Lai Yonax

(Jonah)

1

 Gumlox Simiang Siyiex lih hoek kah Yonax kawn: simex Amitie: ah nin:, 2 "Kaoh hu: kah veng ting Nineve kok yo mai ghlat kah kix, mawh kheu krax pa caox pa caig yuh kix hoik hoek kah plak sivoe ngai: Aux." 3 Viang mawh nan: Yonax keud tix sang to: mox tix kah veng Tasux, khaing: plak sivoe ngai: Siyiex mai nawh lih hu: kah veng Yawppax, mai yaox reu ting tix lam pa sang hu: kah veng Tasux, mai nawh tawx ngawh brug tix reu, nawh laig kah daux reu, mai brug reu hu: tau mai kix kah daux veng Tasux, khaing: plak sivoe ngai: Siyiex heue.

Lih Bhaung: Ting Daux Rawm: Sigrit Sigra:

4 Yam an: Siyiex kieh bhaung: ting lih kah piang rawm: sigrit sigra:, bhaung: ting phlu: piang rawm: sigrit sigra:, tom: dex sang laux reu ting heue. 5 Yam an: pwi yuh kaing daux reu kukaux kied lhat graung, mai pwi kukaux kok yo kah siyiex mawx siyiex an:, mai kix teei tix tik kraung tiblah kah daux rawm:, sonsang chaong: reu ting kah, yam an: Yonax kied laig it kah daux lawg plak greem: reu ting heue. 6 Mawh kheu nan:, cao: kaing: reu hu: kah nawh, mai ah nin:, "Pwi pa laig it eue, yuh kah mawh maix lai laig it, kaoh! mai rawg bwan: kah siyiex maix, ha siyiex maix siep doh keud kah ex, mai taoh ex khaing: krax pa laux pa leeing: in: nieh." 7 Khaix an: pwi pa ot kah daux reu "Phaw: tix yuh niieb, sonsang tawng kix grawng: in:, mawh kheu pwi mawx?" Mai kix niieb tix yaox mai caw kah Yonax heue. 8 Mawh kheu nan: kix chawk kah nawh ah nin:, "Mawh pwi mawx pa kieh ceu in: hoek kah piang ex, krai ex mhong: liak? Mawh yuh maix kaing patix? Mawh kaoh maix khaing: dee mawx? Mawh maix pwi meung mawx? Mawh maix pwi ceu tix?" 9 Nawh deeh pawk ah nin: kah kix, "Aux mawh ceu pwi Hebrie, pa lhat graung kah Siyiex Cao: raoma:, Cao: pa phan: haktiex mai rawm: sigrit sigra:, mai aux mawh pa to: khaing: plak sivoe ngai: Siyiex heue."

Grawng: Taing Sau: Yonax Daux Rawm: Sigrit Sigra:

10 Pwi khankix nie koe: krax lhat krax graung kah, mai kix chawk nawh ah nin:, "Maix lai yuh nin: yuh kah mawx?" Mawh kheu krai nawh grawng: tix kah kix, kix tom: tawng mawh nawh pa to: khaing: plak sivoe ngai: Siyiex heue. 11 Khaix an: kix chawk kah nawh ah nin:, "Mawh kheu nie ting bhaung:, mai puk pak rawm:, sonsang yiien: yawg bhaung:, ex sang caw: tix yuh kah mawh kah maix?" 12 Mai nawh ah nin: kah kix, "Pex yaog tix taing sau: aux daux rawm: sigrit sigra:, phan: pex yuh nan: rawm: sigrit sigra: tag yiien: yawg hu: heue. Aux tawng bhaung: ting in: hoek kah piang pex mawh kheu jao aux heue." 13 Viang mawh nan: kix co ca: tix vai: reu sonsang hoek kah praok rawm:. Viang mawh nan: mawh kheu nie ting bhaung:, mai kix ang lai peh lai pon heue. 14 Mawh kheu nan: kix kok yo kah Simiang Siyiex ah nin:, "Simiang Siyiex eue, yix khyox khaw: kah Maix, paw doh kieh yix lauxleeing: kheu jao pwi in:, mai paw kieh nham: pwi pa ang koe: phimap phighram: hoek kah piang yix liak! Simiang Siyiex eue, Maix hoik yuh awm: pa koe: alo Tix heue." 15 Yam an: kix yaog tix taing sau: Yonax daux rawm: sigrit sigra: heue. 16 Yam an: puk pak rawm: sigrit sigra: kawx yien yawg hu: heue. khaix an: kix lhat graung kah Simiang Siyiex, mai yuh krax tan krax lu, mai yuh sijax mukheu kah siyiex heue. 17 Yam an: Simiang Siyiex khre: rien kax ting tix mu:, kieh bleet kah Yonax, mai Yonax ot kah daux vaig kax ting loe: singaix loe: sawm: heue.

Lox Rawg Yonax Bwan:

2

 Khaix an: Yonax ot kah daux vaig kax ting mai rawg bwan: kah Siyiex tix, 2 mai nawh ah nin:, "Yam yaox aux krax kharhawm: kharhi: aux kok yo kah Siyiex, mai Nawh Cao: pawk lox aux heue. Yam ot aux daux meung yum: mai riag yo, Maix Cao: mhong: kah lox aux heue. 3 Mawh kheu Maix Cao: hoik teei tix sau: aux daux dee raux sigreung rawm:, rawm: sigrit sigra: hoik vungviang aux, mai puk pak rawm: cie Maix khankix hoik kheem: kah piang aux heue. 4 Aux ah nin:, kheu mawh aux pwi pa hoik tik tix khaing: sivoe ngai: Maix Cao:, aux keud tix ang lai yaox kah nyiiex bwan: pa singax singeh Maix Cao: heue 5 Rawm: khankix hoik rob vungviang aux, tom: dex sang yum: aux, mai dee pa raux sigreung rawm: hoik ot vungviang aux, rib riem rawm: sigrit sigra: khankix hoik vungfiien: kah kaing: aux heue. 6 Aux hoik lih bleeh kah num: caong gawng, mai jhong: siviex haktiex hoik nyeep kah aux leeing (leeing:) ju, viang mawh nan: Siyiex aux eue, Maix Cao: tag sang taoh ju aux lih khaing: dung raux daux nu heue. 7 Yam khrup rhawmrhi: aux, aux doh keud kah Simiang Siyiex, mai lox rawg aux bwan: hoik laig hoek kah plak sivoe ngai: Maix Cao:, kah daux nyiiex bwan: pa singax singeh Maix Cao: heue. 8 Pwi pa yungyi: kah rieng rao pa giex pa going khankix, kix hoik tik vud krax caoxrhawm: siyiex tix heue. 9 Viang mawh nan: aux tag sang yaogyaw kah Maix kah daux pa tan pa lu pa ap peung kah Maix; mai tag yuh sijax mukheu awm: pa hoik ah aux tix yuh heue. Bwanson: krax taoh mawh pa kaoh khaing: Simiang Siyiex heue." 10 Khaix an: Simiang Siyiex tawx lox kah kax ting, mai kax ting an: hao: Yonax lih caong raog kah dee kroh tiex heue.

Grawng: Nghiiet Yonax Lox Siyiex

3

 Gumlox Simiang Siyiex baox hoek kah Yonax ra: bawg tix bawg ah nin:, 2 "Kaoh mai hu: kah veng ting Nineve mai krai pao: awm: lox pa hoik tawm: Aux kah maix heue." 3  Mawh kheu nan: Yonax kaoh hu: kah veng ting Nineve awm: gumlox pa hoik tawm: Siyiex heue. Veng ting Nineve mawh veng pa kied ting mai veng pa ting ceu mai veih loe: singaix krax heue. 4 Mawh kheu nan: Yonax jah tix laig hu: kah daux veng tix singaix krax, mai krai pao: ah nin:, "Khaix hoik luan tipon: ngaix tag sang pluk pliak tix tik kah veng Nineve heue."

Grawng: Tieh Loh Pwi Veng Nineve Rhawm: Tix

5 Mawh kheu nan:, pwi veng ting Nineve khankix yumrhawm: kah Siyiex, mai kix krai pao: sonsang twah pa ih pa un:, jah kah pwi ting tom: hoek kah pwi iak khawm: uik, mai ceep kah chee: rhix heue. 6 Mai yam hoik mhong: khunhawkham veng ting Nineve kah lox satang in: khankix, nawh lih khaing: dangngeung dee ngawm tix, mai peeik sibex dha: tix mai ceep kah chee: rhix ngawm kah daux nyaox heue. 7 Mai nawh tawx lox hu: kah pwi pa ot kah daux veng ting Nineve, grawng: hoik mawh lox tawm: khaing: khunhawkham mai pwi ting pa ot greem: nawh khankix pa ah nin:, "Paw doh kieh pwi tix kaux kawx, mai khawng: brie pa mawh moi, yung: khankix ih nyaux tix ceu kawx heue. 8 Mawh kheu nan: kieh pwi kukaux mai khawng: brie khankix ceep kah chee: rhix mai kieh pwi kukaux sau: riang tix rawg bwan: kah Siyiex heue. Kieh pwi kukaux tieh loh khaing: kaing pa caox pa caig pa yuh tix mai tik vud kah pa lang: teung: kin: pa yuh nawh kah taix tix heue. 9 Pwi mawx pa tawng kah pa sang deeh tieh Siyiex Tix mai doh keud doh sawn: mai deeh veeh tix khaing: pa songrhawm: songrhi: Nawh Cao:, mai ang lai kieh ex hoek krax laux krax leeing:?" 10 Khaix an: Siyiex hoik yaox kaing pa yuh kix, mai hoik tieh loh kix tix khaing: pa caox pa caig yuh tix, mai Siyiex deeh tieh loh rhawmrhi: Tix khaing: krax pa ah Nawh tix sang ciyang kah kix mai caoxrhawm:, Nawh ang lai ciyang heue.

4

 Viang mawh nan: Yonax ang lai nyawmrhawm: nyawm rhi:, mai nawh kied songrhawmrhi: heue. 2 Mawh kheu nan:, nawh rawg bwan: kah Siyiex mai ah nin:, "Siyiex eue, yam ot aux daux haktiex tix, aux hoik ah yuh nan: ang mawh lie? Mawh kheu nan:, aux tom: nied tix to: hu: kah veng Tasux, mawh kheu hoik tawng aux Maix mawh Siyiex pa koe: bwanson:, mai pa koe: krax caoxrhawm: caoxrhi: mai ang khran: songrhawm: songrhi:, pa naog kah krax moh krax rhawm:, mai pa hoik tieh loh tix khaing: pa hoik ah Maix Cao: tix sang ciyang heue. 3 Mawh kheu nan: yamin:, teei ju aux khaing: aux, phan: aux yum: nie lheu: mhawm: khaing: im: aux heue." 4 Khaix an: Simiang Siyiex ah nin:, "Pa songrhawm: songrhi: maix yuh nin:, khex khaw: lie?" 5 Mawh kheu nan:, Yonax lih hu: khaing: daux veng, mai ngawm praok veng plak lih singaix heue. Nawh yuh tix cie nyiiex gox tix lhang: tan:, mai ngawm greem: veei nyiiex gox an:, tom: hoek bawg yam pon yaox tix ceu pa sang yuh kah mawx kah veng heue. 6 Mai Simiang Siyiex cox khre: khaox bee ia: son nawh tix pang: kieh lhaong: kah piang Yonax tom: veei kah piang nawh, sonsang kieh nawh nyawmrhawm: nyawm rhi: khaing: krax lauxrhawm: lauxrhi: heue. Mawh kheu nan:, Yonax kied koe: krax gauxrhawm: gauxrhi: kheu khaox an: heue. 7 Viang mawh nan: yam hoik bah riieng praix ponngawb singaix khaix, Siyiex khre: viag tix mu:, mai kiied kah khaox bee ia: an: fit kroh hu: heue. 8 Yam lih singaix, Siyiex khre: bhaung: pa kied hax khaing: plak lih singaix, mai kieh koek tong: kah kaing: Yonax, mai kieh nawh peei: awn: riang heue. Khaix an: nawh koe: rhawm: pa simie tix yum:, mai ah nin:, "Yum: aux nie lheu: mhawm: khaing: im: aux heue. 9 Khaix an:, Siyiex ah nin: kah Yonax, "Pa songrhawm: maix kheu jao khaox bee ia: in: khex khaw: caw lie?" Mai nawh deeh ah nin:, "Pa songrhawm: aux sonsang yum: tix mawh pa khaw: pa caw heue." 10 Mai Simiang Siyiex ah nin:, "Khaox pa ang maix taug mao tix sum:, mai pa ang maix priex kieh ting lhaong:, kuah daux tix sawm: mai deeh yum: daux tix sawm: khaing: maix lai kawn: lhawk kah. 11 Mai kah veng ting Nineve pa ot pwi daux tix sien: ra: mheen: kaux haoh, pa ang nyang tawng tix gwieh taix gwiex taix dawm: mai khawng: brie pa haoh hun: an: khankix ang Aux khaw: tix nie lhawk kah lie?"

Lái Younax

(Jonah)

1

Gúm loux Si Míang Si Yíex líh houig kah Younax kon si méix Amitie: ah nin, 2 "Kaoh hu kah véing tíng Nineivei koug yóu mai ghlad kah kix, móh khe krax pa cáox pa cáig yúh kix hoig houig kah plag si vóui ngai Aex." 3 Viang móh nan Younax kéd tix sang tou moux tix kah véing Tasux, khaing plag si vóui ngai Si Yíex mai noh líh hu kah véing Yobpax, mai yáox ré tíng tíx lám pa sang hu kah véing Tasux, mai noh tox ngóh brúg tíx ré, noh láig kah daex ré, mai brúg ré hu táe mai kix kah daex véing Tasux, khaing plag si vóui ngai Si Yíex heui.

Líh Bhaeng Tíng Daex Rom Si grid Si gra

4 Yam an Si Yíex kíeh bhaeng tíng líh kah píang rom si grid si gra, bhaeng tíng phlu píang rom si grid si gra, toum déix sang láex ré tíng heui. 5 Yam an púi yúh káing daex ré kú kaex kíed lhad gráeng, mai púi kú kaex koug yóu kah si yíex mox si yíex an, mai kix téei tix tig kráeng tíx blah kah daex rom, sóun sang chaong ré tíng kah, yám an Younax kíed láig id kah daex lóg plag greem ré tíng heui. 6 Móh khe nan, cao kaing ré hu kah noh, mai ah nin, "Púi pa láig id eui, yúh kah móh maix lai láig id, kaoh! mai róg buan kah si yíex maix, ha si yíex maix sieb douh kéd kah eix, mai taoh eix khaing krax pa láex pa leeing in nieh." 7 Khaix an púi pa oud kah daex ré "Pho tix yúh níab, sóun sang tóng kix grong in, móh khe púi mox?" Mai kix níab tix yáox mai có kah Younax heui. 8 Móh khe nan kix chog kah noh ah nin, "Móh púi mox pa kíeh cé in houig kah píang eix, krái eix mhoung liag? Móh yúh maix káing pa tix? Móh kaoh maix khaing dée mox? Móh maix púi méng mox? Móh maix púi cé tix?" 9 Noh déeh pog ah nin kah kix, "Aex móh cé púi Heibrie, pa lhad gráeng kah Si Yíex Cao ráo ma, Cao pa phan hag tiex mai rom si grid si gra, mai aex móh pa tou khaing plag si vóui ngai Si Yíex heui."

Grong Táing Sae Younax Daex Rom Si grid Si gra

10 Púi khan kix níe koui krax lhad krax gráeng kah, mai kix chog noh ah nin, "Maix lai yúh nin yúh kah mox?" Móh khe krái noh grong tix kah kix, kix toum tóng móh noh pa tou khaing plag si vóui ngai Si Yíex heui. 11 Khaix an kix chog kah noh ah nin, "Móh khe níe tíng bhaeng, mai pug pag rom, sóun sang yian yóg bhaeng, eix sang co tix yúh kah móh kah maix?" 12 Mai noh ah nin kah kix, "Peix yáog tix táing sae aex daex rom si grid si gra, phan peix yúh nan rom si grid si gra tág yian yóg hu heui. Aex tóng bhaeng tíng in houig kah píang peix móh khe jáo aex heui." 13 Viang móh nan kix cóu ca tix vai ré sóun sang houig kah praog rom. Víang móh nan móh khe níe tíng bhaeng, mai kix ang lai peih,péih lai póun heui. 14 Móh khe nan kix koug yóu kah Si Míang Si Yíex ah nin, "Si Míang Si Yíex eui, yix khyoux kho kah Maix, pó douh kíeh yix láex leeing khe jáo púi in, mai pó kíeh nham púi pa ang koui phi mab phi ghram: houig kah píang yix liag! Si Míang Si Yíex eui, Maix hoig yúh om pa koui a lóu Tix heui." 15 Yam an kix yáog tix táing sae Younax daex rom si grid si gra heui. 16 Yam an pug pag rom si grid si gra kox yíen yóg hu heui. Khaix an kix lhad gráeng kah Si Míang Si Yíex, mai yúh krax tán krax lú, mai yúh si jax mú khe kah si yíex heui. 17 Yam an Si Míang Si Yíex khrei ríen kax tíng tíx mu, kíeh bleed kah Younax, mai Younax oud kah daex váig kax tíng loui si ngáix loui som heui.

Loux Róg Younax Buan

2

Khaix an Younax oud kah daex váig kax tíng mai róg buan kah Si Yíex tix, 2 mai noh ah nin, "Yám yáox aex krax kha rhom kha rhi aex koug yóu kah Si Yíex, mai Noh Cao pog loux aex heui. Yám oud aex daex méng yum mai ríag yóu, Maix Cao mhoung kah loux aex heui. 3 Móh khe Maix Cao hoig téei tix sae aex daex dée raex si gréng rom, rom si grid si gra hoig vúng víang aex, mai pug pag rom cíe Maix khan kix hoig kheem kah píang aex heui. 4 Aex ah nin, khe móh aex púi pa hoig tig tix khaing si vóui ngai Maix Cao, aex kéd tix ang lai yáox kah nyíex buan pa si ngax si ngéih Maix Cao heui. 5 Rom khan kix hoig róub vúng víang aex, toum déix sang yum aex, mai dée pa raex si gréng rom hoig oud vúng víang aex, ríb ríem rom si grid si gra khan kix hoig vúng fian kah kaing aex heui. 6 Aex hoig líh bleeh kah num cáong góng, mai jhoung si víex hag tiex hoig nyeeb kah aex leeing jú, víang móh nan Si Yíex aex eui, Maix Cao tág sang taoh jú aex líh khaing dúng raex daex nú heui. 7 Yam khrub rhóm rhi aex, aex douh kéd kah Si Míang Si Yíex, mai loux róg aex buan hoig láig houig kah plag si vóui ngai Maix Cao, kah daex nyíex buan pa si ngax si ngéih Maix Cao heui. 8 Púi pa yúng yi kah ríang ráo pa gíex pa góing khan kix, kix hoig tig vúd krax cáox rhom si yíex tix heui. 9 Viang móh nan aex tág sang yáog yó kah Maix kah daex pa tán pa lú pa ab péng kah Maix; mai tág yúh si jax mú khe om pa hoig ah aex tix yúh heui. Buan soun krax taoh móh pa kaoh khaing Si Míang Si Yíex heui." 10 Khaix an Si Míang Si Yíex tox loux kah kax tíng, mai kax tíng an hao Younax líh cáong ráog kah dée krouh tiex heui.

Grong Nghiad Younax Loux Si Yíex

3

Gúm loux Si Míang Si Yíex báox houig kah Younax ra bóg tíx bóg ah nin, 2 "Kaoh mai hu kah véing tíng Nineivei mai krái pao om loux pa hoig tom Aex kah maix heui." 3 Móh khe nan Younax kaoh hu kah véing tíng Nineivei om gúm loux pa hoig tom Si Yíex heui. Véing tíng Nineivei móh véing pa kíed tíng mai véing pa tíng cé mai veih loui si ngáix krax heui. 4 Móh khe nan Younax jáh tix láig hu kah daex véing tíx si ngáix krax, mai krái pao ah nin, "Khaix hoig lúan tíx poun ngáix tág sang plug pliag tix tig kah véing Nineivei heui."

Grong Tíeh Louh Púi Véing Nineivei Rhom Tix

5 Móh khe nan, púi véing tíng Nineivei khan kix yúm rhom kah Si Yíex, mai kix krái pao sóun sang túah pa ih pa un, jáh kah púi tíng toum houig kah púi iag khom uig, mai ceeb kah chee rhix heui. 6 Mai yám hoig mhoung khun ho kham véing tíng Nineivei kah loux sa tang in khan kix, noh líh khaing dáng ngéng dée ngóm tix, mai peeig si béix dha tix mai ceeb kah chee rhix ngóm kah daex nyáox heui. 7 Mai noh tox loux hu kah púi pa oud kah daex véing tíng Nineivei, grong hoig móh loux tom khaing khun ho kham mai púi tíng pa oud greem noh khan kix pa ah nin, "Pó douh kíeh púi tíx kaex kox, mai khong bríe pa móh mói, yung khan kix ih nyáex tíx cé kox heui. 8 Móh khe nan kíeh púi kú kaex mai khong bríe khan kix ceeb kah chee rhix mai kíeh púi kú kaex sae ríang tix róg buan kah Si Yíex heui. Kíeh púi kú kaex tíeh louh khaing káing pa cáox pa cáig pa yúh tix mai tig vúd kah pa lang teng kin pa yúh noh kah taix tix heui. 9 Púi mox pa tóng kah pa sang déeh tíeh Si Yíex Tix mai douh kéd douh son mai déeh veeh,véeh tix khaing pa sóung rhom sóung rhi Noh Cao, mai ang lai kíeh eix houig krax láex krax leeing?" 10 Khaix an Si Yíex hoig yáox káing pa yúh kix, mai hoig tíeh louh kix tix khaing pa cáox pa cáig yúh tix, mai Si Yíex déeh tíeh louh rhóm rhi Tix khaing krax pa ah Noh tix sang cí yáng kah kix mai cáox rhom, Noh ang lai cí yáng heui.

4

Viang móh nan Younax ang lai nyóm rhom nyóm rhi, mai noh kíed sóung rhóm rhi heui. 2 Móh khe nan, noh róg buan kah Si Yíex mai ah nin, "Si Yíex eui, yám oud aex daex hag tiex tix, aex hoig ah yúh nan ang móh líe? Móh khe nan, aex toum níed tix tou hu kah véing Tasux, móh khe hoig tóng aex Maix móh Si Yíex pa koui buan soun, mai pa koui krax cáox rhom cáox rhi mai ang khran sóung rhom sóung rhi, pa náog kah krax mouh,móuh krax rhom, mai pa hoig tíeh louh tix khaing pa hoig ah Maix Cao tix sang cí yáng heui. 3 Móh khe nan yám in, téei jú aex khaing aex, phan aex yum níe lhe mhom khaing im aex heui." 4 Khaix an Si Míang Si Yíex ah nin, "Pa sóung rhom sóung rhi maix yúh nin, kheix kho líe?" 5 Móh khe nan, Younax líh hu khaing daex véing, mai ngóm praog véing plag líh si ngáix heui. Noh yúh tix cíe nyíex goux tíx lhang tan, mai ngóm greem véei nyíex goux an, toum houig bóg yám póun yáox tix cé pa sang yúh kah mox kah véing heui. 6 Mai Si Míang Si Yíex coux khrei khaox bée ia sóun noh tíx pang kíeh lhaong kah píang Younax toum véei kah píang noh, sóun sang kíeh noh nyóm rhom nyóm rhi khaing krax láex rhom láex rhi heui. Móh khe nan, Younax kíed koui krax gáex rhom gáex rhi khe khaox an heui. 7 Viang móh nan yám hoig bah ríang práix póun ngób si ngáix khaix, Si Yíex khrei víag tíx mu, mai kíad kah khaox bée ia an fid krouh hu heui. 8 Yam líh si ngáix, Si Yíex khrei bhaeng pa kíed hax khaing plag líh si ngáix, mai kíeh kouig toung kah kaing Younax, mai kíeh noh peei on ríang heui. khaix an noh koui rhom pa si míe tix yum, mai ah nin, "Yum aex níe lhe mhom khaing im aex heui. 9 Khaix an, Si Yíex ah nin kah Younax, "Pa sóung rhom maix khe jáo khaox bée ia in kheix kho có líe?" Mai noh déeh ah nin, "Pa sóung rhom aex sóun sang yum tix móh pa kho pa có heui." 10 Mai Si Míang Si Yíex ah nin, "Khaox pa ang maix táeg máo tix sum, mai pa ang maix priex kíeh tíng lhaong, kúah daex tíx som mai déeh yum daex tíx som khaing maix lai kon lhog kah. 11 Mai kah véing tíng Nineivei pa oud púi daex tíx sien ra mheen kaex haoh, pa ang nyáng tóng tix gúih taix mguix taix dom mai khong bríe pa haoh hun an khan kix ang Aex kho tix níe lhog kah líe?"

Lāi Yōu Nax

(Jonah)

1

Mgūm loux Si Mīang Si Yīex līh houig gah Yōu Nax gon si mēix A Mi Die: ah nin, 2 "Kaoh hu gah vēing dīng Nī Nēi Vēi goug yōu mai nklad gah gix, mōh ke grax ba jāox ba jāig yūh gix hoig houig gah blag si vōui ngai Aex." 3 Viang mōh nan Yōu Nax gēd dix sang dou moux dix gah vēing Dā Sux, kaing blag si vōui ngai Si Yīex mai noh līh hu gah vēing Yob Bax, mai yāox rē dīng dīx lām ba sang hu gah vēing Dā Sux, mai noh dox ngōh nbrūg dix rē, noh lāig gah ndaex rē, mai nbrūg rē hu dāe mai gix gah ndaex vēing Dā Sux, kaing blag si vōui ngai Si Yīex heui.

Līh Npaeng Dīng Ndaex Rom Si mgrid Si mgra

4 Yam an Si Yīex gīeh npaeng dīng līh gah bīang rom si mgrid si mgra, npaeng dīng plu bīang rom si mgrid si mgra, doum ndēix sang lāex rē dīng heui. 5 Yam an būi yūh gāing ndaex rē gū gaex gīed hlad mgrāeng, mai būi gū gaex goug yōu gah si yīex mox si yīex an, mai gix dēei dix dig grāeng dīx nblah gah ndaex rom, sōun sang qaong rē dīng gah, yām an Yōu Nax gīed lāig id gah ndaex lōg blag mgreem rē dīng heui. 6 Mōh ke nan, jao gaing rē hu gah noh, mai ah nin, "Būi ba lāig id eui, yūh gah mōh maix lai lāig id, gaoh! mai rōg nbuan gah si yīex maix, ha si yīex maix sieb ndouh gēd gah eix, mai daoh eix kaing grax ba lāex ba leeing in nieh". 7 Khaix an būi ba oud gah ndaex rē "Po dix yūh nīab, sōun sang dōng gix mgrong in, mōh ke būi mox"? Mai gix nīab dix yāox mai jō gah Yōu Nax heui. 8 Mōh ke nan gix qog gah noh ah nin, "Mōh būi mox ba gīeh jē in houig gah bīang eix, grāi eix hmoung liag? Mōh yūh maix gāing ba dix? Mōh gaoh maix kaing ndēe mox? Mōh maix būi mēng mox? Mōh maix būi jē dix"? 9 Noh ndēeh bog ah nin gah gix, "Aex mōh jē būi Hēi Nbrīe, ba hlad mgrāeng gah Si Yīex Jao rāo ma, Jao ba pan hag diex mai rom si mgrid si mgra, mai aex mōh ba dou kaing blag si vōui ngai Si Yīex heui."

Mgrong Dāing Sae Yōu Nax Ndaex Rom Si mgrid Si mgra

10 Pūi kan gix nīe goui grax hlad grax mgrāeng gah, mai gix qog noh ah nin, "Maix lai yūh nin yūh gah mox"? Mōh ke grāi noh mgrong dix gah gix, gix doum dōng mōh noh ba dou kaing blag si vōui ngai Si Yīex heui. 11 Khaix an gix qog gah noh ah nin, "Mōh ke nīe dīng npaeng, mai bug bag rom, sōun sang yian yōg npaeng, eix sang jo dix yūh gah mōh gah maix"? 12 Mai noh ah nin gah gix, "Beix yāog dix dāing sae aex ndaex rom si mgrid si mgra, pan beix yūh nan rom si mgrid si mgra dāg yian yōg hu heui. Aex dōng npaeng dīng in houig gah bīang beix mōh ke njāo aex heui." 13 Viang mōh nan gix jōu ja dix vai rē sōun sang houig gah braog rom. Vīang mōh nan mōh ke nīe dīng npaeng, mai gix ang lai beih,bēih lai bōun heui. 14 Mōh ke nan gix goug yōu gah Si Mīang Si Yīex ah nin, "Si Mīang Si Yīex eui, yix kyoux ko gah Maix, bō ndouh gīeh yix lāex leeing ke njāo būi in, mai bō gīeh hnam būi ba ang goui pi mab pi ghram: houig gah bīang yix liag! Si Mīang Si Yīex eui, Maix hoig yūh om ba goui a lōu Dix heui." 15 Yam an gix yāog dix dāing sae Yōu Nax ndaex rom si mgrid si mgra heui. 16 Yam an bug bag rom si mgrid si mgra gox yīen yōg hu heui. Kaix an gix hlad mgrāeng gah Si Mīang Si Yīex, mai yūh grax dān grax lū, mai yūh si njax mū ke gah si yīex heui. 17 Yam an Si Mīang Si Yīex krei rīen gax dīng dīx mu, gīeh nbleed gah Yōu Nax, mai Yōu Nax oud gah ndaex vāig gax dīng loui si ngāix loui som heui.

Loux Rōg Yōu Nax Nbuan

2

Kaix an Yōu Nax oud gah ndaex vāig gax dīng mai rōg nbuan gah Si Yīex dix, 2 mai noh ah nin, "Yām yāox aex grax ka hrom ka hri aex goug yōu gah Si Yīex, mai Noh Jao bog loux aex heui. Yām oud aex ndaex mēng yum mai rīag yōu, Maix Jao hmoung gah loux aex heui. 3 Mōh ke Maix Jao hoig dēei dix sae aex ndaex ndēe raex si mgrēng rom, rom si mgrid si mgra hoig vūng vīang aex, mai bug bag rom jīe Maix kan gix hoig keem gah bīang aex heui. 4 Aex ah nin, ke mōh aex būi ba hoig dig dix kaing si vōui ngai Maix Jao, aex gēd dix ang lai yāox gah nyīex nbuan ba si ngax si ngēih Maix Jao heui. 5 Rom kan gix hoig rōub vūng vīang aex, doum ndēix sang yum aex, mai ndēe ba raex si mgrēng rom hoig oud vūng vīang aex, rīb rīem rom si mgrid si mgra kan gix hoig vūng fian gah gaing aex heui. 6 Aex hoig līh nbleeh gah num jāong mgōng, mai nqoung si vīex hag diex hoig nyeeb gah aex leeing njū, vīang mōh nan Si Yīex aex eui, Maix Jao dāg sang daoh njū aex līh kaing ndūng raex ndaex nū heui. 7 Yam krub hrōm hri aex, aex ndouh gēd gah Si Mīang Si Yīex, mai loux rōg aex nbuan hoig lāig houig gah blag si vōui ngai Maix Jao, gah ndaex nyīex nbuan ba si ngax si ngēih Maix Jao heui. 8 Pūi ba yūng yi gah rīang rāo ba mgīex ba mgōing kan gix, gix hoig dig vūd grax jāox hrom si yīex dix heui. 9 Viang mōh nan aex dāg sang yāog yō gah Maix gah ndaex ba dān ba lū ba ab bēng gah Maix; mai dāg yūh si njax mū ke om ba hoig ah aex dix yūh heui. Nbuan soun grax daoh mōh ba gaoh kaing Si Mīang Si Yīex heui." 10 Khaix an Si Mīang Si Yīex dox loux gah gax dīng, mai gax dīng an hao Yōu Nax līh jāong rāog gah ndēe grouh diex heui.

Mgrong Hngiad Yōu Nax Loux Si Yīex

3

Mgūm loux Si Mīang Si Yīex nbāox houig gah Yōu Nax ra nbōg dīx nbōg ah nin, 2 "Gaoh mai hu gah vēing dīng Nī Nēi Vēi mai grāi bao om loux ba hoig dom Aex gah maix heui." 3 Mōh ke nan Yōu Nax gaoh hu gah vēing dīng Nī Nēi Vēi om mgūm loux ba hoig dom Si Yīex heui. Vēing dīng Nī Nēi Vēi mōh vēing ba gīed dīng mai vēing ba dīng jē mai veih loui si ngāix grax heui. 4 Mōh ke nan Yōu Nax njāh dix lāig hu gah ndaex vēing dīx si ngāix grax, mai grāi bao ah nin, "Kaix hoig lūan dīx boun ngāix dāg sang blug bliag dix dig gah vēing Nī Nēi Vēi heui."

Mgrong Dīeh Louh Būi Vēing Nī Nēi Vēi Hrom Dix

5 Mōh ke nan, būi vēing dīng Nī Nēi Vēi kan gix yūm hrom gah Si Yīex, mai gix grāi bao sōun sang dūah ba ih ba un, njāh gah būi dīng doum houig gah būi iag kom uig, mai jeeb gah qee hrix heui. 6 Mai yām hoig hmoung kun ho kam vēing dīng Nī Nēi Vēi gah loux sa dang in kan gix, noh līh kaing ndāng ngēng ndēe ngōm dix, mai beeig si nbēix nta dix mai jeeb gah qee hrix ngōm gah ndaex nyāox heui. 7 Mai noh dox loux hu gah būi ba oud gah ndaex vēing dīng Nī Nēi Vēi, mgrong hoig mōh loux dom kaing kun ho kam mai būi dīng ba oud mgreem noh kan gix ba ah nin, "Bō ndouh gīeh būi dīx gaex gox, mai kong nbrīe ba mōh mōi, yung kan gix ih nyāex dīx jē gox heui. 8 Mōh ke nan gīeh būi gū gaex mai kong nbrīe kan gix jeeb gah qee hrix mai gīeh būi gū gaex sae rīang dix rōg nbuan gah Si Yīex heui. Gīeh būi gū gaex dieh,dīeh louh kaing gāing ba jāox ba jāig ba yūh dix mai dig vūd gah ba lang deng gin ba yūh noh gah daix dix heui. 9 Pūi mox ba dōng gah ba sang ndēeh dīeh Si Yīex Dix mai ndouh gēd ndouh son mai ndēeh veeh,vēeh dix kaing ba sōung hrom sōung hri Noh Jao, mai ang lai gīeh eix houig grax lāex grax leeing?" 10 Khaix an Si Yīex hoig yāox gāing ba yūh gix, mai hoig dīeh louh gix dix kaing ba jāox ba jāig yūh dix, mai Si Yīex ndēeh dīeh louh hrōm hri Dix kaing grax ba ah Noh dix sang jī yāng gah gix mai jāox hrom, Noh ang lai jī yāng heui.

4

 Viang mōh nan Yōu Nax ang lai nyōm hrom nyōm hri, mai noh gīed sōung hrōm hri heui. 2 Mōh ke nan, noh rōg nbuan gah Si Yīex mai ah nin, "Si Yīex eui, yām oud aex ndaex hag diex dix, aex hoig ah yūh nan ang mōh līe? Mōh ke nan, aex doum nīed dix dou hu gah vēing Dā Sux, mōh ke hoig dōng aex Maix mōh Si Yīex ba goui nbuan soun, mai ba goui grax jāox hrom jāox hri mai ang kran sōung hrom sōung hri, ba nāog gah grax mouh,mōuh grax hrom, mai ba hoig dīeh louh dix kaing ba hoig ah Maix Jao dix sang jī yāng heui. 3 Mōh ke nan yām in, dēei njū aex kaing aex, pan aex yum nīe hle hmom kaing im aex heui." 4 Kaix an Si Mīang Si Yīex ah nin, "Ba sōung hrom sōung hri maix yūh nin, keix ko līe"? 5 Mōh ke nan, Yōu Nax līh hu kaing ndaex vēing, mai ngōm braog vēing blag līh si ngāix heui. Noh yūh dix jīe nyīex mgoux dīx hlang dan, mai ngōm mgreem vēei nyīex mgoux an, doum houig nbōg yām bōun yāox dix jē ba sang yūh gah mox gah vēing heui. 6 Mai Si Mīang Si Yīex joux krei kaox nbēe ia sōun noh dīx bang gīeh hlaong gah bīang Yōu Nax doum vēei gah bīang noh, sōun sang gīeh noh nyōm hrom nyōm hri kaing grax lāex hrom lāex hri heui. Mōh ke nan, Yōu Nax gīed goui grax mgāex hrom mgāex hri ke kaox an heui. 7 Viang mōh nan yām hoig nbah rīang brāix bōun ngōb si ngāix kaix, Si Yīex krei vīag dīx mu, mai gīad gah kaox nbēe ia an fid grouh hu heui. 8 Yam līh si ngāix, Si Yīex krei npaeng ba gīed hax kaing blag līh si ngāix, mai gīeh gouig doung gah gaing Yōu Nax, mai gīeh noh beei on rīang heui. Kaix an noh goui hrom ba si mīe dix yum, mai ah nin, "Yum aex nīe hle hmom kaing im aex heui. 9 Kaix an, Si Yīex ah nin gah Yōu Nax, "Ba sōung hrom maix ke njāo kaox nbēe ia in keix ko jō līe"? Mai noh ndēeh ah nin, "Ba sōung hrom aex sōun sang yum dix mōh ba ko ba jō heui." 10 Mai Si Mīang Si Yīex ah nin, "Kaox ba ang maix dāeg māo dix sum, mai ba ang maix briex gīeh dīng hlaong, gūah ndaex dīx som mai ndēeh yum ndaex dīx som kaing maix lai gon hlog gah. 11 Mai gah vēing dīng Nī Nēi Vēi ba oud būi ndaex dīx sien ra hmeen gaex haoh, ba ang nyāng dōng dix mgūih daix mguix daix ndom mai kong nbrīe ba haoh hun an kan gix ang Aex ko dix nīe hlog gah līe"?