(14)

Kaix Hoig Lih Npaeng Ding

Goui dix nbog, kaix hoig lih npaeng ding, kaox ding mgouih dix mgo, glad nblong si viex nyiex Am Goi, si vix nblong lai ling Am Gai, kee nin, noh dom ah nin gah Gon Bui mai dou diag dou du: "Bui mox ding riang, mgaih kaox ding in kaing ndaex grax, kaix si ngaix sax gu jee gu jong daeg lai jix hngiad loux noh kom uig."

Gon Bui houig dix mgaih ang boun.
Jag houig dix mgaih ang boun mgaih.
Grih houig dix mgaih ang boun mgaih.
Reeih houig mgaih ang boun.
Sang houig jie dix ang boun mgaih.
Gu jee gu jong ang boun mgaih dix gaex gox.

Bui ngom mgiex gah biang mgo kaox mai lai mgoung ngai dix gah baox kom ged mgroh mgrong sang mgaih noh.

In pao, Nbraing yaox ngom Bui gah biang gag kaox uig heui, dom ged lih dix jee. Sae riang dix yu yaing [sic -> gaing ?] gag kaox kom sae loux riag dix siag ngie ah: "Kaox sang mgouih pao, niad beix moux dix veui."

Gon Bui yaox bu bang gag kaox mai hmoung loux riag loux you in, Bui hoig si ngua ngie gah yaoh dix mai dang dou lih kaing gag kaox.

Kaox ding log hoig dang ndud ngie gah nqan gix noh gah jaong dix yam puih dix lih kaing gag kaox.

Yuh nin gie nieh, Bui ang nai riang rao dix hiog [sic **] boun ndoun gag kaox hu kaing ndee an.

Njaeh dom yam an ndix, Bui dom nab yam yung yi loux ah Nbraing. Kee in, Gon Vax dom lih goui nbeen yuh nin: sang hu gix kaing nyiex kaing ma ndee si ngai ndee nda, gon ran dix hngiad loux Nbraing veui, dox hmom loux Nbraing daeg lih kaing nyiex. Gieh Nbraing ang hmom loux, gix ang hu, houig dom si ngaix ja gon moh boud nin.

(15)

Rom Huan Hoig Keem Ndaex Yaong

Goui dix num, rom huan hoig keem ndaex yaong, hoig mgouih yuh nyiex ma, Gon Bui mai nbrie kong hoig yum blag nie. Kaix hoig hid rom Bui mai nbrie kong nbaox jo nang nqom saex breing, hngoux goi ang hmom guah. Yuh nin, Yiex Dung dom hu grai ngai Dax Jao Mouig. Dax Jao Mouig mgaig mgroh mgrong in biang Hag Diex, dom yaox moh kee njao pid Dax Saih mai nan dix, kee in, Si Yiex dom bloi nqom saex lih goui gah biang gix. Yiex Dung dom goug Dax Saih giex nan Dax Saih houig, qog giex, sen giex gah loux. Dax Saih ang ju dix grai. Yam an, Gong haeg dom grai yaox mgrong yuh giex, Jao Mouig ndaing meed hrom gah, hmaing Yiex Dung krieh nyiex Dax Saih. Nkre Dax Saih dou haog gah ndaex Rao Ma. Yam sang hu noh, noh ah nin gah Bui: "Si ngaix kaix sax, Bui mox nbaox pid log pid ex yuh nin, ex duig noh yum." Jao Si Yong hoig gaig ngai, dom greed dix laig ndaex diex, lih dix moh Si Yong box kaix. Dix num daeg sang boun lih ngie dix nbog ra nbog. Njaeh kaix an ndix, Gon Ba Raog goui nbeen dom ang boun meix mouing baox ru jee jad dix dom houig si ngaix.

(16)

Kex Liex Tog Mai Pox Tog Mo Meix Mouing

Kaix hoig moh Kex Liex Tog mai Pox Tog meix mouing. Nbun ba moh Pox Tog ang jix goui gon. Giex meix mouing dom sog dix eei gon ndoui ba moh baox ru baox jad dix dix gaex ba gaex Ai Lang. Giex meix mouing ndaing muih hrom Ai Lang log muih gon lih dix yuh nan. Je ba ih ang hlog ih kaing, gon dox Ai Lang ih. Graeng krai ang hlog ih gon dox Ai Lang ih kaing dix. Giex meix mouing si mie Ai Lang niad dix ding daix lang jaong gu si ngaix, gieh moh jao blud graeng nyiex graeng ma dix, sin ngao dix. Si ngaix som hoig luan hu si nbie, Ai Lang hoig ding moh Bui pao.

Goui dix ngaix, Kex Liex Tog hu hvi hvang gah nyiex baox mgrom dix yaong dang braix dang glong. Houig boun som, noh jaox maox dix hmoung loux luah grog ah "Kex Liex Tog ding dung, Kex Liex Tog ding dung" nan, njiad log ba goug jee gaex noh yuh nan. Kaix hoig haing noh kaing id dix, noh gin ndaox gin am gah mgroh mgrong yuh nin. Kex Liex Tog ged nin: grog jix goug jee gaex ex yuh gah mox liex? Deed lai moh gaing dang jee ba goui gah nyiex kaix ex euih? Si ngaix kaix boun ngob jao jao noh grai ing dix gah jao nyiex, ing kom ang nyom hrom yuh nan.

Houig gah nyiex, mouing noh ba moh Pox Tog lug saex veui noh, id biang gu mai ngia ngeei. Kex Liex Tog hu sog jao bih dox si nbog.

Dax Jao Bih si nbog geem ah nin gah noh: "Kaix hoig hu maix moh lad nyiex maix ba hoig vog, maix ing gid noh ndud, saex mouing maix geem jix vai kaix."

Kex Liex Tog bu bab ing gid lad ndud, nyiex hoig mgouih nkrub. Viang moh nan, saex mouing noh ja gon yuh boud nan, ang jix vai. Kex Liex Tog nbaox hu sog nang Jao Bih Si Nbog.

Jao Si Nbog hoig si nbog noh, ngiah ngie mai ah nin "Kex Liex Tog eui, maix boun lug moh Bui ndex dix dei heui. Ex moh ngie grai maix hmoung loux peig diam kaing."

"Deed lai moh Gon Nyom briex ex yung?"

Jao Si Nbog ngeeh ngeeh gaing dix gah.

Yuh nin, Kex Liex Tog dom gid gaing Ai Lang ndud, saex mouing noh daeg vai kaix.

Soun sang yung yi nab yam jao grog, Kex Liex Tog dom hu biang gaing Ai Lang gah nyiex grog.

Njaeh dom kaix an ndix, Gan Ba Raog dom goui nbeen gid gaing mgu grog kaix.

(in moh loux nbeen kaing, nbeen gid gaing hoig ndog ang lai goui ndix, mai nbeen gid gaing ang ndouh moh Ba Raog kom uig ox)

(17)

Am Goi Hoig Yum

Am Goi hoig yum, Yiex Dung briex saex si nbaeng yum noh. Yiex Dung goug dou diag dou du houig gu jee. Noh ah nin gah Si Vai:" Gaex hag mgrang mgrei maix ndaing ang nyom dix mgaig, gin hlad Bui gah maix, maix njun Bui mgrum houig si veui hang, maix goi houig kaix."

Lig mai Moi viex neix jie dix houig, Ia viex jie dix dom ia, Hia viex jie dix blai num. Bui hoig si nkoux ngie ndaex nyiex Yiex Dung, ang lai goui ndee oud.

Yiex Dung yaog dix jim blai num viex Hia, ah nin gah Hia: "Blai num viex maix ndaing die, ndaing nyom dix ih. Gieh Bui mgrum houig hang, ih gu gaex. Kee si nkoux nyiex, maix ran hu laex dix blag braix hang."

Njaeh dom yam an ndix, Hia dom oud braog nyiex blag braix kaix dom si ngaix. Blai num yuh Gon Vax ndaing die ndaing nyom, moh hoig mgae gix dix mai Hia.

Si Vai ngom gah liab grax, njun Bui mgrum hang, hoig njun noh miex nkreeng mox nieh, dou diag dou du hod baox dix mgroig ngie, ang jix uig jix leeing, Si Vai hoig man mgaing dix gah njao groux Bui mgrum houig, jub dou diag dou du ja ang jix uig boud. Si Vai ang lai boun njun, dom breed dix laig ndaex jub pung hun. Dou diag dou du ba oud blag kaix Si Vai, yaox glai dom ngai Si Vai yuh nan, uig yaoh ngie gah kom dang dou dix. Njaeh dom kaix an ndix, jan jee ba dou houig blag nyiex Yiex Dung dom hoig lih dix moh kong nbrie eei eix in si ngaix. Jan jee ba hoig yaoh hoig yee yuh Si Vai ba dang dou blag diag dom lih moh jee ba oud ndaex diag ndaex du ba moh dou diag.

Si Vai ang hngiad loux Yiex Dung, Yiex Dung ndaing meed hrom gah, dom hmaing Si Vai hu beeih bloung sang yuh nyiex, Si Vai ang boun beeih bloung, laex dix braog grax, sud dix muan loun loi si maox, bai si maox gah baox dix, Gon Ia Ngu lih kaing si maox, broui yuh bloung, mgleeing yuh Si Vai, Si Vai hmoung saex neix dix gah hax ngu, nieb boun dou dix njee nblaong, si ndaeh Moi gah gaing nblaong: "Moi ba aig eui! Moi ba aig eui! Hax ngu gaex ex, sang dou ex blag mox?" Si Vai qog Moi.

Moi ah: "Dou nblaong!" "Dou nblaong!" [was 'nblaongi' twice]

Si Vai dou haog gah mgong, nie dou ngu nie ding.

Yaox Grag gah braog glong, Si Vai qog Grag: "Grag bux aig eui, Grag bux aig eui, mgleeing ngu gaex ex, geem sang jo ex dix dou blag mox?"

Grag ah: "Niad maix dou laig ndaex ndung rom." Si Vai dou laig ndaex ndung rom, ngu daeg yeed. Gaex Si Vai hoig broui si oui meed ngie gah ngu, mai breeih breeih ngie kom mgo gaex dix. Njaeh dom kaix an ndix, Si Vai dom ndaing gouing gah Moi, giad Moi ang giad Grag.

(18)

Hngoux Goi Mae Kri

Goui dix ngaix, Mae, Kri, Hngoux Goi si mah gah baox dix njao nkrang Hag Diex, Kri mai Mae ah nin: "Gah biang Hag Diex moh ngie yiex ba ndaing hmom, gieh Bui sang ged dix mi hmag nyom oud si u goui, ang ndouh boun dang hu kaing yiex bux aig ra gaex."

Hngoux Goi ah jie dix nin: "Sang glod sang im Bui gah biang Hag Diex, jo dix ran goui ba ih ba un si veui, ang goui jee ba ih ba un, Bui jix yum gia gah jai hrom dix. Hag Diex in jo dix moh yiex ba oud gah."

Si mah njee si mah nblaong, Kri Mae ang lai beix Hngoux Goi, Kri Mae dom nyon daix dix gah Hngoux Goi ah "nbag" nan dix daix mai ah; "Eeh! Bui ang ih ngai dix, gon ang niad dix dou kaing ndee an." Hngoux Goi ang lai boun hmoung loux in dom yaog dix dou kaing ndee an.

Goi dou hu moux dix ndaex glong mgreem rom. Hngoux dou hu moux dix ndaex noung ndaex yia kaox.

Yuh nin, Gon Bui ang lai yaox ba ih ba un dix pao. Njaeh dix ih ngie hlax kaox hlax oux, hoig nyao ih hlax kaox, doh dix ih hloux kaox, hoig nyao ih hloux kaox, ih diex. Hoig glog yuh diex dug, uig sang ih Kri pao.

Yuh nin, Yiex Dung hoig ndaing ki hrom gah, dom hnie Bui mai dou diag dou du hu sog Hngoux Goi ndeeih houig. Sog njee sog nblaong, hoig sog noh miex num mox nieh ang lai uig dong, daeg boun deei Hngoux kaing ndaex noung ndaex yia. Viang moh nan, Goi ja gon moux boud dix oud mgreem rom, ang nbaox yaox. Yuh nin gie nieh, Yiex Dung geem hmaing Si Uing hu sog. Si Uing houig biang rom, glia si ndax dix laig ndaex rom sein daeg yaox oud Goi mai mglaox dae. Si Uing ang dong gah sang hvaing Goi lih. Yiex Dung nbaox hnie Hlaix hu deei Goi, Hlaix houig gah biang rom, yaog dix nqoug Goi gah nyiex grei dix, daeg boun hvaing Goi lih kaing mgreem rom pao.

Goi mai Hngoux hoig boun dix ndeeih houig gah nyiex gah yaong pao, Kri mai Mae njao hoig yuh gaing lud gaing ang hmom, gaig gah, dom greed dix laig ndaex diex. Njaeh dom kaix an ndix, Hngoux Goi dom oud gah biang Hag Diex, Mae Kri dom oud mgreem Hag Diex.

(19)

Gon Guad Yaong Mang Sing

Gon Guad yaong Mang Sing ba gaex Ai Jang mai Gon Guad yaong Ying Eeng ba gaex Ai Ko See moh moui lom jeed baox mgrom muih. Goui dix nbog, giex hag baox dix hu glieh ndee si ngai ndee nda gah dang braix dang glong. Yam ndeeih houig giex mgrang grax, Gon Guad yaong Ying Eeng ba moh Ai Ko See jo saex hoig yum ndaex grax. Ai Jang ndaing saex hrom gah yum noh, dom bux noh ing, viang moh nan, moh kee ndaing si aoh braix glong, grax ndaing si ngai. Ai Jang ang lai boun bux bui yum, dom gid ngie dix viex gaing Ai Ko See ing. Ai Jang hlad Miex Geeing Ai Ko See laex hrom gah, kee in, ang nyang dox gaing Ai Ko See gah nyiex gix. Si ngaix som hoig ndaing hreeng pao, Ai Jang ang lai dong gah sang yuh dix, dom si nbaeng gaing Ai Ko See gah ndaex si nbeem nyiex dix.

Miex Geeing Ai Ko See hoig hmoung ndeeih houig Ai Jang gah yaong, ang nbaox yaox ndeeih houig. Gon dix ba moh Ai Ko See an, dom hu sog gah nyiex Ai Jang.

"Baox mgrom maix ba moh Ai Ko See ang nbaox houig, geem hu noh ndee mox, jix ang houig mai maix yuh gah mox?"

"Noh gon goui gaing jeeix oud kaix ...."

Ai Jang sang grai si ndong noh hmoung, hlad Miex Geeing baox mgrom dix bru kuan gah, dom ran dix bie gix, moux hang ang nyang grai see.

Geeing baox mgrom noh houig pao, Ai Jang bu bab baeh Ia jia blai, yuh moig ia nkaog noh som.

Moig hoig sin pao, hlax ga hlax mou ang goui ndaex moig ia, Geeing Ai Ko See dom ah nin gah Gon Jae dix: "Lih sog hlax si mging gah ndaex si nbeem sein." Houig ndaex si nbeem, yam boun Gon Jae hlax si mging, dom yaox gaing Ai Ko See ndaex si nbeem.

Geeing Ai Ko See hoig saex hrom ngie gah mai ji ngai Ai Jang, ngax noh ah: "Maix hoig blaex Gon ex yum, gon ang grai. Moh Si Meix hmaing hnyag ba dix yuh nan.".

Ai Jang nbrie lai grai gox yuh gah mox kaix, Geeing Ai Ko See boun ang lai hngiad ang lai ju loux grai Ai Jang.

Kaix hoig ndeeih ing Geeing Ai Ko See, noh krom gon rai ndai siao Hag Diex Ying Eeng hu yuh naing mai Bui Hag Diex Mang Sing, gid gaing hvaing haeg Bui Hag Diex Mang Sing miex nyao. Gid njee gid nblaong, buing mgua buing ndom, nie oud nie gouing koi gah baox dix. Baox mgrom baox mgrux Hag Diex kom ra blag gah hoig laig dix yuh naing si vai mai gix; naing nie oud nie ding, nie buing nie lang hu. Njaeh dom kaix an ndix, Gon Ba Raog dom lih moh naing si vai mai baox dix si nqeeng si ngai kaix. Kom moh nan, naing si vai in ang ndouh goui ndee hmom bie jeeix.

Si Ngaix, Sim Uing Mai Kix

Ndi ndix, ndaex Rao Ma sim uing ang goui, kix gah ang goui, moh ngie si ngaix ba goui kaing. Yam an, gah biang Hag Diex goui boun ngaix ang goui boun som.

Goui Yiex Guad dix gaex sang hu sum hngoux ndaex ma, noh kie eeb dix iab, sae dom ia ang nyang sin gah biang eeb dix mu. Houig gah ma, noh hvag iab eeb gah biang gag kaox, kaix an noh dom souh ma, mgleeing rib, hruad si mie. Kaix an miex nkreeng mox nieh, noh lai ged nbog yam gon jao, ang nyang bouig dix ih eeb an. Si mie hngoux sae noh hoig blaeng, hoig guah, hoig dai hoig lih si mgleem. Eeb ba hvag noh gah gag kaox an gah hoig lih dix meuix, lih dix hi, dom ia sae noh gah biang eeb an gah hoig mguah lih moh Gon Ia, dou lih ndaex diag dom dieh lih moh Ia Diag, si ngaix ja gon oud boud ndaex Rao Ma ang quh ang mgoui.

Hngoux hoig gaex pao, Yiex Guad an vog hngoux baeh hngoux, gog noh houig gah nyiex, daeg dong nbog yam hoig ndaing hreeng. Noh meed hrom gah si ngaix an, moh noh ba ang hrom gieh ex ih eeb viex dix. Kee nin, noh dom goug krom Nyom Si No ndaex yaong houig mai ah nin gah gix: "Gon Si No beix, si ngaix ba oud ndaex Rao Ma ja riang boud si nqeeng, gieh eix ang jix dong nbog yam njao. Beix ing deei ag, deei bliah houig yuh si laih, mgaig moh mox ba boun buing si ngaix jod." Gon Si No hmoung ah Yiex Guad nan, dang ing deei ag, deei bliah.

Hmoung ah Si No sang si laih baox dix buing si ngaix, Bui hoig houig mgaig gia noh gah ndee sang si laih baox dix buing. Nyom Si No goui hrom gah sang houig dix buing Bui yaox jie dix, hoig ndog houig gah ndee sang si laih baox dix. Yiex Guad gieh Bui sang yuh si laih ndia baox dix dia mox dia an, yuh si laih kaix. Yam an, hmoung ngie loux luah nad "pang pang" nan dix ju, bliah hoig hu ngie ah "viu viu" nan blag si ngaix. Viang moh nan, si ngaix ang quh ang mgoui, ja gon oud boud ndaex Rao Ma. Yam an, Gon Si No ba mgiex ag an yaog dix lih jie dix, vaig ag sae dei, nyon noh blag si ngaix, ah ag "teg" nan pao, dix daix kaing hoig groux si ngaix, ndaex Rao Ma hoig log lih kiab jo yuh nan, hmoung ngie loux si num ah "vung vung" nan, si ngaix hoig max dang oud ra blag pao, pong ba brid [? sic] an gix, dom dieh lih moh sim uing, hoig naog gah ndaex Rao Ma kom mu kom miang. Si ngaix ba hoig groux buing goui ra blag an, hoig quh vu vied ngie dix kom oud ndaex Rao Ma, riang nqan noh gah hoig on dix miex nyao, gah biang Hag Diex gah hoig vu vi ngie yuh nan.

Yiex Guad ah nin gah si ngaix ba hoig goui ra blag an: "Bax ra gaex mguah gaing yuh dix, dix mu moh si ngaix, dix mu moh kix." Loux Yiex Guad ang nbaox uig gox, si ngaix goui ra blag an yuh si mah mai baox dix, ang hrom hu yuh kix dix gaex gox. Yiex Guad dom ah nin gah giex: "Bo si mah gah, hngoux deei ex kaing ndaex ma gon ang nyang grouh, bax mguah goui ra bum, bax yuh noh grouh dix gaex dix bum, mox gieh hngoux jie dix grouh veui, Bui an moh si ngaix, jie mox grouh kaix, Bui an moh kix."

Hngoux hoig mguah dix hmom pao, Yiex Guad goug si ngaix mguah baox dix dong noh. Dix blag laig ndaex bum hngoux, ang nyang goui miex nkreeng dix, hoig gieh hngoux grouh; an dix blag hvag dix oud Rao Ma, si ngai kaing ndee oud bum hngoux, kee nin, hngoux ba dong noh dom ang hrom grouh. Njaeh dom yam an ndix, si ngaix dix blag ba ang grouh yuh hngoux dom oud ndaex Rao Ma moh kix.

Sim uing hoig goui pao, kix gah hoig goui pao, si ngaix moux dix ndaex bum hngoux, Yiex Guad dom hmaing Bui mai gu jee gu jong hu sog, bie Gon Ia ba mguah ndaex iab eeb an, gah dou houig deem noh. Ia rieh nang hngoux gah jaong dix, ah nang loux dix ah "ged ged gah ded" nan mai rieh dix. Hmaing si ngaix niad dix lih. Si ngaix hmoung ux Ia ah "u de lux" nan, daeg lih kaing ndaex bum hngoux.

Njaeh dom yam an ndix, si ngaix sim uing mai kix hoig goui ndaex Rao Ma, goui boun ngaix boun nbou.

Yam rieh Ia hngoux sag si ngaix, si ndeih moh viag hngoux ba ndung jaong Ia, njaeh kaix an ndix, veui sang riang braix gu si ngaix, jaong Ia dom jix ngiex loui nbog, kaix hoig ux Ia loui nbog, braix daeg riang, kix mai sim uing dom tad hu, gieh si ngaix lih. Houig dom in si ngaix ja gon moh boud nin.

Nbeen lao Hag Diex Si Moung

Ling Mex jao diam

Num Ndee Gaoh Si Ngaix Mai Kix

Ndi ndix, Rao Ma hoig log ngie o diex mgub moing dix gah biang diex yuh nan, moh maox jeing ding ba piaog vien Hag Diex mai Rao Ma dae. Yam an ndix, ang goui boun ngaix ang goui boun som, biang Hag Diex hoig hvaig ngie yuh nan, Gon Ba Raog ba oud ndee in, oud ngie ndee ang goui boun ngaix ang goui boun som.

Oud gah ndaex si ngaix som yuh nin, Gon Bui ang lai boun gan boun mgu, Dax Si Miang geem grog krom Bui mai jan gu jee gu jong houig mgrum, noh ah nin: "Soun sang gieh eix Gon Ba Raog nyom oud si u goui, eix jo sae riang rao dix dad maox jeing ding in ndux ox."

Gon Bui hmoung ah Si Miang nan, hoig mgaex hrom ngie gah, dang dou ing deei vaig lang mai glaing noh lom ngie.

Hoig sae Si Miang loux dix lih pao, Si Meix yaog dix vu hvad vaig lang hu blag maox jeing, jan dou diag dou du gah hoig hod nang Bui pao.

Vaig lang viex Bui hoig dang ah ngie" nbu nbag, nbu nbag" gah maox jeing ding an pao, Gon Ia Ngu ba lih kaing maox jeing an gah hoig mug Bui dix, hoig riang riang ngie mai ngai nbaoh Bui, dou diag dou du ba ndaing meed hrom an gix, gah dang sae nang riang dix dad, ba giad gah hrang dix gah giad, ba deed gah rung dix gah deed heui, lom vaig gah hoig veing veing ngie gah mgu noh, hrang gah hoig mglaoh gah giad noh, rung gah hoig mgraig gah deed noh, Rao Ma ja gon dob boud biang Hag Diex; jeing ja gon gaex boud nan kom piaog Hag Diex mai Rao Ma.

Gon Bui hoig laex hrom gah, ah nin: in been hoig moh nbeen pan Si Yiex, Gon Bui ang lai dong gah sang beix noh, dou diag dou du gah hoig dang ndeeih ing kaing ndee an.

Yam an Gon Ndoui dix gaex yaog dix houig blag ngai Si Miang mai ah nin: "Si Miang eui, dox ex qe yaox."

Si Miang ah: "Gon Ndoui eui, maix moh Bui houd yuh nin, bie vaig ntong ang goui dix mag, mgad jei dix sang boun dad maox jeing an yuh gah mox?"

"Rog nbuan maix Dax Si Miang, dox ex jie vaig dix mag, gieh ex ang boun dad maox jeing an ndud, ex log sei dix."

"Geem ang maix nbaox yaox lieh, num hoig moh Bui nding ndod, gon ang nbaox boun dad ndud? Eix moh ju jie Si Yiex kaing, gieh vaig lang laex hrom dix ndaex pag hmom hmom."

Gon Ndoui yaox ang Si Miang lai goui hrom gah, ndaing laex hrom gah.

Ndaex Ba Rao goui Bui dong Gon Ndoui in ndaing ding riang kaing baox dix, gix dom hnie Dax Si Miang gieh Gon Ndoui qe yaox, ha noh mgaih boun dad maox jeing ndud.

Si Miang yaog dix dox vaig nqaog gah mae an gah Gon Ndoui kom ntah hrom diam ngai dix, mgaig gah sang dad Gon Ndoui noh.

Gon Ndoui hu gah maox jeing an, yiab ngai dix rog nbuan, kaix an, yaog vaig lang nyon noh gah maox jeing ding an pao, houig vaig gah mox jeing hriam an, hoig quh yuh diex, si ndaeh yuh mgong lua, si nax Hag Diex giex Rao Ma, hoig lih si num si aox ngie dix ju, Rao Ma giex Hag Diex hoig si ngua si yaeng ngie gah. Gon Ndoui nbaox yaog vaig lang, sae riang dix dad maox jeing ding an ah "klang" nan dix daix, loux luah log ngie si num npieh mgong lua yuh nan, hoig hleed yuh ngie hyaog ndong Bui uig. Jeing hriam hoig ndud pao, Rao Ma hoig goi yaog ngie dix haog hlaong hlaong, houig hlaong hlaong daeg ang lai hu. Si nax mee Hag Diex giex Rao Ma hoig goui pao, Gon Bui hoig hmoung npom npaeng guad npaeng si giad mai ngai dix pao, si nax Rao Ma giex Hag Diex gah hoig roi riang kaing veui an miex nyao, viang moh nan, braix glong gah ja gon mod boud yuh nan, Hag Diex gah ja gon hloung boud yuh nan.

Gon Ndoui dom ah: "Loux ux Ia si meix ndaing gin luah, eix hmaing noh houig dix goug si ngaix lih kaing."

Ia si meix hoig ju loux goug loux hmaing Gon Bui, dom haog jung biang mgong hlaong, veei ngai dix blag jaong ma mai goug ah: "Nad dix lih si ngaix eui."

Si ngaix ra mu yaog dix lih pao, yaog dix bruih, Gon Ia Ngu lih su sai ngie. Ang nbaox goui miex nkreeng dix, hoig hax yuh Hag Diex, rib riam kaox oux hoig hax hoig grouh gah npom si ngaix, rom glong gah hoig hid hoig grouh heui. Bui ang lai boun gan gah si aoh braix glong, dom hu moux dix ndaex rang.

Njaeh dom yam an ndix, si ngaix goui ndaex Rao Ma ra mu, gah biang Hag Diex ang goui boun som mai boun nbou.

Dou ma dou goi ang jix guah jix ding, gu jee gu jong ang jix glod jix im. Gon Bui ndaing gin ki gah.

Yam an, goui miex Lig dix mu oud ndaex rang, geih Gon gao mu, Gon Lig gao mu in gix mgaex ngie si lei hei si veeig mai hu glieh dix braog rang, kaix an ang nbaox goui miex nkreeng dix, npom ob npom hax si ngaix hoig dong gix yum.

Miex Lig ndaing gin saex hrom gah kom yiam dix, noh yiam nang, nbog nang, nqax nang ah. "Maeng hee Gon Ndoui an, maix hoig dad jeing piaog Rao Ma ndud, gon nbaox hmaing nang Ia si meix goug si ngaix lih, si ngaix hoig mgrouh hoig dong Gon ex yum, ang ex goui Gon, pao ex sang jix glod yuh gah mox?"

Gon Ndoui hmoung loux nbog loux nqax Miex Lig gah dix, ndaing ang nyom hrom gah, yuh nin, noh dom ngu hrom Miex Lig, ang ju Miex Lig laex hrom gah, sang bog nbia dang Gon Miex Lig.

Kee in, Gon Ndoui dom sog ag ndaing gian nan dix bang, mgee dix hu kom hax gouig hax bied, haog gah biang mgong ndee hlaong. Noh vaig ag sae dei nyon noh gah si ngaix an, hmoung ngie ah loux hu dei "viu" nan dix daix, dei dix daix an hoig hu plad ndaex si ngaix, kaix hoig luah si num nan dix daix, si ngaix hoig on riang kaing veui an, dom dieh lih moh jee ba lom lei baing hleng ngie yuh nan dix mu, niad dix bu hu blag jaong ma kaix.

Si ngaix an dix mu ja gon oud boud ndaex Rao Ma, ba lom lei baing hleng an, houig boun som daeg nplian ngai dix lih, Bui dom ah moh noh kix. Njaeh dom yam an ndix, gah biang Hag Diex dom lih dix goui boun ngaix giex boun som heui. Gon Ba Raog gah hoig yaox dix nyom oud si u goui.

Gon Ndoui hoig boun grax yaog yo muih hrom Gon Ba Raog dix, Bui dom gieh noh raoh Si Miang Ba Raog kaix.

Nbeen lao Hag Diex Gaeng Liam

Dax Nab jao lao

Ai Ping jao diam

Nbeen Kix

Ndī ndīx, goui Gon Ndoui lōig dīx gaex, gaex Ai Ko, Mīex Geeing noh hoig ndōg yūm dom yām iag yām o noh, noh ndaing ka dix, ang yāox dix som eeb jeeb grāeng, kee nin, gaex hag nēix hnam hoig grōx hoig hrao ngīe log Si Ndōu yūh nan.

Goui dix ngaix, noh viex ag ba brah ba ndeh Geeing dix hu ndaex diag, houig ndaex diag, Bouih Jag, Sim Saig, Gang Goi hoig haoh ngie ndaex noung ndaex yia diag kaox ding, Ai Ko hoig sang vaig ag miex nbog mox nieh, njao gon iag riang noh, ang noh boun vaig ag. Yuh nin, log nbliex ngie nqom hu Bouih Jag, Gang Goi ndaex diag kaing. Gang Goi hoig haoh ngie yuh gah mox nieh, puih njee puih nblaong dix mai glieh dix. Ai Ko hoig si ngua ngie, daeg nang, noh dom nyah dix id ndaex diag kaox, Nbru Nbrang hoig reem ngie ngai nbaoh noh, Hlaix Nblom hoig haog ngie noh kom mgo gaex, hoig haing noh kaing id dix, mgaig kaix giad Nbru Nbrang hoig bliag ngie kom mgo gaex.

Noh ang lai dong gah sang yuh dix, dom ja deei hlax kaox oud braog si vie dix od hnam dix gah, yam an hoig goug hmoung roi nyom oud dix kaix ndum mox ndum an. Ndee kaix giad Nbru Nbrang, Hlaix Nblom an gix hoig roi uig. Noh ndaing ndaox ngie gah, yuh nin, noh dom deei dix viex hlax kaox an ing gah nyiex.

Mglang ing noh hod grax, noh hoig boun bai yuh Sim yum miex nyao. Soun sang yuh Sim nbuan soun gah Ai Ko gah hoig noh gix ndeeih im, Sim hod ing gah yaong mai Ai Ko kom uig.

Ia deem noh, Soux braix yuh baox bie noh, Moi diag moh jao mgo noh yuh gaing nqo, dang kix dang kaox, Ai Ko hoig yaox grax nyom oud si u goui kaing si veui an ndix.

Kix, moh soun sang yuh noh dix ang lai jix guad jix gom, haoh gon saex gon seix ndaex Rao Ma, dom hu sog si ndah nya ba log boun ndaog jaong ma. Moh hmoung goui si ndah jix gieh Bui yum ndeeih im gah Ai Ko, dom lih dix nbriex kaox in, viex noh hu, sum noh oud braog dix. Gon Soux jie Ai Ko, soun sang deem noh ndeeih deei kaox si ndah nya ba log in, kee nin, Soux dom hod dix giad kix dom ndaex Rao Ma, njao moh kee hoig ding kaox, Soux dom oud dix bae mai kaox. [sic] houig yam uig geih kix gu nbog, Soux guan giad ih noh.

Kix viang gi lang nju lang pan gox, ja moh boud dix mu kaing dom houig si ngaix.

Nbeen lao Hag Diex Si Moung

Gao Lix Qix jao diam

Boun Eix Oud Biang Hag Diex Dom Si Ngaix Yuh Gah Mox

Nbeen gaoh Bui kaing ndaex si mgang, in moh nbeen rian lao Ba Raog heui. Yam in Bui raoh Bui lung hoig goui, moh gaoh gix kaing ndee mox ang dong.

Nbog yam hoig hreeng ang lai ndag uig dong, hoig goui miex hmeen num mox nieh, si mgang ndee lih Bui kaing moh Yaong Ho, Yaong Sung gah moh ndee lih ndee ged Gon Bui kaing, kee nin, loui num dix nbog yix gon baeh Ia si meix baing hu dan hu goung dix ndee an!

Yam an ndix, Bui lih kaing ndee an, gon ndaing dux, ang nie, mai ang nyang jix si mgah. Kaix an ra loui num, daeg goi oud goi hun, mai gon oud mai dou diag dou du dae. Yam njaeh dix, Gon Bui gon gin ndex gin o, dou diag dou du sang giad dix ih Bui, ah nin gah Bui: "Ba goui jaong ra kon eui, eix si laih baox dix, mox man aing dix kom jung dix, eix ih neix jee an, jix ang jix lieh?" Gon Bui hoig dong hrom ba ged gix, dom ah: "Hu dix yaox hang." Hu ang nbaox goui blag ngaix, dou diag dou du ba goui jaong boun kon an gix hoig man aing dix kom jung dix, njaeh dom yam an ndix, Bui dom ih neix dou diag kaix.

Kaix an miex num mox nieh, Bui nbaox hu houig gah Hag Diex Ung Pu Na dix ndaeh, Hag Diex Ung Pu Na goui rom hnong dix mu, Bui njaeh dix yaox si mie hngoux ndee an, yam an, kaox ang jix blix, rib riem gah ang jix hram, kee nan, Bui mai dou diag dou du hoig dang nkrang dix deei hngoux houig ndaex daix dix. Viang moh nan, rom hnong an peix dix vieh ndaing raex yuh nan, Bui ang lai dong gah sang deei hngoux lih. Kaix an, gon moh Bui ba ndouh lih ged gah sang boun deei noh lih: Bui hmaing Si Uing loui dix biang rom, deei hngoux lih. Bui nbreg si ndax Si Uing, yuh nin, daeg boun deei hngoux lih miex nyao.

Bui hu kaing rom hnong, houig gah Yaong Ping. Bui mai dou sad dom ah nin: "Eix sum hngoux dae kaing." Ba yuh gah daix dix gah yuh, ba yuh gah jaong dix gah yuh, ba yuh gah nqeeih dix gah yuh, sae riang rao dix goun ma. Kaix an, geem sang sum dix yuh gah mox box, Bui ang nbaox ndouh lih ged gah sang yuh dix. Kee nin, gix dom hu qog Si Yiex, Si Yiex ah nin gah gix: "Nbaox deei oux goun ma gah, grom rib riem dix ndaeh, hruad si mie hngoux ndaex kaix." Kaix hoig hruad Bui si mie hngoux, hngoux lug hoig guah pao, rib mai hngoux hoig guah dae. Bui dom ah; "Sang boun hngoux jo dix laoh rib." Dou diag dou du hlad dix hnyab gah, ang hiex mgaex hrom gah. Kaix hoig riam gix rib, nbaox hu qog nang Si Yiex: "Geem gon sang yuh dix yuh gah mox?" Si Yiex ah: "Njun dix voung sax, hoig gaex hngoux uig boun dix ih kaix." Dou diag ah: "Yix ang lai boun njun dix ih, kaix in sax, Bui sum hngoux, yix log hu ih rib kaing."

Dou diag ang hrom sae riang dix, moh kee nin, gix dom ja gon moh boud dou diag, ja gon ih boud rib mai blix kaox blix oux; Bui sae riang dix, hoig dang gaex hag kaing dou diag gu ngaix gu som, jix si mgah jix ngiah, een si mie hngoux dom houig in si ngaix.

Nbaox hu kaix an miex num mox nieh, ngu lih jab gah ndaex diag ndum mox ndum an, Bui njaeh ih neix dou diag ba broui ndaex ngu, njaeh jix ih jee ba sin, dom een si mie ngu kaix, hruad hngoux sum hngoux gah ndaex kaix mgleeing ngu, hngoux ndaing hmom guah, moh kee nan, kaix an, Bui dom gid kaox yuh ma, kaix hoig mgleeing noh gah ngu, siao bliah oux gaong diex npo daeg hruad si mie kaix.

Kaix an, Bui nbaox ndux dix hu oud gah Yaong Blong, mai mguah dix dang oud kaing dou diag dou du. Yam an, boun ngaix boun som ang mguah, sum hngoux jo yuh dix jo nbog yam, gieh eix jo yam ang hmom, hngoux gah ang jix guah, moh kee nan, Bui dom ndaing gin hax hrom gah. Bui Si Yiex dix gaex ah nin: "Ang yuh did dix, hmoung beix ah Sim Sua, hlua si num lai mox sax, beix dom niad dix baog mguh yuh gaing. Yam ah sim "eeb bid, eed bid" nan, beix niad dix sae si mie heui. Kaix sax, liah kix hliex lih, liah kix braix gouig, beix baog dix ih mguh yuh dix ih gaing. Yuh nin, beix dom ang lai jix lud nbog yam yuh gaing."

Bui nbaox hu ndux dix oud Yaong Blox. Yam id gix, log ba hmoung ndung rib dix log ndung nyeix yuh nan, gix dom po loux mai baox dix, deei rib houig yuh nyiex gah. Njaeh dom yam an ndix, rib dom ang lai ndung Bui, gah jix dix die nang hliex npaeng, Bui gah hoig goui nyiex oud pao.

Yam an, rib ah nin gah kaox: "Kaox bux gei eui, ex hoig yuh Gon Bui ih nyiex, nie duah nie hmom guah." Kaox ah: "Gieh Bui gid ex dix mgo, ex hoig nbaox guah gao mgo." Yam an, bie Gon Sim gon ang nbaox goui haeg, kaox ah nin gah Sim: "Yam gid Bui ex, beix yiam ex ox." Gon Sim dom yiam. Kaox dom sog haeg glai haeg raoh dox Gon Sim jie.

Goui dix nbog, ngu hoig yeed gah nteem hliex dix, ngu ang lai goui pao. Bui dom hmaing Gon Sim haog sog gah Saih ndaex Rao Ma, Saih ah: "Beix sae riang dix nbluh maox gah kaox, ngu jix lih kaing." Kaix an, yam ang ngu lai goui, Bui dom yuh log nbeen in, deei ngu lih.

Nbeen lao Hag Diex Si Moung

Pang Quing Hui jao diam

Nbun Grih Gei

Ndi ndix, nbog yam hoig ndaing gin hreeng, ndaex yaong Ba Raog goui Miex Mai ndaing houd dix gaex. Noh ang goui gon braix, hoig ndaing gin ka dix.

Loux Bui dom ah: Miex Mai nbrai maeng. Mgum loux in ben lug moh dix dei heui. Bie mgaig maix Miex Mai in kaing, noh saex ngia ang goui Bui houig mgaig dix gaex gox. Jai hrom ang goui Bui houig dox noh ih briex dix mgum, guad braix guad glong leix jo ngie ngu kaing. Viang moh nan, Miex Mai in ndaing rian, noh hu yuh gaing ling ngaix ling som, kom hvaig kom hvoux.

Goui did dix ngaix, noh hu yuh gaing ndaex ma, gouig hoig hax ngie, noh daeg mao gah yuh gaing, jai hrom nang, hoig grouh nkoug grouh nkai. Kee nin, noh dom hu sog dix nyaex rom braog ma gah ndung rom, roi hmon vaig du dix gah rom, mai sud dix ih gei an ndaex ndung rom.

Miex Mai ndeeih houig gah nyiex, hoig hmoung saex vaig dix, saex dom houig ndim si ngaix, noh geih Gon Nyom Nbun dix gaex, ang ndouh dong Gon Nbun ba geih dix an goui ngie boun gei kaing, moh ngie ja goui nqeeih, goui meeih, goui ngai kaing. Njao ang Miex Mai in goui gon goui braix, moh kee nan, noh dom ndaing muih hrom Nbun grih gei in. Bo yaox geih Miex Mai an Gon Nbun goui boun gei, kom moh nan, ngai nbaoh Gon Nbun gei ndaing riang ndaing hei veeig, nqeeih iag an ndaing jix grai loux, jix si mgah, noh ndaing jix grai loux ngiah loux glieh mai Miex dix, loux ba ang Miex noh boun grai boun ged, mgad jix lih kaing ndaex nqeeih iag an.

An dix ngaix, Miex noh qog Gon Nbun dix: "Gon ex eui, geem sang ih maix jee ba dix, grai Miex maix hmoung, Miex log dox maix ih."

Nbun Grih gei hmoung ah Miex dix nin, dom ah nin gah Miex dix: "Miex ex eui, ang ex ih ba did dix, ex sang jie ngie Gon nyiex Si Miang."

"A miex euih, Gon in jix ah loux yuh nan liex! Maix nieb luang dix ah nin, gieh Si Miang hmoung loux ah maix, dee rian dix gid gaing maix ndud ox!"

"Miex eui, ex ben sang meix Gon nyiex Si Miang heui."

Miex Mai hmoung ah Gon Nbun dix nan, ben hoig gieh noh ang nyom oud nyom goui gah. Noh dom bu bab dix ah nin gah Gon Nbun dix: " Gon ex eui, Si Miang ang ndouh jix goui hrom gah eix maeng Bui houd Bui si npom, Gon Si Meix noh gah ang ndouh muih maix."

"Miex eui, ang maix siao guang, maix ja hu qog noh yaox."

Miex hmoung ah Gon Nbun dix nan, ang lai dong gah sang ged dix, dom ja hu qog Si Miang mai ah nin gah Si Miang: "Si Miang eui, vieh hrom riang ngai gah ex jeeix, ex houig dix yuh nong ni mai maix."

Si Miang ah: "Hmaing maix yuh nong ni ba dix?"

"Ex goui Gon Nbun dix gaex, noh hmaing dix ndaing muih Gon Ai maix, ah sang meix noh." Miex Mai ah nin gah Si Miang.

Si Miang hmoung ah Miex Mai nan, hoig ndaing saex hrom gah log giad Nblom ndaex vaig dix yuh nan, ang lai jix grai lih. Noh ged nin ndaex hrom dix: Nbun Grih gei nyiex Miex Mai houd yuh nan, mgad ged sang meix Gon Si Miang, eeh! Mgla maix dix ged.

Si Miang hoig ged noh ndaex hrom dix hreeng nyao, dom ah nin gah Miex Mai an: "Hmom, nbrie luan houig maix dix hmaing yuh nong ni mai ex, Gon Nbun maix gah ged nang dix sang meix Gon ex, maix jo dix yuh jee ba sang hmaing ex gah maix dix mu."

"Geem sang hmaing maix ba dix box?" Miex Mai bu bab yaog dix qog Si Miang.

"Maix briex loux ex hmom, boun ngob boun sax gieh maix boun dom kri gah ndaex grax, njaeh dom nyiex beix houig dom nyiex yix, ex log ju loux maix."'

Miex Mai hmoung ah Si Miang nan, ang lai nyom oud nyom goui gah, noh ged nin: in moh gaing ba ang ex ndouh boun yuh, biang Hag Diex ang mod dix ndouh goui kri nding ndod.

Noh ndeeih houig gah nyiex, grai Gon Nbun Grih gei dix hmoung loux ah Si Miang. Nbun Grih gei yaox hoig kleeb ngai Miex dix yuh nan gah jee ba hmaing Si Miang, dom ngu hrom Miex dix ah: "Miex eui, bo maix ki gah, njun boun sax goi ah."

Braix hoig riang pao, Miex Mai gaoh kaing gu id dix, mgaig noh: a miex euih! Njaeh ndiang si viex gix houig dom nyiex Si Miang lug hoig dom kri gah kom uig, kri dom noh, nbu goui dix sog (dix kaox). Noh ndaing mgaex hrom gah, yaog dix glian Gon Nbun Grih gei houig nyiex Si Miang mai ah nin gah Si Miang: " Si Miang eui, ex houig gah nyiex beix gox, hmaing ax yuh nong ni, jan jee ba rog hmaing maix, in pao ex hoig boun yuh noh, ex hoig viex Nbun Grih houig nyiex beix pao."

Si Miang hmoung ah Miex Mai nan, bu bab dou hu mgaig ndiang si viex, a miex euih, lug hoig dom kri gah ndaex grax kom mu, Si Miang mgaig kri an gix, lai nbaox mgaig nang Nbun Grih goui boun gei an kaing, rieb gah ang moh, ang rieb gah ang jix, gieh noh ang lai dong gah sang ged dix pao, hoig ndaing nu gah hrom noh. Noh ged: lih ex boun moh Si Miang dix gaex, gieh ex grai loux mgla yuh nin, gon rai ndai siao ex ang dae lai hngiad loux grai ex si ngaix kaix. Ged njee ged nblaong, ang lai dong gah sang ged dix, dom hmaing gon dix mouing Nbun Grih gei an.

Lih grai, gah moh nang gaing miex ndaox miex ndeing, Yam rieb Gon Si Miang Nbun Grih gei, Nbun Grih gei nbang lia dix biang diex, dieh beeig dix lih moh Nbun Grih ding Nbun Grih hmom yuh nan dix gaex, Si Miang ndaing mgaex hrom gah dix dei heui, qog noh: "Mun ex, geem deei maix kri nding ndod kaing ndee mox?"

Nbun Grih gei ngiah ngie gah mai ah: "Baox ex eui, an ang moh kri, moh dai gei oud ndaex diag ox."

Nbeen lao Hag Diex Meng Lam

Jang Jeng Young jao diam

Nbeen Ai Vui Mai Gon Nbun Si Yong

Goui Bui dix gaex, gaex noh Ai Vui, noh moh Gon Ndoui. Goui dix ngaix noh hu rub Gax, noh daong rub gah rao kaox, Bui yaox noh hoig dab ngie ngiah mai ah: "Yuh nin, ndouh sang jix boun Gax ndee mox?"

Si ndeih jo yam huan rom, rom huan hoig vug rao kaox rao oux, Gax rug jo dix laig ndaex rub loui mu, Ai Vui mgiang Gax ing gah nyiex pao. Gon Gax loui mu, noh yuh dix ih ra mu, gon goui dix mu noh laeng noh oud ndaex ngoi, njao hoig hreeng nbog yam, noh hoig bi om oud Gax ndaex ngoi an.

Lih dix grai, hoig ndaox eix gah, kaix an, Ai Vui hu yuh gaing, yam ndeeih houig noh gah nyiex gu nbog, blag dix yaox ndieb o, eeb si u hoig goui ngie ndaex o. Gon Si No in hu qog baox blog blag in baox blog blag an gah, "Geem moh maix ba yuh kix ngu veui ex lieh?" Baox blog baox hnyom ah: "Yix goui nbog yam dix yuh maix ih kix ngu ndee mox!" Nbaox hu qog baox blog blag an "Geem moh maix ba guih si veui ex lieh?" Baox blog blag an nbaox ah: "Ang ex ndouh goui nbog yam yuh nin dix nbog gox."

Ai Vui ang ndouh lih hrom ged gah, mox mgad yuh ex ih briex breem yuh nin, dom sae hrom lung dix sog dom boun dong jao yuh.

In si ngaix, noh lo dix hu ma, soung si viex nbong, haog moux dix ndaex si nbaong kaix, ang nbaox goui miex nkreeng dix, bu bab hmoung loux luah rom oud ndaex ngoi, Nbun Grih lih kaing ndaex ngoi dix gaex.. Nbun Grih in njiad baing ngie log ah Bui "Laex baing bag si maox ndaex glong, laex hmom mgrang Si Yong ndaex saeng." Yuh nan, kaix hoig lih noh kaing ndaex ngoi, noh yaog dix mgaig mguax ndom, ang yaox Bui, noh nbrei dix sad haeg dix npad ngie nan.

Ai Vui yaox dai hmom yuh nan dix kou, hoig ndaing mgaex hrom gah yuh gah mox nieh. Noh nbriex gai lih ngie kaing si nbaong hu gom nyoi Nbun sied ngie, ang bloi gox mai bao loux dix ah: "Ia siang lung ex sang yah gleen, Nbun Grih hmom in ex sang mouing pao."

Nbun Grih hoig gaig ngie mai ah: "Bloi ex, bloi ex."

Ai Vui ah: "Ja moh ju maix loux ex, ex log bloi."

Nbun Grih yaog dix si mi Ai Vui dix daix, gah hoig lih hrom hri gah, gaig ngie mai mgum gaing dix. Ai Vui yaox hoig ju noh loux dix, dom bloi daix dix kaing. Njaeh dom kaix an, Ai Vui hoig goui mouing pao. Giex ra gaex ndaing muih hrom baox dix, gah hoig ndaing nyom oud nyom goui mai baox dix.

Goui dix ngaix, Nbun Grih hoig mgrai ang lai yaox. Ai Vui hoig sog noh miex nkreeng mox nieh, ang nbaox yaox. Dox si nbog qog ngai gah, hmaing noh hu gah ndaex rom.

Ai Vui dou hu gah braog rom, yaox ngie si nbloui nbai rom dix biang rom njee nblaong, ang yaox Bui dix gaex gox. Ai Vui mgoung ngie ngai dix nbliex glia njee glia nblaong si niag rom dix ndee an.

Yam an, Viag Glai dou houig gah noh dix mu mai qog noh: "Bux gei eui, geem ged maix ba dix yuh nin?"

Ai Vui ah: "Nbun nyiex yix hoig hu ndaex rom sein, sang deei eix noh yuh gah mox liex?"

"Gieh moh nin, ex yod maix ih rom hid! Viang moh nan, maix bo ngiah ox."

Ai Vui ah: "Ang ngiah, ang ngiah, maix nyaex heui pao." Viag (Kiad) njaeh dix nyaex rom dix mgum dix mgum ngie, ang nbaox goui miex nkreeng dix, hoig nyaex rom miex nyao, Ai Vui yaox hoig bliex ngie vaig Viag an, ang lai boun mgu ngiah dix, dom man loux ngiah dix. Yuh nin, rom ba hoig nyaex Viag laig ndaex vaig dix hoig ndeeih hao lih kom mu njao.

Viag ah: "Ex ang lai dong gah sang ged dix pao. "Hoig ah nan yaog dix hu kaix.

Ai Vui ndaing glih hrom dix kaix.

Yam in Jag nbaox houig dix mu, qog noh: "Ai, Ai, geem ged maix ba dix yuh nan?"

Ai ah: "Nbun nyiex yix hoig laig ndaex rom sein, geem dong maix gah sang deei eix noh lieh?"

"Gieh moh nan, ex deem maix nyaex rom bag ngie kaing." Jag yaog dix nyaex rom dix mgum dix mgum ngie pao, ang nbaox goui miex nkreeng dix, rom hoig nyao, grei ndung goui ndaex brih dix mu. Jag ah: "Maix laig ndaex sein pao!"

Ai Vui yaog daing dix laig ndaex brih, dom moh ndee gin Bui rom dix ndaeh, Nbun houig dix gin rom dix gaex. Ai Vui qog noh: "Bux gei eui, geem sang gin maix mox nyaex rom?"

Nbun ah: "Gin nyiex Si Miang nyaex."

Ai Vui hmoung ah gin nyiex Si Miang nyaex rom, dom beeig njeeb mgian oud gah mgian daix dix, nbriex daing ndaex rom mung. Mouing Ai Vui jee jee hoig ndog moh boud Gon Nbun Si Yong!

In si ngaix, Gon Nbun Si Yong kouig daix dix, yaox lih njeeb mgian kaing ndaex rom mung, ngiah ngie gah, sud noh hu mai ah nin gah Geeing dix "Keui maix houig pao."

Si Yong hmoung ah nin, ang nyang nyei gah, goug Ai Vui houig mai ah: "Geem sang ged maix dix jie Gon Nbun Grih ex lieh? Hmom, in pao ex moux dix, gieh maix boun yaox ex, maix log viex Nbun Grih ing; gieh maix ang boun yaox ex, maix jo dix ing noung dix."

Si Yong yaog moux dix pao, Ai Vui dom hu qog mouing dix gah: "Geeing maix hnie ex sog dix."

Mouing noh ah: "Hmom! Hu ndaex diag, gieh maix yaox Grag lang rung dix mu uig moh an heui."

Ai Vui dou hu ndaex diag, lug yaox Grag lang, rung dix mu, dom dou hu mgiex rung Grag mai ah: "Yaox ex maix pao, yaox ex maix pao." Si Yong ah: "In pao, maix moux dix ex sog maix, gieh ex yaox maix, maix jo dix ing noung dix, gieh ex ang yaox maix, maix log viex Nbun Grih ing."

Ai Vui dou hu qog mouing dix: "Geeing maix sang sog ex." Mouing noh dom dieh Ai Vui lih moh nyeix dix daix, si nkab noh gah dag dao si nbeix dix. Si Yong hoig sog noh miex nkreeng mox nieh, ang ndouh yaox, dom ah: "Ang ex yaox maix, lih maix kaing." Ai Vui daing dix lih kaing dag dao si nbeix mouing dix.

Si ngaix kaix, Si Yong nbaox ah nin gah Ai Vui: " In si ngaix, maix hu souh ma kraox uig nbeen dix kan si mie, hoig souh maix noh, maix log viex Nbun Grih ing; gieh maix ang hoig souh, maix jo ing noung dix."

Ai Vui nbaox hu qog mouing dix ah: "Geeing maix hmaing ex souh ma."

Mouing noh ah: "Hmom, maix souh gaing ma dix daix, souh grei ma dix daix, ma jix hoig souh dix." Ai Vui yaog dix si mi kaix dix, ma lug hoig souh dix kom mu.

Si Yong nbaox ah: "Maix nbaox hu tai hoig, gieh maix hoig tai, maix log viex Nbun Grih ing; gieh maix ang hoig tai, maix jo ing noung dix."

Ai Vui nbaox dou hu qog mouing dix gah: "Geeing maix hmaing ex nbaox hu tai ma."

Mouing roh ah: "Hmom, maix tai gaing ma dix daix, tai grei ma dix daix, ma jix hoig dix ih."

Ai Vui hod yuh noh log loux grai mouing dix, tai gaing ma dix daix, tai grei ma dix daix, ndeeih yaog dix si mi, ma lug hoig tai dix kom mu.

Si Yong nbaox dox nang ian gah Ai Vui dix kan mai ah: "Maix nbaox hruad ian in gah ndaex ma, gieh maix hoig hruad, maix log viex Nbun ing, gieh maix ang hoig hruad, maix jo dix ing noung dix."

Yuh nin, Ai Vui nbaox dou hu qog nang mouing dix gah: "Geeing maix nbaox hmaing ex hruad ian in gix gah ndaex ma." Mouing noh ah: "Hmom, maix hruad gah gaing ma dix nqob hruad gah grei ma dix nqob." Hoig yuh noh nan, noh ndeeih mgaig ma, ian lug hoig hruad dix kom uig.

Kom moh nan, Si Yong nbaox ah:" Ndeeih sud ian ba hoig hruad houig kom uig, hoig sud maix noh, gieh maix viex Nbun Grih ing; gieh ang hoig sud, maix jo ing noung dix."

Ai Vui dou hu ah nin gah mouing dix: "Geeing maix hmaing ex ndeeih sud ian in gix kom uig."

Mouing noh ah: "Hmom, sud gaing ma dix nqob, sud grei ma dix nqob jix hoig kaix."

Ai Vui hod yuh noh log loux dom mouing dix, dou hu gah ma, sud gaing ma dix nqob sud grei ma dix nqob ndeeih yaog dix si mi kaix, ian lug hoig naog ndaex aong pao.

Ai Vui viex ian houig gah Si Yong, Si Yong yaog dix si min ian, ian gon ang nyang gub loui mu, dom ah: "Ian gon qa loui mu."

Ai Vui dou hu gah mouing dix mai ah: "Ian gon qa loui mu."

Mouing lih ged gah sang deei noh, dom ah: "Mgaih grax loui nyaing, kaox goui gah loui mgo, gah biang kaox loui mgo Si Mgaex oud gah loui mu, maix buing ba oud mgreng an jod, ian hoig goui ndaex nblei noh heui."

Ai Vui yuh noh log loux dom mouing dix, houig gah mgaih grax loui nyaing, kaox lug goui gah loui mgo, gah biang kaox loui mgo Si Mgaex lug oud gah loui mu. Ai Vui yaog puad daix si nbeix dix mai vaig ag sae dei, nyon noh gah, dix daix kaing njiad dab ba oud mgreng an jod, bih nblei mgaig noh, ian lug goui ndaex nblei Si Mgaex loui mu.

Ai Vui dox ian loui mu gah Si Yong, Si Yong ang lai dong loux sang ah dix, dom dox Ai Vui viex Nbun Grih ing.

Njaeh dom kaix an ndix, giex Bui ra gaex hoig ndaing hmom si ngaix som go mai baox dix, kaix an gah hoig goui gon goui braix mai baox dix miex nyao.

Nbeen lao Hag Diex Si Moung

See Veng Doung jao diam

Si Maox Daoh Nju

Ndi ndix, goui gon nyom Ba Raog dix gaex, gaex Ai Ga, Miex Geeing noh hoig ndog yum dom yam iag o noh. Noh moh Bui noung noung dix gaex kaing, mad(meng)ngie dix hu buing dou diag dou du kaing, hu ndaex noung kaox ding ndaex yia hreeg gu si ngaix.

Goui did dix ngaix, Ai Ga ja hu boud ndaex diag mai viex dix ag gu si nqeeng. Braix glong njiad nblang ngie nploing. Ndaex diag dai gu jee gu jong dang nkrang ngie dix bruih, loux sim loux saig hoig si nbua ngie gu jaong ndaog, njiad rong ngie log loux hrax Bui lai yuh nan. Ndaex hrom Ai Ga uig mgaex ngie gah, dix vud noh jaig dix muan dai, dix vud noh peed dix mgiex glieh mai Bung Biang. Njiad daeg moh yam nyom glieh noh, bu bab hmoung loux ah: "Houig deem ex jeeix, houig deem ex jeeix." Nan gah ndaex Rao Ma. Noh yaog dix maong, mgaig noh, yaox ngie mgiang Glang gon Si Uing Glai dix mu, njiad jo dix bu biang gaing noh. Ai Ga niad dix vaig ag sae dei, nyon noh gah, "klag bug" nan, njiad jo dab gaing Glang hmoung ngie loux riag Glang dix mgum kaing mai jod dix biang diex, Glang hoig yum pao, gon Si Uing Glai hoig yum bi. Ai Ga yaog dix glian gon Si Uing Glai an, sae noh ndeem dix, bug rom glong dox gon Si Uing nyaex. Gon Si Uing Glai an hoig ndeeih haing ndeeih nbrax pao, bu bab yaog dix mgrux ngong dix si veui ngai Ai Ga mai ah: "Hoig hnyab hrom hnyab hri maix, hoig laoh lie die hloung, gieh ang moh maix, in si ngaix ex hoig moh ba yum." Ai Ga hmoung ah gon Si Uing nan, uig nkrom ah: "Grax deem ex ang moh miex nding dix, in moh gaing ba jo Gon Bui dix yuh." Gon Si Uing Glai qog noh: "Geem gaex maix ba dix? Oud nyiex beix ndee mox?" Ai Ga vu vied gaing dix gah, ang nyei ang nyux. Gon Si Uing Glai nbaox ah: "Moh maix ba daoh nju ex, soun sang hnyab ex hrom hri maix, sang jie maix jee ba dix, maix houig deei gah nyiex yix." Ai Ga ah: "In hoig moh gaing ba jo ex dix yuh heui, ex ang jie ba did dix." Gon Si Uing Glai nkrom ah: "Nin, ang jix, gieh ang moh maix, ex dee...." Ai Ga hoig grai noh si ndong: "Yam in, ex moh Bui noung noung, ang duih hrom gah ba did dix, ja moh boun ex dou diag kaing, ex gah hoig mgaex hrom hri gah." Kaix hoig hmoung gon Si Uing ah Ai Ga nan, hoig mgaex hrom mgaex hri mai ah: "Maix goui hrom gah buing dou diag dou du, ex log deem joi maix gah. Nyiex yix goui siang si maox dix mu, maix hod hu mai ex, ex log hmaing Miex ex dox maix jie. Si ngaix kaix sax, maix nbrie si nbub gaing jee ba dix ang ah, noh jix grai maix hmoung si veui, mgae maix yuh." Ai Ga hmoung ah gon Si Uing Glai nan, dom hu mai gon Si Uing Glai gah nyiex gix.

Gix houig gah nyiex gon Si Uing Glai, Miex gon Si Uing, moh kee yaox noh hu glieh Gon Nbun dix ling si ngaix, ang nbaox yaox ndeeih houig gab nyiex dom yam in, lai jei moh si nbub noh gaing jee ba did dix, hoig groux njun noh gah nyiex kom oud mai ki dix. Kaix hoig yaox noh ndeeih houig Gon Nbun dix, noh daeg nyom hrom. Miex Si Uing yaox hod Si No Gon dix dix gaex, hoig ndaox ngie ;gah, dom qog Gon Nbun dix: "Maix jix viex Bui houig dix gaex, geem yuh gah mox?"

Gon Si Uing uig jai meeih ngie gah kom greed dix yiam ndaex ndeem Miex dix, yiam nang, grai nang ah: "Boun ngob ieh, ex hu glieh ndaex diag, houig gah mgreem yeem gon sai, ex yaox deem gon sai bieh dix ih, njiad moh yam daeg sang nyom ih ex noh, Glang nkrom houig dix mgiex ex, mgiang ex hu Rao Ma, hoig bru kuan bru ngao yuh ex dom hoig man ex loux ah: "Deem ex jeeix, deem ex jeeix nan, "yam an hoig goug hmoung loux riag Glang ndum mox ndum an mai kom lih jod biang diex ah "nbug" nan. Jee jee, kaix moh boud Gon Si No ba buing Glang yum, hoig daoh nju ex, gieh ang moh noh, in si ngaix ex dee ang lai yaox ngai maix Miex dix." Miex Si Uing hmoung loux grai Gon Nbun dix, uig nkom hu nqob daix Ai Ga sied ngie mai ah: "Maix moh ba daoh nju daoh kuan Gon Nbun ex, hoig hnyab hrom hnyab hri maix miex nyao heui! Grai yaox, geem sang jie maix ba dix? " Ai Ga vu vied gaing dix gah, ang nbaox grai ba sang jie dix. Miex Si Uing yaox ang Ai Ga nyei, dom viex Ai Ga hu gah ndaex nyiex ding nyiex va nan dix hlang, ndaex nyiex in, graeng gu jee gu jong hoig haoh ngie ndaex, siang glai siang hleng; vaig gu jee, riang Moi riang Nbrung, jan riang in gix hoig si ngi ngie log kri yuh nan ang lai ndag uig si min njieh si mieh [sic ** ?] jee. Miex Si Uing yaog dix ngiah ah "ha ha" nan mai qog: "Geem sang jie maix ba dix? Maix dang laeg dix jie heui." Ai Ga ah: "Graeng in gix ang ko gah hrom ex bie dix mu gox, ex ang jie did dix." "Gieh moh nan, graeng jee ba dix ba ko gah hrom maix box?" Miex Si Uing nbaox qoh ah nin. Gon Si Uing ba jung oud braog giex an dom ah nin gab Miex: "Miex , geem ang nyiex eix gon een siang si maox glai hnaox? "Miex Si Uing hmoung ah Gon dix nan, daeg lih hrom ged gah siang si maox glai an. Siang si maox in moh siang ba ndeh Dax Yiex gix gah gix ndix, sang dox gah Ai Ga, gah hlog nang gah. Viang moh nan, noh ged nbuan soun yuh Ai Ga gah nyiex gix, kee nin, noh dom beih siang si maox glai lih kaing ndaex nqeeih dix dix loun dox gah Ai Ga mai ah: "Maix ang jie ba did dix, maix jie siang si maox in kaing, maix klieb oud gah hrang dix, ngaix kaix sax, ang guang sang yuh maix gaing jee dix, noh jix mgae jix deem maix, nbrie moh gaing nu jee dix ang ah, noh gah jix grai maix hmoung veui, maix gah jix beix jix..laex leeing yuh gix. Viang moh gox nan, siang si maox in, maix ang ndouh boun grai Bui hmoung ox, gieh maix grai Bui hmoung, maix jix dieh dix lih moh loun si maox dix loun, yaox grax laex grax leeing ling nju dix." Ai Ga hoig briex loux Miex Si Uing ndaex hrom dix, uig grai hu kaing giex Miex Gon.

Ai Ga viex siang si maox, mgaex ngie kom ing dix gah yaong.

Goui dix ngaix, Ai Ga goug gon nyom ndaex yaong hu peed dou diag mai dix, kom moh nan, gon nyom ndaex yaong ang hrom hu mai, noh dix gaex gox. Ai Ga dom ah: "In si ngaix ex dong ndee oud Bouih, gieh beix hod hu mai ex, rian dix boun Bouih." Gon nyom yaong yaox ah noh nan, dom hmaing baox dix hu mai noh.

Houig mgreng grax, siang si maox oud ndaex nqeeih Ai Ga an ah nin gah Ai Ga: "In si ngaix Bouih jo dix diang gah. rong blag veui ngai maix, maix hmaing gon nyom yaong vuh long mgong, maix oud dix, guan noh gah gag rong in, yaox maix houig Bouih, maix buing noh heui."

Ai Ga hmoung ah siang si maox nin, houig ndaex diag, noh hmaing gon nyom hu vuh, guan gah gag mgong, Ai Ga vaig ag sae dei, dix daix dix mui [sic ** ?], gon nyom yaox Bouih liah mu, hoig bum ngie oud gah gag mgong ndee an, hoig yum hrom gah loux Ai Ga pao. Gix hoig si mgaex ngie mai glom Bouih ing gah yaong. Ai Ga mguah neix, dox noh dix nyiex dix nyum [**]. Njaeh dom kaix an ndix, gon nyom ndaex yaong hoig muih dix hu peed diag mai Ai Ga.

. Goui dix ngaix, Ai Ga daeg sang krei dix id, siang si maox bu bab nbaox ah nin gah noh: "Boun nbou in si ngaix gah mgreng som gie, rom ding rom huan sang houig keem yaong ox, maix niad mgaih dix hu kaing yaong." Ai Ga hmoung ah noh nan, uig yaoh ngie gah, bu bab dou hu ndaex yaong grai Bui hmoung gu nyiex gu ma, hmaing Bui ndux nyiex ma, graeng krai dix kaing ndaex yaong, kom moh nan, Gon Bui nyiex Bui yaong ah: "Eix gon im gon glod hmom hmom, lai jix goui gaing ba dix, die moh maix jao mgong jao ngod, mgad dong rom sang keem yaong ndee mox? " Ai Ga hoig ki ngie, dom grai Bui hmoung goui siang si maox dix, gix daeg ju daeg yi loux noh pao. Bui bu bab yaog mgaih dix kaing ndaex yaong, houig mgreng som, rom ding rom huan gaoh kaing mgong kaing lua houig keem ndaex yaong. Kaix an, Ai Ga dieh lih moh si maox ding dix loun mai oud gah si mgreng glong, njiad log ba sang guan glad [**] guan die rom huan yuh nan. Gon Bui dom ah: "Si maox daoh nju" gah noh.

Soun sang dong Bui nbuan soun yuh Ai Ga mai soun sang hnyab Bui hrom hri dix gah noh, Bui dom lai louh baox dix hu dan hu lu dix dox briex breem si maox ih gu si ngaix.

Nbeen Lao Hag Diex Lang Qang
Liux Jung Yin ba krom.

Nbun Grih Si Maox

Ndi ndix, goui Si No Ba Raog dix gaex, gaex Ai Nbluing, Miex noh gah hoig guad, ang nbaox goui Miex nkreeng dix, Miex noh yum. Ai Nbluing ndaing laex hrom gah yum Miex dix, noh daeh glong mong kom laex hrom hri dix, Bui nyiex Bui yaong houig dix yuh klai noh, Ai Nbluing gin ndaing houd, ang goui Moi ang goui Lig dix yuh klai Miex dix, ang goui dix baeh la jia blai Bui ih, ndaing ang nyom hrom gah Bui jao deem dix briex saex si nbaeng yum. Noh ged: ba goui yam in moh ngie riang rao ex kaing, hu sog Gax nkaog Bui gah kaing. Noh yaog dix gog rub Gax hu braog glong.

Noh houig gah braog glong, njog laeg ndee vieh bag rom gah ndee sang raex rom dix ndaeh, sae riang dix daing rub ndaex rom sein. Lai hoig ged dix boun rub Gax miex nyao pao. Kom moh nan, yam ndeeih noh nbluh rub Gax lih kaing ndaex rom, mgaig ndaex rub, did dix ang goui ndaex bie dix mu, ba oud ndaex rub moh ngie si maox lom lei log gla han yuh nan dix mu. Noh sud si maox lom lei an, meed hrom yaog dix dig ndaex rom sein. Noh nbaox tai ndee rub Gax dix ndaeh, nbaox daing rub sein, nbluh rub mgaig noh, Gax ja ang nyang oud ndaex bie dix mu, si maox gla han an ja nbaox oud boud ndaex rub dix mu. Noh sud si maox an, nbaox dig noh ndaex rom sein dom ndee si ngai. Noh nbaox tai nang ndee rub Gax dix ndaeh, nbaox nbluh dix gia, nbaox moh boud si maox an ba oud ndaex rub, ang yaox Gax ndaex bie dix mu. Braix hoig ndeix sang hvaig pao, Ai Nbluing ndie hrom, briex rub krei dix ing blag nyiex. Noh mgaig si maox lom lei an, si maox song si ngi an, uig hngeeig [sic ** ?] ngie gah mai ah: "Si maox gla han eui, nbrie luan goui hrom maix dix hod ex, moh ing maix mai ex gah nyiex box." Noh yaog dix sud si maox gla han an, sae. noh ndaex yang Gax viex dix.

Kaix hoig houig noh gah nyiex, noh eei si maox ndaex ngoi rom.

Kaix hoig deem baox nyiex baox yaong noh briex saex si nbaeng yum Miex noh, Ai Nbluing hoig si nbaeng Miex dix pao.

Kaix an ra loui si ngaix kom daeg kom mao Ai Nbluing. Noh hoig kouig ngai nbaoh dix, daeg sang krei dix plu ngu yuh briex, ndaox gah yaox oud moig kraeh niex mai liab [**] ngu dix dog mai blai dix soi. Noh ged nin: dee moh baox blog baox hnyom ex ba jaox hrom gah hoig yum Miex ex, ang lai goui jao yuh briex ex ih, dom guih ex ih euig? Ang guang, nbrie moh mox ba yuh, ex jen ih kaing.

Si ngaix kaix, noh houig kaing ma, ja yaox boud gaing yuh nin. Ja moh boud gaing yuh nin, noh ang lai nyom hrom gah, dom hu sog Bui jao yuh briex veui dix mai sang grai hnyab hrom hri noh. Viang moh nan, hoig daeh qog Bui gah gu nyiex, Bui ah ang nbaox hu yuh noh ih briex dix gaex gox. Noh ndaing ndaox ndaing am gah dix dei. Dom ged: deed lai moh Jao Mouig euih, ba houig dix deem ex? Noh ndeeih ged, ang dae dix moh. ex moh Si Meix laoh lie dix gaex, ang boud jaong, ang ndug ngai, moh ngie gaing yuh briex yuh nin kaing, soun moh ba dix! Bui ba sang jo eix dix jaox hrom gah gon haoh gin nie! "Deed lai moh si ngie gox euih! "Ai Nbluing ged ged noh, uig lih dix hlad gah. "Geem moh Bui geem moh si ngie, jo yuh dix dong si ndong boun sax." Ai Nbluing hoig sae hrom dix.

Si ngaix kaix, Ai Nbluing hoig guih dix ih briex ngob, gog vaig, glom ko log hu dix ma si nqeeng. Noh houig gah ma, souh ma dix vud, nbriex goi dix ndeeih ing gah nyiex, haog moux dix ndaex si nbaong guan mgaig ndaex nyiex.

Ia hoig ux, Lig hoig ngia pao, si bou baox blog baox hnyom hoig luah pao, uig houig nbog yam yuh briex nbou pao.

Yam an, goug hmoung ngie luah did dix ndaex nyiex ah "kling klang" nan dix daix, jee did dix lih kaing ndaex ngoi pao, Ai Nbluing goug nbriex dix mgaig noh gah ndaex ndouh nqad, yaox moh si maox lom lei gla han an. Si maox gla han an ja nbang lia nbang lia dix ndaex nyiex boud, nie oud nie ding, yaog dix luah ah" Pang" nan dix daix, si maox gla han an hoig lih riang su sai ngie ndaex nyiex dix ju, hoig nbih dang oud pao, Nbun Grih hoig lih kaing ndaex dix gaex. Yaox ngie npeui [**] noh haeg lung blang lung on an biang glib dix kaing. Noh ih si nbeix man nyaox glai mai ndai ndod, goung go baing log mae gah gaing dix, si mgun gah nyoi soi gah daix, hoig vu vied vu vied ngie dix kom hu ndaex nyiex, hoig lih song si ngi ngie ndaex nyiex. Noh ngom liab ngu, hmoung ah "vu" nan mai ngu dix mgum, ngu hoig lih riang ndum mox ndum an. Noh deei nbia houig dix lug, sae hngoux ndaex nbia, goi nboi ngie hngoux gah daix dix, nboi dix vud nbaox plu nang ndaex nbia ah "fu" nan dix mgum. Mgam hngoux ang lai yaox pao. Ba oud ndaex nbia moh ngie mgaox baing mgiex. Noh yaog dix dang o ngu rom biang paex si maox, uig krei dix yuh briex pao.

Ai Nbluing njog dix nbliex, mai yaog dix baoh si viex kom laig ndaex nyiex.

"Moh maix Bui, moh maix si ngie, yuh gah mox lai jix laig ndaex nyiex ex?"Noh mgiex vaig lang mai nbrei dix qog.

Hoig yaoh ngie yuh Nbun Grih an, kaix hoig yaox noh moh Ai Nbluing, uig gaig ngie gah mai vud ngai dix dix blag. Nbun Grih ah: "Eeb ang nyang sin, maix laex dix vud hang."

"Geem lug moh maix Bui, moh maix si ngie?" Ai Nbluing nbaox njiam dix qog.

"Maix hoig ndaing daeg, jo laex dix dix vud hang, ex log grai maix hmoung kaix." Nbun Grih ndaing hang hrom mai ah nin.

Ai Nbluing ang lai nyom hrom, hu ngom ngie liab ngu.

Nbun Grih ah: "Ex moh Gon Nbun Si Yong, gaex Yeix Hua. Veui ndaex loui num ndix, maix houig rub Gax gah braog glong, ex hoig jo dix muih maix. Yam in, Miex hoig yum, maix moh ngie Bui noung noung dix gaex kaing, ex gin jaox hrom gah maix, dom houig dix yuh baox maix."

Ai Nbluing hmoung ah Nbun Grih nan, uig hngeeig [**] ngie gah dix mgum ah nin: "Nyiex yix Moi ang goui bie dix mu, la gah ang goui bie dix mu, Miex ex daeg kraox yum, hngoux gah ang lai nie, ex ang goui mae dix liag maix ih graeng krai, maix jen ndeeih ing kaing.",.

Nbun Grih ah: "Moh yaox ex houd maix, ex dom daeg houig dix deem joi maix."

Ai Nbluing hoig lan gah mgreem loux Nbun, dom een Nbun Grih oud pao. Giex hoig moh meix mouing, hoig nyom oud si u goui mai baox dix.

Dai hoig bruih ndeeih laix, hoig laix ndeeih bruih. Dix kiab ngai kaing, oud giex mai baox dix hoig goui boun num. Nbun Grih hoig lih jei lih nbioung gah Miex Geeing dix pao. dom ah nin gah Ai Nbluing: " Ex hu kaing nyiex hoig goui boun num, jo ing mgaig Miex Geeing dix pao."

Ai Nbluing doung neix Bouih ra loui nyong, ndum blai ra loui doum, hod ing mai Gon Nbun Si Yong.

Giex houig gah braog glong, Nbun Si Yong deei nbod oux lih, goi bod ngie noh ndaex rom, rom glong hoig dang mguah dix pao, dom lih yaox grax ding dix nyaing, giex long grax an houig gah nyiex oud Si Yong. Miex yaox houig Nbun Si Yong, hoig mgaex ngie dom uig ngiah dix. Geeing yaox viex Gon Nbun keui dix houig dix gaex, ang hiex naog hrom gah. Nbriex ged dix sang sog nbog yam gieh Gon Nbun dix dang hu kaing keui an.

Goui dix ngaix, Si Yong goug Ai Nbluing houig, ah nin gah noh: "Keui eui, ex hoig souh ma dix mguang, ged sang sum ian gah, viang moh nan, ndaex voung in, kee ang ex hiex nyom oud, maix hu sum ian kaing." Hoig ah nan, yaog dix dox ian gah Ai Nbluing dix mgie.

Ai Nbluing sae ian ndaex ma, nbog yam hoig hreeng, viang moh nan, ian ang nbaox jix guah. Noh uig ki gah, dom hu sog Nbun Grih Si Yong. Nbun Grih Si Yong ah nin: "Hnie Geeing ex Si Mgaex bag ih ian ba oud gah ma an, ""Gieh moh nan, sang yuh gah mox box? "Ai Nbluing uig ki ngie gah kom ah nin.

"Ang siao ki gah." Nbun Grih Si Yong ah. Noh deei ag houig dix bang dox gah Ai Nbluing mai ah: "Boun sax blag nbou Si Mgaex nan dix houig ndaex ma ian, maix buing noh, si mie ian hoig goui ndaex nblei noh heui."

Si ngaix kaix, blag nbou, Si Mgaex lug bu houig ndaex ma, Ai Nbluing buing noh jod, bih nblei deei si mie ian lih, ndeeih sum noh ndaex ma kaix.

Ian hoig guah hoig dai pao, hoig gaex pao. Si Yong nbaox ah nang nin gah Ai Nbluing: "Hliex si um mglaeh hoig ndeix houig pao, maix hu krom ian houig gah nyiex si ngaix."

Miex ma vieh yuh nin, dix ngaix kaing ndouh hoig deei box ian yuh gah mox? Ai Nbluing nbaox ki nang gah, dom hu sog Nbun Grih Si Yong.

Nbun Grih Si Yong ah nin gah noh: "Ang maix siao ki gah. "Noh beeig nkuan [**] vien gaing dix dox noh gah Ai Nbluing mai ah nin gah noh: "Houig maix gah ma, maix vu vied nkuan [**] gaing in ndaex Rao Ma, kaix an maix ah "Doi Baing bux gei eui, deem ex jeeix," Hoig ah maix nan, maix ja hu glieh kaix braog ma."

Ai Nbluing houig gah ma, hod yuh noh log loux ah Nbun Si Yong. Ndum mox ndum an, Doi Baing hoig ndaex Rao Ma miex nding mox nieh. Yaox ngie bu njee bu nblaong Doi Baing ndaex ma, sud ian ndaex ma kaing, bum noh oud braog ma. Ang nbaox goui miex nkreeng dix, ian hoig krom dix nyao.

Si Yong yaox ang boun dieh Ai Nbluing, ged njee ged nblaong, nbaox ah nang nin gah noh: "Hoig ndeix houig nbog vo pao, ex bloi Bui hu gid kaox grog, maix hu re noh houig gah nyiex ndee een grog."

Miex grog goui nding ndod yuh nan, gu nqeeng moh Bui kom yaong ba hu si re hu nbluh. Ai Nbluing moh ngie Bui dix gaex kaing, ndouh boun re box yuh gah mox? Noh nbaox ki hrom nang gah, dom hu sog Nbun Grih Si Yong.

Nbun Si Yong ah: "Ang maix siao ki gah." Noh deei geei baing houig dix mgong dox noh gah Ai Nbluing mai ah: "Maix deei geei baing in vien gah kaox grog, boun re noh kaix, "

Ai Nbluing vien geei baing gah kaox grog, hoig dieh dix lih iag ndum mox ndum an, siah ngie log mgong briem yuh nan, Ai Nbluing ang miag re noung dix, jen yaog dix dag deui gah hyaog dix kaing.

Grog moh jee graeng ba ding jee, Ai Nbluing ndux yuh dix glieh mai yuh nin. Si Yong dong noh, ndaing soung hrom gah, sae hrom dix sang blaex Ai Nbluing yum.

Goui dix ngaix, Si Yong ah nin gah Ai Nbluing: "Keui eui, hoig ndaing hreeng naox, ang sax yaox dix jim neix dou diag, maix hu sog buing eix ih Brieh kaing." Si Yong nbriex gieh Bui moux dix ndaex grax veui noh, njun dix sang nbriex baeh Ai Nbluing yum ndaex grax.

Ai Nbluing ang nyang dong mgroh yuh Si Yong, dom hu qog Nbun Grih Si Yong gah.

Nbun Grih Si Yong ah: "Qaox nie luan ding hrom maix, ang maix jix nab yam grog, nbog in, Geeing sang blaex maix yum."

"Gieh moh nan, geem sang yuh eix gah mox box liex?" Ai Nbluing uig ki ngie gah, kom ah dix nin.

"Ang maix siao ki gah." Nbun Grih Si Yong ah. Noh deei nyaox houig dix mgie dox noh gah Ai Nbluing mai ah: "Hoig hu maix dix nbaex mgroi jeeix, hoig uig mgroi maix noh, maix dong ngie hu buing Brieh kaix."

Ai Nbluing hu pao. Hod yuh noh log loux dom Nbun Grih Si Yong. Braix glong hoig lih jeeb ndum mox ndum an, pong nyaox hoig dieh lih moh bai om yiab yu hvaig ngie, hoig hvaig yuh ngai nbaoh Bui ba moux dix braog grax ba sang guan baeh Ai Nbluing yum. Gix ang lai jix yaox Ai Nbluing. Ai Nbluing hoig gog neix dou diag neix Brieh houig gah nyiex.

Si Yong yaox ang nbaox boun baeh Ai Nbluing yum, hoig laex hrom ngie gah, njaeh dom kaix an ndix, noh ang lai ged hrom ang hmom yuh nan lih.

Ai Nbluing mai Nbun. Grih Si Yong oud ndaex nyiex Si Yong, ang lai hrom oud, dom hu grai sang ing dix ngai Miex Geeing dix. Si Yong dox giex viex hloux kaox dix song mai si kruai dix peen, kaix an hloux kaox dieh lih moh loun mae loun gon, si kruai dieh lih moh kri.

Njaeh yam an ndix, giex meix mouing hoig ih hrom hri si ma baox dix mai nyom oud nyom goui ling nju ling pan dae.

Nbeen lao Hag Diex Si Moung
Ai Lang jao lao
Ai Dix jao diam

Jouih Quing Dang Mouing Din [sic]

Lao Bui nbeen ndi ndix, goui Si No Ba Raog dix gaex, gaex Quing Dang, gaex hag noh uig ding ngie, ngai nbaoh noh hoig hmom ngie, gaex hag noh hoig gian ngie log kaox diah kaox dung yuh nan. Noh ang njuaing ding riang kaing Bui, gon hoig ndog mgae dix jix gu jee dom yam iag dix. Ndaing see daix, buah noh bliah, gon boun mgouih yuh Bouih dou ra mu, dix daix ag gon groux buing Glang bu loui mu, mgiex noh Si Vai, ang ta ih mgroui gah, siao ngie hnu maox diag dix mgong hoig boun piaog Si Vai houig, gi moh Nbraog ba ndaing hei gox, gi moh Rao Kaox ba ndaing pai gox an, yaox gix noh, hoig dang dou moux dix ndee si ngai.

Kaix hoig ding Quing Dang, hoig moh noh Gon Si No yaog yo Bui gu gaex, bie Nbun Grih hoig hmom gox yuh gah mox hoig muih Quing Dang gu gaex. Geeing hoig qog noh jie Nbun miex gaex mox nieh, viang moh nan, Quing Dang ang naog hrom gah dix gaex gox. Noh hoig daeh houig gah yaong Ba Raog gu yaong, daeg yaox Nbun Grih ba ko hrom dix gah yaong Loi Noung dix gaex, ba moh Yeix Yung.

Yeix Yung hoig gaex joung ngie log kaox graex yuh nan, njiad mgrang ngie log Doi noung yuh nan, hoig si u ngie log mgaox ngu ba gon oud ndaex mglaeh ngu yuh nan, hoig die ngie log blai num yuh nan, yaog noh dix yuh nkraoh, bie Moi Grag gah gon dou houig dix mgaig; yaog noh sae loux ngeei, bie rom glong rom ndaex ba hu an gon naox hu dix gah njao bai sang hngiad loux ngeei noh.

Noh ngeei ah:
Ding nba dom moh Sang,
lang hrom dom moh Bui.
Bui jo hlag log gon Sim,
bo hlaong bu bo diam dum.
Bu hlaong Glang jix deei,
bu diam Sua jix mgiex.

Miex Geeing Yeix Yung hoig ndog yum, grax hoig daeg hoig mao, hoig gieh noh dong nbeen sang glod eix dix moh sim im eix dix moh Bui. Dix ngob noh hoig daeh mgaox loui nbou, dix nbog boun viex rom ra mung, dix nbog boun beeih kix dix yieh gin. Ma hngoux ba riam noh hoig nblang si ngax ngie log riang kix yuh nan; , man ndai ba daing noh hoig hmom glai log bai om ba oud ndaex Rao Ma yuh nan, moig nbi ba yuh noh gon nyom kaing moig neix ia yuh Bui, blai num ba guih noh gon die kaing rom hia. Quing Dang hoig muih hrom Yeix Yung, hoig log daex ba hoig sae gih yuh nan, hoig log Gax hu ndaex ndung rom yuh nan. Kaix hoig yuh giex ba baox dix, ndaing nyom oud si u goui mai baox dix.

Gah ndaex ra loui num, Yeix Yung hoig si ndiad dix geih Gon Nbun loui gaex, moh ngie ang nbaox geih Quing Dang jie Gon Si Meix kaing, Quing Dang dom ngeei ah:

Bou daeh mgaox hoig haoh,
ang nbaox hmoung loux luah bou.
Muah ang goui soug gon jix niex.
Hngoux hvid ang goui Bui brad,
Soux bid si ndax jao noh ang muih.

Njaeh dom kaix an, Quing Dang ang lai muih hrom Yeix Yung, noh deei dix mouing Nbun Grih gon on gah yaong Vo Nu, Nbun Grih in gaex Am Ying.

Dom ngai Am Ying log ngie dom ngai Grag yuh nan, noh ja nbuan boud dom ngai ding an gah Yeix Yung, hrom Am Ying log ngie hrom miex Lig yuh nan, ja ged boud dix sang nbriex blaex Yeix Yung, mgong meeih Am Ying njiad log ngie meeih Miao yuh nan, nyiex mox goui neix Giang grouh, njiad gon jix hmoung npong, hyaog Am Ying njiad log ngie hyaog Soux yuh nan, nyiex mox luah njog gih, njiad jix hmoung noh si ndong laing. Kee nin, Bui dom ngeei ah:

Am Ying eui, moh Nbun ndaox,
ang yuh gaing ang yuh nqo,
ja gu guang ngie gu si ndaeh.
Hoig ih moig ian gah yaong Doi Gra,
nbaox hu ih nang moig Giang yaong Doi Liang.
Nbun ang ih ngai, Nbun ang gaig.

Houig yam hu rom, Yeix Yung glom mung ding, houig gah nyiex njiad goi ndeh ngie mung rom biang mgraih; Am Ying glom jie dix mob mung iag, houig gah nyiex lie rom ndaex o kang ah" sa sa" nan, yaox sang gieh Quing Dang hmoung. Houig yam daeh, Yeix Yung njiad gieh mgrix jie dix jo ndaex bou daeh, Am Ying ja luang dix qun braog bou ah" glug glig glug glag" nan, yaox sang gieh Quing Dang hmoung, Houig yam beeih kix, Yeix Yung beeih jie dix nbeeih ding, houig gah nyiex njiad goi ndeh ngie gah mgreem si ndug nyiex, Am ying beeih jie dix moh ngie kix loui gon ngei kaing, houig gah nyiex nieb dig kix gah nbrog ah "glu glag" nan, sang gieh Quing Dang yaox. Houig yam riam ma, Yeix Yung riam rib ang lai vaoh nyoi dix, hax gouig bied hoig nkeen rom laeh rom lee mai, lih hliex brei, graeng krai Yeix Yung hoig nyong kom njung, braix hoig hvaig daeg ing kaing ma. Am Ying dab hu id jie dix braog ma, kee nan, Bui dom ngeei:

Am Ying eui, moh Nbun nieh,
riam ma ang sax num nyoi dix,
hax gouig bied hu moux dix gah veei braog glong,
lih hliex brei hu mglaig dix ndaex nyiex mgoux.
Nbun Grih nieh eui moh Am Ying.
Am Ying eui moh Nbun nieh.

Ma ba riam Yeix Yung hoig si ngax laing laing, bie diex ma hoig baog dix nbog, gon hngoux njiad guah glai mgliang [**] mgliang. Ma riam Am Ying, rib hoig keem mgong hngoux, gon hngoux hoig siah nyai [**] ngie ndaex rib.

Goui dix ngaix, Yeix Yung hoig riam ma, hu gid kix gah braog ma, Am Ying mad ngie hu gu guang dix gah braog ma mguax ndom. Quing Dang houig gah ma, Am Ying yaox bouig noh, hoig ki ngie, bu bab dou hu gah ma kaix riam Yeix Yung, ju qian njee ju gian nblaong ndaex ma; yuh kaix jaong dix goui ndaex ma. Quing Dang mgaig ma kaix riam giex, Am Ying goug ji ma jie Yeix Yung, ah: "In moh ma riam ex." Giex ra gaex du tiang baox dix gah, yuh nin, Quing Dang ged noh lih dix jee ah: "Mgaig kaix jaong ndaex ma, moh kaix jaong mox, moh ma riam Bui an." Quing Dang diag blah jaong Yeix Yung goui dix ndiex blag, diag blah jaong Am Ying goui dix ndiex, Quing Dang hoig ah moh ma riam Am Ying. Noh yaog dix dog Yeix Yung mai hmaing Bui viex jouih Yeix Yung.

Njaeh dom kaix hoig hu Yeix Yung, nyiex Quing Dang dix num nie houd kaing dix num. Song een gix hngoux gah hoig yi ngie, Lig Soux, Ia Sim, Moi Grag gah hoig yum bag ngie. Houig nbog gaex hngoux, Quing Dang log gog ngie yae hu sog prad hngoux gah ndaex ma hoig hlaong rib an ndaex gu num, hngoux ba boun hrad [**] noh houig gah nyiex gon ang nyang gub Gon ih. Quing Dang hoig ndaing glih hrom hri dix pao, hoig lih ged Yeix Yung, noh dom yaog loux ngeei ah:

Yeix Yung eui, Yeix Yung,
ex hoig lud ah gah maix ndix.
Ex si re maix lih kaing gu,
ex lai nkre [**] maix dou kaing nyiex.
Sim uing hoig mgrai si ngaix nbaox lih,
ex hoig log ngie dai bruih dix kou ndaex nyiex,
ex hoig om ngie hnu Gon Ndoui,
ang goui ndee een hrom hri dix.
Yeix Yung eui, Yeix Yung,
geem sang ndeeih houig maix gah ex lai mox?

Quing Dang yaog dix gog vaig lang mai glom ag, njiad log yam daeg njaeh noh dix hu sog Nbun yam an ndix, noh sang ndeeih hu sog Yeix Yung pao. Noh hoig daeh houig gah yaong Ba Raog, yaong Mian yaong Hox gu yaong, daeg hmoung oud Yeix Yung gah yaong Lang Meng. Yeix Yung oud gah ndaex
rang.

Noh dom yaog loux ngeei ah:
Yeix Yung eui,
nbioung ex gah maix,
nbioung ex gah maix,
ex hoig daeh sog maix gu mgong gu lua,
hoig daeh houig gu nyiex gu yaong,
daeg boun yaox maix in si ngaix.
Moh ex ba lud ndum blai dix ndix,
niex nang, soung nang,
moh ex ba gah maox vien ndix,
bloung dom nkruah [**],
vieh hrom va hri gah ex jeeix.
Niad maix ndeeih ing mai ex gah nyiex.
Nbioung ex gah maix,
nbioung ex gah maix,
Yeix Yung eui,
gon brah ex gon nyom gah nyiex,
gon nyom hoig nbioung gah Miex dix .
Jaox hrom gah gon nyom jeeix!
Niad maix ndeeih ing mai ex gah nyiex.

Loux ngeei loux you hoig si ndaeh si aox [**] ndaex rang oud Yeix Yung, Yeix Yung goug hmoung loux ngeei loux ba you Quing Dang, noh dom goug nplian gaing dix mai ah loux ngeei:

Nbioung ex gah maix, Quing Dang eui,
eix hoig moh ba lih kaing ndaex si mgang dae,

eix hoig hu gom boud kaox daex mgei dae ndix,
eix hoig hu dae boud ndaex bang muah.
Viang moh nan, moh maix, hoig moh maix ox,
Maox si nbaeg moh maix ba dad noh ndud,
dai blie ba hmom kou moh maix ba ndig noh laix.
Maix sang gieh ax ndeeih moh meix mouing,
ja boun nbleed Meeig Sang laig ndaex vaig dix,
Bui hoig yum jix ndeeih glod ....

Quing Dang hoig ndaing laex hrom pao, noh vaig ag, nyon noh see Yeix Yung dein. Hoig buing nbaox buing, dei ba gog noh dix meeing [**] hoig nyao buing uig, gah ang nbaox groux buing Yeix Yung rae. Kaix an noh hoig mgouih noi ngie dix biang diex, sae loux yiam dix. Loux yiam noh hoig si aox ndaex mgong ndaex lua. Yeix Yung nbaox yaog dix nplian gaing dix kaing ndaex rang mai ah:

Bo maix jod rom ngai,
bo lai yuh maix ndai hrom ged.
Bo maix yuh dix nbioung gah ex,
niad maix ing gah nyiex Quing Dang eui,
yiam Si Log gix did, dox Lig Soux maix som,
nbog Jag Jom gix did, nyo gon braix ax id hmom hmom"....

Quing Dang hoig ndeeih houig gah Loi Noung, doung hriam rom ngie nan, yaog dix nyon gah ndieb hrom Am Ying, Am Ying riag ngie dix mgum yum mai.

Kaix an, Yeix Yung hoig yum gah guad dix ndaex Hag Diex A Lang Meng, kaix hoig yum dom dieh lih moh ndaex mo mae.

Nbeen lao Hag Diex Si Moung
Suix Ga jao lao
Ai Dix giex Jang Kai Dax jao diam

Bux Aig A Liah Gaex

Ndi ndix, nbog yam hoig ndaing gin hreeng dix dei, goui bux aig a liah gaex, gix moh Geeing dix mu Miex dix' mu, kee nin, ngai nbaoh mgrang mgrei [**] gix dom njiad om baox dix. Dom ngai njiad lom lei ngie om baox, gaex hag njiad ding mu joung njung om baox. Gieh eix mgaig gix, mox moh bux, mox moh bux gei ang lai dong. Gix hoig hmom hrom hmom hri log baox dix, hrom gix njiad log ba hoig yuh gah kri yuh nan, hoig riang si ngi ngie gu gaex. Kom moh nan, gieh eix lih dix grai lao nqom gix mai jee ba muih hrom gix, ang om baox dix. Ba gaex Ai ndaing joum hrom, rian mgae rian hein dix gah gu jee, ba gaex Nyi ndaing hang hrom hri, jix ngeei jix nkraoh, ba gaex Sam, muih dix jie Nbrung, jix nbrag jix hliao Nbrung, ndaing gua, ba gaex Sai, ndaing goui hrom gah rom, muih dix oud ndee si ngax ndee nblang, ba gaex Ngaox, Loug, Jiad, ndaing goui hrom gah mgong lua, rib riam. Hu gix gah mgong gah lua hoig mgaex ngie gah. Viang moh nan, Ngaox goui hrom gah gaing sum kaox oux, Loug goui hrom gah gaing liang Moi gah mgong gah lua, moh ngie Jiad kaing, noh si mie dix boun goug nbuan Hag Diex kom uig. Kee nin, noh dom rian hu gah doun mgong ndee hlaong hlaong, goug nbuan Hag Diex dom ndee si ngai.

Bux aig a liah gaex hoig dang ding pao, hoig lih dix moh Bui hlag Bui hliao gu gaex. Goui dix ngaix, Miex Geeing gix goug gix hoeing [sic - houig ?] mai ah nin gah gix: "Gon ex beix, beix hoig dang ding dang hlaong dix pao, hoig glod dix moh ndim im dix moh Bui pao, jo dix dang hu gah biang Hag Diex ba vieh ba va in pao, ndih bruig beix dang yaog dix bu pao heui. Bu beix hu gah ndee sang ged beix dix oud. Viang moh nan, beix briex dix .dong ndaex hrom dix hmom hmom o! Nbrie beix bu houig ndee mox ang ah, jo dix sae riang rao dix njouih nqan deem joi Gon Bui, kaix gao num sax, beix dang viex kong pag lag song ba nbloun hmom houig mgaig gia yix ox!"

Bux aig a liah gaex hoig grai hu kaing Miex Geeing dix pao, mgaex ngie kom hu dix gah biang Hag Diex ba vieh ba va in. Gix hoig ndaing yaox gu jee gu jong, jee ba ang sax yaox gah hoig yaox heui, hoig ndaing yuh gaing hmom miex nding mox nieh. Goui dix ngaix, gix houig gah Hag Diex ndaex doung ndaex meng ndee pin [**] ndee si ndom dix ndaeh, yaox ngie moh rib riam ba naog ba guah ndaex kaing, goui Gon Nbun Grih dix gaex ngom ndaex diag rib, klao nang rib yiam nang mai. Bux aig a liah gaex dom qog: "Nbun Grih eui, geem yiam maix kee ba dix?" Nbun Grih ndeeih bog ah nin: "Hngoux ba sum ex rib hoig keem noh uig heui, rib riam hoig guah hoig lang, ang lai uig riam, mgaig dix yaox, rian dix jai hrom num in." Bux aig a liah gaex hmoung ah noh nin, hoig ndaing jaox hrom gah noh, Ai dom ah nin gah bux dix: "Gieh ex oud dix deem mgo noh kaing, ex sang ged blag sang baog dix dig rib in gix, gieh dou ma hmom guah kaix."

Kaix hoig ah noh nin, noh daing dix laig ndaex diag rib, niad dix hlao rib.

Bux aig liah gaex grai hoig hu dix gah bux gei dix, nbaox hu blag si veui ngai dix, hoig hu miex nkreeng mox nieh, gix houig gah braog hnong dix mu, yaox ngie yiam Nbun Grih gah braog hnong dix gaex, bux aig liah gaex ndaing ndaox gah, dom qog noh: "Nbun Grih eui geem yiam maix kee njao, dix?" Nbun Grih bog loux gix ah: "Miex Geeing ex hoig ndog yum dom yam iag o ex ndix, moh ngie ex noung dix kaing, kee nan, ex dom voi hrom laex hri gah, krum rom ngai nbai rom meeih njao. Jee dix ba moh grax mgaex hrom mgaex hri ang sax dong." Gix hmoung ah noh nan, ndaing jaox hrom gah noh, Nyi dom ah nin gah bux aig puan gaex: "Gieh ex oud dix ngu hrom ngu hri noh kaing. Ex sang ah noh hmoung lai ndaing nyom dix hngiad, nkraoh noh yaox jee nkraoh ndaing hmom dix yaox, gieh noh mgaex hrom nyom hri gah." Hoig ah nan, noh lug hrax loux ndaing nyom dix hngiad dix mu, Nbun Grih an hoig haing hiah [**] mgaex lei gah pao.

Bux aig puan gaex nbaox hu blag veui dix, hoig hu miex nkreeng mox nieh, houig gix gah lung diag rib dix ndaeh, yaox ngie ngom Nbun Grih ndaex diag rib dix gaex kom yiam dix. Bux aig puan gaex hu qog noh: "Nbun Grih eui, geem laex hrom maix kee jee dix? " Nbun Grih ndeeih bog loux gix ah "Gon Beix ba ndaing muih ex an, Soux La hoig mgiang noh hu, ang lai boun ndeeih deei houig, ex jix ang laex hrom gah ndee mox." Sam hmoung ah noh nan, yaog dix lih ah nin: "Gieh ex oud deem noh hu peed hu leui Gon Beix ndeeih houig." Hoig ah nan, noh yaog dix vua dix biang Nbrung ba som rib oud liab gix an, hliao Nbrung dou blag goug ji Nbun Grih an.

Bux aig boun gaex yaog dix hu kaing diag rib, nbaox hu nang blag si veui dix, ang nbaox goui miex nkreeng dix, gix houig gah braog glong dix mu, goui Nbun Grih dix gaex si ndaex si nbeix braog glong, rom ngai noh uig joud joud ngie ndaex glong. Bux aig boun gaex hu qog noh: "Nbun Grih eui, krum rom ngai maix kee dix?" Nbun Grih ah: "Ex een ngie hrom dix gah riang deem Bui si ndaex graeng. Beix mgaig yaox, si ngaix hoig glib pao, ex gon ang nyang hoig si ndaex si nbeix, sang yuh gah mox box in?" Gix hmoung ah noh nan, ndaing jaox hrom gah, Sai dom ah nin gah bux aig loui gaex: "Beix ja nbaox hu hang, ex log oud deem mgo noh si ndaex graeng." Hoig ah nan, noh yaog dix puad daix si nbeix dix, puad jaong klax dix, yaog dix puih dix lih ndaex rom ah "blom" nan mai deem joi Nbun Grih an si ndaex.

Bux aig loui gaex nbaox hu si veui ngai dix, hoig hu miex . nkreeng mox nieh, houig gix gah mgong hlaong mgong glai rib dix mu, gix loui bux aig mgaex ngie kom hrax dix lai. Nbun Grih dix gaex hmoung loux lai hrax gix, dou lih kaing ndaex diag qax mai ah: "Gon Si No eui, deem joi ex jeeix, beix mgaig yaox, rao qax ba on toi toi [**] in gix, hoig sang niad dix riex hu si nbie, ex ang hoig jaig uig." Gix bux aig loui gaex, dom dou hu deem joi noh boun qax. Yam daeg jaig gix rao qax, bu bab goug hmoung loux kiad [**] loux you gah mgreng mgong ah:. "Houig deem ex, houig deem ex! Si Vai houig giad Bui ox." Bux aig ra gaex dom ah nin gah Ngaox: "Maix oud deem noh boun qax ndee in, yiex ra gaex hu mgaig yaox! "Ngaox hoig ju noh, Loug mai Jiad dom yaog dou hu blag loux you. Houig gah mgreng mgong, Nbun Grih ra gaex houig kom daeg dix mai ah: "Niad houig, Si Vai oud gah ndaex bang kaox veui eix ndee in! "Bux aig ra gaex yaog dix leed ag viex dix lih, sae hrom vao dix hu blag bang kaox, Si Vai ding dix. mu lug daeg sang lih kaing ndaex bang kaox, giex yaog dix vaig ag sae dei, nyon noh gah Si Vai ah "klag kleg" nan ra daix, dei hoig jieh jieh nyiex grei Si Vai kom ra daix, Si Vai ba hoig mad an uig mgraox ngie ah" ox ox" nan dix mgum, yaog dix dou hu biang mgong kaix. Jiad ah nin gah bux gei dix: "Bo man dou! Bux gei eui, maix oud dix bae noh ndee in, ex hod peed noh gah biang mgong laong" Nbun Grih dix gaex dom viex noh hod dix peed, hod dix si mgo kaix noh houig gah biang mgong, viang moh nan, ang lai yaox Si Vai, giex mgiex ag jung gah biang mgong hlaong hlaong, ja sog boud ndee moux ndee mglaig. Si Vai dix, njaeh dom kaix an ndix, giex dom gud dix oud gah biang mgong kaix.

Nbog yam hoig goui gao num pao, bux aig a liah gaex mai Nbun Grih a liah gaex hoig moh meix mouing. Gix hoig mgaex hrom hmom ngai mai viex gon braix dix ing mgaig gia Miex Geeing dix. Bui kom nyiex hoig raog rum [**] mgrum proig [**] dae, Ai yaog dix dox si mgleem hngoux hleng log kri an dix si mgleem gah Miex dix, in dom moh kong pag lag song jie noh heui. Nyi yaog dix dox ding ba ndaing hmom loux rong loux, Sam dox jie dix brux ba ndaing si ngax si ngeih, Sai dox jie dix si nbeix ba hmom, Ngaox dox jie dix qax npong qax nyom, Loug dox jie dix Moi ding Moi hmom. Kong pag lag song jie Jiad nie nbloun hmom, moh ag ba hmom blang si ngi lug lag ngie dix bang! Miex Geeing hoig mgaex ngie kom ah: "Gon ex beix! Ba yuh beix hoig ndaing hmom dix dei heui! Niad dix dox ex mgaig gia gon braix beix hang." Gon nyom a liah gaex hmoung ah noh nan, uig bu bab goug ah: "Dax eui, Yiex eui, Dax hoig mgaex hrom ngie gah kom bu bi haeg nqeeih dix mai ah" Gon hmom ex eui, ex sum jee gaex beix kaing!" Gon nyom a liah gaex hoig mgaex ngie gah.

Dax ah nin gah gon Ai: "Maix gaex Hox! "Ah nin gah gon Nyi: "Maix gaex jie dix Bex kaing!" Ah nin gah gon Sam: "Maix gaex Yix kaing. Gon Sai gon Jiad an gix dang sum gaex: "Dai. Ai Nyi, Mian mai Gon Vax."

Kaix an, bux aig a liah gaex grai hu dix kaing Miex Geeing dix pao, ndeeih ing gah ndee oud ndee goui dix veui an, nyiex gix nie oud nie hun pao, nie oud nie ding pao, hoig lih brei dix moh a liah jee Gon Bui, dom moh Hox, Bex, Yix, Dai, Ai Nyi, Mian, Gon Vax in si ngaix, gix hoig muih hrom nyom oud nyom goui mai baox dix, ih hrom hri si ma baox dix, hoig log ngie bux aig gon Geeing dae. Veui an hoig ndog moh boud nyiex dix hlang brang dix mu ndix!

Nbeen lao Hag Diex Si Moung
Kang Fux Kuing jao krom

Mae Dieh Dix Moh Miao Baing

Ndi ndix, goui Jao Mi dix gaex, noh muih mae log muih dou gaex dix yuh nan, ndaing si nbian hrom. Bui deem nyiex gix yuh gaing yuh nqo goui ra gaex, gaex Ai Lang dix gaex, gaex Ai Loung dix gaex. Giex deem noh yuh gaing ling kix ling num.

Goui dix num, nbog yam yuh Bui nyiex kraox hoig houig pao. Bui hoig dang jaing dix ih graeng kraox graeng louh: Ai Lang mai Ai Loung hoig daeg hoig mao ling kix ling num, gah ged nang sang jaing dix ih si nbeix kraox graeng kraox. Kee nin, giex dom hmaing riang dix gah Jao Mi. Jao Mi ba gin si nbian hrom an. ah nin: "In pao mae ang nyang goui, njun ha." Hoig ah nin, nkre giex lih kaing nyiex kaix. Giex hoig ndaing meed hrom ngie mai lih kaing nyiex Jao Mi.

Ai Lang ndaing ang lai boun yen, dom ah nin gah Ai Loung: "Ja moh ax hrom dix mu, yuh Jao Mi yaox nqom ha, mae jix lih kaix. Ndaex kui ding nyiex gix an geem dong maix noh lieh? Ba een gix ndaex kui an moh mae mgiex mgiex ox."

"Moh heui, Bui bae mae ra gaex rian dix id blag biang an." Ai Lang ged njee ged nblaong noh, deem nbriex goi ah nin mai hyaog Ai Loung: "Ax yuh nin. "Ai Loung ngeeh ngeeh ga ing dix gah. Ai Lang mai Ai Loung dang sog nbruing [**] dix gaex dix nbin, sae noh ndaex brux id jao bae mae. Houig boun som, nbruing giad jao bae mae an giex dom uig ang giex lai nyom id nyom dum. Yuh nin, giex dom ndux ndee id dix. Kom moh nan, kui gah ja gon so boud dix gah so hriam liex, ang dong geem een gag so ndee mox. Giex ged njee ged nblaong, dom deei kaox dix mgong baoh so an ah" kliag" nan. Bui bae kui mae haing gah loux luah so. Lai jei moh Giang ba viex gag so hu, bu bab doug ngu gia noh, kui gah ja gon so boud dix, mgaig gag so ba hvag gah nding, gag so gah ja gon hvag boud , dix oud gah nding, giex daeg ndeeih id kaix. Gag so ba dag deui gah nding an, Ai Lang mai Ai Loung hoig yaox noh pao. Giex ra gaex dom nbriex goi hu deei ngie gag so baoh kui, deei aong [**] ra mu sae mae ndaex kom uig. Kaix an dom mgiex Miao Baing ding dix mu laeng noh ndaex kui, ndeeih so si viex kaix.

Braix hoig sang riang pao, Miao Baing ding an hoig jai hrom, lu lax ngie njee nblaong ndaex kui kaox an kom bin kui gah hngim dix, gieh kui kaox an uig luah ah" Grad, Grad" nan, Bui ba bae mae hmoung loux luah ndaex kui, gaoh ngom gia, yaox gon so kui kaox dix, gag so gah ja gon dag deui boud dix gah nding. Miao Baing hmoung loux luah blag braix, ang lai quh, yog dix ndaex kui. Bui bae mae hoig hngiad noh hreeng nyao, ang die hmoung ba did dix, nbaox ndeeih id nang kaix, njun dix vud, Miao Baing ding an nbaox ah loux dix kom bu baig ndaex kui. Bui ba bae mae log uig ang lai laig id gah loux luah Miao. Giex ndaing ndaox gah, dom bu bab sou Jao Mi gaoh.

Yam an, Miao hoig ndaing gin jai hrom, hmoung loux luah blag braix gah ang lai guang heui, noh sae riang dix lu lax njee nblaong ndaex kui. Jao Mi hmoung loux luah, gah uig ki nang gah. Geem moh ba dix yuh nin liex? Niad dix hmaing jao bae mae baoh kui."Miao" nan, Miao Baing ding an daing dix lih kaing ndaex kui pao, dou hu blag braix kaix. Jao Mi uig yaoh ngie gah, yaog loux bao dix ah: "Niad houig, mgiex noh! Mgiex noh!" Mgaig ndaex kui, mae ang lai goui. Noh uig mgouih ngie gah biang diex yiam ah "eeih eeih" nan kaing. Mae jie Jao Mi hoig dieh dix moh Miao Baing ding pao.

Nbeen Lao Hag Diex Si Moung
Qeng Qiang Ling jao krom
Ai Dix jao joux diam

Bux Gei Ang Hmom Hrom

Ndi ndix, Hag Diex Meng Ba Raog goui Ba Raog dix nyiex. Nyiex Ba Raog in goui ngie bux aig ra gaex mai geeing hoig guad nan dix gaex. Bux Gei moh Bui nieh, jix ih ang hrom yuh, moh Bui qi hnyae, gin nqom. Bux moh Bui rian Bui raeh hrom, hmom hrom, Bui hman Bui see daix jix buing.

Goui dix num, mgong Ba Raog si npom gah briex gah breem, Bui jai hrom jai hri gah si npom braix, daex diag daex du blix kaox blix oux hoig nyao gah deei Bui dix ih. Goui baox blog baox hnyom dix gaex hu doh mex [**] da (maox si nbaox ah eix) ndaex diag gu si ngaix, ndaing noh moh maox hu jouih noh ndaex laih ndaex jae, louh. dix ih briex breem gah kaix. Kaix hoig dong giex bux aig ra gaex noh, dom hu qog hu mgae dix gah. Bui baox blog in dom ah nin gah giex: "Ex hu qui [sic ** ?] mex (jouih maox ah eix) louh briex houig gah." Ba moh Bux Gei lud hmoung loux grai baox blog an, qui mex in lud hmoung noh lai jei moh jouih Geeing dix. Noh ged nin: jouih Geeing, jouih Geeing, hoig jouih Geeing goui briex ih pao. Si ngaix kaix, noh piao Geeing dix gah maox, sae noh gah ndaex qee, goug Bux dix houig, yaog si mgrong hu jouih Geeing dix ndaex laih. Si mgrong houig mgrong grax, giex yaog dix laex dix num kaox ding dix mgo. Ndum mox ndum an, hmoung loux nyei gon Sim biang kaox, giex yaog dix nbliex biang kaox, dom moh Miex Sim viex gug gah nqeeih dix, houig dix dox gon Sim ba ang nbaox guah haeg ba gon oud ndaex hmeem an ih briex, njao hoig ndaing gin jai hrom gon Sim, gon Sim dom ja ah boud loux dix. Geeing ba hoig sae giex ndaex qee an, gah hmoung nang loux nyei loux riag gon Sim, dom qog gon dix: "Gon eui, geem hoig yaox bax jee ba dix?" Bux jeen grai Geeing dix hmoung. Geeing hmoung ah noh nan, yaog dix hngeeing [**] dix mgum mai ah: "Moh liex, yam iag yam o beix, gah hoig log gon Sim ba ndaing jai hrom an, "u nga, u nga" nan si nqeeng, ex mai Miex maix gah hoig log nang Miex Sim ba sog gug an, dou njee nblaong gah njao sog beix ih briex breem, beix dom daeg jix ding huan gu si ngaix. Log si ngaix, bax lai yuh gaing ang hmom, hu jouih Geeing dix, beix ged yaox, jo ang jo dix yuh yuh nin lieh?"

Kaix hoig hmoung Bux ah Geeing dix loux in, uig ndaing gaig ngie gah mai yaog dix yiam, noh dom yaog dix gah moing qee, bloi Geeing dix lih.

Goui dix ngaix, braix glong hoig si aoh si eem [**] ngie, Geeing hu heem dix ndaex rom glong, noh daing dix ndaex rom, rom glong viex noh si man. Bux aig ra gaex ang yaox gah houig Geeing dix, dom hu sog gu si ndaeh. Kaix an gix yaox si nbeix Geeing dix gah braog glong, daeg dong Geeing dix hoig si man yum mai rom. Giex ra gaex dom puih dix lih sog nklaog Geeing dix ndaex rom, yuh nin, si niag rom glia giex laig ndaex rom sein, njiad daeg moh yam goug yam you giex Bui houig deem dix, ndum mox ndum an grax ding grax vieh hoig lih goui si mgreng rom dix nyaing. Giex ra gaex dom long grax ding an hu, veui giex hoig lih goui nyiex ho nyiex hang, nyiex nbeng nyiex kri dix hlang, hoig hleng si ngi song ngie nan. Gah moing si viex veing, gon Gax gon Dam uig ju qai [**] ngie, ba lih lih, ba hu hu, ba houig houig, si nbua ngie. Gah ndaex si nbeem dai oud braog nyiex, goui Dax Guad dix gaex ngom ndee an kom yod log sub. In uig moh Geeing ba sog giex heui. Giex bux aig ra gaex dom hu qog gah Jao Si Yong, yuh ba dix naix een Geeing gix ndee in, giex ra gaex hmaing dix ndeeih bux Geeing dix ing gah nyiex. Bux Gei yaox ndaing haoh mae kri ndaex nyiex Si Yong, dom hmaing Si Yong dox riang hoig sog Geeing dix gah mae kri in, Si Yong hoig ox hoig ee loux ba rog ba hmaing noh. Bux aig ra gaex uig mgaex ngie mai hu kaing nyiex ho nyiex nbeng an. Yam ndeeih lih giex haong [**] ndaex rom blag braix, Geeing giex hoig ndeeih lih moh Bui yum Bui hoig gaong. Mae kri ba gog ba beeih giex dieh lih moh loun hmaig.

Bux Gei mgaig noh, ndaing gin meed hrom gah, noh sae hrom hri dix bog nbix gah Si Yong, noh dou ndaex diag kaox ding noung raex, yaox Bui Si Yiex, rog hmaing noh deem joi dix. Bui Si Yiex deei nqaeh dix mu dox gah noh, hnie noh viex hu ndeh nqaeh braog glong, Bux Gei viex Bux dix sae riang rao dix leed nqaeh. Dix vud kaing npaeng ding uig lih gah biang glong, npaeng plu si niag rom ding ngie, hoig bu bang yuh nyiex Si Yong. Si Yong uig ndaing gin ki hrom gah, dom bloi Dam hu mgaig Bux aig ra gaex, hmaing giex bo lai leed nqaeh, Bux Gei ang hngiad, nyon daix dix gah Dam, dog gaing Dam dom uig ndib laig ndaex vaig, gaex hag hoig ndib ngie kaix dog noh: Njaeh dom kaix an ndix, gaing Dam dom ndib oud ndaex vaig ling nju ling pan, dou gaex noh gah hoig dieh lih ndib ngie yuh nan.

Si Yong nbaox jae nang Gax ding gaing hu gieh, gaing Gax ding gaing gah hoig ndieh ngie kaix dog Bux Gei noh. Njaeh dom yam an ndix, gaing Gax ding gaing dom lih om ngie log duh ndiag Bui daex yuh nan, ndib ngie. Si Yong nbaox bloi nang Gax baing houig dix gieh, gaex Gax baing gah hoig ndieh ngie log vaig sid Bui daex yuh nan kaix dog Bux Gei noh gah si ang grong vaig.

Si Yong nbaox bloi nang Gax raoh si ndax houig dix gieh. Giex dom jeen mgiex im Gax raoh si ndax houig, sae ndaex log oux, sae riang dix rang hreh log oux, Gax raoh si ndax dom iag ngie, lom lei ngie houig dom si ngaix.

Houig ndee nkoig, bux aig ra gaex hoig daeg hoig mao gah, Bux Gei ged hoig bog nbix gah Si Yong pao, dom naox leed nqaeh pao, gah biang rom hoig yog hoig yian ngie pao, npaeng ang lai lih, si niag rom ang bu bag. Njaeh dom yam an ndix, giex bux aig ra gaex dom oud braog glong ding kaix.

Goui dix ngaix, Bux Gei ah sang yuh re dix mu. Giex dom gid kaox houig dix mgo, lug noh goui boun bag, yuh nin, gix lai uig ah moh re pao. Goui Dax Guad dix gaex houig ndee an yaox noh, dom grai giex bux aig ra gaex hmoung: "Re, jo yuh gaing lom kom ra blag, siah kom ra blag, si mgreng gieh ding ngie, ndaex vaig gieh yi ngie, kaox vai re gieh log nblax yuh nan." Giex hod yuh noh log loux grai Dax Guad an pao, hoig jix yuh re hoig. Giex ngom ndaex re, vai noh gah kaox vai re, re uig hu blag veui ngai.

Goui dix ngaix, giex bux aig ra gaex ngom daex re mai miad Gax, Bux boun miad Gax ding si ndu boun Gon Lig dix mu, Bux ah sang ih neix Gax doung gah ngu, Bux Gei ah sang, ih neix Gax niex im, du tiang nblaong loux baox, ang jix mgrum loux gah. Bux Gei ged nbeen sang yuh noh lih dix jee, jeen mguah neix Gax goui ra soun, dang yuh dix ih. Bux Gei deei Gax gid noh gah vaig. Mox sang dong box qaox nie sae noh riang dix, dix daix kaing kom Gax kom re hoig ndud lih moh ra blag gah sae noh riang dix gid. Lih dix grai, miex ndaox miex ndeing, Gax ba hoig ndud goui ra blag an, njiad gon jix ndeeih toux ndee hoig ndud re hmom, ang gieh rom boun laig ndaex, dix blag jie Bux si nbloui hu blag lih si ngaix, re dix blag jie Bux Gei si nbloui jie dix hu blag glib si ngaix.

Re jie Bux Gei si nbloui houig gah braog mgong blag glib si ngaix. Noh yaog dix haog gah . mgong, gah biang mgong yaong ang goui, Bui ang goui. Ang nbaox goui miex nkreeng dix, noh deei Miex Rao Kaox dix mu gieh moh mouing dix. Kaix an ra num, Miex Rao Kaox ding in geih Gon Nbun dix gaex, haeg ngie kom njung dix. Njaeh kaix an ndix, jee Gon Bui hoig boun dix goui ndaex diag ndaex du. Re jie Bux si nbloui 'hu blag lih si ngaix, houig gah yaong oud braog glong dix mu. Ndaex yaong in Bui yian ngie, kix ngu ang goui, ang hmoung loux soux loux ux ia gah. Bui oud ndaex veui an, hoig nyao gah ih Glang ding jai hrom ba oud ndaex rang dix, nbrie kong gah hoig nyao gah ih glun ding dix. Gah ndaex yaong ndeg ngie Nbun Grih hmom mgrang on nju ra gaex ba moh Bux giex Bux Gei. Ba ou ra gaex in giex, moux dix gu si ngaix, ang boun daeh, ang boun yuh ih briex breem. Bux sae hrom dix baeh Glang ding ba jai hrom oud ndaex rang mai Glun ding bag ngie soun Gon Bui. Noh dom qog Nbun Grih ba ou ra gaex an: "Geem sang ih eix jee dix gah, daeg boun ndo Glang ding mai Glun an lih liex?" Ba ou ra gaex ah nin gah noh: "Ja moh daeh eix mgaox mai plu eix ngu, hoig boun ndo Glang ding jai hrom mai Glun ding an lih." Bux hmoung ah giex ba ou nan, hmaing giex ba ou moux dix, dou gaex noh plu ngu ndaex yaong. Lug moh, Glang ding jai hrom an gix yaox daox ngu, hoig bu si num ngie houig blag yaong. Bux sae dei, buing noh, dei hoig groux Glang gu daix, ang nbaox goui miex nkreeng dix, Glang ding jai hrom an gix hoig nyao yum bag ngie. Noh nbaox daeh mgaox, loux luah bou hoig si ndaeh gah ndaex noung ndaex yia. Lug moh, Glun hmoung loux luah bou hoig laig ndaex yaong uig heui. Bux ang hlad ang mgraeng, nyon ag gah Glun, daix liang njiad dab gaing Glun, jieh gaing Glun oud mai diex, kaix an, noh nbaox loi gah gaex Glun ra loui daix, Glun ding hoig nag ne ngie dix gah biang diex kom yum dix. Njaeh kaix an, yaong Ba Raog ba oud gah braog rom in, hoig blaex in gix uig ngie, daeg yaox dix nyom oud nyom goui pao.

Ba ou ra gaex, soun sang hnyab hrom hnyab hri Bui ba blaex Glang blaex Glun, dom rog hmaing Bux laeg dix mouing giex dix gaex gaex. Bux hoig ndaing gin hnyab hrom hri ba ou ra gaex. Viang moh nan, noh ndaing gin jei si mod Bux Gei dix, dom grai giex ba ou ra gaex hmoung, sang hu sog Bux Gei dix ndeeih houig, gieh Bux Gei mouing ba moh Bux Gei Nbun, noh log yuh meix Bux. Ba ou ra gaex hmoung ah noh nan, nie si ndaing mgaex hrom gah, hmaing noh niad dix hu sog goug Bux Gei dix houig.

Bux yaog dix vai re hu blag mgong mglib si ngaix sog Bux Gei dix. Uig yaox Bux Gei dix ndeix dieh dix lih moh Bui diag. Bux grai noh hmoung mgroh mgrong ba hoig yaox hoig yuh dix, njom yam hu Miex Rao Kaox mai gon Rao Kaox sog dix ih briex breem ndaex diag ndaex du, giex bux aig ra gaex dom nbrug re nbriex dix dou. Giex ra bux aig houig gah yaong oud braog rom, dang yuh dix mouing ba ou ra gaex an, grax oud grax goui gah hoig son ndaing hmom.

Si ngaix som dix ngaix hoig dix ngaix luan hu. Viang moh, nan, ba moh Bux Gei in gon ang nyang naog hrom gah. Noh ged nbloun hmom mouing Bux kaing mouing dix, on nju hmom mgrang nang. Ndum mox ndum an lih ged nin dix jee, sang baeh Bux dix yum, jax mouing noh kaix.

Goui dix ngaix, giex ra bux aig hu peed diag. Bux Gei gieh Bux dix daing dix laig ndaex ba sang gieh Brieh laig gah ndaex sien, ndaex gu in ndaing raex ngie ang ndoud dong nbleeih ndouh houig nyiex Si Yong. Bux daing dix laig ndaex rang, hoig nbleeih houig gah dom nyiex Si Yong, Si Yong yaox noh yaoh ngie gah, dom qog noh: "Maix jix ndeeih houig yuh gah mox, moh houig maix dix hmaing mae, moh houig maix dix hmaing kri? "Bux dom nbrei dix grai lao noh hmoung mgroh mgrong jee ba hoig yaox hoig si nbub dix kom uig, mai gon rog hmaing Si Yong deem joi dix. Si Yong hmoung grai lao noh mgroh mgrong in, ndaing jaox hrom gah, dom ju dix deem joi noh.

Si Yong bloi gon Gax, bloi Dam hu dox noh. Hmaing Nbeei Oux ba bae moing ndaex rang bux noh lih kaing ndaex rang. Veui sang hu noh, Si Yong dox njeeb mgian kri gah noh dix daix mai iab mae dix mu. Kaix hoig houig noh gah nyiex, hmaing noh jeeb njeeb mgian kri gah mgian daix mouing dix, kaix an gieh mouing maix baoh iab mae in gah ndaex ngai Bux Gei maix. Si Yong ah nin gah noh: "Briex ndaex hrom maix hmom, ja moh yuh maix noh yuh nin, Bux Gei maix jix jo jee ba jo noh dix boun. Maix jix ndeeih yaox grax nyom oud si u goui kaix." Houig gah ndaex rang. Nbeei ding bux noh hu gah moing ndaex, moh kee njao ndaing gin hlaong ndaex, hoig haog noh miex nbog mox nieh, ang noh dong gah sang haog dix. Nbeei ding hoig ged noh lih dix jee, yaog dix baeng ag leih, (siao) kee nan, sim saig jan ba ndaing muih dix hrax lai hoig nbioung hrom gah loux ag leih uig mai houig ndee an kom uig. Gon sim gon saig houig dum gah gag oux oud mai moing ndaex si nbua ngie, mai nbrei dix hngiad loux ag leih, hoig beei yuh gag oux dom ndeix moing ndaex, njiad moh yam an, Nbeei ding dom nbreg gag oux diam mai moing ndaex an mai yaog dix lih kaing ndaex rang. Njaeh dom kaix an ndix, rao oux gag oux dom beei blag diex dom si ngaix.
Ba Bux hoig lih kaing ndaex pao, ing blag nyiex, si ndaeh mouing dix gah braog yaong yam hu noh rom. Mouing noh yaog dix yiam mai grai noh hmoung, kaix hoig mgrai noh kaing hu peed bux aig ra gaex diag ndix, Bux Gei houig gah nyiex, mgiex laeng Bux Gei Nbun ndaex nyiex, kin dix hmaing noh moh mouing dix, mouing Bux yum im ang ndouh ju, Bux Gei ang boun dud hrim [**], dom goi njun dom ndeeih mouing Bux hrom dix.

Ba Bux hmoung loux grai mouing dix, ndaing aoh hrom gah. Dom nbrei dix lao mouing dix hmoung mgroh mgrong mglub gah Bux Gei dix, nblon ndaex rang dom houig gah nyiex Si Yong, Si Yong deem joi noh, kaix an, dom deei njeeb mgian kri jeeb gah mgian daix mouing dix, sae iab mae gah ndaex mung rom, mouing noh houig kaing beeih rom pao.

Houig gah nyiex, ba moh Bux Gei si meix hmaing nkoug dix grouh gah sang nyaex nie rom, hmaing dix nyaex rom, mouing Bux dom sae rom ndaex dog kaox dix dog dox noh nyaex, njom yam nyaex noh rom ah "glug glug" nan, mouing Bu dom houi iab mae kaing ndaex rom mung mai baoh noh, mgroig [**] mae hoig dang lih kaing ndaex iab mae miex nyao, mgroig nkog Bux Gei, gaex Bux Gei noh. Bux Gei uig mgouih ngie biang diex ah "nplob" nan kaix, lu lax lu loig mai yum dix.

Bux Gei ba ang hmom hrom an hoig boun jee ba jo dix boun pao.

Yam an, Bux hoig houig pao, giex meix mouing bloi Bux Gei Nbun ba laeng an lih. Njaeh dom kaix an ndix, giex ba ou dom oud dae mai ba moh Bux. Giex meix mouing hoig ndaing jix gia jix ngian ba moh Bux Gei Nbun, gix Bui dix nyiex ndaing muih hrom baox dix mai nyom oud nyom goui.

Nbeen Lao Hag Diex Gaeng Liam
Yeix Fou jao lao
Yang Jox Mo jao krom

Bux Aig Ra Gaex

Goui bux aig ra gaex, Ai moh Bui ndaing god hrom, Nyi moh Bui ndaing raeh hrom, giex eei Moi dix mu, Soux dix mu.

Goui dix ngaix, Ai ah nin gah Nyi: " Nyi, ax ra gaex mguah nyiex dix kaing."

Nyi ah: "Geem sang mguah dix yuh gah mox box?"

Ai dug Moi an mai ah: "Ex nbluh gaing Moi, maix nbluh si ndax Moi, mox boun nbluh dox Bui an jie."

Nyi ang nie loux, ah ngie: "Hmom, mguah yuh nin box."

Ndee si ndaeh, Ai boun nbluh Moi hu. Nyi jie Soux.

Nyi ang goui Mai, dom hu tai ma gah Soux. Yam an, goui Bui jouih jai lai mgee dix gaex yaox noh, ngiah ngie noh ah: "Hoig daeh guang ex Hag Diex gu si ndaeh, ang sax yaox Bui tai gaeng gah Soux!"

Nyi ah: "Maix ja mgaig, ex tai gaeng gah Soux."

Bui ba yuh lai an, ngiah gah mai ah: "Ang ex siao mgaig, gieh Soux maix lug jix tai gaeng dix dei, ex log sei maix ih Lo puan mu."

Nyi hmoung ah noh nan ndaing meed hrom gah, dom ah: "Bui ba yuh lai eui, loux ba hoig ah maix jo gieh moh dix dei ox!"

Hoig ah nan, noh dom yaog dix daing loun eeb si eui. Yam an, Soux ba hoig ndaing jai hrom an viex groung tai dou nkrom loun eeb an. Nyi yaox uig sang houig Soux gah loun eeb, ndeeih sud nbaox daing nang blag kaix, Soux gah hod si hnyab nang loun eeb mguax ndom. Yuh nin, daing blag an Soux dou si hnyub blag an, daing blag in Soux dou si hnyub blag in kom re groung tai. Ang nbaox goui miex nkreeng dix gaeng hoig tai dix pao.

Bui jouih jai lai mgee an ang lai dong gah ged dix, dom sei Nyi ih o puan mu.

Ai yaox goui Lo Nyi puan mu, ndaing ndaox ndeing gah, dom qog: "Nyi, geem deei maix Lo in gix ndee mox?"

Nyi ah: "Moh ba boun rao ex gah Soux!"

Ai hmoung ah Nyi moh ba rao kaing Soux, hoig raoh ngai ngie gah, dom ah: "Ax louh Soux gah Moi jie ex kaing!"

Nyi moh Bui raeh hrom hmom hrom, yaox hmaing Ai dix louh Soux gah Moi, dom ah: "Sang louh maix noh louh box."

Si ngaix an, Ai hod yuh noh log ba yuh Nyi, lu lei loun eeb miex nyao, viex Soux hu tai gaeng. Noh ja ngom ja njun boud Bui houig nbaox du loux mai dix gah braog gaeng, Soux ba hoig som sag an uig nieh ngie nan kom id dix biang diex kaing. Kom hoig moh nan, Ai hoig groux hoig njun Bui blag ngaix, gah ang nbaox yaox houig gog, Bui dix bie dix gaex gox.

Ai hoig ki ngie gah pao, noh ged: "Ex ran tai gaeng veui, mgad goui Bui houig du loux mai ex."Dom yaog dix sae graeng tai gah Soux, daing loun eeb.

Noh lai uig ged Soux niad yaog dix dou nkrom, kom moh nan, Soux an yaog ngie dix si mi noh dix daix ang lai quh lai mgoui kaix. Ai nbrie lai dog Soux gah kaox, hnod gah maox, nkre hu, Soux gah ang gaoh. Ai meed hrom dom dog Soux yum box.

Ai ndeeih houig gah nyiex, ndaex hrom hoig ndaing meed, dom ah nin gah Nyi: "Ndeeih dox Moi jie ex."

Nyi ang dong geem moh njao ba dix, dom ah: "Maix hmaing ex ndeeih dox ex gah dox, Soux jie ex hiex?"

Nyi hmoung hoig yum Soux, ndaing gin laex hrom gah, noh dou hu gah ma, ged dix sang si nbaeng Soux hmom hmom. Viang moh nan, houig gah ma yaox Soux ndee mox, yaox ngie guah oux gah gaing ma dix bang. Npaeng plu oux, oux lih luah. Nyi yaog dix bung bang mgo oux, yaox ngie jod loun kri loun mae kaing, Nyi uig mgaex ngie mai ndeeih ing houig gah nyiex.

Ai yaox goui mae kri Nyi miex nyao, ndaing ndaox ngie gah, dom qog: "Nyi, geem moh mae kri gaoh kaing ndee max miex nyao yuh nin?"

Nyi ah: "Ba bung bang gaoh kaing oux."

Ai hmoung ah jix jod mae kri kaing oux, nbaox ndaing nkoing nang gah, dom ah: "Grai ex hmoung geem oud oux mae ndee mox!"

Nyi ah: "Oud gah gaing ma nyiex eix ndee an, oux guah gah dix bang, uig moh an heui."

Ai hmoung noh, uig bu bab dix dou hu gah ma, mgaig noh, oux lug guah gah gaing ma dix bang. Houig npaeng plu noh, oux hoig lih loux mgraox loux si num. Ai yaog dix bung bang oux, ba krum kaing mgo oux moh ngie aing Soux aing Moi kom mu, hoig lih jod biang gaex Ai jux ngie kom njung.

Nbeen lao Hag Diex Si Moung
See Veng Dung jao krom.

Mun Qi Hnyae Dieh Lih Moh Moi

Ndi ndix, Moi ang sax goui gah "biang riag Diex, moh ngie Grag ba goui kaing, gieh moh nan, geem gaoh Moi kaing ndee mox box liex? Nbeen lao Bui dom ah nin: goui Mun did dix gaex ndix, njao qi hnyae noh gah Miex meix dix, Si Yiex dom log noh, gieh noh dieh dix moh Moi kaix.

Ndi ndix, nbog yam hoig ndaing giad hreeng, oud gah yaong mgong Loi Mu, nyiex did dix nyiex, moh gix Bui loui gaex kaing, Miex, Gon, Mun. Miex gix oud daing man gah nyiex, Gon hu yuh gaing gah ma, Mun noh oud yuh gaing nyiex, gix hoig ndaing nyom oud nyom goui dae mai baox dix kom nyiex.

Loux dom ah: "Ndaex Rao Ma ang jix ang goui hliex brei." Goui dix ngaix, Miex lih mgaig gah hoig houig Gon dix kaing ma, moh kee ang noh hiex rian hrom dix eui! Noh dom mgouih kaing mguh bug nyoi dix, ang lai boun quh mai. Yam njaeh dix, Mun noh gon viex nang hrom on hrom diam dix yaog noh gaoh mai dox noh ih siag briex ba ndeg kaix ih gix. Si ngaix som hoig hreeng, Mun yaog dix nyon loux nqax mai ah: "Guad ang jix yum yuh nin, sang yum maix niad dix yum kaing, eei eix Lig, eei eix. Soux eix gon yaox dix ih neix, sa, eei ngie maeng guad yuh nin, ndaing ang goui ndee siao, jeen yum, gox kaing, nyom hrom ex gah kaix." Loux in gix ndaing ang nyom dix hngiad bie jeeix gox. Moh ngie hu Gon ma gu si ngaix, jao hu hla houig, kee nin, noh dom ang dong gaing blag nyiex. Miex gah ang boun grai ngai Gon dix, sang grai, hlad giex meix mouing yuh si mah njao, an dix jee, noh nie hlad Mun dix hmoung loux grai dix, nie gin ba yuh gah dix kaix.

Mun yaox ang Miex boun grai Gon dix hmoung, nie gin qi hnyae nang, uig si mie Miex dix yum jao, noh dom nyon loux nqax mai dog nkriam Miex dix si nqeeng, Miex uig grox ngie gah njao yuh njao dog noh, ang lai goui riang rao bie jeeix.

Goui did dix ngaix, Miex daeg sang hmoung goui riang dix jeeix, uig jai hrom dom ah nin gah Mun dix: "Yuh maix gaing hmom liag, dox ex hreeb moig jeeix, ja maix jaox hrom gah hoig moh ex Bui sang yum." Mun an yaox nblaih Miex ngai dix, ndaing meed hrom gah, dom nyon loux nqax mai ah: "Dix ngaix ih jee in, ih jee an, nyiex eix hoig houd gah dang maix, mgaox ndee mox ba gon goui pao." Kom ah nan, noh uig si mie dix jiad nkoug Miex dix ndum mox ndum an gah gouing dix gah. Soun sang gieh noh Miex meix dix jao yum, hrom ged ang hmom noh yaog dix lih dix mu: "Heex! Ih moig, gieh maix la ngie rom moig." Noh deei ga mung soung kaing ndaex song, ngaig noh ndaex o diex dox Miex dix ih kaix, Miex daeg hreeb noh dix mgum kom yiab ngai dix, qaox nie soung dom dah gloung braog gu. Mun yaox ang Miex dix ih, nbaox lih hrom ged ang hmom dix mu: noh deei mgaox kaing ndaex kui, ngaig noh mai hyoun [**], dox Miex dix ih kaix.

Heex! Miex jei daeg sang ih moig an, Yiex Guad jaeng did dix gaex yaog dix houig si njaox, noh goug you Miex mai ah: "Ou! yuh gaing hmom liag, dox ex som eeb dix gloung, moh kee ang ex lai sax yaox dix ih ba did dix, hoig goui ndee mod dix puan liah ngaix pao." Njao moh Miex Bui on hrom, kaix hmoung noh loux in, noh dom ged nin ndaex hrom dix: a yih, hoig moh ex Bui ndeix sang yum pao, ex jix gon ih moig in yuh dix box? Nie jao yum nie hmom, jeen dox Yiex Guad jaeng ih moig in kaing. Kee nin; noh dom ah nin gah Yiex Guad jaeng: "Maix ih moig in ndaex gloung box." Mun noh hmoung loux in, uig hlad gix dong mgroh yuh dix, dom bu bab dix hu ah nin: "Ang jix, ang jix."Yiex Guad jaeng dom ah nin: "Bux ou, ang ex ih briex yie jie maix, goui si nbeix si mgraing gah ex dix peen, ax louh noh gah moig jix ang jix lieh?" Mun yaog si mi si nbeix an, a miex eui, log gon moh luad mai. Kee nin, noh dom ju dix louh mai ah nin: "Niad hu heui, niad hu heui, viex moig hu ih ndee si ngai mai."

Kaix hoig hu Yiex Guad jaeng, Mun uig bu bab dix jeeb si nbeix si mgraing an kom mgaex hrom mgaex hri dix, yam in, mgrang mgrei noh yaog dix dieh dix si njaox, noh si mie dix ah loux, loux ah noh log ngie loux nboix [**] Moi yuh nan. Hoig dieh dix lih moh Moi pao. Kee nin, Yiex Guad jaeng in moh Si Yiex, njao qi hnyae Mun, Si Yiex dom yuh noh yaox nqom dix.

Boun nbou, Si Meix nyiex in gix houig, Miex dom ah nin mai noh: "Maix bo yuh dix krum rom ngai gah, sang ah eix gah mox box? dang moh gaex jao noh ba yuh."Hoig grai Miex loux in, Miex dom si la Moi gah kaox dix daix, Moi hlad gah saex dom yaog dix dou hu gah mgong an kaix nyiex oud gix.

In si ngaix, dox yaox Moi Bui, noh dom yuh dix krum rom ngai mai, kom moh nan, glih hrom dix gah ang lai dien.

Nbeen lao Hag Diex Meng Lam
Huang Poung Qeng jao krom

Ndeeih Rom Deeih

Ndi ndix, goui Miex Mai dix gaex, noh goui Gon Si Meix ra gaex. Ba gaex Ai Ngex hoig goui liah num haoh, ba gaex Nyi Bao hoig goui loui num haoh. Nan Miaox ba hoig mgrai Meix an, brah gon nyom iag an giex oud nyiex kaix dix, hu sog dix jiah jang gah dan braix dang glong. Si ngaix som go noh lug ndaing nu dix dei.

Goui dix ngaix blag nbou, Nan Miaox hoig ndeeih houig kaing jang dix, vu vied ngie daix lang mgiang daix yi dix houig kaing, ang yaox viex jee ba ih did dix houig, Dam ba hoig ndog een gah nyiex mai ngu ra loui mu an, Ai Ngex mai Nyi hoig ndog doung dix ih. Ai Ngex mai Nyi Bao ba ang ih klax ba ngom mai laeh ngu an giex, yaox houig Miex dix Nan Miaox, guan ngiah mai goug ah: "Miex! Miex, yix sang som dix, yix sang som dix. "Nan Miaox mgu daeg, mgu jai hrom dix bu bi gon nyom gah daix dix mai ah: "Miex oud yuh briex gah nyiex, beix hu glieh ndee daeh Bui grog ndee luah glong mong hang, sin briex Miex lo hu goug bax houig." Bux aig ra gaex ndaing hngiad loux Miex dix, mgaex hrom dix hu ndee daeh Bui grog ndee luah glong mong, ndee si nbua ndee si aox, ndee ih Nbun Grih Si No graeng hmom, nkraoh Bui, hrax Bui lai mai loux grog loux glong mong. Giex bux aig ra gaex, nie mgaig nie nyom, nie ang lai hrom ing, hoig bi om gox jai hrom dix njao. Braix hoig ndeix hvaig pao, jub Bui pung ba daeh grog daeh glong mong gah ndee biang gaing an gix, uig dux hu dux hu pao, hoig dang ing nyiex dix. Yam an, Ai Ngex daeg lih ged ang Miex dix nbaox houig goug giex ing som. Daeg viex .bux dix Nyi ing gah nyiex. Giex houig gah nyiex, ngu ang nbaox plu dix, ndaex nyiex uig hvaig ngie. Bux aig ra gaex ang dong blag hu Miex dix, yiam riag yiam you goug Miex dix ah: "Miex! Miex! Geem oud maix ndee mox?"Loux yiam riag yiam you giex Miex dix, Dax Guad baox blog baox hnyom gix hmoung noh, dom hu ah nin gah giex: "Miex bax ang boun bouig ndieb o, ang lai dong gah sang eei bax glod moh ndim, im moh Bui, dom brah dom dig bax kaix dix, hoig hu goui Meix. ndee si ngai ndee nda."

Kaix hu Nan Miaox, Ai Ngex Nyi Bao bux aig ra gaex, ang lai goui ndee yah gleen [**] ndee een hrom, si ngaix som go giex hoig grin hoig soung kaing ling lax kaing nkin. Ai Ngex ba roi dong braix an, dug daix bux dix hu sog dix jaong ih briex breem. Si Miang ndaex yaong yaox hoig ding daix lang jaong giex bux aig ra gaex, dom deei giex moh jao liang Moi dix. Gah ndaex num in, Si Miang ang nbaox boun yaox dix ih riang rao giex miex nding dix, dom nkre giex hu kaing nyiex. Bux aig ra gaex dom vu vied vu viang gu nyiex gu yaong, hu sog dix ih briex breem gu si ndaeh. Giex hu sog dix gaong kaex, boun daex ndaex diag ndaex du, sog sud dix ih briex bruad briex jod gah braog bou daeh Bui, jieh noh gah geei, houig yam yuh giex dix ih hreeb daex, dom jei mgaox ndaex rom hreeb dix vud ndeeih lod lih kaix, glod ngie gah hreeb daex mai nbee mgaox jieh giex kaing. Gaing ba daeg ba ka hoig gieh giex boun dix nie goui riang goui rao gah grax sog peed dou diag dou du.

Goui dix ngaix, giex hu buing Lai gah ndaex noung ndaex yia, Ai Ngex hmaing bux dix Nyi Bao oud yuh moig Lai gah ndaex noung kaox mai dom loux gah noh, ang ju noh gieh rom moig Lai qu kaing o. Hoig ah noh nan, noh dom hu sog buing Sim gah ndaex noung ndaex yia kaix. Bux noh Nyi Bao uig plu ngu yuh moig neix Lai pao. Yam hoig loug moig sang qu kaing o, noh raig [**] gag kaox houig dix mgong jae o gah, noh ang ndouh dong gag kaox in jix "ndeeih im" laig gag kaox ndaex o pao, Lai hoig ndeeih glod mai yaog dix dou hu. Bux gei noh Ai Ngex ndeeih houig, yaox ngie moh rom moig ba ndeg kaing, dom ah gah bux dix Nyi Bao: "Yuh gah mox maix lai ih neix Lai uig?" Nyi Bao grai lao Ai Ngex hmoung mgroh mgrong ba yaox dix veui noh, ji bux gei dix yaox kaix dou Lai. Giex bux aig ra gaex hreeb rom Lai, viex gag kaox" ndeeih im" in ing gah nyiex. Houig mgrong grax, giex yaox hvag gaing Lag hoig yum dix gah gag kaox dix mu, dom qe dix yaox hrom ba ged dix, deei gag kaox "ndeeih im" in yib yib noh gah gaing Lag ra loui daix, Lag ba hoig yum an lug "ndeeih im" ah "ag, ag" nan mai bu dix mguax ndom gah biang gaing giex pao. Giex lai nbaox houig gah braog yaong, gaing Moi jo hoig jux hoig si um ba hvag dix gah kaox suad Mai an dix mu, giex gah ja nbaox deei nang gag kaox "ndeeih im" an yib gah gaing Moi ra loui daix, hoig dieh dix lih moh Moi ding Moi gluing blang nan dix mu. Njaeh dom yam an ndix, giex ra gaex, nbrei dix njog eei Moi an, hu tai ma tai gaeng gah gu si ngaix, hoig ndaing boun dou ma dou goi pao, si ngaix som go giex nie oud nie nyom. Yam yaox giex dix ih briex nyom rom hloung gu si ngaix, hrom giex hoig lih ged Miex dix, lai ged nin: yam yaox eix dix ih eeb no, ged moh riang rao dox Miex dix, soun ba hoig hnyab hoig hnyai [**] gah hoig dox Miex eix bex ndix.

Giex bux aig ra gaex njaeh dix hu sog hu krieh Miex dix gu nyiex gu yaong pao. Hoig sog dix yaong nbaox hu sog dix yaong, kom moh nan, ang nbaox hmoung ndee oud Miex dix.

Goui dix ngaix boun nbou, giex oud nyiex Miex Mai dix nyiex, Miex Mai an gieh giex dang krei dang yuh dix ih briex breem, ah nin gah giex: "Gon Nbun Si Miang ndaex yaong hoig yum, hmaing ex hu bae. "Hoig ah nan, yaog dix hu kaix. Nyi Bao dom ah nin gah bux gei dix Ai Ngex: "Ih gag kaox " ndeeih im" jie eix in daoh noh jeeix, rian dix jix gieh Gon Nbun Si Miang ndeeih glod."Ai Ngex ah gah bux dix: "In moh Gon Nbun nyiex Si Miang, gieh eix ang boun bai ndeeih glod, gix jix mug gaing ax."Miex Mai ba hoig lih kaing nyiex an, hoig nbriex hmoung loux grai Nyi Bao, dom dou hu grai ngai Si Miang. Si Miang bloi Bui hu mgiex giex houig ndum mox ndum an, tux giex daoh nju Gon Nbun dix, ah sang dox giex jie Nbrung dix mu. Ai Ngex Nyi Bao yaox ngom Bui braog long Bui yum hun ngie, ba baeh la, ba jia blai, ba yuh si ngie, ba bih pi, hoig dang gi ngie gu gaex ndee an, Si Miang hmaing Bui hu kaing ndee an kom uig, rog hmaing giex bux aig ra gaex houig si veing long Bui yum, blag ndieb long, Ai Ngex Nyi Bao siao gag kaox "ndeeih im" an goi yib ngie noh gah ra loui daix, Gon Nbun Si Miang njiad goi gaoh ngie kaing ndaex long, hu liah ngu, pag o ngu rom loug soun nyou nyiex.

Si Miang ba lug liag lug lie ba qi hnyae an, yaox ndeeih glod Gon Nbun dix, ndux loux dix pao, Nbrung ba ah sang dox giex bux aig ra gaex jie gah ang lai dox. Loux grai ang nbaox dien uig gox, Gon Nbun noh hoig ndeeih yum. Si Miang yaox yuh nin, dom yaog dix mgrux ngong daong daix dix mai grub giex, hmaing giex deem joi dix, kong pag lag song ba ah noh sang dox dix, ang ndouh lai dieh loux dix pao. Kaix hoig nbaox giex bux aig ra gaex daoh nju Gon Nbun Si Miang, yaog dix dug Nbrung baing„an ing kaix. Giex nbaox hu sog nang Miex dix yaong dang ndaeh. Aing Nbrung, baing an hoig lih moh loun mae ling si grax. Rom neem Nbrung baing hoig moh pong kri mgiex mgiex. Giex bux aig ra gaex, hoig hmoung ndee oud Miex dix gah yaong ndee si ngai ndee mglib ndee yian dix ndaeh. Giex laig ndaex nyiex mgaig noh, Nan Miaox hoig hu yuh gaing ang nbaox houig gah nyiex, giex dom ndeh mae kri an gah nyiex, niad dix ing yuh dix ih gaing nqo kaix gah nyiex. Nan Miaox ndeeih houig gah nyiex, yaox ngie song si ngi kri, mae an ndaex nyiex kaing, hoig ndaox ngie gah. Dax Guad baox blog baox hnyom noh dom grai noh hmoung ah nin: "Moh gon lih gon luan maix bux aig ra gaex ba houig dix dox nguah rom deeih maix." Viang moh nan, Nan Miaox ang nbaox yaox ngai Gon dix, gin saex hrom saex hri gah, kee nin, noh uig yum ngie gah laex hrom dix mai jaong mgroh si viex kaing.

Nbeen lao Hag Diex Gaeng Liam
Ai Sung, Nyi La, Ai Kuad jao krom

Miah

Nyi Jai moh Bui hmom hrom raeh hrom dix gaex. Goui dix nbog, noh hu hvi mai baox mgrom dix ba gaex Dax Li gah yaong dang braix. Yam ndeeih houig giex mgrong grax, Dax Li yaog dix miah ah "A qig [**] eui" nan, miah nang, ah nang: "Ged ba dix yuh nan; ex uig houig pao, "Nyi Jai ndaox ndeing gah ah noh nan, dom qog noh: "Dax Li, geem ah maix ba dix yuh nan?"Dax Li dom grai noh hmoung. "bliah eix yam oud ndaex grax, moh jei si mod Bui oud gah nyiex eix, nie miah dom nie, moh hoig grai ndaing gin jei si mod Bui oud gah nyiex eix." " O! Kaix moh yuh nan liex. "Nyi Jai uig hngeeig ngie gah hreeng nyao, noh ged nin ndaex hrom dix: ex ang miah, dee moh ang Bui oud gah nyiex jei si mod ex eui! Kee nin, noh nie ged nie ang nyom hrom gah.

Noh houig gah nyiex pao, meed hrom gah nyiex gix mai ah: "Ex hoig lih kaing nyiex hreeng nyao, beix ang jei si mod ex dix gaex gox, een beix hrom dix ndee mox?" Mouing noh hmoung ah noh nan, ndaing ndaox ngie gah, dom qog: "Maix mgaih dong box yix ang jei dix yuh gah mox?" Nyi Jai dom ah: " Gieh beix lug jei si mod ex, yuh ba dix ex ang miah mgrong grax log Dax Li yuh nan?" Mouing hoig nkom dong hrom ged Nyi Jai pao, dom niad dix yeng lud dix gah Nyi Jai ah: "Yuh nin, nbog in son moh ex ba ang ko mgroh yuh, gieh maix hu kaing nyiex nbog kaix sax, yix rian dix jei si mod maix kom nyiex."

Kaix an ra loui kix, Nyi. Jai hu liag doum dang braix, veui sang hu noh, mouing noh nbriex jaing mag gram oud gah dag dao si nbeix noh dix mu mai gon dom loux ah nin: "Hu ndaex grax moh rian hrom dix jeeix ox."

Nyi Jai hoig liag doum ba ndaing ko hrom dix mu, sae noh gah ndaex song, gog noh ing, braix glong hoig gin si aoh si eem ngie yuh gah mox nieh ling si grax, noh hoig ndaing daeg mao dom uig nkeen rom laeh rom lee dix. Noh yaox uig ndeix houig gah nyiex pao, dom deei dag dao si nbeix dix od rom laeh nkeen hod ngai dix gah," A qig eui" nan, njao hoig gin braix mag gram gah ngai noh, hoig si ndiad houd dix miah gah nqoung braix mag gram, yam si ndiad noh dix miah, noh num nyoi dix mai, doum jod kaing ndaex song ah "gu klang" nan dix daix, hoig max pong vid, Nyi Jai houig mgiex ngie gah nyiex kaix. ngeem ngie gaing dix kom houig gah nyiex, kloui dix ah gah mouing dix: "Yam jo beix jei ex beix ang jei, yam ang jo dix jei, beix kin dix jei." Mouing noh uig jaox ngie mai ah: "A yei! Maix hoig ah: yam hu ex dang braix dang glong, beix jo dix jei si mod ex ox. "Nyi jai ah: "Moh liex! Moh liex! Jei dom jo dix jei, viang moh nan, bo hiex jei dom yuh lung, gieh ex ang lai uig miah gox njao. In pao hoig vai pao, doum gah hoig max pong vid, ndaing hlog gah dix dei."

Mouing Nyi Jai mai Bui kom nyiex mgaig nqom jix dieh jix grai Nyi Jai loux yuh nan, log hoig gieh gix ngiah gah kaing.

Nbeen lao Hag Diex Si Moung
Ai Laig jao krom
Ai Dix jao diam

Nbeen Ai Qing

Ndi ndix, goui Bui dix nyiex, gix kom nyiex goui Bui loui gaex, Miex Geeing goui Gon dix gaex kaing, sum jee gaex gaex Ai Qing.

Nyiex Ai Qing moh nyiex ba mi ba min, ndong kouig ngai gah hoig moh ndong kouig ba yuh gah kri. Njao hoig gin hreeng si ngaix som, Miex Geeing Ai Qing gah hoig guad hu si nbie. Noh mgaig gon dix hoig ding daix lang jaong, hoig glod dix moh ndim, im dix moh Bui pao, giex guad ra gaex ged nin: graeng nyiex graeng ma, jan sin ngao dox gah Ai Qing kaing. Ai Qing rieb graeng in gix, ndaex hrom hoig gin mgaex ngie gah. Noh ged: Miex Geeing ex dox sin ngao in gix, nbrie lai id ih oud som dix nju gah ang ndouh uig ih.

Ang nbaox goui miex nkreeng dix, Miex Geeing Ai Qing hoig yum, njaeh dom kaix an, noh uig njaeh dix oud ih oud som ngie neix non, blai eeb gu si ngaix. Goui dix ngaix, Ai Qing gaoh kaing hu jouih kri, si nbub Dax Guad gah ndaex grax dix gaex, Dax Guad ah nin gah noh: "Maix ja oud ih oud glieh yuh nin gu si ngaix gu som, bie Moi dix mu ang goui, maix ko liag dix eei Moi dix mu yam goui mae, gieh roi deem maix tai gaeng tai ma si ngaix kaix, yuh nin maix dom daeg hmom si ngaix go." Ai Qing hmoung ah noh nan, bliex [**] nie ngiah ah "ha, ha" nan gah mai ah: "Mae kri sin ngao jie ex ih ling nju dix gah ang uig, liag Moi yuh lia dix?" Dax Guad an yaox ang Ai Qing ju loux dix, uig vu vied ngie gaing gab dix gah mai hu kaix. Loux guad ah "Rom oud ndaex ngoi hlad gah nbug, hlad Bui bug dix nyae." [**] Sin ngao ba brah ba ndeh Geeing Ai Qing noh jie, ang nbaox goui miex num dix, noh hoig ih noh bag ngie, bie nyiex ma gah hoig jouih nyao. Ai Qing ndeg hu sog dix jaeng pao.

Goui dix ngaix, noh hu sog dix jaeng dang braix dang glong, houig ndaex grax, nbaox si nbub nang Dax Guad an, Dax Guad an ndaing jaox hrom gah noh, ged noh lih dix jee, ah nin gah Ai Qing: "Yam sang yum Geeing maix, noh grai ex hmoung, noh gon een kri jeeix si nbaeng noh gah ndaex ma, dox ka maix dix gah briex gah breem, maix hu gaong ndaex ma an, dee rian dix yaox kri ba si nbaeng Geeing maix an. " Ai Qing hmoung ah gon goui kri, hoig ndaing mgaex hrom gah. Bu bab dix hu gaong ndaex ma an, njaeh dix gaong dom lih si ngaix houig dom yam glib si ngaix gu si ngaix, hoig gaong noh doui si ngaix daeg hoig baog ma an. Kom moh nan, ang nbaox yaox did dix ndaex ma. Ai Qing meed hrom ngie kom dou ing qog Dax Guad an: "Ex hoig baog noh loui si ngaix hmom hmom, hoig blu bliag noh kom mu ma, gah ang nbaox boun yaox jee did dix ndaex ma, maix dee bie ex."Hoig ah nan, sang yaog dix dog Dax Guad an. Dax Guad nbaox viex nang hrom on hrom diam grai noh hmoung: "Maix bo nyang hax hrom, hruad si mie si vong ndaex ma hang, kaix loui kix sax, maix daeg boun dix yaox kri heui." Ai Qing lai jei lug moh dix dei, kaix ing noh, noh dom deei si vong ba gon ndeg jeeix, viex hu hruad gah ndaex ma. Kaix hoig hruad Ai Qing si vong, Dax Guad an nbaox ah nin gah noh: "Maix jix dix laex dix ha, kaix loui kix sax, kri log dang jix lih dix ih." Kaix an, Ai Qing ja hu mgaig boud gah sang lih kri.

Hoig goui dix kix haoh, si vong hoig guah glai ngie ndaex ma. Dax Guad ah nin gah Ai Qing: "Kri ba sang ih maix hoig goui gah ndaex mgong si vong in gix kom uig. Maix jo dix nbrei riam noh, nbrei dix mgaig gia noh hmom hmom, ang siao njun miex mglang dix, hoig jix boun kri heui." Ai Qing hmoung ah Dax Guad an nan, hu krian krei gon si vong an gix gu si ngaix, ang nbaox goui miex nkreeng dix, Ai Qing hoig boun si vong miex nyao. Yuh nin, si ngaix som go noh nie oud nie hmom.

Ai Qing daeg min mu gah loux grai Dax Guad an heui. Gah biang Hag Diex ba gon nbloun nguah kaing mae kri gon goui: an dom moh grax rian heui.

Nbeen lao Hag Diex Lang Qang
Qeng Ying Qex jao krom
Ai Dix jao diam.

Gung Ming Sang

Gung Ming Sang oud gah Hag Diex meng hmae [**], moh mgong ba nbloun hlaong gah ndaex Hag Diex Gon Ba Raog dix mu.

Mgong Gung Ming Sang veui an ndix ah Bui mgong Loi Mu gah. Nbeen lao Bui noh veui an ndix, Kung Ming hoig viex Bui houig mgaig gia Hag Diex See pu, Gon Bui gu gaex hoig ndaing mgaex hrom mgaex hri gah dix dei heui. Viang moh nan, yam daeg sang njaeh gix dix laig gah Hag Diex Gon Ba Raog, ndux jo grax tieh grax glad ba guan rieb houig noh ang moh loux nad loux mog mgaex hrom gah houig noh, bliex dix moh loux luah grog ah "glung, glung" nan kom Bui viex ag viex vaig houig gu mgong gu lua, dei um, bliah, jee ba bru kuan bru ngao eix gah.

Kung Ming ang boun laig gah mgong Ba Rao, dom goug Guad nyiex Si Miang yaong Ba Raog houig groum loux po si mgah hmom ndaex Kuing Ming. Kung Ming ah nin: "Guad nyiex Si Miang yaong eui, ex ged dix sang laig ndaex Hag Diex Ba Raog, mgaig gia si ngaix som go beix geem yuh gah mox, mgaig mgrong yuh beix gaing nqo."

"Ex nbrug Nbrung nbrug ex in, njaeh dom Kuing Ming hliao hu blag Hag Diex Ba Raog, ndie riang Nbrung ndee mox, ex log ndie ndee an, ju ang beix ju lieh?" Guad Ba Raog ged nin: "Gieh moh Nbrung hmom Nbrung ding riang, dee rian dix boun nbleeih gah Hag Diex Ba Raog kom mu. Kee nan, noh dom vu vied vu vied gaing dix gah loux qog Kung Ming, ang ju. Kung Ming nbaox ah nin: "Beix ang dox ex qe riang Nbrung dix ndaex Hag Diex, dox ex qe riang luan dei jie dix ndaex box?"

"Ba dix ba moh riang dei?"Guad ang dong riang dei ah noh, dom nbaox qog noh gah.

"Ndie riang dei jie ex ndee mox, ex log ndie ndee an, jix ang jix lieh." Guad nyiex Si Miang ged nin: Hag Diex eix Ba Raog boun ndog oud boud ndaex noung ndaex yia, Bui hoig ndog jix muan boud ag dom yam iag yam o dix gu gaex ndaex Bui, buing Sim ba bu gah jix groux, buing Bouih dou doi mgong ang goui ba ang mgouih. Gah biang Hag Diex jo son moh eix Ba Raog ba ndaing min gah buing ag, geem ged maix dix Gon hlee. kaing Gon Ba Raog ndee mox? Yuh nin Guad Ba Raog dom ngeeh ngeeh gaing dix gah loux noh, hoig ju noh pao.

Kung Ming mai Guad Ba Raog ra lai yaog gloung blai vai gloung eeb mai baox dae pao: "Houig, baox mgrom muih, yuh om loux grai eix pao, nyaex blai dix gloung."Kung Ming ah nin.

Guad Ba Raog ndeeih bog: "Gloung eeb lai vai, gloung blai lai nyae, gaing ba hoig grai eix mai baox ang lai boun dieh loux dix, in hoig moh nbeen jie yix Ba Raog heui."Bui ra gaex mgaex hrom mgaex hri yaog dix gaoh pao, ra lai yaog gloung blai vai gloung eeb gah baox dix, dix mgum kaing nyaex blai nyao laing.

Kung Ming hoig dong noh ndaex hrom dix, yaog dix gaoh, vaig ag sae dei, nyon noh see Hag Diex Ba Raog ah "Klag" nan dix daix, dei buing noh houig dum gah mgong Loi Mu.

Yam an, Guad Ba Raog hoig yaoh ngie gah dom uig nbleix[**] ndag ndoui dix gah, njung mgian ding dix gah mai yaog yo Kung Ming ah: "Moh dei Si Yiex, gieh ang moh mgong Loi Mu ba die noh, dei in dee gon sang luan gah Hag Diex Ba Raog kom mu."

Hag Diex Ba Raog hoig si nbua ngie. Loux glong mong, loux grog hoig luah si nbua ngie gu si ndaeh, guan rieb houig Kung Ming gah Hag Diex Ba Raog.

Njaeh dom yam an ndix, mgong Loi Mu dom ah moh mgong Kung Ming Sang, ngai lai "Kung" mai ngai lai "Gung" moh kee ndeix sang om loux dix, kaix an dom nbleeih dieh loux ah moh Gung Ming Sang.

Nbeen lao Hag Diex Si Moung
Gao Lix Qi jao krom
Ai Dix jao diam

Nbeen Lao Num Ndee Gaoh Vo Rom Kraox

Vo rom kraox, gah jix ah" Vo rieb rom kraox" , "Gin rom kraox." In moh si ngaix vo jie Gon Ba Raog. Ndeix sang om vo jie Hox yuh nan. Nbog yam ih vo in moh kix jie Ba Raog kix dix, haog kix dix ngaix dom houig loui ngaix, hoig moh gah kix riang kix gao blag haog kix.

"Vo rom kraox" moh vo liang jie Ba Raog, gah moh nang vo ndaing si nbua si mgouig Bui mai.

Lih eix dix nih nai grai lao num ndee gaoh" Vo rom kraox" in, gah ndaex eix Gon Ba Raog gon goui nbeen lao yuh nin dix mu:

ang eix lai ndag uig dong uig yung, hoig goui miex num mox ndix, goui Guad yaong Hag Diex did dix gaex, noh sum dix oud nyiex, Bui houig ngeei, houig yuh nkraoh, hoig si nbua hoig si mgouig ngie gao ngaix gao som. Bui yaox Nbun Grih hmom ngie nan dix gaex, houig ngeei houig lix yuh nkraoh mai Bui gu nbou, mai bog loux ngeei mai gon Guad yaong ba moh Guang Gex Lo. Nbun Grih in haeg noh njiad hmom lung blang ngie mai npeui noh, gaex hag noh njiad baing on ngie log nga sang yuh nan. Ngai nbaoh noh uig raoh ngie log blix gu yuh nan. Yaog noh dix yuh nkraoh, njiad log ngie plu npaeng dai yuh nan, ndaing nyom dix' mgaig. Yaog noh dix ngeei loux dix, hoig rong ngie, ndaing nyom dix hngiad. Guang Gex Lo ang lai beix noh gah loux ngeei. Houig nbog yam ux la Liang gu si ngaix, log hoig mgrai, ang lai yaox blag hu. Gon Guad ba moh Guang Gex Lo an hoig ndaeh sog ndee oud ndee goui noh gu nyiex gu yaong, Bui ah ang nbaox yaox Nbun Grih ba hmom mgrang in gu gaex. Si ngaix sang hoig yuh nyiex ding an, boun nbou ngaix an, Gon Guad Si Miang ba moh Guang Gex Lo nqob daix Nbun Grih in sied ngie mai qog noh: "Geem gaex maix ba dix? Moh maix Nbun Grih nyiex mox? Oud maix yaong mox, geem gaoh maix kaing Hag Diex ndee mox?"Nbun Grih an bog loux noh ah: "Ex gaex Am Yong, oud gah ndee ang maix boun dix houig."Guang Gex Lo hmaing dix mouing noh. Nbun tiang mai ah: " Ex ang nbaox qog Miex Geeing dix gah, ang nbaox qog bux gei bux kang dix gah ,maix ang boun dix hod hu mai ex."Gon Guad Si Miang ba moh Guang Gex Lo an, kin dix nbluh daix Nbun ang bloi, Ia Liang uig ux pao, Am Yong ang lai dong gah sang ged dix, dom grai Guang Gex Lo hmoung: "Gieh maix rug muih ex kom hrom kom hri dix, maix ing deei mgam riex houig, kaix hoig hu ex, maix si mgo kaix mgroi ex mgam, houig maix gah Hag Diex ndee hoig mgroi ex mgam, maix geem groux ex ndee an heui." Si ngaix kaix boun ngob jao jao, guad ba moh Guang Gex Lo an, yaog jeeb si nbeix kraox si nbeix hmom nan, gog vaig lang, si mgieb [**] ag, glom bliah, hu sog Nbun Grih nblong kaix mgroi mgam. Hoig hu miex num mox nieh, ang lai dong hoig diang mgong njao ngod miex nding mox nieh, hoig laig hoig nbreeng [**] ndaex noung ndaex yia kaox miex nding mox nieh, kaix an houig gah ndung Si Yong dix mu, ang lai yaox mgam pao Gon Si Miang ba moh Guang Gex Lo uig gaog ndee an pao.

Nyiex ding hoig yuh dix pao, nyou nyiex nyou ma gah hoig tad [**], Gon Si Miang ba moh Guang. Gex Lo ang lai yaox, Miex Geeing noh uig hax hrom log hax ngu yuh nan, niad dix bu bab daeh grog luah, goug krom Bui nyiex Bui yaong, hmaing gix hu sog krieh Gon dix, Bui hu sog, hoig sog noh miex ngaix miex num mox nieh, ang lai ndag dong, houig gah braog ndung Si Yong, yaox si nbeix Gon Si Miang braog ndung Si Yong, moh ngie ang nbaox yaox dou gaex Gon Si Miang. Gon rai be sin houig gah yaong grai Geeing noh hmoung mgroh mgrong in, Geeing noh hmaing Bui bae si nbeix gah braog ndung, gieh ang yaox Guang Gex Lo ang ju Bui houig. Bui hoig bae noh miex ngaix miex som mox nieh, boun ngaix ang yaox ba did dix, houig boun som ja jaox maox dix yaox lih giex kaing ndaex ndung Si Yong mai yuh nkraoh, ngeei loux, Nbun Grih oud liad Guang Gex Lo mai gling geei daing man, houig yam uig ndeeih haing Bui kaing id dix, ang lai yaox giex kom ra gaex dix. Geeing Guang Ge Lo ki hrom ngie dom ang lai dong gah sang yuh dix, deeg hrom dom hmaing Bui viex graeng houig gah nyiex. Kaix an, Geeing Guang Gex Lo, baeh Ia baeh Lig, baeh Moi miex nyao, hu yuh dan gah Si Yong, rog hmaing Si Youg bloi Gon dix ndeeih houig.

Goui dix ngaix, Guang Gex Lo lug viex Nbun houig gah nyiex, houig giex gah ndaex nyiex, giex meix mouing mgrux ngong dix veui ngai Miex Geeing dix, rog nbuan soun Miex Geeing dix, hmaing Miex Geeing dix vieh hrom va hri gah dix. Ndum mox ndum an ndaex nyiex hoig lih si oui im ngie kom mu. Geeing noh hmaing Nbun Grih lih hu kaing nyiex, ang ju Gon dix hu mai. Guang Hex lo yum im gah sang hod hu mai Nbun, Geeing noh ang lai dong gah sang yuh dix, dom yaog dix piaog Guang Gex Lo. Am Yong mai Guang Gex Lo uig yiam ngie, ndum mox ndum an, npaeng ding lih pao, ang lai yaox blag hu Nbun Grih an. Soun sang gieh Geeing Gon dix nyom hrom, noh dom hmaing gon rai be sin dix ndeeih bih mgam an nyao kaing ndaex grax mai ndeeih viex noh houig. Guang Gex Lo ah nin gah Geeing dix: "Yum im sang hu sog Nbun Grih, hoig yaox ex Nbun Grih sax, yix log houig mgaig gia beix Geeing dix num dix nbog."Guang Gex Lo nbaox viex ag hu sog Nbun Si Yong.

Mgam riex hoig bih dix nyao pao, grax ang lai ndouh, Guang Gex Lo ang lai yaox Nbun Grih Si Yong pao. Noh ang lai dong grax sang hu dix, dom lud grax, lih moh jao kaox jao oux gah ndaex noung ding noung raex an.

Kaix an, soun sang yuh Gon Bui dix dong dix briex giex meix mouing ndaex hrom ndaex hri dix, si mie giex ndeeih houig oud gah nyiex dae dix num dix nbog, Bui dom rog hmaing Nbun Grih Si Yong viex Bui jie rom si ngax si ngeih, gieh rom si ngax si ngaong ang jix uig jix leeing, gieh Gon Bui nie boun dou ma dou goi, haoh nbrie haoh kong, nyom oud si u goui, kee nin, dom lih dix moh vo rom kraox jie Gon Ba Raog.

Nbeen lao Hag Diex Si Moung
Ai Dix jao krom

Nbeen Krei Ba Raog Nyou Nyiex Dix

Ndi ndix, Ba Raog ang goui nbeen krei nyou nyiex dix. Krei Ba Raog nyou nyiex daeg goui kaix. Lih eix dix grai nbeen in, gon goui nbeen lao ndix yuh nin dix mu.

Lao Bui noh, gah ndaex nju veui ndix, goui Nbun Grih dix gaex, noh ang njuaing hmom mgrang ngie kaing, gon ndaing hmom hrom. Yaox noh daeh Bui mgaox, noh gah deem Bui daeh, yaox noh jiag Bui ma, noh gah deem Bui jiag, njouih Guad long si nbaeg, bux Gon Nyom diang glong, deem Bui njo ron dei, ja moh jan gaing ba boun deem noh Bui, noh deem Bui yuh. Bui ba dong ba yung noh hoig yo hmom hrom hmom hri noh gu gaex, ah moh noh "Nbun hmom hrom." Kaix an, Nbun hmom hrom hoig goui meix, Gon Bui nbaox ah nang" Ou hmom hrom" gah noh.

Goui dix ngaix, Ou hmom hrom mai Nbun dix jub hu dox Si Meix yuh gaing gah diag ih briex, houig mgrong grax, gix si ndaeh Si Meix jaeng dix gaex, Si Meix in gaing uig yih ngie log hmeem ia yuh nan, meeih hoig klaix [**] ngie gah ngai nbaoh, muad [**] mie hoig naog ngie gah nqeeih ngai. Hoig jux ngie kom njung dix uig, hmaing dix ih eeb gah gix. Nbun dix nblah hoig toux ngie meeih dix dou kaing, dix nblah hoig log hoig nqax ngie noh mai hu dix kaing moh ngie Ou hmom hrom ba gon si mgah hang hiah [sic **] mai. Nbun baox hu gix ah nin gah noh: "Ou hmom hrom eui, noh hoig kreeing ngie, maix bo lai si mgah mai noh. Niad dix hu kaing." Ou hmom hrom ngiah gah mai ah: " Grax daeg grax ka Bui gah jix goui gu gaex jix guad jix saex, mgaig dix yaox noh, ndaing jaox hrom gah." Dix nblah nbaox ah: "Noh moh Hox, maix bo naox jaox hrom gah noh." Ou hmom hrom nbaox ah: " Hox, Ba Raog hoig moh Bui om baox." Hoig ah nan, noh dox Bui jaeng ih eeb dix blag. Kom moh nan, Bui jaeng an ah ang sag gah eeb, gon hmaing dix ih. Ou hmom hrom nbaox mguah nang noh ih eeb ba ndeg dix blag an. Eeb ba gon ndeg an ang lai gub Bui ih pao, viang moh nan, sang ndeeih ing nbaox guih grax gah si ngai nang, nbog blai gah hoig luan, Ou hmom hrom dom hu dox Si Meix nyiex dix ih eeb ba gon ndeg an kaing.

Si Meix nyiex Ou Hmom hrom njao ang gub sag gah eeb an, baox noh hoig ngiah ngie noh. Yuh nin, noh dom yaog dix ah gah Ou hmom hrom, hmaing noh ang see hrom, noh nie ah nie soung hrom, yaog dix dag meeih Ou hmom hrom ngud ngie. Ou hmom hrom hoig hmoung loux om kaox, geem yiam kom saex hrom dix ing gah nyiex, houig mgrong grax ndeeih si ndeah [sic ?] Hox jaeng ba gieh noh hmoung loux om kaox njao dix an.

"Ou eui, Ou eui, dox ex jie dog kaox jie maix kom ra mu kaing! "Uig yaox noh Ou hmom hrom, Bui jaeng an uig mgaex ngie mai ah, ang lai guang Ou hmom hrom laex ang laex hrom. Mgong meeih Ou hmom hrom uig saex kaix dog, uig duad duad ngie log glaeh gad yuh nan. Gah ang nbaox bi om nqom qi hnyae Meix dix gah dix, gah ang nbaox bi om loux lang deng ang nyom dix hngiad ba ah Meix gah dix. Noh ged moh Hox jaeng in ba gieh dix jo nbeen, viang moh nan, nie ndaing ged nang ang Hox jaeng goui ndee yah gleen een hrom dix, ndaing jaox hrom gah. Noh od rom ngai dix, nbaox od daix dix gah dag dao si nbeix dix, kaix an dom dox dog gah Hox jaeng an mai ah: "Dog kaox brim in giex, ang maix ntah hrom gah, maix viex box."

Bui jaeng gah ang ah did dix, mgaig noh njee nblaong, bu bi noh mguax ndom, mgaex nang mai ah: " Ou eui, dog kaox ba hoig mgiex hoig bu bi Bui jaeng, geem ang maix kreeing gah lieh?"

"Ex ang kreeing gah."Ou hmom hrom ah.

"Gieh moh nan, ex jie noh dix mu kaing hoig gub, ndeeih dox in gah maix."Bui jaeng hoig ah nan hu kaix.

Ou hmom hrom in yaox yuh Bui jaeng in nin, uig ndaox gah, houig gah nyiex noh grai lao baox blog dix hmoung mgroh mgrong ndeeih dox Bui jaeng dog. Baox blog hmoung noh dom ah: " Dog kaix mgiex kaix bu bi Bui jaeng ang hmom, dig kaing."Ou hmom hrom dom ah: "Hox, Ba Raog hoig moh Bui om baox, Bui jaeng moh ngie ang noh goui nyiex ndee houig ndee hu, ang goui ndee yah gleen een hrom dix kaing, Bui oud gah biang Hag Diex in, mox ba ang jix goui grax yuh nin lieh? Bui jaeng mai Bui ang jaeng bu bi dog geem goui ndee dang ndee ang om ndee mox box, pag noh si ngax gah jix dix siao boud." Hoig ah nan, noh krei dix sang hu pag dog, dog ba oud ndaex daix noh an hoig dieh lih moh gloung kri pao. Ngai lai Hox gon oud gah gloung kri ra loui dia:

Hrom Bui louh hrom Bui,
Bui bro gah moh baox nyiex,
Bui mox jix briex nyou,
dog kaox lih moh kri hleng.

Yam pad Guad jix lai Hox lai ra loui dia in, jan Bui ba hmoung hoig mgum ngie gaing dix ged, gix uig ged gaing hmom ba yuh Ou hmom hrom. Ou hmom hrom boun gloung kri in, noh gah ang jie noung dix, noh hu louh ko, si vog gah miex nyao, mguah baox nyiex baox yaong dix jie. Kee nin, jee gaex Ou hmom hrom nie oud nie ao hu gu si ndaeh, Ba Raog krei nyou nyiex dix nie oud nie haoh, hoig lih dix moh nbeen, dix nju hoig dix nju ra lai grai gon braix dix hmoung.

Nbeen lao Hag Diex Meng Lam
Vui Gox Qiang jao lao
Liux Veng Huax jao krom

Nbeen Yuh Nkraoh Mai Long

Ndi ndix jan gu jee gu jong ba goui gah biang Hag Diex in, hoig iag dieh dix guad, hoig guad dieh dix iag jix glod ngie ang jix yum. Kaix an, houig puan num dix nbog, rom huan keem biang Hag Diex, kee nan, gu jee gu jong hoig yum ndaex rom blag nie, gu jee gu jong dom ang lai si npux [**] baox dix, ang lai yaox dix mgud baox dix biang Hag Diex heui.

Gu jee gu jong yaox keem rom huan biang Hag Diex, dom krom baox dix ged soun grax sang gieh rom mgrai hu. Nbrung ah jie dix nin: "Yam in, si mgleem hngoux hoig si ndu lang mai si ndax ex, blix goi hoig si ndu ding boun gaing ex, eix, eix Gon Bui hoig ia, guad, hoig guad ndeeih dieh dix iag. Si ngaix som go eix ndaing hmom, ang lai boun dix tai glouh louh nqom." Mgoui ah jie dix nin: "Ex ged dix yaox, jo gieh si mgleem hngoux dieh lih goui boun si ndax ex, gieh goi goui boun gaing ex, hoig guad bo lai ndeeih iag, yuh nin gie nieh, geem daeg boun mgrai yuh rom huan rom keem biang Hag Diex si ngaix som ba go eix daeg jix goui mgrong mox mgrong an."Jee ba quh ba gieh gah biang Hag Diex hmoung noh, gin ndaing mgaex hrom gah, dom ju loux noh. Njaeh dom yam an ndix jee ba quh ba gieh goui grax glod gah goui grax yum, glod mai yum hoig dang goui, rom keem Hag Diex puan num dix nbog an gah ang lai goui pao.

Kaix an miex num mox nieh, Mgoui hoig guad yum pao. Gu jee hoig ndaing laex hrom gah, hoig dang houig si nbaeng saex briex yum Mgoui. Gu jee hoig naog si veing long, ngeei loux, yuh nkraoh, hoig ndaing yaog yo gaing ba hmom yuh Mgoui soun dang gu jee gu jong veui sang yum noh ndix.

Ag Qox yaog dix lih vu hvad vaig njee nblaong, vu vied giang dix njee nbIaong mai sae loux hrax, loux hrax noh ben ang ndouh nyom dix hngiad, bie mgrang mgrei noh gah ang ndouh nyom dix yaox. Kee nan, Bui dom ang ju noh hrax, noh kan dix gon sang hrax. Jan gu jee gu jong dom si yiad [**] ngog noh dix gaex dix daix, nbluh nkoug noh, si yiad gaing noh, kee nin, nkoug Ag Qox dom lih lang dom si ngaix.

Raog yaog neix neix npom dix ah: "Gua! Gua" nan, loux ba hrax noh nie ang ndouh hmom kaing loux Ag Qox, mgrang mgrai noh gah nie ang nyom dix yaox kaing Ag Qox. Jan gu jee gu jong dom baig mgaox ngu hloub gah biang noh, Raog hoig mgu ngie saex kom puih dix laig ndaex rom sein, mgaox ngu hoig glaoh [**] yuh gaex hag noh dom uig lih rom im kaing. Njaeh dom kaix an ndix, Raog dom dieh lih moh jee ba ang nyom dix mgaig kaix, moux dix oud ndaex ndung rom ling ngaix, ang boun lih.

Ag Qox mai Raog hoig om kaox hmoung loux, dang jee kaix ang lai boun hrax. Moh ngie Hia kaing ba nda kaix, ang nbaox yaox nqom yuh Bui gah Ag Qox mai Raog, ja gon bu boud ah" vu vu" mguax ndom, Bui ah hla houig noh, dom ang nbaox ndeh ndee oud noh goui, nkram [**] ngie gah vu viang noh gah hod brang nyiex. Kee nin, njaeh dom yam an ndix, Hia dom ja oud ngie gah braog nyiex kaix dom si ngaix.

Gaong ba moh si miang sim yaog dix hrax jie dix, loux hoig ndaing nyom ngie dix hngiad. Mai haeg noh gah ndaing hmom si ngi ngie nan kom njung. Moi hoig mgaex ngie kom yaog daix jaong dix yuh nkraoh, njao ang noh nbaox rian hrom dix, jaong noh nped [**] kaing mgraih, jod biang diex, jo bam [**] hrang blag biang dix mgraig [**], nbod [**] oux gah jo dix bod jaong ngiah ra siag, hoig lih dix moh jee ba ang goui hrang blag biang mai jee ba nqiag [**] jaong kaix.

Kaix hoig hrax lai, jan gu jee groum baox dix oud dix ndaeh ged son jee ba sang yuh eix klai gah, dix nblah ah yuh klai gah Moi, dix nblah ah yuh gah Bui, ndee si ndaeh, geem sang yuh eix noh gah jee ba dix daeg Jix? Moh yuh noh gah Moi, moh yuh noh gah Bui ba hmom? Gu jee hoig dang nkrang ngie dix grai. Gon Gong gieh loux dix siah ngie mai ah: "Bo lai louh, gieh Moi mai Bui si laih baox dix dou kaing, mox ntah kaix, mox man aing dix mai ndig aing dix, yah klai gah an."Jan gu jee hoig ju loux noh gu gaex.

Bui mai Moi si laih dix dou pao, Bui hoig dou houig si veui Moi, Moi niad dix dou hod Bui ang grub. Bui ba ndaing hlag an dou vu viang hod Moi, njao ding gaex Moi, ang nyom dix gling dix mguax ndom, peed njee peed nblaong ang grub Bui. Moi hoig ki ngie pao, ang lai boun mgu, dom man aing dix, Bui yaox aing Moi, niad dix njao heing, Moi ju ngie niad dix peed Bui, jo ndig aing dix gon ang nyang nbaox dong. Kaix an, Bui dong haog biang kaox, Moi ang jix hang gah kaox, hoig mglub pao, gieh Bui yuh klai Mgoui gah dix. Kom moh nan, noh gon ang nyang hvah hrom gah soun dix, ah sang yuh Gong yum, gon hmaing Gon Mgox mai Lai hu mgiex Gong. Gong hoig hlad gah, dom hu moux dix ndaex hloux kaox, Mgox duih njee duih nblaong hloux kaox, Gong moux njee moux nblaong dix ndaex hloux kaox, Lai puih njee puih nblaong dix gah gag kaox, Gong mglaig ngie dix oud ndaex hloux kaox. Mgox mai Lai hoig Sog Gong blag ngaix gah ang nbaox jix yaox Gong. Kaix an, Lai doh hloux kaox gah hngim lom dix, daeg yaox Gong pao. Gong hoig si ngua ngie mai ah nin gah Lai: "Lai bux gei eui, vieh hrom gah ex jeeix, ex dox maix ih si nbeix jie dix."Hoig ah nan, rom ngai hoig ndung ngie ndaex ngai, hoig si ngua ngie kom mgo gaex dix. Mgaig dix yaox gin jaox hrom gah. Lai dom ju loux noh, Gong dox Lai jie si nbeix jie dix. Njaeh dom kaix an ndix, Lai dom ih si nbeix kraox kaix gu si nqeeng.

Bui hoig beix noh pao, hoig mgaex ngie mai, yuh Bui klai Mgoui hoig ndaing moh grax mgaex hrom heui. Dom hu yuh nkraoh gah si veing long Mgoui kaix an, gieh Bui yum, jo dix yuh nkraoh braog si veing long Bui yum. Nbeen in moh njaeh dix dom yam an ndix.

Nbeei lao Hag Diex Si Moung
Ai Lang jao lao
Liux Gox Duang jao diam

Nbeen Ndee Gaoh Vaig Lang Ba Raog

Veui an ndix, Dax Mguah Yiex Lih Ba Raog ang jix yuh hriam, ang jix diam vaig. Vaig lang jie Ba Raog moh kaox dox Si Yong ba dieh dix.

Veui an ndix, Ba Raog oud gah braog glong braog rom ding. Goui Dax Guad dix gaex, noh mad (meng) ngie dix hu rub Gax, noh goui gon ra gaex, ndaing ju loux ju si mgah, jix yung yi nab yam Miex Geeing dix.

Goui dix ngaix, Dax Guad sang hu rub Gax, dom loux gah Gon dix ah nin: "In si ngaix ex sang hu rub Gax, ndeeih houig blag nbou gie, bax guih dix een eeb veui ex, ex log viex Gax houig yuh eix ih buan gah."

Houig blag nbou, giex bux aig ra gaex hoig guih dix een eeb, viang moh nan, ang nbaox yaox houig Dax Guad, njun boud njun boud, si ngaix kaix, braix hoig riang, gon ang nYang nbaox yaox houig. Giex bux aig a gaex hoig ki gah pao, dou hu sog noh gah braog rom. Sog njee sog nblaong, jaong gah hoig saex gah hu dix, nkoug gah hoig gra gah bao dix, hoig sog noh dix ngaix, gon ang nyang nbaox yaox Guad nyiex dix. Kaix an, giex houig gah mgreem kaox ding dix mgong, ang lai boun hu gah daeg dix pao, dom nyah [**] dix ngom mgreem kaox ding an mai laex dix, yam an, braix hoig hvaig, giex ra gaex guad nang, Jai hrom nang, hlad nang, ang lai boun gan uig gom ngie baox dix kom yiam dix kaing. Nie yiam nie dug hrom, nie dug brom [**] loux yiam nie ding, rom ngai rom nbaoh giex hoig jaex yuh si nbeix uig, loux yiam giex boun som hoig aox ngie gu si ndaeh.

"Ang yaox Geeing dix ex ang lai hrom glod." Bux Gei yiam kom ah dix nin.

"Ex gah ang lai hrom glod nang, ax jeen daing dix yum ndaex rom kaing."Bux gah yiam kom ah dix nin.

Njiad moh yam yiam giex mai sang daing giex dix lih ndaex rom, Blang Bloh ba oud biang kaox ding an hoig grai loux.

"Bui hoig yum ang lai jix ndeeih im, bax hoig yum, ang lai goui Bui deem bax bog nbix dix dang Geeing bax."

"Bog nbix?"Giex bux aig ra gaex dug hrom kom ah dix nan: "Geem yum Geeing eix ndee mox, eix ang nbaox dong jix bog nbix dix yuh gah mox?"

Blang Bloh ah: "Ex dox bax jie haeg dix mgong, bax bloi hu ndaex rom, kaix an bax hod noh, yaox bax nien [**] haeg ndee mox, Geeing bax yum ndee an heui, Bui ba blaex Geeing bax gah oud nang dan heui."

Si ngaix kaix, hoig riang braix, giex bux aig ra gaex bloi haeg ba dox Blang Bloh gah dix ndaex rom, giex hod blag hu haeg an. Haeg si nbloui houig gah ndung dix mu, nien ndee an, haeg njiad si nbloui vu viang ngie mai rom ndaex ndung. Giex bux aig ra gaex yaox yuh nin hoig dong Geeing dix yum ndee an, kom moh nan, gon ang nyang nbaox boun hvaing nklaog Geeing dix lih, nie ang lai dong gah sang deem Geeing dix bog nbix, nbaox yiam nang. Ja yiam ja yiam boud! Yiam dom uig lih hliex. Gang Goi ba ndaing nyom id gah ndaex bang yeem an mai Ga Jag ba bu ndaex Rao Ma an gah jia rom. ngai nbai rom meeih gah loux yiam giex. Yam an, Dax Guad baing haeg mgrix kaox houig gah giex dix gaex mai ah nin gah giex: "Bax jen lug moh moi ju hmom gon ju loux, ex log mgae bax deem Geeing beix bog nbix."Kaix an, Dax Guad dox giex bux aig ra gaex ih graeng yuh hriam gah dix ngeem mai hriam im jiad sib jiad loun, grai giex hmoung mgrong sang bog nbix.

Bux aig ra gaex hod yuh noh log loux grai Dax Guad an, ja yuh boud hriam gah braog glong ling ngaix ling som, hriam jiad sib jiad loun an hoig laeh noh rom ngie. Dog boud hriam ah "Ding ding dang dang" Nan, giex ja doing boud hriam ang nbaox naox gox. Kaix dix ngaix mai dix som, Gax meed hrom gah, dom lih ah nin gah giex bux aig ra gaex: "Yuh bax dix ndee an, hoig Meed hlo ngie dax Si Yong, ex houig yuh bax yaox nqom ha."Ah nang nan, ang mang moing dix sang giad giex, giex dom deei si mgiab giab hriam an si vun gah ndaex nqeeih gon Gax an, gon Gax ang lai dien nyei bie dix mgum gox uig yum ngie. Giex bux aig ra gaex nbaox yuh nang hriam ah "Ding ding dang dang" nan, loux doing giex hriam nie oud nie kian. Kaix dix ngaix mai dix som, Reeih meed hrom loui dix houig dix mu gah giex mai ah: "Bax hoig lud hrom Si Yong, nbog yam yum bax hoig houig pao, ah nang nan, ang nang nqeeih dix mai, ged sang nbleed mu giex laig ndaex vaig dix, njiad moh yam an heui, giex nbaox deei nang hriam hoig doung dix ndaex ngu da ing gah ndaex nqeeih Reeih pao, Reeih hmoung saex, uig sod [**] ngie ngog dix mai njuaih [**] jaong dix kom sang yum dix.

Giex bux aig ra gaex ja nbaox doing nang hriam ah" Ding ding dang dang" nan. Houig ndaex loui si ngaix, Si Yong gin meed hrom mai houig dix pao. Vu ving vu voig [**] gaex dix mai houig gah giex kom mgraox dix gah giex. Houig sog bax dix yum, ex sang yuh bax yaox nqom pao!

Bux aig ra gaex yaox houig Si Youg gah dix pao, yaog dix bloi si mgiab mai ndum, yaog maox ba dox Dax Guad gah giex dix gaex dix nyaing mai ah nin: " Si Yong eui, maix hoig blaex Geeing yiex yum, yix houig dix bog nbix pao, maix ged sang gieh yix yum, yix gah ged sang gieh maix ang lai glod." Hoig ah nan, uig yaog dix sae glong maox hoig yuh glong an gah Si Yong. Maox jie Bux Gei jo dix piaog gaing Si Yong, maox jie Bux boun piaog si ndax. Si Yong uig mgraox ngie, sae riang dix lu lax, giex bux aig ra gaex hoig boun nbluh Si Yong mgouih pao. Giex hmoung loux ah Sia ndum mox ndum an, loux Sia ah: "Kaox ding! Bang oux, kaox ding, bang oux." Nan, Bux Gei hmoung noh, bu bab piaog maox mgiex dix gah kaox ding, Bux hmoung noh, uig nkrom piaog maox jie dix gah bang oux. Kaix hoig piaog giex maox gah kaox ding mai bang oux, giex bu bab deei loun hriam im hoig doung rom an nbeed noh ndaeh nqeeih Si Yong, yam njaeh, Si Yong gon boun gan saex, oud kaix ang lai boun gan saex, yam uig gloi sae loun hriam gah ndaex nqeeih Si Yong, Si Yong hoig hmaing giex bux aig ra gaex vieh hrom va hri gah dix.

Giex bux aig ra gaex yaog dix ah nin kom ra gaex dix: "Vieh hrom gah maix jix dix, viang moh nan, maix jo dix ndeeih dox Geeing yix."

Si Yong ah "Beix ran bloi ex ha, ex log viex beix laig ndaex nyiex mgaig yaox Geeing beix."Giex bux aig ra gaex ged noh, ju box.

Si Yong hmaing giex yiab ngai dix mai nbrug biang gaex dix, laig ndaex rom, houig gah nyiex Si Yong pao, giex bux aig ra gaex nblaih ngai dix pao, yaox Bui im miex nyao, ang yaox Geeing dix ngie.

Si Yong hmoung ah ang Geeing giex oud ndaex Bui im, hlad giex ang bloi dix, dom min grai see giex hmoung ah: "Goui dix ngaix naox, ex hoig baeh Dax Guad dix gaex, moh ang mah Geeing bax." Hoig ah nan, dom viex bux aig ra gaex hu houig gah si veui nei ngad. Giex bux aig ra gaex yaox hoig moh Geeing dix, dom ah nin gah Si Yong: "Niad, niad yuh Geeing ex ndeeih im."

Si Yong hoig yaoh ngie gah mai mgrux ngong dix ah nin: "Yum noh hoig ndaing hreeng, gi moh si ndah nya ba log gox, gah ang lai boun bai ndeeih glod."Noh ah nin gah giex bux aig ra gaex: "Bui ang lai boun bai ndeeih im, viang moh nan, ex log bluad pi mab dix gah bax."Hoig ah nan, noh yaog dix deei mae kri siang dox noh gah giex. "Yix ang yuh did dix gah siang jie maix in, siang in gix ang die ji Bui im dix gaex."Giex ah nin.

Si Yong nbaox deei loun diex mai si maox hrang Nbrung dix loun dox gah giex. Giex ang si mi gox. Si Yong nbaox deei nang kaox lang kaox ngoing ra nbaex mai ah: "In gix kom uig dox beix jie heui, loun diex in, gieh maix houig gah blag raog sax, jix lih dix moh hngoux si maox hrang Nbrung in jix lih dix moh Lig, moh Moi, kaox jix lih moh vaig lang, hoig goui in gix sax, si ngaix som go beix ndaing hmom kaix."

Bux Gei hoig ged nin: "Bui hoig yum ang lai jix glod, nbrie ah maix sang bluad pi mab dix, yix gah ang lai ah did dix gah maix, viang moh nan, maix jo dix ju loux grai yiex." "Loux dix?" Si Yong qog.

Bux Gei ah: "Bloi Bui im in gix kom uig, pao sax, bo lai luang dix mgiex Bui, nie ang boun dix blaex Bui."

Bux ah: "Ba hmaing ex moh: yam rung braix ang hliex lih, maix jo gieh hliex lih, yam raex braix, maix ang boun yuh jee ba ang ko ang hmom."

Si Yong hoig ju loux grai giex bux aig ra gaex, mai bloi Bui im an gix.

Bux Gei mgiang nang loun diex gah daix kon mguax, mgiang nang kaox gah daix kon ndom; Bux mgiang nang si maox hrang Nbrung gah daix kon mguax, mgiang nang kaox ngoing gah daix kon ndom, ndeeih ing blag raog kom ra gaex dix. Kaix an, loun diex lug dieh dix lih moh hngoux, si maox hrang Nbrung lug dieh dix lih moh Lig, Moi, kaox lang dieh lih moh vaig lang, kaox ngoing dieh dix lih moh mgon bad, njaeh dom yam an ndix, Ba Raog hoig goui vaig mgon, hoig lih dix moh graeng yuh gaing nqo gah heui.

Nbeen: lao Hag Diex Lang Qang
Vui Da jao lao
Liux Veng Huax jao diam

Nbeen Ai Kang

Dax Brong liag Gon dix eei Nbrung ding dix mu, Gon Dax Brong Nbrug nbrung lai ling ndaex yaong gu si ngaix, baox nyiex baox yaong hoig ndaing gouing gah uig. Ai Kang sae hrom dix sang yuh noh yaox nqom dix nbog.

Did dix ngaix; Gon Dax Brong nbrug Nbrung lih, hoig vid ngie dix ndaex ngai Bui, noh yaox nbrug Ai Kang nbi laing gah ndaex grax mai sae riang dix hnod gah maox, noh dom qog: "Ai Kang eui, Ai Kang, geem ang an moh nbi laing lieh, yuh ba dix maix dog noh?"

Ai Kang ah: "Gon Dax Brong eui, hoig lud mgaig maix noh, in ang moh nbi laing, moh dom Nbrung ba liag ex kaing dang ndaeh."

Gon Dax Brong ah: "Dom nbrung? Geem jix dou noh lieh?"

Ai Kang ah: "Gon nbrax dou kaing Nbrung jie maix an."

"Ang ex yi."

Gon Dax Brong ah: "Ax si laih dix yaox box." "Jix si laih box yuh gah mox?"

"Maix nbrug Nbrung, ex nbrug dom nbrung, ex ah dix ra loui nan, mgaig yaox, moh mox ba liang houig gah nyiex een grog si veui."

"Jix dix."

Ai Kang oud biang dom nbrung, ah, dix ra loui nan! Nbrung jie Gon Dax Brong nkrang dix dou si veui.

Ai Kang yaox hoig luan Gon Dax Brong si ngai, yaog dix glian nbi laing dou grax ndod houig nyiex grog veui.

Gon Dax Brong hoig ndaing ndaox ngie gah, noh yaog dix lih kaing Nbrung, mgaig dom nbrung, hoig mgaig mgaig nbaox mgaig, hmaing giex louh gah Nbrung jie dix.

"Ex ang louh!"Ai Kang lo yuh dix ah nan gah loux noh.

"Hmaing maix louh jo dix louh." Gon Dax Brong tux Ai Kang louh. " Nbrie ah maix sang louh noh dix dei, gieh moh nan, louh box." Ai Kang lo yuh dix log ba ang hiex hrom ju yuh nan.

Ai Kang rieb maox nbrung dug noh hu, yaog dix vua dix biang blog Nbrung hliao Nbrung dou.

Gon Dax Brong yaog dix nbrug "Dom nbrung" Sae riang dix hnod noh gah maox si vied, hnod noh gah maox miex nkreeg [**] mox nieh,"Dom nbrung" Ang quh ang gieh. Gon Dax Brong dom lih kaing dom nbrung, meed hrom yaog dix tied [**] dom nbrung gah jaong dix, nbang lia dom houig jo mgong sein, Gon Dax Brong hoig vai ngie kom ing dix gah nyiex.

Nbeen lao Hag Diex Si moung
Lu Bing jao krom
Ai Dix jao diam

Kaox Nya Ba Log

Mouing Vo Lang ndaing qi hnyae, ndaing mab nu nai Bui si nqeeng, baox nyiex baox yaong ndaing gouing gah noh, ang hrom yaox, kee nin, Bui dom geeig Ai Kang yuh Nban Miex in yaox nqom.

Goui dix ngaix kaix briex nbou, Vo Lang njouih nyoi dix hu gu guang ndaex yaong njee nblaong kom vid dix ndaex ngai Bui. Ai Kang hmaing mouing dix id biang diex, bad nkoug ia mgroi hnam biang gaex mouing dix, deei kaox lo yuh dix sae riang dix dog mouing dix, Vo Lang yaox noh, hoig bru kuan ngie gah kom qog noh: "Geem ang maix hlad mouing dix yum lieh?"

"O, Vo Lang eui, ang yuh did dix, ex jix boun gieh noh ndeeih im."

"Rug moh lieh?"

"Groux maix mgaig kaix."

Ai Kang deei kaox mu lom lei goui nbeen dix kaox an lih kaing ndaex nyiex, goi od ngie noh gah dag dao si nbeix dix, mgiex kaox goi nyon ngie gah biang gaex mouing, goi goug ngie dix mgum ah: "Mouing eui, mouing eui!"

Mouing Ai Kang yaog dix gaoh, yaox Vo Lang, yuh dix log ba gaig nan mai dou haog ndaex nyiex.

"Geem moh in ba dix yuh nin, mgad dix lug yuh nin?" "Kaox nya ba log mah! "Ai Kang yaog dix ndeeih bog loux noh ah nin.

"Ai Kang, maix mgaih dix jix gu jee yuh nin, jouih kaox nya ba log in gah ex kaing."

"In moh siang brah nju Dax nju Yiex yix gah yix, ndouh jix jouih yuh gah mox?" Ai Kang lo dix ah nin.

"Jouih an maix jouih lieh?" Vo Lang nblian dom ngai dix, kin Ai Kang jouih.

"Gieh ex jouih kaox in, pi nyiex pi ma nyiex yix jix yuh ex laex." Ai Kang ang lai nyei dix vud, oud ndeeih ah: "Yuh nin kaing, louh gah Moi ra mu, ex log goung gaing Moi gah ku nyiex, hmaing pi nyiex vieh hrom gah dix."

"Jix! jix!"

Vo Lang viex kaox nya ba log an ing gah nyiex, soun sang qe noh dix yaox riang "Nya ba log" an, noh goug mouing dix houig, deei kaox yuh lung dog mouing dix gah, kaix an, noh nbaox deei "Kaox nya ba log" an, sang gieh mouing dix ndeeih im, mouing noh ang lai jix ndeeih glod pao. Hoig gaong joung ngie gah biang diex kom nblian dom ngai dix nbliex Vo Lang, hoig yum gah dog Vo Lang dix.

Nbeen lao Hag Diex Si Moung
Nab Hang jao lao
Ai Dix jao diam

Mgae Dix Jix

Vo Lang iag ndaing nkoing gah jee ba jix yuh Ai Kang. Goui dix ngaix, noh viex mae houig gah Ai Kang miex nyao, hmaing Ai Kang mgae dix.

"Ai Kang ba hlag eui! Gieh maix boun mgae ex jix jee ba jix maix, in gix ex dox maix pe.

"Hmom, maix mgae dix hmom hmom mai ex, ex rian dix mgae maix hmom hmom. Kom moh nan, sang mgae maix dix jix, jo dix boun mgu saex ox!"

Vo Lang iag ah: "Boun! Boun!"

Ai Kang yaog dix rieb mae, deei qee ding lih dix mu, ah nin gah Vo Lang iag: "Jee ba jix ex hoig goui ndaex in kom uig heui, maix laig dix deei noh."

Vo Lang iag nbeed dix laig ndaex qee. Ai Kang yaog dix npoub [**] moing qee sied ngie, dag deui qee gah kaox ding dix mgo, kaix an, sog kaox ra loui mgong houig, sae riang dix dog qee ba dag deui gah kaox an, dog Vo Lang iag an dom uig riag yo mai lu lax dix ndaex qee njee nblaong.

Hoig dog noh dom hoig yaox noh nqom dix njee nblaong. Ai Kang daeg bloi Vo Lang iag lih kaix.

"Maix daeg dong saex pao, jee, ba jix ex maix rian dix boun jix pao."

Ai Kang ih loux yo gah mai ah.

"In si ngaix moh daeg njaeh dix mgae dix kaing, boun sax nbaox houig ox!"Ai Kang ah nin gah Vo Lang.

"Maix lug ndaing boun se dix ka dix, gah pai yie jix nang, yuh nin ndaing hmom, boun sax bo lai houig. Ing eix pao!" Ai Kang nbaox yo nang noh dix nbog, hoig ah nan, yaog dix viex qee hu kaix. Vo Lang iag gah hoig qoh qoh ngie mai viex "Jee ba mgae" dix ing gah nyiex.

Nbeen lao Hag Diex Si Moung
Lu Bing jao krom
Ai Dix jao diam

Du Baox Dix Gah Moi

Goui dix ngaix, Vo Lang ged nin: Ai kang ndaing jix bie jix hlein Bui, ex yuh noh gaig dix nbog ha.

Noh dom ah nin gah Ai Kaing: "Ai Kang eui, gieh dei jie maix lom gah si maox, ex log sei maix ih Moi dix mu." "Maix bo bie ex Vo Lang!"

"Gieh ex bie maix, ang son dix moh Vo Lang." "Maix njun dix vud, ex ing deei ag ha."

Ai Kang ing deei ag pao, sae nblum gah rao dei viex noh houig gah Vo Lang.

"Maix ji ex yaox jee ba sang buing ex pao. (dou dang)." Vo Lang ji noh yaox rang si maox mai ah nin: "Buing rang an gah heui."

Ai Kang vaig ag sae dei, nyon noh gah rang ah "klag" nan dix daix kaing, dei njiad hu bid gah rang.

"Ing gah nyiex ex dug Moi ox."

"Bo nyang! Bo nyang! Ai Kang eui, hmoung grai Bui noh, maix ndaing njiad jix bie Bui, gieh maix boun bie ex dix nbog, ax log ing dug Moi ndum mox ndum an."

"Vo Lang eui, bie ang bie maix, dom ang Bouih moh ba did dix, yam ing deei ex ag gah nyiex nux, Bui hoig riag hoig yo ndaex yaong, gi dang nkrom dix hu breed ngu, ex lai qog gix, geem daeg dong moh nyiex beix ba broui gah ngu, veui an, ex roung ged sang hu deem Bui breed ngu, hlad nang maix sag gah njun dix ndee in."

"Ba dix? Ah maix broui ngu yuh nyiex yix?" Vo Lang hmoung. ah moh broui nyiex gix, hoig ki ngie, sae riang dix yaog dix dog jaong dix gah diex mai ah: "A miex eui! Maix yuh dix ang ndog grai ex hmoung, gon ang niad dix ing breed ngu liex!"Noh uig bu bab nbluh daix Ai Kang dou ing gah nyiex.

Houig gah yaong, mgaig noh, ang nbaox moh ba did dix, nyiex gon hmom ngie, ang nbaox broui. Vo Lang daeg dong moh Ai Kang ba bie dix. Ngax log Ai Kang ah: "Bui nbrai an, gieh ex blaex dou dix nbog!"

"In moh ged soun Moi dix mu an mah!"Ai Kang yaog dix ngiah ngie mai ah.

"An maix laig ndaex gog dug Moi hu dix mu box."Vo Lang ang lai dong gah sang ah dix, vu vied vu vied ngie daix dix gah.

Nbeen lao Hag Diex Si Moung
Lu Bing jao krom
Ai Dix jao diam

Nbriex Klax

Goui dix ngaix, Vo Lang ih klax kraox, si nbug Ai Kang. Noh yaox ja mgaig boud Ai Kang klax ih dix, dom ah nin gah Ai Kang: "Ai Kang eui, geem muih maix klax jie ex in lieh?"

Ai Kang ngiah ngie kom ngeeh ngeeh gaing dix gah.

"Gieh maix boun nbriex hu, ex log seed maix gah."

Ai Kang ja ngiah ngie gah kom ngeeh ngeeh gaing dix gah.

Ra loui si ngaix, Vo Lang ja ih boud klax kraox an haog biang gu id. Noh, ged nin: Ai Kang nbrie ah jix nbriex gox dix yuh gah mox, ang noh ndouh boun nbriex klax in hu.

Did dix nbou, Vo Lang hoig id, Ai Kang nbriex goi houig bu bi ngie gu id Vo Lang, yaog dix goi nbluh gaing klax Vo Lang, dom deei muah hoig baih hloux sae noh ndaex ndiang klax, Ai Kang yaog dix moux dix kaix blag diex. Ang nbaox goui miex nkreeng dix, Vo Lang hoig haing pao, hmoung klaix ba did dix mgreem, nyiex grei dix, yaog dix bu bi gah daix dix, gon klaix vid.

"Rian dix moh man ex aing dix kaix id dix nux eui."Noh nkrom beeig klax dix dig noh gah biang diex kaix.

Vo Lang nbaox ndeeih laig id nang kaix. Ai Kang laig ndaex nyiex sud klax jeeb noh hu.

Braix hoig riang pao, Vo Lang ang lai yaox klax dix daeg dong dix nbaox soum [**] mgreem Ai Kang. Kom moh nan, jix gaoh peed box yuh gah mox? Noh ang lai dong gah sang ged dix, log noi ngie dix om Lig yum yuh nan biang gu id kaing.

Nbeen lao Hag Diex Si Moung
Lu Bing jao krom
Ai Dix jao diam

Boun Louh Bui Yum Gah Sang

Vo Lang hmaing Gon dix ba moh Vo Lang iag hu liag Sang Hag Diex Siam dix mu, hu ra loui ngaix hoig ndeeih houig. Kaix dong Ai Kang mgrong in, noh hoig lih ged yuh nin dix mu:

Njiad si ndeih jo yam yum jee Gon Vo Lang. Ai Kang viex Gon la houig dix mu yuh klai. Noh ah nin gah Vo Lang: "Maix bo ndouh gieh Bui yum ih la im jie ex in ox! "Vo Lang hmoung ah noh nin, dom ah: "Miex moh loux ngiah in, Bui yum mox ndouh jix ih la im liex?"

"Sang viex ex yuh pi gah, gieh Bui yum ih, maix jo blud ex ih! "Ai Kang ah nin gah noh.

Vo Lang ang lai hrom hngiad loux noh, ah ngie "Hmom hmom" Kaing.

Houig mgreng som, Ai Kang njom yam hoig dang youig dang mao Bui bae ba yum an gix mai hoig id ngie kom ang lai dong did dix; nbriex goi hu ngie gah biang mgraih, si yiad nkoug la ndud, blag brux hloub Bui yum, sae gaing la ndaex nqeeih Bui yum.

Houig si ngaix kaix boun ngob, Ai Kang dou houig biang mgraih mai sog Ia: "Ia jie ex! Ia jie ex?"Nan.

Bui ba bae Bui yum ah ang nbaox yaox dix gaex gox.

"Rian dix moh Bui yum ba hoig ih euih?" Ai Kang ah. "Nab boun ah dix maix, nab boun yuh gaing ba ang hmom." Vo Lang uig meed hrom kom ah dix nin.

Ai Kang nkrom hu blag brux hlob Bui yum. Ia oud ndaex nqeeih Bui yum. Bui hoig yaoh ngie gah uig heui, Guad an gix hoig yaoh ngie dom hoig bru kuan dix.

"Bui yum, ex ang nbaox yuh keen, ang nbaox yuh daoh, maix hoig ran ih la ben lug ang ih ngai dix! Ben lug ang ih ngai dix liex! "Ai Kang uig ah yuh lung nin.

"Naox, naox, Ai Kang, bo lai nyei, bo lai bao Bui hmoung, sang jie maix ba dix yix log blud maix ih."Vo Lang ah nin.

"Ex sang jie Bui yum!"Ai Kang ah.

"Ba did dix maix ang ju dix jie, jix ah sang jie Bui yum yuh gah mox?"Vo Lang meed hrom kom ah dix nan.

"Sang jie Bui yum, boun sang jie Bui yum!" Ai Kang nbaox riex loux dix kian kian ngie.

Vo Lang, ged noh Gon Nyom dix gaex kaing, Miex Geeing ang goui nang, dox noh jie roi kaing gon hnyab eix dix hu si nbaeng noh, dom ah: "Hmom box! Hmom box, maix viex box hu. Kom moh nan, maix jo dix si nbaeng hmom hmom jeeix." Ai Kang yaog dix bux Bui yum hu pao.

Si ngaix hoig ngeih njee dix, Ai Kang ged noh: Vo Lang iag dee rian dix ndeix houig gah nyiex pao:

Ai Kang bux Bui yum houig. ndaex grax, hloub noh gah brux hmom hmom, nyob Roi sae noh ndaex si ngian ra loui mu, een noh mgreem brux kaix.

Vo Lang iag nbrug Sang houig pao. Ai Kang dab yiam dix. Vo Lang iag yaox yiam Ai Kang dom qog: "Ai Kang geem yuh gah mox?" Ai Kang ah: "Saex Gon ex, hoig ngia ngie ah 'hee hee' nan, keen noh ih si ngie!" Vo Lang iag hmoung ah noh nin, gah hmoung nang ah loux ngia "hee hee" nan mgreem brux!

"Bo ndouh gieh Sang ndig Gon ex ax. "Ai Kang grai nang noh hmoung; deei nang dix dig si ngian oud mgreem brux.

Vo Lang iag nbrug Sang hu ndaex grax, Sang ang hngiad loux, jo dix ndig brux:

"A miex eui! Maix hoig gieh Sang ndig Gon ex yum pao!" Ai Kang yaog dix yiam riag yiam yo. Vo Lang iag hmoung noh, lug ang lai hmoung loux ba did dix mgreem brux pao. Roig gieh noh yaoh gah dom hoig nbang lia ah "nbug" nan kaing nblog Sang.

"Maix jo blud Gon ex pao! Maix jo blud Gon ex pao!"Ai Kang yiam nang, nbluh nang ngog si nbeix Vo Lang iag.

"Geem sang jie maix ba dix? Ex log dox maix jie, niad bloi ex!" Vo Lang iag hoig yum bi ngie gah yaoh dix."Ex ang bloi maix, ang maix dox ex jie Sang in, ex ang bloi maix. "Ai Kang nie niad dix nqob nang ngog si nbeix Vo Lang iag mai ah nan.

"Hmom, hmom, ex log dox maix jie, ex log dox maix jie!" Vo Lang iag hoig ndaing ki ngie gah, dom dox maox dug Sang gah Ai Kang. Ai Kang sae Bui yum gah biang nblog Sang, dug Sang hu kaix.

Nbeen lao Hag Diex Si Moung
Nab Hang jao krom
Ai Dix jao diam

Plu Npaeng

Goui dix ngaix, Ai Kang hu sog kix ndaex diag, daeg houig mgreng grax, Si Meix ding gluing ngie ra loui gaex lih' gah noh mai yaog dix piaog noh.

Ai Kang ndaing ndaox ndaing am gah, dom qog: "Moh beix Si Meix yaong mox, ex ang nbaox nbriex Lig nbriex Moi beix, yuh dix sang blaex ex?"

"Moh kee ndaing hlag ndaing hliao maix kaing Bui, Vo Lang hlad gah maix, dom hmaing yix houig dix blaex maix! "Si Meix ding an dix gaex ah nin.

"O, kaix moh yuh nin. Gieh moh nan, hmom, ja moh ang ex yum, beix gah ang boun dix glod hmom, yuh nin, ang lai hlee kaing dag deui beix ex gah kaox kaing, gieh ex goi yum ngie, roi kaing nai beix riang rao dix."

Si Meix ding gluing ra loui gaex an gix, hmoung ah noh nin, ged lug ko nang loux grai noh. Dom yaog dix dag deui noh gah kaox oud braog grax dix mgo.

Kaix hoig ing Si Meix an gix, njiad si ndeih jo yaox Gon Vo Lang; gaoh noh kaing yuh lai Hag Diex dang ndaeh. Noh sae riang dix du daig du daig ngai dix, moh kee yam, laig noh gah ndaex diag kaox nux, Gong jo dix bu laig ndaex ngai noh, du daig yuh gah mox ang jix lih. Vo Lang iag yaox dag deui Ai Kang dix gah kaox, dom qog: "Ai Kang, geem yuh maix ba dix ndee in?"

Ai Kang yaox moh Vo Lang iag, yaog dix ngiah ah "hix hix" nan mai ah: "Gong ba bu laig ndaex ngai ex nux, ex dom haog oud hlaong hlaong sang gieh npaeng plu noh lih."

Vo Lang iag hmoung ah noh sang gieh npaeng plu lih, ang lai dien njun gox, uig bu bab bloi Ai Kang lih, doui hmaing Ai Kang dag deui dix. Ai Kang yaog dix dag deui Vo Lang iag hlaong hlaong, kaix an, gon joux piaog maox hmom hmom, yaog dix ing kaix, ang lai mgi gox noh. Vo Lang iag yaox hoig ing Ai Kang, bu bab goug yo noh, Ai Kang goug mgi noh mai ah: "Hmom, hmom, gieh npaeng ha, hoig moi ngai maix, maix boun lih kaix."

Nbeen lao hag diex Si Moung
Rux Gang jao krom
Ai Dix jao diam

O Diex Louh O Kang

Nyiex Vo Lang liag o kang 'houig dix mu, Ai Kang hoig gin nkoing gah, si mie dix boun jie o kang in. Viang moh nan, noh ang goui mae dix liag.

Goui dix ngaix, houig mgreng ngaix, Ai Kang ron hma oux gah braog grax, yaox houig Vo Lang gah ndee oud dix, hmaing Gon dix glian o diex ba yuh moig neix ia an oud braog dix. Vo Lang hoig ndog hmoung boud npong moig neix ia an dom ang nbaox houig mai noh, uig nkrom niad dix hu blag oud Ai Kang ma ah: "A miex eui, ndaing npong ngie!"

"Moh liex, daeg sang njaeh dix som pao." Ai Kang bloi mgon ron hma gah biang diex, bu piah bu piah pong hma ba oud gah gaex dix, yaog dix gaoh mai ah.

"Geem sang gieh maix ex laig ih nang lieh?" Vo Lang hoig jo mia ngie gah.

"Houig ih box."Ai Kang gieh Vo Lang houig ngom mai o diex.

Vo Lang yaox gon loug moig ndaex o diex, ang yaox ngu ang yaox paex jiang, hoig ndaox ngie gah. dom qog: "Ngu ang goui, o diex mgad jix loug yuh gah mox liex?"

"Moh hei liex, o diex jie ex in, yuh briex ang sax siao ngu." Ai Kang bug Vo Lang ih moig neix ia, yaog dix dox gah noh, noh gah bug nang dix ih dix log duh.

Vo Lang nbrei dix liam lia o diex blag biang blag mgreem, hod si vie si hveing o.

Ai Kang yeed yuh dix log ba ang yaox yuh nan, som nang qog nang: "Vo Lang, nyom ang nyom?"

"O ndaing nyom." Vo Lang ah nin.

Vo Lang sang hu yuh lai mgee gah Hag Diex dang ndaeh, ged nin: gieh ex boun dix viex o diex in, ang siao plu ngu gox hoig yaox dix ih eeb sin, ndung goui ndee hmom. Noh bloi dog mgiex dix ji o diex mai ah nin gah Ai Kang: "Jouih o diex in gah ex kaing."

"In moh siang ba een Dax ex, ang boun jouih!" Ai Kang ah nin.

"Sang ih maix noh miex nding mae, ex log dox maix ih." Vo Lang ja hmaing boud.

"Maix gi sang dox miex nding, ex gah ang jouih." Ai Kang ang ndouh ju dix jouih.

"Louh gah dang jee box?" Vo Lang nbaox ah nang nin. "In ...." Ai Kang yeed yuh dix om ba npo npo nan gah loux Vo Lang.

"Louh ba dix gah jix." Vo Lang si mie ngie dix boun o diex.

Ai Kang ged hoig sang houig nbog yam, dom niad dix hod loux noh ah: "Hmom box, moh ngie mgaig ex moh maix Vo Lang kaing, dom louh gah o kang jie maix."

"Hmom, hmom, njun dix vud, ex log hmaing Bui houig dox o kang gah maix kaix." Vo Lang yaog dix viex o diex hu mai. Hoig gin naog hrom gah o diex kom hu dix.

Nbeen lao Hag Diex Si Moung
Nab Hang jao krom
Ai Dix jao diam

Nbrung Jix Aing Mae

Nbrung baing ding jie Ai Kang hoig guad, jouih gah Bui mox, Bui gah ang lai ih. Goui dix ngaix, noh yaox houig Vo Lang blag gog Nbrung nyiex gix, dom deei mae loun gon, een gah mgreem nyiex grei Nbrung, deei kaox guah guah noh gah mai sud mae.

Vo Lang yaox noh, hoig gin ndaox gah, dom qog: "Geem yuh maix ba dix ndee an?"

"Sud ex mae gon ba daeg kraox aing Nbrung nux.

"Maix mgaig, mae gon baing baing ngie in. "Noh yaog dix ndom mae gon houig mai Vo Lang.

Vo Lang yaox mae gon in, hoig mgoung ngie dix nbliex.

"Geem aing noh mae gon yuh nin gu si ngaix lieh?" Vo Lang hoig nkoing ngie gah mai qog noh.

"Moh hei lieh."

"Geem dox maix Nbrung ih dix box?"

"Moh ngie rib kaing."

"Hmom, jouih gah ex kaing."

"Ang, in moh siang ba hman ex gah!"

"Maeng ba nbrai yuh nin, sang ih maix noh miex nding mae, ex log dox maix ih, bo lai tiang! "Vo Lang hoig kin dix ah nin.

Ai Kang lo yuh dix ged ha, yuh dix om ba ang hiex ju yuh nan mai ah dix nin: "Nbrie luan ah maix Vo Lang sang ih noh, ex gah ang lai dong gah sang ah dix, maix ja dox puan yieh rong mae gon box."

"Jix! Jix!"

Vo Lang nbrug Nbrung hu pao. Ai Kang deei mae gon kaing Vo Lang puan yieh rong, hu yuh lai mgee gah Hag Diex doung Mung Jiang kaix.

Nbeen lao Hang Diex Si Moung
Nab Hang jao krom
Ai Dix jao diam

Kaox Si Yiex

Goui dix num ndix, gon nyiex gon yaong hoig gin si npom, Bui hoig jai hrom gah si npom, ih ngie hloux kaox, riah rib kaing. Viang moh nan, nyiex Vo Lang ja gon yaox boud dix ih briex nyom rom hloung, neix Lig neix la ang njud ang njai [**] gu si ngaix.

"Jo ged dix jee ha, deem baox nyiex baox yaong dix." Ai Kang ged nin. Noh gloi deei Miex la ba ndeg dix mu nyiex gix an, baeh noh, mguah noh goui ra soun, njog dix gie gah hlax muah hmom hmom, houig mgreng som nbriex hu si nbaeng gah mgreem mgraih nyiex Vo Lang.

Houig si ngaix kaix, nyiex Vo Lang njiad som biang mgraih kom nyiex. Ai Kang yaog dix gog nbae bee [**] hu, mgiang kaox mgrix houig gah mgreem mgraih ndee an, kaix an, noh yaog dix qun qun kaox mgrix gah diex mguax ndom, yaox did dix, sae noh ndaex nbae bee. Vo Lang yaox noh, gin ndaox gah, yaog dix lih kaing mgraih qog noh: "Ai Kang eui, geem yuh maix ba dix ndee in?"

"O; Vo Lang eui, sog ex jee ba nyom dix ih."Hoig ah nan, nbaox si nblaoh nang biang diex kaix.

Kaix an, noh yaog dix bloi kaox, ndeh hyaog dix biang kaox mai hngiad noh dix daix, kaix an, nyah dix ngom si nblaoh diex, houi mgie hlax muah kaing ndaex diex dix mgie. Vo Lang yaog dix dou hu mgaig geem moh jee ba dix dix dei, yam an, yaox ngie yah Ai Kang mgie hlax muah kaing, ba gie dix oud ndaex mgie moh neix la, noh goi sae ngie neix la ndaex nbae bee.

Ai Kang nbaox yaog nang kaox, si nblaoh diex dix daix, ja nbaox ndeh hyaog dix mai kaox kom hngiad noh, kaix an, nbaox nyah dix ngom, nbaox houi nang mgie lih dix mgie.

Vo Lang hoig yaoh hoig mgoung ngie gah, yaog dix deei kaox kaing Ai Kang mai ah: "In moh siang ba dix yuh nin, jix moh kaox yuh nin?"

"Vo Lang eui, in moh kaox jie Si Yiex. Ndeeih dox gah ex, ex gon sang sog dix ih gu jee gu jong gah."

"Nbrie hoig moh kaox jie Si Yiex, jo dix moh jie Vo Lang pao."

"In moh kaox sang glod ex mai, ex ang boun gieh noh mgrai kaing dix."

"Sang jie maix ba dix gah, ex log dox."

"A, gieh Vo Lang rug ah sang jie noh dix dei, jo dox ex jie hngoux gah sam sib jo."

Vo Lang dox Ai Kang jie hngoux gah sam sib jo pao, Ai Kang hmaing Bui houig deem dix glom hngoux in ing, noh mguah Bui houd Bui si npom ih hngoux, gieh Gon Bui lod luan kaing ndaex si npom heui.

Nbeen lao Hag Diex Si Moung
Lu Bing jao krom
Ai Dix jao diam

Yuh Ba Dix Moi Ang Goui Hrang Blag Biang

Ndi ndix, Moi mai Bui hoig moh baox mgrom. An dix ngaix Moi deem Bui tai ma, gouig hoig hax ngie, Moi gah hoig daeg, Bui gah hoig mao. Bui hoig naox gaing pao, hu piaog Moi oud gah num kaox ruih braog ma, Bui hu laex dix gah mgreem yeem gaing ma kaix.

Yam an, Si Vai gaoh kaing ndaex diag dix mu houig blag oud Moi, noh yaox hoig jieh Bui meeih Moi piaog noh oud mai num kaox, hrom ndaing ndaox ngie gah, dom hu blag oud Moi mai qog noh: "Moi bux gei eui, rung lom maix goui, daix jaong maix ding yuh nan, gaex hag maix hoig goui nding ndod, maix jix gon gieh Bui jieh meeih dix yuh gaing?" Moi ndeeih bog loux noh ah: "Maix bo mgaig ngie iag gaex Bui yuh nan, haeg ndaex meeih gix gon nie kaing haeg ndaex meeih ex 'loui mgong, Gon Bui ndaing hlag kaing eix ox, nbrie moh gaing jee dix gix hoig jix ged noh lih."Si Vai hmoung ah noh nan, ndaing ang hvah hrom gah, dom ah: "Ang ex ndouh yi, Gon Bui mox ndouh goui riang ding ah did. Maix mgaig yaox, ex hu qe yaox mai gix."Moi grai noh hmoung: "Bo hvi hu ox, maix jix laex jix soum gah." Si Vai ang hngiad loux gieh noh, kin dix hu si lung si lung mai yuh nqom dix gah Bui.

Si Vai houig gah gaing ma, Bui yuh gaing njiad daeg ngom yod sub veei num kaox gah braog ma, daox sub uig qu qu ngie lih kaing ndaex meeih Bui, Si Vai yaox noh, hoig ndaox ngie gah, dom qog Bui ah: "Bui bux gei eui, yuh maix ba dix ndee in, ndee doug maix ngu moh dix ndaeh, daox sub ndux hu lih dix blag?" Bui hmoung ah noh nan, uig ngiah ngie gah mai ah: "In ang nu mah, ja nieb boun mgae maix, maix hoig jix noh."Si Vai ndaing mgaex gah, gah sang qe dix yaox nang. Bui yaog dix leed nad ngu ba oud liah dix an, dox noh gah Si Vai mai ah: " Ang moing maix gah see rao nad, ex jux ngu gah dix blag, daox jix lih kaing ndaex meeih maix kaix." Si Vai jei noh rug moh, nbluh rao nad sae noh gah ndaex nqeeih dix. Bui yaog dix jux ngu gah ndee oud mee nad. "Bung" nan dix daix, gaing Si Vai hoig max dang oud pao.

Moi ba piaog oud gah num kaox ruih an, yaox mgroh mgrong in, ben hoig ngiah ngie dom hoig lu lieh njee lu lieh nblaong dix gah biang diex, hrang blag biang noh dom moh si maox ba jo dix bam [**] yam lu lieh noh dix biang diex, njaeh dom yam an ndix, Moi dom ang lai goui hrang blag biang kaix. Njao ndaing lang ndee nbang lia Moi, maox piaog Moi dom nbluh kaox ruih vog, kaox ruih dom vog kaix dom si ngaix.

Si Vai hoig soum gah Gon Bui, dom gouing gah Bui dom si ngaix.

Nbeen lao Hag Diex Si Moung Vuang Veng Qang jao diam

Yuh Dix Si Nbaox Ang Goui Hrang

Goui dix ngaix, gon Sim mai Si Nbaox hu yuh briex ndaex diag, gon Sim moh jao viex ngu mai la, si Nbaox moh jao viex o mai mgaox. Gon Sim hu nang, ah nang loux dix ling njee grax, Si Nbaox ang hrom hmoung, dom ah nin gah gon Sim: "Bo hvi nyei, ex ang hrom hmoung."

Si Nbaox hoig laex yuh hrom gon Sim, Sim ndaing jaox gah, sang njom dix bog nbix dix gah Si Nbaox.

Giex houig ndaex diag pao, giex ra gaex uig krei dix yuh briex pao, ba baeh la baeh, ba baeng ngu baeng, moig neix ia ba oud ndaex o diex an hoig ndeix sin pao. Daox moig hoig npong si oui ob ngie. Yam an, gon Sim uig mgaex ngie, nkraoh nang, ah nang loux dix,"Ngo dud diad dix, gon Sim bu njee nblaong. " Si Nbaox yaox nqom yuh gon Sim, ang lai boun mgu hrom dix, yaog dix ngiah gah. Sim njom yam ang Si Nbaox rian hrom dix, deei log duh kuang noh gah hrang Si Nbaox, hoig krum yuh hrang Si Nbaox uig heui, saex ngie dom uig lu lax njee lu lax nbiaong Si Nbaox dix biang diex. Sim hoig ih moig ia bag ngie, yaog dix hu kaix noung dix.

Njaeh dom yam an ndix, Si Nbaox dom ang lai goui hrang kaix, viang noh boun ih Meeig gox, blix ruih in gix, moh ngie ba on kaing.

Nbeen lao Hag Diex Si Moung
Ai Soung jao lao
Huang Dang Qing jao diam

Lag Mai Doi

Ndi ndix, nbog yam hoig ndaing hreeng, Lag mai Doi hoig moh ba ou nqou glaig ba aig laig hrom, haeg gix hoig baing ngie log baox dix.

Goui dix ngaix, giex ra gaex hu si laih loux mai baox dix, daix hoig nbrei hoig njog giex dix, maix gah mgaig ex, ex gah mgaig maix. Lag yaog dix ji haeg Doi gah daix dix mai ah: "Doi bux gei eui, ax ra gaex hoig ndaing hmom mgrang dix dei, viang moh nan, moh ngie ax si nbeix dix jee kaing, baing ngie uig. Ax sog rom ron dang jee nbreeih [**] noh goui nbog goui lai jeeix, yuh nin gieh nieh, nie ndaing nyom dix mgaig gah." Doi hmoung ah bux gei dix nin, ged noh ndaing ko, geem hu sog rom ron gu jee houig mai ah nin gah Lag: "Gieh moh nan, Lag bux gei eui, maix ran nbog jie ex si veui."Ba nbog Lag ndaing nbrei dix, hoig nbog hoig nbreeih noh miex nkreeng mox nieh, Doi gah hoig man mgaing dix mai ngom dix, ndeg ngie nyiex grei ba ang nyang hoig nbreeih dix, Doi ang lai boun ngom hreeng, njom yam hu sog Lag jee ba sang siang dix gah, nbriex goi ah ngie nin gah Glang Braox: "Goui gaing ding dix jee, maix niad dix hu daeh grog." Glang Braox moh jee ba ndaing raeh hrom hngiad loux, bian moh gaing ba dix, ang lai qog gox si ndong, hoig hu daeh grog ah "Glung glung" nan. Lag ndeeih houig, hmoung loux luah grog, qog Doi: "Geem yuh gah mox?" Doi yuh dix log ba ki hrom yuh nan mai ah: "Goui loux gin see dix jee, niad dix hu krom baox dix dae, nyiex grei ex nbrie ang nbaox hoig nbrei gox nkram ha kaing, ex gah ang lai dien deem maix nbreeih." Lag ah: " Maix jen hlaeg rom ron in gah mgo gaex ex kom uig kaing." Doi deei rom ron lung houig dix nbug hlaeg noh gah biang gaex Lag kom uig, toux nqeeih nqai dix ngiah ah "hix, hix" nan yaog dix hu kaix. Lag ang dong dix soum gah mgroh yuh Doi, meed hrom dom ah "ag ag" nan.

Njaeh dom yam an ndix, Lag dom lung kom mgo gaex dix kaix. Ang lai jix si nkrah baing dix nbog gox.

Nbeen lao Hag Diex Si Moung
Sui Ga jao lao
Jang Kai Dax jao diam

Geed Mai Ai Ga

Veui an ndix, nbog yam hoig ndaing giad hreeng. Yaong oud gah biang mgong ding dix mu, ndaex yaong riex moh Bui houd Bui si npom blag nie. Bui houd in gix rian hvag song geed (mgrae) gah roung si ndug nyiex dix, ndee an moh ndee jei si mod gix jao gaing dix ba moh Ai Ga.

Ai Ga ang moh nyiex jao mi, Miex noh moh Gon Bui houd Bui si npom. Noh lih kaing ndaex vaig ang nbaox goui miex ngaix dix, Bui hoig tux Geeing noh hu buing naing, Miex noh viex Ai Ga hu yuh gaing ling kix ling num, bie did dix gah ang lai yaox sae ndaex vaig blaig ndaex du dix, soun sang yuh dix mglaoh moh ndien im moh Bui, Miex dom rom hngoux nyiex Jao Mi. Kaix an, jeg rom hoig nie ang lai boun blud si ndaeh, Miex noh ang lai dong gah sang ged dix, dom hu yuh gaing nyiex Jao Mi gah soun rom an. Jao Mi ba moh hrom Lig hrom Soux an, hoig mab nu nai Miex Ai. Ga, Miex Ai Ga gaig nang gah, gouing nang gah, dom brah Ai Ga ba ang nyang naog Puan num an, daing dix jod ndaex rang kaix. Viang moh nan, Jao Mi ba qi hnyae an, bie Ai Ga ba gon iag an gix gah ang bloi, mgiex Ai Ga moh jao liang Moi.

Ai Ga, Miex noh hoig yum, si ngaix som go nie gin nu. Hoig riang braix hoig ho Moi hu gu si ngaix, briex ba ih noh moh ngie grad eeb mai houn oi si um ba dox Jao Mi Lig ih kaing, houig blag nbou, bie jao houig dix jeeix gah hoig om kaox hmoung loux gah Jao Mi, briex gah ang dox noh ih. Braix Hag Diex in gix hoig moh ngie noung ding noung hvaig, rib riam hoig hlaong ngie kaing Bui, ndee rian oud rian hu Si Vai gah. Hu liang Ai Ga Moi, hrom noh hoig hlad hoig si ngua ngie gu si ngaix. Noh gin si mie dix jie Sim dix mu, roi ndong hrom hri noh ndaex diag! Nyiex Jao Mi an eei Geed miex nyao, Ai Ga ged dix sang hmaing dix jie gah Jao Mi dix mu, viex hod yuh baox dix ndaex diag. Kom moh nan, mgaig nqom qi hnyae Si Miang mai Jao Mi an, hrom ged Ai Ga dix sang hmaing gah Jao Mi log hoig mgrai dix ih.

Goui dix ngaix, Jao Mi deei dix goui mouing iag, noh kin hrom Bui, kom Nbun kom Si Meix, kom Guad kom Gon Nyom houig mgaex hrom mai. Hrom Ai Ga ged nin: si ngaix mgaex hrom Jao Mi yuh nin, Jao Mi ko dix ang ndouh tiang jee ba sang rog sang hmaing ex gah dix euih? Kee nin noh dom dou hu gah blag ngai Jao Mi mai ah nin: "Jao Mi eui, maix dox ex jie Geed dix mu kaing, yam hu liang ex Moi, njao moh ex noung dix, ang goui baox goui bie, ndaing hlad ex." Jao Mi ged nin: maeng Geed dix mu kaing ang louih moh miex nding dix, mai dix jee, si ngaix mgaex hrom ex yuh nin, maix dieb daix dieb jaong dix gah maeng ba yuh nin kaing ndaex ngai Bui hun, ang hmom. Yuh nin gieh nieh, noh dom ah sang dox jee. ba hmaing Ai Ga. Ai ga gin mgaex hrom gah dom hoig ang lai laig id laig som. Houig boun ngob si ngaix kaix, nbrie moh boun som boun hvaig, nbrie hu ndee mox ang ah, Ai Ga ja viex boud Geed hod dix gu si nqeeng.

Ai Ga oud si nbie ding si nbie, noh hoig lih moh Bui hlag gah ndaex yaong dix gaex. Bui ndaing muih hrom noh gu gaex. Goui dix ngaix, Ai Ga hu liang Moi ndaex diag, yaox" siang" gah ndaex grax dix mu, noh hoig mgaex ngie mai sae noh ndaex nbae. Noh houig kaing liang Moi, hoig som noh, nblaeh dix id biang gu liag vid, yam daeg sang laig id noh, noh yaox Bui dix gaex, hoig riang si ngi ngie houig blag ngai noh, ngiah mai qog noh: "Ai Ga eui, geem jud maix gah jee ba dix, sang jie maix jee. ba dix, maix grai ex hmoung." Noh ged njee ged nblaong, dom bog loux ah: "Ex ang jud gah jee did dix, ang sang jie ba did dix, viang moh nan, si mie ngie dix gieh Bui houd Bui si npom nyom oud nyom goui kaing." Dax Guad an ngiah ngie gah mai bu bi bu bi gaing noh gah daix dix, noh ged dix gon sang ah ba did dix, hoig nkom haing ndum mox ndum an, ang lai yaox Dax Guad an kaix. Yam in, yaox ngie su sai riang ba bloi" siang" lih kaing, hoig nqan ndaex nyiex riang kom mu. Ai Ga viang hoig ding gox, kom moh nan, gon ndaing gin houd, ba moh sin ngao noh moh ngie Geed an kaing. Yam in, noh yaox hoig bum hoig naog mgaox mai si nbeix ndaex nyiex jaox, nyiex laex an, ndaing mgaex hrom gah, kaix hoig riang braix, noh uig hu mguah Bui houd Bui si npom jie graeng in gix kom uig, njaeh dom kaix an ndix, Ai Ga ang lai sax hu liang Moi nyiex Jao Mi.

Jao Mi hmoung yaox Ai Ga "siang" jee ba jix dieh dix jee, dom viex Bui oud mai dix houig yieh kaing Ai Ga. Yam daeg houig hnyeen gix si viex nyiex Ai Ga, hmoung ngie loux si num ding did dix ah "Nbung" nan, mai bloi riang su sai ding dix lih, Jao Mi mai Bui hod noh hoig mgouih biang diex kom uig.

Baox nyiex baox yaong hmoung hoig yum Jao Mi, ndaing mgaex hrom gah dix dei, Bui hun Bui haoh dom gieh Ai Ga moh Guad nyiex Si Miang yaong, njaeh dom yam an ndix, Ai Ga dom viex baox dix hu njo, yuh gaing yuh nqo, guan buing Bui, guan die jan Bui ba sang houig dix jax nyiex nkrang yaong, gieh jan Gon Bui houd Bui si npom kom yaong yaox grax nyom oud si u goui.

Kaix an, Ai Ga hoig guad hoig yum, soun sang briex Bui dix dong Ai Ga ba moh jao gaing, Bui dom eei Geed gu nyiex gu ma, ndeh dix dong moh ba yuh Ai Ga.

Nbeen lao Hag Diex Lang Qang
Vuang Qex Hai, Si voung jao diam

Si Nbaox, Dam, Mai Si Vai

Goui dix nbog, Si Vai hoig si ndiad hu ra loui ngaix, hoig nbleeih miex mgong mox nieh, ang lai ndag uig dong, ang nbaox yaox jee ba ih dix jeeix gox. Vaig hoig luah ngie ah "brob, brob" nan gah jai hrom dix, hoig njo mia gox gah. Kaix an, noh houig gah ndaex nbrom dix ndaeh, ged sang laex dix dix vud, bu bab yaox Si Nbaox haig dix ih Meeig si veui ngai dix dix mu, num num nyoi dix kom guah dix ih Meeig, noh hoig mgaex ngie gah, hoig ah nin ndaex hrom dix: "Laoh lie pao, hreem[**] miex maix kaing, ndaing goui soun pao. "Si Vai sod nyoi dix ndeeih blag grei dix, jai hrom nkrang aing an, yaog dix hnyub Si Nbaox. Si Nbaox nkrom sod gaing dix laig ndaex hloux, bua dix lom lei ngie, nbriex ngiah ngie Si Vai. Si Vai yaog graing Si Nbaox hoig sod gaing dix lom lei an dix mgum, hoig lih hnam hrang gox gah graing noh, qa jeeix kaing, bie hrang gah hoig ndeix jod gox gah, "ae" nan dix mgum, mgouih ndaex bang yeem. Noh laex dix dix vud, ndeeih bu bliag dix gaoh, juang juang dix braog Si Nbaox mai ged nin: ex ih loux gian ang moh, jeen ih loux on pao. Yuh nin noh dom ngiah ah nin mai Si Nbaox;"Ha ha! "Si Nbaox bux eui, ang lai sax yaox maix mglang mgleeing hnaox, ex gin jei maix, in si ngaix yaox ngai maix, ran grai loux ngiah mai maix, bo ndouh ndaox ndeing gah."

Si Nbaox ah nin: "Hnyab hrom maix Si Vai bux gex." Si Vai nyah dix ngom, yaog dix bu bi bu bi hloux ba gian jie Si Nbaox gah daix dix, yuh dix om ba muih hrom Si Nbaox yuh nan mai ah nin gah Si Nbaox: "A miex eui! Ex gon briex noh ndaex hrom dix, si veui an ndix, maix peix dix hmom mgrang yuh nan, in si ngaix, geem yuh gah mox, graeng ba jeeb maix jix dix moh hloux kaox jaox yuh nin, nbrux [**] nbrux ngie, ndaing ang nyom dix yaox." Si Nbaox ah: " Si Vai bux gei eui, hmom ang hmom die sang meix ex maix, ang yuh did dix gah maix!"

Si Vai kin dix ah: "Loux Bui ah nin: neix ang sae gih moh daex, laex ang sae graeng moh jong! Mgaig graeng gob gaex maix in, hlad maix moh Bui riam njao sax."

Si Nbaox ndeeih qog: "Gieh moh nan, maix grai yaox, geem sang yuh eix gah mox box?" Si Vai ah: "Maix nplian gaing dix mgaig yaox si nbeix jeeb ex, geem yuh gah mox, gieh maix muih noh, ex log louh maix pe.

Si Nbaox daeg sang nplian gaing dix, Si Vai hoig nkrom daing dix gah. Si Nbaox hoig dong Si Vai viex hrom ang hmom, dom ndeeih sod gaing dix ndaex hloux dix.

Si Vai ang lai dong gah sang yuh dix gah Si Nbaox, dom nbaox hlein noh ah: "Si Nbaox bux eui, gieh moh nan, ax si laih baox dix, sin maix beix ex, ex log dox maix jie si nbeix kri, gieh maix ang beix, maix jo dix beeig si nbeix hloux kaox, gieh ex ih neix maix."

Si Nbaox ah: "Maix moh bux gei, ex moh bux, ex ang boun yuh si laih mai maix." Si Vai yaog ngai dix nklad Si Nbaox ah: "Maix ang yuh si laih, ex sang ih maix." Si Nbaox ah: "Nbrie sang nyom maix dix ih ex, ex log yuh si laih mai maix bux gei box, maix grai yaox jee ba sang yuh eix si laih gah." Si Vai ah: "Ex moh bux gei, maix moh bux, ba ding mguah ba iag, jo moh maix ba grai si veui!" Si Nbaox dom grai jee ba sang yuh si laih lih loui jee: 1, si laih baox dix laig ndaex diex; 2, si laih baox dix ih Meeig, 3, si laih baox dix dou njee.

Si Vai ged nin: raox [**] ndaex diex? Ang ndouh nu. Noh nbeed dix laig veui, ex log goi hod noh kaix. Ih Meeig? Noh ang goui hrang, noh ih gao mgum, bie ih ex jie dix dix mgum kaing. Dou grax njee? Noh hu gao ndiang, bie dix ndiang ex kaing hoig grub noh. Yuh nin, dom ju loux grai Si Nbaox.

Giex hoig yuh si laih pao, mgrong 1, nbeed dix laig ndaex diex, Si Nbaox uig yah gaex dix laig ndaex diex, Si Vai niad dix hod nbeed dix mai Si Nbaox ndaex diex, pong diex krum, hoig guh yuh ngai noh. Ndaex diex gin iag, Si Vai gaing noh viang iag gox, ang boun nbeed gaex dix laig, hoig nbeed dix laig hreeng nyao, ang nbaox boun laig, dom ndeeih lod dix lih, njao hoig kam [**] noh, hoig sae yuh lung yuh loi riang dix, daeg boun lod dix lih. Si Vai daeg ah ang lai beix. mgrong 2, si laih baox dix ih Meeig. Si Nbaox yaog dix haig ndaex Meeig gah daix dix, nbleix ndag dix een noh gah moing ndaex Meeig, Meeig houig giad houig si hee [**] ndag Si Nbaox uig heui, Si Nbaox yaog dix bua ndag dix nbleed Meeig laig ndaex vaig dix kom uig. Ang nbaox goui miex nkreeng dix, hoig uig ih Meeig miex nyao. Si Vai gah hod dix yuh nang log Si Nbaox yuh nan, haig ndaex Meeig gah daix dix, sae gaing dix ndaex, ged dix sang ih Meeig, Meeig lih kaing ndaex mu ma ngie, hoig haog reem nqeeih Si Vai, gaing Si Vai uig, Si Vai hoig man loux mgraox dix mai ah "ox ox" nan gah saex giad Meeig ngai nbaoh dix. Si Vai ndie hrom, nbaox ah ang lai beix. Meeih Si Vai dom goui kaix nbrax nbrax, lung lung ngie dom si ngaix, in moh kaix giad Meeig noh dom yam an ndix. Mgrong 3, si laih baox dix dou njee. Si Nbaox mai Si Vai houig biang mgong dix mu. Si Nbaox ah: "Bux gei dou veui, ex ba moh bux maix log hod maix kaix". Si Vai yaog dix kruah kruah gaex dix, njaeh gah biang mgong dou houig gah jaong mgong, njiad daeg houig ngie gah nyoi mgong, Bui jiag ma yaox noh, hoig guan sae loux you mai ah: "Houig Si Vai pao! Houig Si Vai pao. "Bui jiag ma dang yaog ko yaog kaox dog Si Vai ah "bu big bu bag" nan, Si Vai dom uig ngud ngie lung ngie. Si Vai hoig yum bi ngie kaix dog Bui dix, hu oud braog glong kaix. Kaix an, Si Nbaox bua dix lom lei nan, yaog dix nbang lia dix lih sein, nbang lia houig ndee mox, Bui riag you ngie kom ah: "Si maox nbang lia! Si maox nbang lia, mgaih dix veui! "Bui hoig dang dou moux dix veui. Si Nbaox hoig nbang lia dom houig grei ma ndaex bang yeem sien.

Si Nbaox hoig beix Si Vai pao, Si Vai hoig vod[**] mgoung ngie gah braog glong kaix.

Yam in, Dam gaoh kaing ndaex glong, mgaig nqom voi hrom nqom gaig Si Vai an, yaog dix sae loux bao ah: "Si Nbaox hoig beix noh pao! Si Nbaox hoig beix noh pao!" Si Vai hoig meed hrom ngie kom ang lai goui riang goui rao, goug ji ngie Dam gah daix dix mai ah: "Ex nbrie beix ang beix, maix ang siao guang, mgaex maix yuh ba dix yuh nan? Maeng moh maix Dam jee ba ndieh dib ngie yuh nan, bie dix daix ndig ex maix ang miag, dix mgum ex kaing ang miag nbleed." Dam hlad gah ah noh nan, niad dix laig ndaex si maox kaix. Si Vai yaog dix daing hod noh sein, yaog dix ngom biang si maox mai ah: "Gieh maix moh si meix hmaing lih yuh si laih mai ex yaox, gieh maix ang beix ex, ex ih maix."Dam moux dix oud mgreem si maox mai ah: "Ang gan pao, Si Vai bux gei eui, maix ngom biang nyiex ex, hoig mgud ngie ex ndib ngie pao." Si Vai hmoung ah Dam nan, nbaox sae nang riang dix ju gian ju gian si maox gah jaong dix, kin dix nbaox hmaing Dam lih yuh si laih mai dix. Dam ndie hrom gah, uig si ngua ngie gaex hag mai lih kaing ndaex si maox, ah nin gah Si Vai: "Si Vai bux gei, sang si laih eix jee dix box? Maix grai yaox! " Si Vai ah: " Ex moh bux gei, maix moh bux, si laih jee dix gah jix." Dam ah: "Gieh moh nan, si laih ra jee box. Mgrong 1, si laih baox dix diang glong, mgrong 2, ax si laih baox dix peed dou diag."

Si Vai hoig ju noh pao. Si Vai qog Dam: "Moh maix ba diang veui, moh ex ba diang veui?" Dam ah: "Ax diang dae kaing! "Yam yaog Si Vai dix nbung nyoi dix, daeg sang daing dix, Dam goi hu gib ngie dix gah si ndax Si Vai, Si Vai yaog dix daing dix mai vud si ndax dix hu biag ngai dix, si ndax Si Vai hoig si vuad [**] Dam nbleeih doi glong blag an, nbeen houig Si Vai gah biang diex dein, Dam hoig ndog houig veui Si Vai.

"Geem moh ba dix an, ex hoig houig veui maix pao! " Dam ah nin gah Si Vai. Si Vai daeg yeng sei dix pao. Kaix an, nbaox si laih mgrong 2, Si Vai ged nin: ex hoig ndog moh boud jee ba peed dix ih dou diag si nqeeng, nbog in, Dam rian dix ang lai beix ex pao. Noh yaog dix dou hu blag diag, hoig hu miex mgong miex ngod mox nieh, ang nbaox yaox ba did dix. Dam greed dix laig id ndaex ndung mglaox. Houig boun ngaix, gouig hoig hax ngie, Brieh ang lai boun gan si aoh dix, dom sog dix luh lieh dix ndaex ndung rom ndee si giad. Dam sae riang dix gib ndag Brieh ang lai bloi, mai yaog sae loux you dix ah: "Si Vai bux gei eui, niad maix houig deem ex , ex boun mgiex Brieh dix mu pao! "Si Vai dou houig giad Brieh yum. Nbog in Si Vai nbaox ang beix nang. Kom moh nan, noh gah ang hvah hrom. dom ah: "Hmom, an ra nbog ja son moh maix ba beix ex. In pao, ax si laih baox dix ih neix, ex mee neix Brieh goui ra soun, gieh si ndu ngie, mgaig mox uig ih jie dix veui."

Dam ah: "Jix dix. Viang moh nan, ndee in ndaing si aoh, ax viex hu ih mgreem kaox ding oud braog glong kaing." Si Vai jia noh, giex dom si mgrong neix Brieh houig gah mgreem kaox ding braog glong, mguah noh goui ra blag.

Dam ah: "Yam ih eix neix, ang boun dix nbliex baox dix ox, dang ih jie dix." Si Vai mai Dam dang viex dix ih neix jie dix dix gaex dix ndaog. Si Vai uig ga ga [**] ngie jie dix kom dou: kom si ang, Dam goi jiah ngie noh gah mgib dix kom ra kon, kig mox kig an mai si vun dix dig ndaex rom glong, Dam hoig yuh neix Brieh uig bag ngie, noh hu qog Si Vai kaix: "Si Vai bux gei, ex hoig uig ih jie dix, hoig uig jie maix lieh?" Si Vai ja gon gi ih boud jie dix kom nkeen rom laeh dix.

Noh yaog gaing dix si mi Dam, ang lai dong gah sang ah dix, mgum ngie gaing dix kaing.

Si Vai nbaox ang beix nang, njaeh dom yam an ndix, noh dom ang lai boun mab nu nai Dam kaix.

Nbeen lao Hag Diex Si Moung
Sui Ga jao lao
Jang Kai Dax Ai Dix jao diam

Lag Mai La Njiah

Miex La Njiah hoig ndog yum dom yam gon iag Gon dix, kaix yum Miex, Gon hu vu vied vu viang gu si ndaeh. Goui dix ngaix, La Njiah houig jaeng dix ih briex gah braog glong dix mu, ang nbaox diang glong, daeg nang jai hrom nang, dom nyah dix id braog glong ndee an. Yam an, Lag bu houig dix mu blag noh, noh mgaig La Njiah gin jaox hrom gah, dom viex La Njiah ing mai dix gah nyiex, gieh noh moh Gon briex dix, hmaing La Njiah oud mgaig Gon dix. Yam njaeh, Lag gon jix gah La Njiah. La Njiah gah mgaig gia Gon Lag kom hrom kom hri dix. Gon nyom ra loui gaex in gix, ang moh glian, moh bux, yuh nang ih briex, heem nang, si ndaex nang graeng, uig gi ngie dom uig bi om dix som dix id njao.

Kaix an, Lag log oud mai sog mgleeih [**], in gah ang hrom yaox gah ngai dix, an gah ang ko gah krom, vi hod baeh gloung, peng max, gon dag deui La Njiah, meeih La Njiah uig uah gah dog Lag dix. Nbog dix nblah dog nyoi La Njiah dom ang lai jix id gah gu gox, log uig id jung ngie njao. Yam njaeh, La Njiah gon boun mgu hrom dix, kaix an, La Njiah ang lai boun mgroh yuh Lag gah dix, dom dou kaing nyiex Lag, dang hu sog dix ih briex breem.

Did dix ngaix, Sim dix pung bu houig gah kaox si beeb, blix si beeb uig yaog ngie kom uig beei yuh gag dix. Sim yaox blix an gix, uig mgaex ngie, puih njee puih nblaong dix gah gag kaox mai ah loux dix loh laeg, geem sang ih noh yuh gah mox ang dong. Dix nblah ah jo ih ba ang deem, dix nblah ah jo ih ba deem. Du tiang baox dix loh laeg laeg, viang moh nan, ang nbaox boun grai ba ko dix gaex gax. Ra lai ang ju jie baox dix. Njiad moh yam an, Sim La Njiah houig dix mu, njog nbrei dix grai Sim gix hmoung: "Jo dix mgaih ba deem si veui, ba ang deem een hang, hoig deem sax goi ih, yuh nin gieh nieh, yaox dix ih si nqeeng, eix ang jix yaox grax jai hrom gah." Noh hoig nbrei dix njog grai Sim hmoung yam laeg dix bieh ba deem jo dix siah hrom liag, bo hvi gieh ba ang deem krum jod. Jan Sim dang ah ko loux grai noh uig, ndaing yaog yo noh. Kaix an, yam sum Sim si miang, Sim dom sin noh moh Vong Sim, gon piaog geei baing gah si ndax noh dix mgong. Gieh moh hmai moh noh Vong. Kaix an, La Njiah dom gon viex geei baing gah si ndax dix dix mgong dom si ngaix, ndaing nyom dix mgaig.

Kaix moh La Njiah Vong Lag, yaox noh Lag ngaix mox, noh viex baox Sim dix houig si hee noh sog dix dud noh. Njaeh kaix an, Lag dom ndaing hlad gah La Njiah, yaox noh La Njiah ndee mox uig dou moux dix ndee si ngai, bie uig hmoung ngie loux La Njiah ndee mox uig dou moux dix. Hmoung ngie loux La Njiah uig si ngua gaex hag ngie gah, dom houig in si ngaix gah gon moh nin.

Nbeen Lao Hag Diex Si Moung
Nab Guai jao lao
Ai Dix jao diam

Yuh Dix Ja Ang Goui Graeng Vaig

Nbog yam hoig ndaing gin hreeng, ang eix lai dong ndix. Goui dix num nbog deei dou ma, did dix ngaix, nbog njung si ngaix, braix glong ndaing si aoh si eem ngie. Bouih hoig sag gah som dix, dug nyoi dix hu id gah ndaex diag kaox kaix. Id ndu ngie ah "glu, glu" nan, ndaing nyom id. Noh man pum dix ah "bud" nan dix daix, ndeeih dang yaoh gah pum dix. Noh yaog dix gaoh dou, dou laig ndaex ma, jo diah kaox ngiex, ngiex krum biang diex ah "sa sa" nan, noh jie moh ba did dix ba peed dix, nie sae nang riang dix dou breed dix njee nblaong. Noh jo nbreeng hnu nbi ndaex ma ndud uig, nbi laing, gei hoig nbang lia ah" gu glag gu glag" nan dom houig jaong mgong, hoig nbaox diah mgong si vong, kaox si nbia bu bang kom uig, noh lai nbaox jei moh jee did dix ba houig lai lom dix kom uig, uig si mie dix boun breed dix laig ndaex diex, jeen glian gaing dix nbang lia kaing." Gu glag gu glag" nan jod ndaex rom ndung jo mgong, noh sae riang dix lu lax, jaong noh jo dix ju gian gaing Log Duh viag, ndig graeng vaig Log Duh pliad. Log Duh ndaing saex hrom gah, nbluh Bouih, hmaing Bouih ndeeih blud.

Ja ba oud gah kaox braog ndung rom, yaox maeng hee Bouih an, ngiah Bouih mai yah yah bruig dix ah "gaig gaig" nan, Bouih saex hrom gah, gaig nang, yaog dix mgiex Ja mai ah nin gah Log Duh: "Moh noh ba gieh ex yaoh gah loux dix jo moh noh ba blud graeng vaig maix." Hoig ah nan, noh yaog dix bih vaig Ja, nieb boun tux tux noh gah ndaex vaig Log Duh. Njaeh dom yam an ndix, Ja dom ang lai goui graeng vaig. Vaig Log Duh gin ding, gaing iag ngie.

Nbeen lao Hag Diex Si Moung
Gao Lix Qix jao krom
Ai Dix jao diam

Nbeen Hlax Lai Mai Mgoui

Ndi ndix, Mgoui mai Hlax Lai hoig moh baox mgrom muih. Giex rian glieh dae mai baox. Mgoui daing njee daing nblaong dix gah biang Hlax Lai, Hlax Lai gah ndaing mgaex hrom gah, ang sax ah loux jaox gah baox dix dix mgum gox.

Goui dix ngaix, Mgoui dou houig ndaex ma, glieh dae mai Gax Baing ling ngaix. Mgoui ah nin gah Gax Baing: "Gax Baing bux eui, in si ngaix ax ra gaex si laih yaox, si nbeix jie mox hmom? Moh mox ba nie nbloun hmom dix mgaig?" Gax Baing ah: "Mgoui bux gei eui, gieh moh nan, ran mgaig jie ex ha." Kaix hoig liam lia Mgoui Gax Baing dom gaing dom jaong dix nbog, noh dom ah nin: "A miex eui, maix lug ndaing hmom mgrang dix, si nbeix breeih, hag ba on, neix baing nang, siah nang, hoig npad ngie lia, ben rug moh jee ba hmom gah mgreem Rao Ma." Kaix hoig yo noh Gax, uig ah nin gah Gax Baing: "Ex ang jix dang yaox dou gaex dix, maix bux deem ex mgaig yaox!" Kaix hoig nbrei Gax Baing dix liam lia Mgoui dom gaing dom si ndax, ah: " A miex eui, geem yuh maix gah mox yuh nin, kom mgo gaex dix ang die om Bui, ang die om si ngie, ndaing ang nyom dix mgaig jeeix gox." Ah Gax Baing nin, hoig yaoh ngie yuh Mgoui, noh yi nang dix blag, ang hiex yi nang dix blag, yaog dix bu bi gaex dix, njaeh dom gaing houig dom jaong, rug moh log ah Gax yuh nan. Noh ged nin: dee lai moh yam glieh ex mai Hlax Lai gox eui? Hlax Lai ba yuh si ngie gah ex eui? Noh voi nan mai ah nin gah Gax: "Bux eui, hmoung grai Bui noh, ndix, Bui ah hmom ex kaing maix, dee moh yaox Hlax Lai hmom ex, dom koing [**] gah, hoig bag yuh si nbeix ex, ex gon sang hu sog noh ha!"

Gax Baing ah nin: "Maix dang hu yuh box kaing."

Mgoui hu nkraoh si veui Hlax Lai, hoig ji ji [**] meeih Hlax Lai gah daix dix mai ah: "Jee ba ang goui hrom ang goui nkin an, gon ah moh baox mgrom mai ex, glieh mai maix gox dix vud, maix jix gieh hag ex mai si nbeix ex yuh nin. Bui ang die om Bui, si ngie ang die om si ngie, sang gieh ex meix Bui mox sax in, eeh! eeh!" [**] Mgoui nie ah nie gin, puih dix hu gah Hlax Lai, si yiad haeg mgom [**] Hlax Lai mai dog noh, Hlax Lai ndaing meed hrom, dom bod nkoug Mgoui dix daix. njaeh dom yam an ndix, kaix hroi bod Hlax Lai dom gon goui gah nkoug Mgoui dom si ngaix. Mgoui sae riang dix hnyeen Hlax Lai dix daix, Hlax Lai mgouih bru gah mguh grax doi glong.

Njaeh kaix an ndix, haeg mgom Hlax Lai dom yih hying [**] njung dix oud gah mguh glong mguh grax, ang lai boun vaoh nyoi dix.

Nbeen lao Hag Diex Si Moung
Suix Ga jao lao
Jang Kai Dax, Ai Dix jao diam

Nbeen Si Mgaex Mai Ia Si Meix

Ndi ndix, Si Mgaex mai la Si Meix hoig moh baox mgrom. Si Mgaex ndaing rian, la Si Meix gin nieh.

Goui dix ngaix, giex hu sog dix guah ndaex diag, jee ba ih ba un ndaing haoh ngie ndaex diag, moh ngie rom ba ang goui kaing. Giex hoig sog rom hreeng nyao, daeg yaox rom goui boun rao nyeix gah mgreem num kaox, nyaex gah ang yaox dix nyaex, Si Mgaex ged noh dix jee, gaong ndung rom dix mu, gieh rom lih. la Si Meix ang hrom yuh, dou hu hvi ndaex diag kaox, moh ngie Si Mgaex ba gaong noung dix; kom moh nan ,rom ndaing si mgu, jo gon njun si ngaong ha, daeg boun dix nyaex. Si Mgaex dom hu sog dix laex dix ndee veei.

Ia Si Meix hoig daeg gah glieh dix pao, lih kaing ndaex diag kaox, si aoh nang, si mie nang dix nyaex rom, kaix hoig lih Si Mgaex laex dix, ndeeih houig, rom oud ndaex ndung ang lai goui. Noh ndaing meed hrom gah, dam yaog dix ah: "Bui nieh in, nyaex rom gaong Bui, ndouh ang hlad saih duih dix!"

Kaix an dix vud, yaog npaeng ding dix lih pao, bai om hoig hvaig ngie, lih hliex ding mai loux duih saih hoig ah ngie "vu vu" nan, hoig gieh la Si Meix hlad gah, lai jei moh Si Yiex ba sang yuh dix yaox nqom, dom dou hu moux dix si nax rang.

Kaix hliex braix hoig ndeeih gouig, Si Mgaex ah nin gah la Si Meix: "Saih ang nbaox duih maix, moh sang gieh maix joux hrom dix dix nbog ha. Njaeh in si ngaix, si veui sang nbaih riang braix gu si ngaix, maix jo dix ux, sou Bui gaoh yuh dix ih gaing nqo."

Kaix an, la Si Meix dom hod yuh log loux dom Si Mgaex, viang moh nan, noh ja gon oud boud mai hlad mai mgraeng dix si nqeeng. Nie moh nbog yam nyaex rom, nyaex dix mgum mgaig nang Rao Ma dix daix. Nbeen in lug gon goui dom si ngaix.

Nbeen lao Hag Diex Si Moung
Nab Li jao lao
Ai Dix jao diam

Nbrung Mai Si Vai

Nbeen lao Bui ndi ndix, Nbrung mai Si Vai hoig moh baox mgrom, hu glieh hu hvi ndaex diag kaox dae.

Goui dix ngaix, Si Vai ah nin gah Nbrung: "Bux gei, maix rug ndaing hmom mgrang dix, gaex hag maix ndaing joung ngie, si mgu njiad hlaong ngie, hyaog njiad hmom lom ngie, ndaex meeih njiad ding ngie, si ndax njiad hmom lang ngie. Jee ba goui gah biang Hag Diex ang lai jix goui ba hmom kaing maix dix jee gox." Noh nbliex jaong Nbrung, yaog dix hngeeig gah mai ah nin: "A yih! Gaex hag maix glai dix hmom, moh ngie jaong maix ba siah kaing, mai gon goui gag yuh nan, ang ndouh nyom dix mgaig, gah ang si vad, yaog dix hu, bie loux luah gah beng ang goui. Gieh ex louh dox maix jie jaong dix, yaog dix hu njiad luah ah" brob, brob" nan, maix ndaing goui si ob si nbrom gah!"

Nbrung mgaig mgaig jaong Si Vai, blong jaong hoig gian ngie, gon ih nang giab hag hriam dix gu, njiad lom lei ngie, nyom dix mgaig, si vad nang. Nbrung hmoung yo Si Vai dix, gon hmaing Si Vai louh dix jie jaong, boun ndaing mgaex hrom dix dei heui. Noh yaog dix plu pliah [**] meeih dix luah mai kruah gaex hag dix, ngiah um mgaex nan mai ah nin gah Si Vai: "Bux aig ex eui, maix rug ndaing hmom hrom dix dei, gieh maix rug louh ex jie jaong dix, ex ang lai jix bi om maix ling nju ling pan!" Si Vai hoig ndaing mgaex hrom gah, ang moing dix, nbleix ndag dix mai lied lied nqeeih dix, hoig jod rom mia lang nyao gah mai ah: "Moh mgaig ex maix bux aig dix, soun sang yuh maix nie nbaox hmom mgrang, ex nbrie ang hmom mgrang gox gah hoig hvah hrom hvah hri gah! Hmom, ex log dox jaong dix gah maix box."

Si Vai yog dix dix vud, yuh dix om ba ang hrom dox yuh nan mai ah nin: "A liex, grai ex maix hmoung loux see, Nbrung bux gei eui! Gieh moh Bui dang, deei jaong boun ngeem louh gah jaong ex boun kon, ex gah ang ju, ex louh maix jie, lug soum ex gah jeeix, boun ang maix boun tie ex ih jeeix?" Nbrung ah: "Ex moh Bui houd, sang tie maix ih jee dix box?" Hrom Si Vai hoig ngiex ngie gah, jeen grai see noh hmoung ah nin: "Nbrie moh hnam dix njaeh tie ex ih gah jix." Nbrung ged noh dix vud: hnam dix njaeh kaing ang Bouih son moh ba did dix, hnam ex goui. Dom ju loux grai Si Vai. Nbrung dom louh Si Vai jie jaong dix.

Njaeh dom yam an ndix, Nbrung dom gon qa hnam gah Si Vai dix njaeh, houig dom yam in si ngaix, yam giad Si Vai Nbrung, Nbrung ran yaog ngog dix gieh Si Vai nqoug hnam dix.

Nbeen lao Hag Diex Si Moung
Suix Ga jao lao
Jang Kai Dax, Ai Dix jao diam

Baog Ba Hlag Nqom

In moh nbeen brim ba hoig ndog lao Bui ndix. Goui dix ngaix, Sua geih, Gon Sua hoig ding gu ngaix gu som, Miex Sua ang lai boun sog Gon Sua ih briex, dom viex Gon Sua hu sog dix ih jee ba ih ba un mai jai hrom jai hri dix. Hoig njao mgong njao ngod hu sog dix guah, kom moh nan, mglang ndaex ra loui si ngaix ang nbaox boun viex ba did dix houig.

Goui dix ngaix, gix houig gah, ndaex diag kaox ding dix ndaeh, si nbub Miex Baog dix mu, Miex Sua mai Gon Sua hoig nbleed ngie mia mung dix gah neix Miex Baog. Miex Sua yuh dix si mgah laing haing hiah mai qog Miex Baog: "Ba aig ba ou eui, nyom oud nyom goui maix lieh? Geem yuh maix ba dix." Miex Baog ah: "Ex gah hu sog dix guah jee ba ih nang, hoig sag vaig sag du eix, geem daeg nyom id nyom dum boun som." Miex Sua nbaox ah: "Maix rian ah loux dix "iu iu" nan boun som, geem moh yuh gah mox?" Baog hoig dong mgroh sang yuh Sua gah dix pao, ged nang sang yuh Miex Sua yaox nqom dix, dom ah "An moh loux ndu ex, yam hmoung maix loux ah ex "iu iu" nan, an moh yam ndaing nyom id ex heui."Miex Sua hmoung ah Baog nan, ndaex hrom hoig mgaex ngie, nbou in si ngaix, rian yaox ih neix dou diag pao!

Houig boun nbou, yam njiad song riang kix, Miex Sua ba ang hmom hrom an viex Gon dix hu dix pung, mgaex nan kom hu dix ndaex diag kaox, sog ndee oud Miex Baog. Hoig nkrom hmoung ah Miex Baog loux dix "iu iu" nan gah biang kaox, Miex Sua viex Gon. dix hu houig gah num kaox an, dom gon dix, gah loux ah nin: "Eix dang sog kaox dix gaex dix mgong, bae num kaox ndee in, ex log haog giad noh, gieh noh jod biang diex, beix. guan dog noh yum gah kaox." Kaix hoig ah nan, noh yaog dix goi haog gah kaox, houig gah rao kaox, gon ang nyang nbaox yaox Miex Baog, Miex Baog hoig ndog groux njun boud gah ndaex yeem kaox, dud ngai Sua ndug kom ra kon pao. Miex Sua yaog dix jod biang diex, Miex Baog ba oud gah rao kaox gieh loux dix log Miex Sua yuh nan mai ah nin: "Gon ex beix, beix niad dix dog noh yum pao, bo lai gieh dou, niad dog ox! "Gon Sua deei kaox dog noh gah njee nblaong, maix dix daix, ex, dix daix, hoig dog Miex Sua yum pao. Mgaex nan kom ah nin gah Miex Baog: "Miex eui! Niad maix lih pab, yix hoig dog noh yum."

Miex Baog ah nin "Gon eui, beix mguah dix ih heui!"Gon Sua an gix hoig dang ih neix Miex dix, maix dix mgum, ex dix mgum, hoig ih neix Miex dix bag ngie.

Yam an, Miex Baog ba oud biang kaox an uig yaog dix ngiah ah "ha ha" nan gah: "Gon ba ndex an gix, beix hoig nyao ih neix Miex dix!" Gon Sua hmoung ah nan, sud haeg oud biang diex mgaig noh, rug moh Miex gix, yam an, gix hoig dang yiam ngie. Soun sang gieh gix neix Miex dix oud ndaex vaig ndaex du dix ling nju ling pan, gix dom deei rib toux ndaex nyiex grei dix gah. Moh njao in, aing Sua yaox eix gu si nqeeng, rib ja gon goui boud ndaex aing gix.

Nbeen lao Hag Diex Si Moung
Nab Hang jao krom
Ying Soung jao diam

Nbeen Soux Hmaing

Ndi ndix, nbog yam hoig ndaing gin hreeng, mgong ding mgong hlaong goui gah Hag Diex Ba Raog dix mu. Gah biang mgong hlaong in goui Jao Saex Vi gah dix gaex. Jao Saex Vi in ja bloi boud nqom saex vi hu gah Hag Diex Ba Raog si nqeeng, saex hreing hoig ndaing giad gin, hoig gieh si ang si niag Bui raog ngie gah biang Hag Diex Ba Raog kom mu kom miang. Soun sang yuh dix beix gum saex vi an, gieh Gon Bui ba gaoh kaing ndaex si mgang an nyom oud nyom goui, yuh nin, Bui nyiex Bui yaong dom bloi Bui hnu Bui nbrax riang hu nkre Jao Saex Vi dou, kom moh nan, hu miex gaex mgrai miex gaex.

Goui dix ngaix boun nbou, Soux Hmaing ba id mai liah ngu an, yaog dix si mgah mai jao dix Nyi Lang ndum mox ndum an: "Jao eui! Jao eui! Nqom jix briex jix gia maix ex yuh nin, ex ang yaox deem maix gah did dix. Log in si ngaix, Gon Bui*nyiex Bui yaong log hoig mgrai iag mgrai liad ngie gah jao saex jao ngia an gix, ndaex hrom ex gin ang nyom gah. Rog nbuan maix viex ex hu blaex Jao Saex Vi an gix kaing." Nyi Lang hmoung ah Soux Hmaing an nan, yaoh nang gah, mgaex hrom nang gah. Geem qog noh sang blaex Jao Saex Vi an gix yuh gah mox , Soux Hmaing ang lai grai. Nyi Lang grai Bui yaong hmoung loux ah Soux an gah dix, rog hmaing dix viex Soux Hmaing hu qe dix yaox. Baox nyiex baox yaong ang lai dong gah jee sang yuh dix gah Jao Saex Vi an, dom ju loux ba rog ba hmaing noh.

Nyi Lang viex Soux Hmaing hu pao, giex hoig njao mgong diang ngod, diang rom laig ndaex diag kaox, hoig hu beid sib beid si ngaix, hoig houig gah biang mgong ding mgong hlaong an."Yaox ngie hvaig bai om gah biang mgong kom mu kom miang, ndaing gin guad, si ang si niag Bui hoig mgrux mgrux ngie dix gah ndaex diag si maox an gix. Soux Hmaing njox njox [**] hyaog dix, nbung si ndax dix hu veui gah biang diag si maox ba haoh mgai an biang, Nyi Lang mgiang ag, gog vaig mai niad dix hu hod Soux Hmaing. Yam hu noh, npaeng glia yaog. dix lih ndum mox ndum an, kaox oux; hoig boud ngie gah si yiad npaeng dix, pong diex pong dug hoig boui ngie haog ndaex Rao Ma Rao Mung, ngua diex ngua dug hoig hvaig ngie yuh braix ndum mox ndum an.

Jao pi Jao Saex Vi hoig ging ngie hrang nbraing dix ndaex npaeng glia an mai sang houig giad giex. Nyi Lang nkrom vaig ag sae dei nyon noh gah ndieb hrom Jao Saex Vi an. Viang mah nan; dix kiab ngai kaing, ndieb hrom Jao Saex Vi an hoig ndeeih moi, Nyi Lang nbaox lod vaig sae noh gah gaing Jao Saex Vi an dix daix, kom moh nan, ndaex mad Jao Saex Vi gah hoig ndeeih hmom ndum mox ndum an. Jao Saex Vi an ngiah ah "Ha ha" nan, yaog dix daing dix blag in, Nyi Lang yaoh gah ,uig nkrom moux dix kaing, viang moh nan, hngim pi an hoig tiah [**] glib Nyi Lang. Mgaig dix yaox hoig sang boun gieh pi an boun dix.

Njiad moh yam an heui, hmoung ngie loux riag Soux dix mgum, Soux giad jaong kon ndom dix boud dix kon, hnam hoig qid qid [**]ngie dix lih mai nbung nbung dix, hoig dieh dix lih moh vi ba si ngi nan piaog Jao Saex Vi an. Dix kiab ngai kaing, hoig mgleeing yuh Jao Saex Vi an pong ngie vid.

Bai om ba hvaig an hoig mgaih dix nyao pao, ndaex Rao Ma hoig nblang ngie pao, Nyi Lang ndeeih mgaig kaix dix, yaox ngie hoig noi Soux Hmaing an dix biang si maox yian ngie nan.

Nyi Lang yaog dix yiam, bux Soux Hmaing an ing gah nyiex.

Soun sang gieh Soux Hmaing ba ged soun Gon Bui an ndeeih gaoh, Gon Bui dom yuh Soux Hmaing an jie jaong dix kon, kom moh nan, jaong in ang ndouh boun gieh rom neem jaex yuh, gieh rom neem jaex yuh, jix ndeeih mgraig. Kee nin, njaeh dom yam an ndix, Soux Hmaing sang neem dix lai mox , dom nkrom yaog jaong dix, houig dom si ngaix gah yuh nin.

Nbeen lao Hag Diex Si Moung
Ai Soung See jao krom
Ai Dix jao diam

Nbeen Grih Mai Giang

Ndi ndix, gaex hag mgrang mgrei Grih ang log in si ngaix. Veui an ndix, noh ndaing goui mgrang, jan dou diag dou du moh ngie noh ba ndaing hmom mgrang kaing baox dix uig, viang moh nan, moh ngie ndaing nieh noh kaing.

Goui dix ngaix, noh boun mgiex Giang dix mu, ged sang yuh dix ih buan briex ngob gah.

"Geem ged maix dix sang ih ex lieh?"Giang qog noh kom si ngua gaex hag dix.

Grih ngeeh ngeeh gaing dix gah.

"Qaox nie iag ex jeeix, ang njuaing sag yuh vaig du maix!" Grih nbaox ngeeh ngeeh nang gaing dix gah.

Giang ba lu liag lug lie an, yaox uig sang ih Grih dix, gaex hag hoig nie si ngua ngie gah, yaog gaing gab dix, uig krum rom ngai nbai rom meeih gah, ged dix sang sog grax glod dix nyaing. Ndum mox ndum an, noh yaox oud Ong gah rang blag Grih dix ndaog, hoig een noh ndaex hrom dix.

"Grih bux gei!" Giang ndieh ndieh Ong oud gah rang mai hang hrom dix ah nin gah Grih: "Maix mgaig yaox, an moh glong mong ba een jub jee nyiex yix dix goug baox dix houig gah, nbrie ang ex njuaing sag yuh vaig du maix, maix haog daeh glong mong an luah. Hoig luah glong mong, jub jee baox nyiex baox ma nyiex yix log jix krom baox dix houig ndee in, houig yam an, maix jix dix ih dom sag dix."

Grih mgaig Ong oud gah rang, vu vied vu vied gaing dix gah.

"Geem hlad maix ex dou lieh?"

Grih ngeeh ngeeh gaing dix gah.

"Gieh moh nan, maix ran laeng ex oud ndaex diex. Hoig hmoung gix luah loux glong mong gie, gieh gix ang houig, maix jix ndeeih houig ih ex kaix."

Grih ba ndaox ba hni' an rug laeng Giang ndaex diex, noh laeng Giang ndaex diex, deei loun si maox dob moing ndaex gah. Kaix an daeg nyom hrom dix hu daeh "Glong mong gah rang."

Eix hoig dong boud Giang moh jee ba raox diex gu mu, in pao, Giang hoig ndaing mgaex hrom gah. Noh ged Grih hoig haog gah rang pao, dom niad dix raox ndaex louih dix, moux dix ndee si ngai mai guan mgaig gah daeh Grih "Glong mong".

Grih ndex Grih glan [**] nqom an hoig haog gah biang nyoig rang, hoig ndeix houig gah ndee oud Ong. Viang noh gin daeg gin mao gox gah haog biang rang, ndaex hrom gah uig mgaex ngie, hoig jod mia mung gah lang nyao, hoig ngiah um ngie mai. Giang ba sang ih noh log ba hoig houig mai ngai noh miex pung yuh nan. Noh houig mgreem nyiex Ong pao, goug nyee daix dix mai sae riang dix daeh Ong. Nbog in ang lai moh pao! Lih Ong ah "vu vu" nan, om ngie boui mgam kaing nbia yuh nan, hoig reem hoig naog gah gaex Grih kom mu kom miang. Noh ang nbaox dien dong gox, geem moh ba dix yuh nin, Ong hoig beeig Grih kom mu kom miang. Saex duad ngie dom uig toux noh ngai nbaoh dix kom sae riang dix nbang lia sein, Grih hoig yum bi gah nbang lia dix pao. Nbeen njun noh ndeeih haing, hu sog bog nbix dix gah Giang, yaox ngie goug oud Giang gah biang beem rang hlaong hlaong kom puih njee puih nbIaong dix mai goug you ah: "Grih hoig mgouih gah mgreem loux ex pao! Grih hoig mgouih gah mgreem loux ex pao!"

Grih ba meed hrom an, ang lai dong gah sang yuh dix, ngom ngie mai goug nbliex Giang kaing.

Si ngaix kaix, gaing Grih nie nbloun ding kaing veui an dix soun, dom ngai nie iag kaing veui an dix soun.

Njaeh dom kaix an ndix, Grih dom dieh lih moh jee ba ding gaing peem ndoung, dom ngai iag ngie ang ndouh nyom dix yaox.

Nbeen lao Hag Diex Si Moung
Lu Bing jao krom
Ai Dix jao diam

Nbeen Soux Mai Lig

Goui dix nbog, Jao Nyiex hmaing Soux giex Lig hu gid, kix ndaex diag. Houig ndaex diag, braix glong hoig ndaing si aoh ngie, Soux hu id ndee veei mgreem kaox, haing. pao, yaox hoig graix Lig kix jie dix, jie Soux ang nbaox goui dix ngei gox; Soux dom hlein Lig ah sang hu aing dix, njom yam ang Lig yaox, nbriex yaog dix gog kix jie Lig dou ing grax ndod. Soux houig gah nyiex grai jao dix hmoung, hmaing Lig nieh. Njaeh dom yam an ndix, Soux hoig boun gieh jao dix muih dix. Houig yam som, Bui dom dox Soux ih eeb, gieh noh id gah nyiex liab ngu yuh baox yuh bie dix. Ah moh Soux ba ju loux ju si mgah. Lig hoig dig kix jie dix, jo nbaox ndeeih graix, braix glong hoig hla daeg houig gah nyiex. Jao ndaing meed hrom gah, njaeh dom yam an, dom dox ngie Lig ih briex haoh briex hna, eed siag kaix ih Bui kaing. Gieh noh id ndaex gog blag braix, dom houig in si ngaix ja gon moh boud nin.

Nbeen lao Hag Diex Si Moung
Ai Sung jao lao
Ai Dix jao diam

Nbeen Si Vai Mai Miao

Ndi ndix, goui Si Vai dix mu viex Bouih gaoh kaing ndaex diaD kaox dix mu, viex noh houig gah ndee yian ndee mglib, krei dix baeng ngu doung dix ih neix Bouih gah. Kom moh nan, ngu ang goui. "Sang yuh box gah mox pao in?" Hoig ndaing nu gah hrom Si Vai pao.

Yam an, Miao njiad jo houig dix mu ndee an, noh krei hu sog dix ih ba ih ba un gah nyiex Siam. Si Vai yaox Miao, hoig goui ndaex hrom noh.

"Miao bux eui, maix houig din dix vud." Si Vai goug Miao. Miao houig gah Si Vai. "A yeih! Geem deei maix Bouih ndee mox yuh nin?" Miao uig ndaox ngie gah mai qog noh.

"Deei noh gah ndaex diag kaox."

"Lug hoig gub maix sag gah dix nbrie pao."Miao ah.

"Moh liex, maix mgaig yaox, ex sang krei dix doung pao, ngu hliex ang goui, sang yuh box gah mox pao in?" Si Vai ah nin kom ki dix.

Miao gah hoig ndaing jai hrom nang, yaox Bouih log hoig mgoung ngie gah.

"Ex mgaig noh, yuh nin kaing, maix moh baox mgrom baox meed Gon Bui, laig ndaex yaong Bui ang yuh did dix gah maix, maix hu hmaing ngu houig kaing, eix doung neix Bouih, njog dix ih hmom hmom dix nbrie."

Miao breed dix laig ndaex nyiex Yiex Guad Siam. Yiex Guad Siam njiad daeg sae kix yuh briex mai ngu. Eeb bid ba hngaong Yiex Guad an uig npong ngie mai meeih Miao. Miao hoig ndog jai hrom, noh lai nbaox long nang grax dix nbaex, nie uig gin jai hrom dom ang lai boun yaog dix gaoh, noh nyah dix ngom liah ngu, ja nbliex boud dung eeb, ang lai yoi ngai gox dix kaing, njun Yiex Guad Siam yaog dung eeb kaing ngu, njun boud njun boud, hoig njun noh miex nkreeng mox nieh, Yiex Guad daeg yaog eeb lih. Miao uig nkrom puih dix houig braog Yiex Guad Siam mai gom jaong noh ah: "Miao miao" nan. Yiex Guad Siam yaox hoig ndaing jai hrom noh, dom jaox hrom ngie gah, bu bab bug eeb dox noh ih. Miao hoig sag pao, nyah dix id liah ngu bliag ngie nan.

Hoig haing Miao kaing id dix, nkrom lih ged loux ba dom Si Vai dix, dom bu bab dix leed ngei ngu kaing ndaex laeh ngu dix ngei viex noh dou hu blag braix.

Si Vai ja njun ja njun boud, gah ang nbaox yaox houig Miao. Noh lug hoig ndaing jai hrom pao, ang lai boun njun, dom ih neix Bouih im.

Si Vai yaox houig Miao pao, ndaing meed hrom gah. Yaog dix mgiex Miao.

"Hmom liex, maix kaix daeg houig yam in, gieh ex ih neix Bouih im njao. Ex ang lai siao ngu pao, sang laex ngie dix hmom hmom."Hoig ah nan, yaog sae Miao mgreem nyiex grei dix yuh kaox ngom dix gah. Ang nbaox goui miex nkreeng dix; Miao hoig yum gah mgud Si Vai dix.

Njaeh dom kaix an ndix, Si Vai dom ih neix dou diag im, mai yaox Miao ndee mox mgiex deei dix yuh kaox ngom dix gah. Houig dom in si ngaix gah ja gon moh boud nin.

Nbeen lao Hag Diex Si Moung
Jing Guang jao krom
Ai Dix jao diam

Nbeen Glang Bloh Mai Miao

Ndi ndix, Glang Bloh ang goui bruig, gah ang jix bu. Giex Miao moh bux aig.

Goui did dix ngaix, giex yaox bu Sim ndaex Rao Ma, ndaing nkoing ngie gah.

Glang Bloh ah nin gah Miao: "Bux aig eui, maix mgaig yaox, gieh eix goui bruig log Sim yuh nan, bu ndaex Rao Ma sog mgiex dix ih Giang, hoig ndaing heui."

"Moh hei liex, ax sang hu sog box bruig ndee mox?" Miao ah nin.

Glang Bloh ged noh dix vud, ah nin: "Ax hu hmaing Sim moh jao mgae dix, mgae dix jix bu log gix yuh nan!"

"Ex ang hu."Miao hoig ged noh yuh nin: "Ang lai hlee kaing hu sog eix jao jix pan gu jee goui, hmaing noh dox dix jie bruig kaing."

"Maix moh hlad gah gaing ba nu euih?" Glang Bloh jaox mai ah dix nin.

"Gieh moh nan hmom box, nbrie ang ax bux aig ra gaex hrom oud dae, dang hu dix gaex dix nblong: "Glang Bloh meed hrom mai ah dix nin.

Glang Bloh yaox ang boun gieh Miao, dom dang hu kaing Miao. Glang Bloh hu blag lih si ngaix, houig njao mgong diang ngod gao sib gao mgong, diang glong jiad sib jiad glong, si nbub Glang dix mu. Noh mgrux ngong daong daix dix gah Glang mai ah nin: "Glang bux gei eui, ex ndaing nkoing gah jix bu maix, gieh ex moh jao hod mgae dix mai maix kaing."Glang yaox hoig gaoh Glang Bloh kaing ndee si ngai ndee nda mai rog hmaing dix moh jao mgae dix, noh moh ba raeh ba see hrom yuh nin, dom rieb Glang Bloh mgae dix mai dix.

Ang nbaox goui miex nkreeng dix, Glang Bloh hoig mgae dix jix bu mai Glang, mai hoig boun dix guah bruig kom ra kon. Bie dou gaex gox noh gah hoig om Glang.

Miao hu jie dix blag glib si ngaix, ang nbaox goui miex nkreeng dix, hoig si nbub jao pan jao yuh gu jee, noh nbluh si nbeix jao pan gu jee mai rog hmaing noh ah nin: "Si Yiex eui, maix ba moh jao pan jao yuh gu jee gu jong, rog nbuan maix dox ex jie bruig jeeix."

Si Yiex ah nin: "Gieh moh nin, nyom dix ah. Yam in, goui Giang puan mu, nbriex dix ih si nbiex [**] ma, gieh maix boun mgiex gix houig kom uig, ex log dox maix jie bruig ra kon."

Miao ndaing mgaex hrom gah ah "miao" nan dix mgum mai hu hnyub Giang ndaex ma, dix vud mgiang Giang houig gah nqeeih dix, gah jaong dix kom boun kon gah Si Yiex.

Si Yiex qog noh: "Hoig boun mgiex maix noh uig?"

Miao ndeeih bog: "Hoig boun mgiex noh kom uig."

Miao ang moing dix, Giang ba mgiang noh an hoig nped kaing nqeeih noh; yaog dix dou. Si Yiex mgaig noh, Miao daeg boun mgiex Giang boun mu kaing, dom puad daix si nbeix dix hu kaing Miao.

Miao ang nbaox boun bruig, laex hrom voi nan kom houig dix. Noh dom ja bae boud gah ndaog nding ndee hvaig ndee hvoux [**] kaix gu nbou kom hngeeig dix. Njao ang noh hngiad loux Glang Bloh dom yam njaeh ndix, dom glih hrom dix kaix.

Nbeen lao Hag Diex Si Moung
Qeng Siao Hox jao krom
Ai Dix jao diam

Geed Mai Sua

Ndi ndix, goui dix ngaix, Sua si nbub Geed dix mu. Sua giad si mie dix ih neix Geed, kom moh nan ang nyom dix sae daix dix gah. Yuh nin, dom qog Geed: "Geed bux eui, geem id maix ndee mox boun nbou?"

Geed ah: "Ex id gah biang bang gon sai." Geed hoig dong ba sang yuh Sua gah dix, dom bie noh.

Houig boun nbou, Geed deei loun si maox baing dix mu een noh gah biang bang gon sai, njun dix vud, Sua lug houig, nbriex goi haog ngie bang gon sai mai yaog dix puih dix gah loun si maox baing an. Hngim noh goug duih gah si maox baing gian an, noh daeg dong dix mglub gah loux Geed pao, dom bu bab daing dix lih kaing bang gon sai, gad gon sai hoig ndung gaex noh kom mu, noh ged dix sang niad hu kaing ndee an yam ang Geed nbaox yaox dix, nu gah ngiah Geed dix. Daeg hoig hu ra loui ndiang kaing, gad gon sai nbaox jo dix ndung jaong noh duad ngie nan, noh nyeh [**] dix ngom mai douig kom jaong dix. Yam an, Geed ba moux dix oud biang yeem gon sai an ah loux qog noh: "Sua bux gei eui, yuh maix ba dix ndee an?"Sua yuh dix ah: "Moh lied ex rom hia gob daix dix." Geed yaox maeng Sua an, hoig ngiah ngie gah.

Nbeen lao Hag Diex Si Moung
Li Qing Foung jao krom
Ming Ju jao diam

Nbraog Giex Ia Si Meix Si Min Sim Uing

Goui dix ngaix, Nbrang mai la Si Meix si laih baox dix si min Sim Uing, mox uig si min Sim Uing oud ndaex Rao Ma, ba uig si min ih neix ba ang uig si min.

Braix hoig hvaig pao, Nbrang hoig njun boud

Sim Uing hoig lih pao, la Si Meix yaog gaing dix mgaig mgaig Sim Uing ba ang hiex nie an ndaex Rao Ma, puih dix lih, ndieh ndieh bruig dix mai ah,

"Ex si min si veui."

Nbrang ngeeh ngeeh gaing dix.

"Dix mu, ra mu, loui mu ...."

Ia Si Meix ba si mie dix beix an, lai jei dix sang hoig si min ndum mox ndum an.

Nbrang mgum gaing dix log ba mgaing nan ndee an.

Braix nie oud nie hvaig, Sim Uing nie oud nie nie. Ia Si Meix si min boud, si min yuh gah mox gah ang uig si min.

Miex kein [**] gox in, nie si min nie haoh! Ia uig ki pao, hoig nkeen rom laeh gox kom mgo gaex, si ngua ngie kom yaog gaing dix si min Sim Uing.

Braix hoig ndeix riang pao, la Si Meix gon ang nbaox hoig si min Sim Uing.

"Bux eui, maix ang die uig si min, ex log houig si min kaing." Nbraog jei nbog yam hoig houig pao, yaog gaing dix si min ah:

"Dix mu, ra mu, loui mu ...."

Braix hoig riang hu pao, Sim Uing hoig mgrai hu pao. Sim Uing nie oud nie dux, mgaig dix yaox ndeix hoig si min noh pao, la Si Meix uig ki ngie, ndieh ndieh bruig dix, dug nkoug dix lang nan yaog dix ah:

"Ud du lu -- Sim Uing lih."

"Ud du lu -- Sim Uing lih."

Braix hoig riang uig pao, Sim Uing ang lai goui ndaex Ra Ma bie dix mu gox.

"Moh dix in, ex hoig uig si min noh pao, gieh ex ih neix maix pao."

"A miex eui!" La Si Meix hoig bru kuan gah pao, ndi ndi bruig dix yaog dix dou kaix.

Bui ah moh la ba goug si ngaix lih, kaix moh boud goug noh Sim Uing:

"Ud du lu -- Sim Uing lih."

"Ud du lu -- Sim Uing lih."

Nbeen lao Hag Diex Si Moung
Ai Dix jao diam

Si Vai Mai Reeih

Goui dix ngaix ndix, Si Vai si nbub Reeih ndaex grax dix mu, ged dix sang giad noh yum, yuh dix sag gah dix nbrie kaix. Miex Reeih vu vied vu vied daix dix mai ah: "Bo nyang! Bo nyang! Si Vai bux gei, veui sang giad maix ex yum, ex gon sang goui loux grai gah maix."

"Loux ba dix?"

"Ax si laih riang baox dix si veui, gieh ex ang beix, ex log gieh maix giad dix."

"Geem sang si laih ax noh yuh gah mox box?"

Reeih yaog dix goug ji noh yaox pung Bui ba yuh gaing ndaex ma veui ngai giex mai ah: "Mgaig yaox, mox boun dou si nax gix."

Si Vai ged moh dix jee ba nbrax ba gua si nqeeng, jan dou diag dou du hlad gah noh kom uig, bie Gon Bui gah hoig hlad gah noh loui soun. Kee nin, noh dom yaog dix ndieh ndieh naog dix mai ah: "Jix dix!"

"Mox sang liang houig?"

"Rian dix moh maix Si Vai bux gei eix ba lih veui." Reeih ah.

"Hmom box. "Si Vai yaog dix vu viad si ndax dix, kruah kruah gaex dix, yaog dix hu si lung si lung ndaex si nax Bui pung. Noh lai jei Bui hlad gah dix.

"Si Vai houig pao! Si Vai houig pao! Niad dix dog. "Bui hoig goug hoig you ngie loux dix, Bui ang nbaox hlad gah Si Vai, bliex nie guan yaog groung ko, kaox nguh [**] gah Si Vai. Si Vai hlad, ndeeih yaog dix dou kaing Bui. Loux nad loux grouh Bui hoig si nbua si aox ngie.

"A miex eui, ndeix yum ex nux, Si Vai hoig pom si leed ngie kom dou dix, rom laeh rom lee hoig naog ngie kom mgo gaex."

"Yuh gah mox pao?"Reeih guan qog noh.

"Maix houig kaing! Maix houig kaing!" Si Vai vu vied vu Vied daix dix ah.

"Hmom." Reeih kiab kiab ngai dix, ndeeih greed gaing dix laig ndaex hloux dix sein, tieb si ndax dix mai vaig dix sied ngie, kaix yaog dix nbang lia dix si nax Bui ah "nbug nbug" nan sein.

"Loun maox nbang lia! Loun maox nbang lia. "Niad beix mgaih dix, Bui yaox ngie lung li, ang dong geem moh jee dix yuh nan, tai jei moh loun maox ba nbang lia, dom bu bab dang dou moux dix kaing.

Reeih hoig boun luan kaing jub. Bui pung pao.

"Lug ndaing pao jie maix!" Si Vai viang ah nan, gon ang nyang hvah hrom, lo yuh dix yo noh.

"Hmom, ex ang lai giad maix pao."Si Vai lo yuh dix ah.

Reeih yaog dix ndeeih ing. Si Vai njom yam ang Reeih rian hrom dix, yaog dix dum gah Reeih. Reeih yaog tieb si ndax dix, sod gaing dix laig ndaex hloux dix sein. Si Vai dab bin hloux Reeih gah hngim lom dix ling si ngaix, ang dong gah sang giad Reeih yum, ndie hrom dom bloi Reeih hu kaing.

"Dee hoig yaoh yuh maix euih! Moh lo ex dix glieh mai maix kaing."Si Vai nbaox ged nblong sang hlein Reeih.

Reeih ang lai yi loux noh, ang lai blih gaing dix lih, yaog dix nbang lia dix ing kaix.

"Miex hoig ndeeih houig pao!" Gon Reeih yaox hoig ndeeih houig Miex dix, uig mgaex ngie oud si vie si veing Miex dix.

"Gon ex eui, gon hmom ex eui, roi ang Si Vai nbaox jo yaox mgie ex nux, gieh ang moh nan, Si Vai hoig boun giad ex yum."

Loux in, Si Vai ba nbriex hod Reeih hoig nbriex hmoung. Kee nin, njaeh dom kaix an ndix, Si Vai yaox Reeih yam mox, yaog dix dum gah mgie ba dag deui oud mgreem nkoug an, ih nbeen in hu giad Reeih yum, giad Si Vai Reeih, yuh nin dom si ngaix.

Nbeen lao Hag Diex Si Moung
Foung Jing Guang jao krom
Ai Dix jao diam

Gaing Bouih Yuh Dix Lai Breeih

Ndi ndix, goui dix ngaix, Bouih mai Jag hu sog dix ih jee ba ih gah ndaex diag kaox, yaox kaox si mei dix mgo.

Bouih ah nin: "Blix in ang boun dix piex, hu eix kaing."

Jag ah: "Ndaing nyom dix piex, hoig piex noh ra loui mu nyaex rom kaix die ngie."

Bouih ah: "Gieh lug om loux grai maix, gieh duih saih ex!" Jag ah: "Maix ang yi loux ex dom qe yaox."

Bouih hoig piex blix si mei ra loui mu, niex nang grin nang. Nyaex rom kaix rug die ngie.

Npaeng ding lih ndum mox ndum an pao, loux si num braix hoig si aox ngie, yaog dix duih gaing Bouih. Kaix duih saih gaing Bouih dom gon goui dom si ngaix gah gaing Bouih.

Nbeen lao Hag Diex Si Moung
Ai Dix jao diam

Soux Mai Beix

Ndi ndix, Soux hoig goui rung, Beix ang goui rung. Soux een ngie hrom dix gah rung dix kaing, hoig ah moh ba ding biang baox dix kom uig, bie Si Vai gox gah gon hlad gah noh loui soun.

Goui dix ngaix, Soux si nbub Beix dix mu, yuh dix sog mgleeih gah Beix, Beix yaox yuh nin dom ah nin gah Soux: "Gieh maix rug min gah gu jee, hu sog nbriex hngoux ndaex yaong box, dox boun nbriex maix hngoux, geem daeg son moh Si Meix hmaing, "Bui hoig dong noh gu gaex, Gon Bui ndaing gin nqom ox, gieh eix ang jix nbriex, nbaox hoig dig dou gaex gox dix mai. Soux ang hrom yuh dix dig ngai dix ndaex ngai dou diag, ah sang hu dix.

Soux mai Beix njom yam hoig hu yuh Gon Bui gaing gah ma, nbriex goi laig ngie ndaex yaong yam ang Bui oud nyiex, houig gah biang mgraih nyiex dix mu, log oux ba een Bui hngoux gah, jao ndeh noh gah biang lad nyiex. Giex nqei [**] jaong dix goug yaig [**] nja lo gah nqeeih dix, mox sang dong box ndaex nja lo, raex ngie yuh nan, rung lang ngie, nqeeih Soux ang jix laig ndaex nja lo gah lang rung. Soux uig ki ngie dom hoig juang njee juang nblaong dix si veing nja lo kaing. Yam an, Beix hoig nbriex ngiah ngie gah mgroh yuh Soux, noh ja yuh dix om ba hax hrom yuh nan nang mai ah nin gah Soux: "Maix jeen deei dix dig ung kaing, qe yaox kaix."

Soux rug deei dix beeig rung dix, een noh gah biang diex, kom gi dix goug yaig nja lo een hngoux. Beix njom yam gi Soux dix yaig nja lo hngoux, bu bab yaog dix jeeb rung Soux gah gaing dix dou hu kaix.

Njaeh dom yam an ndix, Soux dom ang lai goui rung, gah ang lai goui si ob si nbrom yuh nqom dix.

Nbeen lao Hag Diex Si Moung
Ai Ling jao lao
Ai Dix jao diam

Moi, Grag Mai Si Vai

Ndi ndix, goui dix nbog, Si Vai si nbub Moi dix mu, noh ah nin gah Moi: "Moi eui, rung maix qaox dix lang jeeix, ang ndouh nyom dix mgaig; si vix ngie kom hu dix, ang lai hlee kaing gieh maix ex dad ngoing jeeix, jix ang jix lieh?"

Moi moh ged gah sang nyom dix mgaig ngie; ang sang gieh si vix, lai jei Si Vai ged soun dix, moh baox mgrom muih, dom ah nin gah Si Vai: "Hmom! Maix deem ex dad dix nblah box. "Kaix an, rung ba sang een Moi dix guan deed dou diag dou du gah hoig dad dix ngoing ngie, yuh nin, hoig nyom Si Vai giad dix ih Moi pao.

Kaix an, Si Vai nbaox si ndaeh Grag dix mu, nbaox ah nang nin gah Grag: "Grag eui, rung maix qaox nie lang jeeix, ang ndouh nyom dix mgaig, si vix ngie yam hu maix, ang lai hlee kaing dox maix ex dad dix nblah, moh ang moh lieh?"

Grag hmoung noh, dom ah nin gah Si Vai: "Maix jee ba qi hnyae yuh nin, rung jie ex ang siao gieh maix dad, ex sang een noh si veui jee ba sang houig dix jax jiang mgud keem yix, deed noh gah! "Si Vai yaox ah Grag nan, hu kaix. Kee nin, Si Vai dom ang boun giad Grag kaix dom si ngaix.

Nbeen lao Hag Diex Si Moung
Gox See Jiu Jao Yi Ming jao diam

Dom Mgoui, Ga Mung Mai Hngoux Jax

Nbeen lao Bui ndi ndix, goui dix ngaix, Dom Mgoui hu glieh mai Ga Mung, yam njiad ndaing nyom glieh giex, Dom Mgoui lag lo Ga Mung ah nin: " A miex eui, gah biang Hag Diex ba lung ngai nbaoh moh ngie maix kaing."Ga Mung gah ngiah nang mai ndeeih bog loux noh an nin: "Ngai viang lung ang souih [**] moh ba did dix, yam ih Bui vo, Bui hoig ndaog ex houig gah nyiex dix, yaox dix ih vo mai Bui dae gah nyiex si nbua ngie, maix hiex, ngai maix viang baing gox, yam ih Bui vo van, gon bae boud ndaex diag noung noung, voi ngie nan noung dix! Maix qe grai yaox, ax ra gaex moh mox ba yaox grax yuh nin?"Dom Mgoui ang lai dong gah loux sang grai dix.

Yam an, Hngoux Jax njiad jo dix houig ndee an, hmoung loux ah Ga Mung, ang hvah hrom gah, moh kee njao om giex Dom Mgoui baox dix, gah moh nang jee ba daeg deei. Bui kaix vo nang. Noh qub dix houig si veui ngai Ga Mung mai ah nin: "Maix maeng ba lung ngai an, bo qaox dix mgaex ox!" Sae riang dix si yiad gaing Ga Mung dix daix, gaing Ga Mung lih moh loui ndaog, gieh Ga Mung saex dom uig ging hrang dix, Ga Mung yaog dix tib noh, jo dix tib vaig, Hngoux Jax, gieh vaig Hngoux Jax ndouh. Njaeh dom yam an ndix, Ga Mung dom lih lu liah goui loui ndaog, Hngoux Jax kaix hoig gaex gix, vaig dom brih [**] ngie.

Nbeen lao Hag Diex Jeng Kang
Moung Dex Huax jao diam

Goi Mai Nqong

Ndi ndix, Goi, Nqong, Si Vong, Jeem, Nbi, Nbi Laing jan jee ba haog ngaong in gix hoig moh jee ba oud mai Hngoux ndaex diag ndaex du, gix hoig moh nyiex dix hlang brang dix mu. Hngoux moh Miex gix, Goi moh Gon Ai, Nqong moh Gon Nyi, an gix kaix dom moh ba aig ba ou uig, hoig jix oud jix goui mai baox dix, mgaex si lei hei si veeig, houig nbog yam vog gu num, gix uig sang mgrum houig gah nyiex gah yaong gu gaex ndaex Bui. Goui dix num, Goi ah nin gah Hngoux Miex eui, nbog yam vog yam baeh uig ndeix houig pao, eix hmaing bux aig eix ran ing gia gah nyiex gah yaong dix gaex ha, moh gon goui ba ih ba un Gon Bui? n Hngoux ba moh Miex gix hoig ju loux ba ah noh, dom bloi Si Vong Gluah ran ing mgaig gah yaong. Si Vong Gluah houig gah yaong, Bui hoig mgiex doung dix ih. Jan jee ba oud ndaex diag an gix njun njee njun nblaong, ang nbaox yaox ndeeih houig grai Si Vong Gluah mgroh mgrong yuh nyiex yuh yaong, ang dong geem moh si nbub noh gaing ba dix ndee hu dix. Miex gix nbaox bloi nang Si Vong Hla ing mgaig; geem moh yuh gah mox, Si Vong Hla houig gah yaong, Bui nbaox mgiex doung nang dix ih. Jan jee ba oud ndaex diag an gix, groux njee groux nbiaong gah ang nbaox yaox ndeeih houig Si Vong grai mgroh mgrong yuh nyiex yuh yaong, geem moh yuh gah mox. Njiad moh yam uig njun gix noh mai ki dix, Nbi Num mai Gei giex ra bux ou lih dix houig, hmaing dix nbaox ing gia gah yaong. Nbi Num mai Gei houig gah yaong uig qog Bui: "Si Vong jao mai Si Vong hla hoig gah beix, geem viex beix noh hu bIag mox?" Bui grai giex hmoung: "Yix hoig jai hrom dix, Si Vong jao mai Si Vong hla yix hoig doung dix ih, gieh beix nbaox ang niad dix houig, yix uig sang nyao yum gah jai hrom dix ...." Grai njee grai nblaong, Gon Bui uig sang yaog dix nbaox mgiex Nbi Num mai Gei, Nbi Num mai Gei uig yaoh ngie gah mai niad dix dou ing, dou mai nbang lia dom houig daex ma Hngoux. Kee nan, Nbi Num mai Gei pai gaex jao, hla tad [**]. Lom lei ngie, moh yam dou nbang lia dix yam an, dom lom lei gah kaix. Kaix hoig grai Nbi Num mai Gei gix hmoung mgroh mgrong ndaex nyiex ndaex yaong, gix hoig dang grai ngie jie dix gu gaex ah: "Moh hei liex! Eix jo niad dix ing pao." Viang moh nan, sang ing eix yuh gah mox, gix ang nbaox boun lih ged. Yam in, Goi yaog dix lih mai nkrang dix ah nin: "Gieh moh hrom ged ex, eix bux aig kom bux ou ndia baox dix ing mgroig ngie, gieh Bui dong dix krei dix si veui eix, eix dom daeg goui ndee oud ndee sang een. Gieh eix nieb boun si npux baox dix ing yuh nan, Gon Bui ang ndag uig daeh daix gah, bie ndee sang id sang dum eix gah ang goui. In pao, ran gieh Miex eix Hngoux ing si veui, brong gaing in, eix ba aig ba ou hod mgrong mox gaex jao gaex hla; gaex jao ing veui, gaex hla ing kaix." Gix hoig mgrum ju loux ba grai bux gei gix Goi, viang moh nan, moh ngie Nqong ba ang ju kaing, noh yaog dix gaoh mai ah nin: "Gieh sang ing, jo ing dae, ing dix gaex dix nbog, Gon Bui gah ndaing hnyab gah." Goi ah: "Ex moh Gon Nyi, beix jo dix hngiad jie ex." Nqong yaog dix tied loux grai Goi ah: "Maix moh Ai ex moh Nyi geem moh yuh gah mox box?"Giex ra bux aig si mah ang njud, yaog dix dab baox dix, uig lu li ngie baox dix biang diex, hoig tiab Miex dix Hngoux mgouih biang diex, kee nan, nbog yam gaex Hngoux, ang pai deei log jix mgouih biang diex, lao Bui noh, moh Gai giex Nqong ba diah Hngoux mgouih yam dog giex baox dix ndix.

Nqong giex Goi hoig dab dix dix mglaex, Nqong yaox ang beix Goi, dam yaog vaig lang mug gaing Goi lih goui boun siag. Kee nin, si mgleem Goi dom goui boun siag kaix dom houig yam in. Goi sae riang dix nbluh nkoug Nqong, gieh ngog Nqong ngog ngo dix, kee nan, si mgleem Nqom dom ngog ngo dix dom si ngaix.

Nbeen lao Hag Diex Si Moung
Suix Ga jao lao
Ai Dix Jang Kai Dax jao diam

Nbeen Ndee Gaoh Hngoux

Ndi ndix, Gon Ba Raog ang nyang nbaox dong Hngoux jee ba yuh nin goui. Ba ih ba un gix moh ngie daex diag daex du jee ba ang eix dong gaex dong jee, Bui hoig ndaing gin ka dix gah jai hrom, gaex hag ngai nbaoh Bui uig grox grox ngie, yuh gaing gah ang lai goui riang goui rao bie jeeix.

Gah braog yaong goui rom ndung dix mu, rom ndung in ang ding ang raex, rom uig si ngaong ngie dom uig jix nbuan eix grei ndung. Mu Hngoux ding ngie, soug ngie oud grei ndung dix mu, mgaig noh sein, log yaox eix mu bloi si ngi nan dix mu.

Goui dix ngaix, Si Vai gouh gu gaoh kaing ndaex diag kaox houig nyaex rom ndung, yam njaeh noh dix daeg jub nqeeih dix ndaex ndung, riang su sai si ngi log kri an uig nqan ngai noh dom ang lai boun nblaih, noh ang lai dong gah sang yuh dix, dom ndeeih yaog gaing dix, njog dix si mi ndaex grei ndung sein, yaox ngia su sai Hngoux oud grei ndung kaing, noh gin ndaox ndeing gah, yaog dix hu vu viang si veing dix njee nblaong, kaix an, noh ged noh: "Siang" jee ba nguah dix jee. Mgong in moh mgong jie ex, rom ndung in moh rom ndung jie ex,"siang" in moh jie ex heui, noh nie ged nie nyom hrom, nie ged nie mgaex hrom gah, dom yaog loux mgraox dix dix mgum, goug jan dou diag dou du houig mgrum braog ndung, noh yaog dix. ji Hngoux ba oud grei ndung mai ah nin: "Mox boun hvaing Hngoux oud grei ndung dox gah ex, ex uig sum noh moh Si Miang oud mgreem dix."

Jan dou diag dou du hmoung ah noh nan, dang si nkrang dix hu hvaing mu Hngoux an.

Si Vai iag ged nin ndaex hrom dix: lih kaing Si Vai gouh gu, kaix moh mox ba nbloun ding riang, Si Miang ba oud mgreem noh, jo moh heui. Yuh nin, noh dom puih dix houig braog ndung veui, yaog dix sae daix dix ndaex rom. Viang moh nan, njao kee ndaing riex riang rom, hoig bu bag quh yuh rom kom ndung, yam an, ang lai jix yaox "siang" an gah bu bag rom. Noh dom ndeeih lod daix dix kaing ndaex rom mai njog si mi rom kaing. Bom naox bu bag dix pao, "siang" an ndeeih si ngi nang sein, noh nkom nbaox qub daix dix ndaex rom. Yuh nin miex nbog mox nieh, "siang "an ndeeih ang lai yaox nang. Miex ndaox miex ndeing in, yuh nin miex nbog, ja ang nbaox boun hvaing "siang" an lih kaing ndaex rom.

Brieh Bog houig dix mu, yaox nqom Si Vai an, yaog dix sae loux ngiah Si Vai. Ged nin: gaing in ang moh ex ang jix boun hvaing lih. Njung hyaog dix mai vu viad si ndax dix dou houig blag in, puih dix "blom" nan ndaex rom, gee [**] ndaex ndung gah nqeeih dix njee nblaong, kom moh nan ang nbaox yaox "siang" ba did dix. Kee ndaing raex rom ndung, ang lai boun eed pom dix ndaex, gee dix daix yaog gaing dix dix daix, dom nieb luang dix gee dix vud, lih kaix. Plih plih [**] ngie meeih dix mai guan nbliex ndaex rom kaing. Mu blix Hngoux an ja gon si ngi oud boud ndaex grei ndung. Sang nyan nyan [**] ndiang dix houig braog ndung dix mu, goug sae si nboi dix ndaex rom sein, ged dix sang hvaing gah si nboi dix. Ndux moh si nboi ba qaox nie gian, hoig ndaing bu bag yuh rom, ang lai ndouh jix yaox mu "siang" an geem oud ndee mox, gah ang lai dong gah sang deei mu "siang".

Bouih, Jag, Nbraog, Gang Goi ...... jan ba moh dou diag dou du hoig mgrum lai louh baox dix deei, gon ang nbaox. boun hvaing" siang" an lih. Si Vai gouh gu hoig gin ndaing meed hrom pao, sae loux mgraox dix mai bu baig diex dug, loux mgraox in haing yuh Si Uing ba daeg nyom id gah ndaex bang yeem an, noh hu ngu ngied ngu ngied dix houig braog ndung, yaog dix graing rib oud braog ndung gah nqeeih dix, hu glin [**] "siang" an gah si ndax dix, daeg boun hvaing mu "siang" an lih kaing ndaex ndung.

Yam an, Si Mgaex njiad jo houig ndee an dix mu, yaox mu Hngoux an hoig nkom sud, ang nbaox dien njun gox dou diag dou du dong geem bian moh je ba dix, mu Hngoux hoig laig ndaex nblei Si Mgaex sein, dix kiab ngai kaing hoig yaog dix. bu hu kaing dan.

Si ngaix kaix, Bui did Meix Mouing houig yuh gaing vaing nqo gah hod nbaoh rom ndung. Yaox dum Si Mgaex gah gag kaox dix mu, Si Meix dom deei ag buing noh jod gah, bih vaig Si Mgaex, yaox Hngoux an ndaex nblei Si Mgaex, ang dong geem moh je ba dix yuh nin, dom dig gah biang diex nbaoh an. Houig nbog deei Bui dou ma, giex Meix Mouing nbaox houig yuh nang gaing ma nbaoh an ndee dig mu Hngoux. Mu Hngoux an hoig lih blix ra loui si mgiag, giex brad mu Hngoux an, nboi nboi noh ndaex daix dix, njog nbrei dix liam lia, hoig om mu Hngoux ba oud ndaex nblei Si Mgaex an. Giex dom nbaox dig nang gah biang diex nbaoh dix, Num kaix nbog vog, giex Meix Mouing jo nbaox hu nbaoh, yaox hoig moh Hngoux kom uig, ndaing goui hrom gah, yaog dix, mad si mgiag Hngoux an gix, du daig du daig noh ndaex dom daix dix, si mgiag mox si mgiag an, hoig bum noh miex bum. Nbliex Hngoux ba hleng si ngi dix bum an, giex ged nin: gieh ja jix dix ih hmom heui. Giex dom nqob dix ih. Yam njaeh, giex gon ih noh kom hloux, kaix sib noh ndaex nqeeih dix hreeng nyao, hmoung die si ngeih ngie yuh nan, moh ngie riex nqom jeeix. Kaix an, giex nbaox deei dix dig hloux, ih kaix, roi nyom dix ih kaing veui an miex nyao. Giex hoig sag vaig pao. Ndaing mgaex hrom gah dix dei, dom nbaox yuh om an num hruad noh ndaex ma dix nblah, ba gan ndeg viex ing gah nyiex, gieh Bui nyiex Bui yaong jim gu gaex ndaex Bui. Yuh nin gieh nieh, Hngoux dix num nie kaing dix num, mai hod loux ah Sim Mgaex loux dix "Gu Gu" nan, dom sum je gaex noh moh "gu" gu moh Hngoux, Bui ja gon lao boud dom houig si ngaix.

Nbeen lao Hag Diex Si Moung
Oug la jao lao
Ying Soung jao diam

Diah Mai Dung

Ndi ndix, Diah mai Dung hoig moh bux aig, Dung moh bux gei, Diah moh bux. Gix oud gah biang mgong.

Goui dix ngaix kaix som nbou, giex ra bux aig hu glieh hu lao loux dae gah biang mgong.

Bux gei ba ndaing nbrax yo dou gaex dix an ah: "Bux eui, maix mgaig gaex hag ex peix dix gian joung njung yuh nan, dou hoig naog ngie, nyom gah nyom dix ih ...." Bux noh ba ang hiex hrom nyei ang yo dou gaex dix an yog ngie hyaog dix hngiad hmom hmom.

Bux gei lao dou gaex dix dom hoig lih sim uing gah ndaex Rao Ma daeg naox. Noh nbaox bu bab qog Diah: "Bux eui, maix jix gaex deem nbog kix liah kix a liah, yuh dix ang gaex deem mai ex bux gei dix ndaex kix gao?"

Diah ngiah mai ah: "Bux gei eui, geem dong maix noh lieh? Kix liah kix a liah moh nbog yam ang dou ma nyang gaex, yam jud gon rai be sin gah briex, ex gaex deem yam an, gix jix hu sud dix hmon vaig dix gah ex, gieh ex gaex deem dae mai maix ndaex kix gao, ndouh jix deem be sin yuh gah mox box?"

Dung hngiad loux bux dix, jei moh ah noh loux ngiah gah dix, ndaing meed hrom gah. Dom njom yam ang Diah rian hrom dix, yaog dix diad Diah nbang lia gah jaong dix.

Njaeh dom kaix an ndix, Diah dom oud gah braix maeng mgong, Dung gah ja gon oud boud braix biang mgong hlaong. Kee nan, nbog yam gaex giex dom ang moh nbog dix mu.

Nbeen lao Hag Diex Si Moung
Lu Bing jao krom
Ai Dix jao diam