem: liak.
Moi aux khankix, kieh haoh hun: tom: nie, paw kieh grai:, paw kieh pwi nieb rhim: tix teei, mai yam lih hu: aux daux krax daux laux, paw kieh koe: lox riag lox yo liak.
Pwi pa yaox tix ot yuh nan: koe: bwanson: heue. Mai pwi pa kieh Simiang Siyiex mawh Siyiex kix koe: bwanson: heue.
Lox Rhax Yaogyaw
Simiang Siyiex Khunhawkham aux eue, aux yaog Maix ting, mai yaogyaw kah ceukaux Maix leeing ju leeing phan: heue.
Aux tag yaogyaw kah Maix ku singaix jheengjheeng:, mai aux tag yaogyaw kah ceukaux Maix ku ju leeing ju leeing phan: heue.
Simiang Siyiex mawh Cao: pa ting pa lhaong:, mai khaw: tix yaogyaw kah Nawh heue. Mai Nawh ting lhaong: miex ding ex ang dak uik krai heue.
Kawn: pwi tix ju hoik tix ju, yaogyaw kah kaing pa hoik yuh Maix, mai plak jhi: kah siawpsibrawm Maix pa ting khankix heue.
Aux doh keud mai yaogyaw kah siawpsibrawm pa ting pa hoik yuh Maix, mai ceu pa daox pa am: pa yuh Maix khankix heue.
Mai kix krai grawng: siawpsibrawm Maix pa khaw: tix lhat tix graung khankix, mai aux kawx, tag sang krai grawng: pa ting lhaong: Maix heue.
Kix doh keud doh sawn: mai krai grawng: pa jiet mhawm: Maix, kix tag rhax lai gauxrhawm: gauxrhi: grawng: pa rauh pa see Maix heue.
Simiang Siyiex hoik grum naog bwanson: krax caoxrhawm: mai koe: krax pa gun pa yeung, mai krax caoxrawm: Nawh kied ting heue.
Simiang Siyiex yuh pa mhawm: khawm uik, mai Nawh caoxrhawm: kah pa hoik phan: hoik deuh Tix khawm uik heue.
Simiang Siyiex eue, can pa phan: pa deuh Maix khankix, yaoyaw kah bwanson: Maix, mai pwi pa singax singeh khankix yaogyaw kah Maix heue.
Kix tag krai grawng: min: plakngai: meung Maix mai krai grawng: siawpsibrawm Maix,
mai tag krai grawng: siawpsibrawm pa ting pa lhaong: pa hoik yuh Maix khankix, mai min: plakngai: meung Maix kah kawn: pwi khankix heue.
Meung Maix mawh meung leeing ju leeing phan:, mai Maix mawh Simiang ku ju leeing ju leeing phan: heue.
Simiang Siyiex joh jhan kah pwi pa goh khankix, mai yaog kaoh kah pwi pa awnrhawm: awnrhi: khankix heue.
Mai ceu pa phan: pa deuh pa im: ju khankix khawm uik, maong tix jhak kah Maix, mai yam hoek bawg yam, Maix tag tawx kix ih heue.
Mai Maix di taix tix, mai kieh can pa im: ju khankix sak heue.
Daux krax Simiang Siyiex mawh pa rauh pa see, mai pa yuh Nawh tix deuh khawm uik mawh pa singax singeh heue.
Simiang Siyiex ot dex mai pwi pa kaux sijax mai pa rawg pa mhaing: kah Nawh khawm uik heue.
Nawh Cao: kieh alo pwi pa lhat pa graung kah Nawh, grum naog heue. Mai Nawh nghiiet kah lox pa kok pa yo kix mai taoh kah kix heue.
Simiang Siyiex teem: coi kah pwi pa moh kah Nawh khankix heue. Mai Nawh yuh lauxleeing: kah pwi pa ang rah ang see khankix heue.
Mai jheeh aux tag ah lox rhax yaogyaw kah Simiang Siyiex heue. Keh pwi khawm uik yaogyaw kah ceukaux Nawh pa singax singeh ku ju leeing ju leeing phan: heue.
Yaogyaw Kah Siyiex
Yaogyaw kah Simiang Siyiex heue, ju aux eue, yaogyaw kah Simiang Siyiex heue.
Yam kawn: im: ju aux, aux tag sang yaogyaw kah Simiang Siyiex heue. Mai aux tag yaogyaw kah Maix yam kawn: klawd aux heue.
Paw deuh rhawm: kah simiang khankix, mai kah kawn: pwi, pa ang chix taoh.
Yam lih ju khaing: nawh, nawh deeh kah tiex heue. Kah daux singaix an:, krax pa keud pa sawn: nawh kawx grai: hu: heue.
Pwi pa teem: coi Siyiex Yakop, mai pwi pa krox pa jun pot kah Simiang Siyiex nawh, koe: bwanson: heue.
Nawh Cao: yuh raoma: mai haktiex, mai rawm: sigrit sigra: mai can pa koe: khankix khawm uik, priex sijax mukheu Nawh khawm uik heue.
Nawh Cao: prawng ca: hawt beenli mai ot plak pwi pa yaox tix kham: geu: krax tuktiaktukte: heue. Mai Nawh tawx pwi pa cairhawm: khankix sawm:, mai Nawh ploi: kah pwi pa hoik laung khankix heue.
Simiang Siyiex kieh pwi pa dug ngai: khankix deeh chix yaox heue. Mai Simiang Siyiex yaog pwi pa awnrhawm: awnrhi: khankix kaoh heue. Simiang Siyiex moh kah pwi pa rauh pa see khankix heue.
Mai Simiang Siyiex teem: coi kah nyo sinie khankix, mai joh jhan kah miexmai: mai kawn: doe: pwi loeg khankix heue. Mai krax pwi pa ang rah ang see khankix, Nawh kieh kawk kieh vawk heue.
Mai veng Zion eue, Simiang Siyiex maix mawh Simiang ku ju leeing ju leeing phan: heue. Haleluya!
Yaogyaw Kah Simiang Pa Ting Siawpsibrawm
Yaogyaw kah Simiang Siyiex heue, grawhgrawng: nawh, krax pa yaogyaw ex kah Simiang Siyiex mawh kaing pa khaw: pa keung: ex tix yuh heue.
Simiang Siyiex yuh kah veng Yerusaliem mai kieh pwi Isarelax pa hoik to: dee singai khankix, deeh kieh kix hoek khrawm: paox tix tan heue.
Nawh Cao: kieh pwi pa laux rhawm: khankix nyawmrhawm: nyawm rhi:, mai cox dee saux kix moi: heue.
Nawh Cao: simin kah simuing: khankix, mai sum: tix deuh ceukaux mu: mawx ceukaux mu: an: heue.
Siyiex ex mawh pa kied ting siawpsibrawm, mai krax tawng krax yung Nawh ang lai uik krai heue.
Simiang Siyiex yaog kaoh kah pwi pa awnrhawm: awnrhi: khankix, mai Nawh Cao: kieh pwi pa ang rah ang see khankix goh kah piang tiex heue.
Mai rhax lai yaogyaw kah bwanson: Simiang Siyiex heue. Mai tah ting: yaogyaw kah Siyiex ex awawx.
Nawh Cao: teei paiawm: mai tawb kheem: kah raoma:, mai khre: rawm: lhiex son haktiex, kieh rib riem kuah kah piang gawng lua khankix heue.
Nawh Cao: tawx ceu pa ih kah totiag totu mai kawn: lak pa ah lox khankix heue.
Nawh Cao: ang moh kah riang rao brung mai plawng: taix plawng: caong pwi heue.
Simiang Siyiex moh kah pwi pa lhat pa graung kah Nawh, mai moh kah pwi pa krox pa jun pot kah krax caoxrhawm: Nawh heue.
Veng Yerusaliem eue, yaogyaw kah Simiang Siyiex awawx. Veng Zion eue, yaogyaw kah Siyiex maix awawx.
Grawhgrawng: nawh, Nawh Cao: kieh siviex veng maix kaux cong: mai nawb bwanson: kah kawnpraix pa ot mai maix heue.
Nawh Cao: kieh mee: haktiex maix yiien: yawg tix, mai tawx nghox, koi:, pa kied mhawm: sonsang ih maix tom: sak heue.
Mai Nawh Cao: ploi: gumlox tix hu: kah piang haktiex, mai gumlox Nawh phai: khran tah tom: sidauh haktiex heue.
Nawh Cao: tawx rawmrha: awm: hauk yung:, mai Nawh Cao: rhuat rawm: ciex lih awm: nyaox heue.
Nawh Cao: ploi: mu: pre: lih awm: ceu pa ih pa un:, mai pwi mawx pon kham: tix cung, kah pa kied sikiied an:.
Nawh Cao: baox deeh ploi: gumlox Tix, mai kieh rawmrha: an: ceh hu: awm: rawm: heue. Nawh kieh bhaung: hoek, mai kieh rawm: lih hu: heue.
Nawh tawx gumlox Tix kah ceu pwi Yakop, mai lox tawm: beenli Nawh mai krax prawng ca: Nawh kah pwi Isarelax heue.
Nawh Cao: ang yuh nan:, kah pwi tang: ceu, mai kix ang tawng kah krax prawng ca: Nawh tix deuh. Haleluya!
Lox Kok Pa Yaogyaw Kah Siyiex
Yaogyaw kah Simiang Siyiex piang raoma: awawx. Mai yaogyaw kah Nawh dee kied lhaong: heue.
Kawncau Siyiex khankix eue, yaogyaw kah Nawh Cao: awawx. Mai cub kru naing raoma: khawm uik eue, yaogyaw kah Nawh Cao: heue.
Khix, singaix khankix eue, yaogyaw kah Siyiex heue. Simuing: pa pruh riang khankix khawm uik eue, yaogyaw kah Nawh Cao: heue.
Raoma: tix thaix hoik tix thaix, mai rawm: raoma: khankix eue, yaogyaw kah Nawh Cao: heue.
Mai kieh kix yaogyaw kah ceukaux Simiang Siyiex, kheu Nawh Cao: tawx lox mai hoik yuh tix deuh kah kix heue.
Nawh Cao: kieh kix kaux cong: leeing ju, mai ang kieh lheu: kah lox tawm: jhawm: krai Nawh heue.
Mai can pa ot kah piang haktiex khawm uik eue, yaogyaw kah Simiang Siyiex heue. Kax ting khankix mai can pa koe: dee raux,
ngu, mai mu: pre:, rawmrha: mai taox bhawm:, mai bhaung: keu: kanglux, nghiiet kah lox Nawh.
Mai gawng ting, gawng iak pa koe: khankix, mai khaox plix pa plix khankix, mai khaox piakvan pa koe: khankix,
mai totiag pa he:, mai pa nge, mai totiag pa chix mo mai sim: pa pu: khankix,
mai simiang khunhawkham haktiex khankix, mai kawn: nyiiex pwi yaong: khankix, simiang mai cao: pa prawng ca: haktiex khankix,
bunkrih mai sinaw khankix, kuad mai kawn: nyawm khankix eue, kieh yaogyaw kah Simiang Siyiex heue.
Mawh kheu ceukaux Nawh tix kaux khaing: pa jiet mhawm:, mai koe: kah piang haktiex mai meung raoma: heue. Kieh yaogyaw kah ceukaux Simiang Siyiex liak.
Nawh cao: yaog ting kah pwi Nawh khankix, mai pwi pa singax singeh pa mawh ceu pwi Isarelax cub pwi pa ot dex nawh khankix, yaogyaw kah Nawh Cao: heue. Haleluya!
Lox Rhax Yaogyaw
Ah lox rhax pa khraox mai yaogyaw kah Simiang Siyiex mai min: plakngai: Nawh kah dee khrawm: pwi pa singax singeh khankix heue.
Kieh ceu pwi Isarelax gauxrhawm: gauxrhi: kah daux Cao: pa phan: pa deuh pex liak, mai kieh pwi Zion khankix gauxrhawm: gauxrhi: kah daux Simiang Khunhawkham kix liak.
Kieh kix graoh thiao: mai yaogyaw kah ceukaux Nawh liak, mai kieh kix tah kraung:, tah ting: mai yaogyaw kah Nawh Cao: liak.
Grawhgrawng: nawh, Simiang Siyiex moh kah pwi Nawh khankix, mai Nawh kieh pwi pa awnrhawm: awnrhi: khankix koe: min: plakngai: kah krax taoh Nawh heue.
Mai kieh pwi pa singax singeh khankix gauxrhawm: gauxrhi: liak. Kieh rhax lai pa gauxrhawm: gauxrhi: kah dee it dee tum kix liak.
Kieh krax pa yaogyaw min: plakngai: Siyiex koe: kah jheeh jhai: kix liak. Mai kieh vaig lawm khawm ra: plak koe: kah tawm: taix kix liak.
Kieh deeh tawx phimap kah pwi tang: ceu tang: cat khankix, awm: pa khaw: mai beenli mai tawx krax pa kharhawm: kharhi: kah pwi khankix,
teei ceng mai phyawk kah simiang khunhawkham khankix, mai teei ceng phyawk kah simiang greem: kix,
mai sonsang prawng ca: kah phimap, awm: pa hoik tiem: tix deuh mai pwi pa singax singeh Nawh khankix koe: min: plakngai: heue. Haleluya!
Yaogyaw Kah Siyiex
Yaogyaw kah Siyiex kah dee singax singeh heue. Yaogyaw kah Nawh Cao: piang raoma: dee sidawng: siawpsibrawm Nawh Cao: heue.
Yaogyaw kah Nawh, mawh kheu Nawh teei siawpsibrawm mai yuh tix deuh kah ceu in: khankix heue. Mai yaogyaw kah Nawh Cao: kheu mawh Nawh Cao: pa kied ting kied lhaong: heue.
Phlu: teettawng mai yaogyaw kah Nawh heue. Tah ting: mai tah ting: si:, yaogyaw kah Nawh Cao: heue.
Tah kraung: mai graoh thiao: mai yaogyaw kah Nawh Cao: heue. Tah ting: si: pa grum naog maox khankix, mai phlu: byaong phlu: pi: mai yaogyaw kah Nawh Cao: heue.
Tah chiang: lox pa kied luah pa sinum mai yaogyaw kah Nawh Cao: heue. Mai tah chiang: lox pa gauxrhawm: gauxrhi: mai yaogyaw kah Nawh Cao: heue.
Mai kieh can pa im: ju khawm uik, yaogyaw kah Simiang Siyiex heue. Haleluya!
LAI LOX KAB
(Proverbs)
Lox Kab
Gumlox Pa Jah
Gumlox pa kied raux lai lox kab pa tiiem: Sawlamun kawn: simex Davit khunhawkham Isarilax tix deuh.
Kieh tawng kah cuyi: pingnya, kah pa rauh pa see, mai tawng kah lox been upate pa rauh pa see.
Kieh rieb tix teei kah ceu pa gau cuyi: pingnya, mai yuh pa rauh pa see, mai prawng ca: rah see, mai yuh kah daux pa rauh pa see heue.
Kieh pwi caox deeh lhak deeh haing:, mai tawx grum naog krax tawng krax yung pingnya satix kah sinaw khankix heue.
Mawh kheu pwi pa koe: cuyi: pingnya khankix, nghiiet mai tag sang ting lhang: kah cuyi: pingnya heue.
Pwi pa mhawm: cuyi: pingnya khankix, chix keud chix krai dee bleeh lox pa raux pa mox mai tag sang mawh sara pa ting cuyi: pingnya heue.
Num: Cuyi: Pingnya
Rhawm: pa lhat pa graung kah Simiang Siyiex, mawh num: cuyi: pingnya khawm uik heue. Pwi pa caox khankix, yuh pa ang cee ang cak kah been ceu pa gau kah cuyi: pingnya khankix heue.
Lox Pa Tawx Riang Rao Mai Satix
Kawn: simex aux eue, nghiiet kah lox pa sidiex gau keeing: maix, mai paw lai tik kah ceu pa sidiex gau miex maix awawx.
Lox ceu an: khankix, mawh pa mhawm: grang son kaing: maix, mai mawh min: plakngai: pa vhua: kah ngawg maix heue.
Kawn: simex aux eue, phan: pwi caox nyawglaw: kah maix paw lai nghiiet.
Phan: kix ah nin: kah maix, hawt hu: mai ex, ex kuan tix pah ju pwi yum:, mai ex jawm kah kix pa ang koe: phimap tidtix heue.
Awm: pa bleet meung yum: tix ih kah pwi pa laig kah daux simeeig khankix, ex kawx bleet tix ih kah pwi pa im: ju khankix heue.
Phan: ex yaox kraungkhrai: pa ngawh kuceu, ex tud rhim: tix teei mai sau: tom: naog kah daux nyiiex ex heue.
Rom tix yuh paox pie tau mai ex, mai ex gwieh kraungkhrai: pa pon ex sidu awm: paox tix ah nan: kawx,
kawn: simex aux eue, paw lai hu: tau mai kix, via khaing: krax pa hu: kix.
Grawhgrawng: nawh, caong kix phai: to: kah daux phimap, mai kix phai: sonsang pah ju pwi yum: heue.
Rub pa nah tix deuh sivoe ngai: sim: mai mawh pa giex going, ang lih tix mawh tidtix.
Pwi caox an: khankix, pau mai hieh nham: tokaux tix, mai jawm tix pah kah ju tokaux tix heue.
Pwi pa sawg mau khri:, kraungkhrai: kah daux krax pa ang rah ang see khankix khawm uik, bwanson: pa sawg kix an:, chix kieh ju tokaux kix yum: heue.
Cuyi: pingnya kok yo kah praix, mai chix ploi: lox tix lih kah daux krax khankix heue.
Lox pa kok yo nawh, kah dee kum: dee kawng: ang ah, kah diang siviex veng ang ah, kah daux veng ang ah, mai krai lox ah nin:,
pwi caox khankix eue, pex moh kah pa caox pa caig, pwi pa chix sa chix lao mai gauxrhawm: kah daux pa sa pa lao, mai pwi pa caox khankix, chix koeng kah cuyi: pingnya rheung: miex grheung:?
Nghiiet kah lox pa sidiex gau aux, deeh tieh loh tix, jhak heue, Aux prauk Khwan Aux lih kah piang pex, mai pex tag tawng dee bleeh lox Aux pa raux pa mox heue.
Aux kok kah pex, kheu thiang: pex tix tik, mai Aux taong taix Tix kah pex, mai pex ang kieh koe: mu:.
Pex tik kah lox pa tawx Aux satix kah pex, mawh kheu ang pex rhawm: nghiiet kah lox pa sidiex Aux tix gum kawx.
Yam yaox pex krax khi: krax glawh Aux tag nyiah heue. Yam hoek pex krax pa lhat pa graung Aux nyiah maung pex heue.
Yam yaox pex awm: phlu: bhaung: keu: kang: lux, mai yam yaox pex krax laux krax leeing:, awm: hoek bhaung: caox kah piang pex, mai yam yaox pex pa hot pa sibhawm:, mai pa kharhawm: kharhi:, kah piang pex, mai kix kok yo Aux kawx, Aux ang lai pawk.
Viang kix coca: tix sawg Aux kawx, ang lai yaox Aux.
Grawhgrawng: nawh, kix koeng kah cuyi: pingnya mai kix ang koe: rhawm: pa lhat pa graung kah.
Kix ang nghiiet kah lox pa tawx aux satix, mai kix yuh ceu pa ang cee ang cak kah can ceu pa sidiex aux khawm uik heue.
Mawh kheu nan:, kix yaox tix ih plix phimap pa hoik yuh tix, mai kix sak kah ceu pa keud kix heue.
Pwi pa ang koe: cuyi: pingnya, lud krax mai hoek krax som ju heue. Pwi caox khankix, ang koe: satix mai hoek krax laux krax leeing: heue.
Pwi pa nghiiet kah lox aux khankix, ang yaox krax lhat krax graung, yaox tix ot mhawm: yiien: yawg tix mhawmmhawm: heue.
Bwanson: Cuyi: Pingnya
Kawn: simex aux eue, phan: maix nghiiet kah lox aux, mai sau: lox tawm: beenli aux kah daux rhawmrhi: maix.
Taong yhaok maix, mai viex khawm rhawm: khawm rhi:, sawg kah cuyi: pingnya.
Pwi pa kok pa sawg kah cuyi: pingnya, cuyi: pingnya hawt khaix lox pa yo nawh.
Awm: pa sawg kah mau sawg kah cuyi: pingnya, mai awm: pa sawg kah kraungkhrai: pa hoik mox mai sawg kah pingnya.
Rhawm: pa lhat graung kah Simiang Siyiex mawh pa grum naog kah cuyi: pingnya, pa tawng pa yung kah Siyiex heue.
Grawhgrawng: nawh, Simiang Siyiex chix tawx cuyi: pingnya, mai krax tawng krax yung lih khaing: daux jheeh Nawh Cao: heue.
Siyiex khrawm: tix deuh cuyi: pingnya son pwi rah pwi see, mai Siyiex mawh pa tiebtie kah pwi pa yuh pa rauh pa see heue.
Siyiex priex kah pwi Nawh pa yuh pa rauh pa see, mai kah daux krax pa rauh pa see, mai pau daux krax pa lawng kix heue.
Kheu bwanson: Siyiex, maix chix yuh kaing pa mhawm:, mai chix prawng ca: rah see, mai rhawm: pa chix keud chix sawn:, mai tawng kah daux krax pa mhawm: khawm uik heue.
Yam laig cuyi: pingnya kah daux rhawmrhi: maix, mai krax tawng krax yung, rhawm: maix koe: krax gauxrhawm: gauxrhi: heue.
Lox satix pau kah maix, mai krax tawng krax yung kia: ngien kah maix heue.
Tag taoh maix luan khaing: krax pa caox, mai khaing: daux tawm: taix pwi pa chix ah lox kawk lox vawk heue.
Mai pwi pa tik kah krax rah krax see, mai pa hu: kah daux krax pa faik.
Mai pwi pa gauxrhawm: kah daux phimap, mai pa gauxrhawm: kah pa kawk pa vawk mai pa caox pa caig heue.
Pwi pa ang hu: kah daux krax pa rauh pa see, mai pa hu: kah daux krax pa kawk pa vawk.
Tag taoh maix luan khaing: bun: pa chix nyaw chix glaw:, mai bun: coh kaux pa ang mhawm:.
Mai bun: pa tik kah cao: pa yuh bwanson: cao: pa gau yam iak ju nawh, piawm: kah lox tawm: mukheu Siyiex heue.
Nyiiex bun: an:, dex dawd mai krax yum:, mai krax nawh dex dawd mai simeeig khankix heue.
Pwi pa laig kah daux nyiiex nawh ang pon tix deeh hoek tix kaux kawx, mai ang lai pon tix klawd heue.
Mawh kheu in:, maix hu: daux krax pwi pa mhawm: pa mhiem:, mai nied tix hu: hawt daux krax pwi pa rauh pa see heue.
Mai pwi pa rauh pa see khankix, hoek kah daux meung Nawh Cao:, mai pwi pa grum mhawm: khankix, tag yaox tix ot kah dee an: heue.
Pwi pa ang rah ang see khankix, yaox tix kham: kah pa grheu: tix tik khaing: daux meung Nawh Cao:, mai pwi pa nieb luan yuh khankix tag yaox tix kham: geu: kah pa teei tix tik heue.
Pa Lhat Kah Siyiex
Kawn: simex aux eue, paw lai piawm: kah lox tawm: pa sidiex gau aux, mai priex lox tawm: beenli aux khankix kah daux rhawmrhi: maix.
Grawhgrawng: nawh, lox tawm: beenli an: khankix, kieh maix lang: ju lang: phan: mai koe: pa nhim: mai haok hwan heue.
Paw lai kieh krax caoxrhawm: mai sijax mukheu gwieh hu: khaing: maix, teei gumlox an: khankix mai tauk kah ngawg maix mai tiem: tix deuh carang kah dieb rhawmrhi: maix.
Phan: yuh nan:, maix pon min: plakngai: bwanson: sivoe ngai: Siyiex mai sivoe ngai: kawn: pwi heue.
Viex khawm rhawm: khawm rhi: mai deuh rhawm: kah Simiang Siyiex, paw lai deuh rhawm: kah pingnya tokaux tix.
Can krax dee hu: maix khawm uik, yuh rah see sivoe ngai: Simeang Siyiex, phan: yuh nan:, Nawh Cao: tag kieh krax hu: maix khankix rah see heue.
Paw lai keud tokaux tix mawh pa koe: cuyi: pingnya, lhat graung kah Simiang Siyiex, mai via hu: khaing: ceu pa caox.
Phan: yuh nan:, siniag maix khankix koe: riang, mai gua si-ang: maix tag naog heue.
Teei kaung khrai: maix mai plix num: pa liang tix plix khankix, tan lu kah Simiang Siyiex heue.
Phan: yuh nan:, krao: maix tag naog mai kraung pa sau: maix rawm: plix siiet pa khraox tag kreh heue.
Kawn: simex aux eue, paw nieb een: kah ceu pa sivied Simiang Siyiex tix gau tix ang koe: cee, yam chawkcheng: Nawh Cao: kah phimap maix paw laux rhawm:.
Grawhgrawng: nawh, Simiang Siyiex sivied tix gau kah kawnpraix pa moh Nawh, mai puat kah kawnpraix pa khaw: rhawm: Nawh heue.
Ngawh Cuyi: Pingnya
Pwi pa sawg cuyi: pingnya mai pon, koe: bwanson: heue.
Grawhgrawng: nawh, pwi pa yuh lai kah cuyi: pingnya, nie lheu: mhawm: khaing: pwi pa yuh kah lai mau heue. Rao lai pa pon cuyi: pingnya nie lheu: mhawm: khaing: khri: heue.
Mai cuyi: pingnya, nie lheu: ngawh khaing: siang: raoh heue. Can kraung pa khaw: rhawm: khawm uik, ang pon tiag sidu ngawh mai cuyi: pingnya an: heue.
Kah daux taix khawn: dawm: nawh, koe: ceu pa lang: ju, daux taix khawn: gwiex nawh, koe: pa mi pa koe:, mai min: plakngai: nawh heue.
Krax cuyi: pingnya mawh daux krax pa mhawm:, can daux krax cuyi: pingnya khawm uik, mawh pa nhim: pa yiien: heue.
Can pwi pa jhawp kah cuyi: pingnya hoik pon khaox pa im: ju, mai pwi pa ang ploi: taix tix kah cuyi: pingnya koe: bwanson: heue.
Simiang Siyiex teei cuyi: pingnya mai phan: haktiex, teei pingnya mai yuh kah raoma: heue.
Nawh Cao: teei cuyi: pingnya mai kieh rawm: lih dee kied raux bih, mai kieh rawm: ciex lih kah daux paiawm: heue.
Kawn: simex aux eue, cuyi: pingnya mai pa yuh satix paw kieh gwieh hu: sivoe ngai: maix, mai priex tix hawt jheengjheeng: awawx.
Phan: yuh nan:, ceu an: khankix, mawh ju, khwan, mai tag mawh min: plakngai: kah ngawg maix heue.
Yam hu: maix krax ang koe: krax khirhawm: khirhi:, mai ang koe: dee sideeing caong dee hu: tix heue.
Yam it maix ang koe: ceu pa lhat, tag yaox tix laig it mhawmmhawm: heue.
Paw lhat paw graung kah ceu pa caox, pa phai: mai ceu pa laux pa leeing:, pa yaox pwi caox kah heue.
Grawhgrawng: nawh, Simiang Siyiex mawh dee yumrhawm:, mai dee deuh maix rhawm:, Nawh Cao: tag priex maix son ang caong maix lai krix kah jhawk heue.
Krax Keud Pa Koe: Pingnya
Yuh bwanson: kah pwi pa khaw: tix pon bwanson:, phan: ang yuh ang pon.
Yam koe: maix tix tawx tix ceu ceu kah paoxplawg paoxnyhawm: maix, paw ah, "Hu: ha:, deeh hoek pasax, aux lawk tawx kah maix pasax."
Phan: ang tie koe: ceu pa khirhawm: paw lai keud tix ceu pa ang mhawm:, kah paoxplawg paoxnyhawm: pa ot dex maix awawx.
Maix paw lai yuh krax simah kah pwi pa ang phit tidtix kah maix.
Maix paw ghoing: kah kraungkhrai: pwi pa tuktiaktukte: khankix, mai paw laug tix hu: kah krax hu: nawh tix nyaing kawx.
Grawhgrawng: nawh, Simiang Siyiex seeing: brai: kah pwi pa vawk rhawmrhi: khankix heue. Mai pwi rah pwi see khankix, koe: akhwang: tix yuh paox pie kah Nawh Cao: heue.
Lox pa jhax pa lawg Simiang Siyiex hoek kah piang nyiiex pwi pa ang rah ang see khankix, mai Nawh Cao: nawb bwanson: kah dee ot pwi rah pwi see khankix heue.
Nawh Cao: salao kah pwi pa chix sa chix lao khankix, mai yuh bwanson: kah pwi pa awnrhawm: awnrhi: khankix heue.
Pwi pa koe: cuyi: pingnya khankix, tag pon sin: min: plakngai:, mai pwi pa yuh pa caox khankix, tag yaox tix kham: geu: krax kaig krax tua heue.
Lox Pa Sidiex Gau Keeing: Khankix
Kawn: simex aux khankix eue, sonsang tawng pex kah krax cuyi: pingnya nghiiet kah lox tawm: pa sidiex gau keeing: mhawmmhawm: awawx.
Aux hoik tawx lox sidiex pa mhawm: kah maix, paw lai tik kah lox tawm: beenli aux khankix.
Phan: mawh aux, mawh kawn: sok rhawm: keeing:, pa awn: pa tiiem sivoe ngai: pa kied moh miex tix kaux heue.
Keeing: aux sidiex gau mai ah nin: kah aux, "Sau: tix priex lox aux kah daux rhawmrhi: maix, mai priex tix hawt gumlox tawm: beenli aux mai im: ju awawx."
Sawg cuyi: pingnya awawx, sawg pingnya pa tawng pa yung awawx. Paw piawm: satix, paw lai via hu: khaing: lox pa lih khaing: daux jheeh aux.
Paw tik kah cuyi: pingnya, nawh tag priex maix heue. Moh kah nawh awawx, nawh tag teem: coi kah maix heue.
Cuyi: pingnya mawh ceu pa ting pa lhaong: heue. Sawg cuyi: pingnya awawx. Mai sawg cuyi: pingnya khaing: sawg kraungkhrai: awawx.
Deuh nawh mawh pa ting pa lhaong:, nawh tag yaog maix ting lhaong: heue. Phan: maix kawm nawh, nawh tag tawx min: plakngai: kah maix heue.
Nawh tag vhua: lawk kaing: pa mhawm: grang kah kaing: maix, mai tag tawx mhok khri: min: plakngai: kah maix heue.
Kawn: simex aux eue, priex mai nghiiet kah lox aux awawx, phan: yuh nan:, maix tag nie lang: ju heue.
Aux tag jhi: cuyi: pingnya kah maix, mai aux thong: maix hu: kah daux krax pa mawh pa meh heue.
Phan: maix hawt hu:, ang lai hoek krax pa sikhawp, yam to: maix caong maix ang lai sideeing, ang lai goh.
Jhawp kaux kah lox tawm: (upate) pa sidiex aux, paw ploi:, paw man, priex mhawmmhawm:, grawhgrawng: nawh, mawh krax pa im: ju son maix heue.
Paw laig kah daux krax pwi pa ting rhawm: canyhau: khankix, mai paw hu: tau mai pwi pa caox khankix heue.
Via hu: khaing: krax pa hu: kix, paw lai hawt khaix kix, via hu: khaing: kix awawx.
Phan: kix ang yaox tix yuh phimap kah pwi, kix ang nyawm it, mai phan: kix ang pon tix yuh pwi tix kauxkaux goh, kix ang chix laig it heue.
Mai kix ih khaomun pa dex pa dawd mai ceu pa caox, mai nyaux rawm: plix siiet pa dex dawd mai pa tuktiaktukte: heue.
Krax pwi rah pwi see khankix, awm: bah riieng praix, tom: lih singaix, mai lih jhan pa riieng sipie sipie heue.
Krax pwi pa ang rah ang see khankix, awm: pa faik, mai yam goh kix, ang tawng kah ceu pa sideeing caong kix heue.
Kawn: simex aux eue, nghiiet lox aux, mai sau: can lox pa sidiex aux kah daux yhaok mai awawx.
Paw kieh gwieh hu: khaing: sivoe ngai: maix, priex tix deuh kah daux rhawmrhi: maix awawx.
Grawhgrawng: nawh, pwi pa yaox kah beenli ceu an: khankix, mawh pa im: ju mai krax nyawm ot nyawm koe: kah son tokaux kix heue.
Mawh kheu sok rhawm: maix, mawh jaong num: riah pa im: ju, priex sok rhawm: maix khaing: kuceu khawm uik heue.
Via hu: singai khaing: pa ang rah ang see, mai siyieb jheeh pa chix thong: thiang: khankix heue.
Kieh ngai: maix jhak sivoe rah see, mai siyieb ngai: maix kawx kieh jhak sivoe rah see heue.
Keud krax pa hu: caong maix mhawmmhawm:, mai kieh can dee hu: maix kieh koe: pa nhim: heue.
Paw lai via hu: plak gwiex plak dawm:, mai via hu: khaing: krax pa caox pa caig heue.
Moh Kah Daux Pa Singax Mai Ang Moh Kah Daux Pa Ang Singax
Kawn: simex aux eue, veeh yhaok maix nghiiet kah lox tawm: cuyi: pingnya aux, mai priex tix hawt kah lox satix pa tawx aux awawx.
Siyieb jheeh maix gau kah pingnya krax tawng krax yung, mai kieh mawh pwi pa chix priex rhawmrhi: tix.
Grawhgrawng: nawh, siyieb jheeh bun: coh kaux, lheu: tie: khaing: kaing: rawm: hia:, mai lox nawh nyu: khaing: rawm: bee heue.
Viang mawh nan:, dee sidauh nawh song: khaing: lhax ghin: , mai lawm khaing: vaig lawm khawm ra: plak heue.
Caong nawh lih hu: kah daux krax dee yum:, mai can krax hu: nawh chix hoek kah daux meung yum: heue.
Son ang maix lai keud krax pa im: ju, nawh tieh loh kah been tix sipie sipie tom: ang maix lai tawng tidtix heue.
Mawh kheu in:, kawn: simex aux khankix eue, nghiiet kah lox aux awawx. Paw tik kah lox pa lih khaing: jheeh aux khankix heue.
Via maix hu: khaing: bun: pa yuh nan: tom: singai, paw lai dex kah siviex nyiiex ot nawh.
Phan: ang mawh nan:, min: plakngai: maix mai ju maix tag sang tawx kah kix pwi pa caox khankix heue.
Pwi tang: ceu tang: cat khankix, tag sang grum pon kraungkhrai: maix mai kraungkhrai: pa yuh pa pon maix khankix, tag hoek kah daux nyiiex pwi tang: ceu tang: cat khankix heue.
Dee sidauh nawh deeh klih rhawm: kah yam yaox nawh laux rham: tokaux nexnham: tix, kheu ang nawh nghiiet kah lox sidiex gau.
Aux hoik koeng kah ceu pa sidiex gau pwi kah aux, daux rhawm: aux hoik yuh pa ang cee ang cak kah lox sidiex pwi lie?
Mai lox sara khankix kawx, aux ang nghiiet, mai aux ang nghiiet kah lox pa sidiex pwi khankix kah aux yuh nin: lie?
Mai aux hoik luan yuh pa caox kah sinax pwi haoh pwi hun: khawm uik mai tag ah lox ngia tix heue.
Shiao kah aw: rawm: maix, mai nyaux kah rawm: pa lih khaing: daux rawm: maw: maix awawx.
Rawm: keut cie maix kieh lih tom: nie, mai bla: awm: lih rawm: klawng: hawt krax.
Paw kieh mawh khawm cie pwi tang: ceu, kieh mawh son maix nong:.
Rawm: keut cie maix kieh mawh rawm: pa koe: bwanson: son maix, gauxrhawm: mai moeng pa hoik teei maix yam kawn: awn: ju maix khaing: awawx.
Kieh mhawm: grang, awm: cak miex mai poh miex pa khaw: tix moh, mai teeh kiex tawx pa lo maix grum naog jheeing: jheeing: heue. Moh kah kiex mai fahrhawm: heue.
Kawn: simex aux eue, mawh kheu patix, maix lai yoek tau mai bun: pa ang mhawm: been yuh kah mawx? Maix hu: kawm naok bun: coh kaux yuh kah mawx?
Krax hu: kawn: pwi khawm uik hoik sidawng: sivoe ngai: Simiang Siyiex, mai Nawh Cao: jhak kah krax hu: kix khawm uik heue.
Pwi caox pa nieb yuh khankix, phimap pa caox pa yuh kix deeh giex kah kix mai tag sang kham: geu: kah pa phyawk maox phimap kah tix heue.
Mawh kheu nawh kied hai mai phit lud lawlawx, ang pon lox sidiex lox gau mai tag yaox tix yum: heue.
Lox Tawx Satix Sonsang Via Hu: Khaing: Krax Pa Caox
Kawn: simex aux eue, phan: maix hoik luan kham: son paoxgrawm maix ang ah, mai phan: maix hoik luan tawx taix kah pwi tang: kaux ang ah,
maix hoik krix kah jhawk kheu jao lox pa hoik lih khaing: jheeh maix, kheu hoik mawh lox pa hoik ah maix tom: lih mawh see: kah maix heue.
Kawn: simex aux eue, phan: maix hoik hoek kah daux taix paoxgrawm maix, tag sang pon taoh maix kah tokaux tix yuh nin:, mai hu: kah paoxgrawm maix mai viex rhawm: pa awn: pa tiiem mai nied tix khyox khaw: kah nawh awawx.
Paw lai laig it, paw lai yip ngai:, mai paw gaing:.
Taoh tokaux maix awm: pa glawd cak mai sim: khaing: daux taix pwi pa jaw khankix awawx.
Pwi pa nieh khankix eue, hu: kah meeik mai keud sawn: mai jhak kah kaing pa yuh kix, mai gau cuyi: pingnya mai kix awawx.
Meeik khankix ang koe: sara, mai ang koe: cao: thong: cao: gau, mai ang koe: simiang.
Bawg yam rung praix, mai yam vawg nghox, kix chix sawg tix deuh ceu pa ih son tokaux kix heue.
Pwi pa nieh khankix eue, maix tag sang laig it rheung: miex grheung:? Maix tag sang kaoh khaing: dee it tix lai mawx?
Maix ah it tivud ha:, mai it yam bhok maix taix sonsang laig it tivud.
Mai krax pa hot pa sibhawm: tag sang hoek kah piang maix, awm: pwi pa hu: krax, mai kraungkhrai: maix tag sang som nai: awm: hoek pwi naing kah piang maix heue.
Pwi pa caox mai pwi pa ang rah ang see khankix, chix krai ngie lox pa caox, pa ang rah ang see khaing: heue.
Kix khiep ngai: tix mai chix gau kah caong mai gien: taix kix heue.
Kix grum naog pa kawk pa vawk kah daux rhawm: tix, mai kix keud ceu pa ang mhawm: jheengjheeng:, mai chix kieh pwi simah kah paox tix heue.
Mawh kheu in:, krax pa lhat, mai krax pa khirhawm: khirhi: hoek kah piang kix dom: mawx dom: an:, mai kix ang koe: dee deuh rhawm: mai hoek krax laux krax leeing: heue.
Grawng: pa koeng Simiang Siyiex ang joeng mawh ngie liah ceu, mai pa seeing: pa brai: Nawh koe: aliah ceu, mawh inkix heue.
Pa ting rhawm: lhaong: ngai: tix ceu, dak pa chix pie chix lhen: tix ceu, taix pa chix pah kah ju pwi pa ang koe: phimap tix ceu.
Mai rhawm: pa chix keud pa ang mhawm: tix ceu, caong pa phai: to: dee yuh phimap tix ceu.
Pwi pa kham: mhai: sakse pa ang mawh ang meh mai lox pie lox lhen: tix ceu, mai pwi pa chix kieh puxaik simah kah paox tix tix ceu heue.
Lox Tawx Satix Sonsang Via Hu: Khaing: Bun: Coh Kaux
Kawn: simex aux eue, nghiiet kah lox tawm: beenli keeing: maix awawx. Paw lai tik kah ceu pa sidiex gau miex maix awawx.
Vien kah dieb rhawmrhi: maix jheengjheeng:, mai tauk kah ngawg maix awawx.
Yam hu: maix krax tang: dauh, lox tawm: beenli an: tag jhi: krax kah maix heue. Mai yam it maix, tag sang pau kah maix, yam siduad maix, tag sang sikah kah maix heue.
Grawhgrawng: nawh, lox tawm: beenli mawh kawkngu, mai gumlox Nawh Cao: mawh pa riieng, lox sidiex gau pa jhi: phimap mawh krax pa im: ju heue.
Nawh mawh pa pau kah maix sonsang luan khaing: bun: pa caox, mai bun: pa ang mhawm: been, mai jheeh pa chix nyaw glaw: kah maix heue.
Bun: an: khankix, viang mhawm: grang miex ding kawx, paw kieh rhawm: maix ghoing:, mai paw lai kieh maix krix kah siyieb ngai: nawh.
Grawhgrawng: nawh, simex pa yuh paox pie tau mai bun: coh kaux, hot tom: sidauh pon khaomun tix lon: khaing:, mai bun: pa hoik prah hoik tik pwi khankix kawx, chix giex tix teei kah ju pa ngawh heue.
Pwi pon khawp ngu mai ang kraung tix hax khex koe: lie?
Pwi pa hu: piang ngaox ngu mai ang hax caong khex koe: tix kauxkaux lie?
Pwi pa laig hu: kah moeng pwi khankix kawx, awm: an: heue. Mai pwi pa phit kah moeng pwi khankix kawx, ang pon tix luan khang: phimap heue.
Pwi pa cairhawm: mai briex tix ih kawx, awm: pwi briex, ang pon tix luan phimap.
Phan: ex pon giex pwi pa yuh nan:, kieh nawh deeh viied aliah son:, mai kieh nawh se: kraung pa koe: daux nyiiex nawh khawm uik heue.
Pwi pa phit vao kah moeng pwi, mawh pa ang koe: cuyi: pingnya heue. Pwi pa yuh nan:, mawh pa plaux laux kah ju tokaux tix heue.
Nawh tag yaox tix kham: kah jhawm: saux tuat siviet kied sigrien, mai krax pa laux min: plakngai: mai krax kaig krax tua nawh ang chix grai: heue.
Grawhgrawng: nawh, simex pa ang yumrhawm: kah moeng tix, chix lih pa kied songrhawm: songrhi: mai yam hoek bawg yam tawx phimap ang lai koe: krax caoxrhawm: heue.
Pwi tawx mau se: miex ding ang ah, viang tawx khawngphak miex ding ang ah, nawh deuh ang koe: ceu mai ang chix fahrhawm: heue.
Kawn: simex aux eue, nghiiet kah lox aux mai priex lox tawm: beenli aux khankix kah daux rhawmrhi: maix awawx.
Priex lox tawm: beenli aux khankix mai im: ju awawx, priex lox tawm: aux khankix, awm: kawn: ngai: maix awawx.
Vien ceu an: khankix kah gien: taix maix, mai tiem: tix deuh kah piang dieb rhawmrhi: maix.
Deuh cuyi: pingnya mawh nan: tix, mai krax tawng krax yung pingnya kok mawh paoxgrawm.
Phan: yuh nan:, tag taoh tix teei maix luan khang: daux taix bun: pa laux been, mai khaing: jheeh bun: coh kaux pa chix nyaw chix glaw: heue.
Aux jhak kah daux doh siviex iak nyiiex aux, mai aux yaox ceu pa yuh nin:,
yam jhak aux kah paox simex cub pa iak cuyi: pingnya khankix, mai aux yaox sinaw pa ang koe: cuyi: pingnya tix kaux,
hu: lailing dex bun: pa ang koe: cuyi: pingnya pa awm: nawh, kah daog krax heue.
Plak ponbo yam faik praix, nawh hu: krax dee ot bun: an: heue.
Mai bun: an:, teei tix ceep kah kraung bun: coh kaux mai hoek tix rieb kah nawh heue.
Bun: an: chix ah lox ting lox sinum mai koe: rhawm: pa kiien:, mai ang ot daux nyiiex tix, mai ca: lailing heue.
Tivud ot plak praix nyiiex, tivud ot daux krax, mai chix jiang praok krax kudauh kudee heue.
Yam yaox nawh kah sinaw an:, ang koe: ngai: kaig, mai kawm ngheut kah nawh, mai ah nin:,
"Aux yuh pwie tan lu, pa ih pa un: kah daux singaix hoik naog awm: pa ah aux lox mukheu heue.
Mawh kheu in:, aux tom: lih rieb kah maix, mai coca: tix sawg pakngai: maix mai hoik yaox yamin heue.
Aux hoik tawm man lai kuceu, mai man pa mhawm: plang:, pa kaoh khaing: meung Ejiptux kah piang ku: it aux heue.
Aux sau: muran mai rawm: bee pa sioe: baux mai khaox cai: hung: khankix, kah piang kraung it aux heue.
Hoek heue, ax it tau tom: sidauh riang praix, mai yuh krax phit krax vao tom: fahrhawm: heue.
Cao: nyiiex aux ang ot daux nyiiex, nawh viex hau: mau tix mai hoik hu: krax dee singai,
nawh sang deeh hoek kah singaix bak nawh tix deeh hoek heue."
nawh ah lox nyawmrhawm: mai nyaw glaw: kah nawh, siyieb jheeh nawh nyaw glaw: kah nawh, mai yuh tix pex kah nawh heue.
Mai nawh hawt khaix nawh dom: mawx dom: an:, awm: hawt moi kah dee plaux yum: ang ah, cak, poh, kah sivoe ang te nyang krox kah tawm: nawh, awm: hu: dee hawh pwi hu: ang ah.
Awm: sim: pa nied laig kah jhawk pa taong: pwi, mai ang tawng mawh pa som ju tix, sinaw an: nied tix hawt khaix bun: an: dom: mawx dom: an: heue.
Mawh kheu in:, kawn: simex aux eue, nghiiet kah lox aux, mai deuh tix tawng kah lox pa sidiex aux khankix awawx.
Paw kieh rhawm: maix simie tix hu: kah krax dee ot bun: yuh nan:, mai maix paw lud tix hu: kah daux krax hu: nawh.
Grawhgrawng: nawh, nawh hoik kieh pwi naing tom: nie goh, mai nawh hoik pah pwi ting riang ting rao yum: tom: nie.
Nyiiex nawh mawh daux krax hoek meung yum:, mai laig kah daux mawnarhok heue.
Cuyi: Pingnya Kok Kah Kawn: Pwi
Cuyi: pingnya mai krax tawng krax yung, kok yo mai ploi: lox sinum ang mawh lie?
Nawh cung kah dee lhaong: dee choek mai praok krax heue.
Nawh kok yo praok siviex ting, mai diang siviex veng, mai kah daux siviex nyiiex mai ah nin:,
"Kawn: pwi khankix eue, aux kok kah pex mai ploi: lox kah kawn: pwi heue.
Pwi pa ang koe: cuyi: pingnya khankix eue, gau kah cuyi: pingnya awawx, pwi pa caox khankix eue, kieh rhawm: pex keud kah pingnya krax tawng krax yung awawx.
Nghiiet ha:, aux tag krai lox pa ting jum, aux tag sang krai lox rah lox see kah jheeh aux.
Lox pa kaoh khaing: jheeh aux mawh pa dex pa dawd mai pa rauh pa see, siyieb jheeh aux seeing: brai: kah phimap heue.
Can lox pa sidiex aux khankix khawm uik mawh pa rauh pa see, mai ang koe: lox pa kawk pa vawk mai rhawm: pa tieh pa feen heue.
Son pwi pa tawng khankix, hoik sidawng: laing laing, mai pwi pa pon kah cuyi: pingnya khankix, hoik mawh pa khaw: pa caw heue.
Rieb tix teei kah lox pa sidiex aux sivoe, khaing: mau, mai sawg cuyi: pingnya krax tawng krax yung sivoe, khaing: khri:.
Grawhgrawng: nawh, cuyi: pingnya lheu: mhawm: khaing: siang: raoh heue. Can kraungkhrai: pa khaw: rhawm: khawm uik, ang pon tiag sidu ngawh mai cuyi: pingnya an: heue.
Cuyi: pingnya aux in:, ot tau mai pa koe: satix, mai chix plak jhi: kah cuyi: pingnya krax tawng krax yung heue.
Krax pa lhat pa graung kah Simiang Siyiex mawh ceu pa koeng kah phimap, mai pwi pa ting rhawm:, pwi pa map kah pwi, mai pwi pa hu: kah krax pa ang mhawm:, mai pwi pa ah lox pa kawk pa vawk khankix, aux tag koeng kah heue.
Cuyi: pingnya mawh pa ngawh, pa chix tawx krax keud krax sawn: pa mhawm:, koe: kah aux heue. Aux mawh cuyi: pingnya mai pa ting riang ting rao grum koe: kah daux aux heue.
Mawh kheu cuyi: pingnya aux, simiang khunhawkham khankix pon tix kwang:, mai simiang haktiex khankix, chix prawng ca: rah see heue.
Mawh kheu cuyi: pingnya aux, kawn: simiang ang ah, pwi yuh kaing greem: simiang ang ah, mai cao: prawng see: khankix ang ah pon tix kwang: kah haktiex heue.
Aux moh kah pwi pa moh kah aux khankix, pwi pa coca: tix sawg kah aux khankix tag yaox kah aux heue.
Sinngao pa mi, mai min: plakngai: koe: mai aux, sinngao pa kaux cong: mai pa rauh see kawx, koe: mai aux heue.
Plix cuyi: pa tawx aux, ang joeng mhawm: ngie awm: khri:, nie lheu: mhawm: khaing: khri: nawnaw pa hoik thi: heue. Ngawh gha: kraung pa pon mai aux, nie lheu: ngawh khaing: mau heue.
Aux mawh krax rah krax see, mai hu: kah sinax pa prawng ca: rah see heue.
Can pwi pa moh kah aux khankix, aux tag kieh grum naog kah sinngao, kraungkhrai:, mau, khri:, kah daux nyiiex ma: kix heue.
Kah: sivoe ang Simiang Siyiex nyang phan: yuh tidtix dix, aux (cuyi:) hoik mawh cie nawh heue.
Kah: sivoe ang haktiex nyang koe:, aux hoik dawg koe: heue.
Kah: sivoe ang rawm: sigrit sigra: pa raux, mai rawm: keut lih khankix ang nyang koe:, Nawh hoik kieh aux koe: heue.
Kah: ang gawng ting gawng iak nyang koe:, aux hoik dawg koe:.
Kah: ang nyang phan: kah haktiex, mai daux tiag daux tu mai phawng: tiex khankix, Nawh hoik kieh aux keh heue.
Yam phan: Nawh kah raoma: aux ot tau mai Nawh, mai yam phan: Nawh kah rawm: sigrit sigra: ang ah, mai yam phan: kah paiawm: pa koe: dee lhaong: ang ah,
yam phan: Nawh kah rawm: keut pa kaux pa koe: dee raux ang ah,
yam tawx lox dee ot kah rawm: sigrit sigra:, son ang lai kheem: hu: tang: dauh, mai yam jah jaong num: haktiex tix koe:.
Aux ot mai Nawh awm: kawn: nyawm pa priex Nawh, aux mawh pa gauxrhawm: son nawh, mai aux gauxrhawm: klieh sivoe ngai: Nawh jheengjheeng: heue.
Aux gauxrhawm: gauxrhi: kah piang haktiex, kah pa phan: pa deuh Nawh khawm uik, mai aux yuh paox pie gauxrhawm: tau mai kawn: pwi heue.
Mawh kheu in:, kawn: simex aux khankix eue, nghiiet kah lox aux awawx. Pwi pa priex tix hawt krax aux khakix koe: bwanson: heue.
Paw lai tik kah lox pa sidiex gau aux, nghiiet mai kieh koe: cuyi: pingnya heue.
Pwi pa mhong: lox aux, mai pa pau kah diang siviex aux ku singaix mai pa krox jun kah diang siviex ting khankix, koe: bwanson: heue.
Pwi pa sawg mai yaox kah aux, yaox kah ju heue. Nawh tag pon bwanson: kah Simiang Siyiex heue.
Pwi pa phit lud kah aux khankix, phit lud kah ju, khwan, tokaux tix heue. Pwi pa koeng kah aux khankix moh kah krax yum: heue."
Cuyi: Pingnya Mai Bun: Caox
Cuyi: pingnya teei rong: nyiiex aliah gawng: mai hoik sum: nyiiex dee ot tix heue.
Nawh teei khawng: brie khankix pah yum:, mai biiet kah rawm: plix siiet mai hoik cox khre: kah pheem: sawm: heue.
Nawh ploi: siliex bun: khankix, hu: kah daux veng mai kok yo, pa koe: dee lhaong: mai ah nin:,
"Pwi pa ang koe: cuyi: pingnya khankix, kieh laig kah dee in:," mai pwi pa ang koe: cuyi: pingnya khankix eue,
"Hoek heue, mai ih kah khaomun aux, mai nyaux rawm: plix siiet pa biiet aux heue.
Via hu: khaing: pwi caox mai sonsang pon tix im: ju pa nyawmrhawm: mai hu: kah daux krax cuyi: pingnya heue."
Plix Cuyi: Pingnya Mai Plix Pa Caox
Pwi pa sidiex gau kah pwi pa nieb yuh pa ang cee ang cak khankix, yaox tix kham: geu: krax kaig krax tua, mai pwi pa jhi: phimap kah pwi pa caox khankix tag yaox tix kham: geu: kah pa sa pa lao heue.
Paw lai sidiex gau kah pwi pa nieb yuh pa ang cee ang cak khankix, ha kix tag koeng kah maix, plak jhi: phimap kah pwi pa koe: cuyi: pingnya khankix, nawh tag moh kah maix heue.
Phan: sidiex gau kah pwi pa koe: cuyi: pingnya khankix, nawh tag nie lheu: koe: cuyi: pingnya, mai phan: sidiex gau kah pwi rah see khankix, nawh nie lheu: ting lhaong: pingnya krax tawng krax yung heue.
Ceu pa lhat pa graung kah Simiang Siyiex mawh jaong num: cuyi: pingnya heue. Pa tawng kah Siyiex pa singax singeh mawh pingnya krax tawng krax yung heue.
Grawhgrawng: nawh, pwi pa deuh rhawm: kah aux, aux tag sang kieh singaix ju, jhong: khix mee: num maix ting lhaong: heue.
Phan: maix koe: cuyi: pingnya, tag pon bwanson:, son tokaux maix heue. Phan: maix nieb yuh pa ang cee ang cak, tokaux maix yaox tix kham: phimap tix heue.
Cuyi: Pingnya Mai Bun: Caox
Bun: pa caox khankix, chix ah lox ting lox sinum mai kheu ang koe: cuyi: pingnya mai ang tawng praix tidtix heue.
Nawh ngawm kah diang siviex nawh, mai ngawm dee lhaong: pa koe: kah daux veng,
mai kok yo kah pwi pa lawng krax sivoe nawh khankix ah nin:,
"Pwi pa ang koe: cuyi: pingnya khankix, kieh laig dee in:," mai pwi pa ang koe: cuyi: pingnya khankix eue,
"Rawm: pa briex tix nyaux mawh pa nyawm heue. Khaomun pa briex tix ih dee glip mawh pa jiet nyawm heue."
Simex an:, ang tawng kah simeeig pwi yum: koe: tan, mai grawng: nyo sinie bun: an: khankix, ot kah dee raux meung yum: heue.
Lox Phektem: Pa Kied Raux Sawlamun
Lox phektem: pa kied raux lai lox kab pa sidiex khunhawkham Sawlamun mawh nin:, kawn: simex pa koe: cuyi: pingnya mawh ceu pa kieh keeing: tix gauxrhawm:, mai kawn: simex pa caox, mawh grawng: pa kieh miex tix khirhawm: khirhi: heue.
Sinngao mau khri:, pa pon kah daux pa ang rah ang see khankix, ang koe: bwanson:, krax pa rauh pa see chix taoh ex khaing: krax yum:.
Simiang Siyiex ang kieh pwi rah pwi see khankix yum: ca:, Siyiex yieh tix tik kah kaing pwi pa nieb yuh pa ang cee ang cak khankix.
Pwi pa nieh khankix, tag hoek krax hot krax sibhawm:, mai pwi pa rien: pa coca: khankix, tag hoek krax mi krax koe: heue.
Pwi pa khrawm: tix priex yam plix plix khankix, mawh kawn: simex pa koe: cuyi: pingnya heue. Pwi pa it bawg yam vawg nghox mawh kawn: simex pa kaig pa tua heue.
Bwanson: tag sang hoek kah piang kaing: pwi pa rauh pa see heue. Kah jheeh pwi pa ang rah ang see khankix, phimap pa tuktiaktukte: thox jheeh kix heue.
Yam doh keud kah pwi rah pwi see, tag pon bwanson:, mai ceukaux pwi ang rah ang see khankix, chix laux chix leeing: heue.
Pwi pa koe: cuyi: pingnya khankix, chix priex tix hawt kah lox tawm: bee li, pwi caox pa haoh lox kankix, tag hoek krax som krax nai: heue.
Pwi pa lawng hu: kah krax rah krax see khankix, tag khaw: diang hu: nawh, mai pwi pa lawng hu: kah daux krax pa ang rah ang see khankix, tag lih sidawng: pa yuh kix mai hoek krax laux krax leeing: heue.
Pwi pa khiep ngai: khankix, tag kieh rhawm: kix khirhawm: heue. Mai pwi pa caox haoh lox khankix, tag hoek krax som krax nai: heue.
Mai jheeh pwi rah pwi see khankix, mawh rawm: keut pa im: ju heue. Jheeh pwi pa ang rah ang see khankix, phimap pa tuktiaktukte: kix thox jheeh kix heue.
Mai rhawm: pa koeng chix kieh krax simah lih heue. Mai krax moh krax rhawm: mawh pa chix tawb chix kheem: kah phimap khankix heue.
Pwi pa mhawm: pingnya krax tawng krax yung chix krai grawng: cuyi: pingnya heue. Pwi pa ang koe: cuyi: pingnya khankix, khaox sivied hoik koe: son piang blawg kix heue.
Pwi pa koe: cuyi: pingnya khankix, chix khrawm: chix priex tix deuh kah can pa tawng pa mhong: nawh khawm uik heue. Mai jheeh pwi pa caox khankix, dex dawd mai pa som pa nai: heue.
Pwi pa chix pon mau, can sinngao nawh, kaux cong: awm: veng pa kaux cong: heue. Krax hot krax sibhawm: pwi hot pwi sibhawm: khankix, mawh pa som pa nai: heue.
Kaing pa yuh pwi rah pwi see khankix, dex dawd mai ju heue. Mai kaing pa yuh pwi pa ang rah ang see khankix, dex dawd mai phimap heue.
Pwi pa chix priex tix hawt kah lox pa sidiex gau beenli, chix hawt hu: krax im: ju, mai pwi pa ang nghiiet kah lox sidiex gau khankix, chix lud krax hu: tix heue.
Siyieb jheeh pwi pie pwi lhen: khankix, chix tawb chix kheem: kah ceu pa koeng, pwi pa chix krai lox, kieh min: plakngai: pwi laux, mawh pa koe: rhawm: pa caox heue.
Kah daux pa haoh lox sikah chix kieh phimap lih, pwi pa chix priex jheeh tokaux tix mawh pa koe: cuyi: pingnya heue.
Dak pwi rah pwi see khankix, awm: mau pa mhawm: pa hoik thi: heue. Rhawm: pwi caox khankix ang koe: ngawh koe: jum.
Siyieb jheeh pwi rah pwi see khankix, chix tawx pwi haoh hun: ih heue. Pwi caox khankix, tag yum: kheu ang koe: pingnya krax tawng krax yung heue.
Bwanson: Simiang Siyiex chix mawh sinngao, sinngao an: ang khao: tau mai krax khirhawm: khirhi: heue.
Pwi caox khankix gauxrhawm: kah dee yuh kix phimap, mai pwi mhawm: pingnya pa tawng pa yung khankix, chix keud chix sawn: kah heue.
Pwi pa ang rah ang see khankix, ceu pa chix lhat tag hoek kah piang nawh heue. Pwi rah pwi see khankix, Simiang Siyiex tag tawx can pa simie kix tix pon khawm uik heue.
Pwi pa ang rah ang see khankix, chix grai: hu: awm: phlu: bhaung: keu: kang: lux heue. Mai pwi rah pwi see khankix, jaong num: kix kied kaux cong: heue.
Awm: rawm: niex pa siki: yuh rhang:, pa awm: taox ngu pa meet kah ngai:, pwi pa nieh khankix kawx, mawh pa cau pa soi: pwi heue.
Pwi pa lhat pa graung kah Simiang Siyiex, kieh nawh lang: ju, mai pwi pa ang rah ang see khankix, khix num kix dawd heue.
Krax pa krox pa jun pwi rah pwi see khankix, mawh ceu pa gauxrhawm: gauxrhi:, mai pa krox jun pwi caox khankix, tag grai: hu: heue.
Daux krax Simiang Siyiex mawh pa kaux pa cong: son pwi rah pwi see, mai pwi pa yuh pa ang rah ang see khankix, tag hoek krax laux krax leeing: heue.
Pwi rah pwi see khankix, kaux cong: jheengjheeng:, mai pwi pa ang rah ang see khankix, ang yaox tix ot kaux cong: kah piang haktiex.
Cuyi: pingnya chix lih khaing: jheeh pwi rah pwi see, mai dak pa pie pa lhen: tag yaox tix kham: kah pa tat tix tik heue.
Siyieb jheeh pwi rah pwi see khankix, chix tawng kah pa khaw: pa caw rhawm: pwi kah heue. Mai pwi pa ang rah ang see khankix, chix ah lox tiebtie heue.
Simiang Siyiex seeing: brai: kah jiang pa ang khaw:, mai kla: jiang pa khaw: pa caw mawh pa khaw: rhawm: Siyiex heue.
Mai yam ting rhawm: canyhau:, lih mawh krax kaig krax tua, mai pwi pa awn: rhawm: awn: rhi: khankix, mawh pa koe: cuyi: pingnya heue.
Ceu pa rauh pa see, thong: gau kah pwi pa rauh pa see khankix heue, ceu pa kawk pa vawk rhawmrhi: khankix an:, cha nie luan yuh mai hoek krax laux krax leeing: heue.
Sinngao kraungkhrai: khankix, ang chix tawx bwanson: singaix bawg yam lih songrhawm: songrhi: ex, phan: mawh ceu pa rauh pa see, chix taoh ex khaing: pa yum: heue.
Krax pa rauh pa see, thong: gau kah pwi pa grum naog pa rauh pa see, pwi pa ang rah ang see khankix, yaox tix som nai: kah pa ang rah ang see kah ceu pa yuh tix heue.
Mai rhawm: pa rauh pa see, chix taoh kah kix pwi rah pwi see khankix heue, mai pwi pa cha nie luan yuh khankix, deeh krix kah jhawk pa luan yuh tix heue.
Yam yum: pwi caox khankix, pa krox jun nawh tag hoek krax laux krax leeing:, mai pwi pa ang rah ang see khankix, viang kix simie tix pon kawx, hoek krax laux krax leeing: heue.
Pwi rah pwi see khankix, tag luan hu: khaing: pa khirhawm: khirhi:, mai pwi pa ang rah ang see, tieh tix deeh kham: tang: son nawh heue.
Mai jheeh pwi pa nieb yuh khankix, chix kieh nyiiex paoxplawg paoxnyhawm: laux heue. Mai pwi rah pwi see khankix, chix luan khaing: see:, kheu koe: cuyi: pingnya heue.
Phan: pwi rah pwi see ting lhaong: haok hwan tix kaux, pwi khawm veng gauxrhawm: heue. Yam som nai: pwi ang rah ang see tix kaux, pwi lawh maw: kah heue.
Mawh kheu jheeh pwi pa rauh pa see, tawx bwanson: kah veng pa ot nawh an:, mai pon krax yaogyaw heue. Mawh kheu jheeh pwi pa ang rah ang see, chix yuh veng an: lauxleeing: heue.
Pwi pa ang koe: cuyi: pingnya, chix yuh pa ang cee ang cak kah paoxplawg paoxnyhawm: tix, mai pwi pa koe: pingnya krax tawng krax yung chix ot yiien: yawg tix heue.
Pwi pa lailing mai krai lox tom: nie, chix plak jhi: doh kah ceu pa caw tix mox khankix, mai pwi pa kaux sijax khankix, chix mox mhawmmhawm: heue.
Phan: ang koe: pwi pa koe: pingnya, krax tawng krax yung, pa chix tawx krax keud krax sawn:, pwi haktiex khankix, som nai: heue. Phan: koe: cao: pa tawx krax keud krax sawn: tom: nie, pon tix luan kah krax lhat krax kraung heue.
Pwi pa kham: tang: see: pwi pa ang nawh meed, pa ang nawh tawng, nawh tag yaox tix kham: tom: nie heue. Mai pwi pa koeng kah see:, pwi dieh taix paox tix ang koe: krax khirhawm:.
Bun: pa chix priex rhawmrhi:, pon min: plakngai:, mai simex pa ting riang ting rao chix pon sinngao, mau khri: heue.
Pwi pa chix caoxrhawm: caoxrhi:, nawh chix yuh bwanson: kah tokaux tix, mai pwi caox pwi caig chix laklheet kah tokaux tix heue.
Kaing pa yuh pwi pa ang rah ang see, ang chix kaux chix cong:, mai pwi pa ruat simie pa rauh pa see, tag pon bwanson: pa kaux pa cong: heue.
Awm: dex dawd pa rauh pa see kah ju pa im:, mai pwi pa hawt tix sawg phimap kawx, chix sawg tom: sidauh yum: tix heue.
Pwi pa vawk rhawmrhi: khankix, Simiang Siyiex seeing: brai: kah kix heue. Pwi pa hawt hu: daux krax pa rauh see, Nawh Cao: khaw: rhawm: kah kix heue.
Pwi caox khankix, viang kix yuh cub caw: kawx, ang pon tix luan khaing: krax ciyang phimap, simie ceu cat pwi rah pwi see khaing: pa pon tix luan khaing: krax ciyang heue.
Bun: pa ang koe: satix mai cuyi: pingnya, viang mhawm: grang kawx, awm: lig miex pa tauk ih kraung mau khri: kah toh meeh nawh heue.
Pwi rah pwi see krox jun mai sawg kah ceu pa mhawm: khaing:, mai pwi pa ang rah ang see krox jun kah pa dex dawd mai pa songrhawm: songrhi: heue.
Pwi pa gwieh tix tawx kah pwi, tag baox deeh koe: sinngao mau khri: tom: nie, mai pwi pa khrawm: tix deuh, baox deeh hot hu: kah koe:.
Pwi pa chix gwieh tix tawx kah pwi, nawh tag mi koe: heue. Pwi pa see: rawm: kah pwi tang: kaux, nawh deeh pon bwanson: pa deeh see: kah tokaux tix heue.
Pwi pa khrawm: tix deuh nghox, nawh tag yaox tix kham: kah pa jhax pa lawg pwi khankix heue. Kah piang cao: pa coh ih nghox koe: bwanson: pa mhawm: heue.
Pwi pa coca: tix sawg kah ceu pa mhawm:, tag pon bwanson: heue. Mai pwi pa sawg tix yuh pwi laux, tokaux nawh tag hoek krax laux krax leeing: heue.
Pwi pa deuh rhawm: kah sinngao mau khri: tix, tag som nai: heue. Mai pwi rah pwi see, tag awm: lhax khaox pa klai jheengjheeng: heue.
Pwi pa kieh nyiiex ma: tix suksag, pon kah sin: bhaung:, pwi pa caox khankix kawx, tag yaox tix yuh siliex kah pwi pa koe: cuyi: pingnya heue.
Plix pwi pa rauh pa see, plix nawh mawh num: plix pa im: ju heue. Pwi pa pon kah ju pwi khankix, mawh pwi pa koe: cuyi: pingnya heue.
Jhak heue, pwi pa rauh pa see, yam ot kix piang haktiex, yaox tix kham: kah pa ciyang phimap heue. Pwi phimap mai pwi pa ang rah ang see khankix, nie lheu: yaox tix kham: geu: miex ding?
Pwi pa simie tix nghiiet kah lox tawm: beenli pa sidiex gau, mawh pwi pa moh kah cuyi: pingnya heue. Pwi pa koeng kah lox pa sidiex gau, mawh pa koe: rhawm: totiag heue.
Pwi pa mhawm: khankix, tag pon min: plakngai: sivoe ngai: Simiang Siyiex heue. Pwi pa keud pa ang mhawm: khankix, tag pon krax ciyang phimap heue.
Kawn: pwi ang chix kaux chix cong: kheu phimap, riah pwi rah pwi see ang chix gah hu:.
Bun: pa chix priex rhawmrhi: pa mhawm: been, mawh mhok khri: min: plakngai: kah mex nawh heue. Mai bun: pa chix yuh krax kaig krax tua, awm: yuh si-ang: mex tix rham: heue.
Krax keud pwi rah see, mawh pa rauh see heue. Mai krax keud pa tawx pwi ang rah ang see, mawh pa pie pa lhen: heue.
Lox pwi pa ang rah ang see khankix, mawh pa chix jawm tix pah ju pwi yum:, mai jheeh pwi pa rauh pa see khankix, chix taoh kah pwi tang: kaux heue.
Nyiiex pwi pa ang rah ang see khankix, goh mai laux grai: mu: heue. Nyiiex pwi pa rauh pa see khankix, chix kaux chix cong: jheengjheeng: heue.
Kawn: pwi awm: pa koe: nawh cuyi: pingnya, tag pon kah pa yaogyaw pwi heue. Mai pwi pa vawk daux rhawmrhi: khankix, tag yaox tix kham: kah krax nunai: pwi heue.
Mai pwi pa tang: yuh tix ih kaing tokaux tix, viang ang koe: min: plakngai: kawx, nie lheu: mhawm: khaing: pwi pa yaw rangdi tix khawm ang tix koe: pa ih heue.
Pwi rah pwi see khankix, chix lhawk kah ju khawng: brie pa eei: tix heue. Pwi pa ang rah ang see khankix, nieb khin: tix yuh mai ang koe: krax caoxrhawm: heue.
Pwi pa yuh tix ih ma: kaung:, yaox tix ih tom: sak heue. Mai pwi pa lailing giex, pa ang koe: krax keud khankix, mawh pa ang koe: cuyi: pingnya heue.
Pwi pa ang rah ang see khankix, kix simie kah jhawk pa shiao pwi caox khankix, riah pwi rah pwi see khankix, chix plix plix heue.
Mai jheeh pwi pa cha nie luan lox sikah khankix, koe: jhawk pa caox son kix, mai pwi rah pwi see khankix, luan khaing: see: pa nu pa khawm heue.
Kawn: pwi yaox tix ih sak kah plix siyieb jheeh tix heue. Mai nawh tag deeh pon bwanson: pa mhawm:, mai pa ang mhawm:, awm: kaing pa hoik yuh kah taix tix heue.
Pwi caox khankix, keud kaing pa hoik yuh tix, mawh pa caw heue. Pwi pa cu nghiiet kah lox pa tawx krax keud krax sawn:, mawh pwi pa koe: cuyi: pingnya heue.
Krax songrhawm: pwi caox khankix, lih sidawng: dom: mawx dom: an:, viang mawh nan:, pwi pa koe: cuyi: pingnya satix khankix, chix tawb kheem: krax kaig krax tua heue.
Pwi pa sikah, kah lox pa mawh pa meh, chix jhi: kah pa rauh pa see, mai pwi pa kham: mhai: sakse pa ang mawh ang meh khankix, chix jhi: kah ceu pa pie pa lhen: heue.
Pwi tiblah chix sikah awm: pa suat gawn:, dak pwi pa koe: cuyi: pingnya chix kieh jhawm: saux moi: heue.
Siyieb jheeh pwi pa kaux sijax, mawh pa kaux cong: jheengjheeng: heue. Mai dak pwi pa pie pa lhen:, mawh pa kaux tivud khaing:.
Kah daux rhawm: pwi pa keud ceu pa ang mhawm: khankix, koe: ceu pa pie pa lhen: heue. Viang mawh nan:, kah daux rhawm: pwi pa chix tawx krax keud krax sawn: sonsang deeh khaw: deeh caw paox tix khankix, koe: krax gauxrhawm: heue.
Kah piang pwi rah pwi see khankix, ang hoek ceu pa khirhawm: khirhi:, kah piang pwi pa ang rah ang see khankix, tag grum hoek ceu pa khirhawm: khirhi: heue.
Siyieb jheeh pa shiao kah pa pie pa lhen:, Simiang Siyiex seeing: brai: kah heue. Viang mawh nan:, pwi pa priex tix hawt kah lox sijax mukheu Nawh khankix, Siyiex khaw: rhawm: kah heue.
Pwi pa koe: cuyi: pingnya satix, nawh chix mox kah ceu pa tawng tix heue. Pwi pa caox khankix, chix jhi: kah jhawm: pa hai nawh heue.
Pwi pa rien: mai pa coca: tix yuh kaing khankix, pon tix mawh cao: giex kaing: heue. Mai pwi pa nieh khankix, tag yaox tix yuh siliex pwi heue.
Ceu pa khirhawm: khirhi:, mawh ceu pa chix kieh pwi khrup rhawmrhi: heue. Lox pa mhawm: mawh ceu pa chix kieh gauxrhawm: heue.
Pwi rah pwi see khankix, chix jhi: daux krax kah paoxplawg paoxnyhawm: tix heue. Mai Daux krax pa hu: pwi pa ang rah ang see khankix, deeh pie kah cao: kix heue.
Pwi pa nieh khankix, viang kix yuh cao: jaw kawx, totiag pa pon kix, hoik ping: kawx, ang yaox tix ih, pwi pa rien: mai pa coca: tix yuh khankix, sinngao mau khri: nawh mawh pa ting jum heue.
Mai daux krax pwi rah pwi see khankix, ang koe: krax lhat krax yum:, mawh krax pa im: ju heue.
Kawn: simex pa koe: cuyi: pingnya, chix nghiiet kah lox pa sidiex keeing: nawh, mai kawn: simex pa nieb yuh pa ang cee ang cak, ang chix cu chix nghiiet kah lox pa sidiex gau.
Kawn: pwi yaox tix ih kah plix jheeh pa mhawm:, mai pwi pa yuh phimap khankix, yaox tix ih kah plix pa ciyang phimap heue.
Pwi pa priex kah jheeh tix, priex kah ju tix heue. Pwi pa ang: jheeh tix tom: vieh, hoek krax laux krax leeing: heue.
pwi pa nieh khankix, sawg ceu patix kawx ang pon, pwi pa rien: mai coca: tix yuh kaing khankix, tag pon kah pa simie nawh tix pon khawm uik heue.
Pwi rah pwi see khankix, koeng kah lox pa pie pa lhen: heue. Pwi pa ang rah ang see khankix, yuh pa seeing: pa brai: mai hoek krax kaig krax tua heue.
Ceu pa rauh pa see, chix priex kah pwi pa rauh pa see heue. Ceu pa ang rah ang see, chix kieh pwi pa koe: phimap goh heue.
Pwi hot pwi sibhawm:, chix yuh grang tix, awm: pwi pa mi pa koe:, mai pwi pa mi pa koe: kawx, chix yuh grang tix, awm: pwi hot pwi sibhawm: heue.
Sinngao, mau khri: mawh pa taoh kah ju pwi pa mi pa koe:, mai pwi hot pwi sibhawm: khankix, ang mhong: lox deuh phimap heue.
Pa riieng pwi rah pwi see mawh krax gauxrhawm:, mai kawk ngu pwi pa ang rah ang see, mai tag yeet hu: heue.
Mawh kheu krax ting rhawm: ting rhi:, chix viex krax pa simah, pwi pa cu nghiiet kah lox sidiex gau, mawh pa koe: cuyi: pingnya heue.
Sinngao, mau khri: pa pon yie, chix deeh uik hu: heue. Sinngao, mau khri: pa pon kah daux pa coca:, mawh pa chix haok chix hwan heue.
Krax krox jun, phan: ang lih tix mawh dom: mawx dom: an:, chix kieh khirhawm: heue. Yam grum naog pa simie tix pon khankix, lih mawh khaox pa im: ju heue.
Pwi pa nieb yuh pa ang cee ang cak kah gumlox Nawh Cao:, tag hoek krax laux krax leeing: heue. Mai pwi pa yungyi: kah lox tawm: beenli Nawh, tag pon pa nyawmrhawm: nyawmrhi: heue.
Lox pwi pa koe: cuyi: pingnya, mawh rawm: keut pa im: ju, pa luan khaing: jhawk dee yum: heue.
Pwi pa koe: pingnya krax tawng krax yung, pon plakngai:, krax pwi pa yuh phimap khankix, mawh krax pa nu pa khawm heue.
Pwi pa koe: satix khawm uik, chix yuh kaing daux cuyi: pingnya, mai pwi caox chix kieh sidawng: kah phimap pa caox pa yuh tix heue.
Siliex pa ang rah ang see, chix kieh laux kah kaing pa yuh tix, simiang pa yuh tang: (Sandaman) pa kaux sijax, pon krax nyawm ot heue.
Pwi pa thiang: tix tik kah lox sidiex gau, nawh tag hot sibhawm:, mai tag hoek krax kaig krax tua heue. Mai pwi pa nghiiet kah lox pa sidiex gau, tag pon min: plakngai: heue.
Phan: naog alo pa simie tix pon hoik fahrhawm: heue. Ceu pa via kah phimap mawh ceu pa seeing: brai: kah pwi caox khankix heue.
Pwi pa yuh paox pie kah pwi pa koe: cuyi: pingnya, tag chix pingnya heue. Mai pwi pa yuh paox pie mai pwi caox, tag hoek krax laux krax leeing: heue.
Krax khirhawm: chix hawt khaix pwi pa koe: phimap heue. Mai pwi rah pwi see khankix tag pon bwanson: pa mhawm: heue.
Pwi pa mhawm: khankix, chix deuh sin:, kraungkhrai: son kawnpraix mai kawn: saux khankix heue. Sinngao, mau khri: pwi pa koe: phimap khankix, hoik priex tix deuh son pwi rah pwi see khankix heue.
Pwi hot pwi sibhawm: khankix, mawh kheu yuh kix ma:, kaung:, haoh pa ih pa un: heue. Viang mawh nan:, mawh kheu yuh nawh pa ang rah ang see, hoek krax laux krax leeing: heue.
Pwi pa ang shiao kah khaox saux, mawh pa koeng kah kawn: tix heue. Viang mawh nan:, pwi pa moh kah kawn: tix, chix sidiex gau tom: yam iak heue.
Pwi rah pwi see khankix, pon tix ih tom: sak, pwi pa ang rah ang see khankix, tag yaox tix kham: geu: kah pa cairhawm: heue.
Bun: pa koe: cuyi: pingnya, chix priex nyiiex ma: tix mhawmmhawm:, mai bun: pa caox pa ang koe: cuyi: pingnya, teei taix tix mai chix yieh tix tik nyiiex ma: heue.
Pwi pa hawt krax rah krax see, chix lhat chix graung kah Simiang Siyiex, mai pwi pa hawt krax pa kawk pa vawk khankix, chix yuh pa ang cee ang cak heue.
Kah daux jheeh pwi caox khankix, koe: khaox saux son pa ting rhawm: kix heue. Kah daux jheeh pwi pa koe: cuyi: pingnya, chix taoh kah pwi heue.
Kawg moi pa ang koe: moi mhaing:, singax heue. Viang mawh nan:, pwi chix pon mau khri: tom: nie kah riang rao moi heue.
Pwi pa kham: mhai: sakse pa kaux sijax, ang chix pie chix lhen:, mai pwi pa kham: mhai: sakse pa ang kaux sijax, chix pie chix lhen: heue.
Pwi pa nieb yuh pa ang cee ang cak, sawg pingnya kawx ang yaox, mai pwi pa koe: pingnya krax tawng krax yung khankix, yie tix sawg heue.
Phan: maix yaox pwi caox mai phan: maix hoik tawng grawng: mawh nawh pwi ang koe: cuyi: pingnya, via hu: khaing: nawh heue.
Cuyi: pingnya, mai pwi pa koe: cuyi: pingnya satix khankix, nawh tawng kah krax hu: tix, mai krax caox pwi caox khankix, mawh pa pie pa lhen: heue.
Pwi caox khankix, chix yuh phimap pa ang cee ang cak, mai pwi rah pwi see khankix, chix yuh bwanson: kah paox tix, tix kaux hoik tix kaux heue.
Rhawm: pwi tang: tawng kah krax kharhawm: tokaux tix, rhawm: pwi pa gauxrhawm: ang chix dex dawd kah pwi tang: kaux.
Nyiiex pwi pa ang rah ang see chix goh heue. Mai nyiiex gox pwi rah pwi see khankix, chix pruh riang heue.
Krax keud kawn: pwi viang awm: pa mawh pa meh kawx, dee sidauh tawx krax yum: heue.
Kawn: pwi, yam nyiah kawx, daux rhawm: nawh chix khi: heue. Krax nyiah, krax gauxrhawm: an:, dee sidauh chix lih mawh krax voi rhawm: heue.
Mai pwi pa koe: rhawm: pa tieh feen ang ah, pwi pa mhawm: ang ah, tag sak kah pa yuh tix heue.
Pwi pa ang koe: krax keud krax sawn: pa ang koe: pingnya khankix, yie yumrhawm: kah lox pa krai pwi, mai pwi pa koe: cuyi: pingnya satix khankix, chix jhak kah krax pa hu: tix mhawmmhawm: heue.
Pwi pa koe: cuyi: pingnya chix lhat chix graung mai via hu: khaing: phimap heue. Mai pwi caox khankix, ting rhawm: canyhau: mai koe: rhawm: kwa: heue.
Pwi pa dawd rhawm: khankix, chix yuh ceu pa kied caox, mai pwi pa keud ceu pa ang mhawm: khankix, tag yaox tix kham: kah pa koeng pwi heue.
Pwi pa ang koe: pingnya krax keud krax sawn: khankix, chix pon sin: pa caox, mai pwi pa koe: cuyi: pingnya satix, tag yaox tix ceep mhok khri: pingnya krax tawng krax yung heue.
Pwi caox khankix, tag grux ngawng tix krub sivoe ngai: pwi pa mhawm: khankix, mai pwi pa ang rah ang see khankix, tag grux ngawng tix krub kah diang siviex nyiiex pwi rah pwi see khankix heue.
Pwi hot pwi sibhawm: khankix, tag yaox tix kham: kah pa koeng paoxplawg paoxnyhawm: tix, mai pwi pa pon sawg mau khri: tom: nie khankix, haoh paox pie heue.
Pwi pa nieb yuh pa ang cee ang cak kah paoxplawg paoxnyhawm: nawh, koe: phimap, mai pwi pa caoxrhawm: caoxrhi: kah pwi hot pwi sibhawm: khankix, koe: bwanson: heue.
Pwi pa keud kah ceu pa ang mhawm: khankix, chix phit chix lud krax heue. Pwi pa chix keud tix yuh bwanson: kah pwi, pon bwanson: krax caoxrhawm: pa kaux sijax heue.
Mai pa coca: tix yuh daux kaing kuceu koe: bwanson:, mai ceu pa haoh lox haoh sikah mawh pa hot pa sibhawm: khaing: heue.
Sinngao, kraungkhrai:, pwi pa koe: cuyi: pingnya mawh mhok khri: min: plakngai:, pa yuh pwi caox khankix, mawh ngie ceu pa caox khaing:.
Mhai: sakse pa mawh pa meh, mawh pa chix taoh kah ju pwi, mhai: sakse pa ang mawh ang meh, mawh pa shiao kah lox pa chix pie chix lhen: heue.
Krax pa lhat pa graung kah Simiang Siyiex, mawh riang rao dee deuh rhawm: pa kaux, mai kawn: simex nawh khankix, tag pon dee laux dee deuh rhawm: heue.
Krax pa lhat kah Simiang Siyiex, mawh rawm: keut pa im: ju, pa luan khaing: jhawk krax yum: heue.
Simiang khunhawkham pa yaox tix giex kaing: pwi haktiex tom: nie, koe: min: plakngai: heue. Mai simiang pa yaox tix giex kaing: pwi haktiex pa tux pa iak, min: plakngai: kawx iak heue.
Pwi pa lang: rhawm: lang: rhi: khankix, ting cuyi: pingnya, mai pwi pa dawd rhawm: khankix, rhawm: kix nie caox heue.
Mai rhawm: pa nyawm ot nyawm koe:, mawh pa kieh tokaux im: ju, mai pa bohrhawm: bohrhi: mawh pa kieh si-ang: rham: heue.
Pwi pa tuktiaktukte: kah pwi hot pwi sibhawm: khankix, mawh pa sa pa lao kah Siyiex Cao: pa phan: pa deuh heue. Mai pwi pa nab pa yam kah Siyiex khankix, chix caoxrhawm: kah pwi hot pwi sibhawm: khankix heue.
Pwi pa ang rah ang see khankix, tag hoek krax laux krax leeing:, kheu yuh kix pa ang rah ang see, pwi rah pwi see khankix tom: yam yum: kix kawx, kawn: koe: krax keud pot jun pot heue.
Mai pwi pa koe: pingnya krax tawng krax yung khankix, cuyi: pingnya chix ot chix koe: kah daux rhawm: kix, ceu pa koe: kah daux rhawm: pwi caox khankix, chix lih sidawng: heue.
Ceu pa rauh pa see, mawh pa chix yaog pwi haktiex ting lhaong:, phimap phigrham: mawh pa chix yeen pwi haktiex hoek dee tiiem heue.
Siliex pa koe: cuyi: pingnya, simiang khunhawkham chix yuh bwanson: kah nawh heue. Mai siliex pa yuh krax kaig krax tua, yaox tix kham: geu: kah pa songrhawm: songrhi: heue.
Lox pa awn: pa tiiem kieh rhawm: pwi deeh nyawmrhawm:, lox sikah pa riex mawh pa chix kieh rhawm: pwi songrhawm: heue.
Mai dak pa koe: cuyi: pingnya, chix kieh pwi tawng cuyi: pingnya, jheeh pwi caox khankix, chix hieh pa caox heue.
Ngai: Simiang Siyiex koe: kudauh kudee mai jhak kah pa mhawm: mai pa ang mhawm: heue.
Dak pa awn: mawh khaox pa im: ju, mai dak pa riex mawh pa chix kieh rhawm: pwi saux heue.
Pwi caox khankix, deuh lox sidiex gau keeing: ang koe: cee koe: cak, mai pwi pa nghiiet kah lox sidiex gau khankix, mawh pwi pa chix priex rhawm: satix heue.
Kah daux nyie pwi rah pwi see khankix, sinngao koe: tom: nie heue. Gha: pon pwi pa ang rah ang see khankix, hoik nie mai krax pa sungsang rhawm: nawh heue.
Siyieb jheeh pwi pa koe: cuyi: pingnya, chix gwieh tix tawx pingnya krax tawng krax yung kah pwi heue. Viang mawh nan:, pingnya ang koe: kah daux rhawm: pwi caox.
Simiang Siyiex seeing: brai: kah krax tan krax lu pwi pa ang rah ang see khankix, mai Siyiex khaw: rhawm: kah lox rawg bwan: pwi rah pwi see khankix heue.
Simiang Siyiex seeing: brai: kah krax pa hu: pwi ang rah ang see khankix, mai Nawh moh kah pwi pa hawt daux krax pa rauh pa see khankix heue.
Pwi pa lud krax hu: khankix, ang rhawm: nghiiet kah lox sidiex gau pwi, viang mawh kawx nan:, pwi pa koeng kah lox pa deuh phimap khankix, tag yum: tete heue.
Meung yum: mai meung laux meung leeing: kawx, hoik sidawng: sivoe ngai: Simiang Siyiex, lheu: khaing: in:, nie lheu: sidawng: kah daux rhawmrhi: kawn: pwi miex ding?
Pwi pa yuh pa ang cee ang cak khankix, ang lai moh kah lox pa sidiex gau mai ang pon ot dex pwi pa koe: cuyi: pingnya heue.
Mai rhawm: pa chix gauxrhawm: gauxrhi:, chix tawx pakngai: he: sivoek heue. Mai rhawm: pa khirhawm: khirhi:, chix kieh pwi lauxrhawm: heue.
Rhawm: pwi pa mhawm: pingnya krax tawng krax yung, chix sawg kah cuyi: pingnya heue. Mai jheeh pwi caox khankix, moh kah pa caox heue.
Singaix cie pwi hot pwi sibhawm: khankix, mawh pa caox ku singaix, mai rhawm: pwi pa gauxrhawm: gauxrhi: khankix, mawh pwie gauxrhawm: jheengjheeng: heue.
Pwi pa lhat pa graung kah Simiang Siyiex, viang sinngao, mau khri: koe: ceeix khaing: kawx, nie lheu: mhawm: khaing: pwi pa mi pa koe: khawm ot tix mai suksag rhawm: tix heue.
Phan: ih taux klai giex tix brie kah daux krax moh krax rhawm:, nie lheu: mhawm: khaing: ih nex moi tang: pa kluing: pa bee khawm mu:, kah daux pa ang koe: krax moh krax rhawm: heue.
Pwi pa ting rhawm: canyhau: khankix, chix kieh krax simah lih heue. Mai pwi pa chix gun chix yeung khankix, chix kieh krax simah yiien: heue.
Daux krax hu: pwi pa nieh khankix, awm: vie pang: kat pa tie krax, viang mawh nan:, khaix hu: pwi rah pwi see khankix, awm: krax ting heue.
Kawn: simex pa koe: cuyi: pingnya, mawh pa gauxrhawm: son keeing: heue. Phan: mawh kawn: simex pa caox, ang kieh miex tix koe: cee koe: cak heue.
Mai pwi pa ang koe: pingnya krax tawng krax yung, chix gauxrhawm: kah daux kaing pa caox heue. Pwi pa koe: pingnya krax tawng krax yung, chix gauxrhawm: kah daux kaing pa rauh pa see heue.
Kaing ceu pa ang naix num: kum: rhawm: tau, chix laux heue. Viang mawh nan:, kaing pa rom tix kum: mai yuh tau chix kaux cong: heue.
Pwi pa koe: krax gauxrhawm: gauxrhi:, kah lox pa deeh ah nawh, lox pa krai pa khaw: mai bawg yam, nyawm tix nghiiet miex ding?
Krax im: ju pa hawt pwi pa koe: cuyi: pingnya, chix via khaing: meung yum: plak greem:, mai chix thong: haok plak piang dee lhaong: heue.
Simiang Siyiex, tag yieh laux nyiiex pwi pa ting rhawm: canyhau:, phan: mawh gwang dee ot miexmai: tag kieh kaux cong: heue.
Simiang Siyiex seeing: brai: kah krax pa keud pwi pa ang rah ang see khankix, mai Nawh Cao: khaw: rhawm: kah lox pwi pa singax singeh khankix heue.
Pwi pa sawg sinngao, mau khri: kah daux pa ang rah ang see khankix, chix kieh kawn: nyiiex kawn: ma: tix khirhawm: heue. Pwi pa koeng kah khawngphak pa ang rah ang see khankix, tag pon ju pa nyawmrhawm: heue.
Pwi rah pwi see khankix, chix keud chix sawn: kah lox pa sang deeh pawk kah pwi heue. Mai jheeh pwi caox khankix, chix krai lox pa caox heue.
Simiang Siyiex singai khaing: pwi pa ang rah ang see khankix, mai Nawh nghiiet kah lox pa rawg bwan: pwi rah pwi see khankix heue.
Pa riieng ngai: ex, chix kieh rhawm: ex gauxrhawm: heue. Lox pa gauxrhawm: gauxrhi: kawx, chix kieh gua si-ang: naog heue.
Pwi pa nghiiet kah lox pa sidiex gau pa dex mai ju, tag pon tix ot tau mai pwi pa koe: cuyi: pingnya heue.
Pwi pa thiang: tix tik kah lox sidiex gau khankix, yuh pa ang cee ang cak kah ju khwan tix heue. Viang mawh nan:, pwi pa chix nghiiet kah lox pa sidiex gau khankix, chix pon pingnya krax tawng krax yung heue.
Rhawm: pa lhat pa graung kah Simiang Siyiex mawh krax pa gau cuyi: pingnya heue. Mai krax pa awn: rhawm: awn: rhi: koe: sivoe ngai: min: plakngai: heue.
Rhawmrhi: pa keud khawm uik, mawh pa dex mai kawn: pwi, lox pa kaoh khaing: dak khawm uik, mawh pa kaoh khaing: Simiang Siyiex heue.
Kawn: pwi chix fah rhawmrhi: kah kaing pa yuh cao: tix, viang mawh nan:, Simiang Siyiex jhak kah rhawmrhi: kawn: pwi heue.
Kaing pa yuh maix ap kah Simiang Siyiex awawx. Phan: yuh nan:, kaing pa keud maix tag kaux cong: heue.
Simiang Siyiex hoik yuh khawm uik kah son Nawh heue. Mai Nawh hoik phan: tix deuh singaix sonsang ciyang kah pwi caox khankix heue.
Simiang Siyiex seeing: brai: kah pwi pa ting rhawm: canyhau: khankix heue. Kix tok taix paox tix mai yuh cub caw: kawx, ang doh pon luan khaing: krax ciyang phimap heue.
Mawh kheu krax caoxrhawm: mai bwanson: pa rauh pa see, pon tix luan khaing: phimap heue. Rhawm: pa lhat graung kah Simiang Siyiex, mawh pa chix via hu: khaing: phimap heue.
Yam khaw: rhawm: Siyiex kah jhawm: pa yuh kawn: pwi, koe: pwi pa koeng kah paox tix kawx, Nawh deeh kieh kiex khaw: paox tix heue.
Sinngao, mau khri: pa pon kah daux pa rauh pa see, viang mawh ceeix khaing: kawx, nie lheu: mhawm: khaing: pa pon tom: nie kah daux pa ang rah ang see heue.
Kah daux rhawm: kawn: pwi keud krax sang hu: tix, viang mawh nan:, cao: pa thong: hu: mawh Siyiex heue.
Krax prawng ca: pa rauh see, koe: kah siyieb jheeh simiang khunhawkham, yam prawng ca: nawh, ang chix lud heue.
Jiang pa khaw: mai kla: jiang pa khaw:, mawh cie Simiang Siyiex heue. Kla: jiang pa koe: kah daux bau: khankix, mawh pa sang deuh tix prawng ca: heue.
Simiang pa yuh phimap, mawh ceu pa seeing: pa brai: heue. Grawhgrawng: nawh, kheu pa rauh pa see dangngeung kaux cong: heue.
Siyieb jheeh pa rauh pa see mawh pa khaw: rhawm: simiang khunhawkham, mai simiang moh kah pwi pa ah lox pa khaw: pa caw heue.
Krax songrhawm: songrhi: simiang, awm: kawncau simiang yum: heue. Viang mawh nan:, pwi pa koe: cuyi: pingnya, chix kieh yiien: kah pa songrhawm: an: heue.
Kheu mhawm: pakngai: simiang khunhawkham, pon ju pa nyawmrhawm: heue. Bwanson: nawh kawx, awm: rawm: lhiex lha: heue.
Pa pon kah cuyi: pingnya nie lheu: mhawm: khaing: pon khri: pa mhawm:, mai pa pon pingnya krax tawng krax yung, nie lheu: mhawm: khaing: pon mau pa mhawm: heue.
Krax pa hawt pwi rah pwi see khankix, mawh pa via hu: khaing: phimap, pwi pa ang via mai hawt krax an: jheengjheeng:, nawh tag priex ju khwan tix heue.
Mai pwi pa ting rhawm: canyhau: khankix, krax laux krax leeing: koe: sivoe kix, mai pwi pa ting rhawm: lhaong: ngai: khankix, tag rau hu: dee tiiem heue.
Pa yuh paox pie kah pwi pa awnrhawm: awnrhi: khankix, nie lheu: mhawm: khaing: yuh paox pie mai pwi pa ting rhawm: canyhau:, pa gwieh tix cie kraungkhrai: mau khri: pa pon khaing: pa tud pa rhim: tix teei heue.
Mai Pwi pa priex tix hawt kah cuyi: pingnya, tag pon pa mhawm: heue. Pwi pa deuh rhawm: kah Simiang Siyiex, koe: bwanson: heue.
Rhawm: pwi pa lhak lhiem:, pwi tag kok mawh pa koe: cuyi: pingnya satix heue. Mai jheeh pwi pa chix krai lox pa nyawm pa tie: kawx, chix kieh cuyi: pingnya haok hwan heue.
Pwi pa pon kah cuyi: pingnya khankix, pon kah rawm: keut pa im: ju heue. Mai pa sidiex gau pwi caox khankix, mawh ngie ceu pa caox heue.
Rhawm: pa koe: cuyi: pingnya khankix, chix gau kah jheeh nawh, mai baox thiienthie: cuyi: pingnya kah siyieb jheeh nawh heue.
Lox pa nyawm tix nghiiet khankix, awm: rawm: kaing: hia:, tie: laig tom: daux khwan mai kieh nyawm ot nyawm koe: tom: hoek daux si-ang: heue.
Krax pa keud kawn: pwi ce: hoik mawh pa mawh pa meh kawx, dee sidauh mawh krax yum: heue.
Mai kawn: pwi yuh kaing, jao son jheeh tokaux tix heue.
Pwi caox chix keud grawng: pa caox, pa ang mhawm:, lox sikah pa lih khaing: jheeh nawh kawx, awm: ngu pa kied hax heue.
Pwi pa kawk rhawmrhi:, chix ruat simie krax pa simah heue. Lox pwi pa suksiep kawx, chix kieh paoxgrawm tang: gwieh hu: heue.
Pwi pa caox jhawm:, chix nyaw chix glaw: kah paoxplawg paoxnyhawm:, mai chix viex hu: kah daux krax pa ang mhawm: heue.
Yam khiep kix ngai: tix, mai keud ceu pa kawk pa vawk, mai siyieb jheeh kix chuh mai lih mawh pa caox heue.
Mai pwi hoik paing hauk kaing:, phan: ot kah daux krax pa rauh see, mawh mhok khri: min: plakngai: heue.
Pwi pa lang: rhawmrhi:, nie lheu: mhawm: khaing: pwi pa ting riang rao, mai pwi pa chix gun rhawmrhi:, nie lheu: mhawm: khaing: pwi pa pon puing: veng tix veng heue.
Ex nieb, (cawk silak) tix teei lai pa koe: daux bau: kawx, cao: pa hoik laug tix teei tete mawh Simiang Siyiex heue.
Pa yaox tix ih khaomun tix gum kah daux pa khaw: pa caw, kawn: nie lheu: mhawm: khaing: ih priex tan lu, pa naog kah daux nyiiex ma:, mai pa simah kah paox tix heue.
Siliex pa koe: cuyi: pingnya, yaox tix giex kaing: piang kawn: simex pa yuh krax kaig krax tua, mai pon sin: tau mai kawn: pwi tang: kaux heue.
Pa chauk cheu: tix yaox kah mau khri:, mawh ngu heue. Pa cheu: tix yaox kah rhawmrhi: kawn: pwi mawh Simiang Siyiex heue.
Mai pwi pa yuh pa ang rah ang see khankix, chix yumrhawm: kah lox pa pie pa lhen:, pwi pie pwi lhen: kawx, chix nghiiet kah lox pa seeing: pa brai: heue.
Pwi pa nieb yuh pa ang cee ang cak kah pwi hot pwi sibhawm: khankix, map kah Siyiex Cao: phan: Cao: deuh nawh, pwi pa gauxrhawm: gauxrhi: kah yaox pwi tang: kaux krax khirhawm: khirhi:, ang pon luan khaing: krax ciyang phimap.
Kawn: saux kawn: sex mawh mhok khri: kah pwi pa riex ju, mai min: plakngai: kawnpraix mawh keeing: kix heue.
Lox pa mhawm: ang doh keung: kah pwi caox, lheu: khaing: in:, lox pie lox lhen:, ang doh khaw: kah simiang.
Mawh awm: siang: pa mhawm:, sivoe cao: pa pon, tag pex hu: can dee vai: ngai: tix heue.
Mai pwi pa tawb kheem: kah phimap, pa phit pa lud kah pwi tang: kaux, mawh pwi pa sawg kah krax moh krax rhawm: heue. Viang mawh nan:, pwi pa simie tix deeh krai pa phit pa lud pwi tang: kaux, mawh pwi pa kieh paoxgrawm gwieh paox tix heue.
Lox pa sidiex gau tix gum kah pwi pa koe: cuyi: pingnya, nie lheu: mhawm: khaing: pa sivied, tiyieh taix kah pwi caox heue.
Pwi pa tieh feen khankix, chix khrawm: tix deuh pa ang rah ang see khaing:, mawh kheu nan:, ploi: kawncau pa caox hu: kah nawh heue.
Pa sidauh kah krih miex pa grai: kawn:, nie lheu: mhawm: khaing: sidauh kah pwi caox yam lih songrhawm: nawh heue.
Mai pwi pa ang tawng kah bwanson:, mai pwi pa deeh pawk ceu pa ang mhawm: khankix, nyiiex ma: pwi an:, pa caox koe: jheengjheeng: heue.
Krax pa simah yam jah, awm: pa doh guh rawm: nhawng:, kah: sivoe ang nyang koe: krax pa simah, nied via hu: caocao heue.
Pwi pa ploi: phimap kah pwi pa ang rah ang see, mai pwi pa ciyang phimap kah pwi pa rauh see, Simiang Siyiex seeing: brai: kah kiex khawm ra: heue.
Pwi caox pa ang simie kah cuyi: pingnya, tawx ngawh cuyi: pingnya kah nawh chix koe: bwanson: yuh kah mawx?
Paoxgrawm chix moh paox tix jheengjheeng:, puxaik keh sonsang teem: coi kah paox tix yam yaox krax kharhawm: kharhi: heue.
Mai pwi pa ang koe: cuyi: pingnya, dieh taix mai chix kham: sivoe ngai: paoxgrawm heue.
Pwi pa moh kah krax pa simah khankix, mawh pwi pa nie lheu: moh kah pa cha nie luan yuh phimap heue. Pwi pa yuh diang siviex tix ting lhaong: khankix, sawg kah krax laux krax leeing: heue.
Pwi pa vawk rhawmrhi: khankix, ang chix yaox kah ceu pa mhawm:, mai pwi pa pie lhen: khankix, chix yaox kah ceu pa khirhawm: pa caox heue.
Mai pwi pa chix kieh keh kah pwi caox, chix kieh tokaux tix laux rhawm: heue. Kawn: pa caox ang chix yuh ceu pa gauxrhawm: keeing: tix.
Rhawmrhi: pa chix gauxrhawm:, chix kieh nyawm ot nyawm koe: heue. Khwan pa chix laux rhawm: laux rhi:, Kieh si-ang: chix ceh chix rham: heue.
Pwi pa ang rag ang see khankix, chix cawk tix teei mau daux hau: pwi, mai chix yuh laux kah pa rauh see heue.
Cuyi: pingnya koe: sivoe ngai: pwi pa koe: pingnya krax tawng krax yung kgankix, mai ngai: pwi caox khankix chix lulie: tix jhak tom: sidauh haktiex heue.
Mai kawn: simex pa caox chix kieh keeing: tix khirhawm:, mai chix kieh miex tix laux rhawm: heue.
Ang mhawm: tix tawx krax ciyang phimap kah pwi pa rauh see, ang mhawm: tix chuh kah simiang pa prawng see: rah see.
Pwi pa grum naog krax keud ang chix haoh lox, mai pwi pa koe: pingnya krax tawng krax yung, chix deuh rhawm: tix nhim: yiien: mhawm: heue.
Mai pwi caox kawx, phan: chix ot nhim: mhawmmhawm:, pwi ce: kix mawh pa koe: pingnya krax tawng krax yung heue. Pwi pa ang vaoh jheeh tix sikah kawx, pwi tang: kaux ce: mawh pa koe: pingnya krax tawng krax yung heue.
Pwi pa ang yuh paox pie mai pwi tang: kaux, mai pwi pa koe: rhawm: tix sawg kah pingnya krax tawng krax yung awm: pa simie nawh, mawh pwi pa chix sawg kah cuyi: pingnya heue.
Phan: mawh pwi caox, ang chix gauxrhawm: kah cuyi: pingnya, lheu: khaing: chix jhi: rhawmrhi: pa keud tix khaing:.
Yam hoek pwi pa ang rah ang see khankix, yaox tix kham: kah ceu pa yuh pa ang cee ang cak, mai yam laux min: plakngai:, yaox tix kham: kah pa sa pa lao heue.
Lox pa lih khaing: jheeh kawn: pwi, awm: rawm: pa kied raux, daux rawm: keut cuyi: pingnya, awm: pa lih hu: rawm: klawng: khankix heue.
Yam prawng see:, jhak kah plakngai: pwi pa ang rah ang see, mai kieh pwi rah pwi see som ang khaw: tix yuh.
Siyieb jheeh pwi caox khankix, chix kieh pwi yuh krax pa simah, mai jheeh nawh kawx, chix sawg kah krax ciyang phimap heue.
Mai jheeh pwi caox khankix, mawh pa yuh tokaux tix laux, mai siyieb jheeh nawh kawx, mawh jhawk son ju nawh heue.
Lox pa chix kieh pwi simah khankix, nyawm awm: pa ih mai chix laig kah daux vaig daux tu heue.
Pwi pa nieh yuh kaing khankix, mawh awm: puxaik pwi pa cai: mau khri: som nai: giex heue.
Ceukaux Simiang Siyiex, mawh tab pa kaux pa cong:, mai pwi pa rauh pa see khankix, to: tix laig tan mai luan khaing: krax khirhawm: khirhi: heue.
Pwi pa mi, pa koe: mau khri: ah nin:, sinngao aux awm: veng pa kaux pa cong:, mai nawh keud ce: awm: guh veng pa lhaong: heue.
Num: krax laux krax leeing: mawh pa ting rhawm: ting rhi: heue. Num: min: plakngai: mawh pa tiiem rhawm: tiiem rhi: heue.
Pwi pa prawng ca: see: kah pwi, kah: sivoe ang nyang bax chawkcheng: kah grawng: kuceu, mawh pwi caox, pa koe: phimap, mai pon krax kaig krax tua heue.
Ju khwan kawn: pwi, pon kham: kah jhawm: saux jhawm: ngia tix, mai pwi mawx pa pon tix gun yeung kah krax khrup rhawm: khrup rhi: lie?
Pwi pa chix deuh rhawm: satix khankix, mawh pwi pa chix priex kah cuyi: pingnya heue. Mai yhaok pwi pa koe: cuyi: pingnya, chix sawg kah cuyi: pingnya heue.
Mawh kheu khawngphak pa viex kawn: pwi, koe: akhwang: pon tix laig kah sivoe pwi ting khankix heue.
Pwi pa hoek pau tix ah see: sivoe, viang nawh ah lox pa rauh see kawx, paoxplawg paoxnyhawm: nawh, kawn: hoek tix chawkcheng: kah nawh heue.
Mai nieb kieh pwi cawk silak, sonsang kieh pa thungthiang: yiien: mhawm:, mai tat dud kah see: pwi pa ting riang an: khankix heue.
Pa bak pa viang tix yuh krax pa simah kah puxaik tix, nie lheu: nu khaing: veng pa kaux pa cong:, mai pwi pa yuh krax simah kah puxaik khankix, awm: jhong: siviex pa tieb kah tab heue.
Mai vaig pwi naog kah plix jheeh tix, mai nawh yaox tix sak kah kaing pa lih khaing: siyieb jheeh tix heue.
Dak mawh pa kwang: kah ju pa im:, mai ju pa yum: heue. Pwi pa moh kah dak tix, yaox tix ih kah plix dak tix heue.
Pwi pa pon moeng, pon ceu pa mhawm:, mai pon bwanson: khaing: Simiang Siyiex heue.
Mai pwi hot pwi sibhawm: khankix, chix khyox khaw: kah pwi, viang mawh nan:, phan: mawh pwi pa mi pa koe: khankix, chix pawk lox riex lox si oh heue.
Mai pwi pa haoh pa hun: paoxgrawm khankix, chix laux chix leeing:, phan: mawh paoxgrawm pa mhawm:, nie lheu: ot dex ex khaing: puxaik dex heue.
Pwi hot pwi sibhawm: pa hawt daux krax pa rauh pa see, nie lheu: mhawm: khaing: pwi caox pa ah lox pa kawk pa vawk heue.
Rhawmrhi: pa ang chix cuyi: pingnya, ang koe:, ang pon, mai caong pwi pa hu: phai:, chix lud hu: heue.
Mawh kheu kawn: pwi koe: rhawm: pa caox, kah daux rhawm: nawh, deuh phimap ah lox sa lox lao kah Simiang Siyiex heue.
Pwi pa koe: sinngao khankix, haoh paoxgrawm, phan: mawh pwi hot pwi sibhawm: khankix, ang pon yuh paox pie tau mai paoxplawg paoxnyhawm:.
Pwi pa kham: mhai: sakse pa ang mawh ang meh ang lai pon tix luan khaing: krax ciyang phimap, awm: an:, pwi pie pwi lhen: khankix kawx, ang pon tix luan khaing: krax ciyang.
Pwi haoh pwi hun: khankix, chix nyaw glaw: lox kah simiang, mai pwi pa chix tawx khawngphak kawx, pwi kukaux chix yuh paox pie nawh.
Phan: mawh pwi hot pwi sibhawm: can puxaik nawh khankix kawx, koeng kah nawh, mai paoxgrawm nawh khankix, nie lheu: via hu: singai khaing: nawh heue. Viang nawh hawt kok kix kawx, kix mox tix grai: khaing: nawh heue.
Mai pwi pa pon cuyi: pingnya khankix, moh kah ju khwan tokaux tix, pwi pa pon pingnya krax tawng krax yung kawx, tag pon bwanson: pa mhawm: heue.
Pwi pa kham: mhai: sakse pa ang mawh ang meh, ang lai pon tix luan khaing: krax ciyang phimap, awm: an:, pwi pie pwi lhen: khankix kawx, tag hoek krax laux krax leeing: heue.
Krax gauxrhawm: ang doh keung: mai pwi caox, lheu: khaing: an:, siliex kawx, ang keung: tix kwang: kah piang simiang nawh heue.
Pwi pa chix yuh satix, chix gun yaung kah pa songrhawm: songrhi: tix, mai pwi pa chix gun yeung kah pwi pa phit lud kah tix, nawh koe: min: plakngai: heue.
Krax songrhawm: songrhi: simiang khunhawkham, awm: graox sivai sangsi:, viang mawh nan:, bwanson: nawh, awm: rawm: ciex pa lih piang rib khankix heue.
Kawn: simex pa caox, mawh pa kieh keeing: tix tug rhawmrhi:, mai moeng pa chix brax simah lawlawx, awm: pa jah rawm: lhiex pa lih tix jah hoik tix jah heue.
Nyiiex, sinngao, kraungkhrai:, mau khri:, mawh sin: pa pon khaing: miex keeing:, viang mawh nan:, moeng pa koe: satix kawx, mawh sin:, pa caoxrhawm: khaing: Simiang Siyiex tix tawx heue.
Mai rhawm: pa nieh cien kieh pwi chix luan it, pwi pa nieh cien khankix kawx, yaox tix pon pa cairhawm: cairhi: heue.
Pwi pa priex tix hawt kah lox tawm: beenli, mawh pwi pa priex kah ju khwan tix heue. Pwi pa tik kah lox tawm: beenli khankix, tag yaox tix yum: heue.
Pwi pa caox rhawm: kah pwi hot pwi sibhawm:, mawh pwi pa tawx krax yaog krax yaing kah Simiang Siyiex, mai Nawh Cao: deeh viied bwanson: kah pa yuh nawh heue.
Yam kawn: koe: bawg yam, sidiex gau kah kawn: simex maix awawx. Mai son ang nawh sang hoek krax laux paw lai sidiex nawh kah daux krax caox rhawm:.
Pwi pa ting rhawm: canyhau: tag pon krax ciyang phimap, phan: maix taoh nawh, maix tag yaox tix taoh nawh lawlawx heue.
Nghiiet kah lox pa sidiex gau kah maix, mai rieb tix teei kah lox pa tawx riang rao, sonsang mawh maix pwi pa koe: cuyi: pingnya singaix pa sang hoek sax.
Mai kawn: pwi chix keud kuceu kah daux rhawm: tix, viang mawh nan:, mawh krax keud Simiang Siyiex khaing: pa kaux cong: heue.
Phan: mawh pwi pa koe: rhawm: sibieh, mawh pa chix yuh bwanson:, mai pwi hot pwi sibhawm: kawx, nie lheu: mhawm: khaing: pwi chix pie chix lhen: heue.
Rhawm: pa lhat pa graung kah Simiang Siyiex, mawh pa dex dawd mai pa im: ju, mai pwi pa koe: rhawm: yuh nan:, koe: krax fah rhawmrhi:, mai nawh ang yaox krax khirhawm: khirhi:.
Pwi pa nieh cien khankix, viang taix kix hoik cawk kah daux aw: kawx, ang koe: rhawm: deeh toek taix tix sonsang sau: kah daux jheeh tix heue.
Phan: sivied tix gau kah pwi pa yuh pa ang cee ang cak, mai pwi pa ang koe: cuyi: pingnya khankix, tag sang doh keud heue. Phan: sidiex gau kah pwi pa koe: pignya krax tawng krax yung, nawh nie lheu: koe: cuyi: pingnya heue.
Kawn: simex pa kieh sin: keeing: tix nai: nawk, mai grheu: miex tix to:, tag yaox tix kham: krax kaig krax tua pa sa pa lao pwi heue.
Kawn: simex aux eue, paw lai nghiiet kah lox sidiex gau pa sang kieh maix via hu: khaing: pingnya krax tawng krax yung awawx.
Mai pwi pa nieb kham: mhai: sakse chix yuh pa ang cee ang cak kah been pa rauh pa see, mai jheeh pwi pa ang rah ang see khankix kawx chix bleet tix ih kah phimap heue.
Hoik rien tix deuh krax ciyang phimap kah son pwi pa yuh pa ang cee ang cak, mai hoik rien tix deuh khaox saux pa sivied son blawg pwi pa caox khankix heue.
Rawm: plix siiet mawh ceu pa chix pie lhen: kah kawn: pwi, mai plai: mawh ceu pa chix kieh pwi simah, mai pa yuh kah ceu an: khankix, mawh pwi pa ang koe: cuyi: pingnya heue.
Ceu pa songrhawm: simiang khunhawkham, mawh awm: graox sivai sangsi:, mai pwi pa kieh simiang khunhawkham songrhawm: mawh pa plaux kah ju tix heue.
Pwi pa kieh simah yiien: mhawm: khankix, koe: min: plakngai:, viang mawh nan:, pwi pa caox khankix, chix simah jheengjheeng: heue.
Pwi pa nieh khankix, ang rhawm: yuh kaing, kheu kwat, mawh kheu in:, yam hoek bawg yam vawg nghox nawh rawg kah pwi tang: kaux kawx ang pon.
Kah daux rhawm: keud kawn: pwi, awm: rawm: pa kied raux kawx, pwi pa mhawm: cuyi: pingnya khankix, tag kin tix teei heue.
Pwi tom: nie khankix, chix krai kah bwanson: pa hoik yuh tokaux tix, viang mawh nan:, pwi mawx pa pon sawg tix yaox kah pwi pa kaux sijax mukheu lie?
Pwi rah pwi see khankix, hawt krax pa rauh pa see tix, mai kawn: saux kawn: sex nawh khankix kawx, tag pon bwanson: heue.
Simiang khunhawkham, pa ngawm kah piang dangngeung prawng ca:, ngai: nawh grheu: tix tik kah ceu pa caox pa ang mhawm: khawm uik heue.
Pwi mawx pa pon ah, aux hoik kieh rhawm: tix singax, mai aux hoik luan khaing: phimap tix heue.
Kla: jiang pa ang khaw:, mai khrawng: pa ang khaw: khankix, mawh pa seeing: brai: Simiang Siyiex kah heue.
Kawn: nyawm kawx, ceu pa yuh nawh singax lie ang singax lie? Caw lie ang caw: lie? Jhi: kah kaing pa yuh nawh, mai kieh sidawng: kah rhawm: nawh heue.
Yhaok pa chix mhong: ang ah, ngai: pa chix yaox ang ah, mawh pa phan: pa deuh Simiang Siyiex heue.
Mawh kheu lhat kah hot sibhawm:, paw lai koe: rhawm: tix it, blah ngai: tix awawx. Maix tag yaox tix sawm: sak heue.
Cao: pa liag chix ah yuh nin:, ang mhawm:, ang mhawm:, khaix hoik liag hu:, chix deeh yaw tix heue.
Mai jheeh pwi pa grum naog cuyi: pingnya, nie lheu: ngawh khaing: khri: mai siang: raoh pa ting jum tom: nie heue.
Phan: kham: mhai: sakse son pwi pa ang maix tawng, mai son bun: pa ang mhawm: been, teei tix deuh kraung nawh tix ceu ceu heue.
Ceu pa ih pa pie pa lhen: tix ih, viang nyawm kawx, sidauh khaix lih mawh simaox khrap kah jheeh cao: ih heue.
Krax keud krax sawn: pa kum: kawng: tau, mawh pa kaux cong: heue. Phan: koe: krax keud krax kum: kawng: tom: chix yuh naing heue.
Mai pwi pa vuvie haoh lox sikah khankix, chix krai doh kah ceu pa khaw: tix mox heue. Mawh kheu in: paw lai yuh paox pie kah pwi pa chix nyaw glaw:.
Pwi mawx ang ah, pa jhax pa lawg kah miex keeing:, kawk ngu nawh tag yeet kah daux pa kied faik heue.
Viang phai: pon sinngao yam jah kawx, dee sidauh khaix mawh pa ang koe: bwanson: heue.
Paw ah, aux sang deeh pawk pa caox kah pwi, krox jun kah Simiang Siyiex, Nawh tag taoh kah maix heue.
Simiang Siyiex seeing: brai: kah kla: jiang pa ang khaw: heue. Mai jiang pa ang khaw: kawx koe: phimap heue.
Simiang Siyiex, hoik cox daux krax hu: kawn: pwi heue. Phan: ang mawh nan:, kawn: pwi chix tawng krax hu: tix yuh kah mawx?
Pwi pa hoik tiextu tix ah, in: mawh pa mhawm: heue. Mai nawh tieh feen khaix, mawh pwi pa hoik krix kah jhawk heue.
Simiang khunhawkham pa koe: cuyi: pingnya, grheu: tix tik kah pwi caox khankix, mai teei ling: lawx mai gut heue.
Mai ju khwan kawn: pwi mawh kawk ngu Simiang Siyiex, mawh pa sang cheukcheu: tix yaox kah kraung pakpeung: pa koe: kah daux tokaux tix khawm uik heue.
Krax pa caox rhawm: mai ceu pa rauh see, mawh pa chix priex kah simiang khunhawkham heue. Mai kieh dangngeung nawh kaux cong: kheu krax caox rhawm: heue.
Min: plakngai: sinaw khankix mawh riang rao kix heue. Mai min: plakngai: kuad song: khankix, mawh haok kaing: paing heue.
Rhoi: khaix tap toi: chix kieh pwi caox deeh mhawm:, mai rhoi: khaix saux kawx chix yuh bwanson: kah tokaux tix heue.
Rhawm: simiang khunhawkham koe: kah daux tawm: taix Simiang Siyiex, awm: rawm: klawng: mai chix kieh vai: hu: awm: koe: alo Nawh heue.
Kawn: pwi chix fahrhawm: kah krax pa yuh tix, phan: mawh Simiang Siyiex ciang tix yaox rhawmrhi: khankix heue.
Simiang Siyiex khaw: rhawm: kah pa yuh ceu pa rauh pa see, mai pa prawng ca: rah see, nie lheu: khaw: rhawm: khaing: ceu pa tan lu heue.
Plak ngai: pwi ting rhawm:, mai pwi pa ting rhawm: canyau:, mai pa riieng pwi pa ang rah ang see khankix, mawh phimap heue.
Pwi pa chix keud pa coca: tix yuh, mawh pa mi pa koe: heue. Krax keud krax sawn: pwi pa ang koe: satix, mawh pa hot pa sibhawm: heue.
Sinngao, mau khri:, pa khrawm: tix deuh kah lox pa pie pa lhen: khankix, awm: taox rawm: pa chix grai: hu:, mai hoik krix kah jhawk simiang yum: heue.
Pwi pa ang rah ang see khankix, mawh kheu kix ang simie tix prawng see: kah daux pa rauh pa see, phimap pa yuh kix tag deeh kieh kix lauxleeing: heue.
Pwi pa lud krax hu: tag hoek dee singai, kaing pa yuh pwi mhawm: khankix, mawh pa khaw: pa caw heue.
Pa yaox tix ot kah daog piang braux nyiiex, nie lheu: mhawm: khaing: pa yaox tix ot kah daux nyiiex ting mai bun: pa simah kah nyiiex ting pwi haoh pwi hun: heue.
Pwi pa ang rah ang see khankix, simie tix yuh kah pa caox, mai nawh ang rhawm: yuh bwanson: kah paoxplawg paoxnyhawm: tix.
Yam yaox pwi pa yuh pa ang cee ang cak tix kham: kah krax ciyang phimap, pwi pa ang koe: cuyi: pingnya deeh pon satix kah an:, mai pwi pa koe: cuyi: pingnya yam deeh yaox nawh tix gau mai pingnya nawh koe: krax haok hwan heue.
Pwi pa rauh pa see, chix keud chix sawn: kah nyiiex pwi pa ang rah ang see, mai pwi pa ang rah ang see khankix, Siyiex tag yuh kix laux kheu phimap pa yuh tix heue.
Pwi pa thox yhaok mai ang rhawm: mhong: lox yiiem pa kok yo pwi hot pwi sibhawm: khankix, yam deeh yiiem kok yo nawh pwi tix kaux kawx ang lai mhong:.
Khawngphak pa briex tawx, mawh ceu pa kieh nyawmrhawm:, mai khawngphak sivoe naok nawh, chix kieh krax pa kied songrhawm: grai: heue.
Krax prawng ca: pa rauh see mawh pa gauxrhawm: son pwi rah pwi see, viang mawh nan:, pwi pa yuh pa caox khankix tag hoek krax laux krax leeing: heue.
Pwi pa lud hu: khaing: krax cuyi: pingnya, caw tix ot daux simeeig dee khrawm: pwi yum: paox tix heue.
Pwi pa gauxrhawm: gauxrhi: kah alo nex nham:, tag hoek krax hot krax sibhawm:, mai pwi pa miag kah rawm: plix siiet mai rawm: bee, tag ang chix mi chix koe:.
Pwi pa ang rah ang see khankix, mawh sonsang taoh kah pwi rah pwi see, mai pa cha nie luan yuh khankix kawx, mawh sonsang taoh kah pwi pa rauh pa see heue.
Pa yaox tix ot kah daux tiag daux tu, nie lheu: mhawm: khaing: pa yaox tix ot mai bun: pa dawd rhawmrhi: mai pa yie simah kah pwi heue.
Kah daux nyiiex pwi pa koe: cuyi: pingnya koe: kraung mai naman heue. Phan: mawh pwi caox khankix, chix kieh uik pak heue.
Pwi pa sawg kah been pa rauh pa see, mai krax caox rhawm: mai pon pa im: ju pa rauh pa see, mai plakngai: sidawng: heue.
Pwi pa koe: cuyi: pingnya khankix, chix haok kah guh veng pa kaux cong:, mai teei Tix tik kah pwi ting riang dee deuh pwi khankix rhawm: heue.
Pwi pa chix priex jheeh mai dak tix, chix priex ju khwan tix khaing: pa kharhawm: kharhi: heue.
Pwi yie songrhawm:, mai pwi pa ting rhawm: khankix, deuh kix mawh pwi pa yuh pa ang cee ang cak heue.
Pwi pa nieh cien khankix, mawh kheu nieh yuh kaing, ceu pa simie kix, chix kieh kix yum: heue.
Nawh kied chix simie leeing: ngaix leeing: sawm:, phan: mawh pwi rah pwi see, ang lai lhawk mai chix gwieh tix tawx kah pwi heue.
Pa tan lu pwi pa ang rah ang see, mawh ceu pa seeing: brai: heue. Lheu: khaing: in:, phan: nawh tan lu mai rhawm: pa ang rah ang see, nie lheu: seeing: brai: miex ding?
Pwi pa kham: mhai: sakse pa ang mawh ang meh, chix hoek krax laux krax leeing:, pwi pa hoik mhong: khankix jiet chix krai heue.
Pwi pa ang rah ang see khankix, chix kieh pak ngai: tix riex reen, phan: mawh pwi rah pwi see, chix cox kah krax pa hu: tix heue.
Cuyi: pingnya, krax keud krax sawn:, mai pingnya krax tawng krax yung, ang chix kaux cong: sivoe ngai: Simiang Siyiex tix ceu kawx heue.
Viang hoik rien brung son bawg yam sang puing: naing kawx, hoik pex mai pon pa nyawmrhawm: kheu bwanson: Simiang Siyiex heue.
Khaw: tix sawg min: plakngai: nie lheu: khaing: sawg krax pa mi pa koe:, mai bwanson: pa moh pa rhawm: kah pwi tang: kaux, nie lheu: mhawm: khaing: mau khri: heue.
Pwi pa mi pa koe: mai pwi hot pwi sibhawm: sipub paox tix, mawh krax pa yuh Simiang Siyiex khawm uik heue.
Pwi pa koe: satix, nawh grux tawng kah see: ceu pa khirhawm: pa sang hoek piang tix, mai chix mox tix heue. Mai pwi pa ang koe: cuyi: pingnya, hu: awm: pa hu: nawh, mai hu: yaox see: krax khirhawm: khirhi: heue.
Bwanson: pa tiiem rhawm: tiiem rhi:, mai pa lhat pa graung kah Simiang Siyiex, mawh pa pon sinngao, min: plakngai: mai ju heue.
Pang: kat mai jhawk hoik koe: kah daux krax hu: pwi pa vawk rhawmrhi:, mai pwi pa priex ju khwan khankix, chix via hu: singai khaing: kix heue.
Sidiex gau kah daux krax hu: kawn: nyawm awawx. Phan: yuh nan:, yam hoik riex ju nawh ang lud hu: kah daux krax an: heue.
Pwi pa mi pa koe: khankix, giex kaing: kah piang pwi pa hot pa sibhawm:, mai pwi pa yaog yaing mawh siliex kah cao: pa tawx yaog yaing heue.
Pwi pa ruat simie pa caox pa ang mhawm:, nawh tag yaox tix deeh vawg nghox krax kharhawm: kharhi: heue. Mai kaing pa yuh nawh tag grai: hu: heue.
Pwi pa koe: ngai: pa chix caox rhawm:, koe: bwanson:, mawh kheu nawh tag tawx khaomun pa ih pa un: kah pwi pa hot pa sibhawm: heue.
Grheu: tix tik kah pwi pa yuh pa ang cee ang cak khankix, phan: yuh nan:, ceu pa koeng lih hu:, mai pa simah, mai pa sa pa lao tag yiien: hu: heue.
Pwi pa moh kah rhawm: pa singax singeh, chix krai lox pa awn: pa tiiem, mai tag mawh pa chix yuh paox pie kah simiang khunhawkham heue.
Ngai: Simiang Siyiex chix priex kah cuyi: pingnya pa tawng pa yung, mai Nawh yuh laux kah pwi pa phit pa lud heue.
Pwi pa nieh pa cien chix ah nin:, sivai sangsi: koe: kah praix tan, mai phan: aux lih hu:, rien tix yum: heue.
Mai jheeh bun: pa ang mhawm: been, mawh daux tiex pa kied raux, pwi pa seeing: brai: simiang Siyiex kah kawx, tag sang rau kah daux tiex an: heue.
Mai rhawmrhi: pa caox, kie tix deuh kah daux rhawm: kawn: nyawm heue. Viang mawh nan:, khaox saux pa sivied tix gau, grheu: tix tik kah rhawm: an: singai heue.
Pwi pa tuktiaktukte: kah pwi pa hot sibhawm:, sonsang mi sang koe: tokaux nawh, mai pwi pa tawx kah pwi pa mi pa koe: khankix, tag hoek krax pa hot sibhawm: tete heue.
Lox Pa Koe: Cuyi: Pingnya
Veeh yhaok maix mai nghiiet kah lox pwi pa koe: cuyi: pingnya awawx. Pingnya pa tawng pa yung aux kawx, kieh koe: kah daux rhawmrhi: maix heue.
Phan: maix sau: ceu an: khankix, kah daux rhawmrhi: mai daux jheeh maix koe: bwanson: pa mhawm: son maix heue.
Yuh kah mawx sonsang deuh maix rhawm: tix kah Simiang Siyiex, aux sidiex gau kah tokaux maix singaix heue.
Aux hoik tiem: grawng: lox tawm: pingnyap pa tawx satix mai grawng: lox tawm: pingnyap pa tawng pa yung heue.
Mai sonsang tawng maix kah lox pa mawh pa meh, mai sonsang chix krai maix lox pa mawh pa meh, mai lox pa tawx satix, mai lox mhai: pa daox pa am: kah kix, pwi pa ploi: hoek kah maix, aux hoik tiem: tix tawx kah maix ang mawh lie?
Paw lai tud rhim: tix teei kraungkhrai: pwi pa hot sibhawm:, grawhgrawng: nawh, kheu kied hot sibhawm: nawh, paw lai ciyang kah kix, mai pwi pa kharhawm: kharhi:, kah diang siviex veng.
Grawhgrawng: nawh, Simiang Siyiex priex kah kix, mai pwi pa tud rhim: tix teei kraungkhrai: kix, Simiang Siyiex tag deeh rhim: tix teei ju kix heue.
Paw vi yuh paoxgrawm kah pwi pa dawd rhawm:, mai paw lai hawt khaix pwi pa yie songrhawm: songrhi:,
phan: maix hawt khaix kix, ha maix kox gau tix yuh pa yuh kix, mai tokaux maix tag krix kah jhawk heue.
Paw laig tix yuh paox pie mai cub pwi pa dieh taix, mai cub pwi pa kham: tang: ceuk rawm pwi.
Phan: maix ang koe: tix tawx, mawh kheu patix nawh teei kraung it maix hu:?
Paw lai greed mee: haktiex pa hoik sum: tax du pex tix deuh khankix.
Maix sax yaox pwi pa coca: tix yuh kaing tom: hoik lie? Pwi an:, tag yaox tix cung sivoe ngai: khunhawkham, mai tag ang cung sivoe ngai: pwi iak pwi lied heue.
Yam ngawm maix tix sawm: tau mai simiang, keud ceu pa koe: sivoe ngai: maix mhawmmhawm: awawx.
Phan: maix cha nie luan ih, hoik teei gawn: mai nyeu kah ghok maix heue.
Paw lai simie tix ih kah priex ih simiang, grawhgrawng: nawh, ceu pa ih an:, chix pie lhen: kah maix heue.
Paw lai coca: kah sonsang pon mau khri:, paw deuh rhawm: kah cuyi: pingnya tokaux tix.
Khex caw tix sawg kah ceu pa chix grai: pa koe: sivoe ngai: maix khankix lie? Phan: ah tete, ceu an: khankix, chix yuh pruik tix po: hu:, awm: pa po: klang: preng piang raoma: heue.
Paw lai ih priex pa yuh pwi pa koeng riang ciang khoi:, mai paw lai simie kah pa ih pa un: kix.
Nawh yuh awm: pa keud rhawm: nawh, viang nawh ah ih nyaux kah maix kawx, nawh ang koe: rhawm: pa simie tix tawx kah maix.
Maix tag sang deeh hao: Pa ih tix, mai lox mhawm: pa krai maix kawx, tag grai: hu: heue.
Paw lai sikah tom: mhong: pwi caox, lox pa sikah maix kah cuyi: pingnya khankix, ha nawh kox yuh pa ang cee ang cak kah heue.
Paw lai greed kah mee: hak tiex pa sum: tom: dix, paw lai tud rhim: tix teei kraung kawn: doe: khankix.
Grawhgrawng: nawh, cao: pa laug tix teei kah kix, mawh pa ting siawpsibrawm mai priex kix heue.
Priex lox pa sidiex gau kah daux rhawm: maix jheengjheeng:, mai nghiiet kah lox pingnya pa tawng pa yung awawx.
Paw lai yuh tix ang sidiex gau kah kawn: nyawm, viang teei khaox saux sivied nawh kawx, nawh ang yum:.
Mai teei khaox saux sivied nawh, mai taoh ju khwan nawh khaing: meung yum: heue.
Kawn: simex aux eue, phan: rhawm: maix koe: cuyi: pingnya, rhawmrhi: aux mai tokaux aux tag gauxrhawm: gauxrhi: heue.
Yam krai jheeh maix lox pa mawh pa meh, sok lax aux tag sang gaux sile: he: sivoek heue.
Paw lai bohrhawm: bohrhi: kah pwi pa koe: phimap, kieh koe: rhawm: pa lhat pa graung kah Simiang Siyiex leeing: singaix.
Bawg yam prawng ca: tag sang hoek tete, mai krax krox jun maix ang laux heue.
Kawn: simex aux eue, nghiiet lox aux, mai kieh mawh pwi pa koe: cuyi: pingnya, mai kieh rhawm: maix hawt hu: kah daux krax an: heue.
Paw lai yuh paox pie kah pwi pa cha nie luan nyaux rawm: plix siiet, mai pwi pa cha nie luan ih nex heue.
Mai pwi pa cha nie luan ih luan nyaux rawm: plix siiet khankix, tag hoek krax pa hot sibhawm:, mai rhawm: pa cha nie luan it, chix ceep kraung pa caox pa blai kah praix heue.
Nghiiet kah lox keeing: maix pa kieh maix koe: awawx. Paw yuh pa ang cee ang cak kah miex maix pa hoik riex ju.
Liag tix teei kah pa rauh pa see (pa mawh pa meh), mai paw lai coh, cuyi: pingnya ang ah, lox pa sidiex gau pingnya pa tawng pa yung ang ah, liag tix cie heue.
Keeing: pwi rah pwi see, mawh pa kied si daing: gauxrhawm:, mai pwi pa keh kawn: pa koe: cuyi: pingnya, gauxrhawm: gauxrhi: mai kawn: an: heue.
Mai kieh miex keeing: maix gauxrhawm:, mai kieh miex cao: keh maix kawx, tag gauxrhawm: gauxrhi: heue.
Kawn: simex aux eue, tawx rhawmrhi: maix kah aux, kieh ngai: maix jhak tix priex kah krax pa hu: aux liak.
Bun: coh kaux awm: daux pong: pa kied raux, mai bun: pa ang mhawm: been, awm: daux tiex pa sikhawp sikhiep heue.
Nawh chix jawm tix jhak, awm: pwi con mai nawh chix yuh simex tom: nie phit lud heue.
Pwi mawx pa koe: krax khirhawm: khirhi:, mai pwi mawx pa koe: krax kharhawm: kharhi:, pwi mawx pa yaox krax pa simah, pwi mawx pa yaox krax yiiem krax doe:, pwi mawx pa ang koe: krax koe: grawng:, mai mat lheet tix, mai pwi mawx pa koe: pa raoh ngai:.
Mawh kix pwi pa rheung: nyaux rawm: plix siiet, mai pwi pa chix sawg rawm: plix siiet, pa hoik pawng: mai sidauh khankix heue.
Paw lai jhak kah rawm: plix siiet pa raoh, pa toh riang kah daux kawk pa nyawm pa tie: tix ih.
Dee sidauh chix kiied awm: siuing:, mai chix tut saux awm: siuing: pa cai: heue.
Ngai: maix tag jhak kah bun: pa ang mhawm: been, mai rhawm: maix kawx, tag chix krai lox pa kawk pa vawk heue.
Maix awm: pwi pa it, kah daux sigreung rawm: pang: lai, mai tag awm: pwi pa it piang toh rong: nyiiex reu ting heue.
Kix hoik tap toi: aux, viang mawh nan:, aux ang saux, kix hoik tawk hoik klah aux, mai aux ang tawng, aux tag siduad lai mawx? Aux deeh sawg kah ceu an: tix bawg, maix tag ah nan: heue.
Paw lai bohrhawm: bohrhi: kah pwi pa ang rah ang see, mai paw lai simie tix yuh pao pie mai kix.
Kah daux rhawm: kix, chix keud sonsang yuh pwi laux, jheeh kix kawx, chix ah lox caox heue.
Nyiiex pa sum: mai cuyi: pingnya chix kaux cong: heue.
Kheu pingnya pa tawng pa yung, chix kieh kraungkhrai: pa ngawh, mai kraung pa khaw: rhawm: khaw: rhi: kuceu khawm uik, naog kah daux lawg heue.
Pwi pa koe: cuyi: pingnya khankix, koe: siawpsibrawm, mai pwi pa grum tawng kah cuyi: pingnya, chix ting lhaong: riang rao nawh heue.
Khaix hoik kum: kawng: tau mai pwi pa koe: cuyi: pingnya, caw tix hu: yuh naing, phan: pwi pa tawx krax keud krax sawn: koe: tom: nie, chix luan khaing: krax khirhawm: khirhi: heue.
Mawh kheu kied lhaong: cuyi: pingnya, pwi caox khankix ang krup ang hoek, kix ang pon ang: jheeh kah diang siviex veng.
Pwi pa keud tix yuh pa ang mhawm: khankix, tag kok kix mawh pwi pa caox heue.
krax pa keud pwi caox khankix, mawh phimap, mai pwi pa yuh pa ang cee ang cak khankix mawh ceu pa seeing: pa brai: pwi kah heue.
Phan: maix laux rhawm: laux rhi:, singaix yam yaox maix see:, riang rao maix iak hu: heue.
Taoh kah pwi pa sang teei yum: kah daux simeeig, mai teei lih kah pwi pa sang dex pah yum:.
Viang maix ah ex ang tawng kah kix kawx, cao: pa sawg tix yaox kah daux rhawm: keud kawn: pwi khex ang tawng lie? Nawh tag sang deeh viied bwanson: phimap pa yuh kaux pwi mawx kaux pwi an: ang mawh lie?
Kawn: simex aux eue, ih rawm: hia:, kheu mhawm:, mai ih kah rawm: kaing: hia: pa nyawm pa tie: awawx.
Awm: an:, pingnya pa tawng pa yung maix kieh grum naog jhawm: pa nyawm kah ju khwan maix, son ang sang laux krax pa krox jun, mai maix tag pon bwanson: pa mhawm: heue.
Pwi pa ang rah ang see eue, paw lai jawm tix jhak kah nyiiex pwi rah pwi see, mai paw lai yuh laux kah dee ot kix.
Pwi rah pwi see khankix, viang goh aliah bawg kawx, tag deeh kaoh, phan: mawh pwi pa ang rah ang see, yam goh nawh tag som heue.
Yam goh pwi pa koeng kah maix, paw lai gauxrhawm: kah, mai yam sideeing nawh caong tix kawx, paw koe: rhawm: pa gauxrhawm:.
Phan: koe:, Simiang Siyiex tawng, mai Nawh ang khaw: rhawm:, mai krax pa songrhawm: Siyiex gah hu: khaing: nawh heue.
Maix paw khirhawm:, kheu pa ang rah ang see, mai paw lai bohrhawm: kah pwi pa caox.
Grawhgrawng: nawh, pwi pa ang rah ang see khankix, dee sidauh ang pon bwanson:, mai kawk ngu pwi pa yuh pa caox tag yeet heue.
Kawn: simex aux eue, lhat graung kah Simiang Siyiex mai simiang khunhawkham awawx. Paw yuh paox pie tau mai pwi lukliak khankix heue.
Ceu pa khirhawm: chix hoek pa piang kiex dom: mawx dom: an:, mawh pwi mawx pa tawng kah ceu pa kieh kiex laux?
Lheu: khaing: an:, ceu pa dex mai pwi pa koe: cuyi: pingnya mawh nin:, yam prawng see:, ang khaw: tix jhak pak ngai: pwi.
Pwi pa ah kah pwi pa ang rah ang see an: yuh nin:, maix mawh pwi rah pwi see heue. Pa ah nan:, ceu pwi khankix tag jhax lawg mai salao kah nawh, mai ceu pwi kuceu tag seeing: brai: kah nawh heue.
Pwi pa sidiex gau kah pwi pa deuh phimap kah tix, pon pa nyawmrhawm: mai tag pon bwanson: pa mhawm: kah piang kix heue.
Pwi kukaux, nghiiet kah jheeh pwi pa chix krai lox pa khaw: pa caw heue.
Khre: kaing maix plak praix, mai khre: ma: kaung: son maix, khaix an: maix tag sum: nyiiex ot maix.
Phan: ang koe: krax koe: grawng:, paw kham: mhai: sakse kah paoxplawg paoxnyhawm: tix, paw kieh jheeh maix pie lhen: tix ih kah pwi tang: kaux.
Aux tag yuh kah nawh, awm: pa yuh nawh kah aux, paw lai ah tix deeh viied kah nawh, awm: pa hoik yuh nawh.
Yam hu: lailing aux, kah praok kaung: pwi pa nieh, mai sipeem plix siiet pwi pa ang koe: pingnya.
Aux yaox kah pa hoik kheem: pang: kat khawm gwang, mai yaox kah pa hoik grhup guh simaox pa hoik vie heue.
Aux yaox mai keud tix yaox mhawmmhawm:, mai aux yaox ceu pa hawt gau tix yuh heue.
Mai ah it tivud ha:, mai it, yam bhok maix taix sonsang laig it tivud.
Mai krax pa hot sibhawm: tag sang hoek kah piang maix, awm: pwi pa hu: krax, mai kraungkhrai: maix tag sang som nai: awm: hoek pwi naing kah piang maix heue.
Pa tiiem: Simiang Hesakix Tix Deuh Lox Pa Raux Pa Mox Lai Lox Kab Simiang
Sawlamun Mawh Nin: Pa tiiem: pwi simiang Hesakix pwi Yudax tix deuh, kah lox pa raux pa mox lai lox kab simiang Sawlamun mawh nin: heue.
Kaing ceu pa ting pa raux pa mox tix ceu ceu, mawh pa khaw: mai min: plakngai: Siyiex, phan: mawh simiang khunhawkham, koe: min: plakngai: kheu pa chawkcheng: kah see: pa ting heue.
Raoma: mawh pa lhaong:, haktiex mawh pa raux, mai rhawm: simiang khunhawkham chawkcheng: kawx, ang pon tix tawng.
Phan: teei tix tik aing: mau khaing: daux mau, lih mawh kawk pa mhawm: son cao: pa yuh mau heue.
Phan: teei tix tik pwi pa ang rah ang see khaing: simiang khunhawkham, siawpsibrawm nawh tag kaux cong: kah daux pa rauh pa see heue.
Paw lai yaogyaw kah tokaux tix sivoe simiang khunhawkham, paw lai cung kah dee ot pwi pa ting pa lhaong:.
Grawhgrawng: nawh, pwi ah nin: kah maix haok tin:, nie lheu: mhawm: khaing: kieh maix lih kah dee tiiem dee yaox pwi sivoe ngai: simiang heue.
Paw lai brax yuh krax simah kah paoxplawg paoxnyhawm: maix, ha kix kox kieh maix kaig tua, maix tom: sang yuh kah mawx?
Maix kum: kawng: see: tix tau mai paoxplawg paoxnyhawm: maix awawx. Paw lai krai see: pa khaw: tix mox, kah pwi tang: kaux.
Phan: ang mawh nan:, pwi pa mhong: kah lox maix nawh tag kieh maix kaig tua mai kieh min: plakngai: maix laux jheengjheeng: heue.
Lox pa nyawm tix nghiiet, awm: pa ih kraung mau mai plix mak kawk tie: khri: heue.
Kah pwi pa chix nghiiet, mai kah pwi pa chix sidiex gau lox pa mhawm:, awm: krim khri:, mai awm: khao kraung khri: nawnaw heue.
Awm: pa lih rawm: ciex, kheu pa sikied bawg yam vawg nghox, siliex pa kaux sijax kawx, nawh chix kieh rhawmrhi: simiang cao: pa ploi: nawh lih nyawmrhawm:, nhim: rhawm:, jheengjheeng: heue.
Pwi pa yuh plakngai: mai hoik ah tix tawx, mai ang lai tawx khankix, awm: bhaung: mai paiawm: pa ang viex lhiex heue.
Pa lang: gun lang: yeung, pon glaw: rhawm: simiang, dak pa awn:, chix kieh si-ang: pot heue.
Phan: maix yaox rawm: hia:, ih pie khaw: pie jiet, phan: maix cha nie luan ih tag deeh hao: heue.
Maix paw lai rheung: ot kah daux nyiiex paoxplawg paoxnyhawm: maix, phan: maix rheung: ot, nawh meu: mai tag koeng kah maix heue.
Pwi pa kham: mhai: sakse pa ang mawh ang meh kah paoxplawg paoxnyhawm: tix, awm: khaox, vaig, mai pliah pa lawm heue.
Yam yaox maix see:, phan: maix yumrhawm: kah pwi pa ang kaux sijax, tag yaox tix kham: geu: pa pot rhang:, mai pa kluik jhong: si-ang: caong heue.
Pwi pa rhax lai kah pwi pa khrup rhawmrhi:, awm: pwi pa peeik kraung ceep bawg yam kwat, mai awm: teei rawm: niex sau: kah daux numsu paing heue.
Phan: pwi pa koeng kah maix cairhawm:, tawx nawh sawm: heue. Mai phan: nawh sang nyaux nie rawm:, tawx nawh nyaux heue.
Phan: yuh nan:, maix tag pum: sau: gaoxngu kah piang kaing: nawh heue. Simiang Siyiex kawx, tag tawx bwanson: kah maix heue.
Awm: bhaung: pa kaoh khaing: caong ma: laong:, viex rawm: lhiex hoek, dak pa kieh pwi simah kawx, chix vieh plakngai: pa songrhawm: hoek heue.
Pa yaox tix ot kah daog piang praux nyiiex, nie lheu: mhawm: khaing: yaox tix ot daux nyiiex ting mai bun: pa yie simah kah nyiiex ting pwi haoh pwi hun: heue.
Lox pa gauxrhawm: gauxrhi: pa kaoh khaing: meung dee singai, awm: rawm: pa sikied kah son pwi pa simie tix nyaux rawm: heue.
Phan: pwi rah pwi see phit lud sivoe ngai: pwi pa ang rah ang see, awm: rawm: dung pa sigu:, mai awm: rawm: maw: pa cux pa sium: heue.
Awm: pa ang mhawm: kah cha nie luan ih rawm: hia:, mai pwi pa sawg kah min: plakngai: tokaux tix, ang koe: min: plakngai: heue.
Pwi pa ang pon priex rhawm: tokaux tix, awm: veng pa hoik laux guh veng ba la heue.
Awm: pa ang sax lih rawmrha: yam rung praix, mai awm: pa ang sax lih lhiex yam vawg nghox, min: plakngai: ang doh keung: kah pwi pa caox.
Awm: sim: saik mai sim: sivoeg pa po: hu: kudauh kudee, awm: an:, lox pa jhax lawg pa ang khaw: ang lai koe: dee bleeh.
Mai awm: hoik koe: khaox puat son brung khankix, mai koe: maox keu: son la, hoik koe: khaox saux son blawg pwi caox heue.
Paw lai hawt, paw lai deeh pawk lox kah pwi caox, phan: maix yuh nan:, maix tag awm: nawh heue.
Tiebtie mai pawk lox kah pwi caox, phan: ang mawh nan:, ha kix kox yuh pak ngai: mai tag ting rhawm: heue.
Pwi pa tawm: lox kah pwi caox, awm: deeh tat tix tik kah caong tix, mai ang koe: bwanson: heue.
Lox pa raux pa mox lai lox kab pa krai pwi caox, awm: pwi pa laux caong pa hu: khawm chawh tix heue.
Pa yaogyaw kah pwi caox, awm: tik siang: simaox pa ngawh kah daux grux simaox heue.
Lox pa raux pa mox lai lox kab pa koe: kah daux jheeh pwi caox, awm: krix kat kah taix pwi pa yoek kah plai: heue.
Simiang Siyiex Cao: pa ting khawm uik, yuh bwanson: kah awm: paox tix, kah pwi caox mai pwi pa phit lud heue.
Mai sox deeh hoek kah pa hao: tix, awm: an:, pwi caox ca: deeh yuh kah pa caox heue.
Pwi pa keud kah tokaux tix, mawh pa koe: cuyi: pingnya, mai pa krox jun pwi caox, nie lheu: khaing: krax pa krox jun pwi an: heue.
Pwi pa nieh cien chix ah nin:, sivai sangsi: koe: kah praix tan, mai sivai sangsi: koe: daux krax daux laux heue.
Awm: yia siviex kah jhong: siviex, pwi pa nieh cien chix lulie: piang ku: it tix heue.
Pwi pa nieh cien viang taix nawh hoik cawk kah daux aw: kawx, ang rhawm: toek taix lih sonsang deeh sau: kah daux jheeh tix heue.
Pwi pa nieh cien chix keud kah tokaux tix ah nin:, aux mawh pwi pa koe: cuyi: pingnya, nie lheu: khaing: pwi aliah kaux, pa chix krai grawng: kuceu heue.
Yam hu: lailing daux krax, pwi pa laig tix yuh see:, pa ang dex mai nawh, awm: pwi pa tok yhaok sox heue.
Awm: pa klieh aux maix, mai pa pie lhen: tix ih kah paoxplawg paoxnyhawm:, awm: pwi yhot pa teei nge: ngu mai te, puing: pwi yum: heue.
Awm: ang koe: khix mai yeet ngu, phan: ang koe: pwi cheeik pa simah ang koe: heue.
Awm: khrawm: gaoxngu mai kieh khix gleeing, pwi pa sawg gleeh chix khrawm: krax pa simah heue.
Pwi pa chix cheeik lox caox, lox nawh nyawm, awm: ceu pa ih pa un:, mai chix laig kah daux vaig tu heue.
Mai jheeh pa krai lox krax moh, mai pa koe: rhawm: caox, awm: diang aw: pa kraix rawmkhran mau heue.
Pwi pa deuh rhawm: koeng, nawh chix mox lox khaing: jheeh tix, kah daux tokaux chix mox tix deuh lox pa pie pa lhen: heue.
Lox pwi pa yuh nan:, viang nyawm miex ding kawx, paw lai yumrhawm:, kah daux rhawm: nawh hoik naog kah ceu pa seeing: brai: aliah ceu heue.
Pa deuh krax pa koeng pa pie lhen:, mai pa mox pa blawm:, mai phimap nawh tag sidawng: sivoe ngai: pwi haoh pwi hun: heue.
Pwi pa kaong: daux tiex deeh rau kah daux pa kaong: tix, pwi pa banglia simaox tag deeh dheem: nawh.
Mai dak pa chix pie lhen:, chix koeng kah pwi pa tuktiaktukte: kah nawh, mai jheeh pa chix nyaw chix glaw: kawx, chix kieh lauxleeing: heue.
Paw lai ting rhawm: tix deuh rhawm: son pasax, grawhgrawng: nawh, kah daux tix singaix khaing: tag sang lih mawh yuh kah mawx maix ang tawng?
Paw lai yaw kah tokaux tix, kieh mawh pwi tang: kaux pa yaw maix, jheeh maix paw lai yaw tokaux tix, kieh pwi tang: kaux pa ang dex dawd maix yaogyaw maix.
Simaox mai mhaik mawh pa cien heue. Pa songrhawm: pwi caox nie lheu: cien khaing: an: ra: ceu heue.
Pa ting rhawm: lih koe: rhawm: caox heue. Mai pa songrhawm:, lih mawh pa luan yuh, pwi mawx pon kham: tix tiebtie kah pa bohrhawm: bohrhi:.
Pa sidiex gau, raw sidawng: kah pwi deuh phimap, nie lheu: mhawm: khaing: pa briex moh dee glip heue.
Yam ciyang paoxgrawm kah maix, nawh kawn: kaux sijax mai priex maix, yam ngheet pwi koeng kah maix, mawh pa sang tieh kah maix heue.
Pwi pa hoik sawm: sak, via hu: khaing: rawm: kaing: hia: heue. Pwi pa cairhawm: khankix, ceu pa song kawx chix keud mawh ceu pa tie:.
Pwi pa tik vud dee ot tix mai vuvie khankix, awm: sim: pa tik vud mheem: tix mai to: heue.
Rawm: sidauh bhawng:, mai rawm: sidauh bee, awm: kieh rhawmrhi: gauxrhawm:, mai lox pa tawx krax keud krax sawn: paoxgrawm pa moh, mawh mhai: pa chix kieh gauxrhawm: heue.
Paw lai tik kah paoxgrawm maix, mai paoxgrawm keeing: maix, bawg yam hoek see: kah piang maix, paw vi hu: kah nyiiex puxaik maix, nyiiex paoxplawg paoxnyhawm: pa ot dex maix, nie lheu: mhawm: khaing: puxaik lih pa ot dee singai heue.
Kawn: simex aux eue, kieh koe: cuyi: pingnya awawx. Kieh aux nyawmrhawm: tom: chix deeh pawk kah lox pwi pa sa pa lao kah aux heue.
Pwi Pa koe: satix, nawh hoik grux tawng see:, ceu pa khirhawm: pa sang hoek kah piang tix, mai chix mox tix heue. Pwi pa ang koe: cuyi: pingnya, hu: awm: pa hu: nawh, mai hu: yaox see: krax khirhawm: khirhi: heue.
Phan: kham: mhai: sakse son pwi pa ang maix tawng, mai son bun: pa ang mhawm: been, teei tix deuh kraung nawh tix ceu ceu heue.
Pwi pa kaoh ponngawb caocao, mai ah lox sinum mai nawb bwanson: kah paoxgrawm nawh khankix, awm: pa jhax lawg kah paoxgrawm tix heue.
Mai bun: pa chix yuh krax simah kah pwi, awm: singaix lih lhiex ting, lih jah ang jud ang jai heue.
Pwi pa priex tix deuh kah bun: an:, awm: pwi pa priex tix deuh kah bhaung: heue. Taix khawn: dawm: nawh, awm: pa kraix kah rawm: bee.
Awm: rhiem: yuh paox rhiem: lawm, pwi chix kieh pak ngai: paoxgrawm tix mhawm:.
Pwi pa priex kah khaoxruh yaox tix ih plix ruh, awm: an:, pwi pa yuh kaing simiang pon min: plakngai: heue.
Awm: lih plakngai: pwi, kah daux rawm: awm: paox tix, rhawm: kawn: pwi awm: paox tix, tix kaux hoik tix kaux heue.
Awm: meung yum: mai meung laux meung leeing: ang chix fahrhawm:, ngai: kawn: pwi kawx ang chix sak kah jhak tix heue.
Sonsang cheu: tix yaox mau, mawh kawn: aw:, sonsang cheu: tix yaox khri:, mawh jhah ngu, sonsang cheu: tix yaox kawn: pwi, mawh lox yaogyaw kah nawh.
Pwi caox khankix, teei tix tah daux po: tau mai nghox kawx, ang cu tix lih khaing: nawh heue.
Coca: kieh yuh tix tawng grawng: cub yung: maix, cub moi maix kawx jawg tix jeung: ngai: maix mai jhak mhawmmhawm: awawx.
Sinngao ang chix kaux cong: jheengjheeng:, sinngao simiang khunhawkham kawx ang chix kaux cong: leeing ju.
Rib riem chix kuah, pa sum: pa van kawx, chix plaung, plix toma: tokoi: kawx, yaox tix priex heue.
Kawn: yung: khankix, mawh son kraung ceep, pex khankix, mawh son ngawh haktiex heue.
Son pa sang ih maix, mai kawn: nyiiex kawn: ma: maix, mai khawm siliex cawng maix, tag sang kub kah rawm:teeih pex heue.
Pwi pa ang rah ang see, viang ang pwi pheet kawx, nawh yuh lung to: heue. Phan: mawh pwi rah pwi see, kwa: awm: sivai sangsi: heue.
Simiang lih haoh, kheu phimap pwi haktiex, haktiex chix kaux cong:, kheu pwi pa grum mai cuyi: pingnya krax tawng krax yung heue.
Pwi hot deeh tuktiaktukte: kah paox pwi hot, ang lai kieh deuk ceeix kawx, awm: pa si kheet rawm: raoh lhiex heue.
Pwi pa preet kah been pa rauh see, nawh chix yaogyaw kah pwi pa ang rah ang see, mai pwi pa hawt kah been pa rauh see khankix, tag gwieh tix tang: plak khaing: kix heue.
Pwi pa ang rah ang see khankix, ang tawng been krax prawng ca:, phan: mawh pwi pa sawg kah Simiang Siyiex, chix tawng kah been krax prawng ca: khawm uik.
Pwi hot pwi sibhawm:, pa hawt kah been pa rauh pa see, nie lheu: mhawm: khaing: pwi pa pon mau mai yuh tix pa ang khaw: ang caw: heue.
Pwi pa chix priex tix hawt kah lox tawm: beenli, mawh kawn: pa koe: cuyi: pingnya heue. Mai pwi pa yuh paox pie kah pwi pa cha nie luan ih, chix kieh keeing: tix kaig tua heue.
Pwi pa ang rah ang see, pa teei tix ih rao mau kah daux pa ang rah ang see, mai pa mi pa koe:, mawh pwi pa priex mau son pwi caox rhawm: kah pwi hot pwi sibhawm: heue.
Pwi pa ang nghiiet mai veeh hu: khaing: pa sidiex lox tawm: beenli, viang nawh rawg bwan: kawx, mawh pa seeing: brai: heue.
Pwi pa nyaw glaw: kah pwi rah pwi see, kieh lud krax hu: pa ang mhawm:, nawh tag rau kah daux tiex pa kaong: tix heue. Pwi pa rauh daux rhawmrhi:, tag pon sin: pa mhawm: heue.
Mai pwi pa mi pa koe:, chix keud tix mawh pa koe: cuyi: pingnya, phan: mawh pwi hot pwi sibhawm: pa koe: cuyi: pingnya, chawkcheng: tix yaox kah nawh heue.
Yam gauxrhawm: pwi rah pwi see, pon min: plakngai: pa kied ting heue. Yam yaog pwi ang rah ang see ting, pwi khankix glaik mox tix heue.
Pwi pa kheem: kah phimap tix, ang lai pon pa mhawm:, pwi pa doh keud tix tik kah phimap tix nawh tag pon krax caox rhawm: Nawh Cao: heue.
Pwi pa lhat graung jheengjheeng: koe: bwanson: heue. Phan: mawh pwi pa kiien: rhawmrhi:, tag yaox ceu pa lhat pa khirhawm: heue.
Simiang pa caox pa ang mhawm:, pa giex piang pwi hot pwi sibhawm: khankix, awm: graox sivai sangsi: mai krih pa lailing heue.
Simiang pa ang koe: cuyi: pingnya, chix tuktiaktukte: kah pwi, mai simiang pa koeng kah pa ang rah ang see, nawh tag lang: ju lang: phan: heue.
Pwi pa plaux ju pwi yum:, kieh to: hu: kah daux simeeig, paw kieh pwi mawx tiebtie tix kaux kawx.
Pwi pa hu: kah daux krax pa rauh pa see, tag luan khaing: krax khirhawm: khirhi:, mai pwi pa hu: kah daux krax pa kawk pa vawk, tag goh dom: mawx dom: an: heue.
Pwi pa yuh ma: kaung: tag yaox tix sawm: sak, mai pwi pa ot giex, tag hot piang hot heue.
Pwi pa kaux sijax khankix, tag pon bwanson: pa grum naog heue. Viang mawh nan:, pwi pa coca: kah sonsang pon mau, ang pon luan khaing: krax pa ciyang phimap.
Ang khaw: tix khan kah pak ngai: pwi, grawhgrawng: nawh, kawn: pwi yuh phimap jao sang pon khaomun tix pliah heue.
Pwi pa coca: tix sawg kah mau khri:, chix boh rhawmrhi: pa caox, mai ang tawng ceu pa sang hoek krax pa hot sibhawm: khaix.
Pwi pa ah, pa sidiex kah pwi phimap, sidauh khaix sax, nawh nie lheu: ting bwanson: khaing: pwi pa chix ah lox nyaw glaw: kah pwi heue.
Pwi pa tud rhim: tix teei kraungkhrai: miex keeing: tix, mai ah ang koe: phimap, mawh pwi pa yuh paox pie kah pwi pa chix yuh laux heue.
Pwi pa ting rhawm: canyau:, chix thong: krax pa simah, phan: mawh pwi pa deuh rhawm: kah Simiang Siyiex, chix grum naog kuceu heue.
Pwi pa deuh rhawm: kah rhawmrhi: tokaux tix, mawh pwi caox heue. Mai pwi pa priex tix hawt kah pingnya satix, luan khaing: krax khirhawm: khirhi: heue.
Pwi pa chix gwieh tix tawx kah pwi hot pwi sibhawm:, tokaux nawh ang lai hot sibhawm:, mai pwi pa via hu: khaing: pwi hot pwi sibhawm: khankix, tag yaox tix kham: geu: pa jhax lawg heue.
Yam yaog pwi ang rah ang see ting, pwi khankix glaik mox tix heue. Yam hoek kix krax laux krax leeing:, pwi rah pwi see khankix, pre haoh hun: heue.
Pwi pa hoik kham: kah lox sidiex gau lawlawx kawx, mai pwi pa kieh ngawg tix kiien:, ang koe: dee deuh rhawm:, mai tag lauxleeing: dom: mawx dom: an: heue.
Yam giex pwi rah pwi see kaing:, pwi haktiex chix gauxrhawm: heue. Mai yam giex pwi ang rah ang see kaing:, pwi haktiex khirhawm: khirhi: heue.
Pwi pa moh kah been cuyi: pingnya, chix kieh keeing: tix gaurhawm: gauxrhi:, mai pwi pa yuh paox pie mai bun: coh kaux, chix kieh kraungkhrai: som nai: heue.
Simiang khunhawkham pa chix prawng see: hawt been, chix kieh haktiex kaux cong: heue. Mai simiang khunhawkham pa ih mau chun: praok chix kieh haktiex glup laux heue.
Pwi pa chix nyaw glaw: kah paoxplawg paoxnyhawm:, awm: nah tix deuh rub son caong tix heue.
Daux krax pa hu: pwi caox pa phit lud, hoik taong: tix deuh jhawk, phan: mawh pwi rah pwi see, chix ah lox rhax gauxrhawm: gauxrhi: heue.
Pwi rah pwi see, chix keud son pwi hot pwi sibhawm:, phan: mawh pwi pa ang rah ang see, ang lai yuh tix tawng kah grawng: ceu an: heue.
Pwi pa yuh pa ang cee ang cak khankix, chix gleeing tix tik kah veng heue. Phan: mawh pwi pa koe: cuyi: pingnya, chix via hu: khaing: krax pa songrhawm:.
Phan: pwi pa koe: cuyi: pingnya, yuh see: kah pwi caox, nawh songrhawm: ang ah, nawh nyia ang ah, ang chix kieh hoik chix khaw: paox tix.
Pwi pa chix plaux ju pwi yum: khankix, koeng kah pwi grum mhawm:, phan: mawh pwi rah pwi see, chix priex kah ju pwi tang: kaux heue.
Pwi caox chix jhi: kah ceu pa keud pa sawn: nawh khawm uik, phan: mawh pwi pa koe: cuyi: pingnya, chix mox yiien: tom: hoek singaix krai heue.
Phan: simiang nghiiet kah lox pa pie lhen:, siliex pa yuh kaing greem:, tag sang lih mawh pwi caox khawm uik heue.
Pwi hot pwi sibhawm:, mai pwi tuktiaktukte: sipub paox tix, Simiang Siyiex caoxrhawm: mai tawx pa riieng kah ngai: kiex heue.
Mai simiang khunhawkham, pa prawng see: rah see, kah pwi hot pwi sibhawm:, dangngeung nawh kaux cong: jheengjheeng: heue.
Pwi pa yaox tix sivied kah khaox saux, mai yaox tix kham: kah lox pa sidiex gau, chix ting lhaong: cuyi: pingnya heue. Mai kawn: nyawm pa tang: yuh alo tix, mawh pa chix kieh miex tix kaig tua heue.
Yam haoh pwi pa ang rah ang see, phimap pa cha nie luan yuh kawx haoh heue. Viang mawh nan:, pwi rah pwi see khankix, yaox kah pa lauxleeing: kix heue.
Sidiex gau kah kawn: simex maix awawx. Phan: yuh nan:, nawh tag kieh maix nyawmrhawm:, lheu: khaing: in:, nawh tag kieh rhawm: maix gauxhawm: heue.
Phan: ang koe: lox plak jhi: Siyiex, kawn: pwi hoek krax laux krax leeing: heue. Pwi pa priex tix hawt lox tawm: beenli Siyiex, koe: bwanson: heue.
Sidiex gau lox giex, kah siliex ang pex ang pon, viang nawh hoik tawng kawx, ang nghiiet mai ot giex heue.
Phan: koe: pwi pa ang koe: satix, mai haoh lox sikah, pa krox jun pwi caox nie lheu: mhawm: khaing: pa krox jun nawh heue.
Mai siliex pa teei pwi tix eei:, tom: yam iak nawh mhawmmhawm:, sidauh khaix pon tix mawh awm: kawn: lih tix heue.
Pwi pa yie song: rhawmrhi:, chix cheeik kieh pwi simah heue. Mai pwi pa dawd rhawm: khankix kawx, lih mawh pa cha nie luan yuh heue.
Krax pa ting rhawm: maix, tag yeen tokaux maix hoek dee tiiem, phan: mawh pwi pa tiiem rhawm: tiiem rhi:, tag pon min: plakngai: heue.
Pwi pa yuh paox mai pwi briex, mawh pwi pa koeng kah ju tix heue. Viang nawh mhong: lox pa jhax lawg miex ding kawx, ang koe: ceu pa jhi: tix ceu kawx.
Ceu pa lhat kah kawn: pwi, chix taong: jhawk, phan: mawh pwi pa deuh rhawm: kah Siyiex, tag luan khaing: krax khirhawm: khirhi: heue.
Kawn: pwi khankix, chix sawg tix yuh pa khaw: rhawm: simiang, viang mawh nan:, Simiang Siyiex chix mawh Cao: prawng ca: see: kawn: pwi heue.
Mai pwi rah pwi see, seeing: brai: kah pa ang rah ang see, mai pwi pa ang rah ang see, seeing: brai: kah pwi pa priex tix hawt beenli pa rauh pa see heue.
Lox Agurax Kawn: Simex Yake Khankix
Lox pa sidiex gau Agurax, kawn: simex Yake kah Itelax mai Ukalax mawh nin:.
Aux ang lai mawh pwi, hoik mawh totiag heue. Aux ang lai grum kah cuyi: pingnya kawn: pwi.
Aux ang gau kah been cuyi: pingnya, mai aux ang tawng kah ceu pa singax singeh.
Mawh pwi mawx pa haok meung raoma: mai deeh hoek? Pwi mawx pa pon jhawp bhaung: daux taix tix? Pwi mawx pa pon kie tix deuh rawm: kah kraung ceep tix? Pwi mawx pa pa kieh haktiex kaux cong: tom: sidauh? Phan: maix ang tawng Nawh, ceukaux Nawh, mai ceukaux kawn: simex Nawh, kaux patix? khex pon krai maix lie?
Gumlox Siyiex khawm uik, mawh pa singax singeh, Nawh mawh dee tiebtie, pwi pa deuh rhawm: kah Nawh heue.
Paw lai baox naok lox piang lox Nawh, phan: yuh nan:, Nawh deuh phimap kah maix, mai maix tag mawh pwi pie lhen: heue.
Aux rawg bwanson: kah Tokaux Maix Simiang ra: ceu, tom: sidauh ang aux nyang yum:, paw thiang: tix tik aux liak.
Ceu pa ang mhawm: mai pa pie pa lhen: teei tix tik khaing: aux liak, paw kieh aux hot, mai paw kieh aux mi, tawx ngie mee: kub eei: ju tix liak.
Phan: ang mawh nan:, ha: aux kox cha nie luan mi, mai thiang: tix tik kah Simiang Siyiex mai ah nin:, Maix mawh mawx? Phan: ang mawh nan:, ha: aux kox cha nie luan hot sibhawm:, mai briex kraungkhrai: pwi, mai jheeh aux ah lox sibriem kah ceukaux Simiang Siyiex heue.
Phan: ex sang yuh siliex laux, paw krai kah simiang nawh, ha nawh kox jhax lawg kah maix, mai phimap tag hoek kah piang maix heue.
Ceu pwi pa jhax lawg kah keeing:, mai pa ang chix nawb bwanson: kah miex tix,
ceu pwi pa keud tokaux tix, mawh pa singax tix, mai ang khoek, pa seeing: brai: kah tokaux tix,
mai ceu pwi pa ting rhawm: canyhau:, pa deuh tokaux tix ting lhaong:.
Ceu pwi pa grum naog rhang:, pa awm: gawn:, rhang: gieb pa awm: vaig, pa chix kiied tix ih kah pwi cud pwi cha: mai pwi hot pwi sibhawm: kah piang haktiex heue.
Pling: koe: kawn: bun: ra: mu: pa ah nin:, tawx liak tawx liak, lheu: khaing: an:, pa ang chix fahrhawm:, ang joeng mawh loe: ceu, pa ang chix ah naox heue.
Pa ah nin: pon: ceu, simeeig tix ceu, vaig bun: neh pa ang koe: kawn: tix ceu, haktiex pa ang chix sak kah rawm: tix ceu, ngu pa ang chix ah naox heue tix ceu.
Ngai: pwi pa ah lox pa ang cee ang cak, mai naknon: kah keeing: tix, mai pa ang nghiiet lox miex tix khankix, lak pa po: daux klawng: daux ngawd khankix, tag tut ngai: nawh jiiet, mai kawn: klang: preng tag hoek tix ih nex nawh heue.
Pa daox pa am: aux, ang joeng mawh loe: ceu, mai pa ang aux tawng koe: pon: ceu,
mawh nin:, krax pa po: klang: preng daux bhaung: tix ceu, mai daux krax hu: siuing: piang simaox tix ceu, daux krax hu: reu ting daux sigreung rawm: pang: lai tix ceu, daux krax hu: sinaw mai bunkrih tix ceu heue.
Daux krax bun: pa koe: mex mai pa phit vao kawx, awm: an: heue. Bun: pa hoik ih pa ih pa un:, mai khaix hoik awt jheeh jhai: tix, mai ah nin:, aux ang yuh phimap heue.
Pa chix kieh haktiex yungyiang:, ang joeng mawh loe: ceu, mai pa kieh haktiex ang pon kham: pon: ceu pa ah nin:,
siliex pa yaox tix yuh simiang tix kaux, mai pwi caox pa yaox tix sawm: sak tix kaux,
bun: caox pa koe: mex tix kaux, bun: siliex pa pon sin:, miex simiang cao: nyiiex tix kaux heue.
Kah piang haktiex, viang mawh ceu pa nie iak kawx, pa koe: cuyi: pingnya, koe: pon: ceu mawh inkix.
Mawh meeik tix ceu, viang mawh ceu pa iak riang iak rao kawx, chix sawg tix deuh pa ih pa un: bawg yam rung heue.
Petla tix ceu, mawh ceu pa iak riang kawx, chix yuh dee ot tix kah daux rang:.
Sido tix ceu, viang ang koe: laux simiang kawx, chix khrawm: tix ot tau heue.
Lai: tang: ceu pa iak tix ceu, viang mawh pa iak kawx, chix pin taix tix mai ot kah daux nyiiex haw: heue.
Ceu pa chix hu: mhawmmhawm:, ang joeng mawh loe: ceu, pa nyawm tix jhak grang, pa hu: koe: pon: ceu, mawh inkix,
sivai sangsi: tix ceu, mawh ceu pa ting riang khaing: totiag khawm uik, pa ang chix via kah pwi mawx tix heue.
Brung puing naing tix ceu, pex mhaing: tix ceu, mai simiang khunhawkham, pa ang pwi mawx lai pon tix tiebtie tix ceu heue.
Phan: maix yaw tokaux tix, maix yuh pa caox ang ah, maix keud tix yuh pa ang mhawm: ang ah, teei taix maix thox kah jheeh maix awawx.
Nied tix sigwiex kah rawm:teeih moi tom: lih mawh lon: bee (thawpat), phan: ex siyiied gawng: meeh, chix kieh nham: lih, awm: an:, phan: cheeik krax pa songrhawm:, chix lih tix mawh krax pa simah heue.
Lox Pa Sidiex Gau Miex Simiang Khunhawkham Lemoelax Kawn: Simex Tix
Phan: mawh lox pa sidiex gau miex simiang khunhawkham, Lemoelax kah kawn: simex tix ah nin:.
Kawn: simex aux eue, khex yuh kah mawx? Kawn: simex pa keh aux eue, khex yuh kah mawx? Kawn: simex aux, pa keh mai pa dex dawd mai sijax mukheu eue, khex yuh kah mawx?
Paw tawx riang rao maix kah bun: khankix, paw lai tawx krax keud krax sawn: kah pwi pa sang yuh simiang khunhawkham khankix laux.
Lemoelax eue, simiang khunhawkham mai kawn: simiang khankix, ang khaw: tix nyaux rawm: plix siiet mai plai: ceu pa chix yoek heue.
Lhat kix tag nyaux mai piawm: kah lox tawm: beenli, mai prawng ca: pa ang khaw: ang jiet kah pwi hot pwi sibhawm: khankix heue.
Tawx plai: kah pwi pa sang dex hoek krax laux krax leeing:, mai tawx rawm: plix siiet kah pwi pa koe: krax khirhawm: khirhi: heue.
Kieh kix nyaux, sonsang piawm: kix kah pa hot pa sibhawm:, mai ceu pa khirhawm: khirhi: heue.
Ot plak pwi daox pwi aw:, mai teem: coi kah pwi pa ang koe: dee deuh rhawm: khankix heue.
Ang: moing tix mai teem: coi prawng rah see kah pwi hot pwi sibhawm:, mai pwi pa cud pa cha: khankix awawx.
Bun: Pa Mhawm: Been
Pwi mawx pa yaox kah bun: pa grum naog kah been pa rauh pa see, bun: pa yuh nan:, nie lheu: ngawh khaing: siang: raoh pa mhawm: heue.
Mex nawh deuh rhawm: kah nawh, mai ang koe: krax khirhawm: khirhi: heue.
Moeng pa yuh nan:, nawh chix priex kah mex tix, mai chix yuh ceu pa mhawm: kah mex tix tom: sidauh ju tix heue.
Nawh sawg hauk yung:, mai tai, mai yuh kaing taix tix heue.
Nawh awm: reu pwi yuh lai pa chix viex pa ih pa un: khaing: dee singai heue.
Nawh kaoh caocao, tom: ang praix nyang riang, mai khre: tix tawx pa ih pa un:, kah kawnpraix daux nyiiex daux ma: mai bun: siliex khankix heue.
Nawh chix keud chix sawn: mhawmmhawm:, mai liag ma: kaung:, mai mau pa pon nawh, chix khre: chix cox kah sipeem plix siiet tix heue.
Nawh nhawt maox rawd nyoi tix cong:, mai kieh taix tix cong: phai: heue.
Nawh tawng kaing pa yuh tix mawh pa mhawm:, mai nawh ang kieh kawk ngu tix yeet leeing: sawm:.
Taix nawh giex kong mai kling: mawh keei: heue.
Nah taix tix kah pwi hot pwi sibhawm:, mai nyeu plawng: taix tix tawx kah pwi pa cairhawm:, pa siya: khankix heue.
Viang rawmrha: lih kawx, nawh ang khirhawm:, son kawnpraix daux nyiiex daux ma:, grawhgrawng: nawh, hoik koe: kraung ceep pa raoh pa si u: hoik koe: son kix khawm uik heue.
Nawh taing: prux son tix, mai ceep kraung man raoh rawt pa mhawm: heue.
Mex nawh kawx, ngawm tau kah diang siviex veng, mai pwi haktiex pa mawh pwi ting khankix heue.
Nawh chix taing: tix coh kah man pa mhawm: heue. Mai coh maox rawd nyoi kah pwi yuh lai gee khankix heue.
Man pa taing: nawh mawh pa kaux, mai jiet mhawm: grang, mawh kheu nan:, nawh tag sang koe: krax gauxrhawm: gauxrhi: son bawg yam bawg phaokhaix heue.
Nawh chix ah lox pa koe: cuyi: pingnya, mai jheeh nawh chix ah lox been krax moh krax rhawm: pa rauh see heue.
Nawh chix kia: ngien kah jhawm: yuh kawnpraix daux nyiiex tix, nawh ang ih pa ih pa un: ceu pa chix kieh nieh.
Kawn: simex, kawn: bun: nawh khankix kaoh mai chix nawb bwanson: kah miex tix heue.
Mex nawh kawx, kah daux bun: tom: nie, maix hoik yuh pa mhawm:, lheu: khaing: an:, maix nie lheu: yuh khaing: kix khawm uik, mai yaw nawh yuh nan: heue.
Ceu pa mhawm: mawh pa chix pie lhen:, pa mhawm: grang, mawh pa giex going, phan: mawh bun: pa lhat graung kah Simiang Siyiex, tag pon pa yaogyaw heue.
Bun: pa yuh nan:, tawx ngawh riang kah kaing pa yuh nawh, kaing pa yuh nawh, kieh min: plakngai: nawhsidawng:kahdiang siviex veng heue.
LAI TAWX CU YI:
(Ecclesiastes)
Tawx Cu Yi:
Krax Im: Jux Mawh Pa Giex Pa Going
Lox bwan: kawn: simex Davit pa mawh khunhawkham veng Yerusaliem,
Lox bwan: ah nin:, "Pa giex pa going khaing:, pa giex pa going khaing:," "Can kuceu khawm: uik mawh pa giex pa going heue."
Kah daux pa sau: kawn: pwi riang rao tix yuh kaing greem: singaix koe: bwanson: kah ceu patix lie?
Baux ju pwi hoik luan hu: tix ju, mai baux ju pwi tag sang baox deeh hoek tix ju, viang mawh nan:, haktiex kaux cong: leeing ju heue.
Singaix lih, mai singaix deeh klip, mai deeh to: tix hoek kah dee hoik lih tix heue.
Bhaung: pa phlu: hu: plak seh, mai deeh veeh tix ing: kah plak laong:, bhaung: pa phlu: hu: jheengjheeng:, mai baox deeh viex hoek khaix dee hoik phlu: tix heue.
Rawm: klawng: khankix hu: laig daux rawm: sigrit sigra:, viang mawh nan: rawm: sigrit sigra: ang chix naog, khaing: dee kaoh rawm: klawng: khankix mai deeh baox viex tix ing: tan: heue.
Kuceu khawm: uik mawh pa ang lai dak uik krai kah grawng: pa taug mao yuh kawn: pwi heue. Ngai: kawx ang chix fah kah pa yaox tix, mai yhaok kawx ang chix sak kah pa mhong: tix heue.
Pa hoik koe: tag ang awm: ceu pa sang baox koe:, ceu pa hoik yuh yamin: tag awm: ceu pa tag sang yuh, mai ceu pa khraox ang lai koe: pie tix ceu kawx greem: singaix heue.
Mawh kawn: sang koe: pa krai tix ceu ceu lie? "Jhak heue, in: mawh pa khraox," ceu an: hoik dawg mawh pa koe: kah: sivoe ex heue.
Ang koe: ceu pa doh keud doh sawn: glang: kah: an:, mai tag ang koe: krax doh keud doh sawn: kah ceu an: khankix, kah can pwi pa tag sang hoek khaix an: heue.
Krax Khirhawm: Grawng Pingnya
Aux pa sidiex lox bwan:, yam mawh tix khunhawkham kah piang ceu pwi Isarilax kah daux veng Yerusaliem heue.
Mai aux hoik koe: rhawmrhi: sonsang sawg grawng: pa dex pa dawd kah ceu an: khawm: uik pa koe: greem: raoma: kah cuyi: pingnya tix heue. Krax pa kharhawm: in:, mawh pa hoik tawx Siyiex sonsang yuh kawn: pwi kah heue.
Aux hoik yaox kaing jhaw: can pa hoik yuh tix khankix greem: singaix khawm: uik mai ceu an: khankix hoik mawh pa giex pa going mai ceu pa ih kah bhaung: khaing: heue.
Ceu pa kawk tag ang pon yuh rah, mai ceu pa cud pa cha: tag ang pon simin kah heue.
Aux hoik keud mai hoik ah nin: daux rhawm: tix, "Jhak heue, aux hoik mawh pwi pa kied ting lhaong: mai hoik lheu: koe: pingnga cuyi: khaing: pwi khawm: uik, pa koe: sivoe aux kah veng Yerusaliem heue. Rhawm: aux hoik kied koe: krax tawng krax yung kah daux pingnya cuyi: pa kied ting kied lhaong: heue."
Aux hoik koe: rhawmrhi: sonsang tawng kah pingnya cuyi: mai sonsang tawng kah grawng: pa yhot pa vaw khankix heue. Aux hoik tawng ceu in: khankix mawh pa ih kah bhaung: heue.
Mawh kheu pa nie koe: pingnya cuyi: mawh pa nie koe: krax lauxrhawm:, mai kaw pa nie baox kah krax tawng krax yung nie baox krax pa lauxrhawm: heue.
Grawng: Nyawmrhawm: Pa Giex Pa Going
Aux hoik ah nin: kah daux rhawm: tix, "Hoek yamin:, aux sang cheukcheu: tix yaox maix kah krax pa gauxrhawm: gauxrhi:; mawh kheu nan: kieh koe: krax gauxrhawm: kah daux pa nyawmrhawm:;" viang mawh nan: in: kawx baox mawh ceu pa giex pa going heue.
Aux hoik ah nin: kah daux pa nyiah tix, "An: mawh pa yhot," "Ceu pa gauxrhawm: an: tag sang mawh pa koe: bwanson: kah ceu patix lie?
Aux hoik keud tixyaox kah daux rhawmrhi: nex nham: tix pa hoik hawt khaix alo rawm: plix siiet, yam kawn: naog pingnya cuyi: daux rhawm: aux, mai sonsang deuh aux rhawmrhi: tix kah piang pa hai pa meug, tom: hoek yam yaox aux kah can ceu pa mhawm: son kawn: pwi khankix mai pa khaw: kawn: pwi tix yuh kah greem: raoma: tom: sidauh ju tix khawm: uik heue.
Aux hoik yuh kaing jhaw: pa ting pa lhaong:, mai aux sum: nyiiex tix mai hoik sum: sipeem plix siiet tix heue.
Aux hoik cox khre: sipeem plix kuceu, mai sum: khaox plix kuceu pa chix plix plix khankix,
Aux hoik tang: yuh rawm: dung son cao: tix sonsang lhauk rawm: kah khaox pa sum: tix khankix heue.
Aux hoik khrawm: tix cie siliex simex siliex bun: khankix mai hoik koe: siliex pa hoik keh hoik kung kah daux nyiiex aux heue. Mawh heue, aux hoik nie lheu: koe: sinngao khawng: brie mai cub yung: khankix lheu: nie khaing: pwi pa hoik ot kah daux veng Yerusaliem sivoe aux khawm: uik heue.
Aux hoik kraix khrawm: tix cie mau khri: mai sinngao can ceu pa dex pa dawd mai khunhawkham, mai can ceu pa lih khaing: haktiex an: khawm: uik son tix heue. Aux hoik khrawm: tix cie cub simex mai bun: pa chix rhax lai khankix, mai pa jiet chix kieh kawn: pwi gauxrhawm: rauxrhi: kah, pa mawh bun: tom: nie heue.
Mawh kheu nan: aux hoik lih tix mawh pwi ting pwi lhaong: mai hoik nie lheu: mhawm: khaing: pwi pa koe: sivoe aux khawm: uik kah veng Yerusaliem heue. Pingnya cuyi: aux kawx, hoik kaux cong: tau mai aux heue.
Can ceu pa ghoing: ngai: aux tix sang pon khankix aux ang thiang: khaing: ceu an: heue. Aux ang pon giex rhawmrhi: tix khaing: pa nyawmrhawm: nyawmrhi: tix ceu kawx heue. Grawhgrawng: nawh rhawm: aux hoik koe: krax gauxrhawm: gauxrhi: kah daux kaing jhaw: pa yuh tix khawm: uik, mai in: mawh bwanson: khaing: riang rao pa yuh aux khawm: uik heue.
Khaix an: aux deeh simi tix yaox kah kaing jhaw: pa hoik yuh kah taix tix khawm: uik, mai kaing jhaw: pa sau: aux riang rao tix yuh khankix mai hoik mawh ceu pa giex pa going khawm: uik, mai mawh pa ih kah bhaung: khaing: heue. Ang lai mawh pa koe: bwanson: pie tix ceu kawx kah greem: singaix heue.
Dee sidauh Krax Pwi Koe: Pingnya Mai Pwi Hai Pwi Meug
Khaix an: aux deeh veeh tix sonsang keud tix yaox kah pingnya cuyi: mai grawng: pa yhot pa vaw khankix heue. Grawhgrawng: nawh pwi pa plud tix hoek khaix khunhawkham sang pon yuh ceu patix lie? Mawh ngie pon yuh nawh can pa hoik sax yuh tix heue.
Khaix an: aux hoik yaox kah kied mhawm: pingnya cuyi: khaing: pa hai pa meug, awm: kied mhawm: pa riieng khaing: pa faik heue.
Ngai: pwi koe: pingnya cuyi: khankix koe: kah daux dong: kix, viang mawh nan: pwi hai pwi meug khankix lailing kah daux pa faik heue. Viang yuh nan: kawx tokaux aux hoik grux tawng grux yaox kah can pa lih tix mawh awm: paox tix kah piang kix tan: heue.
Mawh kheu nan: aux ah nin: kah daux rhawm: tix, "Awm: hoik lih mawh ceu an: kah piang pwi hai pwi meug, an: kawx, baox lih tix mawh kah piang aux, mai aux sang nie baox koe: pingnya cuyi: khaing: nawh yuh kah mawh lie?" Khaix an: aux deeh ah nin: kah daux rhawm: tix; "In: kawx mawh pa giex pa going khaing: heue."
Grawhgrawng: nawh awm: ang pwi koe: pingnya cuyi: lai koe: krax doh keud doh sawn: leeing ju, pwi hai pwi meug kawx awm: an:, can pa koe: daux yamin: tag sang mawh pa piawm: tix kah daux bawg yam pa sang hoek heue. Awm: yum: pwi pa koe: pingnya cuyi: an: pwi hai pwi meug kawx tag yum: heue.
Mawh kheu nan: aux hoik mee: kah krax pa im: ju tix, kheu jao pa hoik kha: aux rhawm: kah grawng: kaing jhaw: pa yuh tix kah greem: singaix heue. Mawh kheu ceu an: khankix mawh pa giex pa going mai pa ih kah bhaung: khaing: heue.
Khaix an: aux hoik mee: kah kaing jhaw: pa hoik sau: aux riang rao tix yuh kah greem: singaix kuceu heue. Mawh kheu sang yaox aux tix prah an: kah pwi pa tag sang hoek khaix aux heue.
Mai mawh pwi mawx pa tawng kah mawh nawh pwi koe: pingnya cuyi:, phan: ang mawh nan: pwi hai pwi meug lie? Viang mawh nan: nawh tag sang kwang: kah piang kaing jhaw: pa hoik sau: aux riang rao tix yuh mai pingnya cuyi: pa hoik plak jhi: aux kah greem: singaix heue. In: kawx mawh pa giex pa going heue.
Mawh kheu nan: aux hoik lauxrhawm: lauxrhi: kah kaing jhaw: pa sau: aux riang rao tix yuh khawm: uik kah greem: singaix heue.
Grawhgrawng: nawh viang pwi tix kaux yuh kaing jhaw: tau mai pa koe: pingnya cuyi:, mai krax tawng krax yung mai pa min: tix kawx, nawh tag sang yaox tix prah sinngao tix kah pwi, pa ang yaox tix sau: riang rao tix yuh heue, In: kawx mawh pa giex pa going mai ceu pa kied ting caox caig tix ceu heue.
Grawhgrawng: nawh pwi pa sau: riang rao tix yuh kaing jhaw: mai pa kied koe: rhawm: koe: rhi: tix yuh greem: singaix kawx, sang koe: bwanson: kah ceu patix lie?
Mawh kheu singaix sawm: nawh khankix mawh krax pa lauxrhawm:, mai kaing jhaw: yuh nawh kawx mawh ceu pa voi rhawm:, yam ponsawm: kawx nawh ang yaox tix laux lee: rhawm: tix heue. In: kawx mawh pa giex pa going heue.
Ang lai koe: ceu pa lheu: mhawm: son kawn: pwi tix ceu kawx, lheu: khaing: pa ih pa nyaux, mai rhawmrhi: nawh tag koe: krax gauxrhawm: gauxrhi: kah daux riang rao kaing jhaw: pa yuh tix heue. Aux hoik yaox mawh ceu in: pa kaoh khaing: taix Siyiex heue.
Mawh kheu phan: ang mawh daux Nawh Cao:, mawh pwi mawx pa sang yaox tix ih mai mawh pwi mawx pa pon tix koe: pa nyawmrhawm: nyawmrhi: lie?
Grawhgrawng: nawh Siyiex tawx pingnya cuyi: mai krax tawng krax yung mai krax gauxrhawm: gauxrhi: kah pwi pa mhawm: kah plak sivoe Nawh Cao:; viang mawh nan:, kah pwi pa koe: phimap phighram:, Nawh Cao: kieh kix yuh kaing mai khrawm: sinngao sonsang tawx nawh kah pwi mhawm: kah plak sivoe ngai: Siyiex heue. In: kawx mawh pa giex pa going, mai mawh pa ih kah bhaung: khaing: heue.
Kuceu Tag Koe: Bawg Yam Cie Nawh
Praix klawng: kuceu ku cawng tag koe: baux yam cie tix, bawg yam tang: koe: son krax keud krax sawn: tix yuh kuceu greem: raoma:;
koe: bawg yam keh, mai koe: bawg yam yum:, koe: bawg yam sum:, mai koe: bawg yam reeig kah pa sum: tix;
koe: bawg yam pah, mai koe: bawg yam deeh pai: moi:, koe: bawg yam yieh laux, mai koe: bawg yam pa deeh sum:,
koe: bawg yam yiiem, mai koe: bawg yam nyiah, koe: bawg yam khirhawm: mai koe: bawg yam graoh,
koe: bawg yam prungprang:simaox, mai koe: bawg yam deeh khrawm: kah simaox khankix, koe: bawg yam kawm ngheet paox tix, mai koe: bawg yam gwieh paox tix,
koe: bawg yam sawg, mai koe: bawg yam grai:, koe: bawg yam priex deuh, mai koe: bawg yam luan,
koe: bawg yam riah tix tik, mai koe: bawg yam deeh caing, koe: bawg yam yiien: yawg, mai koe: bawg yam sang sikah,
koe: bawg yam moh, mai koe: bawg yam koeng, koe: bawg yam puing naing, mai koe: bawg yam pa nhim: heue.
Kaing Jhaw: Pa Tawx Siyiex
Pwi pa sau: riang rao tix yuh kaing khankix sang koe: bwanson: ceu patix lie?
Aux hoik yaox kah kaing jhaw: pa tawx Siyiex tix deuh sonsang yuh kawn: pwi khankix kah daux pa taug mao tix heue.
Nawh Cao: hoik yuh kuceu ku cawng mhawm: grang kah daux bawg yam cie Tix heue. Nawh Cao: hoik sau: tix deuh baux bawg yam leeing ju leeing phan: kah daux rhawmrhi: kawn: pwi; viang mawh nan: kawn: pwi ang chix pon cied tix yaox kah kaing jhaw: pa yuh Siyiex tom: jah mai tom: sidauh heue.
Aux tawng kah ang ceu pa mhawm: lai koe: tix ceu kawx kah son kix lheu: khaing: krax gauxrhawm: gauxrhi:, mai sonsang yuh ceu pa mhawm: kah daux pa im: ju kix,
mai pwi kukaux tag sang ih mai nyaux mai gauxrhawm: kah daux kaing jhaw: riang rao pa yuh tix khawm: uik, in: mawh khawngphak pa tawx Siyiex heue.
Aux tawng can ceu pa yuh Siyiex, mawh pa koe: leeing ju leeing phan: heue. Ang laix pon tix baox kah piang an:, mai ang lai pon tix tieh khaing: an: heue. Siyiex yuh in: khankix, sonsang lhat graung kawn: pwi kah plak sivoe Nawh Cao: heue.
Can pa hoik dawg lih tix koe:, mai awm: can pa koe: yamin:, mai can pa sang lih tix koe:, hoik awm: pa dawg lih tix koe:, mai Siyiex deeh mhaing: grawhgrawng: ceu pa hoik luan khankix heue.
Krax Pa Pex Kah Pa Ang Rah Ang See
Lheu: khaing: an: kah greem: singaix aux hoik yaox kah koe: dee prawng see: pa ang rah ang see tan:, mai kah dauh dee koe: pa rauh pa see; pa caox pa caig kawx koe: tan: heue.
Aux ah nin: kah daux rhawm: tix, "Siyiex tag sang prawng ca: pwi pa rauh pa see mai pwi pa caox pa caig, grawhgrawng: nawh bawg yam tag koe: sonsang cied kah krax keud krax sawn: kuceu ku cawng mai son kaing jhaw: kuceu heue."
Aux hoik ah nin: kah daux rhawm: tix, "Son grawng: dauh dee ot kawn: pwi khankix, Siyiex cheu: tix yaox kix, mai sonsang tawng kix tokaux tix mawh pa awm: tosat khankix heue."
Grawhgrawng: nawh can ceu pa lih tix koe: kah kawn: pwi khankix, tag sang mawh pa lih tix koe: kah piang tosat, mai tix ceu tag lih hoek kah piang kix, awm: yum: tix ceu, an: tang: ceu kawx tag yum: heue. Mawh kheu kix khawm: uik sileed bhawm: awm: paox tix, kawn: pwi ang koe: ceu pa blon: mhawm: khaing: tosat, mawh kheu mawh ceu an: khankix pa giex pa going khawm: uik heue.
Kuceu khawm: uik hu: kah dauh dee tix mu: khaing:, kuceu khawm: uik kaoh khaing: phawng: tiex, mai deeh ing: kah phawng: tiex heue.
Mawh pwi mawx pa chix gwieh tix tawng kah khwan: ju kawn: pwi khankix pa haok kah dee lhaong:, mai khwan: ju tosat khankix, pa lih hu: kah greem: haktiex lie?
Mawh kheu nan: aux hoik tawng kah ang tix ceu kawx lai mawh pa nie lheu: mhawm: khaing: pa gauxrhawm: pwi kah daux kaing jhaw: yuh tix, kheu mawh an: nyum: son nawh heue. Grawhgrawng: nawh mawh pwi mawx pa sang pon viex nawh yaox kah ceu pa tag sang lih tix mawh khaix nawh lie?
Khaix an: aux deeh keud tix yaox krax pa tuktiaktukte:, pa hoik yuh tix greem: singaix khawm: uik, mai jhak kah rawm: ngai: can pwi pa yaox tix kham: geu: krax tuktiaktukte:, viang mawh nan: ang koe: pwi pa pon tawx krax nyawmrhawm: kah kix tix kaux kawx heue. Mawh kheu can pwi pa tuktiaktukte: khankix koe: siawpsibrawm, viang mawh nan: ang koe: pwi pa pon tawx krax nyawmrhawm: kah kix tix kaux kawx heue.
Mawh kheu nan: aux hoik yaox nie lheu: koe: bwanson: khaing: pwi son pwi hoik dawg yum: khaing: pwi pa kawn im: ju heue.
Viang mawh nan: pa nie lheu: mhawm: khaing: an: kiex khawm: ra:, mawh pa ang sax lih tix koe:, mai pwi pa ang sax yaox kaing ceu pa caox pa caig, pa hoik yuh tix khankix greem: singaix heue.
Pa Coca: Son Cao: Tix Mawh Pa Giex Pa Going
Khaix an: aux hoik yaox pwi pa sau: riang rao tix yuh kaing mai pa min: kah kaing kuceu, mawh pa kieh paoxplawg paoxnyhawm: tix khankix khoi: rhawm: kah jao an: heue. In: kawx mawh pa giex pa going mai pa ih kah bhaung: khaing: heue.
Pwi hai pwi meug bhok taix tix, mai ih kah nex tix heue.
Krax yiien: krax yawg pa koe: tix jhawp an:, mawh pa nie lheu: mhawm: khaing: taix pa naog khawm: ra: jhawp, tau mai pa taug pa mao mai pa ih kah bhaung: khaing: heue.
Khaix an: aux deeh keud rhawm: tix, mai aux hoik yaox kah ceu pa giex pa going greem: singaix;
koe: pwi pa ot nongnong:, ang koe: paox pie, nawh ang koe: kawnpraix mai ang koe: puxaik. Viang mawh nan: nawh yuh kaing ang koe: dee sidauh sidu, mai ngai: nawh ang chix fah tau mai krax pa mag pa mi tix heue. Viang yuh nan: nawh ang sax chawk yuh nin:, "Aux sau: riang rao tix yuh ceu in: khankix mai kharhawm: tix mawh son pwi mawx lie?" In: kawx mawh pa giex pa going, mai ceu pa taug pa mao khaing: heue.
Grawng: Koe: Jum Paoxgrawm Paoxgru
Pwi ra: kaux mawh pa nie lheu: mhawm: khaing: pwi tix kaux, grawhgrawng: nawh kiex hoik pon bwanson: ceu pa mhawm: khaing: daux kaing jhaw: riang rao yuh tix heue.
Grawhgrawng: nawh phan: tix kaux goh, an: tix kaux tag deeh yaog nawh kaoh heue. Viang mawh nan: krax lauxrhawm: hoek kah piang pwi goh an: nongnong:, mawh kheu ang pwi pa sang yaog nawh koe: heue.
Khaix an: phan: pwi ra: kaux noi: tix it tau, kiex tag sang si u:, viang mawh nan: phan: mawh pwi tix kaux khaing: tag sang si u: yuh kah mawx lie?
Viang pwi tix kaux hoik pex kah siawpsibrawm pwi tang: kaux kawx, pwi an: ra: kaux tag pon tiebtie nawh heue. Mai maox brawm: loe nyaing ang pon dud yie yie heue.
Grawng: Luan Hu: Krax Pa Ao: Min:
Kawn: nyawm pwi hot pa awn: ju pa koe: pingnya cuyi: an: tix kaux, nie lheu: mhawm: khaing: khunhawkham riex ju pa koe: rhawm: hai rhawm: meug an: tix kaux pa ang lai pon sidiex gau kah nawh tix bawg kawx heue.
Grawhgrawng: nawh, nawh chix mawh khunhawkham khaing: pa lih tix daux thawng:, viang nawh hoik mawh pa keh kah daux krax pa hot pa shia: daux meung haktiex tix kawx heue.
Aux hoik yaox krax im: ju pwi khawm: uik pa lih tix mawh greem: singaix heue. Mai kawn: nyawm awn: ju pa ot glawk ra: an:, chix pon plud tix ot kah dauh dee ot nawh heue.
Pwi haktiex pa ot greem: pa kwang: khunhawkham an:, ang lai dak uik simin kah, viang mawh nan: can pwi pa plud tix hoek khaix nawh khankix, ang lai koe: krax fahrhawm: fahrhi: kah daux nawh heue. In: kawx mawh pa giex pa going tete, mai mawh pa ih kah bhaung: khaing: heue.
Lhat Graung Kah Siyiex Mai Priex Rhawm: Tix
Yuh satix kah diang caong hu: tix khankix, yam hu: maix kah nyiiex bwan: Siyiex, pa greed tix dex sonsang nghiiet kah lox Siyiex, lheu: mhawm: khaing: sonsang tawx pwi hai pwi meug krax tan krax lu pa appong: tix khankix heue. Grawhgrawng: nawh kix ang tawng kah yuh tix pa caox heue.
Yuh satix mai priex jheeh tix, mai paw kieh rhawmrhi: maix luan phai: sikah tix ceu kawx kah plak sivoe Siyiex. Mawh kheu Siyiex ot kah daux meung raoma:, mai maix ot kah piang haktiex heue. Mawh kheu nan: paw kieh lox maix haoh heue.
Mawh kheu kied haoh hun: kaing yuh mai lih tix mawh camaox kah, mai tawng kah pwi hai pwi meug, kheu pa mhong: haoh lox sikah nawh heue.
Yam yuh maix sijax mukheu kah Siyiex, paw lai greed bawg yam sang yuh tix an:, mawh kheu Nawh Cao: ang khaw: rhawm: kah daux pa yuh pa hai pa meug heue. Tawx awm: ceu pa hoik yuh maix sijax mukheu heue.
Phan: ang yuh sijax mukheu nie mhawm: khaing: yuh maix sijax mukheu, mai ang tie hawt tix yuh heue.
Paw kieh jheeh maix viex maix hoek kah daux phimap, mai paw lai kieh maix yaox tix ah kah plak sivoe kawncau pa ting Siyiex aux hoik phit hoik lud loe: tix heue. Siyiex tag songrhawm: songrhi: kah lox khyox khaw: maix mai yuh laux kah kaing jhaw: pa yuh maix kah taix tix khankix kheu jao patix lie?
Mawh kheu kah daux krax pa kied nie camaox mai kah daux lox sikah haoh hun: khankix kawx, mawh ceu pa giex pa going heue. Mawh kheu nan: kieh maix koe: krax pa lhat pa graung kah Siyiex heue.
Grawng: Pa Pex Mai Min: Plakngai: Pa Giex Pa Going
Phan: maix yaox kah pwi hot pwi shia: yaox kah krax tuktiaktukte: mai prawng ca: kah kix kah daux pa ang rah ang see daux haktiex tix dauh dauh, paw vi daox am: kah grawhgrawng: ankix awawx. Mawh kheu awm: jhak simiang ting kah piang paox tix tix kaux hoik tix kaux mai simiang pa nie lheu: ting lhaong: khankix koe: kah piang kix heue.
Lheu: khaing: an: bwanson: pa kaoh khaing: haktiex mawh son kuceu khawm: uik; tokaux khunhawkham kawx mawh pa pon bwanson: khaing: daux kaung: heue.
Pwi pa moh kah mau, tag ang chix koe: krax fahrhawm: tau mai mau, mai pwi pa moh kah sinngao, tag ang chi koe: krax fahrhawm: tau mai krax pa haok hwan: sinngao tix heue. In: kawx mawh pa giex pa going heue.
Yam haok hwan: kraungkhrai:, pwi pa sang ih kawx haok hwan: heue. Mawh kheu nan: cao: kraungkhrai: sang koe: bwanson: ceu patix lheu: khaing: yaox kix kah ngai: tix lie?
Pwi pa yuh kaing, jiet nyawm laig it, viang nawh ih ceeix ang ah ih tom: nie ang ah, viang mawh nan: pwi pa kied mag kied mi, krax mag krax mi an: ang chix kieh nawh nyawm it heue.
Aux hoik yaox krax caox pa kied kin:, kah greem: singaix, krax mag krax mi pa hoik khrawm: kix tix deuh, deeh mawh pa krix cao: kix kah heue.
Viang mawh nan:, can sinngao an: khankix grai: grup kah daux krax pa ang mhawm:, yam pon nawh kawn: simex tix kawx, ang lai koe: tidtix kah daux taix nawh heue.
Awm: lih hoek kakaong: nawh khaing: daux vaig miex tix nawh tag deeh ing: awm: an:, mai nawh ang pon teei tix viex tix ceu kawx khaing: riang rao pa hoik yuh nawh kah taix tix heue.
Mai in: kawx mawh krax caox pa kied kin:, awm: hoik lih hoek nawh yuh kah mawx nawh tag sang yaox tix hu: awm: an: heue. Mai nawh sang koe: bwanson: kah ceu patix, kah pa sau: nawh riang rao tix yuh kaing son bhaung: lie?
Daux singaix nawh khankix nawh yaox tix ih nyaux kah daux pa faik, mai nawh koe: krax lauxrhawm: lauxrhi:, mai krax saux krax ngia, mai krax pa songrhawm: songrhi: tom: nie heue.
In: mawh pa hoik yaox aux, an: mawh ceu pa mhawm: mai pa khaw: pa caw kah son pwi pa sang ih sang nyaux, mai sonsang koe: krax nyawmrhawm: nyawmrhi: daux kaing jhaw: pa mhawm: yuh nawh khawm: uik, kah daux pa sau: nawh riang rao tix greem: singaix, daux baux singaix ju nawh khankix, kah pa tawx Siyiex kah nawh heue. Mawh kheu an: mawh nyum: cie nawh heue.
Awm: hoik tawx Siyiex krax mag krax mi mai krax koe: kraungkhrai: sinngao son pwi kukaux, mai hoik tawx siawpsibrawm kah nawh sonsang ih tix khaing: an:, mai rieb mawh nyum: cie tix, mai koe: krax gauxrhawm: gauxrhi: kah daux riang rao kaing jhaw: yuh nawh, in: mawh bwanson: khawngphak pa tawx Siyiex heue.
Mawh kheu nawh tag ang yaox tix keud kah daux baux singaix im: ju nawh khankix heue. Grawhgrawng: nawh Siyiex kieh nawh nyawmrhawm: nyawmrhi: kah daux rhawm: tix tau mai yuh tix kaing tom: nie heue.
Aux hoik yaox kah koe: ceu pa caox kah greem: singaix, mai an: mawh pa kied cien daux sinax kawn: pwi khankix,
kah pwi tix kaux Siyiex hoik tawx krax mag krax mi mai kraungkhrai: mai min: plakngai: khankix, son ang nawh lai koe: krax cud krax cha: pie tix ceu kawx son tokaux tix kah can pa simie rhawmrhi: nawh khawm: uik; viang mawh nan: Siyiex ang tawx siawpsibrawm sonsang ih nawh kah an:, viang mawh nan: pwi tang: praix tang: klawng: tix kaux tag teei tix ih heue. In: mawh pa giex pa going mai mawh pa kied caox kied caig heue.
Phan: pwi tix kaux koe: kawnpraix tiyieh kaux mai yaox tix ot tom: reung num, bawg yam singaix tix kawx, viang mawh nan: rhawmrhi: nawh ang nyang fah kah ceu pa mhawm: koe: tix heue. Mai yum: kah daux pa ang yaox tix sipaung: heue. Aux ah nin:, kawn: nyawm pa lawt an: tix kaux kawn: nie lheu: mhawm: khaing: nawh heue.
Mawh kheu nawh lih bleeh kah daux pa giex pa going mai lih hu: kah daux pa faik, mai ceukaux nawh mawh pa hoik kheem: tix kah pa faik heue.
Viang nawh ang sax yaox kah singaix mai ang sax tawng kah grawng: tix ceu kawx nawh hoik nie lheu: pon krax laux lee: tix khaing: pwi ting an:,
viang nawh yaox tix im: ju ra: rheng: num kawx, mai ang mawh pa koe: bwanson: heue. Kukaux khawm: uik hoik mawh pa hu: tix dauh ang mawh lie?
Can kaing jhaw: pa yuh pwi khawm: uik mawh son jheeh nawh, viang yuh nan: kawx rhawmrhi: pa simie tix ih ang chix fah heue.
Grawhgrawng: nawh pwi pa koe: pingnya cuyi: sang nie lheu: koe: ceu patix khaing: pwi hai pwi meug lie? Mawh koe: bwanson: krax im: ju pwi hot sibhawm: kah plak sivoe ngai: pwi im: ju khankix yuh kah mawx lie?
Grawng: pa chix yaox ngai: ceu pa mhawm: khankix mawh pa nie lheu: mhawm: khaing: krax lunglang rhawm: maix tix cie heue. In: kawx mawh pa giex pa going mai mawh pa ih kah bhaung: khaing: heue.
Can pa koe: yamin: ceu patix ang ah, dawg sum: tix deuh ceukaux heue. Mawh kheu tawng grawng: kawn: pwi mawh pa giex pa going, mai nawh ang pon silah tix tau mai Nawh Cao: pa nie lheu: ting siawpsibrawm khaing: nawh heue.
Mawh kheu kied haok hwan: krax pa giex pa going, kawn: pwi sang koe: bwanson: kah ceu patix lie?
Grawhgrawng: nawh mawh pwi mawx pa tawng kah ceu pa mhawm: son pwi kah daux baux ju pa giex pa going nawh khankix khawm: uik, pa luan hu: awm: veei lie? Mawh pwi mawx pa pon krai ceu pa sang lih tix koe: khaix nawh greem: singaix kah kawn: pwi lie?
Krax Im: Ju Pa Koe: Pingnya Cuyi:
Min: ceukaux pa mhawm: mawh pa nie lheu: mhawm: khaing: rawm: bee sioe: bhawng:; mai singaix yum: mawh pa nie lheu: mhawm: khaing: singaix keh heue.
Hu: kah daux nyiiex yum: nie lheu: mhawm: khaing: hu: kah daux nyiiex pa khan: kheu: priex, grawhgrawng: nawh an: mawh dee sidauh sidu hoek pwi khankix khawm: uik, mai can pwi pa im: ju khankix, tag pon sau: tix priex an: kah daux rhawm: tix heue.
Krax lauxrhawm: mawh pa nie lheu: mhawm: khaing: krax pa nyiah heue. Grawhgrawng: nawh, kheu jao koe: pakngai: pa lauxrhawm: an: chix kieh rhawmrhi: nie lheu: mhawm: kah heue.
Rhawmrhi: pa koe: pingnya cuyi: koe: kah daux nyiiex pa yum:, viang mawh nan:, rhawmrhi: pwi pa hai pa meug khankix, koe: kah daux nyiiex pa gauxrhawm: heue.
Pa nghiiet lox sidiex gau pwi pa koe: pingnya cuyi:, mawh pa nie lheu: mhawm: khaing: nghiiet kah lox lai rhax pwi pa hai pa meug khankix heue.
Grawhgrawng: nawh lox nyiah pwi pa hai pa meug, awm: lox luah taoh khaox kah gleeing greem: aw:, in: kawx mawh pa giex pa going heue.
Krax pa yeen ya chix kieh pwi pa koe: pingnya cuyi: yhot kah, mai krax pa ih mau cun: praok chix kieh rhawmrhi: pwi yawm jum kah heue.
Dee sidauh sidu an: mawh pa nie lheu: mhawm:, khaing: dee jah tix koe:, mai pa koe: rhawm: gun rhawm: yeung, mawh pa nie lheu: mhawm: khaing: pa lhaong: rhawm: lhaong: rhi: heue.
Paw doh kieh dawd rhawm: tom: lih koe: krax pa songrhawm: songrhi:, grawhgrawng: nawh, krax pa songrhawm: songrhi: ot kah piang dieb rhawm: pwi hai pwi meug khankix heue.
Paw doh chawk ah nin: glang: kah: singaix pa hoik luan khankix hoik mawh pa nie lheu: mhawm: khaing: baux in: singaix kheu jao grawng: patix lie? Grawhgrawng: nawh pa chawkcheng: maix tix yaox an:, maix ang chawk kah daux pa koe: pingnya cuyi: heue.
Pingnya cuyi: mawh ceu pa mhawm: awm: sinngao mai mawh pa koe: bwanson: kah son pwi khankix, pa yaox kah singaix heue.
Grawhgrawng: nawh pingnya cuyi: chix tieb chix tie, awm: an: mau kawx mawh pa chix tieb chix tie heue. Krax tawng krax yung mawh pa kied mhawm: mai tawx ju kah pwi hoik koe: pingnya heue.
Keud tix yaox kah kaing jhaw: pa hoik yuh Siyiex, grawhgrawng: nawh, pa hoik yuh Nawh Cao: vawk an: mawh pwi mawx pa sang pon yuh rah?
Kah daux singaix pa haok hwan: gauxrhawm: kah, kah daux singaix koe: pa kharhawm:, keud sawn: tix yaox sonsang tawng kawn: pwi kah pa tag sang bleeh tix koe: khaix nawh, Siyiex hoik lailoh tix tawx ceu pa mi mai ceu pa hot kah kawn: pwi heue.
Aux hoik yaox ceu an: khawm: uik kah daux singaix baux ju pa giex pa going aux, pwi pa rauh pa see tag lauxleeing: daux pa rauh pa see nawh, mai pwi caox pwi caig tag lang: ju kah daux pa yuh tix pa caox heue.
Paw doh mawh pa blon: rah see, mai paw doh mawh pa blon: koe: pingnya cuyi:, maix lai sang yuh tokaux tix lauxleeing: kheu grawng: ceu patix lie?
Paw doh mawh pa blon: caox caig, mai paw doh mawh pa hai pa meug, yuh patix maix lai simie tix yum: sivoe bawg yam cie maix?
An: mawh pa mhawm: sonsang jhawp maix tix priex in:, mai paw lai yah taix tix son ang an: lai gah tix hu: kah tang: kaux heue, mawh kheu pwi pa lhat pa graung kah Siyiex, tag glawd khaing: kix khawm: uik heue.
Pingnya mawh pa kieh pwi koe: pingnya cuyi:, koe: siawpsibrawm khaing: cao: kaing: naing ot daux veng kaoX: kaux heue.
Mawh kheu pwi rah pwi see mai pwi yuh ceu pa mhawm: pa ang koe: phimap ang lai koe: kah piang haktiex in: tix kaux kawx heue.
Paw priex ceu pa krai pwi kuceu khankix daux rhawm: tix, phan: yuh nan: maix tag mhong: lox jhax lox lawg siliex maix kah tix heue.
Mawh kheu rhawmrhi: maix hoik tawng kah jhax lawg tix kah pwi tang: kaux ku bawg ku yam heue.
Kah daux kuceu khawm: uik aux cheukcheu: tix yaox kah piang tix heue. Aux hoik ah nin:, "Aux deuh tix mawh pa koe: pingnya cuyi:," viang mawh nan: pingnya cuyi: an: hoik mawh pa singai khaing: aux heue.
Mawh pwi mawx pa pon sawg tix yaox kah ceu pa singai, mai ceu pa kied blon: raux an: lie?
Rhawmrhi: aux deeh keud tix yaox sonsang tawng, mai sawg cied tix yaox kah pingnya, mai kah grawng: ceu an: khankix, sonsang tawng kah pa caox pa caig, pa dex mai phimap, mai pa hai pa meug mai pa yhot pa vaw heue.
Mai aux yaox ceu pa nie lheu: song: khaing: krax yum:, pa mawh bun: koe: rhawm: keud tix sang taong: jhawk mai rub khankix, mai maox ceu pa jiet chix phyawk pwi kah taix nawh heue. Pwi pa een: rhawm: kah Siyiex, tag glawd khaing: bun: an: heue. Viang mawh nan: pwi yuh phimap khankix, tag krix kah bun: an: heue.
Cao: krai lox bwan: ah nin:, "In: mawh ceu pa hoik yaox aux," mai baox naok grawng: tix ceu hoik tix ceu sonsang pon sawg tix yaox kah grawng: tang: ceu,
pa kawn koe: rhawmrhi: aux tix sawg, viang mawh nan: aux ang nyang bax sipub kah, kah sinax simex tix rheng: kaux aux hoik yaox kah tix kaux; viang mawh nan:, kah sinax bun: tix rheng: kaux aux ang yaox kah tix kaux kawx heue.
Jhak heue, aux hoik yaox ngie kah an: tix ceu, Siyiex hoik yuh kawn: pwi rah see, viang mawh nan: kix hoik sawg tix yaox kuceu kah daux krax keud krax sawn: tix tom: nie heue.
Mawh pwi mawx pa awm: pwi koe: pingnya lie? Mai mawh pwi mawx pa pon tawng tix toe: dee bleeh ceu pa kied raux an: lie? Pingnya cuyi: kawn: pwi mawh pa kieh pakngai: nawh riang, mai grang pakngai: nawh hoik tieh loh tix heue.
Nghiiet Lox Pwi Koe: Siawpsibrawm Son Min: Ceukaux Siyiex
Aux tawx krax keud krax sawn: kah maix, "Priex tix hawt kah lox tawm: khunhawkham kah min: pa hoik tiextu maix kah Siyiex heue.
"Paw nieb lih hu: khaing: kah plak sivoe ngai: khunhawkham, mai paw cung tix ot kah daux ceu pa caox tix ceu kawx, mawh kheu khunhawkham pon yuh kuceu awm: pa koe: rhawmrhi: tix heue.
Gumlox khunhawkham: mawh pa koe: siawpsibrawm, mai mawh pwi mawx pa pon ah kah khunhawkham yuh nin:, "Mawh yuh maix ceu patix lie?"
Pwi pa priex tix hawt kah lox tawm: nawh, tag ang yaox krax pa kharhawm: pie tix ceu kawx, mai rhawmrhi: pwi pa koe: pingnya cuyi:, chix yaox kah baux yam mai krax prawng krax ca: khawm: ra: heue.
Grawhgrawng: nawh son grawng: kuceu koe: bawg yam mai pa prawng ca:, viang mawh pa kied kharhawm: kharhi: kawx koe: tom: nie kah piang kawn: pwi heue.
Grawhgrawng: nawh, nawh ang tawng kah ceu pa tag sang lih tix mawh, mawh kheu nan:, mawh pwi mawx pa pon krai, pa tag sang lih tix mawh an: lie?
Ang koe: pwi tix kaux kawx pa koe: sibrawm tix giex kah khwan:, mai phan: ang mawh nan: ang koe: siawpsibrawm kah daux singaix yum: heue. Ang koe: daux krax pa sang glawd kah daux naing an:, mai pa caox pa caig tag ang pon taoh kah pwi khankix khaing: pa caox pa caig an: heue.
Aux hoik sipub kah ceu in: khawm: uik mai hoik keud sawn: tix yaox daux rhawm: tix kah kaing kuceu pa hoik yuh tix greem: singaix heue. Koe: bawg yam pa kwang: pwi tix kaux kah piang pwi tang: kaux pa deeh kieh bwanson: tokaux cao: nawh laux heue.
Krax Yum: Hoek Kah Piang Khawm: Uik
Khaix an: aux yaox kah sipaung: pwi kah pwi caox pwi caig khankix, pwi pa hoik laig lih khaing: dee pa singax singeh, mai koe: pwi pa piawm: kah kix pa yuh pa caox kah daux veng kah dee pa hoik yuh kix ceu an: heue. In: kawx mawh pa giex pa going heue.
Grawhgrawng: nawh mawh kheu ang khran: ciyang kah piang kaing pa caox pa caig an: khankix phaiphai:, mawh kheu nan: rhawmrhi: kawn: pwi khankix hoik naog kah ceu pa sang simie tix yuh kah pa caox heue.
Viang pwi koe: map yuh pa caox tiyieh bawg mai viang nawh lang: ju kawx, viang mawh nan: aux tawng kah pwi pa lhat pa graung kah Siyiex, mai pa lhat pa graung kah plak sivoe Nawh Cao: mawh pa pon bwanson: tete heue.
Viang mawh nan: mawh kheu ang pwi caox pwi caig koe: pa lhat pa graung kah Siyiex, mai nawh tag ang pon bwanson: pa mhawm:, mai baux singaix pa im: ju nawh pa awm: veei kawx tag ang lang: heue.
Koe: pa giex pa going tix ceu pa lih tix mawh kah piang haktiex awm: lih ceu an: tix mawh kah piang kaing yuh pwi rah pwi see khankix, kah piang pwi caox kawx awm: an:, awm: lih ceu an: tix mawh kah piang ju pwi caox khankix kah piang pwi rah pwi see kawx awm: an: heue. Aux hoik ah in: mawh pa giex pa going heue.
Mawh kheu nan: aux yaogyaw kah krax pa gauxrhawm: gauxrhi: heue. Grawhgrawng: nawh kawn: pwi ang lai koe: ceu pa nie lheu: mhawm: kah greem: singaix khaing: ceu pa ih pa nyaux mai krax pa gauxrhawm: gauxrhi: heue. Grawhgrawng: nawh mai kaing jhaw: pa sau: nawh riang rao tix yuh daux baux singaix im: ju tix, nawh tag pon bwanson: pa tawx Siyiex greem: singaix heue.
Aux hoik so: rhawm: tix sonsang tawng tix kah pingnya mai sonsang pub tix kah kaing jhaw: pa hoik yuh tix khankix kah piang haktiex, mawh kheu pwi tiblah ang yaox tix it pon ngaix mai ponsawm: heue.
Khaix an: aux hoik yaox kah kaing jhaw: pa hoik yuh Siyiex khawm: uik, kah: ang pwi tix kaux kawx pon khre: tix yaox kah kaing pa yuh Nawh Cao: greem: singaix heue. Grawhgrawng: nawh, viang kawn: pwi sau: riang tix khre: kawx nawh ang pub kah an: heue. Viang pwi koe: pingnya cuyi: sau: riang tix sonsang tawng kah an: kawx, nawh ang pub ang yaox kah an: heue.
Aux keud tix yaox kah grawng: in: khawm: uik kah daux rhawm: tix, sonsang tiag cheu: aux tix yaox kah kaing jhaw: pa yuh pwi rah pwi see mai pwi koe: pingnya khankix kah daux tawm: taix Siyiex heue. Krax moh krax rhawm: ang ah, mai krax koeng: krax khoi: ang ah, kawn: pwi ang tawng kah tix kaux kawx, can pa koe: sivoe ngai: kix khawm: uik mawh pa giex pa going heue.
Grawng: kuceu khawm: uik, lih tix mawh kah pwi kukaux awm: paox tix tix ceu khaing:; kah pwi rah pwi see mai pwi caox pwi caig, kah pwi mhawm: mai pwi ang mhawm:, kah pwi singax singeh mai kah pwi pa seeing: pa brai:, kah pwi pa tawx krax tan krax lu, mai kah pwi pa ang tawx krax tan krax lu heue. Pwi koe: phimap, mai pwi pa ang koe: phimap, grawng: ceu in: hoek kah piang pwi pa tiextu mai kah piang pwi pa lhat kah pa tiextu heue.
In: mawh ceu pa caox pa lih tix koe: khawm: uik kah greem: singaix, an: tix ceu pa hoek khaing: kah piang pwi khawm: uik heue. Rhawmrhi: kawn: pwi khankix hoik naog kah pa caox tete; mai rhawm: pa yhot koe: kah daux rhawmrhi: kix glang: yam kawn: im: ju kix mai khaix an: kix hu: kah dee yum: heue.
Viang mawh nan:, son can pwi pa kawn im: ju an: khankix khawm: uik mawh pa koe: krax keud pot jum pot, mawh kheu sox pa im: tix mu: lheu: mhawm: khaing: sivai sangsi: pa yum: tix mu: heue.
Mawh kheu pwi pa im: ju tawng kah tag sang yum: tix, viang mawh kawx nan:, pa hoik yum: ang tawng tit tix, mai kix ang lai pon khawngphak, mawh kheu kix hoik piawm: kah nawh heue.
Krax moh krax rhawm: nawh mai krax pa koeng nawh mai rhawm: pa khoi: nawh khankix kawx, hoik grai: hu:, nawh ang lai yaox tix dex dawd mai kaing jhaw: pwi pa kawn im:, kah daux pa yuh tix greem: singaix pie tix ceu kawx heue.
Hu: heue, ih pa ih pa un: tau mai krax pa gauxrhawm: gauxrhi:, mai nyaux rawm: plix siiet tau mai pa nyawmrhawm: nyawm rhi:; grawhgrawng: nawh, Siyiex hoik rieb tix teei kaing jhaw: pa yuh maix khankix heue.
Kieh kraung ceep maix mawh pa paing jheengjheeng:, mai paw kieh rawm: bee sioe: bhawng: cud khaing: kaing: maix tix bawg kawx heue.
Ot kah daux pa nyawmrhawm: tau mai moeng pa moh maix daux singaix im: ju pa giex pa going pa hoik tawx Nawh Cao: kah maix greem: singaix, mai kieh singaix sawm: maix luan daux pa nyawmrhawm: tix, mawh kheu an: mawh nyum: kah daux ju maix mai kah daux riang rao kaing pa yuh maix greem: singaix heue.
Can kaing pa sang yaox maix tix yuh khankix coca: mai sau: riang tix yuh awawx; mawh kheu kah daux meung yum: pa sang hu: maix an: kaing pa yuh ang ah krax keud krax sawn: ang ah, krax tawng krax yung ang ah, pingnya cuyi: ang ah, ang lai koe: kah heue.
Khaix an: aux hoik jhak tix yaox kah greem: singaix, pwi pa phai: to: viang silah tix to: kawx ang lai pex jheengjheeng:, pwi ting riang ang lai pex kah naing jheengjheeng:, pwi lhak pwi haing: ang lai yaox tix sak vaig jheengjheeng:, pwi pa koe: krax tawng krax yung ang lai mag mi jheengjheeng:, pwi pa min: kah kaing jhaw: ang lai koe: min: plak ngai: jheengjheeng:, viang mawh nan: bawg yam mai akhwang: pa chix pon tix kah son khawm: uik heue.
Mawh kheu kawn: pwi ang tawng kah bawg yam cie tix, awm: kax pa hoik krix kah rub, mai awm: sim: pa krix kah jhawk, mawh kheu nan:, kawn: pwi kawx kix ang tien tawng yam krix tix kah jhawk taung: pa caox pa caig kah piang kix heue.
Pingnya Cuyi: Lheu: Mhawm: Khaing: Pwi Hai Pwi Meug
Pingnya cuyi: pa yaox aux greem: singaix mai pa khaw: tix yaogyaw kah mawh awm: in: heue.
Koe: veng iak tix veng pa tux ot pwi kah; mai khunhawkham pa kied ting riang ting rao tix kaux hoek tix puing veng an:, mai lai lawm kah veng an:, mai yuh tab hawt vungviang veng an: huee:.
Yam an: kah daux veng an: koe: pwi lhak pa hot tix kaux, mai nawh hoik taoh veng an: kah pingnya tix heue. Viang mawh nan: pwi tix kaux kawx ang lai doh keud kah pwi hot an: heue.
Khaix an: aux ah nin:, "Pingnya cuyi: mawh pa nie lheu: mhawm: khaing: riang rao heue. Viang mawh nan: pingnya cuyi: pwi hot pwi shia: an:, mawh pa sibriem pwi kah, mai kah lox nawh kawx pwi ang nghiiet kah heue.
Lox sikah pwi lhak kah daux pa yiien: yawg, mawh pa nyawm tix nghiiet lheu: khaing: lox riag yo cao: kwang: kah piang pwi hai pwi meug khankix heue.
Pingnya cuyi: mawh pa nie lheu: mhawm: khaing: kraung naing pa shiao son naing; viang mawh nan:, pwi pa koe: map koe: ghram: tix kaux, mawh pa yuh ceu pa mhawm: khankix lauxleeing: heue."
Roi yum: khankix chix kieh rawm: bee pa sioe: bhawng: cux si um: heue. Awm: an: ceu pa caox ceeix khaing: kieh pwi koe: pingnya pa nab yam pwi kah laux min: plakngai: heue.
Rhawmrhi: pwi koe: pingnya cuyi:, koe: kah taix khawn: dawm: nawh, viang mawh nan: rhawmrhi: pwi pa hai pa meug an:, koe: kah taix khawn gwiex heue.
Yam hu: pwi hai pwi meug krax, nawh yie piawm: rhawm: tix mai jhi: mawh tix pwi hai pwi meug kah pwi kukaux heue.
Phan: pwi kwang: maix lih tix songrhawm: kah piang maix, paw gah tix hu: khaing: dee ot maix; grawhgrawng: nawh krax pa gun yeung chix kieh krax phit lud ting yiien: kah heue.
Koe: pa caox pa caig tix ceu pa hoik yaox aux greem: singaix, mawh krax phit pa kaoh khaing: cao: pa kwang: heue.
Pwi hai pwi meug ngawm kah dee pa lhaong:, mai pwi mag pwi mi ngawm kah dee pa tiiem heue.
Aux hoik yaox kah brug siliex khankix brung, mai yaox hu: simiang khankix kah caong tix piang tiex awm: siliex heue.
Pwi pa kaong: daux o tag dee cod kah daux an:, mai pwi pa yieh kah vie lawng siuing: tag sang tut kah nawh heue.
Pwi pa gah kah simaox khankix, simaox tag dheem: kah nawh, mai pwi pa lug khix, tag deeh mat kah an: heue.
Phan: moe: beem, mai ang deeh klaing: lawm, tag nie lheu: yaox tix sau: riang tix heue. Viang mawh nan: pingnya mawh pa tawx bwanson: kah pex heue.
Phan: siuing: hoik tut cao: simeed sivoe, cao: simeed ang lai koe: bwanson: tidtix;
gumlox pa kaoh khaing: daux jheeh pwi koe: pingnya, mawh pa koe: min: pa mhawm:, viang mawh nan: jheeh pwi hai pwi meug tag bleet nawh heue.
Lox pa jah nawh tix sikah mawh pa hai pa meug, mai deeh sidauh lox pa krai nawh, mawh lox pa yhot pa vaw heue.
Pwi pa hai pa meug kied nie lox sikah, pwi tix kaux kawx ang tawng kah ceu pa sang lih tix mawh, mawh pwi mawx pa pon krai nawh mhong: ceu pa tag sang lih tix mawh khaix nawh lie?
Kaing jhaw: pa yuh pwi hai pwi meug khankix, tawx krax pa taug pa mao kah kix heue. Mawh kheu awm: kix pwi pa ang tawng kah krax pa sang hu: tix kah veng heue.
Pa mawh meung haktiex pa kwang: khunhawkham pa awn: ju, mai simiang cao: kaing: cao: kaing: maix khankix pa kaoh ih nyaux ngie priex pon ngawm caocao khankikx eue, pex tag hoek krax laux krax leeing: heue.
Pa mawh meung haktiex pa kwang: khunhawkham mai simiang cao: kaing: maix khankix pa ang chax nie luan ih luan nyaux pa ih nyaux mai pa khaw: bawg yam khankix eue, kieh bwanson: koe: kah piang pex heue.
Kheu jao pa kied nieh, braux nyiiex tag rham:, mai taix pa nieh cox braux nyiiex, nyiiex tag roik heue.
Pwie mawh pa yuh tix son pa gauxrhawm:, mai rawm: plix siiet mawh pa yuh tix sonsang nyawmrhawm:, viang mawh kawx nan: mau mawh pa pex kah kuceu ku cawng heue.
Pie kah daux rhawm: keud maix kawx paw doh jhax lawg kah khunhwkham, pie kah daux lawg it maix kawx paw doh jhax lawg kah cao: mi, mawh kheu sim: pa pu: daux raoma: tag viex lox maix hu:, mai sim: pa pu: an: tag krai grawhgrawng: an: heue
Ngawh Jum Pa Sau: Riang Tix
Taing pa ih pa un: maix kah piang rawm:, grawhgrawng: nawh ang lai rheung: mai tag deeh yaox an: khankix tom: nie heue.
Gwieh tix tawx nyum: kah pwi aliah kaux, mai baox tawx kah pwi daix kaux, mawh kheu ang maix tawng kah ceu pa caox pa tag sang lih tix koe: kah piang haktiex heue.
Phan: paiawm: khankix naog kah rawm: lhiex mai lhiex lih kah piang haktiex, mai phan: gaw khaox goh kah plak seh ang ah, kah plak laong: ang ah, kah gaw khaox an:, tag noi: tix ot kah dee goh tix tan: heue.
Pwi pa chix tawng grawng: bhaung:, ang ruat simie, mai pwi pa chix keud chix sawn: tix yaox kah paiawm: khankix, ang lai vawg nghox heue.
Awm: ang maix tawng kah hu: khwan: mai ang tawng kah haok khwan: si-ang: kawnngie: kah daux vaig bun: nghe:, mawh kheu nan: maix kawx ang tawng kah kaing yuh Siyiex kuceu khawm: uik heue.
Ruat simie plak pon ngawb, mai plak pon bo kawx paw doh yoi: kah taix maix, grawhgrawng: nawh maix ang tawng kah pa yuh kah mawx pa sang koe: bwanson:, mai pa ang koe: bwanson:, mawh kheu in: khawm: ra: ceu mawh pa mhawm: awm: paox tix heue.
Pa riieng mawh pa tie: tete, mai yam yaox ngai: kah pa riieng singaix kied gauxrhawm: kah heue.
Viang mawh nan: phan: pwi lang: ju lang: phan: tom: rheung: num, mai koe: krax gauxrhawm: gauxrhi: kah daux ceu an: khawm: uik, viang mawh nan: kieh nawh deeh doh keud kah baux singaix pa faik an: khankix mawh kheu singaix an: mawh pa kied rheung: heue. Can pa tag sang lih tix mawh khawm: uik, mawh pa giex pa going heue.
Sawg Siyiex Yam Awn: Ju Tix
Pwi awn: ju eue, gauxrhawm: yam kawn: awn: ju maix, mai kieh rhawmrhi: maix koe: krax nyawmrhwm: nyawmrhi: baux yam kawn: awn: ju maix, hawt hu: kah daux krax pa koe: rhawm: maix, mai kah daux pa yaox maix kah ngai: tix khankix heue. Viang mawh nan: tawng kah mawh kaing ceu an: khankix pa sang viex Siyiex tix prawng ca: kah maix heue.
Mawh kheu nan: teei tix tik krax lauxrhawm: khaing: daux rhawm: maix, mai teei tix tik pa caox khankix khaing: daux tokaux maix heue. Mawh kheu baux yam mawh maix kawn: nyawm mai baux yam awm: ju maix khankix mawh pa giex pa going heue.
Yamin: kah daux baux singaix yam kawn: awn: ju maix, doh keud kah cao: pa phan: pa deuh maix, sivoe sang hoek singaix pa caox pa caig khankix, mai num khankix hoit greed tix dex yam sang ah maix nin:, "Aux ang lai koe: krax nyawmrhawm: nyawmrhi: kah daux ceu an: heue.
Sivoe ang singaix mai pa riieng khix mai sim: uing khankix nyang bax faik, mai paiawm: nyang bax ceep khaix lhiex,
kah dau singaix cao: pau nyiiex khankix hoik sikua, mai pwi pa ting riang ting rao khankix hoik die riang awn: riang, cao: krid mhaw: khankix, hoik naox kaing yuh tix kheu hoik tux pwi, mai pwi pa sigaig khaing: daux siviex iak khankix pa riieng tag faik kah kix,
Yam hoik yiien: lox krid mhaw: siviex dex krax khankix hoik yeep tix singip, mai nawh kaoh caocao kheu mhong: tix lox sim:, mai lox rhax kawn: nyawm bun: khankix yiien: hu;
Kix lhat kah dee pa lhaong:, mai ceu pa yaoh pa yee: koe: kah daux krax daux laux, yam pruh tai khaox Batan, sido hoik cien kah tokaux tix, mai rhawm: pa simiex nawh tag yawm hu: heue. Mawh kheu kawn: pwi tag kawn: hu: kah nyiiex leeing ju leeing phan: tix, mai pwi pa yiiem yo khankix tag hu: hoek kah hawt krax heue.
Doh keud doh sawn: kah Cao: pa phan: pa deuh maix sivoe ang maox mau nyang dud, phan: ang mawh nan: sivoe max klong: khri:, phan: ang mawh nan: sivoe max singiien rawm: kah daux dee lih rawm: keut, phan: ang mawh nan: sivoe graig jaong ling: hawt rawm: maw: heue.
Khaix an: phawng: tiex tag sang deeh ing: kah tiex kah dee hoik kaoh tix, mai khwan: tag sang deeh ing: kah Siyiex, Cao: pa tawx nawh heue.
Mai lai lox bwan: ah nin:, "Pa giex pa going khaing: pa giex pa going, kuceu khawm: uik mawh pa giex pa going heue."
Beeh Glawm: Kawn: Pwi Khawm: Uik
Mai lheu: khaing: an: kheu hoik koe: pingnya cuyi: cao: sidiex lox bwan:, nawh ca: kawn: gau krax tawng krax yung kah pwi khankix; mawh heue, nawh sawg mai tiag tix yaox kah gumlox kab khankix tom: nie glawk mawx glawk an: heue.
Cao: sidiex lox bwan: hoik sawg tix yaox gumlox pa nyawm tix nghiiet, mai tiem: tix deuh gumlox pa rauh pa see, mai pa mawh pa meh khankix heue.
Gumlox sikah pwi koe: pingnya cuyi: khankix awm: khaox lawm, mai gumlox sikah cao: pa gau khankix awm: gawng: rhiem: pa hoik tawk tix laig mhawmmhawm:, pa kaoh khaing: cao: liang yung: pa ting heue.
Mai lheu: khaing: an: kawn: simex aux eue, rieb tix teei kah gumlox sidiex gau in: khankix liak, phan: yuh kah phuk lai tom: nie kawx, mawh pa ang chix sidauh sidu, mai pa sawg tix gau lai khankix tom: nie mawh pa tawx krax taug krax mao kah nex nham heue.
Gumlox ghoik mawh yuh nin:; lhat graung kah Siyiex mai priex tix hawt kah gumlox tawm: pingnyap Nawh Cao: khankix, mawh kheu in: mawh beeh glawm: kawn: pwi khawm: uik heue.
Mawh kheu Siyiex tag cied kah kaing kuceu mai rom tix prawng ca: tau khawm: ceu pa hoik mox tix khankix, viang mawh pa mhawm: ang ah mawh pa caox ang ah heue.
LAI RHAX SAWLAMUN
(Song Of Solomon)
Sawlamun
Lai rhax kah piang lai rhax, mawh lai rhax cie Sawlamun pa nie blon: mhawm: heue.
Daux Bang: Pwie Khan: Kheu:
(bun: Shulamix)
Kieh nawh ngheet aux kah jheeh tix, mawh kheu krax moh nie lheu: mhawm: khaing: rawm: plix siiet heue.
Mawh kheu rawm: bee kraix maix nyawm sioe: bhawng:, ceukaux maix nyawm bhawng: awm: bee pa hieh tix lih mawh kheu nan:, bunkrih khankix moh kah maix heue.
Thong: aux luan liak! (cub kawn: bun: veng Yerusaliem) Ex tag sang to: tix hawt khaix maix heue. (Bun: Shulamix) khunhawkham viex aux laig kah daux lawg ot nawh heue. Yix tag nie lheu: doh keud krax moh maix khaing: rawm: plix siiet heue. (Bun: Shulamix) Kix moh kah maix tete heue.
Kawn: bun: veng Yerusaliem khankix eue, Viang aux lung awm: nyiiex gox Keda kawx kawn: mhawm: grang tixyaox awm: man: tieb cie Sawlamun heue.
Paw vi jhak kah piang aux liak! grawhgrawng: nawh, aux mawh pa lung nex, mawh kheu hax koek lung yuh nex aux heue. Kawn: simex miex aux khankix hoik songrhawm: kah aux, kix kieh aux mawh cao: pa pau sipeem plix siiet, viang nawh nan:, aux ang lai yaox tix pau sipeem plix siiet cao: tix heue. (Son Rhawm: Moh Dud Nawh)
Rhawm: moh dud aux eue, krai aux mhong: liak! Mawh liang maix cub kawn: yung: tix dee mawx, yam jung singaix kieh maix kix laux lee: tix dee mawx, grawhgrawng: nawh aux khex sang awm: pwi an: pa kheem: ngai: tix hawt cub yung: paoxgrawm meed maix khankix yuh kah mawx lie? (Paox Moh Dud)
Maix pa kied mhawm: tai khaing: daux sinax bun: khankix eue, phan: maix ang nyang tawng, hawt tix hu: khaix glah caong cub yung:, maix liang kawn: pex maix, hawt nyiiex gox cub cao: liang yung: heue.
Paox moh aux eue, aux tiag tix yaox maix, kah brung mhaing: pa koe: kah daux sinax cub ling lawx naing brung cie simiang Pharaw heue.
Sibax maix mhawm: grang tixyaox kah kraung pa jawg ngawg maix mhawm: plang: kah nhang: tix maox soi: khri:. (Cub Kawn: Bun: Veng Yerusaliem)
Ex sang jawg kraung maix kah khri: mai kam kah mau. (Bun: Shulamix)
Yam kawn: ngawm khunhawkham hawt pheen: sawm: tix, rawm: bee bhawng: Nadu aux, ploi: bhawm: pa nyawm bhawng: tix lih heue.
Rawm: bee bhawng: Muran tixhau:, mawh rhawm: moh dud, kah son aux, mai it sinax naok aux leeing: sawm: heue.
Pruh tai Hena mawh rhawm: moh dud kah son aux, kah daux sipeem plix siiet Enkedi heue. (Paox Moh Dud)
Jhak heue, paox moh aux eue, maix grang tixyaox, jhak heue, maix kied mhawm: grang tixyaox! maix koe: ngai: sikaux heue. (Bun: Shulamix)
Jhak heue, paox moh aux eue, maix mhawm: grang tixyaox! mawh heue, kied nyawm tixyaox heue. Dee it dee tum ex kawx mawh pa klai tixyaox heue.
Lat nyiiex ex mawh pa yuh kah khaox Arit mai si ox braux nyiiex, mawh pa yuh tix kah khaox gix heue.
Aux mawh tai kat nghim: klang: haktiex Sharon, mai tai siyak pa kuah daux ngawt heue. (Paox Moh Dud)
Awm: pruh tai siyak daux sinax pang: kat, paox moh aux sidawng: daux sinax kawn: bun: khankix heue. (Bun: Shulamix)
Awm: ot khaox plix mak kawk tie: daux sinax pang: khaox daux tiag daux tu, paox moh dud aux kawx ot daux sinax kawn: simex khankix heue. Aux ngawm greem: veei nawh, tau mai krax pa kied gauxrhawm gauxrhi tix, mai plix nawh mawh pa tie: pa nyawm kah aux heue. (Grawng: Pa Ah Bun: Shulamix Kah Bun: Veng Yerusaliem)
Nawh viex aux laig kah daux nyiiex bang: Pwie, mai kieh krax moh tix mawh man: chix kheem: kah piang aux heue.
Baox naok riang aux kah khaoxmun plix siiet, deeh kieh aux koe: riang rao kah plix khaox mak kawk tie, mawh kheu aux saux ngia jao krax moh heue.
Taix khawn: gwiex nawh, ot greem: kaing: aux, mai taix khawn: dawm: nawh rawm kah aux heue.
Kawn: bun: veng Yerusaliem khankix eue, aux tawm: tixdeuh lox kah pex, kah plak sivoe kiah cak khankix ang ah, kah krax pa sidaing: meed ot ceu ankix kah daux tiag daux tu. Paw lai so: kaoh rhawmrhi: paox moh aux mai paw kieh rhawm: paox moh aux deeh siduad, tom: hoek bawg yam koe: krax pa nyawmrhawm: nyawm rhi: nawh heue. (Pwie Khan: Kheu: Paox Moh Aux Bun: Shulamix)
Gumlox sikah paox moh dud aux! Jhak heue, Nawh jao: kah piang gawng Phoh kah piang ton: hoek heue.
Paox moh dud aux mawh pa awm: kiah phan: ang mawh nan: pa awm: kawn: cak mhaing: awn: ju tixmu:, jhak heue, nawh cung kah plak khaix guh veng ex, nawh kok buan: tixjhak plak daux diang siviex iak, mai simi tix jhak plak daux sinax man: tie siviex iak heue.
Paox moh aux ah nin: kah aux "Paox moh aux mai paox moh pa kied mhawm: aux eue, yaog tix kaoh hu: tau mai aux liak!
Mawh kheu vong kwat praix hoik luan, vong raux praix hoik uik mai luan hu: heue.
Tai hoik pruh kah piang haktiex, bawg yam ah sim: lox lai rhax hoik hoek, mai lox kuh sikaux, hoik mhong: tix kah daux haktiex ot ex heue.
Plix khaoxruh klai hoik dex teem, mai tai plix siiet hoik pruh, mai tawx krax nyawm sioe: bhawng: tix heue. Paox moh aux paox moh pa kied mhawm: grang aux eue, yaog tix kaoh mai hoek kah aux heue."
Kawn: sikaux moh aux pa ot daux sinax rang: simaox, mai pa ot dee glip rang: simaox, kieh aux yaox kah ngai: maix, kieh aux mhong: kah lox sikah maix, mawh kheu lox sikah maix mawh pa nyawm tie:; mai ngai: baoh maix, mawh pa kied mhawm: tixyaox heue. (Cub Prie: Nawh Khankix)
Giex sox praix son ex, kawn: sox praix pa laux yuh nhu: plix siiet mawh kheu nhu: plix siiet ex khankix, kawn: tag jah tix pruh tai heue. (Bun: Shulamix)
Paox moh dud aux, mawh cie aux, mai aux mawh cie nawh heue. Nawh liang cub yung: tix kah daux sinax pruh tai siyak heue. (Son Paox Moh Dud Nawh)
Tom: hoek bawg yam ang praix ang riang, mai ang veei nyang luan, paox moh aux eue, deeh veeh tix ing: awm: kiah, phan: ang mawh nan:, awm: kawn: cak mhaing: iak an:, khaing: kah piang gawng Beta liak."
(Daux Sawm: Pa Kharhawm: Tix Sawm: )
(Bun: Shulamix)
Yam kawn: ot aux kah piang dee it tix daux ponsawm:, aux sawg kah rhawm: moh tix, viang mawh nan:, aux ang lai yaox kah nawh heue.
Aux ah nin, "Aux sang yaog tix kaoh yamin:, mai hu: lailing kah daux veng; kah daux krax daux laux mai kah daux bing: pak, aux tag sawg kah rhawm: moh aux heue." Aux sawg nawh, viang mawh nan: aux ang lai yaox kah nawh heue.
Cao: pau veng pa lailing kah daux veng khankix hoik yaox kah aux, aux ah nin: kah pwi ankix, "Mawh yaox pex kah pwi pa moh aux lie?"
Yam kawn: tag jiet luan hu: aux khaing: kix, aux yaox kah pa koe: rhawm: moh tix heue. Aux giex nawh mai ang lai ploi: nawh hu:, tom: hoek bawg yam viex aux nawh hoek kah daux nyiiex ma: miex aux, mai kah daux lawg it nawh pa hoik keh kung aux heue.
Kawn: bun: veng Yerusaliem khankix eue, aux tawm: tix deuh lox kah pex, kah plak sivoe kiah cak khankix ang ah, kah daux krax pa sidaing: meed ot ceu ankix, kah daux tiag daux tu, paw lai so: rhawmrhi: paox moh aux kaoh, mai paw kieh rhawmrhi: paox moh aux deeh siduad tom: hoek bawg yam koe: krax nyawmrhawm: nyawmrhi: nawh heue.
(Grawng: Bleeh Sawlamun)
(Bun: Shulamix)
Mawh pwi mawx pa bleeh khaing: daux tiag daux tu, awm: jung rong: simaox taox ngu, mai sidauh bhawng:, mai sidauh bhawng: Muran mai sidauh bhawng: Lawban, mai mawg sidauh bhawng: cie cao: lai cao: geu khawm: uik lie?
Jhak heue, an: mawh dangkag cie khunhawkham Sawlamun, mai pwi vao pwi kua: tigliah kaux hawt rawb rim an:, hoik mawh pwi vao pa kua: ceu pwi Isarilax heue.
Kix giex vaig khawm: uik, hoik sax mawh pwi pa kied cheung: daux naing. Pwi kukaux tang: giieb vaig kah nyoi tix, jao lhat graung kix daux ponsawm: heue.
Khunhawkham Sawlamun yuh dangkag ngawm cao: tix kah khaox gawng Lebanon;
Nawh yuh plawng: rong: jhong: nawh kah mau, rong: joh jhan: nawh kah khri:, dee ngawm nawh kah man: lung pliex, plak daux nawh tawm mai krax moh krax rhawm:, khaing: cub kawn: bun: veng Yerusaliem khankix heue.
Kawn: bun: Zion khankix eue, nied tix hu: plak sivoe, mai hu: jhak khunhawkham Sawlamun, pa hoik ceep kah mhok khri:, pa hoik ceep miex nawh kah nawh, kah daux singaix kah paox cao: nawh, singaix koe: krax gauxrhawm: gauxrhi: daux rhawm: nawh heue. (Paox Moh Dud)
Paox moh aux eue, jhak heue, maix mawh pa mhawm: tai tixyaox. Jhak heue, maix mawh pa mhawm: tai tixyaox. Maix koe: ngai: sikaux kah plak khaix man: tie maix. Hauk kaing: maix awm: cub pex khankix tixcub, pa lih khaing: piang gawng Gilat heue.
Rhang: maix jiet awm: cub yung: pa tag khraox ghrip hauk tix, mai pa tag hoek khaing: heem: tix rawm:, pa chix keh kawn: brawm: ku mu:, mai pa neh ang lai koe: daux sinax kix, pie tixmu: kawx heue.
Siyieb jheeh maix jiet awm: maox keei: pa raoh gawng:, mai moing jheeh maix kawx mawh pa kied mhawm: tixyaox heue. Baoh maix khawm: ra: plak pa koe: plak khaix man: tie maix mawh pa awm: shiag plix khaox mak cang heue.
Ngawg maix mawh pa awm: nyiiex lhaong: khunhawkham Davit, pa hoik sum: son nyiiex deuh kraung naing khankix tix lhang:, kah piang kix teuk teue: tix priex kraung rhiem: khankix, mai mawh plah rhiem: tiebtie pa shiao cub pwi ting riang ting rao khankix heue.
Teeh maix khawm: ra: plak awm: kawn: kiah iak ra: mu:, pa keh brawm: miex kiah tixmu:, mai pa liang tix sinax pruh tai siyak khankix heue.
Tom: hoek bawg yam ang praix nyang riang, mai ang veei nyang luan, aux tag sang yaog tix hu: daux krax hu: tix kah gawng Muran, mai kah ton: Lawban heue.
Paox moh dud aux eue, maix mawh pa mhawm: tai tixyaox khawm: uik, mai dee pliag dee deen khankix kawx ang lai koe: pie tix dauh kawx kah piang kaux maix heue.
Moeng aux eue, hoek tau mai aux khaing: gawng Lebanon! hoek tau mai aux khaing: gawng Lebanon! jhak tixyaox khaing: dee choek gawng Amana, khaing: choek gawng Shanira mai gawng Hamon, khaing: daux doh rang: ot sivai sangsi: heue. Khaing: dee choek gawng ot sivai heue.
Maix hoik rhim: tix teei rhawmrhi: aux, pux aux, moeng aux; maix hoik rhim: tix teei rhawmrhi: aux, mai krax pa jhak tix kah ngai: tix tix bawg, mai krax pa veeh tix maox soi: ngawg cao: tix tix bawg heue.
Krax moh maix mawh pa mhawm: tai miex ding, pux aux, moeng aux, krax moh maix mawh pa nie lheu: mhawm: khaing: rawm: plix siiet miex ding, mai pa nyawm bhawng: sidauh bhawng: maix khankix, mawh pa nie lheu: mhawm: khaing: sidauh bhawng: khawm: uik heue.
Moeng aux eue, siyieb jheeh maix jah rawm: awm: sigleem: rawm: hia:, rawm: hia: mai rawm:teeih koe: greem: dak maix, mai pa bhawng: kraung ceep maix kawx, awm: pa bhawng: gawng Lebanon heue.
Pux aux, moeng aux, mawh sipeem pa hoik vie tix, rawm: dung pa hoik tawb tix, rawm: keut pa hoik tawk tix deuh cum: heue.
Pang: khaox maix khankix plix plix khaox mak cang, pa nyawm plix tix ih, khaox tai Hena pa nyawm bhawng: mai pang: khaox Nadu,
khaox Nadu mai khaox Kurakuma, pang: mex mai khaox caihung:, khaox Lawban mai khaox Muran, khaox nyawng mai can pa kied bhawng: khaing: paox khaox tix khawm: uik khawm: leeing:,
dee lih rawm: keut kah daux sipeem, mawh dee lih rawm: im: ju kah daux rawm: maw:, mai rawm: klawng: iak khaing: gawng Lebanon heue. (Bun: Shulamix)
Bhaung: plak laong: khankix eue, siduad liak, mai bhaung: plak seh khankix eue, hoek liak! hoek tix phlu: kah piang sipeem aux, sonsang pon tai nawh tix lih pa nyawm sioe: bhawng: heue. Kieh paox moh dud aux hoek kah dau sipeem nawh, mai ih kah plix khaox pa nyawm pa tie: khankix heue. (Paox Moh Dud)
Pux nan: aux, moeng aux eue, aux hoik hoek kah daux sipeem aux; aux hoik khrawm: tix teei Muran mai taux sioe: bhawng: aux; aux hoik yaox tix ih sigleem: rawm: hia:, pa koe: rawm: hia: cie aux, aux nyaux rawm: plix siiet mai rawm:teeih heue. (Son Paoxgrawm Nawh Khankix) Paoxgrawm aux khankix eue, ih heue. Nyaux heue. Rhawm: moh dud pa moh aux khankix eue, Nyaux tom: sak awawx.
(Plak Bo Krax Kharhawm: Kharhi: Bun: Shulamix)
(Bun: Shulamix)
Aux it, viang mawh nan: rhawmrhi: aux ca: kawn: haing:; an: mawh lox sikah paox moh dud aux, nawh gleuh siviex mai ah nin:, "Pux aux, paox moh aux, kawn: sikaux aux mai pwi pa grum naog aux eue, paoh siviex son aux liak! mawh kheu rawm: ciex hoik kheem: kah kaing: aux, hauk kaing: aux hoik caux kah rawm: ciex pa lih daux ponsawm: heue."
Aux hoik peeik sibex lang: jung tix, aux sang baox pon ceep yuh kah mawx lie? Aux hoik khoek caong tix, aux sang pon deeh kieh seeing: yuh kah mawx lie?
Paox moh dud aux sau: taix tix kah daux jhong: saw siviex, mai rhawm: aux hoik kied koe: krax byaong kah nawh heue.
Aux yaog tix kaoh mai paoh siviex son paox moh dud aux, mai rawm: bee muran hoik jah tix lih mai taix aux, gien: taix aux khankix hoik caux kah peeh bee Muran, kah piang rong: khaox jhong: diang siviex an: heue.
Aux hoik paoh siviex son paox moh dud aux, viang mawh nan:, paox moh dud aux hoik deeh veeh tix hu:, mai hoik luan heue. Rhawm: aux hoik lih hu: tau mai nawh yam hoik sikah nawh lox tix. Aux sawg kah nawh, viang mawh nan: aux ang lai yaox kah nawh, aux kok kah nawh, viang mawh nan:, nawh ang lai deeh pawk lox aux heue.
Cao: pa lailing tix pau jhak daux veng khankix, yaox kah aux heue. Kix tawk aux, kix yuh aux mat, cao: pau guh veng khankix, teei man: tie ngai: aux hu: khaing: aux heue.
Kawn: bun: veng Yerusaliem khankix eue, aux tawm: tix deuh lox kah pex heue. Phan: pex yaox kah paox moh dud aux, krai nawh mhong: kah saux aux kheu moh tix nawh liak! (Kawn: Bun: Veng Yerusaliem Khankix)
Maix pa sidaing: mhawm: tai khaing: daux sinax bun: khankix eue, Paox moh maix tag sang mawh pa nie blon: mhawm: khaing: paox moh dud tang: kaux kah daux ceu patix lie? Paox moh dud maix tag sang mawh pa nie blon: mhawm: khaing: paox moh dud tang: kaux, kah ceu patix, awm: lox sikah pa tawm: maix tix priex kah yix lie? (Bun: Shulamix)
Paox moh dud aux koe: grang pa paing mai grang pa raoh nex nham:, mai mawh cao: kaing: ting daux sinax pwi khankix tix mheen: kaux heue.
Kaing: nawh awm: khri: pa mhawm:, hauk kaing: nawh mawh pa pu mai lung awm: lak heue.
Ngai: nawh mawh pa awm: sikaux, pa ot hawt rawm: klawng:, pa hoik heem: tix kah rawm:teeih, mai ot nyawm nyiem hawt rawm: khankix heue.
Sibax nawh awm: tiag baoh dee koe: sidauh bhawng:, awm: baoh dee kuah rib riem pa nyawm sioe: bhawng: heue. Siyieb jheeh nawh jiet awm: tai siyak, pa jaux rawm: peeh Muran heue.
Plawng: taix nawh awm: gawng: khri:, pa hoik kab tix mai siang: simaox klai heue. Kaux cao: nawh awm: nga sang:; pa hoik dia: tix sau siang: simaox raoh khankix heue.
Plawng: caong nawh jiet awm: rong: siang: simaox paing, pa hoik deuh tix kah piang dang: khri: pa mhawm:, ngai: baoh nawh kied mhawm: awm: pang: khaox Arit gawng Lebanon heue.
Lox jheeh moing nawh, mawh pa kied nyawm tix nghiiet, mawh, nawh mawh pa mhawm: grang khawm: uik heue. Kawn: bun: veng Yerusaliem khankix eue, In: mawh paox moh dud aux, mai in: mawh paoxgrawm aux heue. (Kawn: Bun: Veng Yerusaliem Khankix)
Maix pa jiet mhawm: tai khaing: daux sinax bun: khankix eue, Mawh lih hu: paox moh maix dee mawx lie? Mawh veeh paox moh dud maix tix hu: plak mawx, sonsang hu: sawg ex tixyaox nawh tau mai maix dee mawx lie? (Bun: Shulamix)
Paox moh dud aux hoik lih hu: kah daux sipeem cao: nawh, kah dee koe: tiag khaox pa sioe: bhawng: khankix, sonsang liang nawh cub phung: yung: tix kah daux sipeem, mai sonsang khrawm: tix tai siyak heue.
Aux mawh cie paox moh dud aux, mai paox moh dud aux mawh cie aux, nawh liang cub yung: tix sinax tai siyak heue.
(Grawng: Pa Yaogyaw Kah Mhawm: Grang Bun: Shulamix)
(Paox Moh Dud)
Paox moh aux eue, maix kied mhawm: tai awm: veng Teraza, mai mhawm: tixyaox awm: veng Yerusaliem, mai koe: krax pa yungyi: awm: man: chix pwi naing khankix heue.
Veeh ngai: maix luan dee singai khaing: aux liak, mawh kheu kix hoik pex kah aux heue. Hauk kaing: maix mawh pa awm: phung: pex tix cub, pa lih hu: khaing: gawng Gilat heue.
Rhang: maix jiet awm: cub phung: yung:, pa hoek khaing: heem: tix rawm:, pa chix keh kawn: brawm: ku mu:, mai pa neh ang lai koe: kah daux sinax kix pie tix mu: kawx heue.
Baoh maix khawm: ra: plak pa koe: plak khaix man: tie maix mawh pa awm: shiag plix khaox mak cang heue.
Koe: nanghawkham tigliah kaux, mai moeng iak tidaix kaux, mai bunkrih pa ang lai dak uik simin heue.
Kawn: sikaux aux mai pwi pa grum naog cie aux, mawh pa koe: tix kaux khaing:, pa mawh kawn: bun: miex nawh tix kaux khaing:, mai pa kied moh nawh tix kaux mai kok nawh mawh pa koe: bwanson:, cub nanghawkham mai cub moeng iak khankix, mai kix yaogyaw nawh heue.
Awm: pa riieng praix plak ponngawb, awm: pa mhawm: sawng: riang khix, awm: pa jhan: riieng singaix, pa koe: krax yung: krax yi: awm: man: chix cub pwi naing, mawh bun: mawx lie? (Bon Shulamix)
Aux lih hu: kah daux sipeem plix makman, sonsang jhak tix rib riem klai pa koe: daux ngawd, sonsang hu: jhak tix kah hoik plaung ang nhu: plix siiet plaung, kah krax hoik pruh ang tai khaox makcang pruh heue.
Sivoe ang aux nyang bax rien rhawm: tix, khwan: ju aux hoik yuh aux awm: brug tix ling: lawx naing brung cie simiang heue. (Paox Moh Dud Mai Paoxgrawm Nawh Khankix)
Deeh ing:, deeh ing, bun: Shulamix eue, deeh ing:, deeh ing:, sonsang pon ex tix jhak simi kah maix liak! (Paox Moh Dud) Mawh sang yaox pex ceu patix kah daux Shulamix, awm: krax pa graoh cub kru naing khankix ra: tab lie?
Grawng: Jhi: Lox Pa Yaogyaw
(Paox Moh Dud)
Kawn: bun: khuhawkham eue, Caong pa ceep maix daux kiep, mawh pa mhawm: miex ding! Ba: maix, jiet awm: simaox siang:, pa yuh pwi min: kah kaing taix tix heue.
Sitaing maix hoik mawh pa mhawm: lawm: le: awm: kawk rawm:, pa ang chix cud kah rawm: nyaux pa nyawm sioe: bhawng: heue. Nyoi maix mawh pa awm: pum: nghox tix pum:, pa hoik deuh tix priex tau mai tai siyak khankix heue.
Teeh maix khawm: ra: plak awm: kawn: kiah iak ra: mu:, pa keh brawm: khaing: miex kiah tix mu: heue.
Ngawg maix awm: nyiiex tab lhaong: tix lhang: pa hoik yuh tix kah nga sang:; ngai: maix awm: rawm: dung an: khankix pa koe: kah daux veng Heshabon hawt daux diang siviex Batrabim heue. Gawng meeh maix, awm: nyiiex tab lhaong: Lebanon, ot kah plak see veng Damase heue.
Kaing: maix pa hoik ceep kah mhok khri:, awm: gawng Kharame, mai hauk kaing: maix mawh pa lung pliex, khunhawkham hoik mawh awm: pwi pa giex pa laung kah kleen: hauk kaing: maix heue.
Paox moh eue, krax pa mhawm: tai maix mawh pa khaw: rhawm: khaw: rhi: mai pa nyawmrhawm: nyawm rhi: kah miex ding!
Grang grao maix awm: pang: khaox jhie: yaong:, mai teeh maix awm: sigleem: plix nawh heue.
Aux hoik ah, "Aux tag sang haok pang: khaox jhie: yaong: an:, aux tag giex kah kak khaox nawh khankix heue." Yamin:, kieh teeh maix awm: sigleem: plix siiet, mai kieh krax toek maix bhawm: tix, bhawng: awm: plix mak kawk tie:;
Mai moing jheeh maix, awm: rawm: plix siiet pa sidaing: nyawm heue. (Bun: Shulamix) Rawm: plix siiet an: koi koi lih, son paox moh dud aux, mai koi lih hoek kah siyieb jheeh pwi pa laig it khankix heue.
Aux mawh cie paox moh dud aux, mai pa simie nawh hoik bleeh see aux heue.
Hoek heue, Paox moh dud eue, Kieh ex hu: kah daux tiag daux tu; kieh ex hu: ot kah daux nyiiex yaong: khankix heue.
Kieh ex yaog tix kaoh caocao mai hu: kah sipeem plix siiet; kieh ex hu: jhak tixyaox, kah hoik lih plaung nhu: plix siiet, mai kah tai nhu: plix siiet khankix pruh ang pruh, mai khawm: pruh tai plix mak cang khankix heue. Aux tag sang tawx krax moh tix kah maix tan heue.
Pang: khaox pa awm: khaox plix makkheu: niex1 khankix tawx pa nyawm bhawng: tix, mai plak praix diang siviex ex khankix mawh pa koe: plix khaox can ceu pa nyawm, pa khraox mai pa prim: khawm: uik, paox moh dud eue, aux hoik priex tix deuh ceu an: kix kah son maix heue.
Aux simie maix awm: prie: lih tix, pa miex aux tawx nawh peuex rawm:teeih tix! phan: aux yaox maix kah plak praix, aux tag ngheet kah maix, pwi mawx kawx ang pon tix ne raw kah aux heue.
Aux tag sang thong: maix, mai viex maix laig kah daux nyiiex miex aux, cao: pa sidiex gau kah aux heue. Aux tag sang kieh maix nyaux rawm: plix siiet pa hoik kuklao: tix mai sidauh mai rawm: plix makcang cie aux heue. (Son Cub Kawn: Bun: Veng Yerusaliem)
Taix khawn: gwiex nawh ot greem: kaing: aux, mai taix khawn: dawm: nawh rawm kah aux heue.
Kawn: bun: veng Yerusaliem khankix eue, aux tiextu tix deuh lox kah pex, paw lai so: kaoh rhawmrhi: paox moh aux deeh siduad, paw kieh rhawmrhi: paox moh aux deeh siduat tom: hoek bawg yam koe: krax pa nyawmrhawm: nyawm rhi: nawh heue.
(Krax Moh Pa Khraox Daux Lebanon)
(Paox Nyiiex Paox Ma: Pwi Tix kaux)
In: mawh pwi mawx pa hoek khaing: daux tiag daux tu, pa neung tix kah piang paox moh dud nawh lie? Aux so: maix kaoh greem: pang: khaox makkawk tie:, miex maix hoik viex maix bleeh see dee an:, see dee an:, nawh pa hoik keh kung kah maix, hoik viex maix hoek heue. (Lox Pa Ah Bun: Shulamix Kah Paox Moh Dud Nawh)
Deuh tix priex aux awm: cum: kah piang rhawmrhi: maix, awm: cum: kah piang plawng: taix maix, mawh kheu krax moh ting riang awm: krax yum:, krax bohrhawm: lang: teung: caox awm: meung yum: heue. Taox nawh khankix awm: taox ngu, pa kied blon: hax taox heue.
Rawm: khankix ang pon preet tix tik krax moh, rawm: hwan: khankix ang pon kheem: nawh heue. Phan: pwi tix kaux sang koe: rhawm: tix tawx son krax moh kah kraungkhrai: sinngao nyiiex ma: nawh khankix khawm: uik, tag mawh pa ang koe: cee koe: cak heue. (Prie: Bun: Shulamix)
Yix koe: nan: pa iak tix kaux, mai nawh ang nyang koe: teeh heue. Ex tag sang yuh patix kah son nan: ex, kah daux singaix, yam hoek pwi tix mhaing: nawh lie?
Phan: nawh mawh guh veng tix mu:, ex tag sang yuh nyiiex choek mau kah piang nawh, mai phan: nawh mawh siviex tix mu:, ex tag sang nyeep nawh kah khaox phia: Arit heue. (Bun: Shulamix)
Aux mawh guh veng tix mu:, mai teeh aux hoik awm: nyiiex tab lhaong:, khaix an:, aux hoik pon krax pa koe: min: plakngai: kah daux ngai: nawh, awm: pwi pa hoik yaox krax pa nhim: heue.
Khunhawkham Sawlamun koe: sipeem plix siiet tix dauh kah daux haktiex Balahomon, nawh hoik vai tix tawx sipeem plix siiet an: kah cao: pau sipeem, pwi kukaux tag sang viex mau tix rheng: plah hoek son plix an: khankix heue. (Son Khunhawkham Sawlamun)
Sipeem plix siiet cao: aux koe: kah plak sivoe aux heue. Khunhawkham Sawlamun eue, maix tag mawh pa pon mau tix rheng: plah, mai can pwi ankix, pa priex rien kah plix nawh khankix, tag pon mau ra: yieh plah heue. (Paox Moh Dud)
Maix pa ot kah daux sipeem an:, paoxgrawm paoxgru maix tag nghiiet kah lox maix, kieh aux mhong: lox an: liak! (Bun: Shulamix)
Paox moh dud aux eue, nied hoek phaiphai:, mai yuh tix awm: kiah tix mu: ang ah, kawn: cak mhaing: iak tix mu: ang ah, kah piang gawng pa koe: sidauh bhawng: khankix heue. Khaox pa awm: khaox plix makkheu: niex, pang: nawh awm: pang: kun: pangpreug, mai koe: kun: daux tiex, plix nawh sibraw tix lih khaing; daux pang: nawh heue. Lox Kala ah "MANDRAKE" kah heue.