[Page numbers and section ids (if any) are visible in Mozilla Firefox and other browsers which support CSS2 -- not Internet Explorer]
Nbēen Ba Lāo Dex Ang Qux
Siao dex fu jao krom joux diam
Tian gox qaix jao tud gah lāi rāog
Ndee Līh Lāi Ming Qux Ndaex Yun Nan
Loux Grāi Vēui
Dex ang qux, ndīx ah pu gah, njū Qing dai ah Boung loung gah, nūm in kix ndim gox vu yian hoig jū eix ah Dex ang gah. Ndaex Gox jia eix, Dex ang qux goui ngīe ndaex Seng eix kaing. Mōh būi ndōg goui ndōg oud ndaex Seng eix nang. Reng kou goui ngīe dix hmeen mai ra hreing haoh, rīex oud blag dex houng jou, bu prad dix oud briex Jeng kang, gaeng mīex, loux gix lāig gah ndaex jē mung gao mīan yi qux Vax boung loung yi zi, njao ang jē būi Dex ang qux goui līg lāi, mōh kee nan, dui nbēen ba lāo ba ndēh njū dax njū yīex ang yāox dix diam ndaex lāi grāi ndaex pug lāi si mgang. Nblong een dax hrax ndēh geeing grāi lāo ngīe noh gah nqeeih gah nqai dix kaing, dix njū hoig dix njū doui lāo gah gon brāix dix hmoung. Nbēen gu jē gu jōng ba lāo gon būi, gah jū ngīe lāo noh gah nqeeih gah ngai dix kaing, nbēen ba lāo gah nqeeih gah ngai dix in gix, gah ndaex mglang grāi mglang lāo noh hu, hoig bōun dix nbāox naog noh haoh jē, hoig nbāox gīeh nbāex noh, nqoung noh, mgrūm nāog hmom, hoig līh mōh nbēen goui gaing goui si ndax.
Sōun sang nīad gīeh Ba rāog mai Dex ang qux ra lai dōng līg lāi hmai jei baox dix mai ra lai dōng nbēen een dax grax een geeing jīe dix, yix dom lāeg dom rūah nbēen ba lāo Dex ang qux mai num ndēe gaoh bōi (vō) hruad rom joung qux tud līh gah lai ba rāog giex lāi hox. Mōh sōun ba jīx lāi hox gah mōh nang sōun ba jīx lāi ba rāog, nbēen ba lāo Dex ang qux tud līh gah lāi ba rāog, gāing in dāeg mōh gāing njāeh dix yūh, gah ndaex nbōg yām tud yām yūh noh, ndēe lūd ndēe loui dee haoh dee nīe, rōg nbuan beix blih yi jing ba ngōih log siang ba riang [sic] log kri beix līh. sōun sang goui ndēe hmom gah blag tai ba kraox nbāox ba hmom.
Ndēe Sōg Ngai Lāi
Nbēen lāo Dex ang qux num ndēe gaoh gon būi 1
Num ndēe gaoh bōi (vō) hlaeg rom Dex ang qux 7
A loung kex bēix 10
Mgūah nēix nbeei 49
Māe loui rōng 52
Si vāi mai mōi 56
Dax jung nbrūng mai Na jung blang nbrīex mōi 62
Nbēen Lāo Dex Ang Qux Num Ndēe Gaoh Gon Būi
Gah ndaex njū ndī ndīx, rom dīng rom huan hoig keem bīang hag diex dix nbōg, kaix hoig keem rom gah bīang hag diex, būi hoig mīe hoig yūm uig. Dax si yīex yāox mgrōh mgrong in, dom bloi brie giex nan līh gah bīang hag diex, hmaing giex yūh mēix mouing, gīeh gon būi haoh hun. Giex brie nan uig ndaing gāig gah, ang bōun yūh log lōui dom nqom, grāi dax si yīex, giex ja yūh boud dix mōh brie nan, dax si yīex dom gēd dix jē. An dix ngāix, dax si yīex ah nin gah: "Ex bloi mo njang līa dix sein, pan mo ba hoig dang njiah an giex ndēeih mgob bāox dix yām houig gah jō mgōng, bax jō yūh dix mōh mēix mōuing ox, pan ang ndēeih mgob bāox dix, bax log mōh brie nan." Giex brie nan hoig nbrēi dix gēd ndaex hrom dix, mo ba hoig njiah in giex ang dāe dix jīx ndēeih mgob baox dix dix nbōg gox, kee nan, dom sae loux mai dax si yīex. Dax si yīex bloi mo līh sein, goug nbuan ngīe lai njao mo bāox dix sein, uig yīa ngīe hod bāox dix gah rīeh, houig gah jō mgōng pao, hmoung ngīe ah "nbug" nan dix daix, mo ba hoig dang njiah an lug ndēeih mgob baox dix, giex brie nan ndaing ndaox ndaing am gah, gēd noh mōh ba pan si yīex, giex dom yūh dix mōh mēix mōuing box.
Kaix hoig mōh mēix mōuing ang nbāox goui mīex nkreeng dix, mōuing uig hngei box, giex mēix mouing uig ndaing mgāex hrom gah, gēd dix mōh jāo līang yūh gon būi goui gah bīang hag diex. Mōuing gēih pao. Ba gēih noh bliex ang mōh gon būi ba si mīe giex yāox, ndūx mōh ngīe soug si ngīan kaing, giex mēix mōuing ndaing ndaox ndeing gah, mgrux ngōng dix māong rāo ma rāo mung lōg hmaing gah si yīex. Dax si yīex ngu hrom hmon hri giex, ang jū giex lāex hrom gah, ja mōh sum bax si mīe gah ndaex si nbēem, rian dix blix si ngāix kaix sax. Giex mēix mōuing hod dix yah log loux dom nqom grāi dax si yiex, nbrēi dix sum si mīe gah ndaex diex, bae noh gu si ngāix gu som, si mīe noh nīad dix gūah nīad dix huan. Kaix loui si ngāix, soug si ngīan uig njaeh dix blāeng kaing ndaex diex, uig hnu uig dāi, blix si mgīan dīng ngīe loui mu, si ngīan uig dīng uig huan gu si ngaix, si ngīan an dix mu duih pao, si mēix dix gaex nbun dix gaex līh kaing ndaex si ngīan, giex yang dix dou hu ndēe si ngai, njao mgong njao ngōd, hu blag ndēe pin ndēe si ndōm hag diex, hmaing giex mōh dax ndū yīex līh hox. An dix mu nbāox dūih nang, yam an nyōm si nō mai nyōm nbun grih līh kaing ndaex si ngīan bu haog ndaex si yīex, mīex geeing yāox sang bu hu nbun grih an, dom dēei maox hung piaog nyōi noh gah nblūh līh, nbun grih dom vīex maox giex si nō an dou dāe, giex dou, dou houig gah mgrēng mgōng uig ang lai goui nang goui rāo, giex ra gaex dore laex dix ndēe an, nbun grih ndaing hlog gah maox oud gah nyōi dix an, ja yīan boud oud gah nyōi dix, gīeh mōh maox sang een dix yāox yām hu houig dix ndaex gon būi. Hmaing giex mōh dax līh yīex lūan Dex ang qux. Nbun Dex ang qux dom ih maox gah nyōi dix dom si ngāix. Dex ang qux ba lāoh ba rian dom oud gah mgōng gah lūa dom si ngāix Yām nbāox dūih si ngīan an dix mu nbun grih si nō nbāox līh kaing si ngīan, in pao giex ang lai bōun lūan kaing ndaex dōung ndaex mēng, dom oud gah ndaex dōung ndaex mēng, giex dore ah mōh dix dax ndū yīex līh siam.
Yaox jeng ping jao lao (Dex ang qux)
Siao dex fu jao diam gah lai hox
Tian gox qaix jao tud gah lāi ba rāog
Num Ndēe Gaoh Bōi Hlaeg Rom Dex Ang Qux
Ndīx ndīx, dax vād ba ndaing yūm hrom yūm hri Dex ang qux gah boun saex dīng, vad iag vād dīng gu nyīex vād, hoig doug nyōng grub ku rōg nbuan sōun noh mīex ndīng mox nieh, jān būi ba jīx si ndah si dim [sic **] hoig houig dox noh ih si ndah mīex ndīng mox nieh, vīang raoh nan, hoig goui nūm blag, saex ang nbāox moi bīe jeeix gox. Ja id boud bīang gu kom ngīa dix gah saex. An dix ngaix, rīang dax pa jao ba oud ndaex rāo ma yāox ka dax vād hrom dix gah saex, gah ndaex kix siam kix dix ngāix loui njaeh rom nyā ba lōg gah bīang gaex noh, dax vād uig hmoung kiaong gaex hag diex mīex nyāo kaix. Noh dom nbāox rōg hmaing rīang dax pa jao nbāox njaeh rom nyā ba lōg bīang gaex dix, rung dax pa jao hoig jū ba rōg ba hmaing noh, dom nbāox njaeh bīang noh ra si ngāix. Kaix an, dax vād hoig moi saex pao, gaex hag rung rāo noh hoig om yām aing noh nbāox saex ndia. Sōun sang yūh noh dix dōng grax hoig daoh hoig deem dax pa jao dix kaing grax saex grax yūm, noh dom yūh nbēen goui gah būi jān ba ih lī vād: "Houig kix siam len si dom hlaeg rom gah gah rīang pa jao, būi dom lai pruih rom gai bāox dix, sōun sang pag sang si nkrah nqom saex nqom ngīa ba oud gah gaex gah hag hu nyao, yāox grax nyōm oud si u goui kaix. Dex ang qux dom ih bōi (vō hlaeg rom) gu njū.
A Loung Kex Bēix
Ndīx ndīx, gah ndaex yaong ndēe oud Dex aing qux, goui jao mī dīx gaex, njāo ndaing mī nyīex gix, būi dom sum noh gaex "Na si tai", Rū nyīex gix būi hoig bī om noh.
Nyīex Na si tai goui gon nbun 7 gaex, ba dīng an gix 6 gaex hoig goui mēix, ndeg ngīe gon nkoig ba mgrāng ba hlag an ba ang nbaox goui mēix. Si nō ndaex yaong si nō dang brāix hoig houig hvi gah mīex ndīng mox nieh, baeng siao plu hraong, daeh ding nbīaong hrom hri būi gah mīex ndīng mox nieh, noh nyeeb si vīex nbong toux hyaog ndong dix gah ang hngiad; ah būi leing yō glao yō gah noh mīex ndīng mox, gon ang nbāox quh yūh hrom hri noh blie jeeix jung. Ba nbīaong yūh hrom hri noh mōh loux gon bēix vū vīed vū vīang ndaex yaong an kaing. Yām houig ah gon bēix loux dix gah līab si vīex nyīex gix gu nbōg, Nang gūai (Nang gūai mōh gon nkoig an) hoig līh hrom gah loux nbiex gon bēix, hu gah bēix, gōi si nbeed ngīe gaex hag bēix ba jāox hrom eix gah an, log uig krum rom ngai nbāi rom mēeih gah ndaing jāox hrom gah. Noh rian dox gon bēix an ih rīb ih gīh, gon bēix gah ndaing muih hrom Nang gūai ba hmom hrom an, ja houig lai līng boud gah nbrog nyīex Nang gūai gu si ngāix, gon bēix nai nang gūai hoig līh mōh bāox mēed yūm ndūd yūm ndāi.
Goui dix ngāix, Nang gūai vīex bēix hu som rīb gah braog yaong ndaex bag rīb, Nang gūai mgāig gon bēix an mai ah nin gah noh: "Gon bēix eui! yūh ba dix hrom ex ja jei si mōd boud maix, maix yūh ba dix ang mōh si nō yix Dex ang qux liex?!" Nang gūai eui, jao ba hmom hrom eui, nbuan sōun ba yūh maix ex hoig briex noh ndaex hrom dix hmom hmom, si ngāix kaix ex rīan dix ndēeih bog, nbuan sōun ba yūh maix!" Gon bēix jīx si mgah pao, Nang gūai uig si yaoh ngīe gah dom uig yūm bī dix. Lai nang gūai ndēeih si ndūad kaing yūm bī dix, njōg dix mgāig, gon bēix an hoig līh mōh nyōm si nō ba hlag ba hliao Dex ang qux dix gaex mai ah nin gah noh: "Nbun grih eui, ex ndōg mōh būi, ang mōh beix, vīang mōh nan, ex leix [**] ka hrom dix log bēix, goui dix ngāix sax rīan dix līh mōh būi du dēi, "Nang gūai uig mgāex ngīe nan, puih dix hu blag noh, gōm ngōg si nō an sīed si mgēen [**] kom jīa rom ngai dix. Ndum mox ndum an ang lai yāox si nō ba hlag ba hliao an, ba gom noh mōh bēix ,Nang gūai uig ndaox ndeing gah, gēd noh mōh qaox māox, vīang mōh nan, ba hoig yāox noh gah ngai dix gah hoig mōh nang du dēi, ndouh jīx mōh qaox maox bōun ngāix ndēe mox. Nqom jīx dīeh gon bēix dix uig gīeh ngīe noh nkoing gah; loux ba grāi si nō uig nja luih [**] yūh ndaex hrom ndaex hri noh.
Nang gūai mgaex ngīe nan kom dou ing gah nyīex, grāi mīex geeing dix hmoung mgrah mgrong jē ba dīeh ba ndaox ba am in, mai hmaing dix yūh bāox bēix ling njū ling pan. Lāo geeing noh sang jū, gon lōg gon ah gah noh: "Geem hyoud maix lieh! Mīex haoh si nō hmom ndaex nyīex ndaex yaong, dang brāix dang glong, maix ang muih, yūh ba dix lai hu muih dou sād ang dōng nbēen būi?" Mīex noh bu bi bu bi gaing mai gieh noh gah loux hmom nqom njiad, "Nang gūai eui, ex mgāig dix yāox, gaex hag, ngai nbāoh maix hoig dang ang lai hmom, geem mōh saex maix lieh. Gaong ba hmom mgrāng yūh nan jīx ko mai lag yūh gah mox; Nang gūai ba mgrāng yūh nan jīx ko dix yūh bāox bīe gon bēix. Bōun sax ex log doug nyōng grūb ku, keen pi ,si ngīe ba oud gah gaex gah hag maix hu!" Nang gūai dom ah: "Mīex eui, geeing eui, ang ex saex, ang ex hyoud, gon bēix in mōh bēix si yīex, noh mōh si nō eix Dex ang qux, ......" Geeing yāog dix nbīah gah: "Bō lai grāi! Ba rōg ba hmaing maix in, ex ang ndouh jū dix nbōg gox!" Yām an, kaix hoig nbrīex, grāi aig 6 gaex Na si tai hmoung loux, Na si tai ngēeih ngēeih gaing dix gah, uig nkom hmaing aig 6 gaex bāeh gon bēix yūm. Nang gūai hmoung ah sang bāeh gon bēix yūm, uig yīam rīag yīam yō ah: "Ang bōun bāeh! Ang bōun bāeh! pan beix bāeh gon bēix yūm, ex gah ang lai glōd gah bīang hag diex? "Na si tai giex mēix mōuing uig su sag hrom gah Nang gūai sang bāeh gon bēix an, hlad nang gon nbun dix yūm, dom ang lai jū aig 6 gaex peed gon bēix.
Nang gūai ang lai nyāex rom som eeb, ja nog hmaing boud mīex geeing dix jū, mīex geeing gah ang ndouh jū. Si ngāix kaix, būi yaong hoig dōng goui gāing ndaox gāing am gah nyīex Na si tai. Maix ah mōh in, noh ah mōh an, loux blai hoig qu qa ngīe gu ndāog gu ndīem [**], dix nblah ah mōh Nang gūai ba si ngīe, dix nblah hmaing mōh yaong Dex aing qux ba sang yāox grax lāex grax leeing; dix nblah hmaing gon bēix an mōh si ngīe mōh pi, ...... Na si tai ba mōh gūad nyīex si mīang yaong an meed hrom nang gah, gāig nang gah, gah ndaex yām ang noh lai dōng gah sang gēd dix, aig 6 gaex dam hmaing noh bāeh Nang gūai mai gon bēix an hoig dix ih, nyīex yaong dāeg ang lai yāox grax lāex grax leeing gah, dom daeg bōun ndēeih breed grax hoig sā lāo būi Na si tai. Na si tai giex mēix mōuing ang bōun sae hrom dix bāeh gon nbun dix, sōun sang toux nqeeih nqai būi hun būi haoh, Na si tai dom nkre [** cf. nkree] Nang gūai dou kaing yaong. Noh ah nin gah nang gūai, "Mōh kee jē ba rōg ba hmaing maix, mōh jē ba ndaox ba am eix gah, nbrīe muih hrom maix dou sād an, vīex noh hu oud dīag si mēeig braog yaong kaing? ang nyāng hmoung loux luah mgōng mung jīe maix, ang bōun dix log dang houig gah yaong ox! Lāo Nang gūai sang yīam, bliex [**] nīe mgāex nan gah. Kaix hoig grūb noh mīex geeing dix, yāog dix vīex hraong ba ndaing muih noh an līh kaing nyīex, gon bēix yāog dix līed daix noh mai hod hu mai noh blag brāix.
Houig gah ndaex dīag si mēeig, Nang gūai mgāig nqom yian dīag an, yāog nyah dix ngōm bīang diex mai si nbeed gon bēix gah daix dix, uig krum rom ngai nbāi rom mēeih, in pao, gon bēix uig ndēeih si mgah pao, ah: "Nang gūai eui, mōh sōun ex, gīeh maix yāox grax dūg grax ka njāo, vī ang mōh nan, maix bō ndouh lāex hrom, ex log rōg hmaing gah būx gei eix "Gex nang" (jao mgōng jao lūa) ha gix mgaih bōun deem eix nkre [** cf. nkree] ba jāox ba jāig hu. "Gon bēix mgrux ngōng dāong daix dix blag dīag si mēeig, goug bao goug yō jao mgōng jao lūa deem jōi, kaix hoig goug bao goug yō noh, nyīex oux oud. Dex ang qux lug uig līh njūng nqug [**] gah ndaex dīag yian an dix hlang. Nang gūai mai gon bēix ndaing mgāex hrom gah dēi dēi, giex lāig dix mgāig, laeh ngū, paex jīang hoig goui ndaex, mgaox, o guih ......, kin gix mōh ba deem būx gei eix Gex nang.
kaix hoig līh giex kaing yaong bōun si ngaix ndaex bōun ngōb jāo jāo, nkom hmoung loux luah mgōng mōng nyīex Na si tai pao. Nang gūai grāi hu dix gah gon bēix, houig gah mōuing si vīex vēing yaong blag brāix. Na si tai hmaing nyīex gix grāi noh hmoung: "Yām in mīex geeing maix sang ih nīex gax kri, gon bēix mai aig 6 gaex jō hu sōg houig ra mu dox gix ih, pan gon bēix ang bōun gax kri, ang jū maix oud mai, "Nang gūai ndēeih houig dīag si mēeig, grāi gon bēix hmoung loux dom nqom grāi mīex geeing dix. Gon bēix ah nin gah noh: "Nang gūai eui, bō maix ndouh ki gah, pan rom muih ax mōh ling njū, ex rīan dix bōun sōg gax kri m Ba sax maix gaoh yūh brīex ngōb jāo jāo, ex sang gōung noh gah būx gei eix" Ga luing "hmaing noh deem jōi eix." Si ngāix kaix, gon bēix hu blag ndaex glong, kiux ko [** cf. kioux ko] rōg hmaing noh gah "Ga luing! Ga luing eui!" Na si tai ba raex hrom ba ang hmom hrom an sang dang ndiah [**] yāx nang gūai dang hu, tux ex sōg gax kri dox gah dix, rōg nbuan sōun maix deem ex jeeix! Loux njiad dāeg hoig grāi dix, gax dīng nyāo ra mu uig līh goui ndaex nyīex oux an. Nang gūai bāeh gax, yūh sa gah dix gloung, yūh rom hreeb gah dix gloung, ndīag dix gloung mai gax ba ang nbāox bāeh an dix mu dox dāe noh gah mīex geeing dix. Na si tai giex mēix mōuing ndaing ndaox am gah dēi dei, mīex gax kri dīng yūh nin, uig gīeh giex mēix mouing jō rom mia rom mung gah nqom npong nēix gax, nyah dix ngōm nkom yāog dix ih. Yām an, aig 6 gaex vū vīed ngīe daix lang njīang daix yī dix houig kaing, grāi ang bōun gax gah Na si tai. Na si tai ah gah: "Beix jūb būi ba ndaox o in gix, blaex ngīe dix mōh būi, gon ang nyāng keed bēix saex an, beix mgāig yaox, gax ba bōun mgiex gix goui mīex ndīng, nēix gax yūh gix peix dix nyōm npong yūh nin!" Aig 6 gaex gāig nang gah ndāox nang gah, kaix hoig nāox Na si tai jāox dix, aig 6 gaex uig lāig nkrang dix ih nēix gax ba ndeg an. Bēix mai Nang gūai hoig bēix noh pao. Vīang mōh nan, aig 6 gaex nīe uig gōuing koi gah gix. Aig dīng qeeh loux [** cf. qeh loux] gah Na si tai ah: "baox ba hmom ex eui, ia si mēix jīe maix an ndaing hai gah yūh, ba sax hmaing giex yīex ia houig si yūh bāox, pan gix ang bēix, eix gah jīx dix yūh gix!" Na si tai mōh sōun sang gīeh noh Nang gūai pai bōun dang hu kaing gon bēix, dom jū loux ba dom nqom ba grāi krei dīng. Hmaing giex nang gūai yīex ia houig.
Nang gūai ah nin gah gon bēix: "ax uig houd yūh nin, bīe haeg ia dix mgong ang goui, hu dēei ia si mēix ndēe mox!" gon bēix gah uig saex gaing saex gab gah sōg ia si mēix, gon bēix nbrēi dix gēd, uig līh mgāex ngīe mai ah: "Līh gēd ex noh dix jē pao, ex hu rōg hmaing gah Sam būx gei eix ba gāex [sic] lāng dāx!" (Lang dax mōh sim feng huang, būi hmaing noh mōh si mung sim) ,Noh uig nkom līh kaing nyīex oux, ah nin gah lang dax: "lang dax eui, sam būx gei muih ex eui, ex mōh būx maix kex bēix, Na si tai ba qi hnyae an hmaing ex sōg ia si meix gieh yūh si laih mai ia si mēix gix, pan ex bēix dom dāeg ang lai gīeh Nang gūai hu kaing ex, yām in, lāo sang goui ia, bīe haeg dix mgong ang goui, vīex ba dix houig si laih mai ia jie noh box? Lang dax ba hmom hrom eui, rōg nbuan maix deem ex jeeix!" Giex njūn boud, njūn boud! njūn noh dom uig houig mgrēng som, lang dax ba oud ndaex dīag ndaex lēg [**] an uig bu houig, haeg ba song si ngī log kri an uig lug lag ngīe ndaex bōun som ba hvaig, loux uig aox ngīe ndaex bōun som ba yōg ba yian an, hoig sou hoig haing yūh jān sim saig lai gung ba oud ndaex dīag ndaex dū uig heui. Noh ja bu boud, bu houig dom nyīex oux oud gon bēix giex Nang gūai, dīeh dix līh mōh gon ia si mēix grōx ngīe mai lang ngōg dix dix mu, haeg gah ang nbāox mgrūm gūah. Nang gūai mgāig noh, hrom uig lāex ngīe gah, vung mōh nan, noh gēd, lang dax rīan dix bēix, hrom noh hoig gaex joung log rom muih giex gon bēix yūh nan.
Brāix uig rung pao, blaig gon ia ndaex mgrāe, nang gūai mgiang noh hu gah ndaex bag ndēe si laih ia. Būi ba mgāig si laih ia uig jūng si nbūa ngīe gah ndaex bag nyīex Na si tai. Yām houig nang gūai gah ndaex bag, yāox būi mōh ia grōx ia lang ngōg ia ang nbāox mgrūm gūah haeg yūh nan, būi uig ki gah dang noh gu gaex. Būi dix nblah uig vu vīed ngīe gaing gab dix gah, dix nbLah nbrīex gēd nin, nang gūai rīan dix ang bēix. Na si tai mai krei 6 gaex ngai uig haing ngīe, gēd dix bēix, sōun sang yūh gix dix pai bēix, uig nīad dix grāi būi hmoung si laih ia uig njāeh dix pao.
Ia si mēix ba dīng ba vāo jīe nyīex Na si tai, yāox uig bloi nang gūai ia si mēix ba nbēh, ba iag an līh, uig nkom dāing dix gah, gēd dix sang dud [**] yūm ndum mox ndum an. Gon ia nbēh ia nbrai an, blaig njēe blaig nblāong dix, pai ngīe nan vēui mgāoh ia dīng ia vāo an, hoig si laih noh hreeng nyāo, ia si mēix dīng vāo an gon ang nyāng nbāox bēix. Yām an, būi ba mgāig ba gia, loux uig si nqu ngīe pao. Ndum mox ndum an, gon ia yāog dix hlaong hlaong, hoig līh dīeh dix mōh sim feng huang ba hmom ba mgrāng nan dix mu, si nblad [** cf. si nblab] dix gah ia si mēix dīng an log hu dēi yūh nan, dud [**] si mgōui ba dīng ba raoh an kom ndīg bruig noh gah jāong ra kon an, gīeh ngīe nyīex Na si tai hmoung loux rīag ia si mēix dīng an kaing. Būi hun būi haoh uig yāog loux bao loux yō dix sōun in, ndaox ndeing gah. Nang gūai gah uig ndaox am gāh jē ba jīx dīeh jīx louh an, yāox ngīe nba rom ngai gah ngai gah nbāoh gah mgāex hrom hri dix. Nā si tai yāox yūh nin, uig yaoh ngīe gah, krei 6 gaex uig meed hrom gah gāig dix, sae loux dix kian ngīe, ang jū būi lai groh [**] lai yō mai hmaing nang gūai houig yūh si laih mōi ba sax. Nbāox yūh grax dēg grax ka gah nang gūai.
Nang gūai houig gah nyīex, gon bēix yāox uig vōi ngīe noh nan, geem qog noh: "Geem ang eix bēix lieh?" "Ang, eix hoig bēix noh, būx gei eix lang dax hoig mgiang ia si mēix dīng jīe gix hu. Aig 6 gaex ndūx hmaing eix yūh si laih mōi ba sax, eix sang hu sōg box in ndēe mox?" Nang gūai uig ki ngīe kom ah nin. Gon bēix ngū hrom nang gūai ang jū noh ki, ex log hu sōg.
Houig mgrēng som, gon bēix yāog dix hu kaing nyīex, houig gah bīang mgōng dix mu, kaix hoig nqan noh diex gah jāong dix 3 daix, noh ah: " Māx dax vāi eui, māx dax vāi eui! Sai būx gei ba nbrax ba vāo ex eui, ex vīang nbrax vīang vāo, ang nyāng dīng rīang om maix, krei 6 gaex nyīex Na si tai tux kin ex vīex mōi yūh si laih mai gix ba sax, lāo ex sang goui mōi, bīe haeg dix mgong ang goui, rōg nbuan maix deem ex jeeix!" Njūn dix vūd, si vai brēeih si vāi gouh gu gaoh kaing ndaex dīag kaox lug houig dix mu, ah nin gah gon bēix: "Būx aig eui, maix dug ex hu ih mōi dēed nyīex Na si tai ba sax!" Hoig ah nan, si vai dīeh dix mōh mōi grōx mōi hrao yūh nan dix mu, mgāig nqom grōx nqom hrao bīe npaeng gah log ba sang bōun plu mgōuih nan. Ia līang ux pao, gon bēix nīad ho mōi ing gah nyīex. Nang gūai ba ang nbāox lāig id ling som an, hmoung loux luah jāong gon bēix, uig nīad dix līh kaing nyīex oux gūan rīeb houig noh. Yām yāox noh mōh mōi grōx mōi hrao yūh nin kaing, noh hoig ndaing vōi hrom gah, vīang mōh gox nan, lai noh ndēeih gēd yām si yūh ia bāox dix gox, hoig gīeh noh ndēeih goui hrom gah.
Brāix dāeg kraox rīang, Nang gūai dug mōi grōx mōi deed ngōng an houig gah ndaex bag si yūh. Yām yāox būi dug noh mōi grōx mōi hrao mōi deed ngōng yūh nin houig, nbāox gieh nang būi siah hrom dang dix uig. Nang gūai ang nyei ang nyux, ang gūang loux ngīah loux sā būi dix, noh blaig mōi lāig ndaex bag si laih, mōi uig yāng dix nka ah "oih, oih" nan kom ang lai goui rīang goui rāo gah grōx gah hrao dix, gīeh ngīe būi uig ngīah ah "ha ha" nan gah loux nka dix. Mōi dang dīng nyīex Na si tai, mgāig dīng gluing yūh nan, dee goui nbēen 900 gīn haoh, pan gīd nba noh, būi si mgrong noh ra gaex gon yūh lūng noh. Mgao noh uig lom lei dīng ngīe, om gon mgōng yūh nan dix mu, noh yāox houig mōi grōx mōi hrao an yūh nan ndaex bag, ngai uig raoh ngīe gah, yāog dix plu pliah [**] npom mēeih dix uig qu yūh pong diex pong dūg ndaex bag. Ngōg noh uig lu lī ngīe log sōng nan, puih dix gah mōi grōx gōi si vaeg [**] ngīe noh gah gaing dix, uig si vūad mōi grōx mōi hrao an bru dix dob haoh. Nyīex na si tai nkom nyīex uig mgāex ngīe nan, uig ndīeh būi daix dix ah hmom. Vīang mōh gox nan, ba ndīeh daix ah hmom an gix mōh ngīe bāox mēed bāox dōng gix kaing, līh kaing an, ang mōd dix deem gix ndīeh daix ah hmom. Bliex ah: "Bō qaox dix louh hrom yūh nan, gox ia lag ih ia dīng, in si ngāix ang jīx ah nbāox gon mōh mōi grōx mōi hrao ba beix mōi dīng mōi gluing. Krei 6 gaex hmoung ah gix loux ah nin, ndaing jāox ndaing meed hrom gah, dēei kaox nbuad si vīed būi ba ah loux yūh nin gah. Ang jū būi ah loux dāng nang gūai, mōh kee nin, gon būi ndaing meed hrom gah, mōi ba gluing ba nbrax oud ndaex bag gah gon si yūh boud; mōi grōx mōi hrao an puih njēe dāing nblāong dix, uig nkeen laeh kom mgō gaex dix, oud blag ngai vai blag grei. Yām uig yāox noh ang rung mōi gluing lai goui, yāog dix dum gah eeg mōi gluing. Ang dōng geem yūh gah mox, mōi grōx mōi hrao an peix dix dīng rung yūh nan, noh sae rung dix jah mōi gluing an gah rung dix, ox nan dix mgūm yāog dix njao gōg dou blag līah yaong. Gon būi nyīex būi yaong uig yaoh ngīe gah dom uig dang dou dix gaex dix ndāog, nang gūai nīad jiu yām mu mī mu mā būi, nīad dix dou ing gah nyīex, gōm gon bēix mgāex nan kom ah: "Eix nbāox bēix noh pao!"
Nbōg yām uig pai ngīe log kiab jō nan, kaix gīeh mōi yūh si laih, dix kiab ngai kaing hoig goui 6 ngāix, nang gūai ang nbāox hmoung, loux luah mgōng mōng nyīex na si tai qi hnyae an. Gah ndaex 7 ngāix mgōng mōng ba grāi loux nbāox luah pao. Kaix mōh boud aig 6 gaex ba nbāox hmaing na si tai bāeh nang gūai mai gon bēix yūm. Ba ah gix, hmaing gon bēix om aig 6 gaex, ndaex 7 si ngāix sum nyīex kraox ba groux gah hrom Na si tai dix hlang, pan gon bēix ang bōun na si tai ang yēng noh mōh krei dix, pan ang mōh nan jō dix bāeh gon bēix mai nang gūai yūm dāe.
Hoig bloi loux in līh, krei 6 gaex, sōun sang yūh dix bēix gon bēix mai nang gūai, hoig goug hoig krom jāng māi ao min houig, hoig krei kaox nyīex mgrūm ngīe, nqi, nqaig jān grāeng siao hoig mgrūm uig, houig ndaex 7 si ngāix sang sum roung njūng nyīex hoig Gon bēix mai nang gūai, nqaig ang goui, moui ang goui, ang goui māe kri dix goug jāng māi houig deem dix yūh. Kaix mōh nan, gon bēix ndouh ah mōh jīx sum nyīex. Uig houig ndaex 6 ngaix blag nbōu, gon ang nbāox bōun līh gēd gah sang yūh noh, bīe roung gah ang goui dix mgong, lad ang goui bīe dix nbāex, Houig yām uig sang hvaig brāix, gon bēix uig līh ged ngāox būx gei eix Kun si ga (si yīex) noh yāog gaing dix mgong rāo ma, kaix hoig ah noh "miex miex" nan ra mgūm, kun si ga eui, kun si ga! Būx gei ba hmom ex eui, mōh ngīe maix ba jīx gīeh brāix glong hmom kaing, ex qa joix [**] kaing ndēix bī om maix. Na si tai hmaing ex hoig yūh nyīex hmom ba sax dix hlang, geem dāeg yēng ex mōh krei dix kaix, pan ang mōh nan, sang bāeh ex mai nang gūai yūm, pan maix gēd rom muih yax mōh du dēi, rōg nbuan maix deem ex luad lūan kaing ndūng raex ndaex nū joix!" Kaix hoig ah nan, noh ndēeih ing gah nyīex, giex nang gūai ja ndāong boud ngai dix gah kun si ga, si mīe noh deem jōi dix. Giex ja njūn boud, njūn dom houig mgrēng som, ang nbāox hmoung houig mōd dix, uig ki ngīe gah. Nang gūai hmon hrom gon bēix ah nin, "pan kun si ga ang bōun deem jōi eix, kaix haig yūm ex, ex sang dīeh dix mōh ndūng rom dix mu, si mīe maix dīeh dix līh mōh gax kri dix mu oud ndaex ndang rom ling njū ling pan, ax ang jīx dang hu ling njū ling pan." Gon bēix yāog dix ah, "pan lug houig ndiang an, ex jēn si mīe maix dīeh dix līh mōh gaong ba hmom mgrēng an dix mu, ex log dīeh dix līh mōh kaox hleig ba ndaing muih hrom eix Dex ang qux dix mgō, maix dum laex dix gah bīang gag kaox in ling njū ling pan sax", ...... Njiad mōh yām daeg po giex loux in gix, loux duih saih aox ngīe ndaex rāo ma ndum mox ndum an, hoig, jax loux ba sang gēd giex dix mōh jē in jē an si ngāix kaix, saih ja gon duih si nūm boud, līh hliex dīng, loux duih saih nīe oud nīe kian.
Houig rom huan pao, loux aox rom uig si nūm ngīe, hoig keem hoig mgud loux mgōng mōng yaong dīng mai loux kiad loux yō būi nyīex būi yaong. Kaix an dix ngōb, loux duih saih uig yōg uig yian pao, hliex gab uig bluad dix pao, loux mgrāox rom huan gah uig gōi oud gōi mgrai hu pao, sim uing gah bāing ngīe ndaex rāo ma rāo mung. Hliex dīng npaeng dīng ba houig si njāox in, gon bēix mai nang gūai yōg yian dix gēd ndaex hrom ndaex hri dix. Nang gūai ja seeih [** cf. seeh] boud kix ba oud ndaex laeh ngū an, ngū ba rung an goug nqan ngai nbāoh ba hmom mgrāng an, kaix an dix vūd, brāix rīang, sim saig gah uig nyei pao, blag daoh uig njāeh dix bāing, ndaex yaong ia gah uig nkoig dix ux, jān mgrōh mgrong in gix uig mōh grai jē ba sang houig si ngāix kaix sax. Loux ia loux sim uig gīeh nang gūai ba yōg ba yian dix gēd laing gah dix. Yām vai noh ngai dix si mī gon bēix ba mom dix id līah ngū an, uig gīeh ngīe noh ndaing yaoh ndaing am gah Gon bēix an, hoig dieh dix līh mōh si nō ndaing mgrāng ndaing hmom dix gaex, ngōm gah līah ngū. Noh ih log gaing bāing, in mōh grāi grax rom muih si ngēih si ngax yūh nin; vīen si yuh kouig glāi gah nyōi dix, in mōh grāi rom muih ndūd rom muih ndāi giex mai bāox dix; gōg vāig ba hmom dix mag, in mōh grāi hrom ba ang hlad ang mgrāeng gah jē ba nū; grāeng māe ba lu lag sang si ngī an, in mōh grāi hrom hmom hrom rāeh giex. Noh uig mgāex ngīe mai ah: "A loung kex bēix" gōm noh sīed si mgēen [**] kom ra kon daix, jīa rom ngai nbāi rom mēeih kom hmaing noh yūh dix mōh būi lāoh būi rian ling njū ling pan. A loung ngu hrom hri noh ah: "Bō maix ki gah, Nang gūai ba hmom ex eui, grax ba muih ba hrom maix ex bēn lug jēn dix dēi, ex ang lai mōh bēix ling njū ling pang yūh dix mōh būi dēi dēi dēi lāi, oud mai maix ling njū ling pan."
Giex nīe grāi nīe mgāex hrom gah, hoig bī om jē ba nū ba ka ba sang houig bīang gaing dix si ngāix kaix uig, hrom uig gēd ngīe rom muih ndūd rom muih ndāi an kaing. Rīang su sai uig lu lag ngīe braog si yīex blag brāix ndum mox ndum an, hoig nqan nyīex oux rīang ngīe. Giex ra gaex nkom hu mgāig braog si vīex, grax dīng grax vīeh hoig līh goui mai ngai giex dix nyāing, a loung kex bēix ah nin gah Nang gūai: "in rīan dix mōh ngāox būx gei eix ba houig dix deem jōi eix, nyīex jīe eix rīan dix jīx yūh hmom."
Brāix hoig rīang dīng pao, nang gūai mai a loung kex bēix vīex daex vīex eeb ba sang dox mīex geeing dix ih, long grax dīng grax vīeh grax rīang an hu gah nyīex Na si tai yaong dīng. Yam dāeg houig giex si vīex vēing yaong, yāox goui nyīex hmom nyīex dīng gah dāoh grax dix hlang, nqan si ngāix noh uig song si ngī ngīe. Būi mgāig noh si nbūa ngīe kom nbun kom si mēix, būi ah hmom gu gaex. Dix nblah hraing bēix as mōh bēix si yīex; dix nblah hmaing mōh si yīex ba deem ba jōi gix. Na si lei giex mēix mōuing uig saex gi ngai nbāoh gah, giex vīang mōh guad nyīex gūad yaong ndaex yaong Dex ang qux, vīang mōh jao mī jao hmag hoig ao min gu si ndāeh, yāox giex nyīex hmom nyīex hlaong, nyīex ndaox nyīex am eix gah, dāeg mōh ngīe nbōg in kaing. Na si tai yaoh nang gah, goui hrom gēd nang gah, ba yaoh noh gah mōh, kao mōh ngī e būi yūh nan ang bōun yūh ox; ba haoh hrom gēd noh gah mōh, gon bēix ang dāe mōh bēix du dei. deed lai mōh bēix si yīex euih. Yām an, Nang gūai mai A loung kex bēix houig mgrūx ngōng dāong daix dix mai vēui ngai Na si tai giex mēix mōuing, yāog dix ah mīex geeing, nan kom ra gaex, gāog eeb dox noh gah na si tai. Na si tai uig ndaox ngīe gah mai yāog dix qog A loung ke bēix ba hlag ba hliao an ah: "Mōh noh būi mox?!" Nang gūai ngīah um ngīe gah mai grāi noh, noh uig mōh gon bēix ba muih ba hrom ex heui ba mōh A loung kex bēix!" A liex! Geem mōh noh gon bēix lieh?" Na si tai giex mēix mōuing ndēeih uig ja bēed ngīe gah yaoh dix gah. A loung kex bēih dom njōg dix gōi hu ndēix giex mai ah: "Mōh heui, ex uig mōh gon bēix ba sang bāeh sang blaex beix vēui an ndīx. Ex ndōg mōh būi, mōh ngīe sōun sang sōg ex dix bōun mōuing nbun grih ba rāeh hrom hmom hri an dom dīeh dix mōh gon bēix ang goui mīex ang goui geeing vū vied vu vīang gu si ndāeh dix mu, ex hoig nblēeih [** cf. nbleeih] bōun ndāog jāong ma, hoig houig gah yaong mīex yaong mox nieh, būi hoig dog hoig nkre ex, hu mīex nbōg mox nieh, mōh ngīe nang gūai nbun grih in ba ndaing hmom hrom, ngai noh ndaing rīang, noh hoig si nbub [**] grax ka grax qe hrom mīex ndīng mox nieh, hrom hri noh ja gon lu lag song si ngī boud log māe log kri yūh nan, ex hoig ndaing mgāex hrom gah ba rāeh ba sēe jīe noh heui, dāeg hoig ndēeih līh mōh būi bōun nbou gox, ex hoig dax hrom jīe dix gah noh, "Kaix hoig hmoung Na si tai noh, dāeg dōng noh, nkom hu dug daix A loung kex bēix, uig gāig ngīe mai ah: "A liex! Kaix mōh nin, krei ba hmom ex in! mōh kee dīeh maix dix mōh bēix, ex dom ah mōh maix si ngīe pi jāox pi jāig njao, sōun ang lai sang gīeh gon nbun ex Nang gūai yaox grax lāex grax sōum, ex lug hoig hmaing krei 6 gaex yūh grax ka hrom ka hri gah beix hnaox, ......" Njūn dix jū, Na si tai nbāox ah, "Gox bōun nbōu līh hliex huan rom hoig nbax roung n yīex roung ma ba een aig 6 gaex hu bag ngīe, roung nyīex roung ma nbrīe gon goui gox, nyīex ba sum gix gah ang dāe ndouh hmom log nyīex ba sum bax yūh ran!" Yām an, aig 6 gaex uig houig kom vōi dix kaing, yōg ngīe hyaog dix hngiad loux yō baox A loung kex bēix kaing, hrom gōuing hrom koi nīe uig nīad dix līh pao, A loung kex beix dom ah nin gah baox mīex dix: "Nyīex ba hmaing beix mīex geeing ex yūh, ngāox būx gei ex kun si ga deem jōi ex, ex hoig sum noh pao, rōg nbuan beix mīex geeing dix lāig mgāig qaox, ko ang ko gah hrom beix, pan ko; gah hrom beix, beix lāig oud ndaex heui," Yām lāig Na si tai giex meix mouing ndaex nyīex kraox, rīang su sai si ngī ba saex gi yūh ngai giex, uig gīeh ngīe giex ang lai bōun nblaih ngai dix; rīang pa jao ba yūh gix bāe si vīex ra gaex nqom nblīan ngai nbāoh dix si yaoh ngīe yūh hroih hri giex mēix mōuing. Na si tai dom ah: "Ang siao lai lāig ndaex! ang siao lai lāig ndaex! Nyīex ba hmom yūh nin ang eix sax yāox, pan eix oud ndaex nyīex yūh nin dee gīeh ngai eix ndūg gah." Mīex ah: "eix lug ang bōun oud gah yīex in, bax krei nkoig mai nang gūai oud gah heui!" Yām an, krei 6 gaex lo loux ah nin gah A loung kex bēix: "Soun sang gīeh bax bēix bōun mai yāox grax nyōm oud si u goui, ba sax eix hu yūh si laih rē gah ndaex rom dīng lieh? A loung kex bēix uig nkom ah hmom nan gah loux gix.
Si ngāix kaix, būi ba mgāig si laih rē uig nāog si nbūa ngīe gah braog rom dīng, loux groh [**] loux yō būi uig si aox ngīe ndaex mgōng ndaex ngōd dām uig vai A loung kex bēix rē jīe dix houig gah si mgrēng rom, krei 6 gaex uig vīex rē jīe dix lai lōm rē jē A loung kex bēix, aig dīng ba mōh mēix yeix, mgiex mgong oux mai ah nin: "In si ngāix ex mgāig bax pi si ngīe an giex, geem gēd bax dix sang bōun dou blag mox pao!" Hoig ah nan, gix aig 6 gaex nyon dāe mgong oux gah A loung kex bēix mai nang gūai, Na si tai giex mēix mōuing mai jān būi ba oud braog rom uig saig hrom gah mgrōh ba yāox A loung kex bēix, giex nang gūai. A loung kex bēix rīan nang nang gūai, mgiex nang kaox sae rīang rāo dix gūan dīe ba yūh gix, ndaex rom uig loug ndum mox ndum an pao, rom loug uig qu ndaex rāo ma rāo mung, teen rē jīe A loung kex bēix houig gah braog rom, si nīag rom dīng hoig bu bliag hoig keem rē jīe krei 6 gaex kom 6 mu, ang lai yāox nplian bīe jeeix. A loung kex bēix houig gah līab rom blag rāog, būi hoig si nūm si nbūa ngīe mai giex, qog giex, geem mōh gaing ba dix yūh nin. A loung kex bēix dom ah: "Aig 6 gaex bīe hlein mglo nyō, hmaing ex houig soi laih rē, sang yūh ex mai nang gūai yūm. Lōug būx gei eix (Lōug mōh si yōng) roi pai houig deem ex, dāeg bōun gīeh yax yāox grax glōd!" Na si tai mgāex ngīe dom uig krum rom ngai dix, dug daix A loung kex bēix hu blag oud jūb būi pung ba mgāig mai gon nbāox joux grāi lāo brāi hmoung: "Njāeh in si ngāix, A loung kex beix Kun ndaex yaong"! (guad nyīex si mīang yaong) ndaex yaong ding Dex ang qux heui. Loux kiad loux yō būi hun būi haoh uig aox ndaex mgōng ndaex lūa.
Mgūah Nēix Nbeei
Ndīx ndīx, goui būi ra gaex hag bāox dix hu gaeng nbeei ndaex dīag, giex gaeng nbeei ling ngāix, bōun gaeng nbeei loui mu. Giex gēd sang mgūah si ndū dang ing kaix, bīang mōh nan, nbeei loui mu mgūah goui ra sōun gīeh si ndū sang mgūah yūh gah mox? Būi ra gaex mgūah noh, brāix gox uig sang hvaig ang nbāox dōng gah sang mgūah noh, meng ngīe nblīex nbeei hoig yūm an kaing. Yām an, būi njō houig dix gaex, qog giex Brāix uig sang hvaig bax ja gon oud boud ndēe in yūh ba dix? Giex dom ah: "Nbeei loui mu mgūah goui ra sōun, mgūah yūh gah mox ja gon hlee boud dix mu, yax ja gon gēd boud gah sang mgūah nbeei si ndū, bīang mōh nan, ja gon ang nyāng dōng gah sang mgūah noh. Būi njō an uig ngīah ngīe gah. Dom mgō giex mgūah si ndū, noh yāog dix dox nbeei gah giex dix gaex dix mu, ba ndeg an dix mu noh vīex noh ing. Giex ra gaex yāox hoig uig nbeei loui mu bīang diex an, uig mgāex ngīe mai goug jī būi njō ba hoig ing lūan an ah nin: "Lug ndaing hlag gō an!"
Māe Loui Rōng
Ndīx ndīx, goui būi loui gaex, houd nang nīeh nang, ang hu yūh dix ih gāing nqo, dōng ngīe vū vīed vu vīang dix gu si ngāix. Lu hlia dix ling kix ling nūm. Houd dom uig ang lai goui ba ih, ih dix nbrīe sōg dix nbrīe, būi nyīex būi yaong grāi noh hmoung, hmaing noh tai loux joux hrom dix, yūh dix ih gāing nqo hmom hmom, dang ih rīang tao dix, vīang mōh gox nan, nqeeih ba hoig mēed ih brīex nyōm an, jāong ba hoig mēed dou njēe nblāong an, ang rōd jū loux gieh būi, ja gon vu vīed vu vīang njēe nblāong, būi iag būi dīng uig gōuing ngīe gah nkom yaong.
Goui dix nbōg, uig ndēix houig nbōg yām sang ih būi vō, būi uig krei brīex brēem ba sang ih mai vō, gix loui gaex gah hoig dōng nang gouing [** cf. gōuing] būi gah dix uig, gix dom po dix hu sōg yūh gāing ndaex vēing ndaex jēi, bōun māe jeeix jung roi līag blai nēix houig, nbrēi dix ih nang vō hmom hmom om būi yūh nan.
Gix houig ndaex vēing ndaex jēi hoig yūh gāing ra loui si ngāix, ang lai bōun kad bōun kam saex nēix saex non dix gah yūh gāing, ang lai yūh. Māe rīang dāeg gix ndaex ra loui si ngāix, kom uig mōh ngīe loui rōng. Gix būi loui gaex gah hoig dang sang yūh si ngīe gah bāox dix, gēd dix sang bōun jīe māe noung noung. Jiax [**] mai yix gēd sang yūh bing yūm (jiax, yix bing) mōh gaex gix, dom yūh dāe, giex hmaing bing groux dix gah ndaex nyīex, pax mai yix hu līag blai ndaex vēing houig dix gong, giex sae si ndah ob ndaex blai, gēd sang gīeh bing nyāex vēui gīeh noh yūm. Bing ba raex hrom an mōh sōun sang; gēd noh dix bōun māe loui rōng, gah līh gēd nang gah sang yūh giex, noh hoig krei moui lōm nan dix māg, moux dix līah grax sang ing jiax mai yix. Jiax mai yix līag blai ing, houig ndēe in, bing yāog dix houig blag giex, nyon moui gah giex ra gaex, jiax mai yix hoig yūm. Bing hoig bēix noh pao, māe loui rōng hoig mōh jīe noh pao, noh dēei māe loui rōng ba uig gēd noh ndaex hrom ndaex hri dix ling ngāix ling som an kom ngīah dix. Noh uig mgāex ngīe dix sud gong blai jōd bīang diex ang nbāox max an kom nkud blai, uig lāig blai ndaex vāig sein, uig nkom hmoung saex grāeng vāig grāeng dū dix log ba sang ndūd yūh nan, mai līh hnam kaing, kaix an, uig ja bēed ngīe līah jiax yix ba hoig yam an, gaex hag uig līh lūng ngīe ndum mox ndum an, ja gon nqob boud māe loui rōng an ndaex daix dix.
Si Vāi Mai Mōi
Ndīx ndīx, nbōg yām hoig ndaing hreeng, dīd dix ngāix, si vāi dix mu hoig sag, noh līh kaing ndēe oud dix, jō dix si ndaeh mōi gah līah hnong dix mu. Noh qog nyōi, yūh ba dix maix peix dix nkeen rom laeh rom lee yūh nan, mōi ah deem jao dix tai. Si vāi uig hngeeig [**] ngīe gah kom ah: "Ah yēeih, mōi bāox gei eui! Gaex maix goui ndīng ndōd, rīang maix dīng yūh nin, gah gaing maix gon goui nang rung lang rung gian rung lōm an, mgaih gon jīx deem būi ba iag ba līad [**] an tai, ben [**] lūg ang ko euih! yūh ba dix ang dēed noh yūm, dang nyōm oud nyōm goui dix ih kaix! Mōi dom ah: "Būi mōh jao ex, noh sum ex ih gōg njōg ex oud nyīex, ang gīeh ex si gāong si guad ndaex guad brāix; noh dox ex som ang gīeh ex jai hrom ling nūm, ex jīx ang deem mgō gix yūh gāing yūh gah mox?" A yēeih, maix hoig mglub gah ba hlein ba hlong gon būi dix, pan mōh ex ba tai, ex rīan dix gīad gix yūm!" Si vāi uig vīd ngīe dix ndaex ngai mōi. Mōi ah: "Būx eui, bō maix jom yō dix vēui, ba jix gon būi gon nīe kaing jīe eix mīex ndīng mox nieh, ang ndouh om ba ah maix yūh nan!" A yēeih, ang ex jū, ang ex ndouh jū, gon būi vīang ah jīx dix, ang ndouh lai nbloun kaing hngim lōm ex si mīang dou dīag, pan maix ang yi, ex log hu deem maix tai ba sax, mgāig nqom yūh ex gah gix!" "Hmom! Yix log groux maix ndaex dīag ba sax." "Ex log houig ba sax."
Yām ah si vai nan gah mōi, būi yūh gāing ba moux dix oud ndaex bang rīb līah giex hoig hmoung noh, noh uig nbrīex gēd boud mgrōh sang yūh gah si vāi.
Si ngāix kaix, mōi som braog ma, būi yūh gāing hreeb qax līah ngū, noh goug nbuan houig si vāi blag gix, būi yūh gāing uig nkom Yāog kaox sod [**] ngōg dix mgōng mai moux dix lian kaox dīng. Si vāi houig, yāog dix qog mōi kom yūh loux dix dīng ngīe: "Mōi būx gei! Būi yūh gāing geem hu noh ndēe mox, ex uig houig nblūh tai pao!" Noh uig ndēix houig pao!" Yām hu houig si vāi mai num kaox dīng an, būi yūh gāing sae maox sod [**] ngōg gah si vāi pao. Būi yūh gāing ah: "Si vāi eui, nblūh tai bēn [**] jō dix ran sae maox vēui, in pao, ex uig gīeh maix nblūh tai pao!" Būi yūh gāing yāog dix dēei dou tai hoig doung rom ndaex ngū an, sae noh bīang gaex si vāi, si vāi uig rīag gah saex ah "ox! ox!" nan pao, hoig dōng dix mglub pao, uig nkom hmaing būi jāox hrom gah dix. Mōi yāox mgrōh mgrong ka si vāi hrom dix yūh nan, ngīah ah "hah hah" nan gah, noh qog si vāi geem dōng maix noh pao, si vāi ah: "Jū noh pao, jū noh pao." Būi yāox ang si vāi lai bōun quh, dom bloi noh, si vāi vīex ngīe kaix brōui kaix glaoh log rīang si vōg an kom mgo gaex dix hu kaix. Njāeh dom kaix an ndīx, gon saex gon seix si vāi dom gon gōg boud hroi kaix bied būi gah gaex dix dom si ngāix.
Dax Jūng Nbrūng Mai Na Jūng Blang Nbrīex Mōi
Ndīx ndīx, goui gon nyōm Dex ang qux dix gaex, geem mōh njao ba dix ang dōng, gaoh bōun ngōb ja yīam boud, ja yīam boud, mīex geeing mglo nyō gah jē dix, gah ang ih; dox mōn jē dix gah ang jū dix mōn. Mglo yūh gah mox gah ang bōun mglo, houig bōun som noh gah ja gon yīam boud. Geeing noh ang lai dōng gah sang yūh dix gah, dom nklad noh gah si vāi, si ngīe, pi, vīang mōh gox nan, noh gah ang jū dix nāox. Geeing noh mēed hrom dom ah: "Pan maix gon yīam, ex goug Dax jūng nbrūng mai Na jūng blang būx maix hu ox! Mīex ndaox mīex ndeing in, gon nyōm hmoung ah geeing dix sang goug Dax jung nbrūng mai Na jūng blang houig būx dix hu, uig nkom nāox loux yīam dix. Yām ah geeing gon nyōm nan, si vai ba njōm dix nbrīex gīed mōi ndaex gōg mgreem nyīex gah uig hmoung. Noh gēd nin: "Mīex mōh ex si mīang dīng dou diag dou dū mgaih ang nyāng keed si ob si nbrōm Dax jūng nbrūng mai Na jūng blang mox, giex ra gaex dee gon rīex gin nqom kaing ex euih, si ngāix ex jō dix briex hrom rīan dix gah giex jeeix." Si vāi hu kaing nyīex oux oud gon nyōm, hu blag gōg nyīex Na si tai (Na si tai mōh jao mi) gēd sang gīed ih gon mōi.
Dax jung nbrūng mai Na jūng blang in ang ndouh mōh jē ba hlad eix gah, mōh ngīe būi houd būi sia kom ra gaex, ba sēe dix mōh jē gaex giex, an dix gaex gaex "Dax jūng" An dix gaex gaex "Na jūng" mōh kee Dax jūng nbrax gōg si kroi, (loux Dex ang ah nbrūng gah) mōh kee nan būi dom ah "Dax jūng nbrūng" gah, "Blang, mōh qoh jāong," mōh kee nan būi dom ah Na jūng blang gah noh. Nbōu in si ngāix, giex ra gaex gah krei dix sang hu nbrīex mōi nyīex Na si tai. Houig mgrēng som, giex gah houig nang si vīe gōg nyīex Na si tai, Na jūng blang ah nin gah dax jūng nbrūng: "Dax jūng nbrūng eui! maix lāig piaog mōi ndaex gōg, ex hu gum mai na si tai, ha gah hmoung gix loux rāoh soux līh mgāig. [sic] maix nīad dix lāeg ba hmom ba gluing dix mu, dug hu, ex log hod maix kaix." Si vāi ba ndōg līang houig an, hmoung ah mōh dax jūng nbrūng, uig si yaoh gah, moux dix oud ndāog gōg ndēe hvaig, bīe pom gah ang lai bōun pom gah hlad dix. Kaix hoig hu na jung blang, dax jūng nbrūng uig jiu yām rāoh soux nīad lāig ndaex gog mōi, noh bu bi mōi ba oud ndaex gōg gu mu gu mu, ang nbāox yāox ba hmom ba gluing log ba ah na jūng blang dix mu gox, ang mōh mōi gūad, ndūx mōh mōi grōx grōx ngīe, ang mōh mōi lang gaing gah hrao dix, ndūx mōh gon mōi kaing, noh uig lāex hrom gah, noh ndēeih līam līa dix nbōg, yāox gon nboui lūng li gah ndāog gōg ndēe hvaig dix mu, yāog dix bu bi, gēd noh, in uig ko ba ah na jūng blang pao, nīad dix gah maox hung vīen gah nyōi dix piaog mōi gah, dug noh hu blag dieh yaong.
Hoig hu nbēen dix log sūb, Na jūng blang hoig gub Dax jūng nbrūng pao, noh uig nkom yāog dix bu bi mōi, geem hmom ang hmom. Dax jūng nbrūng qog noh ah: "Bāox mgrōm eui, mōi in geem hmom ang hmom?" Na jūng blang dom ah: "Hmom dom hmom kee, mōh ngīe diam joix!" giex hoig hu dix nbāex grax, blag daoh uig bāing, brāix sang rung pao, glang glia uig ah loux dix, brāix uig nbaih rung pao, yām an, Na jūng blang yaox brēeih gaex moi nan, uig si yaoh ngīe gah mai ah nin gah dax jung nbrūng ba dug mōi: "A mīex eui, bāox mgrōm! gah gaex moi in log ba goui rīang si vōg nan gah!" Dax jūng nbrūng gah hoig ndōg gēd, ba dug noh log ba ang mōh moi nan, loux hu jāong kiaong [** cf. kioung] ngīe mai log ba ang dong mū hmag dix yūh nan. Sōun sang gieh hrom dix joung, bō gieh na jūng blang hlad gah, dom ah nin: "Ang siao gūang, moi brēeih moi jāg gah jix goui njūm!" Na jūng blang oud kaix, nīe mgāig nīe hoig dōng noh si ndong, dōng noh mōh jē ba gīed ba sōum eix gah, dom ah nin gah dax jūng nbrūng: "Bāox mgrōm eui, ex sang aing dix, maix mgrūx hu vēui ex, dix vūd ex grub maix kaix!" Kaix hoig ah nan, noh hu lāig ndaex bang yēem, yāog dix dou gah hlad dix. Dax jūng nbrūng hoig dong noh, Na jūng blang mōh kee hlad noh dom lo loux ah sang hu aing dix dou kaix. In pao, ndeg ngīe noh dix gaex kaing, ndaex hrom uig hlad ngīe, sang dou gah ang gan dou. Yūh gah mox pao in, in jēn lug mōh nbrog si vāi sang līh ndaing nū heui, nū ngīe kom ra blag. Hu ra loui ndiang, sōun sang yūh noh hrom dix joung, dom gieh loux dix dīng ngīe ah: "Na jūng blang eui! bāox mgrōm ba hmom ex liex, geem aing maix hriam mōh nēem maix jēing? yūh ba dix maix kaix ang nbāox houig!" Si vāi hmoung ah aing Na jung blang hriam nēem jēing, uig hlad uig si gūa gah, hrom gēd nin, ba aing noh mōh hriam, ba ih noh dee gon gian kaing hriam, dom ja jū Dax jūng nbrūng dug dix hu. Dax jūng nbrūng uig ki ngīe dom uig ang lai dong gah sang yūh dix, hrom uig su sāg ngīe, dom bai ngū yod sūb, si vāi yāox douh douh ngū kaing dōuih mgian noh, gon jix broui yūh sūb, ndaex hrom gēd nin: "Dax jūng nbrūng an peix dix gin yūh nan, gon jix gieh ngū līh kaing hngim dix yūh nin" Yām lai houig gah ndaex grax iag grax gog log grāeng vāig bēix an, gag kaox gag oux hoig glad ngīe ndaex grax. Dax jūng nbrūng yāox yūh nan, lōd vāig gid gag kaox an gix ndūd, si vāi yāox noh, uig hlad ngīe gah, noh gēd nin: "Dax jūng nbrūng an lug mōh būi lāoh līe dix gaex, siang braog noh gon jix bōun dad gag kaox gag oux ndūd, ex ang ndouh bōun yūh dix leeih noh."
Brāix uig ndēix rīang pao, Dax jūng nbrūng uig ndaing ki ngīe, dom piaog si vāi oud mai num kaox ruih līab grax, nīad dix haog oud gah kaox kaix, noh yāox goui hmeem grih gah kaox dix nklong, gah ndaex hmeem, gon grih gon id ndaex ra mu. Noh bāeh gon grih yūm dāing noh gah si vāi, si vāi yāox gon grih yūm an, uig si gūa ngīe gah hlad dix. Dax jūng nbrūng dāeg lāig dix ngōm ndaex hmeem grih, nblūng vāig ndaex grei hmeem sein, lōm vāig lang uig dag deui ngīe dix log si ndax si yōng yūh nan gah grei hmeem grih. Kaix an dix vūd, mīex grih houig gah hmeem dix, noh yāox gon grih yūm an noi dix bīang diex mai si vāi ba piaog dix oud mai num kaox ruih an, uig yāog dix dum gah si vāi, si vāi nja len dix, mīex grih ang bōun bīn si vāi. Si vāi nkom ah nin gah grih: "Grih eui, maix bō nyāng gī, gon grih ang mōh ex ba bāeh yūm, ......" Ang mōh maix mōh mox box? maix sang tiang" "Mōh gō ba jix līh ngū kaing hngim, si ang braog jix mōh vāig, ba ih mōh hriam dou tai, ba aing hriam ba gaex dax jūng nbrūng an ba bāeh noh yūm, gah mōh nang noh ba piaog ex oud mai num kaox in. Yām in noh gon id ndaex hmeem maix. "Grih hmoung noh, uig yāog dix nblīex hmeem dix gah ngai ngēem ngai raoh an, yāox dag deui si ndax dax jūng nbrūng gah grei hmeem dix, noh sae loux mgrāox dix dix mgūm, yāog dix haog gah kaox lāong, nbreg si ndax ba dag deui an gah daix dix kom ra kon, goug hmoung ngīe ah "sād" nan dix daix mai jōd dix bīang diex pao, in pao, brāix hoig rung, yāox ngie nba hnam daix grih kaing, kaix mōh boud hoig ndūd yūh dom daix grih dix blag, grih ngōm bīang diex jo hnam daix dix kom ka hrom dix gah saex mai ah nin gah si vāi: "Si vai būx gei eui, dax jūng nbrūng lug ndaing gin euih, maix hoig bōun gīeh noh piaog dix, ex hoig bōun gīeh noh bad daix dix, mgāig dix yāox, jū ngīe ax ra gaex kaing, ang ndouh bēix noh dix nbōg gox, jō dix hu goug hu krom jān dou dīag dou dū ba oud ndaex dīag ndaex lēg [**] houig rām si hee noh!" Si vāi ah, "Hmom! Maix nīad dix hu, hmaing mōh ex ba goug ba krom gix houig!" Grih yēng ngīe saex kom hu bung bīang bu bīang dix ndaex diag kaox mai goug grāi dou dīag hmoung.
Dax jūng nbrūng ba oud ndaex hmeem grih an uig ki ngīe dom uig nkeen laeh lee dix, rag ron jāong dix ndaex hmeem hloub dix ih si kroi [**], si vāi gah uig ki uig hlad nang dom uig lu lax dix njēe nblāong, lu lax dom uig ndēeih nbug kaox ruih dix dāeg bōun nped [** cf. npeed] kaing maox. Noh dou ang nbāox goui mīex mglang dix, uig si ndaeh dou diag jān ba hu goug hu krom grih dix pung dīng, gix uig yāox si mīang dou diag, njog jūng līab noh vōig hyaog dix hngiad loux dom nqom grāi si vāi, si vāi yāog dix ah nin gah gix: "Būx aig ex beix! Yām in, ba gaex Dax jūng nbrūng id gah bīang kaox lioung lioung [**], noh hoig bāeh gon grih yūm, gon bad nang dom daix grih ndūd, eix jō ih hrom hri si māe bāox dix, deem grih ba mōh būx gei eix bog nbīx!" Grih uig mgāex ngīe mai ah: "Mōh nin heui, noh ang njūaing [**] bāeh gon ex yūm kaing, ang njūaing bad dom daix ex ndūd, gon piaog si vāi ba mōh būx gei eix oud mai kaox nbōu gox dix som, eix jo ih hrom hri bāox dix dom dāeg bēix noh!" Si vāi yāog dix qog: "Mox ba sang sae daix dix vēui? Lēed Dax jūng nbrūng līh kaing kaox!" Jūb dou dīag dou dū hmoung hoig piaog noh si vāi dix som, mōh kee nan, mōd dix ang nbāox nyei gah. In pao, si vāi iag houig ndēix si vāi dīng mai ah: "Būx gei, ex mgāig dax jūng nbrūng būi in, gon mōh hmaing būx eix ba hlag hu nbrīex haeg noh houig dix mgong vēui, mgāig, pan haeg noh ngoing kaing haeg eix, eix dom hu si hee noh dāe kaix; pan haeg noh lang, mōh lug mōh jē ba ndaing gin nqom dix jē, eix jō nīad ndēeih ing ndaex dīag ndaex dū kaing, sōun ang eix lai nbāox sōum gah noh." Jān dou dīag dou dū hoig jū loux ba ah si vāi iag. Si vāi dīng gah uig ndēeih yaoh nang gah ba jō dix gox bōun nbōu, ngēeih ngēeih gaing dix gah mai hmaing jid lōm nqeeih hu nbrīex haeg noh.
Jid lōm nqeeih haog kaox mgāig noh. Dax jūng nbrūng ja gon id boud ndaex hmeem. Noh gōi haog dad si kroi jīe Dax jūng nbrūng houig dix mgong, nīad dix vīex dou līh kom hlad hrom dix. Gix yāox houig jid lōm nqeeih, uig si hee ngīe dix mgāig haeg noh, si vāi dīng mai jān jūb dou diag dou dū uig hlad uig si gūa ngīe gah yāox haeg lang noh, gēd dix ang sang bēix dax jūng nbrūng. Gon rāo kaox uig siag ngīe loux dix mai ah, "Būx aig gon geeing ex beix, haeg mox lai gon si ndū lang mai haeg dax jūng nbrūng ndēe mox, mgāig dix yāox ang eix dāe lai jix bēix noh dix nbōg gox! nīad eix ndēeih ing kaing! Ang mōh nan, njūn noh haing, dee uig ih eix nyao nan!" Dou dīag dou dū hmoung ih gon rāo kaox nan, uig si yaoh uig hlad yūh gix gu gaex, ang lai njūn si vāi dīng grāi loux gox, uig nkom dou ing ah "vū vū" nan blag dīag kaox. Si vāi ba hoig sag gah jim nqom dix som an, hoig ndaing dōng mgrōh mgrong gin nqom dax jūng nbrūng, gah uig ing dou hod nang bāox dix gah hlad dix Grih ba mad an ang lai bōun quh gieh, id ngīe bīang diex mai nklua [**] dix līh blag jō mgōng sein.
Dax jūng nbrūng ba id gah hmeem grih an dom uig houig njūng si ngāix dāeg goi blag ngīe si kroi kaing ngai dix mai nbrīex mgāig blag bīang diex sein, noh yāox hoig dang dou si vāi kaing num kaox, ang lai hmoung loux dīd dix diag an, dāeg gōi līh kaing kaox, mgiang si kroi kom jai hrom gox dix kaing, hu sōg bāox mgrōm dix gō ba aing hriam blag ngāix an ba gaex Na jūng blang.
