[Page and paragraph numbers are visible in Mozilla Firefox and other browsers which support CSS2 -- not Internet Explorer]

Nbēen Loux Gon Nyōm Ang Tux Seng


Loux Si Vēui

Sōng sang gīeh līg lāi hmaing jei gon Ba rāog nīed dix haog huan, gīeh gon nyōm Ba rāog nīed dix hlag hliao gū gaex gīeh gix goui lāi gia nbēen hmoung, ex tud «Nbēen loux gon nyōm Ang Tux Seng» in. Nbēen loux gon nyōm Ang tux seng mōh nbēen hoig ao min dīng jē gah nbaoh mēng hag diex gū si ndāeh, hoig tud dix līh gah lāi ming qux dang jē bīang hag diex dīx yīieh jē haoh. Nbēen loux gon nyōm Ang tux seng gin haoh gin nīe, ndaex pug lāi in ex tud noh ndaix blah ngīe. Nbēen in gix, jē si ndiex mgāe gon būi si ndaing raex heui, bōun deem bōun mgō gon būi hlaong ba gēd, nīe ba dōng.

Nyī hlee • Mōuig dōun


Gaing Lāi

Si Nbēix Kraox Vōng (1)
Hang See O (17)
Nyōm Giex Būi Yūh Lāi (31)
Nyōm Nbun Goui Boun Mgian (44)
Būi Liang Līg (81)
Nyōm Nbun Jōuih Bai Mgīx (98)
Glang Nqom (108)
Kex Lao See Iag Giex Kex Lao See Dīng (143)


Si Nbēix Kraox Vōng

Ndī ndīx, goui Vōng yūh nin dīx gaex noh gīad muih dix jeeb grāeng hmom si nbēix kraox. Njāo nin, hoig nai māe uig bag gah līag dix si nbēix, ang lai gēd lai mgāig gia gāing Gox jia dix mai gon rāi būi hun, bīe glieh yūh būi noh gah ang lai sax muih dix mgāig. Nbrūg noh Nbrūng hu lai līng gū si ndāeh, mōh ngīe sang glang noh būi nkoing koi gah si nbēix kraox dix, ndaex dīx ngāix, dīx daix na rī louh noh si nbēix kraox dīx yēng heui. Si mōd būi gix Vōng in ang lai ah nin: "Vōng oud gah nyīex brōng gāing mgaing loux," hoig dīeh ah nin uig, "Vōng oud gah ndaex nyīex louh grāeng."

Ndaex jēi dīng oud Vōng in, būi meng hag diex dang ang njūd gah houig hu dix gah si nqeeng. Goui an dīx ngāix, būi dīeh houig gah ra gaex, giex ah mōh dix būi jāing grāeng, ah njiad jīx daing dix Man gīad hmom gīad mgrāng bīang hag diex, Man daing giex lāo Dāi goui gah ang mgrāng, sin eix jāing mōh si nbēix, būi o būi peem dix dēi gah ang jīx yāox goui si nbēix gah gaex eix.

Vōng hmoung lāo būi noh geem gēd ah nin: "Did hoig mōh si nbēix gīad ko gah hrom ex heui, sin ex yāox dix jeeb si nbēix yūh nin, dee jīx yāox jīx dōng mox mōh būi bīe būi lu liag, mox mōh būi hlag hliao, mox mōh būi o peem gah ndaex Gox jia ex uig. Mōh heui, ex sang hmaing giex nīed daing man līh." Kaix an, noh dox māe gah būi dīeh an giex mīex nyāo, hmaing giex nīed dix daing heui.


Būi dīeh an giex nblih Jāg daing līh ra mu, kom mōh nan, jē dīd dix ang dīe goui bīang Jāg jāing grāeng bīe dīx mu, giex ja yūh dix om ba glia geei yūh nan, yūh dix om ba hoig mād dix yūh gāing si nqeeng. Gon nbāox hmaing Vōng nīed dox dix sīao luad mai māe kri, māe kri mai luad dox Vōng an gix hoig lāig ndaex hae giex kom uig.

"Ex gīad mīe dix dōng gah hoig daing giex Man mīex ndīng nieh," An dīx ngāix Vōng gēd nin, dīx blag noh ndēeih gēd nang nin: būi o būi bīe gix ang jīx yāox Man jē nin. Yūh nin, hrom hri noh gah ang nyōm oud gah, noh hlad dix ang yāox hlad būi dōng dix mōh būi o dīx gaex, njāo nin, noh dom ran bloi būi hu mgāig dīx gaex. "Ex sang bloi Bu jāng gūad hu mgāig yāox gāing yūh giex būi jāing grāeng," Vōng gēd nin, "Ja hoig yāox noh mōh man jē dix ngīe, noh mōh būi gīad goui ndīeb ndoung mai būi ang sax bīe, būi dang gah ang om noh bīe dīx gaex."

Bu jāng gūad an hu gah ndēe yūh būi dīeh an giex gāing, giex yūh dix om ba hoig mād dix yūh gāing gī nan, ja vu vīed box Jāg yī an.

"Jīx yūh gah mox nin?" Bu jāng gūad gēd nin, hrom noh hoig si yaoh, Dou ngai noh hoig nplian dix dīng goui ndīng mōing gloung nan.

"Ang ex dīe yāox box jē dīd dix!" Noh ang dīe bōun ah mgūm loux līh, būi dīeh an giex hmaing noh hu ndēix jeeix, jī Jāg daing yī an qog noh gah yūh Man gah mox? hmom ang hmom laih? Bu jāng gūad nplian dou ngai dix dom dīng nbrēi dix mgāig, ang dīe yāox box Man dīd dix bīe jeeix, Jāg jāing gah mōh ngīe Jāg yī mgīex mgōing nan.

"Si yīiex si yōng eui," Noh gēd nin ndaex hrom dix, "Geem mōh ex būi o peem dīx gaex box laih? ang ex jīx sax dōng yūh nin, ang ex dāe ndouh gīeh būi dōng bīe dīx gaex gox. Geem mōh ex būi bīe dīx gaex nang laih? ...ang, ang ex sax bīe; ang ndouh gīeh būi dōng ang dix yāox Man."

"Oh, maix ang lai goui loux gah Man daing yiex bīe jeeix gox laih?" Jao daing dīx gaex qog noh ah nin.

"A ... a, mgrāng dix dēi, mgrāng dix dēi, hoig ndaing hmom dix dēi heui." Bu jāng gūad kom yāog yō noh ah nan, nbāox dēei sae si līag ngai nbrēi dix mgāig kom ah dix nin: "Ndaing hmom dix dēi heui Man in, njiad mgrāng om Dāi heui. Mōh heui līeh, ex gah sang ing grāi Vōng hmoung, hoig ndaing mgāex hrom ex gah yāox dix Man in."


"Eh, hmoung loux ah maix nin hoig gīad mgāex hrom hri yiex gah," Būi jao jāing an giex ah nin gah noh. Oud kaix giex grāi noh hmoung gah daing dix Man yūh gah mox; gah hmom noh yūh gah mox. Nbāox sae box loux ang noh sax hmoung an gix mai, Bu jāng gūad an hoig nbrēi dix hngiad loux grāi giex, ngēeh gaing dix yāeng [**] gāoh Ia si vōng nan. Geem sang ing grāi noh Vōng hmoung, dom grāi box loux ah giex in gix.

Bu jāng gūad lūg ing grāi Vōng hmoung, Vōng gīad mgāex gah. Būi dīeh daing Man an giex nbāox nīed hmaing Vōng dox Māe, Luad mai Kri mīex nyāo, giex ah mōh sang sīao dix noh gah daing dix man. Luad bīe dīx mgong ang dīe yāox sae giex noh gah Jāg, Māe kri an gix hoig lāig ndaex Hae giex uig. Kom mōh nan, giex ja gon yūh dix yu yaing box Jāg yī an.

Ang nyāng goui mīex mglang dix, Vōng nbāox bloi si mīang dīx gaex hu mgāig gāing yūh giex, si mīang an lāig gah nyīex daing giex, mgāig njēe mgāig nblāong, ang dīe yāox dīd dix bīang Jāg daing giex, ang dīe yāox man ah Bu jāng gūad hoig yāox dix bīe jeeix gox.

"Ang ex ndouh mōh ba o peem," Si mīang in gēd nin, "Dee mōh ang ex ko dix yūh si mīang dīng nin. Si yīiex si yōng eui, nyōm dix ngīah dix dēi heui gāing in, vīang mōh nan, ang ex ndouh gīeh būi dōng dīx gaex gox." Kaix an, noh dom nbāox yāog yō nang Man dīx nbōg, dīx jē noh ang dīe nyāng yāox Man bīe dīx ngai gox. Gon yāog yō būi daing an giex nang, ah gīad muih dix Dāi goui gah Man daing giex.

"Mōh kee heui, mōh Man ndaing hmom dīx jē." Noh ing ah nin gah Vōng. Kaix an, būi oud ndaex jēi dīng in hoig grāi lāo bāox dix hmoung Man jē in gū si ndāeh.

Vōng gīad mīe dix hu mgāig yāox Man daing giex vēui sang hoig dīx nbōg, noh kreh krom būi gīad hngiad loux dix dīx jūb -- gon jō si mīang hoig hu nbōg vēui an giex nang. Gix houig gah nyīex daing būi dīeh an giex gah. Būi an gix ja sae rīang dix vu vīed box Jāg yī, eix ang dīe yāox Luad dīx mgong bīang Jāg.

"Dax Vōng eui, mgāig maix yāox mgrāng ang mgrāng laih? Man in hoig hmom om bruih heui." Si mīang an jī Jāg yī kom ah dix nin gah Vōng, giex gēd būi oud braog hveing dix dee hoig yāox Man kom uig.

"Jīx mōh gāing yūh gah mox nin?" Vōng gēd nin ndaex hrom dix. "Ex ang dīe yāox box dīd dix. Nyōm dix ngīah heui gāing nbrai in, geem mōh ex būi o dīx gaex box? in hoig mōh gāing gīad saig soung yāox ex gah njū mōh dix būi dīx mgrong heui."

" A ... a, lūg mōh Man ndaing hmom dīx jē kee heui, hoig ndaing ko gah hrom ex. "Vōng ngēeh gaing dix kom ah dix nin. Noh yūh dix om ba hoig nbrei dix mgāig Jag daing an, njao ang noh ndouh bōun grāi ang dix dīe yāox dīd dix ngai būi hun. Būi houig mai noh an gix hoig nbrei dix mgāig nang gu gaex, gix gah ang dīe yāox nang did dix. Kom mōh nan, gix ja gon hod nang loux ah Vōng nin: "A ..., lūg mōh Man ndaing hmom dix dēi kee heui." Gix ah nin gah Vōng: hmaing giex jāing maix ih si nbēix klax gah Man ang būi sax yāox yūh nin, hu lai ling yam Vō yam Van gu si ndaeh, gieh būi hun yāox kom uig, dee mōh gaing ndaing hmom dix mgrong, "Mōh, mōh heui, dee ndaing hmom dix dēi." Būi hun hoig ah nin uig. Hoig gīad mgaex hrom hri būi gu gaex. Kaix an Vang sum būi dieh an giex mōh Jox see (Jox see mōh gaex si mīang dīx jē) kom ra gaex. Gon gīeh giex mōh jao juang meng dix jāing Vōng ih grāeng.


Blag bōun ngōb ngāix kaix, hoig mōh nbog yam lai ling būi gah Vō kraox heui, nbou ngaix an, būi dieh an giex doug ngu dein gao mgong liah, om ba hoig nīad dix yūh gaing ling som nan, būi gix hoig dong mōh nīad giex dix jāing Vōng jeeb si nbēix vēui Vō. Giex yūh om deei dix Man līh kaing Jag, oud kaix nbaox deei nang mgib goung dog gib Man gah, hoig gib giex Man, giex nbaox deei nang nyēix yī ang geei goui gah yūh om ba dog jāing dix si nbēix, būi gix ang dīe yāox ba dog gib giex, jāing giex bīe jeeix gox. Hoig jāing dix giex ah nin kom ra dix: "mgāig beix yāox. Si nbēix kraox Vōng hoig jāing dix pao."


Vōng vīex būi jao mi dix jūb dang houig deei graeng. Būi dieh an giex yāox daix dix yūh om mgiex dix si nbēix nan, giex ah nin: "mgāig beix yāox, in mōh klax, in mōh si nbēix, graeng jē in hoig on ngie om nyīex mgrēeih nan, būi jeeb graeng in ang hmoung goui did dix bīang gaex dix bīe jeeix -- in mōh ndee dang noh kaing baox ndee hmom noh heui."

"Mōh heui, ang lūd jeeix gox. " Būi jao mi an gix ah nin kom uig, gix ang dīe nyāng yāox nang graeng did dix kom ah dix nin.

"Dax Vōng, beeig graeng krai maix heui. "Būi dieh an giex ah nin, "Sang louh yiex maix ih si nbēix kraox pao."

Vōng beeig graeng goui gah gaex dix kom uig, būi dieh an giex yūh om ba deei dix sei nbēix dix peen dix peen yūh nan dix dox gah daix Vōng. Oud kaix, yūh om ba jeeb dix Vōng ih, hmaing Vōng yāog daix laong dix yūh om ba hnod maox gah nyōi noh, gon ah nin: "In mōh njāong nbēix blag kaix," Vōng o an gah moing dog blu blie dix mgāig ndaex si liag, om ba lug hoig jeeb graeng hmom dix dēi nan, Man jē did dix ang dīe lai hvee [**] dix gah gaex noh bīe jeeix.

"Si yīiex si yōng eui, si nbēix in njiad ndaing ko gah gaex noh, gīad ndaing hmom jāing dix mai. Njiad hmom om bruih, mōh graeng gīad ngūah bīang hag diex dix peen heui. "Būi hun hoig yāog yo noh ah nin kom uig.

"Kaox mglom hoig krei dix blag gah diex, ndaeg groux eix Vōng līh ngie, jīx dix mgrong hu lai ling gu si ndaeh heui.," Si mīang jao nkaog Vō ah nan.


"Hoig pao, hoig jeeb ex graeng pao, geem ko nang graeng in gah gaex ex laih?" Geem sang gieh noh būi hun mgāig gia graeng hmom dix, noh ja nbaox mad dix mgāig dix ndaex si liag kom qog dix ah nin.

Si mīang jao yāog njāong si nbēix an gix, ja yūh nang dix bu bi bīang diex kaix Vōng, yūh om ba dog yāog dix njāong si nbēix yūh nan. yāog gix dix hu kaix, did dix ang dīe goui ndaex daix gix jeeix gox -- gix gah ang gieh būi dong gah ang dix yāox jē did dix --hlad būi dong dix mōh būi o.

Kaix an, gix mgrong Vōng hu lai ling gu si ndaeh. Būi jung braog grax mai būi mgāig gah ndaex ndouh nding an gix ja ah nang nin uig: " U --, si nbēix kraox Vōng mgrāng dix dēi, njāong si nbēix blag mgreem hmom heui, njiad ko gah gaex noh. "Njao hlad gix būi dong dix bīe dong dix o peem, būi mod dix gah ang ndouh grai ang dix yāox jē did dix. Si nbēix jeeb Vōng ang būi sax yāog yo om si nbēix in dix peen gox.

"Noh ang dīe jeeb graeng jē did dix," Gon nyōm yāog dix ah nin dīx gaex.

"Si yīiex si yōng eui, hngiad beix hmoung loux ah gon nyōm did heui." Geeing gon nyōm ah nin, oud kaix būi hun nbrīex su siah dix grai loux ah gon nyōm hu gu si ndaeh.

"Ang noh ndouh jeeb graeng did dix." Gon nyōm nbaox ah nin dīx gaex. "Ang noh ndouh jeeb graeng did dix eui."


"Mōh dix dēi, ang noh ndouh jeeb graeng dīd dix."

Ndee nkoig būi hun hoig ah nin uig. Vōng hmoung su siah būi hun dix nbrīex ah nan, hoig si yaoh gah. Kom mōh nan noh ndēeih gēd nang nin: "Ex dee hu lai ling dom si ndaeh kom." Oud kaix, noh yūh dix om ba ang dong dīd dix nīe nīed dix mgaex hleing. Si mīang hod noh an gix, ja yūh dix om ba dog yāog njāong si nbēix nan hu hod noh nang.


Hang See O

Ndī ndīx goui go guad jīx līg min lai dīx gaex. Noh goui gon si meix gīad hlag ra gaex, hlag giex bīe siao giex noh dix blag ngie hoig gūb, an dix blag mōh ba nīe. Yām in giex sang hu qog dix mouing Gon nbun Vōng, njao hoig hmoung giex ah būi ah Gon nbun Vōng nin, ah sang sog di dix meix būi dang jē dang nqom kaing būi hun dīx gaex.

Būi in giex krei graeng sang vīex dix dīx vang duah. Hoig krei giex graeng sang vīex dix, an dīx gaex gon yūh dix uig dong pug Mīex lai Jam līg La ding kom pug mai Bao zi līh gah ndaex jei ding in kom loui num. An dīx gaex yūh dix jīx lāo nbēen gāing ding goun bīang hag diex gu si ndaeh, gon jāing Dai gah Hae si nbēix dix, jē mōh noh būi rian daix jaong om nbun dīx gaex.


"Ex sang mouing Gon nbun Vōng heui," Giex ah nin kom ra dix.

Oud kaix, Geeing giex dox Nbrūng gah giex dīx gaex dīx mu. Ba yūh dix hoig bōun bei Mīex lāi kom pug an jō dix jīe Nbrūng lung, ba yūh dix jīx dong nbēen ding mai ba jāing Dai gah Hae si nbēix dix an jo dix jīe Nbrūng bāing. Kaix an giex nbaox graix nbee gah njeeih dix, yūh dix jīx ah loux roig roig ngie om nbee, vēui sang hu giex būi yūh jong nyīex gix hoig jung dix mgāig giex kom uig. Yūh nin dix vūd ngie nyōm si no bu bāb dix dou houig dīx gaex, noh mōh būx būi hlag in giex heui, njao ang noh dong nbēen ding kon yie ah noh loux o, būi mod dix dom ang sax son noh mōh būx būi hlag in giex bīe dīx gaex, būi hun hoig ah "Hang see o peem" gah noh kom uig.


"Bax jeeb graeng njiad hmom yūh nin, geem sang hu bax ndee mox?" Noh qog giex.

"Sang hu nyīex Vōng, hu qog dix mouing Gon nbun Vōng, geem ang maix hmoung daeh būi kaox ndēeng [sic **?] gū si ndāeh laih?" Oud kaix dom grai noh hmoung yūh gah mox njao hu qog giex dix goui mouing kom uig ngai noh.

"Si yīiex eui, ex ko dix hu nang. "Hang see o ah nin. Bāox gei noh giex yāox yāog noh dix ah nin hoig ngīah ha ha gah, dang yāog dix nbrūg Nbrūng hu kaix.

"Geeing eui, dox ex jīe Nbrūng dīx mu nang," Hang see o rīag yōu dix ah nin, "Gīad sang yūh ex ba baox nang, sin noh muih ex, noh hoig yāox dix jīe ex, sin noh ang muih ex, ex gah jīe noh heui."


"In hoig mōh loux nbrai loux o ba ah maix heui," Geeing noh ah nin. "Ex ang ndouh dox Nbrūng dīd dix gah maix, bīe loux maix die jīx grai si ndong, maix kloui sang sog dix goui mouing ba dix. Haih [**], bāox gei maix giex daeg son dix mōh būi hlag dix die heui an."

"Sin ex ang ko dix mōh būi goui Nbrūng dīx mu,"Hang see ah nin, "yūh nan maix ja dox ex jīe Beix hmaing dīx mu box. Noh hoig ndōg mōh jīe ex, noh boun dang ex hu."

Kaix an, geeing noh dom dox noh jīe Beix hmaing dīx mu. Noh yāog dix nbrūg Beix hmaing hu, giab Beix gah nba dix sīed, peed dix hu hod bāox gei dix giex.


"Hai, heui, ndaing nyōm dix nbrūg, houig ex pao. "Hang see o ah nin, gon sae loux ngeei mai, loux ngeei noh hoig loh yūh mgōng lua glong ngōd.

Bāox gei noh giex yūh dix om būi hoig gīed sog būi gīed hlag hliao ao min yūh nin, ang ah loux bīe dīx mgūm, yām in, giex dang gēd loux ko loux njiad sang ah dix gah ngai nbun, loux in gix ang gēd hmom ang ndouh mōh.

"Veui [**]," Hang see o goug yōu giex, "Houig ex pao, mgāig bax yāox ba sud ex gah ndaex grax in." Noh deei Lag hoig yūm dīx mu dox giex mgāig.

"Jē ba o peem nbrai māeng," Giex ah nin, "sang vīex maix dix yūh dix gah?"

"Ex sang vīex dix dox gah Gon nbun Vōng."


"Hmom heui, vīex maix dox heui. " Hoig ah giex nan, nbaox ngīah kom nbrūg dix Nbrūng hu luan.

"Veui, houig ex pao, mgāig bax yāox ba nbaox yāox ex pao, in ang ndouh mōh ba yie yāox eix dix sud ndaex long grax."

Bāox gei noh giex ngēeh gaing dix mgāig gah jē ba nbaox yāox noh.

"Eui, ba peem. "Giex ah nin, "In mōh gīad hoig jaox kreeing dig būi dīx gū, man goui blag bīang ang lai goui bīe jeeix gox, geem sang kloui maix dix dox in gah gon nbun Vōng nang?"

"Dox heui lieh. "Hang see o ah nin, bāox gei noh giex nbaox ngīah noh dix nbog kom nīed di dix hu.


"Veui, houig ex pao," Hang see o nbaox yōu dix goug giex, "Hai, nīed dix hmom si nyeig pao, ndaing hmom heui."

"Geem nbaox yāox maix ba dix?" Bāox gei noh giex qog noh.

"Aih," Hang see o ah nin, "In gīed nu dix grai, noh -- Gon nbun Vōng dee ndaing mgaex gah dix dēi heui."

"Peih, si yīiex si yōng eui," Bāox gei noh giex ah nin, "An ang mōh ngīe mglāox oud ndaex sog raoh laih?"

"Mōh heui, ang lūd jeeix gox," Hang see o ah nin, "In hoig mōh mglāox gīed hmom dix jē heui, bīe bin ang maix boun bin gaex. "Kaix ah noh nan noh nbaox jaog dix sae mglāox naog gah Hae man.

Bāox gei an giex geem nbrax Nbrūng nbrūg giex, hoig pai houig vēui Hang see dīx daix, giex hoig boun deei lāi deng ji gaex gix būi houig qog nbun gah.


Būi houig qog dix mouing Gon Vōng gin gu, hoig mguah dix goui ra loui ndia dīx ndia līah gaex. Gix hoig sīed mgīen [**] heui. Bīe daix jāong ang lai jīx quh giah. Sīed yūh nin ndee hmom goui nang, sin būi nīe jīx quh daix jāong dix, būi oud blag kaix dee hoig soung hrom dix dog nblog būi oud vēui mog vīd.

Būi oud ndaex jei dīng in kom uig hoig sīed ngīe gah braog hveing nyīex Vōng, gon nāog gah ndaex ndouh nding gu si ndāeh nang. Gix sang mgāig gah rīeb gon nbun Vōng ba houig qog dix yūh gah mox? būi houig qog dix goui mouing an gix, mox haog ndaex nyīex hoig ang lai dong loux sang ah dix.


"Ang ndouh goui ndee ih bīe jeeix. "Gon nbun Vōng ah nin, "Dou ing heui."

Yām in jo bāox gei boun bei Mīex lai kom pug an haog pao, bīe jung noh mglang paix dix dui, hoig bī om ba goui ndaex Mīex lāi uig. Pia goui mgreem jāong noh hoig ah ried ried nan gah si ngūa noh. Si nbaong nyīex bīang gaing noh yūh dix gah si līag bāing, noh hoig jīx yāox dix gah ndaex kom uig. Braog ndouh nding gu mu būi jao ji lāi loui gaex mai si mīang dīx gaex jung gah. Gix mōh jao guan dix ji loux ah būi houig dix qog nbun in gix, hoig ji gix noh dom diam noh līh gah ndaex Bao zi, dom vīex dix jouih Bao zi ndaex laih, bīe in gix hoig gīeh būi lāig ndaex nyīex si ngūa heui, kom mōh nan, gon gēeig ngu dīng laeh ngīe ndaex nyīex.


"Ah, ndaing si aoh din did [sic **?]," Gō in ah nin.

"Mōh heui, njāo sang doung Geeing ex gon ia din ngāix ra loui mu. "Gon nbun Vōng ah nin.

Hmoung loux ah nin, noh hoig jung o ngīe dan. Ang ndouh gēd dix sang jo hmoung loux ah, nin, noh jei dix sang ah loux glieh loux ngīah heui, oud ndee in bīe loux dīx mgūm noh ang boun ah līh.

"Ang ndouh goui ndee ih jeeix gox, "Gon nbun Vang ah nin, "Dou ing heui.

Yūh nin noh dom ja yāog dix ing mgīex mgōing ngīe, kaix noh jo bāox gei nbrūg Nbrūng bāing an ba lāig pao.

"Din ndag dix si aoh yūh nin," Noh ah nin.


"Mōh heui, sang doung geeing ex gon ia din ra loui mu ngāix. "Gon nbun Vōng ah nin.

"Oh, ba dix -- ah maix ba dix?" Noh hoig si yaoh kom ah dix nin, būi jao guan dix ji lāi an gix hoig ji loux ah noh "ba dix -- ba dix?" uig.

"Ang ndouh goui ndee ih bīe jeeix gox. "Gon nbun Vōng nbāox ah nin, "Dou ing heui."

Yām ndee nkoig jo Hang see o ba haog pao, noh nbrūg Beix hmaing lāig gah ndaex nyīex.

"Din lai ndaing si aoh ah did?" Noh qog gix.

"Mōh heui, njāo dāeg doung ex gon ia din pao. "Gon nbun Vōng ah nin.

"Oh, sin yūh nan ndaing hmom heui, "Hang see o ah nan, "Geem jīx ex dix doung Lag vīex dix din nang laih?"


"Jīx oh, vīex maix doung heui," Gon nbun Vōng ah nin, "Njāo ang ex goui Dōg gloung, O kang, maix sang doung gah jē dix box?"

"Ex goui nang. "Hang see o ah nin, "O goui din dīx mu, mōh O goui daix. "Noh dēei gīad jāox kreeing līh dīx gū, yāog dix sae Lag yūm an bīang.

"In hoig gūb dix ih dīx nbrīe heui. "Gon nbun Vōng ah nin, "Kom mōh nan ax sang dēei dix ih nbēe Jīang yiux ndēe mox?"

"Hoig goui ndaex Hae ex uig," Hang see o ah nin, "Mgāig maix yāox, hoig haoh din, ex gōn jīx dix dig noh dīx nblah. "Kaix ah noh nan noh gūh dix dig mglāox goui ndaex Hae dix līh uig.

"In hoig mōh gāing mgāex hrom ex gah dix dēi heui." Gon nbun Vōng ah nin, "Maix jīx bog ba qog ex, maix njiad jīx grāi loux, ex muih maix mōh mēix dix. Vīang mōh nan gox, geem dōng ang maix dōng, loux grāi maix gū mgūm hoig ji dix līh uig, gon sang diam dix līh gah ndaex Bao zi bōun sax, mgāig maix yāox, gah ndaex ndouh nding gū si ndāeh hoig jūng būi jao ji lāi gah."

Ah noh loux yūh nin, mōh sang qe dix nklad noh. Būi jao ji lāi an gix hoig ngīah gah uig, gon mgrōi noh yāox Rom nām mēg bīang pia nyīex.

"Ai yōu, gix hoig mōh būi hlag hliao ah būi heui. "Hang see ah nin, "Ex ko dix seed gix gah grāeng hmom dīx jē nang "Kaix ah noh nin noh blu bliag Hae nbēix dix, ndōm mglāox goui gah ndaex Hae dix hruad noh gah ngai gix.


"Mōh gāing hlag ba yūh maix heui, "Gon nbun Vōng ah nin, "Bīe ex ang sax bōun yūh nin, kom mōh nan ang goui mīex nkreeng dix sax ex dee jīx yūh nang."

Njāeh kaix an Hang see o bōun dix mōh keui nyīex Vōng, yāox dix mōuing gon nbun Vōng mai yāox dix jeeb hmoug Vōng, gon yāox dix ngōm ngoud hlaong ngōm si mīang nang.


Si Ngie Giex Būi Yūh Lāi

Ndī ndīx goui nyōm ah lāi dīx gaex, oud gah nyīex hlaong nklog bīang dīx gex, gīed houd ang goui grāeng dīd dix; yām in goui būi yūh lāi dīx gaex, oud dix jīie gah nklog dīam blag mgreem, nyīex hlaong in kom mu hoig mōh Sin noh uig. Gon si ngīe oud mai gō jao yūh lāi in dīx gaex, njāo muih noh dix oud din mōh vēui Vō seng dang gū nūm, noh yāox dix ih hreeb hngoux jax dox būi yūh lāi an dīx pang, ndaex hreeb nklaog nbēe gon goui gah dīx kig, būi yūh lāi yāox dix dox jē ba ih in gix, yūh nin gon si ngīe an dom muih dix oud mai noh. In hoig mōh gāing goui nqom si ndiex mgāe dīx mgrong.


Goui dīx nbōu, nyōm ah lāi gaoh kaing blag gah diex, līag dix sīao dein mai līag dix ih nblāeh. Būi yūh lāi giex mōuing noh ngēeh gaing dix gah noh, yūh nin mōh mīe noh nyōm oud nyōm goui som in gīeh. Gāing jīx yūh mōuing jao yūh lāi in ang mōh ngīe jīx ngēeh gaing dix, noh gon ndaing gah blag lāo loux nang.

Nyōm ah lāi ngēeh nang gaing dix gah giex. Oud kaix noh jūng gāog ngīe, ah lāi goui gah lāi mgīe nblāeh. In mōh jei rīah dix kaing lāi brim dīx blah, lāi in ang ndouh ko dix rīah dix, njāo mōh in lāi brim ndaing hmom dīx pug.

"Lāi yūh nin haoh gū si ndāeh!" Būi yūh lāi ah nin. "Ex dēei soug Ka feui ra loui mu louh pug lāi in kaing yīiex gūad an giex. Sin maix dox māe luah gah ex loui pag, jīx dix vīex ba ndaeg in gix hu."

"Lāoh līe dix dēi," Nyōm ah lāi ah, "Hnyiab [sic - hnyab] maix dox lāi in gah ex, ndēeih briex nblāeh goui rom deeih Mōi an gah, ex ih nblāeh goui nbēe in ngīe hoig gūb. Rīah lāi dīx pug mgriah [sic - mgrīah **?] brum brām yūh nin, mōh gāing ang hmom dīx mgrong. Maix mōh būi jīx gāing min nqo dīx gaex, būi ah in hoig mōh būi ndaing goui si mū dīx gaex. Kom nan gīeh eix ah blag dōng līg lāi, ang maix dāe dōng lāi om dōng dix peng kouig an mīex ndīng dix.

Loux in mōh loux ang goui si mū, nīe dīag noh mai peng kouig an. Kom mōh nan būi yūh lāi an hoig yāog ngīe dix ngīah gah, nyōm ah lāi gah ngīah nang, loux in son dix mōh loux glieh loux ngīah ngīe. Mōh ngie gon si ngīe an ba ndaing soung hrom hri gah hmoung dix loux ah nin, gēd nin ndaex hrom dix, mgah gon goui būi ah loux yūh nin gah būi yūh lāi jōuih nbēe nyōm mai jao nyīex yūh nin.

Yām hvaig brāix, nyīex jōuih grāeng hoig nyeeb si vīex, qux kaing nyōm ah lāi an, būi gix hoig hu id kom uig dix. Yām in gon si ngīe an yāog dix lāig ndaex nyīex, deei dix mōn ndag mōuing būi yūh lāi -- yām id noh noh ang sīao ndag. Ja mōh een eix ndag in bīang grāeng goui ndaex nyīex gū jē, grāeng jē an hoig jīx ah loux dix, om mōuing gō yūh lāi an nan, jīx nblih hrom gēd dix mai ah loux gū jē. Kom nan grāeng dix jē dāe jīx sīao ndag ngīe, in glāi mōh nang gāing hmom dix jē nang, gīeh ang mōh nan gix jīx lai ju jax loux bāox dix.


Gon si ngīe ndēh ndag gah ndaex peng goui Bao zi ndaex. "Būi ah ang maix dōng ngai lāi mōh jē dīd dix," Ndag qog peng, "Geem mōh nang laih?"

"Ex dōng noh," Peng ah, "See mōh jē ba diam dix ndēe bag bāing Bao zi, jīx dix suix bian dix rīah dix dig. Ex sīang sing, See oud ndaex gaex ex gon nīe kaing ba dōng nyōm ah lāi an. Kom mōh nan bi noh mai būi yūh lāi an, ex mōh peng ang goui jē jog dīx mu.

Kaix an gon si ngīe nbāox ndēh ndag bīang Mō grīd gix Ka feui gah. Ai yu yu! Mō grīd gix Ka feui gah hoig dīeh dix mōh Iab loux dīx mu, hoig ah loux nbīed nbīed ngīe. Noh nbāox een ndag bīang Tung nbēe dīx mu, oud kaix noh nbāox een bīang Iab māe Loux grāi gix hoig om loux grāi peng kom mu. Loux grāi būi hun ko dix nāb yung noh.


"Hmom heui, ex sang grāi loux in gix mai nyōm ah lāi an. "Gon si ngīe ah.

Kaix an gon si ngīe nbrīex gōi dix haog nbong houig gah ndēe oud nyōm ah lāi an. Ngū dein rīang gah ndaex nyīex, gon si ngīe nbrīex mgāig ndaex nyīex gah ndaex ndouh Sō. Noh yāox mgāig nyōm ah lāi an lāi mgrīah dēei dix kaing būi yūh lāi an nux.

Ndaex nyīex in ndaing rīang di dēi heui! mgong rīang si ngī ngīe dong dix līh kaing ndaex pug lāi an, oud si nyeig njāeh dix dīeh dix mōh kaox dix mgong, oud kaix dīeh dix mōh kaox dīng dīx mgong, gīad ndaing hlaong, yēem gag noh nih dix bīang gaing nyōm ah lāi gu blag. Hlax gū blah hoig on glāi ngīe, Dāi gū mgong hoig om ngīe nbāoh nbun mgrāng nan, dom ngai dīx nblah hoig lūng douh ngīe, goui dīx nblah hoig hleeng song ngīe. Blix goui gah kaox gū mu hoig mōh sim uing rīang dīx mu.

Hai! gon si ngīe an ang sax yāox dix mgāig ba hmom ba mgrāng yūh nin dīx nbōg gox, noh yāog mglouig [sic - mglōuig?] dix jūng dan, mgāig lai nbāox mgāig, mgāig houig dom yeed ngū goui ndaex nyīex. Nyōm ah lāi an breed ngū Deng, yāog dix hu id bīang gu. Gon si ngīe an ja gon jūng box dan, njāo gon hmoung noh luah loux Ying yox [sic - yōx ?] ndaex nyīex, loux Ying yox hoig on hoig nyōm ngīe dix hngiad, nyōm ah lAi an hngiad loux ngeei hmom yūh nin, dee njiad nyōm id ngīe gah.


"In ndaing hmom dix dēi heui! Gon si ngīe ah. "In mōh gāing ang ex ndouh nyāng gēd dīx mgrong! ex ndaing mīe dix oud mai nyōm ah lāi in heui."

Njūn dīx vūd noh ndēeih nbrei dix gēd, vōi hrom kom ah dix nin "Nyōm ah lāi an dīe yāox dix dox ex ih moig ih hreeb!" Oud kaix noh yāog dix līh kaing nbong, ndēeih ing houig gah nyīex būi yūh lāi an. Yām ing houig noh njiad jō nbōg yām, Peng hoig nklei yūh ndag mōuing būi yūh lāi an mīex nyāo, noh hoig grāi loux grāi dix uig dīx blag, gon sang nbāox blu bliag dix grāi noh dīx blag. Njāeh dix yām in, grāeng goui ndaex nyīex kom mu, njāeh gah Iab māe houig gah Bai mgīx, hoig rōub dix hod loux ah Peng an heui. Gix ndaing nāb yung noh, ndaing yāog yō noh, dom ndēe nkoig gīeh Lao bang jao nyīex mgāig pug lāi glieh pi ping an gix gah ndaex Bao zi, gix hoig jei noh mōh loux grāi peng in heui.

Kaix an gon si ngīe an ang lai si ngēih ngōm gāog nan gah hmoung dix grāi gix ba jīx dix mai ba dōng dix. Bīe yāox noh rīang Deng gah ndēe oud nyōm ah lāi an, rīang dong dix līh kaing ndouh an gix, hoig om mguaig nan sang si lēed noh haog lāong. Yūh nin noh ang jīx ang haog lāong, nqou dou ngai dix gah ndaex ndouh Sō mgāig ndaex nyīex, hrom hri noh hoig si mglaoh ngīe, om jūng eix braog rom huan vīeh ding dāeg dog npaeng mgēe hliex brie si njāox yūh nan. Rom ngai noh jīa ngīe dix līh dix daix heui! noh gah ang dōng geem mōh njāo ba dix rom ngai noh lai njīa [**] , kom mōh nan yām njīa [**] rom ngai noh hrom hri noh hoig nyōm oud si u ngīe, sin yāox dix ngōm mai nyōm ah lāi an mgreem kaox dee ndaing nyōm di dēi nieh! kom nan gox ang noh ndouh bōun dix yūh nan ja hoig yāox noh dix mgāig ngīe ndaex ndouh hoig gūb hoig lāoh līe heui.

Noh jūng ndaex guad gah bīang nbong, npaeng guad hoig pru dix lāig ndaex nyīex gah ndaex ndouh nding, brāix glong gīad guad nyāo. Kom nan gox, ngū Deng goui gah nyīex nklog hlaong hoig yeed mai hoig nāox Ying yox dix, Gō dīam in dom dāeg hmoung guad dix. Yām in noh hoig si yaeng ngīe gah guad, yāog dix līh gah nbong, ndēeih ing gah ndēe si u ndēe oud dix gah njāong ndāog nyīex dan. Dan hoig si u ngīe mai si ngēih ngīe.


Hreeb hngoux jax Vō seng dang mai nēix nbēe dīx kig dox jao nyīex gon si ngīe ih hoig houig pao loux di dēi, yām in noh hoig ah mōh būi yūh lāi jao nyīex dix heui.

Houig blag mgrēng som, gon si ngīe si yaoh njāox gah gūh būi ndaex ndouh nding. Būi gix hoig rīag yōu gah blag ga diex, būi jao bāe som baeng deed dōng, rīang ngū hoig raoh yūh ndaex laih gū si ndāeh. Geem mōh brōui yūh ngū nyīex jao nīe, geem mōh brōui yūh nyīex goui braog hveing nīe? Būi hun hoig ang lāi jīx dōng, hoig oud būi gah si ngūa hrom hri gū gaex.


Mōuing gō yūh lāi hoig māo mung ngie, bū bāb dix dēei nbee kri oud gah hyaog dix, seed noh ndaex hae si nbēix dix, yūh nin jei mōh hoig bōun jiu dix grāeng iag kom dīx jē. Būi yūh lāi an hoig gī gah sōg dix Gū piao yūh dix, nbun jōng jao nyīex dou dix hu sōg si nbēix luad lūng dix njāo ang noh lai goui māe dix nbāox līag nbēix yūh nin dīx peen. Būi gū gaex hoig dang sōg dix briex grāeng hmom jīie jao dix, gon si ngīe gah mōh nin nang. Noh yāog dix dou haog gah nbong, hu lāig gah ndaex nyīex oud nyōm ah lai. Nyōm ah lai si ngēih jūng gah ndēe baoh ndouh nding dix, gaog [sic - gāog ?] nbuan gah brōui yūh ngū nyīex goui gah doi dieh blag an. Gon si ngīe yāog pug lāi oud gah bīang peen an, seed noh ndaex hmoug raoh iag dix, glīen hmoug kom ra blag daix dix. Grāeng ndaing hmom dīx jē son dix hoig bōun jiu dix pao! Noh bu bāb dix dou haog bīang nyīex, ngōm bīang roung rū dao, ngū brōui yūh nyīex blag doi dieh dong rīang yūh gaex noh bīn hmoug moux dix lāi gah ndaex kom ra kon daix dix. Yām in noh dāeg dōng hrom muih goui ndaex gaex dix, si ndong gah hoig hod hrom hri dix būi mox. Kom nan houig yām hoig bōun breed ngū dix, kaix hoig ndēeih hloung ndīeb ndoung mai hrom hri noh -- hai ......

"Ex ko dix mgūah dix mōh būi ra gaex," Noh ah. "Njāo sang ih hreeb an dīx gloung, ex ang ndouh ndūx dou kaing būi yūh lāi an!"


Nyōm Nbun Goui Boun Mgian

Ndī ndīx goui nbun dīx gaex, noh gin mīe dix goui gon goui bōun [sic] mgian. Noh ang dīe dōng ndēe sang sōg dix nyōm iag yūh nin, njāo nin, noh hu qog yīiex gūad jao bīh jao nqai gah, ah nin gah yīiex gūad an giex; "Ex gin mīe dix goui gon gīed iag gīed ngoing ngīe dīx gaex, vīex maix nqai ex ih yāox gah goui ndēe mox?"

"Hai! gīed yīe dīx dēi! maix vīex soug si vōng in ing, soug si vōng in ang om soug si vōng sum būi gix gah ndaex `ma, gah ang om ba yīe hruad eix ia gāoh an gix. Maix nbrēi sum noh ndaex peng dīx mu. Ang goui mīex mglang dix sax maix hoig yāox ba mīe di dix goui heui. "Yīiex jao bīh an ah nin kom dox dix si vōng gah noh dīx soug.

"Lāoh līe maix heui!" Nbun an ah nin gah yīiex jao bīh an. Oud kaix, dox māe luah gah noh loui kuai. Ing houig gah nyīex, noh nbrēi dix sum soug si vōng an ndaex peng. Ang nyāng goui mīex nkreeng dix, soug si vōng an hoig gūah, Dāi raoh mgrāng ngīe, mgong gah dīng heui. Mgāig eix noh hoig om Don dāi yōu jing siang dīx mgong, hlax noh gix gon gaex rōub dix dāe, om mōh lom dāi nan.

"In hoig mōh Dāi gīed hmom dīx jē," Nbun an ah nin kom hu hngeed dix noh dīx daix. Yām dāeg hngeed noh dāi heui, Dāi luah ah pix pax nan, hoig bruih ngīe, dīx daix heui. Yām in eix dom dāeg dōng, in lūg mōh dāi yōu jing siang heui, gah ndaex mgrēng dāi bīang ndēe goui hlax glāi an, nyōm nbun iag goui bōun mgian ngōm gah dīx gaex. Noh njiad bāing nbī gīed mgrāng dix yāox. Njāo ang noh nyāng goui bīe dīx blag mgian dīng ngīe, būi gix sum. noh gaex nyōm nbun goui bōun mgian.

Yāe id gon nyōm nbun goui bōun mgian mōh hloux Mag mān lom lei dīx mu. Hmon yāe id noh mōh blah dāi Jee lox lang, brūx id noh mōh blah dāi Bi gad. In gix hoig mōh ndēe id noh mai grāeng id noh blag bōun som heui, bōun ngāix noh dang glieh dix mōn bīang geng. Nbun jao nyīex ndēh Gloung pang ding bīang Peng dīx mu, sae rom ndaex, nbāox sae nang blah dāi gah.


Blah dāi an gix si nbloui mai rom, nyōm nbun an dom ngōm bīang blah dāi, dēei haeg si ndax Lō bāing ra mgong yūh dix lōui noh houig blag an. Noh gon jīx ah nqom gāb mai, loux glao noh hoig ndaing hmom dix hngiad heui. In hoig mōh loux glao ang būi sax yāox dix hngiad bīang hag diex dīx jē.

Goui dix ngāix yām blag nbōu, yām dāeg nyōm id noh bīang gu id dix, Rāog dāing dix haog gah ndouh nding dīx mu. Rāog in hoig kreeing ngīe kom mgō gaex dix, gah gīed dīng mai, noh dāing dix haog bīang peen, gon nyōm nbun an gōn nyōm id ndaex blah dāi Bi gad oud bīang peen.

"Nyōm nbun in hoig gīed mgrāng dix yāox heui, jīx dix dēei vīex gon dix mōuing noh kaing."


Rāog ah nin Kaix an noh yāog dix bīn hloux Mag mān id gon nyōm nbun an gah, mgao noh gah glaig dix ndēeih dāing dix līh kaing ndaex ndouh nding, ing houig gah ndēe oud nyīex noh gah ma dāi.

Ndaex ma dāi rom glong iag goui gah dīx mu, jō dix lāig mgrēng ma dāi, braog glong si ndōm ngīe kom leed dix, nyīex Rāog giex gon noh hoig oud din heui. Ai yia! Gon rāog hoig om ngīe mīex dix taig tiam heui, lūng ngīe kom ru rid gaex dix, ang ndouh hmom dix yāox. Noh gah ang jīx ah loux dīd dix mai, yāox noh gon nyōm nbun gīed mgrāng id ndaex hloux Mag mān an, dāe jīx ah ngīe; "Gex gex gex, gox gox gox," Nan gah mgāex hrom dix.

"Bō ndag ah loux dīng mai, maix gīeh nang noh haing gah dan gieh," Mīex rāog ah nin gah gon dix. Oud kaix noh nbāox ah nin ``Kaix haing noh dee yāog dix dou kaing din, noh hoig kioung om ngīe mgong haeg Han nan, ax jēn ndēh noh id gah ndaex ndūng rom bīang hlax dāi Graox rom. Noh mōh būi iag ngoing kom kioung dix yūh nin, hlax dāi Graox dīx blah hoig om hag diex vīeh gah noh heui. Kom nan, noh gah ang lai bōun dou ndēe mox dix mai. Mglang gīeh ax noh oud dan, ax dom nīed dix joux nyīex goui mgreem mglāox an, ndēh mōh nyīex krian krei bax nyīex ma dix gah kaix ngāix an sax."

Ndaex ndūng rom an Dāi graox hoig glāi nbeing gah, hlax vīeh ngīe. Mīex rāog dom lōui rom hu ndēh hloux Mag mān id nyōm nbun an bīang hlax graox vīeh dīx blah.


Houig blag bōun ngōb, nyōm nbun an haing gah id dix, yām mgāig noh braog hveing dix hoig si yaoh ngīe, hoig mōh rom ba nāog gah, noh hoig rīag yōu dix yīam gah hlad dix.

Mīex rāog ngōm ndaex mglāox kom dēei dix mgāi rom mai rīb gū jē dix nbrēi dix joux nyīex hmom gah nyīex in mōh nyīex sang id gon noh mai mōuing kraox dix ndaex, dom nbrēi nang hmom jeeix. Hoig krei giex nyīex hoig, noh dug daix gon dix lōui rom hu gah ndēe oud nyōm nbun an, giex sang dēei hloux Mag mān -- Gu id nyōm nbun an houig si vēui sang vīex giex nyōm nbun an houig gah. nyīex kraox. Mīex rāog jūng ndaex rom kom hmaing dix gon dix grūb nyōm nbun, ah nin "In mōh gon ex, mōh mēix maix pao sax heui. Dee nyōm oud si u goui bax gah ndaex mglāox dāe sax heui."


"Gex! gex!" Gon rāog dāe jīx ah ngīe nin, ang noh lai jīx ah loux dīd dix kaix an.

Giex yāog vīex gu id nyōm nbun an, ndēeih vīex noh hu braog glong gah nyīex yūh giex gah ndaex mglāox. Nyōm nbun an ang ndouh jū dix ing mai giex, dang ngōm bīang blah hlax kom yīam dix. Njāo ang noh ndouh muih dix oud mai Rāog, ang noh ndouh muih dix mēix rāog nbrai ang lēd [**] an. Gon gax oud ndaex rom hoig yāog gix gaing dix hu mgāig nyōm nbun kom uig, yāox gix noh, hoig ah gix gīed mgrāng noh gū gaex, gix gah gīed hlog hleing gah sang mēix noh Rāog nbrai an. Kaix an ang gix nyōm oud gah si loh ndaex hrom dix, ang ndouh jū gāing ang lēd yūh nin līh bīang hag diex. Gix rōum dix braog hveing hlax oud nyōm nbun gah, gēid [**] si gāog hlax gah hrang dix, gīeh ndūd, hlax dom vīex nyōm nbun si bloui [sic - si nbloui ?] dix hu mai rom lūan dom ndēe si ngāi, Rāog dom ang lai jīx bōun nqom dix.


Nyōm nbun si bloui mai rom hoig nbleeih [**] gah hag diex dang gū si ndāeh. Houig noh gah rāog kaox sim saig yāox noh, hoig mgāex hrom hri gix kom ah dix nin: "Hoig mōh noh būi mgrāng dix dēi heui!", hlax vīex nyōm nbun nīed si nbloui lūan dom ndēe si ngāi, ndēe nkoig, si mam dix houig gah mēng nbaoh hag diex dang.

Būng bīang yāox houig noh hoig mgaex hrom hri kom bu dix dix dum braog hveing. noh, hoig gīed muih gix nyōm nbun heui. Nyōm nbun gah gīed mgāex hrom nang, njāo gēd noh dix ang sang lai yāox ngai rāog nbrai pao sax, ndēe houig noh in hoig mōh ndēe vīeh ndēe va dīx ndāeh, si ngāix dong bīang rom, hoig rīang om kri hleeing nan, nyōm nbun an gah maox nboung dix pioug noh dīx blag gah nyōi Būng bīang, dīx blag pioug noh gaex gah si gāog hlax. Noh jūng bīang hlax, hlax hoig vīex noh nīed si nbloui hu lūan.


Gōng kri bruig bu dix houig dīx mu, yāox noh hoig gīed nkoing gah mgrāng noh, dom bīn nyōi noh gah mgīb lang dix, vīex noh bu bīang kaox hlaong dīx mgong. Hlax oud nyōm nbun bīang si nbloui dix lūan mai rom, Būng bīang gah hod dix si nbloui mai noh nang, njāo gon pioug maox dix gah nyōi noh.

Si yīiex si yōng eui, yām vīex Gōng kri bruig nyōm nbun bu dix haog gah bīang kaox, hoig gīed ndaing si yāeng [** cf. si yaeng] hrom noh heui, ba nīe gīed krub hrom hri noh gah mōh njāo Būng bīang, noh ja gon pioug dix mai hlax si nbloui an, sin noh ang bōun gah dix ih maox, dee yūm gah hnōd maox nyōi dix, si yīiex si yōng eui, mōh ex ba lūd yūh heui, nyōm nbun gēd nin gah ndaex hrom dix, Gōng kri bruig gah ang dīe yūh dix yāox bīe jeeix gox, gon ngōm mai nyōm nbun bīang kaox gah blah hlax vīeh dīx mu, dēei dix dox noh ih rom dāi die, gon, yāog yō noh ah hmom noh yūh gah mox. Ang nyāng goui mīex mglang dix, Gōng kri bruig oud bīang kaox an gix hoig houig dix mgāig noh kom uig. Gōng mīex an gix gon nblēih noh ah nin: "Hai, nba noh dāe goui ra kon ngīe, ndaing ang hmom dix yāox!"


"Ai yīh, ang haeg mēeih noh ndouh goui!" Gix ah nin.

"Nyōi noh siah ngoing ngīe, peui [**]! njiad om noh būi dix dēi heui, noh gīed nbēh ang ndouh hmom dix yāox!" Gix hoig ah nin gah noh kom uig dix.

"Nyōm nbun an gīed mgrāng dīx dēi heui," Gōng kri bruig mgiex nyōm nbun an yam njāeh hoig ah nin, kaix hoig hmoung noh ah būi hun ang noh mgrāng jeeix gox uig, noh gah hoig yi loux gix, ang lai jei dix jīie noh, gix ndēeih yāog dix vīex noh bu, ndēh noh bīang lom dāi gah bīang diex.

Njāeh yām aoh brāix houig dom yām guad, noh hoig oud ndaex rāog kaox ndaex noung. Noh dēei hlax kaox jāing dix id gu iag gah dīx blah, dang deui noh gah mgreem hlax vīeh dīx blah, yūh hliex ang lai bōun njaeh bīang. Brīex ih noh ngīe dēei dix bēeb rom dāi, rom nyāex noh mōh rom jīiex goui bīang blah hlax. Yah nin, si ngāix som hoig luan ra loui kix, yām guad hoig houig pao, si ngāix som hoig njāeh dix lang, sim yīe glao noh hmoung loux an gix hoig bu dix dou kaing rāog kaox vēui guad. Hlax kaox mai dāi ga jē hoig krum uig, hlax ndēh noh gū id dix mgreem gah hoig lom lei dix, ndāeg [**] mōh ngīe mgong grouh. Si nbēix jeeb noh hoig gīed mgrīah, gaex jao noh gīed iag, noh hoig ndaing hlad gah guad, hoig ndaing si mgīad hrom eix gah noh gah hlad dix noh yūm gah guad. Hra hoig njāeh dix līh, jē nīe iag mu gaex noh, mu hra om ba hoig dog gaex noh si yāeng nan, noh ja dīe gaex dix gah hlax kaox grouh, vīang yūh nan ang dīe si u mīex ndīng dix nang, noh hoig si yāeng kom mgō gaex dix.


Gah braog rāog kaox an goui ma hngoux jax vīeh gah dīx mgūang, hngoux jax hoig vōg dix uig kaing ndaex ma, ndaeg mōh ngīe mgong yī ba goui bīang diex, lāig nyōm nbun in gah ndaex ma, hoig om lāig noh gah ndaex noung dīng dīx mu, gah njāo nīe lūan hlaong mgong hngoux jax, hai, noh hoig gīed si yāeng gah guad kom hu dix. Oud kaix noh houig gah ndīang si vīex nyīex Lūh. Lah yūh nyīex dix gah mgreem hliam hngoux jax, gah ndaex nyīex Lūh hoig si u, Lūh hoig hlong dix een hngoux jax gah ndaex nyīex dix mīex nyāo, gon dang goui nang nyīex yūh brīex giex nyīex ih brīex. Nyōm nbun an jūng mai ndīang si vīex nyīex Lūh, om gon nyōm sōg dix jāeng [**] nan, hmaing Mīex lūh ja seed dix ih brīex gah hngoux jax dīx soug, ang noh yāox dix ih brīex hoig goui ra ngāix haoh.

"Si yīiex eui, maix nyōm nbun iag in piex nīe yūh ex krub hrom nin, "Lūh ah nin -- Lūh in hoig ndōg mōh ba hmom hrom dīx gaex. "Nīed haog ndaex nyīex ndēe si u, kom ih maix brīex mai ex heui. " Noh hoig gīed muih nyōm nbun goui bōun mgian in heui, dīx vūd noh nbāox ah nin: "Oud maix mai ex din heui, gīeh yām guad in luan ha, vīang mōh nan, maix krei bih nyīex yaong ex nblang hleing mai grāi maix ex hmoung nbēen gū jē, ex ndaing bai sang hngiad nbēen."


Gāing hmaing Lūh noh yūh, noh hoig yūh hoig bag ngīe, noh ndaing nyōm oud gah oud dix mai Lūh.

"Ang goui. mīex mglang dix kaix nyōu sang houig gah nyīex dīx gaex, mōh noh bāox blōg ex, yīe houig mgāig ex gū vāng dūah, nyīex noh gon nyōm dix oud kaing nyīex ex, gon vīeh va kaing nyīex ex mīex ndīng mox ngīe, grāeng jeeb noh gah gīed mgrāng gīed hmom nang. Sin maix yāox dix mēix noh heui, dee ang maix lai ki gah grāeng jeeb eeb som dix lāoh njū dix. Vīang mōh nan, mōh ang noh jīx yāox gah ngai dix, maix dom sang yīe grāi noh hmoung nbēen dōng dix nbēen gin ndaing nyōm dix hngiad gū jē. "Lūh ah nin gah nyōm nbun an.


Nyōm nbun an hmoung ah Lūh nan, ndaex hrom noh ang lai si ngīeh [**], noh ang jū dix mēix bāox blōg Lūh an, njāo mōh noh Lai lēe. Lai lēe jeeb si nbēix luad lung dix houig hvi gah nyīex Lūh. Lūh hoig ah loux yāog yō noh mīex ndīng mox ngai nyōm nbun an, ah hoig nīe māe noh mai ba dōng noh mīex ndīng mīex nklaong mox, ah gon vīeh nyīex noh kaing nyīex dix gao sōun ra, ah ndaing haoh jū yi pi nyā dōng noh. Mōh ngīe ang noh muih dix yāox si ngāix giex dāi, mai yīe mab noh dix mōn jē in giex, gah njāo hvaig ngai noh ang noh sax jīx yāox giex.

Lūh hmaing nyōm nbun qang Lai lēe hmoung go dīx mu, nyōm nbun qang noh ah nin: "Giem [** ?] eui, bu maix hu heui!" Nbāox qang ah nin "Jao līang nbrīe kong hu gah mgōng lūa". Loux qang noh hoig ndaing nyōm dix hngiad heui, Lai lēe hoig nbrīex muih noh ndaex hrom dix. Mōh ang noh nyāng grāi līh, njāo ndaing iag hrom noh.


Lai lēe ing houig gah nyīex, ran bu bāb dix krei dix douh grax lang dīx mu, grax in sang njāeh dix gah ndaex nyīex noh douh noh houig dom ndaex nyīex Lūh. Hoig douh noh grax, noh hmaing Lūh giex nyōm nbun houig lai līng gah nyīex dix, ja mōh jū giex noh, houig yām mox gah jīx. Noh gon grāi giex hmoung, ang jū giex hlad gah sim yūm goui braog grax. Mōh sim yūm gah guad, dom si nbaeng dix din, Lai lēe jō dix douh grax gah hod si mēeig noh. Sim in ang nyāng si um, bruig noh mai nqeeih gon hmom.

Lai lēe gīed dix vīex kaox saih ngū houig Kaox jē in oud ndēe hvaig jīx saih dix rīang. Noh hu si vēui, di Lūh giex nyōm nbun yāox grax, yām houig gix ndēe goui sim yūm an, Lai lēe gēeih diex blag bīang gaing dix ndouh mōh ndaex, si ngāix dong dix lāig gah, eix dom dāeg yāox mōh si vāig ba yūm gah dīx mu, haeg bruig noh glōb dix gah gaex noh, nyōm nbun in yāox noh hoig ndaing krub hrom hri gah, njāo ndaing muih noh sim gū jē, jō nbōg yām aoh brāix glong, nbōg yām mgāex hrom sim saig, gix yie qang noh hmoung go, noh ah loux gū jē maix noh. Lai lēe mgiex jāong sim an si lēed dix ndēh noh braog grax kom ah dix nin: "Ang noh lai jīx qang go pao, jō dix mōh gon sim dīx mu, hoig mōh gāing saig hrom hri heui, lāoh līe si yīiex si yōng, ang gon ex gix dāe ndouh yāox gāing saig soung yūh nin om sim. Yūh nin, ang dīe jīx yūh dīd dix, dāe jīx ju ja ngīe dix ah loux ling ngāix ling som, houig nbōg yām guad jēn gīeh dix yūm ja ngīe."


"Mōh heui, mōh maix ba gīed hlag dīx gaex, loux grāi maix hoig gīed ko dix dēi, houig yām guad, loux qang go 'ji ji ja ja' an gix goui ndēe hmom gah gix sim ndēe mox? grax sang lōng grax hvid vāig dū grax ka guad dīx mgrong. Gēd ex noh in dee mōh die vēui soung kaix ah būi gix heui. " Lūh hod dix ah nin kaix loux Lai lēe.

Nyōm nbun an ang nyei nyux bīe dix mgūm. Yām blag giex dix mgāig noh, noh hoig num nyōi dix, si nbeed haeg gaing si vāig, gon gōi gix dāe mōh ngie dix hngeed ngai noh dix daix. "Nbōg yām aoh brāix, ba yīe qang ex hmoung go hmom an gix dee hoig mōh noh heui, hoig gīeh noh ex mgāex hrom nyōm oud mīex nding mox nieh noh, sim ndaing mgrāng laex muih ex in!" Nyōm nbun an gēd nin.


Lai lēe ndēeih toux ndaex douh dix ndaex dong si ngāix an, vīex Lūh giex nyōm nbun ing gah nyīex. Som ngāix an nyōm nbun in ang ndouh lāig id bīe jeeix gox. Noh yāog dix gaoh kaing gu, dēei rīb dix daing brūx vīeh mgrāng gah dīx mu, hoig daing noh brūx, noh vīex noh hu gah ndēe oud sim yūm an, hloub noh bīang noh, nbāox dēei dāi njiad on krom dix kaing ndaex nyiiex Lūh hloub gaex noh gah, gieh noh si u gah yām ngāix guad yūh nin.


"Oud maix heui, gon sir, oud maix heui! nbōg yām aoh brāix, yām glāi hlax gū si ndāeh, yām dong si ngāix eix si u ngie, maix njiad qang ex hmoung go nyōm dix hngiad njāo in ngie, hoig ndiang lāoh līe maix heui!" Nyōm nbun an vōi hrom kom ah dix nin, oud kaix noh ndēh gaing dix bīang naog sim, noh si yaoh dīx daix ngie, noh hmoung luah dīd dix ndaex vaig sim -- in hoig mōh hrom sim ba gon quh, sim ang nyāng yūm, mōh ngīe hoig yūm bi noh gah mgrōn dix gah guad, yām in noh hoig yāox dix si u, dom dieh ndēeih nbrax, nyōm nbun in hoig si yāeng kom mgō gaex dix, njāo goui noh bōun mgian ngīe, vīex hu lai lah mai sim in, sim in hoig gīad dīng kaing noh dix dēi heui, vīang mōh nan noh ja nqob hrom hri dix nbāox sae dāi on bīang sim in; gon dēei hlax vou id dix brūx gah, hloub noh bīang gaing sim.


Nbōu ngāix kaix, noh nbāox hu mgāig noh, sim hoig haing, mōh ngīe ja gon māo sīu [**] noh yūh nan. Noh hoig bōun nblaih ngai dix mgāig nyōm nbun. Nyōm nbun nqob kaox saih ngū ndaex dom daix dix, di noh ih rīang gah, njāo ang ba rīang dīd dix goui braog noh dīx jē gox.

"Hoig lāoh lie maix, nyōm nbun eui," Si vāig ah nin, "Ex hoig ndaing s i u ndaing nyōm oud pao, ang goui mīex nkleeng dix sax rīang ex hoig ndēeih goui, ex ndēeih bōun bu yām gouig brāix glong ndaex rāo ma."

"A ..." Nyōm nbun ah nin," Gin ndaing guad blag ga diex heui, hra hoig hloub bīang diex gū si ndāeh, hoig bāing om dāi nan. Vīex maix ja id bīang gu ndēe si u hang, ex gōi houig briex mai."


Oud kaix noh dēei blah dāi būg rom ndaex dox si vāig nyāex, kaix hoig nyāex si vāig rom, noh grāi nyōm nbun hmoung ah nin: Gad bōd bruig noh mad dīx blag, noh dom ang lai nbrax bu yāeng bāox dix gix, mōh sang bu gix dix hu mēng nbaoh si u dom ndēe si ngāi, yām dāeg sang bu gix, noh dom. rāe dix jōud bīang diex. Kaix an noh ang lai dōng did dix, gah ang lai dōng yūh gah mox noh lai oud din yūh nin.

Si vāig an oud din dom lūan guad, nyōm nbun an hoig briex noh hmom, gah gīed muih noh, gon grāi noh hmoung yām yāox gix noh mgreem diex din, mai grāi noh hmoung nbēen gū jē. Lūh giex Lai lēe ang dīe dōng sim gon nbrax ang dīe dōng nyōm nbun dog briex noh, njāo ang giex die ndouh muih dix yāox sim dīx ngai.


Nbōg yām guad hoig lūan, si ngāix hoig dong hag diex si u, brāix glong mgōng ngōd hoig nblang hleing gū si ndāeh. Yām in, si vāig grāi gah sang ndēeih ing dix ngai nyōm nbun, nyōm nbun baoh ndaex douh Lai lēe bīang gaing giex, si ngāix hoig dong dix lāig rīang yūh braog hveing giex. Si vāig qog noh jū ang noh jū dix ing mai noh, sin noh ing mai si vāig, jīx dix ngōm bīang glib si vāig, oud kaix, si vāig dom vīex giex bu dix houig dom ndēe si ngāi, ndēe glāi rāog kaox. Nyōm nbun gēd nin: sin ex bu mai noh, Lūh dee krub hrom vōi hri kaix ex.

"Ang, ang ex bōun dix hu mai maix!" Nyōm nbun ah nin.


"Sin mōh nan oud maix box, oud maix hmom, hoig ndaing lāoh līe gāing yūh maix heui, ang ex ndouh bi om lāoh njū dix sax," Si vāig ah nan, oud kaix noh yāog dix bu blag līh si ngāix. Nyōm nbun hod dix nbuan noh kaix noh, rom ngai noh hoig krum līh, njāo ndaing muih noh si vāig in.

"Dix dix! dix dix!" Si vāig qang go ah nan, bu dix luan blag goui noung rāog kaox vīeh dix ndaeh.

Nyōm nbun in hoig gīed krub hrom hri kaix hu si vāig kaing dix, Lūh gah ang jū noh lai līng gū si ndāeh, yām in, braog hveing nyīex Lūh hngoux jax hoig gūah nbēing gah, lāig nyōm nbun ndaex hoig om lāig noh ndaex noung rāog kaox dix ndaeh, njāo nīe iag gaex noh goui bōun mgian ngie.


"Yām rāex brāix glong, nīed maix jāing grāeng sang jeeb maix yām yūh ba bāox," Lūh ah nin gah noh, njāo hoig qog bāox blōg Lūh Lai lēe an dix mōuing nyōm nbun. "Maix sōg krei heui nbēix hag mai nbēix dāi. Yām hoig mōh maix mōuing Lai lēe sax, ko hoig goui grāeng jeeb yām ngōm mai grāeng jeeb yām id, in giex ang jīx dix ang goui nang."

Yūh nan, nyōm nbun an dom njāeh dix daing man pao, Lai lēe gon goug mgrēeih houig boun mu houig mgō noh daing, gon houig mgāig noh gū nbōu mai, gīeh yām rāex hoig lūan sax, giex hoig yūh ba bāox heui, nyōm nbun hmoung, hmaing Lūh dix yūh ba bāox mai Lai lēe, hrom noh ang lai nyōm oud gah jeeix gox, noh ang ndouh muih Lai lēe bīe jeeix gox, yām līh si ngāix blag bōun ngōb mai yām glib si ngāix, noh hoig nbrīex yāox dix lai ling braog si vīex. Yāog dix gaog nbuan rāo ma, mīe dix douh ngai gah si vāig an, gah ndēeih gēd nin nang, dee hoig bu noh dix houig dom ndēe si ngāi ndaex rāog kaox.

Nbōg gaex hngoux hoig houig pao, grāeng sang jeeb noh yām ba bāox hoig krei dix hoig bag ngie.

"Kaix boun vāng dūah sax, hoig yūh ba bāox maix heui. "Lūh ah nin gah noh, nyōm nbun an hmoung noh hoig rīag yīam gah, grāi ang dix ndouh jū dix mēix Lai lēe.

"Ah maix loux nbrai ba dix nan!" Lūh ah nin, "Bō maix yūh dix ang jū, sin yūh nan, ex gīed maix yūm gah hrang bāing dix. Noh hoig mōh būi gīed lāoh dīx gaex, maix mōh yūh ba bāox mai noh heui, vīang mōh mōuing vōng gox ang ndouh goui grāeng luad man haeg han lūng yūh nan, nyīex briex noh mai nyīex grao ndēh noh brīex gah, hoig haoh ba ih gū jē gah, yāox, maix dix mēix būi yūh nin, ko maix dix yāog yō si yīex si yōng heui."


Gix sang yūh ba bāox giex pao, Lai lēe hoig houig dix rīeb nyōm nbun. Noh sang vīex nyōm nbun hu oud dom ndēe raex ndaex diex sein, ndēe ang si ngāix lai bōun dix dong. "Si yīiex si yōng eui, ex ang lai yāox ngai si ngāix pao sax!" Nyōm nbun ah nan kom krub hrom hri dix. Noh yāog daix dix ndaex Rao ma, līh kaing ndaex nyīex Lūh yām in hngoux jax hoig vōg dix uig, ndaeg ngīe mgong grouh yī ndaex ma. Noh yāox dāi raoh iag ndaex ma dīx mu gōm noh kom ah dix "Sin maix yāox gon si vāig, maix.. grāi noh hmoung qog ex noh nyōm oud si u goui dīx mgūm."


"Dix lix! dix lix!" Yām dāeg ah noh nin gah dāi, noh hoig si yaoh gah, hmoung dix loux ah nin bīang gaing dix, noh yāog gaing dix mgāig, hoig mōh si vāig an ba bu dix houig, yāox noh nyōm nbun, hoig gīed mgāex hrom hri gah. Nyōm nbun yīam kom grāi dix noh hmoung ah nin: Ang noh ndouh jū dix mēix Lai lēe nbrai an, sin noh mēix Lai lie, hoig mōh oud dom ndaex raex ndēe ang si. ngāix lai houig dix dong. Gēd noh in gix, hrom hri noh mūng mang ngie gah.

"Nbōg yām guad hoig sang houig pao! "Si vāig ah nin. "Ex sang bu dix hu nbaoh mēng hag diex si u dom ndēe si ngāi, muih maix dix jū dix hu mai ex laih? Maix jīx ngōm bīang glib ex, yūh nan, ax dom bu dix hu ndēe si ngāi, bu bīang mgōng hlaong, bu bīang noung rāog kaox, bu dix houig mēng nbaoh hag diex si u. Hag diex an si ngāix dong gah si nqeeng, hag diex an aoh brāix gah līng nūm, hag diex an bruih dāi mgrāng gah ling njū ling pan. Bu maix mai ex heui, yām yūm bi ex gah si guad brāix gah ndaex diex, mōh maix ba ndēeih yūh ex im glōd dix gon yāox rīang brāix."

"Mōh, ex sang bu mai maix heui!" Nyōm nbun ah nin. Noh ngōm bīang glib si vāig, nih jāong dix bīang bruig si vāig, kaix an, si vāig vīex noh bu ndaex Rāo ma, bu bīang rāog kaox, bu bīang rom si mgrid si ndōu, bu dix lūan kaing mgōng dīng nāog hra gah ling nūm. Yām bu giex ndēe hlaong bīang Rāo ma, nyōm nbun hoig si yāeng gah guad dix, yūh nan, noh dom qub dix lāig ndaex haeg bruig si vāig, gon nplian gaing dix mgāig bīang hag diex ndēe hmom gū si ndāeh.

Ndēe nkoig giex bu dix houig gah mēng nbaoh hag diex, si u, gouig hoig dong gū si ndāeh, Rāo ma om ba hoig nīed dix hlaong nan, braog ma gaeng gah bīang ndīe, hnu kaox siad hoig vu hvian dix nāog gah, ndaex rāog kaox blix gū jē gah gin haoh gah. Gon nyōm gix dou njēe dou nblāong gah glieh dix mai Bung bīang. Nyōm nbun giex si vāig nīed dix bu houig ndēe si ngāi, gah nīed. nbāox yāox brāix glong mgrāng lāoh. Braog glong dīx ndaeh, goui rāog kaox njiad glāi hmom gah dīx ndia ndia, ndaex rāog kaox goui nyīex sum Vōng gah dom nbēen ndīx gah dīx hlang. Hnu siad hoig gūah gah braog hveing nyīex. Gah nding nyīex mgreem nyīex gū si ndāeh, nyīex si vāig hoig nāog gah, nyīex si vāig vīex nyōm nbun an bu gah oud din nang heui.

"In mōh nyīex ex," Si vāig an ah nin gah nyōm nbun. "Mgreem nyīex bīang diex sein hoig nāog dāi mgrāng hmom gix gah, maix dang lāeg dix jē dīx mgong, ex ndēh maix id bīang, sang dang yūh maix dix nyōm oud yūh gah mox, hoig jīx heui."

"Yūh nan gīed hmom heui!" Nyōm nbun ah nin kom ndīeh dix daix dix.

Bīang diex goui roung nyīex hoig mgūaih [**] dīx mgong, hoig boud dix goui loui nbāex, gah mgrēng si nax roung gūah dāi gīed mgrāng dāi bāing lom gah dīx mgong, si vāig vīex noh bu dix dum bīang dāi vīeh dīx blah. Nyōm nbun in hoig gīed si yaoh gah yāox dix ngōm nyōm si mēix iag gah ndaex blah dāi dīx gaex hoig bāing om si līag ngīe, gon jeeb hmoug kri Vōng dīx lūg, bīang glib noh gūah bruig hreeng gah ra mgong. Gaex noh ang goui bōun mgian ngīe. Noh hoig mōh ba gaex Ang qix e heui. Gū blah dāi hoig oud būi iag yūh nin gah dīx gaex, nyōm si mēix in hoig jō dix mōh gon si mīang gix heui.

"Si yīiex ex eui, hoig gīed mgrāng noh yūh nin heui!" Nyōm nbun ah nin gah si vāig.

Gon si mīang oud bīang dāi in gīad hlad gah si vāig an, njāo ndaing gīed iag noh, lai lah dix mai si vāig, si vāig hoig gīed dīng kaing noh mīex nyāo. Kaix hoig yāox noh nyōm nbun goui bōun mgian in, noh dīeh hoig gīed mgāex ngīe gah, noh hoig mōh nbun gīed mgrāng yāox noh gah bīang hag diex dīx gaex heui. Noh beeig hmoug Vōng jeeb dix jeeb noh gah gaing nyōm nbun, qog gaex ngai noh, muih ang muih noh, sin noh jū dix mēix gon si mīang, noh hoig mōh mīex dīng gah jūb dāi in gix. Gon si mīang in hoig njiad ko dix mōh mēix noh, ang ndouh om gon Rāog mai Lai lēe gēeih diex an giex. njāo nin nyōm nbun dom mgāex hrom kom ah dix nin gah gon si mīang dāi an: "Ex jū dix mēix maix. "Kaix ah noh nan, bāox gon si mīang an gix hoig līh kaing blah dāi gū blah, gix hoig njiad mgrāng gū gaex, hoig yāox dix nbuan gix dīx ngai hoig mōh nbuan sōun eix ba dox heui. Gix dox nyōm nbun jīie grāeng gū jē, grāeng dox gix ba gīed hmom gah hrom nyōm nbun mōh bruig dēei gix gah gaex Rōi bāing. Gix dēei bruig Rōi in bīd noh gah glib nyōm nbun, kaix in sax, noh dom jīx bu mai gix bīang dāi gū blah. Yām in, būi hun hoig mgāex hrom kom uig. Si vāig oud gah ndaex hmeem dix qang gix hmoung go gīed nyōm dix hngiad, vīang mōh nan, ndaex hrom noh gah gīed vōi, njāo ndaing muih noh nyōm nbun goui bōun mgian an, mīe dix ang lai mgah_ dix kaing noh ling njū.

"Maix ang lai ko dīx gaex nyōm nbun goui bōun mgian pao!" Si mīang dāi an ah nin gah noh. "In mōh ngīe gaex ang ndouh hmom dīx jē, maix hoig ndaing mgrāng yūh nin, ang ndouh ko mai maix. Pao sax, eix ah Ma ya gah maix heui (Ma ya mōh gon mōuig lao būi ndaex nbēen si lax, gīed ndaing goui mgrāng.)

"Oud maix box! Oud maix heui!" Gon si vaig an ah nin gah nyōm nbun. Noh sang njaeh kaing hag diex si u in bu dix hu gah hag diex Dang maix (mōh gox jia dīx mu). Gah ndaex hag diex Dang maix, yūh nyīex dix gah mgreem nbrāex nyīex būi jīx grai lāo nbēen gon nyōm dīx gaex, dog qang nyīex būi nin hmoung go ah "Dix lix! dix lix!" nan.

Nbēen grāi lāo ex mōh njāeh dix hmoung noh gah nyīex būi an heui.


Būi Liang Līg

Ndī ndīx, goui gon vōng houd dīx gaex, noh oud gah Gox jia iag dīx mu, kom mōh nan, Gox jia an vīang iag gox, gah gon gūb krei ba sang yūh noh ba baox gah. Yām in noh gēd dix sang yūh ba bāox.

Noh mōh būi gīed dīng hrom hri dīx gaex, bōun yāog dix ah nin gah gon nbun Vōng Gox jia dang dīx gaex: "Sang jū nang maix dix mēix ex laih?" Geem bōun ah noh loux yūh nin, mōh nang njao hoig ao min gaex noh kom meng hag diex gū si ndāeh heui, Nāng gon vōng mīex ndīng mox nieh yīe bog loux qog noh ah noh: "jū". Nāng gon vōng qog noh nbōg in sang bog yūh gah mox nīe?


Bīang si mēeig geeing gon vōng in, Kaox bi gad gūah gah dīx mgong -- mōh kaox bi gad gīed mgrāng dīx mgong heui. Kaox in houig puan nūm dom daeg bruih dīx nbōg, dīx nbōg bruih dāe goui dāi dīx mgong. Dāi in hoig mōh dāi hmom dāi lāoh dīx mgong, npom npong noh hoig ju ja dix hu gū si ndāeh, vīang mōh būi mox ja hoig hngeed noh npong dāi in, noh hoig bī om gāing saig soung ang hmom ba jō dix heui. Gon vōng gon eei sim glang nqom dīx mu, yām qang noh go, om hoig ndōg sab būi gix go hmom gah ndaex nkoug noh yūh nan. Dāi bi gad in mai sim glang nqom in ko dix dox gah Nāng gon vōng heui. Kaix an gix sae grāeng in giex ndaex iab māe ra mu, hu dox noh nyīex nbun.

Vōng hmaing būi houig dox grāeng in giex vīex grāeng lāig ndaex nyīex, gīeh noh mgāig yāox. Nāng gon vōng ja mād dix glieh mai nbun jōng an gix ndaex nyīex, njāo ang gix goui gāing yūh jeeix gox. Noh yāox grāeng iab māe vīex gix, hoig mgaex kom ndīeh dix daix dix.

"Ex si mīe grāeng goui ndaex mōh gon Miao dīx mu. "Noh ah.

Ba goui ndaex iag mōh bruih dāi bi gad gīed hmom gīed mgrāng dīx mgong.

"Yīah! Dāi in ndaing hmom yūh dix dīx dēi heui!" Nbun jōng an gix hoig roum dix ah nin.

"Lāo ang hmom yūh dix," Vōng ah nin, "Gon ndaing mgrāng mai."

Nāng gon vōng hu bu bi dāi, ndēix sang yīam ngīe kom ah dix nin: "Peuih! Geeing, dāi in ang mōh būi ba yūh, noh mōh dāi bi gad dīag dīx mgong."


"Peuih! kee dāe mōh ngīe dāi dīag dix mgong!" Nbun nyīex vōng hoig ah nin kom uig.

"Eix bō nyāng yūh dix saex hrom, nbāox mgāig yāox ba goui ndaex iab an. "Vōng ah. Yām baoh gix iab sim dāing dix līh kaing dīx mu. Loux go qang noh hoig gin ndaing nyōm dix hngiad, būi hun hoig ang lai dōng loux sang ah dix ndēe ang noh hmom.

"Sim in gīeh ex līh gēd iab go jīie Nāng vōng hoig mgrai ngai kaing eix nan." Si mīang gūad ah nin dīx gaex, "Loux noh mai hog qang noh go hoig om loux luah iab an taig tiam."

"Mōh heui," Vōng ah. Kaix an noh yāog dix yīam om gon nyōm nan.


"Ex ang ndouh yi an mōh sim oud gah dīag. "Nāng gon vōng ah.

"Ang, noh hoig mōh sim oud gah blag brāix taig tiam heui!" Būi jao houig dix dox grāeng hvi an gix ah nin uig.

"Sin yūh nan jēn bloi sim in bu hu heui," Nāng gon vōng ah, vīang yūh gah mox noh ang jū gon vōng an houig mgāig dix.

Kom mōh nan, gon vōng houd an ang ndouh yūh dix vōi hrom krub hri gah. Noh graix ngai dix raoh dīx blag lūng dīx blag. Si lēed mglīeb hmoug jeeb haeg ngai dix, houig gūh si vīex Nyīex vōng.

"Dax vōng!" noh ah, "Ang gāing goui ex yūh din dīx jē laih?"

"Hai, būi houig sōg dix yūh gaing din ndaing gīad haoh hun," Vōng ah, "Kom mōh nan gīeh ex gēd yāox, oh, ex sang sōg dix sīao būi eei līg dīx gaex, njāo gīed nīe eei ex līg."


Kaix an, Gon vōng an hoig bōun dix mōh jao eei līg, nyīex Vōng. Gix dox noh oud gah nyīex hoig hram lāex iag goui gah braog gōg līg, noh ang sang oud gah ang yāox ndēe oud dix. Noh njāeh blag ngōb jāo houig blag bōun nbōu hoig yūh gāing dan heui. Houig blag bōun nbōu, noh yūh O ndaing mgrāng hmom dīx mu, gah mōing O hoig daeg deui hring gah mīex nyāo. Yām loug rom goui ndaex O, hring in gix hoig luah dix mōh loux ngeei ah nin

Ah, Ao gu see ding rom muih ex;
Hoig uig heui, uig heui, uig heui!


Ndēe nīe ndaox eix gah O in mōh: Sin būi mōd dix qub daix dix gah npom dao līh kaing ndaex O, noh hoig hmoung npong brīex yūh būi daex ndīag būi gix gah Jēi dīng in kom uig dīx daix ngīe, vīex dix bi noh mai dāi bi gad, nīe nyōm dix glieh kaing dīx dēi.

Nāng gon vōng jō dix vīex nbun jōng an gix houig dix glieh din. Noh hmoung loux luah hring geem jūng dix hngiad, noh gīed ndaing mgāex hrom, njāo jīx ngeei noh "Ah, Ao gu see ding hrom muih ex" go in nang.

"Eh, in mōh go jīx qang ex heui!" Noh ah. "Noh dee rīan dix mōh būi eei līg goui si mū dīx gaex! beix hngiad loux ex: Hu qog noh yāox, sang jōuih noh O an mīex ndīng?"

Nbun jōng hu qog noh dīx gaex, njāo hlad noh giab dix kreeing, noh ran louh dix ih giab si lēed dīx gū.


"Geem sang jōuih maix O in mīex nding?" Nbun jōng qog.

"Ja mōh jū Nāng gon vōng dix hngeed ex gao daix hoig gūb ngīe. Jao līang līg ah."

"Si yīiex si yōng ex!" Nbun jōng ah.

"Mōh dix dēi, yōm dīx daix ex ang ndouh jōuih!" Jao eei līg ah.

"Oh, geem ah noh ga mox?" Nāng gon vōng qog.

"Ang ex ndouh dōng gah sang grāi dix loux ah noh," Nbun jōng ah, "hngiag eix noh hoig si yaoh gah!"

"Geem mōh nan, maix nbrīex gōi dix ah ex hmoung noung yāox. " Yūh nan nbun jōng dom nbrīex gōi dix ah noh hmoung.


"Noh ang goui si mū jeeix gox!" Nāng gon vōng ah nin geem hu kaix. Ang nyāng hu mīex ndīang dix, hring nbāox luah ah nin:

Ah, Ao gu see ding rom muih ex;
Hoig uig heui, uig heui, uig heui.

"Beix hngiad," Nāng gon vōng ah: "Hu qog noh jū ang jū gīeh nbun jōng hngeed dang ex!"

"Hoig hnyiab maix, ex ang jū. " Jao līang līg bog ah nin, "Gīeh Nāng gon vōng hngeed ex gao daix, sin ang mōh nan ex ang jōuih O!"

"In hoig mōh gāing gāig gaing nbrai dīx jē!" Nāng gon vōng ah. "Yūh nan beix jūng braog hveing ex, bō gīeh būi gix yāox hngeed noh ex."


Kaix an nbun jōng an gix dom jūng braog hveing noh, nih njāong ndai noh. Jao līang līg hngeed noh gao daix, noh dom dāeg yāox dix jīe O an.

Gix hoig mgāex leing leing kom uig dix! gix ngaig gū jē gah O in ling ngāix ling som; brīex yūh būi gah Jēi dīng in gū nyīex gū yaong, gix hoig dōng noh taig tiam kom uig, njāeh gah brīex yūh nyīex būi houd houig gah nyīex si mīang jao mī.

"Yām in eix hoig dōng uig, nyīex mox ba ih hreeb die, ih nblāeh glāng [**], nyīex mox ba ih moig mai hreeb si ang, in hoig ndaing goui jē jog heui!"

"Ndaing goui jē jog!" Nbun jao briex nyīex ah.

"Mōh heui, kom mōh nan beix bō ndouh grāi būi hmoung. Njāo mōh ex gon nbun vōng!"


"Mīe si yīiex gīeh eix nyōm oud si u goui gū gaex!" Gix ah nin kom uig.

Jao līang līg an, gix ang dōng noh mōh gon vōng dīx gaex nang, jei noh mōh dix dēi būi jao eei līg dīx gaex Mōh būi vūng vāng būi ang dōng dix gīeh si ngāix som nīeb lūan, ang dōng dix yūh gāing dīd dix līh. Kaix an noh nbāox yūh ba glieh gon nyōm ba jīx luah ah ga ga nan līh dīx jē. Ja hoig bai līng eix jē glieh in ra loui daix, noh hoig jīx luah dix mōh ba hoig dōng eix om "Yian vu qix" mai "Bo lang vu qix" an gix. "In mōh ba ndaing hmom heui!" Yām hu Nāng gon vōng braog grax din noh ah nin. "Ex ang sax yāox dix hngiad ba gīed ndaing nyōm dix hngiad yūh nin! beix hngiad gū gaex, haog qog noh sang jōuih noh noh mīex ndīng? grāi noh hmoung ang ex lai ndouh hngeed noh nbōg in.


"Hmaing noh Nāng gon vōng hngeed dix dīx yīeh daix. " Nbun jōng lāig qog an ndēeih houig ah nin.

"Jei noh hoig hyoud gox!" Nāng gon vōng ah nin kom yāog dix dix hu. Ang nyāng hu mīex ndīang dix, noh ndēeih jung o ngīe. "Eix ko dix njouih nqan hrom hri būi yūh, līg lāi pi nyā dom daeg mōh!" noh ah. "Ex mōh gon nbun vōng dīx gaex, grāi noh hmoung, yūh om nbōg vēui nan, noh jīx dix hngeed ex gao daix, ba ndaeg an gix jīx dix dox nbun jōng gix mgō ex hngeed."

"Ai yia! ang yix ndouh muih dix yūh gāing nbrai yūh nin!" Nbun jōng an gix yāog dix ah nin uig.


"Toux [**] nqeeih jūx beix!" Nāng gon vōng ah. "Ex jīx dix dox būi hngeed ra loui daix, beix gah jīx nang. Bō beix bī om; mōh ex ba dox beix ih brīex jeeb grāeng mai dox beix sīao māe!"

Yūh nin, nbun jōng an gix ang lai dōng loux ah dix, ndēeih nbāox hu qog būi līang līg.

"Ex hmaing Nāng gon vōng hngeed dix dīx yīeh daix," Noh ah, "Sin ang mōh nan, eix kom ra blag jēn ang lai ah sang louh dix jē dix heui."

"Beix jūng braog hveing ex kom uig!" Nāng gon vōng ah. Nbun jōng an gix lūg jūng braog hveing noh uig, yūh nan jao līang līg dom njāeh dix hngeed noh.

"Būi an gix hveing gōg līg dāe dan yūh dix?" Vōng si vōx [**] dix qog ah. Oud kaix noh yāog dix jang ndēe hlaong, du dāig du dāig ngai dix, sae si līag ngai nbrēi dix nbuan gix. "Ai yih [**], geem mōh box nbun jōng an gix ba oud dan, ex hu mgāig yāox geem yūh gix dix."

Noh sae rīang dix si lēed mglouig [**] gīab dix sang yāog dix yūh dom yāox dix ba yūh būi an gix dan. Si yīiex eui, mgāig eix dix yāox gah hoig dux dāx noh dix hoig ndaing nyōm dix ngīah

Noh yāog dix dou lāig ndaex nyīex, nbrīex gōi dix ang gīeh jāong dix luah. Nbun jōng an gix hoig uig gī gah si mīn dix ndīng hngeed gon vōng noh, gīeh noh hngeed dom si ndū, ang gīeh noh nīe hngeed dīx daix gah ang gīeh noh yōm hngeed dīx daix. Njāo nin, geem houig Vōng yām mox dan gix ang dōng. Vōng yāog mglouig [**] dix sang mgāig gah ba yūh gix.


"Geem yūh gix dix dan nieh?" Vōng mgāig gah hngeed gix bāox dix kom ah dix nin. Yām dāeg hngeed jao līang līg noh houig beid sib hroug nbōg, Vōng yāog gīab dix gūh gaing gix gah ra loui daix. "Ba nbrai māeng in gix dou beix heui!" Vōng ah. Noh hoig ndaing saex hrom hri. Kaix an, Nāng gon vōng mai jao līang līg an hoig nteen dix hu kaing hag diex Vōng.

"Ex būi saig ba yāox yūh nin!" Nāng gon vōng ah, "Sin ex ndōg jū dix mēix gon vōng nāox dee ndaing lāoh heui! Aih, māeng sōun ex piex nbrah yūh nin!"

Jao līang līg hu ndēe hvaig mgreem yēem kaox dīng dīx bang, kouig ba kreeing goui gah ngai dix, beeig si nbēix jāox goui gah gaex. Hoig uig heui, uig heui, uig heui! dix, jeeb dix ih si nbēix gon vōng, ndēeih līh kaing yēem kaox. Mgāig eix noh hoig mōh būi goui mgrāng dīx gaex, bīe Nāng gon vōng an num gaing dix si vēui ngai noh.


"Maix, ex ang lai ndēh maix goui ndaex dou ngai dix jeeix gox pao," Noh ah, "Gon vōng hngiad loux lāoh maix ang jū dix jīe, kom mōh nan, njāo gīed mīe maix dix jīe ba glieh gon nyōm gah dīx jē, maix jū dix hngeed būi jao līang līg dīx gaex. In hoig mōh ba mīe maix dix yāox heui ngāix!"

Kaix ah noh nan noh ndēeih ing. gah hag diex dix, nyeeb si vīex, sae sō gah. Blag gah diex dāe ndaeg ngīe Nāng gon vōng ba gon qang boud go an

Ah, Ao gu see ding rom muih ex;
Hoig uig heui, uig heui, uig heui!


Nyōm Nbun Jōuih Bai Mgīx

Hoig mōh blag bōun nbōu, hra līh ah sa sa nan gū si ndāeh, brāix glong gīad guad. Oud ndaex guad ndaex hloung yūh nin, gon nyōm būi houd dīx gaex ja yāog dix hu ndaex laih, lai līng braog grax ndaex hra gū si ndāeh. Yām dāeg hu noh kaing ndaex nyīex noh ja gon jeeb giab si lēeb [**] dīx gū, an mōh giab hoig ih mīex noh mglang ga in nāox, njāo nīe lūan dīng, dīeh ang lai goui jē jog ang bōun dīe guad jāong noh jeeix gox. Noh nīad hu si vēui dix, yām dāeg sang dīang noh grax dīng, nbrūng si lēed grāeng pai hu om ba bu nan si vēui ngai noh, noh yāog dix dou kom si yaeng dix. Giab noh mgrai dīx blag, an dīx blag gīeh nyōm si mēix vu viad dīx gaex nkrang dix vīex dou, gon ah nin mai: ndēh houig dom goui gon dix sax, sang yūh ex gon dix id yāe gah.

Nyōm nbun ang lai goui giab, jāong noh hoig raoh ngūd ngīe gah guad. Ndaex hae ndai jeeb noh gon goui iab Bai mgīx ra loui iab. Noh mgiex dou Bai mgīx ndaex daix dix dīx nqob, ngāix in noh ang nyāng bōun jōuih Bai mgīx bīe dīx mgong, būi mōd dix gah ang nyāng seed noh gah māe bīe dīx mid.

Nyōm nbun in hrom hoig gīad jai gon gīad, guad mai, mōh gāing saig hrom hri heui, noh hoig si yaeng kom hu dix, hra krum bīang haeg noh uig, bāing om dāi nan haeg gaing noh hoig hloub dix bīang nblōg noh, mgāig eix noh hoig gīad mgrāng dix dēi heui. Nan gox, noh ang dīe sax gēd dix mōh būi mgrāng dīx gaex. Ndaex ndouh nding nyīex oud braog laih hoig rīang gū sī ndāeh, ngāix mōh ngāix vēui nūm kraox, nēix Han doung būi hoig npong ndaex nbing laih gū si ndāeh. Noh gah hoig dōng mōh in ngāix nkoig nūm brim dix.

Noh nyaih [**] dix ngōm braog nding nyīex oud braog laih, mu mei dix lom lei ngīe, hloub jāong dix gah njāong ndai, vīang yūh nin, gon hmoung gīed guad dix mai. Noh hlad ing gah nyīex, njāo ang noh nyāng bōun jōuih Bai mgīx bīe dīx mgong, ang noh nyāng bōun māe dīx mid. Geeing noh dee vāing dee sēn [**] noh njāo, kom mōh nan ndaex nyīex gix gah gīed guad nan, ang lai si u kaing din mīex ndīng dix. Nyīex gix ang lai goui grāeng dīd dix, nyīex dāe ndaeg ngīe bīang nbrāex ba goui, nding hoig ndouh gū si ndāeh, gix vīang hoig toux gox ndouh nding gah hnyee gah man jāox, npaeng guad gon pru dix lāig box.

Daix noh kom Ra kon hoig nīad dix si gāong. Aih, yām in bīe Bai mgīx dīx mgong hoig goui ndēe hmom gah noh, ja mōh dēei noh soug Bai dīx mgong bai gah nding dīx daix, gah hoig si u yūh daix noh. Yām nkoig noh lūg lōd Bai mgīx dīx mgong, bai noh, si! si! [**] Bai mgīx hoig jab raoh ngīe, noh ja ga daix dix bīang, ngū Bai mgīx hoig dīeh dix mōh don ngū si u rīang om Dein iag dīx mgong.. In mōh rīang ngū mgrāng hmom dix jē, nyōm nbun an gēd dix hoig ngōm ndaex nyīex rīang va si u gah braog laeh ngū dīx ndaeh. Ngū hoig raoh dīng ngīe, gīad ndaing si u, noh jei sang dāeg nqou jāong dix līh ga gah ngū, laeh ngū hoig yeed ngīe dīx daix, braog ngū laeh an gah mgrai ngīe. Noh ja gon ngōm box dan, ndaex daix noh dāe ndaeg ngīe Bai mgīx hoig yeed ngū kaing dīx mgong.

Noh nbāox bai Bai mgīx dīx mgong, ngū hoig jab dix rīang yūh gū ndāeg [**] ndon [**], ndēe rīang ngū bai noh gah nding, yām in hoig dīeh dix bāing om si līag nan, om luad hri ba dīe ngīe nding, noh hoig jīx yāox grāeng goui ndaex nyīex kom uig: Man hloub peen bāing om hra; bīang peen gon goui gloung pang gīad hmom gah, ndaex gloung pang an gix blix gū jē mai nēix Han doung hoig nāog gah. Npom npong hoig ju ja ndaex nyīex gū si ndāeh. Ba nīe si yaoh noh gah mōh: Han hoig doung goui ndaex gloung pang an dāing dix līh kaing ndaex gloung, mgon bad gon sad dix gah bo noh, noh yāog dix hu bīang diex, hu blag oud nyōm nbun in ...... yām in ngū bai nyōm nbun an nbāox yeed dīx daix ngīe, si vēui ngai noh dāe mōh ngīe nding nyīex gīed bū gīed hloung dīx mu.

Noh nbāox bai Bai mgīx dīx mgong. Yām in noh dīeh ngōm mgreem Kaox seng dang gīed hmom dīx mgong, kaox in gon dīng gon mgrāng kaing kaox yāox noh gah Vō seng dang nūm luan gah ndaex ndouh si līag nyīex jao mī, bīang gag kaox hoig doug gix ngū Dein gah mīex hreing mgong mox; rīang mōn gon nyōm goui ndaex nyīex an gix om ba dog kru kreib ngai dix gah noh, noh yāog daix dix sang hu bīn rīang an gix, ngu Bai mgīx nbāox yeed ngīe, ngū Dein rīang gah. Kaox seng dang an gix hoig yāog dix haog ndaex Rao ma, noh yāox dīeh gix dix mōh sim uing rīang ndaex Rao ma. Sim uing dīx mu krum, noh yāox raoh yūh ndaex Rao ma.

"Yām in mōh mox ba nbāox yūm dīx gaex bīang hag diex?" Noh ah nin, yām gon glōd yīiex noh mai noh ndīx-yīiex noh mōh būi njiad jīx briex rīan noh bīang hag diex dīx gaex, mōh ngīe hoig ndōg mgrai ngai kaing noh yīe grāi noh hmoung ah nin: yāox eix krum sim uing kaing Rao ma dīx mu, hoig mōh mīang yūm gon būi bīang hag diex ba haog ndēe oud si yīiex dīx gaex.

Noh nbāox bai Bai mgīx gah nding dīx mgong. Ngū hoig rīang yūh braog hveing noh, gah ndaex rīang ngū in noh yāox līh yīiex dix gah, nbāoh yīiex noh hoig raoh om ngū, ngīah kom mgāig dix noh.


"Yīiex eui, vīex ex hu mai maix heui, dōng ex noh, sin ngū bai ex yeed, maix dee mgrai kaing ex, ex dee ang lai yāox ngai maix. Maix dee om laeh ngū si u giex nēix Han doung mai kaox seng dang hoig yāox, ex ndaex nyīex an gix hoig yeed ngū mgrai ngīe. "Nyōm nbun an rīag yōu kom yīam dix ah nin.

Njāo sang gīeh noh yīiex dix hreeng oud mai dix, noh dēei Bai mgīx ndaeg ndaex Hae dix bai noh kom uig. Bai mgīx in gix gīed rīang dix dēi, hoig rīang om dong si ngāix nin. Yīiex noh gīed hlaong kom gīed goui mgrāng dix, noh yāog dix glīen gon nyōm nbun in. Oud kaix, giex yāog dix bu kom mgāex hrom hri dix, nīed bu nīed hlaong, bu dix houig ndēe ang guad hloung goui; ndēe ang būi lai jīx jai hrom; ndēe ang būi lai jīx krub hrom krub hri dīx ndāeh -- giex houig oud mai Si yīiex ndaex Rao ma.


Ndaex ngāix njāeh nūm kraox dix blag bōun ngōb, brāix glong gon gin si gāong. Nyōm nbun an ja gon ngōm box gah njāong nding, ngai nbāoh noh hoig raoh ngūd gah guad, noh gon om ba ngīah mai, noh hoig ndōg yūm -- yūm gah guad ndaex bōun som nkoig nūm brim dix. Gah ndaex nūm kraox, si ngāix hoig rīang yūh mgōng lūa gū ndāog gū ndōn, dong gaex nyōm nbun an. Noh gon ngōm box dan, gon nqob box Bai mgīx ndaex daix dix Bai mgīx in gix dīx blag hoig mglēeing dix uig.


"Mōh sang ga noh gaex dix si u gah," Būi gix ah nin gah yāox dix Bai mgīx nqob noh. Būi mōd dix gah ang dōng noh hoig yāox jē ba hmom an gix bīang hag diex vēui sang yūm dix; ang dōng gah hoig mgāex hrom hri noh kom oud dix mai yīiex dix; ang dōng nyōm oud si u goui noh kom lāig dix ndaex nūm kraox.


Glang Nqom

Maix gah dee dōng, gah ndaex Joung gox, Vōng mōh būi Joung gox dīx gaex, būi oud braog hveing noh gix gah mōh būi Joung gox uig. Nbēen in mōh ba dāeg līh si vēui in Ra loui nūm, njāo nin vēui sang bī om būi noh, eix nbāox hngiad noh dīx nbōg. Nyīex oud Vōng Joung gox mōh nyīex gīed hmom gīed lāoh kaing bāox bīang hag diex, jūang yūh gix nyīex gah gīed lāoh gīed ngūah, kom mōh nan jūang in gix gah nīe lūan hri, sin maix bu bi dix hmoung, mōh nbrīex rīan hrom dix. Gah ndaex ma Dāi nyīex vōng Dai gū jē gū jōng bīang hag diex eix hoig yāox gah ndaex. Gah mgong Dāi gīad ngūah an gix, gix gon daeg hring māe gah, yūh būi lai līng ndēe in gix hmoung luah hring dom mgāig Dāi in gix dīx ngai. Ma Dāi in ndaing gīad vīeh, bīe būi jao rīam Dāi gah ang dōng gah houig ndeeg braog hveing noh ndēe mox. Nīad hu blag vēui dix, nbāox mōh noung rāog kaox vīeh dīx ndaeh, Ndaex rāog kaox an kaox dīng kaox hlaong gīad haoh gah, hnong rom vīeh gon goui gah ndaex rāog kaox dīx mu. Rāog kaox in braog noh houig gah dom braog rom vīeh, Rē dīng bōun pad dix houig gah ndaex rāog kaox in gix, ndaex rāog kaox in gon goui sim Glang nqom ndaex dīx mu, go qang noh gīad ndaing nyōm dix hngiad, bīe būi houd rūb gax gīeh noh hu rūb blag bōun nbōu, hmoung noh go qang sim in, gon jūng dix nbrēi dix hngiad dīx vūd.


"Si yīiex eui, ndaing hmom qang dix heui. "Noh ah. Kom nan, jē gīad haoh gāing sang yūh noh, noh jēn sang yūh dix bī om sim in. Houig gah blag bōun nbōu ngāix kaix, sim in nbāox qang nang go. Jao rūb gax hmoung noh, nbāox ah nang nin: "Si yīiex ex eui, ndaing hmom qang dix heui!"

Būi Gox jia dang bro houig gix dix lai līng gah Joung gox, houig gix dix mgāig jēi dīng oud Vōng gah, nyīex oud Vōng mai ma Dāi Vōng. Sin gix hmoung loux go qang sim Glang nqom in hoig ah nin uig: "In mōh ba nīe hmom dīx jē."

Būi in gix kaix ndēeih ing houig gix gah Gox jia dix, gon dog grāi lāo sim in, būi goui ngai lai gon diam ba mōh jēi dīng oud Vōng, Nyīex vōng mai ma Dai nyīex Vōng līh gah lāi. Kom mōh nan gix gah ang bī om nang sim in, gon yāog yō noh gū si ndāeh. Būi jīx loux ngeei loux glao an gix gon ji noh mōh pug lāi, gīeh noh nīe ao min gū si ndāeh.

Lāi in gix quang dix houig gah bīang hag diex kom mēng. Goui Ra loui pug ndēeih quang dix houig gah ndaex daix Vōng, noh ngōm bīang ngoud kri, mgāig lāi in gix, gon ngēeh gaing dix dīx vūd dīx vūd kom ngīah dix, njāo diam gix jēi oud noh, nyīex noh mai ma Dāi noh an gix hoig hmom ngīe ndaex. Mgāig noh ndēe in gix hoig nyōm oud noh gah. "Kom mōh nan sim Glang nqom in mōh ba hmom kaing bāox dīx jē. " Hroi mgūm loux in līh gah si vēui ngai noh.

"In jīx mōh gāing ba dix yūh nin?" Vōng ah nin. "Glang nqom! Ex ang sax hmoung grāi būi gix Glang nqom, Gox jia ex goui sim yūh nin, sim yūh nin gon jō dix oud ndaex Ma Dāi nyīex ex, gāing yūh nin ex jīx dāe yāox dix mgāig ngīe gah ndaex lāi!"

Kaix an noh goug si mīang houig dīx gaex. Si mīang in mōh ba gīad dīng nqom dīx gaex, jān būi iag mgīex si mīang kaing noh, gīeh gix nyei mai noh qog noh gah gāing ba dix nin, noh dāe dōng dix nbāig ngīe ah: "Peih!" nan mgūm loux yūh nin ang dīe goui jē jog jeeix gox.

"Hmoung ex ah būi goui sim Glang nqom din dīx mu. "Vōng ah nin, "Būi gix ah mōh noh ba gīad lāoh gīad ngūah gah ba goui ndaex Gox jia eix dīx jē. Geem yūh gah mox ang būi mōd dix jīx sax grāi lāo ex hmoung?"


"Ex ang sax hmoung grāi būi gix gaex sim yūh nin," Si mīang ah nin, "Būi mōd dix ang sax vīex dix dox sim yūh nin gah Nyīex vōng."

"Ex nbloi loux: nbōu ngāix beix yūh dix dom bōun vīex noh houig, gīeh noh qang ex hmoung go," Vōng ah nin, "Būi bīang hag diex gū si ndāeh hoig dōng ex goui jē ba hmom yūh nin, ex gaex jao dīeh ang dōng bīe jeeix!"

"Ang ex sax hmoung grāi būi gix gaex noh," Si mīang nbāox ah nin, "Ex hu sōg yāox, ex hu sog yāox."

Vīang mōh nin sang hu sōg sim in ndēe mox nīe? Si mīang in hoig gīad ki hrom, noh geem haog gah nbong geem ndēeih līh kaing nbong; geem lāig ndaex nyīex geem ndēeih līh gah nbrog, hoig lu lax om ngō doung gouig nan. Būi si ndaeh noh gū gaex gah ah ang dix sax hmoung grāi būi sim yūh nin, si mīang in jēn ndēeih hu houig gah ndēe oud Vōng, ah dee mōh būi jao diam lāi ba luang dix diam loux nbrai yūh nin ndaex lāi.

"Maix bō yi loux diam būi ndaex lāi, loux an gix mōh loux hlein būi loux ang goui jē jog!"

"Pug lāi an gix," Vōng ah nin "Mōh Vōng Rex beng ba du dox gah ex, ko dix ang ndouh mōh ba hlein. Ex sang hngiad loux Glang nqom, blag bōun nbōu ngāix yūh dom vīex houig! ex nbloi loux hmaing beix sōg dom yāox! sin ang vīex houig nbōu ngāix, beix būi oud din kom uig, kaix som nbōu om kaox lāeh kom uig!"


"Mōh!" Sī mīang ah nin kom si ngūa dix, kaix an noh nbāox bu bāb dix dou njēe dou nblāong, lāig gah nyīex līh gah diex. Būi jōng oud ndaex nyīex Vōng dīx blag hoig dou njēe dou nblāong mai noh nang, njāo ang būi hun ndouh mīe dix om kaox bīe dīx gaex gox.

Kaix an gix dom njāeh dix diao qax [**] gū si ndāex [sic - si ndāeh ? **?], diao qax ndēe goui sim in qux ngīe kaing būi oud nyīex Vōng in gix ba ang dōng sim in, būi hun hoig dōng noh kom uig.

Ndēe nkoig gix yāox gon nyōm nbun būi houd dīx gaex gah ndaex nyīex brīex. Nyōm nbun ah nin: "Ai ya, si yīiex eui, sim sang sōg beix kee mōh Glang nqom! ex hoig ndōg dōng noh dom ndīx. Mōh līeh, go qang noh ndaing nyōm dix hngiad gū nbōu beix gīeh ex kroh krom dix vīex brīex haoh goui bīang peen ing gah nyīex, ing dox mīex saex dix ih -- noh oud gah braog rom vīeh. Dāeg māo ex gah ing dix gah nyīex ndaex grax, ex yīe laex dix gah vēei rāog kaox si dīx vūd, yām an ex yīe hmoung qang Glang nqom go. Rom ngai ex blā [**] dix līh dīx daix ngīe, om mōh mīex ex ba si nbeed ex yūh nan!"

"Gon nyōm nbun. "Si mīang ah nin," Ex log sōg maix yūh gāing gah nyīex yūh brīex dīx jē, gīeh maix mōh jao gūan dix krei Vōng ih brīex. Kom mōh nan maix vīex yix hu gah ndēe oud Glang nqom, njāo sang gīeh eix noh qang Vōng hmoung go nbōu in gīeh."

Yūh nin, gix dom hu gah blag rāog kaox yīe qang sim go gah, būi oud nyīex Vōng hoig hu dīx blag.


Yām dāeg hu gix ndaex lōng grax, Mōi siang dīx mu yāog dix ah "Nbōh ......" nin.

"Yia!" Nbun si no nyīex jao mī ah nin dīx gaex," Ex hoig hmoung loux Glang nqom pao, jē ba iag yūh nin, loux rīag mgah jīx dīng yūh nin, ex hoig ndōg hmoung loux rīag yūh nin ndēe mox dix naox."

"Ang mōh, lūd. In mōh loux rīag Mōi!" Gon nyōm nbun jōng jao yūh brīex ah nin. "Ndēe oud sim an gon si ngāi kaing eix mīex nyāo!"

Yām in Keid oud ndaex hnong rom yāog dix ah loux dix.

Dax gūad jao bīh gah nyīex Vōng yāog dix ah nin: "Did hoig mōh hmoung eix loux rīag Glang nqom pao loux noh njiad om hmoung eix gah luah jung iag oud ndaex nyīex vād."


"Lūd, ang mōh. In mōh loux Kied [**]. "Gon nyōm nbun jōng nbāox ah nin. "Ang goui mīex nkrēeng [**] dix eix hoig yāox dix hngiad loux go qang Glang nqom."

Glang nqom njāeh dix qang go pao.

"In dāeg mōh loux Glang nqom pao heui. "Gon nyōm nbun jōng an grāi gix hmoung.

"Mgāig beix yāox, mgāig beix yāox, Glang nqom oud dan. "Noh jī gix yāox sim brēeih bae iag oud gah gag kaox dīx mu.

"Geem lūg mōh laih?" Si mīang ah nin, "Ang ex ndouh gēd noh mōh jē ba yūh nin. Mgāig beix yāox dīe goui ndēe dang noh kaing bāox jē sim dix! dee mōh yāox noh haoh oud si mīang dīng braog hveing dix din, noh dom hlad dom ang ndouh hmom dix yāox yūh nin."


"Glang nqom eui," Gon nyōm nbun jōng an goug yōu dix ah nin, "Dax vōng yix mīe maix hu qang dix hmoung go heui."

"Ex gīad mgāex hrom gah," Glang nqom ah nin, oud kaix noh sae dix qang gix hmoung go dīx mu.

"Loux in njiad om loux luah jung si līag," Si mīang an ah nin, "Mgāig beix yāox, nkoug iag yūh nan njiad jīx qang go hmom yūh nin. Mglang ga in nāox, ang sax hmoung si mōd būi noh. Sin sim in lūg houig gah ndaex Nyīex vōng dee muih būi noh kom uig!"

"Geem gon muih beix ex nbāox qang Vōng hmoung dīx nbōg laih?" Glang nqom ah nin, njāo jei noh Vōng hoig oud mai būi in gix.

"Glang nqom gīad hmom rom muih ex. "Si mīang an yāog ah nin, "Ex gīad mgāex hrom mgāex hri dix goug maix hu qang go gah ndaex Nyīex vōng, hu qang Vōng hngiad go gīad hmom qang maix dīx jē."

"Sin ex oud ndaex rāog kaox go qang ex dom nyōm dix hngiad," Glang nqom ah nin, kaix hmoung noh ah gix mīe Vōng dix yāox dix, noh jū dix ing mai gix.

Nyīex vōng hoig joux dix hmom ngīe vēui sang houig Glang nqom, nding nyīex mai bīang diex hoig saih nblang ngīe gah dong rīang dēng dix, Dāi gīad hmom daeg gix hring māe an gix gah hoig tog noh nbēing ngīe gah nbrog nyīex, houig hu būi hun njēe nblāong, yām līh npaeng hring māe in gix hoig luah ah ding dang ding dang nan, gīeh būi houig hu ang jīx hmoung loux lāo bāox dix.


Gah ndaex nbing nyīex braog ndēe ngōm Vōng gix gon njūng kaox nban kri gah dīx mgong, gīeh Glang nqom laex dix bīang, jao yūh brīex gah Nyīex vōng hoig houig uig, nyōm nbun jōng iag an hoig houig nang, noh hoig bōun dix mōh "Jao yūh brīex nyīex Vōng "dīx gaex. Gix jeeb grāeng kraox dix houig gū gaex. Houig mgāig gah qang sim go, Vōng ngōm bīang ngoud kri dog ngēeh gaing dix kom nbuan dix sim.

Kaix an Glang nqom dom njāeh dix qang go, go qang noh hoig gīad hmom dix dēi, bīe hngiad Vōng noh hoig roig rom ngai gah, rom ngai hoig nba gah nbāoh noh uig. Glang nqom nīe qang nīe hmom, go qang noh hoig mgāex yūh hrom hri Vōng. Vōng nbloi loux hmaing gix

daeg giab kri dix gah nkoug noh, Glang nqom ang jū, ah hoig gūb ba yāox dix. "Hoig yāox ex krum rom ngai Vōng gah go qang dix -- in hoig mōh ba gīad ngūah kaing gū jē heui, rom ngai Vōng mōh rīang gīad dīng bīang hag diex dix jē. Si yīiex hoig dōng, yāox ex in gix gah ngai dix hoig lāoh kaing kri māe dox beix gah ex mīex nyāo. "Kaix ah noh nan noh nbāox qang gix hmoung go dīx nbōg.

"Ang ex sax yāox jē ba gīeh būi yāox būi muih dix kom uig yūh nin dīx nbōg gox. "Nbun oud braog hveing an gix ah nin dīx nblah. Yām ah būi loux mai. gix, gix ja sae rom ndaex mōing dix, gīeh rom luah ah gu lu lux gu lu lux nin, yūh om hoig mōh dix Glang nqom dīx mu nang. Gon nyōm jōng iag an gix kom nbun kom si mēix gah hoig ah ndaing go qang Glang nqom nang, loux ah gix līh yūh nin ang ndouh yīe, njāo ang gix sax nīeb yāog yō būi mōd dix, ah eix loux uig dix mgūm, houig Glang nqom dix qang go hoig ndaing qeng gung heui.


Glang nqom sang līed oud gah Nyīex vōng, gix yūh noh oud lōg dīx mu. Kaix an noh dāe dang yāox dix līh lai līng bōun ngāix ra nbōg mai bōun nbōu dīx nbōg, līh lai līng dīx nbōg būi jōng gon hod noh gao gaex ra, gix nqob maox vīen jāong noh gaex, noh ang nyōm oud gah bīe jeeix.

Būi oud ndaex jēi dīng in hoig grāi lāo sim in kom uig gū si ndāeh, gīeh gix si ndaeh bāox dix, dīx gaex ah "Glang", an dīx gaex ah "Nqom". Gon nyōm krom dix yūh lāi dāe dīx jūb, gon sum dīx gaex "Glang nqom" gū gaex, kom mōh nan gix ang dīe jīx qang go dīx mu gox bīe dīx gaex.


Goui dīx ngāix Vōng rīeb iab si nbaox būi houig dīx mu, blag bīang iab diam ngai lāi "Glang nqom "gah ra mu.

"In dee nbāox mōh lāi diam gix sim eix gah dīx pug. "Vōng ah nin.

An ang lai mōh pug lāi, mōh iab sae grāeng dīx mu gah ndaex iab mōh Glang nqom yūh būi ba goui gah ndaex dīx mu. Mgāig eix noh hoig lūg om Glang nqom im dix dēi, kom mōh nan noh mōh Glang nqom yūh būi gah Kri Māe, Gōn mai Yi. Glang nqom yūh būi in, ja hmom yūh eix kai gūang noh, noh gah jīx qang go qang Glang nqom an gix. Si ndax noh gah gon jīx vu vīed dix nang, gon saih om rīang kri giex māe nan. Gah nkoug noh gon daeg Man luad gah dīx mu, blag bīang diam lāi ah: "Glang nqom jīe Vōng Rex beng, sin lai lah mai Glang nqom jīe Vōng Joung gox, ang ndouh son dix mōh ba dīd dix."

"Sim in ndaing hmom dix yāox heui. "Būi hun ah nin uig. Būi houig dox sim an hoig bōun dix mōh "Jao gūan dix eei sim gah Nyīex vōng."

"Yām in gīeh giex qang go dāe, loux ra jē rīan dix ndaing nyōm dix hngiad. "Būi mōd dix yāog ah nin dīx gaex.

Yūh nin, sim an giex sae dix qang go dāe, kom mōh nan loux go qang giex ang ndouh om bāox, Glang nqom im an qang log qang dix noh si nqeeng, sim yūh būi an dāe jīx qang ngīe go, brim yīe qang būi gix. "Ang jīx dix ah gah noh njāo," Jao daeh Ding ah nin, "Go qang noh hoig ko mai Ding daeh ex, hoig jō dix mōh jūb ex heui."

Yām in jō dix mōh sim yūh būi ba dang qang noung. Loux go qang noh hoig om loux Glang nqom heui, gaex hag noh gah gīad mgrāng nang, Kri māe goui gah gaex noh hoig saih rīang ngīe.

Go dīx jē noh hoig qang heui sam sib sam nbōg, gon ang nyāng hmoung dāeg māo dix, būi hun gah gon mīe dix hngiad hu sein, Vōng hmaing gix dox Glang nqom qang nang, kom mōh nan, noh hoig bu dix hu ndēe mox nieh? būi mōd dix gah ang ndouh ndēh hrom dix gah yām bu noh dix līh kaing ndaex ndouh, bu dix ndēeih houig ndaex rāog kaox oud dix.


"Jīx yūh gah mox nin?" Vōng ah.

Si mīang oud braog hveing vōng kom uig hoig sae loux nqax gah Glang nqom, ah mōh noh ba ang goui hrom gēd dīx gaex.

"Eix hoig goui sim gīad hmom dīx mu heui" Gix ah nin. Kaix an, sim yūh būi an nbāox qang gix hmoung go hoig qang dix sam sib nbōg haoh an, kom mōh nan būi gix gah ang nyāng bōun ji go qang noh, njāo ndaing nū dix ji. Jao daeh Ding nbāox yāog yō sim in dīx nbōg. Noh ah nin, sim in gon hmom kaing sim Glang nqom an mīex nyāo. Haeg noh, si ang noh mai grāeng ndaex gaex noh hoig gīad hmom heui.

"Njāo yūh nin, bāox aig bāox ou beix mai dax vōng eix, beix ko dix dōng gū gaex gū būi, sim Glang nqom im an gah lai jīx qang go hngiag ba dīx; gah ndaex gaex Glang nqom yūh būi in, hoig ndōg sae grāeng gū jē gah, hmaing noh qang go dix noh qang go dix, eix jīx dix ah dao lī līh, jīx dix yīeh dix mgāig gah quh grāeng goui ndaex vāig noh, kaix uig go qang noh ndēe nbāox ndēeih doui dix an gix."

"In hoig om ba gēd eix heui," Būi hun ah nin uig.

Kaix an, ndaex ngāix dūah jao daeh ding bōun pi jouing dix glang būi hun yāox rīang sim in. Vōng gah gēd nin nang, gon rāi būi hun ko nang dix hngiad go qang noh nang, houig ngāix dūah būi hun lūg yāox dix hngiad go qang noh, hoig mgāex būi om yāox dix dix hreeb qax nan -- njāo yīe muih būi Joung gox dix hreeb qax, gix ah "ndaing heui!" nan kom yāog dix mgian dīng dix mai ngēeh dix gaing. Jao rūb gax ba yīe hmoung loux go qang Glang nqom im an yāog dix ah nin: "Go qang noh glāi dix hmom, lūg om sim dix dēi, kom mōh nan om ba gon qa dīd dix nan ex glāi ang dōng geem mōh jē ba dix ba qa!"

Glang nqom im an hoig dou kaing Hag diex Gox jia in.

Glang nqom yūh būi an gīe dix oud ndaex man luad braog gu id Vōng. Grāeng yāox noh dix jīie mōh Kri, Blōi mai Yi an gix hoig nāog braog hveing noh, būi hoig sum gaex noh mōh "Būi lāoh jao qang nyīex Vōng hmoung go ". Si mīang krian noh hoig yāog dix houig gah nklog" Di yix gah blag ndom. ", njāo ah Vōng ndēe oud hrom eix gon būi blag ndom gīed ndaing gin joung yao dix dēi vīang mōh Vōng dīx gaex, hrom noh gah oud blag ndom. Jao daeh ding ah lāi sim yūh būi in dīx pug, kom uig goui dīx ngai blah puan, pag lāi in mōh ba diam dix gah lāi nū dix dōng lāi Joung gox, ba raex ndēe dōng, ba vīeh blah dīx pug. Si mīang dīng uig ah hoig mgāig dix lāi in gū gaex, ah dōng dix ba goui ndaex lāi uig, njāo hlad gix dix om kaox mai hlad gix būi ah ba o peem gah dix.

Nbōg yām hoig lūan ngīe dīx nūm. Vōng, si mīang mai būi haoh būi hun, hoig bōun bei gix go qang sim in gū mu. Yūh nin njāo hoig jīx būi hun noh uig, gix nīe gīed muih sim in heui. Yām in gix hoig jīx dix qang go mai sim dāe, gon nyōm oud ndaex laih qang ah; "ji ji, ge lux, ge lux!" nan, Vōng gah hod dix qang nang.


Goui dīx nbōu, Vōng noi dix bīang gu nbloi dix hngiad qang sim yūh būi in go, noh hmoung luah ah ndaex gaex sim "sa sa! sa sa!" nin, oud kaix grāeng dīd dix luah ah " si " kom bai līng ling goui ndaex dix uig, kaix yūh nin go nāox dix dīx daix ngīe. Vōng yāog dix līh kaing gu, nbloi loux hmaing gix goug būi bai saex houig. Kom yūh nan jao bai saex ang goui bang fax dīd dix, yūh nin gix nbāox goug būi jao joux Bīao houig, jao joux Bīao in jing qax noh njēe nblaong, dāeg ja ndēeih bōun joux noh hmom, noh gon ah nin mai: Kaix in sax mōh nbrēi dix briex hmom liag, yāox hoig lāex ling goui ndaex, dox eix joux tai sae ling kraox ndaex dom dāeg ndēeih jīx qang go, gāing in mōh gāing gred nū dīx jē, sim in dāe jīx dix- qang ngīe go dīx nūm ngīe, gon ah mōh hoig nīe qang noh go mai! jao daeh ding an grāi loux ra loui mgūm, būi ang bian dōng dix hngiad loux grāi noh si ndong. Noh ah ang sim nyāng lāex gon hmom om mglang ga in nāox njāo nin dom gon hmom om mglang ga in nāox.

Yūh nin si ngāix som lūan puan nūm. Gāing krub hrom krub hri nbāox līh gah Gox jia in, njāo ndaing muih būi Gox jia in gix Vōng dix, yām in noh hoig jō bōun saex, grāi būi noh dee ang noh lai glōd mīex mglang dix. Vōng kraox hoig joux bōun rūah dix līh. Būi houd būi hun hoig hu houig ndaex laih uig, qog bāox dix gah yūh saex Vōng gah mox.


"Peih!" Si mīang an gix nbāig ah nin kom vu vīed dix gaing dix.

Vōng id bīang gu brēeih dīng gīed hmom dīx mu, gaex hag noh hoig si gāong ngīe, ngai nbāoh hoig nbaih bāing ngīe. Būi oud ndaex nyīex Vōng jei Vōng hoig yūm. Gix hoig hu grūb Vōng kraox kom mu. Si mēix yūh soux hliex din hoig hu lāo yūm Vōng blag gah diex uig, nbun jōng an gix dāeg māo gah brāeg [**] dix būi houig hu nyāex qax, gah ndaex nyīex gah mglōg nbong gū si ndāeh hoig dōm Man uig gah, gīeh jāong būi houig hu lai līng ang lai luah yūh nyīex. Njāo nin din dom ndaing yian. Kom mōh nan Vōng ang nyāng yūm mai, noh gon ngīa kom nōi di dix bīang gu - bīang gu id noh dag deui Man luad om haeg han gah, bīang Man gon jāing rīang Dāi luad kri gah, ndaex ndouh nding goui blag bīang. npang dix, rīang kix dong gaex Vōng mai sim Glang nqom yūh būi an.


Vōng in hoig nīed dix ang lai bōun npom si nyeig, om mgud dīd dix bīang naog noh nin. Noh nblah ngai dix mgāig, yāox ngōm mōuig dēei yūm bīang naog dix, gon jeeb dix ih hmoug kri noh mai, daix noh dīx kon mgiex mgon lāoh Vōng. Braog hveing noh gah ndēe ru rid Man luad an gix ndīeb ndoung gū jē gū jōng hoig līh gah, dīx nblah mgrāng dīx nblah ang mgrāng. Gaing in gix hoig dai bīao gāing lūd gāing hmom yūh Vōng kom uig. Yām in mōuig hoig ngōm bīang soug hrom noh gix dom ja nplian gaing dix hngoig mgāig noh dīx nbōg.


"Gon ji nang maix gāing jē in laih?" Dīx gaex qog noh ah nin, "Gon ji nang maix gāing jē an laih?" Gaing an dīx mu nbāox qog nang noh yūh nin. Gix grāi noh hmoung gāing hoig yūh noh gū jē, hoig hmoung noh loux in gix,, rom laeh hoig nba dix līh kaing nbāoh noh.

"Ang ex ndouh dōng gāing in gix!" Vōng ah nin, "Nīed nbloi loux go līh, nīed nbloi loux go līh, nīed daeh kaox ndēeng [**] luah! bō gīeh ex hmoung loux lāo gix in gix!" Noh yōu dix ah nin.

Kom mōh nan gix ja nīed dix lāo box, mōuig dog ngēeh gaing dix gah loux grāi gix.

"Nīed nbloi loux go līh! nīed nbloi loux go līh!" Vōng nbāox rīag ah nin. "Maix gon sim kri in, qang heui, qang heui! ex hoig dox Māe kri gah maix mīex ndīng mox nīeh, ex gah hoig sae maix daeg gīab kri dix yām in vīex maix qang heui, qang heui!"


Sim in ang dīe quh bīe jeeix gox, njāo sin būi ang houig dix quh njim goui ndaex gaex noh, noh gah ang jīx līh qang go. Mōuig ja nblian box dou ngai dix mgāig Vōng. Braog hveing noh hoig yian yeed ngīe.

Yām in loux qang go dīx mu līh gah ndaex ndouh blag gah diex. In hoig mōh loux go qang Glang nqom an heui, noh jūng gah gag kaox iag dīx mu. Mōh hmoung noh nīe saex Vōng, dom ndēeih bu dix houig qang noh hmoung go, gīeh noh nyōm oud si u goui, yām hoig līh qang noh go, ngai mōuig mīang an gix ngūd raoh gah hmoung dix loux qang go, gah ndaex gaex Vōng nēix hnam noh gah hoig njāeh dix ndēeih quh.


Mōuig gah yeeb ngai dix hngiad go qang noh, gon ah nin mai: "Qang heui, Glang nqom, vīex maix qang heui!"

"Geem yūh nan, sang jū nang maix dix dox mgon kri an gah ex laih? sang jū maix dix dox qix bloi loux ngūah nan gah ex laih? sang jū maix dix dox hmoug kri Vōng gah ex laih?"

Mōuig ndēeih dēei grāeng in gix dix dox gah noh. Glang nqom nīed sae rīang dix qang go. Noh qang go nyīex oud gah dīag si mēeig ndēe an Dāi bi gad bāing gūah gah; ndēe an kaox doui si ang gah haoh gah; ndēe an gah bīang rīb glāi an gix rom ngai būi yīam hoig krum gah. Hmoung mōuig loux qang go in gix hoig ndēeih gēd ngīe nyīex yaong dīx, yūh nin noh dīeh dix mōh bai om bāing, mgrai ngīe gah ndouh nding.


"Lāoh līe maix, lāoh līe maix heui!" Vōng ah nin. "Maix sim bloi si yīiex in, dāeg dōng ex maix pao Si vēui in nāox ex gon nkree maix dou kaing hag diex dix, yām in go qang maix gīeh mōuig mīang oud braog hveing ex dou uig, gīeh saex ngīa oud ndaex gaex ex mgrai mgrib [**], ex sang dox maix jīe jē ba dix nīe?"

"Hoig nīe ba dox maix gah ex heui!" Glang nqom ah nin. "Yām dāeg qang ex maix hmoung go nāox, ex yāox krum rom gai maix ang ex ndouh bī om ling njū ling pan. Rom ngai dīx soug hoig mōh Kri māe dīx loun noh jīx gīeh hrom būi qang go mgāex dix bruih om Dāi nan. Kom mōh nan mglaig maix id heui, laex dix hmom hmom, gīeh gaex hag dix ndēeih nbrax, ex log nbāox qang maix hmoung go dīx mu."

Kaix an noh nbāox qang go dīx mu, Vōng hoig lāig id nyōm ngīe. Yām ndēeih haing noh noh hmoung hoig ndēeih nbrax gaex hag - dix, rīang rāo noh gah hoig ndēeih goui, si ngāix dong dix lāig gah ndaex nyīex, jō dix dong bīang gaex noh. būi jōng ang lai oud braog hveing noh dīx gaex gox, njāo ndōg hoig jei gix noh yūm. Dāe mōh ngīe Glang nqom ba gon qang go braog noh.

"Vīex maix oud mai ex ling njū heui," Vōng ah nin, "Muih maix dix qang yūh gah mox maix qang yūh nan heui. Sang dog ex sim yūh būi an max goui dīx hreing nbliah."


"Maix bō ndouh yūh nin. " Glang nqom ah nin. "Noh gah hoig ndaing sae rīang dix qang go mglang ga in nāox, ja ndēh noh oud braog hveing maix heui. Ex ang jīx yūh hmeem dix gah nyīex Vōng dix oud mai maix. Kom mōh nan, yām mīe ex dix houig, maix ja jū ex houig. Blag bōun nbōu yām sang glib si ngāix, ex log jūng gah gag kaox braog nyīex, qang maix hmoung go, gīeh maix mgāex hrom mgāex -hri, gīeh maix dōng dix raex gēd, ex sang qang būi nyōm oud si u goui mai būi yāox gāing ang mōh būi houd an gix hmoung go, ex sang qang ba lāoh mai ba nbrai moux dix braog maix an gix. Sim iag qang maix hmoung go in sang bu dix hu ndēe si ngāi pao. Noh sang bu dix houig braog būi houd rūb gax an, noh sang bu dix dum gah nyīex būi yūh ma nka gāing, bu dix hu gah būi si ngāi oud hod braog maix an gix gū gaex. Sin eix lai laih mai hmoug jeeb si mīang mgiex maix, ex nīe muih hrom hmom nqom nqeed maix, kom mōh nan hmoug jeeb si mīang mgiex maix gon goui ndēe ndaing hmom dīx blag nang. Kaix in sax ex gon sang houig, houig qang maix hmoung go, vīang yūh nin ex mīe maix jū dix deem ex gah gāing dīx mgrong."

"Tix deem maix gū jē "Vōng ah nin. Noh dang jeeb si nbēix dix jūng dan, gon ndāeh mgon kri dix bīang hrom dix.

"Gāing sang mīe ex maix deem dix gah dīx mgrong, mōh ang ex jū maix grāi būi mōd dix hmoung, ah goui maix sim yūh nin dīx mu. Sin yūh nin dom dāeg hmom."


Kaix ah Glang nqom nan noh bu hu kaix.

Būi jōng an gix lāig ndaex nyīex haog mgāig Vōng hoig yūm dix mōh heui, gix hoig jūng dan kom uig, Vōng ah nin gah gix: "Mīe si yīiex gīeh būi nyōm oud si u goui gū gaex!"


Kex Lao See Iag Giex Kex Lao See Dīng

Ndī ndīx goui būi ra gaex, giex oud gah yaong dīx mu, gaex giex hoig om bāox dix, mōh Kex lao see. An dīx gaex goui Nbrūng boun mu, an dīx gaex dāe goui Nbrūng dīx mu. Geem sang yūh būi gix dix si ndong gah gaex giex, dom seed ba goui Nbrūng an boun mu gaex Kex lao see dīag, seed ba goui Nbrūng dīx mu an gaex Kex lao see iag.

Kex laosee iag mōh jao sum gaeng gah nyīex Kex lao see dīng, gon vīex Nbrūng nyīex dix hu yūh gāing dan. Kex lao see dīng dāe deem noh yūh gāing dīx van dūah dīx ngāix ngīe. Njāo nin, Kex lao see iag yīe sae rīang dīng dix lāeh Nbrūng an gix ah bag bag nan gah soung hrom dix! Ngāix an noh hoig yūh Nbrūng in gix yāeng sin ngāo nyīex dix nan. Si ngāix hoig dong rīang ngīe, loux hrax būi gix gah nyīex jong hoig si mgouig ngīe, būi gix hoig jeeb grāeng mgrāng dix lāig gah nyīex jong houig hngiad gah grāi si lax nbēen. Gix hoig yāox gah dog Kex lao see iag Nbrūng heui, noh hoig gīed mgāex leing heui, hoig yāog dix lāeh Nbrūng ah bag bag nan kom ah dix nin: "Nbrūng ex in gix, nīed sae rīang heui!"

"Maix bō ah loux yūh nin!" Kex lao see dīng ah. "Njāo dāe goui Nbrūng maix dīx mu ngīe."

Kom nan, yām nbāox houig būi gix braog noh, noh hoig bī ngīe gah ang dix ko dix ah loux yūh nin. Noh nbāox yāog dix ah nin: "Nbrūng ex puan mu in gix, nīed sae rīang beix heui!"


"Ex ang lai jū maix ah loux yūh nin," Kex lao see dīng ah. "Sin maix nbāox ah loux yūh nin, ex dee hoig yāog ngīe dix dog gaing Nbrūng maix heui, yūh noh yūm heui, yūh nan maix ang lai goui Nbrūng dīd dix kaix."

"Ex ang ndouh lai ah loux yūh nin pao sax," Kex lao see iag ah. kom nan, yām nbāox houig būi gix braog noh, noh hoig ndēeih mgāex ngīe, lūg om hoig mōh vīex noh Nbrūng nyīex dix hu yūh gāing nan, nbāox sae rīang dix lāeh gix kom ah dix nin: "Nbrūng ex puan mu in gix, sae rīang heui!"

"Ex sang sae rīang dix dog Nbrūng maix pao. "Kex lab see dīng ah, kaix an noh yāog dix dog `gaing Nbrūng, Nbrūng hoig mgōih dix yūm dīx daix ngīe.


"Hai! ex ang lai goui Nbrūng bīe dīx mu gox pao!" Kex lao see iag ah nin kom yīam dix.

Ang nyāng goui mīex mglang dix, noh doh [**] hag Nbrūng yūm an, houg noh. Oud kaix sae noh ndaex hae, vīex dix hu jōuih noh ndaex laih.

Yām hu noh noh jō dix houig gah rāog kaox dīng dīx ndaeh. Brāix glong hoig hvaig ngīe, noh lūd grax ang lai dōng nblōng sang hu dix, sang ing gah nyīex gah ang lai jīx, sang hu grax mox gah ang lai dōng. Gah braog grax goui nyīex gah dīx hlang, ndaex ndouh nding hoig nyeeb dix, rīang gon dong dix līh kaing ndaex ndouh nding jeeix jeeix.


"Nyīex in gix nbāox ja dox ex id din dīx som," Kex lao see gēd nin ndaex hrom dix. Kaix an dom hu gūh si yīex.

Mōuing būi yūh gāing dīx gaex baoh si vīex, kaix hoig hmoung noh loux grāi Kex lao see iag, noh hmaing noh dou, ah nin: Ang mēix noh oud nyīex, ang noh bōun gīeh būi dang lāig id gah nyīex.

"Sin mōh nan ex dee mōh id ngīe blag gah diex heui. "Kex lao see ah. mōuing būi yūh gāing an hoig yeeb ngīe si vīex dīx daix kom ah dix nan ngai noh.

Braog nyīex gix mglāeh hnyee goui gah dīx nbum [**], gah si nax nyīex giex mglāeh hnyee gon goui nyīex bloung iag gah dīx mu. Kex lao see yāog gaing dix mgāig bīang nyīex, ah nin: "Ex dee mōh ja id bīang nyīex dan som in! An hoig mōh gu gīed hmom dīx mu. Ang sim jē -dīd dix dāe houig dix duih nba ex. "Sim dīng lūg oud braog hmeem dix dan dīx mu.

Kex lao see yāog dix haog bīang nyīex, noi dix bīang hnyee, lu līeh dix bīang, hoig njiad nyōm ngīe. gah ndouh nding nyīex jao yūh gāing an ang nyāng nyeeb dix hmom, noh hoig jīx yāox ndaex.

Gah ndaex nyīex bīang peen dīng dīx mu, Blai, Nēix doung mai Gax ngaig hoig nāog gah. Braog peen dan mōh si lax jao nyīex lāig lī mai mōuing gō yūh gāing an ba ngōm gah, kaix giex ang lai goui būi mōd dix. Mōuing gō yūh gāing an sae si lax an nyāex blai, giab noh ih nēix gax, in hoig mōh daex ndaing muih noh dix ih heui.


"Ex ndaing muih dix ih nang did!" Kex lao see iag gēd nin ndaex hrom dix.

Yām in noh hmoung loux luah jāong Nbrūng nbrūg būi mōd dix houig. Mgāig noh hoig yāog mōh mēix mīex oud ndaex nyīex an giex.

Noh hoig mōh būi lāoh dīx gaex heui, noh ndaing gōuing gah gō si lax an. Bīe yāox noh gō si lax an dix ngai ngīe, noh hoig meed hrom heui. Gō si lax an yāox ang noh oud gah nyīex, dom houig dix sōg mōuing noh, mōuing noh hoig dēei jē ba nyōm dix dox gō si lax an ih. Yām in giex hmoung houig mēix noh, hrom giex hoig gīed si ngūa gah. Mōuing noh hmaing gō si lax an greed dix ndaex kui yī goui braog nding an. Gō si lax an ang lai dōng gah sang yūh dix, hoig bu bāb dix greed dix ndaex, njāo dōng noh ndaing gōuing mēix mīex an giex gah dix. Mōuing jao yūh gāing an gah bu bāb dix moux daex blai goui bīang peen an gix gah ndaex kui, hlad mēix dix yāox, hlad noh qog gah yūh gah mox.

"Hai, si yīex ex eui!" Kex lao see yāox yāog gix dix vīex ba nyōm an gix hu, hoig hlog ngie gah kom ah dix nin.

"Mox ba oud bīang nyīex dan?" Gō jao yūh gāing an qog ah nin, yāog gaing dix mgāig Kex lao see. "Maix jīx id dan yūh gah mox? līh din lāig id ndaex nyīex mai ex."

Kex lao see iag grāi noh hmoung gah lūd dix grax, hmaing dix id nyīex noh dīx som.

"Jīx oh," Jao yūh gāing an ah, "Kom nan, ax ran sōg dix ih brīex ha."


Mōuing gō an yūh giex ih brīex, sae. moig ra gloung een noh bīang peen, hmaing giex ih. Gō jao yūh gāing an gīed jai hrom, hoig ih noh nyōm ngīe. Kex lao see ja dog gēd box nēix doung, blai mai nblāeh hoig yāox dix an gix nux Noh dōng mōh mōuing gō yūh gāing an ba moux.

Kex lao see iag yāog een qee sae dix hag Nbrūng gah mgreem peen, een noh braog jāong dix. Njāo ang noh ndouh lāig ih moig yūh mīex an giex, noh hoig yāog dix ndīg bīang qee goui hag gah, qee luah ah rad rad nan.

"Bō nyei!" Noh ah nin gah qee, kom nan gon sae rīang dix ndīg qee, gīeh noh nīed dix luah ding.


"Geem yūh gah mox, een maix ba dix ndaex qee?"Jao yūh gāing an qog noh.

"Ai, mōh jē ba jīx lāb [**]," Kex lao see iag bog noh ah nin. "Noh ang lai jū ax ih moig, noh hoig yūh Nēix doung, Gax mai Mglāeh gix līh, gix oud ndaex kui brīex."

"Ndaing hmom heui!" Jao yūh gāing ah nin, noh baoh kui, yāox daex moux mōuing dix an gix ndaex kui. Kom nan, noh lūg jei hoig mōh jē ba jīx lāb an ba dīeh yūh līh. Mōuing noh ang lai dōng loux sang ah dix, jēn nīed dix dēei daex an gix dix ndēh noh bīang peen. Giex hoig sae rīang dix ih heui Nēix an gix. Yām in Kex lao see nbāox ndīg qee dīx nbōg, hag nbāox luah ah rad rad nan.

"Geem nbāox ah jao lāb an dix?"Jao yūh gāing qog ah nin.


Kex lao see bog ah nin: "Noh ah nbāox dīeh dix Blai līh loui gong, Blai in gix gah goui ndaex kui nang."

Mōuing gō an hmoung noh jēn dēei Blai moux dix līh. Būi yūh gāing gīed mgāex kom nyāex dix Blai. Yām in noh gīed mīe dix goui nang qee njiad jīx lāb yūh nin dīx mu.

"Geem jīx dīeh noh si ngīe līh nang laih?" Jao yūh gāing an nbāox qog ah nin. "Yām in hrom hri ex ndaing hmom, ex mīe dix yāox gah yūh si ngīe gah mox."

"Jīx oh," Kex lao see iag ah nin. "Ja hmaing ex jē dix līh, qee lāb ex gīeh jē an līh heui Geem mōh nang lāih [**], jao lāb?" Noh ah nan kom sae dix rīang dix ndīg hag goui ndaex qee an, qee hoig luah ah rad rad nan. "Hoig hmoung maix noh? noh ah: 'Jīx dīeh noh līh'. Kom nan ngai nbāoh si ngīe in ang ndouh mgrāng dix yāox, maix bō jom lai mgāig kaing."

"Ao, ex ang hlad jeeix gox. Ngai nbāoh noh geem yūh gah mox?"

"Ao, njiad om gō si lax ndaex yaong taig tiam."

"Ha!" Jao yūh gāing ah, "Ndaing nbēh di dēi kee heui! maix gah dee dōng, ex ang ndouh muih dix yāox ngai gō an dīx nbōg gox. Kom nan pao ang hma yūh gah mox dix, ja hoig dōng ex noh mōh si ngīe ngie, ang lai goui hrom gēd dīd dix gah. Yām in ex log nqob hrom hri dix Maix bō ndouh gīeh noh ndēix ex."

"Sin yūh nan ex qe qog yāox jao yūh lāb ex," Kex lao see iag ah nan kom een dix hyāog [**?] dix bīang qee, yūh om nbrēi di dix hngiad nan.


"Ah noh gah mox?"

"Hmaing noh maix hu dien, hu blag ndīeb kui goui ndāog nding an. Maix hoig yāox heui si ngīe goui ndaex. Kom nan, maix mgiex ndīeb gaex jeeix, bō gīeh noh dou lūan."

"Maix mgō ex mgiex ndīeb jeeix!" Jao yūh gāing ah nin. Kaix ah noh nan noh hu ndēe goui kui an. Ndaex kui hoig mōh gō si lax moux mōuing noh ba oud ndaex. Gō an ngōm ndaex kui, hoig si ngūa ngīe gah hlad dix.

Jao yūh gāing yāog dix blag ndīeb, si mī ndaex kui sein dix ngai.

"Ai yōu, si yīex eui!" Noh ah, hoig ndēeih yoi dix blag kaix ra ndīang. "Mōh kee, hoig yāox ex noh, noh njiad om gō si lax ndaex yaong taig tiam. Ah! mōh gāing hlad dī dēi heui!"


Kaix hoig yāox giex noh, giex nbāox sae dix nyāex blai, nyāex houig dom mgrēng som.

"Maix jēn jōuih qee lāb in gah ex kaing," Jao yūh gāing ah nin. "Hmaing maix māe mīex ndīng ex dox mīex ndīng, ex jīx dix dox māe gah maix dix mog."

"Ang jīx, ang ex jū," Kex lao see iag ah. "Gēd maix yāox yaox, jao lāb in goui ndēe ih gah ex mīex ndīng mox nieh."

"Ah, ndaing mīe ex maix dox dix jīe!" Jao yūh gāing an nbāox ah boud nin.

"Jīx box," Ndēe nkoig Kex lao see ah nin. "Ngāix maix hoig gīeh ex id din, hoig ndaing lāoh līe maix heui. Jēn yūh nin kaing, maix dox māe gah ex dīx mog, jīx dix vīex jao lāb in hu, kom nan ex mīe maix sae māe dom nāog mog."

"Jīx oh," Jao yūh gāing ah. Kom nan maix vīex kui an hu mai dix, bō ndouh een noh gah nyīex ex din. Hlad eix si ngīe an gon oud ndaex boud."

Kex lao see dox qee hag an gah jao yūh gāing an, louh māe dīx mog gah. Jao yūh. gāing an gon dox Qe dīng gah noh dīx hlang, gīeh noh re māe giex kui hu gah.

"Oud maix heui!" Kex lao see ah nin gah jao yūh gāing an, kaix an noh si re māe giex kui hu, gō si lax an gon oud ndaex kui boud.

Hoig luan kaing rāog kaox goui glong dīng gah dīx mu, rom ndaing mgēe huan. Bīang glong goui si nbaeg dīng gah dīx mu, Kex lao see houig mgrēng si nblaeg [**] laex dix, ja yūh dix ah loux dix dīng dīng ngīe, sang gīeh si lax oud ndaex kui hmoung:


"Hai! ex sang yūh kui in yūh gah mox nieh? hoig gīan ngīe om mōh si māox ba goui ndaex. Ex hoig gīed dāeg, ang lai bōun tui hu, jēn re dix dig ndaex glong sein. Sin noh si bloui dix houig gah nyīex yix, ndaing hmom heui; Sin noh ang si bloui dix houig gah nyīex yix, nyog ndēe si bloui noh dix hu houig."

Kaix an noh yūh dix lu lieh kui jeeix, yūh om sang nteen dix noh ndaex glong nan.

"Bō nteen, bō nteen!" Gō si lax oud ndaex kui an rīag dix ah nin: "Bloi ex līh liag!"

"Ai ya!" Kex lao see iag yūh dix om ba si yaoh si njāox nan. "Noh kee gon oud box ndaex kui, ex dee mōh nīed dix nteen noh luan ndaex glong sein, gīeh rom taih [**] noh yūm."


"Ai ya! bō ndouh nteen! bō ndouh nteen!" Gō si lax rīag yō dix ah nan. "Ex log dox māe gah maix dīx mog!"

"Ai, in jīx dix gēd qaox," Kex lao see iag ah nin, yāog dix baoh kui kaix.

Gō si lax mōu dix līh kaing ndaex kui, oud kaix nteen kui ndaex rom sein. Kaix an noh ing gah nyīex, dēei dix dox māe gah Kex lao see iag dīx mog. Kex lao see hoig bōun māe ra nbōg pao, māe noh hoig nāog dīx Qe heui.

"Maix mgāig, hag Nbrūng ex hoig bōun māe ndīng in!" Yām ndēeih ing houig noh ndaex nyīex noh ah nin kom mgāex hrom dix. Noh hieh māe bīang diex, hoig bum dix goui mīex nyāo heui. "Sin kex lao see dīng dōng ex bōun māe mīex nyāo gah hag Nbrūng dix, noh dee hoig soung hrom gah, ex ang ndouh grāi noh hmoung."

Yūh nan noh bloi gon nyōm hu vāi mog nyīex Kex lao see ding dīx mu.

"Sang yūh noh dix gah in nieh?" Kex lao see dīng gēd nin. Noh sae nbēe bīd mgreem mog jeeix, gīeh noh bīd jē ba doung gix gah. Yām ndēeih vīex gix mog houig, noh lūg yāox māe kraox gah mgreem mog loui pag.

"In mōh ba dix?" Kex lao see dīng ah nin. Noh dou dix hu gah nyīex Kex lao see iag. "Geem dēei maix māe in gix ndēe mox?"


"Oh, mōh māe bōun ex gah jōuih dix hag Nbrūng dix. Nbōu go gox ex hoig jōuih noh."

"Noh hoig son dix ndaing ngōih heui!" Kex lao see dīng ah nin. Kaix ah noh nan noh bu bāb dix dou ing ndaex nyīex, dēei Moui dīx māg, gīd gaing- Nbrūng dix kom boun mu yūm. Doh hag gix vīex dix hu jōuih ndaex laih.

"Līag hag eui, līag hag eui! mox sang līag hag?" Noh yōu ndaex laih ah.

Būi yūh Gīab hag mai būi yūh grāeng hag an gix dou dix houig braog noh, qog noh gah ngōih hag.

"Hag dīx mu jōuih gah māe dīx mog!" Kex lao see dīng ah.

"Jei maix hoig hyoud gox?" Gix ah. "Maix jei māe yix hoig gīed nīe hoig jīx dix doung gah mog laih?"


"Houig līag hag eui! līag hag eui! mox sang līag hag?" Noh nbāox yōu ah nin. Qog būi gix ngōih hag jōuih noh, noh ja nbāox ah boud nin: "Māe dīx mag."

"Jei mōh yūh noh dix log lo eix," Būi hun ah nin uig. Oud kaix gix dēei maox hag mai ndai an gix dix vīed noh gah.

"Houig līag hag eui! līag hag eui!" Gix ngīah noh kom yōu dix ah nin: "Yix hmaing maix hloub hag raoh hnam in bīang nblōg maix. Dou maix kaing ndaex jēi in heui!" Kex lao see hoig sae rīang dix dou, ang būi sax lāeh noh om ngāix nin dīx nbōg gox.

"Eh," Houig gah nyīex noh ah.

"Kex lao see iag dee mōh pex ex ih jeg in gix, ex sang blaex noh yūm. " Ngāix in yīex Kex lao see iag jō dix yūm, vēui yūm giex nāox, giex ang ndouh hmom gah noh, kom nan yām in noh hoig ndaing krub hrom. Noh glīen yīex dix ndēh giex id bīang gu si u, noh ngōm njāong nding bīang ngoud bāe yīex dix ling som, mglang ga in nāox noh yīe id yūh nin heui. Houig mgrēng som noh ja gon ngōm box dan, yām in si vīex nbaoh dīx daix ngīe, Kex lao see dīng hoig vīex Moui lāig ndaex nyīex. Noh gah hoig dōng ndēe goui gu id- Kex lao see iag heui. Noh hu hod ndēe goui mgrong ndēe id, sae Moui gah gaing yīex Kex lao see iag dan dīx daix, noh jei hoig mōh Kex lao see iag heui.

"Maix ko dix dōng," Noh ah, "Maix bō yūh ex om būi o nan dog nog non ex. "Hoig ah noh nan noh yāog dix ing kaix.


"Gō in bēn mōh būi ang hmom dīx gaex," Kex lao see iag ah nin. "Noh sang mūg ex yūm. Sin yīex ex ang ndōg yūm, noh dee hoig blaex yīex ex yūm heui."

Ngāix kaix Kex lao see jeeb yīex dix ih grāeng kraox, vāi Nbrūng mai Qe dīx hlang si re yīex dix hu ndaex rāog kaox. Yām hoig līh si ngāix, giex houig hod ndīang si vīex nyīex jōuih brīex dix nyīex. Kex lao see līh kaing Qe, lāig ndaex nyīex hu sōg dix līag dix ih brīex.

Jao nyīex jōuih brīex in mōh būi ndaing goui māe dīx gaex, noh gah mōh būi hmom hrom dīx gaex.

"Maix jāo," Noh ah nin gah Kex lao see iag. "Maix lai jeeb si nbēix hmom yūh nin dom jāo."

"Mōh heui," Kex lao see iag ah, "Hu ex mai yīex dix ndaex jēi dīng ngāix. Noh ngōm gah ndaex Qe blag ga diex. Ex ang nyāng vīex noh lāig ndaex nyīex. Geem jīx nang maix dix dox noh nyāex blai dīx jung laih? Kom nan maix ah loux dīng jeeix, ang hyaog noh bian hmom."

"Jīx oh," Jao nyīex jōuih brīex an ah nin. Oud kaix noh braeg blai die dīx gloung hu dox yīex Kex lao see nyāex. Noh hoig ndōg yūm, gaex hag noh hoig gian ngīe kom ngōm noh ndaex Qe dan. "In mōh blai hmaing gon saex maix ex dox maix nyāex." Jao nyīex jōuih brīex ah nin. Kom nan yīex gūad in ang nyei nyux bīe dīx mgūm gox, ja ngom box dan.

"Geem hmoung maix noh laih?" Jao nyīex jōuih brīex an yōu dix ah nin. "In mōh blai dox gon saex maix maix nyāex!"


Noh nbāox yōu yūh nin ra loui mgūm. Yīex an giex ja ang quh box dix. Ndah kaix noh meed hrom gah, dom dāing gloung blai gah nbāoh giex, blai hoig nba dix līh gah mēeih giex, giex hoig mgōuih ngīe kaing ndēe ngōm dix.

"Haih! yūh gah mox?"Kex lao see iag rīag yōu dix ah nin, dou dix līh blag ga diex, hu. gōm nyōi jao nyīex jōuih brīex an. "Maix jīx dog yīex ex yūm! mgāig maix yāox, kaix dog maix hoig ndouh yūh gaing giex dan."

"Ai, hoig mōh gāing lāex leeing heui!" Gō jao nyāex jōuih brīex an gah ah nin nang, hoig du dāig daix dix gah ang dix nyōm oud. "Ang nqom ex ndouh hmom jeeix gox! Kex lao see iag rom muih eui, ex dox māe gah maix dix mog laih, ex yūh giex yāeng mīex līh dix nan, si nbaeng giex hmom hmom. Kom nan ex si mīe maix ang ndouh grāi būi mōd dix hmoung, sin ang mōh nan, būi dee gīd gaing ex, ex dee ang lai yāox dix glōd!"


Yūh nan Kex lao see nbāox bōun dix jīe māe dīx mog dan. Gō jao nyīex jōuih brīex an gon mgō noh si nbaeng yīex noh, briex giex hmom yāeng mīex līh dix yūh nan.

Kex lao see iag ndēeih vīex māe in gix ing houig gah nyīex, nbāox hmaing gon dix hu vāi mog gah nyīex Kex lao see dīng. "Jīx yūh gah mox nin?"Kex lao see dīng ah nin. "Geem ang ex nyāng yūh noh yūm? ex qe hu mgāig noh dīx ngai yāox. " Noh vīex mog hu gah nyīex Kex lao see iag.


"Geem dēei maix māe in gix ndēe mox?" Noh qog. Yām yāox noh bum Kex lao see iag māe dan mīex nyāo, hoig nplian dou ngai dix dīng dīng ngīe gah.

"Ba blaex maix yūm mōh yīex ex ang mōh ex," Kex lao see iag ah nin. Ex hu jōuih noh, dom bōun māe ndīng in."

"In ndaing son dix hlaong ngōih heui," Kex lao see dīng ah nin. Yūh nan yām ing houig noh gah nyīex, noh dēei Moui dīx māg dix mūg yīex dix yūm gah. Oud kaix sae giex ndaex Q e, si re giex hu ndaex laih, qog būi yūh si ndah dīx gaex gah līag ang noh līag būi yūm.

"In mōh mox? mōh ba dēei maix kaing ndēe mox?" Jao yūh si ndah qog noh ah nin.

"Giex mōh yīex ex," Kex lao see dīng ah nin. "Mōh ex ba mūg giex yūm, sang jōuih noh mōh māe dīx mog."


"Si yīex eui," Jao yūh si ndah ah nin. "Jei maix hoig hyoud gox! bō lai ah loux o yūh nin, nbāox ah būi gix gīd gaing maix gah. "Oud kaix jao yūh si ndah an grāi noh hmoung, gāing yūh noh nin ang ndouh hmom, noh hoig mōh būi lūd dīx gaex, būi gix dee mgiex dix blaex noh njāo. Kex lao see dīng hmoung ah gō an nin, hoig si yaoh si njāox gah, noh bu bāb dix dou kaing ndaex nyīex gō yūh si ndah an, dāing dix lāig ndaex Qe, dou ndēeih ing gah nyīex. Jao yūh si ndah mai būi hun hoig jei noh mōh būi hyoud dīx gaex, hoig nbloi noh dou ngie.

"Maix ndēeih blūd jeg in!" Yām houig Kex lao see dīng ndaex lōng grax noh hoig ah nin, "Mōh heui, Kex lao see iag maix dee blūd jeg in!" Yām ing houig noh ndaex nyīex, noh bu bāb dix sōg qee dīng mōing dīx mu, hu blag goui nyīex Kex lao see iag, noh ah: "Maix nbāox nog non ex dīx nbōg! nbōg njāeh maix gīeh ex dog Nbrūng dix yūm; nbōg in maix gīeh ex blaex yīex dix yūm! Gāing in gix mōh maix ba fu jex kom uig. Nbōg in maix bō lai nog non ex. "Kaix ah noh nan noh hu gōm nyōi Kex lao see iag, tux noh ndaex qee, pioug mōing qee gah maox, dom gōg noh hu kom ah dix nin: "Pao ex sang gōg noh hu braog glong, dāing noh ndaex rom, gīeh noh si mam dix yūm!"

Sang hu houig braog glong, gon sang lōng grax lang dīx mu. Kex lao see iag gah ang kioung mai, yāog noh dix glom Kex lao see iag hu, hoig ndaing gīed gīan heui. Grax in jō dix houig gah braog nyīex jong, loux hra būi ndaex nyīex jong hoig ndaing nyōm dix hngiad, yām houig Kex lao see dīng din, noh ndēh qee oud Kex lao see iag ndaex hod ndīang si vīex. Noh gēd nin: hu hngiad loux hra būi gix dīx vūd hang, Kex lao see hoig oud ndaex qee, dāe dīe sang lai bōun dou. Yūh nan noh haog ndaex nyīex hra.

"Ai, si yīex eui!" Kex lao see iag ah nin ndaex qee, noh hoig blu bliag dix njēe nblāong, kom nan ang dīe goui bang fax dīd dix bōun yūh maox mgah. Yām in dax gūad nkree nbrīe kong jō houig din dīx gaex, noh hoig hreh Mōi Grag gix hu braog nyīex jong. Mōi nkree noh jō dix tib qee oud Kex lao see ndaex.


"Hai, si yīex eui!" Kex lao see iag ah nin, "Ex gon on njū yūh nin, pao lai sang hu gah ndee oud si yīex!"

"Kom nan ex būi saig ba yāox yūh nin," Gūad nkree Mōi an ah nin, "Nūm ex hoig dīng yūh nin, ex ang dīe nyāng bōun lāig gah hag diex oud si yīex!"

"Sin mōh nan, vīex maix gah mōing qee in," Kex lao see iag yōu dix ah nin. "Maix gōi lāig ndaex qee, yūh nan bīe dīx vūd ngīe maix hoig houig hag diex oud si yīex heui."

"Sin yūh nan ndaing hmom, ex mīe dix yūh nin," Gūad nkree nbrīe an ah nin. Noh gah mōing qee, Kex lao see iag hoig bu bāb dix līh kaing ndaex.

"Vīex maix mgō ex mgāig nbrīe kong in gix, jīx laih?" Dax gūad qog Kex lao see ah nin. Oud kaix noh qub dix lāig ndaex qee. Kex lao see iag hnod mōing qee gaex, nkree nbrīe kong hu kaix.

Ang goui mīex mglang dix, Kex lao see dīng līh kaing nyīex jong, nbāox yāog dix glom qee in bīang glaig dix. Noh hoig hmoung kioung ngīe Njāo kioung gō nkree nbrīe an kaing Kex lao see iag mīex nyāo.

"Njiad kioung ngīe dix glom, in dee mōh njāo hoig hngiad ex loux hra būi gix nux."

Noh glom gō an hu gah braog glong dien, houig noh gah braog glong noh dāing qee oud dax gūad an gah ndaex glong. Noh lūg hoig jei mōh Kex lao see iag ba oud ndaex heui, yūh nin noh yōu ah nin: "Noi maix mgreem rom sein heui, ang maix lai yāox dīx nog non ex pao sax!"


Kaix an noh ndēeih ing gah nyīex, yām houig noh gah mgah grax, noh yāox hreh Kex lao see iag nbrīe kong hu si vēui dix.

"Jīx yūh gah mox nin?" Kex lao see dīng ah nin. "Geem ang ex nyāng si bloui maix yūm laih?"

"Mōh heui," Kex lao see iag ah nin, "Veui in nux, maix hoig dāing ex ndaex glong sein."

"Geem mōh nan maix dēei nbrīe kong lāoh in gix ndēe mox box?" Kex lao see dīng nbāox qog ah nin.

"Gix hoig mōh nbrīe kong oud ndaex rom dīng heui," Kex lao see iag ah nin. "Pao ex grāi maix hmoung dom si ndong gah yūh gah mox, ex ndaing mgāex hrom hri gah dāing maix dix ndaex rom, hoig ndaing lāoh līe ba yūh maix heui. Yām in ex hoig mōh būi mī hmag dīx gaex heui! yām qub maix ex ndaex qee ex hoig ndaing si ngūa heui, yām dāing maix ex ndaex rom hloung sein, npaeng hoig luah mai ndong hyaog ex. Oud kaix ex jōum mgreem rom, ang mad jeeix gox, njāo hoig gūah rīb gīed on mgreem rom heui, ex dum bīang rīb an gix mōing qee hoig mgah dīx daix ngīe. Nbun ndaing mgrāng dīx gaex, jeeb si nbēix bāing yāeng hra nan, gon bag Dāi glāi gah haeg gaing dix, hu dug daix ex, ah nin gah ex: `Geem mōh maix Kex lao see iag laih? ex njāeh dox nbrīe kong gah maix ra loui mu hang. Lōng grax in dien, hu vēui maix gao li ra, maix gon nbāox yāox nbrīe kong hun dīx pung Ex hoig dox gix gah maix heui. Yām in ex dom dāeg dōng, glong an mōh grax hu būi gix gah rom ding heui. Sang gaoh gix gah mgreem rom dix houig gah blag rāog, ja hu gix dom si ndāeh glong in hoig houig. Ndēe an Dāi gū jē hoig goui gah, rīb gū jē gah goui nang gah. Gax goui ndaex rom hoig hu mai ndong hyaog ex, om bu sim in gix ndaex rāo ma yūh nin. Būi oud dan hoig mgrāng gū gaex! Gah mgōng gah ngōd ndaex ma ndaex gaeng dan uig hoig mōh nbrīe kong ba nāog gah, ndaing hmom dix mgāig heui!"

"Sin lūg yūh nan maix lai ndēeih houig gah ndēe oud yix din box?" Kex lao see dīng qog ah nin. "Sin ndaex rom lūg hmom yūh nan, ex ang ndouh lai houig din!"

"Hai," Kex lao see iag bog noh ah nin, "In hoig mōh ndēe hlag ex heui, nu nux ex gah hoig grāi maix hmoung, nbun oud ndaex rom ah nin gah ex: 'Lōng grax in hu gao li ra dien' -- Grax ah noh hoig mōh glong heui, njāo ang noh lai jīx hu grax dīd dix -- ndēe ah noh dan nbrīe kong gon groux ex dīx pung. Ex dōng noh rom glong gog ngo dix njēe nblāong -- Din gog dix yūh nin, dan gog dix yūh nan, hoig gog dix gū si ndāeh. Yūh nin maix jīx dix haog gah rāog hu grax rāeh, dad mgōng lūa dix ndēeih lāig ndaex glong, yūh nin grax rīex ndōd heui. Yūh nin ex dom yōm hu grax līah li haoh, yūh nan ex dom pai yāox dix jīe pung nbrīe in gix!"

"Ah, maix hoig mōh būi goui sōun dīx gaex heui!" Kex lao see dīng ah. "Maix gēd, sin ex hu mgreem rom nang, geem yāox ex dix jīe nbrīe kong oud ndaex rom an gix nang laih?"


"Ex gēd dee yāox nang," Kex lao see iag bog ah nin, "Kom nan, ndaing gīed gian maix, ex ang goui rīang dīng dix sae maix ndaex qee glom dix vīex maix hu braog glong. Sin maix dang hu houig dan, dang qub dix ndaex qee, ex gīed rian hrom hri dix dāing maix ndaex glong sein!"

"Lāoh līe maix!" Kex lao see dīng ah nin. "Kom nan, sin ex jōum mgreem rom sein, gon ang yāox dix jīe nbrīe kong mai, ex dee nbrīe dix lāeh maix dīx nbōg heui! Din maix yūh dix dōng."

"Oh, bō maix yūh nan, bō maix yūh dix yūh nan!" Oud kaix giex yāog dix hu braog glong. Mōi Grax an gix hoig ndaing mīe dix nyāex rom, hoig houig gix braog glong, gix hoig sae rīang dix dou hu nyāex rom.


"Mgāig maix yāox gix ang lai bōun groux heui!" Kex lao see iag ah nin, "Gix ndaing mīe dix ndēeih lāig mgreem rom sein!"

"Mōh heui, maix mgō ex jeeix," Kex lao see dīng ah, "Sin maix ang jū dix mgō ex ex lāeh maix yāox nqom!"

Kaix an, noh qub dix lāig ndaex qee dīng an.

"Nbāox sae si māox ndaex dīx mu, sin ang yūh nan ex ang jīx jōum mgreem rom sein. "Kex lao see ah.

"In maix ang od ki gah," Kex lao see iag bog ah nin, kaix an noh lūg dēei si māox dīng dīx mu, sae noh ndaex qee, hnod mōing qee gaex kaix. Hoig nan, noh dom nteen qee ndaex glong sein, hua la! Kex lao see dīng hoig jōum ndaex rom sein.


"Ex hlad maix ang yāox nbrīe sōg dix pao!" Kex lao see iag ah. Oud kaix kreh nbrīe kong an gix ing gah nyīex.